རྡོ་རྗེའི་དམ་ཚིག་གི་རྣམ་བཞག་གོ་བདེར་བརྗོད་པ་སྤང་ལེན་གསལ་བའི་མེ་ལོང། སྒྲོ་འདོག་ཕྲིན་ལས་བསྟན་འཛིན།
རྡོ་རྗེའི་དམ་ཚིག་གི་རྣམ་བཞག་གོ་བདེར་བརྗོད་པ་སྤང་ལེན་གསལ་བའི་མེ་ལོང་ཞེས་བྱ་བ་བཞུགས་སོ། །གདོད་ནས་ཀུན་ཁྱབ་བདེ་ཆེན་རྡོ་རྗེའི་སྐུར། །སྣང་སྟོང་ཟུང་འཇུག་ཟག་བྲལ་ཆོས་ཉིད་ཆེ། །རྡོ་རྗེ་སློབ་དཔོན་མཆོག་གི་རྣམ་རོལ་ཅན། །ཀུན་མཁྱེན་ཚེ་དབང་ནོར་བུ་སྙིང་དབུས་མགོན། །དབང་བསྐུར་རྒྱུད་བཤད་དཔག་དཀའི་གནད་དོན་བཀྲོལ། །རིག་པའི་གནས་སྟོན་ཐེག་གསུམ་ཆོས་ལ་སྦྱོར། །མདོར་ན་ཚིགས་སུ་བཅད་པ་གཅིག་ཙམ་གྱིས། །ལམ་སྟོན་ཡོངས་འཛིན་ཀུན་ལའང་དྭངས་བས་འདུད། །གང་ཞིག་རྡོ་རྗེ་ཐེག་པའི་ཉམས་ལེན་མཐིལ། །སྨོན་གྲོལ་ལམ་ཡིན་དེ་ཡི་བསྲུང་སྡོམ་སྒོ། །འདའ་ཉམས་བཀའ་བ་རྡོ་རྗེའི་དམ་ཚིག་གིས། །རྣམ་བཞག་གོ་བདེར་བཀྲོལ་ཏེ་འདིར་བཤད་བྱ། །དེ་ལ་རབ་འབྱམས་རྒྱུད་སྡེ་རྒྱ་མཚོའི་སྙིང་པོ་ནི་སྨིན་གྲོལ་གྱི་ལམ་ཉིད་དང་། དེའི་རྩ་བ་ནི་རྡོ་རྗེའི་དམ་ཚིག་སྟེ། དེ་དོན་གྱི་གནད་འགག་ཙམ་བཀྲོལ་ཏེ་འཆད་ན། བསྲུང་བྱ་དམ་ཚིག་གི་ངོ་བོ། ངེས་ཚིག །དབྱེ་བ། བསྲུང་ཚུལ་མ་བསྲུང་བའི་ཉེས་དམིགས། བསྲུང་བའི་ཕན་ཡོན། ཉམས་ན་ཕྱིར་བཅོས་བྱ་ཚུལ་དང་བདུན་ལས། དང་པོ་ནི། གསང་སྙིང་གི་རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོས། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་བླ་མ་དང་དཀྱིལ་འཁོར་མདུན་པར་ཁས་བླངས་པའི་སྡོམ་པ་གང་ཞིག །བསྲུང་བྱའི་དོན་ཁྱད་པར་ཅན་ལས་རྨི་ལམ་ཙམ་དུའང་འདའ་རུ་མེད་པའི་སེམས་པ་ས་བོན་དང་བཅས་པ་སྟེ། ཐུགས་ཐིག་ལས། གསང་སྒོར་ཞུགས་པ་ཐམས་ཅད་ཀྱིས། །སྒོ་གསུམ་རང་གི་བསྲུང་བྱ་ལ། །རྒྱལ་པོའི་བཀའ་རྟགས་ཇི་ལྟར་བར། །མི་འབྲལ་སྡོམ་པ་དེ་ངོ་བོ། །ཞེས་སོ། །གཉིས་པ་ནི་ས་མ་ཡཱའི་སྒྲ་ལས། ཡལ་གམ་བཅས་པའི་ཐ་ཚིག་དང་། མནའ་དང་། སྡོམ་པ་ལ་འཇུག་པས། དོན་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པའི་ཕྱིར་ན་དམ་ཚིག་སྟེ། ཀུན་འདུས་ལས། འདའ་དཀའ་རྡོ་རྗེ་དམ་ཚིག་གཏན་གྱི་གཉེར། །ཞེས་སོ། །དེ་ཡང་ཁོག་གཞུང་ལས། ངེས་ཆིག་སྐྱོན་ཡོན་སྐབས་ཀྱི་བསྒྱུར། །ཞེས་པ་བཞིན་ཏེ། རྡོ་རྗེ་ལས། དམ་པ་རྣམས་ཀྱི་དགོངས་པ་ལས། །དབང་དང་བྱིན་རླབས་ཐོབ་པ་ཡིན། །དམ་པའི་ཚུལ་བཞིན་ངེས་སྤྱད་ན། །མི་མཐུན་ཚོགས་རྣམས་ཚིག་པར་འགྱུར། །ཞེས་གསུངས་པའི་ཕན་ཡོན་གྱི་དམ་ཚིག་ཏུ་བཞག་པ་དང་། ཡང་། དེ་ལས། དམ་པ་འདི་ལས་གང་འདས་པ། །རྡོ་རྗེ་ཅན་ཡང་ཚིག་པར་འགྱུར། །ཞེས་དང་། ཧེ་རུ་ཀ་འདུས་པ་ལས། མི་འདའ་དམ་པ་མཆོག་གྱུར་པ། །འདབ་པར་གྱུར་ན་ཚིག་པར་བཤད། །ཅེས་ཉེས་དམིགས་ཀྱི་དམ་ཚིག་ཏུ་བཞག་པ་སྟེ། དེ་ཡང་ས་གཞི་དང་ལྗོན་ཤིང་བཞིན་བསྲུང་ན་དགེ་ལེགས་ཀྱི་ཡོན་ཏན་ཐ་དག་བསྐྱེད་པར་བྱེད་པའི་གཞི་དང་། མ་བསྲུང་ནས་ཐར་འབྲས་ཀྱི་བསྐྱེད་བྱ་ཐབས་བཅས་ཡལ་བའི་ཕྱིར་དང་། དམ་པའི་ཚུལ་བཞིན་སྤྱད་ན་མི་མཐུན་ཕྱོགས་ཀྱི་ཉེས་པ་ཚིག་པ་དང་། ནམ་ཡང་འདའ་རུ་མེད་པའི་དམ་ཞིང་། གལ་ཏེ་དེ་ལས་འདས་ནས་ཐར་པའི་ས་བོན་ཆ་བཅས་ཚིག་པའི་འབྲས་བུ་རྩུབ་མོས་མནར་བའམ་ཕྱིར་དེ་སྐད་ཅེས་བྱ་སྟེ། དམ་ཚིག་རྣམ་པར་བཀོད་པའི་རྒྱུད་ལས་ས་ཞེས་བྱ་བ་བསྐྱེད་པ་ལ། མ་ཞེས་བྱ་བ་མཉམས་ན། དངོས་གྲུབ་ཐམས་ཅད་སྟེར་བ་ཉིད། །ཡ་ཞེས་ཉམས་ན་ཡས་པར་འགྱུར། །དམ་ཞེས་བྱ་བ་བཅིངས་པ་ཉོས། །དེ་ཉིད་གྲོལ་ན་ཉམས་པ་ཉིད། །ཚིག་ཅེས་བྱ་བ་དེ་འདས་ན། །མི་ཡི་སྡུག་བསྔལ་མྱོང་བའོ། །ཞེས་སོ། །གསུམ་པ་ནི། རྒྱུད་སྡེའི་རྣམ་བཞག་བཞི་ལ་ལྟོས་ཏེ་སོ་སོའི་དམ་ཚིག་དང་། སྤྱིའི་རྣམ་བཞག་རྒྱས་པར་སྟོན་པ་སོགས་ཡི་གེས་འཇིགས་པར་མི་ཟད། བློ་དམན་རྣམས་ཀྱི་རྟོགས་དཀའ་ཞིང་མང་ཐོས་མཁན་དག་རྒྱུད་འགྲེལ་བཤད་དང་། སྡོམ་གསུམ་དང་རྩ་འགྲེལ་སོགས་སྔགས་སྡོམ་སྟོན་བྱེད་ཀྱི་གཞུང་ཉམས་སུ་བལྟ་བར་བྱོས་ལ། འདིར་ཉམས་སུ་བླང་བྱའི་འགག་དོན་ཆེ་ལོང་ཙམ་ཞིག་ཏུ་སྟོན་པ་ལ་དབང་བཞིའི་དམ་ཚིག་སོ་སོར་བྱ་བ་དང་། སྤྱི་སྡོམ་གྱི་ཉམས་བཞག་སྟོན་པའོ། །དང་པོ་ལའང་། ཕུང་ཁམས་ལྷ་རུ་སྨིན་པ་བུམ་དབང་གི་དམ་ཚིག་ནི། བསྐྱེད་རིམས་གསལ་སྟོང་ཆུ་ཟླའི་རང་བཞིན་ཅན་དུ་སྒོམས་པ་མཉམ་བཞག་གི་དམ་ཚིག །ཤེས་པ་ཐ་མལ་དུ་མི་འཁྲུལ་ཞིང་རྟག་ཏུ་ལྷའི་འདུ་ཤེས་དང་མ་བྲལ་བ་རྗེས་ཐོབ་ཀྱི་དམ་ཚིག །ཤ་ལྔ་བདུད་རྩི་ལྔ་ལ་གཙང་སྨེའི་བློ་གཏོངས་མི་འཇུག་པར་ལོངས་སྤྱོད་པ་བཟའ་བའི་དམ་ཚིག །རྡོ་རྗེ་དང་དྲིལ་བུ་ཚད་ལྡན་འབྲས་བུ་ཚད་ལྡན་འབྲལ་མེད་ཀྱི་རྟེན་དུ་འཆང་བ་བཅངས་པའི་དམ་ཚིག །སྣོད་གཞལ་ཡས་ཁང་དང་བཅུད་ལྷའི་དཀྱིལ་འཁོར་དུ་ཤེས་པས་འབྱུང་ལྔ་སྐྱེ་འགྲོ་ཀུན་ལ་ལོག་ལྟ་སྤང་བ་བསྲུངས་པའི་དམ་ཚིག་སྟེ་ལ་དང་། རླུང་འབྱིན་འཇུག་གནས་གསུམ་དང་བརྗོད་ཚིག་ཐ་དག་སྔགས་སུ་སྨིན་པ་གསང་དབང་གི་དམ་ཚིག་ནི། གཏུམ་མོའི་མེ་བསྒོམས་པ་མཉམས་བཞག་གི་དམ་ཚིག །ལྟེ་འོག་ཨ་ཐུང་གི་མི་མི་བརྗེད་པ་རྗེས་ཐོབ་ཀྱི་དམ་ཚིག །བཟའ་བཏུང་གི་ཚོགས་ལ་ཟས་ཀྱི་འདུ་ཤེས་རང་ཁ་མར་མི་འཇུག་པར་ཐམས་ཅད་ཡེ་ཤེས་ཀྱི་བདུད་རྩིར་བྱིན་རླབས་ཏེ་རོལ་བ་གཟའ་བའི་དམ་ཚིག །ཉི་ཞགས་ཕྲུག་གཅིག་རླུང་ཁ་སྦྱོར་ཉེར་གཅིག་མི་ཆད་པར་བྱེད་པ་བཅངས་པའི་དམ་ཚིག །ཀུན་རྫོབ་རྒྱུའི་ཐིག་ལེ་མི་ཉམས་པ་བྱེད་པ་བསྲུང་བའི་དམ་ཚིག་སྟེ་ལྔ། ཁམས་ཐིག་ལེ་བདེ་བ་ཆེན་པ་དང་ཚོར་བ་ཐ་དག་ལྷན་སྐྱེས་ཀྱིས་ཡེ་ཤེས་སུ་ཤེར་དབང་གི་དམ་ཚིག་ནི། བརྟན་པ་ཐོབ་མ་ཐོབ་ཀྱི་དབྱེ་བས་དངོས་ལམ་གྱི་ཕྱག་རྒྱ་བརྟེན་པ་ཉམས་བཞག་གི་དམ་ཚིག །བདེ་སྟོང་ཡེ་ཤེས་ཆེན་པོའི་ཉམས་དང་མ་བྲལ་བ་རྗེས་ཐོབ་ཀྱི་དམ་ཚིག །ལྷན་སྐྱེས་སྙོམས་འཇུག་གི་ཚུལ་དུ་རོལ་བ་བཀའ་བའི་དམ་ཚིག །ཀུན་དང་བྱང་ཆུབ་ཀྱི་སེམས་ལ་གཅེས་སྤྲས་སུ་བྱ་བ་བཅངས་བའི་དམ་ཚིག །ཤེས་རབ་ཀྱི་རང་བཞིན་བུད་མེད་ཀྱི་རིགས་ལ་མི་སྨོད་ཅིང་ལོག་ལྟ་སྤང་བ་བསྲུང་བའི་དམ་ཚིག་སྟེ་ལྔ། སྣང་སྲིད་དག་པ་རབ་འབྱམས་ཁྱབ་གདལ་ཆེན་པོར་སྨིན་པ་ཚིག་དབང་རིན་པོའི་དམ་ཚིག་ནི། ཟུང་དག་བློ་འདས་ཆོས་ཉིད་ཆེན་པོའི་དོན་རྩེ་གཅིག་ཏུ་སྒོམ་པ་མཉམ་བཞག་གི་དམ་ཚིག །ཡེངས་འཁྲུལ་གྱི་རྟོགས་པས་མ་བསླད་པར་ཟུང་འཇུག་གི་ཉམས་དང་མ་བྲལ་བ་རྗེས་ཐོབ་ཀྱི་དམ་ཚིག །ཆོས་ཉིད་ལ་ཆོས་ཉིད་ཀྱི་རོལ་པ་བཟའ་བའི་དམ་ཚིག །ལྟ་སྒོམ་གྱི་གནད་ལ་དུས་རྟག་ཏུ་མ་གཡོས་པར་བྱ་བ་བཅངས་པའི་དམ་ཚིག་བཟང་ངན་གྱི་རྟོག་ཚོགས་གང་ལྟར་འཆར་ཡང་དགག་སྒྲུབ་ཞེན་འཛིན་གྱི་བློས་མ་བསླད་པ་བསྲུང་བའི་དམ་ཚིག་སྟེ་ལྔའོ། །གཉིས་པ་སྤྱི་སྡོམ་གྱི་རྣམ་བཞག་སྟོན་པ་ལ། རྩ་བ་དང་། ཡན་ལག་གི་དབྱེ་གཉིས་སོ། །དང་པོ་ནི། སྒྱུ་འཕྲུལ་རྩ་རྒྱུད་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་གོ། །ཞེས་པ་སྟེ། འདི་ཉིད་འབྲུ་གནོན་གྱིས་འཆད་པ་ལ་སྤྱིར་བླ་ན་མེད་ཅེས་པ་དེའི་སྟེང་ངམ་གོང་ན་གཞན་མེད་པའི་དོན་ཡིན་ཏེ། འདིར་བསྟན་གྱི་བླ་མེད་ནི་དཀོན་མཆོག་རིན་ཆེན་རྣམ་པ་གསུམ་གྱི་དེ་ཡང་ཕྱི་ལྟར་མཆོད་ཕུལ་གྱི་དཀོན་མཆོག་གསུམ་དང་། ནང་སེམས་ཀྱི་ཆོས་ཉིད་དོན་དམ་པའི་གནས་ལུགས་སྟོང་ཉིད་སྤྲོས་བྲལ་གྱི་ངོ་བོ་ཆོས་སྐུ། རང་བཞིན་གསལ་ལ་འགག་མེད་ལོངས་སྤྱོད་སྐུ། ཐུགས་རྗེའི་རྩལ་ཅིར་ཡང་མ་འགག་ཅིང་ཕྱོགས་ལྷུང་བྲལ་བ་སྤྲུལ་སྐུ་སྟེ། ངོ་བོ་གཅིག་ལ་ལྡོག་ཆ་ཐ་དད་པའི་རང་བཞིན། བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ་ཟུང་འཇུག་དོན་དམ་པའི་ཡེ་ཤེས་ལ་མཉམས་པར་བཞག་པའི་དོན་ཏེ། དེ་ཉིད་དམ་ཚིག་ཀུན་གྱི་རྩ་བའི་གཞི་ལྟ་བུར་གྱུར་པས་དེ་དོན་རྩེ་གཅིག་ཏུ་ཉམས་སུ་ལེན་དགོས་པའི་དོན་གྱི་མི་སྤང་བའོ། །དེ་ཡང་གསལ་བཀྲ་ལས། བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔར་གསུམ་ཕྱག་རྒྱ་བཞི། །ཞེས་གསུངས་པའི་དང་པོ་དང་གནད་གཅིག་པ་སྟེ། ཡུལ་ལྷག་པ་དོན་དམ་ལྷག་པ་ཀུན་རྫོབ་ཀྱི་བདེན་པ་གཉིས་མི་སྤངས་པར་བཤད་པའང་བདེན་གཉིས་དབྱེར་མེད་དུ་རྟོགས་པ་ལྟ་བའི་དམ་ཚིག་ཏེ། གསང་སྙིང་ལས། མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་པས་དེ་མངོན་གྱུར་འབྲས་བུ་ལ་དམིགས་པ་སྨོན་པ་དང་། དེ་སྒྲུབ་པའི་ཕྱིར་རང་ལ་གནས་པའི་ཡེ་ཤེས་དང་རྗེས་མཐུན་པར་སྒོ་གསུམ་སྤྱོད་ཡུལ་དང་བཅས་པའི་སྣང་བ་ཐ་དག་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བས་ནང་བཤད་དག་པའི་སྣང་བར་ལམ་ཁྱེར་དུ་སྤྱོད་པ་འཇུག་སེམས་ལ་བསླབ་པ་སྟེ། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་གཉིས་མེད་རྡོ་རྗེའི་སྐུ། །བྱས་མཐོང་ཟོས་པ་ཐམས་ཅད་ཀྱང་། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅིའི་ཕྱིར་ཆུད། །ཅེས་སོ། །གཞན་ཡང་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་ཞབས་ཀྱིས། གཞི་སེམས་ཅན་ཐམས་ཅད་ཡེ་དཀོན་མཆོག་གསུམ་དུ་གནས་པས་མི་སྤང་བ་དང་། ལམ་བ སྐྱེད་རྫོགས་དང་གཉིས་སུ་མེད་པའི་རང་བཞིན་དོན་དམ་པ་དང་ཀུན་རྫོབ་བྱང་ཆུབ་ཀྱི་སེམས་གཉིས་མི་སྤང་བ་དང་། འབྲས་བུ་བླ་ན་མེད་པའི་སངས་རྒྱས་སྐུ་གསུམ། དེའི་གསུང་མདོ་རྒྱུད་ལུང་དང་རྟོགས་པའི་ཆོས། དེའི་དོན་ལ་སློབ་པའི་དགེ་བའི་དགེ་འདུན་དཀོན་མཆོག་གསུམ་མི་སྤང་བའོ། །ཞེས་དང་། དཀོན་མཆོག་འགྲེལ། འདི་ལྟར་སངས་རྒྱས་དང་དགེ་འདུན་ནི་ཡེ་ཤེས་ཀྱི་དབྱིངས་ཡིན་ལ། ཆོས་དེའི་ཆོས་ཉིད་ཡིན་པས། དེ་བས་ན་ཡེ་ཤེས་དང་ཆོས་ཉིད་ནི་ཀུན་རྫོབ་ཙམ་དུ་ཆོས་དང་ཆོས་ནི་བདག་ཉིད་གཅིག་པ་ཡིན་པ་དང་། དོན་དམ་པར་སྤྲོས་པ་ཞི་བའི་ཕྱིར་གཉིས་སུ་མེད་ཏེ། དེ་ལྟ་བུའི་དོན་གྱི་བྱང་ཆུབ་ཀྱི་སེམས་ཡིན་ནོ། །དེའི་རྟགས་ཀྱི་ཕྱག་རྒྱ་ནི་ལྷའི་སྐུ་སྟེ། དེ་བས་ན་ལྷའི་སྐུ་གཅིག་པུ་བསྒོམས་པས་གཞུང་ལས། དཀོན་མཆོག་གསུམ་དང་བྱང་ཆུབ་སེམས། །ལྷ་དང་བླ་མ་དེ་བཞིན་ཏེ། །ཞེས་གང་གསུངས་པའི་བླ་མ་གཏོགས་པ་གསུམ་འདུས་པར་གྱུར་པ་ཡིན་ནོ། །ཞེས་སོ། །བླ་མ་བཀུར་ཞེས་པ་ལ་གཉིས་ཏེ། བླ་མའི་དབྱེ་བ་དང་། དེ་ཇི་ལྟར་བཀུར་ཚུལ་དངོས་པོ། དང་པོ་ནི། གསལ་བཀྲ་ལས། སྤྱི་དང་འདྲེན་དང་དམ་ཚིག་དབང་། །ཉམས་པ་སྐོང་དང་ཤེས་རྒྱུད་དཀྲོལ། །མན་ངག་ལུང་གི་སློབ་དཔོན་དྲུག །ཅེས་པས་ཀུན་གྱི་དམ་པས་བཀུར་ཞིང་མཆོད་འོས་དུ་གྱུར་པ་ནི་སྤྱིའི་བླ་མ། ཐོག་མར་ཆོས་སྒོར་འདྲེན་བྱེད་རབ་བྱུང་གི་མཁན་པོ་ལྟ་བུ་ནི་འདྲེན་པའི་བླ་མ། ཐུན་མོང་གི་རིག་གནས་ཕྲ་མོ་ནས་གསུངས་རབ་ཀྱི་དགོངས་དོན་འགྲོལ་བའི་བར་གྱི་ཆོས་འཆད་པོ་ནི་ཤེས་རྒྱུད་དགྲོལ་བའི་སློབ་དཔོན། སྔར་ཉམ་ཆགས་བྱུང་བའི་བཤགས་འཚམས་སྦྱར་བ་ནས་ཉེས་ལྟུང་ཅི་རིག་པ་དག་བཤགས་ཡུལ་དུ་གྱུར་པ་ནི་ཉམས་ཆག་སྐོང་བའི་སློབ་དཔོན། དཀྱིལ་འཁོར་དུ་བཅུག་ཅིང་དབང་བསྐུར་ཏེ་དམ་ཚིག་འབོགས་པ་པོ་ནི་དམ་ཚིག་དབང་གི་སློབ་དཔོན། རང་བྱུང་གི་གནས་ལུགས་ཟབ་མོའི་དོན་མངོན་སུམ་དུ་སྟོན་པའི་ཟབ་ཁྲིད་ཀྱི་གདམས་པ་སྟོན་པ་ནི་མན་ངག་ལུང་གི་སློབ་དཔོན་ནོ། །གཉིས་པ་ནི། སྔ་མ་ལས། ཡུལ་ལས་དབང་བའི་རྒྱལ་པོ་དང་། །ཁུ་བོ་ཕ་དང་མ་དང་མིག །སྙིང་ལས་ལྷག་པའི་ཚུལ་བལྟ་སྟེ། །ཞེས་པས་སྤྱིའི་བླ་མ་ཡུལ་ལ་དབང་བའི་རྒྱལ་པོ་དང་། ཆོས་སྒོར་བཅུག་པའི་སློབ་དཔོན་ཁུ་བོ་དང་། ཉམས་ཆག་སྐོང་བའི་སློབ་དཔོན་ཕ་དང་། ཤེས་རྒྱུད་འགྲོལ་བའི་སློབ་དཔོན་མ་དང་། དམ་ཚིག་དབང་གི་སློབ་དཔོན་མིག་དང་། མན་ངག་ལུང་གི་སློབ་དཔོན་རྙིང་ལས་ལྷག་པའི་ཚུལ་དུ་བཀུར་ཞིང་། དེ་ཡང་འདུལ་བ་ལས། མཁན་པོ་མཐོང་མ་ཐག་ཏུ་སྟན་ལས་ལྡང་བར་བྱའོ། །ཞེས་དང་། ཀཱ་རི་ཀ་ལས་བླ་མ་གནས་པའི་སྒོ་གླེགས་ལ། ལག་པས་དལ་གྱི་བརྡུང་བར་བྱ། །ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་དྲི། །ཅེས་སོ། །གཞན་ཡང་འདུལ་བ་རང་གཞུང་ལས་ནི་རབ་བྱུང་གི་མཁན་པོ་ཕ་ལྟར་དུ་བཀུར་བར་གསུང་སྟེ་ཇི་སྐད་དུ། ཁྱོད་ཀྱི་མཁན་པོ་ལ་ཕའི་འདུ་ཤེས་བཞག་པར་བྱའོ། །མཁན་པོས་ཁྱོད་ལ་བུའི་འདུ་ཤེས་བཞག་པར་བྱའོ། །ཞེས་གསུངས་སོ། །ཤེས་རབ་རྒྱུད་ཀྱི་སློབ་དཔོན་ཡང་། མདོ་སྡེ་ཐར་པ་ཆེན་པོ་ལས། ཆོས་སྨྲ་བའི་དགེ་སློང་ལ་གུས་པར་བླ་མར་བྱ་སྟེ། ཞེས་དང་། དཀོན་བརྩེགས་ལས། ཆོས་སྨྲ་བ་ནི་བླ་མའི་མཆོག་རབ་སྟེ། རྒྱལ་བའི་མཆོད་སྡོང་ཆེན་པོ་དེ་བཀུར་རོ། །ཞེས་སོ། །གཞན་པ་སེམས་བསྐྱེད་ཀྱི་དགེ་བའི་བཤེས་ལྟ་བུའང་། སྡོང་པོ་བཀོད་པ་ལས། དེ་ནི་བདག་གིས་ཐོག་མེད་པ་ན་སེམས་བསྐྱེད་པའི་དགེ་བའི་བཤེས་ཏེ། ཞེས་དང་། ཉམས་ཆག་བཤགས་པའི་སློབ་དཔོན་ཡང་། སུ་པི་ཏི་ཀ་རིའི་རྒྱུད་ལས། བཤགས་པའི་ཡུལ་དུ་གང་གྱུར་པ། །དེ་ཡང་དེ་ཡི་བླ་མ་ཡིན། །ཞེས་པས་དེ་དང་རྗེས་མཐུན་གྱི་བཀུར་བའོ། །དེ་ལས་ཁྱད་པར་དུ་དབང་བསྐུར། བརྒྱུད་བཤད། དེ་ཉིད་སྟོན་པ་སྟེ་མན་ངག་ཤོད་པ་གསུམ་ནི་ལྷག་པར་ཡང་བཀུར་བའི་ཡུལ་ཡིན་པར། བདེ་འདུས་ཞིང་རྒྱུད་ལས། དབང་བསྐུར་རྒྱུད་གྲོལ་དེ་ཉིད་བསྟན་ནས། ཞེས་གསུངས་ཤིང་། དེ་ཡང་ཡུལ་གཅིག་ལ་གསུམ་ཀ་ནོས་ན་བཀའ་དྲིན་གསུམ་ལྡན་དང་། གཉིས་ནོས་ན་གཉིས་ལྡན། གཅིག་ནོས་ན་ཅིག་ལྡན་ནོ། །གོང་གི་གསལ་བཀྲའི་ལུང་ལས་བཀུར་ཚུལ་རིམ་ཅན་ལྟ་བུར་གསུང་ཤིང་མཁས་པ་འགའ་ཞིག་ཚུལ་དེ་ལྟར་བུ་འགྲེལ་ཀྱང་། འདིར་གོ་བརྗེས་པ་ནི་དོན་འགྲེལ་ཏེ་མཁས་གྲུབ་དུ་མའི་བཞེད་པ་ལྟར་འཐད་པ་དང་བཅས་པའོ། །དེ་ཡང་རྒྱ་མཚོ་ལས། དབང་བསྐུར་མཆོག་ཐོབ་རྡོ་རྗེ་ཡི། །བླ་མ་ལ་ནི་དེ་བཞིན་གཤེགས། །ཞེས་སོ། །དེ་ལྟར་ན་གསང་ལྟར་སྔགས་རྡོ་རྗེ་ཐེག་པའི་ལམ་གྱི་མཆོག་ནི་དབང་རྒྱུད་མན་ངག་གསུམ་གྱི། དེ་སྟོན་པའི་བླ་མ་ནི་སངས་རྒྱས་ལས་མཉམ་པའམ། ལྷག་པ་དཀོན་མཆོག་བཞི་པར་བལྟ་བ་གང་རུང་གི་སྒོ་ནས་སྒོ་གསུམ་གཡོ་ཟོལ་མེད་པར་ཐུགས་ཅི་མཉེས་དང་བཀའ་ཅི་གསུང་བསྒྲུབ་པའི་སྒོ་ནས་བཀུར་བ་སྟེ། རྣམ་སྣང་རྒྱུད་དྲྭ་ལས། བླ་མ་སངས་རྒྱས་ཀུན་དང་མཉམ། །ཞེས་དང་། གསང་བ་འདུས་པ་ལས། ཕྱོགས་བཅུའི་སངས་རྒྱས་ཐམས་ཅད་པས། །བླ་མའི་བ་སྤུ་ཁུང་གཅིག་མཆོག །ཅེས་དང་། རྡོ་རྗེ་རྩེ་མོ་ལས། སངས་རྒྱས་ཆོས་དང་དགེ་འདུན་དང་། །བླ་མ་ཡང་ནི་བཞི་པ་ཡིན་ཅེས་སོ། །དེ་ཡང་མིག་ལ་རྡུལ་ཕྲ་མོ་ཚུད་ནའང་སྐད་ཅིག་ཀྱང་བཟོད་བླག་མེད་པ་དང་། སྙིང་མཚོན་ཕྲ་མོ་ཞིག་ཟུག་ན་དབང་པོ་གཞན་ཡོད་ཀྱང་འཆི་བ་ལས་མ་འདའ་བ་བཞིན་དུ་དབང་བསྐུར་བ་དང་། དེ་ཉིད་སྟོན་པ་གཉིས་ལྷག་པར་བཀུར་བས་མཚོན་ལྕི་རིམ་ཤེས་པར་བྱའོ། །སྔགས་དང་ཕྱག་རྒྱ་རྒྱུན་མི་བཅད། །ཅེས་པའི་དོན་ནི། ཡུལ་སྔགས་གསུམ་དང་ཕྱག་རྒྱ་བཞི་སྟེ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། །དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་པ། སྔགས་ལ་རྒྱུ་མ་ནོར་བ་རྩ་བའི་སྔགས། བསྐྱེད་པ་རྐྱེན་གྱི་སྔགས། བཟླས་པ་ལས་ཀྱི་སྔགས་དང་། ཐབས་ཤེས་ཀྱི་བདག་ཉིད། དེའི་སྒོ་ཡིག་འབྲས་བུར་སྣང་བས་གསང་སྟེ་ངག་ཏུ་བརྗོད་པར་བྱེད་པ་དང་བཅས་ཤིང་ཤེས་སྐྱོབ་ཀྱི་ལས་ཀྱི་ལོག་རྟོག་གི་གཉེན་པོར་གྱུར་པ་ནི་གསང་སྔགས། ཤེས་རབ་དང་ཡེ་ཤེས་ཀྱི་བདག་ཉིད་དངོས་དོན་རིག་པར་བྱེད་པའི་ལས་ཀྱི་མ་རྟོག་པའི་གཉེན་པོར་གྱུར་པ་ནིརིགས་སྔགས། དྲན་ཤེས་ཀྱི་བདག་ཉིད་ཆོས་ཀྱི་ཚིག་དོན་མི་བརྗེད་པར་འཛིན་པའི་ལས་ཀྱི་དྲན་ཉམས་ཀྱི་གཉེན་པོར་གྱུར་པ་ནི་གཟུངས་སྔགས་སུ་བཤད་པ་དང་། ཕྱག་རྒྱ་ལ་དམ་ཚིག་གི་ཕྱག་རྒྱ། ལས་ཀྱི་ཕྱག་རྒྱ། ཆོས་ཀྱི་ཕྱག་རྒྱ། ཕྱག་རྒྱ་ཆེན་པོ་དང་བཞིར་གསུངས་ཤིང་། དེ་ཉིད་ལ་བཅའ་བ་དང་། བསམ་པ་གཉིས་གཉིས་སུ་དབྱེ་བ་སོགས་དབྱེ་བསྡུའི་གྲངས་མང་ཡང་རྒྱས་པར་རྒྱུད་འགྲེལ་རྣམས་སུ་གསལ་ཞིང་། འདིར་བསྡུས་དོན་གྱི་སྙིང་པོ་ནི། དག་རྫོགས་སྨིན་གསུམ་གྱི་འཇུག་པས་ཡི་དམ་ལྷའི་བསྐྱེད་རིམ་ལ་བློ་སྦྱངས་ཤིང་། དེ་ཉིད་ཀྱི་སྐུའི་ཕྱག་རྒྱ་སྣང་ལ་རང་བཞིན་མེད་པ། གསལ་ལ་དེར་འཛིན་མེད་པ་སྟེ་དམིགས་གཏད་ཀྱི་བློ་དང་བྲལ་བར་ཆུ་ཟླའི་གཟུགས་བརྙན་བཞིན་རྣམ་པ་གསལ་བ། ང་རྒྱལ་བསྟན་པ་དག་པ་དྲན་པ་གསུམ་གྱི་སྟེང་དུ་བཅུར་ནས་གཡོ་འགུལ་མེད་པར་བསྒོམ་པས་གོམས་པ་དང་། ལམ་ཞུགས་དག་རིམ་གྱིས་བློ་སྦྱངས་པའི་མོས་པས་སྤྱོད་ངང་དུ་ཉམས་སུ་ལེན་པའོ། །དེ་ཡང་རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ཉིད་ཀྱིས་འདི་ཉིད་ཀྱི་ཁོངས་སུ་ཕྱག་རྒྱ་བཞི་པོའི་དོན་ཚངས་པ་ཉིད་ཏེ། ཐུགས་ཐིག་ལས་བཞི་རྫོགས་ཉིད་ལས་མི་འདའ་བ། གང་ལ་སྣང་བ་དེ་ངོ་བོ། ཞེས་གསུངས་པའི་ཕྱིར་རོ། །སྔགས་ཀྱང་འདིར་བཟླས་བྱའི་སྔགས་ལྷ་གང་ཡིན་པ་དེའི་ས་བོན་དང་བསྐྱེད་སྔགས་སྦྲེལ་བའི་སྙིང་པོ་བཟླ་བ་ཉིད་དོ། །རྒྱུན་མི་བཅད་པའི་ཚུལ་ནི། བརྩོན་པ་རབ་ཀྱི་ཆུ་བོའི་རྒྱུན་བཞིན་ནམ། ཉིན་ཞག་གཅིག་གི་ནང་དུ་ཐུན་བཞིའི་དྲུག་གི་རྣལ་འབྱོར་དུ་བྱ་བ་དང་། འབྲིང་གི་ཟླ་བ་རེ་ལ་དུས་ཚིག་དྲུག་གམ། དུས་བཟང་པོ་བཞིའམ། ཉ་སྟོང་གཉིས་ཙམ་དང་། ཐ་མས་ཀྱང་ཟླ་དུས་དང་ལོ་དུས་ཀྱི་མཆོད་པ་རྒྱུན་མི་བཅད་པ་འབད་པར་བྱ་བ་སྟེ། རྔམ་གློག་ལས། རང་གི་སྒོ་གསུམ་ཡིད་དམ་གྱི། །སྐུ་གསུང་ཐུགས་སུ་མངོན་སྦྱར་ལ། །རྟག་ཏུ་བཟླས་པ་བྱེད་པ་ནི། །བྱང་ཆུབ་གཟུངས་ལ་ཞུགས་པ་ཡིན། །རབ་ཀྱི་ཆུ་བོའི་རྒྱུན་བཞིན་ནི། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་པ་ཡི་ངག་གི་བཟླ། །འབྲིང་གི་ཟླ་གཅིག་དུས་དྲུག་དང་། །དུས་བཞིའི་བར་དུ་མི་བཅད་ཅིང་། །ཐ་མར་བརྩོན་པའི་རྣལ་འབྱོར་པས། །ཟླ་རེའི་མ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་པར། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་ཏེ། །ཐ་མས་ལོ་ཟླ་མ་འདའོ། །ཞེས་སོ། །ཡང་དག་ལམས་སུ་ཞུགས་ལ་བྱམས། །ཞེས་པ་འདིས་རྡོ་རྗེ་མཆེད་ཀྱི་དམ་ཚིག་བསྟན་ཏེ། དེ་ཡང་མཆེད་ཀྱི་དབྱེ་བ་དང་། དེ་ལ་དམ་བསྲུང་བའི་ཚུལ་ལོ། །དང་པོ་ནི། འགྲོ་བ་ཐ་དག་གཞི་རྒྱུད་བདེ་གཤེགས་སྙིང་པོས་རྒྱུན་ཆགས་སུ་ཁྱབ་པའི་དོན་གྱིས་ཡེ་གཞི་གདོད་མའི་སྤུན་ཏེ་སྤྱིའི་མཆེད། བྱེ་བྲག་ཏུ་ཡང་དག་གི་ལམ་དུ་ཞུགས་པ་སྟེ་སངས་རྒྱས་ཀྱི་ཆོས་ཀྱི་བསྡུས་པ་སྟེ་བསྟན་པ་གཅིག་པའི་མཆེད་ཡིན་པས་རིང་པའི་མཆེད། ཁྱད་པར་རྡོ་རྗེ་ཐེག་པ་སྔགས་ཀྱི་ལམ་ལ་ཞུགས་པ་རྣམས་རྡོ་རྗེའི་དམ་ཚིག་གི་བསྡུས་པ་སྟེ་ལྟ་སྤྱོད་གཅིག་ཏུ་མཐུན་པས་ཉེ་བའི་མཆེད། དེ་ལས་བླ་མ་དང་དཀྱིལ་འཁོར་གཅིག་གི་བསྡུས་པ་ནི་ལྷག་པར་དམ་འདྲེས་པས་འདྲེས་པའི་མཆེད། དེ་ཡང་བླ་མ་གཅིག་གི་བསྡུས་པ་ནི་ཕ་གཅིག་པའི་སྤུན་དང་དེའི་ཤུགས་ཀྱི་དཀྱིལ་འཁོར་གཅིག་གི་བསྡུས་པ་ནི་མ་གཅ ིག་པའི་སྤུན་ཏེ། དེ་དག་སྔ་མ་ལས་ཕྱི་མ་ཉེ་ཞིང་། ཁྱད་པར་ནང་འདྲེས་ལའང་ཕ་གཅིག་པ་ལ་མ་གཅིག་པ་དང་། དེ་གཉིས་ཀ་གཅིག་པ་ལའང་དབང་ཐོབ་པའི་དུས་སྔ་ཕྱི་ཡོད་ན་སྤུན་རྒན་གཞོན་དང་། དུས་གཅིག་པ་ནི་མཚེ་མ་ལྟ་བུ་སྟེ་དེ་དག་ཀྱང་ཕྱི་རིམ་གྱི་ཉེ་ལ། དེ་ཡང་དབང་བཞི་ཀ་རྫོགས་པར་ལྷན་གཅིག་ཏུ་ཐོབ་པའི་སྤུན་རྣམས་ནི་ལྷག་པར་ཡང་ཤིན་ཏུ་ཉེ་བ་ཡིན་ནོ། །འདི་དག་ལ་ཀུན་མཁྱེན་ཆོས་རྗེས་སེམས་ཅན་ཐམས་ཅད་ཡེ་གདོད་མ་ནས་བདག་གིས་སྤུན་ཡིན་པའི་ཕྱིར་སྤྱིའི་མཆེད་དོ། །སངས་རྒྱས་ཀྱི་ཆོས་ལ་ཞུགས་སོ་ཅོག་ནི་བསྟན་པ་གཅིག་པའི་མཆེད་དོ། །ལྟ་སྤྱོད་གཅིག་པ་ནི་མཐུན་པའི་མཆེད་དོ། །བླ་མ་གཅིག་པ་ནི་མཛེས་པའི་མཆེད་དོ། །ཆོས་ལྷན་ཅིག་ཏུ་ཉན་པ་ནི་ཉེ་བའི་མཆེད་དོ། །དབང་ལྷན་ཅིག་ཏུ་ཞུགས་པ་ནི་འདྲེས་པའི་མཆེད་དེ་རྡོ་རྗེའི་སྤུན་ནོ། །ཞེས་གསུངས་པའང་དོན་མཐུན་ཅིང་། གཞན་ཡང་གསལ་བཀྲ་ལས། མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མེད་ཅིང་། །བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནོ། །སྤྱི་ཡི་མཆེད་དེ་ཕ་མཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་པ། །ཞེས་དང་། སངས་རྒྱས་ཡེ་ཤེས་ཞབས་ཀྱི་རིམ་པ་རྣམ་པར་བཞག་པ་ལས། བསྟན་དང་རྡོ་རྗེའི་ཐེག་པ་ལ། །ཞུགས་པ་ཐམས་ཅད་སྤུན་དུ་བརྗོད། །ཀུན་ཀྱང་ཡེ་ཤེས་ལྡན་པ་ལ། །རྡོ་རྗེ་སེམས་དཔའི་རྡོ་རྗེ་སྤུན། །དཀྱིལ་འཁོར་སློབ་དཔོན་རིག་མ་གཅིག །དབང་བཞི་དག་གི་བྱེ་བྲག་གིས། །ཉེ་དབང་ཁྱད་པར་བྱེ་བྲག་གོ། །ཞེས་སོ། །གཉིས་པ་ནི། དེ་དག་ལ་རྟག་ཏུ་མི་འབྲལ་ཞིང་ཕན་འདོགས་པའི་ལྷག་བསམ་གྱིས་བརྩེ་བ་རྒྱུན་མི་ཆད་པས་བྱམས་པར་བྱ་བ་སྟེ། ཡེ་ཤེས་གྲུབ་པ་ལས། སེམས་ཅན་ཀུན་གྱི་ཡིད་ཁྱབ་པར། །རྡོ་རྗེ་སེམས་དཔའ་རང་ཉིད་བཞུགས། །དེ་ལྟར་བསམ་ནས་རྣལ་འབྱོར་གྱི། །དབང་པོས་གང་ལ་བརྙན་མི་བྱ། །ཞེས་དང་། དཔལ་འཕྲེང་གི་མདོ་ལས། བྱང་ཆུབ་སེམས་བརྟེན་ཐེག་ཆེན་ཞུགས་ལ་བྱམས། །ཞེས་གསུངས་པས་སྔར་བཤད་པ་ལྟར་སྤྱི་རིང་ཉེ་བ་འདྲེས་པའི་མཆེད་བཞི་དང་དེ་ལས་ཀྱང་བརྟན་ཞུགས་ཀྱི་མཆེད་ཕྱི་མ་གསུམ་དང་། དེའི་ནང་ནས་འདྲེས་པའི་མཆེད་ལྷག་པར་གཉན་པར་ཤེས་པའི་རིམ་པས་རྟག་ཏུ་མི་འབྲལ་ཞིང་། ཕན་འདོགས་ཀྱི་བརྩེ་གདུང་ལ་འབད་པས་བརྩོན་པ་སྟེ། རྔམ་གློག་ལས། རྡོ་རྗེ་སྤུན་ལ་གདུང་སེམས་ཀྱང་། །འདྲེས་དང་མ་འདྲེས་ཡོངས་ཀྱི་སྤུན། །ཡང་དག་ལམ་དུ་ཞུགས་པ་ལ། །རྔན་དང་བཅས་པའི་སེམས་ཙམ་ཡང་། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུངས་ལ། །གཅིག་ལ་གཅིག་ནི་མིག་བཞིན་བལྟས། །མདོར་ན་སྲོག་ལའང་མི་ཆགས་པར། །སྤུན་དང་མིང་སྲིང་དགོས་པ་བསྒྲུབ། །ཅིའི་ཕྱིར་རྡོ་རྗེ་སྤུན་རྣམས་ནི། །འདི་ནས་བྱང་ཆུབ་བར་དག་ཏུ། །མི་འབྲལ་འགྲོགས་པའི་གྲོགས་མཆོག་སྟེ། །མར་མེའི་འོད་དང་སྡོང་བུ་འདྲ། །ཞེས་སོ། །དེ་ཡང་མཆེད་ཀྱི་དམ་ཚིག་སྒོ་ང་ཕྱེད་གཤག་ཅེས་ཁ་གཏམ་དུ་གྲགས་པ་བཞིན་ཕན་ཚུན་གཉིས་ཀས་མཉམ་པར་བསྲུངས་དགོས་རྒྱུའི་དོན་གོང་གི་ལུང་ཚིག་གིས་ཟིན་ཞིང་། འོན་ཀྱང་གཅིག་ཤོས་ནས་ཡལ་བར་བོར་ཀྱང་རང་ཉིད་ཀྱི་ཅི་ནུས་བསྲུང་བྱར་རིག་པ་ཉིད་དོ་རྨོང་བ་ཁ་ཅིག་དམ་ཚིག་སྒོ་ང་ཕྱེད་གཤག །ཕྱེད་བླ་མས་བསྲུང་། ཕྱེད་སློབ་མས་བསྲུང་། ཞེས་བླ་མ་ལ་སྦྱར་ཏེ་སྨྲ་བ་ནི་དོན་མ་གོ་བའི་འཆལ་གཏམ་དུ་ཟད་དོ། །བླ་མས་སློབ་མ་ལ་བསྲུང་དགོས་པ་ཡང་། དམ་ཚིག་གི་རྣམ་དབྱེ་ལན་གསུམ་དུ་སྤྲོས་ཏེ་མ་བཤད་པ་དང་། འོན་ཀྱང་གཅིག་སློབ་མ་སྙིང་ནས་ཆོས་རྩེ་གཅིག་ཏུ་འདོད་ཅིང་གདམས་ངག་དོན་དུ་གཉེར་བ་ཞིག་ལ་གདམས་པ་དཔེ་འཁྱུད་ཀྱི་སྒོ་ནས་མི་སྟོན་ཅིང་དེའི་བློ་ཁ་ཆོས་ལ་འཇུག་པ་དེ་ལས་བཟློག་སྟེ་སྡིག་ལ་སྦྱར་བ། སྔོན་དམ་འགལ་བྱུང་བ་བཤགས་ཚིག་ལས་ལ་འདས་པའི་ནང་ཁོངས་སུ་གཞུང་བཞིན་སྙིང་ནས་མཐོལ་ཏེ་བཤགས་པ་མ་བླང་བ་གསུམ་ཡོད་ཅེས་བདག་གི་རྗེ་བླ་མ་ཐམས་ཅད་མཁྱེན་པས་གསུངས་པར་ཐོས། གསང་བའི་དོན་ཕྱིར་སྨྲ་མི་བྱ། ཞེས་པས་གསང་བ་མི་སྨྲ་བར་བསྟན་ཞིང་། དེ་ལ་དབྱེ་ན། ཕྲ་རྒྱས་ལས། སྤྱི་དང་བར་གསང་བཞི་བཞི་དང་། །འོས་དང་གཏེར་གཏད་རྣམ་པ་བཅུ། །ཞེས་པ་ལྟར་བཅུ་སྟེ། དེའི་དང་པོ་སྤྱིར་གསང་བཞི་ནི། དེ་ལས། ལྟ་ཟབ་སྤྱོད་པ་བརླང་པོ་དང་། །ལྷ་མིང་གཟུངས་དང་གྲུབ་རྟགས་རྣམས། །སྤྱིར་གསང་རྣམ་པ་བཞི་ཡིན་ནོ། །ཞེས་པ་སྟེ། ལྟ་བ་ཟབ་མོ་ཆོས་ཉིད་དོན་དམ་པའི་གནས་ལུགས་དང་། སྤྱོད་པ་ནི་བརླང་སྤྱོད་ཏེ། དེ་ཡང་འཇིག་རྟེན་ན་སྤྱད་བྱར་མ་གྱུར་པ་ཞིག་ལ་སྤྱོད་པ་དེ་ལ་བརླང་པོ་ཞེས་བྱ་ཞིང་། དེ་ཇི་ལྟར་ན་ཏ་ན་ག་ན་སྟེ་སྦྱོར་དང་སྒྲོལ་བ་གཉིས་ཡིན་ལ་དེ་སྤྱད་པའི་ནུས་པ་རྙེད་ཀྱང་གསང་སྟེ་སྤྱོད་དགོས་པ་དང་། ལྷ་མིང་ནི་རང་ཉིད་ཡི་དམ་ལྷག་པའི་ལྷ་ལ་གང་བྱེད་པ་དེའི་མཚན་དང་། དེའི་གཟུངས་སྔགས་དང་། དེ་གྲུབ་པའི་རྟག་མཚན་རྣམས་སོ། །དེ་ཡང་དགོངས་དོན་ཁྱད་པར་ཅན་མཐོང་ན་མ་གཏོགས་སྤྱིར་ནམ་ཡང་གསང་དགོས་པས་ན་སྤྱིར་གསང་ཞེས་བྱའོ། །བར་གསང་བཞི་ནི་དེ་ལས། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་པས། གང་དུ་བསྒྲུབ་པའི་གནས། ནམ་གྱི་ཚེ་བསྒྲུབ་པའི་དུས། བརྟེན་པར་འོས་པའི་གྲོགས། ཇི་ལྟར་མཁོ་བའི་སྒྲུབ་རྫས་རྣམས་བསྒྲུབ་པ་ནམ་གྲོལ་དང་། གསང་བའི་སྤྱོད་པ་ལ་ཞུགས་པའི་བར་དེ་སྲིད་དུ་སྐབས་དོན་དཔག་པའི་སྒོ་ནས་གསང་དགོས་པའི་དོན་གྱིས་ན་བར་གསང་ཞེས་བྱའོ། །གསང་བར་འོས་པ་ནི། ཕུད་དང་གཏོར་མ་སོགས་གསང་སྔགས་ཀྱི་ཐུན་མོང་མ་ཡིན་པ་དམ་རྫས་ཀྱི་ཡོ་བྱད་དང་། བླ་མའི་མཛད་སྤྱོད་གདུལ་བྱ་མ་དག་པའི་བློ་མི་ཤོངས་པ་རྣམས་དང་། མཆེད་ཀྱི་ངན་སྤྱོད་སོགས་མཐོང་ཐོས་སུ་མི་རུང་བ་རྣམས་སོ། །གཉེར་གཏད་པ་ནི། བླ་མ་དང་མཆེད་ལྕམ་གྱི་འདི་ཉིད་གཞན་ལ་མ་སྟོན་ནམ་མ་སྨྲ་ཞེས་གསང་ཚིག་གི་གཉེར་གཏད་པ་རྣམས་ཏེ། སྔ་མ་ལས། གསང་བར་འོས་པའི་དམ་ཚིག་ནི། །ཕུང་དང་གཏོར་མ་ཚོགས་དག་དང་། །བྷནྡྷ་ཕུར་པ་མར་མེའི་སྣོད། །རྫས་དང་ལག་ཆ་དཀྱིལ་འཁོར་རྣམས། །སྐྱེ་བོས་མཐོང་བས་ཡོངས་མི་བྱ། །དྲིལ་བུ་རྔ་ཆུང་ལ་སོགས་སྒྲ། །སྐྱེ་བོས་ཐོས་པར་ཡོངས་མི་རུང་། །གྲོགས་ཀྱི་སྐྱོན་དང་མཚངས་རྣམས་དང་། །སེམས་ཅན་ཀུན་གྱིས་ངན་སྤྱོད་ཀྱི། །ཀུན་ལ་གནོད་པའི་སྤྱོད་པ་རྣམས། །ཤིན་ཏུ་གསང་ན་བྱང་ཆུབ་རྒྱུ། །གཉེར་གཏད་པ་ནི་གདམས་པ་སྟེ། །སྔར་བཤད་སློབ་དཔོན་མཆེད་ཀྱི་སོ། །ཞེས་དང་། ཞི་རྒྱུད་ལས། གཞན་ཡང་སློབ་དཔོན་མཆེད་ལྕམ་གྱིས། །གསང་བར་བསྒྲགས་དང་གནས་སྐབས་སུ། །དེ་ལྟར་འོས་པ་ཤིན་ཏུ་གསང་། །ཞེས་སོ། །དེ་ཉིད་གསང་བའི་ཡུལ་ནི། ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་དང་། རྔམ་གློག་ལས། སྣོད་མ་ཡིན་པའི་གང་ཟག་ལ། །དུས་དང་གནས་སྐབས་ཀུན་ཏུ་གསང་། །སྣོད་དང་ལྡན་པ་རྣམས་ལ་ཡང་། །དབང་མ་ཐོབ་པར་བཤད་པ་མིན། །ཞེས་པ་སྟེ། ལྟ་སྤྱོད་ནི་ཉན་ཐོས་སོགས་ཐེག་པ་འོག་མ་པ་རྣམས་དང་སོ་སོའི་སྐྱེ་བོ་ལོག་སྲིད་ཅན་སོགས་སྣོད་མ་སྨིན་པའི་གང་ཟག་རྣམས་ལ་སྟེ། དེ་དག་གི་བློར་མི་ཤོང་ཞིང་ལོག་རྟོག་གི་སྐྱོན་འཕེལ་བའི་ཕྱིར་རོ། །ལྷ་མིང་གཟུངས་སྔགས་གྲུབ་རྟགས་སོགས་ངོམ་ཆོས་འཕྱར་གཡེམས་ཀྱི་སྨྲ་བར་མི་བྱ་སྟེ། གསང་སྒྲོག་གི་ཉེས་པས་འདོད་འབྲས་ལས་རིང་ཞིང་ངན་སོང་གི་རྒྱུ་འགྲུབ་པའི་ཕྱིར་བླ་མ་དང་དམ་གཙང་གི་མཆེད་མ་གཏོགས་གཞན་ལ་མི་སྨྲ་བའོ། །དེ་ཡང་མ་འདྲེས་པ་ལ་བསྟན་ནས་དམ་ཚིག་ཉམས་ལ། འདྲེས་པ་ལའང་རང་གར་བསྟན་ན་དངོས་གྲུབ་ཉམས་པའི་དོན་གྱིས་ཤིན་ཏུ་གསང་དགོས་ཏེ། གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་བརྡ་དག་སྣ་ཚོགས་གསུངས། །ཞེས་སོ། །ཇི་ལྟར་གསང་ན། ཕྲ་རྒྱས་ལས། སེམས་ཀྱི་བསྟན་པར་མི་བསམ་ཞིང་། །ལུས་ཀྱི་ཐམས་ཅད་སྦས་ལ་སྤྱད། །ངག་གི་རྡོ་རྗེའི་ལྕེ་ཡོད་ཀྱང་། །བརྗོད་པར་བྱ་བ་མ་ཡིན་ནོ། །ཞེས་ཡུལ་དུས་ཀྱི་དམིག་ཕྱེད་པས་གསང་ཚུལ་ཤིིན་ཏུ་དམ་པར་བྱའོ། །འདི་ནི་རྩ་བ་ལྔ་རྣམས་ཏེ། ཞེས་པས་ལྔ་པོ་འདི་ནི་རྩ་བའི་དམ་ཚིག་ཅེས་བྱ་སྟེ། དཔེར་ན་ལྗོན་ཤིང་གི་རྩ་བ་རུལ་ན་ཡལ་ག་ལོ་མ་སོགས་ཡན་ལག་གཞན་རྣམས་ཡོད་ཀྱང་སྙིང་པོ་སྟོང་པས་ཕན་མི་ཐོག་པ་བཞིན་རྩ་བ་འདི་ལྔ་གང་རུང་དང་འགལ་ཕྱིན་ཆད་སོ་བྱང་སྔགས་ཀྱི་བསྲུང་བྱ་ཕྲ་མོ་གཞན་རྣམས་མ་ཉམས་ཀྱང་འདོད་འབྲས་འགྲུབ་པ་ལྟ་ཞོག །ངན་སོང་གི་གནས་མཐར་ཐུག་ལ་འགོད་པའི་ཕྱིར་ཏེ་དེ་སྐད་བྱ་སྟེ། ཁོ་བོའི་བླ་མ་རྡོ་རྗེ་འཆང་ཆེན་པོས་བླ་སྒྲུབ་ཏུ། རྩ་བའི་དམ་ཚིག་སྡོང་པོ་མེ་འབྲས་འདྲ། དེ་ཉམས་ཐར་པའི་ས་བོན་ངེས་པར་ཚིག །ཅེས་གསུངས་སོ། །བསྒྲུབ་དང་བསྲུང་བའི་དམ་ཚིག་མཆོག །ཅེས་པ་འདི་ལ་བཞེད་ཚུལ་མི་མཐུན་པ་གཉིས་ཏེ། རོང་ཟོམ་པ་ཆེན་པོ་དང་ཟུར་ལུགས་ཀྱི་བཀའ་སྲོལ་འཆད་པ་པོ་རྣམས། བླ་མེད་མི་སྤོང་བ་དང་སྔགས་རྒྱ་རྒྱུན་མི་བཅད་པ་གཉིས་ཡོན་ཏན་ཁྱད་པར་ཅན་བསྒྲུབ་པའི་དམ་ཚིག་དང་། བླ་མ་བཀུར་ཞིང་མཆེད་ལ་བྱམས་པ་གཉིས་ཐུགས་འགལ་བསྲུང་བ་དང་། གསང་སྒྲོག་དེའི་གྲོགས་སུ་སྲུངས་བྱ་གཙོ་ཆེ་བས་བསྲུང་བའི་དམ་ཚིག་ཏུ་བཞེད། ཀུན་མཁྱེན་ཆེན་པོས་ནི། ལྷ་མི་སྤང་བ་དང་། དངོས་གྲུབ་ཀྱི་འབྱུང་གནས་བླ་མ་བཀུར་བ། སྔགས་རྒྱ་རྒྱུན་མི་བཅད་པ་ནི་ཡོན་ཏན་ཁྱད་པར་ཅན་སྒྲུབ་པའི་དམ་ཚིག་ཡིན་ལ། དེའི་ཡན་ལག་ཏུ་ཡང་དག་པའི་ལམ་དུ་ཞུགས་པ་དང་མཆེད་ལྕམ་ལ་བྱམས་པ་ནི་བླ་མའི་ཐུགས་འགལ་བསྲུང་ཞིང་། གསང་བ་གཞན་ལ་མི་སྨྲ་བ་ལྷ་དང་སྔགས་དང་ཕྱག་རྒྱའི་དེ་ཉིད་དང་འགལ་བ་བསྲུང་བ་སྟེ་བསྲུང་བའི་དམ་ཚིག་ཏུ་བཞེད་ཅིང་། མཉམ་སྦྱོར་ལས། སྒྲུབ་པའི་དམ་ཚིག་ཆེན་པོ་ནི། །ལྷ་དང་བླ་མ་མི་སྤང་ཞིང་། །སྔགས་དང་ཕྱག་རྒྱ་རྒྱུན་མི་བཅད། །ཅེས་འདྲེན་པར་མཛོད་ཅིང་གང་ལྟར་ལྔ་པོ་དམ་ཚིག་ཀུན་གྱི་མཆོག་ཏུ་གསང་སྔགས་པའོ། །དེ་དག་སྐུ་གསུང་ཐུགས་ཀྱི་དམ་ཚིག །གསུམ་གསུམ་དུ་གྱུར་ཏེ་དཔེར་ན་བླ་མེད་མི་སྤང་བ་ལྟ་བུའི་འང་ལུས་ཀྱིས་བཀུར། ངག་གིས་བསྟོད། ཡིད་ཀྱིས་གུས་པར་བྱ་བ་དང་། ཚུལ་དེས་བླ་མ་དང་མཆེད་ལའང་སྒོ་གསུམ་གུས་པ་དང་། སྔགས་རྒྱའི་དམ་ཚིག་ཡང་སྒོ་གསུམ་ཚང་བ་དང་། གསང་བ་ཡང་སྒོ་གསུམ་གྱི་བྱ་བས་གསང་ཞིང་སྦེད་པ་སོགས་ཀུན་ལས་རིགས་འགྲེ་བའི་ཕྱིར་རོ། །དམིགས་བསལ་གྱི་ཕྱེ་ན། བླ་མ་དང་མཆེད་ལ་བསྲུང་བ་ནི་ཕན་འདོགས་ཞིང་གནོད་པ་སྤང་བའི་གཞིའི་གཙོ་བོ་ལུས་ཡིན་པས་སྐུའི་དམ་ཚིག་སྟེ། ཞི་རྒྱུད་ལས། བླ་མ་ཉིད་དང་ལྷན་གྲོགས་ལ། །ལུས་ངག་ཡིད་ཀྱི་བཀུར་བ་ནི། །རྡོ་རྗེ་སྐུ་ཡི་དམ་ཚིག་གོ། །ཞེས་སོ། །སྔགས་རྒྱ་རྒྱུན་མི་བཅད་པ་ནི་བཟླས་བརྗོད་ཀྱི་ཡན་ལག་ཏུ་གཏོགས་པས་ངག་གཙོ་བོར་ཡིན་པའི་ཕྱིར་གསུང་གི་དམ་ཚིག་སྟེ། དེ་ལས། རང་གི་ཡིད་དམ་ལྷ་མཆོག་གི། །སྔགས་དང་ཕྱག་རྒྱ་རབ་འཛིན་པས། །དུས་ཀུན་ཏུ་ནི་རྒྱུན་མི་གཅོད། །རྡོ་རྗེ་གསུང་གི་དམ་ཚིག་ཡིན། །ཞེས་སོ། །གསང་བཅུ་ནི་ཟུར་པའི་བཤད་སྲོལ་འཛིན་པ་རྣམས་མི་སྨྲ་བ་ངག་ཡིན་ཀྱང་གང་གསང་བ་ནི་ཐུགས་ལ་གནས་པས་གཙོ་བོ་སེམས་ཀྱི་ཆོས་ཉིད་ཡིན་ཞེས་ཐུགས་སུ་བསྡུ་ནའང་། སྔ་མ་ལས། གསང་བར་བྱ་བ་འདི་རྣམས་ནི། །སྐུ་གསུང་ཐུགས་ཀྱི་དམ་ཚིག་གོ། །ཞེས་གསུམ་ཀས་བསྡུས་པར་གསུངས་ཤིང་། བླ་མེད་མི་སྤང་བ་ནི་ཐུགས་ཀྱི་དམ་ཚིག་སྟེ། དེ་ལས། བྱང་ཆུབ་སེམས་གསུམ་བསྒོམ་པ་ནི། །རྡོ་རྗེ་ཐུགས་ཀྱི་དམ་ཚིག་གོ། །ཞེས་གསུངས་སོ། །འདི་ལ་ཀུན་མཁྱེན་ཆོས་རྗེས། ཁ་ཅིག་བླ་མ་དང་མཆེད་ལྕམ་ལ་གུས་པ་ནི་གཞི་མ་ལུས་ཀྱི་བྱ་བ་ཡིན་པས་སྐུའི་དམ་ཚིག །ལྷ་མི་སྤང་ཞིང་སྔགས་དང་ཕྱག་རྒྱ་རྒྱུན་མི་བཅད་པ་ནི་བཟླས་བརྗོད་ཀྱི་ཡན་ལག་སྟེ་གསུང་གི་དམ་ཚིག །གསང་བ་མི་སྨྲ་བ་ནི་ཡིད་ལ་གནག་པར་བྱ་བ་སྟེ་ཐུགས་ཀྱི་དམ་ཚིག་གོ་ཟེར་བ་དེ་ཡང་རིག་མ་མཐོང་སྟེ་འདོན་པ་བསྒྱུར་ན་མཚུངས་པའི་ཕྱིར་རོ། །ཞེས་གསུངས་ཤིང་། ལོ་ཆེན་དྷརྨ་ཤྲིས། འདིར་བྱང་སེམས་དང་གསང་བ་མི་སྨྲ་བ་གཉིས་ཐུགས་ཀྱི་དམ་ཚིག་ཏུ་བསྡུས་ན་བདེ་སྟེ། རྩ་བའི་དམ་ཚིག་གསུམ་དུ་བསྡུ་བའི་སྐབས་ཡིན་པའི་ཕྱིར་རོ། །ཞེས་གསུངས་ལ། འདི་དང་མཐུན་པར་དྲི་མེད་རྒྱལ་པོ་བཤགས་པའི་རྒྱུད་ཀྱི་དམ་ཚིག་ཉི་ཤུ་རྩ་བརྒྱད་པའི་བཤགས་པའི་ལེའུ། གསང་བཅུ་ལ་སོགས་མན་ངག་རབ་སྟེར་དང་། ཞེས་ཐུགས་ཀྱི་དམ་ཚིག་ཏུ་བསྡུས་པར་བཤད་ཅིང་། ཁོ་བོ་ནི་གོང་དུ་གྲངས་པའི་བདེར་འདུས་ཞི་རྒྱུད་ཀྱི་ལུང་ལྟར་གསང་བཅུ་ནི་སྐུ་གསུང་ཐུགས་གསུམ་ཀས་བསྡུས་པ་ཉིད་འཐད་དམ་སྙམ། གཉིས་པ་ཡན་ལག་གི་དམ་ཚིག་བཅུ་བཤད་པ་ལ་གཉིས་ཏེ། མི་སྤང་བ་ལྔ་དང་། མི་དོར་བ་ལྔའོ། །དང་པོ་ནི། གསལ་བཀྲ་ལས། དེ་དག་དུག་ལྔ་ལོག་དུག་ལྔ། ཞེས་ཡང་ལོག་གཉིས་སུ་གསུངས་ཤིང་། དེ་ཡང་ལོག་པའི་དུག་ལྔ་ནི་དུག་ལྔ་རང་མཚན་པ་རྣམས་ཡིན་ལ། དེ་ཉིད་ཉན་ཐོས་ལུང་བཞིན་དགྲར་བལྟས་ཏེ་མི་སྤང་ཞིང་། ཅིའི་ཕྱིར་ཞེ་ན་ཆོས་ཐམས་ཅད་རང་གི་ངོ་བོ་སྟོང་པས་སྤང་བྱའི་རྫས་མ་གྲུབ་སྟེ། སྨིག་རྒྱུའི་ཆུ་ལ་རགས་མི་དགོས་པ་བཞིན་ནོ། །དེ་ཡང་ཇི་སྐད་དུ་རྡོ་རྗེ་ལས། ཉོན་མོངས་རྣམས་ནི་སྒྱུ་འདྲ་ངོ་བོས་སྟོང་། །རང་གི་མི་རྟག་རང་བཞིན་ཤེས་པས་གྲོལ། །ཞེས་སོ། །དེར་མ་ཟད་ཐབས་ཀྱིས་ཟིན་ན་སྤྱད་ཀྱང་མི་འཆིང་ཞིང་ལམ་གྱི་གྲོགས་སུ་འགྱུར་པས་ཡང་མི་སྤང་སྟེ། རྒྱ་མཚོ་ལས། ཉོན་མོངས་ལམ་ནི་དག་པ་ཆེ། །ཐབས་ཀྱི་འདོད་ཡོན་རྒྱན་གྱི་མཆོག །ཐམས་ཅད་ཐམས་ཅད་རོལ་བ་ཡིས། །མྱུར་དུ་ཧེ་རུ་ཀ་དཔལ་འགྱུར། །ཞེས་གསུངས་ཤིང་། ཚུལ་འདི་དང་མཐུན་པར་མདོ་སྡེ་ལས་ཀྱང་གསུངས་པ་ཡོད་དེ། དཀོན་བརྩེགས་ལས། ཇི་ལྟར་གྲོང་ཁྱེར་རྣམས་ཀྱི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་མི་གཙང་ལུད། །དེ་ནི་རྒྱལ་བའི་ཆོས་ཀྱི་ཞིང་ལ་ཕན། །ཞེས་དང་། ཐེག་བསྡུས་ལས། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་སོ། །རིགས་ལྔ་ཡེ་ཤེས་ལྔའི་རང་བཞིན་ཡིན་པས་ཀྱང་མ་སྤངས་ཏེ། དམ་ཚིག་ཉེར་བརྒྱད་པ་ལས། ཕྲག་དོག་ལ་སོགས་ཉོན་མོངས་རྣམས་ལྔ་ནི། །ཡེ་ནས་རིག་ལྔའི་རང་བཞིན་ཡིན་པའི་ཕྱིར། །ཞེས་དང་། ཐབས་ཞགས་ལས། གཏི་མུག་ཞེ་སྡང་ང་རྒྱལ་དང་། །འདོད་ཆགས་ཕྲག་དོག་ཆེན་པོ་ནི། །བསྲུང་བ་མེད་པའི་སྡོམ་པ་ཅན། །དེ་ནི་དམ་ཚིག་རྡོ་རྗེ་ཡིན། །ཞེས་པའི་འགྲེལ་པར་སློབ་དཔོན་ཆེན་པོ་པདྨས། གཏི་མུག་གི་རྣམ་པར་སྣང་མཛད་ཀྱི་དམ་ཚིག་སྟེ། ཅིའི་ཕྱིར་ཞེ་ན་མ་རིག་པ་ནི་སྤང་དུ་མེད། རིག་པ་ནི་སྒྲུབ་ཏུ་མེད་དེ། ཆོས་ཀྱི་དབྱིངས་སུ་རོ་གཅིག་པའི་ཕྱིར་རོ། །ཞེས་དང་། ཞི་རྒྱུད་ལས་ཀྱང་། རང་བཞིན་ཤེས་པས་མི་སྤང་སྟེ། །རང་རིག་ཡེ་ཤེས་ཉིད་ཡིན་ནོ། །ཞེས་སོ། །སྦས་དོན་དུ་ཡང་དག་དུག་ལྔ་ཞེས་བཤད་དེ། དེ་ཡང་ཆོས་ཐམས་ཅད་མཉམ་པ་ཉིད་དུ་རྫོགས་པས་ལྟ་བ་ལ་ཕྱོགས་རིས་དང་སྤྱོད་པ་ལ་བླང་དོར་གྱི་འབྱེད་པ་མེད་པའི་གཏི་མུག །དེ་ལྟར་མ་རྟོགས་པ་ལ་དམིགས་པ་མེད་པའི་སྙིང་རྗེ་ཆེན་པོ་ནས་རྗེས་སུ་ཆགས་པའི་འདོད་ཆགས། རང་རིག་པའི་ཡེ་ཤེས་ཀྱི་ལོག་རྟོག་འཇོམས་པའི་ཞེ་སྡང་། ཉམས་ཉིད་རྟོགས་པའི་ལྟ་བ་ཤོངས་སུ་མི་འབེབས་པའི་ང་རྒྱལ། གཉིས་འཛིན་གྱི་ལྟ་སྤྱོད་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་རྣམས་ཏེ། དེ་ཉིད་རྟོགས་གོམས་ཐབས་ཀྱི་བྱེད་རྩོལ་གྱིས་མི་སྤང་པའོ། །གཉིས་པ་མི་འདོར་བ་ལྔ་ནི། གསང་སྙིང་ལས། དཀར་རྩི་དམར་རྩི་དྲི་ཤ་ཆེན། དག་པའི་སྣོད་ཆུ་ནི་དྲི་ཆུ་སྟེ་ལྔ་པོ་ཡེ་ནས་བདུད་རྩི་ལྔའི་རང་བཞིན་་ཡིན་པས་ན་མི་དོར་ཏེ། ལེ་ལག་ལས། བདུད་རྩི་ཡེ་ནས་དག་པའི་ཆོས། །བླང་དོར་མེད་པ་ཀུན་ལས་འདས། །ཡེ་བསྲུང་ཆེན་པོའི་དམ་ཚིག་ཏུ། །མཁས་པས་དང་དུ་བླང་བར་བྱ། །ཞེས་སོ། །རིགས་ལྔ་ཡེ་ཤེས་ལྔའི་རང་བཞིན་ཡིན་པས་ཀྱང་མི་དོར་ཏེ། དེ་ཡང་བྱང་སེམས་ནི་རྡོ་རྗེ་རིགས། མེ་ལོང་ལྟ་བུའི་ཡེ་ཤེས། དྲི་ཆེན་དེ་བཞིན་གཤེགས་པའི་རིགས་ཆོས་དབྱིངས་ཡེ་ཤེས། ཤ་ཆེན་ནི་རིན་ཆེན་རིགས། མཉམ་ཉིད་ཡེ་ཤེས། རཀྟ་ནི་པདྨའི་རིགས། སོར་རྟོགས་ཡེ་ཤེས། དྲི་ཆུ་ནི་ལས་ཀྱི་རིགས། བྱ་གྲུབ་ཡེ་ཤེས་ཏེ། ཐལ་བ་ལས། བདུད་རྩི་ལྔ་ནི་རིགས་ལྔའི་དངོས། །དྲི་ཆེན་དྲི་ཆུ་བྱང་ཆུབ་སེམས། །ཞེས་སོ། །གཞན་ཡང་ནད་ལྔ་སེལ་ཞིང་རང་བཞིན་གྱི་མཐུ་ལྔ་ཡོད་པའི་ཕྱིར་ཡང་མི་སྤང་སྟེ། བྱང་སེམས་ཀྱི་ཚད་པའི་ནད་རྣམས་སེལ་ཞིང་མི་བརྗེད་པའི་གཟུངས་ཐོབ་པ་དང་། དེ་བཞིན་དུ་རཀྟས་གྲང་བའི་ནད་སེལ་བཀྲག་མདངས་གསལ་བ་དང་། དྲི་ཆུའི་དུག་ནད་སེལ་ཚེ་རིང་བ་དང་། །གཙང་རྨིའི་རྟོགས་པ་སྦྱངས་ཕྱིར་དང་། །ཐུན་མོང་དགོས་པ་ལྔ་ཕྱིར་དང་། །རིགས་ལྔ་འགྲུབ་པའི་ཡོན་ཏན་དང་། །སྡུག་བ སྔལ་ལས་གྲོལ་དངོས་གྲུབ་ཐོབ། །ཞེས་དང་། མཁའ་འགྲོ་མ་རྡོ་རྗེ་གུར་ལས། མི་བསྐྱོད་རྟེན་པའི་རྣལ་འབྱོར་པས། །ནད་ཀུན་རྣམས་པར་སྤང་བར་འ གྱུར། །རྟག་པ་ཡིས་ནི་མདངས་ཆེན་འགྱུར། །ཞེས་སོགས་གསུངས་སོ། །དངོས་གྲུབ་སྒྲུབ་པའི་རྫས་ཡིན་པས་ཀྱང་བླང་སྟེ། གསང་འདུས་ལས། ཤ་ཆེན་དམ་ཚིག་མཆོག་གིས་ནི། །རྡོ་རྗེ་གསུམ་མཆོག་བསྒྲུབ་པར་བྱ། །གཤང་གཅིའི་དམ་ཚིག་མཆོག་གིས་ནི། །རིག་པ་འཛིན་པའི་གཙོ་བོར་འགྱུར། །ཞེས་སོ། །དེ་དང་མཐུན་པར་ཤ་ལྔ་པོ་ཡང་བསྟེན་ན་མཁའ་འགྲོ་འདུ་ཞིང་དངོས་གྲུབ་ཉེ་བ་སོགས་ཀྱི་ཡོན་ཏན་ཁྱད་པར་དུ་མངའ་བ་སྟེ། དེ་ལས། གླང་པོའི་ཤ་ཡི་དམ་ཚིག་གིས་མངོན་ཤེས་ལྔ་དག་ཐོབ་པར་འགྱུར། རྟ་ཤ་དག་གི་དམ་ཚིག་གིས། །མི་སྣང་བ་ཡི་བདག་པོར་འགྱུར། །ཁྱི་ཤ་དག་གིས་དམ་ཚིག་པ། །དངོས་གྲུབ་ཐམས་ཅད་འགྲུབ་པར་འགྱུར། །བ་ལང་ཤ་ཡི་དམ་ཚིག་གི། །རྡོ་རྗེ་འགུག་པའི་མཆོག་ཏུ་འགྱུར། །ཞེས་སོ་དང་། སྤྱི་མདོ་ལས། བ་གླང་ཁྱི་དང་རྟ་ཤ་དང་། །མི་ཤ་གླང་ཆེན་ཤ་ལ་སོགས། །ཟོས་ན་ཡོན་ཏན་ཐམས་ཅད་འགྲུབ། །བདག་ཅག་རྣམས་ཀྱི་དམ་ཚིག་ལགས། །ཞེས་དང་། སྔོན་གྱི་རྒྱལ་བ་གྲངས་མེད་ཀྱང་། །བརྟུལ་ཞུགས་འདི་ལྔ་གཙོར་སྤྱད་ནས། །དམ་ཚིག་དམ་པ་བཟུང་བས་ན། །སྔོན་གྱི་དམ་ཚིག་ཡིན་པར་གྲགས་ཞེས་པས་བརྟུལ་ཞུགས་སྤྱོད་པའི་གྲོགས་སུ་གྱུར་པས་ཀྱང་དང་དུ་བླང་བར་བྱ་བ་ཡིན་ནོ། །དེ་དག་ལ་ཡན་ལག་གི་དམ་ཚིག་ཅེས་བྱ་སྟེ། རྩ་བའི་གྲོགས་སམ་ཐབས་སུ་གྱུར་བའི་ཡན་ལག་ཡིན་པའི་ཕྱིར་རོ། །སྔར་འགྱུར་བླ་མེད་ཀྱི་ཡང་རྩེ་མན་ངག་སྡེའི་དགོངས་དོན་ལྟར་ན། དམ་ཚིག་རྣམ་པར་བཀོད་པ་ལས། །འགྲོ་བའི་སྨིན་སོ་གསུམ་དག་ལས། །སྔགས་ཀྱི་དམ་ཚིག་གསུམ་དུ་བཤད། །དེ་ལ་ཁྱད་པར་ངེས་ཕྱེ་བ། །སྐུ་དང་གསུང་དང་ཐུགས་དག་ལས། །རེ་རེ་ལའང་དགུ་དགུ་སྟེ། །འཇུག་དང་ལས་ཀྱི་རྣམ་པས་ཤེས། །ཞེས་རྩ་བ་སྐུ་གསུང་ཐུགས་གསུམ་ལ་ཕྱི་ནང་གསང་གསུམ་དང་། དེ་རེ་རེ་ལའང་གསུམ་གསུམ་དུ་ཕྱེ་བས་ཉི་ཤུ་རྩ་བདུན་དུ་གསུངས་ཏེ། དེ་ཡང་དང་པོ་ལུས་ཀྱི་བསྲུང་བར་བྱ་བ་སྐུའི་དམ་ཚིག་ལ་ཕྱི་ནང་གསང་བ་གསུམ་ལས། དང་པོ་ཕྱིའི་ཕྱི་ནང་གསང་གསུམ་ནི། རིམ་པར་མ་བྱིན་ལེན། མི་ཚངས་སྤྱོད། སྲོག་གཅོད་གསུམ་སྤང་བ་སྟེ། རྡོ་རྗེ་སྙིང་པོ་ཁོང་བུ་བརྩེགས་པའི་རྒྱུད་ལས། སྐུ་ཡི་ཕྱི་ཡི་དམ་ཚིག་ལས། །རྣམ་པ་གསུམ་དུ་རབ་ཕྱེ་སྟེ། །མ་བྱིན་བླངས་པ་ཕྱི་ཡི་ཡང་། །སྐུ་ཡི་དམ་ཚིག་ཉམས་པར་འགྱུར། །དེ་ཡི་རྟགས་སུ་ཡན་ལག་ནི། །མི་བཟད་སྣ་ཚོགས་ལུས་ལ་འབྱུང་། །མི་ཚངས་སྤྱད་པ་ནང་ཡིན་ཏེ། །རྟགས་སུ་དབང་པོའི་ནད་རྣམས་སོ། །སྲོག་བཅད་པ་ནི་གསང་བ་སྟེ། །དེ་ཡི་རྟགས་སུ་དོན་སྣོད་ན། །རྣལ་འབྱོར་པ་ཡི་མྱོང་བའོ། །ཞེས་སོ། །ནང་གི་གསུམ་ནི། ཕ་མ་རྡོ་རྗེ་སྤུན་སྲིང་དང་རང་ལུས་ལ་སྨོད་པ། ཆོས་དང་གང་ཟག་ལ་སྨོད་པ། རང་ལུས་ལ་བརྡེག་འཚོག་དང་བཀའ་ཐུབ་ཀྱི་བརྙས་ཤིང་གདུང་བ་རྣམས་སྤང་བ་སྟེ། གསེར་གྱི་ཁང་བུ་བརྩེགས་པའི་རྒྱུད་ལས། ནང་གི་ཕྱི་ནི་སྤུན་དང་ཡང་། །གང་གི་ཕ་དང་མ་ཉིད་དང་། །རང་གི་ལུས་ལ་མི་སྨད་དོ། །ནང་གི་ནང་ཉིད་སྤྱི་ན་ཡང་། །ཐེག་པ་ཆེ་ཆུང་ཆོས་རྣམས་ལ། །འཇུག་པར་འདོད་དང་ཞུགས་པ་དང་། །ཞུགས་ཏེ་གཟུགས་བརྙན་འཛིན་པའི་ལུས། །རྨད་ཅིང་མཐོ་བཙམས་རྒྱན་སྨད་ན། །སངས་རྒྱས་སྐུ་ནི་བརྒྱ་ཕྲག་བསླུས། །ནང་གི་གསང་བ་རང་གི་ལུས། །ལྷ་ཡི་དཀྱིལ་འཁོར་ཡིན་པའི་ཕྱིར། །སྨད་དང་ཟས་ལ་དུག་འདྲེས་ཟོས། །གལ་ཏེ་མཚོན་གྱིས་བཏབ་ན་ཡང་། །ཟག་པའི་ལམ་མེད་ལུས་བརྒྱ་བླངས། །དེ་འོག་ཚ་བའི་དམྱལ་བ་མྱོང་། །ཞེས་སོ། །གསང་བའི་གསུམ་ནི། རྡོ་རྗེ་སྤུན་སྲིང་གི་ལུས་ལ་བརྡེག་པར་གཟས་ཤིང་རྒྱན་ལ་སྨོད་པ། རྡོ་རྗེ་མཆེད་ལྕམ་ལ་བརྡེག་པ་དང་བླ་མའི་ཡུམ་ལ་གཅེས་པ། བླ་མའི་གྲིབ་མར་འགོངས་པ་དང་སྤྱན་སྔར་ལུས་ངག་གི་སྤྱོད་པ་བག་མེད་རྣམས་སྤང་བ་སྟེ། དཔལ་ཉི་ཟླ་བརྩེགས་པའི་རྒྱུད་ལས། རྡོ་རྗེ་སྤུན་ནམ་སྲིང་མོ་ཡི། །ལུས་ཀྱི་རྒྱན་ལ་དཔྱས་པ་དང་། །མཐོ་བཙམས་ལག་གིས་བརྡེག་པའི་ཚུལ། །གལ་ཏེ་གཞན་གྱི་བྱེད་བཅུད་ན། །འདི་ཡང་མནར་མེད་རྒྱུད་འཕེལ་འགྱུར། །ནང་གི་ཤིན་ཏུ་འདྲེས་པའི་མཆེད། །ཀུ་རེ་རྩེད་མོའི་ཚུལ་ཙམ་དུའང་། །བརྡེག་གམ་བརྡེག་པར་བཙམས་པའམ། །རྨི་ལམ་ནའང་ཡུམ་ལ་བཙེས། །དེ་མ་ཐག་ཏུ་མ་བཤགས་ན། །འདི་ཡང་སྔར་དང་སྡིག་མཉམ་མོ། །གསང་བའི་གསང་བ་བླ་མ་ཡི། །སྐུ་ཡི་གྲིབ་མར་མི་འགོང་ལ། །བླ་མའི་སྤྱན་ལམ་དག་ཏུ་ཡང་། །མཚོན་ཆ་བཟུང་བར་མི་བྱའོ། །རྐང་ལག་བརྐྱང་དང་ཉལ་མི་བྱ། །སྐྱིལ་ཀྲུང་འདུག་དང་རྒྱབ་མི་བསྟན། །ལྷམ་དང་སྟན་དང་བཞོན་པ་དང་། །གདུག་སོགས་སྒེག་པའི་རྒྱན་རྣམས་སྤང་། །བླ་མའི་གཟིམས་ཁང་དག་ལ་ཡང་། །ལག་པས་མཚོན་ནམ་རྡོ་དག་གི། །བཅོམ་པར་བྱ་བ་མ་ཡིན་ནོ། །དེ་དག་ལས་ནི་འབུམ་འགྱུར་དུ། །བླ་མའི་གནས་ཁང་བཤིག་པ་དང་། །སྐུ་ལ་བཙམས་པའི་སྡིག་བྱས་པས། །འདི་ཡི་སྡིག་པ་ཕ་མཐའ་ཡས། །གལ་ཏེ་བླ་མར་བག་མེད་པས། །མ་དཔྱད་བསྡོངས་ནའང་ཕ་མཐའ་ཡས། །མཆོག་ཏུ་སྐུ་ལ་བརྙས་བྱས་ན། །འདི་ཡི་རྣམ་སྨིན་བརྗོད་མི་ལོང་། །ཞེས་སོ། །གཉིས་པ་གསུང་གི་དམ་ཚིག་ཡང་ཕྱི་ནང་གསང་བ་གསུམ་ལས། ཕྱིའི་གསུམ་ནི། བརྫུན་ཚིག །ཕྲ་མ། གཞན་གྱི་ཞོར་འདེབས་ཀྱི་ཚིག་སྨྲ་བ་རྣམས་སྤང་བ་སྟེ། འཁོར་རྣམ་པར་བརྩེགས་པའི་རྒྱུད་ལས། སྔགས་ཀྱི་མོས་པ་སྤྱོད་པ་ཡིས། །འགྲོ་བ་ཕལ་པ་དག་ལ་ཡང་། །བརྫུན་པའི་ཚིག་ནི་རང་འདོད་ཀྱི། །སྨྲ་ལ་རྟག་ཏུ་དགའ་བ་ལ། །སྔགས་བཟླས་ནུས་པ་མི་འབྱུང་ཞིང་། །གཞན་ལ་སྨྲས་པ་བཙུན་པ་མིན། །རང་གི་ངག་ཉིད་ཉམས་པ་ཡིས། །འགྲོ་བ་གཞན་གྱི་ལྕེ་འབབ་འགྱུར། །མ་འོངས་དུས་ན་མེ་ཤའི་ལུས། །བྱང་གི་ཕྱོགས་སུ་མྱོང་བར་འགྱུར། །དེ་འོག་ངན་སོང་སྡུག་བསྔལ་ཡང་། །རྣམ་པ་སྣ་ཚོགས་མྱོང་བར་འགྱུར། །ཞེས་དང་། སྔགས་ལ་ཞུགས་པའི་གང་ཟག་གང་། །གཞན་གཉིས་དབྱེར་འཇུག་ཕྲ་མ་སྒྲ། །ཆོས་སྨྲས་འཁོར་རྣམས་མི་འདུ་དང་། །ཅི་བྱས་ལོག་པར་འགྱུར་བ་དང་། །མ་དཔྱད་པ་རྣམས་དགྲ་འགྱུར་དང་། །ལུས་ལ་མཚོན་གྱིས་འདེབས་པ་དང་། །ཤི་འཕོས་ནས་ནི་སྡེར་ཅན་ལུས། །དེ་ནས་ངན་སོང་རིམ་གྱིས་མྱོང་། །ཞེས་དང་། རྟག་ཏུ་ཞེ་གཅོད་ཚིག་སྨྲ་བ། །སྔ་མའི་ལས་དང་ཕྱི་མའི་རྟགས། །འགྲོ་བ་བྱམས་བྲལ་བཤེས་ཀྱང་ལྡང་། །ཆོས་ཀྱི་ཚིག་ཀྱང་འཆོལ་བར་འགྱུར། །ཤི་འཕོས་རབ་ཏུ་དྲེགས་པའི་ལུས། །དེ་ནས་ངན་སོང་གསུམ་དུ་འཁོར། །ཞེས་སོ། །ནང་གི་གསུམ་ནི། ཆོས་ཀྱི་ཚིག་སྨྲ་བ། དོན་ཡིད་ལ་བསམ་པ། གནས་ལུགས་སྒོམ་པར་བྱེད་པ་རྣམས་ལ་གཤེ་སྐུར་འདེབས་པ་རྣམ་སྤང་བ་སྟེ། དམ་ཚིག་རྣམ་པར་བཀོད་པའི་རྒྱུད་ལས། །སྔགས་པ་སྡོམ་ལ་གནས་པ་ཡིས། །ཆོས་སྨྲ་རྣམས་དང་ཆོས་སྒྲུབ་དང་། །ཆོས་ནི་བསྒོམ་པའི་གང་ཟག་ལ། །སྒྲོ་ཞིང་བསྐུར་པ་བཏབ་པ་དང་། །གཤེ་ཞིང་སྨོད་པའི་ཚིག་སྨྲས་ན། །གཞན་གྱི་མོས་པ་ཉམས་པ་དང་། །རང་གི་བདོག་པ་ཉམས་པ་དང་། །རང་གི་ཆོས་རྣམས་བརྗོད་ངས་ཏེ། །ཡིད་དཔྱོད་འདྲ་མིན་འཆོལ་བར་འགྱུར། །ངན་སོང་སྡུག་བསྔལ་ཚད་མེད་མྱོང་། །ཞེས་སོ། །གསང་བའི་གསུམ་ནི། རྡོ་རྗེ་སྤུན་སྲིང་གི་ཚིག །བླ་མའི་ཕྱག་རྒྱ་དང་ཉེ་འཁོར་གྱི་ཚིག །བླ་མའི་གསུང་རྣམས་ལ་བརྙས་ཤིང་གཅོག་པ་སོགས་སྤང་བ་སྟེ། ཕྱག་རྒྱ་གཉིས་སྦྱོར་གྱི་རྒྱུད་ལས། རྡོ་རྗེའི་མཆེད་དང་ལྕམ་དྲལ་ལ། །ཚིག་གིས་སྨྲས་དང་ངག་བཅག་ན། །བསྐལ་པ་བརྒྱ་ཕྲག་བྱེ་བར་ནི། །ཁྱད་པར་ངན་སོང་གསུམ་པོ་ཡི། །སྡུག་བསྔལ་མི་བཟད་དྲག་པོ་ཉིད། །གང་ཟག་དེ་ཡིས་མྱོང་བར་འགྱུར། །སྔ་མར་བྱས་དང་ད་ལྟའི་རྟགས། །རིམ་པར་མྱོང་བར་འགྱུར་བ་ནི། །སྔ་མར་བྱས་པ་ཚེ་འདི་ལ། །བར་ནས་ཐ་མར་མྱོང་བ་ལ། །ཡང་སྔ་ཚེ་སྟོད་ལ་བྱས་ཏེ། །སྐྱེས་མ་ཐག་ཏུ་མྱོང་བར་འགྱུར། །འདི་ལ་བྱས་པའི་ལས་མཐའ་ནི། །ཚེ་ཡི་ཞབས་ལ་ངག་གི་ལས། །འཁོར་དང་གཞན་གྱིས་ལྕེ་འབབ་དང་། །གློ་བུར་དག་ཏུ་སྨྲ་རྒྱུན་འགག །བླ་མའི་བུ་དང་ཆུང་མ་དང་། །གང་དག་ཉེ་གནས་དག་ཀྱང་རུང་། །བཀའ་ལས་འདས་ཤིང་ངག་བཅག་ན། །སྔ་མ་ལས་ནི་ཉིས་འགྱུར་རོ། །ཡང་ན་བླ་མའི་བྱེ་བྲག་གིས། །རྩ་བ་དང་ནི་ཡན་ལག་གི། །ངག་འདས་ངག་ཏུ་སྨྲས་པ་དང་། །སྒྲོ་སྐུར་འདོད་ཚིག་སྨྲས་བྱས་ན། །སྔ་མ་ལས་ནི་སྟོང་ཕྲག་འགྱུར། །རྣམ་པར་སྨིན་པ་མི་བཟད་པ། །རིམ་པས་བླ་མའི་ཁྱད་ཀྱིས་ཡང་། །དེ་མ་ཐག་ཏུ་མྱོང་བར་འགྱུར། །ཞེས་སོ། །གསུམ་པ་ཐུགས་ཀྱི་དམ་ཚིག་ལའང་ཕྱི་ནང་གསང་གསུམ་ལས། ཕྱིའི་གསུམ་ནི། གནོད་སེམས་བརྣབ་སེམས་ལོག་ལྟ་གསུམ་སྤང་བ་སྟེ། སྙིང་པོའི་དོན་རྣམས་པར་ལེན་པའི་རྒྱུད་ལས། གང་དག་སྔགས་པ་རྡོ་རྗེ་འཛིན། །སེམས་ཅན་གཞན་ནམ་རང་ཡང་རུང་། །གནོད་པར་བྱ་བའི་ལས་འཆད་ན། །འདི་ནི་དུ་བ་ཅན་ཀྱི་ལུས། །གྲང་བའི་རེག་པར་ལྡན་པ་ཡི། །ལུས་ནི་སྟོང་ཕྲག་ལྔ་བླང་ནས། །གྲང་བའི་དམྱལ་བར་ངེས་པར་སྐྱེ། །ཞེས་དང་། གནམ་ལྕགས་མེ་ལྟར་འབར་བའི་རྒྱུད་ལས། གལ་ཏེ་སེམས་ཅན་ཕལ་པ་ལ། །ཡུལ་དུར་གནོད་པའི་སེམས་སྐྱེད་ནས། །འགྲོ་བ་ཐུན་མོང་ལུས་ཅན་ནི། །བརྒྱ་ཕྲག་གསུམ་གྱི་སྲོག་བཅད་པ། །འདི་ཡི་སྡིག་པའི་ཆ་དང་མཉམ། །གལ་ཏེ་བརྟན་པའི་རྟགས་འཛིན་པའི། །གཟུགས་ཅན་རྣམས་ལ་ལོག་འགྱུར་རོ། །སྔགས་ལ་ཞུགས་པས་བརྒྱ་ཕྲག་འགྱུར། །རྡོ་རྗེའི་སྤུན་སྲིང་བདུན་ཕྲག་གོ། །བརྒྱུད་པའི་བླ་མ་བརྒྱ་ཕྲག་གོ། །རྩ་བའི་བླ་མ་འབུམ་ཕྲག་འགྱུར། །ཞེས་དང་། བཀོད་པ་ཆེན་པོ་ལས། རང་ངམ་གཞན་གྱི་གྲུབ་མཐའ་ཡི། །ཆོས་ལ་སྨོད་པ་ལོག་པའི་ལམ། །རྩ་བའི་དམ་ཚིག་ལས་འདས་ན། །ས་སྤྱོད་མེ་ཡི་སྡུག་བསྔལ་ལས། །ཡུན་རིང་བར་དུ་གནས་པར་འགྱུར། །རང་ནི་གྲུབ་མཐའ་ལོག་ལྟ་སྐྱེས། །དམྱལ་བ་ཉིད་ལས་ཐར་སྐབས་མེད། །ཅེས་སོ། །ནང་གི་གསུམ་ནི། སྤྱོད་པ་ལོག་པ་བག་མེད། སྒོམ་པ་ལོག་པ་བྱིང་རྒོད་དང་གོལ་སྒྲིབ། ལྟ་བ་ལོག་པ་རྟག་ཆད་མཐར་འཛིན་རྣམས་སྤང་བ་སྟེ། ཤེལ་གྱི་ཁང་བུ་བརྩིགས་པའི་རྒྱུད་ལས། ལྟ་དང་སྒོམ་དང་སྤྱོད་པ་ལོག །འདི་ནི་ལམ་ལོག་ཆེན་པོ་སྟེ། །སེམས་ཅན་ཀུན་གྱི་སྡུག་བསྔལ་གང་། །འདི་ཡི་སེམས་ལ་སྨིན་པར་ངེས། །ཞེས་སོ། །གསང་བའི་གསུམ་ནི། ཉིན་ཞག་ཐུན་རེ་རེ་བཞིན་ལྟ་སྒོམ་སྤྱོད་གསུམ་ཡིད་ལ་མ་བྱས་པ། ཡི་དམ་གྱི་ལྷ་ཡིད་ལ་མ་བྱས་པ། བླ་མའི་རྣལ་འབྱོར་དང་མཆེད་ལྕམ་ལ་བརྩེ་གདུང་ཡིད་ལ་མ་བྱས་པ་སྤང་བ་སྟེ། པདྨ་ཀློང་ཡངས་ལས། སུ་ཡི་ཡིད་ཀྱི་ལས་འཆལ་ཏེ། །ཡིད་ལ་བྱ་བའི་ཆོས་རྣམས་ལས། །ཡིད་ལ་མ་བྱས་ཉམས་པ་དང་། །འདས་དང་ཞིག་པའི་ལས་ཀྱི་མཐའ། །མནར་མེད་སྡུག་བསྔལ་མྱོང་བའོ། །ཞེས་སོ། །གཞན་ཡང་ཡན་ལག་གི་དམ་ཚིག་ལྔ་ཚན་ལྔར་དབྱེ་བ་སོགས་མཐའ་ཡས་པ་ཞིག་ཡོད་ནའང་སྔར་བཤད་པ་རྣམས་སུ་དངོས་ཤུགས་གང་བྱུང་གི་སྒོ་ནས་འདུས་ཤིང་ཡི་གེའི་ལུས་སུ་ཆེ་བར་ཞིབ་པར་གཞན་དུ་རྟོག་པར་བྱའོ། །མདོར་བསྡུ་ན། གང་སྤྱོད་ན་སྔགས་སྡོམ་གཏོང་བའི་རིགས་དང་། མི་གཏོང་ནའང་ཡན་ལག་ཉམས་པར་བྱེད་པའི་རིགས་གཉིས་སུ་འདུས་ཤིང་དེ་ཡང་རང་སེམས་ལ་སྐྱོན་མེད་པར་གཙང་མར་བྱེད་པ་ནི་དམ་ཚིག་གཙོ་བོ་ཡིན་པས་དེ་ལ་བསླབ་སྟེ། དམ་ཚིག་བཀོད་པའི་རྒྱུད་ལས། དམ་ཚིག་དམ་ཚིག་ཅེས་བྱ་བ། །མདོར་ན་རང་སེམས་གཙང་མར་བསྲུང་། །འདི་ནི་དམ་ཚིག་རྨད་པོ་ཆེ། །སངས་རྒྱས་ཀུན་གྱིས་བསྟན་པར་མཛད། །ཅེས་གསུངས་ཤིང་ཚངས་པས་ཞུས་པའི་མདོ་ལས་ཀྱང་། སེམས་ཀྱི་སྐྱོན་རྣམས་རབ་ཤེས་ན། སེམས་ཡོད་སྐྱོན་རྣམས་མི་བརྟེན་ནོ། །སེམས་ལ་དྲན་པ་ལོད་གནས་ན། སྐྱོན་མེད་ཞི་བའི་གནས་ཐོབ་བོ། །ཞེས་དང་། སྤྱོད་འཇུག་ལས། སེམས་འདི་བསྲུང་བར་མ་བྱས་ན། །བསླབ་པ་སྲུང་བར་ཡང་མི་ནུས། །ཞེས་དང་། སེམས་བསྲུང་བརྟུལ་ཞུགས་མ་གཏོགས་པ། །བརྟུལ་ཞུགས་མང་པོས་ཅི་ཞིག་བྱ། །ཞེས་གསུངས་པའི་ཕྱིར་རོ། །གཞན་ཡང་། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །ཞེས་གསུངས་པ་བཞིན་རང་གི་ལུས་གཉུག་མའི་རྩ་རླུང་ཐིག་ལེའི་རང་བཞིན་ཡེ་ཤེས་དང་བཅས་པ་གདོད་ནས་སྐུ་གསུང་ཐུགས་དབྱེར་མེད་ཡེ་ཤེས་རྡོ་རྗེའི་བདག་ཉིད་དུ་བཞུགས་པ་གང་ཞིག་ཐོས་བསམ་སྒོམ་པའི་ཤེས་རབ་ཀྱི་སྒྲོ་འདོགས་ཆོད་ཅིང་མངོན་གྱུར་དུ་རྟོགས་པར་གྱུར་ན་དམ་ཚིག་ཐམས་ཅད་དེར་འདུ་བ་སྟེ། གནས་ལྔ་རིག་པ་པཎ་ཆེན་པདྨ་དབང་གི་རྒྱལ་པོས། མདོར་ན་རང་ལུས་རྡོ་རྗེ་གསུམ་ཤེས་ན། །སྔགས་ཀྱི་དམ་ཚིག་ས་ཡ་འབུམ་སྡེ་འདུས། །ཞེས་གསུངས་ཤིང་། གསང་སྙིང་ལས་ཀྱང་། དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་ཡིན། །ཞེས་དང་། ཀུན་བྱེད་ལས། ཀྱེ་ཀུན་བྱེད་རྒྱལ་པོ་ང་ཡི་དམ་ཚིག་ནི། སྐྱེ་མེད་ནམ་མཁའ་ལྟ་བུར་ཕྱོགས་འདས་པས། །བསྲུང་དང་མི་བསྲུང་གཉིས་སུ་མེད་པ་སྟེ། །ཀུན་བྱེད་རྒྱལ་པོའི་དམ་ཚིག་རྟོགས་པ་ཡིན། །ཞེས་སོ། །བཞི་པ་བསྲུང་ཚུལ་ནི། སྤྱིར་མདོ་སྔགས་ཐུན་མོང་ཉེས་ལྟུང་འབྱུང་བའི་སྒོ་བཞིར་བཤད་པ་སྟེ། དེ་ཡང་འདུལ་བ་བསྡུ་བ་ལས། ལྟུང་བའི་རྒྱུ་ཡང་རྣམ་བཞི་སྟེ། མི་ཤེས་པ་དང་བག་མེད་དང་། ཉོན་མོངས་མང་དང་མ་གུས་པའོ། །ཞེས་གསུངས་པ་ལྟར། སྤང་བླང་ལ་སློབ་པར་འདོད་ཀྱང་ལྟུང་བ་སོ་སོའི་བླང་དོར་གྱི་མཚམས་མི་ཤེས་པ་དང་། ཤེས་ཀྱང་བླ་མ་དང་ངེས་འདོམས་པའི་བསླབ་བྱའི་གནས་ལ་ཡིད་མི་བསྟོན་ཞིང་མ་གུས་པས་འཕྲོག་སྟེ་དེར་འཇུག་པར་མི་བྱེད་པ་དང་། སྤྱིར་མོས་གུས་ཀྱི་བློ་ཡོད་ཀྱང་ཉེས་དམིགས་ཀྱི་གནས་མ་མཐོང་པའམ་མཐོང་ནའང་དྲན་ཤེས་ཀྱི་གཉེན་པོ་མི་བརྟེན་པ་བག་མེད་ཀྱི་དབང་དུ་ཤོར་ནས་འཛེམས་བག་ལས་གཡེལ་བ་དང་། འཛེམ་བློ་ཅུང་ཟད་སྐྱེས་ཀྱང་དུག་གསུམ་ཤས་ཆེ་བས་སེམས་ཉོན་མོངས་པའི་དབང་དུ་ཐལ་བས་ཉོན་མོངས་མང་བ་སྟེ་བཞི་དང་། དེའི་སྟེང་དུ་བསྲུང་བྱའི་དོན་ཡིད་ལ་མི་འཇོག་པའི་བརྗེད་ངས་པ་དང་། བློ་རྨོངས་པས་དྲན་དུ་མེད་པའི་དྲན་པ་མི་གསལ་བ་གཉིས་བསྣན་པས་དམ་ཚིག་ཉམས་པའི་རྒྱུ་དྲུག་ཏུ་བཞེད་ཅིང་། མཁའ་འགྲོ་སྡོམ་པའི་རྒྱུད་ལས། མི་ཤེས་པ་དང་བག་མེད་དང་། ཉོན་མོངས་མང་དང་མ་གུས་པའོ། །ཞེས་གསུངས་པ་ལྟར་སྤང་བླང་ལ་སློབ་པར་འདོད་ཀྱང་ལྟུང་བ་སོ་སོའི་བླང་དོར་གྱི་མཚམས་མི་ཤེས་པ་དང་། ཤེས་ཀྱང་བླ་མ་དང་དེས་འདོམས་པའི་བསླབ་བྱའི་གནས་ལ་ཡིད་མི་སྟོན་ཞིང་མ་གུས་པས་འཕྲོག་སྟེ་དེར་འཇུག་པར་མི་བྱེད་པ་དང་། སྤྱིར་མོས་གུས་ཀྱི་བློ་ཡོད་ཀྱང་ཉེས་དམིགས་ཀྱི་གནས་མ་མཐོང་བའམ་མཐོང་ནའང་དྲེན་ཤེས་ཀྱི་གཉེན་པོ་མི་བརྟེན་པར་བག་མེད་ཀྱི་དབང་དུ་ཤོར་ནས་འཛེམས་བག་ལས་གཡེལ་བ་དང་། འཛེམ་བློ་ཅུང་ཟད་སྐྱེས་ཀྱང་དུག་གསུམ་ཤེས་ཆེ་བས་སེམས་ཉོན་མོངས་མང་པའི་དབང་ཐལ་བས་ཉོན་མོངས་མང་བ་སྟེ་བཞི་དང་། དེའི་སྟེང་དུ་བསྲུང་བྱའི་དོན་ཡིད་ལ་མི་འཇོག་པའི་བརྗེད་ངས་པ་དང་། བློ་རྨོངས་པས་དྲན་དུ་མེད་པའི་དྲན་པ་མི་གསལ་བ་གཉིས་བསྣན་པས་དམ་ཚིག་ཉམས་པའི་རྒྱུ་དྲུག་ཏུ་བཞེད་ཅིང་མཁའ་འགྲོ་སྡོམ་པའི་རྒྱུད་ལས། མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་དང་། །བརྗེད་ངས་དྲན་པ་མི་གསལ་བ། །འདི་དྲུག་དམ་ཚིག་ཉམས་པའི་རྒྱུ། །ཞེས་པ་སྟེ། དེ་ལྟར་ལྟུང་བ་འབྱུང་པ་སྒོ་དེ་དང་དེ་ལ་ལྟོས་པའི་གཉེན་པོ་བརྟེན་པས་བསྲུང་བར་བྱ་དགོས་ཤིང་། དེ་ཡང་ལྟུང་བའི་འཚམས་སྤང་ལེན་མི་ཤེས་པའི་གཉེན་པོར་བསླབ་བྱ་རྣམས་ལེགས་པར་བསླབ་པས་བླང་དོར་ཤེས་པར་བྱ་བ་དང་། མ་གུས་པའི་གཉེན་པོར་བླ་མ་དང་དེས་འདོམས་ཤིང་གཞུང་ལུགས་ལས་སྟོན་པའི་བསླབ་བྱ་ཐ་དག་ལ་བློས་བརྟག་ཅིང་གཞིག་ཏེ་ཕན་ཡོན་ལ་བྲོད་པ་སོགས་ཀྱིས་གུས་པ་བསྐྱེད་པ་དང་། བག་མེད་ཀྱི་གཉེན་པོར་དགྲ་ཉེན་ཆེ་སར་ཟོན་བྱེད་པ་བཞིན་ཉེས་དམིགས་ལ་འཇིགས་པའི་སྒོ་ནས་སེམས་བསྒྲིམ་སྟེ་རྟག་ཏུ་བག་ཡོད་པར་བྱ་བ་དང་། ཉོན་མོངས་ཀྱི་གཉེན་པོར་བཟོད་པ་བསྒོམ་པ་སོགས་ཐང་སྐྱེས་དེའི་གཉེན་པོ་དེ་དག་དེ་བརྟེན་པ་སོགས་ཀྱི་སྦྱངས་ཤིང་ཀུན་ཀྱང་གཞི་མེད་རྩ་བྲལ་དུ་ལ་བཟླ་བ་དང་། བརྗེད་ངས་ཀྱི་གཉེན་པོར་དྲན་པའི་ལྕགས་ཀྱིས་བསྐུལ་ཏེ་གནང་བཀག་གི་རྣམ་དབྱེ་ཉིན་དང་མཚན་དུ་མི་བརྗེད་ཅིང་ཡིད་ལ་བྱེད་པས་འགལ་བ་རྣམས་འཕྲལ་ལར་བཤགས་སྡོམ་ལ་བརྩོན་པ་དང་། དྲན་པ་མི་གསལ་བའི་གཉེན་པོར་དྲན་ཤེས་ཀྱི་བྱ་རས་རྟོགས་ཤིང་དཔྱོད་པའི་བླང་དོར་ལ་རྒྱུན་དུ་བརྩོན་པས་དམ་ཚིག་ལས་འདས་མ་འདས་བརྟགས་པ་སོགས་ཀྱི་སྒོ་ནས་རང་རང་གི་གཉེན་པོ་ལ་བརྩོན་པས་ཞུགས་ཅིང་མདོར་ན་སྒོ་གསུམ་གྱི་སྤྱོད་པ་ཐ་དག་དམ་ཚིག་དང་འགལ་ན་སྤོང་། མི་འགལ་ན་སྒྲུབ་པའི་སྒོ་ནས་རྟག་ཏུ་བསྲུངས་སེམས་ལ་འབད་པ་ཉིད་ཁོ་ནའོ། །དེ་ཡང་དམ་ཚིག་ལས་ཉམས་ན་བདག་ངན་ནོ་སྙམ་པ་རང་ལ་བརྟེན་ནས་རྩ་བ་དང་ཡན་ལག་གི་ཉེས་ལྟུང་ཅུང་ཟད་ལའང་འཛེམ་པ་སྟེ་ངོ་ཚ་ཤེས་པ་དང་། བླ་མ་དང་ཡི་དམ་མཁའ་འགྲོ་ཟག་མེད་མཁྱེན་པའི་སྤྱན་མངའ་བ་རྣམས་ལྐོགས་གྱུར་སྒྲིབ་མེད་དུ་གཟིགས་ཏེ་ཁྲེལ་བ་དང་། སྐྱེ་བོ་རྨོངས་པ་དག་གིས་ཀྱང་སྤྱོད་ལམ་གྱི་ཚུལ་མཐོང་ཐོས་དོགས་གསུམ་ལ་བརྟེན་ཏེ་ཁྲེལ་ནས་སྨད་པའི་གནས་སུ་འགྱུར་རོ་སྙམ་པས་གཞན་ལ་བརྟེན་ནས་བསྲུངས་པ་སྟེ་ཁྲེལ་ཡོད་པས་ཉམས་པའི་ཉེས་དམིགས་ལ་འཇིགས་པ་དང་། བསྲུང་བའི་ཕན་ཡོན་ལ་བྲོད་པའི་སྒོ་ནས་སྲོག་ལ་བབ་ཀྱང་རྟག་ཏུ་དམ་ཚིག་གི་བསྲུང་བ་ལ་བརྩོན་པར་བྱ་བ་སྟེ། སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་བཏང་ཀྱང་སླ། །འཆི་བའི་དུས་ལ་བབས་ཀྱང་སླའི་རྟག་ཏུ་དམ་ཚིག་གི་བསྲུང་པར་བྱ། ཞེས་དང་། རྒྱལ་པོ་ལ་གདམས་པའི་མདོ་ལས། །བདག་གིས་ནོར་ནི་བཏང་ལ་ལུས་བསྲུང་ངོ་། །ནོར་དང་ལུས་ཀྱང་བཏང་ལ་སྲོག་བསྲུང་སྟེ། །ནོར་དང་ལུས་དང་དེ་བཞིན་སྲོག་རྣམས་ཀྱང་། །ཐམས་ཅད་བཏང་ལ་འདིར་ནི་ཆོས་བ སྲུང་ངོ་། །ཞེས་གསུངས་པ་ལྟར་རོ། །དེ་ཡང་སྤྱིར་སོ་ཐར་གྱི་སྡོམ་པ་ནི་ཕྲ་ཞིབ་ནས་སྲུང་དཀའ་བའི་ཁུལ་དང་། དེ་ལས་ཀྱང་བྱང་སེམས། དེ་ལས་ཀྱང་སྔགས་སྡོམ་ནི་ཤིན་ཏུ་ཟོར་ཡངས་པའི་དབང་དུ་བྱེད་པ་སྔགས་སྡོམ་སྟོན་འཁོར་གྱི་བླ་མ་ཕལ་ཆེར་ཡང་ཐུགས་ལ་བཞེད་འདྲ་ཞིང་། རྒྱུ་མཚན་གསང་སྔགས་ཀྱི་དབང་བསྐུར་ལ་ནི་ཞུ་མཁན་དང་། གནང་མཁན་གཉིས་ཀས་ཧར་འཚངས་དང་། བསྐུར་བ་གང་རྙེད་བྱེད་པ་ཞིག་འདུག་ཀྱང་འདི་དག་ནི་ཐེག་པ་གསུམ་གྱི་གནད་ཤིན་ཏུ་མགོ་བར་ཟད་དེ། པན་ཆེན་ཇོ་བོ་རྗེས། བདག་ལ་སོ་ཐར་གྱི་སྡོམ་པའི་ཉེས་ལྟུང་ནི་ཡེ་ནས་གོས་མ་མྱོང་ཞིང་། བྱང་ཆུབ་སེམས་དཔའི་སྡོམ་པའི་ཉེས་ལྟུང་ནི་རྩ་རེ་ཙམ་ཕོག །དེ་ལས་ཀྱང་རིག་འཛིན་སྔགས་ཀྱི་སྡོམ་པའི་ཉེས་ལྟུང་ནི་ཅ་རེ་ཉ་རེ་ཙམ་ཕོག །ཅེས་དང་། རྡོར་བྲག་མཆོག་སྤྲུལ་དམ་པ་རིག་འཛིན་པདྨ་འཕྲིན་ལས་ཀྱི་རྣམ་ཐར་ཞལ་གསུངས་མར་སོ་ཐར་ལ། ཕམ་ལྷག་སྤང་ལྟུང་ཉེས་བྱས་ཀྱི་རིགས་ཆེ་བས་མ་གོས་པ་རང་རྒྱུད་ལ་ལེགས་པར་རྟོགས་ཤིང་དཔྱོད་པའི་ལུགས་ཡིན་ལ། དེ་ཡང་ཚུལ་ཁྲིམས་བརྟུལ་ཞུགས་མཆོག་འཛིན་ལྟ་བུའི་རློམ་སེམས་མེད་པ་དང་། དེ་བས་ཀྱང་ཐེག་ཆེན་བྱང་ཆུབ་སེམས་དཔའི་བསླབ་བྱ་རྣམས་དཀའ་ཚེགས་ཆེ་བས་ནམ་མཁའི་སྙིང་པོའི་མདོ་དང་སྡོམ་པ་ཉི་ཤུ་པ་སོགས་ནས་བཤད་པའི་བླང་དོར་རྣམས་ལ་འབད་རྩོལ་བྱེད་ཁུལ་དང་། གཙོ་བོར་རྡོ་རྗེ་ཐེག་པའི་ཉེས་ལྟུང་རྣམས་ཕྲ་ཞིང་ཟབ་པས་དམ་ཚིག་གི་ཉེས་བ་ཆར་ལྟར་འབབ་པ་ཞིག་འདུག་པས་འཕྲལ་མར་བཤགས་སྡོམ་འདྲ་བྱེད་ཁུལ་ཡིན་ཀྱང་། དེང་སང་བུམ་དབང་གཅིག་པོའི་མཉམ་རྗེས་བཀའ་བཅའམ་དམ་ཚིག་ཙམ་བསྲུང་སྡོམ་ཡང་མི་ནུས་ན་གཞན་རྣམས་དགོངས་པ་རྩ་ཁྲོལ་གྱི་རང་བཞིན་དུ་འདུག །འོན་ཀྱང་ལ་ལ་དག་འདུལ་བ་ཁོ་ན་དཀའ་བའི་ཁུལ་དང་། བྱང་སྡོམ་དང་གསང་སྔགས་གཉིས་ལ་མཆོང་རྒྱང་གནང་མཁན་རང་མང་བར་འདུག་པས། གུ་རུ་པདྨས། གསང་སྔགས་ཟབ་མོའི་ལས་སྐལ་རྣམས་མི་བྱེད་ཟས་སྐལ་རྣམས་ཟ་ཞེས་གསུངས་པ་རྡོ་རྗེའི་གསུང་ཁོ་ནར་ངེས་པ་རྙེད། ལས་སྐལ་ཅི་ཡིན་ན་ཐོག་མར་དབང་བཞིའི་དམ་ཚིག་ནས་བཟུང་གསར་རྙིང་རང་རང་གི་གཞུང་ལྟར་བསྲུངས་བ་ལྟ་ཅི་སྨོས། སྲུངས་སེམས་ཀྱི་རྣམ་རྟོག་ཙམ་ཡང་མི་འདུག་པས་ལས་སྐལ་རྣམས་མི་བྱེད་གསུངས་པ་དེ་ཡིན། ཟས་སྐལ་ཚོགས་འཁོར་གྱི་མཚོན་བཅས་ལྡན་དགེ་སློང་ཡང་སྔགས་མ་གུས་མི་གུས། དམ་ཚིག་གི་རྫས་ཡིན་མིན། ལོངས་མ་སྤྱད་པའི་ཉེས་དམིགས། སྤྱོད་པའི་གནང་བཀག་སོགས་ཅི་བསམ་རྒྱུ་མེད་པར་ཚོགས་འཁོར་ཡིན་ན་ཟ་དགོས་པས་ཁྱབ་པར་ལྟ་བུར་སྣང་། ཞེས་དམ་པའི་གསུངས་དེ་དག་སྙིང་ལ་འབབ་པས་ཐལ་མོ་སྙིང་གར་ལན་བརྒྱར་སྦྱོར་རིག་གོ། །དེའི་རྒྱུ་མཚན་ཡང་། གོང་དུ་བཤད་པའི་དམ་ཚིག་ཉེར་བདུན་པོའི་ནང་དུ་སོ་ཐར་གྱི་སྤོང་བདུན་དག་བཤད་ཅིང་། ལྷག་རྣམས་སྔགས་སྡོམ་གྱི་ཁྱད་ཆོས་སུ་གསུངས་པས་སྔགས་སྡོམ་བསྲུང་སླ་ཞིང་གུ་ཡངས་བར་འགྲོ་ཨེ་འདུག་རྣམས་དཔྱོད་ཀྱི་སྤྱན་རྒྱང་མཐོན་པོས་གསུང་རབ་མཐའ་དག་གི་དོན་ལ་ཐུགས་རྟོགས་ལེགས་པར་བཅུག་སྟེ་དེ་དང་རྗེས་མཐུན་གྱི་སྤང་ལེན་རང་གི་སྤྱོད་པ་དང་། གཞན་ལ་དོན་དེ་དག་ཆུ་ཤིང་གི་འབྲས་བུ་བཞིན་བསྟན་དོན་དུ་འགྱུར་པ་ཞིག་དཀའ་ནའང་། སྨྲ་མཁན་བདག་ལྟ་བུའི་རིས་ཅན་གྱི་འདི་ལྟར་དུ་སྨྲས་ཀྱང་ཆེ་ཕྲ་མང་པོའི་ཐུགས་དང་འགལ་བས་རང་ཉིད་ཀུན་གྱི་ཁྱུ་རུ་མི་ཚུད་པའི་རྒྱུར་མཐོང་སྟེ། ཀུན་མཁྱེན་དམ་པ་བུ་སྟོན་གྱིས། །མང་དུ་སྨྲས་ན་དགྲ་རུ་སྡང་། །མ་སྨྲས་ལག་ལེན་འཆོལ་པར་སྤྱོད། །ཅེས་གསུངས་པ་ཉིད་ཁོ་ན་ཐུགས་བདེན་པར་ཟད་དོ། །ལྔ་པ་མ་སྲུང་བའི་ཉེས་དམིགས་ལ་ཉེས་དམིགས་སྤྱིར་བསྟན་པ་དང་། བྱེ་དྲག་ཏུ་བསྟན་པ། ལྕི་ཡང་གི་ཚད་བསྟན་པའོ། །དང་པོ་ལ་སྤྱིར་དམ་ཚིག་ཉམས་པའི་ཉེས་པ་ནི་བརྗོད་ཀྱི་མི་ལངས་བ་སྟེ། དམ་ཚིག་བཀོད་པའི་རྒྱུད་ལས། །དམ་ཚིག་ལས་ནི་འདས་གྱུར་ན། །འདི་ཕྱིར་བདེ་ལེགས་ཉམས་པ་དང་། །ཡིད་དུ་མི་འོང་སྣ་ཚོགས་མྱོང་། །ས་སྤྱོད་མེ་ཡི་སྡུག་བསྔལ་ལ། །བསྐལ་པ་བྱེ་བ་གྲངས་མེད་གནས། །ཞེས་དང་། སྤྱི་མདོ་ལས། གལ་ཏེ་ཉམས་པར་གྱུར་པ་ན། །ཆད་པའི་སྐྱེ་གནས་བསྐལ་ཆེན་བརྒྱད། །མི་བཟད་སྡུག་བསྔལ་དྲག་པོ་ཡིས། །མཚོན་ཆའི་འཁོར་ལོ་བཞིན་དུ་འཁོར། །ཞེས་དང་། བརྟག་གཉིས་ལས། མ་གསངས་སྦྲུལ་དང་ཆོམ་རྐུན་དང་། །ས་སྤྱོད་མེ་ཡི་སྡུག་བསྔལ་བསྐྱེད། །ཅེས་དང་། གཞན་ཡང་། ཡམས་དང་འཚེ་བའི་ནད་རྣམས་དང་། །རྒྱལ་པོ་མེ་དང་སྦྲུལ་གདུག་དང་། །ཆུ་དང་མཁའ་འགྲོ་རྐུན་པ་དང་། །གདོན་དང་ལོག་འདྲེན་ཉམས་ཀྱིས་ཀྱང་། །བསད་ནས་སེམས་ཅན་དམྱལ་བར་ལྟུང་། །ཞེས་སོ། །གཉིས་པ་ནི་སྤྱི་མདོ་ལས། ལང་ཉིད་བདག་པོ་གང་འདི་ལས། །ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་པ་ལྟར་ཉམས་པ་ནི་ཡུལ་ཆེས་གཉེན་པ་ལ་ཀུན་དཀྲིས་དྲག་པོས་སྤྱད་པའི་ལན་གྲངས་དུ་མར་བྱུང་བ་དུས་འདས་རལ་ལ་སོགས་ཡིན་ལ། རྩ་ཉམས་པ་ནི་རྩ་བའི་དམ་ཚིག་ལས་ཉམས་པར་གྱུར་ན་ཚེ་འདིར་ཡང་དབང་སྡུད་བསྒྲུབ་པས་ཡུལ་ཁམས་དགྲར་སྡང་བ་བཞིན་སྒྲུབ་པ་ཐམས་ཅད་འདོད་འབྲས་ཕྱིན་ཅི་ལོག་ཏུ་འགྱུར་བ་སོགས་མི་འདོད་པ་ཐ་དག་ཆར་བཞིན་དུ་འབེབས་པ་དང་། ཕྱི་མའི་ཚེ་ཕྱི་དབུགས་དང་བྲལ་མ་ཐག་རྡོ་རྗེ་དམྱལ་བའི་སྐྱེས་གནས་སུ་ལྟུང་བར་བཤད་དེ། གསང་སྙིང་ལས། རྩ་བའི་དམ་ཚིག་ཉམས་གྱུར་ན། །བསྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོངས་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་དང་། གསལ་བཀྲ་ལས། རྩ་ཀུན་ཉམས་པའི་འཆལ་པ་དག །གསོལ་ཉེ་བར་མི་བརྩོན་པ་རྡོ་རྗེ་དམྱལ་བར་དེ་ལྟུང་སྟེ། དམྱལ་བ་ཕལ་པ་ཐམས་ཅད་ཀྱི། །སྡུག་བསྔལ་གཅིག་ཏུ་བསྡོམ་པ་ནི། །དེ་ཡི་འབུམ་གྱི་ཆར་མི་ཕོད། །སངས་རྒྱས་སྟོང་གི་འོད་ཟེར་དང་། །བྱང་ཆུབ་སེམས་དཔའི་ཕྲིན་ལས་ཀུན། །རྒྱུན་དུ་འཛད་ཀྱང་ཕན་མི་འགྱུར། །བསྐལ་པ་ཐེར་འབུམ་ལ་སོགས་སུ། །དེ་ནི་འཐོན་པར་མི་འགྱུར་རོ། །འཇིག་རྟེན་འཇིག་ན་གཞན་དུ་འཕོ། །སེ་གོལ་གཅིག་གིས་ཕྱིན་པར་བྱེད། །དེ་བས་ཤིན་ཏུ་ནན་ཏན་གྱིས་ཞེས་དང་། རྩ་ལྟུང་གི་གཞུང་ལས། གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་བཟུང་བར་འགྱུར། །དེ་ནས་སྡུག་བསྔལ་མྱོང་འགྱུར་ཞིང་། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །དེ་ཡང་ཚིག་གི་ཟུར་དང་བརྡ་ཙམ་གྱི་ཀྱང་བརྗོད་མི་རུང་ཞིང་། རྨི་ལམ་ཙམ་དུ་ཉེས་པ་བྱུང་ཀྱང་བཤགས་དགོས་པ་ཡང་། བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །རྡོ་རྗེ་སྤུན་དང་སྲིང་མོ་ལ། །ངན་སྨྲ་ཚིག་གི་ཟུར་ཙམ་ཡང་། །བརྡའི་དངོས་པོར་བརྗོད་མི་བྱ། །གལ་ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱི་བཤགས་པར་བྱ། །དངོས་དང་ཞེ་ཡི་བྱས་པ་དང་། །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །ཡན་ལག་གཉིས་པ་ནི། ཡན་ལག་གི་དམ་ཚིག་ཉམས་པར་གྱུར་པས་ཀྱང་ཚེ་འདིར་དངོས་གྲུབ་མི་འགྲུབ་ཅིང་ཕྱི་མ་ངན་སོང་དུ་ལྟུང་བ་སྟེ། རྩ་རྒྱུད་གསང་སྙིང་ལས། ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་པས་གོང་གི་རྩ་བ་ཉམས་པ་དང་སྡུག་བསྔལ་ཆེ་ཆུང་དང་མནར་ཡུན་རིང་ཐུང་གི་ཁྱད་པར་ཆེ་བ་ལས་གཞན་འདྲ་བར་ཡང་། རྡོ་རྗེ་སྙིང་པོ་རྒྱན་ལས། དེ་ལས་སྔགས་པས་ཡོངས་འདས་ན། །ངེས་པར་བདུད་དང་འཕྲད་པར་འགྱུར། །ནད་དང་སྡུག་བསྔལ་འཕེལ་འགྱུར་ཏེ། །བསྲིད་མེད་སྤྱིའུ་ཚུགས་དམྱལ་བར་འགྲོ། །སྦོམ་པོ་ལྟུང་བྱེད་ཉེས་དམིགས་ཀྱང་། །དེ་དང་འདྲ་བར་ཤེས་པར་བྱ། །ཞེས་སོ། །བཟླས་ཉམས་ནི་སྙམ་པ་དང་འགྲོད་པའི་ཉེས་པ་སྟེ། གསང་སྙིང་ལས། རྩ་བ་ཉམས་པའི་འཆབ་པ་དག །གསོ་ལ་ཉེ་བར་མི་བརྩོན་དང་། །སྐད་ཅིག་ཡུད་ཙམ་སྨྲ་བ་བྱེད། །ཉེས་གྱུར་ཉེས་པ་བརྗོད་མི་ལོངས། །ཞེས་དང་། ཀུན་འདུས་ལས་ཇི་ལྟར་འོ་མ་རུལ་པ་དག །རུལ་བས་འོ་མ་ཀུན་རུལ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུངས་བྱེད། །ཅེས་སོ། །ཞར་ཉམས་ནི་གཞན་ཅི་ཟེར་བརྟག་པའི་གཞན་གྱི་ངོ་གར་ཐལ་བའི་ཉེས་བྱས་སོ། །གསུམ་པ་ལ། ངོ་བོ་ལ་ལྟོས་པ་དང་། དུས་ལ་ལྟོས་པའོ། །དང་པོ་ནི། སློབ་དཔོན་མཚོ་སྐྱེས་ཀྱི་རྣམ་ཐར་བསྡུས་པ་ལས། དངོས་གྲུབ་ཐམས་ཅད་གཞིར་གྱུར་པ། །རྩ་བ་དང་ནི་ཡན་ལག་གོ། །རྩ་བ་དུས་འདས་ཕམ་པ་འདྲ། །ཚད་ལྡན་ལྟུང་བར་བཤད་པ་ཡིན། །ཡན་ལག་གཙོ་བོ་དུས་འདས་པ། །ལྕི་བ་ཞེས་ནི་བཤད་པ་སྟེ། །སྦྱོར་བ་མ་རྫོགས་སྦོམ་པོའོ། །ཡན་ལག་ཕྲ་བ་ཉེས་བྱས་སོ། །ཞེས་པས། ལྟུང་བ་ཀུན་ལ་གང་ལ་བརྟེན་ནས་ལྟུང་བ་འབྱུང་བའི་གཞི་དང་། ཡུལ་དེ་ལ་དེར་ཤེས་ཤིང་ཉེས་སྤྱོད་པའི་ལས་ལམ་རྫོགས་པར་གྲུབ་པ་མཐར་ཐུག་ཏེ་ཡན་ལག་བཞི་ལྡན་ནམ། ཡང་རྩ་ལྟུང་གི་བཤགས་པའི་སྐབས། །ཉོན་མོངས་ཀུན་སློང་དེར་ཤེས་ལྡན། །ལུས་ངག་སྦྱོར་བསྟན་བར་ཆད་དང་། །མ་འཁྲུལ་འགྱོད་མེད་ཚད་ལས་འདས། །ཞེས་བདུན་ལྡན་གསུང་པས། བདུན་པོ་དེའི་ངོ་བོ་ཇི་ལྟར་ཞེ་ན། ཡུལ་རྡོ་རྗེ་སློབ་དཔོན་སོགས་གང་ཡིན་དེ་ལ་སྙིང་ནས་ཁྲོ་ཞིང་ཞེ་སྡང་དང་ཕྲག་དོག་སོགས་ཉོན་མོངས་པས་ཀུན་ནས་བསླང་བའི་བསམ་པ་མ་རུངས་པའི་ངོ་བོ་སྟེ་འདི་ལ་ཀུན་དཀྲིས་ཀྱང་ཟེར། ཡུལ་དེ་ལ་དེར་ཤེས་པས་ཡུལ་གཞན་དང་ནོར་བ་སོགས་མ་ཡིན་པ་དང་། གནོད་པའི་སྦྱོར་བ་དེ་ལུས་ངག་ཡིད་གསུམ་གང་གི་སྒོ་ནས་སྤྱོད་ཀྱང་དངོས་སུ་བཀལ་བས་གྲུབ་པ་དང་སྤྱད་པའི་བྱ་བ་དེས་ཡུལ་དེ་ལ་བར་ཆད་དུ་གྱུར་པའམ་ཉིན་མཚན་གྱི་དྲུག་ཆའི་ནང་དུ་གཉེན་པོས་མ་སླེབ་པར་ཐུན་ཚོད་ཀྱི་བར་ཆོད་པ་དང་། རང་ཉིད་གདོན་གྱིས་བརླམ་སྟེ་སྨྱོ་བ་སོགས་ཀྱི་འདུ་ཤེས་འཁྲུལ་པ་མ་ཡིན་པར་ཞེ་ཐག་པ་ནས་བསམ་བཞིན་པར་སྤྱད་པ་དང་། དེ་ལྟ་བུར་བྱས་པ་ཟིན་ནས་འགྱོད་པ་མ་སྐྱེས་པར་དེས་མགུ་སྟེ་ཡིད་ཚིམ་པ་དང་། བཤགས་ཚད་རང་རང་གི་དུས་ལས་འདས་པ་སྟེ་ཡན་ལག་བདུན་པོ་དངོས་གཞི་གཅིག་གི་སྟེང་དུ་ཚངས་ན་ཤིན་ཏུ་ལྕི་བས་སྡོམ་པའི་མཐུན་ཕྱོགས་བཅོམ་ཞིང་སྔགས་སྡོམ་གཏོང་བས་ཕམ་པ་ཞེས་བརྗོད་དོ། །ཡང་རྩ་ལྟུང་གང་རུང་གཉེན་པོ་དང་སྤེལ་ནས་སྐྱེས་པ་ལྟ་བུ་དངོས་གཞི་རྒྱུ་ཚོགས་མ་ཚང་ཞིང་མ་བཤགས་པར་ཐུན་ཚོད་འདས་ནས་ལྟུང་བ་ཞེས་བརྗོད་དེ་ཕམ་པའི་འོག་ནས་ལྕི་བའི་ལྟུང་བ་སྟེ་སོ་ཐར་གྱི་དགེ་འདུན་ལྷག་མ་བཞིན་ནོ། །བསམ་སྦྱོར་དང་པོ་གསུམ་བྱས་ཀྱང་དེ་མ་གྲུབ་པས་ཡན་ལག་མི་ཚངས་པ་ནི་སྦོམ་པོ་དང་། ཡན་ལག་གི་ལྟུང་བ་གཞན་རྣམས་ནི་སྟུང་བྱེད་དང་ཐུན་ཚོད་ལས་འདས་པར་བཤགས་ན་ལྟུང་བ་ཞེས་པའི་མིང་ཙམ་དང་། ལུས་ངག་གི་རྣམ་འགྱུར་ཙམ་རྩེད་མོའི་ཕྱིར་བྱས་པ་སོགས་ཀྱི་ཕྱོགས་མཐུན་གྱིས་ཉེས་པ་ཕྲ་མོ་ཉེས་བྱས་དང་། གལ་ཏེ་རྡོ་རྗེའི་མཆེད་ལ་ཕན་པའི་སེམས་ཀྱི་ཁྲོས་པ་ལྟ་བུ་ནི་ལྟུང་བའི་གཟུགས་བརྙན་ཏེ་དོན་ལ་ལྟུང་མེད་དེ། པཎ་ཆེན་པདྨ་དབང་རྒྱལ་གྱིས། ཀུན་ལ་ཡུལ་བསམ་སྦྱོར་བ་མཐར་ཐུག་གམ། །ཀུན་སློང་ཉོན་མོངས་གང་འགལ་དེར་ཤེས་དང་། །ལུས་ངག་སྦྱོར་བྱས་དངོས་གཞིའི་བར་ཆོད་དང་། །མ་འཁྲུལ་སྤྱད་དང་འགྱོད་མེད་བཤགས་ཚད་འདས། །ཕམ་པ་ཞེས་བརྗོད་དངོས་གཞི་མ་ཚང་ན། །ཐུན་འདས་ལྟུང་བ་ཞེས་བརྗོད་ལྷག་མ་ལྟར། །རིམ་པས་དམན་ན་སྦོམ་པོ་ལྟུང་བྱེད་དང་། །ཉེས་བྱས་ལྟུང་བའི་གཟུགས་བརྙན་ཤེས་པར་བྱ། །ཞེས་གསུངས་པ་ལྟར་རོ། །གཉིས་པ་ནི། ཉིན་མོ་ལ་སྔ་གྲོ། ཉིན་གུང་། ཕྱི་དྲོ་སྟེ་ཐུན་གསུམ་དང་། མཚན་མོ་ལ་སྟོད། ནམ་གུང་། ཐོ་རིང་སྟེ་ཐུན་གསུམ་གྱི་དྲུག་ཆའི་ནང་དུ་འགལ་ཉམས་བྱུང་མ་བྱུང་ལེགས་པར་བརྟགས་ཏེ་སྤང་ལེན་ལ་བློ་སྒྲིམས་ཤིང་དཔྱད་པས་ཐུན་རེ་རེ་དེ་དག་གང་རུང་གཅིག་གི་ནང་དུ་ཉེས་པ་དེ་བྱས་ནས་ཐུན་དེ་གའི་ནང་དུ་བཤགས་པ་གཡེངས་པར་གྱུར་ན་ཐུན་ཚོད་ལ་འདས་པ་ཞེས་བྱ་བ་དང་། ཉིན་ཞག་ཕྲུག་གཅིག་གི་བར་ཆོད་ན་ངམ་ལས་འགལ་བ་དང་། ཟླ་བ་གཅིག་གིས་བར་མ་ཆོད་པ་ཚུན་ཆད་ནི་ཉམས་པ་དང་། ལོ་གཅིག་ཚུན་ཆད་ནི་འདས་པ་དང་། ལོ་གཉིས་སམ་ཚུན་ཆད་ནི་རལ་བ་ཞེས་ཉེས་ཕྱིན་རིམ་བཞིན་དུ་ལྕི་བར་འགྱུར་ཞིང་དེ་དག་ལོ་གསུམ་ཚུན་དུ་སྙིང་ཐག་པའི་སྒོ་ནས་བརྩོན་པ་ཆེན་པོ་ནས་བཤགས་ན་གསོ་བར་རུང་བ་དང་། ལོ་གསུམ་འདས་ཕན་ཆོད་ནི་ནམ་ཡང་གསོར་རུང་བར་མ་གསུངས་ཏེ། དམ་ཚིག་བཀོད་པའི་རྒྱུད་ལས། སྤྱི་དང་ཁྱད་པར་དམ་ཚིག་ལས། །དུས་ལས་ཁྱད་པར་ངེས་ཕྱེ་བས། །དམ་ལས་འགལ་ཞེས་ཉེས་བྱས་གང་། །ཞག་གི་བར་མ་ཆོད་པར་ནི། །དམིགས་པའི་ཡུལ་ལ་བཤགས་བྱས་ནས། །དེས་ནི་སོར་ཡང་ཆུད་པའོ། །ཉེས་ཞེས་ཟླ་བར་ཆོད་པ་ལ། །འགྱོད་པ་དྲག་པོས་བཤགས་པས་སོ། །ངན་ལ་འདས་པ་ལོ་དག་གིས། །བར་དུ་མ་ཆོད་བཤགས་པས་སོ། །ལོ་ནི་གཉིས་དང་གསུམ་དག་ལས། །དམ་ཚིག་རལ་བ་ཞེས་བྱ་སྟེ། །མཆོག་ཏུ་རག་ན་གསོ་རུ་རུང་། །ལོ་གསུམ་དག་ལས་འདས་པ་ནི། །དེ་ནས་གསོ་རུ་མི་རུང་སྟེ། །གལ་ཏེ་བླང་ན་གཉིས་ཀ་ཚིག །ངེས་པར་ས་སྤྱོད་སྡུག་བསྔལ་ལ། །རྒྱུན་དུ་སྤྱོད་པ་ཁོ་ནའོ། །ཞེས་དང་། གཞན་ཡང་ཉེས་ལྟུང་ལན་གྲངས་བཅུ་གཉིས་པར་སྤྱད་པའི་ཉམས་པ་ཆེན་པོའི་རིགས་ནི་གསོར་མི་རུང་བར་ཡང་གསུང་སྟེ། ཇི་སྐད་དུ། རང་ལོ་འདས་ནས་བཤགས་པའི་ཡུལ། རྡོ་རྗེ་སེམས་དཔའ་མ་གནང་ངོ་། །ཞེས་གསུངས་སོ། །དེ་དག་སྤྱད་ཀྱང་ཉེས་མེད་དུ་བསྟན་པ་ཡང་། རང་ཉིད་འབྱུང་ཁམས་འཁྲུགས་པས་གདུང་སྟེ་ན་བ་དང་། རང་དབང་མ་ཐོབ་པ་སྟེ་རང་དབང་ཉམས་པ་དང་། དེ་ཉིད་སྤྱད་ན་གཞན་དོན་དུ་འགྱུར་ཆེ་བར་འབྱུང་བ་དང་། དོན་རླབས་ཆེན་པོའི་རྒྱུར་མཐོང་བ་དང་། སྐྱེ་བ་མེད་པའི་དོན་བརྟེན་པ་དང་། གཞན་དྲངས་བ་སོགས་ཀྱི་དགོས་ཁྱད་དང་ལྡན་པ་དང་། རྟོགས་གོམས་རྨད་དུ་བྱུང་བའི་ནུས་པ་ཁྱད་པར་ཅན་རྙེད་པ་དང་། ལྷག་པའི་ལྷ་ལྟ་བུ་ཡུལ་ཁྱད་པར་ཅན་གྱིས་གནང་བ་ཐོབ་པ་དང་། བླ་མ་བཀའ་བསྒོ་བས་སྤྱོད་ཅིག་པའི་ལུང་ནོད་པ་དང་། སྲོག་གི་བར་ཆད་དུ་འགྱུར་བ་སོགས་ལས་ཏེ། སྙིང་པོ་རྒྱན་ལས། ན་ད ང་དབང་ཉམས་བྱ་བ་དང་། །གཞན་གྱི་དོན་དང་དོན་ཆེན་དང་། །སྐྱོན་མེད་བརྟན་པ་དགོས་ལྡན་དང་། །ནུས་པ་ཉིད་དང་གནང་བ་དང་། །བཀའ་བསྒོ་བ་དང་བར་ཆད་ལས། །ཉེས་པ་མེད་པར་ཤེས་པར་བྱ། །ཞེས་སོ། །དྲུག་པ་བསྲུང་བའི་ཕན་ཡོན་ནི། །སྤྱི་ལོ་ཏོག་བསྐྱེེད་ཅིང་འབྲས་བུ་སྨིན་པའི་གཞི་རྟེན་ས་གཞི་ཡིན་པ་ལྟར་དམ་ཚིག་ནི་དགེ་ལེགས་ཀྱི་ཡོན་ཏན་ཐ་དག་སྐྱེ་བ་དང་གནས་པའི་གཞི་རྟེན་དུ་གྱུར་པ་སྟེ། སྤྱི་མདོ་ལས། ཇི་ལྟར་ས་གཞི་གཤིན་པོ་ལས། །བརྟེན་ནས་ས་བོན་བཏབ་པ་ལ། །འབྲས་བུ་སྨིན་པར་གྱུར་པ་ཡིས། །གང་དག་འཚོ་བའི་སྲོག་འཛིན་ལྟར། །ཆོས་རྣམས་ཀུན་གྱི་གཞིར་གྱུར་པ། །དམ་ཚིག་འདི་ལ་གནས་པ་ན། །བླ་མེད་བྱང་ཆུབ་རྣམ་སྨིན་པས། །དགེ་བའི་སྲོག་འཛིན་དམ་པའོ། །ཞེས་སོ། །ཁྱད་པར་གནས་སྐབས་སུ་ཡིད་ལ་བསམ་པའི་དོན་རྣམས་གེགས་མེད་དུ་འགྲུབ་པ་དང་། སྐྱེ་འགྲོ་ཀུན་གྱི་ཡིད་དུ་འོང་བ་དང་། འཇིག་རྟེན་གྱི་གཙོ་བོ་ལྷ་ཆེན་པོ་རྣམས་ཀྱི་བཀུར་གནས་སུ་འགྱུར་པ་དང་། རྒྱལ་བ་དེ་སྲས་དཔའ་བོ་རྣལ་འབྱོར་མ་རྣམས་ཀྱིས་སྲས་དང་སྤུན་དུ་དགོངས་ནས་རྒྱུད་བྱིན་གྱིས་བརླབས་པ་དང་། དེའི་མཐུས་དེ་བཞིན་གཤེགས་པའི་སྤྱོད་ཡུལ་ལ་ཞུགས་ཏེ་རིག་པ་འཛིན་པའི་ལས་སྦྱོར་བར་བྱེད་པ་སྟེ། རྩ་རྒྱུད་གསང་སྙིང་ལས། རྒྱལ་བའི་རིག་པ་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རླབས། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་དང་། དམ་ཚིག་གསུམ་བཀོད་ལས། གསང་སྔགས་རྡོ་རྗེའི་དམ་ལ་གནས། །དེ་ཡིས་སྨོན་པ་ཀུན་འགྲུབ་ཅིང་། །ལྷ་རྣམས་ཀྱིས་ཀྱང་རྟག་ཏུ་བསྲུང་། །རྒྱལ་བ་རྒྱལ་མཆོག་སྲས་བཅས་ཀྱིས། །བུ་བཞིན་དགོངས་པ་དམ་པ་མཛད། །ཏིང་འཛིན་ཡོན་ཏན་དཔག་ཡས་ཤིང་། །ཀུན་བཟང་རིགས་ཀྱི་དམ་པ་འགྲུབ། །ཅེས་སོ། །གལ་ཏེ་ཚེ་འདིར་ལམ་རིམ་པ་གཉིས་ལ་འབད་པར་མ་བྱས་ཀྱང་རྡོ་རྗེ་ཐེག་པའི་དམ་ཚིག་ལ་གནས་ན། དེ་སྐྱེ་བ་ཕྱི་མའམ། བདུན་ནམ། ཇི་ལྟར་འགོར་ཀྱང་སྐྱེ་བ་བཅུ་དྲུག་ལས་མི་འགྱངས་བར་མྱང་འདས་ཀྱི་འབྲས་བུ་ཐོབ་པ་སྟེ། རྒྱུད་གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་དང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ལ་ནི། །མ་སྒོམས་པར་ཡང་དངོས་གྲུབ་ཐོབ། །གལ་ཏེ་དམ་ཚིག་སྡོམ་ལ་གནས། །སྐྱེ་འདིར་ལས་དབང་གི་མ་འགྲུབ། །སྐྱེ་བ་གཞན་དུ་དངོས་གྲུབ་ཐོབ། །ཅེས་དང་། པདྨ་བཛྲ་གྱིས་དམ་ཚིག་ལྔ་པ་ལས། གལ་ཏེ་ལྷུང་བ་མེད་གྱུར་ན། །སྐྱེ་བ་བཅུ་དྲུག་དག་ལ་འགྲུབ། །ཅེས་དང་། སྙིང་པོ་ལས། མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་གསུངས་སོ། །བདུན་པ་ཉམས་ན་ཕྱིར་བཅོས་བྱ་ཚུལ་ལ། དབང་བཞིའི་དབྱེ་བས་གོས་ཚུལ་དང་དུས་འདས་ལ་ལྟོས་པའི་གོས་ཐབས། གསོ་ཐབས་ཀྱི་རིམ་པ་གཞན་སྟོན་པའོ། །དང་པོ་ནི། ཇི་ལྟར་བུམ་དབང་འདི་ཉིད་དུས་ཀྱི་འཁོར་ལོའི་བྱིས་འཇུག་གི་དབང་བདུན་པོའི་རྣམ་དབྱེའོ། །བདུན་ཙམ་ཐོབ་པས་ཉམས་ན་དཀྱིལ་འཁོར་གྱི་ལྷ་གྲངས་རེ་རེ་འམ་གཙོ་བོའི་བཟླས་པ་སུམ་ཁྲི་དྲུག་སྟོང་སྟེ་སྟོང་ཕྲག་སུམ་ཅུ་རྩ་དྲུག་བཟླས་པ་སྦྱངས་ཤིང་། བུམ་དབང་ཐོབ་པས་ནི་དེའི་སྟེང་དུ་སློབ་དཔོན་གྱིས་གསུངས་པའི་ཆད་ལས་ཀྱི་བརྟུལ་ཞུགས་སྤྱད་པས་སྦྱོང་། ཤེར་དབང་ཚིག་དབང་ཐོབ་པས་ནི་དབེན་པའི་གནས་སུ་མཚན་བཅས་པ་བསྐྱེད་པའི་རིམ་པ་དང་མཚན་མེད་རྫོགས་པའི་རིམ་པ་བསྒོམ་པ་འབའ་ཞིག་གིས་རང་རྒྱུད་བྱིན་གྱིས་བརླབས་པས་སྦྱང་སྟེ། དེ་ལྟར་སྦྱངས་པས་དག་པའི་མཚན་མ་མཐོང་ན་སླར་དཀྱིལ་འཁོར་དུ་ཞུགས་ཏེ་སྡོམ་པ་བཟུང་ཞིང་དབང་བླང་བར་བྱ་དགོས་པ་ཡིན་ལ། དེའི་ཚེ་སྔར་དབང་ཐོབ་པའི་བསླབ་གྲལ་དང་རྙེད་པ་ཀུན་ལེན་པ་སོགས་མི་བྱ་བར་གསུངས་སོ། །གཉིས་པ་ནི། གོང་དུ་བཤད་པའི་འགལ་ཉམས་འདས་རལ་ལ་ལྟོས་ཏེ་བཤགས་ཚུལ་ཐ་དད་པར་གསུངས་པ་སྟེ། དེ་ལྟར་ཡང་། དམ་ཚིག་རྣམ་བཀོད་ལས། འགལ་ན་ཚོགས་ཀྱི་འཁོར་ལོས་བཤགས། །ཉམས་ན་རང་གི་བདོག་པས་བསྐང་། །འདས་ན་བུ་དང་ཆུང་མ་དང་། །ཉེ་འཁོར་ལུས་དང་ངག་དག་དང་། །ཡིད་དང་བདོག་པར་བཅས་པས་བསྐང་། །རལ་ན་རང་གི་སྲོག་གིས་བསྐང་། །ཞེས་གསུངས་པའི་གཞན་གོ་སླ་ལ། རལ་པ་སྲོག་གིས་བསྐང་པ་ནི། བླ་མ་དང་སངས་རྒྱས་བསྟན་གྱི་ཆེད་དུ་རང་སྲོག་བློས་བཏང་བའི་བརྩོན་པ་དྲག་པོས་བསྐང་ཞིང་། གང་ལྟར་ཐམས་ཅད་ཀྱི་རྗེས་སུ་ཚོགས་འཁོར་དང་རྗེས་སུ་འབྲེལ་བར་སྤྱི་བླ་མའི་སྤུན་ལས་ཉམས་ན་གང་ལས་ཉམས་པ་དེའི་དྲུང་དུའམ་དེ་དག་མེད་ན་སྐུ་གཟུགས་ལ་སོགས་པའི་མདུན་དུ་གནོང་ཞིང་འགྱོད་པའི་སེམས་ཀྱི་བཤགས་ཤིང་ཕྱིས་སྡོམ་པའི་བརྟུལ་ཞུགས་ཉིད་ལ་གནས་པར་བྱ་ཞིང་། ཁྱད་པར་བླ་མ་ལ་བརྟེན་པའི་སྡིག་པ་ནི་གཞན་ལས་འབུམ་འགྱུར་གྱིས་ལྕི་བར་བཤད་པ་བཞིན། བཞུགས་ན་དེ་ཉིད་ལ་ཉིན་ཞག་གི་བར་མ་ཆོད་པར་བཤགས། མི་བཞུགས་ན་སྐུ་འབགས་ལ་སོགས་པའི་དྲུང་དུ་བཤགས་སྡོམ་བྱ་བའོ། །གཞན་ཡང་སྤྱི་མདོ་ལས། ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་ཉིད་དོ། །ཞེས་བསྐང་ཐབས་ལྔར་བཤད་པའི་ལས་ཀྱིས་བསྐང་བ་ནི། སྦྱིན་བསྲེག་དང་བཟླས་བརྗོད་ཀྱིས་ཏེ། དེ་ཡང་ཀུན་ཏུ་ཉམས་པ་ལ་ཁྲི་ཕྲག་བཅུ་གསུམ་སྟེ་འབུམ་ཕྲག་གཅིག་དང་ཁྲི་གསུམ། རྩ་བ་ཉམས་པ་ལ་ཁྲི་ཕྲག་ལྔ་དང་སྟོང་ཕྲག་གསུམ། ཡན་ལག་ཉམས་པ་ལ་སྟོང་ཕྲག་ལྔ་དང་བརྒྱ་ཕྲག་གསུམ། ཟླས་ཉམས་ལ་བརྒྱ་ཕྲག་ལྔ་དང་བཅུ་ཕྲག་གསུམ། ཞལ་ཉམས་ལ་ལྔ་བཅུ་རྩ་གསུམ་གྱིས་གྲངས་ཀྱིའོ། །རྫས་ཀྱིས་བསྐང་བ་ནི། རིགས་ལྔ་གང་གིས་དམ་ཚིག་གི་ཁྱད་པར་ལ་ལྟོས་ཏེ། རྙེད་ན་དམང་གདོལ་སོ་སོར་ཕྱེ་བའི་ཡུལ་མི་རིགས་ལྔའི་བླ་མ་དངོས་དང་། མ་རྙེད་ན་ཡིད་ཀྱི་མོས་པས་དེ་བཞིན་གཤེགས་པ་ལྔའི་རང་བཞིན་དུ་བསམ་སྟེ་རྫས་རིན་པོ་ཆེ་ལྔ་ལས་རིགས་མཐུན་པའི་དངོས་པོས་ཕོངས་སེམས་ཆགས་འཛིན་མེད་པར་སྟོབ་པའོ། །འདུན་པས་བསྐང་བ་ནི། ཡིད་རབ་ཏུ་དྭངས་བ་དང་ཉམས་ཆག་བྱང་ཞིང་དངོས་གྲུབ་ཐོབ་འདོད་ཀྱི་དད་པས་ཉེས་བྱས་བསགས་པ་ལ་གནོང་འགྱོད་ཀྱི་བློས་གདུང་ཤུགས་དྲག་པོའི་ང་རོས་བཤགས་པར་བྱ་སྟེ། གལ་ཆེ་ལས། མི་དགེ་སྡིག་པའི་བག་ཆགས་རྣམས། །གདུང་བའི་གླུ་དང་བཅས་ཏེ་བཤགས། །ཞེས་སོ། །ཏིང་ངེ་འཛིན་གྱི་བསྐང་བ་ནི། སྟོབས་བཞི་ཚངས་པའི་སྒོ་ནས་བཤགས་པས་བཤགས་ཡུལ་གྱི་གནས་གསུམ་ལས་དཀར་དམར་མཐིང་བའི་འོད་ཟེར་རང་ཉིད་ལ་ཕོག་པས་སྡིག་སྒྲིབ་ཉམས་ཆག་ཐམས་ཅད་དག་པར་བསམ་པའོ། །དེ་ཁོ་ན་ཉིད་ཀྱི་བསྐང་བ་ནི། ཀུན་འདུས་ལས། ཤེས་རབ་ཆེན་པོས་རྒྱུད་ཀྱི་བག་ཆགས་ཐམས་ཅད་རང་བཞིན་མེད་པར་ཤེས་པ་དང་། ཞེས་པས་སྦྱངས་བྱ་སྡིག་པ། སྦྱང་བྱེད་གཉེན་པོ། བྱེད་པོ་རང་ཉིད་སོགས་ཐ་དག་རྨི་ལམ་སྒྱུ་མ་ལྟ་བུའི་རང་བཞིན་གྱིས་འཁོར་གསུམ་རྣམ་པར་མི་རྟོག་པའི་ཤེས་པ་བསྒོམ་པ་ནི་སྡིག་སྦྱངས་རྣམས་ཀྱི་ནང་ན་ཕུལ་དུ་བྱུང་བ་སྟེ། ལུང་ལས། གང་ཞིག་འགྱོད་ཚངས་བྱེད་འདོད་ན། །རང་སོར་འདུག་ལ་ཡང་དག་ལྟོས། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་ནོ། །ཞེས་གསུངས་སོ། །ཁྱད་པར་རྩ་བ་ཡན་ལག་གི་དམ་ཚིག་སོ་སོའི་བསྐང་ཐབས་ཀྱང་བཤད་དེ། རྔམ་གློག་ལས། དམ་ཚིག་ཉམས་པར་གྱུར་པ་ན། །མགོན་བཙུན་མཉམ་པའི་དོན་རྟོགས་ན། །དེ་ཉིད་སྐང་བའི་གནས་སུ་འགྱུར། །བླ་མ་སྤུན་ལ་སྨད་གྱུར་ན། །ཚེ་འདི་ཉིད་ལ་མཉེས་བྱས་ཏེ། །མཐོལ་བཤགས་དྲག་པོས་འགྱོད་བྱས་ན། །དེ་ནི་སྐང་བའི་མཆོག་ཏུ་འགྱུར། །གལ་ཏེ་བདག་གི་བླ་མ་སྤུན། །མ་བསྐང་བར་དུ་ཚེ་འཕོས་ན། །དེ་ནི་བསྐང་བའི་ཚད་ལས་འདས། །གསུང་གི་ཐ་ཚིག་རལ་གྱུར་ན། །རྡོ་རྗེ་ཆོས་སུ་བདག་བསྒོམས་ཏེ། །ཐ་ཚིག་གང་བཀླགས་འབུམ་འབུམ་འདོན། །ཐུགས་ཀྱི་དམ་ཚིག་རལ་གྱུར་ན། །རྡོ་རྗེ་སེམས་དཔར་བདག་བསྒོམ་ན། །ལོ་གསུམ་བར་དུ་མི་སྨྲ་བར། །བསམ་གཏན་སྦྱོར་བ་རབ་ཏུ་བྱ། །ཡན་ལག་ཐ་ཚིག་རལ་གྱུར་ནས། །སོ་སོར་རང་རང་རིགས་ཀྱིས་བསྐང་། །ཞེས་རང་གི་སྒོ་གསུམ་གྱི་གཞི་ལས་སྐུ་གསུང་ཐུགས་ཀྱི་དམ་ཚིག་ཉམས་པ་བསྐང་བར་གསུངས་པའོ། །གསུམ་པ་ནི། རྟེན་གསུམ་ཁྱད་པར་ཅན་ནམ་སངས་རྒྱས་བྱང་སེམས་བླ་མ་སོགས་ཚོགས་ཞིང་ཡིད་ཀྱི་སྤྱན་དྲངས་པའི་མདུན་དུ་སྔར་གྱི་ཉམས་ཆག་བཤགས་ཤིང་ཕྱིན་ཆད་སྲོག་ལ་བབ་ཀྱང་མི་འགལ་བའི་སྡོམ་སེམས་བྱ་བ་དང་། གཏོར་ཚོགས་སྦྱིན་སྲེག་སོགས་རྒྱུན་གྱིས་རྣལ་འབྱོར་ལ་འབད་པ་དང་། སྒོ་གསུམ་གཡོ་ཟོལ་མེད་པས་བླ་མའི་ཞབས་ཏོག་ལ་འབད་པ་དང་། ཉིན་དང་མཚན་གྱི་ཆ་དྲུག་ཏུ་བདག་འཇུག་གི་དབང་བཞི་ལེན་པ་དང་། ལུས་དང་ལོངས་སྤྱོད་དགེ་ཚོགས་ཀྱི་དངོས་པོ་ཐམས་ཅད་དངོས་ཡིད་ཀྱི་སྒོ་ནས་མཎྜལ་འབུལ་ལ་བཤགས་པ་དང་། སྲོག་བསླུ་དང་ཉེའུ་འདོན་སྦྱིན་བཏང་སོགས་ཀྱི་དགེ་རྩ་ཅི་འགྲུབ་ལ་འབད་པ་དང་། མཆོད་རྟེན་ཚད་ལྡན་དུ་བཞེངས་པའི་སཱཙྪ་གདབ་པ་དང་། དབང་བསྐུར་ཞུ་བ་དང་། མདོ་རྒྱུད་ཟབ་མོ་ལ་ཀློག་འདོན་བགྱིད་པ་དང་། བྱམས་སོགས་ཚད་མེད་བཞི་བསྒོམ་པ་དང་། ཞི་བའི་སྲེག་བླུག་རྒྱས་པའི་ཟ་བྱེད་རྡོ་རྗེ་མཁའ་འགྲོའི་སྦྱིན་བསྲེག་ལ་བརྩོན་པའི་མེས་སྦྱངས་པ་དང་། གཞན་གྱི་ཡོན་ཏན་བརྗོད་ཅིང་། གང་ལ་ཉེས་པ་དེ་ལ་བསྔགས་པ་ཕྱོགས་བཅུར་བརྗོད་ཅིང་ཡོན་ཏན་བསམ་པ་དང་། དེ་གང་ལ་དགའ་བས་མཉེས་པར་བྱ་བ་དང་། རྟེན་གསུམ་བྱིན་ཅན་མང་པོར་ཕྱག་དང་བསྐོར་བ་ལ་བརྩོན་པ་དང་། ཡིད་དམ་ལྷག་པའི་ལྷའི་གསང་སྔགས་བཟླ་བ་དང་། འབྲུ་གསུམ་གྱི་བར་དུ་བླ་མའི་མཚན་སྔགས་བཅུག་སྟེ་ཟླ་བ་དང་། ཟབ་མོའི་བསམ་གཏན་ཞི་ལྷག་གི་ཏིང་ངེ་འཛིན་བསྒོམ་པ་དང་། ཕུང་པོ་གསུམ་པའི་མདོ་ཉིན་མཚན་དུས་དྲུག་ཏུ་གདོན་པ་དང་། སྒྲིབ་སྦྱངས་ཀྱི་གཟུངས་སྔགས་བྱིན་ཅན་མང་པོར་ཁ་ཐོན་ལ་འབད་པ་དང་། ཁྱད་པར་སྤྱི་བོར་བླ་མ་རྡོ་རྗེ་སེམས་དཔའ་བསྒོམ་ནས་དམིགས་པའི་སྤྲོ་བསྡུས་གསལ་བས་ཡི་གེ་བརྒྱ་པ་བརྒྱ་རྩ་བརྒྱད་རེ་མི་ཆགས་པར་བསྒྲངས་ཤིང་སྟོབས་བཞིའི་ཡན་ལག་ཚངས་བ་བཤགས་པ་དང་། ན་རག་དོང་སྤྲུག་གི་ཆོ་གའི་གཞུང་སམ། ཉམས་ཆག་བཤགས་པའི་རྒྱུད་ཀྱི་རྒྱལ་པོ་དྲི་མེད་བཤགས་པའི་རྒྱུད་ལ་རྒྱུན་དུ་ཁ་ཏོན་འབད་པ་ནི་བཤགས་པའི་ནང་ནས་མཆོག་ཏུ་བསྔགས་པ་སྟེ། བཀའ་བརྒྱད་རང་ཤར་རྩ་རྒྱུད་ལས། འདི་ཉིད་དག་པར་དུས་གཅིག་ལ། །བརྒྱ་རྩ་བརྒྱད་བརྗོད་མ་ཡེངས་ན། །དུས་གསུམ་རྒྱལ་བའི་སྲས་སུ་འགྱུར། །ཞེས་དང་། ཇི་སྐད་དུ། གང་གིས་སྒྱུ་འཁྲུལ་ཞི་ཁྲོ་ཡིས། དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་ཀུན་ཀྱང་བྱང་གྱུར་ཏེ། །མཚམས་མེད་ལྔ་ཡི་སྡིག་ཀྱང་བྱང་། །ན་རག་གནས་ཀྱང་དོང་སྤྲུག་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་ཤིང་། དཀྱིལ་འཁོར་གྱི་ལྷ་དེ་རྣམས་ཀྱི་མཚན་ཐོས་པ་ཀྱང་ཉམས་ཆག་དག་ཅིང་ངན་སོང་ལས་ཐར་བ་ཡང་། དྲི་མེད་རྒྱལ་པོ་བཤགས་པའི་རྒྱུད་ལས། དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣལ་འབྱོར་ཕོ་མོ་རྣམས་ཀྱི་ཐོས་པ་ཙམ་གྱིས་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་སྐོངས་ཏེ། ཞེས་གསུངས་ཤིང་། དེའི་ཕྱིར་དུ་པཎ་ཆེན་པདྨ་དབང་གི་རྒྱལ་པོས། གླང་ཆེན་རབ་འབོགས་རྒྱུད་ནས་གསུངས་པ་ཡིས། །རྣལ་འབྱོར་སྤྱི་ཁྲུས་འགྱོད་ཚངས་དོང་སྤྲུལ་གི། །བཤགས་པས་མི་འདག་མེད་ཕྱིར་ཉམས་སུ་བླངས། །ཞེས་གསུངས་སོ། །གཞན་ཡང་ཚོགས་གཉིས་རྫོགས་ཤིང་བར་ཆད་ཐམས་ཅད་ཞི་བ་དང་། དངོས་གྲུབ་བསྒྲུབ་ཅིང་ཉམས་ཆག་ཐམས་ཅད་བསྐང་བའི་ཕྱིར་ཟླ་བ་བྱུང་ངོ་ཅོག་གི་ཉ་དང་གནམ་སྟོང་དང་། ཚེས་བརྒྱད་དང་། ཉི་ཤུ་ལྔ་དང་། ཚེ་བཅུ་དང་། ཉི་ཤུ་དགུ་སྟེ། འདི་དག་ལ་ཕྱི་རུ་མཁའ་འགྲོ་རྣམས་རྒྱུ་ཞིང་། ནང་དུ་རྩ་རླུང་ཁྱད་པར་ཅན་འདུ་བས་ཉེ་བའི་འདུ་བ་དང་། ཁྱད་པར་དུ་ཡར་ངོའི་ཚེས་བཅུའི་ཉིན་མོ་དང་། མར་ངོའི་ཚེས་བཅུ་སྟེ་ཉི་ཤུ་ལྔའི་མཚན་མོ་བསྒྲུབ་པ་པོའི་གནས་སུ་མཁའ་འགྲོ་གྲུབ་པ་ཅན་འདུ་བས་ལས་གང་ཡང་འགྲུབ་པའི་ཕྱིར་བསྙེན་སྒྲུབ་རྣམ་པ་བཞི་དང་། ཕྱི་ཡོ་བྱད་ཚོགས་ཀྱི། ནང་ཕུང་པོ་རྟེན་གྱི། གསང་བ་བྱང་ཆུབ་སེམས་ཀྱི་བསྐང་བཤགས་སོགས་ཚོགས་མཆོད་དང་བསྐང་བཤགས་ལ་འབད་པར་བྱ་སྟེ། ཀུན་མཁྱེན་ཆེན་པོས། ཉ་དང་གནམ་སྟོང་ཚེས་བརྒྱད་ཉི་ཤུ་དགུ། །ཚེས་བཅུ་ཡར་ངོ་མར་ངོའི་ཉིན་དང་མཚན། །བསྙེན་བསྒྲུབ་ཚོགས་མཆོད་བསྐང་བཤགས་འབད་པར་བྱ། །ཞེས་གསུངས་ཤིང་། དེས་ཟླ་བ་དེའི་རིང་ལ་ཉམས་པ་ཐམས་ཅད་སོས་པ་དང་། མཆོག་ཐུན་མོང་གི་དངོས་གྲུབ་ཐམས་ཅད་མྱུར་དུ་འགྲུབ་པར་བཤད་དོ། །ཁྱད་པར་གོང་དུ་བཤད་པ་བཞིན་ལས་དང་པོ་པ་རྣམས་ཀྱི་བསྒྲུབ་སླ་ལ་ཕན་ཡོན་ཆེ་བ་ཡིག་བརྒྱའི་བཟླས་བསྒོམ་ཉིད་གཙོ་བོར་བསྔགས་ཏེ། དེའི་ཚུལ་ཡང་། རང་ཐ་མལ་གྱི་སྤྱི་བོས་པད་དཀར་ཟླ་བའི་གདན་ལ་ཧཱུཾ་ཡིག་དཀར་པོའི་འཕྲོ་འདུ་ཡོངས་སུ་གྱུར་པ་ལས་རྩ་བའི་བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་རྡོ་རྗེ་སེམས་དཔའ་སྐུ་མདོག་སྟོན་ཟླ་ལྟར་དཀར་ཞིང་ཞབས་སེམས་དཔའི་སྐྱིལ་ཀྲུང་ཅན་ཐུགས་ཀར་ཟླ་དཀྱིལ་ལ་གནས་པའི་རྡོ་རྗེ་དཀར་པོ་རྩེ་ལྔ་པའི་ལྟེ་བར་ས་བོན་དང་། དེའི་མཐར་ཡིག་བརྒྱ་བཀླག་ཐབས་སུ་འཁོར་བར་དམིགས་ཤིང་། སྡིག་སྒྲིབ་ཉེས་ལྟུང་གི་ཚོགས་ལ་འགྱོད་སྡོམ་དྲག་པོས་ཡིག་བརྒྱ་སྔགས་དོན་དང་མཐུན་པར་གསོལ་འདེབས་ཀྱི་ཚུལ་དུ་བཟླས་པས་སྐུའི་ཆ་དང་ཐུགས་ཀའི་ས་བོན་སྔགས་འཕྲེང་དང་བཅས་པ་ལས་བདུད་རྩིའི་ཆུ་རྒྱུན་བྱུང་བས། རང་གི་སྤྱི་བོ་ནས་ཞུགས་ལུས་ཐམས་ཅད་སྡིག་སྒྲིབ་རྣམས་དུད་སོལ་གྱི་ཁུ་བ་དང་། ནད་རྣམས་ཁྲག་རྣག་ཆུ་སེར། གདོན་རྣམས་ཤིག་སྲོ་སྦལ་སྦྲུལ་སོགས་སྲོག་ཆགས་ཀྱི་རྣམ་པར་ཤེལ་ཧྲོམ་ཆུའི་བརྡས་པ་བཞིན་རྩ་ལམ་ཆུ་ལམ་བ་སྤུའི་ཁུངས་བུ་སོགས་ནས་ཐོན་པར་བསམ་པ་སྡིག་སྒྲིབ་བཀྲུ་བའི་དམིགས་གནད་དང་སྦྱར་ཞིང་། སླར་རང་ལུས་ཤེལ་ལྟར་དྭངས་པའི་རང་བཞིན་དུ་གྱུར་པ་བདུད་རྩིའི་ཐེམ་གྱི་གང་བས་ཤེལ་སྣོད་འོ་མས་གང་བ་ལྟར་དམིགས་པ་སྟེ་དམིགས་པའི་རྟེན་འབྲེལ་གྱི་སྒོ་ཁོ་ནས་ཀྱང་སྡིག་སྒྲིབ་སྦྱངས་བ་ལ་མཆོག་ཏུ་བསྔགས་སོ། །མཇུག་ཏུ་མགོན་པོ་ཞེས་གདུང་ཡུས་དྲག་པོས་མཚན་ནས་བོས་ཏེ། བདག་ནི་མི་ཤེས་རྨོངས་པ་ཡིས། །ཞེས་སོ། །གནོང་ཚིག་གིས་བཤགས་མཐར་རྡོར་སེམས་འོད་ཞུས་རང་ལ་བསྟིམ་སྟེ་འཁོར་གསུམ་མི་དམིགས་པའི་ངང་ལ་མཉམ་པར་འཇོག་གོ། །དེ་ཡང་སྡིག་སྒྲིབ་སྦྱང་བར་བྱེད་པའི་གཉེན་པོ་ནི་མཐོལ་བཤགས་ཏེ། ཉེས་པ་ལ་བསགས་པ་གསང་ཞིང་སྦས་ན། སྡིག་པའི་ས་བོན་བཏབ་པ་ལ་གཡོ་རྒྱུའུ་ཆུ་ལུད་འཛོམ་པ་སྟེ་ཇེ་འཕེལ་ཉིད་དུ་འགྲོ། སྐྱོན་དུ་མཐོང་ཞིང་མ་སྦེད་པར་བསྒྲག་ན་ཅུང་ཞིག་སྟོབས་འཕྲ་ལ་ནམ་ཡང་འཕེལ་བར་མི་འགྱུར་ཞིང་། དེའི་ཕྱིར་བཤགས་ཡུལ་གྱི་སྤྱན་སྔར་མ་གསང་བར་བརྗོད་པ་ནི་མཐོལ་བ་ཡིན་ལ། ལས་བསགས་པ་དེ་འགྱོད་སེམས་དྲག་པོས་སྐྱོན་དུ་ཁས་བླང་བ་བཤགས་པ་སྟེ། རང་ཉིད་ཉེས་སྐྱོན་དང་བཅས་པས་གནོང་ཞིང་ངོ་ཚ་བ་དོར་ནས་དྲང་པོར་སྨྲ་བའི་སྒོ་ནས་དག་ཚངས་མཛད་པར་སྙིང་ནས་གསོལ་བ་ནི་བཤགས་པའི་དོན་གྱི་སྙིང་པོའོ། །དེ་ཡང་བཤགས་པ་ཐམས་ཅད་ལ་སྟོབས་བཞི་ཚངས་དགོས་ཏེ། ཆོས་བཞི་བསྟན་པའི་མདོ་ལས། བྱམས་པ། བྱང་ཆུབ་སེམས་དཔའ་ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཐམས་ཅད་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན་འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པའི་སྟོབས་དང་། གཉེན་པོ་ཀུན་ཏུ་སྤྱོད་པའི་སྟོབས་དང་། སོར་ཆུད་པའི་སྟོབས་དང་། རྟེན་གྱིས་སྟོབས་སོ། །ཞེས་གསུངས་པའི་དོན་འདི་ཡང་ཚངས་པ་སྟེ། རྟེན་གྱི་སྟོབས་ནི་གཉིས་ལས། བཤགས་ཡུལ་གྱི་རྟེན་སངས་རྒྱས་ཀུན་འདུས་བླ་མ་རྡོ་རྗེ་སེམས་དཔའ། རང་རྒྱུད་ཀྱི་རྟེན་སྐྱབས་སེམས་དང་། རང་གཞན་གྱི་སྡིག་སྒྲིབ་དག་པར་གསོལ་བ་སྔགས་དོན་རྣམས་ལ་ཚངས། གཉེན་པོ་ཀུན་ཏུ་སྤྱོད་པའི་སྟོབས་ནི། ལྷ་བསྒོམ་ཞིང་སྔགས་བཟླ་བ་དང་སྡིག་སྒྲིབ་བཀྲུ་བའི་དམིགས་པ་རྣམས་དང་། སུན་འབྱིན་གྱི་སྟོབས་ནི། དུག་ཁོང་དུ་སོང་བ་ལྟར་ཉེས་བྱས་ལ་འགྱོད་པ་དྲག་པོའི་བློ་སྐྱེས་པ་དང་། སོར་ཆུད་པའི་སླར་ལྡོག་པའི་སྟོབས་ནི། ཕྱིན་ཆད་སྲོག་ལ་བབས་ཀྱང་མི་བགྱིད་པར་སྡོམ་པའི་སེམས་སོ། །དེ་ཡང་གནོང་འགྱོད་མེད་ན་བཤགས་བློ་ཡང་མི་སྐྱེ་ལ། འགྱོད་པ་ཤ་མ་ཞིག་སྐྱེས་ཕྱིན་ཆད་སྡོམ་སེམས་ཀྱང་ཤུགས་ལས་འབྱུང་བ་ཡིན་ནོ། །དེ་ལྟར་སྡིག་སྒྲིབ་དག་པའི་རྟགས་མ་བྱུང་བར་དུ་བཤགས་པ་ལ་འབད་པར་བྱ་སྟེ། རྟགས་ནི། ནམ་མཁའ་ལ་འཕུར་བ། ཁྲུས་བྱས་པ། ཆུ་བོ་ཆེན་པོ་བརྒལ་བ། གོས་དཀར་གྱོན་པ། ལུས་ལས་རྣག་ཁྲག་ཟག་པ། འབྲུ་སྐྱུགས་བྱས་པ་སོགས་ཉམས་ལམ་དུ་ལན་ཁ་ཡར་དུ་བྱུང་བ་དང་། དངོས་སུ་རིག་པ་སྔར་ལས་དངས་ཤིང་དམིགས་པ་གསལ་བ་དང་། ལུས་སྤངས་བ། དད་དང་ངེས་འབྱུང་སྙིང་རྗེ་སོགས་རྩོལ་མེད་དུ་རྒྱུད་ལ་སྐྱེ་བ་དང་། ལེ་ལོ་གཉིད་རྨུགས་ཆགས་སྡང་སོགས་ཆུང་དུ་སོང་ན་སྡིག་སྒྲིབ་དག་པའི་རྟགས་མཆོག་གོ། །དེ་ལྟར་བཟླས་ལ་བརྩོན་པའི་ཡོན་ཏན་ཡང་བཀའ་བརྒྱད་རང་ཤར་གྱི་ལུང་གོང་དུ་དྲངས་བ་དང་། དྲི་མེད་བཤགས་རྒྱུད་ལས་ཀྱང་། འདི་དག་དུས་གཅིག་ལ་ལན་བརྒྱ་རྩ་བརྒྱད་བཟླས་ན་ཉམས་ཆག་ཐམས་ཅད་བསྐོང་སྟེ། ངན་སོང་ལྟུང་བའི་ལས་ཀྱི་སྒྲིབ་པ་ལས་ཐར་བར་འགྱུར་རོ། །ཚེ་འདི་ལའང་དེ་བཞིན་གཤེགས་པ་རྣམས་ཀྱི་སྲས་ཀྱི་དམ་པར་དགོངས་ནས་བསྲུང་ཞིང་སྐྱོབས་པར་མཛད་ལ། ཤི་འཕོས་ནས་ཀྱང་བདེ་བར་གཤེགས་པ་རྣམས་ཀྱི་སྲས་ཀྱི་ཐུ་བོར་གྱུར་བར་གདོན་མི་ཟའོ། །ཞེས་དང་། ཕན་ཡོན་གཞན་ཡང་། མདོ་ལས། གང་ཞིག་སྡིག་པའི་ལས་བྱས་པ། །དགེ་བས་འགེབས་པར་བྱེད་པ་སྟེ། །སྤྲིན་བྲལ་ཉི་མ་ཟླ་བ་ལྟར། །འཇིག་རྟེན་འདི་ནས་ཀུན་ཏུ་གསལ། ། ཞེས་སོ། །དེ་ལྟ་བུའི་དམ་ཚིག་རིམ་པ་ནི་ཕྲ་ཞིང་ཟབ་ལ། གང་ཟག་རང་རྒྱུད་པ་རྣམས་གནས་སྐབས་སུ་ཡུད་ཙམ་ལའང་ཉོན་མོངས་པའི་ཀུན་རྟོག་ནི་ཕ་མཐའ་ཡས་ཤིང་། ཉེས་ལྟུང་ཡང་དེའི་རྗེས་འགྲོ་བཞིན་བསགས་པ་ཆོས་ཉིད་བཤགས་སྦྱངས་ལ་རྒྱུན་དུ་བརྩོན་དགོས་ཏེ། ཚོར་ཏེ་ཉམས་པ་དང་མ་ཚོར་ཏེ་ཉམས་པའི་སྡིག་ལྟུང་མཐའ་ཡས་པའི་ཕྱིར་རོ། །འོན་ཀྱང་ཡིག་བརྒྱ་བཤགས་རྒྱུད་སོགས་ལ་ཁ་ཏོན་དུ་བྱེད་པ་ན། མུ་ཅོར་སྨྲ་བ་དག །བཤགས་རྒྱུ་ཅི་ཐོན་ཟེར་བ་སོགས་ཀྱི་འཕྱ་ཁྲེལ་གྱི་གནས་སུ་བྱེད་པ་མཐོང་སྟེ། དེ་དག་ནི་རྡོ་རྗེ་ཐེག་པའི་ལམ་གྱི་ཆ་ཤས་རྟོགས་པ་ཅི་ལྟ། དགེ་སྡིག་གི་ཕན་ཉེས་ཅུང་ཟད་ཀྱང་མ་གོ་བའི་སྐྱོན་ཟད་དེ། མགོན་པོ་བྱམས་པས། ལོག་པའི་ལམ་ལ་མཐའ་མེད་ཕྱིར། །དེ་དག་འདིར་ནི་སྤྲོ་བྱ་མིན། །ཞེས་གསུངས་པ་ཉིད་དོ། །ཚུལ་འདིར་ལ་ལ་དག་བློ་རྨོང་གཏི་མུག་གི་མུན་པས་སྒྲིབ་ཏེ་དམ་ཚིག་ཅེས་པ་ཅི་ཡིན་འདི་ཡིན་ཆ་མ་འཚལ་བ་དང་། ལ་ལས་དམ་ཚིག་ཅེས་པ་བསྲུང་དགོས་རྒྱུ་ཙམ་གོ་རུང་བསྲུང་ཡུལ། བསྲུང་བྱ། བསྲུང་བྱེད། བསྲུང་ཚུལ། ཁེ་ཉེན་སོགས་ཀྱི་རྣམ་བཞག་གང་ཡང་མི་ཤེས་པར་རྨུས་ལོང་ཐང་དུ་འཁྱམས་པ་ལྟ་བུ་དང་། ལ་ལ་བསྲུང་བྱའི་རྣམས་བཞག་ཆ་ཙམ་བློ་ཡུལ་དུ་ལོང་ཀྱང་སྤང་ལེན་ཇི་བཞིན་པར་ལག་ཏུ་མ་ལེན་པའི་བག་མེད་ཀྱི་གཡེང་བ་དང་ཤེས་བཞིན་ཁྱད་གསོད་ཀྱི་འདོར་བ་སྟེ་རྒྱུ་འབྲས་ལ་རྩི་བཞག་མི་བྱེད་པ་དང་། ཉམས་ཤིང་ཆགས་པ་བྱུང་བ་དག་ཀྱང་དངོས་བརྒྱུད་ཐབས་ཀྱི་བརྩོན་པས་བཤགས་བློ་ལྟ་ཅི་འགྱོད་སེམས་ཙམ་ཡང་མེད་པར་ཅི་དགར་བཏང་སྙོམས་ཀྱི་བོར་བ་དང་། འགའ་ཞིག་རང་ལ་བཀའ་དྲིན་ཆེ་ཆུང་གི་རྗེ་འགྲོ་བཞིན་དམ་བསྲུང་བ་མ་ཡིན་པར་བླ་མའི་སྟོབས་དང་མངའ་ཐང་ལ་དཔག་སྟེ་དེ་དང་བསྟུན་འཇུག་གི་སྒོ་ནས་དམ་བསྲུང་ཚུལ་སོགས་མདོར་ན་ཚུལ་མཐུན་གྱི་སྤྱོད་པ་ནི་ཉུངས་ཞིང་། གང་ལྟར་བླ་མ་དམ་ཚིག་གི་གནང་བཀག་གི་རྣམ་དབྱེ་སྟོན་མཁན་དང་། སློབ་མ་དམ་ཚིག་གི་བསྲུང་སེམས་ཙམ་ཡོད་པ་གཉིས་ཀ་ཉིན་མོའི་སྐར་མ་ལྟ་བུར་མཐོང་བས་ཡིད་སྐྱོ་བ་ལས་ཀྱང་ཆེས་སྐྱོ་བའི་གནས་ཉིད་དོ། །དེའི་རྒྱུ་མཚན་གསང་སྔགས་ཀྱི་རྩ་བ་དབང་དང་། དབང་གི་རྩ་བ་དམ་ཚིག་ཅེས་དབང་དཔེ་ལག་ཏུ་བསྣམས་ཚད་ཀྱི་ཞལ་ནས་ཆུ་རྒྱུག་པ་ལྟར་གསུངས་ཀྱང་དེའི་དོན་ཤེས་མཁན་དང་། ཉམས་སུ་བླང་མཁན་ཇི་ཙམ་དུ་མཆིས། གཟུར་གནས་མཁྱེན་ལྡན་རྣམས་དགོངས་པས་གཟིགས་ཚེ། ཁོ་བོས་ཀུན་སློང་ཕྲག་དོག་ང་རྒྱལ་རང་མཐོ་ཁྱད་གསོད་འགྲན་སེམས་ཀྱིས་ཟུར་ཟ་ཡིན་མིན་དེས་རྟོགས་ཤིང་། དེ་ཡང་ཐོག་མར་རྟོག་གཞིབ་གང་ཡང་མེད་པར་གྲགས་པ་ཁོ་ན་ཡིད་བསྐྱོད་པའམ་དབང་ལུང་དགོས་པའི་རྒྱུ་མཚན། ཐོབ་པའི་ཕན་ཡོན། མ་ཐོབ་པའི་ཉེས་དམིགས་སོགས་ཀྱི་རྣམ་དབྱེ་གང་ཡང་མི་ཤེས་པར་བུམ་པ་ཕྱག་ཏུ་བཟུང་ཚད་ཀྱི་ཕྱག་ཞབས་སུ་མགོ་རྒུ་ས་སྙེད་ན་མ་སྙེད་དང་། གླེགས་བམ་གློག་ཚད་ཀྱི་གྲལ་དུ་རྣ་བ་གཏོད་རྒྱུ་བྱུང་ན་མ་བྱུང་ན་བྱེད་པར་སྣང་ཡང་། ཕྱིན་ཆད་ཅི་མཛད་ལེགས་མཐོང་། ཅི་གསུངས་ཚད་མར་བྱེད་པས་མཉེས་པ་གསུམ་གྱིས་ཞབས་ཏོག་སྒྲུབ་པ་ལྟ་ཞོག །རྗེས་སུ་དཔྱད་པ་སྣ་ཚོགས་སུ་ཞུགས་པ་དང་། ལོག་ལྟ་བཏང་སྙོམས་སོགས་ཀྱི་དབང་དུ་ཐལ་ཏེ་དམ་ཉམས་ཀྱིས་སྟེང་གང་བའི་ཚུལ་འདི་ལྟ་བུའི་ཤན་གྱིས་ཡུལ་ཁམས་ཀུན་ཏུའང་ནད་ཡམས་འཁྲུགས་རྩོད་སད་སེར་བཙའ་ཐན་སོགས་མི་འདོད་པའི་ཉེས་ཚོགས་ཆར་བཞིན་དུ་འབབ་པ་ཚད་མས་གྲུབ་མངོན་ནོ། །ཡང་འགའ་ཞིག་བླ་མའི་མཚན་ཉིད་བརྟགས་པའང་མ་ཡིན། དམ་ཚིག་གི་ཁེ་ཉེན་ཤེས་པ་ཡང་མ་ཡིན་པར་དེ་དང་གོ་ས་མཉམ་པའོ། །འདྲ་མཉམ་དུ་ཡོད་རེ་བ་ཞིག་གིས་རང་གིས་ལྟག་ཚུགས་ཁོ་ན་གཙོ་བོར་འཛིན་པའང་། མཐོང་མེད་སྣང་ཚུལ་ལ་ཚད་བཟུང་ཅི་ཡོད་ཏེ་བཏང་སྙོམས་འགའ་ཞིག་གིས་གནས་སོ། །སྔར་གྱི་སྐྱེས་བུ་དམ་པ་རྣམས་ཀྱིས་རང་རང་གི་བླ་མ་དམ་ཚིག་བསྲུང་བའི་ཚུལ་དང་། ད་ལྟ་ཡང་ཁོ་བོའི་སྐྱབས་གཅིག་པུ་ངེས་པ་དོན་གྱི་རྡོ་རྗེ་འཆང་ཆེན་པོ་རིག་འཛིན་རྒྱལ་བའི་དབང་པོ་ཚེ་དབང་ནོར་བུ་སོགས་སྐྱེས་ཆེན་འགའི་རང་གི་བླ་མར་བརྟེན་ཕྱིན་གོ་ས་མཐོ་དམན་ལ་མ་ལྟོས་ཕྱག་དང་ལྡང་བ་ཞེས་བཀུར་བསྟི་ཡོན་ཏན་བརྗོད་པ་སོགས་ཀྱི་རྣམ་ཐར་ནི་བློའི་ར་བས་གཞལ་བའི་ཡུལ་ལས་འདས་ཀྱང་། དབང་བསྐུར་ཆོས་འཆད་ཀྱི་ངང་ཚུལ་ཇི་སྙེད་པས་འགྲོ་བློ་བསྒྱུར་ཞིང་ཕུགས་ཡུལ་བླ་མི་རྣམ་ཐར་ལ་བློ་མི་གཏོད་ཅིང་ཡིད་མི་བསྟོན་པ་འགའ་ལ་དཔག་ན། རང་བཞིན་ཤུགས་ཀྱི་དམ་ཚིག་ལ་འགལ་ཉམས་བྱུང་ན་མ་གཏོགས་བླ་མ་དང་རྒྱུ་འབྲས་ལ་བརྩི་བཞག་དོར་བའི་བཏང་སྙོམས་མེད་ཁུལ་དང་། བླ་མའི་རྣམ་ཐར་དྲན་པས་དད་པའི་སྤུ་ལོང་གཡོ་ཞིང་གདུང་ཤུགས་ཀྱི་མཆི་མ་འ ཁྲུགས་པ་སྐབས་རེས་འགའ་མ་ཡིན་པར་འཆར་ཞིང་བློ་སྙིང་བྲང་གསུམ་གཏོད་པའི་བསམ་པ་ནི་རྒྱུན་དུ་ཡོད་པ་བཅས་དང་དམ་ཅུང་ཟད་ཡོད་གྲས་སུ་ཆུད་དམ་སྙམས་པ་ཡང་རང་བློ་ལྐོགས་སུ་མ་གྱུར་པ་རྒྱལ་བ་སྲས་བཅས་ཀྱི་མཁྱེན་པའི་ཡུལ་ཏེ་དེ་ཡང་གང་གི་ཚད་མེད་པའི་བཀའ་དྲིན་དང་རྒྱུད་བྱིན་གྱིས་རླབས་པའི་ཐུགས་རྗེ་ཁོ་ན་ལས་བྱུང་བར་སེམས་ཏེ་རང་གི་གནས་ཚུལ་ཞར་བྱུང་དུ་སྨོས་ལ་འདིར་མཐོང་ཡུལ་གྱི་ཁ་དོག་བཞིན། དྲང་པོའི་གཏམ་གྱི་བརྗོད་ཚིག་སྣ་ཚོགས་སུ་སོང་ཡང་གཅིག་ཤོས་དག་རང་སྐྱོན་ལ་བརྟགས་པའི་བློ་སེམས་ནང་དུ་ཁ་བཟློག་ལ་ཟུག་རྒྱུའི་རྐྱེན་དུ་མི་འགྱུར་པ་ཞིག་གསོལ་བ་སྙིང་ནས་འདེབས་པ་མཆོག་དམན་ཀུན་གྱིས་དགོངས་འཚལ་ལོ། །དེ་ལྟར་དམ་ཚིག་རྣམ་གྲངས་རྒྱ་མཚོའི་གཏེར། །ཇི་སྙེད་དོན་ཟབ་ཇི་བཞིན་རྟོགས་དཀའ་ཡང་། །རྒྱུད་དང་དེ་འགྲེལ་བླ་མའི་མན་ངག་གིས། །བདག་རྒྱུད་བསླན་མཐུས་ཅུང་ཟད་ཙམ་འདི་གླེང་། །འོན་ཀྱང་དེངས་སྐབས་སྙིགས་མའི་རྣལ་འབྱོར་གྱི། །བླ་མ་ཕལ་ཆེར་འདུ་འཛིའི་གཡེངས་བས་ཁྱེར། །གཞན་སྣང་བློ་འབྲིང་སྒྱུ་མའི་འཁྲུལ་འཁོར་གྱིས། །ཚེ་འདིའི་འདོད་ཞེན་ཁེ་གྲགས་དོན་དུ་གཉེར། །རྒྱུད་དང་གདམས་པའི་གནད་རྣམས་ཐོས་བསམ་གྱིས། །གཏན་ལ་མ་ཕེབས་ལག་ལེན་འཆོལ་ཉོག་སྤྱོད། །དམ་ཚིག་ལྟ་བ་སྔགས་དང་ཕྱ་རྒྱ་རྣམས། །གནད་དུ་མ་སོང་ལྷ་སྔགས་རྟག་ཆད་འཛིན། །བླ་མ་རྒྱང་བོར་རང་ཆེ་ཐབས་ཀྱིས་འདོན། །རྒྱུད་པའི་སྐང་ཚུགས་མི་ཟིན་རིས་མེད་རློམ། །ཁ་བསགས་ཚུལ་ཆོས་གཡོ་རྒྱུའི་ཡོ་ལངས་དེས། །བླུན་རྣམས་མགུ་ལ་རང་ཡང་གཟེངས་སུ་མཐོ། །སློབ་མ་ཕལ་ཆེར་ངན་རྟོག་དུག་ཆུའི་མྱོས། །མཛད་པའི་ཆ་ཤས་ཙམ་ལའང་རྟོགས་དཔྱོད་ཞུགས། །ཡོན་ཏན་མི་མཐོང་སྐྱོན་ལ་མཛུབ་རིས་བཙུག །མཉམ་འགྲོགས་སྤྱོད་པས་ཉེས་ལྟུང་ཞར་དུ་བསགས། །ཟས་ནོར་འབག་པ་ཚེ་འདིའི་སྐྱོང་བྲན་ལ། །བཀའ་དྲིན་སྙིང་པོ་ཡིན་པའི་ངེས་ཤེས་ཀྱིས། །དད་པའི་རྣམ་འགྱུར་དེ་ཡིས་རང་གཟུགས་བསྟན། །ཕྱི་མའི་དོན་ལ་བསམ་གཞིག་རྒྱང་དུ་བསྲིངས། །དཔོན་སློབ་ཕལ་ཆེར་འར་འུར་མཛེས་སྤྱོད་ཀྱི། །ཀུན་རྟོགས་ཚོན་རིས་འཇའ་ལ་ཞེན་ཅིང་འཐས། །གཅིག་ཤོས་གཉིས་དྲན་ཀུན་སྤྱོད་མང་པོ་ཡིས། །ཟ་ཟའི་གཡེངས་བས་རང་སྣང་བསླུ་ཞིང་བྲིད། །ཚུལ་དེས་གང་ནས་སེམས་ཀྱང་ཆེ་ཕྲ་ཀུན། །བཟང་པོའི་བསླབ་བྱར་ཡིད་བསྟོན་མི་འཇུག་པས། །གཡོ་འཕྲུལ་གཙོ་བོར་འདོན་པའི་ཐབས་མཁས་ན། །རྟ་མཆོག་དུལ་བ་བཞིན་དུ་གར་ཡང་བྲིན། །འཕྲལ་ཕུགས་ཆོས་ལ་དཀྲི་བའི་བསམ་སྤྱོད་གང་། །སྐྱུགས་ནད་ཅན་ལ་རོ་བརྒྱའི་ཁ་ཟས་བཞིན། །དྲི་ཙམ་བསྟན་ཀྱང་སེམས་ལ་མི་འབབས་པས། །མི་སྨྲ་བ་ཉིད་ཡང་ཟབ་གནད་དུ་གོ། །དེ་ཕྱིར་སྙིགས་དུས་མི་ལ་ཕན་སེམས་ཀྱིས། །ཉེས་ལས་ལྡོག་ཀྱང་ཡོན་ཏན་སྐྱོན་མཐོང་ཆོས། །མངའ་ཐང་ཕོངས་པ་བདག་འདྲའི་ལེགས་བཤད་རྩ། །དྲེགས་པས་བརྒྱག་པའི་ནོར་སྐྱོང་སྤྱོད་སྙམས་མེད། །འོན་ཀྱང་རང་དང་རིས་མཐུན་སྐལ་ལྡན་འགར། །ཕན་ཕྱིར་ཙམ་འདི་དྭངས་བས་ཉེས་ལོངས་ལས། །སྨིན་གྲོལ་ལམ་སྟོན་རྡོ་རྗེའི་སློབ་དཔོན་མཆོག །གཙུག་གི་ནོར་ལྟར་བརྟེན་ལ་གསོལ་བ་ཐོབ། །དེ་ཡང་རྩ་ལག་བླ་མའི་རྣམ་དབྱེ་བཞན། །བཀུར་ཚུལ་རིམ་པས་གཡོ་ཟོལ་མེད་པ་ཡིས། །སྒོ་གསུམ་དད་བརྟེན་ཁྱད་པར་སྐུ་གསུམ་སེམས། །ངོ་སྤྲོད་མཆོག་དེ་སྙིང་ལྟར་བཀུར་བར་མཛོད། །ལྷ་སྔགས་ཏིང་འཛིན་ཡེ་ཤེས་རོལ་པ་ཡིས། །སྣང་གྲགས་རྟོགས་ཚོགས་ཆོས་སྐུར་རྟོགས་དཀའ་ཡང་། །མོས་སྤྱོད་ཀྱིས་ཞུགས་ལྷ་བསྒོམ་སྔགས་བཟླ་ཞིང་། །རྗེས་དཔག་ཚད་མས་གཏན་ལ་ཕེབ་པར་མཛོད། །གསང་སྔགས་ལམ་ནི་གསང་བས་གྲུབ་པས་ན། །གསང་བ་བཅུ་པོ་ཚུལ་བཞིན་བསྟན་སྲུངས་ཏེ། །ཉམས་ལེན་རྟག་ཚད་ཁ་ཆོས་མ་ཁྱེར་བར། །མཆོག་ཐུན་དངོས་གྲུབ་རིང་མིན་བསྙེས་པས་འབད། །མཆེད་ཀྱི་དམ་ཚིག་སྤྱིར་བཏང་དམིགས་གསལ་གྱིས། །རྣམ་དབྱེ་མང་ཡང་ཁྱད་པར་ནང་འདྲེས་སྤུན། །བླ་མ་དཀྱིལ་འཁོར་གཅིག་གི་བསྡུས་གྱུར་གང་། །བརྩེ་དུངས་རྒྱུན་ཆད་མེད་པས་སྐྱོངས་པར་མཛོད། །སྤྱིར་ན་དམ་ཚིག་རྒྱ་ཆེ་གྲངས་མང་ཞིང་། །སེམས་ཀྱི་རྒྱུན་ཙམ་ལའང་རྟག་ཁྱབ་པས། །ཉེས་བྱས་ལྟུང་བ་ཞལ་དུ་འབྱུང་བའི་ཕྱིར། །བཤགས་པའི་ལས་ལ་རྟག་ཏུ་བརྩོན་པ་གནད། །གཞན་ཡང་དལ་འབྱོར་རྟེན་འདི་རྙེད་དཀའ་ཞིང་། །ལན་གཅིག་ཐོབ་པའང་སྟེས་དབང་མ་ཡིན་པས། །གསེར་གླིང་སྟོང་ལོག་གྱུར་ན་ཨ་རེ་འགྱོད། །སྒོ་གསུམ་ཆོས་ཀྱི་ཕྱོགས་སུ་འབད་འབུང་ཐོན། །དོ་ནུབ་ཙམ་ཞིག་མི་འཆིའི་གདེངས་མེད་ནས། །ཡུན་རིང་སྡོད་པའི་གྲབ་ཤོམ་མང་པོ་ཡིས། །རང་གི་རང་ཉིད་བསླུ་ན་ཕུང་ཚབས་ཆེ། །དེ་བས་བློ་སྣ་ནང་དུ་སྐྱིལ་བར་གྱིས། །དཔེར་ན་རང་ལུས་ལས་བྱུང་གྲིབ་མ་བཞིན། །དཀར་ནག་ལས་བསགས་འབྲས་བུ་རང་ཉིད་དང་། །ལྷན་ཅིག་འབྲེལ་བས་སྡིག་སྤངས་དགེ་བསྒྲུབ་ལ། །ནན་ཏན་འབད་ནས་ཐར་པའི་ལམ་སྙེགས་འཚལ། །མདོར་ན་ཆོས་ཀུན་ཉམས་ལེན་སྙིང་པོ་ནི། །སྡོམ་པ་གསུམ་གྱི་ལམ་ཡིན་དེ་ལས་ཀྱང་། །སྔགས་ཀྱི་དམ་ཚིག་ཡང་སྙིང་ཐུན་པ་སྟེ། །ལུས་སྲོག་ལྟོས་མེད་འབད་པས་བསྲུང་འཚལ་གྱི། །དེ་སྐད་སྨྲས་པ་གྲོང་ཚིག་རྙོགས་མ་ལ། །ལེགས་བཤད་ཡན་ལག་བརྒྱད་ཀྱིས་ཕོངས་ན་ཡང་། །ལྷག་བསམ་དཀར་པོས་ཆེད་དུ་སྤེལ་བ་གང་། །ཡིད་ཀྱི་ཡོལ་གོར་སྨོན་ན་དོན་ཆེན་གྲུབ། །འོན་ཀྱང་བློ་མིག་དག་པ་འཕངས་པའི་ས། །རྙེད་པ་ལྟར་ཅི་ཚོགས་སྦྱོར་ལམ་སྣེ་ཙམ། །མ་ཆུད་རྨོང་བློའི་སྐྱོན་གྱི་ཆ་ཤས་ཀུན། །བླ་མ་ལྷ་དང་མཁའ་འགྲོར་སྙིང་ནས་བཤགས། །འདིར་འབད་རབ་དཀར་ལེགས་བྱས་བསོད་ནམས་མཐུས། །མ་ནོར་དམ་ཚིག་སྤང་ལེན་རྟག་སྤྱོད་ཅིང་། །སེལ་མེད་རྒྱུད་པ་འཛིན་པའི་བུ་སློབ་ཀྱིས། །ཕྱོགས་ཀུན་ཡོངས་ཁེངས་ཆོས་དཀར་འཕྲིན་ལས་རླབས། །ཆེས་འཕྲོའི་བསྟན་འཛིན་ཚོགས་ཀུན་སྐུ་ཚེ་བརྟན། །བཞེད་པ་གཅིག་མཐུན་མདོ་རྒྱུད་མན་ངག་གིས། །དགོངས་དོན་ཟབ་མོའི་ཤིང་རྟས་རྒྱ་ཆེན་འགྲོ། །སྲིད་མཚོ་ལས་སྒྲོལ་གཏན་བདེའི་སར་སྐྱོལ་ཤོག །ཁྱད་པར་ངེས་གསང་ཆོས་ཀུན་སྙིང་པོའི་བཅུད། །རྡོ་རྗེ་སྙིང་པོའི་བསྟན་པ་ཀུན་ནས་ཀུན། །གསལ་ཞིང་གང་པས་ལོག་སྨྲ་བདུད་སྡེའི་དཔུང་། །མ་ལུས་ལམ་འདིའི་གྲོམ་ལ་རྒྱལ་ཀུན་གྱིས། །འཕྲིན་ལས་བྱེད་པོར་སྐྱེས་དང་ཚེ་རབས་ཀུན། །བདག་ཉིད་གྱུར་ཏེ་སྤངས་རྟོགས་མཐར་ཕྱིན་པའི། །མགོན་པོ་སྐུ་གསུམ་ངོ་བོ་མྱུར་འགྲུབ་ཅིང་། །སྲིད་པའི་གནས་ཀུན་གཏན་ནས་སྟོང་བྱེད་ཤོག །ཞེས་དམ་ཚིག་གི་རིམ་པ་འདི་ལྟ་བུ་ཞིག་དགོས་ཞེས་ཤར་རྒྱལ་མོ་རོང་གི་བླ་མ་བསོད་ནམས་ཡེ་ཤེས་ཀྱི་ནན་ཏན་ཆེན་པོ་གསུང་གིས་བསྐུལ་བར་མཛད་ཅིང་། དེའི་རྗེས་འཐུད་དུ་གྲོགས་དམ་པ་འགས་ཀྱང་བསྐུལ་མཛད་ནའང་། ཇི་ལྟར་དེངས་སང་དུས་དབང་གིས་གལ་ཆུང་ཆོས་ལ་བྱེད་པའི་རྣམ་ཐར་ཤ་སྟག་གིས་སྔོན་གྱིས་མཁས་གྲུབ་དུ་མའི་ལེགས་བཤད་རྣམས་ཀྱང་ཉིན་གཅིག་གི་ཁ་ཕྱེ་བའི་རྟོགས་དཔྱོད་ཙམ་ལ་བློ་འཇུག་མཁན་མེད་པར་ངེད་ཀྱི་སྐྱེ་བ་གོང་མའམ། བླ་མ་གོང་མ་ཕྱག་དཔེ་ཡིན་ཞེས་ཁྱིམ་སྦུགས་སུ་བརྩེགས་པ་ཁོ་ན་གཙོ་བོར་བཟུང་བ་ལས། རང་ཉིད་ཀྱི་ཐོས་བསམ་བྱེད་ཅིང་གཞན་དེ་ལ་སྦྱོར་བ་སོགས་མེད་པ་དང་། གལ་སྲིད་སྦྱོར་ཀྱང་བློ་ཡིད་ཆོས་ལ་འཇུག་པ་དང་བྲལ་ཚེ། ངན་པ་བདག་ལྟ་བུའི་རྩོམ་པས་གཞན་ཕན་གྱི་ནུས་པ་ཟད་ཀྱང་། རེ་ཟུང་ཙམ་གྱིས་ཉམས་སུ་ལེན་པ་སྲིད་མཐའ་མ་བཀག་ཕྱིར་དང་། བསྐུལ་བ་པོའི་གསུང་མི་གཅོག་ཆེད་དུ་གྲུབ་དབང་ནམ་མཁའི་སྙིང་པོའི་སྐྱེ་བ་གོང་འོག་གི་ཐུགས་རྗེས་རྒྱུད་བརླན་རྗེས་སུ་འཇུག་པ་སྟེ། ས་ལ་ཀྱི་ཉེར་ལེན་ལ་སྤྲུལ་སྐུའི་མིང་གི་སྒྲོ་འདོག་འཕྲིན་ལས་བསྟན་འཛིན་པས་ཀཿཐོག་རྡོ་རྗེ་གདན་གྱི་བླ་བྲང་གི་ཡང་རྩེར་གྲུབ་པར་སྦྱར་བའི་ཡི་གེ་རང་ཉིད་ཀྱི་སུག་ལས་སུ་བསྟར་བ་སྟེ་དགེ་བས་རང་གཞན་ལམ་ཞུགས་རྣམས་དམ་ཚིག་སྤང་ལེན་འདོར་མེད་དུ་བརྩོན་པའི་འབྲས་བུ་མཉམ་རྫོགས་ཆེན་པོའི་དམ་ཚིག་གི་དོན་མངོན་སུམ་དུ་རྟོགས་པའི་རྒྱུར་གྱུར་ཅིག ༈ །སརྦ་མངྒ་ལམ།། །།