གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ།

གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་བཞུགས་སོ། །རྒྱ་གར་སྐད་དུ། གུ་ཧྱ་མནྟ་བཛྲ་ཡཱ་ན་ཨཱུ་པ་དེ་ཤ་པ་ཐཿཀྲ་མ་རཏྣ་བི་ཨཱུ་ཧ་ནཱ་མ། བོད་སྐད་དུ། གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་ཞེས་བྱ་བ། དཔལ་གྱི་དཔལ་དཔལ་རྡོ་རྗེ་སེམས་དཔལ་ལ་ཕྱག་འཚལ་ལོ། །དཔལ་གྱི་དཔལ་གསུམ་ཉིད་ལྡན་རྡོ་རྗེ་ལྟ་བུ་ཡེ་ཤེས་འདུས་མ་བྱས། །མ་བཙལ་ལྔ་རྫོགས་རྐྱེན་བྲལ་མི་ཤིག་དབྱིངས་ཉིད་ཡེ་ཤེས་འདུ་འབྲལ་མེད། །ལྔ་ཡིས་གྲུབ་ཉིད་གཉིས་མེད་ངང་གསལ་མི་གཡོ་མི་སེམས་སེམས་ཆེན་པོ། །འཕྲིན་ལས་བཞི་བཅོམ་དཔའ་བོ་རིན་ཉིད་ལྷ་ཡི་ལྷ་ལ་གཉིས་མེད་མོས། །གསང་བའི་བདག་པོ་མངོན་གཤེགས་ནས། །ལྷ་ཀླུ་གནོད་སྦྱིན་སྲིན་པོ་དང་། །མི་ལས་སྐལ་ལྡན་འདུས་པ་ལ། །དབང་པོས་ཇི་ལྟར་ལུང་བསྟན་དུས། །རྒྱལ་བུ་རིགས་ཅན་ལྟས་ཤར་ནས། །འབྲེལ་པས་སྣང་ལ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་གྲུབ། །བསྟན་པའི་དངོས་གྲུབ་དེ་ནས་ཐོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་རུ་འགྲུབ། །སྨོན་པའི་ལྷ་དང་དེ་རུ་མཇལ། །དེ་ནས་རྡོ་རྗེ་གདན་སྟེང་གི །འཛམ་གླིང་ཤར་གྱི་ཕྱོགས་མཚམས་སུ། །ཕོ་བྲང་དམ་པ་རིན་ཆེན་ནང་། །བཀྲ་ཤིས་དམ་པའི་ཁང་བུ་རུ། །ཀུ་ཀུ་ར་ཛེནྡྲ་བྷཱུ་ཏི། །སིདྷ་ཨུ་པ་རཱ་ཛ་དང་། །སྲས་མོ་གོ་མ་ས་ལ་སོགས། །སྒྱུ་འཕྲུལ་དྲ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །དེ་ཕྱིར་སངས་རྒྱས་མཚན་ཐོབ་ངས། །དམ་པའི་རིགས་ཅན་དྲ་མ་དང་། །དེ་རྗེས་མ་འོངས་སྐལ་ལྡན་ཕྱིར། །སྟོང་ཕྲག་བརྒྱ་པའི་རྒྱུད་དག་ལས། །གཤེགས་ཤུལ་ལམ་མཆོག་འདི་བསྡུས་ཏེ། །སྙིགས་མའི་རྒྱུད་དྲག་དུས་ཀྱི་ཚེ། །དུས་ཀྱིས་འདུལ་ཕྱིར་བསྟན་པར་བྱ། །སྤྱན་བཟང་འགྲོ་མཐུ་མེད་པ་ཡི། །དམིགས་བུ་བྲལ་བའི་ཉམས་སྟོར་བས། །བགྲོད་ཅིང་ཕྱིན་པར་མི་ནུས་བཞིན། །རྩིང་པོ་དམུ་རྒོད་རང་ཉམས་ཀྱིས། །གསང་བའི་སྙིང་པོར་མི་འགྱུར་ཏེ། །བུལ་ཤིང་མེ་ཏོག་འབྲས་བཞིན་འགྱུར། །དེ་བས་བླ་མ་ལུང་བཞིན་བཀུར། །བརྟག་སྤྱོད་ཞེ་གཅོད་བཟོད་བྱས་ཏེ། །མཐོང་བའི་གདུང་བ་ཁུར་མི་བལྟ། །དེ་ཀུན་ཡུན་གྱི་དོན་དུ་བཟོད། །དཀའ་བས་བསྟེན་ན་རྡོ་རྗེ་རྒྱལ། །ཉམས་ཀྱིས་གནང་བ་ཐོབ་འགྱུར་ཏེ། །དེ་ཚེ་རྒྱུད་ཆེན་གཞུང་བཞིན་ཡོན། །ཕུལ་ན་ཐུགས་ཀྱི་ཉིང་ཁུ་སྟེར། །དེ་ཡིས་བཞོན་པ་བཟང་འགྲོ་བཞིན། །གསང་བའི་རྫུ་འཕྲུལ་སྟོབས་ཞོན་པས། །མཐོང་འཇུག་མཐར་ཕྱིན་བཞི་བགྲོད་ནས། །ཡེ་ཤེས་སྙིང་པོའི་གནས་སུ་ཕྱིན། །དེ་བས་རྡོ་རྗེ་གཉེར་ལྡན་པས། །རྒྱང་དྲུང་སེམས་པྲ་མཁའ་འགྲོ་ཡིས། །གསང་སྔགས་ལྟས་སྟོན་སྤྱོ་བ་ཡིས། །ཅི་ནས་བརྟགས་ཏེ་བཟང་ལྡན་ན། །མི་ལྡོག་བརྟན་བྱས་རྟས་པ་ཡི། །སློབ་བུ་གང་ཡིན་ལག་ཏུ་གཏད། །ངན་པའི་ལྟས་མཐོང་མངོན་ཤེས་པས། །འདོད་པ་ཕྲ་མོའི་རྒྱུར་བྱེད་དང་། །ཁེ་དང་གྲགས་པ་ཆེ་བའི་རྒྱུར། །བྱེད་ཅིང་བཅུད་ཆེན་འཛག་དང་འབོ། །མི་ཆགས་མ་རུངས་བྱེད་པ་དང་། །ཟང་ཟིང་མཐའ་གཏོང་དབུས་འཆིང་དང་། །གཡོན་ཅན་ངོ་དགའ་ལྟག་སྤྲད་སྐུར། །ལྐོག་ན་རང་དགའ་བྱེད་པ་དང་། །ངག་ལ་རིགས་ངེས་བསམ་མི་ངེས། །བུད་མེད་འདོད་པ་ཕྱལ་བ་དང་། །མུན་ལྐོག་འཕྲོད་པར་འདོད་སྤྱོད་སྙེག །ཕོ་མོ་ཏནྟྲ་མ་བསྔགས་ལ། །བསྐལ་པར་གྲིབ་བཞིན་འཁོར་འགྱུར་ཡང་། །ཐུགས་ཀྱི་བདེ་བར་སྤྲོ་མི་བྱ། །འཚལ་པར་སྐུ་བསྟན་གཅན་འཕྲང་སྦྱིན། །དེ་མིན་བེའུ་སྤྲེལ་གཡང་བསྒྱུར་བཞིན། །འདོད་ཁེས་ཕྲོགས་ཤིང་གཅམ་འཕྱལ་བས། །མ་རྟོགས་སྤྲོས་ན་དུར་ཁྲོད་གླིང་། །བརྒྱད་ཀྱི་མཁའ་འགྲོ་བཞིན་འདུས་ནས། །ཤ་ཟ་སྲོག་ལ་འབེབས་ཤིང་ལྟུང་། །དེ་ལྟར་བརྟགས་པའི་སྐལ་ལྡན་ཕྱིར། །རང་བཞིན་ཡེ་ཤེས་རང་གནས་དང་། །དེ་མཐོང་དེར་འཇུག་རྣལ་འབྱོར་བཞི། །བར་ཆད་མེད་སྒྲུབ་རྣམ་པར་སྨིན། །དབང་བསྒྱུར་ཕྱག་རྒྱ་ལྷུན་གྲུབ་ལམ། །མངོན་བྱས་རིམ་པ་བརྗོད་པར་བྱ། །དེ་ལ་དང་པོ་ཉིད་སྤྲོས་པ། །དེ་ཉིད་དེ་ཡིས་ཤེས་བྱ་བ། །ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །འཁོར་བ་སེམས་ཕྱིར་བདག་མེད་པས། །དེ་ཕྱིར་དེ་བཞིན་གཤེགས་བསམ་ཡས། །འཁོར་བའི་རང་བཞིན་མི་དམིགས་ཕྱིར། །མྱ་ངན་འདས་པ་ཡོད་མ་ཡིན། །དེ་ལྟར་རིགས་དང་རྒྱུད་མེད་པས། །བྱང་ཆུབ་མཆོག་གི་ངོ་བོ་ལ། །སོ་སོའི་རང་བཞིན་ངེས་ཞེ་ན། །ཡང་དག་ལམ་གྱིས་བཅོས་སུ་མེད། །ཡང་དག་གཤེགས་དང་ལོག་རྟོག་གཉིས། །ངོ་བོ་ཉིད་ཀྱིས་གནས་གྱུར་ན། །དེ་ལ་བཅོས་ཤིང་སྒྱུར་དུ་མེད། །མཆིང་བུ་རིན་ཆེན་བཞིན་མི་རིགས། །དེ་བས་དེ་ལྟའང་འདི་བཞིན་པས། །མ་རིག་ལོག་རྟོག་ཞགས་པའི་རྒྱུ། །ལས་དང་ཉོན་མོངས་བརྒྱད་རྐྱེན་གྱིས། །བཅུ་གཉིས་འཁོར་ལོས་གནས་སུ་བསྐྱར། །རྟེན་དང་འདོད་པ་ཐ་དད་པའི། །བདེ་སྡུག་གདུང་བས་ཉམ་ཐག་བྲལ། །བརྩོམ་མེད་བཞི་དུས་ཀུན་ཏུ་ཉམས། །རང་བཞིན་ཉིད་ལས་ཉམས་པ་མེད། །དེ་ལྟའང་རྒྱལ་པོའི་ཕྲུག་གུ་འཁྱམས། །དེ་བཞིན་རིགས་ལ་འགྱུར་མེད་པས། །ཤུལ་དོན་རང་ལས་གཞན་མིན་ཕྱིར། །འཕྲུལ་དགའི་ཚུལ་དེ་གཞན་ལས་མིན། །དེ་ཡང་རྣམ་གསུམ་གནས་ཚུལ་བཞག །འབྲུ་ལྔར་གནས་པའི་ཐབས་ཆེན་པོ། །འགྲོ་བ་ཀུན་ལ་རང་བཞིན་གནས། །དཀྱིལ་འཁོར་བཞི་དང་སྲོག་ཤིང་གསུམ། །གནས་ན་ཀཱ་ལིའི་སྒྲ་དབྱངས་ལྡན། །ཨེ་ཝཾ་མ་ཡ་མཁའ་ལྡན་དང་། །སྙིང་པོ་རླུང་སྒྲོམ་གནས་ན་ཡོད། །དེ་ཡིས་ཏནྟྲ་འབྱིན་པར་སྐྱེད། །དེ་དོན་དེ་ན་ཆོས་ཉིད་དང་། །ཡེ་ཤེས་ཡོན་ཏན་ལས་ཉིད་དངོས། །རྣལ་འབྱོར་ལམ་རིམ་རང་བཞིན་ལྡན། །སྣོད་ཀྱི་འོད་དབྱིངས་འཕྲིན་ལས་བཞི། །ཐིག་ལེ་བསྙེན་སྒྲུབ་རང་བཞིན་ལྡན། །པ་བཞི་བརྒྱད་ཤིང་མཎྜ་ལ། །རཾ་ཡཾ་གཡས་གཡོན་སྦྱིན་སྲེག་ལྡན། །གནས་བཞི་འབྱུང་བའང་ལས་བཞི་སྟེ། །གསང་བའི་མཁའ་ལ་ལས་བཞི་ལྡན། །གནས་རྟེན་རྩ་དང་ཐིག་ལེ་ལ། །བཅུ་དབང་ལྔ་གསུམ་དབང་རྣམས་ལྡན། །གསང་བ་ནང་གི་འདོད་ཡོན་དང་། །དམ་རྫས་ལྔ་ལྡན་མཆོད་པ་སྟེ། །དེ་དག་རང་གནས་མི་འདའ་བར། །རང་བཞིན་གནས་པའི་ས་མ་ཡ། །རང་བཞིན་ཕྱི་ནང་གསང་བ་ཡི། །འདུ་བྱེད་སྤྱོད་པ་ངང་གིས་གནས། །ཆགས་པས་ཁམས་འགྲུབ་ཅིག་ཤོས་ཀྱིས། །རང་བཞིན་ཡེ་ཤེས་འགྲུབ་བྱེད་པའོ། །རྡོ་རྗེ་ཕུང་པོའི་ཡན་ལག་ཀུན། །རྫོགས་པའི་སངས་རྒྱས་ལྔར་གྲགས་སོགས། །དངོས་ཀུན་ཆགས་དང་ནང་ཚུལ་གྱི། །ལས་དང་ངོ་བོས་འབྲས་བུར་གནས། །ཆུ་ཟླ་སྒྱུ་མ་སྤྲུལ་པ་བཞིན། །ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅི་ཡང་འགྱུར་ཞིང་ཅིར་ཡང་འགྲུབ། །བར་མ་ལམ་དང་འབྲས་བུ་རྣམས། །གང་ཡང་རིགས་རྒྱུད་རྟག་མིན་པས། །སེམས་ཕྱིར་ཀུན་ཀྱང་དེ་དེ་ངང་། །གཟུགས་གཉིས་མཚན་གསུམ་ཡོད་དང་མེད། །གནས་རིགས་སྡེ་ཆ་ཡོད་མིན་རྫོགས། །གཉིས་ཡུལ་བྲལ་བཞིན་དེ་ལྡན་པའི། །དོན་མཆོག་ལྔ་འབྲས་ཡེ་ཤེས་དབྱིངས། །བདུན་དང་གསུམ་ཕྱིར་དོན་དམ་པ། །དཔག་བསམ་ཤིང་དང་རིན་ཆེན་ལྟར། །དེ་ཀུན་ངོ་བོ་ཉིད་རྒྱུར་གནས། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །རང་བཞིན་ངང་གིས་དེ་ལྟར་གནས། །དེ་ལས་གཞན་པའི་ཐོབ་བྱ་མེད། །ཀུན་ཀྱང་སྨིན་ཟིན་བགྲོད་པ་མེད། །དེ་ཉིད་ལམ་གྱིའང་ངོ་བོ་སྟེ། །འཇུག་གནས་འབྱིན་པས་ཕྱེ་བ་ཡིན། །ཕྱོགས་བཅུ་མ་ལུས་ཐམས་ཅད་ལ། །རང་བྱུང་ཆེན་པོས་ཀུན་ཏུ་ཁྱབ། །རང་བྱུང་དེ་ཉིད་དངོས་མེད་པས། །ཀུན་གྱི་ཕྱག་རྒྱའི་རྒྱུ་ཡིན་ཕྱིར། །དེ་ལྟ་བུ་ཡི་ངང་དུ་ངེས། །དེ་བཞིན་ཉིད་དབྱིངས་ཡེ་ཤེས་ཏེ། །ཐབས་ཀྱི་ཕྱག་རྒྱ་ཀུན་གྱི་རྒྱུ། །མིང་གྲངས་མེད་པའི་རྒྱུ་ཉིད་དང་། །ཡོངས་སུ་རྫོགས་པ་ཞེས་ཀྱང་བརྗོད། །གསུམ་པ་དངོས་པོར་ཞེན་པ་ཡི། །མྱ་ངན་འདས་དང་འཁོར་བའི་ཆོས། །ཡེ་ནས་རིགས་རྒྱུད་རྟག་མིན་པས། །སོ་སོའི་གཟུགས་སྒྲ་དྲི་རོ་རེག །ཆོས་ཀྱི་བྱེ་བྲག་ཐ་སྙད་ཀུན། །འཇའ་སྣང་མཁའ་ལྟར་མ་འདྲེས་གཅིག །འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་བའང་རྡོ་རྗེ་ཉིད། །རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའང་། །དེ་མིན་ཞེན་པ་དགྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཡུལ་དང་ཤེས་པར་སྣང་བ་ཡང་། །རང་བྱུང་ཡེ་ཤེས་རང་སྣང་ཟད། །རྒྱུ་འབྲས་སྣང་ཡང་གཉིས་པ་མེད། །ཕྱི་ནང་གསལ་བའང་ནང་ཉིད་དང་། །དེ་ལྟར་ཡེ་ཤེས་རང་གནས་པ། །ལམ་དང་འབྲས་བུ་ཀུན་དངོས་པས། །འབྲེལ་བ་བདག་ཕྱིར་ཐབས་ཆེན་པོས། །མངོན་བྱེད་རང་ལས་བྱུང་བར་ཟད། །ཡེ་ཤེས་རང་ལ་གནས་པའི་ལེའུ་སྟེ་དང་པའོ། ༈ །ལྷུན་གྲུབ་ངང་ལ་ཕྱག་བཙལ་ནས། །དང་པོ་ལམ་མཆོག་བཤད་པར་བྱ། །གང་དག་རང་གནས་མཐོང་འདོད་དགོས། །དུས་སྣོད་རྒྱུ་རྐྱེན་ཐབས་གྲངས་དངོས། །སྤྱོད་ཡོན་དྲོད་རྟགས་ཚད་དང་སྐྱོན། །ཡན་ལག་སྤྲོས་པའི་རྩ་བར་གཞག །བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པ། །བླུན་པོ་མུན་སྤྲུལ་བློ་ཅན་དེ། །ལོང་བའི་གྲོང་ཆེན་ཆེན་པོར་འགྲོ། །དེ་བས་མ་རིག་ལིང་ཏོག་མིག །ལྡོངས་པ་རྡོ་རྗེ་ཐུར་མ་མཁན། །མཉེས་ཐོབ་སྔོན་བྱས་གཞུང་ཐོས་པས། །སྤྱན་དབྱེ་དཀྱིལ་འཁོར་མཐོང་བྱ་དགོས། །དེ་ཡང་རང་བཞིན་སྦྱངས་པ་ཡིས། །སྣོད་དུ་གྱུར་པས་ཉེ་རིང་ཕྱིར། །རིམ་དང་ཅིག་ཅར་བཞི་ཆ་ཡིས། །ཕྱེ་བས་རྣལ་འབྱོར་ཆེན་པོར་འཇུག །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་འདིར་འཇུག་ཕྱིར། །རིང་བའང་རིམ་དང་ཅིག་ཅར་བའོ། །སྔ་མའང་ཏནྟྲ་གཞུང་ཉིད་ལས། །ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཐེག་པ་བཞི་ཡིན་ངེས་འབྱུང་ལ། །ཐེག་པ་གཅིག་གིས་འབྲས་བུར་གནས། །ལམ་སྟེགས་སྔོན་དུ་རྫོགས་པར་སྦྱོར། །དེ་ཕྱིར་མ་ངེས་རིགས་མཆོག་ནས། །མུན་པའི་ཤེས་པ་པ་དེ་ཉིད། །རང་བཞིན་རྒྱུ་ཡིས་སྨྱུང་བར་གནས། །ཕལ་པའི་སེམས་བརྒྱད་མཐར་གནས་ཚེ། །སྙིང་པོ་རང་བཞིན་མཚུངས་པ་དང་། །བཤེས་གཉེན་མགོན་ལས་ལུང་གཉིས་ཐོབ། །ཡོན་ཏན་མཐོང་དང་སྐྱོན་མཐོང་དང་། །དེ་ཡིས་སྐྱོ་རྨོངས་བྲོད་དང་བ། །གཉིས་པའི་རྒྱུ་རུ་གསུངས་པ་ཡིན། །དེ་བདག་གསང་སོགས་དམིགས་པ་སྟེ། །སྐད་ཅིག་འཕེལ་བ་དེ་མ་ཐག །དྲུག་ལས་རྩྭ་མེ་བཞིན་གཡོས་ཏེ། །བཞི་ཡི་ཐེག་པ་དང་པོར་ཞོགས། །དེ་ནས་རིམ་གྱིས་བགྲོད་བྱས་ཏེ། །རྒྱུ་ནས་རྐྱེན་གྱིས་འཕར་བྱས་ཏེ། །རྣལ་འབྱོར་རྒྱུད་ལ་གནས་པ་ལ། །འདི་སྟོན་མགོན་ལ་ལུང་ཐོས་པས། །དེ་ཇི་བཞིན་དུ་གཉིས་དྲང་བཞིས། །མཆོག་གི་གཡོ་བའི་སེམས་འབྱུང་འགྱུར། །གཞི་དེས་ཁོང་དུ་ཆུད་སྨོས་པས། །ལྷག་པའི་གཟུགས་བརྙན་འཇུག་པར་བྱེད། །མཆོག་གི་དམ་ཚིག་དེ་རུ་བྱིན། །རིགས་ངེས་གྱུར་ལ་ཕན་པ་བཅུ། །ནུས་པ་གཉིས་ཀྱི་བྱིན་བརླབས་བཞག །རང་གི་སྤྱན་མཆོག་འབྱེད་ལ་བརྩོན། །རྒྱུ་ཡིས་དཀྱིལ་འཁོར་མཐོང་བྱའིི་ཕྱིར། །ཐོས་བསམ་དམ་པ་ལེན་པར་བྱེད། །ཁ་ཅིག་དུས་མཐའི་ཅིག་ཅར་བ། །བསྐལ་པ་རྡུལ་སྙེད་སྔོན་སོང་བས། །ཐུན་མོང་དེ་སྙེད་སྦྱངས་པའི་མཐའ། །སྒྱུ་འཕྲུལ་དྲ་བའི་དོན་ཞུགས་པའང་། །སྔར་སྦྱངས་འདི་ཚེ་ངེས་འབྱུང་བ། །རིམ་གྱིས་སྦྱངས་ལ་ཅིག་ཅར་བགྲོད། །ལ་ལ་དབང་པོ་རྣོན་པོ་དག །ཐེག་པ་ཆེན་པོ་གཉིས་འཇུག་སྟེ། །མ་སྦྱངས་གྲུབ་པ་གསུམ་ཕྱིར་གྱིས། །མཐོ་བརྟན་མྱུར་རྣོ་རྒྱ་ཆེ་ཡངས། །ཟབ་ཡོད་རྒྱུ་ཡི་གང་ཟག་དེ། །ཉིད་དང་རྐྱེན་དང་དེ་རིམ་པས། །ཕྱེ་བས་རྒྱུ་འབྲས་ཆེན་པོ་རྣམས། །མ་ངེས་འཇུག་དང་འདི་ཉིད་དུའོ། །དེ་དེའང་རང་སེམས་བརྟན་པའི་དངོས། །བཤེས་གཉེན་རྣམས་དང་ངོ་བོས་འབྲེལ། །དེ་ལྡན་བྱ་བྱེད་སྣོད་བཅུད་དུ། །ཆེན་པོའི་ལུང་དང་འབྲེལ་བ་དང་། །མགོན་དང་བྱ་བྱེད་ཐུགས་རྗེས་འབྲེལ། །དེ་ཕྱིར་མཆོག་ལུང་རྡོ་རྗེ་རྣམས། །དང་མཇལ་བྱེད་ཕྱིར་རྒྱུ་རྐྱེན་དྲུག །ལྡན་པས་མ་ངེས་འཇུག་པ་ནི། །དབང་པོ་ཇི་བཞིན་མོས་རྐྱེན་གྱིས། །རྒྱུའམ་བྱ་བའམ་གཉིས་ཀའམ། །རྣལ་འབྱོར་ཐེག་པར་སྦྱོར་བར་བྱེད། །དེ་ནས་དེ་བཞིན་འདིར་འཇུག་པའང་། །སྔོན་བཞིན་གཡོ་སྨོས་འཇུག་སེམས་སྦྱོར། །གནས་པས་མཐར་ཕྱིན་བྱེད་པ་ནི། །ལྟོས་པས་རིང་བའི་དུས་ཉིད་དོ། །མེ་ངེས་ས་ནས་འབྲེལ་རྒྱུ་རྐྱེན། །ལྡན་པས་རྣལ་འབྱོར་མཆོག་སྦྱོར་བ། །མུན་པའི་ཟེར་ཚུལ་རྩྭ་མེ་ལྟར། །གཡོ་སྨོན་འཇུག་པ་སྔོན་བཞིན་ཏེ། །བདུད་ལྡན་པའང་ཏནྟྲ་ཡི། །གཞུང་གི་ངང་ཚུལ་རང་བཞིན་སོགས། །སྣོད་ཡོན་ལྡན་པས་བསླབ་པ་ལ། །གནས་པའི་དཀྱིལ་འཁོར་ཆེན་པོ་རུ། །འཇུག་པ་བཞི་ཡི་ཡན་ལག་མཆོག །དང་པོ་ཆེ་དུ་གཉེར་བར་བྱེད། །གང་དེ་ཐོས་པས་འཚོལ་བའི་ཚེ། །རྒྱུ་གཉིས་རྐྱེན་གྱིས་བཟོད་ཐོབ་དང་། །རང་བཞིན་ངང་གིས་བཟོད་ཐོབ་པས། །རེ་སྨོན་སེམས་ཀྱིས་ཉན་བརྩོན་སྦྱར། །གང་དག་མཉན་བསམ་ཤེས་རབ་ཆེ། །ཉན་ཅིང་ཐོས་འཛིན་བསམ་པ་དང་། །བསམ་པའི་ཚེ་ནའང་རྟོག་དཔྱོད་པ། །གཉིས་པོ་འདི་དག་ཤེས་པའི་རྒྱུ། །མཁན་པོ་ལུང་དང་མན་ངག་བཅས། །ལྷན་ཅིག་བྱེད་པའི་རྐྱེན་དུ་འདོད། །རང་བཞིན་བདུན་དང་མཚུངས་ལྡན་པ། །ཅིག་ཤོད་རྒྱུ་རུ་ངེས་པ་ཡིན། །དེ་ལྟར་ལྡན་པས་སྤྱན་འཚོལ་ཚེ། །གཏན་ཚིགས་རྣམས་ཀྱིས་རྨལ་བྱས་ཏེ། །ནོར་བའི་ཤེས་རབ་དམིགས་བསམ་ནས། །མ་ནོར་དམིགས་ནས་བླང་བར་བྱ། །གཞི་དང་གཏན་ཚིགས་གྲུབ་པའི་དོན། །རྣམ་གསུམ་སྔ་མའི་གཞི་རུ་གཞག །ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུང་ལྔ་བསྟན་པས་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །དེ་ཉིད་དངོས་ལྔ་ཚུལ་དང་ཚིག །བརྗོད་པས་ལྔས་མཚོན་འབྱུང་བའི་གཞི། །དེ་ལས་གཏན་ཚིགས་དངོས་ལྔ་ཡིས། །བརྡའ་སྤྲོད་རྗེས་སུ་འཇུག་བསྟན་པའང་། །བསྲེགས་བཅད་བརྡར་བའི་གསེར་བཞིན་དུ། །དངོས་ལྔས་ལེགས་པར་བརྟགས་ཏེ་དབབ། །དེ་ཡང་ཡོངས་སུ་བརྟག་གཞི་ནི། །དབང་པོ་ཡུལ་དུ་སྣང་བ་ཀུན། །ཡུལ་རྣམས་ཡོད་པ་མ་ཡིན་ཏེ། །ཀུན་གཞིའི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་བས། །འཁོར་དང་འདས་དངོས་ཞེན་སྣང་བརྟག །འཇིག་རྟེན་འདི་ན་ཅི་ཡོད་པ། །མིང་དང་མཚན་མར་འཛིན་པ་ཡི། །ལོག་རྟོག་སོ་སོ་རང་སྤྱི་མཚན། །ཇི་ལྟར་གནས་པ་དཔྱད་པར་བྱ། །དངོས་གཉིས་ཞེན་དངོས་དུས་གསུམ་ཆོས། །སྐད་ཅིག་གཅིག་ལ་ཀུན་རྫོགས་ཕྱིར། །དེ་དངོས་མཐོང་བས་ཡང་དག་པར། །རིག་བཞིན་ཀུན་ཀྱང་དེ་ལྟར་ཤེས། །ཀུན་བརྟགས་ཤེས་པ་བར་མར་འགྱུར། །སྤྱི་ཡུལ་ལུས་མེད་གྲིབ་མ་བཞིན། །མེད་པས་མི་བཏུབ་རང་ཉིད་ལ། །མི་བཏུབ་མཛུབ་མོ་བཞིན་དོགས་པ། །གཉེན་པོ་མེད་པས་དག་མིན་ཅིང་། །བར་མིའི་ཡུལ་ཕྱིར་ངེས་ཚིག་འགྲུབ། །དེ་ལྟར་ལྔ་ཡིས་དེ་དེ་ལ། །དེ་དེའི་རང་བཞིན་བརྟག་བྱ་བའང་། །རྟོགས་དང་ལྡན་པའི་བློ་རྣམས་ལ། །དངོས་པོ་སྣ་ཚོགས་སེམས་གསང་སྔགས། །ངེས་ལུང་ཡིན་ཕྱིར་ཆོས་ཚུར་སྟོན། །བརྗོད་དང་འདྲ་བར་བརྡའ་སྤྲོད་པས། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཡང་ནི་ས་གནས་མིག་ལྡན་ལ། །རང་བཞིན་ཤུགས་ཀྱིས་སྐྱེ་མེད་དོན། །མ་བཙལ་ངང་གིས་སྣང་བྱེད་པས། །བརྗོད་མེད་དེ་ཉིད་བརྗོད་དང་འདྲ། །གང་དག་གཟུགས་དང་རྣལ་འབྱོར་གྱིས། །མཐོང་ཐོས་ལ་སོགས་རང་བཞིན་བརྡའ། །དཔའ་བོའི་བརྡའ་དང་དགོངས་པ་དང་། །རང་གི་ཏིང་འཛིན་གྱིས་བརྡའ་སྤྲོད། །དཔེར་ན་ས་འོག་གསེར་རླངས་དང་། །མེ་ལོང་ཉི་མའི་ངང་བཞིན་དུ། །ཀུན་ཀྱང་རིག་ཕྱིར་རང་བཞིན་དྲོད། །རང་བཞིན་ངང་གིས་བརྗོད་འདྲར་སྣང་། །ཀུན་ཀྱང་བྲག་ཅའི་རང་བཞིན་ཕྱིར། །གྲག་སྟོང་དབྱེར་མེད་རྡོ་རྗེའི་གསུང་། །སྒྲ་ཐོས་ཉིད་ཀྱིས་དེ་ཉིད་དུ། །སོ་སོར་མ་བརྟགས་འཇལ་བར་བྱེད། །སོ་སོའི་སྐད་དུ་བརྡའ་སྤྲོད་ལྟར། །ཚིག་དབྱངས་མེས་པོའི་ངག་ལྟ་བུ། །མོས་སྤྱོད་གྲོལ་བཞིན་བརྗོད་པ་ཡིས། །བརྡའ་སྤྲོད་ཡོངས་སུ་གྲོལ་བར་བྱེད། །དང་པོའི་རྒྱུད་ལ་ཐ་དད་ཕྱིར། །གང་མོས་གྲོལ་བ་ཡོད་མོད་ཀྱང་། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་དམ་འགྲུབ་བྱེད་ཕྱིར། །མི་དམིགས་ངང་ལས་དམིགས་པ་ཡི། །ཆོ་འཕྲུལ་ཚིག་གིས་མཚོན་པར་བྱ། །གསུང་ལྔ་ཐོས་པ་ལྔ་ཚུལ་ཡང་། །རྗེས་སུ་ཚིག་གིས་མཚོན་པར་བྱ། །ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་དྲང་ཚིག །འདོད་རྐྱེན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཐམས་ཅད་གསང་སྔགས་ངོ་བོ་ཕྱིར། །མཐའ་དང་དབུས་མེད་དེ་བཞིན་ཉིད། །དབྱེར་མེད་ངང་དུ་གནས་པ་ལ། །ཡེ་ཤེས་རྟོགས་པའི་དོན་བྱའི་ཕྱིར། །ཕྱོགས་དང་དབུས་སུ་གནས་པར་བྱ། །ཀུན་ལ་དེ་ལྟར་སྦྱོར་བར་གྱིས། །ཡེ་གེ་ཚིག་དང་སྒྲ་སྤངས་པའི། །བརྗོད་མེད་ངང་དུ་གནས་པ་ནི། །གསུང་ཉིད་རང་བཞིན་མེད་པ་ཡི། །ཆོས་རྣམས་ཐམས་ཅད་ཡེ་ཤེས་དག །ཐམས་ཅད་ཐུགས་སུ་གྱུར་པས་ན། །སྒྲ་དང་ཚིག་ལ་གནས་པ་མེད། །འདས་དང་མ་འདས་ཐམས་ཅད་ཀུན། །ཡང་དག་ཤེས་པར་རབ་བརྟགས་ན། །རང་བཞིན་མེད་ལས་ཅིར་ཡང་སྣང་། །སྣང་བ་ཉིད་ན་དབྱིངས་ཡིན་ཏེ། །དེ་ལྟར་རྟོགས་པའི་ཡེ་ཤེས་ནི། །ཀུན་ལ་དབང་སྒྱུར་རང་དབང་ཅན། །ཐམས་ཅད་ཚིག་གི་སྒྲ་ལྟར་གནས། །འདི་ནི་ཡེ་ཤེས་གསུང་མཆོག་ཡིན། །ཆོས་རྣམས་བསམ་གྱིས་མི་ཁྱབ་སྟེ། །མཐའ་དང་དབུས་མེད་ཀུན་ཏུ་ཁྱབ། །ཁྱབ་དང་ཁྱབ་མེད་རྡོ་རྗེའི་སྐུ། །སྒྲ་སྐད་སྣ་ཚོགས་གྲག་པ་ཡང་། །དངོས་པོ་མེད་ལས་དངོས་པོའི་སྒྲ། །ཇི་ལྟར་པི་ཝང་ལག་ཐོགས་ན། །སྒྲ་ནི་སྣ་ཚོགས་འབྱུང་འགྱུར་ཡང་། །དངོས་པོ་མེད་དེ་དེ་བཞིན་ཉིད། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །མེ་ལོང་བཞིན་དུ་སྐུ་ལ་སྣང་། །ཆོས་རྣམས་མ་ལུས་ཐམས་ཅད་ཀུན། །མིང་དང་ཚིག་ཏུ་བཏགས་ནས་བསྟན། །ཇི་སྙེད་མང་པོའི་དོན་བརྗོད་ཀྱང་། །རྡོ་རྗེའི་གསུང་ལ་སྤྲོས་པ་མེད། །སྤྲོས་མེད་དེ་ཉིད་སྣ་ཚོགས་པ། །ཀུན་ལ་བརྡའ་འཇལ་ཡེ་ཤེས་གསུང་། །སྒྲ་དང་མིང་ཚིག་ཀུན་ལས་འདས། །ཐམས་ཅད་པདྨ་ཆགས་མེད་པའོ། །དབང་པོ་རྣམ་གཉིས་བསྲུངས་པ་ཡི། །མཁའ་ལ་ཉི་ཟླ་དུས་གཅིག་འཆར། །མི་འཇིག་ཚུལ་དུ་ཟིལ་མནན་མཐོང་། །དེ་ཕྱིར་གཏན་ཚིགས་ལས་ལ་བརྗོད། །དེ་ལྟ་མོད་ཀྱང་བསྡུ་ན་གཉིས། །བཞི་རྗེས་མི་དཔྱོད་གཅིག་རྗེས་དཔྱོད། །རྣམ་གཉིས་ཚུལ་གྱིས་མཐོང་བྱེད་པ། །དབང་པོ་གཉིས་དང་མཐུན་སྦྱོར་བའོ། །དེ་ལ་སྔ་མར་གོ་བྱ་བའང་། །སེམས་ཅན་མ་ལུས་ཐམས་ཅད་ཀུན། །ཡེ་ནས་བྱང་ཆུབ་སྙིང་པོར་གནས། །དེ་ཕྱིར་དཔྱད་པའི་བྱ་བྱེད་མེད། །ཚིག་དང་ཡི་གེས་མི་མཚོན་ཏེ། །སངས་རྒྱས་ཀྱིས་ཀྱང་རྙེད་པར་དཀའ། །རྒྱལ་བའི་སྲས་པོ་ཅང་མི་གསུང་། །མ་གསུངས་པ་ཉིད་རྒྱ་ཆེར་བཤད། །བཤད་དང་ཉན་པ་གཉིས་ཀ་མེད། །དཔྱོད་པ་ཞུགས་ན་རྟོག་པའི་གཞི། །རྟོག་པ་ཞུ་ན་དམིགས་པའི་རྟེན། །དམིགས་པ་ཞུགས་ན་འཛིན་པའི་གཟུགས། །འཛིན་པས་ཟིན་ཕྱིར་གྲོལ་མི་འགྱུར། །དེ་བས་གསེར་ལྟ་གསེར་བཞིན་དུ། །བདག་ཕྱེར་བྱ་བྱེད་མི་དམིགས་པས། །རྟོག་དཔྱོད་དམིགས་འཛིན་མི་འཚོལ་པར། །དེ་བརྗོད་ཉིད་ཀྱིས་དེ་ཉིད་མཐོང་། །སུས་ཀྱང་མ་བཅིངས་བཅིངས་མེད་དེ། །བཅིང་བར་བྱ་བ་ཡོད་མ་ཡིན། །བཅིངས་མེད་རྣམ་པར་གྲོལ་མེད་པས། །གྲོལ་བར་མི་འདོད་བཅིངས་དང་བྲལ། །སོ་སོར་གང་ལའང་རྟོག་མེད་པས། །སོ་སོར་སྣང་བ་ཀུན་རྟོགས་ཕྱིར། །བརྟགས་པ་མེད་པའི་བླ་དྭགས་ཡིན། །ཁ་ཅིག་ཕྱི་མར་གོ་བྱེད་པ། །བརྗོད་པའི་དངོས་པོའི་སྤྱོད་ཡུལ་ལ། །སོ་སོར་རྟོག་པའི་གཏན་ཚིགས་རྐྱེན། །དོ་དང་མཐུན་དང་མི་མཐུན་པའོ། །ཕྱི་མ་མི་མཐུན་མཚོན་བྱེད་ལྟར། །ཆོས་ཀུན་མཐའ་ལས་འདས་པ་ལ། །མཐའ་རྣམ་གང་ཡང་དོར་མེད་པས། །འདི་ལྟར་འདིའོ་ཞེས་བསྟན་མེད། །རང་གི་ངོ་བོ་བསྟན་པར་བཀའ། །འོན་ཀྱང་ཡིན་མིན་འཛིན་དགྲོལ་ཕྱིར། །མདོར་ན་ཇི་ལྟར་བརྟགས་བསམས་བཞིན། །འགྱུར་བས་ཀུན་གྱི་ངོ་བོར་སྣང་། །དེ་མཚོན་ཅི་ཡང་ཡིན་པའི་ཕྱིར། །སེམས་ཆོས་ཅི་ཡང་མ་ཡིན་ནོ། །དེ་ཕྱིར་མི་ཡིན་ཀུན་ཡིན་པས། ཅི་ཡང་ཡིན་ནོ་ལྷུན་གྱིས་གྲུབ། །མཐའ་ཀུན་ཕྱོགས་སུ་མ་ཆད་ཕྱིན། །མཐའ་དང་བྲལ་ཕྱིར་མ་བྲལ་བའོ། །གང་ཡང་མ་སྤངས་མི་ལྡན་པས། །མ་བྲལ་ཕྱིན་ན་བྲལ་ཞེས་བྱ། །ངོ་བོས་ཕེབས་བས་རྒྱས་པར་འགྱུར། །ཅིག་ཤོས་མཐུན་པར་སྟོན་པ་ཡང་། །བྱེ་བྲག་བསྡུས་པ་ཀུན་ཁྱབ་གསུམ། །དེ་ལྡན་རྣམ་པ་བསམ་ཡས་པ། །ཆ་ཙམ་བརྗོད་པ་འདི་ལྟ་མོང་། །ཆོས་རྣམས་ཡོང་གིས་དག་པ་ཡི། །རྣམ་བཞིའི་ཚུལ་གྱིས་དོན་རྟོགས་མངོན། །སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པ འི་མཉམ་གཉིས་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཉིད་ལ་དབང་སྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་བླ་མེད་ཐེག་པའི་མཆོག །འདས་དང་མ་འདས་ཐམས་ཅད་ཀུན། །ཡང་དག་ཤེས་པས་རབ་བརྟགས་ན། །རང་བཞིན་མེད་ལས་ཅིར་ཡང་སྣང་། །སྣང་བ་ཉིད་ན་དབྱིངས་ཉིད་ཡིན། །གཤེགས་སྐུ་སྒྱུ་མར་སྣང་བ་དང་། །ལོག་རྟོག་སྒྱུ་མར་སྣང་བ་གཉིས། །གཞི་རྩ་མེད་དེ་རང་བཞིན་སྟོང་། །རིགས་དང་རྒྱུད་དུ་བརྟག་ཏུ་མེད། །རིགས་དང་ཁ་དོག་དབྱིངས་མེད་ལས། །ཕྱི་ནང་སྣོད་བཅུད་ཐམས་ཅད་སྣང་། །སྣང་བ་ཉ ིད་ན་ཆོས་ཀྱི་སྐུ། །ཅིར་ཡང་འགྱུར་ཞིང་ཐམས་ཅད་འགྲུབ། །ཉོན་མོངས་རང་དང་སྤྱི་བསྟན་པ། །མཚན་ཉིད་མ་ནོར་དོན་རྟོགས་ན། །རྣམ་པར་བྱང་བའི་ལམ་དུ་འགྱུར། །དེ་ཕྱིར་རང་སྤྱིའི་གཏན་ཚིགས་གཅེས། །མཐའ་དང་དབུས་མེད་དུ་མར་བྲལ། །གང་ཡང་མ་ཡིན་དེ་བཞིན་ཉིད། །དབྱེར་མེད་པ་ཡི་ཚུལ་རྟོགས་ཕྱིར། །མཐའ་དང་བྲལ་བའང་དེ་བཞིན་ནོ། །འབྱུང་བ་ཆེན་པོ་ལྔ་རྣམས་ལ། །རང་བཞིན་མེད་བར་གཞིག་པའི་ཕྱིར། །གཅིག་ལའང་ལྔ་ལྔར་དབྱེ་བྱ་ཞིང་། མུཾ་གི་དབྱིངས་སུ་བསྟིམ་བར་བྱ། །མུཾ་ཉིད་སྨྲ་བསམ་ཡུལ་ལས་འདས། །ནམ་མཁའ་གཟུང་དུ་མེད་པ་ལྟར། །སྣང་སྲིད་ཐམས་ཅད་དེ་དང་འདྲ། །བརྟེན་ས་མཉེན་བཀྲུ་གཟུང་མེད་རླུང་། །གསལ་སྲེག་མེ་ལྟར་ཤེས་པར་བྱ། །དེ་བཞིན་ཕུང་པོ་དབང་ཡུལ་ལྔ། །ཉོན་མོངས་ཁ་དོག་ཕྱོགས་སོགས་པ། །དོན་དང་ངོ་བོ་གཅིག་མ་འདྲེས། །དེ་ཕྱིར་དེ་ཡིས་མཚོན་རྟོགས་བྱེད། །གཏན་ཚིགས་གཏན་ཚིགས་བརྗོད་པ་རྣམས། །བསྒྲུབ་བྱ་གང་ཡིན་ཤེས་དོན་ལ། །ངེས་ཚིག་ངོ་བོ་མཚན་ཉིད་སོགས། །གང་ནས་འབེབས་ཀྱང་རྒྱས་པར་བྱ། །ཐམས་ཅད་འཇིག་བྱེད་དམ་ཚིག་དང་། །ཤེས་པའི་དམ་ཚིག་ལྡན་པར་བྱ། །ཐམས་ཅད་མ་ལུས་དོན་འབྱུང་བ། །ཚིག་གིས་མཚོན་ལས་གུད་ན་མེད། །སྒྲ་ཉིད་དོན་གྱི་དངོས་པོ་མིན། །དོན་ཉིད་སྒྲ་ལས་གུད་ན་མེད། །མིང་ཚིག་སྒྲ་ལ་མི་བརྟན་པར། །བློ་ཡི་གཏིང་དུ་གོ་བར་བྱོས། །གསུམ་བཞི་ལུས་དོན་བརྗོད་བྱ་བ། །སྔགས་མཆོག་བླ་ན་མེད་པ་ནི། །མཚན་མ་ཀུན་ཏུ་བརྟག་པར་པར། །མཉམ་པའི་ངང་དུ་ཐམས་ཅད་ཤེས། །ཀུན་ཀྱང་མཉམ་པ་ཉིད་ཡིན་པས། །འཇིག་རྟེན་འདས་དང་འཇིག་རྟེན་པའི། །སོ་སོའི་ལྟ་བ་བརྗོད་མི་བྱ། དགག་ཅིང་བླང་བར་བྱ་བ་མིན། །སྤྱིར་ནི་ལོག་རྟོག་བསམ་ཡས་པ། །ཡེ་ནས་ཡོད་པ་མ་ཡིན་ཏེ། །སོ་སོའི་འཛིན་རྟོག་བག་ཆགས་ཀྱི། །གཟུང་འཛིན་དྲ་བས་བསྒྲིབས་གྱུར་ཏེ། །ཅི་ཡང་མིན་ལས་ཅིར་ཡང་སྣང་། །བྱང་ཆུབ་སྙིང་པོའི་གཞི་ལས་གོལ། །བདེན་མིན་མ་གྲོལ་བཅིངས་པ་དང་། །དུས་དགྲས་འཇོམས་བསླུལ་མི་རྟག་དང་། །འཕགས་ལམ་བྲལ་དང་བཙོན་རར་ཆུད། །སྡུག་བསྔལ་མི་འཇིལ་དགུ་ཕྱིར་འཁྲུལ། །དེ་བས་མཉམ་ཉིད་མ་རྟོགས་པས། །དུག་ལྔ་འཇོལ་སྤྱོད་རྒྱུད་ལྔར་འཁོར། །དགེ་བཅུ་དག་ལ་གཙོར་ལེན་ཅིང་། །དགེ་དང་མི་དགེ་མི་མཉམ་པས། །ལྷ་དང་མི་ཡི་སྐྱེ་གནས་ཏེ། མཉམ་ཉིད་མ་རྟོགས་འདོད་ཁམས་འཁོར། །མཉམ་པའི་དོན་ཉིད་མ་རྟོགས་ཤིང་། །ཚད་མེད་བཞི་དང་བསམ་གཏན་བཞི། །རིམ་པར་སོ་སོར་བདག་འཛིན་ཅིང་། །གཟུགས་རྣམས་ཀུན་ལ་བདག་ཏུ་རྟོག །འདི་ནི་ཚངས་གནས་རིམ་པར་སྐྱེ། །མཉམ་དང་གཟུགས་མེད་མ་རྟོགས་ནས། །མིང་བཞི་མེད་པར་མ་ཤེས་ཏེ། །སྐྱེ་མཆེད་བཞི་ལ་གནས་གྱུར་ན། །སྲིད་པའི་རྩེ་མོ་ས་རུ་སྐྱེ། །རྟག་ཆད་གཉིས་ཀར་གང་གི་བློ་ཞེན་ན། །དོན་གྱི་སྙིང་པོ་ཉིད་ལས་གོལ་བར་གཟུངས། །ས་དགུ་དག་པའི་ཡེ་ཤེས་ནི། ས་དགུ་མ་སྤངས་གནས་སུ་བཅོམ། །གཉིས་མེད་མ་རྟོགས་ཐམས་ཅད་ལ། །བདེན་བཞིའི་དངོས་པོ་ཡོད་ལྟ་ཞིང་། །སྤོང་དང་མི་སྤང་བྱེད་གྱུར་ན། །འདི་ནི་ཉན་ཐོས་ས་པ་ཡིན། །ལས་དང་ཉོན་མོངས་ཐམས་ཅད་ལ། །མཉམ་པའི་དོན་དུ་མི་ཤེས་ཤིང་། །རྟེན་འབྲེལ་རྒྱུ་འབྲས་ཡོད་འཛིན་ན། །འདི་ནི་རང་སངས་རྒྱས་ཀྱི་ས། །མཉམ་པའི་དོན་ཉིད་མི་ཤེས་ཤིང་། །ཀུན་རྫོབ་དོན་དམ་གཉིས་འབྱེད་ལ། །ཆོས་དང་གང་ཟག་བདག་མེད་ན། །འདི་ནི་བྱང་ཆུབ་ས་པ་ཡིན། །བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་དེ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོ་ནི། །རྣམ་པར་བྱ་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །མཉམ་པ་ཉིད་ལས་མ་གཡོས་བཞིན། །ཐབས་ཀྱི་ཕྱག་རྒྱ་ཆེན་པོར་སྟོན། །ཐབས་དང་ཤེས་རབ་རྣམ་པར་དག །ཐམས་ཅད་དག་ཅེས་བྱ་བ་ཡང་། །དངོས་པོ་བསལ་དག་མ་ཡིན་ཏེ། །སྣང་སྦྱོར་ཉིད་ན་རྣམ་པར་དག །དེ་ཕྱིར་ཀུན་རྫོབ་རྫུན་མི་བལྟ། གཉིས་མེད་མཉམ་པར་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོན་ཀུན་རྫོབ་ལྷ། །ངེས་བསྒོམ་བྱ་བ་ལས་ཀྱི་ས། །ལྷུན་འགྲུབ་མཉམ་པ་མ་མཐོང་བས། །ཆོས་ཀུན་རྣམ་དག་ཡེ་ཤེས་ཀྱི། །བྱིན་བརླབས་རྡོ་རྗེ་དབྱིངས་སྤྲུལ་པ། །བླང་དོར་འབྱེད་པ་རྣལ་འབྱོར་སའོ། །ཆོས་རྣམས་མ་ལུས་ཐམས་ཅད་ལ། །བྱ་ལམ་ནམ་མཁའ་གཅོད་བཞིན་གྱིས། །འཛིན་ཆགས་མ་ལུས་ཐམས་ཅད་ཀུན། །མཁའ་ལ་རླུང་ཆེན་འཕྱོ་བ་བཞིན། །ཡིད་ཀྱི་རྟོག་ཆགས་མ་ལུས་པ། །ཆུ་ལ་ཉ་ཆེན་འཕྱོ་བ་ལྟར། །རྣལ་འབྱོར་ལྟ་བ་དེ་ལྟར་ལྟོས། །དེ་ལྟར་དངོས་བརྟགས་དམིགས་ཕྱེ་ནས། །མ་ནོར་དོན་གྱི་གྲུབ་མཐའ་ནི། །ཐེག་པ་མཐོ་དམན་ཐམས་ཅད་དང་། །འཇིག་རྟེན་ལྟ་བ་ཐམས་ཅད་ཀུན། །ཡེ་ཤེས་ཆེན་པོས་རབ་བརྟགས་ན། །རང་བཞིན་མེད་ལས་ཅིར་ཡང་སྣང་། །རང་བཞིན་དབྱིངས་ལས་ཉམས་པ་མེད། །མཉམ་པའི་དོན་ཉིད་ཇི་ལྟ་བུ། །མཉམ་ཉིད་རང་བཞིན་གང་ཡང་མིན། །ཀུན་ཡིན་ངོ་བོ་འདི་འདྲར་མེད། །མཉམ་དང་རྟོག་པ་གང་ཡང་མེད། །བྱང་ཆུབ་སེམས་ཞེས་བརྗོད་པ་ནི། །གང་ནས་མ་འོངས་གར་མི་འགྲོ། །རྟོག་མེད་རང་རིག་ཁོ་ན་ཙམ། །སངས་རྒྱས་སེམས་ཅན་སེམས་ལ་གནས། །བྱང་ཆུབ་སེམས་རྣམས་ཐམས་ཅད་ནི། །ཤིན་ཏུ་བརྟག་དཀའ་གཏིང་ཟབ་པས། །མ་དམིགས་མི་དམིགས་དམིགས་སུ་མེད། །སེམས་ཉིད་དེ་ནི་ཇི་ལྟ་བུ། །བྱང་ཆུབ་དེ་ནི་སེམས་ཡིན་ནོ། །སེམས་དང་བྱང་ཆུབ་དབྱེར་མེད་པས། །སེམས་ཅན་མ་ལུས་ཐམས་ཅད་དང་། །དུས་གསུམ་ཆོས་རྣམས་ཐམས་ཅད་ཡིན། །ཡོད་ལས་བཙལ་ན་སྒྲོ་བཏགས་ཏེ། །སྒྲོ་འདོགས་བརྒྱད་དུ་ལྟུང་བར་འགྱུར། །མེད་ལས་བཙལ་ན་སྐུར་བཏབ་སྟེ། །སྐུར་པ་བཅུ་ཡི་གནས་སུ་ལྟུང་། །ཡོད་མེད་གཉིས་ལས་བཙལ་བྱས་ན། །དེ་སྙེད་ལུང་དུ་མ་བསྟན་འགྱུར། །དེ་ཕྱིར་ནམ་མཁའ་ཡོད་མེད་ཅེས། །བླུན་པོ་རྣམས་ནི་རྩོད་པར་བྱེད། །མཁས་པས་ནམ་མཁའི་རང་བཞིན་ལ། །མེད་པར་མི་འཛིན་ཡོད་མི་འཛིན། །སེམས་ཉིད་ཡོད་མེད་ཀུན་ངོ་བོ། །སྒྲ་ཙམ་བརྗོད་རུང་དོན་ཉིད་ཀྱི། །ངོ་བོ་འདི་ཞེས་བསྟན་དཀའ་ལ། །ཡོད་དང་མེད་ཅེས་ཅི་བྱར་ཡོད། །སེམས་ཉིད་ཡེ་ནས་སངས་རྒྱས་ལ། །དེ་ནི་ལྟ་བ་བཟློག་པའི་ཕྱིར། །གཉིས་མེད་མཉམ་དང་སངས་རྒྱས་དང་། །བདག་ཉིད་ལྷུན་གྲུབ་ཆོས་དབྱིངས་དག །བྱང་ཆུབ་ཆོས་ཉིད་སྟོང་བསམ་འདས། །དེ་བཞིན་ཉིད་དང་སྐྱེ་འགག་མེད། །མཐའ་བྲལ་འདས་དང་གྲོལ་སོགས་སུ། །བླ་དྭགས་ཙམ་དུ་བརྗོད་པ་ཡིན། །ཡེ་ནས་ཚིག་དངོས་ཚིག་ལམ་ཆད། །སེམས་ཉིད་དེ་ཀུན་རང་བཞིན་ལ། །དེ་དག་སྒྲར་བརྗོད་བསྙད་ཅི་ཡོད། །བསྟན་བརྟག་དཀའ་བར་རྒྱལ་བས་གསུངས། །མ་ཆགས་པདྨ་འདྲ་བ་ཡི། །ཡེ་ཤེས་ཅན་གྱི་སྤྱོད་ཡུལ་ཏེ། །ཀུན་དང་ཐུན་མོང་དེ་མ་ཡིན། །དེ་བཞིན་གཤེགས་པའི་སྤྱོད་ཡུན་ཏེ། །སྐྱེས་བུ་བློ་རྩ་རབ་ཀྱིས་རྟོགས། །དེ་ཕྱིར་བློ་ཅན་རྣམས་ཀྱི་བརྩོན། །ཤེས་པའི་མཚན་ཉིད་དངོས་མིང་གྲངས། །ངོ་བོ་རིམ་པས་ཕྱེ་བ་ཡིན། །སྔ་མ་ཁ་ཅིག་མངོན་སུམ་ལ། །དྲུག་གམ་བརྒྱད་ཉིད་གནས་འབྱུང་ཕྱིར། །ཤེས་རབ་དབང་དྲུག་ཚུལ་ནས་བརྗོད། །ངེས་པར་མ་ནོར་མཐོང་བ་ཡང་། །ཡེ་ཤེས་ལྔ་རུ་གསལ་བའི་ཕྱིར། །བརྒྱད་ཀྱི་ངོ་བོ་དེ་ཉིད་དེ། །ལྔ་དང་དམིགས་བྱེད་མེད་པའི་ཕྱིར། །དེ་བས་ཡུལ་མེད་རང་གསལ་བའོ། །དབྱིགས་དང་རིག་པ་གཉིས་མེད་པར། །དེ་བཞིན་ཉིད་དུ་རྡོ་རྗེའི་རིག །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་དེར་སྣང་ངོ་། །ཡང་ཤིང་རྒྱ་ཆེ་ལྷུན་གྲུབ་ནི། །ཕྱི་ནང་སྣོད་བཅུད་ཡེ་ནས་དག །དོན་རྟོགས་ཉིད་ཀྱང་དབྱིངས་ཉིད་ཡིན། །འདི་ནི་རྡོ་རྗེ་མཉམ་ཡིན་ནོ། །ཤེས་དང་སྤྱོད་ཡུལ་གཉིས་མེད་པས། །ཐམས་ཅད་མ་ལུས་གཅིག་པའི་ངང་། །མ་འདྲེས་ཡོངས་རྫོགས་གསལ་སྟོང་གཟུགས། །ལྟ་དང་ལྟ་བར་བྱ་མེད་པར། །ཕྱོགས་བཅུའི་ཞིང་ཁམས་ཐམས་ཅད་མཐོང་། །གང་དུའང་མ་མཐོང་སྤྱན་གྱི་མཆོག །ཁྱབ་གསལ་རང་བཞིན་གོ་བའི་སྒྲ། །ཐོས་པ་མེད་པར་ཐོས་པའི་ཕུལ། །དང་བས་ཚིམ་བྱེད་ཆོས་ཀྱི་དྲི། །སྣོམ་བྱེད་མེད་པར་ཚོར་བའི་ཤངས། །དོན་བཅུད་ཉམས་སུ་མྱོང་བའི་རོ། །མྱོང་བའི་བྱེ་བྱེད་མེད་ཉིད་མྱོང་། །ཡང་དག་དོན་ལ་རེག་པ་ཉིད། །རེག་པ་ཀུན་དངོས་རེག་དང་བྲལ། །ཆོས་ཁམས་སྣ་ཚོགས་ཀུན་མཁྱེན་པ། །རང་རིག་རྒྱལ་པོ་རང་སྣང་ངོ་། །དེ་བས་བདག་འཛིན་རང་གསལ་བ། །བདག་བཅས་བདག་དང་བྲལ་བའི་ཡིད། །དོན་དང་སེམས་ཅན་རྟོག་མེད་གསལ། །རང་བྱུང་ཡེ་ཤེས་ཐམས་ཅད་མཁྱེན། །ཡང་ནི་རིམ་པས་དོན་གྲངས་བརྗོད། །དོན་དམ་ཀུན་རྫོབ་གཉིས་མེད་མཐོང་། །མངོན་བྱས་རིམ་པས་རྟོགས་གོ་རིམ། །རྣམ་བཞིའི་ལམ་དང་སྒོ་བཞི་དང་། །བསྙེན་སྒྲུབ་ལམ་གྲངས་ཉམས་གཡོ་ཐོབ། །གོམས་བརྟན་མཐར་ཕྱིན་རིམ་པར་འབར། །མཉམ་ཉིད་ངང་ལས་མི་སྐྲག་པས། །མངོན་བྱས་ངེས་པའི་ཤེས་རབ་དང་། །རྣམ་པ་ཀུན་ལྡན་སྟོང་ཆེན་མཐོང་། །རང་རིགས་ཡེ་ཤེས་སྙིང་རྗེར་གཟིགས། །ཕྱག་རྒྱ་གཅིག་སྐུ་འབྲས་བུར་བལྟ། །ཐམས་ཅད་གསལ་བའི་ལྟ་བ་དང་། །བར་ཆད་མེད་པའི་ཚོགས་ཆེན་མཐོང་། །དབང་སྒྱུར་མཉམ་ཉིད་མི་གཡོ་བ། །ཡེ་ཤེས་ཀུན་མཁྱེན་ལྟ་བ་དགུ །ཐོས་བསམ་སོ་སོར་རྟོག་གོམས་དང་། །རྣལ་འབྱོར་རིམ་པའི་རྒྱུ་ལས་སྐྱེས། །དེ་བས་ཤེས་རབ་གསུམ་ལ་འབོད། །རྒྱུད་དོན་གཟུངས་ཀྱི་ཟིན་པ་ནི། །དམ་ཚིག་དམ་ཚིག་ཅེས་བྱ་བ། །རང་གི་ལྟ་བ་དམ་ཚིག་ཡིན། སྡོམ་པ་རྣམ་པ་བཅུ་གསུམ་དང་། །སྤྱི་ཡི་དམ་ཚིག་མཐའ་ཡས་པ། །ཐིག་ལེ་ཆེན་པོའི་ངང་དུ་གསལ། །ཇི་ལྟ་སྤྱོད་ཀྱང་སྡོམ་མི་འདའ། །སྤྱོད་པ་རྣམ་པ་གཉིས་པོ་ཡང་། །ཐིག་ལེ་ཆེན་པོའི་ངང་དུ་ངེས། །ཅི་ལའང་མི་གནས་ཀུན་ལ་སྤྱོད། །སྤྱོད་པར་བྱེད་དང་སྤྱད་མེད་མཐོང་། །བྱ་བྱེད་མེད་པའི་ཚུལ་གྱིས་སུ། །ཀུན་ལ་ཐོགས་པ་མེད་པར་སྤྱོད། །བཞི་ཡི་ལས་དང་གཅིག་པུ་ཡང་། །ཐིག་ལེ་ཆེན་པོའི་ངང་དུ་གསལ། །མཆོད་པའི་རྒྱན་དང་ལོངས་སྤྱོད་ཀུན། །རིག་པ་བྱང་ཆུབ་སེམས་ཆེན་པ། །ཆོ་འཕྲུལ་ཆེན་པོའི་ངང་དུ་འདུས། །ཕུལ་བ་མེད་པར་ཐམས་ཅད་མཉེས། །གཞལ་ཡས་ཁང་དང་དཀྱིལ་འཁོར་དང་། །ཁྲོ་ཚོགས་འདུ་འཕྲོ་མང་པོ་ཡང་། །སེམས་ཀྱི་ཆོ་འཕྲུལ་ཆེན་པོ་ཡིན། །དེ་བས་རྣམ་བདུན་རིག་པའི་ངང་། །ཆོས་རྣམས་མ་ལུས་ཐམས་ཅད་ཀུན། །རང་བཞིན་ངང་གིས་བདག་ཉིད་ཕྱིར། །དབང་ལྔ་མ་བཙལ་ལྷུན་གྱིས་རྫོགས། །བཅོ་བརྒྱད་རང་རིག་ཆོ་འཕྲུལ་སྣང་། །ཨེ་མའོ་མ་བསྒྲུབས་གྲུབ་ཆེན་པོ། །གྲུབ་པ་ཆེན་པོ་ཡེ་ཤེས་ཆེ། །དོན་དུ་གཉེར་བའི་རྣམ་གྲངས་ཀུན། །རང་རིག་བྱང་ཆུབ་སེམས་ཆེན་པོ། །ཏིང་འཛིན་ལྟ་བའི་བྱེ་བྲག་ཀུན། །རང་རིག་སྣང་ཕྱིར་ཆུ་བུར་དང་། །ནམ་མཁའ་ལྟ་བུའི་རང་བཞིན་པས། །རང་རིག་ཡེ་ཤེས་ཉིད་ལས་མིན། །སྔགས་དང་ཕྱག་རྒྱའང་སེམས་ཉིད་ཕྱིར། །བྲག་ཅ་ཆུ་ཟླ་འདྲར་ཤེས་ན། །འཆིང་བརྗོད་ལས་ཉིད་མྱ་ངན་འདས། །དེ་བས་བྱ་བྱེད་མཉམ་ཉིད་རྟོགས། །ལྟ་བ་ལྟ་བ་གཙོར་བརྗོད་མོད། །དོན་དུ་ཤེས་རབ་ཀུན་མཉམ་ཉིད། །དེད་དཔོན་རིན་ཆེན་ཇི་བཞིན་དུ། །གདོད་ཐའི་བྱེ་བྲག་འདིར་ཤེས་དགོས། །ཤེས་རབ་རྟོགས་པ་གཉེར་ཆུབ་ཚེ། །བདག་དང་གཞན་ཕྱིར་བྱ་བ་རྣམས། །ཤེས་པའི་གཞི་ལ་ཀུན་ཀྱང་སྤྱོད། །ཐོས་བསམ་བཅུ་སྤྱོད་ཆེད་དུ་གཉེར། །འདི་ཡང་རྒྱལ་པོའི་ས་ཁམས་དང་། །སྟོབས་ཅན་རྩལ་སྒྱིད་དྲག་ཞན་དང་། །མཁའ་ཡུལ་ཆེ་ཆུང་ཇི་ལྟ་བ། །གཞི་གཅིག་སྟོབས་ཀྱིས་ཁྱད་པར་འགྱུར། །ཡེ་ནས་དབྱིངས་སུ་རོ་གཅིག་པས། །དེ་ལ་ང་དང་བདག་མ་རྟོག །རང་བཞིན་རྣམ་པར་དག་པ་ལ། །གཙང་དང་དམེ་བའི་བློ་མ་བྱེད། །ཐམས་ཅད་བདེ་གཤེགས་སྙིང་པོ་བས། །རྐྱེན་གྱི་རྡུལ་གྱིས་གལ་ལ་འགོ །ཤེས་རབ་མཆོག་གིས་དེ་ལྟར་རྟོགས། །མ་ལུས་ཀུན་འདུས་དབྱིངས་ཤེས་བྱོས། །དེ་བས་ཤེས་པར་བྱ་བ་རྣམས། །དམ་ཚིག་སྡོམ་བའི་ངོ་བོར་བྱེད། །བདག་དང་གཞན་གྱི་གཙོར་བྱེད་ཀྱི། །དང་པོའི་སྡོམ་པ་ཀུན་ཀྱང་སློབ། །ཤེས་རབ་ཆེན་པོའི་སྦྱིན་སྲེག་གིས། །སྲིད་གསུམ་སྲེག་པའི་མི་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །རཾད། ཀུན་ཀྱང་ཆོད་ཉིད་ངང་དུ་བསྒྲལ། །གདོད་མཐར་ལམ་གཉེར་སྤྲོས་གཅོད་ཅིང་། །གྲུབ་པ་བགྲོད་ནས་འཇུག་པ་ཡང་། །བདག་གཞན་ཆོས་ཕྱིར་དམ་བཅས་པས། །བདག་ཉིད་ལ་ཡང་གཞན་དོན་རྫོགས། །དེ་བས་བྱིས་པ་མི་མཚུངས་ཏེ། །ཀུན་ལམ་སྐབས་ལས་ཤེས་པར་བྱ། །གང་ཞིག་འདི་འདྲར་མཐོང་རྟོགས་པ། །དངོས་གྲུབ་མཆོག་གི་སྙིང་པོ་ནི། །ཆུ་སྲིན་ཕྱག་རྒྱ་ཇི་བཞིན་དུ། །དང་པོ་དོན་རྟོགས་མཐའ་མི་གཏོང་། །སྤྱོད་ཡུལ་ཀུན་ཏུ་ཚད་དཔག་མེད། །ཀུན་ནས་ཉོན་མོངས་སྤྱོད་པའང་གྲོལ། །ཐུན་མོང་ལམ་གཉིས་དེ་བཞིན་པས། །རྣམ་སྨིན་གཉིས་མེད་ཚོགས་གཉིས་རྫོགས། །གང་གིས་དེ་ལྟར་རྟོགས་གྱུར་པས། །སྒྲོ་སྐུར་མཐའ་གསུམ་ལས་གྲོལ་ཏེ། །འཇུག་པའི་དོན་རྣམས་འབྱིན་པར་བྱེད། །དེ་བས་བདག་གཞན་ཆོས་དོན་རྫོགས། །རྒྱ་ཆེ་ཟབ་ཡངས་ཤེས་རབ་མྱུར། །ཟབ་པའི་དོན་རྟོགས་མི་ལྡོག་བདེ། །ང་དང་བདག་མེད་ཡངས་པ་བདེ། །བརྩོན་པས་རྟོགས་པ་ལྷུན་བྱེད་ན། །དབང་ཐོབ་བདེན་མཐོང་མཚན་མཐོང་ཞིང་། །རྩ་བའི་དྲོད་ལས་ཡན་ལག་ཀུན། །ཤུགས་ཀྱིས་འབྱུང་བར་ཐེ་ཚོམ་མེད། །དེ་ལ་མཚན་མ་འབྱུང་བ་ནི། །སྟོབས་ཀྱིས་རྟོགས་པའི་ཀླུང་ལྡན་ལ། །འཕོ་འགྱུར་མཐོང་ཡང་འཇིགས་མེད་ཅིང་། །འཁྲུལ་པའི་ཁམས་ལ་སྐྱོ་བ་མེད། །གྲུབ་པའི་གནས་ལ་མི་སྨོས་ཏེ། །འདོད་པའི་ལོངས་སྤྱོད་མཉམ་པར་སྦྱོར། །སྡུག་བསྔལ་ཉོན་མོངས་བཟོད་ཆེན་ཏེ། །ལས་རྣམས་གང་ལའང་ཁུར་མི་བལྟ། །ཏནྟྲའི་ལུགས་དང་འགལ་མེད་སྤྱོད། །ཐ་མལ་སྤྱོད་པས་ལྷག་པར་འགྱུར། །སྤྱོད་པ་རྒྱུན་གྱི་ཚོགས་གཉིས་རྫོགས། །མདོ་སྨོས་ཐ་དད་བརྗོད་མི་ལང་། །རྒྱ་མཚོ་དྭངས་བའི་གཟུགས་བརྙན་ལྟར། །སྒྲ་བརྟན་ཡིན་ལ་བྱེད་མིན་པར། །རང་རིག་མངོན་སུམ་དམིགས་བྲལ་བར། །རང་གསལ་གསུམ་དྲལ་མི་བསྒྲུལ་བར། །ངེས་པར་གདེང་དུ་གང་བྱས་པ། །ཐོས་བསམ་བརྟན་པའི་ལྟ་མཐར་ཕྱིན། །འོན་ཀྱང་ས་དང་ས་ཡི་རིམ། །དབང་པོ་དང་བའི་སྤྱོད་ཡུལ་ལ། །ཉི་རིང་དྲུང་བཞིན་སྟོབས་འཕེལ་བས། །རྒྱུ་རྐྱེན་གོང་འོག་འབྲས་བུར་འབྲེལ། གསལ་བའི་བྱེ་བྲག་རིམ་པར་འགྲོ། །དེ་ཆས་སྐབས་མིང་བརྗོད་དངོས་གཅིག །གོང་གི་དོན་ལྟར་མ་རྟོགས་པའི། །བློ་ངན་མཉམ་པར་ཁུངས་ཕྱུང་ནས། །མ་རྟོགས་ལེ་ལོ་སྙོམས་ལས་བྱས། །དོན་མ་གྲུབ་པར་ངན་སོང་འགྲོ། །སེམས་ཀྱི་མཉམ་པ་མ་རྟོགས་ན། །ཚིག་གི་མཉམ་པས་འཚང་མི་རྒྱ། །དེ་བས་དོན་ཚིག་ལྡན་པར་བྱོས། །འོན་ཀྱང་ཐེ་ཚོམ་མེད་པར་འགྲུབ། །སྤྱན་བཟང་ལམ་ཞུགས་ཇི་བཞིན་དུ། །ལམ་ཀུན་ཟག་ཅིང་འཆིང་བའི་རྒྱུ། །དོན་དུ་མི་འགྱུར་ཕྱིར་ན་བརླག །དེ་བས་དོན་ལ་འགྲུབ་པར་གྱིས། །དེ་ལྟར་དོན་མཐོང་གང་དང་གང་དག་གིས། །གཞན་དུ་མི་བསམ་དེ་ལ་འདྲིས་པར་བྱ། །སྐྱེས་བུ་དམ་པ་མཆོག་འདོད་པས། །དེ་ལ་རྟག་འགྲུས་གསལ་བར་གྱིས། །ལམ་ཤེས་ལམ་འཇུག་ཇི་བཞིན་དུ། །འཇུག་པ་རྣམས་དང་རྒྱུ་འབྲས་ཚུལ། །རང་གནས་མཐོང་བའི་ལེའུ་སྟེ་གཉིས་པའོ། ༈ །བདག་ཉིད་དང་ཆེན་རྟོགས་པས་མོས། །དེ་རྗེས་གོམས་བྱེད་བཤད་པར་བྱ། །སྔ་མ་ལྔ་མ་གང་དང་གང་། །ཕྱི་མ་ཕྱི་མའི་ཐབས་དང་རྒྱུ། །དེ་བཞིན་ཕྱི་མ་ཕྱི་མ་གང་། །སྔ་མ་སྔ་མ་ལས་བྱུང་འབྲས། །དེ་ལྟར་རྒྱུ་འབྲས་ཐབས་འབྲེལ་བ། །སྲིད་པ་འཁོར་ལོའི་ཚུར་བཞིན་དུ། །དབང་པོ་བརྩོན་འགྲུས་བཟང་ངན་གྱིས། །རྣམ་པར་དབྱེ་བའི་ལུས་གཉིས་བསྟན། །སྲིད་པ་རྫོགས་པར་སྨིས་ཚུལ་དུ། །ལྷག་པའི་གདེང་ལྡན་སྐྱེས་བུ་ཡིས། །སྒོམ་པ་རྣམ་བཞི་ཟུང་ལྡན་པར། །གདོང་མ་ཉིད་ནས་གོམས་པར་བྱེད། །ཐིག་ལེ་ཆེན་པོའི་ངང་ཉིད་ལ། །སྒོམ་པ་རྣམ་གསུམ་དུས་གཅིག་རྫོགས། །དེ་ནི་དེ་བཞིན་ཉིད་ཀྱི་དབྱིངས། །དེ་ནི་ཀུན་ཏུ་སྣང་གི་ངང་། །དེ་ནི་རྒྱུ་ཡི་རིམ་པར་ལྡན། །ཚོགས་བརྒྱད་ཡེ་ཤེས་ལྔར་རྟོག་པས། །ཏིང་ངེ་འཛིན་གྱིས་དབང་བསྒྱུར་ནས། །ཡེ་ཤེས་ལྔ་རུ་གསལ་བ་ཉིད། །ཐུགས་ཀྱི་ཕྱག་རྒྱ་ཆེན་པོའོ། །མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་འགྱུར་བས། །འདས་ན་སངས་རྒྱས་མ་ཡིན་ནོ། །ཡང་ན་དམ་ཚིག་འདི་ལྟ་བུ། །ཇི་ལྟར་སྤྱོད་ཀྱང་སྡོམ་མི་འདའ། །བྱེད་སྤྱོད་ཚོགས་ཆེན་གཉིས་སུ་འགྱུར། །འགྲོ་དང་འདུག་དང་ཉལ་བ་ན། །མ་ཉམས་དེ་ཡི་དབྱིངས་སུ་གནས། །ཤེས་རབ་མཆོག་གིས་རྟག་ཏུ་སྤྱོད། །དབྱིངས་ཉིད་ལ་ནི་ཉིད་སྤྱོད་ཕྱིར། །དབྱིངས་ཉིད་མཆོག་གི་གནས་ལ་སྤྱོད། །དེ་ཉིད་མི་གནས་མྱ་ངན་འདའ། །རྟོགས་པའི་ཡེ་ཤེས་ཡིད་བཞིན་གཏེར། །ཐམས་ཅད་ལ་ཡང་མེ་ལོང་བཞིན། །བལྟས་ཀྱང་གཟུགས་བརྙན་མི་སྣང་ངོ་། །ཤེས་རྒྱུད་ཅི་ཡིན་གང་གིས་ངོ་ཤེས་ཤིང་། །བྱ་བྱེད་ལས་འཕགས་གྱིན་འདར་འདུག་བྱེད་པ། །གང་ཞིང་བློ་ལ་སྤྱོད་པས་བྱང་ཆུབ་འཆོར། །རྣམ་པར་དག་པའི་གཡུང་དྲུང་སངས་རྒྱས་ལ། །ཐམས་ཅད་ཡེ་ནས་མཉམ་པར་རྣམ་དག་ཅིང་། །མི་རྟོག་སལ་ལེར་གནས་ལ་རྟོག་པ་མཛད། །བསྙད་དུ་མེད་པས་སྣ་ཚོགས་འབྱུང་བ་ཡིན། ། བདག་མེད་བདག་ཆེན་ཐམས་ཅད་འབྱུང་བའི་གཏེར། །མ་བཀག་པ་ལས་རྒྱུ་ཞིང་འབྱུང་མེད་པའི། །རྣམ་རྟོག་ཉིད་ན་ཡེ་ཤེས་རང་བཞིན་ཏེ། །རྣམ་གསུམ་སྣོང་ཞིང་སྟོང་ཉིད་པས། །རྣམ་རྟོག་མི་སྐྱེ་ཡེ་ཤེས་བརྗོད་དུ་མེད། །ཐམས་ཅད་སེམས་ཀྱི་ངང་སྟེ་སེམས་ཞེས་གདགས་སུ་མེད། །མ་བཅོས་ལྷུན་གནས་ཡེ་ནས་བྱང་ཆུབ་ཅིང་། །ཐོབ་རྒྱུ་མེད་པས་ཡེ་ནས་བདེ་གཤེགས་ཡིན། །ནམ་མཁར་བཟུང་བས་སྤྲིན་གྱིས་ཁེབས་པར་འགྱུར། །ནམ་མཁའ་མེད་པར་གང་གིས་ཤེས་པ་ནི། །སྤྲིན་ཞིག་འབྱུང་ཞིག་ཁེབས་པར་མི་སྲིད་བཞིན། །སྒོམ་པའི་སེམས་ཀྱང་དེ་ལྟར་ཕལ་བར་བྱ། །མ་བཅོས་ལྷུན་མཉམ་ཇི་བཞིན་ངང་གཞག་དང་། །རྒྱུ་འབྲས་ལྷུན་གྱིས་གྲུབ་པའི་དཀྱིལ་འཁོར་འགྱུར། །དེ་བཞིན་ཉིད་ལ་གནས་བཅས་ན། །ཉོན་མོངས་སྡུག་བསྔལ་མི་འབྱུང་སྟེ། །རྟག་ཏུ་བདེ་གནས་བྱང་ཆུབ་ཉིད། །མཚན་དང་དཔེ་བྱད་ཀུན་དང་ལྡན། །སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་གཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོ། །དང་པོ་ལམ་ལ་རྟེན་བྱེད་པས། །དེ་བཞིན་ཉིད་དུ་གོམས་བྱ་བ། །སྔོན་དགོས་ཐབས་དང་ངོ་བོ་དང་། །མི་མཐུན་བཅོས་ཉམས་སྤྱོད་དམ་ཚིག །དྲོད་རྟགས་མཚན་ཡོན་འདའ་ཀ་མ། །རང་གི་འབྲས་བུས་རྫོགས་པར་འགྱུར། །སྐྱེས་བུ་སེང་གེ་བཞིན་རྒྱུ་བས། །སྔོན་དུ་རི་མོར་རིམ་པ་རྫོགས། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་ཏིང་འཛིན་ཤེས་རབ་དང་། །བྱང་ཆུབ་སེམས་དང་སྙིང་རྗེ་ལྡན། །ལྷག་པའི་ཡོ་བྱད་ལྔ་རྫོགས་བྱ། །དེ་ནས་མ་ཡི་སེམས་ལྡན་པས། །གནས་དྲུག་ཐར་བར་དགོད་དམ་བཅའ། །ཚངས་པའི་གནས་བཞི་སྔོན་སོང་བས། །ཡིད་འོང་སྐྱོན་མེད་ས་བཙལ་བསླང། །རན་བྱས་བྱི་དོར་ལྡན་བྱས་བསྲུང་། །པི་པར་སྟན་དང་ལྡན་པར་བྱ། །བར་ཆད་བསལ་ཞིང་ལམ་རྫོགས་ཕྱིར། །ཚོགས་དང་སྦྱིན་སྲེག་དཔུང་ཚོགས་འབད། །ཕྱི་ནང་འབྲེལ་ཆགས་ཐམས་ཅད་ཀུན། །གཞན་ཕྱིར་དུར་ཀུན་སེམས་ཀྱིས་དོར། །ཁམས་དང་ཏིང་འཛིན་རྐྱེན་བསྡུས་ལ། །བར་ཆད་བསྲུང་བ་སྔོན་རྫོགས་ནས། །ལོངས་སྤྱོད་རིགས་མའང་ལྡན་བྱས་ལ། །འཚེ་བ་བཟློག་པ་ཉེར་རྫོགས་གཞག ། ཐུན་མོང་སྤྱི་ཡི་སྔོན་རྫོགས་ནས། །མཆོད་རྟེན་ཉེ་བའི་གཟུགས་བརྙན་བཞུགས། །ཡན་ལག་བརྒྱད་པའི་ཚུལ་བཟུང་ནས། །ཡོངས་གྱུར་ཐིམ་བྱས་རྗེས་ལ་འཇུག །དག་པ་རྣམ་གསུམ་མ་ནོར་ཞིང་། །རང་རིག་རྒྱལ་པོ་གོམས་པ་ཡིས། །བྱང་ཆུབ་མཆོག་འདི་རྙེད་པར་འགྱུར། །དེ་ཕྱིར་མཐོང་རྗེས་དེ་བཞིན་ཉིད། །སྙིང་རྗེ་འབྱུང་བའི་གཞི་རུ་གཞག །གོ་རིམ་འབྱུང་བའང་དེ་བཞིན་ངེས། །གང་དག་སྐལ་ལྡན་ཅུང་དམན་པས། །གཞན་སེལ་ཕྱིར་དང་དོན་གཉེར་ཕྱིར། །འཇུག་པའང་སྔ་མ་གཉིས་དོན་དུ། །མ་རིག་འཁྲུལ་པའི་འདམ་དབྱིངས་སུ། །ཡེ་ཤེས་སྒྲོན་མའི་མདའ་འཕངས་ནས། །གཏི་མུག་མུན་པ་རྣམ་བསལ་ཏེ། །རང་བཞིན་འོད་གསལ་བདེ་བའི་མཆོག །མདོར་ན་སྒྲིབ་ཚོགས་མུན་སྣང་ཚུལ། །ཆོས་དབྱིངས་མཁའ་དཀྱིལ་ཡངས་པ་ལ། །ཤེས་རབ་མྱུར་དུ་དོན་འགྲོ་བ། །འགྲོ་མེད་འོང་མེད་མི་གནས་པ། །བྱང་ཆུབ་སེམས་མཆོག་ཨ་རབ་བདེ། །མུན་སྣང་དུག་རྩིའི་ཚུལ་བཞིན་དུ། །རྟོག་པའི་དབང་སྒྱུར་ཏིང་འཛིན་ཡིན། །དོན་དུ་གཉེར་བ་གང་དག་ཀུན། །ཏིང་འཛིན་འདི་ཡིས་བྱེད་པར་འགྱུར། །གལ་ཏེ་རྣལ་འབྱོར་འདི་མེད་ན། །རྒྱ་མཚོའི་འཇིང་གི་ཕ་བོང་ལྟར། །བསྐལ་པར་ལམ་ལ་བཙལ་བྱས་ཀྱང་། །དོན་མེད་སྙིང་པོ་བསྐམས་པ་ཡིན། །དེ་ཕྱིར་ལྷག་མ་ཆ་བསྙམས་པའི། །བདེ་ལྡན་བྲོད་པས་ཆོས་བདུན་ཚུལ། །ལྡན་བྱས་རྗེ་བཙུན་རྣམ་སྣང་བཞིན། །འཛིན་རྩོལ་མེད་པའི་སེམས་ཀྱི་འཇུག །དེ་ཡང་གདམས་ངག་ཤེས་རབ་ཀྱི། །སྟོབས་ཀྱིས་གཞག་པས་གོམས་པས་བྱེད། །སྔོན་བརྗོད་བུ་དེས་དབེན་པའི་སར། །རིན་ཆེན་ལྷབ་ལྷུབ་ལོངས་སྤྱོད་ཀྱིས། །མཉེས་བྱས་བུ་དེ་པང་དུ་བཞག །བགེགས་བསྐྲད་སྦུབས་མཆུས་ཤིབ་བུར་བསྟིམ། །དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་མི་དམིགས་དབྱིངས་བསྒོམ་བྱ། །ཕྱི་མ་སྤྱི་བླུགས་མཐོང་རྗེས་གཞག །བདག་དང་བདག་གི་གཞན་རྣམས་ནི། །ཤིན་ཏུ་མི་དམིགས་དབྱིངས་སུ་བསྒོམ། །རང་རིག་ཉིད་ལ་གནས་པ་ནི། །སུས་ཀྱང་མ་བྱས་རང་བྱུང་སྟེ། །ཐམས་ཅད་དེ་བཞིན་ཉིད་དུ་སྦྱོར། །གཉིས་མེད་དབྱིངས་ཀྱི་ངང་དུ་ཐིམ། །རང་བྱུང་ཡེ་ཤེས་དཀྱིལ་འཁོར་གྱིས། །མ་ལུས་དེ་བཞིན་ཉིད་དུ་སྡུད། །སྡུག་དང་མི་སྡུག་གཉིས་ཀ་མིན། །ཡང་དག་ཁོ་ན་ཉིད་དུའོ། །བསྒོམ་བྱ་སྒོམ་བྱེད་མ་སྐྱེས་ན། །ཆོས་ཉིད་བསྒོམ་པར་བྱ་བའང་མེད། །དོན་དམ་བསྒོམ་པར་བྱ་མེད་པས། །གང་ལའང་མི་འཇུག་ཞུགས་པའི་མཆོག །བསམ་བྱ་བསམ་པར་མི་བྱ་སྟེ། །མི་བསམ་པར་ཡང་ཡོང་མི་བསམ། །གང་ལ་རྣམ་པར་མི་སེམས་པ། །དེ་ནི་རང་རིག་མཉམ་ཉིད་དོ། །བྱང་ཆུབ་སེམས་ཀྱི་དེ་བཞིན་ཉིད། །ཤིན་ཏུ་མི་དམིགས་བརྟག་དཀའ་བ། །ཡངས་ལ་རྒྱ་ཆེ་གཏིང་ཟབ་པས། །ཤེས་རབ་ཟབ་པས་རྟོགས་འགྱུར་ཏེ། །གང་ནས་མ་འོངས་གར་མི་འགྲོ། །འགྲོ་དང་འོང་བར་བྱ་བར་མིན། །ཤིན་ཏུ་བརྟག་དཀའ་མི་དམིགས་པས། །མཐའ་དང་དབུས་ཀྱང་བརྟག་ཏུ་མེད། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་དེར་སྣང་ངོ་། །དབྱིངས་དང་དབྱིངས་ཀྱི་ཡེ་ཤེས་ཀྱང་། །རང་རིག་ཁོ་ན་ཙམ་དུ་ཟད། །གང་ཞིག་དམིགས་ནས་འཇུག་པ་ནི། །དེ་སྲིད་འཇིག་རྟེན་རྒྱང་ཕན་པ། །འཇུག་མེད་སངས་རྒྱས་ཡིན་པར་ནི། །དབང་པོ་ཉིད་དང་ཀུན་གྱིས་གསུངས། །ངེས་པར་བསམ་ཞིང་དམིགས་ཡོད་ན། །ཕྲ་རབ་འཐེན་ཐག་འཛུད་ལྟ་བུས། །དེ་བཞིན་ཉིད་དེ་མི་མཐོང་སྟེ། །འཐེན་ཐག་འཛུད་བས་མཁའ་བཞིན་ནོ། །རྣལ་འབྱོར་མཉམ་པ་དེ་བཞིན་ཉིད། །ངོ་བོ་བཞིན་དུ་གྲངས་འཇུག་ཅིང་། །ངེས་ཚིག་རྣམ་པར་འབྱུང་བ་ཡིན། །དེ་བས་ཀུན་ལ་འབྱོར་བར་གྱིས། །ཆེན་པོ་དམན་པས་མཐའ་བསལ་བའི། །མ་སྐྱེས་དེ་བཞིན་ཉིད་སྟོང་པ། །གདོད་སྟོང་སྟོང་པའི་ཐ་སྙད་བྲལ། །སྤྲོས་པ་བརྒྱད་བྲལ་འདོད་མ་ཡིན། །གང་གིས་རང་སེམས་མཐའ་དྲི་མ། །མེད་པའི་དེ་བཞིན་དག་པ་ཉིད། །རྣལ་འབྱོར་མཚན་མེད་དེ་བཞིན་ཉིད། །གཉིས་མེད་ལྷུན་མཉམ་དེ་བཞིན་ཉིད། །གྲངས་བཞིའི་རིམ་པ་ཐ་མ་ཉིད། །བྱིན་རླབས་ཡོན་ཏན་ངོ་བོས་བླ། །བླ་མའང་སྐབས་མིང་མཉམ་ཉིད་དང་། །ལྷུན་གྲུབ་མཐའ་བྲལ་ཐ་སྙད་མེད། །སྟོང་ཆེན་མ་སྐྱེས་ཆོས་དབྱིངས་སོགས། །ཡོན་ཏན་ཆ་རེ་བརྗོད་པར་ཟད། །དེ་རེའང་སྐབས་ཀྱི་ངོ་བོ་དང་། །མིང་དོན་ངེས་ཚིག་བརྗོད་པ་ཡང་། །གཏན་ཚིག་ཡན་ལག་དུ་ལྡན་པ། །རྣམ་གསུམ་ཕྲུགས་པར་འབྱུང་བ་ཡིན། །ལྷག་པའི་དོན་མཆོག་གང་ཡིན་པ། །དངོས་རྣམས་ཉིད་ན་དངོས་མེད་པས། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཉིད་རང་གསལ་མི་གཡོ་བ། །ཞི་གནས་ལྷག་མཐོང་ཟུང་དུ་འབྲེལ། །ཐམས་ཅད་ཤེས་རབ་དབྱིངས་ཉིད་དེ། །དབྱིངས་ལ་དབྱིངས་ནི་རྣམ་པར་སྦྱར། །ཤེས་རབ་དབྱིངས་ཉིད་སྦྱོར་བ་ཡིས། །བྱང་ཆུབ་རྡོ་རྗེ་ཐིག་ལེ་ཡིན། །དེ་ཡང་སོ་སོར་རྟོག་སྒོམ་དང་། །མི་དམིགས་ཤིན་ཏུ་མི་དམིགས་དང་། །རྗེས་སུ་མི་དམིགས་རིམ་པ་ཡིས། །མི་གནས་མི་རྟོག་རློམ་སེམས་མེད། །རང་བཞིན་ངང་གིས་བདག་མེད་པས། །བྱ་བྱེད་གཉིས་ཀ་མི་དམིགས་ཕྱིར། །མཁའ་ལྟར་འདུ་བྱེད་ཀུན་བྲལ་བ། །བསམ་མེད་འདུག་ལ་སྒོམ་ཞེས་བརྗོད། །འདུ་ཤེས་གང་དུའང་མ་ཞུགས་ན། །འདོད་ཆགས་མེད་པས་འདུ་འབྲལ་མེད། །དེ་ལྟར་དེ་ལྟར་མཉམ་བཞག་ཚེ། །གནས་དང་སྤྱོད་ལམ་སྒྲིབ་པ་རྣམས། །ནོར་བར་ཟིན་ནས་མི་འཕྲོག་པར། །བྱ་ཕྱིར་མདོ་ཙམ་བརྗོད་པར་བྱ། །དམིགས་པ་བརྗེད་དང་བྱིང་རྒོད་དྲག་།རྩོལ་དང་མི་རྩོལ་བྱེད་པ་དང་། །དོགས་པ་ལོག་པ་བཅུ་གཅིག་དང་། །ཐུན་མོང་བདུན་ཏེ་བཅོ་བརྒྱད་དོ། །དེ་བཞིན་གཡེང་བ་རྣམ་དྲུག་སྟེ། །ངོ་བོས་གཡེང་བ་རྣམ་ཤེས་ལྔ། །ཕྱི་རོལ་ཡུལ་ལྔར་འཕྲོ་བས་གཡེང་། །བྱིང་རྒོད་རོ་མྱོང་ནང་ཡིན་ཏེ། །གཞན་ཕྱིར་དགེ་སྦྱོར་མཚན་མའོ། །སྙོམས་འཇུག་གཞན་ནམ་ཐེག་པ་གཞན། །དེ་ཡི་ལུགས་ལ་སེམས་འཕྲོ་ཡིད། །ངའོ་སྙོམ་པས་སྙོམས་འཇུག་པ། །གནས་ངན་ལེན་པར་ཐེ་ཚོམ་མེད། །དྲན་འབྱུང་རྗེས་སུ་འབྲང་བ་དང་། །འགོག་དང་ཐེག་ཟུག་ཕྱལ་བ་དང་། །ཆེད་དུ་གསུམ་འཆོས་ཡིད་ལ་བྱེད། །མྱོང་དང་འདུ་ཤེས་གནས་དམིགས་དང་། །སྡུད་དང་མངོན་བྱེད་རེ་བ་མང་། །སྒྲིབ་པ་ལྔ་བཅུ་རྩ་ཡན་ལག །འཇིག་རྟེན་དང་པོའི་བསམ་གཏན་བཞི། །སྙོམས་འཇུག་བཞིར་གོལ་ས་དགུ་སྟེ། །ཐེར་ཟུག་ཆད་པ་ཕྱིན་ཅིང་ལོག །བྱ་བ་མང་ལ་འབྱུང་སྐྱེན་ཞིང་། །ངང་ཐུང་འཁྲུག་དང་དུ་གཤང་ཐོས། །འཁོར་ཞིང་ཁ་དོག་མཐོང་བ་ན། །ཁམས་ལས་གྱུར་པའི་ཆ་ཡང་ཤེས། །དེ་ཡིས་འགྲོ་ཉལ་འདུག་སྡོད་དང་། །ལོངས་སྤྱོད་ཚེ་ནའང་རྣལ་འབྱོར་བྲལ། །ཡེ་ཚེ་དུར་རྐུན་ཉ་གླང་གཉིད། །བརྐམ་ཆགས་ཚོང་སེམས་སྤྲེ་སྤྱོད་སྐྱོན། །དེ་ལྟར་ཤེས་པའི་རྣལ་འབྱོར་པས། །སྤོང་བའི་འདུ་བྱེད་བརྒྱད་བརྟེན་པའམ། །སོ་སོར་ཅུང་ཟད་བལྟ་བྱའམ། །ཡང་ན་རང་བྱུང་རང་ཞིར་བྱ། །ཇི་ལྟར་བྱིན་པ་ཤེད་མ་བྱེད། །བྱ་བྱེད་མང་པོས་གཡེང་བར་གནས། །བྱ་བྱེད་མང་པོ་བདག་མེད་པར། །ཏིང་ངེ་འཛིན་གྱིས་དབང་བསྒྱུར་ནས། །མཚན་མ་མཉམ་པའི་དབྱིངས་སུ་མནན། །དགག་དང་སྒྲུབ་པ་ག་ལ་ཡིན། །ཅུང་ཟད་ཁམས་ཀྱི་ཆ་ཉམས་པས། །མི་གསལ་མཐོང་དང་མི་འཇུག་སོགས། །ཟིན་ནས་སྤྱོད་ལམ་དགའ་བརྟེན་དང་། །མཐུན་པའི་ཆོ་གས་གསོ་བར་བྱ། །སྤྱོད་ལམ་རྣལ་དུ་མ་འབྱོར་པས། །སོ་མཐས་ཆོད་ནས་དོར་བྱ་ཞིང་། །དྲན་པའི་ཐག་པས་བསྡམས་བྱས་ཏེ། །རྣམ་པ་ཀུན་ཏུ་ཉམས་མི་བྱ། །དེ་ལྟར་ནོགས་བརྩོན་ཡུན་རིང་བར། །གནས་པའི་གདོད་མཐར་འཕེལ་བ་ཡང་། །གཡོ་ཐོབ་གོམས་བརྟན་མཐར་ཕྱིན་པ། །མུ་ལྔས་ཡོངས་སུ་རྫོགས་པར་འགྱུར། །གང་དག་གཟར་བོའི་ཆུར་གནས་ཚེ། །ཀུན་བརྟགས་གོམས་པའི་རྫ་མཁན་གྱིས། །མི་སྡོད་འགྲོ་བས་སྐྱོ་བར་བྱེད། །དེ་ཚེ་མགོ་ལ་མེ་འབར་བཞིན། །ཅུང་ཟད་ཡོད་ལ་དེ་དག་ཉུང་། །དེ་ཚེ་དལ་བུས་འབྱུང་འཇུག་བསྲིང་། །དེ་གོམས་ཆེད་དུ་བྱེད་སོགས་ན། །བཏང་སྙོམས་དང་པོ་བླང་བར་བྱ། །རི་བོ་ལྟ་བུར་མི་བསྒུལ་བ། །ཐུན་ཀྱང་ནུས་ནས་སུན་མི་བྱ། །རོ་མྱོང་དོར་བས་དེ་མཐར་ཕྱིན། །ཤུགས་སྣང་མཐོང་ལ་དགའ་བྲོད་མེད། །གཉིས་པ་བར་འགའ་འཆོར་ཐོབ་ལ། །ཁམས་དང་འཆོར་རྒྱུ་བརྟགས་གསོ་དོར། །ཤིན་ཏུ་ཡོན་རིང་བརྩོན་པ་ཡིས། །གོང་ནས་གོང་དུ་འཕེལ་བར་འགྱུར། །བདག་དང་གཞན་ཕྱིར་བྱ་བ་ཀུན། །སློབ་གཡོ་ནས་བཟུང་ལྔ་བའི་བར། །རྣམ་པར་རྟོག་མེད་ཚུལ་གྱིས་ནི། །ཐམས་ཅད་ཀུན་ལ་ཆགས་མེད་རོལ། །སྤྱོད་དགུ་དོར་བའི་གཅིག་ཆ་ཡང་། །མི་དམིགས་མཐུན་པར་སྤྱོད་ཅེས་བྱ། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ལོངས་སྤྱོད་མེད་ལས་ཐམས་ཅད་སྤྱོད། །སྤྱོད་པ་ཉིད་ན་སྤྱོད་མེད་ལས། །ཉམས་པ་མེད་སྤྱོད་ཆགས་མི་བྱ། །མི་འགོག་མི་འཛིན་ཚོགས་གཉིས་ལྡན། །བདག་ཕྱིར་ཀུན་ལ་མི་དམིགས་པར། །རྣལ་འབྱོར་མྱུར་ཐོབ་ཐེ་ཚོམ་མེད། །འགྲོ་ཉལ་འདུག་སྡོང་ལོངས་སྤྱོད་ཚེ། །དེ་ལྟར་སྤྱོད་པས་ཆོས་ཉིད་དུ། །བྱིན་བརླབས་སྒྲོལ་བས་ཅིག་ཤོས་ཏེ། །གང་ཡང་གཞན་ཕྱིར་སེམས་པས་རྫོགས། །གཞུང་ལས་གྲགས་པའི་སྤྱོད་པ་རྣམས། །སྐྱེ་བོ་ཀུན་གྱིས་སྤྱོད་གསུངས་པས། །མོས་སློབ་ཅི་སྨོས་རྐྱེན་མཐོང་བ། །དེ་དག་ཤེས་སྒོམ་གཞི་ལ་སྤྱོད། །ཤེས་འཇུག་ཀུན་ཀྱང་གཞན་དོན་དུ། །ལས་བཞི་སྤྱོད་ཅིང་སྒྲུབ་དབང་ཚེ། །ལས་ཀུན་སྤྱོད་ཅིག་ཆས་བསྒོམས་ནས། །སྤྲོས་པའི་འཁོར་ལོ་མོས་བསྒོམ་ཞིང་། །རང་བཞིན་ཕབ་རྫོགས་མཆོད་བསྙེན་ནས། །ནུས་པའི་བྱིན་ལྡན་རྫོགས་པར་བྱེད། །དེ་ཚེ་སྡོམ་པ་ཐམས་ཅད་ཀུན། །མོས་སློབ་མི་གཏོང་བསྲུང་མོད་ཀྱང་། །ཁྱབ་པར་ཏིང་འཛིན་དམ་ཚིག་ལྡན། །དམ་ཚིག་དམ་ཚིག་ཅེས་བྱ་བ། །ལོགས་ན་ཡོད་པ་མ་ཡིན་ཏེ། །རང་གི་ལྟ་བ་དམ་ཚིག་ཡིན། །མི་གཏོང་ཕྱིར་ཡང་དམ་ཞེས་བྱ། །གཟུགས་སུ་གྱུར་པས་དམ་ཞེས་བྱ། །སྔར་ལྡན་དེ་ཡང་འདིར་གོམས་བྱེད། །དེ་བས་རང་སེམས་རྟོགས་བྱས་ཏེ། ལེ་ལོ་གཡེང་བ་ཡོངས་སྤངས་ལ། །ང་དང་བདག་མེད་མཉམ་པར་བསུང་། །དེ་བཞིན་ཉིད་ལས་འདའ་མི་བྱེད། །དེ་བཞིན་ཉིད་ལྡན་དམ་པ་སྟེ། །དེ་ལས་འདས་ན་འཚིག་པར་གྱུར། །སྔ་མ་སྔར་མར་རྫོགས་བྱས་པས། །གོང་མ་གོང་མའི་རྒྱུད་ལྡན་པས། །ཡོངས་སུ་འཕར་གྱི་མངོན་སྤྱོད་མིན། །འཕར་བས་སྤྱོད་ཀུན་མངོན་དུ་རྒྱུ། །དེ་བས་སོ་སོའི་ལྟ་གཞི་ལས། །སྤྱོད་སོགས་ཁྱད་པར་མཁའ་ཡུལ་འདྲ། །ཞིང་ཁམས་དབང་པོའི་ས་ཁམས་བཞིན། །སྟོབས་ནི་སྟོབས་ལྡན་རྩལ་སྒྱེད་འདྲའོ། །དེ་ལྟར་བྱ་བྱེད་མེད་བསྲིངས་ན། །ལུས་ངག་སེམས་ལ་དྲོད་འབྱུང་སྟེ། །བཟོད་པ་ཕྲ་མོ་ཐོབ་པ་དང་། །འགྱུར་བའི་དབུགས་ལ་དབང་ཐོབ་དང་། །དོན་ལ་རྣལ་དུ་ཕེབས་པ་ནི། །ངེས་པར་དྲོད་གསུམ་མྱོང་བའོ། །གཞན་དུ་ཕྱི་རོལ་རྡུལ་ཕྲན་དང་། །ཟླ་ཚེས་ལ་སོགས་མཚན་མ་མཐོང་། །རིག་པ་ཀླུངས་སུ་འབབ་པ་དང་། །འདོད་པའི་ཡུལ་ལ་མི་འཕྲོ་ཞིང་། །འཕྲོ་འགྱུར་དག་ལ་ཉམ་མི་ང་། །ཕྱི་ནང་ཆགས་ཡུལ་ཞེན་པ་ཆུང་། །སྔ་བས་སྤངས་པ་ཉམས་སུ་འབྱུང་། །གཞན་ཡུལ་ཐུགས་རྗེས་སེམས་འཕྲོག་དང་། །ཆོས་བརྒྱད་མཉམ་སོགས་ཕལ་ཆེར་འབྱུང་། །དེ་ཡང་གཡོ་ཐོབ་བརྟན་རིམ་གྱིས། །ཀུན་ཏུ་འཁོར་བར་འབྱུང་བ་ཡིན། །གུ་ལྗོ་མིན་པའི་རིགས་དེ་ལ། །ཕ་མས་ཁྱིམ་ཐབ་ལྷས་བསྟན་ན། །བྲོད་པས་བསུ་ཞིང་ཟང་ཟིན་དག །དོན་དུ་གཉེར་ལ་བརྩོན་པར་བྱེད། །དེ་བཞིན་རྣལ་འབྱོར་བདེ་འཚོལ་བ། །དྲོད་རྟོགས་མཐོང་བའི་ཚུལ་གྱིས། །ཤིན་ཏུ་ལམ་ལ་བརྩོལ་བྱེད་འགྱུར། །དེ་ཕྱིར་འདི་དག་རྗེས་སུ་བསྟན། །ཕྱི་མའང་ལམ་གྱི་སྟོབས་ཆ་ལས། །རྟགས་མངོན་ཆོ་འཕྲུལ་སྣང་བར་འགྱུར། །དེ་ལ་སྔ་མ་ཕྱི་ནང་སྟེ། །ཕྱི་རོལ་ཟད་པར་སྐྱེ་མཆེད་དངོས། །མཐོང་དང་པདྨའི་འོད་སོགས་མཐོང་། །ནང་དུ་བཟོད་ཐོབ་བྱེ་བྲག་དང་། །ཆུ་ལྔ་རྒྱུན་ལམ་བགས་ཀྱིས་བཅད། །མི་འཕྲོག་མྱོས་སྐྲག་དགའ་བྲོད་མེད། །ཤུགས་སྣང་བརྒྱད་པོ་མཐོང་བའང་འབྱུང་། །བཅོ་བརྒྱད་བདུད་ཡུལ་ཆ་ཡང་འབྱུང་། །མངོན་པར་ཤེས་པ་རྣམ་པ་དྲུག །ལམ་གྱི་ཟག་པ་ཡོད་མེད་པ། །སྔོན་ལ་དམིགས་པའི་མངོན་ཤེས་དང་། །ཡོངས་སུ་རྫོགས་པའི་མངོན་ཤེས་དང་། །བར་ཆད་མེད་པའི་མངོན་ཤེས་སོ། །དམིགས་པ་འགའ་དང་འཕེལ་བ་དང་། །ཉི་ཤུ་ལྔ་རྫོགས་ཡུལ་ཁམས་མཐོང་། །གླིང་གྲངས་མཐོང་ཐོས་རིམ་པས་ཕྱེ། །ཕྱི་མ་སྟོང་གསུམ་བརྒྱ་ཡུལ་དང་། །སྟོང་གསུམ་སྟོང་སོགས་ཡུལ་འགྱུར་སོགས། །སྟོང་གསུམ་སྟོང་ཕྲག་བཅུ་རྡུལ་སྙེད། །གྲངས་མེད་བརྒྱ་སྟོང་ཕྲག་བཅུའི་རྡུལ། །དེ་སྙེད་ཡུལ་གྱུར་རྒྱལ་བ་དང་། །མཉམ་པས་ཕྱེ་བས་ལམ་རྫོགས་ཡིན། །དེ་བས་རྒྱུ་ཡི་སེམས་དཔའ་དང་། །སྐལ་མཉམ་ཕྱིར་ན་བརྗོད་པའི་ཚུལ། །ཤེས་པའི་ཁྱད་པར་དགོངས་པ་ཡི། །གཞི་ཡིས་ཕྱེ་བས་རྒྱུ་འབྲས་ངེས། །འདི་ཚེ་རྫུ་འཕྲུལ་རྗེས་བསྟན་དང་། །ཆོས་སྣང་ཀུན་བརྗོད་ཅིག་ཅར་ལ། །རྫོགས་ཀྱི་འདི་ཚེ་འབྱུང་བའི་རྒྱུ། །ཉམས་མཐར་བཞི་ཆ་འབྱུང་སྲིད་དོ། །རྣལ་འབྱོར་གནས་པའི་རྨི་ལམ་ཡང་། །གཅེར་བུར་བྱུང་ཞིང་དྲི་མ་དག །བྱང་ཆུབ་ཆེན་པོའི་མཆོད་རྟེན་མཐོང་། །དམ་པ་མཆོད་དང་དམ་པ་ཡིས། །སྲས་དང་སྤུན་དགོངས་བྱིན་རློབ་ཕྱིར། །རྨི་ལམ་མཚན་མར་བླ་མ་མགོན། །སྣང་བས་དབང་བསྐུར་བྱིན་རླབས་སོགས། །ལམ་དུ་འཛུག་པ་ལྔ་བྱེད་ཅིང་། །བར་ཆད་ལེགས་ཉེས་བརྩོན་ལུང་སྟོན། །དེ་ཡང་བདུད་དང་ཆ་དབྱེ་སྟེ། །བྱིན་རློབ་ལུང་བསྟན་ལྟར་སྣང་བ། །འབྱུང་བས་ཉེས་བྱེད་བདུད་འབྱུང་ཕྱིར། །བདུད་དང་ཆ་བརྟག་ཀུན་ཏུ་གཅེས། །བར་ཆད་བསལ་ཕྱིར་དེ་དག་ཀུན། །བླ་མ་ཉིད་ལས་གཞན་དུ་མིན། །དེ་བཞིན་ཉིད་དུ་མཐོང་གོམས་ན། །དགེ་དང་མི་དགེ་གཉིས་སུ་མེད། །རྣམ་རྟོག་མཚན་མར་ཡང་མི་འཛིན། །རང་བཞིན་ཡེ་ནས་འོད་གསལ་བའི། །དགེ་སྡིག་མེད་པས་ཤིན་ཏུ་བདེ། །བདེ་དང་མི་བདེ་གཉིས་མེད་པས། །ཡེ་ཤེས་ཆགས་མེད་རྣམ་པར་དག །ཐམས་ཅད་དབྱེར་མེད་ཡེ་ཤེས་ཡིན། །སེམས་ཉིད་དང་བས་ཨ་རབ་བདེ། །ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བཞི་བློ་མ་འཛིན། །ཐམས་ཆད་ཆོས་ཉིད་རོ་གཅིག་པས། །གཉིས་སུ་མེད་པས་ཤིན་ཏུ་བདེ། །ཤེས་རབ་ཆུང་ཆེ་ཏིང་འཛིན་གྱིས། །ཐམས་ཅད་མ་ནོར་གཞུང་ལུགས་བཞིན། །འཁོར་བ་མ་སྤངས་སྡུག་བསྔལ་མེད། །གཉིས་མེད་ཚིམ་པས་ཨ་རབ་བདེ། །ཐམས་ཅད་མ་ལུས་གཅིག་པའི་ངང་། །ལྟ་དང་བལྟ་བ་གཉིས་ཀ་མེད། །ཡེ་ཤེས་སྒྲོན་མ་སྒྲེང་བས་ནི། །ཕྱོགས་བཅུའི་ཞིང་ཁམས་ཐམས་ཅད་མཐོང་། །འདི་དང་ཕ་རོལ་གཉིས་མེད་ཕྱིར། །འགྲོ་དང་འོང་བར་བྱ་བ་མིན། །ཡན་ལག་སྟོབས་ཆེན་མ་མཆོངས་པར། །ཕྱོགས་བཅུའི་སྟོང་ཁམས་ཐམས་ཅད་མནན། །འདི་ཚེ་སྤྱོད་ཡུལ་འགྱུར་མཐོང་ན། །གཡེང་བསལ་སྟོང་ཉིད་ངང་ལ་འདུག །དྲན་པས་ལས་ཀྱི་རྒྱུན་བཅད་དེ། །འདོད་ཁམས་ལྷ་མིའི་ཐེག་ཆེན་སྦྱོར། །ཡང་ན་གསང་བའི་གསེར་སྦྲོམ་དུ ། །ཚོན་གང་འོད་དང་ཟླ་བའི་ཧཱུཾ། །རིང་པོར་བརྩེགས་པའི་དམིགས་ཐོབ་ནས། །རླུང་གི་འཕྲོ་འདུས་འོད་བརྡལ་འདུག །སྣང་སྟོང་དབྱེར་མེད་རྣལ་འབྱོར་མཐའ། །མངོན་བྱས་ལྷག་པའི་ཆོས་སྐུར་སྦྱོར། །འབྲས་བུ་ཉིད་ལ་ལམ་ཕྱིར་ཏེ། །ཕྱོགས་མཐུན་བརྗོད་ཀྱི་རིགས་མ་ཡིན། །སྟོང་པ་ཆེན་པོའི་རྣལ་འབྱོར་བསྟན་པའི་ལེའུ་སྟེ་གསུམ་པའོ། ༈ །ཆོས་ཀྱི་སྐུ་ལ་ཕྱག་བཙལ་ཏེ། །སྙིང་རྗེ་ཆེན་པོའི་རྣལ་འབྱོར་བཤད། །རྗེས་སུ་མཐུན་པའི་ལུས་ཉིད་ཀྱི། །ཡན་ལག་སྒོ་ནས་ཤེས་པར་གྱིས། །སྔོན་སྟོང་གོམས་པའི་རྣལ་འབྱོར་པས། །ཁམས་གསུམ་ཐུགས་རྗེས་གཟུང་བའི་ཕྱིར། །ཡན་ལག་བརྒྱད་སྔོན་བཞིན་བྱས་ནས། །ཡེ་ཤེས་སྒྱུ་མའི་སྙིང་རྗེ་བསྒོམ། །བདག་གཉིས་དྲི་མ་བསལ་བ་དང་། །སྟོང་པའི་མདུད་པ་བཤིག་པ་དང་། །གདུལ་བྱ་ས་ལ་དགོད་པ་དང་། །ཕྱག་རྒྱ་གཅིག་པའི་རྒྱུར་བྱ་ཞིང་། །རྣལ་འབྱོར་འདི་ཉིད་གཉེར་བ་དང་། །བདེན་པ་གཉིས་སུ་མི་གཏང་ཕྱིར། །རྣལ་འབྱོར་འདི་ལ་གནས་བྱས་ཏེ། འཇུག་པའི་ཐུན་མཚམས་དུས་ཀྱིས་བྱ། །གང་གི་ཁམས་གསུམ་འདས་པའི་ཆོས། །ཐུགས་རྗེ་ཆེན་པོའི་ཡེ་ཤེས་སུ། །མཐོང་ཐོས་མྱོང་རེག་ཚོར་བའམ། །སོ་སོར་བརྟག་རྒྱུའམ་རྗེས་ལས་ཐོབ། །དེ་ཡི་མ་ལུས་ཆོས་སོ་ཅོག །སྙིང་པོ་ཡོད་པ་མ་ཡིན་ཏེ། །སྒྱུ་མ་མིག་ཡོར་སྤྲུལ་པ་དང་། །སྨིག་རྒྱུ་འཇའ་ཚོན་ཆུ་ཟླའི་ཚུལ། །བདག་དང་འགྲོ་བ་ངོ་བོས་གཅིག །བསལ་དང་བརྟགས་པས་ཐ་དད་ཕྱིར། །གཅིག་དང་ཐ་དད་གཉིས་མེད་པས། །བྱ་མེད་བྱ་བའི་འགོད་མེད་པར། །མཐོང་བ་མ་ཤོར་ཙམ་དུ་བྱ། །རྗེས་སམ་རྟོག་དཔྱོད་སྔོན་འགྲོས་བྱ། །དེ་བས་གཉིས་གོམས་རྒྱུ་གོམས་པས། །དྲན་པ་སྤྱི་བླུགས་ཡེ་ཤེས་གསལ། །སྔོན་དུ་བཏང་བ་གང་ཡང་མེད། །ནམ་མཁས་ནམ་མཁའ་ཇི་བཞིན་དུ། །ལུས་ངག་སེམས་དང་ཆོས་ཐམས་ཅད། །གང་ནའང་མི་གནས་མི་དམིགས་པས། །མིག་ཡོར་ཚུལ་དུ་སྦྱོར་བ་ཡིས། །ནམ་མཁའ་ལ་ནི་ནམ་མཁའ་བསྒོམ། །ཐམས་ཅད་ཐབས་ཀྱི་མཚན་ཉིད་དེ། །ཐབས་ལ་ཐབས་ནི་རྣམ་པར་སྦྱོར། །ཐབས་ཆེན་ཐབས་ལས་བྱུང་བ་ཡི། །དེ་ནི་བྱང་ཆུབ་རྡོ་རྗེ་མཆོག །ཐམས་ཅད་དུ་ནི་ཡེ་ཤེས་གསལ། །ཡེ་ཤེས་མ་ཡིན་ཆོས་ཡོད་མིན། །གདུང་འདྲར་མ་བསྒྲལ་དུས་གཅིག་བསྒྲལ། །གསོད་ཆེན་སྙིང་རྗེའི་རང་བཞིན་ཏེ། །མི་འབྱེད་ཕན་རྫོགས་བྱམས་ཆེན་པོ། །མི་འགྱོད་དགའ་མཆོག་འབྲལ་མེད་སྙོམས། །ཚངས་པའི་རྒྱུ་བཞི་དུས་གཅིག་རྫོགས། །མངོན་པར་གདུང་བ་དེ་ལ་མེད། །དེ་ཕྱིར་རྒྱུ་རྐྱེན་འབྲས་བུ་དང་། །དུས་དང་རང་བཞིན་འཁྲུལ་བ་དང་། །ཚུལ་གྱིས་ཉམས་དང་ངོ་བོ་དང་། །བཙོན་ར་ལྟ་བུ་བརྒྱད་ལ་དམིགས། །དེ་ཡིས་གཅིག་ཤོས་བཞི་འབྱུང་བ། །ཕ་རོལ་ཕྱིན་དང་མཚུངས་མ་ཡིན། །དེ་དག་ངོ་བོ་ཉིད་བསྟན་པའང་། །ངོ་བོ་བཞིན་དུ་གྲངས་འཇུག་སྟེ། །དོན་དང་རྣལ་འབྱོར་ངོ་བོ་ཡིས། །ཕྱེ་བས་ཟུང་འགྱུར་ངས་ཚིག་འབྱུང་། །དེ་ལ་ལོག་རྟོག་སྒྱུ་མ་ནི། །ཆོས་དང་བདག་དང་དངོས་པོ་རྣམས། །ངོ་བོ་ཡོད་ལ་སོགས་བརྟགས་པས། །རྟོག་པ་སྒྱུ་མའི་ཀླུང་དུ་གྱུར། །སྐྱེས་དང་མི་བདེན་སླུ་བས་འགྲུབ། །རྟེན་ཅིང་འབྲེལ་བ་ཤིང་རྟ་བཞིན། །འཇིག་རྟེན་རྣམ་རྟོག་གཟུགས་བརྙན་ཕྱིར། །སྒྱུ་མ་ལྟ་བུར་རྐྱེན་ལས་སྐྱེས། །འཕྲལ་སྣང་བྱ་བ་ཀུན་ཀྱང་བྱེད། རྟོག་ཅན་རྣམས་ལ་མཐུན་པར་ཚད། གཟུགས་བརྙན་འདྲ་ཕྱིར་བརྟགས་པས་དབེན། །དེ་ཕྱིར་ཐམས་ཅད་རྫུན་པ་ཙམ། །མིང་ལས་དངོས་མེད་འདོད་མ་ཡིན། །ཡང་དག་ཉིད་དུ་གྲགས་སོ་ཅོག །གཉིས་སྣང་ཉིད་ན་མ་དམིགས་པས། །སེམས་ཕྱིར་ཅིར་སྣང་རྒྱུ་མེད་ཤར། །སྣང་ལ་ངོ་བོ་ངེས་མེད་ཅིང་། །ཇི་ལྟར་བལྟས་པར་སྣང་བ་དང་། །སྣང་བཞིན་ཐེར་ཟུག་ཆད་དང་བྲལ། །རྒྱལ་བའི་སྐུ་ཡང་མ་སྐྱེས་པར། །རིག་པའི་ཡེ་ཤེས་སྒྱུ་མར་ཤར། །ཁམས་གསུམ་པའང་དེ་བཞིན་པས། །ཐབས་ཆེན་སྒྱུ་མ་ཀུན་ངོ་བོ། །ཡེ་ཤེས་ལ་ནི་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱང་གསོབ། །རྒྱལ་བ་མངོན་བྱུང་སྐྱོབ་པ་དང་། །བྱིན་རླབས་སྟོན་པའང་དེ་བཞིན་ཏེ། །རྒྱུ་རྐྱེན་རག་ལུས་མེད་པའི་ཕྱིར། །སྒྱུ་མ་རྡོ་རྗེ་བཙན་པོ་མཆོག །འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་པའང་རྡོ་རྗེ་ཉིད། །ཡིན་ཕྱིར་ངོ་བོས་ཐ་དད་མིན། །དམན་བ་སྣང་བར་གོམས་བྱེད་ཙམ། །འགྲོ་ལ་སེམས་རྒྱུད་གཉིས་མི་འཆར། །རྒྱུད་གཅིག་མ་སྐྱེས་མ་འགགས་པས། །གཟུང་འཛིན་བྲལ་བའི་རང་རིག་ཉིད། །ཡེ་ཤེས་སྒྱུ་མར་མི་གཡོ་གསལ། །ཆུ་དང་ཟླ་བ་ཇི་བཞིན་དུ། །མཚུངས་པར་གསལ་བ་ངོ་བོར་བརྗོད། །སེམས་ལས་མ་གཏོགས་ཆོས་མེད་ཕྱིར། །ཡེ་ཤེས་སྒྱུ་མ་གཞན་ན་མེད། །སྒྱུ་མ་ཉིད་ཀྱི་ཆགས་བྲལ་བ། །ཐ་སྙད་ཙམ་དུ་བསྒོམ་ཞེས་བྱ། །མི་མཐུན་སྒྲིབ་པའི་དམིགས་གཟུང་བ། རྒྱུ་དང་ངོ་བོའི་ཉེས་པ་ནི། །མ་གོམས་པ་དང་འགྲུབ་བྱེད་པས། །མེ་དང་དུ་བའི་ཚུལ་བཞིན་དུ། །བདག་ཏུ་འཛིན་པ་རྣམ་གཉིས་ཀྱིས། །ཏིང་འཛིན་སྒྲུབ་པ་འབྱུང་བར་བྱེད། །སྔོན་དུ་ཇི་བཞིན་ཉིད་བསྟན་མོད། །མཚམས་སྦྱོར་སྙིང་རྗེ་གཡུང་མི་པས། །བརྗོད་ཀུན་འབྲིང་དང་ཉུང་བར་འབྱུང་། །རྐྱེན་སྤངས་གོམས་པས་ཐ་མལ་དཀོན། །འོན་ཀྱང་འདི་ཉིད་འཕྲོ་སྡུད་དང་། །མ་ངེས་ས་ཕྱོགས་མཁར་བཅས་མཐོང་། །ཟད་པར་མཐོང་དང་མ་ངེས་མདོག །མེ་ཆུ་རླུང་སའི་ཆ་འཁྲུལ་བས། །མི་གསལ་མདོག་མཐོང་ཁམས་འཁྲུལ་བལྟ། །ས་གཡོས་མཐོང་བའང་ཆ་དབྱེའོ། །སྤྲིན་དང་ལིང་ཏོག་མུན་པ་བཞིན། །གང་དེ་གཞུང་ལས་གྲགས་པའི་སྐྱོན། །ཕྲ་རགས་ཆ་ཡིས་སྒྱུ་མའི་དོན། །མི་གསལ་ཤིན་ཏུ་བུལ་བར་བྱེད། །སྔོན་བཞིན་རྟོག་པའི་ནད་བཅོས་པ། །ཤེས་བཞིན་སོ་མཐས་ཆོད་པར་བྱ། །དེ་ལྟར་གྱུར་ན་རྐུན་པོའི་ཚུལ། །མ་བསལ་རང་བཞིན་དང་བར་འགྱུར། །རྣམ་རྟོག་མཚན་མ་ཅི་སྐྱེས་ཀྱང་། །ཡེ་ཤེས་སྒྱུ་མ་རང་སྣང་ཕྱིར། །ཆགས་སྡང་རེ་དོགས་མི་འབྱུང་སྟེ། །ཡེ་ཤེས་སྒྱུ་མ་གཞན་དུ་མིན། །དེ་ལྟར་མ་ལྡན་གང་དག་གིས། །ཚོར་ན་ལོ་རྒྱུས་དཔྱད་པས་ཞི། །ཡང་ན་རྟོག་པའི་གནས་ཡུལ་བལྟ། །དེ་མཐོང་མུན་པ་རྣམ་དག་སངས། །འདོད་མིན་ཁ་དོག་མཐོང་བ་ན། །འབྱུང་བ་བཞི་ཡི་གཉེན་པོས་གཞིལ། །སྔོན་བཞིན་སྔར་འབྲངས་ཕྱིས་སྔོན་བྱེད། །ད་ལྟ་རང་བཞིན་རྐྱེན་གྱིས་འགྱེས། །ཚོར་ན་ཐོག་ཐའི་ཉེས་བསམ་སྟེ། །སྐྱོ་བ་བསྐྱེད་ལ་དོར་དྲན་བཅིང་། །གང་དུ་ཐིམ་ན་ཁྲུས་འཆག་བསང་། །བྲོད་པས་འཇུག་ཅིང་གཟེངས་བསྟོད་བྱ། །དེ་ལྟར་དེ་ལྟར་བརྩོན་གྱུར་པའི། །སྐབས་སུ་ཡེ་ཤེས་རྣལ་འབྱོར་ཉིད། །འཕེལ་བའང་གཡོ་ཐོབ་གོམས་པ་དང་། །བརྟན་མཐར་འགྲོ་བ་ངོ་བོ་ལ། །མེད་ཀྱང་རབ་རིབ་དག་ཆས་བརྗོད། །འབོ་འགྱེས་ཐིམ་པ་རླུང་དྲག་ཆུ། །ཅུང་ཟད་ཐུན་གྱི་སུམ་ཆར་ཡོད། །བཞི་ཆ་ལྔ་ཆར་དེ་མེད་ཐོབ། །ཐུན་རྐྱང་ནུས་ཤིང་གསལ་ལྡན་པ། །ཆུ་ཀླུང་དལ་འབབ་ཚུལ་བཞིན་ནོ། །སྒོ་རྟེན་རྫས་ལྟར་རྟོག་རླུང་གིས། །མི་བསྒུལ་གཞི་ལ་གནས་པའོ། །དབང་པོའི་མངོན་སུམ་གང་བྱས་པ། །བསྐྱེད་དུ་བྱར་མེད་ཕྱིར་མཐའོ། །སྙིང་རྗེ་ཆེན་པོའི་རྣལ་འབྱོར་པས། །སྲིད་གསུམ་སྒྱུ་མ་འདྲ་བར་ནི། །རྫོགས་པའི་བྱང་ཆུབ་མཁས་པས་ཤེས། །འགྲོ་བའི་ཆེད་དུ་གོ་བགོས་ཏེ། །འགྲོ་བ་དེ་ལྟར་སྔ་ནས་ཤེས། །ལོག་པར་རྟོག་བརྟགས་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །རྗེས་སུ་འཇུག་པའང་དེ་བཞིན་ཤེས། །དེ་བཞིན་ཉིད་དབྱིངས་སྣ་ཚོགས་མང་པོའི་ཐབས་སུ་སྣང་། །ཐབས་ཉིད་སྒྱུ་མ་མིག་ཡོར་ཆུ་ཟླ་གཟུགས་བརྙན་བཞིན། །དེ་ཉིད་རང་རིག་ཡེ་ཤེས་ཆགས་མེད་སྣ་ཚོགས་སྣང་། །ཐབས་དང་ཤེས་རབ་ལྡན་པ་མཆོག་གི་གནས་གྱུར་པས། །ཇི་ལྟར་སྤྱད་ཀྱང་ཟད་མེད་གཉིས་འགྲུབ་སྒྲིབ་མི་འགྱུར། །ཤེས་རབ་ཐབས་ཆེན་མཆོག་ལ་ཡེ་ནས་རོལ་པ་ཡིན། །བྱང་ཆུབ་སེམས་སུ་རྒྱུ་གཅིག་པས། །རྩ་བ་སྙིང་རྗེ་ཆེན་པོ་འབྱུང་། །སངས་རྒྱས་སེམས་ཅན་གཅིག་རྟོགས་ན། །སྙིང་རྗེ་ཆེན་པོ་སྐྱེས་ཤེས་བྱ། །བརྡལ་ཆེན་བློ་ནི་ཀུན་ཏུ་སྣང་། །ཐབས་ཆེན་ཀུན་མཛད་འོད་གསལ་བྱམས། །ཐམས་ཅད་དགྱེས་མཛད་དབྱིངས་མ་གདུང་། །སེམས་ཅན་མ་ལུས་ཐམས་ཅད་ལ། །སྙིང་རྗེའི་ཐག་པ་མ་ཆད་པར། །ཉོན་མོངས་ལས་ལས་སྒྲོལ་བྱེད་ཅིང་། །བྱམས་པ་དག་གིས་མཉེས་པར་གྱིས། །དེ་བཞིན་འཁོར་བའི་བརྩོན་ར་ལ། །སྙིང་རྗེའི་ཞགས་པ་ཆེར་བརྐྱང་ནས། །ཉོན་མོངས་འདམ་ནས་འདྲེན་པར་བྱེད། །སྙིང་རྗེ་ཆེན་པོ་སྐྱོ་མ་བྱེད། །དེ་བཞིན་སྐྱེ་བོ་ཕལ་རྣམས་ལ། །ལས་ཀྱི་སྒྲིབ་པས་མི་གོས་ཤིང་། །ཐམས་ཅད་མངོན་པར་སངས་རྒྱས་པར། །དགའ་བ་དག་ལ་འགྱོད་མ་བྱེད། །སེམས་ཅན་ང་དང་བདག་མེད་ལ། །ཐུགས་རྗེས་གཉིས་རྟོག་མི་འབྱེད་དེ། །བུ་གཅིག་འདྲ་བར་བློ་གཞག་བྱ། །ཐམས་ཅད་དྲི་མ་མེད་པར་བྱ། །སྔོན་རྫོགས་རྐྱེན་འཕྲད་སྔོན་བཞིན་ཏེ། །རྣལ་འབྱོར་ཉིད་ལ་གཞན་དོན་རྫོགས། །དམིགས་པ་བདུན་གཉིས་གདུལ་བྱ་དང་། །ངོ་བོ་ལས་དང་ཕན་ཡོན་གྱིས། །ཕྱོགས་གཏན་མེད་དེ་ཐུན་མོང་གི །ཆེན་པོ་དག་ལས་བླར་འགྱུར་ཡིན། །བདག་ཕྱིར་སྤྱོད་ཡུལ་ཐམས་ཅད་ཀུན། །ཡེ་ཤེས་སྒྱུ་མ་རང་སྣང་ཕྱིར། །ཕྱི་ནང་སྒྲིབ་མེད་གསལ་བའི་ངང་། །ཡེ་ཤེས་བློ་བརྟན་ཤིན་ཏུ་བདེ། །ལོངས་སྤྱོད་ལྔ་ལྡན་ཐམས་ཅད་ལ། །གཙང་དང་དམེ་བའི་བློ་མ་བྱེད། །ཐམས་ཅད་ཡེ་ཤེས་རོ་གཅིག་པས། །གཉིས་སུ་མེད་པས་ཤིན་ཏུ་བདེ། །དེ་བས་སྤྱད་དང་མི་སྤང་ལེན། །འདོད་ཡོན་ལྔ་སོགས་ཡེ་ཤེས་རོལ། །ཐུབ་ཆེན་སྟོན་པའི་སྤྱོད་ཡུལ་ནི། །ཇི་ལྟར་དམིགས་པ་བཞིན་དུ་འགྲུབ། །ཆོས་རྣམས་ཐམས་ཅད་དམིགས་སུ་མེད། །ཡེ་ཤེས་སྒྱུ་མ་ཅིར་ཡང་འགྲུབ། །ཟག་མེད་ཟབ་པས་དོན་རྟོགས་ན། །དག་པར་མ་གྱུར་གང་ཡང་མེད། །ཡེ་ཤེས་མ་བཅོས་ཀུན་ཏུ་གསལ། །རང་བཞིན་རྣམ་པར་དག་པའོ། །དེ་ཕྱིར་སྤྱོད་ལམ་ཐམས་ཅད་དུ། །སྒྱུ་མའི་ཡེ་ཤེས་འདའ་མི་བྱ། །རྩ་བ་ཡན་ལག་ཐམས་ཅད་ཀུན། །སྔ་མ་བཞིན་དུ་ནུས་པ་འཕེལ། །དེ་ལྟར་སྒྱུ་མ་རྟོགས་གོམས་པས། །འཁོར་བའི་ཆོས་ལ་ཚད་མེད་པའི། །བྱང་ཆུབ་སེམས་ཀྱིས་འཕྲོག་པར་འགྱུར། །མ་འཁྲུལ་འཁྲུལ་ལ་ཡ་མཚན་སྐྱེ། །དོན་མེད་འདུག་ལའང་དེ་བཞིན་ཏེ། །རྣམ་གསུམ་སྔ་ལས་འཕེལ་བར་སྣང་། །ཉམས་རིམ་འཕེལ་བའི་མཐའ་རྟགས་ནི། །ཤིང་བལ་ལྟ་བུར་ཡང་བ་དང་། །ལུས་ཀྱི་བཟོད་པ་ཕྲ་ཐོབ་ཅིང་། །ཁམས་བདེ་མི་བདེ་སྙོམས་པ་དང་། །ཕལ་ཆེར་ཡོད་ཅིང་ཆོས་བརྒྱད་སྙོམས། །དེ་བས་མང་དང་འབྲིང་ལ་མཉམ། །ཀུན་ཀྱང་སྔ་ལས་གྲངས་འཕེལ་ཞིང་། །ངོ་བོ་གསལ་ལ་ཡུན་རིང་བའོ། །ལྷན་ཅིག་དྲུང་འདུག་ཕ་རོལ་གྱི། །མངོན་ཤེས་འཕེལ་དང་ཅུང་ཟད་བརྟན། །གཞན་ཡང་ཤེས་པ་ཅུང་ཟད་འབྱུང་། །དེ་བས་རྣལ་འབྱོར་བརྟན་པར་བྱ། །འདི་ཚེ་སྤྱོད་ཡུལ་ཐམས་ཅད་ཀུན། །རྨི་ལམ་དུ་ཡང་སྒྱུ་མར་མཐོང་། །སྙིང་རྗེས་གང་བ་མཐོང་བ་དང་། །བྱིན་བརླབས་དབང་བསྐུར་མང་མཐོང་དང་། །བདུད་ཀྱི་སྤྱོད་ཡུལ་མཚན་མར་ཐོབ། །དེ་སོགས་སྣང་ཡང་ཆགས་མི་བྱ། །སྙིང་རྗེ་ཆེན་པོ་གོམས་བྱས་ན། །རྣལ་འབྱོར་དོན་ཆེད་རྟོགས་པ་ཡིས། །དུས་མཐའ་མེད་པར་དེ་ལྟར་བསྒོམ། །ཡོན་ཏན་ནམ་མཁའི་མཐའ་དང་མཉམ། །སྤྱོད་ཡུལ་སངས་རྒྱས་ཉིད་དང་གཅིག །རྒྱུ་སྤྱོད་བསོད་ནམས་ཚོགས་ཆེན་ལྡན། །དེ་མིན་མ་ཆགས་ཡེ་ཤེས་ཆེ། །རྣལ་འབྱོར་ཕྱི་མ་བཙལ་བ་མེད། །ཉི་འོད་ས་བོན་སྐྱུར་སྒྲ་བཞིན། །འཕོ་བ་མེད་བཞིན་འགྱུར་སྣང་ཚེ། །སྒྱུ་མ་བརྟན་བྱས་ལས་རྒྱུན་གཅོད། །འབྲེལ་པས་ལམ་དང་བཀོལ་མི་འགྱུར། །ཕྱི་མའམ་ལན་གྲངས་གཞན་དག་ལ། །མི་ལྡོག་དབང་སྒྱུར་རིགས་སུ་ངེས། །ལམ་འདིར་ཆ་རྐྱེན་རྫོགས་བསྒྲུབས་པས། །མཚན་དང་དཔེ་བྱད་ཀུན་ལྡན་པའི། །དབང་ཕྱུག་ཆེན་པོའི་གནས་ཉིད་དུ། །མངོན་དུ་འབྱུང་བའི་ཐེ་ཚོམ་མེད། །མ་རྟོགས་ལེ་ལོ་སྙོམ་ལས་བྱས། །དོན་མ་གྲུབ་པར་ངན་སོང་འགྲོ །སྙིང་རྗེ་ཆེན་པོའི་རྣལ་འབྱོར་བསྟན་པའི་ལེའུ་སྟེ་བཞི་པའོ།། ༈ །།གཉིས་མེད་ངང་དུ་ཕྱག་བཙལ་ནས། །ཕྱག་རྒྱ་གཅིག་པའི་རྣལ་འབྱོར་བཤད། །གང་དག་རྡོ་རྗེ་གསུམ་སྒོམ་པའང་། །སྔ་བར་འདས་པའི་ལུས་ཀྱིས་ཤེས། །སྤྱི་ཡི་ལམ་སྔོན་རྫོགས་པ་ཡིས། །འདི་ཉིད་སྒྱུ་མཐར་མངོན་བྱ་ཞིང་། །ལུགས་སོགས་མཚན་མའི་ཕྱག་རྒྱ་གཞག །དེ་ལ་ཡན་ལག་བརྒྱད་སྟོན་བཞིན། །འབྲས་བུ་ཡོངས་སུ་རྫོགས་བྱ་དང་། །སྤྲོས་པའི་རྒྱུ་ཡིས་ཐོབ་བྱ་དང་། །སྒྱུ་སྟོང་རྟོག་ཞེན་དབང་དུ་བྱ། །རྟོག་པའི་ཕུང་སོགས་གནས་སྒྱུར་ཞིང་། །གཞན་དག་སྨིན་པར་བྱ་བའི་ཕྱིར། །ཕྱག་རྒྱའི་རྣལ་འབྱོར་ཤིན་ཏུ་གཅེས། །དེ་ལ་འཇུག་ཐབས་རྣམ་གཉིས་ཏེ། །སེམས་སྦྱངས་པ་དང་ལྷར་བསྐྱེད་པའོ། །སྔ་མ་གདམས་ངག་ཤེས་རབ་ཀྱིས། །འཇུག་པའི་གཞི་པོ་འདི་ཉིད་དེ། །ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བརྟན། །དེའམ་ཡང་ན་ཐུགས་ཡེ་གེ །དེ་བཞིན་ཡང་དང་ཡང་གོམས་ནས། །ཕྱི་ནང་སྣོད་བཅུད་ཧཱུཾ་དུ་བསྡུ། །ཡན་ལག་རྣམ་ཤེས་ཡེ་ཤེས་ཕྱིར། །ཡི་གེ་ཧཱུཾ་དུ་ཤིན་ཏུ་བསྡུ། །ནྲྀ་ཡི་མིག་གིས་བལྟར་ཡོད་པར། །འདྲིས་ནས་བདག་གཞན་དོན་ཕྱིར་སྤྲོ། །མཆོད་དོན་རྫོགས་ནས་སླར་བསྡུས་ཏེ། །ཧཱུཾ་ཉིད་མི་དམིགས་དབྱིངས་སུ་གསལ། །གོམས་པར་བྱ་བ་ཤིན་ཏུ་གཅེས། །ཕྱི་མ་ཚངས་པ་སྲིན་པོའི་ཚུལ། །རྫོགས་པར་བྱ་བས་ཟུང་དུ་འགྱུར། །ཚངས་པའི་ཆ་ལུགས་རྫོགས་བྱ་བའང་། །གང་སྒྲུབ་ཡི་གེ་སོ་སོ་སྟེ། །སྤྱིར་ནི་གང་བསྒོམས་ཀུན་ཏུ་འདྲ། །རྡོ་རྗེ་སེམས་དཔའ་ཉིད་དུ་འདུ། །འདི་ལྟར་དེ་ཉིད་གོམས་བྱ་བ། །སྔོན་དུ་མི་དམིགས་ངང་ཉིད་ལས། །ཨ་དཀར་གསུང་གི་ཕྱག་རྒྱ་འབར། །ཤིན་ཏུ་འཚེར་བར་གསལ་བསྒོམས་ལ། །ཐམས་ཅད་ཨར་ནི་གྱུར་པར་བསྒོམ། །དེ་བཞིན་ཉིད་དུ་འདྲིས་གྱུར་ནས། །ཨ་ལས་མ་ཡི་དཀྱིལ་འཁོར་སྤྲོ། །ཨ་མ་གསལ་བར་འབྱོར་གྱུར་ནས། །ཉི་ཟླ་ག ང་བ་སྒྲིལ་མར་བསྒོམ། །ཧྲཱིཿགསལ་པདྨ་ཆགས་མེད་བསྒོམ། །རིན་ཆེན་འབར་བའི་གཞལ་ཡས་བསྒོམ། །ཉི་ཟླ་གདན་དང་གཞལ་ཡས་ཁང་། །ཐམས་ཅད་བསྡུས་ཤིང་ཕྲ་བར་བསྒོམ། །དེ་དཀྱིལ་ཡི་གེ་ཧཱུཾ་གནས་པ། །མཐིང་ག་འཚེར་ལ་གསལ་བ་ཡི། །འོད་ཟེར་འཕྲོ་བ་རྣམ་པར་བསྒོམ། །འོད་འཕྲོ་དབྱིངས་སུ་སླར་བསྡུས་ནས། །ཤིན་ཏུ་རྡོ་རྗེ་ཕྲ་བར་བསྒོམ། །རྡོ་རྗེ་འོད་འཕྲོ་གསལ་འབར་ནས། །དབྱིངས་སུ་ཡང་ནི་བསྟིམ་པར་བྱ། །དེ་ཉིད་སེམས་དཔའི་སྐུར་གྱུར་ནས། །ཤིན་ཏུ་ཕྲ་ཞིང་འདུས་པར་བསྒོམ། །དེ་བཞིན་གཉིས་མེད་གསལ་གྱུར་ནས། །སྐུ་གཅིག་རྡོ་རྗེ་དྲིལ་འབར་བསྒོམ། །དེ་བཞིན་ཉིད་དུ་གྱུར་པ་དང་། །དབུ་གསུམ་ཕྱག་དྲུག་ཉིད་དུ་བསྒོམ། །རྡོ་རྗེ་འཁོར་ལོ་རལ་གྲི་འབར། །རིན་ཆེན་པདྨ་དྲིལ་བུ་འབར། །ཕྲ་བའི་གཞལ་ཡས་གདན་དང་ལྡན། །གནས་གཅིག་ཡེ་ཤེས་སེམས་དཔའ་བསྒོམ། །སྤྱི་མགྲིན་ཙིཏྟའི་གནས་གསུམ་དུ། །བྱིན་བརླབས་རྡོ་རྗེ་གསུམ་བསྒོམ་བྱ། །དབུ་ཡི་གནས་ལྔར་ཡི་གེ་ལྔ། །ཡེ་ཤེས་ལྔ་དབང་རྫོགས་པས་བརྒྱན། །བློ་ཡི་ཤེས་རབ་ཆེ་ཆུང་གིས། །ཡང་ན་ཕྱག་རྒྱ་ཆེན་པོ་སྟེ། །ཆུ་ལས་ཉ་ལྡང་ཇི་བཞིན་དུ། །བདག་ཉིད་ཕྱག་རྒྱ་ཆེན་པོ་སྟེ། །ཞལ་གསུམ་ཕྱག་དྲུག་རྟག་ཏུ་བསྒོམ། །གཞལ་ཡས་གདན་སོགས་སྔ་མ་བཞིན། །ཡན་ལག་དགུ་ཡང་དེ་བཞིན་ནོ། །དེ་ལ་ཤིན་ཏུ་གོམས་པར་བྱ། །རཀྴའི་ཆ་ལུགས་འཛིན་པའང་། །རིམ་དང་ཅིག་ཅར་སྔོན་བཞིན་ཏེ། །རྡོ་རྗེའི་ཆོ་ག་ཁ་དོག་དང་། །གཞལ་ཡས་ལ་སོགས་བསྒྱུར་ཏེ་བསྒོམ། །ཐུགས་ཀྱི་རིགས་ལས་གཞན་མོས་པའང་། །འབྲུ་བཞིས་སྦྱངས་ཏེ་གདན་གནས་གཅིག །རྡོ་རྗེ་རྣམ་གསུམ་རིགས་སུ་བསྒྱུར། །སྐུ་དང་ཡན་ལག་དེ་བཞིན་ནོ། །རིམ་པས་ཐོབ་པའམ་ཅིག་ཅར་བ། །བརྒྱད་མཐར་བྱིན་ཕབ་ལྷར་བསྐྱེད་ལ། །མཆོད་པ་བྱིན་བརླབས་སྐུར་བསྒོམས་ལ། །ཡན་ལག་ལྡན་རྫོགས་མཆོད་བསྟོད་བྱ། །ཡན་ལག་མ་ཉམས་སྔགས་བཟླས་པའང་། །སྐྱོན་བཅུ་སྤངས་ཏེ་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱ། །སྤྲོ་བསྡུ་བདག་དང་གཞན་དོན་རྫོགས། །ཕྱི་ནང་གསང་བ་གང་མོས་སུ། །བཟླས་པ་ཚད་དུ་ཕྱིན་པར་བྱ། །དུབ་ན་ཡེ་ཤེས་ཐིག་ལེ་བལྟ། །ཉལ་བས་ནང་པར་དེ་ཉིད་ལས། །ཧཱུཾ་སོགས་བསྒྱུར་ཏེ་སྐུར་རྫོགས་པས། །སྔོན་བཞིན་བརྩོན་པས་འདྲིས་པར་བྱ། །གཞལ་ཡས་ལྷ་ཡི་དཀྱིལ་འཁོར་ཡང་། །སེམས་ཀྱི་ཆོ་འཕྲུལ་རང་སྣང་ཕྱིར། །ལྷ་ཡང་དམིགས་མེད་རིག་པ་ཉིད། །གཞི་རྫོགས་སྐུ་དེར་རང་སྣང་བའོ། །རྒྱལ་བའི་རྒྱལ་བ་རྣམས་ཀྱི་སྐུ། །ཀུན་ཏུ་རིན་ཆེན་ལྟ་བུ་སྟེ། །རྫོགས་དང་རྟོག་མེད་རེ་བ་སྐོང་། །ཟད་འཕེལ་འགྲོ་འོང་ཉེ་རིང་མེད། །ཕྱག་རྒྱ་ཡོད་མེད་གྲོལ་མ་གྲོལ། །བདག་ཕྱིལ་ཕྱོགས་ལེན་བླང་དོར་མེད། །བྱིང་རྒོད་སྙོམ་ཙམ་མཉམ་གཞག་པའོ། །མི་མཐུན་འདི་ཚེ་དམིགས་གཟུང་བ། །ཡི་གེ་ནས་བཟུང་རྫོགས་པའི་བར། །ཐུན་མོང་ཀུན་ཏུ་འབྱུང་རགས་ཕྲ། །ཐ་མ་འདི་ལ་སོ་མཐས་བཅད། །ཁྱད་པར་རབ་རིབ་མག་མོག་གྲིབ། །གང་ཚོད་དམིགས་ལ་ཚད་དང་ཚུལ། །གྲངས་དང་ཆ་ལུགས་མདོག་དང་དབྱིབས། །ཁ་དོག་འབའ་ཞིག་རིམ་པར་ནུབ། །དེ་ལྟར་གྱུར་པ་ཚོར་བྱས་ཏེ། །འདུ་བྱེད་རླུང་གིས་བསྐྱོད་མི་བྱ། །དེ་ལྟར་ཟིན་པས་དེ་དག་ཀུན། །ཁྱད་པར་གསུམ་ལའང་སྒྱུ་སྟོང་འདུག །རྗེས་ལས་ཐོབ་པ་མ་སུན་འདུག །དྲུག་ལ་རི་ལྟར་གཏོས་ཆེར་བྱ། །བདུན་ལ་དབྱིབས་ལ་བསྲེག་པར་བྱ། །བརྒྱད་ལ་སྦྱི་མིན་བྲེ་བྲག་གནས། །བྱ་མིན་ལས་ཀུན་དོར་བྱས་ཏེ། །སྤྱོད་ལམ་སྐྱོན་རྣམས་གཏང་བར་བྱ། །གཉིས་ལ་ཞུགས་མོད་རྒྱ་གཅིག་ལ། །གོམས་པས་འཕེལ་བ་གོང་མ་བཞིན། །སྨིག་རྒྱུ་དུ་བ་སྲིན་མེ་ཁྱེར། །མར་མེ་ཉི་མའི་ཚུལ་དང་སྦྱར། །བཏང་སྙོམས་རིམ་དང་བརྩོན་པ་དང་། །སྐབས་ཀྱིས་བླང་དོར་ཉམས་ལས་ཤེས། །འབྲུ་བཞིས་རྟག་ཏུ་མཚམས་བཅད་དེ། །བདག་ཉིད་ཆེན་པོའི་ཚོགས་མཆོད་བྱ། །ནང་གི་སྦྱིན་སྲེག་བླང་བར་བྱ། །གཟུགས་སོགས་ཐིག་ལེའང་ལྷ་མོ་དྲུག །དབང་པོ་ཡུལ་དུས་སྦྱོར་བ་བྱ། །ཞི་ཁྲོ་གང་ཡིན་སྐབས་ཀྱིས་བསྒྱུར། །བདག་ཉིད་ཆེན་པོའི་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །འགྲོ་ཉལ་འདུག་སྡོད་ལོངས་སྤྱོད་དང་། །ཉོན་མོངས་སྡུག་བསྔལ་ཚེ་ན་ཡང་། །ཐེག་ཆེན་ཕྱག་རྒྱ་མི་བཏང་སྟེ། །སྔོན་བཞིན་སྦྱོར་བས་མྱུར་དུ་འགྲུབ། །རྒྱུ་འབྲས་མཚམས་སྦྱོར་བར་སྐབས་ཀུན། །ཆོས་སྤྱོད་དགུ་ཡི་སྤྲོས་པ་དོར། །རྒྱུད་ལ་ལྡན་ཡང་བླང་བྱ་མིན། །མཚན་མའི་གཡེང་བ་ཡིན་ཕྱིར་རོ། །རྡོ་རྗེ་གསུམ་བསྒོམ་ཕྱག་མི་བྱ། །ཕྱག་རྒྱའི་རྣལ་འབྱོར་སྤྱོད་པ་ལ། །དོན་ལྡན་མ་ཉམས་དག་བྱས་ཏེ་། །བརྩོན་འགྲུས་ཆེར་བསྐྱེད་མྱུར་བར་འགྲུབ། །ལྷ་ལ་ལྷ་རོལ་བསོད་ནམས་ཏེ། །སྤྱོད་ལ་མ་ཆགས་གཉིས་མེད་པའོ། །གཞན་ཕྱིར་འཕྲོ་འདུ་རིམ་པར་རྫོགས། །རྐྱེན་དང་འཕྲད་པས་མི་འདོར་ཏེ། །དུས་མིན་གཞན་ཕྱིར་སྤྲོས་པའང་ལེན། །གང་དང་འཚམ་པར་དོན་རྫོགས་བྱེད། །བདག་ཕྱིར་ཐུན་མོང་མཆོག་གྲུབ་རྣམས། །འདི་བརྟན་སྦྱོར་བས་ཐེ་ཚོམ་མེད། །འདི་ཚེ་ས་གཞི་ཀུན་ལྡན་མོད། །གསུང་གི་གཞི་ལ་ལྷུར་བྱ་ཞིང་། །ཕྱག་རྒྱ་ཆེན་པོའི་རྣལ་འབྱོར་དུ། །སྤྱོད་ཡུལ་ཀུན་ཏུ་བསྡམ་པར་བྱ། །ཕྱི་ནང་གས