སྒྱུ་འཕྲུལ་དྲྭ་བའི་མན་ངག་རིམ་གསུམ་པ། པཎྜི་ཏ་བི་མ་ལ།
སྒྱུ་འཕྲུལ་དྲྭ་བའི་མན་ངག་རིམ་གསུམ་པ་བཞུགས་སོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གཞི་ལམ་འབྲས་བུར་བཅས་པའི་ཆོས། །དྲིས་ལན་དམ་བཅའ་མཐར་དབྱུང་བ། །ལུང་དང་མན་ངག་རིགས་སྒོ་ནས། །རྟོགས་པར་བྱ་ཕྱིར་རྣམ་བཤད་བྱ། །དང་པོ་རྣམ་པ་གཉིས་ཡིན་ཏེ། །ངོ་བོའི་གཞི་དང་བརྟགས་པའི་གཞི། །གཞི་ཡི་ངོ་བོའི་མཚན་ཉིད་དང་། །ངེས་ཚིག་དཔེ་ཡི་རྣམ་པ་དང་། །སྣང་ཚུལ་གཉེར་གྱིས་རྟོགས་པར་བྱ། །ངོ་བོ་ཐམས་ཅད་སེམས་ཉིད་དེ། །གསེར་གྱི་དཔེ་བཞིན་གཉིས་སུ་མེད། །མཚན་ཉིད་མཐའ་རྣམས་ཀུན་བྲལ་བའི། །ཅིར་ཡང་གཟུང་དུ་མེད་པའོ། །ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ནམ་མཁའ་རྒྱ་མཚོ་རིན་ཆེན་སོགས། །ཉེ་བའི་དཔེ་ཡིས་མཚོན་པའོ། །རྒྱུ་རྐྱེན་བྲལ་བའི་སྐད་ཅིག་མ། །རང་སྣང་ཉིད་དུ་བྱུང་བའོ། །ལུང་དང་མན་ངག་གཉིས་དག་གིས། །བློ་གཏིང་ཡིད་ཆེས་འགྱུར་བར་བྱ། །བརྟགས་གཞི་གཉིས་སུ་བསྟན་པའི་ཆོས། །འཁོར་དང་མྱ་ངན་འདས་པར་གསུངས། །འཁོར་བའི་རྒྱུ་རྐྱེན་ངོ་བོ་དང་། །དཔེ་དང་མཚན་ཉིད་བྱེད་པོ་དང་། །འཁོར་ཚུལ་ཉེས་པ་དུས་རྣམས་སུ། །ངེས་པར་བསྟན་ཕྱིར་མགོན་པོས་བཤད། །འཁོར་བའི་འབྱུང་རྒྱུ་རྣམ་པ་བཞི། །རྒྱུད་མཚུངས་ཉེར་ལེན་ལྷན་ཅིག་པ། །བདེ་གཤེགས་སྙིང་པོ་མ་རིག་དང་། །རྣམ་སྨིན་བག་ཆགས་ཉོན་མོངས་སོ། །རྐྱེན་གཉིས་བསྟན་པ་ལས་གསུམ་དང་། །ཀུན་བརྟགས་མ་རིག་ཉོན་མོངས་ལྔ། །ངོ་བོ་སྣོད་བཅུད་འཇིག་རྟེན་གྱི། །སྣང་དང་ཞེན་པའི་ཆོས་རྣམས་སོ། །ཟོ་ཆུན་རྩྭ་སོགས་མེ་དཔེ་བཞིན། །ཀུན་ཏུ་འཁོར་ཞིང་མཆེད་པའོ། །འཇིག་དང་ཆགས་དང་སྟོང་དང་གནས། །སྐྱེ་རྒ་ན་འཆི་བཞི་ལྡན་བས། །མཚན་ཉིད་ཐེར་ཟུག་མ་ཡིན་པའོ། །རྒྱུན་དང་བཅས་པའི་སྐད་ཅིག་མ། །ལས་ཀྱི་བྱེད་པོར་བརྗོད་པ་ཡིན། །རྟེན་འབྲེལ་བཅུ་གཉིས་ཚུལ་དག་ཏུ། །ཕྱི་ནང་གཉིས་ཀར་འཁོར་བའོ། །འཕགས་ལམ་བྲལ་དང་སྡུག་བསྔལ་མྱོང་། །ཉེས་པ་རྣམ་པ་གཉིས་སུ་གསུངས། །ཐོག་མ་ཐ་མ་མེད་དུས་ནས། །ཡང་དག་དོན་ལ་རྟོག་པས་ཉམས། །མྱ་ངན་འདས་པའི་མཚན་ཉིད་དང་། །ངེས་ཚིག་རྣམ་གྲངས་གང་ལ་སྣང་། །མཚོན་དཔེ་མ་གྲུབ་ཚུལ་དོན་བསྟན། །ངོ་བོ་ཅི་བཞིན་ཀུན་སྣང་བས། །གཅིག་དང་དུ་མ་ལས་གྲོལ་ཏེ། །མཚན་ཉིད་བརྗོད་མཐའ་ཀུན་བྲལ་བའོ། །སྐྱེ་འཇིག་ཆོས་རྣམས་བྲལ་གྱུར་པས། །མྱ་ངན་འདས་པར་དེ་བརྗོད་དོ། །རྣམ་གྲངས་གཉིས་སུ་བརྗོད་པ་སྟེ། །ཐེག་པ་མཐོ་དམན་བྱེ་བྲག་གིས། །ཕྱོགས་གཅིག་པ་དང་མི་གནས་པའི། །མྱ་ངན་འདས་པར་བསྟན་པའོ། །མྱ་ངན་འདས་པའི་ངོ་བོ་ཉིད། །དེ་བཞིན་གཤེགས་ལ་སྣང་བ་དང་། །དེ་ཡི་སྤྲུལ་པ་རྒྱ་ཆེན་ཉིད། །གདུལ་བྱ་འཁྲུལ་ལ་སྣང་བའོ། །ཆུ་བོ་བརྒལ་བའི་གྲུ་བཞིན་ཏུ། །འཁོར་བའི་ཆུ་ལས་རྣམ་པར་བརྒལ། །བརྩོན་ར་ཐར་པ་ཇི་བཞིན་དུ། །འཆིང་བའི་བདུད་ལས་གྲོལ་བའོ། །གཞི་བོ་སེམས་ཉིད་མ་གྲུབ་པས། །སྤྲུལ་སྣང་ཆོས་ཀུན་མ་ངེས་པས། །ཅིར་ཡང་བཟུང་དུ་མེད་པའོ། །དབུ་མ་རྣམ་པ་གཉིས་ཡིན་ཏེ། །གྲོལ་ལམ་ཐབས་སུ་རྣམ་པར་བསྟན། །དབུ་མའི་དང་པོ་ངོ་བོ་དང་། །རྐྱེན་དང་རྣམ་གྲངས་མཚོན་དཔེ་དང་། །བསླབ་ཚུལ་རིམ་པ་བསྟན་པ་དང་། །གོང་འོག་དགོས་པ་མཐར་ཕྱིན་སྤྱོད། །ངོ་བོ་ཤེས་རབ་རྣམ་གསུམ་གྱིས། །སེམས་ལྔ་བསྐྱེད་པ་བསྟན་པ་ཡིན། །ཚིག་དང་ཡི་གེའི་རྐྱེན་གཉིས་ལས། །བརྟེན་ནས་རྟོགས་པར་བྱེད་པ་ཡིན། །མཚན་མ་བསྒོམ་པའི་རིམ་པ་དང་། །དེ་བཞིན་ཉིད་དུ་བསྒོམ་པ་ཡི། །བྱེ་བྲག་རྣམ་པ་གཉིས་སུ་གསུངས། །ཁྲོན་པ་སྒྲོན་མེའི་དཔེ་བཞིན་དུ། །གྲོལ་བའི་ལམ་གིས་རྟོགས་པར་བྱ། །ཐུན་མོང་ལམ་ལྔར་བསླབ་པ་དང་། །ཁྱད་པར་སོ་སོའི་ལམ་བཞིན་བསླབ། །སྔོན་དུ་གོམས་པར་གང་བྱས་པ། །གོང་མ་གསལ་བར་འགྱུར་ཕྱིར་རོ། །ཐུན་མོང་ཁྱད་པར་གནས་སྐབས་ལམ། །ཏིང་འཛིན་དྲོད་ཚད་ཉམས་ལྡན་ན། །ལམ་བཟང་ཕྱིན་པ་ཞེས་སུ་བཤད། །ཏིང་འཛིན་ཁྱད་པར་འགྱུར་པའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱད། །དབུ་མའི་ཐ་མ་བསྟན་པ་ནི། །རྣམ་གྲངས་གདམས་ངག་ཐབས་ཉིད་དེ། །རྟོགས་ཆུད་རྒྱུ་རྐྱེན་ལྡན་པ་ཡིས། །ཤུགས་ཀྱིས་སྣང་ཚུལ་གསེར་འགྱུར་བཞིན། །གདམས་ངག་སྟེང་དང་འོག་གི་སྒོ། །ཐིག་ལེ་བརྐྱང་བར་བཅས་པ་ཡིན། །ཐབས་རྣམས་སྔོན་དུ་གོམས་བྱས་པས། །དེ་བཞིན་ཉིད་དུ་འགྱུར་བྱེད་པ། །ཏིང་འཛིན་ཁྱད་འགྱུར་དབང་གི་རྒྱུ། །ཐབས་ཀྱི་རྒྱུ་རྐྱེན་ངོ་བོ་དང་། །ངེས་ཚིག་བསྐུར་བའི་རིམ་པ་དང་། །མཚོན་དཔེ་དགོས་པ་བསྟན་པའོ། །ཁྱད་པར་རྒྱུ་རྐྱེན་ལྔར་བཤད་དེ། །བླ་མའི་དགོངས་དང་རླུང་གི་དུས། །སྦྱོར་བའི་ཐབས་དང་བསོད་ནམས་ལས། །ཕྱག་རྒྱ་ཡོན་ཏན་ལྡན་གྱུར་པས། །དངོས་པོ་ལྷན་ཅིག་སྐྱེས་བ་མྱོང་། །དེ་ཕྱིར་ཐབས་སུ་བསྟན་པ་ཡི། །ངོ་བོ་ནུས་ཕན་གསང་བའི་ཆོས། །ཤེས་རབ་ཡེ་ཤེས་བདེ་ཆེན་པོ། །འཆིང་བའི་ལས་རྣམས་སྤྱོད་པ་ཡིས། །གྲོལ་བར་འགྱུར་ཕྱིར་མིང་དུ་བརྗོད། །དད་དང་བརྩོན་འགྲུས་གསུམ་དང་ལྡན། །བརྟུལ་ཤུགས་གསུམ་ལ་སྤྱོད་པ་ལ། །གོ་རིམ་ཚུལ་དུ་འཚམས་པར་ཕྱིན། །རྒྱལ་པོ་ཕྲུག་གུ་དུག་འགྱུར་བཞིན། །དབང་ཐབས་རྣམ་གཉིས་ཉམས་ལོན་བྱ། །རིམ་པ་དབང་གིས་བགྲོད་ཕྱིར་དང་། །ཐུན་མོང་ལམ་གྱི་ཁྱད་པར་གྱིས། །སྒོ་དབྱེ་ཐོབ་ཕྱིར་བསྟན་པ་ཡིན། །ཐ་མའི་དོན་ལ་ངོ་བོ་དང་། །མཚན་ཉིད་ཡོན་ཏན་བསྟན་པ་དང་། །མཛད་སྤྱོད་ཐུགས་རྗེའི་སྣང་ཚུལ་དང་། །གདུལ་བྱ་གཟིགས་ཚུལ་དོན་རྣམས་ཀྱིས། །འབྲས་བུའི་དོན་རྣམས་རྟོགས་པར་བྱ། །དང་པོ་སྐུ་གསུང་ཐུགས་རྣམས་དང་། །ཡོན་ཏན་ལས་ལྔར་བསྡུས་པ་ཡིན། །མཚན་ཉིད་བཞི་དང་ལྡན་པའི་ཕྱིར། །མ་ལུས་གཅིག་མིན་ཐ་དད་མིན། །འབྲས་བུའི་ཡོན་ཏན་ལྷུན་གྲུབ་པས། །ཡིད་བཞིན་ནོར་ལྟར་སྣང་བའོ། །འཕྲིན་ལས་བཞི་ཡི་མཛད་སྤྱོད་ཀྱིས། །བྱ་བྱེད་མེད་པར་དོན་རྣམས་རྫོགས། །ཐུགས་རྗེ་ཆེན་པོས་གདུལ་བྱ་ལ། །རྟག་རྒྱན་རང་བཞིན་ཤུགས་གསོལ་དང་། །ཡུལ་དང་འཕྲད་ནས་འབྱུང་བར་སྣང་། །ཉིད་ལས་མི་གཞན་དོན་ཉིད་ཀྱིས། །མེ་ལོང་ཚུལ་བཞིན་གཟིགས་པར་འགྱུར། །གཞི་ལམ་འབྲས་བུའི་ཤེས་བྱ་རྣམས། །བླ་མ་མཁས་ཉམས་ལྡན་པ་ལ། །དྲི་བ་དྲུག་གི་ཚུལ་ཉིད་ལས། །རྣམ་གསུམ་ཚུལ་གྱིས་ཞུ་བར་བྱ། །བླ་མ་མཁས་ལྡན་དེ་ཉིད་ཀྱིས། །བུ་རྣམས་མི་ཤེས་མདུད་དགྲོལ་ཕྱིར། །རྣམ་གསུམ་ལན་གདབ་གཞུང་ཉིད་ལས། །འགོ་གཅིག་རྣམ་དབྱེ་དྲི་ཚུལ་གྱིས། །ལན་གདབ་ཡིད་ཆེས་འགྱུར་བར་བྱ། །གལ་ཏེ་གཞུང་ལ་རྩོད་འགྱུར་ན། །དམ་བཅའ་བསྒྲུབས་ཏེ་དེ་ཉིད་ནི། །དཔེ་དོན་གཏན་ཚིགས་གསུམ་ལྡན་པས། །ཤེས་བྱ་དེ་ཉིད་མཐར་ཕྱིན་བྱ། །རྡོ་རྗེ་སེམས་དཔའི་དགོངས་བརྒྱུད་པ། །སྒྱུ་འཕྲུལ་དྲྭ་བའི་དོན་ཉིད་ལས། །རིམ་གསུམ་དོན་ཉིད་བསྡུས་པ་ཡི། །མ་ལུས་མངོན་པ་འཚང་རྒྱ་ཤོག །དེ་ལྟའི་དགེ་རྩ་ཅི་མཆིས་པ། །བདག་གི་རྒྱུད་ལ་ཡོངས་སྨིན་ཏེ། །བླ་མེད་བྱང་ཆུབ་ཐོབ་གྱུར་ནས། །མཐའ་ཡས་སེམས་ཅན་འདྲེན་པར་ཤོག །བདག་བློ་མུན་པར་འཁྱམས་པ་ཡི། །དགོངས་པ་ཉི་མའི་ཟེར་ཤར་བས། །ཉམས་དང་ལུང་ལ་བརྟེན་པ་ཡི། །བརྩམས་ནོངས་འཕགས་ལ་བཟོད་པར་གསོལ། །སྒྱུ་འཕྲུལ་དྲྭ་བའི་མན་ངག་རིམ་པ་གསུམ་པ་རྫོགས་སོ། །འཕན་ཡུལ་ཕྲབ་ཀྱི་བྲག་ཕུག་ཏུ་སློབ་དཔོན་བི་མ་ལས་མཛད་པ་ཛྙཱ་ན་ཀུ་མཱ་རས་བསྒྱུར་བའོ། །དགེའོ།། །།