ཀློང་ཡངས་བདེ་འབྱམས་ཀྱི་འགྲེལ་པ།

ཀློང་ཡངས་བདེ་འབྱམས་ཀྱི་འགྲེལ་པ་བཞུགས་སོ།། བཅོམ་ལྡན་འདས་དཔལ་ཀུན་ཏུ་བཟང་པོ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐེག་པ་ཆེན་པོའི་ལུགས་ཀྱི་རྗེས་སུ་འགྲོ་བའི་མན་ངག་གི་རྒྱལ་པོ་བྱང་ཆུབ་ཀྱི་སེམས་ཀློང་ཡངས་པའི་དཀྱིལ་འཁོར་འདི། དོན་རྣམས་གསུམ་གྱིས་བཤད་དེ། རྩ་བའི་དོན་དང་། དགོས་ཆེད་ཀྱི་དོན་དང་། ཚིག་གི་དོན་རྣམ་པར་ཕྱེ་བའོ། །དེ་དག་གི་ལུང་ཁོང་ནས་གདོན་པར་གསུངས་སོ། །དེ་ལ་རྩ་བ་བདེ་འབྱམ་སྡུག་བསྔལ་དབྱིངས་ཕྱུག་པ་ག་ལ། ཞེས་བྱ་བ་ལ་སོགས་པས་རྩ་བའི་དོན་སྟོན་ཏེ། བདེ་བ་ནི་གཞན་ལས་འགྲུབ་སྟེ། གང་སྡུག་བསྔལ་ནི་ཕུང་པོ་ལ་སོགས་པ་ཁོ་ནའོ། །དེ་དག་གིས་འཆིང་བ་དང་། ཞེན་པའི་གདུང་བ་དང་། ཕྱོགས་གཞན་དུ་གདུང་བའི་ཕྱིར་ཏེ། ཐ་སྙད་ལས་རྒྱས་པར་བསྟན་ཏོ། །དེ་དག་རིལ་རྒྱུ་དང་ངོ་བོ་དང་། མཐའ་ཀར་དག་པ་དང་། དེ་ཉིད་བསྙེམས་པས་འདོད་པ་དང་བྲལ་བ་ནི། བདེ་བ་ཞེས་བྱ་བའི་དོན་ཏོ། །དེ་ཉིད་ཀྱི་དུས་ན་ཀློང་གི་དོན་གྱིས་སེལ་མེད་པ་དང་། མང་བ་དང་རྒྱ་དང་བྲལ་བས་མིང་གཉིས་ངེས་པར་འགྲུབ་སྟེ། གང་རིལ་རྫོགས་པ་ཉིད་ཀུན་ཏུ་ཡང་གསལ་བ་ནི་མི་མཐུན་པ་གཉིས་ཏེ། ལྟ་བ་པོ་དག་པ་དང་། མ་དག་པའི་ཕྱིར་རོ། །གཞིའི་དོན་ནི་རྒྱུ་དང་ཡུལ་དང་ཕྱོགས་གཞན་དུ་མི་སྟོན་ཏོ། །དངོས་པོ་གཅིག་པའི་ཕྱིར། བདག་དབྱེར་མེད་ཅེས་གསུངས་སོ། །དབྱེར་མེད་ལྷུན་རྫོགས་ཐིག་ལེ་དབྱིངས་ཉིད་ཆེ། །ཞེས་བྱ་བ། དེ་དག་འབྱེད་པ་ནི་ལྟ་བ་པོའི་དབང་ཙམ་མོ། །དེ་དག་གཅིག་པའི་དོན་ཡང་རྒྱུའི་ངོ་བོ་ཉིད་ཀྱིས་ལུས་ལ་སོགས་པ་ཉིད་རྗེས་སུ་མཐུན་པའི་འབྲས་བུ་རྫོགས་པར་ཡེ་ནས་གནས་པ་ཉིད་དོ། །དེ་ཉིད་བསམ་པ་གཉིས་ཀྱང་གུད་དུ་དཀྲི་མི་ནུས་པས་སྤྲོས་པ་ཐམས་ཅད་ཡོངས་སུ་བཅད་པ་ནི། ཡེ་ཤེས་ཆེན་པོ་ཉིད་ཀྱི་ཕྱིར། །རང་གི་མཚན་ཉིད་ངེས་པར་མི་རྙེད་པས། །དེ་རྟོགས་པའི་རྣལ་འབྱོར་པ་ནི་ཐམས་ཅད་བདག་ཏུ་གྱུར་པའི་ཕྱིར། རྒྱལ་པོ་ལྟ་བུར་གསུངས་པས། རང་བཞིན་ངང་དུ་ཕེབས་པས་བདག་ཉིད་ཆེ། བྱ་བྱེད་རྩོད་པ་མེད་པས་ཐིག་ལེའི་དོན། ཞེས་གསུངས་སོ། །བསྐྱེད་པ་མི་མངའ་ཡེ་ཤེས་རིན་པོ་ཆེ། །ཞེས་བྱ་བ་ནི་ཡང་དག་པའི་དཀྱིལ་འཁོར་གྱི་མཚན་ཉིད་གསལ་བར་བྱ་སྟེ། བདག་ཅག་ནི་ཐ་སྙད་པའི་རྒྱུ་རིལ་ནི་ངེས་པར་སྤོས་ཏེ། དཔེར་ན་རིན་པོ་ཆེ་ནི་འདུ་ཤེས་མེད་པར་རིལ་རེ་བ་སྐོང་ཡང་ཡོངས་སུ་བརྩལ་ན་མི་རྙེད་དེ། འཕེལ་འགྲིབ་མེད་པ་ནི་དོན་མ་གྲུབ་པའོ། །དེ་བཞིན་དུ་ཡེ་ཤེས་ཆེན་པོ་ནི་ངེས་པར་རྗེས་སུ་མཐུན་ཏེ་ཤེས་པར་སླའོ། །དེ་དག་འབྲས་བུ་ཉིད་ཀྱང་དེ་ཉིད་ཀྱི་ངོ་བོའི་ཕྱིར་བཙལ་བས་རིས་སུ་མི་རྙེད་དེ། ལྟ་བ་པོ་ཕྱོགས་གཅིག་གི་དབང་གིས་བདེན་པར་གསུངས་ཀྱི་གལ་ཏེ་རྟག་ན་འཁོར་བ་ཡང་ངེས་པར་བདེན་པས། ཐིག་ལེ་ཆེན་པོ་ལས་ཉམས་ཤེས་བྱའོ། །བྱ་བ་མེད་པས་ལྷུན་རྫོགས་ཐིག་ལེ་ཆེ། །ཞེས་བྱ་བ་ནི། དེ་གཉིས་ག་ཡང་ལྟོས་ནས་མ་གྲུབ་པ་ནི། དངོས་པོ་གསུམ་ཡོངས་སུ་བཅད་དེ། །གཡུང་དྲུང་གི་ལྷུན་ལ་བཞུགས་པས། ཕྲིན་ལས་ལྷུན་གྱིས་གྲུབ་པ་ཞེས་བྱ་སྟེ། བྱ་བ་ཐམས་ཅད་སྤངས་པ་ནི་ཐིག་ལེ་ཆེན་པོའོ། །འོ་ན་དེ་དག་ནི་བདག་ཅག་ལས་གུད་དུ་གྱུར་པས་ལམ་དང་བྲལ་ལོ་བར་བདོགས་པ་ལ། ཐམས་ཅད་མ་བཀག་དབྱེར་མེད་བདག་གི་རྒྱུ། །ཞེས་གསུངས་ཏེ། དངོས་པོ་གཉིས་ཀྱིས་བསྡུས་པ་རིལ་བདེན་པ་གཉིས་ཀྱི་གཞུང་གིས་ཀྱང་མ་སྤངས་ན། ངོ་བོ་ཉིད་ལྟ་སྨོས་ཀྱང་ཅི་དགོས་པས་དབྱེར་མེད་ཅེས་བྱའོ། །ལམ་པ་དག་གིས་དགོས་ཆེད་དང་། གཞི་དང་མཐུན་པ་དང་ཐ་སྙད་ཀྱིས་ཐ་སྙད་དཀྲི་བའི་ཕྱིར་ཏེ། དེ་ལ་ཁས་ལེན་པ་ནི་ཡེ་ཤེས་རིན་པོ་ཆེ་སྟེ་བྱང་ཆུབ་པོ། །དེའི་འབྲེལ་པ་ཡང་མཐོང་བར་བྱེ་པ་སྟེ། ས་བོན་ནི་ནམ་ཡང་བཀག་པས་བཤད་ཟིན་ཏོ། །བྱེད་པ་པོ་ཡང་བསྒོམ་པའི་ས་མི་རྙེད་ཕྱིར་བསྒོམ་པ་དེ་དག་རྙེད་པར་མི་འགྱུར་ཏེ། སེམས་ཀྱི་སྤྱོད་ཡུལ་ཤེས་པས་དེ་ལ་དེ་དག་ཆོས་རྣམས་ཀྱི་ནི་ཆོས་ཉིད་ཡིན། །ཞེས་གསུངས་སོ། །སྒྲ་གཙོར་བྱེད་པའི་མིང་གི་རྣལ་འབྱོར་པ་དག་འདི་དག་ལམ་ཕྱོགས་གཅིག་གི་ཕྱིར། ནམ་ཞིག་དོར་བ་སྟེ་གྲུ་ལྟ་བུའོ། །ཐ་མི་དད་པའི་ཕྱིར་ས་གསེར་ལྟ་བུར་གཞག་གི། འབྱུང་ཁུངས་དག་ཏུ་སྨྲ་བ་ནི། གནས་སྐབས་ཀྱི་རིགས་པ་མ་ཡིན་ནོ། །དེ་ཉིད་བསྟན་པའི་ཕྱིར། དོན་དམ་ཉིད་དུ་སེམས་པ་ཆེ། །ཞེས་གསུངས་ཏེ། དེ་དག་ཡེ་ཤེས་ཀྱི་དོན་གྱིས་མ་སྐྱེས་པ་དང་ལྷུན་གྱིས་གྲུབ་པའི་ཕྱིར། དོན་དམ་པ་ཡོངས་ཀྱི་ངོ་བོ་ནི། རྡོ་རྗེ་སེམས་དཔའ་བྱང་ཆུབ་ཀྱི་སེམས་ཏོ། །མཐའ་ཐམས་ཅད་ལས་འདས་པས། སྤང་བ་དང་བླང་བ་མེད་དོ། །བསྒྲུབ་ཏུ་མེད་པས་ཡེ་ནས་གནས། །ཞེས་བྱ་བ་བདག་ཅག་གི་བསྒྲུབ་བྱ་ནི་ཆོས་ཀྱི་སྐུ་སྟེ། དེ་ཉིད་མཚན་ཉིད་ལོགས་སུ་གྲུབ་པ་མེད་པ་ནི། བཤད་པའི་ཚུལ་རིལ་ལ་སྣུབས་པས་གུད་ན་མེད་པ་ལ་གནས་ཞེས་ཐ་སྙད་དུ་འདོགས་ཏེ། དེ་ཡིན་པའི་སངས་རྒྱས་པའི་ཆེ་བའོ། །བརྩལ་དུ་མེད་པས་མངོན་གསུམ་དབྱིངས། །ཞེས་པ། ཐམས་ཅད་ལ་དེ་ཉིད་སྣུམས་པ་ཡང་མཐའ་དབུས་དང་བྲལ་བ། ངོ་བོ་ཉིད་བཙལ་ན་ཡོངས་སུ་མི་སྙེད་པ་ནི། མཐའ་རྣམས་ཀྱིས་མ་བསྒྲིབས་པར་རང་རིག་པ་ལ་གསལ་ཏེ། ཐམས་ཅད་དུ་བདལ་པ་ནི་ཆོས་ཀྱི་དབྱིངས་སུ་སངས་རྒྱས་པའི་ཆེ་བའོ། །སྨོན་དུ་མེད་པས་རང་ལ་རྫོགས། །ཞེས་བྱ་བ་དེ་ནི། གསལ་བ་ཉིད་ཡེ་ཤེས་ཆེན་པོ་ཡིན་པའི་དོན་གྱིས་ཐམས་ཅད་ཀྱང་ལྷུན་གྱིས་གྲུབ་པ་ཀུན་ཏུ་སྣང་བས་སྨོན་ལམ་དང་བྲལ་བ་ནི་མངོན་པའི་སངས་རྒྱས་ཆེ་བའོ། །ཐ་སྙད་མེད་པའི་རྣལ་འབྱོར་བདག །ཅེས་བྱ་བ་དེ་དག་སྤྱོད་པ་དང་ཡུལ་ཡོངས་སུ་བཅད་དེ། རིལ་བདག་ཏུ་གཅིག་པ་ནི་ཤིན་ཏུ་རྣལ་འབྱོར་ཏེ། གང་གིས་མྱོང་བ་ཡང་སྤྱོད་ཡུལ་དང་བྲལ་བས། བདག་ཉིད་ཆེན་པོ་སངས་རྒྱས་པའི་ཆེ་བའོ། །གོ་འཕང་གཅོད་པས་ཆོས་ཀྱི་དབྱིངས། །ཞེས་བྱ་བ་གང་དག་ཐིག་ལེ་ཆེན་པོ་ཉིད་ཀྱི་ཕྱིར་དེ་ཉིད་ཀྱིས་གྱུར་བ་ནི། སྤྲོས་པས་ཕྱེ་བ་མ་ཡིན་གྱི། སྤྲོས་པ་མེད་པས་ཕྱེ་བས་སངས་རྒྱས་སུ་ངེས་ཚིག་འགྲུབ་སྟེ། ཐ་དད་པ་མེད་དོ། །གང་གིས་དེའི་རྗེས་སུ་ཞུགས་པའང་སངས་རྒྱས་ཀུན་གྱི་གོ་འཕང་དུས་ཅིག་ཆོད་པ་སྟེ། ཐོབ་པར་བྱ་བ་གང་ཡང་མེད་དོ། །དེའི་ངོ་བོ་ཉིད་ནི་ཐམས་ཅད་ཀྱི་ངོ་བོ་ཉིད་ཀྱི་ཕྱིར་དང་། དེར་གྱུར་པར་བྱས་པ་གང་ཡང་མེད་པས་ཐམས་ཅད་དུ་སངས་རྒྱས་པ་མེད་པའི་ཆེ་བའོ། །དེ་དག་ནི་རྩ་བའི་དོན་ལྟ་བུའོ། །ལས་རྣམས་སྣ་ཚོགས་ཅིང་སྤྱད་ཀྱང་། །ཞེས་བྱ་བ། གང་སྒོ་གསུམ་གྱི་བྱ་བས་འབྲས་བུ་ཡོངས་སུ་འབྱིན་པ་ནི་ལས་ཏེ། དེ་དག་ངོ་བོ་གསུམ་གྱི་བསྡུས་པ་ནི་རབ་ཏུ་མང་ངོ་། །དེ་དག་བདག་གིས་སྤྱད་པ་ནི་ཉན་ཐོས་ལྟར་ངེས་པ་མ་ཡིན་ནོ། །མི་མཐུན་པར་འདྲེན་པ་ནི་དེ་དག་ལས་སྨད་པ་རྣམས་ཀྱང་འགལ་བ་མེད་དོ། །ཞེས་བྱ་བའི་ཐ་ཚིག་གོ །དེའི་དོན་བསྟན་པའི་ཕྱིར་ཐིག་ལེ་ཉིད་ལས་སྤང་དུ་མེད། །ཞེས་བྱ་བ་ནི། གཅོད་པ་ཞེས་བྱ་བའི་ནི། བྱ་བ་དང་བཅས་པ་སྟེ། ཤེས་རབ་ཀྱིས་ཆེ་བ་ལྔ་དང་ལྡན་ཞིང་བྱང་ཆུབ་ཀྱི་སེམས་མངོན་དུ་བྱས་པ་ནི། ཅི་བྱ་བ་ཡང་འདུ་ཤེས་དང་བྲལ་བའི་ཚུལ་གྱིས་སྤྱོད་པས། དངོས་པོ་གསུམ་པོ་གསུམ་མ་དམིགས་པའི་ཕྱིར། ལས་ཀྱི་ངོ་བོ་གསུམ་དུ་མི་འགྱུར་བ་ནི་བསྒྲུབ་བྱ་ཉེ་བར་མིི་ལེན་པས། ཐིག་ལེ་ཆེན་པོ་ཉིད་ལས་མ་གཡོས་པ་ཞེས་བྱའོ། །དེ་ལྟ་བུ་ལ་ལས་ཉིད་ཀྱང་མ་གྲུབ་ན་སྤོང་བ་དང་། ལེན་པ་ལྟ་ཅི་སྨོས་སོ། །གལ་ཏེ་ན་མང་དུ་མ་བྱས་པ་དག་གིས་སྨད་པ་ཉེ་བར་བསྟན་པ་ནི། ངོ་བོ་ངན་པ་ཉིད་དང་འབྲས་བུ་གསུམ་ཉེ་བར་ལེན་པས། འདི་དག་ནི་སངས་རྒྱས་ཉིད་ཁོ་ནའི་སྤྱོད་ཡུལ་ཏེ། བསྟན་པ་དོན་མེད་དོ་སྙམ་པའི་བདོགས་པ་བསུ་བའི་ཕྱིར། འདོད་ཆགས་ཞེ་སྡང་གཏི་མུག་ཀྱང་། །སྤང་དུ་མེད་པས་བདག་གི་རྒྱུ། །ཞེས་གསུངས་ཏེ། གང་ཆོས་ཉིད་ལ་ཞེན་པ་ཡང་ཁྱིའི་ཡིས་ཁྱིའུ་ཚུལ་དུ་བསྟན་པས་འདོད་པ་མ་ཡིན་ན། གཞན་ལྟ་ཅི་སྨོས་སོ། །དེ་བཞིན་དུ་བར་གཅོད་པ་ལ་འཇུག་པར་མོས་པ་དང་། རིགས་པ་མ་ཡིན་པའི་བྱེ་བྲག་མི་ཤེས་པ་དག་ཀྱང་གོང་མ་བཞིན་པས། ལ་ལ་དག་མངོན་པར་སྨོད་པའི་ཆོས་ཀྱང་ཞེས་བྱའོ། །དེ་དག་ལས་ཀྱི་ཤེས་རབ་ཀྱིས་རྒྱུ་ལས་མ་བྱུང་བ་ལྟ་ཅི་སྨོས། མངོན་པར་བྱས་པ་ཡང་དེའི་ངོ་བོ་ཉིད་བྱང་ཆུབ་སེམས་སུ་རྣམ་པར་དག་པས་རྗེས་སུ་མཐུན་པ་ནི། ངོ་བོ་མ་སྐྱེས་པ་དག་པ་སྟེ་བདག་གིས་མ་བྱས་པའོ། །དེའི་ངོ་བོ་ཉིད་ཇི་བཞིན་དུ་ཤེས་པ་ནི། དེ་དེའོ་སྙམ་པའི་འདུ་ཤེས་དང་བྲལ་བ་སྙམ་པ་ལ་ཡང་། སྤང་བ་རྗེས་སུ་མི་མཐོང་བས། དཔེར་ན་དགྲ་གཉེན་དུ་བྱས་པ་ནི་སྲིད་མཐར་བརྟན་པ་ལྟ་བུ་སྟེ། འབྲས་བུ་ཉིད་ཀྱང་དཔེར་ན་སྔགས་ཀྱིས་ཟིན་པའི་དུག་ནི། བདུད་རྩིར་འགྱུར་པ་ལྟ་བུའོ། །ཞེས་གསུངས་སོ། །གཏི་མུག་གཉིད་པས་བསམ་དུ་མེད། །ཞེས་བྱ་བ་ནི། ལས་ཤེས་རབ་ཀྱིས་དག་པ་ལ་མི་སྤོང་བ་ཞེས་བྱ་བའི་དོན་ཞོར་ལ་སྟོན་ཏེ། འདི་དག་གིས་བྱ་བ་མེད་པ་སྟོན་ཏོ། །བྱང་ཆུབ་ཀྱི་སེམས་ཆེ་བ་ལྔའི་བདག་ཉིད་ནི་ངོ་བོ་མ་གྲུབ་པས་མཐའ་ཐམས་ཅད་སྤངས་པའི་ཕྱིར་བསམ་པར་བྱ་བ་མེད་དོ། །ཐམས་ཅད་དུ་བཅད་པ་ནི། ཐོགས་མེད་གསལ་བའི་མར་མེ་བསམ་པ་ཀུན་དང་བྲལ། ངང་གིས་མི་གཡོ་རྨུགས་ཤིང་ཏིང་འཛིན་རྒྱལ་པོར་གནས། ཞེས་གསུངས་སོ། །རྣམ་གྲངས་མེད་པས་དབྱིངས་ཉིད་ཀློང་། ཞེས་བྱ་བ་དེ་ཉིད་རིལ་བདག་ཏུ་གྱུར་པས། ཐ་སྙད་དུ་བཏགས་པ་ཐམས་ཅད་ནུས་པ་ནི་ཐམས་ཅད་ཀྱི་གཞི་གྱུར་ཅིང་། སེལ་མེད་པས་ཐམས་ཅད་དབང་གྱུར་ཏེ། བྲལ་བ་མེད་པ་ནི་འདོད་ཆགས་ཆེན་པོའོ། །གཟུགས་རྣམས་མེད་པས་བྱང་ཆུབ་སྐུ། །ཞེས་བྱ་བ་སེམས་ཉིད་ཀུན་ཏུ་བཟང་པོ་སྣང་བ་མེད་པའི་ཀློང་ནི། གཞན་གྱི་སྤྲོས་པ་ཐམས་ཅད་ཀྱང་དེ་བཞིན་ཉིད་སྦྱར་བའི་ལས་མཛད་པས། རང་བཞིན་ཕྱག་རྒྱ་ལས་ཀྱང་འདས་པ་ནི། མཚན་ཉིད་ཐམས་ཅད་མ་གྲུབ་པའི་སྙིང་པོ་བྱང་ཆུབ་ཀྱི་སྐུ་ནི་རང་བཞིན་ཕྲིན་ལས་ཡོངས་སུ་ལྷུན་གྱིས་གྲུབ་པས། ཡེ་ཤེས་ཀྱི་ཧེ་རུ་ཀ་ཆེན་པོ་སྟེ། རྨད་དུ་བྱུང་བའི་འཇིགས་བྱེད་གསང་བའི་ལེའུ་ལས་རྒྱས་པར་གསུངས་སོ། །ཐིག་ལེ་ཡེ་ནས་དམ་ཚིག་པས། །དམ་ཚིག་མིང་དུ་བཏགས་པ་མེད། །ཞེས་བྱ་བ་ནི། ཆེ་བ་ལྔ་དང་ལྡན་པའི་བྱང་ཆུབ་སེམས་ནི་བདག་གཞན་ལ་སོགས་པའི་སྤྲོས་པ་ཐམས་ཅད་དང་བྲལ་བའི་ངོ་བོ་གནས་པ་མེད་པའི་ཚུལ་གྱིས་གནས་པ་དུས་གསུམ་དུ་འགྱུར་བ་མེད་པ་ནི་རང་བཞིན་གྱི་དམ་ཚིག་གོ །དེ་དག་གི་རྗེས་སུ་ཆུད་པ་རྣམས་ཀྱང་རྗེས་སུ་མཐུན་པར་གནས་པའི་དུས་ན་བསྲུང་མཚམས་དང་བྲལ་ཡང་སྒོ་གསུམ་གྱིས་ཉེས་པ་མེད་པར་བསྟན་ཏོ། །འཆི་བ་མེད་པས་བདུད་རྩི་དབྱིངས། །ཞེས་བྱ་བ་ནི་རིལ་བདག་ཉིད་དུ་གྱུར་པ་ནི་བདག་ཉིད་ཆེན་པོ་སྟེ། འཕོ་འགྱུར་བྱ་བའི་ངོ་བོ་མེད་དོ། །དེ་ཉིད་ཕྱིན་པ་དང་མ་གྲུབ་པའི་དོན་གྱིས་འཆི་འཕོ་ཞེས་བྱ་བའི་ཐ་སྙད་ཀ་ནས་དག་པ་ནི་ཡེ་ཤེས་ཀྱི་བདུད་རྩི་འཐུངས་པའི་ཕྱིར། གདོད་བསྟེན་མི་དགོས་སོ། །ཁྱད་པར་ཉིད་པས་ཡེ་ཤེས་ཆེ། །ཞེས་བྱ་བ་ནི། དེ་ལྟར་རང་བྱུང་གི་ཡེ་ཤེས་ཆེན་པོ་ལྷུན་གྱིས་གྲུབ་པའི་ངང་སྙིང་པོ་བྱང་ཆུབ་ཀྱི་སྐུ་ལ་བྱ་བྱེད་ཐམས་ཅད་ཡོངས་ཀྱིས་སྤངས་པའི་ཀློང་ན། གནས་པ་མེད་པའི་ཚུལ་གྱིས་བཞུགས་པའི་དོན་མངོན་དུ་བྱེད་པའི་རྣལ་འབྱོར་པ་ནི་ཡེ་ཤེས་ཆེན་པོའི་ལྷུན་ལ་བཞུགས་པས། ལུས་ལ་སོགས་པའི་བྱ་བ་ཐམས་ཅད་མ་སྤངས་པར་གྱུར་པ་ཀུན་དང་བྲལ་བ་ནི། བདུད་ཀྱི་སྤྱོད་པ་ཡང་མི་སྤོང་ལ། ལམ་ཡོངས་སུ་རྫོགས་པའི་སྤྱོད་པ་ལ་ཡང་མི་གནས་པས་ཐེག་པ་ཆེན་པོ་པ་ཞེས་བྱ་སྟེ། ལུས་མི་ཡང་སེམས་སངས་རྒྱས་པས་ཐམས་ཅད་ལས་ཁྱད་པར་དུ་འཕགས་པའོ། །ཡེ་ཤེས་ཆེན་པོའི་ལྷུན་དེ་གསལ་བར་བསྟན་པའི་ཕྱིར། རི་རབ་རྩེ་ལ་ཉི་མ་སྟོང་ཤར་བས། །ཡེ་ཤེས་ཐུགས་ཀྱི་ཉི་མ་ཅིག་ཤར་དྲོ། །ཞེས་གསུངས་ཏེ། དེ་དག་ནི་ཆོས་མཐུན་པར་ཟད་ཀྱི་ཡུལ་དུ་མ་ཡིན་ནོ། །ལན་ཅིག་འཕོང་ལས་ལྟོས་པའི་མདུང་ནི་རིང་བའི་མཆོག་བཞིན་ནོ། །གྲངས་ནི་ཚད་པོར་བའོ། །སེམས་ཅན་གྱི་ཉོན་མོངས་པ་དང་རྟོག་པ་དག་ལང་བ་དང་ཆེ་བའི་ཚད་མེད་པ་ནི་མཆོག་གོ །དེ་དག་ཉིད་ཡེ་ཤེས་ཆེན་པོའི་ངོ་བོ་ཉིད་དུ་བསྟན་པ་ནི་རྩེ་མོར་གྱུར་པ་སྟེ། དེ་དག་མ་ཤེས་པས་མངོན་པར་འཆོལ་པ་ནི་མུན་པའོ། །བདག་གིས་བདག་མི་དམིགས་མོད་ཀྱི་ཁོ་ན་བཞིན་རིག་པས་ཞེན་པ་ཐམས་ཅད་དང་བྲལ་བ་ནི་ཤར་བ་ཞེས་བྱ་སྟེ། དེ་ཉིད་ཐོག་མའི་རྒྱུན་ཡིན་ཡང་། རྒྱུད་མཐུན་པ་ཉིད་དང་། མཐར་ཀློང་དུ་ཆུད་པས་གཅིག་དང་དུ་མ་ལས་གྲོལ་བ་ནི་ཐ་སྙད་དུ་གཅིག་ཞེས་འདོགས་སོ། །གང་ཞེན་པ་ལོག་པ་ནི་གདུང་བ་ཐམས་ཅད་དང་བྲལ་བར་དྲོ་བ་ཞེས་བྱའོ། །ཤར་བ་ཉིད་ན་ནུབ་པ་མེད། །ཞེས་བྱ་བ་ནི་དེའི་དུས་ན། གཡུང་དྲུང་གི་ལྷུན་ལ་ཕྱིན་པའི་ཕྱིར། དཔེ་རྒྱལ་མཚན་ལྟ་བུར་བསྟན་ཏེ། སྐྱེ་འཇིག་དང་བྲལ་བ་ཞེས་པ་བསྟན་ཏོ། །དེ་ཉིད་ཀྱི་བསྒོམ་པ་བསྟན་པའི་ཕྱིར། བསྒོམ་པ་ཉིད་ན་བསྒོམ་དུ་མེད། །ཞེས་བྱ་བ་ནི། དུ་མ་ཡིད་ལ་བྱེད་ཅིང་། ཞེན་པ་ནི་འཐད་པ་མིན་པས། ལྟ་བའི་རྗེས་སུ་འཇོག་པ་ནི་བསྒོམ་ཞེས་བྱའོ། །འོན་ཀྱང་ཤེས་རབ་བར་མ་ལས་མྱོང་བ་མེད་པ་ཉིད་མྱོང་བ་དང་། མཐོང་པའི་མཆོག་ཏུ་ཐོས་པས་རྗེས་སུ་འཇོག་པའང་དེ་བཞིན་པ་ནི་མེད་དོ་ཞེས་བྱ་བ་ཁོ་ནའོ། །འོན་ཏེ་མཐོང་བ་དང་མྱོང་བ་ནི་ལྟ་བའི་ཕྱི་མོ་དང་འགལ་བས་དེ་གཅད་པའི་ཕྱིར་བསྒོམ་པ་དམིགས་སུ་མེད་པའོ། །ཞེས་པ། བྱ་བ་དང་བྱེད་པ་ནི་བྱང་ཆུབ་ཉིད་ཁོ་ན་ཡིན་ལ། དེ་ནི་མཐའ་དབུས་ཐམས་ཅད་དང་བྲལ་བས་ངོ་བོ་མི་རྙེད་པའི་ཕྱིར། མིག་གིས་མིག་མི་དམིགས་པའི་ཚུལ་དུ་ཤེས་པ་ནི་བསམ་དུ་མེད་པ་ཞེས་བྱ་སྟེ། དམིགས་པ་ཡིད་ལ་ཅི་གསལ་ཡང་། ཤེས་པ་ཡུལ་ལ་འཇུག་འགྱུར་བས། དེ་དག་མ་རབས་ཏིང་ངེ་འཛིན། དེས་ན་དམིགས་མེད་རྒྱལ་བས་གསུངས་ཞེས་འབྱུང་ངོ་། །འོ་ན་དེ་དག་ནི་མ་མྱོང་བས། བདག་གི་ཡུལ་མ་ཡིན་ནོ། །ཞེས་དོགས་པ་བསུ་བར་བྱ་བའི་ཕྱིར། བསྒོམས་པས་གཞན་ནས་ཆོས་མི་རྙེད། །ཅེས་གསུངས་པ་ནི། དམན་པའི་བསྒོམ་པ་སྟེ་མཐའ་རྣམས་ཞིག་ཡིད་ལ་བྱས་པས་འདི་དག་ལས་འདས་སུ་ཟིན་ཡང་། སྙིང་པོ་བྱང་ཆུབ་ནི་ནམ་ཡང་ཐོབ་པར་མི་འགྱུར་རོ། །དེ་ཅིའི་ཕྱིར་ཞེ་ན། སྙིང་པོ་མཐའ་ཐམས་ཅད་ཀྱིས་མ་རེག་པའི་ཕྱིར་ཏེ། དེ་དག་ནི་འོ་མ་འདོད་པས་རྭ་ལ་འཇོ་བ་བཞིན་ནོ། །རྡོ་རྗེ་ཉིད་ཆེན་འབར་བ་ལྟར། །ཞེས་བྱ་བ། གཞན་ནས་ཅེས་འདི་ཉིད་དུ་ཁས་བླངས་པ་ཡང་། ཐམས་ཅད་ཞེས་སུ་འབྲེལ་ཏེ། འདུས་མ་བྱས་པའི་རྡོ་རྗེ་ནི་སྙིང་པོ་བྱང་ཆུབ་སྟེ། ལྷུན་གྱིས་གྲུབ་པའི་ངང་ངོ་དེ་ཉིད་འབྲས་བུ་ཐམས་ཅད་ཀྱིས་གཞག་པ་ཡང་རང་གི་ཆོས་ཐམས་ཅད་ལྷུན་གྱིས་གྲུབ་པར་སྦྱར་བ་ལ། མཐའ་རྣམས་བསྲེག་པ་ནི་སྐལ་པའི་མེ་ལྟར་གསུངས་ཏེ། ཕྲིན་ལས་ལྷུན་གྱི་གྲུབ་པར་བཞུགས་ཏེ། གཉིས་སུ་སྣང་བ་རིལ་དག་གོ །ཐམས་ཅད་ཀུན་ཀྱང་དེ་བཞིན་ནོ། །ཞེས་པ་རྗེས་སུ་འཇུག་པ་མང་དུ་བྱས་པ་དག །གོམས་པའི་དབང་གིས་འདུ་ཤེས་དུ་མ་རྐྱེན་གྱིས་སྣང་བ་ཡང་སྐྱོན་མེད་དོ། །དེ་ཡང་ཤེས་རབ་བར་མའི་སྣང་བ་བཞིན་སྒྲུབ་པ་ནི། ངོ་བོ་ཉིད་མི་གཞན་པར་ཤེས་པས་སླར་ལམ་གྱི་མཆོག་དང་འབྲས་བུའི་ཕུལ་དུ་གྱུར་ཏེ། བསྒོམ་པའི་གཞི་མི་རྙེད་པའི་ཕྱིར་བསྒོམས་པས་རྙེད་པར་མི་འགྱུར་ཏེ། སེམས་ཀྱི་སྤྱོད་ཡུལ་ཤེས་པ་སྟེ་དེ་ལ་དེ་དག་ཆོས་རྣམས་ཀྱི་ནི་ཆོས་ཉིད་ཡིན། རྣམ་བྲལ་གང་ལ་མཆོག་དང་ཐ་མ་མེད་པར་མཆོག་འདི་བསྒོམ་མོ་ཞེས་འབྱུང་ངོ་། །འགྱུར་བ་མེད་པས་བལ་ནག་བཞིན། །འགྱུར་དུ་བཏུབ་པས་བལ་དཀར་བཞིན། །བརྟགས་ན་བལ་ནག་ཉིད་ཀྱི་དབྱིངས། །ཞེས་བྱ་བ། དཔེར་བལ་དཀར་རྐྱེན་ལ་རག་ལས་པ་ནི་སྣ་ཚོགས་ཀྱི་གཞི་མ་ངེས་པ་ཞེས་བྱ་སྟེ། བདག་ཉིད་ནི་ངེས་སོ། །དེ་བཞིན་ཐིག་ལེ་ཆེན་པོ་རིལ་བདག་ཏུ་ལོངས་སྤྱོད་པ་ནི་འཕོ་འཇུག་གི་སྐབས་མེད་ཀྱང་འདུ་ཤེས་ཐ་དད་པ་ཚོན་ལྟ་བུ་ནི་དག་པ་དང་། མ་དག་པ་ཐ་དད་དུ་སྣང་ངོ་། །ཞེས་བྱ་སྟེ་རྗེས་སུ་འཇུག་པ་ཡང་བདེན་མོད་ཀྱི་སྐབས་འདིར་དེ་དག་གི་ངོ་བོ་ཉིད་མ་གྲུབ་པའི་ཕྱིར། ཡེ་ཤེས་ཆེན་པོ་སྣང་བ་མེད་པའི་ཉམས་སྙེད་པ་ནི། མ་གཡོས་པ་ཁོ་ནར་བདེན་ནོ། །ལྷུན་གྱིས་གནས་པས་གོ་འཕང་གཅོད། །ཞེས་བྱ་བ་ནི། གོ་འཕང་གཅོད་པས་ཆོས་ཀྱི་དབྱིངས། །ལས་རྣམས་སྣ་ཚོགས་ཅི་སྤྱོད་ཀྱང་། །ཞེས་གསུངས