གྲུབ་མཐའ་སོ་སོའི་བཞེད་གཞུང་གསལ་བར་སྟོན་པ་ཆོས་འབྱུང་གྲུབ་མཐའ་ཆེན་མོ་བསྟན་པའི་སྒྲོན་མེ། བན་དྷེ་ཤེས་རབ་འོད།
བླ་མ་རོག་གི་བན་དྷེ་ཤེས་རབ་འོད་ཀྱིས་མཛད་པའི་གྲུབ་མཐའ་སོ་སོའི་བཞེད་གཞུང་གསལ་བར་སྟོན་པ་ཆོས་འབྱུང་གྲུབ་མཐའ་ཆེན་མོ་བསྟན་པའི་སྒྲོན་མེ་ཞེས་བྱ་བ་བཞུགས་སོ། །སྐུ་གསུམ་དབྱེར་མེད་རྡོ་རྗེ་འཆང་གི་ངོ་བོ་ཉིད། །གདུལ་བྱའི་དོན་དུ་མཚོ་ཆེན་མི་ཡི་གཟུགས་འཛིན་ཅིང་། གང་འདུལ་ཐབས་ཀྱིས་གདུལ་བྱའི་དོན་ལ་སྐྱོ་དུབ་མེད། །རྩ་བ་བརྒྱུད་པར་བཅས་པའི་བླ་མ་རྣམས་ལ་འདུད། །རང་བཞིན་སྤྲོས་བྲལ་མཁའ་ལྟར་དག་པ་ཆོས་ཀྱི་སྐུ། །གཉིས་མེད་བདེ་ཆེན་རོལ་པ་ལོངས་སྤྱོད་རྫོགས་མཛད་ཅིང་། །གདུལ་བྱའི་དོན་དུ་ཡུལ་དང་མཐུན་པར་ཅིར་ཡང་སྤྲུལ། །སངས་རྒྱས་གཙོ་ལ་གུས་པ་མཆོག་གིས་ཕྱག་འཚལ་ལོ། །སྟོན་པའི་བསྟན་པ་དམ་ཆོས་གསུང་རབ་བཅུ་གཉིས་དང་། །བསྒྲུབ་པའི་ཐབས་མཆོག་འཕགས་ལམ་ཡན་ལག་བརྒྱད་དང་ནི། །དོན་དམ་སྤྲོས་མེད་ཞི་བ་མྱ་ངན་འདས་པའི་ཆོས། །སྐྱོབ་པའི་ཆོས་ལ་གུས་པ་མཆོག་གིས་ཕྱག་འཚལ་ལོ། །ཐུབ་དབང་སློབ་མ་འཕགས་པ་ཉན་ཐོས་སྡེ་གཉིས་དང་། །སྲིད་པའི་ཉེས་བཅོམ་འཕགས་པ་རང་རྒྱལ་རྣམ་པ་གཉིས། སློབ་དང་མི་སློབ་རྒྱལ་བ་སྲས་ཀྱི་ཚོགས་མཆོག་སྟེ། །དགེ་འདུན་ཆེ་ལ་གུས་པ་མཆོག་གིས་ཕྱག་བགྱིའོ། །གང་གིས་ཤེས་རབ་མཚོ་ཆེན་མཁའ་ལ་རབ་ཕྱར་ནས། །མ་རྟོགས་ལོག་རྟོག་ཐེ་ཚོམ་དྲྭ་བ་ཀུན་བཅད་དེ། །ཤེས་བྱའི་གནས་ལུགས་ཇི་བཞིན་ཁོང་དུ་ཆུད་པའི་དོན། །རོག་གི་བན་དེ་ཤེས་རབ་འོད་ཀྱིས་བཤད་པར་བྱའོ། །གང་ཞིག་ཐོས་བསམ་གཉིས་ཀྱིས་སྒྲོ་འདོགས་མ་བཅད་ཅིང་། །ལྟ་བའི་གནས་ལུགས་དེ་ཉིད་ཁོང་དུ་མ་ཆུད་པར། །བདག་ནི་བསྒོམ་ཆེན་ཡིན་ཞེས་གླེན་པ་ཡུས་ཀྱིས་རྒྱལ། །དོན་མེད་འདུག་བསྲན་ཅན་གྱི་མི་ལ་མཁས་པས་ཁྲེལ། །སྒྲ་ཚད་རིག་པས་ཚིག་དོན་འབྲེལ་བ་རབ་བརྟགས་ཏེ། །གཞུང་ཆེན་ཐ་སྙད་ཚིག་ལ་མཁས་པར་གྱུར་ན་ཡང་། །རང་གི་དེ་ཉིད་མ་མཐོང་གོ་ཡུལ་རྐྱང་པར་འཇལ། །ཚིག་མཁན་ང་རྒྱལ་ཅན་ལ་རྟོགས་ལྡན་རྣམས་ཀྱིས་ཁྲེལ། །ཇི་ལྟར་མིག་གིས་བལྟས་ནས་རྐང་པས་བགྲོད་པ་བཞིན། །ཐོས་བསམ་ཉིད་ཀྱིས་ཤེས་བྱའི་སྒྲོ་འདོགས་བཅད་བྱས་པའི། །མན་ངག་སྙིང་པོ་གདེང་དུ་བཅངས་ཏེ་དབེན་པར་སྒོམ། །དོན་མཆོག་གྲུབ་ནས་འགྲོ་བའི་དཔལ་མགོན་རིན་པོ་ཆེ། །འདི་ནི་ཐུབ་པའི་སྲས་མཆོག་འགྲོ་བའི་མགོན་པོ་ཡིན། རྗེས་འཇུག་རྣམས་ཀྱང་དེ་བཞིན་ཐུགས་ལ་དགོངས་པར་ཞུ། །འདི་ན་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་པ་རྣམས་ཀྱི་བདྲེན་པ། སྟོན་པ་རྡོ་རྗེ་ཐུབ་པའི་དབང་པོ་རྣམས་ཀྱིས་ལེགས་པར་གསུངས་པའི་བསྟན་པ་མཐའ་དག་གི་དོན་མདོ་ཙམ་དུ་བསྡུས་ཏེ་ཆོས་སྤྱིའི་རྣམ་པར་བཞག་པ་དང་། གྲུབ་མཐའི་རིམ་པ་མདོ་ཙམ་ཞིག་བརྗོད་པར་བྱའོ། དེ་ལ་སྤྱིར་གྲུབ་མཐའི་རྣམ་པར་བཞག་པ་ལ་དོན་གསུམ་སྟེ། གཏན་ལ་དབབ་པར་བྱ་བའི་ཡུལ་ཤེས་བྱའི་ཆོས་བསྟན་པ་དང་གཅིག །ཤེས་བྱའི་ཡུལ་འཛིན་པར་བྱེད་པ་ཤེས་བྱེད་སྐྱེས་བུའི་བློ་དང་གཉིས། དེ་གཉིས་གཉིས་སུ་མེད་པ་ཤེས་བྱའི་དངོས་པོའི་གནས་བསྟན་པ་དང་གསུམ་མོ། །དང་པོ་གཏན་ལ་དབབ་བྱའི་ཤེས་བྱ་ལ་གཉིས་ཏེ། ཡུལ་དངོས་དང་། ཡུལ་དེ་དག་གི་ཁྱད་པར་རོ། །ཤེས་བྱའི་ཡུལ་དངོས་ནི། གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་ཆོས་ཐམས་ཅད་དོ། །དེ་ལ་ཡང་གཉིས་ཏེ། མཚན་ཉིད་འཛིན་པའི་ཆོས་དང་། རྣམ་པར་དཀར་བའི་ཆོས་སོ། །དེ་ཡང་། སངས་རྒྱས་ཐམས་ཅད་ཀྱི་ཡེ་ཤེས་གཏན་ལ་དབབ་པའི་མདོ་ལས། ཆོས་རྣམས་མ་ལུས་ཐམས་ཅད་ཀུན། །རང་གི་མཚན་ཉིད་འཛིན་མོད་ཀྱང་། །རྣམ་པར་དཀར་བ་མ་ཡིན་ཕྱིར། །ངས་ནི་རྣམ་པར་དཀར་བ་བསྟན། །ཅེས་སོ། །དེ་ལ་རང་གི་མཚན་ཉིད་འཛིན་པའི་ཆོས་ཞེས་གང་ལ་བྱ་ན། ཤེས་བྱ་དངོས་པོའི་ཆོས་ཐམས་ཅད་ལ། རང་རང་གི་མཚན་ཉིད་མི་འདྲ་བ་རེ་རེ་ཡོད་དེ། མེའི་མཚན་ཉིད་ཚ་བ། ཆུའི་མཚན་ཉིད་གཤེར་བ་ལ་སོགས་པའམ། བུམ་པའི་མཚན་ཉིད་ཁ་གཡེལ། ཞབས་ཞུམ། མགྲིན་པ་ཕྲ། ལྟོ་བ་ལྡིར། མཆུ་འཕྱང་བ་ཡིན་བྱ་བ་ལ་སོགས་པ་གཟུགས་ནས་རྣམ་པ་ཐམས་ཅད་མཁྱེན་པའམ། ཆོས་ཅན་དངོས་པོར་སྣང་བ་ཐམས་ཅད་ལ་རང་གི་མཚན་ཉིད་མི་འདྲ་བ་རེ་རེ་ཡོད་པ་ཡིན་ཏེ། ཁྱབ་ཆེ་བ། ཁྱབ་ཆུང་བ་མི་སྲིད་པ་གསུམ་དང་བྲལ་བའི་རང་ལྡོག་རྫས་སུ་གྲུབ་པ་རེ་རེ་ཡོད་པ་ཡིན་ནོ། །འོ་ན་དེ་བས་རང་གི་མཚན་ཉིད་འཛིན་ན། ཆོས་ཞེས་ཅི་བྱར་རམ་སྙམ་ན། དེའི་རྒྱུ་མཚན་ནི། ཆོས་ཅན་དངོས་པོ་མཐའ་དག་ལ། ཆོས་ཉིད་དེ་བཞིན་ཉིད་ཀྱིས་ཁྱབ་པར་གནས་པས་ན་རང་གི་མཚན་ཉིད་འཛིན་པའི་ཆོས་ཞེས་བྱ་སྟེ། དེས་འཁོར་འདས་ཀུན་ལ་ཁྱབ་པར་གནས་སོ། །རྣམ་པར་དཀར་བའི་ཆོས་ནི། ཁྱད་པར་དུ་ཐར་པ་དང་ཐམས་ཅད་མཁྱེན་པ་དངོས་སམ་བརྒྱུད་ནས་ཐོབ་པར་བྱེད་པའི་ཐབས་གང་ཡིན་པའོ། །དེ་ལ་གཉིས་ཏེ། བརྗོད་བྱ་དོན་གྱི་བདག་ཉིད་ཀྱི་ཆོས་དང་། རྗོད་བྱེད་ཚིག་གི་བདག་ཉིད་ཀྱི་ཆོས་སོ། །དེ་ཡང་མདོ་སྡེ་རྒྱན་ལས། ཇི་ལྟར་མནམ་ན་རབ་བསྒུ་བ། །མྱང་ན་ཞིམ་པའི་སྨན་བཞིན་དུ། །དེ་བཞིན་ཆོས་ཀྱང་རྣམ་གཉིས་ཏེ། །དོན་དང་ཡི་གེར་ཤེས་པར་བྱ། །ཞེས་སོ། །དེ་གཉིས་ཀྱི་ཁྱད་པར་ཡང་། གང་ཞིག་མིང་དང་ཚིག་དང་ཡི་གེའི་ཚོགས་ཀྱིས་དངོས་པོ་དང་། ཞེན་པའི་ཚུལ་གྱིས་བརྡ་སྤྲད་པར་བྱ་བའི་ཡུལ་ནི་བརྗོད་བྱ་དོན་གྱི་ཆོས་ཡིན་ལ། གང་ཞིག་དོན་གོ་བར་བྱེད་པའི་མིང་དང་ཚིག་དང་ཡི་གེའི་ཚོགས་ནི། རྗོད་བྱེད་ཚིག་གི་ཆོས་སོ། །བརྗོད་བྱའི་དོན་གཏན་ལ་འབེབས་པརབྱེད་པ། རྗོད་བྱེད་ཚིག་གི་ཆོས་ལ་གཉིས་ཏེ། བཀའ་དང་། བསྟན་བཅོས་སོ། །ལྷའི་བུས་ཞུས་པའི་མདོ་ལས། ཆོས་རྣམས་བཀའ་དང་བསྟན་བཅོས་གཉིས་སུ་འདུས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་འདི། འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་གསུངས་སོ། །དེ་ལྟར་སངས་རྒྱས་ཀྱི་བསྟན་པ་རིན་པོ་ཆེ་འདི། བཀའ་བསྟན་བཅོས་གཉིས་ཀྱིས་གཏན་ལ་དབབ་པ་ལ་དོན་ལྔ་སྟེ། ཡང་དག་པར་རྫོགས་པའི་སངས་རྒྱས་དེ་ཇི་ལྟར་མངོན་པར་སངས་རྒྱས་པའི་ཚུལ་དང་གཅིག །དེས་ཆོས་ཇི་ལྟར་གསུངས་པའི་ཚུལ་དང་གཉིས། བསྟན་པ་ཇི་ལྟར་བསྡུས་པའི་ཚུལ་དང་གསུམ། ལྷ་དང་མི་ཡུལ་དུ་ཇི་ལྟར་གྲགས་པའི་ཚུལ་དང་བཞི། ཆོས་དེ་རྣམས་ཀྱི་རྣམ་པར་བཞག་པ་བསྟན་པ་དང་ལྔའོ། །དང་པོ་སྟོན་པ་ཡང་དག་པར་རྫོགས་པའི་སངས་རྒྱས་ཇི་ལྟར་མངོན་པར་རྫོགས་པར་སངས་རྒྱས་པའི་ཚུལ་ལ་འདོད་པ་མི་མཐུན་པ་བདུན་ཏེ། དང་པོ་ཉན་ཐོས་སྡེ་གཉིས་ན་རེ། བསྐལ་པ་གྲངས་མེད་གསུམ་དུ་ཚོགས་བསགས་ཤིང་། སྐྱེ་བོ་ཐ་མ་སོ་སོ་སྐྱེ་བོར་གནས་པ་ཞིག །ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དཀའ་ཐུབ་ལ་ཞུགས་ནས། གདན་གཅིག་གི་སྟེང་དུ་ས་བཅུ་ནོན་པར་བྱས་ནས་རྡོ་རྗེ་གདན་གྱི་སྤོ་ལ་སངས་རྒྱས་པ་ཡིན་ནོ། །ཟེར་རོ། །དེ་ཡང་། མངོན་པ་མཛོད་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པ་ཡིན། །ཞེས་པའི་དོན་གོ་བར་བྱའོ། །ཡང་མཚན་ཉིད་ཀྱི་ཐེག་པ་ཆེན་པོ་པ་རྣམས་ན་རེ། སྟོན་པ་འདིས་ཐུགས་དང་པོ་བྱང་ཆུབ་མཆོག་ཏུ་སེམས་བསྐྱེད། བར་དུ་བྱ་དཀའི་སྤྱོད་པ་སྣ་ཚོགས་ཀྱི་སྒོ་ནས་བསོད་ནམས་དང་ཡེ་ཤེས་ཀྱི་ཚོགས་བསགས་ཏེ་ས་བཅུ་རིམ་གྱིས་བསྒྲོད་ནས། ཐ་མ་ས་བཅུའི་དབང་ཕྱུག་དམ་པ་ཏོག་དཀར་པོར་སྐུ་སྐྱེ་བ་བཞེས་ནས་ལྷའི་སྟོན་པ་མཛད་ནས་སངས་རྒྱས་ཀྱིས་བསྐུལ་པའི་སྒྲ་ལ་བརྟེན་ནས་མི་ཡུལ་དུ་བྱོན་ཏེ། མཛད་པ་བཅུ་གཉིས་མཐར་ཕྱུང་ནས་སངས་རྒྱས་པ་ཡིན་ཟེར་ཏེ། མདོ་རྒྱ་ཆེར་རོལ་པ་ནས་རྒྱས་པར་གསུངས་སོ། །ཡང་གསང་སྔགས་ཡོ་ག་པ་རྣམས་ན་རེ། སྟོན་པ་བྱང་ཆུབ་མཆོག་ཏུ་སེམས་བསྐྱེད་པ་ལ་སོགས་པས་ཐུན་མོང་དང་མཐུན་པ་ལ། ཁྱད་པར་དུ་རྒྱལ་པོ་དོན་གྲུབ་ལ་དཀའ་ཐུབ་ཀྱི་ཁོག་པ་མི་ཡུལ་དུ་བཞག་ནས་སེམས་འོག་མིན་དུ་རྣམ་པར་སྣང་མཛད་ཆེན་པོར་སངས་རྒྱས་ཏེ། ཕྱོགས་བཅུའི་སངས་རྒྱས་ཀྱིས་བྱང་ཆུབ་པ་ལྔ་བསྟབས་སོ། །དེ་ལྟར་སངས་རྒྱས་ནས་རི་རབ་རིའི་རྩེ་མོ་ལ་སོགས་པར་ཡོ་ག་གཞུང་དུམ་བུ་བཞི་ལ་སོགས་པ་གསུངས་ནས། སླར་མི་ཡུལ་དུ་བྱོན་ཏེ། དཀའ་ཐུབ་ཀྱི་ཁོག་པ་ཞུགས་ནས། །རྡོ་རྗེ་གདན་གྱི་སྤོ་ལ་སངས་རྒྱས་པའི་ཚུལ་བསྟན་པར་འདོད་དེ། དེ་ཡང་ཡོ་ག་ལས། གཙང་མའི་གནས་ནི་རབ་སྤངས་པའི། །འོག་མིན་གནས་ནི་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་ནི་འདིར་འཚང་རྒྱ། །ཞེས་གསུངས་ཤིང་། སྒྱུ་འཕྲུལ་ལམ་རིམ་ལས། རྣལ་འབྱོར་གཞུང་གི་དོན་གྲུབ་ཉིད། །ནཻ་རཉྫ་ནའི་འགྲམ་ལོག་ཏུ། །དཀའ་ཐུབ་དཀའ་བ་སྤྱོད་པའི་ཚེ། །ཕྱོགས་བཅུའི་སྤྲུལ་པ་ལོངས་སྤྱོད་སྐུས། །བྱང་ཆུབ་ལྔ་ལྡན་དབང་བསྐུར་ནས། །འོག་མིན་ཉིད་དུ་དོན་གྲུབ་ཉིད། །སྤྲུལ་པའི་དཀའ་ཐུབ་ཁོག་པ་རུ། །ཡེ་ཤེས་སྣང་མཛད་ཚུལ་དུ་གཤེགས། །རི་རབ་རྩེ་མོར་འཁོར་ལོ་བསྐོར། །དེ་ཡང་རྟོགས་པའི་གཟུགས་སྐུ་ཡིན། །ཞེས་གསུངས་ཤིང་། དགོངས་འདུས་ལས། རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པ་ལས། འདིའང་སྤྲུལ་པ་ཉག་གཅིག་ཡིན་པར་གསུངས་སོ། མ་ཧཱ་ཡོ་ག་པ་རྣམས་ན་རེ། ཐུབ་པ་སེམས་བསྐྱེད་ནས་གྲངས་མེད་གསུམ་དུ་ཚོགས་བསགས་པར་བསྟན་པ་ནི་དྲང་དོན་ཡིན་གྱི་ངེས་དོན་ལྟར་ན། དཔལ་ཀུན་ཏུ་བཟང་པོ་ཡབ་ཡུམ་གྱི་མཁའ་མཚམས་ནས། རིགས་དྲུག་གི་གནས་སུ་ཐུབ་པ་དྲུག་སྤྲུལ་པ་བཀྱེས་ནས། རིགས་དྲུག་གི་དོན་མཛད་པ་ཡིན་ལ། ཁྱད་པར་དུ་མིའི་ཡུལ་དུ་ཐུབ་པའི་དབང་པོ་ཤཱཀྱ་སེང་གེ་ཞེས་བྱ་བར་བསྟན་ནས། སེམས་ཅན་རྣམས་ཡིད་ཆེས་པར་བྱ་བའི་དོན་དུ། །མཛད་པ་བཅུ་གཉིས་ཀྱི་ཚུལ་དུ་སངས་རྒྱས་པར་བསྟན་པ་ཡིན་ནོ་ཟེར་རོ། །དེ་ཡང་རྩ་བའི་རྒྱུད་གསང་བ་སྙིང་པོ་ལས། རིགས་པའི་སྐྱེས་བུ་ཐུབ་པ་དྲུག་ཅེས་བྱ་བ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལས་འཐོན་ཏོ། །ཞེས་པ་དང་། འགྲེལ་པ་སྤར་ཁབ་ལས། ཐ་མ་དགའ་ལྡན་ནས་བབས་ཟེར་བདེན་མོད་ཀྱང་། བྱང་ཆུབ་སེམས་དཔའ་དབང་ཐོབ་པ་ལ་འགལ་བ་མེད་ལ། ངེས་པ་ན་ཀུན་དུ་བཟང་པོའི་ཐུགས་ལས་སྤྲུལ་པའོ། །ཞེས་བཞེད་དོ། །ཡང་སློབ་དཔོན་ཟླ་བ་གྲགས་པ་དང་། སྐལ་ལྡན་གྲགས་པའི་བཞེད་ཀྱིས། སྟོན་པ་འདི་བསྐལ་པ་དཔག་ཏུ་མེད་པའི་སྔོན་རོལ་ནས་སངས་རྒྱས་ནས། བསྐལ་པ་འདི་ལ་ཡང་། སྤྲུལ་པའི་སྐུ་ཤཱཀྱ་ཐུབ་པ་ཞེས་བྱ་བར་སངས་རྒྱས་པའི་ཚུལ་བསྟན་པ་ཡིན་ལ། དེ་བཞིན་དུ་དུས་རྟག་ཏུ་འཚང་རྒྱས་པའི་མཛད་པ་སྣ་ཚོགས་སྟོན་ཅིང་བཞུགས་པར་འདོད་དེ། མདོ་སྡེ་ལས། བཅོམ་ལྡན་འདས་འདི་བསྐལ་པ་དཔག་ཏུ་མེད་པའི་སྔོན་རོལ་ནས་སངས་རྒྱས་ནས། འདིར་ཤཱཀྱའི་རིགས་སུ་སྐྱེ་བ་སྟོན་པར་མཛད་དོ། །ཞེས་གསུངས་སོ། །མན་ངག་རྫོགས་པ་ཆེན་པོ་བ་ན་རེ། དེ་རྣམས་ཀྱང་སེམས་ཅན་གྱི་སྣང་བ་ལ་འགལ་བ་མེད་ཀྱིས། ཡང་དག་པར་ན། ཆོས་ཐམས་ཅད་བྱེད་པ་པོ་མེད་པར་ཡེ་ནས་སངས་རྒྱས་པའི་བདག་ཉིད་གནས་པ་ཡིན་པ་ལ། དེ་ལྟར་མ་རྟོགས་པས་འཁྲུལ་པའི་རྩལ་སྣ་ཚོགས་སུ་ཤར་བ་ནི། འདོད་ཁམས་ཀྱི་ལྷ་གཉིད་ལོག་པ་ལྟ་བུའོ། །དེ་ལྟར་འཁྲུལ་ཀྱང་དོན་ལས་གཡོས་པ་མེད་པའི་ཡོན་ཏན་གྱིས། སེམས་ཅན་དབང་པོའི་རིམ་པ་དང་མཐུན་པར་སྐུ་གསུམ་གྱི་སྣང་བ་ཤར་ནས། བསྟན་པའི་སྒོ་དང་ཐེག་པའི་རྣམ་གྲངས་དུ་མར་བསྟན་ནས་དོན་བྱེད་པ་ཡིན་ནོ་ཟེར་རོ། དེ་ཡང་། ཡེ་ནས་སངས་རྒྱས་པ་དང་། ཉིད་མངོན་སུམ་གནས་པ་ལ། གྲིབ་མ་གཟུགས་ཀྱི་དཔེ་བཞིན་དེ་ལ་རྟོག་པ་བྱུང་། ཞེས་སོ། འོ་ན་དེ་རྣམས་གང་ལྟར་འཐད་སྙམ་ན། བློ་ཆུང་དག་ཁྲོན་པའི་སྦལ་པ་བཞིན་དུ། རང་གི་འཐད་ཕྱོགས་སུ་དྲངས་ནས། གཞན་དག་སུན་འབྱིན་པ་དག་ཡོད་དེ། རྨོངས་པར་ཤེས་པར་བྱའོ། ཡང་དག་པར་ན་སངས་རྒྱས་ཀྱི་ཐུགས་རྗེ་དང་། མཛད་པའི་རྣམ་སྤྲུལ་བསམ་གྱིས་མི་ཁྱབ་པས། སེམས་ཅན་རྣམས་རང་རང་གི་ལས་དང་། དབང་པོའི་རིམ་པས། སྣང་བ་བསམ་གྱིས་མི་ཁྱབ་པའི་ཕྱིར། དེ་རྣམས་གང་ཡང་འགལ་བ་མེད་པར་ཤེས་པར་བྱའོ། དེ་ནས་ཆོས་ཉིད་ཇི་ལྟར་གསུངས་པའི་ཚུལ་ལ་གཉིས་ཏེ། རྒྱུ་མཚན་ཉིད་ཀྱི་ཐེག་པ་ཇི་ལྟར་གསུངས་པའི་ཚུལ་དང་། འབྲས་བུ་སྔགས་ཀྱི་ཐེག་པ་ཇི་ལྟར་གསུངས་པའི་ཚུལ་ལོ། །དང་པོ་རྒྱུ་མཚན་ཉིད་ཀྱི་ཐེག་པ་ཇི་ལྟར་གསུངས་པའི་ཚུལ་ནི། ཐུབ་པས་མཛད་པ་བཅུ་གཉིས་མཐར་ཕྱིན་པ་ནི་གཞན་དོན་དུ་ཤེས་པར་བྱས་ལ། བྱེ་བྲག་ཏུ་ཆོས་ཀྱི་འཁོར་ལོ་བསྐོར་བའི་མཛད་པ་ནི། ཐུབ་པ་དེ་ལོ་ཉེར་དགུ་ལ་རབ་ཏུ་བྱུང་། སུམ་ཅུ་སོ་ལྔ་ལ་མངོན་པར་རྫོགས་པར་སངས་རྒྱས། ཞག་བདུན་ཕྲག་བདུན་དུ་ཆོས་མ་གསུང་། བརྒྱ་བྱིན་གྱིས་ཞུས་པས་མ་གནང་། ཚངས་པས་ཞུས་པས་གནང་ནས། འཀའ་འཁོར་ལོ་རིམ་པ་གསུམ་དུ་བསྐོར་རོ། །དེ་ཡང་བཀའ་འཁོར་ལོ་གསུམ་ལ་དེ་ལྔ་ལྔ་སྟེ། ཡུལ་དང་གཅིག །ཡོན་བདག་གཉིས། དུས་དང་གསུམ། འཁོར་ལོ་དང་བཞི། བརྗོད་བྱ་དང་ལྔའོ། །དེ་ཡང་བཀའ་འཁོར་ལོ་དང་པོ་ནི། ཡུལ་ཝ་ར་ཎ་སིར། རྒྱལ་པོ་གཟུགས་ཅན་སྙིང་པོས་ཡོན་བདག་བྱས་ནས། འཁོར་ལྔ་སྡེ་བཟང་པོ་ལ་སོགས་པ་ལ། དུས་དཔྱིད་ཟླ་འབྲིང་པོའི་ཚེས་བརྒྱད་ལ་སངས་རྒྱས་ནས། དབྱར་ཟླ་ར་བའི་ཚེས་བརྒྱད་ཀྱི་བར་ཆོས་གསུངས་ཏེ། ལོ་བདུན་དུ་ཟླ་བ་གཉིས་ཀྱིས་མ་ལོངས་པར་ཆོས་གསུངས། བརྗོད་བྱ་ནི། ཉན་ཐོས་སྡེ་པ་གཉིས་དང་བསྟུན་ནས། གང་ཞིག་བདག་མེད་ལ་ཆོས་བདག་མེད་བཟུང་འཛིན་དོན་དམ་པར་ཡོད་པར་ཞལ་གྱིས་བཞེས་ནས། བདེན་པ་བཞི་ལ་ལན་བཅུ་གཉིས་སུ་གསུངས་པ་ཡིན་ནོ། །གཉིས་པ་བཀའ་འཁོར་ལོ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ་ནི། ཡུལ་རྒྱལ་པོའི་ཁབ་བམ། བྱ་རྒོད་ཕུང་པོའི་རི་ལ། རྒྱལ་པོ་ཆོས་སྦྱིན་གྱིས་ཡོན་བདག་བྱས་ནས། འཁོར་འདུས་བ་གསུམ་ལ། དུས་ལོ་བཞི་བཅུ་ཞེ་གཉིས་ནས་ལྔ་བཅུ་རྩ་བཞིའི་བར་དུ་ལོ་བཅུ་གཉིས་སུ་མདོ་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་རྟོགས་པའི་མདོ་རྒྱས་འབྲིང་བསྡུས་གསུམ་དང་། སྙིང་པོའི་དོན་གྱི་མདོ་ཤེས་རབ་སྙིང་པོ་ལ་སོགས་པ་གཞུང་ཆུང་བཅུ་གསུམ་གསུངས་སོ། །བརྗོད་བྱ་ནི། རང་བཞིན་སྤྲོས་བྲལ་ཐེག་པ་ཆེན་པོ་དབུ་མའི་ལྟ་བ་གསལ་བར་བྱས་སོ། །གསུམ་པ་བཀའ་འཁོར་ལོ་ཐ་མ་ནི། དོན་དམ་རྣམ་པ་ངེས་པའི་ཆོས་ཀྱི་འཁོར་ལོ་སྟེ། ཡུལ་ཡངས་པ་ཅན་དང་། རྒྱལ་པོ་རྒྱལ་བྱེད་ཀྱི་ཚལ་ལ་སོགས་པར། ཁྱིམ་བདག་མགོན་མེད་ཟས་སྦྱིན་ལ་སོགས་པས་ཡོན་བདག་བྱས་ནས། འཁོར་ཐེག་པ་སྣ་ཚོགས་ལ་མོས་པ་ལ། ཆོས་མདོ་དགོངས་པ་ངེས་པར་འགྲེལ་པ་ལ་སོགས་པ། དུས་ལོ་ང་བཞི་ནས་གྱ་གཉིས་ཀྱི་བར་དུ་ལོ་ཉི་ཤུ་རྩ་བརྒྱད་དུ་གསུངས་སོ། །བརྗོད་བྱ་ནི། ཐེག་པ་ཆེན་པོ་སེམས་ཙམ་གྱི་ལྟ་བ་གསལ་བར་བྱས་སོ། །དེ་ཡང་། བཀའ་འཁོར་ལོ་དང་པོ་ནི། སེམས་ཅན་རྣམས་དངོས་པོ་ལ་ཞེན་པ་དྲང་བའི་དོན་དུ། གཟུང་འཛིན་དོན་དམ་པར་ཡོད་པར་ཞལ་གྱིས་བཞེས་པས། དེ་ལ་ཐེག་པ་ཆེན་པོ་བ་རྣམས་ཡིད་མ་ཆེས་ཏེ། རྩོད་པའི་གནས་སུ་གྱུར་ཏོ། །བཀའ་འཁོར་ལོ་གཉིས་པ་ནི། ཆོས་ཐམས་ཅད་རང་བཞིན་མེད་པར་གསུངས་པས། ཉན་ཐོས་རྣམས་ཐེ་ཚོམ་ཟ་ཞིང་རྩོད་པའི་གནས་སུ་གྱུར་པ་ལ། བཀའ་འཁོར་ལོ་གསུམ་པ། ཡོད་པ་དང་མེད་པར་འདོད་པ་ཐམས་ཅད་ཀྱི་མཚན་ཉིད་གཏན་ལ་ཕབ་སྟེ། ཆོས་ཐམས་ཅད་སེམས་ཀྱི་འཆར་ལུགས་ཙམ་དུ་གསུངས་བས། ཀུན་ཡིད་ཆེས་སྟེ་རྩོད་པ་བྲལ་བ་ཡིན་ནོ། །དེ་ཡང་། མདོ་དགོངས་པ་ངེས་པར་འགྲེལ་པ་ལས། བཅོམ་ལྡན་འདས་ཀྱི་དང་པོ་ཡུལ་ཝཱ་ར་ཎཱ་སིར། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ། འཕགས་པའི་བདེན་པ་བཞིའི་རྣམ་པ་བསྟན་པས། སུས་ཀྱང་མ་བསྐོར་བའི་འཁོར་ལོ་བསྐོར་ཏེ། འཁོར་ལོ་དེ་བླ་ན་མཆིས་པ་དྲང་བའི་དོན་རྩོད་པའི་གནས་ལུས་གྱུར་པ་ལགས་པ། བཅོམ་ལྡན་འདས་ཀྱིས་ཆོས་ཐམས་ཅད་ངོ་བོ་ཉིད་མེད་པ་ནས་བརྩམས་ཏེ། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ། སྟོང་པ་ཉིད་སྨོས་པའི་རྣམ་པས། ཆོས་ཀྱི་འཁོར་ལོ་གཉིིས་པ་བསྐོར་རོ། །འཁོར་ལོ་དེ་བླ་ན་མ་མཆིས་པ། དྲང་བའི་དོན་རྩོད་པའི་གཞིར་གྱུར་པ་ལགས་ལ། བཅོམ་ལྡན་འདས་ཀྱིས་ཆོས་ཐམས་ཅད་ངོ་བོ་ཉིད་མ་མཆིས་པ་ནས་བརྩམས་ཤིང་ཐོག་མར་ཡོད་པར་ཡང་བརྩམ་ནས། ཐེག་པ་ཆེན་པོ་ལ་ཡང་དག་པར་ཞུགས་རྣམས་ལ་ལེགས་པར་ཕྱེ་བ་དང་ལྡན་པ། ཤིན་ཏུ་ངོ་མཚར་བ་དང་ལྡན་པའི་ཆོས་ཀྱི་འཁོར་ལོ་གསུམ་པ་བསྐོར་ཏེ། ཆོས་ཀྱི་འཁོར་ལོ་དེ་བླ་ན་མ་མཆིས་པས་ངེས་པའི་དོན། བརྩོན་པའི་གནས་སུ་གྱུར་པ་ཡང་མ་ལགས་སོ་ཞེས་གསུངས་སོ། །དེ་ལྟར་བཀའ་འཁོར་ལོ་རིམ་པ་གསུམ་དུ་བསྐོར་བ་ལ། ཁ་གཅིག་ན་རེ། ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བ་དེ་ཡང་། སངས་རྒྱས་ཀྱི་གསུང་གཅིག་ལ་གདུལ་བྱའི་དབང་པོའི་རིམ་པས་སོ་སོར་ཐོས་པས་ཡིན་ཟེར། འབུམ་ལས། ངས་ནི་གཟུགས་ཀྱི་དེ་བཞིན་ཉིད་གཅིག་པུ་ལས་མ་གསུངས་ན། ལ་ལས་ནི་གཟུགས་སྟོང་ཞེས་བྱ་བར་ཐོས། ལ་ལས་ནི་གཟུགས་མི་སྟོང་ཞེས་བྱ་བར་ཐོས་སོ། །ཞེས་པ་དང་། དཔེར་ན་དེ་བཞིན་སྦྲིད་བསངས་བཞིན་གསུང་གཅིག་སྒྲ་ཡིས་ཐམས་ཅད་གོ་ཟེར་རོ། །དེ་ལ་ཡང་འགལ་བ་མེད་དེ། ཡང་དག་པར་ན་སངས་རྒྱས་ལ་གཟུགས་དང་སྒྲར་སྣང་བ་མེད་དེ། གདུལ་བྱ་དག་པའི་སྣང་བ་ཡིན་པས་གང་ལྟར་བྱས་ཀྱང་འགལ་བ་མེད་དོ། །གཉིས་པ་གསང་སྔགས་ཇི་ལྟར་གསུངས་པའི་ཚུལ་ལ་བཞི་སྟེ། འོག་མིན་ཆེན་པོའི་གནས་དང་། ལྷའི་གནས་དང་། མིའི་གནས་དང་། མི་མ་ཡིན་པའི་གནས་སོ། །འོག་མིན་ཆེན་པོའི་གནས་ནི། སྒྱུ་འཕྲུལ་རྡོ་རྗེ་ལས། གཙང་མའི་རིགས་དག་རབ་སྤངས་པའི། །འོག་མིན་ཆེན་པོའི་གནས་མཆོག་ན། །ཞེས་སོ། །དེའི་ཚད་ནི། འཇིག་རྟེན་གནས་ཀྱི་འོག་མིན་ལས། ཉིས་འགྱུར་ཤིན་ཏུ་འཕགས་པ་ཡི། ཞེས་སོ། །གནས་འདིའི་མཚན་ཉིད་ནི། ངོ་བོ་མཐའ་གསུམ་ལས་འདས་པ། མ་སྤངས་རྒྱན་རྫོགས་གཞལ་ཡས་ཁང་། ཡོན་ཏན་ལྔ་ཡི་བདག་ཉིད་དེ། གྲུ་བཞི་སྤྱི་བོར་འཁྱིལ་སྣང་བའོ། །ཞེས་སོ། །གནས་དེར་ཆོས་སྐུ་སྐྱེ་བ་མེད་པའི་ངང་ལས་ལོངས་སྤྱོད་རྫོགས་པའི་སྐུ་ཞལ་ཕྱག་གི་རྣམ་པར་བསྟན་ནས། ངེས་པ་ལྔ་ལྡན་གྱི་ཚུལ་གྱིས། གདུལ་བྱ་ལས་དག་པ་ལ་གནས་པའི་བྱང་ཆུབ་སེམས་དཔའ་དང་། རིག་པ་འཛིན་པ་མཆོག་གི་འཁོར་རྣམས་ལ། རང་རང་གི་སྐལ་པ་དང་འཚམ་པའི་གསང་སྔགས་ཀྱི་རྒྱུད་སྡེ་དཔག་ཏུ་མེད་པ་གཅིག་གསུངས་སོ། །གཉིས་པ་ལྷའི་གནས་སུ་གསུངས་པ་ནི། འོག་མིན་དེར་བསྒྲོད་པར་མ་ནུས་པའི། ལྷ་དང་མིའི་བྱང་ཆུབ་སེམས་དཔའ་སྐལ་པ་ཅན་རྣམས་ལ། འོག་མིན་གཙང་མ་རིགས་ཀྱི་ལྷ་གནས་དང་། དབང་སྒྱུར་གྱི་ཁང་བཟང་དང་། རི་རབ་ཀྱི་ལྕོག་དང་། ལྕང་ལོ་ཅན་གྱི་ཕོ་བྲང་དུ། གསང་སྔགས་ཀྱི་རྒྱུད་སྡེ་མང་དུ་གསུངས་སོ། །གསུམ་པ་མིའི་གནས་སུ་གསུངས་པ་ནི། གོང་ལྟར་དུ་ལྷ་གནས་གསུམ་དང་། འོག་མིན་དུ་བསྒྲོད་པར་མི་ནུས་པའི། མིིའི་གང་ཟག་སྐལ་པ་ཅན་རྣམས་ཀྱི་དོན་དུ། སྟོན་པ་སྤྲུལ་པའི་སྐུ་དེ་ཉིད། ལོངས་སྐུ་རྡོ་རྗེ་འཆང་དུ་བཞེངས་ནས། རི་བོ་བྱ་རྐང་དུ། འཇམ་དཔལ་སྒྱུ་འཕྲུལ་དྲྭ་བ་ལེའུ་ཁྲི་དྲུག་སྟོང་པ་གསུངས་སོ། །བསིལ་བའི་ཚལ་ལ་སོགས་པར་ཀྲི་ཡའི་རྒྱུད་མང་དུ་གསུངས། རྒྱུལ་པོ་ཨིནྟྲ་བོ་དྷིའི་ཕོ་བྲང་དུ། འོག་མིན་དུ་གསུངས་པའི་སངས་རྒྱས་མཉམ་སྦྱོར་ལྡབས་པའི་ཚུལ་དུ་གསུངས་ཞིང་། གཞན་ཡང་གསང་སྔགས་མ་རྒྱུད་མང་དུ་གསུངས་སོ། །བཞི་པ་མི་མ་ཡིན་པའི་གནས་སུ་གསུངས་པ་ནི། ཕྱག་ན་རྡོ་རྗེའི་རྒྱུད་ཕལ་ཆེར་དང་། རྡོ་རྗེ་ཕུར་བའི་རྒྱུད་མང་དུ་གནོད་སྦྱིན་གྱི་གནས་སུ་གསུངས། གཤིན་རྗེ་དགྲ་ནག་དང་། འཇིགས་བྱེད་ལ་སོགས་པ་གཤིན་རྗེའི་གནས་སུ་གསུངས་པ་དང་། དཔལ་འབྱུང་བ་དང་། དཔལ་དམ་པ་ལ་སོགས་པ་སྲིན་པོའི་གྲོང་ཁྱེར་དགའ་བ་ཅན་དུ་གསུངས་པ་ལ། རྟོགས་པའི་རྒྱལ་པོའི་རྒྱུད་རྣམས་ཀླུའི་གནས་སུ་གསུངས་སོ། །གསུམ་པ་བསྟན་པ་ཇི་ལྟར་བསྡུས་པའི་ཚུལ་ལ་གསུམ་སྟེ། གང་ཟག་གང་གིས་བསྡུས་པ་དང་། དུས་ནམ་བསྡུས་པ་དང་། ཚུལ་ཇི་ལྟར་བསྡུས་པའོ། །དང་པོ་གང་ཟག་གང་གིས་བསྡུས་པ་ལ་ལུགས་གཉིས་ཏེ། ཐེག་པ་ཆུང་བ་རྣམས་ན་རེ། འདུལ་བ་ཐམས་ཅད་ཉེ་བ་འཁོར་གྱིས་བསྡུས། མདོ་སྡེ་ཐམས་ཅད་ཀུན་དགའ་བོས་བསྡུས། མངོན་པ་ཐམས་ཅད་འོད་སྲུང་སྒྲེས་པོས་བསྡུས་ཟེར་རོ། །ཐེག་པ་ཆེན་པོ་ལྟར་ན། རྒྱལ་པོའི་ཁབ་ཀྱི་ལྷོ་ཕྱོགས། བི་མ་ལ་སཾ་བྷ་བ་ཞེས་བྱ་བའི་རི་ཡོན་ཏན་དང་ལྡན་པ་ཞིག་ཡོད་པ་དེར། བྱང་ཆུབ་སེམས་དཔའ་བྱེ་བ་ཕྲག་བཅུ་གཅིག་འདུས་ནས། ཆོས་ཀྱི་མཛོད་ཆེན་པོ་འབུམ་ཕྲག་བཅུ་བསྡུས་ཏེ། མདོ་སྡེ་འཇམ་དཔལ་གྱི་བསྡུས། འདུལ་བ་ཕྱག་ན་རྡོ་རྗེ། མངོན་པ་བྱམས་པས་བསྡུས་པ་འདོད་དེ། དེའི་དུས་སུ་ཚིག་ཏུ་བསྡུས་ནས་ཡི་གེ་ལ་མ་གཏབ་བོ། །གཉིས་པ་དུས་ཇི་ཙམ་ན་བསྡུས་པ་ནི། བཀའ་བསྡུ་བ་དང་པོ་ནི། སྟོན་པ་འདས་པའི་ཕྱི་ལོ་དེ་ལ། རྒྱལ་པོ་མ་སྐྱེས་དགྲས་ཡོན་བདག་བྱས་ནས། ཨ་སུ་རའི་བྲག་ཕུག་ཏུ། དགྲ་བཅོམ་པ་ལྔ་བརྒྱས་བསྡུས་ནའང་ཡི་གེ་ལ་མ་གཏབ་བོ། །བཀའ་བསྡུ་བ་གཉིས་པ་ནི། སྟོན་པ་འདས་ནས་ལོ་ཉིས་བརྒྱ་ན། རྒྱལ་པོ་དྷ་མཱ་རཱ་ཛ་ཨ་ཤོ་ཀའི། བྱ་གག་གི་ཀུན་དགའ་རྭ་བར། དགྲ་བཅོམ་པ་ལྔ་བརྒྱས་བསྡུས་སོ། །དེའིཚེའང་ཡི་གེ་ལ་མ་གཏབ་བོ། །བཀའ་བསྡུ་བ་གསུམ་པ་ནི། སྟོན་པ་འདས་ནས་ལོ་སུམ་བརྒྱ་ན། རྒྱལ་པོ་ཀ་ནི་ཀའི་དྲིན་ལས་ཁ་ཆེའི་ཡུལ་ཀུན་དགའ་རྭ་བ་ཞེས་དགོན་པ་ཛ་ལན་དྷ་ར་ཞེས་བྱ་བ་རུ། དགྲ་བཅོམ་པ་ལྔ་བརྒྱ་དང་། བ་སུ་མི་ཏྲ་ལ་སོགས་པ་བྱང་ཆུབ་སེམས་དཔའ་དཔའ་ལྔ་བརྒྱ་དང་། སོ་སོ་སྐྱེ་བོ་སྒྲ་དོན་ལ་མཁས་པ་ཉིས་བརྒྱ་ལྔ་བཅུས་བསྡུས་ནས། སོ་སོ་སྐྱེ་བོ་མི་བརྗེད་པའི་གཟུངས་མ་ཐོབ་པ་རྣམས་ཀྱིས། བཀའ་ལྷག་ཆད་དུ་འདོན་པ་རྣམས་ཀྱི་དོན་དུ་ཡི་གེར་གཏབ་བོ་ཞེས་གྲགས་སོ། །གསང་སྔགས་ཀྱི་རྒྱུད་སྡེ་རྣམས་ནི་ངེས་པར་ཕྱག་ན་རྡོ་རྗེ་ཁོ་ནས་བསྡུས་ཏེ། ཡེ་ཤེས་ཐིག་ལེའི་རྒྱུད་ལས། མ་འོངས་པའི་དུས་སུ་ཡང་དག་པའི་རྒྱུད་གསུངས་པ་རྣམས། སྐལ་བ་དང་ལྡན་པའི་སེམས་ཅན་ལ་སུས་བཤད་པ་བྱེད་པར་འགྱུར། ཅེས་ཞུས་པས། བཀའ་སྩལ་པ། ཕྱག་ན་རྡོ་རྗེ་མགོན་པོས་བཤད་པ་བྱེད་པའོ། །ཞེས་གསུངས་སོ། །ཚུལ་ཇི་ལྟར་བསྡུས་པ་ནི། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཇི་སྙེད་གཅིག་བཀའ་སྩལ་བ་རྣམས། དོན་བཞིར་བསྡུས་ཏེ་གཉེན་པོ་ལ་དགོངས་ཏེ་རྒྱས་པར་བཀའ་སྩལ་བ་དང་། དབྱེ་བ་ལ་དགོངས་ནས་འབྲིང་དུ་བཀའ་སྩལ་བ་དང་། བསྡུ་བ་ལ་དགོངས་ནས་བསྡུས་ཏེ་བཀའ་སྩལ་བ་དང་། གང་ཟག་གི་དབང་པོ་ལ་དགོངས་ནས་ཐེག་པའི་རིམ་པར་བཀའ་སྩལ་བའོ། །དང་པོ་གཉེན་པོ་ལ་དགོངས་ནས་རྒྱས་པར་བཀའ་སྩལ་བ་ནི། འདོད་ཆགས་ཀྱི་གཉེན་པོར་འདུལ་པ་ཉི་ཁྲི་ཆིག་སྟོང་སྟེ། ཞེ་སྡང་གི་གཉེན་པོར་མདོ་སྡེ་ཉི་ཁྲི་ཆིག་སྟོང་། གཏི་མུག་གི་གཉེན་པོར་མངོན་པ་ཉི་ཁྲི་ཆིག་སྟོང་། དུག་གསུམ་ཆ་མཉམ་པའི་གཉེན་པོར་གསང་སྔགས་ཉི་ཁྲི་ཆིག་སྟོང་སྟེ། ལར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དུག་གསུམ་གྱི་གཉེན་པོར་གསུངས་སོ། །དབྱེ་བའི་དོན་ལ་དགོངས་ཏེ་འབྲིང་དུ་བཀའ་སྩལ་བ་ནི། བསྟན་པ་མཐའ་དག་གསུང་རབ་ཡན་ལག་བཅུ་གཉིས་སུ་ཕྱེ་སྟེ། མདོའི་སྡེ། དབྱངས་སུ་བསྙད་པའི་སྡེ། ཚིགས་སུ་བཅད་པའི་སྡེ། ཆེད་དུ་བརྗོད་པའི་སྡེ། རྟོགས་པ་བརྗོད་པའི་སྡེ། ལུང་དུ་བསྟན་པའི་སྡེ། ཤིན་ཏུ་རྒྱས་པའི་སྡེ། ཆོས་རྨད་དུ་བྱུང་བའི་སྡེ། གླིང་བཞིའི་སྡེ། དེ་ལྟ་བུ་བྱུང་བའི་སྡེ། སྐྱེས་པ་རབས་ཀྱི་སྡེ། གཏན་ལ་ཕབ་པའི་སྡེ་དང་བཅུ་གཉིས་སོ། །བསྡུས་པའི་དོན་ལ་དགོངས་ནས་བསྡུས་ཏེ་བཀའ་སྩལ་བ་ནི། སངས་རྒྱས་ཀྱི་བཀའ་ཐམས་ཅད་སྡེ་སྣོད། རིན་ཆེན་གསུམ་དུ་བསྡུས་པའམ། ཐེག་པ་ཆེ་ཆུང་གཉིས་སུ་བསྡུས་པའམ། ཡང་ན་སྔགས་མཚན་ཉིད་གཉིས་སུ་བསྡུས་པའོ། །གང་ཟག་གིས་བསམ་པ་ལ་དགོངས་ནས་ཐེག་པ་རིམ་པར་བཀའ་སྩལ་བ་ནི། ཡང་དག་པའི་དོན་ལ་ཐེག་པ་དུ་མ་མེད་ཀྱང་། དབང་པོའི་རིམ་པས་ཐེག་པ་དུ་མར་ཕྱེ་བ་ཡིན་ནོ། །དེ་ལ་གསུམ་སྟེ། ཐེག་པའི་ངོ་བོ་དང་། ངེས་ཚིག་དང་། དབྱེ་བའོ། །དང་པོ་ཐེག་པའི་ངོ་བོ་ནི། ལམ་འབྲས་བུ་དང་བཅས་པའམ། ཡང་ན་ཤེས་རབ་དང་སྙིང་རྗེའོ། །དེ་ཡང་། ལང་ཀར་གཤེགས་པ་ལས་ཐེག་པའི་རང་བཞིན་ཤེས་རབ་སྙིང་རྗེ་སྟེ། ཞེས་སོ། །ངེས་ཚིག་ནི། འདེགས་པར་བྱེད་པས་ན་ཐེག་པ་སྟེ། རྟའམ། གླང་པོའམ། གྲུ་དང་གཟིངས་ལྟ་བུའོ། །དེ་ཡང་འདིས་འདེགས་པས་ན་ཐེག་པ་སྟེ་ཆོས་སོ། །འདི་འདེགས་པས་ན་གང་ཟག་གོ །འདིར་འདེགས་པ་ནི་འབྲས་བུའོ། །དབྱེ་བ་ཐེག་པ་གཅིག་ཏུ་ཡང་བཤད་དེ། དགོངས་འདུས་ལས། གསང་ཉིད་སྙིང་པོར་ངེས་པ་ན། །ཐེག་པའི་སྒོ་ཡང་གཅིག་ལས་མེད། །ཅེས་སོ། །དགོངས་པ་ལུང་སྟོན་ལས། རྟོག་པ་མེད་ཅིང་འཁྲུགས་པ་མེད། ཡིད་འོང་རྡོ་རྗེའི་ཚིག་གཅིག་ཏུ། །གདུལ་བྱའི་བསམ་པའི་དབང་གིས་ནི། །བྱེ་བྲག་མང་པོ་བྱུང་བ་ཡིན། །ཞེས་སོ། །གཉིས་སུ་ཡང་བཤད་དེ། དགོངས་འདུས་ལས། ཆེ་ཆུང་རིམ་པའི་བློ་ཡོད་ཕྱིར། །ཐེག་པའི་རིམ་པའང་དེ་བཞིན་ཏེ། །བསྡུས་པས་ཆེ་ཆུང་གཉིས་ཀྱིས་སོ། །ཞེས་སོ། །གསུམ་དུ་ཡང་བཤད་དེ། མཚན་བརྗོད་ལས། ཐེག་པ་གསུམ་གྱིས་ངེས་འབྱུང་ལ། ཞེས་སོ། །བཞིར་ཡང་བཤད་དེ། རྩ་རྒྱུད་གསང་བ་སྙིང་པོ་ལས། ཐེག་པ་བཞི་ཡི་ངེས་འབྱུང་ལས། །ཐེག་པ་གཅིག་གི་འབྲས་བུར་གནས། །ཞེས་སོ། །ཐེག་པ་ལྔར་ཡང་བཤད་དེ། གསང་སྙིང་ལས། ཐམས་ཅད་ཀྱང་འདི་ལྟ་སྟེ། འདུ་བའི་དབང་གི་ལྷ་དང་མིའི་ཐེག་པ་དང་། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་དང་། བླ་ན་མེད་པའི་ཐེག་པའོ། །ཞེས་སོ། །ཐེག་པ་དགུར་ཡང་བཤད་དེ། ཀུན་བྱེད་ལས། ཐེག་པ་དགུ་དང་འཁོར་བའི་ཆོས་རྣམས་ཀུན། ཞེས་སོ། །བསམ་གྱིས་མི་ཁྱབ་པར་ཡང་བཤད་དེ། དགོངས་འདུས་ལས། ཇི་སྲིད་འདུ་ཤེས་ཡོད་ཀྱི་བར། ཐེག་པའི་མཐའ་ལ་ཐུག་པ་མེད། ཅེས་སོ། །འོ་ན་གསང་སྔགས་ཐེག་པ་གང་དུ་བསྡུ་སྙམ་ན། ཁ་གཅིག་ན་རེ། མདོ་སྡེ་འདི་ཉིད་ཉན་བྱེད་ན། ཟེར་བས། མདོ་སྡེར་བསྡུས་ཟེར་རོ། །ཁ་གཅིག་ན་རེ། མངོན་པར་བསྡུས་ཏེ། མངོན་པ་ལ་གཉིས་ལས། སྔགས་འདི་ནང་གི་མངོན་པ་ཡིན་ཟེར་རོ། འོན་ཀྱང་འདིར་སྡུད་མི་འཚལ་ཏེ། གསང་སྔགས་ནི་རིག་པ་འཛིན་པའི་སྡེ་སྣོད་ཅེས་ལ་སོགས་པའོ། །སྤྱིར་བགྲངས་པའི་བཞི་པ་ཡིན་ནོ། །སྤྱི་དོན་བཞི་པ་ལྷ་དང་མིའི་ཡུལ་དུ་ཇི་ལྟར་གྲགས་པའི་ཚུལ་གཉིས་ཏེ། སྔགས་དང་མཚན་ཉིད་དོ། །མཚན་ཉིད་ཀྱི་བཀའ་རྣམས་བསྡུས་ནས་བགོ་བཤའ་བྱ་ལོང་མེད་པར། མི་དང་མི་མ་ཡིན་རྣམས་ཧབ་ཐོབ་ཤོར་ནས་ཁྱེར་རོ། །མིའི་གནས་ན་བཞུགས་པ་རྣམས་ཀྱང་རིམ་གྱིས་དར་རོ། །མི་མ་ཡིན་གྱི་གནས་ན་བཞུགས་པ་རྣམས་ཀྱང་གྲུབ་ཐོབ་རྣམས་ཀྱིས་སྤྱན་དྲངས་ནས་རིམ་གྱིས་དར་རོ། གསང་སྔགས་ལ་གཉིས་ཏེ། རྙིང་མ་ལ་གྲགས་ཚོད་དང་། གསར་མ་ལ་གྲགས་ཚོད་དོ། །གསང་སྔགས་རྙིང་འགྱུར་བའི་གྲགས་ཚོད་ནི། ལྷ་གནས་གསུམ་དང་འོག་མིན་དུ་གསུངས་པ་རྣམས་གསང་བའི་བདག་པོས་ཚིགས་སུ་བསྡུས་ཏེ། གསེར་གྱི་གླེགས་བམ་ལ། བཻ་ཌརྻའི་ཞུན་མས་བྲིས་ཏེ། རྩ་བ་རང་གནས་བྱས་ནས། དགོངས་པའི་རྩ་བ་མདུན་གྱི་ནམ་མཁའ་ལ་སྦས་པ་ལ། ཟ་ཧོར་གྱི་རྒྱལ་པོ་ཛ་ཞེས་བྱ་བ་ལ། རྨི་ལྟས་བདུན་ལ་བརྟེན་ནས་བསྒྲུབ་པ་བྱས་པས། གླེགས་བམ་རྣམས་མི་ཡུལ་དུ་བབས་ཏེ་བྱོན་ནོ། གང་དུ་བབས་ན། ཀྲི་ཡ་རྣམས་ཝཱ་ར་ཎཱ་སིར་བབས་ཏེ། དེ་ན་ཀྲི་ཡའི་རྫས། བ་དམར་པོའི་འོ་མ་ཡོད་པས་སོ། །ཡོ་ག་རྣམས་རི་མེ་རི་འབར་བ་ལས་བབས་ཏེ། རི་དེ་ལྷུན་ཞིང་བརྗིད་ཆེ་བས། ཡོ་གའི་ལྷ་དང་མཐུན་པའོ། །མ་ཧཱ་ཡོ་ག་བ་རྣམས་རྒྱལ་པོ་ཛའི་ཁང་སྟེང་དུ་བབས་ཏེ། དེ་ན་ལོངས་སྤྱོད་ཆེ་བས་མ་ཧཱ་ཡོ་གའི་ཚོགས་བསྒྲུབ་དང་མཐུན་ནོ། །ཨ་ནུ་ཡོ་ག་རྣམས་རི་མ་ལ་ཡ་གནམ་ལྕགས་ཡོད་པའི་རྩེ་ལ་བབས་ཏེ། དེ་ན་དྲག་པོའི་རྫས་གནམ་ལྕགས་ཡོད་པ་ཡིན་ནོ། །ཨ་ཏི་ཡོ་ག་རྣམས་ཨོ་རྒྱན་དྷ་ན་ཀོ་ཤའི་གླིང་དུ་བབས་ཏེ། གླིང་དེ་ཁོད་སྙོམས་པས་རྫོགས་པ་ཆེན་པོའི་ཆོས་ཐམས་ཅད་མཉམ་པ་ཉིད་དུ་སྟོན་པ་དང་མཐུན་ནོ། དེ་རྣམས་ལ་རྒྱུད་སྟེ་གཞན་རྣམས་ནི་དངོས་སུ་པོ་ཏི་བབས་པ་ཡིན་ལ། ཨ་ཏི་ཡོ་ག་ནི་པོ་ཏི་བབས་པ་མ་ཡིན་ཏེ། རྡོ་རྗེ་སེམས་དཔའི་སློབ་མ། ལྷའི་བུ་ཀུན་དགའ་སྙིང་པོ་བྱ་བ། མི་ཡུལ་དུ་སློབ་དཔོན་ཆེན་པོ་དགའ་རབ་རྡོ་རྗེར་སྐུ་སྐྱེ་བ་བཞེས་ནས། རྡོ་རྗེ་སེམས་དཔས་དངོས་སུ་གསེར་གྱི་རྡོ་རྗེ་རྩེ་ལྔ་པ་དབུ་ཐོག་ཏུ་བཞག་ནས་དབང་བསྐུར་བས། རྫོགས་པ་ཆེན་པོའི་རྒྱུད་ཁ་ས་མ་ཏཱ་ནམ་མཁའ་དང་མཉམ་པའི་རྒྱུད་བྱ་བ་ཐུགས་ལས་ཕྱུང་སྟེ། རྫོགས་པ་ཆེན་པོའི་རྒྱུད་སྡེ་མཐའ་དག་དེ་ནས་ཁོལ་དུ་ཕྱུང་བ་ཡིན་ནོ། མི་ཡུལ་དུ་གསུངས་པ་རྣམས་ཀྱང་། སྡུད་པ་པོས་ཡི་གེ་ལ་གཏབ་ནས། དཔལ་ཨོ་རྒྱན་གྱི་ཡུལ་དུ་མཁའ་འགྲོ་མ་ལ་གཏད། ལྷའི་གནས་ནས་བྱོན་པ་ཤས་གཅིག་ཀྱང་མཁའ་འགྲོ་མས་བདག་བྱས་ནས་ཡོད་པ་ལ་གྲུབ་ཐོབ་རྣམས་ཀྱིས་བག་རེ་བླངས་ཏེ་དར་བར་བྱས་སོ། །གནོད་སྦྱིན་གྱི་གནས་ན་བཞུགས་པ་རྣམས་ནི། གནོད་སྦྱིན་ལག་ན་རྡོ་རྗེ་སྤྱན་དྲངས་ནས། སྲས་ཐུ་བོ་རཱ་ཛ་ཧས་ཏི་ལ་བཤད་དོ། །གཤིན་རྗེ་གནས་ན་བཞུགས་པ་རྣམས་ནི། སློབ་དཔོན་འཇམ་དཔལ་བཤེས་གཉེན་གྱིས་སྤྱན་དྲངས་སོ། །སྲིན་པོའི་གནས་ན་བཞུགས་པ་རྣམས་ནི། སློབ་དཔོན་པདྨ་རྒྱལ་པོས་སྤྱན་དྲངས་སོ། །དེ་ནས་རིམ་པར་བརྒྱུད་ཅིང་དར་བ་ཡིན་ནོ། །རྒྱུད་སྡེ་འགའ་ཞིག་སྡུད་པ་པོ་རྣམས་ཀྱིས་བསྡུ་བར་མ་ནུས་ཏེ་སྒྲ་རང་ཡལ་ལ་སོང་ངོ་། །ད་འོ་ན་གསུངས་པ་ལ་དོན་མེད་དམ་སྙམ་ན་དོན་ཡོད་དེ། མངོན་བྱུང་གི་འཁོར་རྟོགས་པ་ཆེན་པོ་ལ་གནས་པ་རྣམས་ཀྱི་སྒྲོ་འདོགས་བཅད་པ་ཡིན་ནོ། །འགའ་ཞིག་ཤིན་ཏུ་དར་ཞིང་རྒྱས་པར་འགྱུར་འགའ་ཞིག་འགྲོ་དོན་བག་རེ་བྱས་ནས་ནུབ། འགའ་ཞིག་ད་རུང་མཁའ་འགྲོའི་ཕྱག་ནས་མ་ལོན་ཏེ། ཕྱིས་རྒྱས་པར་འགྱུར་རོ། །ཞེས་གསུངས་སོ། །ཡང་དག་པའི་ཚིག་དང་གཏམ་ཡིན་ནོ། །འགའ་ཞིག་དེ་ལྟ་བུའི་ཚིག་དང་གཏམ་ལ་ཡིད་ཆེས་པ་མེད་དོ། །ཞེས་ཟེར་བ་ནི། ཤིན་ཏུ་རྨོངས་པ་ཡིན་པས། ལོ་ཙཱ་བ་གཟུ་དགའ་རྡོར་གྱིས་དཔལ་ཤྲཱི་ན་ལེནྜའི་གཙུག་ལག་ཁང་དུ་པོ་ཏིའི་ཆར་བབས་པའི་ལོ་རྒྱུས་ལྷ་ཁང་ལ་རི་མོ་བྲིས་པ་མཐོང་བ། སྔོན་བྱུང་དུ་བསྟན་པ་རིན་པོ་ཆེ་འདི་གྲ་མ་ཉམས་ཏེ་དར་བའི་དུས་སུ་ས་ལ་གནས་པའི་པཎྜི་ཏ་དང་། སྤྲུལ་པའི་ལོ་ཙཱ་བ་དང་། བྱང་ཆུབ་སེམས་དཔའི་ཡོན་བདག་རྣམས་བཞུགས་པའི་དུས་སུ་གཏན་ལ་ཕབ་པའི་ལོ་རྒྱུས་ཡིན་པས་ཤིན་ཏུ་ཡིད་ཆེས་པའི་གནས་ཁོ་ན་ཡིན་ནོ། །ཡང་གསང་སྔགས་གསར་འགྱུར་ལས་གྲགས་པའི་དབང་དུ་བྱས་ནས། མི་མཐུན་པ་འགའ་འདུག་སྟེ། འགའ་ཞིག་ན་དེ། བཅོམ་ལྡན་འདས་གྲོང་ཁྱེར་གཉན་ཡོད་ན་བཞུགས་པའི་ཚེ། དེ་ནས་དཔག་ཚད་སུམ་བརྒྱ་ན་ཨོ་རྒྱན་གྱི་ཡུལ་ཡོད་དེ། དེ་ནས་རྒྱལ་པོ་ཨིན་དྲ་བོ་དྷི་ཞེས་བྱ་བ་ཡོད་པ་ལ་དེའི་སྔ་འགྲོའི་དུས་གཅིག་གི་ཚེ། དགེ་སློང་གི་གཟུགས་ནམ་མཁའ་ལ་འགྲོ་བ་མཐོང་ངོ་། དེས་དེ་དག་ཅི་ཡིན་དྲིས་པས། འདི་ནི་དཔག་ཚད་སུམ་བརྒྱ་ན་མཉན་ཡོད་ཅེས་བྱ་བའི་གྲོང་ཁྱེར་ན། རྒྱལ་པོ་ཟས་གཙང་མའི་སྲས་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་པའི་སློབ་མ་ཡིན་ནོ་ཟེར། དེ་སྐད་ཐོས་པས་རྒྱལ་པོ་རབ་ཏུ་དད་པས་དགའ་སྟེ། དེའི་ཕྱོགས་སུ་ཕྱག་འཚལ། ཐལ་མོ་སྦྱར་བས་གཉན་ཡོད་ན་བཅོམ་ལྡན་འདས་འཁོར་དང་བཅས་པ་བཞུགས་པར་མཐོང་ངོ་། དེ་ལ་དད་པ་སྐྱེས་ནས་བཅོམ་ལྡན་འདས་རྣམ་པ་ཐམས་ཅད་མཁྱེན་པ་ཐུགས་རྗེ་དང་རྫུ་འཕྲུལ་གྱི་ཞབས་མངའ་བ། སང་བདག་ནི་གན་དུ་གདུགས་ཚོད་ལ་གཤེགས་པར་ཞུའོ། །ཞེས་གསོལ་བ་བཏབ་པས། སང་གདུགས་ཚོད་ལ་བཅོམ་ལྡན་འདས་འཁོར་དང་བཅས་པ་བྱོན་པ་དེ་ལ་བསྙེན་བཀུར་བྱས་ནས་གསོལ་བ། བདག་ཅག་རྣམས་སྲིད་པའི་སྡུག་བསྔལ་ལས་ཐར་བར་མཛད་དུ་གསོལ་ཞེས་ཞུས་པས། བཀའ་སྩལ་པ། ཁྱིམ་ནས་ཁྱིམ་མེད་པར་རབ་ཏུ་བྱུང་ན་ཐབས་ཡོད་དོ། །ཞེས་གསུངས་པས། རྒྱལ་པོས་གསུངས་པ། བདག་ནི་འདོད་ཡོན་གྱིས་གདུང་བ་ཆེ་བས། འདི་མ་སྤངས་པར་འཁོར་བ་ལས་གྲོལ་བའི་ཐབས་ཞུའོ་ཞེས་ཞུས་པས། གསང་སྔགས་ཀྱི་སྣོད་དུ་གཟིགས་ནས། དེ་ཉིད་ཀྱི་ཚེ་སྐྱེས་བུ་ཆགས་པ་ཅན་རྗེས་སུ་བཟུང་བའི་ཕྱིར། རྡོ་རྗེ་འཆང་གི་ཆ་ལུགས་སུ་བཞེངས་ནས། རྡོ་རྗེ་བཙུན་མོའི་བྷ་ག་ལ་བཞུགས་ནས། བཙུན་མོའིདབུས་སུ་རྒྱལ་པོ་དབང་བསྐུར་ཏེ་གྲོལ་བར་མཛད་ནས། གསང་སྔགས་ཀྱི་རྒྱུད་སྡེ་རྣམས་གསུངས། དེ་ཕྱག་རྡོར་གྱིས་བསྡུས་ནས་མཁའ་འགྲོ་མ་ལ་གཏད། གནྡྷོ་ལའི་གཙུག་ལག་ཁང་དུ་སྦས་ཏེ། གྲུབ་ཐོབ་རྣམས་ཀྱིས་བག་རེ་བླངས་ནས་དར་བར་བྱས་པ་ཡིན་ཟེར་རོ། འགའ་ཞིག་ན་རེ། ཕྱག་རྡོར་གྱིས་བསྡུས་པའི་རྒྱུད་རྣམས་མཁའ་འགྲོ་མ་ལ་གཏད་པ་ཡིན། རྒྱལ་པོ་ཨིནྡྲ་བོ་དྷི་ལ་རྒྱུད་སྡེ་མཐའ་དག་གསུངས་པ་མེད་དེ། ཁོ་རང་ལ་དབང་བསྐུར་ནས་གྲོལ་བར་བྱས་པ་ཡིན་ནོ། །ཞེས་ཀྱང་ཟེར་རོ། །ཡང་འགའ་ཞིག་ན་རེ། ཕྱག་རྡོར་གྱི་རྒྱུད་བསྡུས་པ་རྣམས་རྒྱལ་པོ་འཁོར་དང་བཅས་པ་ལ་གཏད། དེ་དག་གིས་བསྒྲུབས་པས་དངོས་གྲུབ་རིམ་པར་ཐོབ་པར་གྱུར། དེ་ནས་ཨོ་རྒྱན་གྱི་ཡུལ་སྟོངས་ཏེ། མཚོ་ཆེན་པོ་གཅིག་ཏུ་གྱུར། དེར་ཀླུས་གང་། དེ་ནས་ཕྱག་རྡོར་གྱིས་རྒྱུད་རྣམས་ཀླུ་ལ་གནང་བས་ཀླུ་རྣམས་ཀྱང་རིམ་གྱིས་མིའི་གཟུགས་སུ་གྱུར་ནས། མཚོ་འགྲམ་དུ་གྲོང་བཅས་ཏེ། གསང་སྔགས་རྣམས་ཉམས་སུ་བླངས་པས། ཕལ་ཆེར་གྱིས་གྲུབ་པ་ཐོབ་སྟེ། མ་ཐོབ་པ་རྣམས་ཀྱང་མིར་གྱུར། བུད་མེད་རྣམས་ཀྱང་མཁའ་འགྲོ་མར་གྱུར་ནས། ཨོ་རྒྱན་མཁའ་འགྲོའི་གླིང་ཞེས་གྲགས་སོ། །ཞེས་ཟེར་བ་ཡང་ཡོད་དོ། །མདོར་ན་རྒྱུད་རྣམས་ཨོ་རྒྱན་ནས་སྤྱན་དྲངས་པར་འདོད་དེ། རྒྱལ་པོ་བ་སུ་ཀ་ལ་བས་གསང་བ་འདུས་པ་དང་། དེ་ཉིད་འདུས་པ་སྤྱན་དྲངས། ཀླུ་སྒྲུབ་ཀྱིས་གླེན་པར་བརྫུས་ནས་དགྱེས་རྡོར་སྤྱན་དྲངས། ཀུ་ཀུ་རི་པས་མ་ཧཱ་མཱ་ཡཱ། ལ་ལི་ཏ་བཛྲས་རྡོ་རྗེ་འཇིགས་བྱེད་ལ་སོགས་པ་མང་དུ་སྤྱན་དྲངས་པར་འདོད་དོ། །དེ་ལྟར་ལོ་རྒྱུས་མི་མཐུན་པ་ཇི་ལྟར་ཡིན་སྙམ་ན། དུས་ཕྱིས་རྒྱ་གར་ཡུལ་ན་བསྟན་པ་གྲ་ཉམས་ཤིང་། རྒྱུད་སྡེ་ཆེན་པོ་རྣམས་རིམ་གྱིས་ནུབ་ཅིང་དཔེ་རུལ་བས། གྲུབ་ཐོབ་ཁ་ཡར་གྱིས་མཁའ་འགྲོ་མའི་ཕྱག་ནས་དཔེ་གསར་དུ་བླངས་པ་རྣམས་ལ་སྤྱོད་པས། རྒྱུད་སྡེ་རྣམས་ཀྱི་བྱུང་ཚུལ་ཇི་ལྟར་བ་བཞིན་དུ་ཁོང་དུ་མ་ཆུད་པ་ཡིན། ད་ལྟའི་པཎྜི་ཏ་གསེར་འདོད་ཀྱིས་བོད་ན་ཆོས་གང་ལ་གཙིགས་ཆེ་དྲིས་ནས་བཅོས་མ་མང་པོ་བྱེད། ལོ་ཙཱ་བ་མཁས་འདོད་ཀྱིས་དབྱར་མང་ཡུལ་དུ་དོན་བྱས། དགུན་བལ་ཡུལ་དུ་བསྡད། སྔོན་གྱི་ལོ་པཎ་བྱང་ཆུབ་སེམས་དཔས་བསྒྱུར་བའི་ཆོས་ལ། རང་བཟོའི་འགྱུར་སྣ་ཚོགས་བྱེད། རྩ་རླུང་ཐིག་ལེ་ལ་སོགས་པ་ཕྱི་རོལ་པ་དང་ཐུན་མོང་གི་ཆོས་ལ་ངོ་མཚར་གྱིས་གནས་སུ་མཐོང་ནས་གསེར་ཆོས་བྱས་པས་བསྟན་པ་ཉམས་རྨས་པ་ཡིན་ནོ། །འོ་ན་གསང་སྔགས་རྙིང་མིའི་དཔེ་ཙམ་རྒྱ་གར་ན་མི་བཞུགས་སམ་སྙམ་ན། སྤྱིར་སྔོན་གྱི་དུས་སུ་རྒྱ་གར་ན་བཞུགས་པའི་ཆོས་མ་ལུས་པ་བསྒྱུར་བ་ཡིན་སྐད། དེ་ལ་དུས་ཕྱིས་བསྐྱར་ནས་བསྒྱུར་བ་རྣམས་ལ་གསར་མར་གྲགས། མ་འགྱུར་བ་རྣམས་ལ་རྙིང་མར་གྲགས་པ་ཡིན་ནོ། །གསང་སྔགས་མ་རྒྱུད་འགའ་ཞིག་སྔོན་མ་འགྱུར་ཏེ། དུས་ཕྱིས་མཁའ་འགྲོ་མའི་ཕྱག་ནས་བླངས་ནས་བསྒྱུར་བའང་ཡོད་དོ། །རྙིང་མ་རྣམས་དུས་ཕྱིས་མི་འགྱུར་བ་ཇི་ལྟར་ཡིན་སྙམ་ན། སྔོན་གྱི་རྒྱུད་སྡེ་རྣམས་ཀྱི་བབས་ས་རྡོ་རྗེ་གདན་གྱི་ཤར་ལྷོའི་མཚམས་ཟ་ཧོར་གྱི་ཡུལ་ཡིན་པས། ཡུལ་དེ་ན་གསང་སྔགས་དར་རོ། དེའི་དུས་སུ་པཎྜི་ཏ་རྣམས་ཀྱང་ཟ་ཧོར་དུ་རིག་པ་སྦྱོང་བས། དེའི་དུས་སུ་བོད་དུ་སྤྱན་དྲངས་པའི་པཎྜི་ཏ་ཟ་ཧོར་བ་དང་། རྒྱ་གར་ཤར་ཕྱོགས་དྷ་ན་ད་ལ་བ་དང་། གཞན་གྱིས་ཀྱང་ཟ་ཧོར་དུ་བསླབས་པ་ཕལ་ཆེ་བས་ཡི་གེ་རྣམས་ཀྱང་ཟ་ཧོར་གྱི་ཡི་གེ་ཡོད་པས་དུས་ཕྱིས་རྒྱ་གར་དབུས་ཀྱི་པཎྜི་ཏས་མི་ལྷོགས་པ་ཡིན་ནོ། །ཟ་ཧོར་གྱི་ཡུལ་དུ་མཐའི་རྒྱལ་པོས་དམག་དྲངས་ནས་ཆོས་སྣུབས་པས། དུས་ཕྱིས་སྤྱན་མ་དྲོངས་པ་ཡིན་ནོ། །མན་ངག་རྫོགས་པ་ཆེན་པོ་ནི། ཤིན་ཏུ་ཟབ་ཆེས་པས་ཀུན་གྱི་བློར་མ་གཤོང་སྟེ། རྡོ་རྗེ་གདན་གྱི་འོག་ཏུ་སྦས་པ་ལ། ཤྲཱི་སིང་ཧས་བག་ཙམ་གཅིག་བཏོན་ནས་བཻ་རོ་ཙ་ན་ལ་བཤད། ལྷག་མ་སྦྲས་ནས་ཡོད་པ་ལ། ཕྱིས་ལོ་ཙ་བ་མི་གསུམ་གྱིས་སློབ་དཔོན་བི་མ་ལ་སྤྱན་དྲངས་བའི་ཚེ། རྒྱ་གར་གྱི་མཎྜི་ཏས་ཕྲག་དོག་བྱས་ནས། བཻ་རོ་ཙ་ན་རྒྱལ་མོ་ཚ་བའི་རོང་དུ་སྤྱུགས་པའི་སྙིང་ནད་དང་། བི་མ་ལ་མཁས་དྲག་པས་རྒྱལ་པོ་ལ་ལྕུགས་སྤྱུགས་ཏེ། པཎྜི་ཏ་ལྔ་བརྒྱས་བོད་དུ་མི་འགྲོ་བའི་དབང་མེད་པ་སྤྱུགས་པའི་སྙིང་ནད་ཀྱིས། བི་མ་ལ་མི་ཏྲ་དཔོན་གཡོག་གིས། རྒྱལ་པོ་དང་པཎྜི་ཏ་རྣམས་ལ་ཞུ་བ་ཕུལ་ཏེ། བདག་བོད་དུ་མཆིས་ཕན་ཆད། བོད་དུ་སྔོན་ཆད་ཡོངས་སུ་མ་གྲགས་པའི་ཆོས་གཅིག་བསྒྱུར་དགོས་བྱས་པས། པཎྜི་ཏ་རྣམས་ན་རེ། རྡོ་རྗེ་གདན་གྱི་འོག་ན་མན་ངག་གི་ཆོས་སྦས་ནས་ཡོད་པ་དེ་འོ་སྐོལ་རྒྱ་གར་ན་སྤྱད་དབང་མེད་ན་ཡང་། ཁྱོད་བོད་དུ་འགྲོ་བ་ཤིན་ཏུ་ཡུས་ཆེ་བ་ཡིན་པས། ཇི་ལྟར་རིགས་པར་ཐོན་ལ་ཁྱེར་ཟེར་བས། བི་མ་ལ་དཔོན་གཡོག་གིས་མན་ངག་གི་ཆོས་མ་ལུས་པར་སྤྱན་དྲངས་ནས། རྒྱའི་དཔེ་རྩ་བས་བཅད་པ་ཡིན་ནོ། །དེ་རྣམས་ནི་ལྷ་དང་མི་ཡུལ་དུ་ཇི་ལྟར་གྲགས་པའི་ཚུ ལ་ལོ། །ལོ་རྒྱུས་དེ་དག་ནི། ཁམས་པ་སེང་གེ་ཡིས། མདོ་ཁམས་སྨད་ཀྱི་ཆོས་འབྱུང་དང་། སྨྲི་ཏི་ཛྙཱ་ན་ཀཱི་ར་ཏི་ལ་དྲི་བའི་ཐེ་ཚོམ་བཅད་པའི་ལོ་རྒྱུས་ཆེན་མོ་དག་ལས་ཇི་ལྟར་འབྱུང་བའི་ཚུལ་བརྗོད་པའོ། །ལྔ་པ་ཆོས་དེ་རྣམས་ཀྱི་རྣམ་པར་བཞག་པ་ལ་བཞི་སྟེ། རྒྱུ་མཚན་ཉིིད་ཀྱི་ཐེག་པའི་དབང་དུ་བྱས་ནས་བཀའི་རྣམ་པར་བཞག་པ་དང་། བསྟན་བཅོས་ཀྱི་རྣམ་པར་བཞག་པའོ། །འབྲས་བུ་གསང་སྔགས་ཀྱི་དབང་དུ་བྱས་ནས། རྒྱུད་ཀྱི་རྣམ་པར་བཞག་པ་དང་། མན་ངག་གི །བསྒྲུབ་ཐབས་ཀྱི་རྣམ་པར་བཞག་པའོ། །དང་པོ་བཀའི་རྣམ་པར་བཞག་པ་ལ་དྲུག་སྟེ། ངོ་བོ་དང་། ངེས་ཚིག་དང་། དབྱེ་བ་དང་། བསྡུ་བ་དང་། གང་སྔ་བ་དང་། ཆོས་སྡེ་ངོས་གཟུང་བའི། དང་པོ་བཀའི་ངོ་བོ་ནི་མི་འགྱུར་བའོ། །དེ་ཡང་གཟུངས་ལས། ཉི་མ་དང་ཟླ་བ་འདི་ཡང་ས་ལ་ལྷུང་ཡང་སྲིད། རླུང་ཞགས་པས་ཟིན་ཀྱང་སྲིད་ཀྱིས། དེ་བཞིན་གཤེགས་པའི་བཀའ་ནི། དེ་འགྱུར་མི་སྲིད་དོ། །ཞེས་སོ། དགོངས་འདུས་ལས། སྲིད་པ་འདྲེ་ལྡོག་ཀྱང་བཀའ་འདྲེ་མི་ལྡོག་གོ །ཞེས་སོ། །ངེས་ཚིག་ནི། འདའ་བརདཀའ་བས་ན་བཀའ་ཞེས་བྱའོ། །མདོ་སྡེ་ལས། རྒྱལ་བའི་བཀའ་གསང་ཇི་ལྟ་བར། །འདའ་བར་དཀའ་བས་བཀའ་ཞེས་བྱ། །ཞེས་སོ། །དབྱེ་ན་གསུམ་སྟེ། ཞལ་ནས་གསུང་པ་དང་། རྗེས་སུ་གནང་བ་དང་། བྱིན་གྱིས་བརླབས་པའི་བཀའ་འོ། །ཞལ་ནས་གསུངས་པའི་བཀའ་ལ་གཉིས་ཏེ། སྟོན་པས་མདོངས་གསོལ་དུ་གསུངས་པ་དང་། འཁོར་གྱིས་ནུས་པས་ཞུས་ཏེ་གསུངས་པ་དང་། སྐབས་ལས་གླེང་བསླངས་དུ་གསུངས་པའོ། །སྟོན་པས་མདོངས་གསོལ་དུ་གསུངས་པ་ནི། འཕགས་པ་སྡུད་པ་སྟེ། དེ་ནས་བཅོམ་ལྡན་འདས་ཀྱིས་འཁོར་བཞི་པོ་དེ་དག་རབ་ཏུ་དགའ་བར་མཛད་པའི་ཕྱིར་ཡང་ཤེས་རབ་ཀྱི་ཕ་རོལ་དུ་ཕྱིན་པ་འདི་སྟོན་ཅིང་། དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཞེས་པའོ། །འཁོར་གྱིས་ཞུས་ཏེ་གསུངས་པ་ནི། མཚན་བརྗོད་ལྟ་བུ་སྟེ། གླུར་བླངས་གར་བླངས་བཤད་དུ་གསོལ། ཞེས་པ་ལྟ་བུའོ། །སྐབས་ལས་གླེང་དུ་བསླངས་པ་ནི། དུས་སྐབས་ཀྱི་དགོངས་འབྲེལ་གང་ཡང་རུང་བ་ལ་བརྟེན་ནས་གསུངས་པའོ། །བྱིན་གྱི་རླབས་པའི་བཀའ་ལ་གསུམ་སྟེ། སྐུས་བྱིན་གྱིས་རླབས་པ་ནི། བཅོམ་ལྡན་འདས་ཀྱིས་སེམས་དཔའ་རྡོ་རྗེ་སྙིང་པོའི་སྤྱི་བོར་ཕྱག་གླང་པོའི་སྣ་ལྟ་བུ་བཞག་ནས་བྱིན་གྱིས་རླབས་ཏེ། ཆོས་མདོ་སྡེ་ས་བཅུ་པ་གསུངས་པ་ལྟ་བུའོ། །གསུང་གིས་བྱིན་གྱིས་རླབས་པ་ནི། ཡུམ་ལས། རབ་འབྱོར་ཅི་ནས་ཀྱང་ཅི་ནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤོབས་པར་གྱིས་ཤིག །ཅེས་བསྒོ་བས་སྤོབས་པ་སྐྱེས་ནས་ཕ་རོལ་དུ་ཕྱིན་པ་བཤད་ཅེས་གསུངས་པ་ལྟ་བུའོ། །ཐུགས་ཀྱིས་བྱིན་གྱིས་བརླབས་པ་ནི། བཅོམ་ལྡན་འདས་ཟབ་མོའི་སྣང་བ་ཞེས་བྱ་བའི་ཏིང་ངེ་འཛིན་ལ་བཞུགས་ནས། སྤྱན་རས་གཟིགས་ཀྱིས་ཆོས་གསུངས་པ་ལྟ་བུའོ། །གང་བྱིན་གྱིས་བརླབས་ན་གཉིས་ཏེ། སེམས་ཀྱི་རྒྱུད་དང་མི་འབྲེལ་བར་བྱིན་གྱིས་རླབས་པ་དང་། སེམས་ཀྱི་རྒྱུད་དང་འབྲེལ་བར་བྱིན་གྱིས་རླབས་པའོ། །དང་པོ་ནི་ཐུབ་པ་བཞུགས་པའི་དུས་སུ་བེམ་པོ་ལས་ཀྱང་ཆོས་ཀྱི་སྒྲ་འབྱུང་སྟེ། མཁའ་དང་གཟུགས་ནི་དད་པ་དང་། །ནམ་མཁའ་ལས་ཀྱང་ཆོས་ཀྱི་སྒྲ། །རྒྱུན་མི་ཆད་པར་འབྱུང་བར་འགྱུར། །ཞེས་པ་དང་། སྟོན་པས་དགའ་ལྡན་གནས་སུ་ནི། །རི་དང་ཤིང་བུ་རྡེའུ་དང་། རྔ་བོ་ཆེ་དང་པདྨ་ལས། སྒྲ་བྱུང་བས་ནི་བཀའ་ཞེས་བརྗོད། །ཞེས་སོ། །སེམས་ཀྱི་རྒྱུད་དང་འབྲེལ་བར་བྱིན་གྱིས་རླབས་པ་གཉིས་ཏེ། སེམས་ཅན་གྱི་སེམས་དང་འབྲེལ་བར་བྱིན་གྱིས་རླབས་པ་དང་། འཕགས་པའི་ཐུགས་དང་འབྲེལ་བར་བྱིན་གྱིས་རླབས་པའོ། །དང་པོ་ནི། ཐུབ་པ་ཞལ་བཞུགས་པའི་དུས་ན། སེམས་ཅན་ཕལ་པས་ཀྱང་ཆོས་འཆད་པར་ནུས་ཏེ། ཐུབ་དབང་ཁྱོད་ཀྱི་བྱིན་རླབས་ལས། །སེམས་ཅན་ཀུན་གྱིས་ཆོས་རབ་སྒྲོགས། ཞེས་སོ། །འཕགས་པའི་ཐུགས་དང་འབྲེལ་བར་བྱིན་གྱིས་རླབས་པ་ནི། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། འཆད་དང་། རིགས་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེའི་འབྲས་ཐོབ་པ། དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་པའོ། །རྗེས་སུ་གནང་བའི་བཀའ་ལ་གཉིས་ཏེ། གསུང་ཞིག་པར་རྗེས་སུ་གནང་བ་དང་། བསྡུས་ཤིག་པར་རྗེས་སུ་གནང་བའོ། དང་པོ་ཐུབ་པས་འཁོར་རྣམས་ཤོད་ཅིག་ཅེས་གསུངས་པའམ། ཇི་ལྟར་ཁྱོད་ཀྱིས་བསྟན་པ་བཞིན་དུ་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་ལ་བསླབ་པར་བྱའོ། །ཞེས་པ་ལྟ་བུའོ། །བསྡུས་ཤིག་པར་རྗེས་སུ་གནང་བ་ནི། འདི་སྐད་བདག་གིས་ཐོས་པའི་ཞེས་པ་ཆོས་རྣམས་ཀུན་གྱི་དབུ་རུ་ཆུག་ཅིག །གསུངས་པ་ལ་མངོན་པར་བསྟོད་དོ། །ཞེས་པ་ཆོས་རྣམས་ཀུན་གྱི་ཞབས་ལ་ཆུག་ཅིག་ཅེས་པ་ལྟ་བུའོ། །བཀའི་བསྡུ་བ་ནི། །བཀའ་ཐམས་ཅད་ཐེག་པ་ཆེ་ཆུང་གཉིས་སུ་འདུས་པའམ། ཡང་ན་འདུལ་བ། མདོ་སྡེ། མངོན་པ་གསུམ་དུ་འདུས་པའོ། །བཀའ་ལ་གང་སྔ་བ་ནི། འགའ་ཞིག་ན་རེ་མདོ་སྡེ་ཤིས་པར་བརྗོད་པ་སྔ་སྟེ། ཐུབ་པ་སངས་རྒྱས་ཏེ་ཞག་བདུན་ཕྲག་བདུན་དུ་ཆོས་མ་གསུངས་པའི་ཚེ། བདུན་ཕྲག་ཐ་མ་ལ་བྱང་ཆུབ་ཀྱི་ཤིང་སྒྲོལ་རྒྱུའི་རྩ་ན་བཞུགས་པ་ལ། ཚོང་དཔོན་མགོན་བཟང་སྐྱོན་དང་འཕྲད་པའི་ཚེ། མདོ་སྡེ་ཤེས་པ་བརྗོད་པ་གསུངས་པས་དེ་སྔ་མ་ཡིན་ཞེས་ཟེར་རོ། །ཁ་ཅིག་ན་རེ། དེ་ཙ་ན་སངས་རྒྱས་མ་ཟིན་ཏེ། རྡོ་རྗེ་གདན་དུ་བཞུད་པའི་ལམ་ག་ཡིན་པས་དེ་དག་ནི་བཀར་མི་འགྲོ་ལ། སངས་རྒྱས་ནས་བརྒྱ་བྱིན་གྱིས་ཞུས་པའི་ཚེ། ཟབ་བཞི་སྤྲོས་བྲལ་འོད་གསལ་འདུས་མ་བྱས། བདུད་རྩི་ལྟ་བུའི་ཆོས་ཤིག་བདག་གིས་རྙེད། སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་སུ་གཅིག་པུར་བསྒོམ་པར་བྱ། ཞེས་གསུངས་པ་དེ་སྔ་སྟེ། དབང་པོ་རབ་ལ་ཡང་དག་པའི་དོན་ངོ་སྤྲོད་པ་ཡིན་ནོ། །ཟེར་བ་ཡོད། བཀའི་ཆོས་སྡེ་ངོས་བཟུང་བ་ནི། ཐེག་པ་ཆུང་ངུ་ལ་ཉན་ཐོས་དང་། རང་རྒྱལ་ལོ། ཉན་ཐོས་ཀྱི་བཀའ་ནི། འདུལ་ལུང་སྡེ་བཞི་མདོ་སྡེ་ལས། ལེགས་ཉེས་སྟོན་པ་ལས་བརྒྱ་པ། གད་མོ་ལ་སོགས་པའི་རྟོགས་བརྗོད། བྲམ་ཟེ་ཚོམས་ཀྱི་མདོ། དྲིན་ལན་བསབ་པ། མངོན་པ་སྡེ་བདུན་ལ་སོགས་པའོ། །རང་རྒྱལ་ལ་བཀའ་ལ་སོགས་པའི་གཞུང་མི་གཞུང་དེ་ཞར་བྱུང་ཡིན་ནོ། །ཐེག་པ་ཆེན་པོ་ལ། སེམས་ཙམ་དང་། དབུ་མ་གཉིས་སོ། །སེམས་ཙམ་གྱི་བཀའ་ནི། སངས་རྒྱས་ཕལ་པོ་ཆེ་དང་། མདོ་སྡེ་ལང་ཀར་གཤེགས་པ། དགོངས་པ་ངེས་པར་འགྲེལ་པ་ལ་སོགས་པ། མདོ་སྡེ་ཕལ་ཆེར་ཡིན་ནོ། །དབུ་མའི་བཀའ་ནི། མདོ་ཕ་རོལ་དུ་ཕྱིན་པ་རྒྱས་འབྲིང་རྣམ་གསུམ། །གཞུང་ཆུང་བཅུ་གསུམ། །གཞན་ཡང་མདོ་སྡེ་ཏིང་ངེ་འཛིན་གྱི་རྒྱལ་པོ་ལ་སོགས་པ་མང་དུ་བཞུགས་སོ། །བསྟན་བཅོས་ལ་དྲུག་སྟེ། ངོ་བོ་དང་། ངེས་ཚིག་དང་། དབྱེ་བ་དང་། བསྡུ་བ་དང་། གང་སྔ་མ་དང་། ཆོས་སྡེ་ངོས་བཟུང་བའོ། ངོ་བོ་ནི། སེམས་ཅན་ཉོན་མོང་སྤོང་ཞིང་། ངན་འགྲོ་སྲིད་ལས་སྐྱོབ་པའོ། དེ་ཡང་། སློབ་དཔོན་དབྱིག་གཉེན་གྱི་ཞལ་ནས། ཉོན་མོངས་དགྲ་རྣམས་མ་ལུས་འཆོས་པ་དང་། །ངན་འགྲོའི་སྲིད་ལས་སྐྱབས་པ་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། གཉིས་པོ་འདི་དག་གཞན་གྱི་ལུགས་ལ་མེད། །ཅེས་སོ། །ངེས་ཚིག་ནི། བཀའི་དོན་དམ་སངས་རྒྱས་ཀྱི་བསྟན་པ་མི་གསལ་བ་རྣམས་གསལ་བར་བཅོས་པའོ། །དབྱེ་ན་གསུམ། དོན་མེད་པ་དང་། དོན་ལོག་པ་དང་། དོན་དང་ལྡན་པའོ། །དོན་མེད་པ་ནི། བྱ་རོག་སོ་བརྟག་གི་བསྟན་བཅོས་ལ་སོགས་པའོ། །དོན་ལོག་པ་ནི་མུ་སྟེགས་ཀྱི་བསྟན་བཅོས་སོ། །དོན་དང་ལྡན་པ་ནི། ནང་པའི་བསྟན་བཅོས་སོ། །དེ་ལ་གཉིས་ཏེ། རྩོད་པ་ལྷུར་ལེན་དང་། སྒྲུབ་པ་ལྷུར་ལེན་པའོ། །དང་པོ་ལ་གཉིས་ཏེ། བརྗོད་བྱ་ངག་གི་འགྲེལ་པ་སྒྲའི་བསྟན་བཅོས་དང་། རྗོད་བྱེད་ཚིག་གི་འགྲེལ་པ་ཚད་མའི་བསྟན་བཅོས་སོ། སྒྲུབ་པ་ལྷུར་ལེན་པ་ལའང་གཉིས་ཏེ། ལུང་བསྡུ་བའི་བསྟན་བཅོས་དང་། ལུང་དགྲོལ་བའི་བསྟན་བཅོས་སོ། །ལུང་བསྡུ་བ་ནི། སངས་རྒྱས་ཀྱི་བཀའ་རྒྱ་ཆེ། ལུང་གྲངས་མང་བས། དེ་རྣམས་སེམས་ཅན་གྱིས་བློས་བསྡུར་འདུས་པས། དེའི་དོན་དུ་འཕགས་པས་བསྟན་བཅོས་མང་དུ་མཛད་དེ། མངོན་པར་རྟོགས་པའི་རྒྱན་ལྟ་བུའོ། །ལུང་དགྲོལ་བའི་བསྟན་བཅོས་ནི། སངས་རྒྱས་ཀྱི་བཀའ་རྡོ་རྗེའི་ཚིག་ཏུ་གནས་པས། སེམས་ཅན་གྱི་བློས་དཔག་པར་དཀའ་ཞིང་མི་རྟོགས་པས། འཕགས་པ་དང་གང་ཟག་མཁས་པ་རྣམས་ཀྱིས། དེའི་དོན་གསལ་བར་བྱ་བའི་ཕྱིར། བཀའི་བཤད་འགྲེལ་ཆེན་པོ་རྣམས་མཛད་པ་ཡིན། བསྟན་བཅོས་ཀྱི་བསྡུ་བ་ནི། བཀའ་ཐམས་ཅད་ཐེག་པ་ཆེ་ཆུང་གཉིས་སུ་འདུས་པས། བསྟན་བཅོས་ཀྱང་གཉིས་སུ་འདུས་པའམ། བཀའ་ཐམས་ཅད་སྡེ་སྣོད་གསུམ་དུ་འདུས་པས། བསྟན་བཅོས་ཀྱང་སྡེེེ་སྣོད་གསུམ་དུ་འདུས་པའོ། །བསྟན་བཅོས་ལ་གང་སྔ་བ་ནི། གཞུང་གཅིག་ལ་བསྟན་བཅོས་མངོན་པ་སྡེ་བདུན་སྔ་སྟེ། ཐུབ་པ་མ་འདས་པའི་གོང་དུ་བརྩམས་པ་ཡིན་ནོ་ཟེར་རོ། །ཁ་ཅིག་ན་རེ། བྱེ་བྲག་གི་བཤད་མཛོད་ཆེན་མོ་སྔ་སྟེ། བཀའ་བསྡུ་བ་མཛད་པའི་རྗེས་ཐོགས་ལ་དགྲ་བཅོམ་པ་ལྔ་བརྒྱས་མཛད་པ་ཡིན་ཟེར་རོ། །ཆོས་སྡེ་ངོས་བཟུང་བ་ནི། བཀའ་འཁོར་ལོ་དང་པོའི་དགོངས་པ་འགྲེལ་པ། བྱེ་བྲག་གི་བཤད་མཛོད་ཆེན་མོ་དང་། པྲ་ཀ་ར་ཎཱ་སྡེ་བརྒྱད་དང་། འདུལ་བ་མདོ་རྩ་ལ་སོགས་པའོ། །བཀའ་འཁོར་ལོ་བར་བའི་དགོངས་པ་འགྲེལ་བར་བྱེད་པ། དོན་གྱི་འགྲེལ་པ་དབུ་མ་རིགས་པའི་ཚོགས་དྲུག་དང་། ཤར་གསུམ་མོ། ཚིག་གི་འགྲེལ་པ་དམ་པའི་ཆོས་མངོན་པ། ཚིག་དོན་གཉིས་ཀའི་འགྲེལ་པ་མངོན་པར་རྟོགས་པའི་རྒྱན་ནོ། །བཀའ་འཁོར་ལོ་ཐ་མའི་དགོངས་པ་འགྲེལ་བར་བྱེད་པ། མདོ་སྡེ་རྒྱན་དང་། དབུས་མཐའ་དང་། ཆོས་དང་ཆོས་མིན་རྣམ་པར་འབྱེད་པ་དང་། སྡོམ་རྣམ་གཉིས་དང་། རྣལ་འབྱོར་སྤྱོད་པའི་ས་སྡེ་ལྔ་དང་། དོན་གསལ་བ་ལ་སོགས་པ་ཡིན་ནོ། །དེ་གཉིས་ཀའི་ཐུན་མོང་པ་རྒྱུད་བླ་མ་ལ་སོགས་པའོ། །སྤྱིར་བཀའ་རེ་རེ་ལའང་ཐེག་པ་ཆེ་ཆུང་གཉིས་ཀ་ཚང་བ་ཡོད་དོ། །བསྟན་བཅོས་རེ་རེ་ལ་ཡང་གཉིས་ཀ་ཚང་བ་ཡོད། དེ་རེ་རེས་ཀྱང་བཀའ་འཁོར་ལོ་གསུམ་ཀའི་དོན་གཏན་ལ་འབེབས་པ་ཡོད་དོ། །གསང་སྔགས་སྤྱི་སྡོམ་རྣམ་པར་བཞག་པ་ལ་ལྔ་སྟེ། ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། རྣམ་གྲངས་སོ། །ངོ་བོ་ནི། ཡིད་སྐྱོབ་པའང་ཤེས་པ་སྐྱོབ་པར་བྱེད་པ་ཡིན་ཏེ། གསང་བ་འདུས་པའི་ཕྱི་མ་ལས། མ་ནི་ཡིད་ཅེས་བྱ་བ་དེ། དྲ་ནི་སྐྱོབ་པར་བྱེད་པར་བཤད། ཅེས་སོ། །འོ་ན་ཕ་རོལ་དུ་ཕྱིན་པས་ཀྱང་ཡིད་དང་ཤེས་པ་སྐྱོབ་པས། སྔགས་དང་ཁྱད་པར་ཅི་ཡོད་ཅེ་ན། ཡོད་དེ། སྔགས་ནི་བདེ་བར་སྐྱོབ་པ་དང་། མྱུར་བར་སྐྱོབ་པས་ཁྱད་པར་དུ་བྱས་པའོ། །བདེ་བར་སྐྱོབ་སྟེ། རྔམ་གློག་ལས། དཀའ་ཐུབ་དཀའ་སྤྱད་འདིར་མི་དགོས། །ཁྲིམས་དང་སྡོམ་པ་འདིར་མི་དགོས། །ཞེས་སོ། །མྱུར་བར་སྐྱོབ་སྟེ། མཚན་ཉིད་ཐེག་པ་ལྟར་བསྐལ་པ་གྲངས་མེད་གསུམ་དུ་བསྒྲོད་མི་དགོས་པར་གསུངས་ཏེ། དཔལ་ལམ་རིམ་ལས། དེ་ནི་འདི་དང་ཕྱི་མ་དང་། ལན་གྲངས་གཞན་དུ་རབ་འབྲིང་གིས། ཐོབ་ཕྱིར་བསྐལ་བར་མི་འགྱངས་ཏེ། ཞེས་སོ། །མི་འགྱང་བའི་ལུགས་ནི། དབང་པོ་རབ་ཀྱིས་ཚེ་འདི་ལ་འབྲས་བུ་ཐོབ་སྟེ། གསང་བ་འདུས་པ་ལས། འདི་ཡིས་བཅོམ་ལྡན་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོ་རྣམ་པར་བརྒྱན། །ཚེ་འདི་ཉིད་ལ་ཐོབ་པར་འགྱུར། །ཞེས་སོ། །འབྲིང་བར་དོ་ལ་ཐོབ་སྟེ། ཡེ་ཤེས་ཐིག་ལེ་ལས། ཡང་ན་ལུས་ནི་སྤངས་མ་ཐག །རྩོན་པ་མི་ལྡན་པས་ཀྱང་འགྲུབ། ཅེས་སོ། །ཐ་མས་སྐྱེ་བ་བདུན་ན་འགྲུབ་སྟེ། གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ན་ནི། །མ་བསྒྲུབས་པར་ཡང་དངོས་གྲུབ་ཐོབ། །ཅེས་སོ། །ཐ་མའི་ཐ་མས་སྐྱེ་བ་བཅུ་དྲུག་ན། འགྲུབ་པར་བཤད་དེ། དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ན་འགྲུབ། །ཅེས་སོ། །མདོར་ན་གསང་སྔགས་ཀྱི་ངོ་བོ་ནི། སྐྱེས་སྐྱོབ་བདེ་མྱུར་ཞེས་བྱའོ། །ཡང་ན། ཡོན་ཏན་གྱི་རིམ་པ་ལའང་། གསང་སྔགས་ཀྱི་ངོ་བོ་ནི། སྟོང་པ་དང་སྙིང་རྗེའི་ཁྱད་པར་བཤད་དེ། སྟོང་པ་དང་ནི་སྙིང་རྗེ་གཉིས། །གཉིས་སུ་མེད་པའི་ཚུལ་གྱིས་སུ། །གསང་སྔགས་ཞེས་ནི་དེ་ལ་བཤད། །ཅེས་སོ། །ངེས་ཚིག་ནི། སྣོད་མིན་ལ་གསང་ཞིང་སྣོད་ལྡན་ལ་སྔགས་པ་ན། གསང་སྔགས་སོ། །སྒྱུ་འཕྲུལ་རྒྱ་མཚོ་ལས། གསང་སྔགས་གསང་ཞེས་བརྗོད་པ་ནི། །ཆོས་ལ་སྐྱོན་ཡོད་མ་ཡིན་ཏེ། །སྣོད་མིན་སེམས་ཅན་བློ་ཆུང་ལ། །ཐུགས་རྗེ་ཐབས་ཀྱིས་རབ་ཏུ་གསང་། །ཞེས་སོ། །དབྱེ་ན་གསུམ་སྟེ། གསང་སྔགས་དང་། རིག་སྔགས་དང་། གཟུངས་སྔགས་སོ། །དེ་གསུམ་གྱི་ཁྱད་པར་ཀྱང་། མཁའ་འགྲོ་མ་གསང་བའི་རྒྱུད་ལས། མ་རིག་རྣམས་ལས་གསང་བའི་ཕྱིར། །གསང་སྔགས་ཞེས་སུ་བསྟན་པ་ཡིན། །དེ་དོན་ཕྱིན་ཅི་མ་ལོག་པས། །རིགས་སྔགས་ཞེས་སུ་བསྟན་པ་ཡིན། །སྟོང་པའི་ངང་ལས་མ་གཡོས་པས། །གཟུངས་སྔགས་ཞེས་སུ་བསྟན་པ་ཡིན། །ཞེས་པས། ཡང་འགའ་ཞིག་ན་རེ། ལྷ་ཕོ་མོ་ཟུང་འབྲེལ་དུ་སྟོན་པ་གསང་སྔགས། ལྷ་ཕོ་ཤས་ཆེ་བ་རིགས་སྔགས། ལྷ་མོ་ཤས་ཆེ་བ་གཟུངས་སྔགས་ཟེར་རོ། །ཡང་འགའ་ཞིག་ན་རེ། ༀ་གྱིས་སྔགས་ཀྱི་མགོ་དྲངས་པ་ཐམས་ཅད་གསང་སྔགས། ཏདྱ་ཐཱས་དྲངས་པ་རིག་སྔགས། ན་མོརརྣ་ཏྲ་ཡཱ་ཡས་དྲངས་པ་གཟུངས་སྔགས་ཟེར་ཏེ། གཅིག་ཏུ་ངེས་པར་བཞག་པ་མེད་དོ། །སྔགས་ཀྱི་མཚན་ཉིད་ནི། སངས་རྒྱས་ཀྱི་ཐུགས་ཡང་དག་པའི་ཡེ་ཤེས་སོ། །དེ་ཡང་རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་པས། །ཆོས་ཀྱི་སྙིང་པོ་སྒྲུབ་བྱེད་ཅིང་། །ཆོས་ཀྱི་དབྱིངས་དང་ཡང་དག་ལྡན། །སྔགས་ཀྱི་མཚན་ཉིད་ཡིན་པར་གསུངས། །ཞེས་སོ། །རྣམ་གྲངས་རྣམ་པར་ཕྱེ་ན་གཉིས་ཏེ། རྒྱུད་ལས། རྒྱུད་ལ་བརྟེན་པའི་སྒྲུབ་ཐབས་སམ། །མན་ངག་གོ །རྒྱུད་ལ་ལྔ་སྟེ། ངོ་བོ་དང་། ངེས་ཚིག་དང་། དབྱེ་བ་དང་། རྣམ་གྲངས་དང་། ལྡང་ཚད་དོ། །ངོ་བོ་ལ་གཉིས་ཏེ། བརྗོད་བྱ་དོན་གྱི་རྒྱུད་ཀྱི་ངོ་བོ་དང་། རྗོད་བྱེད་ཚིག་གི་རྒྱུད་ཀྱི་ངོ་བོའོ། །དང་པོ་འདོད་ལུགས་མང་སྟེ། ཨཱརྻ་དེ་ཝ་ན་རེ། བརྗོད་བྱའི་རྒྱུད་ཀྱི་ངོ་བོ་ནི། གང་ལས་གཉིས་མེད་ཀྱི་ཡེ་ཤེས་སྣང་བར་ནུས་པ་ཡིན་ལ། རྗོད་བྱེད་ཚིག་གི་རྒྱུད་ཀྱི་ངོ་བོ་ནི། གང་ལ་གཉིས་མེད་ཀྱི་ཡེ་ཤེས་སྣང་བའི་ངག་ཡིན་གསུངས། དེ་ཡང་མཚན་བརྗོད་ལས། གཉིས་མེད་གཉིས་སུ་མེད་པར་སྟོན། །ཅེས་སོ། །ཀུན་དགའ་སྙིང་པོ་ན་རེ། བརྗོད་བྱའི་རྒྱུད་ཀྱི་ངོ་བོ་ནི། སྟོན་པའི་སྐུ་གསུང་ཐུགས་ཀྱི་འཁོར་ལོ་ཡིན་ལ། རྗོད་བྱེད་ཀྱི་ངོ་བོ་ནི། སྒྲ་སྤྱིའི་རྣམ་པ་ཡི་གེར་སྣང་བའོ་ཟེར། དེ་ཡང་དེ་གཉིས་འདུས་པ་ལས། རྒྱུད་ཀྱི་ངོ་བོ་སྟོན་པས་ཏེ། །སྒྲ་ཡི་བདག་ཉིད་རྒྱུད་ཅེས་བྱ། །ཅེས་སོ། །ཡང་ཁ་ཅིག་ན་རེ། རྒྱུད་ཀྱི་ངོ་བོ་ཐབས་ཤེས་གཉིས་སུ་མེད་པ་ཡིན་་ཏེ། དགྱེས་པ་རྡོ་རྗེ་ལས། ཐབས་དང་ཤེས་རབ་བདག་ཉིད་རྒྱུད། །འདི་ནི་བདག་གིས་བཤད་ཀྱིས་ཉོན། །ཅེས་སོ། །རྒྱུད་ཀྱི་ངེས་ཚིག་ནི། རིན་ཆེན་ཕྲེང་བ་ལས། ངེས་པའི་ཚིག་ནི་དྲུག་ཡིན་ཏེ། །ཕུན་སུམ་ཚོགས་ལྔས་འཆད་ཕྱིར་དང་། །འབྲེལ་དང་མ་ཚང་མེད་ཕྱིར་དང་། །དཀྲུག་པའི་ཕྱིར་དང་རག་ལས་ཕྱིར། །གསང་སྔགས་བསླབ་པ་སྟོན་ཕྱིར་རོ། །ཅེས་སོ། །འཇམ་དཔལ་ཆེན་པོའི་རྒྱུད་ལས། འབྲེལ་དང་མ་ཚང་མེད་ཕྱིར་དང་། །ཕུན་གསུམ་ཚོགས་པས་རྒྱུད་ཅེས་བྱ། །ཞེས་སོ། །དེ་ལ་དྲུག་སྟེ། རྒྱུན་ཆགས་པའི་དོན་གྱིས་ན་རྒྱུད་དེ་ཆུ་བོའི་རྒྱུན་ལྟ་བུའོ། །འབྲེལ་བའི་དོན་གྱིས་རྒྱུད་དེ་ས་བོན་དང་མྱུ་གུ་ལྟ་བུའོ། །མ་ཚང་པ་མེད་པའི་དོན་གྱིས་རྒྱུད་དེ། འཁོར་ལོས་བསྒྱུར་བའི་རྒྱལ་སྲིད་ལྟ་བུའོ། །རྒྱས་པའི་དོན་གྱིས་ན་རྒྱུད་དེ། དཔག་བསམ་གྱི་ཤིང་ལྟ་བུའོ། །རང་གིས་རང་ཐུམས་པའི་དོན་གྱིས་ན་རྒྱུད་དེ། དར་གྱི་སྲིན་བུ་ལྟ་བུ་འོ། །དཀྲུགས་པའི་དོ ན་གྱིས་ན་རྒྱུད་དེ། ཐག་པ་ལྟ་བུའོ། །རྒྱུད་ལ་དབྱེ་ན་གཉིས་ཏེ། བརྗོད་བྱ་དོན་གྱི་རྒྱུད་བརྗོད་བྱེད་ཚིག་གི་རྒྱུད་དོ། །དོན་གྱི་རྒྱུད་ལ་གསུམ་སྟེ། རྒྱུའི་རྒྱུད་དང་། ཐབས་ཀྱི་རྒྱུད་དང་། འབྲས་བུའི་རྒྱུད་དོ། །དེ་ཡང་གུར་ལས། བསྒྲུབ་བྱ་རྒྱུད་དང་བྱ་བ་ཤེས། །གཞི་དེ་རང་བཞིན་རྒྱུན་ཡིན་ཏེ། །བསྒྲུབ་པའི་རྡོ་རྗེ་བདག་ཅེས་སོ། །གསང་བ་འདུས་པ་ལས། རྒྱུད་ནི་རྣམ་པ་གསུམ་འགྱུར་ཏེ། །གཞི་དང་དེ་ཡི་རང་བཞིན་དང་། །མི་ཕྲོག་པ་ཡི་རབ་ཕྱེ་བ། །གཞི་དེ་རང་བཞིན་རྒྱུ་ཡིན་ཏེ། །དེ་བཞིན་མི་ཕྲོག་འབྲས་བུའོ། །ཞེས་སོ། །དགོངས་འདུས་ལས། རྒྱུའི་རྣལ་འབྱོར་དང་། རྐྱེན་གྱི་རྣལ་འབྱོར་དང་། འབྲས་བུའི་རྣལ་འབྱོར་རོ། །ཞེས་སོ། །དེ་ལ་རྒྱུའི་རྒྱུད་བྱ་བ་ནི། སེམས་ཅན་རྣམས་ཀྱི་སེམས་ཉིད་ཡེ་ནས་བདེ་བར་གཤེགས་པའི་སྙིང་པོ་ཅན་དུ་ཡེ་ནས་གནས་པ་སྟེ། རྐྱེན་ལམ་ཉམས་སུ་བླངས་ན། འབྲས་བུ་ཐོབ་ངེས་པ་ལ་བྱའོ། །དེ་ཡང་། རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །ཞེས་སོ། །ལམ་གྱི་རྒྱུད་ནི། རྒྱུད་དེ་འབྲས་བུར་བྱེད་པའི་ཐབས་ལམ་ཡིན་ཏེ། སམྦྷོ་ཊ་ལས། སེམས་ཅན་ཡེ་ཤེས་སྐྱེས་བའི་ཕྱིར། །ཐབས་ནི་སངས་རྒྱས་ཉིད་ཀྱིས་བསྟན། །ཞེས་སོ། །རྒྱུད་གསང་བ་སྙིང་པོ་ལས། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་སྐུ་ལྔ་ལྷུན་གྱིས་གྲུབ། །ཅེས་སོ། །འབྲས་བུའི་རྒྱུད་ནི། སེམས་ཉིད་སྐུ་དང་ཡེ་ཤེས་ཀྱི་ངོ་བོར་ཡེ་ནས་རྒྱུན་མ་ཆད་པར་གནས་ཀྱང་། གློ་བུར་གྱི་དྲི་མས་བསྒྲིབས་པ་ལ། དྲི་མ་དེ་བསལ་ནས་གཞི་ཇི་ལྟ་བ་བཞིན་དུ་མངོན་དུ་བྱས་པའོ། །དགྱེས་རྡོར་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་ཉིད་བསལ་ན་སངས་རྒྱས་ཡིན། །ཞེས་སོ། །བརྗོད་བྱེད་ཚིག་གི་རྒྱུད་ནི། བརྗོད་བྱའི་དོན་གཏན་ལ་འབེབ་པར་བྱེད་པའི་མན་ངག་བཀའ་གསང་སྔགས་སུ་བྱུང་བ་ཞིག་ལ་བྱའོ། །རྒྱུད་ཀྱི་རྣམ་གྲངས་རྣམ་པར་དབྱེ་ན་གཉིས་ཏེ། བཀའ་རྙིང་འགྱུར་ལས་གྲགས་པ་དང་། །བཀའ་གསར་འགྱུར་ལས་གྲགས་པའོ། །བཀའ་རྙིང་འགྱུར་ལས་གྲགས་པའི་དབང་དུ་བྱས་ན་གཉིས་ཏེ། ཕྱི་པ་ཐབས་ཀྱི་རྒྱུད་དང་། ནང་པ་ཐབས་ཀྱི་རྒྱུད་དོ། །ཕྱི་པ་ཐབས་ཀྱི་རྒྱུད་ལ་གསུམ་སྟེ། བྱ་བའི་རྒྱུད་ཀྲི་ཡ་དང་། སྤྱོད་པའི་རྒྱུད་ཨུ་པ་ཡ་དང་། རྣལ་འབྱོར་རྒྱུད་ཡོ་གའོ། །ཀྲི་ཡ་ལ་བྱ་བའི་རྒྱུད་ཟེར་བ་ནི། ལས་དང་བྱ་བ། ཁྲུས་དང་གཙང་སྦྲ་གཙོ་བོར་སྟོན་པས་བྱ་བའི་རྒྱུད་དོ། །དེ་ཡང་བསམ་གཏན་ཕྱི་མ་ལས། རྒྱུད་འདི་ནི་ལུས་ངག་གི་བྱ་བ་གཙོ་བོར་སྟོན་པས་ན་བྱ་བའི་རྒྱུད་དོ། །ཞེས་སོ། །དེའི་ཆོས་སྡེ་ངོས་བཟུང་ན་ཀྲི་ཡ་སྤྱིའི་རྒྱུད་དང་། བྱེ་བྲག་གི་རྒྱུད་དོ། །སྤྱིའི་རྒྱུད་ནི། དཔུང་བཟང་དང་། སུཾ་སིདྡྷ་ཀ་ར་དང་། རིག་པ་མཆོག་དང་། གསང་བ་སྤྱི་རྒྱུད་ལ་སོགས་སོ། །བྱེ་བྲག་གི་རྒྱུད་ནི། རིགས་གསུམ་གྱི་རྒྱུད་དུ་མ་དང་། གཟུངས་ཀྱི་རིགས་མང་དུ་བཞུགས་སོ། །སྤྱོད་པའི་རྒྱུད་ལ། ཨུ་པཱ་ཡ་ཞེས་ཅིའི་ཕྱིར་བྱ་ན། སྤྱོད་པ་ཀྲི་ཡ་ལྟར་སྤྱོད་ཅིང་ལྟ་བ་ཡོ་ག་ལྟར་ལྟ་བས་གཉིས་ཀའི་རྒྱུད་ཡིན་ནོ། །དེ་ཡང་། རྣམ་སྣང་མངོན་པར་བྱང་ཆུབ་པའི་དོན་བསྡུས་པ་ལས། རྒྱུད་འདི་ནི་གཙང་སྦྲ་ལ་སོགས་པས་སྨན་ལ་ཏིང་ངེ་འཛིན་གྱི་འཕགས་པར་སྤྱོད་པས་ན་གཉིས་ཀའི་རྒྱུད་དོ། །ཞེས་སོ། །དེའི་ཆོས་སྡེ་ངོས་བཟུང་བ་ནི། རྣམ་པ་སྣང་མཛད་མངོན་པར་བྱང་ཆུབ་པའི་རྒྱུད་དང་། ཕྱི་མ་དང་། རྡོ་རྗེ་ས་འོག་དང་འབྱུང་པོ་འདུལ་བྱེད་ཀྱི་རྒྱུད་ལ་སོགས་པའོ། །ཡོ་ག་ལ་ཅིའི་ཕྱིར་རྣལ་འབྱོར་གྱི་རྒྱུད་ཅེས་བྱ་ན། དེ་ཁོ་ན་ཉིད་རྣམ་པར་འབྱེད་པའི་དོན་བསྡུས་པ་ལས། རྒྱུད་འདི་ནི་ཏིང་ངེ་འཛིན་གཙོ་བོར་སྤྱོད་པས་ན་རྣལ་འབྱོར་གྱི་རྒྱུད་དེ་ཞེས་སོ། །དེའི་ཆོས་སྡེ་ངོས་བཟུང་བ་ནི། རྩ་བའི་རྒྱུད་དེ་ཁོ་ན་ཉིད་འདུས་པ། དེ་དང་ཉེ་བའི་རྒྱུད་ངན་སོང་སྦྱོང་བའོ། །བཤད་པའི་རྒྱུད་ལ་བཞི་སྟེ། སྐུ་མདོག་ཕྱག་མཚན་འཆད་པ་དཔལ་མཆོག་དང་པོ། །ཏིང་ངེ་འཛིན་དང་མཆོད་པ་འཆད་པ་རྡོ་རྗེ་རྩེ་མོ། དེ་ཁོ་ན་ཉིད་དང་མངོན་པར་བྱང་ཆུབ་པ་འཆད་པ་ཐབས་གསལ་བའི་རྒྱུད། བསྒོམ་པ་དང་བཟླས་པ་འཆད་པར་བྱེད་པ་དམ་ཚིག་གི་མངོན་པར་བྱང་ཆུབ་པའི་རྒྱུད་དོ། །ནང་པ་ཐབས་ཀྱི་རྒྱུད་ལ་གཉིས་ཏེ། ཐེག་པ་སྤྱིར་དབྱེ་བ་དང་། ཆོས་སྡེ་བྱེ་བྲག་ཏུ་དབྱེ་བའོ། །དང་པོ་ཐེག་པ་སྤྱིར་དབྱེ་ན་གསུམ་སྟེ། རྒྱུད་མ་ཧཱ་ཡོ་ག་དང་། ལུང་ཨ་ནུ་ཡོ་ག་དང་། མན་ངག་རྫོགས་པ་ཆེན་པོ་ཨ་ཏི་ཡོ་གའོ། །དེ་རྣམས་ཀྱང་གཙོ་ཆེ་བའི་མིང་འདོགས་ཡིན་ལ། བྱེ་བྲག་ཏུ་རེ་རེ་ལ་ཡང་རྒྱུད་ལུང་མན་ངག་གསུམ་ག་ཚང་བར་གནས་དེ། བདུད་རྩི་བམ་བརྒྱད་ལས། རྒྱུད་དང་ལུང་དང་མན་ངག་ཀྱང་། །དམངས་དང་རྗེ་དང་རྒྱལ་པོའི་ཚུལ། །གཅིག་ལ་གཅིག་རྟེན་གཅིག་གི་ངང་། །ཞེས་སོ། ཆོས་སྡེ་བྱེ་བྲག་ཕྱེ་ན་གཉིས་ཏེ། རྒྱུད་སྡེ་དང་། སྒྲུབ་སྡེའོ། །རྒྱུད་སྡེ་ནི་མདོ་དང་། སྒྱུ་འཕྲུལ་དང་། སེམས་ཕྱོགས་སོ། །དེ་ཡང་ཐེག་པ་དང་སྦྱར་ན། སྒྱུ་འཕྲུལ་ནི་མ་ཧཱ་ཡོ་ག མདོ་ནི་ཨ་ནུ་ཡོ་ག སེམས་ཕྱོགས་ནི་ཨ་ཏི་ཡོ་གའོ། །དེ་རྣམས་སྟོན་པའི་ཆོས་སྡེ་ནི། སྤྱི་རྒྱུད་མ་ཧཱ་ཡོ་ག་ལ། ཏན་ཏྲ་སྡེ་བཅོ་བརྒྱད་བཞུགས་ལ་ཁྱད་པར་དུ་གསང་བ་སྒྱུ་འཕྲུལ་ལ། རྒྱུད་སྒྱུ་འཕྲུལ་སྡེ་བརྒྱད་དུ་གྲགས་སོ། །ལུང་ཨ་ནུ་ཡོ་ག་ལ། ལུང་གིས་རྒྱུ་སྡེ་ཉེར་གཅིག་ཏུ་ཡང་གྲགས་སོ། །སེམས་ཕྱོགས་ལ་ཀུན་བྱེད་རྒྱལ་པོ། །རྨད་དུ་བྱུང་བ། བང་མཛོད། ཡང་མཛོད། སྔ་འགྱུར་གྱི་རྒྱུད་ལྔ། རྒྱུད་ཕྲན་བཅུ་གསུམ། བྱེ་བྲག་ཏུ་རྒྱུད་ཕྲན་བསམ་གྱིས་མི་ཁྱབ་པ་བཞུགས་སོ། །རྒྱུད་ཀྱི་རྒྱལ་པོ་དྲུག་ནི། བསྐྱེད་རྫོགས་གསུམ་གའི་ཐུན་མོང་གི་རྒྱུད་ཡིན་ནོ་ཡང་ཟེར། ལུང་ཨ་ནུ་ཡོ་གའི་རྒྱུད་ཡིན་ནོ་ཡང་ཟེར་རོ། །སྒྲུབ་སྡེ་ནི་སྤྱིར་དེ་བཞིན་གཤེགས་པ་ཐམས་ཅད་སྐུ་གསུང་ཐུགས་ཡོན་ཏན་འཕྲིན་ལས་ལྔའི་བདག་ཉིད་དུ་གནས་པས་དེ་སྒྲུབ་པའི་ཐབས་ལ་ཡང་ལྔ་སྟེ། འཇམ་དཔལ་སྐུའི་སྒྲུབ་པ། པདྨ་གསུང་གི་སྒྲུབ་པ། ཡང་དག་ཐུགས་ཀྱི་སྒྲུབ་པ། བདུད་རྩི་ཡོན་ཏན་གྱི་སྒྲུབ་པ། ཕུར་པ་འཕྲིན་ལས་ཀྱི་བསྒྲུབ་པའོ། །དང་པོ་འཇམ་དཔལ་ལ་སྐུའི་སྒྲུབ་པ་ཟེར་བ་དེ། དཔལ་ཡ་མནྟ་ཀའི་སྐུ་ལ་འཁོར་ལོ་བཞི་དང་ལྡན་པར་སྒྲུབ་པས་ནའོ། །དེ་སྟོན་པའི་རྒྱུད་ནི། གཤིན་རྗེའི་རྣ་རྒྱུད་ཡ་མ་རཱ་ཛ་སྐུ་ཁྲོས་པ། གསུང་ཁྲོས་པ། ཐུགས་ཁྲོས་པ་གསང་རྒྱུད་ལ་སོགས་པའོ། །པདྨ་ལ་གསུང་གི་སྒྲུབ་པ་ཟེར་བ་དེ། རྟ་སྐད་ཐེངས་གསུམ་ལ་བརྟེན་ནས་སྒྲུབ་པས་སོ། །དེ་སྟོན་པའི་རྒྱུད་ནི། རྟ་མཆོག་རོལ་པ་དབང་ཆེན་འདུས་པ། ཟླ་གསང་ཐིག་ལེ། དྲག་པོ་ཚར་གཅོད་ལ་སོགས་པའོ། །ཡང་དག་ལ་ཐུགས་ཀྱི་སྒྲུབ་པ་ཟེར་བ་ནི། དཔལ་ཆེན་པོའི་མཁྱེན་པའི་ཡེ་ཤེས་ཆེན་པོ་དགུ་མར་མེ་དགུ་ལ་བརྟེན་ནས་སྒྲུབ་པས་སོ། །དེ་སྟོན་པའི་རྒྱུད་ནི། ཧེ་རུ་ཀ་གལ་པོ། འཇིག་རྟེན་འདས་པའི་མདོ་དང་། གལ་ཆུང་དང་། ཧེ་རུ་ཀ་འདུས་པའི་རྒྱུད་དང་། སངས་རྒྱས་མཉམ་སྦྱོར་ལ་སོགས་པའོ། བདུད་རྩི་ལ་ཡོན་ཏན་གྱི་སྒྲུབ་པ་ཟེར་བ་ནི། དཔལ་ཆེ་མཆོག་ཧེ་རུ་ཀའི་ཞབས་ཀྱི་གདན་ཁྲི་ནས། དབུའི་གཙུག་ཏོར་མན་ཆད་ནས། འཁོར་འདས་ཀྱི་ཆོས་ཐམས་ཅད་ཡོན་ཏན་གྱི་ཚུལ་དུ་རྫོགས་པར་སྒྲུབ་པའོ། །དེ་སྟོན་པ་ནི། རྒྱུད་བཞི་ལུང་དང་ལྔ་སྟེ། བདུད་རྩི་ལ་རོལ་པ། ཡེ་ཤེས་གསང་བའི་འཁོར་ལོ། །དངོས་གྲུབ་ཉེ་བའི་སྙིང་པོ། དུམ་བུ་གསུམ་པ། ལུང་བམ་པོ་བརྒྱད་པའོ། །ཕུར་བ་ཕྲིན་ལས་ཀྱི་སྒྲུབ་པ་ཟེར་བ་ནི། ལས་ཀྱི་གདབ་ཀ་འབའ་ཞིག་སྟོན་པས་སོ། །དེ་སྟོན་པའི་རྒྱུད་ནི། ཕུར་བུ་ལ་རྒྱུད་སྡེ་སུམ་ཅུ་སོ་གཅིག་གོ །དེ་རྣམས་ནི་ཡེ་ཤེས་ལྷའི་སྒྲུབ་སྡེའོ། །བསྒྲུབ་པ་བཀའ་བརྒྱད་དུ་བྱས་ན། འཇིག་རྟེན་པ་དང་། འཇིག་རྟེན་ལས། འདས་པའི་སྒྲུབ་པ་སྡེ་ཐུན་མོང་ལ་གསུམ་སྟེ། མ་མོ་རྦོད་སྟོང་གི་སྒྲུབ་པ་དང་། དྲག་སྔགས་དམོད་མོའི་སྒྲུབ་པ་དང་། འཇིག་རྟེན་མཆོད་བསྟོད་ཀྱི་སྒྲུབ་པའོ། །དེ་དག་ཀྱང་ཡེ་ཤེས་ལྷའི་སྒྲུབ་པའི་བསྟན་པ་སྲུང་བ་དགོངས་ནས་ལས་བཀའ་བསམ་གྱིས་མི་ཁྱབ་པ་གཅིག་གསུངས་པ་ཡིན་ནོ། །བཀའ་གསར་འགྱུར་ལས་གྲགས་པ་ནི། རྒྱུད་སྡེ་བཞི་དང་། ལྔ་དང་། དྲུག་ལ་སོགས་པར་བཤད་པ་ཡང་ཡོད་དེ། འདིར་རྒྱུད་སྡེ་ཆེན་པོ་བཞིར་སྡུད་པ་ཡིན་ནོ། །དེ་ཡང་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་གྱི་རྒྱུད། རྣལ་འབྱོར་བླ་ན་མེད་པའི་རྒྱུད་དོ། །དེ་རྣམས་གཏན་ལ་དབབ་པ་ལ་བཞི་སྟེ། གྲངས་ངེས་པ་དང་། གོ་རིམ་ངེས་པ་དང་། མིང་གི་དོན་དང་། ཆོས་སྡེའི་གྲངས་སོ། །དང་པོ་གྲངས་ངེས་པ་ལ་བཞི་སྟེ། དང་པོ་དུས་བཞི་ལ་དགོངས་ནས་ཀྱང་རྒྱུད་སྡེ་བཞིར་ངེས་ཏེ། དཔལ་འཕྲེང་དམ་པའི་རྒྱུད་ལས། གསང་སྔགས་བྱུང་ཚུལ་རྣམ་པ་བཞི་སྟེ། སྐལ་པ་རྫོགས་ལྡན་གསུམ་ལྡན་གཉིས། །རྩོད་དུས་རྒྱུད་དང་རིམ་བཞིན་དུ། །གདུལ་བྱའི་ངོས་ལ་སྣང་བ་ཡིན། །ཞེས་སོ། །གཉིས་པ་སྐྱེ་གནས་བཞི་ལ་དགོངས་ནས་ཀྱང་རྒྱུད་སྡེ་བཞིར་ངེས་ཏེ། གུར་ལས། སྒོང་སྐྱེས་མངལ་ནས་སྐྱེས་པའམ། དྲོད་གཤེར་ལས་སྐྱེས་རྫུས་སྐྱེས་སམ། རྒྱུད་ནི་བཞི་རུ་ངེས་པའོ། །ཞེས་སོ། །གསུམ་པ་མི་རིགས་བཞི་ལ་དགོངས་ནས་ཀྱང་བཞིར་ངེས་ཏེ། རྡོ་རྗེས་འོག་གི་རྒྱུད་ལས། རྒྱལ་རིགས་རྗེ་རིགས་བྲམ་ཟེ་དང་། །དམངས་རིགས་གདོལ་པ་འདུལ་བའི་ཕྱིར། །རྒྱུད་སྡེ་སོ་སོར་བསྟན་པ་ཡིན། །ཞེས་སོ། །བཞི་པ་འདོད་ཁམས་ཀྱི་ལྷའི་ཆགས་པ་སྤྱོད་ཚུལ་དང་བསྟུན་ནས་ཀྱང་རྒྱུད་སྡེ་བཞིར་ངེས་ཏེ། གུར་ལས། གཉིས་གཉིས་འཁྱུད་དང་ལག་བཅང་དང་། །བལྟས་དང་རྒོད་དང་འཁྲིགས་པ་ཡི། །སྲིན་པོ་ཡི་ནི་ཚུལ་གྱིས་སུ། །རྒྱུད་ནི་རྣམ་པ་བཞི་རུ་བཤད། །ཅེས་གསུངས་སོ། །གོ་རིམ་ངེས་པ་ནི། སེམས་ཅན་གྱི་དབང་པོའི་རིམ་པ་དང་བསྟུན་ནས། རྒྱུད་སྡེ་བཞིན་རིམ་པར་བཤད་དེ། བསམ་གཏན་ཕྱི་མ་ལས། སེམས་ཅན་དམན་ལ་བྱ་བའི་རྒྱུད། །དེ་ལྷག་རྣམས་ལ་སྤྱོད་པའི་རྒྱུད། །སེམས་ཅན་མཆོག་ལ་རྣལ་འབྱོར་རྒྱུད། །དེ་ལྷག་རྣམས་ལ་བླ་མེད་རྒྱུད། །ཅེས་བཤད་དོ། མིང་གི་དོན་ནི། ཁྲུས་དང་གཙང་སྦྲ་ལ་སོགས་པ་ལུས་ངག་གི་བྱ་བ་གཙོ་བོར་སྟོན་པས་ན་བྱ་བའི་རྒྱུད་དོ། །སྤྱད་པ་བྱ་བ་དང་མཐུན་ཞིང་། །ཏིང་ངེ་འཛིན་རྣལ་འབྱོར་དང་མཐུན་ཏེ་ཐེག་པ་གཉིས་ཀྱི་དོན་སྤྱོད་པས་ན་སྤྱོད་པའི་རྒྱུད་དོ། །ནང་ཏིང་ངེ་འཛིན་གཙོ་ཆེ་བས་ན་རྣལ་འབྱོར་གྱི་རྒྱུད་དོ། རྣལ་འབྱོར་གྱི་རྒྱུད་ལས། ཆེས་འཕགས་པའི་ཕྱིར་རྣལ་འབྱོར་བླ་ན་མེད་པའི་རྒྱུད་དོ། །ཆོས་སྡེའི་གྲངས་ནི། ཡེ་ཤེས་རྡོ་རྗེའི་རྒྱུད་ལས། རྟགས་པའི་རྒྱུད་ནི་སྟོང་ཕྲག་བཞི། །བྱ་བའི་རྒྱུད་ནི་སྟོང་ཕྲག་བཞི། །སྤྱོད་པའི་རྒྱུད་ནི་སྟོང་ཕྲག་བརྒྱད། །གཉིས་ཀའི་རྒྱུད་ནི་སྟོང་ཕྲག་དྲུག །རྣལ་འབྱོར་སྟོང་ཕྲག་བཅུ་གཉིས་སོ། །དེ་ལྟར་སྟོང་ཕྲག་སུམ་ཅུ་སོགས། །རྒྱས་པར་བཤད་ན་ཚད་མེད་དོ། །ཞེས་ལྔར་བྱས་ནས་ཚད་གསུངས་སོ། །དེ་ལ་བྱ་བ་དང་། སྤྱོད་པ་དང་། རྣལ་འབྱོར་གྱི་རྒྱུད་གསུམ་གྱི་ཆོས་སྡེ་ངོས་བཟུང་ན། བཀའ་རྙིང་འགྱུར་གྱི་ཕྱི་པ་ཐུབ་པའི་རྒྱུད་གསུམ་དང་མཐུན་ནོ། །བྱེ་བྲག་ཏུ་རྣལ་འབྱོར་བླ་ན་མེད་པའི་རྒྱུད་ལ་གསུམ་ཏེ། ཐབས་ཕའི་རྒྱུད་ད ང། ཤེས་རབ་མའི་རྒྱུད་དང་། གཉིས་སུ་མེད་པ་སྙིང་པོ་དོན་གྱི་རྒྱུད་དོ། །ཕ་རྒྱུད་དང་མ་རྒྱུད་ཀྱི་ཁྱད་པར་ཀྱང་། གདུལ་བྱའི་ཁྱད་པར་ཡང་། གུར་ལས། སྐྱེས་པ་རྣམས་ནི་གདུལ་བྱའི་ཕྱིར། །རྣལ་འབྱོར་ཕ་ཡི་རྒྱུད་བཤད་ཅིང་། །བུད་མེད་རྣམས་ནི་གདུལ་བའི་ཕྱིར། །རྣལ་འབྱོར་མ་ཡི་རྒྱུད་རབ་བཤད། །ཅེས་སོ། །ཡང་རྫོགས་རིམ་གྱི་གནས་སྐབས་ན། རྩ་གཙོ་བོར་སྟོན་པ་ནི་མ་རྒྱུད། རླུང་གཙོ་བོར་སྟོན་པ་ནི་ཕ་རྒྱུད་དོ། །སམྦྷོ་ཊ་ལས། གནས་དེ་རྣམས་སུ་དཔའ་བོ་ནི། །རླུང་གི་ཁམས་དང་ཡང་དག་ལྡན། །གནས་དེ་རྣམས་སུ་དཔའ་མོ་ནི། །རྩ་ཡི་ཁམས་དང་ཡང་དག་ལྡན། །ཞེས་སོ། །ཡང་སྐྱེད་རིམ་ཀྱི་སྐབས་ན། ལྷ་ཕོ་ཤས་ཆེ་བ་ནི་ཕ་རྒྱུད་དོ། །མོ་ཤས་ཆེ་བ་ནི་མ་རྒྱུད་དོ། །གཉིས་སུ་མེད་པ་སྙིང་པོ་དོན་གྱི་རྒྱུད་ནི། དེ་རྣམས་ཆ་མཉམ་པར་སྟོན་པ་ཡིན་ཏེ། མཚན་བརྗོད་ལས། གཉིས་མེད་གཉིས་སུ་མེད་པར་སྟོན། །ཞེས་སོ། །དེ་ལ་རྒྱུད་སྡེ་ངོས་བཟུང་ན། ཕ་རྒྱུད་ནི། དཔལ་གསང་བ་འདུས་པ་གཤིན་རྗེ་དགྲ་ནག །འཇིགས་བྱེད། དམ་པ་དང་པོའི་རྒྱུད་ལ་སོགས་པའོ། །མ་རྒྱུད་ནི། དགྱེས་རྡོར། བདེ་མཆོག །གདན་བཞི། མ་ཧཱ་མཱ་ཡ་ལ་སོགས་པའོ། །གཉིས་སུ་མེད་པ་སྙིང་པོ་དོན་གྱི་རྒྱུད་ནི། རྩ་བའི་རྒྱུད་རབ་ཏུ་མི་གནས་པ། བཤད་པའི་རྒྱུད་བསམ་གྱིས་མི་ཁྱབ་པ། གཉིས་ཀའི་རྒྱུད་རྙོག་པ་མེད་པ། རྒྱབ་རྟེན་གྱི་རྒྱུད་ཧེ་རུ་ཀ་བཟང་པོ། ཕན་པར་བྱེད་པའི་རྒྱུད་ཡེ་ཤེས་སྙིང་པོ། ཡིད་བཞིན་ནོར་བུ་ལྟ་བུའི་རྒྱུད་འཇམ་དཔལ་སྒྱུ་འཕྲུལ་དྲ་བ་ལེའུ་ཁྲི་དྲུག་སྟོང་པའོ། །དེ་རྣམས་ནི་རྒྱུད་སྡེ་སྤྱིའི་རྣམ་གྲངས་ཕྱེ་བ་ཡིན་ནོ། །རྒྱུད་སྡེ་རེ་རེ་ལ་ཡང་བྱེ་བྲག་ཏུ་ཕྱེ་ན། རྒྱུད་རྒྱས་པ་ཡན་ལག་བདུན་ལྡན་དུ་འདོད་པ་དང་། །རྩ་རྒྱུད་དང་། བཤད་རྒྱུད་གཉིས་སུ་འདོད་པའི་ལུགས་སོ། །ཡན་ལག་བདུན་ནི། རྩ་བའི་རྒྱུད། བཤད་པའི་རྒྱུད། རྒྱུད་ཕྱི་མ། ཕྱི་མིའི་ཕྱི་མ། མ་ཚང་བ་ཁ་སྐོང་བའི་རྒྱུད། དཀའ་བ་ཡོངས་སུ་གཅོད་པའི་རྒྱུད། བཀོལ་བ་དུམ་བུར་ཕྱུང་བའི་རྒྱུད་དོ། །དེའི་ཚེ་ཁྱད་པར་ཡང་། ཐོ་མར་སྟོན་པ་བདག་ཉིད་ཀྱིས་གསུངས་པ་རྩ་བའི་རྒྱུད། དེའི་རྗེས་ལ་འཆད་པའི་སྐྱེས་བུས་གསུངས་པ་བཤད་པའི་རྒྱུད་རྩ་རྒྱུད་དུ་གབ་པ་རྣམས་སྔོན་དུ་ཕྱུང་བ་ནི་རྒྱུད་ཕྱི་མ། ཕྱི་མ་ན་མ་གསལ་བར་གསལ་བར་བྱས་པ་ནི་ཕྱི་མའི་ཕྱི་མ། རྩ་རྒྱུད་དུ་མ་ཚང་བ་རྣམས་ལོགས་སུ་གསུངས་པ་མ་ཚང་བ་ཁ་སྐོང་བའི་རྒྱུད། རྩ་བའི་དཀའ་གནད་ལོགས་སུ་བཀྲལ་བ་ཡོངས་སུ་གཅོད་པའི་རྒྱུད། རྩ་བཤད་ནས་བཀོལ་ལོགས་སུ་ཕྱུང་བ་ནི་སྐོལ་བ་དུམ་བུའི་རྒྱུད་དོ། །ཡང་རྩ་བཤད་གཉིས་སུ་ཕྱེད་ན། སྔ་མར་བྱུང་ཞིང་བཤད་གཞིར་གྱུར་པ་ནི་རྩ་བའི་རྒྱུད། རྗེས་ལ་བྱུང་ཞིང་འཆད་བྱེད་དུ་དུག་པ་ནི་བཤད་པའི་རྒྱུད་དོ། བཤད་རྒྱུད་ལ་ཚུལ་དྲུག་སྟེ། མི་གསལ་བ་གསལ་བར་བྱེད་པ་དང་། མ་ཚང་བ་ཁ་སྐོང་བ་དང་། ཚུལ་མི་འདྲ་བ་སྟོན་པ་དང་། དོན་བསྡུ་བ་དང་། ཆ་མཐུན་ངེས་པ་བསྐྱེད་པ་དང་། ཚིག་དོན་རྣམ་པར་ཕྱེ་བའི་བཤད་པའི་རྒྱུད་དོ། །རྒྱུད་ཀྱི་ལྡང་ཚད་ནི། རྒྱུད་ཀྱི་དངོས་པོ་བཅུ་ཚང་བར་སྟོན་པ་ལ། གླེང་གཞི། གླེང་སླངས། གདམས་གཏད་དང་བཅས་པར་སྟོན་པའོ། །དེ་རྣམས་ཚང་ན་རྒྱུད་ཡོངས་སུ་རྫོགས་པ་ཆེན་པོ། དེ་རྣམས་མ་ཚང་བར་སྟོན་ན་རྒྱུད་འཐོར་བ་ཞེས་བྱའོ། །མན་ངག་དང་སྒྲུབ་ཐབས་ལ་ཡང་ལྔ་སྟེ། ངོ་བོ་དང་། ངེས་ཚིག་དང་། དབྱེ་བ་དང་། བསྡུ་བ་དང་། རྩོམ་པའི་ཚད་དོ། ངོ་བོ་ནི་མི་བསླུ་བས་དེ་མན་ངག་དང་འདྲ་བས་དེ་མན་ངག་གོ །དེ་ཡང་བདུད་རྩི་དུམ་པ་གསུམ་པ་ལས། བུ་གཅིག་མ་འཚོལ་བདེ་བས་མཚན་ནས་ཞེས་སོ། །ངེས་ཚིག་ནི། དགོངས་འདུས་ལས། ཐབས་ཆེ་ཚེགས་ཆུང་དོན་དཔག་མེད། བྱ་སླ་དཔག་དཀའ་མན་ངག་དམ་པ་ཡིན། ཞེས་སོ། །དབྱེ་ན་གཉིས་ཏེ། དེ་ཁོ་ན་ཉིད་ཀྱི་མན་ངག་དང་། མངོན་པར་རྟོགས་པའི་རིམ་པའི་མན་ངག་གོ །དེ་ཁོ་ན་ཉིད་ཀྱི་མན་ངག་ནི་རྫོགས་པ་ཆེན་པོ་རྩ་བ་བཅོ་བརྒྱད་དམ། བཅུ་གསུམ་མ་འམ། དོ་ཧ་བསྐོར་གསུམ་ལྟ་བུའོ། །མངོན་པར་རྟོགས་པའི་མན་ངག་ལ་གཉིས་ཏེ། ཤེས་ཤིང་གསལ་བར་བྱེད་པ་དང་། བསླབ་ཅིང་ཉམས་སུ་བླངས་བའོ། །དང་པོ་ནི། འགྲེལ་བ་དང་། བཀའ་ཚོམས། ཁོག་དབུབ་དང་ས་བཅད་དོ། །བསླབ་ཅིང་ཉམས་སུ་བླང་བ་ནི། རྒྱུད་ཀྱི་དངོས་པོ་བཅུ་ལ་དེའི་མན་ངག་ཀྱང་བཅུའོ། །དེ་ཡང་ཐུགས་ཐིག་ལས། ལྟ་སྤྱོད་དཀྱིལ་འཁོར་དབང་དམ་དང་། །འཕྲིན་སྒྲུབ་ཏིང་འཛིན་མཆོད་སྔགས་ཀྱིས། ཞེས་གསུངས་སོ། །བསྡུ་བ་ནི། རྒྱུད་སྡེ་བཞིའི་མན་ངག་བཞིའམ། ཕྱི་ནང་གཉིས་ཀྱི་མན་ངག་གཉིས་སམ། བསྐྱེད་རྫོགས་གསུམ་གྱི་མན་ངག་གོ །མན་ངག་རྩོམ་ཚད་ནི། ལུང་ལ་འདྲིས་ཤིང་ཚད་ལ་མཁས། རང་གི་ཉམས་མྱོང་མན་ངག་ལྡན། ཡོངས་སུ་ཤིང་བྱའི་དངོས་པོ་ལ། ཚད་དུ་ཕྱིན་པས་མན་ངག་བརྩམ། །ཞེས་གསུངས་སོ། །དེ་རྣམས་ནི་ཤེས་བྱའི་ཡུལ་གྱི་རྣམ་པར་བཞག་པ་བསྟན་ཏེ། ཆོས་སྤྱིའི་རྣམ་པར་བཞག་པའོ། །གཉིས་པ་ཡུལ་དེ་དག་གི་ཁྱད་པར་ལ་བཅུ་སྟེ། འཁོར་བ་དང་མྱ་ངན་ལས་འདས་པའི་ཁྱད་པར་དང་། འཇིག་རྟེན་པའི་ལམ་དང་འཇིག་རྟེན་ལས་འདས་པའི་ལམ་གྱི་ཁྱད་པར་དང་། གྲུབ་མཐའ་བློས་བསྒྱུར་མ་བསྒྱུར་གྱི་ཁྱད་པར་དང་། མུ་སྟེགས་པ་དང་། སངས་རྒྱས་པའི་ཁྱད་པར་དང་། ཐེག་པ་ཆེ་ཆུང་གི་ཁྱད་པར་དང་། སྔགས་མཚན་ཉིད་ཀྱི་ཁྱད་པར་དང་། སྔགས་ཕྱི་ནང་གི་ཁྱད་པར་དང་། ནང་པ་བསྐྱེད་རྫོགས་གསུམ་གྱི་ཁྱད་པར་དང་། བཀའ་བསྟན་བཅོས་ཀྱི་ཁྱད་པར་དང་། སྔགས་གསར་རྙིང་གི་ཁྱད་པར་དང་བཅུའོ། །དང་པོ་འཁོར་བ་དང་མྱ་ངན་ལས་འདས་པའི་ཁྱད་པར་ནི། ཕྱི་འཇིག་འཆགས་སྟོངས་གནས་བཞི། ནང་སྐྱེ་རྒས་ན་འཆི་བཞི་དང་ལྡན་པ་ནི་འཁོར་བ་ཡིན་ལ། དེ་དང་བྲལ་བ་ནི་མྱ་ངན་ལས་འདས་པའོ། །དེ་ཡང་རིམ་གསུམ་ལས། འཇིག་དང་འཆགས་དང་སྟོངས་དང་གནས། །སྐྱེ་རྒས་ན་འཆི་བཞི་ལྡན་པས། །མཚན་ཉིད་ཐེར་ཟུག་མ་ཡིན་པའོ། །ཞེས་སོ། །ཡང་། སྐྱེ་འཇིག་ཆོས་རྣམས་བྲལ་འགྱུར་པས། །མྱ་ངན་འདས་པར་དེར་བརྗོད་དོ། །ཞེས་སོ། །འོ་ན། སྟོན་པ་སྤྲུལ་པའི་སྐུ་ལ་ཡང་དེ་བཞི་དང་ལྡན་པས། མྱ་ངན་ལས་མ་འདས་སམ་ཞེ་ན། དེ་ནི་གཞན་དོན་ལ་དེ་ལྟར་སྣང་བ་ཡིན་ལ། ཡང་དག་པར་ན་དེ་བཞི་དང་བྲལ་ཏེ། དགོངས་འདུས་ལས། ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོང་མི་མངའ། །འཇིག་རྟེན་པ་དང་མཐུན་འཇུག་ཏུ། །འདའ་བས་ཡོངས་སུ་འདུལ་བར་དགོངས། །ཞེས་སོ། འཇིག་རྟེན་པའི་ལམ་དང་། འཇིག་རྟེན་ལས་འདས་པའི་ལམ་གྱི་ཁྱད་པར་ནི། །ཆོས་འགའ་ཞིག་གི་སྒོར་ཞུགས་ནས་མཐར་ཕྱིན་པར་བསྒྲུབས་ཀྱང་། འཇིག་རྟེན་ལས་མི་གཡོ། མི་འཕགས། མི་འདའ་བས་ན་འཇིག་རྟེན་པའི་ལམ་ཞེས་བྱའོ། །ཆོས་འགའ་ཞིག་གི་སྒོར་ཞུགས་ནས་མཐར་ཕྱིན་པར་བསྒྲུབས་པས་འཇིག་རྟེན་ལས་གཡོ། འཕགས། འདའ་བས་ན། འཇིག་རྟེན་པ་ལས་འདས་པའི་ལམ་ཞེས་བྱའོ། །དེ་ཡང་ཕར་ཕྱིན་ལས། སྦྱིན་པ་ལ་འཇིག་རྟེན་པ་ཡང་ཡོད། འཇིག་རྟེན་ལས་འདས་པ་ན་ཡང་ཡོད་དོ། །དེ་ཡང་། འཇིག་རྟེན་པའི་སྦྱིན་པ་གང་ཞེ་ན། གང་སྦྱིན་པ་བྱིན་པས་འཇིག་རྟེན་ལས་མི་གཡོ། མི་འཕགས། མི་འདའ་ན་འཇིག་རྟེན་པའི་སྦྱིན་པ་ཞེས་བྱའོ། །གང་སྦྱིན་པ་དེ་བྱིན་པས་འཇིག་རྟེན་ལས་གཡོ། འཕགས། འདའ་བས་ན་འཇིག་རྟེན་ལས་འདས་པའི་སྦྱིན་པ་ཞེས་བྱའོ། །ཞེས་པ་ལ་སོགས་པ་གསུངས་པ་ཡིན་ནོ། །གྲུབ་མཐའ་བློས་བསྒྱུར་བ་དང་མ་བསྒྱུར་བའི་ཁྱད་པར་ནི། འགའ་ཞིག་ན་རེ། ཕྱི་མའི་བདེ་བ་འདོད་ཅིང་དེ་སྒྲུབ་པའི་ཐབས་ལ་ཞུགས་པ་ནི། གྲུབ་མཐས་བློ་བསྒྱུར་བ། ཕྱི་མའི་བདེ་བ་མི་འདོད་ཅིང་། དེ་སྒྲུབ་པའི་ཐབས་ལ་མ་ཞུགས་པ་ནི། གྲུབ་མཐས་བློ་མ་བསྒྱུར་བའོ། །ཞེས་ཟེར་བ་ཡང་མི་འཐད་དེ། མུ་སྟེགས་ཆད་པར་སྨྲ་བ་དག་ཚེ་ཕྱི་མ་མི་འདོད་ལ། འོན་ཀྱང་གྲུབ་མཐའ་འཛིན་པ་ཡིན་ནོ། །རང་གི་འདོད་པ་ནི། ཐོས་བསམ་གྱིས་རང་གི་ལྟ་བ་ངེས་པར་བྱས་པ་ནི། གྲུབ་མཐས་བློ་བསྒྱུར་བའོ། །ཐོས་བསམ་གྱིས་རང་གི་ལྟ་བ་ངེས་པར་མ་བྱས་པ་ནི་གྲུབ་མཐས་བློ་མ་བསྒྱུར་བའོ། །གྲུབ་མཐས་བློ་མ་བསྒྱུར་བ་ནི། བྱིས་པ་སོ་སོ་སྐྱེ་བོ་ཡིན་ཏེ། ཕྱལ་པ་བ་དང་། རྒྱང་འཕེན་པ་གཉིས་སོ། །ཕྱལ་བ་ནི། ཚེ་སྔ་ཕྱི་ཡོད་མེད་དང་། ལས་དཀར་ནག་གང་ཡང་མི་ཤེས་པའི་བླུན་པོ་རྣམས་སོ། །རྒྱང་འཕན་ནི། ཚེ་སྔ་ཕྱི་དང་། ལས་དཀར་ནག་ངོ་ཤེས་ཀྱང་དེའི་རྗེས་སུ་མི་འབྲང་བར། ཚེ་ཕྱི་མ་རྒྱང་དུ་བཞག་ནས། །ཚེ་འདི་ཡི་ཕན་བདེ་སྒྲུབ་པ་སྟེ། འཇིག་རྟེན་པའི་རིག་པའི་གནས་ལ་སློབ་པ་རྣམས་སོ། །གྲུབ་མཐས་བློ་བསྒྱུར་བ་ལ་ཕྱི་རོལ་མུ་སྟེགས་པ་དང་། ནང་པ་སངས་རྒྱས་པའོ། །དེ་གཉིས་ཀྱི་ཁྱད་པར་ལ་འདོད་གཞུང་མང་སྟེ། མདོར་བསྡུ་ན་ལྔ་སྟེ། དང་པོ་འགའ་ཞིག་ན་རེ་རྟེན་སྐྱབས་གནས་ཀྱི་ཁྱད་པར་ཡོད་དེ། དབང་ཕྱུག་ཆེན་པོ་དང་ཁྱབ་འཇུག་ལ་སོགས་པ་ལ་སྟོན་པར་འཛིན་དེས་གསུངས་པའི་ཆོས་ལ་ལམ་དུ་བྱེད། དེ་སྒྲུབ་པའི་ཆོས་ལ་ལམ་དང་། དེ་སྒྲུབ་པའི་དགེ་འདུན་ལ་ལམ་སྒྲུབ་པའི་གྲོགས་སུ་བྱེད་པ་ནི་མུ་སྟེགས་པ། ཡང་སངས་རྒྱས་སྐུ་གསུམ་ལ་སྟོན་པར་འཛིན་ཅིང་། དེས་གསུངས་པའི་ཆོས་ལ་ལམ་དང་། དེ་སྒྲུབ་པའི་དགེ་འདུན་ལ་ལམ་སྒྲུབ་པའི་གྲོགས་སུ་བྱེད་པར་ནི་ནང་པ་སངས་རྒྱས་པའོ། །ཞེས་ཟེར་བ་ཡང་མི་འཐད་དེ། །མུ་སྟེགས་གནས་མ་བུའི་སྡེ་པ་ཡང་ནང་པར་འགྱུར་ཏེ། དཀོན་མཆོག་གསུམ་ལ་སྐྱབས་སུ་འགྲོ་བའི་ཕྱིར་རོ། །ལྷ་ཁྱབ་འཇུག་ལ་འཇུག་པ་བཅུ་ཡོད་པ་ལས། ཤཱཀྱ་ཐུབ་པའང་ཁྱབ་འཇུག་གི་སྤྲུལ་པར་འདོད་ཅིང་དེ་ལ་སྐྱབས་སུ་འགྲོ་བས། དེ་ཡང་ནང་པར་འགྱུར་རོ། །དེ་འདོད་ཐོག་ཅེ་ན། དེ་མི་སྟུབ་སྟེ། རྟག་པར་ལྟ་བ་དང་མ་བྲལ་བའི་ངོས་སུ་མུ་སྟེགས་ཀྱི་སྡེ་པ་ཡིན་ནོ། །ཡང་འགའ་ཞིག་ན་རེ། བྱ་བ་སྤྱོད་པ་ལ་ཁྱད་པར་ཡོད་དོ། །ངལ་ཞིང་དུབ་པའམ། འདོད་པ་བསོད་སྙོམས་ཀྱི་མཐར་ལྷུང་བ་ནི་ཕྱི་རོལ་པ། དེ་གཉིས་སུ་མ་ལྷུང་བ་ནི་ནང་པ་ཡིན། ཞེས་ཟེར་བ་ཡང་མི་འཐད་དེ་ཉན་ཐོས་ཀྱི་སྦྱངས་བའི་ཡོན་ཏན་བཅུ་གཉིས་ཀྱང་ངལ་ཞིང་དུབ་པའི་མཐའ་ཡིན་ལ། མ་ཧཱ་ཡོ་གས་འདོད་ཡོན་ལྔ་ལོངས་སྤྱོད་ཅིང་། ཚོགས་ཀྱི་འཁོར་ལོ་བསྐོར་བ་དང་། རྡོ་རྗེ་སློབ་དཔོན་གྱི་ཆས་བརྒྱད་གོན་པ་ཡང་འདོད་པ་བསོད་སྙོམས་ཀྱི་མཐའ་ཡིན་ནོ། ཡང་འགའ་ཞིག་ན་རེ། ལྟ་བ་ལ་ཁྱད་པར་ཡོད་དེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཁས་ལེན་པ་ནི་ནང་པ། བདག་རྟག་པ། གཅིག་པུ། ཟ་བ་པོ། བྱེད་པ་པོ་འམ། ཆད་པ་ཅང་མེད་པ་ཁས་ལེན་པ་ནི་ཕྱི་རོལ་པའོ། །ཟེར་བ་ཡང་མི་འཐད་དེ། དེ་བཞིན་ཚོགས་པ་ཁྱད་པར་དུ་སྟོང་ངམ། ཁ་ཡར་བ་ཁྱད་པར་སྟོང་། ཚོགས་པ་སྟོང་ན། ཉན་ཐོས་པས་སྟོང་པ་དང་། ཆོས་ཀྱི་བདག་མེད་ཁས་ལེན་མི་ནུས་པས་ཕྱི་པར་འགྲོ་ལ། ཁ་ཡར་ཁྱད་པར་དུ་སྟོང་ན། རྒྱུ་འབྲས་ཆད་པའི་སྟོང་པ་ཙམ་དུ་མུ་སྟེགས་པ་ཡང་ཁས་ལེན་ནོ། ཡང་རྟག་པ་ཆོས་བཞི་ལྡན་དུ་ཁས་ལེན་པ་མུ་སྟེགས་ཡིན་ན། མདོ་སྡེ་མྱ་ངན་ལས་འདས་པ་ལས། ཐུབ་པ་མྱ་ངན་ལས་འདའ་ཁར་རྟག་པ་ཆོས་བཞི་ལྡན་ཁས་བླངས་འདུག་པས། དེ་ཡང་མུ་སྟེགས་སུ་འགྱུར་རོ། །ཡང་། མེ་ལྔ་བསྟེན་པ་དང་། དབྱུག་གུ་གསུམ་པ། སྐྲའི་ལྭ་བ་ཅན་ལ་སོགས་པའི་སྤྱོད་པ་བརྟེན་པ་མུ་སྟེགས་པ། ཆོས་སྤྱོད་བཅུ་སྤྱོད་པ་ནི་ནང་པ་ཡིན་ཟེར་བ་ཡང་མི་འཐད་དེ། མུ་སྟེགས་པ་ལ་ཡང་ཁོ་རང་གི་གཞུང་གི་ཆོས་སྤྱོད་བཅུ་ཤིན་དུ་ཡང་ཡོད་ལ། ཆ་ལུགས་ཀྱང་། སྐྲའི་ལྭ་བ་ཅན་དང་། རལ་པའི་ཐོར་ཚུགས་ཅན་ཕྱི་རོལ་པ་། དབུ་རེག་གམ། ལྕང་ལོ་ཅན་ནང་པའོ། །ཟེར་བ་ཡང་མི་འཐད་དེ་རལ་པའི་ཐོར་ཚུགས་ཁོ་ན་ལྕང་ལོ་ཅན་ཡིན་ཏེ། ནང་པའི་ལྷ་ལོངས་སྐུ་ཐམས་ཅད་ལ་རལ་པའི་ཐོར་ཚུགས་ཡོད་དོ། །དབུ་རེག་ཀྱང་མུ་སྟེགས་ཀྱི་དགེ་སློང་ལ་ཤིན་ཏུ་ཡང་ཡོད་དོ། །དེས་ན་ཕྱོགས་རེ་ནས་དེ་རྣམས་ཐམས་ཅད་བདེན་ཏེ། སྐྱོན་ཕྱོགས་རེ་མེད་པ་མེད་དོ། །འོ་ན་ཇི་ལྟར་ཡིན་ཞེ་ན། བདག་རྐྱེན་སྤངས་པ་དང་རྟོགས་པ་མཐར་ཐུག་པའི་སངས་རྒྱས་ཀྱིས་བྱས་ན། དངོས་དང་བརྒྱུད་པའི་བསྟན་པ་མཐའ་དག་ལ་ནང་པ་སངས་རྒྱས་པ་ཞེས་བྱའོ། བདག་རྐྱེན་མུ་སྟེགས་ཀྱི་སྟོན་པ་དྲུག་གིས་བྱས་ནས་གསུངས་པའི་དངོས་དང་བརྒྱུད་པའི་བསྟན་པ་མཐའ་དག་ལ་མུ་སྟེགས་ཞེས་བྱའོ། །མུ་སྟེགས་ལ་ཡང་། མུ་སྟེགས་ཞེས་བྱ་བ་རྟག་པར་སྨྲ་བ་དང་། མུར་ཐུག་པ་ཞེས་བྱ་བ་ཆད་པར་སྨྲ་བ་གཉིས་སོ། །ནང་པ་སངས་རྒྱས་ལའང་གཉིས་སྟེ། ཐེག་པ་ཆུང་ངུ་དང་། ཐེག་པ་ཆེན་པོའོ། །དེ་གཉིས་ཀྱི་ནང་པའི་ཐེག་པ་ཆེ་ཆུང་གི་ཁྱད་པར་ལ་ཡང་། འཇོག་ལུགས་མི་མཐུན་ཏེ། ལང་ཀར་གཤེགས་པ་ལས། ཆོས་ལྔ་དག་དང་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དེ། །བདག་མེད་གཉིས་ཀྱི་ནང་དུ་ནི། །ཐེག་པ་ཆེན་པོ་མཐའ་དག་འདུས། །ཞེས་སོ། །ཆོས་ལྔ་ནི། མིང་རྒྱུ་མཚན་རྣམ་རྟོག་དེ་བཞིན་ཉིད། ཡང་དག་པའི་མཐའོ། །རང་བཞིན་གསུམ་ནི། ཀུན་རྟགས། གཞན་དབང་། ཡོངས་གྲུབ་གསུམ་མོ་རྣམ་པར་ཤེས་པ་བརྒྱད་དང་། བདག་མེད་གཉིས་གོ་སླའོ། །དེ་རྣམས་ཁས་ལེན་མི་ནུས་ན་ཐེག་པ་ཆུང་ངུ་ཡིན། དེ་རྣམས་ཁས་ལེན་ནུས་པ་ཐེག་པ་ཆེན་པོ། ཟེར་བ་ཡང་མི་འཐད་དེ། དབུ་མ་བས་རྣམ་ཤེས་ཚོགས་བརྒྱད་ཁས་ལེན་མི་ནུས་པས་ཐེག་པ་ཆུང་ངུ་བཞིན་དུ་འགྱུར་རོ། །ཞེ་ན། བདག་ཉིད་ཁས་ལེན་ནུས་སོ། །དེའང་མི་འཐད་དེ། ཀླུ་སྒྲུབ་ཀྱི་གཞུང་གི་ཉན་ཐོས་ཀྱིས་ཀྱང་བདག་མེད་རྟོགས་པར་འདོད་པས་མི་སྟུབ་བོ། །ཡང་མདོ་སྡེ་རྒྱན་ལས། དམིགས་པ་ཆེ་བ་ཉིད་དང་ནི། །དེ་ནི་བསྒྲུབ་པ་གཉིས་དག་དང་། །ཡེ་ཤེས་བརྩོན་འགྲུས་རྩོམ་པ་དང་། །ཐབས་ལ་མཁས་པར་གྱུར་པ་དང་། །ཡང་དག་བསྒྲུབ་པ་ཆེན་པོ་དང་། །སངས་རྒྱས་འཕྲིན་ལས་ཆེན་པོ་དེ། །ཆེན་པོ་བདུན་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། ཅེས་སོ། །ཆེན་པོ་བདུན་དང་ལྡན་པ་ནི་ཐེག་པ་ཆུང་ངུ་བཞིན་དུ་གསུངས་སོ། །ཡང་ལང་དཀར་གཤེགས་པ་ལས། ཐེག་པའི་རང་བཞིན་ཤེས་རབ་སྙིང་རྗེ་སྟེ། །དེ་དང་མི་ལྡན་ཐེག་ཆེན་ཁས་ལེན་པ། །དཔེར་ན་ཝ་ཡིས་སེང་ལྤགས་གོན་དང་མཚུངས། །ཞེས་པས། ཤེས་རབ་ཆེ་ཞིང་སྙིང་རྗེ་ཆེ་བ་ནི་ཐེག་པ་ཆེན་པོ། ཤེས་རབ་ཆུང་ཞིང་སྙིང་རྗེ་ཆུང་བ་ནི། ཐེག་པ་ཆུང་ངུའོ། །དེའི་གོ་བ་ཡང་། ཐེག་པ་ཆུང་ངུ་གཉིས་ནི། ཤེས་རབ་ཆུང་ཞིང་ཆོས་ཀྱི་བདག་མེད་མ་རྟོགས། སྙིང་རྗེ་ཆུང་སྟེ་རང་དོན་གཙོ་བོར་བྱེད། གཞན་དོན་ཞར་ལ་འཇོག་པའོ། །ཐེག་པ་ཆེན་པོ་ནི་སྙིང་རྗེ་ཆེ་སྟེ། གཞན་དོན་གཙོ་བོར་བྱེད། རང་དོན་ཞར་ལ་འཇོག །ཤེས་རབ་ཆེ་སྟེ་བདག་མེད་གཉིས་རྟོགས་པའོ། །དེ་ལ་རྒོལ་བ་དག་ན་རེ། ཀླུ་སྒྲུབ་ཀྱི་གཞུང་གིས་ཉན་ཐོས་ཀྱིས་ཀྱང་བདག་མེད་གཉིས་རྟོགས་པར་བཞེད་དོ། །ཞེ་ན། མངོན་རྟོགས་རྒྱན་དང་འགལ་ཏེ། བཟུང་བའི་ཆ་ནི། སྤངས་ཕྱིར་དང་། །འཛིན་པ་མ་སྤངས་ཕྱིར་དང་ནི། །རྟེན་གྱི་བསེ་རུ་ལྟ་བུ་སྟེ། །ཉན་ཐོས་དག་ལས་ཁྱད་པར་འཕགས། །ཟེར་བས། རང་རྒྱལ་གྱིས་ཀྱང་ཆོས་ཀྱི་བདག་ཕྱོགས་གཅིག་མ་རྟོགས་ན། ཉན་ཐོས་ཀྱིས་བདག་གལ་རྟོགས་སོ། །ཡང་ཉན་ཐོས་མཆོག་ཆེན་པོ་གཉིས་ཀྱིས། སྔ་འགྲོའི་དུས་སུ་སྲིད་པ་གསུམ་གྱི་སེམས་ཅན་རྣམས་ཐེག་པ་གསུམ་གྱི་བྱང་ཆུབ་ལ་མ་འཁོད་ཀྱི་བར་ལ་གྲོ་མི་བཟའ་བར་བྱའོ། །ཞེས་དམ་བཅའ་བས། སྙིང་རྗེ་ཆེའོ་ཞེ་ན། ཉན་ཐོས་མཆོག་ཆེན་གཉིས་ནི་སྤྲུལ་པ་པོ་ཡང་ཡིན་ལ། སངས་རྒྱས་ཀྱིས་བྱིན་གྱིས་བརླབས་པ་ཡང་ཡིན་ནོ། །ཐེག་པ་ཆེ་ཆུང་གཉིས་རང་རང་གི་སྟོབས་འགྲན་པའི་དུས་སུ། དང་པོ་རྒྱུ་སེམས་བསྐྱེད་ལ་ཁྱད་ཡོད་དེ། ཆུང་ངུ་ནི་རང་ཞི་བདེ་ལ་དམིགས་ལ། ཆེན་པོ་ནི་སེམས་ཅན་གྱི་དོན་ལ་དམིགས་པའོ། །ལམ་འཇུག་པ་ལ་ཁྱད་ཡོད་དེ། །ཆུང་ངུ་ནི་རང་ཞི་བདེ་ལ་གནས་ན་ལམ་སྒྲོད་དེ། ཆེན་པོ་ནི་སེམས་ཅན་གྱི་དོན་དུ་ལུས་དང་ལོངས་སྤྱོད་ཐམས་ཅད་གཏོང་ནུས་པའོ། །འབྲས་བུ་མཛད་པ་ལ་ཁྱད་ཡོད་དེ། ཆུང་ངུ་ཡིས་རང་གི་ཞི་བདེ་སྔོན་དུ་བྱེད་ལ། ཆེན་པོས་སེམས་ཅན་གྱི་དོན་དུ་མཛད་པ་སྣ་ཚོགས་སྟོན་པས་ཁྱད་ཤིན་ཏུ་ཆེའོ། །ཐེག་པ་ཆེན་པོ་ལ་རྒྱུ་མཚན་ཉིད་དང་འབྲས་བུ་གསང་སྔགས་ཀྱི་ཁྱད་པར་ལ་འདོད་གཞུང་མང་སྟེ། འདིར་ལྔ་ལས་དང་པོ། འགའ་ཞིག་ན་རེ། སྐྱེ་བོ་ཆགས་བྲལ་གྱི་དོན་དུ་གསུངས་པ་ནི་མཚན་ཉིད། ཆགས་ཅན་གྱི་དོན་དུ་གསུངས་པ་ནི་གསང་སྔགས་ཟེར་རོ། །དེ་ཡང་སྒྲོན་གསལ་ལས། སྐྱེ་བོ་འདོད་ཆགས་ཅན་ཆེད་དུ། །འདི་ཡི་བྱེད་པ་རྡོ་རྗེ་སེམས། །ཞེས་པ། དགྱེས་རྡོར་ལས། སྐྱེ་བོ་མི་བཟད་པ་ཡི་ལས། །གང་གང་གིས་ནི་འཆི་འགྱུར་པ། །ཐབས་དང་ལྡན་ན་དེ་ཉིད་ཀྱང་། །སྲིད་པའི་འཆིང་ལས་གྲོལ་བར་འགྱུར། །ཞེས་སོ། །ཡང་འགའ་ཞིག་ན་རེ། ཡུལ་འདོད་པའི་ཡོན་ཏན་སྤོང་བ་ནི་རྒྱུ་ཡི་ཐེག་པ་ཡིན་ལ། མི་སྤོང་བ་ནི་སྔགས་ཀྱི་ཐེག་པ་ཟེར་ཏེ། གསང་བ་འདུས་པ་ལས། ཆགས་ཅན་ཡེ་ཤེས་འདོད་པ་ཡིས། །འདོད་པའི་ཡོན་ཏན་ལྔ་བརྟེན་བྱ། །ཅེས་སོ། །དེ་ལ་རྒོལ་བ་ན་རེ། འཕགས་པ་ཆོས་འཕགས་ལ་བཙུན་མོ་དྲུག་ཁྲི་ཡོད། རྟག་ཏུ་ངུ་ལ་ལྔ་བརྒྱ་ཡོད་པས། དེ་ཀུན་ཀྱང་ཆགས་བཅས་མིན་ཏེ། སྡུད་པ་ལས། ཁྱིམ་པར་གྱུར་ཀྱང་རྟག་ཏུ་དངོས་པོ་ཀུན་མ་ཆགས། ཞེས་པ་དང་། བྱང་ཆུབ་སེམས་དཔའ་འདོད་པའི་ཡོན་ཏན་ལྔ་སྤྱོད་ཀྱང་། ཞེས་པ་དང་། མི་འགལ་ལམ་ཞེ་ན། བྱང་ཆུབ་སེམས་དཔའ་དེ་དག་ནི་ས་ལམ་མཐོ་བས། ཉོན་མོངས་པ་དང་འདོད་ཡོན་གྱི་སྐྱོན་གྱིས་མ་གོས་པས། གཞན་ཡང་སེམས་དཔའ་ཆེ་ལ་གཞན་དོན་མཐོང་ན་མི་དགེ་བ་བདུན་གནང་བ་ཡིན་གྱིས། ཐབས་ཁྱད་པར་ཅན་གྱིས་ཉོན་མོངས་པ་འདོད་ཡོན་ལམ་དུ་སློངས་པ་ཡིན་ནོ། །ཚུལ་གསུམ་པའི་སྒྲོན་མ་ལས། དོན་གཅིག་ནའང་མ་རྨོངས་པ་དང་། །ཐབས་མང་དཀའ་བ་མེད་པ་དང་། དབང་པོ་རྣོན་པའི་དབང་བྱེད་དང་། །སྔགས་ཀྱི་བསྟན་ཆོས་ཁྱད་པར་འཕགས། །ཞེས་པས་ཁྱད་པར་བཞི་འདོད་དེ། བསྒྲུབ་བྱ་མཐར་ཐུག་ཤེས་བྱའི་གནས་ལུགས་གཅིག་ཀྱང་། ཕ་རོལ་ཏུ་ཕྱིན་པ་ཞོར་ལ་སྨོས་ཏེ་ཆོས་ཉིད་དེ་གོ་ཡུལ་ལམ། རྗེས་དཔག་གི་ཡུལ་དུ་བྱེད་ལ། གསང་སྔགས་ནི་མ་རྨོངས་ཏེ། ཐབས་ཁྱད་པར་གྱི་ཆོས་ཉིད་མངོན་སུམ་དུ་བསྟན་ལ་ཕེབས་སོ། །ཡང་རྒྱུའི་ཐེག་པ་ནི་ཐབས་ཉུང་སྟེ། ཕ་རོལ་ཏུ་ཕྱིན་པ་དྲུག་ཙམ་ལས་མེད། སྔགས་ནི། ཐབས་མང་སྟེ། བསྐྱེད་རིམ་དང་། རྫོགས་རིམ་དང་། མཆོག་ཐུན་མོང་གི་སྒྲུབ་པ་དང་། རྩ་རླུང་དང་། འཕོ་བ་གྲོང་འཇུག་ལ་སོགས་ཐབས་དུ་མ་སྟོན་ནོ། །ཡང་ཕ་རོལ་ཏུ་ཕྱིན་པ་ནི་བྱ་དཀའ་སྟེ། བྱང་ཆུབ་གྱི་སྤྱོད་པ་སྣ་ཚོགས་ལ་སློབ་དགོས་སོ། །གསང་སྔགས་ནི་བྱ་སླ་སྟེ། དཀའ་ཐུབ་དང་། དཀའ་སྤྱད་ལ་མི་ལྟོས་སོ། །ཡང་མཚན་ཉིད་ནི་དབང་པོ་རྟུལ་པོས་རིམ་གྱིས་རྟོགས་པར་བྱེད་པའི་ཐབས་ཡིན་ལ། གསང་སྔགས་ནི། དབང་པོ་རྣོན་པོ་གཅིག་ཆར་རྟོགས་པར་བྱེད་པའི་ཐབས་ཡིན་པས་ཁྱད་པར་ཆེ་གསུངས། ཡང་མདོ་གདམ་ངག་བོག་པའི་རྒྱལ་པོ་ལས། རྒྱུ་ལ་སྤྱོད་པ་རྒྱུ་ཡི་ཆོས། །འཁོར་ལོ་བཞིན་དུ་བསྐོར་བྱས་ནས། །འབྲས་བུའི་ཐེག་པ་ཉེ་ལམ་ཞིག །དུས་ཚིག་ཕྱི་མར་འབྱུང་བ་སྣང་། །ཞེས་པས། སེམས་ཉིད་སངས་རྒྱས་ཀྱི་རྒྱུ་ཙམ་དུ་ཤེས་ནས་ལམ་དུ་བྱེད་པ་ནི་རྒྱུ་མཚན་ཉིད་ཀྱི་ཐེག་པ། སེམས་ཉིད་འབྲས་བུའི་ངོ་བོར་ཤེས་ནས་ལམ་དུ་བྱེད་པ་ནི། འབྲས་བུ་གསང་སྔགས་ཀྱི་ཐེག་པ་ཟེར་རོ། །དེ་ལ་རྒོལ་བ་དག་ན་རེ། ཁྱེད་གསང་སྔགས་པ་འབྲས་བུ་ལམ་དུ་བྱེད་པ་སྟེ། འབྲས་བུ་སྨིན་པ་གཅིག་ལམ་དུ་བྱེད་དམ། མ་སྨིན་པ་ལམ་དུ་བྱེད། སྨིན་ནས་ཀྱང་ལམ་དུ་བྱེད་དགོས་པའི་ཕྱིར་ཐུག་པ་མེད་པར་ཐལ། སྨིན་ཀྱང་ལམ་དུ་བྱེད་དགོས་པའི་ཕྱིར། མ་སྨིན་པ་ལམ་དུ་བྱེད་ན། མ་སྨིན་པའི་ཕྱིར་འབྲས་བུ་མ་སྨིན་པར་ཐལ། མ་སྨིན་པའི་ཕྱིར། ཞེ་ན། ལན་ལ་གཉིས་ཏེ། དངོས་པོའི་ལན་དང་། མགོ་བསྒྲེའི་ལན་ནོ། །ཁྱེད་མཚན་ཉིད་པའི་ལུགས་ཀྱི་ཕ་རོལ་ཏུ་ཕྱིན་པ་དྲུག་ལམ་དུ་བྱེད་པ་ཡིན་ནམ་མིན། མིན་ན་སྡུད་པ་ལས། ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། ཞེས་པ་དང་འགལ། ལམ་དུ་བྱེད་པ་ཡིན་ན། ཕྱིན་ཟིན་པ་ལམ་དུ་བྱེད་དམ། ཕ་ཕྱིན་པ་ལམ་དུ་བྱེད། ཕྱིན་ཐིས་པ་ལམ་དུ་བྱེད་ན་ཐུག་པ་མེད་པར་ཐལ། མ་ཕྱིན་པ་ལམ་དུ་བྱེད་ན་ཕ་རོལ་དུ་ཕྱིན་པ་མ་ཡིན་པར་ཐལ་ལོ། །ཁོ་ན་རེ་སྔར་མ་ཕྱིན་པར་བྱེད་པ་ཡིན་ཟེར་ན། འདིར་ཡང་སྔར་མ་སྨིན་པ་སྨིན་པར་བྱེད་པ་ཡིན་ནོ། །ཞེས་བྱའོ། །དང་པོའི་ལན་ནི། འབྲས་བུ་སྨིན་ཞེས་སྒྲོ་མི་འདོགས། །མ་སྨིན་ཞེས་སྐུར་པ་མི་འདེབས་ཏེ། །འབྲས་བུ་ངོ་བོ་ལམ་དུ་བྱེད་པ་ཡིན་ནོ། །འབྲས་བུའི་ངོ་བོ་གང་ཡིན་ཞེ་ན། སྐུ་དང་ཡེ་ཤེས་ཡིན་ལ། དེ་ཡེ་ནས་རང་ལ་གནས་པ་ནི་འབྲས་བུ་ཡིན་པས། དེ་མ་ཤེས་པ་ཤེས་པར་བྱེད་པའམ། མི་གསལ་བ་གསལ་བ་བྱེད་པའམ། །མངོན་དུ་མ་གྱུར་པ་གྱུར་བར་བྱེད་པ་ཙམ་ལ་ལམ་དུ་བྱེད་ཟེར་བ་ཡིན། མདོར་ན་ཐོབ་བྱ་ད་ལྟ་ཉིད་ནས་རང་ལ་གནས་པ་ནི་འབྲས་བུ། དེ་ལ་སྒྲིབ་པར་བྱེད་པའི་ཞེན་པ་འདག་པར་བྱེད་པ་ཙམ་ལ་ལམ་དུ་བྱེད་ཟེར་བ་ཡིན་ནོ། །དེ་ལ་སྐྱོན་གསུམ་ཏེ། དང་པོ་སངས་རྒྱས་སྐྱོན་དང་བཅས་པར་འགྱུར་ཏེ། སངས་རྒྱས་ཡིན་ཀྱང་འཁོར་བའི་སྡུག་བསྔལ་ཉམས་སུ་མྱོང་བར་འགྱུར་བའི་ཕྱིར་རོ། །གཉིས་པ་འཁོར་བ་ཡོན་ཏན་དང་བཅས་པར་ཐལ་ཏེ། འཁོར་བའི་ཡོན་ཏན་ཐམས་ཅད་ཡེ་ནས་སངས་རྒྱས་དུ་འདུག་པའི་ཕྱིར་རོ། །གསུམ་པ་ལམ་འབད་པ་དོན་མེད་དུ་ཐལ་ཏེ། ཡེ་ནས་སངས་རྒྱས་ཡིན་ན་ལམ་སྒོམ་པ་ལ་དོན་མེད་པའི་ཕྱིར་རོ་ཞེ་ན། ལན་ལ་གསུམ་སྟེ། དང་པོ་སངས་རྒྱས་སྐྱོན་དང་བཅས་པར་མི་འགྱུར་ཏེ། ཡེ་ནས་སངས་རྒྱས་ཡིན་ཀྱང་ཡིན་པ་ལ་ཡིན་པར་མ་ཤེས་པ་ཡིན་ཏེ། རྒྱལ་བུ་རྨངས་སུ་འཁྱམས་ཀྱང་རྒྱལ་པོའི་རིགས་མི་འགྱུར་བ་བཞིན་ནོ། །གཉིས་པ། འཁོར་བ་ཡོན་ཏན་དང་བཅས་པ་འདོད་ཐོག་སྟེ། འཁོར་བ་ཡེ་ནས་སངས་རྒྱས་ཡིན་པས་ཡིན་པ་ལ་ཡིན་པར་ཉམས་སུ་བླངས་པས། ཡིན་པར་རྟོགས་སུ་བཏུབ་པ་སྟེ། རྨུན་ལོོང་ལ་འཁོར་ལོས་བསྒྱུར་བའི་མཚན་དཔེ་ལྟ་བུའོ། །གསུམ་པ། ལམ་ལ་འབད་པ་དོན་མེད་དུ་ཡང་མི་འགྱུར་ཏེ། འཁོར་བ་ཡེ་ནས་སངས་རྒྱས་ཡིན་ཀྱང་ཡིན་པ་ལ་ཡིན་པར་ངོ་མ་ཤེས་པ་དེ། ལམ་གྱིས་ཤེས་པར་བྱེད་པ་ནི། དབུལ་མོ་གཏེར་དང་སྤྲོད་པར་བྱེད་པ་ལྟ་བུའོ། །རྒྱས་པ་གཞན་ལ་ཡང་ཡོད་དེ། ལྟ་བ་གཏན་ལ་འབེབས་ཚུལ་གྱི་སྒོ་ནས་རྟོགས་པར་མྱུར་བུལ་གྱི་ཁྱད་པར་ཡོད་དེ། གཏན་ལ་ཕབ་པའི་གྲུབ་མཐའ་ལ་མཐར་ལྷུང་མ་ལྷུང་གི་ཁྱད་པར་ཡོད། ཆོས་ཉིད་ཉམས་སུ་ལེན་པའི་དུས་སུ་བློ་ཡུལ་དུ་བྱེད་མི་བྱེད་ཀྱི་ཁྱད་པར་ཡོད། འབྲས་བུ་ཐོབ་པའི་དུས་ལ་ལམ་མྱུར་བུལ་གྱི་ཁྱད་པར་ཡོད། འབྲས་བུ་རང་གི་ངོ་བོའི་སྐབས་ན་གནས་སྐབས་དང་མཐར་ཐུག་གི་ཁྱད་པར་ཡོད། གཞུང་ལེགས་པར་བརྟགས་ན་དོན་གསལ་གྱི་བར་སྟོན་མི་སྟོན་གྱི་ཁྱད་པར་ཡོད་དོ། །འབྲས་བུ་གསང་སྔགས་ལ་གཉིས་ཏེ། ཕྱི་པ་ཐུབ་པའི་རྒྱུད་དང་། ནང་བ་ཐབས་ཀྱི་རྒྱུད་དོ། །དེ་གཉིས་ཀྱི་ཁྱད་པར་ཡང་། དང་པོ་རྒྱུད་གཞུང་གི་སྐབས་སུ། རྒྱུད་ཀྱི་དངོས་པོ་བཅུས་ཕྱིར་འགྱུར་ན་ཕྱི་བ། ནང་དུ་གྱུར་ན་ནང་བའོ། །ལྟ་བའི་སྐབས་སུ་རང་བྱུང་གི་ཡེ་ཤེས་སྨྲ་མི་ནུས་ན་ཕྱི་པ། སྨྲ་ནུས་པ་ན་ནང་བའོ། །སྤྱོད་པའི་སྐབས་སུ། འཁོར་བའི་ཆོས་ཉི་ཤུ་ལ་ཐབས་ཀྱིས་ཟིན་ནས་སྤྱོད་ནུས་པ་ནང་པ། མི་ནུས་པ་ཕྱི་པ། ཡང་དངོས་གྲུབ་ཀྱི་སྐབས་སུ་ཕྱི་ནས་རེ་བ་ཕྱི་པ། ནང་ནས་རེ་བ་ནང་པའོ། །དབང་གི་སྐབས་སུ་ཟབ་མོའི་དབང་གསུམ་སྟོན་ནུས་པ་ནང་པ། མི་ནུས་པ་ཕྱི་པའོ། །ནང་པ་བསྐྱེད་རྫོགས་གསུམ་གྱི་ཁྱད་པར་ནི། ཏིང་ངེ་འཛིན་གྱིས་རིམ་གྱིས་བསྐྱེད་པ་གཙོ་ཆེ་བ་མ་ཧཱ། ལྷ་རྫོགས་ཚུལ་དུ་བསྐྱེད་པ་ཨ་ནུའོ། །བསྐྱེད་རྫོགས་གཉིས་ལས་གྲོལ་བ་ཨ་ཏི་ཡོ་གའོ། །ཡང་རང་རིག་པའི་ཆོ་འཕྲུལ་དུ་སྣང་བ་མ་ཧཱ། རང་རིག་པའི་རྩལ་དུ་སྣང་བ་ཨ་ནུ། རིག་པ་རང་སྣང་བ་ཨ་ཏིའོ། །ཡང་རྒྱུད་ཀྱི་དངོས་པོ་བཅུ་ལ་ཆེད་འཛིན་ཆེ་བ་མ་ཧཱ། དེ་བས་ཆུང་བ་ཨ་ནུ། ཆེད་འཛིན་ལས་གྲོལ་བ་ཨ་ཏིའོ། །སྔགས་གསར་རྙིང་གི་ཁྱད་པར་ལ་གསུམ་སྟེ། ཁྱད་ཡོད་པའི་འདོད་པའི་གཞུང་། ཁྱད་པར་འདོད་པའི་གཞུང་དང་། ཆེ་བའི་ཁྱད་པར་རོ། །དང་པོ་ལ་བཞི་སྟེ། དུས་ཁྱད་པར་ནི། མངའ་བདག་གླང་དར་མས་དམ་པའི་ཆོས་མ་བསྣུབས་པའི་གོང་དུ་བསྒྱུར་བ་ཐམས་ཅད་རྙིང་མ། ཆོས་བསྣུབས་ནས་རྗེས་ལ་ཕྱིས་རྒྱ་གར་ནས་བསྒྱུར་བ་ཐམས་ཅད་ལ་གསར་མར་གྲགས་སོ། །འགྱུར་བྱེད་ལོ་ཙིའི་ཁྱད་པར་ནི། སྔོན་གྱི་ལོ་ཙཱ་བ། རྒན་གསུམ་དང་། གཞོན་གསུམ་ལ་སོགས་པས་བསྒྱུར་བ་ཐམས་ཅད་རྙིང་མར་གྲགས། རིན་ཆེན་བཟང་པོ་དང་། སྨྲི་ཏི་དང་། རྔོག་ལ་སོགས་པས་བསྒྱུར་བ་ལ་གསར་མར་གྲགས་སོ། །ལོ་ཙཱ་བ་རྒན་གསུམ་ནི། བཻ་རོ་ཙ་ན། གཉགས་ཛྙ་ན་ཀུ་མཱ་ར། རྨ་རིན་ཆེན་མཆོག་གོ །གཞོན་གསུམ་ནི། ཀ་བ་དཔལ་བརྩེགས། ལྕོག་རོ་ཀླུའི་རྒྱལ་མཚན། ཞང་བནྡྷེ་ཡེ་ཤེས་སྡེའོ། །བེ་རོ་ཙ་ན་ནི་སྔགས་མཚན་ཉིད་གཉིས་ཀའི་ལོ་ཙཱ་བ་ཡིན་ནོ། །གཉགས་ཛྙཱ་ན་ཀུ་མ་ར་དང་། རྨ་རིན་ཆེན་མཆོག་གཉིས་ཀྱི་སྔགས་ཕལ་ཆེར་བསྒྱུར། ལོ་ཙཱ་བ་གཞོན་གསུམ་གྱིས་མཚན་ཉིད་ཤས་ཆེར་བསྒྱུར་རོ། །བརྗོད་བྱ་ཆོས་ཀྱི་ཁྱད་པར་ནི། སྤྱིར་མཚན་ཉིད་ལ་གསར་རྙིང་དུ་མ་གྲགས་ཀྱང་། དོན་གྱི་གསར་རྙིང་དུ་ཡོད་དེ། འདུལ་བ་དང་། མདོ་སྡེ་ཕལ་ཆེར་དང་། མངོན་པ་ཐམས་ཅད་རྙིང་འགྱུར་ཡིན། བཤད་པ་ཡང་བཀའ་ཆད་ནས་མེད་་དེ། ཕྱིས་རྩལ་བཤད་བྱས་པ་ཡིན་ནོ། ཚད་མ་ལ་གསར་རྙིང་གཉིས་ཀ་ཡོད། དབུ་མ་ཕར་ཕྱིན་བྱམས་ཆོས་རྣམས་སྔར་ཡང་འགྱུར། ཕྱིས་རྔོག་ལོ་ཙཱ་བ་ལ་སོགས་པས་འགྱུར་བག་རེ་བཅོས་པ་ཡིན། བཤད་བཀའ་ནི་རྒྱ་གར་གྱི་བཤད་བཀའ་ཡིན་ནོ། །གསང་སྔགས་ཀྱི་དབང་དུ་བྱས་ན། མདོ་སྒྱུ་འཕྲུལ་སེམས་ཕྱོགས་གསུམ། སྒྲུབ་པ་བཀའ་བརྒྱད་དུ་གྲགས་པ་རྣམས་རྙིང་མ་ཡིན་ནོ། །འཕགས་གཡོག་དུས་གསུམ། གཤིན་རྗེ་ནག་འཇིགས། མ་རྒྱུད། དགྱེས་རྡོར། བདེ་མཆོག །མ་ཧཱ་མ་ཡ། གདན་བཞི་ལ་སོགས་པ་རྣམས་གསར་མ་ཡིན་ནོ། །བཞི་པ་འགྱུར་གྱི་ཁྱད་པར་ནི། རྙིང་མའི་འགྱུར་རྣམས་ནི། སྔོན་སྤྲུལ་པའི་ལོ་ཙཱ་བས་བསྒྱུར་བས་གཅིག་ཐོག་ཏུ་གཅིག་ཡོང་ལ་འདྲ་མིན་མི་འབྱུང་། སླར་རྒྱ་གར་དུ་བསྒྱུར་ཡང་ཞུ་ཏིག་བཏུབ་པ་ཡིན་པར་གདའོ། །གསར་མའི་འགྱུར་ནི། ཕྱིས་ལོ་ཙཱ་བ་སོ་སོའི་སྐྱེ་བས་བསྒྱུར་བས། རང་གི་འདོད་པ་དང་བསྟུན་ནས་བོད་ཀྱིས་གོ་བདེ་བར་བྱ་བའི་ཕྱིར་མི་འདྲ་བ་མང་དུ་གནས་པ་ལ་སོགས་ཡོད། ཁྱད་པར་མེད་པར་འདོད་པའི་ལུགས་ནི་གཉིས་ཏེ། ཚིག་དང་། དོན་ནོ། ཚིག་ལ་ཁྱད་པར་མེད་དེ། འགྱུར་སྔ་ཕྱིའི་ཚིག་ཟུར་མི་མཐུན་ཙམ་ལས་གཞན་མེད། རྙིང་མ་རྣམས་ཕྱིས་མི་འགྱུར་བའི་རྒྱུ་མཚན་གོང་དུ་བཤད་ཟིན་ནོ། །དོན་ལ་ཁྱད་པར་མེད་ལུགས་ནི། གསང་སྔགས་མཐའ་དག་ལ་མ་སྨིན་པ་སྨིན་པར་བྱེད་པ་དབང་དང་བྱིན་རླབས། སྨིན་པ་གྲོལ་བར་བྱེད་པ་ལམ་གཉིས་སུ་འདུས་པ་ཡིན། དབང་ལ་མིང་མི་འདྲ་བ་ཡང་དོན་མཐུན་ཏེ། གསར་མ་ལ་དབང་བཞིར་གྲགས། རྙིང་མ་ལ་དབང་བཞིར་གྲགས་པ་ཡང་ཡོད། མིང་གཞན་དུ་འདོགས་པ་ཡང་ཡོད། ཐུན་མོང་གི་དབང་དང་། ཁྱད་པར་གྱི་དབང་དང་། མཆོག་གི་དབང་གསུམ་དུ་ཡང་མིང་འདོགས་སོ། །ཐུན་མོང་གི་དབང་ནི་ཕན་པའི་དབང་བཅུ། ཁྱད་པར་གྱི་དབང་ནི་ནུས་པའི་དབང་ལྔ། དེ་གཉིས་ནི་བུམ་དབང་དུ་འདུས་པ་ཡིན་ནོ། །མཆོག་གི་དབང་གསུམ་ནི། ཐབས་ཀྱི་གསང་དབང་། ཤེས་རབ་ཀྱི་གསང་དབང་། གཉིས་སུ་མེད་པའི་དབང་ངོ། །ཐབས་ཀྱི་གསང་དབང་ནི། ཐིག་ལེ་བྱང་ཆུབ་ཀྱི་སེམས་ཀྱིས་སློབ་མའི་ལྕེ་ཐོག་ཏུ་དབང་བསྐུར་བས། གསང་དབང་དངོས་ཡིན། ཤེས་རབ་ཀྱི་གསང་དབང་ནི། ཤེས་རབ་མ་ལ་བརྟེན་ནས་ངོ་སྤྲོད་པ་སྟེ། ཤེས་རབ་ཡེ་ཤེས་ཀྱི་དབང་ཡིན་ནོ། །ཐབས་ཤེས་གཉིས་སུ་མེད་པར་ངོ་སྤྲོད་པ་སྟེ། ཤེས་བྱ་བདེན་པ་དབྱེར་མེད་གནས་ལུགས་ལ་ངོ་སྤྲོད་པས། དབང་བཞི་པ་ཡིན་ནོ། །དེས་ན་དབང་ཡང་ཤིན་ཏུ་མཐུན་པ་ཡིན་ནོ། །གྲོལ་ལམ་ཡང་མཐུན་ཏེ། གྲོལ་ལམ་མཐའ་དག་བསྐྱེད་རིམ་དང་རྫོགས་རིམ་གཉིས་སུ་འདུས་པ་ལ་བསྐྱེད་རིམ་གྱི་སྐབས་སུ་མིང་ཙམ་མི་མཐུན་ཏེ། དོན་ཤིན་ཏུ་མཐུན་ཏེ། དང་པོ་རྙིང་མའི་མཚམས་གཅོད་དང་། གསར་མའི་བསྲུང་བའི་འཁོར་ལོ་གཉིས་དོན་གཅིག་པ་ཡིན་ནོ། །དེ་བཞིན་དུ་བཤགས་པ་དང་། བདུན་རྣམ་དག་དང་། ཚོགས་སོགས་གཉིས་པོ་དོན་གཅིག །དེ་བཞིན་ཉིད་ཀྱི་ཏིང་ངེ་འཛིན་སྟོང་པ་སྒོམ་པ་དང་། ཡེ་ཤེས་ཀྱི་ཚོགས་སྟོང་ཉིད་བསྒོམ་ལ་གཉིས་དོན་གཅིག །ཀུན་སྣང་གི་ཏིང་ངེ་འཛིན་སྙིང་རྗེ་སྒོམ་པ་དང་། ཚད་མེད་པ་བཞི་སྒོམ་པ་དོན་གཅིག གཞལ་ཡས་ཁང་འབྱུང་བ་རིམ་བརྩེགས་དང་བཅས་པ་སྒོམ་པ་ཡང་དོན་གཅིག །ལྷའི་སྐུ་སྒོམ་པ་ལ། ལྷ་སྐུ་ཡན་ལག་དྲུག་གི་བསྐྱེད་པ་དང་། མངོན་པར་བྱང་ཆུབ་པ་ལྔས་བསྐྱེད་པ་དང་། ཆོ་ག་གསུམ་གྱིས་བསྐྱེད་པ་དང་། སྐད་ཅིག་དྲན་རྫོགས་སུ་བསྐྱེད་པ་རྣམས། གསར་རྙིང་གཉིས་ཀ་ལ་ཡོད་དེ་དོན་གཅིག །སྤྱན་འདྲེན་པ་དང་། མཆོད་པ་འབུལ་བ་ཡན་དོན་གཅིག །གསར་མའི་བསྐྱེད་རིམ་བདུད་རྩི་མྱང་བ་དང་། རྙིང་མའི་སྨན་མཆོད་ལུང་དོན་གཅིག །བསྟོད་པ་དང་བཟླས་པ་དང་། ཚོགས་དང་ལྷག་མ་ཡང་དོན་གཅིག་གོ །བྱེ་བྲག་མི་འདྲ་བ་གསར་རྙིང་གཉིས་ཀ་ལ་སོ་སོར་ཡོད་དོ། །དེ་ནི་རྒྱུད་སྡེ་སོ་སོའི་ལུགས་ཡིན། དོན་མཐུན་པར་གནས་སོ། །རྫོགས་རིམ་གྱི་གནས་སྐབས་ན་ཡང་སྟེང་སྒོ་རྣམ་པར་གྲོལ་བའི་ལམ། རྩ་འཁོར་ལོ་གཉིས་དང་། སྲོག་ཤིང་གསུམ་ལ་བརྟེན་ནས། གཏུམ་མོའི་རྣལ་འབྱོར་སྒོམ་པ་དང་། འོག་སྒོ་བདེ་བ་ཆེན་པོའི་ལམ། མཁའ་གསང་གཉིས་ལ་བརྟེན་ནས་ཐིག་ལེའི་འཇུག་ལྡོག་དུ་བྱེད་ཅིང་། ལྷན་ཅིག་སྐྱེས་པའི་ཉམས་སྤོར་བ་རྣམས་ཤིན་ཏུ་གཅིག་པ་ལགས་སོ། །དེ་ནི་ཁྱད་པར་མེད་ལུགས་སོ། །རྙིང་མ་ཁྱད་པར་གྱི་ཆེ་བ་ནི། རོང་པ་ཆོས་བཟང་གི་ཞལ་ནས། གསང་སྔགས་རྙིང་མ་རྣམས་ལ། གསར་མ་བས་ཁྱད་པར་དུ་འཕགས་པའི་ཆེ་བ་དྲུག་ཡོད་གསུངས་སོ ། །དང་པོ་སྤྱན་འདྲེན་པ་ཡོན་བདག་གི་ཁྱད་པར་ནི། རྙིང་མ་བའི་ཡོན་བདག་ནི། མངའ་བདག་མེས་དབོན་གསུམ་སོགས་འཕགས་པ་རིགས་གསུམ་མགོན་པའི་སྤྲུལ་པས་སྤྱན་དྲངས་པ་ཡིན་ལ། དེ་ལྟར་གང་ཟག་སྐྱ་རེས་ཡོན་བདག་བྱས་ནས་བསྒྱུར་བའི་ཆོས་དང་མི་འདྲ་གསུངས། ཕྱག་བཞེས་གཙུག་ལག་ཁང་གི་ཁྱད་པར་ནི། སྔོན་དཔལ་གྱི་བསམ་ཡས་སོགས་ཆོས་སྐོར་སྟོད་སྨད་དུ་གདན་ཕབ་ནས་གསུངས་པ་ཡིན་ལ། ད་ལྟའི་དགོན་བུ་ལྕག་ལྕོག་དང་མི་འདྲ་གསུངས། འགྱུར་བྱེད་ལོ་ཙཱ་བའི་ཁྱད་པར་ནི། སྔོན་སྤ་སྒོར་བཻ་རོ་ཙ་ན་དང་། སྐ་ལྕོག་གཉིས་ལ་སོགས་པ། སྤྲུལ་པའི་ལོ་ཙཱ་བས་བསྒྱུར་བའི་ཆོས་ཡིན་ལ། ད་ལྟའི་ལོ་ཙཱ་བ་དགུན་བལ་ཡུལ་དུ་བསྡད། དབྱར་མང་ཡུལ་དུ་དོན། སྔོན་གྱི་མཁས་པའི་འགྱུར་ལ་རང་གཟོའི་བཅོས་མ་སྣ་ཚོགས་བྱེད་པ་དང་མི་འདྲ་གསུངས་སོ། །པཎྜི་ཏའི་ཁྱད་པར་ནི། སྔོན་གྱི་པཎྜི་ཏ། བོ་དྷི་ས་ཏྭའམ། སངས་རྒྱས་གསང་བའམ། བི་མ་ལ་མི་ཏྲའམ། པདྨ་འབྱུང་གནས་ལ་སོགས་པ་རིག་འཛིན་གྱི་ས་ལ་གནས་པའི་བྱང་ཆུབ་སེམས་དཔས་སྤྱན་དྲངས་པའི་ཆོས་ཡིན་ལ། ད་ལྟའི་པཎྜི་ཏ་ལྟོ་མ་ཕྱིད་པ་བོད་དུ་གསེར་འཚོལ་དུ་ཡོད་བའི་བཟང་སྤྲང་ཚོ་གཅིག་དང་མི་འདྲ་གསུངས་སོ། །ཞུ་རྟེན་མེ་ཏོག་གི་ཁྱད་པར་ཡང་། སྔོན་གསེར་ཕྱེ་བྲེ་ལ་འཇལ་ནས་ཕུལ། གསེར་ཤ་བའི་བླུད་བུ་བཀང་ནས་ཕུལ། གསེར་རྟ་ཁལ་དང་དྲེལ་ཁལ་དུ་ཕུལ་ནས་ཞུས་པའི་ཆོས་ཡིན་ལ། ད་ལྟར་མཆན་ནས་གསེར་ཞོ་རེ་རེ་གཉིས་གཉིས་ཉུག་ཉུག་བྱས་ནས་ཞུས་པའི་ཆོས་དང་མི་འདྲ་གསུངས་སོ། །བརྗོད་བྱ་ཆོས་ཀྱི་ཁྱད་པར་ཡང་། སྔོན་སངས་རྒྱས་ཀྱི་བསྟན་པ་གྲ་མ་ཉམས་པའི་དུས་སྤྲུལ་པའི་ལོ་ཙཱ་བ་བཀའ་འགྱུར་བ་མེད་པ་གཏན་ལ་ཕབ་པ་ཤེས་བྱའི་དངོས་པོའི་འདུག་ཚུལ་གཏན་ལ་འབེབས་ཤིང་། དེ་རྟོགས་པར་བྱེད་པའི་ཐབས་དུ་མས་བརྒྱན་པའི་ཆོས་ཡིན་ལ། དུས་ད་ལྟའི་དུས་ལོ་ཙ་བ་རྫུན་པོ་ཆེས། སྔོན་གྱི་འགྱུར་ལ་བཅོས་མ་སྣ་ཚོགས་བྱེད། སངས་རྒྱས་ཀྱི་བཀའ་དང་བླ་མའི་གསུང་ལ་རས་ཆོད་བྱས་ནས། མི་རེས་ཆོས་རེ་བཅོས་ནས་གཅིག་སྐྱོན་གཅིག་ལ་འགེལ། ཕ་དེ་ལ་བུ་དེས་མི་བཏུབ་པའི་ཆོས་དང་མི་འདྲ་སྟེ་ཁྱད་པར་ཡོད་གསུངས་སྐད་དོ། བཀའ་བསྟན་བཅོས་གཉིས་ཀྱི་ཁྱད་་པར་ནི་དགེ་བའི་བཤེས་གཉེན་མཆིམས་ཀྱི་ཞལ་ནས། གནས་རྒྱུན་ཆགས་པ་ཞིག་ཏུ། སྟོན་པ་རྒྱུན་ཆགས་པ་ཞིག་གིས། འཁོར་རྒྱུན་ཆགས་པ་ཞིག་ལ། བསྟན་པ་རྒྱུན་ཆགས་པ་ཞིག་གསུངས་པ་ནི་བཀའ། །སྟོན་པ་ངེས་པ་མེད་པས། གནས་ངེས་པ་མེད་པས། འཁོར་ངེས་པ་མེད་པ་ལ། དུས་ངེས་པ་མེད་པ་རུ། ཆོས་ངེས་པ་མེད་པ་གསུངས་པ་ནི་བསྟན་ཆོས་ཡིན་གསུང་སྟེ། ཅིས་ཀྱང་འདི་ཡིན་གྱི་བཞག་པ་མི་འདུག །ཡང་འགའ་ཞིག་ན་རེ། སྤངས་པ་དང་ཡེ་ཤེས་ཕུན་སུམ་ཚོགས་པའི་སངས་རྒྱས་ཀྱིས་དངོས་སུ་ཞལ་ནས་གསུངས་པའམ། རྗེས་སུ་གནང་བའམ། བྱིན་གྱིས་བརླབས་པ་ལ་ནི་བཀའ་ཞེས་བྱ། བཀའི་དོན་ལ་བརྟེན་ནས་ཕྱིས་འཕགས་པ་དང་གང་ཟག་རྣམས་ཀྱིས་མཛད་པ་རྣམས་ལ་ནི་བསྟན་བཅོས་ཞེས་བྱ་སྟེ། དེ་ཡང་མདོ་སྡེ་ཉི་མའི་སྙིང་པོ་ལས། སྤངས་དངས་ཡེ་ཤེས་ཕུན་སུམ་ཚོགས། །དེ་ཡི་མཐུ་དང་དེར་སྣང་དང་། །དེ་ཉིད་ཀྱིས་གསུངས་བཀའ་རུ་བརྗོད། །ང་ནི་མྱ་ངན་འདས་འོག་ཏུ། །ང་མིན་ང་འདྲ་དག་གིས་ཀྱང་། །སངས་རྒྱས་བསྟན་ལ་འགྲེལ་བྱེད་པ། །བསྟན་བཅོས་དག་ཏུ་ང་ཡིས་བཤད། །ཞེས་ངོ་བོའི་སྒོ་ནས་ཁྱད་པར་དུ་འཇོག །ཡང་འགའ་ཞིག་ན་རེ། དུས་ཀྱི་སྒོ་ནས་འཇོག་ཏེ། སངས་རྒྱས་མྱ་ངན་ལས་མ་འདས་པའི་གོང་དུ་གང་ཅི་གསུངས་པ་ཐམས་ཅད་བཀའ་ཡིན་ལ། སངས་རྒྱས་མྱ་ངན་ལས་འདས་ནས་གང་ན་ཅི་གསུངས་པ་ཐམས་ཅད་བསྟན་ཆོས་ཡིན་ཟེར། རྒོལ་བ་དག་ན་རེ། འོ་ན་བསྟན་བཅོས་མངོན་པ་སྡེ་བདུན་པོ་ཀྱང་བཀར་ཐལ། ཆོས་ཀྱི་ཕུང་པོ་ཤཱ་རིའི་བུ། གདགས་པའི་བསྟན་བཅོས་མོའུ་འགལ་བུ། ཞེས་གསུངས་པས། མཆོག་གཉིས་ཀྱིས་མཛད་བར་གསུངས་པས། ཉན་ཐོས་མཆོག་གཉིས་ནི། སངས་རྒྱས་མ་འདས་པའི་གོང་དུ་འདས་པའི་ཕྱིར་རོ་ཞེ་ན། འདས་པའི་རྒྱུ་མཚན་ཡང་མོའུ་འགལ་གྱི་བུ། སངས་རྒྱས་ཀྱི་གོང་དུ་འདས་པ་འདུལ་བ་ལུང་ནས་གསུངས་ལ། ཤཱ་རིའི་བུ་གོང་དུ་འདས་པར་མདོ་སྡེ་དྲིན་ལན་གསབ་པ་ལས་གསུངས་སོ། །ཟེར་རོ། །འགའ་ཞིག་ན་རེ། དེང་འདིར་དེ་ལྟར་མིན་ཏེ། མཆོག་གཉིས་ཐུབ་པའི་གོང་དུ་འདས་པར་གསུངས་པ་དེ། ཉན་ཐོས་ཀྱི་ལོག་རྟོག་ཡིན། མདོ་སྔགས་གཉིས་ནས་མོའུ་འགལ་བུ་གོང་དུ་མ་འདས་པར་གསུངས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒོ་མཐའ་ཡས་པ་ནས། ཐུབ་པ་འདས་པའི་ཚེ། ཐུབ་པའི་ཞལ་ནས། ང་ཡོངས་སུ་མྱ་ངན་ལས་འདས་པས། མོའུ་འགལ་གྱི་བུ་ཁྱོད་ཀྱིས། འཇིག་རྟེན་གྱི་ཁམས་ན་ང་ཡི་སློབ་མ་ཇི་སྙེད་ཡོད་པ་རྣམས་བསྡུས་ཤིག་ཞེས་བཀའ་སྩལ་ནས། མོའུ་འགལ་གྱི་བུས་རི་རབ་རིའི་རྩེ་མོར་བྱོན་ནས། འཁོར་སྡུད་པའི་ཚིག་འདི་སྐད་ཅེས་གསུངས་ཏེ། བདེ་གཤེགས་སློབ་མར་གྱུར་པ་གང་སུ་དག །འཇིག་རྟེན་ཁམས་འདིར་གནས་པ་ཀུན་ཉོན་ཅིག །དེང་འདིར་སྟོན་པས་ཆོས་ཀྱི་འཆར་འབེབས་ཀྱིས། གང་དག་ཉན་པར་འདོད་ན་འདིར་གཤེགས་ཤིག །ཅེས་གསུངས་པ་དང་། དགོངས་འདུས་ལས། ཐུབ་པ་འདའ་བའི་ཚེ། རྫུ་འཕྲུལ་ཅན་ཁྱོད་སོང་ལ། འཇིག་རྟེན་གྱི་ཁམས་ན་ངའི་སློབ་མ་ཇི་སྙེད་པ་རྣམས་བསྡུས་ཤིག །ངེས་པར་བཞག་པར་བྱ་བ་དག་ཡོད་དེ། ཞེས་གསུངས་པ་དང་། རྫུ་འཕྲུལ་ཅན་དེས་ཆོས་ཀྱི་སྒྲས་སྐད་གཅིག་གིས་གོ་བར་གྲགས་པ་ནི། རྒྱལ་བའི་ཞིང་གྱུར་ངེས་པར་གང་སུ་དག ངེས་པར་འདི་བར་ཕྱོགས་པ་ཀུན་ཉོན་ཅིག །དེང་འདིར་རྒྱལ་བའི་བདུད་རྩི་གསུམ་འཇོག་གིས། །དུག་གསུམ་འཇོམས་པར་བྱེད་པ་ཀུན་ཉོན་ཅིག །ཅེས་གསུངས་པས། གོང་དུ་མ་འདས་སྟེ། ཐུབ་པ་འདས་ནས་མཛད་པའི་བསྟན་བཅོས་ཡིན་ཟེར་རོ། །ཡང་མཆིམས་ཀྱི་ཞལ་ནས། ཉན་ཐོས་མཆོག་གཉིས་ནི། ཐུབ་པའི་གོང་དུ་འདས་ལ། མངོན་པ་སྡེ་བདུན་ཀྱང་བཀའ་ཡིན་ཏེ། བཀའ་ཐོར་བུ་བར་གསུངས་པ་རྣམས་དགྲ་བཅོམ་པ་བདུན་གྱིས་སྡེབས་པ་ཡིན་གསུང་ངོ་། །དེ་ལ་བསྟན་བཅོས་ཟེར་བ་ཡིན། སྤྱིར་ཆོས་ལ་གསུམ་སྟེ། བསྟན་པའི་ཆོས་དང་། སྒྲུབ་པའི་ཆོས་དང་། ཞི་བ་མྱ་ངན་ལས་འདས་པའི་ཆོས་དང་གསུམ་ཡོད་པ་ལས། འདི་བསྟན་པའི་ཆོས་ཡིན་པའི་བསྟན་ཆོས་ཟེར་བ་ཡིན། དངོས་སུ་བཀའ་ཡིན་ནོ་གསུང་ངོ་། །ཡང་ན་ཉན་ཐོས་མཆོག་ཆེན་པོ་གཉིས་ཐུབ་པའི་གོང་དུ་འདས་པར་འདོད་པ་དང་། མ་འདས་པར་འདོད་པ་ཡང་མི་འགལ་ཏེ། མཆོག་གཉིས་པོ་ཐུབ་བསྟན་པའོ། །བསྟན་ལ་དབབ་པའི་ཡུལ་ཤེས་བྱའི་ཆོས་བསྟན་པ་སྟེ། ས་གཅོད་ཀྱི་དམིགས་དང་པོའོ། །གཉིས་པ་ཤེས་བྱའི་ཡུལ་ངོས་འཛིན་པར་བྱེད་པ་ཤེས་བྱེད་སྐྱེས་བུའི་བློ་ལ་གཉིས་ཏེ། གྲུབ་མཐས་བློ་བསྒྱུར་བ་དང་། མ་བསྒྱུར་བའོ། །མ་བསྒྱུར་བ་ལ་གཉིས་ཏེ། ཕྱལ་བ་དང་། རྒྱང་འཕེན་པའོ། །དེ་ལ་ཕྱལ་བ་ནི། ཚེ་སྔ་ཕྱི་དང་། ལས་རྒྱུ་འབྲས་ངོ་ཤེས་ཀྱང་མི་ཤེས་དེ་གཉིས་ཀྱི་རྗེས་སུ་མི་ཞུགས་ཏེ། ཤིན་ཏུ་བླུན་པ་བྱོལ་སོང་ལྟ་བུའོ། །རྒྱང་འཕེན་པ་ནི། དེ་གཉིས་ངོ་ཤེས་ཀྱང་དེ་གཉིས་ཀྱི་རྗེས་སུ་མི་ཞུགས་པར། ཚེ་ཕྱི་མ་རྒྱང་དུ་བཞག་ནས་འདི་ཡི་ཕན་པ་སྒྲུབ་པས་ཏེ། བཟོ་དང་སྨན་སྤྱད་ལ་སོགས་པའི་རྗེས་སུ་ཞུགས་པའོ། །གྲུབ་མཐའ་བློ་བསྒྱུར་བ་གཉིས་ཏེ། །འབྲས་བུ་འདོད་པ་ཙམ་དུ་མཐུན་ཀྱང་། ལམ་ལོག་པ་ལ་ཞུགས་པ་མུ་སྟེགས་པ་དང་། འབྲས་བུ་ཡང་འདོད་ཅིང་ལམ་མ་ལོག་པ་ལ་ཞུགས་པའི་ནང་ལ་སངས་རྒྱས་པའོ། །དང་པོ་ལ་གཉིས་ཏེ། མུར་ཐུག་པ་དང་། མུ་སྟེགས་པའོ། དེ་གཉིས་གཏན་ལ་དབབ་པ་དོན་བཞི་སྟེ། ངོ་བོ་དང་། ངེས་ཚིག་དང་། དབྱེ་བ་དང་བསྡུ་བའོ། །ངོ་བོ་ནི་ལོག་པའི་ཤེས་རབ་ཀྱི་ཕྱིན་ཅི་ལོག་གི་གྲུབ་མཐའ་ལ་མངོན་པར་ཞེན་པའོ། །ངེས་ཚིག་ནི་ལྟ་བ་ངན་པ་ལ་མུ་བཅས། སྤྱོད་པ་ངན་པ་ལ་སྟེགས་བྱས་པས་ན་མུ་སྟེགས་པའོ། །ཁོ་རང་གི་འདོད་པ་ནི་དོན་ལ་བློ་ཞུགས་ཤིང་བསླབ་པའི་གཞི་མ་འཁྲུལ་པ་ལ་འདོད་དེ། དེ་ཡང་ཚངས་པའི་དྲ་བ་ལས། མུ་ཞེས་བྱ་བ་ཆོས་ཉིད་ལ། སྟེགས་ཞེས་བྱ་བ་རྟོགས་པའི་གནས། །ཞེས་སོ། །མུ་སྟེགས་ལ་དབྱེ་ན་ལྟ་ལོག་སུམ་རྒྱ་དྲུག་ཅུ། འཇིག་ཚོགས་ཀྱི་རི་བོ་དྲུག་ཅུ། གྲགས་ཅན་གྱི་བདག་ལྟ་ཉེར་ལྔ། སྤྱིའི་བདག་འཛིན་ཉི་ཤུ། བྱེ་བྲག་གི་བདག་འཛིན་བཅུ། སྟོན་པ་དྲུག་གི་སྲོལ་ཀ །གཏར་ཀ་སྡེ་དྲུག །མུར་ལྟ་བ་བཞིའོ། བསྡུ་བ་ནི། དེ་དག་ཐམས་ཅད་ཀྱང་། ཆད་པར་སྐུར་པ་འདེབས་དང་། རྟག་པར་སྒྲོ་འདོགས་པ་གཉིས་སུ་འདུས་ཏེ། སྡུད་པ་ལས། འཇིག་ཚོགས་ལྟ་བུ་དྲུག་ཅུ་རྩ་གཉིས་གཉིས་འདུས་ལྟར། ཞེས་པ་དང་། ཚངས་པའི་དྲྭ་བ་ལས། ཚངས་པའི་ལྟ་བ་བསམ་ཡས་ཀྱང་། །མདོར་བསྡུས་རྟག་དང་ཆད་པ་གཉིས། །དེ་ལྟར་སུམ་བརྒྱ་དྲུག་ཅུ་ལ་བརྟེན་ལུགས་གསུམ་ཏེ། །དུས་ཀྱི་སྒོ་ནས་བགྲང་བ་དང་། །སྟོན་པའི་སྒོ་ནས་བགྲང་བ་དང་། །ཕུང་པོའི་སྒོ་ནས་བགྲང་བའོ། །འདས་པའི་མཐའ་ལ་རྟོག་པ་བརྒྱ་ཉི་ཤུ། ད་ལྟར་གྱི་མཐའ་ལ་རྟོག་པ་བརྒྱ་ཉི་ཤུ། མ་འོངས་པ་མཐའ་ལ་རྟོག་པ་བརྒྱ་ཉི་ཤུ་སྟེ་སུམ་བརྒྱ་དྲུག་ཅུའོ། །སྟོན་པ་སྒོ་ནས་བགྲང་བ་ནི། སྟོན་པ་འོད་སྲུང་རྫོགས་བྱེད་ཀྱི་ལྟ་བ་དྲུག་ཅུ། སྟོན་པ་ཕུག་ལྟས་ཀྱི་དྲུག་ཅུ། སྟོན་པ་ཅེ་ཏའི་བུ་ཐུབ་རྒྱལ་གྱི་དྲུག་ཅུ། སྟོན་པ་ཀ་ཏྱའི་བུ་ནག་པོ་ཅན་གྱི་དྲུག་ཅུ། སྟོན་པའི་འོད་སྲུང་རྫོགས་བྱེད་ཀྱི་དྲུག་ཅུ། སྟོན་པ་བེ་རུ་ཝ་སྙན་གྱི་ལྟ་བ་དྲུག་ཅུ་སྟེ། སུམ་བརྒྱ་དྲུག་ཅུའོ། །ཕུང་པོའི་ས་ནས་བགྲང་བ་ནི། རང་བཞིན་གྱི་གོལ་ས་བརྒྱད། ཕྱོགས་ལོག་གི་གོལ་ས་བཅུ་གཉིས། ཉི་ཤུའོ། །རང་བཞིན་གྱི་གོལ་ས་བརྒྱད་ནི། རྒྱུར་ལྟ་བ་དང་། སྤྱོད་པ་ཡང་དག་པར་ལྟ་བ་དང་། འཚོར་བ་བཅོས་པས་ཡང་དག་པར་བལྟ་བ་དང་། སྐྲ་སྤུ་བཅོས་པས་ཡང་དག་པར་བལྟ་བ་དང་། ལྷམ་གོས་བཅོས་པས་ཡང་དག་པར་བལྟ་བ་དང་། རྒྱན་ཆ་གཅོས་པས་ཡང་དག་པར་བལྟ་བ་དང་། དཀའ་ཐུབ་ལ་བརྟེན་པས་ཡང་དག་པར་བལྟ་བ་དང་། བསླབ་པ་འཆལ་བ་དང་བརྒྱད་དོ། །ཕྱོགས་ལོག་གི་གོལ་ས་བཅུ་གཉིས་ནི། ཕྱི་རོལ་པ་དང་། ཡང་དག་པ་དང་། གསང་སྔགས་པ་དང་། གསང་ཆེན་བ་དང་བཞི་ལས། ཕྱི་རོལ་པ་ལ་གསུམ། བྱེ་བྲག་པ་དང་། ཐ་སྙད་པ་དང་། རང་སྣང་ཕྱོགས་གཅིག་པའོ། །ཡང་དག་པ་ལ་གསུམ། ཟབ་པ་ཕྲ་བ། རྒྱ་ཆེ་བའོ། །གསང་སྔགས་པ་ལ་གསུམ། རིགས་སྤྱོད་པ། རིགས་གནས་པ། རིགས་སྦྱོར་བའོ། །གསང་ཆེན་པ་ལ་གསུམ། བརྟུལ་ཤུགས་ཆེར་སྤྱོད་པ་དང་། རྒྱལ་འབོགས་པ་དང་། རྒྱལ་ཐབས་པའོ། །དེ་ལྟར་ཉི་ཤུ་ལ། རྒྱུད་ལྟ་བ་དང་། བསླབ་པ་འཆལ་བ་ཀུན་གྱིས་གཞི་ཡིན་པས་དབྱེ་བ་མེད་དོ། །གཞན་བཅོ་བརྒྱད་ལ། འོག་ནས་འབྱུང་བའི་བདག་ལྟ་ཉི་ཤུ་རྩིས་པས་སུམ་བརྒྱ་དྲུག་ཅུའོ། །འཇིག་ཚོགས་ཀྱི་རི་བོ་དྲུག་བཅུ་ནི། བདག་བདག་ལྟ་བུ། བདག་ལས་བྱུང་བ་ལྟ་བུ། བདག་ལ་གནས་པ་སྣོད་ལྟ་བུ། བདག་གི་ཡིག་འབང་ལྟ་བུ། དེ་ཕུང་པོ་ལྔ་ལ་སྦྱར་བས་ཉི་ཤུ། དེ་དུས་ལ་སྦྱར་བས་དྲུག་ཅུའོ། །གྲངས་ཅན་གྱི་བདག་ལྟ་ཉེར་ལྔ་ནི། ཡུལ་ལྔ། དབང་པོ་ལྔ་སྟེ་བཅུའོ། །འདེགས་འཇོགས། བརྐྱང་སྐུམ་བཞི། རྡུལ་མུན་པ་གཉིས་ཏེ་བཅུ་དྲུག །འབྱུང་བ་བཞི་སྟེ་ཉི་ཤུ། བདག །ཕྱོགས། དུས། ཡིད། ནམ་མཁའ་སྟེ་ཉེར་སྔ། རྟག་པར་ལྟ་བའོ། །བདག་ཏུ་ལྟ་བའི་རི་བོ་ཉི་ཤུ་ནི། བདག་གཟུགས་ཡིན་ཞེས་པ་ལྔ། བདག་དང་ལྡན་ཞེས་པ་ལྔ། གཟུགས་བདག་ཡིན་ཞེས་པ་ལྔ། གཟུགས་བདག་དང་ལྡན་ཞེས་པ་ལྔ་སྟེ་ཕུང་པོ་ལྔ་ལ་བདག་བཞི་སྦྱར་བས་ཉི་ཤུའོ། །བདག་འཛིན་བཅུ་ནི། རྒྱུར་འཛིན་པའི་བདག་དང་། ཟ་བ་པོར་འཛིན་པ་དང་། བྱེད་པ་པོར་འཛིན་པ་དང་། དབང་བསྒྱུར་ཅན་དུ་འཛིན་པ་དང་། བདག་པོའི་དོན་དུ་འཛིན་པ་དང་། དག་པར་འཛིན་པ་དང་། ཉོན་མོངས་པར་འཛིན་པ་དང་། གནས་སུ་འཛིན་པ་དང་། མ་གྲོལ་བར་འཛིན་པ་དང་། རྣལ་འབྱོར་དུ་འཛིན་པའི་བདག་གོ །སྟོན་པ་དྲུག་གི་གོང་དུ་བཤད་པ་དེའོ། །གཏར་ཀ་སྡེ་དྲུག་ནི། ཝ་མགོ་རེ་ཐོད་ཅན་གྱི་སྡེ་དང་། བཅོ་བརླག་མི་ཤ་ཅན་གྱི་སྡེ། བསེ་རུ་བོང་འདེད་ཅན་གྱི་སྡེ་དང་། རྒྱང་འཕེན་པའི་སྡེ། ཕྱལ་པའི་སྡེ་དང་། ཆད་པའི་སྡེ་དང་དྲུག་གོ །རྒྱུད་ལྟ་བ་བཞི་ནི། རང་བཞིན་རྒྱུར་ལྟ་བ་དག་། བྱེད་པ་པོ་རྒྱུར་ལྟ་བ་དང་། དབང་ཕྱུག་རྒྱུར་ལྟ་བ་དང་། དུས་རྒྱ྄ུར་ལྟ་བའོ། །བསྡུས་པའི་དོན་རྟག་ཆད་གཉིས་སུ་གནས་པ་ལས། ཆད་པར་སྨྲ་བ་ལ་གཉིས་ཏེ། འདོད་པ་དགོད་པ་དང་། དེ་དགག་པའོ། །དང་པོ་འདོད་པ་དགོད་པ་ནི། ཆད་པར་སྨྲ་བ་རྣམས་ན་རེ། ཚེ་སྔ་ཕྱི་མེད། ལས་རྒྱུ་འབྲས་མེད། ཐམས་ཅད་མཁྱེན་པའི་སྟོན་པ་མེད། འགྲོ་བ་ཡང་མི་དང་བྱོལ་སོང་བ་མཐོང་ཚད་ཙམ་འདི་ལས། ལྷ་དང་སངས་རྒྱས་ཀྱང་མེད། དམྱལ་བ་དང་ཡི་དྭགས་ཀྱང་མེད་ཟེར་བའོ། །དང་པོ་ཚེ་སྔ་ཕྱི་མེད་དེ། ལུས་འབྱུང་བ་བཞི་ལས་གྲུབ་སྟེ། སེམས་ནམ་མཁའ་ལས་གྲུབ། ཤི་བའི་ཚེ་ལུས་འབྱུང་བ་བཞི་ལ་ཐིམ། སེམས་ནི་ནམ་མཁའ་ལ་ཡལ་ཏེ། ཚེ་སྔ་མ་འདི་ནས་ཡོང་བྱ་བ་མེད། ཕྱི་མ་འདིར་འགྲོ་བྱ་བ་མེད་དོ། །ཚངས་པའི་དྲྭ་བ་ལས། མཛེས་མ་ལེགས་པར་གཡོས་ལ་ཞིམ་པར་ཟོ། །མི་ཤི་བར་དུ་ཅི་གང་གིས། །རྟ་ལྟར་ཟོ་ལ་བོང་ལྟར་འགྲེས། །ཤི་ནས་དེ་ཡི་སྤྱོད་ཡུལ་མིན། །མི་ཤི་ཐལ་བ་རླུང་ཁྱེར་འདྲ། །སླར་སྐྱེ་བ་དག་ག་ལ་སྲིད། །ཟེར་རོ། །དེ་དགག་པ་ནི་གཉིས་ལས། དང་པོ་འབྲས་བུའི་གཏན་ཚིགས་ཀྱིས་ཚེ་སྔ་མ་ཡོད་པར་བསྒྲུབ་པ་ནི། སྐྱེས་མ་ཐག་གི་བུ་ཆུང་འདི་ཆོས་ཅན་སྐྱེ་བ་སྔོན་མ་སྔོན་དུ་སོང་སྟེ། མ་སླབ་པར་གོམས་པ་ངང་གིས་འཛུག་པའི་ཕྱིར། ཀ་ཁ་བསླབས་པས་ཀློག་མཁན་འབྱུང་བ་བཞིན་ནོ། །གཏན་ཚིགས་མ་གྲུབ་ཅེ་ན། ལུ་གུ་སྐྱེས་མ་ཐག་ཏུ་འདོམས་སུ་ནུ་མ་ཡོད་པ་ཤེས་པ་དེ་ཅིས་འགོགས། དེ་ཀ་ཚེ་སྔ་ཕྱིའི་བག་ཆགས་སྔོན་དུ་སོང་བ་ཡིན་ནོ། །གཉིས་པ་རང་བཞིན་གྱི་གཏན་ཚིགས་ཀྱིས་ཚེ་ཕྱི་མ་ཡོད་པར་བསྒྲུབ་པ་ནི། འཆི་ཁ་མའི་སེམས་འདི་ཆོས་ཅན། འདིས་ཕྱི་མའི་ལུས་ལེན་ཏེ། སེམས་ཙམ་འདུག་པའི་ཕྱིར། གཉིད་ལོག་པའི་སེམས་བཞིན་ནོ། །ཁོ་ན་རེ་སེམས་ཙམ་འདུག་ཀྱང་སྐྱེ་བ་ཕྱི་མ་མི་ལེན་ན་ཅི་སྟོ་སྟེ་ཁྱབ་པ་མ་གྲུབ་ཟེར་ན། སེམས་ཙམ་དུ་འདུག་ཀྱང་ཕྱི་མ་མི་ལེན་པ་ཅིའི་ཕྱིར། ཚོགས་དྲུག་འགགས་པའི་ཕྱིར་ཟེར་ན། འོ་ན་རྒྱལ་འབོགས་ཀྱི་དུས་སུ་ཡང་ཚོགས་དྲུག་འགགས་པས་ཕྱིས་མི་མི་ལྡང་བར་ཐལ་ལོ། །གཉིས་པ་ལས་རྒྱུ་འབྲས་མེད་པར་འདོད་པ་ནི། དགེ་བ་བྱས་པའི་འབྲས་བུ་མཐོ་རིས་ཐོབ་པ་དང་། ལས་སྡིག་པ་བྱས་པའི་འབྲས་བུ་ངན་སོང་དུ་སྐྱེ་བ་བྱ་བ་མེད་དེ། ཚེ་འདི་ཡི་བདེ་སྡུག་ཐམས་ཅད་གློ་བུར་བ་ཡིན་ནོ་ཟེར་རོ། །དེ་དགག་པ་ནི། དཀར་ནག་གི་ལས་འདི་ཆོས་ཅན། གང་བྱས་ཀྱི་འབྲས་བུ་སྨིན་ཏེ་དམ་བཅའ། རྣམ་སྨིན་དང་རྒྱུ་འབྲས་ལ་འཆོལ་བ་ཉུང་བའི་ཕྱིར། ས་བོན་གྱི་རྒྱུ་འབྲས་བཞིན། གཏན་ཚིགས་མ་གྲུབ་ན། རྒྱུ་ནས་བཏབ་པའི་འབྲས་བུ་སྲན་མ་སྐྱེ་བར་ཐལ། འདོད་ན་མངོན་གསུམ་གྱིས་གསལ། ཡང་དཀར་ནག་གི་ལས་འདི་ཆོས་ཅན། འབྲས་བུས་མི་བསླུ་སྟེ། འགྲོ་དྲུག་ལ་བདེ་སྡུག་འདུག་པའི་ཕྱིར། མཛེ་ཕོ་དང་རྒྱལ་པོ་བཞིན་ནོ། །ཁོ་ན་རེ། དེ་ལས་ལས་བྱུང་བ་མིན་ཏེ། རྐྱེན་སྣ་ཚོགས་ལས་གྲུབ་པའི་ཕྱིར། ནུས་པ་ཡིན་ནོ་ཟེར་ན། དེ་མི་བཏུབ་སྟེ། ནམ་མཁའ་ཀློང་ཡངས་པས། རྒྱུ་མེད་རང་གི་བརྟགས་མཐོང་ན། །མེད་པའི་ཆོས་བཞི་སྲིད་པར་འགྱུར། །ཞེས་པ་དང་། རྒྱུ་མེད་རྐྱེན་ལ་མི་ལྟོས་ཕྱིར། རྟག་ཏུ་ཡོད་པ་དང་མེད་པར་ཐལ། །ཞེས་པས། རྒྱུ་མེད་པ་ལ་རྐྱེན་གྱི་རྩོལ་བ་མི་འཇུག་སྟེ། ས་བོན་མེད་པའི་མྱུ་གུ་བཞིན་ནོ། །ཡང་ཐམས་ཅད་མཁྱེན་པའི་སྟོན་པ་མེད་པར་འདོད་དེ། སྐྱེས་བུ་མཆོངས་བསླབས་པས། དཔག་ཚད་དང་རྒྱང་གྲག་ཙམ་དུ་མཆོངས་སྲིད་ཀྱི། ནམ་མཁའ་ལ་འཕུར་བ་མི་སྲིད་པ་བཞིན་དུ། སྤྱངས་བའི་རིམ་པའི་འཇིག་རྟེན་དུ་བློ་རྣོ་རྟུལ་ཙམ་སྲིད་ཀྱིས་ཐམས་ཅད་མཁྱེན་པ་མི་སྲིད་དོ། །ཟེར་རོ། །དེ་ཡང་ཕྲ་མེན་ལས། ཉུང་དུ་བསྡུ་བའི་ཁྱད་པར་ལས། །ཤིན་ཏུ་ཁྱད་འཕགས་ཡོངས་མི་སྲིད། །མཁའ་ལ་འདོམ་བཅུ་ཚུན་ཆད་དུ། །ཕྱོགས་པར་འགྱུར་གྱི་དེ་ལས་མིན། །སྒོམ་པར་གྱུར་བས་འགྲུབ་མེད་ཅིང་། །ཞེས་སོ། དེ་དགག་པ་ནི་གཉིས་ཏེ། དང་པོ་ཐམས་ཅད་མཁྱེན་པ་སྔར་བྱུང་བར་བསྒྲུབ་པ་ནི། བཀའ་རྒྱས་འབྲིང་ཆོས་ཅན། འདི་གསུངས་པའི་སྟོན་པ་ཐམས་ཅད་མཁྱེན་པའི་སྟོན་པ་གཅིག་ཡོད་པར་དམ་བཅའ། བརྗོད་བྱ་ལ་འཁྲུལ་པ་མེད་པའི་ཕྱིར། དཔེར་ན་ལྷ་ཁང་ལེགས་པ་མཐོང་བས་ལྷ་བཟོ་མཁས་པར་རྟོགས་པ་བཞིན་ནོ། །ཁོ་ན་རེ། བརྗོད་བྱ་ལ་འཁྲུལ་པ་མེད་ཀྱང་། ཐམས་ཅད་མཁྱེན་པས་མ་གསུངས་ན་ཅི་སྟོ་སྟེ་ཁྱབ་པ་མ་གྲུབ་ཟེར་ན། འོ་ན་ལྷ་ཁང་ལེགས་པར་མཐོང་ཡང་། ལྷ་བཟོ་མཁས་པས་མ་བྱས་ཟེར་ན་ཅིས་འགོགས། རྗེས་སུ་འགྲོ་ལྡོག་ངེས་པ་ཡིན། གཉིས་པ་ཐམས་ཅད་མཁྱེན་པ་ཕྱིས་འབྱུང་དུ་རུང་བར་བསྒྲུབ་པ་ནི། རྒྱུད་བརྟན་པ་གོམས་པ་ཁྱད་པར་ཅན་ཡོད་པའི་སྒོམ་ཆེན་པའི་ཤེས་རྒྱུད་ནི་ཆོས་ཅན། ཐམས་ཅད་མཁྱེན་པར་འགྱུར་རོ། །ཞེས་དམ་བཅའ། སྦྱངས་པ་རབ་ཀྱི་མཐར་ཐུག་པ་ཡིན་པའི་ཕྱིར། རྒྱུ་རྐྱེན་འཛོམ་པའི་འབྲས་བུ་བཞིན་ནོ། །གཏན་ཚིགས་མ་གྲུབ་ཟེར་ན། འོ་ན་རྒྱུ་རྐྱེན་འཛོམ་ཡང་འབྲས་བུ་མི་འབྱུང་བར་ཐལ་ལོ། །ཡང་འགྲོ་བ་རང་རང་ལ་ཇི་ཙམ་སྣང་བ་དེ་ཙམ་ཡིན་གྱིས་གཞན་མི་བདེན་ཏེ། མ་མཐོང་བའི་ཕྱིར་རོ། །ཟེར་ན། དེ་དགག་པ་ནི། འགའ་ཞིག་གིས་མ་མཐོང་བས་འགྲོ་བ་གཞན་ཡོད་པར་མི་བདེན་ནམ། འགའ་ཞིག་གིས་མ་མཐོང་བས་ཡོད་པར་མི་བདེན་ན། ཁྱོད་ཀྱིས་མ་མཐོང་བའི་ཕྱིར། རྡོ་རྗེ་གདན་ཡང་མེད་པར་ཐལ། ཐམས་ཅད་མ་མཐོང་བས་མི་བདེན་པ་རྒྱུ་མཚན་མེད་དེ། །འཕགས་པ་རྣམས་ཀྱིས་འཁོར་འདས་མ་ལུས་པར་གཟིགས་པའི་ཕྱིར་རོ། །ཡང་ཆད་པ་རྣམས་ལ་སྤྱི་སྐྱོན་འདི་ཡང་ཡོད་དེ། ཁྱོད་ཀྱི་ཆད་པ་དེ་ཉམས་སུ་མྱོང་ནས་ཆད་དམ། མ་མྱོང་ཡང་ཆད། ཉམས་སུ་མྱོང་ནས་ཆད་ན། ཉམས་སུ་མྱོང་བའི་ཕྱིར། མ་ཆད་པར་ཐལ། མྱོང་ཡང་ཆད་དོ་ཟེར་ན། འོ་ན་མིག་གི་ཡུལ་དུ་ཡང་གཟུགས་ཆད་པར་ཐལ། མྱོང་ཡང་ཆད་པའི་ཕྱིར་རོ། །དེ་མ་ཆད་པར་མངོན་སུམ་གྱིས་གསལ་ལོ་ཟེར་ན། ཁྱོད་ཀྱི་ཡང་མྱོང་བས་གསལ་ལོ། །ཡང་མ་མྱོང་ཀྱང་ཆད་ཟེར་ན། འོ་ན་རྣ་བའི་ཡུལ་དུ་ཡང་གཟུགས་སྣང་བར་ཐལ། དེ་འདོད་ཐོག་ཞེ་ན། རྣ་བའི་ཡུལ་དུ་གཟུགས་ཡོད་མ་མྱོང་བར། ཆད་མ་ཆད་ཀྱི་དཔྱད་ར་མི་འཇུག་གོ །དེ་བཞིན་དུ་ཉམས་སུ་མ་མྱོང་བ་ལ་ཆད་རྒྱུ་མེད་དོ། །ཆད་པར་བསྟན་པའོ། །རྟག་པར་ལྟ་སྨྲ་བ་ནི། བདག་རྟག་པ། གཅིག་བུ། ཞེས་བྱ་བ། ཕུང་པོ་ལྔའི་རྒྱུན་ལ་ཟ་བ་པོ་དང་། བྱེད་པ་པོ་དང་། བྱེད་པ་བདག་ཉིད་གཅིག་དོན་དམ་པར་ཡོད་པར་འདོད་དོ། །དེ་ལ་གཉིས་ཏེ། རྟག་པ་སྤྱིར་དགག་པ་དང་། བྱེ་བྲག་ཏུ་དགག་པའོ། །སྤྱིར་དགག་པ་ནི། རྟག་པ་ཆོས་ཅན། ཡང་དག་པར་ན་རང་བཞིན་མེད་དེ། རིམ་དང་། ཅིག་ཆར་གྱིས་དོན་བྱེད་ནུས་པས་སྟོང་པའི་ཕྱིར་རོ། །རི་བོང་གི་རྭ་བཞིན་ནོ། །མདོ་ལེགས་པའི་སྒྲོན་མེ་ལས། རིམ་གྱི་མ་ཡིན་ཅིག་ཅར་མིན། རིམ་དང་ཅིག་ཅར་སྟོང་པའི་ཕྱིར། རང་བཞིན་མེད་ཅེས་རྒྱལ་བས་གསུངས། ཞེས་སོ། །ཧེ་ཧེ། རྒྱུ་མ་གྲུབ་ཞེ་ན། ཁྱོད་ཀྱི་རྟག་པ་དེས་དོན་བྱེད་ནུས་སམ་མི་ནུས། མི་ནུས་ན་རྟག་པ་མ་ཡིན་པར་ཐལ། རྟག་པ་ནི་དངོས་པོ་ཡིན་ལ། དངོས་པོའི་མཚན་ཉིད་དོན་བྱེད་ནུས་པ་ཡིན་ལ། ཁྱོད་ཀྱི་རྟག་པ་དེ་དོན་བྱེད་མི་ནུས་པའི་ཕྱིར། དོན་བྱེད་ནུས་སོ་ཞེ་ན། རིམ་གྱིས་བྱེད་དམ་ཅིག་ཅར་བྱེད། རིམ་གྱིས་བྱེད་ན་རྟག་པ་མ་ཡིན་པར་ཐལ། རིམ་པ་ནི་འགྱུར་བ་ཅན་ཡིན་ལ། རྟག་པ་མི་འགྱུར་བར་འདོད་པ་འགལ་ལོ། །ཅིར་ཅར་བྱེད་ན་རྒྱུའི་དུས་སུ་འབྲས་བུ་སྨིན་པར་ཐལ། འདོད་ན་མངོན་སུམ་གྱིས་གསལ་ཏེ། ས་བོན་དང་མྱུ་གུ་བཞིན་ནོ། །སྤྱོད་འཇུག་ལས། གལ་ཏེ་རྒྱུ་ལ་འབྲས་གནས་ན། །ཟས་ཟོས་མི་གཙང་ཟ་བར་འགྱུར། །ཞེས་སོ། །ཡང་སྔར་དོན་བྱས་ནས་ཕྱིས་དོན་བྱེད་དམ་མི་བྱེད། བྱེད་ན་རྟག་པ་མི་འགྱུར་པ་ཡིན་པ་ལ། སྔ་ཕྱི་འགྱུར་བ་ཅན་ཡིན་པས་ན་རྟག་པ་ཉམས། སྔར་བྱས་ནས་ཕྱིས་མི་བྱེད་ན། སྔར་དོན་བྱེད་པ་ལ་ཕྱིས་མི་བྱེད་པར་འགྱུར་བས་རྟག་པ་ཉམས་སོ། །བྱེ་བྲག་ཏུ་དགག་པ་ལ་གསུམ་སྟེ། མཚན་མ་རྫས་ཀྱི་རྟག་པ་དང་། གནས་ལུགས་རིག་པའི་རྟག་པ་དང་། གསང་བའི་མཐའ་རིག་བྱེད་དུ་སྨྲ་བའོ། །དང་པོ་མཚན་མ་རྫས་ཀྱི་རྟག་པ་ནི། བདག་ཅེས་བྱ་བ་དངོས་པོ་ཅན་གཅིག །སེམས་ཅན་ཀུན་གྱི་སྙིང་གི་དཀྱིལ་ན་ཡོད་དེ། ཆེ་སྟེ་ཆེ་ན་མཐེ་བོང་ཙམ་ཆུང་སྟེ་ཆུང་ན་ཡུངས་འབྲུ་ཙམ། ཡང་ཆུང་སྐྲའི་རྩེ་མོ་ཙམ། དཀར་ལ་འཚེར་བ་སྣུམ་ལ་འདྲིལ་བ་གཅིག་རྟག་པར་གནས་ཏེ། དེས་ལས་དགེ་སྡིག་བྱས་པའི་རྐྱེན་གྱིས་མཐོ་རིས་དང་ངན་སོང་དུ་འགྲོ་བར་བྱེད་པ་ལ། རྟག་པའི་རྟོག་པ་མི་འགྱུར་ལ། བློ་བེམ་པོ་འདི་འགྱུར་བར་འདོད་དོ། །དེ་ཡང་ཕྲ་མེན་ལས། བདག་གི་རྟག་པ་བློ་ནི་འགྱུར། །ཕུང་པོ་ཉིང་འཚམས་སྦྱོར་བ་ཡང་། །རྫ་ཆག་བྱེ་ཕུར་ཇི་བཞིན་ནོ། །རྟག་པ་ཐེ་བོང་ཡུངས་འབྲུ་ཙམ། །བདག་ཅེས་བྱ་བ་དེ་ལེན་ནོ། །ཞེས་སོ། དེ་དགག་པ་ན། ཁྱོད་ཀྱི་དཀར་ལ་འཚེར་བ་དེ་ལ་མིག་གིས་རྣམ་ཤེས་ཀྱིས་འདྲེན་ནུས་སམ་མི་ནུས། །ནུས་སོ་ཞེ་ན། རྟག་པ་མི་འགྲུབ་སྟེ། མིག་གི་རྣམ་ཤེས་འདྲ་པའི་རྫས་ནི་དངོས་པོ་ཅན་ཡིན་ལ། དངོས་པོ་ཅན་ལ་རྟག་པའ་ིརྫས་མི་གྲུབ་སྟེ། གཅིག་དང་དུ་མ་དང་བྲལ་བའི་ཕྱིར། གཟུགས་བརྙན་བཞིན་ནོ། །མིག་གིས་རྣ་ཤེས་འདྲེན་མི་ནུས་སོ་ཞེ་ན། འོ་ན་དཀར་ལ་འཚེར་བ་ཡོད་པ་གང་གི་ཤེས། ཡིད་ཀྱིས་ཤེས་ཤེ་ན། དངོས་པོ་ཅན་ཡིན་ནམ་ཡིད་དཔྱོད་ཡིན། དངོས་པོ་ཅན་ཡིན་ན་མིག་གི་རྣམ་ཤེས་མི་འདྲེན་མི་སྲིད་དེ། ཡིད་དཔྱོད་ཡིན་ན། དེ་ཚད་མས་གཏན་ལ་ཕབ་སམ་མ་ཕབ། ཕབ་ན་ཡིད་དཔྱོད་མི་བཏུབ་ལ། མ་ཕབ་ན་དེ་རྟག་པའི་དངོས་པོར་མི་འགྱུར་རོ། །གནས་ལུགས་རིག་པའི་རྟག་པ་ནི། བདག་རྟག་པ་གཅིག་པུ་བྱེད་པས་སོ། །རང་དབང་ཅན་ཤེས་ཤིང་རིག་པའི་བདག་ཉིད་ཅན། འབྱུང་བ་བཞི་ལས་མ་སྐྱེད་པ་རིག་པའི་ཆོས་སུ་གྲུབ་པ། ཐམས་ཅད་ཀྱི་བྱེད་པ་པོ་གཅིག་ཡོད་ཟེར་རོ། །དེ་དགག་པ་ནི། །དེ་ལྟ་བུའི་རྟག་པ་དེ་སྐད་ཅིག་མར་ཡོད་དམ། རྒྱུན་དུ་ཡོད། སྐད་ཅིག་མར་ཡོད་ན་མི་རྟག་པར་ཐལ། སྐད་ཅིག་མ་ནི་དུས་གཉིས་པར་མི་འདོད་དེ་འགྱུར་བའི་ཕྱིར། རྒྱུན་དུ་ཡོད་ན། རྒྱུན་དེ་སྐད་གཅིག་མ་ཁྱབ་སམ་མ་ཁྱབ། མ་ཁྱབ་ན། ཁྱབ་བྱེད་སྐད་ཅིག་མ་མེད་པའི་ཕྱིར་ཁྱབ་བྱ་རྒྱུན་ཀྱང་མེད་པར་ཐལ། ཁྱབ་ན། སྐད་ཅིག་མས་ཁྱབ་པའི་ཕྱིར་མི་རྟག་པར་ཐལ། གསང་བའི་མཐའ་རིགས་བྱེད་དུ་སྨྲ་བ་ན་རེ། ཆོས་ཐམས་ཅད་ཤེས་ཤིང་རིག་པའི་ཕྱིར་བདག་ཉིད་ཅན་དུ་འདོད། རིག་པ་དེ་ཡང་རྟག་པ་ཡང་མ་ཡིན། ཆད་པ་ཡང་མ་ཡིན། ངོ་བོ་མི་འགྱུར་བ། རྩལ་སྣང་རིག་པ་སྣ་ཚོགས་སུ་འཆར་བ་གཅིག་ཏུ་འདོད། དེ་ཡང་ཚངས་པའི་དྲྭ་བ་ལས། རྟག་ཆད་གཉིས་དང་བྲལ་བའི་དྭངས་མ་གཅིག །དོན་དམ་རང་བཞིན་ལྟ་བ་ཡིན་པར་འདོད། །ཅེས་སོ། །དེ་དགག་པ་ནི། ཁྱོད་ཀྱི་ངོ་བོ་མི་འགྱུར་བ་དང་། རྩལ་སྣང་འགྱུར་བ་གཉིས་གཅིག་གམ་ཐ་དད། གཅིག་ན་རྩལ་སྣང་གི་རིག་པ་འགྱུར་བ་བཞིན་དུ། ངོ་བོ་ཉིད་ཀྱང་འགྱུར་བ་ཐལ། གཅིག་པའི་ཕྱིར། ག་བུ་གཅིག་ན་སྔོན་པོའང་འཆག་པ་བཞིན་ནོ། །འདོད་ན་ངོ་བོ་ཉིད་མི་འགྱུར་བའི་དམ་བཅའ་ཉམས་སོ། ཐ་དད་ན། རྩལ་སྣང་དེ། ངོ་བོ་མི་འགྱུར་བ་དེ་ལས་བྱུང་ངམ། གཞན་ལས་བྱུང་། ངོ་བོ་མི་འགྱུར་བ་ལས་བྱུང་ན། ངོ་བོ་འགྱུར་བ་བཞིན་དུ་རྩལ་སྣང་ཡང་མི་འགྱུར་བར་ཐལ། རྒྱུ་འབྲས་རྗེས་སུ་འགྲོ་ལྡོག་ངེས་པའི་ཕྱིར། གསེར་མི་འགྱུར་བས་སེར་མི་འགྱུར་བ་བཞིན་ནོ། །འདོད་ན་རྩལ་སྣང་འགྱུར་བའི་དམ་བཅའ་ཉམས་སོ། །གཞན་ལས་བྱུང་ན། ངོ་བོ་ཉིད་ཀྱི་རྩལ་སྣང་མ་ཡིན་པར་ཐལ་ལོ། །རྟ་མགྱོགས་པ་དེ་གཡག་གི་ཡོན་ཏན་མ་ཡིན་པ་བཞིན་ནོ། །དེས་རྟག་པ་གཏན་ལ་ཕབ་པའོ། །མུ་སྟེགས་པའི་གྲུབ་མཐའ་བཤད་ཟིན་ཏོ། །ནང་པ་སངས་རྒྱས་པ་ལ་གཉིས་ཏེ། ཐེག་པ་ཆུང་ངུ་དང་། ཐེག་པ་ཆེན་པོའོ། །ཆུང་ངུ་ལ་གཉིས་ཏེ། ཉན་ཐོས་དང་རང་སངས་རྒྱས་སོ། །ཉན་ཐོས་ལ་བཞི་སྟེ། ངོ་བོ་དང་། ངེས་ཚིག་དང་། དབྱེ་བ་དང་། བསྡུ་བའོ། །ངོ་བོ་ནི་ཆོས་ཀྱི་བདག་ཉིད་དུ་ལྟ་བའི་སྒོ་ནས་རང་གི་ཞི་བདེ་སྒྲུབ་པའོ། །ངེས་ཚིག་ནི། མཛོད་ཀྱི་ཊཱི་ཀ་ལས། ཉན་ཉན་ཐོས་ཤིང་ཐོས་ཐོས་སྒྲོག་ཞེས་སོ། །དབྱེ་ན་བཞི་སྟེ། ཉན་ཐོས་སྤྲུལ་པ་བ་དང་། རང་རྒྱུད་བ་དང་ཞི་བར་བསྒྲོད་པ་དང་། གྲུབ་པ་མཐར་འཛིན་པའོ། །སྤྲུལ་པ་ནི། ཤཱ་རིའི་བུ་དང་། མོའུ་འགལ་གྱི་བུའམ། ཉན་ཐོས་མཆོག་བརྒྱད་ལྟ་བུ། ཉན་ཐོས་ཀྱི་ཚུལ་བཟུང་ནས་ཉན་ཐོས་རྣམས་ཀྱི་དོན་བྱེད་པའོ། །རང་རྒྱུད་པ་ནི། ཐེག་པ་ཆེན་པོ་ལ་སྡང་ཞིང་སྐུར་བ་འདེབས་པའོ། །རྩ་བའི་སྡེ་པ་བཞི། དེ་ལས་གྱེས་པའི་སྡེ་པ་བཅོ་བརྒྱད་པོ་རྣམས་སོ། །ཞི་བར་སྒྲོད་པ་ནི། འགོག་པ་ལ་སྙོམ་པར་བཞུགས་པའོ། །གྲུབ་མཐའ་འཛིན་པ་ནི། མདོ་སྡེ་པ་དང་། བྱེ་བྲག་པ་གཉིས་སོ། །བསྡུ་ན་ཡང་མདོ་སྡེ་པ་དང་བྱེ་བྲག་པ་གཉིས་སུ་འདུས་སོ། །དེ་རྣམས་གཏན་ལ་དབབ་པ་ལ་དོན་བཞི་བཞི་སྟེ། ལྟ་བ་དང་། ཏིང་ངེ་འཛིན་དང་། སྤྱོད་པ་དང་འབྲས་བུའོ། །དང་པོ་ཉན་ཐོས་ཀྱི་ལྟ་བ་ལ་གཉིས་ཏེ། སྤྱིར་བསྟན་པ་དང་། བྱེ་བྲག་ཏུ་བསྟན་པའོ། །དང་པོ་སྤྱིར་བསྟན་པ་ནི། མུ་སྟེགས་རྟག་པ་བས་རྟག་པའི་གང་ཟག་གིས་བདག་རྟག་པ་ནི། ཀུན་རྫོབ་ཏུའང་མི་འདོད་ལ། གང་ཟག་གི་བདག་རྟག་པ་དེ་གཅིག་པུ་མ་ཡིན་སྟེ་ཕུང་པོ་ལྔ་གྱེས། བྱེད་པ་པོ་མ་གྲུབ་སྟེ། རང་གི་མཚན་ཉིད་འཛིན་པ་ཁམས་བཅོ་བརྒྱད་དུ་གྱེས། ཟ་བ་པོ་མ་གྲུབ་སྟེ། རྣམ་ཤེས་སྐྱེ་པའི་སྒོ་སྐྱེ་མཆེད་བཅུ་གཉིས་སུ་འདོད་པས་གང་ཟག་གི་བདག་མ་གྲུབ་པ། ཆོས་ཀྱི་བདག་གཟུང་འཛིན་དོན་དམ་པར་འདོད་དེ་བཟུང་བའི་ཡུལ་གྱི་རྣམ་པ་རགས་པར་སྣང་བ་འདི་བློས་གཞིག་ཅིང་གཞོམ་དུ་རུང་བ་ཀུན་རྫོབ་ཡིན་ལ། འདི་ཙམ་བསྐྱེད་ཟེར་བའི་གཞི་རྡུལ་ཕྲ་རབ་ཆ་མེད་རིས་མེད་ནི་བློས་གཞིག་ཅིང་གཞོམ་དུ་མི་རུང་བས་དོན་དམ་དུ་འདོད། འཛིན་པའི་སེམས་ཀྱང་རགས་པའི་སེམས་ནི་དུས་གསུམ་གྱི་ཆས་གཞིག་ཏུ་རུང་བས་ཀུན་རྫོབ་ཡིན། དེ་ཙམ་བསྐྱེད་པའང་ཟེར་བའི་སྐད་ཅིག་མས་དུས་ཀྱི་ཆ་དང་བྲལ་བ་དོན་དམ་དུ་འདོད་དེ། བྱེ་བྲག་ཏུ་ཕྱེ་ན། ཉན་ཐོས་བྱེ་བྲག་ཏུ་སྨྲ་བ་དང་། མདོ་སྡེ་པའོ། །བྱེ་བྲག་ཏུ་སྨྲ་བ་ནི། རྡུལ་ཕྲ་རབ་སྐོར་བ་བར་དང་བཅས་པ་གཡག་རྔ་དང་ནེ་སིང་ལྟར་འདོད་པ་ལ། མདོ་སྡེ་བ་ནི་འབྱར་ཡང་མ་འབྱར་བར་ཡང་མེད། པོ་ཏི་ཕྱིར་བསྡོམ་པ་ལྟར་འདོད ། དེ་དགག་པ་ནི། ཁྱོད་རྡུལ་ཕྲ་རབ་ལ་བརྟེན་ནས་གོང་བུ་རྩོམ་པའི་ཚེ། དབུས་ཀྱི་རྡུལ་ལ་ཕྱོགས་ཆ་དྲུག་གི་རྡུལ་གྱི་སྐོར་རམ་མ་སྐོར། མ་སྐོར་ན་གོང་བུ་རགས་པ་མི་འགྲུབ་བོ། སྐོར་ན་ཤར་གྱི་རྡུལ་གྱི་དབུས་ཀྱི་རྡུལ་ལ་ཁ་ལྟས་པའི་ཚེ། ནུབ་ཀྱི་རྡུལ་ལ་ཁ་ལྟས་སམ་མ་ལྟས། བལྟས་ན་ཤར་གྱི་རྡུལ་དང་དབུས་ཀྱི་རྡུལ་ལ་ཐིམ་པར་ཐལ། མ་ཐིམ་ན་དབུས་ཀྱི་རྡུལ་གྱིས་བར་ཆོད་པས་ནུབ་ཀྱི་རྡུལ་ལ་ཁ་བལྟར་མི་བསྟུབ་བའི་ཕྱིར་རོ། །དེ་འདོད་ན། རྡུལ་ཐམས་ཅད་གཅིག་གི་གོ་སར་ཐིམ་པར་གོང་བུ་རགས་པར་གཏན་ནས་མི་འགྲུབ་བོ། །ཤར་གྱི་རྡུལ་དེས་ནུབ་ཀྱི་རྡུལ་ལ་ཁ་མ་ལྟས་ན། ཤར་གྱི་རྡུལ་དེ་ཆ་ཤས་དང་བཅས་པར་ཐལ། དབུས་ལ་ཁ་བལྟས་པའི་ཆ་དང་། ནུབ་ལ་ཁ་མ་ལྟས་པའི་ཆ་གཉིས་སུ་བྱུང་བའི་ཕྱིར་རོ། །འདོད་ན་ཆ་ཤས་དང་། བྲལ་བའི་དམ་བཅའ་ཉམས་སོ། །ཡང་བྱེ་བྲག་པའི་སྐོར་བ་བར་དང་བཅས་པ་ཡང་མི་འཐད་དེ། བར་དེ་ཀར་ལྷག་གེ་ཡོང་ན་སྣང་བའི་རྡུལ་ཡིན་ལ། མུན་པའི་རྡུལ་མིན་པར་བར་མི་སྲིད་དོ། །མདོ་སྡེ་པའི་འབྱར་ཡང་མ་འབྱར་བར་ཡང་མེད་པ་མི་འཐད་དེ། མ་འབྱར་ན་བར་ཡོང་བ་ཡིན་མོད། བར་མེད་ན་འབྱར་བ་ཡིན་མོད། དེ་ལྟར་གཟུང་བའི་ཡུལ་ཡང་དག་ཏུ་མ་གྲུབ་ཙ་ན། དེ་ལ་ལྟོས་པའི་འཛིན་པ་ཡང་མི་འགྲུབ་སྟེ། གཟུང་འཛིན་ལྟོས་ཆོས་ཡིན་པའི་ཕྱིར། གཞན་ཡང་འཛིན་པའི་ཤེས་པ་སྐད་ཅིང་མ་དུས་ཀྱི་ཆ་དང་བྲལ་བ་ཡང་མི་འཐད་དེ་སྐད་ཅིག་སྔ་མ་དེ་བར་མ་དང་ཕྲད་པའི་ཚེ། ཕྱི་མ་དང་ཕྲད་དམ་མ་ཕྲད། ཕྲད་ན་སྐད་ཅིག་སྐད་ཅིག་མ་སྔ་མ་དེ་བར་མ་ལ་ཐིམ་པར་ཐལ། བར་མ་ལ་མ་ཐིམ་ན་སྐད་ཅིག་མ་སྔ་ཕྱི་གཉིས་བར་མ་ཆོད་ནས་ཕྲད་དུ་མི་སྟུབ་ལ། ཐིམ་པར་འདོད་ན་ཤེས་པ་ཐམས་ཅད་སྐད་ཅིག་མ་གཅིག་ཏུ་ཐལ། བར་མ་ལ་ཐིམ་པའི་ཕྱིར། དེ་ཡང་འདོད་ན་རྒྱུན་གྱི་ཤེས་པ་རགས་པ་འདི་གཏན་མེད་དུ་ཐལ་ལོ། །ཡང་སྐད་ཅིག་མ་སྔ་མ་དེ་བར་མ་དང་ཕྲད་པའི་ཚེ་ཕྱི་མ་དང་མ་ཕྲད་དེ། བར་དུ་ཆོད་དེ་ཟེར་ན་སྐད་ཅིག་མ་སྔ་མ་དེ་ཆོས་ཅན། དུས་ཀྱི་ཤས་དང་བཅས་པར་ཐལ། བར་མ་དང་ཕྲད་པའི་ཆ་དང་། ཕྱི་མ་དང་ཕྲད་པའི་ཆ་གཉིས་བྱུང་བའི་ཕྱིར་རོ། །དེ་འདོད་ན་སྐད་ཅིག་མ་དུས་ཀྱི་ཆ་དང་བྲལ་བའི་དམ་བཅའ་ཉམས་སོ། །ཉན་ཐོས་ཀྱི་ཏིང་ངེ་འཛིན་ནི། ཐ་མས་མི་རྟག་བསྒོམས། འབྲིང་གིས་རླུང་འཛིན། རབ་ཉི་ཚེ་བའི་སྟོང་བ་སྒོམ་མོ། །སྤྱོད་པ་ནི། སྦྱངས་པའི་ཡོན་ཏན་བཅུ་གཉིས་ལ་གནས་ནས་རང་དོན་གཙོ་བོར་སྤྱོད་ཅིང་། གཞན་དོན་ཞར་ལ་བྱེད་དོ། །འབྲས་བུ་ནི་འཕགས་པ་དགྲ་བཅོམ་པ་ཐོབ་པའོ། །རང་སངས་རྒྱས་ལ་བཞི་སྟེ། ངོ་བོ། ངེས་ཚིག་དང་། དབྱེ་བ་དང་། བསྡུ་བའོ། །ངོ་བོ་ནི། གཟུང་བ་རང་བཞིན་མེད་པར་ཤེས་པའི་སྒོ་ནས་རྟེན་འབྲེལ་སྒོམ་པའོ། །དེ་ཡང་མངོན་རྟོགས་རྒྱན་ལས། གཟུང་བའི་ཆ་ནི་སྤངས་ཕྱིར་དང་། འཛིན་པ་མ་སྤངས་ཕྱིར་དང་ནི། རྟེན་གྱི་བསེ་རུ་ལྟ་བུའི་ལམ། ཞེས་སོ། ངེས་ཚིག་ནི། རང་གི་ཤེས་རབ་ཟབ་མོས། རང་གི་བྱང་ཆུབ་རྟོགས་པ་སྟེ། རྒྱས་པ་ལས། དགེ་བཤེས་མི་སློབ་རང་གི་རིག་པས་རྟོགས། ཞེས་སོ། དབྱེ་ན་གཉིས་ཏེ། དབང་པོ་རྟུལ་པོ་ནེ་ཙོ་ལྟར་ཁྱུས་ལྡིང་བ་དང་། དབང་པོ་རྣོན་པོ་བསེ་རུ་ལྟར་གཅིག་པུར་གནས་སུ། །བསྡུ་ན་རང་སངས་རྒྱས་བྱ་བ་གཅིག་ཏུ་གནས་སོ། །དེ་ལ་བཞི་སྟེ། ལྟ་བ་དང་། སྒོམ་པ་དང་། སྤྱོད་པ་དང་། འབྲས་བུའོ། །ལྟ་བ་ནི། ཕྱི་བཟུང་བའི་ཡུལ་ནི་ཕྱོགས་ཆ་དྲུག་དང་། གཅིག་དང་དུ་བྲལ་གྱིས་གནོད་པས་རང་བཞིན་མེད་ལ། ནང་འཛིན་པའི་སེམས་ནི། གཅིག་དང་དུ་མ་ལ་སོགས་པས་མི་གནོད་པས། སྐད་ཅིག་མ་དོན་དམ་དུ་འདོད་དོ། །དེ་དགག་པ་ནི། ཕྱི་བཟུང་བའི་ཡུལ་ལ་ཕྱོགས་ཆ་དྲུག་གིས་གནོད་པ་བཞིན་དུ། ནང་འཛིན་པའི་སེམས་ལ་ཡང་། སྐད་ཅིག་མ་དུས་ཀྱི་ཆས་བཤིག་པས་ཅི་སྟེ་མི་གནོད། གནོད་ལུགས་ཀྱང་ཉན་ཐོས་ཀྱི་སྐབས་སུ་བཀག་པ་བཞིན་ནོ། །གཞན་ཡང་ཁྱོད་འཛིན་པའི་སེམས་སྐད་ཅིག་མ་དོན་དམ་དུ་འདོད་པ་དེ། ཡུལ་ཡོད་ནས་འཛིན་ནམ། མེད་ཀྱང་འཛིན། ཡོད་ནས་འཛིན་ན་བཟུང་ཡུལ་མ་གྲུབ་པའི་དམ་བཅའ་བུད། མེད་ཀྱང་འཛིན་ན་འཁྲུལ་པར་ཐལ། ཡང་ཤེས་པ་ནང་གི་ཆ་ལ་བཟུང་འཛིན་དུ་འདོད་དེ། ཡུལ་མེད་དོ་ཞེ་ན། འོ་ན་ཤེས་པ་ནང་གི་ཆ་དེས་དུས་མཉམ་དུ་འཛིན་ནམ། དུས་ཐ་དད་དུ་འཛིན། དུས་མཉམ་དུ་འཛིན་ན། ཤེས་རྒྱུད་ཆ་གཉིས་ཡོད་པར་ཐལ། དུས་ཐ་དད་འཛིན་ན། གཟུང་བ་ཡོད་ཙ་ན་འཛིན་པ་མ་སྐྱེས་པས། གཟུང་འཛིན་མི་བསྟུབ་བོ། །ཏིང་ངེ་འཛིན་ནི། རྟེན་འབྲེལ་བཅུ་གཉིས་ལུགས་ལས་ཟློག་པའི་སྒོ་ནས་མ་རིག་པའི་གཉེན་པོར་རིག་པའི་ཡེ་ཤེས་ཕྲ་མོ་བསྒོམ་པའོ། །སྤྱོད་པ་ཡང་། སངས་རྒྱས་མི་བཞུགས་པའི་ཞིང་ཁམས་སུ་རྫུ་འཕྲུལ་གྱིས་སེམས་ཅན་གྱི་དོན་བྱེད་པའོ། །འབྲས་བུ་ནི། ཡིད་བཞིན་བདེ་བ་མཆོག་གིས་ཐོས་པའོ། །ཐེག་པ་ཆེན་པོ་ལ་གཉིས་ཏེ། རྒྱུ་མཚན་ཉིད་ཀྱི་ཐེག་པ་དང་། འབྲས་བུ་གསང་སྔགས་ཀྱི་ཐེག་པའོ། །རྒྱུ་མཚན་ཉིད་ཀྱི་ཐེག་པ་ལ་གཉིས་་ཏེ། ཐེག་པ་ཆེན་པོ་སེམས་ཙམ་དང་། དབུ་མའོ། །སེམས་ཙམ་ལ་བཞི་སྟེ། ངོ་བོ་ནི། ཆོས་ཐམས་ཅད་སེམས་ཙམ་དུ་སྨྲ་བའོ། །ངེས་ཚིག་ནི། ཕྱི་རོལ་གྱི་དོན་འདི་མི་བདེན་ཏེ། རང་གི་སེམས་ཀྱི་སྣང་བ་ཙམ་དུ་འདོད་པས་ན། སེམས་ཙམ་མོ། །དེ་ཡང་ཕལ་ཆེན་ལས། ཀྱེ་རྒྱལ་བའི་སྲས་དག །ཁམས་གསུམ་པོ་འདི་དག་ནི་སེམས་ཙམ་མོ། །ཞེས་སོ། །དབྱེ་ན། རྣམ་བདེན་དང་། རྣམ་རྫུན་ནོ། །བསྡུ་ན། སེམས་ཙམ་ཞེས་པ་གཅིག་ཏུ་འདུས་སོ། །དེ་ལ་བཞི་སྟེ། ལྟ་བ་དང་། སྒོམ་པ་དང་། སྤྱོད་པ་དང་། འབྲས་བུའོ། །དང་པོ་ལྟ་བ་ནི་བཞི་སྟེ། ཉན་ཐོས་བས་བརྟགས་པའི་བཟུང་འཛིན་དོན་དམ་པར་ཡོད་པ་བཀག་ནས། ཆོས་ཐམས་ཅད་སེམས་ཙམ་ཡིན་ལ། སེམས་ནི་རང་རིག་རང་གསལ་མྱོང་བ་གཉིས་མེད་ཀྱི་ཤེས་པ་མར་མེ་རླུང་གིས་མ་སྐྱོད་པ་ལྟ་བུ་གཅིག་དོན་དམ་པར་འདོད་དོ། །འོ་ན་ཕྱི་རོལ་གྱི་སྣང་བ་འདི་ཇི་ལྟར་ཡིན་ཞེ་ན། འཁོར་བ་ཐོག་མ་མེད་པ་ནས་མ་རིག་པ་མཐུ་བརྟས་པ་ལས་བྱུང་བའི་བག་ཆགས་ཀྱིས་སྣང་བ་འདོད་དོ། །རང་རིག་དོན་དམ་དུ་འགྲུབ་པར་ཅིས་ཤེས་ཞེ་ན། རང་རིག་ཙམ་ཞིག་ཡོད་པར་མྱོང་བས་ཤེས་ལ་དེ་ལ་གཟུང་འཛིན་གྱིས་སྟོང་པར་འཐད་པ་རྗེས་དཔག་གིས་གྲུབ་སྟེ། ཉན་ཐོས་་ཀྱི་གཟུང་འཛིན་དོན་དམ་དུ་འདོད་པ་བཀག་པ་བཞིན་ནོ། །དེ་ལ་རིག་པས་མི་གནོད་པས་ན་བདེན་པ་ཡོད་པ་ཡིན་ནོ། །དེ་ལ་མཚན་ཉིད་གསུམ་གྱི་འཇོག་ལུགས་ནི། ཕྱི་རོལ་གྱི་ཡུལ་དུ་རྒྱུ་རྐྱེན་རྟེན་འབྲེལ་གྱིས་བསྐྱེད་པ་ནི་གཞན་དབང་། དེ་ལ་གཟུང་འཛིན་མེད་པ་ལ་ཡོད་པར་སྒྲོ་བཏགས་པ་ནི་ཀུན་བརྟགས། དེ་ལ་ཡང་དག་པར་ན་གཟུང་འཛིན་གྱིས་སྟོང་པར་ཤེས་ན་ཡོངས་གྲུབ་བོ། །སེམས་ཙམ་ལ་དབྱེ་ན། རྣམ་བདེན་དང་། རྣམ་རྫུན་ནོ། །རྣམ་བདེན་པ་ནི་ཕྱི་རོལ་གྱི་དོན་འདི་བདེན་པར་གྲུབ་པ་མེད་ཞེས་པའི་རྣམ་པ་ཙམ་ཡིན་ཏེ། ཤེས་པའི་རྣམ་པ་ཙམ་དུ་བདེན་པར་འདོད་པའོ། །རྣམ་བརྫུན་པ་ནི། ཕྱི་རོལ་གྱི་དོན་འདི་བདེན་པར་མ་གྲུབ་སྟེ་ཤེས་པའི་རྣམ་པ་ཙམ་ཡིན་ལ། ཤེས་པའི་རྣམ་པ་ཙམ་དུ་ཡང་མི་བདེན་ཏེ་བརྫུན་པ་དངོས་མེད་དུ་འདོད་དོ། །རྣམ་བདེན་པ་ལ་ཡང་གསུམ་སྟེ། སློབ་དཔོན་ཆོས་ཀྱི་ཟླ་བའི་བཞེད་ཀྱི་ཤེས་པ་ཡང་གཅིག་ལ། རྣམ་པ་ཡང་གཅིག་ཏུ་འདོད་པའོ། །དེ་ཡང་རྣམ་པ་ཐམས་ཅད་གསལ་བའི་ངོ་བོར་གཅིག །ཤེས་པ་ཐམས་ཅད་རང་རིག་གི་ངོ་བོ་གཅིག་ཟེར་རོ། །དེ་དགག་པ་ནི་རྣམ་པ་ཐམས་ཅད་གཅིག་པ་ཡང་མི་འཐད་དེ། དུ་མར་སྣང་ཞིང་ཕྱོགས་ཆ་དྲུག་ལ་སོགས་པར་དབྱེ་བ་ཡོད་པའི་ཕྱིར་རོ། །ཁོ་ན་རེ། དུ་མར་སྣང་ཡང་ངོ་བོ་གཅིག་པ་ཡིན་ཟེར་ན་འོ་ན་མུ་སྟེགས་པ་ན་རེ། ཡན་ལག་ཅན་་གྱི་རྫས་བྱ་བ་དངོས་པོ་གཅིག་གིས་ཐམས་ཅད་ལ་ཁྱབ་པ་གཅིག་ཡོད་ཟེར་བ་དེ་ཅིས་འགེགས། མི་འགེགས་ན་སེམས་ཙམ་མ་ཡིན་ཏེ་ཕྱི་རོལ་གྱི་དོན་ཁས་བླངས་པར་ཐལ། ཁོ་ན་རེ་བུམ་པ་ལྟ་བུའི་རྫས་གཅིག་ལ། ཆ་ཤས་དུ་མ་དང་བཅས་ནས་འབུག་པས། ཡན་ལག་ཅན་གྱི་རྫས་མི་གྲུབ་བོ་ཞེ་ན། འདིར་ཡང་སྣང་ལ་ཆ་ཤས་དུ་མ་དང་བཅས་པ་གཅིག་མི་འགྲུབ་བོ། །དུ་མར་སྣང་ཡང་གཅིག་ཏུ་བདེན་ཟེར་ན། བུམ་པ་ལ་ཆ་ཤས་དུ་མར་སྣང་ཡང་། ཡན་ལག་ཅན་གྱི་རྫས་གཅིག་ཏུ་བདེན་ཏེ་ཁྱད་མེད་དོ། ཤེས་པ་རང་རིག་གཅིག་ཏུ་མི་འཐད་དེ། འདས་མ་འོངས་ལ་སོགས་པའི་དུས་ཀྱི་དབྱེ་བ་ཡོད་པའི་ཕྱིར་རོ། །དུས་ཀྱི་དབྱེ་བ་ཡོད་ཀྱང་ཤེས་པའི་ངོ་བོ་གཅིག་གོ་ཞེ་ན། འོ་ན་མུ་སྟེགས་པའི་བདག་རྟག་པ་མི་འགྱུར་བ་ཅིས་འགེགས། རིམ་གྱིས་དང་གཅིག་ཆར་གྱི་དོན་བྱེད་ནུས་པས་སྟོང་པའི་ཕྱིར། བདག་རྟག་པ་མི་འགྲུབ་ཞེ་ན། འདིར་ཡང་འདས་མ་འོངས་ལ་སོགས་པའི་དུས་ཀྱི་དབྱེ་བ་ཡོད་པའི་ཕྱིར། རང་རིག་གཅིག་མི་འགྲུབ་བོ། །ཁོ་ན་རེ། འདས་མ་འོངས་ལ་སོགས་པ་ཤེས་པའི་གནས་སྐབས་ཙམ་ལས་རྟག་པ་ཡིན་གྱིས། དེ་དག་ཀྱང་ཤེས་པའི་ངོ་བོར་གཅིག་གོ་ཞེ་ན། འདི་ཡང་རིམ་གྱིས་པ་དང་། ཅིག་ཆར་བས་དོན་བྱེད་པས་རྟག་པའི་གནས་སྐབས་འགྱུར་བ་ཙམ་ལ་བརྟགས་པ་ཡིན། རྟག་པའི་ངོ་བོ་ལ་འགྱུར་བ་མེད་དེ། ཤིན་ཏུ་འདྲའོ། །ཡང་སློབ་དཔོན་ཤཱཀྱ་བཤེས་གཉེན་གྱིས་བཞེད་པས། ཤེས་པ་ཡང་དུ་མ་ལ། སྣང་བ་ཡང་དུ་མར་བཞེད་དེ། ཡུལ་གཅིག་ཉེ་བར་གྱུར་པ་ན། དེར་འཛིན་པའི་ཤེས་པ་ཡང་གཅིག་སྐྱེ། ཡུལ་གཉིས་ཉེར་བས་གྱུར་པ་ན། དེར་འཛིན་པའི་ཤེས་པ་གཉིས་སྐྱེ་བར་འདོད་པ་ཡིན་ནོ། །དེ་དགག་པ་ནི། ཡུལ་དང་ཤེས་པ་གཉིས་ཀ་དུ་མར་བདེན་ན། དུ་མའི་ཁྱབ་བྱེད་གཅིག་བདེན་པར་གྲུབ་བམ་མ་གྲུབ། གཅིག་བདེན་པར་གྲུབ་བ་དུ་མར་བདེན་པ་ཡང་འགལ། གཅིག་བདེན་པར་མ་གྲུབ་ན་ཁྱབ་བྱེད་གཅིག་པས། ཁྱབ་བྱ་དུ་མར་ཡང་མི་འགྲུབ་བོ། །ཡང་ཡུལ་དང་ཤེས་པ་གཉིས་ཀ་དུ་མའི་བདག་ཉིད་དུ་བདེན་ན། རང་སྣང་འདི་གཏན་མེད་དུ་ཐལ། རང་སྣང་མེད་པ་འདོད་པ་ཡིན་ཞེ་ན། འོ་ན་རྡུལ་ཕྲ་རབ་ལ་ཕྱོགས་ཆས་དབྱེ་མི་དགོས་པར་ཐལ་ལོ། །ཡང་སློབ་དཔོན་ཤེས་རབ་འབྱུང་གནས་སྦས་པའི་བཞེད་པས། རྣམ་པ་དུ་མ་ཤེས་པ་གཅིག་གི་ངོ་བོར་གནས་པར་བཞེད་དོ། །རྣམ་པ་ནི་དཀར་དམར་སྣ་ཚོགས་སུ་སྣང་ཡང་། ཤེས་པ་གཅིག་གི་བདག་ཉིད་དུ་བདེན་པ་ཡིན་ཟེར་རོ། །དེ་དགག་པ་ནི། ཚོར་བ་བདེ་སྡུག་གཉིས་ཀྱང་རྫས་གཅིག་ཡིན་བྱ་ཡིས། དེ་ཅིས་འགེགས། རྫས་གཅིག་པ་འདོད་པ་ཡིན་ན། ཚོར་བ་དབྱེ་བ་མེད་པར་ཐལ། ཁོ་ན་རེ། བདེ་སྡུག་རྫས་གཅིག་ཏུ་མི་གཏུབ་ཏེ་མྱོང་བ་དང་འགལ་ཞེ་ན། ཁྱོད་ཀྱི་རྣམ་པ་དུ་མ་ཤེས་པ་གཅིག་གི་ངོ་བོར་བདེན་ན། ཤེས་པ་དུ་མར་འཆར་བ་དང་འགལ། དུ་མར་སྣང་བ་ཙམ་ཡིན། ངོ་བོ་ལ་དུ་མ་མེད་ཟེར་ན། ཚོར་བ་ཡང་བདེ་སྡུག་དུ་སྣང་བ་ཙམ་ཡིན། ངོ་བོ་ལ་བདེ་སྡུག་མེད་དོ། །བདེ་སྡུག་མེད་པ་འདོད་ཐོག་ཞེ་ན། མཐོ་རིས་དང་ངན་འགྲོ་ཁྱད་མེད་པར་ཐལ་ལོ། །བདེ་སྡུག་མེད་པའི་ཕྱིར་རོ། །ཡང་རྣམ་བདེན་པ་ལ་སྤྱི་སྐྱོན་འདི་ཡང་ཡོད་དེ། ཁྱེད་རྣམས་བདེན་པ་ལྟར་ན། ཤེས་པའི་རྣམ་པ་ཐམས་ཅད་བདེན་པར་འདོད་པའི་ཕྱིར། འཁྲུལ་རྒྱུན་ཆད་པར་ཐལ་ལོ། །ཁོ་ན་རེ། རགས་པ་སྣང་བ་བདེན་ཀྱང་རགས་པར་གྲུབ་པ་མི་བདེན་ནོ་ཞེ་ན། འོ་ན་སྣང་བ་ལས་མ་གཏོགས་པའི་གྲུབ་པ་གཅིག་ལོགས་ན་ཡོད་པར་ཐལ། དེ་འདོད་ན་ཤེས་པ་ལ་ཡུལ་བདེན་རྫུན་གཉིས་ཡོད་པར་ཐལ་ལོ། །ཡང་རྣམ་རྫུན་པ་ནི། ཤེས་པ་ནི་གཟུང་འཛིན་དང་བྲལ་བའི་རང་རིག་དུ་བདེན་ལ། ཕྱི་རོལ་གྱི་དོན་ནི་གཅིག་དང་དུ་མ་ལ་སོགས་པས་གནོད་པས་མི་བདེན་ཏེ། རྫུན་པ་དངོས་མེད་ཡིན་ཟེར་རོ། །འོ་ན་ཕྱི་རོལ་གྱི་དོན་མེད་ན། ད་ལྟ་རགས་པར་སྣང་བ་འདི་ཇི་ལྟར་ཡིན་ཟེར་ན། མ་རིག་པ་འཁྲུལ་པའི་རྒྱུ་ལས་གྲུབ་པ། ཤེས་པ་ཡོད་པའི་རྣམ་པ་གསལ་བའི་འགྲོག་ལ། མེད་པའི་རྣམ་པ་ཡང་གསལ་བ་ཡིན་ཏེ། བཞིན་དང་མེ་ལོང་ལྟ་བུ་ཡིན་ཟེར་རོ། །འོ་ན་འཁྲུལ་པ་ཟད་པའི་སངས་རྒྱས་ལྟ་བུ་ལ་གསལ་ལམ་མི་གསལ་བྱས་པས། རྣམ་རྫུན་དྲི་བཅས་པ་ན་རེ། སངས་རྒྱས་ཀྱི་ས་ན་ཡང་གསལ་ལོ་ཟེར་རོ། །དེ་ལྟར་ན་འཁྲུལ་སྣང་གི་རྒྱུ་མ་རིག་པ་སྤངས་སམ་མ་སྤངས། མ་སྤངས་ན་སངས་རྒྱས་མ་ཡིན་པར་ཐལ། སྤངས་ན་འཁྲུལ་པ་འདི་མི་སྣང་བར་རིགས་སོ། །འོ་ན་སངས་རྒྱས་འཁྲུལ་པར་མི་འགྱུར་རམ་བྱས་པས། རྣམ་པ་གསལ་ཀྱང་མི་བདེན་པར་ཤེས་པས་འཁྲུལ་བར་མི་འགྱུར་རོ། །ཟེར་རོ། །དེ་ལྟར་མ་རིག་པ་སྤངས་ཀྱང་འབྲས་བུ་འཁྲུལ་སྣང་མ་སྤངས་པར་འགྱུར་རོ། རྣམ་བརྫུན་དྲི་མེད་པ་ན་རེ། ཡུལ་རང་སྣང་འདི་ཤེས་པའི་འཁྲུལ་པའི་ཆ་ཡིན་པས། སངས་རྒྱས་ལ་འཁྲུལ་པའི་རྒྱུན་ཆད་པས། རྣམ་པ་གསལ་བ་མེད་དོ་ཟེར་རོ། །དེ་ལྟར་ན་ཤེས་བྱ་ཇི་སྙེད་པ་མེད་པར་ཐལ། འཁྲུལ་པ་མི་གསལ་བའི་ཕྱིར་རོ། །དེ་རྣམས་སྤྱིར་དགག་པ་ནི་གཟུང་འཛིན་དང་བྲལ་བའི་རང་རིག་དོན་དམ་དུ་གྲུབ་ལ། ཕྱི་རོལ་གྱི་དོན་མི་བདེན་པར་གང་གིས་ཤེས། ཁོ་ན་རེ། རང་རིག་ཙམ་གཅིག་ཡོད་པར་མྱོང་བས་གྲུབ་ལ། དེ་ལ་གཟུང་འཛིན་གྱིས་སྟོང་པར་གྲུབ་པ་རྗེས་དཔག་གིས་གྲུབ་སྟེ། ཉན་ཐོས་བཀག་པ་བཞིན་ནོ། །ཕྱི་རོལ་གྱི་དོན་གཟུགས་ཅན་ཡིན་པ་དང་། གཅིག་དུ་བྲལ་ལ་སོགས་པས་གནོད་པས་མི་བདེན་ནོ་ཟེར། དེ་ལྟར་རང་རིག་ཙམ་ཞིག་མྱོང་བས་གྲུབ་པས་བདེན་ནོ། །ཕྱི་རོལ་ཀྱང་རྣམ་པ་གསལ་བ་ཙམ་གཅིག་གྲུབ་པ་ཅི་མི་བདེན། ཕྱི་རོལ་གྱི་དོན་གཟུགས་ཅན་ཡིན་པས་གཅིག་དང་དུ་མ་ལ་སོགས་པའི་གནོད་པས་མི་བདེན་ཟེར་ན། དེ་ལྟར་ན་ཤེས་པ་ཡང་མྱོང་བ་ཙམ་གཅིག་ཡོད་པ་དེ། གཅིག་ཏུ་མྱོང་ངམ། དུ་མར་མྱོང་། གཅིག་ཏུ་མྱོང་ན་གཅིག་པོ་དེ་ཆ་ཤས་དང་བཅས་པར་མྱོང་ངམ། ཆ་ཤས་དང་བྲལ་བར་མྱོང་། ཆ་ཤས་དང་བཅས་པ་མྱོང་ན། ཆ་ཤས་དང་བཅས་པའི་ཕྱིར་གཅིག་མ་ཡིན་ཏེ་དུ་མར་ཐལ། ཆ་ཤས་དང་བྲལ་བ་གཅིག་ཏུ་མྱོང་ན། བདེ་སྡུག་ཆ་ཤས་ཀྱི་དབྱེ་བ་མེད་པར་ཐལ། ཡང་ན་བདེ་སྡུག་མྱོང་བ་མ་ཡིན་པར་ཐལ་ལོ། །དུ་མར་མྱོང་ན། དུ་མ་དེ་གཅིག་ལ་ལྟོས་སམ་མ་ལྟོས། ལྟོས་ན། དུ་མ་མི་འགྲུབ་དེ་གཅིག་ཏུ་ཐལ། མ་ལྟོས་ན་ཁྱབ་བྱེད་གཅིག་མ་འགྲུབ་པའི་ཕྱིར། ཁྱབ་བྱ་དུ་མ་ཡང་མི་འགྲུབ་པར་ཐལ། ཡང་འཛིན་བྱ་བདེན་པ་དང་གཟུང་བ་དངོས་མེད་འབྲེལ་བ་ཡོད་དམ་མེད། མེད་ན་ཡུལ་དེ་ཤེས་པ་ལ་སྣང་ངམ་མི་སྣང་། མི་སྣང་ན་མངོན་སུམ་གྱིས་གསལ། སྣང་ན་འབྲེལ་མེད་མཉམ་ལ། མིག་གི་ཡུལ་དུ་གཟུགས་སྣང་ལ། སྒྲ་མི་སྣང་བ་ཅིའི་ཕྱིར། དེ་བདག་པོའི་རྐྱེན་ཀྱིས་བྱེད་པའི་ལག་རྗེས་སོ་སོ་བ་ཡིན་ནོ་ཞེ་ན། འབྲལ་མེད་མཉམ་པོ་ལ། བྱེད་པའི་ལག་རྗེས་སོ་སོར་ཡོང་བ་ཅིའི་ཕྱིར་སྟེ་རྒྱུ་མཚན་མེད་དོ། །ཡང་འབྲེལ་བ་ཡོད་དོ་ཞེ་ན། བདག་གཅིག་འབྲེལ། དེ་ལས་བྱུང་བར་འབྲེལ། བདག་གཅིག་པ་ཡང་མི་འཐད་དེ། བདག་གཅིག་པ་ནི། ངོ་བོ་དབྱེར་མེད་པའི་ཚུལ་གྱིས་ཆོས་གཞན་མི་འདོར་བ་ཡིན་ལ། དངོས་པོ་དང་དངོས་མེད་ཕན་ཚུན་སྤང་འགལ་ཡིན་པས་བདག་གཅིག་ཏུ་མི་གཏུབ་བོ། །དེ་ལས་བྱུང་བས་འབྲེལ་ལམ་ཞེ་ན། དེ་ལས་བྱུང་བ་ནི་རྒྱུ་འབྲས་ཀྱི་ཚུལ་གྱིས་ཆོས་གཞན་མི་འདོར་བ་ཡིན་ལ། དངོས་མེད་ནི་རྒྱུར་ཡང་མི་རུང་ལ། འབྲས་བུར་མི་རུང་བས་འགལ་ལོ། །སེམས་ཙམ་གྱི་ཏིང་ངེ་འཛིན་ནི། རང་རིག་རང་གསལ་གྱི་ངང་ལ་མཉམ་པར་འཇོག་པའོ། །སྤྱོད་པ་ནི། ཕ་རོལ་ཏུ་ཕྱིན་པ་དྲུག་སེམས་ཅན་གྱི་དོན་དུ་སྤྱོད་པའོ། །འབྲས་བུ་ནི། བསྐལ་པ་གྲངས་མེད་གསུམ་ན་ཀུན་ཏུ་འོད་ཀྱི་ས་ཐོབ་པའོ། །ཐེག་པ་ཆེན་པོ་དབུ་མ་ལ་ཡང་བཞི་སྟེ། ལྟ་བ་དང་། སྒོམ་པ་དང་། སྤྱོད་པ་དང་། འབྲས་བུའོ། །དེ་རྣམས་ངེས་པར་བྱ་བ་ལ་གསུམ་སྟེ། གཞི་དབུ་མ། ལམ་དབུ་མ། འབྲས་བུ་དབུ་མའོ། །གཞི་དབུ་མ་ལ་བཞི་སྟེ། ངེས་པར་འབྱེད་པའི་གཞུང་ལུགས་ཀྱི་དབྱེ་བ་དང་། དེའི་དོན་བདེན་པ་གཉིས་གཏན་ལ་དབབ་པ་དང་། གཏན་ལ་འབེབ་པར་བྱེད་པའི་དོན་ལྔ་ངོས་བཟུང་བ་དང་། རྗེས་དཔག་གི་འཇུག་ཡུལ་བསྟན་པའོ། །ངེས་པར་འབྱེད་པའི་གཞུང་ལུགས་ལ་གསུམ་སྟེ། གཞུང་ཕྱི་མོ་དང་། ཕྱོགས་འཛིན་པ་དག་། གཞུག་ཕྱི་མོའི་ཡང་ཕྱི་མའོ། །དེ་ལ་གཞུང་ཕྱི་མོ་ནི། སློབ་དཔོན་ཀླུ་སྒྲུབ་ཀྱིས་མཛད་པའི་རིགས་པའི་ཚོགས་དྲུག་སྟེ། དབུ་མ་རྩ་བ་ཤེས་རབ། སྟོང་ཉིད་བདུན་ཅུ་པ། རིགས་པ་དྲུག་ཅུ་པ། གང་ལ་མི་འཇིགས་པ། རྩོད་པ་བཟློག་པ། ཞིབ་མོ་རྣམ་ཐག་གོ །སློབ་དཔོན་ཨཱརྻ་དྷེ་བའི་དབུ་མ་བཞི་བརྒྱ་པ་དང་། ལག་པའི་ཚད་རྣམས་སོ། །གཞུང་ཕྱི་མོའི་ཕྱི་མོ་ནི། མདོ་རྒྱས་འབྲིང་གསུམ། མདོ་ཕྲན་བཅུ་གསུམ་དང་བཅས་པའོ། །ཕྱོགས་འཛིན་པའི་དབུ་མ་ལ་གསུམ་སྟེ། མདོ་སྡེ་སྤྱོད་པའི་དབུ་མ་དང་། རྣལ་འབྱོར་སྤྱོད་པའི་དབུ་མ་དང་། དབུ་མ་སྤྱི་གཞུང་གི་ཞལ་མཆུ་པའོ། །མདོ་སྡེ་སྤྱོད་པའི་དབུ་མ་ནི། བདེན་གཉིས་མཁན་པོ་ཡེ་ཤེས་སྙིང་པོའི་ཞལ་ནས་ཟབ་མོ་དོན་གྱི་མཐར་ཐུག་པ་ལ་ཡུལ་ཡང་མེད་ལ་སེམས་ཀྱང་མེད། ཀུན་རྫོབ་ཙམ་དུ་སེམས་ལས་ཐ་དད་པའི་ཕྱི་རོལ་གྱི་ཡུལ་ཡང་ཡོད་པར་འདོད་དེ། འདོད་ལུགས་ཉན་ཐོས་མདོ་སྡེ་པ་དང་མཐུན་ནོ། །རྣལ་འབྱོར་སྤྱོད་པའི་དབུ་མ་ནི། རྒྱན་གྱི་མཁན་པོ་ཞི་འཚོའི་ཞལ་ནས། ཟབ་མོའི་དོན་གྱི་མཐར་ཐུག་པ་ལ་ཡུལ་ཡང་མེད་ལ། སེམས་ཀྱང་མེད། ཀུན་རྫོབ་ཙམ་དུ་སྣང་བ་རང་རིག་གི་སེམས་ཀྱིས་སྣང་བར་འདོད་དེ། སེམས་ཙམ་དང་མཐུན་ནོ། །དབུ་མ་སྤྱི་གཞུང་གི་ཞལ་མཆུ་བ་ནི། སྣང་བ་མཁན་པོ་ཀ་མ་ལ་ཤཱི་ལིའི་ཞལ་ནས། དོན་དམ་མཐར་ཐུག་པ་ལ་ཡུལ་ཀྱང་མེད་ལ། སེམས་ཀྱང་མེད། སྤྲོས་པ་ཐམས་ཅད་བྲལ་བས་ཆོག་ལ། ཀུན་རྫོབ་ཏུ་ཕྱི་རོལ་གྱི་དོན་ཡོད་པར་འདོད་པ་དང་། སེམས་སུ་འདོད་པ་གཉིས་གང་ལྟར་བྱས་ཀྱང་ཆོག །ཕྱི་རོལ་གྱི་དོན་ཡོད་ན་ཡང་ཡོད། མེད་ན་ཡང་མེད་ཟེར་རོ། །དེ་རྣམས་ནི་རབ་ཏུ་དབྱེ་བའི་གཞུང་ལུགས་སོ། །དེའི་བདེན་པ་གཉིས་གཏན་ལ་དབབ་པ་ལ་དགུ་སྟེ། བདེན་པ་གཉིས་ཀྱི་དབྱེ་བའི་གཞི་གཅིག་དང་། དབྱེ་བའི་དོན་གཉིས་དང་། དབྱེ་བའི་རྒྱུ་མཚན་གསུམ་དང་། གྲངས་ངེས་པ་བཞི་དང་། གོ་རིམ་ངེས་པ་ལྔ་དང་། རྒྱས་པར་དབྱེ་བ་དྲུག་དང་། སོ་སོའི་མཚན་ཉིད་བདུན་དང་། མིང་གི་དོན་བརྒྱད་དང་། གཅིག་དང་ཐ་དད་ཀྱིས་བརྟག་པ་དང་དགུའོ། །དང་པོ་དབྱེ་བའི་གཞི་ནི། ཁ་ཅིག་ན་རེ། མཁས་པ་དང་མི་མཁས་པའི་བློ་ཡུལ་ལས་ཕྱེ་ཟེར། ཁ་ཅིག་ན་རེ། ཤེས་བྱ་ཙམ་པོ་ལས་ཕྱེ་ཟེར། ཁ་ཅིག་ན་རེ། ཤེས་པ་དང་ཤེས་བྱ་འཚོགས་པ་ལས་ཕྱེ་ཟེར། གཉིས་པ་དབྱེ་བའི་དོན་ནི། དོན་དམ་པའི་བདེན་པ་དང་། ཀུན་རྫོབ་ཀྱི་བདེན་པའོ། །གསུམ་པ་དབྱེ་བའི་རྒྱུ་མཚན་ནི་སྣང་བའི་ཤེས་ངོ་ལ་ལྟོས་ནས་ཀུན་རྫོབ། སྟོང་པའི་ཤེས་ངོ་ལ་ལྟོས་ནས་དོན་དམ་མོ། །བཞི་བ་གྲངས་ངེས་པ་ནི། སྤྱིར་ཤེས་བྱ་ལ་འཁྲུལ་མ་འཁྲུལ་གཉིས་སུ་ངེས་པས་འཁྲུལ་པའི་བློ་ཡུལ་ལ་ལྟོས་ནས་ཀུན་རྫོབ། མ་འཁྲུལ་པའི་བློ་ཡུལ་ལྟོས་ནས་དོན་དམ་མོ། །ལྔ་པ་གོ་རིམ་ངེས་པ་ནི། ཀུན་རྫོབ་སོ་སོ་སྐྱེ་བོའི་བློ་ཡུལ་ལྟོས་ནས་དང་པོ་སྟོན། དོན་དམ་ནི་འཕགས་པའི་བློ་ཡུལ་ལ་ལྟོས་ནས་ཐ་མར་སྟོན་ནོ། །དྲུག་པ་རྒྱས་པར་དབྱེ་ན་བཞི་སྟེ། ཀུན་རྫོབ་དང་དོན་དམ་གཉིས་ལ་གཉིས་གཉིས་སྟེ་བཞིའོ། །དང་པོ་ཀུན་རྫོབ་ལ་ཡང་དག་པའི་ཀུན་རྫོབ་དང་། ལོག་པའི་ཀུན་རྫོབ་གཉིས་སོ། །དོན་དམ་ལ་ཡང་། རྣམ་གྲངས་ཀྱི་དོན་དམ་པའི་བདེན་པ་དང་། རྣམ་གྲངས་མ་ཡིན་པའི་དོན་དམ་པའི་བདེན་པའོ། །བདུན་པ་སོ་སོའི་མཚན་ཉིད་ཀྱང་ཀུན་རྫོབ་སྤྱིའི་མཚན་ཉིད་ནི། བློའི་ཡུལ་དུ་གྱུར་པའི་ཆོས་ཅན་མཚན་མ་ཅན་ནོ། །ལོག་པའི་ཀུན་རྫོབ་ཀྱི་མཚན་ཉིད་ནི། སྣང་བ་ལ་སྣང་བ་བཞིན་དུ་དོན་བྱེད་མི་ནུས་པ་དེ། སྲབ་མོ་ལྟར་སྣང་བ་ལྟ་བུའོ། །ཡང་དག་པའི་ཀུན་རྫོབ་ཀྱི་མཚན་ཉིད་ནི། སྣང་བ་ལ་སྣང་བ་བཞིན་དུ་དོན་བྱེད་ནུས་པ་སྟེ། མེ་ལ་མེར་སྣང་བ་བཞིན་ནོ། །ཡང་ན་ཆོས་བཞི་ལྡན་ཏེ། རྒྱུ་རྐྱེན་ལས་སྐྱེས་པ། དབང་ཡུལ་གྱི་སྣང་བ། མཐུན་པར་སྣང་བ། བརྟགས་ན་བདེན་པ། དོན་བྱེད་ནུས་པའོ། །དོན་དམ་གྱི་བདེན་པ་སྤྱིའི་མཚན་ཉིད་ནི། སྤྲོས་པ་དང་བྲལ་བའོ། །རྣམ་གྲངས་ཀྱི་དོན་དམ་པའི་བདེན་པ་ནི། སྤྲོས་པ་ཕྱོགས་རེ་དང་བྲལབའོ། །རྣམ་གྲངས་མ་ཡིན་པའི་དོན་དམ་པའི་བདེན་པ་ནི། སྤྲོས་པ་མཐའ་དག་དང་བྲལ་བའོ། །བརྒྱད་པ་མིང་དོན་ནི། ཀུན་རྫོབ་ནི། སམ་བྲི་ཏ་ཞེས་བྱ་སྟེ། ཡང་དག་ལ་སྒྲིབ་པའམ་ངན་པའི་སྒྲིབ་པ་མི་བསླུ་བའོ། །དོན་དམ་པ་ནི། པ་ར་མརྠ་ཞེས་བྱ་སྟེ། དོན་ཡང་མིན་ལ། དམ་པ་ཡང་མིན་པས་མི་བསླུ་བའོ། །གཅིག་དང་ཐ་དད་ཀྱི་བརྟག་པ་ལ་གཉིས་ཏེ། གཅིག་པ་ལ་བསྐལ་པའི་སྐྱོན་བཞི། ཐ་དད་པ་ལ་བསྐལ་པའི་སྐྱོན་བཞིའོ། །གཅིག་པ་ལ་བསྐལ་པ་སྐྱོན་བཞི་ནི། བདེན་པ་གཉིས་་གཅིག་ཏུ་འདོད་ན། ཀུན་རྫོབ་སོ་སོ་སྐྱེ་བོའི་མངོན་སུམ་དུ་འགྱུར་བ་བཞིན་དུ། དོན་དམ་ཡང་སོ་སོའི་སྐྱེ་བོས་མངོན་སུམ་དུ་འགྱུར་བར་ཐལ། དེ་འདོད་ན་གྲོལ་བར་ཐལ་ལོ། །གཉིས་པ་ཡང་ཀུན་རྫོབ་བློ་ཡུལ་དུ་བྱས་པས་ཟག་པ་འཕེལ་བ་བཞིན་དུ། དོན་དམ་ཡང་བློ་ཡུལ་དུ་བྱས་པས་ཀྱང་ཟག་པ་འཕེལ་བར་ཐལ་བས་གཅིག་པའི་ཕྱིར་རོ། །གསུམ་པ་དོན་དམ་ཉམས་སུ་བླངས་པས་གྲོལ་བ་བཞིན་དུ་ཀུན་རྫོབ་ཉམས་སུ་བླངས་པས་ཀྱང་གྲོལ་བར་ཐལ། གཅིག་པའི་ཕྱིར། བཞི་པ་ཀུན་རྫོབ་སྤྲོས་པ་དུ་མ་དང་བཅས་པ་བཞིན་དུ། དོན་དམ་ཀྱང་སྤྲོས་པ་དུ་མ་དང་བཅས་པས་ཐལ་ལོ། །གཅིག་པའི་ཕྱིར་རོ། །ཐ་དད་ན་ཡང་སྐྱོན་བཞི་ལས། དང་པོ་དོན་དམ་རྟོགས་ཀྱང་ཀུན་རྫོབ་ཀྱི་འཁྲུལ་སྣང་མི་སྤོངས་པར་ཐལ། ཐ་དད་པའི་ཕྱིར་རོ། གཉིས་པ་དོན་དམ་དེ་ཀུན་རྫོབ་ཀྱི་ཆོས་ཉིད་མ་ཡིན་པར་ཐལ། ཐ་དད་པའི་ཕྱིར་རོ། །གསུམ་པ་གང་ཟག་གཅིག་གི་རྒྱུད་ལ་ཀུན་ནས་ཉོན་མོངས་པ་དང་། རྣམ་པར་བྱང་བ་གཉིས་ཀ་འཚོགས་པར་ཐལ། ཐ་དད་པའི་ཕྱིར་རོ། །བཞི་པ་ཀུན་རྫོབ་དངོས་པོར་སྣང་བ་བཞིན་དུ། དོན་དམ་ཀྱང་དངོས་པོར་སྣང་བར་ཐལ། དངོས་པོའི་ལྡོག་ཕྱོགས་ཡིན་པའི་ཕྱིར་རོ། །དེས་འདིར་ངོ་བོ་གཅིག་ལ་ལྡོག་པ་ཐ་དད་པའམ། དེ་ཉིད་དང་གཞན་དུ་བརྗོད་དུ་མེད་པར་འདོད་པའོ། །གསུམ་པ་དེ་གཏན་ལ་འབེབས་པར་བྱེད་པའི་དོན་ལྔ་ངོས་བཟུང་བ་ནི། ཞི་བ་འཚོའི་རྒྱན་ལས། བདག་དང་གཞན་དུ་བརྗོད་དུ་མེད་པར་འདོད་པའོ། །གསུམ་པ་དེ་གཏན་ལ་འབེབས་པར་བྱེད་པའི་དོན་ལྔ་ངོས་བཟུང་བ་ནི། ཞི་བ་འཚོའི་རྒྱན་ལས། བདག་དང་གཞན་སྨྲའི་དངོས་འདི་དག །ཡང་དག་པར་ནི་གཅིག་པའམ། དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་གསུངས་པ་དང་། རྩོད་གཞིའི་ཆོས་ཅན། རྣམ་གཅོད་དགག་བྱ་དང་། ཡོངས་གཅོད་བསྒྲུབ་བྱ་དང་། འཐད་པ་གཏན་ཚིགས་དང་། ཁྱབ་པ་གཏན་ལ་འབེབས་པའི་དཔེའོ། །དང་པོ་རྩོད་གཞི་ཆོས་ཅན་ལ་དྲུག་སྟེ། ཆོས་ཅན་དུ་འགྲོ་ཚོོད་དང་། ཆོས་ཅན་ཀྱི་མཚན་ཉིད་དང་། དབྱེ་བ་དང་། བཞག་པའི་དུས་དང་། ངེས་པར་བྱེད་པའི་ཚད་མ་དང་། དེ་ལ་རྩོད་པའི་སྐྱོན་སྤང་བ་དང་དྲུག་གོ །དང་པོ་ཆོས་ཅན་དུ་འགྲོ་ཚོད་ནི། གཞན་སེལ་སྣང་བརྟགས་ཀྱི་སྒྲ་དོན་ཆ་མ་ཕྱེ་བའོ། ཆོས་ཅན་གྱི་མཚན་ཉིད་ནི། དགག་སྒྲུབ་གང་བྱེད་ཀྱང་དེ་ཉིད་ལ་གནོད་པ་མ་ཞུགས་ཤིང་ཤེས་འདོད་དང་ལྡན་པ་གཅིག་ཡིན་ཟེར། ཡང་ན་རྟེན་རྩོད་བྱེད་ཀྱི་གཞིར་གྱུར་པ་གཅིག་ཡིན་ནོ། །དབྱེ་ན་བཞི་སྟེ། སྣང་བ་ཆོས་ཅན་ནི། སྣང་བ་ཉམས་སུ་མྱོང་བ་ཆོས་ཅན་དུ་བཞག་ནས་རང་བཞིན་མེད་པར་བསྒྲུབ་པའོ། །བརྟག་པ་ཆོས་ཅན་ནི། རྣམ་རྟོག་ཡུལ་ལ་བདེན་པར་ཞེན་པ་དེ་ཆོས་ཅན་དུ་བཞག་ནས། རང་བཞིན་མེད་པར་སྒྲུབ་པའོ། །སྣང་བརྟག་ཆ་མ་ཕྱེ་བའི་ཆོས་ནི། སྣང་བ་ཉམས་སུ་མྱོང་བ་དང་། བརྟག་པ་གཉིས་ཆོས་ཅན་དུ་བཞག་ནས། རང་བཞིན་མེད་པར་སྒྲུབ་བའོ། །གྲགས་པ་ཆོས་ཅན་ནི། ཆོས་ཉིད་སྟོང་པ་ཉིད་ལ་སོགས་པ་གྲགས་ཚད་ཆོས་ཅན་དུ་བཞག་ནས། རང་བཞིན་མེད་པར་སྒྲུབ་པའོ། ཆོས་ཅན་དུ་བཞག་པའི་དུས་ནི། རྒོལ་བ་དང་། ཕྱི་རྒོལ་རྩོད་པའི་དུས་སོ། །ངེས་པར་འབྱེད་པའི་ཚད་མ་ནི། སྣང་བ་ཆོས་ཅན་ནི་དབང་པོའི་ཕྱུགས་ལས་ངེས། བརྟགས་པ་ཆོས་ཅན་ནི། རང་རིག་གི་ཤུགས་ལས་ངེས་སོ། །དེ་ལ་རྩོད་པ་སྤང་པ་ནི། འོ་ན་ཆོས་ཅན་དང་གཞན་གྱི་སྡེ་པས་བརྟགས་པའི་ལོག་རྟོག་ཡིན་ནོ། །དེ་ཆོས་ཅན་དུ་འཇོག་པའི་ཚེ། སྣང་བ་ཙམ་ཆོས་ཅན་དུ་འཇོག་གམ། སྣང་བའི་ཁྱད་པར་འགའ་ཞིག་ཆོས་ཅན་དུ་འཇོག །དང་པོ་ལྟར་ན་དེ་ཙམ་བློ་ལ་སྣང་བར་མི་ནུས་ལ། གཉིས་པ་ལྟར་ན་སྤྲོས་པ་མཐའ་དག་གཅོད་པའི་རིག་པར་མི་འགྱུར་རོ། །ཞེ་ན། དེའི་སྐྱོན་མེད་དེ། སྣང་བའི་ཁྱད་པར་འགའ་ཞིག་ཆོས་ཅན་དུ་བཞག་པས། ཀུན་གྱི་སྤྲོས་པ་ཆོད་དེ། འདམ་བུ་གཅིག་ཁོག་སྟོང་ན་ཀུན་ཀྱང་ཁོག་སྟོང་བཞིན་ནོ། །མདོ་ལས། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པར་ཤེས་པར་འགྱུར་རོ། །ཞེས་སོ། །གཉིས་པ་རྣམ་གཅད་དགག་བྱ་ལ་གཉིས་ཏེ། སྤྱི་དང་བྱེ་བྲག་གོ །དང་པོ་དགག་བྱ་སྤྱིའི་མཚན་ཉིད་ནི། དངོས་པོ་འམ། དངོས་མེད་ཀྱང་རུང་སྟེ། རིགས་པས་དཔྱད་ནས་རང་བཞིན་གྱི་ཁྱད་པར་འགའ་ཞིག་དང་ལྡན་པར་འདོད་པ་གང་རྙེད་པ་དེ་དགག་བྱ་ཡིན་ནོ། །དགག་བྱ་ལ་བྱེ་བྲག་ཏུ་ཕྱེ་ན་གཉིས་ཏེ། མེད་པ་དགག་པ་དང་། མ་ཡིན་པ་དགག་པའོ། །མེད་པ་དགག་པ་ནི། སོ་སོ་སྐྱེ་བོ་དང་། ཉན་ཐོས་པ། ཕྱི་རོལ་གྱི་དོན་དངོས་པོར་འདོད་པ་འགོགས་ལ། མ་ཡིན་པ་དགག་པ་ནི། སེམས་ཅན་རང་རིག་དོན་དམ་དུ་འདོད་པ་འགོགས་པའོ། །ཡོངས་སྤྱོད་བསྒྲུབ་བྱ་ལ་གཉིས་ཏེ། སྒྱུ་མ་ལྟ་བུ། རབ་ཏུ་མི་གནས་པའོ། །སྒྱུ་མ་ལྟ་བུ་ནི། སྣང་བའི་དངོས་པོར་བཀག་ནས། ཤུལ་དུ་སྒྱུ་མ་ཙམ་གཅིག་སྒྲུབ་པའོ། །རབ་ཏུ་མི་གནས་པ་ནི། སྣང་བའི་དངོས་པོར་འདོད་པ་བཀག་ནས་སྒྱུ་མ་ཙམ་དུ་ཡང་མི་འདོད་དེ་རབ་ཏུ་མི་གནས་པའོ། །བཞི་པ་འཐད་པ་གཏན་ཚིགས་ལ་ལྔ་སྟེ། རྒྱུ་འགོགས་པ་རྡོ་རྗེ་གཟེགས་མའི་གཏན་ཚིགས་དང་། འབྲས་བུ་འགོགས་པ་ཡོད་མེད་སྐྱེ་འགོགས་ཀྱི་གཏན་ཚིགས་དང་། རྒྱུ་འབྲས་བུ་གཉིས་ཀ་འགོགས་པ་མུ་བཞི་སྐྱེ་འགོགས་ཀྱི་གཏན་ཚིགས་དང་། རང་གི་ངོ་བོ་འགོགས་པ་གཅིག་དང་དུ་བྲལ་གྱི་གཏན་ཚིགས་དང་འགལ་ཟླ་བསྒྲུབས་ནས་འབྲེལ་ཟླ་འགོགས་པ་རྟེན་འབྲེལ་གྱི་གཏན་ཚིགས་སོ། །དང་པོ་རྒྱུ་འགོགས་པ་རྡོ་རྗེ་གཟེགས་མའི་གཏན་ཚིགས་ནི། སྣང་བ་ཆོས་ཅན། ཡང་དག་པར་ན་རྒྱུ་འབྲས་མེད་དེ། །མུ་བཞིའི་སྐྱེ་བ་དང་བྲལ་བའི་ཕྱིར། གཟུགས་ཅན་བཞིན། རྩ་བ་ཤེས་རབ་ལས། རང་ལས་མ་ཡིན་གཞན་ལས་མིན། །གཉིས་ཀ་ལས་མིན་རྒྱུ་མེད་མིན། །དངོས་པོ་གང་དང་གང་དག་ལ། །སྐྱེ་བ་ནམ་ཡང་ཡོད་མ་ཡིན། །ཞེས་སོ། གཏན་ཚིགས་མ་སྒྲུབ་ཞེ་ན། འོ་ན་རྒྱུ་འབྲས་ཡང་དག་ཏུ་ཡོད་དམ། ཡོད་ན་རང་ལས་སྐྱེའམ། གཞན་ལས་སྐྱེའམ། གཉིས་ཀ་ལས་སྐྱེའམ། རྒྱུ་མེད་ལས་སྐྱེ། རང་ལས་་སྐྱེ་ན་རང་གྲུབ་པ་ལས་སྐྱེའམ། མ་གྲུབ་པ་ལས་སྐྱེ། མ་གྲུབ་པ་ལས་སྐྱེ་ན། རྒྱུ་མེད་ལས་སྐྱེ་བ་མི་འཐད་དེ། རྒྱུ་མེད་རྐྱེན་ལ་མི་ལྟོས་ཕྱིར། རྟག་ཏུ་ཡོད་པའམ་མེད་པར་ཐལ། ཞེས་སོ། རང་གྲུབ་པ་ལས་སྐྱེ་ན། གྲུབ་པ་ལས་ཀྱང་སྐྱེ་དགོས་པའི་ཕྱིར་ཐུག་པ་མེད་པར་ཐལ་ལོ། །གཞན་ལས་སྐྱེ་ན། རྟག་པ་ལས་སྐྱེའམ། མི་རྟག་པ་ལས་སྐྱེ། རྟག་པ་ལས་སྐྱེ་ན། རིམ་གྱིས་སྐྱེའམ། གཅིག་ཆར་སྐྱེ། རིམ་གྱིས་སྐྱེ་ན། རྟག་པ་མི་འགྱུར་བ་ཡིན་ལ། རིམ་གྱིས་འགྱུར་བ་ཅན་ཡིན་པས། རྟག་པ་དང་འགལ་ལོ། །གཅིག་ཆར་སྐྱེ་ན་རྒྱུའི་དུས་ཉིད་ན་འབྲས་བུ་སྨིན་བར་ཐལ། གཅིག་ཆར་ཁ་ལ་རྒྱུ་འབྲས་གཅིག་དགོས་པའི་ཕྱིར་རོ། །འདོད་ན་མངོན་སུམ་གྱིས་གསལ་ལོ། གཞན་མི་རྟག་པ་ལས་སྐྱེ་ན། འདས་པ་ལས་སྐྱེའམ། མ་འོངས་པ་ལས་སྐྱེའམ། ད་ལྟ་བ་ལས་སྐྱེ། འདས་པ་ལས་སྐྱེ་བ་མི་འཐད་དེ། རྒྱུ་འབྲས་སྤྱད་ཟིན་པའི་ཕྱིར་རོ། །མ་འོངས་པ་ལས་སྐྱེ་བ་མི་འཐད་དེ། ཡུལ་ན་མེད་པའི་ཕྱིར་རོ། །ད་ལྟ་ལས་སྐྱེས་ན། དུས་མཉམ་ལས་སྐྱེའམ། དུས་ཐ་དད་ལས་སྐྱེ། དུས་མཉམ་ལ་ཕན་འདོགས་བྱེད་མེད་པས་སྐྱེ་མི་གཏུབ་བོ། །དུས་ཐ་དད་ལས་སྐྱེ་ན། རྒྱུ་འབྲས་ལ་ཕྲད་པ་ཡོད་དམ་མེད། ཕྲད་ན་དུས་མཉམ་དུ་འཕྲད་དམ། དུས་ཐ་དད་ཕྲད། དུས་མཉམ་དུ་ཕྲད་ན་རྒྱུ་འབྲས་ཀྱི་དམ་བཅའ་བུད། དུས་ཐ་དད་དུ་ཕྲད་ན། རྒྱུ་འབྲས་མི་གཏུབ་སྟེ། ཕན་གདགས་བྱ་དང་འདོག་བྱེད་མེད་པའི་ཕྱིར་རོ། །གཉིས་ཀ་ལས་སྐྱེ་ན། རང་གཞན་ལས་སྐྱེ་བ་མེད་པར་གཉིས་ཀ་ལས་ག་ནས་སྐྱེ། ཡང་རྒྱུ་མེད་ལས་སྐྱེ་ཟེར་ན། རྒྱུ་མེད་རྐྱེན་ལ་མི་ལྟོས་ཕྱིར། རྟག་ཏུ་ཡོད་པའང་མེད་པར་ཐལ་ཏེ། དུས་གློ་བུར་དུ་བྱུང་བས་རྒྱུ་འབྲས་མི་སྟུབ་བོ། །གཉིས་པ་འབྲས་བུ་འགོགས་པར་བྱེད་པ་ཡོད་མེད་སྐྱེ་འགོགས་ཀྱི་གཏན་ཚིགས་ནི། སེམས་ཙམ་རང་རིག་དོན་དམ་དུ་འདོད་པ་དེ་ཆོས་ཅན། ཡང་དག་པ་རང་བཞིན་མེད་དེ། འབྲས་བུ་ཡོད་མེད་ལས་མ་སྐྱེས་པའི་ཕྱིར་ནམ་མཁའ་བཞིན་ནོ། །དེ་ཡང་། ཡོད་པ་སྐྱེ་བ་རིགས་མིན་ཏེ། །མེད་པའང་ནམ་མཁའི་མེ་ཏོག་བཞིན། །དེ་ལྟར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་སོ། །གཏན་ཚིགས་མ་གྲུབ་ཞེ་ན། འོ་ན་འབྲས་བུ་གཅིག་སྐྱེ་བ་དེ་ཡོད་པ་ལས་སྐྱེའམ་མེད་པ་ལས་སྐྱེ། ཡོད་པ་ལས་སྐྱེ་ན་ཡོད་ན་ཅི་སྐྱེ་དགོས། ཁོ་ན་རེ། མ་ལེགས་པ་ལེགས་པར་བྱེད་པའམ། ཆུང་བ་ཆེ་བར་བྱེད་པ་ལ་སོགས་པའི་དགོས་པ་ཡོད་དོ་ཞེ་ན། འོ་ན་ཡོད་པ་ལས་སྐྱེ་བ་མ་ཡིན་ཏེ། ལེགས་པ་དང་ཆེ་བ་མེད་པའི་ཕྱིར་རོ། །མེད་པ་ལས་སྐྱེ་ན། མེད་པ་འབྲས་བུའི་ཆོས་སུ་མི་རིགས་པས་སྐྱེ་བ་མི་འཐད་དེ། གལ་ཏེ་མེད་པ་ལས་སྐྱེ་ན། རི་བོང་ལས་ར་སྐྱེ་བར་ཐལ་ལོ། །ཡང་མེད་པ་ལས་སྐྱེ་ན། ཕྱིས་སྐྱེས་བའི་ཚེ་སྔར་གྱི་མེད་པ་དེ་ལོག་གམ་མ་ལོག །མ་ལོག་ན་ཕྱིས་ཀྱང་མེད་པར་ཐལ། ལོག་ན་སྔར་ཀྱང་ཡོད་པར་ཐལ། སྔར་མེད་པ་ལས་ལོག་པའི་ཕྱིར་རོ། །དེས་ན་རང་རིག་དོན་དམ་དུ་འདོད་པ་མི་འཐད་དོ། །གསུམ་པ་རྒྱུ་འབྲས་གཉིས་ཀ་འགོགས་པ་མུ་བཞིའི་སྐྱེ་འགོགས་གི་གཏན་ཚིགས་ནི། སེམས་ཙམ་རང་རིག་དོན་དམ་དུ་འདོད་པ་དེ་ཆོས་ཅན། ཡང་དག་པར་ན་རང་བཞིན་མེད་དེ། གཅིག་དང་དུ་མ་ལས་འབྲས་བུ་མ་སྐྱེས་པའི་ཕྱིར་རོ། །དེ་ཡང་བདེན་གཉིས་ལས། དུ་མའི་ངོ་བོ་གཅིག་མི་བྱེད། གཅིག་གིས་དུ་མའི་དངོས་མི་བྱེད། །ཅེས་སོ། གཏན་ཚིགས་མ་གྲུབ་ཞེ་ན། འོ་ན་རྒྱུ་དུ་མ་ལས་འབྲས་བུ་གཅིག་སྐྱེའམ། རྒྱུ་གཅིག་ལས་འབྲས་བུ་མ་སྐྱེ་འམ། རྒྱུ་དུ་མ་ལས་འབྲས་བུ་དུ་མ་སྐྱེའམ། རྒྱུ་གཅིག་ལས་འབྲསབུ་གཅིག་སྐྱེ། རྒྱུ་དུ་མ་ལས་འབྲས་བུ་གཅིག་སྐྱེ་ཟེར་བ་ཡང་མི་འཐད་དེ། རྒྱུ་ས་བོན་མང་པོ་ལས་འབྲས་བུ་གཅིག་སྐྱེ་བར་ཐལ། འདོད་ན་མངོན་སུམ་གྱི་གསལ་ལོ། །རྒྱུ་གཅིག་ལས་འབྲས་བུ་དུ་མ་སྐྱེ་ཟེར་བ་ཡང་མི་འཐད་དེ། རྒྱུ་ནས་ཀྱི་ས་བོན་གཅིག་པོ་ལས། འབྲས་བུ་གྲོ་དང་སྲན་མ་ལ་སོགས་པ་དུ་མ་སྐྱེ་བར་ཐལ་ལོ། །རྒྱུ་དུ་མ་ལས་འབྲས་བུ་དུ་མ་སྐྱེེ་བ་ཡང་མི་འཐད་དེ། རྒྱུར་ཤིང་སྤྱིན་ལ་སོགས་པའི་གྲགས་དང་མ་ཉམས་པར་འབྲས་་བུ་གཞུ་ཡང་དེ་ཙམ་འབྱུང་བར་ཐལ་ལོ། །རྒྱུ་གཅིག་ལ་འབྲས་བུ་གཅིག་སྐྱེས་ཟེར་བ་ཡང་མི་འཐད་དེ། རྒྱུ་ནས་འབྲུ་གཅིག་བཏབ་པས་འབྲས་བུ་ཡང་ནས་འབྲུ་གཅིག་རང་སྨིན་བར་ཐལ་ལོ། །བཞི་པ་རང་གི་ངོ་བོ་འགོགས་པ་གཅིག་དང་དུ་བྲལ་གྱི་གཏན་ཚིགས་ནི། སྣང་བ་ཕྱི་ནང་གི་དངོས་པོ་འདི་ཆོས་ཅན། ཡང་དག་པར་ན་རང་བཞིན་མེད་དེ། གཅིག་དང་དུ་མ་བྲལ་བའི་ཕྱིར་གཟུགས་ཅན་བཞིན་ནོ། །དེ་ཡང་དབུ་མའི་རྒྱན་ལས། བདག་དང་གཞན་སྨྲའི་དངོས་འདི་དག །ཡང་དག་པར་ནི་གཅིག་པ་དང་། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་ཅན་བཞིན། །ཞེས་སོ། །གཏན་ཚིགས་མ་གྲུབ་ཞེ་ན། འོ་ན་སྣང་བ་འདི་གཅིག་ཏུ་ཡོད་དམ་དུ་མར་ཡོད། གཅིག་ཏུ་ཡོད་ན་ཆ་ཤས་དང་བཅས་པ་གཅིག་ཏུ་ཡོད་དམ། ཆ་ཤས་དང་བྲལ་བའི་གཅིག་ཏུ་ཡོད། ཆ་ཤས་དང་བཅས་ན་གཅིག་མི་སྟུབ་སྟེ་དུ་མར་ཐལ། ཆ་ཤས་དང་བྲལ་བར་ཡོད་ན་མི་གྲུབ་སྟེ། ཕྱོགས་ཆ་དྲུག་དང་བཅས་པའི་ཕྱིར་རོ། །ཞིབ་པར་ཉན་ཐོས་ཀྱི་སྐབས་སུ་བཤད་དོ། །དུ་མར་ཡོད་ན། དུ་མ་དེ་གཅིག་ལ་ལྟོས་སམ་མི་ལྟོས། མི་ལྟོས་ན་ཁྱབ་བྱེད་གཅིག་མ་གྲུབ་ལ། ཁྱབ་བྱེད་དུ་མ་ཡང་མི་འགྲུབ་པར་ཐལ། ལྟོས་ན་གཅིག་པོ་དེ་ཆ་ཤས་དང་བཅས་སམ་མ་བཅས་ཀྱིས་བརྟག་པ་གོང་དང་མཚུངས་སོ། །ལྔ་པ་འགལ་ཟླ་བསྒྲུབས་ནས་འབྲེལ་ཟླ་འགོགས་པ་རྟེན་འབྲེལ་གྱི་གཏན་ཚིགས་ནི། མིག་གི་རྣམ་པར་ཤེས་པ་ལ་སོགས་པས་སྣང་བ་ཉམས་སུ་མྱོང་བ་འདི་ཆོས་ཅན། ཡང་དག་པའི་རྟེན་འབྲེལ་ལམ། ཡང་དག་པའི་རྒྱུ་འབྲས་མིན་པར་དམ་བཅའ། རེ་ཞིག་པའི་རྟེན་འབྲེལ་ལམ། རེ་ཞིག་པའི་རྒྱུ་ཡིན་ཏེ། རྒྱུ་རྐྱེན་སྣ་ཚོགས་བར་རག་ལུས་པའི་ཕྱིར་རོ། །གཏན་ཚིགས་མ་གྲུབ་བོ་ཞེ་ན། འོ་ན་རྒྱུ་འབྲས་ཡང་དག་ཏུ་ཡོད་དམ། ཡོད་ན་དངོས་པོར་ཐལ། འདོད་ཐོག་ཞེ་ན། དངོས་པོ་ཐམས་ཅད་ལ་གཅིག་དང་དུ་བྲལ་གྱིས་གནོད་པས་རང་བཞིན་མེད། རང་བཞིན་མེད་པ་ལ་ཡང་དག་ཏུ་འདོད་པ་མི་སྟུབ་བོ། །རྒྱུ་འབྲས་ཡང་དག་ཏུ་མེད་ན། དེ་ཀ་རྟེན་འབྲེལ་ཡིན་མོད། ཡང་དག་ཏུ་བདེན་ཀྱང་རྟེན་འབྲེལ་མིན་ན་ཅི་སྟོ་སྟེ་ཁྱབ་པ་མ་གྲུབ་ཅེ་ན། སྣང་བ་ཡང་དག་ཏུ་མ་གྲུབ་ལ་སྣ་ཚོགས་སུ་འཆར་བ་དེ་རྟེན་འབྲེལ་ཡིན་ཏེ། སྒྱུ་མའི་སྣང་བ་བཞིན་ནོ། །ཡང་ཡུལ་དང་། དབང་པོ་དང་། རྣམ་ཤེས་གསུམ་ལ་རྟེན་ནས། གཟུགས་འགྲོ་ལྡོག་ངེས་ལ། རྣམ་ཤེས་གསུམ་རེ་རེ་མ་ཚང་ཡང་རྣམ་ཤེས་མི་སྐྱེ་བར་མངོན་སུམ་གྱིས་གསལ་ལོ། །དེས་ན་ཁྱབ་པ་རང་རྒྱུད་ལ་ཡང་གྲུབ། མཐུན་གྲུབ་ལ་ཡང་གྲུབ་པ་རྟེན་འབྲེལ་ཡིན་ནོ། །ལྔ་པ་ཁྱབ་པ་གཏན་ལ་འབེབས་པའི་དཔེ་ལ་ཡང་གཉིས་ཏེ། ཁྱབ་པ་དང་དཔེའོ། །ཁྱབ་པ་ལ་གཉིས་ཏེ། ཁྱབ་པའི་མཚན་ཉིད་དང་། ཁྱབ་པའི་བྱེ་བྲག་གོ །ཁྱབ་པའི་མཚན་ཉིད་ནི། བསྒྲུབ་བྱ་སྒྲུབ་བྱེད་འབྲེལ་བ་ལྟར་སྣང་ཞིང་ལྡོག་པའམ། རྣལ་མ་གང་རུང་ལ་རྗེས་སུ་འགྲོ་ལྡོག་པ་གཅིག་ཡིན་ཏེ། གང་དུ་བ་ཡོད་པ་དེ་ན་མེ་ཡོད་དེ་ཚང་མང་བཞིན་ནོ། །གང་དུ་བ་མེད་པ་དེ་ན་མེ་མེད་དེ། ཆུ་ཀླུང་བཞིན་ནོ། །ཞེས་པ་ལྟ་བུའོ། །ཁྱབ་པ་བྱེ་བྲག་ལ་གཉིས་ཏེ། གང་ཞིག་དངོས་པོ་རྒྱུ་མཚན་དུ་བྱས་ཏེ། ཁྱབ་པ་རྩོད་གཞིའི་ཐོག་ཏུ་བསྒྲུབ་པ་ནི། གཅིག་དང་དུ་མ་བྲལ་བ་ལ་རང་གཞིན་མེད་པས་ཁྱབ་པ་ལྟ་བུའོ། །གང་ཞིག་ཁྱབ་པ་རྒྱུ་མཚན་དུ་བྱས་ནས། ཁྱབ་པ་མཐུན་དཔེའི་ཐོག་ཏུ་བསྒྲུབ་པ་ནི། གང་དུ་བ་ཡོད་པ་ན་མེ་ཡོད་དེ་ཚང་མང་བཞིན་ཞེས་པ་ལྟ་བུའོ། དཔེ་དངོས་ལ་གཉིས་ཏེ། རང་བཞིན་གྲུབ་པའི་མཐུན་དཔེ་ནི། ཡང་དག་པར་ན་རང་བཞིན་མེད་པའི་དཔེ་ནི། གཟུགས་ཅན་བཞིན་ཞེས་པ་ལྟ་བུའོ། །གཞན་གཞུང་འགོགས་པ་མི་མཐུན་པའི་དཔེ་ནི། མུ་སྟེགས་པ་ན་རེ། གཟུགས་ཅན་ད་ཕར་ལ་སོང་བ་ཡིན་ཟེར་བ་དེ་མི་འཐད་དེ། ཕན་ཚུན་སྤངས་པའི་ཕྱིར། ཉན་ཐོས་པ་ན་རེ་འབྱུང་བ་ལས་གཡར་ཟེར་བ་ཡང་མི་འཐད་དེ། གཟུགས་ཅན་མ་ཡིན་པ་དང་། ཐོགས་པ་དང་བཅས་པ་གཉིས་གོ་ས་གཅིག་ན་མི་གནས་པའི་ཕྱིར་རོ། །སེམས་ཙམ་པ་ན་རེ། རང་གི་སེམས་ཡིན་ཟེར་བ་ཡང་མི་འཐད་དེ། གཟུགས་ཅན་དེ་ལ་དཔྱད་བཟོད་མེད་པའི་ཕྱིར་རོ། །དེ་བས་ན་སྒྱུ་མ་ཙམ་ཡིན་ཏེ་རང་བཞིན་མེད་པའི་ཕྱིར་རོ། །སྤྱི་དོན་བཞི་པ་རྗེས་དཔག་གི་འཇུག་ཡུལ་ལ་གཉིས་ཏེ། རང་རྒྱུད་དང་། ཐལ་འགྱུར་རོ། །དེ་གཉིས་ཀྱི་ཁྱད་པར་ནི། རང་རྒྱུད་ཀྱི་ལྟ་བ་ལ་དོགས་པའི་སྐྱོན་སེལ་ཙམ་གཅིག་རང་རྒྱུད་ཡིན་ལ། གཞན་གྱི་ཁས་ལེན་འགོགས་པ་དེ་ཐལ་འགྱུར་རོ། །རང་རྒྱུད་ལ་གཉིས་ཏེ། སྒྱུ་མ་ལྟ་བུ་དང་། རབ་ཏུ་མི་གནས་པའོ། །དེ་གཉིས་ཀྱི་ཁྱད་པར་ཡང་། རྣམ་དཔྱད་ཀྱི་དུས་སུ་དགག་བྱ་བཀག་ནས། ཡོངས་དཔྱོད་ལ་རྫུན་པའམ། སྒྱུ་མ་ལྟ་བུར་ཁས་ལེན་པ་ནི། སྒྱུ་མ་ལྟ་བུའོ། རྣམ་དཔྱད་ལ་བདེན་པའི་དངོས་པོ་བཀག་ནས། ཡོངས་དཔྱོད་ལ་ཁས་ལེན་གང་ཡང་མེད་པ་ནི་རབ་ཏུ་མི་གནས་པའོ། །དེ་གཉིས་རང་རྒྱུད་དོ། ཐལ་འགྱུར་ནི། རང་གི་ཁས་ལེན་གང་ཡང་མེད་པ་ལ། གཞན་གྱིས་ཡང་དག་ཏུ་ཁས་ལེན་པ་འགོགས་པའོ། །དེ་གང་གིས་འགོགས་ན། གོང་དུ་བསྟན་པའི་རིགས་པ་ལྔ་པོས་འགོགས་སོ། །དེ་ནི་གཞིའི་དབུ་མའོ། །ལམ་དབུ་མ་ནི་ཏིང་ངེ་འཛིན་སྟེ། མཉམ་བཞག་ཏུ་ཆོས་ཐམས་ཅད་སྟོང་པ་ཉིད་ནམ་མཁའི་དཀྱིལ་ལྟ་བུར་བསྒོམ་པའོ། །སྤྱོད་པ་ནི། རྗེས་ཐོབ་ཀྱི་དུས་སུ་སེམས་ཅན་གྱི་དོན་དུ་ཕ་རོལ་དུ་ཕྱིན་པ་དྲུག་སྒྱུ་མ་ཙམ་དུ་སྤྱོད་པའོ། །འབྲས་བུ་དབུ་མ་ནི། དེ་ལྟར་ཡེ་ཤེས་ཀྱི་ཚོགས་སྟོང་པ་ཉིད་མངོན་དུ་གྱུར་ནས། རང་དོན་ཆོས་སྐུར་གྲོལ་ནས་རྗེས་ཐོབ་ལ་བསོད་ནམས་ཀྱི་ཚོགས་ལ་བརྟེན་ནས། གཞན་སྣང་ལ་གཟུགས་སྐུ་གཉིས་ལ་བརྟེན་ནས་སེམས་ཅན་གྱི་དོན་བྱེད་པའོ། །དེ་དགག་པ་ནི། ཁྱེད་དབུ་མ་ལ་དགག་སྒྲུབ་སྐྱོན་དུ་ཆེ་འམ་མི་ཆེ། ཆེ་ན། ཡང་དག་པའི་དོན་ལ་དགག་སྒྲུབ་ཡོད་དམ་མེད། ཡོད་ན། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་པ་ལྟ་བུ་དང་འགལ་ལོ། །མེད་ན་གཏན་ཚིགས་ཆེན་པོ་ལྔས། དངོས་འཛིན་འགོག་གམ་མི་འགོག །འགོག་ན་དགག་སྒྲུབ་ཅན་དུ་འདུག་པས་ཡང་དག་པ་མ་ཡིན་པར་ཐལ། མི་འགོག་ན་གཏན་ཚིགས་ཆེན་པོ་ལྔ་དོན་མེད་དུ་ཐལ་ལོ། །དགག་སྒྲུབ་སྐྱོན་དུ་མི་ཆེ་ན། ཐེག་ཆུང་གི་ལྟ་བ་དགག་སྒྲུབ་ཅན་ཡང་སྐྱོན་མེད་དུ་ཐལ། འདོད་ན་དགག་སྒྲུབ་ཚད་མར་འཛིན་པས་ཅི་སྨྲས་ཀྱང་བདེན་པས་བསླུས་ཏེ་ཅི་སྨྲས་ཀྱང་གཏན་ལ་ཕེབས་པ་མིན། ཞེས་གསུངས་དང་འགལ་ལོ། །ཡང་མཚན་ཉིད་པ་སྤྱི་ལ་འགལ་བ། ཁྱོད་སེམས་ཅན་གྱི་རྒྱུད་ལ་གནས་པའི་ཉོན་མོངས་པ་འདི་སྤོང་ངམ་ལམ་དུ་བྱེད། སྤོངས་ན་ཉོན་མོངས་དངོས་པོར་ཡོད་པ་སྤོང་ངམ། མེད་ཀྱང་སྤོང་། དངོས་པོར་ཡོད་ནས་སྤོང་ན་ཁྱོད་ལ་དངོས་འཛིན་སྐྱོན་དུ་ཆེ་འམ་མི་ཆེ། མི་ཆེ་ན་སོ་སོ་སྐྱེ་བོ་དངོས་པོར་འཛིན་པ་ཡང་སྐྱོན་མེད་དུ་ཐལ་དང་། གཏན་ཚིགས་བཞི་པོ་ཡང་དགོས་མེད་དུ་ཐལ་ལོ། །དངོས་འཛིན་སྐྱོན་དུ་ཆེ་ན། ཁྱོད་ཉོན་མོངས་པ་དངོས་པོར་འདོད་པའི་ཕྱིར། སྐྱོན་ཅན་གྱི་ལྟ་བར་ཐལ་ལོ། །ཡང་ཉོན་མོངས་པ་དངོས་མེད་དུ་འདོད་ན། དངོས་མེད་སྤོང་ངམ་མི་སྤོང་། མི་སྤོང་ན་ཉོན་མོངས་པ་སྤང་བའི་དམ་བཅའ་སྭཱ་ཧཱ། སྤོང་ན་འགལ་བར་སྤོང་ངམ། འབྲེལ་བས་སྤོང་། འགལ་བས་སྤོང་ན། དངོས་མེད་ཀྱི་འགལ་བ་དངོས་པོ་ཡིན་པས། དངོས་པོར་འདོད་པར་ཐལ། འབྲེལ་བས་སྤོང་ན། བདག་གཅིག་པའི་འབྲེལ་བས་སྤོང་ངམ། དེ་ལས་འབྱུང་བའི་འབྲེལ་བས་སྤོང་། བདག་གཅིག་པའི་འབྲེལ་བས་སྤོང་ན། གསེར་གྱི་སེར་པོ་སྤོང་དགོས་པར་ཐལ། དེ་ལས་བྱུང་བས་སྤོང་ན། དུ་བས་ཀྱང་མི་སྤོང་བར་ཐལ། ཡང་ཉོན་མོངས་པ་ལམ་དུ་བྱེད་ན། རང་རྒྱུད་པ་ལམ་དུ་བྱེད་དམ། གཉེན་པོ་བརྟེན་ནས་ལམ་དུ་བྱེད། རང་རྒྱུད་པ་ལམ་དུ་བྱེད་ན། དེས་གྲོལ་ལམ་མི་གྲོལ། གྲོལ་ན་སོ་སོ་སྐྱེ་བོ་ཡང་གྲོལ་བར་ཐལ། མི་གྲོལ་ན་ལམ་དུ་བྱེད་པ་དོན་མེད་དུ་ཐལ་ལོ། གཉེན་པོས་ཉོན་མོངས་པ་སྤོང་ངོམ་མི་སྤོང་། མི་སྤོང་ན་གཉེན་པོ་བརྟེན་པ་དོན་མེད་དུ་ཐལ། སྤོང་ན་ཉོན་མོངས་མི་སྤོང་བར་ལམ་དུ་བྱེད་པའི་དམ་བཅའ་སྭཱ་ཧཱ། འབྲས་བུ་གསང་སྔགས་ཀྱི་ཐེག་པ་ལ་གཉིས་ཏེ། ཕྱི་པ་ཐུབ་པའི་རྒྱུད་དང་། ནང་པ་ཐབས་ཀྱི་རྒྱུད་དོ། །ཕྱི་པ་ཐུབ་པའི་རྒྱུད་ལ་གསུམ་སྟེ། བྱ་བའི་རྒྱུད། ཀྲི་ཡའི་རྒྱུད། གཉིས་ཀའི་རྒྱུད་ཨུ་པཱ་ཡ། རྣལ་འབྱོར་རྒྱུད་ཡོ་གའོ། །ཀྲི་ཡ་ལ་བཞི་སྟེ། ལྟ་བ་དང་། སྒོམ་པ་དང་། སྤྱོད་པ་དང་། འབྲས་བུའོ། དང་པོ་ལྟ་བ་ནི། དོན་དམ་པར་མཐའ་བཞི་དང་བྲལ་ཏེ། ཡོད་པ་ཡང་མ་ཡིན། མེད་པ་ཡང་མ་ཡིན། གཅིག་པ་ཡང་མ་ཡིན། ཐ་དད་ཡང་མ་ཡིན་པར་འདོད་པའོ། །ཀུན་རྫོབ་དུ་རིགས་གསུམ་གྱི་དཀྱིལ་འཁོར་དུ་ཡེ་ནས་སངས་རྒྱས་པར་འདོད་དེ། མཐོ་མཐོ་ཐམས་ཅད་སྤྱན་རས་གཟིགས། འཇམ་འཇམ་ཐམས་ཅད་འཕགས་པ་འཇམ་དཔལ། རྩུབ་རྩུབ་ཐམས་ཅད་ཕྱག་ན་རྡོ་རྗེའི་ངོ་བོར་སངས་རྒྱས་པར་འདོད་དོ། །ལ་ཤན་ལས། མཐོང་བའི་དངོས་པོ་མཐོ་འཇམ་རྩུབ། །དྲུག་ཕྱེད་རིགས་ཀྱི་དཀྱིལ་འཁོར་དུ། །མཐོང་བས་རྣམ་པར་དག་ཅེས་བྱ། །ཞེས་སོ། །བསྒོམ་པའི་ཏིང་ངེ་འཛིན་ནི། ཀྲི་ཡ་དོན་གྱི་ལྷ་དྲུག་གི་སྒོ་ནས་བདག་དམ་ཚིག་སེམས་པར་བསྐྱེད་དེ། སྟོང་པ་ཉིད་ཀྱི་ལྷ་དང་། གྲགས་པ་སྒྲའི་ལྷ་དང་། གསུང་ཡིག་འབྲུའི་ལྷ་དང་། ཐུགས་ཕྱག་འཚན་གྱི་ལྷ་དང་། སྐུ་ཕྲ་མོའི་ལྷ་དང་། སྐུ་ཡོངས་སུ་རྫོགས་པའི་ལྷ་དང་དྲུག་གིས་བདག་བསྐྱེད་ནས། ཡེ་ཤེས་སེམས་དཔའ་སྤྱན་དྲངས། མཆོད་བསྟོད་བཟླས་པ་བྱས་ནས་རྗེ་ཁོལ་གྱི་ཚུལ་དུ་དངོས་གྲུབ་ཞུ་བའོ། །སྤྱོད་པ་ནི། གཟའ་སྐར་དུས་ཚིག་ལ་གཙོ་བོར་བྱས་ནས། ཁྲུས་དང་གཙང་སྦྲ་ལ་གནས་ཤིང་། དཀར་གསུམ་མངར་གསུམ་ལ་ལོངས་སྤྱོད་པའོ། །འབྲས་བུ་ནི། མི་ཚེ་བདུན་གྱི་རིགས་གསུམ་རྡོ་རྗེ་འཛིན་པའི་ས་ཐོབ་པར་འདོད་པའོ། །དེ་དགག་པ་ནི། ཁྱོད་ཀྲི་ཡ་བ་དོན་དམ་པ་མཐའ་བཞི་བྲལ་བའི་ཏིང་ངེ་འཛིན་ལ། ཀུན་རྫོབ་ཏུ་རིགས་གསུམ་ལྷའི་དལ་དུ་བསྒོམ་ཅིར་དགོས་མི་དགོས་པས་མི་སྒོམ་ན། ཁྱེད་རང་གི་གཞུང་དང་འགལ། ཡང་དོན་དམ་པར་དག་ཀྱང་མ་རྟོགས་པས་ཀུན་རྫོབ་དུ་བསྒོམ་དགོས་ཟེར་ན། དོན་དེས་ཀུན་རྫོབ་ལ་ཁྱབ་བམ་མ་ཁྱབ། ཁྱབ་ན་ཀུན་རྫོབ་ཀྱང་དག་པར་ཐལ། དག་ཀྱང་བསྒོམ་དགོས་ན་དག་པ་དོན་མེད་དུ་ཐལ། དོན་དེས་ཀུན་རྫོབ་ལ་མ་ཁྱབ་ན། དོན་དམ་དེ་ཀུན་རྫོབ་ཀྱི་ཆོས་ཉིད་མ་ཡིན་པར་ཐལ། མ་ཁྱབ་པའི་ཕྱིར་རོ། །དེ་ཡང་རྔམ་ཀློག་ལས། སྦྲང་མས་ནམ་འཕང་གཅོད་དུ་གཤོག་རྒྱངས་ཡེ་ནས་མེད། །ཀྲི་ཡས་བྱང་ཆུབ་ཐོབ་ཏུ་རྟོགས་པའི་རླུང་ལ་གནས། །ཞེས་སོ། །ཨུ་པཱ་ཡ་ལ་བཞི་སྟེ། ལྟ་བ་དང་། ཏིང་ངེ་འཛིན་དང་། སྤྱོད་པ་དང་འབྲས་བུའོ། །ལྟ་བ་ནི། ཡོ་ག་དང་མཐུན་ཏེ། དོན་དམ་སྐྱེ་འགག་མེད་པའི་འོད་གསལ་བར་འདོད་དོ། །ཏིང་ངེ་འཛིན་ཡང་ཡོ་ག་དང་མཐུན་ཏེ། མངོན་པར་བྱང་ཆུབ་པ་ལྔས་ལྷའི་སྐུ་བསྐྱེད་དོ། །སྤྱོད་པ་ཀྲི་ཡ་དང་མཐུན་ཏེ། གཟའ་དང་དུས་ཚིགས་བཟང་པོ་ལ་བརྟེན་ནས་ཁྲུས་དང་གཙང་སྦྲ་གཙོ་བོར་བྱེད་དོ། །འབྲས་བུ་ཡང་མི་ཚེ་ལྔ་ན་རིགས་བཞི་རྡོ་རྗེ་འཆང་གི་ས་ཐོབ་པར་འདོད་དོ། །དེ་དགག་པ་ནི། ཁྱེད་ཨུ་པ་བའི་ལུགས་ཀྱི་ལྟ་སྤྱོད་ཐ་དད་གཉིས་ཀྱིས་འབྲས་བུ་གཅིག་གྲུབ་པར་མི་འཐད་དེ། ལྟ་སྤྱོད་འཛོལ་པའི་ཕྱིར་རོ། །ལྟ་སྤྱོད་ཇི་ལྟར་འཛོལ་ཞེ་ན། ལྟ་བ་དོན་དམ་སྐྱེ་འགག་མེད་པ་ལ། སྤྱོད་པ་དགག་སྒྲུབ་ཅན་དུ་སོང་བས་འཛོལ་ལོ། །ལྟ་སྤྱོད་འཛོལ་ཡང་འབྲས་བུ་བྱུང་ན་ཅིས་སྟོ་སྟེ། ཁྱབ་པ་མེད་དོ་ཞེ་ན། གང་མར་དང་སྦྱིན་བསྲེས་པ་ལ་ནུས་པ་མེད་པ་བཞིན་དུ། ལྟ་སྤྱོད་འཛོལ་བ་ལ་འབྲས་བུ་མི་འབྱུང་སྟེ། པྲ་བོའི་ས་བོན་ཀུན་བཏབ་པ་ལ། ནས་ཀྱི་འབྲས་བུའི་སྟོན་མི་འབྱུང་བ་བཞིན་ནོ། །དེ་ཡང་སྒྱུ་འཕྲུལ་རྒྱས་པ་ལས། ཁ་ཅིག་ལྟ་བ་མཉམ་ནས་ཀྱང་། །སྤྱོད་པ་དག་དང་ཡོངས་མི་ལྡན། །ཁ་ཅིག་སྤྱོད་པ་བདེ་སྤྱོད་ཀྱང་། །མཉམ་པའི་ལྟ་བ་ག་ལ་ཡོད། །ཅེས་སོ། །རྣལ་འབྱོར་ཡོ་ག་ལ་བཞི་ལས། ལྟ་བ་དང་། སྒོམ་པ་དང་། སྤྱོད་པ་དང་། འབྲས་བུའོ། ལྟ་བ་ནི། དོན་དམ་སྐྱེ་འགག་མེད་པའི་འོད་གསལ་སྟོང་པ་ཉིད་ལ། ཀུན་རྫོབ་ཏུ་རྡོ་རྗེ་དབྱིངས་ཀྱི་ལྷ་ཚོགས་ཡེ་ནས་སངས་རྒྱས་པར་འདོད་དོ། །བསྒོམ་པའི་ཏིང་ངེ་འཛིན་ནི། མངོན་པར་བྱང་ཆུབ་ལྔའི་སྒོ་ནས་ལྷའི་སྐུ་བསྐྱེད་དེ། སྟོང་པ་ཉིད་ལས་མངོན་པར་བྱང་ཆུབ་པ། གདན་པད་ཟླ་ལས་བྱང་ཆུབ་པ། གསུང་ཡིག་འབྲུ་ལས། ཐུགས་ཕྱག་མཚན་ལས། སྐུ་ཡོངས་སུ་རྫོགས་པ་ལས་བྱང་ཆུབ་པ་དང་ལྔས་དམ་ཚིག་པ་བསྐྱེད། ཡེ་ཤེས་པ་སྤྱན་དྲངས། མཆོད་བསྟོད་བཟླས་པ་བྱས་ནས། སྤུན་ནམ་གྲོགས་པོའི་ཚུལ་གྱིས་དངོས་གྲུབ་ཞུ་བའོ། །སྤྱོད་པ་ནི། འདོད་པའི་ཡོན་ཏན་ལྔ་ལ་ལོངས་སྤྱོད་པའོ། །འབྲས་བུ་ནི། མི་ཚེ་ལྔའམ་གསུམ་ཚུན་ཆད་ཀྱིས་སྟུག་པོ་བཀོད་པའི་ས་ཐོབ་པར་འདོད་པའོ། །དེ་དགག་པ་ནི། ཁྱེད་ཡོ་ག་བ་ནི་ལྟ་བ་དོན་དམ་སྐྱེ་འགག་མེད་པ་དེ་ལ། དགག་སྒྲུབ་ཡོད་དམ་མེད། ཡོད་ན་སྐྱེས་འགག་མེད་པ་མ་ཡིན་ཏེ། དགག་སྒྲུབ་ཅན་དུ་ཐལ་ལོ། །མེད་ན་དམ་རྫས་ལྔ་འགོགས་སམ་མ་འགོགས་མི་འགོགས་ན་དེ་ཡོ་གའི་གཞུང་མ་ཡིན་ཏེ། ཕྱི་རྒྱུད་སྤྱི་དང་འགལ་ལོ། །འགེགས་དགག་སྒྲུབ་ཅན་དུ་ཐལ་ལོ། །རྔམ་གློག་ལས། སྤལ་པས་མཁའ་ལྡིང་བྱས་ཀྱང་རང་གི་སྲོག་དང་བྲལ། ཡོ་གས་སྐྱེ་མེད་བསྒོམས་ཀྱང་གནས་ལུགས་དོན་མི་མཐོང་། །ཞེས་གསུངས་སོ། །ནང་པ་ཐབས་ཀྱི་རྒྱུད་ལ་གསུམ་སྟེ། རྒྱུད་མ་ཧཱ་ཡོ་ག །ལུང་ཨ་ནུ་ཡོ་ག །མན་ངག་ཨ་ཏི་ཡོ་གའི། །རྒྱུད་མ་ཧཱ་ཡོ་ག་ལ་བཞི་སྟེ། ལྟ་བ་དང་སྒོམ་པ། སྤྱོད་པ་དང་འབྲས་བུའོ། །ལྟ་བ་ནི། དོན་དམ་པར་རིག་པ་སྤྲོས་པ་དང་བྲལ་བ་ལ་སྣང་བ་ངོ་བོ་ཉིད་ཀྱི་སྐུར་ལྷུན་གྱིས་གྲུབ་པར་འདོད་དེ། རྩ་རྒྱུད་གསང་སྙིང་ལས། ཨེ་མ་ཕྱོགས་བཅུ་སྟོང་ཁམས་ཡེ་ནས་དབེན། སྙིགས་མ་ལྔ་ཉིད་དག་པའི་ཞིང་། །ཕུང་པོ་ལྔ་ཉིད་བདེ་ལྡན་གནས། །ཐམས་ཅད་མཆོག་གི་སྙིང་པོ་ལས། །གཞན་དུ་རྒྱལ་བས་ཆོས་མི་རྩལ། །ཉིད་ལས་གཞན་ཞེས་བྱ་བའི་ཆོས། །རྩལ་ཀྱང་རྒྱལ་བས་མི་རྙེད་དོ། །ཞེས་སོ། །ཡང་ལམ་རིམ་ལས། རྣམ་པ་ཀུན་ལྡན་སྟོང་ཆེན་མཐོང་། །ཞེས་སོ། །ཀུན་རྫོབ་ཏུ་རིག་པ་སྒྱུ་མའི་རྩལ། རྟོགས་ཚོགས་ལྷ་དང་ལྷ་མོའི་རང་བཞིན་དུ་ཡེ་ནས་སངས་རྒྱས་པར་འདོད་དོ། །རྩ་རྒྱུད་ལས། ཀྱེ་ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་པ་དང་། ཕུང་པོ་ལྔ་ཉིད་མངོན་སངས་རྒྱས། །འབྱུང་བ་ལྔ་ཉིད་རིགས་ཀྱི་ཡུམ། །ཁམས་དང་སྐྱེ་མཆེད་མང་པོ་ཀུན། །བྱང་ཆུབ་སེམས་དཔའི་ངོ་བོ་ཉིད། །ཅེས་སོ། །དེ་གཉིས་ཀྱང་སྣང་སྟོང་ཕྱོགས་རེ་བ་མ་ཡིན་ཏེ། སྣང་སྟོང་ངེས་མཉམ་གྱི་ཤེས་བྱ་བདེན་པ་དབྱེར་མེད་ལ། དབྱེར་མེད་ཙམ་དུའང་མི་འཛིན་པས། དབྱེར་མེད་སྤྱོད་ཡུལ་དང་བྲལ་བའོ། །བདེན་པ་དབྱེར་མེད་ཡིན་པ་ཡང་། །རྩ་རྒྱུད་ལམ་རིམ་ལས། བདེན་པ་གཉིས་ཀར་དབྱེར་མེད་པས། འཕྲུལ་དགའི་ཚུལ་དེ་ཐ་དད་མིན། །ཞེས་སོ། །དབྱེར་མེད་སྤྱོད་ཡུལ་དང་བྲལ་བར་ཡང་། ལམ་རིམ་ལས་དེ་མིན་ཞེན་པ་གྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་སོ། །བསྒོམ་པའི་ཏིང་ངེ་འཛིན་ལ་གཉིས་ཏེ། ཆོས་ཉིད་དེ་བཞིན་སྒོམ་པ་དང་། མཚན་བཅས་ལྷ་བསྒོམ་པའོ། །རིམ་གསུམ་ལས། མཚན་མ་བསྒོམ་པའི་རིམ་པ་དང་། །དེ་བཞིན་ཉིད་དུ་བསྒོམ་པ་སྟེ། བྱེ་བྲག་རྣམ་པ་གཉིས་སུ་གསུངས། ཞེས་སོ། །ཆོས་ཉིད་དེ་བཞིན་ཉིད་བསྒོམས་པ་ནི། དབང་པོ་རྣོན་པོས་ལྟ་བ་རྟོགས་པའི་དོན་ལ་གོམས་པར་བྱ་བའི་ཕྱིར་སེམས་མ་བཅོས་པར་འཇོག་པ་སྟེ། བསམ་བྱ་བསམ་པར་མི་བྱ་སྟེ། །མི་བསམ་པར་ཡང་མི་བསམ་མོ། །གང་ལ་རྣམ་པར་མི་བསམ་པ། །འདུ་ཤེས་ཀུན་བྲལ་ཏིང་འཛིན་མཆོག །ཅེས་དང་། འཛིན་རྩོལ་མེད་པའི་སེམས་ཀྱི་འདུ་ཞེས་སོ། །མཚན་བཅས་ལྷ་སྒོམ་པ་ལ་གཉིས་ཏེ། ལམ་དགོས་པས་སྒོམ་པ་དང་། ངེས་པར་ཡོངས་རྫོགས་སྒོམ་པའོ། །མོས་པས་སྒོམ་པ་ནི། ནུབ་གཅིག་གི་བསྐྱེད་རིམ་ལྟ་བུ་སྟེ། ཏིང་ངེ་འཛིན་གསུམ་ལ་བརྟེན་ནས། རྟེན་གཞལ་ཡས་ཁང་བསྐྱེད་སྤྱན་དྲངས་མཆོད་ཅིང་བསྙེན་པ་འབུལ། བརྟན་པ་མ་ཐོབ་ཀྱང་རྣམ་པ་ཙམ་དུ་ང་རྒྱལ་ཙམ་བསྒོམ་པའོ། །དེ་ཡང་ལམ་རིམ་ལས། ལམ་ཀུན་སྐད་ཅིག་ཆས་བསྒོམས་ན། །སྤྲོས་པའི་འཁོར་ལོ་མི་སྒོམ་ཞིང་། །ཞེས་སོ། །ངེས་པ་ཡོངས་རྫོགས་སྒོམ་པ་གཉིས་ཏེ། ལམ་ཟག་བཅས་དང་ཟག་མེད་དོ། །སྟོང་པ་ཆེན་པོ་དང་། སྙིང་རྗེ་ཆེན་པོ་དང་། ཕྱག་རྒྱ་གཅིག་པ་དང་། ཕྱག་རྒྱ་སྤྲོས་པ་དང་། བར་ཆད་མེད་པའི་ལམ་དུ་ཚོགས་བསྒྲུབ་པའོ། །ཟག་མེད་ལ་བཞི་སྟེ། རྣམ་པར་སྨིན་པའི་རིག་འཛིན་དང་། ཚེ་ལ་དབང་བའི་རིག་འཛིན་དང་། ཕྱག་རྒྱ་ཆེན་པོའི་རིག་འཛིན་དང་ལྷུན་གྱིས་གྲུབ་པའི་རིག་འཛིན་ནོ། །དེ་ཡང་ལམ་རིམ་ལས། རྣམ་པ་ཀུན་ལྡན་སྟོང་ཆེན་མཐོང་། །རང་རིག་སྙིང་རྗེ་ཡེ་ཤེས་གཟིགས། །ཕྱག་རྒྱ་གཅིག་ཀུན་འབྲས་བུའི་ལྷ། །ཐམས་ཅད་གསལ་བའི་ལྟ་བ་དང་། །བར་ཆད་མེད་པའི་ཚོགས་ཆེན་མཐོང་། དབང་བསྒྱུར་མཉམ་ཉིད་མི་གཡོ་བ། །ཡེ་ཤེས་ཀུན་ལྡན་ལྷ་གྲངས་དགུ་ཞེས་སོ། །སྤྱོད་པ་ནི་ཐབས་ཀྱི་ཟིན་པའི་སྒོ་ནས། འཁོར་བའི་ཆོས་ཉི་ཤུ་རྩ་ལྔ་ལ་སྤྱོད་དེ། སྤྱད་པར་བྱ་བ་ལྔ། མི་སྤང་པར་བྱ་བ་ལྔ། དང་དུ་བླང་བ་ལྔ། ཤེས་པར་བྱ་བ་ལྔ། སྒྲུབ་པར་བྱ་བ་ལྔའོ། །འབྲས་བུ་ནི། འདིའམ་ཕྱི་མའམ། བར་དོ་ལ་ཡི་གེ་འཁོར་ལོ་ཚོགས་ཆེན་གྱི་ས་ཐོབ་པའོ། །དེ་དགག་པ་ནི། ཁྱེད་མ་ཧཱ་ཡོ་གའི་དབྱེར་མེད་སྤྱོད་ཡུལ་དང་བྲལ་བ་དེ་ལ་གཏན་ལ་དབབ་དུ་ཡོད་དམ་མེད། མེད་ན་སྤྱོད་ཡུལ་དང་བྲལ་བ་དེ་རྟོགས་སུ་མི་སྟུབ་སྟེ། གཏན་ལ་དབབ་ཏུ་མེད་པའི་ཕྱིར་རོ། །དཔེར་ན་མིག་གི་སྒྲ་སྙན་མི་སྙན་མ་རྟོགས་པ་བཞིན་ནོ། །གཏན་ལ་དབབ་ཏུ་ཡོད་ན། གཏན་ལ་འབེབས་སུ་ཡོད། དེ་བློས་གཏན་ལ་འབེབས་པ་ཡིན་ནམ་མིན། ཡིན་ན་བློའི་སྤྱོད་ཡུལ་དང་བྲལ་བའི་དམ་བཅའ་བུད། བློའི་སྤྱོད་ཡུལ་མིན་ཏེ་བློས་གཏན་ལ་མི་ཕེབས་སོ་ཞེ་ན། འོ་ན་ཇི་ལྟར་གཏན་ལ་འབེབས་ཏེ། གཏན་ལ་ཕབས་སུ་མི་སྟུབ་བོ། །ཁོ་ན་རེ། དཔེར་ན་ནམ་མཁའ་མ་གྲུབ་པ་ལ་མ་གྲུབ་པ་ལ་གྲུབ་པར་གཏན་ལ་ཕེབས་པའི་བློས། དབྱིབས་དང་ཁ་དོག་ཙམ་སྟོང་པ་ཙམ་དུ་བློ་ཡུལ་ན་ཡོད་ཀྱང་། ནམ་མཁའ་ལ་འདི་ཡིན་བྱ་བ་གཅིག་གྲུབ་ནས་བློ་ཡུལ་ན་ཡོད་པ་མིན་པ་བཞིན་དུ། འདིར་ཡང་སྣང་སྟོང་ཐ་དད་ཀྱི་ཞེན་པ་དགག་པའི་ཕྱིར་དབྱེར་མེད་དུ་བརྗོད་ཀྱིས་དབྱེར་མེད་ལ་འདི་ཡིན་གྱི་སྤྱོད་ཡུལ་དང་བྲལ། སྤྱོད་ཡུལ་དང་བྲལ་བ་ཙམ་དུ་གཏན་ལ་འབེབ་པའི་བློ་ཡོད་ཀྱང་། དབྱེར་མེད་ལ་འདི་ལྟ་བུ་གཅིག་ཡིན་གྱི་ངོས་བཟུང་དང་བྲལ་བའི་སྤྱོད་ཡུལ་དང་བྲལ་བ་ཡིན་ནོ་ཟེར་ན། ནམ་མཁའ་དངོས་པོ་མེད་པ་ལ་སྟོང་པར་གཏན་ལ་ཕབས་པས། སྟོང་པར་ཡིད་ཆེས་པའི་བློ་ཡོད་ཀྱིས། ཁྱེད་ཀྱི་དབྱེར་མེད་སྤྱོད་ཡུལ་དང་བྲལ་བ་ལ། སྤྱོད་ཡུལ་དང་བྲལ་བ་ཙམ་དུ་གཏན་ལ་འབེབས་པའི་བློ་ཡོད་པ་མི་འགེགས་ཀྱིས། སྤྱོད་ཡུལ་དང་བྲལ་བ་ཙམ་དུ་རྟོགས་པའི་ངེས་ཤེས་ཡོད་དམ་མེད། ངེས་ཤེས་མེད་ན་དོན་ལ་སྤྲོས་པས་མི་ཆོད་པས། ཡང་དག་པའི་ལྟ་བ་མ་ཡིན་པར་ཐལ། ངེས་ཤེས་ཡོད་ན་དེ་ཀ་བློའི་སྤྱོད་ཡུལ་ཡིན་ནམ་མིན། མིན་དེ་སྤྱོད་ཡུལ་དང་བྲལ་བ་ལ་ངེས་ཤེས་གང་ལྟ་བུ་གཅིག་སྐྱེ་ཏེ་མི་སྲིད་ལ། བློ་ཡིན་ན་བློའི་སྤྱོད་ལུས་དང་བྲལ་བའི་དམ་བཅའ་བུད། ཡང་གནས་ལུགས་བློའི་སྤྱོད་ཡུལ་དུ་མ་གྱུར་པ་ལ། མ་གྱུར་བར་ཡིད་ཆེས་པ་ཙམ་ཡིན་ནོ་ཞེ་ན། ཡིད་ཆེས་པའི་བློ་དེ་གང་གི་སྤོང་སྟེ། བྲལ་མི་སྲིད་དོ། །ལུང་ཨ་ནུ་ཡོ་ག་ལ་བཞི་སྟེ། ལྟ་བ་སྒོམ་པ། སྤྱོད་པ་འབྲས་བུའོ། །ལྟ་བ་ནི་ཡུལ་པས་སྣང་བ་ནི་དབྱིངས་སྐྱེ་བ་མེད་པའི་རང་བཞིན། ཡུམ་ཀུན་ཏུ་བཟང་མོའི་མཁའ། རིག་པ་ནང་ནས་འཆར་བ་ནི་ཡེ་ཤེས་འགག་པ་མེད་པ་ཀུན་ཏུ་བཟང་པོའི་རོལ་པ། དེ་གཉིས་གཉིས་སུ་མེད་པ་ནི། དབྱིངས་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོའི་རང་བཞིན་དུ་ཡེ་ནས་སངས་རྒྱས་པར་འདོད་ལ། ཀུན་ཏུ་བཟང་པོའི་རོལ་པ། མ་འགགས་པའི་རྩ་ལྷའི་སྐུར་འཆར་བར་འདོད་པའོ། །དེ་ཡང་ཀུན་འདུས་ལས། །ཀུན་བཟང་རྫོགས་ཆེན་ཡེ་ནས་གདལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །ཞེས་སོ། །བསྒོམ་པའི་ཏིང་ངེ་འཛིན་ལ་གཉིས་ཏེ། དོན་བཀོད་པ་དང་། རྟགས་ཀྱི་རོལ་པའོ། །དོན་བཀོད་པ་ནི། ལྟ་བའི་ངང་ནས་མ་བཅོས་པར་འཇོག་སྟེ། མཚན་མ་མེད་པའི་རྣལ་འབྱོར་རོ། །དེ་ཡང་དགོངས་འདུས་ལས། ཇི་བཞིན་པ་ཡི་ཆོས་ཉིད་ལ། །དེ་བཞིན་པ་ཡི་བློ་བཞག་ནས། །བརྗོད་པ་མེད་པའི་ངང་ཉིད་ལས། །མ་ཡེངས་རྒྱུན་དུ་དྲན་པའོ། །ཞེས་སོ། །རྟགས་ཀྱི་རོལ་པ་ནི། ལྷའི་སྐུ་གྲངས་དང་མདོག་དབྱིབས་མ་ངེས་པ་དང་། ངེས་པ་ཅན་ཅི་རིགས་སུ། སྔགས་བརྗོད་པ་ཙམ་གྱིས་ཆུ་ལས་ཉ་ལྡང་གི་ཚུལ་དུ་བསྐྱེད་པའོ། །དེ་ཡང་ཀུན་འདུས་ལས། སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །ཞེས་སོ། །སྤྱོད་པ་ནི། རྒྱུད་ལུང་ཉི་ཤུ་རྩ་གཅིག་གི་སྒོ་ནས་སེམས་ཅན་གྱི་དོན་བྱེད་པའོ། །འབྲས་བུ་ནི། ཚེ་གཅིག་གིས་ཡི་གེ་འཁོར་ལོ་ཚོགས་ཆེན་གྱིས་ས་ཐོབ་པར་འདོད་པའོ། །དེ་དགག་པ་ནི། ཁྱེད་ཨ་ནུ་ཡོ་གའི་ལུགས་ཀྱིས། དབྱིངས་ཡེ་ཤེས་གཉིས་སུ་མེད་པའི་བདེ་བ་ཆེན་པོར་སངས་རྒྱས་ནས། ལྷ་ཆུ་ལས་ཉ་ལྡང་བའི་ཚུལ་གྱིས་སྒོམ་དགོས་སམ་མི་དགོས། །མི་དགོས་པས་མི་སྒོམ་ན་སྒོམ་པར་བཤད་པ་འགལ། སྒོམ་དགོས་ན། སངས་རྒྱས་པ་དོན་མེད་དུ་ཐལ་ལོ། །ཞེ་ན། ཁོ་ན་རེ། དེ་ལྟར་ཡེ་ནས་སངས་རྒྱས་ཀྱང་། དེ་ལྟར་མ་རྟོགས་པ་རྟོགས་པ་བྱ་བའི་ཕྱིར་སྒོམ་དགོས་སོ། །ཟེར་ན། ཡེ་ནས་ཡིན་པ་ལ་བསྒོམས་པས་བསྐྱེད་བྱུང་ངམ་མ་བྱུང་། མ་བྱུང་ན་བསྒོམ་པ་དོན་མེད་དུ་ཐལ། བསྐྱེད་བྱུང་ན་གཞི་འཕོ་འགྱུར་ཅན་དུ་ཐལ། ཡེ་ནས་ཡིན་པ་ལ། དེ་སྟེང་དུ་ལྷག་པའི་སྐྱེད་བྱུང་བའི་ཕྱིར་རོ། །ཁོ་ན་རེ། ངོ་བོ་ལ་སྐྱེད་མེད་ཀྱང་དོན་རྟོགས་མ་རྟོགས་ཀྱི་སྐྱེད་ཡོད་དོ་ཞེ་ན། འོ་ན་ལྟ་བའི་དུས་སུ་ཡང་ཉིད་ཀྱི་སྲས་བདེ་བ་ཆེན་པོ་དེ་རྟོགས་སམ་མ་རྟོགས། མ་རྟོགས་ན་ལྟ་བ་མ་ཡིན་པར་ཐལ། རྟོགས་ན་བསྒོམ་ཀྱང་མི་འབྱུང་བར་ཐལ། འདོད་ན་བསྒོམས་པ་དོན་མེད་དུ་ཐལ་ལོ། །མན་ངག་ཨ་ཏི་ཡོ་ག་ལ་བཞི་སྟེ། ལྟ་བ་སྒོམ་པ། སྤྱོད་པ་འབྲས་བུའོ། །ལྟ་བ་ལ་གཉིས་ཏེ། སྤྱིར་བསྟན་པ་དང་། བྱེ་བྲག་ཏུ་གཏན་ལ་དབབ་པའོ། །སྤྱིར་བསྟན་པ་ནི། སྣང་སྲིད་འཁོར་འདས་ཀྱི་བསྡུས་པའི་ཆོས་ཐམས་ཅད། ཐིག་ལེ་ཆེན་པོ་ཆོས་ཀྱི་སྐུ་རང་བྱུང་གི་ཡེ་ཤེས་ཆེན་པོའི་ངོ་བོར། བྱ་རྩོལ་མེད་པར་ཡེ་ནས་སངས་རྒྱས་པར་གནས་པའོ། །དེ་ཡང་། ནམ་མཁའ་ཆེ་ལས། རང་བྱུང་ཡེ་ཤེས་རྩལ་མཆེད་པས། གྲོལ་ནས་གྲོལ་བའི་ལམ་ཡང་སྟོན། ཞེས་དང་། ཡང་། རང་བྱུང་ཡེ་ཤེས་ཀུན་ཏུ་ཇི་བཞིན་གནས། ཞེས་སོ། །བྱེ་བྲག་ཏུ་གཏན་ལ་དབབ་པ་ལ་གསུམ་སྟེ། གཞི་དངོས་པོའི་གནས་ལུགས་བསྟན་པ་དང་། དེ་ལྟར་མ་རྟོགས་འཁྲུལ་པའི་ཚུལ་བསྟན་པ་དང་། འཁྲུལ་པ་ཡེ་ཤེས་སུ་གཏན་ལ་དབབ་པ་བསྟན་པའོ། །དང་པོ་དངོས་པོའི་གནས་ལུགས་ནི། གཞི་ཆོས་བཞི་ལྡན་ཡིན་ཏེ། སེམས་ཀྱི་རང་བཞིན་ཤེས་བྱ་དངོས་པོའི་གནས་ལུགས་ཏེ། རང་གི་ངོ་བོ་ཙམ་ཡང་མ་གྲུབ་པར་ཀུན་ལ་ཁྱབ་པར་ནམ་མཁའ་ལྟ་བུ་གཅིག་ཡིན་ངོས་བཟུང་མེད་པར་ཅིར་ཡང་འཆར་བ་ནོར་བུའི་དགོས་འདོད་འབྱུང་བ་ལྟ་བུ་གཅིག་ཡིན། སྣང་གཞི་མ་གྲུབ་པར་སྣང་བ་དངོས་མེད་ཕྱོགས་མེད་དུ་འཆར་བ་རྨི་ལམ་ལྟ་བུ་གཅིག་ཡིན། བཅོས་སླད་མེད་པ་ཡེ་ནས་ཆེན་པོར་གནས་པ་གསེར་ས་ལེ་སྦྲམ་ལྟ་བུ་གཅིག་ཡིན་ནོ། །མ་རྟོགས་ཏེ་འཁྲུལ་པའི་ཚུལ་ལ་གསུམ་སྟེ། གང་ལས་འཁྲུལ་པའི་གཞི་དང་གཅིག ཇི་ལྟར་འཁྲུལ་པའི་ཚུལ་དང་གཉིས། དེ་ལྟར་འཁྲུལ་པའི་འབྲས་བུ་གསུམ་མོ། །དང་པོ་གང་ལས་འཁྲུལ་པའི་གཞི་ལ་གསུམ་སྟེ། གཞི་ལ་ཡོད་པ་ལས་འཁྲུལ་ན། འཁྲུལ་པ་སྤང་གིས་མི་སྤོང་བར་འགྱུར་ཏེ། གཞི་ལ་ཡོད་པའི་ཕྱིར་རོ། །གཞི་ལ་འཁྲུལ་པ་མེད་ཀྱང་འཁྲུལ་ན། རྒྱུད་དག་པའི་སངས་རྒྱས་ལ་འཁྲུལ་པ་འབྱུང་བར་ཐལ་ལོ། །འོ་ན་ཇི་ལྟར་ཡིན་ཞེ་ན། གཞི་ལ་འཁྲུལ་པ་མེད་ཀྱང་། འཁྲུལ་པ་ལ་གཞི་ཡོད་པར་ཐག་པ་ལ་སྤྲུལ་དུ་འཁྲུལ་པ་ལྟ་བུ་ཡིན་ཏེ། ཐག་པ་ལ་སྤྲུལ་གྱི་རྣམ་པ་གང་ཡང་མེད་ཀྱང་། སྤྲུལ་དུ་འཁྲུལ་པའི་གཞི་ཐག་པས་བྱས་སོ། །དཔེ་དེ་བཞིན་དུ་ཤེས་བྱའི་གཤིས་ལ་འཁྲུལ་པའི་གཞི་གང་ཡང་གྲུབ་པ་མེད་ཀྱང་། འཁྲུལ་པ་ནི་ཤེས་བྱའི་གཤིས་མ་རྟོགས་པས་བྱས་སོ། །ཇི་ལྟར་འཁྲུལ་པ་ནི། གཞི་མ་བཅོས་ལྷུན་གྱིས་གྲུབ་པའི་ཆོས་ཉིད་རང་གི་ངོ་བོར་ཅིར་ཡང་མ་གྲུབ་པ་ལ་རྩལ་ཅི་ཡང་འཆར་བ་སྟེ། དྲན་པའི་རྩལ་དུ་ཤར། དྲན་པ་རང་ངོ་རང་གིས་མ་ཤེས་པས་ལྷན་ཅིག་སྐྱེས་པའི་མ་རིག་པ་རྒྱུ་བྱས། དེས་ཡུལ་ཀུན་ལ་ལོག་པར་བརྟགས་པའི་མ་རིག་པས་རྐྱེན་བྱས་ནས། ཡུལ་རང་རྒྱུད་དུ་བཟུང་ནས། རང་གི་གཟུགས་བརྙན་ལ་བདེན་པར་བཟུང་བ་མེ་ལོང་དང་བཞིན་ལྟ་བུར་གྱུར། མིན་པ་ལ་ཡིན་པར་བཟུང་བ་ཐོ་ཡོར་ལ་མིར་འཁྲུལ་བ་ལྟ་བུར་གྱུར། །རང་གི་རང་བཅིངས་པ་སྲིན་གྱི་ཁ་ཆུ་ལྟར་གྱུར་ཏོ། །འཁྲུལ་པའི་འབྲས་བུ་ནི། སྣང་བ་བཅུ་བདུན་ཏེ། རང་འཁྲུལ་པ་འགྲོ་བ་རིགས་དྲུག །ལོག་པར་འཁྲུལ་པ་མུ་སྟེགས་རྟག་ཆད་གཉིས། ཕྱོགས་ཙམ་འཁྲུལ་པ་ཐེག་པ་རིམ་པ་དགུ་རྣམས་ཡིན་ནོ། །འཁྲུལ་པ་ཆོས་ཉིད་དུ་གཏན་ལ་འབེབས་པ་ལ། སྤྱིར་རྫོགས་པ་ཆེན་པོ་ལ་བཤད་གཞུང་མང་དུ་ཡོད་པ་ལས། མྱང་ལུགས་པ་ནི། ངང་རང་བཞིན། བདག་ཉིད་གསུམ་དུ་འདོད་དོ། །སྐོར་ལུགས་པ་ནི། རང་བཞིན་སྐྱེ་མེད། རོལ་པ་འགག་མེད། མཚན་ཉིད་གཉིས་མེད། བློ་ངོ་བོ་ཉིད་དུ་གྲོལ་བ་དང་བཞིར་འདོད། དགོངས་པ་ཀློང་ཆེན་པ་ནི། གནས་ལུགས། ཡིན་ལུགས། ཤར་ལུགས། གྲོལ་ལུགས་དང་བཞིར་འདོད་དོ། སོ་ལུགས་པ་ནི། ཡིན་ལུགས། རྟོགས་ལུགས། ཉམས་སུ་བླང་ལུགས་གསུམ་དུ་འདོད་དོ། །དེ་རྣམས་ཀྱང་གྲུབ་མཐའ་ཕྱོགས་རེའི་ཞེན་པ་དང་མ་བྲལ་བའོ། །ད་རེས་རྫོགས་པ་ཆེན་པོའི་རང་གཞུང་ཕྱིན་ཅི་མ་ལོག་པ་ཤེས་བྱ་མཐའ་མེད་དུ་གཏན་ལ་འབེབས་པ་འདིའི་ལུགས་ཀྱིས། གཤིས་སྐྱེ་བ་མེད་པ་ཐིག་ལེ་ཉག་གཅིག རྩལ་འགག་པ་མེད་པ་རང་བྱུང་གི་ཡེ་ཤེས། ངོ་བོ་གཉིས་མེད་རང་གྲོལ་ཆོས་ཀྱི་སྐུའི་དགོངས་པ་དང་གསུམ་མོ། །དེ་ལ་བཞི་སྟེ། ཤེས་བྱ་ཁ་ཕྱིར་བལྟས་ཏེ་གཏན་ལ་འབེབས་པ་དང་གཅིག ཤེས་བྱ་ཁ་ནང་དུ་བལྟས་ཏེ། གཏན་ལ་འབེབས་པ་དང་གཉིས། ཤེས་བྱ་སྤྱིར་གཏན་ལ་འབེབས་པ་དང་གསུམ། ཤེས་བྱ་དོན་ཐོག་ཏུ་བཞག་སྟེ་གཏན་ལ་འབེབས་པ་དང་བཞིའོ། །དང་པོ་ཤེས་བྱ་ཕྱིར་བལྟས་ཏེ་གཏན་ལ་དབབ་པ་ནི། སྣང་སྲིད་འཁོར་འདས་ཀྱི་ཆོས་ཉིད་ཐམས་ཅད་ཡང་དག་པར་ཅིར་ཡང་མ་གྲུབ་པར་གནས་པ་ནི་གཤིས་སྐྱེ་བ་མེད་པ་ཐིག་ལེ་ཉག་གཅིག་གོ །འཁོར་འདས་སྣོད་བཅུད་སྣ་ཚོགས་སུ་སྣང་བ་ནི་རྩལ་འགག་པ་མེད་པ་རང་བྱུང་གི་ཡེ་ཤེས་སོ། །དེ་ལྟར་སྣང་ཡང་སྟོང་པའི་གཟུགས་བརྙན་ཅིར་ཡང་འཆར་བའི་རྩལ་ལས། རང་རྒྱུད་དུ་འཛིན་པ་གང་ཡང་མེད་པར་གནས་པ་ནི། ངོ་བོ་གཉིས་མེད་རང་གྲོལ་ཆོས་ཀྱི་སྐུའི་དགོངས་པའོ། །ཤེས་བྱ་ཁ་ནང་དུ་བལྟས་ཏེ་གཏན་ལ་དབབ་པ་ནི། སེམས་ཀྱི་རང་བཞིན་ཅིར་ཡང་མ་གྲུབ་པ་ནི་གཤིས་སྐྱེ་བ་མེད་པའོ། །བཟང་རྟོག་ངན་རྟོག་ཅིར་ཡང་འཆར་བ་ནི་རྩལ་འགགས་པ་མེད་པའོ། །ཅི་ཤར་དྲན་སྟོང་གཉིས་མེད་འཛིན་པ་རང་གྲོལ་དུ་ཤེས་པ་ནི་ངོ་བོ་གཉིས་མེད་རང་གྲོལ་ལོ། །ཤེས་བྱ་སྤྱིར་གཏན་ལ་དབབ་པ་ནི། ཤེས་པ་དང་ཤེས་བྱས་བསྡུས་པའི་ཆོས་ཐམས་ཅད་ཡང་དག་པར་ན་ཅིར་ཡང་གྲུབ་པ་མེད་དེ་ནམ་མཁའ་དྭངས་པའི་དཀྱིལ་ལྟར་གནས་པ་ནི་གཤིས་སྐྱེ་བ་མེད་པའོ། །ཅིར་ཡང་མ་གྲུབ་པའི་ངང་ལས་ཅིར་ཡང་འཆར་ཏེ་ངེས་མེད་ཕྱོགས་མེད་དུ་འཆར་བ་ནི་རྩལ་འགག་པ་མེད་པ་ནམ་མཁའི་ཆོ་འཕྲུལ་ལྟ་བུའོ། །ཅིར་ཡང་ཤར་བ་ཙམ་ན་ཅིར་ཡང་མ་གྲུབ། ཅིར་ཡང་མ་གྲུབ་ཙམ་ན་ཅིར་ཡང་འཆར་ཏེ། དེ་གཉིས་གཉིས་སུ་མེད་པ་རྒྱ་མཚོའི་གཟུགས་བརྙན་ལྟར་སྣང་བ་ནི། ངོ་བོ་གཉིས་མེད་རང་གྲོལ་ལོ། །རྣལ་འབྱོར་པ་དོན་ཐོག་ཏུ་བཞག་སྟེ་གཏན་ལ་དབབ་པ་ནི། འཁོར་འདས་ཀྱི་ཆོས་ཐམས་ཅད་རང་གི་རིག་པ་བྱང་ཆུབ་སེམས་ཀྱི་འཆར་ལུགས་སུ་ཤེས་པར་བྱས་ལ། སེམས་ཀྱིས་སེམས་ལ་བལྟས་པས་ཅིར་ཡང་མ་གྲུབ་ལ། སྟོང་ཉིད་བློ་བྲལ་དུ་རྗེན་པར་མཐོང་བ་ནི། སྟོན་གྱི་བར་སྣང་དྭངས་པ་ལྟ་བུ་སྟེ། གཤིས་སྐྱེ་བ་མེད་པ་ཐིག་ལེ་ཉག་གཅིག་གོ །སྟོང་པའི་ངང་ལས་བཟང་ངན་གྱི་དྲན་རྟོག་ཅིར་ཡང་འཆར་བ་ནི། སྟོང་ལམ་གྱི་འགྲུལ་པ་ལྟ་བུ་རྩལ་འགག་པ་མེད་པའོ། །དེ་ལྟར་བཤད་ཀྱང་དྲན་པ་རང་གི་ངོ་བོས་སྟོང་སྟེ་རྩ་བྲལ་རང་དྭངས་ཆེན་པོ། །མ་བཅོས་ལྷུན་གྱིས་གྲུབ་པའི་ངང་ལ་ལྷན་ནེ་གནས་པ་ནི། བར་སྣང་སྟོང་པ་ལ་ཉི་མ་ཤར་བ་ལྟ་བུ་སྟེ། ངོ་བོ་རང་གྲོལ་ཆོས་ཀྱི་སྐུའི་དགོངས་པའོ། །དེ་ནི་ལྟ་བའི་གནས་ལུགས་སོ། །བསྒོམ་པའི་ཏིང་ངེ་འཛིན་ལ་གཉིས་ཏེ། ལྟ་བའི་ངང་བསྒོམ་པ་དང་། མཚན་མའི་འཛིན་སྒོམ་མོ། །ལྟ་བའི་ངང་སྒོམ་ནི་རྟོགས་པའི་དོན་ལས་མ་གཡོས་པར་ཐིག་ལེ་ཆེན་པོ་ཆོས་ཀྱི་སྐུའི་ངང་དུ་ལྷོད་དེ་ཤིག་གི་གནས་པའོ། །དེ་ཡང་ཁྱུང་ཆེན་ལས། ལྷུན་གྱིས་གནས་པས་བཞག་པ་ཡིན། །ཞེས་སོ། །མཚན་མའི་འཛིན་སྒོམ་ནི། རྫོགས་པ་ཆེན་པོ་ལ་སེམས་འཛིན་གྱི་སྐོར་དཔག་ཏུ་མེད་པ་ཞིག་བཞུགས་ཏེ། དེ་ཐམས་ཅད་ཀྱང་གནས་ལུགས་རྟོགས་པར་བྱེད་པའི་ཐབས་ཡིན་ཏེ། དེ་ཡང་། རྣམ་གྲངས་བརྒྱ་སྟོང་ཕྲག་ཡས་པ། །གང་ལྟར་བསྒྲུབས་ཀྱང་རྟོག་མེད་སྐྱེ། །ཞེས་སོ། །སྤྱོད་པ་ནི། ཅིར་སྣང་ཆོས་ཉིད་ཀྱི་རོལ་པར་ཤར་བའི་སྒོ་ནས། །དགག་བསྒྲུབ་དང་སྤང་བླང་མེད་པར་སྤྱོད་པའོ། །དེ་ཡང་། བྱ་བ་མེད་ལྟ་ལས་རྣམས་ཏེ། །ཞེས་སོ། །འབྲས་བུ་ནི། མ་བསྒྲུབས་ལྷུན་གྱིས་གྲུབ་པ་དངོས་གྲུབ་ཆེན་པོ་འབྲས་བུ། ཀུན་ཏུ་བཟང་པོ་དབྱེ་བ་མེད་པའི་ས་ལ་གནས་པའོ། །དེ་ཡང། བསྒྲུབས་མེད་རྩལ་སྤྲུགས་སྨོན་མེད་པས། ཞེས་སོ། །དེ་ལྟར་ཨ་ཏི་ཡོ་ག་ལ་ཐེག་པ་གོང་མས་སུན་འདོན་པ་མེད་ཀྱང་། འོག་མའི་རྩོད་བྱེད་ཡོད་པས་དེ་གསལ་བ་ནི། ཐེག་པ་འོག་མ་ན་རེ། ཁྱེད་རྫོགས་པ་ཆེན་པོ་ལ་ཐིག་ལེ་ཆེན་པོ་ཆོས་ཀྱི་སྐུར་ཡེ་ནས་སངས་རྒྱས་པར་འདོད་དམ་མི་འདོད། འདོད་ན་དེ་ལ་ཐོས་བསམ་གྱིས་གཏན་ལ་དབབ་ཏུ་ཡོད་དམ་མེད། ཡོད་ན་ཡེ་ནས་སངས་མ་རྒྱས་པར་ཐལ། མེད་ན་ཐོས་བསམ་བྱ་མི་དགོས། ཞེ་ན། ཡེ་ནས་སངས་རྒྱས་ཀྱང་སངས་རྒྱས་པར་ངོ་མ་ཤེས་པ་དེ་ཤེས་པར་བྱ་བའི་ཕྱིར་ཐོས་བསམ་དགོས་ཏེ། །དཔེར་ན་དབུལ་མོའི་ཁྱིམ་ན་གཏེར་ཡོད་ཀྱང་། དེ་ངོ་ཤེས་པ་དེད་དཔོན་གྱིས་ངོ་བསྟན་པ་ལྟ་བུ་ཡིན་ནོ། །དེ་ཡང་། ཡེ་ནས་སངས་རྒྱས་བདག་ཉིད་ལ་གནས་པ་ལ། །གྲིབ་མ་གཟུགས་ཀྱི་དཔེ་བཞིན་དེ་ལ་རྟོག་པ་བྱུང་། ཞེས་སོ། །ཡེ་ནས་སངས་རྒྱས་ན་ད་ལྟར་འཁོར་བ་འཁྲུལ་བའི་སྣང་བ་འཆར་བ་འདི་ཅེས་ལན་ཞེ་ན། ཆོས་ཉིད་ཀྱི་རོལ་པར་ཅིར་ཡང་ཤར་བ་ལས་མ་རྟོགས་པས་དངོས་པོར་བཟུང་བ་ནི་འདོད་པའི་ཁམས་ཀྱི་ལྷ་གཉིད་ལོག་པ་ལྟ་བུ་སྟེ། དེ་ཡང་། མ་ངེས་འཇའ་ཚོན་ཁ་དོག་ལས། །རིགས་ཀྱི་ཁྱད་པར་མངོན་པར་སྣང་། །ཞེས་སོ། །འོ་ན་རིགས་དྲུག་གི་སྡུག་བསྔལ་སྣ་ཚོགས་སུ་ཤར་བ་འདི་སངས་རྒྱས་ཡིན་ཞེ་ན། དོན་ལས་མ་གཡོས་ཤིང་རྟོགས་ན་སངས་རྒྱས་ཡིན་ཏེ། རྒྱལ་པོ་དམངས་སུ་འཁྱམས་ཀྱང་རིགས་མི་འགྱུར་བ་ལྟ་བུའོ། །དེ་ཡང་། འགྲོ་བའི་སྡུག་བསྔལ་བྱང་ཆུབ་སེམས། །ཀུན་ཏུ་ཆུབ་བས་རྣམ་པར་རོལ། །ཞེས་སོ། །འོ་ན་ཉོན་མོངས་པ་དུག་ལྔ་པོ་འདི་ཡང་སངས་རྒྱས་ཡིན་ནམ་ཞེ་ན། རྟོགས་ན་སངས་རྒྱས་ཡིན་ཏེ། ཁྱག་པ་ཆུ་ལས་མ་འདས་པ་བཞིན་ནོ། །དེ་ཡང་། འདོད་ཆགས་ཞེ་སྡང་གཏི་མུག་ཀྱང་། །བྱང་ཆུབ་ཆེན་པོའི་ལམ་ལས་བྱུང་། །ཞེ་ན། འོ་ན། ས་རྡོ་རི་བྲག་འདི་ཡང་སངས་རྒྱས་ཡིན་ནམ། ཞེ་ན། རྟོགས་ན་ཆོས་ཉིད་ཀྱི་རོལ་པ། རིག་པའི་རང་རྩལ་འདི་ཁོ་ན་ལྟར་སངས་རྒྱས་པ་ཡིན་ཏེ། དེ་ཡང་། འབྱུང་བ་ཆེན་པོ་བཅོམ་ལྡན་འདས། ཞེས་སོ། །འོ་ན་ཐེག་པ་འོག་མའི་དཀའ་ཐུབ་ལ་དོན་མེད་དམ་ཞེ་ན། ཡེ་ནས་སངས་རྒྱས་བའི་དོན་རྟོགས་པར་དུ་དགོས་ཏེ། དེ་ཡང་། རྣམ་གྲངས་བརྒྱ་སྟོང་ཕྲག་ཡས་པ། །གང་ལྟར་བསྒྲུབས་ཀྱང་མི་རྟོག་སྐྱེ། །ཞེས་སོ། །འོ་ན། འགྲོ་བ་ལས་ངན་སྣ་ཚོགས་བྱེད་པ་འདི་ཡང་སངས་རྒྱས་ཡིན་ནམ། ཞེ་ན། རྟོགས་ན་ལས་ཀྱི་དབང་དུ་མི་འགྲོ་བ་སངས་རྒྱས་པ་ཡིན་ཏེ། དེ་ཡང་། ཁྱད་པར་ཅིར་ཡང་མཚུངས་པ་ལ། །ལས་སོ་ཞེས་ནི་རྣམ་པར་བརྟགས། །ཇི་ལྟར་ལས་ཀྱི་དབང་མི་འགྱུར། །ཞེས་སོ། །འོ་ན། ས་ལམ་རིམ་པར་བསྒྲོད་དུ་མེད་དམ་ཞེ་ན། མ་རྟོགས་ན་ཡོད་དོ། །དེ་ཡང་། ལམ་མེད་ལམ་དུ་འཇུག་པར་འདོད་པས་ལམ་གྱི་གནད་ཆེ་སར་ཕྱིན་པར་འདོད་པས་རི་དྭགས་སྨྲིག་རྒྱུ་སྙེགས་པ་འདྲ། ཞེས་སོ། །འོ་ན་སངས་རྒྱས་པའི་ཆོས་འགའ་ཙམ་ཡོད་དོ་ཞེ་ན། རྟོགས་བར་འཁོར་བ་བྱ་བ་གྲུབ་པ་མེད་དེ། ཐམས་ཅད་སངས་རྒྱས་ཀྱི་ངོ་བོར་གནས་པ་ཡིན་ནོ། །དེ་ཡང་། ལྷག་མ་མེད་པ་ཡོངས་སུ་རྫོགས། །ཞེས་གསུངས་སོ། །ཤེས་བྱའི་ཡུལ་ངོས་འཛིན་པར་བྱེད་པ་ཤེས་བྱེད་སྐྱེས་བུའི་བློ་བསྟན་པ་སྟེ། ས་གཅོད་ཀྱི་དམིགས་པ་གཉིས་པའོ། །སྤྱི་དོན་གསུམ་པ་དེ་གཉིས་སུ་མེད་པ། ཤེས་བྱ་དངོས་པོའི་གནས་ལུགས་ནི། དེ་ལྟར་ཤེས་བྱའི་ཡུལ་དང་། །ཤེས་བྱེད་ཀྱི་བློ་དང་། བསྟན་པའི་སྒོ་དང་། ཐེག་པའི་མཐའ་ཇི་སྙེད་པ་རྣམས་ཐ་དད་དུ་ཡོད་དམ་ཞེ་ན། ཡང་དག་པའི་དོན་ལ་ཤེས་བྱ་དངོས་པོ་དོན་གྱི་གནས་ལུགས་ཤེས་པ་དང་། ཤེས་བྱའི་ཆོས་དང་། བསྟན་པའི་སྒོ་དང་། ཐེག་པའི་མཐའ་ཐམས་ཅད། རྩལ་གང་དུ་ཡང་མ་འགགས་ལ། ཡང་དག་པར་ན་ཅི་ཡང་གྲུབ་པ་མེད་དེ། དེ་ལ་དཔེ་དོན་གཉིས་ལས། དང་པོ་ནི། ཤེས་པ་དང་ཤེས་བྱ་གཉིས་སུ་སྣང་ཡང་། རང་རང་གི་ངོ་བོ་ཐ་དད་དུ་གྲུབ་པ་མེད་པ་ནི། བཞིན་དང་མེ་ལོང་ལྟ་བུའོ། །མེ་ལོང་ནང་གི་བཞིན་དང་། རང་གི་བཞིན་གཉིས་ལ་ཐ་དད་པར་སྣང་ཡང་གཉིས་སུ་གྲུབ་པ་མེད་པ་ལྟར་དུ། ཤེས་པ་དང་ཤེས་བྱའི་ཆོས། ཡུལ་དང་ཡུལ་ཅན་ཐ་དད་སྣང་ཡང་། རང་གི་ངོ་བོ་དང་དབྱེར་མེད་དེ། །ཤེས་པ་ཕྱི་ཡུལ་གྱི་གཟུགས་བརྙན་ལྟར་དུ་ཤར། ཕྱི་ཤེས་བྱའི་ཡུལ་ཉིད་ཤེས་པའི་གཟུགས་བརྙན་ཡིན་ཏེ། དེ་ཡང་། མེ་ལོང་བསྟན་པའི་ཚུལ་བཞིན་དུ། །སྣ་ཚོགས་ཁ་དོག་དབྱིབས་སུ་སྣང་། །ཞེས་སོ། །འོ་ན་ཤེས་པ་དང་ཤེས་བྱའི་ངོ་བོ་དབྱེར་མེད་ན། དེ་གཉིས་ཀ་ཡང་དག་ཏུ་གྲུབ་པ་ཡོད་དམ་ཞེ་ན། ཡང་དག་ཏུ་གྲུབ་པ་མེད་དེ། མདོ་སྡེ་རྒྱན་ལས། ཆོས་རྣམས་རང་གི་སེམས་སུ་བློས་རྟོགས་ནས། དེ་ནས་སེམས་ཀྱང་མེད་པར་རིག་པར་བྱ། ཞེས་སོ། །ཡང་དག་པར་གྲུབ་པ་མེད་ན། ད་ལྟ་སྣོད་བཅུད་སྣ་ཚོགས་སུ་སྣང་བའི་ཇི་ལྟར་ཡིན་ཞེ་ན། སྟོང་པ་ལས་རིག་པ་ཤར། རིག་པའི་རྩལ་དུག་ལྔར་ཤར། དུག་ལྔའི་རྩལ་འབྱུང་བ་ལྔར་ཤར་ནས་ཕྱི་ནང་སྣོད་བཅུད་ཀྱི་འཁྲུལ་སྣང་ཅིར་ཡང་ཤར་བ་ཡིན་ཏེ། ནམ་མཁའ་སྟོང་པ་ལས་འབྱུང་བ་བཞི་འཆར་བ་ཡིན་ནོ། །དེ་ཡང་། ནམ་མཁའི་རང་བཞིན་དེ་ལ་འབྱུང་བའི་དྲན་པ་སྐྱེ། ཞེས་སོ། །དེ་ལྟར་སྣོད་བཅུད་ཀྱི་འཁྲུལ་པ་སྣ་ཚོགས་སུ་ཤར་ཡང་། ཡང་དག་པའི་དོན་ལས་་གཡོས་པ་མེད་དེ། འབྱུང་བ་བཞིས་ནམ་མཁའ་ལས་འཕགས་མ་ནུས་པ་ལྟ་བུའོ། །དེ་ཡང་། འགྲེ་ལྡོག་སྤྱི་གཙུག་གར་སོང་ཡང་། །སྙིང་པོ་དོན་ལས་གཡོས་པ་མེད། །ཞེས་སོ། །ཡང་དག་པའི་དོན་ཕྱིན་ཅི་མ་ལོག་པ་དེ་རྟོགས་ན། ནམ་རྟོགས་པ་ན་གྲོལ་བ་ཡིན་ནོ། །དེ་ལྟར་རྟོགས་ཡོད་ན་ཆོས་ཅི་དགོས་ཤེས་ན། དེ་མ་རྟོགས་ན་གྲོལ་བ་ནམ་ཡང་མེད་དེ། དེ་ཡང་། བསམ་གཏན་རྫུན་པས་ཐར་པ་ཐོབ་བམ་ཅི། ཞེས་སོ། །ཡང་དག་པའི་དོན་དེས་སེམས་ཅན་ཐམས་ཅད་ལ་ཁྱབ་བམ་མ་ཁྱབ་ཞེ་ན། ཏིལ་འབྲུ་ལ་མར་གྱིས་ཁྱབ་པ་ལྟར་བགོས་པ་མེད་པར་མཉམ་པར་ཁྱབ་སྟེ། དེ་ཡང་བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། ཞེས་སོ། །སེམས་ཅན་ཐམས་ཅད་བདེ་བར་གཤེགས་པའི་སྙིང་པོ་ཅན་དུ་མཉམ་ན། དབང་པོ་ལ་རྣོ་བརྟུལ་ཡོང་བ་ཇི་ལྟར་ཡིན་ཞེ་ན། དེ་ལ་གཉིས་ཏེ། རང་བཞིན་གྱིས་དབང་པོ་ལ་རྣོ་རྟུལ་ཡོང་བའི་རྒྱུ་མཚན་ནི། སེམས་ཅན་འཁོར་བ་ཐོག་མ་མེད་པ་ནས་འཁྲུལ་ཀྱང་མཉམ་དུ་འཁྲུལ་། བདེ་བར་གཤེགས་པའི་སྙིང་པོ་ཡོད་པར་མཉམ་སྟེ། ལས་ངན་ཚབས་ཆེ་ཆུང་བྱུང་གིས། སྒྲིབ་པ་ཐུབ་སྲབ་བྱུང་། དེས་ཆོས་ཉིད་རྟོགས་དཀའ་སླ་རིམ་པར་བྱུང་བས་དབང་པོ་རྣོ་རྟུལ་དུ་གྱུར་པ་ཡིན་ནོ། །དཔེར་ན་མེ་ལོང་ཡོངས་སུ་དྭངས་པར་མཉམ་ཀྱང་། དྲི་མ་སྲབ་ཐུག་གིས་གསལ་མི་གསལ་དུ་སྣང་བ་བཞིན་ནོ། །མདོ་ལས། འཇམ་དཔལ་གྱིས་ཞུས་པ། གནས་ངན་ལེན་སྒྲིབ་པ་དེ་ཇི་ཙམ་གྱིས་དག་པར་གྱུར། བཀའ་སྩལ་བ། གནས་ངན་ལེན་གྱི་སྒྲིབ་པ་ནི་བསྐལ་པ་གྲངས་མེད་པས་སམ། གཅིག་གིས་ཙམ། མི་ཚེ་གཅིག་གིས་སམ། སྐད་ཅིག་ཡུད་ཙམ་གྱིས་ཀྱང་དག་པར་འགྱུར་ཏེ། དེ་ཅིའི་ཕྱིར་ཞེ་ན། གནས་ངན་ལེན་གྱི་དྲི་མ་ཚན་ཆེ་ཆུང་གི་དབང་གིས་སོ། །ཞེས་སོ། །སྦྱངས་པའི་དབང་པོ་ལ་རྣོ་རྟུལ་ཡོང་བའི་རྒྱུ་མཚན་ཡང་། གནས་ངན་ལེནགྱི་དྲི་མ་ཚན་ཆེ་ཆུང་མཉམ་ཡང་། སྐྱེ་བ་གོང་མ་སྦྱངས་པ་ཆེ་ཆུང་གི་བྱེ་བྲག་གིས། འདི་ལ་དབང་པོ་རྣོ་རྟུལ་དུ་འགྱུར་བ་ཡིན་ཏེ། དཔེར་ན། ལྕགས་ཀྱི་རྒྱུ་མཉམ་པོ་ལ། རྐྱེན་མགལ་བ་མཁས་མི་མཁས་ཀྱི་ཁྱད་ཀྱིས་མཚོན་རྣོ་བརྟུལ་བྱུང་བ་ཡིན་ནོ། །ཐོས་དང་བསམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་བཟུངས། །ཞེས་སོ། །ཡང་ཤེས་བྱ་དེ་ཁོ་ན་ཉིད་ཐ་དད་མེད་ཅིང་གཅིག་ཏུ་གནས། སངས་རྒྱས་རྣམས་ཀྱི་ཆོས་ཐེག་པ་དུ་མ་གསུངས་པ་ཇི་ལྟར་ཡིན་ཞེ་ན། དེ་ལ་གཞུང་གཉིས་ལས། གཞུང་གཅིག་ལྟར་ན། མ་བུ་ཚ་མང་པོ་གསོ་བ་དེ། བུ་ཚའི་ལོ་ཚོད་དང་་སྦྱར་ནས། ཁ་ཟས་རིགས་མི་འདྲ་བ་སྟེར་བ་ལྟར་དུ། སངས་རྒྱས་ཀྱིས་ཀྱང་གདུལ་བྱའི་དབང་པོའི་རིམ་པ་དང་སྦྱར་ནས་ཐེག་པ་དུ་མ་གསུངས་པ་ཡིན་ཏེ། རྩ་རྒྱུད་གསང་བ་སྙིང་པོ་ལས། ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར་ཆོས་ཀྱི་སྒོ་མོ་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། གསུངས་པར་འགྱུར་རོ། །ཞེས་སོ། །གཞུང་གཅིག་ལྟར་དུ། སངས་རྒྱས་རྣམས་ཀྱིས་དེ་ཁོ་ན་ཉིད་ཀྱི་ཐེག་པ་གཅིག་ལས་མ་གསུངས་ཀྱང་། གདུལ་བྱ་རྣམས་ཀྱིས་རང་རང་གི་དབང་པོ་དང་མཐུན་པར་ཆོས་ཐེག་པ་ཐ་དད་དུ་ཐོས་ཏེ། ཐུབ་པ་སྦྲིད་པ་སངས་པ་བཞིན་ནོ། །འབུམ་ལས། ངས་ནི་གཟུགས་ཀྱི་དེ་བཞིན་ཉིད་གཅིག་པུ་ལས་མ་གསུངས་ཏེ། ལ་ལས་ནི་གཟུགས་སྟོང་ཞེས་བྱ་བར་ཐོས། ལ་ལས་ནི་གཟུགས་མི་སྟོང་ཞེས་བྱ་བར་ཐོས་སོ། །ཞེས་དང་། དགོངས་འདུས་ལས། གསང་ཉིད་ངེས་པར་འཇུག་པར་དུ། ཐེག་པའི་སྒོ་ཡང་བསམ་མི་ཁྱབ། གསང་ཉིད་སྙིང་པོར་ངེས་པ་ནི། ཐེག་པའི་སྒོ་ཡང་གཅིག་ལས་མེད། །ཅེས་སོ། །ཡང་ཐེག་པ་ཐ་དད་དུ་བྱུང་བ་དང་གང་ཟག་དབང་པོའི་རིམ་པ་དང་བསྟུན་པ་ཡིན་ན། གང་ཟག་གཅིག་ལ་ས་ལམ་གྱི་རིམ་པ་མང་པོ་འོང་བ་ཇི་ལྟར་ཡིན་ཞེ་ན། དཔེར་ན་ཟླ་བ་ལ་འཕེབ་འགྲིབ་མེད་ཀྱང་རང་གི་སྒྲིབ་མའི་བྱེ་བྲག་གིས་འཕེབ་འགྲིབ་དུ་སྣང་བ་ལྟར་དུ། སེམས་ཅན་གྱི་གནས་ལུགས་ལ་འགྱུར་བ་མེད་ཀྱང་། དེ་རྟོགས་ཚབས་ཆེ་ཆུང་གི་བྱེ་བྲག་གིས་ས་ལམ་ལ་མཐོ་དམན་ཡོད་པར་སྣང་བ་ཡིན་ཏེ། མདོ་སྡེ་ལས། རི་བོང་འཛིན་པ་འཕེལ་བ་བཞིན། །རང་གི་སེམས་ཀྱང་རིམ་གྱི་འཕེལ། །དེ་ལ་ས་ཞེས་བཏགས་པར་ཟད། །ཡང་དག་དོན་ལ་འཕེལ་འགྲིབ་མེད། །ཞེས་སོ། །ཡང་ཆོས་ཐམས་ཅད་མཐར་ཐུག་སེམས་ཉིད་གཏན་ལ་ཕབ་པ་ལ་མཐུན་པ་ལས། སེམས་ཀྱི་རང་བཞིན་ལ་བཟང་ངན་དང་ཆེ་ཆུང་མེད་པ་ལ། གྲུབ་མཐའ་རེ་རེ་ལ་མཐར་ཐུག་གི་རྟོགས་པ་མི་འདྲ་བ་རེ་རེ་འོང་བ་ཇི་ལྟར་ཡིན་ཞེ་ན། དཔེར་ན་རི་རབ་ཀྱི་ཁ་དོག་དང་། ལུང་པའི་དབྱིབས་ལ་བརྟེན་ནས་ནམ་མཁའ་ལ་ཁ་དོག་དང་དབྱིབས་སུ་མཐོང་བ་ལྟར་དུ། ཐེག་པ་རིམ་པ་དགུ་པོས་ཀྱང་། ཆོས་ཉིད་དངོས་མེད་ཕྱོགས་མེད་ལ། བློ་ངོས་ཅན་དུ་མཐོང་ནས་རང་འདོད་ཀྱི་ལྟ་བ་རེ་རེ་བྱེད་དེ། དེ་གོམས་འདྲིས་ཀྱི་བསྟན་པ་ཐོབ་པས་ཆོས་ཉིད་དམ་སེམས་ཉིད་ཀྱི་ཕྱོགས་རེ་རེ་ཙམ་མཐོང་བ་ཡིན་ཏེ། ཀུན་བྱེད་རྒྱལ་པོ་ལས། ཡོད་ནི་གཅིག་ལས་མེད་པ་ལ། །བསྟན་ནི་རྣམ་པ་གཉིས་སུ་བསྟན། །བྱུང་ནི་ཐེག་པ་རིམས་དགུར་བྱུང་། །འདུས་ནི་བྱང་ཆུབ་སེམས་སུ་འདུས། །ཞེས་སོ། །ཡང་། སེམས་ཀྱི་རང་བཞིན་བྱང་ཆུབ་ཀྱི་སེམས་རྣམ་པ་དག་པ་ལ། འཁྲུལ་པ་སྣ་ཚོགས་སུ་འཆར་བ་འདི་ཇི་ལྟར་ཡིན་ཞེ་ན། དཔེར་ན་ནམ་མཁའི་རང་བཞིན་སྟོང་པར་གནས་པའི་ཡོན་ཏན་གྱིས། རྩལ་འགགས་མེད་ཆོ་འཕྲུལ་སྣ་ཚོགས་སུ་ཤར་བ་ལྟར་དུ། སེམས་ཀྱི་རང་བཞིན་སྟོང་པ་ཡིན་པའི་གནད་ཀས། རྩལ་འགགས་མེད་སྣ་ཚོགས་སུ་ཤར་བ་ཡིན་ནོ། །དེ་ཡང་། ནམ་མཁའི་རང་བཞིན་དེ་ལས་འབྱུང་བའི་དྲན་པ་སྐྱེ། ཞེས་སོ། །ཡང་སེམས་ཉིད་སྟོང་པ་ལས་སེམས་ཀྱི་རྩལ་དངོས་པོར་འཆར་བ་ཇི་ལྟ་བུ་ཞེ་ན། དཔེར་ན་ལྕགས་ཕག་གྲང་མོ་ལས་རྐྱེན་དབང་གིས་མེ་ཚ་མོ་འབྱུང་བ་ལྟར། སེམས་སྟོང་པར་མ་རྟོགས་པས་འཁྲུལ་པའི་རྐྱེན་གྱིས་སེམས་ཀྱི་རྩལ་བདེན་བདེན་ཡོད་ཡོད་ལྟར་ཤར་བ་ཡིན་ཏེ། སྐྱེ་བ་མེད་ལས་ཐམས་ཅད་སྐྱེས། །ཞེས་སོ། །ཡང་སྟོང་པའི་རྩལ་དངོས་པོར་ཤར་བར་སྣང་ཡང་དངོས་པོར་ཡོད་པ་མ་ཡིན་ཏེ། རྨི་ལམ་བདེན་པར་བཟུང་བ་ལྟ་བུའོ། །ཀུན་འདུས་ལས། དངོས་པོ་མེད་ལ་དངོས་པོའི་སྤྲིན། །སྣ་ཚོགས་རྣམ་པར་འབྱུང་བ་སྣང་། །ཞེས་སོ། །མདོར་ན་ཀུན་རྫོབ་འཁྲུལ་སྣང་ལ་གང་དུའང་སྣང་། ཅིར་ཡང་འཆར། འདི་ཡིན་འདི་མིན་མེད་དེ་སྔོར་སྣང་དགུ་འགྱུར་གྱི་རྩ་བ་ལྟ་བུའོ། །ཡང་དག་པར་ན་གནས་ལུགས་ཀྱི་དོན་ལ་འདི་ཡིན་མེད་དེ། བསམ་ཚད་བློ། བསྒོམ་ཚད་རྟོག་པ། བྱས་ཚད་བཅོས་མ། ཆོས་ཐམས་ཅད་གཞི་བཞེངས་གཏན་བཞེངས་སུ་ཡེ་གདོད་མ་ནས་ཆོས་སྐུར་ཡོད་པའོ། །དེ་ཡང་ཆོས་སྐུ་ཁྱབ་པ་ཅིག་པའི་ཕྱིར། ཞེས་སོ། །བསྟན་པའི་སྒོ་དང་། ཐེག་པ་དུ་མའི་དོན་རྟོགས་ཏེ། མ་རྟོགས་ལོག་རྟོག་བློ་ཡི་ཐེ་ཚོམ་སྤྲོས་བཅད་ནས། །ཤེས་བྱའི་གནས་ལུགས་ཇི་བཞིན་གཏན་ལ་ཕབ་པའི་དོན། །རོག་གི་བནྡྷེ་ཤེས་རབ་འོད་ཀྱིས་ཡི་གེར་བཀོད། །དེ་ལས་བྱུང་བའི་དགེ་བ་སྟོབས་ཆེན་རབ་འཕེལ་ནས། །འགྲོ་ཀུན་ཤེས་བྱའི་གནས་ལུགས་མཐར་ཕྱིན་རྟོགས་པར་ཤོག །ཤེས་བྱའི་དོན་གསལ་བར་སྟོན་པ་ཆོས་ཀྱི་འབྱུང་གནས་གྲུབ་མཐའ་ཆེན་མོ་བསྟན་པའི་སྒྲོན་མེ་ཞེས་བྱ་བ་རྫོགས་སོ། །དགེའོ། །དགེའོ། །དགེའོ། །མངྒ་ལ་ཏྲ། ཨེ་ཝྃ། ཞུས་སོ། །བླ་མ་རོག་གི་བནྡྷེ་ཤེས་རབ་འོད་ཀྱིས་མཛད་པའི་གྲུབ་མཐའ་ཆོས་འབྱུང་ཆེན་པོ་བསྟན་པའི་སྒྲོན་མེ་འདི་ལ་གཞན་དང་གཞན་ལས་འཕགས་པའི་ཁྱད་ནོར་དུ་མས་ཕྱུག་ཀྱང་དཔེ་རྒྱུན་དཀོན་པས། རབ་བྱུང་བཅུ་དྲུག་པའི་ནང་བསེས་ལྕགས་ཕོ་རྟའི་ལོར་འབྲས་ལྗོངས་ཁང་གསར་བླ་མ་ཨོ་རྒྱན་བསྟན་འཛིན་གྱིས་བསྟན་པའི་སྲི་ཞུར་པར་དུ་བསྒྲུབས་པའོ། །