རྙིང་ལུགས་བཀའ་མའི་བྱིན་འབེབས་ཀྱི་འགྲེལ་པ་ལེགས་བཤད་སྤྲིན་གྱི་རོལ་མོ།

རྙིང་ལུགས་བཀའ་མའི་བྱིན་འབེབས་ཀྱི་འགྲེལ་པ་ལེགས་བཤད་སྤྲིན་གྱི་རོལ་མོ་ཞེས་བྱ་བ་བཞུགས་སོ། །སྣང་སྲིད་གདོད་ནས་དག་པའི་དཀྱིལ་འཁོར་དུ། །ཡོངས་གྲུབ་ལྷུན་མཉམ་རྡོ་རྗེ་བཀོད་པའི་རྒྱན། །མི་ཟད་རྟག་པ་རྒྱུན་གྱི་འཁོར་ལོ་རུ། །ཡེ་བཞུགས་འཕོ་འགྱུར་བྲལ་བའི་དབྱིངས་ལ་འདུད། །སྲིད་ཞི་དབྱེར་མེད་མཉམ་པ་ཆེན་པོ་རུ། །དབང་བསྒྱུར་ཏིང་འཛིན་སྔགས་རྒྱའི་བྱེད་པ་ཡིས། །རིག་པ་ཆོས་སྐུའི་ཀློང་ནས་ཡེ་ཤེས་བྱིན། །རྩོལ་མེད་རང་བབ་རྡོ་རྗེ་ཐེག་པའི་ལམ། །རྒྱུད་ཀྱི་དགོངས་པ་གྲུབ་པའི་མན་ངག་གིས། །ཇི་ལྟར་བཀྲལ་བ་བླ་མའི་ཞལ་ལུང་བཞིན། །མདོར་བསྡུས་ངག་གི་ལེགས་པར་བཤད་པ་འདི། །དམ་པ་དགྱེས་པའི་མཆོད་པར་མོས་ཏེ་སྤྲོ། །དེ་ལ་འདིར་སྔ་འགྱུར་བཀའ་མའི་སྒྲུབ་ཕྲིན་གྱི་ཡིག་རྙིང་རྣམས་ལས་བྱུང་བའི་བྱིན་འབེབས་བབ་དྲུག་འདས་བཞིར་གྲགས་པ་འདི་ཉིད་ཀྱི་དགོངས་པ་འཆད་པ་ལ། སྤྱི་དོན་དང་། ཡན་ལག་གི་དོན་གཉིས་ལས། དང་པོ་ལའང་། བྱིན་རླབས་དབང་དང་དངོས་གྲུབ་རྣམས་གང་གིས་འབེབས་པའི་བྱེད་པ་པོ་དང་། གང་ལ་དབབ་པའི་ཡུལ། གང་ཞིག་དབབ་བྱའི་བྱིན། ནམ་ཞིག་དབབ་པའི་དུས། ཕེབས་པའི་རྟགས་མཚན། ཇི་ལྟར་འབེབས་པའི་ཚུལ་དང་དྲུག་ལས། དང་པོ་ནི། བྱེད་པ་པོ་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དང་རང་བཞིན་དབྱེར་མི་ཕྱེད་པའི་རིགས་ལྔ་ཞི་ཁྲོའི་ལྷ་ཚོགས་བརྒྱུད་གསུམ་གྱི་བླ་མ་མཁའ་འགྲོ་འཁོར་དང་བཅས་པ་རྣམས་སོ། །གཉིས་པ་ནི། བདག་གནས་ཡོ་བྱད་གསུམ་སྟེ། རྒྱུད་ལས། སྟོན་པ་མཆོད་བརྩོན་རྟོགས་པ་གསལ། དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འགྲུབ་འགྱུར་མི་ལྡན་དོན་མེད་བརླག །ཅེས་གསུངས་པ་ལྟར་སྟོན་འཁོར་མཚན་ཉིད་ཚང་བའི་སྒྲུབ་པ་པོ། བཀྲ་ཤིས་ཤིང་བྱིན་ཆགས་པའི་གནས་སུ་ཚོགས་ཁང་རིམ་པ་གསུམ་པ་སོགས་ཀྱི་གནས་དང་། དཀྱིལ་འཁོར་སྒྲུབ་རྫས་སོགས་ཀྱི་ཡོ་བྱད་རྣམས་སོ། །གསུམ་པ་ནི། བདག་ཉིད་ཆེན་པོ་རྣམས་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་བྱིན་རླབས་དང་། ཡེ་ཤེས་རང་སྣང་གི་གཞལ་ཡས་ཁང་དགྱེས་དགུར་འཆར་བའི་ལོངས་སྤྱོད་དང་བཅས་པའི་གཟི་བྱིན་དང་། བཅུད་རྣམས་སོ། །བཞི་པ་ནི། ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པས། །མ་ཉམས་འཇུག་ལ་རབ་བརྩོན་ན། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་གསུངས་པ་ལྟར། སྟོང་ཆེན། སྙིང་རྗེ་སྒྱུ་མ། ཕྱག་རྒྱ་བཅིག་པ་ཕྲ་རགས་གཉིས། ཕྱག་རྒྱ་སྤྲོས་བཅས་ཀྱི་ཆོ་ག་ལྔ་ལ་གསལ་བརྟན་གྱི་ཚད་རྫོགས་པས་ཏིང་འཛིན་ལས་སུ་རུང་བར་གྱུར་པའི་རྣལ་འབྱོར་པས། བཟའ་བཏུང་། གོས་རྒྱན། བྲོ་གར། གླུ་ཚིག །སྦྱོར་སྒྲོལ་གྱི་ཡོ་བྱད་ལྔ་ཚང་ཞིང་རྫོགས་པའི་སྒོ་ནས། ལྷ་སྔགས་འཕྲོ་འདུ། སྔགས་ཀྱི་ཡན་ལག་ལྔ་དང་ལྡན་པས་རྩ་བ་དང་ཡན་ལག་གི་དམ་ཚིག་ཉམས་པར་སྒྲུབ་པ་ལ་འཇུག་ཅིང་ཞུགས་ནས་ཀྱང་། རིམ་གཉིས་ཀྱི་ཉམས་ལེན་ལ་རབ་ཏུ་བརྩོན་ན་དབང་པོའི་ཁྱད་པར་གྱིས་ཟླ་དྲུག་སོགས་ཀྱིས་དངོས་གྲུབ་ཐོབ་པའི་དུས་བསྟན་པ་ལྟར། བྱིན་དབབ་པའི་དུས་ཀྱང་དེ་ཡིན་ཏེ། དབང་ཐོབ་ཅིང་དམ་ཚིག་ལ་སེལ་མ་ཞུགས་པའི་སྒྲུབ་པ་པོ་མཆེད་ལྕམ་རྣམས་ཀྱིས། སྒྲུབ་པའི་དལ་དང་། རྫས་རྣམས་གཞུང་བཞིན་བཤམས་ཏེ་རིམ་གཉིས་ཀྱི་ཏིང་ངེ་འཛིན་གསལ་བརྟན་ཐོབ་པས། སྒྲུབ་པ་ཆེན་པོའི་ཆོ་ག་ཡན་ལག་མ་ཉམས་པ་ལ་ཚུལ་བཞིན་དུ་ཞུགས་པ་ན་རྒྱལ་བ་སྲས་དང་བཅས་པས་སྲས་དང་སྤུན་དུ་དགོངས་ཤིང་མཁའ་འགྲོ་ཆོས་སྐྱོང་རྣམས་ཀྱི་གྲོགས་དང་རྗེ་དཔོན་དུ་མཐོང་ནས་བྱིན་གྱིས་རློབས་ཤིང་དངོས་གྲུབ་སྟེར་བའི་དུས་ཡིན་ནོ། །དབང་དུས་སུ་བྱིན་དབབ་པ་ཡང་དེས་མཚོན་ཏེ། རྡོ་རྗེ་སློབ་དཔོན་ལྟ་དགོངས་དང་ལྡན་པས་སློབ་མ་སྣོད་དུ་རུང་ཞིང་དམ་ཚིག་གཙང་བ་ལ། དབང་གི་ཆོ་ག་ཡན་ལག་མ་ཉམས་པར་གཞུང་བཞིན་དུ་སྒྲུབ་པའི་ཚེ་ན་བྱིན་གྱིས་རློབ་པའི་དུས་ཡིན་ནོ། །འདི་ནི་གལ་ཆེ་སྟེ་ཚིག་དོན་གྱི་སྐབས་སུ་ཡང་དུས་ལ་བབ་བོ་ཞེས་ལན་དྲུག་ཏུ་གསོལ་བའི་དུས་ནི