་ཏེ། སངས་རྒྱས་ཀུན་གྱི་གོ་འཕང་ལ་ཆུད་པ་ཡང་ཆོས་ཀྱི་སྐུ་ལ་སངས་རྒྱས་རིལ་ཡོན་ཏན་དང་བཅས་པར་རྫོགས་པས་གཅིག་དང་དུ་མར་བྲལ་བ་ནི། གཅིག་གིས་ཀུན་ཐོབ་པར་གསུངས་སོ། །གདོད་ནས་དག་པས་པད་མ་བཞིན། །ཞེས་བྱ་བ། ལས་རྣམས་སྣ་ཚོགས་ཅི་སྤྱད་ཀྱང་། །ཐིག་ལེ་ཉིད་ལས་ཡང་དུ་མེད། །ཞེས་གསུངས་ཏེ། དཔེར་ན་པད་མའི་མེ་ཏོག་ནི། རྩ་བའི་ནས་རྫོགས་སོ། །ལས་སྣ་ཚོགས་སྤྱོད་པ་པོའི་འདུ་ཤེས་མེད་པས་དག་གོ་ཞེས་པ། ཡང་ལས་ཀྱི་དངོས་པོ་གསུམ་སེམས་ཉིད་ཀྱི་ངོ་བོ་མ་གྲུབ་པས་རྒྱུ་ནས་དག་པར་འགྱུར་རོ། །འགྱུར་བ་མེད་པས་ཐིག་ལེ་བདེ། །ཅེས་པ། འགྱུར་དུ་མི་བཏུབ་བལ་ནག་བཞིན་འགྱུར་དུ་བཏུབ་པས་བལ་དཀར་བཞིན། །བརྟགས་ན་བལ་ནག་ཉིད་ཀྱི་དབྱིངས། །ཞེས་གསུངས་ཏེ། །འདུ་ཤེས་ཀྱི་དབང་གིས་ཐ་དད་པ་དག་ངོ་བོ་ཉིད་མི་གཡོ་བར་ཤེས་པ་ཡང་། བྱང་ཆུབ་སེམས་བདེ་བ་ཆེན་པོ་ནི་རིལ་བདག་ཉིད་དུ་གྱུར་པས་སྤྲོས་པ་ཐམས་ཅད་ནམ་ཡང་སྣང་མ་མྱོང་མི་མཐུན་པའི་ཟུག་རྔུ་ཀར་དག་པའི་ཕྱིར་རོ། །བྱ་བ་མེད་པས་ཐིག་ལེ་བདེ། །ཞེས་བྱ་བ། བསྐྱེད་པ་མི་མངའ་ཡེ་ཤེས་རིན་པོ་ཆེ། བྱ་བ་མེད་པས་ལྷུན་རྫོགས་ཐིག་ལེ་ཆེ། ཞེས་གསུངས་ཏེ། དཀྱིལ་འཁོར་ལ་སོགས་པ་རྒྱུས་འབྲས་བུ་ཚོལ་བ་བྱང་ཆུབ་ལས་ཐམས་ཅད་མེད་པར་སྟོན། ཐིག་ལེ་ཆེན་པོ་ལ་རྒྱུ་དང་། སེམས་ཅན་དང་ཕྱོགས་གཞན་གྱི་སྤྲོས་པ་ཐམས་ཅད་ཀར་དག་པའི་ཕྱིར་ཏེ། དེ་ཉིད་རྒྱུས་ལས་ཀྱི་ཟུག་རྔུ་ཡེ་ནས་མེད་དོ། །དུས་གསུམ་མེད་པས་ཐིག་ལེ་བདེ། །ཞེས་བྱ་བ། ཐམས་ཅད་མ་བཀག་དབྱེར་མེད་བདག་གི་རྒྱུ། །སྐྱེ་མེད་དབྱིངས་ལས་ཐམས་ཅད་སྐྱེས། །དོན་དམ་ཉིད་དུ་སེམས་པ་ཆེ། །ཞེས་གསུངས་ཏེ། དང་པོ་སྐྱེ་བའི་རྒྱུ་དང་ངོ་བོ་དང་གྲུབ་མཐའ་གསུམ་སེམས་ཉིད་དུ་བསྟན་པ་ཡང་བྱང་ཆུབ་སེམས་འགྱུར་བ་མེད་པ་ནི། གསུམ་གྱི་རྗེས་སུ་འཇུག་པ་དེ་ཡང་མེད་པས། གསུམ་གྱི་སྤྲོས་པ་ཡོངས་སུ་བཅད་པ་ནི་འདུ་ཤེས་གསུམ་གྱིས་བསྒྲུབ་པའི་ཟུག་རྔུ་ཡེ་ནས་མེད་དོ། །བརྩལ་དུ་མེད་པས་ཐིག་ལེ་བདེ། །ཞེས་བྱ་བ། བསྒྲུབ་ཏུ་མེད་པས་ཡེ་ནས་གནས། །སྨོན་དུ་མེད་པས་རང་ལ་རྫོགས། །ཞེས་གསུངས་ཏེ། ཆོས་ཀྱི་སྐུ་གྲུབ་རྩོལ་དང་བྲལ་བ་རིག་པ་ལ་གསལ་བ་ཡང་ཡེ་ཤེས་ནང་ནས་ཤར་བ་ནི། རང་རིག་པ་ཞེས་བྱ་སྟེ། སྤྱོད་པ་དང་ཡུལ་གྱི་སྤྲོས་པ་མེད་པས་ཤེས་བྱེད་ཀྱི་ཟུག་རྔུ་ཀར་དག་པར་བསྟན་ཏོ། །བརྩལ་བར་འདོད་པས་དབྱིངས་མི་བསྐྱོད། །ཞེས་བྱ། སྨོན་དུ་མེད་པས་རང་ལ་རྫོགས། །ཐ་སྙད་མེད་པས་རྣལ་འབྱོར་བདག །ཞེས་གསུངས་ཏེ། ཐ་སྙད་རིལ་འབྲས་བདུད་རྫོགས་པ་བདག་གིས་མངོན་དུ་བྱས་པ་ཡང་ཐ་སྙད་ལ་གཉེན་པོར་བསྒྱུར་ནས། གསལ་བར་འདོད་པ་ནི། དཔེར་ན་ཁྱིའི ས་རྒྱ་མཚོ་དཀྲུག་པ་ལྟ་བུའོ། །དེ་བས་ན་བདེ་བ་ཆེན་པོས་ཀར་དག་པ་ནི་མ་བརྩལ་བར་གསལ་ལོ། །རྒྱ་བ་ཉིད་རབས་མུ་ཁྱུད་བདེ། །ཞེས་བྱ་བ། བསྒོམས་པས་གཞན་ནས་ཆོས་མི་རྙེད། །རྡོ་རྗེ་ཉིད་ཆེན་འབར་བ་ལྟར། །ཐམས་ཅད་ཀུན་ཀྱང་དེ་བཞིན་ནོ། །ཞེས་གསུངས་ཏེ། བྱང་ཆུབ་ཀྱི་སེམས་རང་བྱུང་གི་ཡེ་ཤེས་མཐའ་རྣམས་བྲལ་བས་དམིགས་སུ་མེད་པ་ཁོ་ན་བཞིན་དུ་བྱིན་གྱིས་རླབས་ཀྱི་འཁོར་དེ་རང་སྣང་བ་ནི། ཐ་མི་དད་པ་ཞེས་བྱ་བའི་