སྨོན་ཚིག་གཞན་ཕན། ཆོས་ཀྱི་བློ་གྲོས།
ཨོ་སྭ་སྟི། དག་པ་གཉིས་ལྡན་ཆོས་སྐུ་ཀུན་ཏུ་བཟང་། །ལྷུན་གྲུབ་ངེས་པ་ལྔ་རྫོགས་ལོངས་སྐུའི་སྤྲིན། །གང་འདུལ་དེར་སྣང་མ་འགགས་སྤྲུལ་པའི་སྐུ། །སྐུ་གསུམ་དབྱེར་མེད་བླ་མེད་མཆོག་གིས་སྐྱོངས། །གཞི་རྒྱུད་དབང་བཞིས་སྨིན་པའི་བྱང་ཆུབ་སེམས། །ལམ་རྒྱུད་བསྐྱེད་རྫོགས་ཟབ་མོའི་རྣལ་འབྱོར་གྱིས། །འབྲས་རྒྱུད་སྐུ་བཞིའི་གོ་སར་སྦྱོར་བྱེད་པའི། །རྒྱུད་སྡེ་བྱེ་བའི་ཡང་བཅུད་འདི་ཁོ་ན། །སྣང་སྲིད་ཡེ་སངས་རྒྱས་པ་ལྟ་བུའི་ལུང་། །དག་མཉམ་བདེན་པ་དབྱེར་མེད་གྲུབ་པའི་མཐའ། །དབང་རྣོན་རིག་འཛིན་རྣམ་བཞིའི་རྒྱལ་ཐབས་ལ། །མིག་འཕྲུལ་བཞིན་དུ་བགྲོད་བྱེད་འདི་མིན་སུ། །ཏནྟྲའི་ཟབ་གནད་རིག་འཛིན་རྒྱལ་པོ་ཡི། །ལུང་དུ་བསྡུས་པའི་མན་ངག་ཡིད་བཞིན་དབང་། །གྲུབ་མཆོག་ཡོངས་ཀྱི་གཤེགས་ཤུལ་ཟླ་མེད་ཕུལ། །སྔ་འགྱུར་བརྒྱུད་པའི་ཁྱད་ནོར་མཚུངས་བྲལ་ཡིན། །གཞན་ཟེར་བྲག་ཅའི་ལད་མོ་མི་མཛད་པར། །རང་ལུགས་འཁྲུལ་པ་ཀུན་བྲལ་མ་ཎི་ཀ །བཤད་སྒྲུབ་རྒྱལ་མཚན་རྩེ་མོར་མཆོད་མཛེས་ཞེས། །གུས་ལྡན་ཐལ་མོ་སྦྱོར་དང་ཆབ་ཅིག་པར། །མན་ངག་རྣམ་པར་བཀོད་པའི་གཞུང་བཟང་ཆེ། །གཅིག་ལས་དུ་མར་འཆར་བའི་སྤར་གྱི་འཕྲུལ། །བསྟན་གཉིས་དར་རྒྱས་གླིང་གི་ཆོས་གྲྭར་སྤེལ། །དགེ་བས་འགྲོ་ཀུན་གདོད་གཞིར་ངལ་འཚོ་ཤོག །མཁའ་ལ་རིག་འཛིན་བརྒྱུད་པའི་སྤྲིན་ཆེན་འཁྲིགས། །ས་ལ་དམ་ལྡན་སློབ་མའི་འདུ་ཚོགས་རྒྱས། །བར་ལ་སྨིན་གྲོལ་བདུད་རྩིའི་ཆར་རྒྱུན་འཇོ། །ངེས་གསང་བསྟན་པ་དར་སྨིན་བཀྲ་ཤིས་ཤོག །ཅེས་པའང་རྣམ་དཀར་འདུ་བྱེད་པ་པོ་གཞན་ཕན་ཆོས་ཀྱི་བློ་གྲོས་རང་ཉིད་ཀྱིས་བྲིས་པ་ཛ་ཡནྟུ།། །།བྱེ་སྤར་ལྟར་ཞལ་བཤུས་པའོ། །