་འདི་ཁོ་ན་སྟེ། གཞན་དུ་ཡེ་ཤེས་པ་འབེབས་པའི་རྒྱུ་ཚོགས་གང་དང་ཡང་མི་ལྡན་བཞིན་དུ་དུས་ལ་བབ་པོ་ཞེས་ཡང་དང་ཡང་དུ་བསྐུལ་ཀྱང་ལྷ་དང་མཁའ་འགྲོའི་ཐུགས་ཀྱིས་ཁྲེལ་བའི་རྒྱུ་ལས་ཅི་ཡང་མེད་དོ། །ལྔ་པ་ནི། སྐུའི་བྱིན་ཕེབས་རྟགས་སུ་ལུས་འཕར་གཡོ་དང་ཞི་ཁྲོའི་ཉམས་གར་གྱི་འགྱུར་བ་འཆར་ཞིང་འབྱུང་བཞིའི་རྫུ་འཕྲུལ་སྟོན་ནུས་པ་དང་། གསུང་ཕེབས་རྟགས་སུ་སྔགས་པ་སཾ་སྐྲྀ་ཏའི་སྐད་སོགས་བཅོས་མིན་བྱུང་རྒྱལ་དུ་འབྱུང་བ་དང་། ཐུགས་ཕེབས་རྟགས་སུ་བདེ་གསལ་མི་རྟོག་པའི་ཉམས་འབར་བ་དང་། ཏིང་ངེ་འཛིན་དང་མངོན་ཤེས་ཀྱི་ཁྱད་པར་དུ་མ་འཆར་བ། གཞན་ཡང་སྒྲུབ་རྫས་འཕེལ་བ་སྨན་རཀ་ཁོལ་ཞིང་གནས་ཁང་གཟི་བྱིན་དང་ལྡན་པ་སོགས་འབྱུང་ངོ་། །དྲུག་པ་ནི། རྣལ་འབྱོར་ཕོ་མོ་རྣམས་ཞི་ཁྲོའི་གར་ཆས་དང་ལྡན་པས་དཀྱིལ་འཁོར་གྱི་མཐའ་ནས་བསྐོར་ཏེ། གཡབ་དར་ཧསྟ་སོགས་ཀྱིས་གཡོབ་ཅིང་། ཁྱད་པར་གྱི་སྤོས་སོགས་བཏུལ། འབུད་རྡུང་དཀྲོལ་བའི་རོལ་མོའི་བྱེ་བྲག་རྣམས་སྦིར། བཤུགས་པའི་གླུ་དང་གར་གྱི་བརྡས་བསྐུལ་ཏེ། མཉམ་པ་ཆེན་པོའི་དགོངས་སྤྱོད་ལ་གནས་པས་བྱིན་དབབ་པར་བྱའོ། །གཉིས་པ་ཡན་ལག་གི་དོན་ལ། རྡོ་རྗེའི་གླུས་བསྐུལ་ཏེ་སྙན་གསན་དབབ་པ་དང་། བྱིན་དབབ་པ་དངོས་གཉིས་སོ། །དང་པོ་ནི། ཨཱོཾ་ཧཱུཾ། ཞེས་ཞི་ཁྲོའི་གླུའི་འགོ་འདྲེན་པ་སྟེ། ཡིག་འབྲུ་སོ་སོས་སྐུ་ལྔ་ཡེ་ཤེས་ལྔ་སོགས་འབྲས་ཆོས་ཉེར་ལྔར་མཚོན་པས་རང་བཞིན་ལྷུན་གྲུབ་ཀྱི་དཀྱིལ་འཁོར་དབྱིངས་དང་ཡེ་ཤེས་གཉིས་སུ་མེད་པའི་བདག་ཉིད་དཀྱིལ་འཁོར་ཐམས་ཅད་ཀྱི་འཆར་གཞི་ཆེན་པོའི་དགོངས་པ་རང་གསལ་གདབ་པའོ། །ཨ་ལ་ལ་ཧོ་ཞེས་དེ་ལ་ངམ་ཞིང་ངོ་མཚར་བ་སྟེ་ཞི་ཁྲོ་སོ་སོའི་ཆེ་བའི་ཡོན་ཏན་ལ་ངམ་པའམ། དབྱིངས་ཡེ་ཇི་བཞིན་པའི་དཀྱིལ་འཁོར་ལས་ཡེ་ཤེས་ལྷུན་གྱིས་གྲུབ་པའི་དཀྱིལ་འཁོར་རྩོལ་མེད་རང་བྱུང་བདེ་བ་ཆེན་པོར་ཤར་བ་ལ་ངོ་མཚར་ཞིང་ངེས་པ་སྐྱེ་བའོ། །བྷ་ག་ཝཱན་ནི། བཅོམ་ལྡན་འདས་ཞེས་དཀྱིལ་འཁོར་ཐམས་ཅད་ཀྱི་བདག་པོ་ལ་བོད་པ་སྟེ། བདུད་བཞི་བཅོམ་པ་སྤངས་པའི་ཡོན་ཏན་དང་། དབང་ཕྱུག་སོགས་དང་ལྡན་པ་རྟོགས་པའི་ཡོན་ཏན། སྲིད་ཞིའི་མཐའ་ལས་འདས་པ་ཆེ་བའི་ཡོན་ཏན་དང་ལྡན་པའི་སངས་རྒྱས་སོ། །ས་མ་ཡ་ཧོཿ ཞེས་པ་དམ་ཚིག་ལ་དགྱེས་པར་མཛོད་ཅེས་ཐུགས་དམ་གནད་ནས་བསྐུལ་བ་སྟེ། གདུལ་བྱ་འདུལ་བའི་ཕྲིན་ལས་དུས་ལས་ཡོལ་བར་མི་མཛད་པའི་སྔོན་གྱི་དམ་བཅའ་ལ་ཉེ་བར་དགོངས་ཤིག་ཅེས་མཁྱེན་པར་གསོལ་བའོ། །ས་མ་ཡ་སྟྭཾ། ཞེས་པ་ཁྱོད་ཀྱི་དུས་ལ་བབ་ཅེས་དུས་གསོལ་བའོ། །དེ་ལྟར་བསྐུལ་བའི་སྒྲ་བྱུང་མ་ཐག་ཏུ། ཆོས་ཀྱི་དབྱིངས་རྩོལ་རྟོག་མི་མངའ་བའི་ངང་ལས་ཐུགས་རྗེ་ཆེན་པོའི་དབང་གིས་ཡེ་ཤེས་ཀྱི་འཁོར་ལོ་གང་འདུལ་ཞི་ཁྲོའི་རོལ་གར་ནམ་མཁའ་ཁྱབ་པར་འཆར་ཞིང་སད་པར་འགྱུར་བ་ནི་རྒྱལ་བ་རྣམས་ཀྱི་མ་འདྲེས་པའི་པའི་ཆོས་ཉིད་དོ། །གཉིས་པ་ལ་བྱིན་དབབ་པ་དང་། བསྡུ་བ་གཉིས་ལས། དང་པོ་ལ། དུས་གསོལ་བའི་སྒོ་ནས་ཐུགས་རྗེ་བསྐུལ་བ་དང་། ཉེ་བའི་ཚིག་དང་སྦྱར་ཏེ་འདོད་དོན་ཞུ་བ། དོན་བསྡུས་ཏེ་གསོལ་བ་གདབ་པ་དང་གསུམ་ལས། དང་པོ་ལའང་། ཐུགས་རྗེ་སྤྱིར་བསྐུལ་བ་དང་། འདོད་དོན་ཁྱད་པར་ཅན་ལ་བྱེ་བྲག་ཏུ་བསྐུལ་བ་གཉིས་ལས། དང་པོ་ནི། འཕགས་མཆོག་སོགས་རྐང་པ་གཉིས་ཏེ། དེ་ཡང་སྤྱིར་སོ་སོའི་སྐྱེ་བོའི་འཆིང་བ་ལས་གྲོལ་བའི་འདས་ལམ་མངོན་གྱུར་གྱི་འཕགས་པ་ལ་ཉན་རང་ཐེག་ཆེན་འཕགས་པ་གསུམ། ཐེག་ཆེན་འཕགས་པ་ལའང་སློབ་ལམ་སར་གནས་ཀྱི་བྱང་སེམས་འཕགས་པ་དང་། སྤངས་རྟོག་མཐར་ཕྱིན་གྱི་སངས་རྒྱས་འཕགས་པ་གཉིས་ཏེ་བཞི་ལས། འདིར་འཕགས་པ་མཆོག་གི་སྒྲས་སངས་རྒྱས་འཕགས་པ་ཡིན་ཞིང་། དེ་ཡང་སྐུ་ལྔ་ཡེ་ཤེས་དྲུག་གི་རང་བཞིན་ཁ་སྦྱོར་གྱི་ཡན་ལག་བདུན་དང་ལྡན་པའི་བཅོམ་ལྡན་འདས་རྡོ་རྗེ་འཆང་ངམ་ཧེ་རུ་ཀ་སྟེ་དཀྱིལ་འཁོར་གྱི་དབང་ཕྱུག་ལ་བྱའོ། །གཙོ་བོ་བསྐུལ་བས་འཁོར་རྣམས་ཞར་ལ་བསྐུལ་བར་འགྱུར་ཏེ་འཁོར་ལོས་སྒྱུར་རྒྱལ་གང་དུ་ཕེབས་པ་དེ། དཔུང་ཚོགས་བཞི་ཤུགས་ཀྱི་ལྷགས་པ་བཞིན་ནོ། །ཐུགས་རྗེ་ལ་དབྱེ་ན། རིམ་གསུམ་ལས། རྟག་རྒྱུན་རང་བཞིན་ཤུགས་གསོལ་དང་། །ཡུལ་དང