དཔལ་མགོན་འཕགས་པ་ཀླུ་སྒྲུབ་ཞལ་སྔ་ནས་བརྒྱུད་པའི་སྒྲོལ་མ་གཡུལ་བཟློག
དཔལ་མགོན་འཕགས་པ་ཀླུ་སྒྲུབ་ཞལ་སྔ་ནས་བརྒྱུད་པའི་སྒྲོལ་མ་གཡུལ་བཟློག་བལྟས་ཆོག་ཏུ་བཀོད་པ་བདེན་འབྲས་མྱུར་སྟོན་ཅེས་བྱ་བ་བཞུགས་སོ། །ན་མོ་གུ་རུ་ཨཱརྱ་ཏཱ་ར་ཡེ། དཔའ་ཞིང་གློག་ལྟར་མྱུར་བའི་ཐུགས་རྗེའི་སྤྱན། །མཁའ་ཁྱབ་སྡུག་བསྔལ་ཡིད་ཅན་ལ་གཟིགས་པས། །སྐད་ཅིག་རེ་རེར་རྣམ་གྲོལ་བདེ་བ་ཆེར། །དབུགས་འབྱིན་སྩོལ་མཛད་རྗེ་བཙུན་འཕགས་མར་འདུད། །གང་དེའི་རྣལ་འབྱོར་ལ་བརྟེན་ནས། །ཕྱི་ནང་བར་ཆད་བཟློག་པའི་ཐབས། །ཁུངས་ལྡན་བྱིན་རླབས་གཟི་བརྗིད་ཅན། །འཁྲུལ་མེད་གོང་མའི་ལུང་བཞིན་འགོད། །རྒྱལ་བ་གཉིས་པ་འཕགས་མཆོག་ཀླུ་སྒྲུབ་ཞབས་ནས་རིམ་པར་བརྒྱུད་ཅིང་འཕགས་བོད་ཀྱི་ལྗོངས་ན་ཡོངས་སུ་གྲགས་པའི་མདོས་ཟློག་འདི་ལ་དོན་བཞི། གང་ལས་བརྒྱུད་པའི་ཚུལ། ཕན་ཡོད་དང་འབྲེལ་བའི་ལོ་རྒྱུས། སྒྲུབ་པ་པོའི་གང་ཟག་ཆོག་དངོས་ལག་ཏུ་ལེན་པའི་ཚུལ་ལོ། །དང་པོ་ནི། རྒྱལ་བས་ལུང་བསྟན་ཅིང་སྒྲོལ་མའི་རྒྱུད་ལ་བརྟེན་ནས་གྲུབ་པ་ཐོབ་པ་འཕགས་པ་ཀླུ་སྒྲུབ་ཀྱིས་མཛད་དེ་སྐལ་ལྡན་རྣམས་ལ་གནང་། དེ་ནས་བརྒྱུད་པའི་ཟམ་མ་ཆད་པར་བྱོན་ཏེ་ཇོ་བོ་རྗེ་ཨ་ཏི་ཤས་བོད་དུ་བསྣམས། ཇོ་བོས་སྐུ་གཤེགས་ཁར་ན་བཟའི་གསེབ་ནས་བཏོན་ཏེ་དགེ་བཤེས་སྟོན་པ་ལ་གནང་། དེས་གསང་ཕུ་བ་རྔོག་ལེགས་པའི་ཤེས་རབ། དེས་སྣེ་ཟུར་བ་ལ་གནང་ཞིང་རིམ་པར་བརྒྱུད་ནས་རྒྱ་སྟོན་ལ་བཀའ་བབས་ཏེ་ཡིག་ཆ་རྒྱས་པའང་མཛད། ཕྱིས་རྒྱལ་ཚབ་གྲགས་པ་མཆོག་དབྱངས་དང་ཞུ་ཆེན་སོགས་ཀྱིས་ཡིག་ཆ་ལག་ལེན་རྒྱས་བསྡུས་ཅི་རིགས་པར་མཛད་ཅིང་ལུང་དང་ལག་ལེན་གྱི་བརྒྱུད་པའང་མ་ཉམས་པར་བཞུགས་པའོ། །གཉིས་པ་ནི། འཕགས་པ་ཀླུ་སྒྲུབ་ཀྱི་ཞལ་ནས། །ཡེ་ཤེས་ལྷ་དང་འཇིག་རྟེན་པ། །དེ་དག་ནུས་པ་འདི་ཡིས་ཞི། །ཀླུ་རྒྱལ་གཙུག་གི་ནོར་བུ་བཞིན། །དགོས་འདོད་ཐམས་ཅད་འདི་ཡིས་འགྲུབ། །རྟེན་གསུམ་འོག་ཏུ་མནན་པ་དང་། །སྡེ་བརྒྱད་དག་ལ་གཏད་པ་དང་། །ཟོར་ཐུན་ཕུར་པ་བསྒྲིལ་བ་དང་། །ཡུལ་དུ་ལྟས་ངན་སྐྱེས་པ་སོགས། །དེ་དག་ཀུན་གྱི་ནུས་པ་ནི། །ཅུང་ཟད་ཙམ་ཡང་འབྱིན་མི་ནུས། །རང་ཉིད་བསྒྲུབས་ན་མཆོག་ཏུ་བསྔགས། །ཞེས་གདམས་པ་དང་། ཇོ་བོའི་ཞལ་ནས། ཐག་རིང་པོར་འགྲོ་ན་ཆོ་ག་འདི་བྱས་པས་རྐྱེན་ངན་གང་ཡང་མི་འབྱུང་ངོ་། །ཡང་ཡུལ་ཕྱོགས་སུ་འཁྲུགས་པ་ཡོད་པ་དང་། ནད་རིམས་གཡོས་པ་དང་། མི་དགེ་བའི་ལྟས་བྱུང་བ་ལ་ཆོ་ག་འདིས་ཟློག་གོ། །རང་ལ་མི་འདོད་པ་ཅི་བྱུང་ཡང་ཐེ་ཚོམ་མི་བྱེད་པར་ཆོ་ག་འདི་བགྱིས་པས་རང་ཅི་འདོད་པའི་དོན་མི་འགྲུབ་མི་སྲིད། འདོད་པའི་དོན་སྒྲུབ་པ་དང་ཟློག་པའི་ཆོ་ག་འདི་ལས་བྱིན་རླབས་ཆེ་བ་མཐུ་ཆེ་བ་མེད་པས། འདི་ལ་ཤིན་ཏུ་བརྩོན་པར་གྱིས་ཤིག །བོད་དུ་ཐོན་པའི་ཡིག་ཆ་འདི་ལས་ཟབ་པ་མེད་པར་འདུག་གསུངས་སོ། །དེས་ན་མཐུ་དང་བྱད་ཁ་ཐན་ལྟས་རྨི་ལམ་ངན་པ། ལྷ་འདྲེ་དྲག་པོ་དང་འགྲས་པ། གདོན་ཆེན་གྱི་གནོད་པ་ཟུག་པ། དལ་ཡམས་རིམས་ནད། གོད་ཁ་ཕྱུགས་ནད། ལོ་ཟླ་ཞག་དུས་གཟའ་སྐར་ངན་པའི་གནོད་པ་སོགས་གང་ལའང་ཟློག་པ་འདི་ཟབ་ཅིང་སྟོབས་ཆེ། གཞན་ཡང་དྲག་སྔགས་བགྲང་བ་དང་། མནའ་ཟོས་པ་དང་། ཐག་རིང་འགྲོ་བའི་ཉེས་པ་སོགས་ཀྱང་སྒྲིབ་ཅིང་མདོར་ན་ཡེ་ཤེས་པ་དང་འཇིག་རྟེན་པ་ཐམས་ཅད་ཟློག་ཅིང་དགེ་ལེགས་ཐམས་ཅད་སྤེལ་བ་ལ་ཁྱད་པར་དུ་འཕགས་པའོ། །དེ་ལྟ་བུའི་བྱིན་རླབས་ཕན་ཡོན་ཆེན་པོ་དང་ལྡན་པའི་ཆོ་ག་འདི་ཉིད་བྱས་པས་ཡིད་ཆེས་པའི་རྟགས་རྒྱ་གར་དང་བལ་པོ་དང་བོད་རྣམས་ལས་བྱུང་བའི་ལོ་རྒྱུས་རྒྱ་ཆེར་འདུག་པ་ནི་ཡིག་རྙིང་རྣམས་ལས་ཤེས་པར་བྱའོ། །གསུམ་པ་ནི། སྒྲོལ་མའི་དབང་དང་རྗེས་གནང་གང་རུང་ཐོབ་པ། ཕྱག་འཚལ་ཉི་ཤུ་རྩ་གཅིག་གི་ལུང་ཐོབ་ཅིང་ཁྱད་པར་དུ་ཚུལ་འདིའི་ལུང་ཐོབ་པའི་རབ་དགེ་སློང་། འབྲིང་དགེ་ཚུལ། ཐན་དགེ་བསྙེན་ཡང་རུང་སྟེ། ཁྱིམ་པ་མ་ཡིན་པ་ཉི་ཤུ་རྩ་གཅིག་གམ། བདུན་ནམ། ལྔའམ། གཅིག་གམ་གསུམ་ལ་སོགས་པ་ཡུལ་དུས་དང་འཚམས་པས་བསྒྲུབ་བོ། །བཞི་པ་ཆོ་ག་དངོས་ལ་གསུམ། སྦྱོར་བ། དངོས་གཞི། རྗེས་ཀྱི་བྱ་བའོ། །དང་པོ་ནི། དུས་བཟང་པོའམ་དགོས་པ་ལ་བབ་པའི་ཚེ། གནས་ཁང་བྱི་དོར་བྱས་པའི་གུང་དུ་སྟེགས་བུ་མཐོ་ཞིང་ཁེབས་ལྡན་གྱི་དབུས་སུ་རྡུལ་ཚོན་ནམ་རས་བྲིས་ཀྱི་པདྨ་འདབ་མ་ཉི་ཤུ་བ་ལྟེ་བ་དང་བཅས་པ་བཀོད། མ་འབྱོར་ན་མཎྜལ་ལ་འབྲུའི་ཚོམ་བུ་དབུས་སུ་གཅིག །མཐའ་བསྐོར་ཕྱོགས་བཞིར་ལྔ་རེ་སྟེ་ཉེར་གཅིག་ཚང་བར་བཀོད་པའི་སྟེང་དུ་སྒྲོལ་མ་ཉེར་གཅིག་གམ། སྒྲོལ་ལྗང་གི་སྐུ་བྲིས་འབུར་གང་རུང་རབ་གནས་ཅན་བཀོད། དེའི་མདུན་དུ་ཕྱི་མཆོད་ཕྲེང་ཚར། ཁྲུས་བུམ། སྐུ་ཕྱིས་ན་བཟའ་རྣམས་དང་། སྣོད་གཙང་མར་གཏོར་ཟླུམ་ཐེབ་ཀྱུ་མང་པོས་བསྐོར་རྒྱན་སྤྲོས་ཅན་བཅས་གཙང་སྦྲ་དང་ལྡན་པར་བཤམ། དེ་དག་ལས་དམའ་བའི་སྟེགས་བུར་བགེགས་གཏོར་ཅོག་རྡོག་རིལ་བུ་སྤུངས་པ་དང་། ལན་ཆགས་གཏོར་མ། ངར་ཆུང་ཆང་བུ་ཏིང་ལོ་ཐེབ་ཀྱུ་བཅས་པ་དང་། གཞི་བདག་ལ་དཀར་གཏོར་འབྲུ་བླུགས་པ་བཅས་བཤམ་མོ། །དེ་ནས་མདོས་ཟློག་ནི། སྟེགས་བུ་གྲུབ་བཞི་བའི་སྟེང་དུ་ཟན་ནམ་འཇིམ་པའི་རི་རབ་བང་རིམ་བཞི་པ་བྱ། རི་རབ་ཀྱི་སྟེང་དུ་མཁར་ཐབས་གྲུ་བཞི་རྒྱའི་གཏོག་དང་བཅས་པ་མཛེས་ཚོན་བྱས་ལ་བཞག །མཁར་གྱི་སྒོ་མདུན་གྱི་བང་རིམ་གོང་མ་ལ་ཟན་གྱི་ངར་མི་མཐོ་གང་རྟ་ལ་ཞོན་པ་གཅིག་བཞག །དེ་ལ་གསེར་གཡུ་དང་དར་གོས་ཀྱིས་བརྒྱན། ཟན་ལ་གསེར་སྐྱེམས་བརྡར་བའི་མིའུ་ཐུང་གིས་གཟུགས་སུམ་ཅུ་ལག་བཟོའམ། སྤར་བཏབ་པ་གང་བ་དེར་བྱས་ལ་བང་རིམ་དང་པོ་མཁར་གྱི་མཐའ་བསྐོར་དུ་བཞག །ངར་མི་ཆེ་བ་རྟ་ཅན་གྱི་གཡས་གཡོན་རྒྱབ་གསུམ་དུ་ནམ་མཁའ་གསུམ་བཙུག །མདུན་དུ་རྒྱང་བུ་གསུམ་བཙུག །བང་རིམ་གཉིས་བར་ཞལ་ཟས་བརྒྱད་དང་བྱ་རིགས་སྣ་ཚོགས་ཀྱིས་བསྐོར་བ། བང་རིམ་གསུམ་བར་གླང་ཆེན་རྟ་མཛོ་བ་གླང་ར་ལུག་སོགས་དུད་འགྲོའི་རིགས་ཀྱི་གཟུགས་བརྙན་དང་། ཤྭ་གནའ་སྒོ་སོགས་རི་དྭགས་ཀྱི་རིགས་ཐམས་ཅད་ཀྱི་གཟུགས་བརྙན་དང་། ཉ་ལྕོང་སྦལ་སྦྲུལ་སོགས་ཆུ་གནས་སྣ་ཚོགས་ཀྱི་གཟུགས་བརྙན་བཀོད། བང་རིམ་བཞི་པའི་ཕྱོགས་བཞི་དང་ཟུར་བཞིར་མར་མེ་རེ་རེ་སྟེ་བརྒྱད། འབྲུ་སྣ་ཚོགས་དང་ཟས་སྣ་ནོར་གཡུའི་རིགས་གང་འཛོམ། སྨན་སྣ་འབྲུ་སྣ་ངར་མི་ཆང་བུ་གོས་དུམ་སྤུ་གླུད་གཟུགས་ལྷག་མའི་རིགས་དང་། ཐན་ལྟས་སོགས་བྱུང་བ་ཡིན་ན་གང་བྱུང་བའི་གཟུགས་བརྙན་དང་ཡས་སྟག་སོགས་ཀྱི་རིགས་ཅི་འཛོམ་པས་བསྐོར། མཐར་ལྕགས་རིས་བསྐོར་བའི་གཡས་ཀྱི་ཁར་ཕོ་ཏོང་དྲུག །གཡོན་དུ་མོ་ཏོང་དྲུག །མདུན་དུ་མདའ་བཀྲ་གསུམ། ཕྱོགས་བཞིར་ནམ་མཁའ་བཞི། མཚམས་བཞིར་རྒྱང་བུ་བཞི་རྣམས་བཙུག །དེའི་ཕྱི་ནས་སྣལ་མས་བཅིངས་ཏེ་མདུན་དུ་མདུད་པ་ཁ་ཚུར་རང་ལ་བསྟན་ཏེ་བཞག་གོ། །བཅའ་ལུགས་འདི་བཞིན་ཡིག་རྙིང་ནས་བཤད་པ་དང་དམ་པ་ཁ་ཅིག་གི་ཕྱག་བཞེས་སུ་སྣང་བས་ཁུངས་བཙུན་པ་ཡིན་ལ། སྤྱིར་གཏོ་མདོས་ཀྱི་རིགས་ལ་མཁས་བླུན་དང་འབྱོར་པའི་ཁྱད་པར་གྱིས་རྒྱས་བསྡུས་འདྲ་མིན་རང་བཟོའི་བྱ་བ་མཐའ་གཅིག་ཏུ་མ་ངེས་པས་འདི་ལའང་བྱེད་ལུགས་སྣ་ཚོགས་སུ་སྣང་ངོ་། །གཉིས་པ་ལ་ལྔ། བདག་བསྐྱེད། མདུན་བསྐྱེད། མཆོད་བསྟོད་གཏོར་འབུལ། གླུད་བརྫང་། བདེན་སྟོབས་ཀྱིས་བཟློག་པའོ། །དང་པོ་ལ། སྐྱབས་སེམས་ནི། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །རྗེ་བཙུན་མ་འཕགས་མ་སྒྲོལ་མའི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆིའོ། །ལན་གསུམ། སེམས་ཅན་ཐམས་ཅད་ཀྱི་དོན་དུ་རྣམ་པ་མཁྱེན་པ་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཕྱིར་དུ་རྗེ་བཙུན་མ་འཕགས་མ་སྒྲོལ་མའི་བསྒོམ་བཟླས་ལ་འཇུག་པར་བགྱིའོ། །ལན་གསུམ། སངས་རྒྱས་ཆོས་ཚོགས་ལན་གསུམ་དང་། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་སོགས་ཀྱིས་ཚད་མེད་བཞི་བསྒོམ། སྟོང་པའི་ངང་ལས་རང་གི་སྙིང་གར་ཨ་ལས་ཟླ་བའི་སྟེང་དུ་ཏཱྃ་ལྗང་གུ། དེའི་འོད་ཀྱིས་ལུས་གང་། རྣམ་སྨིན་རྡོས་བཅས་དང་སྡིག་སྒྲིབ་ལྷན་ཅིག་ཏུ་སྦྱངས། རང་ཉིད་སྒྲོལ་མའི་སྐུར་གྱུར་བ་ནི། སྐུ་མདོག་ལྗང་གུ་ཞལ་གཅིག་ཕྱག་གཉིས་གཡས་མཆོག་སྦྱིན་དང་གཡོན་ཨུཏྤལ་སྔོན་པོའི་རྩ་བ་ཐུགས་ཀར་སྙན་གྱི་ཐད་ཀར་ཁ་བྱེ་བ། ཞབས་གཡས་བརྐྱང་གཡོན་བསྐུམ་པའི་སྐྱིལ་ཀྲུང་ཕྱེད་པའི་རོལ་བས་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པད་ཟླའི་གདན་ལ་བཞུགས་པར་གྱུར། ཐུགས་ཀར་ཟླ་བ་ལ་གནས་པའི་ཏཱྃ་དེ་ལས་འོད་ཟེར་འཕྲོས། རྗེ་བཙུན་འཕགས་མ་སྒྲོལ་མ་ཡེ་ཤེས་སེམས་དཔའི་ལྷ་ཚོགས་བཛྲ་ས་མ་ཛཿཕྱག་དང་མཆོད་པ་ཡིད་ཀྱིས་བྱ་ཞིང་ངག་ནས་མི་བརྗོད། ཛཿཧཱུྃ་བཾ་ཧོ། གཉིས་སུ་མེད་པར་ཐིམ། སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོས་མཚན་པར་གྱུར། ལྷ་ཡི་སྐུའི་གསལ་སྣང་ལ་སེམས་བཟུང་། བཟླས་པ་ནི། ཐུགས་ཀར་ཟླ་བའི་སྟེང་ཏཱྃ་ཡིག་ལྗང་གུའི་མཐའ་བསྐོར་དུ་ཡི་གེ་བཅུ་པས་བསྐོར་བ་བསྒོམས་ལ། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་པ་དང་། གཟུངས་སྔགས་ཀྱིས་བསྐོར་བ་གསལ་བཏབས་ལ། ན་མོ་རཏྣ་ཏྲ་ཡཱ་ཡ། ན་མོ་ཨཱརྱ་ཨ་ཝ་ལོ་ཀི་ཏེ་ཤྭ་རཱ་ཡ། བོ་དྷི་ས་ཏྭ་ཡ། མ་ཧཱ་ས་ཏྭ་ཡ། མ་ཧཱ་ཀ་རུ་ཎི་ཀཱ་ཡ། ༀ་ཏཱ་རེ་ཏུཏྟ་རེ་ཏུ་རེ་སརྦ་དུ་དུཥྚ། པྲ་དུཥྚ། མ་མ་ཀྲྀ་ཏེ། ཛམྦྷཱ་བྷ་ཡ། སྟཾ་བྷ་ཡ། མོ་ཧ་ཡ། བྷན་དྷ་ཡ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། སརྦ་དུཥྚཾ་སྟམ་བྷ་ནི་ཏ་རེ་སྭཱ་ཧཱ། ཞེས་པའང་ཅི་འགྲུབ་ཏུ་བཟླས། མཐར། ཡེ་ཤེས་པ་མདུན་དུ་ཞུགས་པར་གྱུར། ཨརྒྷཾ་ནས། ཤབྟའི་བར་གྱིས་མཆོད། རྗེ་བཙུན་མ་འཕགས་མ་སྒྲོལ་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཅེས་འདོད་དོན་གསོལ་བ་གདབ། དགེ་བ་བསྔོ། ༀ་མུཿ ཞེས་གཤེགས་སུ་གསོལ། རང་དམ་ཚིག་པའི་ང་རྒྱལ་གྱིས་གནས་པར་བྱའོ། །གཉིས་པ་མདུན་བསྐྱེད་ནི། ༀ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། སྟོང་པའི་ངང་ལས་པྃ་ལས་སྣ་ཚོགས་པདྨའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ལྗང་གུ་ལས་ཨུཏྤལ་ཏཱྃ་གིས་མཚན་པ་ཡོངས་སུ་གྱུར་པ་ལས་བཅོམ་ལྡན་འདས་མ་རྗེ་བཙུན་མ་འཕགས་མ་སྒྲོལ་མ་སྐུ་མདོག་ལྗང་གུ་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། ཞལ་གཅིག་ཕྱག་གཉིས་གཡས་མཆོག་སྦྱིན་གྱི་ཕྱག་རྒྱས་སེམས་ཅན་ཐམས་ཅད་ཀྱི་བསམ་པ་རྫོགས་པར་མཛད་པ། གཡོན་པས་རབ་ཏུ་རྒྱས་པའི་ཨུཏྤལ་འཛིན་ཅིང་མཛེས་པའི་དར་གྱི་ན་བཟའ་བཀླུབས་པ། རྒྱལ་བ་དོན་ཡོད་གྲུབ་པའི་དབུ་རྒྱན་ཅན། པད་ཟླའི་གདན་ལ་རོལ་པའི་སྟབས་ཀྱིས་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པའི་དབུས་སུ་བཞུགས་པ། མཐའ་བསྐོར་གྱི་པད་འདབ་ཉི་ཤུ་ལ་མདུན་ནས་གཡས་བསྐོར་གྱིས་རིམ་པ་བཞིན་མྱུར་ཞིང་དཔའ་བ་བགེགས་དང་འཚེ་བ་རྣམ་པར་འཇོམས་པའི་སྒྲོལ་མ་སྐུ་མདོག་དམར་མོ་དབང་དུ་སྡུད་པའི་བུམ་པ་དམར་པོ་བསྣམས་པ། སྟོན་ཀའི་ཟླ་བ་ལྟར་དཀར་བ་ནད་དང་གདོན་བགེགས་འཇོམས་པའི་སྒྲོལ་མ་ཞི་བའི་བུམ་པ་དཀར་པོ་བསྣམས་པ། ཚེ་དང་ལོངས་སྤྱོད་འཕེལ་བར་མཛད་པའི་སྒྲོལ་མ་གསེར་མདོག་ཅན་རྒྱས་པའི་བུམ་པ་སེར་པོ་བསྣམས་པ། ཚེའི་མཆོག་སྩོལ་བར་མཛད་པའི་སྒྲོལ་མ་རྣམ་པར་རྒྱལ་མ་གསེར་མདོག་ཅན་ཚེའི་བུམ་པ་སེར་པོ་བསྣམས་པ། ཧཱུྃ་སྒྲ་སྒྲོགས་མ་ཤེས་རབ་ཀྱི་ཕྱག་རྒྱས་དབང་དུ་སྡུད་པར་བྱ་ཞིང་འགུགས་པར་མཛད་པའི་སྒྲོལ་མ་སྐུ་མདོག་དམར་སེར་ཡིད་འཕྲོག་པའི་བུམ་པ་དམར་པོ་བསྣམས་པ། འཇིག་རྟེན་གསུམ་ལས་རྣམ་པར་རྒྱལ་བ་འབྱུང་པོ་འདུལ་བར་མཛད་པའི་སྒྲོལ་མ་སྐུ་མདོག་དམར་ནག་འབྱུང་པོ་རོ་ལངས་མྱོས་པོར་བྱེད་པའི་བུམ་པ་སྔོན་པོ་བསྣམས་པ། གཞན་འཇོམས་ཤིང་གཞན་གྱི་རིག་སྔགས་ཟློག་པར་མཛད་པའི་སྒྲོལ་མ་སྐུ་མདོག་ནག་མོ་རིག་སྔགས་ཟློག་པའི་བུམ་པ་ནག་པོ་བསྣམས་པ། བདུད་དགྲ་འཇོམས་པའི་སྒྲོལ་མ་སྐུ་མདོག་དམར་ནག་བདུད་དང་དགྲ་འཇོམས་པའི་བུམ་པ་དམར་པོ་བསྣམས་པ། དཀོན་མཆོག་གསུམ་མཚོན་གྱི་ཕྱག་རྒྱ་ཅན་འཇིགས་པ་ཐམས་ཅད་བསྲུང་བར་མཛད་མ་འཇིགས་པ་ཐམས་ཅད་འཇོམས་པའི་བུམ་པ་དཀར་པོ་བསྣམས་པ། བདུད་དང་བར་དུ་གཅོད་པ་འདུལ་བར་མཛད་པའི་སྒྲོལ་མ་སྐུ་མདོག་དམར་མོ་བདུད་འཇོམས་པའི་བུམ་པ་དམར་པོ་བསྣམས་པ། དབུལ་བའི་སྡུག་བསྔལ་སེལ་ཞིང་དངོས་གྲུབ་སྩོལ་བར་མཛད་པའི་སྒྲོལ་མ་སྐུ་མདོག་གསེར་བཙོ་མ་ལྟར་དམར་སེར་དབུལ་བ་སེལ་བའི་བུམ་པ་སེར་པོ་བསྣམས་པ། བཀྲ་ཤིས་ཐམས་ཅད་སྦྱིན་པར་མཛད་མ་སྐུ་མདོག་གསེར་གྱི་མདོག་ཅན་བཀྲ་ཤིས་པའི་བུམ་པ་དཀར་པོ་བསྣམས་པ། བགེགས་དང་བར་ཆད་འཇོམས་པར་མཛད་མ་མེ་ལྟར་འབར་བའི་སྐུ་མདོག་དམར་མོ་བར་ཆད་སྲུང་བའི་བུམ་པ་དམར་པོ་བསྣམས་པ། བགེགས་རྣམ་པར་འཇོམས་པའི་ཁྲོ་གཉེར་ཅན་གྱི་སྒྲོལ་མ་སྐུ་མདོག་ནག་པོ་ཁྲོ་གཉེར་ཅུང་ཟད་ཡོད་པ་བགེགས་ལ་བསྣུན་པའི་བུམ་པ་མཐིང་ག་བསྣམས་པ། སྡིག་པ་དང་སྒྲིབ་པ་སྦྱོང་བར་མཛད་པའི་སྒྲོལ་མ་ཞི་བ་ཆེན་མོ་སྐུ་མདོག་དཀར་མོ་སྡིག་སྒྲིབ་སྦྱོང་བར་མཛད་པའི་བུམ་པ་དཀར་པོ་བསྣམས་པ། ཕ་རོལ་གྱི་རྩོད་པ་ལས་རྒྱལ་ཞིང་བློ་གྲོས་འཕེལ་བར་མཛད་པའི་སྒྲོལ་མ་སྐུ་མདོག་དམར་མོ་ཤེས་རབ་འཕེལ་བར་མཛད་པའི་བུམ་པ་དམར་སེར་བསྣམས་པ། བདུད་དང་བར་ཆད་ཞི་ཞིང་འཇིག་རྟེན་གསུམ་གཡོ་བའི་སྒྲོལ་མ་སྐུ་མདོག་དམར་སེར་རིག་སྔགས་གནོན་པའི་བུམ་པ་སེར་པོ་བསྣམས། ཀླུའི་དུག་ཐམས་ཅད་རབ་ཏུ་ཞི་ཞིང་སེལ་བར་མཛད་པའི་སྒྲོལ་མ་སྐུ་མདོག་དཀར་མོ་དུག་ནད་སེལ་བའི་བུམ་པ་དཀར་པོ་བསྣམས་པ། རྨི་ལམ་ངན་པ་དང་སྡུག་བསྔལ་སེལ་བར་མཛད་པའི་སྒྲོལ་མ་སྐུ་མདོག་དཀར་མོ་སྡུག་བསྔལ་སེལ་བའི་བུམ་པ་དཀར་པོ་བསྣམས་པ། རིམས་ནད་ཐམས་ཅད་སེལ་བར་མཛད་པའི་སྒྲོལ་མ་སྐུ་མདོག་དཀར་མོ་རིམས་ནད་སེལ་བའི་བུམ་པ་དམར་པོ་བསྣམས་པ། ཕྲིན་ལས་ཡོངས་རྫོགས་ཀྱི་སྒྲོལ་མ་སྐུ་མདོག་དཀར་མོ་འོད་ཟེར་སྣ་ཚོགས་འཕྲོ་བ་དངོས་གྲུབ་སྣ་ཚོགས་འབྱུང་བའི་བུམ་པ་ལྗང་གུ་བསྣམས་པ། ཐམས་ཅད་ཀྱང་ཞལ་གཅིག་ཕྱག་གཉིས་པ། ཕྱག་གཡས་མཆོག་སྦྱིན་གྱི་མཐིལ་ན་ཕྲིན་ལས་སོ་སོ་སྒྲུབ་པའི་བུམ་པ་དང་། ཕྱག་གཡོན་ཨུཏྤལ་བསྣམས་ཤིང་པད་ཟླའི་གདན་ལ་བརྐྱང་བསྐུམ་སྟབས་ཀྱིས་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་འོད་ཟེར་དཔག་ཏུ་མེད་པ་འཕྲོ་བ། མཐའ་བསྐོར་དུ་སངས་རྒྱས་བྱང་སེམས་ཡི་དམ་མཁའ་འགྲོ་ཆོས་སྐྱོང་སྲུང་མའི་ཚོགས་དཔག་ཏུ་མེད་པས་བསྐོར་བ། དེ་དག་ཐམས་ཅད་ཀྱི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་པོ་ཏ་ལ་ནས་རྗེ་བཙུན་འཕགས་མ་སྒྲོལ་མ་ཉི་ཤུ་རྩ་གཅིག་ལ་སངས་རྒྱས་བྱང་སེམས་ཡི་དམ་མཁའ་འགྲོ་ཆོས་སྐྱོང་དཔག་ཏུ་མེད་པས་བསྐོར་བ་ༀ་བཛྲ་ས་མཱ་ཛ། ཞེས་བསྡུ་བའི་ཕྱག་རྒྱ་དང་། མཐར་ཐལ་མོ་སྦྱར་ལ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པ། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །པོ་ཏ་ལ་ཡི་གནས་མཆོག་ནས། །ཏཱྃ་ཡིག་ལྗང་གུ་ལས་འཁྲུངས་ཤིང་། །འོད་དཔག་མེད་པས་དབུ་ལ་བརྒྱན། །དུས་གསུམ་སངས་རྒྱས་ཕྲིན་ལས་མ། །འགྲོ་བའི་དོན་ཕྱིར་གཤེགས་སུ་གསོལ། །ཞེས་བརྗོད། མདུན་དུ་བཞུགས་པ་ལ། བཙོ་མ་གསེར་གྱི་མདོག་འདྲ་ཤིང་། །ཉི་མ་ལས་ལྷག་གཟི་བརྗིད་ཆེ། །དད་པས་སྤྱན་ནི་དྲངས་པར་བགྱི། །ཞི་ཞིང་ཐུགས་རྗེ་ཆེ་ལྡན་པ། །དུལ་ཞིང་བསམ་གཏན་ས་ལ་བཞུགས། །ཆོས་དང་ཡེ་ཤེས་ཆགས་བྲལ་བ། །ཀུན་ཏུ་མི་བཟད་ནུས་པར་ལྡན། །ཚུར་སྤྱོན་ཚུར་སྤྱོན་ཞི་དག་ལྷ། །ཐུབ་པའི་སྐྱེས་མཆོག་ཐམས་ཅད་མཁྱེན། །ཤིན་ཏུ་ལེགས་བྱས་གཟུགས་བརྙན་ནི། །མཆོད་པས་འདིར་ནི་གཤེགས་སུ་གསོལ། །འདིར་ནི་གཟུགས་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཞེས་པས་སངས་རྒྱས་བྱང་སེམས་ཐམས་ཅད་སྤྱན་དྲངས་པར་མོས། ཁྲུས་གསོལ་ཕྱག་ལེན་ལྟར་བྱས་ལ། ཁྱེད་ཀྱི་རང་བཞིན་ཡོངས་དག་པས། །སྲིད་པའི་འཆིང་བ་མི་མངའ་ཡང་། །བདག་ཅག་སྒྲིབ་པ་སྦྱང་སླད་དུ། །གཙང་མ་ཆབ་ཀྱིས་སྐུ་ཁྲུས་གསོལ། །ཞེས་དང་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ༀ་ཧཱུྃ་ཏྲཱྃ་ཧྲཱིཿཨཱཿཀཱ་ཡ་བི་ཤོ་དྷ་ན་སྭཱ་ཧཱ། ཞེས་པས་སྐུ་ཕྱིའོ། །དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་མཛེས་སྣ་ཚོགས་དང་། །རྒྱན་མཆོག་བརྒྱ་ཕྲག་དེ་དང་དེ་དག་འབུལ། །ༀ་བཛྲ་ཝ་སྟྲ་ཨ་ལཾ་ཀ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། གིས་གོས་རྒྱན་འབུལ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ༀ་བཛྲ་ཨཱ་ས་ན་པདྨ་ཀ་མ་ལཱ་ཡ་སྟྭཾ། ༀ་ཨཱརྱ་ཏཱ་རེ་ས་པ་རི་ཝཱ་ར་པུཥྤེ་པྲ་ཏཱིཙྪ་སྭཱ་ཧཱ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ་པྲ་ཏཱིཙྪ་སྭཱ་ཧཱ། ཉེར་སྤྱོད་ལྔས་མཆོད། ལྷ་དང་ལྷ་མིན་ཅོད་པན་གྱིས། །ཞེས་སོགས་ཀྱིས་བསྟོད། ལག་གཉིས་མཉམ་པའི་ཐལ་མོ་ལས་གུང་མོ་གཉིས་རྩེ་སྦྱར་བའི་ཚིགས་གསུམ་པར་མཛུབ་མོའི་རྩེ་མོ་བཀུག་ལ་བཞག་མཐེ་བོང་གཉིས་གཤིབ་སྟེ་མཉམ་དུ་བསྒྲེང་། སྲིན་མཛུབ་ནང་དུ་བཅུག །མཐེའུ་ཆུང་སྦྱར་ནས་བརྐྱངས་པ་ཨུཏྤལ་ཁ་བྱེ་བའི་ཕྱག་རྒྱ་བཅིངས་ཏེ། ཛཿཧཱུྃ་བཾ་ཧོཿ ཡེ་ཤེས་པ་དང་དམ་ཚིག་པ་གཉིས་མེད་དུ་འདྲེས་པར་གྱུར། བཟླས་པ་བྱ་བ་ནི། མདུན་བསྐྱེད་རྗེ་བཙུན་མ་གཙོ་འཁོར་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ཡིག་ལྗང་གུའི་མཐའ་མར་ཡི་གེ་བཅུ་པའི་སྔགས་ཀྱིས་བསྐོར་བ་ལས་འོད་ཟེར་འཕྲོས། བདག་གཞན་སེམས་ཅན་ཐམས་ཅད་ཀྱི་འཇིགས་པ་བརྒྱད་དང་བཅུ་དྲུག་སོགས་མི་མཐུན་པའི་ཕྱོགས་ཞི་ནས་ཚེ་དང་བསོད་ནམས་དཔལ་འབྱོར་འདོད་དགུ་མཐའ་དག་འཕེལ་ཞིང་རྒྱས་པར་གྱུར། ཅེས་དམིགས་ལ། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། རྩ་སྔགས་ཇི་ལྟར་འོས་པ་ལོངས་སྐབས་དང་བསྟུན་ཏེ་བཟླའོ། །གསུམ་པ་མཆོད་བསྟོད་གཏོར་འབུལ་སོགས་ལན་གསུམ་བྱ་དགོས་པའི་ཐོག་མར་མཆོད་པ་བྱིན་རླབས་ནི། ༈ སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྱིན་གྱིས་བརླབས་པའི་སྟོབས་དང་བདག་གི་བསོད་ནམས་དང་སྨོན་ལམ་གྱི་སྟོབས་དང་། རིག་སྔགས་ཀྱི་སྟོབས་ཀྱིས་སངས་རྒྱས་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྣམས་ལ་མཆོག་ཏུ་རྒྱ་ཆེན་པོ་བྱང་ཆུབ་སེམས་དཔའི་ཀུན་ཏུ་བཟང་པོའི་སྤྱོད་པ་ལས་མངོན་པར་མཐོ་བའི་མཆོད་པའི་སྤྲིན་ཆེན་པོ་རབ་ཏུ་འཕྲོ་བར་གྱུར་ཅིག །ཅེས་དང་། ན་མཿསརྦ་བུདྡྷ་བོ་དྷཱི་ས་ཏྭ་ནཱཾ་སརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་ས་མནྟ་སྭཱ་ཧཱ། ཞེས་སྔགས་ལན་བརྒྱད་བརྗོད་ལ། འཇིག་རྟེན་ཁམས་ནི་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་ནི། །རྒྱལ་བའི་ཡུམ་ལ་མཆོད་པར་བགྱི། །ༀ་ཨཱརྱ་ཏཱ་རེ་ས་པ་རི་ཝ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཚིགས་བཅད་དང་སྔགས་ཀྱི་ཐོག་མཐའ་འདྲ་བ་ལ། མཆོད་ཡོན་གྱི་གནས་སུ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ཞེས་དང་། ཨརྒཾ་གྱི་གནས་སུ། པུཥྤེ་སོགས། ཞེས་བཅུག་པ་དང་། ཡིད་འོང་ཁང་བརྩེགས་ཁྲུས་ཀྱི་རྫིང་། །སྐྱེད་མོས་ཚལ་དང་རིན་ཆེན་བདུན། །ཁྲི་སྟན་འཕན་གདུགས་རྒྱལ་མཚན་སོགས། །ནམ་མཁའི་ཁམས་ཀུན་བཀང་སྟེ་འབུལ། །ༀ་སརྦ་བི་ཤིཥྛ་པཱུ་ཛ་མེ་གྷ་པྲ་ས་ར་ས་མུ་དྲེ་ཨཱཿཧཱུྃ། ཞེས་པས་མཆོད། བཅོམ་ལྡན་འདས་མ་གཙོ་འཁོར་གྱི་ཕྱག་གཡས་སྐྱབས་སྦྱིན་མཛད་པའི་འོག་ཏུ་བསྲུང་བྱ་འཁོར་བཅས་ཚུད་བར་བསམས་ལ། ༀ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་ཏཱ་རེ་མྱུར་མ་དཔའ་མོ། ཏུཏྟཱ་ར་ཡིས་འཇིགས་པ་ཀུན་སེལ། ཏུ་རེས་དོན་ཀུན་གྲུབ་པའི་སྒྲོལ་མ། སྭཱ་ཧཱའི་ཡི་གེར་བཅས་ལ་རབ་འདུད། ཕྱག་འཚལ་སྒྲོལ་མ་མྱུར་མ་དཔའ་མོ། ཞེས་པ་ནས། ཕྱག་འཚལ་བ་ནི་ཉི་ཤུ་རྩ་གཅིག །གི་བར་བརྗོད། ཡང་། རབ་འབྱམས་རྒྱ་མཚོ་དཔག་མེད་ན། །མཆོད་རྫས་ཇི་སྙེད་ཡོད་པ་དང་། །བདག་གིས་གུས་པས་བཤམས་པ་འདི། །རྒྱལ་བའི་ཡུམ་ལ་མཆོད་པར་བགྱི། །ༀ་ཨཱརྱ་ཏཱ་རེ་ས་པ་རི་ཝཱ་ར་ཨརྒྷཾ་པཱ་དྱཾ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་བི་དྱ་ཤབྟ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་མཆོད། སྔར་བཞིན་ཕྱག་འཚལ་ཉེར་གཅིག་ཚར་གཅིག་བརྗོད། དེ་ལྟ་བུའི་མཆོད་བསྟོད་ལན་བདུན་རྫོགས་ནས། ལྷ་མོ་ལ་གུས་ཡང་དག་ལྡན་པས། སོགས་ཕན་ཡོན་ཚར་གཅིག་བརྗོད། ༈ དེ་ནས་གཏོར་མ་ཆ་གསུམ་གྱི་དང་པོ་སྒྲོལ་མ་གཙོ་འཁོར་ལ་འབུལ་བ་ནི། ཆབ་བྲན་ལ། གཏོར་མའི་སྟེང་དུ་ཨ་ལས་ཟླ་བའི་དཀྱིལ་འཁོར་ལ་གནས་པའི་ཏཱྃ་ལྗང་གུ་དེ་ལས་འོད་ཟེར་འཕྲོས་པས་སེམས་ཅན་གྱི་དོན་བྱས་ནས་ཚུར་འདུས། སྣོད་ལ་ཐིམ་པས་ཡངས་ཤིང་རྒྱ་ཆེ་བ་དང་། བཅུད་ལ་ཐིམ་པས་ལྷ་རྫས་ཀྱི་གཏོར་མ་བདུད་རྩིར་གྱུར་པར་བསམ། ༀ་ཨཱཿཧཱུྃ། ལན་གསུམ་བརྗོད་པས་བྱིན་གྱིས་བརླབས། མདུན་བསྐྱེད་ཀྱི་བཅོམ་ལྡན་འདས་མ་འཁོར་བཅས་ཀྱི་ལྗགས་འོད་ཟེར་གྱི་སྦུ་གུ་ཅན་གྱིས་གཏོར་མ་གསོལ་བས་མཉེས་པར་གྱུར། ༀ་ཏཱ་རེ་ཏུཏྟ་རེ་སྭཱ་ཧཱ། ཨ་ཀ་རོ་སོགས་བཏགས་པ་ལན་བདུན་ནམ་ཉེར་གཅིག་གིས་ཕུལ་ལ། མཆོད་སྦྱིན་གྱི་གཏོར་མ་འདོད་ཡོན་མ་ཚང་བ་མེད་པ་དགོས་འདོད་འབྱུང་བའི་གཏོར་མ་ཟག་མེད་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་འཛད་པ་མེད་པ་འདི་ཉིད་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། རྗེ་བཙུན་མ་འཕགས་མ་སྒྲོལ་མ་ཐུགས་རྗེའི་བདག་ཉིད་ཅན་ཉི་ཤུ་རྩ་གཅིག་ལ་སོགས་པ་ཡི་དམ་རྒྱུད་སྡེ་བཞི་དང་ཐེག་པ་རིམ་དགུའི་དཀྱིལ་འཁོར་གྱི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ་རྣམས་དང་། བསྟན་པ་དང་འཁོར་རྣམ་བཞི་སྐྱོང་བར་ཞལ་གྱིས་བཞེས་པའི་ཕྱི་ནང་གི་དམ་ཅན་ཆོས་སྐྱོང་སྲུང་མའི་ཚོགས་མ་ལུས་པ་རྣམས་དང་། ནོར་ལྷ་གཏེར་བདག་དང་བཅས་པ་རྣམས་ལ་འབུལ་བར་བགྱིའོ། །བཞེས་ནས་རྐྱེན་ཕྱི་ནང་གི་བར་ཆད་ཐམས་ཅད་ཉེ་བར་ཞི་བར་མཛད་དུ་གསོལ། བདག་ཅག་འཁོར་དང་བཅས་པའི་དོན་ཐམས་ཅད་ཆོས་དང་མཐུན་པའི་ཡིད་བཞིན་དུ་འགྲུབ་པར་མཛད་དུ་གསོལ། བདག་སོགས་སེམས་ཅན་ཐམས་ཅད་ཀྱི་རྒྱུད་ལ་ཚོགས་གཉིས་རྫོགས་སྒྲིབ་གཉིས་བྱང་ནས་མྱུར་དུ་སངས་རྒྱས་ཀྱི་གོ་འཕང་ཐོབ་པར་མཛད་དུ་གསོལ། ན་མོ། བདག་གིས་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་འདིར་མ་ལུས་པ། །ཐོགས་པ་མེད་པར་འབྱུང་གྱུར་ཅིག །ཅེས་བརྗོད་རོལ་མོ་དང་བཅས་པས་གཏོར་མ་དང་པོ་རྟེན་གྱི་དྲུང་དུ་ཕུལ་ལ། རྗེ་བཙུན་འཕགས་མ་སྒྲོལ་མ་དང་། སོགས་ནས། ཀུན་ནས་དང་བས་ཕྱག་བགྱིའོ། །ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ན་མེ་ཎ་བཛྲ་བྷནྡྷ་ནཾ་ཀ་རོ་མི་ཞེས་ཕྱག་འཚལ་ཞིང་། མེ་ཏོག་བདུག་སྤོས་མར་མེ་དྲི། ཞེས་པ་ནས། འཕགས་མའི་ཚོགས་ཀྱིས་བཞེས་སུ་གསོལ། གྱི་བར་དང་། ༀ་བཛྲ་པུཥྤེ་ཨཱཿཧཱུྃ་ནས། ནཻ་ཝི་དྱའི་བར་ཉེར་སྤྱོད་ལྔ་དང་། ༀ་སརྦ་བི་ཤི་ཥྛ་པཱུ་ཛ་མེ་གྷ་པྲ་ས་ར་ས་མུ་དྲེ་ཨཱཿཧཱུྃ། གིས་འཕན་གདུགས་རྒྱལ་མཚན་རིན་ཆེན་སྣ་བདུན་ལ་སོགས་པས་མཆོད་པའི་རྗེས་སུ། ཐོག་མ་མེད་ནས་ད་ལྟའི་བར། ཞེས་པ་ནས། འདྲེན་པའི་དཔལ་དུ་བདག་གྱུར་ཅིག །ཅེས་པའི་བར་དང་། རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །སོགས་ཀྱང་བརྗོད་དོ། །སྐབས་འདིར་རང་ལུགས་ཀྱི་ཆོས་སྐྱོང་གཏོར་འབུལ་བྱེད་པར་འདོད་ནའང་རྒྱས་བསྡུས་གང་འགྲུབ་བྱ་བར་གསུངས་པས་སྤྲོ་ན་བྱ། མ་བྱས་ཀྱང་གཞུང་གི་དངོས་དོན་མིན་པས་དོ་གལ་མེད་དོ། །གང་ལྟར་གསོལ་བ་གདབ་པ་ནི། ཐལ་མོ་སྤྱི་བོར་སྦྱར་ཏེ་ཡིད་བརྟན་པའི་སྒོ་ནས་ཚིགས་འདི་དག་བརྗོད་དོ། །ན་མོ། འཕགས་པ་དཀོན་མཆོག་གསུམ་གྱི་མཐུ་དང་། གསང་སྔགས་གཟུགས་སྔགས་རིག་སྔགས་ཀྱི་མཐུ་དང་། ཡི་དམ་ཞི་བ་ཁྲོ་བོ་རྣམས་ཀྱི་མཐུ་དང་། ཁྱད་པར་དུ་འཕགས་མ་སྒྲོལ་མ་ཐུགས་རྗེའི་བདག་ཉིད་ཅན་ཉི་ཤུ་རྩ་གཅིག་གི་མཐུ་དང་། བསྟན་པ་རིན་པོ་ཆེ་བསྲུང་ཞིང་སྐྱོང་བར་ཞལ་གྱིས་བཞེས་པའི་དམ་ཅན་ཆོས་སྐྱོང་སྲུང་མ་རྣམས་ཀྱི་མཐུ་དང་། ཆོས་ཉིད་རྣམ་པར་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་མཐུ་དང་། བདག་གིས་གཏན་པ་མེད་པའི་མཆོད་སྦྱིན་རྒྱ་ཆེན་པོ་བགྱིས་པའི་མཐུ་སྟོབས་ནུས་པ་ལ་བརྟེན་ནས། ལྷ་དང་ཀླུ་དང་། གྲུལ་བུམ་དང་དྲི་ཟ་དང་ཤ་ཟས་དང་། སྲུལ་པོ་དང་སྨྱོ་བྱེད་དང་བརྗེད་བྱེད་དང་། དེ་དག་རྒན་པོ་དང་རྒན་མོ་དང་། དེ་དག་གི་བུ་ཕོ་དང་བུ་མོ་དང་། འཁོར་ཕོ་དང་འཁོར་མོ་དང་། མངགས་པ་དང་། གཞན་ཡང་མ་མོ་མཁའ་འགྲོ་དང་། ལོག་འདྲེན་ཐམས་ཅད་དང་། གཤིན་རྗེ་དང་རྒྱལ་པོ་དང་། འགོང་པོ་དང་། ནམ་མཁའ་ལྡིང་དང་། གཉན་དང་ས་བདག་དང་། ཀླུ་སྲིན་རྣམས་དང་། གནོད་སྦྱིན་དང་། འབྱུང་པོ་ཐམས་ཅད་དང་བཙན་བདུད་རྣམས་དང་། ཡི་དྭགས་རྣམས་དང་། དྲང་སྲོང་དང་རིག་སྔགས་འཆང་བ་ཐམས་ཅད་དང་། གཟའ་དང་། རྒྱུ་སྐར་དང་། ལོ་དང་། ཟླ་བ་དང་། ཞག་དང་། ཟ་མ་ལ་སོགས་པ་ཐམས་ཅད་དང་། གདོན་བགེགས་ཆེན་པོའི་རིགས་ཐམས་ཅད་ཀྱི་སྦྱོར་བ་ངན་པས་གནོད་པའི་ལས་བྱེད་པའི་བསམ་སྦྱོར་ངན་པ་ཐམས་ཅད་ཞི་བར་གྱུར་ཅིག །མེད་པར་གྱུར་ཅིག །མི་འབྱུང་བར་གྱུར་ཅིག །ཕྱིན་ཆད་མི་བྱེད་པར་དམ་ཆོས་ཤིག །དེའི་ཕྱིར་སོ་སོའི་འདོད་ཡོན་རྣམས་ཀྱང་སྟེར་རོ། །བདེན་པའི་ཆོས་ཀྱང་འཆད་དོ། །བདག་ཅག་དཔོན་སློབ་རྒྱུ་སྦྱོར་བ་ལ། མི་ནད་དང་ཕྱུགས་ནད་དང་། རྨི་ལམ་ངན་པ་དང་། ལྟས་ངན་པ་དང་། བཀྲ་མི་ཤིས་པ་དང་། བྱད་ཀ་དང་། ཕུར་ཀ་དང་གཏད་ཁྲོམ་དང་། ལོ་ཀག་དང་། ཟླ་ཀག་དང་། ཞག་ཀག་དང་། དུས་ཀྱི་ཀག་དང་། ལོ་ཉེས་དང་། ཐན་ཆེན་དང་། བཙའ་དང་། སད་དང་། སེར་བ་དང་། ཇག་རྐུན་དང་། ནད་སྲི་དང་། འཆི་སྲི་དང་། ཆེ་སྲི་དང་། ཆུང་སྲི་དང་། དར་སྲི་དང་། རྒན་སྲི་དང་། དུར་སྲི་དང་གོད་ཁ་དང་གོད་སྲི་དང་། བྱུར་དང་མི་ཁ་དང་། རྦོད་གཏོང་དང་། བསམ་སྦྱོར་ངན་པ་དང་། བགེགས་དང་ལོག་འདྲེན་ཐམས་ཅད་དང་། དུས་མ་ཡིན་པར་འཆི་བ་དང་། ནོར་དང་ལོངས་སྤྱོད་མི་འཕེལ་བར་བྱེད་པ་དང་། བཀྲ་མི་ཤིས་པར་བྱེད་པ་ཐམས་ཅད་དང་། བདག་ཅག་འཁོར་དང་བཅས་པའི་ལུས་ངག་ཡིད་གསུམ་ལ་གནོད་པར་བྱེད་པའི་ནད་རིགས་གདོན་བགེགས་བར་ཆད་དང་རྐྱེན་ངན། དགྲ་འདྲེ་བྱུར་གསུམ་གྱི་གནོད་པ་ཐམས་ཅད་ཞི་བར་གྱུར་ཅིག །མེད་པར་གྱུར་ཅིག །ཕྱིར་ཟློག་པར་གྱུར་ཅིག །ཕྱིན་ཆད་མི་འབྱུང་བར་གྱུར་ཅིག །ཐལ་མོ་བརྡབ་ལ་རོལ་མོ་དྲག་ཏུ་བྱ་བའི་མཐར། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་ཀྱི་སྟོབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རང་བཞིན་གྱིས་རྣམ་པར་དག་ཅིང་། ཆོས་ཉིད་རྒྱུ་འབྲས་བསླུ་བ་མེད་པའི་སྟོབས་ཀྱིས་དེ་དེ་བཞིན་དུ་འགྲུབ་པར་གྱུར་ཅིག །ཅེས་བརྗོད། དེས་མཆོད་བསྟོད་དང་གཏོར་མ་ཆ་དང་པོ་གྲུབ། ༈ གཉིས་པ་ལ་སླར་ཡང་མཆོད་པ་ཁ་གསོ། བྱིན་རླབས་ནས་བརྩམ། ཚར་དང་པོ་ལ་རྒྱས་པ་དང་། ཕྱི་མ་རྣམས་ལ་མཆོད་ཚིག་བསྡུས་པའི་མཆོད་པ། ཕྱག་འཚལ་ཉེར་གཅིག་གི་བསྟོད་པ་སྤེལ་བ་ལན་བདུན་གྱི་མཐར་ཕན་ཡོན་བཅས་གྲུབ་ནས། གཏོར་མ་གཉིས་པའང་འབྲུ་གསུམ་གྱི་བྱིན་གྱིས་བརླབས་ནས། ༀ་ཨཱ་ཀཱ་རོ་སོགས་ལན་བདུན་བརྗོད་པའི་རྗེས་སུ། རང་རང་གི་ཡིད་དང་མཐུན་པའི་གཏོར་མ་འདོད་ཡོན་ཕུན་སུམ་ཚོགས་པ་ཐམས་ཅད་ནམ་མཁའ་མཛོད་བཞིན་དུ་འཛད་པ་མེད་པ་འདི་ཉིད་བགེགས་རིགས་སྟོང་ཕྲག་བརྒྱད་ཅུ། བྱིས་པའི་གདོན་ཆེན་བཅོ་ལྔ། ནད་བདག་ཡམས་བདག་གདོན་བགེགས་འབྱུང་པོའི་རིགས་སུ་གྱུར་པ་ཐམས་ཅད་དང་འགྲོ་བ་རིགས་དྲུག་ལམ་རྒྱུད་ལྔ་སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་ལ་སྦྱིན་ནོ། །སོ་སོའི་བསམ་པ་དང་མཐུན་པའི་ལོངས་སྤྱོད་ཟད་མི་ཤེས་པ་ཇི་སྲིད་འཁོར་བ་མ་སྟོངས་ཀྱི་བར་དུ་འབྱུང་ཞིང་རྒྱས་པར་གྱུར་ཅིག །ཐམས་ཅད་སྡུག་བསྔལ་ལས་ཐར་ནས་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་རིན་པོ་ཆེའི་མྱུར་དུ་ཐོབ་པའི་སྐལ་བ་དང་ལྡན་པར་གྱུར་ཅིག །ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ན་མོ། བདག་གི་བསམ་པའི་སྟོབས་དག་དང་། །སོགས་ནས། ཐོགས་པ་མེད་པར་འབྱུང་གྱུར་ཅིག །ཞེས་པའི་བར་གོང་བཞིན་བརྗོད་ལ་གཏོར་མ་མདོས་ནང་ཕུལ་བ་རོལ་མོ་བྱ། དེ་ནས་ཐལ་མོ་མགྲིན་པའི་ཐད་དུ་སྦྱར་ལ། ༈ ན་མོ། འཕགས་པ་དཀོན་མཆོག་གསུམ་གྱི་མཐུ་དང་། སོགས་ནས་ཐལ་མོ་བརྡབ་ནས་རོལ་མོ་བྱ་བ་དང་། དེ་བཞིན་དུ་འགྲུབ་པར་གྱུར་ཅིག །ཅེས་པའི་བར་གོང་བཞིན་བརྗོད་དོ། །དེས་མཆོད་བསྟོད་གཏོར་མ་ཆ་གཉིས་པ་གྲུབ། ༈ གསུམ་པ་ལ་ཡང་མཆོད་པ་ཁ་གསོ། བྱིན་རླབས་ནས་མཆོད་བསྟོད་རྒྱས་བསྡུས་འདོན་ལུགས་སྔ་མ་བཞིན་ཚར་བདུན་ཕན་ཡོན་དང་བཅས་པ་སོང་ནས། གཏོར་མ་གསུམ་པ་འབྲུ་གསུམ་གྱིས་བྱིན་བརླབ། ༀ་ཨ་ཀཱ་རོ་སོགས་ལན་གསུམ་གྱིས་བསྔོས་ནས། མཆོད་སྦྱིན་གྱི་གཏོར་མ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་སོ་སོའི་ཡིད་དང་མཐུན་པའི་ལོངས་སྤྱོད་ཟག་པ་མེད་པ་འདི་ཉིད་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་ཚེ་རབས་འཁོར་བ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་དུ་ཉོན་མོངས་པ་དུག་གསུམ་དང་དུག་ལྔའི་དབང་གིས་བརྐུས་ཤིང་འཕྲོག་པས་ནོར་དབུལ་བའི་ལན་ཆགས། བརྡུང་ཞིང་བརྩོགས་པས་ནད་དང་འཚེ་བའི་ལན་ཆགས། བསད་ཅིང་གཏུབ་པ་སྲོག་བཅད་པས་ཚེ་ཐུང་བའི་ལན་ཆགས། མཐོ་བའི་མཁར་ཕབ་པ་དམའ་བའི་ཡུལ་བཅོམ་པ། མི་རྟ་གྲིར་བསད་པ། སྔོན་གྱི་ལན་ཆགས་པ་ལ་སོགས་པའི་ལན་ཆགས་དང་ཤ་འཁོན་གྱི་བདག་པོ་བདག་མོ་ཐམས་ཅད་ལ་སྦྱིན་ནོ། །གནོད་བྱེད་གདོན་བགེགས་ལན་ཆགས་ཀྱི་རིགས་སུ་གྱུར་པ་ཐམས་ཅད་ཚིམས་པར་གྱུར་ཅིག །ངོམས་པར་གྱུར་ཅིག །ཚེ་རབས་ཐོག་མ་མེད་པ་ནས་བསགས་པའི་ལན་ཆགས་ཐམས་ཅད་བྱང་བར་གྱུར་ཅིག །བུ་ལོན་སོད་པར་གྱུར་ཅིག །ཤ་མཁོན་དང་ཕོག་ཐུགས་སུ་གྱུར་པ་ཐམས་ཅད་ཞི་བར་གྱུར་ཅིག །བསམ་ངན་དང་གནོད་སེམས་གདུག་རྩུབ་ཐམས་ཅད་དང་བྲལ་ནས། ཕན་པ་དང་ཞི་བ་དང་བྱང་ཆུབ་ཀྱི་སེམས་དང་ལྡན་པར་གྱུར་ཅིག །མཐར་ཐུག་རྣམ་མཁྱེན་སངས་རྒྱས་ཀྱི་གོ་འཕང་རིན་པོ་ཆེ་མྱུར་དུ་ཐོབ་པའི་སྐལ་བ་དང་ལྡན་པར་གྱུར་ཅིག །ཐམས་ཅད་ནམ་མཁའ་མཛོད་བཞིན་དུ། །སོགས་ནས། ན་མོ། བདག་གི་བསམ་པའི་སྟོབས་དག་དང་། །སོགས་གོང་ལྟར་དུ་བརྗོད་པས། རོལ་མོ་དང་བཅས་པས་གཏོར་མ་མདོས་ནང་དུ་ཕུལ་ལོ། །དེ་ནས་ཐལ་མོ་སྙིང་གར་སྦྱར་ལ་ཡིད་བརྟན་པའི་ངང་ནས། ན་མོ། འཕགས་པ་དཀོན་མཆོག་གསུམ་གྱི་མཐུ་དང་། སོགས་ནས་ཐལ་མོ་བརྡེབ་པ་རོལ་མོ་བཅས། དེ་དེ་བཞིན་དུ་འགྲུབ་པར་གྱུར་ཅིག །བར་ཚང་བར་བརྗོད་པས་ཆ་གསུམ་པ་གྲུབ། ༈ གཏོར་མ་བཞི་པ་བཞི་བདག་དཀར་གཏོར་མདོས་ཀྱི་ལམ་སེལ་གྱི་ཚུལ་དུ་བསྔོ་བ་ཡིན་པས། སྤྲོ་ན་གསེར་སྐྱེམས་དཀར་གཏོར་སྤྱི་འགྲོ་རྒྱས་པ་སྐབས་འདིར་སྦྱར་ཆོག །བསྡུ་ན་འབྲུ་གསུམ་གྱིས་བྱིན་བརླབ། ཨ་ཀཱ་རོ་ལན་གསུམ་གྱིས་བསྔོ། སྡིག་པ་ཅི་ཡང་མི་བྱ་ཞིང་། །སོགས་ཆོས་སྦྱིན་བྱེད་ལ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་གནས་བདག་གཞི་བདག་ཡུལ་བདག་གྲོང་བདག་གཉུག་མར་གནས་པ་རྣམས་ལ་འབུལ་ལོ། །སངས་རྒྱས་ཀྱི་བསྟན་པ་དར་བ་དང་། འཇིག་རྟེན་དུ་དགེ་ལེགས་རྒྱ་ཆེན་པོ་འབྱུང་ཞིང་། བདག་ཅག་དཔོན་སློབ་སྦྱིན་བདག་འཁོར་བཅས་ཀྱི་འགལ་རྐྱེན་བར་ཆད་ཐམས་ཅད་ཞི་ཞིང་བསམ་སྦྱོར་ཆོས་མཐུན་ཡིད་བཞིན་དུ་འགྲུབ་པའི་སྡོང་གྲོགས་མཛོད་ཅིག །ཅེས་པ་ཙམ་བརྗོད་ལ་མདོས་ཕུལ་ཕྱོགས་སུ་བསྐྱལ་བས་འཐུས་སོ། ༈ །བཞི་པ་མདོས་ཀླུད་སྣང་སྲིད་ལ་བརྫང་ཞིང་བསྔོ་བ་ལ། ཐོག་མར་སྔགས་དྲུག་ཕྱག་དྲུག་གིས་བྱིན་གྱིས་རླབས་པ་ནི། མདོས་ཆུ་གཙང་གིས་བྲན་ལ། བདག་ཉིད་བཅོམ་ལྡན་ཤཱཀྱ་ཐུབ། །ཕྱག་རྒྱའི་ཡི་གེ་ཨ་དཀར་ལས། །འོད་འཕྲོས་གཏོར་རྫས་དངོས་འཛིན་གྱི། །དྲི་མ་སྦྱོངས་ནས་སྟོང་བར་གྱུར། །ཐལ་མོ་ཁོང་སྟོང་སྦྱར་ལ། ༀ་སྭ་བྷཱ་ཝ་སོགས། ལན་གསུམ་རེ་རེ་བཞིན་ཕྱག་རྒྱ་བཀྲོལ་ནས་སེ་གོལ་གཏོགས་པ་གཞན་རྣམས་ལའང་འགྲེ། ཆོས་དབྱིངས་རྣམ་དག་ཕྱག་རྒྱ་སྔགས། །ཏིང་འཛིན་བདེན་པས་གཏོར་རྫས་ཀྱི། །འབག་རྩོག་ཉམས་གྲིབ་ཉེས་སྐྱོན་དང་། །མཚན་འཛིན་དྲི་མ་དག་གྱུར་ཅིག །བདག་ཉིད་བཅོམ་ལྡན་རྣམ་སྣང་མཛད། །ཕྱག་རྒྱའི་ཡི་གེ་ཁྃ་སྔོན་ལས། །འོད་འཕྲོས་གཏོར་རྫས་ཟག་མེད་མཛོད། ནམ་མཁའི་ཁམས་ཀུན་ཁྱབ་པར་གྱུར། ཐལ་མོ་སྦུབས་སྟོང་དུ་སྦྱར་བའི་ཚིགས་པར་པ་རྣམས་བཅག་པ་རིན་ཆེན་སྒྲོམ་བུའི་ཕྱག་རྒྱ་སྨིན་མཚམས་སུ་བསྐོར་ཞིང་། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ནམ་མཁའ་མཛོད་ཀྱི་ཕྱག་རྒྱ་སྔགས། །ཏིང་འཛིན་བདེན་རྫས་ཡེ་ཤེས་ཀྱི། །བསྐལ་པའི་བར་དུ་ཟད་མི་ཤེས། །རྒྱ་ཆེ་ནམ་མཁའ་གང་གྱུར་ཅིག །བདག་ཉིད་བཅོམ་ལྡན་བདུད་རྩི་འཁྱིལ། །ཕྱག་རྒྱའི་ཡི་གེ་ཧྲཱིཿདམར་ལས། །འོད་འཕྲོས་གཏོར་རྫས་ཡེ་ཤེས་ཀྱི། །བདུད་རྩི་ཆེན་པོའི་རང་བཞིན་གྱུར། །མཐེ་བོང་བསྣོལ། སོར་མོ་གཞན་རྣམས་གཤོག་པ་ལྟར་གདེངས་པ་བཞི་ཁའི་ཐད་དུ་བཞག་ལ། ༀ་བཛྲ་ཨ་མྲི་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། བདུད་རྩི་ཐབས་སྦྱོར་ཕྱག་རྒྱ་སྔགས། །ཏིང་འཛིན་བདེན་པས་གཏོར་རྫས་རྣམས། །བདུད་རྩི་ཡེ་ཤེས་ལྔ་ཡི་དངོས། །འཆི་གསོས་དུག་ལྔའི་སྨན་གྱུར་ཅིག །བདག་ཉིད་བཅོམ་ལྡན་རིན་ཆེན་འབྱུང་། །ཕྱག་རྒྱའི་ཡི་གེ་ཏྲྃ་སེར་ལས། །འོད་འཕྲོས་གཏོར་རྫས་འདོད་ཡོན་ལྔ། །སོ་སོའི་མོས་པ་ཇི་བཞིན་གྱུར། །ལག་པ་གཉིས་མཛུབ་མོ་སྒྲེངས་བའི་ཁུ་ཚུར་གཡོན་སྙིང་གར་བཞག །གཡས་བརྐྱངས་ཏེ་རྫས་ལ་གཏོད་པའི་ཚུལ་བྱས་ལ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུཾ། རྒྱ་ཆེན་ཤུགས་ལྡན་ཕྱག་རྒྱ་སྔགས། །ཏིང་འཛིན་བདེན་པས་གཏོར་རྫས་རྣམས། །དབང་པོའི་སྤྱོད་ཡུལ་ཚིམས་བྱེད་པའི། །འདོད་ཡོན་སྣ་ཚོགས་ཆར་འབེབས་ཤོག །བདག་ཉིད་བཅོམ་ལྡན་དོན་ཡོད་གྲུབ། །ཕྱག་རྒྱའི་ཡི་གེ་ཧ་ལྗང་ལས། །འདོད་འཕྲོས་མཆོག་དམན་སྐལ་པ་བཞིན། །འཐབ་རྩོད་མེད་པར་ཐོབ་པར་གྱུར། །ལག་གཡས་རྡོ་རྗེ་ཁུ་ཚུར་སྙིང་གར་བཅང་། གཡོན་པས་མཆོག་སྦྱིན་གྱི་ཕྱག་རྒྱས་སྣོད་འདེགས་པའི་ཚུལ་བྱས་ལ། ༀ་ཛྙཱ་ན་ཨ་བ་ལོ་ཀི་ཏེ་སམྟ་སྥ་ར་ཎ་རསྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་ཧཱུྃ། འདི་གོ་ལྡོག་པའང་སྣང་། མཆན། ཡེ་ཤེས་སྐར་མདའི་ཕྱག་རྒྱ་སྔགས། ཏིང་འཛིན་ལྡན་པས་མགྲོན་རྣམས་ཀུན། །ཕམ་རྒྱལ་འཁྲུགས་རྩོད་མེད་པར་ཐོབ། །དགྱེས་ཤིང་རེ་བ་གང་གྱུར་ཅིག །བདག་ཉིད་བཅོམ་ལྡན་རྡོ་རྗེ་འཛིན། །ཕྱག་རྒྱའི་ཡི་གེ་ཛ་དམར་ལས། །འོད་འཕྲོས་མགྲོན་རྣམས་དབང་དུ་སྡུས། །ཕྲིན་ལས་གང་འདོད་སྒྲུབ་པར་གྱུར། །ལག་གཉིས་སོར་མོ་བསྣོལ་བའི་ཁུ་ཚུར་ངོས་མཐེ་བོང་གཉིས་གཤིབས་ཏེ་བརྐྱང་བ་སྤྱི་བོར་བསྐོར་ཏེ། ན་མཿས་མནྟ་བུདྡྷཿནཱཾ་གྲ་ཧེ་ཤྭ་རི་པྲ་བྷྱ་ཛྱ་ཏེ་ན་མ་ཧཱ་ས་མ་ཡེ་སྭཱ་ཧཱ། དབང་སྒྱུར་འཁོར་ལོའི་ཕྱག་རྒྱ་སྔགས། །ཏིང་འཛིན་བདེན་པས་མགྲོན་རིགས་ཀུན། །བདག་གི་དབང་འདུས་གང་བཅོལ་ལས། །སྒྲུབ་པའི་སྡོང་གྲོགས་མཛད་གྱུར་ཅིག །མཐར། ན་མོ། བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །ལན་ཆགས་མགྲོན་རྣམས་བརྔན་པ་དང་། །སེམས་ཅན་ཀུན་ལ་ཕན་གདགས་སླད། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་ནི་མ་ལུས་པ། །ཐོགས་པ་མེད་པར་འབྱུང་གྱུར་ཅིག །ཅེས་བདེན་པའི་སྟོབས་ཀྱིས་ཀྱང་བྱིན་གྱིས་བརླབ། བྱེ་བྲག་དམིགས་པའི་ཁྱད་པར་དབྱེ་ཞིང་བསྔོ་བ་ནི། ཨ་མྲྀ་ཏས་བསང་། སྭཱ་བྷ་ཝས་སྦྱང་། མདུན་དུ་རིན་པོ་ཆེ་ལས་གྲུབ་པའི་རི་རབ་བང་རིམ་བཞི་པའི་དབུས་སུ་ཁང་བཟང་ལྕགས་རིས་བསྐོར་བའི་མཐའ་བསྐོར་དང་རི་རབ་བང་རིམ་གྱི་སྟེང་རྣམས་སུ་མགྲོན་རྣམས་སོ་སོར་མཉེས་པའི་མཐུན་རྫས་འདོད་པའི་ཡོན་ཏན་ལྔ་ཡི་ལོངས་སྤྱོད་འཛད་པ་མེད་པ་ས་དང་ནམ་མཁའ་བར་སྣང་ཁྱབ་པར་གྱུར་བར་བསམས་ལ། སམྦྷ་རའི་སྔགས་ལན་བདུན་དང་། བཅོམ་ལྡན་འདས་དེ་བཞིན་གཤེགས་པ་རྒྱལ་བ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་ཡོངས་སུ་བྲལ་བ་ལ་ཕྱག་འཚལ་ལོ། །གསང་སྔགས་འདི་ཡི་མཐུ་དང་དེ་བཞིན་གཤེགས་པ་ཁྱེད་རྣམས་ཀྱི་མཚན་ནས་བརྗོད་ཅིང་། ཕྱག་འཚལ་བའི་བྱིན་རླབས་ལ་བརྟེན་ནས་བདག་གིས་གཏན་པ་མེད་པའི་མདོས་གཏོར་རྒྱ་ཆེན་པོ་བགྱིས་པ་འདིའི་མཐུས་མགྲོན་རིགས་ཐམས་ཅད་ཚིམས་ཤིང་མགུ་ནས་བདག་གཞན་གྱི་བསམ་པའི་དོན་ཐམས་ཅད་ཆོས་དང་མཐུན་པ་ཡིད་བཞིན་དུ་འགྲུབ་པར་གྱུར་ཅིག །དེ་ནས་སྐབས་འདིར་ཡི་དམ་དྲག་པོ་བསྐྱེད་པར་བཤད་པས། བདག་ཉིད་སྐད་ཅིག་གིས་བཅོམ་ལྡན་འདས་པདྨ་དབང་ཆེན་སྐུ་མདོག་དམར་པོ་ཞལ་གཅིག་ཕྱག་གཉིས་པ། ཕྱག་གཡས་པས་སེང་ལྡེང་གི་དབྱུག་ཏོ་ནམ་མཁའ་ལ་ཕྱར་ཞིང་། གཡོན་ཐུགས་ཀར་བསྡིག་མཛུབ་མཛད་པ། དམར་ལ་ཟླུམ་པའི་སྤྱན་གསུམ་གདོང་མིག་ཏུ་བགྲད་ཅིང་། ཞལ་ནས་མཆེ་བ་བཞི་རྣམ་པར་གཙིགས་པ། སྨིན་མ་དང་སྨ་ར་དམར་སེར་དུས་མཐའི་མེ་ལྟར་འབར་བ། དབུ་སྐྲ་ཁམ་སེར་གྱེན་དུ་བརྫེས་པ། སྤྱི་གཙུག་ན་རྟ་མགོ་ལྗང་གུ་རྟ་སྐད་འབྱིན་པ། ཀླུ་ཆེན་པོ་བརྒྱད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། ཞབས་གཡས་བསྐུམ་གཡོན་བརྐྱངས་པས་ཡེ་ཤེས་ཀྱི་མེ་རབ་ཏུ་འབར་བའི་ཀློང་དཀྱིལ་ན་བཞུགས་ནས་གནོད་བྱེད་གདུག་པ་ཅན་དང་། སྡིག་སྒྲིབ་ཐམས་ཅད་སྲེག་པར་བྱེད་པ་ཆེ་བཙན་འགྲན་ཟླ་དང་བྲལ་བའི་སྐུར་གྱུར། མདུན་བསྐྱེད་སྒྲོལ་མ་འཁོར་བཅས་ཀྱང་གཟུ་དང་དཔང་ལ་བཞུགས་ནས། བདག་གིས་ཇི་ལྟར་བསྔོས་ཤིང་ཟློག་སྒྱུར་བརྗོད་པའི་ཕྲིན་ལས་མཛད་པས་མགྲོན་ཐམས་ཅད་ཀྱིས་བཀའ་ཉན་ཅིང་ཕྲིན་ལས་མྱུར་དུ་སྒྲུབ་བར་གྱུར། ཅེས་པའི་ང་རྒྱལ་མ་བྲལ་བར་རོལ་མོ་དབྱངས་དང་བཅས་ཏེ་འདི་སྐད་དོ། །ཧཱུཾ། གསོན་ཅིག་དགོངས་ཤིག་ཐམས་ཅད་ཉོན། །རྩ་བརྒྱུད་བླ་མ་ཐམས་ཅད་ཀྱིས། །དོ་ནུབ་བཟློག་སྒྱུར་མཛད་དུ་གསོལ། །ཡི་དམ་ལྷ་ཚོགས་ཐམས་ཅད་ཀྱིས། །དོ་ནུབ་བཟློག་སྒྱུར་མཛད་དུ་གསོལ། །རྗེ་བཙུན་འཕགས་མ་སྒྲོལ་མ་ཀུན། །དོ་ནུབ་བཟློག་སྒྱུར་མཛད་དུ་གསོལ། །ངན་པར་གྱུར་པ་ཐམས་ཅད་ཀུན། །མྱུར་དུ་བཟློག་ཅིང་མེད་པར་མཛོད། །དམ་ཅན་ཆོས་སྐྱོང་སྲུང་མ་རྣམས། །འདིར་ནི་བཅོལ་པའི་ཕྲིན་ལས་མཛོད། །མདོས་གཏོར་མཆོད་སྦྱིན་གླུད་དང་བཅས། །འདི་རྣམས་ཁྱེར་ལ་གནོད་མ་བྱེད། །སྣང་སྲིད་ལྷ་འདྲེ་སྡེ་བརྒྱད་སོགས། །སྔགས་འཆང་བདག་གི་ངག་ལ་ཉོན། །གཞན་གྱིས་རྦད་ལ་མ་ཉན་ཅིག །གདོན་བགེགས་ཆེན་པོ་ཁྱོད་རྣམས་ཀྱི། །བསམ་སྦྱོར་ངན་པ་ཞི་བར་གྱིས། །ཁྱོད་ལ་དགོས་པའི་གཏོར་མ་དང་། །སྲོག་ཆགས་ནོར་གླུད་མང་པོ་དང་། །ལ་རྫས་ལུང་རྫས་འདོད་གུར་བཅས། །ཡིད་འོང་ཁང་པ་སྤེའུ་ཞོལ་དང་། །ཡིད་འོང་རྟ་ཕོ་ཆེ་མགྱོགས་ལ། །འབྲུ་ཡི་ངར་མི་ཆེན་པོ་བསྐྱོན། །ལུས་ལ་གསེར་གཡུའི་རྒྱན་ཆ་བཏགས། །རྒྱན་ཆ་ཡིད་འོང་སི་ལི་ལི། །དར་གྱི་གོས་གྱོན་ལྷུབས་སེ་ལྷུབ། །སྨྲ་བ་མཁས་ཤིང་བཞིན་མདངས་རྒྱས། །འོག་ན་རྟ་ཞོན་ཞུངས་སེ་ཞུང་། །མགོ་ལ་ཐོད་བཅིངས་པུ་རུ་རུ། །རྩེད་འཇོ་སྣ་ཚོགས་བསྒྱུར་ལ་མཁས། །གཡུ་ཡི་ལྷྭམ་ཆུང་ཟུ་ལུ་ལུ། །གསེར་གྱི་སྐེད་ཆིངས་ཁྲུ་ལུ་ལུ། །ནམ་རྒྱང་ལྡེམ་པས་སྐུ་ལ་བརྒྱན། །ཕོ་ཏོང་མོ་ཏང་མི་སྐད་སྨྲ། །མངའ་རིས་འདོད་རྒུ་ཚང་བ་རྣམས། །ཡོན་བདག་གླུད་དུ་ཁྱོད་ལ་འབུལ། །ཡིད་འོང་ནོར་ནི་མང་པོ་དེར། །ཞལ་ཟས་ཞིམ་དགུ་མངར་བཅུ་དང་། །འཁོར་གཡོག་ངར་མི་སུམ་ཅུ་དང་། །སྨན་སྤོས་སྒྲོན་མེ་གསལ་བ་རྣམས། །ཁྱེད་ལ་མཆོད་པ་འབུལ་ལགས་ཀྱིས། །དྭང་བའི་སེམས་ཀྱིས་བཞེས་ནས་སུ། །སྔགས་པས་ཕུར་བུ་བསྒྲིལ་བ་དང་། །ཡུངས་ཀར་ཐུན་དུ་བྲབ་པ་དང་། །ཟོར་ཁ་སྣ་ཚོགས་འཕེན་པ་དང་། །མནན་གཏད་སྦྱོར་བ་བྱེད་པ་རྣམས། །དེ་དག་ནུས་པ་ཕྱིར་ལ་བཟློག །བོན་པོས་རྔ་ཆེན་བརྡུང་བ་དང་། །སྔོན་དམར་འུར་རྡོ་འཕེན་པ་དང་། །རྩོད་བསྡིག་བྱེད་པ་ཕྱིར་ལ་ཟློག །དྲག་སྔགས་ཕྲ་མེན་བྱེད་པ་དང་། །སྡེ་བརྒྱད་དྲག་པོས་བསྐུལ་བ་རྣམས། །དེ་དག་ནུས་པ་ཕྱིར་ལ་བཟློག །ཆོས་སྐྱོང་ལྷ་འདྲེ་ཐམས་ཅད་ཀྱང་། །ལ་ལ་དཀོར་གྱི་ཤུལ་དུ་འབྲངས། །ལ་ལ་མནའ་ཟན་གཤེད་དུ་འོང་། །ལ་ལ་སྔགས་པ་དྲག་པོས་རྦད། །ལ་ལས་སྟོན་པའི་རྒྱུ་འབྲས་སྟོན། །ལ་ལས་རིམས་ནད་དལ་ཡམས་གཏོང་། །ཆར་པ་མི་འབེབས་ལོ་ཉེས་གཏོང་། །འགའ་ཞིག་སད་དང་སེར་བ་གཏོང་། །ལན་ཆགས་བུ་ལོན་འདེབས་པ་དང་། །ཉེ་འབྲེལ་གྲོགས་ཀྱི་ཤུལ་འབྲང་དང་། །མཛེ་ནད་གཏོང་བའི་ཀླུ་རྣམས་དང་། །གནོད་བྱེད་ལན་ཆགས་ལྷ་འདྲེ་རྣམས། །ཤ་ཁྲག་སྲོག་དབུགས་ཟ་བ་དང་། འབྲས་བུ་ལོ་ཐོག་ཟ་བ་དང་། །ངར་སྣབས་མི་གཙང་ཟ་བ་དང་། །འབྱུང་བའི་ལྷ་དང་ས་བདག་དང་། །ལོ་དང་སྤར་ཁ་སྨེ་བར་བཅས། །ཀུན་ཀྱང་གླུད་ཀྱིས་མཉེས་གྱུར་ཅིག །གནོད་འགལ་ངན་པ་ཞི་བར་མཛོད། །བུ་ལོན་ལན་ཆགས་དག་པར་བཅོལ། །བདག་ཅག་ལོངས་སྤྱོད་འཕེལ་བར་མཛོད། །རྦོད་གཏོང་བྱད་ཁ་ཟློག་ཏུ་གསོལ། །བསམ་པའི་དོན་རྣམས་འགྲུབ་པར་མཛོད། །སྙིང་རྗེའི་སྟོབས་ཀྱིས་དམ་ཆོས་བཤད། །ཁྱོད་ཀྱང་མ་རིག་འཁོར་བར་འཁྱམས། །ད་ནི་བྱང་སེམས་ལྡན་པར་གྱིས། །རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་སྐྱེལ་བར། །སྡིག་སྤངས་ཐར་པའི་ལམ་ལ་སྙོམས། །རང་སེམས་ཆོས་སྐུའི་རང་ཞལ་ལ། །འཛིན་མེད་ཡེངས་མེད་རྒྱུན་དུ་ལྟོས། །སྟོང་ཉིད་སྙིང་རྗེའི་ངང་ཉིད་ལ། །ནད་དང་དལ་ཡམས་ཞི་བར་མཛོད། །ལོ་ལེགས་ཆར་ཆུ་དུས་སུ་ཕོབ། །རྣལ་འབྱོར་བདག་ཅག་འཁོར་བཅས་ལ། །སྔ་དགྲ་སྡང་དང་ད་དགྲ་རྩུབ། །ཕྱི་དགྲ་ཤོམ་པ་ཐམས་ཅད་ཟློག །གློ་བུར་བརྒྱད་ཅུ་རྩ་གཅིག་ཟློག །ཡེ་འདྲོག་སུམ་བརྒྱ་དྲུག་ཅུ་ཟློག །བཞི་བརྒྱ་རྩ་བཞིའི་ནད་རྣམས་ཟློག །སྟོང་ཕྲག་བརྒྱད་ཅུའི་བགེགས་རྣམས་ཟློག །ཡ་བདུད་གཡོས་དང་དམ་སྲི་ལོངས། །མ་བདུད་མ་ཚན་རྒྱབ་འདྲེ་དང་། །མ་བུའི་བྱུར་འདྲེ་བཟློག་ཏུ་གསོལ། །སྡང་བའི་དགྲ་དང་གནོད་པའི་བགེགས། །ཐམས་ཅད་མ་ལུས་ཟློག་ཏུ་གསོལ། །ལོ་ཟླ་ཞག་དུས་ངན་པ་ཟློག །ཕུང་འདྲེ་ཐམས་ཅད་ཟློག་ཏུ་གསོལ། །ལྟོག་འདྲེ་ཐམས་ཅད་ཟློག་ཏུ་གསོལ། །སྲི་ལ་རྐུ་བ་ཟློག་ཏུ་གསོལ། །བྱིས་པའི་གདོན་རྣམས་ཟློག་ཏུ་གསོལ། །ཕྱུགས་ཀྱི་གདོན་རྣམས་ཟློག་ཏུ་གསོལ། །མི་ཁ་ཁ་སྨྲས་མ་གཏོང་ཞིག །གཞན་གྱི་གཡུལ་ངོ་ཞི་བ་དང་། །བདག་གི་དམག་ཐབས་ལེགས་པར་མཛོད། །དགྲ་ཇག་ཆོམ་རྐུན་ཞི་བར་མཛོད། །མྱོས་ཤིང་འཐབ་པ་བསམ་པ་དང་། །ཉིན་གཅིག་གཉིས་གསུམ་བདུན་པ་ཡི། །རིམས་ནད་ཐམས་ཅད་ཞི་བར་མཛོད། །ཉམ་ང་འཚེ་བ་ཟློག་ཏུ་གསོལ། །ངན་དང་རྩུབ་པའི་རིགས་རྣམས་ཀུན། །ད་ལྟ་ཉིད་དུ་ཟློག་ཏུ་གསོལ། །ཡུལ་ཕྱོགས་དགེ་བར་མཛད་དུ་གསོལ། །དམ་ཆོས་རྒྱས་པར་མཛད་དུ་གསོལ། །འཐབ་རྩོད་ཞི་བར༴ ལོ་བརྒྱ་འཚོ་བར༴ སྟོན་བརྒྱ་མཐོང་བར་མཛད་དུ་གསོལ། །བཀྲ་ཤིས་རི་བོ་བརྟན་པ་དང་། །བསོད་ནམས་ནམ་མཁའ་ཉི་འོད་དང་། །མི་ཕྱེད་མི་ཤིགས་དངོས་གྲུབ་སྩོལ། །ཞེས་བརྗོད་པས་ལམ་དུ་བསྐྱལ་བཅོལ་ལ། རང་གིས་ནང་ནས་འོག་ཏུ་བཤད་པའི་བདེན་སྟོབས་བརྗོད། ཟློག་པ་འདི་ཚར་གྲངས་གསུམ་སོགས་བསྐྱར་འདོད་ནའང་བྱ་ཆོག །ཡང་ན་རིམས་གཅོད་པ་སོགས་གལ་ཆེ་དུས་ཕྱི་རོལ་དུ་གཏོ་སྐྱེེལ་བྱེད་ན་འཕེན་ཕྱོགས་སུ་དར་ནག་དང་རོལ་མོ་བཅས་ཏེ་ཁྱེར། དེའང་ནད་ཡམས་དལ་ཕྱོགས་ལམ་མདོ་སོགས། །བྱད་ཁ་དང་དགྲ་བགེགས་ལ་དེ་ཕྱོགས། ཐན་ཆེན་ཆར་འབེབས་ལ་ཆུ་མགོའམ་མཚོ་འགྲམ་དུ་སྐྱེལ་བ་སོགས་རིགས་པས་དཔྱད། མདོས་གཏོར་གནམ་དུ་བཏེགས་ལ་རང་ཉིད་ཡི་དམ་གྱི་ང་རྒྱལ་བརྟན་པ་དང་། སྒྲོལ་མ་སོགས་ཀྱི་གཟུགས་དཔང་དང་རྒྱབ་བརྟེན་གསལ་བའི་ངང་ནས་བདེན་སྟོབས་བརྗོད་ཅིང་མདོས་བཟློག་བྱ་བ་ནི། ན་མོ། འཕགས་པ་དཀོན་མ ཆོག་གསུམ་གྱི་མཐུ་དང་སོགས་ནས། ཕྱིན་ཆད་མི་འབྱུང་བར་གྱུར་ཅིག །བར་གོང་ལྟར་བརྗོད་པའི་མཐར། སྔགས་པས་ཕུར་བུ་བསྒྲིལ་བ་དང་། ཡུངས་ཀར་ཐུན་དུ་བྲབ་པ་དང་། ཟོར་ཁ་གནན་གཏད་བྱེད་པ་དང་། དེ་དག་གི་ནུས་མཐུ་ཐམས་ཅད་ཕྱིར་བཟློག་ཏུ་གསོལ། བོན་པོས་རྔ་ཆེན་བརྡུང་བ་དང་། སྔོ་དམར་འུར་རྡོ་འཕེན་པ་དང་། ཛོ་རྡེག་བྱེད་པ་དང་། དྲག་སྔགས་ཕྲ་མེན་བྱེད་པ་དང་། སྡེ་བརྒྱད་དྲེགས་པ་བསྐུལ་བ་དང་། དེ་དག་གི་ནུས་མཐུ་ཐམས་ཅད་ཕྱིར་བཟློག་ཏུ་གསོལ། །ཆོས་སྐྱོང་དང་ལྷ་འདྲེ་རྣམས་དཀོར་གྱི་ཤུལ་དུ་ཕྲེང་བ་དང་། མནའ་ཟན་གཤེད་དུ་འོང་བ། སྔགས་པ་དྲག་པོས་རྦད་པ། བདེན་པའི་རྒྱུ་འབྲས་སྟོན་པ། རིམས་ནད་ཡམས་ནད་གཏོང་བ། ཆར་མེད་ཐན་ཆེན་གཏོང་བ། ལོ་ཉེས་བཙའ་དང་སད་སེར་གཏོང་བ། ལན་ཆགས་བུ་ལོན་སྙགས་པ། ཉེ་འབྲེལ་དང་གྲོགས་ཀྱི་ཤུལ་དུ་འབྲང་བ། ཀླུ་ནད་དང་མཛེ་ནད་དང་ཤུ་བ་གཏོང་བ། དེ་དག་གི་ནུས་མཐུ་ཐམས་ཅད་ཕྱིར་བཟློག་ཏུ་གསོལ། །ཤ་ཁྲག་སྲོག་དབུགས་འཕྲོག་པ། ཁེ་ཚོལ་གླག་ལྟ་བ། ཡིད་བརྒལ་བ། ལོ་ཟླ་ཞག་དུས་ཀྱི་ཀག་རྩུབ་པ། སྤར་ཁ་དང་སྨེ་བ་རྩུབ་པ། ལུས་ཁ་རྗེ་དབང་ཐང་ཞན་པ། བླ་གནས་དང་ཀླུང་རྟ་རྒུད་པ་ཐམས་ཅད་ཕྱིར་ཟློག་ཏུ་གསོལ། ནད་རིམས་མེ་ལྟར་མཆེད་པ། ལྟས་ངན་མུན་ལྟར་འཐིབ་པ། རྨིས་ལྟས་མཚན་མ་ངན་པ་ཐམས་ཅད་ཕྱིར་བཟློག་ཏུ་གསོལ། །ནད་རིམས་བཞི་བརྒྱ་རྩ་བཞི་དང་། བགེགས་རིགས་སྟོང་ཕྲག་བརྒྱད་ཅུ་ཟློག་ཏུ་གསོལ། །གློ་བུར་བརྒྱད་ཅུ་རྩ་གཅིག་གི་གནོད་པ་ཐམས་ཅད་ཕྱིར༴ བྱིས་པའི་གདོན་ཆེན་བཅོ་ལྔ། ཡ་བདུད་རྒྱལ་པོའི་གནོད་པ། མ་བདུད་མོ་འདྲེ་མོའི་གནོད་པ། དམ་ལོག་དམ་སྲིའི་གནོད་པ་དང་། ཕ་ཚན་གྱི་རྒྱབ་འདྲེ། མ་བུའི་བྱུར་འདྲེ། དགུ་མིག་དང་། དུར་མིག་དང་། བཞི་གཤེད་དྲུག་འགྲམ་བདུན་ཟུར་ཕྱོགས་ངན་བདུད་གཅོད་སྡང་དགྲ་གནོད་བྱེད་ཐམས་ཅད་ཕྱིར་ཟློག་ཏུ་གསོལ། ལོ་ཟླ་ཞག་དང་ཟ་མའི་ཀག་ངན་ཕུང་འདྲེ་ཕུང་སྲི། དབུལ་སྲི་མི་ལ་བསེ་རག་ལྟོག་འདྲེ་འགོང་པོ་ཕྱུགས་ཀྱི་གོད་ཁ་ཐམས་ཅད་ཕྱིར་ཟློག༴ དཔལ་ལ་འཇབ་པ་སྲིད་ལ་རྐུ་བ་དམག་སྣ་རྐུན་སྣ་ཟུག་པ་ཐམས་ཅད༴ དྲན་པ་མི་གསལ་བར་རྨུག་ཅིང་འཐིབ་པ་མི་ཁ་དང་སྨྲས་གཏོང་བ། ཉིན་མོའི་ལྟས་ངན་པ། མཚན་མོའི་རྨི་ལམ་ངན་པ་ཐམས་ཅད༴ ཚེ་འདིའི་རྐྱེན་དང་བྱུར། དམ་པའི་ཆོས་སྒྲུབ་པའི་བགེགས། ཕྱི་མའི་ས་ལམ་ལ་གནོད་པའི་འགལ་རྐྱེན་བར་དུ་གཅོད་པ་ཐམས་ཅད༴ མདོར་ན་བཀྲ་མི་ཤིས་པའི་རིགས་སུ་གྱུར་པ་གང་ཡིན་པ་དེ་དག་ཐམས་ཅད་བདག་ལ་སྡང་དགྲ་གནོད་བྱེད་བསམ་ངན་སྦྱོར་རྩུབ། དོ་བདོ་ཕོད་འཛུག་བསམ་ངན་ལོག་པར་ལྟ་བར་བྱེད་པའི་སྟེང་དུ་ད་ལྟ་ཉིད་དུ་ཕྱིར་བསྒྱུར་རོ། །ཕྱིར་ཟློག་གོ། །བདག་ཅག་འཁོར་དང་བཅས་པ་ལ་ལེགས་པའི་ཡོན་ཏན་མཐའ་དག་འབད་མེད་ལྷུན་གྲུབ་ཏུ་ཟླ་བ་ཡར་གྱི་ངོ་ལྟར་འཕེལ་ཞིང་རྒྱས་པར་མཛད་དུ་གསོལ། །ཅེས་བརྗོད་མདོས་བཟློག་འཕེན། ཐུ་བ་བརྡབ་སུམྦྷ་ནི་སོགས་དྲག་སྔགས་གང་ཤེས་བརྗོད། མཐར་ཟློག་བྱ་ཟློག་བྱེད་དང་བྲལ་བའི་ངང་ལ་དམིགས་མེད་ཡུན་རིང་བཞག་རོལ་མོ་བྱ། དེ་ནས་དཀོན་མཆོག་གསུམ་གྱི་བདེན་པ་དང་སོགས་ནས། དེ་དེ་བཞིན་དུ་འགྲུབ་པར་གྱུར་ཅིག་པར་བརྗོད། ཡེ་ཤེས་ཀྱི་ཁྲོ་བོའི་སྤྲུལ་པ་བྱ་ཁྱུང་མཐིང་ནག་རབ་ཏུ་འབར་བས་ཞལ་ཕར་གཟིགས་ཏེ་འབྱུང་པོའི་ཕྱིར་སྙོགས་ནམ་ཡང་མི་ཐར་བའི་རྗེས་བཅད་པར་གྱུར། ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ། ཞེས་གཏོ་ཡས་ཀྱི་རྗེས་ཕྱི་བཅད། ༀ་བཛྲ་རཀྵ་རཀྵ་ཧཱུཾ་ཕཊ། རྡོ་རྗེའི་ས་གཞི་རྭ་བ་དྲ་བ་གུར་བླ་བྲེ་དང་བཅས་པ་སྲ་ཞིང་བརྟན་པའི་ཕྱི་རོལ་དུ་མཚོན་ཆ་སྣ་ཚོགས་པའི་གུར་ཁང་ཡེ་ཤེས་ཀྱི་མེ་རབ་ཏུ་འབར་ཞིང་ཁྲོ་བོ་དྲག་སྔགས་སྒྲོག་པ་རྡུལ་ལྟར་འཚུབས་པས་བསྐལ་པའི་རླུང་ཡང་རྒྱུ་བར་མི་ནུས་པར་གྱུར། ཅེས་བསྒོམས་ལ་ནང་དུ་ལོག །སྲུང་བའི་འཁོར་ལོའི་ནང་དུ་མདུན་བསྐྱེད་སྒྲོལ་མ་འཁོར་བཅས་བཞུགས་པའི་སྐྱབས་སྦྱིན་ཕྱག་རྒྱའི་འོག་ཏུ་བདག་ཅག་བསྲུང་བྱ་འཁོར་བཅས་ཚུད་པས་གེགས་དང་བར་ཆད་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བར་གྱུར་པར་མོས་སོ། ༈ །གསུམ་པ་རྗེས་ཀྱི་བྱ་བ་ནི། མཆོད་པ་གསར་དུ་བརྗེ་བའམ་ཁ་གསོས་ལ། བྱིན་རླབས་ནས་བཟུང་ཚིགས་བཅད་དང་སྔགས་ཀྱིས་འབུལ་པ་གོང་སྨོས་ལྟར་རྒྱས་པར་བྱ། ཕྱག་འཚལ་ཉེར་གཅིག་གི་བསྟོད་པ་ཚར་གཅིག་གམ་གསུམ་དང་། ཕན་ཡོན་བཅས་བརྗོད། རྗེ་བཙུན་འཕགས་མ་སྒྲོལ་མ་སོགས་ཡན་ལག་བདུན་པ་ཚང་བར་བྱས་ལ། འདོད་དོན་གསོལ་བ་གདབ་པ་ནི། ༀ། འགྲུབ་པར་གྱུར་ཅིག་རྗེ་བཙུན་ཐུགས་རྗེ་ཅན། །འཕགས་མ་ཁྱོད་ལ་བསྙེན་སྒྲུབ་མཆོད་པ་དང་། །བསྟོད་ཅིང་གསོལ་བ་བཏབ་པའི་མཐུ་བྱིན་གྱིས། །དེང་ནས་བཟུང་སྟེ་བྱང་ཆུབ་མ་ཐོབ་པར། །འཕགས་མ་ཁྱོད་དང་རྟག་ཏུ་མི་འབྲལ་ཞིང་། ནད་མེད་ཚེ་དབང་ལོངས་སྤྱོད་འཕེལ་བ་དང་། །བྱང་ཆུབ་སྒྲུབ་ལ་བར་ཆད་མི་འབྱུང་ཞིང་། །ས་དང་ལམ་གྱི་ཡོན་ཏན་རབ་རྫོགས་ནས། །བདག་གཞན་དོན་གཉིས་ལྷུན་གྱིས་གྲུབ་པ་ཡི། །རྣམ་མཁྱེན་རྫོགས་པའི་སངས་རྒྱས་ཐོབ་པར་ཤོག །བཟོད་གསོལ་ནི། ཡིག་བརྒྱ་ལན་གསུམ་དང་། མ་འབྱོར་པ་དང་སོགས། དེ་ཀུན་མགོན་པོས་བཟོད་པར་མཛོད། བདག་ཅག་སོ་སོའི་སྐྱེ་བོའི་བསམ་པ་ཉོན་མོངས་པ་ཅན་དུ་གྱུར་པའི་དབང་གིས་ཏིང་ངེ་འཛིན་མི་གསལ་ཞིང་བྱིང་རྒོད་ཀྱི་དབང་དུ་གྱུར་པ་དང་། ཡོ་བྱད་ལ་དབང་མ་ཐོབ་པས་མཆོད་པའི་དངོས་པོ་ཆུང་ཞིང་ངན་པ། གཙང་སྦྲས་མ་ཕྱེད་པ། ཆོ་ག་བཞིན་དུ་མ་ལྕོགས་པ་ལ་སོགས་པ། ནོངས་པའི་ཚོགས་ཅི་མཆིས་པ་ཐམས་ཅད་འཕགས་པ་ཐུགས་རྗེ་ཆེན་པོ་དང་ལྡན་པ་ཁྱེད་རྣམས་ལ་བཟོད་པར་གསོལ་ན་བདག་ཅག་ལ་འཕྲལ་དང་ཡུན་དུ་སྒྲིབ་པ་མི་འབྱུང་བར་བྱིན་གྱིས་བརླབ་ཏུ་གསོལ། སྨོན་ལམ་ནི། བསོད་ནམས་འདི་ཡིས་འགྲོ་བ་ཀུན། ། རྗེ་བཙུན་སྒྲོལ་མ་འདྲ་བར་ཤོག །བདག་ཀྱང་ཏིང་འཛིན་འདི་བསྒྲུབས་པས། །འགྲོ་བའི་དོན་དུ་སངས་རྒྱས་ཤོག །མདུན་བསྐྱེད་རྟེན་མེད་ན། ༀ་ཁྱེད་ཀྱིས་སེམས་ཅན་སོགས་ཀྱིས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ། འདིར་རྟེན་དང་ཁྱད་པར་སྐུ་གཟུགས་ཡོད་པའི་དབང་དུ་བྱས་ནས། སྤྱན་དྲངས་པའི་ཡེ་ཤེས་པ་རྣམས་རྟེན་འདི་དག་ལ་བརྟན་པར་བཞུགས་ནས། སྦྱིན་པའི་བདག་པོས་ཐོག་དྲངས་སེམས་ཅན་ཐམས་ཅད་ལ་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ༀ་སུ་པྲ་ཏིཥྛ་བཛྲཱ་ཡེ་སྭཱ་ཧཱ། ཞེས་བརྟན་བཞུགས་བྱས་ལ་འབྲུ་འཐོར། རང་གི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཅེས་པས་སྒོ་གསུམ་བསྲུང་ངོ་། །ཤིས་བརྗོད་ནི། སྟོན་མཆོག་དམ་པ་ལྷ་མིའི་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ༴ ཞི་བ་ཆགས་བྲལ་ལྷ་མིའི་མཆོད་འོས་པ། །ཆ ོས་ལ་ཕྱག་འཚལ་དེང་འདིར༴ སེམས་ཅན་གང་དག༴ དེ་དག་ཐམས་ཅད༴ ཚོགས་ཀྱི་དམ་པ་ལྷ་མིའི་མཆོད་འོས་པ། །དགེ་འདུན་ཕྱག་འཚལ་དེར༴ སེམས་ཅན་གང་དག༴ དེ་དག་ཐམས་ཅད་དེང་འདིར་བདེ་ལེགས་ཤོག །འབྱུང་པོ་གང་དག་འདིར་ནི་ལྷག་གྱུར་ཏམ། །སའམ་འོན་ཏེ་བར་སྣང་འཁོད་ཀྱང་རུང་། །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་མོར་ཆོས་ལ་སྤྱོད་པར་ཤོག །བདག་དང་སྦྱིན་བདག་འཁོར་དང་བཅས་པ་མི་མཐུན་པའི་ཕྱོགས་ཐམས་ཅད་ལས་ཤིན་ཏུ་རྒྱལ་ཞིང་བཀྲ་ཤིས་པར་གྱུར་ཅིག །ཅེས་བཀྲ་ཤིས་བརྗོད་ཅིང་མེ་ཏོག་གི་ཆར་དང་རོལ་མོའི་སྒྲ་བསྒྲག་གོ། །འདི་ནི་ཉིན་ཆོག་བྱ་བའི་ཚུལ་ཡིན་ལ། ཞག་གསུམ་མམ་བདུན་སོགས་བསྒྲུབས་ཀྱང་རུང་བས་ཞག་གྲངས་བྱེད་ན་ཉིན་ཕྱི་མ་རྣམས་ལ་མཆོད་པ་གསར་དུ་བརྗེ། འབུལ་གཏོར་བཞི་པོ་ཉིན་རེ་བཞིན་བཤམས་ནས་འབུལ། མདོས་ཟློག་ཁ་གསོ་བ་ཙམ་གྱིས་ཆོག །བདག་བསྐྱེད་ནས་བཟུང་ས་བཅད་བཞི་པ་གླུད་ལྷ་འདྲེ་ལ་བསྔོ་བ་མ་རྫོགས་པར་བཏང་ལ་རྗེས་ཆོག་མཆོད་བསྟོད་མན་ཆད་བྱ། འབུལ་ཉིན་མདོས་ཀླུད་བསྔོ་བའི་སྐབས་མར་མེ་རྣམས་སྤར། བདེན་སྟོབས་ཀྱི་ཟློག་པ་ལ་སོགས་གོང་སྨོས་ལྟར་བྱས་པས་འགྲུབ་བོ། །སྤྱིར་རྗེ་བཙུན་སྒྲོལ་མའི་མཚན་དྲན་པ་ཙམ་གྱིས་འཇིགས་པ་ཐམས་ཅད་ལས་སྐྱོབ་པ་དང་། བར་ཆད་ཐམས་ཅད་ཟློག་ཅིང་ཁྱད་པར་ཐེག་པ་ཆེན་པོ་པ་རྣམས་ཀྱི་ལྷག་པའི་ལྷ་དང་མགོན་སྐྱོབ་གཅིག་པུ་པ་ཡིན་པ་དང་། བོད་ཁ་བ་ཅན་གྱི་ལྷ་སྐལ་སྙིགས་མའི་དུས་སུ་བྱིན་རླབས་ལྷག་པར་མྱུར་བ་ཡིན་པས་བོན་ལུགས་དང་འབྲེལ་བའི་གཏོ་ཕྲན་གཞན་ལས་ཀྱང་འདི་ཉིད་ལ་འབད་རྩོལ་ནུས་ན་འདི་ཕྱི་གཉིས་ཀའི་དོན་ཆེན་པོ་བདེ་བླག་ཏུ་འགྲུབ་པར་འགྱུར་བ་ཡིན་ནོ། །སྙིགས་དུས་སྐྱེ་བོ་བསོད་ནམས་དམན། །དེ་ལས་བློ་གྲོས་རྒྱ་ཆུང་བས། །ནོར་བུ་བོར་ནས་མཆིང་བུ་ཚོལ། །ཕུག་ནོར་ལས་ཀྱང་ཉིན་ལྟོ་འདོམ། །འདི་འདྲས་དོན་དུ་འགྱུར་དཀའ་ཡང་། །རྒྱུན་སྲོལ་མང་དུ་ཐོས་པས་ན། །མི་ནུབ་བཙས་སུ་འདི་བྱས་དགེས། །འགྲེལ་ཚད་འཕགས་མས་རྗེས་འཛིན་ཤོག །འདི་ཉིད་དགོས་པ་ཕན་ཡོན་བྱིན་རླབས་ཆེ་བར་མཐོང་ཡང་ཕྱོགས་འདིར་དང་སྲོལ་ཆུང་བས། རང་གཞན་ཕན་འདོད་ཀྱི་ལྷག་པའི་བསམ་པས་ཀུན་ནས་བསླངས་ཏེ། རྒྱ་སྟོན་ཡི་གེ་རྩ་བ་དང་རྒྱལ་ཚབ་གྲགས་མཆོག་གི་ཡིག་ཆ་ལ་གཞི་བྱས། ཡིག་ཆ་གཞན་ལས་ཀྱང་ལེགས་པའི་ཆ་བླངས་ཏེ། ཡོན་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བྲིས་པ་དགེ་ལེགས་འཕེལ། ༈ །ཐུགས་རྗེ་རབ་མྱུར་འཕགས་མ་ལ། །བརྟེན་ནས་མི་མཐུན་གཡུལ་གྱི་ཚོགས། །ཟློག་བྱེད་ཆོ་ག་ཟབ་མོ་འདི། །གཞན་ཕན་རྒྱ་མཚོ་འབྱུང་བའི་བློས། །དཔལ་སྤུངས་གདན་སར་ཆོས་སྦྱིན་འཕྲུལ། །རྗེ་དཔོན་བློ་གྲོས་སེང་གེ་ཡིས། །བསྒྲུབས་པའི་དགེ་ཚོགས་དཔལ་ལྡན་གྱི། །བླ་མ་མཆོག་རྣམས་ཐུགས་དགོངས་རྫོགས། །བསྟན་པ་དར་ཞིང་བསྟན་འཛིན་གྱི། །ཞབས་པད་ཡུན་བརྟན་འགྲོ་བ་ཀུན། །ཕན་བདེས་རྟག་ཏུ་འཚོ་བ་སོགས། །དགེ་ལེགས་རྫོགས་ལྡན་རྒྱུར་གྱུར་ཅིག །ཅེས་པའང་དམ་པ་མཆོག་གིས་བཀྲ་ཤིས་པའི་ལྷ་རེག་བཅས་བསྐུལ་ངོར་ཏཱའི་སི་ཏུ་པདྨ་དབང་མཆོག་རྒྱལ་པོས་སྨྲས་པ་དགེ་ལེགས་འཕེལ།། །།