ཐུན་མོང་ཕྱིའི་སྔོན་འགྲོ།

དང་པོ། དལ་འབྱོར་རྙེད་དཀའ།

འདིར་དང་པོ་སྔོན་འགྲོའི་ཁྲིད་ལ་ཐུན་མོང་དང་ཐུན་མོང་མིན་པ་གཉིས་ལས། འདིར་དང་པོ་ཐུན་མོང་གི་སྔོན་འགྲོ་འཆད་པ་ལ། དེ་ལ་སྔོན་འགྲོ་ཞེས་པ་དེ་དང་པོ་ཞིང་ས་བརྟུལ་བ་ལྟར་དངོས་གཞི་ཞུ་བར་བྱེད་པ་ལ་ཐུན་མོང་གི་སྔོན་འགྲོས་རྒྱུད་སྦྱངས་དགོས། དེ་ལ་ཐུན་མོང་ཕྱི་ཡི་སྔོན་འགྲོས་རང་གིས་རང་གཤིན་པོར་བྱས་ནས། ཐུན་མིན་སྐྱབས་འགྲོ་སོགས་ལོ་ཏོག་བཏབ་ཅིང་ལོ་ཏོག་བརྡུང་བཅག་གི་བར་ལྟ་བུ་ཐུན་མིན་ཡིན་ལ། ནས་ཟ་རན་པ་ལྟ་བུ་དངོས་གཞིའི་ཁྲིད་ཡིན་ནོ། །དེ་ལའང་སྨིན་ཁྲིད་དང་མོས་ཁྲིད་གཉིས་དང་པོ་ལ་བི་མ་ལའི་དུང་ཡིག་ཅན་དུམ་དུམ་ཁྲིགས་ཀྱི་དབང་དུ་བྱས་ནས་མན་ངག་དུམ་བུའི་ལུགས་སུ་གདབ་པ་དང་། མཐར་ཆགས་སུ་གདབ་པ་གཉིས་ལས་དང་པོ་ནི་བླ་མ་ཀུ་མ་རཱ་ཛ། ཀུན་མཁྱེན་ཆོས་ཀྱི་རྒྱལ་པོས་ལོ་དྲུག་ཏུ་བསྟེན་ནས་ཁྲིད་རྫོགས་པ་དང་། སློབ་མ་ལམ་མཐར་ཕྱིན་པ་དུས་མཉམ་སྟེ་ཀུན་མཁྱེན་ཆེན་པོ་ཀ་དག་གི་ཆོས་ཉིད་ཟད་པ་དང་ལྷུན་གྲུབ་ཀྱི་རིག་པ་ཚད་ལ་ཕེབས་པ་ལྟ་བུ་དགོས། ཀུན་མཁྱེན་ཆེན་པོས་ཕྱིན་ཆད་ཁོ་བོའི་རྗེས་སུ་འཇུག་པ་དག་གིས་བླ་མ་བསྟེན་ཡུན་རིང་། གདམས་ངག་ཉན་ཡུན་རིང་བ་ཞིག་དགོས་ཞེས་དམ་ཚིག་གི་རིམ་པ་རྣམ་གྲོལ་རྒྱ་མཚོར་ཞལ་ཆེམས་སུ་བཞག་པ་ལྟ་བུ་ཡིན། དེ་ལྟར་མ་ཡིན་པར་མོས་ཁྲིད་དང་བདུན་ཁྲིད་དང་ཟླ་ཁྲིད་ལྟ་བུའི་མིང་བཏགས། ཁྲིད་རྟ་རྒྱུག་མའི་བླ་མས་བྱེད་མདོག་དང་། སློབ་མས་ཉན་ཁ་ཁ་རེ་བྱས་ནས་མགོ་མ་ཚོས་གོང་ལྕེ་སྙབ་མལ་མ་དྲོས་གོང་རྡོག་པ་རྐྱོང་ཟེར་བ་བཞིན་བླ་མས་སློབ་མ་སྐྱོང་ཁོམས་མེད། སློབ་མས་བླ་མ་བསྟེན་ཁོམས་མེད་པར། དངོས་གཞི་དངོས་གཞི་ཟེར་ནས་མཐོ་སྙབ་བྱས་ཏེ་སྔོན་འགྲོའི་ཆོས་གཞུག་ཤོར་ན་མགོ་མཐོ་ས་ནས་བཏགས་ན། སྐེ་དམའ་ས་ནས་ཆད་ཟེར་བ་བཞིན་དུས་ཕྱིས་ཆོས་པར་རློམ་པ་ཁ་དང་དོན་འཛོལ། ཕྱི་དང་ནང་འགལ། རང་རྒྱུད་དང་དམ་པའི་ཆོས་ཕྱོགས་ལུང་པ་སོ་སོར་སོང་ཞིང་ལུས་གནད་བཅོས་མིག་རི་ཟིང་ཟིང་བྱེད་པ་འདི་འདྲ་རང་རྒྱུད་སྤུ་གང་ཡར་སྐྱེད་མེད་པ་ཡིན་ནོ། ། འདིར་ནི་སྨིན་ཁྲིད་ཀྱི་དོད་གདམས་ངག་མཐར་ཆགས་སུ་གདབ་པའི་དབང་དུ་བྱས་ནས། ཐུན་མོང་ཕྱིའི་སྔོན་འགྲོ། ཐུན་མིན་ནང་གི་སྔོན་འགྲོ། དངོས་གཞིའི་ཆ་ལག་ཉེ་ལམ་འཕོ་བའི་ཁྲིད་དང་གསུམ། དང་པོ་ཐུན་མོང་ཟེར་རྫས་པོ་སུ་དང་ཐུན་མོང་རེད་ཟེར་ན། གཞུང་གི་ལུགས་ལ་ཐེག་པ་མཐའ་དག་གི་བསམ་བྱ་ཐུན་མོང་བ་ཡིན་པས་ཐུན་མོང་ཕྱི་ཡི་སྔོན་འགྲོ། མན་ངག་གི་ལུགས་ལ་སྐྱེས་བུ་གསུམ་ཀའི་བསམ་བྱ་ཐུན་མོང་སོགས་སོ། །ཐུན་མིན་ཟེར་བ་སུ་དང་ཐུན་མིན་ཡིན་ཟེར་ན། གཞུང་གི་ལུགས་ལ་འཇིག་རྟེན་པའི་ཐེག་པ་དང་ཐེག་དམན་ཉན་རང་གི་ཐེག་པ་དང་ཐུན་མོང་མིན། མན་ངག་གི་ལུགས་ལ་སྐྱེས་བུ་ཆུང་འབྲིང་གཉིས་ཀྱི་ཐུན་མོང་མིན་ལ། སྐྱེས་བུ་ཆེན་པོའི་བསམ་བྱ་ཐུན་མོང་མ་ཡིན་པ་ཡིན་པས་ཐུན་མིན་ནང་གི་སྔོན་འགྲོ་ཞེས་བྱའོ། །འཕོ་བ་ནི་ལམ་སྦྱངས་པ་དམན་ལ་འཕོ་བས་བསུ་ཞེས་པས། དང་པོ་དངོས་གཞི་ཞུ་མ་ཁོམས་པ་དང་། ཞུས་ནས་སྐྱེ་འཆི་བར་དོ་གསུམ་གྱི་དྲོད་ཚད་དང་མི་ལྡན་ཅིང་ལམ་བརྟན་པ་མ་ཐོབ་པ་དག་འཕོ་བ་ལ་བརྟེན་ནས་ལམ་གྱི་སྦྱངས་བ་འཕྲོ་མཐུད་དགོས་པ་ཡིན་པས་རྫོགས་རིམ་དངོས་གཞིའི་ཆ་ལག་བློ་ཆོད་འཕོ་བ་ཞེས་ཆོས་དྲུག་གི་ནང་ཚན་དུ་གཏོགས་པ་ཡིན་ནོ། །དེ་ལ་དང་པོ་ཐུན་མོང་ཕྱིའི་སྔོན་འགྲོ་ལ་ནང་གསེས་དྲུག་ལས། དང་པོ་བློ་ལྡོག་རྣམ་པ་བཞིའམ་ཞེན་ལོག་རྣམ་པ་བཞི་ཞེས་ལྡོག་བྱེད་རྣམ་པ་བཞིས་ལྡོག་བྱ་ཚེ་འདི་དང་ཕྱི་མ་གཉིས་དང་གཞན་ཕན་བྱང་ཆུབ་སེམས་ཀྱིས་རང་འདོད་ཡིད་བྱེད་ཀྱི་བསམ་པ་ལ་བློ་ལྡོག་དགོས། དལ་འབྱོར་རྙེད་པར་དཀའ་བ་དང་ཚེ་མི་རྟག་པ་གཉིས་ཀྱིས་ཚེ་འདི་སྒྲུབ་པའི་བསམ་པ་ལ་བློ་ལྡོག འཁོར་བའི་ཉེས་དམིགས་དང་ལས་རྒྱུ་འབྲས་གཉིས་ཀྱིས་ཚེ་ཕྱི་མ་འཁོར་བ་སྒྲུབ་པའི་བསམ་སྦྱོར་ལས་བློ་ལྡོག དེའི་ཤུགས་ལ་རང་འདོད་སྒྲུབ་པའི་བསམ་སྦྱོར་ལ་བློ་ལྡོག་དགོས་པ་ཀུན་མཁྱེན་ཡབ་སྲས་ཀྱི་ཁྱད་ཆོས་ཡིན། ཚེ་འདི་དང་ཕྱི་མ་བདག་འདོད་སྒྲུབ་པའི་བསམ་སྦྱོར་གསུམ་ལ་བློ་ལྡོག་ནས་ཐར་པ་དོན་དུ་གཉེར་དགོས་པས་ཐར་པའི་ཕན་ཡོན་བསམ་པ་དང་། ཐར་པའི་ལམ་བླ་མ་དགེ་བའི་བཤེས་གཉེན་མཚན་ཉིད་དང་ལྡན་པ་མ་གཏོགས་སུ་ཐུག་ཐུག་ཞིག་གིས་མི་སྟོན་པས་བཤེས་གཉེན་བསྟེན་པའི་ཐབས་ཤེས་དགོས། དང་པོ་དལ་འབྱོར་རྙེད་པར་དཀའ་བ་ལ་ཁྲིད་ཉན་པའི་ཚུལ་སོགས་ལས། ཁྲིད་ཉན་པའི་ཚུལ་འདི་དང་པོ་ཉན་དུས་ཉན་ཚུལ། སྒྲུབ་དུས་སྒྲུབ་ཚུལ། སྒོམ་དུས་སྒོམ་ཚུལ་ཡིན་པས་དེ་ལ་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་ཐབས་རྒྱ་ཆེ་བ་སོགས་ཀུན་སློང་དང་ཀུན་སྤྱོད་གཉིས། དང་པོ་བསམ་པ་གཙོ་ཆེ་ལ། ཕྱི་མ་ལུས་ངག་གི་བྱ་བ་དང་སྤྱོད་པ་གཙོ་ཆེ་བས། དང་པོ་ཀུན་སློང་ཞེས་པས་ཀུན་ཞེས་པ་མང་ཚིག་ཡིན་པས་རྣམ་པར་རྟོག་པ་མང་པོ་ཞིག་གི་ནང་ནས་རྟོག་པ་ཁྱད་པར་བ་ཞིག་སློང་བ་ཡིན་ལ༑ དེ་ལ་མི་དགེ་བའི་ཀུན་སློང་། ལུང་མ་བསྟན་གྱི་ཀུན་སློང་། དགེ་བའི་ཀུན་སློང་གསུམ་ལས། དང་པོ་མི་དགེ་བའི་ཀུན་སློང་དེ་ལ་ནང་གསེས་འཇིགས་སྐྱོབ་ཀྱི་ཀུན་སློང་དང་། ལེགས་སྨོན་གྱི་ཀུན་སློང་གཉིས་ལས། དང་པོ་ཚེ་འདིའི་ནད་ཀྱི་འཇིགས་པ༑ གདོན་གྱི་འཇིགས་པ། རྒྱལ་པོའི་ཆད་པའི་འཇིགས་པ། མུ་གེའི་འཇིགས་པ་སོགས་སྐྱོབ་པའི་ཆེད་དུ་ཆོས་སྒྲུབ་ནས་མ་ཀི་ཉན་ཐོས་ཐེག་པ་ནས། ཡ་ཀི་འོད་གསལ་རྫོགས་པ་ཆེན་པོའི་བར་གང་ཉམས་སུ་བླངས་ཀྱང་འཇིགས་པ་དེ་དག་སྐྱོབ་ན་མ་གཏོགས་དེ་ཕན་འབྲས་བུ་གང་ཡང་མེད་པས་སྤངས་དགོས། གཉིས་པ་ལེགས་སྨོན་གྱི་ཀུན་སློང་ནི། དང་པོ་ནས་ཆོས་བཙོང་ཞིག་ལ་ཁས་འཐེན་ནས་ངས་ཆོས་ཞིག་ཞུས་དབང་ལུང་རེ་ཐོབ་ནས་མཚམས་བསྙེན་སྒྲུབ་རེ་བྱས་ན་བདག་གི་རྙེད་པ་རེ་ལོན་འོང་བསམ་པ་དང་། བསྟོད་པ་དང་སྙན་པ་དང་གྲགས་པ་དང་། རྙེད་བསྟོད་སྙན་གྲགས་གསུམ་གྱིས་ཚེ་འདི་ལ་ཟས་གོས་སོགས་བདེ་བ་ཐོབ་པ་བཞི་དང་། དེའི་མི་མཐུན་ཕྱོགས་བཞི་མི་འདོད་པ་བརྒྱད་ནི་འཇིག་རྟེན་ཆོས་བརྒྱད་ཡིན་པས་དམ་པའི་ཆོས་ཀྱིས་ཚེ་འདི་སྒྲུབ་ནས་ཁུག་ཁུག་འདྲ་ན་རྟ་དང་མཛོ་མ་ཁུག་ཁུག་དང་འདྲ་ན་བལ་རུལ་ཁུས་རུལ་ཡན་ཆད་ལ་བསྟན་པ་དམ་པའི་ཆོས་དམར་དང་འཇིག་རྟེན་གྱི་ཟས་གོས་སོགས་ཟོང་དང་དམར་ཟོང་བརྗེས་ནས་ཆོས་ཀྱིས་འཇིག་རྟེན་སྒྲུབ་པ་དང་། འཇིག་རྟེན་པའི་རྒད་པོ་ཞིག་གིས་མེ་མདའ་ཕྲ་རིང་ཞིག་བཟུང་ནས་ནོར་སྒྲུབ་པ་གཉིས་ལ་ཆོས་ཀྱིས་འཇིག་རྟེན་སྒྲུབ་ན་དེའི་ཐབས་སྡུག་པ་འཇིག་རྟེན་ན་མེད་ལ། མཉམ་མེད་དྭགས་པོས་ཆོས་ཆོས་བཞིན་དུ་མ་སྤྱད་ན། ཆོས་ཀྱི་སླར་ངན་སོང་དུ་འགྲོ་བའི་རྒྱུ་བྱེད་གསུངས་པ་བཞིན། དཀོར་མ་ཞུས་ན། ཆོས་གོས་འབར་བ། ལྷུང་བཟེད་འབར་བ། ཐོ་ལུམ་འབར་བ། ལྕགས་ཞུན་འབར་བ་སོགས་མྱོང་དགོས་པས་དེ་ནི་སྤངས་དགོས་ཏེ། ས་སྐྱའི་ཞེན་པ་བཞི་བྲལ་ལས། ཚེ་འདི་ལ་ཞེན་ན་ཆོས་པ་མིན། །ཞེས་གསུངས་པས། དེ་ལྟ་བུའི་གང་ཟག་དེ་ལ་མིང་ཅི་བཏགས་ན་བསྟན་པའི་བླ་བཙོང་། དཀོན་མཆོག་གི་རྐང་འདྲེན་དགེ་འདུན་གྱི་དགབ་སྡུད་པ་པོ་ཡིན་པས་དེ་དུག་བཞིན་སྤང་དགོས་ཏེ། དེ་ལྟ་བུའི་ལེགས་སྨོན་གྱི་ཀུན་སློང་གིས་ཀུན་ནས་བསླངས་ཏེ་མ་ཀི་ཉན་ཐོས་ཀྱི་ཐེག་པ་ནས་རྫོགས་པ་ཆེན་པོའི་བར་ཉམས་སུ་ལེན་མདོག་བྱས། ལོ་དགུའི་བར་དུ་སྒོ་འདག་སྦྱར་བྱས། མཚམས་བསྙེན་སྒྲུབ་ལ་འབད་ཁུལ་བྱས་ཀྱང་རང་ལ་རྙེད་བསྟོད་སྙན་གྲགས་རེ་འགྲུབ་ན་ཆོས་དེ་ཉམས་སུ་བླངས་བའི་འབྲས་བུ་རེད་ཟེར་རྒྱུ་མ་གཏོགས་ཕྱི་མ་ཐར་པའི་ས་བོན་ཙམ་ཡང་མི་ཐེབས་ཞེས་ཨ་བུས་གསུངས་སོ། །དེ་ནི་དཔེར་ན་མི་གཡོ་ཅན་གྱིས་བོང་ཤ་ལ་རི་དྭགས་ཀྱི་སྤུ་གཏོར་ནས་འཚོང་བ་དང་འདྲ་བས་རང་གི་རྒྱུད་ངན་པ་བོང་ཤ་ལྟ་བུ་ལ་དམ་པའི་ཆོས་རི་དྭགས་ཀྱི་སྤུ་ལྟ་བུའི་ཁེབ་མ་བརྒྱབས་ནས་ཆོས་བཙོང་བ་ཡིན་པས་འཇིག་རྟེན་པ་ཆུས་ཉེས་ཞིག་ལ་ཆུས་བཙོང་ཆུས་བཙོང་ཟེར་བ་བཞིན་འདི་ལ་ཆོས་བཙོང་ཆོས་བཙོང་ཟེར་བ་ཡིན་ནོ། །གཉིས་པ་ལུང་མ་བསྟན་གྱི་ཀུན་སློང་ནི། དོན་དུ་གཉེར་བྱ་གཞན་ཅི་ཡང་མེད་པས། ཆོས་ཞིག་ཞུ་དར་བ་ཙམ་མ་གཏོགས་དོན་དུ་གཉེར་བྱ་ཅི་ཡང་མེད་པ་མི་དྲེད་ཀྱིས་མིའི་ལད་མོ་བྱེད་པ་ལྟ་བུ་དང་མི་སོང་བའི་རྗེས་ལ་ཁྱིས་དེད་པ་ལྟ་བུའམ་མདའ་སྟོང་འཕེན་བྱེད་པ་ལྟ་བུའི་དགེ་བ་དང་མི་དགེ་བ་གཉིས་ཀར་ལུང་སྟོན་རྒྱུ་མེད་པ་དེ་ཡིན་པས་ཨ་བུས་འདིས་ཀྱང་ཐར་པའི་ས་བོན་ཙམ་ཡང་མི་ཐེབས་གསུངས། བླ་མས་འདི་ལ་ཀུན་སློང་བཟང་པོ་ཅི་མེད་ཀྱང་ངན་པ་ཡང་མེད་པས་ཐར་པའི་ས་བོན་ཐེབས་རྒྱུ་རེད་གསུངས། གསུམ་པ་དགེ་བའི་ཀུན་སློང་ལ་ནང་གསེས་སྐྱེས་བུ་ཆུང་འབྲིང་ཆེ་གསུམ་གྱི་ཀུན་སློང་གསུམ་ལས། དང་པོ་སྐྱེས་བུ་ཆུང་ངུའི་ཀུན་སློང་ནི་རང་ངན་སོང་གསུམ་ལས་ཐར་ནས་མཐོ་རིས་ལྷ་མིའི་གོ་འཕང་ཐོབ་པར་འདོད་པ་དང་དེའི་ཆེད་དུ་མ་ཀི་ཉན་ཐོས་ཀྱི་ཐེག་པ་ནས་ཡ་ཀི་འོད་གསལ་རྫོགས་པ་ཆེན་པོའི་བར་ཉམས་སུ་བླངས་ཀྱང་མཐོ་རིས་ཐོབ་པའི་རིང་ལམ་ཉེ་ལམ་མྱུར་ལམ་ལས་སངས་རྒྱས་ཐོབ་པའི་རྒྱུར་གང་ཟག་གི་བསམ་པས་འགྲོར་མི་འཇུག དེ་ལྟ་བུའི་ཀུན་སློང་གིས་སོ་སོར་ཐར་པའི་འདུལ་ཁྲིམས་ཉེས་བརྒྱ་དང་ལྔ་བཅུ་རྩ་གསུམ་པོ་བསྲུངས་ནས་ཆོས་གོས་རྣམ་པ་གསུམ་པོ་གྱོན་ནས་བསྡད་ཀྱང་བསམ་པ་རྒད་པོའི་བསམ་རྒྱུ་ལས་མ་འཕགས་པས་རྒད་པོ་སྡོམ་ལྡན་རྒད་པོ་ཚུལ་ཁྲིམས་དང་ལྡན་པ་ཞིག་ཡིན། དེ་བཞིན་དུ་བསྐྱེད་རིམ་གྱི་ལྷ་ཞི་བ་རང་རྒྱུད་པ་བསྒོམ་ན་འདོད་ཁམས་ཀྱི་ལྷར་སྐྱེ་ལ། ཁྲོ་བོ་རང་རྒྱུད་པ་ཞིག་བསྒོམ་ན་བདུད་དང་རུ་ཏྲར་སྐྱེ་བ་ཡིན་ཏེ་ཨ་བུའི་ཞལ་ནས། ཁ་གདངས་མིག་བསྒྲད་ལྷ་སྒོམ་འདྲེ་རུ་ལོག །ཞེས་གསུངས་པ་ཡིན་ནོ། །དེ་བཞིན་དུ་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གཉིས་བ སྒོམས་ཀྱང་ཚོགས་བསགས་སྒྲིབ་སྦྱང་ཞིག་གིས་ཐེག་ན་གཟུགས་མེད་སྐྱེ་མཆེད་མུ་བཞི་དང་གཟུགས་ཁམས་གནས་རིས་བཅུ་བདུན་དུ་སྐྱེ། མ་ཐེག་ན་བྱི་བ་དང་དྲེད་མོ་ལྟ་བུའི་གནས་ལས་འགྲོ་ས་མེད་དེ། ས་པཎ་ཆེན་གྱིས། བླུན་པོས་ཕྱག་རྒྱ་ཆེར་བསྒོམས་པས། ། ཕལ་ཆེར་དུད་འགྲོའི་གནས་སུ་འགྲོ། །གསུངས་པ་བཞིན་ནོ། །དེ་ལྟ་བུའི་ཀུན་སློང་དེ་སྤངས་དགོས་ཏེ། འཁོར་བ་ལ་ཞེན་ན་ངེས་འབྱུང་མིན། ཞེས་གསུངས་སོ། །གཉིས་པ་སྐྱེས་བུ་འབྲིང་གི་ཀུན་སློང་ནི། སྲིད་པ་རིགས་དྲུག་པོ་སྡུག་བསྔལ་གྱི་རང་བཞིན་སྡུག་བསྔལ་གྱི་འཁྲུལ་འཁོར་མེའི་འོབས་ལྟ་བུ་སྲིན་མོའི་གླིང་ལྟ་བུ། སྤུ་གྲིའི་སོ་ལྟ་བུའི་རང་བཞིན་དུ་མཐོང་ནས། རང་འཁོར་བ་རིགས་དྲུག་གི་གནས་ནས་ཐར་ཏེ་ཞི་བ་ཉན་རང་གི་གོ་འཕང་དོན་དུ་གཉེར་ནས་རིང་ལམ་སོགས་ཅི་ཉམས་སུ་བླངས་ཀྱང་ཉན་རང་དགྲ་བཅོམ་པའི་གོ་འཕང་ཐོབ་པའི་རིང་ལམ་ཉེ་ལམ་མྱུར་ལམ་ལས་སངས་རྒྱས་ཐོབ་པའི་རྒྱུར་མི་འགྲོ་སྟེ། མཉམ་མེད་ཇོ་བོ་རྗེ་བོད་ན་བཞུགས་སྐབས་ནང་སྔ་མོ་ཇ་བཞེས་ནས་རྒྱལ་བུ་འབྲོམ་སྟོན་པ་མདུན་ན་བཞུགས་སྐབས་ཨ་ཁ་ཁ་གསུངས། ཅི་རེད་ལགས་ཞུས་པས། རྒྱ་གར་ན་ཁོ་བོའི་སློབ་མ་ཧེ་བཛྲ་སྒྲུབ་པ་ཞིག་ཡོད་པ་ད་ནང་ཉན་ཐོས་འགོག་པའི་ལམ་དུ་ཞུགས་ཐལ་གསུངས། འབྲོམ་སྟོན་པས་ཧེ་བཛྲ་གྱིས་ཉན་ཐོས་འགོག་པའི་ལམ་དུ་ཞུགས་པ་ཇི་ལྟར་ལགས་ཞུས་པས། གང་ཟག་གི་བསམ་པས་སྒྲུབ་མ་ཤེས་ན་ཧེ་བཛྲ་གྱིས། དམྱལ་བར་འཕེན། ཡི་དྭགས་སུ་འཕེན། དུད་འགྲོར་འཕེན། སངས་རྒྱས་ཀྱི་སར་ཡང་འཕེན་པས་སྒྲུབ་བྱའི་ཆོས་བས་སྒྲུབ་པའི་ཚུལ་ལམ་བསམ་པ་གཙོ་ཆེ་གསུངས། དེས་ན། རང་དོན་ལ་ཞེན་ན་སེམས་བསྐྱེད་མིན། །གསུངས་ལ། དུས་ཕྱིའི་མཐོ་དམན་ཐམས་ཅད་ནས་ང་འཆི་ཁ་མི་སྐྲག་རྫས་མི་འཁྲུལ་རྫས་རེ་ཟེར་ནས་སྒོམ་སྒོམ་ཟེར་བ་འདི་ཀུན་སློང་རང་འདོད་སྒྲུབ་པའི་བསམ་པ་འདི་ལྟ་བུ་ལ་ཐུག་པ་ཡིན་གསུངས། གསུམ་པ་སྐྱེས་བུ་ཆེན་པོའི་ཀུན་སློང་ནི། འོག་མ་བཞི་པོ་དེ་བདག་རང་འདོད་སྒྲུབ་པའི་བསམ་སྦྱོར་དེ་ལ་ཐུག་པ་ཡིན་པས་བདག་རང་དོན་སྒྲུབ་པའི་བསམ་སྦྱོར་དེ་དུས་ཉི་མ་དེ་རིང་ནས་བཟུང་། དགྲར་བལྟ། སྐྱོན་དུ་བལྟ། སུན་ཕྱུང་སྟེ། བདག་རང་གི་དོན་མིན་པར་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ་མཐའ་གཉིས་ལ་མི་གནས་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བསམ་པ་དེ་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་ཡིན། དེ་རྒྱུད་ལ་སྐྱེ་བ་ལ་མར་ཤེས་དྲིན་དྲན་སོགས་སྒོམ་དགོས་མ་གཏོགས། བླ་མས་ཀྱང་འདི་ལྟར་ནམ་མཁས་གར་ཁྱབ་སོགས་ཟེར་མདོག སློབ་མས་ཀྱང་བསམ་མདོག་བྱས་ནས་གཉིས་ཀས་མིག་ཟིང་ཟིང་བྱས་ནས་ཨ་བ་རིས་ཟེར་ནས་གཉིས་ཀས་སྟོང་ཧོབ་བཀྱེ་བ་ལ་སྙིང་པོ་ཅི་ཡང་མེད་པ་ད་ལྟའི་དུས་ཀྱི་བླ་སློབ་ཡིན་ཁུལ་བྱེད་པ་སུས་ཀྱང་རྒྱུད་ལ་ཡོན་ཏན་གཞན་ལྟ་ཅི་བསམ་པ་བཟང་པོ་རེ་མེད་པ་དེ་འདྲ་འབྱུང་ཉེན་ཆེ་བས་དང་པོ་རང་གི་ཨ་མ་རྒན་མོ་ལ་མར་ཤེས་པ་དྲིན་དྲན་པ། དྲིན་གཟོ་འདོད། རྣམ་མཁྱེན་སངས་རྒྱས་ལ་བཀོད་འདོད་རྣམས་བསམ་དགོས། ད་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ངོ་བོ་ནི། ཟུར་གཉིས་སམ་དོན་གཉིས་དང་ལྡན་པ་བྱང་ཆུབ་སེམས་བསྐྱེད་ཀྱི་ངོ་བོ་ཡིན་ཏེ། བྱམས་པས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་སངས་རྒྱས་འདོད། ། ཅེས་པས་ཟུར་དང་པོའམ་དོན་དང་པོ་སྙིང་རྗེས་སེམས་ཅན་ལ་དམིགས་པ་ནི་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ། ཟུར་ཕྱི་མའམ་དོན་ཕྱི་མ་ཤེས་རབ་ཀྱིས་རྫོགས་བྱང་ལ་དམིགས་པ་ནི། རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བསམ་དགོས་ཏེ་སྙིང་རྗེ་དང་མ་འདྲེས་པ་བྱམས་པ་དང་མ་འདྲེས་པ་སེམས་ཅན་གྱི་དོན་དུ་ཞེས་བསམ་ཀྱང་སངས་རྒྱས་ཀྱི་ས་ལ་འགོད་འདོད་མ་བསྐྱེད་ན་སྙིང་རྗེ་ཙམ་དང་། སངས་རྒྱས་ཐོབ་པར་བྱ་བསམ་ཀྱང་སེམས་ཅན་གྱི་དོན་དུ་མ་བསམ་ན་བྱམས་པ་ཙམ་ལས་མི་འཕགས་པས། སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་བསམ་པ་དེ་ཡིན། དེ་ལྟ་བུའི་སེམས་དེ་སྒོམ་དུས་ཇི་ལྟ་བུ་ཞིག་བྱེད་དགོས་ཟེར་ན། དང་པོ་རང་གི་རྩ་བའི་མ་ལ་བསྒོམ། དེ་ནས་རིམ་གྱིས་ནམ་མཁའི་མཐའ་ཁྱབ་ཏུ་བསྒོམ་དགོས། དང་པོ་འདི་ལྟར་ནམ་མཁས་གར་ཁྱབ་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་ལས་སྣང་སྡུག་བསྔལ་གྱིས་ཁྱབ། ལས་སྣང་སྡུག་བསྔལ་གྱིས་ཁྱབ་པའི་སེམས་ཅན་ཐམས་ཅད་ཐོག་མ་མེད་པའི་དུས་ནས་རང་གི་ཕ་དང་མ་དང་གཉེན་བཤེས་སུ་མ་གྱུར་པའི་སེམས་ཅན་གཅིག་ཀྱང་མེད། དེའི་ནང་ནས་ཀྱང་མ་མ་བྱས་པའི་སེམས་ཅན་གཅིག་ཀྱང་མེད། མ་བྱས་པའི་ཚེ་དྲིན་ཆེན་པོ་ཤ་སྟག་གིས་མ་བསྐྱངས་བའི་སེམས་ཅན་གཅིག་ཀྱང་མེད་ལ། ད་ལྟའི་མ་འདི་བཞིན་ལན་གྲངས་བསམ་གྱིས་མི་ཁྱབ་པར་མ་བྱས་ཏེ་བདག་འཁོར་བ་ཐོག་མ་མེད་པ་ནས་ད་ལྟའི་བར་དུ་འཁྱམས་པས་ས་ལག་པ་ཙམ་ཞིག་གི་སྟེང་ནས་ལན་གྲངས་མང་པོར་སྐྱེས་མ་མྱོང་ས་དང་འཆི་མ་མྱོང་ས་མེད་པས་དམྱལ་བ་དང་ལྷ་ཕལ་ཆེར་མ་གཏོགས་མ་མེད་པར་མི་སྐྱེ་ལ་སེམས་ཅན་གཅིག་གིས་མ་བྱས་པ་མི་ངེས་པས་སེམས་ཅན་ཐམས་ཅད་ཀྱིས་མ་བྱས་ལན་གཅིག་ཙམ་དུ་མ་ཟད་ལན་གྲངས་བསམ་གྱིས་མི་ཁྱབ་པར་མ་བྱས་ཏེ་མ་ཡི་ཐུག་མཐའ་སོགས་མར་ཤེས་པ་ཡིན། དྲིན་དྲན་པ་ནི་ཁྱད་པར་ད་ལྟའི་མ་འདིའི་བདག་དྲི་ཟ་ཉེར་བར་ལེན་པའི་རྣམ་པར་ཤེས་པ་འཁྱམས་པོ་ཞིག་མ་དྲིན་མོ་ཆེ་འདིའི་མངལ་དུ་ཞུགས་ཚུན་ཆད་ནས་བཟུང་། ཟླ་དགུ་ངོ་བཅུ་ཞིག་གི་བར་ལ་མངལ་དུ་བཟུང་། སྡིག་སྡུག་གཏམ་ངན་ཐམས་ཅད་ཁྱད་དུ་བསད་དེ། མའི་ལུས་ཀྱི་བཅུད་དང་ཁ་ཟས་ཀྱི་དྭངས་མ་ལྟེ་བ་ནས་བརྒྱུད་དེ་ལུས་སྐྱེད་བསྲིང་། ཕྱིར་བཙའ་བའི་གནས་སྐབས་ཤི་བོ་ཡིན་ན་དབུགས་མ་ཆད། གསོན་པོ་ཡིན་ན་མགོ་མི་ཐེག་པའི་ཉར་རེ་ཉོར་རེ་བ་དེ་མ་དྲིན་མོ་ཆེ་དེས་འཆི་རྒྱུ་འཆི་མ་བཅུག རུལ་རྒྱུ་སྐམ་ཁ་མ་བཅུག་པར་ཨ་མ་ལ་བུ་སྐྱེས་བྱུང་སྙམ་པའི་དགའ་སོ་ཆེན་པོ་བཅས་ནས། ལག་སོར་མོ་བཅུས་ཁ་ལ་གཡེངས། བརྩེ་བའི་སེམས་ཀྱིས་བསྐྱངས། འཛུམ་པའི་མིག་གིས་བལྟ། སྙན་པའི་ངག་གིས་བོས། ཟས་ཀྱི་དང་པོ་མངར་བའི་ནུ་ཞོ་བྱིན། གོས་ཀྱི་དང་པོ་ཤ་དྲོད་ལ་བཅར། ཟས་ཀྱི་ཕུད་བྱིན། གོས་ཀྱི་རྩེས་གཡོག