་འཕྲད་ནས་འབྱུང་བར་སྣང་། །ཞེས་པ་ལྟར། རྟག་པ་རྒྱུན་གྱི་ཐུགས་རྗེ་དུས་ལས་མི་ཡོལ་བ་ཆུ་བོའི་རྒྱུན་ལྟ་བུ། རང་བཞིན་ཤུགས་ཀྱི་ཐུགས་རྗེ་རྩོལ་རྟོག་མེད་པར་ངང་གིས་འབྱུང་བ་ཉི་མའི་འོད་ཟེར་ལྟ་བུ། བསྐུལ་ཞིང་གསོལ་བ་གདབ་པའི་ཐུགས་རྗེ་སྙིང་རྗེ་ཅན་ལ་དབུལ་པོས་ནོར་སློང་བ་ལྟ་བུ། གདུལ་བྱ་ཡུལ་དང་འཕྲད་པའི་ཐུགས་རྗེ་མཛངས་པས། སྤྱོད་ལོག་བྱེད་པ་མཐོང་བའམ་དཔལ་ཆེན་པོས་རུ་ཏྲ་ལ་ཐུགས་རྗེ་སྐྱེས་པ་ལྟ་བུ་སྟེ་བཞི་ལས་འདིར་བཞི་ཀ་སྟེ། གང་བསྐུལ་བར་བྱ་བ་སངས་རྒྱས་རྣམས་ཀྱི་རང་བཞིན་ཤུགས་ཀྱི་ཐུགས་རྗེ་སེམས་ཅན་གྱི་ཁམས་ལ་རྟག་པར་རྒྱུན་གྱིས་འཇུག་པས། གང་གིས་བསྐུལ་བ་པོ་གདུལ་བྱ་དུས་ལ་བབས་པ་རྨ་སྨིན་པ་མཚོན་གྱིས་བརྡོལ་རན་པ་ལྟ་བུའི་གང་ཟག་གིས་སྙིང་ནས་གདུང་ཤུགས་དྲག་པོས་བསྐུལ་ཞིང་གསོལ་བ་བཏབ་པ་ན་ཐུགས་རྗེ་ཆེན་པོ་མི་སྐྱེ་བའི་དབང་མེད་དེ་རྒྱུ་རྐྱེན་ཚོགས་པའི་འབྲས་བུ་བཞིན་ནོ། །དེ་ཡང་གདུལ་བྱ་དུས་ལ་མ་བབས་ན་གདུལ་བྱེད་ཀྱི་ཐུགས་རྗེ་མི་འཇུག་པས་དུས་ལ་བབས་པ་གཙོ་ཆེ་སྟེ། རྒྱ་མཚོ་ཆུ་སྲིན་རྣམས་ཀྱི་གནས། །དུས་ལས་ཡོལ་བར་འགྱུར་ཀྱང་སྲིད། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །ཅེས་པ་ལྟར་རོ། །དེ་ལ་དུས་ནི་གོང་དུ་སྨོས་པ་ལྟར་སྒྲུབ་པ་པོ་དབང་གིས་སྨིན་པ། དམ་ཚིག་དག་པ། བསྐྱེད་རྫོགས་བརྟན་པ་། སྒྲུབ་རྫས་ཚང་བ། ཡོ་བྱད་འབྱོར་བ། སྒྲུབ་པའི་ཆོ་ག་ཡན་ལག་མ་ཉམས་པས་ལེ་ལོ་གཉིད་ཆང་སོགས་ཀྱི་དབང་དུ་མི་གཏོང་བར་བརྩོན་པས་སྒྲུབ་ལ་འཇུག་པ་རྣམས། ནང་འཛོམ་པས་ན་བྱིན་རླབས་དབང་དང་དངོས་གྲུབ་ཐམས་ཅད་འབྱུང་བའི་དུས་ཡིན་པས། དུས་ལ་བབ་བོ་ཞེས་བརྗོད་པའང་སྐབས་སུ་བབས་པར་འགྱུར་བ་ཉིད་དོ། །དུས་གསོལ་བ་འོག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །དེའི་འོག་ཏུ་འཕགས་པ་མཆོག་གི་ཐུགས་རྗེ་བསྐུལ་ན་ཅི་བྱ་ཞེ་ན། ཁྱད་པར་བསྟན་པའི་དུས་ལ་བབ། །ཞེས་སྨོས་ཏེ། ཁྱད་པར་ཅན་གྱི་གདུལ་བྱའི་ཡུལ་གསང་བ་ཟབ་མོའི་ལམ་གྱི་ཉེ་ལམ་གྱི་སྣོད་དུ་རུང་བ་རྣམས་ཀྱི་ཁྱད་པར་ཅན་གྱི་འདུལ་བྱེད་ཟབ་མོ་བསྙེན་སྒྲུབ་ཡན་ལག་བཞིའི་གཞུང་བསྲང་བས་ཁྱད་པར་ཅན་གྱི་མཐུ་བྱིན་དབང་དང་དངོས་གྲུབ་ཐམས་ཅད་དུས་ཕྱི་མར་མི་སྡོད་པར་ད་ལྟ་ཉིད་དུ་བསྟན་པའི་དུས་ལ་བབ་བོ་ཞེས་གསོལ་བའོ། །གཉིས་པ་ཁྱད་པར་བསྟན་པ་དེ་ཡང་གང་ཞེ་ན། ནུས་པ་མཐུ་ཡི་ཁྱད་པར། བྱིན་གྱིས་རླབས་ཀྱི་ཁྱད་པར། སྨིན་པ་དབང་གི་ཁྱད་པར། འབྲས་བུ་དངོས་གྲུབ་ཀྱི་ཁྱད་པར་དང་བཞི་སྟེ་གོ་རིམ་བཞིན། དང་པོ་ལམ་གྱི་འགལ་རྐྱེན་བསལ་བ་དང་། གཉིས་པ་ལམ་རྒྱུད་ལ་སྐྱེ་བའི་སྣོད་རུང་དུ་བྱེད་པ་དང་། གསུམ་པ་ལམ་ལ་རང་དབང་དུ་བྱ་བ་དང་། བཞི་པ་ལམ་དེས་གྲུབ་པའི་གནས་སྐབས་དང་མཐར་ཐུག་གི་འབྲས་བུ་བསྟན་པ་སྟེ། དེ་དག་ནི་རྒྱུ་འབྲས་དོན་གྱི་གོ་རིམ་ཡིན་ནོ། །དེ་ལ་དང་པོ། མཐུ་རྩལ་དབྱུང་བའི་དུས་ལ་བབ། །ཅེས་པ་སྟེ། རྒྱལ་བ་ཐུགས་རྗེའི་བདག་ཉིད་ཅན་ཁྱེད་རྣམས་ལ་མངའ་བའི་སྤྱན་དང་མངོན་ཤེས་རྫུ་འཕྲུལ་དང་སྟོབས་ལ་སོགས་པའི་མཐུ་དང་ནུས་པའི་རྩལ་ཆེན་པོ་ཕྱུང་བའི་དུས་ལ་བབ་བོ། །ཞེས་པའོ། །གཉིས་པ་ནི། བྱིན་གྱིས་རློབས་པའི་དུས་ལ་བབ། །ཅེས་པ་སྟེ། གསེར་འགྱུར་གྱི་རྩིས་ལྕགས་ཁམས་གསེར་དུ་བྱེད་པ་ལྟར། རྡོ་རྗེ་གསུམ་གྱི་བྱིན་ཆེན་པོས་བདག་ཅག་གི་སྒོ་གསུམ་རྒྱལ་བའི་གསང་བ་གསུམ་དུ་རློབ་པའི་དུས་ལ་བབ་བོ་ཞེས་པའོ། །གསུམ་པ་ནི། དབང་མཆོག་བསྐུར་བའི་དུས་ལ་བབ། །ཅེས་པ་སྟེ། གཞི་དུས་ཀྱི་རྩ་རླུང་ཐིག་ལེ་གཉུག་མ་ཡེ་ཤེས་ཀྱི་ཁམས་དང་བཅས་པའི་དཀྱིལ་འཁོར་བཞི་པོ་ལམ་བསྐྱེད་རྫོགས་ཡན་ལག་བཞིའི་རིམ་པས་སྦྱངས་ཏེ། འབྲས་བུ་རྡོ་རྗེ་བཞིའི་རྒྱལ་ཐབས་ལ་དབང་བསྐུར་བའི་དུས་ལ་བབ་བོ། །ཞེས་པའོ། །བཞི་པ་ནི། དངོས་གྲུབ་སྩོལ་བའི་དུས་ལ་བབ། །ཅེས་པ་སྟེ། སྨིན་སྒྲོལ་ཟབ་མོའི་ལམ་ལ་བསླབ་པའི་འབྲས་བུ་གྲུབ་པ་བརྒྱད་སོགས་ཐུན་མོང་དང་། རིག་འཛིན་བཞི་དང་ཁ་སྦྱོར་བདུན་སོགས་གནས་སྐབས་དང་མཐར་ཐུག་གི་མཆོག་གི་དངོས་གྲུབ་ཐམས་ཅད་དུས་འདི་ཉིད་དུ་སྩོལ་བའི་དུས་ལ་བབ་བོ་ཞེས་