ཐོག་མར་ཡུམ་གྱི་སྐྱེ་མཆེད་ལ།
༈ ཐོག་མར་ཡུམ་གྱི་སྐྱེ་མཆེད་ལ་གཙོ་བོ་ཡབ་ཡུམ་གཉིས་སྤྱིར་བསྟིམས་པའི་ལྷ་ཐབས་ཀྱི་ལྷ་བཞི་བཅུ་སྟེ་ཡབ་ཀྱི་སྤྱི་བོ་རྣམ་སྣང་། མགྲིན་པ་སྣང་མཐའ། ཐུགས་ཀར་རྡོ་རྗེ་སེམས་དཔའ། ལྟེ་བ་རིན་འབྱུང་། གསང་གནས་སུ་དོན་གྲུབ་མིག་གི་ནང་རྩར་ས་སྙིང་། ཕྱི་རྩར་བྱམས་པ་རྣ་བའི་ནང་རྩར་སྤྱན་རས་ཕྱི་རྩར་སྒྲིབ་སེལ་སྣའི་ནང་རྩར་ནམ་སྙིང་ཕྱི་རྩར་ཀུན་བཟང་། ལྕེ་ནང་རྩར་ཕྱག་རྡོར། ཕྱི་རྩར་འཇམ་དཔལ་ལ་སོགས་ཕྱག་གཡས་གཤིན་རྗེ། གཡོན་སྟོབས་ཆེན་ཞབས་གཡས་རྟ་མགྲིན་གཡོན་བདུད་རྩིའོ། །སྤྱི་བོར་ལྷ། མགྲིན་པར་ལྷ་མིན། སྙིང་གར་མི། ལྟེ་བར་བྱོལ་སོང་། གསང་བར་ཡི་དྭགས། རྐང་མཐིལ་དམྱལ་བའི་ཐུབ་པ། ཐུགས་ཀར་ཀུན་བཟང་། དེ་བཞིན་དུ་ཡུམ་ལ་ཡུམ་རྣམས་དགོད་པར་སྦྱར་ཏེ་ཐབས་ཀྱི་ལྷ་བཞི་བཅུ། དེ་རེ་རེའི་ཐུགས་ཀར་ཤེས་རབ་ཀྱི་ལྷ་ཡེ་ཤེས་སེམས་དཔའ་རེ་རེ་སྟེ་བཞི་བཅུ། ཐབས་ཀྱི་གནས་གསུམ་དུ་བསམ་གྱིས་མི་ཁྱབ་པའི་ལྷ་སྐུ་གསུང་ཐུག་ས ཀྱི་ལྷ་གསུམ་སྟེ་བཞི་བཅུ་ཕྲག་གསུམ། སྔར་གྱི་དང་ལོག་པས་ཉིས་བརྒྱ་བདག་པོ་རིགས་ཀྱི་ལྷ་དབུ་རྒྱན་ལྔ་ལྔ་བཀོན་པས་དབུ་རྒྱན་གྱི་ལྷ་སྟོང་ཕྲག་ཁྲིགས་བཅད་དོ། །སངས་རྒྱས་སྟོང་གི་དཀྱིལ་འཁོར་ཡང་། །རི་རབ་ཏིལ་འབྲུའི་ཚུལ་བཞིན་དུ། །ཞེས་སོ། །དེ་བཞིན་རྣམ་སྣང་ལ་སོགས་པར་ཡབ་ཡུམ་ཟུང་བཅུ་བདུན་ཐུབ་པ་དྲུག་སྟེ། ཉེར་གསུམ་ལ་སྟོང་སྟོང་བརྩིས་པས་སྔར་གྱི་དང་ལོག་པས་སྟོང་ཕྲག་ཉི་ཤུ་རྩགས་ཏེ་ལམ་རིམ་དང་མཐུན་པར་བརྩིས་ནས་དེའི་སྟེང་དབུ་རྒྱན་གྱི་གཞི་ཐབས་དང་ཤེས་རབ་བསམ་གྱིས་མི་ཁྱབ་པ་སྐུ་གསུང་ཐུགས་ཀྱི་ལྷ་ཉིས་བརྒྱ་ཕྲག་ཉི་ཤུ་བཞི་སྟེ་གཙོ་བོ་ཡབ་ཡུམ་ལ་སྔར་བཞིན་ཐབས་ཀྱི་ལྷ་བརྒྱད་བཀོད་ཅིང་། དེ་རེ་རེའི་ཐུགས་ཀར་ཤེས་རབ་ཀྱི་ཡེ་ཤེས་སེམས་དཔའ་རེ་རེ་བསམ་གྱིས་མི་ཁྱབ་པའི་སྐུ་གསུང་ཐུགས་ཀྱི་ལྷ་གསུམ་གསུམ་གནས་སུ་བཀོད་པས་ཉིས་བརྒྱ་དགུ་བཅུ། དེ་རེ་རེ་ལ་བདག་པོ་རིགས་ཀྱི་ལྷ་དབུ་རྒྱན་ལྔ་ལྔ་བཀོན་པས་དབུ་རྒྱན་གྱི་ལྷ་སྟོང་ཉིས་བརྒྱ་ལྔ་བཅུ་བྱུང་ཚོགས་སུ་སྟོང་བདུན་བརྒྱ་བཞི་བཅུའོ། །དང་པོར་གཙོ་བོ་བཛྲ་ཧེ་རུ་ཀའི་སྤྱི་བོར་བུདྡྷ། མགྲིན་པར་རྟ་མགྲིན། ཐུགས་ཀར་བཛྲ། ལྟེ་བར་རཏྣ། གསང་གནས་སུ་ཀརྨ། ཚོགས་བརྒྱད་ཀྱི་དབང་བརྟེན་ནང་རྩར་ཀོའུ་རི་ལས་སོ་བརྒྱད། ཕྱི་རྩར་སེངྷ་ལས་ས་བརྒྱད། ཡན་ལག་བཞིར་སྒོ་བ་བཞི། སྒལ་ཚིགས་ཉེར་བརྒྱད་ལ་དབང་མོ། དེ་བཞིན་བཛྲ་ཀྲོ་ཏའི་གནས་ལྔར་ཡང་ཡབ་ལ་བཀོད་པ་བཞིན་དུ་ཁྲག་འཐུང་ཡུམ་ལྔ་བཀོད་དེ། ཡན་ལག་བཀོད་པས་ལྔ་བཅུ་བརྒྱད། །ཆ་ལྔའི་གྲངས་ནི་གཉིས་བརྒྱ་དང་། །དགུ་བཅུ་ལྷ་ལ་ཡང་དག་ལྡན། །ཅེས་པས་ང་བརྒྱད་ཕྲག་ལྔ་ལ་དེ་ལྟར་ལྷ་ང་གསུམ་ཀུན་ལ་སྦྱར་བས་དབུ་རྒྱན་བདུན་ཁྲི་དགུ་སྟོང་དྲུག་བརྒྱ་ལྔ་བཅུ་རྣམ་གྲངས་བྱུང་ཚོགས་སུ་དགུ་ཁྲི་ལྔ་སྟོང་བདུན་བརྒྱར་མནན་པས་རྒྱུད་སྙིང་པོའི་དབང་དུ་བརྩིས་པའི་ཉི་ཁྲི་ཆིག་སྟོང་དུས་གཅིག་གསལ། །ཅེས་སོ།། །།