འགྲང་ལྟོག་ལག་པས་བྱུག ཟས་ཁས་བསྙོད། སྣབས་ལུད་ཁས་གཞིབ། མི་གཙང་བ་ལག་པས་ཕྱིས། ཟ་མི་ཤེས་པ་ལ་ཟ་ཚུལ་བསླབ། སྨྲ་མི་ཤེས་པ་ལ་སྨྲ་ཚུལ་བསླབ། འགྲོ་མི་ཤེས་པ་ལ་འགྲོ་ཚུལ་བསླབ། ཁ་ཟས་མེད་ལ་ཟས་བྱིན། ལག་ནོར་མེད་ལ་ནོར་བྱིན། རྒྱབ་གོས་མེད་ལ་གོས་བྱིན། ཤིན་ཏུ་བྱམས་པས་སྐྱེད་བསྲིང་བའི་དྲིན་ཆེན་ཡིན་བསམ་སྟེ་ལུས་བསྐྱེད་པའི་དྲིན། སྲོག་བྱིན་པའི་དྲིན། ཡོ་བྱད་བསྟབས་པའི་དྲིན། འཇིག་རྟེན་བསྟན་པའི་དྲིན་རྣམས་དྲན་པ་ནི་འཇིག་རྟེན་གྱི་ཕྱོགས་ནས་དྲིན་དྲན་པའོ། ། ཆོས་ཀྱི་ཕྱོགས་ནས་དལ་འབྱོར་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་འདི་ཡང་མ་དྲིན་ཆེན་མས་བསྐྱེད། མ་སེམས་ཅན་མེད་ན་དང་པོ་བྱང་ཆུབ་མཆོག་ཏུ་སེམས་བསྐྱེད་ས་དང་། བར་དུ་རྒྱལ་སྲས་ཀྱི་སྤྱོད་པ་ལ་སློབ་ས་མེད། དེ་མེད་ན་མཐར་མངོན་པར་རྫོགས་པར་སངས་རྒྱས་པ་ཡང་མེད་པས། དེས་ན་དང་པོ་བྱང་ཆུབ་མཆོག་ཏུ་སེམས་བསྐྱེད། བར་དུ་རྒྱལ་སྲས་ཀྱི་སྤྱོད་པ་རྒྱ་མཚོ་ལྟ་བུའི་ཡུལ། མཐར་མངོན་པར་རྫོགས་པར་སངས་རྒྱས་པ་ཡང་མ་དྲིན་མོ་ཆེའི་དེ་ཡི་དྲིན་ཡིན་དེར་མ་ཟད་ད་ལྟ་ཆོས་སྒྲུབ་པའི་མཐུན་རྐྱེན་གནས་མལ་ཡོ་བྱད་ལ་སོགས་པ་མ་སེམས་ཅན་ལ་མ་ལྟོས་པར་མི་འབྱུང་བའི་དྲིན་རྣམས་དྲན་པ་དྲིན་དྲན་པ་ཡིན། དྲིན་གཟོ་འདོད་ནི། ད་སྔོན་མ་དྲིན་མོ་ཆེས་ཁེ་དང་རྒྱལ་ཁ་ཐམས་ཅད་བུ་ལ་བྱིན། གྱོང་དང་བུབ་ཁ་ཐམས་ཅད་མ་རང་གིས་བླངས་ནས། བདེ་སྐྱིད་བདེ་བའི་དངོས་པོ་ཐམས་ཅད་བུ་ལ་བསྒྲུབས། སྡིག་སྡུག་གཏམ་ངན་ཐམས་ཅད་མ་རང་གིས་བཟོད་ནས་ཕན་བཏགས་པས། ད་བུ་ངའི་རེས་ལ་བབ་སྟེ་མ་རྒན་གྱི་སྐྱིད་སྡུག་ལ་ངས་བལྟ་དགོས་པས། མ་རྒན་མོ་དེས་བདེ་བ་མྱོང་གི་ཡོད་གི་དང་། སྡུག་བསྔལ་མྱོང་གི་ཡོད་བསམ་ན༑ བདེ་བ་གནས་སྐབས་ཀྱི་ཉི་མ་དྲོན་མོ་ཞིག་བདེ་བ་ནས་བཟུང་རྫོགས་པའི་སངས་རྒྱས་ཀྱི་བར་གྱི་བདེ་བ་འདོད་ཀྱང་བདེ་བའི་རྒྱུ་དགེ་བ་དང་ཡང་དག་པའི་ལམ་ནི་སྒྲུབ་མི་ཤེས། ཚུལ་བཞིན་དུ་སྟོན་པ་པོ་དགེ་བའི་བཤེས་གཉེན་གྱི་ངག་ནི་མི་ཉན། སྡུག་བསྔལ་ཐ་ན་མེ་སྟག་ཕྲ་མོ་ཙམ་སྟེང་དུ་ལྷུང་བ་ནས་སྲིད་པ་འཁོར་བའི་སྡུག་བསྔལ་ཐམས་ཅད་མི་འདོད་ཀྱང་སྡུག་བསྔལ་གྱི་རྒྱུ་ལས་དང་ཉོན་མོངས་པ་ལ་འཇོལ་ཉོག་ཏུ་སྤྱོད་ནས་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པ་ནི། བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་གཞོམས། །ཞེས་པ་ལྟར། བདེ་བ་ཉིན་སྐར་བས་དཀོན། སྡུག་བསྔལ་གྱི་བདེན་པས་དངོས་སུ་གནོད། ཀུན་འབྱུང་གི་བདེན་པས་བརྒྱུད་དེ་གནོད་པས། སྡུག་བསྔལ་གྱི་རྒྱུ་ཀུན་འབྱུང་ལས་དང་ཉོན་མོངས་འབྲས་བུ་ཁམས་གསུམ་འཁོར་བའི་སྡུག་བསྔལ་ཐམས་ཅད་དང་བྲལ་ན་ཅི་མ་རུང་སྙམ་དུ་འདུན་པ་དང་འབྲེལ་བ་དང་། བྲལ་བར་གྱུར་ཅིག་སྙམ་དུ་སྨོན་པ་དང་འབྲེལ། བྲལ་བ་ཞིག་ངས་བྱ་སྙམ་པའི་དམ་བཅའ་དང་འབྲེལ་བ་སྟེ་འབྲེལ་བ་གསུམ་ལྡན་དང་། མ་རྒན་སྡུག་བསྔལ་རྒྱུ་འབྲས་གཉིས་དང་བྲལ་བ་ཞིག་སྐྱབས་བསླུ་བ་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་པོ་ཁྱེད་མཁྱེན་སྙམ་དུ། བླ་མ་རྒྱལ་བ་སོགས་ནས། ཀྱེ་མ་ཀྱེ་ཧུད་དཀོན་མཆོག་སོགས་དང་། དཔའ་བོ་ཁྱོད་ལ་སོགས་ཀྱིས་གསོལ་བ་གདབ། དེ་དག་ནི་ཟུར་དང་པོ་སྙིང་རྗེས་སེམས་ཅན་ལ་དམིགས་པ་ཡིན། ད་སྡུག་བསྔལ་རྒྱུ་འབྲས་གཉིས་དང་བྲལ་ནས་གང་ལ་བཀོད་དགོས་བསམ་ནས་འདམ་པ་ཞིག་བྱེད་དགོས། མཐོ་རིས་ནི་མ་རྒན་གྱིས་ད་སྔོན་ལན་གྲངས་མང་པོ་ཚངས་པ་དང་བརྒྱ་བྱིན་ལ་སོགས་པའི་གོ་འཕང་ཐོབ་ཀྱང་སྡུག་བསྔལ་ལས་མ་འདས་པ་དང་མི་རྟག་པས་སྲིད་པ་འཁོར་བའི་མཐའ་ཡིན་པས་དེ་ལ་བཀོད་དགོས་མི་འདུག ཞི་བ་ཉན་རང་གི་གོ་འཕང་ནི་འཁོར་བའི་སྡུག་བསྔལ་ཐམས་ཅད་ལས་ཐར་བའི་འབྲུམ་ནད་བྱུང་བའི་སྐྱེས་བུ་བཞིན་དུ་འཁོར་བར་སླར་མི་ལྡོག་པའི་ཆོས་ཅན་ཡིན་ཀྱང་། རྒྱལ་སྲས་བྱང་ཆུབ་སེམས་དཔའི་ས་དང་། སངས་རྒྱས་བཅོམ་ལྡན་འདས་ཀྱི་འབྲས་བུའི་ཡོན་ཏན་གང་ཡང་མེད་པས་དེ་ལ་བཀོད་ན་ཞི་བ་མྱ་ངན་ལས་འདས་པའི་མཐའ་ཡིན་པས་དེ་ལ་བཀོད་དགོས་མེད། ད་ནི་མཐའ་གཉིས་ལ་མི་གནས་པ་རྫོགས་པའི་སངས་རྒྱས་ཀྱི་གོ་འཕང་ལ་བཀོད་དགོས་བསམ་པ། ཟུར་ཕྱི་མ་འདིའི་སྟེང་ནས་བློ་སྟོབས་ཆེ་འབྲིང་ཆུང་གསུམ་འབྱུང་སྟེ་ང་ཅིར་འགྲོ་འགྲོ་ལ་སོང་། སྔོན་དུ་སེམས་ཅན་ཐམས་ཅད་ཀྱི་དོན་བསྒྲུབ་པར་བྱ་སྙམ་པའི་བློ་སྟོབས་ཆེན་པོ་དང་། ང་སྔོན་དུ་མི་འགྲོ་སེམས་ཅན་རྗེས་ལ་མི་བཞག རང་གཞན་མཉམ་དུ་སངས་རྒྱས་བ སྒྲུབ་སྙམ་པ་བློ་སྟོབས་འབྲིང་། མ་ལག་ཟླུམ་མའི་བུ་ཆུས་ཁྱེར་བ་བཞིན་ད་ལྟ་བདག་ལ་ནུས་པ་མེད་པས་ནུས་པ་ཡོད་པ་པོ་སྟོན་པ་སངས་རྒྱས་བཅོམ་ལྡན་འདས་ཡིན་པས། དང་པོ་ངས་སངས་རྒྱས་ཀྱི་གོ་འཕང་བསྒྲུབ་སྟེ། དེ་ནས་རྟོགས་པས་བདག་རྒྱུད་གྲོལ་བ་དང་། ཐུགས་རྗེས་གཞན་སེམས་ཅན་ཐམས་ཅད་དགྲོལ་ནས་གྲོལ་བའི་ལམ་བསྟན་པ་དང་། འགྲོ་བའི་དོན་རྒྱ་ཆེ་བ་ནམ་མཁའི་མཐའ་དང་མཉམ་པ། རྒྱུན་རིང་བ་ཇི་སྲིད་འཁོར་བ་མ་སྟོང་གི་བར་དུ་ཕྱོགས་བཅུ་དུས་གསུམ་གྱི་རྒྱལ་བ་སྲས་དང་རིག་པ་འཛིན་པ་གོང་མ་རྣམས་ཀྱིས་ཇི་ལྟར་བསྒྲུབས་པ་བཞིན་བདག་གིས་བསྒྲུབ་པར་བགྱིའོ་སྙམ་པ་ཟུར་ཕྱི་མ་ཤེས་རབ་ཀྱིས་རྫོགས་བྱང་ལ་དམིགས་པའོ། །ཤེས་རབ་འདི་ནི་གཞན་དོན་སྒྲུབ་པའི་ཤེས་རབ་ཡིན། དེ་ལྟར་དང་པོ་རང་གི་རྩ་བའི་མ་ལ་སྐྱེས་པ་དང་། དེ་ནས་ཕ། དེ་ནས་སྤུན་ཟླ། དེ་ནས་གྲོགས་དགའ་མཛའ། དེ་ནས་རང་གི་ཕ་སྐོར། དེ་ནས་མ་སྐོར། དེ་ནས་ཡུལ་མི་ཐམས་ཅད། དེ་ནས་རིམ་གྱིས་ཐུན་འཇོག་ཁར་ནམ་མཁའི་མཐའ་ཁྱབ་ལ་རིམ་གྱིས་མ་སྒོམ་ན་གོ་ཡུལ་གཤིས་འབྱམས་ལ་འགྲོ་བས་རིམ་གྱིས་སྒོམ་པ་གལ་ཆེ། དེ་ལྟ་བུའི་ཟུར་གཉིས་སམ་དོན་གཉིས་དང་ལྡན་པ་བྱང་ཆུབ་སེམས་ཀྱི་ཀུན་སློང་ངམ། དགེ་རྩ་ཐབས་ཀྱི་ཟིན་པར་བྱེད་པ་སྦྱོར་བ་སེམས་བསྐྱེད་དམ་པ་ཞེས་བྱ་སྟེ། ཀུན་མཁྱེན་ཆེན་པོས། སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་ནི། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། ། ཞེས་པ་ལྟར། དང་པོ་དགེ་རྩ་ཐབས་ཀྱིས་ཟིན་པར་བྱེད་པ་སྦྱོར་བ་སེམས་བསྐྱེད་དམ་པ་ནི། སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བསམ་སྟེ། བསམ་པ་ལྕགས་ཀྱུ་ལྟ་བུས་དགེ་བའི་རྩ་བ་རྩྭ་ཕོན་ལྟ་བུ་དེ་ཟིན་པར་བྱེད་པ་ཡིན་ནོ། ། གཉིས་པ་དགེ་རྩ་རྐྱེན་གྱིས་མི་འཇིག་པར་བྱེད་པ་དངོས་གཞི་དམིགས་མེད་དམ་པ་ནི༑ དགེ་རྩ་རྐྱེན་གང་གིས་འཇིག་ན། གཞན་དོན་རྫོགས་པའི་སངས་རྒྱས་ཐོབ་པའི་ཆེད་དུ་མ་བསྔོས་ན། བདེ་འབྲས་ལན་གཅིག་མྱོང་ནས་ཟད་པ་དང་། ཁོང་ཁྲོ་སྐྱེས་ན། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། ། ལེགས་དཔྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་བྱེད། ། ཅེས་གསུངས་པ་བཞིན། བསྐལ་པ་ཆེན་པོ་སྟོང་ཕྲག་གཅིག་གི་བར་དུ་བསགས་པའི་སྦྱིན་པ་དང་ཚུལ་ཁྲིམས་ལས་བྱུང་བའི་དགེ་བ་ཐམས་ཅད་ཁོང་ཁྲོ་རྒྱུད་ལ་སྐྱེ་བའི་སྐད་ཅིག་དེ་ཉིད་ལ་འཇོམས་པ་དང་། དགེ་རྩ་ལ་འགྱོད་པ་སྐྱེས་ན་དགེ་རྩ་འཛད་དེ། སྔར་རང་གི་མཆོད་སྦྱིན་བྱས་པ་དེ་ལ་ཕྱིས་འགྱོད་དེ། སྔར་གྱི་དངོས་པོ་དེ་ལ་བློས་བསྒོས་འཐེན་ཏེ་དངོས་པོ་དེའི་ཕྱེད་དམ་སུམ་ཆ་ཙམ་ཞིག་མཆོད་ན་ཅིག་ཡིན་ཏེ་བསམས་ནས་འགྱོད་པ་སྐྱེས་ན་འཛད། དགེ་རྩ་ངོམས་ན་འཛད་དེ། མ་ཎི་དུང་གཅིག་ཐུབ་རུང་མ་ཐུབ་རུང་ཕྲེང་བ་དེའི་ནང་དུ་དུང་ཞིག་བརྒྱུས་ནས་བདག་གིས་མ་ཎི་དུང་ཕྱུར་ཐུབ་མ་ཚར་རེ་ཟེར་ནས། ཕྲེང་བ་ཐམས་ཅད་ལ་ངོམས། དགེ་བ་ཅུང་ཟད་རེ་འགྲུབ་པ་དེ་རྐང་ཐང་གི་སྔོན་ནས་འདུག་ནས་བཤད། སྐྱ་མིའི་སྔོན་ནས་ལངས་ཏེ་བཤད་བསྡད་ན། དགེ་བ་ཟད་འགྲོ་བས། དགེ་རྩ་འཛད་པའི་རྒྱུ་བཞི་པོ་དེས་མི་ཟད་པར་བྱེད་པ་ལ། གཞི་དབུ་མ་ཆེན་པོ། ལམ་ཕྱག་རྒྱ་ཆེན་པོ། འབྲས་བུ་རྫོགས་པ་ཆེན་པོ་གསུམ་གྱི་ལྟ་བ་རྟོགས་དགོས། དེ་དང་རྗེས་མཐུན་པ་ཞིག་བསྐྱེད་ན་འཁོར་གསུམ་པོ་སྣང་ལ་རང་བཞིན་མེད་པ་སྒྱུ་མ་དང་རྨི་ལམ་དང་། དྲི་ཟའི་གྲོང་ཁྱེར་དང་། སྣང་ལ་རང་བཞིན་མེད་པ་ཆུ་ཟླ་ལྟ་བུའི་ངེས་པ་དྲངས་ཀྱང་ལས་དང་པོ་པའི་དངོས་གཞི་དམིགས་མེད་ཀྱི་གོ་ཆོད་གསུངས། ཁྱད་པར་ལས་དང་པོ་པས་དང་པོ་ཉིད་ནས་དངོས་གཞི་དམིགས་མེད་འོང་དཀའ་མོ་ཡིན་ཏེ་སྣ་འཐེན་ནས་ཁ་ནང་དུ་ཨེ་འོང་ལྟ་བ་དང་འདྲ་བས། ཞི་བ་ལྷས། ཆོས་ལ་སེམས་པའི་ཀ་ཆེན་ལ༑ ༑ཇི་ལྟར་བཏགས་བཞིན་མི་འཆོར་བ། །ཞེས་གསུངས་པ་བཞིན། དལ་འབྱོར་རྙེད་དཀའ་སོགས་ལ་ཡང་ན་དཔྱད་སྒོམ་བྱེད། ཡང་ན་འཇོག་སྒོམ་བྱས་ནས་དཔྱད་འཇོག་རེས་མོས་བྱེད་པ་འདི་གལ་ཆེ། དགེ་བའི་རྩ་བ་གོང་ནས་གོང་དུ་འཕེལ་བར་བྱེད་པ་མཇུག་བསྔོ་བ་དམ་པ་ནི། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིག་རྒྱ་མཚོ་ཆེར་ལྷུང་བ། །རྒྱ་མཚོ་མ་ཟད་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་པ་བཞིན། རྒྱ་མཚོ་ཆེན་པོའི་ནང་དུ་ཆུའི་ཐིག་པ་གཅིག་བཞག་པ་དེ་བསྐལ་པ་ཆེན་པོའི་བར་དུ་མི་ཟད་པ་དེ་བཞིན། འབྲས་བུ་རྣམ་པ་ཐམས་ཅད་མཁྱེན་པའི་རྒྱ་མཚོ་ཆེན་པོར་ཡོངས་སུ་བསྔོས་པའི་དགེ་བ་དེ། གནས་སྐབས་སུ་བྲམ་ཟེའི་རིགས་ཤིང་སཱ་ལ་ལྟ་བུ། རྒྱལ་རིགས་ཤིང་སྭ་ལ་ལྟ་བུ། ཁྱིམ་བདག་གི་རིགས་ཤིང་སཱ་ལ་ལྟ་བུ་རིགས་དང་ཡོན་ཏན་གྱི་འབྱོར་པས་བརྒྱན་པའི་གོ་འཕང་ཐོབ་ཀྱང་། མཐར་ཐུག་བྱང་ཆུབ་ཆེན་པོའི་བར་དུ་མི་བམ་མི་རུལ། ཆུད་མི་ཟ་བར་མཐར་གྱིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འགྱུར་བ་ཡིན། དེ་ལྟ་བུའི་བསྔོ་བ་དེ་ལ་ནང་གསེས་གཉིས་ལས། དང་པོ་བསྔོ་བ་དུག་ཅན་པ་ནི། སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། ། ཞེས་པས། དཔེར་ན་ཟས་བཟང་པོ་དུག་ཅུང་ཟད་འདྲེས་པ་དེས། ཟ་བའི་ཚེ་རོ་མཆོག་ཏུ་བདའ་མོད་བཅུད་མྱོང་བ་ན་དུག་གིས་ཟུག་རྔུ་བསྐྱེད་པ་དེ་བཞིན་དུ། དགེ་བའི་འབྲས་བུ་མངོན་མཐོའི་བདེ་བ་ཐོབ་ཀྱང་འཁོར་གསུམ་དུ་ཞེན་པའི་བདེན་འཛིན་དེས་འཁོར་བ་ལས་ཐར་པ་ཐོབ་པར་མི་འགྱུར་བས་སྤང་དགོས། གཉིས་པ་བསྔོ་བ་དུག་མེད་ལ་འཁོར་གསུམ་ཡོངས་དག་གི་བསྔོ་བ་མཚན་ཉིད་པ་དང་རྗེས་མཐུན་པ་གཉིས་ལས། དང་པོ་ནི། སྡུད་པ་ལས། རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །ཅེས་པ་ལྟར། རྣམ་ཀུན་མཆོག་ལྡན་གྱི་སྟོང་ཉིད་བྱམས་སྙིང་རྗེ་བྱང་ཆུབ་སེམས་བསྔོ་བ་སྨོན་ལམ་ལ་སོགས་པའི་རྣམ་པར་ཤར་བའི་ལྟ་བའི་རྩིས་ཟིན་པ་དེ་ཡིན། རྗེས་མཐུན་པ་ནི། བདག་གིས་སྔར་བསགས་ཟིན་པའི་དགེ་བ། མ་འོངས་པ་ན་བསགས་པར་འགྱུར་བའི་དགེ་བ། ད་ལྟ་བསགས་བཞིན་པའི་དགེ་བ། རྒྱལ་བ་སྲས་དང་བཅས་པའི་ཟག་མེད་ཀྱི་དགེ་བ། སེམས་ཅན་ཐམས་ཅད་ཀྱི་ཟག་བཅས་ཀྱི་དགེ་བ་ཐམས་ཅད་བློས་གཅིག་ཏུ་བསྡུས་ཤིང་ཟླུམ་སྟེ་སྡོམ་ནས་སེམས་ཅན་ཐམས་ཅད་སྲིད་པ་ཁམས་གསུམ་འཁོར་བའི་སྡུག་བསྔལ་རྒྱུ་འབྲས་གཉིས་དང་བྲལ་ཏེ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་བསྔོ། བསྔོ་བའི་ཚུལ་ནི༑ རྒྱལ་བ་སྲས་དང་བཅས་པས་འཁོར་གསུམ་ཡོངས་སུ་དག་པའི་ཚུལ་དུ་ཇི་ལྟར་བསྔོ་བ་དེ་བཞིན་དུ་བདག་གིས་ཀྱང་བསྔོ་བར་བགྱིའོ་སྙམ་པའི་སྒོ་ནས། འཇམ་དཔལ་དཔའ་བོ་དང་། དུས་གསུམ་གཤེགས་པའི་རྒྱལ་བ་སོགས་ཤླཽ་ཀ་གཉིས་བརྗོད་པས་འཁོར་གསུམ་ཡོངས་དག་གི་བསྔོ་བ་མཚན་ཉིད་པའི་གོ་ཆོད། དེས་ན་ཐེག་ཆེན་མདོ་སྔགས་གཉིས་ཀྱི་ཉམས་ལེན་ཐམས་ཅད་དམ་པ་གསུམ་གྱི་ར་བ་ལས་མི་འདའ་བས། རྫོགས་པའི་སངས་རྒྱས་ཀྱི་གོ་འཕང་བསྒྲུབ་པ་ལ་དམ་པ་གསུམ་ལས་མང་མི་དགོས། ཉུང་ན་མི་འདུ་བའི་རང་བཞིན་ཅན་ཡིན་ཏེ། འཕགས་པ་ཀླུས། བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །ཅེས་པས། དམ་པ་གསུམ་པོ་དེ་ཚོགས་གཉིས་སམ་བདེན་པ་གཉིས་ཀྱི་བསྡུས་པ་ཡིན་ཏེ། སྦྱོར་བ་སེམས་བསྐྱེད་དམ་པ་དང་མཇུག་བསྔོ་བ་དམ་པ་གཉིས་སྣང་བཅས་བསོད་ནམས་ཀྱི་ཚོགས་དང་། དངོས་གཞི་དམིགས་མེད་དམ་པ་སྣང་མེད་ཡེ་ཤེས་ཀྱི་ཚོགས་ཡིན་པས། སྣང་བཅས་བསོད་ནམས་ཀྱི་ཚོགས་ཀྱིས་ཉེར་ལེན་གྱི་རྒྱུ་བྱས། སྣང་མེད་ཡེ་ཤེས་ཀྱི་ཚོགས་ཀྱིས་ལྷན་ཅིག་བྱེད་པའི་རྐྱེན་བྱས་ནས་སངས་རྒྱས་གཟུགས་ཀྱི་སྐུ་ཐོབ། སྣང་མེད་ཡེ་ཤེས་ཀྱི་ཚོགས་ཀྱིས་ཉེར་ལེན་གྱི་རྒྱུ་བྱས། སྣང་བཅས་བསོད་ནམས་ཀྱི་ཚོགས་ཀྱིས་ལྷན་ཅིག་བྱེད་པའི་རྐྱེན་བྱས་ནས་སངས་རྒྱས་ཆོས་ཀྱི་སྐུ་ཐོབ་པས། གཞི་སྒྲིབ་གཉིས་སྦྱང་། ལམ་ཚོགས་གཉིས་རྫོགས། འབྲས་བུ་སྐུ་གཉིས་ཀྱི་གོ་འཕང་ཐོབ་པ་ལ་དམ་པ་གསུམ་དེ་ལས་མང་མི་དགོས། ཉུང་ན་མི་འདུ་བའི་ཕྱིར་རོ། །དེ་ལྟ་བུའི་དམ་པ་གསུམ་པོ་དེ་མདོ་སྔགས་ཐུན་མོང་གི་བསམ་བྱ་ཡིན། གཉིས་པ་ཐབས་རྒྱ་ཆེ་བ་གསང་བ་རིག་འཛིན་སྔགས་ཀྱི་ཀུན་སློང་ནི་གསང་སྔགས་རྡོ་རྗེ་ཐེག་པའི་ཆོས་ཉན་འཆད་སྒོམ་སྒྲུབ་གང་གི་སྐབས་ནའང་གལ་ཆེ་བས། དང་པོ་ནས་བླ་མ་དང་སློབ་མའི་རྟེན་འབྲེལ་མི་འཆུགས་པ་ཞིག་ངེས་པར་དགོས་ཏེ། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་པས། མདོ་སྔགས་གཉིས་ཀའི་ལུགས་ཀྱི་བསྒྲུབ་བྱ་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་སྒྲུབ་པ་ལ་དོན་གཅིག་ནའང་། སྒྲུབ་ཚུལ་གྱི་ཐབས་ལྟ་བ་མ་རྨོངས་པའི་ཁྱད་པར། སྒོམ་པ་ཐབས་མང་བའི་ཁྱད་པར། སྤྱོད་པ་དཀའ་བ་མེད་པའི་ཁྱད་པར། གང་ཟག་དབང་པོ་རྣོན་པོའི་རྣོན་པོ་ཡིན་པའི་ཁྱད་པར་བཞིས་ཁྱད་པར་འཕགས་ཏེ། མདོ་སྔགས་གཉིས་ཀས་བལྟ་ཡུལ་ཆོས་ཀྱི་དབྱིངས་ཙམ་ལ་ལྟ་བ་གཞོལ་བ་ལ་འབབ་ཀྱང་ལྟ་བ་རང་གི་ངོ་བོ་ལ་མིག་གསལ་བ་དང་མི་གསལ་བས་གཟུགས་ལ་ལྟ་བ་དང་མཚུངས་ཏེ། རྒྱུ་མཚན་ཉིད་ཐེག་པས་ཆོས་ཉིད་དོན་དམ་པའི་བདེན་པ་སྟོང་པ་ཆེན་པོ་སྤྲོས་མཐའ་བརྒྱད་དང་བྲལ་བར་གཏན་ལ་ཕབ་ཀྱང་། དབྱིངས་ཡེ་ཟུང་འཇུག་གི་རང་བཞིན་ཅན་ཇི་ལྟ་བ་བཞིན་རྟོགས་མ་ནུས་པའི་རྨོངས་པའི་ཆ་དེ་བསལ་ནས་དབྱིངས་ཡེ་ཟུང་འཇུག་གི་རང་བཞིན་གཏན་ལ་ཕབ་པས་ཆོས་ཉིད་ཀྱི་ལྟ་བ་མ་རྨོངས། ཆོས་ཅན་ཀུན་རྫོབ་ཀྱི་དངོས་པོ་དེ་རྒྱུ་མཚན་ཉིད་ཐེག་པས་རྟེན་འབྲེལ་སྒྱུ་མ་ལྟ་བུའི་རང་བཞིན་དུ་གཏན་ལ་ཕབ་ཀྱང་། ད་དུང་མ་དག་པ་སྒྱུ་མ་ལྟ་བུ་ལས་སྐུ་དང་ཡེ་ཤེས་སུ་གཏན་ལ་མ་ཕབ་པའི་རྨོངས་པའི་ཆ་དེ། གསང་སྔགས་རྡོ་རྗེ་ཐེག་པས་སྐུ་དང་ཡེ་ཤེས་རོལ་པ་ཡེ་ནས་དབྱིངས་ཡེ་གཉིས་སུ་མེད་པའི་དོན་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་གཏན་ལ་ཕབ་པས་མ་རྨོངས་པའི་ཁྱད་པར། སྒོམ་པ་ཐབས་བསྐྱེད་པའི་རིམ་པ། ཤེས་རབ་རྫོགས་པའི་རིམ་པ་གཉིས་ཀྱིས་ཁྱད་པར་འཕགས་པ་ཡིན། སྤྱོད་པ་དཀའ་བ་མེད་པ་ནི། རྒྱུ་མཚན་ཉིད་ཐེག་པས་འདོད་པའི་ཡོན་ཏན་ལྔ་མ་སྤང་བར་བྱང་ཆུབ་སྒྲུབ་པའི་ལམ་བསྟན་པ་མེད་ལ༑ སྐབས་འདིར་ཡིད་ཤེས་བདེ་མྱུར་དུ་སྐྱོབ་པ་འདོད་ཡོན་མ་སྤངས་ལམ་དུ་ཁྱེར་ནས་ཚེ་གཅིག་ལུས་གཅིག་ལ་ཟུང་འཇུག་རྡོ་རྗེ་འཆང་གི་གོ་འཕང་སྒྲུབ་ནུས་པས་ཁྱད་པར་འཕགས། བཞི་པ་གང་ཟག་དབང་པོ་རྣོན་པོའི་རྣོན་པོ་ཡིན་པའི་ཁྱད་པར་ནི༑ སྤྱིར་རྣམ་བྱང་བསྐྱེད་པའི་དབང་པོ་ལྔ་པོ་ཁྱད་པར་ཅན་གྱིས་ཁྱད་པར་འཕགས་པ་དང་། ཁྱད་པར་དུ་གསང་སྔགས་རྡོ་རྗེ་ཐེག་པའི་ལྟ་བ་ཟབ་མོ་རྟོགས་ནུས་པའི་ཤེས་རབ་དང་། སྤྱོད་པ་རླངས་པོ་ལ་མི་སྐྲག་ཅིང་དད་པའི་དབང་པོ་ཤིན་ཏུ་རྣོན་པོའི་གང་ཟག་ཁྱད་པར་ཅན་གྱི་ཡུལ་དུ་གྱུར་པས་ཁྱད་པར་འཕགས་པའོ། ། དེ་ལྟ་བུའི་གསང་སྔགས་རྡོ་རྗེ་ཐེག་པའི་ཆོས་ཉན་འཆད་སྒོམ་སྒྲུབ་གང་གི་དུས་སུ་ཕུན་སུམ་ཚོགས་པ་ལྔ་པོ་ཡོད་དེས་ཆོག མེད་ཐབས་ཆགས་ཡིན་ཏེ། འཇིགས་མེད་གླིང་པའི་ཞལ་ནས། བླ་མ་མིར་མཐོང་ན། དངོས་གྲུབ་ཁྱི་ལས་མི་འབྱུང་ཞེས་གསུངས་པ་བཞིན། བླ་མས་སློབ་མ་ལ་བལྟས་ན་སངས་རྒྱས། སློབ་མས་བླ་མ་ལ་བལྟས་ན་སངས་རྒྱས་སུ་མཐོང་དགོས་མ་གཏོགས་གསང་སྔགས་རྡོ་རྗེ་ཐེག་པའི་དམ་ལྡན་དམ་ཉམས་གཉིས་ཀའི་བར་ན་སྣང་བ་ལྷར་མཐོང་དུས་དམ་ལྡན། ས་ལ་ས༑ ཆུ་ལ་ཆུར་མཐོང་དུས་དམ་ཉམས་ལས་མེད་པས་ཕུན་སུམ་ཚོགས་པ་ལྔའི་དང་པོ་བླ་མ་སངས་རྒྱས་སུ་སྒྲུབ་པ་ལ། ལུང་དང་། ཆོས་ཉིད་ཀྱི་རིགས་པ་གཉིས་ལས། དང་པོ་ནི། ཨཱཪྱ་དེ་ཝས། འདི་ནི་རང་བྱུང་བཅོམ་ལྡན་འདས། །གཅིག་པུ་བདག་ཉིད་ཆེ་བའི་ལྷ། །མན་ངག་རྣམས་ནི་རབ་སྟེར་བས། །རྡོ་རྗེ་སློབ་དཔོན་དེ་བས་ལྷག ། ཅེས་དང་། བླ་མ་སངས་རྒྱས་བླ་མ་ཆོས། །སོགས་དང་། བླ་མ་ཀུན་བཟང་དགོངས་སུ་གསོལ། །ཞེས་དང་། རྡོ་རྗེ་སློབ་དཔོན་སངས་རྒྱས་དཔལ། །ཞེས་སོགས་བླ་མ་སངས་རྒྱས་སུ་བཤད་པའི་ལུང་མཐའ་ཡས་སོ། །རིགས་པས་སྒྲུབ་པ་ནི། བླ་མའི་ཐུགས་ཡེ་ཤེས་ཆེན་པོ་དེ་ཆོས་སྐུ་ཡིན། ཡེ་ཤེས་དེའི་རྣམ་འགྱུར་གཟུགས་སྐུ་ཡིན་ལ་གཟུགས་སྐུའི་ངོ་བོ་ཆོས་སྐུ། ཆོས་སྐུའི་རྣམ་འགྱུར་གཟུགས་སྐུ། དབྱེར་མེད་རྡོ་རྗེའི་སྐུ་ཡིན་ཏེ། ཐུགས་ཡེ་ཤེས་ཆེན་པོ་སྐུ་ལྟར་ཤར་བ་སྣང་སྟོང་སྐུ་རྡོ་རྗེ། སྐུ་ཡེ་ཤེས་ཆེན་པོ་གསུང་ལྟར་གྲགས་པ་གྲགས་སྟོང་གསུང་རྡོ་རྗེ། ཐུགས་ལྟར་འཕྲོ་བ་དྲན་རྟོགས་ཐུགས་རྡོ་རྗེ་སྟེ། རྡོ་རྗེ་གསུམ་གྱི་རང་བཞིན་ཡིན་པས་ཐུགས་ཡེ་ཤེས་ཆེན་པོའི་འཆར་ཚུལ་གཟུགས་སྐུ་དང་གཟུགས་སྐུའི་ངོ་བོ་ཡེ་ཤེས་ཡིན་པས་དེ་གཉིས་དབྱེར་མ་ཕྱེད་པའི་ཆ་ཟུང་འཇུག་རྡོ་རྗེ་འཆང་སྐྱབས་གནས་དགུ་སྤྲུག་གི་ངོ་བོ་བླ་མ་ཡིན་པས་བླ་མ་སངས་རྒྱས་སུ་གྲུབ་ལ། འཁོར་ཐམས་ཅད་ཀྱང་རང་རང་གི་རྟོགས་རུང་མ་རྟོགས་རུང་བདེ་བར་གཤེགས་པའི་སྙིང་པོས་ཏིལ་ལ་མར་གྱིས་ཁྱབ་པ་བཞིན་དུ་ཁྱབ་པས། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། ། སོགས་ཀྱིས་གསལ་བར་སངས་རྒྱས་ཡིན་པར་བསྟན་ཏེ། རང་བཞིན་རྣམ་དག་གི་སངས་རྒྱས། ངོ་བོ་ཡེ་དག་གི་སངས་རྒྱས། ཡོན་ཏན་ལྷུན་གྲུབ་ཀྱི་སངས་རྒྱས་ཡིན་ཀྱང་། སངས་རྒྱས་གོ་མི་ཆོད་པའི་རྒྱུ། འོན་ཀྱང་དྲི་མ་གློ་བུར་འབྲལ་རུང་བས་བསྒྲིབས་ནས་ཡོད་མོད་ཀྱང་། དོན་ལ་སངས་རྒྱས་ཡིན་པས། རིགས་གང་རུང་གི་དཔའ་བོ་མཁའ་འགྲོ་རྣམས་སུ་གསལ་བཏབ། སྟོན་འཁོར་གཉིས་ཀ་སངས་རྒྱས་ཡིན་ན་དེའི་ཞིང་ཁམས་ཀྱང་དག་པར་གྲུབ་པས་གནས་འོག་མིན་སོགས་སུ་གསལ། ཆོས་ནི་འོད་གསལ་རྫོགས་པ་ཆེན་པོ། དུས་ཀུན་ཏུ་བཟང་པོ་ནས་ད་ལྟའི་རྩ་བའི་བླ་མའི་བར་དུ་ཞལ་ནས་སྙན་དུ་བརྒྱུད་པའི་བརྒྱུད་པ་མ་ཆད་པ་རྟག་པ་རྒྱུན་གྱི་འཁོར་ལོ་སྟེ་ཕུན་སུམ་ཚོགས་པ་ལྔ་ཡེ་ནས་ཡིན་པ་ལ་ཡིན་པར་གསལ་བཏབ་པ་སྟེ་སྣང་སྲིད་གཞིར་བཞུགས་ཀྱི་སངས་རྒྱས་ལ་གཞིར་བཞེངས་སུ་གསལ་བཏབ་པ་མ་གཏོགས། བོང་བུ་ལ་རྟ་ཡིན། སོལ་བ་ལ་གསེར་ཡིན་ཟེར་བ་ལྟ་བུ་མ་ཡིན་ནོ། །དེ་ཡན་ཆད་ཀྱི་ཀུན་སློང་དེ་སོང་ནས། ད་ནི་གཉིས་པ་ཀུན་སྤྱོད་ལ། དུག་ལྟ་བུའི་སྤང་བྱའི་ཀུན་སྤྱོད་དང་། སྨན་ལྟ་བུའི་བླང་བྱའི་ཀུན་སྤྱོད་གཉིས་ལས། དང་པོ་ལ་གསུམ་ལས་སྣོད་ཀྱི་སྐྱོན་ཞེས་པ་ནི། སྣོད་དུག་ཅན་ཞིག་གི་ནང་ལ་བཅུད་བཟང་པོ་ཇི་ལྟ་བུ་ཞིག་བླུག་ན་སྣོད་ཀྱི་དུག་གིས་དུག་ཅན་དུ་འགྲོ་བ་བཞིན་སློབ་མ་སྣོད་མེད་ལ་ཆོས་ཇི་ཙམ་བསྟན་ཀྱང་ཉོན་མོངས་པའི་གཉེན་པོར་མི་འགྲོ་བར་མ་ཟད་ཆོས་ཉོན་མོངས་པའི་སྣོན་མར་འགྲོ་བས། དང་པོ་རྣ་བས་མ་ཉན་ན་སྣོད་ཁ་སྦུབས་ཏེ་སྟེང་ནས་བཅུད་བླུགས་ཀྱང་ནང་དུ་མི་འགྲོ་བ་བཞིན། ལུས་ཆོས་གྲལ་ན་གནས་ཀྱང་སེམས་ཆོས་གྲལ་དུ་མེད་པས་བླ་མའི་གསུང་ལ་རྣ་བས་མ་ཉན་ན་ཅི་གསུང་མི་གོ་བས་རྣ་བའི་དབང་པོ་གཏད་ནས་ཉན་དགོས། རྣ་བས་ཉན་ཀྱང་སེམས་ལ་མ་བཟུང་ན་མི་ཕན་ཏེ་ཚིག་དོན་གཉིས་ཀ་མི་གོ་བས་ཡིད་ལ་འཛིན་དགོས། ཉོན་མོངས་དང་འདྲེས་ན་ཆོས་བཙོང་དང་། ཆོས་རའི་ནང་དུ་ཆགས་སྡང་རྨོངས་པ་སྐྱེ་ན་ལས་ངན་སོགས་འགྲོ་བས་ཉོན་མོངས་དང་འདྲེས་དུག་ཅན་ལྟ་བུ་ཡིན་པས། དེ་གསུམ་གྱི་གཉེན་པོ་ལ། མདོ་ལས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ་ཞེས་གསུངས་ཏེ། དེ་བཞིན་གཤེགས་པས་ཀུན་དགའ་བོ་ལ་ཁྱོད་ཀྱི་ཀུན་སློང་ཉོན་མོངས་དང་མ་འདྲེས་པར་ཚིག་རྣ་བས་ཉོན་དོན་ཡིད་ལ་ཟུངས་ཤིག་དང་ཁྱོད་ལ་བཤད་དོ་ཞེས་གསུངས་པ་མ་གཏོགས། ཀུན་སློང་ཆགས་སྡང་དང་འདྲེས་རྣ་བ་མ་གཏད་ཡིད་ལ་མ་འཛིན་དང་ཁྱོད་ལ་བཤད་དོ་ཞེས་མ་གསུངས་པས་ཀུན་སློང་ཆགས་སྡང་དང་མ་འདྲེས་པ་བསམ་པ་བྱང་ཆུབ་སེམས་དང་མ་བྲལ་བས་ཚིག་རྣ་བས་ཉན་དོན་ཡིད་ལ་བཟུང་སྟེ་ཉན་དགོས། གཉིས་པ་དྲི་མ་དྲུག་ནི། ང་རྒྱལ་དང་ནི་སོགས་སོ། །དང་པོ་ང་རྒྱལ་ནི་རང་ལས་དམན་པ་ལ་ལྟོས་ཏེ་དེ་ལས་རང་མཐོ་བའི་རྣམ་པ་ཅན་དེ་ཡིན། ང་རྒྱལ་ཡོད་ནས་བཟུང་རང་ལས་དམན་པ་ལ་བརྙས་བཅོས། མཐོ་བ་ལ་ཕྲག་དོག བར་བ་ལ་འགྲན་སེམས་སྐྱེས་པས། ང་རྒྱལ་ལྕགས་ཀྱི་གོང་བུ་ལ། ཡོན་ཏན་གྱི་ཆུ་མི་ཆགས། ཞེས་ལ་ལྟར། རང་རྒྱུད་ལ་ང་རྒྱལ་ཡོད་ནས་བཟུང་རང་གི་སྐྱོན་མི་མཐོང་། གཞན་གྱི་ཡོན་ཏན་མི་མཐོང་བས། དེའི་གཉེན་པོ་རྟག་ཏུ་རང་སྐྱོན་ངོས་བཟུང་། རང་མཚང་ཐེར་ལ་བཏོན། དམའ་མོའི་ས་བཟུང་། ཧྲུལ་པོའི་གོས་གྱོན། བཟང་ངན་འབྲིང་གསུམ་ཐམས་ཅད་གོང་དུ་བཀུར་དགོས། མ་དད་པ་ནི་ཆོས་དང་གང་ཟག་ལ་ཡིད་མི་ཆེས་པ་ཡིན་པས། དེའི་གཉེན་པོ་ཆོས་དང་གང་ཟག་གིས་མི་བསླུ་བར་ཡིད་ཆེས་དགོས། དོན་གཉེར་མེད་པ་ནི༑ ཆོས་ཐོབ་རུང་མ་ཐོབ་རུང་ཆོས་ལ་དོན་གཉེར་མེད་པ་རྟ་སྔོན་དུ་རུས་པ་བླུགས་པ་དང་། ཁྱི་སྔོན་དུ་རྩྭ་འཕང་བ་ལྟ་བུའི་བསམ་པ་དེ་ཡིན་ལ། དེའི་གཉེན་པོ་ཆོས་དང་འཕྲད་པར་དཀའ་བ་དགེ་བའི་གཤེས་གཉེན་དང་མཇལ་བར་དཀའ་བའི་འདུ་ཤེས་བསྐྱེད་ནས་ཆོས་ཀྱི་ཚིག་དོན་རེ་རེ་ལའང་དོན་གཉེར་གྱི་འདུན་པ་བསྐྱེད་དགོས། ཕྱི་རོལ་རྣམ་གཡེང་གི་སྒོ་ནས་ཆགས་སོགས་ཉོན་མོངས་པ་བསྐྱེད་པས་དེའི་གཉེན་པོར་སེམས་ནང་དུ་སྡུད་དགོས། ཡང་ཧ་ཅང་ནང་དུ་སྡུད་ཆེ་ན་གཉིད་དང་རྨུགས་པ་བྱིང་བ་རྣམས་འབྱུང་བས། དབང་པོ་བག་ཡངས་ལ་བཞག་ཤེས་པ་དང་བཏོན་ནས་ཉན་དགོས། སྐྱོ་བས་ཉན་པ་ནི། ཆོས་ཐུན་རིང་དྲག་པ་ལ་སོགས་པའི་ཚེ་བཀྲེས་སྐོམ་དང་ཉི་མ་དང་ཆར་བ་སོགས་ཀྱིས་གདུང་བ་ན་ཆོས་དང་བླ་མ་སྤང་འགྲོ་ཉེན་ཆེ་བས། ཆོས་སྤང་མ་བསགས་གོང་ནས་ཆོས་དང་བླ་མ་འཇལ་བར་སྨོན་ལམ་བཏབ་ནས་ཆོས་གྲལ་ནས་བུད་འགྲོ་དགོས། ཡང་ན་དགའ་བ་བསྐྱེད་དེ་བདག་གི་སྔོན་དོན་མེད་ལུས་སྲོག་ཆུད་ཟོས་སུ་སོང་། ད་རེས་དམ་པའི་ཆོས་འདིའི་ཆེད་དུ་ན་ཚ་བཀྲེས་སྐོམ་སོགས་ཀྱིས་སེམས་ཅན་ཐམས་ཅད་ཀྱི་ན་གོ་དང་ཚ་གོ་སོགས་བཅད་དེ་ཉན་ན། ཞིང་གཞན་ནས་རྡོ་རྗེ་དམྱལ་བར་འགྲོ་བའི་ལས་ངན་མང་པོ། བདག་ཅག་གི་སྟོན་པའི་ཞིང་ཁམས་འཛམ་གླིང་ལས་ཀྱི་ས་པ་འདིར་མགོ་ན་བ་ཙམ་གྱིས་བྱང་ན་ད་རེས་ལས་ངན་དཔག་ཏུ་མེད་པ་འཛད། ཚོགས་དཔག་ཏུ་མེད་པ་རྫོགས་པ་ཡིན་པས་ང་རེ་དགའ་སྙམ་དུ་དགའ་བཞིན་སྤྲོ་བཞིན་དུ་ཉན་དགོས། གསུམ་པ་མི་འཛིན་པ་ལྔ་ནི། རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་ཁ་ཕྲལ་ནས་འཛིན་པ་ཡིན། དང་པོ་དོན་ལ་མི་སེམས་པར་ཚིག་སྙན་སྙན་ལེགས་ལེགས་གཏམ་རྒྱུད་ལྟ་བུ་རེའམ་ཡང་ན་ཚིག་འཁྲི་བཅད་དགོས་ཟེར་ནས་དོན་མེད་པའི་ཚིག་གི་ཕྲེང་བ་འཛིན་པ་ཡིན། གཉིས་པ་རྙིང་མ་ལྟ་བུའི་སྒོམ་ཆེན་ཡིན་ཟེར་བ་རྣམས་ཀྱིས་བཤད་པ་ཚིག་གི་རོ་ཡིན། སེམས་ངོ་འདི་ལ་ཅིག་གོ་དགོས་ཟེར་ནས་བྲང་ལ་འཛུབ་མོ་བཙུག་ནས་ཚིག་ལ་མི་ལྟ་བར་དོན་རྗེན་པར་ཟིན་རྒྱུ་ཡོད་པར་འདོད་པ་དེ་ཡིན། དེ་གཉིས་ཀའི་གཉེན་པོ་ཚིག་དོན་འབྲེལ་ཆགས་སུ་འཛིན་དགོས། གསུམ་པ་བརྡ་མ་འཕྲོད་ནས་འཛིན་པ་ནི། དྲང་དོན་ལ་ངེས་དོན་དུ་འཛིན། དགོངས་པ་ལྡེམ་དགོངས་ཕྱིན་ཅི་ལོག་ཏུ་འཛིན། རྟོན་པ་བཞི་གོ་བཟློག་ནས་འཛིན་པ་ཡིན། དེའི་གཉེན་པོ་གང་ཟག་ལ་མི་རྟོན་པར་ཆོས་ལ་རྟོན་དགོས། གང་ཟག་གྲགས་པ་ཆེ་རུང་ཆོས་རྒྱུ་འབྲས་ཐེག་པ་ཆེན་པོའི་ལམ་དང་མ་མཐུན་ན་གང་ཟག་གིས་མི་ཕན་པས། ཆོས་ཐེག་པ་ཆེན་པོ་དང་མཐུན་ན་གང་ཟག་ཀྱང་དེ་ཅི་ལྟ་བུ་ཡིན་པས་ཆོས་ལ་རྟོན་དགོས། ཆོས་ཀྱི་ཚིག་ལ་མི་རྟོན་པར་དོན་ལ་རྟོན་དགོས། དོན་དྲང་དོན་དང་ངེས་དོན་གཉིས་ལས་ངེས་དོན་ལ་རྟོན་དགོས། ངེས་དོན་ལ་རྣམ་ཤེས་ཡེ་ཤེས་གཉིས་ཀྱི་ཟླས་ཕྱེ་བའི་ཡེ་ཤེས་ལ་རྟོན་དགོས། བཞི་པ་ལོག་པར་འཛིན་པ་ནི་དོན་ལོག་པར་འཛིན་པ་ཡིན་པས་གསང་སྔགས་ཀྱི་ཆོས་ཞིག་ཞུས་ནས་བཟུང་ནག་ཆང་སྦྱོར་སྒྲོལ་གྱི་སྤྱོད་པ་ལ་སྤྱད་ཆོག་པར་བསམ་པ་དེ་ཡིན་ལ། དེའི་གཉེན་པོ་སྤྱོད་པ་དུས་ཚོད་དང་འབྲེལ་དགོས་ཏེ། ཏིང་ངེ་འཛིན་གྱི་དྲོད་ཐོབ་ནས་འབྲུ་གསུམ་བརྗོད་པས་ཆང་གི་ཁ་དོག་དྲི་རོ་བསྒྱུར་ནུས་དུས། སྤྱོད་པས་བསད་ནུས་པ་དགོངས་པས་གསོ་ནུས་པ་ལ་སོགས་པའི་དྲོད་ཐོབ་པ་དང་བསྟུན་སྤྱོད་པ་སྤྱད་དགོས། དེ་ལྟར་མ་ཤེས་གབ་པའི་གསང་བ་མ་རྟོགས་པར་སྦས་པའི་གསང་བ་ལ་འཆོལ་ཉོག་ཏུ་སྤྱོད་ན་བདུད་དང་རུ་ཏྲ་ལྟ་བུ་ལས་འགྲོ་ས་གཞན་མེད། ལྔ་པ་གོང་འོག་བསྣོལ་ནས་འཛིན་པ་སྔོན་འགྲོ་མ་ཞུས་གོང་ནས་དངོས་གཞི་བཤད་ཉན་བྱེད། སྔོན་འགྲོ་ལ་ཐུན་མོང་ཕྱི་ནང་གི་སྔོན་འགྲོ་གོ་བཟློག་ནས་འཛིན་པ་ཡིན་པས། དེའི་གཉེན་པོ་རྫོགས་པའི་སངས་རྒྱས་ཀྱི་བསྟན་པ་སྐས་ཀྱི་གདང་བུ་ལྟ་བུའི་གོང་འོག་བབ་ཆགས་པས་འཛིན་དགོས། གཉིས་པ་བླང་བྱའི་ཀུན་སྤྱོད་ལ། འདུ་ཤེས་བཞི་བསྟེན་པ་རང་ལ་ནད་པའི་འདུ་ཤེས་ལ་རང་རྒྱུད་ཀྱི་རྒྱུ་དུག་གསུམ་འབྲས་བུ་སྡུག་བསྔལ་གསུམ་གྱི་ནད་ཀྱིས་ཟིན་པའི་རང་སྐྱོན་ངོས་ཟིན་དགོས། གཞན་གོ་སླའོ། །ཕྱིན་དྲུག་གི་ཉན་པ་པོ་དང་འཆད་པ་པོ་དྲུག་ལས། དང་པོའི་དྲུག་ནི་དངོས་དང་། འཆད་པ་པོའི་དྲུག་ནི། རྙེད་བསྟོད་སྙན་གྲགས་ཀྱི་རེ་བ་མེད་པའི་སྒོ་ནས་འཆད་པ་སྦྱིན་པ། གཞན་ལ་ཟུར་ཟ་ཁྱད་གསོད་སོགས་མེད་པ་ཚུལ་ཁྲིམས། ཡང་ཡང་དྲིས་ན་མི་ཁྲོ་བ་བཟོད་པ། ཉིན་མཚན་རྣམས་སུ་ཆོས་བཤད་ན་མི་སྐྱོ་བ་བརྩོན་འགྲུས། ཚིག་དོན་ལ་སེམས་གཏད་པ་བསམ་གཏན། འཁོར་གསུམ་དག་པ་དང་སློབ་མ་ལ་ཐོས་བསམ་བསྐྱེད་པ་ཤེས་རབ་ཡིན་ནོ། །གཞན་ནི་གོ་སླའོ། །གཉིས་པ་བཤད་བྱའི་ཆོས་ཀྱི་རིམ་པ་དལ་འབྱོར་རྙེད་པར་དཀའ་བ་སོགས་དྲུག་ཡིན། ཆོས་ཞེས་པའང་གོང་ལྟར་ཆོས་འདིས་རང་གི་སེམས་འདུལ་དགོས་ཏེ། རལ་པས་མ་ཡིན་དབྱུག་པས་མིན། །ཞེས་པས་དལ་འབྱོར་སོགས་འདི་དག་ཡང་ནས་ཡང་དུ་རང་རྒྱུད་ལ་བསམ་དགོས། དང་པོ་བློ་ལྡོག་གི་ཆོས་རྣམ་པ་བཞིའམ། ཞེན་ལོག་གི་ཆོས་རྣམ་པ་བཞིའམ། ངེས་འབྱུང་གི་ཆོས་རྣམ་པ་བཞི་ཞེས་པ་དོན་གཅིག་མིང་གི་རྣམ་གྲངས་ཡིན་ལ། དང་པོ་དལ་འབྱོར་རྙེད་དཀའ་དང་། ཚེ་མི་རྟག་པ་གཉིས་ཀྱིས་ཚེ་འདི་ལ་བློ་ལྡོག་དགོས། ཞེན་པ་བཞི་བྲལ་ལས། ཚེ་འདི་ལ་ཞེན་ན་ཆོས་པ་མིན། །ཞེས་པས་དལ་འབྱོར་འདི་ནི་རྙེད་པར་དཀའ་བས། ཡང་ཡང་རྙེད་དཀའ་ཨུ་དུམ་ཝ་ར་འདྲ། ། རྙེད་པ་དོན་ཆེ་ཡིད་བཞིན་ནོར་བུ་འདྲ། །ཞེས་པས། ཡར་འགྲོ་མར་འགྲོའི་ས་མཚམས་རྟ་ཁ་སྲབ་ཀྱིས་བསྒྱུར་བ་ལྟ་བུ་ད་རེས་ཀྱི་ལུས་རྟེན་འདིའི་སྟེང་ནས་ཡིན་པ་ཤེས་དགོས་ཏེ། དེ་ཡང་མི་རྟག་པ་སྐྱེ་བ་ཡོད་ན་འཆི་བ་ཆོས་ཉིད་དུ་གྲུབ་པས་མི་རྟག་འཆི་བའི་དབང་དུ་འགྲོ་བས་ཚེ་འདི་བསྒྲུབ་པ་ལ་དོན་ནམ་སྙིང་པོ་མེད་པར་ཤེས་ནས་ཕྱི་མ་དོན་དུ་གཉེར་དགོས། འཁོར་བ་རྒྱུ་འབྲས་གཉིས་བསམ་ནས། ཕྱི་མ་ཕན་ཆད་ཀྱི་འཁོར་བ་ལ་བློ་ལྡོག་དགོས། དེ་ལ་བློ་ལྡོག་ཚུལ་ལ། སྐྱེས་བུ་ཆུང་ངུས་ངན་སོང་གསུམ་ལ་བློ་ལྡོག་ནས་མཐོ་རིས་དོན་དུ་གཉེར། འབྲིང་གིས་འཁོར་བ་རིགས་དྲུག་པོ་ལ་བློ་ལྡོག་ནས་ཐར་པ་དོན་དུ་གཉེར། ཁྲིད་ལུགས་གཞན་ལ་འདི་གཉིས་ལས་མེད་ཀྱང་། ཀུན་མཁྱེན་ཡབ་སྲས་ཀྱི་ལུགས་ལ་རང་འདོད་ཡིད་བྱེད་ཀྱི་བསམ་པ་ལ་བློ་ལྡོག་དགོས། དེ་ཡང་འཁོར་བའི་ཉེས་དམིགས་བསམ་པའི་དུས་སུ་སེམས་སྡུག་ལྷང་ངེ་སྐྱོ་ཤས་དང་། དེ་ལས་ཐར་འདོད་ཀྱི་ངེས་འབྱུང་གི་བསམ་པ་སྐྱེ་བའི་དུས་ང་རང་གཅིག་པུ་ཙམ་ཐར་བས་ཅི་ཕན། ཐོག་མ་མེད་པ་ནས་དྲིན་གྱིས་བསྐྱངས་པའི་མ་དྲིན་མོ་ཆེ་རྣམས་ཤུལ་དུ་བཞག་ནས་རང་གཅིག་ཐར་པར་བྱས་ན་དེ་ལས་ཁྲེལ་བོར་བ་སུ་ཡང་མེད་པས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པར་བྱ་དགོས་བསམ་ནས་མཐའ་གཉིས་ལས་ངེས་པར་འབྱུང་བ་ཆེན་པོའི་བློའོ། ། ངེས་འབྱུང་བཞིར་བཞག་ན། སྐྱེས་བུ་ཆུང་ངུའི་ཀུན་སློང་དེ་ངེས་འབྱུང་ཙམ་དང་། ཉན་རང་གཉིས་ཀྱི་ངེས་འབྱུང་གཉིས། ངེས་འབྱུང་ཆེན་པོ་དང་བཞིའོ། །ངེས་འབྱུང་གསུམ་གྱི་དབང་དུ་ན། ཉན་རང་གཉིས་དང་བྱང་སེམས་གསུམ་གྱིས་ངེས་འབྱུང་དང་གསུམ་མོ། །ད་འཁོར་བ་མཐའ་དག་ལ་ངེས་པར་འབྱུང་ནས་འབྲོས་ས་ཞིག་བཙལ་དགོས་པས། ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་དགོས། ཐར་པའི་ལམ་དེ་རང་གི་རང་གར་ནི་མི་ཤེས། ཕ་མ་ཉེ་དུ་སོགས་ཀྱིས་མི་སྟོན། སྟོན་ཀྱང་མི་ཤེས་པས་དགེ་བའི་བཤེས་གཉེན་ཞིག་བཙལ་དགོས། དེ་ཡང་སུ་ཐུག་ཐུག་གང་རུང་རུང་ཞིག་གིས་མི་འོང་བས་བླ་མ་དགེ་བའི་བཤེས་གཉེན་མཚན་ཉིད་དང་ལྡན་པ་ཞིག་མཉེས་པ་གསུམ་གྱི་ཞབས་ཏོག་སྒྲུབ་པའི་སྒོ་ནས་བརྟེན་ཅིང་དགོངས་སྤྱོད་བསླབ་དགོས། དེ་ལས་དང་པོ་དལ་འབྱོར་རྙེད་པར་དཀའ་བའི་ཁྲིད་སོགས་ལ་སྨིན་ཁྲིད་དང་མོས་ཁྲིད་གཉིས་ལས་ད་ལྟ་མོས་ཁྲིད་ཙམ་ལས་མེད་ནའང་། རིག་འཛིན་ཆེན་པོ་འཇིགས་མེད་གླིང་པ་ཚུན་ཆད་དུ་སྨིན་ཁྲིད་ཀྱི་དོད་ཐུབ་ཙམ་བཞུགས་པས་དང་པོ་དལ་འབྱོར་རྙེད་པར་དཀའ་བའི་ཁྲིད་ནི་རང་གི་ལུས་ཀྱི་ཁྲིད་ཡིན་པས། དལ་འབྱོར་འདིའི་སྟེང་ནས་འགྲོ་ས་གཉིས་ལས་མེད། ལེགས་ན་ཐར་པའི་གྲུ་གཟིངས་ལུས་འདི་ཡིན། །ཞེས་པས་ལུས་འདིའི་སྟེང་ནས་དམ་པའི་ཆོས་ཡང་དག་པ་ཞིག་བསྒྲུབ་ན་བདེ་བ་དང་སྐྱིད་པའི་ཆུས་མགོ་ཚུགས་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པ་དང་། ཁྱད་པར་འོད་གསལ་རྫོགས་པ་ཆེན་པོ་བསྒོམ་ན་ཚེ་འདིའམ། བར་དོའམ། ཕྱི་མ་གསུམ་གང་རུང་ལ་གྲོལ་བར་འགྱུར། ཉེས་ན་འཁོར་བའི་གཏིང་རྡོ་ལུས་འདི་ཡིན། །ཞེས་པས་ལུས་འདིའི་སྟེང་ནས་འཇིག་རྟེན་ཚེ་འདི་བསྒྲུབ་ན་འཇིགས་དང་སྡུག་བསྔལ་ཐམས་ཅད་ཀྱི་མགོ་འཛིན་པ་ཡིན། དེ་ལྟ་བུའི་རང་ངོས་ནས་ཆོས་སྒྲུབ་པའི་འགལ་རྐྱེན་མེད་ཅིང་ཁོམས་པས་ན་དལ་བ་ཞེས་བྱ་བ་འདི་རང་གི་ལུས་འདི་ཡིན་པས་དེའི་ལྡོག་ཕྱོགས་མི་དལ་བ་བརྒྱད་ཡོད་དེ་བརྒྱད་ལ་རང་རྒྱུད་རྟེན་གྱི་མི་ཁོམས་པ་བརྒྱད་ཟེར། དེ་ལ་མི་མ་ཡིན་པའི་མི་ཁོམས་པ་བཞི་དང་། མིའི་མི་ཁོམས་པ་བཞི་ལས། དང་པོ་མི་མ་ཡིན་པའི་མི་ཁོམས་པ་དམྱལ་བ་བསྒོམ་ནས་ཆོས་སྒྲུབ་པ་ལ་ཁོམས་མི་ཁོམས་ཡང་ནས་ཡང་དུ་བསམ་དགོས། དེ་ལ་ཐུན་དང་ཐུན་མཚམས་གཉིས། ཐུན་ལའང་ཐུན་གཉིས་དང་གསུམ་དང་བཞི་དང་དྲུག་ལ་སོགས་པའི་ལུགས་མང་ཡང་འདིར་ནི་ཉིན་ཐུན་གཉིས་མཚན་ཐུན་གཉིས་དང་བཞིའི་དབང་དུ་བྱས་ན། ལས་དང་པོ་པ་འཇུག་བདེ་བའི་ཕྱིར་ནངས་དུས་ཐོ་རངས་བྱ་གྲགས་དང་པོ་ཙམ་ནས་ཐུན་མགོ་བཟུང་སྟེ་ནམ་མ་གསལ་བར་དུ་ཐོར་ཐུན་ནམ་ལངས་པ་དང་ཐུན་གྲོལ་ནས་ཉི་མའི་དྲོས་པོ་ཆེ་བར་དུ་ཐུན་མཚམས་ཀྱི་བྱ་བ་ཆུ་གཏོར་དང་དཀར་གསུར་རྒྱུན་དུ་མི་ཆག་པའི་ཡི་དམ་རྣམས་འདོན། དེ་ནས་ཐུན་བསྡམ་ནས་ཉིན་གོང་ཉི་མ་ཀླད་ལ་མ་འཁོར་གྱི་བར་དུ་སྔ་ཐུན། དེ་ནས་ཐུན་གྲོལ་ནས་གུང་ཚིགས་དང་། ཕྱག དཔེ་ལྟས་སོགས་བྱས་ནས་ཕྱི་དྲོ་གྲིབ་ཆེན་གུག་མ་འོང་བར་དལ་བར་བསྡད། དེ་ནས་ཐུན་བསྡམ་ནས་ཉི་མ་ལ་མ་སོང་བར་དུ་ཐུན་བསྡམ་པ་ཕྱི་ཐུན། དེ་ནས་ཐུན་གྲོལ་ནས་གསོལ་ཀ་དང་བསྔོ་བ་སྨོན་ལམ་གང་ཤེས་དང་དམར་གསུར་རྣམས་འདོན། དེ་ནས་སྲོད་གདོང་ནག་ཅེས་མི་གཅིག་མཐོང་ན་མི་ཡིན་རྒྱུ་ཙམ་ལས་འདི་ཡིན་ནོ་ཞེས་ངོ་མི་ཤེས་པའི་དུས་སུ་ཐུན་བསྡམ་པ་སྲོད་ཐུན། དེ་ནས་མི་ཉལ་ཕྱི་བ་ཙམ་དུ་ཐུན་གྲོལ་བ་སྟེ་ཐུན་བཞི་བོ་དེའི་དུས་སུ་བསྒོམ་ན་སེམས་ལས་སུ་རུང་ལ། ཐུན་མཚམས་རྣམས་སུ་ལས་དང་པོ་པས་བསྒོམ་ཀྱང་གནད་དུ་མི་འགྲོ་ཁྱད་པར་བྱིང་རྒོད་ཀྱི་སྐྱོན་ལྷག་པར་འབྱུང་བས་ཐུན་མཚམས་ཁ་ཏོན་དང་དགེ་སྦྱོར་ལ་བརྩོན་པ་ལས་བསྒོམ་པ་བག་ཡང་བྱ། དེ་ལྟ་བུའི་ཐུན་རེ་རེ་ལ་ཐུན་གྱི་སྔོན་འགྲོ་དང་དངོས་གཞི་དང་རྗེས་གསུམ་ལས་དང་པོ་སྔོན་འགྲོ་ལ་སྔོན་འགྲོའི་སྔོན་འགྲོ་དང་སྔོན་འགྲོ་གཉིས་ལས་སྔོན་འགྲོའི་སྔོན་འགྲོ་ནི། སྣབས་འབུད་གདོང་ཕྱི་སྒོ་ཕྱི་ནང་གི་བྱ་བ་བསྒྲུབ་རྒྱུ་ཡོད་ཚད་རྣམས་བ སྒྲུབ་མདོར་ན་ཐུན་ནང་ནས་ཐུན་ཕེད་དེ་བརྒྱུག་མི་དགོས་པར་བྱེད་པ་ཡིན། དེ་ནས་མལ་དུ་ལུས་སེམས་ཁོད་ལྷོད་དེ་བསྡད་ནས་ངལ་བསོ། དེ་ནས་ད་ངས་ཐུན་ནང་འདིར་དྲིན་ཆེན་གྱི་ཕ་དེ་ཐོན་འོང་ནའང་ཐུན་ཕེད་དེ་འཁྲུལ་པའི་དབང་དུ་གཏོང་རེ་ཤི དེ་ལྟ་བུའི་དམ་བཅའ་དེ་ཤ་སེན་མོས་བཏོགས་ཏེ་བསད་ན་གཏོང་རེ་སྙམ་པའི་དམ་བཅའ་དྲག་པོ་ཞིག་བྱས་ཏེ། ཐུན་གྱི་སྔོན་འགྲོ་ནི་ལུས་གནད་རྣམ་སྣང་ཆོས་བདུན་ཏེ། རྐང་པ་རྡོ་རྗེ་སྐྱིལ་ཀྲུང་། ལག་པ་མཉམ་བཞག རྒལ་ཚིག་དོང་ཚེ་ལྟར་བརྩིགས། དཔུང་པ་ལྷོད་དེ་བརྒྱང་། མགྲིན་པ་ཨེན་ཙམ་དགུག ལྕེ་ཡ་རྐན་ལ་སྦྱར། མིག་སྣ་རྩེར་ཕབ་པ་སྟེ་བདུན། ངག་གནད་རླུང་རོ་བསལ་བ་ལ་གཡས་གཡོན་རེས་མོས་གསུམ་གསུམ་མཉམ་དུ་གསུམ་སྟེ་དགུ་སྤྲུག་གམ། ཡང་ན་གཡས་གཅིག་གཡོན་གཅིག་མཉམ་པར་གཅིག་སྟེ་སུམ་སྤྲུག་གམ། ཡང་ན་མཉམ་པར་གསུམ་སྟེ་སུམ་སྤྲུག་གང་རུང་བྱེད། དེ་ལ་ལག་པ་གཡོན་པ་རྡོ་རྗེ་ཁུ་ཚུར་བརླའི་རྩ་བོ་ཆེའི་སྟེང་ནས་མནན། གཡས་པ་རྡོ་རྗེ་རྩེ་གསུམ་པའི་ཕྱག་རྒྱས་སྣ་བུག་གཡས་པ་བཀག གཡོན་པ་ནས་རླུང་ནང་དུ་དལ་བུས་རྔུབ་ལྟེ་འོག་ཏུ་ཆིལ་གྱིས་བཅགས། དམིགས་པ་བདག་གི་ཚེ་རབས་འཁོར་བ་ཐོག་མ་མེད་པ་ནས་བསགས་པའི་ལས་ཉོན་མོངས་སྡིག་སྒྲིབ་དམ་ཚིག་ཉམས་ཆག་སྒོམ་སྐྱོན་བྱིང་རྨུགས་འཐིབ་གསུམ་རླུང་ནག་པོ་ཞིག་གི་རྣམ་པར་གྱུར་ནས་ཕྱིར་སངས་ཀྱིས་འགྲོ་བར་བསམ་ལ་རླུང་འཕེན་དུས་ནས་འབྲུ་འདྲ་བར་དང་པོ་ཆུང་ངུ་བར་ཆེར་བསྐྱེད་ཐ་མ་ནར་གྱིས་འཕང་། དེས་ནི་སྣོད་བཀྲུ་བཤལ་བྱེད་པ་དང་མཚུངས། གསུམ་པ་སེམས་གནད་ཀུན་སློང་བཅོས་པ་ནི་ད་ག་རེ་ངའི་ཐུན་ཞིག་སྡོམ་པ་འདི། ཚེ་འདིའི་ནད་སོགས་ཞི་བར་འདོད་པའི་འཇིགས་སྐྱོབ་ཀྱི་ཀུན་སློང་རེད་དམ། རྙེད་བསྟོད་བསྒྲུབ་པའི་ལེགས་སྨོན་དེ་ཡིན། དེ་གཉིས་ཀ་ཡིན་ན་དུག་ལྟར་སྤང་། ལུང་མ་བསྟན་ཡིན་ན་བཅོས། སྐྱེས་བུ་ཆུང་ངུའི་ཀུན་སློང་དེ་འཇིག་རྟེན་རྒན་པོའི་བསམ་བྱ་ཡིན་པས་ང་ལམ་ཞུགས་ཤིག་གི་བསམ་བྱ་མིན། སྐྱེས་བུ་འབྲིང་གི་ཀུན་སློང་དེ་ཡང་བདག་རང་འདོད་བསྒྲུབ་པའི་བསམ་པ་ཡིན་པས་དེ་ཡང་སྤང་བྱ་ཡིན། ད་ནི་སྐྱེས་བུ་ཆེན་པོའི་ཀུན་སློང་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ངས་དལ་འབྱོར་རྙེད་པར་དཀའ་བ་བསྒོམ་པར་བགྱིའོ་སྙམ་པའི་ཀུན་སློང་རྣམ་པར་དག་པ་བསྐྱེད་དགོས། བླ་མ་ལ་གསོལ་བ་འདེབས་པ་ནི། རང་གི་སྤྱི་བོར་པདྨ་དཀར་པོ་འདབ་མ་འབུམ་ཕྲག་བརྡལ་བ་ཟེའུ་འབྲུ་དམར་སེར་གྱེས་པའི་སྟེང་དུ་སེང་ཁྲི་དར་ཟབ་འབོལ་བརྩེགས་ཀྱི་གདན་ལ་རྩ་བའི་བླ་མ་རབ་བྱུང་ངམ་སྔགས་པའི་ཆ་ལུགས་ཇི་ལྟ་བ་བཞིན་གསལ་ལ་བླ་མ་སངས་རྒྱས་སུ་ཤེས་པ་ལྔས་གསོལ་བ་བཏབ་སྟེ། དུས་གསུམ་སངས་རྒྱས་ཐམས་ཅད་སོགས་དང་། བློ་ལྡོག་བཞི་པོའི་མགོ་མཇུག་གི་གསོལ་འདེབས་ཀྱི་ཚིགས་བཅད་དེ་དག་བཏོན་ཏེ་མོས་གུས་དུང་དུང་བས་གསོལ་བ་བཏབ་པས་བླ་མ་ཐུགས་བརྩེ་བ་ཆེན་པོས་འོད་དུ་ཞུ་ནས་རང་ལ་ཐིམ་སྟེ་བླ་མ་དང་ཐུགས་ཡིད་དབྱེར་མེད་དུ་འདྲེས་པའི་ངང་ལ་འདས་པའི་རྗེས་སུ་མི་འབྲང་། མ་འོངས་པའི་མདུན་མི་བསུ། ད་ལྟའི་རྟོག་པ་འཕྲོ་མི་མཐུད་པར་ཅི་གནས་སུ་མཉམ་པར་འཇོག དེ་དག་ནི་ཐུན་གྱི་སྔོན་འགྲོ་ཡིན། དངོས་གཞི་ལ་དང་པོ་དལ་བ་བརྒྱད་སྒོམ་པའི་མི་མ་ཡིན་པའི་མི་ཁོམས་པ་བཞིའི་དང་པོ་དམྱལ་བ་ལ་གནས་དང་། ལུས་དང་། སྡུག་བསྔལ་དང་། ཚེ་ཚད་བསྒོམ་པ་བཞི་ལས། གནས་ནི་མུན་པ་མུན་ནག་སྨག་ཏུ་གྱུར་པའི་གནས། ས་གཞི་ཐམས་ཅད་ལྕགས་སྲེག་གི་ས་གཞི་མགལ་གྱི་སོལ་མེ་ལས་བྱུང་བ་ལྟ་བུ་ཐ་མལ་ས་རྡོག་པ་བཞག་ས་ཙམ་ཡང་མི་མངོན་པ། མེ་རི་སྨུག་ནག་ཁྲུ་གང་བ་འབར་བ། སྟེང་ན་མདག་མ་དང་། རྡོ་བསྲེག་དང་མཚོན་ཆའི་ཆར་བ་འབེབས་པ། དེའི་ལུས་ནི། འཛམ་བུ་གླིང་པའི་མི་བས་བཞི་འགྱུར་གྱིས་ཆེ་བ་ལུས་མདོག་ཁྲག་ཚོས་པའམ། ཡང་ན་བལ་ནག་གི་འདབ་མ་གཡེང་བ་ལྟ་བུའམ་རྒྱལ་པོའི་བུ་བཙས་མ་ཐག་པ་ལྟ་བུའི་པགས་པ་སྲབ་པ། ཤ་ཚག་དམ་པ། ཤིན་ཏུ་དྭངས་པ་མིག་ལྟ་བུ་རེག་བྱ་སྲན་མི་བཟོད་པ། སྐྲ་གྱེན་དུ་གཟེང་བ། མིག་ཟུར་གསུམ་པ། བ་སྤུ་གཟེང་བ་ཡན་ལག་རགས་པ། གསུས་ཁྱིམ་ཆེ་བ་ཁྲོ་བོ་ལྟ་བུ་དམྱལ་བའི་སེམས་ཅན་དེ་འཛམ་བུ་གླིང་པའི་མིས་མཐོང་ན་བརྒྱལ་འགྲོ་ཐུབ་པ་ལྟ་བུ། སྡུག་བསྔལ་ཉིན་མི་དལ་མཚན་མི་ཉལ་བར་ཉིན་དང་མཚན་མེད་པར་མཚོན་གྱིས་གཤོག་པ་དང་། ས་གཞི་དང་རྡོ་བསྲེག་གི་ཆར་བ་སོགས་ཀྱིས་ལུས་མགོ་མཇུག་མེད་པར་བསྲེགས་ཏེ་བདེ་བའི་གོ་སྐབས་ཅུང་ཟད་ཙམ་ཡང་མེད་དེ་སྡུག་བསྔལ། ཚེ་ཚད་ནི་ལོའི་གྲངས་ལས་འདས་པ་བར་གྱི་བསྐལ་བ་ལ་སོགས་པར་མྱོང་དགོས། གྲང་དམྱལ་གྱི་གནས་གངས་རི་ཆབ་རོམ་གྱི་ཁྲོད་ཁ་བ་བུ་ཡུག་སྦྲེབས་པ། ལུས་ཚ་དམྱལ་དང་མཚུངས། སྡུག་བསྔལ་གྲང་བའི་སྡུག་བསྔལ། ཚེ་ཚད་ལོ་དཔག་ཏུ་མེད་པར་མྱོང་དགོས། ད་དེ་ལྟ་བུའི་ཚ་གྲང་གི་དམྱལ་བ་གང་དུ་སྐྱེས་ཀྱང་དམ་པའི་ཆོས་བསྒྲུབ་ཁོམས་སམ་མི་ཁོམས་ཡང་ནས་ཡང་དུ་བསམ་སྟེ་དཔྱད་སྒོམ་དང་། ཡང་དེ་ལྟར་དཔྱད་ནས་སེམས་ཆད་དེ་གར་ཡང་འགྲོ་མི་བཏུབ་ན་འདས་པའི་རྗེས་སུ་མི་འབྲང་། མ་འོངས་པའི་མདུན་མི་བསུ། ད་ལྟའི་འཕྲོ་མི་མཐུད་པར་བཅས་བཅོས་མེད་པར་འཇོག་སྒོམ་བྱེད། ཡང་རྟོག་པ་ཞིག་འཕྲོ་བར་རྩོམ་པ་ན་ཡང་དཔྱད། ཡང་འཕྲོ་མི་འདོད་དུས་བཞག་དཔྱད་འཇོག་རེས་མོས་བྱེད་པ་ཡིན། གཉིས་པ་ཡི་དྭགས་ཀྱི་གནས་ནི། ཟག་མ་དང་རྡོ་གསེག་གིས་གང་བ། སྡོང་དུམ་མེས་ཚིག་པ་མང་པོ་དང་། དུག་ཚེར་རགས་པོ་ཐ་ཐོར་ཡོད་པ༑ ཆུ་སྐམ་པའི་གྲམ་པ་སྐྱ་ཁྲོག་གེ་ཡོད་པ། ན་བལ་སྐམ་པ་མང་པོ་གཡེང་བ། ལུས་ནི་བསྐལ་པའི་རུས་པའམ། ཤྭ་མོང་སྐམ་པའམ། མར་གྱི་སྐོག་གྱོང་བ་ལྟ་བུ། མགོ་བོ་ནི་རྒྱ་རྫ་ཙམ། མགྲིན་པ་རྟ་རྔ་ཙམ། ལྟོ་བ་ཡུལ་ལྗོངས་ཙམ། ཡན་ལག་འཇག་སྐྱ་ཙམ། ཡི་དྭགས་གཅིག་སོང་བའི་སྒྲ་ལ་ཤིང་རྟ་འཁོར་ལོ་ལྔ་བརྒྱ་ཙམ་དྲུད་པའི་སྐྲ་ཙམ་དང་། ལྷུ་ཚིགས་ནས་མེ་སྟག་དམར་ཆལ་ཆལ་བྱེད་པ། སྡུག་བསྔལ་ནི། ཡི་དྭགས་རྣམས་ལ། དབྱར་ནི་ཟླ་བའང་ཚ་ལ། དགུན་ནི་ཉི་མའང་གྲང་བ་ལྗོན་ཤིང་ཐོག་བུ་ཅན་མང་པོ་མཐོང་ཡང་མེད་པར་འགྱུར་བ་དང་། རྒྱ་མཚོ་ཆེན་པོ་རླབས་ཕྲེང་ཤེལ་ཕྲེང་ལྟར་གཡོ་བ་མཐོང་ཡང་མཐོང་བ་ཙམ་གྱིས་སྐམ་ནས་སྔ་མ་བས་ཀྱང་ཉམས་ཐག་ཅིང་སྡུག་བསྔལ་བར་འགྱུར་བ་ཡིན། ཚེ་ཚད་རིང་མཐའ་མི་ལོ་ཁྲི་དང་ཐུང་ཚད་མ་ངེས་སོ། །དེ་ལྟ་བུའི་གནས་སུ་སྐྱེས་ན་དམ་པའི་ཆོས་བསྒྲུབ་ཁོམས་མི་ཁོམས་ལ་དཔྱད་འཇོག་སྤེལ་མར་བསྒོམ། གསུམ་པ་དུད་འགྲོའི་གནས་ནི། ཕལ་ཆེར་གླིང་བར་མུན་པ་མུན་ནག་གི་གནས་རང་གི་ལག་པ་བརྐྱང་བསྐུམ་ཙམ་ཡང་མི་མངོན་པའི་གནས་སུ། ལུས་ནི་ཉ་དང་ཆུ་སྲིན་གྱི་རིགས་རིའི་རྒྱལ་པོ་རི་རབ་ལ་དཀྲིས་ལན་གསུམ་ལ་སོགས་པར་འཁོར་བ། ཆུང་བ་རྡུལ་ཕྲན་དང་ཁབ་རྩེ་ལ་སོགས་པའི་རྣམ་པ། སྡུག་བསྔལ་ནི་སྤྱིར་གླེན་ཅིང་གཏི་མུག་པ་བླང་དོར་ལ་རྨོངས་པ། བྱེ་བྲག་ཏུ་ཆེན་པོ་རྣམས་ཀྱིས་ཆུང་ངུ་རྣམས་གྱུར་མིད་བྱེད། ཆུང་ངུ་རྣམས་ཀྱིས་ཆེན་པོ་རྣམས་ཐལ་མར་འབིགས་ཤིང་གནས་དང་གོས་གཉིས་ཀའི་གོ་བཅད་དེ་ཟ་བའི་སྡུག་བསྔལ་དཔག་ཏུ་མེད། ལྷ་ཚེ་རིང་པོ་གནས་བསམ་གཏན་བཞི་པའི་གྲོང་གི་བྱང་ཤར་མཚམས་ན་སྡོང་དུམ་མེས་ཚིག་པ་ལྟ་བུའི་ནག་ངམ་མེ་བའི་གནས་སུ། ལུས་ནི་སྟོང་རིག་ཏིང་ངེ་འཛིན་གྱི་ལུས། བདེ་སྡུག་དང་། དགེ་སྡིག་གི་འདུ་ཤེས་མེད་པ་དཔེར་ན་གཉིད་འཐུག་པོའི་གནས་སྐབས་ལྟ་བུ་ཡིན། དེ་ཡང་བསམ་གཏན་བཞི་པའི་ཐད་དུ་ཡོད་པར་བཤད་པ་དྲང་དོན་དང་། གང་དུ་འཆི་ས་དེ་དང་ཅིས་མི་མཚུངས་ཞེས་པ་ལྟར་རང་ཉིད་གང་དུ་འཆི་ས་དེ་ཉིད་དུ་འདུ་ཤེས་མེད་པའི་ངང་དུ་གནས་ནས་བསྐལ་པ་ཆེན་པོ་བརྒྱད་ཅུ་རེའི་བར་དུ་གནས་པས་དམ་པའི་ཆོས་ཀྱི་སྣང་བ་དང་བྲལ་ཏེ་ཆོས་བསྒྲུབ་མི་ཁོམས། དེ་ལྟར་དཔྱད་འཇོག་ལེགས་པར་བྱས་ནས་བསྒོམ། གཞན་མིའི་མི་ཁོམས་པ་བཞི་ནི། སྒོམ་ཚུལ་གོང་ལྟར་དཔྱད་འཇོག་སྤེལ་མར་བསྒོམ། དེ་ནི་ཐུན་གྱི་དངོས་གཞིའོ། །ཐུན་གྱི་རྗེས་ནི། དེ་ལྟར་ཐུན་དེའི་ནང་དུ་བསྒོམ་པའི་དགེ་བ་དེས་མཚོན་དུས་གསུམ་གྱི་དགེ་བའི་དངོས་པོ་རྣམས་དང་རྒྱལ་བ་སྲས་བཅས་ཀྱི་ཟག་མེད་ཀྱི་དགེ་བའི་རྩ་བ། སེམས་ཅན་ཐམས་ཅད་ཀྱི་ཟག་བཅས་ཀྱི་དགེ་བའི་རྩ་བ་ཐམས་ཅད་བློས་གཅིག་ཏུ་བསྡུས་ཤིང་བསྡུམས་ཏེ་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ནས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའི་ཆེད་དུ་བསྔོ། བསྔོ་བའི་ཚུལ་ཡང་རྒྱལ་བ་སྲས་དང་བཅས་པས་འཁོར་གསུམ་ཡང་དག་གི་བསྔོ་བའི་སྒོ་ནས་ཇི་ལྟར་བསྔོས་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ་སྙམ་པའི་སྒོ་ནས། འཇམ་དཔལ་དཔའ་བོས་ཇི་ལྟར་སོགས་བརྗོད། དེ་ནས་ཧར་ལངས་མི་བྱེད་པར་ད་ག་རེ་ངས་སྔ་ཐུན་གྱི་མགོར་དམ་བཅས་པ་དེ་འཁྲུལ་པའི་དབང་དུ་ཤོར་རམ་མ་ཤོར་སྙམ་དུ་ཕྱི་ལྟས་བྱེད་ཅིང་། གལ་ཏེ་འཁྲུལ་པའི་དབང་དུ་སྐད་ཅིག་ཀྱང་མ་སོང་བར་ཐུན་ལེགས་པར་ཆོད་ན་དགའ་ཞིང་ང་རྒྱལ་བར་འགྱུར་བས་ང་རྒྱལ་བཅགས་དགོས་ཏེ། ཨོ་ཁྱོད་ལ་ད་ལྟ་ཐུན་ལེགས་པོ་ཞིག་ཆོད་འོང་རྒྱུ་དེ་བསོད་ནམས་འཁྱམས་པོས་ཕྱི་ལྟས་ཟེར་བ་དེ་རེད་ཁྱོད་ལ་ང་རྒྱལ་རྒྱུ་ཅི་ཡོད། ཁྱོད་དེ་འདྲའི་བཟང་པོ་ཞིག་ཨེ་ཡིན་ངས་ཐུན་ཕྱི་མའི་ནང་དུ་བལྟའོ་སྙམ་དུ་ང་རྒྱལ་གཅག་དགོས། ཡང་སེམས་འཁྲུལ་པའི་དབང་དུ་སོང་ནས་དགེ་བ་སྣ་གཅིག་བསམ་མ་ཉན་ན་སེམས་སྡུག་འོང་སྟེ་ཨེ་ངས་ཅི་འོང་ས་མི་འདུག་སྙམ་སྒྱིད་ལུག་པར་འགྱུར་བས། དེ་ལ་སྤྲོ་བ་བ སྲིངས་ཤིང་གཟེངས་བསྟོད་དགོས་ཏེ། ཨོ་ཁྱོད་ད་ལྟ་འཁྲུལ་པའི་དབང་དུ་ཤོར་སོང་བས་མ་ལེགས་ཀྱང་སྡུག་རྒྱུ་ཡང་ཅི་ཡོད། ཁྱོད་ཐོག་མ་མེད་པའི་དུས་ནས་ད་ལྟའི་བར་དུ་འཁྲུལ་ཏེ། ད་ལྟའང་ཐུན་དང་ཐུན་མཚམས་ཕྱེ་ནས་བསྒོམ་དགོས་པ་དེ་ལ་ཐུག་པ་ཡིན་མ་གཏོགས་ཁྱོད་དང་པོ་ནས་མི་འཁྲུལ་བ་ཞིག་ཡིན་ན་ད་སངས་ཅིའི་ཕྱིར་མ་རྒྱས། ད་ལྟ་འཁྲུལ་བའི་དབང་དུ་སོང་རུང་ཐུན་ཕྱི་མ་དེ་ལ་འཁྲུལ་པའི་དབང་དུ་གཏོང་རེ་ཀན་སྙམ་དུ་དམ་བཅའ་བློས་འཁྱུད་ཚད་ཅིག་བྱ། དེ་ནས་དལ་གྱིས་གདན་ལས་ལངས་ཏེ་ཐུན་མཚམས་ཀྱི་བྱ་བ་རྣམས་ལ་འཇུག དེའང་ཐུན་མཚམས་སུ་སྔར་གྱི་དལ་བ་བརྒྱད་པོ་རེ་རེ་ནས་མ་བསམ་ན། དཔེར་ན་མགལ་གྱིས་མེ་ནང་དུ་ལྕགས་བསྲེགས་པ་ཕྱིར་བླངས་པ་དང་མཉམ་དུ་ནག་ཁྲོག་གེ་འགྲོ་བ་བཞིན་ཐུན་ནང་དུ་ཅུང་ཟད་སེམས་འགྱུར་བ་ལྟ་བུ་རེ་ཡོད་པ་དེ་ཐུན་མཚམས་འཇིག་རྟེན་ཚེ་འདིའི་སྣང་ཤས་གང་དགའ་དགའ་ལ་ཐོང་དང་ཐུན་ནང་དུ་དལ་བ་སོགས་བསམ་མ་བསམ་མེད་པར་བློ་དྲེད་པོར་འཆོར་ཉེན་ཡོད། དེས་ཐུན་གྱི་རྗེས་སོང་ནས། འབྱོར་པ་བཅུ་ནི་དེ་ལྟར་དལ་བ་ཙམ་ཐོབ་པས་མི་ཕན་པར་དམ་པའི་ཆོས་བསྒྲུབ་པ་ལ་རང་ངོས་ནས་མཐུན་རྐྱེན་ཚང་དགོས་པ་ལྔ་དང་། གཞན་ངོས་ནས་མཐུན་རྐྱེན་ཚང་དགོས་པ་ལྔ་སྟེ་བཅུ་པོ་དེ་དག་གི་སྔ་མ་གསུམ་གསུམ་ཚང་བ་ལ་དགའ་བ་བསྒོམ་པ་ཙམ་ལས་མེད་ལ༑ ཕྱི་མ་གཉིས་གཉིས་ལེགས་པར་བརྟགས་ཏེ་ཚང་བའི་ཐབས་ལ་འབད་དགོས་པ་ཐུན་དང་ཐུན་མཚམས་ཕྱེ་སྟེ་དཔྱད་འཇོག་སྤེལ་མར་བསྒོམ་པ་འདྲའོ། །འཕྲལ་བྱུང་རྐྱེན་གྱི་མི་ཁོམས་པ་བརྒྱད་པོ་དེ་དཔེར་ན་དལ་འབྱོར་བཅོ་བརྒྱད་པོ་ལུག་བཅོ་བརྒྱད་ཡོད་པ་ལྟ་བུ་ཞིག་ལ་འཕྲལ་བྱུང་རྣམས་སྤྱང་ཁུ་བྱུང་སྟེ་གཅིག་བསད་ན་བཅུ་བདུན་ལས་མེད། གཉིས་བསད་ན་བཅུ་དྲུག་ལས་མེད་པ་ལྟ་བུ་ཡིན་པས་འཕྲལ་བྱུང་རྣམས་དེ་རིང་རང་རྒྱུད་ལ་མེད་ཀྱང་སང་ཉིན་འབྱུང་ཉེ། ཐུན་སྔ་མ་ལ་མེད་ཀྱང་ཕྱི་མ་ལ་འབྱུང་ཉེ། ཐུན་མགོར་མེད་ཀྱང་ཐུན་མཇུག་ཏུ་འབྱུང་ཉེ་བས་རང་རྒྱུད་ལ་ཞིབ་ཏུ་བརྟགས་ནས་རེ་རེ་ནས་གཉེན་པོ་བསྟེན་དགོས། དང་པོ་ནི་ཉོན་མོངས་གང་ཆེ་གཉེན་པོ་འབད་དེ་བསླབ་ཅེས་པས་འདོད་ཆགས་ཀྱི་གཉེན་པོ་མི་སྡུག་པ། ཞེ་སྡང་གི་གཉེན་པོ་བྱམས་པ། གཏི་མུག་གི་གཉེན་པོ་ཁམས་ཀྱི་རབ་དབྱེ་རྣམས་བསྒོམ། བླུན་རྨོངས་ཀྱི་གཉེན་པོ། ཐོས་པས་ཚིག་མི་གོ བསམ་པས་དོན་མི་ཤེས། བསྒོམས་པས་གནས་ལུགས་ཀྱི་རྟོགས་པ་མི་སྐྱེ་བ་སྔོན་གྱི་སྡིག་པ་དང་སྒྲིབ་པ་ཡིན་པས་གཉེན་པོ་སྟོབས་བཞི་ཚང་བའི་བཤགས་པ་དང་། བྱང་ཆུབ་སེམས་དཔའ་ཉེ་བའི་སྲས་བརྒྱད་པོ་རེ་རེ་བཞིན་ཐུགས་བསྐྱེད་དང་ཕྲིན་ལས་ཀྱི་ཁྱད་པར་འཕགས་པ་རེ་རེ་ཡོད་པས་ཤེས་རབ་བསྐྱེད་པའི་ལྷ་འཕགས་པ་འཇམ་དཔལ་དབྱངས་ལ་གསོལ་བ་འདེབས། བདུད་ཀྱིས་ཟིན་པའི་གཉེན་པོ་དགེ་བའི་བཤེས་གཉེན་ཡང་དག་ཡིན་མིན་བརྟག་དགོས། དེ་ཡང་ཕྱིའི་རྫུ་འཕྲུལ་དང་མངོན་ཤེས་ལ་སོགས་པས་མི་བརྟག དེའི་ཐུགས་རྒྱུད་ན་རིན་ཆེན་བྱང་ཆུབ་ཀྱི་སེམས་རིན་པོ་ཆེ་ཡོད་མེད་ཀྱིས་བརྟག་དགོས། ཡོད་ན་འབྲེལ་ཚད་དོན་ལྡན་ཡིན་པས་དགའ་བ་བསྒོམ། མེད་ན་དེ་ལྟ་བུའི་བདུད་ཀྱི་བཤེས་གཉེན་ནམ་བདུད་ཀྱི་གྲོགས་པོ་དེ་དང་ཡང་ན་བཟང་གྱེས་བྱེད། ཡང་ན་ངན་གྱེས་བྱས་ནས་བུད་འགྲོ་དགོས། ལས་ངན་ཐོག་བབས་ཀྱི་གཉེན་པོ་ནི། དང་པོ་དགེ་བའི་གཤེས་གཉེན་མཇལ་བ། བར་དུ་ཐོས་བསམ་བྱེད་པ། ཐ་མ་བསྒོམ་པའི་དུས་རྣམས་སུ་བར་ཆད་ཀྱི་རྐྱེན་བྱུང་བ་ན། ང་ལ་འདི་ལྟ་བུ་འོང་མི་ཐང་བ་ལ་མི་བསམ་པར་རྡོ་རྗེ་གཅོད་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་ནི་མནར་མནར་ཤིན་ཏུ་མནར་བར་འགྱུར་གསུངས་པ་བཞིན་ལས་རྒྱུ་འབྲས་བསླུ་བ་མེད་པ་ལ་ཡིད་ཆེས་བསྐྱེད་ནས་སྔོན་གྱི་ལས་ངན་ལ་འགྱོད་པ་བྱེད་དགོས། ལེ་ལོའི་གཉེན་པོ་ནི། འཆི་བ་མི་རྟག་པ་སྙིང་ནས་དྲན་ཅིང་རྟག་སྦྱོར་དང་གུས་སྦྱོར་གྱི་བརྩོན་འགྲུས་རྩོམ་དགོས། གཞན་འཁོར་བྲན་གཡོག་གི་གཉེན་པོ་ནི། བླ་མ་དང་ཕྱུག་པོའི་བྲན་གཡོག་དབང་མེད་དུ་གྱུར་པ་ལ་ཐབས་ལེགས་པ་ཞིག་བཙལ་ཏེ། དེ་ལས་ཐར་པའི་ཐབས་ལ་འབད་དགོས། འཇིགས་སྐྱོབས་ཀྱི་གཉེན་པོ་ནི། ངེས་འབྱུང་དང་བྱང་ཆུབ་ཀྱི་སེམས་རྣམ་པར་དག་པ་ཞིག་གིས་ཟིན་པ་བྱེད་དགོས། ཆོས་ལྟར་བཅོས་པའི་གཉེན་པོ་འཇིག་རྟེན་ཚེ་འདི་སྒྲུབ་པའི་བསམ་སྦྱོར་གྱི་ཉེས་དམིགས་ཤེས་ནས་སྤང་དགོས། རིས་ཆད་ནི་རང་གི་རྒྱུད་དང་ཐར་པ་དང་ཐམས་ཅད་མཁྱེན་པའི་ལམ་གཉིས་སོ་སོར་བྲལ་བས་རིས་ཆད་དམ་འདི་བརྒྱད་པོ་གང་བྱུང་ན་ཐར་པ་བྱང་ཆུབ་གསུམ་གྱི་མྱུ་གུ་སྔོ་སྐམ་དུ་གྱུར་ནས་ཐར་པའི་རིགས་དང་བྲལ་བས་ན་རིགས་ཆད་ཅེས་བྱ། སྐྱོ་ཤས་ཆུང་བའི་གཉེན་པོ་ནི་སྲིད་པ་ཁམས་གསུམ་འཁོར་བའི་ཉེས་དམིགས་ཤེས་ནས་ངེས་འབྱུང་གི་བློ་བསྐྱེད་པའོ། །དད་མེད་ཀྱི་གཉེན་པོ་ཆོས་དང་བླ་མའི་ཡོན་ཏན་ལ་བསམ་སྟེ་ཕྱིར་མི་ལྡོག་པའི་དད་པ་འཆང་། འདོད་སྲེད་ཀྱི་གཉེན་པོ་མི་རྟག་མཐའ་བཞིའི་བསྡུས་པའི་ཉེས་དམིགས་དྲན་དགོས། ཀུན་སྤྱོད་ངན་པ་ལ་གཉེན་པོ་མེད་དོ། །སྡོམ་ཉམས་ཀྱི་གཉེན་པོ་ནི་ལྟུང་བ་འབྱུང་བའི་རྒྱུ་བཞི་པོ་ཡང་དག་པ་ཤེས་པར་བྱས་ནས། སོ་ཐར་གྱི་རྩ་བ་བཞི་པོའི་གཅིག་ཉམས་ཀྱང་གཞན་གསུམ་པོ་བསྲུང་དགོས། བཞི་ཀ་ཉམས་ན་ཚུལ་བཞིན་བཤགས་པ་བྱེད་དགོས། ཚུལ་ལྡན་ང་རྒྱལ་ཆེ་བ་བས། །ཚུལ་འཆལ་འགྱོད་པ་མང་ན་དགའ། །ཞེས་པས། དང་པོ་ཚུལ་ཁྲིམས་བླངས་ནས་མ་ཉམས་ན་སངས་རྒྱས་ཀྱི་བསྟན་པའི་རྒྱལ་མཚན་བསྒྲེང་། བདུད་ཀྱི་རྒྱལ་མཚན་སྙིལ་བ་པོ་ཡིན། གལ་སྲིད་ཉམས་ནའང་ཆོས་བཞིན་དུ་བཤགས་པ་བྱེད་པ་དེ་བསྟན་པའི་རྒྱལ་མཚན་བསྒྲེང་། བདུད་ཀྱི་རྒྱལ་མཚན་སྙིལ་པ་པོ་ཡིན་པས་ཅི་མི་སྙམ་དུ་མི་བཞག་པར་བཤགས་པ་བྱེད་དགོས། སྙིང་ཐག་པ་ནས་བཤགས་བསྡམས་དང་། ཚུལ་ཁྲིམས་ལྡན་པ་གཞན་ལའང་ཡི་རང་ཕུལ་ན་རང་ཚུལ་ལྡན་དུ་འགྱུར་བ་ཡིན། བྱང་སེམས་ཀྱི་སྨོན་འཇུག་གཉིས་ཉམས་ན་ཐུན་གྱི་དྲུག་ཆ་ལས་མ་འདས་གོང་དུ་བཤགས་ན་རྩ་ལྟུང་དུ་མི་འགྱུར་བས་དྲུག་ཆ་ལས་མ་འདས་པར་བཤགས་དགོས། སྔགས་སྡོམ་ཉམས་ན་བྱང་སེམས་བཞིན་གཉེན་པོས་སླེབ་དགོས། སྔགས་ཀྱི་སྡོམ་པ་ཐམས་ཅད་སྐུ་གསུང་ཐུགས་ཀྱི་དམ་ཚིག་ཏུ་འདུ་བས། སྐུའི་དམ་ཚིག་ཏུ་བླ་མ་དང་མཆེད་ལྕམ་གྱི་སྐུ་མི་བརྙས། གསུང་གི་དམ་ཚིག་ཏུ་བླ་མ་དང་མཆེད་ལྕམ་གྱི་གསུང་མི་བཅག ཡི་དམ་ལྷའི་བཟླས་པ་རབ་ཆུ་བོའི་རྒྱུན་བཞིན་འབྲིང་ཉ་སྟོང་དུས་དྲུག་ཐ་ན་ཟླ་བ་བྱུང་ངོ་ཅོག་གམ། ཡང་ཐ་ར་བ་རྣམས་སམ་ཤིན་ཏུ་ཐ་ནའང་ལོ་སར་གྱི་ཟླ་བའི་དུས་ཆེན་ལ་བཟླས་བརྗོད་མི་ཆགས་པར་འབད། ཐུགས་ཀྱི་དམ་ཚིག་ཏུ་གསང་བ་བཅུ་པོ་བསྲུང་བ་དང་བླ་མ་དང་མཆེད་ལྕམ་གྱི་ཐུགས་མི་དཀྲུག་པར་འདུ་བ་ཡིན། རྙེད་དཀའི་དཔེ་ལ་བསམ་པ་ལ་མན་ངག་གི་ལུགས་ལ་དང་པོ་རྒྱུའི་སྒོ་ནས་རྙེད་པར་དཀའ་བ་བསམ་དགོས། གྲགས་རྒྱལ་གྱིས། དལ་འབྱོར་མི་ལུས་ཐོབ་པ་འདི། །ཕོ་སྒོ་མཐོ་བས་མ་ལགས་ཏེ། །བསོད་ནམས་བསགས་པའི་འབྲས་བུ་ཡིན། །ཞེས་པས་བསྟན་ཏེ། དེ་ལ་སྤྱི་དང་བྱེ་བྲག་གཉིས་ལས། དང་པོ་རང་གི་ད་སྔོན་ལས་དགེ་བ་ཅི་བསགས་ལ་བསམ་པ་དང་ད་ལྟ་ཅི་བསགས་ལ་བསམ་ན་དགེ་བ་ཅུང་ཟད་རེ་བསགས་ཡོད་ནའང་སྡིག་པ་བསམ་གྱིས་མི་ཁྱབ་པ་ཞིག་བསགས་ཡོད་པས་དལ་བ་ཙམ་ཡང་ཐོབ་པ་དཀའ་ན་འབྱོར་བ་ཐོབ་པ་ལྟ་ཅི། བྱེ་བྲག་ཏུ་དལ་བ་ཐོབ་པ་ལ་ཚུལ་ཁྲིམས་རྣམ་པར་དག་པ་བསྲུང་དགོས། འབྱོར་བ་ཐོབ་པ་ལ་སྦྱིན་སོགས་དགེ་བའི་བསགས་རྒྱབ་རབ་ཏུ་མང་པོ་ཞིག་བསགས་དགོས། དེ་ཡང་དལ་འབྱོར་ཐོབ་པའི་ཆེད་དུ་རྐྱེན་སྨོན་ལམ་རྣམ་པར་དག་པས་མཚམས་སྦྱར་དགོས་པས། དང་པོ་དལ་བ་ཐོབ་པའི་རྒྱུ་ཚུལ་ཁྲིམས་ལ་ཕྱི་སོ་སོར་ཐར་པའི་སྡོམ་པ་ལ་སྤོང་བའི་བསླབ་བྱ་ཉིས་བརྒྱ་དང་ལྔ་བཅུ་རྩ་གསུམ། སྒྲུབ་པའི་བསླབ་བྱ་བཞི་བཅུ་བདུན་པོའི་སྤང་བླང་ལ་དང་པོ་རྩ་བ་བཞི་ནས་ཞིབ་ཏུ་བསམ་ན་རང་བཞིན་གྱིས་ངོ་ཚའི་ལེན་འབེན་ཙམ་གྱིས་མོ་ཁ་མ་ཕོག་པ་ཙམ་ལས་སོ་ཐར་གྱི་སྡོམ་པ་ལ་དལ་བ་ཐོབ་པར་ཡིད་བརྟན་རུང་བའི་ཚུལ་ཁྲིམས་དེ་ཡང་དཀའ་མོར་གདའ། རྒྱལ་སྲས་བྱང་ཆུབ་སེམས་དཔའི་ཚུལ་ཁྲིམས་ཟབ་མོ་ལྟ་སྲོལ་གྱི་རྩ་ལྟུང་བཅོ་བརྒྱད་སྨོན་འཇུག་གི་བསླབ་བྱ་གཉིས་དང་ཉི་ཤུ་པོ་དང་ཡན་ལག་གི་ཉེས་བྱས་བརྒྱད་ཅུ་པོ་ལ་བསམ་ན་དེ་བས་དཀའ། རྒྱ་ཆེན་སྤྱོད་པའི་ཕྱོགས་ཀྱི་རྩ་ལྟུང་ཀུན་སློང་བཞི་སྦྱོར་བ་བརྒྱད་ཡན་ལག་གི་ཉེས་བྱས་ཞེ་དྲུག་པོ་ལ་བླང་དོར་བྱས་ནས་དལ་བ་ཐོབ་པའི་རྒྱུ་ཡིད་བརྟན་རུང་བའང་ཤིན་ཏུ་དཀའ། གསང་སྔགས་རྡོ་རྗེ་ཐེག་པའི། ཐོག་མའི་བརྟུལ་ཞུགས་ཉེར་ལྔ། ཐུན་མོང་ཕྱི་ནང་གི་རིགས་ལྔའི་སྡོམ་པ། རྩ་ལྟུང་བཅུ་བཞི། ཡན་ལག་གི་སྦོམ་པོ་བརྒྱད། རྫོགས་པ་ཆེན་པོའི་བསྲུང་དུ་ཡོད་པ་རིམ་གྱིས་པའི་དམ་ཚིག་རྩ་བ་བླ་མའི་སྐུ་གསུང་ཐུགས་ལ་དབྱེ་བ་ཉེར་བདུན། ཡན་ལག་གི་དམ་ཚིག་ཉེར་ལྔ། བསྲུང་དུ་མེད་པ་ཅིག་ཆར་པའི་དམ་ཚིག་མེད་ཕྱལ་གཅིག་པུ་ལྷུན་གྱིས་གྲུབ་པ་བཞི། ཡན་ལག་གི་དམ་ཚིག་ས་མ་ཡ་འབུམ་སྡེ་པོ་རྣམས་ལ་བསམ་ན་དལ་བ་ཐོབ་པའི་རྒྱུ་ཡིད་བརྟན་རུང་བ་ཞིག་ཉིན་མོའི་སྐར་མ་བས་དཀོན། གལ་ཏེ་ཚུལ་ཁྲིམས་རྣམ་པར་དག་པ་དལ་བ་ཐོབ་པའི་རྒྱུ་ཞིག་ཡོད་སྲིད་ནའང་། འབྱོར་བ་ཐོབ་པའི་རྒྱུ་སྦྱིན་སོགས་དགེ་བའི་ཆོས་ཡར་དཀོན་མཆོག་ལ་མཆོད་པ། མར་ངན་སློང་ལ་སྦྱིན་པ་ཅི་ལྟ་བུ་ཞིག་སྦྱིན་ཡོད་དེ་རང་རྒྱུད་ལ་བརྟག་ན་དེ་ཡང་དཀའ་ལ། གལ་ཏེ་ཚུལ་ཁྲིམས་བསྲུངས། སྦྱིན་སོགས་བྱིན་ཡོད་ན་རྐྱེན་སྨོན་ལམ་རྣམ་པར་དག་པས་མཚམས་སྦྱར་ཡོད་མེད་བརྟག དལ་འབྱོར་ཐོབ་པའི་ཆེད་དུ་སྨོན་ལམ་རྣམ་པར་དག་པས་ཆེད་དུ་མཚམས་སྦྱར་མེད་ཀྱང་། རིན་ཆེན་བྱང་ཆུབ་སེམས་ཀྱིས་ཟིན་པའི་ཚུལ་ཁྲིམས་སོགས་དགེ་བ་ཡང་དག་པ་ཞིག་འགྲུབ་ཡོད་ན། དཔེར་ན་སྟོན་ལོ་ཏོག་གི་ཆེད་དུ་ས་བོན་བཏབ་ན་སྡོང་བུ་ལོ་མ་ཤུགས་ལ་འབྱུང་བ་བཞིན་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ལ་དམིགས་པའི་དགེ་བ་ཞིག་བ སྒྲུབས་ཡོད་ན་གནས་སྐབས་སུ་ལྷ་དང་མིའི་ལུས་རྟེན་ཁྱད་པར་ཅན་ཤུགས་ལ་འགྲུབ་པ་ཡིན་ཏེ་གནས་སྐབས་སུ་བྲམ་ཟེའི་རིགས་ཤིང་སཱ་ལ་ལྟ་བུ། ཁྱིམ་བདག་གི་རིགས་ཤིང་སཱ་ལ་ལྟ་བུ། རྒྱལ་རིགས་ཤིང་སཱ་ལ་ལྟ་བུ་ལ་སོགས་པ་མང་པོ་ཐོབ་པ་ཡིན། དེ་ལྟར་ཞིབ་ཏུ་དཔྱད་དེ་བསམ་ལ་དཔྱད་འཇོག་སྤེལ་མར་བསྒོམ་དགོས། དེ་ལྟར་ལེགས་པར་བསམ་ན། སྔ་མ་གང་བྱས་ད་ལྟའི་ལུས་ལ་ལྟོས། །ཞེས་པས། སྔོན་བསགས་བསོད་ནམས་ཀྱི་འབྲས་བུས་ད་ལྟའི་ལུས་རྟེན་ཁྱད་པར་ཅན་འདི་ཐོབ་པ་ཡིན་ལ། ཕྱི་མ་གར་འགྲོ་ད་ལྟའི་ལས་མ་ལྟོས། །ཞེས་པས། ཕྱི་མ་ལ་འབྲོག་པ་ཞོ་འཐུང་ས། རོང་པ་རྒོ་ལི་ཟ་ས་ཞིག་ལ་མི་སྐྱེ་ངེས་པ་རེད་ཅེས་ཨ་བུ་རིན་པོ་ཆེ་ནས་གསུངས། ད་ནི་དེ་ལྟར་དལ་བ་དང་འབྱོར་པ་རྒྱུའི་སྒོ་ནས་རྙེད་པར་དཀའ་བ་རྣམས་ལ་བསམ་སྟེ་དལ་འབྱོར་ལ་སྙིང་པོ་ཞིག་ལེན་དགོས། ད་ལྟའི་གྲོང་ཆོག་པ་རྣམས་གྱིས་བསྐྱེད་རྫོགས་གང་ཡང་མེད་པའི་ཆོ་ག་ཉིན་གང་མ་ཞིག་བཏོན་ཞལ་ཟས་རུལ་བ་སྤུ་མཐོ་གང་སྐྱེས་ཡོད་པ་ཞིག་གི་ནང་དུ་སྨན་རག་གཡའ་ཁུ་མ་ཞིག་བླུགས་ནས་མིག་སྐར་མ་ལོག་བྱས་ཏེ། སྙིང་པོ་མེད་ལས་དངོས་གྲུབ་སྙིང་པོ་བླངས། །ཀཱ་ཡ་སིདྡྷི་ཨོཾ་སོགས་ཟེར་བ་ལ་སྙིང་པོ་ཅི་ཡང་མེད། དེ་བས་དལ་འབྱོར་གྱི་ལུས་མི་གཙང་བའི་རྫས་སུམ་ཅུ་སོ་དྲུག་གི་རང་བཞིན་ཅན་གྱི་ལུས་འདི་ལ་སྙིང་པོ་དམ་པའི་ཆོས་ཀྱི་སྙིང་པོ་ཞིག་ལོན་ན་ཀཱ་ཡ་སིདྡྷི་ཨོཾ་དེ་ཡིན། ཝཱཀྐ་སིདྡྷི་ཨཱཿདེ་ཡིན། ཙིཏྟ་སིདྡྷི་ཧཱུྃ་དེ་ཡིན་པས་ད་རེས་ཀྱི་ལུས་རྟེན་འདིའི་སྟེང་ནས་ཡར་འགྲོ་མར་འགྲོའི་ས་མཚམས་རྟ་ཁ་སྲབ་ཀྱིས་བསྒྱུར་བ་ལྟ་བུའི་མཛོ་བདམས་ཚྭ་བདམས་ཀྱི་དཔེ་ལྟར་སྐྱིད་སྡུག་གང་གི་སྣེ་ནས་འཛིན་ན་ད་ལྟ་རང་ལག་ན་ཡོད་དེ། སྐྱིད་ཀྱི་སྣེ་ནས་འཛིན་བསམ་ནས་དམ་པའི་ཆོས་དགེ་བ་ཞིག་བསྒྲུབ་ན་ཚེ་སྟོད་བས་ཚེ་སྨད་དུ་སྐྱིད། ཚེ་སྨད་བས་བར་དོར་སྐྱིད། བར་དོ་བས་ཡང་སྲིད་སྐྱེ་བ་ཕྱི་མར་སྐྱིད། དེ་ནས་བདེ་ནས་བདེ་བར་འགྲོ་བ་ཡིན་ཏེ། སྤྱོད་འཇུག་ལས། བྱང་ཆུབ་སེམས་ཀྱི་རྟ་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུགས་འགྱུར། །ཞེས་དང་། བསོད་ནམས་ཀྱིས་ནི་ལུས་བདེ་ལ། །ཤེས་རབ་ཀྱིས་ནི་སེམས་བདེ་ན། །གཞན་དོན་འཁོར་བར་གནས་ཀྱང་ནི། །སྙིང་རྗེ་ཅན་དག་ཅི་སྟེ་སྐྱོ། །ཞེས་པས། སྣང་བཅས་བསོད་ནམས་ཀྱི་ཚོགས་ཀྱིས་ལུས་བདེ་སྟེ་རིགས་དང་ཡོན་ཏན་གྱི་འབྱོར་པའི་གོ་འཕང་ཐོབ་པ་དང་། བདག་མེད་རྟོགས་པའི་ཤེས་རབ་ཀྱིས་སེམས་བདེ་སྟེ་ཆོས་ཐམས་ཅད་དོན་དམ་སྤྲོས་བྲལ་དང་ཀུན་རྫོབ་སྒྱུ་མ་ལྟ་བུའི་རང་བཞིན་དུ་མཐོང་བས་འཁོར་བའི་སྡུག་བསྔལ་ཐམས་ཅད་ཀྱི་འཇིགས་པ་དང་བྲལ་བས་བདེ་བར་འགྱུར་བ་ཡིན་ལ། སྡུག་གི་སྣེ་ནས་འཛིན་བསམ་ན་ཡང་རང་གི་ལག་ན་ཡོད་དེ་སྡིག་པ་མི་དགེ་བ་འབའ་ཞིག་བསྒྲུབ་ན་ཚེ་སྟོད་བས་ཚེ་སྨད་སྡུག དེ་བས་བར་དོར་སྡུག དེ་བས་ཡང་སྲིད་སྐྱེ་བ་ཕྱི་མར་སྡུག་ནས་ངན་སོང་ངན་འགྲོ་མུ་མཐའ་མེད་པར་འགྲོ་དགོས་པས་ད་རེས་ཀྱི་ལུས་རྟེན་འདིའི་སྟེང་ནས་སྙིང་པོ་དམ་པའི་ཆོས་ལེན་དགོས། སྙིང་པོ་ལེན་ལུགས་སྐྱེས་བུ་ཆུང་ངུས་ངན་སོང་གསུམ་པོ་སྡུག་བསྔལ་གྱི་རང་བཞིན་དུ་ཤེས་ནས་མངོན་མཐོ་ལྷ་མིའི་གོ་འཕང་སྒྲུབ་པའི་ཆེད་དུ་ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་མི་དགེ་བ་བཅུ་སྤངས། དགེ་བ་བཅུ་སྒྲུབ། སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་ཡར་དཀོན་མཆོག་ལ་མཆོད་པ། མར་ངན་སློང་ལ་སྦྱིན་པ་བྱེད། མི་གཡོ་བ་ལས་བྱུང་བའི་བསོད་ནམས་བྱ་བའི་དངོས་པོ་བསམ་གཏན་བཞི་དང་གཟུགས་མེད་བཞིའི་ཏིང་ངེ་འཛིན་བསྒོམས་ཏེ་སྐྱེས་བུ་ཆུང་ངུའི་ལུགས་ཀྱི་སྙིང་པོ་ལོན་ཀྱང་། དེ་ནི་ལམ་གྱི་རྟེན་ཙམ་ལས་ལམ་རང་གི་ངོ་བོ་མིན་པས། འབྲིང་དང་ཆེན་པོ་གཉིས་ཀའི་སྙིང་པོ་ལོན་པ་མ་ཡིན། སྐྱེས་བུ་འབྲིང་གི་ལམ་བདེན་གྱི་གཙོ་བོ་བདག་མེད་རྟོགས་པའི་ཤེས་རབ་ཀྱི་བསླབ་པ་དང་འཁོར་ཚུལ་ཁྲིམས་དང་ཏིང་ངེ་འཛིན་གྱི་བསླབ་པ་སྟེ་བསླབ་པ་རིན་པོ་ཆེ་རྣམ་པ་གསུམ་ལ་བསླབས་ཏེ་སྐྱེས་བུ་འབྲིང་གི་ལུགས་ཀྱི་སྙིང་པོ་ལོན་ཀྱང་། ཆེན་པོའི་སྙིང་པོ་ལོན་པ་མིན། དེས་ན་སྐྱེས་བུ་ཆེན་པོའི་ལུགས་ཀྱིས། རིང་ལམ་མཚན་ཉིད་ཐེག་པ། ཉེ་ལམ་རྡོ་རྗེ་ཐེག་པ། དེ་ལའང་ནང་གསེས་ཕྱི་རྒྱུད་ཀྲྀ་ཡོག་སྡེ་གསུམ་རིང་ལམ། ནང་རྒྱུད་ཀྱི་མ་ཧཱ་ཨ་ནུ་གཉིས་ཉེ་ལམ། མྱུར་ལམ་འོད་གསལ་རྫོགས་པ་ཆེན་པོ་རྣམས་གང་རུང་གིས་དལ་འབྱོར་ལ་སྙིང་པོ་ལེན་དགོས་བསམ། ཁྱད་པར་འོད་གསལ་རྫོགས་པ་ཆེན་པོའི་ལམ་ནས་ལོ་དང་ཟླ་བས་འཇའ་ལུས་འཕོ་བ་ཆེན་པོའི་གོ་འཕང་ཐོབ་པས་དེའི་ལམ་ནས་སྙིང་པོ་ཞིག་ལེན་དགོས་སྙམ་དུ་དཔྱད་འཇོག་སྤེལ་མའི་སྒོ་ནས་ཡང་ནས་ཡང་དུ་ཐུན་དང་ཐུན་མཚམས་ཕྱེས་ཏེ་བསྒོམ་དགོས། རུས་སྦལ་གྱི་དཔེའི་སྐབས། རྒྱ་མཚོའི་དཔེ་ལ་ངན་སོང་གསུམ་པོ་གཏིང་ཟབ་པ་རྒྱ་ཆེ་བ་སྡུག་བསྔལ་མཐའ་མི་མངོན་པ་དང་། རུས་སྦལ་ལོང་བ་ལྟ་བུའི་ངན་སོང་གི་འགྲོ་བ་བླང་དོར་གྱི་མིག་དང་བྲལ་བ། ལོ་བརྒྱ་རེ་ལས་སྟེང་དུ་མི་འབུད་པ་ལྟ་བུ་དེ་ལས་ཐར་དཀའ་བ། གཉའ་ཤིང་བུ་ག་གཅིག་པ་ལྟ་བུའི་ལྷ་མིའི་ལུས་རྟེན་རྒྱ་ཆུང་ཞིང་ཉུང་བ། རླུང་གིས་དེད་པ་ལྟ་བུའི་དགེ་བའི་རྐྱེན་གྱིས་གཞན་དབང་ཅན་ཡིན་པའི་དོན་དཔེས་མཚོན་ཏེ་དཔྱད་འཇོག་སྤེལ་མར་བསྒོམ།

གཉིས་པ་ཚེ་མི་རྟག་པ།

ད་སྙིང་པོ་ཞིག་ལེན་པར་བྱེད་པ་ལ་དལ་མོས་མི་ལོན་པར་མི་རྟག་འཆི་བའི་དབང་དུ་འགྲོ་བས་དེ་ལ་བདུན། དང་པོ་ཕྱི་སྣོད་ཀྱི་འཇིག་རྟེན་འདི་ཆགས་པ་ལ། སྣོད་ཀྱི་འཇིག་རྟེན་མས་ནས་ཡར་ཆགས། བཅུད་ཀྱི་སེམས་ཅན་ཡས་ནས་མར་ཆགས་པ་ཡིན་པས་དེ་བསམ་པ་ཐུན་དང་ཐུན་མཚམས་ཕྱེ་སྟེ་བསྒོམ་པ་དལ་འབྱོར་རྙེད་དཀའ་ལྟར་ཡིན་ལ། ཐུན་གྱི་དངོས་གཞི་ལ། དང་པོ་འཇིག་རྟེན་འདིའི་སྔོན་དུ་བསྐལ་བ་གཅིག་ཞིག་ནས་ནམ་མཁའ་སྟོང་པ་གཅིག་ཏུ་གྱུར་པའི་བར་བསྐལ་ཉི་ཤུ་རྫོགས་ནས་ད་ལྟའི་འཇིག་རྟེན་འདི་ཆགས་པའི་མགོ་རྩོམ་པ་ལ། བསྐལ་བ་འདིའི་སེམས་ཅན་རྣམས་ཀྱིས་སྤྱི་མཐུན་གྱི་བསོད་ནམས་ཀྱིས་འོག་གཞི་ཡིད་མཁའ་རྣམ་དག་གི་ནམ་མཁའ་ཆོས་འབྱུང་གི་དབྱིབས་ཅན་ཁ་དོག་མཐིང་ཀ་མཐིང་གསལ་གྱི་མུ་ཁྱུད་ཅན་ཞིག་ཆགས། དེའི་སྟེང་དུ་རླུང་གི་དཀྱིལ་འཁོར་ཤར་རླུང་ནུབ་ལ་འཐབ། ནུབ་རླུང་ཤར་དུ་འཐབ། ལྷོ་རླུང་བྱང་དུ་འཐབ། བྱང་རླུང་ལྷོ་རུ་འཐབ་པ་རྒྱ་གྲམ་གྱི་རྣམ་པ་ཞེས་ཁ་དོག་ལྗང་ནག་གི་མུ་ཁྱུད་ཅན། དེའི་སྟེང་དུ་སྤྲིན་གསེར་གྱི་སྙིང་པོ་ཅན་ལས་ཆར་བབས་པས་ཆུའི་དཀྱིལ་འཁོར་དཀར་གསལ་ཟླུམ་པོ་ཁ་དོག་དཀར་གསལ་གྱི་མུ་ཁྱུད་ཅན། དེའི་སྟེང་དུ་ཁམས་རབ་འབྱེད་པའི་རླུང་གིས་རི་རབ། འབྲིང་འབྱེད་པའི་རླུང་གིས་གསེར་རི། ཐ་མ་འབྱེད་པའི་རླུང་གིས་གླིང་བཞི་རྡོ་སོལ་ཅན་གྱི་ལྕགས་རི་དང་བཅས་པ་ཆགས། བཅུད་ཀྱི་སེམས་ཅན་རྣམས་ཡས་ནས་མར་ཆགས་ཏེ་སྲིད་རྩེ་ནས་བཟུང་སྟེ་དམྱལ་བའི་བར་དུ་རྟོག་པ་ཇེ་རགས་ཇེ་རགས་སུ་སོང་སྟེ་རིམ་གྱིས་དམྱལ་བའི་སེམས་ཅན་གཅིག་དང་པོ་སྐྱེ་བའི་བར་དུ་བར་བསྐལ་ཉི་ཤུ། དེ་ནས་གནས་པའི་མགོ་བརྩམས་ཏེ་སྐྱེ་རྒུ་རྣམས་ཀྱི་ཚེ་ལོ་དཔག་མེད་ཐུབ་པ་ནས་བཅུ་པའི་བར་དུ་འགྲིབ་པ་ཡ་ཐོག་རིང་མོ། དེ་ནས་འཕེལ་ཏེ་ཚེ་ལོ་བརྒྱད་ཁྲིར་འཕེལ། ཡང་འགྲིབ་སྟེ་བཅུ་པའི་བར་དུ་ཁུག་པ་གཅིག དེ་ལྟར་འཕེལ་འགྲིབ་བཅོ་བརྒྱད་རྫོགས་དེ་ནས་ཡར་འཕེལ་ཚེ་ལོ་དཔག་མེད་དུ་འཕེལ། དེ་ནས་གཅིག་འགྲིབ་པ་དང་མོས་པ་བྱོན་ནས་བརྒྱད་ཁྲིར་ཐུག་པ། མ་ཐོག་ཐུང་ངུ་སྟེ་བར་བསྐལ་ཉི་ཤུ། བརྒྱད་ཁྲི་ནས་འཇིག་པའི་མགོ་བརྩམས་ཏེ་ཞིང་འདིའི་དམྱལ་བ་ལ་སེམས་ཅན་གསར་སྐྱེ་གཅིག་མི་སྐྱེ་བར་ཞིང་གཞན་དང་གཞན་གྱིས་དམྱལ་བར་སྐྱེ། སྐྱེས་ཟིན་རྣམས་རིམ་གྱིས་ལས་སྲབ་པ་གནས་གོང་མ་གོང་མར་སྐྱེ། རྡོ་རྗེའི་གདན་དུ་མཚམས་མེད་པའི་ལས་བྱས་པ་དམ་པའི་ཆོས་སྤངས་པ། སྔགས་ཀྱི་རྡོ་རྗེ་སློབ་དཔོན་དང་དམ་ཚིག་ཉམས་པ་འགའ་ཞིག་ལས་དམྱལ་བ་རྣམས་སྟོང་། དེ་ནས་རིམ་གྱིས་ཡི་དྭགས་དང་དུད་འགྲོ་རྣམས་དེ་བཞིན་དུ་སྟོང་། དེ་ནས་མི་རྣམས་ཀྱི་ནང་ནས་གཅིག་གིས་དབེན་པ་ལ་སོང་ནས་བསམ་གཏན་གཉིས་པའི་སེམས་རྙེད་ནས་ཀྱེ་མ་དབེན་པ་ལས་བྱུང་བའི་དགའ་བ་དང་བདེ་བ་ནི་འདིའོ་ཞེས་བསྒྲགས་པས་མི་ཐམས་ཅད་ཀྱིས་གོ་ནས་བསྒོམས་པས་བསམ་གཏན་གཉིས་པའི་སེམས་ཐོབ་ནས་རིམ་གྱིས་འཕོས་ཏེ་བསམ་གཏན་གཉིས་པ་འོད་གསལ་གྱིས་གནས་སུ་སྐྱེས། དེ་ནས་རྒྱལ་ཆེན་རིགས་བཞི་དང་སུམ་ཅུ་རྩ་གསུམ་པ་དང་ནམ་མཁའ་ལ་བརྟེན་པའི་གནས་བཞི་པོ་རིམ་བཞིན་མི་ལྟར་བསམ་གཏན་གཉིས་པའི་སེམས་ཐོབ་སྟེ་ཐམས་ཅད་བསམ་གཏན་གཉིས་པར་སྐྱེས། བསམ་གཏན་དང་པོ་པ་རྣམས་བསམ་གཏན་གཉིས་པར་འཕོས་ནས་བསམ་གཏན་གཉིས་པ་མན་ཆད་དང་དམྱལ་བའི་མཐིལ་གཉིས་ཀྱི་བར་དུ་སེམས་ཅན་སྣ་ནས་རླུང་རྒྱུ་བ་གཅིག་ཀྱང་མེད་པས་ཆར་མི་འབབ་རྩི་ཤིང་ནགས་ཚལ་ཐམས་ཅད་བསྐམས་ཏེ། ཉི་མ་བདུན་རིམ་གྱིས་ཤར་ནས་རི་རབ་གླིང་བཞི་ལྷ་གནས་དང་བཅས་པ་མེས་ཚིག་ཅིང་མེ་ལྕེ་ཆེན་པོ་གཅིག་ཏུ་གྱུར་པས་རླུང་གིས་ཐུར་དུ་དེད་ནས་ངན་སོང་གི་གནས་སྟོང་པ་རྣམས་བསྲེགས་ནས་དམྱལ་བའི་མེ་དང་འཕྲད་པ་ན་དང་པོ་དམྱལ་བའི་མེས་དུས་མཐའི་མེ་གྱེན་དུ་བསྲེགས་པ་དང་། ལས་སྟོབས་ཤུགས་བཙན་པས་དུས་མཐའི་མེས་དམྱལ་བའི་མེ་ཐུར་དུ་བསྲེགས་ནས་དམྱལ་གནས་གོང་མ་རྣམས་བསྲེགས། མནར་མེད་བསྲེགས་པ་དང་ལྷན་ཅིག་དེའི་སེམས་ཅན་རྣམས་མིག་འབྱེད་འཛུམ་ཙམ་གྱི་ཡུན་ལ་ཞིང་གཞན་གྱི་མནར་མེད་དུ་སྐྱེས། དེ་ནས་མེ་ལྕེ་གྱེན་དུ་ལོག་པས་ལྷ་གནས་གོང་མའི་གནས་སྟོང་པ་རྣམས་བསྲེགས་ཏེ་བསམ་གཏན་གཉིས་པ་མན་ཆད་སྟོང་སྟེ་ཐལ་བའི་ཕུང་པོ་གཅིག་ཏུ་གྱུར་པ་ལ་བསམ་གཏན་གཉིས་པ་རྣམས་བསམ་གཏན་གསུམ་པར་འཕོས་པས་བསམ་གཏན་གཉིས་པའི་གནས་ནས་སྤྲིན་ཆུའི་སྙིང་པོ་ཅན་ཆགས་ཏེ་ཆར་གྱི་རྒྱུན་གཉའ་ཤིང་ཙམ་དང་གཤོལ་མདའ་ཙམ་པ་མང་པོ་བབ་པས་སྔར་གྱི་ཐལ་ཕུང་དེ་ཆུས་བཤིགས་ནས་སྐྱོ་མར་གྱུར་པ་ལ། བསམ་གཏན་གསུམ་པ་རྣམས་བཞི་པའི་སེམས་ཐོབ་ནས་འཕོས་པ་ལ། འོག་གཞི་རླུང་རྒྱ་གྲམ་འུ་རུ་རུ་གྱེན་དུ་འཕགས་ནས་བསམ་གཏན་གསུམ་པ་མན་ཆད་ཐལ་བ་རླུང་གིས་གཏོར་བ་ལྟ་བུར་གྱུར་ནས་ནམ་མཁའ་སྟོང་པ་གཅིག་ཏུ་གྱུར་པའི་བར་དུ་བར་བསྐལ་ཉི་ཤུ། དེ་ནས་ནམ་མཁའ་སྟོང་པ་གཅིག་ཏུ་གྱུར་པའི་སྐབས་བར་བསྐལ་ཉི་ཤུ་སྟེ་བསྐལ་བ་ཆགས་གནས་འཇིག་སྟོང་བཞི་པོའི་ཡུན་ལ་བར་བསྐལ་བརྒྱད་ཅུ་ཐམ་པ་ལ་བསྐལ་བ་ཆེན་པོ་གཅིག་ཅེས་བཏགས་པ་ཡིན་ལ་འདི་ནི་བསྒོམ་ཚུལ་ཡིན་ལ་བཤད་ཚུལ་གཞན་ཡོད་དོ། །དེ་ལྟར་ཕྱི་སྣོད་བཅུད་མི་རྟག་པ་ལྟར། ནང་རང་གི་ལུས་འདི་ཡི་ལུས་ནི་སྣོད། རྣམ་ཤེས་ནི་བཅུད་ཀྱི་སེམས་ཅན་ལྟ་བུ་ཡིན། དང་པོ་མའི་མངལ་དུ་ཆགས་ནས་བཙའ་བའི་བར་ཆགས་པ། བྱིས་པ་ནས་ན་བའི་བར་གནས་པ། འཆི་ནད་ཀྱིས་བཏབ་ནས་འཆི་བའི་བར་འཇིག་པ། དཀར་ལམ་ཆུ་འཇིག དམར་ལམ་མེ་འཇིག ནག་ལམ་རླུང་འཇིག བརྒྱལ་བ་སྟོང་པའི་སྐབས་ཡིན་པས་ཕྱི་ནང་སྣོད་བཅུད་ཐམས་ཅད་མི་རྟག་པའི་ཚུལ་ཐུན་དང་ཐུན་མཚམས་ཕྱེ་སྟེ་དཔྱད་འཇོག་སྤེལ་མར་བསྒོམ་ནས་འཆི་ཁ་ཕན་བྱེད་དགེ་བ། གནོད་བྱེད་སྡིག་པ་ལས་མེད་པའི་ཚུལ་བསམ་ལ་གནོད་བྱེད་སྡིག་པ་ཡོད་ན། རྗེ་བཙུན་མི་ལས་སྡིག་པ་ལ་ཡོན་ཏན་མེད་ཀྱང་། བཤགས་པས་འདག་པ་སྡིག་པའི་ཡོན་ཏན་ཡིན་གསུངས་པ་བཞིན་སྡིག་པ་ལ་བཤགས་པ་བྱེད། དགེ་བ་མེད་ན་ད་ལྟ་ཅི་འགྲུབ་བྱེད་དགོས་པས་ད་ལྟ་ནས་རང་རྒྱུད་ལ་དགེ་སྡིག་གི་གོ་རྩིས་ལེན་དགོས་མ་གཏོགས། འཆི་ཁར་དགེ་སྡིག་ལ་གོ་རྩིས་བླངས་པས་དགེ་བ་མེད་སྡིག་པ་ཡོད་ན། ཨ་ཕ་ཕོ་ཕོ་མ་སྐྱེས་འདུན་མ་མ་ལེགས་སྙམ་ནས། མིག་མཆི་མས་གང་། བྲང་སེན་རྗེས་ཀྱིས་བཀང་། སེམས་སྡུག་ཡུས་ཀྱིས་བཀང་ནས་ཕྱི་མའི་ལམ་པོ་ཆེར་འགྲོ་དགོས་པས་ད་ནི་འཆི་ཁར་ཕན་པའི་ཆོས་རྣམ་དག་ཞིག་མི་བྱེད་རེ་ཤི་སྙམ་དུ་ཡང་ནས་ཡང་དུ་བསམ་དགོས། ནམ་འཆི་ངེས་མེད་ཀྱི་སྐབས་ངེས་པར་འཆི་བ་དང་། ནམ་འཆི་ངེས་པ་མེད་པ་དང་། འཆི་བའི་དུས་གང་གིས་ཀྱང་མི་ཕན་པ་དང་གསུམ་པོ་དེ་ཐུན་དང་ཐུན་མཚམས་ཕྱེ་ནས་བསྒོམ་དགོས། དེ་ལ་དང་པོ་ངེས་པར་འཆི་བ་ནི་སྐྱེ་བ་ཡོད་ན་འཆི་བའི་ཆོས་ཉིད་དུ་གྲུབ་པས་ཉི་མ་ནུབ་རིར་ཕྱོགས་པའམ་གསོད་སར་ཁྲིད་པའི་དུད་འགྲོ་བཞིན་སྐད་ཅིག་རེ་རེ་སོང་། ཡུད་ཙམ་རེ་རེ་སོང་བ་བཞིན་ཚེ་འཛད་དེ་ད་ལྟའི་ལོ་བརྒྱད་ཅུ་ལོན་པ་ཞིག་དང་མདངས་སུམ་སྐྱེ་བའི་བྱིས་པ་ཞག་གཅིག་ལོན་པ་གཉིས་ད་སྟེ་ལོ་བརྒྱ་ལོན་པ་དང་གཉིས་ཀ་མེད་ལུགས་འདྲ་བས་ངེས་པར་འཆི་བ་འདི་གོ་སླ་ལ། ནམ་འཆི་ངེས་པ་མེད་པ་འདི་རྒྱུད་ལ་མ་སྐྱེས་པའི་ལན་པས། ནམ་འཆི་ངེས་པ་མེད་པ་ནི། ང་ལོ་ཉུང་སྙམ་ནས་མི་འཆི་བའི་གདེང་མེད། ཟས་དང་གོས་ལ་སོགས་པའི་མཐུན་རྐྱེན་འཛོམས་སྙམ་ནས་མི་འཆི་བའི་གདེང་མེད། ནད་མེད་སྙམ་ནས་མི་འཆི་བའི་གདེང་མེད། མི་འཆི་སྙམ་པའི་གདེང་ཞིག་ཡོད་དགོས་ན། ཡང་ན་སྟོན་པ་ཐམས་ཅད་མཁྱེན་པས་ཁྱོད་འདི་ཙམ་དུ་མི་འཆི་ཞེས་ལུང་བསྟན་པའམ། ཡང་ན་རང་ལ་ཟག་མེད་ཀྱིས་མངོན་པར་ཤེས་པ་ཞིག་ཡོད་ནས་འདི་ཙམ་དུ་མི་འཆི་སྙམ་པའི་མཁྱེན་པ་ཡོད་པའམ། ཡང་ན་གཤིན་རྗེ་ཆོས་རྒྱལ་དང་འཕྲད་ནས་ཁྱོད་འདི་ཙམ་དུ་ཁོ་བོས་མི་ཁྲིད་ཅེས་ཤག་པོ་བཟང་པོ་ཞིག་བསྒྲིགས་ཡོད་དགོས་མ་གཏོགས། ད་ལྟའི་ཚེ་འདིའི་འཕེན་པ་ནི། དཔེར་ན་མདའམ། མར་མེ་ལྟར་སྐྱེས་བུའི་མཐེབ་ཤུགས་དང་སྣུམ་ཟད་པ་བཞིན་དེ་རིང་ཙམ་ལ་ཟད་ཨེ་ཡོད་སང་ཉིན་ཙམ་ལ་ཟད་ཨེ་ཡོད་ཟླ་བ་འདིའི་མར་ངོའམ། ཟླ་བ་ཕྱི་མའམ་ལོ་ཕྱི་མ་ལ་ཟད་ཨེ་ཡོད་མི་ཤེས་པས། ནམ་འཆི་ངེས་པ་མེད་པ་ཡིན། ཚེ་ཟད་ནས་འཆི་བ་ལ། སངས་རྒྱས་སྨན་ལྷས་སྨན་སྦྱིན་རྒྱུ། ཚེ་དཔག་མེད་ཀྱིས་ཚེ་དབང་བསྐུར་རྒྱུ། ཕྱག་ན་རྡོ་རྗེས་བསྲུང་བ་བྱེད་རྒྱུ་མེད་པར་འཆི་བ་ཡིན། གློ་བུར་གྱི་འཆི་བ་ལ་བཟློག་རྒྱུ་ཡོད་ཀྱང་དཔེར་ན་མར་མེ་སྣུམ་མ་ཟད་གོང་ནས་རླུང་གིས་བསད་པ་བཞིན་གློ་བུར་གྱི་རྐྱེན་ནད་རིགས་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། ཡེ་འདྲོག་སུམ་བརྒྱ་དྲུག་ཅུ་ལ་སོགས་པས་གློ་བུར་གློ་བུར་དུ་འཆི་བ་འབྱུང་བས་འཛམ་བུ་གླིང་པའི་ཚེ་ལ་ངེས་པ་མེད་པས། གནས་གང་དུ་སོང་ཡང་འཆི། གྲོགས་སུ་དང་འགྲོགས་ཀྱང་འཆི། ཡུལ་གང་དུ་བསྡད་ཀྱང་འཆི། འབྱོར་བ་ལོངས་སྤྱོད་དང་ལྡན་ཀྱང་འཆི། མི་ལྡན་ཀྱང་འཆི། དེས་ན་ཚེའི་འཕེན་པ་དེ། དེ་རིང་ཙམ་དུ་ཟད་ཨེ་ཡོད་མི་ཤེས་པས་ནམ་འཆི་ངེས་པ་མེད། ཚེའི་འཕེན་པ་ཟད་མེད་ཀྱང་གློ་བུར་གྱི་རྐྱེན་གྱིས་ནམ་འཆི་ངེས་པ་མེད་པ་སྙིང་ནས་ཡང་ནས་ཡང་དུ་དཔྱད། འཆི་བའི་དུས་གང་གིས་མི་བསྟོངས་པ་ནི༑ འཆི་བའི་དུས་སུ་དམ་པའི་ཆོས་མ་གཏོགས་པའི་ཟས་གོས་གནས་མལ་ལོངས་སྤྱོད་ཕ་མ་གཉེན་བཤེས། གྲོགས་དགའ་མཛའ་སུས་ཀྱང་མི་ཕན། གྲྭ་སྟོང་ཕྲག་མང་པོའི་བླ་མ་ཡིན་ཀྱང་གྲྭ་པ་གཅིག་ཁྲིད་ས་མེད། སྡེ་འབུམ་ཕྲག་མང་པོའི་མགོ་དཔོན་ཡིན་ཀྱང་གཡོག་པོ་གཅིག་ཁྲིད་དབང་མེད། འཛམ་བུ་གླིང་གི་ལོངས་སྤྱོད་ལ་དབང་ཡང་ཁབ་སྐུད་པ་གཅིག་འཁྱེར་དབང་མེད། ཐ་ན་གཅེས་པར་བསྐྱངས་པའི་ལུས་ཀྱང་ཤུལ་དུ་བཞག་ནས་འགྲོ་དགོས་པས། མལ་གྱི་ཐ་མ་ན་ཉལ། ཟས་ཀྱི་ཐ་མ་ལ་སྤྱོད། གོས་ཀྱི་ཐ་མ་ནི་གྱོན། གཏམ་གྱི་གཞུག་མ་ནི་གླེང་། གཉེན་བཤེས་ཀྱི་ཐ་མས་ནི་བསྐོར་ཞིང་འཆི་བའི་དུས་ལ་བབ་པའི་ཚེ་ཐམས་ཅད་ཀྱིས་བཤོལ་ནི་མི་ཐེབ། སྡོད་དབང་ནི་མེད། གཉེན་བཤེས་ལོངས་སྤྱོད་ཐམས་ཅད་བློས་ནི་མི་ཐོང་། རྗེས་སུ་ནི་མི་འབྲང་བར་གཅེར་བུ་ལག་སྟོང་མཆན་དུ་བཅུག་ནས་ཕྱི་མའི་ལམ་པོ་ཆེར་འགྲོ་བའི་དུས་སུ་ཕ་མ་གཉེན་བཤེས་ལ་སོགས་པའི་དོན་དུ་བསགས་པའི་སྡིག་པ་ཐམས་ཅད་སུ་ལའང་བགོ་བཤའ་བྱེད་དུ་མེད་པར་རང་གིས་ཁུར་དུ་བླང་ནས་འགྲོ་བ་མ་གཏོགས་མེད་པས། དེའི་དུས་སུ་གནོད་བྱེད་སྡིག་པ་མ་ཡིན་པར་འཛམ་བུ་གླིང་པ་དགྲར་གྱུར་ཀྱང་མདའ་སྐྱ་ཤར་གཅིག་རྗེས་སུ་འཕེན་པ་མེད། དམ་པའི་ཆོས་མ་གཏོགས་འཛམ་བུ་གླིང་གི་ནོར་ལ་དབང་ཡང་ཁབ་སྐུད་པ་ཙམ་ཡང་ཁྱེར་དབང་མེད་ན་དམ་པའི་ཆོས་ནི་མགོན་དང་སྐྱབས་དང་། གླིང་དང་། དཔུང་གཉེན་དང་། སྣང་བ་དང་། སྒྲོན་མེ་ཡིན་པས་ད་ལྟ་ཉིད་ནས་འཆི་ཁར་ཕན་པའི་ཆོས་ཞིག་བ སྒྲུབ་དགོས། དེ་ལ་སྐྱེས་བུ་ཆུང་ངུས་ངན་སོང་གསུམ་པོ་སྡུག་བསྔལ་དུ་ཤེས་ཤིང་། མངོན་མཐོ་ལྷ་མིའི་གོ་འཕང་དོན་དུ་གཉེར་བའི་བསམ་པས་བསོད་ནམས་བྱ་བའི་དངོས་པོ་གསུམ་བསྒྲུབས་ཏེ་སྐྱེས་བུ་ཆུང་ངུ་རང་གི་ལུགས་ཀྱིས་འཆི་ཆོས་འགྲུབ་པ་ཡིན་ཀྱང་། འབྲིང་དང་ཆེན་པོ་གཉིས་ཀའི་ལུགས་ཀྱིས་འཆི་ཆོས་འགྲུབ་པ་མིན་ལ། སྐྱེས་བུ་འབྲིང་གིས་སྲིད་པ་ཁམས་གསུམ་འཁོར་བ་སྡུག་བསྔལ་དུ་ཤེས་ནས་རང་ཉིད་གཅིག་པུ་ཐར་འདོད་ཀྱི་ངེས་འབྱུང་གི་བསམ་པས་ཀུན་ནས་བསླངས་ཏེ་ཐར་པ་འཐོབ་འདོད་ཀྱི་བསམ་པས་ལམ་ལྷག་པའི་བསླབ་པ་རིན་པོ་ཆེ་རྣམ་པ་གསུམ་ཉམས་སུ་བླངས་ཏེ་སྐྱེས་བུ་འབྲིང་གི་འཆི་ཆོས་འགྲུབ་ཀྱང་ཆེན་པོའི་འཆི་ཆོས་འགྲུབ་པ་མིན། སྐྱེས་བུ་ཆེན་པོས་གཞན་ཕན་བྱང་ཆུབ་སེམས་ཀྱིས་ཀུན་ནས་བསླངས་ཏེ། རིང་ལམ་མཚན་ཉིད་ཐེག་པའམ། ཉེ་ལམ་རྡོ་རྗེ་ཐེག་པ། མྱུར་ལམ་འོད་གསལ་རྫོགས་པ་ཆེན་པོ་གསུམ་གང་རུང་གི་ལམ་ནས་འཆི་ཆོས་ཞིག་བསྒྲུབ་ན་སྐྱེས་བུ་ཆེན་པོ་རང་ལམ་གྱི་འཆི་ཆོས་རྣམ་པར་དག་པ་འགྲུབ་པ་ཡིན་ལ། དེ་ལས་ཁྱད་པར་འོད་གསལ་རྫོགས་པ་ཆེན་པོའི་ལམ་ནས་འཆི་ཆོས་རྣམ་པར་དག་པ་ཞིག་བསྒྲུབ་ན། སྐྱེ་འཆིའི་བར་ལག་གྱེས། འཆི་མེད་གཉུག་མའི་བཙན་ས་ཟིན་པ་ཞིག་མི་བྱེད་རེ་ཤི་སྙམ་པ་དང་། དེ་ལྟ་བུའི་དམ་བཅའ་དེ་གཏོང་རེ་སྙམ་པའི་དམ་བཅའི་ལྕགས་ཀྱུ་གཉིས་པ་རེས་ཟིན་པར་བྱེད་པ་ཡིན་ལ། དེ་ལྟར་ཐུན་དང་ཐུན་མཚམས་ཕྱེས་ཏེ་ཐུན་གྱི་དངོས་གཞི་ལ་དཔྱད་འཇོག་སྤེལ་མར་བསྒོམ་པ་ཡིན། རྩ་བའི་འདུན་པ་ནི་ལམ་རྗེས་ཐོབ་ཀྱིས་གནས་སྐབས་སུ་བསྒོམ་པ་ཡིན། ད་ནི་དེ་ལྟར་འཆི་བ་མི་རྟག་པ་འོང་ཡང་མེ་ཤི་བའམ་ཆུ་སྐམ་པ་ཙམ་ལས་མེད་ན་དེར་ཟད་ཀྱང་། ཤི་ནས་མེད་དུ་མི་འགྲོ་ཞིང་སྐྱེ་བ་ལེན་དགོས་ཞེས་པས། ཤི་ནས་འཁོར་བའི་གནས་འདི་ལས་གཞན་དུ་འགྲོ་ས་མེད་པས་འཁོར་བའི་ཉེས་དམིགས་བསམ་དགོས། འཁོར་བ་ནི་ཁམས་གསུམ་ཡིན་ལ་ཉེས་དམིགས་ནི་སྡུག་བསྔལ་གསུམ་ཡིན། དེ་ལྟ་བུའི་དལ་འབྱོར་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་ཐོབ་རུང་མི་རྟག་འཆི་བའི་དབང་དུ་འགྲོ་བས་ཚེ་འདིའི་སྐྱེ་རྒ་ན་འཆིའི་སྡུག་བསྔལ་གྱིས་དེད། བར་དོའི་སྡུག་བསྔལ་གྱིས་བསུས། ཕྱི་མའི་སྡུག་བསྔལ་ལ་མཚམས་སྦྱར་བ་ཡིན་ཏེ་བར་དོའི་བརྒྱལ་སངས་པ་དང་། དང་པོ་ཤི་བ་ངོ་མ་ཤེས་ནས་རང་གི་ཉེ་དུ་སོགས་ཀྱིས་ངུ་འབོད་བྱེད་པ་ལ་མ་ཤི་སྟེ་འདི་ན་ཡོད་དོ་ཟེར་ཀྱང་དེ་རྣམས་ཀྱིས་མི་མཐོང་མི་ཐོས་ནས། ད་ནི་ང་ངེས་པར་ཤི་བ་ཡིན་ནམ་མིན་སྙམ་ནས་ཉི་མ་ལ་གྲིབ་མ་དང་། བྱེ་མ་ལ་རྐང་རྗེས་ཡོད་མེད། ཆུ་ལ་གཟུགས་བརྙན་ཡོད་མེད་བརྟགས་པས་དེ་དག་མེད་ན་ང་ངེས་པར་ཤི་བ་ཡིན་སྙམ་ནས་སྐྲག་པའི་རྐྱེན་གྱིས་འཇིགས་པའི་སྒྲ་བཞི་ནི། ས་ཆེན་པོ་དུས་གཅིག་ལ་གཡོས་པ་ལྟ་བུའི་སྒྲ་དང་། སྟོང་གསུམ་གྱི་སྟོང་ཆེན་པོ་མེས་ཚིག་པ་ལྟ་བུའི་སྒྲ་དང་། སྟོང་གསུམ་གྱི་སྟོང་ཆེན་པོ་རླུང་གིས་འཐོར་བའི་སྒྲ་དང་། སྟོང་གསུམ་གྱི་སྟོང་ཆེན་པོ་ཆུས་བཤིགས་པ་ལྟ་བུའི་སྒྲ་དང་བཞི། ཡ་ང་བའི་གཡང་ས་གསུམ་ནི། སྤྱིར་མུན་ཚབ་ཚུབ་ཀྱི་དུས་ལྟ་བུའི་འདོད་ཆགས་ཀྱི་རང་མདངས་གང་དུ་བལྟས་པ་ཐམས་ཅད་དམར་ཟང་ཟིང་བ་དང་། ཞེ་སྡང་གི་རང་མདངས་གང་དུ་བལྟས་པ་ཐམས་ཅད་དཀར་ལྷག་ལྷག་པ་དང་། གཏི་མུག་གི་རང་མདངས་གང་དུ་བལྟས་པ་ཐམས་ཅད་ནག་མུན་མུན་པའི་སྣང་བ་ཤར་དུས། ལས་དག་པ་རྣམས་ལ་དཔའ་བོ་དང་མཁའ་འགྲོའི་བསུ་མ་སླེབས་ཏེ་ཡར་གྱི་ཟང་ཐལ་དུ་གྲོལ་བ་དང་། མཚམས་མེད་ཀྱི་ལས་བྱས་པ་རྣམས་སྔགས་ཀྱི་ལུགས་ལ་ལས་མཁན་དང་མདོ་ལྟར་གཤིན་རྗེའི་སྐྱེས་བུ་མང་པོའི་སྣང་བ་ཤར་ནས་མར་གྱི་ཟང་ཐལ་དུ་འགྲོ་ལ། དེ་ལས་གཞན་རྣམས་ལ་ཞག་ཞེ་དགུའི་བར་དང་མིན་ཀྱང་བདུན་གསུམ་དང་བཞི་ལ་སོགས་པར་ཚད་མེད་རུང་། ཞག་ཞེ་དགུའི་བར་དུ་འདུག་ན་ཕྱེད་ཡན་ཆད་ལ་སྔར་གྱི་ལུས་དང་། ཕྱེད་མན་ཆད་ལ་ཕྱི་མའི་ལུས་ལྟ་བུ་མཐོང་སྟེ་དམྱལ་བ་དང་ཡི་དྭགས་སུ་སྐྱེ་ན་མགོ་ཐུར་དུ་བསྟན་ནས་འགྲོ་བ་ལྟ་བུའི་སྣང་བ་དང་། དུད་འགྲོ་ལ་སྐྱེ་ན་མགོ་ལ་རྭ་ཟིང་ངེ་ཡོད་སྣང་དང་གོག་ནས་འགྲོ་སྣང་དང་། ལྷ་དང་མིར་སྐྱེས་ན་མགོ་གྱེན་དུ་བསྟན་ནས་འགྲོ་སྣང་དང་ལུས་ལ་ཉི་ཟླའི་འོད་སྣང་བ་ཡིན་ལ། དེ་ལྟར་བར་དོའི་སྡུག་བསྔལ་གྱིས་མཚམས་སྦྱར་ནས་ཕྱི་མའི་སྡུག་བསྔལ་གྱི་མགོ་བརྩམས་པ་ཡིན། དེ་ཡང་ཁྲིད་ཚུལ་གཞན་ལ། ལས་རྒྱུ་འབྲས་ཀྱི་ཁྲིད་སྔོན་དུ་བཤད་ཀྱང་། འདིར་ནི་དེ་བཞིན་གཤེགས་པས་དང་པོ་བདེན་པ་བཞིའི་ཆོས་སྟོན་པ་ན། སྡུག་བསྔལ་ཤེས་པར་བྱ་ཞེས་གསུངས་པ་ལྟར། དང་པོ་སྡུག་བསྔལ་ཤེས་པར་བྱ་བ་འཁོར་བའི་ཉེས་དམིགས། དེ་ནས་ཀུན་འབྱུང་སྤང་བར་བྱ་བ་ལས་རྒྱུ་འབྲས་ཀྱི་ཁྲིད། དེ་ནས་ལམ་རྒྱུད་ལ་བསྟེན་པ་ཐར་པའི་ཕན་ཡོན་བསམ་པ་དང་། བཤེས་གཉེན་བསྟེན་པའི་ཁྲིད་གཉིས་ཀྱིས་ལམ་གྱི་མཚམས་སྦྱར་ནས་ལམ་དངོས་སྐྱབས་འགྲོ་ནས་བླ་མའི་རྣལ་འབྱོར་གྱི་བར་དང་། འགོག་པ་མངོན་དུ་བྱ་བ་འོད་གསལ་རྫོགས་པ་ཆེན་པོའི་དངོས་གཞིའི་ཁྲིད་བཏབ་ནས་ལེ་ལོ་ཅན་འབད་མེད་དུ་གྲོལ་བ་ཀ་དག་ཁྲེགས་ཆོད། བརྩོན་འགྲུས་ཅན་འབད་བཅས་སུ་གྲོལ་བ་ལྷུན་གྲུབ་ཐོད་རྒལ་གྱི་ཁྲིད་རྣམས་ཡིན་པས།

གསུམ་པ། འཁོར་བའི་ཉེས་དམིགས།

དང་པོ་འཁོར་བའི་ཉེས་དམིགས་ལ་སྤྱི་དང་བྱེ་བྲག་གཉིས་ལས་དང་པོ་ལ་དྲུག །གནས་གང་དུ་འཁོར་བ་དང་། སེམས་ཅན་སུ་འཁོར་བ་དང་། དུས་ནམ་འཁོར་བ། ཚུལ་ཇི་ལྟར། རྒྱུ་གང་གིས་འཁོར་བ། དཔེ་ཇི་ལྟར་འཁོར་བ་དང་དྲུག་ཏུ་བསྡུས་ནས་དཔྱད་འཇོག་སྤེལ་མའི་ཚུལ་དུ་བསྒོམ། འཁོར་བ་རྣམས་ཀྱིས་དང་པོ་སྐྱིད་ཀྱི་མགོ་བཟུང་སྡུག་གིས་མཐའ་ཕུད་པ་ཡིན། ཆོས་པ་རྣམས་དང་པོ་སྡུག་གི་མགོ་བཟུང་ནས་སྐྱིད་ཀྱིས་མཐའ་ཕུད་པ་ཡིན་པས། དེ་ལྟ་བུའི་འཁོར་བའི་སྡུག་བསྔལ་སྤྱིར་བསམ་པ་ཙམ་ལས་མི་དགོས་ཀྱང་དེས་བློ་མ་ལྡོག་ན། བྱེ་བྲག་གི་སྐབས་སུ་རིགས་དྲུག་སོ་སོའི་སྡུག་བསྔལ་བསམ་པའི་སྐབས། དམྱལ་བ་རྣམས་ལྕགས་ཀྱི་ཁང་པ་ཐོག་སོ་བརྒྱད་ཀྱི་ཚུལ་དུ་བསམ་པ་ནི་སྒོམ་ཚུལ་ཡིན་གྱི། སྤྱིར་དམྱལ་བ་ལ་གནས་དང་སྡུག་བསྔལ་མིང་གི་རྣམ་གྲངས་བསམ་གྱིས་མི་ཁྱབ་པ་ཞིག་ཡོད་པ་ནི་མདོ་སྡེ་དྲན་པ་ཉེར་བཞག་ལས་གསུངས་པ་ལྟར་ཤེས་དགོས་ལ། འཁོར་བའི་ཉེས་དམིགས་དང་ལས་རྒྱུ་འབྲས་ཀྱི་སྐབས་འདི་རྣམས་སུ། མདོ་སྡེ་ལས་བརྒྱ་པ་དང་། མཛངས་བླུན། དྲན་པ་ཉེར་བཞག གང་པོའི་རྟོགས་བརྗོད་རྣམས་ལ་ཡང་ཡང་བལྟ་རྟོགས་དགོས། སྡུག་བསྔལ་གྱི་རྣམ་གྲངས་རྣམས་བསམ་པའི་དུས་སུ་ཕར་མི་གཅིག་བཅད་གཏུབ་བྱེད་པ་ལ་ལྟད་མོ་ལྟ་བ་ལྟར་མ་ཡིན་པར་རང་དེ་དང་དེར་དངོས་སུ་སྐྱེས་ནས་སྡུག་བསྔལ་ཉམས་སུ་མྱོང་བ་དངོས་ལྟ་བུ་ཞིག་བསམ་དགོས། དེ་དག་བསམ་དུས་གནས་དང་གཅིག ལུས་རྟེན་དང་གཉིས། སྡུག་བསྔལ་དང་གསུམ། ཚེ་ཚད་དང་བཞི་པོ་དལ་བའི་སྐབས་ལྟར་ཡིན། དེ་ལྟར་བསམ་པའི་དུས་སུ་སེམས་སྡུག་ལྷང་ངེ་འོང་བ་དེ་སྐྱོ་ཤས་ཡིན་ལ། དེ་ལས་ཐར་འདོད་ཀྱི་བློ་སྐྱེ་བ་ནི་ངེས་འབྱུང་ཡིན་པས་ངེས་འབྱུང་གི་འབྲས་བུ་དང་། བསམ་པ་གཉིས་ལས་འདི་ངེས་འབྱུང་གི་བསམ་པ་ཡིན་ལ། དམྱལ་བ་དེར་སྐྱེ་བའི་རྒྱུ་སྤྱིར་དུག་གསུམ་གྱིས་ཀུན་ནས་བསླངས་བའི་མི་དགེ་བ་བཅུ་ཀ་ཆེན་པོར་བསགས་པ་ཡིན་ཀྱང་གཙོ་བོ་ཞེ་སྡང་གིས་ཀུན་ནས་བསླངས་བའི་སྲོག་གཅོད་པ་སོགས་ཡིན་པས། དེ་ལྟ་བུའི་ལས་རང་རྒྱུད་ལ་ཐོག་མ་མེད་པའི་དུས་ནས་བསགས་པ་གྲངས་ཀྱིས་མི་ཆོད་པ་ཡོད་པས་དེ་དག་ལ་གཉེན་པོ་སྟོབས་བཞི་ཚང་བའི་བཤགས་པ། སླད་ཆད་དེ་ལྟ་བུའི་ཞེ་སྡང་གི་ལས་དེ་ཤ་མཐེབ་གཏོགས་བྱས་ནས་གསོད་ཀྱང་མི་བྱེད་སྙམ་པའི་དམ་བཅའ། དེར་སྐྱེས་པའི་སེམས་ཅན་རྣམས་ལ་མར་ཤེས། དྲིན་དྲན། དྲིན་བཟོ་འདོད་ཀྱི་རྟོག་པ་བསྐྱེད། དེ་ལྟ་བུའི་སྡུག་བསྔལ་རྒྱུ་འབྲས་གཉིས་པོ་དེ་དང་བྲལ་བར་གྱུར་ཅིག་སྙམ་པའི་འདུན་པ་དང་འབྲེལ་བ། བྲལ་ན་ཅི་མ་རུང་སྙམ་པའི་སྨོན་པ་དང་འབྲེལ་བ། དེ་དང་བྲལ་བ་ཞིག་ངས་བྱ་སྙམ་པའི་དམ་བཅའ་དང་འབྲེལ་བ་སྟེ་འབྲེལ་བ་སུམ་ལྡན། སྡུག་བསྔལ་རྒྱུ་འབྲས་གཉིས་པོ་དེ་དང་བྲལ་བ་ཞིག་སྐྱབས་བསླུ་བ་མེད་པའི་དཀོན་མཆོག་གསུམ་ལ་གསོལ་བ་བཏབ་ནས་ངའི་མ་རྒན་སེམས་ཅན་དམྱལ་བ་ན་གནས་པ་དེ་དག་སྡུག་བསྔལ་རྒྱུ་འབྲས་གཉིས་དང་དུས་ད་ལྟ་ཉིད་མྱུར་བ་ཉིད། འདུག་ས་འདི་རུ། གདན་ས་འདི་རུ་ཐར་བ་ཞིག་ཟེར་ནས་ཉག་བརྡུང་སྟེ་དཀོན་མཆོག་ལ་གསོལ་བ་འདེབས་པ་ནི། ཀྱེ་མ་ཀྱེ་ཧུད་དཀོན་མཆོག་ཐུགས་རྗེ་ཅན་སོགས། བླ་མ་རྒྱལ་བ་འགྲོ་བའི་མགོན། །འགྲོ་བ་སྐྱོབས་པའི་དོན་བརྩོན་པ། །སོགས་དང་། དཔའ་བོ་ཁྱོད་ལ་ཐུགས་རྗེའི་སྟོབས་མངའ་བས་སོགས་བརྗོད་པ་ནི་ཀུན་མཁྱེན་ཡབ་སྲས་ཀྱི་ལུགས་ལ་རང་འདོད་ཡིད་བྱེད་ཀྱི་བསམ་པ་ལ་ཤུགས་ཀྱིས་བློ་ལྡོག་དགོས་གསུངས་པ་དེ་ཡིན། དེ་བཞིན་དུ་རིགས་དྲུག་གཞན་གྱི་སྡུག་བསྔལ་རྣམས་ལའང་གནས་ལུས་སྡུག་བསྔལ་ཚེ་ཚད་སོགས་ཞིབ་ཏུ་བསམ་ནས་སྐྱོ་ཤས་ངེས་འབྱུང་། བཤགས་པ་དམ་བཅའ། མར་ཤེས་དྲིན་དྲན་སོགས་བསྒོམ་པ་མཚུངས་སོ། །འཕགས་པ་ཀ་ཏྱཱ་ནས། ཕ་ཤ་ཟ་ཞིང་མ་ལ་རྟེག །ལས་ངན་དགྲ་བོ་པང་ན་བཟུང་། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་དྲོ། །

བཞི་པ། ལས་རྒྱུ་འབྲས།

གཉིས་པ་ཀུན་འབྱུང་སྤང་བར་བྱ་གསུངས་པ་དེ། རྒྱུ་འབྲས་ཀྱི་ཁྲིད་འདི་ཡིན་ཏེ། སྲིད་པ་རིགས་དྲུག་གི་གནས་རིས་འདྲ་མི་འདྲ་ལུས་རྟེན་འདྲ་མི་འདྲ། བདེ་སྡུག་འདྲ་མི་འདྲ། ཚེ་ཚད་འདྲ་མི་འདྲ་སོགས་ཐམས་ཅད་ལས་རྒྱུ་འབྲས་ལས་བྱུང་བ་ཡིན་ཏེ། དེ་ལ་སྟོན་པ་བཅོམ་ལྡན་འདས་ཀྱི་ལྟ་བ་བཀའ་རྟགས་ཀྱི་ཕྱག་རྒྱ་དེ་ཡེ་དྷརྨཱ་ནས་ཤྲ་མ་ཎའི་བར་དེ་ཡིན། དེའི་མགོར་ཨོཾ་བདེ་ལེགས་དང་འཇུག་གི་སྭཱ་ཧཱ་གཞི་ཚུག་ཟེར་བ་ཡིན། དེ་གཉིས་ནི་པཎྜི་ཏ་ཐམས་ཅད་ཀྱིས་རབ་གནས་དང་བཀྲ་ཤིས་རྣམས་ལ་དགོངས་ནས་བཞག་པ་ཡིན། ཡེ་དྷརྨཱ་དེ་བོད་སྐད་དུ་བསྒྱུར་ན། ཆོས་རྣམས་ཐམས་ཅད་རྒྱུ་ལས་བྱུང་བ་དང་། །དེ་ཡི་རྒྱུ་དང་དེ་འགོག་གང་ཡིན་པ། །དེ་བཞིན་གཤེགས་པ་ཉིད་ཀྱིས་བཀའ་བསྩལ་པ། །དེ་སྐད་གསུངས་པའི་ཚུལ་ཅན་དགེ་སྦྱོང་ཆེ༑ ༑ཞེས་པ་ཡིན་པས། དང་པོ་ཆོས་རྣམས་ཐམས་ཅད་མང་ཚིག་ཡིན་པས་དེ་ལྟ་བུའི་ཆོས་མང་པོ་དེ་གང་ཡིན་ན་ཤེས་བྱ་འཁོར་འདས་ལམ་གསུམ་གྱི་བསྡུས་པའི་ཆོས་རྣམས་ཡིན། དེ་ལ་ནང་པ་སངས་རྒྱས་ཀྱི་ལུགས་ལ་རྒྱུ་དང་ལས་ལས་བྱུང་བ་རྟེན་ཅིང་འབྲེལ་བར་འབྱུང་བའི་ཆོས་ཐམས་ཅད་རྒྱུ་ལས་བྱུང་བ་ཡིན། དེ་ལ་དང་པོ་ཕྱི་རོལ་པའི་ལུགས་ལ་རྒྱུ་ལས་མ་བྱུང་པའམ། རྒྱུ་མེད་པ་ལས་བྱུང་བར་འདོད་པའི་ལྟ་ལོག་སུམ་བརྒྱ་དྲུག་ཅུ་ཡོད། དེ་རྣམས་བསྡུ་ན་ཏརྐ་སྡེ་ལྔའམ་རྟོག་གེ་སྡེ་ལྔར་འདུས། དེ་བསྡུ་ན་རྟག་ཆད་གཉིས་ལ་འདུ། དང་པོ་ཆད་ལྟ་ཚང་གིས་གོ་ཏ་མ་དང་རྟག་ལྟ་བའི་ལུགས་གཉིས་ཀ་དེ་ནོར་བ་ཡིན་ཏེ་ཆོས་ཐམས་ཅད་ངོ་བོ་ཉིད་ལས་བྱུང་བ་ཡིན། དཔེར་ན་ད་ལྟའི་ལུས་འདི་ནམ་མཁའ་ལ་འཇའ་ཚོན་ཤར་བའམ་སྤང་ལ་ཤྭ་མང་བ རྡོལ་བ་ལྟར་སྣང་བ་ཡིན་ཏེ་ལུས་ནི་ཁ་བ་ལྟ་བུ་དང་སེམས་སྤྱང་ཁུའི་རྗེས་ལྟ་བུ་ཡིན་ཏེ་ཁ་བ་ཞུ་འགྲོ་སྐབས་སྤྱང་ཁུའི་རྗེས་མེད་འགྲོ་བ་ལྟར་ད་ལྟའི་སྣང་བ་ཙམ་ལས་ཚེ་ཕྱི་མ་ཐར་པ་གྲོལ་བ་ཐམས་ཅད་མེད་པར་འདོད་དེ། འཆི་བའི་ཚེ་ལུས་ནི་འབྱུང་བཞིའི་ཁམས་ལ་དེངས་འགྲོ། སེམས་ནི་དེའི་བག་ལ་ཞ་ནས་མེད་འགྲོ་བ་ཡིན་ཏེ་དབང་ཕྱུག་ནག་པོའི་གཞུང་ལས། ཉི་ཤར་ཆུ་བོ་ཐུར་དུ་འབབ་པ་དང་། །སྲན་ཟླུམ་ཚེར་མ་གཟེང་རིང་རྣོ་བ་དང་། །རྨ་བྱའི་མདོངས་བཀྲ་ལྟ་ན་སྡུག་པ་རྣམས། །སུས་ཀྱང་མ་བྱས་ངོ་བོ་ཉིད་ལས་བྱུང་། །ཞེས་སོ། །རྟག་ལྟ་བའི་ལུགས་ལ། གོ་ཏ་མའི་ལུགས་དེ་ནོར་བ་ཡིན། ཚེ་སྔ་ཕྱི་ཡོད་ཀྱང་ལས་རྒྱུ་འབྲས་ལས་བྱུང་བ་མིན། བྱེད་པ་པོ་གཞན་ཞིག་གིས་བྱེད་པ་ཡིན་ཏེ། སུས་བྱེད་ན་ལྷ་ཆེན་དབང་ཕྱུག་ཆེན་པོ་རྟག་པ་གཅིག་པུ་རང་དབང་ཅན་ཞིག་གིས་བྱས་པ་ཡིན་ཏེ། དེ་ལ་བྱིས་པ་དང་བ་གླང་གི་ཤས་མཆོད་ན་དེ་མགུ་ནས་འཇིག་རྟེན་ལ་བདེ་བ་སྟེར་འོང་། མ་མགུ་ན་འཇིག་རྟེན་ལ་མི་བདེ་བ་སྟེར་འོང་བས། བདེ་སྡུག་གཞན་གྱི་བྱས་པའམ། ཡང་ན་གཙོ་བོ་ཞེས་བྱ་བ་བདེ་སྡུག་བཏང་སྙོམས་གསུམ་མམ་འདོད་ཆགས་ཞེ་སྡང་གཏི་མུག་གསུམ་ཆ་མཉམ་པ་ལ་གཙོ་བོའི་གོ་ཁུག་བཏགས་པ་ནམ་མཁའ་ལས་རྡུལ་སྤྲུལ་པ་དེ་ལ་ནང་ཤེས་རིག་གི་སྐྱེས་བུ་རྟག་པས་ལོངས་སྤྱོད་ནས་མཐར་ཤེས་པས་གཙོ་བོས་སྤྲུལ་པ་ཡིན་པར་ཤེས་པའི་ཚེ་གཙོ་བོ་ངོ་ཚ་ནས་བྲོས་པ་ན། གཙོ་བོའི་རྣམ་འགྱུར་ཐམས་ཅད་གཙོ་བོའི་ཀློང་དུ་ནུབ་ནས་སྐྱེས་བུ་རྣམ་འགྱུར་དང་བྲལ་བའི་ཚེ་ཐར་བ་ཐོབ་པར་འདོད་ལ་སྙིང་གི་ནང་ན་བསམ་གྱིས་མི་ཁྱབ་པའི་བདག་རྟག་པ་ཆེ་ཆུང་མཐེ་འོང་ཙམ་དུ་ཡོད་པར་འདོད་པས་དཔེར་ན་ལུས་འདི་རྫ་མ་ལྟ་བུ་ཡིན་ལ་ཤེས་པ་དེ་བྱིའུ་ལྟ་བུ་ཡིན་པས། ལུས་ཞིག་འགྲོ་བའི་ཚེ་ཤེས་པ་དེ་ལ་རང་དབང་ཡོད་བཞིན་དུ་གང་ལ་ཡང་འགྲོ་ཆོག་ཟེར། ནང་པ་སངས་རྒྱས་པའི་ལུགས་ལ་རྟག་ཆད་གཉིས་ཀའི་འདོད་པ་དེ་ནོར་བ་ཡིན། འཁོར་འདས་ལམ་གསུམ་གྱི་བསྡུས་པའི་ཆོས་དེ་ཐམས་ཅད་རྒྱུ་ལས་བྱུང་བ་ཡིན་ཏེ། རྒྱུ་ལས་ཇི་ལྟར་བྱུང་བའི་ཚུལ་འགྲོ་བ་ལྷ་དང་བཅས་པ་ཚངས་པ་དང་བཅས་པ་བདུད་དགའ་རབ་དབང་ཕྱུག་དང་བཅས་པས་མི་མཁྱེན། སྐྱེ་དགུའི་བདག་པོ་རྒྱལ་པོ་གཟུགས་ཅན་སྙིང་པོ་དང་རྒྱལ་པོ་མ་སྐྱེས་དགྲ་དང་ཤར་པ་སོགས་ཀྱིས་མི་མཁྱེན། ཕྱི་རོལ་པའི་སྟོན་པ་སྡེ་དྲུག་ལ་སོགས་པས་མི་མཁྱེན། ནང་པའི་སངས་རྒྱས་ཀྱི་སྲས་རྒྱལ་ཚབ་བྱམས་པ་མགོན་པོ་དང་འཇམ་དཔལ་དབྱངས་ཀྱིས་ཀྱང་སངས་རྒྱས་ཀྱི་བཀའི་རྗེས་སུ་འབྲང་ནས་སྟོན་པ་མ་གཏོགས་མི་མཁྱེན། དེའི་མཁྱེན་པ་དེ་མུར་ཐུགས་པ་ཞིག་ཡིན་པའི་རྒྱུ་མཚན་བག་ཆགས་ཀྱི་སྒྲིབ་པ་མ་སྤང་བའི་ཕྱིར་རོ། །ཀླུ་སྒྲུབ་ཐོགས་མེད་སོགས་རྒྱན་དྲུག་མཆོག་གཉིས་ལ་སོགས་པས་མི་མཁྱེན། སློབ་མ་ཉན་ཐོས་དང་རང་རྒྱལ་དག་གིས་མི་མཁྱེན། དེ་དག་གི་རང་ལམ་ཡང་སངས་རྒྱས་ཀྱི་བཀའི་རྗེས་སུ་འབྲང་བ་མ་གཏོག་མི་མཁྱེན་ཏེ། ཉན་ཐོས་ལ་མི་མཁྱེན་པའི་རྒྱུ་བཞི་ཡོད་པས་གནས་ཀྱིས་བསྐལ་བས་མི་མཁྱེན་པ་དང་གཅིག