བྱང་ཆུབ་ཀྱི་སེམས་མི་ནུབ་པའི་རྒྱལ་མཚན་རྡོ་རྗེ་སེམས་དཔའ་ནམ་མཁའ་ཆེའི་འགྲེལ་བཤད་གསང་བདག་དགའ་རབ་དཔའ་བོའི་དགོངས་རྒྱན། མཁྱེན་བརྩེའི་བློ་གྲོས།

བྱང་ཆུབ་ཀྱི་སེམས་མི་ནུབ་པའི་རྒྱལ་མཚན་རྡོ་རྗེ་སེམས་དཔའ་ནམ་མཁའ་ཆེའི་འགྲེལ་བཤད་གསང་བདག་དགའ་རབ་དཔའ་བོའི་དགོངས་རྒྱན་ཞེས་བྱ་བ་བཞུགས་སོ། །ན་མོ་གུ་རུ་རཏྣ་བྷྱཿ ཁྱད་ཆོས་དྲུག་ལྡན་ཆོས་སྐུ་འོད་མི་འགྱུར། །ལྔ་ལྡན་ལོངས་སྐུའི་མངའ་བདག་རྡོ་རྗེ་སེམས། །ཐུགས་རྗེ་སྤྲུལ་སྐུའི་སྟོན་མཆོག་དགའ་རབ་རྗེ། །དབྱེར་མེད་འཁོར་ལོའི་མགོན་ལ་གུས་བཏུད་དེ། །ཐེག་མཆོག་རྫོགས་ཆེན་རྒྱུད་རྣམས་ཀུན་གྱི་བཅུད། །ཡང་སྤྲུལ་དཔའ་བོའི་མཚན་དཔེའི་ཉི་མ་མཆོག །གླིང་འདིར་ཤར་ཚེ་ཞལ་འདོན་མཛད་བཞིན་དུ། །བྱུང་བའི་རྨད་བྱུང་སྙིང་པོའི་དོན་རྣམས་དབྱེ། །དེ་ལ་འདིར་བསྟན་པ་ཡོངས་ཀྱི་སྙིང་པོ། གསུང་རབ་མ་ལུས་པའི་ཉིང་ཁུང་། རྒྱུད་ཐམས་ཅད་ཀྱི་རྒྱལ་པོ། ལུང་མཐའ་དག་གི་སྤྱི་འགྲེལ། མན་ངག་ཐམས་ཅད་ཀྱི་ངེས་དོན། གསང་བ་བས་ཀྱང་ཆེས་གསང་བ། ཡང་གསང་རྨད་དུ་བྱུང་བ། དངོས་པོ་ཐམས་ཅད་རང་གྲོལ་དུ་གཏན་ལ་འབེབས་པར་བྱེད་པ། བྱང་ཆུབ་ཀྱི་སེམས་མི་ནུབ་པའི་རྒྱལ་མཚན་རྡོ་རྗེ་སེམས་དཔའ་ནམ་མཁའ་ཆེ་ཞེས་བྱ་བ་འདི་ཉིད་ཚིག་གི་དོན་གྱི་བཤད་པ་ལ་གསུམ་སྟེ། གང་ཟག་དབང་པོ་རབ་ལ་མཚན་དང་ཕྱག་འཚལ་བ་བསྟན་པ། འབྲིང་ལ་དཀྱུས་ཀྱི་ས་བཅད་པ། ཐ་མ་ལ་ཡན་ལག་རྒྱས་པར་བཤད་པའོ། །དང་པོ་ལ་མཚན་ནི། རྒྱ་གར་སྐད་དུ། བཛྲ་སྭ་བྷཱ་ཝ་མ་ཧཱ་ཀཪྴ་ཀཱ་རི་ཀ །བོད་སྐད་དུ། རྡོ་རྗེ་སེམས་དཔའ་ནམ་མཁའ་ཆེ་ཞེས་བྱ་བ། འདི་ལ་གཡུ་སྒྲའི་འགྱུར་དུ། རྒྱལ་མོ་ཚ་བའི་སྐད་དུ། བེ་བོ་ཤན་ཅ་མན་ཙ་གོ། ཞེས་ཀྱང་འབྱུང་ངོ་། །དེ་ལ་གསུམ། དཔེ་ལས་མཚན་དུ་བཏགས་པ་ནམ་མཁའ་ཞེས་བྱ། དོན་ལས་མཚན་དུ་བཏགས་པ་རྡོ་རྗེ་སེམས་དཔའ་ཞེས་བྱ། ཡོན་ཏན་ལས་མཚན་དུ་བཏགས་པ་ཆེ་ཞེས་བྱ་བ་དང་གསུམ་ལས། དང་པོ་ལ་འབྱུང་ཆེན་གཏོས་ཀྱི་ནམ་མཁའ་འདི་ལ་མཐའ་དབུས་མེད་ཅིང་འཕོ་འགྱུར་དང་བྲལ་བ། དེ་ལས་ཆོ་འཕྲུལ་ཅིར་ཡང་མི་འགག་པ། ཆོ་འཕྲུལ་འབྱུང་ཡང་ནམ་མཁའ་དང་གཉིས་མེད་པ། བརྟགས་ན་ཅིའི་ངོ་བོར་ཡང་མ་གྲུབ་པའི་ཁྱད་པར་གྱི་ཆོས་བཞི་ཡོད་པ་ལྟར། དོན་ལ་ཡང་། གཞི་མི་འགྱུར་ལྷུན་གྱིས་གྲུབ་པའི་རྡོ་རྗེ་སེམས་དཔའ། ངོ་བོ་མ་ངེས་རང་རིག་ཅིར་ཡང་གསལ་བའི་རྡོ་རྗེ་སེམས་དཔའ། དོན་མི་འབྱེད་གཉིས་འཛིན་སྤྲོས་པ་གཅོད་པའི་རྡོ་རྗེ་སེམས་དཔའ། བདག་ཉིད་མི་གནས་རིག་པ་ཡུལ་མེད་དུ་གྲོལ་བའི་རྡོ་རྗེ་སེམས་དཔའ་བཞི་དང་། ཡོན་ཏན་ལའང་། གཞི་ལྷུན་གྲུབ་དམིགས་མཐའ་དང་བྲལ་བ་ཆོས་ཉིད་དབྱིངས་སུ་སངས་རྒྱས་པའི་ཆེ་བ། ངོ་བོ་ངེས་མེད་རོལ་པ་ཅིར་ཡང་འཆར་བ་བདག་ཉིད་ཆེན་པོ་དབུས་མཐའ་མེད་པའི་ཆེ་བ། དོན་སྐྱེ་མེད་གཉིས་སུ་མེད་པ་དེ་ཉིད་ཡིན་པའི་ཆེ་བ། བདག་ཉིད་ཐོག་མཐའ་མེད་པར་རྟོགས་པ་མངོན་དུ་གྱུར་པ་མངོན་པར་སངས་རྒྱས་པའི་ཆེ་བ་དང་བཞི་སྟེ། ཅི་སྟེ་ཆེ་ན་དེ་བཞིས་ཨ་ནུ་མན་ཆད་ཀྱི་ཐེག་པ་འོག་མ་ཟིལ་གྱི་གནོན་པས་སོ། །དེ་ཡང་དཔེ་བཞི་དོན་བཞི་ཆེ་བ་བཞི་དབྱེར་མེད་དུ་སྦྱོར་བ་ཡིན་པས། འོ་ན་ཨ་ཏི་ཡོ་ག་བྱ་བའི་ཆེ་བ་ཟླ་བ་ཁུར་དུ་བྱས་པ་ལྟ་བུ་ཞིག་ཡོད་དམ་ཞེ་ན། མེད་དེ། གཞི་ངོ་བོ་དོན་དང་བདག་ཉིད་མཉམ་པ་ཉིད་ཕྱོགས་མེད་ཆེན་པོའི་རང་བཞིན་ལ་གང་གིས་ཀྱང་བོགས་གདོན་དུ་མེད་དེ། མཉམ་པ་རིས་མེད་ཐམས་ཅད་ནས་ཐམས་ཅད་དུ་སངས་རྒྱས་པའི་ཆེ་བ་སྟེ། དེས་རྫོགས་པ་ཆེན་པོའི་ཆེ་བ་བཞི་རུ་འཛིན་པ་རང་ཡང་ཟིལ་གྱིས་གནོན་པ་ཡིན་ཏེ། བྱང་ཆུབ་ཀྱི་སྙིང་པོ་བསྟན་པ་ལས། མངོན་སུམ་སྣང་བའི་རང་བཞིན་ཡེ་སངས་རྒྱས། །དེ་ཡི་མཚན་ཉིད་ཆོས་དབྱིངས་མུ་མཐའ་གྲོལ། །དེ་མཁྱེན་ཡེ་ཤེས་མཐའ་དབུས་ཀུན་ཁྱབ་རྒྱས། །དེ་ཉིད་དེ་ཡིན་དེ་མཚོན་ངེས་པའི་ཚིག །དགོས་པས་སྤྲད་ཀྱི་སྒྲ་ལ་དོན་མི་བཞག །ཅེས་གསུངས་པས། དང་པོ་གང་ཆེ་ན། རྫོགས་ཆེན་རང་གཞུང་མངོན་སུམ་པར་སངས་རྒྱས་པས་ཆེ་ལ། གང་ལས་ཆེ་ན། ཉན་ཐོས་སྤོང་བ་དང་རང་རྒྱལ་འགེགས་ལ་བྱང་སེམས་ཀྱིས་སྤྱོད་པ་རྣམས་ལས་ཆེ་ཞིང་། གང་གིས་ཆེ་ན། ཚོགས་བརྒྱད་ཡུལ་དང་བཅས་པ་ཉིད། །མཚན་ཉིད་རང་རིག །རང་བཞིན་སྤྲོས་བྲལ། རྣམ་པ་སྒྱུ་མར་མངོན་སུམ་དུ་ལྷུན་གྱིས་གྲུབ་པས་ཆེ་སྟེ། ཇི་ལྟར་ཆེ་ན་དེ་ལྟར་རྟོགས་པའི་ངང་ལ་གནས་པས་བག་ཆགས་ཀྱི་རྟེན་ཀུན་གཞི་གྲོལ་བས། དངོས་མཚན་དང་མ་རིག་པའི་མུན་པ་སངས་ཏེ་ཡེ་ཤེས་ཕྱོགས་རིས་མེད་པར་རྒྱས་པས། མཚན་ཉིད་སྡེ་གསུམ་ཟིལ་གྱིས་གནོན་པའི་གཉེན་པོས་ཆེ་བས་ན། དེ་ལས་རྫོགས་ཆེན་རང་གཞུང་མངོན་པར་སངས་རྒྱས་ཆེ། སྤོང་འགེགས་སྦྱོང་ལས་ཚོགས་བརྒྱད་ཡུལ་དང་བཅས། རང་རིག་སྤྲོས་བྲལ་སྒྱུ་མར་ལྷུན་གྲུབ་པས། །དེར་གནས་བག་ཆགས་རྟེན་གྲོལ་དངོས་མཚན་དང་། །མ་རིག་མུན་སངས་ཡེ་ཤེས་ཕྱོགས་མེད་རྒྱས། །དམན་པའི་ཐེག་པ་ཟིལ་གནོན་གཉེན་པོར་ཆེ། །ཞེས་སོ། །གཉིས་པ་གང་ཆེ་བ། རྫོགས་པ་ཆེན་པོ་བདག་ཉིད་ཆེན་པོར་སངས་རྒྱས་པས་ཆེ་ལ། གང་ལས་ཆེ་ན། རྣལ་འབྱོར་ཆེན་པོ་ལ་སོགས་རྩོལ་སྒྲུབ་ཀྱི་གཞན་དབང་ལ་ལྟོས་ནས་འབྲས་བུ་ཐོབ་པར་འདོད་པ་དེ་ལས་ཆེ་ཞིང་། གང་གིས་ཆེ་ན། བདག་ཉིད་ཆེན་པོར་རང་ཉིད་ཡེ་ནས་དབང་ཐོབ་ཟིན་པས་ཆེ་སྟེ། ཇི་ལྟར་ཆེ་ན། འོག་མའི་ཚུལ་ངན་པའི་རྩོལ་བ་སངས་ནས་རང་རིག་པའི་ཡེ་ཤེས་ཕྱོགས་མེད་དུ་རྒྱས་པས་མ་ཧཱ་ཟིལ་གྱིས་གནོན་པའི་གཉེན་པོར་ཆེ་བས་ན། སྔ་མ་ལས། རྣམ་འབྱོར་ཆེན་པོ་ལ་སོགས་རྩོལ་སྒྲུབ་ཀྱི། །གཞན་དབང་ལ་ལྟོས་ཟིལ་གནོན་གཉེན་པོར་ཡང་། །བདག་ཉིད་ཆེན་པོར་རང་ཉིད་ཡེ་དབང་བས། །ཚུལ་ངན་རྩོལ་སངས་རང་རིག་ཕྱོགས་མེད་རྒྱས། །ཞེས་སོ། །གསུམ་པ་གང་ཆེ་ན། རྫོགས་པ་ཆེན་པོ་ཆོས་ཉིད་དབྱིངས་སུ་སངས་རྒྱས་པས་ཆེ་ལ། གང་ལས་ཆེ་ན། ཨ་ནུ་ལ་སོགས་རྒྱུ་འབྲས་སུ་འདོད་པའི་གཉེན་པོར་ཆེ་ཞིང་། གང་གིས་ཆེ་ན། རྒྱུ་རྐྱེན་འབྲས་བུ་ཐམས་ཅད་ཆོས་ཀྱི་དབྱིངས་སུ་རོ་གཅིག་པས་ཆེ་སྟེ། ཇི་ལྟར་ཆེ་ན། རྒྱུས་མ་བསྐྱེད་རང་གི་ངོ་བོས་ཅིར་ཡང་མི་གནས། གཉེན་པོས་འགག་པ་མིན་པས་དེ་ལྟར་འདོད་པ་སངས་ལ། མུ་བཞི་མཐའ་དྲུག་ཀུན་མཁྱེན་ལ་རྒྱུ་འབྲས་ཀྱི་མཚན་མ་ཟིལ་གྱིས་གནོན་པའི་ཡེ་ཤེས་རྒྱས་པས་ཆེ་བས་ན། དེ་ཉིད་ལས། རྗེས་འཇུག་ལ་སོགས་རྒྱུ་འབྲས་གཉེན་པོར་ཡང་། །རྒྱུ་རྐྱེན་འབྲས་བུ་ཆོས་དབྱིངས་རོ་གཅིག་པས། །མ་བསྐྱེད་མི་གནས་འགག་མིན་དེ་འདོད་སངས། །ཀུན་མཁྱེན་མཚན་མ་ཟིལ་གནོན་ཡེ་ཤེས་རྒྱས། །ཞེས་སོ། །བཞི་པ་གང་ཆེ་ན། རྫོགས་པ་ཆེན་པོ་དེ་ཉིད་ཡིན་པར་སངས་རྒྱས་པས་ཆེ་ལ། གང་ལས་ཆེ་ན། སེམས་དཔའ་རྣལ་འབྱོར་ལ་སོགས་བླང་དོར་ཅན་དུ་འདོད་པ་ལས་ཆེ་ཞིང་། གང་གིས་ཆེ་ན། བླང་བྱ་དོར་བྱ་ཐམས་ཅད་ཆོས་ཉིད་དེ་ཉིད་ཡིན་པར་སངས་རྒྱས་པས་ཆེ་སྟེ། གང་ལྟར་ཆེ་ན། ཡིན་པ་བླང་བྱ་དང་མིན་པ་དོར་བྱའི་ཕྱོགས་རིས་ཐམས་ཅད་སངས་ལ་མཉམ་ཉིད་རང་གསལ་དུ་རྒྱས་པས་ཆེ་བས་ན། དེ་ཉིད་ལས། སེམས་དཔའི་རྣལ་འབྱོར་ལ་སོགས་བླང་དོར་ཅན། །ཟིལ་གནོན་གཉེན་པོ་ཐམས་ཅད་དེ་ཡིན་པས། །ཡིན་མིན་ཕྱོགས་སངས་མཉམ་ཉིད་རང་གསལ་རྒྱས། །ཞེས་སོ། །ལྔ་པ་ནི། དེ་ལྟར་ལྷུན་གྱིས་གནས་པའི་བདེ་བ་ཆེན་པོ་དོན་དམ་པའི་ཡེ་ཤེས་ཀྱི་ཁྱད་པར་དུ་འཕགས་ཏེ། རྩོལ་བ་དང་རྒྱུ་འབྲས་དང་བླང་དོར་གྱི་ཕྱོགས་གསུམ་ལ་བཟླས་པས་རང་གསལ་དུ་ཡེ་ནས་སངས་རྒྱས་པ་ལ། གཞན་སེལ་སངས་རྒྱས་དངོས་པོ་དང་མཚན་མར་འདོད་པ་དང་། ཉི་ཚེ་བའི་སྟོང་པ་ཉིད་དུ་འདོད་པ་ལས་གྲོལ་ཞིང་། དོན་གཉེར་འབྲས་བུའི་དེ་ཁོ་ན་ཉིད་རྨོངས་པ་ལ་མཚོན་པའི་དགོས་པ་ཡོད་པའི་ཕྱིར་བརྡ་དོན་སྤྲད་པ་ཡིན་གྱི། དེ་ཡང་ཚིག་ཏུ་བཏགས་པ་ཙམ་ལ་ངེས་པའི་དོན་དུ་འདོད་པ་དེ་ཟིལ་གྱིས་གནོན་པས་ཆེ་བ་སྟེ། སྔ་མ་ལས། ལྷུན་གནས་བདེ་ཆེན་དོན་དམ་ཡེ་ཤེས་འཕགས། །ཕྱོགས་གསུམ་ལ་བཟླས་རང་གསལ་ཡེ་སངས་རྒྱས། །དངོས་མཚན་ཉི་ཚེའི་སྟོང་པ་ལས་གྲོལ་ཞིང་། །དོན་ཉིད་རྨོངས་ལ་མཚོན་ཕྱིར་བརྡ་སྤྲད་ཀྱི། །དེ་ཡང་ཚིག་ཙམ་ངེས་འདོད་ཟིལ་གནོན་ཆེའོ། །ཞེས་སོ། །དེའང་དང་པོ་མངོན་སུམ་པར་སངས་རྒྱས་པས་ཤེས་བྱའི་རང་བཞིན་བསྟན་ལ། བདག་ཉིད་ཆེན་པོ་དང་ཆོས་ཀྱི་དབྱིངས་སུ་སངས་རྒྱས་པ་གཉིས་ཀྱིས་མཚན་ཉིད་བསྟན་ཞིང་། ཐམས་ཅད་དེ་ཉིད་ཡིན་པར་སངས་རྒྱས་པས་ངེས་ཚིག་བསྟན་ནས། ཐ་མ་སངས་རྒྱས་མེད་པའི་ཆེ་བས་རྒྱས་གདབ་སྟེ་བརྡ་དོན་དུ་འཛིན་པ་ལས་བཀྲོལ་བ་དེས་ན་ཆེ་བ་ལྔ་ལྡན་གྱི་རྫོགས་པ་ཆེན་པོ་ཞེས་བྱ་སྟེ། དེ་ཉིད་ལས། དང་པོས་ཤེས་བྱའི་རང་བཞིན་གཉིས་མཚན་ཉིད། །གཅིག་གིས་ངེས་ཚིག་ཐམས་ཅད་རྒྱས་བཏབ་པ། །ཆེ་ལྔས་ཁྱད་འཕགས་དེས་ན་རྫོགས་པ་ཆེ། །ཞེས་སོ། །གཉིས་པ་ཕྱག་འཚལ་བ་ནི། བཅོམ་ལྡན་འདས་དཔལ་རྡོ་རྗེ་སེམས་དཔའ་ཕྱག་འཚལ་ལོ། །ཞེས་ཏེ། འདི་ལ་བསྡུས་དོན་དང་ཚིག་དོན་གཉིས་ལས། དང་པོ་ལ་བཞི། ཡུལ་གང་ལ་ན། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ། གང་གིས་ན། སྔོན་བྱུང་དུ་སྤྲུལ་པའི་སྐུ་མཆོག་མཁས་པ་དགའ་རབ་རྡོ་རྗེ་དང་རྗེས་འཇུག་ཏུ་འདི་ལ་འཇུག་པ་རྣམས་ཀྱིས། ཚུལ་ཇི་ལྟར་ན། ཕྱི་ལུས་ཀྱི་ཕྱག་ཡན་ལག་ལྔ་ས་ལ་གཏུག་པའམ། མར་མེ་མཛད་ཀྱི་བརྐྱང་ཕྱག་ལྟ་བུ། ནང་ངག་གི་ཕྱག་དབྱངས་སྙན་པ་དང་ཚིག་ཏུ་བརྗོད་པ། གསང་བ་ཡིད་ཀྱི་ཕྱག་རྟོགས་པ་དབྱེར་མེད་ཀློང་དུ་གྱུར་པ་ཆུ་ལ་བཞག་པ་ལྟ་བུའོ། །དེས་ན་ངེས་ཚིག་ཀྱང་། གཉིས་མེད་རྟོགས་པའི་བརྡའ་འཇལ། རིག་པའི་མེ་ཏོག་དོར། དོན་གྱི་གནས་ལུགས་མཐོང་བས་ན་ཕྱག་ཅེས་བྱའོ། །དེ་ལྟར་ལུས་ངག་ཡིད་གསུམ་གུས་པའི་ཚུལ་དུ་འཚལ་ལོ། །དགོས་ཆེད་ལའང་། ཡ་རབས་ཀྱི་ཚུལ་དང་མཐུན་ཏེ། དེའི་ཆ་རྐྱེན་ཕྱག་དང་ཞེ་ས་ཡིན་པས་དང་། ཐེག་པ་འོག་མ་དང་སྒོ་བསྟུན་ཏེ། ལྷ་དཀོན་མཆོག་གུས་པས་ཡུལ་དུ་བྱས་པས་དང་། གཟུ་ལུམས་དང་རས་ཆོད་ཚར་གཅོད་དེ། སྔགས་ཀྱི་བླ་མ་དང་བདེ་བར་གཤེགས་པ་གོང་ན་གཉེན་པར་བཏུད་པས་དང་། བར་ཆད་མེད་ཅིང་ཡོན་ཏན་འབྱུང་སྟེ། བར་ཆད་སེལ་ན་དམ་པ་ཆོས་ཀྱི་གྲུ་རྒྱས་པའི་དགོས་ཆེད་བཞི་དང་ལྡན་པའོ། །གཉིས་པ་གཞི་མི་འགྱུར་ལྷུན་གྱིས་གྲུབ་པའི་ཕྱོགས་མེད་ཀྱིས་ཕྱོགས་འཛིན་མཐའ་དག་བཅོས། ངོ་བོ་མ་ངེས་རང་བྱུང་གི་ཡེ་ཤེས་ཅིར་ཡང་འཆར་བས་ཡོན་ཏན་ཕྱོགས་མེད་དུ་ལྡན། དོན་མི་འབྱེད་སྐྱེ་བ་མེད་པའི་རང་བཞིན་ལ་གཉིས་སུ་མེད་པས་མཐའ་ཡི་རྟོག་པ་ཐམས་ཅད་ལས་འདས། བདག་ཉིད་མི་གནས་ཐོག་ཐ་དང་བྲལ་བར་ཆོས་ཐམས་ཅད་ཀྱི་འབྱུང་གཞིར་གྱུར་པས་དཔལ། འདུས་མ་བྱས་ཤིང་སྐྱེ་འཇིག་མཐའ་དག་དང་བྲལ་བས་རྡོ་རྗེ། རྒྱ་ཆད་ཕྱོགས་ལྷུང་མེད་པར་ཀུན་ཁྱབ་མ་བཅོས་པར་འོད་གསལ་བས་སེམས། རྟག་ཆད་ཀྱི་མཐའ་ལ་མི་གནས་པར་མཚན་མ་ཐམས་ཅད་ཟིལ་གྱིས་གནོན་པས་དཔའ་བ་ནི། དཔེར་ན་འཇིག་རྟེན་གྱི་དཔའ་བོས་གཡུལ་ངོ་བཟློག་པ་དང་འདྲ་ལ། དེ་ལྟ་བུའི་དོན་ལ་གོམས་པ་ཀློང་དུ་གྱུར་པས་ན་ཕྱག་འཚལ་བ་སྟེ། སངས་རྒྱས་མཉམ་སྦྱོར་ལས། ལྟ་བ་དོན་དམ་སྙིང་པོ་ལ། །ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞིན་དུ། །གང་གིས་རང་གི་ཡེ་ཤེས་འདི། །ལེགས་མཐོང་གང་ཡིན་འདིར་ཕྱག་ཡིན། །ཞེས་སོ། །གཉིས་པ་ནི་ལུས་ཀྱི་ཚུལ་དུ་མདོར་བསྟན་པ་སྟེ། ནམ་མཁའ་ཆེ་དབུ་ཞབས་ཀྱི་དོན་ཐམས་ཅད་བསྡུས་པས་ཐིག་ལེ་ཆེན་པོ་དྲུག་ཏུ་འདུས། དེ་ཡང་ཐིག་ལེའི་ངོ་བོ་ནི་དབྱིངས་སྐྱེ་འགག་མེད་པའི་ཆོས་ཀྱི་སྐུ། སེམས་ཅན་རང་རང་གི་རིག་པ་བྱང་ཆུབ་ཀྱི་སེམས་སོ། །ངེས་ཚིག་ནི། ཚིག་གིས་མ་སྤྲོས་ཀུན་ལ་ཁྱབ་བས་ཐིག་ལེ། གདལ་བ་ཆེན་པོར་མཐའ་དབུས་མེད་པས་ཐིག་ལེ། གྲྭ་ཟུར་མེད་པར་ཟང་ཐལ་ཡིན་པས་ཐིག་ལེ། ཀུན་ནས་གཅིག་ཏུ་བཟླུམས་པར་ཉག་གཅིག་ཏུ་གནས་པས་ཐིག་ལེ་ཞེས་བྱའོ། །དབྱེ་བ་ལ། ཆོས་ཉིད་ཀྱི་ཐིག་ལེ། དབྱིངས་ཀྱི་ཐིག་ལེ། དབྱིངས་རྣམ་པར་དག་པའི་ཐིག་ལེ། །ཡེ་ཤེས་ཆེན་པོའི་ཐིག་ལེ། ཀུན་ཏུ་བཟང་པོའི་ཐིག་ལེ། ལྷུན་གྱིས་གྲུབ་པའི་ཐིག་ལེ་དྲུག་གོ། །འོ་ན་ཐིག་ལེ་གཅིག་ལ་དབྱེ་བ་དྲུག་བྱས་པ་མི་འགལ་ལམ་ཞེ་ན། འདི་རྣམས་ར་ཡི་རྭ་ལྟར་སོ་སོར་རེང་ངེ་ཡོད་ན་འགལ་ཡང་། དེ་ལྟར་མི་འདོད་དེ། དཔེར་ན་སྐྱེས་བུ་རིག་གནས་དང་དཔའ་རྩལ་སོགས་ཡོན་ཏན་གྱི་གནས་དགུ་དང་ལྡན་པ་ཞིག་ལ། ཡུལ་འཇོམས་པའི་ངོས་ནས་དཔའ་བོར་བཏགས། རྩལ་ཆེ་བའི་ངོས་ནས་རྩ་ལྡན། ནོར་མང་བའི་ངོས་ནས་ཕྱུག་པོ། འདུན་མའི་གཞིའི་ངོས་ནས་གཙོ་བོ། རིག་ཤེས་ཀྱི་ངོས་ནས་བཟང་པོ་སོགས་སུ་བཏགས་ཀྱང་། དེ་རྣམས་ལོགས་ན་མེད་པར་དེའི་ཡོན་ཏན་གྱི་ཆ་ནས་བཏགས་པ་ལྟར། རང་རིག་པ་བྱང་ཆུབ་ཀྱི་སེམས་དུས་གསུམ་དུ་འདུས་མ་བྱས་ཤིང་མ་སྐྱེས་པ་ལ་ཆོས་ཉིད་ཀྱི་ཐིག་ལེ། དེ་ཁོ་ན་ལ་རོལ་པ་ཅིར་ཡང་མི་འགག་པས་དབྱིངས་ཀྱི་ཐིག་ལེ། དེ་ལྟར་ཡོན་ཏན་ཟད་མི་ཤེས་པས་ཆོས་ཉིད་ཀྱི་ཐིག་ལེ་ནམ་མཁའ་ལྟ་བུར་མ་སྐྱེས་པ་དང་། དབྱིངས་ཀྱི་ཐིག་ལེ་ནམ་མཁའི་ཆོ་འཕྲུལ་ལྟ་བུར་མི་འགག་པ་གཉིས། ཚིག་ལ་སྔ་ཕྱི་བྱུང་ཡང་དོན་ལ་ཐ་དད་མེད། མཚོན་ཚུལ་ནས་རེས་མོས་མཚོན་ཀྱང་ངོ་བོ་ལ་སྐྱེ་འགག་གཉིས་སུ་མེད་དེ་གཉིས་འཛིན་གྱི་སྤྲོས་པ་རྣམ་པར་དག་པས། དབྱིངས་རྣམ་པར་དག་པའི་ཐིག་ལེ། དེའི་དོན་ལ་ཤར་ནུབ་དང་ཕྱི་ནང་མེད་པས་ཡེ་ཤེས་ཆེན་པོའི་ཐིག་ལེ། དེ་ལ་བཟང་ངན་བླང་དོར་དང་དགག་སྒྲུབ་སྐྱོན་ཡོན་མེད་པས་ཀུན་ཏུ་བཟང་པོའི་ཐིག་ལེ། དེ་རུ་ཐམས་ཅད་འདུས་ཤིང་མཐའ་མ་སྤངས་རང་སར་གྲོལ་བས་ལྷུན་གྱིས་གྲུབ་པའི་ཐིག་ལེ་ཞེས་བྱ་སྟེ། འབྲས་བུའི་ཀློང་ལས། མ་བཅོས་པ་ལས་ཡོན་ཏན་མཐའ་དག་རྫོགས། །ཤར་ཚད་དོན་དང་བཅས་ཏེ་ཡེ་ནས་དག །དེ་མཁྱེན་རང་གསལ་དེ་ལ་ཕྱོགས་རིས་གྲོལ། །མ་བཙལ་གདོད་ནས་རྫོགས་པའི་བླ་དྭགས་ཡིན། །ཞེས་པས། དང་པོ་ནི། ལྟ་བའི་ཀློང་ལས། མཚན་ཉིད་འཛིན་ཅིང་ངོ་བོས་ཁྱད་པར་འཛིན། །སྣང་མྱོང་རིགས་པའི་ཆོས་ལས་དཀར་སྤྱོད་ཀྱིས། །ལྟུང་བ་ལས་འཛིན་དེ་དག་གནས་ལུགས་ཉིད། །རང་བཞིན་སྤྲོས་པ་ཀུན་བྲལ་ཉིད་ངེས་ཏེ། །དེ་མཁྱེན་མཚན་ཉིད་རང་རིག་ཡེ་ཤེས་ཉིད། །དེ་ཡི་རྣམ་པ་ཐུགས་རྗེའི་སྤྲུལ་པར་ཤར། །སྒྱུ་མ་རྩལ་འཛིན་རྡོ་རྗེ་བཙན་པོ་མཆོག །གདོད་ནས་འདུ་འབྲལ་མེད་པར་རྫོགས་པ་ཆེ། །དེ་མིན་མུ་བཞི་མཐའ་བརྒྱད་འཁོར་འདས་ཆོས། །ཅིར་ཡང་འཆར་བར་མི་རིགས་དེ་ཡི་ཕྱིར། །ཆོས་ཀྱི་ཆོས་ཉིད་གནས་ལུགས་དེར་རིགས་པའོ། །གནས་སྐབས་ཆོས་ཉིད་འཁྲུལ་སྣང་རང་མཚན་ཉིད། །ས་སྲ་ཆུ་གཤེར་མེ་ཚ་རླུང་ཡང་གཡོ། །ཞེ་སྡང་ཀུན་ནས་མནར་སེམས་ལ་སོགས་པ། །ཀུན་ནས་མ་འདྲེས་ཡེ་གནས་སོ་སོར་ཤར། །སྤྱི་མཚན་མི་རྟག་སྡུག་བསྔལ་སྟོང་བདག་མེད། །ཅེས་གསུངས་པ་ལྟར། ཆོས་ཅན་རྣམས་ཀྱི་ཆོས་ཉིད་སྤྱི་དང་རང་གི་མཚན་ཉིད་འཛིན་ཅིང་ལས་རྣམ་པར་དཀར་བས་ལྟུང་བ་ལས་འཛིན་ལ། རིགས་པས་བདེན་པའི་དོན་འཛིན་པ་དང་། ངོ་བོ་ཡིས་ཁྱད་པར་གྱིས་ཆོས་འཛིན་པས་ཆོས་ཞེས་བྱ་ལ། བཞི་པོ་དེ་ཡི་གནས་ལུགས་ནི། མཚན་ཉིད་རང་གསལ། རྣམ་པ་ལྷུན་གྲུབ། རང་བཞིན་ངོས་བཟུང་མེད་པ་ལས་མི་འདའ་བས། དེས་མཚོན་པ་དངོས་པོའི་རྐྱེན་དུ་ཆོས་ཉིད་ཅེས་བྱ་བ་ཡིན་པས་ངེས་ན་མཚན་མ་རུ་འཛིན་པ་དང་། རྒྱུ་འབྲས་སུ་འཛིན་པ་དང་། གནས་སྐབས་ཀྱི་རིགས་པ་བདེན་པར་འཛིན་པ་དང་། ངོ་བོ་ཆོས་ཅན་དང་ཁྱད་པར་གྱི་ཆོས་སུ་འཛིན་པ་རྣམས་ཀྱི་འདོད་པའི་སྤྲོས་པ་གཅོད་པས་ཐིག་ལེ་ཡིན་ལ། དེའང་ཆོས་བཞི་པོ་རང་རེའི་རང་བཞིན་ལྷུན་གྲུབ་གསུམ་ལས་གཞན་དུ་མི་འགྱུར་བར་སྤྲོས་པ་ཡེ་ནས་མེད་པས། ཆོས་བཞི་པོ་དེ་དག་དོར་བ་མིན་གྱི་ངང་ཚུལ་ལྷུན་གྲུབ་གསུམ་པོ་དེ་དེ་ལྟ་བུར་གནས་པའོ། །དེ་སྐད་དུ། འབྲས་བུའི་ཀློང་ལས། རང་མཚན་ལྟུང་བ་རིགས་པས་ངོ་བོ་ཡིས། །ཁྱད་པར་འཛིན་པས་ཆོས་རྣམས་དེ་ཡི་གནས་ལུགས་ནི། །རང་གསལ་ལྷུན་གྲུབ་ངོས་མེད་ལས་མི་འདའ། །དེས་མཚོན་དངོས་པོའི་རྐྱེན་དུ་ཆོས་ཉིད་ཅེས། །དེས་ན་མཚན་མ་རྒྱུ་འཐས་གནས་སྐབས་རིགས། །ཆོས་ཅན་ཆོས་ཉིད་འདོད་པའི་སྤྲོས་པ་གཅོད། །རང་རེའི་རང་བཞིན་མི་འགྱུར་སྤྲོས་པ་མེད། །དེ་དག་དོར་མིན་ངང་ཚུལ་དེ་ལྟའོ། །ཞེས་སོ། །གཉིས་པ། དེ་ལྟར་ཆོས་ཐམས་ཅད་ཀྱི་ངང་ཚུལ་རྣམ་པར་དག་པའི་ཆོས་ཉིད་དེ་ཡང་སངས་རྒྱས་ཀྱི་ཡོན་ཏན་དང་བསྟན་པ་རྒྱ་མཚོའི་འབྱུང་གནས་ཀྱི་ཡོན་ཏན་གཞིར་གནས་སུ་ཡེ་ནས་རྫོགས་པས། ཆད་པ་ཉི་ཚེ་བའི་སྤྲོས་པའི་མཐའ་ལས་ཀྱང་འདས་པ་ཡིན་ཏེ། དེས་ན་གཞིར་གནས་ཀྱི་ཆོས་ཉིད་ཆད་པ་ཉི་ཚེའི་སྤྲོས་པ་ལས་ཏེ་རོལ་པ་ཅིར་ཡང་མི་འགགས་པས་དབྱིངས་ཀྱི་ཐིག་ལེར་རྫོགས་པའོ། །དེ་ལྟར་ལང་སྡམ་ལས། དེ་ལྟར་ངང་ཚུལ་རྣམ་པར་དག་པ་ཉིད། །བསྟན་པ་རྒྱ་མཚོའི་འབྱུང་གནས་གཞིར་གནས་རྫོགས། །ཆད་པ་ཉི་ཚེའི་སྤྲོས་པའང་འདས་པ་སྟེ། །ཆོས་ཉིད་དབྱིངས་ཀྱི་ཐིག་ལེ་རྫོགས་པའོ། །ཞེས་སོ། །གསུམ་པ། ཀུན་གྱི་འབྱུང་གནས་སུ་གྱུར་པ་དེ་ཚེ་ཉིད་ནའང་འབྱུང་བའི་ས་དང་འབྱུང་བའི་ཚུལ་དང་འབྱུང་བ་པོའི་དབྱིངས་ཀྱི་ཕྱོགས་རིས་དང་ཀུན་བརྟགས་ཐམས་ཅད་རང་བཞིན་གྱིས་རྣམ་པར་དག་པས། དབྱིངས་ཞེས་ཆད་སྟོང་གི་སྤྲོས་པ་གཅོད་པའི་དགོས་པས་ཐ་སྙད་དུ་བཏགས་ཀྱིས། རང་ངོ་ཡེ་ནས་རྣམ་པར་དག་པས། སྤྲོས་པ་ཡོད་དོ་ཅོག་ཐམས་ཅད་ཀྱང་རྣམ་པར་བཅད་པའི་ངང་ཡིན་པས་དབྱིངས་རྣམ་པར་དག་པའི་ཐིག་ལེ་ཞེས་བྱ་སྟེ། དེ་ཉིད་ལས། དེ་ཚེ་ཉིད་ན་འབྱུང་བ་འབྱུང་ཚུལ་འབྱུང་། །ཕྱོགས་རིས་ཀུན་བརྟགས་རྣམ་པར་རང་དག་པས། །དབྱིངས་ཞེས་དགོས་པས་བརྟགས་ཀྱིས་ཡེ་དག་པས། །སྤྲོས་པའོ་ཅོག་ཀྱང་རྣམ་པར་བཅད་པའི་ངང་། །ཞེས་སོ། །བཞི་པ་ནི། གཤིས་ཀྱི་གནས་ལུགས་དེ་དག་མཁྱེན་པ་ནི། རང་རིག་པའི་ངོ་བོ་རང་འོད་གསལ་བའི་ཡེ་ཤེས་ཡིན་པས། ཉན་ཐོས་ལྟར་སྤང་བ་དང་། རང་རྒྱལ་ལྟར་དགག་པ་དང་། བྱང་ཆུབ་ལྟར་སྦྱོང་བ་དང་། གསང་སྔགས་ལྟར་རྩོལ་བའི་སྤྲོས་པ་ཐམས་ཅད་ཡེ་ནས་གསལ་སྒྲིབ་མེད་པར་རང་གྲོལ་བས། གཤིས་ལ་ཕྱོགས་རིས་མེད་པར་མཁྱེན་པས་རྩོལ་བརྒྱད་ལས་ཁྱད་པར་ཅན་དུ་གྱུར་པར་རང་ཤར་བ་ནི་ཡེ་ཤེས་ཆེན་པོའི་ཐིག་ལེ་ཡིན་ཏེ། སྔ་མ་ལས། དེ་མཁྱེན་རང་རིག་འོད་གསལ་ཡེ་ཤེས་པས། །སྤང་དགག་སྦྱོང་རྩོལ་སྤྲོས་པ་ཡེ་གསལ་གྲོལ། །ཕྱོགས་རིས་མེད་པར་མཁྱེན་པས་ཁྱད་པར་ཅན། །རང་ཤར་ཡེ་ཤེས་ཆེན་པོའི་ཐིག་ལེ་ཡིན། །ཞེས་སོ། །ལྔ་པ། དེ་ལ་ཕྱོགས་རིས་མེད་པར་དགག་སྒྲུབ་དང་བླང་དོར་ཐམས་ཅད་བྲལ་ཏེ། ཆོས་ཐམས་ཅད་ཡེ་ནས་བྱང་ཆུབ་ཀྱི་སེམས་བདེ་བ་ཆེན་པོ་ཡིན་པས། ཡོད་པ་དངོས་པོར་རམ། མེད་པ་སྟོང་པར་རམ། སྣང་སྟོང་གཉིས་ཀའམ། གཉིས་སུ་མེད་པའམ། ཀུན་ཡིན་པར་རམ། གང་ཡང་མིན་པར་འདོད་པའི་སྤྲོས་པ་ཐམས་ཅད་བཅད་པས། བདེ་བ་ཆེན་པོར་ཐམས་ཅད་ཤོང་བས་ཡངས་པ་ཆེན་པོ་ཀུན་ཏུ་བཟང་པོའི་ཐིག་ལེ་སྟེ། དེ་ཉིད་ལས། དེ་ལ་ཕྱོགས་རིས་དགག་སྒྲུབ་བླང་དོར་བྲལ། །ཐམས་ཅད་ཡེ་ནས་བྱང་སེམས་བདེ་ཆེན་པས། །ཡོད་མེད་ཡིན་མིན་འདོད་པའི་སྤྲོས་པ་བཅད། །བདེ་ཆེན་ཡངས་པ་ཆེན་པོའི་ཐིག་ལེའོ། །ཞེས་སོ། །དྲུག་པ། དེ་ཡི་རོལ་པའི་རྒྱན་དུ་ཐམས་ཅད་རྫོགས་ཏེ་སྒྱུ་མ་ལྟར་ཡུལ་གྱི་རྣམ་པ་ཀུན་ཀྱང་ངེས་པ་མེད་པའི་རོལ་བར་ལྷུན་གྱིས་གྲུབ་པས་རིགས་ཀྱི་ཁྱད་པར་དུ་མར་རང་ཤར་པ་ལས། ཉན་ཐོས་སྤོང་། རང་རྒྱལ་འགེགས། བྱང་སེམས་སྦྱོང་། ཕྱི་པས་སྒྱུར། ནང་པ་མ་ཧཱས་རྩོལ། ཨ་ནུས་སྒྲུབ་པ་ལས་གྲོལ་བས་ལྷུན་གྱིས་གནས་པའི་བདེ་བ་ཆེན་པོར་རྫོགས་པའི་ཕྱིར་ལྷུན་གྱིས་གྲུབ་པའི་ཐིག་ལེ་སྟེ། སྔ་མ་ལས། དེ་ཡི་རོལ་པ་རྒྱན་རྫོགས་སྒྱུ་མ་ལྟར། །རྣམ་པ་ལྷུན་གྲུབ་རིགས་ཀྱི་ཁྱད་པར་ཤར། །སྤོང་འགེགས་སྦྱོངས་སྒྱུར་རྩོལ་སྒྲུབ་ལས་གྲོལ་བས། །ལྷུན་གནས་བདེ་ཆེན་རྫོགས་པའི་ཐིག་ལེའོ། །ཞེས་སོ། །དེའང་དང་པོ་གསུམ་གྱིས་གཤིས་བསྟན་ལ། ཡེ་ཤེས་ཆེན་པོས་ངོ་བོ་བསྟན་ཅིང་། ཐ་མ་གཉིས་ཀྱིས་ཡེ་ཤེས་དང་གཤིས་ཀྱི་ཡོན་ཏན་བསྟན་པ་སྟེ། དེ་ཉིད་ལས། གསུམ་གྱིས་གཤིས་བསྟན་གཅིག་གིས་ངོ་བོ་བསྟན། །གཉིས་ཀྱིས་ཡོན་ཏན་ཁྱད་པར་དམ་པ་བསྟན། །ཞེས་སོ། །དྲུག་པོ་དེ་ཡང་སེམས་ཉིད་གཅིག་པུའི་ངོས་ནས་བཏགས་པ་མ་གཏོགས་པ། དོན་ལོགས་པ་ཞིག་ཀ་ནས་མ་གྲུབ་བོ། །དོན་དེ་ལེགས་པར་གོ་ན་ནམ་མཁའ་ཆེ་དབུ་ཞབས་ཀྱི་དོན་ཐམས་ཅད་དེ་རུ་འདུས་སོ། །གསུམ་པ་ཡན་ལག་གི་ཚུལ་དུ་རྒྱས་པར་བཤད་ན། སྐབས་ཉི་ཤུ་རྩ་བདུན་གྱིས་སྟོན་པ་ཡིན་ཏེ། དང་པོ་ཆོས་ཉིད་ཀྱི་སྐབས་ནས། མཐའ་ལུང་འགྲེལ་བ་མིང་ཙམ་བརྡར་བསྟན་པའི་སྐབས་ཡན་ཆད་ལ་ཟེར་ཏེ། ངེས་དོན་མདོ་བཅུ་ལས། སྐབས་ཞེས་བྱ་བའི་མན་ངག་ནི། །སེམས་ཉིད་རྫོགས་པའི་སྙིང་པོ་དེ། །སྒྲིབ་མེད་རང་བྱུང་ཡེ་ཤེས་ལ། །ཆོས་ཀུན་དུས་གསུམ་སྒྲིབ་མེད་པས། །ཆོས་ཉིད་དོན་ལ་འགག་པ་མེད། །སོ་སོ་དག་གིས་གོ་སྐབས་འབྱེད། །དེས་ན་སྐབས་ཞེས་བསྟན་པ་ཡིན། །ཞེས་པ་དང་། སེམས་ཀྱི་ཆོས་ཉིད་དེ་རྣམས་ལ། །མ་འགགས་པ་ཡི་སྐབས་ཞེས་བྱ། །ཞེས་གསུངས་པས་དེ་རྣམས་གསལ་བར་བཤད་པ་སྟེ། དེ་ཡང་རྡོ་རྗེ་སེམས་དཔའ་ནམ་མཁའ་ཆེ་ལ། སྐབས་ཉི་ཤུ་རྩ་བདུན། ཐིག་ལེ་ཆེན་པོ་དྲུག །ཆེ་བ་རྣམ་པ་ལྔ། ཕྱག་རྒྱ་ཉི་ཤུ་རྩ་ལྔ་ཞེས་སུ་གྲགས་པ་ལས། ད་རེས་མན་ངག་ཀློང་ཆེན་གྱི་ལུགས་ཀྱིས། ཕྱག་རྒྱ་སོ་སོར་མི་འདོད་པར་འཕྲུལ་གྱི་གཟེར་བུ་རྣམ་པ་ལྔས་མི་འགྱུར་བར་རྒྱས་འདེབས་པར་བྱེད་པའི་གནད་ཀྱིས་གོ་ས་བྱེ་བྲག་ཏུ་མི་འབྱེད་པར་ཤུགས་ཆོད་དུ་འདོད་པས་ཕྱག་རྒྱ་ཡང་བྱེ་བྲག་ཏུ་མི་འདོད་དོ། །འོ་ན་སྐབས་དང་ཐིག་ལེའི་ས་གཅོད་དུ་མི་འདོགས་པ་འཐད་དམ་སྙམ་ན། འདི་ཀ་རང་ལུགས་ཀྱི་ས་གཅོད་དུ་འཐད་དེ། སྐབས་དང་ཐིག་ལེ་གཉིས་ཀྱིས་དཀྱུས་ཀྱི་གོ་སྐབས་ཕྱེ་ནས་འབྱུང་བས་སོ། །དེ་ཉིད་ཉིང་ལག་གི་ཚུལ་དུ་ཤིན་ཏུ་རྒྱས་པར་བཤད་པ་ལ། སྐབས་རེ་རེ་ལའང་དཔེ་དོན་རིགས་པ་གཏན་ཚིགས་བཞི་བཞིས་སྟོན་པས་དགོངས་པ་ཉི་ཤུ་རྩ་བདུན་གྱིས་ཆོས་ཉིད་ཉམས་སུ་བླང་པ་དང་གཅིག །མཐུན་དཔེ་ཉི་ཤུ་རྩ་བདུན་གྱིས་ཆོས་ཉིད་དཔེ་ཡིས་མཚོན་ཚུལ་དང་གཉིས། རིགས་པ་ཉི་ཤུ་རྩ་བདུན་གྱིས་ཆོས་ཉིད་ཀྱིས་འཐད་པ་སྒྲུབ་པ་དང་གསུམ། གཏན་ཚིགས་ཉི་ཤུ་རྩ་བདུན་གྱིས་ཆོས་ཉིད་གཏན་ལ་དབབ་པ་དང་བཞིའོ། །དེ་ལྟར་རྩ་བདུན་ཕྲག་བཞིས་སྟོན་པ་ལས། སྐབས་དང་ཐིག་ལེ་དང་པོ་ལ། སྐབས་ཀྱི་དོན་བསྟན་པ། གཞི་ཇི་བཞིན་པ་རང་ལུགས་ཆེན་པོའི་དགོངས་པ་ནམ་མཁའ་ལྟར་ཁྱབ་གདལ་ཆེན་པོའི་ཀློང་དུ་བསྟན་པ། ངོ་བོ་རང་དང་གཞན་གྱི་ཐ་སྙད་ལས་འདས་ཏེ་ཆོས་ཐམས་ཅད་ཀྱི་བདག་ཉིད་ཡིན་པའི་རིགས་པ་བསྟན་པ། བྱ་རྩོལ་དང་བྲལ་བའི་གཏན་ཚིགས་བསྟན་པ། །ཐིག་ལེའི་ངེས་ཚིག་བསྟན་པ་དང་ལྔ་ལས། དང་པོ་ནི། ཆོས་ཉིད་ཀྱི་སྐབས་ཞེས་ཏེ། ཆོས་ཉིད་ནི་རྒྱུ་རྐྱེན་ལས་ཀ་ནས་མ་བྱུང་སྟེ། འདུས་བྱས་ཀྱི་གཉེན་པོར་འགྱུར་མི་སྲིད་པས། རིག་པ་བྱང་ཆུབ་ཀྱི་སེམས་ཉིད་སངས་རྒྱས་སྒམ་སྟེ་མ་མཛད། སེམས་ཅན་སྒྲིན་ཏེ་མ་བཅོས། གཞི་ཕྱི་མོ་དངོས་པོ་གཤིས་ཀྱི་གནས་ལུགས། ནམ་མཁའ་ལྟ་བུ་རྒྱ་ཆད་དང་ཕྱོགས་ལྷུང་མེད་པར་ཀུན་ལ་ཁྱབ་པ་ཉིད་སྟོན་པའི་སྐབས་ལ་བབ་བོ། །ཞེས་པ་སྟེ། མདོ་བཅུ་ལས། ཇི་ལྟར་སྣང་བའི་ཆོས་རྣམས་ཀུན། །ཡེ་ནས་འདུས་བྱས་མ་ཡིན་པས། །ཆོས་ཉིད་དག་ཏུ་གནས་པ་དེ། །ཆོས་ཉིད་སྐབས་ཞེས་བསྟན་པ་ཡིན། །ཞེས་སོ། །གཉིས་པ་ནི། རྡོ་རྗེ་སེམས་དཔའ་ནམ་མཁའ་ཆེ། །ཞེས་པ་ལ་སོགས་པ་སྟེ། དེ་ཡང་གཞི་ནི། དངོས་པོའི་གནས་ལུགས། རང་བྱུང་གི་ཡེ་ཤེས། ཤེས་བྱའི་གཤིས། དེ་ཁོ་ན་ཉིད་ཀྱི་འདུག་ཚུལ། ལྷུན་གྱིས་གྲུབ་པའི་ཆོས་ཉིད་ཡིན་ཏེ། དངོས་པོའི་གནས་ལུགས་ནི་ཅིར་ཡང་གནས་པ་ཡིན། རང་བྱུང་གི་ཡེ་ཤེས་ནི་ཅིར་ཡང་འབྱུང་བ། ཤེས་བྱའི་གཤིས་ནི་སུས་ཀྱང་མ་བཅོས་པ། དེ་ཁོ་ན་ཉིད་ཀྱི་འདུག་ཚུལ་ནི་ཅིར་ཡང་འདུག་པ། ལྷུན་གྱིས་གྲུབ་པའི་ཆོས་ཉིད་ནི་ཅིར་ཡང་གྲུབ་པ་སྟེ་དེ་ལ་གཞི་ཇི་བཞིན་པ་ཞེས་ཟེར་རོ། །རང་ལུགས་ཆེན་པོ་ནི། སེམས་ཅན་ལ་སངས་རྒྱས་རང་ལུགས། སྣང་བ་ལ་སྟོང་པ། སྡུག་བསྔལ་ལ་བདེ་ཆེན། སྐྱོན་ལ་ཡོན་ཏན། ཆོས་ཅན་ལ་ཆོས་ཉིད། ཉོན་མོངས་ལ་ཡེ་ཤེས་རང་ལུགས་སུ་གནས་པས་སུས་ཀྱང་བཅོས་བསྒྱུར་བྱར་མེད། དགོངས་པ་ནི་མ་བཅོས་པའི་ངང་ངོ་། །ནམ་མཁའ་ལྟ་བུ་ཁྱབ་གདལ་ཆེན་པོའི་ཀློང་ནི། ནམ་མཁའ་ལ་མཐའ་དབུས་དང་འཕོ་འགྱུར་མེད་པ་བཞིན་དུ། ཆོས་ཉིད་ལ་རྒྱ་ཆད་དང་ཕྱོགས་ལྷུང་མེད་པས་ནམ་མཁའ་ལྟ་བུ་ལ། ཁྱབ་གདལ་ཆེན་པོའི་ཀློང་ནི། མཐོ་སྟེ་ཡང་དག་པར་རྫོགས་པའི་སངས་རྒྱས་ནས། དམའ་སྟེ་དམྱལ་བའི་གཏིང་ཡན་ཆད་ལ། ཆོས་ཉིད་དེ་དབྲི་བསྣན་ཆེ་ཆུང་བཟང་ངན་མེད་པར་གནས་པས་མ་བཅོས་པའི་ཀློང་དུ་བསྟན་པ་ཞེས་བྱའོ། །དེ་ལ་བདག་གཞན་གཉིས་སུ་མ་གྲུབ་པས། ངོ་བོ་རང་དང་གཞན་གྱི་ཐ་སྙད་ལས་འདས་པའི་རིགས་པ། དེ་ལ་འབྲས་བུ་གཞན་ནས་རྩོལ་དུ་མེད་པས་རྩོལ་བ་དང་བྲལ་བའི་གཏན་ཚིགས་བསྟན་པ་ཡིན་ནོ། །ཚིག་གི་དོན་ནི། རྡོ་རྗེ་སེམས་དཔའ་ནམ་མཁའ་ཆེ་ཞེས་འཕོ་འགྱུར་མེད་པའི་དགོངས་པ་བསྟན་ཏེ། འདུས་བྱས་རྫས་ཀྱི་རྡོ་རྗེའམ། བཏགས་པ་མིང་གི་རྡོ་རྗེ་ཙམ་ལ་མི་བྱ་བར། སེམས་ཅན་རང་རང་གི་རིག་པ་བྱང་ཆུབ་ཀྱི་སེམས་དེ་ཉིད། འདུས་མ་བྱས་ཤིང་སྐྱེ་འཇིག་མེད་པས་རྡོ་རྗེ། དབྱེར་མི་ཕྱེད་པས་ནའང་རྡོ་རྗེ། མཐའ་ཐམས་ཅད་འཇོམས་པས་ནའང་རྡོ་རྗེ་སྟེ། དཔེར་ན་རྡོ་རྗེ་ཕ་ལམ་གྱིས་ཕར་ལ་སྲ་བའི་དངོས་པོ་ཐམས་ཅད་གཅོད་ཅིང་འབིགས་ལ། ཚུར་ལ་གང་གིས་ཀྱང་མི་ཆོད་ཅིང་མི་ཤིགས་པ་ལྟར་རོ། །སེམས་ནི་གསལ་བ་རྒྱུན་མི་འཆད་པས་དང་། མ་བཅོས་པར་འོད་གསལ་བ་ཡིན་ལ། དཔའ་བ་ནི་རྟག་ཆད་ཀྱི་མཐའ་ཐམས་ཅད་འཇོམས་པ་དང་། མཚན་མའི་ཆོས་མཐའ་དག་ཟིལ་གྱིས་གནོན་པས། འཇིག་རྟེན་ན་དཔའ་བོ་ལྟ་བུ་ལ་བྱ་སྟེ། དེ་ཡི་འབྱུང་ཆེན་གཏོས་ཀྱི་ནམ་མཁས་ཐམས་ཅད་ཀྱི་གོ་འབྱེད་པ་ལྟར། རྡོ་རྗེ་གསང་བའི་ནམ་མཁའ་ནི་ཆོས་ཉིད་ཡིན་ཏེ། འཁོར་འདས་སྣང་སྲིད་ཀྱི་གོ་འབྱེད་པ་དང་། མི་གཡོ་ཞིང་ལྟོས་པ་མེད་པས་འབྱུང་བ་ཐམས་ཅད་ལས་ནམ་མཁའ་ཆེ་བ་ལྟར། འཁོར་འདས་ཐེག་པ་ཐམས་ཅད་ལས་ཆོས་ཉིད་ཆེ་བ་སྟེ་ཆེ་བ་ལྔའི་དོན་ནི་བཤད་ཟིན་ལ། དེས་ན་ཡངས་དོག་མེད་པའི་དགོངས་པ་བསྟན་ཏེ། ཀུན་བཟང་ཡངས་པ་ཆོས་ཀྱི་དབྱིངས། །ཞེས་མ་འདྲེས་པ་དང་