རྫོགས་པ་ཆེན་པོའི་གལ་གནད། གཙང་སྟོན་རྡོ་རྗེ་རྒྱལ་མཚན།

བླ་མ་རིན་པོ་ཆེ་ཀཿཐོག་རྡོ་རྗེ་རྒྱལ་མཚན་གྱི་མཛད་པའོ། །རྫོགས་པ་ཆེན་པོའི་གལ་གནད། ཨཱོཾ་སྭཱ་སྟི། ན་མོ་གུ་རུ། བཀྲ་ཤིས་པར་གྱུར་ཅིག །སེམས་ཉིད་རང་རིག་ཡེ་ཤེས་ཉི་མ་སྟོང་ལྡན་འོད་ཟེར་གྱིས། ལྷན་ཅིག་གནས་པའི་མི་མཐུན་རྩ་བ་ཡན་ལག་བཅས་པ་རྣམས། སྐད་ཅིག་ཉིད་ལ་དངས་མཛད་སྟོན་ཀའི་ནམ་མཁའ་དག་པ་དང་། སེམས་ཉིད་གསལ་དབྱེར་མ་བྱེད་གསལ་སྟོང་སྨྲ་བསམ་ལས་འདས་པ། རང་སྣང་ཅིར་ཡང་འཆར་བ་དགོས་འདོད་དབང་གི་རྒྱལ་པོའི་ཚུལ། གདུལ་བྱའི་འཁོར་སློབ་དགོས་སྐོང་མཐུན་སྣང་མེ་ལོང་བཞིན། རྩ་ལོང་བྱུང་འཇུག་བྲལ་བ་ཆུ་ཡི་ཟླ་བ་ལྟ་བུའི་ཚུལ། ཡོན་ཏན་མཆོག་ལྡན་རྗེ་བཙུན་བླ་མ་རྣམས་ཀྱི་ཞབས་ལ་འདུད། །ཐམས་ཅད་མཁྱེན་པའི་ཐུགས་རྗེ་ཡིས། །ཐེག་པ་བསམ་གྱིས་མི་ཁྱབ་པ། །གདུལ་བྱའི་དོན་དུ་གསུངས་པ་ཡང་། །བློ་ཡི་རིམ་པ་བཞིན་སྣང་བ། །གདུལ་བྱའི་རྐྱེན་གྱིས་སྣང་བ་རྩམ། །ལྟ་སྤྱོད་སྒོམ་པ་འབྲས་བུ་རྣམས། །ཐེག་པ་སོ་སོའི་གཞུང་བཞིན་དུ། །བློ་དང་མཐུན་པར་སྣང་ན་ཡང་། །འདིར་ནི་བླ་མེད་ཐེག་པ་མཆོག །བགྲོད་པ་གཅིག་པས་ཚེ་གཅིག་གིས། །འབྲས་བུ་མངོན་དུ་བྱ་བའི་ལམ། །དབང་པོ་ཡང་རབ་སྦྱངས་པ་ཅན། །བསགས་པ་མཆོག་ཏུ་གྱུར་པ་ཡིས། །སྐྱེས་ཆེན་ཅིག་གི་བཅུད་ཡིན་ཏེ། །དཔེར་ན་སེང་གེའི་འོ་མ་བཞིན། །སྤྱིར་ཐུབ་པ་ཆེན་པོ་འདི་ཉིད་ཀྱིས། །བསྟན་པ་སྣང་བའི་ཐེག་པ་མཆོག །སྒོས་སུ་སྙིགས་མའི་ཐ་མ་ལ། །བསྟན་པ་དར་བར་ལུང་བསྟན་ཏེ། །སྐྱེས་མཆོག་ལམ་ལ་གནས་པ་རྣམས། །གྲངས་མང་བསམ་གྱིས་མི་ཁྱབ་པས། །རྗེ་བཙུན་བླ་མ་ཡན་དུ་བསྟན། །དད་བརྩོན་ཆེན་པོའི་དང་དུ་བླངས། །གྲུབ་ཐོབ་བླ་མ་ནམ་མཁའི་སྐར་མ་བཞིན། །གསང་སྔགས་བྱིན་རླབས་བསམ་མི་ཁྱབ། །སྤྱིར་གསང་སྔགས་ཀྱི་ལྟ་སྒོམ་སྤྱོད་གསུམ་འབྲས་བུ་བཞི་ཞེས་བརྗོད་ཀྱང་། ལྟ་བ་ནི་ལམ་གྱི་སྔོན་འགྲོ་ལམ་གྱི་གཞི་གང་གི་ཡང་རྒྱབ་རྟེན་ལྟ་བུ་ཡིན་ཏེ། དེ་ཐ་སྙད་ཡིད་ཀྱི་ཡུལ་དུ་བྱས་པའི་སྟོང་པ། སྤྱི་ཁྱབ་ཀྱི་ཞེར་འཛིན་ཅིག་ལ་ལྟ་བ་ཞེས་བརྗོད་དེ། འདིར་གདར་ཤ་ཆོད་པར་བྱེད་ན། གསང་སྔགས་ཀྱི་སྐབས་སུ་ལྟ་བ་གཉིས་ཏེ། སོ་སོར་རྟོགས་པ་ཡུལ་གྱི་ལྟ་བ་དང་། །མི་དམིགས་པའི་ཤེར་གྱི་ཡུལ་གྱི་ལྟ་བའོ། །སོ་སོར་རྟོག་པ་ཤེས་རབ་ཀྱི་ལྟ་བའོ། །ལུང་ཟབ་མོ་དང་བླ་མ་དམ་པའི་མན་ངག་གཉིས་སེམས་ཐོག་ཏུ་མ་ཕེབས་པར་ཐ་སྙད་ལ་དོན་དུ་འཛིན་ཏེ། སྣང་བ་སེམས་ཡིན། སེམས་ལས་བྱུང་ཞིང་སེམས་སུ་འདུས་ཞེས་པ་དང་