རྫོགས་པ་ཆེན་པོ་ངལ་གསོ་སྐོར་གསུམ་གྱི་དཀར་ཆག་པདྨ་སྟོང་ལྡན། ཐུབ་བསྟན་སྙན་གྲགས་སམ་རིག་འཛིན་གཞན་ཕན་རྡོ་རྗེ།
༅། །རྫོགས་པ་ཆེན་པོ་ངལ་གསོ་སྐོར་གསུམ་གྱི་དཀར་ཆག་པདྨ་སྟོང་ལྡན་ཞེས་བྱ་བ་བཞུགས་སོ། །རྫོགས་པ་ཆེན་པོ་ངལ་གསོ་སྐོར་གསུམ་གྱི་དཀར་ཆག་པདྨ་སྟོང་ལྡན་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་བཀྲ་ཤིས་ཡོན་ཏན་མཚོ་ཆེན་ལྡན། །བྱང་ཆུབ་ཡིད་བཞིན་ཀླུ་དབང་སྙིང་པོའི་གནས། །ཟབ་ཅིང་རྒྱ་ཆེ་ཆོས་ཀྱིས་ཡོངས་གང་བ། །ཀུན་བཟང་ཆོས་རྗེ་བླ་མའི་ཞབས་ལ་འདུད། །རྒྱལ་བས་གསུངས་པའི་ཆོས་ཚུལ་དཔག་མེད་ལས། །སྙིང་པོའི་དོན་ཀུན་ཡང་ནས་ཡོངས་བསྡུས་པས། །ངལ་གསོ་སྐོར་གསུམ་རིན་ཆེན་ཆོས་ཀྱི་མཛོད། །དེ་ཡི་དཀར་ཆག་ངེས་པ་འདིར་གསལ་བྱ། །ངལ་གསོ་སྐོར་གསུམ་ཤིང་རྟ་སྐོར་གསུམ་དང་། །ཕྲེང་བ་སྐོར་གསུམ་ཁྲིད་ཡིག་སྐོར་གསུམ་དང་། །ལེགས་བཤད་རྒྱ་མཚོ་པདྨ་དཀར་པོ་དང་། །དཀར་ཆག་ཉིད་དང་རྣམ་གྲངས་བཅོ་ལྔ་གནས། །དེ་དག་སོ་སོའི་དགོས་ཆེད་བསྟན་པ་ནི། །ལེགས་བཤད་རྒྱ་མཚོས་ཆོས་སྤྱིའི་དོན་རྣམས་བསྟན། །ཐེག་པའི་བབས་དང་ཆོས་ཀྱི་བྱུང་ཚུལ་དང་། །ཇི་ལྟར་བཤད་ཚུལ་མ་རིག་མུན་པ་སེལ། །བཤད་པའི་སྒྲོམ་བུ་འདི་ཀུན་མཆོག་ཏུ་གཅེས། །སྡེ་ཚན་དང་པོ་སེམས་ཉིད་ངལ་གསོ་ལ། །ལུས་དང་ཡན་ལག་བྱེ་བྲག་བསྟན་པ་ནི། །ངལ་གསོ་ལུས་ཏེ་འབྱེད་འབྲེལ་ཡན་ལག་གོ། །སེམས་ཉིད་ངལ་གསོ་ཐེག་ཆེན་སྙིང་པོའི་གཞི། །ངོ་བོ་རང་བཞིན་གནས་ཚུལ་རྒྱས་པར་བསྟན། །ཐོག་མ་བར་དང་ཐ་མའི་ལམ་རིམ་རྣམས། །ཚང་ལ་མ་ནོར་ངེས་དོན་སྙིང་པོ་ཡིན། །ལེའུ་བཅུ་གསུམ་གཞུང་གི་རང་ལུས་རྫོགས། །དེ་ཡི་བསྡུས་དོན་ཀུནྡའི་ཕྲེང་བ་ཡིས། །སྡེ་ཚན་འབྱེད་འབྲེལ་ཤིན་ཏུ་གསལ་བར་བྱས། །མཐོང་བ་ཙམ་གྱིས་གནས་རྣམས་རྟོགས་པས་ན། །འབྱེད་འབྲེལ་ལྡེ་མིག་མཆོག་ཏུ་བཟང་པོ་ཡིན། །ཤིང་རྟ་ཆེན་པོ་སེམས་ཉིད་ངལ་གསོའི་གནས། །རྒྱ་ཆེར་འགྲེལ་པས་ཀུན་ཏུ་མཐའ་ཡས་ཉིད། །ཚིག་དོན་འབྱམས་ཀླས་རླབས་ཆེན་གནས་སྟོན་པས། །ཟབ་ཅིང་རྒྱ་ཆེ་འཇུག་ངོགས་ཆེན་པོ་ཡིན། །དེ་ཡི་བསྡུས་དོན་པདྨ་དཀར་པོ་ཡིས། །སྔ་ཕྱིའི་གནས་དང་དོན་གྱི་ངོ་བོ་རྣམས། །སོ་སོར་འབྱེད་འབྲེལ་དོན་ཀུན་གསལ་བྱེད་ཡིན། །འབྲེལ་བཤད་གནས་སུ་འདི་ཀུན་གཅེས་པས་ཟུང་། །ངལ་གསོའི་དོན་ཁྲིད་བྱང་ཆུབ་ལམ་བཟང་གིས། །སྐལ་བཟང་རིགས་གསུམ་ཐར་པའི་ལམ་ལ་འདྲེན། །དགེ་བ་གསུམ་གྱི་གནད་གསུམ་སྙིང་པོ་ཅན། །མེད་ཐབས་མེད་པས་དད་བརྒྱའི་གཙུག་གིས་གཟུང་། །དེ་དག་ཀུན་གྱིས་སེམས་ཉིད་ངལ་གསོའི་སྐོར། །ལུས་དང་ཡན་ལག་བྱེ་བྲག་རྫོགས་པར་བསྟན། །སྡེ་ཚན་གཉིས་པ་བསམ་གཏན་ངལ་གསོ་ལ། །ལུས་དང་ཡན་ལག་བྱེ་བྲག་བསྟན་པ་ནི། །ངལ་གསོ་ལུས་ཞེས་གཞན་རྣམས་ཡན་ལག་གོ། །བསམ་གཏན་ངལ་གསོས་ཏིང་འཛིན་འོད་གསལ་ལ། །ཇི་ལྟར་བསྒོམ་ཚུལ་ཡང་ཟབ་གནད་རྣམས་བསྟན། །རྡོ་རྗེའི་གནས་གསུམ་དེ་ཡི་གཞུང་ཚད་རྫོགས། །གསང་ཆེན་གནས་འདི་ཤིན་ཏུ་ཟབ་པས་ན། །སྐལ་བཟང་རྣམས་ཀྱིས་རྟག་ཏུ་གཅེས་སྤྲས་མཛོད། །དེ་ཡི་བསྡུས་དོན་པུཎྜ་རཱི་ཀ་ཡིས། །སོ་སོའི་ཚིག་དོན་ཤིན་ཏུ་གསལ་བར་བྱེད། །ཚིག་ཉུང་དོན་འགྲེལ་གོ་ཞིང་རྟོགས་པ་སླ། །དེ་ཕྱིར་དེ་ཡི་གནས་ལ་ཤིན་ཏུ་གཅེས། །ཤིང་རྟ་རྣམ་དག་བསམ་གཏན་ངལ་གསོའི་གནས། །རྒྱ་ཆེར་འགྲེལ་པས་ཚིག་དོན་གསལ་བར་བྱས། །ཡང་ཟབ་གནད་དང་ལུང་གི་གནས་གསལ་བས། །ངེས་ཤེས་སྐྱེ་ཞིང་གཞན་ལས་མཆོག་ཏུ་འཕགས། །དེ་དག་དོན་ཁྲིད་སྙིང་པོ་བཅུད་བསྡུས་ཀྱིས། །ཡང་ཟབ་བསྒོམ་པ་འོད་གསལ་སྙིང་པོ་བསྟན། །གནད་ལས་ཏིང་འཛིན་མངོན་དུ་བྱེད་པའི་ཕྱིར། །མེད་ཐབས་མེད་དོ་རྟག་ཏུ་གུས་པས་བཟུང་། །དེ་དག་ཀུན་གྱིས་བསམ་གཏན་ངལ་གསོའི་སྐོར། །ལུས་དང་ཡན་ལག་བྱེ་བྲག་རྫོགས་པར་བསྟན། །སྡེ་ཚན་གསུམ་པ་སྒྱུ་མ་ངལ་གསོ་ལ། །ལུས་དང་ཡན་ལག་བྱེ་བྲག་བསྟན་པ་ནི། །ངལ་གསོ་ལུས་ཡིན་འབྱེད་འབྲེལ་དོན་ཁྲིད་བཅས། །དེ་ཡི་ཡན་ལག་ཕྲན་བུ་འཕྲོས་ཏེ་བསྟན། །སྒྱུ་མ་ངལ་གསོས་སྤྱོད་པ་རྣམས་སྤྱོད་དེ། །གཉིས་འཛིན་བདེན་ཞེན་འཆིང་བ་གཅོད་པར་བསྟན། །ལེའུ་བརྒྱད་ཀྱིས་དེ་ཡི་གཞུང་ཚད་རྫོགས། །ཐར་ལམ་བགྲོད་ལ་འདི་ཉིད་མེད་ཐབས་མེད། །དེ་ཡི་བསྡུས་དོན་མནྡྭ་ར་བ་ཡིས། །རིག་པའི་གནས་རྣམས་རབ་ཏུ་གསལ་བར་བྱེད། །སྐྱེས་བུའི་བཞིན་ལ་མེ་ལོང་བསྟན་པ་བཞིན། །དེ་ཉིད་རྟོགས་པའི་གནས་སུ་གཅེས་པ་གཟུང་། །ཤིང་རྟ་བཟང་པོས་སྒྱུ་མ་ངལ་གསོའི་གནས། །མ་ལུས་རང་བཞིན་རྒྱ་ཆེར་འགྲེལ་བས་ན། །བློ་གྲོས་སྣང་བ་རབ་ཏུ་རྒྱས་བྱེད་ཡིན། །དེ་དག་དོན་ཁྲིད་ཡིད་བཞིན་ནོར་བུ་ཡིས། །བླང་དོར་གཉིས་མེད་སྒྱུ་མ་མངོན་སུམ་ལམ། །བདེན་མེད་རྟོགས་པས་འཁོར་བའི་འཁྲུལ་སྣང་འཇིག །ཡང་དག་སྒྱུ་མ་འོད་གསལ་དོན་སྟོན་པས། །ཟབ་མོའི་གནས་འདི་གུས་པས་གཅེས་སྤྲས་མཛོད། །དེ་དག་ཀུན་གྱིས་སྒྱུ་མ་ངལ་གསོའི་སྐོར། །ལུས་དང་ཡན་ལག་བྱེ་བྲག་རྫོགས་པར་བསྟན། །རྒྱལ་བས་ཆོས་ཚུལ་རིན་ཆེན་སྙིང་པོའི་དོན། །མ་ལུས་གཅིག་བསྡུས་ངལ་གསོ་སྐོར་གསུམ་གྱི། །ལུས་དང་ཡན་ལག་དཀར་ཆག་བསྟན་པ་ཡིས། །མ་ལུས་འགྲོ་ཀུན་མངོན་པར་སངས་རྒྱས་ཤོག །ཚུལ་འདི་ཐེག་མཆོག་སྙིང་པོའི་རྣལ་འབྱོར་པ། །དྲི་མེད་འོད་སྟོང་ཉིན་མོར་བྱེད་པ་དེས། །གངས་རི་ཐོད་དཀར་མགུལ་དུ་ལེགས་པར་བཀོད། །དད་ལྡན་སྐྱེ་བོའི་ཚོགས་རྣམས་དགའ་བར་མཛོད། །རྫོགས་པ་ཆེན་པོ་ངལ་གསོ་སྐོར་གསུམ་གྱི་དཀར་ཆག་པདྨ་སྟོང་ལྡན་ཞེས་བྱ་བ། མང་དུ་ཐོས་པའི་རྣལ་འབྱོར་པ་དྲི་མེད་འོད་ཟེར་གྱིས་ཀུན་ཏུ་བཟང་པོའི་ཁང་བཟངས་སུ་བཀོད་པ་རྫོགས་སོ།། །།དགེའོ། །དགེའོ། །དགེའོ།། ༈ །།