ཡོངས་སུ་རྫོགས་པ་ལ་བྱ་སྟེ། ངོ་བོ་མ་ངེས་ཅིར་ཡང་འཆར་བས་སོ་སོར་མ་འདྲེས་ལ། གཞི་མི་འགྱུར་ལྷུན་གྱིས་གྲུབ་པར་ཐམས་ཅད་གཅིག་པས་ཡོངས་སུ་རྫོགས་ཏེ་དོན་སྐྱེ་མེད་གཉིས་སུ་མེད་ཅིང་བདག་ཉིད་ཆེན་པོ་བསམ་གྱིས་མི་ཁྱབ་པའོ། །དེ་ན་ཡང་སྤྲུལ་དགའ་རབ་རྡོ་རྗེའི་ཞལ་སྔ་ནས་བཀའ་སྩལ་བའི་ཀློང་ཆེན་རབ་འབྱམས་ལས། རང་བཞིན་ལྷུན་གྱིས་གྲུབ་པ་ཆོས་ཉིད་གཞི་ཡི་ཀློང་། ངོ་བོ་ངེས་པ་མེད་པར་རང་བྱུང་ཡེ་ཤེས་ཀློང་། དོན་ལ་སྐྱེ་བ་མེད་པས་གཉིས་སུ་མེད་པའི་ཀློང་། བདག་ཉིད་ཐོག་མཐའ་མེད་པས་འབྲས་བུ་ཡེ་གྲུབ་ཀློང་། ཞེས་གསུངས་པ་ལྟར་གཞི་ངོ་བོ་དོན་བདག་ཉིད་གཅིག་གི་རང་བཞིན་བཟང་ངན་བླང་དོར་མེད་པས་ཀུན་བཟང་། ལྷུན་གྱིས་གྲུབ་པའི་ཀློང་ལ་གང་ཡང་མ་བཀག་པས་ཡངས་པ། མུ་མཐའ་མེད་ཅིང་ཟད་མི་ཤེས་པས་ཆོས་ཀྱི་དབྱིངས་སོ། །རྣམ་དག་ལམ་ཆེན་ཀུན་གྲོལ་ཕྱིར། །ཞེས་རྣམ་པར་དག་པའི་དགོངས་པ་བསྟན་ཏེ། གཞི་མི་འགྱུར་ལྷུན་གྱིས་གྲུབ་པའི་ཆོས་ཉིད་ལ་ཕྱོགས་འཛིན་གྱི་སྤྲོས་པ་ཐམས་ཅད་རྣམ་པར་དག་པས་དང་། ངོ་བོ་མ་ངེས་རིག་པ་རང་བྱུང་གི་ཡེ་ཤེས་ཀྱི་སྐྱེ་འགག་མེད་པ་ལ་གཉིས་འཛིན་གྱི་སྤྲོས་པ་གང་ཡང་གདོད་མ་ནས་རང་བཞིན་གྱིས་རྣམ་པར་དག་གོ། །རྒྱལ་འགྲོ་ལམ་པས་བསྡུས་པ་ཐམས་ཅད་ཀྱི་འབྱུང་གཞིར་གྱུར་པས་དང་། མཐོ་དམན་མེད་པར་གཅིག་ཏུ་འགྲོ་བའི་ལམ་ཆེན། ཡེ་གྲོལ་ཆེན་པོར་སངས་རྒྱས་པ་དང་། བཟང་ངན་མེད་པའི་ཀློང་དུ་གྲོལ་བས་ཀུན་གྲོལ་ཕྱིར་ཞེས་སོ། །མ་སྐྱེས་མི་འགག་ཅིར་མི་དགོངས། །ཞེས་སྐྱེ་འགག་མེད་པའི་དགོངས་པ་བསྟན་ཏེ། དོན་སྐྱེ་བ་མེད་པའི་རང་བཞིན་ལ་བསྒོམས་པས་ཉམས་མྱོང་མི་སྐྱེ་སྟེ་ངེས་ཤེས་རང་རྒྱུད་པ་གང་ཡང་མེད་དོ། །ཆོས་ཉིད་སྐྱེ་མེད་ལ་ངོ་བོ་ཅིར་ཡང་མི་འགག་པས་མ་བསྒོམས་ཀྱང་ཡེ་ཤེས་མི་འགག་སྟེ། སྣང་བ་མི་འགག་ལ་རོལ་པ་ཅིར་ཡང་འཆར་བས། སྐྱེ་འགག་གཉིས་མེད་ཀྱི་ཆོས་ཉིད་བསམ་པས་བཟུང་བས་བློ་ཡི་རྩོལ་བ་དང་བྲལ་བའི་གནད་ཀྱིས་ཡུལ་ཅིར་ཡང་མི་དགོངས་པའི་དགོངས་པ་ཆེན་པོའོ། །འོ་ན་དེ་ལྟར་བུའི་དགོངས་པ་དེ་ལ་ཆེད་དུ་བསྒོམ་བྱ་ཡོད་དམ་མེད། ཡོད་ན་ཐེག་པ་འོག་མ་པ་དང་ཁྱད་མེད་དུ་འགྱུར་ལ། མེད་ན་སོ་སྐྱེས་རང་ག་མ་དང་ཁྱད་པར་མེད་པར་ཐལ་ལོ་ཞེ་ན། སྐྱོན་རང་བྱུང་ཡེ་ཤེས་ཀྱིས་བསལ་བ་དང་། ལ་སྐྱེ་འགག་མེད་པར་བཟླ་བ་སྟེ། བསྒོམས་ཀྱང་སྐྱོན་མེད་རང་བྱུང་རོལ་པ། མ་བསྒོམས་སྐྱོན་མེད་མཚན་མ་རང་གྲོལ། མདོར་ན་བསྒོམས་མ་བསྒོམས་གཉིས་སུ་མེད་པར་ཆོས་ཉིད་ཀྱི་ཀློང་ན་ལྷོད་དེ་ཤིགས་སེ་གནས་པ་དེ་ཡི་ཀློང་ཆེན་པོའི་ཏིང་ངེ་འཛིན་ཏེ་བསྒོམས་ཀྱང་ཉམས་མྱོང་མི་སྐྱེ་ཆོས་ཉིད་གཉིས་མེད་དུ་ལ་ཟློ། མ་བསྒོམས་ཀྱང་ཡེ་ཤེས་མི་འགག་ཆོས་ཉིད་འགག་མེད་དུ་ལ་ཟློ། དུས་དང་རྣམ་པ་ཀུན་ཏུ་བསྒོམས་དང་མ་བསྒོམས་མེད་པར་བདེ་བ་ཆེན་པོ་འཕོ་འགྱུར་མེད་པའི་ཀློང་ལས་གཞན་དུ་འཆར་ས་མེད་པས་ལ་སྐྱེ་འགག་མེད་པར་དེ་ལྟར་བཟླ་སྟེ། འདི་ནི་ཀུན་ལ་ཤེས་པར་བྱའོ། །སྤྱིར་བརྒྱུད་སྲོལ་འདི་ལ་སྤྲུལ་པའི་ལོ་ཙཱ་བ་ཆེན་པོའི་བཻ་རོ་ཙ་ནས་གཡུ་སྒྲ་སྙིང་པོ་ལ་གདམས་པའི་བསམ་གཏན་དོན་གསུམ་པ་ལས། སྙིང་པོ་ཇི་ལྟར་གནས་པ་ལས། སྒྲོ་སྐུར་མ་ཡིན་དོན་མཐུན་ཉིད། །རང་གི་ཚོགས་བརྒྱད་སྐྱེ་བ་གསུམ། །གཏན་ཚིགས་ཚད་མ་རིགས་པ་སྒྲས། །གཞིགས་འཇལ་བརྟགས་མཚོན་བརྒྱུད་པ་ཡིས། །གཏན་ལ་ཕབ་སྟེ་ལུང་ལས་གཅད། །ཅེས་གསུངས་པས་སྒྲ་དང་ཚད་མ་བརྒྱུད་པའི་ལུང་བཞིན་དུ་སྦྱར་ན། ལྟ་བའི་ཀློང་ལས། ཚད་མ་མངོན་སུམ་རྗེས་སུ་དཔག་པས་ཀྱང་། །རང་མཚན་སྤྱི་ཡི་རྣམ་པ་དེ་འཐད་སྒྲུབ། །སྣང་ལ་མི་རྟོག་དོན་ལ་མ་འཁྲུལ་བར། །སྒོ་ལྔས་ཡུལ་ལྡ་རྣམ་པ་སྒྱུ་མར་བཅད། །སྡུག་བསྔལ་རྩོལ་བསྒྲུབ་བཅས་ཚེ་ངེས་ཤེས་འཆར། །སྤྲུལ་སྐུ་མ་བརྩལ་གནས་པ་འཐད་པས་གྲུབ། །ཡིད་ཀྱི་ཡེ་ཤེས་ཟིན་དང་མ་བཟུང་བར། །སྤྲོས་པའི་རང་བཞིན་སྤྲོས་བྲལ་ཉིད་དུ་ཟིན། །བསམ་གྱིས་མི་ཁྱབ་དུས་སུ་ངེས་ཤེས་འཆར། །ཆོས་སྐུ་མ་བརྩལ་གནས་པ་འཐད་པས་སྒྲུབ། །རང་རིག་མངོན་སུམ་ངར་འཛིན་ཉོན་མོངས་ཚེ། །སིངས་ཀྱིས་རིག་ལ་གང་དུའང་མི་རྟོག་པར། །རང་རིག་བདེ་ཆེན་ཤར་དུས་ངེས་ཤེས་འཆར། །ལོངས་སྐུ་ལྷུན་གྱིས་གནས་པ་འཐད་པས་གྲུབ། །རང་རིག་སྟོང་ཉིད་སྤྲུལ་པའི་རྣམ་པ་ཅན། །རང་ལ་གནས་པས་བག་ཆགས་རྙོག་གཞི་དྭངས། །རྣལ་འབྱོར་ཤིན་ཏུ་རྫོགས་གསལ་སྐུ་གསུམ་ངང་། །རྟོག་པ་རང་གྲོལ་ཡེ་ཤེས་མ་འཁྲུལ་འཐད། །དེ་ལྟར་རང་མཚན་རྫོགས་ཆོད་མ་ནུས་ལ། །འཁྲུལ་སྣང་འབྲས་བུ་ངོ་བོ་ཉིད་ཀྱི་རྒྱུ། །བྱང་ཆུབ་སེམས་དེ་ལྷུན་གྱིས་གནས་པར་དཔག །རྣམ་ཤེས་ཚོགས་བརྒྱད་ཡུལ་དང་བཅས་པ་ཡི། །རང་བཞིན་ཡེ་ནས་སྟོང་གསལ་སྤྲུལ་པར་བཅས། །ནོར་བ་མེད་པས་མ་བཅོས་རང་བཞིན་དཔག །འཁྲུལ་ཤེས་ཡུལ་དང་བཅས་པ་དེ་བདེན་ན། །དེ་ཡིས་གྲོལ་བར་རིགས་ཏེ་དེ་སྡུག་བསྔལ། །རིགས་པའི་ཡུལ་དང་རྒྱལ་བའི་དགོངས་པ་དང་། །རྣལ་འབྱོར་དགོངས་པའི་ངོ་ན་དེ་མི་དམིགས། །ངེས་དོན་གཤིས་ལའང་མི་དམིགས་དེ་རྗེས་དཔག །གནས་སྐབས་འཁྲུལ་སྣང་རིགས་པས་ཡུལ་ཤེས་པ། །གྲུབ་ཀྱང་ངེས་པའི་རིགས་པས་དེ་མི་འཐད། །འཁྲུལ་ངོར་འཐད་ཕྱིར་དོན་དང་འགལ་བར་ངེས། །ཐག་པ་སྦྲུལ་དུ་འཛིན་པ་འཁྲུལ་པ་བཞིན། །ཐ་སྙད་ཚིག་གི་སྒྲོ་སྐུར་དེས་བསལ་ལ། །ངེས་དོན་རང་རིག་ཉམས་ལ་གནས་པར་བྱའོ། །མཚན་མ་ཀུན་རྫོབ་ཞེས་པ་ལས་གྲོལ་བའི། །ཀུན་བྲལ་ཇི་མ་སྤངས་པའི་རང་རིགས་པ། །ཐམས་ཅད་ཡུལ་མེད་ཀུན་གསལ་སྟོང་ཉིད་དེ། །དེ་ཡང་དགོས་པས་ཐ་སྙད་བརྗོད་པ་ཙམ། །ཞེས་སོ། །དེ་ཡང་བློ་གྲོས་ཀྱི་རྩལ་དང་བསྟུན་ཏེ་ཚད་མ་གཉིས་ཀྱིས་འཇལ་བའི་ཚུལ་ཡང་། སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས། དོན་ཉིད་སྒྲོ་བྲལ་མངོན་སུམ་ལ། །མ་མཐོང་ཆ་གཞན་ལུས་མེད་པས། །རྟགས་ལ་བརྟེན་པས་དཔག་ཏུ་མེད། །དེ་ལྡན་རིགས་རྒྱུད་ཆིག་ཆོད་པའོ། །གཞན་དུ་རྟགས་ཙམ་འཛིན་པ་ཡང་། །ཤེས་བྱ་ཀུན་ལ་འཇུག་ནུས་ལ། །དེ་ལའང་སྙིང་པོ་མ་དམིགས་པས། །འཇུག་མཁན་རང་རིག་ཡེ་ཤེས་ལ། །ཤེས་བྱ་དེ་ཉིད་རྣམ་པ་སྟེ། །མ་འབྲེལ་ཤེས་པར་མི་འཐད་པས། །རང་བཞིན་དམིགས་པ་ཀུན་གྲོལ་བ། །མ་འདྲེས་ཡོངས་རྫོགས་སྤྱི་ཙམ་དཔག །བསམ་སྒོམ་གཉིས་ཀྱིས་བསྲིང་བསྐྱེད་དྲང་། །དེ་ཡི་རང་བཞིན་དེ་ཡིན་པས། །ཁྱབ་འབྲེལ་མེད་ན་མི་འབྱུང་ངེས། །ཕལ་ཆེར་དེ་ལ་བརྟེན་དགོས་ཏེ། །ལོག་སྟོབས་ནུས་རྩལ་རྒྱས་ཕྱིར་རོ། །ཞེས་པ་ལྟར་རོ། །སྒྲས་མཚོན་ཚུལ་ཡང་། སྒོམ་ཐབས་སྒྲོན་མ་ལས། དེ་ཡི་མཚན་ཉིད་ཅི་འདྲར་སེམས། །གཤིས་ཉིད་དགོས་པས་མིང་བཏགས་ཀྱིས། །ཕྱོགས་སུ་འདི་འདྲར་གནས་མེད་པས། །དེར་གནས་ཉམས་དང་འདིར་དེ་བཞིན། །རང་གི་མཚན་ཉིད་བརྗོད་བྱ་མིན། །བུ་རམ་མངར་བར་བཏགས་པ་ལྟར། །འོན་ཀྱང་རྨོངས་ལ་དོན་མཚོན་ཕྱིར། །དོན་ལ་དམིགས་དང་སྒྲ་ལ་བྱུང་། །མཐུན་པར་གསལ་ལ་ཐུན་མོང་དུ། །གྲགས་པའི་སྒྲ་ཡིས་མངོན་པར་ཞེན། །བརྗོད་ན་བདེ་གསལ་ངོས་མེད་མཁྱེན། །ཞེས་པ་རྣམས་སྦྱར་ཏེ་ཀུན་ལ་ཤེས་པར་བྱའོ། །གསུམ་པ་ནི། བྱམས་པས་དོན་ནི་རྣམ་སྦྱངས་ཕྱིར། །ཞེས་པ། དོན་ཆོས་ཉིད་ཀྱི་རིགས་པ་བསྟན་ཏེ། བྱམས་པ་ཆེན་པོ་ནི་ཆོས་ཉིད་མ་དང་འདྲ་བས་འཁོར་འདས་ཐམས་ཅད་ཀྱི་གཞི་མ་བྱས་ནས་མི་གཏོང་བ་དང་། དོན་ཆོས་ཉིད་ཕྱོགས་མེད་ཀྱི་བྱས་པས་རྣམ་པར་རྟོག་པ་ཕྱོགས་སུ་འཛིན་པ་ཐམས་ཅད་ཀ་ནས་དག་ཟིན་པས་རྣམ་པར་སྦྱངས་པའི་ཕྱིར་ན། སྙིང་རྗེ་ཆེན་པོ་ཅིར་མི་མཛད། །ཅེས་ཡུལ་དང་ཡུལ་ཅན་མེད་པའི་རིགས་པ་བསྟན་ཏེ། ཐེག་པ་འོག་མ་པ་བཞིན་དུ་སེམས་ཅན་ལ་དམིགས་པའི་སྙིང་རྗེ་ཆུང་ངུ་ནི་རྡུལ་ཙམ་ཡང་མི་དམིགས་ཏེ། ཨ་ཏི་ཡོ་ག་རིག་པ་ཡུལ་མེད་ཕྱོགས་བྲལ་ངེས་མེད་དུ་ཤར་བའི་སྙིང་རྗེ་ཆེན་པོའོ། །དེས་ན་འོག་མ་བཞིན་དུ་ཆེ་ཆུང་དང་དམིགས་གཏད་ཅིར་ཡང་མི་མཛད་དོ། །ཆེ་བས་ཆེ་བ་ཟབ་མོ་ཡི། །ཞེས་པ། གཉིས་སུ་མེད་པའི་རིགས་པ་བསྟན་ཏེ། འདི་ལ་རྫོགས་པ་ཆེན་པོ་ཐོག་བབ་ཀྱི་གདམས་ངག་ཟེར་ཏེ། སྣང་སྲིད་འབྱུང་བ་ཁྲོ་བ་ལས་ཆེ་བ་ནི་ཆོས་ཉིད་མྱ་ངན་ལས་འདས་པ་ཡིན་ལ་དེ་བས་ཀྱང་ཕྱོགས་ཆེ་ཞིང་ཟབ་པ་ནི་རིག་པ་ཡུལ་དང་ཡུལ་ཅན་གཉིས་སུ་མེད་པ། ཟབ་མོ་བྱང་ཆུབ་ཀྱི་སེམས་ཐིག་ལེ་ཉག་གཅིག་ཡིན་ཏེ། དེ་གོ་ན་འཁོར་འདས་ཐོག་བརྫིས་ཅར་ཕོག་ཏུ་གྲོལ་བས་སོ། །ཡོན་ཏན་ཅིར་ཡང་བསྔགས་པ་མེད། །ཅེས་པ། སྐྱོན་ཡོན་མེད་པའི་རིགས་པ་བསྟན་ཏེ། རང་གི་རིག་པ་བྱང་ཆུབ་ཀྱི་སེམས་ཡུལ་མེད་པ་དེ་ལ། ཡང་དག་པར་རྫོགས་པའི་སངས་རྒྱས་ཀྱི་ཆེ་བའི་ཡོན་ཏན་མཚན་དང་དཔེ་བྱད་སྟོབས་དང་མི་འཇིགས་པ་ལ་སོགས་པ་བོགས་འདོན་དུ་མེད་པས་བཟང་ངོས་བསྔགས་སུ་མེད་ལ། སྐྱོན་གྱིས་མ་ཕྲི་བས་ངན་པར་བརྗོད་དུའང་མེད་དོ། །བཞི་པ་ནི། དོན་རྣམས་ཇི་བཞིན་མི་བསྐྱོད་དེ། ཞེས་གཡོ་འགུལ་མེད་པའི་གཏན་ཚིགས་བསྟན་ཏེ། འཁོར་འདས་གཉིས་ཀའི་རྩ་བ་བྱང་ཆུབ་ཀྱི་སེམས་ཡིན་ལ། དེ་ལ་སུས་ཀྱང་བཅོས་བསྒྱུར་བྱར་མེད་པས། གཞི་ཇི་བཞིན་པ་རང་རིག་ཆེན་པོའི་ཀློང་ལམ་ལ། བཟང་ངན་གང་གིས་ཀྱང་མི་བསྐྱོད་དེ། མཉམ་པ་ཉིད་ལ་ཕྱོགས་རིས་མེད་པས་བཟང་རྟོག་ངན་རྟོག་གང་ཡང་འདྲ་སྟེ་རྟོགས་པས་བོགས་མ་ཐོན་པས་ཡར་མི་བསྐྱོད། མ་རྟོགས་པས་ངན་དུ་མ་སོང་བས་མར་མི་བསྐྱོད་དེ་འཕོ་འགྱུར་མེད་པར་གནས་སོ། །བྱ་བ་མེད་པས་གྲོལ་བའང་གྲོལ། །ཞེས་པ། བྱ་བྲལ་གྱི་གཏན་ཚིགས་བསྟན་ཏེ། བྱ་བ་མེད་པའི་ཆོས་བཅུ་གཉིས་ལ། ལྷུན་གྲུབ་གསུམ་དུ་ས་ལེར་མ་འདྲེས་ཡོངས་རྫོགས་སུ་མཐོང་བས་ལྟ་བ་ཉམ་ང་མེད་ན་ཆོས་ལ་བྱར་མེད། དེ་ལས་མི་འདའ་བར་རང་སར་གྲོལ་བའི་སྒོམ་པ་ལ་བྱས་པའི་ཆོས་ཀྱིས་སངས་མི་རྒྱ། དེ་ལྟར་རྟོགས་ནས་བླང་དོར་བྲལ་བའི་སྤྱོད་པ་རང་བྱུང་ཉིད་བཀག་པས་མི་ཁེགས། རང་གསལ་འཛིན་ཞེན་མེད་པའི་ཉམས་མྱོང་ལ་རིག་པ་གང་དགར་ཐོང་། གཞི་བཞག་རང་ལུགས་སུ་ཤེས་པའི་བཅོས་ཐབས་ལ་རྣམ་རྟོག་དགྲར་མི་ལྟ། རང་སྣང་དུ་རྟོགས་ཏེ་གཉིས་འཛིན་དྲུངས་ཕྱུང་བའི་གདམས་ངག་ལ་དུག་ལྔ་མདོག་མ་སྒྱུར། མཐར་འཛིན་བྲལ་བའི་འཆིང་ཞགས་ལ་དགེ་སྡིག་སྤོང་ལེན་མ་བྱེད། ཆོས་ཉིད་ཕྱོགས་ཡན་གྱི་འབྲས་བུ་ལ་མི་མཐུན་པ་སྐྱོན་དུ་མ་འདོར། རྩོལ་བྲལ་རིག་པའི་དམ་ཚིག་ལ་གཉེན་པོ་རྒྱུད་ལ་མ་བརྟེན། རང་བཞིན་མ་བཅོས་པའི་ཕྲིན་ལས་ལ་བྱ་བ་ཅི་དང་ཅི་བྱེད་ཀྱང་ཤུགས་འབྱུང་ཀློང་རྡོལ་རང་ཤར་རང་ལུགས་སུ་ཐོང་། སྦྱང་བགྲོད་མེད་པའི་ས་ལམ་ལ་འགྲོ་ས་དང་གྲོལ་ས་ཡོད་ཀྱིས་རེ་དོགས་མ་བྱེད། ཕྱོགས་མེད་ཁྱབ་གདལ་དུ་ཤེས་པའི་གོ་ཚད་ལ་རྟོགས་རུང་མ་རྟོགས་རུང་གྲོལ་བ་ཡིན་པས་བློ་བདེ་བ་དང་བཅུ་གཉིས་པོ་དེས། རྫོགས་པ་ཆེན་པོ་བྱ་བྲལ་གྱི་ཀློང་དུ་ལ་བཟླ་བ་ཡིན་ཏེ། ཀུན་བྱེད་ལས། བྱར་མེད་འདི་ལ་གང་གནས་པ། །ལུས་ནི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་པས། །འདི་ཡིས་སེམས་ཅན་དོན་བྱས་ནས། །རྩོལ་སྒྲུབ་མི་བྱེད་བདེ་བར་གནས། །ཞེས་འབྱུང་བས་སོ། །དེ་ལྟ་བའི་བྱ་རྩོལ་མེད་པའི་དོན་དེ་ཉིད་སེམས་ཅན་ཐམས་ཅད་ལ་ཁྱབ་གདལ་དུ་གནས་པས་ཡེ་གྲོལ་ཡིན་ལ། དེ་ཀ་བཞིན་དུ་བླ་མས་བསྟན་ཏེ་རྟོགས་པས་མངོན་དུ་གྱུར་པ་ལས་ཡང་གྲོལ་དུ་གྱུར་པ་ཞེས་བྱ་སྟེ། རྫོགས་པ་ཆེན་པོ་བྱར་མེད་དེའང་དེ་ལྟ་བུ་ཞིག་གོ་ན་བྱར་རུང་གི། གཞན་དུ་ཁ་འུད་ཙམ་ལ་བརྟེན་པས་ཅི་ཡང་ཕན་པ་མེད་དེ། ཀློང་རབ་འབྱམས་ལས། ཆགས་སྡང་གནས་ལས་མ་འཕགས་པར། །གཟུང་དང་འཛིན་པའི་སྟེགས་བྱས་ནས། །ཕྱོགས་མེད་འབྲས་བུ་འདོད་པ་ནི། །ཁྱི་རྒན་འདབ་ཆགས་སྙེག་པ་འདྲ། །ཟབ་མོའི་དགོངས་པ་འཆར་མི་འགྱུར། །ཞེས་སོ། །རང་བྱུང་ཡེ་ཤེས་བརྩལ་མེད་པས། །ཞེས་པ་རྒྱུ་རྐྱེན་མེད་པའི་གཏན་ཚིགས་བསྟན་ཏེ། རིག་པ་བྱང་ཆུབ་ཀྱི་སེམས་རྒྱུ་རྐྱེན་མེད་པས་རང་བྱུང་ཡེ་ཤེས། ཤར་ནུབ་མེད་པས་རང་བྱུང་ཡེ་ཤེས། ཕྱི་ནང་སྒྲིབ་གཡོག་མེད་པས་རང་བྱུང་ཡེ་ཤེས། ཀ་ཕྱི་མོ་ནས་རང་བྱུང་བས་གཞན་ནས་བརྩལ་དུ་མེད་པའོ། །གྲོལ་ནས་གྲོལ་བའི་ལམ་ཡང་སྟོན། །ཅེས་པ། ཡེ་གྲོལ་ཆེན་པོའི་གཏན་ཚིགས་བསྟན་ཏེ། འོ་ན་འདི་ལ་ཐུག་པ་མེད་པའི་སྐྱོན་དུ་འགྱུར་རམ་སྙམ་ན། མཐའ་ལ་སྐྱོན་དུ་འཛིན་ན་ཐུག་པ་མེད་པའི་སྐྱོན་འོང་ལ། རྫོགས་པ་ཆེན་པོ་ཤེས་བྱ་མཐའ་མེད་དུ་གཏན་ལ་ཕེབས་ན། སྐྱོན་དུ་ཆེ་རྒྱུ་མེད་དེ་འདོད་ཐོག་ཡིན་ཡང་། མཚོན་པའི་སྒོ་མ་འགགས་པས་འཁོར་འདས་ཀྱི་ཆོས་ཐམས་ཅད་བྱ་བྲལ་ཀློང་ཆེན་གྱི་ངང་དུ་ཡེ་གྲོལ་གྱི་ངོ་བོར་ཐིག་ལེ་ཉག་གཅིག་ཏུ་སངས་རྒྱས་པ་ཡིན་ཏེ། ད་དུང་ཉག་གཅིག་གི་དོན་དེ་རྟོགས་པའི་ཕྱིར་བྲམ་ཟེ་ཆེན་པོས། ལས་ཟིན་པ་ཡི་དམ་པ་ཡི། །དྲུང་དུ་སེམས་ཐག་ཅོད་པར་གྱིས། །ཞེས་གསུངས་པ་ལྟར་མཚོན་ཚད་ཙམ་དུ་བླ་མས་སྟོན་དགོས་པས། རྣམ་པར་གྲོལ་བའི་ལམ་ཐུན་མོང་མ་ཡིན་པ་ཡང་འཐད་པ་སྟེ། རྨད་བྱུང་ལས། རྡོ་རྗེ་སེམས་དཔའ་ང་ཉིད་ཀྱང་། །རྡོ་རྗེའི་གདན་ལ་ཡང་སངས་རྒྱས། །ཞེས་སོ། །ལྔ་པ་ནི། ཆོས་ཉིད་ཀྱི་ཐིག་ལེ་ཞེས་པ་གཞན་གྱིས་སེལ་མེད་པའི་སྐབས་ཡིན་པས། འདུས་མ་བྱས་ཤིང་མ་བཅོས་པར་ཡེ་ནས་གནས་པས་ན་ཆོས་ཉིད། མ་སྤྲོས་ཀུན་ལ་ཁྱབ་པར་གདལ་བས་ཐིག་ལེའོ། །འོ་ན་དཔེ་དོན་རིགས་པ་གཏན་ཚིགས་བཞི་པོ་ཐ་དད་དམ་ཞེ་ན། བཤད་པ་དཀྱུས་ཀྱི་དབང་དུ་བཏང་ན་དེ་ལྟར་འགྲོ་ཡང་། གདམས་ངག་དོན་ཐོག་ཏུ་དྲིལ་ན། བཤད་ཚོད་དེ་དག་ཐམས་ཅད་མདོ་ཐིག་ལེ་ཉག་གཅིག་ཏུ་བསྡུ། འགག་བྱ་རྩོལ་མེད་པར་བསྡམ། གནད་འཁོར་འདས་དབྱེར་མེད་དུ་བཀྲོལ། ཕུགས་ཐག་ད་ལྟར་གྱི་སྣང་བ་ལ་བཅད། འགྲོ་ས་ཆོས་ཀྱི་དབྱིངས་སུ་བཏང་བ་དང་ལྔས་རྒྱས་གདབ་པས། དང་པོས་སེམས་ཉིད་ཁྱབ་གདལ་ལ་འགྲན་པའི་ཟླ་མེད་པས་བློ་བདེ། གཉིས་པས་ཐེག་པས་སོ་སོས་རྩོལ་སྒྲུབ་མེད་པས་བློ་བདེ། གསུམ་པས་ལམ་འོག་མས་སྤངས་ཐོབ་བྲལ་བས་བློ་བདེ། བཞི་པས་དུས་ཕྱི་མར་རེ་དོགས་དང་གཡང་ས་ཐམས་ཅད་དུས་གཅིག་ལ་ཆོད་པས་བློ་བདེ། ལྔ་པས་ལམ་ལོག་པར་མ་སོང་སྟེ་འཁོར་བར་མི་འཁྱམས་པས་བློ་བདེ་བ་ནི་ཕྱག་རྒྱའི་དོད་པོ་ཁྱད་པར་དང་ལྡན་པ་གནས་ཀྱི་ཡང་སྙིང་ཡིན་ཏེ། མདོ་བཅུ་ལས། ཕྱག་རྒྱ་དག་གི་ངེས་པ་ནི། །སེམས་ཉིད་རྫོགས་པའི་སྙིང་པོ་དེ། །ཡེ་ནས་བྱང་ཆུབ་སྐུ་ཡིན་པས། །སྐྱེ་བ་མེད་ཅིང་འགྱུར་བ་མེད། །ཡེ་ནས་ཡེ་ཤེས་ཆེན་པོའི་སྐུ། །འགྱུར་བ་མེད་པའི་རང་བཞིན་ལ། །ཕྱག་རྒྱ་ཞེས་ནི་བསྟན་པ་ཡིན། །ཞེས་གསུངས་པས་སྐབས་ཀུན་ལ་དེ་ལྟར་ཤེས་པར་བྱའོ། ༈ །ད་ནི་སྐབས་གཉིས་པ་ལ། སྐབས་ཀྱི་དོན་བསྟན་པ། སྣོད་བཅུད་གཞིར་བཞེངས་ཀྱི་དགོངས་པ་ཉི་མའི་སྙིང་པོ་ལྟ་བུར་གསལ་འགྲིབ་མེད་པའི་ཀློང་དུ་བསྟན་པ། ལས་དང་ཉོན་མོངས་པའི་དབང་གིས་ཅིར་ཡང་འཆར་བའི་རིགས་པ་བསྟན་པ། རང་གྲོལ་ཆེན་པོའི་གཏན་ཚིགས་བསྟན་པ་དང་བཞི་ལས། དང་པོ་ནི། རང་བཞིན་གྱིས་གནས་པའི་སྐབས། ཞེས་ཏེ། རང་བཞིན་ནི་མ་བཅོས་པའམ་ལྷུན་གྱིས་གྲུབ་པའི་ཆོས་ཉིད་ལ་བྱ་སྟེ། དེ་སུ་ལ་གནས་ན་འཁོར་འདས་ཀྱི་ཆོས་ཐམས་ཅད་ལ་རང་གི་རང་བཞིན་ནམ་སྤྱི་ཁྱབ་ཏུ་གནས་པས་དེ་ལྟ་བུའི་ཡིན་དོན་ཟབ་མོ་ཞིག་འདིར་སྟོན་པའི་སྐབས་ལ་བབ་བོ། །ཞེས་པ་སྟེ། འདུས་མ་བྱས་པའི་ཆོས་ཉིད་དེ། །འགྲོ་བ་རྣམས་ལ་རང་བཞིན་གྱིས། །ཡེ་ནས་མ་ཕྱེ་གནས་པའི་ཕྱིར། །རང་བཞིན་གནས་པའི་སྐབས་ཞེས་བྱ། །ཞེས་སོ། །གཉིས་པ་ནི། འབྱུང་བ་ཆེན་པོ་བཅོས་ལྡན་འདས། །ཞེས་ཕྱི་སྣོད་ཀྱི་འཇིག་རྟེན་ཡང་འབྱུང་བ་ས་ཆུ་མེ་རླུང་ནམ་མཁའ་ལྔ་སྟེ། དེ་ལ་ཕྲ་རགས་སུ་དབྱེ་ན་ཉི་ཤུ་རྩ་ལྔར་བཤད་ཀྱང་རྩ་བའི་ལྔ་ལ་འདུ། དེ་ཡང་འགྲོ་བའི་དོན་མཛད་པའི་ཕྱིར། རིན་པོ་ཆེ་རྣམ་པ་ལྔའམ། རྡོ་རྗེ་རྣམ་པ་ལྔའི་ངོ་བོར་སངས་རྒྱས་ཏེ་ཆོས་ཉིད་གཞིར་བཞེངས་ཡིན་པ་དང་། ནང་བཅུད་ཀྱི་སེམས་ཅན་ཡང་འབྱུང་བ་ལྔ་ལས་ཕུང་ཁམས་སྐྱེ་མཆེད་དུ་གྲུབ་སྟེ་རྡོ་རྗེའི་སྙིང་པོར་རང་འཁྲུངས་པའི་སངས་རྒྱས་ཡིན་ཏེ་ཆོས་ཉིད་གཞིར་བཞེངས་ཡིན་པའོ། །ཇི་ལྟར་གཞི་ནས་བཞེངས་ན། འཁོར་འདས་དབྱིངས་སུ་གཞི་ནས་བཞེངས་ཏེ་ལྷག་མ་མ་ལུས། སྣང་སྲིད་རིག་པར་གཞི་ནས་བཞེངས་ཏེ་ལྷག་མ་མ་ལུས། རང་རིག་ཆོས་སྐུར་གཞི་ནས་བཞེངས་ཏེ་ལྷག་མ་མ་ལུས་པས་ཇི་ལྟར་བྱས་ཀྱང་དགོངས་པ་ཆོས་ཉིད་ཀྱི་ངང་ངོ་། །ཉི་མའི་སྙིང་པོ་ལྟ་བུ་ནི། ཉི་མའི་སྙིང་པོ་ལ་མུན་པ་ཀ་ནས་དག་ཅིང་མུན་པའི་སེལ་མེད་པ་ལྟར། སྣོད་བཅུད་ཀྱི་འཇིག་རྟེན་ལ་ལོག་རྟོག་ཀ་ནས་དག་ཅིང་མ་རིག་པའི་སེལ་མེད་པ་དང་། ཉི་མའི་སྙིང་པོ་འདི་སྣང་བ་རྩལ་རྫོགས་ཤིང་བྱུང་ས་ཐེབ་པ་ལྟར། སྣོད་བཅུད་ཐམས་ཅད་སངས་རྒྱས་སུ་རྩལ་རྫོགས་ཤིང་རང་བྱུང་ཡེ་ཤེས་སུ་བྱུང་ས་ཐེབ་པ་ལ་བྱ་ཞིང་། གསལ་འགྲིབ་མེད་པ་ནི་མ་རིག་པས་བསྒྲིབས་ཏེ་མི་གསལ་བ་དང་། གཉེན་པོས་གསལ་དུ་སོང་བ་མེད་པར་ཤར་ནུབ་མེད་པའི་ཀློང་ཞེས་བྱའོ། །དེའི་རང་བཞིན་ལ་ངེས་པ་མེད་པས་ལས་དང་ཉོན་མོངས་པས་ཅིར་ཡང་སྣང་བའི་རིགས་པ་བྱུང་ལ། བྱུང་ཡང་རང་བྱུང་རང་ཞིར་ཤེས་པས་རང་གྲོལ་ཆེན་པོའི་གཏན་ཚིགས་ཀྱང་བྱུང་ངོ་། །དེས་ན་འབྱུང་བ་ཆེན་པོ་བཅོམ་ལྡན་འདས་ནི་ཕྱི་སྣོད་ཀྱི་འཇིག་རྟེན་ཡེ་ནས་སངས་རྒྱས་པའི་དགོངས་པ་འབྱུང་བ་ལྔས་ཡེ་ནས་འགྲོ་དོན་མཛད་པས་སྤྱི་ལ་ཁྱབ་པའི་བཅོམ་ལྡན་འདས་ཡིན་ཏེ། རིན་པོ་རྣམ་པ་ལྔའི་ངོ་བོར་རམ། རྒྱུ་རྐྱེན་གྱིས་མ་བསྐྱེད་པར་རང་བྱུང་གི་བཅོམ་ལྡན་འདས་ཡིན་པས། རྡོ་རྗེ་རྣམ་པ་ལྔའི་ངོ་བོར་སངས་རྒྱས་སོ། །འགྲོ་བ་ཀུན་ལ་རང་བཞིན་གནས། །ཞེས་པ། དེས་ན་ནང་བཅུད་ཀྱི་འགྲོ་བ་རིགས་དྲུག་གི་ལུས་སུ་སྐྱེས་པ་ཀུན་ཀྱང་། དེ་ལྔ་ལས་ཕུང་ཁམས་སྐྱེ་མཆེད་ལ་སོགས་པར་གྲུབ་པས། རྡོ་རྗེ་སྙིང་པོར་རང་འཁྲུངས་པའི་སངས་རྒྱས་སུ་རང་བཞིན་གྱིས་གནས་སོ། །དེ་ལྟ་བུའི་དགོངས་པ་དེ་ལ་ཆེད་དུ་སྒོམ་པ་ཡོད་མེད་གོང་ལྟར་ཤེས་དགོས་སོ། །གསུམ་པ་ནི། ཕྱིན་ཅི་ལོག་ཏུ་རྣམ་བརྟགས་ཀྱང་། ཞེས་པ། མ་ངེས་པའི་རང་བཞིན་ལས་བརྟགས་པ་ལྟར་ཅིར་ཡང་སྣང་བའི་རིགས་པ་བསྟན་ཏེ། ཕྱིན་ཅི་ལོག་ལ་གཉིས་ལས། རྐྱེན་ངན་ལས་ཀྱིས་བཏགས་པའི་ཕྱིན་ཅི་ལོག ། སོ་སོ་སྐྱེ་བོ་གཟུང་འཛིན་ལ་མངོན་པར་ཞེན་པས། ང་མེད་ལ་ངར་བཏགས། བདག་མེད་ལ་བདག་ཏུ་བཟུང་བས། མཉམ་པ་ཉིད་ལས་ཤུགས་ཀྱིས་ལོག་པ་དང་། ཁྲིད་པ་ཉོན་མོངས་པས་ལོག་པ། མུ་སྟེགས་ཀྱི་སྟོན་པ་རྣམས་ཀྱིས་གདུལ་བྱའི་བློ་བསྒྱུར་ཏེ། རྟག་པ་གཅིག་པུ་ལ་སོགས་པའི་གྲུབ་མཐས་ཁྲིད་དེ། བྲོད་པ་བསྐྱེད་ནས། ལོག་ལྟ་ལ་བཙུད་པའོ། །དོན་གོ་ན་དེ་དག་གང་ཡང་མི་སྤོང་བས་བཞི་པ་ནི། གྲོལ་བ་རང་བྱུང་གཞན་ལས་མིན། །ཞེས། རྒྱུ་རྐྱེན་མེད་པར་གྲོལ་བའི་གཏན་ཚིགས་བསྟན་ཏེ། སྐྱེ་བོ་དང་མུ་སྟེགས་སུ་མ་ཟད་འཁོར་འདས་ཀྱི་ཆོས་ཐམས་ཅད་རྒྱུ་ཆོས་ཉིད་ལ་རྐྱེན་རོལ་པ་འབྲས་བུ་རང་བྱུང་ཡེ་ཤེས་སུ་གྲོལ་བ་དང་། གཞི་ལྷུན་གྲུབ་ངོ་བོ་ངེས་མེད། དོན་སྐྱེ་མེད་བདག་ཉིད་ཐོག་མཐའ་མེད་པར་གྲོལ་བ་དང་། སྣང་བ་སྟོང་པ། སྡུག་བསྔལ་བདེ་ཆེན། ཡུལ་ཡུལ་ཅན་ཡེ་གྲོལ། སྐྱོན་ཡོན་རང་དག །ཆོས་ཅན་ཆོས་ཉིད་དུ་གྲོལ་བས་འབྲས་བུ་གཞན་ལ་མི་རེ་སྟེ་གཞི་ནས་དེ་ལྟར་གྲོལ་བ་ལ། ད་གདོད་བརྩལ་དུ་མེད་པས་གཞན་ལས་འབྱུང་བ་མིན་ནོ། །དེའི་འཇུག་སྡུད་འདྲའོ།། ༈ །།ད་ནི་སྐབས་གསུམ་པ་ལ། སྐབས་ཀྱི་དོན་བསྟན་པ། ཐབས་ཤེས་རབ་གཉིས་སུ་མེད་པའི་དགོངས་པ་ཁྱུང་དར་མ་ནམ་མཁའ་ལ་ལྡིང་བ་ལྟ་བུ་བྱ་རྩོལ་དང་བྲལ་བའི་ཀློང་དུ་བསྟན་པ། ཚོད་འཛིན་པའི་རིགས་པ་བསྟན་པ། འབྲས་བུ་གཞན་ནས་མི་འབྱུང་བའི་གཏན་ཚིགས་བསྟན་པ་དང་བཞི་ལས། དང་པོ། རང་བཞིན་གྱིས་ཆེ་བ་ལ་གནས་པའི་སྐབས། ཞེས། རང་བཞིན་ནི་མ་བཅོས་པའི་ཆོས་ཉིད་ལྷུན་གྱིས་གྲུབ་པའི་དགོངས་པ་སྟེ། དེ་སེམས་ཅན་ཐམས་ཅད་ཀྱི་སེམས་ཀྱི་རང་བཞིན་དུ་གནས་ཀྱང་བརྟགས་པར་དཀའ་ཞིང་ཐུན་མོང་གི་སྤྱོད་ཡུལ་དུ་མ་གྱུར་པས། འཁོར་འདས་ལམ་པ་ལས་ཆེ་བར་གནས་པའི་དོན་སྟོན་པའི་སྐབས་ལ་བབ་བོ། །ཞེས་པ་སྟེ། མདོ་བཅུ་ལས། འདུས་མ་བྱས་པའི་ཆོས་ཉིད་དེ། །མ་བཅོས་རང་ལ་གནས་པ་ཡིས། །སངས་རྒྱས་ཆེ་བ་ཐོབ་པའི་ཕྱིར། །རང་བཞིན་ཆེ་བའི་སྐབས་ཀྱི་བསྟན། །ཞེས་སོ། །གཉིས་པ་ནི། ཆེ་བའི་ཡེ་ཤེས་རྙེད་དཀའ་བ། །ཞེས་པས། རྫོགས་པ་ཆེན་པོ་ཨ་ཏི་ཡོ་གའི་ལུགས་ཀྱིས་སྣང་ཞིང་སྲིད་པས་བསྡུས་པའི་ཆོས་ཐམས་ཅད། གཞི་ངེས་མེད་ཀྱི་རོལ་པ་ཕྱོགས་མེད་དུ་ཤར་བ་ལ་མཐར་འཛིན་གང་ཡང་མི་སྤོང་བ་ཐབས་ཀྱི་རྒྱལ་པོ་ཡིན་ལ། དོན་སྐྱེ་མེད་བདག་ཉིད་ཐོག་མཐའ་མེད་པའི་ཀློང་དུ་གྲོལ་བ་ལ། མཚན་མའི་སྤྲོས་པའམ་ཕྱོགས་སུ་འཛིན་པ་མེད་པས། འཛིན་མེད་ཅིར་ཡང་མི་རྟོག་པ་ཤེས་རབ་ཀྱི་རྒྱལ་པོ་ཡིན་ཏེ་དེ་གཉིས་ཚིག་ལ་སྔ་ཕྱི་བྱུང་ཡང་དོན་ལ་ཐ་དད་མེད་དེ། རྒྱུ་ཆོས་ཉིད་རྐྱེན་རོལ་པ་འབྲས་བུ་རང་བྱུང་གི་ཡེ་ཤེས་སུ་གཅིག་པས། དཔེ་ནམ་མཁའ་དོན་ཆོས་ཉིད་རྟགས་རང་བྱུང་ཡེ་ཤེས་སུ་གཅིག་སྟེ། ཐབས་ཤེས་རབ་གཉིས་སུ་མེད་ཅིང་དམིགས་པའི་མཐའ་ལས་འདས་པས་ཡེ་ཀློང་ཆེན་པོའི་དགོངས་པའོ། །ཁྱུང་དར་མ་ནམ་མཁའ་ལ་ལྡིང་བ་ལྟ་བུ་ནི། དང་པོ་སྟེགས་འཆའ། བར་དུ་རྩོལ་བས་གཡོ་བ། ཐ་མར་མི་རྩོལ་བར་རང་ལུགས་སུ་འཇོག་པ་ལྟར། རྫོགས་པ་ཆེན་པོ་ཨ་ཏི་ཡོ་ག་པའང་། དང་པོ་བླ་མའི་གདམས་ངག་གི་སྟེགས་འཆའ། བར་དུ་ཐོས་བསམ་སྒོམ་སྒྲུབ་ལ་རྩོལ་བ་གཡོ་བ། ཐ་མར་མཉམ་པ་རིས་མེད་ལ་ཆེད་དུ་མི་རྩོལ་ཏེ། རང་ལུགས་སུ་འཇོག་པ་ཡིན་པས་བྱ་རྩོལ་དང་བྲལ་བའི་ཀློང་དུ་བསྟན་པ་ཟེར་ལ། དེ་ལ་ཆེད་དུ་རྩོལ་ན་གོལ་ས་ཡིན་པས་ཚོད་འཛིན་གྱི་རིགས་པའང་དེ་ལ་བྱ་ཞིང་། མ་བརྩལ་ཀྱང་རང་ལ་གནས་པས་འབྲས་བུ་རང་ལས་འབྱུང་བའི་གཏན་ཚིགས་བསྟན་ཏེ། དེས་ན་ཆེ་བའི་ཡེ་ཤེས་ནི། ཐུན་མོང་མ་ཡིན་པའི་དགོངས་པ་སྟེ། འཁོར་འདས་ཐེག་པ་ཐམས་ཅད་ལས་ཆེ་བའམ། མཐའ་ཇི་སྙེད་པ་ཟིལ་གྱིས་གནོན་པས་ཆེ་བ་ནི་རང་གི་སེམས་ཉིད་དོན་རང་བྱུང་གི་ཡེ་ཤེས་ཕྱི་ནང་མེད་པར་ངེས་མེད་ཕྱོགས་རིས་ངང་བྲལ་བར་ཤར་བས། གང་གིས་ཀྱང་རྙེད་པར་དཀའ་བས་ཨ་ནུ་མན་ཆད་ཀྱི་ཐེག་པ་འོག་མ་པས་མ་རྙེད་པའོ། །དེ་ཅིས་རྙེད་པར་དཀའ་ན་ཆོས་ཉིད་ཕྱོགས་མེད་ལ་ཕྱོགས་དང་རིས་སུ་རྩོལ་བའམ། རང་ལ་བཞག་ནས་གཞན་དུ་ཚོལ་བས་རྙེད་པར་དཀའ་བའོ། །འོ་ན་གཏིང་ནས་རང་མི་རྙེད་དམ་ཞེ་ན། གཏིང་ནས་མི་རྙེད་པའམ་རིགས་ཆད་མ་ཡིན་མོད། རྫོགས་པ་ཆེན་པོ་རང་གནས་སྐབས་སུ། ཤེས་རབ་ཐབས་ལ་བརྟེན་པས་གྲུབ། ཅེས། འཛིན་པ་མེད་པ་ཤེས་རབ་ཀྱི་རྒྱལ་པོ་མ་སྐྱེས་པ་དང་། བྱ་བ་མེད་པ་ཐབས་ཀྱི་རྒྱལ་པོ་མ་འགག་པ་ལ་བརྟེན་ནས། རང་བྱུང་ཡེ་ཤེས་སྐྱེ་འགག་མེད་པའི་དོན་དེ། ཚེགས་མེད་པར་རང་ལ་གྲུབ་པའོ། །དེ་ལྟ་བུའི་དགོངས་པ་ལ་སྐྱོན་བསལ་བ་འདྲའོ། །གསུམ་པ་ནི། མིང་ཙམ་གཞན་ལ་བརྟེན་འདྲ་ཡང་། །ཞེས་མིང་མཐའ་ཚོད་འཛིན་དུ་བསྟན་པའི་རིགས་པ་ཉིད་དེ། གོང་དུ་ཐབས་དང་ཤེས་རབ་གཉིས་སུ་སྨོས་པ་དེ་རང་ཡང་མིང་ཙམ་མམ་ཚིག་གམ་བརྡ་ཙམ་གྱིས་གཞན་ནས་བསྐོར་ཏེ་སྟོན་པ་འདྲ་ཡང་དོན་རང་ལ་རང་བྱུང་དུ་གནས་པའི་ཕྱིར་རོ། །མིང་ཙམ་ཞེས་ཚོད་འཛིན་པའི་ཚིག་ཡིན་པས། ཚིག་རང་རྒྱུད་པའི་ཕྱིར་འབྲངས་ན་དོན་ལས་གོལ་བར་འགྱུར་ཞེས་བྱ་བའི་ཐ་ཚིག་གོ། །བཞི་པ་ནི། མངོན་སུམ་བདེ་བ་རང་ལས་འབྱུང་། །ཞེས་པ་ཡེ་ཤེས་ཁོང་ནས་འཆར་བའི་གཏན་ཚིགས་བསྟན་ཏེ། ལར་ཐེག་པ་འོག་མ་པའི་ལུགས་ཀྱིས་དབང་པོའི་མངོན་སུམ་རང་ལས་ཐ་དད་ཀྱི་ཡུལ་འཇལ་བར་བྱེད་པ་ལ། འདིར་ཡེ་ཤེས་ཀྱི་རྣམ་པ་སྒྱུ་མ་ལྷུན་གྲུབ་ཀྱིས་རྒྱུ་འབྲས་རང་ལ་ཡོད་པས་ཡུལ་དུ་མ་བྱས་པ་དང་། ཡིད་ཀྱི་མངོན་སུམ་དབང་པོའི་རྗེས་ལ་སྐྱེ་བ་ལ། འདིར་རང་བཞིན་སྤྲོས་བྲལ་ལྷུན་གྲུབ་ཀྱིས་ཆོས་ཉིད་བསམ་གྱིས་མི་ཁྱབ་པ་ལ་དམིགས་པའི་ཡུལ་དང་བྲལ་བ་དང་། རང་རིག་པའི་མངོན་སུམ་གསལ་རིག་གི་ངོ་བོས་རང་མྱོང་ལྟོས་མེད་དུ་གཅོད་པ་ལ། འདིར་རྫོགས་པ་ཆེན་པོའི་ཆོས་ཉིད་རང་གིས་རིག་པས་མཚན་ཉིད་རང་རིག་ལྷུན་གྲུབ་ཀྱིས། རང་རིག་པའི་རྒྱལ་པོ་དབང་དུ་གྱུར་པ་དང་། རྣལ་འབྱོར་གྱི་མངོན་སུམ་བདག་མེད་ཀྱི་དོན་དང་ཕ་རོལ་གྱི་བཟང་རྟོག་སོགས་སྣང་བ་ཡིན་པ་ལ། འདིར་ཡོངས་རྫོགས་དབྱེར་མེད་ཀྱི་དགོངས་པས་སྐུ་གསུམ་ལྷུན་རྫོགས་སུ་གསལ་བ་རབ་ཏུ་གྱུར་པས་ཚོགས་བརྒྱད་ཀྱི་རྟོག་པ་ཡུལ་མེད་དུ་གྲོལ་ཏེ་ཐིག་ལེ་ཉག་གཅིག་ཏུ་ཤར་བར་མངོན་སུམ་དུ་མཐོང་བས། འབྲས་ཀློང་ལས། ཡུལ་ལ་མཚན་མར་རྟོག་དང་ངར་འཛིན་ཅན། །རྗེས་སུ་མིང་ལ་སྤྲོས་པར་འབྲང་བར་བསླད། །དེ་ཉིད་སྤྲུལ་པར་རོལ་པས་དེ་མཁྱེན་པའི། །ཡེ་ཤེས་ཀུན་ལ་བདེ་བར་ལོངས་སྤྱོད་རྫོགས། །དེ་ཉིད་རྣམ་དག་དམིགས་མེད་ཆོས་སྐུར་གྲོལ། །སྐུ་གསུམ་ལྷུན་གྲུབ་ཀུན་བཟང་ཉག་གཅིག་པོ། །མ་བསླད་མ་བཅོས་མ་སྤངས་མ་བཀག་ཅིང་། །མ་སྦྱངས་མ་བསྒྱུར་མ་བརྩལ་མ་བསྐྱེད་གྲོལ། །ཞེས་གསུངས་པ་ལྟར་མངོན་སུམ་བཞིས་མ་འདྲེས་ཡོངས་རྫོགས་སུ་རྟོགས་པའི་མཐུ་ལ་བརྟེན་ནས་གནས་ལུགས་བྱ་རྩོལ་ལམ་ཟག་པའི་འཕོ་འགྱུར་མེད་པའི་ཆོས་ཉིད་བདེ་བ་ཆེན་པོ་དེ་ཉིད་གཞན་ནས་བརྩལ་བ་མེད་པར་ད་ལྟ་རང་གི་སྣང་གྲགས་ཀྱི་ཆོས་ཝལ་ལེ་ཁྱུག་གེ་བ་རང་ལ་རང་བྱུང་དངོས་གྲུབ་ཤར་བར་གོ་བས་འབྲས་བུ་དམ་པ་ཉིད་འབྱུང་སྟེ། སློབ་དཔོན་ཆེན་པོ་ཤྲི་སིདྷས། །སྒྱུ་མའི་རོ་ལ་མ་ཆགས་པས། །ཆགས་མེད་ཡེ་ཤེས་རྫོགས་པའི་ལམ། །བྱང་ཆུབ་སེམས་ཀྱི་རང་གསལ་འདི། །དངོས་མེད་ཤེས་རབ་ཐབས་ཀྱིས་འགྲུབ། །ཅེས་སོགས་ལྟར་རོ། །དེ་ལྟར་དཔེ་དོན་རིགས་པ་གཏན་ཚིགས་བཞི་ལ་རྒྱས་འདེབས་འདྲའོ།། ༈ །།ད་ནི་སྐབས་བཞི་པ་ལ། སྐབས་ཀྱི་དོན་བསྟན་པ། ཚོགས་དྲུག་ལྷུག་པ་འཆར་བའི་དགོངས་པ་སྐྱེས་བུ་ནད་ཀྱིས་གཟིར་བ་ལྟ་བུར་རང་ལུགས་ཆེན་པོའི་ཀློང་དུ་བསྟན་པ། ཆོས་ཐམས་ཅད་གཉིས་མེད་ལ་རྩོལ་བས་མི་སྒྲུབ་པའི་རིགས་པ་བསྟན་པ། བརྟགས་ན་མི་རྙེད་ཅིང་ངོ་བོ་ཅིར་ཡང་འཆར་བའི་གཏན་ཚིགས་བསྟན་པ་དང་བཞི་ལས། དང་པོ་ནི། བརྩལ་བ་དང་བྲལ་བའི་སྐབས། ཞེས་ཨ་ནུ་ཡོ་ག་མན་ཆད་ཐེག་རིམ་བརྒྱད་པོ་གཞི་ཕྱོགས་མེད་ལ་ཕྱོགས་སུ་བརྩལ་བས་རང་རང་གི་ལྟ་སྒོམ་སྤྱོད་པ་ལ་ཆེད་དུ་འཛིན་པས། འབྲས་བུ་ལ་ཞེས་འདོད་བྱེད་པ་དེ། ཨ་ཏི་ཡོ་ག་རྫོགས་པ་ཆེན་པོ་བྱ་བྲལ་ཀློང་ཆེན་རྩོལ་མེད་ལྷུན་གྲུབ་ཏུ་བརྡ་སྤྲོད་དེ། འོག་མའི་རྩོལ་བ་དེ་ཀུན་དང་བྲལ་བར་སྟོན་པའི་སྐབས་ལ་བབ་བོ། །ཞེས་པ་སྟེ། འདུས་མ་བྱས་པའི་ཆོས་ཉིད་དེ། །བཙལ་བ་མེད་པར་གྲུབ་པའི་ཕྱིར། །བརྩལ་དང