མཐའ་ཡི་མུན་སེལ་སྒྲོན་མ། དཔལ་དབྱངས།
༈ མཐའ་ཡི་མུན་སེལ་སྒྲོན་མ་བཞུགས་སོ། །ཆོས་རྣམས་སེམས་ཀྱི་འཁྲུལ་པ་སྟེ། །སེམས་ལས་མ་གཏོགས་ཆོས་གཞན་མེད། །ཆོས་སུ་སྣང་བ་འཁྲུལ་པའི་སེམས། །རྟེན་འབྲེལ་སྒྱུ་མ་སྐྱེ་བ་མེད། །སྐྱེ་བ་མེད་ཅེས་བསྟན་པ་ཡང་། །དངོས་པོར་འཛིན་པ་བཟློག་ཕྱིར་ཏེ། །སྒྱུ་མ་ཡེ་ནས་སྐྱེ་མེད་ལ། །སྐྱེ་མེད་གནས་ཀྱི་སྒྲ་མི་གདགས། །ནམ་མཁའ་འདི་ནི་མེད་དོ་ཞེས། །བླུན་པོ་གང་ཞིག་རྟོག་པར་བྱེད། །མཁས་པ་སྔོན་ནས་ཡོད་མི་འཛིན། །མེད་པར་མི་རྟོག་ཚིག་མི་བརྗོད། །སེམས་ལས་མ་གཏོགས་ཆོས་མེད་ཕྱིར། །བསྒོམ་བྱའི་ཆོས་ཉིད་གུད་ན་མེད། །སེམས་ཀྱང་ཡེ་ནས་མ་སྐྱེས་ནས། །སྒོམ་པ་པོ་ཡང་གང་ལ་ཡོད། །བརྗོད་པའི་རྩ་བ་སེམས་ཉིད་ནི། །མ་སྐྱེས་དངོས་གཞི་ཡོད་མིན་ན། །སྒོམ་དང་བསྒོམ་དུ་མེད་པ་ཡི། །ཐ་སྙད་གང་ཞིག་གང་ལ་འཇུག །འགྲོ་ལ་སེམས་རྒྱུད་གཉིས་མི་འཆང་། །དེ་ནི་མ་སྐྱེས་རང་མི་དམིགས། །དེ་ལས་གཞན་པའི་སེམས་མེད་ཕྱིར། །བཅོས་ཤིང་གནས་པ་གང་ཞིག་ཡོད། །འཁྲུལ་རྟོག་རྐྱེན་དང་ལྡན་གྱི་བར། །སྨིག་རྒྱུ་བཞིན་དུ་སེམས་སྣང་ན། །རང་བཞིན་ཤེས་པས་བཅོས་སུ་མེད། །མི་ཤེས་སྨིག་རྒྱུ་བཅོས་པ་བཞིན། །མི་རྟོག་མཚན་མེད་སེམས་རྣམས་ཀྱི། །མཚན་མ་མེད་ལའང་གནས་མི་བྱེད། །མཚན་མ་མེད་ལ་མི་གནས་ན། །མཚན་མར་གནས་པ་སྨོས་ཅི་དགོས། །བསྒྲུབ་པ་མེད་ཅིང་གནས་པ་མེད། །འདུ་བྱེད་མེད་པ་མཁའ་འདྲ་བས། །འདུ་བྱེད་ལས་བྱུང་བསམ་གཏན་སྐྱེན། །མ་ལུས་ཀུན་གྱི་དགོས་པ་མེད། །ཇི་ལྟར་རྟོག་མེད་ཟབ་མོ་ཞིག །བློ་ཡི་ཡུལ་དུ་སྣང་ཞེ་ན། །མི་རྟོག་ཟབ་མོའི་ཉམས་མྱོང་བ། །མྱོང་བ་ཡིན་ཕྱིར་དེ་ཉིད་མིན། །ལྟ་བ་སྒོམ་ཆུང་མཐའི་མུན་སེལ་སྒྲོན་མེ། །བོད་ཀྱི་པཎྜི་ཏ་ཨཱ་ཙརྻ་གཉན་དཔལ་དབྱངས་ཀྱི་མཛད་པའོ།།