ༀ་སྭ་སྟི། རྨད་བྱུང་མཁྱེན་རབ་སྤྱན་གྱིས་ཆོས་ཀུན་གཟིགས། །གསང་ཆེན་རྒྱུད་དོན་རྒྱ་མཚོའི་མཛོད་འཆང་བའི། །ཀུན་མཁྱེན་གཉིས་པ་ཀློང་ཆེན་རབ་འབྱམས་ཀྱི། །བཀའ་དྲིན་བསྟན་འགྲོའི་བླ་རུ་གསལ་འདི་རྨད། །གང་གིས་མདོ་སྔགས་ཆོས་ཚུལ་བྱེ་བའི་བཅུད། །རྒྱུ་འབྲས་ཐེག་པ་རྒྱ་མཚོའི་ཟབ་གནད་ཀུན། །འགལ་མེད་ལམ་རིམ་གཅིག་ཏུ་ཡོངས་དྲིལ་ཏེ། །རང་སེམས་འོད་གསལ་སྔགས་ཀྱི་དེ་ཁོ་ན། །ཇི་བཞིན་སྟོན་པའི་ཐབས་ཚུལ་བླ་ན་མེད། །སེམས་ཉིད་གནས་ལུགས་ངང་དུ་ངལ་གསོའི་གཞུང་། །གཉུག་མ་རང་གནས་ཟབ་མོའི་ཏིང་ངེ་འཛིན། །ཇི་བཞིན་སྒོམ་པའི་ལམ་གནད་ནོར་མེད་དུ། །སྟོན་པ་བསམ་གཏན་ངལ་གསོའི་ལེགས་བཤད་ཕུལ། །ཆོས་ཀུན་བདེན་ཞེན་འཆིང་བ་བཅད་པའི་ཐབས། །སྒྱུ་མའི་དཔེ་བརྒྱད་ལྟ་བུར་སྟོན་པ་ཡི། །སྙིང་པོའི་ནོར་མཆོག་སྒྱུ་མ་ངལ་གསོ་སྟེ། །གཞུང་བཟང་ངལ་གསོ་སྐོར་གསུམ་ཞེས་གྲགས་པ། །ཡན་ལག་བཅས་ཀུན་མི་ཟད་སྤར་གྱི་འཕྲུལ། །སྐུ་གསུང་ཐུགས་ཀྱི་སྣང་བརྙན་གཞི་འདི་ཉིད། །གཅིག་ལས་དུ་མ་འཆར་བར་བྱེད་པའི་དཔྱིད། །༧རིག་འཛིན་གར་གྱི་དབང་ཕྱུག་བཞད་པ་རྩལ། །ཐུགས་བསྐྱེད་ཤིན་ཏུ་དཀར་པོས་ཉེ་བར་བསྒྲུབས། །དགེ་དེས་ཡིད་ཅན་སྲིད་པའི་འགྲོ་ཚོགས་ཀྱིས། །རང་གནས་ཆོས་སྐུའི་གནས་ལུགས་མངོན་སུམ་དུ། །རྟོགས་ཏེ་གདོད་མ་སྐུ་བཞིའི་སར་ཕྱིན་ནས། །ཕྱམ་གཅིག་བྱང་ཆུབ་ཆེན་པོ་བརྙེས་གྱུར་ཅིག །ཅེས་ཆོས་རྗེ་བླ་མའི་བཀས་བསྐུལ་ངོར་གུས་འབངས་ཐུབ་བསྟན་སྙན་གྲགས་སམ་རིག་འཛིན་གཞན་ཕན་རྡོ་རྗེས་སྦྱར་བའོ།། །།