རྡོ་རྗེ་ཐེག་པའི་དཀྱིལ་ཆོག་གང་ལའང་སྦྱར་ཆོག་པ་ཡན་ལག་བརྒྱད་པའི་འབྲུ་འགྲེལ་ཉུང་ངུར་བསྡུས་པ།
རྡོ་རྗེ་ཐེག་པའི་དཀྱིལ་ཆོག་གང་ལའང་སྦྱར་ཆོག་པ་ཡན་ལག་བརྒྱད་པའི་འབྲུ་འགྲེལ་ཉུང་ངུར་བསྡུས་པ་བཞུགས་སོ། །ན་མོ་གུ་ར་ཝེ། འདིར་སྔ་འགྱུར་རྙིང་མའི་བཀའ་གཏེར་རྣམས་ནས་ཡང་ཡང་འབྱུང་བའི་ཡན་ལག་བརྒྱད་པ་འདི་ལ་ཀུན་མཁྱེན་བླ་མའི་ཞལ་རྒྱུན་མདོར་བསྡུས་པའི་ཚུལ་གྱིས་སྤྱི་དོན་བཀྲ་ཤིས་པའི་རྟགས་ཀྱི་གྲངས་དང་ལྡན་པ་བརྗོད་པ་ལ། ང་རྒྱལ་གྱི་གཉེན་པོ་ཕྱག་འཚལ་བ། མ་གུས་པའི་གཉེན་པོ་སྐྱབས་སུ་འགྲོ་བ། སེར་སྣའི་གཉེན་པོ་མཆོད་པ་འབུལ་བ། ཞེ་སྡང་གི་གཉེན་པོ་སྡིག་པ་བཤགས་པ། ཕྲག་དོག་གི་གཉེན་པོ་རྗེས་སུ་ཡི་རང་བ། རང་དོན་ཡིད་བྱེད་ཀྱི་གཉེན་པོ་བྱང་ཆུབ་མཆོག་ཏུ་སེམས་བསྐྱེད་པ། གཅེས་འཛིན་གྱི་གཉེན་པོ་ལུས་འབུལ་བ། ཐེ་ཚོམ་གྱི་གཉེན་པོ་དགེ་བ་བྱང་ཆུབ་ཏུ་བསྔོ་བའོ། །དང་པོ་ནི། རྡོ་རྗེ་སློབ་དཔོན་རང་ལ་ལམ་སྟོན་པར་བྱེད་པའི་རིགས་ཀུན་གྱི་བདག་པོ་དཀྱིལ་འཁོར་ཀུན་གྱི་གཙོ་བོར་མངའ་དབང་རྫོགས་པའི་ཁྱབ་བདག་ཆེན་པོ་རང་ཉིད་ལ་རང་བྱུང་གི་རིག་པ་ངོ་སྤྲོད་པའི་རྩ་བའི་བླ་མ་ཉིད་ཡིན་ལ། སངས་རྒྱས་ཕྱོགས་བཅུའི་ཞིང་ཁམས་རབ་འབྱམས་རྡུལ་གཅིག་གི་སྟེང་ན་རྡུལ་སྙེད་ཀྱི་གྲངས་དང་མཉམ་པར་བཞུགས་པ་དེ་དང་། དཔལ་ནི་མ་འོངས་པ་ན་འབྱོན་པར་འགྱུར་བའི་ཀུན་གཞི་བདེ་གཤེགས་སྙིང་པོའི་སེམས་ཅན་ཐམས་ཅད་ཡིན་པས་ན། དུས་གསུམ་དུ་གཤེགས་ཤིང་བཞུགས་པ་དང་འབྱོན་པར་འགྱུར་པ་ཐམས་ཅད་ལ་ཕྱག་འཚལ་ལོ། །གཉིས་པ། མཆོག་གསུམ་ནི། གང་ལ་བསྟེན་ན་དོན་ཆེ་བ། །དཀོན་མཆོག་དེ་ལ་ཕྱག་འཚལ་ལོ། །ཞེས་གསུངས་པ་ལྟར། ཕྱི་ལྟར་ན་དཀོན་མཆོག་གསུམ། ནང་ལྟར་ན་རྩ་བ་གསུམ། གསང་བ་ལྟར་ན་སྐུ་གསུམ་ཀུན་འདུས་ཀྱི་བདག་ཉིད་ཅན། བསྟེན་པའི་ཞིང་དུ་གྱུར་པ་ཐམས་ཅད་ལ། གང་ལ་སྐྱབས་སུ་འགྲོ་བའི་ཡུལ། གང་གིས་སྐྱབས་སུ་འགྲོ་བའི་གང་ཟག །ཇི་ལྟར་སྐྱབས་སུ་འགྲོ་བའི་ཚུལ་རྣམས་གཉིས་སུ་མེད་པའི་ཡིད་ཀྱིས་སྐྱབས་སུ་མཆི། གསུམ་པ། དངོས་སུ་འབྱོར་པའི་མཆོད་པ་ཕྱི་མཆོད་ཉེར་སྤྱོད། ནང་སྨན་རཀ་གཏོར་གསུམ། གསང་བ་བདུད་རྩི་བྱང་སེམས་དང་བཟའ་བཅའ་བཏུང་བའི་ཚོགས་ཀྱི་ལོངས་སྤྱོད། ཡིད་ཀྱིས་སྤྲུལ་པའི་མཆོད་པ་སྟོང་གསུམ་རབ་འབྱམས་ཀྱི་འཇིག་རྟེན་བྱེ་བ་ཕྲག་བརྒྱའི་ཞིང་ཁམས་སུ་མཆོད་པའི་དངོས་པོ་ཇི་སྙེད་ཡོད་པ་ཐམས་ཅད་རྣམ་པ་བློས་སྤྲུལ་ཏེ། འབུལ་བའི་ཞིང་དག་པ་མཆོག་གསུམ་རྒྱལ་བ་སྲས་དང་བཅས་པ་རྣམས་ལ། དངོས་པོ་དག་པ་དངོས་ཞེན་སེར་སྣ་དང་བྲལ་བ། བསམ་པ་དག་པ་ཉེས་པའི་སྐྱོན་རྣམས་དང་བྲལ་བ་སྟེ། དག་པའི་མཆོད་པ་རྣམས་སྟོང་ཉིད་ཀྱི་རྩིས་དང་མ་བྲལ་བའི་ངང་ནས་ཕུལ་བ་རྒྱལ་བ་སྲས་དང་བཅས་པ་རྣམས་ཀྱིས་བཞེས་སུ་གསོལ། བཞི་པ། དངོས་གྲུབ་ཀྱི་ཆུ་བོ་ཆེན་པོ་ཉིད་ཐོབ་པ་ལ་བར་དུ་གཅོད་པའི་གེགས་སུ་གྱུར་པ་ཉེས་བྱས་ཏེ་སོ་བྱང་སྔགས་གསུམ་གྱི་ལྡོག་ཕྱོགས་ཀྱི་ཕམ་ལྟུང་རྩ་བ་དང་ཡན་ལག་གི་དམ་ཚིག་ཉམས་ཆག་ཉེས་ལྟུང་ཆུ་བོ་གངྒཱ་ལ་རགས་བརྩེགས་པ་ལྟ་བུའི་གེགས་སུ་གྱུར་པ་ཐམས་ཅད་མ་ལུས་པ། ཚོགས་རྟེན་དཔང་པོར་བཞུགས་པའི་སྤྱན་སྔར་གཉེན་པོ་སྟོབས་བཞི་ཚང་བའི་སྒོ་ནས་བཤགས་པར་བགྱིའོ། །ལྔ་པ། ཕྱོགས་བཅུ་དུས་བཞིའི་སངས་རྒྱས་རྣམས་ཀྱིས་འཁོར་གསུམ་ཡོངས་སུ་དག་པ་སྟེ། ཐོག་མཐའ་བར་གསུམ་དགེ་བའི་ཆོས་ཀྱི་འཁོར་ལོ་དུས་གསུམ་དུ་མ་ཆགས་ཤིང་སེམས་ཅན་རྣམས་ཀྱི་དོན་དུ་རྟག་པར་ཁྱབ་བརྡལ་ལྷུན་གྲུབ་ཆེན་པོར་སྤྱོད་པ་ལ་རྗེས་སུ་ཡི་རང་ངོ་། །དྲུག་པ། མགོན་པོ་བྱམས་པས། འདི་ལ་བསལ་བྱ་ཅི་ཡང་མེད། །བསྣན་པར་བྱ་བའང་ཅི་ཡང་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་གྲོལ་ལོ། །ཞེས་གསུངས་པ་ལྟར། རང་གི་རིག་པ་ཡེ་ནས་རྣམ་པར་དག་པའི་ཆོས་ཅན་དེ་ཉིད་ཡོད་མེད་རྟག་ཆད་ཀྱི་མཐའ་བཞིའི་དྲི་མ་དང་བྲལ་བའི་བླ་ན་མེད་པ་མངོན་པར་རྫོགས་པའི་བྱང་ཆུབ་མཆོག་ཏུ་མཉམ་པར་བཞག་པ་སེམས་བསྐྱེད་དོ། །བདུན་པ། སྤངས་རྟོགས་ལེགས་པར་རྫོགས་པའི་མཆོག་ཏུ་བདེ་བར་གཤེགས་པས་ན་བདེ་གཤེགས་ཏེ་འདས་པའི་སངས་རྒྱས་རྣམས་དང་། དབང་ཕྱུག་ནི་ད་ལྟ་དབང་བསྐུར། རྒྱུད་འཆད། མན་ངག་སྟོན་མཛད་རྡོ་རྗེ་སློབ་དཔོན་བཀའ་དྲིན་གསུམ་ལྡན་ཉིད་དང་། སེམས་ཅན་མ་འོངས་པ་ན་འཚང་རྒྱ་བར་འགྱུར་པ་གཞི་གཅིག་གིས་བསྡུས་པ་ཐམས་ཅད་ལ། དགོས་པ་རྣམ་པ་གསུམ་གྱི་སྒོ་ནས་ལུས་འབུལ་བ་སྟེ། བདེ་གཤེགས་རྣམས་ལ་ལུས་ཕུལ་བས་ཚོགས་གཉིས་རྫོགས། སྒྲིབ་གཉིས་བྱང་ནས་རྒྱལ་བ་རྣམས་ཀྱི་སྲས་ཀྱི་ཐུ་བོར་འགྱུར་བའི་དགོས་པ། འཁོར་ལོའི་དབང་ཕྱུག་བླ་མ་ལ་ལུས་ཕུལ་བས་མཉེས་པ་གསུམ་གྱི་སྒོ་ནས་ཐུགས་རྒྱུད་དགོངས་པའི་བྱིན་རླབས་ཐོབ་པའི་དགོས་པ། མ་འོངས་པ་ན་འཚང་རྒྱ་བར་འགྱུར་བའི་སེམས་ཅན་ཐམས་ཅད་ལ་ལུས་ཕུལ་བས་གནས་སྐབས་སུ་འདོད་པའི་དོན་ཐམས་ཅད་འགྲུབ་ཅིང་མཐར་ཐུག་ཚོམ་བུ་གཅིག་ཏུ་འཚང་རྒྱ་བའི་དགོས་པ་དེ་དག་སྒྲུབ་པའི་ཕྱིར་དུ་ལུས་འབུལ་ལོ། །བརྒྱད་པ། ཚེ་རབས་བགྲངས་པའི་ལས་ཏེ་དུས་གསུམ་དུ་བསགས་ཤིང་བསགས་པ་བསགས་འགྱུར་ཏེ། མདོར་ན་གཅིག་ཏུ་རྣམ་པར་དག་པ་དགེ་བའི་ཕྱོགས་ཀྱི་ལས་རྣམས་ཀུན་གཅིག་ཏུ་བསྡུས་ཏེ་མཐར་ཐུག་རྫོགས་པའི་བྱང་ཆུབ་ཆེན་པོར་ཡོངས་སུ་བསྔོ་བར་བགྱིའོ། །ཞེས་པའང་མི་ཕམ་རྣམ་རྒྱལ་རྒྱ་མཚོས་སོ།། །།