དུས་ཀྱིས་བསྐལ་བས་མི་མཁྱེན་པ་དང་གཉིས། རྒྱུ་ཐུག་མེད་ཀྱི་འབྲས་བུ་ཐུག་མེད་མི་ཤེས་པ་དང་གསུམ། སངས་རྒྱས་ཀྱི་ཆོས་ར བ་ཏུ་མང་པོ་མི་མཁྱེན་པ་དང་བཞི་ཡོད་པས་མི་མཁྱེན། དེའི་རྒྱུ་དེ་བཞིན་གཤེགས་པས་གསུངས་ཞེས་པ་ནི་འཁོར་འདས་གཉིས་ཀ་རྒྱུ་ལས་བྱུང་བ་ཡིན་པས། དེའི་རྒྱུ་དེ་བཞིན་གཤེགས་པས་གསུངས་པ་ན་ཆོས་ཐམས་ཅད་ཀྱི་གནས་ལུགས་དོན་དམ་པའི་བདེན་པ་ཆོས་ཀྱི་དབྱིངས་ཡང་དག་པའི་མཐའ་ཆོས་སྐྱོན་མེད་པ་ཉིད་དང་ཆོས་ཀྱི་གནས་ཉིད་དེ་དེ་ལྟ་བུའི་གནས་ལུགས་དེ་རྟོགས་བསྒོམ་མཐར་ཕྱིན་ཏེ་ལྷག་མ་མ་ལུས་པ་མངོན་དུ་བྱས་ནས་ཆོས་ཐམས་ཅད་ཀྱི་གནས་ལུགས་དོན་དམ་པའི་བདེན་པ་ཇི་ལྟ་བ་མཁྱེན་པའི་ཡེ་ཤེས། དེའི་སྟོང་ཉིད་དེ་རྟོགས་པས་ཤེས་བྱ་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་དཔེར་ན་མེ་ལོང་ནང་ན་གཟུགས་བརྙན་ཤར་བའམ། སྐྱུ་རུ་ར་ལག་མཐིལ་དུ་བཞག་པ་ལྟ་བུའི་ཅིག་ཆར་དུ་མཁྱེན་པ་དེ་ཇི་སྙེད་མཁྱེན་པའི་ཡེ་ཤེས་ཡིན། དེ་ལ་དབྱེ་ན་ཤེས་བྱ་ཐམས་ཅད་མཁྱེན་པ་དང་ཉེར་མཁོ་ལྷག་པར་མཁྱེན་པ་གཉིས་ལས། དང་པོ་ཤེས་བྱ་ཐམས་ཅད་མཁྱེན་པ་ནི་ལྷས་སྦྱིན་གྱི་གྲོང་ཁྱེར་གྱི་འབྲུ་དང་ཉིན་སྲིབ་ཀྱི་རྩི་ཤིང་ནགས་ཚལ་ཐམས་ཅད་བསྲེགས་པའི་ཐལ་བ་དང་ཀུ་ཤ་རྒྱ་མཚོ་ལ་རིམ་ཅན་དུ་བྱ་ན་པ་ལྟ་བུ་ལྷས་སྦྱིན་ལ་ལྐོག་གྱུར་དུ་ཡོད་པ་ཐམས་ཅད་སངས་རྒྱས་ལ་མངོན་གྱུར་དུ་ཡོད་པ་ནི། ཇི་སྐད་དུ། རྨ་བྱའི་མདོངས་བཀྲ་གཅིག་ལ་ཡང་། ། རྒྱུ་ཡི་དབྱེ་བ་ཐ་དད་པ། །དེ་མཁྱེན་པ་ནི་ཀུན་མཁྱེན་ཏེ། །ཀུན་མཁྱེན་ཡེ་ཤེས་མིན་པས་མིན། །ཞེས་པས། དེ་ནི་གདུལ་བྱ་རྣམས་ལ་དད་པ་ཙམ་རེ་སྐྱེ་བ་མ་གཏོགས་དགོས་པ་ཆེར་མེད་ལ། ཉེར་མཁོ་ལྷག་པར་མཁྱེན་པ་ནི་འཁོར་འདས་གཉིས་ཀྱི་རྒྱུ་འབྲས་མཁྱེན་པས་འཁོར་བའི་རྒྱུ་ཀུན་འབྱུང་གི་བདེན་པ། འབྲས་བུ་སྡུག་བསྔལ་གྱི་བདེན་པ། མྱང་འདས་ཀྱི་རྒྱུ་ལམ་གྱི་བདེན་པ། འབྲས་བུ་འགོག་པའི་བདེན་པ་སྟེ་དོན་ལ་བདེན་བཞིའི་བླང་དོར་ཚུལ་བཞིན་མཁྱེན་པ་ཡིན། རྒྱུ་ལ་འགོག་པ་གང་ཡིན་པ༑ ༑ཞེས་པས་འགོག་ཚུལ་ལ། ཕྱི་རོལ་པས་རྒྱུ་མི་འགོག་པར་འབྲས་བུ་འགོག་པར་འདོད་དེ། དཔེར་ན་རྒྱུ་དུག་འཐུང་བར་མི་འགོག་པར་འབྲས་བུས་ནད་འགོག་པ་ལྟ་བུ་ཡིན་ཀྱང་། འབྲས་བུ་འགོག་མི་ནུས་པས་རྒྱུ་འགོག་དགོས་ཏེ་དཔེར་ན་དུག་མ་འཐུང་ན་ནད་མི་འབྱུང་བ་བཞིན་དུ་སྐྱེ་བ་ཕྱི་མ་ཕན་ཆད་ཀྱི་རྒྱུ་ཀུན་འབྱུང་ལས་དང་ཉོན་མོངས་རྣམས་འགོག་དགོས་པས་དེ་ལ་སྐྱེས་བུ་གསུམ་གྱི་རྒྱུ་འགོག་ཚུལ་ལ། དང་པོ་ཐར་པ་བྱང་ཆུབ་གསུམ་གྱི་ལམ་བསྒྲུབ་པ་ལ་ལུས་རྟེན་ཁྱད་པར་ཅན་གཅིག་ལོན་དགོས་པས། སྐྱེས་བུ་ཆུང་ངུས་ངན་སོང་གསུམ་པོ་སྡུག་བསྔལ་དུ་ཤེས་ཏེ་དེ་ལས་ཐར་འདོད་ཀྱི་བློས་མཐོ་རིས་ལྷ་མིའི་གོ་འཕང་དུ་གཉེར་ནས་མི་དགེ་བ་བཅུ་སྤང་དགེ་བ་བཅུ་བསྒྲུབ། དེའི་སྟེང་ལ་མི་གཡོ་པའི་ལས་བསམ་གཟུགས་བརྒྱད་བསྒོམ་པས་མཐོ་རིས་ལྷ་མིའི་གོ་འཕང་ཐོབ་པ་ཡིན་ལ་དེའི་ལས་དགེ་བས་མི་དགེ་བ་འགོག་པ་མ་གཏོགས། ཉོན་མོངས་འགོག་མི་ནུས་སྐྱེས་བུ་ཆེ་འབྲིང་གཉིས་ཀས་སྲིད་པ་རིགས་དྲུག་པོར་བློ་ལྡོག་ནས་འཁོར་བ་རྒྱུ་འབྲས་གཉིས་སྤང་མྱང་འདས་རྒྱུ་འབྲས་གཉིས་བླང་དགོས། དེ་ཡང་རྒྱལ་པོ་གསལ་རྒྱལ་གྱི་བུ་མོ་དཔལ་ཕྲེང་སེངྒེ་སྒྲས་ཞུས་པའི་མདོ་ལས། བདེན་བཞི་བགྱི་བ་དང་བཅས་པ་དང་། བགྱི་བ་མ་མཆིས་པ་གཉིས་གསུངས་པས། དང་པོ་སྐྱེས་བུ་འབྲིང་གིས་འཁོར་བ་མཐའ་དག་སྡུག་བསྔལ་དུ་ཤེས་རུང་། ཉན་རང་གཉིས་ཀའི་ས་ན་ཉོན་མོངས་པ་ཅན་མ་ཡིན་པའི་མ་རིག་པ། ལྷན་སྐྱེས་ཀུན་བརྟགས་གཉིས་ལས་ལྷན་སྐྱེས་ཀྱི་མ་རིག་པ་ཡིད་ཀྱི་རང་བཞིན་ཅན་གྱི་ལུས། ཟག་མེད་ཀྱི་ལས་བསམ་གྱི་མི་ཁྱབ་པའི་འཆི་འཕོ་སོགས། རྟེན་འབྲེལ་ཕྲ་བའི་སྡུག་བསྔལ་མ་ཤེས་པའི་སྡུག་བསྔལ་ཤེས་བྱ་དེ་ཡང་བགྱི་བ་དང་བཅས་པ་ཡིན། ཀུན་འབྱུང་སྤང་བར་བྱ་བ་དེའི་ལས་ཉོན་གཉིས་སྤང་རུང་ཤེས་སྒྲིབ་མ་སྤང་པས་ཀུན་འབྱུང་སྤང་བར་བྱ་བ་བགྱི་བ་དང་བཅས་པ་ཡིན། ལམ་རྒྱུད་ལ་བརྟེན་པར་བྱ་བ་དེ་ལ་གང་ཟག་གི་བདག་མེད་རྟོགས་ཆོས་བདག་རིལ་པོར་འཛིན་པ་ཞིག་ནས་སིལ་བུར་རྟོགས་རུང་། ད་དུང་ཆེན་པོ་གསུམ་གྱི་ལྟ་བ་མ་རྟོགས་པས་ལམ་བགྱི་བ་དང་བཅས་པ་ཡིན། འབྲས་བུ་དགྲ་བཅོམ་པའི་གོ་འཕང་ཐོབ་རུང་སངས་རྒྱས་ཀྱི་འོད་ཟེར་གྱིས་འགོག་པ་ལས་བསླང་ནས་ད་གཟོད་སངས་རྒྱས་ཀྱི་གོ་འཕང་བསྒྲུབ་དགོས་པས་འགོག་པ་དེ་བགྱི་བ་དང་བཅས་པ་ཡིན། དེའི་འཁོར་བ་རིགས་དྲུག་པོ་སྡུག་བསྔལ་དུ་ཤེས་ནས་རང་ཐར་འདོད་ཀྱིས་བློས་ཀུན་ནས་བསླངས་ཏེ་འཁོར་བའི་སྡུག་བསྔལ་བསྐྱེད་པར་བྱེད་པ་ཀུན་འབྱུང་ལས་དང་ཉོན་མོངས་གཉིས་ཉོན་མོངས་པའི་རྩ་བ་བདག་ཏུ་འཛིན་པ་འདི་ཡིན་པས། དེའི་གཉེན་པོ་བདག་མེད་རྟོགས་པའི་ཤེས་རབ་ཡིན་པ་ལ། དང་པོ་ནས་ཤེས་རབ་ཞིག་རྒྱུད་ལ་བསྟེན་རྒྱུ་མེད་པས་ངེས་འབྱུང་གི་བསམ་པས་ཀུན་ནས་བསླངས་ཏེ་སོ་ཐར་གྱི་སྒོར་ཞུགས་ཚུལ་ཁྲིམས་རྣམ་པར་དག་པས་རྒྱུད་བསྡམ། དེའི་སྟེང་དུ་བསམ་གཟུགས་བརྒྱད་བསྒོམ། དེའི་སྟེང་དུ་ཤེས་རབ་བསྐྱེད་དགོས་པས། དེ་ནི་གང་ཟག་གི་བདག་ང་ཞེས་བྱ་བ་དེ་གང་ན་འདུག་ཕུང་པོ་ལྔ་དང་གཅིག་གམ་ཐ་དད་པར་བརྟག་ན་གཅིག་དང་ཐ་དད་མེད་པའི་ཚུལ་གྱིས་བསྒོམ་པས་བདག་མེད་མངོན་གསུམ་དུ་མཐོང་བ་རྒྱུན་ཞུགས་མཐོང་ལམ་ལྟ་བུ་ཡིན། ཕྱིར་འོང་ཕྱིར་མི་འོང་གཉིས་བསྒོམ་ལམ་ཡིན། ལས་ཀྱི་རྩ་བ་ཉོན་མོངས་དང་དེའི་རྩ་བ་ངར་འཛིན་མེད་པར་རྟོགས་པས། དཔེར་ན་སྒྱུ་མ་མཁན་གྱི་རྒད་པོ་བསད་ན་སྒྱུ་མའི་འཁྲུལ་འཁོར་ཤུགས་ཀྱིས་ལྡོག་འགྲོ་བ་ལྟར་ངར་འཛིན་གྱི་བསྐྱེད་པའི་ལས་ཉོན་གཉིས་ལྡོག་ནས་འབྲས་བུ་དགྲ་མཅོམ་པ་ལྷག་བཅས་ཀྱི་མྱང་འདས་དང་ལྷག་མེད་གཉིས་ཐོབ་པ་མི་སློབ་པའི་ལམ་ཡིན། སྐྱེས་བུ་ཆེན་པོས་འཁོར་བ་མཐའ་དག་དང་། ཞི་བ་ཉན་རང་གི་མཐའ་ལ་བློ་ལྡོག་ནས་དེ་ཕན་ན་སྡུག་བསྔལ་ཤེས་བྱ་གཞན་མེད་པས་སྡུག་བསྔལ་ཤེས་བྱ་བགྱི་བ་མ་མཆིས་པ་ཡིན། ཀུན་འབྱུང་སྤང་བྱ་དེ་ཡང་ལས་དང་ཉོན་མོངས་ཤེས་བྱ་བག་ཆགས་དང་བཅས་པ་ཡིན་པས། དེ་ཕན་ན་ཀུན་འབྱུང་སྤང་བྱ་མེད་པས་ཀུན་འབྱུང་སྤང་བར་བྱ་བ་བགྱི་བ་མ་མཆིས་པ་ཡིན། ལམ་བདེན་ལ་ཆོས་ཐམས་ཅད་ཀྱི་གནས་ལུགས་དོན་དམ་པའི་བདེན་པ་བདག་མེད་གཉིས་ཀྱི་རང་བཞིན་ཅན་རྟོགས་པས། ལམ་རྒྱུད་ལ་བསྟེན་པར་བྱ་བར་བགྱི་བ་མ་མཆིས་པ་ཡིན། འབྲས་བུ་སངས་རྒྱས་ཆོས་ཀྱི་སྐུ་ཐོབ་པས་དེ་ཕན་ན་ཐོབ་བྱ་གཞན་མེད་པས་འགོག་པ་བགྱི་བ་མ་མཆིས་པ་ཡིན། ད་སྐྱེས་བུ་ཆེན་པོས་སྲིད་ཞི་གཉིས་ཀ་ལ་བློ་ལྡོག་ནས་ངེས་འབྱུང་ཆེན་པོས་ཀུན་ནས་བསླངས་ཏེ་རིང་ལམ་མཚན་ཉིད་ཐེག་པ་སོགས་ཀྱི་མདོ་སྔགས་གཉིས་ཀྱི་སྡོམ་པས་རྒྱུད་བསྡམ་བསམ་གཟུགས་བརྒྱད་དང་སྔགས་ཀྱི་བསྐྱེད་རྫོགས་གཉིས་སྒོམ་པ་ནི་བསམ་གཏན་ཡིན་ལ་དེའི་སྟེང་དུ་ཆེན་པོ་གསུམ་གྱི་ལྟ་བ་རྟོགས་པ་ཤེས་རབ་ཡིན། ཉན་རང་ནས་ཨ་ནུ་མན་ཆད་ཀྱི་རྟོགས་པས་རྟོགས་པ་འདུལ་བ་ཡིན། ཨ་ཏིའི་སྤྲོས་བྲལ་ཀ་དག་གི་ལྟ་བ་གཅིག་པུའི་རང་ངོ་བསྐྱངས་པས་དེའི་བཟང་ངན་གྱི་རྟོག་པ་ཐམས་ཅད་ཡེ་ཤེས་ཆེན་པོ་དེའི་ཀློང་དུ་དག་གྲོལ་ཞིག་ཆད་ནས་ལས་ཉོན་ཤེས་བྱ་བག་ཆགས་ཀྱི་སྒྲིབ་པ་མ་ལུས་པ་བཅོམ་ནས་སངས་རྒྱས་ཆོས་ཀྱི་སྐུ་ཐོབ། དེ་ལས་གཟུགས་སྐུ་འགགས་པ་མེད་པ་ལོངས་སྐུ་དང་སྤྲུལ་སྐུས་འགྲོ་བའི་དོན་མཛད་པ་ཡིན་ནོ། །དེ་ལྟ་བུའི་བདེན་པ་བཞིའི་རྣམ་པར་བཞག་པ་དེ་སྟོན་པ་རྫོགས་པའི་སངས་རྒྱས་བཅོམ་ལྡན་འདས་མཉམ་མེད་ཤཱཀྱའི་རྒྱལ་པོ་ཤཱཀྱ་སེངྒེ་དེའི་དེ་སྐད་དུ་གསུངས་པ་ཡིན་ནོ། །དེ་རྣམས་ནི་བསྟན་པ་སྤྱིའི་སྡོམ་དུ་གསུངས་པ་ཡིན་ནོ། །ད་ཉམས་སུ་བླང་བྱ་ལ་སྤང་བྱ་མི་དགེ་བའི་ལས་དང་། བསྒྲུབ་བྱ་དགེ་བའི་ལས་དང་། ཐམས་ཅད་ལས་ཀྱི་རང་བཞིན་དུ་བསྟན་པ་དང་གསུམ་ལས། དང་པོ་སྤང་བྱ་མི་དགེ་བའི་ལས་བཤད་པ་དང་འབྲས་བུ་བཤད་པ་གཉིས་ལས། དང་པོ་མི་དགེ་བའི་ལས་དེ་ལ་མུ་དང་མཐའ་མེད་པ་ཞིག་ཡོད་ནའང་དེ་ཐམས་ཅད་བསགས་པའི་སྒོ་ནས་བསྡུ་ན་ལུས་ཀྱི་མི་དགེ་བ་གསུམ་སོགས་བཅུའོ། །ལས་ཀྱི་ཀུན་ནས་སློང་བར་བྱེད་པ་པོ་དུག་གསུམ་ཡིན་ཏེ། དབུ་མ་རིན་ཆེན་ཕྲེང་བ་ལས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བའོ། །ཞེས་པས། དུག་གསུམ་པོ་དེ་ངོ་བོ་ཉིད་ཀྱིས་མི་དགེ་བ་དང་དེའི་ཀུན་ནས་བསླངས་བའི་ལས་དེ་ལ་མཚུངས་ལྡན་གྱི་མི་དགེ་བ་ཞེས་བྱ། ཉོན་མོངས་པས་ཀུན་ནས་སློང་བར་བྱེད་པ་པོ་ནི་གཞུང་གི་ལུགས་ལ་སེམས་བྱུང་སེམས་པ་དང་། མན་ངག་གི་ལུགས་ལ་ཡིད་རྟོག་བཅས་ཡིན་ལ། ཉོན་མོངས་པ་དེ་སྐྱེ་བའི་ཚེ་ཡུལ་ལ་བརྟེན་ནས་སྐྱེ་དགོས་པས་ཡུལ་ཡིད་དུ་འོང་བ་ལ་བརྟེན་ནས་འདོད་ཆགས། མི་འོང་བ་ལ་བརྟེན་ནས་ཞེ་སྡང་། བར་མ་ལ་བརྟེན་ནས་གཏི་མུག་རྣམས་འབྱུང་བ་ཡིན་ནོ། །འབྲས་བུ་ལ་བཞི་སོགས། གཉིས་པ་བསྒྲུབ་བྱ་དགེ་བའི་ལས་དེ་བསམ་གྱིས་མི་ཁྱབ་པ་མུ་དང་མཐའ་མེད་པ་ཞིག་ཡོད་ནའང་། དེ་བསགས་པའི་སྒོ་ནས་བསྡུ་ན་ལུས་ཀྱི་དགེ་བ་གསུམ་སོགས་ཡིན་ནོ། ། ཀུན་ནས་སློང་བར་བྱེད་པ་དེ་ལ། ཇི་སྐད་དུ། མ་ཆགས་མི་སྡང་གཏི་མུག་མེད། ། དེས་བསྐྱེད་ལས་ནི་དགེ་བ་འོ། །ཞེས་པས། མི་དགེ་བ་བཅུ་བསྒྲུབ་མི་ཉན་བསམ་ནས་ཕྱིན་ཆད་སྲོག་ལ་བབ་ཀྱང་མི་དགེ་བ་བཅུ་མི་བྱེད་བསམ་པ་དེ་མི་དགེ་བ་བཅུ་སྤང་གི་ཚུལ་ཁྲིམས་ཡིན། དགེ་བཅུ་ཁྱད་པར་བ་སྲོག་གཅོད་པ་སྤང་ནས་སྲོག་སྐྱབས་པ་སོགས་ཡིན། འབྲས་བུ་བཞིའོ། །དེ་ལྟ་བུའི་མི་དགེ་བའི་ལས་དང་། དགེ་བའི་ལས་གཉིས་བསྒོམ་དུས་རྒྱུ་འབྲས་ཐོ་གཏུག་ནས་བསམ་དགོས་སོ། །གསུམ་པ་ཐམས་ཅད་ལས་ཀྱི་རང་བཞིན་དུ་བསྟན་པ་ལ། མདོ་ལས། ལུས་ཅན་དག་གི་ལས་རྣམས་ནི་སོགས། ལས་དེ་ལ་གཅིག་ཏུ་དཀར་བའི་ལས་དང་། གཅིག་ཏུ་གནག་པའི་ལས། དཀར་ནག་འདྲེས་མའི་ལས་དང་གསུམ། གཅིག་ཏུ་དཀར་བའི་ལས་ནི་མཐའ་གཅིག་ཏུ་བསམ་སྦྱོར་དགེ་བ་ཡིན། དེའི་འབྲས་བུ་ལྷ་དང་མི་ཡི་བདེ་འབྱོར་ཆེ་ཤོས་རྣམས་སུ་སྐྱེ། གཅིག་ཏུ་གནག་པའི་ལས་ནི། བསམ་སྦྱོར་གཉིས་ཀ་མི་དགེ་བ་ཡིན་པས་ངན་སོང་གསུམ་གྱི་སྡུག་བསྔལ་ཆེ་ཤོས་རྣམས་སུ་སྐྱེ། གསུམ་པ་འདྲེས་མའི་ལས་ནི་བསམ་པ་དཀར་ལ་སྦྱོར་བ་གནག་པའི་ལས་དེད་དཔོན་སྙིང་རྗེ་ཅན་གྱིས་མི་ནག་མདུང་འཐུང་ཅན་བསད་པ་ལྟ་བུ་རང་འདོད་ཀྱི་འཁྲི་བ་མེད་ན་བྱང་ཆུབ་སེམས་དཔའ་ལ་ལུས་ངག་གི་མི་དགེ་བ་བདུན་གནང་བའི་སྐབས་ཡོད་པ་ལྟ་བུའོ། །བསམ་པ་གནག་ལ་སྦྱོར་བ་དཀར་བའི་ལས་ནི་ཀུན་སློང་ཚེ་འདི་སྒྲུབ་འདོད་ཀྱིས་ཀུན་ནས་བསླངས་ཏེ། སྦྱོར་བ་དགེ་བའི་ལས་སྒྲུབ་པ་ལྟ་བུ་ཡིན། བསམ་སྦྱོར་འདྲེས་མའི་ལས་ནི་ཐང་འགའ་བསམ་སྦྱོར་གཉིས་ཀ་དཀར་བ་དང་། ཐང་འགའ་བསམ་སྦྱོར་གཉིས་ཀ་གནག་པའི་ལས་ཡིན་པས་དེའི་འབྲས་བུས་གླིང་བཞིའི་མི་དང་ལྷ་འཐོར་བུ་རྣམས་སུ་སྐྱེ་བ་ཡིན་ནོ། །ལས་མ་བྱས་པ་དང་མི་འཕྲད། བྱས་པ་ཆུད་མི་ཟ། ཉེ་དུ་ལོངས་སྤྱོད་ཀྱི་རྗེས་སུ་མི་འབྲང་ལས་བསགས་པ་པོ་འབའ་ཞིག་གི་རྗེས་སུ་འབྲང་བ་ཡིན་ཏེ། དེ་ལྟ་བུའི་ལས་དེ་ས་ལ་མི་སྨིན་རྡོ་ལ་མི་སྨིན་ཤེས་རྒྱུད་ཀྱིས་ཟིན་པའི་ཕུང་པོ་འབའ་ཞིག་ལ་སྨིན། དེ་ལྟར་སྨིན་པའི་ཚུལ་མཐོང་ཆོས་མྱོང་འགྱུར་གྱི་ལས་དང་། སྐྱེས་ནས་མྱོང་འགྱུར་གྱི་ལས། ལན་གྲངས་གཞན་ལ་མྱོང་འགྱུར་གྱི་ལས་གསུམ་ལས། མཐོང་ཆོས་མྱོང་འགྱུར་གྱི་ལས་དེ་ལ་དགེ་སྡིག་གཉིས། སྡིག་པའི་འབྲས་བུ་ཉི་འོག་གི་རྒྱལ་ཁབ་ས་འོག་ཏུ་སོང་བ་ལྟ་བུའོ། །དགེ་བའི་འབྲས་བུ་རྒྱལ་པོ་གསལ་རྒྱལ་གྱི་བུ་མོ་རྡོ་རྗེ་ལྟ་བུའོ། །སྐྱེས་ནས་མྱོང་འགྱུར་གྱི་ལས་མཚམས་མེད་པའི་ལས་ཡིན། ལན་གྲངས་གཞན་ལ་མྱོང་འགྱུར་མི་རྟ་སོགས་བསད་པའི་སྡིག་པ་ཡིན། ལས་དེ་མི་བམ་མི་རུལ་མི་སྐམ་པར་ཆུད་མི་ཟ། ཆུད་ཟ་བར་བྱེད་པ་ལ་ཡང་ན་འབྲས་བུ་མྱོང་ནས་འཛད་ལ། ཡང་ན་སྡིག་པ་ལ་བྱང་སེམས་མན་ཆད་ཀྱི་གཉེན་པོ་སྟོབས་བཞི་ཚང་བའི་སྒོ་ནས་བཤགས་ན་ལས་ཇེ་སྲབ་ལ་འགྲོ་སྟེ། དཔེར་ན་ཁ་བ་ཉི་མས་སྲབ་པ་ལྟ་བུའོ། །བྱང་ཆུབ་སེམས་དཔས་བྱང་ཆུབ་ཀྱི་སེམས་རྒྱུད་ལ་སྐྱེས་ན་སྡིག་པ་མ་བཤགས་ན་ཡང་རང་དག་ལ་འགྲོ་སྟེ་དཔེར་ན་ཉི་མས་མུན་པ་བསལ་བ་བཞིན་ནོ། །དགེ་བ་ཡང་ཆུད་ཟད་དེ་དགེ་རྩ་ཟད་པའི་རྒྱུ་བཞིའི་ཆུད་འཛད་པ་ཡིན། ལས་དེ་དག་བསགས་པའི་གཞི་ནི་དབུ་མ་བས་བསགས་པའི་གཞི་མེད་པར་འདོད་དེ་ལས་བསགས་དུས་སྟོང་པར་འགགས་ནས་མྱོང་དུས་སྟོང་རྟེན་འབྱུང་དུ་ཤར་ནས་མྱོང་བ་ཡིན་ཟེར། སེམས་ཙམ་པས་ཀུན་གཞི་དང་སྔགས་ཀྱི་ལུགས་ལ་མ་དག་པའི་རླུང་སེམས་མ་དག་པའི་ཚེ་ན་རིགས་དྲུག་གི་ས་བོན་དྲུག་གནས་པས་ལས་ཀྱི་བསྒོ་གཞིར་འདོད་དོ། །ལས་མྱོང་བ་པོ་ནི་སངས་རྒྱས་ཡར་གཅད་རྒྱུ་མེད། སེམས་ཅན་མར་གཅད་རྒྱུ་མེད། སངས་རྒྱས་སྲས་དང་སློབ་མ་རིག་པ་འཛིན་པའི་ཚོགས་སོགས་ཐམས་ཅད་ཀྱི་མྱོང་དགོས། ལས་དེ་ལྕི་ཡང་བྱེད་ཚུལ་ལ་ཀུན་སློང་གསུམ་ལས། རྟག་པའི་ཀུན་སློང་། མངོན་ཞེན་གྱི་ཀུན་སློང་། གཉེན་པོ་མེད་པའི་ཀུན་སློང་། དེ་གསུམ་དགེ་སྡིག་གཉིས་ལ་འདྲ། ཡོན་ཏན་གྱི་ཞིང་ཕན་བརྟགས་པའི་ཡུལ། སྡུག་བསྔལ་བའི་ཡུལ་ལས། དཀོན་མཆོག་གི་ཞིང་ལ་བརྟེན་ནས། དགེ་མི་དགེ་བཅུ་བསགས་པ་དང་། ཁྱད་པར་རྡོ་རྗེ་ཐེག་པའི་ལུགས་ལ་བླ་མ་དཀོན་མཆོག་ཀུན་འདུས་ཀྱི་ངོ་བོ་ཡིན་པས། དེ་ལ་བསྟེན་པའི་དགེ་སྡིག་གང་བསགས་ཀྱང་ཉེས་པ་དང་ཕན་ཡོན་ཆེ། ཕན་བཏགས་པའི་ཡུལ་ཕ་མ་སོགས། རང་ལ་ཕན་བཏགས་པ་ལ་ཕན་གནོད་བྱེད་པ་ཕན་ཡོན་དང་ཉེས་པ་ལྕི་བ་ཡིན། སྡུག་བསྔལ་བའི་ཡུལ་ནད་པ་དང་སྡུག་བསྔལ་ཅན་སོགས་ལ་བརྟེན་པའི་དགེ་སྡིག་གི་ལས་དེ་དག་ཕན་ཡོན་དང་ཉེས་པ་ལྕི་བ་ཡིན། དེ་ལྟ་བུའི་ལས་དེ་མྱོང་བ་ལ་དུས་སྔ་ཕྱིའི་གོ་རིམ་ནི། ལས་ཀྱིས་འབྲས་བུ་ལྕི་གང་དང་། །ཉེ་བ་གང་དང་གོམས་པ་གང་། །སྔར་བྱས་གང་ཡིན་དེ་དག་ནི། །ཐོག་མ་ཉིད་དུ་སྨིན་པར་འགྱུར་། །ཞེས་པས། དེ་ལྟ་བུའི་དགེ་སྡིག་གི་ལས་གཉིས་པོ་དེའི་འབྲས་བུ་གང་སྔོན་དུ་མྱོང་བ་ཡིན་ཞེ་ན་དགེ་སྡིག་གཉིས་ཀྱི་འབྲས་བུ་གང་ལྕི་བ་དེ་སྔོན་དུ་མྱོང་བ་ཡིན་ལ། ལྕི་ཡང་མཉམ་ན་འཆི་ཁའི་མཚམས་སྦྱོར་གང་གིས་ཉེ་བ་དེ་སྔོན་དུ་མྱོང་ལ། འཆི་ཁའི་མཚམས་སྦྱོར་ལ་ཡང་མཉམ་ན་སྔར་གོམས་ཤུགས་གང་ཆེ་བ་དེ་སྔོན་དུ་མྱོང་ལ། གོམས་ཤུགས་ཀྱང་འདྲ་ན། སྔར་བྱས་པའི་གོ་རིམ་ལྟར་གང་སྔོན་དུ་བྱས་པ་དེ་ཐོག་མ་ཉིད་དུ་སྨིན་པ་ཡིན་པས་ཤེས་པར་བྱའོ། །ད་ནི་དེ་ལྟ་བུའི་ལས་དགེ་བ་བཅུ་ལྟ་བུ་དེ་ཡང་སྲིད་པ་སྒྲུབ་པའི་ལས་དང་། ཞི་བ་སྦྱོར་བའི་ལས་གཉིས། གང་དུ་འགྲོ་མི་འགྲོའི་ཚུལ་རང་རྒྱུད་ལ་བརྟགས་ཏེ་ཀུན་སློང་མངོན་མཐོ་དོན་གཉེར་གྱི་བསམ་པས། དགེ་བཅུ་དང་བསམ་གཟུགས་བརྒྱད་བསྒོམས་པས་མཐོ་རིས་ཐོབ་པ་སྲིད་པ་སྒྲུབ་པའི་ལས་དང་། རང་སྲིད་པ་རིགས་དྲུག་གི་གནས་ལས་ཐར་ནས་ཐར་པའི་གོ་འཕང་དོན་དུ་གཉེར་ཅིང་དགེ་བ་བཅུ་བསྒྲུབ་ན་སྐྱེས་བུ་འབྲིང་གི་ཞི་བ་སྦྱོར་བའི་ལས་ཡིན་རུང་། དེ་ཐབས་རྐྱང་པ་ཡིན་པས་ཤེས་རབ་ཀྱིས་ཟིན་དགོས་སོ། །སྐྱེས་བུ་ཆེན་པོས་ཐམས་ཅད་མཁྱེན་པའི་གོ་འཕང་དོན་དུ་གཉེར་ནས་དགེ་བཅུ་བསྒྲུབ་ན་སྐྱེས་བུ་ཆེན་པོའི་ཞི་བ་སྦྱོར་བའི་ལས་ཡིན། དམ་པ་གསུམ་དང་ལྡན་པས་ཉམས་སུ་ལེན་དགོས། དེ་ལྟ་བུའི་ལས་རྣམས་རྟེན་འབྲེལ་ཡིན་ཏེ་རྒྱུ་དགེ་སྡིག་ལ་ལྟོས་ནས་འབྲས་བུ་བདེ་སྡུག་འབྲེལ་བར་འབྱུང་བས་རྟེན་ཅིང་འབྲེལ་བར་འབྱུང་བའོ། །དེ་ཡང་ཀླུ་སྒྲུབ་ཀྱིས། རྟེན་ཅིང་འབྲེལ་འབྱུང་མ་གཏོགས་པ༑ ༑ཆོས་འགའ་ཡོད་པ་མ་ཡིན་ནོ། །རྒྱུ་དཔྱིད་ཀྱི་ས་བོན་འདེབས་རྒྱུ་མེད་ན་སྟོན་གྱི་འབྲས་བུ་ནས་མི་འབྱུང་བས་རྒྱུ་དཔྱིད་ཀྱི་ནས་དེ་ལ་བརྟེན་ནས་འབྲས་བུ་འབྲེལ་བར་འབྱུང་བའོ། །རྒྱུ་ལོག་ལྟ་དང་ཞེ་སྡང་སོགས་མེད་ན་འབྲས་བུ་སྡུག་བསྔལ་བ་མེད་པ་ཡིན་པས། རྒྱུ་ལོག་ལྟ་དང་ཞེ་སྡང་སོགས་ལ་བརྟེན་ནས་འབྲས་བུ་འབྲེལ་བར་འབྱུང་བའོ། །རྒྱུ་དགེ་བཅུ་ལྟ་བུ་མ་བ སྒྲུབ་ན་འབྲས་བུ་ལྷ་མིའི་གོ་འཕང་མི་ཐོབ་པ་ཡིན་རུང་། རྒྱུ་དགེ་བ་བཅུ་བསྒྲུབ་པས་འབྲས་བུ་མངོན་མཐོ་ལྷ་མིའི་གོ་འཕང་ཐོབ་པ་རྟེན་ཅིང་འབྲེལ་བར་འབྱུང་བའོ། །དེ་བཞིན་དུ་རྒྱུ་བྱང་ཆུབ་གསུམ་གྱི་ལམ་དང་། འབྲས་བུ་བྱང་ཆུབ་གསུམ་གྱི་གོ་འཕང་རྟེན་ཅིང་འབྲེལ་བར་འབྱུང་བའོ། །དེ་ཐམས་ཅད་ཐོབ་པ་ལ་བདེན་འཛིན་གྱིས་འཛིན་སྟངས་ལྟར་གྲུབ་ན་བདེན་གྲུབ་ལ་རྟེན་འབྲེལ་གྱི་བྱ་བྱེད་མི་རུང་བས། དེ་ཕྱིར་སྟོང་ཉིད་མ་གཏོགས་པ། །ཆོས་འགའ་ཡོད་པ་མ་ཡིན་ནོ། །ཞེས་པས། རྒྱུ་ནས་ལྟ་བུ་དེ་བདེན་པར་གྲུབ་པ་རང་གི་ངོ་བོས་གྲུབ་པ་རང་གི་མཚན་ཉིད་ཀྱིས་གྲུབ་པ་ཞིག་ཡིན་ན་སྟོན་ལོ་ཐོག་སྐྱེད་པའི་བྱ་བ་བྱེད་མི་རུང་ཡང་རྒྱུ་ནས་དེ་བདེན་པར་གྲུབ་པ་མ་ཡིན། རང་གི་ངོ་བོས་གྲུབ་པ་མ་ཡིན་པས། འབྲས་བུ་བསྐྱེད་པའི་བྱ་བ་བྱེད་རུང་བ་ཡིན་ཏེ། གང་ལ་སྟོང་པ་ཉིད་རུང་བ། ། དེ་ལ་ཐམས་ཅད་རུང་བ་ཡིན། །ཞེས་གསུངས་པ་བཞིན། རྒྱུ་ནས་ཞིག་ནས་འབྲས་བུ་མྱུ་གུ་བསྐྱེད། མྱུ་གུས་ནི་ལྗང་བུ་སོགས་རིམ་གྱིས་བསྐྱེད་པས། རྒྱུར་མ་ཟད་སྟོན་གྱི་འབྲས་བུ་དེ་ཡང་བདེན་པར་གྲུབ་པ་ངོ་བོས་གྲུབ་པ་རང་གི་མཚན་ཉིད་ཀྱིས་གྲུབ་པ་ཞིག་ཡིན་ན་རྒྱུ་ལ་ལྟོས་མི་དགོས་པར་འབྲས་བུ་རང་ཚུགས་ཐུབ་པ་ཞིག་ཡིན་དགོས་པས། དེ་ལྟར་ན་གཞོམ་གཞིག་ཐམས་ཅད་དང་བྲལ་བར་འགྱུར་བས་བསྐྱེད་བྱ་སྐྱེད་བྱེད་ཀྱི་རྒྱུ་འབྲས་སུ་མི་རུང་ངོ་། །དེ་བཞིན་དུ་ལོག་ལྟ་དང་ཞེ་སྡང་སོགས་བདེན་པར་གྲུབ་པ་ངོ་བོས་གྲུབ་པ་རང་གི་མཚན་ཉིད་ཀྱིས་གྲུབ་པ་ཞིག་ཡིན་ན། དང་པོ་ཉིད་ནས་ལོག་ལྟ་སོགས་རྟག་པར་ཚུགས་ཐུབ་ཡིན་དགོས་པ་དང་། ཡུལ་ལ་མི་ལྟོས་པར་འགྱུར་བ་དང་། རྣམ་རྟོག་གཞན་གྱིས་བར་མི་ཆོད་པ་དང་། འབྲས་བུ་སྡུག་བསྔལ་བསྐྱེད་མི་རུང་བའི་སྐྱོན་དུ་འགྱུར་ཡང་། དེ་མ་ཡིན་པར་སྣང་ལ་རང་བཞིན་མེད་པ་དོན་དམ་དཔྱོད་པའི་རིགས་ངོ་ན་ལོག་ལྟ་ལ་སོགས་པའི་མི་དགེ་བའི་ལས་དེ་དག་རང་གི་ངོ་བོ་ཉིད་མ་སྐྱེས་པས་ལས་སྟོང་པའོ། །ཞེས་དང་། སྟོང་ཉིད་ཅིར་ཡང་མ་ཡིན་པའི་རྩལ་ལས་རྟེན་འབྱུང་འགགས་པ་མེད་པའི་རང་བཞིན་དུ་ཤར་བས་སྟོང་པ་ཉིད་ལས་སོ། །དེ་ལྟར་སྟོང་དང་རྟེན་འབྱུང་དབྱེ་བསལ་མེད་པས་སྣང་བས་ཡོད་མཐའ་སེལ་ཞིང་། སྟོང་པས་མེད་མཐའ་སེལ་བའི་སྣང་ལ་རང་བཞིན་མེད་པ་ཆུ་ནང་གི་ཟླ་བ་ལྟ་བུ་དེ་ནི་སྟོང་པ་ཉིད་ལས་ལས་གཞན་མ་ཡིན། ལས་ལས་ཀྱང་སྟོང་པ་ཉིད་གཞན་མ་ཡིན་ནོ་ཞེས་པའི་སྟོང་ཉིད་བཞི་སྦྱོར་གྱི་རིགས་པས་དཔྱད་པར་བྱའོ། །རྒྱུ་དད་སོགས་བྱང་ཆུབ་གསུམ་གྱི་ལམ་བདེན་པར་གྲུབ་པ་རང་གི་ངོ་བོས་གྲུབ་པ་རང་གི་མཚན་ཉིད་ཀྱིས་གྲུབ་པ་ཡིན་ན། ཡུལ་ལ་ལྟོས་མི་དགོས་པ་དང་། དེ་ལ་གཞན་གྱི་བར་མེད་པ་དང་། དེའི་འབྲས་བུ་བྱང་ཆུབ་བསྐྱེད་པའི་བྱ་བ་བྱེད་མི་རུང་། འབྲས་བུ་བྱང་ཆུབ་གསུམ་གྱི་གོ་འཕང་དེ་བདེན་པར་གྲུབ་པ་སོགས་ཡིན་ན་རྒྱུ་བསྒྲུབ་པས་འབྲས་བུ་བསྐྱེད་མི་རུང་ངོ་། །དེ་ལ་མཐའ་གཉིས་སེལ་ཚུལ་ནི། རྒྱུ་འབྲས་བུར་འཕོ་བ་མེད་ཅིང་སྐྱེ་བ་མེད་པས་རྟག་པའི་མཐའ་དང་བྲལ། རྒྱུ་སྔོན་དུ་སོང་བ་ལ་བརྟེན་ནས། འབྲས་བུ་འགགས་པ་མེད་པས་ཆད་པའི་མཐའ་དང་བྲལ་བ་སྟེ་དེ་ཐམས་ཅད་སྟོང་པ་དང་སྟོང་པ་རྟེན་འབྱུང་དང་སྟོང་དང་རྟེན་འབྱུང་དབྱེ་བསལ་མེད་པར་བསྒྲུབ་དགོས་སོ། །ལས་དེ་རྣམས་སུས་བསགས་ན་བཅོམ་ལྡན་འདས་ཀྱི་མདོ་སྡེ་ལས། གང་རྣམ་པར་རྟོག་པ་ལས་འབྱུང་གི་རྣམ་པར་མི་རྟོག་པས་ནི་མ་ཡིན་ནོ།། ཞེས་དང་། བྱང་ཆུབ་སེམས་འགྲེལ་ལས། ཀུན་རྫོབ་ཉོན་མོང་ལས་ལས་བྱུང་། ། ལས་ནི་སེམས་ལས་བྱུང་བ་ཡིན། །སེམས་ནི་བག་ཆགས་རྣམས་ཀྱིས་བསགས། ། བག་ཆགས་བྲལ་ན་བདེ་བ་སྟེ། །བདེ་བའི་སེམས་ནི་ཞི་བ་ཉིད། །ཅེས་དང་། ལང་ཀར་གཤེགས་པ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་འགྱུར་ན་མི་རུང་གི །ངས་འདི་བྱིས་པ་རྣམས་ལ་ཡོངས་མ་བསྟན། །ཞེས་དང་། ཀུན་མཁྱེན་ཆེན་པོས། དེ་ལྟར་སྲིད་ཞིར་འདུ་བྱེད་སོགས། དེ་ལྟ་བུའི་བདེན་པ་བཞི་པོ་དེ་རྟེན་འབྲེལ་ཡིན། དེ་གང་ལས་བྱུང་ན་དོན་དམ་པའི་བདེན་པ་དེ་ལས་བྱུང་བ་ཡིན། ཇི་ལྟར་བྱུང་ན་ཆོས་ཉིད་ངོ་བོ་ཀ་ནས་དག་པའི་བདེན་པ་དེ་ལས་ཀུན་རྫོབ་རྒྱུ་འབྲས་བསླུ་བ་མེད་པའི་ཆོས་ཐམས་ཅད་དཔེར་ན་ནམ་མཁའ་ལས་སྤྲིན་འབྱུང་བ་དང་། ཆུ་ལས་རླབས་འབྱུང་བ་དང་ཉི་མ་ལས་འོད་བྱུང་བ་ལྟ་བུ་ཡིན་པས་དེ་ལྟར་ཀུན་རྫོབ་ཀྱི་ཆོས་ཐམས་ཅད་འབྱུང་བས་མེད་ན་མི་འབྱུང་ངེས་པའི་རྒྱུ་ཡིན་མ་གཏོགས་བསྐྱེད་བྱ་སྐྱེད་བྱེད་ཀྱི་རྒྱུ་འབྲས་མཚན་ཉིད་པ་མིན་པས། དེ་ལྟ་བུའི་ཀུན་རྫོབ་དང་དོན་དམ་གཉིས་དབྱེར་མེད་དུ་ཤེས་ན་ཤེས་རབ་ཀྱི་ལྟ་བ་དག་འཁྲུལ་པའི་ངོས་ནས་རྒྱུ་འབྲས་སྤང་བླང་ཡོད་པར་ཤེས་ནས་རྒྱུ་འབྲས་ལ་བླང་དོར་བྱེད་དགོས་ཏེ། ཨོ་རྒྱན་ཆེན་པོས། ལྟ་བ་ནམ་མཁའ་བས་ཀྱང་མཐོ། ལས་རྒྱུ་འབྲས་བག་ཕྱེ་བས་ཀྱང་ཞིབ། ཅེས་པས་རྒྱུ་འབྲས་ལ་སྤང་བླང་བྱས་པས་ཐབས་ཀྱི་སྤྱོད་པ་དག་ནས་དེ་ལྟ་བུའི་ཚོགས་གཉིས་ཟུང་འཇུག་གམ་བདེན་གཉིས་ཟུང་འཇུག་གིས་འབྲས་བུ་སྐུ་གཉིས་ཟུང་འཇུག་གི་གོ་འཕང་ཐོབ་པ་ཡིན་ནོ། ། ལས་དང་པོ་པས་དོན་དམ་པར་མེད་པས་མེད་གོ་མི་ཆོད་པས་དགེ་སྡིག་ལ་བླང་དོར་བྱེད་དགོས། བྱེད་ལུགས་ལ་དྲན་ཤེས་བཞིན་བག་ཡོད་གསུམ་གྱི་སྒོ་ནས་དང་པོ་བླང་དོར་གྱི་གནས་མི་བརྗེད་པའི་དྲན་པ་སྒོ་བ་ལྟ་བུ། སྒོ་གསུམ་ལ་བརྟགས་པར་བྱེད་པའི་ཤེས་བཞིན་བྱ་ར་བ་ལྟ་བུ། བླང་དོར་གྱི་གནས་ལ་གཟོབ་པ་ལྷུར་ལེན་པ་བག་ཡོད་བག་མ་ལྟ་བུ་སྟེ་དེ་ལྟ་བུའི་རྫི་བོ་དེ་གསུམ་གྱི་རང་གི་སྒོ་གསུམ་གྱི་སྤྱོད་པ་དང་ཁྱད་པར་སེམས་འདི་ལ་བརྟག་ནས་དགེ་མི་དགེ་བར་མའི་རྟོག་པ་གསུམ་ཡོད་པས། མི་དགེ་བའི་རྟོག་པ་སྐྱེས་ན་ཕག་སྣ་གཏུན་བུས་རྒྱོབ། སྤྲ་མེ་སེན་རྩེས་སོད། རྟོག་པ་འབུར་འཇོམ་བྱེད་དགོས་པ་གསུམ་དང་ལྡན་པ་བྱ་དགོས་སོ། །དེ་ཡན་ཆད་ཀྱིས་ལས་རྒྱུ་འབྲས་ཚར་རོ། །

ལྔ་པ། ཐར་བའི་ཕན་ཡོན།

ད་འཁོར་བ་མཐའ་དག་ལ་བློ་ལྡོག་ནས་འགྲོ་ས་བཙལ་དགོས་པས་ཐར་པའི་ཕན་ཡོན་བསམ་དགོས། དེ་ལྟར་བློ་ལྡོག་རྣམ་པ་བཞིས་འཁོར་བ་མཐའ་དག་ལ་བློ་ལྡོག་ནས་ཐར་བའི་ཕན་ཡོན་བསམ་པ་ལ་སྔོན་འཁོར་བ་བདེ་བར་བཟུང་ནས་སྡུག་བསྔལ་བར་མ་མཐོང་ཡང་ད་འཁོར་བའི་ཉེས་དམིགས་བསམ་ནས་ཐར་པའི་ཕན་ཡོན་དྲན་པས་བྱང་ཆུབ་གསུམ་གྱི་གོ་འཕང་དེའི་ཡོན་ཏན་ཞི་བ་བསིལ་བ་གྱ་ནོམ་པ་སྤང་བ་དང་རྟོགས་པའི་ཡོན་ཏན་རྣམས་དྲན། དེ་ལ་བདམས་ང་ཞིག་བྱེད་ན། ཐམས་ཅད་མཁྱེན་པའི་གོ་འཕང་བསྒྲུབ་དགོས་དལ་འབྱོར་རྙེད་དཀའ་སོགས་བསམ་ནས་དེ་རྙེད་པར་དཀའ་བའི་ཕན་ཡོན་སོགས་དྲན། སྐྱབས་འགྲོ་སོགས་ནས་དངོས་གཞིའི་ཡོན་ཏན་རྣམས་དྲན་དགོས། ད་ཐར་པ་བྱང་ཆུབ་གསུམ་གྱི་གོ་འཕང་ཞིག་བསྒྲུབ་པ་ལ་སྐྱེས་བུ་གསུམ་གྱི་ལམ་གྱི་རིམ་པ་ལ་འདུས་པས་སྐྱེས་བུ་གསུམ་གྱི་ལམ་གྱི་རིམ་པ་དྲན་དགོས་དེ་ལ་ཐར་པ་བྱང་ཆུབ་གསུམ་གྱི་ལམ་གྱི་རྟེན་ལུས་རྟེན་ཞིག་ལོན་དགོས་པས། སྐྱེས་བུ་ཆུང་ངུའི་ལམ་གྱི་རིམ་པ་ཉམས་སུ་བླང་དགོས་དེ་ལ་ཐེག་པ་འཇིག་རྟེན་པའི་ཐེག་པ་ཀུན་སློང་མངོན་མཐོ་དོན་གཉེར་གྱི་ཀུན་སློང་དགེ་རྩ་བསོད་ནམས་ཆ་མཐུན་ནམ་སྲིད་པ་སྒྲུབ་པའི་ལས་ཡིན། ལྟ་བ་འཇིག་རྟེན་པའི་ཡང་དག་པའི་ལྟ་བ་ཡིན། དགེ་བའི་རྩ་བ་དེ་རྣམས་མདོར་བསྡུ་ན་ངེས་བྱུང་གི་བསམ་པས་མ་ཟིན་སྟོང་ཉིད་ཀྱི་ལྟ་བས་མ་ཟིན། བྱང་ཆུབ་སེམས་ཀྱིས་མ་ཟིན་པའི་དགེ་བའི་རྩ་བ་རྒྱ་ཆེ་ཆུང་ཅི་བསྒྲུབ་ན་སྐྱེས་བུ་ཆུང་ངུའི་དགེ་རྩ་ཡིན། འཇིག་རྟེན་པའི་ཡང་དག་པའི་ལྟ་བ་དེ་བསྒོམ་ན་འབྲས་བུ་ལྷ་མིའི་གོ་འཕང་ཐོབ། སྐྱེས་བུ་འབྲིང་གི་ལམ་གྱི་རིམ་པ་ཇི་ལྟར་ཡིན་ན་སངས་རྒྱས་ཀྱི་བཀའི་ནང་གསེས་འཇིག་རྟེན་ལས་འདས་པའི་ཐེག་པ། ཀུན་སློང་རང་འདོད་ཡིད་བྱེད་ཀྱི་བསམ་པ་ཀུན་སློང་ཡིན། དགེ་རྩ་ཐེག་དམན་ཐར་པ་ཆ་མཐུན་ཡིན། ལུང་གི་ཆོས་སྡེ་སྣོད་གསུམ། རྟོགས་པའི་ཆོས་བསླབ་པ་གསུམ། འདུལ་བའི་བསྟན་དོན་ཚུལ་ཁྲིམས་ཀྱི་བསླབ་པ་སོགས་ཚུལ་ཁྲིམས་ཀྱི་བསླབ་པ། མདོ་སྡེའི་བསྟན་དོན་མི་སྡུག་པ་སོགས་ཏིང་ངེ་འཛིན་གྱི་བསླབ་པ། མངོན་པའི་བསྟན་དོན་གང་ཟག་གི་བདག་ང་ཞེས་བྱ་བ་གང་ན་འདུག་བརྟག་ན་ཕུང་པོ་ལྔ་དང་ཁམས་དྲུག་ལ་སོགས་པ་གཅིག་དང་ཐ་དད་དུ་བརྟག་ན་གང་ཟག་གི་བདག་མེད་པར་རྟོགས། ཆོས་ཀྱི་བདག་རགས་པ་མེད་པར་རྟོགས། དེ་ཤེས་རབ་ཀྱི་བསླབ་པ་ཡིན་པས་དེ་ཡུན་རིང་པོར་མི་ཚེ་གསུམ་དང་ལོ་སྟོང་ལ་སོགས་པ་གོམས་པས་འབྲས་བུ་ལྷག་བཅས་ལྷག་མ་མེད་པའི་དགྲ་བཅོམ་པའི་འབྲས་བུ་ཐོབ་བོ། །རང་རྒྱལ་ནི་ལྟ་བ་ཅུང་ཟད་ཙམ་མ་གཏོགས་ཉན་ཐོས་དང་འདྲའོ། །མདོར་ན་ངེས་འབྱུང་གི་བསམ་པས་ཟིན། སྟོང་ཉིད་ཉི་ཚེ་བའི་རྟོགས་པས་ཟིན་བྱང་ཆུབ་སེམས་ཀྱིས་མ་ཟིན་པའི་དགེ་རྩ་རྒྱ་ཆེ་ཆུང་གང་བསྒྲུབ་ཀྱང་ཐེག་དམན་ཐར་པ་ཆ་མཐུན་གྱི་དགེ་རྩ་ཡིན། ད་སྔ་མ་གང་བྱས་ད་ལྟའི་ལུས་ལ་ལྟོས། །ཞེས་པས། སྐྱེ་བ་སྔོན་མ་དེས་དགེ་རྩ་རྒྱ་ཆེན་པོ་བསྒྲུབས་པས་ད་ལྟའི་ལུས་འདི་ཐོབ། ཕྱི་མ་གར་སྐྱེ་ད་ལྟའི་ལས་ལ་རགས། །ཞེས་པས། རང་ལ་རགས་ལས་པས། རང་གི་མངོན་མཐོ་དང་ཉན་རང་གི་ལམ་རྣམས་བསྒྲུབ་དགོས་མི་འདུག་པས། གང་བ སྒྲུབ་དགོས་ན་སྐྱེས་བུ་ཆེན་པོའི་ལམ་ལ་ཞུགས་ནས་སངས་རྒྱས་ཀྱི་གོ་འཕང་ཐོབ་དགོས་པས། དེ་སྒྲུབ་པར་བྱེད་པ་ལ་སྐྱེས་བུ་ཆེན་བོའི་ལམ་ལ་ཞུགས་དགོས། དེ་སངས་རྒྱས་ཀྱི་བཀའ་ཐེག་པ་ཆེན་པོ་སྐྱེས་བུ་ཆེན་པོའི་ལམ་གྱི་རིམ་པ་ཀུན་སློང་བྱང་ཆུབ་ཀྱི་སེམས་དགེ་རྩ་ཐེག་ཆེན་ཐར་པ་ཆ་མཐུན་དེ་གང་ཡིན་ན། རིང་ལམ་གྱི་ཚོགས་གཉིས། ཉེ་ལམ་གྱི་བསྐྱེད་རྫོགས་གཉིས། མྱུར་ལམ་གྱི་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གཉིས་ཏེ་ལྟ་བ་ཆེན་པོ་གསུམ་གྱི་ལྟ་བ་དེ་ལྟ་བུ་རྟོགས་སྒོམ་མཐར་ཕྱིན་ན། མདོ་ལུགས་ལ་སངས་རྒྱས་དང་། སྔགས་ཀྱི་ལུགས་ལ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པ་ནི་འབྲས་བུ་ཡིན་ནོ། །མདོར་ན་ངེས་འབྱུང་གི་བསམ་པས་ཟིན། བདག་མེད་གཉིས་རྟོགས་ཀྱི་ཤེས་རབ་ཀྱིས་ཟིན། བྱང་ཆུབ་སེམས་ཀྱིས་ཟིན་པའི་དགེ་རྩ་རྒྱ་ཆེ་ཆུང་གང་བ སྒྲུབ་ན་ཐེག་ཆེན་ཐར་པ་ཆ་མཐུན་གྱི་དགེ་རྩ་ཡིན། དེ་ལ་བདམས་ང་བྱས་ནས་རིང་ལམ་ཉེ་ལམ་མྱུར་ལམ་གསུམ་ལས། མྱུར་ལམ་འོད་གསལ་རྫོགས་པ་ཆེན་པོ་བསྒོམ་དགོས། རིང་ལམ་མཚན་ཉིད་ཐེག་པས་བསྐལ་བ་གྲངས་མེད་གསུམ་སོགས་ཀྱི་བར་དུ་རྫོགས་སྨིན་སྦྱང་བ་རྒྱ་མཚོ་ལྟ་བུ་མཐར་ཕྱིན་པར་བྱེད་པ་ནི་བཟང་པོ་སྤྱོད་པའི་སྨོན་ལམ་ལས་བཤད་པ་ལྟར། སེམས་ཅན་རྒྱ་མཚོ་ལྟ་བུ་སྨིན་པར་བྱེད། ཞིང་ཁམས་རྒྱ་མཚོ་ལྟ་བུ་སྦྱོང་བ། སངས་རྒྱས་རྒྱ་མཚོ་ལྟ་བུ་མཆོད་པས་ཐུགས་སུན་པར་མ་བྱས་མགུ་བར་བྱས་ནས་ཚོགས་གཉིས་རྒྱ་མཚོ་རྫོགས་པར་མ་བྱས་པར་སངས་རྒྱས་ཐོབ་པ་མིན་ལ། ཉེ་ལམ་རྡོ་རྗེ་ཐེག་པས་སྨིན་བྱེད་ཀྱི་དབང་ལ་དང་པོ་བྱ་རྒྱུད་སོགས་གསུམ་ལ་ཐུན་མོང་རིགས་ལྔའི་དབང་གིས་སྨིན་པར་བྱས་ནས་རང་ལམ་གྱི་དམ་ཚིག་རྣམ་པར་དག་པས་རྒྱུད་བསྡམས་ཏེ་མཚན་བཅས་མཚན་མ་མེད་པའི་རྣལ་འབྱོར་བསྒོམ་ནས་མི་ཚེ་གསུམ་མམ་ལྔའམ་བདུན་གྱིས་སངས་རྒྱས་བསྒྲུབ་པ་ཡིན་ལ། མ་ཧཱ་དང་ཨ་ནུ་གཉིས་ཀ་སྨིན་བྱེད་དམ། འཇུག་སྒོའམ་སྡོམ་ཆོག་དམ་ཚིག་རྣམ་པར་དག་པས་རྒྱུད་བསྡམས་ནས། ཐབས་བསྐྱེད་པའི་རིམ་པ་དང་ཤེས་རབ་རྫོགས་པའི་རིམ་པ་གཉིས་བསྒོམས་ནས་མི་ཚེ་གཅིག་གིས་རྡོ་རྗེ་འཆང་གི་གོ་འཕང་བསྒྲུབ་པ་ཡིན་ལ། འོད་གསལ་རྫོགས་པ་ཆེན་པོའི་ལུགས་ཀྱིས་སྤྲོས་བཅས་སྤྲོས་མེད་སོགས་ཀྱི་དབང་ཐོབ། དམ་ཚིག་རྣམ་པར་དག་པས་རྒྱུད་བསྡམས་ནས། ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གཉིས་ཀྱི་ལམ་ཉམས་སུ་བླངས་པས་ལོ་དང་ཟླ་བས་འཕོ་བ་ཆེན་པོའི་སྐུ་བསྒྲུབ་པ་ཡིན་པས་རིང་ལམ་སོགས་ལས་མྱུར་ལམ་ཉམས་སུ་ལེན་དགོས་སོ། །

དྲུག་པ། བཤེས་གཉེན་བསྟེན་པ།

དྲུག་པ་བཤེས་གཉེན་བསྟེན་ཚུལ་ནི། དེ་ལྟ་བུའི་ལམ་དེ་སྟོན་པ་ཞིག་བཙལ་ན། འགྲོ་བ་ལྷ་དང་བཅས་པ། བདུད་དང་བཅས་པ། སྐྱེ་དགུའི་བདག་པོ་ཚངས་པ་དང་བཅས་པས་སྟོན་མི་ཤེས། རང་ཉིད་ལ་བརྩེ་བའི་ཕ་མ་དང་གཉེན་བཤེས་གྲོགས་དགའ་མཛའ་ལ་སོགས་པས་སྟོན་མི་ཤེས། དེ་ལྟ་བུའི་ལམ་དེ་སུས་སྟོན་ན་བླ་མ་དགེ་བའི་བཤེས་གཉེན་ཞིག་གིས་སྟོན་ལ། དགེ་བའི་བཤེས་གཉེན་ནི་ཕན་འདོགས་པ་པོ་ཡིན་པས་དགེ་བའི་བཤེས་གཉེན་དང་དགེ་བའི་གྲོགས་པོ་བསྟེན་དགོས། དེ་གཉིས་ལ་མ་བརྟེན་པར་ཐར་པ་དང་ཐམས་ཅད་མཁྱེན་པའི་གོ་འཕང་བསྒྲུབ་མི་ཤེས་ལ༑ དེ་གཉིས་མ་བསྟེན་པར་རང་བཟོ་དང་ཕོ་ཚོད་ཀྱིས་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པ་མདོ་རྒྱུད་བསྟན་བཅོས་ཐམས་ཅད་ནས་མ་གསུངས་ལ། དེ་གཉིས་མ་བསྟེན་པར་ཐར་པའི་ལམ་རང་གིས་བསྒྲུབ་ཤེས་མི་ཤེས་བརྟག་དགོས་པས་དེ་ལྟར་བརྟག་ན་རང་གིས་བསྒྲུབ་མི་ཤེས་པས། བླ་མ་དགེ་བའི་བཤེས་གཉེན་ཞིག་བསྟེན་དགོས་ལ་དེ་ཡང་སུ་ཐུག་ཐུག་ཞིག་གིས་མི་ཕན་ཏེ། ལྟ་སྤྱོད་ཕྱིན་ཅི་ལོག་ཏུ་སྟོན་པ་ཞིག་བླ་མ་བྱས་ནས་བསྟེན་ན་བདུད་ཀྱི་བཤེས་གཉེན་དང་། གྲོགས་པོ་བྱས་ནས་བསྟེན་ན་བདུད་ཀྱི་གྲོགས་པོ་ཡིན་པས། དགེ་བའི་བཤེས་གཉེན་མཚན་ཉིད་དང་ལྡན་པ་ཞིག་བཙལ་བར་བྱེད་པ་ལ། དང་པོ་བླ་མ་བརྟག་དགོས། དེ་ལ་རིང་པོའི་རྣ་ཐག ཐུང་ཐུང་གི་མིག་རིག མོ་དང་ཕྲ་ལ་སོགས་པས་བརྟག་པ་དང་། ཁྱད་པར་ཆོས་ཀྱིས་བརྟག་དགོས་ཏེ། ཉན་རང་གི་དགེ་བའི་བཤེས་གཉེན་ནམ་མཁན་པོ་ལྔ་ཕྲུག་ཉེར་གཅིག་དང་ལྡན་པའི་སོ་ཐར་ཞུས་ནས་ལོ་བཅུ་ལོན་པ་དེའི་ཚུལ་ཁྲིམས་ཉམས་པ་མ་བྱུང་པ་སོགས་བརྟན་མཁས་བཙུན་པའི་ཡོན་ཏན་དང་ལྡན་པ༑ བྱང་ཆུབ་སེམས་དཔའི་དགེ་བའི་བཤེས་གཉེན་ཞི་བ་དུལ་བ་ཉེ་བར་ཞི་བ་ལ་སོགས་པའི་ཡོན་ཏན་བཅུ་ལྡན། རྡོ་རྗེ་ཐེག་པའི་བཤེས་གཉེན་ནམ་བླ་མ་རྒྱུད་སྡེ་རང་རང་གི་གཞུང་ནས་བཤད་པའི་ཡོན་ཏན་དང་ལྡན་པ། ཁྱད་པར་མ་ཧཱ་ཨ་ནུ་གཉིས་ཀྱི་བླ་མ་སྟོན་པ་མཛོད་ལྡན་ཆུ་བོ་རྫོགས་སོགས་ཡོན་ཏན་བརྒྱད་ལྡན། དེ་ལས་ཁྱད་པར་མན་ངག་སྟོན་པའི་བླ་མ། རྫོགས་པ་ཆེན་པོ་རང་ལམ་གྱི་དབང་འོག་མའི་དབང་བཞི་པ་ལས་སྤྲོས་པའི་སྤྲོས་བཅས་སྤྲོས་མེད་སོགས་ཀྱི་དབང་བཞི་ཐོབ་པས་རྒྱུད་སྨིན་པ། དམ་ཚིག་ལ་བསྲུང་དུ་ཡོད་པ་རིམ་གྱིས་པའི་དམ་ཚིག་རྩ་བ་བླ་མའི་སྐུ་གསུང་ཐུགས་ལ་དབྱེ་བ་ཉི་ཤུ་རྩ་བདུན། ཡན་ལན་གི་དམ་ཚིག་ཉེར་ལྔ་དང་། བསྲུང་དུ་མེད་པ་ཅིག་ཆར་པའི་མེད་ཕྱལ་སོགས་ཏེ། མེད་ཕྱལ་གཉིས་ཀ་དག་དང་། གཅིག་པུ་དང་ལྷུན་གྲུབ་གཉིས་ལྷུན་གྲུབ་ཀྱི་དམ་ཚིག་རྣམ་པར་དག་པས་རྒྱུད་བསྡམས། གྲོལ་བྱེད་ཀྱི་གདམས་པ་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གཉིས་ཀྱི་ཆོས་ཉིད་མངོན་སུམ་དུ་མཐོང་བ། ལམ་སྣང་བ་བཞིའི་ས་མཚམས་ཀྱི་གོ་མྱོང་རྟོགས་པ་ཅི་རིགས་དང་ལྡན་པ། སློབ་མ་བཟང་ངན་མེད་པར་རྗེས་སུ་འཛིན་པ། བརྒྱུད་པའི་བྱིན་རླབས་དང་ལྡན་པ་བརྒྱུད་པ་གསེར་གྱི་ཉག་ཐག་ལ་དམ་སེལ་གྱི་གཡའ་ཡིས་མ་གོས་པ། བརྒྱུད་པ་གོང་མའི་བྱིན་རླབས་བུམ་པ་གང་བྱོའི་ཚུལ་དུ་སྙན་ནས་སྙན་དུ་བརྒྱུད་པའི་བྱིན་རླབས་དང་ལྡན་པ་སྟེ་དེ་ལྟ་བུའི་བླ་མ་ཡོན་ཏན་ཐམས་ཅད་དང་ལྡན་པ་ཞིག་ཨེ་ཡིན་བརྟག ཁྱད་པར་བླ་མ་བརྟག་པ་གཅིག་པུ་བྱང་ཆུབ་ཀྱི་སེམས་ཡོད་མེད་ཀྱིས་བརྟག བྱང་ཆུབ་ཀྱི་སེམས་དང་ལྡན་ན་འབྲེལ་ཚད་དོན་ལྡན་བཟང་འབྲེལ་ཚེ་གཅིག་གིས་སངས་རྒྱས། ངན་འབྲེལ་འཁོར་བ་མཐའ་ཅན་ཡིན་ལ། དེའི་སྟེང་དུ་ཆེན་པོ་གསུམ་གྱི་ལྟ་བ་ལ་གོ་མྱོང་རྟོགས་གསུམ་དང་ལྡན་པ་ཞིག་ཡིན་མིན་བརྟག བར་དུ་བླ་མ་བསྟེན་པ་ནི། མཉེས་པ་གསུམ་གྱིས་ཞབས་ཏོག་གི་སྒོ་ནས་བསྟེན་ཅིང་། དེ་བསྟེན་པའི་ཚེ་སྒྲུབ་པ་གཙོ་བོར་མི་བྱེད་པར་ཐོས་བསམ་གཉིས་གཙོ་བར་བྱེད་དགོས། ཐ་མ་དགོངས་སྤྱོད་སློབ་པའི་ཚེ་དང་པོ་བླ་མའི་ཐུགས་དམ་གྱི་མཐིལ་གང་ཡིན་པ་དེ་རང་རྒྱུད་ལ་ལོན་དགོས། བླ་མའི་དགོངས་པ་མ་ལོན་པར་སྤྱོད་པ་ལ་བསླབ་ན་ཚུལ་འཆོས་སུ་འགྲོ་བས་དགོངས་པ་ལོན་ན་དེ་ནས་སྤྱོད་པ་བསླབ་དགོས།