མ་མོའི་འགྲེས་བྱང་།
༈ མ་མོའི་འགྲེས་བྱང་བཞུགས་སོ། །འབུལ་ལོ་མཐུན་པའི་དམ་རྫས་འབུལ། །མཆོད་དོ་མ་སྲིང་རྒྱ་མཚོ་མཆོད། །བསྐང་ངོ་སྐལ༴ དམ་ཚིག་ཉམས་ནི་མ་ཉམས་ན། །ཉམས་ན་བདུད་རྩི་སྨན་གྱིས་བསྐང་། །ལྟ་བ་ལོག་པ་ལོག་ནི་མ་ལོག་ན། །ལོག་ན་ཆོས་ཉིད་དབྱིངས་ལ་ལྟ། །མ་མོ་གཡེལ་ནི་མ་གཡེལ་ན། །མ་མོ་གཡེལ་ན་རྫས་ཀྱི་བསྟེན། །སྤྱོད་པ་འཁྲུལ་ནི་མ་འཁྲུལ་ན། །འཁྲུལ་ན་ནོང་པ་རྗེས་སུ་བཤགས། །བསྐང་གསོ་ལྷ་ལ་རྒྱ་ཆེན་འབུལ། །མཐུན་པའི་རྫས་ཆེན་ངས་འབུལ་གྱིས། །ང་ཡི་ལས་བཅོལ་གྲུབ་པར་མཛད། །ཐུགས་དམ་བསྐང་བའི་བྱིན་རླབས་ཀྱིས། །བདག་ཅག་རྣལ་འབྱོར་འཁོར་བཅས་ལ། །མི་ལ་ན་ཚ་མ་བཏང་ལ། །ཕྱུག་ལ་གོད་འགྲམ་མ་ཤོར་ཅིག །ཞིང་ལ་བཙའ་སད་སེར་གསུམ་སྣ་མ་འདྲེན། །དམ་ཚིག་ཉམས་ཆག་སྐོངས་པར་མཛོད། །ཆག་ཆེན་ཉམས་པ་བཟློག་ཏུ་གསོལ། །རྣལ་འབྱོར་སྐུ་ཚེ་བསྲིང་བ་དང་། །དགྲ་བོ་དམ་ཉམས་བརླག་པའི་ཕྱིར། །སྒྲུབ་མཆོག་བདག་ལ་དངོས་གྲུབ་སྩོལ། །སྡང་བའི་དགྲ་ལ་རྟགས་ཕྱུང་ཞིག། །།