པའོ། །གཉིས་པ་ཉེ་ཚིག་དང་སྦྱར་ཏེ་འདོད་དོན་ཞུ་བ་ལའང་། དུས་གསོལ་བའི་གོ་རིམ་དང་མཚུངས་པར་བཞི་སྟེ། འགལ་རྐྱེན་བསལ་བ། བྱིན་གྱིས་རློབས་པ། དབང་བསྐུར་བ། དངོས་གྲུབ་སྩོལ་བར་ཞུ་བ་དང་བཞི་ལས། དང་པོ་ནི། མཐུ་ཆེན་བདུད་ཐུལ་བཅོམ་ལྡན་འདས། །ཞེས་སྨོས་ཏེ་མཐུ་སྟོབས་ཆེན་པོའི་རྩལ་གྱིས་དངོས་གྲུབ་ལ་བར་དུ་གཅོད་པའི་བདུད་དང་དམ་སྲི་ཕྱི་ནང་གསང་བའི་རུ་ཏྲའི་སྡེ་དཔུང་སྤྱི་དང་། བྱེ་བྲག་དབང་བཞིའི་ལམ་གྱིས་སྦྱང་བྱར་གྱུར་པའི་སྒྲིབ་བཞིའི་ས་བོན་བཅོམ་སྟེ། གསང་བའི་བདུད་བཞི་ཐུལ་བར་མཛོད་ཅིག །བཅོམ་ལྡན་འདས་ཞེས་ཉེ་བའིི་ཚིག་གིས་བོས་ཏེ་ཐུགས་དམ་གནད་ནས་བསྐུལ་བ་ནི། འོག་མ་གསུམ་ལ་ཡང་ཤེས་པར་བྱའོ། །གཉིས་པ་ནི། བྱིན་ཆེན་བྱིན་ཕོབ་བཅོམ་ལྡན་འདས། །ཞེས་པ་སྟེ། འབྲས་ཆོས་ཉི་ཤུ་རྩ་ལྔས་བསྡུས་པའི་མི་ཟད་རྒྱན་གྱི་འཁོར་ལོའི་བྱིན་རླབས་ཀྱི་དབྱིག་ཆེན་པོ་དང་ལྡན་པ་ཁྱོད་ཀྱིས་བདག་གནས་ཡོ་བྱད་ཐམས་ཅད་ལ་བྱིན་རླབས་ཀྱི་ཆར་ཆེན་པོ་ཕོབས་ཤིག་བཅོམ་ལྡན་འདས། ཞེས་པའོ། །གསུམ་པ་ནི། དབང་ཆེན་དབང་བསྐུར་བཅོམ་ལྡན་འདས། །ཞེས་པ་སྟེ། འཁོར་འདས་ཀྱི་ཆོས་ཐམས་ཅད་ལ་དབང་བསྒྱུར་བའི་དབང་ཕྱུག་ཆེན་པོའི་བདག་ཉིད་དུ་གྱུར་པ་ཁྱོད་ཀྱིས་གཞི་ལམ་གྱི་འབྲས་བུའི་དབང་བསྐུར་བ་ཆེན་པོས་བདག་ལ་དབང་བསྐུར་ཅིག་བཅོམ་ལྡན་འདས། ཞེས་པའོ། །བཞི་པ་ནི། དངོས་གྲུབ་མཆོག་སྩོལ་བཅོམ་ལྡན་འདས། །ཞེས་པ་སྟེ། མཁའ་སྤྱོད་ལ་སོགས་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་ལམ་གྱུར་གྱི་འབྲས་བུ་རིག་འཛིན་བཞི་དང་། མཐར་ཕྱིན་གྱི་འབྲས་བུ་སྐུ་དང་ཡེ་ཤེས་རྒྱ་མཚོའི་བདག་ཉིད་ལྷུན་རྫོགས་སྟུག་པོ་བཀོད་པའི་རྒྱན་ཉིད་དུ་བཞུགས་པ་སྟེ། དེ་ལྟ་བུའི་དངོས་གྲུབ་ཀྱི་མཆོག་དམ་པ་སྩོལ་བར་མཛོད་ཅིག་བཅོམ་ལྡན་འདས། ཞེས་པའོ། །ལམ་དང་འབྲས་བུས་བསྡུས་པའི་དངོས་གྲུབ་རྨད་དུ་བྱུང་བ་རྣམས་ཀྱང་གློ་བུར་གྱི་དྲི་མ་བྲལ་སྟོབས་ཀྱིས་རང་གནས་ཀྱི་ཡོན་ཏན་མངོན་དུ་གྱུར་པ་ལས་གཞན་བྱུང་དང་། གསར་ཐོབ་མ་ཡིན་ཏེ། རྒྱུད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ན་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་དང་། རྨད་བྱུང་རྒྱལ་པོ་ལས། སངས་རྒྱས་སྐུ་དང་ཡེ་ཤེས་ཞིང་ཁམས་དང་། །ཡེ་ཤེས་ཡོན་ཏན་ཕྲིན་ལས་ཇི་སྙེད་པ། །ཡེ་ཤེས་དེ་ཉིད་དེ་ལྟར་སྣང་བ་ཡིན། །གཞན་ནས་མ་ཡིན་དེ་ལྟར་ལྷུན་གྱིས་གྲུབ། །ཅེས་གསུངས་པ་ལྟར་རོ། །གསུམ་པ་དོན་བསྡུས་ཏེ་གསོལ་བ་གདབ་པ་ནི། བདག་ཅག་ལས་འབྲས་མཆིས་པར་མཛོད། །ཅེས་པ་སྟེ། བདག་ཅག་སྒྲུབ་པ་མཆོག་ལ་ཞུགས་པའི་མཆེད་དང་ལྕམ་དྲལ་རྣམས་ཀྱིས་བསྒྲུབ་པའི་དལ་བཀྲམ། མཆོད་པའི་ཡོ་བྱད་སྦྱར། རིམ་གཉིས་ཀྱི་ཏིང་འཛིན་སྒོམ། བསྙེན་སྒྲུབ་གཉིས་ཀྱི་ལས་གཞུང་བསྲང་སྟེ་ཚུལ་བཞིན་དུ་སྒྲུབ་པའི་ལས་སམ་བྱ་བ་འདི་ལ་གནས་སྐབས་དང་མཐར་ཐུག་གི་འབྲས་བུ་མཆིས་པ་སྟེ་དོན་ཡོད་པར་མཛོད་ཅིག་ཅེས་པའོ། །གཉིས་པ་བྱིན་བསྡུ་བ་ནི། ཧཱུཾ་ཧཱུཾ་ཧཱུཾ་ཧཱུཾ་ཞེས་བརྗོད་པ་ནི་སྡུད་པར་བྱེད་པའི་གསང་སྔགས་ཏེ། ནམ་མཁའ་གང་བའི་ཡེ་ཤེས་ཀྱི་འཁོར་ལོ་ཐམས་ཅད་བདག་གནས་ཡོ་བྱད་དང་བཅས་པ་ལ་རྒྱ་མཚོ་ཆེན་པོ་ལ་ཆར་བབ་པ་བཞིན་དུ་བབས་ཤིང་ཐིམ་པར་གྱུར་པས་གསལ་ཞིང་བརྟན་པ་གཟི་བྱིན་དང་ལྡན་པར་མོས་པར་བྱའོ། །དེ་ལྟར་བཀའ་མའི་བྱིན་འབེབས་ཀྱི་གཞུང་འདི་ཉིད་ཚིག་བརླིང་ཞིང་དོན་རྟོགས་པར་དཀའ་བ་དེ་ལྟར་ནའང་། བཀའ་དྲིན་འཁོར་མཐའ་དང་བྲལ་བའི་འདྲེན་པ་མཆོག་གི་གསུང་གསང་སྤྱི་བོར་ཕེབས་པ་ལྡོག་ཏུ་མ་ནུས་པར་སྙོམས་ལས་པ་རྨོངས་པ་པདྨ་བཛྲ་དུ་འབོད་པས་གཡར་ཁྲལ་དུ་བྲིས་པ་དགེ་བར་གྱུར་ཅིག །དམ་པའི་ཞལ་ལུང་ཇི་བཞིན་མ་རྟོགས་པར། །རང་བཟོས་ནོངས་པའི་དྲི་མ་གང་མཆིས་པ། །ཆོས་ཀྱི་སྤྱན་ལྡན་རྣམས་ལ་སྙིང་ནས་འཆགས། །ཆོས་སྤོང་ལས་ཀྱིས་སྒྲིབ་པར་མ་གྱུར་ཅིག །ལྷག་བསམ་ཆབ་ལས་འཁྲུངས་པའི་ལེགས་བཤད་ཆའི། །དགེ་ཚོགས་པདྨ་དཀར་པོའི་ཕོན་པོ་འདི། །དམ་པའི་ལྷ་གྲལ་དགྱེས་པའི་དོ་ཤལ་དུ། །བླངས་ནས་རྗེས་སུ་འཛིན་པའི་རྒྱུ་གྱུར་ཅིག །ཅེས་ཀྱང་སྨྲས་སོ།། །།