གཉིས་པ། བྱང་ཆུབ་མཆོག་ཏུ་སེམས་བསྐྱེད་པ།

གཉིས་པ་ཐེག་ཆེན་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་ལ། དེའི་བསམ་པ་རྒྱ་ཆེ་ན་ཆོས་ཐེག་པ་དམན་པའི་ཆོས་ཉམས་སུ་བླངས་ན་ཐེག་པ་ཆེན་པོའི་ཆོས་སུ་འགྲོ། ལས་དང་པོ་པ་རྣམས་ཀྱི་ཐད་ནས་ཐེག་པ་ཆེ་ཆུང་དུ་འཇོག་པའི་རྒྱུ་ཀུན་རྫོབ་བྱང་ཆུབ་ཀྱི་སེམས་ཡོད་མེད་ལས་ཆོས་ཐེག་པ་ཆེ་ཆུང་གིས་མིན་པས་ཀུན་རྫོབ་བྱང་ཆུབ་ཀྱི་སེམས་གཙོ་ཆེ་ཞིང་ལྟ་བ་གྲོགས་ལ་ཡོད་དགོས། ངེས་པའི་དོན་ལ་མཐར་ཐུག་གི་སྐྱེལ་སོ་ལ་དོན་དམ་པའི་བྱང་ཆུབ་ཀྱི་སེམས་དེ་ལས། ཀུན་རྫོབ་བྱང་ཆུབ་ཀྱི་སེམས་ཀྱིས་མཐར་ཐུག་གི་འབྲས་བུ་མི་ཐོབ། དེ་ཡང་ལས་དང་པོ་པའི་ཚེ་བསམ་པ་བཟང་པོ་ཞིག་ཡོད་དགོས། བསམ་པ་བཟང་ན་ས་དང་ལམ་ཡང་བཟང་། ། བསམ་པ་ངན་ན་ས་དང་ལམ་ཡང་ངན། །ཞེས་བསམ་པ་བྱང་ཆུབ་ཀྱི་སེམས་དང་ལྡན་ན་ས་བཟང་པོ་ས་བཅུ་དང་། ལམ་བཟང་པོ་ལམ་ལྔ་བགྲོད་པ་དང་། བསམ་པ་ངན་ན་ས་ངན་པ་ཁམས་གསུམ་ས་དགུ། ལམ་ངན་པ་འགྲོ་བ་ལམ་རྒྱུད་ལྔ་ལ་བརྟེན་ནས་འགྲོ་དགོས་པ་ཡིན། དེས་ན་ལས་དང་པོ་པའི་ཚེ་ལྟ་བ་ལ་རག་མི་ལས། སྒོམ་པ་ལ་རག་མི་ལས། བསམ་པ་བྱང་ཆུབ་ཀྱི་སེམས་དེ་ལ་རག་ལས་པ་ལས་གཞན་གང་ལའང་རག་མི་ལས། ལྟ་བ་ཉན་རང་གིས་ཀྱང་རྟོགས་ཡོད་དེ། ས་སྐྱ་པཎ་ཆེན་གྱིས། སྟོང་ཉིད་ཉན་ཐོས་རྣམས་ཀྱིས་བསྒོམས། །དེ་ཡི་འབྲས་བུ་འགོག་པ་ཡིན། ། ཞེས་པ་བཞིན་ནོ། །དེས་ན་བསམ་པ་བྱང་ཆུབ་ཀྱི་སེམས་དེ་དང་། ཚོགས་བསགས་པ་གཉིས་ལས་འབྲས་བུ་སངས་རྒྱས་ཐོབ་པ་ཡིན་པས། གསར་མས་ཀུན་རྫོབ་སེམས་བསྐྱེད་གཙོ་ཆེ་བར་གསུངས་པ་དང་། རྙིང་མ་པས། དྲང་བའི་དོན་དང་། ངེས་དོན་ཙམ་དང་། ངེས་པའི་དོན་གསུམ་ལས། དང་པོ་ཀུན་རྫོབ་བྱང་ཆུབ་ཀྱི་སེམས་ཡོད་དགོས། ངེས་དོན་ཙམ་ལ་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་ཟུང་དུ་འཇུག་དགོས། ཉན་རང་གིས་ཀྱང་ཆེན་པོ་གསུམ་གྱི་ལྟ་བ་མ་རྟོགས། ངེས་པའི་དོན་ལ་མཐར་ཐུག་གི་སྐྱེལ་སོ་མཐར་ཐུག་པ་དེ་དོན་དམ་བྱང་ཆུབ་ཀྱི་སེམས་ཡིན་ཏེ། ཀླུ་སྒྲུབ་ཀྱིས་བྱང་ཆུབ་སེམས་ནི་ཐེག་པ་ཆེན་པོ་སོགས་དང་། དཔལ་ལྡན་ཟླ་བས་འཇུག་པ་ལས་མཐར་ཐུག་ཐེག་པ་གཅིག་ཏུ་བསྒྲུབ་པ་ལ་དོན་དམ་བྱང་ཆུབ་སེམས་ཀྱིས་མཐར་ཐུག་ཐེག་པ་གཅིག་ཏུ་བསྒྲུབ་པ་མ་གཏོགས། ཀུན་རྫོབ་བྱང་ཆུབ་སེམས་ཀྱིས་མཐར་ཐུག་ཐེག་པ་གཅིག་ཏུ་བསྒྲུབ་མི་ནུས་སོ། །དེ་ལྟ་བུའི་བསམ་པ་བཟང་པོ་བྱང་ཆུབ་ཀྱི་སེམས་དེ་མི་བསམ་བཟང་ཞིག་ལ་སྐྱེ་བ་མ་གཏོགས་བསམ་ངན་ཞིག་ལ་མི་སྐྱེ་པས། དེ་སྐྱེ་བའི་ཐབས་ལ། ཚད་མེད་བཞིའི་བློ་སྦྱོང་པ། བྱང་ཆུབ་མཆོག་ཏུ་སེམས་བསྐྱེད་པ། སྨོན་འཇུག་གི་བསླབ་བྱ་བཟུང་བ་དང་གསུམ་ལས། དང་པོ་ཚད་མེད་བཞིའི་བློ་སྦྱོང་དགོས། དེས་བློ་མ་སྦྱང་ན་བདག་རང་གི་དོན་སྒྲུབ་པའི་བསམ་སྦྱོར་མི་སྤང་ཞིང་རང་དོན་སྒྲུབ་ན་ཆོས་འཇིག་རྟེན་གཉིས་ཀྱི་ངོས་ནས་རང་འདོད་བསྒྲུབ་ནས་འགྲུབ་པའི་དཔེ་མེད་དེ། ད་ལྟ་མངོན་སུམ་ཚད་མས་གཞལ་ན༑ འཇིག་རྟེན་འདིའི་རྒྱལ་པོ་བློན་པོ། མི་དྲག་རང་འདོད་ཕུག་བཅུག་རྣམས་མཐར་དེ་བས་སྡུག་མེད་པའི་སར་ལྷུང་རང་གཞན་གཉིས་ཀ་ཕུང་ལ་སྦྱོར་བ་ལས་མེད། ཆོས་ཀྱི་ཕྱོགས་ནས་རང་འདོད་སྒྲུབ་པའི་ཉན་རང་རྣམས་རྒྱལ་སྲས་བྱང་ཆུབ་སེམས་དཔའི་སའི་ཡོན་ཏན། སངས་རྒྱས་བཅོམ་ལྡན་འདས་ཀྱི་འབྲས་བུའི་ཡོན་ཏན་ཐམས་ཅད་མི་ཐོབ་པ་རང་འདོད་འདི་ལ་ཐུག་པས། ད་རང་འདོད་དེ་བསྒྲུབ་མི་ཉན་པར། བསམ་པ་བྱང་ཆུབ་ཀྱི་སེམས་རྒྱུད་ལ་བསྐྱེད་དགོས། དེ་ཡང་ཞི་བ་ལྷས། བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེ་གྱུར་ཅིག །སྐྱེས་པ་ཉམས་པ་མེད་པར་ཡང་། །གོང་ནས་གོང་དུ་འཕེལ་བར་ཤོག །ཅེས་པས། དང་པོ་བྱང་ཆུབ་སེམས་མཆོག་རིན་པོ་ཆེ་ཞེས་པ། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་འདོད་ཀྱི་བསམ་པ་དེ་ཡིན། མ་སྐྱེས་པ་སྐྱེ་བའི་ཐབས་ཚད་མེད་བཞིའི་བློ་སྦྱངས་པ་དེ་ཡིན། མི་ཉམས་པ་གོང་ནས་གོང་དུ་འཕེལ་བའི་ཐབས་བྱང་ཆུབ་མཆོག་ཏུ་སེམས་བསྐྱེད་པ་དང་། དེའི་བསླབ་བྱ་ལ་བསླབ་པ་ཡིན་པས། དེ་ལྟར་མ་སྐྱེས་པ་སྐྱེ་བའི་ཐབས་དང་སྐྱེ་བ་མི་ཉམས་པ་དང་མི་ཉམས་པ་གོང་ནས་གོང་དུ་འཕེལ་བའི་ཐབས་ལ་རྒྱས་པ་བྱེད་ན་ཚད་མེད་བཞི། འབྲིང་བྱམས་སྙིང་རྗེ་གཉིས། བསྡུ་ན་སྙིང་རྗེ་ཉག་མ་གཅིག་པོ་འདི་བསྒོམ་དགོས། དེ་ལྟ་བུའི་བྱང་ཆུབ་ཀྱི་སེམས་མ་སྐྱེ་པ་སྐྱེ་བའི་ཐབས་ཚད་མེད་བཞི་ལ། ཚད་མེད་དང་། ཚངས་གནས་བཞི། ཚངས་པའི་གནས་པ་བཞི་ཚངས་པ་མདུན་ན་འདོན་སོགས་བཞི་ཡིན་ལ། དེ་ལ་སྐྱེ་བའི་རྒྱུ་བྱམས་སོགས་བཞི་དམིགས་པ་དང་བློ་ཚད་མེད་མ་ཡིན་པ་ཁོལ་བུ་ཁོལ་བུར་བཅད་ནས་བསྒོམ་པ་ཡིན། དེ་བཞི་ལ་ཚད་མེད་མི་ཟེར་བའི་རྒྱུ་བྱམས་སོགས་བཞི། མདོར་ན་ངེས་འབྱུང་གི་བསམ་པས་མ་ཟིན། བྱང་ཆུབ་ཀྱི་སེམས་ཀྱིས་མ་ཟིན། སྟོང་ཉིད་ཀྱི་ལྟ་བས་མ་ཟིན། བདག་མེད་རྟོགས་པའི་ཤེས་རབ་ཀྱིས་མ་ཟིན་པས་ཚངས་གནས་ཞེས་ཟེར། དཔེར་ན་རྒན་མོ་བསམ་བཟང་ལྟ་བུའི་དམིགས་རྣམ་ཁོལ་བུ་ལ་བཅད་པ་མས་བུ་འདི་བདེ་ན་སྐྱིད་ན་སོགས་ལྟ་བུར་བསམ་པ་དེ་རྣམས་ཡིན། དེ་ཐམས་ཅད་མཁྱེན་པའི་ལམ་ལ་འགྲོ་བ་ཚད་མེད་བཞི་ཡིན། དེ་ཡང་ལམ་དུས་ཀྱི་བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་གྱི་དང་པོ་ཚད་མེད་བཞི་དང་། འབྲས་དུས་སངས་རྒྱས་ཀྱི་ཚད་མེད་བཞི་ཡིན། དེ་དམིགས་པའི་ཡུལ་ཚད་མེད། རྣམ་པའི་བློ་ཚད་མེད། དེའི་འབྲས་བུ་ཚད་མེད་པས་ཚད་མེད་ཅེས་པ་ཡིན། དེ་ཡང་གཞུང་བཤད་པའི་གོ་རིམ་ནས་དང་པོ་བྱམས་པ་ནས་སྨྲོས་ཀྱང་། མན་ངག་གི་ལུགས་ལ་དང་པོ་བཏང་སྙོམས་ཚད་མེད་ནས་མ་བསྒོམ་ན་གཞན་རྣམས་ཚངས་གནས་སུ་འགྲོ་བས། དང་པོ་བཏང་སྙོམས་ནས་བསྒོམ་དགོས། དེ་ཡང་སེམས་ཅན་བདེ་བ་རྒྱུ་འབྲས་གཉིས་དང་ལྡན་འདོད་བྱམས་པའི་ངོ་བོའམ། མཚན་ཉིད་དམ། རྣམ་པ་ཡིན། སེམས་ཅན་སྡུག་བསྔལ་རྒྱུ་འབྲས་གཉིས་དང་བྲལ་འདོད་སྙིང་རྗེའི་ངོ་བོའམ། མཚན་ཉིད་དམ་། རྣམ་པ་ཡིན། སེམས་ཅན་བདེ་བ་དང་མི་འབྲལ་བར་འདོད་པ་དགའ་བའི་ངོ་བོའམ། མཚན་ཉིད་དམ། རྣམ་པ་ཡིན། སེམས་ཅན་ཆགས་སྡང་གཉིས་དང་བྲལ་བར་འདོད་པ་བཏང་སྙོམས་ཀྱི་ངོ་བོའམ། མཚན་ཉིད་དམ། རྣམ་པ་ཡིན། དེ་ལ་ཡང་དམིགས་བཅས་ཀྱི་ཚད་མེད་དང་དམིགས་མེད་ཀྱི་ཚད་མེད་གཉིས་ལས། དེ་ལ་དམིགས་བཅས་ཀྱི་ཚད་མེད་བསྒོམ་དུས་དམིགས་རྣམ་སྤྲད་ནས་བསྒོམ་དགོས། དང་པོ་བྱམས་པའི་དམིགས་པ་ཡུལ་ནི། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག ཅེས་པས། སེམས་ཅན་བདེ་བ་དང་མི་ལྡན་པ་ཞིག་ལ་དམིགས་པ་ཡུལ་དང་། རྣམ་པ་བློ་བདེ་བ་རྒྱུ་འབྲས་གཉིས་དང་ལྡན་པར་འདོད་པ་ཡིན། སྙིང་རྗེ་ནི། སེམས་ཅན་སྡུག་བསྔལ་བ་ཞིག་ལ་དམིགས་པ་ཡུལ་དང་། རྣམ་པ་སྡུག་བསྔལ་རྒྱུ་འབྲས་གཉིས་དང་བྲལ་བར་འདོད་པ་ཡིན། དགའ་བ་ནི། སེམས་ཅན་བདེ་བ་རྒྱུ་འབྲས་གཉིས་དང་ལྡན་པ་ཞིག་ལ་དམིགས་པ་ཡུལ་དང་། རྣམ་པ་བདེ་བ་དེ་དང་མི་འབྲལ་བར་འདོད་པ་ཡིན། བཏང་སྙོམས་ལ། རང་རྒྱུད་ཀྱི་ཆགས་སྡང་དང་། གཞན་རྒྱུད་ཀྱི་ཆགས་སྡང་གཉིས་ལ་དམིགས་པ་ཡུལ་དང་། རྣམ་པ་དེ་སྙོམས་འདོད་ནས་ཆགས་སྡང་གཉིས་ཀྱི་བློ་ཞི་ནས་ཕན་འདོགས་པར་འདོད་པ་ཡིན། དེ་ལྟ་བུའི་ཚད་མེད་བཞི་པོ་དམིགས་རྣམ་སྤྲད་ནས་བསྒོམ། དམིགས་མེད་ནི་ལས་དང་པོ་པས། སྒྱུ་མ་དང་རྨི་ལམ་སོགས་སྒྱུ་མའི་དཔེ་བརྒྱད་ལ་བློ་སྦྱངས། རྟོགས་ལྡན་ཞིག་ཡིན་ན་རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད་ཅེས་པས་མཉམ་བཞག་དེའི་རྩལ་བྱམས་སྙིང་རྗེ་སོགས་བསྒོམ་པ་ཡིན། ད་ཚད་མེད་བསྒོམ་པར་བྱེད་པ་ལ། དང་པོ་བཏང་སྙོམས་ནས་མ་སྦྱངས་ན། བྱམས་སོགས་ཚད་མེད་དུ་མི་འགྲོ་བས། བསྒོམ་ལུགས་ལ་དཔྱད་བསྒོམ་འཇོག་སྒོམ་གཉིས། བྱམས་པ་དང་བྱམས་པའི་ཏིང་ངེ་འཛིན། སྙིང་རྗེ་དང་སྙིང་རྗེའི་ཏིང་ངེ་འཛིན། དགའ་བ་དང་དགའ་བའི་ཏིང་ངེ་འཛིན། བཏང་སྙོམས་དང་བཏང་སྙོམས་ཀྱི་ཏིང་ངེ་འཛིན་ཞེས་ཞི་གནས་དང་ལྷག་མཐོང་བསྒོམ་པ་གཉིས་ལས་འདི་ཞི་གནས་བསྒོམ་པ་ཡིན། དེ་ལ་གཞུང་གི་སྒོམ་ལུགས་དང་མན་ངག་གི་སྒོམ་ལུགས་གཉིས་ལས་འདིར་ཕྱི་མ་ལྟར་ཐུན་གྱི་སྔོན་འགྲོ་ཐམས་ཅད་ལ་འདྲ། དངོས་གཞི་ལ། རང་གི་གཡས་སུ་དགྲ། གཡོན་དུ་གཉེན་བསམ་ནས། དང་པོ་རང་གི་དགྲ་གཉེན་གཉིས་ལ་ཆགས་སྡང་སློང་ངེས་པ་ཞིག་བྱས་ཏེ། དེ་ནས་འདིར་དུས་གསུམ་ལ་བསྐོར་ནས་བསམ་དགོས་ཏེ། འདི་ལྟར་དགྲ་གཉེན་གཉིས་བདག་དང་བཅས་པ་སྐྱེ་ཤིའི་ཁ་བརྒྱུད་པའི་ཚེ་ཕ་མ་གཉེན་བཤེས་གྲོགས་དགའ་མཛའ་མ་བྱས་པ་མེད་པས་དེའི་དུས་སུ་ཕན་དཔག་ཏུ་མེད་ལ་ཞིག་བཏགས། གནོད་པ་དཔག་ཏུ་མེད་པ་ལས་སྐྱབས་པས། ཕན་བཏགས་པའི་གཉེན་ཡིན། ད་ལྟ་ཡང་རང་གི་ཕར་དགྲར་འཛིན་པ་རེད་མ་གཏོགས། ཁོས་ང་ལ་ཚུར་དགྲར་བཟུང་བའི་ངེས་པ་ཡང་མེད། གལ་སྲིད་དགྲར་བཟུང་ན་ཡང་ཕན་ཚུན་འཐབ་པ་ལ་སོགས་པའི་ཚེ་དཔའ་ཁ་དང་རྒྱལ་ཁ་ཡང་ཐོབ་ནས་སྙན་པར་གྲགས་པའི་རྒྱུ་བྱེད་པའམ། རང་ལ་ཚུར་དགྲར་མི་འཛིན་པའམ། དགྲར་བཟུང་ཡང་གཞན་བར་བ་ལྟ་བུ་ཞིག་གིས་སེམས་བསླུ་ངོ་འཕྲོད་པ་ཞིག་བྱས་ཏེ་གཉེན་དུ་གྱུར་ནས་རང་ལ་བྱུང་བ་བས་ཐུ་བའི་གཉེན་དུ་འགྱུར་བ་ཡོད། དེ་མིན་ཀྱང་ཕན་ཚུན་གཉིས་ཀས་གཅིག་གིས་གཅིག་ལ་ཁྱོད་ཀྱིས་མ་ཐོན། ངས་ཀྱང་མ་ཐོན། ད་ནི་སྔར་གྱི་དེ་ལྟ་བུ་མི་བྱེད་ཅེས། ཡང་ན་རྒྱུ་ཞིག་གིས་ཤད་སྦྱང་བའམ། ཡང་ན་ཚིག་གིས་ཤད་སྦྱང་བས་ཕན་ཚུན་ནང་འགྲིགས་ནས་གཉེན་དུ་འགྱུར་བ་ཡང་ཡིན། ཆོས་ཀྱི་ལུགས་ལ། དགྲས་འཕྲོག་བཅོམ་བྱེད་པའི་རྐྱེན་གྱིས་ཆོས་དང་འཕྲད་པ་ཡིན་པས། དེ་ལྟ་བུའི་རྐྱེན་བྱུང་ན། ད་ག་རེ་ང་རྒྱལ་བའི་སྲས་པོ་བྱང་ཆུབ་སེམས་དཔའ་ཞིག་ཡིན་པས། སྦྱིན་པ་ལོ་བརྒྱར་བྱིན་པ་བས། ཚུལ་ཁྱིམས་ཉིན་གཅིག་བསྲུང་བས་དགའ། ཚུལ་ཁྱིམས་ལོ་བརྒྱར་བསྲུང་བ་བས། བཟོད་པ་ཉིན་གཅིག་བསྒོམ་པས་དགའ་ཞིང་། སངས་རྒྱས་ཀྱི་མཚན་དང་དཔེ་བྱད་བཟང་པོ་ཐམས་ཅད་བཟོད་པས་ཐོབ་པ་དང་། བཟོད་པ་བསྒོམ་པའི་ཡུལ་དགྲ་ཡིན་པས་རང་གི་བཟོད་པ་བསྒོམ་ནུས་ན་དགྲས་ཕན་བཏགས་པ་ཡིན་པས་ན་དགྲ་མིན། མ་འོངས་པ་ན་ཡང་དགྲ་འདིས་གཉེན་དུ་གྱུར་ནས་ཕན་འདོགས་པར་འགྱུར་སྙམ་དུ་བསྒོམ། ཡང་དགྲ་འདིའི་སྐྱེ་བ་ཐོག་མ་མེད་པ་ནས་དགྲ་བྱས་གནོད་བསྐྱལ། ད་ལྟ་ཡང་དགྲ་བྱས་གནོད་པ་བསྐྱལ། མ་འོངས་པ་ན་ཡང་དགྲ་བྱས་གནོད་པ་བསྐྱལ་བར་འགྱུར་བས་དགྲ་འདིས་ཀྱང་ཕན་གནོད་གཉིས་ཀ་བྱས། གཉེན་འདི་ལ་ཡང་ཆགས་འདུག་པ་རེད་མ་གཏོགས་འདི་ལ་ཡང་བསམ་མནོ་ཞིབ་ཏུ་བཏང་ནས་དགྲ་ཡིན་པར་གཏན་ལ་ཕབ་དགོས། དེ་ཡང་ཚེ་སྔ་མ་ལ་གཉེན་འདིའང་གནོད་བྱེད་ཡིན་ཏེ། དགྲ་བྱས་ནས་ནོར་དང་སྲོག་འཕྲོག་མགོ་དང་ཡན་ལག་བཅད་པ་གྲངས་ཀྱིས་མི་ཆོད། ཚེ་འདི་ལ་ཡང་དམ་པའི་ཆོས་སྒྲུབ་པའི་བར་ཆད་དང་། བུ་ཕ་མའི་སྡུག་གྲོགས་སུ་སོང་། ཕ་མ་བུ་ལ་གནོད་བྱེད་དུ་སོང་། གཏན་གྲོགས་ཀྱི་ཆུང་མ་བསུས། འཁོར་བའི་འཆིང་ཐག་དང་འབྲེལ། དགྲ་འདུལ་ལུགས། གཉེན་སྐྱོང་ལུགས། ཚོང་དང་གཡོ་རྒྱུ་མི་དགེ་བ་སྣ་ཚོགས་ཀྱི་ལས་ཐབས་ལ་སྦྱོར་ནས་འཁོར་བ་ནས་གཏན་དུ་མི་ཐར་པའི་གནོད་པ་བྱས། ཆོས་ཀྱི་ཕྱོགས་ལ་ཡང་དང་པོ་བླ་མ་དམ་པ་དང་མཇལ་བ་དང་། བར་དུ་དམ་པའི་ཆོས་བསྒྲུབ། ཐ་མ་ཚུལ་ཁྲིམས་བསྲུང་བ་ལ་སོགས་པ་ཕ་མ་སོགས་འདི་དག་གི་དོན་སྒྲུབ་ནས། རང་གི་ཚུལ་ཁྲིམས་ཞིག ཏིང་ངེ་འཛིན་ཉམས། ཤེས་རབ་རྒུད་པར་བྱེད་པ་ཡང་འདི་དག་གིས་ལན། དེས་ན་ཚེ་སྔོན་མའི་དགྲའི་ལན་ཆགས་ཀྱིས་ད་ལྟ་གཉེན་དུ་གྱུར་ཀྱང་། ད་ལྟའི་གཉེན་གྱི་ལན་ཆགས་ཀྱིས་ཕྱི་མ་ལ་འདི་རྣམས་དགྲ་འགྱུར་བ་ཡིན་པས་འདིས་དུས་གསུམ་གར་དགྲར་བྱེད་པ་ཡིན། ཡང་གཉེན་འདིའི་འཁོར་བ་ཐོག་མ་མེད་པ་ནས་ཕ་མ་སོགས་བྱས་ནས་ཕན་བཏགས། ད་ལྟ་ཡང་གཉེན་བྱས་ཏེ་ཟས་གོས་གནས་མལ་ལ་སོགས་པའི་སྒོ་ནས་ཕན་བཏགས། མ་འོངས་པ་ན་ཡང་འདི་དག་གཉེན་དུ་གྱུར་ནས་ཕན་བཏགས་པ་ཡིན་པས་གཉེན་གྱིས་ཀྱང་ཕན་གནོད་གཉིས་ཀ་བྱས་པ་ཡིན་པས། ད་ནི་གཉིས་ཀ་སྤོམ་བསྡམ་ནས་དགྲ་གཉེན་གཉིས་ཀས་ཕན་གནོད་བྱས་པས་དགྲ་ལ་གནོད་པ་བྱ་འདོད་ཀྱང་མེད། གཉེན་ལ་ཕན་འདོགས་འདོད་ཀྱང་མེད་པ་ཞིག་འོང་བས་དེ་ལྟ་བུ་ཞིག་གི་སྟེང་ནས་བཞག་ན་ཕན་མེད་གནོད་མེད་གཏི་མུག་བཏང་སྙོམས་ཞེས་པ་ཡིན་པས་དེས་དགྲ་གཉེན་གཉིས་ཀ་མའི་ཡུལ་དུ་སྙམ་ཞིང་ཕན་འདོགས་པའི་ཡུལ་དུ་སྙོམ་པ་ཞིག་དགོས། དེ་ཇི་ལྟར་བསྒོམ་ན་འདི་ལྟར་ནམ་མཁས་གར་ཁྱབ་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་ལས་སྣང་སྡུག་བསྔལ་གྱིས་ཁྱབ། ལས་སྣང་སྡུག་བསྔལ་གྱིས་མནར་བའི་སེམས་ཅན་ཐམས་ཅད་ཐོག་མ་མེད་པའི་དུས་ནས་རང་གི་ཕ་དང་མ་དང་གཉེན་བཤེས་ལ་སོགས་པ་མ་བྱས་པ་གཅིག་ཀྱང་མེད། དེའི་ནང་ནས་སྙིང་ཉེ་བའི་དབང་དུ་བྱས་ན་ད་ལྟའི་མ་འདི་བཞིན་དགྲ་འདིས་ཀྱང་བདག་གི་མ་བྱས། མ་ལན་གཅིག་ཙམ་མ་ཡིན་པར་ལན་གྲངས་བསམ་གྱིས་མི་ཁྱབ་པར་བྱས་ཏེ། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུར་དྲིལ་ཀྱང་ས་ཡིས་ལོངས་མི་འགྱུར། ། ཞེས་པས། དེ་བཞིན་གཤེགས་པ་ཐམས་ཅད་མཁྱེན་པ་ཞིག་གི་མདུན་དུ་བདག་མ་བུའམ། དགྲ་དང་བདག་གཉིས་བསྡད་ནས་དགྲ་འདི་དང་ཁྱེད་གཉིས་སྐྱེ་བ་འདིའི་སྔོན་མ་ལ་མི་ཞིག་གི་མ་བྱས། དེའི་སྔོན་མ་ལ་ལྷ་ཞིག་གི་མ་བྱས་སོགས་རིམ་གྱིས་གསུངས། བདག་གིས་ས་ཆེན་པོ་འདི་རྒྱ་ཤུག་གི་ཚིག་གུའི་རིལ་བུ་ཙམ་དུ་དྲིལ་ནས་བགྲངས་ཀྱང་ས་ཆེན་པོ་འདི་ཟད་པར་བྱས་ཀྱང་དགྲ་གཅིག་པུ་འདིའི་མ་བྱས་པའི་མཐའ་མི་ཆོད། དེ་རྒྱུ་མཚན་ཅིས་ཡིན་ན་འཁོར་བ་ཐོག་མ་མེད་པ་ནས་ད་ལྟའི་བར་དུ་འཁོར་བས། ས་ལག་པ་ཙམ་ཞིག་གི་སྟེང་ནས་ལན་གྲངས་བསམ་གྱིས་མི་ཁྱབ་པ་མང་པོ་སྐྱེ་མ་མྱོང་ས། འཆི་མ་མྱོང་ས་མེད་པས། ལྷ་དང་དམྱལ་བ་ཕལ་ཆེ་བ་རྫུས་སྐྱེས་ཡིན་མ་གཏོགས་འགྲོ་བ་ཕལ་ཆེ་བ་མངལ་སྐྱེས་ཡིན་པས་མངལ་ནས་སྐྱེས་དགོས་ན་མ་མེད་པར་སྐྱེ་མི་ཤེས་ལ་དེ་ཡང་སེམས་ཅན་གཅིག་གི་མ་བྱས་ན་དེ་ཙམ་དུ་ཟད་ཀྱང་། དེ་ལྟར་མ་ཡིན་པར་སེམས་ཅན་ཐམས་ཅད་དང་ཕན་ཚུན་མ་ལན་གྲངས་བསམ་གྱིས་མི་ཁྱབ་པར་བྱས་པ་ཡིན་པས་ན་དགྲ་འདིའི་མ་ལན་གྲངས་མང་པོར་བྱས་པར་བསམ་པ་མར་ཤེས་པ་ཡིན། དེས་ན་དྲིན་དྲན་དགོས་ཏེ་མ་དྲིན་ཅན་མ་ཞིག་མ་གཏོགས་དྲིན་མེད་པ་ཞིག་ནི་མེད་དེ་ཁྲ་དང་སྤྱང་ཀི་ལ་སོགས་པའི་གཅན་གཟན་གཏུམ་པོར་གྱུར་པའི་བུར་གྱུར་ན་ཡང་མ་དེས་གཞན་གྱི་སྲོག་བཅད་ནས་རང་གི་བུ་གསོ་ཞིང་དྲིན་གྱིས་བསྐྱངས ། ཟས་གོས་སོགས་ཡོད་པའི་ཕྱུག་པོའི་བུར་སྐྱེས་ན་ལྟ་ཅི། སྤྲང་པོ་ལྟ་བུ་ཞིག་ཏུ་གྱུར་དུས། མ་དྲིན་མོ་ཆེ་དེས་སྐར་རྗེན་གྱི་ཞྭ་བྱེད། བ་མོས་ལྷམ་བྱེད། སྣལ་མས་ལྕགས་བྱེད། རྐང་ཁྲག་ས་ལ་བརྡབ། ལག་ཁྲག་རྡོ་ལ་བརྡབ། གདོང་ཤ་མི་ལ་བྱིན། ཉ་ཤ་ཁྱི་ལ་བྱིན་ནས་སྡུག་སྡིག་པ་གཉིས་ཀས་བསྒྲུབ་པའི་སྤྲང་ཟས་ལྟ་བུ་དེའི་ནང་ན་སྣུམ་མཛུབ་མོ་ཙམ་ཞིག་ཡོད་ན་བུ་ལ་བྱིན། སྟན་ཆད་པོ་ཞིག་ལས་མ་ལོན་ཀྱང་ཅུང་ཟད་སྲ་ས་ནས་བུའི་གོས་སམ་ལྷན་པོ་ལ་སོགས་པར་བྱས་ནས་བྱམས་པའི་དྲིན་གྱིས་བསྐྱངས། ད་ལྟའི་དགྲ་འདིའི་མ་བྱས་དུས། རང་ཉིད་དྲི་ཟ་ཉེར་བར་ལེན་པའི་རྣམ་པར་ཤེས་པ་བར་དོ་ན་འཁྱམས་ཤིང་ཟས་ཀྱི་དྲི་ལ་སྣོམས་ཤིང་འགྲོ་བའི་ཚེ་སྔོན་གྱི་ལས་དང་ཕ་མའི་འདུ་ཕྲོད་ཀྱི་རྒྱུ་རྐྱེན་ཉེ་བར་གནས་པ་ལས་མངལ་དུ་ཞུགས་ནས། ཟླ་བ་དགུ་དང་ངོ་བཅུའི་བར་ལ་མངལ་དུ་བཟུང་། སྡིག་སྡུག་བསྔལ་བཟོད། སྡུག་མཆིལ་མ་གཉིས་ལྐོག་འཐུང་བྱས་ཤིང་། ཤ་ཁྲག་འོ་མ་བཤིགས་བཤིགས་བྱས་ནས་སྡིག་སྡུག་གཏམ་ངན་ཐམས་ཅད་ཁྱད་དུ་བསད། མས་ཟས་ཟོས་པའི་དྭངས་མ་དང་ལུས་ཀྱི་ཟུངས་ཐམས་ཅད་བུའི་ལྟེ་བ་ནས་བརྒྱུད་དེ་བུའི་སྲོག་གི་གསོས་སུ་བྱས་ནས་ལུས་བསྐྱེད་པ་ནི་ལུས་བསྐྱེད་པའི་དྲིན། དེ་ནས་ཕྱིར་བཙའ་བའི་དུས་གསོན་པོ་རེད་ཟེར་ན་མགོ་མི་ཁྱོགས་པ། ཤི་བོ་རེད་ཟེར་ན་དབུགས་མ་ཆད་པ། ཉ་རེ་ཉོ་རེ་ཆུང་ཕུད་བུ་ཙམ་པ་དེ་མ་དྲིན་མོ་ཆེ་དེས་ཤི་རྒྱུ་ཤི་མ་བཅུག རིལ་རྒྱུ་སྐམ་མ་བཅུག་པར་ཨ་མ་ལ་བུ་སྐྱེས་བྱུང་སྙམ་བའི་དགའ་སོ་ཆེན་པོ་ཞིག་བཟུང་། བརྩེ་བའི་སེམས་ཀྱིས་བསྐྱང་། འཛུམ་པའི་མདངས་ཕྱུང་། སྙན་པའི་ངག་གིས་བོས། ལག་སོར་མོ་བཅུས་པང་དུ་བླངས་ནས་འཆི་མ་བཅུག་པ་སྲོག་བྱིན་པའི་དྲིན། དེ་ནས་བར་དོའི་རྣམ་ཤེས་འཁྱམ་པོ་ཁ་ན་ཟས་མེད་ལག་ན་ནོར་མེད་རྒྱབ་ན་གོས་མེད་པ་ཞིག་ཕར་ངོ་ཕར་ལ་མི་ཤེས་ཚུར་ངོ་ཚུར་ལ་མི་ཤེས་པ་ཞིག་གི་ཁྱིམ་དུ་ཕྱིན་པ་ན། མ་དྲིན་མོ་ཆེ་དེས་ཟས་ཀྱི་དང་པོ་མངར་བའི་ནུ་ཞོ་བྱིན་པས་དེའི་དྭངས་མ་མིག་ལ་བབས་སོང་བ་འཆི་བའི་དུས་སུ་མིག་ནས་མཆི་མ་ཁྲ་ལི་ལི་འགྲིལ་བ་དེ་ཡིན་ལ། སྙིགས་མ་ལུས་ཀྱི་ནང་དུ་གནས་ད་ལྟ་ཟས་ཀྱི་བཅུད་ཐམས་ཅད་ལེན། ལུས་བསྐྱེད་པར་བྱས་ནས་འཆི་བའི་དུས་ལུས་ཟུང་ཞེས་པ་སྐྱུག་པའམ་ཡང་ན་སྦྱོང་བར་བྱེད་པ་དེ་ཡིན་ལ། གོས་ཀྱི་དང་པོ་ཤ་དྲོད་ལ་བཅར། དེ་ནས་ཅུང་ཟད་ཟ་ནུས་པའི་དུས་སུ་ཟས་ཀྱི་ཕུད། དཀར་གྱི་དྲུང་། དམར་གྱི་ཕུད། ཟས་གང་བཟང་གང་ཞིམ་མང་པོ་བྱིན་ནས་ཟས་ཐམས་ཅད་ཁས་སྙོད། མི་གཙང་བ་ལག་པས་ཕྱིས། འགྲང་ལྟོག་ལག་པས་བྱུག ཚ་གྲང་མཛུབ་མོས་ཚོད་བཟུང་ནས་བྱིན། གོས་ཀྱི་རྩེ་མོ་གང་འཇམ་གང་དྲོ་མང་པོས་བུ་ལ་གོས་བྱས་ཏེ་མ་རང་གིས་ཡར་དཀོན་མཆོག་ལ་མཆོད་མི་བྲ། མར་ངན་སློང་ལ་སྦྱིན་མི་བྲ། ཤི་བོའི་རྒྱབ་ནས་གཏོང་མི་བྲ། གསོན་པོའི་ཁ་ལ་ཟ་མི་བྲ། རྒྱབ་ལ་གྱོན་མི་བྲ་བར་སྡིག་སྡུག་གཏམ་ངན་ཐམས་ཅད་ཁྱད་དུ་བསད་ནས་བསགས་ཤིང་། སྡིག་པ་དང་གཡོ་རྒྱུའི་མགོ་སྐོར་ཁོ་ནས་བསགས་པའི་ལོངས་སྤྱོད་ཐམས་ཅད་བུ་ལ་བྱིན། ད་དུང་འཁོར་ལོས་བསྒྱུར་བའི་རྒྱལ་སྲིད་ལ་བཀོད་ཀྱང་ཆེ་སོང་བསམ་རྒྱུ་མེད་པར་ཁ་ཟས་འདོད་ཟས་དང་སྤྲད། ལག་ནོར་འདོད་ནོར་དང་སྤྲད། རྒྱབ་གོས་མེད་གོས་དང་སྤྲད་དེ་སེར་སྣ་དང་ཕངས་སེམས་མེད་པར་མ་རང་གི་ལོངས་སྤྱོད་ཐམས་ཅད་བུ་ལ་བྱིན་པ་ནི་ཡོ་བྱད་བསྟབས་པའི་དྲིན་ཡིན། དེ་ནས་ཅུང་ཟད་ཞིག་ཟ་ཤེས་འགྲོ་ཤེས་དུས། ཟས་ཟ་ཚུལ། གོས་གྱོན་ཚུལ། གོས་ཀྱི་མགོ་འཇུག སྐེ་རག་གི་དམ་ལྷོད། ལྷམ་སྒྲོག་གི་བཅིང་ཚུལ། འགྲོ་མི་ཤེས་པ་ལ་འགྲོ་ཚུལ། སྨྲ་མི་ཤེས་པ་ལ་ཨ་གྱིས་མ་གྱིས། ཨ་ཕ་གྱིས་ལ་སོགས་པས་འཇིག་རྟེན་གྱི་ཐ་སྙད་ཐམས་ཅད་ལེགས་པར་བསླབ། བུ་ཆུང་རྫི་བོར་ནང་བསྙལ་བའི་དུས་སུ་མ་རང་གི་སྙིང་དེ་དམར་ལྡོག་གེ་བླངས་ཏེ་ཐང་དུ་བཞག་པ་ལྟ་བུ་གཅེས་ཀ་དང་རིན་ཐང་ཆེན་པོར་བཟུང་ནས། ད་ལྟ་ཉ་ཀ་བ། བ་སྤུ་སྡོང་པོར་མ་སོང་གི་བར་དུ་བསྐྱེད་པ་ནི་འཇིག་རྟེན་བསྟན་པའི་དྲིན་ཡིན། དེ་ལྟར་ལུས་བསྐྱེད་པ། སྲོག་བྱིན་པ། ཡོ་བྱད་བསྟབས་པ། འཇིག་རྟེན་བསྟན་པ་བཞི་ནི་འཇིག་རྟེན་ཀྱི་ཕྱོགས་ཀྱི་དྲིན་དྲན་པ་ཡིན། དམ་པའི་ཆོས་ཀྱི་ཕྱོགས་ནས་དལ་འབྱོར་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་འདི་ཡང་མ་དྲིན་མོ་ཆེས་བསྐྱེད། བྱང་ཆུབ་སྒྲུབ་པའི་མཐུན་རྐྱེན་ཟས་གོས་གནས་མལ་ཡོ་བྱད་འདི་དག་ཀྱང་མ་སེམས་ཅན་ཞིག་མེད་ན་རང་སྟོབས་ཀྱིས་གཅིག་ཀྱང་མི་འགྲུབ་པས་མ་སེམས་ཅན་གྱི་དྲིན་དྲན། རྒྱལ་སྲས་བྱང་ཆུབ་སེམས་དཔའི་ལམ་གྱི་དང་པོ་བྱང་ཆུབ་མཆོག་ཏུ་སེམས་བསྐྱེད་ས་མ་སེམས་ཅན་མེད་ན་བསྐྱེད་པའི་ཐབས་མེད། བར་དུ་རྒྱལ་སྲས་ཀྱི་སྤྱོད་པ་རྒྱ་མཚོ་ལྟ་བུ་ལ་བསླབ་པ་ཡང་མ་སེམས་ཅན་མེད་ན་བསླབ་པའི་ཡུལ་མེད། དེ་གཉིས་མེད་ན་མཐར་མངོན་པར་རྫོགས་པ་སངས་རྒྱས་པ་ཡང་མེད་པས་ཆོས་ཀྱི་ཕྱོགས་ནས་ཀྱང་དྲིན་ཆེ། དེ་ལྟར་ཆོས་འཇིག་རྟེན་གཉིས་ཀའི་ཐད་ནས་དྲིན་དྲན་པ་ནི་དྲིན་དྲན་པ་ཡིན། ད་ནི་དེ་ལྟར་དྲིན་ཆེན་པོ་དང་ལྡན་པའི་མ་དྲིན་མོ་ཆེ་དེས་ད་སྔོན་ཁེ་དང་རྒྱལ་ཁ་བུ་ལ་བྱིན། གྱོང་དང་བུབ་ཁ་རང་གིས་བླངས་ནས་དྲིན་ཆེན་པོས་བསྐྱངས་བ་ཡིན་ན། བདག་ད་རེས་ཐེག་པ་ཆེན་པོའི་ཆོས་དང་མཇལ། བླ་མ་དགེ་བའི་བཤེས་གཉེན་གྱིས་རྗེས་སུ་བཟུང་། ལམ་གྱི་ཁེ་ཉེན་ཤེས་པའི་དུས་འདིར་སྔར་ཨ་མས་ངའི་སྐྱིད་སྡུག་ལ་བལྟས་པས་ད་ངའི་རེས་མོ་ལ་བབ་པས་ཨ་མའི་སྐྱིད་སྡུག་ལ་ད་བུས་བལྟ་དགོས་སྙམ་དུ་དྲིན་གཟོ་འདོད་པ་ནི་དྲིན་གཟོ་འདོད་ཀྱི་རྟོག་པ་བསྐྱེད་པ་ཡིན། དེ་ལྟར་དགྲ་ལ་མར་ཤེས་དྲིན་དྲན་དྲིན་གཟོ་འདོད་ཀྱི་རྟོག་པ་སྐྱེས་པ་ན། དེ་ནས་རང་གི་མ་དང་ཕ་དང་ཤ་ཉེ་དང་། སྲིང་མོ་སོགས་ནས་ཐུན་བཞག་ཁར་སེམས་ཅན་ཐམས་ཅད་དགྲ་གཉེན་ཆགས་སྡང་མེད་པར་མའི་ཡུལ་དུ་སྙོམས་པ་དེ་བཏང་སྙོམས་ཚད་མེད་བསྒོམ་པ་ཡིན། དེ་ལྟར་དཔྱད་ནས་བསྒོམ་ཚེ་སེམས་ཆད་ནས་འགྲོ་མི་འདོད་པའི་ཚེ་ཡང་འདས་པའི་རྗེས་སུ་མི་འབྲང་། མ་འོངས་པའི་འདུན་མི་བསུ། ད་ལྟའི་རྟོག་པ་འཕྲོ་མི་མཐུད་པར་བཅའ་བཅོས་མི་བྱེད་པར་ཅི་གནས་སུ་བཞག་པ་བཏང་སྙོམས་ཀྱི་ཏིང་ངེ་འཛིན་ཡིན། ཡང་འཕྲོ་འདོད་པ་དང་ཡང་དཔྱད། དེ་ལྟར་དཔྱད་འཇོག་རེས་མོས་བྱས་ནས་ཞི་གནས་བསྒོམ། ཐུན་གྱི་རྗེས་ནི་ཐམས་ཅད་འདྲ། དེ་ནས་ཐུན་མཚམས་སུ་སེམས་ཅན་ཆགས་སྡང་ཅན་ཞིག་དམིགས་ཡུལ་དུ་བྱས་ནས། མར་ཤེས་དྲིན་དྲན་སོགས་འདྲ་བ་ལ་འདིའི་རྒྱུད་ཀྱི་ཆགས་སྡང་གཉིས་པོ་དེ་བྲལ་བར་གྱུར་ཅིག བྲལ་ན་ཅི་མ་རུང་སྙམ་པ་དང་། བྲལ་བ་ཞིག་བདག་ངས་བྱ་སྙམ་པ་དང་། བྲལ་བ་ཞིག་དཀོན་མཆོག་ལ་གསོལ་བ་འདེབས་དགོས། དེ་ནས་དམིགས་མེད་ཀྱི་བཏང་སྙོམས་བསྒོམ་ན། རང་གཞན་གྱི་ལུས་རྡུལ་ཕྲན། སེམས་སྐད་ཅིག་མའི་སྐྱེ་འགག་གི་ཕྲེང་བ་ཤར་ར་སྐད་ཅིག་གཉིས་པར་མི་སྡོད་པ་དོན་དམ་པར་རང་བཞིན་མ་གྲུབ་པ་དང་། ཐ་སྙད་དུ་སྟོང་ཉིད་ཅིར་ཡང་མ་ཡིན་པ་ལས་རྟེན་འབྱུང་འགགས་པ་མེད་པས་སྟོང་དང་རྟེན་འབྱུང་འགགས་པ་མེད་པར་མཉམ་པ་ལ་ངེས་ཤེས་དྲངས་ཏེ་ཡང་བཅའ་བཅོས་མེད་པར་འཇོག་པ་ལྷག་མཐོང་བསྐྱེད་པའི་ཐབས་ཡིན། གཞན་ཡང་ཐུན་མཚམས་ཐམས་ཅད་ལ་སེམས་ཅན་ཆགས་སྡང་རྩོད་འདུག་པ་རྣམས་ལ་དམིགས་ནས། འདི་དག་གི་རྒྱུད་ཀྱི་ཆགས་སྡང་གཉིས་པོ་དུས་དང་རྣམ་པ་ཐམས་ཅད་དུ་བྲལ་བར་གྱུར་ཅིག་སྙམ་པ་སྨོན་པ་དང་འབྲེལ་བ། བྲལ་ན་ཅི་མ་རུང་སྙམ་པ་འདུན་པ་དང་འབྲེལ་བ། བྲལ་བ་ཞིག་བདག་ངས་བྱ་སྙམ་པ་དམ་བཅའ་དང་འབྲེལ་བ་སྟེ་འབྲེལ་བ་སུམ་ལྡན། དཀོན་མཆོག་ལ་གསོལ་བ་འདེབས་པ་བཞི་པོ་དེ་ལ་ཡང་ཡང་བསམ་དགོས། དེ་ལྟར་ཐུན་ནང་ནས་བཏང་སྙོམས་བཟང་པོ་ཞིག་བསྒོམ་ནས་རྒྱུད་ཅུང་ཟད་འགྱུར་བ་ཞིག་ཐོན་ཀྱང་། ཐུན་མཚམས་སུ་མ་བསམ་ན་སྔར་གྱི་རང་རྒྱུད་ངན་པའི་ཤུལ་དུ་ཡང་ལྷུང་འོང་བས། དཔེར་ན་ལྕགས་མེའི་ནང་དུ་བསྲེགས་པ་དམར་ཟེང་ངེ་ཡོད་པ་དེ་མེའི་ནང་ནས་བླངས་ཏེ་སར་བཞག་ན་ནག་ཁྲོག་གེ་འགྲོ་བ་དང་འདྲ་བས་ཐུན་ནང་བས་ཐུན་མཚམས་སུ་བསྒོམ་པ་འདི་གལ་ཆེ་བ་ཡིན། དེ་ལྟར་བསྒོམ་ནས་ཐུན་མཚམས་ལ་ཡང་དགྲ་ལ་སྡང་བ་བཏང་། གཉེན་ལ་ཆགས་པ་བཏང་། ཐམས་ཅད་ཕ་མའི་ཡུལ་དུ་སྙོམས་དགོས། གཉིས་པ་བྱམས་པ་བསྒོམ་པ་ལ་བཏང་སྙོམས་ཀྱི་ཆགས་སྡང་ཞི་ནས་ཕ་མའི་ཡུལ་དུ་སྙོམས་པ་དེ་ལ་བྱམས་པ་བསྒོམ་དགོས་ཏེ། དེ་ཐུན་གྱི་མགོར་ཁོལ་བུར་ཁོལ་བུར་བཅད་ནས་བསྒོམ། མཇུག་ཏུ་སེམས་ཅན་ཐམས་ཅད་ལ་བསྒོམ་དགོས། དང་པོ་རང་གི་རྩ་བའི་མ་དེ་མདུན་དུ་ཕུང་པོ་ཁམས་སྐྱེ་མཆེད་ཐམས་ཅད་གསོན་པའི་དུས་ལྟར་རམ་དངོས་སུ་བསམ་ནས། ད་ལྟའི་མ་འདིས་བདག་གི་མ་ལན་གཅིག་བྱས་པས་མི་ཚད་ལ་ལན་གྲངས་བསམ་གྱིས་མི་ཁྱབ་པར་བྱས་ཏེ་མའི་ཐུག་མཐའ་སོགས་མར་ཤེས། ད་དྲིན་དྲན་པ་ལ་བདག་གནམ་ནས་ཐོག་ལྷུང་བ་དང་ས་ལས་མེ་ཏོག་སྐྱེས་པ་ལྟ་བུ་མ་ཡིན་པར་ཟླ་དགུ་ངོ་བཅུ་སོགས་ལུས་སྲོག་བསྐྱེད་པ་ཡིན་ཏེ་མས་ཟས་ཟོས་ཚད་ཀྱི་བཅུད་ཀྱིས་མར་མེ་ལ་སྡོང་སྐྱ་བཞག་པ་བཞིན་མ་རང་གི་ལྟེ་བ་ནས་བརྒྱུད་དེ་ལུས་སྲོག་བསྐྱེད་པའི་དྲིན་དྲན། དེ་ནས་བཙའ་བའི་དུས་མའི་ཁའི་རུས་པའི་ཚིག་མ་གཏོགས་པའི་ཚིག་མཚམས་ཐམས་ཅད་བྱེ། ཞག་བདུན་གྱི་བར་དུ་འཁྲིག་པ་ཡིད་ལ་དྲན་ཀྱང་སྐྲག་འོང་བ་ལྟ་བུའི་སྡུག་བསྔལ་མྱོང་། བུ་ལྕགས་ཀྱི་འཇུར་མིག་ནས་དྲངས་པ་ལྟ་བུའི་སྡུག་བསྔལ་མྱོང་། སྐྱེ་བའི་ཚེ་ཤི་བོ་ཡིན་ན་དབུགས་མ་ཆད་སོགས་དེ་ནས་ཕྱིར་ལྟས་ཞིག་བྱས་ན་རིགས་དྲུག་པོ་གང་ནས་འོང་མི་ཤེས། སྔ་ལྟས་ཞིག་བྱས་ན་ཡུལ་རིས་གང་ལ་ཐོན་ཡོད་པ་མི་ཤེས་པས་དེའི་དུས་མ་དྲིན་མོ་ཆེས་བདག་པོ་ཞིག་མ་བྱས་ན་ཤི་འགྲོ་རྒྱུ་ལ། མས་དང་པོ་ཕྲུ་མ་བཤུས། འོ་མའི་ཆུ་རྒྱུན་དྲོད་མོས་བཀྲུས། ལྟེ་ཐག་བཅད་ནས་འཆི་རྒྱུ་འཆི་མ་བཅུག་སོགས་སྲོག་བྱིན་པའི་དྲིན་དྲན། དེ་ནས་ཟས་ཀྱི་དང་པོ་མངར་བའི་ནུ་ཞོ་སོགས་ཡོ་བྱད་བསྟབས་པའི་དྲིན་དྲན། དེ་ནས་མ་རང་གི་སྙིང་ཐང་དུ་བཞག་པ་ལྟ་བུའི་བརྩེ་བའི་སེམས་ཀྱིས་འགྲོགས། ཕན་པའི་སེམས་ཀྱིས་བསྐྱངས་ཏེ་སོགས་ནས་ཤེས་ཤེས་པོ་གོ་གོ་བར་དུ་བ སྐྱངས་བའི་འཇིག་རྟེན་བསྟན་པའི་དྲིན་དྲན། དེ་ནས་ཆོས་ཀྱི་ཕྱོགས་ནས་སོགས་ཀྱི་དྲིན་དྲན་ཏེ། དེས་ན་ཕན་བཏགས་པའི་ཞིང་གནས་མལ་ཡོ་བྱད་ཐམས་ཅད་མས་བདག་ལ་བསྟབས། བྱམས་པ་བསྒོམ་པའི་ཞིང་ཡང་མ་དྲིན་མོ་ཆེ་འདི་ཡིན་པས་མས་ང་ལ་དེ་ལྟ་བུའི་ཕན་བཏགས། རང་གིས་མ་ལ་དེ་ལྟ་བུའི་ཕན་དེ་སྔོན་མ་བཏགས་ཤིང་མ་རྒན་གྱིས་འཇིག་རྟེན་ཕྱོགས་ན་ཁ་ཏ་བསྒོ་བརླག་རེ་བྱེད་ན་དེ་ལ་ཉན་དུ་མི་བཏུབ་པར་སྔོ་ར་མ་སྔོ་རྒོག་མ་ཁྱོད་ལ་ཤི་རྒྱུ་མི་འདུག་ཟེར་ནས་དྲིན་ཅན་ལག་པ་རྡོ་བརྡུང་བྱེད་པ་དེ་དག་དྲིན་མ་དྲན་པས་ལན་པ་ཡིན། ད་ནི་དྲིན་དྲན་ནས་དྲིན་ཞིག་གཟོ་བ་ལ། མ་འདིའི་འདོད་རྒྱུ་ཅི་འདོད་གི་ཡོད་བསམ་ན་འདོད་རྒྱུ་བདེ་བ་འདོད་དེ་ཟས་གོས་གནས་མལ་ཡོ་བྱད་ལ་སོགས་ཚེ་འདིའི་བདེ་བ་ནས་མཐོ་རིས་ལྷ་དང་མིའི་བདེ་བ་ཐམས་ཅད་འདོད། ཐ་ན་ཉིན་གཅིག་གི་ཉི་མ་དྲོན་པོ་ཞིག་འདེ་བ་དང་ཇ་ཞིམ་པོ་ཕོར་བ་གང་བཏུང་རྒྱུའི་བདེ་བ་འདོད་ཅིང་སྡུག་བསྔལ་མི་འདོད་ཀྱང་། བདེ་བའི་རྒྱུ་དད་ངེས་འབྱུང་བྱང་ཆུབ་སེམས་འབྲས་བུ་མངོན་མཐོ་ལྷ་མིའི་བདེ་བ་ནས་སངས་རྒྱས་ཀྱི་གོ་འཕང་གི་བདེ་བ་མི་ལྡན་ཅིང་། སྡུག་བསྔལ་གྱི་རྒྱུ་ལ་ཁོར་མོ་ཡུག་ཏུ་སྤྱོད་པའི་མ་དྲིན་མོ་ཆེ་བདེ་བ་རྒྱུ་འབྲས་གཉིས་དང་མི་ལྡན་པ་དེ་དམིགས་པ་ཡུལ་དང་། རྣམ་པ་བློ་ནི་མ་འདི་སྐྱེ་བ་འདི་དང་ཚེ་རབས་ཐམས་ཅད་དུ་བདེ་བའི་རྒྱུ་དད་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་རྣམ་པ་གསུམ་དང་ལྡན་པར་གྱུར་ཅིག ལྡན་ན་ཅི་མ་རུང་། ལྡན་པ་ཞིག་ངས་བྱ་སྙམ་པ་དང་། ལྡན་པ་ཞིག་དཀོན་མཆོག་རིན་པོ་ཆེ་རྣམ་པ་གསུམ་ལ་གསོལ་བ་འདེབས། བདེ་བའི་འབྲས་བུ་མངོན་མཐོ་ལྷ་མིའི་གོ་འཕང་ནས་རྫོགས་པའི་སངས་རྒྱས་ཀྱི་གོ་འཕང་གི་བར་གྱི་བདེ་བའི་འབྲས་བུ་དང་ལྡན་པར་གྱུར་ཅིག ལྡན་ན་ཅི་མ་རུང་། ལྡན་པ་ཞིག་བདག་ངས་བྱ་སྙམ་པ་དང་། ལྡན་པ་ཞིག་དཀོན་མཆོག་ལ་གསོལ་བ་གདབས་ཏེ། ཀྱེ་མ་ཀྱེ་ཧུད་དཀོན་མཆོག་ཐུགས་རྗེ་ཅན་སོགས་དང་། བླ་མ་རྒྱལ་བ་འགྲོ་བའི་མགོན་སོགས་དང་། དཔའ་བོ་ཁྱེད་ལ་ཐུགས་རྗེའི་སྟོབས་མངའ་བས་སོགས་བརྗོད། དེ་ལྟར་བདེ་བའི་ངད་དང་ལྡན་པའི་ཚེ་བཀག་འབྲང་མེད་པར་སེམས་ཅི་གནས་སུ་བཞག་པ་ཡིན། དེ་ལ་རྒྱུ་འབྲས་ཡིད་ཆེས་ཀྱི་དད་པ་ནི་མཐོ་རིས་ཀྱི་རྒྱུ་ཡིན། ངེས་འབྱུང་ཐར་བའི་རྒྱུ་ཡིན། བྱང་ཆུབ་ཀྱི་སེམས་རྫོགས་པའི་སངས་རྒྱས་ཀྱི་རྒྱུ་ཡིན། དེ་ལྟར་མར་ཤེས་པ་ནས་བདེ་བ་རྒྱུ་འབྲས་གཉིས་དང་ལྡན་པར་འདོད་པའི་བར་དཔྱད་བསྒོམ་ཡིན། བཀག་འབྲང་མེད་པར་བཞག་པ་བྱམས་པའི་ཏིང་ངེ་འཛིན་ཡིན། ཐུན་མཚམས་ཐམས་ཅད་ལ་བྱམས་པའི་ལུས་ཀྱི་ལས་དང་། ངག་གི་ལས་རྣམས་བསྒྲུབ་དགོས། སེམས་ཀྱི་ལས་མ་རྒན་འདི་རྣམས་གནས་སྐབས་དང་མཐར་ཐུག་གི་བདེ་བ་ཐམས་ཅད་བསྒྲུབ་དགོས་སྙམ་དུ་བསམ། དེ་ཡང་ཕ་ཁུ་རྒན་རབས་དང་ཐ་ན་སྒོ་ཟོག་ཐམས་ཅད་ལ་བྱམས་པའི་ལུས་ཀྱི་ལས་བརྡུང་བརྡེག་ལ་སོགས་སྤངས། ངག་གི་ལས་ཚིག་རྩུབ་མོ་དང་མི་སྙན་པར་བརྗོད་པ་ཐམས་ཅད་སྤངས། སེམས་ཀྱི་ལས་སེམས་ཅན་གྱིས་འདོད་རྒྱུའི་གནས་སྐབས་དང་མཐར་ཐུག་གི་བདེ་བ་ཐམས་ཅད་བསམ་པས་ཡིན་ན་བསྒྲུབ། སྦྱོར་བས་ཡིན་ན་བསྒྲུབ་དགོས། དམིགས་མེད་ནི་འཁོར་གསུམ་པོ་སྣང་ལ་རང་བཞིན་མེད་པའི་ངེས་ཤེས་དྲངས། སྙིང་རྗེ་བསྒོམ་པ་ལ་ཨ་བུ་དང་ཇོ་བོའི་ལུགས་ལ། རང་གི་རྩ་བའི་མ་ནས་བསྒོམ། རིག་འཛིན་འཇིགས་གླིང་གི་དགོངས་པ་ལྟར་ན། བཤའ་ལུག་ལ་སོགས་པ་སེམས་ཅན་གསོད་དུ་ཉེ་བའམ་ནད་པ་དང་སྡུག་བསྔལ་ཅན་ཞིག་ལ་དམིགས་ནས་རང་ངམ་རང་གི་མ་རྒན་གྱི་འདུ་ཤེས་བཞག་ནས་བསྒོམ་པ་ཡིན། གང་ལྟར་བསྒོམ་ཡང་ཆོག་ལ། ལས་དང་པོ་བས་རང་གི་རྩ་བའི་མ་ནས་བསྒོམ་པའི་དབང་དུ་བྱས་ན། དེ་ཡང་མ་རྒན་མོ་དེ་ཕུང་ཁམས་སྐྱེ་མཆེད་གསལ་བར་རང་གི་མདུན་དུ་བསྒོམ། དང་པོ་མར་ཤེས་པ་ལ་མ་ལན་གཅིག་མ་ཡིན་པར་ལན་གྲངས་མང་པོར་བྱས་པ་དང་། ལུས་སྲོག་སྦྱིན་པའི་དྲིན་སོགས་དང་། ཡོ་བྱད་བསྟབས་ཏེ་དཀའ་བ་སྤྱད་པ་སོགས་མ་དྲིན་མོ་ཆེས་ཉིན་གྱི་བྱ་ར། མཚན་གྱི་མེལ་ཚེ་བྱས་ནས་བསྐྱངས་བ་སོགས་དང་། འཇིག་རྟེན་བསྟན་པ། སྨྲ་མི་ཤེས་པ་ལ་སྨྲ་ལོབ། འགྲོ་མི་ཤེས་པ་འགྲོ་ལོབ། ཟ་མི་ཤེས་པ་ལ་ཟ་ལོབ། གོན་མི་ཤེས་པ་ལ་གོས་གྱོན་ལོབ་བསླབ། བྱིས་པ་གཞོན་པ། གཞོན་པ་དར་བབ་སོགས་ནས་ཤེས་ཤེས་གོ་གོའི་བར་དུ་བསྐྱངས་བའི་དྲིན་དྲན། ཆོས་ཀྱི་ཕྱོགས་ལ་དལ་འབྱོར་སོགས་དྲན། དྲིན་གཟོ་འདོད་བསྐྱེད་དེ་དེ་ལྟ་བུའི་མ་དྲིན་མོ་ཆེ་དེའི་འདོད་རྒྱུ་ཅི་འདོད་ན། འདོད་རྒྱུ་བདེ་བ་འདོད་ཀྱང་བདེ་བའི་རྒྱུ་དད་ངེས་འབྱུང་བྱང་ཆུབ་ཀྱི་སེམས་རྣམས་ནི་རང་གིས་སྒྲུབ་ནི་མི་ཤེས། སྟོན་པ་པོ་དགེ་བའི་བཤེས་གཉེན་ནི་མེད། གལ་སྲིད་སྟོན་པ་པོ་ཞིག་ཡོད་ནའང་དེའི་བཀའ་བཞིན་མི་བསྒྲུབ་པས། སྤྱོད་འཇུག་ལས། བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་གཞོམས། ། ཞེས་པ་བཞིན། བདེ་བའི་རྒྱུ་དགེ་བ་རྣམས་དགྲ་མི་ཤ་བོ་མཐོང་བ་ལྟར་འཇོམས། སྡུག་བསྔལ་ནི་མི་འདོད་ཀྱང་སྡུག་བསྔལ་གྱི་རྒྱུ་མི་དགེ་བ་ལ་འཆོལ་ཉོག་ཏུ་སྤྱོད་དེ། སྡུག་བསྔལ་འདོར་འདོད་སེམས་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུག ། ཅེས་པས། སྲིད་པ་ཁམས་གསུམ་འཁོར་བའི་སྡུག་བསྔལ་ཐམས་ཅད་མི་འདོད། ཐ་ན་མེ་སྟག་ཕྲ་མོ་ཕོག་པའམ་ཚེར་མ་ཟུག་པ་ལྟ་བུའི་སྡུག་བསྔལ་ཕྲ་མོ་ཡང་མི་འདོད་ཀྱང་། དེའི་རྒྱུ་མི་དགེ་བ་ལུས་ཀྱིས་ལས་ན་མི་དགེ་བ་ལས། ངག་གིས་བཤད་ན་མི་དགེ་བ་བཤད། སེམས་ཀྱིས་བསམ་ན་མི་དགེ་བ་བསམ། དེ་ལྟར་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པའི་སྡུག་བསྔལ་གྱི་བདེན་པས་དངོས་སུ་གནོད། ཀུན་འབྱུང་གི་བདེན་པས་བརྒྱུད་ནས་གནོད་དེ། ཚེ་འདིའི་སྡུག་བསྔལ་གྱིས་སྐྱེལ་མ་བྱེད། ཕྱི་མའི་སྡུག་བསྔལ་གྱིས་བསུ་མ་བྱེད། བར་དོའི་སྡུག་བསྔལ་གྱིས་མཚམས་སྦྱར་བའི་སྡུག་བསྔལ་རྒྱུ་འབྲས་གཉིས་དང་ལྡན་པ་དེར་མ་ཟད་ང་གཅིག་པུའི་དོན་ལ་མི་དགེ་བ་མི་ལ་འཛིང་། ཁྱི་ལ་འཐབ། ཐ་ན་མགོ་ཤིག་གཅིག་པུ་བསད་པའི་རྣམ་སྨིན་གྱིས་དམྱལ་བའི་སྡུག་བསྔལ་མུ་མཐའ་མེད་པར་འཁྱམ་དགོས་ཤིང་། སྡུག་བསྔལ་གྱི་རྒྱུ་མི་དགེ་བའི་ཉེས་དམིགས་ནི་མི་ཤེས་ལ། དགེ་བའི་ཕན་ཡོན་ཀྱང་མི་ཤེས་ཤིང་ཉིན་མཚན་རྒྱུན་མི་འཆད་པར་སྡུག་བསྔལ་ལ་འཁོར་མོ་ཡུག་ཏུ་སྤྱོད་པའི་མ་དྲིན་མོ་ཆེ་འདི་ཤ་ཚ་སྙིང་རྗེ་སྙམ་པ་སྙིང་རྗེའི་དམིགས་པའམ་ཡུལ་ཡིན། འདི་སྡུག་བསྔལ་གྱི་འབྲས་བུ་སྲིད་པ་ཁམས་གསུམ་འཁོར་བའི་སྡུག་བསྔལ་དང་བྲལ་བར་གྱུར་ཅིག བྲལ་ན་ཅི་མ་རུང་། བྲལ་བ་ཞིག་བདག་ངས་བྱ་སྙམ་པ་དང་། སྡུག་བསྔལ་དེ་དང་བྲལ་བ་ཞིག་སྐྱབས་བསླུ་བ་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་པོ་ཁྱེད་ཀྱི་ཐུགས་རྗེ་དང་ནུས་པ་མ་ཆུང་སྙམ་དུ་གསོལ་བ་འདེབས། སྡུག་བསྔལ་གྱི་རྒྱུ་ལས་དང་ཉོན་མོངས་ཐམས་ཅད་དང་བྲལ་བར་གྱུར་ཅིག བྲལ་ན་ཅི་མ་རུང་། བྲལ་བ་ཞིག་བདག་ངས་བྱ་སྙམ་པ་དང་། དཀོན་མཆོག་ལ་གསོལ་བ་འདེབས། དེ་ལྟར་དཔྱད་འཇོག་སྤེལ་མར་བསྒོམ། དེ་ནས་ཕ་དང་སྲིང་མོ་སོགས་ཕ་ཚན་ཕུ་ནུ་སོགས་ལ་རིམ་གྱིས་བསྒོམ། མཐར་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་ཀྱི་སྡུག་བསྔལ་གསུམ་གཏོར་ནས། ངན་སོང་གསུམ་སྡུག་བསྔལ་གྱི་སྡུག་བསྔལ། མཐོ་རིས་ལྷ་མི་གཉིས་འགྱུར་བའི་སྡུག་བསྔལ། ཁམས་གོང་མ་གཉིས་ན་ཁྱབ་པ་འདུ་བྱེད་ཀྱི་སྡུག་བསྔལ། ཁྱད་པར་མི་ལ་དགྲ་སྡང་བ་དང་འཕྲད་ཀྱིས་དོགས་པ། གཉེན་བྱམས་པ་དང་བྲལ་གྱིས་དོགས་པ། འདོད་པ་ཐོག་ཏུ་མི་ཁེལ་བའི་སྡུག་བསྔལ། མི་འདོད་པ་ཐོག་ཏུ་བབ་པའི་སྡུག་བསྔལ། སྐྱེ་རྒ་ན་འཆིའི་སྡུག་བསྔལ་སོགས་ཚེ་འདིའི་སྡུག་བསྔལ་གྱིས་དེད། ཕྱི་མའི་སྡུག་བསྔལ་གྱིས་བསུས། བར་དོའི་སྡུག་བསྔལ་གྱིས་མཚམས་སྦྱར་བས་དེ་ལྟ་བུའི་སྡུག་བསྔལ་རྒྱུ་འབྲས་གཉིས་དང་བྲལ་བར་གྱུར་ཅིག བྲལ་ན་ཅི་མ་རུང་། བྲལ་བ་ཞིག་བདག་ངས་བྱ་སྙམ་པ་དང་། གསོལ་འདེབས་བྱ། དེ་ལྟ་བུའི་འཁོར་གསུམ་པོ་སྣང་ལ་རང་བཞིན་མེད་པའི་ངེས་ཤེས་དྲངས། ཐུན་མཚམས་སུ་སེམས་ཅན་མཐོང་ཚད་ལ་བསྒོམ། དགའ་བ་ནི་དང་པོ་ཡང་རང་གི་མ་ལ། མར་ཤེས་དྲིན་དྲན། དྲིན་གཟོ་འདོད་དང་། བདེ་བ་ལྡན་འདོད་ཀྱི་བྱམས་པ་དང་། སྡུག་བསྔལ་བྲལ་འདོད་ཀྱི་སྙིང་རྗེ་གཉིས་བསྒོམ་ལ། དེ་ནས་རང་གི་མ་རྒན་མོ་ལ་ཟས་གོས་གནས་མལ། ནོར་དང་ལོངས་སྤྱོད་ཐོབ་དང་མངའ་ཐང་། དཔལ་དང་འབྱོར་བ། རིགས་དང་གྲགས་པ། བདེ་ཞིང་སྐྱིད་པ་ཅུང་ཟད་རེ་ཡོད་པ་དེ་དམིགས་པའམ་ཡུལ་ཡིན་ལ། རྣམ་པའམ་བློ་དེ་ལ་དགའ་བར་བལྟ། དགོས་པར་བལྟ། མེད་ཐབས་མེད་པར་བལྟ་ཞིང་དགའ་བ་བསྒོམ། མ་རྒན་གྱི་སྐྱིད་ཀྱི་འབྲས་བུ་དང་དེའི་རྒྱུ་དགེ་བ་ཅུང་ཟད་རེ་ཡོད་པ་དེ་མ་ཉམས་མ་གོད་པར་གོང་ནས་གོང་དུ་འཕེལ་ཞིང་བདེ་བའི་རྒྱུ་དགེ་བ་དང་འབྲས་བུ་བདེ་བ་དེ་དང་མི་འབྲལ་བར་གྱུར་ཅིག མ་བྲལ་ན་ཅི་མ་རུང་། མི་འབྲལ་བ་ཞིག་བདག་ངས་བྱ་སྙམ་པ་དང་། གསོལ་བ་བདེབས། དེ་ལྟར་བདེ་བའི་རྒྱུ་དང་འབྲས་བུ་ཐོབ་ཡོད་པ་རྣམས་མི་འབྲལ་བར་གོང་ནས་གོང་དུ་འཕེལ་ནས་གནས་སྐབས་མངོན་མཐོ་ལྷ་མི་དང་། མཐར་ཐུག་ངེས་ལེགས་ཐར་པ་དང་ཐམས་ཅད་མཁྱེན་པའི་གོ་འཕང་གི་བར་དུ་གོང་ནས་གོང་དུ་འཕེལ་བར་གྱུར་ཅིག འཕེལ་ན་ཅི་མ་རུང་། འཕེལ་བ་ཞིག་བདག་ངས་བྱ་སྙམ་པ་དང་། འཕེལ་བའི་ཆེད་དུ་དཀོན་མཆོག་ལ་གསོལ་བ་འདེབས། དེ་ལྟར་དཔྱད་འཇོག་སྤེལ་མར་བསྒོམ། དེ་ལྟར་འཁོར་གསུམ་པོ་སྣང་ལ་རང་བཞིན་མེད་པའི་ངེས་ཤེས་དྲངས། ཐུན་མཚམས་སུ་དུས་དང་རྣམ་པ་ཐམས་ཅད་དུ་སེམས་ཅན་བདེ་སྐྱིད་ཅན་རྣམས་ལ་ཕྲག་དོག་མི་བྱེད་པར་དགའ་བ་བསྒོམ། མཆེད་གྲོགས་སོགས་ཐོས་བསམ་སྒོམ་པ་དང་ལྡན་པ་ཐམས་ཅད་ལ་དེ་ལྟ་བུའི་བདེ་སྐྱིད་ཡོན་ཏན་ཐམས་ཅད་དང་མི་འབྲལ་བར་ཤོག མི་འབྲལ་བར་གོང་ནས་གོང་དུ་འཕེལ་བར་ཤོག དེ་དང་མ་བྲལ་ན་ཨང་སྙམ་པས་དགའ་བ་བསྒོམ་ན་རང་གི་རྒྱུད་ཀྱིས་ཐོས་བསམ་སྒོམ་པ་ཐམས་ཅད་མི་གོད་མི་ཉམས་པའི་དགོས་པ་ཡོད། དེ་ལྟར་སེམས་ཅན་ཐམས་ཅད་མ་ཡིན། ང་བུ་ཡིན་སྙམ་ནས། མའི་བདེ་བ་ཐམས་ཅད་བུས་བསྒྲུབ་དགོས་པ་ལ་ངས་བ སྒྲུབ་མ་དགོས་པར་སེམས་ཅན་རང་རང་གི་བདེ་བ་རྙེད་པ་ལ་དགའ་བ་བསྒོམ་པ་ལས་ཕྲག་དོག་གཏན་ནས་བྱེད་པའི་ཐབས་མེད། གཉིས་པ་བྱང་ཆུབ་མཆོག་ཏུ་སེམས་བསྐྱེད་པ་ལ། ངོ་བོ་དབྱེ་བ། སེམས་བསྐྱེད་ཚུལ་དང་གསུམ་ལས། དང་པོ་ངོ་བོ་ནི། ཟུར་གཉིས་སམ་དོན་གཉིས་དང་ལྡན་པ་བྱང་ཆུབ་སེམས་བསྐྱེད་ཀྱི་ངོ་བོ་ཡིན་ཏེ། རྒྱལ་ཚབ་བྱམས་པས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པས། ཟུར་དང་པོའམ་དོན་དང་པོ་སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ་སྙམ་པ་སྙིང་རྗེས་སེམས་ཅན་ལ་དམིགས་པ་ཡིན། ཟུར་ཕྱི་མའམ་དོན་ཕྱི་མ་སྡུག་བསྔལ་རྒྱུ་འབྲས་གཉིས་དང་བྲལ་ཏེ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ་སྙམ་པ་དེ་ཤེས་རབ་ཀྱིས་རྫོགས་བྱང་ལ་དམིགས་པ་ཡིན། དེ་ཡང་ཟུར་གཉིས་མ་ཚང་བ་སེམས་ཅན་སྡུག་བསྔལ་དང་བྲལ་ཏེ་བསམ་པ་ལས་སངས་རྒྱས་ཐོབ་འདོད་ལ་མ་དམིགས་པའི་སྙིང་རྗེ་དང་མ་༼ནོར་པ་༽འདྲེས་པ། སྡུག་བསྔལ་མ་དམིགས་ནས་སངས་རྒྱས་ཐོབ་པར་བྱ་སྙམ་པའི་བྱམས་པ་དང་མ་༼ནོར་༽འདྲེས་པའི་ཟུར་གཉིས་སམ་དོན་གཉིས་དང་ལྡན་དགོས། དབྱེ་བ་ལ། བློ་སྟོབས་ཀྱི་དབྱེ་བས་གསུམ་སྟེ་དེ་གསུམ་པོས་ཟུར་དང་པོ་སྙིང་རྗེས་སེམས་ཅན་ལ་དམིགས་པ་ལ་དབྱེ་བ་མེད་ཀྱང་། ཟུར་ཕྱི་མ་འདིའི་སྟེང་ནས་དང་པོ་ངས་སངས་རྒྱས་ཀྱི་གོ་འཕང་བསྒྲུབ་འདོད་པ། འདོད་པ་ཆེན་པོའམ་རྒྱལ་པོ་ལྟ་བུའི་སེམས་བསྐྱེད། ང་དང་སེམས་ཅན་མཉམ་དུ་སངས་རྒྱས་བསྒྲུབ་པ་ལས། ང་སྔོན་དུ་མི་འགྲོ་སེམས་ཅན་རྗེས་སུ་མི་བཞག་ལྷན་དུ་སངས་རྒྱས་ཀྱི་གོ་འཕང་བསྒྲུབ་འདོད་པ། མཉན་པ་ལྟ་བུའམ་ཡེ་ཤེས་དམ་པའི་སེམས་བསྐྱེད། ངས་ཐོག་མ་མེད་པའི་དུས་ནས་རང་འདོད་ཡིད་བྱེད་འདི་བསྒྲུབས་བསྡད་པས་ད་ལྟའི་བར་དུ་འཁྱམས། ད་དུང་ཡང་འདི་བསྒྲུབ་ན་ཐ་མ་མེད་པའི་བར་དུ་འཁྱམ་དགོས་པས་ད་ནི་ང་ཅི་འགྲོ་འགྲོ་ལ་སོང་། དང་པོ་ངས་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་བཀོད་ནས། དེ་ནས་ངས་སངས་རྒྱས་ཀྱི་གོ་འཕང་དེ་ཐོབ་རུང་མ་ཐོབ་རུང་འདྲ་སྙམ་ནས་རང་འདོད་ཡིད་བྱེད་ཀྱི་འགོང་པོ་འདི་རིན་ཆེན་བྱང་ཆུབ་སེམས་ཀྱིས་བཏུལ་ནས། སེམས་ཅན་གཞན་སངས་རྒྱས་ཀྱི་གོ་འཕང་ཐོབ་འདོད་དེ་དཔེ་མེད་པའམ་རྫི་བོ་ལྟ་བུའི་སེམས་བསྐྱེད་ཡིན། དཔེ་རྣམས་ནི་གོ་སླའོ། །དེ་ལྟར་དབང་པོ་ཐ་མས་བསྐལ་བ་གྲངས་མེད་སུམ་ཅུ་སོ་གསུམ། འབྲིང་གིས་བདུན་དང་། རྣོན་པོས་གྲངས་མེད་གསུམ་གྱིས་སངས་རྒྱས་ཐོབ་པ་ཡིན། ས་མཚམས་ཀྱི་དབྱེ་བ་ལ་ཚོགས་སྦྱོར་གཉིས་ཀྱི་ལམ་ན་མོས་པས་སྤྱོད་པའི་སེམས་བསྐྱེད་ཅེས་བྱ་སྟེ། ཀུན་རྫོབ་བྱང་ཆུབ་ཀྱི་སེམས་མཚན་ཉིད་པ་རྒྱུད་ལ་སྐྱེ་རུང་ཡོད་ཀྱང་། དོ ན་དམ་བྱང་ཆུབ་ཀྱི་སེམས་ལ་དོན་སྤྱིའི་སྒོ་ནས་གོ་བའམ་མྱོང་བ་ཙམ་ལས་མངོན་སུམ་དུ་མ་རྟོགས་པས་ན་མོས་པས་སྤྱོད་པའི་སེམས་བསྐྱེད་ཅེས་བརྗོད། ས་དང་པོ་ནས་བདུན་པའི་བར་ལ་ལྷག་བསམ་དག་པའི་སེམས་བསྐྱེད་ཅེས་བྱ་སྟེ། མཉམ་བཞག་ཏུ་ཉོན་ཡིད་འགགས་ནས་རྗེས་ཐོབ་ཏུ་ངར་འཛིན་ཕྲ་བ་རེ་སྐྱེས་ཀྱང་ལམ་གྱི་བར་ཆད་དུ་མི་འགྱུར་བས་ན་ལྷག་བསམ་དག་པའི་སེམས་བསྐྱེད། དག་པ་ས་གསུམ་གྱི་གནས་སྐབས་རྣམ་པར་སྨིན་པའི་སེམས་བསྐྱེད་ཅེས་བྱ་སྟེ། སྔར་ཚོགས་སྦྱོར་གྱི་ལམ་གྱི་སྐབས་སུ་སྨོན་ལམ་གང་བཏབ་པ་དེ་དག་ད་བསྒྲུབ་རན་ཞིང་དཔེར་ན་སྟོན་ལོ་ཏོག་སྨིན་པ་དང་འདྲ་སྟེ་གཞན་དོན་རླབས་པོ་ཆེ་འགྲུབ་པའི་དུས་ཡིན་པས་སོ༑ ༑སངས་རྒྱས་ཀྱི་ས་ན་སྒྲིབ་པ་སྤངས་པའི་སེམས་བསྐྱེད་ཅེས་སྒྲིབ་གཉིས་བག་ཆགས་དང་བཅས་པ་སྤངས་ནས་ཀུན་རྫོབ་སེམས་བསྐྱེད་སྔར་བྱང་ཆུབ་སྙིང་པོར་མཆིས་ཀྱི་བར་ཞེས་པའི་ཁས་བླངས་བའི་དུས་ལས་འདས་ཀྱང་། དོན་དམ་སེམས་བསྐྱེད་ཐོབ་ལ་མ་ཉམས་པའི་ཚུལ་དུ་ཡར་ལྡན་དུ་ཡོད་ཅིང་། གཞན་སེམས་ཅན་དཔག་ཏུ་མེད་པ་ལ་སེམས་བསྐྱེད་པའི་མགོ་ཚུགས་པས་སེམས་བསྐྱེད་ཅེས་སྨྲས་པ་ཡིན་ལ། དེ་ཡང་ཚོགས་སྦྱོར་གྱི་ལམ་ན་ཀུན་རྫོབ་སེམས་བསྐྱེད་རྣམ་པར་དག་པ་ཞིག་ཡོད་ཀྱང་། དོན་དམ་སེམས་བསྐྱེད་ཚོགས་ལམ་པས་གོ་བ་དང་། སྦྱོར་ལམ་པས་མྱོང་བ་ཡིན་ཏེ། ལྟ་བ་ལ་མངོན་སུམ་དང་རྗེས་དཔག་གི་ལྟ་བ་གཉིས་ལས་སྐབས་འདིར་རྗེས་དཔག་གི་ལྟ་བ་ཡིན་པས་མོས་པས་སྤྱོད་པའི་སེམས་བསྐྱེད་ཡིན། སྦྱོར་ལམ་ཆོས་མཆོག་དེ་མ་ཐག་པའི་ཡེ་ཤེས་ཡིན་པས་དེ་རྒྱུད་ལ་སྐྱེ་བའི་སྐད་ཅིག་ཕྱི་མར་མཐོང་ལམ་ལ་སྦྱོར་འགྲོ་བས་དེའི་བར་གྱི་ཚོགས་ལམ་ནས་མཐོང་ལམ་ལ་བསྐལ་པ་གྲངས་མེད་གསུམ་ལྟར་ན་གཅིག་དགོས། མཐོང་ལམ་ཆོས་ཉིད་ཀྱི་བདེན་པ་མཐོང་བའི་ས་དང་པོ་རབ་ཏུ་དགའ་བ་ཞེས་རང་དོན་དུ་ཡེ་ཤེས་མངོན་སུམ་དུ་རྟོགས་པ་དང་། གཞན་དོན་ལ་ཏིང་ངེ་འཛིན་དང་རྫུ་འཕྲུལ་ལ་དབང་འབྱོར་ནས་བསྐལ་བ་སྐད་ཅིག་དང་། སྐད་ཅིག་བསྐལ་བར་བསྒྱུར་བའི་རྫུ་འཕྲུལ་ལ་དབང་འབྱོར་བས་འགྲོ་དོན་རྒྱ་ཆེན་པོ་འོང་བས་རབ་དགའ་ཞེས་དང་། དེ་ལྟར་མ་དག་ས་བདུན་ཏེ་འདི་དག་གི་དུས་སུ་ཉོན་སྒྲིབ་དངོས་སུ་སྤོང་། ཤེས་སྒྲིབ་བརྒྱུད་དེ་ཉམས་སྨད་པར་བྱས་པ་ས་བདུན་པ་མན་ཆད་དུ་ཉོན་ཡིད་མ་སྤངས་པས་མ་དག་ས་བདུན་ཞེས་བརྗོད་ལ། རྗེས་ཐོབ་ན་རང་འདོད་ཀྱི་རྟོག་པ་ཕྲ་མོ་རེ་བྱུང་ཡང་། རང་བཞིན་གྱི་དག་པའམ་ཞིག་འགྲོ་བ་ལས་སྦྱོར་བས་རང་དོན་མི་སྒྲུབ་པས་ལྷག་བསམ་དག་པ་དང་། དག་པ་ས་གསུམ་ཞེས་པ་ཞིང་དང་སྤྱོད་ཡུལ་དག་པས་ཏེ། དག་ས་གསུམ་ན་ཉོན་སྒྲིབ་ལྷག་མ་མ་ལུས་པ་ས་བདུན་པ་ནས་སྤངས་ཟིན་ལ་སྐབས་འདི་གསུམ་དུ་ཤེས་སྒྲིབ་ཕྲ་རགས་ཐམས་ཅད་སྤངས་ནས་ས་བཅུའི་རྒྱུན་གྱི་མཐའ་མ་ལ་བག་ཆགས་ཀྱི་སྒྲིབ་པ་ལྷག་མ་མ་ལུས་པ་སྤངས་པ་ནི་རྣམ་པར་སྨིན་པའོ། །དེ་ལ་སྐད་ཅིག་དང་པོ་གཉེན་པོ་རྡོ་རྗེ་ལྟ་བུའི་ཡེ་ཤེས་ཀྱིས་བག་ཆགས་ཀྱི་སྒྲིབ་པ་ལྷག་མ་མ་ལུས་པ་སྤངས་ནས་སྐད་ཅིག་གཉིས་པ་རྣམ་པ་ཐམས་ཅད་མཁྱེན་པའི་ཡེ་ཤེས་སུ་གནས་གྱུར་པ་སྒྲིབ་པ་སྤངས་པའི་སེམས་བསྐྱེད། དེ་སྐད་ཅིག་མར་བཤད་པ་དེ་རང་གི་ངོ་བོས་ནི་མ་ཡིན་པ། ཡུལ་ལ་བྱ་བ་བྱེད་ཚུལ་གྱི་སྒོ་ནས་ཡིན། སྒྲིབ་གཉིས་ལ་རང་ལུགས། རྒྱུད་བླ་མ་ལས། སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་འདོད། ། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་པས། ཉོན་མོངས་པ་འདོད་ཆགས་ལ་སོགས་པ་ནི་ཉོན་སྒྲིབ་དང་། འཁོར་གསུམ་དུ་བདེན་པར་ཞེན་པ་ཤེས་སྒྲིབ་དུ་བཞེད། གསར་མའི་ལུགས་ལ། ཉོན་སྒྲིབ་དང་ཤེས་སྒྲིབ་གཞི་མཐུན་དུ་འདོད་པ་སྟེ་བདེན་འཛིན་ཉོན་སྒྲིབ་ཏུ་འདོད་ལ། དེ་ལྟར་ན་ཉོན་སྒྲིབ་ཇེ་ཕྲ་ཇེ་ཕྲར་སོང་བ་ལ་ཤེས་སྒྲིབ་དང་། དེ་ཇེ་ཕྲར་སོང་བ་བག་ཆགས་ཀྱི་སྒྲིབ་པར་འདོད་པ་སྟེ། དཔེར་ན་གླ་རྩི་དང་དེའི་སྣོད་ལ་དྲི་མ་བསྣམས་པ་དང་། དེ་ཡང་ཇེ་ཕྲར་གྱུར་པ་ལྟ་བུར་འདོད། ད་ངོ་བོའི་སྒོ་ནས་དབྱེ་ན། ཀུན་རྫོབ་བྱང་ཆུབ་ཀྱི་སེམས་དང་། དོན་དམ་བྱང་ཆུབ་ཀྱི་སེམས་གཉིས། ཇི་སྐད་དུ། ཀུན་རྫོབ་དོན་དམ་དབྱེ་བ་ཡིས། །བྱང་ཆུབ་སེམས་དེ་རྣམ་པ་གཉིས། །ཞེས་པས། ཀུན་རྫོབ་བྱང་ཆུབ་ཀྱི་སེམས་བློ་རྣམ་པར་རྟོག་པ་འདིའི་སྟེང་ནས་བསྐྱེད་སྡུད་བྱེད་པ་ཡིན་ལ། དོན་དམ་བྱང་ཆུབ་ཀྱི་སེམས་རྣམ་པར་རྟོག་པའི་རྒྱུ་བ་དབྱིངས་སུ་ནུབ་པའི་ཡེ་ཤེས་དེ་དོན་དམ་པའི་བྱང་ཆུབ་ཀྱི་སེམས་ཡིན། ཀུན་རྫོབ་བྱང་སེམས་དེ་ལ་སྨོན་པ་དང་། འཇུག་པ་བྱང་ཆུབ་ཀྱི་སེམས་གཉིས། དང་པོ་འབྲས་བུ་ལ་དམ་བཅའ་བ་སྨོན་པ་བྱང་ཆུབ་ཀྱི་སེམས་དང་། དེ་ཐོབ་པའི་རྒྱུའམ་ཐབས་ཕ་རོལ་ཏུ་ཕྱིན་པ་དྲུག་བསྒྲུབ་འདོད་ཀྱི་བསམ་པ་དེ། རྒྱུ་ལ་དམ་བཅའ་བ་འཇུག་པ་བྱང་ཆུབ་ཀྱི་སེམས་ཡིན། དེ་ལ་དམ་བཅའི་ལྕགས་ཀྱུ་གཉིས་པ་རེས་ཟིན་དགོས་པར་གསུངས། དེ་ནི་ཆོ་ག་ལ་བརྟེན་ནས་སྐྱེ་དགོས། དོན་དམ་བྱང་ཆུབ་ཀྱི་སེམས་དེ་གསང་སྔགས་ཀྱི་ལུགས་ལ་ཆོ་ག་ལ་བརྟེན་ནས་སྐྱེ་བར་བཤད་ཀྱང་དེ་ནི་མོས་པ་ལམ་བྱེད་ལས་མཚན་ཉིད་པ་མིན། མཚན་ཉིད་པ་ནི་དམ་པ་གསུམ་ལ་བརྟེན་ནས་བསྒོམ་པའི་སྟོབས་ཀྱིས་སྐྱེ་དགོས་ཏེ། དམ་པ་གསུམ་ནི། མདོ་སྡེ་རྒྱན་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེ་ཕྱིར་དེ་ནི་དམ་པར་འདོད། །ཅེས་པས། ཡོངས་འཛིན་དམ་པ་ལ་ཕྱི་ནང་གཉིས་ལས། ཕྱི་ནི་ཚོགས་ལམ་ནས་བཟུང་མཐོང་ལམ་གྱི་བར་ལ་བླ་མ་དང་རྫོགས་པའི་སངས་རྒྱས་མང་པོ་རབ་ཏུ་མཉེས་པར་བྱས་ཤིང་སུན་པར་མ་བྱས་པ་དང་། ནང་གི་ཡོངས་འཛིན་དམ་པ་སྙིང་རྗེ་དང་ཤེས་རབ་རྣམ་པ་གཉིས་ཀྱིས་ཡོངས་སུ་བཟུང་བ་དང་། རྗེས་སྒྲུབ་དམ་པ་ཚོགས་བསགས་པ་སྣང་བཅས་བསོད་ནམས་ཀྱི་ཚོགས་དང་སྣང་མེད་ཡེ་ཤེས་ཀྱི་ཚོགས་གཉིས་བསགས་པ་དང་། རྟོགས་པ་དམ་པ་ནི་དེའི་མཐའ་ལ་རྣམ་པར་མི་རྟོག་པའི་ཡེ་ཤེས་སྐྱེ་ཞིང་མཐོང་ལམ་གྱི་ཡེ་ཤེས་མཐོང་བ་དེ་ཡིན་ལ། དེ་ནི་མཚན་ཉིད་པ་བསྒོམ་པའི་སྟོབས་ལས་སྐྱེ་དགོས་ཏེ་དེ་ལྟར་ཡོངས་འཛིན་དམ་པ་དང་། རྗེས་སྒྲུབ་དམ་པ་དང་། རྟོགས་པ་དམ་པ་སྟེ་གསུམ་ལ་བརྟེན་ནས་སྐྱེ་དགོས་སོ། །ཀུན་རྫོབ་བྱང་ཆུབ་ཀྱི་སེམས་ཆོ་ག་ལ་བརྟེན་ནས་སྐྱེ་དགོས། དེ་ལ་དབུ་མ་དང་སེམས་ཙམ་གཉིས་སམ། ཟབ་མོ་ལྟ་སྲོལ་དང་། རྒྱ་ཆེན་སྤྱོད་སྲོལ་གཉིས་ལས་གང་ལྟར་ཀྱང་། སྦྱོར་བ་སྔོན་འགྲོའི་ཆོས། དངོས་གཞི་དམ་བཅའ་བ། མཇུག་རང་གཞན་དགའ་བ་བསྒོམ་པ་དང་གསུམ་ལས། དང་པོ་སྦྱོར་བ་སྔོན་འགྲོའི་ཆོས་ལ། ཚོགས་བསགས་པ། བློ་སྦྱོང་བ། དེའི་སྟེང་དུ་ཞི་བ་ལྷའི་དགོངས་པ་ལྟར་ན་ཡོངས་སུ་བཟུང་བའི་གཞི་གསུམ་གཏོང་བའོ། །དེ་ལ་དབུ་མ་པས་ཚོགས་བསགས་པ་ལས་སྐྱེ་བར་བཞེད་པ་དང་། སེམས་ཙམ་པའི་ལུགས་ལ་སེམས་དྭངས་བ་ལས་སྐྱེ་བར་བཞེད་པ་ཡིན་ལ། དེ་ཡང་ཡན་ལག་བདུན་གྱིས་སྒོ་ནས་ཚོགས་བསགས་པ་དང་དེའི་རྗེས་སུ་ཚད་མེད་བཞིའི་བློ་སྦྱངས། དེ་ནས་ཡོངས་སུ་བཟུང་བའི་གཞི་གསུམ་པོ་བཏང་ཞིང་དེ་ནི་ཡོངས་སུ་བཟུང་པའི་གཞི་གསུམ་པོ་ལ་འཛིན་པ་གཅོད་པས་གཅོད་ཡུལ་གྱི་ཉམས་ལེན་ཡང་ཡིན། སྐབས་འདིར་བསྟན་གྱི་བློ་སྦྱོང་བ་དང་གཉིས་ཀ་ཡིན། གཉིས་པ་དངོས་གཞི་ལ། དགོངས་སུ་གསོལ་བ་མ་སོང་བའི་མགོར། འདི་ལྟར་ནམ་མཁས་གར་ཁྱབ་སེམས་ཅན་གྱིས་ཁྱབ་སོགས་ནས། མར་ཤེས། དྲིན་དྲན། དྲིན་གཟོ་འདོད། སྙིང་རྗེས་སེམས་ཅན་ལ་དམིགས་པ་དང་ཤེས་རབ་ཀྱིས་རྫོགས་བྱང་ལ་དམིགས་པ་གཉིས་པོ་ཚང་བར་བྱས་ནས་བསྒོམ། ཡང་མདོར་བསྡུས་ཏེ། སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ཏེ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པའི་ཆེད་དུ་ངས་སྨོན་པ་བྱང་ཆུབ་མཆོག་ཏུ་སེམས་བསྐྱེད། འཇུག་སེམས་ལ་ཡང་རང་གི་ནུས་ཚོད་ཀྱིས་ཕར་ཕྱིན་དྲུག་ལ་བསླབ་པར་བསམ་ནས། དེ་ནས་ཕྱོགས་བཅུ་ན་བཞུགས་པའི་སོགས་སངས་རྒྱས་དང་བྱང་ཆུབ་སེམས་དཔའ་དང་། བླ་མ་རྡོ་རྗེ་འཛིན་པ་ཆེན་པོ་དང་གསུམ་ལ་དགོངས་སུ་གསོལ་བ་གསུམ་སྔོན་དུ་སོང་ནས། དེ་ནས་སྐྱབས་སུ་འགྲོ་བ་ཁྱད་པར་གསུམ་དང་ལྡན་པའི་སྒོ་ནས་བྱང་ཆུབ་སྙིང་པོར་མཆིས་ཀྱི་བར་སོགས་ཀྱིས་སྐྱབས་སུ་འགྲོ་བ་གསུམ་གྱི་གཞི་བཟུང་། དེ་གཉིས་ནི་སྦྱོར་བའི་ཆོས་ཡིན་ལ། དངོས་གཞི་དམ་བཅའ་བ་གསུམ་ནི། ཇི་ལྟར་སྔོན་གྱི་བདེ་གཤེགས་སོགས་བརྗོད། དེ་ཡང་ཚིག་སྔ་མ་གཉིས་ཀྱིས་རྒྱལ་བ་སྲས་བཅས་ཀྱི་སྔོན་སྨོན་པ་བྱང་ཆུབ་མཆོག་ཏུ་ཐུགས་ཇི་ལྟར་བསྐྱེད་པ་དང་། ཕྱི་མ་གཉིས་ཀྱིས་འཇུག་པ་བྱང་ཆུབ་མཆོག་ཏུ་ཐུགས་བསྐྱེད་པ་ལྟར་ཞེས་པས། གང་གི་ལད་མོ་བྱེད་པའི་ཡུལ་བསྟན། དེ་ནས་ཚིག་ཕྱི་མ་གཉིས་ཀྱིས་བདག་གིས་ཀྱང་རྒྱལ་བ་སྲས་དང་བཅས་པའི་རྗེས་སུ་བསླབ་སྟེ་སྨོན་པ་བྱང་ཆུབ་མཆོག་ཏུ་སེམས་བསྐྱེད་པ་དང་། དེའི་རྒྱུ་ཕ་རོལ་ཏུ་ཕྱིན་པ་དྲུག་ལ་རང་གི་ནུས་ཚོད་ནས་རིམ་གྱིས་བསླབ་པར་བགྱིའོ་སྙམ་པའི་སྒོ་ནས་ལན་གསུམ་བརྗོད་པའི་ཐ་མ་ལ་རྒྱལ་བ་སྲས་བཅས་ཀྱིས་ཐབས་ཡིན་ནོ། །ཞེས་གསུངས་ཤིང་། བདག་གིས་ལེགས་སོ་ཞེས་བརྗོད་པར་བསམ་ལ་ཐོབ་ཤེས་ཀྱི་གོ་བ་དང་བཅས་པ་ཡིད་ལ་བཞག སྡོམ་པའི་ཐོབ་མཚམས་ནི༑ ཐོབ་མཚམས་བརྗོད་པ་གསུམ་གྱི་མཐའ་ལའོ། །ཞེས་པས་བརྗོད་པ་གསུམ་པའི་མཇུག་རྫོགས་པ་དེ་མ་ཐག་ཏུ་སྐྱེ་བ་ཡིན། དེ་ནས་མཇུག་རང་གཞན་དགའ་བ་བསྒོམ་པ་ནི། དེང་དུས་བདག་ཚེ་སོགས། དུས་དེ་རིང་གི་ཉི་མའི་ཚེ་འདི་ལ་བདག་གི་མིའི་ལུས་རྟེན་ཐོབ་པ་ལ་འབྲས་བུ་དོན་ཡོད་པར་བྱས་ཏེ། གང་གིས་ན་མི་ཡི་སྲིད་པ་ཞིག་ཐོབ་པ་དེ་ཉེས་ཐོབ་མ་ཡིན་པར་ལེགས་པར་ཐོབ་སྟེ། ཇི་ལྟར་ན་དེ་རིང་བདག་སངས་རྒྱས་ཀྱི་རིགས་རིན་ཆེན་བྱང་ཆུབ་ཀྱི་སེམས་བདག་གི་རྒྱུད་ལ་སྐྱེས་ཤིང་། སངས་རྒྱས་ཀྱི་སྲས་སྐུའི་གདུང་འཚོ་བ། གསུང་གི་མཛོད་འཛིན། ཐུགས་ཀྱི་གསང་བ་འཆང་། གདུལ་བྱའི་ལྷག་མ་སྐྱོང་བར་བྱེད་པའི་སྲས་བྱང་ཆུབ་སེམས་དཔར་ཡང་གྱུར་ལ། ད་ནི་བདག་གིས་ཅི་ནས་ཀྱང་སྲོག་དམར་པོ་འདི་ལ་ཐུག་ཀྱང་རང་འདོད་ཡིད་བྱེད་ཀྱི་སྐྱོན་མེད་པ་ཡོན་ཏན་འབའ་ཞིག་གིས་བཙུན་པའི་རིགས་རྒྱལ་པོའི་བཙུན་མོ་དམ་པ་ལྟ་བུ་འདི་ལ། རང་འདོད་ཀྱི་བསམ་པ་ངན་པས་རིགས་བསླད་པའི་རྙོགས་མར་མི་འགྱུར་བ་དེ་ལྟར་བྱ་དགོས་ཤིང་། རིགས་དམ་པ་དང་མཐུན་པའི་ལས་རྒྱལ་སྲས་བྱང་ཆུབ་སེམས་དཔའི་སྤྱོད་པ་བརྩམ་དགོས་སོ། །ཇི་ལྟར་རྒྱུད་ལ་སྐྱེས་ན་མི་ལོང་པས་ཕྱག་དར་གྱི་ཁྲོད་ནས་རིན་པོ་ཆེ་ནོར་བུ་རྙེད་པ་ལྟར། ཅི་ཞིག་ན་སྟབས་ལེགས་དང་ལྟེས་དབང་ལྟ་བུའི་ངའི་རྒྱུད་ལ་རིན་ཆེན་བྱང་ཆུབ་ཀྱི་སེམས་སྐྱེས་སོ་སྙམ་དུ་རང་དགའ་བ་བསྒོམ། གཞན་དགའ་བ་བསྒོམ་དུ་གཞུག་པ་ནི། བདག་གིས་དེ་རིང་སོགས། བདག་གིས་དུས་དེ་རིང་གི་ཉི་མ་འདི། དུས་ཚོད་འདི་ཟླ་བ་འདི་ལོ་འདི་ཞེས་པ་ལ་སྐྱོབས་པ་སྲས་དང་བཅས་པའི་སྤྱན་སྔར་སེམས་ཅན་ཐམས་ཅད་གནས་སྐབས་ལྷ་དང་མིའི་གོ་འཕང་། མཐར་ཐུག་རྫོགས་པའི་སངས་རྒྱས་ཀྱི་གོ་འཕང་གི་བདེ་བ་ལ་མགྲོན་དུ་འབོད་ཅིང་བོས་ཟིན་པ་ཡིན་པས། ལྷ་དང་ལྷ་མིན་དང་། མི་དང་མ་ཡིན་ལ་སོགས་འགྲོ་བ་རིགས་དྲུག་པོའི་སེམས་ཅན་ཁྱེད་རྣམས་དགའ་བ་སྒོམས་ཤིག་སྙམ། དེ་ནས་རིའི་ལྷ་དང་ཤིང་གི་ལྷ་དང་ཚལ་གྱི་ལྷ་ལ་སོགས་པ་ནས་འོག་མིན་གྱི་ལྷའི་བར་དུ་གཅིག་གིས་གཅིག་ལ་བསྒྲགས་ཏེ། གནས་ག་གེ་མོ་ན། གང་ཟག་ཆེ་གེ་མོས་བདག་ཅག་རྣམས་གནས་སྐབས་ལྷ་དང་མི་དང་། མཐར་ཐུག་རྫོགས་པའི་སངས་རྒྱས་ཀྱི་གོ་འཕང་ལ་འགོད་པ་ཡིན་ཟེར་བས་དགའ་བ་སྒོམས་ཤིག་ཅེས་ཐོས་པར་བསམ་ན་ཕྱིས་ལྟུང་བ་ལ་སྦྱོར་འདོད་པ་སོགས་བྱུང་ན་ངོ་ཚ་དང་ཁྲེལ་ཡོད་ཀྱི་རྟེན་དུ་རུང་བ་ཡིན། དེ་ལྟར་བྱང་ཆུབ་མཆོག་ཏུ་སེམས་བསྐྱེད་ནས་གཏོང་རྒྱུ་རྩ་ལྟུང་རེ་མ་བྱུང་གི་བར་དུ། མིང་གནས་འགྱུར་ནས་རྒྱལ་སྲས་བྱང་ཆུབ་སེམས་དཔའ་ཞེས་པ་དང་། དོན་གནས་འགྱུར་ནས་འགྲོ་བ་ལྷ་དང་བཅས་པ་སྐྱེ་དགུའི་བདག་པོ་དང་བཅས་པ་དེར་མ་ཟད་སྟོན་པ་བཅོམ་ལྡན་འདས་ཀྱིས་ཀྱང་ཕྱག་དང་མཆོད་འོས་སུ་གྱུར་པ་དང་། རྒྱལ་སྲས་ཕྱག་ན་རྡོ་རྗེ་ཕྲག་ལྷར་ཐོགས། དཀར་ཕྱོགས་སྐྱོང་བའི་ལྷ་ཚངས་པ་སོགས་གཙང་རིས་ཀྱི་ལྷ་དཔལ་མགོན་བདུན་ཅུ་ལ་སོགས་པས་བསྲུང་ཞིང་སྐྱོབ། གང་དུ་གནས་པའི་ཕྱོགས་སུ་ནད་དང་དབུལ་ཕོངས་ཞི་བ་ལ་སོགས་པའི་ཡོན་ཏན་ཐམས་ཅད་ཐོབ་པ་ཡིན། དེ་ལྟ་བུའི་བྱང་ཆུབ་ཀྱི་སེམས་དེ་བསྐྱེད་པ་སླ་ཡང་རྒྱུད་ལ་སྐྱེ་བར་དཀའ་བས་ཚད་མེད་བཞིའམ། བྱམས་སྙིང་རྗེ་གཉིས་སམ། སྙིང་རྗེ་ཉག་མ་གཅིག་པུ་འདི་བསྒོམ་ནས་གཟབ་གཟབ་བྱེད་དགོས། ཇི་ལྟར་ཡིན་ན། ཁས་ལེན་ཟོས་ན་སོ་ཐར་གྱི་སྡོམ་པ་ཉམས་ན་མཁན་སློབ་ལྔ་དྲུག་ཙམ་མགོ་བསྐོར་བ་ལྟ་བུ་མ་ཡིན་པར། བྱང་ཆུབ་ཀྱི་སེམས་ཉམས་ན་ནག་པོའི་ཆོས་བཞི་པོ་ཅིག་ཆར་དུ་རྒྱུད་ལ་འབྱུང་སྟེ་མཆོད་འོས་བསླུ་བ་རྒྱལ་བ་སྲས་དང་བཅས་པ་མ་ལུས་པ་བསླུས་པ་དང་། འགྲོ་ལ་གཡོ་རྒྱུའི་སྤྱོད་པ་སེམས་ཅན་ཐམས་ཅད་བསླུས་ཏེ་མདོར་ན་འཁོར་འདས་གཉིས་ཀ་མགོ་ཁྱི་སྐོར་སྐོར་བྱེད་པས་སྡིག་པ་ཤིན་ཏུ་ལྕི་བ་ཐོབ་པ་ཡིན་ནོ། །བྱང་ཆུབ་སེམས་ཀྱི་ཕན་ཡོན་ནི། ཡོད་ན་སངས་རྒྱས་སྒྲུབ་ལ་དེས་ཆོག་ཅིང་། །མེད་ན་སངས་རྒྱས་སྒྲུབ་ལ་ཐབས་ཆག་པའི། ། སངས་རྒྱས་སྒྲུབ་པའི་ས་བོན་མ་ནོར་བ། །རྣམ་དག་བྱང་ཆུབ་སེམས་མཆོག་འབྱུང་བར་ཤོག ། ཅེས་པས། བྱང་ཆུབ་ཀྱི་སེམས་ཡོད་ན་བྱང་ཆུབ་སྒྲུབ་པ་ལ་དེས་ཆོག་ལ། མེད་ན་ཐབས་ཆག་པའི་ས་བོན་ཞེས་པ་ལ། རང་བཞིན་གནས་རིག་དང་། རྒྱས་འགྱུར་གྱི་རིགས་གཉིས་ལས། དང་པོ་སེམས་ཅན་ཐམས་ཅད་ཀྱི་རྒྱུད་ན་བདེ་གཤེགས་སྙིང་པོའི་ཡེ་ཤེས་ཡོད་པ་དེ་ཡིན། རྒྱས་འགྱུར་གྱི་རིགས་ཀུན་རྫོབ་བྱང་ཆུབ་ཀྱི་སེམས་ཡིན་ལ། དེ་གཉིས་སངས་རྒྱས་སྒྲུབ་པ་ལ་རང་བཞིན་གནས་རིགས་རྒྱུ་དང་། རྒྱས་འགྱུར་གྱི་རིགས་རྐྱེན་ཡིན་པས་ས་བོན་ལྟ་བུ་ཡིན་ལ། དེ་ལྟ་བུའི་སེམས་དེ་རྒྱུད་ལ་སྐྱེ་བ་ནས་གོང་དུ་བཤད་པ་ལྟར་མིང་དོན་གནས་འགྱུར་བའི་ཕན་ཡོན་དགེ་རྩ་ཐམས་ཅད་ཐེག་པ་ཆེན་པོར་འགྲོ་བ་བཟའ་ཤིང་གི་འབྲས་བུའི་དཔེའི་ཕན་ཡོན། བྱང་ཆུབ་སེམས་ཀྱིས་མ་ཟིན་པའི་དགེ་རྩ་ཐམས་ཅད་བདེ་འབྲས་ལན་གཅིག་མྱོང་སྟེ་ཟད་པ་ཆུ་ཤིང་གི་འབྲས་བུ་ལྟ་བུ་ལས་ཁྱད་པར་དུ་འཕགས་པའི་ཕན་ཡོན། ཕན་ཡོན་གསུམ་པོ་དཔེར་ན། མར་མེ་རྡོག་པོ་གཅིག་ལྟ་བུ་ལས་མ་མཆོད་ཀྱང་། སངས་རྒྱས་ཀྱི་གོ་འཕང་ལ་དམིགས་ནས་མཆོད་ན། ཡར་སངས་རྒྱས་ཀྱི་ཡོན་ཏན་གྱི་གྲངས་དང་། མར་སེམས་ཅན་གྱི་གྲངས་ཀྱིས་དགེ་རྩ་གོང་ནས་གོང་འཕེལ་དུ་འགྲོ་བ་ཡིན། ངེས་པའི་སྡིག་པ་མཚམས་མེད་ཀྱི་ལས་བསགས་པ་ཞིག་གི་རྒྱུད་ལ་རིན་པོ་ཆེ་བྱང་ཆུབ་ཀྱི་སེམས་དེ་སྐྱེས་ན་ངན་སོང་དུ་དར་གྱི་ཕོ་ལོང་བརྡབ་པ་ཙམ་ལས་འགྲོ་མི་དགོས་པ་དང་། མ་ངེས་པའི་སྡིག་པ་མི་བསད་རྟ་སྒྲིལ། ཁང་མེ་རོ་དུད་སྤྲད་པ་ལྟ་བུའི་སྡིག་པ་ཐམས་ཅད་བྱང་ཆུབ་ཀྱི་སེམས་རྒྱུད་ལ་སྐྱེ་བའི་སྐད་ཅིག་ལ་དུས་མཐའི་མེས་རྩྭ་སྦུར་བསྲེགས་པ་ལྟར་འཇོམས་པ་དང་། དེས་ན་ལས་ཉོན་གྱི་སྒྲིབ་པ་དྲུང་ནས་འབྱིན་པ། ཤེས་བྱའི་སྒྲིབ་པ་མཐར་འབྱིན་པ་ཡིན་པས་དེ་ལྟ་བུའི་ཕན་ཡོན་རྣམས་རྒྱས་པར་ཕལ་པོ་ཆེའི་མདོ་ལྟར་དང་། འབྲིང་སྤྱོད་འཇུག་ལེའུ་དང་པོའམ། བསྡུ་ན་བྱམས་པས། ངན་འགྲོའི་ལམ་ལས་བཟློག་བགྱིད་ཅིང་། །མཐོ་རིས་ལམ་ནི་རབ་སྟོན་པ། །རྒ་ཤི་མེད་པར་འདྲེན་བགྱིད་པ། །བྱང་ཆུབ་སེམས་ལ་ཕྱག་འཚལ་ལོ། ། ཞེས་པས། བྱང་ཆུབ་སེམས་ཀྱི་ཕན་ཡོན་དུས་དང་རྣམ་པ་ཐམས་ཅད་དུ་དྲན་ན་བྱང་ཆུབ་སེམས་མི་ཉམས་ཤིང་རྩ་ལྟུང་སོགས་མི་འབྱུང་བའི་ཐབས་སུ་དང་པོ་མགོ་དང་། མཇུག་རང་གཞན་དགའ་བ་བསྒོམ་པའི་མགོ་རྣམས་སུ་དྲན་དགོས། ད་ནི་སྐྱེས་པ་ཉམས་པ་མེད་པ་དང་མི་ཉམས་པ་གོང་ནས་གོང་དུ་འཕེལ་བའི་ཐབས་ལ། སྨོན་པའི་བསླབ་བྱ་དང་། འཇུག་པའི་བསླབ་བྱ་གཉིས་ལས། དང་པོ་སྐྱེས་པ་མི་ཉམས་པའི་ཐབས་ལ་སྨོན་པའི་སེམས་ཏེ། བྱང་ཆུབ་ཀྱི་སེམས་ཉམས་པར་བྱེད་པའི་རྒྱུ་བདག་རང་འདོད་སྒྲུབ་པའི་བསམ་པ་དང་དེའི་གྲོགས་ཁོང་ཁྲོ་གཉིས་པོ་འདི་ཡིན་ལ། འདི་གཉིས་ཀས་བྱང་ཆུབ་ཀྱི་སེམས་ཉམས་པ་དང་མི་འཕེལ་བར་བྱེད་དེ། ཇི་ལྟར་ཉམས་ན། སྨོན་པ་བྱང་ཆུབ་ཀྱི་སེམས་དེའི་ཟུར་གཉིས་པོ་གང་ཉམས་ན་དཔེར་ན་སྡོང་པོའི་རྩ་བ་བཅད་པ་ན་ཡན་ལག་ཐམས་ཅད་ཤུགས་ལ་འགྱེལ་བ་དང་འདྲ་བས་རྩ་བའི་ལྟུང་བ་བྱུང་ཚར་ནས་ཡན་ལག་གི་ལྟུང་བ་གཞན་མ་ཉམས་ཀྱང་མི་ཕན། རྩ་བ་ཉམས་ན་གསོ་དཀའ་ལ་ཡན་ལག་ཉམས་ན་གསོ་སླ། དེ་ལ་ཟུར་གཉིས་པོ་ཇི་ལྟར་ཉམས་ན། སེམས་ཅན་བློས་བཏང་དང་། རྣམ་མཁྱེན་བློས་བཏང་གཉིས། དང་པོ་སེམས་ཅན་བློས་བཏང་ལ་རང་ལ་གནོད་པ་བྱེད་པ་ཕ་བསད་ཀྱི་ལག་དམར་ལྟ་བུའམ། མིན་ཀྱང་རང་གི་སེམས་མི་དགའ་ས་ཞིག་ལ་ཁྱོད་ཀྱིས་ང་ལ་ཟེར་ནས་དེའི་དུས་སུ་ཕུག་རང་འདོད་ཡིད་བྱེད་ཀྱི་བསམ་པ་དེ་བསླང་བ་ཡིན་ཏེ། ཁོང་ཁྲོ་སྐྱེ་བའི་ཚེ་གཅིག་གིས་གཅིག་བློས་བཏང་བ་སྟེ་དེ་ལྟར་རང་འདོད་ཡིད་བྱེད་དང་ཁོང་ཁྲོ་གཉིས་ཀྱིས་སྙིང་རྗེས་སེམས་ཅན་ལ་དམིགས་པ་ཉམས་པར་བྱེད་པ་སྟེ་དཔེར་ན་དབྱུག་པ་མང་པོ་ལྷན་དུ་བསྡམས་པ་ནས་གཅིག་བླངས་ན། གཞན་ཐམས་ཅད་ཤུགས་ཀྱིས་འཐོར་བ་ལྟར། སེམས་ཅན་གཅིག་བློས་བཏང་། གཞན་བློས་མ་བཏང་ཡང་མི་ཕན་དེ་རྩ་ལྟུང་བྱུང་ཚར་བ་ཡིན། རྣམ་མཁྱེན་བློས་བཏང་། དཔེར་ན་སྦྱིན་པ་ལྟ་བུ་གཅིག་ལ་མཚོན་ན། སྦྱིན་རྒྱུའི་དངོས་པོ་མགོ་དང་ཡན་ལག སྦྱིན་པའི་ཡུལ་སེམས་ཅན་ཐམས་ཅད། དུས་སྲིད་པ་ཇི་སྲིད་དུ། གྲངས་སེམས་ཅན་རེ་རེ་ལ་མགོ་དང་ཡན་ལག་རྡུལ་གྱི་གྲངས་སྙེད་རེ་མ་འཕྲོད་ས་མེད་པ། དེའི་རིགས་འགྲེས་དེ་ཚུལ་ཁྲིམས་ལ་སོགས་པ་དེ་ལྟ་བུ་རེ་བསྒྲུབ་དགོས་ཏེ། བདག་ཅག་གི་སྟོན་པས་བྱང་ཆུབ་ཤིང་གི་དྲུང་དུ་མགོ་དང་ཡན་ལག་ས་ཆེན་པོའི་རྡུལ་གྱི་གྲངས་ལས་འདས་པ་ཞིག་བྱིན་པ་ཡིན་ན་གཞན་དང་གཞན་ནས་སྨྲས་མ་དགོས་པའི་ཕྱིན་དྲུག་ལ་བསླབ་པ་ལྟར་བསླབ་ཅིང་ཚོགས་བསགས་པ་བདུད་ཀྱི་བར་ཆད་ཀྱིས་ཀྱང་ཚོགས་སྦྱོར་གྱི་ལམ་ནས་བླ་ཤོར་ཏེ་ཨེ་ངས་དེ་ལྟ་བུ་སྒྲུབ་པ་ཆེན་པོ་མ་རེད། ཉན་རང་དགྲ་བཅོམ་པའི་གོ་འཕང་བསྒྲུབ་ན་དེའི་དགའ་འམ་སྙམ་ནས། མཐོང་ལམ་གྱི་རྟོགས་བྱ་ཆོས་ཐམས་ཅད་སྒྱུ་མ་ལྟ་བུ་ཉམས་འོག་ཏུ་མ་ཆུད་པས་རྣམ་མཁྱེན་བློས་བཏང་ཡང་། ཚོགས་སྦྱོར་གྱི་ལམ་འདི་ནས་དང་པོ་བདག་རང་འདོད་སྒྲུབ་པའི་བསམ་སྦྱོར་འདི་ལ་ཐུག་པས་མདོ་ལུགས་ཀྱི་སོ་བྱང་གཉིས་ཀའི་སྡོམ་པའང་རང་འདོད་ཡིད་བྱེད་འདིས་ཤོར། སྔགས་ཀྱི་བླ་མ་དང་མཆེད་གྲོགས་དང་འགལ་ནས་སྡོམ་པ་ཉམས་པ་དེ་བདག་རང་འདོད་སྒྲུབ་པའི་བསམ་སྦྱོར་འདི་ལ་ཐུག་པས་བདག་རང་འདོད་སྒྲུབ་པའི་ཉེས་དམིགས་དང་རིན་པོ་ཆེ་བྱང་ཆུབ་སེམས་ཀྱི་ཕན་ཡོན་གོང་དུ་བཤད་པ་རྣམས་དྲན་དགོས། མདོར་ན་ཞི་བ་ལྷས། མང་དུ་བཤད་ལྟ་ཅི་ཞིག་དགོས། །ཐུབ་པས་གཞན་དོན་མཛད་པ་དང་། །བྱིས་པ་རང་དོན་སྒྲུབ་པ་ཡིས། །འདི་གཉིས་ཀྱི་ནི་ཁྱད་པར་ལྟོས། །ཞེས་པས། ཐུབ་པ་རྫོགས་པའི་སངས་རྒྱས་བཅོམ་ལྡན་འདས་ཀྱིས་གཞན་ཕན་དོན་དུ་གཉེར་བས་མངོན་པར་རྫོགས་པའི་སངས་རྒྱས་ཀྱི་གོ་འཕང་ཐོབ། བྱིས་པ་རྣམས་ཀྱིས་ཐོག་མ་མེད་པ་ནས་ང་ཞེས་རང་འདོད་བ སྒྲུབས། ད་དུང་ཡང་ང་ཞེས་རང་འདོད་སྒྲུབ་བསྡད་ན་ཐ་མ་མེད་པའི་བར་དུ་འཁོར་བ་ཡིན་ཅིང་དེས་ན་སྲིད་ཞི་གཉིས་ཀའི་བདེ་སྐྱིད་ཀྱི་ཆ་ཅི་ཡོད་ཐམས་ཅད་གཞན་ཕན་བྱང་ཆུབ་སེམས་ཀྱི་ཕན་ཡོན་ཡིན་ཏེ། ཟླ་བས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས་སོགས། ཚེ་འདི་དང་ཕྱི་མའི་སྡུག་བསྔལ་ཕྲ་རགས་སྟེ་ཁམས་གསུམ་འཁོར་བའི་སྡུག་བསྔལ་ཐམས་ཅད་རང་འདོད་སྒྲུབ་པའི་བསམ་སྦྱོར་འདི་ལ་ཐུག དེས་ན་རང་འདོད་འདི་ལ་འགོང་པོ་ཞེས་བཏགས་དགོས་ཏེ་འབྲི་གཅིག་གི་འོ་མ་ཁ་ལ་མི་འོང་བ་ལ་འགོང་པོ་བཏགས་དར་ན། རང་འདོད་ཡིད་བྱེད་ཀྱི་བསམ་པ་འདིས་གནས་སྐབས་རྒྱལ་སྲས་བྱང་ཆུབ་སེམས་དཔའི་སའི་ཡོན་ཏན། མཐར་ཐུག་རྣམ་པ་ཐམས་ཅད་མཁྱེན་པའི་འབྲས་བུའི་ཡོན་ཏན་ཐམས་ཅད་རང་རྒྱུད་ལ་འོང་དུ་མི་སྟེར་བའི་འགོང་པོ་འདི་ཡིན་ལ། འདི་ཕུད་པར་བྱེད་པ་ལ། བྱང་ཆུབ་ཀྱི་སེམས་ལ་འགོང་པོ་འགོང་རྫོང་གི་ཆོ་ག་ཞེས་མིང་བཏགས། ཇི་ལྟར་རྫོང་དགོས་ན། བདག་གཞན་མཉམ་པ་དང་། བརྗེ་བ་དང་། གཞན་གཅེས་གསུམ་ལ་བློ་སྦྱོང་ནས་བྱང་ཆུབ་ཀྱི་སེམས་མི་ཉམས་ཤིང་རང་འདོད་སྒྲུབ་པའི་འགོང་པོ་ཡུལ་འདོན་ཐུབ་པ་ཡིན་པས། དང་པོ་བདག་གཞན་མཉམ་པ་བསྒོམ་པ་ལ། ཐོག་མ་མེད་པ་ནས་བདག་གཞན་མ་མཉམ་པས་བདག་དང་དེའི་ཕྱོགས་ལ་ཆགས། དགྲ་དང་དེའི་ཕྱོགས་ལ་སྡང་བས། ད་ནི་བདག་དང་དེའི་ཕྱོགས་ལ་ཆགས་པ་བཏང་། གཞན་དང་དེའི་ཕྱོགས་ལ་སྡང་བ་བཏང་དགོས། དེ་གཉིས་ཀའི་རྩ་བ་བདག་རང་འདོད་སྒྲུབ་པའི་བསམ་སྦྱོར་འདི་ལ་ཐུག་པས་དེའི་སྐྱོན་ཤེས་ནས་ད་ནི་སྔོན་གྱི་དེ་ལྟར་མི་བྱེད་པར་རང་གཞན་གཉིས་གཞི་སྡོང་ཆུས་སྡོང་བྱེད་དགོས། དེ་ཇི་ལྟར་སྡོམ་དགོས་ན། ནམ་མཁས་གར་ཁྱབ་ཀྱི་སེམས་ཅན་ངའི་མ་ཡིན། ང་བུ་ཡིན། ངེད་མ་གཅིག་ལ་བུ་གཅིག་པུ་ཡོད་པ་ཡིན་པས་ངེད་མ་བུ་གཉིས་སྐྱིད་སྡུག་མཉམ་པ་ཡིན་བསམ་ན་བདག་དོན་སྒྲུབ་པའི་བསམ་པ་དེ་མེད་དེ་ཞི་འགྲོ་བ་ཡིན། སེམས་ཅན་ཐམས་ཅད་ངེད་ཚང་ཡིན། ངེད་གཉིས་ཀས་བདེ་བ་འདོད་པ་ལ་མཉམ། སྡུག་བསྔལ་མི་འདོད་པ་ལ་མཉམ་པ་ཡིན། བྱམས་པ་ཆེན་པོས་བདག་དང་སེམས་ཅན་ཐམས་ཅད་ཀྱི་བདེ་བ་ལྷན་སྒྲུབ་བྱེད་བསམ་ནས། བསམ་པས་ཡིན་ན་བདེ་བ་ལྷན་སྒྲུབ་བྱེད། སྦྱོར་བས་ཡིན་ན་བདེ་བ་ལྷན་སྒྲུབ་བྱེད་དགོས་ཏེ། སེམས་ཅན་ཐམས་ཅད་ཀྱིས་འདོད་པ་བདེ་བ་འདོད་ཀྱང་བདེ་བའི་རྒྱུ་དགེ་བ་དང་ཡང་དག་པའི་ལམ་སྒྲུབ་ནི་མི་ཤེས། ཚུལ་བཞིན་སྟོན་པའི་དགེ་བའི་བཤེས་གཉེན་ནི་མེད། གལ་ཏེ་ཡོད་ན་ཡང་དེའི་བཀའ་བཞིན་མི་སྒྲུབ། ང་དགེ་བའི་བཤེས་གཉེན་དང་མཇལ། ཐེག་པ་ཆེན་པོའི་ཆོས་དང་འཕྲད། བླང་དོར་གྱི་དམིགས་ཤེས་པ་པོ་བླ་མ་དགེ་བའི་བཤེས་གཉེན་དང་དགེ་བའི་གྲོགས་པོ་དག་དང་འགྲོགས་པའི་ཆོས་པ་ཡིན་ཆགས་བྱེད་དགོས་ན། སེམས་ཅན་ཐམས་ཅད་ཀྱི་བདེ་བ་ངས་བསྒྲུབ་དགོས། དེ་ལ་སེམས་ཅན་ཐམས་ཅད་ཀྱི་བདེ་བའི་འབྲས་བུ་མངོན་མཐོ་ལྷ་དང་མིའི་གོ་འཕང་ནས་རྫོགས་པའི་སངས་རྒྱས་ཀྱི་བར་གྱི་བདེ་བ་དང་། དེའི་རྒྱུ་དད་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་སྟེ་བདེ་བ་རྒྱུ་འབྲས་གཉིས་དང་ལྡན་པར་གྱུར་ཅིག ལྡན་ན་ཅི་མ་རུང་། ལྡན་པ་ཞིག་བདག་ངས་བྱ་སྙམ་པའི་སྨོན་པ་དང་འབྲེལ་བ། འདུན་པ་དང་འབྲེལ་བ། དམ་བཅའ་དང་འབྲེལ་བ། དཀོན་མཆོག་ལ་གསོལ་བ་གདབ་པ་སྟེ་བཞི་པོ་བསྒོམ། དེ་ནི་དང་པོ་བདེ་བའི་འབྲས་བུ་མངོན་མཐོ་སོགས་ལ་དམིགས་ནས་འབྲེལ་བ་གསུམ་ལྡན་དང་གསོལ་འདེབས། དེ་ནས་དེའི་རྒྱུ་དད་སོགས་ལ་དམིགས་ནས་འབྲེལ་བ་གསུམ་ལྡན་གསོལ་འདེབས་བཅས་པ་དང་། དེ་རིང་ནས་བཟུང་བསམ་སྦྱོར་གཉིས་ཀས་མཉམ་པར་ཕན་འདོགས་དགོས། བསམ་པས་ཡིན་ན་སངས་རྒྱས་ཀྱི་གོ་འཕང་ལྷན་སྒྲུབ་དང་། སྦྱོར་བས་ཡིན་ན་ཡང་སངས་རྒྱས་ཀྱི་གོ་འཕང་ལྷན་སྒྲུབ་བྱེད་སྙམ་པ་དང་། ཡང་སྡུག་ལྷན་བསལ་དགོས་པས། འདི་ལྟར་ནམ་མཁས་གར་ཁྱབ་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་ལས་སྣང་སྡུག་བསྔལ་གྱིས་ཁྱབ། ལས་སྣང་སྡུག་བསྔལ་གྱིས་མནར་བའི་སེམས་ཅན་རྣམས་ཐོག་མ་མེད་པའི་དུས་ནས་ཕ་མ་སོགས་མ་བྱས་པ་མེད། དེའི་ནང་ནས་སྙིང་ཉེ་བའི་དབང་དུ་མ་མ་བྱས་པ་གཅིག་ཀྱང་མེད། མ་ལན་གཅིག་ཙམ་མ་ཡིན་པར་མ་ལན་གྲངས་བསམ་གྱིས་མི་ཁྱབ་པར་བྱས་ཏེ་ས་ཆེན་པོ་འདི་རྒྱ་ཤུག་གི་ཚིག་གུ་ཙམ་དུ་དྲིལ་ན་ཟད་ཀྱང་སེམས་ཅན་རེ་རེའི་མ་བྱས་པའི་མཐའ་མི་ཟད་པའི་བར་དུ་མ་བྱས་ཏེ་དྲིན་གྱིས་བསྐྱངས་བ་ཤ་སྟག་ཡིན་པ་དང་། དེ་ནས་མ་བྱས་པའི་དྲིན་དྲན་དགོས་ཏེ། དང་པོ་ལུས་བསྐྱེད་པའི་དྲིན། གཉིས་པ་སྲོག་བྱིན་པའི་དྲིན། གསུམ་པ་ཡོ་བྱད་བསྟབས་པའི་དྲིན། བཞི་པ་འཇིག་རྟེན་བསྟན་པའི་དྲིན་དང་བཞི་པོ་རྣམས་དྲན། དེ་ནས་དྲིན་གཟོ་འདོད་ཀྱི་རྟོག་པ་བསྐྱེད་དེ། སེམས་ཅན་དེ་དག་གི་འདོད་རྒྱུ་བདེ་བ་འདོད་ཀྱང་བདེ་བའི་རྒྱུ་དགེ་བ་དང་ཡང་དག་པའི་ལམ་སྒྲུབ་ནི་མི་ཤེས། སྟོན་པ་པོ་ནི་མེད། དགེ་བའི་བཤེས་གཉེན་གྱི་བཀའ་ཚུལ་བཞིན་དུ་མི་བ སྒྲུབ། བདེ་བའི་འབྲས་བུ་མངོན་མཐོ་ལྷ་མིའི་བདེ་བ་ནས་རྫོགས་པའི་སངས་རྒྱས་ཀྱི་བར་གྱི་བདེ་བ་ཐམས་ཅད་དང་ནི་མི་ལྡན། སྡུག་བསྔལ་ནི་མི་འདོད་ཀྱང་སྡུག་བསྔལ་གྱི་འབྲས་བུ་སྲིད་པ་ཁམས་གསུམ་འཁོར་བའི་སྡུག་བསྔལ་གསུམ་གྱིས་དངོས་སུ་གནོད། ཀུན་འབྱུང་ལས་དང་ཉོན་མོངས་གཉིས་ཀྱིས་བརྒྱུད་དེ་གནོད་པའི་སེམས་ཅན་དེ་རྣམས་ལ་དམིགས་ནས་ཐམས་ཅད་མའི་ཡུལ་དུ་སྙོམས་པ་བཏང་སྙོམས་དང་། བདེ་བ་དང་མི་ལྡན་པ་ལ་དམིགས་ནས་བདེ་བ་རྒྱུ་འབྲས་གཉིས་དང་ལྡན་པར་འདོད་པའི་བྱམས་པ། སྡུག་བསྔལ་རྒྱུ་འབྲས་གཉིས་དང་ལྡན་པ་ལ་དམིགས་ནས་སྡུག་བསྔལ་རྒྱུ་འབྲས་གཉིས་པོ་དང་བྲལ་པར་འདོད་པའི་སྙིང་རྗེ། ངེད་མ་བུ་གཉིས་ཡིན་པས་མའི་སྐྱིད་སྡུག་ལ་བུས་ལྟ་དགོས་ན། དེ་ལྟར་བལྟ་མ་དགོས་པར་མ་སེམས་ཅན་རང་རང་གི་བདེ་བ་རེ་རྙེད་པ་ལ་མི་དགའ་བར་ཕྲག་དོག་བྱེད་པའི་ཐབས་མེད་དེ་དགའ་བར་བལྟ་དགོས་པར་བལྟ་མེད་ཐབས་མེད་པ་ཉིད་དུ་བལྟ་ཞིང་དགའ་བ་བསྒོམ་པ་སྟེ་ཚད་མེད་བཞི་པོ་མཉམ་རྗེས་གཉིས་པོའི་མར་ཤེས་དྲིན་དྲན་ཐམས་ཅད་ལ་ཚང་བ་རེ་བསྒོམ་དགོས། དེས་ན་སེམས་ཅན་དེ་དག་གི་སྡུག་བསྔལ་ངའི་སྡུག་བསྔལ་ཡིན། དཔེར་ན་ངའི་མགོ་ན་བ་ན་ལྷའི་སྡུག་བསྔལ་ཡིན། མགྲིན་པ་ན་བ་ན་ལྷ་མིན། སྙིང་གཟེར་བ་ན་མིའི་སྡུག་བསྔལ། ལྟོ་བ་སོགས་སྨད་ན་བ་ན་ངན་སོང་གསུམ་གྱི་སེམས་ཅན་གྱི་སྡུག་བསྔལ་ཡིན། དེའི་ཕྱིར་སྡུག་བསྔལ་བསལ་བྱ་ཡིན་ཏེ། རྐང་པའི་སྡུག་བསྔལ་ལག་པས་བསལ་དགོས་པ་བཞིན། སེམས་ཅན་གྱིས་འདོད་རྒྱུ་བདེ་བ་འདོད་སྡུག་བསྔལ་མི་འདོད་པ་ཡིན་པ་ལ། ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པའི་སེམས་ཅན་ལོང་བ་བཤེས་མེད་ཐང་སྟོང་དུ་འཁྱམས་པ་ལྟ་བུ་ཡིན་པས། ང་ཐེག་པ་ཆེན་པོའི་བླ་མ་དང་ཆོས་དང་མཇལ་བས། ངས་ཁེ་ཉེན་ཤེས་པས། དེ་དག་སྡུག་བསྔལ་རྒྱུ་འབྲས་གཉིས་དང་བྲལ་བར་གྱུར་ཅིག བྲལ་ན་ཅི་མ་རུང་། བྲལ་བ་ཞིག་བདག་ངས་བྱ། བྲལ་བ་ཞིག་དཀོན་མཆོག་ལ་གསོལ་བ་འདེབས། དེ་ལྟར་བསམ་པས་ཡིན་ན་རང་དང་གཞན་གྱི་སྡུག་བསྔལ་ལྷན་བསལ་བྱེད། སྦྱོར་བས་ཡིན་ན་སྡུག་བསྔལ་ལྷན་བསལ་བྱེད་དགོས། དེ་ནི་སེམས་ཅན་གྱི་མགོ་ན་ན་བྱང་ཆུབ་སེམས་དཔའ་རང་གི་སེམས་ན་བ་ཞིག་དགོས། སྦྱོར་བས་ཡིན་ན། དཔེར་ན་ཁ་བ་ཞིག་གི་ནང་ནས་འགྲོ་བ་ལ་རང་ལ་ལྷམ་ཞིག་ཡོད་གཞན་པ་དེ་ལ་མེད་ན་ལྷམ་ཡ་ལྷམ་ཡ་བྱས་ནས་འགྲོ་ནུས་པ་ཞིག་དགོས། དེ་ནི་རྐང་ཡ་གཉིས་ཀྱིས་སྡུག་ལྷན་མྱོང་བྱེད། རྐང་ཡ་གཉིས་ཀྱིས་བདེ་བ་ལྷན་མྱོང་བྱེད་པ་ཡིན། དེས་ན་སེམས་ཅན་གྱི་བདེ་བ་ངས་བ སྒྲུབ་དགོས། སྡུག་བསྔལ་ངས་བསལ་དགོས། ངས་བལྟ་མ་དགོས་པར་རང་རང་གི་བདེ་བ་མྱོང་བ་འདི། དཔེར་ན་ངའི་བུ་ཆུང་བ་དེས་མངོན་མཐོའི་བདེ་བ་མྱོང་། འབྲིང་བས་ཉན་རང་གི་བདེ་བ་མྱོང་། ཆེ་བས་སངས་རྒྱས་ཀྱི་བདེ་བ་མྱོང་བ་ལ་བདག་གིས་འབད་མ་དགོས་རྩོལ་མ་དགོས་པར་སེམས་ཅན་གྱི་བདེ་བའི་འབྲས་བུ་མྱོང་བ་ལ་དགའ་བ་བསྒོམ། རྒྱུ་དད་སོགས་ཐོབ་པ་ལ་དགའ་བ་བསྒོམ་དགོས། འདི་ལྟ་བུའི་བདེ་སྐྱིད་འདི་མ་ཉམས་མ་གོད་པར་གོང་ནས་གོང་དུ་འཕེལ་ན་ཅི་མ་རུང་སྙམ་སྟེ་བསམ་པའི་ངོས་ནས་དེ་ལྟར་དགའ་བ་བསྒོམ། སྦྱོར་བའི་ངོས་ནས་ཀྱང་དེ་ལྟར་བདེ་བ་ལྷན་སྒྲུབ་བྱེད་དགོས། དེ་ལྟར་རྒྱས་པར་བྱེད་ན་ཚད་མེད་བཞི་ཚང་པའམ། བསྡུ་ན་བྱམས་སྙིང་རྗེ་གཉིས་སམ། ཡང་ན་སྡུག་བསྔལ་དང་བྲལ་འདོད་ཀྱི་སྙིང་རྗེ་གཅིག་པུ་བསྒོམ། དེ་ཀུན་རྫོབ་བྱང་ཆུབ་ཀྱི་སེམས་ཡིན། དོན་དམ་བྱང་ཆུབ་ཀྱི་སེམས་ནི་འཁོར་གསུམ་པོ་སྣང་ལ་རང་བཞིན་མེད་པའི་དཔྱད་སྟོང་གི་ངེས་ཤེས་དྲངས། མདོར་ན་ཨ་བུ་རིན་པོ་ཆེའི་ཞལ་ནས། སྐྱིད་ན་སྐྱ་ཀ་ཁྲ་མཉམ། སྡུག་ན་ཕོ་རོག་ནག་མཉམ་ཞིག་དགོས་ཏེ། བདེ་བ་ལྷན་སྒྲུབ་དང་སྡུག་བསྔལ་ལྷན་བསལ་བྱེད་དགོས་གསུངས། བདག་གཞན་མཉམ་པ་འདི་ལམ་གྱི་དུས་སུ་བསམ་སྦྱོར་གཉིས་ཀས་མཉམ་པ་དང་། འབྲས་བུའི་དུས་སུ་བདག་གཞན་གྱི་ཆོས་ཐམས་ཅད་མཉམ་པ་ཉིད་དུ་རྟོགས་པའི་ཐབས་ཡིན། དེས་ན་བདག་གཞན་ཐམས་ཅད་ཆོས་ཉིད་སྟོང་པ་ཉིད་ཀྱི་ངོས་ནས་མཉམ། སྟོང་པ་སྣང་བའི་ངོས་ནས་མཉམ། ཀུན་རྫོབ་སྣང་བའི་ངོས་ནས་མཉམ། སྣང་སྟོང་ཟུང་འཇུག་གི་སྒོ་ནས་མཉམ་པ་ནི་མདོ་ལུགས་ཀྱི་མཉམ་པ་ཉིད་ཀྱི་དོན་བསྒོམ་པ་ཡིན། བདག་གཞན་མཉམ་པ་ཉིད་དེ་ལེགས་པར་གོམས་པ་ན། བདག་གཞན་བརྗེ་བ་བྱང་ཆུབ་ཀྱི་སེམས་བསྒོམ་དགོས། བདག་གཞན་བརྗེ་བ་ལ་ཐུག་ཚེ། ཨ་བུའི་ཞལ་ནས་དཔེར་ན་ཕྱུག་རྫི་མང་པོ་ཞིག་ལ་ཕྱིང་བ་ཞིག་ཡོད་ན། བདག་གཞན་མཉམ་པའི་དུས་རང་གཙོ་བོར་བྱས་ཏེ་གྱོན་པའི་སྐབས་དང་འདྲ་ལ། བརྗེས་པའི་དུས་སུ་གཞན་ཐམས་ཅད་ལ་ཕྱིང་བ་དེ་བསྐོན་ནས། རང་ཉིད་ཕྱིར་བུད་དེ་ཆར་བའི་ནང་དུ་འདུག་པ་དང་འདྲ་གསུངས། དེས་ན་བདེ་བ་ལྷན་སྒྲུབ་དང་སྡུག་བསྔལ་ལྷན་བསལ་འདོད་པ་བསྒོམ་དུས་སྐྱོན་ཅི་ཡོད་ན་རང་ཉིད་གཙོ་བོ་ལྟ་བུར་བསྒོམ་པ་ཡིན་ལ། ད་བདག་འཛིན་གྱི་འགོང་པོ་འདི་འགོང་བཀར་བྱེད་དགོས། བདག་གཞན་བརྗེས་པའི་བསམ་པ་ལ་འགོང་རྫོང་གི་ཆོ་ག་ཞེས་བཏགས་དགོས། དེ་བསྒོམ་པ་ལ་དང་པོ། སྔོན་དུ་མར་ཤེས་དྲིན་དྲན་དྲིན་གཟོ་འདོད་ཀྱི་རྟོགས་པ་བསྐྱེད་དེ་དེའི་མཚམས་སུ་བསྒོམ་དགོས། ད་མ་འདིས་དང་པོ་རང་ལ་གྱོན་རྒྱུ་མེད་པ་ལ་གོས་ལེབ་གཅིག་ལོན་ན་ཡང་བུ་ལ་བྱིན། ཟས་ཟ་རྒྱུ་མེད་པ་ལ་ཟས་བཟང་པོ་ཅུང་ཟད་ཅིག་ཡོད་པ་དེ་བུ་ལ་བྱིན། ནོར་དང་ལོངས་སྤྱོད་ཐམས་ཅད་ཕངས་པ་མེད་པར་བུ་ལ་བྱིན་ཏེ་བུ་འཁོར་ལོས་བསྒྱུར་བའི་རྒྱལ་སྲིད་ལ་བཀོད་ཀྱང་ཆེ་སོང་སྙམ་པ་མེད་པར་བདེ་སྐྱིད་བདེ་བའི་དངོས་པོ་ཐམས་ཅད་ཀྱི་ཤས་བུ་ལ་བསྐོར། སྡུག་སྡིག་གཏམ་ངན་ལ་སོགས་པའི་སྡུག་བསྔལ་གྱི་ཤས་ཐམས་ཅད་མ་རང་གིས་བླངས་ཏེ། གྱོང་དང་བུབ་ཁ་ཐམས་ཅད་མ་རང་གིས་བླངས། ཁེ་དང་རྒྱལ་ཁ་ཐམས་ཅད་བུ་ལ་བྱིན་པ་ཡིན་ན། ད་ནི་བུ་ངའི་རེས་ལ་བབ་སྟེ། མ་རྒན་གྱི་སྡུག་བསྔལ་ངས་བསལ་དགོས་པས། སྙིང་རྗེ་ཆེན་པོས་ལེན་པ་ནི། མ་འདི་སྐྱིད་ཀྱི་ཡོད་ཀྱི་དང་། སྡུག་གི་ཡོད་གི་བསམ་ན། སྐྱིད་རྒྱུ་མེད་སྡུག་གི་ཡོད་དེ། ཚེ་འདིའི་སྐྱེ་རྒ་ན་འཆིའི་སྡུག་བསྔལ་གྱིས་དེད་བར་དོའི་སྡུག་བསྔལ་གྱིས་མཚམས་སྦྱར། ཡང་སྲིད་སྐྱེ་བ་ཕྱི་མའི་སྡུག་བསྔལ་གྱིས་བསུ་མ་བྱས་ཏེ་འབྲས་བུ་སྡུག་བསྔལ་གསུམ་གྱིས་གདུང་གི་ཡོད་པ་དང་། རྒྱུ་ཆགས་སྡང་རྨོངས་གསུམ་དང་། དེས་བསྐྱེད་པའི་ལས་མི་དགེ་བ་བཅུ་ལྟ་བུའི་སྡུག་བསྔལ་རྒྱུ་འབྲས་གཉིས་དང་བྲལ་བར་གྱུར་ཅིག བྲལ་ན་ཅི་མ་རུང་། བྲལ་བ་ཞིག་བདག་ངས་བྱ། སྡུག་བསྔལ་རྒྱུ་འབྲས་གཉིས་པོ་དེ་དང་བྲལ་བ་ཞིག་དཀོན་མཆོག་ལ་གསོལ་བ་འདེབས་དགོས་ཏེ། ཀྱེ་མ་ཀྱེ་ཧུད་དཀོན་མཆོག་ཐུགས་རྗེ་ཅན་སོགས་དང་། བླ་མ་རྒྱལ་བ་འགྲོ་བའི་མགོན་སོགས་དང་། དཔའ་བོ་ཁྱོད་ལ་ཐུགས་རྗེའི་སྟོབས་མངའ་ཞིང་སོགས་ཀྱིས་འདོད་པའི་དོན་ལ་གསོལ་བ་འདེབས། དེ་ལྟ་བུའི་འཕོ་བ་རྒྱང་འཕེན་བྱས་པ་ཞིག་གིས་མི་ཕན་ཏེ། མ་དྲིན་མོ་ཆེའི་སྡུག་བསྔལ་རྒྱུ་འབྲས་གཉིས་པོ་དེ་ད་ལྟ་ཉིད་མྱུར་བ་ཉིད། འདུག་ས་འདི་རུ། གདན་ས་འདི་རུ་བདག་ལ་སྨིན་པར་གྱུར་ཅིག སྨིན་ན་ཅི་མ་རུང་། སྨིན་པ་ཞིག་བདག་ངས་བྱ། སྨིན་པ་ཞིག་སྐྱབས་བསླུ་བ་མེད་པའི་དཀོན་མཆོག་གསུམ་པོ་ཁྱེད་ཀྱི་ཐུགས་རྗེའི་མཐུ་དང་ནུས་པ་མ་ཆུང་སྙམ་དུ་གསོལ་བ་འདེབས། ངའི་ད་ལྟའི་བདེ་བ་ཅུང་ཟད་པོ་འདི་ནས་བཟུང་གནས་སྐབས་རྒྱལ་སྲས་བྱང་ཆུབ་སེམས་དཔའི་བདེ་བ་དང་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་གི་བར་གྱི་བདེ་བ་ཐམས་ཅད་མ་དྲིན་མོ་ཆེ་འདིའི་རྒྱུད་ལ། ད་ལྟ་ཉིད། མྱུར་བ་ཉིད། འདུག་ས་འདི་རུ། གདན་ས་འདི་རུ་སྨིན་པར་གྱུར་ཅིག སྨིན་ན་ཅི་མ་རུང་། སྨིན་པ་ཞིག་བདག་ངས་བྱ། སྨིན་པ་ཞིག་དཀོན་མཆོག་ལ་གསོལ་བ་འདེབས། སྐབས་སུ་དམིགས་པ་གོམས་སླ་བའི་ཆེད་དུ་རླུང་གི་རྟ་ལ་བསྐྱོན་པ་ནི། མ་རྒན་གྱི་སྡུག་བསྔལ་རྒྱུ་འབྲས་གཉིས་པོ་རླུང་ནག་པོའི་རྣམ་པས་ཚུར་དབུགས་དབྱུང་བ་དང་མཉམ་དུ་བདག་གི་རླུང་ནང་དུ་རྔུབ་པ་དང་ལྷན་ཅིག་སྣ་ནས་ཚུར་ཞུགས་ཏེ་བདག་སྡུག་བསྔལ་རྒྱུ་འབྲས་གཉིས་དང་ལྡན། མ་རྒན་སྡུག་བསྔལ་རྒྱུ་འབྲས་གཉིས་པོ་དང་བྲལ་ཏེ། དཔེར་ན་ཉི་མ་སྒྲ་གཅན་གྱི་གནོད་པ་ལས་གྲོལ་བ་བཞིན་དུ་གྱུར་པར་བསམ། དེ་ལྟར་ཨ་མའི་སྡུག་ངའི་སྟེང་དུ་ལེན་དགོས་བསམ་པས་ཡིན་ན་ཨ་མའི་སྡུག་བསྔལ་ངས་ལེན་བསམ། སྦྱོར་བས་ཡིན་ན་ཨ་མའི་སྡུག་བསྔལ་བསལ་དགོས་སྙམ་དུ་ཡང་ནས་ཡང་དུ་བསམ། དེ་ནས་བྱམས་པ་ཆེན་པོས་གཏོང་པ་ནི། ཨ་མ་མངོན་མཐོ་དང་ངེས་ལེགས་ཀྱི་བར་གྱི་བདེ་བ་དང་ལྡན་པར་གྱུར་ཅིག ལྡན་ན་ཅི་མ་རུང་། ལྡན་པ་ཞིག་ངས་བྱ་སྙམ། ལྡན་པའི་ཆེད་དུ་གསོལ་བ་གདབ། བདེ་བའི་རྒྱུ་དད་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་དང་ལྡན་པར་གྱུར་ཅིག ལྡན་ན་ཅི་མ་རུང་། ལྡན་པ་ཞིག་ངས་བྱ། ལྡན་པའི་ཆེད་དུ་གསོལ་བ་གདབ། དེ་ལྟ་བུས་ཀྱང་མི་ཕན་ཏེ་བདག་གི་ལུས་ཀྱི་བདེ་བ་དང་སེམས་ཀྱི་བདེ་བ་སོགས་བདེ་བའི་འབྲས་བུ་མངོན་མཐོ་ངེས་ལེགས་ཀྱི་བར་གྱི་བདེ་བ་དང་། དེའི་རྒྱུ་དད་ངེས་འབྱུང་བྱང་ཆུབ་སེམས་རིན་པོ་ཆེ་རྣམ་པ་གསུམ་སྟེ་བདེ་བ་རྒྱུ་འབྲས་གཉིས་པོ་དེ་མ་རྒན་ལ་བྱིན་པ་ཡིན། བསྔོས་པ་ཡིན་པས། བུས་བྱིན་མས་ཐོབ་པར་བསམ་ལ་རླུང་གི་རྟ་ལ་བསྐྱོན་དགོས་ཏེ། བདག་གི་ཚེ་བསོད་ནམས་ཁ་རྗེ་དབང་ཐང་ལུས་ལོངས་སྤྱོད། བདེ་སྐྱིད་བདེ་བའི་དངོས་པོ་ཐམས་ཅད་རླུང་དཀར་པོའི་རྣམ་པར་བསང་དུད་ཆད་པ་བཞིན་སྣ་བུག་ནས་ཐོན་ཏེ་རླུང་ཕྱིར་འགྲོ་བ་དང་མཉམ་དུ་མས་རླུང་ནང་དུ་རྔུབ་པ་དང་ཆབ་གཅིག བདག་བདེ་བ་རྒྱུ་འབྲས་གཉིས་དང་བྲལ། མ་རྒན་བདེ་བ་རྒྱུ་འབྲས་གཉིས་དང་ལྡན་ཏེ་དཔེར་ན་ལུས་ལ་གོས་གྱོན་པ་བཞིན་ཐོབ་པར་བསམ། དེ་ལྟར་བསམ་པས་ཡིན་ན་མ་རྒན་ལ་བདེ་བ་རྒྱུ་འབྲས་གཉིས་བསྒྲུབ། སྦྱོར་བས་ཡིན་ན་བདེ་བའི་ཤས་ཕྲ་མོ་ནས་མ་རྒན་ལ་བསྒྲུབ་དགོས། དེ་ནས་རང་གི་ཕ་དང་སྤུན་ཟླ་སོགས་ལ་རིམ་གྱིས་བྱམས་པ་བསྒོམ་སྟེ་གནས་སྐབས་མངོན་མཐོ་སོགས་ནས་མཐར་ཐུག་ངེས་ལེགས་ཀྱི་བར་གྱི་བདེ་བ་དང་ལྡན་འདོད་དང་། དེའི་རྒྱུ་དད་སོགས་དང་ལྡན་པར་གྱུར་ཅིག་སོགས་དང་། རང་གི་ལུས་ལོངས་སྤྱོད་དགེ་རྩ་དང་བཅས་པ་གཏོང་བ་རྣམས་བསྒོམ། ཐུན་གྱི་མཇུག་ཏུ་ནམ་མཁས་གར་ཁྱབ་ཀྱི་སེམས་ཅན་གྱི་ལུས་ཀྱི་ན་ཚ། སེམས་ཀྱི་སྡུག་བསྔལ། བསམ་པའི་བར་ཆད། སྡིག་ལྟུང་། སྒྲིབ་པ་ཐམས་ཅད་བདག་གི་རྒྱུད་ལ་ད་ལྟ་ཉིད་མྱུར་བ་ཉིད་དུ་སྨིན་པར་གྱུར་ཅིག་སོགས་འབྲེལ་བ་གསུམ་ལྡན་དཀོན་མཆོག་ལ་གསོལ་འདེབས་བཅས་བྱ། དེ་ནས་སེམས་ཅན་གྱི་སྡིག་ལྟུང་ཐམས་ཅད་རླུང་ནག་པོ་ཞིག་གི་རྣམ་པར་རང་གི་སྣ་བུག་ནས་ཞུགས། སྙིང་ནང་གི་བདག་གཅེས་འཛིན་གྱི་འགོང་པོ་དེ་ལ་སིབ་སིབ་ཐིམ་པས་སྣམ་བུ་ཚོས་ལ་བཅུག་པ་ལྟར་སྡུག་བསྔལ་རྒྱུ་འབྲས་གཉིས་དང་ལྡན་པར་བསམ། སེམས་ཅན་ཐམས་ཅད་ལ་གཅེས་པར་བལྟ། ཕངས་པར་བལྟ། དམར་བར་བལྟ། དགའ་བར་བལྟ། དགོས་པར་བལྟ། མེད་ཐབས་མེད་པར་བལྟ། དེའི་མཐའ་ལ་དམིགས་པ་གོམས་སླ་བའི་ཆེད་དུ་རླུང་གིས་རྟ་ལ་བསྐྱོན་པ་སོགས་འདྲ། དགའ་བ་བསྒོམ་དགོས་ཏེ་བསམ་པས་ཡིན་ན་ངེད་མ་བུ་གཉིས་ཀྱི་མའི་བདེ་བ་ལ་བུས་ཕྲག་དོག་བྱེད་པའི་ཐབས་མེད་པས་དགའ་བ་བསྒོམ། སྦྱོར་བས་ཡིན་ན་བདེ་བ་བསྒྲུབ་པ་ལས་ཕྲག་དོག་གི་བསམ་པས་ཀུན་ནས་བསླངས་ཏེ་སྡུག་བསྔལ་སྦྱོར་བའི་ཐབས་མེད་པས་བདེ་བ་བ སྒྲུབ་དགོས། བདག་རང་འདོད་སྒྲུབ་པའི་བསམ་སྦྱོར་འདི་ལ་མི་གཅེས་རྒྱུ། མི་དམར་རྒྱུ། མི་ཕངས་རྒྱུ། མི་དགའ་བར་ལྟ། དགོས་པ་མེད་པར་བལྟ་ཞིང་བདག་དོན་སྒྲུབ་པའི་བསམ་སྦྱོར་གྱི་འགོང་པོ་འདི་འགོང་བཀར་བྱེད་དགོས། སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག་སོགས་འབྲེལ་བ་གསུམ་ལྡན་གསོལ་འདེབས་བཅས་བསྒོམ་ནས། བསམ་པའི་སྟེང་ནས་བདག་གི་ཚེ་བསོད་ནམས། ཁ་རྗེ་དབང་ཐང་ལུས་ལོངས་སྤྱོད་བདེ་སྐྱིད་བདེ་བའི་དངོས་པོ་ཐམས་ཅད་སེམས་ཅན་ཐམས་ཅད་ལ་བསྔོས་ནི་ཡིན། བྱིན་ནི་ཡིན། བཏང་ནི་ཡིན་པས་ཐོབ་པར་གྱུར་ཅིག་སོགས་བསམ། ཡང་རླུང་གི་རྟ་ལ་བསྐྱོན། དེ་ལྟར་བསམ་སྦྱོར་གཉིས་ཀས་བསྒྲུབ་དགོས། བདག་གཞན་བརྗེ་བའི་རྩ་བ་ཁེ་དང་རྒྱལ་ཁ་སེམས་ཅན་ལ་བྱིན། གྱོང་དང་བུབ་ཁ་རང་གིས་ལེན་པར་འདུ་ཞིང་དེ་བྱང་ཆུབ་ཀྱི་སེམས་ཡིན་ལ་དེ་ལ་ཟུར་གཉིས་ཚང་པ་དགོས་པས། སྙིང་རྗེ་ཆེན་པོས་ལེན་པ་ནི་སྙིང་རྗེས་སེམས་ཅན་ལ་དམིགས་པ་ཟུར་དང་པོ་ཡིན། བྱམས་པ་ཆེན་པོས་གཏོང་བ་ཤེས་རབ་ཀྱིས་རྫོགས་བྱང་ལ་དམིགས་པ་ཡིན་པས་དེ་ལ་བཞི་ལས། དང་པོ་འཛིན་སྟངས་བརྗེས་པ་ནི་སེམས་ཅན་ཐམས་ཅད་ང་ཡིན་ཞེས་མཐོ་རིས་གསུམ་ལུས་ཀྱི་སྟོད་དང་། ངན་སོང་གསུམ་ལུས་ཀྱི་སྨད་ཡིན་པར་ངར་འཛིན་དགོས། ཡང་ན་སེམས་ཅན་ཐམས་ཅད་ངའི་མ་ཡིན། ང་བུ་ཡིན་པས། སེམས་ཅན་ཐམས་ཅད་ངའི་མ་ཡིན་ཞེས་ང་ཡིར་བར་འཛིན་དགོས། གཉིས་པ་གཅེས་འཛིན་བརྗེས་པ་ནི་སྔར་བདག་གཅེས་པར་འཛིན་པའི་བསམ་པ་དེ་དོར་ནས། ད་སེམས་ཅན་ཐམས་ཅད་གཅེས་པར་བལྟ། དམར་བར་བལྟ། དགའ་བར་བལྟ། དགོས་པར་བལྟ། མེད་ཐབས་མེད་པར་བལྟ། གསུམ་པ་བདེ་སྡུག་བརྗེས་པ་སྔར་ཁེ་དང་རྒྱལ་ཁ་ཐམས་ཅད་བདག་རང་ལ་བསྐོར། གྱོང་དང་བུབ་ཁ་ཐམས་ཅད་གཞན་ལ་བསྐོར། དྲོ་དྲོ་ཐམས་ཅད་རང་ལ་བླངས། འཁྱག་འཁྱག་ཐམས་ཅད་མི་ལ་བྱིན་པས་ད་ནི་ཉི་མ་དེ་རིང་ནས་ཁེ་དང་རྒྱལ་ཁ་ཐམས་ཅད་གཞན་ལ་བྱིན། གྱོང་དང་བུབ་ཁ་ཐམས་ཅད་བདག་རང་གིས་ལེན། དྲོ་དྲོ་ཐམས་ཅད་མི་ལ་བྱིན། འཁྱག་འཁྱག་ཐམས་ཅད་རང་ལ་བསྐོར་ཏེ་མདོར་ན་བདེ་སྐྱིད་བདེ་བའི་དངོས་པོ་ཐམས་ཅད་སེམས་ཅན་གཞན་ལ་བྱིན། གཞན་གྱི་སྡུག་བསྔལ་ཐམས་ཅད་བདག་རང་གི་སྟེང་དུ་བླངས་པ་ཡིན། རླུང་གི་རྟ་ལ་བསྐྱོན་པ་སོགས་སྔར་བཞིན་ཡིན། བདག་མེད་ལ་བདག ང་མེད་ལ་ངར་འཛིན་པ་འདི། འཛིན་དོན་མེད་པ་ཞིག་ཡིན། བདག་གི་སེམས་ནི་སྐྱེ་བ་སྔོན་མའི་ལྷ་ལ་སོགས་པའི་རྣམ་ཤེས་འཁྱམས་པོ་ཞིག་ཡིན་ལ། ལུས་ཀྱི་རྒྱུ་ལ་བསམ་ན། སྐྱེ་བ་སྔོན་མའི་རྒྱུ་དགེ་བ་དང་མི་དགེ་བའི་རྒྱུ་དང་། རྐྱེན་ཕ་མའི་ཁུ་ཁྲག་གི་བར་དུ་རླུང་སེམས་ཞུགས་པ་ཡིན་པས། སེམས་འདི་ཡང་གཞན་གྱི་སེམས་ཞིག་ཡིན། ལུས་འདི་ཡང་གཞན་གྱི་ལུས་ཞིག་ལ་ངར་བཟུང་བ་ཡིན་པས། སྔོན་དང་ད་ལྟ་དང་ཕྱིན་ཆད་གསུམ་ལ་ངར་བཟུང་བ་ཐོག་མ་མེད་པ་ནས་གོམས་པས་དེས་ན་འཇིག་རྟེན་ཆོས་བརྒྱད་ཀྱི་མཐུན་ཕྱོགས་རྙེད་བསྟོད་སྙན་གྲགས་བཞི་རང་ལ་བསྐོར་ནས་ཁེ་དང་རྒྱལ་ཁ་རང་ལ་བསྐོར། གྱོང་དང་བུབ་ཁ་གཞན་ལ་བྱིན་པ་ཡིན་འཇིག་རྟེན་ཆོས་བརྒྱད་ཀྱི་མི་མཐུན་ཕྱོགས། མ་རྙེད་པ་མི་བསྟོད་པ། གྲགས་པ་མ་ཡིན་པ། སྙན་པ་མ་ཡིན་པ་བཞི་པོ་གཞན་ལ་བསྐོར་བའི་སྐྱོན་གྱིས་ད་ལྟའི་བར་དུ་འཁྱམས་པ་ཡིན་པས། ད་ནི་དེ་ལྟ་བུ་བྱེད་མི་ཉན་པར་བདག་རང་དོན་སྒྲུབ་པའི་སྐྱོན་ནི་གོ་ཞིང་རིག་སྟེ་མཐོང་བ་ཡིན། བདག་གཞན་ཡིན་པར་གོ གཞན་བདག་ཡིན་པར་གོ་བས། བདག་གཞན་དུ་བཞག གཞན་ལ་བདག་ཏུ་བཟུང་ནས་ཁེ་དང་རྒྱལ་ཁ་གཞན་ལ་བྱིན། གྱོང་དང་བུབ་ཁ་རང་གིས་བླངས་དགོས། དེ་ལྟར་བྱས་ན་སེམས་ཅན་འདི་རྣམས་ཀྱི་སྐུ་དྲིན་གྱིས་སྐྱེ་བ་ཚེ་རབས་ཐམས་ཅད་དུ་དལ་འབྱོར་བཅོ་བརྒྱད་དང་ལྡན་པའི་མི་ལུས་ཐོབ་པ་དང་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ཡིན། བདག་རང་འདོད་ཡིད་བྱེད་འདི་གོམས་པས། དེའི་སྐྱོན་གྱིས་སྐྱེ་བ་ཐོག་མ་མེད་པ་ནས་ད་ལྟའི་བར་དུ་འཁྱམས་ཤིང་ད་དུང་ཡང་ཐ་མ་མེད་པའི་བར་དུ་འཁྱམ་དགོས་པ་ཡིན་པས། གཞན་གཅེས་པར་བཟུང་བ་དང་རང་གཅེས་པར་བཟུང་བའི་སྐྱོན་དང་ཡོན་ཏན་ལ་བསམ་དགོས། ད་ནི་ཚིག་གི་རྟ་ལ་བསྐྱོན་ནས་སྦྱང་དགོས་ཏེ། སྐྱིད་ན་བདེ་བ་ཚོགས་སུ་བསྔོ། །ཕན་བདེས་ནམ་མཁའ་གང་བར་ཤོག །སྡུག་ན་གཞན་གྱི་སྡུག་བསྔལ་ཁུར། །སྡུག་བསྔལ་གྱི་རྒྱ་མཚོ་སྐེམ་པར་ཤོག །ཅེས་དང་། མཁའ་མཉམ་འགྲོ་བའི་སྡུག་བསྔལ་རྒྱུ་དང་བཅས། །བྲལ་ནས་བདག་གི་རྒྱུད་ལ་སྨིན་གྱུར་ཅིག །བདག་གི་ཕན་བདེའི་དགེ་ཚོགས་མ་ལུས་པ། །མ་གྱུར་འགྲོ་བར་ཐོབ་ནས་སངས་རྒྱས་ཤོག །ཅེས་པ་འདི། ཟ་ཉལ་འགྲོ་འདུག་ལ་སོགས་སྤྱོད་ལམ་ཐམས་ཅད་དུ་ཚིག་གིས་སྦྱང་དགོས། ཡང་ཡུལ་གསུམ་དུག་གསུམ་དགེ་རྩ་གསུམ་ཞེས་པས། བདེ་བ་རྒྱུ་འབྲས་གཉིས་དང་། སྡུག་བསྔལ་རྒྱུ་འབྲས་གཉིས་དང་ཁྱད་པར་དམ་ཚིག་ཉམས་ཆག་སོགས་བྱུང་ན་དེ་ལ་མི་འདོད་པ་ཐམས་ཅད་སྤང་ནས། བྱང་ཆུབ་སེམས་དཔའ་ཐབས་ལ་མཁས་པས་ཐམས་ཅད་ལམ་དུ་ཁྱེར་དགོས། དེ་ཡང་སྐྱིད་རྒྱུ་འབྲས་གཉིས་བྱུང་ན་བྱང་ཆུབ་སེམས་ཀྱི་ངོ་བོར་ལམ་དུ་ཁྱེར་ནས་བདེ་བ་རྒྱུ་འབྲས་གཉིས་ཀ་བྱམས་པ་ཆེན་པོས་གཏོང་བ་དང་། སྡུག་བསྔལ་རྒྱུ་འབྲས་གཉིས་བྱུང་ན་བྱང་ཆུབ་ལམ་གྱི་བར་ཆད་དུ་མི་འགྲོ་བ་སྙིང་རྗེ་ཆེན་པོས་ལེན་པའི་སྒོ་ནས་སྐྱིད་སྡུག་གཉིས་ཀ་ལམ་གྱི་ངོ་བོར་འགྱུར་བའི་ཐབས་ལ་འབད། དེ་ཡང་བདེ་བ་རྒྱུ་འབྲས་གཉིས་སེམས་ཅན་ཐམས་ཅད་ལ་བྱིན་ནས་འཇིག་རྟེན་ཆོས་བརྒྱད་ཀྱི་མཐུན་ཕྱོགས་བཞི་བཏང་དགོས། སྡུག་རྒྱུ་འབྲས་གཉིས་བླངས་ནས་འཇིག་རྟེན་ཆོས་བརྒྱད་ཀྱི་མི་མཐུན་ཕྱོགས་བཞི་བླངས་དགོས། ལོག་གནོན་ནི། མི་བདེ་བ་རང་གི་མགོ་ན་བ་ཙམ་གྱི་སྡུག་བསྔལ་ཕྲ་མོ་རེ་མྱོང་བ་ཚུན་ཆད་ཀྱི་སྟེང་དུ། སེམས་ཅན་ཐམས་ཅད་ཀྱི་སྲིད་པ་ཁམས་གསུམ་འཁོར་བའི་སྡུག་བསྔལ་ཐམས་ཅད་དེའི་སྟེང་དུ་བླངས་ནས་ངའི་མགོ་ན་བ་འདིས་སེམས་ཅན་ཐམས་ཅད་ཀྱི་སྡུག་བསྔལ་མྱོང་བའི་གོ་ཆོད། ན་ན་སེམས་ཅན་གྱི་ན་གོ་ཆོད། ཚ་ན་སེམས་ཅན་གྱི་ཚ་གོ་ཆོད། ཤི་ན་སེམས་ཅན་གྱི་ཤི་གོ་ཆོད་པར་ཤོག་སྙམ་དུ་སྡུག་བསྔལ་གྱི་འབྲས་བུ་དང་། རྒྱུ་ཆགས་སྡང་རྨོངས་གསུམ་གྱི་རྟོག་པ་སྐྱེ་བའི་ཚེ་དེ་བྱང་ཆུབ་སེམས་ཀྱིས་ཟིན་པར་བྱས་ཏེ་དོན་ཐོག་ལ་འཇོག་པ་ཡིན་ཏེ་རང་གི་རྒྱུད་ཀྱི་ཆགས་སོགས་ཀྱི་རྟོག་པ་དང་པོ་དྲན་ཏེ་སློང་བར་བྱས་ནས་དེའི་སྟེང་དུ་སེམས་ཅན་ཐམས་ཅད་ཀྱི་རྒྱུད་ཀྱི་འདོད་ཆགས་ཞེ་སྡང་གཏི་མུག་ལ་སོགས་མི་དགེ་བའི་རྟོག་པ་དེས་ཀུན་ནས་བསླངས་པའི་ལས་མི་དགེ་བ་ལ་སོགས་པའི་སྡུག་བསྔལ་གྱི་རྒྱུ་ཐམས་ཅད་བདག་གི་འདོད་ཆགས་ལ་སོགས་པའི་རྟོག་པ་འདིས་གོ་ཆོད། སེམས་ཅན་ཐམས་ཅད་ཀྱི་འདོད་ཆགས་ཀྱི་རྟོག་པ་བདག་ལ་སྨིན། ཞེ་སྡང་གཏི་མུག་ལ་སོགས་པའི་རྟོག་པ་བདག་གི་རྟོག་པ་འདིས་གོ་ཆོད། བདག་གི་རྒྱུད་ལ་སྨིན། སེམས་ཅན་ཐམས་ཅད་འབྲས་བུ་སྡུག་བསྔལ་དང་། རྒྱུ་ཆགས་སྡང་རྨོངས་སོགས་དང་བྲལ་ནས། དེ་དག་ཐམས་ཅད་བདག་ལ་སྨིན་པར་ཤོག་ཅིག འདིས་སེམས་ཅན་དེ་དག་གི་སྡུག་བསྔལ་རྒྱུ་འབྲས་གཉིས་ཀྱི་གོ་བཅད་ནས་ན་ན་གོ་ཆོད། ཚ་ན་ཚ་གོ་ཆོད། ཤི་ན་ཤི་གོ་ཆོད། སྡུག་ན་སྡུག་གོ་ཆོད་པར་ཤོག་སྙམ་དུ་རང་རྒྱུད་ལ་བླང་། ཡང་བྱང་ཆུབ་སེམས་དཔའ་འབྲེལ་ཚད་དོན་ལྡན་བཟང་འབྲེལ་ཚེ་གཅིག་གིས་སངས་རྒྱས། ངན་འབྲེལ་འཁོར་བ་མཐའ་ཅན་ཞིག་འོང་དགོས་པས། སྔར་གྱི་གཏོང་ལེན་དེའི་སྟེང་ལ་སེམས་ཅན་ཐམས་ཅད་བདེ་བ་ཐོབ་པའི་འཚོགས་ཆས་དང་། སྡུག་བསྔལ་བསལ་བའི་ཆ་རྐྱེན་དུ་རང་གི་ཡོངས་སུ་བཟུང་བའི་གཞི་གསུམ་པོ་བཏང་དགོས་ཏེ། དེ་ཡང་དང་པོ་བདག་གི་ད་སྔོན་གྱི་ལུས་ཐམས་ཅད་དོན་མེད་ཆུད་ཟོས་སུ་སོང་བ་ཡིན་ན། ད་ནི་ཉི་མ་དེ་རིང་ནས་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་ཞིག་ཐོབ་རྒྱུ་ཡོད་ལ་དེ་བར་གྱི་ཆེ་ཆེ་ནས་ཚངས་པ་དང་བརྒྱ་བྱིན། ཆུང་ཆུང་ནས་གྲོག་སྦུར་ཕྲ་མོ་ཡན་ཆད་ཀྱི་ལུས་མཐོ་དམན་གང་དང་གང་བླངས་པ་དེ་དག་བཟང་པོ་དད་པ་དག་སྣང་གིས་འབྲེལ་བ་ངན་པ་ཆགས་སྡང་རྨོངས་གསུམ་གྱིས་འབྲེལ་བའི་སེམས་ཅན་རྣམས་ཀྱིས་གཟུགས་མིག་གིས་མཐོང་བ། སྒྲ་དང་སྐད་རྣ་བས་ཐོས་པ། ཐ་ན་རོ་རུལ་བའི་དྲི་ཙམ་མྱོང་བ། ལུས་ཀྱི་རེག་པ། ཡིད་ལ་བསམ་པ་དེ་དག་ཐམས་ཅད་ཀྱི་ནད་ཅན་གྱི་ནད་ཞི། གདོན་ཅན་གྱི་གདོན་ཞི། ལུས་ཀྱི་ན་ཚ། སེམས་ཀྱི་སྡུག་བསྔལ། བསམ་པའི་བར་ཆད་མདོར་ན་སྲིད་པ་ཁམས་གསུམ་འཁོར་བའི་སྡུག་བསྔལ་ཐམས་ཅད་ཞི་བ་དང་། ཡང་སྡུག་བསྔལ་དེའི་རྒྱུ་འདོད་ཆགས་ཞེ་སྡང་གཏི་མུག་ལ་སོགས་པའི་ཉོན་མོངས་པ། དེའི་ཀུན་ནས་བསླངས་པའི་མི་དགེ་བ་ཐམས་ཅད་ཞི་ཞིང་མདོར་ན་སྡུག་བསྔལ་རྒྱུ་འབྲས་གཉིས་པོ་དང་བྲལ་བར་བྱེད་ནུས་པར་སྨོན་ལམ་འདེབས། ཡང་རང་གི་ལུས་མཐོང་ཐོས་དྲན་རེག་ཐམས་ཅད་ཀྱི་རྒྱུད་ལ་བདེ་བའི་འབྲས་བུ་མངོན་མཐོ་ལྷ་མིའི་བདེ་བ་ནས་རྫོགས་པའི་སངས་རྒྱས་ཀྱི་བར་གྱི་བདེ་བ། དེའི་རྒྱུ་དད་པ་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་རྣམ་པ་གསུམ་པོ་སྐྱེ་བར་སྨོན་ལམ་གདབ། དེ་ནས་ལོངས་སྤྱོད་ལ་ཡང་སྔོན་གྱི་དུས་ཀྱི་ལོངས་སྤྱོད་རྣམས་གྲོན་འཛར་སོང་ནས་དོན་མེད་པ་ཡིན་ལ། ད་ཉི་མ་དེ་རིང་ནས། དམའ་སྤྲང་པོ་བེར་ག་འཛིན་པ་ནས། མཐར་ནམ་མཁའ་མཛོད་ཀྱི་ལོངས་སྤྱོད་ཀྱི་བར་གྱི་ལོངས་སྤྱོད་ཆེ་ཕྲ་ཐམས་ཅད་ལ་བཟང་པོ་དད་པ་དག་སྣང་གིས་འབྲེལ་བ། ངན་པ་ཆགས་སྡང་རྨོངས་གསུམ་གྱིས་འབྲེལ་བ་བཟང་འབྲེལ་དང་ངན་འབྲེལ་ཅི་བྱེད་པའི་དབང་པོ་དྲུག་གི་ཡུལ་ལ་མཐོང་ཐོས་སོགས་ཀྱི་སྡུག་བསྔལ་རྒྱུ་འབྲས་གཉིས་ཞི། ནད་ཅན་གྱི་ནད་ཞི། གདོན་ཅན་གྱི་གདོན་ཞི། ལུས་ཀྱི་ན་ཚ་ཞི། སེམས་ཀྱི་སྡུག་བསྔལ་བསམ་པའི་བར་ཆད་ཞི་བ་དང་། སྡུག་བསྔལ་གྱི་རྒྱུ་ཆགས་སྡང་རྨོངས་གསུམ་གྱི་རྟོག་པ་ཞི་བ་དང་། བདེ་བའི་འབྲས་བུ་མངོན་མཐོ་ནས་སངས་རྒྱས་ཀྱི་བར་གྱི་བདེ་བ་ཐོབ་པ་དང་། རྒྱུ་དད་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་རྣམ་པ་གསུམ་པོ་རྒྱུད་ལ་སྐྱེ་བར་སྨོན་ལམ་བཏབ། ལོངས་སྤྱོད་རྣམས་མཐོང་གྲོལ། ཐོས་གྲོལ་རེག་གྲོལ་དུ་སྨོན་ལམ་བཏབ། དེ་ལྟར་འགྲུབ་པར་དཀོན་མཆོག་གི་བདེན་པ་བརྡར། ཡང་དགེ་བའི་རྩ་བ་དུས་གསུམ་དུ་བསགས་པ་རྣམས་ལའང་དེ་བཞིན་དུ། ཆུང་ཆུང་ནས་བསོད་ནམས་ཆ་མཐུན་གྱི་དགེ་བ་ཕྲ་མོ་ནས་བཟུང་། མཐར་ཐུག་རྣམ་པ་ཐམས་ཅད་མཁྱེན་པའི་ཟག་མེད་ཀྱི་དགེ་བ་རྒྱ་མཚོ་ལྟ་བུའི་བར་གྱི་དགེ་བའི་རྩ་བ་དེ་དག་ལ་བཟང་པོ་དད་པ་དག་སྣང་གིས་འབྲེལ་བ། ངན་པ་ཆགས་སྡང་རྨོངས་གསུམ་གྱིས་འབྲེལ་བའི་སེམས་ཅན་གྱི་དབང་པོ་དྲུག་གི་ཡུལ་དུ་གྱུར་པ་ཐམས་ཅད་ལ་འབྲེལ་ཚད་དོན་ལྡན་གྱི་སྨོན་ལམ་སྔ་མ་བཞིན་དུ་གདབ། དཀོན་མཆོག་གི་བདེན་པ་བརྡར། དེ་དག་གིས་བདག་གཞན་བརྗེ་བ་སོང་། ད་ནི་བདག་བས་གཞན་གཅེས་བསྒོམ་པ་ལ། བདག་གཞན་བརྗེ་བ་སེམས་ཀྱི་སྟེང་ནས་གོམས་གོམས་ཤིང་འབྱོངས་ནས། འདི་ནི་སྦྱོར་བ་ལག་ལེན་གྱི་སྟེང་ནས་བདག་བས་གཞན་གཅེས་བ སྒྲུབ་དགོས་ཏེ། དེ་ཡང་སོ་སོའི་སྐྱེ་བོའི་དུས་ནས་འོང་བ་ཡོད་དེ་བླ་མ་བྱམས་པའི་རྣལ་འབྱོར་པ་ལྟ་བུ་ཡིན། དེ་ཀུན་རྫོབ་བྱང་ཆུབ་སེམས་ལ་བློ་འབྱོངས་སྟོབས་ཀྱིས་འོང་བ་དང་། བདག་བས་གཞན་གཅེས་མཚན་ཉིད་པ་མཐོང་ལམ་གྱི་ཡེ་ཤེས་རྟོགས་པ་དང་དུས་མཉམ་པར་མཉམ་པ་ཉིད་བཞིའི་དོན་མངོན་དུ་གྱུར་པ་སྟེ་བདག་དང་གཞན་དོན་དམ་སྤྲོས་བྲལ་དུ་མཉམ་ཉིད་དུ་རྟོགས། ཀུན་རྫོབ་སྒྱུ་མ་ཙམ་དུ་མཉམ་ཉིད་དུ་རྟོགས། སངས་རྒྱས་དང་སེམས་ཅན་མཉམ་ཉིད་དུ་རྟོགས། བདག་དང་སངས་རྒྱས་མཉམ་ཉིད་དུ་རྟོགས་ནས་དེའི་དུས་སུ་གཞན་དོན་དངོས་སུ་སྒྲུབ་ནུས་པའི་མགོ་ལ་སླེབས་པ་ཡིན་ཏེ། མགོ་བཅད་དེ་ཁྱེར་སོང་ན་ས་རྡོ་བོང་བ་ལྟ་བའི་འདུ་ཤེས་ལས་མེད་པས་དེའི་དུས་བདག་བས་གཞན་གཅེས་བསྒྲུབ་ནུས་པ་ཡིན། ལས་དང་པོ་པའི་སྐབས་འདི་ཀུན་རྫོབ་བྱང་ཆུབ་ཀྱི་སེམས་ལ་བློ་སྦྱོང་ནས་བདག་བས་གཞན་གཅེས་བསྒྲུབ་དགོས། བདག་འཛིན་བཅད་བའི་ཐབས་ལ། ཐབས་དང་ཤེས་རབ་གཉིས། དེ་ལ་དང་པོ་ཐབས་ཀྱིས་བཅད་དགོས་ཏེ། བདག་གཞན་མཉམ་པ་དང་། བརྗེ་བ་དང་། བདག་བས་གཞན་གཅེས་གསུམ་གྱི་སྒོ་ནས་དང་པོ་ཐབས་ཀྱིས་རང་འདོད་ཡིད་བྱེད་ཀྱི་རྟོག་པ་དེ་བཅད། དེ་ནས་ཐབས་དེ་ལ་བརྟེན་པའི་ཐབས་བྱུང་དོན་དམ་རྟོགས་པའི་ཤེས་རབ་ཀྱིས་དྲུང་ནས་འབྱིན་ཏེ་བཅད། དེ་ལ་དང་པོ་ཀུན་རྫོབ་བྱང་ཆུབ་ཀྱི་སེམས་ཡང་ནས་ཡང་དུ་བསྒོམ་ཞིང་གཏན་ལ་ཕབ་ཏེ། དེ་ནས་དོན་དམ་བྱང་ཆུབ་ཀྱི་སེམས་ལ་གཙོ་བོར་སྦྱང་དགོས། རང་འདོད་ཀྱི་བསམ་པ་དེ་སྔ་མས་མགོ་ནོན་གྱི་ཚུལ་གྱིས་སྤང། ཕྱི་མས་དྲུང་འབྱིན་གྱི་ཚུལ་གྱིས་སྤང་པ་ཡིན། དེ་ལྟར་མི་ཞིག་གི་ཚེ་གཅིག་གི་ཉམས་ལེན་བྱང་ཆུབ་ཀྱི་སེམས་འདི་ཡིས་ཆོག་པ་ཞིག་དགོས་པས་སྐྱིད་སྡུག་གང་བྱུང་འདིའི་ལམ་དུ་ཁྱེར་ཤེས་པ་དགོས། དེ་ཡང་མི་ཞིག་ལ་སྐྱིད་རྟག་པ་དང་སྡུག་རྟག་པ་ཞིག་ནི་མི་འོང་བས་རེ་འགའ་སྐྱིད། རེ་འགའ་སྡུག་ཞིག་སྟེ་གཉིས་ཀ་རེས་མོས་བྱས་ནས་འོང་བས་སྐྱིད་སྡུག་གཉིས་བྱུང་ན་བྱང་ཆུབ་ལམ་གྱི་ངོ་བོར་འགྲོ་བ་དང་། སྡུག་བསྔལ་ལམ་གྱི་བར་ཆད་དུ་མ་སོང་ན་བྱང་ཆུབ་སེམས་དཔའ་ཐབས་ལ་མཁས་པ་ཡིན། དེས་ན་བྱང་ཆུབ་སེམས་དཔའ་རང་ལ་སྐྱིད་འོང་ན་དེ་ལ་མི་དགའ་བར་བལྟ། རང་གི་རྒྱུད་ལ་བདེ་བའི་རྒྱུ་དད་ངེས་འབྱུང་བྱང་ཆུབ་ཀྱི་སེམས་རིན་པོ་ཆེ་རྣམས་བྱུང་ན་འདི་འཛིན་འདུག་མི་ཉན། ཡང་ངས་ཁོང་ཁྲོ་ཞིག་བྱས་ནས་ཚིག་འགྲོ་བས་འདི་མ་ཚིག་གོང་དུ་སེམས་ཅན་ལ་སྦྱིན་དགོས། སྡུག་བསྔལ་མཛེ་དང་འབྲུམ་བུ་ལ་སོགས་པའི་ནད་ཀྱིས་མནར་བ། གདོན་གྱིས་ཟིན་པ། གྲིབ་ཀྱིས་ནོན་པ་ལ་སོགས་པའི་མི་འདོད་པ་ཅི་བྱུང་ཡང་སྐྱབས་འགྲོའི་དུས་ལྟར། དཀོན་མཆོག་གི་ཐུགས་རྗེ་ཡིན་པར་ཤེས་ཏེ་བདག་གིས་སྐྱེ་བ་ཚེ་རབས་ཐམས་ཅད་དུ་བསགས་པའི་རྒྱུ་མི་དགེ་བའི་འབྲས་བུ་སྐྱེ་བ་ཕྱི་མའི་མྱོང་འགྱུར་གྱི་ལས་ཐམས་ཅད་དཀོན་མཆོག་གི་ཐུགས་རྗེས་ད་ལྟ་ཚེ་འདི་ལ་སྨིན་པ་ཡིན་པས། འདིའི་སྟེང་དུ་ནམ་མཁའི་མཐའ་ཁྱབ་ཀྱི་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་མྱོང་བའི་གོ་བདག་གཅིག་པུས་ཆོད་པར་བསམ། རྒྱུ་ཆགས་སྡང་སོགས་སྐྱེས་ན་དཀོན་མཆོག་གི་ཐུགས་རྗེས་བྱ་གཏོང་ཡིན་པས། འདི་ཡིས་སེམས་ཅན་ཐམས་ཅད་ཀྱི་འདོད་ཆགས་ལ་སོགས་པའི་ཉོན་མོངས་པ་ཐམས་ཅད་ཀྱི་གོ་ཆོད་ནས་སེམས་ཅན་ཐམས་ཅད་འདོད་ཆགས་ལ་སོགས་པའི་ཉོན་མོངས་པ་དང་ལས་ཐམས་ཅད་བདག་ལ་སྨིན་པར་གྱུར་ཅིག་སྙམ། དེ་ལྟར་སྡུག་བསྔལ་རྒྱུ་འབྲས་གཉིས་གང་བྱུང་བ་ལམ་དུ་ཁྱེར་བས་བྱང་ཆུབ་ལམ་གྱིས་གྲོགས་བྱས་ནས་བསྐལ་བ་གྲངས་མེད་ཀྱི་སྡིག་པ་འདག་པ་དང་ཚོགས་རྫོགས་པ་ཡིན། ཡང་ཚུལ་ཁྲིམས་འཆལ་བ་ལ་སོགས་པའི་གང་ཟག་ངན་པ་རྣམས་མཐོང་ན་དེ་ལ་གཏོང་ལེན་བྱེད། རང་གི་ཚུལ་ཁྲིམས་བསྲུང་བ་ལ་གཉེན་པོ་བསྟེན་དགོས། སྦྲུལ་མ་ཤི་བ་ཁྭ་ཏས་བཟའ་མི་ཕོད་པ་བཞིན་གཉེན་པོ་དྲན་ཤེས་བག་ཡོད་རྣམས་མ་ཉམས་ན་ལྟུང་བ་ཆེན་པོའི་རྒྱུའི་ལྟུང་བ་འབྱིན་མི་ནུས་ལ། སྦྲུལ་ཤི་བ་དང་འཕྲད་ན་ཁྭ་ཏའང་མཁའ་ལྡིང་བཞིན་དུ་སྤྱོད་པ་བཞིན། གཉེན་པོ་དང་བྲལ་ན་ཉེས་བྱས་ཕྲ་མོས་ཀྱང་ལྟུང་བའི་རྒྱུར་འགྱུར་བ་ཡིན་པས་དེ་ལྟར་གཉེན་པོའི་སྟོབས་བསྐྱེད་དགོས་ཏེ། རྒྱལ་བ་རྫོགས་པའི་སངས་རྒྱས་བཅོམ་ལྡན་འདས་སེངྒེ་ལྟ་བུ་དེའི་རྗེས་སུ་འཇུག་པ་བདག་བྱང་ཆུབ་སེམས་དཔའ་སེང་ཕྲུག་དར་མ་ལྟ་བུ་ཡིན་པས། བདག་གིས་ལྟུང་བ་མི་མཐུན་པའི་ཕྱོགས་ཐམས་ཅད་ལ་བློ་སྟོབས་བསྐྱེད་དེ་སྲན་གཟུགས་དགོས། དེ་ལྟར་རང་ཚུལ་ཁྲིམས་སོགས་ལ་གནས་ནས་གཞན་དེ་ལ་འགོད་པ་ལ་མངོན་ཞེན་དང་ང་རྒྱལ་དང་བདེན་ཞེན་དུ་བཟུང་ན་བདུད་ཀྱི་ལས་ཡིན་པས་སྤང་དགོས། དེ་ལྟར་སེམས་ཐོག་ནས་བདག་གཞན་བརྗེས། མཉམ་བརྗེས་གཉིས་སེམས་ཀྱི་སྟེང་ནས་འཇིག་རྟེན་ཆོས་བརྒྱད་ཀྱི་བླང་དོར་ལ་རོ་སྙོམས་པའི་མཐུ་ཐོབ་ནས། གཞན་གཅེས་བསྒོམ་པ་ལ། བདག་གིས་ཉི་མ་དེ་རིང་ནས་བཟུང་ཐར་པ་མ་ཐོབ་རུང་འདྲ་སྟེ། དམྱལ་བ་ཡི་དྭགས་དུད་འགྲོ་ལ་སོགས་པའི་རིགས་དྲུག་གི་སྡུག་བསྔལ་འདི་བདག་གི་སྟེང་དུ་བླངས་ཏེ་བཟོད་པར་བྱ། བདག་གི་བདེ་སྐྱིད་བདེ་བའི་དངོས་པོ་སོགས་སེམས་ཅན་ཐམས་ཅད་ལ་བཏང་ནི་ཡིན་སོགས་བསམ། དེ་ལྟར་སེམས་ཅན་མཐོ་སྲིད་པའི་རྩེ་མོ་ནས་དམའ་ན་རག་དམྱལ་བའི་བར་གྱི་སེམས་ཅན་ཐམས་ཅད་ལ་མར་ཤེས། དྲིན་དྲན། དྲིན་གཟོ་འདོད་ཀྱི་རྟོག་པ་བསྐྱེད། སྡུག་བསྔལ་དང་བྲལ་འདོད་སྐབས། སེམས་ཅན་དེ་དག་ཐམས་ཅད་ཀྱི་སྡུག་བསྔལ་གྱི་འབྲས་བུ་སྡུག་བསྔལ་གསུམ་དང་། རྒྱུ་ཆགས་སྡང་གཏི་མུག་སོགས་ཉོན་མོངས་དང་། དེས་ཀུན་ནས་བསླངས་བའི་ལས་མི་དགེ་བ་བཅུ། མཚམས་མེད་ལྔ། ཉེ་བ་ལྔ། ལྕི་བ་བཞི། ལོག་པ་བརྒྱད་ལ་སོགས་པའི་སྡུག་བསྔལ་རྒྱུ་འབྲས་གཉིས་པོ་དང་བྲལ་བར་གྱུར་ཅིག