རིམ་པ་དྲུག་པ། སློབ་དཔོན་སྒེག་པ་རྡོ་རྗེ།
༄༅ ། །རིམ་པ་དྲུག་པ་ཞེས་བྱ་བ་བཞུགས་སོ། །བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རང་བཞིན་མ་སྐྱེས་ལྷུན་གྲུབ་དམིགས་མེད་རང་རིག་སྣ་ཚོགས་རང་སྣང་ལ། །ཡིད་སོགས་དབང་བསྒྱུར་ཕྲ་མོ་རིམ་སྣང་ཐམས་ཅད་བསམ་ཡས་ལྷུན་གྲུབ་ནི། །ལམ་གཞི་བསྒྲུབ་བྱ་དངོས་གསུམ་རང་རིག་འབྲེལ་བའི་ཚུལ་གྱིས་བསྡུ་མཛད་ལ། །མཉམ་ཤེས་མོས་སྦྱོར་མངོན་བྱེད་བསྐྱེད་ཚུལ་རིམ་གཉིས་རང་སྣང་ཚུལ་ཕྱག་འཚལ། །བསྒྲུབ་བྱ་གཞན་རྒྱུས་མི་བསྐྱེད་དེ། །རང་བཞིན་ཐབས་འབྲེལ་མངོན་བྱེད་པའི། །ཐབས་ཆེན་གསང་བའི་རིམ་འདི་དག །ཐམས་ཅད་རྒྱུད་དུ་མ་བསྟན་པ། །བསྟན་པའི་སྙིང་པོར་གསལ་མཛད་དེ། །ལུས་རྣམས་རིམ་པ་ཡན་ལག་བཅས། །རྒྱས་བཏབ་གཟུ་ལུམས་དོན་མཛད་དེ། །རྡོ་རྗེ་ལས་གཉེར་གཏད་པ་དག །གཏན་ཚིགས་གཉིས་རྗེས་རིགས་འབྲངས་ནས། །རྣམ་གསུམ་དང་བའི་ལས་དག་གིས། །བླ་མ་བསྙེན་བྱེད་དོན་ཕྱིར་དབྱེ། །རིམ་འདི་གཉེར་གཉིས་ཀྱིས་དབྱེ་ན། །ལུས་ནི་རྣམ་པ་གསུམ་གཉིས་ཏེ། །རང་བཞིན་ཏིང་འཛིན་ལྔར་ཤེས་བྱ། །རང་བཞིན་རྐྱེན་གྱིས་མངོན་བྱས་པ། །འབྲས་བུ་རྒྱུ་ལ་མིང་བཏགས་ཀྱང་། །གསལ་ཞིང་གསལ་བྱས་གསུམ་དུ་འགྱུར། །འདི་དག་མཚན་ཉིད་བསྡུ་བ་ཉིད་ནི། །ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །བར་མ་གོམས་པའི་ལུས་ཉིད་ནི། །སྲིད་པ་འབྱུང་བའི་རིམ་ཚུལ་གྱིས། །རང་གི་ཡན་ལག་བཞི་རུ་འགྱུར། ༈ །འདི་དག་འབྲེལ་བའི་མཚན་ཉིད་ནི། །ཕུང་སོགས་རང་གི་ཡེ་ཤེས་ཀྱི། །དཀྱིལ་འཁོར་ཉིད་ཀྱི་དབྱིངས་ཡིན་པས། །ཚད་མ་གསུམ་གྱི་དངོས་པོ་ཡིས། །ཤེས་ན་བསྒྲུབ་པའི་གཞི་རུ་འགྱུར། ༈ །དག་པ་རྣམ་གསུམ་མ་ནོར་ཞིང་། །རང་རིག་རྒྱལ་པོ་གོམས་པ་ཡིས། །བྱང་ཆུབ་མཆོག་འདི་རྙེད་འགྱུར་ཕྱིར། །མཚན་ཉིད་གཉིས་པའི་དང་པོར་བཞག །བདེན་གཉིས་རྒྱུ་འབྲས་ཚུལ་དག་གིས། །དོན་དམ་སྐྱེ་འགག་མེད་པ་སྟེ། །ཀུན་རྫོབ་སྒྱུ་མ་ཅིར་ཡང་འགྲུབ། །མཉམ་ཉིད་གསང་བའི་དཀྱིལ་འཁོར་དབྱིངས། །དབྱིངས་ཉིད་ཡེ་ཤེས་ཐིག་ལེའི་ངང་། །དེ་ཉིད་གཟུགས་བརྙན་སྒྱུ་མའི་ཚུལ། །སྣང་བྱེད་ཉིད་ན་མ་གྲུབ་པས། །ཡེ་ཤེས་དཀྱིལ་འཁོར་བཞི་བཅུ་ལྔ། །བདེན་པ་གཉིས་སུ་མི་འགྱུར་ཕྱིར། །ཡེ་ཤེས་སྒྱུ་མ་རྗེས་སུ་བསྟན། །ཡེ་ཤེས་སྒྱུ་མའི་ལུས་ཉིད་ནི། །རང་བཞིན་གཅིག་ཏུ་མ་ངེས་པས། །ཅི་ཡང་མེད་ལས་ཅིར་ཡང་སྣང་། །རྫུ་འཕྲུལ་མངོན་པར་ཤེས་ཚུལ་གྱིས། །གཅིག་དང་དུ་མར་མ་ངེས་པས། །ཕྱི་ནང་སྣོད་བཅུད་ཧཱུཾ་དུ་བསྡུ། །ཕྲ་མོ་ལུས་སུ་སེམས་དཔའ་གསུངས། །ཕུང་སོགས་རང་བཞིན་དཀྱིལ་འཁོར་ཚོགས། །འདི་ལས་རིམ་པ་ཡོད་མིན་ཏེ། །ཤེས་བྱ་བསྡུས་པའི་ཚུལ་དག་གིས། །དུ་མའི་དངོས་པོ་གཅིག་གིས་སྣང་། །གོལ་བ་དམན་པའི་དོན་ཕྱིར་དུ། །ངེས་ཕྱིར་རྗེས་སུ་བཞག་པ་ཡིན། །ཡན་ལག་མཚན་ཉིད་འདིར་གསུངས་པ། །དུ་མ་གཅིག་བྲལ་ཤེས་རབ་ཀྱིས། །ཟིན་པའི་ཐབས་ནི་མི་འཆིང་ཞིང་། །ངེས་པར་ཚོགས་སུ་འགྱུར་བའི་ཕྱིར། །ཡོ་བྱད་ལྔ་སོགས་ལྡན་པར་བཤད། །འདི་དག་དགོས་པའི་དོན་ཡིན་ནོ། །དེ་ཡི་ཡང་དགོས་བསྟན་པར་བྱ། །ཏིང་འཛིན་སྤྱོད་པ་འབྲེལ་གོམས་དང་། །ཡོ་བྱད་གཅིག་གི་ཐབས་ཆེན་པོས། །འཛིན་པ་ཡོངས་སུ་གྲོལ་བའི་ཕྱིར། །དྲུག་སོགས་མང་པོ་རོ་མྱོང་ཡང་། །མ་ལུས་བདག་ལས་གཞན་མིན་ཕྱིར། །མི་དམིགས་མཁའ་དང་སྙོམས་པ་ཡིས། །དགྱེས་པ་ཆེན་པོར་ལོངས་སྤྱོད་པའི། །དབང་པོའི་ཡུལ་དུ་སྦྱོར་ཞེས་བྱ། །འཁོར་བ་སྤངས་མེད་སངས་རྒྱས་ཤིང་། །རྒྱན་གྱི་དཀྱིལ་འཁོར་ལྷུན་གྱིས་གྲུབ། །བདུད་བཞི་བཅོམ་པའི་དཔའ་བོ་ནི། །དེ་ལ་སྣང་ཕྱིར་དེར་བཞག་གོ། །འདི་དག་ཕལ་གྱི་ཡུལ་མིན་ཕྱིར། །གཞན་དག་རྒྱུད་དང་འདི་ཉིད་དུ། །མ་གསུངས་ཤིན་ཏུ་གབ་པ་ཡིན། །ཡུན་དང་རྩོལ་བས་སྐལ་མེད་ཕྱིར། །ངང་གིས་བློ་དམན་སྒྲ་གོམས་ཉུང་། །སེར་སྣ་རང་ཕྱོགས་ཁྱེངས་སེམས་ཀྱིས། །དུལ་བཅས་གུས་པའི་བསྙེན་བཀུར་མེད། །རྡོ་རྗེ་སྤུན་ལའང་དེ་བཞིན་ཏེ། །ལམ་ཀུན་བློ་དང་མི་འཚམས་ཕྱིར། །ཆུང་དུས་མྱ་ངན་བཟླ་བར་ངེས། །གང་ཡང་ཕྱོགས་ཆ་ཆུབ་པས་ན། །སྟོན་པ་གཉིས་ལ་རྒྱབ་ཕྱོགས་པ། །གསང་བའི་སྙིང་པོའི་སྣོད་མིན་ཕྱིར། །ཁམ་སར་སེང་གེའི་ཞོ་མི་བླུགས། །རྨོང་ལ་འཕྱར་བས་གལ་ཏེ་བྱིན། །དུས་མིན་པར་ནི་སྲོག་ཟད་ནས། །བསྲེགས་དང་སྦྲེབས་པར་ཡུན་རིང་གནས། །མགོ་འགས་སྙིང་ཡང་ཚིག་པར་འགྱུར། །ཁབ་ལེན་གྱིས་ནི་ལྕགས་སྡུད་ཕྱིར། །མི་འདོད་བཞིན་དུ་དབང་མེད་པས། །བསྐལ་པར་ངན་སོང་སྡུག་བསྔལ་མྱོང་། །དེ་ཕྱིར་ཤིན་ཏུ་གསང་བར་བྱ། །བྲན་མཐའ་བཞིན་དུ་གསུམ་ནས་ནི། །ཆགས་གཉིས་བྲལ་བའི་བསྙེན་བཀུར་ཅན། །ཤེས་རབ་རྒྱ་ཆེ་བློ་ཡངས་པ། །སྙིང་རྗེས་སེམས་ཅན་མི་བསླུ་ཞིང་། །བློ་བརྟན་ངང་ཚུལ་བཟང་ལ་སྦྱིན། །གསེར་ཕྱིས་བླུགས་པའི་སེང་གེའི་ཞོས། །ཞོ་ངན་ཐམས་ཅད་འཐོར་བས་ནུས། །དེ་བས་ལམ་འདི་སྣོད་བརྟགས་བྱ། །དང་པོ་ཡན་ལག་བཅས་པའི་ལུས། །རྒྱུ་རྐྱེན་བྱེད་པའི་ངོ་བོ་དང་། །རང་བཞིན་མཐའ་དྲུག་གིས་རྫོགས་འགྱུར། །ཡང་དག་གཤེགས་དང་ལོག་རྟོག་གཉིས། །ངོ་བོ་ཉིད་ཀྱིས་གནས་འགྱུར་ན། །དེ་ལ་བཅོས་ཤིང་བསྒྱུར་དུ་མེད། །ཡེ་ནས་རང་བཞིན་དབྱེར་མེད་ཕྱིར། །ཉོན་མོངས་སྤང་ཞིང་བྱང་བསྒྲུབ་མེད། །སོ་སོའི་རང་བཞིན་ངེས་ཤེས་ན། །ཡང་དག་ལམ་གྱིས་བཅོས་སུ་མེད། །དེ་བས་ཡང་དག་བློ་ཅན་གྱིས། །ཐམས་ཅད་དངོས་པོ་མེད་པར་བཤད། །འཁོར་བ་སེམས་ཕྱིར་བདག་མེད་པས། །དེ་ཕྱིར་དེ་བཞིན་གཤེགས་བསམ་ཡས། །ཐབས་དང་ཤེས་རབ་ལྡན་གྱུར་ན། །ཕྱིན་ཅི་ལོག་ཉིད་ཡང་དག་སྟེ། །འཁོར་བའི་རང་བཞིན་མི་དམིགས་ཕྱིར། །མྱ་ངན་འདས་པ་ཡོད་མ་ཡིན། །དེ་ཤེས་བྱ་ཕྱིར་རྒྱུ་སོགས་དབྱེ། །མ་རིག་ལྷན་ཅིག་མཚུངས་པའི་རྒྱུ། །གཏི་མུག་མིང་གི་རྣམ་གྲངས་ཏེ། །རང་རིག་ཉིད་ལས་ཉམས་མེད་ཕྱིར། །གཉིས་མེད་དོན་གཅིག་ཡིན་པར་བཤད། །ཅེས་དང་བདག་དང་དངོས་པོ་རྣམས། །ངོ་བོ་ཡོད་ལ་སོགས་བཏགས་པའི། །རྟོག་པ་སྒྱུ་མའི་ཀླུང་འགྱུར་བས། །ཕྱི་ནང་རྟེན་འབྲེལ་གཉིས་འཁོར་ཕྱིར། །སྲིད་རྩ་ཉེས་དམིགས་བདག་ལས་བྱུང་། །རྣམ་རྟོག་རང་གིས་སེམས་ཡིན་ཕྱིར། །ཆོས་རྣམས་མ་ལུས་ཐམས་ཅད་ལ། །བྱང་ཆུབ་སྙིང་པོ་ཡོད་པར་བལྟ། །རང་བཞིན་ཡེ་ནས་འོད་གསལ་བའི། །བྱང་ཆུབ་སྙིང་པོར་ཐམས་ཅད་ཐིམ། །དེ་ཕྱིར་རང་བཞིན་མ་སྐྱེས་པས། །ཐམས་ཅད་མིང་ཙམ་སྟོང་ཉིད་ཡིན། །ཐམས་ཅད་མ་ལུས་སྟོང་ཞེས་ཏེ། །ས་རྡོ་དྲན་མེད་མ་ཡིན་ཏེ། །རྟོག་མེད་རང་རིག་འོད་གསལ་བས། །འདི་ལྟར་སྣང་བ་ཐམས་ཅད་ཀུན། །རྡོས་པ་ཅན་གྱིས་ཆོས་མིན་ཏེ། །ཤེས་པ་འབའ་ཞིག་ཁོ་ནའོ། །དེ་ཕྱིར་བརྟན་གཡོ་མ་ལུས་ཀུན། །སྒྱུ་མའི་རང་བཞིན་བྱ་བྱེད་ཀྱང་། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུར་རང་གནས་པར། །ཀུན་བཟང་རྡོ་རྗེ་སེམས་དཔས་གསུངས། །ཉོན་མོངས་ལས་ཀྱིས་ལྷན་ཅིག་བྱེད། །ཉོན་མོངས་རང་དང་སྤྱིར་བསྟན་པ། །མཚན་ཉིད་མ་ནོར་དོན་རྟོགས་ན། །རྣམ་པར་བྱང་བའི་ལམ་དུ་འགྱུར། །སྐུ་གསུང་ཐུགས་ཀྱི་དངོས་གྲུབ་ཀྱང་། །གང་ན་མེད་དེ་དེ་ཉིད་ཡིན། །སྒྱུ་མ་རྩལ་འཛིན་ཐབས་སུ་འཕྲོས། །མཚན་རྣམས་མི་དམིགས་ཤེས་རབ་སྦྱོར། །གཉིས་མེད་ཡེ་ཤེས་བྱང་ཆུབ་སེམས། །ཉོན་མོངས་སྤྱི་ཡི་མཚན་ཉིད་ནི། །མི་རྟག་སྡུག་བསྔལ་སྟོང་བདག་མེད། །རང་མཚན་ཆགས་སོགས་སྣང་བ་ནི། །རྣམ་རྟོག་ཉིད་ན་ཡེ་ཤེས་ཏེ། །རང་བཞིན་རང་རིག་འོད་གསལ་ཕྱིར། །ཉོན་མོངས་ཡེ་ཤེས་སྤངས་སྒྲུབ་མེད། །རྟོག་ཞེན་ངོ་ལ་རྒྱུ་སྣང་ཡང་། །སེམས་ཕྱིར་རང་བཞིན་མ་སྐྱེས་པས། །དེ་ཉིད་ཡི་གེའི་སྒྲས་མཚོན་ཏེ། །སྣང་སྟོང་གཉིས་མེད་ཆོས་སྐུའི་རྒྱ། །ལས་རྟོག་མི་མཐུན་ཐ་དད་ཕྱིར། །རང་མཚན་སྒྱུ་མ་ལྔ་སྣང་བ། །རང་བཞིན་དབྱིངས་ལས་མ་གཡོས་ཀྱང་། །གདུལ་བྱ་སོ་སོའི་དོན་བྱེད་པ། །ཆ་གཉིས་ལྡན་པའི་ཡིག་ཚུལ་གྱིས། །གསུང་གི་ཕྱག་རྒྱ་ཆེན་པོ་ཡིན། །དེ་ལྟར་རྒྱུ་ནས་དོན་ལྔར་དག །རང་རིག་སྒྱུ་མ་ལྔར་སྣང་ཡང་། །སེམས་ཕྱིར་གཅིག་དང་དུ་མ་མེད། །བདེན་པ་གཉིས་ཀ་དབྱེར་མེད་ཕྱིར། །དེ་བཞིན་ཏིང་འཛིན་དབང་བསྒྱུར་ན། །ཡེ་ཤེས་ལྔ་རུ་གསལ་བ་ཉིད། །ཡི་གེ་རྫོགས་པའི་ཚུལ་ཉིད་ཀྱིས། །ཐུགས་ཀྱི་ཕྱག་རྒྱ་ཆེན་པོ་ཡིན། །དེ་ལྟར་དོན་ལྔར་དག་པ་ཉིད། །མྱ་ངན་འདས་པའི་རང་བཞིན་ལ། །ཐབས་དང་ཤེས་རབ་མ་རྟོགས་པས། །མ་གྲོལ་ཁམས་གསུམ་འཁོར་བ་ཡིན། །དེ་ལྟར་ངེས་པར་ཅིས་མངོན་ན། །སྔགས་ཀྱིས་ཡོངས་སུ་ཟིན་པའི་ནད། །ཀུན་ལ་གནོད་པར་བྱེད་མི་ནུས། །ཐབས་དང་ཤེས་རབ་རྟོགས་པ་ཡིས། །དུག་གསུམ་སྡུག་བསྔལ་གནོད་མི་འགྱུར། །ཐབས་དང་ཤེས་རབ་ལྡན་པ་ལ། །ཉོན་མོངས་ཐམས་ཅད་བྱང་ཆུབ་རྒྱུ། །ལུས་ངག་ཡིད་གསུམ་རང་བཞིན་ནི། །སྣང་སྟོང་གཉིས་མེད་སྐུ་གསུང་ཐུགས། །ཆོས་ཀུན་རང་བཞིན་དག་པའི་ཕྱིར། །ལས་རྣམས་ཡོངས་སུ་དག་པར་འགྱུར། །གསང་སྔགས་བླ་ན་མེད་པ་འདི། །ཐབས་ཀྱིས་ཇི་ལྟར་ཟིན་ཞིང་འགྲུབ། །བསམ་གྱིས་མི་ཁྱབ་ངེས་པ་མེད། །ཐབས་ལ་མཁས་པས་མ་ཟིན་ན། །ལམ་གྱི་དགེ་སྤྱད་སྟེགས་བཅས་ཀྱང་། །མཐོ་རིས་ལྷ་དང་མི་རུ་སྐྱེ། །སྐྱེ་ཤི་མེད་པའི་ས་མི་ཐོབ། །ཐབས་མཁས་སྙིང་རྗེས་ཟིན་པ་ནི། །མཚན་མེད་སེམས་ཅན་མ་ལུས་ཀུན། །བྱང་ཆུབ་སྙིང་རྗེས་བསད་ན་ཡང་། །བསོད་ནམས་དཔག་ཏུ་མེད་པ་ཐོབ། །ཉོན་མོངས་ཕྱིན་ཅི་ལོག་གི་ལམ། །ཐབས་ལ་མཁས་པས་ཟིན་གྱུར་ཀྱང་། །གྲོལ་ལམ་ཐར་པར་མི་འགྱུར་ན། །བྱང་ཆུབ་སེམས་དཔའ་རྣམས་ཀུན་གྱིས། །གདུལ་བྱའི་དབང་གི་བྱ་བྱེད་པ། །རྔོན་དང་སྨད་འཚོང་སྟོན་པའང་རུང་། །བྱང་ཆུབ་སེམས་དཔའ་སྤྱོད་ཚུལ་བཟང་། །ཕལ་ལ་མེད་པར་མི་རུང་ཡང་། །སྔགས་མཆོག་ཤིན་ཏུ་ཟབ་པ་ཡི། །སྐྱེ་བོ་ཀུན་གྱིས་བྱ་བར་འགྱུར། །དེས་ན་རང་བཞིན་དག་པ་ཡིན། །དེ་དག་མངོན་དུ་བསྒྲུབ་པ་ནི། །མ་བཅོས་རྒྱུན་གྱི་སྐད་ཅིག་མ། །དེ་ཡིས་མ་བྱས་གང་ཡང་མེད། །དབང་པོ་ཡུལ་དུ་སྣང་བ་ཀུན། །ཡུལ་རྣམས་ཡོད་པ་མ་ཡིན་ཏེ། །ཀུན་གཞིའི་རྣམ་པར་ཤེས་པ་ཉིད། །དངོས་པོ་སྣ་ཚོགས་པར་སྣང་སྟེ། །ནད་དང་ནང་གི་ཕྱི་རོལ་གྱིས། །རྣམ་རྟོག་སྣ་ཚོགས་སྣང་བ་ཡང་། །དངོས་པོ་མེད་དབྱིངས་སྐད་ཅིག་མ། །དེ་ཉིད་རྣམ་པར་དག་པའི་ལམ། །ཡང་དག་གཤེགས་དང་ལོག་རྟོག་དང་། །གཞན་ཡང་སྤྲུལ་པ་མང་པོའི་ཚོགས། །ཕྱོགས་བཅུ་མ་ལུས་ཐམས་ཅད་ཀྱིས། །དེ་ལ་བསད་ཅིང་བཟུང་དུ་མེད། །ཁ་དོག་གནས་དང་དབྱིངས་རིགས་མིན། །དེ་ཉིད་ཡེ་ཤེས་རང་སྣང་ཕྱིར། །སྣ་ཚོགས་སྣང་བ་དེ་བཞིན་ལྟ། །རང་རིགས་ཉིད་ལས་གཞན་མིན་ཕྱིར། །སྣང་སྟོང་གཉིས་མེད་བྱང་ཆུབ་སེམས། །སྐྱེས་བུ་དམ་པ་མཆོག་འདོད་པས། །དེ་ལ་བརྩོན་འགྲུས་གསལ་བར་གྱིས། །དེ་ཡི་འབྲས་བུ་མཐར་ཕྱིན་མིན། །རྒྱུ་འབྲས་མེད་པའི་དུས་གཅིག་ཏེ། །ཐམས་ཅད་མིང་ཙམ་མཚན་ཉིད་དུ། །ཡི་གེ་འབྲུ་གསུམ་རྫོགས་པར་འགྱུར། །མི་ཟད་རྒྱན་གྱི་འཁོར་ལོར་བསྡུ། །ཚོགས་ཆེན་གཉིས་ཀྱང་རྫོགས་པར་རོལ། །སྐྱེ་འཇིག་མེད་པའི་དབྱིངས་ལ་བཞུགས། །དེ་དག་ངོ་བོ་ཉིད་བསྟན་པ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །མི་མཐུན་བདེ་སྡུག་མྱོང་བར་འགྱུར། །བདག་དང་བདག་གི་གཞན་རྣམས་ནི། །ལོག་པར་རྟོག་པ་ཙམ་ཉིད་ལས། །ཕྲ་ཞིང་ཟབ་པའང་ཡོད་མ་ཡིན། །ལོག་རྟོག་ཉིད་ལ་ཉིད་སྤྱོད་དེ། །གཞན་དུ་གཡོ་བ་ཅི་ཡང་མེད། །ལོག་རྟོག་རང་བཞིན་རང་རིག་ཕྱིར། །ཐམས་ཅད་མ་ལུས་ཆོས་སོ་ཅོག །སེམས་ཉིད་ལས་ནི་གཞན་ན་མེད། །སེམས་དང་ཆོས་སུ་དབྱེར་མེད་པས། །བྱང་ཆུབ་ལམ་དེ་རིང་བ་མེད། །གཅིག་ཕྱིར་རང་རིག་རྐྱེན་བྲལ་བས། །རྣམ་པར་དག་པའི་དབྱིངས་ཉིད་ཚུལ། །ཉིད་ལ་དབང་བསྒྱུར་ཉིད་སྤྱོད་ཕྱིར། །བདག་དང་གཞན་དང་རྟོག་པའི་རྒྱུན། །རྣམ་དག་སྣོད་བཅུད་རྒྱུན་མི་དམིགས། །ལྔ་ཕུང་ཡན་ལག་ཐམས་ཅད་ནི། །འབྲུ་ལྔར་འདུས་པའི་བྱང་ཆུབ་སྐུ། །འབྱུང་ལྔ་མ་སྐྱེས་ཤེས་རབ་ཡུམ། །སྐྱེ་མཆེད་ཁམས་རྣམས་རྡོ་རྗེའི་ཚོགས། །རྣམ་ཤེས་ཡེ་ཤེས་དཀྱིལ་འཁོར་དུ། །དག་ཕྱིར་འབྲས་བུའི་ཐེག་པ་མཆོག །ངེས་འབྱུང་ཀུན་གྱི་བསྒྲུབ་བྱར་གསུངས། །དམིགས་བྱ་དམིགས་བྱེད་མེད་ཚུལ་གྱིས། །ཤིན་ཏུ་གསལ་བའི་མངོན་གསུམ་པ། །ངོ་བོ་ཉིད་ནི་དམིགས་སུ་མེད། །དེ་ལྟར་འཁོར་བ་ངོ་བོས་དག །དེ་ལྟར་དེ་དག་མཐའ་བརྟགས་ན། །འཁོར་བའི་རང་བཞིན་མ་སྐྱེས་ཕྱིར། །འཁོར་བ་ཡོངས་སུ་ཤེས་པ་ན། །མྱ་ངན་འདས་ཤེས་དེ་ལ་བྱ། །འཇིག་རྟེན་འདི་ན་ཅི་ཡོད་པའི། །མིང་དང་ཐ་སྙད་འཛིན་པ་དེ། །སོ་སོའི་མཚན་ཉིད་གཤིག་བྱས་ན། །རང་བཞིན་མེད་དེ་ཡང་དག་ཉིད། །རང་བྱུང་ཆེན་པོའི་ཡེ་ཤེས་ཀྱིས། །ཐམས་ཅད་སངས་རྒྱས་ཞིང་དུ་སྦྱོར། །མ་བཅོས་མ་བྱས་ངང་གི་གསལ། །ཡེ་ནས་འོད་གསལ་སངས་རྒྱས་ཞིང་། །ཕུང་སོགས་མ་སྐྱེས་ཡེ་ཤེས་པས། །སྣང་སྟོང་གཉིས་མེད་བྱང་ཆུབ་སེམས། །སྐུ་དང་ཡེ་ཤེས་བསམ་མི་ཁྱབ། །གང་གི་དེ་ལྟར་མངོན་སུམ་པ། །མཐའ་རྣམས་ལྟ་བས་ཡོངས་གྲོལ་ཏེ། །སྤྱོད་ཡུལ་ཡོངས་སུ་དག་གྱུར་པས། །མཚན་ཉིད་དང་པོར་ཤེས་པར་བྱ། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བསྡུས་པ། །རང་བཞིན་གྱིས་གནས་པའི་དོན་རྗེས་སུ་ཤེས་པའི་མཚན་དེ་རིམ་པ་དང་པོའོ། ༈ །དེ་ནས་ཉམས་སུ་བླང་བའི་དོན། །མཚན་ཉིད་བར་མ་བཤད་པར་བྱ། །དེ་ཉིད་གཞི་ཡི་དཔེས་མཚོན་ཏེ། །རྒྱུ་འབྲས་ཚུལ་གྱིས་འབྱུང་བ་ཡི། །སྲིད་པ་སྐྱེ་བའི་རིམ་པ་ནི། །ཁམས་དང་ལས་ཀྱི་རྐྱེན་དག་གིས། །སུམ་མདོ་སྙིང་ལྐོག་ལྟེ་རླུང་ལ། །འབྱུང་བཞི་ལས་རླུང་འདུས་པ་ལས། །དོན་རྣམས་སྣང་བ་བྲལ་འགྱུར་ཞིང་། །དངས་མའི་སྙིང་པོར་ཞུགས་པ་ན། །གཉིས་མི་འཛིན་པ་ཉམས་པ་ཡིས། །ཐམས་ཅད་འཛིན་སྣང་བྲལ་བའི་མཐུས། །བར་མ་སྒྱུ་མའི་སྐུ་ཐོབ་སྟེ། །གདོས་དང་བྲལ་བས་ས་སོགས་སྨིན། །ཕྱིས་འབྱུང་ཆ་བྱད་ཡོངས་གཟུང་བ། །རྫུ་འཕྲུལ་ཐོགས་མེད་ལས་ལས་བྱུང་། །དབང་པོ་ཡན་ལག་ཀུན་རྫོགས་པ། །དངོས་པོ་ཀུན་ལ་ཐོགས་མེད་ཅིང་། །འོད་ལྡན་སྣོད་བཅུད་གསལ་བར་སྣང་། །འོད་ཀྱིས་དཔག་ཚད་བྱེ་བ་འགེངས། །ཞག་བདུན་ཉིད་དུ་གནས་པར་གསུངས། །དེ་ཉིད་རྣམ་ཤེས་སྐད་ཅིག་མ། །ཉོན་མོངས་ལས་ཀྱིས་འཕགས་པ་ཡིས། །ས་བོན་གཉིས་དང་ལྷན་ཅིག་པ། །མིང་གཉིས་སུ་ཡང་གྱུར་པ་ཡིན། །སྟོང་ཕྲག་བདུན་བཅུ་གཉིས་གཉིས་བཅུད། །མ་ལུས་འདུས་པའི་ནུས་མཐུ་ཅན། །གསུམ་འདྲེས་ཐ་དད་ཚུལ་གཅིག་པ། །རང་གི་ལས་ཀྱིས་རབ་བསྐུལ་བའི། །རླུང་གིས་འཇུག་པ་འཕེལ་བྱེད་དེ། །གཏུན་ཤིང་ལྟ་བུར་འགྱུར་བ་དཔེ། །དེ་ལ་ཡང་ནི་དེ་བཞིན་པས། །ཡན་ལག་ཆོས་རྣམས་རྫོགས་འགྱུར་པ། །རླུང་གིས་བསྐུལ་ནས་མངོན་སུམ་འགྱུར། །གང་ཡིན་དེ་འདྲར་བདག་འཛིན་སེམས། །ངེས་པར་སྙིང་ལ་གནས་པ་ཡིན། །རིམ་བྲོ་རྣམས་ཀྱིས་ལུས་སྨིན་ཅིང་། །བརྡ་ཡིས་ངག་ཀྱང་གྲོལ་བར་འགྱུར། །དེ་ཉིད་ཀྱིས་ནི་རྣམ་ཤེས་གསལ། །དངོས་པོ་ཀུན་ཀྱང་ཤེས་པ་ཉིད། །ཡུལ་ཟླ་ཟས་ནོར་སྤྱོད་དབང་བས། །ཆགས་གཉིས་ལ་སོགས་འཇུག་པར་བྱེད། །རྐྱེན་ལྡན་ཕུང་སོགས་རྒྱས་པ་དེ། །རིག་པ་ལ་སོགས་རྒྱས་པ་དེས། །ཐམས་ཅད་ལས་ལ་ཐོགས་མེད་ཅིང་། །གཞན་གྱི་དོན་ཡང་བྱེད་པར་ནུས། །ཀུན་ཏུ་ཀུན་ནས་བརྟགས་པ་ཡི། །འཁོར་བ་ལྷུན་གྲུབ་ཉིད་དུ་སྣང་། །རང་བཞིན་དག་པའི་སངས་རྒྱས་ཀྱང་། །ཐབས་དང་ལྷན་ཅིག་མི་གནས་ན། །གཟུང་འཛིན་འཆིང་བས་བཅིངས་པར་འགྱུར། །དེ་ཉིད་ཚུལ་གྱིས་འཇུག་སོགས་པའི། །རིམ་པ་ཡོངས་སུ་རྫོགས་པར་འགྱུར། །ལམ་གྱི་ཚུལ་ཡང་དེ་བཞིན་ཤེས། །རིམ་པ་རྗེས་འཇུག་དོན་ཉིད་ནི། །སྔོན་དུ་བྱ་བའི་ལས་བྱས་ནས། །ཤིན་ཏུ་དབེན་པའི་ས་ཕྱོགས་སུ། །རང་བཞིན་མཉམ་པའི་རྗེས་མཐུན་པར། །དེ་བཞིན་ཉིད་དང་མཉམ་སྦྱོར་ཕྱིར། །དམ་པའི་དོན་ཡིན་བསྒོམ་མ་བྱ། །བྱང་ཆུབ་ཚོགས་ལ་བཟུང་བར་གནས། །མཆོག་ཏུ་བདེ་བའི་ཞི་གནས་པས། །མཉམ་རྫོགས་ཆེན་པོ་ལྷུན་བསྒོམ་ཞིང་། །བྱང་ཆུབ་སེམས་སུ་བརྟན་པར་གཟུང་། །བྱ་བ་མེད་ལས་བྱ་མེད་བྱས། །མི་གནས་པའི་ངང་གནས་པར་བསྒོམ། །གཏན་ཚིགས་རྒྱས་པར་ལུས་བཞག་ན། །དགོས་ཆེད་ཐབས་དང་མི་མཐུན་དང་། །བཅོས་ཉམས་རྗེས་སུ་སྤྱོད་པ་ཡིས། །རིམ་འདི་ཡོངས་སུ་ཤེས་པར་འགྱུར། །འཇིག་རྟེན་འདས་དང་འཇིག་རྟེན་པའི། །ཆོས་རྣམས་མ་ལུས་རང་བཞིན་ནི། །མ་སྐྱེས་སེམས་ལས་ཅིར་སྣང་ཡང་། །དེ་ཕྱིར་བདེན་གཉིས་རྒྱུ་འབྲས་ཚུལ། །གསེར་ལས་བྱས་པའི་རྫས་རྣམས་ཀུན། །མིང་ལས་མཚན་མ་སོ་སོ་ཡང་། །ཐམས་ཅད་གསེར་གྱི་ངོ་བོར་གཅིག །སེམས་ཉིད་རིག་དང་མ་རིག་ལས། །འདས་དང་མ་འོང་ཅིར་ཡང་སྣང་། །ཐམས་ཅད་རང་རིག་ངོ་བོའི་ཕྱིར། །རང་བཞིན་ཉིད་ཀྱི་དག་པས་ན། །སྒྱུ་མ་སྟོང་སོགས་རྣམ་གྲངས་དང་། །བདེན་གཉིས་དབྱེར་མེད་ཡེ་ཤེས་དང་། །དཀྱིལ་འཁོར་ལ་སོགས་དོན་རྣམས་ཀུན། །དེ་ཉིད་རྗེས་སུ་བརྗོད་པ་ཡིན། །རང་བཞིན་གཏན་ཚིགས་སྔར་སོང་བས། །གསུམ་སོགས་གཏན་ཚིགས་རྗེས་སུ་གསུངས། །རྡོ་རྗེས་ཉམས་བླངས་དགོས་ཆེད་ནི། །དཀྱིལ་འཁོར་བསམ་ཡས་ལྷུན་གྲུབ་པ། །མི་དམིགས་དབྱིངས་ནས་དོན་འབྱིན་ཏེ། །མ་བཅོས་ཇི་བཞིན་ངང་བཞག་དང་། །ལྷུན་གྱིས་གྲུབ་པའི་དཀྱིལ་འཁོར་འབྱུང་། །མི་དམིགས་ཐུགས་ཀྱི་དཀྱིལ་འཁོར་ལས། །ཏིང་ངེ་འཛིན་གྱིས་དབང་བསྒྱུར་ནས། །ཡེ་ཤེས་སྤྲུལ་པ་སྣ་ཚོགས་འགྲུབ། །སྤྱོད་ཡུལ་ཐམས་ཅད་མཎྜ་ལ། །ལོངས་སྤྱོད་སྐུ་དང་སངས་རྒྱས་ཞིང་། །ཇི་ལྟར་འདོད་པ་སྨོན་ན་འགྲུབ། །ཡངས་ཤིང་རྒྱ་ཆེ་ལྷུན་གྲུབ་ནི། །ཕྱི་ནང་སྣོད་བཅུད་ཡེ་ནས་དག །དག་རྟོག་ཉིད་ཀྱང་དམིགས་ཉིད་ཡིན། །འདི་ནི་རྡོ་རྗེ་མཉམ་ཡིན་ནོ། །ལྷུན་གྲུབ་ཇི་ལྟར་འདོད་སྣང་བ། །གཉིས་སོགས་མཚན་མས་སྒྲིབས་པའི་ཕྱིར། །ཇི་ལྟར་བྱིས་པ་ཤེད་མ་ཕྱེ། །བྱ་བྱེད་མང་པོས་གཡེངས་པར་གནས། །བྱ་བྱེད་མང་པོས་བདག་མེད་པར། །ཏིང་ངེ་འཛིན་གྱིས་དབང་བསྒྱུར་ནས། །མཚན་མ་མཉམ་པའི་དབྱིངས་སུ་མནན། །དེ་དག་དང་པོ་ལུས་ཞེས་བྱ། །དངོས་གྲུབ་མྱུར་དུ་གྲུབ་འདོད་ན། །ཤིན་ཏུ་ཕྲ་ཞིང་ཟབ་པར་བསྒོམ། །བདག་དང་བདག་གི་གཞན་རྣམས་ནི། །ཤིན་ཏུ་མི་དམིགས་དབྱིངས་སུ་བསྒོམ། །རང་བཞིན་མཐོང་ལས་དོན་མེད་ཕྱིར། །དེ་ཉིད་རྗེས་སུ་མྱོང་བྱས་པས། །ཐབས་ཀྱི་དམ་པ་དེ་བཤད་དེ། །ཡང་དག་གཉིས་མེད་བྱང་ཆུབ་སེམས། །སྣང་སྟོང་ལ་སོགས་གང་མེད་ཅིང་། །ཕྱོགས་དང་གནས་པ་ཡོད་མིན་པས། །རྗེས་འཇུག་ཅིར་ཡང་མི་བསམ་ཞིང་། །གང་ལ་གནས་པར་བྱ་མ་ཡིན། །གང་ཞིག་དམིགས་པ་གསལ་བ་ནི། །བསྒོམ་པར་བྱ་བ་བསྒོམ་པ་མིན། །ཡོད་མེད་ལ་སོགས་མཐའ་དབུས་ཆོས། །གང་ཡང་དང་དུ་མ་བླངས་ཤིང་། །སེམས་ཀྱིས་མངོན་པར་མ་ཕྱོགས་ལ། །ཐ་སྙད་ཙམ་དུ་མཉམ་གཞག་པའོ། །བསམ་བྱ་དམིགས་སུ་མེད་པས་ན། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་རང་སྣང་བ། །བསྒོམ་པའི་མཆོག་ཏུ་འདི་གསུངས་སོ། །ཡིད་ལ་བྱེད་དང་བྱིང་རྒོད་དང་། །མི་གཟུགས་འགོག་དང་དགག་འབྲངས་དང་། །ཆགས་སྡང་རེ་དོགས་བདག་ཉིད་དང་། །འཆོས་དང་གནས་དམིགས་སྡུད་པ་དག །མངོན་བྱེད་ཐེར་ཟུག་ཕྱག་བ་དག །བདག་དབང་འདུ་ཤེས་མཚན་ཉིད་དེ། །འདུ་ཤེས་སྟོང་པའི་ཏིང་འཛིན་མཆོག །སྟོང་པའི་འདུ་ཤེས་མ་རབ་སེམས། །དེ་ཕྱིར་རྒྱུད་རྩིང་ཞི་བ་སོགས། །གཡོ་འཁྲུལ་དབང་གིས་ཅིར་ཡང་སྣང་། །རང་བཞིན་སེམས་ཉིད་ཡིན་ཤེས་པས། །མཚན་ཉིད་གང་དུའང་མིན་དམིགས་ན། །ལས་སུ་བྱ་བ་མེད་པའི་ཕྱིར། །ཐ་སྙད་ཀུན་ལས་གྲོལ་འགྱུར་ཏེ། །མི་རྟོག་ཡེ་ཤེས་གཞན་དུ་མིན། །གང་ཞིག་བསམ་ཞིང་དམིགས་ཡོད་ན། །ངེས་པར་དེ་ཉིད་གཡང་ས་ཡིན། །ཅི་ཡང་ཡིད་ལ་མི་བྱེད་པས། །གོལ་སར་ལྟུང་བ་ཅི་ཞིག་ལྟུང་། །རང་བཞིན་གནས་དམིགས་མེད་གསུངས་ལ། །ཞེས་བློས་གནས་དང་དམིགས་བྱེད་པ། །གཟུང་འཛིན་ཞེས་ནི་དེ་ལ་བརྗོད། །མི་དམིགས་བསམ་པ་གང་སྤོང་བ། །དེ་ཉིད་རྗེས་མཐུན་ཏིང་འཛིན་ཡིན། །རིང་དུ་བྱས་པའི་རང་ཉམས་དག །དྲག་དལ་ཆུ་དང་མཚོ་གཏིང་གི། །སེམས་ཀྱིས་བསྟན་པའི་ཉམས་བཟུངས་ལ། །གཟུགས་སྒྲ་རེག་དང་ལས་རླུང་སོགས། །སྣང་ཡང་དམིགས་པར་མ་གྱུར་ན། །གང་ཡང་ཞེན་པར་འགྱུར་མ་ཡིན། །ལུས་སྒྲ་ཤིན་ཏུ་གཡེངས་འགྱུར་ཡང་། །ཅིག་ཤོས་འཇུག་མེད་ཚུལ་གྱིས་བརྟན། །རང་རིག་ཤིན་ཏུ་གསལ་བ་ཡང་། །ངོ་བོས་དམིགས་སུ་མེད་པར་གསུངས། །དེ་རྗེས་མཐུན་པའི་སྤྱོད་པ་ཡང་། །ལས་དང་སྤྱོད་པ་ཐམས་ཅད་ལ། །རང་བཞིན་བདག་ཕྱིར་མི་དམིགས་ཤིང་། །བྱས་མཐོང་ཟོས་པ་ཅི་ཡང་མེད། །གང་ཡང་བྱེད་མེད་ཚུལ་གྱིས་བྱ། །ཤིན་ཏུའང་ཞི་བར་འགྱུར་བར་རིགས། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བསྡུས་པ། དེ་བཞིན་ཉིད་ཀྱི་ཏིང་ངེ་འཛིན་གྱི་རིམ་པ་དེ་གཉིས་པའོ། །དེ་ནས་གསང་བ་བཤད་པར་བྱ། །ཏིང་འཛིན་དེ་ཉིད་གོམས་པ་དང་། །ཐམས་ཅད་རང་སེམས་རྣམ་པའི་ཕྱིར། །ཐམས་ཅད་སྒྱུ་མ་མིག་ཡོར་དང་། །སྤྲུལ་པའི་ཚུལ་དུ་ཤེས་པར་བྱ། །དེ་ཉིད་ཤིན་ཏུ་གོམ་པར་བསྒོམ། །དེ་ཉིད་རྒྱས་པའི་ལུས་བསྟན་པ། །རང་བཞིན་ངོ་བོ་སྤྱོད་པ་ལུས། །འཇིག་རྟེན་སྣ་ཚོགས་སྣང་བ་ཡང་། །རང་རིག་རྣམ་རྟོག་གཟུགས་བརྙན་ཕྱིར། །སྒྱུ་མའི་ཚུལ་དུ་ཐམས་ཅད་སྣང་། །འབྲས་སྣང་བྱ་བ་ཀུན་བྱེད་ཀྱང་། །རྟོག་པ་ཀུན་གྱི་ཚད་མར་སྣང་། །འདི་ལྟར་ཐམས་ཅད་གཟུགས་བརྙན་ཏེ། །བྱ་བྱེད་སྣང་ཞིང་དངོས་པོ་མེད། །ཆུ་ཟླའི་ཚུལ་དུ་ཐམས་ཅད་གནས། །ཐམས་ཅད་སྣང་ལ་རང་བཞིན་མེད། །རྗེས་སུ་དྲན་པར་བྱེད་པས་ཀྱང་། །ཐམས་ཅད་སེམས་ཀྱི་རྣམ་པ་ནི། །དོན་གྱི་རྩ་བ་མཆོག་ཡིན་ཏེ། །ཐམས་ཅད་དམིགས་མེད་མ་ཆགས་པའི། །རང་རིག་ཡེ་ཤེས་དེ་བཞིན་ཉིད། །ཕུང་སོགས་སྣ་ཚོགས་ཐབས་སྣང་བ། །ཡེ་ཤེས་སྒྱུ་མ་རང་སྣང་ཕྱིར། ། སྣང་སྟོང་གཉིས་སུ་མ་ཡིན་པས། །ཐབས་དང་ཤེས་རབ་ལྡན་པར་གནས། །གོམས་བློས་ཅི་སྤྱོད་མི་གོས་ཏེ། །བསགས་བྱ་དམིགས་སུ་མེད་པར་འགྱུར། །རང་བཞིན་ཡེ་ནས་དེ་བཞིན་ཉིད། །སྔོན་གོམས་རང་རིག་སྣང་བའི་ཆོས། །གདོས་པ་ཅན་གྱི་ཆོས་མིན་པས། །རིག་པ་རང་དབང་བསྒྱུར་བ་ཡིས། །ཁམས་སོགས་ཇི་ལྟར་བརྟས་བཞིན་སྣང་། །རྒྱུ་འབྲས་དབྱེར་མེད་སྔ་ཕྱི་མེད། །དེ་ཉིད་ལམ་ཕྱིར་མཉམ་པར་སྦྱོར། །ཐམས་ཅད་འབྱུང་བའི་གནས་ཡིན་ཏེ། །ཀུན་ཀྱང་སྐབས་ལས་ཤེས་པར་བྱ། །དེ་ཉིད་འདུ་བར་འགྱུར་བ་ཡིན། །གཉིས་སྣང་བྲལ་བ་མཉམ་པའི་དབྱིངས། །རང་དབང་བསྒྱུར་བའི་ཐབས་ཉིད་ཀྱིས། །དཀྱིལ་འཁོར་ཐམས་ཅད་མི་ཟད་འཕྲོ། །ཐམས་ཅད་རང་རིག་སྒྱུ་མ་ཉིད། །དམིགས་མེད་ཚུལ་གྱི་སྣང་བ་ཡིས། །ཡན་ལག་གསུམ་པ་བཤད་པར་བྱ། །སྲིད་གསུམ་སྒྱུ་མ་འདྲ་བར་ནི། །ཐུགས་རྗེའི་སྤྱན་གྱིས་གཟིགས་པར་འགྱུར། །རྗེས་མཐུན་ཐུགས་རྗེ་གསལ་མཛད་ཀྱང་། །རང་རིག་ཉིད་ལས་མི་གཞན་ཕྱིར། །མངོན་པར་གདུང་བས་ནོན་མི་འགྱུར། །རྩ་བ་བྱང་ཆུབ་སེམས་ཉིད་རྟོགས། །ཐབས་ཀྱིས་ཕ་རོལ་ཕྱིན་པར་སྤྱོད། །དམིགས་མེད་སྙིང་རྗེས་ཆུད་མི་གསན། །མ་ཆགས་ཐབས་མཁས་སྤྱོད་པ་ཡིས། །དོན་དང་མཐུན་པ་འབའ་ཞིག་བྱེད། །མི་མཐུན་ཞགས་པས་འཁོར་བ་གཅོད། །ས་ཡི་སྤྱོད་པར་དེ་གསུངས་སོ། །དཔལ་གསང་བའི་སྙིང་པོ་དེ་ཁོ་ཉིད་ངེས་པ་ལས་བསྡུས་པ། །སྒྱུ་མ་ལྟ་བུའི་ཏིང་ངེ་འཛིན་གྱི་རིམ་པ་སྟེ་གསུམ་པའོ། །ཐབས་དང་ཤེས་རབ་གཉིས་མེད་པའི། །རྫོགས་སངས་རྒྱས་ལ་ཕྱག་འཚལ་ནས། །ཕྲ་མོའི་ཏིང་འཛིན་བཤད་པར་བྱ། །ཐམས་ཅད་རང་རིག་སྒྱུ་མའི་ཕྱིར། །ཕྱི་ནང་སྣོད་བཅུད་ཧཱུཾ་དུ་བསྡུ། །གང་བསྒྲུབ་ཡི་གེ་སོ་སོ་སྟེ། །སྤྱིར་ནི་གང་བསྒོམས་ཀུན་དང་འདྲ། །རྡོ་རྗེ་སེམས་དཔའ་ཉིད་དུ་འདུ། །ཡན་ལག་ལྔ་དང་རྣམ་ཤེས་ཉིད། །ཡི་གེ་ཧཱུཾ་དུ་ཤིན་ཏུ་བསྡུ། །ནྲྀ་ཡི་མིག་གིས་བལྟར་ཡོད་པས། །རབ་ཏུ་འདྲེས་ནས་སྤྲོ་བར་བྱ། །ཕྱོགས་བཅུ་གང་ནས་སླར་བསྡུས་ཐིམ། །ཧཱུཾ་ཉིད་མི་དམིགས་དབྱིངས་སུ་གསལ། །རྣམ་ཤེས་ལྷུམས་སུ་ཞུགས་པར་བཤད། །ཧཱུཾ་ཉིད་ཨ་དང་མ་གཉིས་ཏེ། །ཤིན་ཏུ་གསལ་ཞིང་འཚེར་བ་དང་། །ཐམས་ཅད་ཡི་གེར་རྒྱུད་བྱས་ཏེ། །བསྡུས་ནས་ཉི་ཟླ་གང་སྒྲིལ་སྒོམ། །ས་བོན་གཉིས་ཀྱི་བདག་ཉིད་པས། །རང་བཞིན་ཧཱུཾ་གི་བདག་ཉིད་དོ། །འདྲེས་ཕྱིར་མིང་གཉིས་ཐོབ་པ་ཡིན། །ཆགས་མཚན་ཧྲཱིཿལས་པདྨར་སྣང་། །ཐམས་ཅད་རང་རིག་རང་སྣང་ཕྱིར། །བྱིན་བརླབས་འོད་ཟེར་གཞལ་ཡས་ཁང་། །དྭངས་སྙིགས་ཚུལ་གྱིས་ཉི་ཟླ་གཉིས། །སྐབས་འདི་མི་ཕྱེད་ཚུལ་ཕྱིར་སྨོས། །ཤེས་རབ་ཐབས་ཅིག་ལས་བྱུང་ཧཱུཾ། །མཐིང་ག་ཚེར་ལ་གསལ་བ་ཡི། །འོད་ཟེར་ཕྱོགས་བཅུའི་ཧཱུཾ་བསྡུས་པ། །རླུང་གི་མཚན་མར་ཤེས་པར་བྱ། །འཚིག་གུ་ལྟ་བུའི་རྡོ་རྗེའི་གཟུགས། །རྗེས་སུ་མཐུན་པའི་འཕྲོ་འདུར་ལྡན། །དེ་ཉིད་སེམས་དཔའ་ཡབ་ཡུམ་སྐུ། །ཤིན་ཏུ་འཕྲོ་ཞིང་འདུས་པར་བསྒོམ། །མཚན་དང་དཔེ་བྱད་ཐམས་ཅད་ལྡན། །ཞལ་གཅིག་ཕྱག་གཉིས་ཡང་ན་དྲུག །རྡོ་རྗེ་འཁོར་ལོ་རལ་གྲི་འབར། །རིན་ཆེན་པདྨ་དྲིལ་བུ་འབར། །ཕྲ་བའི་གཞལ་ཡས་ཉི་ཟླར་ལྡན། །སྙིང་ལ་ངེས་པར་གནས་པར་བྱ། །དེ་ནི་ཡེ་ཤེས་སྙིང་པོ་སྟེ། །དེ་ལྟར་གནས་གཅིག་གནས་གསུམ་དང་། །གནས་ལྔ་དག་ཏུ་བསྒོམ་བྱ་བ། །སྐུ་གསུང་ཐུགས་ཀྱི་ཕྱག་རྒྱ་དང་། །ཡེ་ཤེས་ལྔ་ཡིས་རྒྱས་གདབ་བྱ། །དེ་ཉིད་ཤིན་ཏུ་གནས་པ་དང་། །དེ་བཞིན་ཕྱག་རྒྱ་ཆེན་པོ་སྟེ། །གཞལ་ཡས་ཕྱག་མཚན་གདན་ལ་སོགས། །པྲ་བའི་ཚུལ་ཏེ་སྔ་མ་བཞིན། །མཚོན་གང་ཡེ་ཤེས་རྡོ་རྗེའི་སྐུ། །རྟག་ཏུ་སྙིང་ལ་གནས་པར་བྱ། །སེན་ཟླུམ་ཉི་ཟླ་གང་བ་དང་། །ཡུངས་འབྲུ་འབར་བའི་ཧཱུཾ་གནས་པའོ། །རང་བཞིན་སེམས་དཔའ་སྤྱན་དྲངས་ནས། །ཡེ་ཤེས་དམ་ཚིག་ལ་གནས་བསྟིམ། །བདག་ཉིད་ཆེན་པོའི་མཆོད་པ་བྱ། །རྟག་ཏུ་ནང་གི་སྦྱིན་སྲེག་བཏང་། །རང་སྔགས་ཕྲེང་བའི་འཁོར་ལོ་ཡིས། །ཤིན་ཏུ་གསལ་ཞིང་བདེ་ལ་གནས། །འགྲོ་ཉལ་འདུག་སྡོད་ལོངས་སྤྱོད་དེ། །ཐེག་ཆེན་བསྒོམ་ལས་ཉམས་པ་མེད། །ཆོས་སྤྱོད་རྣམས་དགུ་རབ་སྤངས་ནས། །ཕྱོགས་གཅིག་སྤྱོད་ལ་གང་གནས་པ། །རྩེ་གཅིག་ཏིང་འཛིན་ཉིད་དུ་བཤད། །མཆོད་སོགས་རང་གི་དོན་དུ་མིན། །ཡན་ལག་མ་ཉམས་སྔགས་བཟླས་ཤིང་། །འདོད་པ་ཀུན་ལ་ལོངས་སྤྱོད་བྱ། །ལུས་དང་ངག་སེམས་བརྟན་གྱུར་ན། །བྱང་ཆུབ་རབ་འབྱམས་ཐོབ་པར་འགྱུར། །དོན་ལྡན་མ་ཉམས་དག་བྱས་ཤིང་། །བརྩོན་འགྲུས་ཆེར་བསྐྱེད་མྱུར་བར་འགྲུབ། །སྔགས་བསྒོམས་མ་ཉམས་ཕྱག་རྒྱར་གསལ། །ཆོ་ག་ཡོ་བྱད་གཙོར་མ་གསུངས། །ལྷ་ཡི་སྐུ་རྣམས་གསལ་བསྒོམས་པས། །བསོད་ནམས་ཚོགས་ཆེན་རྫོགས་པར་འགྱུར། །དེ་ཉིད་ཆུ་ཟླའི་ཚུལ་སྣང་བས། །ཡེ་ཤེས་ཚོགས་ཆེན་རྫོགས་པར་འགྱུར། །གང་གིས་མཐོང་མོས་མཆོད་པ་ཡིས། །ཐུན་མོང་སྡིག་ལས་གྲོལ་བར་འགྱུར། །འདི་ལྟར་བསྒོམས་ཤིང་བསྒྲུབས་བྱས་ན། །འབྲས་བུ་མངོན་དུ་མ་བྱུང་ཡང་། །ཚེ་རབས་སྐྱེ་བ་ཐམས་ཅད་དུ། །ལྷ་མིའི་མཚན་རྫོགས་སྡུག་བསྔལ་སེལ། །བདེ་གཤེགས་འབྱུང་དང་མི་སྒོལ་ཞིང་། །ཐེག་པ་དམན་པར་འཇུག་མི་འགྱུར། །རྡོ་རྗེའི་རིགས་སུ་ངེས་པ་ཡིན། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བསྡུས་པ། །ཕྲ་མོའི་ཏིང་ངེ་འཛིན་གྱི་རིམ་པ་སྟེ་བཞི་པའོ། །དེ་ནས་སྤྲོས་བཅས་རྣལ་འབྱོར་བཤད། །དེ་ཉིད་ནུས་མཐུ་ལྡན་པ་ཡིས། །ལྟ་སྤྱོད་འབྲེལ་བར་བསྟན་པའི་ཕྱིར། །དེ་ཉིད་སྐུ་གསུང་ཐུགས་ཀྱི་བདག །དེ་ཉིད་ཐབས་དང་ཤེས་རབ་ལྡན། །ལོངས་སྤྱོད་སྤྲུལ་སྐུ་མཆོག་རྫོགས་ཕྱིར། །བྱང་ཆུབ་མཆོག་ཏུ་ཉི་ཟླ་ཤར། །དེ་ཉིད་བཞུགས་གནས་ཡིན་པར་གསུངས། །གཟུགས་སོགས་རང་བཞིན་སྤྲོས་བཅས་པས། །འོད་ཟེར་འཕྲོ་བ་འབྲུ་གསུམ་སྟེ། །ཡང་ན་འོད་ཟེར་ཕྱག་རྒྱ་ལྔ། །ལྔ་པོའི་དོན་སྤྲོས་བཞི་བཅུ་གཉིས། །གཞན་ཡང་དཀྱིལ་འཁོར་བསམ་ཡས་མཆོག །འཕྲོ་འདུས་སྣ་ཚོགས་དེ་བཞིན་ཏེ། །མ་བཅོས་ངང་གིས་གནས་པ་ལས། །ཡེ་ཤེས་ལྷག་པའི་དཀྱིལ་འཁོར་བསྒོམ། །ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོས་འགྱུར། །དེ་ལྟར་གཙོ་མཆོག་ལྡན་བྱས་ནས། །རིགས་བཞི་རྒྱལ་མཆོག་དེ་བཞིན་བསྒོམ། །བཅུ་གཉིས་གཉིས་ཀྱང་དེར་ཤེས་ནས། །དྲུག་གི་ཕྱག་རྒྱ་འོད་འཕྲོ་བར། །བློ་ཡི་ཤེས་རབ་ཆེ་ཆུང་གིས། །རིམ་པ་བཞིན་དུ་བསྒོམ་པར་བྱ། །ཕྱོགས་བཅུ་མ་ལུས་གཞལ་ཡས་ཁང་། །ཉི་ཟླ་གཟའ་སྐར་གདན་དང་རྒྱན། །བདེ་གཤེགས་དཀྱིལ་འཁོར་མ་ལུས་བསྒོམ། །ཉི་ཟླ་གཟའ་སྐར་དུས་གཅིག་ཏུ། །མཚོ་དཀྱིལ་དང་བར་འཆར་བ་ལྟར། །དེ་ལྟར་གོམས་རྟོགས་རིགས་མཆོག་དེས། །དེ་ལྟར་དམིགས་པ་བཞིན་དུ་འགྲུབ། །མཁའ་ལ་འཕྱོ་དང་རིག་འཛིན་གནས། །ཆུ་རྒྱུན་བཟློག་དང་རླུང་མི་འགུལ། །རི་བྲག་ལ་སོགས་ཐོགས་མེད་འཛུལ། །དུག་མཚོན་འབྱུང་བས་ཚུགས་མི་འགྱུར། །འབྱུང་བ་ལྔ་ལ་དབང་བསྒྱུར་ཅིང་། །ལྷ་སྲིན་རྣམས་ལ་དབང་བྱེད་འགྱུར། །ནད་སེལ་ལོངས་སྤྱོད་ངན་སོང་སྦྱོང་། །དགུག་གཏང་བཅིང་དགྲོལ་གསོ་བསད་དང་། །ཡུངས་འབྲུ་སྟོང་གསུམ་དགང་བསྡུ་དང་། །བདུད་དང་གཅན་ཟན་ལ་སོགས་པས། །ཚུགས་པར་མི་འགྱུར་བྲན་བཞིན་འགྱུར། །ལུས་མ་སྤངས་པར་རིག་འཛིན་ས། །བསོད་ནམས་ཡེ་ཤེས་ལོངས་སྤྱོད་ཀྱིས། །ཡི་གེ་འཁོར་ལོ་ཚོགས་ཆེན་བརྙེས། །ཐུགས་རྗེ་སྤྲུལ་པའི་བྱིན་བརླབས་ཀྱིས། །སོ་སོ་ཐར་པའི་ལམ་ཡང་སྟོན། །ཞི་བ་ཕྱོགས་གཅིག་ཤེས་བྱ་སྤྱོད། །ས་བཅུ་མཉམ་པར་སྦྱོང་བྱེད་ཅིང་། །བདེ་གཤེགས་འཁོར་བཅས་དག་པར་བྱེད། །ལས་རྣམས་མ་ལུས་ཀུན་བྱས་ནས། །སྐྱེ་ཤི་མེད་པའི་གཡུང་དྲུང་ཐོབ། །མཚན་དང་དཔེ་བྱད་ཀུན་གྱིས་བརྒྱན། །མཐར་ཕྱིན་བྱ་བ་མེད་པར་འགྲུབ། །དེ་ལྟར་ཆོ་ག་རྫོགས་བྱས་ཤིང་། །སྔགས་ཀྱི་ཡན་ལག་ལྔ་རྫོགས་པའི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །གསང་བ་ལ་སོགས་ཡོ་བྱད་ལྔ། །དགོན་པའི་གནས་སུ་བསྡུ་བྱ་སྟེ། །རིན་ཆེན་སྤྲས་པའི་གཞལ་ཡས་ཁང་། །འཁོར་ཁང་ཕྱི་ནང་བར་ལྡན་བྱ། །བདེ་བ་ཆེན་པོ་བསྐྱེད་པའི་ཕྱིར། །ཡོ་བྱད་རོལ་མོ་བདེ་ལྡན་དགོད། །ཡན་ལག་དབང་པོ་རྣམ་ཤེས་དང་། །གཟུགས་སྒྲ་དྲི་རོ་རེག་རྣམས་ཀུན། །དཀྱིལ་འཁོར་བཤད་བཞིན་གསལ་བར་བྱ། །གོས་སོགས་ཡོ་བྱད་བཞི་པོ་ལ། །སེམས་ཕྱིར་མ་སྐྱེས་ཡེ་ཤེས་བརྟགས། །ཆགས་མེད་ཚུལ་གྱིས་རོལ་མོས་ནས། །ངོ་མཚར་འབྱུང་བའི་དཀྱིལ་འཁོར་བརྙེས། །རྒྱན་དང་བགོ་བས་ལུས་བརྒྱན་ནས། །ཡན་ལག་དཀྱིལ་འཁོར་གསལ་རྫོགས་པས། །བྲོ་གར་གླུ་ཚིག་ལ་སོགས་པ། །ཐམས་ཅད་གཞུང་བཞིན་རྫོགས་པར་བྱ། །བཟའ་དང་བཏུང་བའི་མཆོག་རྣམས་ཀུན། །ཆགས་མེད་ཚུལ་གྱིས་བསྟིམ་པར་བྱ། །བདག་མཆོད་ཀུན་མཉེས་ཐམས་ཅད་འགྲངས། །ཀུན་ལ་ཕན་པའི་སྨན་ཡིན་ཏེ། །རྣལ་འབྱོར་བདག་ཉིད་ཆེན་པོ་ཡིས། །ཐམས་ཅད་བཟའ་ཞིང་བརྒྱན་པར་བྱ། །ལྷ་མོ་ཀླུ་མོ་རིགས་ངན་མོ། །དབྱེའམ་ཡང་ན་མི་དབྱེ་བར། །བདེ་བའི་གནས་སུ་སྤྱད་པར་བྱ། །བསྙེན་པ་དང་ནི་ཉེ་བསྙེན་པོ། །བསྒྲུབ་པ་དང་ནི་བསྒྲུབ་ཆེན་པོས། །པདྨའི་རྩ་གནས་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །བདག་ཉིད་ཆེན་པོའི་མཆོད་པ་ཡིས། །སངས་རྒྱས་སྤྲིན་ཚོགས་མ་ལུས་མཉེས། །སྲིད་གསུམ་འགྲོ་བ་ཐམས་ཅད་ལ། །དགའ་བ་ཆེན་པོས་ཁྱབ་པར་འགྱུར། །རང་བཞིན་གནས་པའི་དཀྱིལ་འཁོར་ཡང་། །སྐད་ཅིག་གཅིག་གིས་གསལ་བར་བྱེད། །ལམ་དང་ས་གསུམ་ཡོངས་རྫོགས་ཕྱིར། །ཐབས་ཆེན་ཐེག་པ་ཐེག་པའི་མཆོག །མཆོག་དང་མཆོག་ཕྲན་ལ་སོགས་པ། །ཆགས་མེད་ཐུགས་རྗེས་དོར་མི་བྱ། །སྒྱུ་འཕྲུལ་དྲ་བས་མངོན་རྫོགས་པའི། །དཀྱིལ་འཁོར་བརྟན་པའི་ཏིང་འཛིན་ལྡན། །བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁར་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཨཱ་ལི་ཀཱ་ལའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །རྡོ་རྗེ་པདྨར་ལྡན་པ་ཡིས། །རཀྟ་བྱང་ཆུབ་དུས་གཅིག་འབར། །གཉིས་མེད་ཟུང་དུ་འབྲེལ་གྱུར་ན། །བདེ་གཤེགས་དཀྱིལ་འཁོར་མ་ལུས་འབྱུང་། །འགྲོ་བའི་དོན་རྣམས་ལྷུན་གྱིས་གྲུབ། །རྣལ་འབྱོར་ཆེན་པོའི་སྤྱོད་པ་ནི། །ཐམས་ཅད་ཀུན་ལ་དབྱེར་མེད་སྤྱོད། །བདེ་བའི་རོ་མཆོག་མྱོང་འགྱུར་ཏེ། །བདག་ཕྱིར་དེ་ལ་ཆགས་པ་མེད། །སྤྱོད་བཞིན་མ་ཆགས་ཡེ་ཤེས་ཡིན། །བདེ་བའི་མཆོག་ཉིད་བསོད་ནམས་ཚོགས། །དེ་བས་ལམ་འདི་ཚོགས་སུ་བཤད། །ལྟ་སྤྱོད་ཡ་ཆར་མ་གྱུར་པས། །སྔགས་འཆང་རྣམས་ཀྱིས་རྟག་ཏུ་སྤྱོད། །བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་དུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་དུ་ཡང་དབྱེར་མེད་པས། །ལྟ་བ་མཐོ་དམན་དེ་ཙམ་མོ། །ཐབས་ཀྱི་ཐེག་པ་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་དུ་ནི་མཉམ་རྫོགས་སོ། །དེ་ཕྱིར་བདེན་གཉིས་དབྱེ་བ་མེད། །ཐམས་ཅད་དག་ཅེས་བྱ་བ་ཡང་། །དངོས་པོ་བསལ་དག་མ་ཡིན་ཏེ། །སྣང་སྦྱོང་ཉིད་ན་རྣམ་པར་དག །གདོད་ནས་དེ་བཞིན་གོམས་བྱེད་པ། །ལམ་གཞན་རྫོགས་པའི་རྣལ་འབྱོར་པ། །ཚོམ་བུའི་གྲངས་ནི་མ་ངེས་ཏེ། །དང་པོ་དམ་ནོས་བཞིན་དུ་བྱ། །ལེ་ལོ་སྒྱིད་སྙོམས་མེད་པ་ཡིས། །ཐེ་ཚོམ་མེད་པར་བསྒྲུབས་བྱས་ན། །བདག་ཉིད་ཆེན་པོ་ལྷུན་གྱིས་གྲུབ། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་དུ། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་ས། །མཐོང་བའི་ཆོས་ལ་མྱ་ངན་འདའ། །སྐུ་ལྔ་ལྷུན་གྱིས་རྫོགས་པར་འགྱུར། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བསྡུས་པ། སྣང་བ་རྣམ་པར་འབྱེད་པའི་ཏིང་ངེ་འཛིན་གྱི་རིམ་པ་སྟེ་ལྔ་པའོ། །དེ་ནས་མཐར་གནས་བཤད་པར་བྱ། །ཡེ་ཤེས་རྫོགས་པའི་དཀྱིལ་འཁོར་ལ། །རིམ་པ་ལྔ་ཡི་མཉམ་སྦྱོར་བས། །རང་བྱུང་སྐུ་ལྔ་ལྷུན་གྱིས་གྲུབ། །ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོངས་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །རང་རིག་ཉིད་ལ་གནས་པ་ནི། །སུས་ཀྱང་མ་བྱས་རང་བྱུང་སྟེ། །རང་བྱུང་ཆེན་པོའི་ཡེ་ཤེས་ཀྱིས། །མ་ལུས་དེ་བཞིན་ཉིད་དུ་སྦྱོར། །སྦྱོར་དང་སྦྱོར་བ་གཉིས་ཀ་མིན། །གཉིས་མེད་དབྱིངས་ཀྱི་ངང་དུ་ཐིམ། །ཉིད་ལ་མཚན་ཉིད་ཡོད་མ་ཡིན། །ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་རང་སྣང་བས། །ཐ་སྙད་མ་ལུས་ཡེ་ཤེས་དངོས། །ཡེ་ཤེས་ལ་ནི་ཡེ་ཤེས་རོལ། །མ་བཀག་ཚུལ་གྱིས་རང་སྣང་བ། །སོ་སོའི་དོན་བཞིན་རོ་མྱོང་ཡང་། །རང་རིག་ཉིད་ལས་གཞན་མིན་ཕྱིར། །བདེ་བ་ཆེན་པོའི་ཡེ་ཤེས་ལ། །གཟུང་བའི་མཚན་མ་ཡོད་མ་ཡིན། །མི་རྟོག་ཚུལ་གྱིས་ལོངས་སྤྱོད་པ། །མ་ཆགས་པདྨ་དག་པའི་སྐུ། །འདས་དང་མ་འདས་དངོས་པོ་ཀུན། །རང་རིག་ཡེ་ཤེས་བྱང་ཆུབ་སེམས། །སྣང་སྟོང་གཉིས་སུ་མ་ཡིན་པས། །ཡེ་ཤེས་དཀྱིལ་འཁོར་ལྷུན་གྱིས་གྲུབ། །རང་རིག་བསམ་ཡས་ཅིར་ཡང་སྣང་། །གདུལ་བྱའི་དབང་གིས་བརྗོད་མི་ལང་། །བྱང་སེམས་ལྷུན་གྲུབ་རང་སྣང་བའོ། །འདུ་འཕྲོ་ཚུལ་དུ་བརྡར་བསྟན་ཏོ། །སྤྲོས་བྲལ་ཐུགས་ཀྱི་ཆོས་ཐམས་ཅད། །སྙོམས་པར་ཁྱབ་པས་རྗེ་ཉིད་དེ། །འབྲས་བུ་ལྷུན་གྲུབ་བྱིན་ལྡན་པས། །མཚོ་རླབས་ཚུལ་དུ་ཀུན་ཏུ་སྣང་། །བསམ་ཡས་ལྷུན་གྱིས་གྲུབ་པའི་ཕྱིར། །ཞིང་ཁམས་རྣམས་དང་འགྲོ་ཀུན་ལ། །རྡོ་རྗེ་འཛིན་ནས་རྩི་ཤིང་སོགས། །སོ་སོར་མཐུན་པའི་སྐུར་སྣང་ཡང་། །སྟོང་ཉིད་དངོས་དང་བྱ་བྱེད་མེད། །ཆུ་ཟླའི་ཚུལ་དུ་ཀུན་སྣང་ཡང་། །བྱིན་རླབས་ཁྱབ་ཕྱིར་འགྲོ་འོང་མེད། །རྡོ་རྗེ་འཛིན་པའི་ལུས་ཉིད་ནི། །སངས་རྒྱས་ཀུན་གྱི་སྤྱི་གཟུགས་ཏེ། །སྣང་སྟོང་གཉིས་སུ་མ་ཡིན་པས། །གྲངས་དང་ཆེ་ཆུང་མཐའ་དབུས་ཀྱང་། །འདི་ལ་སུས་ཀྱང་དམིགས་མི་ནུས། །ནམ་མཁའ་ལྟ་བུར་མཐའ་བྲལ་བས། །འོད་ཟེར་ཕྱག་རྒྱ་གདན་སོགས་པ། །རྒྱན་དང་བྲལ་བས་གཉིས་མ་ཡིན། །ཞི་ཁྲོ་ལ་སོགས་སྐུ་གཉིས་རྫོགས། །ལྷུན་གྱིས་གྲུབ་པས་ཅིར་ཡང་སྣང་། །རིམ་པའང་རིམ་པ་མེད་ཚུལ་གྱིས། །གདུལ་བྱའི་བསམ་པས་ཕྱེ་བ་ཡིན། །དུས་གསུམ་དུ་ཡང་མི་འགྱུར་ཕྱིར། །རྟག་ཆེན་རྡོ་རྗེའི་སྐུ་ཞེས་གསུངས། །བདེན་པ་གཉིས་ཀྱི་མཐའ་ལས་འདས། །དངོས་པོ་བདག་ཕྱིར་མིང་ཚིག་ཙམ། །ཐམས་ཅད་ཚིག་གིས་སྒྲ་ལྟར་གནས། །དེ་ཉིད་མ་སྐྱེས་སེམས་ཡིན་ཕྱིར། །རང་བཞིན་བརྗོད་མེད་དོན་ཡིན་ཀྱང་། །སྒྲ་རྣམས་སེམས་སུ་ལྷུན་གྲུབ་ཕྱིར། །གསུང་གཅིག་ཚིག་ཏུ་མ་བརྗོད་ཀྱང་། །ཐར་དང་མ་ཐར་ཐམས་ཅད་ལ། །ཇི་ལྟར་འདོད་བཞིན་གསལ་བར་སྣང་། །དེ་ཕྱིར་བརྗོད་ཉིད་བརྗོད་པ་མེད། །གདུལ་བྱ་མ་ལུས་ཐམས་ཅད་ཀུན། །དེ་བཞིན་ཉིད་ལས་མི་གཞན་ཕྱིར། །གང་ཞིག་དེ་ཉིད་གྱུར་པ་ཡིས། །དུས་གསུམ་སྡུག་བསྔལ་མ་འདྲེས་པས། །ལོག་རྟོག་རྒྱུན་ཙམ་སྣང་བ་ཡང་། །རང་སྣང་ཚུལ་གྱིས་རྟོགས་མེད་པར། །སྒྱུ་མའི་ཚུལ་གྱིས་གསལ་བར་གསུངས། །དེ་བས་འདས་དང་མ་འདས་ཆོས། །རང་རིག་བྱང་སེམས་ངོ་བོའི་ཕྱིར། །སྔ་ཕྱི་ཅུང་ཟད་ཡོད་མིན་པས། །མཚན་ཉིད་མ་འདྲེས་ཡོངས་རྫོགས་པས། །རྫོགས་སངས་རྒྱས་ཀྱིས་མངོན་ནས་མཁྱེན། །སོ་སོར་སྣང་བ་ཐམས་ཅད་ཀྱང་། །རང་རིག་རྒྱལ་པོར་ཡང་དག་འདུ། །རང་རིག་དེ་ཉིད་ཐམས་ཅད་ཡིན། །སྤྱོད་ཡུལ་ཐམས་ཅད་རང་རིག་ཕྱིར། །རང་སྣང་ཡེ་ཤེས་ངོ་བོས་སྟོང་། །མཐའ་རྣམས་བྲལ་བའི་རང་རིག་ལ། །མ་སྐྱེས་དོན་སྣང་མེ་ལོང་བཞིན། །ཐམས་ཅད་བདག་ཏུ་གྱུར་པའི་ཕྱིར། །ཐ་སྙད་གཉིས་ཀ་ངང་གིས་སྟོང་། །མཚན་ཉིད་བསམ་ཡས་སེམས་སྣང་ཡང་། །སེམས་ཕྱིར་སོ་སོར་དམིགས་སུ་མེད། །རང་བཞིན་རྣམ་དག་ཡེ་ཤེས་ལ། །བྱ་བྱེད་དམིགས་པར་ཡོངས་མི་འགྱུར། །གཟུང་འཛིན་བྲལ་བའི་ཡེ་ཤེས་ནི། །རྩ་བ་ལྔ་ཞེས་བརྗོད་མོད་ཀྱང་། །བརྗོད་པའི་མཚན་ཉིད་ཡོད་མེད་དེ། །མཚན་ཉིད་མེད་པར་སོ་སོར་སྣང་། །དེ་ཉིད་ཐམས་ཅད་མཁྱེན་ཉིད་ཡིན། །མཚན་ཉིད་གཉིས་མེད་དམིགས་མི་འགྱུར། །གནས་པ་མེད་པས་ཀུན་ཏུ་ཁྱབ། །ཕྱོགས་བཅུ་སྣང་གྲགས་བསམ་ཡས་པ། །རང་རིག་ཉིད་ལས་མི་གཞན་ཤར། །ཡོན་ཏན་རིན་ཆེན་བཀོད་པ་དང་། །ཡེ་ཤེས་རྒྱན་གྱིས་སྤྲས་པ་ཡིས། །ཞིང་གི་ཡོན་ཏན་བསམ་མི་ཁྱབ། །ཕྱོགས་བཅུ་དུས་བཞི་ཞིང་སྦྱོར་བས། །དོག་ཡངས་ཚད་དང་དཔག་ཏུ་མེད། །སངས་རྒྱས་སྤྱི་གཙུག་ལྟ་བུའི་མཚན། །ཡེ་ཤེས་རྒྱུ་ལས་གྲུབ་པའི་ཕྱིར། །འདི་ཞེས་གཅིག་ཅེས་བརྗོད་དུ་མེད། །ཟག་མེད་བསོད་ནམས་ལྷུན་གྲུབ་པས། །ཇི་ལྟར་བལྟས་པས་དེར་སྣང་སྟེ། །བརྡོས་པ་ཅན་གྱི་ཆོས་མིན་ཞིང་། །ཐམས་ཅད་རང་རིག་དབང་བསྒྱུར་བས། །སྟོང་པར་བྱའམ་མི་སྟོང་བྱ། །ཐམས་ཅད་དབྱེར་མེད་ངང་ཡིན་པས། །རྟོག་པ་མེད་པར་ཅིར་ཡང་སྣང་། །གཞན་གྱིས་དབྲོག་ཏུ་མེད་པ་ཡི། །བོ་དྷི་དཀོར་ནི་རིན་པོ་ཆེ། །ཐམས་ཅད་མཁྱེན་པའི་ཡེ་ཤེས་ཀྱིས། །བྱ་བྱེད་མེད་པར་རྣམ་བཞི་མཛད། །སྒྱུ་མའི་ཚུལ་དུ་རོལ་མཛད་ཀྱང་། །བྱ་བྱེད་མེད་པའི་དམིགས་སུ་མེད། །འདས་དང་མ་འདས་བསམ་ཡས་པ། །མ་ལུས་སེམས་ཕྱིར་གཟུང་འཛིན་མེད། །གཟུང་འཛིན་བྲལ་བའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་གནས། །གནས་དང་ངོ་བོར་དབྱེར་མེད་དེ། །དེ་ཉིད་རིག་པ་རང་སྣང་བ། །སྣ་ཚོགས་མཚན་ཉིད་རྣམ་པར་རོལ། །ཐམས་ཅད་མཁྱེན་ཉིད་བསམ་ཡས་ཀྱང་། །རང་རིག་དེ་བཞིན་ཉིད་དུ་འདུས། །དེ་ཉིད་ཐམས་ཅད་མ་འདྲེས་སྣང་། །སྤྱོད་ཡུལ་འཕྲོག་མེད་བརྗོད་མི་ལང་། །གཉིས་མེད་ཐུགས་རྗེའི་དབང་གིས་ན། །འགྲོ་དྲུག་དུས་གནས་སྙོམས་པར་ཞུགས། །རང་བཞིན་ཉིད་ལས་མི་གཞན་ཕྱིར། །དུས་བཞི་མཉམ་པ་ཉིད་དུ་གསུངས། །དེ་སོགས་མཚན་ཉིད་ཡོན་ཏན་གྲངས། །སྟོང་གསུམ་གཅིག་དང་ཐམས་ཅད་ཀྱི། །མགོ་ལུས་ཁ་ལྕེ་གཅིག་རྫོགས་པས། །བསྐལ་པ་མཐར་ཀླས་པར་བརྗོད་ཀྱང་། །དེ་དག་མཐར་ཐུག་སྤོང་མི་འགྱུར། །མཚན་ཉིད་རྨོངས་པ་མདོར་བསྡུས་པ། །བསྒྲུབ་བྱ་མ་ལུས་མངོན་འགྱུར་བས། །བྱ་བསམ་བསླབ་པ་ཀུན་ལས་འདས། །ཐམས་ཅད་མ་སྤངས་བདག་ཉིད་ཕྱིར། །གསལ་ཡང་འདུ་ཤེས་ཐམས་ཅད་སྤངས། །གཉིས་མེད་ཐུགས་རྗེ་ཆེན་པོ་ཡིས། །མཛད་པ་གང་ཡང་འགོག་པ་མེད། །སྐུ་གསུང་ཕྱག་རྒྱ་ཅིར་སྣང་ཡང་། །རང་བཞིན་རྫོགས་ཕྱིར་འགྲོ་འོངས་མེད། །ཡུམ་སོགས་བདེ་བ་ཀུན་སྣང་ཡང་། །རང་གི་ངོ་བོ་མི་དམིགས་པས། །མཐའ་རྣམས་ཀུན་ལས་གྲོལ་བ་ཡིན། །ཁམས་གསུམ་བདག་ཉིད་ཆེན་པོའི་ཕྱིར། །སེམས་ཅན་ཀུན་གྱི་སེམས་ལ་སོན། །ས་སོགས་ཞེན་མཐའ་མ་རེག་པས། །གཅིག་པུ་རབ་ཏུ་ཆེ་བའི་ལྷ། །དེ་བཞིན་ཉིད་དང་དབྱེར་མེད་ཕྱིར། །འདི་ལ་སྤྱོད་ཡུལ་ཡོད་མ་ཡིན། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པ་ལས་བསྡུས་པ། བསམ་ཡས་ལྷུན་གྱིས་གྲུབ་པའི་ཏིང་ངེ་འཛིན་གྱི་རིམ་པ་སྟེ་དྲུག་པའོ། །དགོས་རྫོགས་རྒྱ་ཆེན་མཚན་ཉིད་རྟོགས་དཀའ་རླབས་ལྡན་རང་རྒྱུད་རྒྱ་མཚོ་ཡིན། །མཚན་ཉིད་རྗེས་མཐུན་གཉིས་བྲལ་ཡི་གེ་གསུམ་གཉིས་གབ་སྤས་ར་ཆོད་དོན། །གཉིས་རྗེས་གོམས་ཞུགས་མཐོང་ཉམས་འབྲེལ་བས་དགོས་དོན་དང་འབྲེལ་གསལ་བྱས་པས། །རྗེས་འཇུག་ལ་སོགས་གཉིས་བཅིངས་མ་ལུས་དེ་ཉིད་ཤེས་གོམས་ཐར་བར་ཤོག །རིམ་པ་དྲུག་པ་ཞེས་བྱ་བ་སློབ་དཔོན་སྒེག་པ་རྡོ་རྗེས་མཛད་པ་རྫོགས་ས྄ོཧ྅྅྅།། །།