དཔལ་ལྡན་གསང་བ་སྙིང་པོའི་ཁོག་འབུབ་ས་བཅད་ཀྱི་རིམ་པ་ཉུང་ངུ་། རྒྱལ་བའི་སྲས་པོ་གཞན་ཕན་མཐའ་ཡས།
དཔལ་ལྡན་གསང་བ་སྙིང་པོའི་ཁོག་འབུབ་ས་བཅད་ཀྱི་རིམ་པ་ཉུང་ངུ་འཁོར་འདས་བར་གྱི་ལོ་ཙཱ་ཞེས་བྱ་བ་བཞུགས།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །པདྨའི་སྐྱེ་གནས་ལས་འབྱུང་ཕན་བདེ་ཡི། །འབྱུང་གནས་དྲི་མེད་ཐུགས་རྗེའི་འོད་ཟེར་ཅན། །སྐྱེ་རྒུའི་ཉི་མ་གྲུབ་དབང་རྫོགས་ཆེན་པ། །ཡབ་སྲས་དབྱེར་མེད་བདག་བློའི་པད་མོར་རོལ། །ཞེས་མཆོད་པར་བརྗོད་པས་མདུན་བསུས་ཏེ་རྒྱུད་ཐམས་ཅད་ཀྱི་རྒྱལ་པོ་སྒྱུ་འཕྲུལ་དྲྭ་བ་རྩ་བའི་རྒྱུད་འཕགས་པ་རྟོག་པའི་རྒྱལ་པོ་ལུང་གི་སྤྱི་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་ས་བཅད་ཅུང་ཟད་ཅིག་འགོད་པར་བྱ་བ་ལ། ཐོག་མར་ཇི་ལྟར་བྱུང་བའི་ལོ་རྒྱུས་དང་། རྒྱུད་དོན་དངོས་གཉིས་ལས། དང་པོ་ལའང་སྒྱུ་འཕྲུལ་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །གང་ལ་ཐུག་གི་བར་དུའོ། །ཞེས་པ་ལྟར། རྒྱལ་བ་དགོངས་བརྡའི་བརྒྱུད་པ། རིག་འཛིན་རིག་པས་བརྒྱུད་པ། གང་ཟག་རྣ་བར་བརྒྱུད་པ་སྡེ་གསུམ་ལས། དང་པོ་ལའང་དགོངས་བརྒྱུད་དང་བརྡ་བརྒྱུད་གཉིས། གཉིས་པ་ལ་རིག་འཛིན་མི་མ་ཡིན་གྱི་བརྒྱུད་པ་དང་། མི་དང་མི་མ་ཡིན་གཉིས་ཀའི་བརྒྱུད་པ་སྟེ་གཉིས། གསུམ་པ་ལ་རྒྱ་གར་པ་དང་། བོད་ནས་བརྒྱུད་ཚུལ་གཉིས་རྣམས་ཡོད། གཉིས་པ་རྒྱུད་དོན་དངོས་བཤད་པ་ལ། བཤད་བྱའི་ཡན་ལག་བསྟན་པ་དང་། བཤད་བྱ་དངོས་བཤད་པ་གཉིས་ལས། དང་པོ་ལ་བཤད་བྱ་དམ་པའི་ཆོས་ངོས་བཟུང་བ་དང་། འཆད་བྱེད་ཀྱི་ཆོས་ངོས་བཟུང་བ་དང་། ཇི་ལྟར་འཆད་པའི་ཚུལ་ཏེ་གསུམ་དུ་ཡོད་པ་ལས། དང་པོ་ནི། སྤྱིར་སྔགས་ལ་རྒྱུད་སྡེ་དྲུག་ཏུ་ཡོད་པ་ལ། འདིར་གང་བཤད་པར་བྱ་བ་ནི་མ་ཧཱ་ཡོ་ག །དེ་ལའང་ཏནྟྲ་སྡེ་བཅོ་བརྒྱད་ཡོད་པ་ལས། སྤྱི་རྒྱུད་སྒྱུ་འཕྲུལ་དྲྭ་བ། དེ་ལའང་ནང་གསེས་སྒྱུ་འཕྲུལ་སྡེ་བརྒྱད་དང་བཤད་རྒྱུད་སྡེ་བཞི་སྟེ་བཅུ་གཉིས་ཡོད་པའི་ནང་ནས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཉིད་དེ་བཤད་བྱ་ངོས་བཟུང་བའོ། །གཉིས་པ་འཆད་བྱེད་ནི། བཤད་རྒྱུད་མེ་ལོང་ལས། ལུང་དང་རིག་པ་མན་ངག་གི། །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་པ་ལྟར་ལུང་རིག་མན་ངག་གསུམ་གྱིས་འཆད་དགོས་པའི་དང་པོ་ནི་རྒྱལ་བའི་བཀའ་ལུང་སྤྱི་དང་བྱེ་བྲག་བཤད་རྒྱུད་སྡེ་བཞིའི་ལུང་ཚད་མའོ། །གཉིས་པ་མན་ངག་ཚད་མ་ནི་རྒྱ་བོད་ཀྱི་མཁས་གྲུབ་རྣམས་ཀྱིས་མཛད་པའི་འགྲེལ་པ་རྣམས་དང་། བླ་མ་དམ་པའི་ཞལ་གྱི་གདམས་པ་རྣམས་སོ། །གསུམ་པ་རིག་པ་ཚད་མ་ནི། དེ་གཉིས་ཀ་དང་རྗེས་སུ་མཐུན་པར་རང་གི་བློས་དཔག་པའོ། །གསུམ་པ་ཇི་ལྟར་འཆད་པའི་ཚུལ་ལ་མ་ཧཱ་ཡོ་ག་སྤྱིའི་འཆད་ཚུལ་རྒྱན་བདུན་གྱི་སྒོ་ནས་འཆད་པ་དང་། ཟུར་པོ་ཆེའི་ཕྱག་བཞེས་མདའ་ལྟར་རྩེ་མོ་ནས་བཟུང་སྟེ་འཆད་པ་སོགས་གསུམ་དང་། སྒྲོ་ཕུག་པའི་ཕྱག་བཞེས་ཆོས་ལྔའི་སྒོ་ནས་འཆད་པ་རྣམས་ཡིན་མོད་དེ། འདིར་ནི་བི་མ་ལའི་ཁོག་གཞུང་གསལ་སྒྲོན་གྱི་དགོངས་པ་ལྟར་འཆད་པ་ཡིན་ནོ། །གཉིས་པ་བཤད་བྱ་དངོས་བཤད་པ་ལ། ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། ཐ་མ་འབྲུ་གཉེར་དཀྲོལ་བའོ། །ཞེས་པ་ལྟར་གསུམ་ལས། དང་པོ་དབང་པོ་རབ་ལ་རྒྱུད་ཀྱི་མཚན་བསྟན་པ་ལའང་། རབ་མཚན་ཐ་སྙད་གསུམ་དུ་གྲགས། །ཞེས་པ་ལྟར་རྒྱུད་དང་མཐུན་པའི་མཚན་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་བཤད་པ་དང་། ལུང་དང་མཐུན་པའི་མཚན་འཕགས་པ་རྟོག་པའི་རྒྱལ་པོ་ལུང་གི་སྤྱི་བཤད་པ་དང་། མན་ངག་དང་མཐུན་པའི་མཚན་གསང་བའི་སྙིང་པོ་དེ་ཁོ་ན་ཉིད་ངེས་པར་བཤད་པ་སྟེ་གསུམ་མོ། །དེ་དག་ལ་ནང་གསེས་ཀྱི་དབྱེ་བའང་མང་དུ་ཡོད་དོ། ༈ །གཉིས་པ་དབང་པོ་འབྲིང་ལ་རྒྱུད་དོན་རྣམ་པར་དབྱེ་བ་ལའང་དོན་གྱི་རྣམ་གྲངས་རྣམ་པར་དབྱེ་བ་དང་། ཚིག་གི་རྣམ་གྲངས་རྣམ་པར་དབྱེ་བ་གཉིས་ལས། དང་པོ་ལའང་རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་སློང་། འབྲས་བུ་ཡོངས་ཤེས་རྒྱུད་དོན། རྒྱུད་ཀྱི་དགོངས་འགྲེལ། འཁོར་ལ་གདམས་ཤིང་བསྟན་པ་གཏད་པ་སྟེ་ལྔ་ལས། དང་པོ་ལའང་ཐུན་མོང་མ་ཡིན་པའི་དང་། ཐུན་མོང་གི་གླེང་གཞི་གཉིས་ལས། དང་པོ་ལ་ཡང་། ཕྱི་གྲོལ་ལམ་ལྟར་རྒྱུད་འབྱུང་བ་ཁྱད་པར་གྱི་གླེང་གཞི་དང་སྦྱར་ཏེ་བཤད་པ་དང་། ནང་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ་དང་། གསང་བ་ཐབས་ལམ་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པ་སྟེ་གསུམ་ཡོད། གཉིས་པ་ཐུན་མོང་ལའང་། རྒྱུད་འབྱུང་བ་ཁྱད་པར་གྱི་གླེང་གཞིའམ་ལོངས་སྐུའི་གླེང་གཞི་དང་གཅིག །གདུལ་བྱ་དགོས་ཆེད་ཀྱི་གླེང་གཞིའམ་ཁྲོ་བོའི་གླེང་གཞི་དང་གཉིས། འགྲོ་བ་འདུལ་བའི་གླེང་གཞིའམ་སྤྲུལ་སྐུའི་གླེང་གཞི་སྟེ་གསུམ་ཡོད། དེ་དག་རེ་རེ་བཞིན་ཕུན་སུམ་ཚོགས་པ་ལྔ་ལྔའི་བདག་ཉིད་ཅན་ཏེ། དེ་ལྟར་ཐུན་མིན་དང་ཐུན་མོང་བསྡོམས་པས་དྲུག་གོ། ༈ །གཉིས་པ་རྒྱུད་འབྱུང་བའི་རྐྱེན་གླེང་སློང་ལའང་། ཐུན་མོང་མ་ཡིན་པའི་གླེང་སློང་དང་། ཐུན་མོང་གི་གླེང་སློང་གཉིས་ལས། དང་པོ་ལའང་ཡབ་ཀྱིས་ཐབས་ཀྱི་ཆ་བཟུང་སྟེ་གླེང་སློང་བ་དང་། ཡུམ་གྱིས་ཤེས་རབ་ཀྱི་ཆ་བཟུང་སྟེ་གླེང་སློང་བ་དང་། ཡབ་ཡུམ་གཉིས་མེད་ཀྱིས་ཐབས་ཤེས་དབྱེར་མེད་ཀྱི་ཆ་བཟུང་སྟེ་གླེང་སློང་དང་། གསུམ་ཡོད་པ། དེ་ལས་ཕྱི་མ་ལའང་གཞི་རང་བཞིན་གྱི་སེམས་བསྐྱེད། བསྒྲོད་པ་ལམ་གྱི་སེམས་བསྐྱེད། མཐར་ཕྱིན་འབྲས་བུའི་སེམས་བསྐྱེད་དང་གསུམ་དུ་སྦྱར་ཚུལ་ཡོད། དེ་དག་ལ་བརྟེན་ནས་འཁོར་རྣམས་ཀྱིས་རིམ་བཞིན་ལྷག་པ་ཀུན་རྫོབ་ཀྱི་བདེན་པ་དང་། ལྷག་པ་དོན་དམ་གྱི་བདེན་པ་དང་། ལྷག་པའི་བདེན་པ་དབྱེར་མེད་རྣམས་རྟོགས་ནས་སྟོན་འཁོར་དགོངས་པ་དབྱེར་མེད་དུ་གྱུར་ཏེ་རང་དོན་དུ་རྒྱུད་ཞུ་མ་དགོས་པའོ། །གཉིས་པ་ཐུན་མོང་གི་གླེང་སློང་ལའང་གཞན་དོན་དུ་རྒྱུད་གསུངས་པར་འཁོར་གྱིས་ཞུས་པ་དང་། སྟོན་པས་ལན་སྩལ་བ་གཉིས་ཏེ། བསྡོམས་པས་ལྔའོ། ༈ །གསུམ་པ་འབྲས་བུ་ཡོངས་སུ་ཤེས་པར་བྱ་བ་རྒྱུད་དོན་དངོས་ལའང་རྒྱུད་གསུམ་གྱི་རྣམས་བཞག་སྤྱིར་བཤད་པ་དང་། ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་གཉིས་ལས། དང་པོ་ལའང་། གཞི་རྒྱུད་བཤད་པ་དང་། ལམ་རྒྱུད་བཤད་པ་དང་། འབྲས་རྒྱུད་བཤད་པ་དེ་གསུམ་ཡོད་པའི་དང་པོ་ལའང་། ངོ་བོའི་གཞི་དང་བརྟགས་པའི་གཞི་གཉིས་ཡོད། གཉིས་པ་ལམ་ལའང་། ཐབས་ཀྱིས་ངེས་པའི་ལམ་དང་། ཤེས་རབ་ཀྱིས་རྣམ་པར་གྲོལ་བའི་ལམ་གཉིས་ཡོད། དང་པོ་ཐབས་ལམ་ལའང་། ངོ་བོ། ངེས་ཚིག །དབྱེ་བ་གསུམ་གྱི་ངོ་བོ་ལ་སེམས་ལྔ་ཡོད། ངེས་ཚིག་ལ་དཔེ་དཔེ་ཅན་གཉིས་ཡོད། དབྱེ་ན་ཐབས་ལམ་གཅིག་ཅར་བ་སྟེ་འོག་སྒོའི་ལམ་དང་། རིམ་གྱིས་པ་སྟེང་སྒོའི་ལམ་གཉིས་ཡོད། ༈ གཉིས་པ་གྲོལ་ལམ་པ་ལའང་། ངོ་བོ་ངེས་ཚིག་དབྱེ་བ་གསུམ་ཡོད། ངོ་བོ་ནི་སེམས་ལྔ་ཡིན་ཀྱང་ཐབས་ལམ་དང་ཅུང་ཟད་མི་འདྲ་བའི་གོང་འོག་འཁྲུགས་སྡེབས་ཡོད། ངེས་ཚིག་ནི་འདྲ། དབྱེ་ན་གྲོལ་ལམ་གཅིག་ཅར་བ་དང་། རིམ་གྱིས་པ་གཉིས་ཡོད། དེ་གཉིས་ཀའི་ལམ་གྱི་ཁོག་མཚན་ཉིད་གསུམ་གྱིས་འབུ་བ་དགོས་ཏེ། དེ་ཡང་རྩ་རྒྱུད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པ་ལྟར། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུའི་མཚན་ཉིད་རིག་འཛིན་བཞི་སྟེ་གསུམ་ལས། དང་པོ་ལའང་གཞལ་བྱ། འཇལ་བྱེད། གྲུབ་མཐའ་དང་གསུམ་ལས། དང་པོ་ནི། འཁོར་འདས་གཉིས་སུ་ཞེན་པ་སྒྲོ་བཏགས་དང་བཅས་པའོ། །གཉིས་པ་ལ་དབྱེ་ན། རྒྱུ་གཅིག་པའི། ཡིག་འབྲུའི་ཚུལ་གྱིས། བྱིན་གྱིས་བརླབས་པའི། མངོན་སུམ་པའི་གཏན་ཚིགས་ཏེ་རྟོགས་པ་བཞིའི་གཏན་ཚིགས། སྣོད་བཅུད་རྒྱུད་གསུམ་དག་པ་སྟེ་དག་པ་གསུམ་གྱི་གཏན་ཚིགས། ཐུན་མོང་གི་མཉམ་པ་གཉིས་དང་ལྷག་པའི་མཉམ་པ་གཉིས་ཏེ་མཉམ་པ་བཞིའི་གཏན་ཚིགས། བདག་ཉིད་ཆེན་པོའི་གཏན་ཚིགས་ཏེ་གཏན་ཚིགས་བཞི་ཡོད། གསུམ་པ་ནི། གཏན་ཚིགས་དེ་དག་གི་རིམ་པ་ལྟར་