། སྣང་བ་སྒྱུ་མ་ལྟ་བུ་ཞེས་པ་དང་། སྣང་བ་རང་བཞིན་མེད་པ་ཡིན་ཞེས་པ་དང་། ཕུང་པོ་ལྔ་རིག་ལྔ། འབྱུང་བ་ལྔ། ཡུམ་ལྔ། ཡིན་ཞེས་པ་ལ་སོང་པའི། སྙམ་བློ་ཡིད་ཀྱི་འདུ་ཤེས་ནི་སོ་སོར་རྟོག་པའི་ཤེས་རབ་ཀྱི་ལྟ་བ་སྟེ། དཔེར་ན་མུན་ནག་ནང་ན་རིན་པོ་ཆེ་ཚོལ་བའི། གསལ་བྱེད་སྒྲོན་མ་བཟུང་བ་ཡིས། རིན་པོ་ཆེ་མ་མཐོང་ནས་སྒྲོན་མ་དོན་དུ་འཛིན་པ་ལྟ་བུའོ། །མི་དམིགས་པ་ཤེས་རབ་ཡུལ་གྱི་ལྟ་བ་ནི། ཉམས་ཅན་གྱི་བླ་མ་ལུང་ཟབ་མོའི་དོན་ལ་བརྟེན་ཏེ། ཕྱི་ནང་གི་ཆོས་ཐམས་ཅད་ལ་གཞལ་བ་ནི། ཆོས་ཐམས་ཅད་སེམས་སྣང་སྟེ། སེམས་ཉིད་རྟོགས་པའི་གཞི་མེད་བསྐྱེད་པའི་རྩ་བ་མེད་པར། རང་སྣང་མི་འགག་པ་ཡུལ་སེམས་ཐམས་ཅད་ཀྱི་ངོ་བོ་ཉིད་ཡིན་པ་ལ་བརྡའ་སྤྲད་པས། ཡུལ་ཐམས་ཅད་སེམས་སུ་དབྱེར་མེད་པས་ཡུལ་མ་གྲུབ། སེམས་རྩ་བ་དག་སྟེ་ནམ་མཁའ་དང་དབྱེར་མེད། ཡུལ་དང་ཡུལ་ཅན་དབྱེར་མེད་པའི་དགོངས་པ། ལྷུན་གྱིས་གྲུབ་པས་རྣལ་འབྱོར་པའི་རིག་པ་དེ་ཉིད་དུ་གྱུར་པ་ལ་བལྟ་བྱ་བལྟ་བྱེད་མེད་རྟོགས་སྙམ་གྱི་ཞེ་རློམ་མེད་པ། དོན་དམ་ཉིད་ནི་ལྟ་བ་རྟོགས་པ་མཐར་ཕྱིན་པའོ། །ཐ་མལ་པའི་ཤེས་པ་ཡུལ་ལ་གསལ་བར་གཅོད་པའི་བདག་ཉིད་སྐད་ཅིག་མ་ནི། ཡིད་ཀྱི་ཤེས་རབ་ཅེས་བྱ་སྟེ་ཡུལ་དང་ཁྱད་མེད་པས། བསྒོམ་པའི་གནས་སྐབས་སུ་དག་བྱའོ། །དེ་ལྟ་བུའི་ལྟ་བ་མངོན་དུ་གྱུར་ཡང་། བསྒོམ་པས་འདྲིས་པར་མ་བྱས་པར་ཟག་བཅས་ཀྱི་སའོ། །ཟག་པ་མེད་པ་མངོན་དུ་སྣང་བ་ནི་སྒོམ་པའི་ཏིང་ངེ་འཛིན་ཁོ་ནའི་སྟོབས་སོ། །དེ་ལྟ་བུའི་ལྟ་བ་དེ་རྣལ་འབྱོར་པ་ལ་མངོན་དུ་གྱུར་པ་མི་སླ་ན་ཡང་། སོ་སོར་རྟོགས་པའི་ཤེས་རབ་ཙམ་ལ་བརྟེན་ནས། གདམ་ངག་རིམ་པ་བཞིན་ཉམས་སུ་བླང་པ་ན། ཏིང་ངེ་འཛིན་གོང་མའི་ཚེ་ལྟ་བ་དེ་དག་རང་བཞིན་གྱིས་རྟོགས་པར་འགྱུར་ཏེ། སྒོམ་པའི་སྟོབས་ཀྱིས་ལྟ་བ་སྐྱེ་བ་ཞེས་བྱའོ། །ལྟ་བྱ་ལྟ་བྱེད་མེད་པ་ལྟ་བ་མཆོག །རྟོགས་པའི་གདེངས་དང་ལྡན་པའི་སྐྱེས་བུ་ལ། །མི་འཇིགས་རྫོང་ལ་ཞེན་པའི་དཔའ་བོ་ནི། །གོ་མཚོན་ཕུན་སུམ་འཚོགས་པ་ལྡན་པ་འདྲ། །བྱས་འཛིན་བྲལ་བའི་འདུ་ཤེས་ལྷུན་གྲུབ་པས། །བསྔོ་བ་མི་དགོས་བྱང་ཆུབ་ཆེན་པོར་ཕྱིན། །ཡུལ་དྲུག་ཆོས་རྣམས་གང་དང་གང་མཐོང་བ། །གསལ་ལ་མི་འཛིན་ལྟ་བའི་ངོ་བོ་རྫོགས། །བྱས་འཛིན་བྲལ་བ་ནམ་མཁའི་བྱ་ལམ་བཞིན། །དུག་ལྔ་རང་རྒྱུད་དག་སྟེ་ཆ་ཕྲ་བ། །སྒོམ་པའི་ཏིང་ངེ་འཛིན་གྱིས་དག་པར་བྱེད། །འགྲོ་བ་རྣམས་ལ་ཐུགས་རྗེ་ཆེན་པོ་ཉིད། །ངང་ངམ་རྒྱུན་གྱིས་གཏིང་ནས་དྲག་པོར་འཆར། །ཕ་ལ་མོས་གུས་བར་མཚམས་མེད་པ་སྟེ། །གནག་ལས་འཕྲ་བའི་ཕྲ་བ་མིག་བཞིན་འཛེམ། །དཀར་པོ་ལས་རྣམས་རྒྱུན་འཆད་མེད་པར་འཕེལ། །འཇིག་རྟེན་བྱ་བ་སྦྲུལ་ཤུན་བཞིན་དུ་འདོར། །རང་གནས་མི་ཆགས་གཞན་དུ་འགྲོ་བར་འདོད། །རྨི་ལམ་རྟགས་ཀྱང་མང་འབྱུང་སྟེ། །ཐ་སྙད་བརྗོད་ཀྱིས་མི་ལང་མདོར་བསྡུ་ཙམ། །བླ་ན་མེད་པའི་བྱང་ཆུབ་མྱུར་དུ་ཐོབ་པར་འདོད་པའི་རྣལ་འབྱོར་པས། ཟག་མེད་ནས་སངས་རྒྱས་ཀྱི་ས་མངོན་པའི་ལམ་གྱི་ངོ་བོ་ནི་ཏིང་ངེ་འཛིན་ཡིན་ཏེ། ཆོས་སྤྱོད་དགུ་པོ་གཞན་ཐམས་ཅད་ནི་དེའི་གདོང་གྲོགས་སུ་གྱུར་པའོ། །དེ་ཡང་རྒྱུ་ཅན་དྲུག་གིས་ལམ་གོང་ནས་གོང་དུ་འཕར་བ་བཙའ་མྱེ་བཞིན་ཏེ། བཙའ་མྱེ་ཆུང་ངུ་དུ་བ་ལ་མེ་སྟག །དེ་ལས་གོང་ནས་གོང་དུ་འཕེལ་ནས་མཐར་ཕྱིན་པ་འབྲས་བུ་ཆོས་སྐུ་ལྷུན་གྱིས་གྲུབ་པའོ། །རྒྱུ་ཅན་དྲུག་ནི། མཚུངས་པའི་རྒྱུ་ནི་རང་གི་རྟོགས་པའི་ཤེས་རབ། བསགས་པ་དང་སྦྱངས་པ་གཉིས་ཀྱི་བརྒྱན་པ། རྣོ་བ་རལ་གྲི་གན་མ་ལྟ་བུའོ། །གདམ་ངག་གི་སྟོབས་ཀྱིས་རིག་པ་མཐའ་བྲལ་གྱི་ཡེ་ཤེས་ཆེན་པོ། སེམས་ཉིད་མ་བཅོས་པ་གཉུག་མའི་ངོ་བོ་ཉིད་ངོ་སྤྲད་ནས་ཉམས་སུ་བྱུང་སྟེ། རང་ངོ་རང་གིས་ཤེས་པ་དང་། མཐའ་ཐམས་ཅད་དང་བྲལ་ནས་གོང་དུ་སྟོབས་སུ་གྱུར་ནས། འབྲས་བུ་སྦྱོར་བ་སྟེ། རྒྱུ་གཉིས་སོ་རྐྱེན་བཞི་ལ། བདག་པོའི་རྐྱེན་བླ་མ་སྟེ། དཔེར་ན་དབྱར་གྱི་ལོ་ཏོག་རླན་གྱིས་བསྐྱོད་ནས་སྟོན་འབྲས་བུ་ལྷག་པ་ལ། བདག་པོས་བདག་བྱས་ནས་རྐྱེན་ཆུ་ལུད་འཛོམས་པར་བྱས་ཏེ། ཐན་པའི་དུས་སུ་ཆུ་བཀྱེ། གཞན་གྱི་གནོད་པ་ལས་སྲུང་བར་བྱ་བ་དང་འདྲ་བར། རྡོ་རྗེ་སློབ་དཔོན་གྱིས་བདག་བྱས་ནས། ཏིང་ངེ་འཛིན་གྱི་འགལ་རྐྱེན་སྤང་། མཐུན་རྐྱེན་བསྒྲུབ་བོགས་འདོན་གྱི་གདམ་ངག་དབོག །ཉོན་མོངས་པ་དང་ཡུལ་གྱི་ཆོས་ཐམས་ཅད་སེམས་སུ་རྟོགས་པར་བྱེད། ལྟས་ངན་གཡང་དུ་བླན་མི་མཐུན་པ་གཉེན་པོར་བསྟེན་པ་ནི། ལམ་མཐོ་པོའི་ཡན་ལག་རྐྱེན་ཏེ། ལམ་དམའ་བའི་གྲོགས་རྣམས་ཀྱང་ཉམས་སུ་མྱོང་བར་བྱེད། འབྲས་བུ་ལ་སྦྱོར་བ་ནི་རྐྱེན་ནོ། །དཔེར་ན་རྡོ་རྗེ་སློབ་དཔོན་ནི་རྒྱུ་དང་རྐྱེན་གཉིས་ཀར་འགྲོའོ། །དབང་པོ་རྐྱེན་ནི། དབང་པོ་ལྔ་དང་སྟེ། མིག་ལ་བརྟེན་ཏེ་གཟུགས་ཐམས་ཅད་ཏིང་ངེ་འཛིན་གྱི་གྲོགས་སུ་འགྱུར་བ་དང་། རྣ་བ་ལ་བརྟེན་ཏེ་སྒྲ་ཐམས་ཅད་དེས་འགྲེས་པས། ཡུལ་དྲུག་གི་ཆོས་སེམས་ཉིད་ཀྱི་ངང་དུ་རྟོགས་པར་བྱེད་ལ། སེམས་མ་ཡེངས་པའི་བཏང་སྙོམས་ཆེན་པོའི་ངང་དུ་ལྷུན་གྱིས་གྲུབ་པ་ནི། དབང་པོའི་རྐྱེན་ནོ། །དམིགས་པའི་རྐྱེན་ནི། རྣལ་འབྱོར་པའི་དོན་དུ་གཉེར་བྱ་འཁོར་འདས་དབྱེར་མེད་པའི་ངོ་བོ་འོད་གསལ་གྱི་ཡེ་ཤེས་ཏེ། སེམས་ཉིད་ཅི་ལྟར་ཡིན་པའི་དོན་ལ། བྱས་བཅོས་ཐམས་ཅད་དང་བྲལ་བ་ཞེས་འདོད་ཕྲ་བའི་ཕྲ་བའང་མི་མངའ་བ་ནི་མ་བཅོས་པའི། དེ་ཉིད་ཆུའི་རང་བཞིན་གཤེར་བ་དང་འདྲ་བར། ཆོས་ཐམས་ཅད་ལ་ལྷུན་གྱིས་གྲུབ་ཅིང་། མི་མཐུན་པ་དང་གཉེན་པོ་མ་དམིགས་པའི་ངོ་བོ་ཉིད་ནི་གཉུག་མའི་བྱང་ཆུབ་སེམས་སོ། །གསང་སྔགས་ཀྱི་ངོ་བོ་འོད་གསལ་བ་ལ་སོགས་པ་མཚོན་པའི་ཐ་སྙད་ཚིག་གི་ཐ་སྙད་ཀྱིས་དོན་ཅིག་ཏུ་སྟོན་ལ། དཔེར་ན་ཡིད་བཞིན་གྱི་ནོར་བུ་རི་དབང་གི་རྒྱལ་པོ། ཉི་མ་ཕྱེད་ནགས་ཚལ་གྱི་དབུས་སུ་བཞུགས་པ་ལྟ་བུ་སྟེ། དེ་ལ་དམིགས་པས་ཏིང་ངེ་འཛིན་སྟོབས་སུ་གྱུར། འབྲས་བུ་སངས་རྒྱས་པའོ། །དེ་མ་ཐག་པའི་རྐྱེན་ནི། གོང་མ་འགགས་པས་གོ་ཕྱེ་ནས། ཏིང་ངེ་འཛིན་སྟོབས་སུ་གྱུར་ཏེ། ལམ་པའི་ངོ་བོས་ཏིང་ངེ་འཛིན་པ་གཡོ་བ་དང་། དེ་ལས་སྐྱེད་དུ་བྱ་བ་རིམ་པ་བཞིན། ཐོབ་པ་དང་། བརྟེན་པ་དང་། མཐར་ཕྱིན་པའི་གཞི་ཀུན་ལ་སྦྱར་ཏེ། སྔ་མ་བརྟེན་པ་དང་། ཕྱི་མ་གཡོ་བ་དང་ཐོབ་པ་ཀུན་བསྣོལ་མ་ལྟ་བུ་སྟེ་རྒྱུད་འབྲེལ་པའོ། །ཁྲིགས་གདུམ་དུ་མེད་དོ། །དོན་གྱི་རྣམ་གྲངས་རྣམ་དབྱེར་མེད་དེ་ཁྲིགས་བུར་མེད་དོ། །ཉམས་སུ་ལེན་པའི་ཐབས་མདོར་བསྡུས་པར་གྱུར་ན། དགོངས་ཉམས་སུ་དང་ལྡན་པའི་བླ་མ་ལ། དད་བརྩོན་ཤེས་རབ་དང་ལྡན་པའི་སློབ་མས་ཞུས་ཏེ། བཅུད་འཛོམས་ནས། བླ་མས་གདམ་ངག་ཕོག་པའི་དོན། སློབ་མས་ཉམས་སུ་བླངས་པའི་དང་པོ་ལ། རིག་པ་མ་བཅོས་པའི་ཤེས་རབ་རང་སོར་བཞག་པའི་དུས་སུ། བྱིང་རྨུག་དང་རྒོད་འཐོར་གྱི་སྐྱོན་དང་བྲལ་ཉི་མ་ཕྱེད་སྐད་ཅིག་མ་ལ་རྒྱུད་དུ་གནས་པའི་ཚུན་ཆད་ནི་གནས་པའི་ཏིང་ངེ་འཛིན་ཞེས་བྱ་སྟེ། ཏིང་ངེ་འཛིན་དང་པོའོ། །འདི་ཡི་དུས་སུ་རྟོགས་པས་མ་ཁྱབ་ཆེད་དུ་བསྒྲུབ་པའི་མ་བཅོས་པའོ། །སེམས་མཐོང་བའི་ལམ་མམ་སྣ་ག་ལྟ་བུ་ཡིན། ཞི་གནས་ཡིན་པས་རྣལ་འབྱོར་པ་བརྩོན་འགྲུས་སྟོབས་ཆེ་ན་ཉམས་སྣང་འཇམ་རྩུབ་རྣམས་སོ། །ནམ་མཁའི་སྤྲིན་ལྟར་རང་བྱུང་རང་ཞིར་གཞག །རེ་དོགས་གང་ཡང་མི་བྱ། འདིའི་དུས་སུ་ཉམས་ཅན་གྱི་བླ་མ་ཁོ་ན་གལ་ཆེ། འཁོར་དང་ཡུལ་ཞིང་དང་ཉེ་དུ་ལ་མི་ཆགས་ནས། ཐག་རིངས་གཏོད་པར་འགྲོ་བའི་འདུ་ཤེས་འབྱུང་། ཏིང་ངེ་འཛིན་དེའི་ཉམས་ཀྱི་རྨི་ལམ་ཡང་ཐད་སོར་འབྱུང་བར་བཤད། དེ་དག་ཀྱང་བསྒོམ་པའི་ཏིང་ངེ་འཛིན་བརྩོན་འགྲུས་ཆེ་བ་ལ་སྣང་གི། བརྩོན་འགྲུས་ཆུང་ན་སྣང་བ་མ་ཡིན་ཏེ། རྒྱུ་འབྲས་ཡིན་པས་སོ། །འདིའི་དུས་སུ་ཆུད་སོ་སོ་ཆོས་གང་དང་གང་ལ་བརྟེན་ཏེ། སྣང་བ་སེམས་སུ་ཆོད་པ་སྣང་བ་ཙམ་འབྱུང་། དེ་ནས་བརྩོན་འགྲུས་བསྐྱེས་པས་ཉིན་གཅིག་འམ། ཉིན་ཞག་གཅིག་ལ་ཐུན་ཅིག་ཙམ་ནུས་ནས་གོང་གི་སྐྱོན་དེ་དག་ཕྲ་བ་མི་འབྱུང་ན། ཏིང་ངེ་འཛིན་གཉིས་པའི་ཚད་དེ། འདིའི་དུས་སུ་ཆུ་རྙོག་མ་དང་འདྲ་བས་རྟོགས་པ་ཕྲ་བ་དག་ནས། ཏིང་ངེ་འཛིན་ལ་དེ་ཉིད་དུ་འཛིན་པའི་འདུ་ཤེས་ཀྱང་ཆུང་སྟེ། སེམས་ཀྱི་དོན་ཟུར་གསལ་བའོ། །འདིའི་དུས་སུས་དོན་མཐར་ཐུག་པ་འདི་ཡིན། ཆོས་སྐུ་འདི་ཁོ་ན་ཡིན་སྙམ་པ་འབྱུང་སྟེ། ཆུ་དྭངས་མས་གཉེར་མ་དང་འདྲ་བས་སེམས་ཉིད་ཀྱི་སྒྲིབ་བྱེད་གཙོ་བོའི་རྟོག་པ་བྲལ་བའི་ཕྱོགས་སོ། །འདིའི་དུས་སུ་སྣང་སེམས་དབྱེར་མེད་ཀྱི་རྟོགས་པ་འགོ་ཟུག་པ་བརྟན་པ་ཡིན་ཏེ། ཏིང་ངེ་འཛིན་ལ་འཛིན་པ་ཆུང་བ་ཉིད་སེམས་ཉིད་ཀྱི་དོན་མཐོང་བས་སེམས་ཉིད་རང་གི་རང་བཞིན་ཅི་ལྟར་ཡིན་པ་རྟོགས་པ་ལ་འཕྲིག་ཁུར་བའོ། །རྟོགས་པའི་བྱེ་བྲག་གི་སྣང་བ་རྨ་མས་འདི་ནས་འཆར་ཏེ། ཧ་ཅང་ཞི་བ་ན་ཡུན་པར་འགྱུར། འདིའི་དུས་སུ་ཁམས་གསུམ་གྱི་སེམས་ཅན་ལ་སྙིང་རྗེ་ཆེན་པོ་ཤུགས་ཀྱིས་འཆར། བླ་མ་སྐད་ཅིག་ཀྱང་མི་བརྗེད། དཀར་པོའི་ཆོས་སྤྱོད་རྒྱུན་མི་འཆད། གནག་ལས་འཕྲ་བའི་འཕྲ་བ་ཡང་ཡང་། ལུས་མ་བོར་བར་སྤྲུལ་པ་འགྲོ་བ་སྣ་ཚོགས་ཀྱི་དོན་བྱ་སྙམ་བློའང་འབྱུང་། གོས་དང་ཟས་ཀྱི་འདུ་ཤེས་ཆུང་། འདོད་ཆགས་ལ་སོགས་པ་ཆ་འཕྲ། བསྟོད་སྨད་དགའ་མི་དགའ་འདྲ། དོན་རྣམས་ཀྱང་དཔེར་ན་གཙུབ་ཤིང་གི་སྦྱོར་བ་བཞིན་བརྩོན་འགྲུས་དྲག་པོ་ལས་སྣང་གི། སོ་བདེ་ཙམ་གྱི་སྒོམ་སྒྲུབ་ལས་ནི་གང་ཡང་མི་སྣང་ངོ་། །སྐྱེས་བུ་སྐལ་ལྡན་གྱིས་དེ་ནས་བསྒོམ་པ་ལ་འབད་པས་སེམས་ཀྱི་གནས་ལུགས་ཅི་ལྟ་བ་ནི་སྣང་སེམས་དབྱེར་མེད་ཡིན་པས། དེའི་རྟོགས་པ་འཆར་བས། ཡུལ་སེམས་དབྱེར་མེད་ཅེས་བྱའོ། །ཡུལ་སེམས་སྣང་སེམས་དངོས་པོ་ཐམས་ཅད་བྲལ་བས་རྣལ་འབྱོར་པའི་ལུས་ལ་སེམས་གནས་པར་བཅས་པའི་འདུ་ཤེས་ཟད་པས་ནམ་མཁའ་ཡི་དབྱིངས་སུ་ཡལ་ཏེ། ནམ་མཁའ་རིག་པ་ཅན་དུ་གྱུར་པས་ཡུལ་གྱི་ཆོས་ཐམས་ཅད་སྣང་མི་སྣང་གི་ཐ་དད་ལས་འདས་པས། བློའི་ཡུལ་དུ་བཟུང་བའི་ཆོས་འཕྲ་བ་མ་དམིགས་པ་ནི། དེ་ལྟ་བུའི་དོན་རྣལ་འབྱོར་པའི་དོན་མངོན་དུ་བྱས་པའི་རྟོགས་པ་ཡིན་གྱི། དོན་མངོན་དུ་མ་བྱས་པ་རྣམས་ལ་ནི་ཚིག་གི་ཐ་སྙད་དེ་གཏམ་མོ། །དེ་ལྟ་བུའི་དགོངས་པ་ལ། འཁོར་དང་མྱ་ངན་ལས་འདས་པའི་ཆོས། ཅི་ལྟར་ཡང་མ་གཟིགས་ཏེ། ཞེས་པས། འཁོར་བའི་འཛིན་པ་དག