དགྲ་བོ་གསོད་པ་མཚོན་ཆ་ཐོག་གི་འཁོར་ལོ།
༈ བོད་སྐད་དུ༔ དགྲ་བོ་གསོད་པ་མཚོན་ཆ་ཐོག་གི་འཁོར་ལོ་ཞེས་བྱ་བ༔ དྲག་པོ་ལས་ཀྱི་ལྷ་ལ་ཕྱག་འཚལ་ལོ༔ འདི་སྐད་བདག་གིས་ཐོས་པའི་དུས་གཅིག་ན༔ དུར་ཁྲོད་ཕུང་ལུང་ནག་པོ་ཞེས་བྱ་བ་སྐྱི་ཟིངས་པའི་གནས་གཅིག་ན༔ མུ་སྟེགས་ཀྱི་སྟོན་པ་ཁྲི་རལ་པ་ཅན་ཞེས་བྱ་བ་སྲོག་གཅོད་ཀྱི་འཁོར་བསམ་གྱིས་མི་ཁྱབ་པས་བསྐོར་ནས་བཞུགས་སོ༔ དེའི་ཚེ་བདུད་ཤན་པ་ལག་དམར་སྟན་ལས་ལངས་ནས་སྟོན་པ་ལ་འདི་སྐད་ཅེས་གསོལ་ཏོ༔ ཀྱེ་ཀྱེ་དྲང་སྲོང་ཁྲོས་པའི་རྒྱལ༔ བསྟན་པའི་དགྲ་བོ་སྒྲོལ་བ་ལ༔ སྒྲུབ་མཐུ་ལས་ཀྱི་རིམ་པ་དང༔ རྣོ་མྱུར་རྫས་ཀྱི་སྦྱོར་ཐབས་དང༔ དགྲ་འཇོམས་མུན་པའི་སྒྲིབ་ཤིང་ཞུ༔ ཞེས་ཞུས་པ་དང་སྟོན་པས་གསུངས་པ༔ ཀྱེ་ཀྱེ་ལས་ཀྱི་གཤིན་རྗེས་ཉོན༔ ཞག་གཉིས་དགྲ་བོ་བསད་འདོད་ན༔ མཎྜལ་དྲག་པོ་མདའ་གང་ཚད༔ དབུས་སུ་གྲུ་གསུམ་ཁྲུ་གང་ཚད༔ ཆག་གང་ཡར་རྩིག་མཛུབ་གང་ཐུར་དུ་རྐོ༔ དུག་དང་ཁྲག་དང་རོ་སོལ་གྱིས༔ འབྲུབ་ཁུང་ཕྱི་ནང་ནག་པོར་བྱུག༔ ཟག་པའི་རྫས་ལ་ངར་གླུད་བྱ༔ ངར་གླུད་སྙིང་ཀར་དཀར་གླུད་གཞུག༔ རོ་བསྲེག་འགལ་དུམ་ལྟེ་སོར་གསུམ་བར་གཟུགས༔ ཤི་བའི་སྐྲ་ལིང་སྤྱི་གཙུག་གདགས༔ རབས་ཆད་ནག་པོའི་ཐོད་པ་ལ༔ ཕུག་ཏུ་གཏིང་དུ་ཕོ་ཡི་སྔགས་བྲིས་ལ༔ གཡས་ཕོ་སྔགས་དང་གཡོན་དུ་མོ་སྔགས་བསྐོར་བར་བྱ༔ བར་དུ་སྔགས་ཀྱི་དགྲ་ཡི་མིང་རུས་གཞུག༔ ཁ་ཐོད་པའི་ཁྱེར་བསད་བཅུ་གསུམ་པའི་རྩ་ལྔ་སྔགས་ཀྱིས་བསྐོར༔ འབྲུབ་ཁུང་གཏིང་དུ་བཙུག་ནས་ཀྱང༔ ཐོད་པ་དབུས་ཀྱི་ས་སྟོང་ལ༔ ངར་གླུད་མགོ་ཡི་རིག་པར་བྱ༔ དེ་ཐོག་རོ་གཡམ་ནག་པོ་ལ༔ དཀྱིལ་དུ་སོང་ཏོང་དོང་ཁ་བཅད༔ དེ་སྟེང་མཆོད་རྟེན་ནག་པོ་ཞིག༔ བུམ་པའི་ནང་དུ་ཐུན་གྱིས་བྲབ༔ ཟུར་གསུམ་ཚ་ཚ་རེ་རེས་མནན༔ ཐབ་ཤིང་ཕུར་པ་རེ་རེས་གཟུགས༔ སོར་བཞི་མ་རེག་པ་ཕྱོགས་སུ་གཞུག༔ མཚན་ངན་དུམ་བུ་དྲུག་པ་རུ༔ ཡུངས་ཀར་ཡུངས་ནག་སྐྱེ་ཚེ་དང༔ བཙན་དུག་ལྕགས་ཕྱེ་ཟངས་ཕྱེ་བླུག༔ འབྲུབ་ཁུང་རྩ་རུ་བཞག་པར་བྱ༔ གཅིག་ཏུ་ཡུངས་ཀར་ཡུངས་ནག་བླུག༔ ཡང་ན་ཐོད་པ་གསུམ་དུ་བགོ༔ ཕྱོགས་ཕྱོགས་དག་བཅུ་བཞག་པར་བྱ༔ གཅིག་ཏུ་ལྕགས་ཕྱེ་ཟངས་ཕྱེ་བླུག༔ གཅིག་ཏུ་དུག་སྣ་ཁྲག་སྣ་བླུག༔ ཐོད་པ་གནག་ཏུ་གཏོར་མ་བཞག༔ མ་གྲུབ་བར་དུ་རྟ་རུ་བཞག༔ རྒྱུན་དུ་གཏོར་མ་རེ་རེ་སྦྱིན༔ ཕོ་མོ་གཉིས་ཀྱི་སྔགས་མཇུག་ཏུ༔ མ་ཧཱ་བ་ལིངྟ་ཁཱ་ཧི༔ འདོད་པའི་དུས་སུ་གཏོར་མ་སྦྱིན༔ སྔགས་ཀྱི་རིམ་པ་བསྟན་པ་ནི༔ ཏྲག་རཀྴ་མ་ཏྲི་སྲོག་ལ་ཀརྨ་བྷྱོ༔ བཛྲ་མུག་ཐིབ་དྷ་ཡ་ཐིབས༔ དྷ་ཀ་ར་ཡ་ཐིབས༔ སྤྲ་ཐ་ཏི་ཛྙཱ་ན་དྷ་ར་པར་ཐིབས་རྦད༔ ཆེ་གེ་ལ་ཐུན་བྷྱོ༔ དགྲ་བོ་མ་ར་ཡ་ཕཊ༔ ཡ་མ་སྙིང་ཡ་མ་ཁྲག༔ ཡ་མ་སྲོག་སྙིང་ཁྲག་ལ་བྷྱོ༔ དགྲ་བོ་ཙིཏྟ་དྷ་ར་ཡ་སྲོག་ཆོད༔ ཁྲག་ལ་ཧུབས༔ དགྲ་བོ་ཆེ་གེ་ལུས་ངག་ཡིད་གསུམ་མགོ་ཆོད༔ ཕུང་པོ་ཤིག་ནྲྀ་མ་ར་ཡ་ཕཊ༔ དགུག་པ་དང་ནི་མོ་ཡི་སྔགས༔ སོ་གསུམ་པོ་ཡི་དྲག་སྔགས་དང༔ ལྔ་བཅུ་པ་ནི་གསང་བའི་སྔགས༔ གོང་གཉིས་དྲིལ་ཏེ་བཟླས་པ་ཡིན༔ རྒད་པོ་སོ་ཡི་སྣ་ཚོགས་པ༔ ཕོ་ཡི་ཆོ་འཕྲུལ་སྣ་ཚོགས་འབྱུང༔ རྡོ་ཆར་འབེབས་དང་མཚོན་ཆ་འབེབས༔ མདའ་མདུང་དྲག་པོ་རྡེབས་པའོ༔ བསྒྲུབ་དུས་དེ་ལྟར་བྱུང་བ་འགྲུབ༔ གཞན་ཡང་རྟགས་ཀྱི་རིམ་པ་ནི༔ རབ་ཏུ་མེ་སྟག་འོད་དུ་འོང༔ འབྲུབ་ཁུང་ནང་གི་ཐོད་པ་འཚག༔ འབྲིང་གི་ཐུན་དང་ཐོད་པ་འཚག༔ ཐ་མ་ཉམས་དང་རྨི་ལམ་དུ༔ ཐོད་པ་ཚེག་པ་ཙམ་ཡང་ཡོང༔ མི་ཁྱི་ར་གཡག་བསད་པ་དང༔ དེ་ལྟར་བྱུང་ན་བརྟགས་ཤིང་བསད༔ །ཡང་ནས་ཡང་དུ་ཐུན་གྱིས་བསད༔ ཡང་ན་ལན་གསུམ་དཔོག་བྱ་སྟེ༔ སྟོད་སྟོད་རྫོགས་ནས་རིམ་པར་བརྡེག༔ ཐུན་ཡང་ཕྱིན་ག་ལོག་ཏུ་གཏོར༔ ཏྲག་དང་བྷྱོ་ཡི་ཐོག་མཐའ་ལ༔ བར་ན་ཡིག་འབྲུ་བདུན་གནས་པ༔ མ་མོ་ནག་མོའི་དྲག་སྔགས་ཡིན༔ བཛྲ་ཕཊ་ཀྱི་ཐོག་མཐའ་ལ༔ བར་ན་ཞེ་བརྒྱད་འབྲུ་གནས་པ༔ བསད་པའི་སྤུ་གྲི་མཚོན་ཆ་ལས༔ སྲོག་རྩ་གཅོད་པའི་དྲག་སྔགས་ཡིན༔ རྡོ་རྗེའི་སྐུ་ཡང་འཇིགས་པར་བྱེད༔ མཆོག་ཏུ་ཆོས་བྱེད་རྣམས་ལ་ཤིས༔ བསྒྲུབ་པའི་ཞག་གྲངས་བདུན་དུ་བཤད༔ དེས་མ་གྲུབ་ན་ལན་གཉིས་བསྐྱར༔ གཉིས་གསུམ་ཉི་ཤུ་རྩ་གཅིག་གིས༔ མི་འགྲུལ་མི་སྲིད་དོ༔ སྔགས་འདི་ལ་འབོད་རྦད་བསད་གསུམ་ཀ་ཚང༔ འདིའི་ལུགས་ཀྱི་མོ་ཡི་སྔགས་ཀྱི་སྣ་འདྲེན་པར་བཤད༔ ལས་དྲུག་དག་ཀྱང་འགྲུབ་པར་བྱེད༔ ལྷ་ནི་འདི་ཞེས་སྒོམ་དུ་མེད༔ སྒོམ་མེད་གཏོར་མ་ལེན་དུ་འོང༔ ནམ་བྱུང་དེ་དུས་གཏོར་མ་སྦྱིན༔ སྔགས་ནི་མ་ཧཱ་བ་ལིང་གདགས༔ ང་ཡི་གཏོར་མ་འདི་བཞེས་ལ༔ དགྲ་སྙིང་ཕྱུང་ལ་ཁྱེར་ལ་ཤོག༔ ཁང་ཁྱིམ་རྡོ་རྗེེ་ཤིག་ལ་ཤོག༔ ནག་པོ་ཆེ་པོ་གཏོར་མ་ལོང༔ མ་མོ་ཆེན་མོ་གཏོར་མ་ལོང༔ སྔགས་བདག་ཆེན་མོ་གཏོར་མ་ལོང༔ རྡོ་ཡི་ཆར་པ་ཕོབ་ལ་ཤོག༔ ཁང་ཁྱིམ་རྡོ་ཡི་ཤིག་ལ་ཤོག༔ གྲོང་ཁྱེར་མེ་ཡི་སྲེག་ལ་ཤོག༔ མཚོན་ཆའི་ཆར་པ་ཕོབ་ལ་ཤོག༔ ཁང་རྣམས་ས་ཡིས་ཁེངས་ལ་ཤོག༔ ཐབ་ཀྱི་མེ་ལ་སློར་ལ་ཤོག༔ མཁར་རྣམས་རྨངས་ནས་སྒྱེལ་ལ་ཤོག༔ ཅེས་བརྗོད་གཏོར་མ་བཏང༔ འདི་ཡི་བསྒྲུབ་པའི་ཆག་ཚད་ནི༔ བརྒྱ་ཚོ་གཅིག་ན་བད་དང་བོང་བ་ཡོང༔ བདུན་ཚོ་གཉིས་ནས་རྡོ་ཡི་ཆར་པ་འབེབས༔ ཉི་ཤུ་གཅིག་ནས་དངོས་སུ་ཡོང༔ བདུན་ཚོ་བཞི་ནས་མེ་རུ་འབར༔ བདུན་ཚོ་ལྔ་ནས་གྲོང་ཁྱེར་འཇིག༔ བདུན་ཚོ་དྲུག་ནས་མཚོན་གྱི་ཆར་པ་འབེབས༔ ལས་ཀྱི་མཇུག་སྡུད་བསྟན་པར་བྱ༔ བསྲེག་བྱེད་ལས་ཀྱི་མཇུག་སྡུད་ནི༔ ཐོན་ནས་ལིང་ག་གསུམ་དུ་བགོ༔ གཅིག་ནི་སྦྱིན་བསྲེག་བྱེད་པ་ཡིན༔ གཅིག་ནི་ཀླུ་གནས་ས་རུ་མནན༔ གཅིག་ནི་འབྲུབ་ཁུང་ནང་དུ་མནན༔ དགྲ་བོ་ཤི་བར་འགྱུར་བ་དང༔ འབྲུབ་ཁུང་ནང་དུ་ལིངྒ་དེ༔ སྦྱིན་བསྲེག་བྱས་ལ་ཐལ་བ་ཕྱར༔ དེ་ནི་གཏང་རག་དོད་པོ་ཡིན༔ བསྲེག་པ་ལས་ཀྱི་དང་པོ་ཡིན༔ བླ་རྡོ་བཟུང་འདི་མོ་གོ་ཉོག་པ་ཡིན་ཐབས་བཤད་པར་བྱ༔ དུར་ཁྲོད་མི་རོའི་རས་དག་ལ༔ ཚིལ་མི་ཁྱི་ཆེན་གཉིས་ཀྱི་ཞལ་བ་བྱ༔ ལུང་པ་ཁ་ནུབ་ཏུ་ལྟ་བ་ནག་པོའི་རྡོ་དག་དང༔ རྡོ་བ་སྲིན་ལུང་ནག་དང་གཉིས་དང༔ ཤི་ཤིང་ཆུ་ཤིང་ནག་པོ་སོར་གསུམ་ཚད༔ རོ་རས་ནང་དུ་བསྟུམ་པར་བྱ༔ མཆོད་རྟེན་བུམ་པ་དག་ལ་གདགས༔ དེ་ན་བླ་རྡོའི་བླ་ཤིང་ཡིན༔ དེ་མིན་ཁོ་ནི་མི་འཁོར་རོ༔ བྱ་ནག་སྒྲོ་ནི་བསྒྲོན་པ་ཡི༔ མདའ་ལ་དར་ནག་མཐོ་གང་གདགས༔ རབས་གྲིར་ཤི་བའི་ཆད་ཤི་བའི་ལག་པ་གཡས་གདགས༔ ཡང་ན་ནལ་ཕྲུག་ལག་པ་གདགས༔ ནུབ་བྱའི་མཚམས་སུ་བཞག་པར་བྱ༔ དེ་གཉིས་མེད་པར་གྱུར་པ་ན༔ ཁོ་གཉིས་བདག་ལ་ཁྲོ་རུ་འོང༔ མཆོད་རྟེན་བང་རིམ་གོང་མ་ལ༔ ར་རོག་ཁྲག་གིས་སྔགས་འདི་བྲིས༔ ནག་པོ་དྷ༔ ནག་པོ་ཁ་ལ་གྷྲིན་ཏེ་ཧེ་ད་འདུ་ཧ་བྷ་ནི་ཏུ་ཏེ༔ ཐོད་པ་གཅིག་གི་ནང་དུ་ནི༔ དུག་དང་ཁྲག་གསུམ་སྦྱར་བར་བྱ༔ སྔགས་བདག་སྐུ་གཟུགས་བྲི་བར་བྱ༔ མགོ་བོ་མཐུར་དུ་བསྟན་ལ་གཞུག༔ དྲག་པོའི་སྔགས་འདི་བྲི་བར་བྱ༔ ཏྲག་ཏི་ཤག་ནག་པོ་རྦད༔ བཛྲ་མུག་ཐིབས་དྷ་ར་ཡ་རྦད༔ ཅེས་པ་གཟུགས་ལ་ཐུན་གྱིས་བྲབ༔ ཁོ་ནི་དངོས་སུ་འོང་བ་ཡིན༔ དེ་ལ་འཇིགས་པར་མི་བྱའོ༔ ལོ་གཅིག་བསྒྲུབ་ན་ཁོལ་པོར་འཁོལ༔ དེ་ནི་བཅུད་ཀྱི་མན་ངག་ཡིན༔ ཁྲོས་ནག་གསང་རྒྱུད་ལས༔ ལྷ་འདྲེ་རྩ་བའི་བསྒྲུབ་ཐབས་ལེའུ་སྟེ་དང་པོའོ༔ སྟོན་པས་སེར་བ་བཀའ་སྩལ་པ༔ མཎྜལ་ཁྲུ་གང་གྲུ་བཞི་པ༔ མི་ལྤགས་གྲུ་བཞི་བུད་མེད་ཀྱི་བཞག་པར་བྱ༔ དེ་སྟེང་རབས་ཆད་ཐོད་པ་བཞག་པར་བྱ༔ ཐོད་པའི་ནང་དུ་བླུག་པར་ནི༔ དགྲ་ཡུལ་སྔན་སྔོན་ཆུ་འཁྱོར་གང༔ ཁྲག་སྣ་ཡང་རྣ་ནི་གང་ཡོད་དག་དང་བསྲེ་དགས་༔ ཐོད་པའི་ནང་དུ་བླུག་པར་བཞག༔ གཡའ་རྡོ་དམར་པོའི་ཕྱེ་མ་དང༔ ཐོད་ནལ་བྱི་མོ་ཡི་ཁྲག་དག་དང༔ ནལ་ཕྲུག་སྐྱེས་པའི་ཤ་མ་དང༔ སྦལ་པ་སྡིག་པ་སྡོམ་གྱི་རོ༔ མཛེ་བོ་རྩོད་དང་དྲེའུ་གསུམ༔ ར་ཁྲག་ཕག་ཁྲག་ཁྱི་ཁྲག་གསུམ༔ བཅུ་གཉིས་དག་ལ་རིལ་བུ་བྱ༔ སྔགས་བཏབ་ཐོད་པའི་ནང་དུ་བླུག༔ ཡབ་ཡུམ་སྔགས་ལ་བརྣག་པར་བྱ༔ བཛྲ་ཏ་ཀི་ནི་རག་ཏ་རཾ་ས་ཐ་རཾ༔ ཀུ་རུ་ཏ་ཀི་ནི་ཀ་ལེ་ཆེ་གེ་ཡུལ་ཐ་རཾ༔ བཛྲ་བི་རུ་རཀྵ་ཀ་རུ་ནི་ཨ་བེ་ཤ་ཡ་ཨེ་ཀ༔ སྟོང་ཚོ་གསུམ་བརྟག་པ་མི་རེངས་ཐོད་པ་ཐོགས་པས་བཙས་མ་བརྔ་བ་སོགས་འབྱུང་གྱིས་འབེབས་པར་ངེས༔ དེ་ལས་མང་ན་རང་ལ་འབབ༔ ཐུན་ནི་ཕྱོགས་སུ་གཏོར་བར་བྱ༔ དྲག་སྔགས་བཟླས་ཤིང་གཟུ་དཔང་གསོལ༔ འོ་འདོད་འབོད་ཅིང་བྲང་ཡང་བརྡུང༔ ཆོ་ངེས་གདབ་ཅིང་དམོད་མོ་བྱ༔ ང་ཡིས་མ་ཉེས་ཁོ་ཡིས་ཉེས༔ ད་རིས་རི་རྡོ་ཀླུང་དུ་ལྡོག༔ དེ་སྐད་གྱིས་ལ་གཡབ་མོ་གདབ༔ སྲེ་མོང་བྱི་བའི་མཇུག་མ་དང༔ འབྲུ་གསུམ་རིན་ཆེན་བྲིས་པ་ནི༔ རང་གི་མགོར་ཡོད་ཐོག་མི་ཡོང༔ བདུན་ཚོ་གསུམ་གྱི་སེར་བ་བསྒྲུབས༔ གོང་གི་སྦྱོར་བ་དང་ལྡན་པའི༔ དྲག་སྔགས་འདི་དག་དྲག་ཏུ་བཟླས༔ གོང་གི་སྔགས་ཀྱི་གཞུག་ཏུ་གདགས༔ ཀ་སོ་ཨཱི་ཡ་ཤརྦ་ཨ་ནོ་ཏ་རུ་ཀྵ་རུ་བི་བཛྲ་རཾ་ཐ་ས་མོ་ར་ཡལ་ཆེ་གེ་ལི་ཀ་ནི་ཀ་ཏ་ཀུ་རཾ་ཐལ་མོད་སྟཾ་རག་ནི་གི་ཏི་བཛྲ་མུན་ཏི་བ་དར་ཡ་རྦད༔ སེར་བ་མི་ཕེབས་མི་སྲིད་དོ༔ སྟོན་པས་ལྟས་ངན་བཀའ་སྩལ་པ༔ མོན་བལ་ལས་བྱུང་ཐོད་པ་རུ༔ ལྟས་ངན་སེམས་ཅན་ཤ་སྙིང་རུས༔ ས་དང་བསྲེས་ལ་གཏུན་དུ་བརྡུངས༔ ཁྱི་དང་སྤྲེལ་གྱི་གཟུགས་བྱས་ལ༔ ཕོ་ནི་སྤྲེའུ་དག་ལ་བསྐྱོན༔ མོ་ནི་ཁྱི་མོ་དག་ལ་བསྐྱོན༔ དེ་གཉིས་ཐོད་པར་བཅུག་ནས་ནི༔ འབྲུབ་ཁུང་ནང་དུ་གཞུག་པར་བྱ༔ སྔགས་ནི་ཕོ་ཡི་སྔགས་ལ་གདགས༔ ཞག་གསུམ་བར་དུ་བཟླས་པར་བྱ༔ རྟགས་ནི་འདི་བཞིན་འོང་བ་ཡིན༔ མོན་པ་གསེར་གྱི་རྣ་བ་ཅན༔ ཞག་གཅིག་རང་གི་གམ་དུ་འོང༔ ཞག་གྲངས་གསུམ་ལ་དགྲ་ལ་འོང༔ རང་ལ་ཅི་ཡོང་དགྲ་ལ་འོང༔ ལྟས་ངན་སྣ་ཚོགས་རུས་ཐུན་བྲབ༔ སྔགས་ཐུན་རིམ་པ་འདི་ཡིས་བྲབ༔ ཏྲི་རག་ཤ་ཁཾ་ལིང༔ ཧ་པ་དེ་ཝ་དམ་ཉམས་དགྲ་བོ་འདི་མྱོག༔ འདུར་ཏ་འདུར་ཏ་མྱོག་མྱོག་རྒྱུག་རྒྱུག་བྷྱོ་བྷྱོཿ དེ་ཡིས་ལྟས་ངན་སྣ་ཚོགས་འབྱུང༔ སྟོན་པས་རྡོ་ཆར་བཀའ་སྩལ་པ༔ བྲ་བོ་མ་ཡིན་འབྲུ་སྣ་རྣམས༔ ཨ་རུ་ལ་སོགས་སྨན་སྣ་དང༔ ཕ་བོང་ལ་སོགས་རྡོ་སྣ་དང༔ དེ་རྣམས་མི་རྐང་ནང་དུ་བླུག༔ ཁུ་བྱུག་ལ་སོགས་བྱ་མགོ་ཡི༔ རྣམ་པ་མང་བསགས་མཆན་དུ་སྦ༔ སྔགས་ནི་ཡུམ་གྱི་སྔགས་མཇུག་གདགས༔ སྟོང་ཚོ་གསུམ་གྱིས་ཕེབས་པར་འགྱུར༔ ཐོག་བར་ཡུག་གྲི་གྷྲིམ་གྷྲིམ་དྷ་ར་ཡ་རྦད༔ ཤར་ཤར་དེས་ཆེམ་དྲག་རྡོབ་ཤར་རྒྱོབ་ཡ༔ ཉི་ཤུ་ཐམ་པ་རྡོ་བར་བསྔགས༔ རྟགས་ནི་ས་བསྲེས་འདེབས་པ་དང༔ བོང་བ་རྡོ་དང་མཚོན་འཕེན་པ༔ དངོས་སུ་བྱུང་ན་གྲུབ་པ་ཡིན༔ རང་ལ་ཤིན་ཏུ་རྡོ་མང་ན༔ བསྒྲུབ་ཁང་རྡོ་རྗེ་རྒྱ་གྲམ་བྲི༔ དེ་ཡིས་ཉུང་ངུ་འགྲོ་བའོ༔ ནམ་དགོས་མི་རྐང་ཐུན་གཏོར་བས༔ རྡོ་འོང་དེ་ནས་ཆུ་རྡོ་འབབས༔ སྣ་ཚོགས་རྡོ་འབབས་ཐབ་མེ་འབར༔ དེ་ནས་མཚན་འབབས་གྲོང་མཁར་འཇིག༔ བཅད་ན་རང་གི་དམ་ཚིག་ཉམས༔ རྡོ་ཆར་གོང་ལ་སྔགས་འདི་གཅེས༔ ཡ་རྒྱོབ་ཤུ་བ་ཡེ་ག་ཏེ་ཏི་ཁྲག་ངེས་ཆོམ་ངེས་ཤར་རྨད་ཡ་དྷ་ཡ་དྷ་ཡ་ཁྲིམས་གྷྲི་མ་ཏི་ཡུག་ས་ཐོང༔ བཛྲ་མུ་ག་ཙི་བ་དྷ་ར་ཡ་རྦད༔ སྟོང་ཚོ་རེ་རེ་ཐུན་ཡང་ཏིག༔ མཚན་མོ་གཅིག་གིས་རྡོ་ཆར་འབབས༔ དགྲ་མཁར་སྒྱེལ་ཐབས་བཀའ་རྩལ་པ༔ གྲོག་མ་དམར་ནག་འཐབ་པ་དང་། ལུང་བསྐམ་ས་གཡོས་བྱུང་བ་དང༔ ས་མཁར་སྒྱོགས་ཀྱིས་བཤིགས་པ་དང༔ མི་ནི་ཕུང་ཤུལ་རེ་རུལ་དང༔ མཆོད་རྟེན་ལྷ་ཁང་རྙིང་པའི་ས་རྡོ་དང༔ སྣོད་ནི་ཁམ་ཕོར་གསར་བ་དང༔ ཡབ་ཡུམ་སྔགས་མཇུག་སྟོང་ཚོ་གསུམ༔ བཟླས་ནས་གོང་གི་ས་རྡོ་ལ༔ རྒྱལ་ཆེན་བཞི་བྱ་ཕྱོོགས་བཞིར་སྦ༔ རྒྱལ་ཆེན་བཞི་པོས་མཁར་ཚལ་བཞི༔ བཏང་ནས་སེར་པོར་ཁྱེར་བར་བསམ༔ རང་ཉིད་ཧ་ལུ་མ་དྷར་བསམ༔ ཞལ་གསུམ་སྤྲེའུ་སེང་གེ་གླང༔ གཡས་གསུམ་སྒྱོགས་ཤིང་ལྕགས་ཐོ་ན༔ འཁོར་ལོ་དབྱུག་ཐོ་འུར་རྡོ་གཡོན༔ མགུལ་ནག་རང་རྟགས་འ ཁོར་ཆུན་རྟགས༔ སྲིན་ཡུལ་ལང་ཀ་བཤིག་པར་བསམ༔ ཉམས་པའི་ཡུལ་མཁར་བཤིག་པ་བཞིན༔ མཇུག་མ་འདོམ་ནི་ལྔ་བརྒྱ་ཡི༔ དམ་ཉམས་མཁར་ལ་འཁྱུད་པར་བསམ༔ མཁར་དེ་མཁའ་ལ་འདེགས་ཚུལ་བྱ༔ མུ་སྟེགས་ཕོ་མོ་ཧ་ལུ་དང༔ རྒྱལ་ཆེན་བཞི་ལ་གཏོར་མ་གཅིག༔ བསོག་པ་ཆེན་འདི་ནས་འབྲུ་ཆད་ཡོད། བརྡུང༔ འོ་དོད་བོས་པས་མཁར་འགྱེལ་འགྲོ༔ སྟོན་པས་ཕྱིར་བཟློག་བཀའ་སྩལ་པ༔ འདི་ཡི་རྦོད་གཏོང་བྱུང་བ་ན༔ འདི་རང་མ་ཡིན་གཞན་གྱི་མིན༔ འདི་ཤེས་སྡེ་བརྒྱད་འཇིགས་མི་དགོས༔ ཕྱིར་བཟློག་བསད་འཁོར་བཅད་ལུགས་ལ༔ འདམ་ལིང་སྙིང་ཀར་མིང་རུས་བཅུག༔ འབྲུ་ནག་དགུ་ཡི་དོད་དུ་གཞུག༔ འཁོར་ལོ་རྩིབས་བཅུ་བྲིས་བྱས་ལ༔ མཆོད་རྟེན་གཡམ་པའི་བར་དུ་གཞུགས༔ ཡབ་ཡུམ་སྔགས་ལ་སྔགས་འདི་གདགས༔ དྷ་བྷ་སད་དྷེ་མ་བྷ་ཏི་པའི་རོ་མ་མ་ཙ་ཙ་བཟློག་སོད༔ ཏྲི་ཡ་ཁ་ལ་མ་ཏེ་བཟློག་སོད༔ ཝར་ཏི་བུ་མ་ཛ་ཛ་སྨོག་སོད༔ ཏྲག་རག་ཤག་མ་ཏི་ན་བཟློག་སོད༔ བྷྱོ་བྷྱོ༔ བྷྱོ་བྷྱོ༔ ཞག་བདུན་བཟླས་ནས་གོང་གཟུགས་ཐོགས༔ ཚིགས་བཤད་འདི་ཡང་བརྗོད་པར་བྱ༔ དགྲ་བོ་ཆེ་གེ་ཁྱོད་རང་གི་མིང་སོང་ངོ༔ བྱས་ལ་བྱད་འགོད་བྱས་ལ་བསྐུར་རོ༔ ཡབ་ཡུམ་སྔགས་འདི་ལ་བཏག་བཟླས༔ སླར་ལོག་སྟེ་ཏོད་ལོག་ཏན་ར་བཟློག༔ མ་མ་ཀེ་ཏ་བཟློག༔ ཤ་ཤ་མ་ཁྲུག་བཟློག༔ ཡ་ཡ་རྒྱུག་རྒྱུག་སྤར་སོད༔ དྲག་ཏུ་བཟླས་ལ་གཟུགས་སྐུར་རོ༔ སྟོན་པས་ཇག་ཆིངས་བཀའ་སྩལ་པ༔ མིག་གི་དབང་པོ་མ་གསལ་བའི༔ ནང་ལྔ་དོན་སྙིང་ཕྱི་ལྔ་དབང་པོ་བསགས་པར་བྱ༔ ཡན་ལག་བཞི་ཡི་ཤ་བཞི་དང༔ སྙིང་ཤུན་ཀླད་རྒྱས་བཅུ་བཞིའོ༔ སྨྱོན་ཁྲག་གོང་གི་གསེབ་ཏུ་གདབ༔ དིགས་པའི་རྐང་བླུགས་ཀླད་རྒྱས་དགབ༔ ཡང་ན་དིགས་པའི་སྙིང་ཤུན་དུ༔ བླུགས་ལ་སྔགས་འ དི་སྟོང་ཚོ་གསུམ༔ པྲ་པྲ་ཏི་གན་ཛར་པ་ངག་རྦུད་རྦུད་པྲ་མ་ཙར་ཡ་གན༔ རྟགས་བཟང་མ་བྱུང་བར་དུ་བཟླས༔ སྣ་ལ་རང་རེ་རེངས་པའོ༔ ལག་པ་རེངས་སོགས་གྲུབ་པ་ཡིན༔ རང་གི་སྒྲུབ་པ་ཚར་བ་དང༔ གྲོལ་འདོད་དྲི་ཆུས་ལུས་ཀུན་བཀྲུ༔ དགྲ་བྱུང་ཐུན་གཏོར་མཐེབ་སོར་གདམས༔ དགྲ་བོ་བརྒྱ་སྟོང་རེངས་པར་འགྱུར༔ རེངས་པ་གྲོལ་འདོད་དྲི་ཆུ་ལ༔ སྔགས་ཀྱི་བཟླས་གཏོར་གྲོལ་བ་ཡིན༔ བུ་ཏ་ཧྲོ་ཧྲིང་པྲ་ཝེ་ཤ་ཡ་ཕཊ༔ འབྱུང་བ་ཤིག་ཁྲོལ༔ ཚིག་བཤད་འདི་ཡང་བརྗོད་པར་བྱ༔ མཐོ་གསུམ་མཐོ་ལ་ཡལ༔ རི་གསུམ་རྩེ་ལ་ཡལ༔ དམའ་གསུམ་དམའ་ལ་ཡལ༔ ལུང་གསུམ་མདོ་ལ་ཡལ༔ ཇག་ཆིངས་ཆེན་པོ་ཡལ་དུ་གསོལ༔ ཞེས་པས་མུ་སྟེགས་གྱེས་པར་བསམ༔ དེ་ནི་བཅིངས་གྲོལ་གདམས་པའོ༔ སྟོན་པས་སྔགས་ཐིམ་བཀའ་སྩལ་པ༔ མ་སྔགས་འབྲུ་བརྒྱད་ཏྲག་རག་ཤག་མི་ཏི་སྲོག་ཀར་མ་བྷྱོཿ བཛྲ་མུག་ཐིམས༔ དྷ་ར་ཡ་ཐིབས་དྷ་ར་ཡ་ཐིབས༔ པྲ་ཏི་ཛྙཱ་ན་དྷ་ཡ་ཐིབས་རྦད་ཐིབ་རྦད་ཆེ་གེ་ལ་ཐུན་བྷྱོ༔ དགྲ་བོ་མ་ར་ཡ་ཕཊ༔ བཤད་པ་ལྔ་བཅུ་ཡོད་ས་མ་ཡ་སྙིང་ལ་ས་མ་ཡ་སྲོག་སྙིང་ཁྲག་ལ་བྷྱོ༔ དགྲ་བོ་ཙི་ར་ད་ར་ཡ༔ སྲོག་ལ་རྩ་ཆོད་ཁྲག་ལ་ཧཱུྃ༔ དགྲ་བོའི་ལུས་ངག་ཡིད་མགོ་ཆོད་ཕུང་པོ་ཤིག་ནྲྀ་མ་ར་ཡ་དུ་མ་ར་ཡ་ཕཊ༔ སེར་བ་བཛྲ་ཏ་ཀི་ནི་རག་སྟཾ་བ་ཐ་རཾ་ཀུ་རུ་ཏ་ཀི་ནི་ཀ་ལི་ཡུལ་ཆེ་གེར་པ་ཐ་རཾ་བཛྲ་བི་དུ་རཀྵ་ག་རུ་ཏ་ནི༔ ཨ་བེ་ཤ་ཡེ༔ ཨེ་ཀ་ཏྲི༔ ཤ་ར་ཁཾ་ལི་ཧ་ས་དེ་ཝ་དམ་ཉམས་དགྲ་བོ་འདི་མྱོས་འདུར་ཏི་འདུར་ཏེ་རྒྱུག་རྒྱུག་བྷྱོ་བྷྱོ༔ ཐོང་ས་ར་ཡུག་ཏི་གྷྲི མ་ཁཾ་ད་ར་ཡ་རྦད༔ ཤར་ཤར་ངེས་ཆོམ་ཁྲག་ཏིག་ཏོ་ཤོ་རྒྱོབ་ཡ༔ མཁར་བཤིག་པ་ཉི་ཤུ་ཧ་ས་དེ་ཝ་ས་སྤྲེའུ་ཏྲིག་ནན་འུར་ཆུམ་ཧྲལ་ངེས་སོད༔ དྷར་དྷར་པྲིལ་པྲིལ་འུར་འུར་ཤིག་རྡོ་ཆར་ཉི་ཤུ་ཤིག་ཡ༔ ཕྱིར་ཟློག་ཞེ་གཅིག་ཧ་བྷ་ས་དྷ་རི་མ་བྷིས་རི་མ་བཟློག་སོད་ཏྲི་ཡ་ཁ་ལ་མ་དེ་བཟློག་སོད༔ ཝར་ཏྲི་བྲུཾ་ཛ་ཛ་བཟློག་སོད༔ ནག་པོ་ལོག་སོད༔ བྷྱོ་བྷྱོཿ བྷྱོ་བྷྱོཿསླར་ལོག་ཏེ་ཏེར་ལོག་ན་ཏེ་ལོག༔ མ་མ་ཀེ་ཏ་བཟློག༔ ཤ་ཤ་འཁྲུག་བཟློག༔ ཡ་ཡཱ་རྒྱུག་རྒྱུག་སླར༔ ངག་ཆིངས་བཅུ་བདུན་པར་པྲཏ་ནན་ཛ་བད་ཀ༔ ངག་འདུད་ཧུང༔ པྲ་མ་ར་ཙ་ནན༔ བུ་ར་ཧྲིང་ཧྲིང་པྲ་བེ་ཤ་ཡ་ཕཊ༔ ཏྲག་ཤ་མ་རི་ཟློག་སོད་ལ་རུང་པ་ཤིག་ཁྲོལ་ནག་པོ་ཁ་ལ་འདུ༔ ནག་པོ་ཏྲི་ན་འདུ༔ ཧེ་ཧེད་འདུ་ཧ་བ་ནི་རྒྱུ་སྟེ༔ ཏྲག་ཏི་ཤད་ནག་པོ་རྦད༔ བཛྲ་མུག་ཐིབ་དྷ་ར་ཡ་རྦད༔ ཅེས་གསུངས་སོ༔ ཁྲོས་ནག་གསང་རྒྱུད་ལས༔ ལས་མཐའི་ལེའུ་སྟེ་གཉིས་པའོ༔ དེ་ནས་ཡང་བཀའ་སྩལ་པ༔ བསྟན་པའི་དགྲ་བོ་རྒང་ཚལ་དུ༔ བསད་པའི་ལས་ནི་འདི་ལྟར་རོ༔ ས་ལ་གྲུ་གསུམ་དོང་བྲུས་ལ༔ དེ་ལ་སྟེང་འོག་གཉིས་བྱ་སྟེ༔ འོག་མ་ས་ཡི་སྟེང་དུ་བྲུ༔ བར་མ་རོ་བསྲེགས་གཡམ་པར་བྱ༔ གཡམ་བུག་སྟེང་དུ་ཁམ་ཀོང་ནང༔ ཁྭ་རཾ་བྱ་རོགས་སྒོང་སེར་བླུག༔ མ་རུལ་པའམ་སྐམ་པའི་ནང༔ གནག་པའི་དགྲ་བོའི་དྲི་ཆེན་བླུག༔ ཁ་ཁ་དམ་པར་བཅད་བྱས་ལ༔ སྨྱུག་མའི་སྲང་བཞི་གྲུ་གསུམ་དང༔ རབ་ཆད་སྐྲ་ཡིས་གའུ་བཅིངས༔ ཤིང་འོམ་བུའི་རྟ་ལ་བསྐྱོན་པར་བྱ༔ དྲི་ཆེན་གསེབ་ཏུ་སྡིག་ནག་ཤ༔ རྣག་ཀྱང་བཏབ་ལ་སྟེང་ཁར་བཞག༔ འོག་ཏུ་དུག་སྣ་བྷ་ནག་མེས༔ ཀོང་བུ་སྲོས་ལ་སྔགས་འདི་ནི༔ ཞག་གསུམ་བཟླས་ནས་གཉན་སར་གཏད༔ མྱུར་དུ་དགྲ་བོ་སྒང་ཚལ་འགྲོ༔ ན་མོ་དྷ་ཀི་ཙ་རི་མན་ཏྲ་རཀྵ༔ ༀ་ཀེ་ཏ་ཀེ་ཏ་སྭཱ་ཧཱ༔ ཀུན་ཏུ་རྒྱུ༔ སྒུལ་སྐྱོད་ཆུག༔ མཐའ་ས་ལ་ཐུམ༔ གཟུགས་ལ་བྲེང༔ ཡིད་ལ་ཁྱིག༔ ཐུག་ལ་རྦད༔ སི་སི་ས་རྡོག༔ ཕེ་པེ་ལེ་པེ༔ ཨན་བུ༔ ཨ་དྷ་ན་རྦད་ཡ༔ ཞེས་གསུངས་སོ༔ ཡང་ནི་བསྐྲད་འདོད་བཀའ་སྩལ་པ༔ རྟ་དང་དྲིའུ་ཁ་སེར་གྱི༔ ཚུལ་ས་གཉིས་ལ་དགྲ་གཟུགས་བྱ༔ ཞག་གསུམ་སྔགས་ཤིང་དུག་ཆུས་བྲབ༔ ཉེར་ལྔའི་ཉིན་པར་ཐོད་པ་གདབ༔ དེ་བུས་ཤར་ནས་རླུང་བྱུང་ན༔ ཤིན་ཏུ་བཟང་བས་ཆུ་ལ་བསྐུར༔ དགྲ་བོ་ཡུལ་གཞན་སྐྲོད་པ་ལ༔ ཐེ་ཚོམ་མེད་དོ་ས་མ་ཡ༔ ས་སི་ས་རྡོག༔ དེ་བི་ཨ་པ་པུ་རུ་ཕོ་རོ༔ རྟེན་དྷེ༔ པ་དེ་པ་དེ༔ ཨུ་ཙ་ཏ་ཡ་ཕཊ་ཕཊ༔ ཅེས་གསུངས་སོ༔ ཡང་ནི་དགྲ་རེངས་བཀའ་སྩལ་པ༔ ཐོད་ངན་དུམ་བུ་དྲུག་པ་རུ༔ ཐང་ཤིང་བྱང་བུ་དགྲ་གཟུགས་བྲི༔ ཐོད་ནང་བཅུག་ལ་ངན་སྔགས་འ དི༔ སྟོང་ཕྲག་གསུམ་བཟླས་རྒྱ་རིང་དུ༔ རྡོ་རྗེ་རྒྱ་གྲམ་ཁ་བཅས་མནན༔ དེ་ཡི་རེངས་པར་ཐེ་ཚོམ་མེད༔ ས་སི་ས་སྟོང་དེ་བའི་ཧ་ས་ཧ་ར་ཐ་ཐ་པྲ་ཏི་ཏ་ར་ཙ་ཐ༔ རེངས་པར་བྱེད་པའི་ངན་སྔགས་སོ༔ དེ་ནས་སྔགས་ནག་ནུས་པ་ཅན༔ བསད་པའི་ཐབས་འདི་བཀའ་སྩལ་པ༔ ནས་ནག་ས་ནག་བཙན་དུག་དང༔ ཁྱི་ནག་ཁྲག་ལ་མི་གཟུགས་བྱ༔ ཕག་པའི་མགོ་ཅན་ཁ་ནང་དུ༔ སྔགས་པ་དེ་ཡིས་ལིངྒ་བརྫང༔ མཛེ་ཐོད་ནང་བཅུག་ས་མཚམས་ཀྱི༔ རྒྱ་གྲམ་ལམ་གྱི་འོག་ཏུ་ནི༔ དགྲ་ལ་ཁ་བསྟན་སྦ་བར་བྱ༔ གཟའ་ནི་ཕུར་བུ་དག་ལ་ཤིས༔ ངན་སྔགས་སྟོང་ཕྲག་བརྒྱད་བཟླས་ནས༔ མཐའ་ཆད་མཆོད་རྟེན་རྙིང་པ་ལ༔ རི་རབ་བྱས་ལ་སྟེང་ནས་མནན༔ གང་བྱས་དགྲ་བོ་བརླག་པར་འགྱུར༔ ས་སི་ས་སྟོག་ཡག་ཤ༔ རག་ཤ༔ ཀྲ་རྡོ༔ པི་ཙུཿ གར་ས་ནི་ཛཿ ཁ་ཡགཿ ནྲྀ་ཛཿ ཡག་ཤ་སི་སི་ཁ་མནན༔ སྔགས་འདིས་ལིངྒའི་མཐའ་ལ་བསྐོར༔ དུག་ཆུས་བྲབ་ཅིང་དག་པར་བསྒྲང༔ དེ་ཡིས་བསྟན་པ་ཐུབ་པར་ངེས༔ དེ་ནས་སེར་བ་བཀའ་སྩལ་པ༔ ཐོད་ངན་ནང་དུ་མུ་ཟི་ནག༔ བཙན་དུག་རབ་ཆད་ནག་པོའི་ཤ༔ ཁྱི་ནག་ཁྲག་ཚོ་ཆ་སྙམས་ཏེ༔ ངན་སྔགས་ཞག་པོ་བཅུ་གཅིག་བཟླས༔ དགྲ་ཡུལ་ཀླུ་སར་ཐབས་བྲུབ་ནས༔ སེར་བ་འཕྲོས་ལུང་མེ་པར་འབབ༔ གསང་ཐབས་བྱ་བ་མན་ངག་གོ༔ ས་རྡོ་ས་སི༔ དེ་ཡི་ཨ་བ༔ འཕ་བེ་ཏོ་ཤི༔ རྦེ་ཎེ་བ་ཏ་ན་ཤ་ཡ་ན་པྲོ་མ་རྦད་ཤར་བྷྱོ༔ ཅེས་གསུངས་སོ༔ དགྲ་བོ་མཛེ་ལ་བསྐུར་ཐབས་ནི༔ དགྲ་གཟུགས་མཚལ་དམར་མཛེ་རུས་དང༔ བར་མེ་རྦ་བ་དགྲ་ཏུག་དང༔ རའི་རྒྱའི་ལོ་མའི་གྲོ་ག་ལ༔ དགྲ་བོའི་ལིངྒ་དཔྲལ་བར་མིང༔ སྙིང་གར་མིང་བྲི་སྔགས་མཐའ་བསྐོར༔ དྲིལ་ལ་སྦལ་སྦྲུལ་ཁོག་པར་བརྫང༔ དབྱར་རའི་ཚེས་བརྒྱད་ཆུ་མིག་གི༔ ཁྲུ་གང་འོག་ཏུ་སྦ་བར་བྱ༔ ལོ་མི་འགོར་བར་མཛེ་ཡིས་ཁྱེར༔ སྔགས་འདི་སྟོང་ཚོ་གསུམ་དུ་བཟླས༔ པི་ས་ཏོག་དི་བི༔ ཕུ་རུ་ལ་སན་ཏེ༔ ཛ་ན་ཛྭ་ལ༔ ས་ག་པ་ལ༔ ནག་དེ་ནག༔ དེ་བི༔ ཙི་ཙི་ཛྭ་ལ་ཁན་ཡན་ཏ་ཧཱུྃ་ཧཱུྃ༔ ཞེས་གསུངས་སོ། །ཁྲོས་མ་ནག་མོའི་གསང་རྒྱུད་ལས༔ ངན་སྔགས་ཅོག་བརྡུང་གི་ལེའུ་སྟེ་གསུམ་པའོ༔ དེ་ནས་བཤན་པ་ལག་དམར་ལ༔ སྟོན་པས་རྫས་མཐུ་བཀའ་སྩལ་པ༔ བྱང་བ་ནག་པོའི་ཤ་དང་ནི༔ བསེ་ཤིང་ནག་པོའི་འབྲུབ་ཁུང་དང་༔ བཙན་དུག་ནག་པོའི་མེ་ཏོག་གསུམ༔ རྫིས་ས་སྙིང་སུམ་གསུམ་ཆ་གཅིག༔ ག་པུར་བྱས་ལ་ཁོང་སོང་ན༔ ཟླ་བ་གཅིག་སོང་ནང་རོལ་གཏུབ༔ རྩ་བ་གསུམ་ལ་ཐང་ཕྲོམ་མནན༔ སྨྱོ་འབོག་དག་གིས་དགྲ་བོ་འཆི༔ རྩ་བ་གསུམ་ལ་དཀྲུ་ནག་མནན༔ རླུང་ལ་བསྐུར་ན་རིམ་གྱིས་འགུམ༔ རྩ་བ་གསུམ་དང་བསེ་ཞོ་དང༔ ཟོ་ཤར་སྦྱར་ནས་གང་རེག་ཀྱང༔ རྨ་ནག་ཧོལ་མིག་དག་གིས་འགུམ༔ རྩ་བ་གསུམ་དང་ཙན་དན་སྦྱར༔ དགྲ་བོའི་རི་ཕྱུགས་ཀླུང་ཕྱུགས་ལ༔ བྱིན་ན་ཤ་ཟོས་ཐམས་ཅད་འགུམ༔ མཚལ་ནག་ཞོ་གང་དན་རོག་དགུ༔ ཁྲུན་བུ་ཐུན་གཅིག་ཕྱེ་མ་བྱ༔ གང་ཡང་རུང་བའི་རྟ་ལ་བསྐྱོན༔ ལྷོར་སོང་ཡར་མར་ཁྲག་ཏུ་སྐྱུག༔ དེ་ཡང་མན་ངག་གཅིག་ཆོས་ཡིན༔ ཡང་ཅིག་རྒྱས་བཤད་བཀའ་སྩལ་པ༔ མཚལ་ནག་ཏི་ཚ་ནག་པོ་དང༔ བཙན་དུག་ནག་པོ་ཐང་ཕྲོམ་ནག༔ མུ་ཟི་ནག་པོ་ལྗིད་མཉམ་སྟེ༔ ཞིབ་བཏགས་ཆང་བཟང་སྐྱོ་མ་བྱ༔ རྫ་བུམ་ནང་བླུག་ཁ་བཅད་ལ༔ རྟ་ཡི་ལུད་ལུག་ཚ་མོའི་ནང༔ ཞག་གཉིས་དག་ཏུ་བསྙལ་བར་བྱ༔ སྦྲང་རས་སམ་ལྕང་ཤིང་སོ་བ༔ རྟ་བོང་ལྕིང་ལ་ཁ་སྟོམས་རྩེ༔ གྲིབ་སྐམ་བྱས་ལ་གོང་རྫས་སྦྱར༔ དེ་ཡང་གྲིབ་སྐམ་བྱས་ནས་ནི༔ ཐབས་ལ་མཁས་པས་རླུང་ལ་བསྐུར༔ དུད་པ་ཕོག་ཚད་སྨྱོ་ཡིན་འཆི༔ རང་བསྲུང་མན་ངག་འདི་མེད་ན༔ བྱ་བ་མང་ན་རང་ལ་ངན༔ གླ་རྩི་མར་རྙིང་མི་མཁྲིས་དང༔ རང་གི་དྲི་ཆུ་ཨ་རུ་ར༔ ར་ཚིལ་བསྲེས་ལ་དུད་པས་བདུག༔ ལྷོར་བཟའ་ཡན་ལག་ཀུན་ལ་བྱུག༔ དེ་ཡི་རྫས་དུད་གནོད་པ་ཐུབ༔ དེ་ནས་བྱུག་པ་རྒྱས་བཤད་བྱ༔ བྱི་མོང་བརྡུངས་པའི་ཁུ་བ་དང༔ བསྲུབ་མ་བརྡུངས་པའི་ཁུ་བའི་ནང༔ བཙན་དུག་ར་དུག་ཐང་ཕྲོམ་དང༔ ཐར་ནུ་རེ་ལྕག་བུལ་ཏོག་དང༔ དུད་པ་རལ་པ་ཅན་རྣམས་མཉམ༔ ཞིབ་བཏགས་ཁྱི་ལུད་སྐམ་པོ་ཡིས༔ དུད་པས་རྫ་ཡི་བུམ་པར་བདུག༔ གོང་རྫས་ཆང་བཟང་སྐྱོ་མ་སྦྱར༔ བུམ་ནང་འདམ་ཁས་རྒྱས་བཏབ་ལ༔ རྟ་ལུད་ཚ་མོར་ཞག་གཉིས་མནན༔ དེ་ནས་འབྱིན་དུས་རང་བསྲུང་ནི༔ གླ་རྩི་མར་རྙིང་ཆང་རྒན་དང༔ རང་གི་དྲི་ཆུ་རྣམས་བསྲེས་ལ༔ ལྟོར་བཟའ་ཡན་ལག་སྣར་ཡང་བྱུག༔ དེ་ནས་བུམ་པ་ཁ་ཕྱེ་ལ༔ རང་ལ་རླངས་པ་མ་སོང་བར༔ ཤིག་ཀྱོག་བལ་དཀྲིས་དཀྲུགས་བྱས་ལ༔ བལ་དེ་དགྲ་བོའི་གོང་སམ་ཤ༔ ལྷམ་དང་རྟ་སྒ་གཡག་ཤིང་སོགས༔ ཀུན་ལ་རྫས་དེ་བྱུག་གྱུར་ན༔ སུ་ཡི་རེག་པ་ཕོ་ལ་འབྲས་སུ༔ སོང་ནས་མྱུར་དུ་འགྱུར་བར་འགུམ༔ དགྲ་བོའི་རྟ་ཕྱུགས་གསོད་འདོད་ན༔ ནུ་མ་ལག་པར་བླ་ཁྲག་བྱུག༔ རྫས་དེ་ར་རུར་བླུག་བྱས་ནས༔ མཁར་ལ་སྦས་ན་དགྲ་མཁར་འཇིག༔ རྫས་དེ་བ་རུར་བླུག་བྱས་ལ༔ ཐོང་གཤོལ་མི་རླེབ་ཞིང་དཀྱིལ་དུ། སྦས་ན་དགྲ་བོའི་ལོ་ཏོག་སྐམ༔ ཡང་ནི་དུར་བྱིད་ར་མཆིན་གཉིས༔ ཆ་མཉམ་བཟང་བར་ནང་དུ་བླུག༔ ཞག་གསུམ་དྲོད་ལ་བསྙལ་ནས་མནན༔ དེ་ནས་བཏོན་ལ་གྲིབ་བསྐམ་བྱ༔ ཞིབ་བཏགས་དངོས་གཞི་ཞོ་གང་ལྟོར་སོང་ན༔ ལོ་དུས་ན་ནི་ལེན་པ་ཡིན༔ ཞོ་དྲུག་ཟླ་བ་གསུམ་ན་འཕོ༔ སྲང་གཉིས་བཏང་ན་ཞག་གཉིས་ན༔ དེ་དག་གསོ་ན་ཁོང་བཤལ་བཏང༔ ཡང་ནི་དགྲ་བོ་གསོད་འདོད་ན༔ བཙན་དུག་ཐང་ཕྲོམ་ཕུག་རོན་བྲུན༔ བྱ་རྒོད་སྤོས་དང་ར་དུག་ས༔ རླུང་སྤང་ལངས་མ་ཐག་པ་དང༔ གར་ཆང་སྦྱར་ལ་གྲིབ་སྐམ་བྱ༔ ཞིབ་པར་བཏགས་ལ་ལྟོར་སོང་ན༔ མི་ཕྱུགས་གང་ཡང་འདྲ་བ་ཡི༔ མིག་གིས་གཟུགས་མི་མཐོང་སྟེ་ལོང༔ ཁ་ཡིས་སྨྲ་མི་ཤེས་ཏེ་ལྐུག༔ དགྲ་བོའི་གྲོང་ཁྱེར་འཕྲོག་པའམ༔ དམག་དཔུང་འཇོམས་ན་ཤིན་ཏུ་ཟབ༔ དེ་ཉིད་གསོ་ན་མི་བསྐྱོད་པ༔ ཕོ་རིལ་བཟང་དྲུག་བཏབ་ལ་བཏང༔ མི་རེ་སོས་པར་འགྱུར་བ་ཡིན༔ ཡང་ན་ཐང་ཕྲོམ་ནག་པོ་ཡི༔ འབྲུ་ཞིབ་བཏགས་པ་ཐུར་མགོ་གསུམ༔ ལྟོར་སོང་སྨྱོ་གྲིར་འཆི་བ་ཡིན༔ གསོ་ན་མར་ཁུ་ཕུལ་གང་བཏང༔ དེ་ཡི་ཁད་ཀྱི་སོས་པ་ཡིན༔ ཡང་ན་བསྒྲལ་ཐབས་རིགས་གཅིག་ལ༔ གུར་གུམ་མཚལ་དང་ཁྲག་སྐམ་དང༔ སོ་སོ་འཆའ་དང་ལྕམ་རྩ་ལྔ༔ ཞིབ་བཏགས་ལྟོར་སོང་ཁྲག་ཏུ་སྐྱུག༔ ཡང་ཅིག་མུ་ཟི་རྒྱ་སྐྱེགས་སྦྱར༔ ཞག་གཅིག་བསྙལ་ན་སྐམ་པ་དང༔ ཞིབ་བཏགས་ལྟོར་སོང་རབ་ཆད་དོ༔ བོང་ང་ནག་པོ་རི་ཤི་མང༔ རྩ་བ་ཞི་བཏགས་ལྟོར་སོང་ན༔ མི་རྟ་ཁྱི་གསུམ་གང་ཡང་ལེན༔ བོང་དཀར་མར་གཉིས་བཏང་ན་སོས༔ ཡང་ཅིག་དགྲ་བོའི་ཁྱི་གསད་ནས༔ ནོར་གྲོང་འཕྲོག་ན་འདི་བཞིན་བྱ༔ ཁྱི་ཡི་ཤ་མ་སྐམ་པ་དང་། བོང་ང་ནག་པོ་ཐང་ཕྲོམ་དང༔ སྦྱར་ནས་བྱིན་ན་མྱུར་དུ་འཆི༔ མར་ཟན་བྱིན་ན་སོས་པར་འགྱུར༔ དགྲ་བོ་དམག་དང་ཇག་པ་རྣམས༔ རེངས་པར་འདོད་ན་དུད་པ་དང༔ ཚུར་ནག་མཚལ་ནག་བུལ་ཏོག་དང༔ སུག་པ་ཡུང་ཀར་མུ་ཟི་དང༔ ཕ་བ་སྒོར་སྒོར་སྔགས་ཐལ་རྣམས༔ ཞིབ་ཏུ་སྦྱར་ནས་རླུང་གཅིག་བསྟུན༔ དགྲ་བོའི་གདོང་དུ་གཏོར་ན་རེངས༔ འཁུམ་པར་འགྱུར་བ་ཐེ་ཚོམ་མེད༔ ཡང་ཅིག་ཡུངས་ཀར་ཐལ་ཆེན་ལ༔ སྔགས་འདི་བཟླས་ལ་དགྲ་གདོང་དུ༔ གཏོར་ན་དགྲ་བོ་ཉམས་པར་འགྱུར༔ རང་བཞིན་ཧུར་ཕྱུང་འབུར་ཚུགས་བལྟ༔ ཡང་ཅིག་ཡུངས་ཀར་མི་མཁྲིས་ཀྱིས༔ བྱུག་ལ་སྔགས་བཟླས་དགྲ་མཁར་གཏོར༔ གང་ལ་གཏོར་བའི་ཁྱིམ་དེ་ཕུང༔ ༀ་ཤན་ཏ་ཤན་ཁ་ཐུན༔ ཡག་ཤག་སྙིང་ཤད་ཤད་བྷྱོ༔ ༀ་ནི་ཛ་ཛ་ཤ་རྦད༔ སྙིང་ལ་ས་མ་ཡ་རྦུད་ཕཊ༔ ཁྲག་རྩ་འདུས་རྦད༔ སྙིང་ཡ་མ་ཧཱུྃ་ཕཊ༔ སྲོག་ཕྲེང་སྲོག་ཕྲེང་ཆོང༔ སྙིང་ཡཾ་ཧཱུྃ་ཕཊ༔ ངན་སྔགས་ཤུགས་སྒྲོལ་ཤིན་ཏུ་ཟབ༔ ཡང་ཅིག་བསེ་ཞོ་མཛེ་ཁྲག་སྦྱར༔ གང་བྱུག་དགྲ་བོ་མཛེ་ཡིས་འཛིན༔ ཡང་ཅིག་གནམ་སྦལ་ཆེན་པོ་དེ༔ བཟུང་ལ་རྫ་མར་འོ་མས་གསོ༔ དེ་ཉིད་ཆེ་རུ་སོང་བ་དང༔ འོ་མའི་ནང་དུ་བཙན་དུག་དང་། བོང་བ་ནག་པོ་ཀ་ར་དང༔ བཟང་དྲུག་སྦྱར་ལ་སྦལ་པ་གསོ༔ ཤི་ནས་སྦལ་པའི་རོ་དེ་ཉིད༔ བླངས་ལ་གཙང་སར་གྲིབ་སྐམ་བྱ༔ ཀླད་པ་བྱིན་ན་ཀླད་པ་གཟེར༔ སྦལ་ལྤགས་བྱིན་ན་དགྲ་མིག་གཟེར༔ མདོར་ན་སྦལ་པའི་ཤ་དེ་དང༔ བོང་བ་ནག་པོ་ཀ་ར་སྦྱར༔ གང་བྱིན་དགྲ་ལ་དེ་ལྟར་འོང༔ པགས་པ་བྱིན་ན་མཛེས་འོང་ངོ་༔ ཡང་གཅིག་བསྒྲལ་ཐབས་ལུགས་གཅིག་ལ༔ བོང་ནག་སྤྲ་ཚིལ་སྦྱར་བྱས་ན༔ འོ་དོད་འབོད་ཅིང་འཆི་བ་ཡིན༔ སྤྲ་ཚིལ་ལྡུམ་བུ་རེ་རལ་གཉིས༔ བསྲེས་ནས་བྱིན་ན་སྐམས་ནས་འཆི༔ ཡང་ཅིག་སྦལ་པའི་ཤ་ཁྲག་དང༔ ཐང་ཕྲོམ་བསྲེས་ནས་བྱིན་གྱུར་ན༔ བུ་ག་དགུ་ནས་ཁྲག་འབབ་འགྱུར༔ བུལ་ཏོག་མུ་ཟི་དུད་པ་དང༔ བཅའ་སྒ་ཕྱེ་མ་རྣམས་སྦྱར་ནས༔ བཏབ་ན་དགྲ་ཞིང་སྐམ་པར་འགྱུར༔ བུད་མེད་མདོག་སེར་གདོང་སྨེ་གཡས༔ ཡོད་པ་ཅིག་གིས་བལ་ཚོན་ལྔ༔ རྨེད་པའི་ནང་དུ་ཉུངས་ཀར་བསྟུམ༔ ཕུར་ཆུང་གཅིག་གི་སྐེ་ལ་བཅིངས༔ ཤང་རྫས་ལ་ཤག་རྫས་ལ་ཨ་ལི་ནི༔ ཛ་བལ་ཨ་ཀར་ཤ་ལ་ཛ་ལ་བྷྱོ་བྷྱོ༔ འབུམ་ཙམ་བཟླས་ནས་མཁར་ནང་སྦས༔ འགོར་ཡང་ལོ་དུས་ཚུད་ལ་ནི༔ འཇིག་པར་འགྱུར་བ་ཐེ་ཚོམ་མེད༔ ཡང་ཅིག་རྫས་ཀྱི་སེར་བ་ནི༔ སྦལ་པའི་ཤ་དང་སྤྲུལ་གྱི་ཤ༔ ཉ་ཡི་ཤ་དང་རྩངས་པའི་ཤ༔ སྡིག་པའི་ཤ་དང་ཁྱི་ནག་ཁྲག༔ རྩ་ནག་ཁྲག་དང་ཁྱི་རྒྱའི་ཁྲག༔ བུད་མེད་ནལ་ཡུགས་མངལ་ཁྲག་བཟང༔ དེ་ཚོ་སྦྱར་བའི་རིལ་བུ་ནི༔ མཐེ་བོང་ཙམ་པ་བཅུ་གཅིག་བྱ༔ མི་ལུད་ཁྱི་ལུད་བྱ་ལུད་བྱ༔ དགྲ་ཡུལ་ལྷ་ཀླུ་གཉན་པར་བསྲེག༔ རྫས་སེར་ཡུལ་ཁམས་ཕུང་བ་འབབས༔ དེ་ལ་སོགས་པའི་ངན་ཐབས་རྣམས༔ ཤན་པ་ལག་དམར་ཡིད་ལ་འཆོངས༔ ཁྲོས་མ་ནག་མོ་གསང་བ་སྙིང་གི་ཐིག་གི་རྒྱུད་ལས༔ མྱུར་མགྱོགས་རྫས་ཀྱི་སྟོབས་བཤད་པའི་ལེའུ་སྟེ་བཞི་པོའོ༔ དེ་ནས་བཤན་པ་ལག་དམར་ལ༔ མུན་པའི་སྒྲུབ་པ་འདི་གསུངས་སོ༔ འདི་ལ་རྫས་སྔགས་ཏིང་འཛིན་གསུམ༔ རྫས་ནི་བྱ་ལེ་ཤར་བའི་ཚེ༔ རི་གསུམ་རྩེ་དང་ལུང་གསུམ་མདོ༔ རླུང་འཚུབ་ལངས་ཚེ་ས་དྲུག་བླངས༔ རྒྱ་མཚོ་མདོ་གསུམ་གཏིང་ནས་ནི༔ ཐབས་ལ་མཁས་པ་བླངས་པ་ནི། ས་དང་བསྲེ་ལ་ཟངས་སུ་བསྐོལ༔ ཟར་མའི་བྱེ་བཏབ་རིལ་བུ་བྱ༔ དབྱར་མཐའ་ཐ་ཆུང་ཉི་ཤུ་དགུའི༔ ནམ་ནི་སྨུག་པ་འཐིབ་པའི་སར༔ གློག་དམར་འཁྱུག་པའི་དུས་བཟུང་སྟེ༔ ཕ་ཝཾ་ཁོག་པར་རིལ་བུ་གཞུག༔ གཉིས་པ་སྔགས་ཀྱི་རིམ་པ་ནི༔ ཕ་ཝཾ་རོ་ལ་གསང་སྔགས་འདི༔ སྟོང་ཕྲག་དྲུག་ཏུ་བཟླས་པས་འགྲུབ༔ མཐོང་མཐོང༔ ཧྲེབ་ཧྲེབ༔ ཡེལ་ཡེལ༔ བུན་བུན༔ ལོང་ལོང༔ ཕྱོད་ཕྱོད༔ རུ་སི་རུ་པ་ཧྲིབས་ཐིབས༔ དྷེ་བ་རི་ལ་བྱོལ་བྱོལ་ཕྱིས་ཏ་ནི་རུ་ས་ཡེས་ཧྲིལ༔ རིལ་བུ་དང་ནི་ཕ་ཝང་ངོ་༔ ནང་ནུབ་ཉི་ཟེར་གཉིས་ལ་བསྐམ༔ རོ་དང་རིལ་བུ་རྡོ་དཀར་དང༔ རྡོ་ནག་གཉིས་ལ་བསྲེས་ལ་བརྡུངས༔ ཤིང་རིགས་གཉིས་ཀྱི་སླང་ངར་རྔོ༔ རྩི་བཞིན་བཏགས་པའི་ཕྱེ་མ་ནི༔ རིན་ཆེན་གའུའི་ནང་དུ་སྦ༔ འགྲོ་འདོད་དགྲ་བོ་གང་འཇོམས་ཀྱང༔ ཐིག་ལེ་བྱ་ཞིང་རྫས་དེ་བཅངས༔ དེ་ཡིས་ཚུར་ལ་མི་མཐོང་ཞིང༔ ཕར་ལ་མཐོང་བས་དུ་རུ་ཀའི༔ དམག་དཔུང་ལ་སོགས་འཇོམས་པར་ནུས༔ དེ་ནས་རང་ཉིད་གཞན་དག་གིས༔ མཐོང་བར་འདོད་ན་རྫས་དེ་བཀྲུ༔ སྔགས་འདི་བརྒྱ་བཟླས་མཆིལ་མ་ཡིས༔ ལུས་ལ་བྱུག་པས་མཐོང་བ་ཡིན༔ རྡོ་ས་ནི་རུ་ས་སེར༔ ཡེད་ཡེད་སེར་དྲང་ངེས་ནི་ཏི་སྭཱ་ཧཱ༔ གསུམ་པ་ཏིང་འཛིན་རིམ་པ་ནི༔ ཐོག་མ་བར་དང་ཐ་མ་རུ༔ ཕྱོགས་བཅུའི་རྫས་རྣམས་ཐམས་ཅད་དུ༔ མུན་པ་ནག་པོས་འཚུབས་པར་བསམ༔ ཁྲོས་མ་ནག་མོ་གསང་བ་སྙིང་ཐིག་གི་རྒྱུད་ལས༔ དགྲ་བོ་འཇོམས་པ་མུན་ནག་འཁོར་ལོ་བསྒྲུབ་པའི་ལེའུ་སྟེ་ལྔ་པའོ༔ བདུད་ཤན་པ་ལག་དམར་གྱིས་བཀའི་བསྡུ་བ་པོ་བྱས་ནས་གཏེར་དུ་སྦས་པ་ལས༔ ཕྱིས་བཅོམ་ལྡན་འདས་ཕྱག་ན་རྡོ་རྗེའི་གཟི་བརྗིད་མ་ཐུབ་པར་ལ་བརྟེན་ནས༔ རང་གི་སྲོག་སྙིང་དང་རྒྱུད་འདི་བཏོན་ནས་བཅོམ་ལྡན་འདས་ལ་ཕུལ་ལོ༔ དེ་ནས་ཕྱག་ན་རྡོ་རྗེས་རྒྱུད་བཅུ་བདུན་གྱི་བཀའ་སྲུངས་སུ་བཞག་ནས་རིམ་པར་གཅིག་ནས་གཅིག་ཏུ་བརྒྱུད་ནས་གཏེར་དུ་གཏམས་ཏེ༔ མི་ནུབ་ཙམ་དུ་བྱས་པ་ལས་སྲོག་ལ་བསྔོ་བ་དང་བསྟན་པ་འཇིགས་པ་བྱུང་ན་སྤྱད་ཀྱི༔ གཞན་ནི་ཚིག་ཙམ་དུ་མ་ཤོར་བར་སྦོས་ཤིག༔ ཟབ་རྒྱ༔ གཏད་རྒྱ༔ གཏེར་རྒྱ༔