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བར་གཏན་ལ་ཕེབས་པ་ནི་སྔགས་བླ་མེད་ཀྱི་ལྟ་བའི་གྲུབ་མཐའ་འོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལའང་། བསྐྱེད་པའི་རིམ་པའི་ཏིང་ངེ་འཛིན་དང་། རྫོགས་པའི་རིམ་པའི་ཏིང་ངེ་འཛིན་གཉིས་ཡོད། དེ་གཉིས་ཀའི་ལམ་གྱི་གཞུང་ཤིང་། སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཉིས་པ། ཕྱག་རྒྱ་སྤྲོས་བཅས་ཏེ་ཟག་ལྡོག་གཉིས་ལྡན་ཚོགས་ལམ་གྱི་རྣལ་འབྱོར་བཞི་དང་། བྲག་བཅས་ལྡོག་པ་མེད་པ་སྦྱོར་ལམ་གྱི་རྣལ་འབྱོར་ཚོམ་བུ་ཚོགས་བསྒྲུབ་སྟེ་ལྔ་རེར་ངེས་པ་ལས། དང་པོ་ལ་རིག་པ་སྤྱི་བླུགས་སུ་འཇོག་པ་དང་། མཐོང་བའི་རྗེས་ལ་འཇོག་པ་སྟེ་འཇོག་ཐབས་གཉིས་ཡོད། གཉིས་པ་ལ་དམིགས་བཅས་དང་དམིགས་མེད་གཉིས་ཡོད། གསུམ་པ་ལ་ཕྲ་བ་ཡིག་འབྲུ་ལ་བསླབ་པ་དང་། རིག་པ་ལྷ་སྐུ་ལ་བསླབ་པ་གཉིས་ཡོད། བཞི་པ་ལ་དཀྱིལ་འཁོར་སྤྲོས་པ། ཚོམ་བུ་སྤྲོས་པ། གྲངས་སྤྲོས་པ། ཞལ་ཕྱག་སྤྲོས་པ་དང་བཞི་ཡོད། དེ་དག་ལའང་ནང་གསེས་རྒྱས་འབྲིང་བསྡུས་པའི་དབྱེ་བ་འགའ་ཞིག་ཀྱང་ཡོད་དོ། ༈ །ལྔ་པ་ཚོམ་བུ་ཚོགས་སྒྲུབ་ལའང་ཕུན་སུམ་ཚོགས་པ་ལྔས་གཞི་བཟུང་བ་དང་། བསྙེན་བསྒྲུབ་ཡན་ལག་བཞིས་གཞུངས་བསྲངས་བ། འབྲས་བུ་རིག་འཛིན་འགྲུབ་པའི་དུས་བསྟན་པ་སྟེ་གསུམ་ཡོད། ༈ གསུམ་པ་ལམ་གྱུར་གྱི་འབྲས་བུའི་མཚན་ཉིད་ལའང་། མཐོང་སྒོམ་མཐར་ལམ་གསུམ་གྱིས་བསྡུས་པའི་རིག་འཛིན་རྣམ་པ་བཞི་ལས། དང་པོ་རྣམ་སྨིན་རྡོས་བཅས་ཀྱི་ཕུང་པོའི་སྦུབ་ནས་སེམས་ལྷའི་སྐུར་ཡོངས་སུ་སྨིན་པ་རྣམ་སྨིན་རིག་འཛིན་དང་། རྣམ་སྨིན་སྙིགས་མའི་ལུས་ཀྱང་དྭངས་མའི་ལུས་སུ་ཚེ་འདིར་བསྒྱུར་ནུས་པ་ཚེ་དབང་རིག་འཛིན་ཏེ། འདི་གཉིས་བློའི་ནུས་སྟོབས་ཆེ་ཆུང་གི་ཁྱད་མ་གཏོགས་སྔགས་ཀྱི་མཐོང་ལམ་པའོ། །ཕྱག་ཆེན་རིག་འཛིན་ནི་སྒོམ་ལམ་པ་སྟེ། དེའང་དབྱེ་ན། རྡོ་རྗེའི་རིག་འཛིན་དང་། འཁོར་ལོའི་རིག་འཛིན་དང་། རིན་པོ་ཆེའི་རིག་འཛིན་དང་། པདྨ་རིག་འཛིན་དང་། རལ་གྲིའི་རིག་འཛིན་ཏེ། ལྔ་ཡོད། ལྷུན་གྲུབ་རིག་འཛིན་ནི་མི་སློབ་པའི་ལམ་པ་སྟེ། རྒྱུའི་ཐེག་པའི་ཀུན་ཏུ་འོད་དུ་བཏགས་པ་དེ་དང་ཚུལ་གཅིག་པའོ། ༈ །གསུམ་པ་འབྲས་རྒྱུད་ལའང་སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། འཕྲིན་ལས་ལྔ་སྟེ་འབྲས་ཆོས་ཉི་ཤུ་རྩ་ལྔ་ཡོད། ༈ དོན་གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བཅུ་བྱེ་བྲག་ཏུ་བཤད་པ་ཡང་། ལུང་ལས། ལྟ་༡སྤྱོད་༢དཀྱིལ་༣འཁོར་དབང་༤དམ་ཚིག༥ །མཆོད་༦སྔགས་༧ཏིང་༨འཛིན་འཕྲིན་༩སྒྲུབ་༡༠ཀྱིས། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པ་ལྟར། དེ་ཁོ་ན་ཉིད་ལྟ་བ། ལ་དོར་བ་སྤྱོད་པ་བཀོད་པ་དཀྱིལ་འཁོར། རིམ་པ་བསྒྲོད་པ་དབང་། མི་འདའ་བ་དམ་ཚིག །གནས་སུ་སྟོབས་པ་མཆོད་པ། འཆིང་ཟློས་སྔགས་དང་ཕྱག་རྒྱ། མི་གཡོ་བ་ཏིང་ངེ་འཛིན། རོལ་བ་འཕྲིན་ལས། དོན་དུ་གཉེར་བ་བསྒྲུབ་པ་སྟེ་བཅུ་ཡོད་པ་ལ། དེ་དག་རེ་རེ་བཞིན་ངོ་བོ་སོགས་བཅུ་གཅིག་རེར་དབྱེ་བའི་ཚུལ་ཡོད་ཀྱང་། འདིར་ངོ་བོ་ངེས་ཚིག །དབྱེ་བ་གསུམ་རེར་དབྱེ་བ་ལས། ངོ་བོ་དང་ངེས་ཚིག་རྣམས་ནི་འགྲེལ་བ་ལས་རྟོགས་པར་བྱ། དབྱེ་བ་ནི། དང་པོ་ལྟ་བ་ལ་ལམ་གྱི་རིམ་པའི་ལྟ་གྲངས་དགུ་དང་། ཉམས་སུ་བླང་བྱ་རྒྱུད་ཀྱི་ལྟ་གྲངས་དགུ་སྟེ་བསྡོམས་པ་བཅོ་བརྒྱད་དང་། ཤེས་རབ་ཀྱི་ཚོགས་བརྒྱད་ལ་སོགས་པ་དང་། གཞན་ཡང་དབང་རབས་ཀྱིས་གོང་དུ་སྨོས་པའི་གཏན་ཚིགས་རྣམས་ལ་བརྟེན་ནས་རྟོག་པར་བྱ་བ་དང་། དབང་འབྲིང་གིས་རང་བཞིན་དང་འབྲས་བུའི་རྟགས་ལ་བརྟེན་ནས་རྟོགས་པར་བྱ་བ་དང་། དབང་པོ་ཐ་མས་ཐབས་ཉེ་རིང་གཉིས་ལ་བརྟེན་ནས་རྟོགས་པར་བྱ་བ་སོགས་རྟོགས་བྱ་རྟོགས་བྱེད་སོ་སོའི་སྒོ་ནས་དབྱེ་བ་དུ་མ་ཡོད་དོ། ༈ །གཉིས་པ་སྤྱོད་པ་ལའང་ཐབས་གྲོལ་ཐུན་མོང་གི་སྤྱོད་པ་དང་། བྱེ་བྲག་སོ་སོའི་སྤྱོད་པ་གཉིས་ལས། དང་པོ་ལའང་གསུམ་སྟེ། ལས་དང་པོ་པའི་དུས་སུ་དགེ་སྤྱོོང་གཞོན་ནུ་ལྟ་བུའི་སྤྱོད་པ་དང་། ཅུང་ཟད་གོམས་ཚེ་རྟོགས་པ་རྐྱེན་ཐུབ་ཀྱི་སྤྱོད་པ་སྨྱོན་པ་ལྟ་བུ་དང་། ཤིན་ཏུ་གོམས་ཚེ་རྒྱལ་པོ་ས་འཛིན་གྱི་སྤྱོད་པ་དང་གསུམ་མོ། །གཉིས་པ་བྱེ་བྲག་གི་སྤྱོད་པ་ལ། ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་གཉིས་ཡོད། ཕྱི་མ་ལ་ཡང་ཅིག་ཅར་མཉམ་པའི་སྤྱོད་པ་དང་། དད་བརྩོན་གྱི་སྤྱོད་པ་སོགས་རིམ་གྱིས་པའི་སྤྱོད་པའི་དུས་གྲངས་བདུན་ཡོད། ༈ གསུམ་པ་དཀྱིལ་འཁོར་ལའང་བཅུ་གཅིག་དང་བརྒྱད་སོགས་སུ་དབྱེ་ཚུལ་ཡོད་ཀྱང་། འདིར་བཤད་རྒྱུད་ཀྱི་རྗེས་སུ་འབྲང་ནས་འཆད་པ་ལ། རང་བཞིན་གྱི་དཀྱིལ་འཁོར་དང་། གཟུགས་བརྙན་གྱི་དཀྱིལ་འཁོར་དང་། ལྷག་པ་གཟུགས་བརྙན་གྱི་དཀྱིལ་འཁོར་དང་། ཏིང་ངེ་འཛིན་གྱི་དཀྱིལ་འཁོར་དང་། ལྷག་པ་ཏིང་ངེ་འཛིན་གྱི་དཀྱིལ་འཁོར་དང་། བྱང་ཆུབ་སེམས་ཀྱི་དཀྱིལ་འཁོར་དང་། ཚོམ་བུ་ཚོགས་ཀྱི་དཀྱིལ་འཁོར་ཏེ་བདུན་ཡོད། ༈ བཞི་པ་དབང་ལའང་། ཞི་བ་ལ་ཕན་དབང་བཅུ། ཁྲོ་བོ་ལ་ཕན་དབང་བཅོ་བརྒྱད། གཉིས་ཀ་ལ་ནུས་དབང་ལྔ་དང་། ཟབ་དབང་གསུམ་འདྲ། དེ་དག་ཀྱང་བསྡུ་ན། ཕྱི་ཕན་པའི་དབང་། ནང་ནུས་པའི་དབང་། གསང་བ་ཟབ་མོའི་དབང་སྟེ་གསུམ་དུ་འདུ། དེ་ལས་ཟབ་དབང་གསུམ་སོ་སོར་དབྱེ་ན་ལྔར་འགྱུར། དེ་ལས་ཀྱང་ཕན་ནུས་གཉིས་བུམ་དབང་དུ་བསྡུས་ནས་གཅིག་ཏུ་བགྲང་ཚེ་དབང་བཞིར་འདུ་བ་ཡིན་ནོ། ༈ །ལྔ་པ་དམ་ཚིག་ལའང་བླ་ན་མེད་པའི་བྱང་ཆུབ་ཀྱི་སེམས་མི་སྤངས་བ་སོགས་རྩ་བའི་དམ་ཚིག་ལྔ། དུག་ལྔ་མི་སྤང་བར་ལམ་དུ་འཁྱེར་བ་དང་། བདུད་རྩི་ལྔ་མི་འདོར་བསྟེན་པ་སྟེ་ཡན་ལག་གི་དམ་ཚིག་བཅུ། དེ་ལས་དབྱེ་བའི་སུམ་བརྒྱ་དྲུག་ཅུ་ལ་སོགས་པའོ། ༈ །དྲུག་པ་མཆོད་པ་ལའང་འཇིག་རྟེན་དང་འཇིག་རྟེན་ལས་འདས་པས་མཆོད་པ་གཉིས་སམ། བྱེ་བྲག་གི་མཆོད་པ་བཅུ་བཞི་ལ་སོགས་པའོ། །དེ་དག་ཀྱང་བསྡུ་ན། ཕྱི་ཉེར་སྤྱོད། ནང་དམ་རྫས་བདུད་རྩི། གསང་བ་སྦྱོར་སྒྲོལ་ཟབ་མོའི་མཆོད་པ་སྟེ་གསུམ་དུ་འདུའོ། ༈ །བདུན་པ་འཆིང་ཟློས་སྔགས་དང་ཕྱག་རྒྱ་ལ་འཆིང་བ་ཕྱག་རྒྱ་དང་། ཟློས་པ་སྔགས་གཉིས་ལས། དང་པོ་ལའང་། དམ་ཚིག་གི་ཕྱག་རྒྱ་དང་། ལས་ཀྱི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་སྟེ་བཞིའོ། །ཡང་ན་དེ་ལ་དབྱེ་བའི་ཕྱག་རྒྱ་བདུན་ནོ། །དེ་ཡང་བསྡུ་ན། རང་བཞིན་གྱི་ཕྱག་རྒྱ་དང་། ལྟ་བའི་ཕྱག་རྒྱ་དང་། ཏིང་ངེ་འཛིན་གྱི་ཕྱག་རྒྱ་སྟེ་གསུམ་གྱི་ཁོངས་སུ་འདུའོ། ༈ །གཉིས་པ་སྔགས་ལའང་བཟླ་བྱ་སྔགས་ཀྱི་སྒོ་ནས་དབྱེ་བ་དང་། བཟླས་པ་སྒོའི་སྒོ་ནས་དབྱེ་བ་གཉིས་ལས། དང་པོ་ལ་གསང་སྔགས། རིགས་སྔགས། གཟུངས་སྔགས་གསུམ་མོ། །དེ་དག་ལ་ངོ་བོ་དང་། བྱེད་ལས་དང་། རྟགས་ཀྱི་སྒོ་ནས་དབྱེ་བ་སོ་སོར་ཡོད་དོ། །གཉིས་པ་ལ་རྒྱུ་མ་ནོར་བ་རྩ་བའི་སྔགས་ཐུགས་སྲོག་གི་ས་བོན་ཧཱུཾ་ལྟ་བུ་དང་། བསྐྱེད་པ་རྐྱེན་གྱི་སྔགས་ལྷ་རང་རང་གི་མཚན་སྔགས་དང་། དེ་གཉིས་སྦྲེལ་བ་བཟླས་པ་ལས་ཀྱི་སྔགས་ཏེ་གསུམ་མོ། ༈ །བརྒྱད་པ་ཏིང་ངེ་འཛིན་ལ་བསྐྱེད་རྫོགས་གཉིས་ཀ་དང་རྗེས་སུ་མཐུན་པའི་ཏིང་ངེ་འཛིན་གཉིས་སོ། ༈ །དགུ་པ་ཕྲིན་ལས་ལ་ཞི་རྒྱས་དབང་དྲག་སྟེ་ལས་བཞིའི་སྟེང་མཆོག་གི་ལས་བསྣན་པས་ལྔའམ། མཆོག་གི་ལས་ལ་ནང་གསེས་བཞིར་དབྱེ་བས་བརྒྱད་དུ་འགྱུར་བ་རྣམས་སོ། །དེ་དག་ཐབས་གང་གི་སྒོ་ནས་བྱེད་པ་ཡང་། ཧོ་མ་སྟེ་སྦྱིན་སྲེག་གི་སྒོ་ནས་ལས་བྱེད་པ་དང་། རྫས་ཀྱི་སྒོ་ནས་ལས་བྱེད་པ་དང་། ལུ་གུ་རྒྱུད་དེ་བྲོའི་སྒོ་ནས་ལས་བྱེད་པ་དང་། མཆོད་རྟེན་ཏེ་མནན་པའི་སྒོ་ནས་ལས་བྱེད་པ་རྣམས་སོ། ༈ །བཅུ་པ་བསྒྲུབ་པ་ལའང་ཐུན་མོང་གི་སྒྲུབ་པ་དང་། མཆོག་གི་སྒྲུབ་པ་གཉིས་ལས། དང་པོ་ལའང་མང་དུ་ཡོད་ཀྱང་འདིར་རྩ་རྒྱུད་དངོས་ཀྱིས་བསྟན་པ། ཡོན་ཏན་འབྱུང་བའི་དངོས་གྲུབ་དྲུག །འབྱུང་ལྔའི་དངོས་གྲུབ་ལྔ། ལས་ཕྲན་ཚེག་བརྒྱད་ལ་སོགས་པའོ། །མཆོག་གི་སྒྲུབ་པ་ནི་རིག་འཛིན་གྱི་གོ་འཕང་གང་ཞིག་དོན་དུ་གཉེར་བའོ། །དེ་དག་ཀྱང་རང་རང་གི་སྒྲུབ་ཐབས་རྣམས་དང་ཁྱད་པར་རྒྱུད་འདིའི་དགོངས་པ་ཚོམ་བུ་ཚོགས་སྒྲུབ་ལ་བརྟེན་ནས་བསྒྲུབ་པའོ། །དེ་དག་གི་འབྲས་བུ་ཡོང་ཤེས་རྒྱུད་དོན་རྫོགས་ནས། གཞུང་གི་ས་བཅད་བཞི་པ་རྒྱུད་ཀྱི་དགོས་འགྲེལ་ནི། གཞི་རྒྱུད་ཀྱི་དོན་ལྟ་བུ་བརྗོད་བྱ། ལམ་རྐྱེན་ཡི་གེའི་རྒྱུད་ལྟ་བུ་རྗོད་བྱེད། དེ་ལ་བརྟེན་ནས་ལམ་རྒྱུད་དངོས་བསྐྱེད་རྫོགས་རིམ་གཉིས་ཀྱི་དོན་རྟོགས་པ་ལྟ་བུ་དགོས་པ། དེ་བསྒོམས་པའི་མཐུས་མཐར་ཐུག་སངས་རྒྱས་ཐོབ་པ་ལྟ་བུ་ཉིད་དགོས་ཏེ། དེས་ན་བརྗོད་བྱ་དང་རྗོད་བྱེད་ཤེས་བྱ་དང་ཤེས་བྱེད་དུ་འབྲེལ། རྗོད་བྱེད་དང་དགོས་པ་ཐབས་ལས་ཐབས་བྱུང་དུ་འབྲེལ། དགོས་པ་དང་ཉིང་དགོས་དེ་ལས་དེ་བྱུང་དུ་འབྲེལ། ཉིང་དགོས་དང་བརྗོད་བྱ་ངོ་བོ་བདག་གཅིག་གིས་འབྲེལ་བ་སྟེ། དགོས་འབྲེལ་ཡན་ལག་བཞིའོ། ༈ །ས་བཅད་ལྔ་པ་འཁོར་ལ་གདམས་ཤིང་བསྟན་པ་གཏད་པ་ལའང་གདམས་པ་དང་གཏད་པ་གཉིས་ལས། དང་པོ་ལའང་གཞི་རང་བཞིན་གྱི་སྣང་བ་རྟོགས་བྱར་གདམས་པ། གདུལ་བྱ་ལམ་གྱི་སྣང་བ་བགྲོད་བྱར་གདམས་པ། ལོག་རྟོགས་འཁྲུལ་བའི་སྣང་བ་དག་བྱར་གདམས་པ། འབྲས་བུ་བདེ་བར་གཤེགས་པའི་སྣང་བ་ཐོབ་བྱར་གདམས་པ་སྟེ་བཞི་ཡོད། གཉིས་པ་གཏད་པ་ལའང་། དང་པོ་བཀའི་བསྡུ་བ་པོ་གསང་བདག་ཕྱག་ན་རྡོ་རྗེ་ལ་གཏད་པ། བར་དུ་མ་མོ་དང་མཁའ་འགྲོ་ལ་གཏད་པ། ཐ་མ་མ་འོངས་པའི་གང་ཟག་ཆོས་མིག་ཅན་རྣམས་ལ་གཏན་པ་སྟེ་གསུམ་མོ། །འདི་དག་ཀྱང་གཞུང་ཚིག་གང་དང་གང་གིས་སྟོན་པ་དང་། ཁོག་འབུབ་ཚུལ་གྱི་ལུང་སོགས་ཀྱང་ཡི་གེ་མང་དུ་དོགས་ནས་མ་བཀོད་པ་ཉིད་ལས་རང་བཟོ་བྱས་པ་ནི་མ་ཡིན་ཏེ། བཀའ་སྡེ་ཟུར་བའི་བཤད་སྲོལ་གཙོ་བོར་བཟུངས་ནས་བི་མ་ལའི་མན་ངག་གིས་ཀྱང་ཟུར་བརྒྱན་ཏེ་བཤད་རྒྱུད་ཀྱི་དགོངས་པ་འཁྲུལ་མེད་བཀོད་པ་ཡིན་ནོ། ༈ །སྤྱི་དོན་གཉིས་པ་ཚིག་གི་རྣམ་གྲངས་རྣམ་པར་དབྱེ་བ་ནི། ལམ་རྐྱེན་ཡི་གེའི་རྒྱུད་ཇི་ལྟར་གྲུབ་ཚུལ་སྨྲོས་པ་སྟེ། དེ་ཡང་དཀར་ལྟ་བུ་ཡི་གེ། ཡི་གེ་དུ་མ་ཚོགས་པས་དོན་གྱི་ངོ་བོ་ཙམ་སྟོན་པ་དཀར་པོ་ལྟ་བུ་མིང་། མིང་དུ་མ་འདུས་པར་ས་དཀར་པོ་ཞེས་པ་ལྟ་བུ་དོན་གྱི་ཁྱད་པར་སྟོན་པ་དག་ནི་ཚིག །ཚིག་དེས་དོན་དངོས་སུ་སྟོན་པ་རས་དཀར་པོའི་ལྭ་བ་གྱོན་ན་ཤིན་ཏུ་མཛེས་ལྟ་བུ་སྟེ། དེས་ན་ཡི་གེ་འདུས་པ་ལས་མིང་། མིང་འདུས་པ་ལས་ཚིག །ཚིག་འདུས་པ་ལས་དོན་གྱི་རྣམ་གྲངས་སྟོན་པའི་ཚིགས་བཅད་ལྷུག་དང་ལེའུ་དང་གླེགས་བམ་གྱི་བར་གྲུབ་པ་ཡིན་ནོ། ༈ །གསུམ་པ་དབང་པོ་མ་ཐར་འབྲུ་གཉེར་བཀྲོལ་བ་ལའང་རྩ་རྒྱུད་ལེའུ་ཉེར་གཉིས་ཀྱི་དོན་གྱི་མ་ལུས་པ་མཐར་ཆགས་སུ་འབྲུ་འགྲེལ་བྱས་ནས་འཆད་པ་སྟེ་འགྲེལ་གཞུང་བཞིན་ཤེས་པར་བྱའོ། །དེ་ལྟ་བུའི་འབྲེལ་ཞིང་རྒྱུན་མ་ཆད་པའི་རྒྱུད་གང་ལ་དབྱེ་ན་ཚིག་དང་དོན་གྱི་སྒོ་ནས་དབྱེ་བ་དྲུག་སྟེ། ཚིག་གི་སྒོ་ནས་དབྱེ་བ་སྒྲར་སྣང་བའི་རྒྱུ། སྒྲར་གྲགས་པའི་རྒྱུད། བརྡར་གྱུར་པའི་རྒྱུད་དང་གསུམ། དོན་གྱི་སྒོ་ནས་དབྱེ་བ་གཞི་ལམ་འབྲས་བུའི་རྒྱུད་གསུམ་སྟེ་དྲུག་གོ། །ལྟ་བ་དང་སྤྱོད་པའི་སྒོ་ནས་དབྱེ་ན། ལྟ་བ་གཙོ་བོར་སྟོན་པ་རྣལ་འབྱོར་རྒྱུད་དང་། སྤྱོད་པ་གཙོ་བོར་སྟོན་པ་བྱ་བའི་རྒྱུད་གཉིས། སྔ་མ་ལ་དངོས་དང་རྣལ་འབྱོར་བླ་མེད་ཀྱི་རྒྱུད་གཉིས། ཕྱི་མ་ལའང་དངོས་དང་ཆ་མཐུན་གྱི་རྒྱུད་དམ་སྤྱོད་རྒྱུད་གཉིས་ཏེ་བཞི། དེ་ལ་བླ་མེད་ལ་ཕ་རྒྱུད་མ་རྒྱུད་གཉིས་མེད་ཀྱི་རྒྱུད་སྡེ་གསུམ་དུ་དབྱེ་བས་དྲུག་གོ། །རྩ་བ་དང་ཡན་ལག་གི་སྒོ་ནས་དབྱེ་ན། རྩ་བའི་རྒྱུད་དང་། བཤད་པའི་རྒྱུད་དང་། ཕྱི་མའི་རྒྱུད་དང་། རྟོགས་པའི་རྒྱུད་དེ་བཞིར་འགྱུར་རོ། །དེས་ན་ཐམས་ཅད་བསྡོམས་པས་རྒྱུད་ཀྱི་དབྱེ་བ་བཅུ་དྲུག་གོ། །དེ་ལས་ཀྱང་རྒྱུད་ཀྱི་དབྱེ་བ་དངོས་ནི་གཞི་ལམ་འབྲས་གསུམ་ཡིན་ལ་གཞན་རྣམས་ནི་ལམ་རྐྱེན་ཡི་གེའི་རྒྱུད་ཀྱི་དབྱེ་བའོ། །སླར་ཡང་སྨྲས་པ། སྣ་ཚོགས་བཤད་པའི་རྒྱུ་སྐར་ནི། །ཤེས་བྱའི་མཁའ་ལ་ཆས་པའི་ཚེ། །ཕྱོགས་ལྷུང་སེམས་ཀྱིས་རང་རང་གཞུང་། །མུན་སེལ་སྒྲོན་མ་ཡིན་པར་རློམ། །དེ་ཚེ་ལེགས་བཤད་འོད་བརྒྱ་པ། །རྙིང་བསྟན་ཤར་རིའི་རྩེར་སླེབས་པས། །ཕར་ཆེར་བག་ཉལ་གྱུར་ཏོ་ཞེས། །གཏམ་འདི་ཁོ་བོས་མ་བསྒྲགས་སམ། །བྱིས་པ་གང་ཞིག་བུམ་མཁའ་མཐོང་ནས་དེ་ལས་ནམ་མཁའ་གཞན་མེད་ཅེས། རྟོགས་འདི་བསལ་ཕྱིར་སྐྱེ་བོ་མཁས་པས་ནམ་མཁའི་མཚན་ཉིད་རབ་བརྗོད་པས། དེ་ཡི་དེ་ཚུལ་རྟོགས་དེས་རང་ཉིད་གྱི་ནར་གྱུར་ཞེས་བརྗོད་པ་ལྟར། ཐེག་པ་དམན་མཆོག་ཉིད་དང་དེ་འཛིན་སྐྱེས་བུའང་དེ་བཞིན་མཁྱེན་འཚལ་ལོ། །འདི་བརྩམ་དགེ་བ་བླ་མེད་ནི། །ལམ་རྒྱུད་བླང་དོར་བྱེད་ཕྱིར་མིན། །གཞི་རྒྱུད་གང་ཞིག་མངོན་གྱུར་པའི། །རྒྱུད་དེ་ཁོ་ནར་བསྔོ་བར་བགྱི། །དེ་མཐུས་གཞི་ལ་གནས་པའི་ཡེ་ཤེས་ནི། །ལོག་རྟོག་འཁྲུལ་པའི་སེམས་དང་དགྲར་གྱུར་ནས། །འགྲོ་ཀུན་གཞོན་ནུ་བུམ་སྐུའི་ཁང་བཟང་དུ། །བཙན་ས་ཟིན་པའི་དབུགས་འབྱིན་འཐོབ་པར་ཤོག །ཅེས་དཔལ་ལྡན་གསང་བ་སྙིང་པོའི་ཁོག་འབུབ་ས་བཅད་ཀྱི་རིམ་པ་ཉུང་ངུ་འདི་ཡང་། ༈ སྐྱབས་མགོན་ཐམས་ཅད་མཁྱེན་པའི་ཐུགས་སྲས་བུ་ཆེན། རང་ཉིད་ཀྱི་རྡོ་རྗེའི་མཆེད་པོ་རིག་པ་འཛིན་པ་བུདྡྷ་ཕ་ལ་ནས་འདི་ལྟ་བུ་ཞིག་དགོས་ཞེས་བསྐུལ་ངོར། ༈ གྲུབ་དབང་རྫོགས་ཆེན་པ་ཡབ་སྲས་ཀྱི་བཀའ་འབང་གི་གྲལ་མཐར་སྡོད་པ་པོ་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་དུ་འབོད་པས་བློ་ཐོག་ནས་ཇ་བར་ཞིག་ལ་བྲིས་པའོ། །མངྒ་ལཾ།། །།