དོན་ཏོ། །སྣང་བ་ཐམས་ཅད་ཀྱང་མ་དམིགས་པས་སྐྱོན་མེད་པའོ་ཞེས་བྱ་བ་ཡང་། བདེ་བ་ཆེན་པོའི་ཀླུང་ནི་སྣང་བ་གདོད་མ་ནས་མ་སྐྱེས་པས། མི་གཡོ་མི་འགྱུར་བསྙེད་པ་ཀུན་དང་བྲལ་ཞེས་བྱ་སྟེ། དེ་ལྟ་བུའི་ཀླུང་དུ་བྱེད་པའི་ཕྱིར་གསུངས་ཀྱི་དེ་བཞིན་ཉིད་ལ་འདུ་ཤེས་གཉིས་སུ་འདོད་པ་ནི་ཤིན་ཏུ་འགལ་ལོ། །དེ་ན་ཆོས་ཉིད་ཙམ་དུའང་དམིགས་སྐྱོན་ན། རྒྱུ་བ་འཕྲ་རགས་སྨོས་ཅི་སྨོས། །ཞེས་གསུངས་སོ། །ཐིག་ལེ་ཉིད་ལས་ཐིག་ཕྲན་བདེ། །ཞེས་བྱ་བ། ཐིག་ལེ་ཡེ་ནས་དམ་ཚིག་པས། །དམ་ཚིག་མིང་དུ་བརྟགས་པ་མེད། །ཅེས་གསུངས་ཏེ། ཕྱལ་བ་ལ་སོགས་པ་རྗེས་སུ་གནས་པའི་ས་ནི། བྱ་བ་དང་བྲལ་ཞེས་པ་ཡང་། ཐིག་ལེ་ཆེན་པོ་ཉིད་བསྲུང་བའི་བསྒྲུབ་བྱ་ཐམས་ཅད་ལྷུན་གྱིས་གྲུབ་པས་ཟུག་རྔུ་དང་བྲལ་དུ་ཟིན་གྱི། བདག་ཉིད་ཀྱིས་སྒྱུར་བར་འདོད་པ་ནི་རྩོལ་བ་དང་བྲལ་བ་ཞེས་མི་བྱའོ། །ཞེས་བྱ་བའི་ཐ་ཚིག་གོ །རྩེ་རྒྱལ་རྟོག་ན་གནས་ཆེན་བདེ། །ཞེས་བྱ་བ། གཏི་མུག་ཉིད་པས་བསམ་དུ་མེད། །ཞེས་པ་དང་། བསམ་པ་ཉིད་ན་བསྒོམ་དུ་མེད། །བསྒོམ་པ་དམིགས་སུ་མེད་པའོ། །ཞེས་གསུངས་ཏེ། བསྒོམ་པས་དམིགས་པ་གང་ཡུལ་ཀར་དག་པ་ནི། རྐྱེན་མ་ཚང་བས་དམིགས་པ་ཐམས་ཅད་བྲལ་བ་ཞེས་བྱ་བ་ཡང་གོམས་པའི་འདུ་ཤེས་སྒྲས་མུན་པའི་མཐར་འདུག་པས་ཟུག་རྔུར་འགྱུར་བ་ཡང་ལས་དང་འབྲས་བུ་ལ་སོགགས་པ་ཀུན་ཀྱི་མཆོག་ཏུ་གྱུར་པ་ནི། ཤིན་ཏུ་རྣལ་འབྱོར་ཏེ། དེ་ཉིད་དོན་གྱིས་མི་འགྲུབ་པའི་ཕྱིར་ཐིག་ལེ་ཆེན་པོ་ཡོངས་སུ་ཤེས་པ་ནི་གཟུང་འཛིན་དང་བྲལ་བའི་ཡེ་ཤེས་ལ་གནས་པ་སྟེ། དེ་བཞིན་གཤེགས་པ་ཐམས་ཅད་དང་ཐ་མི་དད་པ་ཞེས་བྱ་སྟེ། འབད་པར་འབྲལ་བར་མ་གསུངས་ཏེ། བསམ་གྱིས་མི་ཁྱབ་མི་ཤེས་པར། །བསམ་དུ་མེད་དང་གང་འཇོག་པ། །བྱས་པ་དེ་ནི་བླུན་པ་སྟེ། །མུན་པའི་སྐྱེ་མཆེད་ཉིད་དུ་འགྱུར། །བསམ་གྱིས་མི་ཁྱབ་དོན་ཤེས་ནས། །བསམ་མེད་ངང་དུ་གང་འཇོག་པ། །དེ་ནི་ཐམས་ཅད་མཁྱེན་པ་སྟེ། །ཡོན་ཏན་དཔག་ཏུ་མེད་པར་འགྱུར། །ཞེས་གསུངས་སོ། །ཐོག་མེད་ཡོངས་ལ་བྱང་བའི་བ་ག་ལ། །དབྱེར་མེད་ལྷུན་རྫོགས་ཐིག་ལེ་དབྱིངས་ཉིད་ཆེ། །ཞེས་བྱ་བ། བདེ་འབྱམ་སྡུག་བསྔལ་དབྱིངས་ཕྱུག་བ་ག་ལ། །དབྱེར་མེད་ལྷུན་རྫོགས་ཐིག་ལེའི་དབྱིངས་ཉིད་ཆེ། །ཞེ་གསུངས་ཏེ། གང་འཁོར་བ་དང་མྱ་ངན་ལས་འདས་པ་གཉིས་སུ་མེད་པ་ཉིད་འབྲས་བུའི་ཕུལ་དུ་འགྱུར་བ་ཞེས་བྱ་བ་ཡང་། ཤེས་བྱ་སྣ་ཚོགས་ལ་ཐོགས་ཆགས་དང་བྲལ་བ་ནི་ཐམས་ཅད་མཁྱེན་པའི་ཡེ་ཤེས་ཏེ། དེ་ཉིད་གློ་བུར་བའི་རབ་རིབ་ཡོངས་སུ་དག་པའི་ངོ་བོ་ཉིད་ཁོ་ན་སྟེ། དེ་དག་མུ་མཐའ་བྲལ་བ་ཉིད་རང་གི་རབ་རིབ་ཡོངས་སུ་དག་པས་འདུ་ཤེས་བྲལ་བར་གསུངས་སོ། །དེ་དག་གཡོ་བ་དང་བྲལ་བས་ཐམས་ཅད་ཀྱི་གཞིར་གྱུར་པ་ནི། བ་ག་སྟེ་ཆོས་ཐམས་ཅད་ཀྱི་སྐུའོ། །དེ་དག་སྐུ་དང་ཡེ་ཤེས་ཐ་མི་དད་པར་གསུངས་པའི་ཕྱིར་ཐོགས་པ་མེད་པ་དང་། བ་ག་ཞེས་བྱ་བའི་གཅིག་གི་མིང་གི་དངོས་པོ་དེ་ཁོ་ན་ཉིད་ལ། ཆོས་ཐམས་ཅད་དབྱེར་མེད་པ་ཞེས་བྱ་བ་ནི། བདག་ཉིད་ལ་འབྲས་བུར་རྫོགས་པས་མ་གྲུབ་པར་འདུ་ཤེས་ཅན་ལ་ཡོད་པ་རིལ་ཐ་མི་དད་པའི་ཚུལ་གྱིས་ཤེས་པ་ཡང་བདག་ཉིད་ཀ་ནས་དག་པ་ནི་མི་གཡོ་བ་ཞེས་གསུངས་སོ། །སྐུ་གསུང་ཐུགས་ཀར་མུ་ཁྱུད་དཀྱིལ། །ཞེས་བྱ་བ། འདོད་ཆགས་ཞེ་སྡང་གཏི་མུག་ཀྱང་། །སྤང་དུ་མེད་པས་བདག་གི་རྒྱུ། །ཞེས་གསུངས་ཏེ། ཀུན་ནས་ཉོན་མོངས་རྩ་བར་གྱུར་པ་དག་སྐུ་ལ་སོགས་པ་ལྷུན་གྱིས་གྲུབ་པ་དེ་དག་ཡེ་ཤེས་ཆེན་པོའི་དོན་གྱིས་སྣང་བ་ནི། གཞན་ལ་སྣང་བའི་གཞིར་གསུངས་པ་ཡང་། ཡེ་ཤེས་ཀྱི་སྣང་བ་ཉིད་ཀྱི་སྐུ་ལ་སོགས་པར་གདོད་ནས་ལྷུན་གྱིས་གྲུབ་པས། སེམས་ཅན་གྱི་མཐུན་པའི་འབྲས་བུར་འབྲེལ་བ་ཡང་སྐུ་ལས་སྐུ་སྣང་བ་ལ་སོགས་པར་དག་ནི་ལྷུན་གྱིས་གྲུབ་པའི་དཀྱིལ་འཁོར་ཏེ། དེའི་ཕྱིར་རྒྱུད་ཞེས་ཐ་སྙད་དུ་འདོག་གོ །རྣམ་པར་དག་པས་བྱང་ཆུབ་སྐུ། །ཞེས་བྱ་བ། རྣམ་གྲངས་མེད་པས་དབྱིངས་ཉིད་ཀློང་། །གཟུགས་རྣམས་མེད་པས་བྱང་ཆུབ་སྐུ། །ཞེས་གསུངས་ཏེ། སྤྲོས་པ་དང་བྲལ་བ་ལ་གནས་པ་ཆོས་ཀྱི་སྐུ་ཐོབ་པར་སྟོན་པ་ཡང་གང་ཤེས་རབ་ཀྱིས་སྦྱངས་པ་ལས་ཆུད་པ་ནི། ལས་ལ་རག་ལས་པས་ཡོངས་སུ་སྦྱངས་པ་ཞེས་མི་བྱ། དེ་དག་མིང་དང་གྲངས་ཀྱི་དངོས་པོ་གཉེན་པོའི་ཚུལ་གྱིས་ཀྱང་། ཀ་ནས་མེད་པས་ཐ་མ་དང་བར་དུ་གནས་སུ་མེད་པ་ནི། ངོ་བོ་ཉིད་དང་འདུ་ཤེས་ཙམ་ཡང་དག་པས་དེ་ཉིད་ཡོངས་སུ་གསལ་བ་ནི་བྱང་ཆུབ་པའི་སྐུའོ། །འགྲོ་བའི་ལམ་ཆེན་ནམ་མཁའི་དབྱིངས། །ཞེས་བྱ་བ། ལས་རྣམས་ཐམས་ཅད་ཅི་སྤྱད་ཀྱང་། །ཐིག་ལེ་ཉིད་ལས་སྤང་དུ་མེད། །ཞེས་གསུངས་ཏེ། ལས་ཉིད་འདུ་ཤེས་དང་བྲལ་བས། ངོ་བོ་མེད་པ་ཞེས་བྱ་བ་ཡང་། བྱས་པ་ཐམས་ཅད་ཀར་དག་པ་ནི་མ་སྐྱེས་པའི་ཕྱིར་མ་གཡོས་པས། ཆེན་པོ་སྟེ་དེ་ཉིད་བདེ་བ་ཆེན་པོའི་ཀླུང་ལས། མི་ཉམས་པ་ནི་ཆོས་ཀྱི་དབྱིངས་ཀྱི་ལས་ཞེས་བྱ་སྟེ། དེའི་ཕྱིར་མ་སྤངས་པར་ཀར་དག་པས། ལས་ནི་རྣམ་དག་དབྱིངས་ཀྱི་ཀློང་། །བདག་ཉིད་འཇུག་བྲལ་ཐིག་ལེ་ཆེ། །ཞེས་བྱའོ། །ཐིག་ལེ་རྩ་བ་ཡེ་ནས་རྡོ་རྗེ་དབྱིངས། །རྡོ་རྗེ་ཉིད་ལ་འདུ་འབྲལ་མེད། །ཞེས་བྱ་བ། འཆི་བ་མེད་པ་བདུད་རྩིའི་དབྱིངས། །ཁྱད་པར་ཉིད་ལས་ཡེ་ཤེས་ཆེ། །ཞེས་གསུངས་ཏེ། གང་རང་བྱུང་གི་ཡེ་ཤེས་སྐྱེ་ཤི་མེད་པའི་འབྲས་བུ་ཉིད་ཐམས་ཅད་ལྷུན་གྱིས་གྲུབ་པར་གསུངས་པ་སྟེ། བྱ་བྱེད་བྲལ་བའི་ཡེ་ཤེས་ཆེན་པོ་ནི། སྐུ་གསུང་ཐུགས་རིལ་ལྷུན་གྱིས་འགྲུབ་པའི་ཀླུང་དུ་རྟོགས་ཆེན་པོར། བཞུགས་པས་བདེན་པ་གཉིས་ཀྱི་ཚུལ་ལས་འདས་པ་བྱིན་གྱིས་རླབས་སུ་མ་གསུངས་སོ། །དེ་བས་ཐིག་ལེ་བདལ་བའི་དབྱིངས། །བདལ་བ་ཉིད་ན་ནུབ་པ་མེད། །ཅེས་བྱ་བ། རི་རབ་རྩེ་ལ་ཉི་མ་སྟོང་ཤར་བས། །ཡེ་ཤེས་ཐུགས་ཀྱི་ཉི་མ་ཅིག་ཤར་དྲོ། །ཅེས་གསུངས་ཏེ། ཡེ་ཤེས་ཆེན་པོ་ལྷུན་གྱིས་གྲུབ་པ་ནི། གཏན་ཚིགས་དེ་ཉིད་ཀྱིས་ཆོས་ཀྱི་སྐུ་ནི་གཟུང་འ ཛིན་ཐམས་ཅད་གང་ཡང་མ་སྤངས་པས་ཁྱབ་པ་ནི་རྒྱ་དང་བྲལ་ལོ། །དེའི་ཕྱིར་མེའི་འོད་ལྟར་དངོས་པ་བདལ་བ་མིན་ཏེ། རིལ་ཡེ་ཤེས་ཆེན་པོ་ཉིད་དུ་གསལ་བ་ནི་དུས་གསུམ་ཡོངས་སུ་མ་ཆད་པས། ཤར་བ་ཉིད་མི་དམིགས་ན་ནུབ་པ་ལྟ་ཅི་སྨོས་ཏེ། ཐ་སྙད་ཀ་ནས་དག་པར་གསུངས་སོ། །ཐམས་ཅད་ཀྱི་སེམས་ཀློང་ཡངས་པའི་དཀྱིལ་འཁོར་ཐམས་ཅད་བྱང་ཆུབ་ཀྱི་སེམས་སུ་སངས་རྒྱས་པ་སེལ་མེད་པའི་ཡེ་ཤེས་ཆེན་པོ་ཉིད་ཐམས་ཅད་དུ་སྣང་བར་གསུངས་སོ། །བདེ་འབྱམས་འགྲེལ། རྫོགས་སོ།། །།