ང་བ་ཤིན་ཏུ་འཕེལ། །ཐོབ་དང་བརྟན་པའི་ཆར་འགྱུར་ཏེ། །ལོངས་སྤྱོད་ཞེན་པ་མེད་པ་དང་། །དབང་པོ་ཡུལ་དུས་གོམས་པ་དང་། །རྒྱུ་བ་ཆད་དང་ཐུན་མཚམས་བྲལ། །དྲོད་ཀྱི་བྱེ་བྲག་ཀུན་དང་ལྡན། །རྟགས་ཆེན་གོམས་མཐར་མཚན་མ་ལྔ། །དངོས་སུ་མཐོང་དང་རྡོ་རྗེ་གསུམ། །སྐྱེ་མཆེད་མཐོང་བ་མཚན་མ་སྟེ། །གྲུབ་པ་དང་པོའི་རྟགས་ཞེས་བྱ། །དམིགས་པ་རྒྱུ་ཆེན་མངོན་ཤེས་ཀྱང་། །གྲངས་དང་ལུས་གྱིས་བླ་ན་མེད། །ཉི་ཤུ་རྩ་ལྔའི་མངོན་ཤེས་ཀྱང་། །གཡོ་ཐོབ་འབྱུང་བར་ཐེ་ཚོམ་མེད། །ལུས་ངག་སེམས་མཐུའི་རྟགས་རྣམས་ཀྱང་། །ཆོ་འཕྲུལ་བཞི་ཚུལ་གཡོ་ཐོབ་བྱེད། །གཞན་ཡང་སྔོན་བས་གསལ་བརྟན་པ། །རྣལ་འབྱོར་ལྷག་པའི་སྟོབས་ཀྱིས་འཐོབ། །སྤྱོད་ལམ་ཉིད་དུ་ལེགས་ཉེས་ཀུན། །གསལ་བར་འབྱུང་ཞིང་ཤིན་ཏུ་བརྟན། །བསམ་གཏན་འབད་པས་བཟླས་པ་ཡིས། །སྒྲུབ་པ་པོས་ནི་རྟག་ཏུ་མཐོང་། །སངས་རྒྱས་མཐུ་དང་མཚུངས་པར་མཐོང་། །སངས་རྒྱས་ལོངས་སྤྱོད་རྫོགས་པའི་སྐུ། །བདག་མེད་པར་ནི་མྱུར་དུ་མཐོང་། །སེམས་དཔའ་ཆེན་པོ་ཁམས་གསུམ་པས། །མཆོད་པ་བྱེད་པར་དེས་མཐོང་ངོ་། །ཡེ་ཤེས་ཆེན་པོ་འོད་འདྲའི་གཟུགས། །སངས་རྒྱས་བྱང་ཆུབ་སེམས་དཔའ་ཡིས། །འདོད་པའི་ཡོན་ཏན་ལྔ་རྣམས་ཀྱིས། །རྟག་ཏུ་མཆོད་པ་བྱེད་པར་མཐོང་། །རྡོ་རྗེ་སེམས་དཔའི་གཟུགས་ཆེན་དང་། །གྲངས་ཆེན་རྡོ་རྗེའི་མཆོག་དག་ཏུ། །རྨི་ལམ་དག་ན་རང་གཟུགས་མཐོང་། །གྲགས་ཆེན་རྡོ་རྗེ་གསང་དབང་དང་། །བྱང་ཆུབ་སེམས་དཔའ་འཁོར་ལོ་ཅན། །སངས་རྒྱས་ཆེན་པོ་ཕྱག་འཚལ་བའི། །རྨི་ལམ་འདི་དག་མཐོང་འགྱུར་བ། །ལུས་ངག་སེམས་ཀྱི་མཐུ་ལས་སྐྱེས། །རྒྱན་རྣམས་ཐམས་ཅད་ཡོངས་རྫོགས་པའི། །ལྷ་ཡི་བུ་མོ་ཡིད་འོང་དང་། །ཁྱེའུ་བུ་མོ་དག་མཐོང་ན། །དེ་ནི་དངོས་གྲུབ་ཐོབ་པར་འགྱུར། །ཕྱོགས་བཅུའི་སངས་རྒྱས་ཐམས་ཅད་རྣམས། །ཞིང་ན་གནས་པ་ངེས་པར་མཐོང་། །ཐུགས་ནི་དགྱེས་པར་གྱུར་ནས་ཀྱང་། །ཆོས་མཛོད་ཡིད་དུ་འོང་པ་སོགས། །ཆོས་ཀྱི་འཁོར་ལོ་སྒྱུར་བའི་སྐུ། །སེམས་ཅན་ཀུན་གྱིས་ཡོངས་བསྐོར་བ། །བསམ་གཏན་རྡོ་རྗེ་ལ་གནས་པའི། །དམ་ཚིག་སྦྱོར་བས་མཐོང་བར་འགྱུར། །སྣ་ཚོགས་ཀུན་དགའ་སྐྱེད་མོས་ཚལ། །ལྷ་ཡི་བུ་ལ་སོགས་པས་རྒྱན། །སངས་རྒྱས་ཀུན་གྱིས་བྱིན་བརླབས་པ། །བསམ་གཏན་དམ་ཚིག་ཅན་གྱིས་མཐོང་། །སངས་རྒྱས་བྱང་ཆུབ་སེམས་དཔའ་ཡིས། །དེ་ནི་མངོན་པར་དབང་བསྐུར་མཐོང་། །རིག་འཛིན་རྒྱལ་པོ་ཆེན་པོ་ཡིས། །མཆོད་པ་བྱེད་བར་དེས་མཐོང་ངོ་། །རྡོ་རྗེ་ལས་བྱུང་སྣ་ཚོགས་པའི། །རྨི་ལམ་དྲི་མེད་དག་མཐོང་ན། །སྐུ་གསུང་ཐུགས་ཀྱི་རྡོ་རྗེ་ལས། །སྐྱེས་པ་བླ་ན་མེད་པ་འགྲུབ། །གདོལ་པ་ཁྱི་ཡི་སྦྱོར་ལ་སོགས། །རྡོ་རྗེ་འཛིན་པས་མཐོང་ན་ནི། །བློ་ལྡན་རྡོ་རྗེ་སེམས་དཔའ་ཡི། །སེམས་ཀྱི་གནས་ནི་འགྲུབ་པར་འགྱུར། །ཡི་གེ་ཕྱག་རྒྱ་རྣམ་གཉིས་ཀྱི། །སྐྱེ་མཆེད་མཐོང་བའང་དེ་བཞིན་ནོ། །ལྷ་ཡི་སྐུ་ནི་གསལ་བསྒོམས་ན། །བསོད་ནམས་ཚོགས་ཆེན་ཐོབ་པར་འགྱུར། །དེ་ཉིད་ཆུ་ཟླའི་ཚུལ་ཤེས་ན། །ཡེ་ཤེས་ཚོགས་ཆེན་ཐོབ་པར་འགྱུར། །བདག་ཉིད་ལྷ་དང་མཉམ་སྦྱོར་བས། །ཡོན་ཏན་ཆུང་ཡང་འགྲུབ་པར་འགྱུར། །ཡེ་ནས་མཉམ་ཉིད་སྦྱོར་བས་སུ། །ལྷ་ཉིད་དུ་ནི་རྟག་ཏུ་བསྒོམ། །བདེ་གཤེགས་ཀུན་དང་མཉམ་སྦྱོར་བས། །དཀྱིལ་འཁོར་ཀུན་དང་མཉམ་པར་འགྱུར། །དཀྱིལ་འཁོར་ཀུན་དང་མཉམ་པའི་ཕྱིར། །སྐུ་གསུང་ཡེ་ཤེས་ལྔ་རྫོགས་འགྲུབ། །ཡི་དམ་ལྷ་ཡི་མཚན་ཉིད་ནི། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་རྡོ་རྗེའི་བདག་པོའི་ཕྱིར། །ལྷ་སྤངས་དགེ་སྤྱད་དོན་མེད་འགྱུར། །དམ་ཚིག་བསྲུང་དང་སྔགས་བཟླས་དང་། །ཕྱག་རྒྱ་རྒྱུན་མི་བཅད་པ་བཞི། །བརྩོན་འགྲུས་ཆེ་ཞིང་བརྟན་པར་ཟུངས། །རྣལ་འབྱོར་བརྩོན་འགྲུས་ཆུང་གྱུར་ན། །མི་འགྲུབ་ཉེན་ཡང་ཆེ་བར་གསུངས། །ཇི་ལྟར་རལ་གྲི་སོ་ལ་ནན་ཏན་དུ། །ལེགས་པར་མ་བཟུང་ལག་པ་གཅོད་པར་འགྱུར། །དེ་བཞིན་ནན་ཏན་མེད་པའི་གསང་བསྔགས་པ། །ཕུང་བའང་ཡང་ན་འབྲས་བུ་མེད་པར་འགྱུར། །དེ་བས་བར་ཆད་བརྩོན་མེད་ན། །དཔེར་ན་ས་བོན་འཚིག་པ་ལས། །འབྲས་བུ་འདོད་པ་དང་འདྲ་སྟེ། །བསྒྲུབས་པའི་འབྲས་བུ་མེད་པར་འགྱུར། །མི་ཁོམ་འཁོར་བར་བརྒྱུད་པར་འགྱུར། །གང་ཞིག་ཞལ་མཐོང་མོས་པ་ཡི། །བསྙེན་བསྐུར་མཆོད་པའི་བསོད་ནམས་ཀྱིས། །མི་དགེ་མཚམས་མེད་བཅོ་ལྔ་སོགས། །ལས་ངན་སྦྱངས་ཏེ་རིགས་ལ་སྦྱོར། །གང་གིས་མི་རྟག་མཐོང་ན་ཡང་། །ཕྱག་རྒྱ་མ་ཉམས་གསལ་བཟུང་སྟེ། །ལས་ཀྱི་མི་འཁོལ་གང་འདོད་དུ། །ཨ་ཡཾ་སྟོབས་ཀྱིས་བསྐུལ་བར་བྱ། །རྣམ་སྨིན་རིགས་ལ་ཐེ་ཚོམ་མེད། །འོན་ཏེ་ན་ཡང་རིམ་པ་ཡིས། །དེ་ཉིད་བར་ཕྱི་ལན་གྲངས་གཞན། །ཚེ་ཡང་ཕྱི་མའམ་གཞན་ཐོབ་ངེས། །རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡིད་གཉིས་མེད་པ་ན། །དཀྱིལ་འཁོར་ཆེན་པོ་འབར་བར་འགྱུར། །འདི་ལྟར་བསྒོམས་ཤིང་བསྒྲུབས་བྱས་ན། །འབྲས་བུ་མངོན་དུ་མ་བྱུང་ཡང་། །ཚེ་རབས་སྐྱེ་བ་ཐམས་ཅད་དུ། །ལྷ་མི་མཚན་རྫོགས་སྡུག་བསྔལ་སེལ། །བདེ་གཤེགས་འབྱུང་དང་མི་བཀོད་ཞིང་། །ཐེག་པ་དམན་པར་འཇུག་མི་འགྱུར། །བྱང་ཆུབ་གཟུང་ལ་ཞུགས་པ་ཡིན། །དེ་བས་ལམ་འདི་འབྲལ་མི་བྱའོ། །ཕྱག་རྒྱ་གཅིག་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། ༈ །།རང་གི་ལྷ་ལ་ཕྱག་བཙལ་ཏེ། །སྤྲོས་པའི་རྣལ་འབྱོར་བཤད་པར་བྱ། །སྤྲོས་པའི་གཞིའོ་དེ་ལྟ་བུར། །གཞག་པ་དགྲོལ་ཕྱིར་རྒྱས་པར་བཤད། །རྣལ་འབྱོར་རྣམ་གསུམ་སྔོན་རྫོགས་ནས། །ས་ལ་སོགས་ལ་ཕྱག་རྒྱར་བྱས། །རི་མོ་རྒྱུ་བཞིའམ་འབུར་ལུགས་དང་། །འཇིམ་པ་ལས་བྱས་དཀྱིལ་འཁོར་ནི། །ལྷག་པའི་གཟུགས་བརྙན་ཁང་བུ་དངོས། །ཡེ་ཤེས་བྱིན་ལྡན་བསྟེན་པར་བྱ། །མ་ཧཱ་བ་ལིཾ་ཨ་མྲྀ་ཏ། །དམར་ཆེན་ཕྱི་ནང་མཆོད་པ་དགྲམ། །རོལ་མོ་མཆོད་སོགས་ཆ་རྐྱེན་རྣམས། །ཇི་ལྟར་འོས་པ་བཞིན་བསྡུ་བྱ། །ཕྱོགས་བཅིང་བརྒྱད་ཀྱི་རིམ་རྫོགས་ནས། །ལས་ཀྱི་ལྷ་ཡི་རྣལ་འབྱོར་གྱིས། །མཆོད་རྫས་བྱིན་གྱིས་བརླབ་པར་བྱ། །བདུད་རྩིའི་ཆུའི་བསངས་བགེགས་བསྐྲད་འདུག །བསོད་ནམས་ཡོངས་སུ་རྫོགས་བྱ་ཞིང་། །སྤྱོད་ཡུལ་བྱིན་གྱིས་བརླབ་པ་དང་། །འཁོར་ལོའི་ས་མཐར་དབྱུང་བ་དང་། །ཚོགས་ལ་དུས་ཀྱིས་བསྒྲུབ་ཕྱིར་བསྒོམ། །དགུག་གཏང་བཅིངས་དགྲོལ་གསོ་བསད་དང་། །ཕམ་རྒྱལ་ཏིང་འཛིན་འདིས་བྱེད་ཕྱིར། །གང་དག་གདུལ་བྱའི་ཇི་སྙེད་པ། །སྤྲོས་པའི་ལས་ཀྱིས་གདོན་ཕྱིར་རོ། །གཅིག་ནས་སྤྲོས་པའང་རྣམ་གཉིས་ཏེ། །རྗེས་སུ་མཐུན་པར་ཞི་དང་ཁྲོ། །དེ་རེ་རེ་ཡང་ཚུལ་གཉིས་ཀྱིས། །བློ་དང་ལྡན་པར་འཚམ་སྟོན་ཡིན། །སྔ་མ་རིམ་དང་ཅིག་ཅར་བར། །ཕྱེ་བས་ཕྱི་མ་བཞིན་འཇུག་པ། །ཉི་ཟླ་གཟའ་སྐར་དུས་གཅིག་ཏུ། །ཆུ་དཀྱིལ་དང་བར་གསལ་བ་བཞིན། །སྐུ་གསལ་སྐད་ཅིག་འོང་དུ་འབར། །སྙིང་པོ་བརྗོད་པས་འཁོར་ལོར་ཤར། །དེ་སྔོན་བསྟན་པ་བཞིན་འཇུག་པ། །མཐོང་དང་སྔ་མའི་རྣལ་འབྱོར་སྟོབས། །ཐོབ་པས་ཤེས་བྱ་སློབ་ཚུལ་དུ། །དུ་མ་གཅིག་གིས་གསལ་བར་བྱེད། །མ་བསྒྱུར་རྣལ་མའི་དཀྱིལ་འཁོར་ལ། །འཁོར་ལོ་ཚོམ་བུ་གྲངས་ཞལ་ཕྱག །དང་པོ་བཅོ་བརྒྱད་བཞི་བཅུ་གཉིས། །རྒྱས་པའི་དཀྱིལ་འཁོར་རིམ་པར་སློབ། །གཉིས་པ་བདག་ཅག་ཡབ་ཡུམ་ཉིད། །གནས་པའི་འཁོར་ལོ་གསལ་བྱས་ཏེ། །གདན་ལྡན་དབུས་ན་བདག་པོ་གནས། །དེ་ལ་སེམས་དཔའ་ཁྲོ་བོས་བསྐོར། །བརྟན་ནས་མདུན་རྒྱབ་སྐུ་གསུང་ཐུགས། །འཁོར་ལོ་རྫོགས་པ་འབྲུ་གསུམ་བརྟན། །མི་ཡི་དབང་དུ་ཚོམ་བུ་གསུམ། །ཤིན་ཏུ་གོམས་པར་བྱ་བ་ཡིན། །བརྟན་ནས་གཡས་དང་གཡོན་ཉིད་དུ། །ཡོན་ཏན་འཕྲིན་ལས་དཀྱིལ་འཁོར་གཞག །རྣལ་འབྱོར་དབང་དུ་ཚོམ་བུ་ལྔ། །ཤིན་ཏུ་འདྲིས་ནས་དུས་ཚོགས་སྦྱར། །གསུམ་པ་རྩ་བའི་སྐུ་ཉིད་དུ། །བརྟན་ནས་སྐུ་གསུང་གཙོ་བོར་གསལ། །གསུམ་འཚོར་མེད་ནས་ཡོན་ཏན་ལས། །ལྔ་རྫོགས་ཡབ་ཡུམ་ཟུང་བརྟན་ནས། །ལྔ་པའི་དོན་སྤྲོས་བཞི་བཅུ་གཉིས། །མ་བཅོས་ངང་གིས་གནས་པ་ལ། །ཡེ་ཤེས་ལྷག་པའི་དཀྱིལ་འཁོར་བསྒོམ། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །སྟངས་དཔྱལ་གཉིས་ཀྱི་ཕྱག་རྒྱ་དང་། །སངས་རྒྱས་སྟོང་གི་དཀྱིལ་འཁོར་ཡང་། །རི་རབ་ཏིལ་འབྲུའི་ཚུལ་བཞིན་དུ། །དཔེ་བྱད་མཚན་གྱིས་རྒྱན་སྤྲོས་པའོ། །དེ་ལྟར་གཙོ་མཆོག་ལྡན་བྱས་ནས། །བྱ་བྱེད་རིགས་བཞིའང་སྟོང་བསྒོམ་བྱ། །བཅུ་གཉིས་དྲུག་གིས་འོད་འཕྲོ་འབར། །ཉི་ཁྲི་བཞི་སྟོང་དུས་གཅིག་གསལ། །ཕྱོགས་བཅུ་མ་ལུས་གཞལ་ཡས་ཁང་། །ཉི་ཟླ་གཟའ་སྐར་གདན་དང་རྒྱན། །བདེ་གཤེགས་དཀྱིལ་འཁོར་མ་ལུས་བསྒོམ། །བསམ་ཡས་ལྷུན་གྲུབ་ཉིད་ལ་སློབ། །བཞི་པ་གཅིག་ཞལ་གསུམ་ཕྱག་དྲུག །བརྟན་ནས་གསུམ་པའང་དེ་བཞིན་ཏེ། །ལྔ་ཡང་རྗེས་སུ་མཐུན་གོམས་ནས། །སྤྲོས་པའི་ཞལ་ཕྱག་རྫོགས་གསལ་བའོ། །བསྒྱུར་བའི་འཁོར་ལོའང་དེ་བཞིན་ཏེ། །དང་པོ་ལྔ་བཅུ་བརྒྱད་གོམས་ནས། །དྲུག་བཅུ་རྩ་བརྒྱད་དེ་བཞིན་ཏེ། །དབུས་ཀྱི་ཧེ་རུ་བཞི་པོ་ལ། །སྐུ་གསུང་ཁྲོ་བོ་མདུན་རྒྱབ་གསལ། །དེ་བརྟན་འཁོར་དང་བཅས་པར་བསྒོམ། །སྐུ་གསུང་ཐུགས་ལ་བརྟན་བྱས་ནས། །གཡས་གཡོན་ཡོན་ཏན་ལས་ཁྲོ་བོ། །ཡབ་ཡུམ་གསལ་ནས་འཁོར་ལོ་ལྷ། །རྫོགས་པར་བསྒོམ་པ་རིམ་བཞིན་དུ། །གསལ་བྱས་མ་སུན་གྱེན་དུ་འཕར། །རྗེས་སུ་མཐུན་པར་འཇིགས་བྱེད་ཀྱང་། །གཅིག་དང་གཉིས་དང་གསུམ་བཞི་ལྔ། །ཡབ་ཡུམ་མཐར་ཕྱིན་འཁོར་ལོའི་ཆས། །ལྔ་བཅུ་ཚོམ་བུའི་གནས་ཡུལ་དང་། །སྒོ་སླས་ཧཱུཾ་ཆེན་བརྒྱ་རྩ་བརྒྱད། །ཡན་ལག་བཀོད་པ་ལྔ་བཅུ་བརྒྱད། །ལྔ་ཆའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞལ་གཅིག་ཕྱག་གཉིས་གསུམ་དྲུག་དང་། །དགུ་དང་བཅོ་བརྒྱད་ཀུན་ལྡན་དང་། །ཉི་ཤུ་རྩ་གཅིག་བཞི་བཅུ་གཉིས། །དགུ་བརྒྱ་སྟོང་བརྒྱད་བརྒྱ་ཞབས་ཕྱག །གྲངས་མེད་བར་དུ་སློབ་བྱེད་པ། །རིམ་ཐབས་བརྗོད་ཀྱི་སྤྱོད་ཡུལ་ནི། །ཉི་ཤུ་གཅིག་དང་དགུ་བརྒྱ་དང་། །གྲངས་མེད་མཐར་ལམ་རིམ་པར་ལྡན། །དེ་ལྟར་གསལ་བའི་ཏིང་འཛིན་གྱིས། །ཞུགས་སློབ་མཐར་ཕྱིན་བར་སྐབས་སུ། །རང་བཞིན་ཡུལ་ལས་དབབ་བྱས་ཏེ། །གཞུག་བཅིང་བརྟན་སོགས་ལྡན་བྱས་ལ། །རྫས་དང་ཏིང་འཛིན་རིམ་བཞིན་མཆོད། །བསྟོད་སྨོས་ལྡན་ནས་བསྙེན་པ་བྱ། །བར་སྐབས་ལྷག་མའི་གནས་བསྐངས་ནས། །དམ་བསྒྲགས་བཅོལ་ཞིང་ལས་ལ་བཀྱེ། །འཁོར་ལོ་བསྡུ་བསྲུང་སྤྱོད་ལམ་ཀུན། །ཁྲོ་ཞིའི་མན་ངག་གཞུང་བཞིན་བྱ། །ཕུང་སོགས་དཀྱིལ་འཁོར་ལྔ་སྣང་བ། །རྒྱ་མཚོའི་གཟུགས་བརྙན་ཇི་བཞིན་དུ། །ཀུན་དངོས་རང་རིག་ལྷར་གསལ་བ། །གཅིག་དང་དུ་མ་ཡོངས་ཀྱིས་མེད། །གསལ་ལ་ཡུལ་མེད་མི་གཡོ་བ། །རྣལ་འབྱོར་ངོ་བོར་རྒྱལ་བས་གསུངས། །རང་བཞིན་སྤྲོས་པས་རྣལ་འབྱོར་སྤྲོས། །དེ་ཡང་གདུག་འདུལ་ཁྲོ་ཞི་སྤྲོས། །འཁོར་ལོ་སྤྲོས་དང་ཕྱག་རྒྱ་སྤྲོས། །ཚོམ་བུ་སྤྲོས་དང་ཞལ་ཕྱག་སྤྲོས། །ཀུན་ནས་སྤྲོས་ཕྱིར་འབྲས་བུའང་སྤྲོས། །སྤྲོས་པས་ཉམས་གསལ་རྣམ་འབྱོར་སྒྲ། །འདི་ཚེ་ལེ་ལོ་རྣམ་གཉིས་དང་། །མཚན་མ་ལྔ་དངོས་མཐོང་འཛིན་དང་། །རྣལ་འབྱོར་བདུད་ཀྱི་ཡུལ་མཐོང་བའང་། །སྤྲུལ་པ་གྲངས་མེད་འགྱེད་པ་མཐོང་། །དམ་པར་འདུན་མཐོང་དམ་པར་སྨྲ། །རྒྱལ་བས་གསུངས་ཀུན་གསལ་མཐོང་དང་། །དུས་གསུམ་གསལ་ཤེས་མཐོང་བ་དང་། །རྒྱུད་དྲུག་ལམ་གནས་ཀུན་མཐོང་དང་། །དེ་ལ་སྙིང་རྗེའི་ཤུགས་འབྱུང་དང་། །ཀུན་ཀྱང་གསལ་བར་མཐོང་བ་དང་། །ཅི་ལའང་ཐོགས་མེད་འགྲོ་བ་དང་། །མཁའ་ལ་བྱ་བཞིན་འགྲོ་འདུག་དང་། །རྒྱལ་བས་ཕྱག་བརྐྱང་ལུང་སྟོན་དང་། །ཀུན་གྱི་སྐད་དུ་ཆོས་སྨྲ་དང་། །སྣོད་བཅུད་བསྟི་གནས་མཐོང་བ་དང་། །སྟོང་གསུམ་མཉམ་པར་བཀོད་པ་དང་། །དེ་ཉིད་རང་བཞིན་གསལ་སྣང་དང་། །ལས་སུ་རུང་བས་ཐོགས་མེད་དང་། །དམ་པའི་དོན་ལ་བསྒོ་བ་དང་། །འཇིག་རྟེན་གཙོ་བོས་མཆོད་འབྱུང་རྣམས། །རང་བཞིན་རྟོགས་ན་དམ་པའི་རྟགས། །མི་ཤེས་དགའ་བྲོད་བྱེད་པ་བདུད། །ཁེ་དང་གྲགས་པས་འཕྲོགས་པ་དང་། །བསྔགས་པ་ཐོབ་པས་མཚན་མས་གཡེང་། །རེ་དང་དོགས་པ་ཅུང་ཟད་ཡོད། །ངའམ་ང་ཞེས་ཆེ་བས་རྒྱལ། །ཐ་མལ་པ་ཡང་ཉུང་ལ་ཕྲ། །རྒྱུ་བའི་གཟུང་འཛིན་བྱེ་བྲག་ཤེས། །ཤེས་འཇུག་འབྱོར་བས་འགོ་ཐོབ་ཅིང་། །ཟུང་དུ་འབྲེལ་བས་བསྐྱེད་མཐར་ཕྱིན། །འབྲས་བུ་ལམ་ཤེས་བརྟན་པ་ཡིས། །བྱ་བ་མེད་པའི་བརྩོན་འགྲུས་བླང་། །མཚན་མ་རང་རིག་ཆོ་འཕྲུལ་པས། །སེམས་ཕྱིར་མཐོང་ལ་རེ་དོགས་མེད། །དཔེར་ན་ནམ་མཁའི་རང་བཞིན་ལ། །ཉི་ཟླ་གཟའ་སྐར་གློག་འགྱུ་དང་། །འཇའ་ཚོན་སྤྲིན་མང་འཁྲུག་འགྱུར་ཡང་། །ནམ་མཁའི་དབྱིངས་ལ་འགྱུར་ཉམས་མེད། །ཆོས་ཀྱི་དབྱིངས་ཉིད་བསམ་ཡས་པར། །སྐུ་གསུང་རྨད་བྱུང་ངོ་མཚར་དང་། །མཚན་མ་སྣ་ཚོགས་སྣང་འགྱུར་ཡང་། །དེ་བཞིན་ཉིད་ལ་འགྱུར་ཉམས་མེད། །རྣལ་འབྱོར་སྟོབས་ཡོན་རྫོགས་འགྱུར་ཡང་། །བདག་གཉིས་མེད་ཤེས་ང་རྒྱལ་མེད། །སྤྱོད་ཡུལ་མཚན་མ་གང་མཐོང་ཡང་། །ཡེ་ཤེས་རང་སྣང་ཉིད་དུ་སྦྱར། །སྣང་བྱེད་སྤྲོས་པའང་འཕེལ་བའི་རིམ། །བསླབ་པའི་རིམ་པ་ཇི་བཞིན་ཏེ། །སྔོན་བརྟན་མོད་ཀྱང་འདི་སློབ་པས། །མ་གོམས་དབང་གིས་རྣམ་པ་ལྔའོ། །གསུམ་ལྔ་ལྷ་གསལ་ཅུང་ཟད་གཡོ། །བར་ཆད་འབྱུང་བ་དང་པོའོ། །དེ་བསལ་ཐུན་གྱི་བཞི་ཆ་གསུམ། །གསལ་ལ་མི་གཡོ་གཉིས་པ་སྟེ། །ཐུན་བརྐྱང་ནུས་པ་གསུམ་པའོ། །དེ་ཉིད་རྐྱེན་དབང་མི་འགྲོ་བ། །བཞི་པའོ་ཁྱད་པར་གང་གནས་པ། །ཤིན་ཏུ་མི་འཕྲོག་ལྔ་པ་སྟེ། །གྲངས་ལ་སྦྱར་ན་མཐར་ཐལ་འགྱུར། །དེ་བས་ཉམས་ཚོན་ཟིན་པ་གཅེས། །རྣལ་འབྱོར་ཆེན་པོའི་ལྟ་སྤྱོད་ནི། །ཇི་ལྟར་སྤྱད་ཀྱང་རང་བཞིན་མེད། །མཁའ་ལ་བྱ་ཆེན་ལྡིང་བ་བཞིན། །ཆུ་ལ་རྐྱལ་ཆེན་འཕྱོ་བ་བཞིན། །མཁའ་ལ་རླུང་ཆེན་འཕྱོ་བ་བཞིན། །རྣལ་འབྱོར་ལྟ་བ་དེ་ལྟར་བལྟ། །རྣལ་འབྱོར་ཆེན་པོའི་སྤྱོད་པ་ནི། །ཐམས་ཅད་ཀུན་ལ་དབྱེར་མེད་སྤྱོད། །བདེ་བའི་རོ་མཆོག་མྱོང་འགྱུར་ཏེ། །དེ་ལ་སུ་ཞིག་ཆགས་པར་བྱེད། །སྤྱོད་བཞིན་མ་ཆགས་ཡེ་ཤེས་ཡིན། །བདེ་བ་མཆོག་ཉིད་བསོད་ནམས་ཚོགས། །དེ་ལྟ་བུ་ཡི་ངང་དུ་སྤྱོད། །འདི་ནི་སྤྱོད་པ་རླབས་ཆེན་ཡིན། །ལྟ་སྤྱོད་ཡ་ཆར་མ་འགྱུར་པར། །སྔགས་འཆང་རྣམས་ཀྱིས་རྟག་ཏུ་སྤྱོད། །ལྔ་བཞི་སྤང་བྱ་སྨད་སྤྱོད་ཀུན། །བདག་དང་གཞན་ཕྱིར་འཇོལ་ཉག་སྟེ། །གང་ཡང་བྱས་ལ་མ་ཐོག་ཤིང་། །ཚོགས་འགྱུར་འདམ་སྐྱེས་བཞིན་སྤྱོད་ཐབས། །ཡན་ལག་དབང་པོ་རྣམ་ཤེས་ཀུན། །རྣམ་མིན་ༀ་དུ་ཤེས་པར་བྱ། །རྫོགས་པའི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་བོའི་དཀྱིལ་འཁོར་བསྒོམ། །གཟུགས་སྒྲ་དྲི་རོ་རེག་ལ་སོགས། །རྣམ་སྨིན་མཱུཾ་དུ་ཤེས་པར་བྱ། །ཡུམ་གྱི་དཀྱིལ་འཁོར་ཉིད་དུ་བསྒོམ། །ཡང་ན་ཁྲོ་མོའི་དཀྱིལ་འཁོར་བསྒོམ། །སྤྱོད་ཡུལ་ལྷ་དང་ལྷ་མོར་རོལ། །འདོད་ཡོན་ལྔ་པོ་ཐམས་ཅད་དང་། །སྣ་ཚོགས་སྣང་བ་ཐམས་ཅད་ཀུན། །དེ་བཞིན་གཤེགས་པའི་དཀྱིལ་འཁོར་དང་། །གཟུགས་མཛེས་ལྷ་ད ང་ལྷ་མོར་བརྟག །ཐམས་ཅད་ཀུན་ཏུ་བཟང་པོ་ཡི། །འདོད་པའི་ཡོན་ཏན་ལྔ་རྣམས་ལ། །ཐོགས་པ་མེད་པར་སྤྱད་བྱ་སྟེ། །བསོད་ནམས་ཚོགས་ཆེན་ཡིན་པར་བརྟག །དེ་བཞིན་གཤེགས་པ་ལྔར་ཡང་བརྟག །གཞན་ཡང་སྟོང་ཁམས་ཐམས་ཅད་ན། །ཤེས་རབ་དབྱིངས་དང་འདོད་ཡོན་རྣམས། །རབ་འབྲིང་ཐ་མ་ཐམས་ཅད་སྤྱོད། །དང་དུ་བླང་དང་མི་སྤང་བ། །རྣལ་འབྱོར་བ་ཡིས་རྟག་ཏུ་སྤྱད། །ཆགས་པ་མེད་པར་གྱུར་པ་དང་། །དངོས་གྲུབ་ཡ་མཚན་ཆེན་པོ་ནི། །དམ་ཚིག་མདོ་བཤད་ནང་ནས་བྱུང་། །སྤྱོད་ཡུལ་མཐོང་ཐོས་ཐམས་ཅད་ཀུན། །འགྲོ་དང་འདུག་དང་ཉལ་བ་ན། །དཀྱིལ་འཁོར་གཉིས་ཀྱི་རྣལ་འབྱོར་ལས། །མ་ཉམས་དེ་ཡི་དབྱིངས་ན་གནས། ཤེས་རབ་མཆོག་གིས་རྟག་ཏུ་སྤྱོད། །ཡང་ན་དམ་ཚིག་འདི་ལྟ་བུ། །ཇི་ལྟར་སྤྱད་ཀྱང་སྡོམ་མི་འདའ། །ཐམས་ཅད་མ་ལུས་སངས་རྒྱས་ལ། སྒྲུབ་ཅིང་བསྲུང་བར་བྱ་བ་མེད། །དགེ་དང་མི་དགེ་གཉིས་ཀ་མེད། །དེ་ལ་བསྲུང་དུ་རྡུལ་ཙམ་མེད། །གཞན་ཕྱིར་གྲགས་པའི་བསྲུང་བྱ་ཀུན། །གང་ལྟར་འཚམ་པར་འདའ་མི་བྱེད། །རྡོ་རྗེ་སེམས་དཔའི་བཀས་བཤད་པའི། །སྡོམ་པའི་རྩ་བ་ཐམས་ཅད་ཀུན། །དེ་བཞིན་དུ་ནི་མ་བསྲུངས་ན། །ཡཀྵ་ཁྲོ་བོ་མེ་དབལ་གྱིས། །སྙིང་ནས་དྲངས་ཏེ་ཁྲག་འཐུངས་ནས། །ངན་སོང་གསུམ་དུ་སྐྱེ་བར་འགྱུར། །དེ་ཡི་སྡུག་བསྔལ་བཟོད་གླགས་མེད། །དེ་ཕྱིར་ལམ་བཞིར་ལྡོག་ཟག་ཡོད། །ཤིང་བལ་ལྟ་བུར་ཤིན་ཏུ་ཡང་། །དབུགས་ཀྱི་རྒྱུ་བ་ཡུན་རིང་བྲལ། །རྣལ་འབྱོར་མཁའ་ལ་གཟའ་སྐར་བཞིན། །གསལ་ལ་མི་གཡོ་སྤྱོད་ཡུལ་མེད། །ཞར་ལས་བྱུང་བ་ཀུན་རྫོགས་ཕྱིར། །འདི་ཞེས་གྲངས་ཀྱི་ཆ་ལས་འདས། །ལས་སུ་རུང་བའི་རྟགས་རྣམས་ཀྱང་། །སྔོན་བྱུང་སྟོབས་ཀྱི་འཕེལ་བ་དང་། །ཁམས་སྙོམས་རང་ལུས་བདེ་བས་རྒྱས། །འདུ་བ་བཞི་བྲལ་བཟོད་ཐོབ་ཆེ། །མངོན་ཤེས་དྲུག་དང་རྩ་ལྔ་རྫོགས། །རབ་འབྲིང་ཆ་ཡིས་ཡུལ་ཁམས་གླིང་། །ཚུན་ཆད་གསལ་ཞིང་འདུལ་བར་བྱེད། །ཚོགས་དྲུག་དག་པའི་སྟོབས་ལས་གྱུར། །རྫུ་འཕྲུལ་ཉི་ཤུ་ཆ་གཡོ་ཐོབ། །ཐམས་ཅད་སྐད་མཐུན་ཆོས་སྟོན་རྗེས། །ས་གཡོས་ཆོས་སྣང་བྱེད་པ་དང་། །ཡི་གེ་སྒྲར་བྱེད་ཀུན་བརྗོད་པའོ། །འདི་དག་མཐོང་དང་བཅོ་བརྒྱད་དང་། །ཤུགས་སྣང་བརྒྱད་མཐོང་རེ་དོགས་གཞག །རྨི་ལམ་གཅིག་དང་ཆོས་མཐུན་པར། །འབྱུང་བ་གསལ་དང་བརྟན་པས་ཕྱི། །བཟང་པོའི་ལྟས་སུ་ལུང་བསྟན་ཀུན། །ལམ་འདིར་རྫོགས་པར་འབྱུང་བ་ཡིན། །གྲུབ་པའི་རིག་འཛིན་ལམ་འདི་ཉིད། །མཐར་ཕྱིན་རིགས་ཀྱི་རྒྱུ་ཡིན་ཕྱིར། །མཚན་མ་འབྱུང་བའི་ས་ཡིན་ཏེ། །བར་ཆད་མེད་ཚོགས་སྐབས་སུའང་འདིའོ། །ཕུང་པོ་ལྔ་ཉིད་དེ་བཞིན་གཤེགས། །འབྱུང་བ་ལྔ་ནི་རིགས་ཀྱི་ཡུམ། །དབང་པོ་རྣམ་ཤེས་བྱང་ཆུབ་སེམས། །ཡུལ་དུས་བྱང་ཆུབ་ཆེན་མོ་ཡིན། །བདག་རྟོག་རྣམ་བཞི་ཁྲོ་བོ་ཡིན། །རྟག་ཆད་མུ་བཞི་ཁྲོ་མོའོ། །དེ་སེམས་རང་རིག་ཉིད་ཅེས་བྱ། །དེ་བཞིན་མཉམ་རྫོགས་ལྷུན་གྲུབ་པའི། །དེ་བཞིན་གཤེགས་དང་ཡེ་ཤེས་ལྔ། །རང་བྱུང་ཆེན་པོའི་དཀྱིལ་འཁོར་བསྒོམ། །རྟོག་གཉིས་བྲལ་བའི་ཐབས་མཁས་ཀྱིས། །ལྷ་གསལ་དངོས་པོ་མེད་བསྒོམས་ན། །མཐོང་ཐོས་ལ་སོགས་མེད་པའི་ཚུལ། །རང་རིག་ཡེ་ཤེས་གསལ་བསྒོམས་ན། །རང་བཞིན་མེད་ལས་ཅིར་ཡང་འགྲུབ། །རྐྱེན་གྱིས་འགྱུར་བའི་དུས་བྱུང་ན། །སྤྲོས་པ་གང་ཡིན་བཟུང་བ་ཡིས། །ལས་ངན་ལམ་ཞེན་རྒྱུན་བཅད་ནས། །བར་མའམ་ཕྱི་མར་གཉིས་སྦྱོར་འཛིན། །གང་ཞིག་ནུས་ཞན་སྐབས་མེད་ནའང་། །འཕེན་པའི་འབྲེལ་བ་ས་བོན་གྱིས། །ཚེ་རབས་ཀུན་ཏུ་བདེ་ཐོབ་ནས། །གསུང་དང་མི་སྐོལ་སྤྱད་པས་ཐོབ། །སྙོམས་ལས་མེད་པར་བརྩོན་བྱས་ན། །ལམ་དུ་རིག་འཛིན་ཐོབ་པ་ཡང་། །ཆོས་ཉིད་དམ་ཚིག་སྨོན་མཐུ་དང་། །ཡན་ལག་རྫོགས་པས་རིག་འཛིན་འགྱུར། །སྤྲོས་པའི་རྣལ་འབྱོར་རྒྱུན་ཆགས་པའི། །བསོད་ནམས་ཡེ་ཤེས་ལོངས་སྤྱོད་ཀྱིས། །མུན་སྣང་དུག་འགྱུར་ཇི་བཞིན་དུ། །ཡི་གེ་འཁོར་ལོ་ཚོགས་མཆོག་བརྙེས། །སྤྲོས་པའི་རྣལ་འབྱོར་ལ་བསླབ་པའི་ལེའུ་སྟེ་དྲུག་པའོ།། ༈ །།དཀྱིལ་འཁོར་གཉིས་ལ་ཕྱག་བཙལ་ནས། །བར་ཆད་མེད་པར་སྦྱོར་བ་ཡི། །སྒྲུབ་པ་དུས་ཀྱི་ཚོགས་བཤད་བྱ། །བར་ཆད་མེད་པའི་ལམ་སྒྲུབ་པའང་། །བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །རྫོགས་པར་སྐབས་འདིར་ཤེས་པར་བྱ། །འདི་ཡང་ལམ་སྒྲུབ་སྦྱོར་བ་ཡི། །ཆ་ཡི་དང་པོ་བསྙེན་པ་ནི། །བྱང་ཆུབ་སེམས་རྟོགས་འགྲུས་པ་སྟེ། །བསྙེན་པའི་དམ་པ་ཡིན་བྱའི་ཕྱིར། །སེམས་བཅས་སྙིང་རྗེ་མན་ཆད་དོ། །ཕྱག་རྒྱ་གསལ་བ་ཉེ་བསྙེན་པ། །དེ་ཕྱིར་གཅིག་དང་སྤྲོས་པའོ། །སྒྲུབ་པ་ཉིད་ནི་བར་ཆད་མེད། །དུས་ཀྱི་ཚོགས་མཐས་སྒྲུབ་ཆེན་ལེན། །མཐར་ལམ་གང་ཐོབ་གྲུབ་པའོ། །གསུམ་པ་མཆོད་པའི་སྐབས་སུ་ཤེས། །གཉིས་པ་གཙོ་བོ་འདིར་བསྟན་པ། །གཞི་དང་གཞུང་གིས་རྫོགས་པར་འགྱུར། །ཕུན་སུམ་ཚོགས་པ་ལྔ་གཞི་ལ། །བསྙེན་སྒྲུབ་བཞི་ཡིས་གཞུང་བསྲང་བའང་། །གང་དག་མོས་པ་ཇི་བཞིན་དུ། །ཞི་དང་ཁྲོ་བོས་བསྒྱུར་བར་བྱ། །དེ་ལ་སྔ་མ་གནས་དང་དུས། །ཡོ་བྱད་སྟོན་འཁོར་སྒྲུབ་པ་པོ། །སྒྲུབ་ཐབས་ཕུན་སུམ་ཚོགས་པའང་། །བཞི་དང་སྦྱར་བས་གཞུང་རྫོགས་བྱ། །དེ་ལ་སྤྲོས་པ་མཐར་ཕྱིན་པས། །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པའི། །རྣལ་འབྱོར་འཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བསྟེན། །སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། །འཁོར་གྱིས་འགྲུབ་འགྱུར་མི་ལྡན་བརླག །སྡེ་དཔུང་ཆེན་པོས་མི་ཚུག་ཤིང་། །ས་དང་བར་སྣང་ཤིས་པ་དང་། །ལོ་རྒྱུས་རྣམ་གཉིས་ལྡན་པ་དང་། །ཡིད་འོང་ས་བཙལ་རྒྱས་པར་བྱ། །རྙེད་ནས་ཚོམ་བུའི་གྲངས་བཞིན་དུ། །ཆེ་ཆུང་རྐྱེན་དུ་འཚམས་པར་བྱ། །འཁོར་ཁང་ཕྱི་ནང་བར་ལྡན་པའི། །རིན་ཆེན་བྱུག་པས་བསྲུང་བ་དང་། །རིན་ཆེན་སྤྲ་པའི་གཞལ་ཡས་ཁང་། །ཡིད་འོང་བྱ་བ་ཤིན་ཏུ་གཅེས། །ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་ལ། །གསང་མཆོག་དངོས་གྲུབ་མྱུར་བའི་ཕྱིར། །གཟའ་སྐར་ཤིས་པ་བླང་བར་བྱ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱིས་མཆོག་འགྲུབ་ཕྱིར། །རྣལ་འབྱོར་བརྩོན་བཅས་རིམ་བཞིན་བསྒྲུབ། །གོས་རྒྱན་བཟའ་བཏུང་གསང་བ་དང་། །སྒྲུབ་པའི་ཡོ་བྱད་ལྔ་རྣམས་དང་། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་བརྟེན་དང་བར་ཆད་བཟློག །ཡོ་བྱད་དགབ་པ་སྡུག་བྱས་ཏེ། །ཚོ་གསུམ་བཅད་ལ་བྱིན་གྱིས་བརླབ། །སྒྲུབ་ཐབས་ཡན་ལག་བཞི་སྦྱར་བ། །གནས་དང་ལངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོ་དམ་མནོས་བཞིན་དུ་བྱ། །དམ་བཅའ་ལྡན་པས་འདུས་ཏེ་བསྒྲུབ། །ཡང་ན་དཔག་ཚད་རྒྱང་གྲགས་སམ། །སོ་སོ་འཚམ་པར་གཟུགས་བརྙན་བྲི། །རྒྱན་དང་མཆོད་སོགས་འཁོར་བ་དང་། །ཕྱི་རོལ་མཆོད་པའི་ལངས་རྫོགས་ཏེ། །ཕྱི་བཅད་བསྲུང་བསྒོ་རིམ་བཞིན་བྱ། །བསྙེན་པའི་དོན་དུ་སྔོན་བྱ་བ། །རྫོགས་པའི་ལམ་རྣམས་ཟིན་པར་བྱ། །འདུས་པས་ཕྱོགས་བཅིངས་རྫས་བརླབས་ནས། །སྤྱི་འམ་ཡང་ན་རེ་རེ་ཞིང་། །ཚོམ་བུའི་འཁོར་ལོ་རིམ་བཞིན་བསྒོམ། །སེམས་དཔའ་སེམས་མ་ཉིད་དུ་བསྒོམ། །སོ་སོའི་རིགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གཅིག་པའི་ལྷ་རྣམས་བསྒོམ། །དེ་བཞིན་རིགས་དང་རྡོ་རྗེའི་རིགས། །པདྨའི་རིགས་ཏེ་སྐུ་གསུང་ཐུགས། །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གསུམ་པའི་ལྷ་རྣམས་བསྒོམ། །ལྔ་དང་ལྔ་ཡི་སྦྱོར་བ་ཡིས། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་རྣམ་པར་བསྒོམ། །བྱིན་རླབས་དབང་དང་ལྡན་བྱས་ནས། །རང་བཞིན་གནས་ནས་དབབ་བྱས་ཏེ། །གཞུག་བཅིང་བརྟན་བྱས་རིམ་པར་མཆོད། །རྫོགས་ནས་བསྟོད་དེ་བསྙེན་པ་བྱ། །ཟིན་ནས་བསྡུས་ཏེ་རྣལ་འབྱོར་ཚོགས། །ཚུལ་བཞིན་མཆོད་པའི་འཕྲིན་ལས་བྱ། །ནང་ནུབ་མཁའ་འགྲོར་ལྷག་མ་སྦྱིན། །བར་ཆད་བཟློག་ཅིང་བསྙེན་པ་བྱ། །ཟླ་ཕྱེད་ཕྱེད་ཞག་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །དེ་བཞིན་རྒྱུན་གྱི་ཞག་གྲངས་བཞིན། །བར་ཆད་མེད་པར་བསྒྲུབ་པར་བྱ། །སྤྱོད་ལམ་ཡོ་བྱད་ལྔ་སྦྱོད་ཅིང་། །དངོས་སུ་མཆོད་པ་རྣམ་གཉིས་པ། །གཙོ་རུ་དགོས་པ་གང་ཡིན་པ། །ཕྱི་མ་གདུག་པ་འདུལ་བར་ཤེས། །སྔ་མ་རྒྱས་པར་བཤད་བྱ་བ། །གོས་རྒྱན་བཟའ་བཏུང་གླུ་གར་རྣམས། །ཧཱུཾ་དུ་ཤེས་པས་རབ་སྤྱད་ན། །ངོ་མཚར་དཀྱིལ་འཁོར་མཉེས་པའི་ཕྱིར། །གསང་སོགས་ཡོ་བྱད་ལྔ་པོ་རྣམས། །རིག་ཕྱིར་མ་སྐྱེས་ཡེ་ཤེས་གསལ། །ཆོས་ཉིད་ཡེ་ཤེས་རོལ་པར་བསྒོམ། །ཅིག་ཤོས་ཚེ་ནའང་དེ་བཞིན་ནོ། །ཕྱོགས་བཅུ་མཐའ་ཡས་དུས་བཞི་ཡི། །ཐམས་ཅད་དབྱེར་མེད་མཎྜ་ལ། །ཉི་ཟླ་ཤར་བའི་གཞལ་ཡས་ལ། །པདྨ་ཆགས་མེད་གདན་བཏིང་ནས། །རིན་ཆེན་ཟད་མེད་ཕོ་བྲང་ས། །ཆེ་ཆུང་ཚད་དཔག་མེད་པ་ཡི། །བྱང་ཆུབ་བདེ་ལྡན་དཀྱིལ་འཁོར་ལ། །བདེ་ལྡན་བྱང་ཆུབ་རབ་བཀོད་ནས། །མ་ལུས་ཐམས་ཅད་དབྱིངས་བསྡུས་ནས། །ལུས་བསྐྱོད་ཡན་ལག་བསྒུལ་གསིགས་ན། །དབང་པོ་ལྔ་ཡི་དཀྱིལ་འཁོར་ཀུན། །ཕྱག་རྒྱ་ཆེན་པོ་ཡིན་པར་བཤད། །ལྷག་པའི་ཏིང་འཛིན་འབའ་ཞིང་གམ། །བྲོ་སོགས་ཚེ་ན་བསྒོམ་པ་ཡང་། །བྷྲཱུཾ་དང་ཙཀྲའི་དཀྱིལ་འཁོར་དུ། །ཉི་ཟླ་འཕྲུགས་པའི་ས་གཞི་ལ། །པདྨ་ཆགས་མེད་གདན་བཏིང་ནས། །ཐབས་དང་ཤེས་རབ་ཆགས་མེད་ཚུལ། །ཡན་ལག་དབང་པོ་ཐམས་ཅད་ཀུན། །རང་བཞིན་ཡོང་གིས་དག་པ་དང་། །ཏིང་འཛིན་དེ་བཞིན་གཤེགས་པ་ལྔ། །ཡེ་ནས་མ་བཅོས་ཡོང་གིས་ཏེ། །ལྷག་པའི་ཏིང་འཛིན་དཀྱིལ་འཁོར་གྱིས། །དབུ་ལ་དེ་བཞིན་གཤེགས་པའི་འཁོར། །ཡན་ལག་བཞི་ལ་རིགས་བཞིའི་འཁོར། །ཁ་དོག་དབྱིངས་དང་ཕྱག་རྒྱ་དང་། །ཐབས་དང་ཤེས་རབ་གསལ་བསྒོམས་ཏེ། །ཕྱོགས་བཅུར་སྤྲོ་ཞིང་ངན་སོང་སྦྱོང་། །གནས་སུ་བསྡུ་ཞིང་དཀྱིལ་འཁོར་བསྟིམ། །འདས་དང་མ་འདས་ཐམས་ཅད་ཀུན། །བདེ་གཤེགས་ཞིང་དུ་རྣམ་པར་སྦྱོར། །ཡན་ལག་ཆེན་པོ་ལྔ་བསྐྱོད་ན། །རིགས་ལྔའི་དཀྱིལ་འཁོར་མ་ལུས་གཡོ། །འགྲོ་ལྔ་བྱང་ཆུབ་ལམ་དུ་འཛུད། །སྙིགས་མ་ལྔ་ཡང་རྣམ་པར་དག །བཟང་མཛེས་ལེགས་པའི་གོས་བགོས་ན། །འོད་ཟེར་སྣ་ཚོགས་འཕྲོ་བར་འགྱུར། །དེ་ནས་མཐར་ཐུག་མེད་པའི་བར། །ཡེ་ཤེས་ལྔ་ཡིས་བརྒྱན་པར་འགྱུར། །རྒྱན་མཆོག་མཛེས་པས་ལུས་བརྒྱན་ནས། །ཏིང་འཛིན་འོད་འབར་གསལ་བསྒོམ་ཏེ། །ཕྱོགས་བཅུ་གང་བར་དཀྱིལ་འཁོར་སྤྲོ། །བདག་ཉིད་ཆེན་པོའི་དཀྱིལ་འཁོར་ལ། །མི་དམིགས་དབྱིངས་ནས་དཀྱིལ་འཁོར་མཆོད། །འདོད་ལྔ་ཐབས་དང་ཤེས་རབ་གནས། །བདེ་མཆོག་རོ་ཡང་མྱོང་བར་བྱེད། །མ་ཆགས་ཚོགས་ཆེན་གཉིས་དང་ལྡན། །བྲོ་སྟབས་གར་གྱི་ཕྱག་རྒྱ་དང་། །གླུ་དབྱངས་ཚིག་གི་སྒྲ་བསྒྲགས་ན། །ཕྱོགས་བཅུའི་སྐྱེ་གནས་མ་ལུས་ཀུན། །ལྷུན་གྲུབ་རྡོ་རྗེའི་སྐུ་མཐོང་ཞིང་། །ཆོས་ཀྱི་དུང་ཆེན་སྒྲ་ཡང་ཐོས། །སྒྲིབ་གཉིས་བྱང་ནས་བྱང་ཆུབ་འགྲུབ། །བདེན་མཐོང་སྙན་གྲགས་ཚོགས་ཆེན་འགྲུབ། །མ་ཆགས་ཡེ་ཤེས་ཚོགས་དང་ལྡན། །ཐབས་དང་ཤེས་རབ་ཐམས་ཅད་ཀུན། །དབུས་ནས་ཤར་ཕྱོགས་ཁ་བསྟན་ཏེ། །སེང་གེ་སྟབས་ཆེན་མཆོང་པར་བྱ། །དབང་པོ་ལྔ་ལ་ཡི་གེ་ལྔ། །གསལ་བའི་འཕྲོ་འདུས་མངོན་ཤེས་རྫོགས། །འདོད་པ་ལྔ་ལ་ཆག་མེད་རོལ། །བདག་དང་གཞན་དོན་རྫོགས་པར་བྱེད། །ཚོམ་བུ་གསལ་བའི་ཡབ་ཡུམ་རྣམས། །ཕན་ཚུན་འོད་འཕྲོ་བསྟིམ་བྱས་ཏེ། །དཀྱིལ་འཁོར་འབར་བར་གསལ་གྱུར་ནས། །བདག་དང་ཕྱོགས་བཅུ་གཉིས་མེད་བསྒོ། །ཕྱོགས་ཕྱོགས་རིམ་བཞིན་ཁ་བལྟས་ཏེ། །ཐུགས་སྐུ་གསུང་ཡོན་ལས་ཀྱི་གླུ། །བྲོ་ཚིག་བརྗོད་དང་ཡེ་ཤེས་རྒྱན། །བྲོ་གླུ་རིགས་ལྔའི་སྤྱི་གླུ་བྲོ། །རྣམ་ལྔ་སྟོབས་གླུ་ལྡན་པར་བྱ། །སྲོག་ལྡན་བྲོ་གླུ་དོན་གཉིས་རྫོགས། །བཟའ་དང་བཅའ་དང་མུར་བཏུང་རྣམས། །ཐབས་དང་ཤེས་རབ་ཉིད་གནས་ཤིང་། །བདག་ཉིད་ཆེན་པོའི་མཆོད་པ་ཡིས། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་སེམས་ཅན་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཅིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །དེ་ལྟར་བཞི་དང་ལྡན་པ་ཡིས། །ཐབས་དང་ཤེས་རབ་ལྡན་གྱུར་ནས། །བྱིན་བརླབས་ཆ་རྣམས་རྫོགས་པར་བྱ། །བསྙེན་སྒྲུབ་གསང་བ་བཞི་རིམ་པས། །ཐམས་ཅད་གཉིས་མེད་དབྱིངས་སུ་སྦྱོར། །གཉིས་མེད་དབྱིངས་ནས་བྱང་ཆུབ་འབར། །འོད་འཕྲོ་འབར་བས་ཕྱོགས་བཅུར་གསལ། །བདེ་བས་ཐབས་ཆེན་ཐབས་ཀྱི་མཆོག །ཤེས་རབ་བདེ་མཆོག་བརྟན་ལྡན་རྫོགས། །རྡོ་རྗེ་དྲིལ་བུ་ཡང་དག་ལྡན། །ཕྱག་རྒྱ་བཞི་དང་ལྷ་མོ་བརྒྱད། །རྫོགས་རོལ་ཉི་ཟླ་དུས་གཅིག་ལྡན། །གཉིས་མེད་ཟུང་དུ་འབྲེལ་གྱུར་ན། །བདེ་གཤེགས་དཀྱིལ་འཁོར་མ་ལུས་འབྱུང་། །ཐིག་ལེ་རྡོ་རྗེ་གཟུགས་སུ་ཆགས། །མཆོད་ཚེ་མཁའ་འགྲོ་གསལ་འབར་འགྱུར། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་མངོན་རྫོགས་པའི། །དཀྱིལ་འཁོར་ཐམས་ཅད་འགྲུབ་པར་འགྱུར། །སྒྱུ་འཕྲུལ་དྲྭ་བ་བརྟན་པ་ཡིས། །ཕྱོགས་བཅུ་དུས་བཞིར་གཤེགས་པ་ཡི། །སངས་རྒྱས་དཀྱིལ་འཁོར་མ་ལུས་དང་། །ཁམས་གསུམ་འགྲོ་རྣམས་མངོན་དུ་འགྱུར། །སྒྱུ་འཕྲུལ་དྲྭ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་ངེ་འཛིན། །བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁའ་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །གདུག་པའི་ཚོགས་རྣམས་བསྒྲུབ་བྱ་བ། །གནས་དང་ཟླ་དང་རྫས་རྣམས་ནི། །ཚོགས་ཀྱི་མཆོག་ཏུ་དམིགས་པས་གཞག །ནགས་ཚལ་ཆེན་པོ་དབེན་པའི་ས། །གཞུང་དང་མཐུན་པ་རྙེད་ནས་ནི། །གནོད་བསྐྲད་ས་མནན་བྱིན་གྱིས་བརླབ། །ས་གཞི་བསྙམས་པ་རྒྱས་པར་བྱ། །སྒྱུ་འཕྲུལ་དྲྭ་བས་རྫོགས་སངས་རྒྱས། །དཀྱིལ་འཁོར་ལྔ་བཅུ་བརྒྱད་བསྟན་པའི། །ཆོ་ག་ཡན་ལག་རྫོགས་པ་ཡི། །རྣལ་འབྱོར་འདུས་པས་ངེས་པར་འགྲུབ། །སྟོན་པ་རྡོ་རྗེ་རྒྱལ་དབང་ཅན། །རྒྱལ་ཚབ་རྒྱལ་པོར་མཚུམས་པ་དང་། །ཀརྨ་གདངས་ཆེན་འཕྲེང་བར་ལྡན། །ལྗོན་ལྕུག་སྡོང་རེག་མཚན་རྫོགས་དང་། །རྣལ་འབྱོར་མིང་སྲིང་བརྩེ་གདུང་ལྡན། །ཚོམ་བུ་ལྔའམ་ཟུང་གི་བསྒྲུབ། །དཀར་རྩི་དམར་རྩི་དྲི་ཤ་ཆེན། །རྡོ་རྗེ་དུང་ཆེན་དམར་གྱིས་བཀང་། །དུང་དང་སྲོག་ཤིང་གསར་རྙིང་དང་། །གཟུགས་དང་ལུགས་ཆེན་དུང་མཆོག་དང་། རྒྱས་ཆས་བཅུ་དྲུག་ཚང་བ་དང་། །སྒྲུབ་པོ་འཚོ་བའི་ཡོ་བྱད་དང་། །སྒྲུབ་པ་རྫས་ཀྱི་ཡོ་བྱད་དང་། །ཞིང་གྱུར་མཆོག་དང་མཆོག་ཕྲན་དང་། །ཞིང་གྱུར་མཆོག་དང་མཆོག་ཕྲན་དང་། །རྐྱེན་བཟློག་ཡུངས་ཕུར་ལྕེ་བོག་གནག །སྨན་དང་སྨན་པར་བཅས་པ་དང་། །རྡོ་རྗེ་གོ་མཚོན་བཅས་པ་དང་། །ཇི་སྙེད་པ་ཡི་རྫས་རྣམས་ཀུན། །འཇིགས་བྱེད་ཆེན་པོའ་ིཏིང་འཛིན་དང་། །ཉམས་པ་མེད་པའི་སེམས་གྱིས་སྤྱད། །བསྡུས་ཏེ་ཚོགས་སུ་བྱ་བའི་ཕྱིར། །ཅི་འདོད་སྣང་བར་བདག་གིས་དགོང་། །ཞག་ནི་སུམ་བཅུ་ཕྲག་དྲུག་གམ། །དྲུག་ཅུ་དགུ་བཅུ་རྩ་དྲུག་ཏུ། །འཇིག་བྱེད་ཆེན་པོའི་དཀྱིལ་འཁོར་བསྒོམ། །སྒྱུ་འཕྲུལ་དྲྭ་བའི་དཀྱིལ་འཁོར་ལ། །གདེང་དང་བཅས་པའི་བསམ་པ་ཡིས། །རེ་བ་མེད་པར་རབ་ཏུ་བསྒྲུབ། །གླུ་དང་གར་དང་ཕྱག་རྒྱ་དང་། །ཤེས་རབ་ཐབས་སུ་ཤེས་པ་དང་། །བྱང་ཆུབ་སེམས་ཀྱི་མཆོད་པ་དང་། །བརྡའ་ལ་སོགས་པའི་ཡོན་ཏན་དང་། །བཟའ་དང་བཅས་དང་བཏུང་དང་བགོ །ལོངས་སྤྱོད་ལྔ་ལྡན་ཐམས་ཅད་ཀྱིས། །མདོར་ན་ཚོགས་རྣམས་མངོན་དུ་བསྒྲུབ། །སྤྱི་ཡི་བསྙེན་སྒྲུབ་སྔོན་བཞིན་ཤེས། །སྒྲུབ་པའི་ཐབས་ཀྱི་བསྙེན་སྒྲུབ་བཞི། །དང་པོའི་ཚེ་ན་གནས་ཆེན་དེར། །རྒྱང་གྲགས་དཔག་ཚད་ལ་སོགས་དང་། །ལུས་གང་ལུས་དོ་གསུམ་གྱི་ཚད། །རང་གི་རིག་པས་ཅི་ནུས་བྱ། །ཕྱག་རྒྱ་གཟུགས་དང་སྙིང་པོ་རྣམས། །ལྔ་ཡི་ཚོན་གྱིས་བྲི་བར་བྱ། །ཡོ་བྱད་སྔོན་བཞིན་བྱིན་བརླབས་ནས། །འཕགས་རྒྱལ་མཆོད་ཅིང་ཕྱི་རོལ་པ། །བཅུ་བཞི་མཉེས་དང་གཉིས་པོ་ཡང་། །སྦྱིན་པས་ཚིམ་བྱས་བསྒོམ་པ་བྱ། །འཇིགས་བྱེད་དབང་དུ་བདག་ཞུགས་ནས། །ཁྲོ་བོ་ཁྲོ་མོ་འཁོར་དུ་བྱ། །གདན་དུ་གཟིར་ཞིང་ཕུར་བུས་གདབ། །རང་བཞིན་ཕབ་ལ་མཆོད་བསྟོད་དེ། །བར་ཆད་ཏིང་འཛིན་མཆོག་གིས་བཟློག །ཐུན་མོང་བསྲུང་བའི་འཁོར་ལོ་བྱ། །དེ་ནས་གཉིས་པ་རྒྱན་རྣམས་དང་། །སྒྲུབ་རྫས་མཆོད་པ་དགྲམ་རྫོགས་ནས། །ཕྱི་ནང་གསང་བས་བསྲུང་བྱ་སྟེ། །སྲིན་པོའི་རྒྱལ་པོ་ཚུལ་བཞིན་མནན། །རྟགས་ལྡན་སྦྱང་བྱིན་དབབ་པར་བྱ། །དེ་ནས་རྫས་རྣམས་བྱིན་གྱིས་བརླབ། །དེ་ནས་འཁོར་ལོ་གཅིག་པའང་། །གསུམ་དང་ལྔ་རུ་བསྒོམ་པར་བྱ། །འཁོར་ལོ་བར་ཁྱམས་སྒོ་རྣམས་སུ། །འཇིགས་བྱེད་འཁོར་ལོ་རིགས་ཀྱི་གཙོ། །བཙུན་མོའི་ཚོགས་དང་ལྡན་པར་བསྒོམ། །ཞི་དང་དྲག་པོ་དབང་དང་རྒྱལ། །འཇིགས་པའི་ཚོགས་ཆེན་དེ་དབུས་སུ། །བདག་ཉིད་དྲག་པོར་བཅོས་ཚུལ་དུ། །སྐུ་གསུང་ཐུགས་ཀྱི་དཀྱིལ་འཁོར་བསྒོམ། །དེ་བཞིན་རྡོ་རྗེ་པདྨ་དང་། །རིན་ཆེན་རལ་གྲིའི་ཚོམ་བུ་བསྒོམ། །གཅིག་ལ་རྡོ་རྗེ་གསུམ་མོས་པ། །སྐུ་གསུང་ཐུགས་ཀྱི་འཇིགས་བྱེད་དོ། །འཇིགས་བྱེད་ལྔ་རྫོགས་དཀྱིལ་འཁོར་ནི། །འདུས་པའི་ཚོམ་བུ་ལྔ་ཡི་རིགས། །ཉི་ཤུ་རྩ་ལྔ་སྐུ་གསུང་ཐུགས། །ཡོན་ཏན་འཕྲིན་ལས་རྫོགས་པར་བསྒོམ། །རྒྱན་དང་ཆ་ལུགས་ལ་སོགས་པ། །འཇིགས་པའི་ཚོགས་ནི་ཇི་བཞིན་པར། །སྤྱིའམ་ཡང་ན་རེ་རེ་རུ། །ཚམ་ངམ་ཆེན་པོའི་ཆ་ལུགས་བསྒོམ། །ལྷག་པའི་དཀྱིལ་འཁོར་དགུ་དགུར་ལྡན། །བྱིན་དབང་ཐོབ་པའི་བདག་དཀྱིལ་ལ། །རང་བཞིན་ཕབ་དགུག་གཞུག་ཅིང་བརྟན། །དགྱེས་ནས་རིམ་བཞིན་མཆོད་པར་བྱ། །ༀ་ཨཱཿཧཱུྃ་སུ་ར་ཏོ་མ་ཧཱ་པཉྩ་ཨ་མྲྀ་ཏ་ཤྲི་ཧེ་རུ་ཀ་མནྟྲ་ཛྭ་ལ་མ་ཧཱ་མཎྜ་ལ་ཀཱ་ཡ་ཝཱ་ཀ་ཙིཏྟ། ༀ་ༀ་ༀ། ཧཱུཾ་ཧཱུཾ་ཧཱུཾ། སྭཱཾ་སྭཱཾ་སྭཱཾ། ཨཱཾ་ཨཱཾ་ཨཱཾ། ཧཱཾ་ཧཱཾ་ཧཱཾ། བཛྲ་མ་ཧཱ་ཀཱ་པཱ་ལ་ཁ་ཌྷ་གྷཎྜེ་ནཱ་ད་ཛྭ་ལ་སིདྡྷི། མ་ཧཱ་ཤྲཱི་ཧེ་རུ་ཀ །ཨ་མེ་དཱུ་མེ་སིདྡྷོ་བྷ་ཝ་ཏུ། སཾ་ཧ་ར་ཎ། ཧཱུཾ་ཧཱུཾ་ཧཱུཾ། མ་ཧཱ་ཡོ་ག །ཨནྟར་མ་ཧཱ་ས་མ་ཡ། རུ་ལུ་རུ་ལུ་ཨ་ལ་ལ་ཧོཿ ༀ་ཨཱཾ་ཧཱུཾ་སུ་ར་ཏཿ ཀ་མ་ལ། མ་ཧཱ་སུ་ཁ་མཱ་ལེ། མ་ནུ་ས་མ་ན། ཛྭ་ལི་ནཾ་དཱ་ན། ཨ་བ་ཡོ་ག་ཁཱ་ཧི། ཨ་ལ་ལ་ཧོ། མཆོད་བསྟོད་རྫོགས་ནས་བསྙེན་པ་ནི། །ཡེ་ཤེས་མདུན་དུ་ལྷག་པ་ལ། །བཟླས་པ་གསལ་བ་གསུམ་གྱིས་བྱ། །ༀ་བཛྲ་མ་ཧཱ་ཀྲོ་དྷ་ཤྲཱི་ཧེ་རུ་ཀ །བཛྲ་ཀྲོ་དྷི་ཤྭ་རི་སརྦ་དུ་ཥྚཱཾ་ཧཱུཾ་ཕཊ། རུ་ལུ་རུ་ལུ་མ་ཧཱ་ས་མ་ཡ་ཧཱུཾ། རུ་ལུ་རུ་ལུ་ཧཱུཾ་བྷྱོ་ཧཱུཾ། དེ་སོགས་བཟླས་ཏེ་འཕྲོ་འདུ་ཡིས། །བདུན་པར་བསྐུལ་དང་སྣོད་བྱེད་པ། །བསྙེན་པའི་དཀྱིལ་འཁོར་རྫོགས་པའོ། །དེ་བསྙེན་དེ་བཞིན་སྒྲུབ་པ་ཡང་། །འཕྲོ་འདུས་བསྐུལ་དང་དངོས་གྲུབ་སྡུད། །སྐྱོན་བཅུ་སྤངས་ཏེ་སྒྲུབ་པ་ནི། །སྒྲུབ་པའི་དུས་སུ་ཤེས་པར་བྱ། །གཅིག་ལ་རྫས་བསྟར་ཚུར་བསྡུ་བ། །སྒྲུབ་པ་ཆེན་པོར་ཤེས་པར་བྱ། །ཤེལ་དང་བྱུ་རུ་བུང་བ་དང་། །མཐིང་གི་བུང་བ་མོང་པོ་དང་། །རིམ་བཞིན་བུང་བ་མེ་ཏོག་དང་། །མཚོ་ལ་སེར་ཆེན་འབའ་བཞིན་ནོ། །འོད་དང་དྲི་དང་སྒྲ་དང་གཟུགས། །འཁོར་དང་འབར་དང་འཁོལ་བྱུང་ན། །བར་ཆད་ཆ་རྣམས་བརྟགས་བྱས་ཏེ། །བར་ཆད་བསྐྲད་དེ་བདག་བསྲུངས་ལ། །ཞག་གྲངས་ཚང་ཞིང་རྟགས་བྱུང་ན། །དཀྱིལ་འཁོར་མཐུན་པ་ཉིད་དུ་སྦྱར། །གནས་སུ་བསྟིམ་ཞིང་བརྟན་པར་བྱ། །ངེས་ན་སྔོན་བཞིན་རྣམ་གསུམ་ཐོབ། །གསང་མཆོད་རྒྱས་པར་བཤད་པར་བྱ། །ཞིང་གྱུར་མཆོག་དང་མཆོག་ཕྲན་རྣམས། །ཉི་ཟླའི་སྟེང་དུ་མཁས་པས་བཞག །ང་རྒྱལ་ལག་གི་འདུ་བྱེད་བསྒོམ། །ཧཱུཾ་དུ་གྱུར་པས་རྣམ་པར་དག །དབྱིངས་སུ་ཐིམ་ནས་ཕྱག་རྒྱར་འབར། །སྐུར་གྱུར་འོད་ཟེར་འཕྲོ་བས་བརྗིད། །གཙུག་ཏུ་རྣམ་པར་རྒྱལ་པ་བསྒོམ། །དེ་བཞིན་གཤེགས་པར་བྱིན་བརླབས་ནས། །རྒྱལ་བའི་སྲས་སུ་དབང་ཡང་བསྐུར། །ཤིན་ཏུ་ཁྲོ་བོ་ཆེན་པོ་ཡིས། །ཐབས་ཀྱིས་ལྷ་ཆེན་བསྒྲལ་བ་ལྟར། །ཆོས་ཉིད་རྟོགས་པའི་ཏིང་འཛིན་གྱིས། །གཉིས་སུ་མེད་པར་ཐབས་ཀྱིས་བསྒྲལ། །ཐུགས་རྗེ་ཆེན་པོའི་བྱིན་རླབས་ཀྱིས། །ལམ་ལྔའི་སེམས་ཅན་ཀུན་བཀུག་ནས། །ཐམས་ཅད་མ་ལུས་བསྒྲལ་བར་བྱ། །ཕྱི་ནང་སྣོད་བཅུད་ཇི་སྙེད་ན། །གནས་པའི་སེམས་ཅན་མ་ལུས་ཀུན། །བདག་ཉིད་ཆེན་པོ་རྟོགས་པ་ཡིས། །དབྱིངས་སུ་ཡང་ནི་བསྒྲལ་བར་བྱ། །རི་རབ་ཆེན་པོའི་གླིང་བཞི་ལ། །གནས་པའི་སེམས་ཅན་མ་ལུས་ཀུན། །ཡེ་ཤེས་མེ་ཆེན་བསྒོམས་བྱས་ཏེ། །ཐམས་ཅད་མ་ལུས་བསྲེག་པར་བྱ། །དབྱིངས་སུ་ཡང་ནི་བསྟིམ་པར་བྱ། །སྲིད་གསུམ་སྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །རཾ། ངོ་མཚར་ངན་འགྲོ་ཐར་པའི་ཐབས། །ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །དེ་ལྟར་བསྒྲལ་བ་ཀུན་བྱས་ཀྱང་། །བསྒྲལ་བའི་དངོས་པོ་གང་ཡང་མེད། །ཕུང་པོ་ལྔ་པོ་གཞིག་པར་བྱ། །བཤིག་ན་འབྱུང་བའི་ཕག་ལ་ཞ། །མ་བཞིན་ན་ཡང་འབྱུང་བ་ཡིན། །རྣམ་ཤེས་མེད་པས་བསད་བྱས་ན། །རྨི་ལམ་སྲོག་བཅད་ཚུལ་བཞིན་དུ། །གནས་པ་ཉིད་ན་དངོས་པོ་མེད། །སེམས་ཀྱི་རང་བཞིན་དེ་ལ་ནི། །དུས་གསུམ་སངས་རྒྱས་དགྲར་ལངས་ཀྱང་། །སུས་ཀྱང་ཟིང་ཅིང་སོད་བ་མེད། །འོ་ན་ཐུགས་རྗེས་གང་བསྒྲལ་ན། །རྣམ་རྟོག་མཚན་མ་ཐམས་ཅད་ཀུན། །ཕྱིན་ཅི་ལོག་ལས་བཟློག་བྱས་ཏེ། །ཏིང་འཛིན་སྔགས་དང་ཕྱག་རྒྱ་རྣམས། །ཤིན་ཏུ་གོམས་པས་དབང་བསྐུར་ཏེ། །བྱང་ཆུབ་ཞིང་ལ་དགོད་པར་བྱ། །དེ་ཙམ་ལ་ནི་བསྒྲལ་ཞེས་གདགས། །བསྒྲལ་བ་ཉིད་ན་སྦྱོར་བ་ཡོད། །ཉོན་མོངས་སྡུག་བསྔལ་རྩད་བཅད་ནས། །བྱང་ཆུབ་གནས་སུ་བསྒྲལ་བས་ན། །གཉིས་མེད་དབྱིངས་སུ་སྦྱོར་བ་ཡིན། །ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་པོ། །སྒྲུབ་པ་དང་ནི་སྒྲུབ་ཆེན་པོས། །ཤེས་རབ་དབྱིངས་མ་ཁྲུས་བཅས་ལ། །བདེ་གཤེགས་དཀྱིལ་འཁོར་ཀུན་བཀོད་དེ། །བདག་ཉིད་རིག་པ་ལྷར་བསྒོམས་ནས། །གཉིས་སུ་མེད་པར་ལྡན་པར་བྱ། །རྡོ་རྗེ་དྲིལ་བུ་ལྡན་གྱུར་ནས། །ཡུལ་གྱི་པདྨའི་དཀྱིལ་འཁོར་དུ། །བྱང་ཆུབ་པདྨའི་བདེ་ཐུགས་སྤྲོ། །སེམས་ལྔའི་རིམ་པ་ཟིན་པ་ཡིས། །སངས་རྒྱས་དཀྱིལ་འཁོར་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྟིམ། །ཕྱོགས་དུས་དཀྱིལ་འཁོར་གསུམ་མཉེས་དང་། །འགྲོ་བ་མང་པོ་བདེ་ཐོབ་ནས། །སླར་ཡང་གཉིས་མེད་དབྱིངས་སུ་ཐིམ། །ཐིམ་གྱུར་དབྱིངས་ནས་ཕྱག་རྒྱ་འབར། །བདེ་གཤེགས་ཐབས་དང་ཤེས་རབ་རྫོགས། །ཕྱག་རྒྱ་དྲུག་ཀྱང་ཡང་དག་རྫོགས། །བསོད་ནམས་ཚོགས་ཆེན་གཉིས་ཀྱང་རྫོགས། །སྒྲུབ་པ་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེ་ལྕེ་ཡིས་བླང་། །མཁའ་འགྲོ་གསལ་འབར་ཚེ་ལ་སོགས། །ཡིད་བཞིན་སྤྲིན་གྱི་བདག་པོར་འགྱུར། །འགྲོ་དྲུག་དུས་གནས་དེ་དག་སྣང་། །མཆོད་པ་ཆེན་པོ་མཉམ་སྦྱོར་ཞིང་། །ཐམས་ཅད་དབྱིངས་སུ་སྦྱོར་བས་ན། །ངན་འགྲོ་མི་ལྟུང་ཡང་དག་འགྲུབ། །འདི་ནི་བསྒྲལ་བ་ཆེན་པོ་ཡིན། །བསྒྲལ་བ་ཆེན་ན་སྦྱོར་བ་ཡིན། །སྦྱོར་བ་ཉིད་ན་མ་ལུས་བསྒྲལ། །ཡེ་ནས་ལྷ་དང་ལྷ་མོ་ཡི། །དཀྱིལ་འཁོར