་པས་མྱ་ངན་ལས་འདས་པ་མ་དམིགས། ཡུལ་གྱི་འཛིན་པ་དག་པས། ཡུལ་ཅན་མ་དམིགས་པས། ཐ་སྙད་དམ་དོན་དམ་ཞེས་པས་བྱུང་བའི་འདུ་ཤེས་ཐམས་ཅད་དང་བྲལ་བ་ནི་མཉམ་ཉིད་ཅེས་བྱ། རོ་ཅིག་ཅེས་བྱ། འཁོར་འདས་དབྱེར་མེད་ཅེས་བྱ་སྟེ། ཟག་མེད་རང་གི་མཚན་ཉིད་མངོན་དུ་སྣང་བས། ཁམས་གསུམ་གྱི་འཇིགས་པ་དང་བྲལ་ལོ། །ཟླ་བའམ་ལོའམ་དེ་བས་ཀྱང་བར་རིང་བར་ཏིང་ངེ་འཛིན་ལ་གནས་ཀྱང་སེམས་རང་ཐོག་ཏུ་ཕེབས། རང་གིས་རང་རིག་བསྒོམ་བྱ་བསྒོམ་བྱེད་མེད། །བསྒོམ་པའི་ངོ་བོ་ལ་དམིགས་ཏེ། །བསྒོམ་མཁན་ལ་དམིགས་པའི་ཕྱིར། །ནམ་མཁའ་ནམ་མཁའ་ལས་མི་འདའ་བ་དང་འདྲ་བར། ཏིང་ངེ་འཛིན་ལ་གནས་མི་ནུས་པ་མེད། གནས་བྱ་གནས་བྱེད་མེད། མ་རྟོགས་པའི་འཁྲུལ་པ་ཐམས་ཅད་མི་མཁྱེན་པའམ་མི་གཟིགས་པ་མེད་ཀྱང་། མཁྱེན་བྱ་མཁྱེན་བྱེད་དང་། གཟིགས་བྱ་གཟིགས་བྱེད་མེད་པ་ནི་རོ་གཅིག་གི་ཏིང་ངེ་འཛིན་མཐར་ཕྱིན་པའོ། །དེའི་རྟགས་ཕྱི་རུ་ཤར་བའི་མཚན་མ་ནི། ལྷའི་བུ་མོ་མཐོང་ཡང་ཆགས་པའི་སེམས་མི་སྐྱེ་སྟེ་སེམས་སྣང་བས་སོ། །སྲིན་པོ་འབར་བ་མཐོང་ཡང་སྐྲག་པའི་སེམས་མི་སྐྱེ་སྟེ། གཅིག་པའི་འདུ་ཤེས་ཟད་པས་སོ། །ཡུལ་དྲུག་གི་ཆོས་ཅི་སྣང་ཡང་གཟུང་འཛིན་དུ་སོང་བ་མེད་དེ། སེམས་ཉིད་རང་སྣང་བའོ། །ཉོན་མོངས་པ་ལྔ་གཏན་དག །མངོན་པར་ཤེས་པ་འདིའི་སྐབས་སུ་འབྱུང་། དེའི་རྟེན་གྱི་གང་ཟག་དེ། འདས་ན་དེའི་བར་དོ་ལ་ཆོས་སྐུ་ལ་སྦྱོར་ནས་སྐུ་གསུམ་ལྷུན་གྱིས་གྲུབ་པའོ། །ཏིང་ངེ་འཛིན་དེ་དག་ཉམས་སུ་ལེན་པའི་རྣལ་འབྱོར་པའི་སྤྱོད་པ་ནི། ཏིང་ངེ་འཛིན་དང་པོའི་དུས་སུ་རྣམ་པར་དཀར་བའི་སྤྱོད་པ་ཐ་དག་ཉམས་སུ་བླང་སྟེ། ཐུན་མོང་གི་ཐེག་པའི་གཞུང་བཞིན་ནོ། །ཏིང་ངེ་འཛིན་དང་པོ་དང་། གཉིས་པ་དང་། གསུམ་པའི་དུས་སུ། ཉམས་ཅན་གྱི་བླ་མ་དང་མི་འབྲལ་བ་གལ་ཆེ། མུན་ནག་གི་ནང་ན་འགྲོ་བའི་ལམ་མཚོན་པའི་སྒྲོན་མེ་ཡིན། ཆུ་ཆེན་པོ་ལས་སྒྲོལ་བའི་སྐྱ་བ་འཛིན་མཁན་ཡིན། བླ་མའི་མོས་གུས་དང་ཏིང་ངེ་འཛིན་ལ་མི་ཞེན་ནས། མ་ཡེངས་པའི་བཏང་སྙོམས་ལ་གནས་པ་དང་། བརྩོན་འགྲུས་ལ་བར་མཚམས་མེད་པ་གསུམ་བོགས་འདོན་གྱི་གཙོ་བོ་ཡིན་ཏེ། གཞན་མ་ལ་ཤས་ཤིག་ཞེ་འདོད་ཀྱི་ལྗང་བུ་འཐོན་པའོ། །འདིའི་གཞུང་དུ་སྨོས་པའི་བརྩོན་འགྲུས་དང་མི་ལྡན་ཡང་། བསྒོམ་པའི་སྲོག་ནི་མ་ཡེངས་པ་ཞེས་པས་སྤྱོད་ལམ་རྣམ་བཞིར་མ་ཡེངས་པར་བྱ་བ་དང་། དེ་རྟོགས་ནས་རྨི་ལམ་དང་གཉིད་འཐུག་པོ་འབྱུང་པ་གལ་ཆེ། སྤྱོད་ལམ་མ་ཡེངས་ཏིང་འཛིན་མི་གཡོ་བ། །རྣམ་རྟོག་ཕྲ་དང་ཕྲ་བའི་ཕྲ་བ་རྣམས། །རྩད་མི་ཆོད་པས་སྐྱོན་སྲིན་ཤས་ཙམ་འདུག །ཏིང་འཛིན་གཉིས་པའང་རྣམ་པར་དཀར་བའི་དཀར་པོའི་སྤྱོད་པ་སྟེ། ཆོས་ཐམས་ཅད་སྒྱུ་མའི་དཔེ་བརྒྱད་ལྟ་བུར་སྦྱོར་བའོ། །གཞན་དོན་ནི་ཆེད་དུ་གཉེར་མི་དགོས། ཏིང་ངེ་འཛིན་གྱི་ཤུགས་ཀྱིས་རང་ཤར་དུ་འོང་། ཁས་བླངས་པའི་འདུལ་སྡོམ་རྣམས་ནི། སྔར་གྱི་གོ་ཆ་ཆེན་པོའི་སྟོབས་ཀྱིས་བསྲུངས་པས། ཕྱིས་ནི་ཉེས་པའི་རྩ་བ་བདག་འཛིན་དག་པས། ཉམས་པ་རྒྱུ་ནས་དག་པའི་སྟོབས་ཀྱིས་ཉི་མའི་དཀྱིལ་ན་མུན་པ་མི་གནས་པ་དང་འདྲའོ། །དེ་ལྟ་བའི་སྐྱེས་བུས་ཀྱང་། གཞན་དོན་དུ། གནས་ཆོས་ཀྱི་དབྱིངས་ལ་གནས་ཀྱང་། འདུས་བྱས་ཀྱི་དགེ་རྩ་རྒྱུན་མི་འཆད། སློབ་མ་གོ་འཕང་མཆོག་བརྙེས་ཀྱང་། །སེམས་ཅན་གནས་པའི་བླ་མ་བཀུར། །སེམས་ཅན་ཡུལ་དུ་མ་དམིགས་ཀྱང་། །སྙིང་རྗེའི་ཆུ་བོ་རྒྱུན་མི་གཅད། །སྒྲ་རྣམས་རང་རིགས་རང་ཤེས་ཀྱང་། །འཆལ་རྒོད་ལོ་རྒྱུས་བླང་མི་བྱ། །ཅི་བྱས་རྒྱལ་བའི་མཛད་སྤྱོད་ཀྱང་། །འཕྱོ་གཡེང་བརྐམ་པའི་ལས་མི་བྱ། །སྟོང་གསུམ་སངས་རྒྱས་པར་ཤེས་ཀྱང་། །གྲོང་པའི་དགོན་པར་གནས་མི་བྱ། །ཡེ་སངས་རྒྱས་པར་མངོན་རྟོགས་ཀྱང་། །སེང་གེའི་ཡུལ་ལྟར་ཅིག་ཏུ་གནས། །རི་ཁྲོད་དགོན་པར་གནས་བཅས་ཀྱང་། །དེ་རུ་བཅས་བཅོས་མི་བྱ་འདུག །དམ་པ་རྣམས་ཀྱི་སྤྱོད་པའོ། །རྣལ་འབྱོར་བཞི་པ་ལྷུན་གྱིས་གྲུབ་པའི་རྣལ་འབྱོར་ནི་སངས་རྒྱས་པ་སྟེ། མཉམ་པ་ཉིད་ཀྱི་ཏིང་ངེ་འཛིན་མཐར་ཕྱིན། ལམ་གྱི་བྱ་བ་ཟད་པའི་ངོ་བོ་ནི་འབྲས་བུ་སྟེ། གཞན་དག་ལས་ཆོས་ཀྱི་སྐུ་ནམ་མཁའ་ལྟ་བུ། ལོངས་སྤྱོད་རྫོགས་པའི་སྐུ་སྤྲིན་ལྟ་བུ། དེ་ལས་སྤྲུལ་པའི་སྐུ་ཆར་ལྟ་བུས་འགྲོ་དོན་རྒྱུན་དུ་བྱེད་པ་ནི། ཤིན་ཏུ་ཡང་བདེ་མོད་ཀྱང་། ཆོས་ཀྱི་སྐུ་ནི་ནམ་མཁའ་ལྟ་བུ་མཐའ་ཐུག་པ་མེད་པ། ཆོས་ཀྱི་དབྱིངས་དང་མཉམ་པའི་ངང་ལས་འཁོར་བའི་ཉོན་མོངས་པ་རྒྱུ་འབྲས་ཕྲ་བའི་ཕྲ་བའང་། མ་གྲུབ་པ་ནི་ལྷག་པའི་ཆོས་སྐུ་ཆེན་པོའོ། །དེའི་ངང་ལས་ཁམས་གསུམ་གྱི་སེམས་ཅན་ཐམས་ཅད་ཀྱི། མེ་ལོང་ལས་གཟུགས་བརྙན་གྱི་ཚུལ་དུ་སྣང་བ་ནི། ཅི་སྙེད་མཁྱེན་པའོ། །ཁམས་གསུམ་གྱི་སེམས་ཅན་ཐམས་ཅད་ཀྱི་རྒྱུད་ལས། སེམས་ཅན་གཅིག་གི་ཐོག་མ་མེད་པ་ནས་ཐ་མ་མེད་པའི་རྣམ་པ ར་རྟོགས་པའི་གྲངས་ཐམས་ཅད་མཁྱེན་ཏེ། གདུལ་བྱ་ཉིད་ལས་མི་གཞན་པ་དང་། བསམ་གྱིས་མི་ཁྱབ་པའི་ཡེ་ཤེས་ལ་མངའ་བརྙེས་པའོ། །དེས་ན་ཐམས་ཅད་མ་འགགས་པ་ནི་ཅི་སྙེད་མཁྱེན་པའོ། །མཁྱེན་བྱ་མཁྱེན་བྱེད་ཀྱི་རྟོགས་པ་ལས་གྲོལ་བ་ནི། ཅི་ལྟ་བ་མཁྱེན་པའོ། །འདིར་ཟག་བཅས་ཀྱི་ཤེས་པས། ཟག་མེད་སངས་རྒྱས་ཀྱི་ས་གཞལ་བ་ནི། ལུང་ཟབ་མོ་རྣམས་ཀྱིས་བསྒྲུབ་དགོས་པའོ། །བྲི་ཡིས་མི་མངའ་བས་འགོ་ཕྱོགས་ཙམ་མོ། །ཆོས་ཀྱི་སྐུ་གང་དུ་ཡང་མ་གྲུབ་པ་ཅིར་ཡང་འཆར་བ་ལྷུན་གྱིས་གྲུབ་པའི་ཐུགས་རྗེ་དང་། སྔོན་གྱི་སྨོན་ལམ་རྒྱ་ཆེན་པོའི་རྒྱུ་ལས། གདུལ་བྱའི་རྐྱེན་གྱིས་མེ་ལོང་གི་གཟུགས་བརྙན་བཞིན་དུ་སྣང་བ་ནི། ཟག་མེད་ལ་ལོངས་སྐུ། ཟག་བཅས་ལ་སྤྲུལ་སྐུའི་གདུལ་བྱའི་བློ་བཞིན་དུ་དོན་མཛད་དོ། །གདུལ་བྱ་རྣམས་ཀྱིས་སེམས་ཉིད་ཆོས་སྐུ་ཡིན་པའི་ཕྱིར། རྒྱུད་ནས་ཤར་བ་མེད་དེ། གདུལ་བྱའི་མདུན་དེ་ཉིད་ན་གདུལ་བྱེད་སྣང་བས། འགྲོ་འོང་དང་བྲལ་ལ་ཆུ་ཟླ་ལྟ་བུའོ། །མཐུན་པར་སྣང་བ་མེ་ལོང་ལྟ་བུའོ། །མཐུ་ཆུང་ནན་ལ་བཏབས་པ་བཞིན། བན་ལྡོམ་ཡིས་ཚིག་སྡོམ་བརྗོད་པ་འདི། ལྷ་ཡུལ་བདུད་རྩི་བརྗོད་ནས་མཚུངས། །སློབ་མས་བསྐུལ་བའི་ངོར་བྱས་པ། །དམ་པའི་དྲིན་ཙམ་བྲོ་བ་ཡིས། །ཐ་སྙད་ཡི་གེར་བཀོད་པ་འདི། །འགལ་འཁྲུལ་གོང་མ་རྣམས་ལ་བཤགས། །ངལ་བའི་དགེ་བ་ཅི་མཆིས་པ། །སྒྲུབ་པ་ཉམས་ལེན་རྣལ་འབྱོར་རྣམས། །ལམ་གྱི་འཚེ་བ་ཀུན་བྲལ་ནས། །མྱུར་དུ་འགྲོ་བ་འདྲེན་པར་ཤོག །བཀའ་བརྒྱུད་ཟབ་མོ་འོ་མའི་རྒྱ་མཚོ་ལ། །འཆི་མེད་འོད་གསལ་སེམས་ཉིད་མངོན་དུ་བཞུགས། །རྗེ་བཙུན་གསུང་གི་བསྒྲུབ་ཅིང་བསྒྲུབ་བྱས་ནས། །ཐོས་བསམ་བསྒོམ་གསུམ་བརྩོན་འགྲུས་གྲོགས་ཀྱིས་བསྙམ། །སྙིང་པོ་མར་ཉིད་ཆོས་སྐུ་མངོན་དུ་སྣང་། །སངས་རྒྱས་གཉིས་པ་རྗེ་བཙུན་ཐུགས་དགོངས་ནས། །འཆི་མེད་སྨན་ཆེན་གཉུག་མ་ལྷུན་གྱིས་གྲུབ། །མོས་གུས་རྡོ་རྗེ་མཆུ་ཡིས་རབ་བླངས་ན། །རང་སེམས་པད་མར་རོ་བཅུད་ཉམས་སུ་མྱོང་། །ཡུལ་དྲུག་གཡོ་མེད་སྨིགས་རྒྱུའི་ཕུང་པོ་ལ། །གསང་སྔགས་རིག་པའི་རྒྱལ་པོ་ལྷུན་གྱིས་གྲུབ། །སྟོན་བྱེད་བླ་མའི་གསུང་བཞིན་ཉམས་བླངས་ནས། །ཐེ་ཚོམ་གཅོད་ཅིང་ངེས་ཤེས་སྐྱེ་བར་སྣང་། །གཉིས་འཛིན་རྡོ་རྗེ་བྲག་གི་སྙིང་པོ་ན། །མ་བཅོས་གཉུག་མའི་བདུད་རྩི་ཆེན་པོ་གནས། །གདམ་ངག་རྡོ་རྗེ་གཟོང་གིས་རབ་བརྐོས་ནས། །ཡུལ་བྲལ་བདུད་རྩི་ཆེན་པོ་མངོན་དུ་སྣང་། །དུག་ལྔ་གཟུང་འཛིན་རག་པའི་རི་བོ་ལ། །ཕྱོགས་འཛིན་བྲལ་བའི་བདུད་རྩི་ཆེན་པོ་གནས། །མཉམ་པ་ཉིད་ཀྱི་གཡོས་ཀྱིས་རབ་སྦྱར་ནས། །དུག་ལྔ་རང་དག་བདུད་རྩི་ཆེན་པོ་ཉིད། །ཧེ་ཧེ་ཧེ། དགེའོ། །གལ་གནད་རྫོགས་སོ། །ཤེས་ཚད་ཀྱི་ཡི་གེ་གཟབས་ནས་འདུག །དཔོན་སྒོམ་རིང་བྱང་ཐུགས་དགྱེས་པར་མཛོད་ཅིག །བཀྲ་ཤིས་དགེའོ།། །།