བྲལ་བའི་སྐབས་ཀྱིས་བསྟན། །ཞེས་སོ། །གཉིས་པ་ནི། ཚིག་བཞིའི་འོག་ནས། སྣང་བ་མེད་པའི་ཆོས་ཉིད་ནི། །ཞེས་འཇུག་པའི་རྣམ་ཤེས་ཚོགས་དྲུག་ཡུལ་དྲུག་ལ་འཇུག་པ་ཉིད། དབང་དྲུག་ཡུལ་དྲུག་སྐུ་དྲུག་ཟང་ཐལ་དུ་ཤར་བས། ཨ་ནུ་མན་ཆད་སྤོང་སྦྱོང་སྒྱུར་བ་སོགས་བྱེད་པ། ཨ་ཏི་ཡོ་ག་སྤྲོ་བསྡུ་གང་ཡང་མི་བྱེད་པས། ཚོགས་དྲུག་ལྷུག་པ་ཡུལ་ལ་ལྡོམ་དུ་བཅུག་པས། ཐམས་ཅད་ནས་ཐམས་ཅད་དུ་ཚོགས་དྲུག་ཡན་པ། ལྷུག་པ། ལྡོམ་པ། ཕྱལ་བ། བློ་བདེ་བར་གནས་པ། ཚོགས་དྲུག་ལྷུག་པར་འཆར་བའི་དགོངས་པ་ཆོས་ཉིད་ཀྱི་ཀློང་ངོ་། །སྐྱེས་བུ་ནད་ཀྱི་གཟིར་བ་ལྟ་བུ་ནི། དཔེར་ན་ནད་ཚབས་པོ་ཆེས་ཐེབས་པའི་སྐྱེས་བུ་ལ། མ་དང་སྲིང་མོ་ལའང་ངོ་ཚ་མི་ཚ་བ་མེད་པར་སྤྱོད་ལམ་ལྷུག་པར་གནས་པ་བཞིན་དུ། རིག་པ་རང་ཡན་ཚུགས་པའི་རྣལ་འབྱོར་པས་སྒོ་གསུམ་ལྷུག་པའི་སྤྱོད་ལམ་ལ། གཉེན་པོ་གང་ཡང་མི་བརྟེན་པར། རང་ལུགས་མ་བཅོས་པའི་ཀློང་དུ་གནས་པར་སྟོན་ཏེ། དེ་ལ་ཡུལ་སེམས་ཐ་དད་པ་མེད་པས་ཆོས་ཐམས་ཅད་གཉིས་སུ་མེད་པ་ལ་བཙལ་ན་མི་འགྲུབ་པའི་རིགས་པ། ཆོ་འཕྲུལ་ཅིར་ཡང་འབྱུང་བ་ལ་བརྟགས་ན་མི་རྙེད་པར་ངོ་བོ་ཅིར་ཡང་འཆར་བའི་གཏན་ཚིགས་སོ། །དེས་ན་སྣང་བ་མེད་པའི་ཆོས་ཉིད་ཕྱོགས་འཛིན་མེད་པའི་དགོངས་པ་ལ། ཨ་ཏི་ཡོ་ག་རྫོགས་པ་ཆེན་པོའི་ལུགས་ཀྱིས་གཞི་ཕྱོགས་འཛིན་དུ་མི་སྣང་། ངོ་བོ་ངེས་མེད་ལ་རོལ་པ་ངོས་གཟུང་མེད། དོན་སྐྱེ་མེད་ལ་མཐར་འཛིན་ནམ་གཉིས་འཛིན་གང་ཡང་མི་སྣང་སྟེ། ཅིར་སྣང་ཐམས་ཅད་རང་སྣང་ལ། །ཅི་ཤར་ཐམས་ཅད་རང་ཤར་ཡིན་པས། གཞན་ཡུལ་དང་ཡུལ་ཅན་གང་ཡང་མེད་པ་ནི་མ་བཅོས་པའི་ཆོས་ཉིད། མི་འགྱུར་བས་འདུས་མ་བྱས་པའོ། །མ་བརྩལ་བཞག་ན་སྒོམ་པ་ཡིན། །ཞེས་རྩོལ་སྒྲུབ་མེད་པའི་དགོངས་པ། སྒོ་གསུམ་ལྷུག་པ། དབང་པོ་རང་ཡན། ཚོགས་དྲུག་ཟང་ཐལ་ལ་མི་མཐུན་པ་དང་གཉིས་སུ་མེད་པར་བརྩལ་བས། ཐམས་ཅད་ནས་ཐམས་ཅད་དུ་ཚོགས་དྲུག་ལྷུག་པ། ལྡོམ་པ། ཡན་པ། ཕྱལ་བ། བློ་བདེ་བར་གནས་པའོ། །ཨ་ཏི་ཡོ་ག་མི་སྒོམ་པའི་བསྒོམ་པ་ཆེན་པོའམ། རིག་པ་སྤྱི་བླུགས་དབང་པོ་རང་ཡན་གྱི་ཀློང་ཆེན་པོ་ཡིན་ནོ། །དེ་ལ་སྐྱོན་བསལ་འདྲ། གསུམ་པ་ནི། དེ་དང་དེར་ནི་རྣམ་པ་བརྩལ་ན། ཞེས་པ། མཉམ་པ་ཉིད་ལ་གཉིས་སུ་འཛིན་ན་འཁྲུལ་པའི་རིགས་པ། འཁོར་འདས་བཟང་ངན་གྱིས་བསྡུས་པའི་ཆོས་ཐམས་ཅད་ཐིག་ལེ་ཉག་གཅིག་དབྱེར་མི་ཕྱེད་པ་གཅིག་ལ། འཁོར་བ་ངན་པ་དང་མྱང་འདས་བཟང་པོ་གཉིས་སུ་ཕྱེ་སྟེ། དགག་སྒྲུབ་དང་བླང་དོར་གྱིས་རྩོལ་བ་ལས་འབྲས་བུར་འདོད་པ་ནི། དེ་ལས་དེ་བཞིན་དེ་མི་འབྱུང་། །ཞེས་གཉིས་འཛིན་ཅན་ལ་གཉིས་མེད་མི་འབྱུང་བའི་རིགས་པ་བསྟན་ཏེ། རྩོལ་སྒྲུབ་ཅན་ནམ། གཉིས་འཛིན་ཅན་གྱི་གང་ཟག་གི་ལྟ་སྒོམ་དེ་ལས། ཆོས་ཐམས་ཅད་ཀྱི་དེ་བཞིན་ཉིད། ཨ་ཏི་ཡོ་ག་མ་ནོར་མ་བཅོས་པའི་འབྲས་བུ་མི་འབྱུང་བས་བཞི་པ་ནི། སྐབས་ཀྱི་རྩ་ནས། ཆོ་འཕྲུལ་ཆེན་པོ་དཀའ་བ་མིན། །ཞེས་རང་བྱུང་ཡེ་ཤེས་མ་ངེས་པའི་གཏན་ཚིགས་བསྟན་ཏེ། སྤྱིར་ན་ཡང་དག་པར་རྫོགས་པའི་སངས་རྒྱས་ལ་ཆོ་འཕྲུལ་ཆེན་པོ་བཞི་ཡོད་དེ། རྫུ་འཕྲུལ་གྱི་ཆོ་འཕྲུལ་གྱིས་གདུལ་བྱ་དད་པར་བྱས། རྗེས་སུ་བསྟན་པའི་ཆོ་འཕྲུལ་གྱིས་དད་པ་བདུན་པར་བྱས། ཀུན་བརྗོད་པའི་ཆོ་འཕྲུལ་གྱིས་འདུན་པ་སྨིན་པར་བྱས། ཆོས་སྣང་བའི་ཆོ་འཕྲུལ་གྱིས་སྨིན་པ་གྲོལ་བར་བྱེད་པ་ནི། འོག་མའི་ཆོ་འཕྲུལ་ཡིན་ཡང་ཆེན་པོ་མིན་ནོ། །དེས་ན་ཆོ་འཕྲུལ་ཆེན་པོ་ནི་དེ་ལས་ཁྱད་པར་དུ་གྱུར་པ་རྫོགས་པ་ཆེན་པོ་ཨ་ཏི་ཡོ་ག། གཞི་ཕྱོགས་མེད་རོལ་པ་ངེས་མེད་དུ་འཆར་བའི་ཆོ་འཕྲུལ་ནི་དཀའ་བ་མེད་དེ། ནམ་མཁའི་ཆོ་འཕྲུལ་ལྟར་འབྱུང་བའི་ཕྱིར་རོ། །འོ་ན་ཆོ་འཕྲུལ་རང་ཇི་ལྟར་འབྱུང་ཞེ་ན། ཡོན་ཏན་ཀུན་ལྡན་སྟོབས་ཀྱི་རྣམས། །ཞེས་ཡོན་ཏན་ཕྱོགས་མེད་དུ་འབྱུང་བའི་གཏན་ཚིགས་བསྟན་ཏེ། ཡང་དག་པར་རྫོགས་པའི་སངས་རྒྱས་ཀྱི་ཆེ་བ་དང་ཡོན་ཏན། སྐུ་གསུང་ཐུགས་ཡོན་ཕྲིན་ལས་རྣམ་པ་ལྔ། མཐུ་དང་རྫུ་འཕྲུལ། དབང་དང་མངོན་ཤེས། སྟོབས་དང་མི་འཇིགས་པ་ལ་སོགས་པ་རྣམས། ཇི་བཞིན་རྟོག་པ་ཕྲ་བ་ཡིས། །ཞེས་ཟབ་མོ་དོན་གྱི་གཏན་ཚིགས་བསྟན་ཏེ་ཆེད་དུ་རྩོལ་སྒྲུབ་བྱ་མི་དགོས་པར། ཡེ་ཇི་བཞིན་པ་མ་བཅོས་པའི་ཆོས་ཉིད་ཟབ་ཅིང་ཆ་ཕྲ་བ་དེ། ཇི་ལྟར་རང་ལ་ཡོད་པ་ལྟར་རྟོགས་པ་དེའི་མཐུ་ལས། དེ་མ་ཐག་ཏུ་རང་ལས་འབྱུང་། །ཞེས་འབྲས་བུ་གཞན་ནས་མི་འབྱུང་བའི་གཏན་ཚིགས་བསྟན་ཏེ། ཐེག་པ་འོག་མ་ལྟར་མི་ཚེ་དང་བསྐལ་པ་གྲངས་སུ་བསྒྲངས་ནས་སངས་རྒྱས་པར་མི་འདོད་དེ། ཡེ་གྲོལ་ཆེན་པོར་རྟོགས་པའི་དུས་ན་དེ་མ་ཐག་ཏུ་སངས་རྒྱས་ཀྱི་དགོངས་པ་དང་འབྲས་བུ་རང་ལས་འབྱུང་ངོ་། །དེ་ལ་རྗེས་གདབ་འདྲའོ།། ༈ །།ད་ནི་སྐབས་ལྔ་པ་ལ། སྐབས་ཀྱི་དོན་བསྟན་པ། མྱོང་སྣང་བསྟན་དུ་མེད་པའི་དགོངས་པ་ལྐུགས་པས་བུ་རམ་གྱི་རོ་མྱོང་བ་ལྟ་བུར་བརྗོད་དུ་མེད་པའི་ཀློང་དུ་བསྟན་པ། ཉན་པ་ཐོས་སུ་མེད་པའི་རིགས་པ་བསྟན་པ། བཤད་པས་བརྗོད་དུ་མེད་པའི་གཏན་ཚིགས་བསྟན་པ། ཐིག་ལེའི་ངེས་ཚིག་བཤད་པ་དང་ལྔ་ལས། དང་པོ་ནི། བརྗོད་པ་དང་བྲལ་བའི་སྐབས། ཞེས་དོན་གྱི་ངོ་བོ་འདི་ལྟར་འདུག་བྱ་བའི་སྨྲ་བརྗོད་ཐ་སྙད་ཐམས་ཅད་བྲལ་བ་ལ། རྫོགས་པ་ཆེན་པོའི་རྣལ་འབྱོར་པས། །དེ་ཇི་ལྟར་བ་བཞིན་གོམས་པ་ཀློང་དུ་གྱུར་ནས་ཆོས་ཉིད་སྨྲར་མེད་པའི་ཀློང་ན་རིག་པ་བདེ་བླག་ཆེན་པོར་གནས་པས་དེ་ལྟ་བུའི་དོན་ཟབ་མོ་སྟོན་པའི་སྐབས་ལ་བབ་བོ། །ཞེས་པ་སྟེ། འདུས་མ་བྱས་པའི་ཆོས་ཉིད་དེ། །ཚིག་དང་ཡི་གེས་བརྗོད་མེད་ཕྱིར། །བརྗོད་དང་བྲལ་བའི་སྐབས་ཀྱིས་བསྟན། །ཞེས་སོ། །གཉིས་པ་ནི། མཆོག་ཏུ་གསང་བའི་ཆོས་ཉིད་ནི། །ཞེས་མྱོང་སྣང་གི་ཡུལ་དང་དབང་པོ་ལ་སྣང་བའི་ཆོས་ཐམས་ཅད་རྫོགས་པ་ཆེན་པོ་ཨ་ཏི་ཡོ་གའི་ལུགས་ཀྱིས། ཕྱི་ནང་དབྱེ་བསལ་མེད་པར་ཆོས་ཉིད་མཉམ་པ་ཉིད་དུ་རོ་སྟོར་བ་ཡིན་ཏེ། ཆོས་ཉིད་སྨྲ་བརྗོད་དང་བྲལ་བའི་ཀློང་ན་རིག་པ་བདེ་བླག་ཆེན་པོར་གནས་པས་གོ་བ་ཀློང་དུ་གྱུར་ཀྱང་བསྟན་དུ་མ་བཏུབ་སྟེ། ཚིག་ཐམས་ཅད་ནི་མཐའ་ཅན་ནམ་ཐ་སྙད་ཡིན་ལ། དོན་མཐའ་མེད་བརྗོད་དུ་མེད་པ་ཡིན་པས་སྨྲ་བརྗོད་ཐ་སྙད་དང་བྲལ་བའི་དགོངས་པ་ཆོས་ཉིད་ཀྱི་ཀློང་ངོ་། །ལྐུགས་པས་བུ་རམ་གྱི་རོ་མྱོང་བ་ནི་བརྗོད་དུ་མ་བཏུབ་པའི་དཔེ་ཡིན་ཏེ། མངར་བར་ཚོར་ཀྱང་མངར་རོ་ཞེས་བརྗོད་མ་ཤེས་པ་ལྟར་ཆོས་ཉིད་ཇི་བཞིན་པའི་དོན་ཉམས་སུ་མྱོང་བ་ལ་འདི་ཁོ་ནར་འདུག་བྱ་བའི་ཕྱོགས་གཅིག་གང་དུའང་བརྗོད་མ་ཤེས་པས། སྨྲ་བརྗོད་དང་བྲལ་བའི་ཀློང་དུ་བསྟན་པ་ཞེས་བྱ། དེ་ལ་ཕྱི་རོལ་གྱི་དོན་མེད་པས་ཉན་པས་ཐོས་སུ་མེད་པའི་རིགས་པ། ཚིག་གི་ལམ་དང་བྲལ་བས་བཤད་པས་བརྗོད་དུ་མེད་པའི་གཏན་ཚིགས་འབྱུང་ངོ་། །དེས་ན། མཆོག་ཏུ་གསང་བའི་ཆོས་ཉིད་ནི། ཞེས་པ། སྣང་བ་ཅི་ཤར་རང་ལ་ཤར་བར་ཤེས་པས། རང་སེམས་སྐྱེ་འགག་མེད་པ་ཁོང་དུ་ཆུད་པ་དང་། དེ་འཕོ་འགྱུར་མེད་པར་རྟོགས་པ་ནི་བྱང་ཆུབ་མཆོག་གི་ཆོས་ཉིད་ཡིན་ཏེ། ད་གཞན་ཨ་ནུ་མན་ཆད་ཀྱིས་གོ་བར་དཀའ་བས། གསང་བ་རྨད་དུ་བྱུང་བ་མ་བཅོས་གཉུག་མའི་ཆོས་ཉིད་དོ། །དེའི་སྐྱོན་བསལ་ལ་བཟླ་འདྲ། གསུམ་པ་ནི། རྣ་དབང་གཞན་ལས་ཐོས་མི་འགྱུར། །ཞེས་དོན་གཞན་ནས་མི་འབྱུང་བའི་རིགས་པ་སྟེ། ཆོས་ཐམས་ཅད་མཉམ་ཉིད་གཉིས་སུ་མེད་པའི་ཀློང་ལས། ཕྱི་རོལ་གྱི་དོན་དུ་གྱུར་པ་ཅུང་ཟད་ཙམ་ཡང་མེད་པས། ཉན་པ་པོས་རྣ་བའི་དབང་པོ་ལ་བརྟེན་ནས། རང་ལས་མ་གཏོགས་པའི་ཆོས་གཞན་ནས་ཐོས་པར་མི་འགྱུར། དེ་ཅིའི་ཕྱིར་ན། བདག་གཞན་གཉིས་སུ་མེད་པར་ཐམས་ཅད་རང་བྱུང་ཡིན་པའི་ཕྱིར་རོ། །བཞི་པ་ནི། དེ་བཞིན་ལྕེ་ཡི་དབང་པོས་ཀྱང་། །ཞེས་དང་། དེ་ལ་བརྗོད་དུ་རྡུལ་ཙམ་མེད། །ཅེས་པ་གོང་དུ་བསྙེགས་པའི་ཚིག་ཡིན་ཏེ། གོང་དུ་རྣ་དབང་ལ་བརྟེན་ནས་ཆོས་ཉིད་དེ་རང་ལས་གཞན་ནས་ཐོས་སུ་མེད་པ་དེ་བཞིན་དུ། ཆོས་ཐམས་ཅད་ཀྱི་དེ་བཞིན་ཉིད་དེ་ནི་དེ་ལྟར་ལྕེའི་དབང་པོ་ལ་བརྟེན་ནས། དབྱིབས་དང་ཁ་དོག་དངོས་པོ་དང་མཚན་མ་འདི་ལྟ་བུ་ཞིག་འདུག་བྱ་བར་བརྗོད་ཅིང་བསམ་དུ་མེད་དེ། ཆོས་ཉིད་སྨྲ་བརྗོད་མེད་ཅིང་ཚིག་མཐའ་བྲལ་བའི་ཀློང་དུ་རིག་པ་མཐའ་མེད་བདེ་བླག་ཆེན་པོ་གཅིག་ཏུ་གནས་པས་སོ། །ལྔ་པ་ནི། དབྱིངས་ཀྱི་ཐིག་ལེ། ཞེས་པ། དང་པོ་སྣོད་བཅུད་ཀྱི་འབྱུང་ཁུངས་བསྟན་པ་དང་། གཉིས་པ་ཐབས་ཤེས་ཀྱི་བྱུང་ཁུངས་བསྟན་པ། གསུམ་པ་ཆོ་འཕྲུལ་གྱི་བྱུང་ཁུངས་བསྟན་པ། བཞི་པ་དམིགས་པའི་མཐའ་དང་བྲལ་བའི་དབྱིངས་ཏེ། རིག་པ་མུ་མཐའ་མེད་ཅིང་ཆོ་འཕྲུལ་ཟད་མི་ཤེས་པས་དབྱིངས་ལ། མ་སྤྲོས་ཀུན་ལ་ཁྱབ་ཅིང་གྲྭ་དང་ཟུར་མེད་པས་ཐིག་ལེའོ། །ཞེས་པ་སྟེ་རྒྱས་གདབ་འདྲ། ༈ ད་ནི་སྐབས་དྲུག་པ་ལའང་། སྐབས་ཀྱི་དོན་བསྟན་པ། སྙིང་པོ་བྱང་ཆུབ་སེམས་ཀྱི་དགོངས་པ་ཏིལ་འབྲུ་ལ་མར་གྱིས་ཁྱབ་པ་ལྟ་བུར་ལྷུན་གྱིས་གྲུབ་པའི་ཀློང་དུ་བསྟན་པ། སྣང་བ་བཅུ་བདུན་ཅིར་ཡང་འཆར་བའི་རིགས་པ་བསྟན་པ། ལས་མི་བཙན་པར་ཐམས་ཅད་རང་བྱུང་ཡེ་ཤེས་ཡིན་པའི་གཏན་ཚིགས་བསྟན་པ་དང་བཞི་ལས། དང་པོ་ནི་། འགྲོ་བ་ལས་ཀྱིས་མི་འཁོར་བའི་སྐབས། ཞེས་པ། འགྲོ་བ་ནི་ལས་ནས་ལས་སུ་འགྲོ་བའི་འགྲོ་བ་ནི་ངན་སོང་གསུམ་སྟེ། གསད་གཅད་ཀྱི་ལས་ཀྱིས་དམྱལ་བ། སེར་སྣ་དང་འཇུར་འགེགས་ཀྱི་ལས་ཀྱིས་ཡི་དྭགས། རྨོངས་ཤིང་ལུས་མ་བསྟན་པའི་ལས་ཀྱིས་བྱོལ་སོང་སྟེ་ལས་ཟད་པ་འགའ་རེ་གྲོལ་བའང་སྲིད་མཐའ་ཙམ་མོ། །ཕལ་ཆེ་བ་ལས་ནས་ལས་སུའང་འགྲོ་མོད་དེ། སྐལ་བ་ལྡན་པ་རྣམས་ཡེ་ཤེས་ནས་ཡེ་ཤེས་སུ་འགྲོ་བའི་ལས་ནི་ལྷ་དང་མི་སྟེ། སྔར་གྱི་རྒྱུ་ཕྲ་མོའི་ཡེ་ཤེས་དཀར་པོའི་ཕྱོགས་ལ་སྤྱད་པས། ད་ལྟ་ལྷ་མིའི་རྟེན་ཐོབ་ནས་འདི་ལ་སྤྱད་པས་གདམས་ངག་དང་ཕྲད་པས་ཡེ་ཤེས་ཆེན་པོའི་ས་ལའང་བགྲོད་པར་ནོས་སོ། །ཨ་ཏི་ཡོ་ག་ནི། ཐམས་ཅད་དབྱིངས་ནས་ཤར་ཞིར་དབྱིངས་སུ་འགྲོ་བས་ན་འགྲོ་བ་ཟེར་རོ། །ལས་ནི་བག་ཆགས་དབང་བཙན་དུ་བཞག་པ་སྟེ་ཆོས་ཉིད་ཀྱི་རོལ་པ་གོ་ན། ནམ་མཁའ་ཆོ་འཕྲུལ་གྱིས་མ་འགྱུར་བ་ལྟར་ཆོས་ཉིད་ལས་ལོགས་སུ་འཁོར་ཏེ་ལས་དེས་མི་འཁོར་བར་སྟོན་པའི་སྐབས་ལ་བབ་བོ། །ཞེས་པ་སྟེ་འདུས་མ་བྱས་པའི་ཆོས་ཉིད་དེ། སྐྱེ་བ་མེད་པའི་རང་བཞིན་གྱིས། །ཁམས་གསུམ་དག་ཏུ་མི་འཁོར་བས། །ལས་ཀྱིས་མི་འཁོར་སྐབས་ཞེས་བྱ། །ཞེས་སོ། །གཉིས་པ་ནི། འགྲོ་བའི་སྡུག་བསྔལ་བྱང་ཆུབ་སེམས། །ཞེས་སྙིང་པོ་ནི་ཆོས་ཉིད་བྱང་ཆུབ་ཀྱི་སེམས་རྟོགས་པ་ཡིན་ཏེ་ཆོས་ཉིད་ནི་གཞི་དངོས་པོ་གཤིས་ཀྱི་གནས་ལུགས་ལ་བྱ་ཞིང་། བྱང་ཆུབ་སེམས་ནི་སེམས་ཉིད་སྒྲུབ་པའི་ལམ་གྱི་མཚོན་ཚུལ་བླ་ན་མེད་པ་ཡིན་ཏེ། གཞི་ཇི་བཞིན་པར་རྟོགས་པས་འཁོར་འདས་གཉིས་ཀ་རང་སར་གྲོལ་ཏེ་དགོངས་པ་ཆོས་ཉིད་ཀློང་ངོ་། །ཏིལ་འབྲུ་ལ་མར་གྱིས་ཁྱབ་པ་ལྟ་བུ་ནི། ཆོས་ཉིད་ཕྱོགས་མེད་དེས། ཡ་ཐ་སངས་རྒྱས་ཀྱི་ཞིང་ཁམས་ནས། མ་ཐ་དམྱལ་བའི་གྲོང་ཁྱེར་ཡན་ཆད་ལ་ཏིལ་ལ་མར་གྱིས་ཁྱབ་པ་བཞིན་དུ། བཟང་ངན་དང་ཆེ་ཆུང་། མཐོ་དམན་དང་ཡངས་དོག་མེད་པར་ཕྱོགས་མེད་དུ་ཁྱབ་པ་ལ་བྱ། ལྷུན་གྱིས་གྲུབ་པ་ནི། ཇི་ལྟར་གྲུབ། གང་ལྟར་འདུག་ཀྱང་རྫོགས་པ་ཆེན་པོའི་ཆོས་ཉིད་ལས་མ་འདས་པར་ལྷུན་གྱིས་གྲུབ་པས། ལྷུན་གྲུབ་ཆེན་པོའི་ཀློང་དུ་བསྟན་ནོ། །དེའི་ངོ་བོ་ལ་ངེས་པ་མེད་པས་སྣང་བ་བཅུ་བདུན་ཅིར་ཡང་འཆར་བའི་རིགས་པ། རོལ་པ་རང་རྒྱུད་པ་མེད་པས་ལས་མི་བཙན་པར་ཐམས་ཅད་རང་བྱུང་ཡེ་ཤེས་ཀྱི་གཏན་ཚིགས་སུ་བྱུང་ངོ་། །དེས་ན། འགྲོ་བའི་སྡུག་བསྔལ་བྱང་ཆུབ་སེམས། །ཞེས་སྡུག་བསྔལ་བྱང་ཆུབ་སེམས་སུ་འཆར་བའི་དགོང་པ་བསྟན་ཏེ། ལས་ནས་ལས་སུ་འགྲོ་བའམ་ཡེ་ཤེས་ནམ་ཡེ་ཤེས་སུ་འགྲོ་བའི་རིགས་དྲུག་གི་སེམས་ཅན་ཐམས་ཅད་ཐེག་པ་འོག་མ་པས་སེམས་ཅན་རང་རྒྱུད་པ་འདོད་ལ། དེའི་ཕྱིར་སྡུག་བསྔལ་སྤངས་ནས་བདེ་བ་ཐོབ་པར་འདོད་ཀྱང་། དེ་སླར་ལ་སྡུག་བསྔལ་ཉིད་དུ་འགྲོ་བས་ནས་རྫོགས་པ་ཆེན་པོའི་ལུགས་ཀྱི། འགྲོ་བ་རིགས་དྲུག་གི་སེམས་ཅན་ཡེ་ཉིད་ནས་རྡོ་རྗེ་སྙིང་པོར་རང་འཁྲུངས་པའི་སངས་རྒྱས་ཡིན་པས། དེ་ལས་བྱུང་བའི་སྡུག་བསྔལ་ཐམས་ཅད་ཆོས་ཉིད་བྱང་ཆུབ་སེམས་ཀྱི་ཡོ་ལང་དུ་ཤར་བས། བྱང་ཆུབ་ཀྱི་སེམས་རང་ཤར་རང་གྲོལ་འབའ་ཞིག་གོ། །ཀུན་ཏུ་ཆུབ་པ་རྣམ་པར་རོལ། །ཞེས་རོལ་པ་ཕྱོགས་མེད་དུ་འབྱུང་བའི་དགོངས་པ་སྟེ། འཁོར་འདས་ཀྱི་ཆོས་ཐམས་ཅད་གཞི་ལྷུན་གྱིས་གྲུབ་པའི་ཆོས་ཉིད་དུ་མ་འདུས་པ་མེད་པ་དང་། ངོ་བོ་ངེས་མེད་ཆེན་པོར་ལྷག་མ་མ་ལུས་པར་ཀུན་ཏུ་ཆུབ་པས་བདེ་སྡུག་རང་འཁོར་འདས་གཉིས་སུ་མེད་པ་མཉམ་ཉིད་ཆེན་པོ་ལ་དགག་སྒྲུབ་མེད་པར་རོལ་བ་ལ་ཕྱོགས་རིས་ཀུན་དང་བྲལ་བའོ། །དེ་ལ་བསྐྱོད་པ་མེད་བཞིན་དུ། །ཞེས་པ། རིག་པ་ཡུལ་གྱིས་མི་བསྐྱོད་པའི་དགོངས་པ་བསྟན་ཏེ། ཆོས་ཉིད་བྱང་ཆུབ་སེམས་འགྱུར་བ་མེད་པ་བྱ་བྲལ་གྱི་ཀློང་ཆེན་པོ་དེ་ལ། ལས་དང་བག་ཆགས་ངན་པས་ངན་སོང་དུ་མར་མི་བསྐྱོད། ལས་དང་བག་ཆགས་བཟང་པོས་མཐོ་རིས་སུ་ཡར་མི་བསྐྱོད། བྱང་ཆུབ་སེམས་ལ་མཐོ་དམན་མེད་ཅིང་འཕོ་འགྱུར་བྲལ་བའི་གནད་དེས་ན། ནམ་མཁའི་མཐའ་ལྟར་མཉམ་པར་གནས། །ཞེས་ཀུན་ལ་ཁྱབ་པར་གནས་པའི་དགོངས་པ་བསྟན་ཏེ། ནམ་མཁའ་མཐའ་དབུས་མེད་ཅིང་འཕོ་འགྱུར་དང་བྲལ་བས། འབྱུང་བ་ཆེན་པོ་བཞི་ལ་ཆེ་ཆུང་དང་ཡ་ཡོ་མེད་པར་ཀུན་ཁྱབ་མཉམ་པར་གནས་པ་བཞིན་དུ་བྱ་བྲལ་གྱི་ཀློང་ལྷུན་གྲུབ་ཀྱི་འཇིངས། ནམ་མཁའ་ལྟར་མཐའ་དབུས་དང་འཕོ་འགྱུར་མེད་པ་དེ་ཡིས། སྣང་སྲིད་འཁོར་འདས་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ལ། ཆེ་ཆུང་བཟང་ངན་དབྲི་བསྣན་མེད་པར་ཕྱོགས་རིས་དང་བྲལ་ཏེ་ཁྱབ་གདལ་མཉམ་པ་ཆེན་པོར་གནས་པས་སོ། །སྐྱོན་བསལ་འགྲེའོ། །གསུམ་པ་ནི། ཁྱད་པར་ཅིར་ཡང་མཚུངས་པ་ལ། །ཞེས་གཞི་ཕྱོགས་མེད་ལྷུན་གྱིས་གྲུབ་པར། རྐྱེན་ཕྱོགས་མེད་ངེས་པ་བྲལ་བ། འདོད་པ་ཕྱོགས་མེད་སྣང་ཚུལ་ཐ་དད་དུ་ཤར་བ་ལ། རང་གི་སྣང་བ་དག་གི་ཁྱད་པར་གྱིས། དམྱལ་བ་ལ་མེ་ཆུ་དང་བཙོ་སྲེག །ཡི་དྭགས་ན་རྣག་ཁྲག །བྱོལ་སོང་ལ་བཀོལ་སྤྱོད། ལྷ་མིན་ལ་འཐབ་རྩོད། ལྷ་ལ་ལྟུང་བ་དང་འདོད་ཡོན། མི་ལ་འབྱུང་བ་རང་ག་མ་འདི། མུ་སྟེགས་ལ་རྟག་ཆད་གཉིས། ཉན་ཐོས་ལ་ཡུལ་སེམས། རང་རྒྱལ་ལ་རྟེན་འབྲེལ། བྱང་སེམས་ལ་བདེན་གཉིས། ཀྲི་ཡ་ལ་རིགས་གསུམ་ལྷའི་དཀྱིལ་འཁོར། ཨུ་པ་ཡ་ལ་ལྟ་སྤྱོད་གོང་འོག། ཡོ་གར་ལྷ་དང་ལྷ་མོ། མ་ཧཱ་ལ་ཐབས་དང་ཤེས་རབ། ཨ་ནུ་ལ་དབྱིངས་དང་ཡེ་ཤེས། ཨ་ཏི་ཡོ་གར་ལྷུན་གྲུབ་ཕྱོགས་མེད་དུ་སྣང་བ་བྱང་ཆུབ་ཀྱི་སེམས་གཅིག་ལས་སྣང་བ་བཅུ་བདུན་ཅིར་ཡང་ཤར་ཞིང་གོང་འོག་གི་ཁྱད་པར་ཅིར་ཡང་མཚུངས་པ་ལ་བྱའོ། །བཞི་པ་ནི། ལས་སོ་ཞེས་ནི་རྣམ་པར་བརྟགས། །ཞེས་གཞི་ལྷུན་གྲུབ་ངོ་བོ་ངེས་མེད་རོལ་པ་ཕྱོགས་མེད་དུ་ཤར་བས་ན། ལས་ཡིན་ཞེས་པ་རྣམ་པར་བརྟགས་ཞེས་བྱའོ། །གང་གིས་བརྟགས་ན། ཨ་ནུ་མན་ཆད་ཀྱི་ཐེག་པ་འོག་མ་དང་། སོ་སོ་སྐྱེ་བོས་བརྟགས། དེས་ན་ལས་རང་རྒྱུད་པར་མི་བདེན་པས་སུན་དབྱུང་བའི་ཕྱིར། ཅི་སྟེ་ལས་ཀྱིས་དབང་འགྱུར་ན། །ཞེས་འགལ་བ་ཆམ་ལ་དབབ་པའི་གཏན་ཚིགས་བསྟན་ཏེ། ཅི་སྟེའམ་གལ་ཏེ་བརྒྱ་ལམ་ན། ཐེག་པ་འོག་མ་པ་དང་སྐྱེ་བོ་རྣམས་ཀྱིས་བརྟགས་པ་བཞིན་དུ། སེམས་ཀྱི་ཆོས་ཉིད་རྒྱུ་རྐྱེན་དང་བྲལ་བ་དེ་རྒྱུ་རྐྱེན་གློ་བུར་བས་བསྐྱེད་པའི་ལས་ཀྱི་དབང་དུ་འགྲོ་ན། རང་བྱུང་ཡེ་ཤེས་ཡོད་མ་ཡིན། །ཞེས་རྒྱུ་རྐྱེན་གཞན་ལ་མི་ལྟོས་པའི་ཕྱིར། རང་བྱུང་ཡེ་ཤེས་བྱ་བ་གཏན་མེད་པའི་སྐྱོན་དུ་འགྲོ་སྟེ་གཅིག །ལས་ཉི་ཚེ་བས་འཁོར་བས། ངན་སོང་དང་འཁོར་བ་རིགས་ཆད་དུ་འགྲོ་བའི་སྐྱོན་ཏེ་གཉིས། ལས་ངན་དུ་སོང་བས་རྒྱལ་བས་ཐུགས་རྗེས་མི་འདྲོངས་བའི་སྐྱོན་ཏེ་གསུམ། ཚིགས་འགལ་བས་སྐབས་དོན་རང་སུབ་ཏུ་འགྲོ་བའི་སྐྱོན་ཏེ་བཞི་འབྱུང་ངོ་། །འོ་ན་ལས་མི་བདེན་ན་ཨ་ཏི་ཡོ་ག་རང་བྱུང་གི་བདེ་བ་དེ་ཉིད་ཇི་ལྟ་བུ་ཞིག་ངེས་ཤེས་ན། རྒྱུ་ཉིད་རྡོ་རྗེ་རྐྱེན་དང་འདྲ། ཞེས་རྒྱུ་རྐྱེན་དང་བྲལ་བའི་གཏན་ཚིགས་བསྟན་ཏེ། རང་གི་རིག་པ་བྱང་ཆུབ་ཀྱི་སེམས་དེ། དུས་གསུམ་དུ་འདུས་མ་བྱས་པ་རང་བྱུང་བས། རྒྱུ་ཉིད་ནི་རྡོ་རྗེ་དང་འདྲ་སྟེ་སྐྱེ་བ་མེད་ལ། ངོ་བོ་ཅིར་ཡང་འཆར་ཞིང་གཉེན་པོས་གཞིགས་སུ་མེད་པས་རྐྱེན་རྡོ་རྗེ་དང་འདྲ་སྟེ་འཇིགས་པ་མེད་དོ། །དེས་ན། མ་སྐྱེས་པས་ན་འཇིག་པ་མེད། །ཅེས་སྐྱེ་འཇིག་མེད་པའི་གཏན་ཚིགས་བསྟན་ཏེ། སེམས་ཉིད་དེ་དང་པོ་སྐྱེ་བའི་གཞི་མེད་དེ་རྒྱུ་ལས་མ་སྐྱེས་པས། ཐ་མ་འགྲོ་བའི་ལམ་མེད་དེ། གཉེན་པོས་འཇིག་པ་མེད་པར་མི་འགྱུར་བར་གནས་སོ། །དེ་ཅིའི་ཕྱིར་ན། གདོད་ནས་སྙིང་པོ་བྱང་ཆུབ་ལ། །ཞེས་འཁོར་འདས་ཀྱི་ཆོས་ཐམས་ཅད་ཡེ་གདོད་མ་ཉིད་ནས་རྒྱུ་རྐྱེན་ལས་མ་བྱུང་བས། རྡོ་རྗེ་སྙིང་པོར་རང་འཁྲུངས་པའི་སངས་རྒྱས་སྙིང་པོ་བྱང་ཆུབ་སེམས་མ་བཅོས་པའི་རང་བཞིན་ཡིན་པ་ལ། བརྩལ་བའི་བསམ་པས་དབྱིངས་མི་བསྐྱོད། །ཅེས་འཕོ་འགྱུར་མེད་པའི་གཏན་ཚིགས་བསྟན་ཏེ། ཨ་ནུ་ཡོ་ག་མན་ཆད་ཀྱིས། རང་རང་གི་ལམ་ལྟ་བ་དང་སྒོམ་པ་ལ་ཆེད་དུ་བརྩལ་བས་ཡུལ་དང་ཡུལ་ཅན་དུ་འཛིན་པའི་སེམས་དེས། དབྱིངས་སྐྱེ་འགག་མེད་ཅིང་མུ་མཐའ་དང་བྲལ་བ་དེའི་དོན་ཇི་ལྟར་བར་གཏན་ལ་འབེབས་ག་ལ་ནུས་ཏེ། ཕྱོགས་གཅིག་ཙམ་ཡང་བསྐྱོད་པར་མི་ནུས་པས། ངོ་བོ་དམིགས་སུ་མེད་ཅིང་དོན་འཕོ་འགྱུར་དང་བྲལ་བར་གནས་སོ། །དེ་རྣམས་ཀྱི་རྒྱས་འདེབས་འདྲ།། ༈ །།ད་ནི་སྐབས་བདུན་པ་ལ། སྐབས་ཀྱི་དོན་སྟོན་པ། རྣམ་པར་རྟོག་པ་ཡེ་ཤེས་སུ་ལྡང་བའི་དགོངས་པ་མེ་ལ་ཤིང་བསྣན་པ་ལྟ་བུར་རང་གྲོལ་ཆེན་པོའི་ཀློང་དུ་བསྟན་པ། བརྟགས་ན་མི་རྙེད་ཅིང་རྣམ་པར་རྟོག་པར་འགྱུར་བའི་རིགས་པ་བསྟན་པ། རྒྱུ་འབྲས་དགེ་སྡིག་ལ་མི་གནས་པའི་གཏན་ཚིགས་བསྟན་པ་དང་བཞི་ལས། དང་པོ་ནི། རྩོལ་སེམས་དང་བྲལ་བའི་སྐབས། ཞེས་ཐེག་པ་འོག་མ་པ། རང་རང་གི་ལམ་ལྟ་སྒོམ་སྤྱོད་པ་འབྲས་བུ་རེ་བར་བྱས་ནས་སོ་སོར་རྩོལ་བ་དང་། ཨ་ཏི་ཡོ་ག་བྱ་བྲལ་གྱི་དོན་གོ་བས་རྩོལ་སེམས་དེ་རྣམས་དང་བྲལ་བར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ཉིད་བརྩལ་བ་མེད་པ་ལ། །བརྩལ་བའི་གོལ་སྒྲིབ་བསྟན་པའི་ཕྱིར། །བརྩལ་སེམས་བྲལ་བའི་སྐབས་ཞེས་བྱ། །ཞེས་སོ། །གཉིས་པ་ནི། ཡོན་ཏན་ཆེན་པོའི་བསམ་གཏན་ནི། །ཞེས་དེ་ཡང་བྱིང་བའི་རྟོག་པ་འཐིབས་པ་དང་། རྒོད་པའི་རྟོག་པ་འཕྲོ་བ་དང་། །འཛིན་པའི་རྟོག་པ་མ་རིག་པ་སྟེ། དེ་ལ་སོགས་པའི་རྣམ་རྟོག་ཇི་ལྟར་ཤར་ཡང་། རང་བྱུང་ཡེ་ཤེས་སུ་རང་ཤར་བས། གྲོལ་ཡང་རང་བྱུང་ཡེ་ཤེས་སུ་གྲོལ་ཏེ་རྣམ་རྟོག་ཡེ་ཤེས་སུ་ལྡང་བ་དགོངས་པ་ཆོས་ཉིད་ཀྱི་ངང་ངོ་། །མེ་ལ་ཤིང་བསྣན་པ་ལྟ་བུ་ནི། མེ་ལ་ཤིང་བསྐྱུར་བས་མེའི་གྲོགས་སུ་འགྲོ་བའམ། ཁ་ཆར་ཆུའི་གྲོགས་སུ་འགྲོ་བ་བཞིན་དུ། རྣམ་པ་རྟོག་པ་ཅི་སྐྱེས་པ་ཐམས་ཅད་ཆོས་ཉིད་ཀྱི་རོལ་པ་ཡིན་ཏེ། ཡེ་ཤེས་སུ་ཀློང་ནོལ་བས་རང་གྲོལ་ཆེན་པོའི་ཀློང་ངོ་། །དེ་ལ་ཕྱོགས་གཅིག་པར་བརྟགས་ན་མི་རྙེད་ཅིང་རྣམ་རྟོག་ཏུ་འགྱུར་བའི་རིགས་པ་རྟོག་དང་མ་རྟོགས་ཁྱད་མེད་པས་དགེ་སྡིག་ལ་མི་གནས་པའི་གཏན་ཚིགས་སོ། །དེས་ན། ཡོན་ཏན་ཆེན་པོའི་བསམ་གཏན་ནི། ཞེས་པ་ཡང་དག་རྒྱུན་ཆད་མེད་པའི་དགོངས་པ་བསྟན་ཏེ། ཨ་ཏི་ཡོ་ག་རྫོགས་པ་ཆེན་པོ་གང་ལའང་སྐྱོན་ཡོན་དུ་མི་ལྟ་བས་ཐམས་ཅད་ཡོན་ཏན་ཆེན་པོ་རང་བྱུང་ཡེ་ཤེས་ཀྱི་བསམ་གཏན་དང་དུས་རྒྱུན་དུ་འབྲལ་བ་མེད་པས་ཡོན་ཏན་ཤིན་ཏུ་ཆེ་སྟེ་རྣམ་རྟོག་གློ་བུར་དུ་བྱུང་ཡང་། རང་བྱུང་རང་ཞིར་སེལ་བའོ། །འོ་ན་དེ་ལ་ཡུལ་དང་ཡུལ་ཅན་དང་ཆེད་དུ་བསམ་རྒྱུ་ཡོད་དམ་སྙམ་པ་ལ། བསམ་གཏན་ཉིད་པས་བསམ་དུ་མེད། ཅེས་ངོ་བོ་དམིགས་སུ་མེད་པའི་དགོངས་པ་བསྟན་ཏེ། བསམ་གཏན་ཉིད་ནི་མཉམ་པ་ཉིད་ཀྱི་དོན་ཡིན་པས། དེ་ལ་ཡུལ་དང་ཡུལ་ཅན་དུ་བསམ་དུ་མེད་པ་ནི་ཡང་དག་པའི་བསམ་གཏན་ཡིན་ལ། དམིགས་གཏད་དང་མཚན་མ་ཅན་དུ་བསྒོམ་དུ་མེད་པ་དེ་ཉིད་ཡང་དག་པའི་སྒོམ་པ་ཡིན་པས། དེས་ན། མ་བསམ་མ་སྦྱངས་ཆོས་བཞིན་དུ། །ཞེས་རྣལ་མ་རང་ལུགས་ཀྱི་དགོངས་པ་བསྟན་ཏེ། ཨ་ཏི་ཡོ་ག་རྫོགས་པ་ཆེན་པོས་ཨ་ནུ་པ་ཡོ་ག་བཞིན་དུ་ཆོས་ཉིད་དུ་མ་བསམ་དབུ་མ་པ་བཞིན་དུ་རྣམ་རྟོག་ཡེ་ཤེས་སུ་མ་སྦྱངས་པར། སེམས་ཉིད་མ་བཅོས་པའི་རྣལ་མ་ཆོས་བཞིན་དུ་འདུག་པ་རང་ལས། རྣམ་རྟོག་ཉིད་ལས་ཡེ་ཤེས་སྐྱེ། །ཞེས་པ་རྣམ་རྟོག་ཡེ་ཤེས་སུ་ལྡང་བའི་དགོངས་པ་བསྟན་ཏེ། རང་གི་བློ་ལ་བཟང་རྟོག་ངན་རྟོག་ཅི་འགྱུས་པ་ཐམས་ཅད། ཆོས་ཉིད་ཀློང་རྡོལ་ཡེ་ཤེས་རང་བྱུང་ལ་ཉམས་མྱོང་ཕྱོགས་མེད་དུ་སྐྱེ་བའོ། །དེའི་སྐྱོན་བསལ་འདྲ། གསུམ་པ་ནི། ཕྲ་བའི་སྒོ་མོར་མིང་བཏགས་ཤིང་། །ཞེས་པ་ཉན་ཐོས་ཀྱི་འདོད་པ་རྣམ་པར་རྟོག་པར་འགྱུར་བའི་རིགས་པ་བསྟན་ཏེ། འཕགས་པ་ཉན་ཐོས་པའི་ལུགས་ཀྱིས། རྡུལ་ཆ་མེད་རྫས་གྲུབ་དོན་དམ་དུ་ཡོད་པ་དེ། གཟུགས་ཅན་རིགས་པ་སྐྱེད་པའི་སྒོ་མོར་མིང་འདོགས་སོ། །དེ་ཡང་ཇི་ལྟར་ན། ཉན་ཐོས་བྱེ་བྲག་པའི་ལུགས་ཀྱིས་ནང་གི་ཤེས་པ་ལས་ཕྱི་རོལ་གྱི་དོན་ལོགས་ན་ཡོད་པར་འདོད་དེ། དབུས་རྡུལ་ཟླུམ་པོ་ཆ་མེད་ལ་མཐའ་ཡི་རྡུལ་གྱིས་བསྐོར་བ་བར་དང་བཅས་པར་འཛིན་བྱེད་ཀྱི་རླུང་གིས་བཟུང་ནས་ཡོད་པར་འདོད། མདོ་སྡེ་པའི་ལུགས་ཀྱིས། གོང་བུ་མ་འབྱར་ལ་བར་མེད་པར་རེག་པས་དཔེར་ན་རྩིག་པ་ལྟ་བུར་འདོད་དེ། ནང་གི་ཤེས་པ་དང་ཡུལ་དང་ཡུལ་ཅན་དུ་འབྲེལ་ཏེ་རྣམ་པ་དང་སྐད་ཅིག་འདབ་འབྱར་གྱི་ཚུལ་དུ་ལྐོག་ན་མོར་བཞེད་དོ། །སེམས་ཀྱི་དབེན་པའི་ལམ་འཚོལ་ཞིང་། །ཞེས་དབུ་མའི་འདོད་པ་ཐམས་ཅད་རྟོག་པ་ཡིན་པའི་རིགས་པ་བསྟན་ཏེ། ཐེག་པ་ཆེན་པོ་དབུ་མ་པ། ཕྱི་ནང་གཟུང་འཛིན་གྱི་འཁྲུལ་པ་ལས་དབེན་པར་བྱ་བའི་ཕྱིར་ན་རྣམ་པར་མི་རྟོག་པའི་ཏིང་ངེ་འཛིན་བསྒོམས་ནས་ལམ་མཚོལ་ལོ། །དེའང་ཕྱི་རྣམ་པ་དབེན་པའི་ཏིང་ངེ་འཛིན་ཉན་ཐོས་ལ་སོགས་པས་ཡུལ་རྫས་སུ་བརྟགས་པ་ལ། གཅིག་དང་དུ་བྲལ་སོགས་ཀྱིས་གཞལ་ཏེ། རང་བཞིན་མེད་པར་བསྒོམས་པས་དངོས་ཡུལ་ལས་དབེན་པ་དང་། ནང་རྒྱུ་འབྲས་དོན་དམ་དུ་འཛིན་པ་ལ། རྡོ་རྗེ་གཟེགས་མ་ལ་སོགས་པས་གཞལ་ཏེ། མི་རྟོག་པའི་ཏིང་ངེ་འཛིན་སྤྲོས་པའི་མཚན་མ་ཐམས་ཅད་ལས་དབེན་པའི་ལམ་དུ་བསྒོམ་པ་ནི། དགོན་པའི་རྒྱུད་དུ་དབེན་འཛིན་ན། །ཞེས་དེར་མ་ཟད་སྔགས་ཕྱི་ནང་གི་རིགས་པས་རྩོལ་བ་རྣམས་རྟོག་པར་འགྱུར་བའི་རིགས་པ་བསྟན་ཏེ། ལར་ནི་རྫོགས་པ་ཆེན་པོ་ཨ་ཏི་ཡོ་གའི་ལུགས་ཀྱིས། ཁྲོམ་གྱི་ནང་ན་འདུག་ཀྱང་རུང་། གཅིག་པུར་འདུག་ཀྱང་རུང་། སེམས་ཉིད་དོན་དང་མ་བྲལ་བས་དགོན་གནས་མེད་ཀྱང་ཆོག །དེ་ལྟར་མ་གོ་ན་དགོན་གནས་རང་ཡང་རྣམ་རྟོག་ཡིན་པས། གསང་སྔགས་ཕྱི་ནང་གི་སྒོར་ཞུགས་པ་རྣམས་ཀྱིས་ཕྱི་ནང་གི་གཟུང་འཛིན་ནམ། འདུ་འཛི་ལས་དབེན་པར་བྱ་བའི་ཕྱིར། སྒྲ་ཡི་ཚེར་མ་དང་། ལྷ་འདྲེ་གདུག་པ་ཅན་གྱི་རྒྱུ་སྲང་མེད་པ། སྐྱེ་བོ་ཕལ་མོ་ཆེས་མི་སླེབ་པའི་དགོན་གནས་དབེན་པའམ། རི་རྒྱུད་བཟང་པོ་ལྷུན་སྡུག་པའི་ས་བཟུང་ནས། གཟུགས་བརྙན་གྱི་དཀྱིལ་འཁོར་བཞེངས། རྡུལ་ཚོན་གྱི་དལ་བྲིས། ཏིང་ངེ་འཛིན་གྱི་དཀྱིལ་འཁོར་བསྒོམ་མོ། །བརྟགས་ན་རྣམ་པར་རྟོག་འགྱུར་སྒོམ། །ཞེས་པ། དེ་ཡོ་ལ་རྫོགས་པ་ཆེན་པོ་ཨ་ཏི་ཡོ་གས་ཡས་ནས་མར་བལྟས་ན། ཨ་ནུ་མན་ཆད་རྟོག་པའི་གཉེན་པོར་མི་རྟོག་པ་སྒོམ་པ་དེ་རང་བཟང་རྟོག་གིས་འཆིང་བ། རྟོག་པ་ཉིད་འཁྲུལ་དུ་སོང་བ་ཡིན་ནོ། །བཞི་པ་ནི། རྒྱུ་དང་འབྲས་བུར་མིང་བཏགས་ནས། །ཞེས་པ། སྤྱིར་ན་ཐེག་པ་འོག་མ་པའི་ལུགས་ཀྱིས། རྒྱུ་དགེ་སྡིག་ལ་སྤྱོད་པའི་དབང་གིས་འབྲས་བུ་མཐོ་རིས་དང་ངན་སོང་སོ་སོར་འབྱུང་བར་འདོད་ཅིང་མིང་འདོགས་པ་དང་། སྒོས་འཕགས་པ་རང་རྒྱལ་བས། རྒྱུ་རྟེན་འབྲེལ་ཡན་ལག་བཅུ་གཉིས་སུ་བྱུང་བས། འབྲས་བུ་འཁོར་བ་གྲུབ་པའི་ཚུལ་དུ་འདོད་པ་དང་། རྒྱུ་རྟེན་འབྲེལ་ལུགས་ལས་བཟློག་པས། །འབྲས་བུ་མྱང་འདས་ཀྱི་ས་ལ་འགྲོ་བའི་མིང་འདོགས་པའོ། །དེ་ལ་མི་གནས་པར་ལ་བཟླ་སྟེ། དགེ་སྡིག་གཉིས་ཀ་རྣམ་པར་སེལ། །ཞེས་ཨ་ཏི་ཡོ་ག་རྫོགས་པ་ཆེན་པོའི་རྣལ་འབྱོར་བས། ཐིག་ལེ་ཉག་གཅིག་ལ་སྐྱེ་ཤི་འཕོ་འགྱུར་མེད་པར་གོ། །ལས་ཀྱི་སྐྱེ་རྐང་ཆོག །བག་ཆགས་གཏན་ནས་སྤྲུགས། རྣམ་སྨིན་དཔྱིས་ནས་ཕྱུང་། རྒྱུ་དྲུག་ལམ་ནས་བཟློག །མཐོ་རིས་དང་ངན་སོང་དུ་སྐྱེ་ས་མེད། རིག་པ་རང་ས་ཟིན་པས། དགེ་བ་ལ་ཕན་དུ་རེ་བ་དང་། སྡིག་པ་ལ་གནོད་དུ་དོགས་པ་གྲོལ་ཏེ། དགེ་སྡིག་གཉིས་མེད་མཉམ་ཉིད་ཆེན་པོ་ཆོས་ཀྱི་སྐུའི་ཀློང་དུ་འདི་ཀ་ལྟར་ཤར་བས་རང་ཤར་ལ། འདི་ཀ་ལྟར་རང་གྲོལ་བས་རང་གྲོལ་ཏེ་མཉམ་པ་ཉིད་དུ་སེལ་བས། སྤྱི་གཅོད་ལས། དོན་རྟོགས་རང་དུ་གོ་བ་ཡི། །གདེངས་སུ་ཆོས་ཉིད་འདི་འཆང་ན། །དེ་ལ་སྒོམ་སྒྲུབ་དགེ་བའི་ཆོས། །དཀར་པོའི་ཕྱིར་དང་སྡིག་ཏུ་མཉམ། །ཞེས་རིགས་པ་རང་སྟོབས་ཀྱིས་དགེ་སྡིག་གི་ཆོས་ཐམས་ཅད་མཉམ་པ་ཉིད་དུ་ལ་ཟློ་བའོ། །འཇིག་རྟེན་འདི་ལས་འབྱུང་ངོ་ཞེས། །ཞེས་ལས་འབྲས་གཙོར་འཛིན་པའི་གཏན་ཚིགས་རང་ལོག་གི་ཚུལ་ཡིན་ཏེ། དེ་ལྟར་མགོ་བའི་ཐེག་པ་འོག་མ་པ་ལ། ལས་དགེ་བའི་ཆ་ཙམ་ལ་བརྟེན་ནས་ཀྱང་། འཇིག་རྟེན་ལས་བྱུང་བའི་འབྲས་བུ་ཐོབ་པར་འདོད་ལ། འཇིག་རྟེན་ལས་ཡར་འབྱུང་བའི་འབྲས་བུ་ནི་དགྲ་བཅོམ་པའི་གོ་འཕང་ལྟ་བུ་སྟེ། སྲིད་པའི་རྩེ་མོ་མན་ཆད་ཟེངས་འཇིགས་པའི་དུས་ན། འདོད་པ་ཆེན་པོའི་ས་ལ་གནས་པས་དེས་མི་འཇིགས་པ་འཇིག་རྟེན་པའི་འབྲས་བུ་ལས་ཡར་ངེས་པར་འབྱུང་བའོ། །ཞེའོ། །བླང་དོར་བྲོད་པ་མཆོག་ཏུ་བསྐྱེད། །ཅེས། དེ་ནི་བྲོད་པས་མདུན་བསུ་བའི་གཏན་ཚིགས་ཏེ། དེས་ན་འོག་མ་པ་དཀར་པོ་དགེ་བའི་ཆོས་སྤྱོད་དུ་བླང་དགོས། ནག་པོ་མི་དགེ་བའི་ཕྱོགས་རྒྱབ་ཏུ་དོར་དགོས་ཟེར་ནས། བྱང་ཆུབ་མཆོག་ཏུ་སེམས་བསྐྱེད་པ་ལ་གནས་སྐབས་ཀྱི་འབྲས་བུར་འཛིན་པ་དེ་བླང་དོར་གཉིས་འཛིན་དང་མ་བྲལ་བས། ཨ་ཏི་ཡོ་ག་བླང་དོར་མེད་པའམ། ཕྱོགས་མེད་བྱ་བྲལ གྱི་དོན་ལས་གོལ་བ་ཡིན་ནོ། །དེའི་རྒྱས་གདབ་འགྲེའོ།། ༈ །།ད་ནི་སྐབས་བརྒྱད་པ་ལའང་། སྐབས་ཀྱི་དོན་བསྟན་པ་བདེན་པ་དབྱེར་མེད་ཀྱི་དགོངས་པ་བྲག་ཆ་ལྟ་བུར་ངོ་བོ་མ་གྲུབ་པའི་ཀློང་དུ་བསྟན་པ། ཆོས་ཐམས་ཅད་གཉིས་སུ་མེད་པས་ཕྱོགས་སུ་རྒྱ་མ་ཆད་པའི་རིགས་པ་བསྟན་པ། དེ་ཉིད་རྣ་བརྒྱུད་ཡིན་པར་ངེས་པའི་གཏན་ཚིགས་བསྟན་པ་དང་བཞི་ལས། དང་པོ་ནི། གཉིས་སུ་མེད་པ་སྐྱོན་དང་བྲལ་བའི་སྐབས། ཞེས་གཉིས་སུ་མེད་པ་ནི་ཐིག་ལེ་ཉག་གཅིག །བདག་གཞན་འཁོར་འདས་གཉིས་སམ། ཕྱི་ནང་རྟག་ཆད་གཉིས་སམ། ཡུལ་སེམས་འཁྲུལ་གྲོལ་གཉིས་སོགས་གང་ཡང་གཉིས་སུ་མེད་དེ། རྒྱུ་ཆོས་ཉིད། རྐྱེན་རོལ་པ། འབྲས་བུ་རང་བྱུང་ཡེ་ཤེས་སུ་གཅིག་སྟེ། གཉིས་སུ་མེད་པ་ལ་འོག་མ་པ་ཐ་དད་དུ་འཛིན་པ་ནི་མཉམ་པ་ཉིད་ལ་གཉིས་སུ་ལྟ་བའི་སྐྱོན་ཡིན་ལ། ཨ་ཏི་ཡོ་ག་སྣང་སྲིད་འཁོར་འདས། ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་མཉམ་ཉིད་ཆེན་པོའི་རང་བཞིན་ལ་གཉིས་སུ་མེད་པས། མཐའ་རུ་འཛིན་པའི་སྐྱོན་ཐམས་ཅད་དང་བྲལ་བར་སྟོན་པའི་སྐབས་ལ་བབ་བོ། །ཞེས་པ་སྟེ། འདུས་མ་བྱས་པའི་ཆོས་ཉིད་དེ། །བྱང་ཆུབ་སེམས་སུ་གཅིག་པའི་ཕྱིར། །གཉིས་མེད་སྐྱོན་བྲལ་སྐབས་ཞེས་བྱ། །ཞེས་སོ། །གཉིས་པ་ནི། ཆགས་དང་མ་ཆགས་ཚིག་གི་ལམ། །ཞེས་ཐེག་པ་འོག་མ་པས། འཁོར་འདས་ཀྱི་ཆོས་ཐམས་ཅད་ཀུན་རྫོབ་ཏུ་ལྷ་དང་ལྷ་མོའི་དཀྱིལ་འཁོར་དུ་བརྟགས་པ་དང་། དེ་ལ་རང་བཞིན་མེད་པས་དོན་དམ་བདེན་པར་བཏགས་པ་ལ་སོགས་པ་དེ། ཨ་ཏི་ཡོ་ག་ལྟ་བ་དབྱེར་མེད་དོ། །ཞེས་བྱའོ། །གང་དུ་དབྱེར་མེད་ན་གཞི་ལྷུན་གྲུབ་ངོ་བོ་ངེས་མེད་དོན་སྐྱེ་མེད། བདག་ཉིད་ཐོག་ཐ་དང་བྲལ་བར་དབྱེར་མེད་པས། མཉམ་པ་ཉིད་ལ་དགག་སྒྲུབ་མེད་ཅིང་དབྱེ་རུ་མེད་པས་དགོངས་པ་ཆོས་ཉིད་ཀྱི་ཀློང་ངོ་། །བྲག་ཆ་ལྟ་བུ་ནི། གྲག་ཙམ་ཉིད་ན་རང་བཞིན་མེད་དེ་གློ་བུར་དུ་འབྱུང་བ་བཞིན། རྒྱུ་རྐྱེན་དུ་བཏགས་པ་ཐམས་ཅད་གློ་བུར་བ་ཡིན་ཏེ། ཆོས་ཉིད་འདི་ཡིན་གྱི་ངོ་བོར་མ་གྲུབ་པས་འཁོར་འདས་ཀྱི་ཆོས་ཐམས་ཅད་རང་ཤར་རང་གྲོལ་གྱི་ཀློང་ངོ་། །དེ་ལ་འཁོར་འདས་ཀྱི་ཆོས་ཐམས་ཅད་མཉམ་པས། ཕྱོགས་སུ་རྒྱ་མ་ཆད་པའི་རིགས་པ་དེ་ཁོ་ན་ལུང་དང་མན་ངག་གི་གྲུབ་པས་གཞི་རྒྱུ་ཡིན་ངེས་པའི་གཏན་ཚིགས་འབྱུང་ངོ་། །དེས་ན། ཆགས་དང་མ་ཆགས་ཚིག་གི་ལམ། །ཞེས་ཆགས་པ་ཀུན་རྫོབ་ཀྱི་བདེན་པ་དང་འཁོར་བའི་ཆོས། མ་ཆགས་པ་དོན་དམ་བདེན་པའམ་ཞི་བ་མྱང་འདས། དེ་གཉིས་ཀ་ཨ་ཏི་ཡོ་ག་ལྟར་ན། ཚིག་གི་ལམ་སྟེགས་ཙམ་ཡིན་ཏེ། དངོས་གཞི་ལ་མེད་པའི་ཕྱིར་རོ། །དབུ་མ་བཞིན་ཏེ་བྲག་ཆ་འདྲ། །ཞེས་པ་རང་དཔེ་རང་གིས་བྱེད་པའི་དགོངས་པ་བསྟན་ཏེ། དཔེར་ན་བྲག་ཆ་གྲག་ཙམ་རང་བཞིན་མེད་པ་བཞིན་དུ། འཁོར་འདས་ལྟར་ཤར་ཡང་དེ་ལ་རང་བཞིན་མེད་པ་དང་། བདེན་གཉིས་སུ་བཏགས་ཀྱང་དེ་ལ་གདགས་གཞི་མེད་པ་དང་། མིང་ཐམས་ཅད་གློ་བུར་བ་ཡིན་པའི་ཕྱིར་དབུ་མ་ཆེན་པོ་རྩོལ་བ་དང་བྲལ་བར་རང་བཞིན་མེད་པ་དང་། བྲག་ཆ་གྲག་ཙམ་ན་ངོ་བོ་སྟོང་པ་གཉིས་འདྲ་བའི་དཔེ་རུ་བསྟན་པའོ། །དེ་རྣམས་ཀྱི་སྐྱོན་བསལ་དང་ལ་བཟླ་འདྲ། གསུམ་པ་ནི། བདེ་དང་སྡུག་བསྔལ་རྒྱུ་མཐུན་ཞེས། །ཞེས་པ་མྱ་ངན་ལས་འདས་པའི་བདེ་བ་དང་། འཁོར་བའི་སྡུག་བསྔལ་གཉིས་ཀ་གར་མཐུན་རྒྱུ་ཆོས་ཉིད། རྐྱེན་རོལ་པ། འབྲས་བུ་རང་བྱུང་ཡེ་ཤེས་སུ་ཆོས་མཐུན་པ་ཞེས་གཉིས་སུ་མེད་ཅིང་མཉམ་ཉིད་ཆེན་པོར་ལྟའོ། །བཞི་པ། འགྲོ་བའི་མགོན་པོ་སེམས་དཔས་གསུངས། །ཞེས། འོ་ན་འཁོར་འདས་སམ་བདེ་སྡུག་གཉིས་པོ་རྒྱུ་མཐུན་དུ་སུས་གསུངས་ཤེ་ན། འགྲོ་བ་ཉོན་མོངས་པས་ཁྲིད་པ་རྣམས་ཀྱི་སྐྱབས་སམ་མགོན་ནམ་དཔུང་གཉེན་ལྟ་བུར་གྱུར་པའི་རྒྱལ་མཆོག་ཀུན་ཏུ་བཟང་པོས་རྡོ་རྗེ་སེམས་དཔའ་ལ་གསུངས་ལ། རྡོ་རྗེ་སེམས་དཔས་སྤྲུལ་པའི་སྐུ་དགའ་རབ་རྡོ་རྗེ་ལ་གསུངས་ཏེ་རིམ་པར་བརྒྱུད་དོ། །དེ་རྣམས་ཀྱི་རྒྱས་གདབ་འགྲེའོ།། ༈ །།ད་ནི་སྐབས་དགུ་པ་ལའང་། སྐབས་ཀྱི་དོན་བསྟན་པ། དུག་གསུམ་ལམ་དུ་ཁྱེར་བའི་དགོངས་པ་རྨ་བྱས་བཙན་དུག་ཟོས་པ་ལྟ་བུར་ཡོན་ཏན་ཆེན་པོའི་ཀློང་དུ་བསྟན་པ། གང་ཡང་མ་སྤངས་ལ་སྐྱོན་གྱིས་མ་གོས་པའི་རིགས་པ་བསྟན་པ། ཆོས་ཐམས་ཅད་ཅི་ཡང་མ་ཡིན་པས་ངེས་མེད་དུ་འཆར་བའི་གཏན་ཚིགས་བསྟན་པ། ཐིག་ལེའི་ངེས་ཚིག་བསྟན་པ་དང་ལྔ་ལས། དང་པོ། ཡེ་ཤེས་རང་ལས་འབྱུང་བའི་སྐབས། །ཞེས་པ། ཡེ་ཤེས་ནི་རིག་པ་ཕྱི་ནང་མེད་ཅིང་ངེས་མེད་ཕྱོགས་མེད་དུ་ཤར་བས་ནུབ་པ་མེད་ལ། སྒྲིབ་གཡོགས་དང་བྲལ་བས་མཐའ་དང་མུན་པ་ཡེ་ནས་མེད་པའོ། །རང་ལས་བྱུང་བ་ནི་རྒྱུ་རྐྱེན་གྱིས་མ་བསྐྱེད་པས་འདུས་བྱས་མ་ཡིན་པ་དང་། བྱེད་པ་པོས་མ་བྱས་པའི་དོན་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་རང་གི་སེམས་ལ་འདུས། །སེམས་ཀྱི་རྟོགས་པ་བཤད་པའི་ཕྱིར། །ཡེ་ཤེས་རང་བྱུང་སྐབས་ཞེས་བྱ། །ཞེས་སོ། །དེ་ཡིན་པར་ཡང་། བདེ་འབྱམས་ལས། རི་རབ་རྩེ་ལ་ཉི་མ་སྟོང་ཤར་བས། །ཡེ་ཤེས་ཐུགས་ཀྱི་ཉི་མ་གཅིག་ཤར་དྲོ། །ཤར་བ་ཉིད་ན་ནུབ་པ་མེད་ཅེས་གསུངས། །ཞེས་སོ། །གཉིས་པ་ནི། འདོད་ཆགས་ཞེ་སྡང་གཏི་མུག་ཀྱང་། །ཞེས་དུག་གསུམ་ནི་འཁོར་བར་སྐྱེ་བར་བྱེད་པའི་རྒྱུ་ཡིན་ཏེ། འདོད་ཆགས་སེར་སྣ་ཡིད་ལ་འཇུག་ཅིང་ལེན་པ། ཞེ་སྡང་མནར་གཞི་ཡིད་ལ་འཇུག་ཅིང་སོད་པར་བྱེད། གཏི་མུག་ནི་ཉོན་མོངས་ཅན་འཇུག་དགེ་སྡིག་གཉིས་ལ་རྨོངས་པས། ཐེག་པ་འོག་མ་པའི་གང་ཟག་རྣམས། ཉོན་མོངས་པ་བཙན་དུག་ལྟ་བུའམ་དགྲ་དང་ཚེར་མར་བལྟས་ཏེ་སྤོར་བ་ཉིད། ཨ་ཏི་ཡོ་ག་པས་འདོད་ཆགས་ཆགས་བྲལ་ཆེན་པོ། ཞེ་སྡང་རང་བྱུང་ཡེ་ཤེས། གཏི་མུག་ཆོས་ཉིད་དབྱེ་མེད་དུ་རང་ཤར་བས། དུག་གསུམ་གཏན་སྤྲུགས་ཏེ་སྐུ་གསུམ་དབྱེར་མེད་དུ་ལམ་ཁྱེར་བྱས་པས། དུག་གསུམ་ལམ་ཁྱེར་གྱི་དགོངས་པ་ཆོས་ཉིད་ཀྱི་ཀློང་ངོ་། །རྨ་བྱས་བཙན་དུག་ཟོས་པ་ལྟ་བུ་ནི། བཙན་དུག་དེ་ཁོའི་ཟས་སྐལ་ཡིན་པས། དུག་གིས་གནོད་པ་མེད་པར་ཡོན་ཏན་གྱི་ཁ་དོག་ལེགས་ཤིང་སྐད་སྙན་པ་ལྟར། དུག་གསུམ་མ་སྤངས་བར་སྐུ་གསུམ་ཕྱོགས་མེད་དུ་ཤར་བས་ཁམས་གསུམ་རང་སར་གྲོལ་བའི་ཡོན་ཏན་ཡོད་དེ། འཁོར་འདས་ཀྱི་ཆོས་ཐམས་ཅད་དེ་ལས་ཤར་ཞིང་དེ་རུ་གྲོལ་བའི་ཀློང་ངོ་། དེ་ལ་འདོད་པའི་ཡོན་ཏན་ལྔ་རྒྱན་དུ་ཤར་བས་མ་སྤངས་སྐྱོན་གྱིས་མ་གོས་པའི་རིགས་པ། དེ་ལ་ཡེ་ཤེས་ཕྱོགས་མེད་དུ་འཆར་བས་ཆོས་ཐམས་ཅད་ཅི་ཡང་མ་ཡིན་པར་ངེས་མེད་དུ་འཆར་བའི་གཏན་ཚིགས་བྱུང་ངོ་། །དེས་ན། འདོད་ཆགས་ཞེ་སྡང་གཏི་མུག་ཀྱང་། །ཞེས་པ་མ་རྟོགས་པ་ལ་དུག་གསུམ་རང་ག་མ་སྟེ། དཔེར་ན་བཙན་དུག་གི་ཕུང་པོ་ཆེན་པོ་གཅིག་ཡོད་ན། སོ་སོ་སྐྱེ་བོས་འབོར། སྨན་པས་སྨན་ནུས་ཀྱིས་བསྒྱུར་ནས་སྨན་དུ་གཏོང་། སྔགས་མཁན་གྱིས་སྔགས་ཀྱི་ནུབ་པས་བསད་ནས་ཟ། རྨ་བྱ་དེས་གང་ཡང་མི་བྱེད་པར་ཟོས་པས་སླར་ལ་ཁ་དོག་ལེགས་ཤིང་སྐད་སྙན པ་བཞིན་དུ། དེ་དང་འདྲ་བའི་དུག་གསུམ་མམ་ལྔ་པོ་འདི་ལ། ཉན་ཐོས་རང་རྒྱལ་གྱིས་དགྲ་དང་ཚེར་མར་བལྟས་ནས་སྤོང་། དབུ་མ་སེམས་ཙམ་གྱིས་ཕྱོགས་དང་ཕ་རོལ་ཕྱིན་པས་སྤྱོད། གསང་བ་སྔགས་ཀྱིས་དབང་བཞིའི་ལས་ཀྱིས་བསྒྱུར་ནས་སངས་རྒྱས་པར་འདོད་པ་ལ། རྫོགས་པ་ཆེན་པོ་དེ་དག་གང་ཡང་མི་བྱེད་པར། རྨ་བྱ་དང་འདྲ་བར། འདོད་ཆགས་རང་བྱུང་ཆགས་བྲལ། ཞེ་སྡང་གསལ་ཡངས་ཡེ་ཤེས། གཏི་མུག་འབྱེད་མེད་ཆོས་ཉིད་དམ། ང་རྒྱལ་རང་རིག་རང་ཀློང་། ཕྲག་དོག་མཉམ་ཆེན་ཀུན་གྲོལ་དུ་རང་ཤར་བ་ལ། དུག་ལྔ་གང་ཡང་མ་སྤངས་རང་སར་གྲོལ་བས། བྱང་ཆུབ་ཀྱི་སེམས་བདེ་བ་ཆེན་པོ་འཕགས་ལམ་རང་བྱུང་ཡེ་ཤེས་རང་ལས་རང་འབྱུང་བར་རྟོགས་ན། ཉོན་མོངས་པ་གང་ཡང་སྤང་དུ་མེད་པའི་ཕྱིར། བྱང་ཆུབ་ཆེན་པོའི་ལམ་ལ་འབྱུང་། །ཞེས་སོ། །དེའི་སྐྱོན་བསལ་དང་ལ་བཟླ་འདྲའོ། །གསུམ་པ་ནི། ཀུན་སྤྱོད་ཡོན་ཏན་རྣམ་ལྔ་ཡང་། །ཞེས་པ་རྒྱལ་བ་ཡང་དག་པར་རྫོགས་པའི་སངས་རྒྱས་ནས་དམྱལ་བའི་གཏིང་ཡན་ཆད། འདོད་ཡོན་རྣམ་པ་ལྔ་ལ་སྤྱོད་ཡུལ་ཐུན་མོང་བར་གནས་པས། ཆོས་ཉིད་དབྱིངས་ཀྱི་རྒྱན་ཞེས་གསུངས ། །ཞེས་འདོད་ཡོན་སྤང་དུ་མེད་པའི་རིགས་པ་བསྟན་ཏེ། འདོད་ཡོན་ཇི་ལྟར་ཤར་ཡང་ཐམས་ཅད་རང་བྱུང་གི་རོལ་པ་ཡིན་པས་ཆོས་ཉིད་ཀྱི་རྒྱན་ཡིན་པ་དང་། སྣང་བ་གང་ཡང་མི་འགོག་པར་དབྱིངས་ཀྱི་རྒྱན་ཡིན་པ་དང་། རོལ་པ་རང་རྒྱུད་པ་མེད་པར་ཆོས་ཉིད་དབྱིངས་ཀྱི་རྒྱན་ཡིན་པ་དང་། ཆད་པའི་མཐའ་བསལ་བས་ཆོས་ཉིད་དབྱིངས་ཀྱི་རྒྱན་ཡིན་པས་ན། དེ་དག་ལ་སྤྱད་ཀྱང་སྐྱོན་མེད་དེ་སྤང་བྱ་མ་དམིགས་པས་མི་སྤོང་། དེ་ལྟར་ཡིན་པར་སུས་གསུངས་ཤེ་ན། ཀུན་ཏུ་བཟང་པོས་རྡོ་རྗེ་སེམས་དཔའ་ལ། དེས་དགའ་རབ་རྡོ་རྗེ་ལ་གསུངས་སོ། །བཞི་པ་ནི། ནམ་མཁའི་རྟོག་པ་སྐྱེ་མེད་ཅིང་། །ཞེས་ཆོས་ཉིད་སྐྱེ་བ་མེད་པའི་གཏན་ཚིགས་བསྟན་ཏེ། གཞི་ལྷུན་གྱིས་གྲུབ་པ་མཐའ་ཡི་རྟོག་པ་རང་ཀ་མ་མེད་པའི་དཔེ་ཡིན་ཏེ། གཞི་མི་འགྱུར་ལྷུན་གྱིས་གྲུབ་པའི་ཆོས་ཉིད། མཉམ་ཉིད་ནམ་མཁའ་ལྟ་བུ་ཀློང་དུ་འཁོར་འདས་ལམ་པས་བསྡུས་པའི་ཆོས་ཐམས་ཅད་མ་བཙལ་བཞིན་དུ་ལྷུན་གྱིས་གྲུབ་པ་ལ། གཞན་གྱི་རྟོག་པ་སྐྱེ་ས་མེད་དོ། །རྟོག་པ་དེ་ཉིད་ནམ་མཁའ་འདྲ། །ཞེས་པ་རོལ་པ་ཅིར་ཡང་འཆར་བའི་གཏན་ཚིགས་བསྟན་ཏེ། ངོ་བོ་ངེས་མེད་དུ་འཆར་བ་ལ་མཚན་མ་རང་རྒྱུད་པར་མེད་པའི་དཔེ་ཡིན་ཏེ། ཆོ་འཕྲུལ་ཇི་ལྟར་བྱུང་ཡང་། རོལ་པ་ཇི་ལྟར་ཤར་ཡང་ནམ་མཁའ་དང་གཉིས་སུ་མེད་པ་བཞིན་དུ། རྣམ་པར་རྟོག་པ་གློ་བུར་དུ་བྱུང་སྲིད་ནའང་། ཆོས་ཉིད་བྱ་བྲལ་ནམ་མཁའ་ལྟ་བུ་དེ་དང་དབྱེར་མེད་པའོ། །དེས་ན། མི་ཆགས་ནམ་མཁའི་དངོས་པོ་ལ། །ཞེས་མཐའ་ཐམས་ཅད་ལས་གྲོལ་བའི་གཏན་ཚིགས་བསྟན་ཏེ། དོན་སྐྱེ་བ་མེད་པའི་རང་བཞིན་དེ་མཐའི་སྐྱོན་གང་ལའང་མི་ཆགས་པའི་དཔེ་ཡིན་ཏེ། དཔེ་ན་ནམ་མཁའ་ནི་དངོས་པོ་དང་མཚན་མ་གང་དུའང་མི་འཆགས་པ་བཞིན་དུ། སྐྱེ་མེད་ཀྱི་རིག་པ་ཡུལ་མེད་དུ་ཤར་བ་ལ་མཐའ་སྤང་དུ་མེད་དོ། །རང་དོན་ཆེན་པོ་ནམ་མཁའ་འབྱུང་། །ཞེས་པ་འབྲས་བུ་རང་ལས་འབྱུང་བའི་གཏན་ཚིགས་བསྟན་ཏེ། བདག་ཉིད་ཐོག་མཐའ་མེད་པ་ལ། །ཡོན་ཏན་ཕྱོགས་མེད་དུ་འབྱུང་བའི་དཔེ་ཡིན་ཏེ། དཔེར་ན་ནམ་མཁའ་ཅིར་ཡང་མ་གྲུབ་པ་ལས་འདོད་ཡོན་ལྔའི་ཆོ་འཕྲུལ་བྱུང་ནས་སེམས་ཅན་གྱི་དོན་བྱེད་པ་ལྟར། བདག་ཉིད་ཐོག་མཐའ་དང་བྲལ་བའི་ཆོས་ཉིད་བྱ་བྲལ་གྱི་ཀློང་ནས། འཁོར་འདས་ཀྱི་ཡོན་ཏན་ནམ་ལམ་དང་འབྲས་བུའི་ཆོས་ཐམས་ཅད་མི་བསླུ་བར་འབྱུང་བས་སོ། །ལྔ་པ་ཐིག་ལེའི་ངེས་ཚིག་བསྟན་པ་ནི། དང་པོ་ཕྱོགས་རིས་དག་པ། གཉིས་པ་དགེ་སྡིག་དག་པ། གསུམ་པ་བདེ་སྡུག་དག་པ། བཞི་པ་དུག་ལྔ་དང་འདོད་ཡོན་དག་པར་བསྟན་པའོ། །དབྱིངས་རྣམ་པར་དག་པའི་ཐིག་ལེ། ཞེས་རིག་པ་མུ་མེད་ཅིང་མཐའ་ཐམས་ཅད་བྲལ་བས་དབྱིངས། ཆོ་འཕྲུལ་ཟད་མི་ཤེས་པར་འབྱུང་བས་ཀྱང་དབྱིངས། གཉིས་འཛིན་གྱི་སྤྲོས་པ་ཐམས་ཅད་རྣམ་པར་དག་པ་ལ། མ་སྤྲོས་ཀུན་ལ་ཁྱབ་པ་དང་གདལ་བ་ཆེན་པོར་གནས་པས་ན་ཐིག་ལེའོ། །རྒྱས་གདབ་འགྲེའོ།། ༈ །།ད་ནི་སྐབས་བཅུ་པ་ལའང་། སྐབས་ཀྱི་དོན་བསྟན་པ། ཆོས་ཉིད་གཉིས་སུ་མེད་པ་དགོངས་པ་ཆུ་ཟླ་ལྟ་བུར་གསལ་འགྲིབ་མེད་པའི་ཀློང་དུ་བསྟན་པ། ཀུན་ཏུ་བཟང་པོ་མཉམ་པ་ཉིད་ཅིར་ཡང་འཆར་བའི་རིགས་པ་བསྟན་པ། ཡུལ་དང་ལམ་མ་དམིགས་པ་ལ་བགྲོད་རྩོལ་ཅན་གྱི་ས་ལམ་མེད་པའི་གཏན་ཚིགས་བསྟན་པ་བཞི་ལས། དང་པོ། གཟུངས་ཀྱི་སྦྱོར་ཐབས་ཀྱི་སྐབས། ཞེས་གཟུངས་ནི་ཆོས་ཉིད་འདུ་འབྲལ་མེད་པའི་དོན་ལ་བྱ་སྟེ། དེ་ཡིས་འཁོར་འདས་ཐམས་ཅད་ལ་ཁྱབ་སྟེ་མི་གཏོང་བར་གནས་པ་ན་གཟུངས། ཐམས་ཅད་ཀྱི་སྲོག་ཡིན་པས་ནའང་གཟུངས། མཐའ་ཕྱོགས་གཅིག་མ་གཡོས་པས་ནའང་གཟུངས་སོ། །སྦྱོར་ཐབས་ནི། འཁོར་འདས་སམ། བདག་གཞན་ནམ། གཉིས་སུ་སྣང་བ་ཐམས་ཅད་ཐེག་ལེ་ཉག་གཅིག་ལ། ངོ་བོ་དབྱེར་མེད་དུ་སྦྱོར་བ་ཉིད་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་རང་གི་སེམས་ལ་འདུས། །སེམས་དང་བྲལ་བ་མེད་པའི་ཕྱིར། །གཟུངས་ཀྱི་སྦྱོར་ཐབས་སྐབས་ཞེས་བྱ། །ཞེས་སོ། །གཉིས་པ་ནི། རྟོག་མེད་མཉམ་ཉིད་ཆོས་ཀྱི་སྐུ། །ཞེས་ཆོས་ཉིད་ནི་རྟོགས་རུང་མ་རྟོགས་རུང་སེམས་ཅན་ཐམས་ཅད་ཀྱི་སེམས་ཉིད། རྒྱུ་རྐྱེན་ལས་ཀ་ནས་མ་བྱུང་། །འདུས་བྱས་སུ་འགྱུར་མི་སྲིད་པས། །དངོས་པོ་གཤིས་ཀྱི་ཆོས་ཉིད་དོ། །དེ་ལ་འཁོར་འདས་ཀྱི་ཆོས་ཐམས་ཅད་ངོ་བོ་དབྱེར་མེད་པས། གཞི་ངོ་བོ་དོན་བདག་ཉིད་མཉམ་པ་ཆེན་པོའི་རང་བཞིན་ལ་གཉིས་སུ་མེད་པའི་དགོངས་པ་ཆོས་ཉིད་ཀྱི་ཀློང་ངོ་། །ཆུ་ཟླ་ལྟ་བུར་ནི། སྣང་ལ་རང་བཞིན་མེད། གསལ་ལ་རྟོག་པ་མེད་པའི་དཔེ་སྟེ། ཐིག་ལེ་བྱང་ཆུབ་སེམས་ལ་འཁོར་འདས། སྣང་སྟོང་བདེ་སྡུག །སྐྱེ་ཤི་ཇི་ལྟར་སྣང་ཡང་རང་བཞིན་མེད་པའི་ངང་ལ་ཤར་ཞིང་དེ་རུ་གྲོལ་བས་མཉམ་ཉིད་ངོས་གཟུང་མེད་པའི་ཀློང་ཞེས་བྱའོ། །དེ་ལ་མཐའ་གང་ཡང་མ་སྤངས་པས་མཉམ་ཉིད་ཅིར་ཡང་འཆར་བའི་རིགས་པ། དེ་དམིགས་པའི་ཡུལ་ལས་འདས་པས་ཡུལ་དང་ལམ་ལ་བགྲོད་རྩོལ་ཅན་དུ་མེད་པའི་གཏན་ཚིགས་བྱུང་ངོ་། །དེས་ན། རྟོག་མེད་མཉམ་ཉིད་ཆོས་ཀྱི་སྐུ། །ཞེས་མཉམ་པ་རིས་མེད་ཀྱི་དགོངས་པ་བསྟན་ཏེ། འཁོར་འདས་ཀྱི་ཆོས་ཐམས་ཅད། རང་རིག་བྱང་ཆུབ་ཀྱི་སེམས། མ་བཅོས་པའི་ཆོས་ཉིད་ལ། ཕྱི་ནང་གཉིས་སུ་མི་རྟོག་སྟེ་ཟང་ཐལ། ཡུལ་སེམས་གཉིས་སུ་མི་རྟོག་སྟེ་རིས་མེད། རྟག་ཆད་གཉིས་སུ་མི་རྟོག་སྟེ་མཉམ་པ་ཉིད་ལ་འཕོ་འགྱུར་མེད་པས་འབྲས་བུ་ཆོས་ཀྱི་སྐུའོ། །བཟུང་བས་མི་ཟིན་ཆུ་ཟླ་འདྲ། །ཞེས་སྣང་ལ་རང་བཞིན་མེད་པའི་དགོངས་པ། གཞི་ལྷུན་གྲུབ་ངོ་བོ་ངེས་མེད་རོལ་པ་ཕྱོགས་མེད་དུ་འཆར་བ་ལ། མཐའ་ཕྱོགས་གཅིག་ཏུ་འདི་ཁོ་ན་ཡིན་ནོ་ཞེས་ངེས་བཟུང་དུ་མ་རྙེད་པས། ཆུ་ཟླ་ལྟར་གསལ་འགྲིབ་མེད་པར་སྤྲུལ་པའི་སྐུ་ཕྱོགས་མེད་དུ་ཤར་བའོ། །དེའི་སྐྱོན་བསལ་དང་ལ་བ ཟླ་འདྲ། གསུམ་པ་ནི། ཀུན་ཏུ་བཟང་པོའི་རོལ་པ་ཡིས། །ཞེས་མཐའ་ཐམས་ཅད་དུ་རང་ཤར་བའི་རིགས་པ་བསྟན་ཏེ། གཞི་ངོ་བོའི་དོན་བདག་ཉིད་མཉམ་པ་ཉིད་ཆེན་པོའི་རང་བཞིན་ལ། དུས་ཐམས་ཅད་བཟང་ངན་དང་བླང་དོར་མེད་པས་ཀུན་ཏུ་བཟང་པོ། ཡང་ན་མ་འདྲེས་ལ་ཡོངས་སུ་རྫོགས་པས་ཀུན་ཏུ་བཟང་པོ། རིག་པ་ཅིར་ཡང་མི་འགག་པར་ཅིར་ཡང་འཆར་བ་སྟེ། འཁོར་འདས་ཐམས་ཅད་དུ་མ་འགགས་པར་ཤར་བའི་རོལ་པ་ཡིས། སྒྲ་ཇི་བཞིན་པར་བཤད་ན། ཨཱ་ལི་ཀཱ་ལི་ཟབ་ཏུ་བསྟན། ཞེས་ཀུན་ཏུ་བཟང་པོ་ཤེས་རབ་ཀྱི་རང་བཞིན་ཡོན་ཏན་སྐྱེ་བ་མེད་པའི་དོན་ཀུན་ཏུ་བཟང་པོ་ཐབས་ཀྱི་རང་བཞིན་སྐྱེ་མེད་ཀྱི་རིག་པ་ཕྱོགས་མེད་དུ་མ་འགགས་པའི་དོན་ཏེ། ཟབ་ཏུ་བསྟན་པ་ནི། སྐྱེ་འགག་གཉིས་མེད་པའི་ཟབ་མོ་བྱང་ཆུབ་ཀྱི་སེམས། ཐིག་ལེ་ཉག་གཅིག་དེ་ཟབ་ཅིང་ཆ་ཕྲ་ལ་བརྟག་པར་དཀའ་བས་ཟབ་ཏུ་བསྟན་ནོ། །སྒྲ་ཐང་ལོག་ཏུ་བཤད་ན། ཨཱ་ལི་ཞེས་པས་མ་སྐྱེས་པ་རྒྱུ་མ ཚན ། ཀཱ་ལི་ཞེས་པས་གོ་བཟློག་པ་སྟེ། སྐྱེ་མེད་ཉིད་སྐྱེ་བ་ལྟར་ཤར་བས་རྒྱུ་མཚན་གོ་བཟློག་གོ། །ཟབ་ཏུ་བསྟན་ཞེས་སྐྱེ་བ་དང་སྐྱེ་མེད་ལ་ཁྱད་མེད་པས་འབྲས་བུ་རེ་དོགས་ཆོད་པས་ཤིན་ཏུ་ཟབ་བོ། །ཡང་ན་ཨཱ་ལི་ཞེས་པ་སྐྱེ་མེད་རང་གི་མཚན་ཉིད་ལ། ཀཱ་ལི་ཞེས་པ་སྐྱེ་མེད་སྤྱིའི་མཚན་ཉིད་དེ། ཟབ་ཏུ་བསྟན་ཞེས་སྤྱི་དང་རང་གི་མཚན་ཉིད་གཉིས་སུ་མེད་པས། ཐམས་ཅད་ཟབ་མོ་བྱང་ཆུབ་ཀྱི་སེམས་ཐིག་ལེ་ཉག་གཅིག་ཕྱོགས་མེད་འབའ་ཞིག་ཏུ་བསྟན་ནོ། །འདི་ནི་ཨ་དང་མཛེས་པའི་ཏ། །ཞེས་པ་དེས་ན་ཆོས་ཉིད་ཐིག་ལེ་ཉག་གཅིག་སྐྱེ་འགག་གཉིས་མེད་མཉམ་པ་ཆེན་པོའི་དོན་འདི། ཨ་དང་འདྲ་སྟེ་རྒྱུ་རྐྱེན་དང་བྲལ་ཏེ་སྐྱེ་བ་མེད་ལ། མ་སྐྱེས་པའི་རིག་པ་དེ་ཆོ་འཕྲུལ་ཅིར་ཡང་མི་འགག་པར་འཆར་བས། སྐྱེ་མེད་ཀྱི་རྒྱན་དུ་སྣང་སྟེ་ལོངས་སྤྱོད་རྫོགས་པའི་སྐུ་ཕྱོགས་མེད་ཡིན་ཏེ་མཛེས་པའི་ཏའོ། །པ་དང་ཡན་ལག་སྤྲོས་པ་བཞིན། །ཞེས་པ་བྱང་སེམས་སྐྱོན་མེད་དུ་འཆར་བའི་རིགས་པ་དཔེར་ན་པདྨའི་རྩ་བ་འདམ་ན་གནས་ཀྱང་། འདམ་གྱི་ཉེས་སྐྱོན་མེད་དེ། དེས་ན་མེ་ཏོག་ཡལ་ག་ཐམས་ཅད་སྐྱོན་མེད་པར་སླར་ལ་ཡོན་ཏན་གྱི་ཁ་དོག་ལེགས་ཤིང་དྲི་ཞིམ་པ་ལྟར། གཞི་ལྷུན་གྲུབ་མཐའི་སྐྱོན་མེད། ཆོས་ཉིད་ངེས་མེད་ཀྱི་སྤྱོད་པ་ཕྱོགས་མེད་དུ་ཤར་བས། མཐར་འཛིན་གྱི་དུས་དང་རྣམ་པ་ཐམས་ཅད་དུ་མ་གོས་ཏེ་ཕྱོགས་མེད་དུ་རང་ཤར་བའོ། །འཇིག་རྟེན་ཡོངས་ཀྱི་སྤྱོད་ཡུལ་ལ། །ཞེས་པ་སྣང་བ་གང་ཡང་མི་འགོག་པའི་རིགས་པ་བསྟན་ཏེ། འཇིག་རྟེན་ནི་ཆོས་བརྒྱད་དེ། བསྟོད་སྨད་ལ་སོགས་པར་ཐ་མལ་ཡོངས་ཀྱིས་བཏགས་པའི་སྤྱོད་ཡུལ་མ་དག་འཁྲུལ་བའི་སྣང་བ་རང་ཀ་མ་འདི་རང་ཉིད། སངས་རྒྱས་གསུང་གི་ཟབ་མོ་འབྱུང་། །ཞེས་སྟོན་པ་རང་ལས་འབྱུང་བའི་རིགས་པ་བསྟན་ཏེ། རྫོགས་པ་ཆེན་པོའི་དོན་གོ་བའི་དུས་ན། སྣང་ཞིང་སྲིད་པས་བསྡུས་པའི་ཆོས་ཐམས་ཅད། སློབ་དཔོན་དུ་མ་སོང་བའམ། དཔེ་ཆར་མ་སོང་བ་གང་ཡང་མེད་དེ། སངས་རྒྱས་ཀྱི་གསུང་ནི་ཀུན་ཏུ་བཟང་པོའི་རོལ་པ་ཕྱོགས་བྲལ་ངེས་མེད་དུ་ཤར་བ་ལ་བྱ་སྟེ། སྣང་བ་འདི་དག་ཐམས་ཅད་ངོ་བོ་ཉིད་ཀྱི་སྟོན་པ་ཀུན་ཏུ་བཟང་པོ། རང་གི་མཚན་ཉིད་འཛིན་པའི་ཆོས་ཉིད་ཚུལ་སྟོན་པས། ས་ཆུ་མེ་རླུང་ལ་སོགས་པའི་སྒྲ་ཐམས་ཅད་གསང་སྔགས་ཀྱི་སྒྲ་འབའ་ཞིག་ཡིན་ཏེ། དགོངས་པ་འདུས་པ་ལས་ཀྱང་། ནམ་མཁའ་དོན་གྱི་གླེགས་བམ་ལ། །སྣ་ཚོགས་རིགས་པའི་ཡེ་ཤེས་བྲིས། །འབྱུང་ཆེན་བཞི་ཡི་སྒྲར་གྲགས་ནས། །གསང་སྔགས་རྒྱལ་པོ་རྒྱུན་མི་འཆད། །ཅེས་གསུངས་སོ། །དེས་ན་ཅིར་སྣང་ཅིར་སྲིད་ཅིར་གྲག་ཐམས་ཅད་གསང་སྔགས་ཟབ་མོའི་སྒྲ་འབའ་ཞིག་ཏུ་རྟོགས་པར་བྱའོ། །བཞི་པ་ནི། ཨེ་མ་སངས་རྒྱས་སྤྱོད་ཡུལ་འདི། །ཞེས་པ་ངམ་ཞིང་ངོ་མཚར་རྨད་དུ་བྱུང་བའི་གཏན་ཚིགས་བསྟན་ཏེ། སྣང་ཞིང་སྲིད་པས་བསྡུས་པའི་ཆོས་ཐམས་ཅད་ཡེ་ཡིན་ཆེན་པོར་རམ་དངོས་ཡིན་ཆེན་པོར་སངས་རྒྱས་པས་ན། འཇིག་རྟེན་འདི་ཉིད་ཞིང་དག་པ་སངས་རྒྱས་ཀྱི་ཞིང་ཁམས། སྣང་བ་འདི་ཉིད་ཀུན་ཏུ་བཟང་པོའི་མཛད་སྤྱོད་དམ། རྣམ་པར་དག་པའི་སྤྱོད་ཡུལ་ཡིན་པ་ལ་ངོ་མཚར་བའོ། །བཙལ་བས་རྙེད་པའི་གནས་མེད་དེ། །ཞེས་པ་ཡེ་ནས་ཡིན་པའི་གཏན་ཚིགས་བསྟན་ཏེ། འཇིག་རྟེན་རང་ཀ་མའི་སྣང་བ་འདི་ཉིད་རང་། བདེ་བ་ཆེན་པོའི་ཞིང་ཁམས་སམ། རྣམ་པར་དག་པ་སངས་རྒྱས་ཀྱི་ཞིང་ཁམས་ཕྱོགས་མེད་དངོས་རང་ཡེ་ནས་ཡིན་པར་མ་ཤེས་ན་གཞན་ནས་བཙལ་བས་རྙེད་པའི་གནས་སམ་དམིགས་པའི་ཡུལ་མེད་པ་ལ། དྲུག་གི་ཆོས་བཞིན་ཡུལ་མེད་པས། །ཞེས་དམིགས་པའི་མཐའ་ལས་འདས་པའི་གཏན་ཚིགས་བསྟན་ཏེ། ཆོས་ཉིད་མཚན་མ་མེད་པའི་ཀློང་དུ་ཡེ་ནས་རང་ཤར་བ་ལ། མིག་གིས་གཟུགས་སུ་གཅད་ལ་ཅེ་རེ་ལྟ་བའམ། རྣ་བས་སྒྲ་རུ་བཅད་ལ་ལྷག་ནེ་ཉན་པའམ། སྣ་ཡིས་དྲི་རུ་བཅད་ལ་ཏུ་རེ་སྣམ་པའམ། ལྕེ་ཡིས་རོ་རུ་བཅད་ལ་རྗེན་ནེར་མྱོང་བའམ། ལུས་ཀྱིས་རེས་བྱར་བཅད་དེ་ཡེ་རེ་རེག་པའམ། ཡིད་ཀྱིས་ཆོས་སུ་བཅད་དེ་ལིང་ངེར་བསམ་དུ་མེད་དེ། རིག་པ་ཡུལ་དང་ཡུལ་ཅན་གཉིས་སུ་མེད་པ་ལ། གཉིས་སུ་འཛིན་ན་འཁྲུལ་པ་ཡིན་པས། མདོངས་པས་ནམ་མཁའ་བསྙབས་པ་བཞིན། ཞེས་དཔེའི་གཏན་ཚིགས་བསྟན་ཏེ། རིག་པ་ཡུལ་མེད་ལ་ཡུལ་དུ་ཚོལ་ན། དཔེར་ན་དམུས་ལོང་གིས་ནམ་མཁའ་ལ་རྫས་སུ་བཙལ་ནས་ལག་པས་བསྙབས་པས་དངོས་པོར་མ་རྙེད་པ་བཞིན་དུ། ཆོས་ཉིད་ཕྱོགས་མེད་དམིགས་པའི་ཡུལ་ལས་འདས་པ་ལ་མཚན་མར་རྙེད་པའི་དུས་མེད་དོ། །གང་ནས་གོང་དུ་ཚངས་པའི་ལམ། །ཞེས་པ་ལམ་ལ་བགྲོད་དུ་མེད་པའི་གཏན་ཚིགས་བསྟན་ཏེ། རྒྱུ་མཚན་ཉིད་ཐེག་པའི་ལམ་ལ། །ཚོགས་ལམ་དུ་དྲན་པ་ཉེར་བཞག་བཞི། ཡང་དག་སྤང་བ་བཞི། རྫུ་འཕྲུལ་གྱི་རྐང་པ་བཞི་སྟེ་བཅུ་གཉིས། སྦྱོར་ལམ་དུ་ངེས་འབྱེད་བཞི་ལ། དབང་པོ་ལྔ་དང་སྟོབས་ལྔ། མཐོང་ལམ་དུ་བྱང་ཆུབ་ཀྱི་ཡན་ལག་བདུན། སྒོམ་ལམ་དུ་འཕགས་ལམ་ཡན་ལག་བརྒྱད་དང་རྣམ་ཐར་སྒོ་གསུམ་དུ་གསུངས་པ་ལ། ལམ་གོང་མའི་ཡོན་ཏན་བདེན་པ་ཕྲ་མོ་རེ་རེ་མཐོང་བ་ཙམ་ལ། འོག་མ་ལ་སྐྱོན་དུ་བལྟས་ནས་སྤོང་བ་དང་། ལམ་གོང་མ་གོང་མ་ལ། ཚངས་པ་ཞི་བ་གྱ་ནོམ་པར་བགྲོད་རྩོལ་བྱེད་པ་དེ། ཨ་ཏི་ཡོ་ག་དང་ཕྱོགས་རེ་ཙམ་དུ་མཐོང་བས་གང་ཡང་མ་བཀག་པས་མཐུན་ཡང་། ཕྱོགས་མཐའ་དག་ནས་མཐུན་པ་མེད་པའི་ཁྱད་པར་གྱིས། བྱ་བྲལ་ཆོས་དང་མཐུན་པ་མེད། །ཅེས་ཨ་ཏི་ཡོ་ག་རྫོགས་པ་ཆེན་པོའི་ལུགས་ཀྱིས་ལམ་བགྲོད་དུ་མེད་པས་ཉེ་རིང་བྱ་རྩོལ་དང་བྲལ་ཏེ་བྱ་བྲལ་གྱི་ཆོས་དེ་ལ་ས་ལ་སྦྱོང་དུ་མེད་པས་མཐོ་དམན་གྱི་ཆོས་དང་བྲལ་བས། གཞི་གནས་ཡེ་གྲོལ་ཡིན་པ་ལ་ད་གདོད་གྲོལ་བར་འདོད་པའི་དམིགས་མཐའ་ཐམས་ཅད་དང་བྲལ་བ། ཇི་ལྟར་བྱ་བྲལ་ཀློང་ཆེན་གཞི་གནས་ཡེ་གྲོལ་སྐྱེ་ཤི་རྩད་ནས་གཅོད་པའི་ཆོས་ཟབ་མོ་དང་། ཐུན་མོང་ནུས་པ་འབྱིན་པའི་ཆོས་ཨ་ནུ་མན་ཆད་མཐུན་པ་མེད་དེ། ཨ་ནུ་མན་ཆད་བསྐལ་པ་དང་མི་ཚེར་བགྲངས་ནས། དུས་ཕྱི་མ་ལ་འཚང་རྒྱ་བར་འདོད་པ་དང་། ཨ་ཏི་ཡོ་ག་དུས་ལ་མི་ལྟོས་ཏེ། ཡེ་ཡིན་ཆེན་པོར་སངས་རྒྱས་པ་ཡིན་པས་མི་མཐུན་ཏེ་ཁྱད་པར་ཆེའོ། །ཅི་སྟེ་ལམ་ལ་བགྲོད་གྱུར་ན། །ཞེས་པ་ཐུག་པ་མེད་པའི་གཏན་ཚིགས་བསྟན་ཏེ། གལ་ཏེ་བརྒྱ་ལམ་ན། ལམ་ལ་བགྲོད་པར་འདོད་ན། རྩོལ་བྲལ་གྱི་ཀླུང་ལམ་དུ་ཡེ་ནས་ཞུགས་ཟིན་ཀྱང་། འོག་མ་ས་ལམ་ཉེ་རིང་དང་གནས་མཐོ་དམན་གཞན་དུ་བགྲོད་པར་གྱུར་ན། ནམ་མཁའི་མཐའ་བཞིན་ཐུག་པ་མེད། །ཅེས་པ་འབྲས་བུ་མི་རྙེད་པ་དཔེའི་གཏན་ཚིགས་ཡིན་ཏེ། དཔེར་ན་ནམ་མཁའ་ལ་མཐའ་བཙལ་བས་མི་རྙེད་དེ། ཁ་གཏིང་དང་རྒྱ་ཁྱོན་མེད་པས་ཐུག་པ་དང་བྲལ་བ་བཞིན་དུ། བཟང་རྟོག་དང་ངན་རྟོག་ལམ་གོང་འོག་བལྟས་པས། རྟོག་པ་རང་ལས་བྱུང་བའི་ཕྱིར་ལམ་གྱི་མཐའ་སྟོར་ཏེ། འབྲས་བུ་མཐར་ཐུག་པ་མི་རྙེད་ཅིང་ལམ་ལ་ཐུག་པ་མེད་པའི་སྐྱོན་དུ་འགྱུར་རོ། །དེ་རྣམས་ཀྱི་རྒྱས་གདབ་འདྲའོ།། ༈ །།ད་ནི་སྐབས་བཅུ་གཅིག་པ་ལའང་། སྐབས་ཀྱི་དོན་བསྟན་པ། འཁོར་བ་གཞིར་བཞེངས་ཀྱི་དགོངས་པ་མིག་གིས་ཀུན་མཐོང་ཡང་རང་མ་མཐོང་བ་ལྟ་བུར་ཡེ་སངས་རྒྱས་པའི་ཀློང་དུ་བསྟན་པ། དངོས་པོ་ལོ་རྒྱུས་ཀྱི་རིགས་པ་བསྟན་པ། ཆོས་ཉིད་རིས་མ་ཆད་པའི་གཏན་ཚིགས་ཀྱིས་ཕྱོགས་ལྟ་དག་པར་བསྟན་པ་དང་བཞི་ལས། དང་པོ་ནི། ཡོངས་སུ་རྫོགས་པའི་སྐབས། ཞེས་པ་སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ཡོངས་སུ་རྫོགས་སོ། །ཞེས་བྱ། གང་དུ་རྫོགས་ན། གཞི་ངོ་བོ་དོན་བདག་ཉིད་མཉམ་པ་ཉིད་ཀྱི་ཐིག་ལེ་ཉག་གཅིག །བྱ་རྩོལ་དང་བྲལ་བའི་ཀློང་དུ་རྫོགས། ཇི་ལྟར་རྫོགས་ན། མ་བརྩལ་ལྷུན་གྱིས་གྲུབ་པའི་ཚུལ་དུ་རྫོགས་པ་དང་། མ་སྤངས་རང་སར་གྲོལ་བའི་ཚུལ་དུ་རྫོགས་པ་དང་། མ་འདྲེས་ཡོངས་སུ་རྫོགས་པའི་ཚུལ་དུ་རྫོགས་པ་དང་། རྒྱ་ཆད་ཕྱོགས་ལྷུང་མེད་པའི་ཚུལ་དུ་རྫོགས་པར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་རང་གི་སེམས་ལ་འདུས། །སེམས་ལ་ཆོས་ཀུན་རྫོགས་པའི་ཕྱིར། །ཡོངས་སུ་རྫོགས་པའི་སྐབས་ཞེས་བྱ། །ཞེས་སོ། །གཉིས་པ་ནི། དེ་ལྟར་དེ་བཞིན་དེ་ཡི་ཕྱིར། །ཞེས་འཁོར་བ་རང་རྒྱུད་པ་བྱ་བ་གཏན་ནས་མེད་དེ། གཞི་ནས་བཞེངས་པས་ཨ་ཏི་ཡོ་གའི་ལུགས་ཀྱིས། འཁོར་བའི་གཞི་ནི་མྱ་ངན་ལས་འདས་པར་དངོས་སུ་ཡེ་ནས་བཞེངས་པ་དང་། དེ་བཞིན་དུ། སྣང་བ་སྟོང་པ། སྡུག་བསྔལ་བདེ་ཆེན། སྐྱོན་ཡོན་ཏན། ཆོས་ཅན་ཆོས་ཉིད། ཉོན་མོངས་ཡེ་ཤེས་སུ་དངོས་ཀྱི་ཚུལ་དུ་ཡེ་ནས་བཞེངས་པ་དང་། སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱི་བསྡུས་པའི་ཆོས་ཐམས་ཅད་གཞི་ཐིག་ལེ་ཉག་གཅིག་བྱང་ཆུབ་སེམས་སུ་བཞེངས་ལ། བྱང་ཆུབ་ཀྱི་སེམས་དེ་ཉིད་ཡོད་པ་མེད་པ་གཉིས་དང་གཉིས་མེད་མདོར་ན་གཉིས་བསྡུས་གང་དུའང་མེད་པར་རང་བཞིན་ཀུན་ཏུ་གསལ་བའི་གཞི་བཞེངས་ཆེན་པོ་དགོངས་པ་ཆོས་ཉིད་ཀྱི་ཀློང་ངོ་། །མིག་གིས་ཀུན་མཐོང་ཡང་རང་མ་མཐོང་བ་ནི། གཟུགས་ལ་སོགས་པ་གཞན་གྱི་ལེགས་ཉེས་ལྟ་བ་བྱེད་པ་མིག་ཡིན་ཡང་། མིག་རང་གིས་རང་མ་མཐོང་བ་བཞིན་དུ། འཁོར་འདས་ཀྱི་ཆོས་ཐམས་ཅད་སེམས་ཤར་བ་ཡིན་ཀྱང་རང་གི་ངོ་བོ་དམིགས་སུ་མེད་དེ། ཡེ་སངས་རྒྱས་པའི་ཀློང་ནས་འཁོར་འདས་ཐམས་ཅད་རང་ཤར་རང་གྲོལ་བའི་ཀློང་ངོ་། །དེ་ཉིད་བདེན་པར་ཡིད་ཆེས་པ་དངོས་པོ་ལོ་རྒྱུས་ཀྱི་རིགས་པ། དེ་ལ་རྒྱ་ཆད་དང་ཕྱོགས་ལྷུང་མེད་པས་ཆོས་ཉིད་རིས་མ་ཆད་པའི་གཏན་ཚིགས་བྱུང་ངོ་། །དེས་ན། དེ་ལྟར་དེ་བཞིན་དེ་ཡི་ཕྱིར། །ཞེས། དེ་ལྟར་གཞི་བཞེངས་ཆེན་པོའི་དགོངས་པ་ལ་སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་དེ་བཞིན་ཉིད་ཀྱི་དབྱིངས་སུ་ཡེ་ཐོག་མ་ནས་སངས་རྒྱས་པས། གཞི་གནས་ཡེ་གྲོལ་བྱ་བྲལ་ཀློང་ཆེན་གྱི་ངང་དུ་ཡེ་ནས་སངས་རྒྱས་པ་ཡིན་ཀྱང་། དེའི་ཕྱིར་ཞེས། སངས་རྒྱས་ཡིན་པ་ལ་ཡིན་པ་རུ་མ་ཤེས་ཆོས་ཉིད་ཀྱི་དོན་མ་གོ་བ་རྣམས་ལ་བསྟན་དགོས་པ་དེའི་ཕྱིར་བསྟན་པ་དམ་པ་ལ་རག་ལས་ཤིང་། བཤེས་གཉེན་བཀའ་དྲིན་ཅན་བསྟན་དགོས་སོ། །དེའི་སྐྱོན་བསལ་དང་ལ་བཟླ་འདྲ། གསུམ་པ་ནི། དེ་ལ་དེ་བསྟན་དེ་ཡང་ཐོབ། །ཅེས་པ་རྒྱལ་བ་དགོངས་པས་བརྒྱུད་པའི་དབང་དུ་བྱས་ན། ལོངས་སྤྱོད་རྫོགས་སྐུ་སྟོན་པ་རྡོ་རྗེ་སེམས་དཔའ་དེ་ལ། ཆོས་ཀྱི་སྐུ་མཆོག་སྟོན་པ་ཀུན་ཏུ་བཟང་པོ་དེས་བསྟན་པའམ། སྤྲུལ་པའི་སྐུ་མཆོག་དགའ་རབ་རྡོ་རྗེ་དེ་ལ། ལོངས་སྐུའི་སྟོན་པ་རྡོ་རྗེ་འཆང་ཆེན་དེ་ཡིས་བྱིན་གྱིས་རླབས་ཀྱི་སྒོ་ནས་ནོར་བུ་རིན་པོ་ཆེ་དང་འདྲ་བར་བསྟན་པས། དགོངས་པ་དབྱེར་མེད་དེ་ཐོབ་པར་གྱུར་ཏོ། །རིག་འཛིན་རིག་པའི་བརྒྱུད་པ་དང་གང་ཟག་སྙན་ཁུངས་བརྒྱུད་པའིདབང་དུ་བྱས་ན། གོང་མ་གོང་མའི་སློབ་དཔོན་ཕ་དང་འདྲ་བ་དེས་འོག་མ་འོག་མའི་སློབ་བུ་བུ་དང་འདྲ་བ་དེར། གདམས་ངག་ནོར་བུ་རིན་པོ་ཆེ་དང་འདྲ་བ་དེ། རིག་འཛིན་རིག་པའི་གསུང་དང་གང་ཟག་ཚིག་གི་གསུང་གིས་བསྟན་པས། ཕའི་རྟོགས་པ་དེ་ཐོག་བབ་ཏུ་བྱིན་རླབས་ཀྱིས་ཐོབ་ནས་དགོངས་པ་དབྱེར་མེད་དུ་གྱུར་པའོ། །འོ་ན་ཐོབ་རྒྱུ་ཇི་ལྟ་བ་ཡིན་ཞེ་ན། དེ་ནི་སྙིང་པོ་དེ་བས་ན། ཞེས་པ་གཞི་རང་གི་སེམས་ཉིད་ཡིན་པའི་རིགས་པ་བསྟན་ཏེ། རྟོགས་པ་བྱ་བའི་དོན་དེ་གཞན་ན་མེད་པར་སེམས་ཅན་རང་རང་ལ་ཡེ་ནས་གནས་པའི་སྙིང་པོ། བྱང་ཆུབ་ཀྱི་སེམས་ཕྱོགས་མེད་དེ་ནི་མར་གྱི་ཡང་ཞུན་ནམ། ཆང་གི་ཉིང་ཁུ་ལྟ་བུར་ཆོས་ཐམས་ཅད་ཀྱི་རང་བཞིན་ནམ། ཐེག་པ་ཐམས་ཅད་ཀྱི་ཡང་རྩེའམ། ལམ་དང་འབྲས་བུའམ་འཁོར་འདས་ཐམས་ཅད་ཀྱི་སྙིང་པོ་ཡིན་པ་དེ་བས་ནའོ། །དེ་ལས་དེ་འབྱུང་ངོ་མཚར་ཆེ། །ཞེས་པ་ཆོས་ཉིད་རང་ལ་འཆར་བའི་རིགས་པ་བསྟན་ཏེ། འཁོར་བ་མི་སྤོང་། མྱང་འདས་མི་སྒྲུབ་པར་སེམས་ཅན་ཡེ་ནས་སངས་རྒྱས་པའི་དགོངས་པ་ཕྱོགས་མེད་དུ་འབྱུང་བ་དེ་ངོ་མཚར་ཆེ་བའམ། ཡང་ཆོས་ཉིད་བྱང་ཆུབ་ཀྱི་སེམས་དམིགས་པའི་མཐའ་ཐམས་ཅད་དང་བྲལ་བ་དེ་ལ། གཟུགས་སྐུ་གཉིས་པོ་མ་བཙལ་བར་འབྱུང་བས་ངོ་མཚར་ཆེ་འམ། ཡང་ན་གདམ་ངག་བསྟན་མ་ཐག་དེ་ཀ་རང་ལ། རྟོགས་གྲོལ་ཐར་པ་དུས་གཅིག་པ་དེ་འབྱུང་བ་ངོ་མཚར་ཤིན་ཏུ་ཆེའོ། །སྔོན་གྱི་དེ་དང་ད་ལྟ་དེ། ཞེས་པ་དུས་གསུམ་གྱི་སངས་རྒྱས་དེ་ལས་འབྱུང་བའི་རིགས་པ་བསྟན་ཏེ། སྔོན་གྱི་རྒྱལ་བ་མར་མེ་མཛད་འདས་པའི་ཆོས་ཉིད་སྐྱེ་མེད་ཀྱི་ཀློང་དུ་གྲོལ་ནས་སངས་རྒྱས་པ་དང་། ད་ལྟར་གྱི་རྒྱལ་བ་ཤཱ་ཀྱ་ཐུབ་པ་ལྷུན་གྱིས་གྲུབ་པའི་ངང་ལ་གནས་ཏེ་སངས་རྒྱས་པ་དང་དེ་བཞིན་དེ་ཡི་གནས་སུ་ཆེ། ཞེས་པ་མ་འོངས་པ་རྒྱལ་བ་བྱམས་པའི་གནས་སམ་རྟེན་དུའང་ཆོས་ཉིད་ཀྱི་བྱང་ཆུབ་ཀྱི་སེམས། ཕྱོགས་རིས་དང་ངེས་པ་མེད་པའི་ཀློང་འདི་ཆེ་བས་ན། སྐྱེ་འགག་མེད་པའི་དོན་འདི་རྟོགས་པ་མངོན་དུ་གྱུར་ཏེ་སངས་རྒྱས་པ་ཡིན་ངེས་སོ། །དེ་ལྟར་དེ་ཡི་ལམ་འདྲ་བ། །ཞེས་པ། དེ་གཅིག་པུར་མ་ཟད་དུས་གསུམ་གྱི་སངས་རྒྱས་ཐམས་ཅད་ཀྱི་གཤེགས་ཤུལ་གྱི་ལམ་ཆེན་ཡིན་པས་དེ་དང་འདྲ་བར། དེ་ནི་དེ་ཡི་རང་བཞིན་ནོ། །ཞེས་པ་ཆོས་ཉིད་བྱང་ཆུབ་ཀྱི་སེམས་དེ་ནི་ཁམས་གསུམ་སེམས་ཅན་ཡོངས་ཀྱིའང་། མི་བསྐྱོད་ཀླུང་ལམ་ཆེན་པོའམ། སེམས་ཅན་ཐམས་ཅད་ཀྱི་སེམས་ཀྱི་རང་བཞིན་ཆོས་ཉིད་མ་བཅོས་པའི་དོན་ཡིན་ནོ། །ཞེས་བྱའོ། །བཞི་པ་ནི། དེ་དང་འདྲ་བ་ཡོངས་ཀྱི་ལམ། །ཞེས་པ་ཐིག་ལེ་བྱང་ཆུབ་ཀྱི་སེམས་བྱ་བྲལ་གྱི་ཀློང་ཆེན་པོ་དེ་ཉིད་དུས་གསུམ་གྱི་སངས་རྒྱས་ཀྱི་ལམ་མམ་གཤེགས་ཤུལ་ཡིན་པ་དེ་དང་འདྲ་བ། ཁམས་གསུམ་གྱི་སེམས་ཅན་ཡོངས་ཀྱིས་ཀྱང་འགྲོ་ས་དང་གྲོལ་ས་ཡིན་པས། བགྲོད་ས་མེད་པའི་ལམ་ཐུན་མོང་མ་ཡིན་པ་དེ་ཡིན་པ་ནི་ངེས་པའོ། །འོ་ན་ཆོས་ཉིད་རང་སྣང་དེ་ཐམས་ཅད་ལ་སྤྱི་ཁྱབ་ཏུ་ཡོད་པའི་དཔེ་ཇི་ལྟ་བུ་ཞེ་ན། ཟླ་བ་ལས་བྱུང་རྟེན་དང་བཅས། །ཞེས་པ་མཚོན་བྱེད་དཔེའི་གཏན་ཚིགས་ཏེ། སྣང་གཞི་ཆུའི་དཀྱིལ་འཁོར་ཡོད་ཚད་ཙམ་དུ། དེ་ནང་སྣང་བྱ་ཟླ་བའི་དཀྱིལ་འཁོར་མི་འགག་པར་གཟུགས་བརྙན་འཆར་ཏེ། ནམ་མཁའ་ལ་ཟླ་བ་གཅིག་ཤར་བ་ཆུའི་ལྡེང་ཀ་ཟླུམ་པོའི་ནང་དུ་ཟླ་བ་ཟླུམ་པོ། ལྡེང་ཀ་ཟུར་གསུམ་དང་གྲུ་བཞི་ལ་སོགས་པ་ཆུང་ངུའི་ནང་དུ་དབྱིབས་རྐྱེན་ཇི་ལྟར་ཡོད་ཡོད་དུ་ཟླ་བའི་གཟུགས་བརྙན་ཀྱང་དེ་འདྲ་རེ་རེ་འཆར་ཏེ། རྟེན་ཆུ་དང་བཅས་པའི་ཕྱིར་རོ། །དེ་ལ་མི་མཁས་པའི་བྱིས་པས། ངའི་ཟླ་བ་ཟླུམ་པོ་འདི་ཡིན་ལ་ཁྱོད་ཀྱི་ཟླ་བ་གྲུ་བཞི་འདིའོ། །ཞེས་སོགས་སུ་འཛིན་པ་ནི་མཉམ་པ་ཉིད་ལ་ཕྱོགས་སུ་བཟུང་བས་སྐྱོན་ཏེ། ཟླ་བ་ཇི་ལྟ་བར་གཏན་ལ་མི་ཕེབས་སོ། །དེས་ན་ཟླ་བ་གཟུགས་བརྙན་ཙམ་དུ་འདྲ་བ་ལ་ཕྱོགས་སུ་བཟུང་བས་ནོར་བའོ། །ཀུན་གྱི་མཉམ་ཉིད་ཡིན་པ་ལ། །ཕྱོགས་སུ་བལྟས་པས་འགྲུབ་པ་མེད། །ཅེས་པ་མཉམ་ཉིད་དོན་གྱི་གཏན་ཚིགས་ཡིན་ཏེ། དཔེ་ན་ཆུ་ཟླ་ལྟར། འཁོར་འདས་ཐེག་པས་བསྡུས་པའི་ཆོས་ཐམས་ཅད། ཆོས་ཉིད་བྱ་བྲལ་གྱི་ཀློང་ཆེན་པོར་དེར། བཟང་ངན་དང་དབྲི་བཀོལ་མེད་པར་ཁྱབ་སྟེ། གཞི་ཕྱོགས་མེད་ལྷུན་གྲུབ། ངོ་བོ་ངེས་མེད་ཡེ་ཤེས། དོན་སྐྱེ་མེད་མཐའ་གྲོལ། བདག་ཉིད་ཐོག་མཐའ་མེད་པའི་ཐིག་ལེ་ཉག་གཅིག་ལ། གནས་ལུགས་ཕྱོགས་མེད་ཅིར་ཡང་གནས། ཤར་ལུགས་ཅིར་ཡང་འཆར། གྲོལ་ལུགས་གང་ཡང་གྲོལ། ཡིན་ལུགས་ཀུན་ཀྱང་རང་གསལ་ཡིན་པས། དཔེ་ནམ་མཁའ་དང་ཆུ་ཟླ། དོན་རང་རིག་བྱང་སེམས། རྟགས་འཆར་ཚུལ་འགགས་མེད། ཇི་ལྟར་བྱས་ཀྱང་མཉམ་ཉིད་ཆེན་པོའི་དོན་ལ་རང་སྣང་ཐད་ཀར་བདེན་པས་ན། ཐེག་པ་འོག་མ་པས། ང་ཙུག་ཡིན་ཁོ་ཙུག་མིན་ཟེར་ནས་ཕྱོགས་སུ་བལྟས་པས་འཆིང་སྟེ། ཉན་ཐོས་པས་ཆོས་ཉིད་གང་ཟག་གི་བདག་མེད་ལ་བྱེད་པ་ནས། ཨ་ནུ་དབྱིངས་དང་ཡེ་ཤེས་ལ་བྱེད་པའི་བར་རོ། །དེ་ལྟར་ཆོས་ཉིད་མཉམ་པ་ཉིད་གྲུབ་པའི་དུས་མེད་དོ། །ཡང་འདིའི་བཤད་ལུགས་གཅིག་ལ། ཟླ་བ་ལས་བྱུང་རྟེན་དང་བཅས། །ཞེས་སོགས་ཟླ་བ་དང་མ་བུའི་ལྟ་ལུགས་སྦྱོར་ཏེ། དཔེར་ན་བུ་ཆུང་ངུ་བ་ལ། མ་ངན་མ་ཞིག་གིས། ཡ་གི་ན་ཨ་བོ་ཟླ་བ་བྱས་པས། བུ་ཆུང་གིས་ཅི་ལ་ཟེར་ཆ་མེད་པས་ངུ་འཕྲོ་མི་ཆོད་དོ། །མ་མཛངས་མ་ཞིག་གིས། བུ་ངུ་བའི་མིག་གི་ཐད་ཀར་མཛུམ་མོ་བསྟན་ནས། འདི་ན་འདི་ན་བྱས་པས། བུ་ཆུང་གི་མིག་མཛུམ་མོ་ལ་འཆགས་པ་ན། རྟེན་དེས་བྲིད་ནས་མཛུབ་མོ་ཇེ་མཐོ་ཇེ་མཐོ་ལ་བཏང་ནས། ཨ་བོ་ཟླ་བ་ཡ་གི་རེད་བྱས་པས་བུ་ཆུང་གི་མིག་ལ་ལྟད་མོ་ལངས་ནས་ངུ་འཕྲོ་ཆོད་དོ། །དཔེ་དེ་དང་འདྲ་བར། ཐེག་པ་འོག་མའི་སློབ་དཔོན་མི་མཁས་པས། སངས་རྒྱས་ལོགས་ནས་ཐོབ་པ་སྐད་བྱས་ཏེ་སྤྱི་ཡི་ཚུལ་དུ་བཤད་པས། ཆོས་ཉིད་ལ་གོ་བའམ་རྟོགས་པའི་དུས་མེད་པར། འཁོར་བའི་སྡུག་བསྔལ་དང་ལམ་ལ་ཕྱོགས་རིས་སུ་འཛིན་པ་ལས་མ་ཐར་རོ། །ཨ་ཏི་ཡོ་གའི་སློབ་དཔོན་མཁས་པ་གདམས་ངག་དང་ལྡན་པ་དེས། སྣོད་དང་ལྡན་པའི་བུ་མཆོག་ལ། བརྡ་དང་ཚིག་གཞན་ལ་བརྟེན་པར་བྱས་ནས། དོན་རང་ལ་མཛུབ་ཚུགས་སུ་བསྟན་པས། ཚིག་དོན་དབྱེ་བ་མེད་པར་ཆོས་ཉིད་ཅེར་མཐོང་གི་ཚུལ་དུ་རིག་པ་ཙིར་གྱིས་ཟིན་ནས་ངོ་འཕྲོད་པ་ཡིན་ནོ། །དེ་རྣམས་ཀྱི་རྒྱས་གདབ་འགྲེའོ།། ༈ །།ད་ནི་སྐབས་བཅུ་གཉིས་པ་ལའང་། སྐབས་ཀྱི་དོན་བསྟན་པ། འཁོར་འདས་དབྱེར་མེད་ཀྱི་དགོངས་པ་ག་བུར་གྱི་ནུས་པ་ལྟ་བུར་དབྱེར་མེད་ཆེན་པོའི་ཀློང་དུ་བསྟན་པ། སྔ་ཕྱི་མེད་པའི་རིགས་པ་བསྟན་པ། དུས་གསུམ་སྐྱོན་གྱིས་མ་གོས་པའི་གཏན་ཚིགས་བསྟན་པ་དང་བཞི་ལས། དང་པོ་ནི། ཆགས་པ་དང་བྲལ་བའི་སྐབས། ཞེས་ཐེག་པ་འོག་མ་པས། ལྟ་སྒོམ་སྤྱོད་འབྲས་དང་གནས་སྐབས་ཀྱི་བདེ་བ་ཞི་གནས་སམ་མི་རྟོག་པ་ཕྲ་མོའི་རོ་ལ་ཆགས་པ་དེ། ཨ་ཏི་ཡོ་ག་བྱ་བ་དང་བྲལ་བའི་གཏན་ཚིགས་ཀྱིས། དེ་ལ་མི་གནས་པར་གང་ལ་ཆགས་པ་ཀུན་དང་བྲལ་བར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་རང་གི་སེམས་ལ་འདུས། །སེམས་ལ་གཟུང་འཛིན་མེད་པའི་ཕྱིར། །ཆགས་དང་བྲལ་བའི་སྐབས་ཞེས་བྱ། །ཞེས་སོ། །གཉིས་པ་ནི། ད་ལྟའི་བདེ་དང་ཕྱི་མའི་བདེ། །ཞེས་པས་སྟོན། ཆོས་ཉིད་བྱ་བྲལ་གྱི་ཀློང་ཆེན་པོ་དེ་ཉིད། ལས་དང་བག་ཆགས་ལྟར་སྣང་བ་ལ་འཁོར་བར་འཁྲུལ་ཡང་། འཁོར་བ་མ་སྤངས་རང་སར་གྲོལ་བས་མྱ་ངན་ལས་འདས་པ་སྟེ། དེ་གཉིས་ཀ་རྒྱུ་ཆོས་ཉིད། རྐྱེན་རོལ་པ། འབྲས་བུ་རང་བྱུང་ཡེ་ཤེས་སུ་གཅིག་ཅིང་ངོ་བོ་དབྱེར་མེད་པ་ལ། གང་ཡང་གཉིས་སུ་མེད་པའི་དགོངས་པ་ཆོས་ཉིད་ཀྱི་ཀློང་ངོ་། །ག་པུར་གྱི་ནུས་པ་ལྟ་བུ་ནི། ནད་ཀྱི་རྐྱེན་གྱིས་ཚ་བ་ཅན་ལ་སྨན་དུ་འགྲོ། གྲང་བ་ཅན་ལ་དུག་ཏུ་འགྲོ་བས། ནུས་པ་སོ་སོར་བྱུང་ཡང་། ངོ་བོ་ལ་དབྱེར་མེད་པ་བཞིན་དུ། འཁོར་འདས་ཐམས་ཅད་བྱང་ཆུབ་སེམས་ལ་ཤར་བ་ཡིན་ཀྱང་། ཐིག་ལེ་ཉག་གཅིག་གི་ཀློང་ལ། ཤར་ཀྱང་རང་ཤར། གྲོལ་ཀྱང་ཐ་དད་མེད་པ་རང་གྲོལ་བས་དབྱེ་བ་མེད་པའི་ཀློང་ངོ་། །དེ་ལ་རྒྱུན་ཆད་བྲལ་བས་སྔ་ཕྱི་མེད་པའི་རིགས་པ། ཐ་དད་དུ་འཛིན་ན་གོལ་བས། དུས་གསུམ་སྐྱོན་གྱིས་མ་གོས་པ་གཏན་ཚིགས་བྱུང་ངོ་། །དེས་ན། ད་ལྟའི་བདེ་དང་ཕྱི་མའི་བདེ། །ཞེས་པ་བདེ་བ་ཆེན་པོ་ཁ་སྤྲོད་ཀྱི་གཏན་ཚིགས་ཏེ། ད་ལྟ་ལུས་འཁོར་བའི་སྡུག་བསྔལ་གྱིས་གཟིར་ཡང་། སེམས་བདེ་བ་ཆེན་པོའི་དོན་དང་མ་བྲལ་བས། ད་ལྟར་གྱི་བདེ་བ། ཕྱི་མར་ལུས་མྱ་ངན་ལས་འདས་ཀྱང་། སེམས་བདེ་བ་ཆེན་པོའི་དོན་དང་མ་བྲལ་བས། ཕྱི་མའི་བདེ་བ་སྟེ། ཇི་ལྟར་བྱས་ཀྱང་བདེ་བ་ཁ་སྦྱོར་རམ། ཡང་ན་འཁོར་བར་ལྷུང་ས་མེད་པས། དོགས་པ་དང་བྲལ་བ་ད་ལྟའི་བདེ་བ། སངས་ལ་རྒྱས་མེད་པས། མྱང་འདས་ཀྱི་རྟེན་དང་བྲལ་བས་ཕྱི་མའི་བདེ་བ། དེ་ལྟ་བུའི་དོན་ལེགས་པར་གོ་ཞིང་རྟོགས་ན་ཇི་ལྟར་བྱས་ཀྱང་ཆོས་ཉིད་རྒྱུན་ཆད་མེད་པའི་ངང་ལ་བདེ་ཆེན་དུ་འབྱམས་པའོ། །སྐྱོན་བསལ་དང་ལ་བཟླ་འདྲ། གསུམ་པ་ནི། མངོན་སུམ་པ་དང་རྒྱབ་ནས་འབྱུང་། །ཞེས་པས་བསྟན་ཏེ། དཔེར་ན་ལུས་གཅིག་གི་ཆ་ལ། མདུན་རྒྱབ་གཉིས་སུ་བཏགས་པས། མདུན་ཕྱོགས་མངོན་དུ་མཐོང་ཡང་། རྒྱབ་དང་དུས་མཉམ་པ་བཞིན་དུ། སེམས་ཉིད་གཅིག་གི་ཆ་ལ་རོལ་བ་འཁོར་འདས་གཉིས་ལྟར་ཤར་བས། སེམས་ཅན་མངོན་སུམ་དུ་མཐོང་བ་དང་། སངས་རྒྱས་བག་ཉལ་གྱི་ཚུལ་དུ་རྒྱབ་ནས་འབྱུང་བ་གཉིས་དུས་མཉམ་པས་འཁོར་འདས་དབྱེར་མེད་པའམ། ཡང་ན་ད་ལྟར་གྱི་མངོན་སུམ་ལ་སྣང་བ་ཉིད་ཆོས་སྐུར་ཤར་བས། རྒྱབ་ནས་འབྱུང་བའི་ཡོན་ཏན་གཟུགས་སྐུ་གཉིས་ཤུགས་ལ་འབྱུང་བ་སྟེ་སྐུ་གསུམ་དབྱེར་མེད་དུ་ཤེས་པའོ། །བཞི་པ་ནི། དེ་ཡང་རྣམ་པའི་སྐྱོན་ཡིན་པས། །ཞེས་འཁོར་འདས་དབྱེར་མེད་ལ་སྔ་ཕྱི་ཐ་དད་ནམ། ཆོས་ཉིད་ངེས་མེད་ལ་སྒྲ་ཇི་བཞིན་པར་འཛིན་པ་དང་། དུས་གསུམ་མཉམ་པ་ཉིད་ལ་རིམ་པར་སྤྱོད་པ་ནི། རྣམ་དཔྱོད་དུས་སུ་བགྲངས་པའི་སྐྱོན་ཡིན་ཏེ། འཁོར་བའི་ཐོག་མཐའ་ཅན་དུ་སོང་བའི་སྐྱོན་ཡོད། ཐོག་མཐའ་ཅན་དུ་སོང་ན། འཁྲུལ་པ་ཟློག་ཐབས་མེད་པའི་སྐྱོན་དང་། མཚན་བརྗོད་ལས། སངས་རྒྱས་ཐོག་མ་ཐ་མ་མེད། །ཅེས་པའི་ལུང་ངམ། བཀའ་རྒྱུད་ལས། དུས་གསུམ་གཅིག་སྟེ་ཁྱད་པར་མེད། །ཅེས་པའི་ཚིག་དང་འགལ་བའི་སྐྱོན་ཡོད་པས་ན། དེ་ལ་བརྟེན་པར་མི་བྱའོ། །ཞེས་དུས་ལ་མི་ལྟོས་པའི་གཏན་ཚིགས་བསྟན་ཏེ། ཨ་ཏི་ཡོ་ག་རྫོགས་པ་ཆེན་པོའི་ལུགས་ཀྱིས། དུས་རིམ་གྱིས་པ་ལ་བརྟེན་པར་མི་བྱ་སྟེ། ཤེས་བྱ་ཆིག་ཆོད་དུ་དུས་གསུམ་ཐིག་ལེ་ཉག་གཅིག་ཏུ་གོ་བ་གདམས་ངག་ཡིན་ནོ། །དེ་རྣམས་ཀྱི་རྒྱས་གདབ་འདྲ།། ༈ །།ད་ནི་སྐབས་བཅུ་གསུམ་པའང་། སྐབས་ཀྱི་དོན་བསྟན་པ། ཆོས་ཉིད་འབྱུང་འཇུག་མེད་པའི་དགོངས་པ་རིན་པོ་ཆེ་གསེར་གླིང་ལྟ་བུར་ཐ་མི་དད་པའི་ཀློང་དུ་བསྟན་པ། ཐ་སྙད་ལ་མི་གནས་པའི་རིགས་པ་བསྟན་པ། ཐིག་ལེ་ཉག་གཅིག་གི་གཏན་ཚིགས་བསྟན་པ་དང་བཞི་ལས། དང་པོ་ནི། གདོད་མ་ནས་ཆེ་བ་སྙིང་པོ་ཉིད་ཀྱི་སྐབས། ཞེས་གདོད་མ་ནས་དུས་ལ་སྔ་ཕྱི་མེད་པའི་གཏན་ཚིགས་ཡིན་ཏེ། ཡེ་གདོད་མ་ཀ་ཕྱི་མོ་ཉིད་ནས། ཆེ་བ་ནི་སེམས་ཉིད་ཐིག་ལེ་ཉག་གཅིག་ཡིན་ཏེ། གཅིག་གིས་ཆེ་བ་དང་། གསུམ་གྱིས་ཆེ་སྟེ་སྐུ་གསུང་ཐུགས་ཀྱི་ཆེ་དང་། ལྔ་ཡིས་ཆེ་སྟེ་ཆེ་བ་ལྔ་ཡིས་ཆེ་བ་ནི་བྱེ་བྲག་གིས་ཆེ་བའོ། །ཐིག་ལེ་ཉག་གཅིག་དེ་འགྲན་གྱི་ཟླ་ཐམས་ཅད་དང་བྲལ་བས་འབྱུང་བ་འཁོར་འདས་ཐེག་པ་ཐམས་ཅད་ལས་ཆེ་བ་ནི་སྤྱི་ཡིས་ཆེ་བའོ། །སྙིང་པོ་ནི་བྱང་ཆུབ་ཀྱི་སེམས་དེ། མར་གྱི་ཡང་ཞུན། ཆང་གི་སྙིང་ཁུ་ལྟ་བུར། ཆོས་ཐམས་ཅད་ཀྱི་སྙིང་པོ་སེམས་ཅན་ཐམས་ཅད་ལ་སྤྱི་ཁྱབ་ཏུ་གནས་པར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་ལ་འདུས། །སེམས་ཉིད་ཡེ་ནས་ཆེ་བའི་ཕྱིར། །གདོད་ནས་ཆེ་བའི་སྐབས་ཞེས་བྱ། །ཞེས་སོ། །གཉིས་པ་ནི། དུས་གསུམ་གཅིག་སྟེ་ཁྱད་པར་མེད། །ཅེས་པས་བསྟན་ཏེ། དེ་ཡང་འཁོར་འདས་སྣང་སྲིད་ཀྱིས་བསྡུས་པའི་ཆོས་ཐམས་ཅད། ཤར་ཡང་གཞི་གནས་ཡེ་གྲོལ་བྱ་བྲལ་ཀློང་ཆེན་གྱི་ངང་ལས་ཤར་བས། ཐོག་མར་ཡང་གཞི་ཤར་ཡིན་ཏེ་གཞན་ནས་མ་བྱུང་། ཐ་མར་ཡང་དབྱིངས་གྲོལ་ཡིན་པས་གཞན་དུ་མི་འཇུག་པར་ཆོས་ཉིད་མཉམ་པ་ཉིད་འབྱུང་འཇུག་མེད་པའི་དགོངས་པ་ཆོས་ཉིད་ཀྱི་ཀློང་ངོ་། །རིན་པོ་ཆེ་གསེར་གླིང་ལྟ་བུ་ནི། རིན་པོ་ཆེ་གསེར་གྱི་གླིང་ན་གསེར་འབའ་ཞིག་ལས་རྡོའི་ཐ་སྙད་བྲལ་བ་བཞིན་དུ། ཐམས་ཅད་ཆོས་ཉིད་ཐོག་མཐའ་དང་བྲལ་བའི་རང་བཞིན་ལ། སྔ་ཕྱིའི་ཐ་སྙད་དང་བྲལ་ཏེ། འདས་པ་ཆོས་ཉིད་སྐྱེ་བ་མེད་པའི་ཀློང་དུ་སྔ་ཕྱི་ཐོག་མཐའ་མེད་པར་གྲོལ་བ་དང་། མ་འོངས་པ་མ་ངེས་པའི་ཀློང་ན་སྔ་ཕྱི་ཐོག་མཐའ་མེད་པར་ཤར་བ་ལ། ད་ལྟ་ལྷུན་གྱིས་གྲུབ་པའི་ཀློང་ན་སྔ་ཕྱི་ཐོག་མཐའ་མེད་པར་གནས་པས། དུས་ཐ་དད་དུ་དབྱེ་བའི་ཕྱོགས་ཀྱི་ཐ་སྙད་ཐམས་ཅད་དང་བྲལ་བས་ཆོས་ཉིད་ཀྱི་ཀློང་ངོ་། །དེ་ལ་དུས་གསུམ་ཐ་དད་མེད་པས་ཐ་སྙད་དང་བྲལ་བའི་རིགས་པ། མཉམ་པ་ཉིད་ལས་མ་གཡོས་པས་ཐིག་ལེ་ཉག་གཅིག་གི་གཏན་ཚིགས་ཟེར་རོ། །དེས་ན། དུས་གསུམ་གཅིག་སྟེ་ཁྱད་པར་མེད། །ཅེས་པ་སྔ་ཕྱི་ཐོག་མཐའ་མེད་པའི་དགོངས་པ་བསྟན་ཏེ། དུས་འདས་པ་ཆོས་ཉིད་སྐྱེ་བ་མེད་པའི་ཀློང་དུ་གྲོལ་བ་དང་། མ་འོངས་པ་མ་ངེས་པའི་ཀློང་ན་འཆར་བ་དང་། ད་ལྟར་ལྷུན་གྱིས་གྲུབ་པའི་ངང་ལ་གནས་པ་དེ། ཐིག་ལེ་ཉག་གཅིག་ལ་དུས་གསུམ་ཐ་དད་མེད་པ་གཅིག་པས། སྔ་ཕྱིའི་ཁྱད་པར་མེད་དེ། དུས་གསུམ་མཉམ་པ་ཉིད་རྒྱུན་མི་འཆད་པར་གྲོལ་བའོ། །དེའི་ལ་བཟླ་དང་སྐྱོན་བསལ་འདྲ། གསུམ་པ་ནི། སྔོན་མེད་ཕྱིས་མེད་གདོད་ནས་འབྱུང་། །ཞེས་པ་ཆོས་ཉིད་ལ་རྒྱུད་ཆད་མེད་པའི་རིགས་པ་བསྟན་ཏེ། ཨ་ཏི་ཡོ་ག་ཆོས་ཉིད་ལ་སྔ་ཕྱི་ཐོག་མཐའ་དང་བྲལ་བས། ཕྱི་མའི་མཐའ་མེད་པའི་གནད་ཀྱིས་སྔོན་མེད་ལ། སྔོན་གྱི་མཐའ་མེད་པའི་གནད་ཀྱིས་ཕྱི་མའི་ཕྱི་མ་མེད། སྔ་ཕྱི་གཉིས་ཀ་མེད་པའི་གནད་ཀྱིས་ད་ལྟ་མ་གྲུབ། ད་ལྟ་མ་གྲུབ་པའི་གནད་ཀྱིས་སྔ་ཕྱི་གཉིས་ཀ་མེད་དེ་འཁོར་འདས་ཀྱི་ཆོས་ཐམས་ཅད་སྔ་ཕྱི་ཐོག་མཐའ་མེད་པས་ཡེ་གདོད་མ་ཉིད་ནས་རང་བྱུང་དུ་འབྱུང་བའོ། །བཞི་པ་ནི། ཆོས་སྐུས་ཁྱབ་པར་གཅིག་པའི་ཕྱིར། ཞེས་པས་ཡ་ཐ་རྒྱལ་བའི་དཀྱིལ་འཁོར་ནས། མ་ཐ་དམྱལ་བའི་འཇིག་རྟེན་ཡན་ཆད་ལ་ཆོས་སྐུ་ཐིག་ལེ་ཉག་གཅིག་དེས། བཟང་ངན་དང་ཆེ་ཆུང་སྔ་ཕྱི་དང་ཐོག་མཐའ་བྲལ་ཏེ་ཕྱོགས་མེད་པར་ཁྱབ་པས། མཉམ་པ་རིས་མེད་ཡུལ་དང་ཡུལ་ཅན་མེད་པའི་ཁྱབ་གདལ་ལ། འཁོར་འདས་ཀྱི་ཆོས་ཐམས་ཅད་རྒྱུ་ཆོས་ཉིད། རྐྱེན་རོལ་པ། འབྲས་བུ་རང་བྱུང་ཡེ་ཤེས་སུ་གཅིག་པའམ། གཞི་ལྷུན་གྲུབ་ངོ་བོ་ངེས་མེད། དོན་སྐྱེ་མེད། བདག་ཉིད་ཐོག་མཐའ་མེད་པར་གཅིག་པའི་ཕྱིར། ཆེ་བའི་ཆེན་པོ་རང་བཞིན་གནས། །ཞེས་པ་གང་གིས་ཀྱང་མཚུངས་པ་མེད་པའི་གཏན་ཚིགས་བསྟན་ཏེ། འཁོར་བ་ལས་ཆེ་བ་ནི་མྱ་ངན་ལས་འདས་པའི་ཆོས་ཡིན་ལ། དེའི་ཡང་ཆེན་པོ་གྱུར་པ་ནི། འཁོར་འདས་གཉིས་ཀ་ལས་ཆེ་བའི་རང་གི་རིག་པ་བྱང་ཆུབ་ཀྱི་སེམས། སྐྱེ་མེད་དང་ཡུལ་དང་ཡུལ་ཅན་གཉིས་མེད་ཀྱི་ངོ་བོ་ཡེ་གདོད་མ་ཉིད་ནས་བྱ་བྲལ་ཀློང་ཆེན་དུ་སངས་རྒྱས་པའི་རང་བཞིན་དུ་གནས་པ་ཡིན་ནོ། །དེ་རྣམས་ཀྱི་རྒྱས་གདབ་འགྲེའོ།། ༈ །།ད་ནི་སྐབས་བཅུ་བཞི་པ་ལའང་། སྐབས་ཀྱི་དོན་བསྟན་པ། ལོངས་སྐུ་ཐུག་ཕྲད་དུ་འཆར་བའི་དགོངས་པ་འཁོར་ལོས་སྒྱུར་བའི་རྒྱལ་པོ་ལྟ་བུར་སྣང་ལ་མ་ངེས་པའི་ཀློང་དུ་བསྟན་པ། ཆོས་ཉིད་མཉམ་པ་ཉིད་ལ་དུས་མི་དམིགས་པའི་རིགས་པ་བསྟན་པ། རིག་པ་སྤྱི་ཁྱབ་ལ་བོགས་གདོན་དོན་དུ་མེད་པའི་གཏན་ཚིགས་བསྟན་པ་དང་བཞི་ལས། དང་པོ། ཀུན་ཏུ་སྨོན་ལམ་དང་བྲལ་བའི་སྐབས། ཞེས་པ་ཨ་ཏི་ཡོ་གའི་རྣལ་འབྱོར་པ་ནི། དུས་དང་རྣམ་པ་ཀུན་ཏུ་འཕེན་པའི་སྨོན་ལམ་མི་གདབ། འབྲས་བུ་གཞན་ནས་མི་སྒྲུབ་སྟེ། ཐེག་པ་བརྒྱད་ཀྱི་ལྟ་སྒོམ་མམ། ལམ་རྣམས་ཀྱི་རེ་སྨོན་ལ་མི་ལྟོས་པས། སྨོན་ལམ་གདབ་བྱ་འདེབས་བྱེད་ཐམས་ཅད་དང་བྲལ་བར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་ལ་འདུས། །སེམས་ལ་སྐྱོན་ཡོན་མེད་པའི་ཕྱིར། །སྨོན་ལམ་བྲལ་བའི་སྐབས་ཞེས་བྱ། །ཞེས་སོ། །གཉིས་པ་ནི། སྲིད་པ་གསུམ་ན་སྦྱོང་བ་ཡང་། །ཞེས་སོགས་ཏེ། དེ་ཡང་སྦྱངས་པ་མངོན་གྱུར་གྱི་ལོངས་སྤྱོད་རྫོགས་པའི་སྐུ་བྱ་བ། སྔོན་གྱི་སྨོན་ལམ་ཐུགས་རྗེའི་དབང་གིས་སྦྱངས་པ་དང་། བརྩལ་བ་དང་བསྒྱུར་བའི་ནུས་མཐུ་ལས། ཀུན་གཞི་དང་བག་ཆགས་ཐམས་ཅད་གནས་གྱུར་པའི་དབང་གིས། མེ་ལོང་ལྟ་བུ། མཉམ་པ་ཉིད་དང་། སོ་སོར་རྟོག་པའི་ཡེ་ཤེས་ཐུགས་སུ་ཆུད་པས། མཚན་དང་དཔེ་བྱད་དུ་ཤར་བ་ལ་བྱ་སྟེ། ལོངས་སྐུ་ཡིན་ཡང་ཐུག་ཕྲད་མ་ཡིན་ནོ། །རྫོགས་པ་ཆེན་པོའི་ལུགས་ཀྱིས། རང་གི་སེམས་ཉིད་འདུས་མ་བྱས་པས་ཆོས་ཀྱི་སྐུ་ལས་འཁོར་འདས་ཐམས་ཅད་རང་ཤར་ཞིང་རང་དུ་ལོངས་སྤྱོད་པས། ཅིར་སྣང་ཅིར་སྲིད་ཐམས་ཅད་ལོངས་སྐུ་ཐུག་ཕྲད་དུ་འཆར་བའི་དགོངས་པ་ཆོས་ཉིད་ཀྱི་ཀློང་སྟེ། དཔེར་ན་འཁོར་ལོས་བསྒྱུར་བའི་རྒྱལ་པོ་ལ། མཚན་དང་དཔེ་བྱད་བསོད་ནམས་ཁྱད་པར་ཅན་ཅི་ཙམ་ཡོད་ཀྱང་གཏན་དུ་མི་སྡོད་དེ་བརྟགས་མི་བཟོད་པ་བཞིན་དུ། ཆོས་ཉིད་ཅིར་ཡང་སྣང་ཙམ་ན། ངེས་པ་མེད་པར་ཐམས་ཅད་རང་ཤར་ཞིང་དེ་རུ་གྲོལ་བས་རང་གྲོལ་གྱི་ཀློང་ངོ་། །དེས་ན་ཐུག་ཕྲད་ལ་དུས་རིམ་གྱིས་པ་མ་དམིགས་པས། དུས་དང་བར་མེད་ཀྱི་རིག་པ་མཉམ་ཉིད་ཆེན་པོ་ལ་བོགས་ཆེད་དུ་མི་འདོད་པས། རིག་པ་སྤྱི་ཁྱབ་ལ་བོགས་འདོན་དུ་མེད་པའི་གཏན་ཚིགས་བྱུང་ངོ་། །དེས་ན། སྲིད་པ་གསུམ་ན་སྦྱོང་བ་ཡང་། །ཞེས་པ་སྲིད་པ་རྣམ་པར་དག་པའི་དགོངས་པ། སྒྲ་ཇི་བཞིན་པ་མ་ཡིན་པའི་སྲིད་པ་གསུམ་ནི། ལྷུན་གྲུབ་ལ་ཡེ་སྲིད་པའི་སྲིད་པ། སྐྱེ་མེད་ལ་མི་སྲིད་པའི་སྲིད་པ། ངེས་མེད་ལ་ཇི་སྲིད་པའི་སྲིད་པ་གསུམ་སྟེ་གནས་ལུགས་མ་བཅོས་པའི་སྲིད་པ་ཡིན་ལ། སྒྲ་ཇི་བཞིན་པའི་སྲིད་པ་གསུམ་ནི། རྒྱུ་མཐུན་གནས་སྐབས་ཀྱི་སྲིད་པ། ས་བླ་ས་འོག་ས་སྟེང་རྣམ་པ་གསུམ་གྱི་སེམས་ཅན་ནི། བག་ཆགས་རང་རྒྱུད་པར་སྣང་ལ། དེ་དག་སྦྱང་བར་བྱ་བའི་ཕྱིར་གདུལ་བྱ་དག་པའི་ཤེས་ངོ་དང་། མ་དག་པའི་ཤེས་ངོ་ལ། ལོངས་སྐུ་དང་སྤྲུལ་སྐུའི་གཟུགས་བརྙན་དཔག་ཏུ་མེད་པར་ཤར་བ་དེ་ཡང་། མིང་ཙམ་སྒྱུ་མར་སྣང་བ་སྟེ། །ཞེས་སྣང་ལ་མ་ངེས་པའི་དགོངས་པ་བསྟན་ཏེ། དེ་ཡང་རང་རྒྱུད་དུ་གྲུབ་པ་མེད་པས། རེ་ཞིག་སྣང་བ་ལྟར་བཏགས་པར་ཟད་ཀྱིས། བྱང་ཆུབ་སེམས་ཀྱི་ཆོ་འཕྲུལ་ཅིར་ཡང་སྣང་ཙམ་ན། དེའི་རང་བཞིན་ལ་ངེས་པ་མེད་ཅིང་ཕྱོགས་རིས་མེད་པས་སྒྱུ་མ་ལྟ་བུ་སྟེ། མེད་པའི་དོན་ལ་ཅིར་ཡང་སྣང་བས་སོ། །འཁོར་ལོས་སྒྱུར་བའི་གནས་ཆེན་ཡང་། །ཞེས་པ་དཔེ་དོན་གཉིས་སུ་མེད་པའི་དགོངས་པ་བསྟན་ཏེ། དཔེར་ན་འཁོར་ལོ་སྒྱུར་བའི་རྒྱལ་པོ་ནི་འཇིག་རྟེན་ན་དབང་ཆེ་ཞིང་ཕུན་སུམ་ཚོགས་པ་ཡིན་ཀྱང་། གཏན་དུ་མི་སྡོད་དེ། རེ་ཞིག་གི་བསྟི་གནས་ཙམ་མམ། སྐད་ཅིག་གི་བདེ་བ་ཙམ་ཡིན་པ་ལྟར། སྒྱུ་མར་སྦྱོང་བའི་བསྟི་གནས་ཡིན། །ཞེས་པ། དེས་ན་གཟུགས་སྐུར་སྣང་བ་ཡང་མ་ངེས་པ་སྒྱུ་མ་ལྟ་བུས། སེམས་ཅན་གྱི་བག་ཆགས་སྒྱུ་མ་ལྟ་བུ་དེ་རང་བཞིན་མེད་པར་སྦྱོང་བས་ན། སྒྱུ་མས་སྒྱུ་སྦྱོང་བའི་བསྟི་གནས་ཙམ་ཡིན་པ་ལས། ཡང་དག་པར། ཉོན་མོངས་དང་ཡེ་ཤེས་སམ། སྦྱོང་བྱ་སྦྱོང་བྱེད་གཉིས་ཀ་མ་གྲུབ་པས་སོ། །དེའི་སྐྱོན་བསལ་ལ་བཟླ་འདྲ། གསུམ་པ་ནི། རྣམ་དཔྱོད་དུས་ལ་ལྟོས་པ་རྣམས་ཞེས་རྣམ་པར་དཀའ་བའི་ཆོས་སྤྱོད་ལ་བརྟན་ནས། དུས་རིམ་གྱིས་པ་ལ་སངས་རྒྱས་ཐོབ་ཏུ་རེ་ནས། རྒྱུ་འདི་ལ་བརྩལ་བས་འབྲས་བུ་ཕྱི་མ་ལ་ཐོབ་པར་འདོད་པའི་དུས་ལ་ས་མཚམས་གཅོད་པ་ཡི་ཐེག་པ་འོག་མ་པ་རྣམས་ལ། དུས་དེར་འབྱུང་བར་མི་འགྱུར་ཏེ། ཞེས་པ་ཆོས་ཉིད་ལ་མཐའ་མེད་པའི་རིགས་པ་བསྟན་ཏེ། ཉན་རང་བསྐལ་པ་འབུམ་ཕྲག་བདུན་ན་སངས་རྒྱས་པར་འདོད་པ་དང་། དབུ་སེམས་གྲངས་མེད་གསུམ་ན་སངས་རྒྱས་པར་འདོད་དེ་ས་བཅུ་མཐར་ཕྱིན་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲོ་བཏགས་ཐམས་ཅད་རྒྱུན་བཅད་ཏེ། བཅུ་གཅིག་ཀུན་དུ་འོད་ཀྱི་ས་ལ་སྐུ་གསུམ་ཡེ་ཤེས་བཞིའི་འབྲས་བུ་ཐོབ་པར་འདོད་པའོ། །འོ་ན་དེ་ཁོ་ན་ལྟར་འབྱུང་ངེས་སམ་ཞེ་ན། འབྱུང་བར་མ་ངེས་པས་དུས་དེར་འབྱུང་བར་མི་འགྱུར་ཏེ། རྒྱུ་མཚན་ཅིས་ན། མ་བྲལ་སྨོན་པ་སྤྱོད་པས་ན། །ཞེས་པ་ཅིས་ཀྱང་མི་རྙེད་པའི་རིག་པ་བསྟན་ཏེ། ཐེག་པ་འོག་མ་པ་དེ་རྣམས་ལམ་ལ་རྩོལ་སྒྲུབ་དང་མ་བྲལ། འབྲས་བུ་རེ་སྨོན་ལ་ལྟོས་པས། ཡུལ་དང་ཕྱོགས་མེད་ལ་ཕྱོགས་འཛིན་དུ་སྤྱོད་པའི་ཕྱིར་འབྱུང་བ་མེད་དོ། །བཞི་པ་ནི། སྟོང་པའི་མཚན་ཉིད་གསུངས་པ་བཞིན། ཞེས་པ་སྟོང་པའི་མཚན་ཉིད་ལ་ཕྱི་སྟོང་ནང་སྟོང་ལ་སོགས་པའི་བགོ་བཤའ་བྱས་ཀྱང་། དངོས་པོ་མ་རྙེད་པ་བཞིན་དུ། སྐྱེ་མེད་ཀྱི་རིག་པ་ཡུལ་མེད་སྤྱི་ཁྱབ་ཏུ་ཤར་བས། ཕྱི་ནང་ངམ་ཡུལ་དང་ཡུལ་ཅན་ནམ། དུས་སྔ་ཕྱིའི་ཁྱད་པར་གང་ཡང་མི་དམིགས་པ་སོགས་སོ། །དེ་བཞིའི་རྒྱས་གདབ་འགྲེའོ།། ༈ །།ད་ནི་སྐབས་བཅོ་ལྔ་པ་ལའང་། སྐབས་ཀྱི་དོན་བསྟན་པ། ཐིག་ལེ་ཉག་གཅིག་གི་དགོངས་པ་ནམ་མཁའི་བྱ་ལམ་ལྟ་བུར་རྗེས་མེད་ཆེན་པོའི་ཀློང་དུ་བསྟན་པ། སྒྲོ་སྐུར་དང་བྲལ་བའི་རིགས་པ་བསྟན་པ། ཕྱི་ནང་མེད་ཅིང་བྱ་རྩོལ་དང་བྲལ་བའི་གཏན་ཚིགས་བསྟན་པ། ཐིག་ལེའི་ངེས་ཚིག་བསྟན་པ་དང་ལྔ་ལས། དང་པོ་ནི། ལུང་སྟོན་པའི་སྐབས། ཞེས་པ་དགོངས་པ་འདུས་པ་ལས། ཐིག་ལེ་གཅིག་གིས་ཀུན་ལ་ཁྱབ། །ཐམས་ཅད་ལུང་ཆེན་ཡིན་པར་བསྟན། །ཞེས་གསུངས་ཏེ། ལུང་ནི་རྣ་བར་བརྒྱུད་པའི་ལུང་། །མངོན་དུ་ཕྱུང་བའི་མདོ་ལུང་། གཏན་ལ་འབེབས་པའི་ངེས་ལུང་དང་གསུམ་ཀ །ཐིག་ལེ་ཉག་གཅིག་བྱ་བྲལ་ཀློང་ཆེན་གྱི་ལུང་དུ་འདུས་པས། རྡོ་རྗེ་སེམས་དཔའ་ནམ་མཁའ་ཆེ་དབུ་ཞབས་ཀུན་ལ་ཁྱབ་པའི་ལུང་ཉིད་ངེས་པར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ལ་ཐམས་ཅད་རྫོགས་པའི་ཕྱིར། །ལུང་ཆེན་སྟོན་པའི་སྐབས་ཞེས་བྱ། །ཞེས་སོ། གཉིས་པ་ནི། གཅིག་སྟེ་རྣམ་པར་ཡོངས་ཀྱིས་མེད། །ཅེས་ཏེ། དེ་ཡང་གནས་ལུགས་ཐིག་ལེ་ཉག་གཅིག་ཅིར་ཡང་གནས། ཤར་ལུགས་ཐིག་ལེ་ཉག་གཅིག་ཅིར་ཡང་ཤར་བས། ཡིན་ལུགས་ཐིག་ལེ་ཉག་གཅིག་ཅི་ཡང་ཡིན་པ། གྲོལ་ལུགས་ཐིག་ལེ་ཉག་གཅིག་ཅིར་ཡང་གྲོལ་བ་ཡིན་ཏེ། གནས་ལུགས་རང་ཤར་ཡིན་ལུགས་རང་གྲོལ་ལ་ཐ་དད་མེད་དེ། མཉམ་ཉིད་ཆེན་པོ་གཅིག་གི་རང་བཞིན། གྲྭ་དང་ཟུར་མེད་པས་ཐིག་ལེ། མ་སྤྲོས་ཀུན་ལ་ཁྱབ་པས་ཉག་གཅིག་གི་དགོངས་པ་ཆོས་ཉིད་ཀློང་ངོ་། །ནམ་མཁའི་བྱ་ལམ་ལྟ་བུར་ནི། བྱ་གར་འཕུར་ཡང་མི་འགལ་ལ་རྗེས་མི་འོང་བ་བཞིན་དུ། རྫོགས་པ་ཆེན་པོའི་རྣལ་འབྱོར་པ། །བྱེད་སྤྱོད་གང་ཡང་མ་བཀག་ཀྱང་། །རྗེས་མེད་རང་ཤར་རང་གྲོལ་གྱི་ཀློང་ངོ་། །དེ་ལ་མཐའ་གང་གིས་ཀྱང་མ་རེག་པས་སྒྲོ་སྐུར་དང་བྲལ་བའི་རིག་པ། མཚན་མ་ཐམས་ཅད་རང་སར་གྲོལ་བས་བྱ་བརྩལ་དང་བྲལ་བའི་གཏན་ཚིགས་འབྱུང་ངོ་། །དེས་ན། གཅིག་སྟེ་རྣམ་པ་ཡོངས་ཀྱིས་མེད། །ཅེས་པ་སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་གཅིག་གི་ངང་ཞེས་བྱའོ། །དེ་ཡང་གང་དུ་གཅིག་ན་རང་རིག་སྐྱེ་མེད་ཀྱི་ངང་དུ་གཅིག་གོ། །ཇི་ལྟར་གཅིག་ན་དཔེ་དོན་རྟགས་དང་གཏན་ཚིགས་བཞི་རུ་གཅིག་སྟེ། དཔེའི་དུས་ན་ནམ་མཁར་གཅིག །དོན་གྱི་དུས་ན་ཆོས་ཉིད་དུ་གཅིག །རྟགས་ཀྱི་དུས་ན་རིག་པ་བྱང་ཆུབ་ཀྱི་སེམས་སུ་གཅིག །དེས་ན་རྒྱུ་རྐྱེན་འབྲས་བུ་གསུམ་ཡང་། རྒྱུ་ཆོས་ཉིད། རྐྱེན་རོལ་པ། འབྲས་བུ་རང་བྱུང་གི་ཡེ་ཤེས་སུ་གཅིག་གོ། །གཏན་ཚིགས་ཀྱི་དུས་ན། གཞི་ལྷུན་གྱིས་གྲུབ་པ་གཅིག །ངོ་བོ་ངེས་པ་མེད་པར་གཅིག །དོན་སྐྱེ་བ་མེད་པར་གཅིག །བདག་ཉིད་ཐོག་མཐའ་དང་བྲལ་བར་གཅིག་པས། འཁོར་འདས་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ལ། བཟང་ངན་ནམ་ཆེ་ཆུང་གི་རྣམ་པ་ངང་ངམ་ཡོངས་ཀྱིས་མེད་པར་ཡིད་ཆེས་སོ། །འོ་ན་དཔེ་ཇི་ལྟ་བུ་ཞེ་ན། རྣལ་འབྱོར་ནམ་མཁའི་བྱ་ལམ་གནས། །ཞེས་པ། དེ་ལྟ་བུའི་དགོངས་པ་ལ་ཕྱོགས་མེད་པའི་གནད་ཀྱིས་སྤྱོད་པ་འགག་མེད་དུ་ཕུལ་ནས། ཤུགས་ལ་དགེ་བའི་ལས་དང་། མི་དགེ་བའི་ལས་དང་། ལུང་བསྟན་པའི་ལས་དང་། ལུང་མ་བསྟན་པའི་ལས་དང་། བྱ་བ་ཅི་བྱེད་པ་ཐམས་ཅད་ལ་བག་ཆགས་དཀར་ནག་བསོགས་པའི་རྗེས་མེད་པས། ནམ་མཁའི་བྱ་ལམ་དང་འདྲ་བ་ཡིན་ཏེ། དེ་ཅིས་ན་ཀུན་གཞི་ཟང་ཐལ་ལ། ཡེ་ཤེས་རང་ཤར་། རྣལ་འབྱོར་ཐང་ཡན་ལ་དགོངས་པ་ཕྱོགས་མེད་ཡིན་པས། ཀློང་རབ་འབྱམས་ལས། སྤྱོད་ཡུལ་འདི་ལ་གནས་པ་གང་། །ཕྱོགས་མེད་དོན་ལ་གནས་པ་ཡིན། །ཞེས་སོ། །བྱ་ལམ་རྗེས་མེད་བྱ་བ་ཡང་དོན་དེ་ལྟ་བུ་ཞིག་རྟོགས་ན་ཡིན་གྱི། ཁ་འུད་ཙམ་གྱི་ལྟ་བ་ལ་བརྟེན་པས་ཅི་ཡང་ཕན་པ་མེད་དོ། །དེའི་སྐྱོན་བསལ་དང་ལ་བཟླ་འདྲ། གསུམ་པ་ནི། མ་བྱུང་མ་སྐྱེས་སྙིང་པོ་ལ། །ཞེས་པ་གཞི་ཆོས་ཉིད་ཀྱི་རིགས་པ། དབྱིངས་སྐྱེ་འགག་མེད་པའི་ཐིག་ལེ་ཆེན་པོ་ཆོས་ཀྱི་སྐུ། སེམས་ཅན་རང་རང་གི་རིག་པ་བྱང་ཆུབ་ཀྱི་སེམས་ཕྱོགས་མེད་དེ་ཉིད། ཕ་ཡི་རྒྱུ་ལས་མ་བྱུང་། མ་ཡི་རྐྱེན་ལས་མ་སྐྱེས། འདུས་བྱས་མ་ཡིན་པས་གཉེན་པོས་མི་འཇིག །ཡེ་གདོད་མ་ཉིད་ནས་འཁོར་འདས་ཀྱི་ཆོས་ཐམས་ཅད་རྡོ་རྗེ་སྙིང་པོར་རང་འཁྲུངས་པའི་སངས་རྒྱས་ཡིན་པས། སྙིང་པོ་བྱང་ཆུབ་ཀྱི་སེམས། ཆོས་ཀྱི་ཆོས་ཉིད། སེམས་ཀྱི་སེམས་ཉིད་ཡིན་པ་ལ། །སྒྲོ་བཏགས་ཆོས་ཀུན་ག་ལ་ཡོད། །ཅེས་པ་སྒྲོ་སྐུར་དང་བྲལ་བ་དངོས་ཀྱི་རིགས་པ། ཆོས་ཉིད་བྱ་བྲལ་མཐའ་གང་གིས་ཀྱང་མ་རེག །མཐའ་གང་ཡང་མ་སྤངས་པ་དེ། ཡོད་པར་སྒྲོ་བཏགས། མེད་ཅེས་སྐུར་པ་གདབ་པའམ། སྣང་ཞེས་སྒྲོ་བཏགས། སྟོང་ཞེས་སྐུར་པ་གདབ་པའམ། རྟག་ཅེས་སྒྲོ་བཏགས། ཆད་ཅེས་སྐུར་པ་གདབ་པའམ། དེ་ལ་སོགས་པ་གང་ཡང་མེད་པས། སྒྲོ་སྐུར་དང་བྲལ་བའི་ཆོས་ཉིད་ཡིན་ནོ། །བཞི་པ་ནི། ཕྱི་ནང་གཉིས་ཀ་ཕྱི་ཉིད་ནང་། །ཞེས་པ་ཆོས་ཉིད་བྱང་ཆུབ་ཀྱི་སེམས་བྱ་བྲལ་ཀློང་ཆེན་དེ་ཉིད། ཡེ་གདོད་མ་ཉིད་ནས་དབྱེར་མེད་ཀྱི་ཟང་ཐལ། བྱ་བྲལ་གྱི་ཀློང་ཆེན་དུ་ཤར་བ་ལ། ནུབ་པའི་མཐའ་མེད་པས། རིག་པ་ལ་ཕྱི་ནང་མེད་དེ། ཕྱི་ཆོས་ཀྱི་དབྱིངས། ནང་ཆོས་ཀྱི་སྐུ་དང་། དབྱེར་མི་ཕྱེད་པས། ཕྱི་གང་ཡིན་ནང་ཡིན། ནང་གང་ཡིན་ཕྱི་ཡིན་ཏེ། དེས་ན་ཐེག་པ་འོག་མ་པ་རིག་པ་ཕྱི་ནང་དགག་སྒྲུབ་ཅན་དུ་བརྟགས་པ་དེ་གཉིས་ཀ་ཨ་ཏི་ཡོ་གས་མ་སྤངས་རང་གྲོལ་དུ་གཏན་ལ་དབབ་པས། ཕྱི་ཉིད་ནང་ངོ་། །ཟབ་མོ་ཆ་ཤས་རྟོག་ཡུལ་མེད། །ཅེས་པ་རིག་པ་ཡུལ་མེད་ཀྱི་གཏན་ཚིགས་ཏེ། ཟབ་མོ་ནི་ཆོས་ཉིད་ཐིག་ལེ་ཉག་གཅིག །ཟབ་ཅིང་གཏིང་རིང་ལ་ཆ་ཕྲ་བས་བརྟག་པར་དཀའ་བའོ། །འོ་ན་སུས་མི་རྟོགས་ཤེ་ན། ཆ་ཤས་ཀྱི་རྟོག་པའི་ཡུལ་དུ་མེད་ཅེས་བྱའོ། །ཆ་ཤས་པ་གང་ཞིག་ཡིན་ན། ཨ་ནུ་མན་ཆད་ཡིན་ལ། དེའང་ཨ་ནུ་དབྱིངས་དང་ཡེ་ཤེས་སམ། མ་ཧཱ་ཐབས་དང་ཤེས་རབ་སོགས་པར་གཉིས་སུ་འཛིན་པའི་ཆ་ཤས་སམ། དེའི་ཡང་འོག་མ་པས་མཐོ་དམན་གྱི་ཆ་ཤས་སམ། བཟང་ངན་གྱི་ཁྱད་པས་འདོད་པས་མཉམ་པ་ཉིད་ལ་རྟོགས་པའི་དུས་མེད་དོ། །སྲིད་པ་མིང་ཙམ་ལོག་པའི་སྟོབས། །ཞེས་པ་ཆོས་ཉིད་རང་ལོག་གི་གཏན་ཚིགས་ཡིན་ཏེ། སྲིད་པ་ཡེ་སྲིད་ཀྱི་སྲིད་པ་ལྷུན་གྲུབ། མི་སྲིད་པའི་སྲིད་པ་སྐྱེ་མེད། ཇི་སྲིད་པའི་སྲིད་པ་ངེས་མེད། རྒྱུ་མཐུན་གནས་སྐབས་ཀྱི་སྲིད་པ། སྟེང་ལྷའི། འོག་ཀླུའི། བར་མིའི་སྲིད་པ་གསུམ་མམ། ས་འོག་ས་སྟེང་ས་བླའི་སྲིད་པ་གསུམ་སྟེ། དེ་གསུམ་རང་ཡང་མིང་དུ་བཏགས་པ་ཙམ་ལས། དོན་ཆོས་ཉིད་ལ་གང་ཡང་མ་གྲུབ་སྟེ། རྒྱུ་མཚན་གོ་ཟློག་གི་འབྲས་བུར་རེ་དོགས་བཅད་པས། སྲིད་པ་གསུམ་པོ་ཆོས་ཉིད་མཉམ་པ་ཉིད་དུ་རང་ལོག་པའི་སྟོབས་ཀྱིས། འཁོར་བ་མ་སྤངས་པར་རང་སར་གྲོལ་ལོ། །དེ་ལ་ཡོན་ཏན་ཇི་ཡོད་ཅེ་ན། དེ་བས་ཏིང་འཛིན་མཉམ་དང་བྲལ། ཞེས་པ་ཏིང་ངེ་འཛིན་འབྱུང་འཇུག་དང་བྲལ་བའི་གཏན་ཚིགས་བསྟན་ཏེ། དེ་བས་ན་སྲིད་པ་གསུམ་གྱི་བག་ཆགས་སྦྱང་བར་བྱ་བའི་ཕྱིར། ཐེག་པ་འོག་མ་པས། ཏིང་ངེ་འཛིན་མཉམ་པ་ལ་བཞག་དགོས་པ་དེ། ཨ་ཏི་ཡོ་ག་ཏིང་ངེ་འཛིན་མཉམ་པ་ལ་བཞག་ས་མེད་པར་ཐམས་ཅད་ཆོས་ཉིད་དུ་ཤེས་པས། བསྒོམ་དུ་ཡོད་པ་དང་མེད་པའི་ཐ་སྙད་ཀུན་དང་བྲལ་ཏེ། མཉམ་པ་ལ་བཞག་ཏུ་མེད་དོ། །དེ་ལ་ཐ་ཚིག་ཕྱི་དང་ནང་། ཞེས་པ་དམ་ཚིག་གྲངས་སྲུང་དང་བྲལ་བའི་གཏན་ཚིགས་བསྟན་ཏེ། མཉམ་པར་བཞག་པ་དང་མི་བཞག་པའི་རྩོལ་བ་དང་བྲལ་བ་དེ་ལ། གསང་སྔགས་ཕྱི་ནང་གི་དམ་ཚིག །རྟོག་ཚོགས་ཕུང་པོ་ལྷའི་ང་རྒྱལ་དུ་བསྒོམ་པ་དང་བྲལ་བས། རང་བཞིན་ཕུང་པོ་ཁམས་བཞིན་གནས། །ཞེས་པ་རྫོགས་པ་ཆེན་པོའི་ལུགས་ཀྱིས་བསྒོམས་མ་བསྒོམས་མེད་པར་ཡེ་གདོད་མ་ཉིད་ནས། ཕུང་ཁམས་སྐྱེ་མཆེད་ཐམས་ཅད་ཀུན་རྫོབ་ཏུ་ལྷ་དང་ལྷ་མོའི་དཀྱིལ་འཁོར་དུ་ལྷུན་གྱིས་གྲུབ་ནས་གནས་པ་དང་། དོན་དམ་པར་ཆོས་ཉིད་བྱང་ཆུབ་ཀྱི་སེམས། མ་སྐྱེས་ལྷུན་གྱིས་གྲུབ་པའི་དཀྱིལ་འཁོར་གྱི་འཁོར་ལོ་གནས་པས། དེའི་ཕྱིར། དུས་གསུམ་འདི་དང་མི་འབྲལ་བས། །ཞེས་པ་ཡི་ཀླུང་ཆེན་པོའི་ཏིང་ངེ་འཛིན་བསྟན་ཏེ། འདས་མ་འོངས་ད་ལྟར་གྱི་དུས་རྣམ་པ་གསུམ་མམ། འགྲོ་ཉལ་འདུག་སྡོད་གང་གི་དུས་སུ་ཡང་རིག་པ་དང་འབྲལ་མ་མྱོང་བས། ཆོས་ཉིད་དང་བྲལ་མ་མྱོང་། ཆོས་ཉིད་དང་བྲལ་མ་མྱོང་བས། དམ་ཚིག་དང་བྲལ་མ་མྱོང་སྟེ། དུས་འདས་པ་ཆོས་ཉིད་སྐྱེ་བ་མེད་པའི་ཀློང་དུ་གྲོལ་བ་དང་། མ་འོངས་པ་མ་ངེས་པའི་ཀློང་ནས་ངེས་མེད་དུ་འཆར་བ་དང་། ད་ལྟ་བ་ལྷུན་གྱིས་གྲུབ་པའི་ཀློང་དུ་མཉམ་ཉིད་ཆེན་པོར་གྲོལ་བས། དུས་གསུམ་ཆོས་ཉིད་ལས་མི་འདའ་བས། །ཐ་ཚིག་མིང་དུ་བཏགས་པ་མེད། །ཅེས་འདའ་ཉམས་དང་བྲལ་བ་ལ་ཕྱི་ནང་གི་དམ་ཚིག་སོ་སོར་ཕྱེ་ལ། མིང་དུ་བཏགས་ཏེ་སྲུང་དུ་ཡེ་ནས་མེད་དོ། །ལྔ་པ་ནི། ཡེ་ཤེས་ཆེན་པོའི་ཐིག་ལེ། ཞེས་ཤར་ལ་ནུབ་པ་མེད་པས་ཡེ་ཤེས། ཕྱི་ནང་མེད་པར་འོད་གསལ་བས་ན་ཡང་ཡེ་ཤེས། འཁོར་འདས་ཐེག་པ་ཐམས་ཅད་ལས་ཁྱད་པར་དུ་འཕགས་པས་ན་ཆེན་པོ། མ་སྤྲོས་ཀུན་ལ་ཁྱབ་ཅིང་། གདལ་བ་ཆེན་པོར་གནས་པས་ན་ཐིག་ལེ་ཞེས་བྱའོ། །དེའང་དང་པོ་མི་རྟོག་པའི་ཡེ་ཤེས་ཆེན་པོ་དང་། གཉིས་པ་མཉམ་ཉིད་ཡེ་ཤེས་ཆེན་པོ་དང་། གསུམ་པ་སྔ་ཕྱི་མེད་པའི་ཡེ་ཤེས་ཆེན་པོ་དང་། བཞི་པ་ཐོག་མཐའ་མེད་པའི་ཡེ་ཤེས་ཆེན་པོ་དང་། ལྔ་པ་མ་ངེས་པའི་ཡེ་ཤེས་ཆེན་པོ་དང་། དྲུག་པ་མི་གཡོ་བའི་ཡེ་ཤེས་ཆེན་པོར་འདུས་སོ། །དེ་རྣམས་ཀྱི་རྒྱས་གདབ་འགྲེའོ།། ༈ །།ད་ནི་སྐབས་བཅུ་དྲུག་པ་ལའང་། སྐབས་ཀྱི་དོན་བསྟན་པ། སྐུ་གསུང་ཐུགས་ཐུག་ཕྲད་དུ་འཆར་བའི་དགོངས་པ་རལ་གྲི་ཁ་མང་ལྟ་བུར་རང་ཤར་ཆེན་པོའི་ཀློང་དུ་བསྟན་པ། བདག་ཉིད་རང་ཤར་གྱི་རིགས་པ་བསྟན་པ། ཆོས་ཉིད་མཉམ་པ་ཉིད་ཀྱི་གཏན་ཚིགས་བསྟན་པ་དང་བཞི་ལས། དང་པོ་ནི། མཉམ་པ་ཉིད་ཀྱི་སྐབས། ཞེས་པ་ཨ་ཏི་ཡོ་ག་ཐིག་ལེ་ཉག་གཅིག་བྱ་རྩོལ་དང་བྲལ་བའི་ཀློང་དུ་སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་བཟང་ངན་མེད་པ་མཉམ་པ་དང་། དེ་བཞིན་དུ། ཆེ་ཆུང་། ཕྱི་ནང་། མཐོ་དམན། མཐའ་དབུས་མེད་པར་མཉམ་སྟེ། མཉམ་པ་ཉིད་ལ་ཐ་དད་མེད་པར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ལ་བཟང་ངན་མེད་པའི་ཕྱིར། །མཉམ་པ་ཉིད་ཀྱི་སྐབས་ཞེས་བྱ། །ཞེས་སོ། །གཉིས་པ་ནི། མི་གཡོ་བ་ནི་སྐུ་ཡི་རྒྱ། །ཞེས། དེ་ཡང་འཁོར་འདས་ཀྱི་ཆོས་ཐམས་ཅད་སྐུ་གསུང་ཐུགས་ཐུག་ཕྲད་དུ་མ་གྱུར་པའི་ཆོས་གང་ཡང་མེད་དེ། ལྟ་བ་ཐུག་ཕྲད་ཀྱི་མན་ངག་ལས། བལྟ་བྱ་ཕྱི་ཡི་ཡུལ་ལ་བལྟས་པས། རང་གི་རིག་པ་བྱང་ཆུབ་ཀྱི་སེམས་ལས། གཞན་གང་ཡང་ཡུལ་དུ་མི་འདུག་སྟེ། ལྟ་བ་སྤྲུལ་སྐུ་ཐུག་ཕྲད། བལྟ་བྱ་ནང་གི་སེམས་ལ་བལྟས་པས། རང་གི་རིག་པ་བྱང་ཆུབ་ཀྱི་སེམས་ལས་གཞན་གང་ཡང་ལྟ་མཁན་མེད་པས། ལྟ་བ་ལོངས་སྐུ་ཐུག་ཕྲད། དེས་ན་རིག་པ་ཕྱི་ནང་མེད་ཅིང་མཉམ་ཉིད་ཆེན་པོ། ཆོས་ཀྱི་སྐུའི་ཀློང་དུ་རང་ཤར་རང་གྲོལ་ལ། ཇི་ལྟར་བྱས་ཀྱང་མ་བཅོས་ཆོས་སྐུའི་ཀློང་ལས་མི་འདའ་བས། ལྟ་བ་དང་ལྟ་མཁན་ཞེས་པ་དེ་མ་བཅོས་མཐར་ཕྱིན་དུ་ཤར་གྲོལ་མཉམ་པ་དེ་ལྟ་བ་ཆོས་སྐུ་ཐུག་ཕྲད་ཡིན་ཏེ། ཇི་ལྟར་བྱས་ཀྱང་སྐུ་གསུམ་འདུས་མ་བྱས་པའི་ཀློང་དུ་གྲོལ་ལོ། །སྒོམ་པ་ལ་སོགས་པ་ཡོད་དེ་ལྟར་ཤེས་པར་བྱའོ། །ཚོགས་དྲུག་སྐུ་གསུང་ཐུག་ཕྲད་ཀྱི་གདམས་ངག་ལ། མིག་གི་ཡུལ་དུ་གཟུགས་སུ་སྣང་བ་ཡེར་ཅིག་ཤར་བ་དེ། ཆོས་ཉིད་ཀྱི་རོལ་པ་ཡིན་ཏེ་སྤྲལ་སྐུ་ཐུག་ཕྲད། དེ་རང་རིག་ཏུ་ངོ་ཤེས་ཤིང་རང་གསལ་དུ་ལོངས་སྤྱོད་པ་ལོངས་སྐུ་ཐུག་ཕྲད། དེ་རང་སར་གྲོལ་ནས་དེ་ལ་དངོས་གཞི་མ་རྙེད་པས་མ་བཅོས་པའི་ཆོས་ཉིད་དེ་ཆོས་སྐུ་ཐུག་ཕྲད། ཇི་ལྟར་བྱས་ཀྱང་སྐུ་གསུམ་འདུས་མ་བྱས་པའི་ཀློང་དུ་གྲོལ། རྣ་བས་སྒྲ་སོགས་དེ་ལྟར་ཤེས་པར་བྱ་ལ། གང་ཇི་ལྟར་བྱས་ཀྱང་སྐུ་གསུམ་ཐུག་ཕྲད་དུ་ཤར་བའི་དགོངས་པ་ཆོས་ཉིད་ཀྱི་ངང་ངོ་། །རལ་གྲི་ཁ་མང་ལྟ་བུར་ནི། རལ་གྲི་ཁ་མང་དེ་གང་ལ་རེག་པ་གཅོད་པ་ལྟར། སྐུ་གསུམ་རང་ཤར་གྱི་དགོངས་པ་དེས། དུས་གསུམ་གྱི་རྟོག་པ་རྒྱུན་གཅོད་པ་སྟེ། ཐམས་ཅད་དེ་ལས་བྱུང་ཞིང་དེར་གྲོལ་བའི་ཀློང་ངོ་། །དེ་གང་ལའང་ཐོགས་པ་མེད་པས་བདག་ཉིད་རང་སྣང་གི་རིགས་པ། མཐའ་མ་སྤངས་པར་རང་གྲོལ་བས་མཉམ་ཉིད་ཆེན་པོའི་གཏན་ཚིགས་བྱུང་ངོ་། །དེས་ན། མི་གཡོ་བ་ནི་སྐུ་ཡི་རྒྱ། །ཞེས་པ་ཆོས་སྐུ་འཇིག་འདྲལ་མེད་པར་རང་བཞིན་རྣམ་དག་ཕྱག་རྒྱ་ཆེན་པོར་ཕྱོགས་མེད་དུ་ཤར་བ་དེ། གང་གིས་མི་གཡོ་ན། རྒྱུ་རྐྱེན་གཉེན་པོ་གང་གིས་ཀྱང་མི་གཡོ་བས། ཆོས་སྐུ་འཕོ་འགྱུར་མེད་ཅིང་སྐྱེ་ཤི་མེད་པར་རྒྱ་བཅད་མི་བསྐྱོད་པ་ནི་ཡེ་ཤེས་ཏེ། ཞེས་པ། ཕྱོགས་སུ་འཛིན་པའི་རླུང་གིས་མ་བརྫི། །མི་ལེན་བས་ན་བདག་མེད་ཅིང་། །ཞེས་པ། བདག་གཞན་གཉིས་སུ་མེད་པའི་དགོངས་པ་སྟེ། སྐུ་གསུང་ཐུགས་ཆེ་བའི་ཡོན་ཏན་ཕྱོགས་མེད་ཐམས་ཅད་རང་ལ་རང་ཆས་སུ་ཡེ་ནས་གནས་པས། འབྲས་བུ་གཞན་ནས་མི་ལེན་ཞིང་། ང་བདག་ཏུ་བཟུང་བ་མེད་པས་ན། མི་འདོར་ཚིག་བྲལ་མཉམ་ཉིད་དོ། །ཞེས་པ་མཉམ་པ་ཉིད་ལྷུན་གྱིས་གྲུབ་པའི་དགོངས་པ་སྟེ། དེས་ན་བདག་གཞན་དབྱེར་མེད། འཁོར་འདས་དབྱེར་མེད། མི་མཐུན་པ་དང་གཉིས་སུ་མེད་པ་ལ། སྐྱོན་ལོགས་སུ་འདོར་དུ་མེད་པས། དོན་གྱི་སྔགས་ཚིགས་སྨྲ་བརྗོད་ཐམས་ཅད་དང་བྲལ་བའི་ཀློང་། དཔེར་ན་རལ་གྲི་ཁ་མང་དེས། གང་ལ་རེག་པ་གཅོད་པ་ལྟར། སྐུ་གསུང་ཐུགས་ཆེ་བའི་ཕྱག་རྒྱ་རྣམ་པ་གསུམ་གྱི་འཁོར་ལོས། ཉོན་མོངས་པ་དང་མཐར་འཛིན་གྱི་གོལ་ས་ཐམས་ཅད་རྒྱུན་གཅོད་པའོ། །དེའི་སྐྱོན་བསལ་དང་ལ་བཟླ་འདྲའོ། །གསུམ་པ་ནི། གང་དང་གང་གིས་གང་དུ་ཡང་། །ཞེས་པ་འཁོར་བར་འཇུག་ལྡོག་མེད་པའི་རིགས་པ་བསྟན་ཏེ། གང་དང་ཞེས་པ་འདས་པའི་སངས་རྒྱས་མར་མེ་མཛད་ལ་སོགས་པ་དེ་གང་ཇི་སྙེད་པའི་བདེ་བར་གཤེགས་པ་ཕྱོགས་མེད་ཀྱི་དགོངས་པ་ལ་མངའ་བརྙེས་པ་རྣམས་དང་། གང་གིས་ཞེས་པ་ད་ལྟ་བ་རྒྱལ་བ་ཤཱཀྱ་ཐུབ་པ་ལ་སོགས་པ་ཇི་སྙེད་པའི་སངས་རྒྱས་ཕྱོགས་མེད་པ་རྣམས་དང་། གང་དུ་ཞེས་པ་མ་འོངས་པའི་འདྲེན་པ་བྱམས་པ་ལ་སོགས་པ་ཇི་སྙེད་པའི་སངས་རྒྱས་ཏེ། དུས་གསུམ་གྱི་སངས་རྒྱས་མ་ལུས་པ་ཀུན་གྱིས་བདེ་བའི་ཡེ་ཤེས་ཕྱོགས་མེད་ལ་ལོངས་སྤྱོད་པའང་ལོགས་ཤིག་ན་མེད་དེ། བདག་ཉིད་ཆེན་པོ་བྱང་ཆུབ་ཀྱི་སེམས་ལས་བྱུང་ཞིང་དེའི་ཡོན་ཏན་ནམ་རྒྱན་ནམ་ཤར་ལུགས་ཡིན་པས། འཁོར་བ་རྣམ་པ་གསུམ་དང་། འགྲོ་བ་རིགས་དྲུག་ལས་ཀྱིས་འཁོར་བ་ཡང་། བདག་ཉིད་ཆེན་པོ་བྱང་ཆུབ་ཀྱི་སེམས་ཀྱི་རོལ་པའམ། རྒྱན་ནམ། ཡོ་ལང་དུ་ཤར་བས་ན། ཀུན་འཁོལ་ཀུན་སྤྱོད་བདག་ལས་འབྱུང་། །ཞེས་པས་བདག་ཉིད་རང་ཤར་གྱི་རིགས་པ་བསྟན་ཏེ་གསུངས་པའོ། །བཞི་པ་ནི། འདི་ལ་སྐྱེས་པ་བུད་མེད་ཅེས། །ཞེས་པ་རིགས་ལ་བྱེ་བྲག་མེད་པའི་གཏན་ཚིགས་བསྟན་ཏེ། ཆོས་ཉིད་མཉམ་པ་ཉིད་སྐྱེ་འགག་དང་བྲལ་ཞིང་། དུས་གསུམ་དུ་རྒྱུན་ཆད་མེད་ཅིང་ཕྱོགས་རིས་མེད་པ་འདི་ལ། སྐྱེས་པའི་སྤྱོད་ཡུལ་ཡིན་ལ་བུད་མེད་ཀྱི་མིན་བྱ་བའམ། བུད་མེད་ཀྱི་སྤྱོད་ཡུལ་ཡིན་ལ་སྐྱེ་བའི་མིན་བྱ་བ་ལ་སོགས་པ་གང་ཡང་མེད་དོ། །བྱང་ཆུབ་སེམས་ལ་ཕོ་མོ་དང་། མ་ནིང་ལ་སོགས་པ་གང་ཡང་དམིགས་སུ་མེད་པར། ཐམས་ཅད་ཆོས་ཉིད་དུ་མཉམ་པས་ན། མཉམ་པའི་རྒྱལ་པོས་ཡོངས་མ་གསུངས། །ཞེས་པ། མཉམ་པ་ཉིད་དངོས་གཞི། ཆོས་ཐམས་ཅད་རིས་མེད་ཁྱབ་གདལ་ལ་བཟང་ངན་ནམ། རྟོག་མི་རྟོག་གི་ཁྱད་པར་གཉིས་སུ་ཡོད་པར་ནི། ཆོས་ཉིད་མཉམ་པ་ཉིད་ལ་ཇི་བཞིན་པར་མངའ་བརྙེས་པས། རྒྱལ་བའི་རྒྱལ་མཆོག་ཀུན་ཏུ་བཟང་པོ་ལ་སོགས་པས། སྔར་ཡང་ཡོངས་སུ་མ་གསུངས། ད་ལྟར་ཡང་གསུང་བ་མེད། མ་འོངས་པར་ཡང་གསུང་བར་མི་འགྱུར་རོ།། ༈ །།ད་ནི་སྐབས་བཅུ་བདུན་པ་ལའང་། སྐབས་ཀྱི་དོན་བསྟན་པ། སྐྱེ་མེད་བདེ་བ་ཆེན་པོའི་དགོངས་པ་སྒྱུ་མའི་ཆོ་འཕྲུལ་ལྟ་བུར་ངེས་མེད་ཆེན་པོའི་ཀློང་དུ་བསྟན་པ། ཅིར་སྣང་ངེས་མེད་ཀྱི་རིགས་པ་ལ་རྩོལ་བ་དགག་པར་བསྟན་པ། ལྡེམ་དགོངས་མན་ངག་གི་གཏན་ཚིགས་ཀྱིས་ཕྱོགས་ལྟ་དག་པར་བསྟན་པ་བཞི་ལས། དང་པོ་ནི། དངོས་གྲུབ་ཆེན་པོའི་བདེ་བ་ལ་ཆགས་པ་སྤོང་བའི་སྐབས། ཞེས་པ་མ་ཧཱ་དང་ཨ་ནུ་ཡོ་གའི་དངོས་གྲུབ་ཆེན་པོ་ནི། ཐུན་མོང་དུ་རིག་འཛིན་ཕལ་པ་སྟེ། ཚེ་ལ་དབང་བའི་རིག་འཛིན་སོགས། ཡོ་བྱད་དང་ལོངས་སྤྱོད་ལ་དབང་བ་སོགས་དང་། མཆོག་གི་དངོས་གྲུབ་ཆེན་པོ། ཡི་གེ་འཁོར་ལོ་ཚོགས་ཆེན་གྱི་ས་དང་། མ་ཆགས་པདྨ་སྤྱན་གྱི་ས་ཐོབ་པར་འདོད་པ་ཡང་། ལམ་མཆོག་ཁ་སྦྱོར་གྱི་བདེ་བ་ལས་འབྱུང་བས། གནས་སྐབས་ཀྱི་བདེ་བ་ལས་འབྱུང་བར་འདོད་ཅིང་། གནས་སྐབས་ཀྱི་བདེ་བ་ལ་ཆགས་པ་དེ། ཨ་ཏི་ཡོ་ག་རྫོགས་པ་ཆེན་པོ་ཞེན་པ་མེད་པའི་ཆོས་ཉིད་ཀྱིས། ཆགས་པ་དེ་སྦོང་བར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །བླང་དོར་མེད་པར་མ་རྟོགས་ཕྱིར། །བདེ་བ་སྤོང་བའི་སྐབས་ཞེས་བྱ། །ཞེས་སོ། །གཉིས་པ་ནི། འདི་ལ་བརྟུལ་ཞུགས་དྲག་ཤུལ་གྱིས། །ཞེས་སོགས་གསུངས་ཏེ། ལར་ཀྱང་མཐའ་བཞིར་མ་སྐྱེས་ཤིང་མུ་བཞིར་མ་འགགས་པ་ལ། གཅིག་ལ་གཞན་མ་སྐྱེས་པ། ལྟ་ལ་བ་གླང་མ་སྐྱེས་པ་ལྟ་བུ། འགགས་ནས་མ་སྐྱེས་པ་རྫ་ཆག་པ་ལྟ་བུ་ལ་སོགས་པ་མ་ཡིན་པར། འཁོར་འདས་ཀྱི་ཆོས་ཐམས་ཅད་རང་བཞིན་གྱིས་མ་སྐྱེས་པའམ། ཡེ་གདོད་མ་ཉིད་ནས་མ་སྐྱེས་པ་ནི། རྒྱུ་རྐྱེན་གྱིས་མ་བསྐྱེད་པས། འདུས་བྱས་མ་ཡིན་ཏེ། ཐམས་ཅད་གཞི་ལྷུན་གྱིས་གྲུབ་པ་ལ་མ་སྐྱེས་པས། ཕྱོགས་འཛིན་གྱི་རྩོལ་སྒྲུབ་མེད་དེ་བདེ་བ་ཆེན་པོ། ངོ་བོ་རང་བྱུང་གི་ཡེ་ཤེས་ལ་མ་སྐྱེས་པས། མཐར་འཛིན་གྱིས་རྩོལ་སྒྲུབ་མེད་དེ་བདེ་ཆེན། དོན་སྐྱེ་མེད་ལ་མ་སྐྱེས་པས། གཉིས་འཛིན་གྱིས་རྩོལ་སྒྲུབ་མེད་པས་བདེ་ཆེན། བདག་ཉིད་ཐོག་མཐའ་མེད་པ་ལ་མ་སྐྱེས་པས། དངོས་པོ་མཚན་མ་རང་རྒྱུད་པ་གང་གིས་ཀྱང་རྩོལ་སྒྲུབ་མེད་པའི་བདེ་བ་ཆེན་པོ་སྟེ། སྐྱེ་མེད་བདེ་ཆེན་གྱི་དགོངས་པ་ཆོས་ཉིད་ཀྱི་ཀློང་ངོ་། །སྒྱུ་མ་ལྟ་བུར་ནི། སྒྱུ་མའི་ཆོ་འཕྲུལ་སྣང་བཞིན་དུ་རང་རྒྱུད་དུ་མ་གྲུབ་པ་ལྟར། ཐིག་ལེ་བྱང་ཆུབ་ཀྱི་སེམས་ཅིར་ཡང་སྣང་ཙམ་ན། དེའི་རང་བཞིན་ལ་ངེས་པ་མེད་དེ། དེའི་ཀློང་ན་ཐམས་ཅད་ཤར་ཞིང་ཐམས་ཅད་གྲོལ་བའི་དགོངས་པ་དམ་པའོ། །དེ་ཉིད་མི་འགག་པས་ཅིར་སྣང་ངེས་མེད་ཀྱི་རིགས་པ། བརྗོད་བྲལ་དེ་སྒྲ་དྲང་ཐད་ཀྱིས་རྟོགས་པར་དཀའ་བས་ལྡེམ་དགོངས་མན་ངག་གི་གཏན་ཚིགས་བྱུང་ངོ་། །དེས་ན། འདི་ལ་བརྟུལ་ཞུགས་དྲག་ཤུལ་གྱིས། །ཞེས་པ་སྦྱོར་སྒྲོལ་གཉིས་ཀྱི་དགོངས་པ་ལ་བློ་མི་གནས་པ་དང་། ཉག་གཅིག་བྱ་རྩོལ་དང་བྲལ་བ་འདི་ལ། མ་ཧཱ་དང་ཨ་ནུ་ལ་སོགས་པ་བརྟུལ་ཞུགས་སྦྱོར་བའི་སྤྱོད་པ་དང་། དྲག་ཤུལ་སྒྲོལ་བའི་སྤྱོད་པ་རིམ་དང་ཅིག་ཆར་ལ་སོགས་པར། གནས་སུ་བྱ་བའི་མིང་མེད་དེ། །ཞེས་པ་དེ་དག་གིས་ཨ་ཏི་ཡོ་ག་བྱ་བྲལ་གྱི་དོན་ལ་གནས་པར་མི་ནུས་པས་སོ། །དེ་ཅིའི་ཕྱིར་ན། ཏ་ན་དང་གྷ་ན་ལ་ཆེད་དུ་བརྩལ་བའི་སྤྱོད་པ་དེ་ལ་རང་བྱུང་ཡེ་ཤེས་ཀྱི་མིང་ཙམ་ཡང་མེད་པས། མ་གྲོལ་བར་ངེས་སོ། །འོ་ན་གང་གིས་གྲོལ་ཞེ་ན། །ཨ་དང་པར་ནི་རྣམ་ལྡན་ན། །ཞེས་པ་སྒྲ་དོན་གཉིས་སུ་མེད་པའི་དགོངས་པ་སྟེ། ཨ་ནུ་ཏྤནྡྷ་སརྦ་དྷརྨ་ཞེས་པའི་སྒྲ་ལས་དྲངས་ན་འཁོར་འདས་ཀྱི་ཆོས་ཐམས་ཅད། གང་ནས་ཀྱང་མ་བྱུང་མ་སྐྱེས་པ་སྟེ། སྐྱེ་བ་མེད་པ་ལ། པ་ར་མ་ན་ཞེས་པའི་སྒྲ་ལས་དྲངས་ན། རིག་པ་མ་འགགས་པར་ཤར་བ་ལ། ཡོན་ཏན་གྱི་རྩལ་རྫོགས་པ་སྟེ། དེ་གཉིས་ཚིག་ལ་སྔ་ཕྱི་བྱུང་ཡང་དོན་ལ་ཐ་དད་མེད་དེ། སྐྱེ་འགག་གཉིས་སུ་མེད་པ་དེ། མ་སྐྱེས་པའི་རྒྱན་དུ་མ་འགགས་པར་ལྡན་པའོ། །སྒྱུ་མའི་བདེ་བ་འབྱུང་བར་འདོད། །ཅེས་པ་ཉམས་མྱོང་ལ་ཞེན་པ་མེད་པའི་དགོངས་པ་གཞི་ངེས་མེད་རོལ་པ་ཕྱོགས་མེད་དུ་ཤར་བ་ལ། ངོ་བོ་འདི་ཡིན་དུ་མ་གྲུབ་པས་སྒྱུ་མ་ལྟ་བུར་མ་ངེས་པའི་བདེ་ཆེན་ཉིད། བྱ་རྩོལ་དང་བྲལ་བར་བདེ་ཆེན་དུ་རང་ཤར་བས་ཞེ་འདོད་མེད་པར་འབྱུང་བའི་གདེངས་ཆེན་པོ་དང་ལྡན་པར་འདོད་དོ། །དགོངས་པ་དེའི་སྐྱོན་བསལ་དང་ལ་བཟླ་འདྲ། གསུམ་པ་ནི། རང་བཞིན་གཅིག་ཏུ་མ་ངེས་པར། །ཞེས་པ་ངེས་མེད་ཀྱི་རིགས་པ་བསྟན་ཏེ། གཞི་དངོས་པོ་གཤིས་ཀྱི་གནས་ལུགས་དེའི་རང་བཞིན་ནི། གཅིག་ཏུ་མ་ངེས་ཏེ་མཐའ་ཐམས་ཅད་དུ་རང་ཤར་བས། འཁོར་འདས་ལམ་པས་བསྡུས་པའི་ཆོས་མི་འདྲ་བ་སྣ་ཚོགས་སུ་ཤར་ཏེ་སྐྱོན་མེད་པར་རང་འབྱུང་བའོ། །དེ་ཡང་ཇི་ལྟར་བྱུང་ཞེ་ན། བྱང་ཆུབ་སེམས་ཐིག་ལེ་ཉག་གཅིག་དེ། སངས་རྒྱས་སུ་མ་ངེས་ཏེ་སེམས་ཅན་དུ་རང་ཤར་ལ། སེམས་ཅན་དུ་མ་ངེས་པར་སངས་རྒྱས་སུ་རང་ཤར་བས་སངས་རྒྱས་སེམས་ཅན་གཉིས་ཀར་མ་ངེས་ཏེ། གཉིས་སུ་རང་ཤར་ལ། གཉིས་མེད་དུ་མ་ངེས་པས། གཉིས་གཉིས་མེད་དང་བྲལ་བས། ཇི་ལྟར་བལྟས་པ་དེ་ལྟར་སྣང་། །ཞེས་པ་ལྟར་སྣང་གི་རིག་པ་བསྟན་ཏེ། གཞི་ཕྱོགས་མེད་ལྷུན་གྲུབ་ལ། རྐྱེན་ཕྱོགས་བྲལ་ངེས་པ་མེད་པས། འདོད་པ་ཕྱོགས་མེད་མཐོང་སྟངས་ཐ་དད་དུ་ཤར་བས་ན། ཡ་གི་རྫོགས་པ་ཆེན་པོ་ཨ་ཏི་ཡོ་གའི་ལྟ་བ་ནས། མ་གི་འགྲོ་བ་རིགས་དྲུག་དང་། མུ་སྟེགས་རྟག་ཆད་ཡན་ཆད། ཇི་ལྟར་བལྟས་པ་ལྟར་སྣང་། བཏགས་པ་ལྟར་ཆགས། བསྒྲུབ་པ་ལྟར་འགྲུབ་པས་ན། སྣང་བ་བཅུ་བདུན་ནམ་སྣང་ཚད་བསམ་གྱིས་མི་ཁྱབ་པར་ཤར་རོ། །འོ་ན་སྣང་འདོད་ཀུན་འདྲའམ་ཞེ་ན། སྣང་འདོད་རྩོལ་སེམས་བདེ་བ་ཡང་། །ཞེས་པ་ཞི་གནས་ཀྱི་བདེ་བས་མི་གྲོལ་བའི་རིགས་པ་སྟེ། ཉན་ཐོས་ཡུལ་སེམས་གཉིས་སུ་སྣང་བ་ལ། དགྲ་བཅོམ་པའི་འབྲས་བུ་འདོད་ཅིང་། ལམ་ལ་རྩོལ་སེམས་བཅུག་ནས་གནས་སྐབས་ཀྱི་བདེ་བ་ལ་ཆགས་པ་ལ་སོགས་པ་སྟེ། སྣང་བ་བཅུ་བདུན་རང་ཀ་མ་ལ་འབྲས་བུ་འདོད་ཅིང་ལམ་ལྟ་སྒོམ་སྤྱོད་འབྲས་ལ་རྩོལ་སེམས་བཅུག་ནས། ཞི་གནས་ཀྱི་བདེ་བ་ལ་ཆགས་པ་དེ་ཡོད་དོ། །དེ་ནི་དེ་སྒྲིབ་སྐྱོན་ཆེན་ཡིན། །ཞེས་པ་ལྟ་སྒོམ་སྤྱོད་པ་ཕྱོགས་རེ་ལ་རྩོལ་ཞིང་། འབྲས་བུ་ལ་ཞེན་འདོད་བྱེད་པ་ནི། ཆོས་ཉིད་མཉམ་པ་ཉིད་དེ་མི་རྟོགས་པའི་སྒྲིབ་པའམ། གཉིས་སུ་འཛིན་པའི་སྐྱོན་ཆེན་པོ་ཡིན་ཏེ་མཐའ་ཕྱོགས་རེ་ལ་ཞེན་པས་སོ། །བཞི་པ་ནི། བྱང་ཆུབ་ཡན་ལག་ཀུན་གྱི་སྒོ། །ཞེས་པ་ཡོ་ག་ཕྱོགས་ལྟ་ཡིན་པའི་གཏན་ཚིགས་ཡིན་ཏེ། ཡོ་ག་བ་མངོན་པར་བྱང་ཆུབ་པ་རྣམ་པ་ལྔས་འཇུག་སྒོ་ཐབས་ཀྱི་ཡན་ལག་ཏུ་འདོད་དོ། །ཆོས་ཉིད་སྟོང་པ་ལ་མངོན་པར་བྱང་ཆུབ་པ། གདན་ཉི་ཟླ་ལ། གསུང་ཡིག་འབྲུ་ལ། ཐུགས་ཕྱག་མཚན་ལ། སྐུ་ཡོངས་སུ་རྫོགས་པ་ལ་མངོན་པར་བྱང་ཆུབ་པར་འདོད་དེ། དེས་ཀྱང་རྫོགས་པ་ཆེན་པོ་བྱ་བྲལ་གྱི་དོན་མ་གོ་བས་གོལ་བར་གྱུར་ཏོ། །ཆ་ལུགས་སྒོམ་པ་ཆུ་ཟླ་བཞིན། །ཞེས་པ་ཡོ་ག་པས་ལྷ་རྣམས་ཀྱི་ཆ་ལུགས་ཀྱང་སྣང་ལ་རང་བཞིན་མེད་པ་ཆུའི་ཟླ་བ་ལྟ་བུར་སྒོམ་སྟེ། དེའང་གཞི་རྒྱུ་བྱིན་རླབས་ལྡན་པའི་ཚུལ་དུ་བརྟེན་ནས། ཡེ་ཤེས་པ་བཅུག་པ་དང་། འཁྲིལ་བ་དང་ལྡེམ་པ་ལ་སོགས་པར་སྒོམ་པའོ། །མ་གོས་མ་ཆགས་འབྱུང་གྱུར་ཀྱང་། །ཞེས་པ་གོམས་པས་གསལ་བའི་ཚད། ཞི་གནས་ལ་ཉོན་མོངས་པའི་དྲི་མས་མ་གོས། ལྷག་མཐོང་ལ་ཤེས་བྱའི་དྲི་མས་མ་གོས་ཏེ། ལྷའི་རང་བཞིན་རང་ལའང་མ་ཆགས་པའི་ཉམས་འབྱུང་བར་འགྱུར་ཡང་། རྫོགས་པ་ཆེན་པོའི་ལུགས་ལ། དེ་གཉིས་ཆོས་ཉིད་དུ་དབྱེར་མེད་པས། བཟང་ངན་དང་རེས་འཇོག་ཏུ་སྒོམ་པ་དེས་མི་གྲོལ་བས། སྒོམ་པ་བྱིས་པའི་སྤྱོད་ཡུལ་ཡིན། །ཞེས་པ་ལྷའི་དཀྱིལ་འཁོར་སྒོམ་པས། བྱིས་པའི་ཁང་བུ་གལ་ཆེ་ཆེ་ལྟར་བརྩིགས་ནས། ཐ་མ་དགོས་པ་མེད་པར་འཇོག་པ་དང་འདྲ་སྟེ། ཡོ་ག་པས། དང་པོ་ལྷ་དགོས་དགོས་ལྟར་བསྐྱེད་ནས། ཐ་མ་མི་དགོས་པ་ལྟར་བཛྲ་མུཿལ་སོགས་པས་བསྡུས་ཏེ། སྤྱོད་ཡུལ་ལ་རེས་འཇོག་ཡོད་པའང་། ཨ་ཏི་ཡོ་ག་བྱ་བྲལ་ཆིག་ཆོད་དོན་ལས་གོལ་ལོ། །དེར་ཡང་མ་ཟད། ཁྲོ་བོའི་ལྷ་ཚོགས་སྒོམ་པ་གོལ་བར་བསྟན་པ་ནི། དཀྱིལ་འཁོར་ཁྲོ་གཉེན་ཆ་ལུགས་ཀྱིས། །ཞེས་པ་མ་ཧཱ་ཕྱོགས་ལྷ་ཡིན་པའི་གཏན་ཚིགས་ཏེ། མ་ཧཱ་ཡོ་ག །དཀྱིལ་བཛྲ་ཧེ་རུ་ཀ །འཁོར་རིགས་བཞིའི་ཁྲོ་བོས་བསྐོར་བ་དང་། ཁྲོ་གཉེར་བརྗིད་པས་གཉེར་མས་ཡས་མནན། མཛེས་འཛུམ་སྡུད་པའི་གཉེར་མས་མས་བཏེག་པའང་། ཆ་ལུགས་དུར་ཁྲོད་ཀྱི་ཆས་བརྒྱད་དེ། ཞིང་གི་གཡང་གཞི་ལ་སོགས་པར་འདོད་དོ། །ཁྲོ་བདག་ཆེན་པོའི་ལུས་བཟུང་ནས། །ཞེས་པ། ཡང་ན་དཀྱིལ་འཁོར་གྱི་དབུས་སུ་རང་ཉིད་དེ་ལྟ་བུར་སྒོམ་པའམ། མདུན་དུ་བསྐྱེད་ནས་སྒོམ་པ་དང་། །ཡི་གེ་མངོན་དུ་ཕྱུང་ན་ཡང་། །ཞེས་པ་ལྷ་དེ་གོམས་པ་གསལ་བའི་ཚད་དཔེར་ན་ཡི་གེ་བྲིས་པས་དབང་པོའི་མངོན་སུམ་དུ་ཅེ་རེ་བལྟར་ཡོད་པ་ལྟར། རྣལ་འབྱོར་གྱི་མངོན་སུམ་དུ་ཝ་ལེར་གསལ་ཀྱང་། རྩོལ་སྒྲུབ་ཀྱི་སྐྱོན་ཡོད་དེ། མཉམ་པ་ཆེན་པོའི་དོན་ལས་གོལ་བས་ན། ཞི་བ་དེ་ཉིད་མཐོང་བ་མེད། །ཅེས་པ་མངོན་སུམ་གྱིས་གཏན་ལ་མི་ཕེབས་པའི་གཏན་ཚིགས་བསྟན་ཏེ། བསྐྱེད་པའི་རིམ་པས་རྟོག་ཚོགས་གནས་གྱུར། ལྷའི་དཀྱིལ་འཁོར་དུ་སྒོམ་པས། ཞི་བ་ཆེན་པོ་ཆོས་ཉིད་ཀྱི་དོན་བྱ་རྩོལ་དང་བྲལ་བའི་དེ་ཁོ་ན་ཉིད་མཐོང་བ་མེད་དོ། །འོ་ན་བསྐྱེད་རིམ་ཐམས་ཅད་དོན་མེད་ཡིན་ནམ་ཞེ་ན། དོན་མེད་པ་མ་ཡིན་ཏེ། རྣམ་གྲངས་བརྒྱ་སྟོང་ཕྲག་ཡངས་པས། ཞེས་པ་འཇུག་སྒོ་གང་ཡང་མ་བཀག་པའི་གཏན་ཚིགས་བསྟན་ཏེ། སེམས་ཅན་གྱི་སེམས་ལ་ཉོན་མོངས་པའི་རྟོག་ཚོགས་མི་འདྲ་བ། བསམ་གྱིས་མི་ཁྱབ་པ་ཡོད་པས་ན། དེའི་གཉེན་པོར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ཕྲག་ཡོངས་སུ་བཤད་དེ་གསུངས་པས། གང་ལྟར་སྤྱོད་ཀྱང་མེ་ཏོག་སྐྱེ། །ཞེས་པ་གཅིག་ཁོ་ནར་མ་ངེས་པའི་གཏན་ཚིགས་བསྟན་ཏེ། རང་རང་གར་མོས་ཀྱི་སྒོར་ཞུགས་ཏེ་ཐད་ཀའི་ལྟ་སྒོམ་ལ་སྤྱོད་པས་ཀྱང་། གནས་སྐབས་ཀྱི་འབྲས་བུ་མེ་ཏོག་དང་འདྲ་བར་སྐྱེའོ། །འོ་ན་འབྲས་བུ་ཀུན་འདྲའམ་ཞེ་ན། །མཚན་མ་མེད་པའི་དབང་གིས་ན། །ཞེས་པ་ཡང་དག་དོན་གྱི་འབྲས་བུ་མི་འབྱུང་བའི་གཏན་ཚིགས་བསྟན་ཏེ། ཆོས་ཉིད་ཕྱོགས་མེད་ཀྱི་རིག་པ་དངོས་མེད་ལ། ཐེག་པ་འོག་མ་པས། ཕྱོགས་གཅིག་ཙམ་གྱི་མཚན་མེད་ལ་གནས་པས་ན། ངལ་བསོ་ཙམ་དུ་རྟོགས་པའི་དབང་གིས་ནའོ། །བསྟི་གནས་དེ་ལས་འབྱུང་མི་འགྱུར། །ཞེས་པ་ཐེག་པ་འོག་མ་པ་ངལ་བསོ་བ་ཙམ་དེ། སྟེགས་འཆའ་བ་ཙམ་གྱི་ལུས་སེམས་ཀྱི་བདེ་བ་གནས་སྐབས་ཀྱི་འབྲས་བུ་ཡིན་པས། རང་གྲོལ་ཆེན་པོ་མ་བཅོས་རང་བྱུང་ཡེ་ཤེས་ཀྱི་འབྲས་བུ་ཕྱོགས་མེད་ཉིད་འབྱུང་བར་མི་འགྱུར་རོ། །དེ་རྣམས་ཀྱི་རྒྱས་གདབ་འགྲེའོ།། ༈ །།ད་ནི་སྐབས་བཅྭོ་བརྒྱད་པ་ལའང་། སྐབས་ཀྱི་དོན་བསྟན་པ། ཆོས་ཉིད་རང་ལ་ཤར་བའི་དགོངས་པ་གཞོན་ནུ་མའི་བདེ་བ་ལྟ་བུ་བརྗོད་པ་དང་བྲལ་བའི་ཀློང་དུ་བསྟན་པ། ལྷུན་གྲུབ་འབྱེད་པ་མེད་པའི་རིགས་པ་བསྟན་པ། སྤྱོད་ཡུལ་ཕྱོགས་མེད་རོལ་པའི་གཏན་ཚིགས་བསྟན་པ་དང་བཞི་ལས། དང་པོ་ནི། རྩོལ་བ་དང་བྲལ་བའི་སྐབས། ཞེས་པ་ཨ་ནུ་ཡོ་ག་མན་ཆད་རྒྱུ་དང་འབྲས་བུ་གཉིས་སུ་རྩོལ། འཁོར་བ་དང་མྱང་འདས་གཉིས་སུ་རྩོལ་ཏེ། ལམ་པའི་ལྟ་སྒོམ་སྤྱོད་པ་དང་འབྲས་བུ་ཆེད་དུ་རྩོལ་བ་དེ་ལས། རྫོགས་པ་ཆེན་པོ་ཨ་ཏི་ཡོ་ག་རྩོལ་བ་དང་བྲལ་བར་བསྟན་པའི་སྐབས་ལ་བབ་བོ། །ཞེས་པ་སྟེ། མདོ་བཅུ་ལས། ཆོས་ཀུན་བྱང་ཆུབ་སེམས་སུ་འདུས། །སེམས་ལ་བརྩལ་དུ་མེད་པའི་ཕྱིར། །རྩོལ་དང་བྲལ་བའི་སྐབས་ཞེས་བྱ། །ཞེས་སོ། །གཉིས་པ་ནི། གླེང་བྲལ་འདི་ལ་གང་གནས་པ། །ཞེས་ཆོས་ཉིད་རང་གི་རིགས་པ་བྱང་ཆུབ་ཀྱི་སེམས་དེ་རྟོགས་རུང་མ་རྟོགས་རུང་། རྒྱུ་རྐྱེན་ལས་ཀ་ནས་མ་བྱུང་སྟེ། འདུས་བྱས་སུ་འགྱུར་མི་སྲིད་པས། དངོས་པོ་གཤིས་ཀྱི་གནས་ལུགས་སོ། །རང་ལས་ཤར་བ་ནི། འཁོར་བ་རང་ལས་མྱ་ངན་ལས་འདས་པར་ཤར་བའམ། བདེ་སྡུག་ལ་སོགས་པ་གཉིས་བསྡུས་ཀུན་ཀྱང་དེ་ལྟར་ཤར་བས། རྣམ་རྟོག་རང་ལ་ཆོས་སྐུར་ཤར། རིག་པ་རང་ལས་འཁོར་འདས་སུ་ཤར་བས། གཉིས་སུ་མེད་པའི་དགོངས་པ་ཆོས་ཉིད་ཀྱི་ཀློང་ངོ་། །གཞོན་ནུ་མའི་བདེ་བ་ལྟ་བུར་ནི། ཉམས་སུ་མྱོང་ཡང་སྨྲ་མི་ཤེས་པའི་དཔེ་སྟེ། ཆོས་ཉིད་མཚོན་དུ་མེད་པའི་ཀློང་ལ། རིག་པ་བདེ་བླག་ཆེན་པོར་གནས་པས་བརྗོད་པ་དང་བྲལ་བའི་དབྱིངས་ལ། ཐམས་ཅད་ཤར་ཞིང་དེ་རུ་གྲོལ་བའི་ཀློང་ངོ་། །དེ་ལ་ཡུལ་དང་ཡུལ་ཅན་གཉིས་སུ་མེད་པས་ལྷུན་གྲུབ་འབྱེད་པ་མེད་པའི་རིགས་པ། སྣང་བ་བརྒྱ་ཡན་ཡིན་པས་སྤྱོད་ཡུལ་ཕྱོགས་མེད་དུ་འཆར་བའི་གཏན་ཚིགས་བྱུང་ངོ་། །དེས་ན། གླེང་བྲལ་འདི་ལ་གང་གནས་པ། །ཞེས་པ་ཆོས་ཉིད་ཕྱི་ནང་མེད་ཅིང་སྨྲ་བརྗོད་དང་བྲལ་བའི་དོན། འདོད་པ་མེད་པར་རང་གི་རྒྱུད་ལ་ཤར་ཏེ། གོ་བ་ཀླུངས་སུ་གྱུར་ནས་ཆོས་ཉིད་མཉམ་པ་ཉིད་ལ་རིག་པ་བདེ་བླག་ཆེན་པོར་གནས་པས་ན། རྣལ་འབྱོར་འདི་ནི་སྐལ་པ་བཟང་ཞེས་པ་ཡེ་ནས་ཡོད་པའི་དགོངས་པ་སྟེ། ཆོས་ཉིད་རྣལ་མལ། རིག་པ་བཏང་བཞག་མེད་པར་འབྱོར་པས། ལུས་མི་ཡིན་ཀྱང་། སེམས་ཡེ་སངས་རྒྱས་པ་ཡིན་ཏེ། ཤིན་ཏུ་རྣལ་འབྱོར་རོ། །སྐལ་པ་བཟང་པོ་ནི། དུས་ཕྱི་མ་ལ་མི་ལྟོས་ཏེ། ཕུགས་ཐག་ད་ལྟར་གྱི་སྣང་བ་ལ་ཆོད་ནས། རྟོག་གྲོལ་ཐར་པ་མཆོག་ཉིད་དུས་གཅིག་ཏུ་ཤར་ནས་ཡེ་སངས་རྒྱས་པར་མངའ་བརྙེས་པས་བསྐལ་པ་བཟང་ངོ་། །དགོངས་པ་དེའི་སྐྱོན་བསལ་འདྲ། གསུམ་པ་ནི། བདག་དང་གཞན་དོན་མི་འབྱེད་པས། ཞེས་པ་གཞི་ངོ་བོ་དོན་བདག་ཉིད་མཉམ་པ་ཆེན་པོའི་རང་བཞིན་ལ། བདག་ཆོས་སྐུ་མཉམ་པ་ཉིད་ལ་གནས་པ་དང་། གཞན་གཟུགས་སྐུ་རྣམ་པ་གཉིས་ཀྱིས་འགྲོ་བ་སེམས་ཀྱི་དོན་མཛད་པ་དང་། བདག་སེམས་ཅན་གྱི་ལས་དང་། གཞན་སངས་རྒྱས་ཀྱི་མཛད་སྤྱོད་གཉིས་ཀ །ཆོས་ཉིད་ཡུལ་མེད་དུ་ཤར་བས་དུས་དང་རྣམ་པ་ཐམས་ཅད་དུ་དབྱེར་མེད་དོ། །བཞི་པ་ནི། སྒྱུ་མ་ལྷུན་གྲུབ་ཡུལ་ལ་རོལ། ཞེས་པ་བྱང་ཆུབ་སེམས་གཞི་ངེས་མེད་རོལ་པ་ཕྱོགས་མེད་ཅིར་ཡང་འཆར་ཏེ་མཐའ་མ་སྤངས་རང་སར་གྲོལ་བས། སྐྱེ་མེད་དུ་ལྷུན་གྱིས་གྲུབ་སྟེ། རིག་པ་ཡུལ་མེད་ཆོས་ཉིད་སྐྱོན་བྲལ་ལ། སྤྱོད་ཡུལ་ཕྱོགས་མེད་དུ་རོལ་ལོ། །དེ་བཞིའི་རྒྱས་གདབ་འགྲེའོ།། ༈ །།ད་ནི་སྐབས་བཅུ་དགུ་པ་ལའང་། སྐབས་ཀྱི་དོན་བསྟན་པ། སྣང་བ་ཡོངས་སུ་རྫོགས་པའི་དགོངས་པ་ནམ་མཁའ་དྭངས་པའི་དཀྱིལ་ལྟ་བུར་འཕོ་འགྱུར་མེད་པའི་ཀློང་དུ་བསྟན་པ། རང་བྱུང་ཡེ་ཤེས་ལྷུན་གྱིས་གྲུབ་པའི་རིགས་པ་བསྟན་པ། ངོ་བོ་འདི་ཞེས་མཚན་པ་ལས་འདས་པའི་གཏན་ཚིགས་བསྟན་པ་དང་བཞི་ལས། དང་པོ་ནི། ཆོས་ཉིད་ཀུན་ཏུ་མི་འགྱུར་བའི་སྐབས། ཞེས་པ་ཆོས་ཉིད་ནི། རྟོགས་རུང་མ་རྟོགས་རུང་གཞི་ཕྱི་མོ་ཡེ་ནས་མ་བསླད་པར་འདུས་མ་བྱས་པའི་ཆོས་ཉིད་དོ། །ཀུན་ཏུ་མི་འགྱུར་བ་ནི། འདས་མ་འོངས་ད་ལྟར་ལ་སོགས་ཏེ། དུས་དང་གནས་སྐབས་ཀུན་ཏུ། རྒྱུ་རྐྱེན་གཉེན་པོ་གང་གི་དབང་དུ་ཡང་མི་འགྱུར་བར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ལ་འགྱུར་བ་མེད་པའི་ཕྱིར། །ཆོས་ཉིད་མི་འགྱུར་སྐབས་ཞེས་བྱ། །ཞེས་སོ། །གཉིས་པ་ནི། ལྷག་མ་མེད་པར་ཡོངས་སུ་རྫོགས། །ཞེས་པ་སྣང་བ་མ་དག་པ་ནི། འཁྲུལ་པའི་སྣང་བ་སྐྱེ་བོ་རང་ཀ་མ། ལོག་ལྟའི་སྣང་བ་མུ་སྟེགས་རྟག་ཆད་གཉིས། ལམ་པ་ཕྱོགས་འཛིན་གྱི་སྣང་བ་ཐེག་པ་རིམ་བརྒྱད་ཀྱི་ལྟ་སྒོམ། བདེ་གཤེགས་ཡེ་ཤེས་ཀྱི་སྣང་བ་རྟོགས་གོམས་ལས་བྱུང་བའི་སངས་རྒྱས་ཏེ། སྣང་བ་རྣམ་པ་བཞི་པོ་དེ་ཡང་དག་པར་རྫོགས་ནས། ཨ་ཏི་ཡོ་ག་རང་རིག་གཉིས་སུ་མེད་ཅིང་མི་འགྱུར་བས་གནས་ལུགས་མ་བཅོས་པའི་སྣང་བ། ཡོངས་སུ་རྫོགས་པའི་དགོངས་པ་དམ་པ་ཆོས་ཉིད་ཀྱི་ངང་ངོ་། །ནམ་མཁའ་དྭངས་པའི་དཀྱིལ་ལྟ་བུར་ནི་ཡོངས་ལ་ཁྱབ་ཅིང་ཕྱོགས་རིས་དང་བྲལ་ཏེ་ངོས་བཟུང་མེད་པར་སང་ངེ་བའོ། །འཕོ་འགྱུར་མེད་པའི་ཀློང་ནི་འདུས་མ་བྱས་པ་ཡིན་པས་གཉེན་པོས་མི་འཇིག་སྟེ། འཇིག་འབྲལ་མེད་པའི་ངང་ལས་ཐམས་ཅད་ཤར་ཞིང་དེར་གྲོལ་བའི་ཀློང་ངོ་། །དེ་རྒྱུ་རྐྱེན་གྱིས་མ་བསྐྱེད་པས་རང་བྱུང་ཡེ་ཤེས་ལྷུན་གྱི་གྲུབ་པའི་རིགས་པ། དེ་ལ་དམིགས་སུ་མེད་པས་འདི་ཞེས་མཚོན་པ་ལས་འདས་པའི་གཏན་ཚིགས་བྱུང་ངོ་། །དེས་ན་ཚིག་གི་དོན། ལྷག་མ་མེད་པར་ཡོངས་སུ་རྫོགས། །ཞེས་པ་མ་འདྲེས་ཡོངས་རྫོགས་ཀྱི་དགོངས་པ་བསྟན་ཏེ། གང་རྫོགས་ན་སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ལྷག་མ་མེད་པར་ཡོངས་སུ་རྫོགས་སོ། །ཞེས་བྱའོ། །གང་དུ་རྫོགས་ན་གཞི་ངོ་བོ་དོན་བདག་ཉིད་མཉམ་པ་ཉིད་ཐིག་ལེ་ཉག་གཅིག་གི་ཀློང་དུ་ཡོངས་སུ་རྫོགས་སོ་ཞེས་བྱ། ཇི་ལྟར་རྫོགས་ན། འགྱུར་བ་མ་ཡིན་དྲང་པོར་གནས། ། ཞེས་པ་བསླུ་བྲིད་མེད་པའི་དགོངས་པ་བསྟན་ཏེ། དེས་ན་ཆོས་ཉིད་དེ་རྒྱུ་རྐྱེན་གཉེན་པོ་ཐམས་ཅད་དང་བྲལ་བས་འཕོ་འགྱུར་མེད་ཅིང་མཉམ་པ་རིས་མེད། ཆོས་ཉིད་ཕྱོགས་མེད་ལས་མ་གཡོས་པར། འཁོར་འདས་སམ་ཕྱི་ནང་མཐོ་དམན་མེད་དེ། ཀུན་ལ་ཡ་ཡོ་མེད་ཅིང་། གཉིས་མེད་དྲང་པོར་གནས་སོ། །འོ་ན་དེ་ཉིད་དཔེ་ཅི་དང་འདྲ་བར་རྫོགས་ཤེ་ན། ནམ་མཁའ་བཞིན་དུ་མཐའ་མཉམ་ཞིང་། ཞེས་པ་དཔེ་དོན་གཉིས་སུ་མེད་པའི་དགོངས་པ་སྟེ། ནམ་མཁའ་ནི་ཕྱོགས་རིས་དང་མཐའ་དབུས་ཀྱི་ཕྱོགས་མེད་ཡིན་ཀྱང་། མཐའི་དངོས་པོ་ཐམས་ཅད་ལ་མ་ཁྱབ་པ་མེད་པ་བཞིན་དུ། ཆོས་ཉིད་མཉམ་པ་ཉིད་ནམ་མཁའ་ལྟ་བུས། ཡ་ཐ་སངས་རྒྱས་ཀྱི་དགོངས་པ་ནས། མ་ཐ་དམྱལ་བའི་གཏིང་ཡན་ཆད། སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ལ། ཕྱོགས་རིས་མེད་པར་ཁྱབ་ལ་གཞན་མེད་པས་ན། གཞན་ལ་ལྟོས་འགྱུར་ཆོས་མ་ཡིན། ཞེས་པ་གཉེན་པོས་གཞིག་ཏུ་མེད་པའི་དགོངས་པ་མ་ནོར་བ་ཉིད་དོ། །དེས་ན་རྫོགས་པ་ཆེན་པོ་ཨ་ཏི་ཡོ་གའི་ལུགས་འདི། ཐེག་པ་འོག་མ་པ་རྒྱུ་རྐྱེན་ལ་ལྟོས་པ་དང་མི་འདྲ་སྟེ། དུས་དང་གཉེན་པོ་གཞན་ལ་མི་ལྟོས་པའི་དཔེས་འབྲས་བུ་མ་བརྩལ་ལྷུན་གྱིས་གྲུབ་པས་རང་ལ་བྱུང་བའོ། །དགོངས་པ་དེའི་སྐྱོན་བསལ་དང་ལ་བཟླ་འདྲ། གསུམ་པ་ནི། ལྷུན་གྱིས་གནས་པས་བདེ་ཆེན་དེ། །ཞེས་པ་ཡང་དག་པར་རྫོགས་པའི་སངས་རྒྱས་ཀྱི་ཆེ་བའི་ཡོན་ཏན་དང་། ཟབ་མོའི་ཆོས་འབྲས་བུ་ལ་རག་མ་ལས་པ་དང་། འཁོར་བའི་སྐྱོན་དང་སེམས་ཅན་གྱི་སྡུག་བསྔལ་མ་ལུས་པ་ཐམས་ཅད། ཐིག་ལེ་ཉག་གཅིག་བྱ་རྩོལ་དང་བྲལ་བའི་ཀློང་དུ་མ་སྤངས་རང་སར་གྲོལ། གཉིས་སུ་མེད་པར་ལྷུན་གྱིས་གྲུབ་ནས་གནས་པས། རྣམ་མེད་རྩོལ་བྲལ་ཟག་པ་མེད་པའི་བདེ་བ་ཆེན་པོ་ཉིད་དེ། མཚུངས་པ་མེད་པའི་ཡེ་ཤེས་ཀྱིས། །ཞེས་པ་ཐུན་མོང་མ་ཡིན་པའི་རིགས་པ་བསྟན་ཏེ། རྫོགས་པ་ཆེན་པོའི་རང་བྱུང་གི་ཡེ་ཤེས་ཆེན་པོ་དེ་ལ་འཁོར་འདས་ཐེག་པ་གང་གིས་ཀྱང་མཚུངས་པར་མི་ནུས་ཏེ། རྟོགས་པས་བོགས་མ་ཐོན། མ་རྟོགས་པས་ངན་དུ་མ་སོང་། བལྟས་པས་ཕྱོགས་རེ་ལས་མ་རྟོགས་ཏེ། རྒྱུ་རྐྱེན་མེད་པར་འཁོར་འདས་ཐམས་ཅད་དུ་རང་ཤར་བས། རང་བྱུང་ཡེ་ཤེས་ཀྱི་སའོ། །རང་གི་མཐུ་ཡིས་རིག་པ་ལས། །ཞེས་པ་ཡུལ་དང་ཡུལ་ཅན་མེད་པའི་རིགས་པ་བསྟན་ཏེ། དེ་ལྟ་བུའི་དོན་དེ་ཡང་ཆོས་ཉིད་རང་གིས་རང་རིག་པའི་མཐུ་ཡིས་སངས་རྒྱས་ཀྱི་དགོངས་པ་རང་ལ་རང་འཆར་བར་རིག་པ་ལགས་ཏེ། ཇི་སྐད་དུ། མངོན་སུམ་རྗེས་དཔག་ཆོས་ཉིད་ཚད་མ་མིན། །གལ་ཏེ་ཡིན་ན་གནས་ལུགས་གཞལ་བྱར་འགྱུར། །ཞེས་སོ། །ཆོས་ནི་གཞན་ལས་འབྱུང་མི་འགྱུར། །ཞེས་པ་ཆོས་ཉིད་སྐྱེ་བ་མེད་པའི་དོན་རང་ལ་བཞག་ནས། ཐེག་པ་འོག་མ་པ་བཞིན་དུ་རྩོལ་སྒྲུབ་བྱས་པས། འབྲས་བུ་གཞན་ནས་འབྱུང་བར་མི་འགྱུར་ཏེ། རིག་པ་ཐུགས་ཀྱི་རྒྱུད་ལས། ཤེས་རབ་རིག་པ་གཞི་ནས་ཤར་བ་ལ། །རྣ་བས་མཉན་ཞིང་ལྕེ་ཡིས་བརྗོད་མི་དགོས། །ཞེས་སོ། །བཞི་པ་ནི། སླ་ཞིང་དཀའ་ལ་དཀའ་ཕྱིར་སླ། །ཞེས་དཔེ་ལ་ལར་སླ་ཕྱིར་དཀའ་ཡང་གསུངས་པ། མན་ངག་ཡིན་ངེས་པའི་གཏན་ཚིགས་ཡིན་ཏེ། ཆོས་ཐམས་ཅད་ཀྱི་དེ་བཞིན་ཉིད་རང་ལ་ཡོད་པ་དང་། འབྲས་བུ་གཞན་ནས་རྩོལ་མི་དགོས་པ་དང་། སྣང་བ་འདི་ཉིད་མ་སྤངས་རང་སར་ཡེ་ནས་གྲོལ་བས་སླ་ཞིང་། ཨ་ནུ་ཡོ་ག་མན་ཆད་ཀྱིས་རང་ལ་ཡོད་ཀྱང་ངོ་མ་ཤེས་པ་དང་། རྩོལ་སྒྲུབ་ལ་སངས་རྒྱས་རེ་བས་དཀའ་ལ། ཨ་ཏི་བསྟན་མ་ཐག་ཏུ་ངོ་ཤེས་པ་དང་། ཡེ་གྲོལ་ཆེན་པོར་སངས་རྒྱས་ཀྱང་ངོས་གཟུང་དང་བྲལ་བས་སླ་ཕྱིར་དཀའ་འོ། །དེ་ཅིས་སླ་བར་ཤིས་ཤེ་ན། མངོན་སུམ་མི་གནས་ཀུན་ལ་ཁྱབ། །ཅེས་པ་དོན་རྒྱས་པར་བཤད་པའི་གཏན་ཚིགས་བསྟན་ཏེ། ཆོས་ཉིད་སྐྱེ་འགག་དང་བྲལ་བ་དེ། དམིགས་པའི་མཐའ་ལས་འདས་ཤིང་། མཚན་མ་མེད་པའི་ཀློང་དུ་ཤར་བས་དབང་པོའི་མངོན་སུམ་ལ་རྫས་ལྟ་བུར་ཡུལ་དང་ཡུལ་ཅན་དུ་མི་གནས་ཀྱང་། ཕྱོགས་དང་རིས་དང་རྒྱ་ཆད་མེད་པས། འཁོར་འདས་ཀུན་ཏུ་ཁྱབ་པ་ཡིན་ནོ། །དེས་ན། མིང་ཙམ་འདི་ཞེས་བསྟན་པ་ནི། ཞེས་པ་མཚོན་བྱ་ལས་འདས་པ་ཆོས་ཉིད་དངོས་ཀྱི་དོན་ཏེ། དངོས་པོ་དང་མཚན་མ་ཕྱོགས་གཅིག་པ་ལྟ་ཅི་སྨོས་ཏེ། ཐོག་མ་ཆོས་ཉིད་ཕྱོགས་མེད་ལ་ཕྱོགས་སུ་གཅིག་པའི་བརྗོད་པ་མིང་ཙམ་ཚིག་ཙམ་དུ་སྨོས་ཏེ་འདི་ཡིན་ནོ་ཞེས། གང་ཟག་གིས་སྟངས་མཚོན་པར་མི་ནུས་པས། རྡོ་རྗེ་སེམས་དཔས་མཚོན་དུ་མེད། །ཅེས་པ་སྟོན་པ་རྡོ་རྗེ་སེམས་དཔའ་ཉིད་ཀྱིས་ཀྱང་ཕྱོགས་གཅིག་ཏུ་མཚོན་དུ་མེད་དེ། གཏེར་གཏད་ལས། གནས་ལུགས་མིང་ལ་མི་གནས་ཤིང་། །རྟོགས་དོན་ལྡོག་ས་ལས་གྲོལ་བས། །དགོངས་པའི་ངོ་བོ་རང་ལ་དྲིས། །བརྡ་རྒྱུད་ཐན་པས་ཅི་ཞིག་སྨྲ། །ཞེས་སོ། །དེ་རྣམས་ཀྱི་རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་པ་ལའང་། སྐབས་ཀྱི་དོན་བསྟན་པ། མཐོང་སྣང་ཐུག་ཕྲད་དུ་འཆར་བའི་དགོངས་པ་ནམ་མཁའ་དང་ཆོ་འཕྲུལ་ལྟ་བུར་རང་བྱུང་ཡེ་ཤེས་ཀྱི་ཀློང་དུ་བསྟན་པ། ཁྱབ་པ་རང་འབྱུང་གི་རིགས་པ་བསྟན་པ། རང་ལ་ཡོད་ཀྱང་མཚོན་དགོས་པའི་གཏན་ཚིགས་བསྟན་པ་དང་བཞི་ལས། དང་པོ་ནི། རྒྱུ་རྐྱེན་ལས་མི་འགྲུབ་པའི་སྐབས། །ཞེས་པ་རྒྱུ་རྐྱེན་འབྲས་བུར་བཏགས་པའི་ཆོས་ཐམས་ཅད་ནི་གློ་བུར་བ་ཡིན་ངེས། འདུས་བྱས་ལ་སངས་རྒྱས་རེ་བ་དེས། ཆོས་ཉིད་འཇིག་འདྲལ་མེད་ཅིང་འདུས་མ་བྱས་པ་དང་། རྒྱུ་རྐྱེན་མེད་ཅིང་རང་བྱུང་གི་དོན་དེ་མི་འགྲུབ་པར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ལ་གཉེན་པོ་མེད་པའི་ཕྱིར། །རྒྱུ་རྐྱེན་བྲལ་བའི་སྐབས་ཞེས་བྱ། །ཞེས་སོ། །གཉིས་པ་ནི། ངོ་མཚར་རྨད་བྱུང་རོལ་པ་འདི། །ཞེས་པ་ལ་སོགས་པས་སྟོན་ཏེ། དབང་མཐོང་སྣང་གི་མིག་གིས་གཟུགས་མཐོང་བ་ལ་སོགས་པ་སྟེ། སྒོ་ལྔ་ཡུལ་དུ་སྣང་ཚོད་དང་བརྟགས་ཚོད། གྲགས་ཚོད་དང་ཤར་ཚོད་འདི་རང་ངོ་། །ཐུག་ཕྲད་ནི་ཚོགས་དྲུག་སྐུ་གསུམ་ཐུག་ཕྲད་དུ་འཆར་བ་ཡིན་ཏེ། གཟུགས་སུ་སྣང་བ་སྤྲུལ་སྐུ་ཐུག་ཕྲད། སྒྲ་རུ་གྲག་པ་ལོངས་སྐུ་ཐུག་ཕྲད། དྲན་རྟོག་ཐམས་ཅད་ཆོས་སྐུ་ཐུག་ཕྲད་དུ་འཆར་བའི་དགོངས་པ་ཆོས་ཉིད་ཀྱི་ངང་ངོ་། །ནམ་མཁའ་དང་ཆོ་འཕྲུལ་ལྟ་བུ་ནི། རང་བྱུང་རང་ཞིའི་དཔེ་ཡིན་ཏེ། འཁོར་འདས་ཀྱི་ཆོས་ཐམས་ཅད་བྱུང་ཡང་རིག་པ་རང་བྱུང་གི་ཡེ་ཤེས་ནམ་མཁའ་ལྟ་བུ་ལས་རང་བྱུང་ལ། ཞི་ཡང་དེ་རང་དུ་ཞི་བས་རང་བྱུང་ཡེ་ཤེས་ཀྱི་ཀློང་ངོ་། །དེ་ཉིད་མཐའ་གང་ལའང་མ་སྤངས་པར་ཁྱབ་པ་རང་བཞིན་གྱི་རིག་པ་ཡེ་ཤེས་ནང་ནས་ཤར་བས་རང་ལ་ཡོད་ཀྱང་མཚོན་དགོས་པའི་གཏན་ཚིགས་ཞེས་བྱའོ། །དེས་ན། ངོ་མཚར་རྨད་བྱུང་རོལ་པ་འདི། །ཞེས་པ་ཆོས་ཉིད་རང་ལ་ཡོད་པས་གཞན་སྒྲུབ་མི་དགོས་པས་ངོ་མཚར་བ་དང་། ཨ་ནུ་མན་ཆད་ཀྱིས་རྟོགས་པར་དཀའ་བས་རྨད་དུ་བྱུང་བ་དང་། ཡོངས་ལ་ཁྱབ་ཅིང་རིས་མེད་པས་གསང་བ་དམ་པའོ། །རོལ་པ་ནི་ཅིར་ཡང་མི་འགག་ལ་རྒྱ་མ་ཆད་པས་ཐམས་ཅད་དུ་ཤར་བ་འདིའོ། །བྱ་བྲལ་ནམ་མཁའ་ཇི་བཞིན་དུ། །ཞེས་པ། དཔེ་དོན་གཉིས་སུ་མེད་པའི་དགོངས་པ་ཆོས་ཉིད་བྱ་བྲལ་གྱི་ངང་ལྷུན་གྲུབ་ཀྱི་འཇིངས་ནམ་མཁའི་ཀློང་དང་འདྲ་བ་ལས། རིག་པ་ཅིར་ཡང་མི་འགག་སྟེ་ཕྱོགས་མེད་དུ་འབྱུང་བའི་དཔེ་ཡང་ནམ་མཁའ་ལ་ཆོ་འཕྲུལ་ཀོག་ལངས་སུ་འབྱུང་བ་ཇི་བཞིན་ནོ། །འོ་ན་ཆོས་ཉིད་དེ་རང་གི་ངོ་བོ་ཇི་ལྟ་བུ་ཞེ་ན། ཅིར་ཡང་མི་དམིགས་གཏི་མུག་ལས། །ཞེས་པ་ཆོས་ཉིད་མི་འབྱེད་པའི་དགོངས་པ། མཉམ་པ་ཉིད་ལ་ཕྱོགས་དང་རིས་སུ་དབྱེར་མེད་པའི་བཟང་ངན་ལེགས་ཉེས། མཐོ་དམན་དང་ཡངས་དོག་མེད་པས་གཉིས་འཛིན་གྱི་སྤྲོས་པ་ཅིར་ཡང་མི་དམིགས་པར། དོན་གྱི་གདེངས་རང་བྱུང་གི་ཡེ་ཤེས་ཆེན་པོ་ལགས་ཏེ། ཐིག་ལེ་དྲུག་པ་ལས། རྣམ་པ་ཅིར་ཡང་མི་འབྱེད་ཡེ་ཤེས་གཏི་མུག་པ། །ཐོགས་མེད་གསལ་བའི་མར་མེ་བསམ་པ་ཀུན་དང་བྲལ། །ཅེས་པས་གསལ་ལོ། །དེ་མ་ཐག་ཏུ་རང་ལས་འབྱུང་། ཞེས་པ་ཧར་ཡ་ཧུར་སྤྲུགས་རིག་པ་ཀོག་ལངས་ཀྱི་དགོངས་པ། གོ་བའམ་བསྟན་པའི་དུས་དེ་མ་ཐག་ཏུ། ཡང་དག་པར་རྫོགས་པའི་སངས་རྒྱས་ཀྱི་ཆེ་བའི་ཡོན་ཏན་ཟབ་མོའི་ཆོས་དང་འབྲས་བུའི་དོན་ཐམས་ཅད་མ་བརྩལ་བཞིན་དུ་རང་ལས་ཕྱོགས་མེད་དུ་འབྱུང་སྟེ། སྐྱོན་ཐམས་ཅད་རང་གྲོལ་དུ་འབྱུང་བས་སོ། །དགོངས་པ་དེའི་སྐྱོན་བསལ་འདྲའོ། །གསུམ་པ་ནི། འདི་ནི་ཐམས་ཅད་མཚུངས་པའི་ལམ། །ཞེས་པ་ཁྱབ་པ་སྤྱིའི་རིགས་པ། ཆོས་ཉིད་སྐྱེ་འགག་མེད་ཅིང་འདུས་མ་བྱས་པའི་དོན་འདི་ནི། ཁམས་གསུམ་གྱི་སེམས་ཅན་ལ་ཚབས་མི་ཆུང་། དུས་གསུམ་གྱི་སངས་རྒྱས་ལ་ཚབས་མི་ཆེ་སྟེ། འཁོར་འདས་ཐམས་ཅད་ཀྱི་ལམ་ཆེན་ནམ། གཤེགས་ཤུལ་ཀྱང་འདི་ཡིན་པས། ཐམས་ཅད་ཐིག་ལེ་གཅིག་ཏུ་དབྱེར་མེད་ཅིང་། མཚུངས་དང་གཅིག་པའི་ཀློང་ལམ་ཆེན་པོའོ། །དེས་ན། འགྲོ་བ་ཀུན་ལ་རང་བཞིན་གནས། །ཞེས་པ་འདུ་འབྲལ་མེད་པའི་རིག་པ། ལས་ནས་ལས་སུ་འགྲོ་བ་ནི། ངན་སོང་གསུམ་སྟེ། སྔར་གྱི་ལས་ངན་པས་ཕྱིས་སྡུག་བསྔལ་གྱི་ཁར་འཁོར་བ་དང་། ཡེ་ཤེས་ནས་ཡེ་ཤེས་སུ་འགྲོ་བ་ནི། ལྷ་དང་མི་སྟེ། སྔར་གྱི་ལས་བཟང་པོས་མཐོ་རིས་སུ་སྐྱེ་ནས། ད་དུང་སངས་རྒྱས་ཀྱི་ས་ལ་འགྲོ་བ་སྟེ། བསྡུས་པར་ཐམས་ཅད་དབྱིངས་ནས་ཤར་ཞིང་དབྱིངས་སུ་འགྲོ་བ་རིགས་དྲུག་པོ་ཀུན་ལ། ཆོས་ཉིད་བྱ་བྲལ་གྱི་ཀློང་ཆེན་པོ་དེ། བཟང་ངན་དང་དབྲི་བསྣན་མེད་པས། ཡེ་ཐོག་མ་ཉིད་ནས་རང་བཞིན་གྱིས་ཁྱབ་པར་གནས་པས་དེ་ཇི་ལྟ་བར་བསྟན་པ་ཙམ་གྱིས་འབྲས་བུ་རང་ལས་འབྱུང་བའོ། །བཞི་པ་ནི། བྱིས་པས་བསླད་པས་འཁྲུལ་པའི་ཕྱིར། །ཞེས་པ་དོན་གང་ལ་དགོངས་པའི་གཏན་ཚིགས་བྱིས་པ་ལ་གཉིས་ཏེ། བརྡ་ལ་ཤེད་མ་ཕྱེ་བའི་བྱིས་པ་སོ་སོའི་སྐྱེ་བོ། དོན་ལ་ཤེས་མ་ཕྱེ་བའི་བྱིས་པ་ཐེག་པ་འོག་མ་པ། ལམ་ལྟ་སྒོམ་ཕྱོགས་རེ་ལ་བརྩལ་བས་ཀྱང་། ཕྱོགས་མེད་ཀྱི་དོན་མ་གོ་སྟེ། རྩོལ་སྒྲུབ་ཀྱིས་བསླད་པས། མཉམ་པ་ཉིད་ཀྱི་ངང་ལ་ཕྱིས་འཁྲུལ་བའི་ཕྱིར་རོ། །འོ་ན་འཁྲུལ་པ་དེ་ལ་སྐྱོན་ཅི་ཡོད་ཅེ་ན། སྨན་ཉིད་སྨན་པ་འཚོལ་བ་བཞིན། །ཞེས་པ་དཔེའི་གཏན་ཚིགས། དཔེར་ན་སྨན་རང་ལ་ཡོད་ཀྱང་སྨན་པས་མ་གཏང་ན་ངོ་མི་ཤེས་པས། སྨན་པ་གཞན་ནས་འཚོལ་བ་བཞིན་དུ། ཆོས་ཐམས་ཅད་ཡེ་སངས་རྒྱས་པ་ཡིན་ཏེ་ཆོས་ཉིད་རང་རང་ལ་མཉམ་པར་ཡོད་ཀྱང་དེའི་དོན་སྟོན་པ་སློབ་དཔོན་ལ་རག་ལས་པ་ཡིན་ནོ། །དེ་བཞིའི་རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་རྩ་གཅིག་པའང་། སྐབས་ཀྱི་དོན་བསྟན་པ། རིག་པ་རང་གྲོལ་གྱི་དགོངས་པ་ནམ་མཁའི་དཀྱིལ་འཁོར་ལྟ་བུར་གདལ་བ་ཆེན་པོའི་ཀློང་དུ་བསྟན་པ། སྣ་ཚོགས་ཀུན་གསལ་ཅིར་ཡང་སྣང་བའི་རིགས་པ་བསྟན་པ། ཕྱི་ནང་སྣོད་བཅུད་ལས་ཆེ་བའི་གཏན་ཚིགས་བསྟན་པ། ཐིག་ལེའི་ངེས་ཚིག་བསྟན་པ་དང་ལྔ་ལས། དང་པོ་ནི། འགྲོ་བ་ཡོངས་ལ་སངས་རྒྱས་པར་བསྟན་པའི་སྐབས། ཞེས་པ་འགྲོ་བ་ནི་རིགས་དྲུག་གོ། །དེར་ཡང་མ་ཟད་དེ་རྒྱལ་འགྲོ་ལམ་པས་བསྡུས་པའི་ཆོས་ཡོངས་ལ་སྤྱི་ཁྱབ་ཏུ་གནས་ཏེ། ཐམས་ཅད་དབྱིངས་སུ་གྲོལ་བའི་ཕྱིར་རོ། །ཡེ་གྲོལ་ཆེན་པོའི་ཀློང་དུ་ཡེ་སངས་རྒྱས་པར་གནས་པས། དེ་ལྟ་བུའི་དོན་ཟབ་མོ་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་གཅིག །རྒྱུད་དྲུག་སྙིང་པོར་སེམས་གཅིག་ཕྱིར། །འགྲོ་ཀུན་སངས་རྒྱས་སྐབས་ཞེས་བྱ། །ཞེས་སོ། །གཉིས་པ་ནི། གོ་བའི་ཡུལ་ན་བདེ་བ་ཆེ། ཞེས་པ་ལ་སོགས་པས་སྟོན་ཏེ། དེ་ཡང་རིག་པ་སྤྱི་ཁྱབ་པ་མ་རྟོགས་རིག་གམ། བསམ་རིག་གམ། ཤེས་རིག་ལྟ་བུ་མ་ཡིན། རྫོགས་པ་ཆེན་པོ་ཨ་ཏི་ཡོ་གའི་ལུགས་ཀྱིས་ཡེ་རིག་ཡེ་ཤར་ཡིན་ཏེ། སེམས་ཅན་ཡེ་ནས་སངས་རྒྱས་སུ་རིག །སྣང་སྟོང་ལ་སོགས་པ་གཉིས་བསྡུས་ཐམས་ཅད་འདྲ་སྟེ། གཞི་ཡེ་ནས་ལྷུན་གྱིས་གྲུབ་པར་རིག །ངོ་བོ་ཡེ་ནས་ངེས་མེད། དོན་ཡེ་ནས་སྐྱེ་མེད། བདག་ཉིད་ཡེ་ནས་ཐོག་མཐའ་དང་བྲལ་བར་རིག །འཁོར་འདས་ཀྱི་ཆོས་ཐམས་ཅད་ཡེ་ནས་རང་གི་བྱང་ཆུབ་ཀྱི་སེམས་སུ་རིག་པས། ཆིག་ཆོད་དེ། རང་གྲོལ་ནི་དེ་ཀ་ལྟར་སེམས་ཅན་སངས་རྒྱས་སུ་གྲོལ་བས་ན་ཀུན་འདྲ་སྟེ། རིག་པ་རང་གྲོལ་གྱི་དགོངས་པ་ཆོས་ཉིད་ཀྱི་ཀློང་ངོ་། །ནམ་མཁའི་དཀྱིལ་ནི་མཐའ་དབུས་མེད་པར་ཁྱབ་ཅིང་གདལ་བ་བཞིན་དུ། ཆོས་ཉིད་བྱ་བྲལ་གྱི་ཀློང་ནི། རྒྱ་གར་ཡང་མ་ཆད་ལ་ཕྱོགས་གང་དུའང་མ་ལྷུང་སྟེ། མཐའ་བྲལ་ཆེན་པོའི་ངང་ལ་ཐམས་ཅད་ཤར་ཞིང་དེ་རུ་འདུས་པའི་ཀློང་ངོ་། །དེ་ལ་མཐའ་ཕྱོགས་གཅིག་པ་གང་ཡང་མེད་པས། སྣ་ཚོགས་ཀུན་གསལ་ཅིར་ཡང་སྣང་བའི་རིགས་པ། ཐམས་ཅད་དེ་ལས་བྱུང་བས་ཕྱི་ནང་སྣོད་བཅུད་ལས་ཆེ་བའི་གཏན་ཚིགས་ཞེས་བྱའོ། །དེས་ན། གོ་བའི་ཡུལ་ན་བདེ་བ་ཆེ། །ཞེས་པ་གོ་བ་དང་སངས་རྒྱས་པ་དུས་མཉམ་པའི་དགོངས་པ། རྫོགས་པ་ཆེན་པོའི་རྣལ་འབྱོར་པས། རིག་པ་ལ་དབང་ཐོབ། སྣང་བ་ལ་འཇལ་སོ་ཚུགས་པས། གོ་བ་ཕྱོགས་མེད་དུ་སྐྱེས་ཙ་ན། ད་ལྟར་གྱི་སྣང་ཚོད་དང་བཏགས་ཚོད། གྲགས་ཚོད་དང་ཤར་ཚོད་ཀྱི་སྤྱོད་ཡུལ་ཝ་ལེ་ཁྱུག་གེར་འདུག་པ་འདི་རང་། བདེ་བ་ཆེན་པོའི་ཞིང་ཁམས་སམ། པདྨ་ཅན་གྱི་ཞིང་ཁམས་སམ། རྣམ་པར་དག་པའི་ཞིང་ཁམས་སམ། འཇིག་རྟེན་འདི་ཉིད་རང་ཡིན་ཏེ། དེ་ཅིས་ན་རྫོགས་པ་ཆེན་པོའི་ལུགས་ཏེ། ཡེ་ཤེས་རྫོགས་པ་ལས། ཡེ་ཤེས་རིག་པའི་འཁོར་ལོ་ལ། །ཅི་ཡང་ཡིན་ནོ་རྣམ་ཀུན་བཅས། །ཞེས་པ་ལྟར་ཅི་ཡང་ཡིན་པའི་གནད་ཀས་སོ། །དེས་ན། འདི་ནི་རྣམ་དག་འཇིག་རྟེན་ཡིན། ཞེས་པ་སྒྲིབ་གཡོགས་མེད་པའི་དགོངས་པ་སྟེ། དེའི་ཕྱིར་སྐྱེ་བོ་རང་ཀ་མས་བཏགས་པའི། མ་དག་འཁྲུལ་བའི་སྣང་བ་འདི་ཉིད་མ་སྤངས་པར། དག་པ་ཡེ་ཤེས་ཀྱི་སྣང་བར་ཕྱོགས་མེད་དུ་ཤར་བས་དངོས་རང་ཡེ་ནས་ཡིན་པས། གང་ལའང་སྐྱོན་མེད་དེ། དེ་ལ་ཕྱོགས་ཀྱི་འོད་འདུས་པས། ཞེས་པ་ཐིག་ལེ་གཅིག་ཏུ་འདུས་པའི་དགོངས་པ་སྟེ། ཆོས་ཉིད་ཐིག་ལེ་ཉག་གཅིག་རྒྱ་གང་དུའང་མ་ཆད། ཕྱོགས་གང་དུའང་མ་ལྷུང་། མཉམ་ཉིད་ཆེན་པོ་དེ་ལ། ཕྱོགས་བཞི་མཚམས་བཞི་སྟེ་བརྒྱད། སྟེང་འོག་གཉིས་ཏེ་བཅུར་རང་གྲགས་པའི་ཆོས་ཐམས་ཅད་མ་སྤངས་ཏེ། ལྷུན་གྱིས་གྲུབ་པར་འདུས་བས་ན། །ཕྱོགས་བཞི་མཚམས་དང་བླ་འོག་འགྲུབ། །ཅེས་པ་ཆོས་ཉིད་རྒྱ་མ་ཆད་པའི་དགོངས་པ་གཞི་ལྷུན་གྲུབ་ཐིག་ལེ་ཉག་གཅིག་ལས་མ་གཡོས་པར་ངོ་བོ་མ་ངེས་རང་བྱུང་གི་ཡེ་ཤེས་རོལ་པ་ཅིར་ཡང་ཤར་བས། ཕྱོགས་བཞི་མཚམས་བཞི་སྟེ་བརྒྱད། སྟེང་འོག་གཉིས་ཏེ་བཅུ་ལ་སོགས་པའི་ཕྱོགས་མཚམས་ཐམས་ཅད་དུ་མ་བརྩལ་བར་རང་ཤར་བས། བླ་འོག་ཕྱོགས་མཚམས་ཀྱི་ཆོས་ཐམས་ཅད་མ་བསྒྲུབས་པར་གྲུབ་པའོ། །དགོངས་པ་དེའི་སྐྱོན་བསལ་བ་འདྲའོ། །གསུམ་པ་ནི། མ་ངེས་འཇའ་ཚོན་ཁ་དོག་ལས། །ཞེས་པ་དཔེ་དོན་གཉིས་མེད་ཀྱི་རིགས་པ། རྫོགས་པ་ཆེན་པོ་ཨ་ཏི་ཡོ་ག་ལ་གཞི་ངེས་མེད་ཀུན་གྱི་དངོས་གཞི་ལ། རོལ་པ་ཅིར་ཡང་འཆར་བས། གཅིག་ཏུ་མ་ངེས་ཏེ། འཁོར་འདས་བདེ་སྡུག་སྐྱོན་ཡོན་ཅིར་ཡང་འཆར་བས། དཔེར་ན་འཇའ་ཚོན་སྣང་ལ་རང་བཞིན་མེད་པ་ལྟར། རོལ་པ་རང་རྒྱུད་པ་མེད་དེ། དེས་ན། རིགས་ཀྱི་ཁྱད་པར་མངོན་པར་སྣང་། །ཞེས་པ་དོན་གཅིག་ཏུ་མ་ངེས་པའི་རིགས་པ་བསྟན་པ། གཞི་མ་ངེས་སྣ་ཚོགས་ནོར་བུ་རིན་པོ་ཆེ་ལྟ་བུ་ལ། འགྲོ་བའི་རིགས་མ་འདྲ་བ་སྣ་ཚོགས་སུ་ཤར་བ་དང་། ཐེག་པའི་ཁྱད་པར་བསམ་གྱིས་མི་ཁྱབ་པ་ཙམ་དུ་འབྱུང་བ་ནི། སྔོན་བྱུང་སངས་རྒྱས་རྣམས་ཀྱིས་གསུངས་པ་དང་། ད་ལྟ་གང་ཟག་གི་བློ་ལ་མངོན་པར་སྣང་བ་འདི་ཉིད་ཡིན་ནོ། །བཞི་པ་ནི། དེ་བཞིན་གཡོ་རྡུལ་མི་གཡོ་བ། །ཞེས་པ། དེ་བཞིན་ཉིད་ཀྱི་དབྱིངས་ལས་མ་གཡོས་པར། གཡོ་བ་ནི་ནང་བཅུད་ཀྱི་སེམས་ཅན་སྐྱེ་ཤི་ལ་སྔས་བཅས་པས་མི་བརྟན་པ་དང་། རྡུ་མི་གཡོ་བ་ནི། ཕྱི་སྣོད་ཀྱི་འཇིག་རྟེན་རྡུལ་ཕྲ་རབ་ལས་གྲུབ་པ་དེ། འབྱུང་བ་རང་རང་གི་མཐུས་མི་འཇིག་སྟེ། མེ་ཡིས་མི་མི་ཚིག །ཆུ་ཡིས་ཆུ་མི་གཤེར་ཀྱང་གཅིག་ལ་གཅིག་འཕངས་པའི་ཚུལ་གྱིས་འཇིག་པ་ནི། ས་ཡིས་ཆུ་འཇིག །ཆུ་ཡིས་མེ་འཇིགས་པ་སྟེ། མེ་བདུན་ཆུ་གཅིག་གི་བསྐལ་པའོ། །དེས་ན་ཕྱི་ནང་སྣོད་བཅུད་གཉིས་ཀྱི་མི་གཡོ་བ་ནི་འབྲས་བུ་ཆོས་ཀྱི་སྐུ་འཕོ་འགྱུར་མེད་ཅིང་ཕྱོགས་མེད་པ་ཡིན། དེའི་ཕྱིར། འབྱུང་བ་ལྔ་པོ་གཙོ་ཆེན་ཡིན། །ཞེས་པ། སེམས་ཉིད་ཐིག་ལེ་ཉག་གཅིག་འབྲས་བུ་ཆོས་ཀྱི་སྐུ་དེ་ནི། འབྱུང་བ་ལྔ་ཡི་སྔོན་རོལ་ནས། སྔ་ཕྱི་ཐོག་མཐའ་མེད་པར་གནས་པས། འཁོར་འདས་སྣོད་བཅུད་ཐམས་ཅད་ཀྱི་གང་ནས། རིག་པ་བྱང་ཆུབ་ཀྱི་སེམས་དེས་ཐམས་ཅད་བསྐྱེད་པས་དོན་གྱི་གཙོ་བོ་ཆེན་པོ་ཡིན་ནོ། །ལྔ་པ་ནི། ཀུན་ཏུ་བཟང་པོའི་ཐིག་ལེ། ཞེས་པ། དང་པོ་རང་བཞིན་ཀུན་ཏུ་བཟང་པོ་བསྟན། གཉིས་པ་རོལ་པ་ཀུན་ཏུ་བཟང་པོ། གསུམ་པ་རང་རིག་ཀུན་ཏུ་བཟང་པོ། བཞི་པ་རང་བྱུང་ཀུན་ཏུ་བཟང་པོ། ལྔ་པ་བྱ་བྲལ་ཀུན་ཏུ་བཟང་པོ། དྲུག་པ་འབྲས་བུ་ཀུན་ཏུ་བཟང་པོ་སོ་སོར་མ་འདྲེས་ཡོངས་རྫོགས་སུ་འདུས་པའོ། །གཞི་ངོ་བོ་དོན་བདག་ཉིད་ཆེན་པོའི་རང་བཞིན་ལ་བཟང་ངན་དང་བླང་དོར་མེད་པས་ཀུན་ཏུ་བཟང་པོ། མ་སྤྲོས་ཀུན་ལ་ཁྱབ་པ་དང་། གདལ་ཁྱབ་ཆེན་པོར་གནས་པས་ན་ཐིག་ལེ་ཞེས་བྱའོ། །དེ་བཞིའི་རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་རྩ་གཉིས་པ་ལའང་། སྐབས་ཀྱི་དོན་བསྟན་པ། ཆོས་ཉིད་སྐྱེ་འགག་མེད་པ་ལ་དུས་གསུམ་མ་དམིགས་པའི་དགོངས་པ་ཆུ་བོ་ལྟ་བུར་རྒྱུན་ཆད་མེད་པའི་ཀློང་དུ་བསྟན་པ། མཉམ་པ་ཉིད་ལ་ཕྱོགས་སུ་བྱ་བརྩལ་དང་བྲལ་བའི་རིགས་པ་བསྟན་པ། ཀུན་ཏུ་བཟང་པོ་ལས་ལྷག་པར་བསྒོམ་དུ་མེད་པའི་གཏན་ཚིགས་བསྟན་པ་དང་བཞི་ལས། དང་པོ་ནི། ཚོགས་འབུལ་པའི་སྐབས། ཞེས་པ། གསང་སྔགས་མ་ཧཱ་ཡོ་གའི་ལུགས་ཀྱིས། འབྱོར་ལྡན་ཡོ་བྱད་ཀྱི་ཚོགས་ཟེར་ནས། ཤ་ཆང་མར་ཁུ་ཛ་གད་ཛ་ཏི། ཞོ་དང་མར་ལ་སོགས་པ་ལ། ཤ་ལྔ་བདུད་རྩི་རྣམ་པ་ལྔ་བྲན་ནས། ཟ་འཐུང་བྱེད་ཅིང་རྔེའུ་ཆུང་བརྡུང་བ་ནི། ཁྱི་རྒན་ཟ་ཚོལ་གྱི་ཚོགས་ཡིན་པས་གོལ་ལོ། །རྫོགས་པ་ཆེན་པོ་ཨ་ཏི་ཡོ་གའི་ཚོགས་ནི། སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་རང་བྱུང་ཡེ་ཤེས་ཀྱི་ཚོགས་ཡིན་ཏེ། དེ་ཡང་ཡིན་ལུགས་ལ་འདི་ཡིན་མེད་པས་གང་ཡང་མི་དམིགས་པའི་དབྱིངས་སུ་མཆོད་པ་འབུལ་བའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ལ་ཚོགས་ཀུན་འདུས་པའི་ཕྱིར། །ཡེ་ཤེས་དག་པའི་ཚོགས་ཆེན་པོས། །ཚོགས་ཆེན་དབུལ་བའི་སྐབས་ཞེས་བྱ། །ཞེས་སོ། །གཉིས་པ་ནི། འདས་དང་མ་འོངས་ད་ལྟར་གྱིས། །ཞེས་བྱ་བ་ལ་སོགས་པས་སྟོན་ཏེ། འདས་པ་ཆོས་ཉིད་སྐྱེ་བ་མེད་པའི་ཀློང་དུ་སྔ་ཕྱི་ཐོག་མཐའ་མེད་པར་གྲོལ་བས། འཁོར་འདས་ཀྱི་ཆོས་ཐམས་ཅད་མི་སྐྱེ། མ་འོངས་པ་མ་ངེས་པའི་ཀློང་ནས་སྔ་ཕྱི་ཐོག་ཐ་མེད་པར་ཤར་བས། འཁོར་འདས་ཀྱི་ཆོས་ཐམས་ཅད་མི་འགག །ད་ལྟ་ལྷུན་གྱིས་གྲུབ་པའི་ངང་ལ་སྔ་ཕྱི་ཐོག་ཐ་མེད་པར་གནས་པས་འཁོར་འདས་ཀྱི་ཆོས་ཐམས་ཅད་ལ་སྐྱེ་འགག་གཉིས་སུ་མེད་དེ། དུས་གསུམ་ཐ་དད་ཀྱི་དམིགས་པ་དང་བྲལ་བའི་དགོངས་པ་ནི་ཆོས་ཉིད་འབའ་ཞིག་གོ། །ཆུ་བོའི་གཞུང་ལྟ་བུ་ནི། རྒྱུན་མི་འཆད་པའི་དཔེ་སྟེ། དུས་གསུམ་མཉམ་པ་ཉིད་རྒྱུན་མི་འཆད་པ་ལ། དུས་གསུམ་ཐ་དད་ལྟར་ཤར་ཞིང་དེ་རུ་གྲོལ་བའི་ཀློང་ངོ་། །དེ་ལ་སོགས་པའི་སངས་རྒྱས་གཞན་ནས་བཙལ་དུ་མེད་པས་མཉམ་པ་ཉིད་ལ་ཕྱོགས་སུ་བྱ་བཙལ་དང་བྲལ་བའི་རིགས་པ། བདག་ཉིད་ཡེ་ནས་སངས་རྒྱས་པས། ཀུན་ཏུ་བཟང་པོ་ལྷག་པར་བསྒོམ་དུ་མེད་པའི་གཏན་ཚིགས་ཞེས་བྱའོ། །དེས་ན། འདས་དང་མ་བྱོན་ད་ལྟར་གྱིས། ཞེས་པ་མ་ཧཱ་ཡོ་ག་ལ་སོགས་པ་འདས་པའི་སངས་རྒྱས་མར་མེ་མཛད། མ་བྱོན་པའི་སངས་རྒྱས་རྒྱལ་བ་བྱམས་པ། ད་ལྟར་གྱི་རྒྱལ་བ་ཤཱཀྱ་ཐུབ་པ། དུས་གསུམ་གྱི་སངས་རྒྱས་རིམ་པར་འདོད་པ་དེ་ལ། ཨ་ཏི་ཡོ་ག་གནས་སམ་ཞེ་ན། ཐ་སྙད་མི་ལ་མི་གནས་ཏེ། །ཞེས་པ། ཨ་ཏི་ཡོ་ག་རྫོགས་པ་ཆེན་པོ་ཆོས་ཉིད་སྔ་ཕྱི་མེད་པ་ལ། དུས་གསུམ་གྱི་སངས་རྒྱས་རིམ་པར་གྲུབ་པ་མེད་དོ། །དེ་མེད་པས་ཐེག་པ་འོག་མ་པ་ལྟར། དུས་གསུམ་ཐ་དད་དུ་འདོད་པའི་ཐ་སྙད་ལ་བློ་མི་གནས་ཏེ་སྔ་ཕྱི་མེད། དེ་ཅིས་མི་གནས་ཞེ་ན། སྐྱེ་འགག་མེད་པར་རྣམ་བརྟགས་ཤིང་། ཞེས་པ་དུས་གསུམ་ཆིག་ཆོད་ཀྱི་དགོངས་པ་སྟེ། འདས་པ་ཆོས་ཉིད་སྐྱེ་བ་མེད་པའི་ཀློང་དུ་སྔ་ཕྱི་ཐོག་མཐའ་མེད་པར་གྲོལ་བ་དང་། མ་འོངས་པ་མ་ངེས་པའི་ཀློང་ན་སྔ་ཕྱི་ཐོག་མཐའ་མེད་པར་འཆར་བ་དང་། ད་ལྟ་ལྷུན་གྱིས་གྲུབ་པའི་ཀློང་ན་སྔ་ཕྱི་ཐོག་མཐའ་མེད་པར་གནས་པ་དང་དུས་གསུམ། སྐྱེ་འགག་མེད་པར་རྣམ་བརྟགས་ཤིང་། །ཞེས་ཏེ། འོ་ན་དུས་གསུམ་འགགས་སམ་ཞེ་ན། དགག་ཏུ་ཡང་མེད་དེ། དེ་ཉིད་དུས་གསུམ་ཆེན་པོར་སྦྱོར། །ཅེས་པ་དུས་གསུམ་ཐིག་ལེར་ཐེག་པའི་དགོངས་པ་སྟེ། ཐིག་ལེ་ཉག་གཅིག་ལ་དུས་གསུམ་ཐ་དད་མེད་དེ། མཉམ་ཉིད་ཆེན་པོ་གཅིག་ཏུ་སྦྱོར་ཞིང་། གཅིག་པོ་ཐ་དད་དུ་མ་འགགས་པས། གསུམ་ལྟར་ཡང་འཆར་ཞིང་སྦྱོར་རོ། །དགོངས་པ་དེའི་སྐྱོན་བསལ་འདྲ། གསུམ་པ་ནི། མཉམ་པས་རིམ་པར་བཀོད་པ་མེད། །ཅེས་པ་དཀྱིལ་འཁོར་རིམ་པར་དགོད་པའི་བྱ་རྩོལ་དང་བྲལ་བའི་རིགས་པ་སྟེ། མ་ཧཱ་ཡོ་ག་དཀྱིལ་འཁོར་རྣམ་པ་བཞི་ལ་བཟང་ངན་གྱི་རིམ་པ་འདོད་པ་ལ། ཨ་ཏི་ཡོ་ག་ཏིང་ངེ་འཛིན་གྱི་དཀྱིལ་འཁོར་བསྐྱེད་མ་བསྐྱེད་དང་། གཟུགས་བརྙན་ལྷའི་དཀྱིལ་འཁོར་བཞེངས་མ་བཞེངས་དང་། རྡུལ་ཚོན་གྱི་དཀྱིལ་འཁོར་བྲིས་མ་བྲིས་དང་། རང་བཞིན་གྱི་དཀྱིལ་འཁོར་སྤྱན་དྲངས་མ་དྲངས་ཡོད་ཚད། ཐིག་ལེ་གཅིག་ཏུ་མཉམ། རྒྱུ་རྐྱེན་འབྲས་བུར་མཉམ་པས། དེ་ཡོ་ལ་མ་ཧཱ་ལྟར་ཆེ་ཆུང་དང་བཟང་ངན་གྱི་རིམ་པ་དགོད་དུ་མེད་དོ། །གཅིག་པས་ཕྱོགས་སུ་བསྔོ་དང་བྲལ། །ཅེས་པ་མཆོད་པ་བསྔོ་བགྲང་དུ་འབུལ་ཞིང་ཕྱོགས་སུ་འཛིན་པའི་བྱ་རྩོལ་དང་བྲལ་བའི་རིགས་པ་སྟེ། སངས་རྒྱས་དང་སེམས་ཅན་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད། རྒྱུ་ཆོས་ཉིད། རྐྱེན་རོལ་པ། འབྲས་བུ་རང་བྱུང་ཡེ་ཤེས་སུ་གཅིག་པས། རིགས་བྱེ་བྲག་གི་ཁྱད་པར་གང་ལའང་མེད་དེ། ཡི་དམ་དང་ལྷ་ཚོམ་བུའི་རྣམ་པ་ལ་དཀྱིལ་འཁོར་གྱི་དཀྱིལ་དུ་འཁོར་ལོའི་ཕྱོགས་སུ་མཆོད་པའི་བསྔོ་བགྲང་དང་བྲལ་བའོ། །ཚོགས་ཀྱི་རྒྱན་རྣམས་བཀྲམ་པ་ཡང་། །ཞེས་པ་ཚོགས་ཆེད་དུ་འགྲིམ་པའི་བྱ་རྩོལ་དང་བྲལ་བའི་རིགས་པ་སྟེ། རྒྱུ་བསོད་ནམས་ཀྱི་ཚོགས་ནི་རྫས་དང་ཡོ་བྱད་ཕུན་སུམ་ཚོགས་པ་ལ་རག་ལས་ཏེ། ཨ་ཏི་ཡོ་ག་འབྲས་བུ་ཡེ་ཤེས་ཀྱི་ཚོགས་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་རང་བྱུང་ཡེ་ཤེས་ཀྱི་ཚོགས། ཆོས་ཉིད་དབྱིངས་ཀྱི་རྒྱན། རིག་པ་ཕྱོགས་མེད་དུ་བཀྲམ་པའོ། །རང་བཞིན་གནས་པ་འགྲིམ་པ་མེད། །ཅེས་པ། མ་ཧཱ་ཡོ་ག་ལྟར་ཨེ་མ་ཧོ་ལ་སོགས་པས་ཆེད་དུ་འགྲིམ་དུ་མེད་དེ། འཁོར་འདས་ཀྱི་ཆོས་ཐམས་ཅད་ཡེ་གདོད་མ་ཉིད་ནས་རང་བཞིན་གྱིས་མ་སྐྱེས་ཤིང་། ཀུན་ལ་ཁྱབ་པར་གནས་པས། རྒྱུ་བསོད་ནམས་ཀྱི་ཚོགས་ལ་རག་མ་ལས་ཤིང་། ཆེད་དུ་འགྲིམ་དུ་མེད་དོ། །ལྷུན་གྱིས་གྲུབ་པས་མི་བསྔོ་ཞིང་། །ཞེས་པས། སྨོན་ལམ་ཆེད་དུ་འདེབས་པའི་བྱ་རྩོལ་དང་བྲལ་བའི་རིགས་པ། ཡང་དག་པར་རྫོགས་པའི་སངས་རྒྱས་ཀྱི་ཆེ་བའི་ཡོན་ཏན་དང་འབྲས་བུའི་ཆོས་དང་། འཇིག་རྟེན་གྱི་ཕུན་སུམ་ཚོགས་པ་ཡང་། ཐིག་ལེ་བྱང་ཆུབ་ཀྱི་སེམས་ལ་མ་བཙལ་བཞིན་དུ་ཡེ་ནས་ལྷུན་གྱིས་གྲུབ་པས། ཐེག་པ་འོག་མ་པ་ལྟར་སྨོན་ལམ་གཞན་དུ་མི་བསྔོ་བ་དེ་ཅིས་ནས་རྫོགས་པ་ཆེན་པོ་ཨ་ཏི་ཡོ་གའི་རྣལ་འབྱོར་པས་ཡེ་གདོད་མ་ཉིད་ནས། འཁོར་བར་འཁྱམས་མ་མྱོང་སྟེ། ལུས་ཀྱང་མི་ལེན་ལ་གནས་ཀྱང་མི་བསྙེག་ཙ་ན། ལྷ་མིའི་གནས་སུ་སྐྱེ་བར་ཤོག་ཅེས་པའི་སྨོན་ལམ་ཞིག་དེ་ལ་དགོས་རྒྱུ་མེད་དོ། །གདོད་ནས་དག་པ་བདུད་རྩི་ཡིན། །ཅེས་པ་བདུད་རྩི་ཆེད་དུ་འབུལ་བའི་བྱ་རྩོལ་དང་བྲལ་བའི་རིགས་པ། ཨ་ཏི་ཡོ་གའི་ལུགས་ཀྱིས། ཡེ་གདོད་མ་ནས་སེམས་རིག་པ་ལ་བག་ཆགས་བསོག་པའི་གནས་མེད་དེ། སྐྱོན་གྱིས་མ་གོས་ཤིང་རྣམ་པར་དག་པ་ཐེག་པ་འོག་མ་པ་ཕྱོགས་འཛིན་གྱི་བདུད་ལ། ཨ་ཏི་ཕྱོགས་མེད་ཀྱི་རྩི་གཏོང་བའི་བདུད་རྩི་ཆེན་པོ་ལ། མ་ཧཱ་ཡོ་ག་དང་ཨ་ནུ་བ་དེ་ལྟར་མ་གོ་སྟེ། ཤིང་གི་ཕྱེ་མ་ལ་མགོ་ནས་ནར་མར་སྒྲུབ་སྟེ། སྨན་གྱི་ཕྱེ་ཚོགས་ལ་འདེབས་པ་དེ་ལ་དགོས་པ་མེད་པར་ལ་བཟླའོ། །བཞི་པ་ནི། འདུ་མཆེད་བཅུ་གཉིས་ཁྱད་པར་ལས། །ཞེས་པ་འདུ་བ་ནི་དབང་པོ་དྲུག །མཆེད་པ་ནི་ཡུལ་དྲུག་ཡིན་ཏེ། མ་ཧཱ་ཡོ་ག་པ་ཡུལ་དྲུག་དབང་པོ་དྲུག་གི་རྟོག་ཚོགས་ལས་ཁྱད་པར་དུ་གྱུར་པ་ནི། གནས་གྱུར་ལྷ་ཡི་དཀྱིལ་འཁོར་བསྒོམ་པ་ཡིན་ཏེ། ལྷག་པའི་བསམ་པས་གཟུང་བ་མེད། །ཅེས་པ། རང་ཡེ་ནས་ཆེ་བའི་གཏན་ཚིགས་རྫོགས་པ་ཆེན་པོ་ཨ་ཏི་ཡོ་གའི་ལུགས་ཀྱིས། ཆོས་ཉིད་ཀུན་ཏུ་བཟང་པོ་རང་ལ་རང་ཆས་སུ་གནས་པས། ཡེ་ཤེས་རང་སྣང་གི་ལྷ་ཡིན་པ་ལ། དེ་ལས་ལྷག་པའི་ལྷ་ཞིག་ལོགས་ནས་བསམ་པ་བཟང་པོས་སྒོམ་དུ་མེད་པར་ལ་བཟླ། གལ་ཏེ་དེ་ལས་གཞན་དུ་སྒོམ་ན་ཡིད་སྨོན་ལམ་བཟང་རྟོག་ཡིན་པས་བྱེ་མ་ལ་གསེར་དུ་སྒོམ་པ་དང་འདྲ་སྟེ། ལྷ་ལ་གྲུབ་པའི་དུས་མེད་པ་ཡིན་ནོ། །རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་རྩ་གསུམ་པ་ལའང་། སྐབས་ཀྱི་དོན་བསྟན་པ། དྲན་རྟོག་ཆོས་ཉིད་དུ་འཆར་བའི་དགོངས་པ་རྒྱལ་པོ་མཐོང་ན་གཉན་པའི་བློ་སྐྱེ་བ་ལྟ་བུར་ཐུག་ཕྲད་ཆེན་པོའི་ཀློང་དུ་བསྟན་པ། སྣང་བ་རང་གྲོལ་གྱི་རིགས་པ་བསྟན་པ། རྫོགས་པ་ཆེན་པོའི་གཏན་ཚིགས་བསྟན་པ་དང་བཞི་ལས། དང་པོ་ནི། རང་བཞིན་གྱིས་ལྷུན་གྱིས་གྲུབ་པའི་སྐབས། ཞེས་པས། མ་ཧཱ་ཡོ་ག་བའི་ཚོགས་ནི། ཛ་གད་ཛ་ཏི་ཟླ་རྒྱས་ཟླ་ཕྲོམ་ལ་སོགས་པ་ཚོམ་བུ་རྒྱན་དུ་འགྲིམས་པས་ན། རྒྱུ་བསོད་ནམས་ཀྱི་ཚོགས་ཡིན་ལ། ཨ་ཏི་ཡོ་ག་སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་རང་བྱུང་ཡེ་ཤེས་ཀྱི་ཚོགས་ཆོས་ཉིད་དབྱིངས་ཀྱི་རྒྱན་ནམ་རོལ་པ་ནི། སྣང་བ་སྣ་ཚོགས་སུ་ཤར་བ་འདི་ཙམ་ན་སྐྱེ་མེད་ཀྱི་རྒྱན་ཡིན་ལ། དེ་ཡང་སྐྱེ་འགག་གཉིས་མེད་དུ་ལྷུན་གྱིས་གྲུབ་ནས་གནས་པར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་དེ་ཡེ་ཤེས་ཤར་བའི་ཕྱིར། །ཚོགས་རྒྱན་ལྷུན་གྱིས་གྲུབ་པའི་སྐབས། །ཞེས་སོ། །གཉིས་པ་ནི། ཡིད་ཀྱིས་བསམ་པ་ཡོན་བདག་སྟེ། བྱ་བ་ལ་སོགས་པས་སྟོན་ཏེ། དྲན་རྟོག་ནི་ཡིད་ལ་ཅི་འགྱུས་ཤིང་། ཚོགས་དྲུག་གིས་གང་དུ་བཏགས་པ་ཐམས་ཅད་ཡིན་ཏེ། དེ་ཅིས་ན། ཨ་ཏི་ཡོ་གའི་ལུགས་ཀྱིས་མིག་གིས་ཅི་མཐོང་ཐམས་ཅད་ཆོས་ཉིད་ཅེར་མཐོང་། ཡིད་ལ་ཅི་བསམ་ཐམས་ཅད་ཡེ་ཤེས་ཀློང་རྡོལ། ལུས་ངག་གིས་ཅི་བྱས་ཐམས་ཅད་ཤུགས་འབྱུང་རང་ཤར་གྱི་ཆོས་ཉིད་ལ། དགོངས་པ་ནི་དེའི་ངང་ལས་མི་འདའ་བས། ཆོས་ཉིད་ཀྱི་ཀློང་ངོ་། །རྒྱལ་པོ་ནི། དཔེར་ན་འཁོར་ལོས་སྒྱུར་བའི་རྒྱལ་པོ་མཐོང་བ་ཙམ་གྱིས་མགོ་ནག་ཕལ་པ་ལས་གཉན་པའི་བློ་སྐྱེ་བ་བཞིན་དུ། ཡུལ་དྲུག་མཐོང་བ་ཙམ་གྱིས་ཐམས་ཅད་ཆོས་སྐུ་ཐུག་ཕྲད་ལས་ཤར་ཞིང་གྲོལ་བའི་ངོ་བོ་ཤེས་པས་ཀློང་ངོ་། །དེ་ལ་ཡུལ་སེམས་གཉིས་སུ་མེད་པས་སྣང་བ་རང་གྲོལ་གྱི་རིགས་པ་། ཐམས་ཅད་དེ་རུ་འདུས་པས་རྫོགས་པ་ཆེན་པོའི་གཏན་ཚིགས་སོ། །དེས་ན། ཡིད་ཀྱིས་བསམ་པ་ཡོན་བདག་སྟེ། ཞེས་པ། ཡིད་ལ་ཅི་བསམ་བློ་ལ་ཅི་ཤར་ཐམས་ཅད་ནི་རང་བྱུང་ཡེ་ཤེས་ཀྱི་གཞི་བྱས་པའི་ཡོན་བདག་སྟེ། དེ་ཅིས་ན། དཔེར་ན་ཡོན་བདག་ནི་རྫས་ཐམས་ཅད་ལ་གཏོར་ཞིང་དབང་སྒྱུར་བ་དང་འདྲ་བར། འཁོར་འདས་ཀྱི་ཆོས་ཐམས་ཅད་རིགས་པ་བྱང་ཆུབ་ཀྱི་སེམས་ཕྱོགས་མེད་དབང་སྒྱུར་བས། རིག་པ་བྱང་ཆུབ་ཀྱི་སེམས་བྱ་བྲལ་གྱི་ཀློང་ཆེན་པོ་དེ་ནི་འཁོར་འདས་ཐམས་ཅད་ཀྱི་ཡོན་བདག་གོ། །དེས་ན། བལྟས་པས་ཚོགས་ནི་བཀྲམ་པ་ཡིན། །ཅེས་པ། ཆོས་ཉིད་ཅེར་མཐོང་གི་དགོངས་པ་དེ། རྫོགས་པ་ཆེན་པོའི་རྣལ་འབྱོར་པས། མིག་གིས་ཅི་མཐོང་ཐམས་ཅད་ཆོས་ཉིད་ཅེར་མཐོང་གི་ལྟ་བ་ཡིན་ཏེ། ཆོས་ཉིད་ཟང་ཐལ་ལ་ཡེ་ཤེས་རང་ཤར་བས། སྣང་སྲིད་ཐམས་ཅད་ཆོས་ཉིད་རིགས་པའི་རྒྱན་དུ་བཀྲམ་པ་ལ། ཡུལ་དང་ཡུལ་ཅན་གཉིས་སུ་གྲུབ་པ་མེད་དོ། །དེའི་སྐྱོན་བསལ་འདྲ། གསུམ་པ་ནི། མཐོང་བར་གྱུར་པས་དངོས་གྲུབ་ལ། །ཞེས་པ། དེས་ན། ཨ་ཏི་ཡོ་ག་པས་མིག་གིས་ཅི་མཐོང་ཐམས་ཅད་ནི། ཆོས་ཉིད་ཟང་ཐལ་གྱི་ལྷ་དངོས་སུ་གྲུབ་པ་དང་། ཡིད་ལ་ཅི་བསམ་ཐམས་ཅད་ཡེ་ཤེས་ཀློང་རྡོལ་གྱི་སྒོམ་པ་དངོས་སུ་གྲུབ་པས་སོ། །ལུས་ངག་གིས་ཅི་བྱས་པ་ཐམས་ཅད་ཤུགས་འབྱུང་རང་ཤར་གྱི་སྤྱོད་པ་དངོས་སུ་གྲུབ་པ་དང་། ཅི་དང་ཅི་རུ་སྣང་བ་ཐམས་ཅད། རང་ཤར་རང་གྲོལ་གྱི་འབྲས་བུ་དངོས་སུ་གྲུབ་པས་ཐེག་པ་འོག་མ་པ་ལྟར་ད་གདོད་བསྒྲུབ་ཏུ་མེད་པར་བསྟན་པ་ནི་དངོས་གྲུབ་ཆེན་པོའོ། །གསང་བ་འདུས་པ་ལས་ཀྱང་། དངོས་གྲུབ་དངོས་གྲུབ་ཅེས་བྱ་བ། །གུད་ན་ཡོད་པ་མ་ཡིན་ཏེ། །དངོས་ནི་རང་གི་བྱང་ཆུབ་སེམས། །གྲུབ་པ་རྟོགས་པ་མངོན་དུ་གྱུར། །དངོས་གྲུབ་ཅེས་ཀྱང་དེ་ལ་བྱ། །ཞེས་གསུངས་སོ། །བཞི་པ་ནི། དེ་ཉིད་མཉམ་བཞག་རྫོགས་པའོ། །ཞེས་པ་སྣང་སྲིད་འཁོར་འདས་ཡོད་མེད་རྟག་ཆད་ཕྱི་ནང་སྣོད་བཅུད་ཀྱི་བསྡུས་པའི་ཆོས་ཐམས་ཅད། གཞི་ངོ་བོ་དོན་བདག་ཉིད་མཉམ་པ་ཆེན་པོའི་རང་བཞིན་དུ་དབྱེར་མེད་པས་མཉམ་བཞག །དེ་ཡང་སྣང་བ་སྟོང་པ་རུ་རྫོགས། སྡུག་བསྔལ་བདེ་བ། སྐྱོན་ཡོན་ཏན། ཆོས་ཅན་ཆོས་ཉིད། སྣང་གྲགས་ཀྱི་ཆོས་ཐམས་ཅད་རིག་པ་ལ་ཕྱོགས་མེད་པར་རྫོགས་པས་ན། རྫོགས་པ་ཆེན་པོ་ཞེས་བྱའོ། །རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་རྩ་བཞི་པ་ལའང་། སྐབས་ཀྱི་དོན་བསྟན་པ། སྦྱོར་བ་བཏང་བཞག་མེད་པའི་དགོངས་པ་ཚ་ལ་དང་གར་སྦྱིན་ལྟ་བུར་འདུ་འབྲལ་མེད་པའི་ཀློང་དུ་བསྟན་པ། དབྱེ་བསལ་བླང་དོར་མེད་པའི་རིགས་པ་བསྟན་པ། དབྱེར་མེད་རང་ཤར་གྱི་གཏན་ཚིགས་བསྟན་པ་དང་བཞི་ལས། དང་པོ་ནི། ལྷུན་གྱིས་གནས་པའི་སྐབས། ཞེས་པ་ཨ་ཏི་ཡོ་གའི་ལུགས་ཀྱིས། རྒྱུ་སེམས་ཅན་གྱི་དུས་ན་འབྲས་བུ་སངས་རྒྱས་ཀྱི་ཡེ་ཤེས་ལྷུན་གྱིས་གྲུབ་ནས་གནས། སྣང་བའི་དུས་ན་སྟོང་པ། སྡུག་བསྔལ་གྱི་དུས་ན་བདེ་བ། ཆོས་ཅན་གྱི་དུས་ན་ཆོས་ཉིད། འཁོར་འདས་ཀྱི་དུས་ནས་རིག་པར་ལྷུན་གྱི་གྲུབ་ནས་གནས་པས། གཉིས་སུ་མེད་པའི་དོན་ཟབ་མོ་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ཉིད་ལྷུན་གྱིས་གྲུབ་པའི་ཕྱིར། །ལྷུན་གྱིས་གྲུབ་པའི་སྐབས་ཞེས་བྱ། །ཞེས་སོ། །གཉིས་པ་ནི། ཡུད་ཙམ་བཟུང་བས་སྦྱོར་བ་ཡིན། །ཅེས་པས་སྟོན་ཏེ། འཁོར་འདས་རྟག་ཆད་ཕྱི་ནང་སྣོད་བཅུད་གཉིས་བསྡུས་ཀྱི་ཆོས་ཐམས་ཅད་གང་སྦྱོར་ན། གཞིའི་དུས་ན་ལྷུན་གྱིས་གྲུབ་པར་སྦྱོར། ངོ་བོ་དོན་བདག་ཉིད་ལ་ཐོག་མཐའ་མེད་པར་སྦྱོར་བས་ན། དོན་གྱི་སྦྱོར་བ་ཆེན་པོ་ཡིན་ཏེ། དེ་ལ་འདུ་འབྲལ་ཀྱང་མེད་ལ། བཏང་བཞག་ཀྱང་མེད་པའི་དགོངས་པ་ཆོས་ཉིད་ཀྱི་ངང་ངོ་། །གར་སྦྱིན་ལྟ་བུ་ནི་རྒྱས་ཐེབས་པའི་དཔེ་སྟེ། དབྱིངས་དང་ཡེ་ཤེས་གཞི་དང་ངོ་བོ་དབྱེར་མེད་ཅིང་འདུ་འབྲལ་མེད་པས། ཐམས་ཅད་དེ་ལས་ཤར་ཞིང་དེ་རུ་གྲོལ་བའི་ཀློང་ངོ་། །དེ་ལ་ཅིར་སྣང་ཆོས་ཉིད་ཡིན་པས། དབྱེ་བསལ་བླང་དོར་མེད་པའི་རིགས་པ། གཅིག་པ་ཀུན་ཏུ་ཤར་བས་དབྱེར་མེད་རང་ཤར་གྱི་གཏན་ཚིགས་ཞེས་བྱའོ། །དེས་ན། ཡུད་ཙམ་བཟུང་བས་སྦྱོར་བ་ཡིན། །ཅེས་པ་ཆོས་ཉིད་སྐྱེ་འགག་མེད་པའི་དོན་འདི་ལ། ཡུན་རིང་པོ་དང་ལྟ་ཅི་སྨོས་ཏེ། སྐད་ཅིག་ཙམ་དུ་རྟོགས་པ་ཕྱོགས་མེད་དུ་ཤར་བས་ཀྱང་། ཆོས་ཉིད་ཕྱོགས་མེད་མཉམ་པ་ཆེན་པོའི་དོན་ལ་སྦྱོར་བ་ཡིན་ཏེ། སྣང་ཞིང་སྲིད་པའི་ཆོས་ཐམས་ཅད། གཞི་ལྷུན་གྱིས་གྲུབ་པ་ལ། འཕོ་འགྱུར་མེད་པར་སྦྱོར་བ་དང་། ངོ་བོ་ངེས་པ་མེད་པ་ལ་ཅིར་ཡང་འཆར་བར་སྦྱོར་བ་དང་། དོན་སྐྱེ་བ་མེད་པ་ལ་གཉིས་སུ་མེད་པར་སྦྱོར་བ་དང་། བདག་ཉིད་ཐོག་ཐ་མེད་པ་ལ་རྒྱུན་མི་འཆད་པའི་ཆོས་ཉིད་དུ་སྦྱོར་བས་ན། སྦྱོར་བ་ཆེན་པོའི་དགོངས་པའོ། །སྐྱོན་བསལ་འདྲ། གསུམ་པ་ནི། དགའ་བར་གྱུར་པ་དམ་ཚིག་སྟེ། ཞེས་ཏེ། ཅིར་སྣང་ཅིར་སྲིད་ཐམས་ཅད་ཆོས་ཉིད་འབའ་ཞིག་ལ། སྐྱོན་ཡོན་དང་བཟང་ངན་གང་དུའང་མི་ལྟ་བས། སྤྱོད་ཡུལ་གང་དུ་ཤར་བ་ཐམས་ཅད་ལ། དགའ་བར་ལྷག་ལྷག་ཤེས་ནས། ཅི་བྱས་ཆོས་ཉིད་ཀྱི་ཀློང་ལས་མི་འདའ་བ་ནི། བསྲུང་མཚམས་དང་འདའ་ཉམས་མེད་པའི་དམ་ཚིག་ཆེན་པོ་ཡིན་ནོ། །བཞི་པ་ནི། ཐབས་ཀྱི་གར་ཐབས་བསྐྱོད་པ་ཡིས། །ཞེས་པ་ཐབས་རང་ཤར་གྱི་གཏན་ཚིགས་གཞི་ལྷུན་གྲུབ་བྱ་བ་མེད་པ་ཐབས་ཀྱི་རྒྱལ་པོ། ངོ་བོ་མ་ངེས་པ་གར་ཐབས་ཕྱོགས་མེད་དུ་བསྐྱོད་པས་ན། གཉིས་མེད་སྦྱོར་བ་ཕུལ་བ་ཡིན། །ཅེས་པ་གཉིས་མེད་ཀྱི་གཏན་ཚིགས་ཏེ། རོལ་པ་ཅི་ཤར་ཐབས་ཡིན་ཏེ། དོན་སྐྱེ་མེད་ལ་འཛིན་པ་མེད་པ་ཤེས་རབ་ཀྱི་རྒྱལ་པོ་བྱ་བྲལ་གྱི་དབྱིངས། འཁོར་འདས་གཉིས་སུ་མེད་ཅིང་མཉམ་པ་ཉིད་དུ་སྦྱོར་བས། སྦྱོར་བ་ཆེན་པོའི་མཆོད་པ་འབུལ་བ་ཡིན་ནོ། །རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་རྩ་ལྔ་པ་ལའང་། སྐབས་ཀྱི་དོན་བསྟན་པ། གཟུང་འཛིན་བྱ་བརྩལ་མེད་པའི་དགོངས་པ་སྐྱི་བསེར་ལྟ་བུར་ཞེན་ཆགས་མེད་པའི་ཀློང་དུ་བསྟན་པ། རྟོགས་པ་བར་ཆད་མེད་པའི་རིགས་པ་བསྟན་པ། བརྗོད་དུ་མེད་པའི་གཏན་ཚིགས་བསྟན་པ་དང་བཞི་ལས། དང་པོ་ནི། ལས་རྒྱ་མཚོའི་སྐབས། ཞེས་པ། མ་ཧཱ་ཡོ་གའི་ཕྲིན་ལས། ཞི་རྒྱས་དབང་དང་མངོན་སྤྱོད་ལ་སོགས་པ་ཐམས་ཅད་ནི། རྒྱ་མཚོའི་ཁའི་ཆུ་བུར་དང་འདྲ་སྟེ། ཡོད་ཡོད་འདྲ་ལ་མེད་པ། བདེན་བདེན་འདྲ་ལ་མི་བདེན་པ། ཨ་ཏི་ཡོ་ག་རྫོགས་པ་ཆེན་པོ་བྱ་བ་མེད་པའི་ཕྲིན་ལས་རྒྱ་མཚོའི་འཇིངས་དང་འདྲ་བ་དེ་ལས་བྱུང་ཞིང་། ཐམས་ཅད་དེ་རུ་འདུས་པར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ལ་རྩོལ་སྒྲུབ་མེད་པའི་ཕྱིར། །ཕྲིན་ལས་རྒྱ་མཚོའི་སྐབས་ཞེས་བྱ། །ཞེས་སོ། །གཉིས་པ་ནི། མི་གཟུང་གཏོང་བས་གཏོར་མ་ཡིན། །ཅེས་པ། རྫོགས་པ་ཆེན་པོ་ཨ་ཏི་ཡོ་གའི་ལུགས་ཀྱིས། འཁོར་འདས་སྣོད་བཅུད་ཀྱིས་བསྡུས་པའི་ཆོས་ཐམས་ཅད། འཛིན་མེད་ཀྱི་རང་ཤར་དུ་བྱུང་བ་ཡིན་ཏེ། སངས་རྒྱས་སུ་མི་འཛིན། སེམས་ཅན་དུ་མི་འཛིན། སངས་རྒྱས་སེམས་ཅན་གཉིས་ཀར་མི་འཛིན། གཉིས་མེད་དུ་མི་འཛིན། མདོར་ན་གང་དུ་ཡང་མི་འཛིན་པས། གཉིས་བསྡུས་ཐམས་ཅད་དེ་ལྟར་དུ་ཤེས་པ་ནི། འཛིན་པ་མེད་པ་ཤེས་རབ་ཀྱི་རྒྱལ་པོ་ཡིན་ཏེ། དེས་ལ་དགག་རྒྱུ་དང་སྒྲུབ་རྒྱུ་ཅི་ཡང་མེད་པས་བྱ་བཙལ་མེད་པའི་དགོངས་པ། ཆོས་ཉིད་ཀྱི་ཀློང་ངོ་། །སྐྱི་བསེར་ལྟ་བུ་ནི་ཞེན་པ་མེད་པའི་དཔེ་སྟེ། ཨ་ནུ་མན་ཆད་ཀྱི་སྤྱོད་ཡུལ་གང་ལ་སྤྱོད་ཀྱང་རང་ཤར་རང་གྲོལ་དུ་ཤེས་པས། གང་ལའང་མ་ཞན་པར་གྲོལ་བའི་ཀློང་ངོ་། །དེ་ལ་ཞེ་འདོད་མེད་པས་རྟོགས་པ་བར་ཆད་མེད་པའི་རིགས་པ། དེ་ལ་ཐ་སྙད་མེད་པས་བརྗོད་དུ་མེད་པའི་གཏན་ཚིགས་སོ། །དེས་ན། མི་གཟུང་གཏོང་བས་གཏོར་མ་ཡིན། །ཞེས་པ་ཡེ་ཤེས་སྦྱིན་གཏོང་ཕྱོགས་མེད་དུ་གཏོང་བའི་དགོངས་པ། རྫོགས་པ་ཆེན་པོ་ཕྱོགས་རིས་དང་བྲལ་བའི་སྦྱིན་གཏོང་ཆེན་པོ་ནི། གཞི་ཕྱོགས་མེད་ལ་ཕྱོགས་སུ་མི་གཟུང་། ངོ་བོ་ངེས་མེད་ལ་མཐའ་རུ་མི་གཟུང་། དོན་སྐྱེ་མེད་ལ་གཉིས་སུ་མི་གཟུང་། ཆོས་ཉིད་མུ་མཐའ་མེད་པ་ལ། རིག་པ་གང་དགར་གཏོང་ཞིང་། ཕྱོགས་དང་རིས་སུ་མི་འཛིན་པ་ནི། ཡེ་ཤེས་ཀྱི་སྦྱིན་གཏོང་ཆེན་པོ་ཕྱོགས་རིས་མེད་པར་བཏང་བའོ། །བྱ་བ་མེད་པའི་ལས་རྣམས་ཏེ། ཞེས་པ་ཕྲིན་ལས་དུས་གཅིག་ཏུ་ཟིན་པའི་དགོངས་པ་སྟེ། སེམས་ལ་གཟུང་འཛིན་བྱ་རྩོལ་རྩྭ་རྩེ་ཙམ་ཡང་མེད་པར་གོ་ན། འདི་དང་ཕྱི་མའི་ཕྲིན་ལས་ཐམས་ཅད་དུས་གཅིག་ལ་འགྲུབ་སྟེ། ཅི་ཡང་བྱ་མི་དགོས་པའི་གནད་ཀྱིས་སོ། །སྐྱོན་བསལ་འདྲ། གསུམ་པ་ནི། མི་རྟོག་ཡེ་ཤེས་བགེགས་བསལ་ནས། །ཞེས་པ་མཚམས་ལ་བར་ཆོད་མེད་པའི་རིགས་པ། ཨ་ཏི་ཡོ་གའི་ལུགས་ཀྱིས། གཞི་ཕྱོགས་མེད་ལ་ཕྱོགས་འཛིན་དུ་མི་རྟོག །ངོ་བོ་ལ་མཐར་མི་འཛིན། དོན་ལ་གཉིས་འཛིན་གང་དུའང་མི་རྟོག་སྟེ། རྣམ་པར་མི་རྟོག་རང་བྱུང་ཡེ་ཤེས་ཆེན་པོ་དེས། ཕྱིའི་བགེགས་བགེགས་རིགས་སྟོང་ཕྲག་བརྒྱད་ཅུས་ཚེ་ལ་བར་དུ་གཅོད། ནང་གི་བགེགས་ཉོན་མོངས་དུག་ལྔ་དང་དུག་གསུམ་གྱིས་རྟོགས་པ་ལ་བར་དུ་གཅོད་པ་ཐམས་ཅད་ཕྱི་ནང་མེད་ཅིང་མཉམ་ཉིད་ཆེན་པོ་དུས་གཅིག་ལ་རང་ཤར་ཏེ་གཉིས་སུ་མེད་པར་རང་གསལ་བའོ། །དེ་ལྟར་མ་ཤེས་ན། བགེགས་ཡུལ་དང་ཡུལ་ཅན་དུ་བཟུང་ནས་བསྐྲད་སྐད་ཀྱང་། རང་ལས་བྱུང་བའི་རོལ་པ་ཡིན་པས། གཞན་དུ་འགྲོ་ས་མེད་དོ། །བཞི་པ་ནི། མི་གསུངས་མཉམ་ཉིད་སྔགས་ཚིག་གོ། །ཞེས་པ་ཆོས་ཉིད་སྨྲ་བརྗོད་དང་བྲལ་བའི་ཀློང་ན་རིག་པ་བདེ་བླག་ཆེན་པོར་གནས་ན། དེ་ཁོ་ན་དོན་གྱི་སྔགས་ཚིག་གི་བཟླས་པ་མ་ནོར་བ་ཡིན་པས། སེམས་མཉམ་པ་ཉིད་ལ། མཐའ་རུ་འཛིན་པའི་ཐ་སྙད་མེད་ན། ཧཱུྃ་དང་ཕཊ྄ཿཀྱི་བཟླས་པ་བྱ་མི་དགོས་སོ། །རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་རྩ་དྲུག་པ་ལ་ཡང་། སྐབས་ཀྱི་དོན་བསྟན་པ། འཁོར་གསུམ་ཡོངས་སུ་དག་པའི་དགོངས་པ། ཤེས་སྒོང་གཡའ་དག་པ་ལྟ་བུ་དྲི་མ་མེད་པའི་ཀློང་དུ་བསྟན་པ། ངོ་བོ་འདི་ཡིན་དུ་མི་རྟོག་པའི་རིགས་པ་བསྟན་པ། ཆགས་ན་འཆིང་བའི་གཏན་ཚིགས་བསྟན་པ་དང་བཞི་ལས། དང་པོ་ནི། བདག་དང་བཅས་པས་གཏོར་མ་འཆིང་བའི་སྐབས། །ཞེས་པ་གང་ལ་བདག་འཛིན་ཡོད་ན་དེ་ལ་འཆིང་བ་ཡོད་དེ། ཐེག་པ་འོག་མ་སྦྱིན་གཏོང་ཅི་བྱས་པ་ཐམས་ཅད་དངོས་པོའམ་མཚན་མ་ཅན་དུ་སོང་བས། ཞེན་པ་དེ་དང་མ་བྲལ་ན་སླར་ལ་འཆིང་བར་སྟོན་པའི་སྐབས་ལ་བབ་བོ། །ཞེས་པ་སྟེ། ཆོས་ཀུན་བྱང་ཆུབ་སེམས་སུ་འདུས། །སེམས་ཉིད་ཆགས་ཤིང་གཡོ་མེད་ལ། །མ་ཆགས་མི་གཡོའི་སེམས་མེད་པས། །འཆིང་བ་ཆེན་པོའི་སྐབས་ཞེས་བྱ། །ཞེས་སོ། །གཉིས་པ་ནི། བླ་མ་མཆོད་དང་གཏོང་བ་དང་། །ཞེས་པས་སྟོན་ཏེ། ཡར་ལ་བླ་མ་དང་དཀོན་མཆོག་མཆོད་པ་དང་། མར་ལ་སྦྱིན་གཏོང་རྒྱ་ཆེ་ཆུང་གང་བྱེད་ཀྱང་། གཏོང་བའི་བདག་དང་གཅིག །དམིགས་པའི་ཡུལ་དང་གཉིས། གཏང་བར་བྱ་བའི་རྫས་དང་གསུམ་ཀ་མི་དམིགས་ཏེ། དམིགས་པའི་ཡུལ་ལས་འདས་པར་བསྟན་པས། འཁོར་གསུམ་ཡོངས་སུ་དག་པ་ཆོས་ཉིད་ཀྱི་ཀློང་ངོ་། །ཤེས་སྒོང་གཡའ་དག་པ་ལྟ་བུ་ནི། ཕྱི་ནང་མེད་ཅིང་དྲི་མས་མ་གོས་པའི་དཔེ་ཡིན་ཏེ། འཇིག་རྟེན་ཆོས་བརྒྱད་ཀྱི་དྲི་མ་མེད་པར་གོ་བ་ལ། ཡོན་ཏན་ཐམས་ཅད་འབྱུང་ཞིང་དེ་རུ་འདུས་པའི་ཀློང་ངོ་། །དེ་ལ་ཚད་གཟུང་མེད་པ་ནི། །ངོ་བོ་འདི་ཡིན་དུ་མི་རྟོག་པའི་རིགས་པ། ཡུལ་དང་ཡུལ་ཅན་དུ་འཛིན་པའི་འཁྲུལ་པ་ཆགས་ན་འཆིང་བའི་གཏན་ཚིགས་ཞེས་བྱའོ། །དེས་ན། བླ་མ་མཆོད་དང་གཏོང་བ་དང་། །ཞེས་པ། ཡོན་ཏན་ལ་ཡར་བལྟས། གཏོང་བ་ལ་མར་བལྟས་གཉིས་འཛིན་གྱི་དགོངས་པ་ཡིན་ཏེ། བླ་མ་ལ་གཉིས། དོན་གྱི་བླ་མ་དང་རྟགས་ཀྱི་བླ་མའོ། །དོན་གྱི་བླ་མ་ནི་སེམས་ཅན་རང་རང་གི་རིག་པ་ཐིག་ལེ་ཉག་གཅིག་བྱང་ཆུབ་ཀྱི་སེམས་ཡིན་ནོ། །དེ་གང་གིས་མཆོད་ན། གོ་བ་ཀློང་དུ་གྱུར་ན་རྟོགས་པ་ཉི་མ་ཤར་བ་ལྟ་བུའི་སྒོ་ནས་མཆོད་པ་ཡིན། རྟགས་ཀྱི་བླ་མ་ནི། བདག་ལ་ལུང་དང་མན་ངག་གི་དོན་མ་ནོར་བར་སྟོན་པའི་དགེ་བའི་བཤེས་གཉེན་ཡིན་པས། དེ་ཡང་མཆོད་ལུགས་གཉིས་ཏེ། ཆོས་ཀྱི་མཆོད་པས་རྒྱུད་བཟུང་བ་དང་། ཟང་ཟིང་གི་མཆོད་པས་རྒྱུད་ཚིམ་པར་བྱ་བའོ། །དང་པོ། བླ་མས་ཇི་ལྟར་བསྟན་པའི་བཀའ་སྲོལ་མ་ནོར་བར་གཞན་ལ་སྟོན་ཤེས་པས་ན། བླ་མའི་ཐུགས་རྒྱུད་བཟུང་བར་འགྲོ་བས། བླ་མ་མཉེས་པ་རབ་ཡིན་ནོ། །གཉིས་པ་ནི། བརྒྱད་ཅུ་པ་ལས་ཀྱང་། རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་འབུལ། །ཞེས་པའོ། །དེ་ཡང་རབ་ཤེས་རབ་ཀྱིས་མ ཉེས་པ། འབྲིང་གུས་ཚུལ་གྱིས་མཉེས་པ། ཐ་མ་ཟང་ཟིང་ནོར་གྱིས་མཉེས་པར་བྱའོ། །དེར་ཡང་མ་ཟད་དེ། ཡར་ལ་དཀོན་མཆོག་མཆོད་པ་དང་། མར་ལ་སྙིང་རྗེ་བ་རྣམས་ལ་སྦྱིན་གཏོང་སྐྱབས་དང་ཟང་ཟིང་ཆོས་ཀྱི་སྦྱིན་པ་གསུམ་ལས་གང་བྱེད་ཀྱང་ངོ་། །དེ་བཞིན་བསོད་ནམས་ཐམས་ཅད་ཀྱང་། །ཞེས་པ། ལྟ་བ་སྲོག་དང་ལྡན་པའི་དགོངས་པ་སྟེ། ལར་བསོད་ནམས་རང་ལ་ཐུན་མོང་དང་། ཐུན་མོང་མིན་པ་གཉིས་ལས། རང་དང་གཞན་གྱི་བསོད་ནམས་གླང་པོ་ཆུ་ཆོད་ཁ་ལན་ངོ་སྲུང་མེད་པའོ། །དེ་ཡང་མ་ཟད་གཞན་གྱི་འདུས་བྱས་ཀྱི་དགེ་རྩ་བྱའོ་ཅོག་ལ་ཟེར། དེ་ཡོ་གོང་དུ་བསྟན་པ་བཞིན་འཁོར་གསུམ་ཡོངས་དག་གི་རྩིས་ཟིན་དགོངས་པས་ན་མི་དམིགས་པར་ཤེས་པའོ། །སྐྱོན་བསལ་འདྲ། གསུམ་པ་ནི། མ་ཆགས་མི་གཡོའི་སྟོབས་མེད་ན། །ཞེས་པ་ཆེད་དུ་བྱ་བ་མེད་པའི་རིགས་པ་སྟོན་ཏེ། དེ་གང་ལའང་མ་ཆགས་པའི་ལྟ་བ་རྟོགས་པ་དང་། མི་གཡོ་བའི་དགོངས་པ་བརྟན་པ་དང་། མི་དམིགས་པའི་སྦྱིན་སྟོབས་ལྡན་པ་དང་། ཕྱོགས་མེད་ཀྱི་ཉམས་མྱོང་གསལ་བ་དང་བཞི་མེད་ན་མི་གྲོལ་ཞེས་པའོ། །དེས་ན། བཞི་པ་ནི། བྱས་ན་འཆིང་བ་ཆེན་པོར་འགྱུར། །ཞེས་པ། འདུས་བྱས་ཀྱི་དགེ་རྩ་གང་ལ་ཡང་། ངས་བྱས་དང་རློམ་སེམས་དང་། ཕྱོགས་འཛིན་གྱིས་བྱས་ན་སླར་ལ་འཆིང་བ་ཆེན་པོར་འགྱུར་ལ། ངས་བྱས་དང་རློམ་སེམས་ཕྱོགས་སུ་འཛིན་པ་མེད་ན་མ་བྱས་ཀྱང་གྲོལ་བ་ཆེན་པོར་འགྱུར་རོ། །རྒྱས་གདབ་འགྲེའོ།། ༈ །།ད་ནི་སྐབས་ཉི་ཤུ་རྩ་བདུན་པ་ལའང་། སྐབས་ཀྱི་དོན་བསྟན་པ། ལུང་ཆེན་སྒྲོག་གྲོལ་གྱི་དགོངས་པ་གྱི་ལིང་སྒྲོག་བཀྲོལ་བ་ལྟ་བུ་ཡན་པ་ཆེན་པོའི་ཀློང་དུ་བསྟན་པ། གནས་སྐབས་འདྲ་གཞི་དང་ནོར་བའི་རིགས་པ་བསྟན་པ། འདོད་པ་ཐོག་ཏུ་མ་ཕེབས་པའི་གཏན་ཚིགས་བསྟན་པ། ཐིག་ལེའི་ངེས་ཚིག་བསྟན་པ་དང་ལྔ་ལས། དང་པོ་ནི། ལུང་འགྲེལ་བ་མིང་ཙམ་བརྡར་བསྟན་པའི་སྐབས། །ཞེས་པ། ལུང་གིས་གཏན་ལ་འབེབས་པའི་དྲང་ལུང་དང་། མངོན་དུ་ཕྱུང་བའི་དྲང་ལུང་ཐམས་ཅད། ཨ་ཏི་ཡོ་ག་རྫོགས་པ་ཆེན་པོ་རྣ་བརྒྱུད་ཟབ་མོའི་ངེས་ལུང་ཕྱོགས་མེད་དུ་བཀྲོལ་ནས། རྡོ་རྗེ་སེམས་དཔའ་ནམ་མཁའ་ཆེ་དབུ་ཞབས་ཐམས་ཅད་བསྡུས་པ་དེ། བརྡའ་འམ་ཟུར་དུ་བཀྲལ་ནས་མངོན་པར་བསྟན་པའི་སྐབས་ལ་བབ་བོ། །ཞེས་པ་སྟེ། ངེས་དོན་མདོ་བཅུ་ལས། ཆོས་ཀུན་བྱང་ཆུབ་སེམས་སུ་འདུས། །སེམས་ཉིད་ཆོས་ཀྱི་ཁུངས་ཡིན་ཕྱིར། །ལུང་ཆེན་འགྲེལ་བའི་སྐབས་ཞེས་བྱ། །ཞེས་སོ། །གཉིས་པ་ནི། དེ་བས་དེ་ལུང་དེ་ཉིད་ལས། །ཞེས་པས་སྟོན་ཏེ། སྤྱིར་ལུང་ལ་གསུམ་སྟེ། རྣ་བ་ནས་རྣ་བར་བརྒྱུད་པའི་ལུང་དང་། མངོན་དུ་ཕྱུང་བའི་ལུང་དང་། གཏན་ལ་འབེབས་པའི་ལུང་དང་གསུམ། འདི་གཏན་ལ་འབེབས་པའི་དྲང་ལུང་ཨ་ནུ་ཡོ་ག་མན་ཆད་དང་། མངོན་དུ་ཕྱུང་བའི་དྲང་ལུང་ལ་མི་ཟེར་ཏེ། དེའི་གནས་སྐབས་སུ་རྣ་བ་ནས་རྣ་བར་བརྒྱུད་པའི་ངེས་ལུང་དུ་བསྟན་ཏེ། རྒྱལ་བ་དགོངས་པའི་བརྒྱུད་པ། རིག་འཛིན་རིག་པས་བརྒྱུད་པ། གང་ཟག་སྙན་ཁུང་དུ་བརྒྱུད་པའི་ལུང་ངོ་། །མན་ངག་ཟབ་མོ་རྡོ་རྗེ་སེམས་དཔའ་ནམ་མཁའ་ཆེ་འདི་བསྟན་པས། ཉོན་མོངས་པ་ལྕགས་སྒྲོག་དང་འདྲ་བ་ལས་གྲོལ་བ་ཆོས་ཉིད་ཀྱི་ཀློང་ངོ་། །གྱི་ལིང་སྒྲོག་བཀྲོལ་བ་ནི་ཁ་ཡན་དུ་འགྲོ་བའི་དཔེ་ཡིན་ཏེ། རྫོགས་པ་ཆེན་པོའི་རྣལ་འབྱོར་པས། མི་མཐུན་པ་དང་གཉེན་པོར་འཛིན་པའི་ལྕགས་སྒྲོག་མེད་པར། འཁོར་འདས་ཀྱི་ཆོས་ཐམས་ཅད་ལ་རང་ཡན་ཚུགས་ཏེ། གང་གིས་ཀྱང་འཆིང་གྲོལ་མེད་པའི་ངང་ལ། ཐམས་ཅད་ཤར་ཞིང་དེ་རུ་གྲོལ་བས་ཀློང་ངོ་། །དེ་ལ་རྩོལ་སྒྲུབ་བྱེད་ན་ཐེག་པ་འོག་མ་བ་དང་ཁྱད་མེད་པས། གནས་སྐབས་འདྲ་ཞིང་ནོར་བའི་རིགས་པ། འབྲས་བུ་ཆེད་དུ་འདོད་ན་གོལ་ས་ཡིན་པས་འདོད་པ་ཐོག་ཏུ་མི་ཕེབས་པའི་གཏན་ཚིགས་བྱུང་ངོ་། །དེས་ན། དེ་བས་དེ་ལུང་དེ་ཉིད་ལས། །ཞེས་པ། དེ་བས་ནི་གོང་ལ་བསྙེགས་པའི་ཚིག་ལ་གོང་དུ་གསུངས་པ་བཞིན་དུ་སྣང་སྲིད་འཁོར་འདས་ཀྱི་ཆོས་ཐམས་ཅད། གཞི་གནས་ཡེ་གྲོལ་བྱ་བྲལ་ཀློང་ཆེན་གྱི་ངང་དུ་སངས་རྒྱས་པ་ཡིན་པས། དེ་བས་ན། དེ་ནི་ལུང་ཐམས་ཅད་ཀྱི་ནང་ནས་ཀྱང་། བྱ་བྲལ་རྫོགས་པའི་ལུང་ཐམས་ཅད་འདུས་པ་ཡིན་པས་ལུང་གི་རྒྱལ་པོ་ཉིད་དུ་རིགས་པར་བྱ་སྟེ། བྱང་ཆུབ་སེམས་ལ་འདུས་པ་ལགས། ལར་ལུང་བྱ་བ་དེ་རྒྱུད་ན་ཁ་འཐོར་ཞིང་དཀྲུགས་ནས་ཡོད་པ་རྣམས་ལ། དོན་སྡེབས་བྱ་སྟེ། སྣོད་ལ་ལུང་བཏགས་པ་ལྟ་བུར་སྤྱོད་བདེ་བའམ་ཉམས་སུ་བླང་བདེ་བ་ལ་ཟེར་ཏེ། རྩེ་མོ་བྱུང་རྒྱལ་ལས། རྒྱུད་ཀྱི་དོན་ལམ་བསྡེབས་པའི་ལུང་ཞེས་བྱ། །རྣམ་གྲངས་རྒྱན་དུ་བཀོད་པས་ཕྲེང་བ་སྟེ། །ཞེས་སོ། །དེའི་སྐྱོན་བསལ་དང་ལ་བཟླ་འདྲ། གསུམ་པ་ནི། དེ་ལ་དེ་བྱར་སྒྲིབ་པར་འགྱུར། །ཞེས་པ། བྱ་བྲལ་ཀློང་ཆེན་ཟབ་མོ་ཡིས། ཞེས་པའི་ལུང་དེ་ཡང་སྙིང་པོར་ངེས་པའི་བསྒྲུབ་བྱར་བཟུང་སྟེ་དེ་ཉིད་རྟོགས་པར་འདོད་ནས། མཉམ་པ་ཉིད་ལ་རྩོལ་སྒྲུབ་བྱས་པས། ཐེག་པ་འོག་མ་པའི་དྲང་ལུང་རྩོལ་སེམས་ཅན་དང་ནོར་ཏེ། སླར་ཆོས་ཉིད་ཟབ་མོའི་དོན་མ་རྟོགས་ཏེ། མཉམ་པ་ཉིད་ལ་རྩོལ་སེམས་བཅུག་པ་ཕྱོགས་མེད་ཀྱི་དོན་ལ་སྒྲིབ་པར་འགྱུར་རོ། །བཞི་པ་ནི། དེ་ལྟར་དེ་ལ་དེ་རྟོག་ན། །ཞེས་པ་བཟང་རྟོག་ཆེད་དུ་བྱེད་ན་མི་གྲོལ་བའི་གཏན་ཚིགས་བསྟན་ཏེ། དེ་ལྟར་དེ་བཞིན་ཉིད་ཀྱི་ལུང་། རྩོལ་སྒྲུབ་ལས་མ་བྱུང་། འདུས་བྱས་སུ་མི་འགྱུར། རྒྱུ་རྐྱེན་གཉེན་པོ་གང་གིས་ཀྱང་མ་བསྐྱེད་པའི་ཆོས་ཉིད་ཕྱོགས་མེད་དེ་ལ། ཐེག་པ་འོག་མ་པས། འཁོར་འདས་གཉིས་སམ། བཟང་ངན་གཉིས་སམ། མཐོ་དམན་གཉིས་སམ། ཕྱི་ནང་གཉིས་སམ། ཡུལ་སེམས་གཉིས་སམ། བདག་གཞན་གཉིས་སུ་རྟོག་ཅིང་ཕྱོགས་མེད་ལ་ཕྱོགས་སུ་བལྟས་པས་ནོར་རོ། །དེ་ལ་དེ་ཉིད་འགྲུབ་པ་མེད། །ཅེས་པ་གཉིས་འཛིན་ཅན་གྱིས་མི་འགྲུབ་པའི་གཏན་ཚིགས་བསྟན་ཏེ། འཁོར་འདས་ཀྱི་ཆོས་ཐམས་ཅད། ཡེ་ནས་གཞི་གནས་ཡེ་གྲོལ་བྱ་བྲལ་ཀློང་ཆེན་པོ་མཉམ་པ་ཉིདཀྱི་ངང་དུ་སངས་རྒྱས་པས། ཨ་ནུ་ཡོ་ག་མན་ཆད་ཀྱིས་དེ་ལྟར་མ་གོ་སྟེ། འཁོར་འདས་སམ། སྐྱོན་ཡོན་གཉིས་སུ་འཛིན་པ་ཅན་དེ་ལས། དེ་བཞིན་ཉིད་མ་ནོར་མ་བཅོས་པའི་དོན་ལ་ཕྱོགས་པ་མེད་དེ་འགྲུབ་པའི་དུས་མེད་པ་ལགས་སོ། །ལྔ་པ་ནི། ལྷུན་གྱིས་གྲུབ་པའི་ཐིག་ལེ། ཞེས་པ། དང་པོ་བྱེ་བྲག་ལྷུན་གྱིས་གྲུབ་པ། གཉིས་པ་རང་བཞིན་ལྷུན་གྱིས་གྲུབ་པ། གསུམ་པ་གཉིས་སུ་མེད་པར་ལྷུན་གྱིས་གྲུབ་པ། བཞི་པ་མཉམ་པ་ཉིད་དུ་ལྷུན་གྱིས་གྲུབ་པ། ལྔ་པ་མ་ཆགས་པར་ལྷུན་གྱིས་གྲུབ་པ། དྲུག་པ་དེ་བཞིན་ཉིད་དུ་ལྷུན་གྱིས་གྲུབ་པར་སྟོན། མ་སྤངས་ལ་རང་གྲོལ་བས་ན་ལྷུན་གྱིས་གྲུབ་པ། མ་སྤྲོས་ཀུན་ལ་ཁྱབ་ཅིང་གདལ་ཁྱབ་ཆེན་པོར་གནས་པས་ན་ཐིག་ལེ་ཞེས་བྱའོ། །འོ་ན་དཔེ་དོན་རིགས་པ་གཏན་ཚིགས་བཞི་པོ་དེ་ཐ་དད་དམ་ཞེ་ན། བཤད་པ་དཀྱུས་ཐོག་ཏུ་བཏང་བའི་དབང་དུ་བྱས་ན་དེ་ལྟར་འགྲོ་ལ། གདམས་ངག་དོན་ཐོག་ཏུ་དྲིལ་ན། ཚིག་རྐང་ལྔ་པོ་འདིར་འདུས་ཏེ་བཤད་ཚོད་དེ་དག་ཐམས་ཅད་ཀྱི་མདོ་ཐིག་ལེ་ཉག་གཅིག་ཏུ་བསྡུ་བ་དང་། འགག་བྱ་རྩོལ་མེད་པར་བསྡམ་པ་དང་། གནད་འཁོར་འདས་དབྱེར་མེད་དུ་བཀྲོལ་བ་དང་། ཕུགས་ཐག་ད་ལྟར་གྱི་སྣང་བ་ལ་བཅད་པ་དང་། འགྲོ་ས་ཆོས་ཀྱི་དབྱིངས་སུ་བཏང་བ་དང་ལྔར་འདུས་སོ། །དེ་ཚོ་ཧྲིལ་གྱིས་དྲིལ་བས། ཐིག་ལེ་ཆེན་པོ་དྲུག །ཆེ་བ་རྣམ་པ་ལྔ། སྐབས་ཉི་ཤུ་རྩ་བདུན་གྱི་སྒོ་ནས། རྡོ་རྗེ་སེམས་དཔའ་ནམ་མཁའ་ཆེ། ལུང་ཐམས་ཅད་ཀྱི་བདག་ཉིད། དཔལ་རྡོ་རྗེ་སེམས་དཔའི་ཞལ་ནས་གསུངས་པ་རྫོགས་སོ། །དཔེ་དོན་རིགས་པ་གཏན་ཚིགས་བཞི་བསྟན་པ། སློབ་དཔོན་ཤྲཱི་སིངྷའི་དགོངས་པ་སྟེ། གཟུ་ལུམས་རས་ཆད་མཁན་ལ་ཤོར་བ་རེ། །རིན་ཆེན་གསེར་བས་དཀོན་པའི་མན་ངག་འདི། །མི་ནུབ་རྒྱལ་མཚན་སྙིང་གི་ཉིང་ཁུ་ཡིན། །བཻ་རོ་ཙ་ན་ཐུགས་ཀྱིས་བརྣག་པར་ཆོངས། །ཞེས་པས་རྒྱ་གདབ་པར་གསལ་ལོ། །རྒྱ་རྒྱ་རྒྱ། སླར་སྨྲས་པ། དེ་ལྟར་ཟབ་ལས་ཆེས་ཟབ་སྙིང་པོའི་དོན། །རང་སྣང་ཆོས་དབྱིངས་འོད་གསལ་གདོད་མའི་གཞི། །མཚོན་བྱ་ཟབ་དོན་གཉུག་མ་གཤིས་ཀྱི་བབ། །གབ་སྤས་མེད་པར་རང་ངོ་རྗེན་པར་སྣང་། །འོན་ཀྱང་མཐའ་བྲལ་ཕྱོགས་རིས་གྲོལ་བའི་དབྱིངས། །ཁྱབ་གདལ་རིག་པ་ཉག་གཅིག་ཐིག་ལེའི་ངང་། །དམུས་ལོང་དག་ལ་གཟི་ལྡན་ཉི་མ་བཞིན། །ཕྱོགས་ལྷུང་བློ་ངོར་རང་གསང་ཐབས་ཀྱིས་ཆོད། །དེ་ཕྱིར་ལུང་དང་རིགས་པ་མན་ངག་གིས། །གཟུར་གནས་སྐལ་བཟང་བློ་དང་ལྡན་པ་ལ། །མ་ནོར་རྫོགས་པ་ཆེན་པོའི་དོན་མཚོན་ཕྱིར། །སྐུ་གསུམ་དགོངས་བཅུད་རིན་ཆེན་འཕྲུལ་གྱི་ཐབས། །ཚུལ་འདིར་གཞི་ལམ་འབྲས་བུའི་ངེས་གསང་གི། །གནད་ཀུན་མ་འདྲེས་ཡོངས་སུ་རྫོགས་པའི་ཕྱིར། །རྟོགས་པར་དཀའ་ཡང་ཇི་བཞིན་མཐོང་ཙ་ན། ། ཐེག་མཆོག་རྒྱལ་པོའི་དགོངས་དོན་ལྷུན་པོ་ལྟར། །ཀུན་གྲོལ་ཀུན་ལས་འདས་ཤིང་ཀུན་གྱི་བཅུད། །ཐེག་པ་ཀུན་རྫོགས་ཀུན་གྱི་ཡང་སྙིང་དུ། །མཐོང་བའི་བློ་མིག་ཉི་ཟླའི་འོད་བཞིན་འཆར། །དེས་ན་རིགས་ལྡན་དྲྭ་མས་ནན་ཏན་མཛོད། །སྔོན་བྱོན་མཁས་གྲུབ་བརྒྱུད་པའི་རྣམ་ཐར་བཞིན། །ལེགས་པར་ཤེས་པའི་དད་ལྡན་བློ་གསལ་རྣམས། །ཤེས་རབ་ཚད་མས་སྙིང་པོའི་ཆོས་ཉིད་ལ། །གོ་བ་ཀླུང་དུ་གྱུར་ཚེ་ངེས་ཤེས་འཆར། །དེ་ཕྱིར་བརྒྱུད་པའི་རིང་ལུགས་མ་ནོར་བར། །འཁྲུལ་མེད་ངེས་པའི་ལུང་གིས་ཟུར་བརྒྱན་ཏེ། །གདམས་ངག་སྙིང་པོ་དུས་ཀྱི་ཡང་མཐའ་འདིར། །བླ་མའི་བཀའ་ལ་བརྟེན་ནས་གསལ་བར་བྱས། །དེ་ལྟར་བརྒྱུད་གསུམ་ནོར་བུའི་ཞལ་ལུང་བཞིན། །མན་ངག་ཚད་མའི་ལམ་མཆོག་ཅུད་ཟད་བཀྲལ། །གང་དེའི་དགེ་བས་མཁའ་ཁྱབ་འགྲོ་བ་ཀུན། །གདོད་མའི་རྒྱལ་སར་མངོན་པར་བྱང་ཆུབ་ཤོག །བཀྲ་ཤིས་གང་ཞིག་སྐུ་གསུམ་སྟོན་པ་ནས། །རིམ་བརྒྱུད་རིག་འཛིན་གོང་མའི་སྙན་རྒྱུད་དོན། །བློ་ལྡན་སྐྱེས་བུའི་དགོངས་པ་རྩལ་རྫོགས་ཏེ། །བསྟན་པའི་སྙིང་པོ་ཕྱོགས་མཐར་རྒྱས་གྱུར་ཅིག །དེ་ལྟར་རྡོ་རྗེ་སེམས་དཔའ་ནམ་མཁའ་ཆེའི་འགྲེལ་ཆུང་འདི་ཉིད་རིག་འཛིན་ཆེན་པོ་ཤྲཱི་སིདྷས་ལོ་ཆེན་བཻ་རོ་ཙ་ན་ལ་སྙན་རྒྱུད་དུ་སྩལ་བའི་དཔེ་རྙིང་ཇི་ལྟ་བ་བཞིན་ལ་ཡིག་ཉམས་གསོ་བ་དང་། མདོ་ཆེན་པོའི་དཀའ་གནད་ལ་བརྟེན་པའི་དགོས་པ་དང་བསྟུན་ཏེ་ཆེ་བ་དང་ཐིག་ལེ་རྣམས་ཅུང་ཟད་བཀྲལ་ནས་ལུང་གི་སྤྲས་ཏེ་སྔར་ཞིག་མཆོག་སྤྲུལ་ཀུན་ཏུ་བཟང་པོ་ནས་ནམ་མཁའ་ཆེ་ལ་ནན་ཏན་བྱེད་བར་མ་འཆུགས་གསུངས་པ་དང་། རྗེས་སོར་སྐྱབས་རྗེ་རིགས་བདག་བཀའ་དྲིན་མཚུངས་མེད་མཁན་ཆེན་ལེགས་བཤད་དུལ་པའི་སྡེས་སེམས་ཕྱོགས་ལའང་གསལ་བྱེད་ཀྱི་ཡི་གེ་རེ་ཅིས་ཀྱང་གྱིས་ཤིག་ཅེས་བཀའ་སྩལ་ཕེབས་པ་བཞིན། མཆོག་སྤྲུལ་པདྨ་ཚུལ་ཁྲིམས་གྱིས་ཀྱང་གསུང་བསྐུལ་བྲི་གཞི་བཅས་གནང་བ་ལ་བརྟེན་ནས་སྤྲང་འཁྱམས་ཐུབ་བསྟན་མཁྱེན་བརྩེའི་བློ་གྲོས་ཀྱིས་འོག་མིན་ཀཿཐོག་གི་ཡང་དབེན་གསེར་ཁང་རི་ཁྲོད་བདུད་འདུས་ཕྲིན་ལས་ཀུན་ཁྱབ་གླིང་གི་གཟིམས་སྤྱིལ་འོད་གསལ་ཐེག་མཆོག་མཛོད་ཁང་ནས་ཞལ་བཤུས་ཏེ་རྫོགས་པར་བགྱིས་པ་འདིས་ཀྱང་རྒྱལ་བསྟན་སྤྱི་དང་སྔ་འགྱུར་མདོ་སྒྱུ་སེམས་གསུམ་གྱི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་པའི་རྒྱུར་གྱུར་ཅིག །ཆོས་ཉིད་བདེ་གཤེགས་སྙིང་པོའི་ཀློང་ཆེན་པོར། །འཁོར་འདས་ལམ་གྱི་སྣང་བ་ཇི་སྙེད་པ། །མཉམ་ཉིད་ཁྱབ་བརྡལ་ཆེན་པོར་བྱང་ཆུབ་པའི། །ཐེག་མཆོག་འོད་གསལ་རྡོ་རྗེ་སྙིང་པོ་ཆེ། །དེ་ཡི་རྒྱུད་ཀྱི་རྩ་བ་ནམ་མཁའ་ཆེ། །རྡོ་རྗེ་སེམས་དཔའི་དགོངས་པའི་གནད་གཅིག་པུའི། །ཆོས་སྒོ་རིན་ཆེན་ནོར་བུའི་མཛོད་ཆེན་པོ། །མཁན་ཆེན་མཁྱེན་བརྩེ་བློ་གྲོས་མཆོག་གིས་ཕྱེས། །དེ་ཡི་བཀའ་དྲིན་དྲན་ཕྱིར་རྩ་འགྲེལ་སྤར། །གསུང་གི་བདུད་རྩི་མྱོང་བའི་སློབ་ཚོགས་ནས། །ལྷག་བསམ་དཀར་པོས་བསྒྲུབས་པའི་དགེ་ཚོགས་ཀྱིས། །འགྲོ་རྣམས་འོད་གསལ་ལམ་མཆོག་མཐར་ཕྱིན་ཤོག །ཅེས་སྤར་གཞིའི་མཐུན་རྐྱེན་སོགས་མཁན་ཆེན་རིན་པོ་ཆེས་སྦྱར་ནས་གུས་པ་སློབ་ཚོགས་རྣམས་ཀྱིས་སྤར་གསར་དུ་བསྐྲུན་པའི་སྐབས་འཇམ་དཔལ་བཟང་པོས་སྨོན་ཚིག་ཏུ་སྤེལ་བའོ། །སརྦ་མདྒ་ལཾ།། །།