་ཡང་དག་སྦྱོར་བ་དང་། །དབང་པོ་ཡུལ་དུས་སྦྱོར་བའོ། །ཕུང་པོ་ལྔ་ཉིད་དེ་བཞིན་གཤེགས། །འབྱུང་བ་ལྔ་ཉིད་ཡུམ་དུ་སྦྱོར། །དུས་བཞི་ལྷ་མོ་ཉིད་དུ་སྦྱོར། །རྟག་ཆད་མུ་བཞི་ཁྲོ་མོ་བཞི། །ཐམས་ཅད་མ་ལུས་འབྱུང་བ་ཀུན། །མཉམ་པའི་དབྱིངས་དང་རིག་པར་སྦྱོར། །ཐབས་ཀྱིས་སྲིན་མོར་རོལ་པ་ལྟར། །སྦྱོར་བ་ཉིད་ན་ཆགས་པ་མེད། །མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཟིན་ཆགས་མེད། །འདི་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །མ་རྟོགས་པ་ཡིས་སྤྱད་གྱུར་ན། །ཡི་དྭགས་སྲིན་པོའི་གནས་སུ་སྐྱེ། །མཆོད་པའམ་སྤྱོད་ལམ་ཐམས་ཅད་དུ། །ཆས་བརྒྱད་རྒྱན་རྣམས་བགོ་བྱ་སྟེ། །བཟའ་བཏུང་རྗེས་སུ་མཐུན་པར་སྤྱད། །བྲོ་གར་གླུ་ཚིག་ལྡན་པར་བྱ། །དབང་པོ་ཡུལ་དུས་རིག་པ་རྣམས། །ཐབས་དང་ཤེས་རབ་ལྡན་འགྱུར་ཞིང་། །མཉམ་པའི་ངང་ཉིད་རྟོགས་གསལ་ན། །ཐམས་ཅད་བདེ་བ་ཆེན་པོའི་རྒྱ། །བསྐྱོད་ཆེན་འཁོར་ལོའི་གཞལ་ཡས་སུ། །ཁྲོ་བོ་ཁྲོ་མོ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ན། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །ཐབས་དང་ཤེས་རབ་ལྡན་པའི་ཞབས། །རྟག་ཏུ་རྡོ་རྗེ་འབར་བར་འགྱུར། །ཐབས་ཆེན་རེ་རེ་བསྐྱོད་ན་ཡང་། །པདྨ་ཆགས་མེད་རེ་རེ་འབྱུང་། །རྡོ་རྗེ་པདྨ་དེ་འབྱོར་ན། །སེམས་ཅན་ཐམས་ཅད་བླ་ན་མེད། །བྱང་ཆུབ་ཞིང་དུ་སྐྱེ་བར་འགྱུར། །རང་བཞིན་དཀྱིལ་འཁོར་ལྷ་རྣམས་ཀྱང་། །ཁྲོ་བོའི་དཀྱིལ་འཁོར་བསྒོམས་བྱས་ཏེ། །དབུ་ཡི་དཀྱིལ་འཁོར་བསྒུལ་བསྐྱོད་ན། །སངས་རྒྱས་དཀྱིལ་འཁོར་ཐམས་ཅད་གཡོ། །ལག་གི་འདུ་བྱེད་བསྐྱོད་བྱས་ན། །རིག་འཛིན་ཞིང་ཁམས་ཐམས་ཅད་གཡོ། །རྐང་པའི་སྟངས་ཆེན་མནན་མཆོངས་ན། །སྡུག་བསྔལ་མི་བཟད་ཐམས་ཅད་དང་། །བདུད་དང་ལོག་འདྲེན་ཐམས་ཅད་མནན། །ཡན་ལག་ཐམས་ཅད་བསྒུལ་གསིགས་ན། །བ་སྤུའི་བུ་ག་རེ་རེ་ནས། །ཁྲོ་བོ་རྡུལ་སྙེད་གྲངས་མེད་སྤྲོ། །དེ་ཡི་སྤྲུལ་པ་གྲངས་མེད་ཀྱིས། །ཕྱོགས་བཅུའི་ཞིང་ཁམས་རྡུལ་སྙེད་དུ། །འགྲོ་བའི་དོན་རྣམས་རྡུལ་ཕྲན་སྙེད། །ཐུགས་རྗེས་འདུལ་ཞིང་དབྱིངས་སུ་ཐིམ། བྲོ་གར་གླུ་ཚིག་ལྟ་སྟངས་དང་། །ཏིང་འཛིན་ཡོ་བྱད་སྤྱད་ཐབས་ཀུན། །ཞི་བའི་ཚོགས་ཀྱི་དཀྱིལ་འཁོར་ལས། །བྲོ་གར་རྩི་འཇོ་ལ་སོགས་སྒྱུར། །འཁོར་གྱི་ཕྲ་མན་ཚིམ་བྱས་ཏེ། །དབང་དུ་སྡུད་དང་བསྒོ་བ་རྣམས། །རྒྱས་བྱས་བཀྱེ་ལ་བསྡུས་ཏེ་སྤྱད། །དེ་ལྟར་བསྒྲུབས་ན་ཐེ་ཚོམ་མེད། །ཐབས་དང་ཤེས་རབ་ཐམས་ཅད་ཀྱིས། །དེ་ལྟ་བུ་ཡིས་ལོངས་སྤྱོད་ན། །སངས་རྒྱས་དཀྱིལ་འཁོར་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །རྟགས་ཆེན་སྔོན་བཞིན་འཕེལ་ལ་བརྟན། །གླིང་གྲངས་མཐོང་བ་དྲུག་ཀྱང་འབྱུང་། །སྒྲ་བརྙན་རྨི་ལམ་དག་ཏུ་ཡང་། །བདེ་བའི་འཇིག་རྟེན་གནས་རྣམས་དང་། །སྐྱེ་བ་གང་དག་འཛིན་པ་དང་། །རིག་འཛིན་ལུང་སྟོན་བརྟག་པར་བྱ། །ཞག་གྲངས་བཅུ་དྲུག་ཚུན་ཆད་ཀྱིས། །ལུས་མ་སྤངས་པར་རིག་འཛིན་ས། །ཡུན་རིང་ཆོས་ཀྱི་བདེ་སྤྱད་ནས། །བླ་མེད་རྡོ་རྗེ་སེམས་དཔའི་ས། །དཔེ་བྱད་མཚན་གྱི་རྣམ་པ་བརྒྱན། །མངོན་ཤེས་དྲུག་ལྡན་ཐམས་ཅད་མཁྱེན། །ཚོགས་ཆེན་གཉིས་ཀྱང་རྫོགས་པར་རོལ། །སངས་རྒྱས་ཞིང་ལ་དབང་སྒྱུར་ཞིང་། །སྤྱོད་ཡུལ་ཀུན་ཏུ་མཎྜལ། །ཇི་ལྟར་དམིགས་པ་བཞིན་དུ་འགྲུབ། །དེ་བས་ལས་དུས་རག་ལུས་སེམས། །ངོར་བྱས་བརྩོན་འགྲུས་ཆེན་པོ་སྦྱར། །མཐོང་བའི་ཆོས་ལ་མྱ་ངན་འདའ། །རྣལ་འབྱོར་ལས་སུ་རུང་རྣམས་ཀྱིས། །འདི་ལྟ་བུ་ཡི་ལས་བྱས་ན། །འབྲས་བུ་མངོན་དུ་མ་བྱུང་ཡང་། །ལུས་ངག་ཡིད་ལ་དབང་ཐོབ་ནས། །སངས་རྒྱས་འབྱུང་དང་སྐལ་མཉམ་འགྱུར། །ལས་དང་འབྲེལ་བའི་བྱིན་བརླབས་ཀྱིས། །ཐེག་པ་དམན་པར་ཡང་མི་སྐྱེ། །བསོད་ནམས་ཡེ་ཤེས་དཔུང་ཚོགས་ཀྱིས། །ལས་ཀྱི་མུན་པ་སྦྱངས་པའི་ཕྱིར། །ངན་སོང་གསུམ་དུ་ཡོང་མི་ལྟུང། །གནས་ངན་ལོངས་སྤྱོད་མི་བདེ་བའི། །ངན་སོང་བརྒྱད་དུ་འགྲོ་མི་འགྱུར། །གཟུགས་མཆོག་དམ་པ་ལྡན་པའི་ཕྱིར། །རྡོ་རྗེའི་ཐེག་མཆོག་བརྗེད་མི་འགྱུར། །ཚེ་རིང་བདེ་བ་ཕུན་སུམ་ཚོགས། །ལྷ་མའི་གནས་མཆོག་སྐབས་དེར་ཡང་། །ལུས་བྱད་བཟང་ཞིང་ཡན་ལག་རྫོགས། །དབང་པོ་ཚང་ཞིང་ཆད་ལྷག་མེད། །སྐད་གདངས་སྙན་ཅིང་འགྲོ་དོན་བྱེད། །བདག་གི་ལོངས་སྤྱོད་ཐམས་ཅད་ཀུན། །གཞན་ལ་གནོད་པ་མེད་པར་འགྲུབ། །ཚན་པོ་ཆེ་ཡི་མཐུ་སྟོབས་ལྡན། །འགྲོ་བའི་དོན་དུ་ཡང་དག་འགྲུབ། །གཞན་ལ་གནོད་པ་ཡོང་མི་བྱེད། །སྙིང་རྗེ་ཆེན་ཞིང་ཤེས་རབ་ལྡན། །མཐུ་སྟོབས་ཆེ་ཞིང་ཐབས་ལྡན་པས། །བདག་དང་གཞན་དོན་རྫོགས་པར་བྱེད། །མཐར་ཕྱིན་སྐྱེ་འཆི་མེད་པའི་ས། །སངས་རྒྱས་ཡོན་ཏན་རིན་པོ་ཆེ། །བཀོད་པའི་གཞལ་ཡས་ཐམས་ཅད་ལ། །འདོད་ལྷ་དྲུག་བ་ཇི་ལྟ་བར། །དབང་སྒྱུར་སྤྱོད་པའི་དངོས་གྲུབ་ཐོབ། །དེ་ཕྱིར་དབང་སྒྱུར་ཕྱི་མའི་དུས། །ཉིད་དུ་སྦྱོར་བ་སྨོས་ཅི་དགོས། །དེ་ལྟར་བརྩོན་འགྲུས་ལྡན་པས་ནི། །མཐོང་དང་ཕྱི་མར་མ་གྱུར་ཡང་། །ལན་གྲངས་གཞན་དུའང་བདུན་ཉིད་ལས། །མི་འདའ་རིགས་ཀྱི་དམ་པར་འགྱུར། །ཆོ་ག་སྔགས་དང་ཡོ་བྱད་དང་། །བཅོ་ལྔ་རྫོགས་ནས་མ་ཉམས་ལྡན། །ངེས་པར་ཚོགས་ཏེ་ཚོགས་སྤྱད་ན། །འབྲས་བུ་མངོན་དུ་མ་བྱུང་ཡང་། །རྒྱལ་བོ་བྲན་མོ་ངན་བཤོས་ཀྱང་། །འབྱུང་ནུར་ཆགས་པའི་རིག་འཛིན་ཏེ། །མཐོང་ནས་དམངས་ཀྱི་བླར་འགྱུར་ཞིང་། །ཀུན་ལ་དབང་སྒྱུར་སྟོབས་ལྡན་ལ། །ལྷ་རྣམས་རེ་བའི་མཐུ་སྐྱེས་པས། །བསྲུང་སྦེད་མཆོད་པ་བྱེད་པ་ལྟར། །རྣལ་འབྱོར་སྟོབས་ལྡན་གྱུར་པ་ན། །རྡོ་རྗེ་དམ་ཅན་མང་པོ་ཀུན། །དེ་ཡི་དབང་གིས་ཁུར་བར་བྱེད། །སྤྱོད་ཡུལ་དོར་ནས་ཕྱག་རྒྱར་རྫོགས། །ལ་ལ་དེ་ལྟར་དེ་ངེས་ན། །དེ་ལྟར་མ་གྱུར་བསོད་ནམས་ས། །ཚེ་རབས་སྐྱེ་བ་ཐམས་ཅད་དུ། །ལས་ངན་ལྔ་བཅུ་བརྒྱད་སྤྱོད་པའི། །ས་གནས་ཀུན་ཏུ་སྐྱེ་མི་འགྱུར། ངེས་འབྱུང་བཞི་ལ་སྤྱོད་མི་འགྱུར། །རྡོ་རྗེ་རིགས་མཆོག་འཛིན་འགྱུར་ཏེ། །རྣམ་སྨིན་ཐོབ་ནས་སྔོན་བཞིན་ཏེ། །འདི་ལ་ཐེ་ཚོམ་ལྡན་མིན་པས། །སྐལ་ལྡན་ཀུན་གྱིས་རྟག་འགྲུས་བྱོས། །བར་ཆད་མེད་པའི་ལམ་ཚོགས་སྒྲུབ་པའི་ལེའུ་སྟེ་བདུན་པའོ།། ༈ །།དངོས་གྲུབ་ལྷག་པའི་མཆོག་ཉིད་ལ། །བསྙེན་སྒྲུབ་བཞི་ཡིས་མོས་བྱས་ནས། །བདེ་ཆེན་ས་ལ་དགོད་པའི་ཕྱིར། །མཐར་ཕྱིན་འབྲས་བུའི་མཚན་ཉིད་བཤད། །དུས་ཚོགས་བར་ཆད་མེད་པ་ནས། །ལྷག་པ་མེད་དང་ཡོད་པ་ཡི། །མྱ་ངན་འདའ་བས་མཐའ་སྦྱོར་བ། །ཐུན་མོང་ལྟ་བུར་ཟུང་དུ་འགྱུར། །དེ་ལ་ཐོག་མ་བཤད་པ་ནི། །གཅིག་དང་དུ་མའི་རྣལ་འབྱོར་ལ། །བརྟན་བྱས་ཉིད་སའམ་དེ་ཐོབ་ནས། །ཟླ་དྲུག་བཅུ་དྲུག་བསྙེན་སྒྲུབ་ཚེ། །རྡོ་རྗེའི་ལུས་སུ་མ་གྱུར་པར། །སྟོབས་ཆུང་རྐྱེན་སྨོས་ཞན་པའི་ཕྱིར། །རྣམ་རྟོག་འབྱུང་བའི་ལྷག་ལུས་བཞག །རྡོ་རྗེ་འཆང་སར་རིག་བས་འགྲོ། །ལྷ་ཡི་རྣལ་འབྱོར་གསལ་རྫོགས་མིན། །ལུས་ཀྱི་དྲ་བས་བསྒྲིབས་གྱུར་པས། །ཀ་ལ་པིངྐ་མི་འཇིགས་བཞིན། །བྲལ་ནས་སྣང་བྱེད་དེ་རྣམ་སྨིན། །ཡིད་ཀྱི་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ནས། །ཕྱག་རྒྱའི་སྐུ་ཉིད་གསལ་གྱུར་ན། །རྣམ་པར་སྨིན་ཞེས་དེ་ལ་བརྗོད། །རྒྱ་མིག་རྒྱ་ས་ཇི་ལྟ་བ། །ཕྱག་རྒྱ་ཐོབ་ལ་མ་རག་པའི། །གཟུགས་རྫོགས་སྟོབས་ཆེན་དེ་ཁོ་ན། །དེ་ཡང་དགོངས་པའི་ཁྱབ་པར་གཉིས། །དགོངས་སྤྱོད་རྒྱ་མཚོ་སྔ་ཕྱི་དང་། །རྒྱུད་མཐུན་སྟོབས་ཆས་མིང་གྲགས་པ། །ལྷག་མེད་འབྱུང་མེད་ལས་ལུས་མེད། །མྱ་ངན་འདས་པའང་སྨིན་ཆས་བརྗོད། །དཀྱིལ་འཁོར་རོལ་པའི་ཚུལ་སྤྱོད་པས། །ཚོགས་གཉིས་རྫོགས་པས་བདག་གི་དོན། །སྨིན་པས་འཕྲིན་ལས་རྫོགས་བྱེད་པས། །མི་འདོར་འགོད་པ་གཞན་གྱིའོ། །དེ་དེའང་འདི་དང་ཕྱི་མ་དང་། །ལན་གྲངས་གཞན་དུ་རབ་འབྲིང་གིས། ཐོབ་ཀྱི་བསྐལ་པར་མི་འགྱང་སྟེ། །དགོངས་སྤྱོད་བརྩོན་པ་གཙོ་ཕྱིར་རོ། །གང་དེ་བྲལ་མ་ཐག་པ་རུ། །རྒྱ་བཞི་རྫོགས་པར་བདག་གྱུར་པས། །རྡོ་རྗེ་ལྔ་སོགས་རིག་པས་འཛིན། །ཕྱག་རྒྱ་ཆེན་པོའི་རིགས་འབྲས་བུ། །དེ་ཕྱིར་རྒྱ་ཆེན་བར་ཆད་མེད། །ལམ་འཚོག་དབྱེ་ས་གཅིག་ཡིན་ནོ། །བར་ཆད་མེད་པའང་སྨིན་པ་ཡི། །མངོན་པར་ཤེས་པ་དེ་མིང་ཅན། །མི་འགྱུར་ངེས་པར་གྱུར་པའང་ཡིན། །དཔག་ཚད་གླིང་ཁམས་ཡུལ་ལ་སྦྱོར། །ཕྱི་མ་དུས་ཀྱི་ཚོགས་བསྒྲུབས་པས། །དགོངས་སྤྱོད་བརྩོན་པ་སྟོབས་རྫོགས་དང་། །ཡོ་བྱད་ཐབས་ཀྱི་སྟོབས་ལས་སྐྱེས། །གཞན་པའི་ཡོ་བྱད་རྟགས་ལྡན་པ། །དངོས་གྲུབ་རོལ་པའི་མཐུ་ལས་བྱུང་། །ཐབས་རྒྱུས་ཕྱེ་བས་སོ་སོ་ཡང་། །ལམ་ལས་སྐྱེས་པ་མཆོག་ཡིན་ཏེ། །དེ་ཡང་རྒྱུ་དུས་ངོ་བོ་གྲངས། །དགོངས་སྤྱོད་མངོན་ཤེས་སྦྱོར་བའི་ཚུལ། །བཞི་གཉིས་ལུས་ཀྱི་རྫོགས་པར་བཤད། །ཐབས་དང་དྲང་བ་རྒྱུར་བ་བྱ། །ཤེས་རབ་རྣམ་གསུམ་གོམས་བྱས་ནས། །ཏིང་འཛིན་མཉམ་པའི་དོན་རྟོགས་ཏེ། །ཀུན་ཏུ་ཡངས་པ་ཆེན་པོ་བསྒོམ། །ཤེས་འཇུག་ལྔ་རྟོགས་གོམས་པས་ནི། །ཟླ་ཞག་རྒྱུད་བཞི་སྒྲུབ་བྱེད་པས། །རྡོ་རྗེའི་ལུས་སུ་ཐེ་ཚོམ་མེད། །མིང་བཞིའི་ལུས་ཉིད་དེ་ལྟའོ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །རབ་འབྲིང་ཇི་བཞིན་མི་བསླུ་བར། །དབང་སྒྱུར་རིགས་ཀྱི་དམ་པ་འགྲུབ། །རྒྱུ་འབྲས་དུས་གཅིག་རྫོགས་པ་ཡི། །རང་རིག་ཉིད་ལ་དབང་ཐོབ་སྟེ། །ཚེ་འདི་བཅུ་དང་དྲུག་པ་ཡི། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་ས། །དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་སྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟད་པ་ཟད། །རྡོ་རྗེའི་ལུས་གྱུར་ཚེ་ཡི་རིགས། །མཐོང་བའི་ཆོས་ལ་མྱ་ངན་འདའ། །ལུས་མ་བོར་བར་སངས་རྒྱས་ས། །འཇིགས་པ་ཀུན་བྲལ་ཆོ་འཕྲུལ་རྫོགས། །ལྷ་མིའི་རྒྱལ་པོའི་སྐྱེ་བ་འཛིན། །ལྷ་དང་མི་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཆ་བྱད་དེ་ཉིད་ཀྱིས་ཆོས་སྟོན། །གང་དག་མི་འཇིགས་རྩི་འཆང་ལྟར། །དབང་སྒྱུར་འཇིགས་པ་ལྔ་སོགས་བྲལ། །དྲུག་བཞི་ཡན་ལག་ཀུན་རྫོགས་ཤིང་། །རང་དབང་སྒྱུར་བའི་སྐྱེ་བ་ཡིས། །སྟོང་གསུམ་འཇིག་རྟེན་བརྒྱ་འདུལ་བྱེད། །རྒྱུ་ཡི་དང་པོར་སྐལ་མཉམ་མོ། །བདག་ཕྱིར་དོན་དུ་གཉེར་བ་ནི། །བརྒྱ་ཕྲག་བཅུ་དྲུག་ཚེ་ཡིས་རྫོགས། །གཞན་དུ་རང་དབང་ཐོབ་པའི་ཕྱིར། །བསྐལ་པ་གྲངས་མེད་གནས་གྱུར་ཀྱང་། །སྐུ་ནི་ཤིན་ཏུ་གཞོན་པའི་ཚུལ། །འདུལ་བའི་དུས་ཀྱིས་འཕོ་འདུག་བྱེད། །ངོ་བོ་སྨན་དང་ཐབས་རིག་འཛིན། །རྣམ་འབྱོར་སྒྲོལ་མའི་རིག་འཛིན་དང་། །ལམ་མཆོག་རྫོགས་པའི་རིམ་པ་བཞི། །བཅུ་དབང་དང་པོར་འདྲ་མོད་ཀྱང་། །དེ་ཉིད་མཐུ་དང་ཟད་མི་ཟག །རྒྱུ་དང་ངོ་བོས་རྣམ་པ་གཉིས། །དེ་བས་དགོངས་སྤྱོད་སྨོས་ཅི་དགོས། །གཞན་ལས་གྲུབ་པས་དེ་རིགས་མིན། །མཆོག་ལའང་ཡོན་ཏན་མཚན་ཆས་བརྗོད། །ལུས་དང་ཕུང་པོར་བཅས་པ་ཡིས། །གནས་པར་དབང་བའི་རིགས་གྲུབ་ཕྱིར། །ལྷག་རྟོག་འབྱུང་ལས་ལུས་བཅས་འདས། །ཟག་ཀུན་ཟད་པའི་རིགས་ཆེན་དེ། །ཇི་ལྟར་སྤྱད་ཀྱང་ལྡོག་པ་མེད། །རང་དབང་ཐོབ་པས་དབུགས་ཕྱུང་ཕྱིར། །སྐབས་འདིར་བདེན་པ་བར་མ་མཐོང་། །མཁས་རྟོགས་གོམས་སྤྱོད་རིག་པ་འཛིན། །ལྷ་ལ་སོགས་པ་རྡོ་རྗེ་འཛིན། །མི་གཏོང་གཟུགས་ལས་མིང་ཐོབ་པ། །ཡོན་ཏན་གྲངས་ཀྱིས་བསམ་མི་ཁྱབ། །དངོས་སུ་ས་ཁམས་ལུང་སྟོན་པ། །རྡོ་རྗེ་རྡོ་རྗེ་བོས་དབང་བསྐུར། །མཐོང་གོམས་མཐར་ལྡན་རིག་པ་ཉིད། །སྣང་བ་རིག་པ་འཛིན་པའི་གནས། །རིག་སྣང་གནས་ལ་ངེས་པ་མེད། །སྐྱེ་བ་ཆ་བྱད་དོན་གྱིས་འགྱུར། །ཆོས་རྣམས་བདག་ཕྱིར་དམིགས་མེད་ཕྱིར། །ཆོས་ཀུན་མི་མཐོང་ཆོས་ཉིད་ཀྱང་། །མི་མཐོང་སངས་རྒྱས་ཐུགས་མི་མཐོང་། །སྣོད་བཅུད་མི་མཐོང་གང་མཐོང་པ། །དེས་ནི་ཡང་དག་བདེན་པ་མཐོང་། །དེ་བས་ཐོས་མྱོང་རིག་སོགས་ལམ། །ཤེས་འཇུག་བར་ཆད་མེད་ལས་སྐྱེ། །དེ་ཕྱིར་མངོན་སུམ་རྟོགས་མཆོག་ནི། །རང་དབང་ཐོབ་ནས་སྔོན་བཞིན་ཏེ། །བྲག་གསུམ་ཟག་པ་འདི་ལ་མེད། །སྔོན་ཆད་ལམ་གྱི་འདུ་བྱེད་མེད། །དེ་ནི་རེ་དོགས་ཆགས་བྲལ་བས། །རིག་པའམ་རིམ་པ་མེད་ཚུལ་གྱིས། །སྟོང་ཁྲི་ལ་སོགས་གྲངས་མང་ལྷའི། །འཁོར་ལོ་གསལ་རྫོགས་རྣལ་འབྱོར་གནས། །དཀྱིལ་འཁོར་གཉིས་ཀྱིས་དོན་གྲུབ་མཛད། །དེ་མིང་དབང་སྒྱུར་རྣལ་འབྱོར་ཏེ། །བརྒྱ་ཕྲག་ཆ་རྫོགས་དུས་བར་དུ། །གོམས་བྱས་གཉིས་ཐོབ་མཐའ་སྐད་ཅིག །ཆ་ཡིས་རྡོ་རྗེ་དཔའ་བོས་སྦྱོར། །རིགས་མཐུན་མཆོག་རྒྱ་སྤྲུལ་པ་ལས། །གསང་ཐོས་བསམ་རིག་སྒོམ་སྦྱོང་བས། །དཀྱུས་སར་ཕྱིན་པའི་ཅང་ཤེས་བཞིན། །ཀུན་ཏུ་འགྲོ་བ་བདག་པོའི་དོན། །རྫུ་འཕྲུལ་ཆོས་སྣང་རྗེས་སྟོན་བརྗོད། །དྲུང་ཤེས་དེ་མིང་ལྡན་པ་ཡིས། །དབང་སྒྱུར་རྩ་བའི་རྡོ་རྗེའི་སྐུས། །བྱ་བྱེད་རྫོགས་པར་གྱུར་པ་ཡིན། །བཞི་ཡིས་ཐོག་མས་དོན་སྤྱོད་པ། །ནུས་མཐུ་ཅན་གྱུར་དབང་ཅན་དེས། །མཁའ་ལ་འཕྱོ་དང་རིག་འཛིན་གནས། །ཆུ་རྒྱུན་ལྡོག་དང་རླུང་མི་འགུལ། །རི་བྲག་ལ་སོགས་ཐོགས་མེད་འཛུལ། །ཆུ་ལ་མི་འབྱིང་མེས་མི་འཚིག །དུག་དང་མཚོན་གྱིས་འཇིགས་མི་འགྱུར། །མི་སྣང་བ་དང་མང་པོར་སྤྲུལ། །གཞན་ཡང་ཇི་ལྟར་འདོད་པ་བཞིན། །ལྷ་སྲིད་རྣམས་ལ་དབང་སྒྱུར་དང་། །ཚེ་དང་དུས་ལ་བསྲིང་བསྟུང་དང་། །སྟོང་གསུམ་ཡུངས་འབྲུར་ཤོང་བ་དང་། །ཡུངས་འབྲུས་སྟོང་གསུམ་གོང་བ་དང་། །བ་སྤུས་དགང་བསྡུའང་དེ་བཞིན་ནོ། །བསྲེག་པའི་བསྐལ་པ་གཞིལ་བ་དང་། །ཉི་མའི་དཀྱིལ་འཁོར་འབུམ་དགྱེ་དང་། །སྐམས་སར་ཆུ་དབྱུང་བྱེ་མ་གསེར། །སོལ་པ་ལྗོན་ཤིང་དབྱུང་བ་དང་། །ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་འཐོར་རླུང་བྱ་བའང་འགྲུབ། །དགུག་དང་བཏང་དང་བཅིང་དགྲོལ་དང་། །གསོ་དང་བསད་དང་ཕམ་དང་རྒྱལ། །ཇི་ལྟར་དམིགས་པ་བཞིན་དུ་འགྲུབ། །སྦྲུལ་དང་གཅན་གཟན་གདུག་པ་རྣམས། །ཁྱི་བཞིན་ཕྱི་ནས་འབྲང་བར་འགྱུར། །བདུད་དང་གདུག་པ་ལ་སོགས་པས། །ཚུགས་པར་མི་འགྱུར་བྲན་བཞིན་འགྱུར། །ལུས་མ་བོར་བར་རིག་འཛིན་སར། །ཐུགས་རྗེ་སྤྲུལ་པའི་བྱིན་བརླབས་ཀྱིས། །སོ་སོའི་སྐད་དང་མཐུན་པ་ཡིས། །སོ་སོ་ཐར་པའི་ལམ་ཡང་སྟོན། །ངན་སོང་སྟོངས་ཤིང་བསྐུལ་བ་དང་། །ལམ་སྟེགས་འགོད་ཅིང་དེ་དག་ཉིད། །ཐེག་ཆེན་ལམ་ལ་འགོད་པར་མཛད། །ཐར་པར་བསྐུལ་ཞིང་ཞི་བ་སློང་། །ས་བཅུའི་ཤེས་བྱ་སྦྱོང་བྱེད་ཅིང་། །བདེ་གཤེགས་འཁོར་ལ་ཆོས་སྟོན་མཛད། །སྟོང་གསུམ་བརྒྱད་བཅུའི་འཇིག་རྟེན་རྣམས། །གཡོ་དང་རབ་གཡོ་ཤིན་ཏུ་གཡོ། །མཛད་པ་སྣང་བས་དེ་གནས་རྣམས། །ནང་གཡོས་ས་ཡི་རིམ་སྦྱོང་བྱེད། །གསང་བ་སྔགས་ཀྱི་སྒྲ་བསྒྲགས་པས། །ཀུན་ཀྱང་རྨད་བྱུང་སྔགས་ཀྱི་སྒྲ། །གྲགས་པས་བདུད་འདུལ་ངན་སོང་སྦྱོང་། །འགྲོ་བ་མ་ལུས་དོན་ཡང་བྱེད། །ལས་རྣམས་ཐམས་ཅད་ཀུན་བྱས་ནས། །སྐྱེ་ཤི་མེད་པའི་གཡུང་དྲུང་ཐོབ། །མཚན་དང་དཔེ་བྱད་ཀུན་གྱིས་བརྒྱན། མཐར་ཕྱིན་བྱ་བ་མེད་པ་འགྲུབ། །རྒྱུད་ལས་གསུངས་པ་ལྔ་བཞི་ཡི། །སྤྱོད་པ་བཅུ་གཉིས་འཕྲིན་ལས་རྣམས། །དབང་སྒྱུར་ཉིད་དུ་ཐོགས་མེད་པར། །སྔོན་བཞིན་ཡུལ་ཁྱོན་འདུལ་བར་བྱེད། །སྐྱེ་མཆེད་རང་བྱུང་ཡེ་ཤེས་ཕྱིར། །དེ་ཉིད་གཅིག་དང་དུ་མའི་མཐའ། །གཉིས་སུ་མེད་པར་མངོན་རྟོགས་གོམས། །མཐོང་བས་དྲི་མ་དྲུག་སྦྱངས་ཕྱིར། །དེ་སྙེད་གཟུགས་སྒྲ་དྲི་རོ་རེག །ཤེས་པའི་བྱེ་བྲག་རྩ་ལྔར་ཤར། །གཅིག་གིས་ཡུལ་ལྔ་གཅོད་བྱེད་པས། ཚང་དང་མ་ཚང་འཇིགས་དོགས་མེད། །གཞན་དུ་ལྷ་ཡི་རྣ་བ་དང་། །སྤྱན་གྱི་མངོན་པར་ཤེས་པ་དང་། །སྔོན་གནས་རྗེས་སུ་དྲན་པ་དང་། །ཕ་རོལ་རྣམས་ཀྱི་སེམས་ཤེས་དང་། །འཆི་འཕོ་སྐྱེ་བ་མཁྱེན་པ་དང་། །རྫུ་འཕྲུལ་ཤེས་པའང་ཟག་ཟད་ཤེས། །དེ་སྙེད་ཚུན་ཆད་ཡུལ་ཤེས་པས། །གང་དང་གང་རྣམས་འདུལ་བར་མཛད། །དེ་མིང་མི་ལྡོག་ཟག་མེད་དང་། །དབང་སྒྱུར་རིགས་ཀྱི་མཚན་ལས་བརྗོད། །བདག་གམ་གཞན་ཕྱིར་དབང་ཅན་དེས། །སྐུ་ཚེའི་ཚད་དམ་ཇི་སྙེད་བར། །བཞུགས་མཐར་རང་གི་གྲུབ་སྦྱོར་བ། །སྔོན་བཞིན་རིམ་དང་ཅིག་ཅར་བ། །སྔ་མ་མཐོང་བའི་ལམ་ཉིད་དུ། །རང་གི་ཤེས་རབ་གསུམ་གོམས་པས། །རང་ལུས་རྒྱལ་བའི་ཕྱག་རྒྱ་ཆེ། །གང་བསྒོམས་མངོན་དུ་གྱུར་པའི་ལྷ། །ཕྱག་རྒྱ་ཆེན་པོའི་རིག་འཛིན་དེར། །ཡོངས་གྱུར་ལྷུན་གྲུབ་ཐོབ་ནས་གཤེགས། །ཕྱི་མ་རིགས་མཆོག་དེ་ཉིད་ནས། །སྔོན་བཞིན་གོམས་པ་གསུམ་བྱས་པས། །རྒྱ་དོར་ཅིག་ཅར་མཐར་འགྲོ་བར། །ཆོས་ཉིད་དམ་ཚིག་སྨོས་མཐུ་ཡིན། །དེ་ཉིད་བར་མ་བཤད་བྱ་བ། །སྔོན་གྱི་ལུས་ཀྱིས་རྫོགས་པར་བྱ། །གཅིག་དང་དུ་མའི་རྣལ་འབྱོར་པས། །འབྱུང་ལུས་སེམས་ཕྱིར་རང་བཞིན་ལྷར། །མཐོང་གོམས་བསགས་པའི་མཐར་བསྒྲུབས་པས། །ཀུན་འགྲོའི་སྒྲིབ་དག་ངོ་བོའི་རྒྱུ། །རྣམ་སྨིན་ཚུལ་གྱིས་གྲུབ་པ་མེད། །སྔ་ཕྱི་རྒྱུ་འབྲས་འདོད་པ་མིན། །དུས་རིམ་འདོད་མིན་གཅིག་འདོད་ཕྱིར། །གཅིག་པས་དེ་ཉིད་ལམ་བྱས་པས། །ལྷག་མར་བཅས་པས་བསྣུར་བསྒྲུབས་མཐའ། །དེ་ཉིད་གྱུར་པ་ངེས་པ་མེད། །རང་སེམས་ཕྱག་རྒྱ་ཆེན་པོ་སྟེ། །བསྒོམས་པས་གང་ཡིན་མངོན་གྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །རང་ལུས་གདོད་ནས་ཕྱག་རྒྱ་ཆེར། །བསྒོམས་པས་མངོན་དུ་གྱུར་པའི་ལྷ། །མཚན་དཔེ་བཞི་དང་མངོན་དྲུག་རྫོགས། །ཕྱག་རྒྱ་ཆེན་པོའི་རིགས་སུ་གྲགས། །ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །དེ་ཕྱིར་སྐུ་ཚེ་ཚད་མེད་དེ། །བསྣུར་ཞིང་མངོན་དུ་བྱ་དང་བྲལ། །དེ་ཉིད་རིགས་གསུམ་རིགས་བཞི་དང་། །ལྔ་དང་མཆོག་ལྔའི་རིག་འཛིན་པས། །རྣམ་པ་བཞི་རུ་སྔོན་བཞིན་འགྱུར། །མཆོག་གི་མིང་གྲངས་གཉིས་དང་གསུམ། །མཉམ་པ་ཉིད་ལས་མི་གཡོ་ཞིང་། །དབང་སྒྱུར་འདུ་བྱེད་དང་བྲལ་བས། །ཟག་པ་མེད་པ་སྒོམ་པའི་ལམ། །མི་གཡོའི་རྣལ་འབྱོར་ཉིད་དུ་བརྗོད། །རྒྱལ་བར་ལུང་སྟོན་དངོས་འབྱུང་བས། །བརྟག་པའི་བྱེ་བྲག་འདི་ལ་མེད། །ཡེ་ཤེས་སྐུ་ཡི་རྣལ་འབྱོར་པས། །སངས་རྒྱས་གཉིས་པའི་སྤྱན་དགོངས་དང་། །རྒྱུད་མཐུན་མོད་ཀྱང་མི་གཡོ་ཐོབ། །ཤིན་ཏུ་བརྟན་པའི་ཀླུང་གནས་པ། །གྲངས་ཅན་འཁོར་ལོ་མངོན་དུ་སྣང་། །འོན་ཀྱང་རྣལ་འབྱོར་རྩོལ་བ་ཅན། །མཉམ་གཞག་ངང་ལས་མ་གཡོས་བཞིན། །སྟོང་གི་འཇིག་རྟེན་བརྒྱ་སྟོང་ཕྲག །བཅུ་ཡི་རྡུལ་སྙེད་འཇིག་རྟེན་དང་། །ཞིང་གྲངས་མེད་པ་བརྒྱ་སྟོང་ཕྲག །བཅུ་ཡི་རྡུལ་སྙེད་ཞིང་ཁམས་སུ། །རྔོན་དང་སྨད་འཚོང་ལ་སོགས་པར། །སྤྲུལ་པའི་ལུས་ཀྱིས་འདུལ་བར་བྱེད། །བཞི་དང་དྲུག་སོགས་དེ་བཞིན་ནོ། །དྲུག་དང་ལྔ་ཡི་ཡན་ལག་བཅས། །ཤེས་པའང་འདྲ་མོད་བཞི་སོགས་ཀུན། །དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་འདུལ་བྱས་སྤགས། །རང་གི་མི་གཡོ་མཐོང་གོམས་དང་། །དོན་དུ་གཉེར་རིམ་བརྩམས་པ་ཡི། །ལམ་ཀུན་རྫོགས་པའི་བྱིན་སྟོབས་ཀྱིས། །རྣལ་འབྱོར་བྲལ་ནས་ལྷུན་གྱིས་གྲུབ། །ལྷན་ཅིག་གནས་པའི་དྲི་མ་དག །བཙལ་བ་མེད་པར་ལྷུན་གྲུབ་ཐོབ། །དེ་དེས་མངོན་དུ་བྱས་པ་ཡི། །ལྷུན་གྱིས་གྲུབ་པའི་རིག་པ་འཛིན། །རང་རྒྱུད་དག་པའི་སངས་རྒྱས་ཏེ། །སྔོན་བཞིན་བཞི་བརྒྱད་དགོད་པར་བྱ། །སྔ་མའི་རིགས་ལས་མཐུ་རྫོགས་པས། །བཤད་པ་བཞིན་དུ་དྲི་མ་སྦྱངས། །སངས་རྒྱས་གཉིས་པའི་ཤེས་རབ་གསུམ། །ལྷུན་གྱིས་གྲུབ་པའི་རིགས་སུ་བྱུང་། །གནས་དེར་སྔོན་བཞིན་གསུམ་རྫོགས་པ། །ལོངས་སྤྱོད་གསང་བའི་ལུང་ཐོབ་ཤིང་། །རང་གི་དགོངས་སྤྱོད་ནུས་པ་ཅན། །ས་མཐར་དབྱུང་བའི་དུས་ལ་བབ། །དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོག་ཉིད་དུ་བཞུགས་པའང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་རག་ལས་རིག་འཛིན་མཐའོ། །ཆ་བྱད་རྒྱལ་བ་ཉིད་དུ་སྟེ། །ལྔ་པོ་ལྷུན་གྱིས་གྲུབ་ཕྱིན་ན། །དེ་འདྲ་དེ་ཉིད་རྒྱལ་འཚབ་སྟོན། །དེ་མི་གཏོང་བས་མི་འགྲུབ་ཡིན། །ཉིད་ལ་སྐྱེ་ཤི་མི་མངའི་ཕྱིར། །རྡོ་རྗེའི་སྐུ་ཡང་གདུལ་བྱ་ལ། །སྤྲུལ་པ་རྣམས་ནི་འདའ་ཚུལ་སྟོན། །དོན་གྲུབ་ལ་སོགས་ཇི་ལྟ་བའོ། །བྱ་བ་ལྷུན་གྲུབ་རྣལ་འབྱོར་གྱི། །རིག་འཛིན་ཆེན་པོ་ནང་རིག་འཛིན། །ཐ་མའི་མིང་གྲངས་མཐར་ཕྱིན་ལམ། །རང་རྒྱུད་དག་པའི་སངས་རྒྱས་དང་། །དེ་ཉིད་དང་ནི་མཐར་སྦྱོར་ལམ། །ཡང་དག་རྫོགས་པའི་རྒྱལ་འཚབ་པོ། །སྔ་མ་གསུམ་དང་དང་པོ་བཞིའི། །ཆ་ལུགས་རང་གི་རྒྱལ་འཚབ་སྡུད། །བསམ་ཡས་ལྷུན་གྱིས་རྫོགས་པའི་ཕྱིར། །ཐམས་ཅད་མཁྱེན་པའི་སྤྱན་མཆོག་འཆང་། །ཡི་གེ་འཁོར་ལོ་མངོན་གཟིགས་པ། །མི་གཡོ་བ་ལ་མི་རྟོག་པས། །ད་དུང་མངོན་པར་མི་རྒྱ་སྟེ། །དུས་མཐའ་སྐད་ཅིག་ཉིད་ཀྱིས་གཤེགས། །དེས་ན་དགོངས་སྤྱོད་རྒྱ་མཚོ་ཀུན། །ཡེ་ཤེས་རྩལ་རྫོགས་བྱ་མེད་པའང་། །མཐར་ཕྱིན་བྱ་བྲལ་སོགས་པ་ཡི། །མིང་གྲངས་ཆ་ལས་བརྗོད་པར་ཟད། །ཉིད་ཕྱིར་རྡོ་རྗེ་འཛིན་རྫོགས་ལ། །སྐད་ཅིག་དུས་ཀྱིས་བསླབ་རྫོགས་ནས། །ཐ་མའི་བག་ལ་ཉལ་བ་དག །བཅོམ་ལྡན་འདས་པ་གྱུར་པ་ཡིན། །དེ་ཚེ་དེ་སྒྲིབ་ཆ་ཡོད་ཀྱང་། །ལྷུན་གྲུབ་རིག་འཛིན་སར་བཞུགས་ནས། །ཞིང་ཁམས་ཐུག་པ་མེད་པ་དག །འདུལ་ཕྱིར་སྤྲུལ་སྐུའི་མཛད་པ་སྟོན། །སྲིད་གསུམ་འགྲོ་བ་བསམ་ཡས་སུ། །ཐུགས་རྗེས་སྟོན་པ་བསམ་མི་ཁྱབ། །དོན་དང་མཐུན་པ་འབའ་ཞིག་སྟོན། །མི་མཐུན་ཞགས་པ་འཁོར་བ་གཅོད། །ལ་ལར་ལྷུམས་ཞུགས་བལྟམས་པ་དང་། །ལ་ལར་རབ་བྱུང་དཀའ་ཐུབ་མཛད། །ལ་ལར་ཁབ་དང་རྒྱབ་སྲིད་དང་། །ཆོས་སྟོན་མྱ་ངན་འདའ་སོགས་སྟོན། །རེས་འགའ་ཞི་ལ་རེས་འགའ་དྲག །གཡེམ་ལ་གཡེམ་སྟོན་སྡང་ལ་སྡང་། །དྲེགས་ལ་རི་དང་མུན་ལ་མུན། །རླུང་ཡང་དེ་བཞིན་མཐུན་མི་མཐུན། །རྒྱ་མཚོ་ལྟ་བུར་ཐབས་སྤྱོད་དང་། །འཕྲིན་ལས་དེ་བཞིན་པ་ཡིས་སྒྲོལ། །གསང་བའི་ཏནྟྲ་སྟོན་པ་དང་། །དེ་བཞིན་བསྡུ་བ་མཛད་པ་དང་། །དམན་ལུས་བསོད་ནམས་ལྡན་ལུས་སུ། །སྣ་ཚོགས་ལུས་ཅན་རིགས་ལ་བསྐོར། །མངོན་ཤེས་དྲུག་ལྡན་མཚན་བཟང་སྤགས། །ཀུན་མཁྱེན་ཡེ་ཤེས་མངའ་བའི་ཕྱིར། །ཡུལ་ཡང་ཚད་མེད་རྒྱལ་བ་ཉིད། །ཇི་ལྟར་མེ་ལོང་ལྟ་བུའི་ཚུལ། །མ་མཐུན་མཚན་མ་གཞོམ་པའི་ཕྱིར། །རྡོ་རྗེ་ལྟ་བུའི་ཏིང་འཛིན་གྱིས། །བདག་རྟོག་མཚན་མ་ཀུན་བཅོམ་ནས། །རྡོ་རྗེའི་དབྱིངས་སུ་ཐིམ་པར་བྱེད། །བདག་མེད་རང་རིག་ཡེ་ཤེས་ཀྱིས། །དངོས་དག་དངོས་མེད་བག་ཆགས་བསྲེགས། །རང་དང་སྤྱི་ཡི་ཆོས་རྣམས་དང་། །སེམས་ཀྱི་ཕྲ་རྟོག་ཐམས་ཅད་ཀུན། །དངོས་པོ་མེད་པར་རྟོགས་བྱས་ནས། །དཔའ་བར་འགྲོ་བའི་རྣལ་འབྱོར་དང་། །རྡོ་རྗེ་རྩེ་མོ་མཆོག་ཐོབ་པས། །ཡིད་ཚོད་མིན་དང་བདུད་སྟེ་རྣམས། །ཚར་བཅད་དཔའ་བོས་དེ་རྗེས་ལ། །རྒྱན་གྱི་འཁོར་ལོ་མཎྜ་ལ། །བསམ་ཡས་ལྷུན་རྫོགས་ཀུན་མཁྱེན་འཇོག །མཉམ་གཞག་ཡེ་ཤེས་དབང་སྒྱུར་ཞིང་། །དོན་དུ་གཉེར་བའི་སྨོན་ལམ་མཐུས། །ཉི་ཤུ་རྩ་ལྔར་གཞན་ལས་མིན། །སྐུ་དང་གསུང་ཐུགས་ཡོན་ཏན་དང་། །འཕྲིན་ལས་རྨད་བྱུང་ཀུན་གྲགས་པ། །གཞན་ནས་ཡོད་འོང་མ་ཡིན་ཏེ། །རང་བྱུང་ཡེ་ཤེས་གནས་མེད་ཡིན། །དེ་བས་ངོ་མཚར་ཆོ་འཕྲུལ་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་སྣང་། །མུན་སྣང་འགྱུར་རྩི་མ་གི་ཏ། །ཇི་བཞིན་མ་སྤངས་དེ་ཉིད་འགྱུར། །འཁོར་བ་མ་སྤངས་རྣམ་པར་དག །མྱ་ངན་མི་འདའ་ཡེ་ནས་གནས། །འགྲོ་དང་གནས་པར་བྱ་བ་མིན། །རྟོག་པ་ཐམས་ཅད་ཡེ་ཤེས་ཚོགས། །མཉམ་དང་མི་མཉམ་མི་མཉམ་མཉམ། །བྱ་དང་མི་བྱ་བྱ་མེད་བྱས། །གྲུབ་དང་མ་གྲུབ་ཐམས་ཅད་གྲུབ། །དེ་ཕྱིར་རིག་འཛིན་ཐ་སྙད་བྲལ། །མཐར་ཕྱིན་པའི་ལམ་བསྟན་པའི་ལེའུ་སྟེ་བརྒྱད་པའོ།། ༈ །།རང་བཞིན་ཉིད་དུ་མངོན་རྫོགས་པའི། །རྡོ་རྗེ་འཛིན་པ་ཉིད་ལ་མོས། །སྲིད་པ་རིམ་དང་རྫོགས་ཚུལ་གྱིས། །མངོན་བྱས་དོན་ཡོད་བཤད་པར་བྱ། །མཚན་ཉིད་ཐ་མའི་ཐ་མ་ནི། །ངོ་བོ་ཚུལ་དང་ཁྱད་པར་གྱི། །ལུས་གསུམ་དོན་དུ་སྣང་བ་རྣམས། །ཇི་ལྟར་བ་བཞིན་ཤེས་པར་བྱ། །ལུས་གསུམ་སྔ་མ་བརྗོད་བྱ་བ། །སྐུ་དང་གསུང་དང་ཐུགས་ཉིད་དང་། །ཡོན་ཏན་འཕྲིན་ལས་རྨད་བྱུང་བ། །ལྔ་ཡང་ལྔ་ཉིད་ངོ་བོར་གནས། །ཨེ་མའོ་ཡང་དག་རྫོགས་སངས་རྒྱས། །རྒྱལ་བའི་རྒྱལ་བ་ལྷ་ཡི་ལྷ། །འཕགས་པའི་འཕགས་པ་ཀུན་ཏུ་བཟང་། །དེ་བཞིན་གཤེགས་ལས་དེ་བཞིན་གཤེགས། །བདེ་གཤེགས་ལས་ཀྱང་བདེ་གཤེགས་པའོ། །རིན་ཆེན་ནོར་བུ་བཞིན་དུ་བཞུགས། །ཆོས་དྲུག་ནོར་བུས་མཚོན་པ་ནི། །གཅིག་དང་དུ་མ་ཀུན་བྲལ་ལྡན། །དེ་དེའི་རིགས་དངོས་རིགས་བྲལ་བ། །ཤི་ཤུ་ལྔར་ལྡན་ཀུན་ངོ་བོ། །མོས་བཞིན་དེ་རིགས་མཐུན་སྣང་ལ། །ཡང་དག་ཉིད་དུ་འདི་ཞེས་མེད། །ལྔ་ཉིད་ལྔ་ལྔར་ལྡན་སྣང་བ། །རིགས་བདག་ཡང་དག་སངས་རྒྱས་པ། །ཐ་མའི་ཐ་མ་ཞེན་བྲལ་བ། །ཡེ་ཤེས་འགྲོ་འོང་མེད་ཀུན་ཁྱབ། །གཉིས་སུ་མེད་པའི་དེ་བཞིན་ཉིད། །ངང་ཉིད་འགྲོ་འོང་མེད་པར་གཤེགས། །དེ་བཞིན་བདེ་ཆེན་ངང་ཉིད་དུ། །ཟུག་རྔུ་ཀུན་བྲལ་གཉིས་ཕྱིར་གཤེགས། །སངས་རྒྱས་སེམས་ཅན་སེམས་ལ་སོན། །དབང་ཕྱུག་ཆེན་པོའི་སྐུར་བཞུགས་པས། །གསང་བའི་དབང་པོ་འདུ་འབྲལ་མེད། །དངོས་པོ་གཉིས་ལ་བདེ་ལེགས་སྤྱོད། །དེ་ཉིད་ཆ་རེ་བརྗོད་པ་ནི། །འཇིག་རྟེན་འདས་དང་མ་འདས་ཀུན། །དུས་གསུམ་ཆོས་ཀུན་གཅིག་པ་ཡི། །རྒྱལ་བ་ཉིད་ཕྱིར་སྣ་ཚོགས་ཆོས། །སྣང་བ་རང་བཞིན་མེད་པའི་ཕྱིར། །དེ་ཉིད་དྷརྨ་ཀཱ་ཡར་གནས། །ཐམས་ཅད་རང་རིག་མངོན་སུམ་སྣང་། །ཞེན་མཐའ་ཀུན་བྲལ་ཀུན་ཆུབ་པའི། །རང་བྱུང་ཡེ་ཤེས་ཆེན་པོ་ཉིད། །ཀུན་གཞི་འདུལ་སྣང་ཕྱིན་སྐུ་མཆོག །འདོད་ཁམས་མཐའ་ནས་རྫོགས་ཀྱི་བར། །སྡུག་བསྔལ་ཀུན་དང་འདོད་བསམ་སྙོམས། །འགོག་ཞི་བཏང་སྙོམས་བདེ་ཆེན་སོགས། །ཡུལ་མེད་ཀུན་རོལ་ལོངས་སྤྱོད་ཆེ། །རྟ་བདུན་རི་བོང་ཅན་ཉིད་ཀྱི། །གཞལ་ཡས་ཁང་ལས་མ་གཡོས་བཞིན། །ཀུན་ཏུ་ཐ་དད་སྣང་བ་ལྟར། །འགྲོ་འོང་མེད་འདུལ་ཀུན་སྤྲུལ་མཆོག །ཇི་ལྟར་མཁའ་ལ་འཇིག་མེད་ལྟར། །མི་རྟག་ཀུན་དངོས་རྟག་ཆེན་པོ། །རྡོ་རྗེའི་སྐུ་མཆོག་སྐྱེ་འཇིག་མེད། །ལྔ་པ་ཉིད་དུ་རབ་ཏུ་གྲགས། །སོ་སོར་འདུལ་བ་ཡེ་ཤེས་འཁོར། །རྒྱ་མཚོའི་ཚོགས་དང་ཤེས་བྱ་ཡི། །སྒྲིབ་པ་མཐའ་སྤོང་སེམས་དཔའ་ཆེ། །རྒྱལ་པོ་ལྔ་སོགས་རྒྱུད་སྦྱངས་དང་། །མོས་སྤྱོད་དང་པོའམ་དབང་སྒྱུར་རིགས། །རྡོ་རྗེ་ཚོགས་མཐོང་ཕྱིར་མིང་གྲུབ། །དེ་ལ་དེ་ཡི་དགོངས་བཤད་པ། །བརྗོད་དང་བརྗོད་འདྲ་ཕྱིར་ངེས་པ། །ཡི་གེ་མེད་པར་འཇལ་བ་བཞི། །ཡི་གེ་དྲུག་བཅུ་དྲུག་སུམ་བརྒྱས། །འཇལ་བ་ལྔ་ཉིད་ཚུལ་གོ་བ། །སོ་སོ་ཉིད་དང་གསང་བདག་གིས། །སྙན་ཆ་ལྔ་ལྡན་ཕྱིར་ཐོས་པས། །གསང་བའི་རྒྱུད་བཤད་ཐོས་ཞེས་གསུངས། །རང་བཞིན་འབྲེལ་དང་དབང་དྭང་བས། །དྭང་བའི་ཆུ་ལ་ཉི་ཟླ་བཞིན། །མ་སྐྱེས་དོན་གྱི་གསུང་མཆོག་གི །སྨྲ་བརྗོད་མེད་པར་སྣང་བར་མཛད། །རིག་པའི་ཡེཤེས་མིང་ལྔ་བ། །དེ་བཞིན་འབྲེལ་བའི་བྱིན་བརླབས་ཀྱིས། །རང་བཞིན་གསང་བའི་རྒྱུད་རྣམས་ཀུན། །ཉི་མ་ལྟ་བུར་གསལ་བར་སྣང་། །མེ་ལོང་ལྟ་བུར་ཆོས་བརྒྱད་ཀྱིས། །མཚོན་པའི་དབང་ཕྱུག་སྐུ་མཐོང་བས། །བྱང་ཆུབ་སེམས་དཔའ་སེམས་དཔའ་ཆེའི། །རྒྱུད་ལ་རྡོ་རྗེའི་དོན་སྣང་སད། །གྲོལ་མཐར་ལམ་དང་འཁོར་བའི་སྒྲ། །དྲུག་གི་རྩ་བ་ཡན་ལག་ཚུལ། །ཚངས་པའི་ངག་ལྟར་ལས་ཅན་ལས། །སྣང་བ་ཤ་ཡི་རྣ་བས་ཐོས། །ཇི་ལྟར་གོ་དང་འདུལ་སྣང་བའི། །གསུང་རྣམས་ངོས་ལ་སྒྲས་རྐྱེན་པའི། །སྒྲ་ལྟར་གྲག་སྟོང་དབྱེར་མེད་པར། །མཐོང་ཐོས་བྱེད་པའང་དེ་ཉིད་མཐུའོ། །དངོས་པོ་གཉིས་ཆོས་ཡན་ལག་བཅས། །སེམས་ཆེན་ཕྱིར་ན་སྟོང་ཆེན་པོའི། །ཡེ་ཤེས་ཟུག་རྔུ་ལྡན་བྲལ་བས། །བདེ་བ་ཆེན་པོ་མཆོག་གི་ཐུགས། །ནམ་མཁའ་ལྟ་བུར་ཡེ་གསལ་སྟོང་། །ཆོས་སྤྱི་རང་མཚན་དབྱེར་མེད་ཀུན། །ཡུལ་འདི་མེ་ལོང་ལྟར་གསལ་བ། །མངོན་སུམ་ཀུན་གྱི་མཆོག་ཡིན་ཏེ། །རྣམ་པར་མི་རྟོག་མཆོག་གི་ཐུགས། །ཆེན་པོ་ལྟ་བུར་ཐམས་ཅད་ལ། །མི་འབྱེད་བླང་དོར་མེད་མཉམ་ཞིང་། །མཉམ་པ་ཉིད་ལས་མི་གཡོ་བ། །མཉམ་པ་ཆེན་པོ་མཆོག་གི་ཐུགས། །ཐུགས་རྗེ་ཆེན་པོས་འབྲེལ་བ་དང་། །ཉིད་ཀྱི་དབྱིངས་ལས་མི་གཞན་ཕྱིར། །བྱ་བྱེད་མེད་པར་རྣམ་བཞི་ཡིས། །འགྲོ་བ་སྒྲོལ་བའི་ཐུགས་ཆེན་ཡིན། །ཆོས་དང་ཆོས་ཉིད་ཀུན་བྲལ་བས། །རང་སྤྱི་དབྱེར་མེད་དུས་གཅིག་ཏུ། །མཁའ་ལ་འཇའ་ལྟར་གསལ་བ་ནི། །མི་ཕྱེད་རྡོ་རྗེའི་ཐུགས་མཆོག་གོ །ཕྱོགས་བཅུ་མ་ལུས་མི་ལུས་པ། །རང་རྒྱུད་མེད་པར་རིག་སྣང་བ། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་མ་ལུས་སངས་རྒྱས་ཞིང་། །ལྷུན་རྫོགས་རིག་པ་རང་སྣང་བའི། །གཞལ་ཡས་ཁང་དང་གཟུང་དང་འཛིན། །བྲལ་བའི་རང་རིག་བརྟན་པ་དང་། །བརྟེན་ཅན་མེད་པར་ཀུན་གྱི་གནས། །མ་སྤངས་ལྷུན་གྱིས་རྫོགས་པའི་ཕྱིར། །སྣ་ཚོགས་དཀྱིལ་འཁོར་ཆེན་པོའི་རྒྱན། །རང་བཞིན་མ་སྒྲིབས་བསལ་བྱའི་ཕྱིར། །སྣ་ཚོགས་འོད་ཟེར་ཕྱོགས་བཅུར་གསལ། །སྟོབས་སོགས་འབྲས་བུ་ལྷུན་རྫོགས་ཕྱིར། །གདན་ལྔའི་བྱེ་བྲག་རང་སྣང་བའོ། །གདུལ་བྱའི་བྱ་བ་ཐ་དད་པ། །ཞི་དང་ཁྲོ་བ་མི་མོས་ཉམས། །བཞི་ཕྱིར་རྣམ་བཞི་རོལ་པ་རྣམས། །གང་ལ་འཚམས་པར་འདུལ་བར་མཛད། །རྣམ་བཞི་བྱེ་བྲག་ཐ་དད་པ། །རེ་རེའང་ལྔ་ལྔའི་ཚུལ་གྱིས་སྣང་། །དེ་རིགས་བཞི་ཡི་ཆ་འཛིན་པ། །ལས་ཀྱི་རིགས་ལ་ལྷུན་གྱིས་གྲུབ། །རྣམ་པ་བཞི་ཡིས་འདུལ་མཛད་པས། །ཕྱོགས་ཀྱིས་འདུལ་བར་རིགས་མ་ཡིན། །དེ་ལྟར་སྦྱངས་མཐའ་སྐྱེས་བུ་བ། །རིགས་ལྔ་ཆ་རེ་འཛིན་བྱེད་ཀྱང་། །ཅིག་ཤོས་སངས་རྒྱས་ཀུན་ངོ་བོ། །ཉིད་དུ་སྔ་ཕྱི་དྲང་བ་ཙམ། །སངས་རྒྱས་སངས་རྒྱས་ཞེས་བརྗོད་པའི། །ཚུལ་ནི་སྨྲ་བསམ་བརྗོད་ལས་འདས། །དེ་དོན་ཕྱོགས་ཙམ་བརྗོད་བྱ་བ། །དྲང་དོན་སྔ་ཕྱིའི་སངས་རྒྱས་པ། །དོན་དམ་གཅིག་པུར་མ་ཡིན་ཏེ། །ཆུ་ལ་ཆུ་ལྟར་གཅིག་པ་མེད། །ཅིག་ཤོད་བདེན་པར་མ་ཡིན་པས། །སོ་སོ་ཐ་དད་ཆ་རིགས་མེད། །བདེན་པ་གཉིས་མེད་དབང་གྱུར་ན། །བདག་དང་གཞན་གྱི་གཉིས་མེད་དེ། །སོ་སོར་མེད་ཕྱིར་དེན་སོན་པ། །མཐའ་རྣམས་ཀུན་བྲལ་ཀུན་ལྡན་པར། །རང་གནས་ཞེན་བྲལ་མངོན་བྱས་ལ། །མིང་བརྗོད་འདི་འདྲར་གནས་སྨྲ་དཀའ། །ངོ་བོ་གཅིག་ལ་རྒྱུད་འདྲེས་མིན། །ཤིང་གི་མེ་དཔུང་ལྟར་བརྗོད་བ། །དྲང་བ་ཙམ་སྟེ་དེ་ཉིད་མིན། །ཆུ་ལ་ཆུ་ལྟར་འདོད་པའང་དེའོ། །བདེན་པའི་ཚུལ་གྱིས་སྐྱོན་བརྗོད་པས། །དག་པའི་ཡེ་ཤེས་གནས་ཡིན་པར། །ཏནྟྲ་ཉིད་ལས་གྲགས་པ་དང་། །བདེ་གཤེགས་མི་གནས་མཉམ་པ་ཡི། །ངང་དུ་བྱོན་གསུངས་བརྗོད་པ་ཡང་། །མཉམ་པ་གསུམ་པ་ཡིན་པའི་ཕྱིར། །ངེས་པར་རྒྱུད་འདྲེས་མ་འདྲེས་པའི། །ཐ་སྙད་བྲལ་བའི་ཚུལ་དུ་གནས། །ཐུན་མོང་མིན་པའི་རྒྱལ་མིང་གྲགས། །བདེ་གཤེགས་དེ་བཞིན་གཤེགས་པ་དང་། །བཅོམ་ལྡན་འདས་དང་སངས་རྒྱས་དང་། །དགྱེས་ཆེན་བརྗོད་སོགས་མཐའ་ཡས་ཀྱང་། །ལུས་གསུམ་གྲངས་མིང་ཁྱད་པར་ཙམ། །མདོ་རུ་བརྗོད་པ་ཆུབ་པར་གྱིས། །ལྔ་ལ་ལྔ་ལྔར་ལྷུན་གྲུབ་པའི། །རྒྱལ་བ་གསུམ་རྫོགས་སོ་སོ་ཡི། །གྲུབ་པའི་མཐའ་ཡི་སངས་རྒྱས་ལས། །གྲངས་རྫོགས་ངོ་བོ་བྱིན་བརླབས་ལས། །སྣང་དང་དོན་བྱེད་ཆེ་ཆུང་གིས། །སྤགས་པར་ངོ་བོ་ཉིད་ཀྱིས་གསལ། །དེ་ཚུལ་ས་གཞིའི་རྒྱལ་བ་དག །རྒྱུད་གཅིག་འདྲེས་དང་གྲོལ་སྨྲ་བ། །འདིར་དྲང་ཙམ་ཡིན་བཤད་བཞིན་ཕྱིར། །རྒྱུད་ཀྱི་ཁྱད་པར་བསམ་ལས་འདས། །མིང་གྲངས་ཐེག་ཆེན་དམན་པ་བས། །ཐུན་མོང་ཚོགས་ཀྱིས་བདེ་གཤེགས་ཤིང་། །དེ་བཞིན་ཉིད་དུ་གཤེགས་པ་ཡང་། །དུས་གྱི་དབང་གིས་སྔ་མ་བཞིན། །གཤེགས་པ་ཉིད་དང་གསང་བ་ས། །བྱ་བའི་ལུགས་ཀྱིས་ཤེས་རབ་དང་། །ཆོ་གའི་རྣལ་འབྱོར་གྲགས་རྫོགས་པས། །འབྲས་བུ་ལམ་བྱས་བདེ་གཤེགས་པའམ། །རྡོ་རྗེ་འཛིན་སར་དེ་བཞིན་གཤེགས། །ཡང་ན་བྱ་རྒོད་འདབ་ལོགས་ཀྱི། །དགོན་ཕུག་བྱེ་མ་འདབ་སྣ་རུ། །ས་རི་དབང་བསྐུར་ཇི་བཞིན་ནམ། །ཝཱ་ར་ཎཱ་སིའི་བསིལ་ཁང་དུ། །དམ་པའི་རིགས་ཅན་དབང་བསྐུར་ནས། །རྡོ་རྗེ་འཛིན་ཐོབ་ཇི་བཞིན་ནོ། །ཐུབ་པའི་དབང་པོ་དེ་ཇི་བཞིན། །གཤེགས་པ་རྒྱུ་དང་བྱ་བ་དང་། །གཉིས་ཀའི་རྒྱུད་ལས་གྲགས་བཞིན་ནོ། །རྣལ་འབྱོར་གཞུང་གི་དོན་གྲུབ་ཉིད། །ནཻ་རཉྫ་ནའི་འགྲམ་ལོགས་སུ། །དཀའ་ཐུབ་དཀའ་བ་སྤྱོད་པའི་ཚེ། །ཕྱོགས་བཅུའི་སྤྲུལ་པ་ལོངས་སྤྱོད་སྐུས། །བྱང་ཆུབ་ལྔ་བལྟབས་དབང་བསྐུར་བས། །འོག་མིན་ཉིད་དུ་དོན་གྲུབ་དེ། །སྤྲུལ་པ་དཀའ་ཐུབ་ཁོག་པ་ནས། །ཡེ་ཤེས་སྣང་མཛད་ལུས་སུ་གཤེགས། །རི་རབ་རྩེ་མོར་འཁོར་ལོ་བསྐོར། །དེ་ཡང་རྟོག་པའི་གཟུགས་སྐུ་ཡིན། །ཐབས་དང་ཤེས་རབ་ལམ་ཉིད་ཀྱིས། །འགྲོ་འོང་མེད་པར་བདེ་གཤེགས་དེ། །ཇི་བཞིན་ལྷུན་གྲུབ་ངང་སོན་པ། །ཚུལ་དང་ངོ་བོས་ཁྱད་པར་ཆེ། །དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། །འདུས་པ་གསང་བའི་ལོངས་སྤྱོད་ཀྱིས། །སྲོད་དང་ཐོ་རངས་དུས་ཉིད་དུ། །ཉི་ཟླ་ཟ་བའི་དབང་ཕྱིན་ཅིང་། །རོལ་པའི་ཀ་ར་བསྟན་པ་ཡིས། །ཡེ་ཤེས་བརྟན་རྫོགས་དབང་ཐོབ་པས། །དེ་བཞིན་དེ་བཞིན་གཤེགས་པའོ། །དེ་ཕྱིར་ཐུན་མོང་རྣམ་གསུམ་ལས། །བྱང་བ་བཞིན་དང་ཆུབ་པ་བཞི། །བདེ་བར་དེ་བཞིན་གཤེགས་པ་བརྒྱད། །གྲངས་དང་ངོ་བོ་རྩལ་གྱིས་འཕགས། །དེས་ན་རྒྱལ་བ་བཅོམ་ལྡན་འདས། །ཐུན་མོང་མཆོག་ལུགས་སྔ་མ་བཞིན། །སོ་སོའི་ལམ་ཐབས་ཤེས་རབ་ཀྱིས། །རྡོ་རྗེ་ལྟ་བུ་བཞི་བསྐྱེད་པས། །བདུད་བཞི་ངེས་བཅོམ་མྱ་ངན་བཞི། །འདས་ཤིང་མཐའ་བཞི་འདས་པ་དང་། །མི་མཐུན་གཞུང་གིས་སངས་རྒྱས་པ། །ལྟ་སྤྱོད་ཏིང་འཛིན་ལམ་རིམ་བཞིན། །གྲུབ་པའི་མཐའ་ཡང་ཁྱད་པར་བ། །ལྟ་བའི་སྒྲིབ་པས་ཕྱེ་བ་ཡིན། །དེས་ན་དགྱེས་པའི་ལོངས་སྤྱོད་ཀྱང་། །མདོ་དང་བྱ་བའི་རྣལ་འབྱོར་གཉིས། །རྒྱུད་ལས་ཇི་ལྟར་གྲགས་པ་བཞིན། །གོང་གི་དགྱེས་ཆེན་ཡིན་ཚོད་མིན། །དེ་ཕྱིར་དགྱེས་པའི་རིམ་ཡོད་པས། །ས་ཡི་སངས་རྒྱས་རིམ་ཡོད་ཕྱིར། །མིང་གྲངས་ཡོན་ཏན་ཆ་མིན་ཏེ། །ངོ་བོ་ཉིད་ཀྱིས་རྣམ་པར་འཕགས། །ལམ་གྱི་རྩོལ་བས་ངལ་བ་རྣམས། །བྲོད་པ་བསྐྱེད་ཕྱིར་ཀུན་ཏུ་འོང་། །རྡོར་འཛིན་སྟུག་པོ་བཀོད་པར་བསྟན། །མཐར་ཐུག་ས་གསུམ་ཆ་ལས་བརྗོད། །དེ་ཕྱིར་སྐས་ཀ་ལྟ་བུ་སྟེ། །ཐབས་མཁས་འདི་ཡིས་གཞན་པ་ཡི། །ཐབས་ལ་རྟེན་ནས་མོས་བཅུག་ཅིང་། །བསྒྱུར་བས་འདིར་གྲུབ་རང་ཐབས་ཀྱིས། །རང་ས་ཐོབ་ལས་ངོ་བོ་ཉིད། །གཅིག་པར་སྨྲ་བ་མུན་སྤྲུལ་ལོ། །མཐར་ཕྱིན་པའི་འབྲས་བུ་བསྟན་པའི་ལེའུ་སྟེ་དགུ་པའོ།། ༈ །།འགྲོ་བ་ལམ་ལོག་ལམ་སྟོར་བ། །ལྔ་དང་ལྔ་རྣམས་བཀྲི་བའི་ཕྱིར། །མི་གཉིས་ལམ་མཆོག་འདི་བགྱིས་པའི། །ངལ་བའི་དགེ་རྩལ་ཀུན་གྲོལ་ཤོག །བྱང་ཆུབ་ཞོར་བྱེད་ཁེ་གྲགས་གཉེར། །བཅུད་ཆེན་འཛག་ཅིང་གཞོགས་ངོམ་ཅན། །གཙུག་རྒྱལ་སྒེག་མོ་འཇག་སྐྱེལ་དང་། །ནེ་བྱ་ལྟ་བུ་ལྐོག་གཡེམ་གསོག །ཚུལ་བསྲུང་དམ་ལ་མི་གནས་དང་། །གསང་བའི་གཞུང་ལ་སྲན་མི་ཚིགས། །གཞུང་མང་སྒྲུབ་ལ་ཡིད་ཆེས་དཀའ། །བླ་མ་སྤྱི་བོས་མི་ལེན་ཅིང་། །ཞེ་བས་སྐུར་ཞིང་ཡོངས་ལའང་སྐུར། །སྣོད་མིན་རྣམས་དང་མ་འཕྲད་ཅིག །གསང་སྔགས་རྡོ་རྗེ་ཐེག་པའི་མན་ངག་ལམ་གྱི་རིམ་པ་རིན་པོ་ཆེ་རྣམ་པར་བཀོད་པ་ཞེས་བྱ་བ་མཆོག་དང་ཐུན་མོང་གི་དངོས་གྲུབ་བརྙེས་པའི་སློབ་དཔོན་མཁས་པ་ཆེན་པོ་སངས་རྒྱས་གསང་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་མ་ཧཱ་པཎྜི་ཏ་བུདྡྷ་གུ་ཧྱ་ཉིད་དང་། བོད་ཀྱི་ལོ་ཙ་བ་གཉགས་ཛྙཱ་ན་ཀུ་མཱ་རས་མང་ཡུལ་ཁྲི་བབས་སུ་བསྒྱུར་བའོ། །སླད་ཀྱིས་རྒྱ་གར་གྱི་མཁན་པོ་མ་ཧཱ་པཎྜི་ཏ་བི་མ་ལ་མི་ཏྲ་དང་། བོད་ཀྱི་ལོ་ཙ་བ་གཉགས་ཛྙཱ་ན་ཀུ་མཱ་ར་ལ་སོགས་པས་བཅོས་ཤིང་ཞུས་ཏེ་གཏན་ལ་ཕབ་པའོ། །ༀ་སྭ་སྟི། རིས་མེད་ཀུན་ཁྱབ་གཞིར་གནས་ཆོས་ཀྱི་དབྱིངས། །དེ་མཐོང་དེར་འཇུག་ཚོགས་སྦྱོར་ལམ་ལྔ་ཡིས། །ལེགས་བསྒྲུབ་སློབ་པའི་ཟུང་འཇུག་རིག་འཛིན་བཞི། །རྒྱུད་ནས་འབྲས་རྒྱུད་སྐུ་ལྔར་མཚམས་སྦྱོར་བའི། །ལམ་མཆོག་རྣམ་པར་བཀོད་པའི་ལེགས་བཤད་གཞུངས། །འཇིགས་བྲལ་སངས་རྒྱས་གསང་བའི་ཐུགས་མཚོ་ལས། །ལེགས་པར་ཐོན་འདི་སྔ་འགྱུར་གཅེས་པའི་ནོར། །རིག་འཛིན་བྱེ་བའི་གཤེགས་ཤུལ་ཟླ་མེད་ཡིན། །དེ་སླད་གླེགས་བམ་གཅིག་ལས་གྲངས་མེད་དུ། །འཆར་བའི་ངོ་མཚར་འཕྲུལ་གྱི་སྤར་ཆེན་འདི། །དད་ལྡན་དགེ་བའི་ཡོན་གྱི་གཞི་སྦྱར་ནས། །བསྟན་གཉིས་དར་རྒྱས་གླིང་གི་ཆོས་གྲར་སྤེལ། །དེ་ལས་བྱུང་བའི་དགེ་འབྲས་བདུད་རྩིའི་ཀླུང་། །འཁོར་གསུམ་རྙོགས་མས་བསླད་མིན་རྣམ་མཁྱེན་མཚོར། །ཡོངས་བསྔོ་རྒྱལ་བ་དགྱེས་པའི་ལམ་གྱུར་ཏེ། །འགྲོ་ཀུན་སྐུ་བཞིའི་རྒྱལ་སར་ངལ་འཚོ་ཤོག །ཐེག་རྒྱལ་ལུང་སྤྱི་རྡོ་རྗེ་རྩེ་མོའི་སྲོག །མི་ནུབ་སྲིད་མཐའི་བར་དུ་ཡུན་གནས་ཤིང་། །བཤད་སྒྲུབ་ཕྲིན་ལས་ཟབ་མོས་ས་གསུམ་ཁྱོན། །ཡོངས་ཁྱབ་བཀྲ་ཤིས་སྣང་བས་མཛེས་གྱུར་ཅིག །བཀྲ་ཤིས་གང་ཞིག་ལྷག་བསམ་མཚོ་ཆེན་ལས་འཁྲུངས་ལེགས་བྱས་ཟླ་གཞོན་འདིས། །ནད་མུག་མཚོན་སོགས་སྐལ་ངན་དུས་ཀྱི་རྒུད་བའི་ཚད་གདུང་གཏན་བཅིལ་ནས། །སྣོད་བཅུད་དཔལ་འབྱོར་ཆུ་གཏེར་རབ་རྒྱས་ཕན་བདེའི་ཀུནྡཱ་བཞད་པ་ཡིས། །ས་འདིར་རྫོགས་ལྡན་དང་པོའི་དུས་སྟོན་གསར་དུ་འཆར་བའི་རྒྱུར་གྱུར་ཅིག །ཅེས་པའང་རྣམ་དཀར་འདུ་བྱེད་པོ་སྔགས་བཙུན་འགྱུར་མེད་པདྨ་བསྟན་འཛིན་རང་ཉིད་ཀྱིས་བྲིས་ཤིང་སྨོན་པ་མངྒ་ལཾ། དགེའོ། །དགེའོ། །དགེའོ། །།བྱེ་ཆེན་ཤིང་པར་ལ་ཞལ་བ ཤུན་པའོ།།