བྲལ་ན་ཅི་མ་རུང་། བྲལ་བ་ཞིག་བདག་ངས་བྱ་སྙམ། དེ་ནས་དཀོན་མཆོག་ལ་གསོལ་བ་གདབ། ད་དེ་ལྟ་བུས་ཀྱང་མི་ཕན་ཏེ་ད་ལྟ་ཉིད་མྱུར་བ་ཉིད་དུ་བདག་གི་རྒྱུད་ལ་སྨིན་པར་གྱུར་ཅིག་སྙམ་དུ་བསམ་པ་དང་སྦྱོར་བ་གཉིས་ཀས་ལེན། དེ་ངེས་པར་སྨིན་རྒྱུ་ཞིག་བྱུང་ན་སེམས་ཅན་ཐམས་ཅད་ཀྱི་ཤ་ཚབ་ཁྲག་ཚབ་རུས་ཚབ་ན་ཚབ་ཤི་ཚབ་ལ་སོགས་པ་བྱས་ནས་དམྱལ་བའི་གནས་སུ་སོང་ན་དམྱལ་བའི་སེམས་ཅན་རྣམས་ཀྱི་སྡུག་བསྔལ་བདག་གིས་མྱོང་བར་བྱ། ཡང་ན་སེམས་ཅན་གྱི་གྲངས་རེ་རེ་བཞིན་བདག་གི་ལུས་མང་པོར་གྱུར་ནས་སེམས་ཅན་དེ་དང་དེའི་ཚབ་བྱས་ནས་སྡུག་བསྔལ་ཐམས་ཅད་མྱོང་ཡང་བཟོད་སྙམ་པ་དང་། ཡང་ན་ལུས་ཆེན་པོ་ཁམས་གསུམ་རིགས་དྲུག་གི་གནས་ཐམས་ཅད་ཁྱབ་པའི་ཆེན་པོར་གྱུར་ནས་སྟོད་ཀྱི་མཐོ་རིས་ཀྱི་སྡུག་བསྔལ་ཁྱབ་པ་འདུ་བྱེད་དང་འགྱུར་བའི་སྡུག་བསྔལ་གཙོ་བོར་གྱུར་བའི་སྡུག་བསྔལ་རྣམས་མྱོང་ནས་མཐོ་རིས་ཀྱི་སེམས་ཅན་ཐམས་ཅད་སྡུག་བསྔལ་དང་བྲལ་བར་བསམ། སྨད་ཀྱི་ངན་སོང་གསུམ་གྱི་སྡུག་བསྔལ་གྱི་སྡུག་བསྔལ་གཙོ་བོར་མྱོང་ནས་ངན་སོང་གསུམ་གྱི་སེམས་ཅན་ཐམས་ཅད་སྡུག་བསྔལ་དང་བྲལ་ནས་བདེ་བ་ཐོབ་པར་བསམ། དམྱལ་བ་ལ་སོགས་པའི་སྡུག་བསྔལ་གྱི་རྣམ་གྲངས་རེ་རེ་ནས་ཞིབ་ཏུ་བསམ་ནས་དེ་དག་རང་གི་རྒྱུད་ཐོག་ལ་བླང་། དེར་གནས་པའི་མ་སེམས་ཅན་གྱི་སྡུག་བསྔལ་ཐམས་ཅད་དང་བྲལ་ནས་མཐོ་རིས་ལྷ་མིའི་གོ་འཕང་ནས་རྫོགས་པའི་སངས་རྒྱས་ཀྱི་བར་གྱི་བདེ་བ་ཐམས་ཅད་མྱོང་ནས་སེམས་ཅན་རེ་རེ་ནས་སངས་རྒྱས་ཐོབ་པར་བསམ། མཐར་སེམས་ཅན་ཐམས་ཅད་སངས་རྒྱས་པ་ན་སེམས་ཅན་དེ་དག་ངའི་དགེ་རྩས་སངས་རྒྱས་ཐོབ་པ་ཡིན་པས་ང་རེ་དགའ་སྙམ་དུ་དུས་ཀྱང་ཐུང་ཐུང་ཞིག་མ་ཡིན་པར་སེམས་ཅན་གཅིག་གི་དོན་ལ་བསྐལ་བ་གངྒཱའི་ཀླུང་གི་བྱེ་མ་སྙེད་ཀྱི་བར་དུ་འདུག་དགོས་ཀྱང་བཟོད་སྙམ་པའི་འདུ་ཤེས་བསྐྱེད། དེ་ལྟར་བསམ་པས་ཡིན་ན་སེམས་ཅན་ཐམས་ཅད་ཀྱི་སྡུག་བསྔལ་ངའི་སྟེང་དུ་སྨིན། སྦྱོར་བས་ཡིན་ན་ངས་བསམ་པ་དང་སྨོན་པ་ཙམ་གྱིས་སེམས་ཅན་ཐམས་ཅད་ཀྱི་སྡུག་བསྔལ་ངའི་སྟེང་དུ་སྨིན། དེའི་རྒྱུ་ལས་དང་ཉོན་མོངས་པ་ཐམས་ཅད་ངའི་སྟེང་དུ་སྨིན་པར་ཤོག ངའི་བདེ་སྐྱིད་བདེ་བའི་དངོས་པོ་ཐམས་ཅད་སེམས་ཅན་གྱི་དོན་དུ་བསྔོ་ཞིང་བྱིན་པ་ཡིན། བྱམས་པ་ཆེན་པོས་གཏོང་བ་ནི། ཉི་མ་དེ་རིང་ནས་བཟུང་ལུས་ལོངས་སྤྱོད་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་སེམས་ཅན་ཐམས་ཅད་ལ་མ་བྱིན་ས་མེད་པ། གྲངས་ས་ཆེན་པོའི་རྡུལ་སྙེད་ཀྱི་གྲངས་ཀྱི་རབ་ཏུ་མང་པོ་སྦྱིན་འདོད་ཀྱི་བསམ་པས་བྱིན་པ་ཡིན་བསྔོས་པ་ཡིན་པས། འདི་རྣམས་བྱིན་པ་ན་ཁ་ཕྱིར་འཁོར་དུ་འཇུག་མི་ཉན་པས། ལུས་འདི་ལ་སེམས་ཅན་རྣམས་ཀྱིས་ཁ་ལ་སྲབ་བཞག རྒྱབ་ཏུ་སྒ་བསྟད་པ་ལ་སོགས་པའི་མི་འདོད་པའི་གནོད་པ་ཅི་བྱས་ཀྱང་རུང་སྟེ་སེམས་ཅན་དེ་དག་ལ་རག་ལས་པ་ལས། ཡང་ངའི་ལུས་ཞེས་སོགས་བདག་ཏུ་འཛིན་ན་བྱང་ཆུབ་སེམས་དཔའི་ཚུལ་མ་ཡིན་པས། དེས་ན་ལུས་ལོངས་སྤྱོད་དགེ་རྩ་དང་བཅས་པ་སེམས་ཅན་ཐམས་ཅད་ལ་ཕངས་པ་དང་ཆགས་པ་མེད་པར་བཏང་ན། དངོས་སུ་སེམས་ཅན་ལ་ཕན་པ་དང་། བརྒྱུད་དེ་བདག་ལ་ཕན་པ་སྒྲུབ་པ་ཡིན་ནོ། ། དེ་དག་ནི་སྨོན་པ་བྱང་ཆུབ་ཀྱི་སེམས་མི་ཉམས་པའི་ཐབས་ཡིན་ནོ། །འཇུག་པ་བྱང་ཆུབ་ཀྱི་སེམས་མི་ཉམས་པར་བྱེད་པའི་རྒྱུ་ཕ་རོལ་ཏུ་ཕྱིན་པ་དྲུག་ལ་བསླབ་པ་ཡིན། དེ་ལྟར་དུ་སྨོན་འཇུག་གི་སེམས་བསྐྱེད་ནས། སྨོན་འཇུག་གི་བསླབ་བྱ་ལ་བསླབ་དགོས་ཏེ། སྨོན་པའི་བསླབ་བྱ་ནི་བཤད་ཟིན་ལ། འཇུག་པའི་བསླབ་བྱ་ལ། རྒྱལ་སྲས་ཀྱི་སྤྱོད་པ་རྒྱ་མཚོ་ལྟ་བུ་ཡོད་ཀྱང་། དེ་ཐམས་ཅད་བསྡུ་ན། ཕ་རོལ་ཏུ་ཕྱིན་པ་དྲུག་ལ་འདུ། ཕ་རོལ་ཏུ་ཕྱིན་པ་དྲུག་པོ་དེ་དག་བསྡུ་ན་སྦྱིན་སོགས་སྔ་མ་ལྔ་དམིགས་བཅས་བསོད་ནམས་ཀྱི་ཚོགས་སམ། ཐབས་སྤྱོད་པའི་ཕྱོགས་ཡིན། ཕྱི་མ་ཤེས་རབ་ནི། དམིགས་མེད་ཡེ་ཤེས་ཀྱི་ཚོགས་སམ། ལྟ་བའི་ཕྱོགས་ཡིན། ཕར་ཕྱིན་གྱི་ངེས་ཚིག་ནི། ཕ་རོལ་མྱ་ངན་ལས་འདས་པའི་ས་ལ་ཕྱིན་པར་བྱེད་པའི་ཐབས་སུ་གྱུར་པས་ཕར་ཕྱིན་ཡིན་ལ། ཕ་རོལ་མྱ་ངན་ལས་འདས་པ་ལ་ཞི་བ་ཉན་རང་དང་། རྫོགས་པའི་སངས་རྒྱས་ཀྱི་ས་ལ་ཕྱིན་པ་དང་། དེའང་ཕར་ཕྱིན་དྲུག་པོ་དེ་དག་ངེས་འབྱུང་གི་བསམ་པས་ཟིན། བདག་མེད་རྟོགས་པའི་ཤེས་རབ་ཀྱིས་ཟིན། སྟོང་ཉིད་ཀྱི་ལྟ་བས་མ་ཟིན་ན་ཕར་ཕྱིན་ཉི་ཚེ་བ་ཞི་བ་ཉན་རང་གི་གོ་འཕང་ཐོབ་པའི་རྒྱུ་ཡིན། སངས་རྒྱས་ཀྱི་གོ་འཕང་ནི་མཐའ་གཉིས་ལ་མི་གནས་པ་ཡིན་པས། དེ་ཐོབ་པའི་ཐབས་ལྟ་བས་སྲིད་པའི་མཐའ་མནན། སྙིང་རྗེས་ཞི་བའི་མཐའ་མནན་ཏེ། སྲིད་ཞི་གཉིས་ཀའི་མཐའ་ལས་མི་གནས་པའི་ཕ་རོལ་ཏུ་ཕྱིན་པར་བྱེད་པས་ཕ་རོལ་ཏུ་ཕྱིན་པ་དྲུག་གོ །དེའང་ཐབས་ཤེས་ཡ་མ་བྲལ་བར་བྱེད་པ། ཐབས་སྙིང་རྗེ་ཆེན་པོ་དང་། ཤེས་རབ་སྟོང་པ་ཉིད་ཀྱིས་ཟིན་ན། ཐབས་ཀྱིས་ཞི་མཐའ་མནན། ཤེས་རབ་ཀྱིས་སྲིད་པའི་མཐའ་མནན་པ་ཡིན་པས། ཕ་རོལ་ཏུ་ཕྱིན་པ་དྲུག་པོ་ལ་བསླབ་པའི་གང་ཟག་མོས་སྤྱོད་ཀྱི་ལམ་ལ་ཞུགས་པ་ཐམས་ཅད་ཀྱི་ཕར་ཕྱིན་དྲུག་པོ་དེ་ལ་ཕར་ཕྱིན་བཏགས་པ་བ་ཞེས་བྱ་བ་ཡིན་ཏེ། དེའི་དུས་སུ་མགོ་དང་ཡན་ལག་གི་སྦྱིན་པ་སོགས་དངོས་སུ་སྦྱིན་མི་ནུས་ཀྱང་། བསམ་པས་བཏང་ཞིང་། སྦྱོར་བས་བསྲུང་བ་ཡིན་ནོ། ། སྟོང་ཉིད་ལ་སྟོང་ཉིད་དོན་སྤྱིའི་ཚུལ་དུ་རྟོགས་པ་ལས། དངོས་སུ་མཐོང་བ་མེད་པས་དེའི་དུས་སུ་མགོ་སོགས་སེམས་ཐོག་ནས་བཏང་ཞིང་སྦྱོར་བས་བསྲུང་བ་མ་གཏོགས་པ་དངོས་སུ་བཏང་ན་ལྟུང་བའི་རྒྱུར་འགྱུར་བས། དེའི་སྦྱིན་སོགས་དང་ཤེས་རབ་ལ་མོས་པས་སྤྱོད་པས་ན་ཕར་ཕྱིན་བཏགས་པ་བ་ཡིན། ཕར་ཕྱིན་མཚན་ཉིད་པ་ནི། མཐོང་ལམ་ཆོས་ཉིད་ཀྱི་བདེན་པ་མཐོང་བ་དང་། ཤེས་རབ་ཀྱིས་མངོན་སུམ་དུ་མཐོང་བ་དང་། དེ་བཞིན་ཉིད་མཐོང་བ་དང་། ཡང་དག་པའི་མཐའ་མངོན་དུ་བྱེད་པ་རྣམས་དོན་གཅིག་མིང་གི་རྣམ་གྲངས་ཡིན་པས། མཐོང་ལམ་གྱི་རྟོགས་བྱ་རྟོགས་ནས་བཟུང་ས་བཅུའི་རྒྱུན་མཐའི་བར་ན། མཉམ་བཞག་སྤྲོས་བྲལ་དང་། རྗེས་ཐོབ་ལ་ཕ་རོལ་ཏུ་ཕྱིན་པ་བཅུ་པོ་རྫོགས་དགོས་ཤིང་། དེའང་ས་དང་པོར་སྦྱིན་སོགས་ལ་དངོས་སུ་མགོ་དང་ཡན་ལག་བཏང་ནུས་པ། རྣམ་ཀུན་མཆོག་ལྡན་གྱི་སྟོང་ཉིད་དུ་ཤར་བས། མཉམ་བཞག་སྣང་མེད་རྗེས་ཐོབ་སྒྱུ་མའི་དཔེ་བརྒྱད་ཀྱི་རྣམ་པས་ཕ་རོལ་ཏུ་ཕྱིན་པ་རྣམས་རྫོགས་པར་བྱེད་པ་སྟེ། དེའི་དུས་སུ་སྦྱིན་སོགས་སྟོང་འགྱུ་ཙམ་མ་ཡིན་པར། ངོ་བོས་སྟོང་ཡང་། རྣམ་པའི་ཆ་ནས་སྦྱིན་པ་དང་ཚུལ་ཁྲིམས་ལ་སོགས་པའི་རྣམ་པར་ཤར་བ་སྟོང་པའི་བྱ་བྱེད། སྟོང་པའི་ཡོ་ལང་། རྣམ་ཀུན་མཆོག་ལྡན་གྱི་སྟོང་ཉིད་དུ་ཤར་བས། འབྲས་བུ་གནས་སྐབས་ཀྱི་ས་བཅུ་ནས་འབྲས་བུ་རྫོགས་པའི་སངས་རྒྱས་ཀྱི་གོ་འཕང་རྫོགས་པར་བྱེད་པ་དེས་ན་ས་དང་པོ་ནས་བཟུང་ས་བཅུ་པའི་བར་གྱི་ཕར་ཕྱིན་ཐམས་ཅད་མཚན་ཉིད་པ་ཡིན་ཏེ། ཚོགས་གཉིས་ཟུང་འཇུག མཉམ་བཞག་སྣང་མེད། རྗེས་ཐོབ་སྒྱུ་མ་ལྟ་བུའི་རྣམ་རོལ་ཡིན་པས་ཕར་ཕྱིན་མཚན་ཉིད་པ་ཡིན། ཕ་རོལ་ཏུ་ཕྱིན་པ་དྲུག་པོ་དེ། རིང་ལམ། ཉེ་ལམ། མྱུར་ལམ་གསུམ་གྱིས་བསླབ་ནས་རྫོགས་སྨིན་སྦྱང་གསུམ་མཐར་ཕྱིན་དགོས་ཏེ། ཕ་རོལ་ཏུ་ཕྱིན་པ་དྲུག་གི་སྒོ་ནས་ཚོགས་གཉིས་རྒྱ་མཚོ་ལྟ་བུ་ཡོངས་སུ་རྫོགས་པར་བྱེད་པ་དང་། ཕ་རོལ་ཏུ་ཕྱིན་པ་དྲུག་གིས་སེམས་ཅན་རྣམས་བྱང་ཆུབ་གསུམ་གྱི་ལམ་ལ་བཀོད་ནས་སེམས་ཅན་རྒྱ་མཚོ་ལྟ་བུ་སྨིན་པར་བྱེད་པ་དང་། ཕ་རོལ་དུ་ཕྱིན་པ་དྲུག་ལ་བརྟེན་ནས་ཞིང་ཁམས་རྒྱ་མཚོ་ལྟ་བུ་སྦྱང་དགོས་ཤིང་། ཞིང་དེ་ལ་དག་པ་དང་མ་དག་པ་གཉིས་སྦྱང་བ་ཡིན། དེའང་རང་གི་འདོད་པ་བཞིན་དུ་ཕར་ཕྱིན་དྲུག་གི་དགེ་བའི་རྩ་བ་འདིས་བདག་མ་འོངས་པ་ན་ཞིང་ཁམས་དག་པ་དང་མ་དག་པ་རང་གིས་གང་སྦྱང་བར་འདོད་པའི་ཞིང་འདི་ལྟ་བུ་འབྱུང་བར་གྱུར་ཅིག་ཅེས་དགེ་རྩས་རྒྱུ་བྱས། སྨོན་ལམ་གྱིས་རྐྱེན་བྱས་ནས་སྦྱང་དགོས། དག་པ་ནི་འཇམ་དཔལ་གྱི་ཞིང་དང་། བདེ་བ་ཅན་གྱི་ཞིང་ལྟ་བུ་དང་། མ་དག་པ་ནི་བདག་ཅག་གི་སྟོན་པའི་ཞིང་ལྟ་བུའོ། ། དེ་ལྟ་བུའི་ཕ་རོལ་ཏུ་ཕྱིན་པ་དྲུག་པོ་དེ་ལ། བྱང་ཆུབ་སེམས་དཔའ་ལས་དང་པོ་པས། འགྲོ་འདུག་བསྒུལ་བསྐྱོད་ཐམས་ཅད་ལ། སྦྱིན་སོགས་ཀྱི་ར་བ་ལས་མི་འདའ་བར་བྱེད་པ་བསམ་པའི་སྟེང་ནས་ཡང་ནས་ཡང་དུ་སྦྱངས་དགོས། སྦྱོར་བའི་སྟེང་ནས་སྦྱིན་པ་ཆུང་རིམ་ནས་རང་གི་ནུས་ཚོད་དང་བསྟུན་ཏེ་བསླབ་དགོས། ཁྱད་པར་གང་ཟག་སེར་སྣ་ཅན་གྱི་རིགས་རྣམས་ནི་དངོས་པོ་ལག་པ་གཡས་གཡོན་དུ་སྤོ་ཞིང་གཏོང་སེམས་དགོས་པ་དང་། དེ་རིམ་པར་གོམས་པ་དང་། རིམ་གྱིས་ལོ་མ་དང་ཚོད་མ་ལ་སོགས་པ་དངོས་སུ་གཏོང་ཞིང་། མཐར་གྱིས་མགོ་དང་ཡན་ལག་སྦྱིན་པའི་བར་དུ་གོམས་པར་བྱའོ། །བྱང་ཆུབ་སེམས་དཔའ་ས་དང་པོ་ནས་བཅུ་པའི་བར་ལ་བསམ་སྦྱོར་གཉིས་ལས། སྦྱོར་བ་གཙོ་བོར་བྱས་ནས་ཕར་ཕྱིན་ལ་བསླབ་དགོས། ལས་དང་པོ་པ་རྣམས་ལ་ལྟ་བ་གཙོ་ཆེར་བྱེད་དགོས་ཏེ། དེ་དགོས་པའི་རྒྱུ་མཚན་བདག་དང་བདག་གིར་འཛིན་པ་འདིས་སྲིད་པའི་གནས་སུ་འཆིང་བར་བྱེད་པས། དེའི་གཉེན་པོ་ལམ་བསླབ་པ་གསུམ་དང་། ལམ་གྱི་གཙོ་བོ་ལམ་བདེན་བདག་མེད་རྟོགས་པའི་ཤེས་རབ་ཀྱིས་གང་ཟག་གི་བདག་ཕུང་པོ་ལྔ་དང་། གཅིག་ཐ་དད་དུ་བརྟག་ནས། གང་ཟག་གཞི་མེད་པར་ཤེས་པ་དང་། གདགས་གཞི་ཕུང་པོ་ལྔ་པོ་རྡུལ་ཕྲན་དང་སྐད་ཅིག་མའི་རང་བཞིན་དུ་བརྟག་པས་ཕུང་པོ་རང་བཞིན་མེད་པར་ངེས་པའི་ཆོས་དང་གང་ཟག་གི་བདག་མེད་དཔྱད་པའི་དཔྱད་སྒོམ་གཙོ་བོར་བྱེད་དགོས། མཐོང་ལམ་གྱིས་མངོན་སུམ་གྱི་ལྟ་བས་དེ་ཁོ་ན་ཉིད་རྟོགས་ནས་སྒོམ་ལམ་ནས་དེའི་རྒྱུན་ལ་གོམས་པར་བྱེད་པ་ཡིན་པས། ལས་དང་པོ་པའི་དུས་སུ་ལྟ་བ་གཙོ་ཆེ་བ་ཡིན། དེ་ལྟ་བུའི་ཕ་རོལ་ཏུ་ཕྱིན་པ་དྲུག་པོ་དེ་ལ། ངོ་བོ་དང་། དབྱེ་བ་གཉིས་ལས། སྐབས་འདིར་བསྒོམ་རྒྱུ་རྣམས་ངོ་བོ་སྒོམ་པ་ཡིན། དབྱེ་བ་རྣམས་ཐུན་མཚམས་སུ་བསམ་པ་ཡིན། དེ་ལ་དང་པོ་ཐུན་དང་ཐུན་མཚམས་ཕྱེས་ཏེ། ཐུན་གྱི་སྔོན་འགྲོ་རྣམས་འདྲ་བ་ལ། གསོལ་འདེབས་བྱེད་དུས་བླ་མའི་ཐུགས་རྒྱུད་ཀྱི་ཕར་ཕྱིན་སྦྱིན་པ་སོགས་སྐབས་སུ་གང་སྒོམ་པ་དེའི་ཡོན་ཏན་རང་རྒྱུད་ལ་སྐྱེ་བར་བསམ་ཞིང་ཐུགས་ཡིད་བསྲེ་སྟེ་སེམས་ཅི་གནས་སུ་མཉམ་པར་བཞག་གོ །དངོས་གཞི་ལ་གཏོང་སེམས་བསྒོམ་དགོས་ཏེ། སྦྱིན་རྒྱུའི་དངོས་པོ་ནི། ལུས་དང་། ལོངས་སྤྱོད་དང་། དུས་གསུམ་དུ་བསགས་དང་ཡོད་པའི་དགེ་བ་རྣམས་ཏེ། དེ་ཡང་དང་པོ། མར་ཤེས། དྲིན་དྲན། དྲིན་གཟོ་འདོད་ཀྱི་རྟོག་པ་བསྐྱེད་དེ། བདག་གིས་ཉི་མ་དེ་རིང་ནས་བཟུང་ལུས་འདོམས་གང་གྲུ་བཞི་འདི་ནས་མཐར་ཐུག་སངས་རྒྱས་མ་ཐོབ་ཀྱི་བར་གྱི་ལུས་དང་། ལོངས་སྤྱོད་དང་། དགེ་བའི་རྩ་བ་ཐམས་ཅད་གཅིག་ཏུ་བསྡུས་ཤིང་བསྡོམས་ནས་མ་སེམས་ཅན་ལ། གནས་སྐབས་དང་མཐར་ཐུག་གི་བདེ་བ་རྒྱུ་འབྲས་གཉིས་སྒྲུབ་པའི་ཆ་རྐྱེན་དང་། སྡུག་བསྔལ་ཐམས་ཅད་བསལ་བའི་ཆ་རྐྱེན་དུ་གཏོང་བ་ཡིན། བྱིན་པ་ཡིན། བསྔོས་པ་ཡིན། གང་ལ་བྱིན་ན། སེམས་ཅན་ཀུན་ལ། གང་བྱིན་ན། ལུས་ལོངས་སྤྱོད་དགེ་རྩ་དང་བཅས་པ། གང་གི་ཆེད་དུ་སྦྱིན་ན། གནས་སྐབས་མངོན་མཐོ་དང་། མཐར་ཐུག་སངས་རྒྱས་ཀྱི་གོ་འཕང་ཐོབ་པའི་ཆེད་དུ། ཚུལ་ཇི་ལྟར་བྱིན་ན། ཚེ་འདིའི་ལན་དང་། ཕྱི་མའི་རྣམ་སྨིན་ལ་རེ་བ་མེད་པར་སྦྱིན་པ་ཡིན། ལུས་ལ་བརྡུང་བརྡེག་སོགས། བསམ་པ་ངན་པ་སྦྱོར་བ་རྩུབ་པ། ངན་པ་ཆགས་སྡང་རྨོངས་གསུམ་གྱིས་འབྲེལ་བ་དང་། དད་སོགས་བཟང་པོ་དད་པ་དག་སྣང་གིས་འབྲེལ་བ་ཐམས་ཅད་འབྲེལ་ཚད་དོན་ལྡན་གྱི་སྨོན་ལམ་གདབ། ཐུན་ནང་སོགས་ལ་བསམ་པའི་སྟེང་ནས། གཏོང་སེམས་ཡང་ནས་ཡང་དུ་བ སྒོམ། ཐུན་མཚམས་སྦྱོར་བ་ལག་ལེན་ལ་འདེབས་དུས་དང་པོ། སྦྱོར་བ་ཆུང་རིམ་ནས་རིམ་གྱིས་ཇེ་ཆེ་ཇེ་ཆེར་བསླབ། དེའང་མཆོད་སྦྱིན་གཉིས་ཀ་སྦྱིན་པའི་ཕར་ཕྱིན་ཡིན་པས། དང་པོ་ཟང་ཟིང་གི་དངོས་པོ་ལྟ་བུ་ལ་མཚོན་ན། སྤྲང་པོ་ཞིག་འོང་བ་མཐོང་ན། བྱང་ཆུབ་སེམས་དཔའ་དེ་སེམས་རབ་ཏུ་དགའ་ཞིང་། སྤྲང་པོ་དེའི་འབོད་ཅིང་དངོས་པོ་ཞིག་བྱིན་ཅིག་ཅེས་སྒྲ་ཐོས་པའི་ཚེ་མི་དགའ་བ་མི་བྱེད་པར། སྦྱིན་རྒྱུའི་དངོས་པོ་ཞིག་ལ་ཁས་འཐེན་ནས་སྦྱིན་དགོས། དེའི་ཚེ་སེར་སྣ་ཐོན་འོང་བས། སེར་སྣའི་ཉེས་དམིགས་དྲན་ནས། སེར་སྣ་ཅན་ནི་ཡི་དྭགས་གནས་སུ་སྐྱེ། གལ་ཏེ་མིར་སྐྱེ་ན་ཡང་དེ་ཚེ་དབུལ་བོར་སྐྱེ། ཞེས་པ་བཞིན་དྲན་ནོ། །དེ་ནས་སྦྱིན་པ་སེར་སྣའི་གཉེན་པོར་འགྱུར་བ་སྦྱིན་རྒྱུའི་དངོས་པོ་ཟས་ལ་སོགས་པ་ལ། བཟང་ངན་གཉིས་ཡོད་ན། ངན་པ་དེ་སྦྱིན་ན་སྦྱིན་པའི་ཚུལ་ཁྲིམས་དང་འགལ་བས། དངོས་པོའི་ཆེ་ཆུང་ལ་མ་ལྟོས་པར་བསམ་པ་རྣམ་པར་དག་པའི་སྒོ་ནས་དངོས་པོ་བཟང་པོ་དེ་སྦྱིན་དགོས། དེ་ལ་སྣོད་གས་ཆག་མེད་པའི་ནང་དུ་རང་གི་འབྱོར་ཚོད་ཀྱི་དངོས་པོ་དེ་བཞག་ནས་ད་ལྟ་བདག་ལ་འདི་ལས་སྦྱིན་རྒྱུ་མེད་ཀྱང་། ཕྱིན་ཆད་ལུས་ལོངས་སྤྱོད་དགེ་རྩ་དང་བཅས་པ་སྤྲང་པོ་འདིས་གཙོས་སེམས་ཅན་རྣམས་ལ་སྦྱིན་དགོས་བསམ་པའི་སྒོ་ནས། མ་དང་བུའི་འདུ་ཤེས་ཀྱི་ཀུན་སློང་བཅོས་ནས། འཛུམ་པ་སྔོན་དུ་འགྲོ་བའི་སྒོ་ནས་ལག་གཉིས་བརྡར་ཏེ་སྦྱིན། ཡང་སློང་ན་མི་ཁྲོ་བར་འབྱོར་ན་འབྱོར་ཚོད་དང་བསྟུན་པར་སྦྱིན། འབྱོར་བ་མེད་ན་མེད་པའི་ཚུལ་ཚིག་གིས་ཤད་ལེགས་པར་སྦྱངས། དེ་ནས་སྦྱིན་པ་དེའི་རྒྱུ་འབྲས་བུ་དང་བཅས་པ་བའི་རྗེས་སུ་བེའུ་འབྲང་བ་བཞིན་ལེན་པ་པོ་གཙོས་སེམས་ཅན་ཐམས་ཅད་ཀྱི་དོན་དུ་བསྔོ་བ་དང་སྨོན་ལམ་བྱ། མཆོད་པ་ལ། སངས་རྒྱས་ཀྱི་སྐུ་གཟུགས་ཙམ་ལ་དམིགས་རྟེན་བྱས་ནས་སྐྱབས་གནས་རྒྱ་མཚོ་ལྟ་བུ་མངོན་སུམ་དུ་བསམ་ནས་མཆོད་རྒྱུའི་དངོས་པོ་མར་མེ་རྡོག་པོ་གཅིག་ལྟ་བུ། མཆོད་ཚུལ་སྦྱོར་དངོས་རྗེས་གསུམ་ཚང་བའི་སྒོ་ནས་མཆོད་དགོས། དངོས་གཞི་ལ་གང་ལ་སྦྱིན་པའི་ཡུལ། སྦྱིན་རྒྱུའི་དངོས་པོ། སྦྱིན་པའི་དོན་ཆེད་དེ། འཁོར་གསུམ་པོ་སྣང་ལ་རང་བཞིན་མེད་པ་སྟོང་པའི་ངེས་ཤེས་དྲངས། དེ་དག་ནི་རང་གི་ཚེ་འདིའི་ལན་དང་། ཕྱི་མའི་རྣམ་སྨིན་ལ་རེ་བ་མེད་པའི་མཆོད་སྦྱིན་བྱེད་དགོས། བྱམས་པའི་སེམས་དང་སྙིང་རྗེའི་སེམས་ཀྱིས་ཚིག་སྙན་པོས་ཚིག་གིས་གཏང་རག་གཏོང་དགོས། སྦྱིན་པ་སེར་སྣའི་གཉེན་པོར་འགྲོ་བ་དང་། ལན་དང་རྣམ་སྨིན་ལ་རེ་བ་མེད་པར་སྒོམ་པའི་ཟང་ཟིང་གི་སྦྱིན་པ་ཚོགས་ལམ་པའི་སྐབས་ཡིན། གཏོང་བ་ཆེན་པོ་སྦྱོར་ལམ། ཤིན་ཏུ་གཏོང་བ་མཐོང་ལམ་པའི་སྐབས་ཡིན། ལས་དང་པོ་པའི་ལུས་བསམ་པས་གཏོང་། སྦྱོར་བས་བསྲུང་དགོས། ལོངས་སྤྱོད་སེར་སྣའི་གཉེན་པོ་ལ་འགྲོ་ཚོད་གཏོང་དགོས། དགེ་རྩ་འབྲས་བུ་དང་བཅས་པ་གཏོང་དགོས། ཆོས་སྦྱིན་གྱི་མཚམས་དངོས་སུ་སེམས་ཅན་ལ་ཕན་ཐོགས་པ་ས་དང་པོ་ནས་ཡིན། དེ་ཚུན་ཆོད་ལ་དངོས་སུ་སེམས་ཅན་ལ་ཕན་འདོགས་པ་མི་འོང་བས། རི་མཐོན་པོ་ལ་སོགས་པའི་རྩེར་སོང་ནས། ཀུན་སློང་རྣམ་པར་དག་པ་བཅོས་ཏེ། ན་མོ་ཨཪྱ་དམ་པ་སོགས་ཀྱིས། མདོ་འདོན་པ་དང་། བསང་དང་གསུར་དང་ལུས་སྦྱིན་རྣམས་ཀྱིས་རྗེས་ཀྱི་ཆོས་སྦྱིན་བྱེད་པ་དེས། འབྱུང་པོ་དཔག་ཏུ་མེད་པའི་རྒྱུད་གྲོལ་བར་བསམ་པ་དེས། ལས་དང་པོ་པའི་ཆོས་སྦྱིན་གྱི་གོ་ཆོད་པ་ཡིན་ནོ། །གཉིས་པ་ཚུལ་ཁྲིམས་ལ་ཐུན་ཐུན་མཚམས་མེད་པར་ཚུལ་ཁྲིམས་དང་འབྲལ་བ་མེད་པར་བྱ་དགོས། དང་པོ་ཐུན་གྱི་སྔོན་འགྲོ་རྣམས་སོང་ནས། སྤོང་སེམས་རྒྱུན་ཆགས་ས་བོན་དང་བཅས་པ་ལ་འདོད་པས་སེམས་ཀྱི་སྟེང་ནས་སྤོང་སེམས་ཡོད་ན་ཚུལ་ཁྲིམས་ཡིན། སེམས་ཀྱི་སྟེང་ནས་སྤོང་སེམས་མེད་ན་མི་དགེ་བ་བཅུ་ལྟ་བུ་སྤངས་ཀྱང་ཚུལ་ཁྲིམས་མིན། དེས་ན་སེམས་ཀྱི་སྟེང་ན་སྤོང་སེམས་ཡོད་ན་ཚུལ་ཁྲིམས་ཡོད། མེད་ན་ཚུལ་ཁྲིམས་མེད་པས། སྤོང་སེམས་དང་། དེ་དམ་བཅའི་ལྕགས་ཀྱུ་གཉིས་པས་ཟིན་དགོས་པ་ཡིན། ཐུན་གྱི་དངོས་གཞི་ལ་མི་དགེ་བ་བཅུ་པོ་ནས། རྫོགས་པ་ཆེན་པོའི་དམ་ཚིག་གི་བར་རྣམས་རེ་རེ་ནས་ཉེས་པའི་ཆ་མི་བྱེད་པའི་སྤོང་སེམས་དང་། དེ་ལྟ་བུའི་དམ་བཅའ་དེ་གཏོང་རེ་སྙམ་པའི་དམ་བཅའི་ལྕགས་ཀྱུ་གཉིས་པ་རེས་ཟིན་དགོས། དང་པོ་སེམས་ཅན་ཐམས་ཅད་ལ་མར་ཤེས། དྲིན་དྲན། དྲིན་གཟོ་འདོད་ཀྱི་རྟོག་པ་བསྐྱེད་པ་རྣམས་འདི་དང་འོག་མ་ཐམས་ཅད་ལ་སྦྱར་དགོས། དང་པོ་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ཉི་མ་དེ་རིང་ནས་བཟུང་རྫོགས་པའི་སངས་རྒྱས་མ་ཐོབ་ཀྱི་བར་དུ། སེམས་ཅན་གྱི་སྲོག་གཅོད་ན་ང་ཤི་ནི་ཡིན། གཞན་ལ་གསོད་བཅུག་ན་ང་ཤི་ནི་ཡིན། གསོད་པ་ལ་རྗེས་སུ་ཡི་རང་བྱེད་ན་ང་ཤི་ནི་ཡིན་སྙམ་དུ་སྤོང་སེམས་རེ་དང་དེ་ལྟ་བུའི་དམ་བཅའ་དེ་སྲོག་དམར་པོ་ལ་བབ་ཀྱང་གཏོང་རེ་ཀན་སྙམ་པའི་དམ་བཅའི་ལྕགས་ཀྱུ་གཉིས་པ་རེས་ཟིན་དགོས་པ་ནི་འོག་མ་ཐམས་ཅད་འགྲེས་སོ། །དེའི་མཐུན་ཕྱོགས་སྲོག་བསྐྱབ་དགོས། ཡང་བདག་མུ་གེས་ཤི་ན་ཡང་མ་བྱིན་པར་ལེན་རེ་སྙམ་དུ་དམ་བཅའ། གཞན་ལེན་དུ་བཅུག་རེ་སྙམ་དུ་དམ་བཅའ། གཞན་གྱིས་ལེན་པ་ལ་ཡི་རང་བྱེད་པ་རྣམས་མི་བྱེད་སྙམ་དུ་དམ་བཅའ། མི་ཚངས་སྤྱོད་པ་བྱེད་རེ་སྙམ་དུ་དམ་བཅའ། དེའི་མཐུན་ཕྱོགས་ཚངས་པར་སྤྱོད་དགོས། རྫུན་སྤང་ནས་བདེན་པར་སྨྲ་དགོས། དེའང་གཞན་མི་ཞིག་དང་གཏམ་ལབ་པ་ན། ངས་རྫུན་བྱ་འོང་ངོ་སྙམ་དུ་རང་རྒྱུད་ལ་ཞིབ་ཏུ་བརྟག་ནས་བདེན་པར་སྨྲ་དགོས། ཡང་ན་རྫུན་བཤད་པ་དེ་ངོས་བཟུང་ནས། ཕྱིན་ཆད་ངས་ལྕེ་འདི་བཅད་སོང་ཡང་རྫུན་བྱ་རེ་སྙམ་དུ་དམ་བཅའ། ཡང་ཕྲ་མ་སྤང་ནས་འཁོན་པ་བསྡུམ་དགོས། མཐུན་གཉིས་འབྱེད་པའི་ཕྲ་མ་བྱེད་ན་ང་ཤི་ནི་ཡིན་སྙམ་དུ་དམ་བཅའ། དེ་ཡང་ཕྲ་མའི་ཚིག་སྨྲ་འདོད་པ་དང་། སྨྲ་བར་གཟོ་བ་ན། ཁ་ལ་ཐལ་ལྕག་བྲབ། བྲང་ཁུ་ཚུར་གྱིས་བརྡུང་སྟེ་སྤང་དགོས། ཚིག་རྩུབ་སྤང་ནས་སྙན་པར་སྨྲ་དགོས། ངག་ཀྱལ་སྤང་ནས་བཟླས་བརྗོད་ལ་འབད་དགོས། དེའི་འཕྲོས་དོན་ལ་གྲོང་ཆོག་སོགས་སུ་འགྲོ་བའི་དུས་སུ་ངག་ཀྱལ་སྤང་ནས་ཆོ་ག་རྣམ་པར་དག་པའི་སྒོ་ནས་རུ་བཞིའི་བཤགས་པ་དང་། ཟུང་བཞིའི་བསྐང་བ་དྭངས་གཙང་བ་རེ་བྱས་ན་སྦྱིན་བདག་གི་ཚོགས་རྫོགས། རང་གི་དཀོར་གྱི་སྒྲིབ་པ་ཡང་སྦྱང་བ་ཡིན་པས། རུ་བཞི་ནི། ལུས་ཀྱི་རུ་ཕྱག་འཚལ་བ། ངག་གི་རུ་ཡི་གེ་བརྒྱ་པ་བཟླ་བ། ཡིད་ཀྱི་རུ་ཀློང་བཤགས་དང་། སྒོ་གསུམ་ཆ་མཉམ་གྱི་རུ་ལྟ་བའི་ཀློང་བཤགས་བཞི་དང་། ཟུང་བཞི་ནི། ལུས་ཀྱི་ཟུངས་བཞི། རྩ་དང་ཐིག་ལེ་དཀར་དམར་དང་། རླུང་དང་བཅས་པ་བཞི་པོ། སྨན་དང་། རཀྟ། གཏོར་མ། མར་མེ་རུ་སྦྱར་ནས་མཆོད་དགོས་པས། འདིའི་དུས་སུ་དབང་པོའི་སྒོ་བསྡམ། ངག་གི་སྨྲ་བ་སྤང་། སེམས་ཀྱི་དྲན་རྟོག་གཞན་དུ་མ་གཡེང་པའི་སྒོ་ནས་འབད་དགོས། ཡང་ངའི་སྙིང་དམར་པོ་འདི་བླང་སོང་ཡང་། གཞན་གྱི་ཡོ་བྱད་དང་། དཀོན་མཆོག་གི་རྫས་ལ། བརྣབ་སེམས་བྱེད་རེ་ཤི་སྙམ་དུ་དམ་བཅའ། དེའི་སྟེང་དུ་གཏོང་སེམས་བསྒོམ་དགོས། ཡང་སེམས་ཅན་ལ་གནོད་པའི་བསམ་པ་ངན་པ། སྦྱོར་བ་རྩུབ་པ། བསམ་ངན་ཁོང་དུག་བྱེད་རེ་ཤི་སྙམ་དུ་དམ་བཅའ། དེ་ནས་སྙིང་རྗེ་བསྒོམ་དགོས། རྒྱུ་འབྲས་ཡང་དག་པའི་ཆོས་ལ་ལོག་ལྟ་བྱེད་རེ་ཤི་སྙམ་དུ་དམ་བཅའ། རྒྱུ་འབྲས་ཡིད་ཆེས་ཀྱི་དད་པ་བརྟེན་དགོས། ད་ནི་གོང་གི་སྐྱབས་སུ་འགྲོ་དུས་དགེ་བསྙེན་གྱི་སྡོམ་པ་ཐོབ་པ་ཡིན་པས། དེའི་བསྲུང་བྱ་རྩ་བ་བཞི། ཆང་དང་བཅས་པ་ལྔ་པོ་ལ་མི་བྱེད་སྙམ་པ་དམ་བཅའ་ལྔ། དེའི་དམ་བཅའ་གཏོང་རེ་སྙམ་པའི་དམ་བཅའི་ལྕགས་ཀྱུ་གཉིས་པ་ལྔ་རེས་ཟིན་དགོས། དགེ་ཚུལ་དང་། དགེ་སློང་དང་། བྱང་ཆུབ་སེམས་དཔའ་དང་། སྔགས་ཀྱི་རྣལ་འབྱོར་པ་རྣམས་ཀྱིས་ཆང་འཐུང་པའི་དུས་ཆང་གི་ཁ་དོག་དྲི་རོ་ནུས་པ་འབྲུ་གསུམ་བརྗོད་པས་བསྒྱུར་ནུས་པའི་ཏིང་ངེ་འཛིན་གྱི་དྲོད་ཐོབ་པ་དང་། དུག་བོང་པ་ལྟ་བུའང་ཁ་དོག་དྲི་རོ་བསྒྱུར་ནུས་པས་བཟའ་ན་མི་གནོད་པའི་དུས་སུ་ཆང་ལ་སོགས་པ་བཏུང་ཡང་གནོད་པར་མི་འགྱུར་བས། དེ་ལྟར་མ་ཡིན་པར་ཆང་གི་དྲི་རོ་ལ་སྲེད་ནས་དགེ་ཚུལ་སློང་སོགས་སུས་བཏུང་ཡང་སྟོན་པས་བླ་སློབ་འབྲེལ་བ་བཅད་པ་ཡིན་ཏེ། ཆང་འཐུང་ང་ཡི་སློབ་མ་མིན། །ང་ནི་དེ་ཡི་སྟོན་པ་མིན། །ཞེས་གསུངས། དེས་ན་དགེ་ཚུལ་གྱི་རྩ་བ་བཞི། ཆང་དང་བཅས་པ་ལྔ་པོ་སྲོག་ལ་བབ་ཀྱང་མི་བྱེད་སྙམ་པའི་དམ་བཅའ་རེ་རེ་དང་། ཡན་ལག་གི་ཉེས་བྱས་ཞིབ་མོ་སུམ་ཅུ་པོ་རྣམས་ལ་མི་བྱེད་པའི་དམ་བཅའ་སུམ་ཅུ། དགེ་སློང་གི་རྩ་བ་བཞི་ལ་དམ་བཅའ་བཞི། ལྷག་མ་བཅུ་གསུམ་ལ་དམ་བཅའ་བཅུ་གསུམ། སྤང་ལྟུང་སུམ་ཅུ་ལ་དམ་བཅའ་སུམ་ཅུ། ལྟུང་བྱེད་དགུ་བཅུ་ལ་དམ་བཅའ་དགུ་བཅུ། སོར་བཤགས་བཞི་ལ་དམ་བཅའ་བཞི། ཉེས་བྱས་བརྒྱ་དང་བཅུ་གཉིས་ལ་སྤོང་སེམས་བརྒྱ་དང་བཅུ་གཉིས། བྱང་ཆུབ་སེམས་དཔའི་ཟབ་མོ་ལྟ་སྲོལ་གྱི་ལུགས་ལ། རྩ་ལྟུང་ཉི་ཤུ་ལ་སྤོང་སེམས་ཉི་ཤུ། ཡན་ལག་གི་ཉེས་བྱས་བརྒྱད་ཅུ་ལ་སྤོང་སེམས་བརྒྱད་ཅུ། རྒྱ་ཆེན་སྤྱོད་སྲོལ་གྱི་རྩ་བ་བཞི་ལ་སྤོང་སེམས་བཞི། ཉེས་བྱས་ཞེ་དྲུག་ལ་སྤོང་སེམས་ཞེ་དྲུག དེ་གཉིས་ཀའི་མདོ་འགགས་སྨོན་འཇུག་བྱང་ཆུབ་ཀྱི་སེམས་གཉིས་ཡིན་པས་བདག་གི་མགོ་བོ་བཅད་ནས་སོང་ཡང་བླའི། ངས་སེམས་ཅན་བློས་གཏོང་རེ་ཀན་སྙམ་པའི་དམ་བཅའི་ལྕགས་ཀྱུ་གཉིས། འཇུག་སེམས་ཕ་རོལ་ཏུ་ཕྱིན་པ་དྲུག་པོ་མ་བསྲུང་ན་ང་ཤི་ནི་ཡིན་སྙམ་པའི་དམ་བཅའི་ལྕགས་ཀྱུ་གཉིས། དེའི་མི་མཐུན་ཕྱོགས་དྲུག་མ་སྤང་ན་ང་ཤི་ནི་ཡིན་སྙམ་པའི་དམ་བཅའི་ལྕགས་ཀྱུ་གཉིས། རྡོ་རྗེ་ཐེག་པའི་དམ་ཚིག མ་ཧཱའི་རྩ་ལྟུང་ལྔ་ལ་སྤོང་སེམས་ལྔ། ཡན་ལག་གི་བཅུ་ལ་སྤོང་སེམས་བཅུ། ཨ་ནུ་ཡོ་གའི་རྩ་བའི་སྐུ་གསུང་ཐུགས་ཀྱི་དམ་ཚིག་གསུམ་ལ་དམ་བཅའ་གསུམ། ཡན་ལག་ཉེར་ལྔ་ལ་སྤོང་སེམས་ཉེར་ལྔ། རྫོགས་པ་ཆེན་པོའི་བསྲུང་དུ་ཡོད་པ་རིམ་གྱིས་པའི་དམ་ཚིག་རྩ་བ་བླ་མའི་སྐུ་གསུང་ཐུགས་ལ་དབྱེ་བ་ཉེར་བདུན་ལ་སྤོང་སེམས་ཉེར་བདུན། ཡན་ལག་གི་དམ་ཚིག་ཉེར་ལྔ་ལ་སྤོང་སེམས་ཉེར་ལྔ། བསྲུང་དུ་མེད་པ་ཅིག་ཆར་པའི་དམ་ཚིག་བཞི་ལ་སྤོང་སེམས་བཞི། དེ་ལྟར་བསྲུང་བྱའི་དམ་ཚིག སྲུང་བའི་གང་ཟག བསྲུང་བའི་ཕན་ཡོན་གསུམ་སྣང་ལ་རང་བཞིན་མེད་པའི་ངེས་ཤེས་དྲངས་ནས། ཐུན་མཚམས་ལ་ཉེས་སྤྱོད་སྡོམ་པའི་སོགས། དང་པོ་བྱང་སེམས་རང་གི་ལུགས་ལ་སོ་ཐར་དང་། བྱང་སེམས་གཉིས་ཀྱི་སྡོམ་པ་གཉིས། སོ་ཐར་ཡར་ལ་འདུ་ཡང་སྔགས་མར་འདུ་མི་དགོས། སྡོམ་པ་གསུམ་པོ་ཐོབ་པའི་གང་ཟག་གིས་སོ་བྱང་སྔགས་གསུམ་གྱི་ཉེས་སྤྱོད་ཐམས་ཅད་སྡོམ་དགོས། ཚུར་བསྡུ་ན། གཞན་གནོད་གཞིར་བཅས་སྤོང་བ་སོ་ཐར། གཞན་ཕན་གཞིར་བཅས་སྒྲུབ་པ་བྱང་སེམས། སྒོ་གསུམ་རྡོ་རྗེ་གསུམ་གྱི་རང་བཞིན་དུ་ཤེས་པ་སྔགས་ཀྱི་སྡོམ་པ་ཡིན། དེས་ན་ལུས་ཀྱི་སྒོ་ནས་བརྡུང་བརྡེག ངག་གི་སྒོ་ནས་ཚིག་རྩུབ། ཡིད་ཀྱི་སྒོ་ནས་གནོད་སེམས་སོགས། མདོར་ན་ལུས་ངག་ཡིད་གསུམ་གྱི་གནོད་པའི་ལས་ཕྲ་མོ་ཙམ་སྤང་བ་ཉེས་སྤྱོད་སྡོམ་པ་ཡིན། དགེ་བ་ཆོས་སྡུད་ཀྱི་ངོ་བོ་ནི༑ ཕར་ཕྱིན་དྲུག་པོ་དེ་ལ་བསླབ་པ་ཡིན་རུང་། ལས་དང་པོ་པས་ལུས་ངག་ཡིད་གསུམ་གྱིས་དགེ་བ་ཕྲ་མོ་ཚུན་ལ་བརྩོན་པ་དགེ་བ་ཆོས་སྡུད་ཡིན། སྐུ་གཟུགས་མཆོད་རྟེན་སོགས་མཐོང་ན་ཞྭ་ཕུད་སོགས། ལུས་ཀྱི་ཕྱག་གཅིག་སོགས། ངག་གི་ལྟུང་བཤགས་སོགས། སེམས་ཀྱི་སྐད་ཅིག་མ་སོགས་དགེ་བའི་ལས་ལ་བརྩོན་པ་ཐམས་ཅད་དགེ་བ་ཆོས་སྡུད་ཀྱི་ཚུལ་ཁྲིམས་ཡིན། སེམས་ཅན་དོན་བྱེད་ནི་མཐོང་ལམ་ཆོས་ཉིད་ཀྱི་བདེན་པ་མཐོང་བའི་ཚེ། བསྡུ་བའི་དངོས་པོ་བཞིས་གདུལ་བྱ་རྣམས་བསྡུས་ནས་སེམས་ཅན་སྨིན་གྲོལ་གྱི་ལམ་ལ་བཀོད་པ་ཡིན། དེ་ཐམས་ཅད་ཤིག་གཅིག་གི་སྟེང་ནས་བཞག་ན། དང་པོ། ཤིག་གཅིག་བཟུང་ནས། ད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པའི་ཆེད་དུ་ཤིག་དེ་མི་གསོད་སྙམ་པ་ཉེས་སྤྱོད་སྡོམ་པའི་ཚུལ་ཁྲིམས ། མ་བསད་ནས་སྲོག་སྐྱོབ་པ་སེམས་ཅན་དོན་བྱེད་ཀྱི་ཚུལ་ཁྲིམས། དེའི་དགེ་རྩ་གཞན་དོན་དུ་བསྔོ་བ་དགེ་བ་ཆོས་སྡུད་ཀྱི་ཚུལ་ཁྲིམས། མདོར་ན་རང་གི་ནུས་ཚོད་ཀྱི་མི་དགེ་བཅུ་སྤང་། ཕན་པ་གཞི་དང་བཅས་པ་སྒྲུབ། སྒོ་གསུམ་རྡོ་རྗེ་གསུམ་དུ་ཤེས་པའི་ནང་དུ་འདུས་པ་ཡིན། རྗེས་ཐོབ་ཐམས་ཅད་ལ། ལུས་ངག་ཡིད་གསུམ་གྱི་མི་དགེ་བ་སྣ་རེ་ཡིན་ན་སྤང་། དགེ་བ་སྣ་རེ་ནས་བསྒྲུབ། དེ་ཐམས་ཅད་དམ་པ་གསུམ་གྱིས་ཟིན་པ། སྣང་ལ་རང་བཞིན་མེད་པའི་ངེས་ཤེས་དྲངས། བཟོད་པའི་ངོ་བོ་མི་འཁྲུགས་པ་ཡིན། ཁོང་འཁྲུགས་པ་ནི། སེམས་བྱུང་སེམས་པའི་སྟེང་ནས་བཞག་པ་ཡིན། ཞེ་སྡང་ནི་ལུས་ངག་ལ་རྣམ་འགྱུར་ཐོན་པ་ཡིན། འཇིག་རྟེན་པའི་ཁ་སྐད་ལ། བསྐལ་བ་སྟོང་གི་ཚོགས་བསགས། ཁོང་ཁྲོང་གཅིག་གིས་འཇོམས་ཟེར་བ་དང་། སྤྱོད་འཇུག་ལས། བསྐལ་བ་སྟོང་དུ་བསགས་པ་ཡི་སོགས། གང་གིས་སྲེག་པར་བྱེད་ན་ཁོང་ཁྲོས་སྲེག་པར་བྱེད། གང་བསྲེག་ན་བསོད་ནམས་ཆ་མཐུན་གྱི་དགེ་རྩ་ཡིན། དམ་པ་གསུམ་དང་ལྡན་པའི་དགེ་རྩ་ནི་མི་ཚིག་ཅེས་འདོད། འཇིག་རྟེན་པའི་དགེ་རྩ་རྣམས་ནི་ཐ་ན་འགལ་རྡུམ་ལའང་ཁྲོ་ན་ཚིག་ཟེར་བ་དང་། ཐེག་དམན་ཐར་པ་ཆ་མཐུན་གྱི་དགེ་རྩ་ཉན་རང་རྣམས་ཕན་ཚུན་གཅིག་གཅིག་ལ་ཁྲོས་ན་དགེ་རྩ་ཚིག་པ་ལས། སོ་སྐྱེ་ཐ་མལ་པ་ལ་ཁྲོས་ན་མི་ཚིག་ཅིང་ཉམས་སྨད་དུ་འགྲོ། བྱང་ཆུབ་སེམས་དཔའ་ཞིག་ཉན་རང་ལ་ཁྲོས་ན་དགེ་རྩ་ཉམ་སྨད་ཙམ་མ་གཏོགས་ཚིག་མི་ནུས་ཏེ་པོ་ཏོས་ལྕགས་མི་ཆོད་པ་བཞིན་ནོ། །བྱང་ཆུབ་སེམས་དཔའ་བྱང་ཆུབ་སེམས་དཔའ་ཞིག་ལ་ཁྲོས་ན་ལྕགས་ཀྱིས་ལྕགས་གཅོད་པ་བཞིན་དགེ་བའི་རྩ་བ་ཐམས་ཅད་འཇོམས་འགྲོ། བྱང་ཆུབ་སེམས་དཔའ་ཚོགས་སྦྱོར་ལམ་པ་ཞིག་ས་ཐོབ་ཞིག་ལ་ཁྲོས་ན་དགེ་བའི་རྩ་བ་ཐམས་ཅད་ལྷག་མ་མ་ལུས་པ་ཚིག་འགྲོ་བས། ཡང་ཚོགས་ལམ་དང་པོ་ནས་བཟུང་སྟེ་སེམས་བསྐྱེད་དགོས། དེས་ན་ཞེ་སྡང་ལྟ་བུའི་སྡིག་པ་མེད་སོགས། གང་ཚིག་ན་སྦྱིན་པ་ཚུལ་ཁྲིམས་གཉིས་ཀྱི་དགེ་རྩ་བསྐལ་བ་སྟོང་གི་བར་དུ་ཚོགས་བསགས་པ་འཇོམས་པར་བྱེད་པ་དང་། འཇུག་པ་ལས། བསྐལ་བ་བརྒྱའི་བར་དུ་བསགས་པའི་སྦྱིན་པ་དང་ཚུལ་ཁྲིམས་གཉིས་ཀྱི་དགེ་བའི་རྩ་བ་ཐམས་ཅད་ཚིག་འགྲོ་བར་བཤད་པ་དང་། བྱང་ཆུབ་ཀྱི་སེམས་ཡུལ་ཕུད། རྗེས་འདོན་བྱེད་པས། དཔེར་ན་མེ་ཆུ་གཉིས་སྣོད་གཅིག་ལ་འདུ་མི་རུང་བ་ལྟར། ཞེ་སྡང་ཡོད་ན་བྱང་ཆུབ་སེམས་མེད། བྱང་ཆུབ་སེམས་ཡོད་ན་ཞེ་སྡང་མེད། དེས་ན་ཞེ་སྡང་གི་རང་འབྲས་མཐར་ཐུག་དམྱལ་བར་འགྲོ། བཟོད་པའི་རང་འབྲས་མཐར་ཐུག་སངས་རྒྱས་ཀྱི་གོ་འཕང་ཐོབ་པར་འགྱུར་བས། དེས་ན་བཟོད་པའི་ཕན་ཡོན་དང་། ཞེ་སྡང་གི་ཉེས་དམིགས་ཤེས་ནས་བཟོད་པ་བ སྒོམ་དགོས། བཟོད་པ་ལྟ་བུའི་དཀའ་ཐུབ་མེད། །སོགས་ཀྱིས་བཟོད་པ་ནི་དཀའ་ཐུབ་ཐམས་ཅད་ཀྱི་ནང་ནས་མཆོག་ཏུ་གྱུར་པ་ཡིན། བཟོད་པ་བསྒོམ་པ་ལ། དང་པོ་ཞེ་སྡང་མུག་སོད་བྱ་དགོས་ཏེ། ཡིད་མི་བདེ་བའི་ཟས་རྙེད་པའི་ཚེ། ཐབས་རྣམ་པ་སྣ་ཚོགས་ཀྱི་སྒོ་ནས་བཟོད་པ་བ སྒོམ་དགོས། ཐུན་མཚམས་རྣམས་སུ་དབྱེ་བ་རྣམས་བསྒོམ་དགོས། གཞན་གྱི་སོགས། ཆོས་སོགས། ཟབ་མོའི་དོན་ལ་སོགས་སོ། །བཟོད་པ་སྒོམ་མཚམས་ཡིད་མི་བདེ་བའི་ཟས་རྙེད་པའི་དུས་ཡིན། བཞི་པ་བརྩོན་འགྲུས་ནི། ངོ་བོ་དབྱེ་བ་གཉིས་ལས། ངོ་བོ་ནི། བརྩོན་གང་དགེ་ལ་སྤྲོ་བའོ། །ཞེས་པས། དགེ་བ་ལ་ཞེས་པ་འཇིག་རྟེན་པའི་བྱ་བ་མི་དགེ་བ་ལ་སྤྲོ་བ་ཐམས་ཅད་ལེ་ལོ་ཡིན་པས། དགེ་བ་ལ་སྤྲོ་བ་ཡིན། སྤྲོ་བ་ཞེས་པས། ལུས་ངག་གཉིས་ཀྱི་དགེ་བ་དམན་པ་རྣམས་བཅད་ནས། སེམས་དགེ་བ་ལ་མཆོག་ཏུ་སྤྲོ་བ་བརྩོན་འགྲུས་ཡིན། བརྩོན་འགྲུས་འོང་བའི་ཐབས་ལ། དགེ་བའི་ཕན་ཡོན་དང་། སྡིག་པའི་ཉེས་དམིགས་རྣམས་དྲན་དགོས། དེ་ལ་མདོ་དཀོན་མཆོག་གི་རྒྱལ་པོ། ཟ་མ་ཏོག་གི་ཕན་ཡོན། མཚམས་མེད་པའི་ལས་བྱང་བ་དང་། ཁོང་ཁྲོས་མི་འཇོམས་པ་ལ་སོགས་པའི་ཕན་ཡོན་དང་། སྐྱབས་འགྲོའི་ཕན་ཡོན་དང་། བྱང་ཆུབ་སེམས་ཀྱི་ཕན་ཡོན་ནོ་དེ་ལྟ་བུའི་བྱང་ཆུབ་ཏུ་སེམས་བསྐྱེད་ན། མིང་དོན་གནས་འགྱུར་བ་དང་། སྐྱེལ་མ་དཔའ་བོའི་དཔེས་ངེས་པའི་སྡིག་པ་ཟིལ་གྱིས་གནོན་པ། དུས་མཐའི་མེའི་དཔེས་མ་ངེས་པའི་སྡིག་པ་དྲུང་ནས་འབྱིན་པ། ལྗོན་ཤིང་གི་འབྲས་བུའི་དཔེས་འབྲས་བུ་མི་ཟད་པ་སྨོན་སེམས་ཀྱི་ཕན་ཡོན། འབྲས་བུ་འཕེལ་བར་མ་ཟད་རྒྱུ་གོང་ནས་གོང་དུ་འཕེལ་བར་བྱེད་པ་འཇུག་པ་བྱང་ཆུབ་སེམས་ཀྱི་ཕན་ཡོན་སོགས་དྲན་ནས་བརྩོན་འགྲུས་བརྩམ་དགོས། དབྱེ་བ་ལ་གོ་ཆའི་བརྩོན་འགྲུས་ལ་སོགས་པ་སྟེ། དང་པོ་ནི་འཇིག་རྟེན་པ་སུས་ཀྱང་དྲན་མ་མྱོང་བའི་བསམ་པ་རྒྱ་ཆེན་པོ་བསྐྱེད་དགོས་ཏེ། རྒྱལ་བ་སྲས་དང་བཅས་པས་བསྐལ་བ་ཆེན་པོ་གངྒཱའི་ཀླུང་གི་བྱེ་མའི་གྲངས་སྙེད་ཀྱི་བར་དུ་རྫོགས་སྨིན་སྦྱང་བ་རྒྱ་མཚོ་ལྟ་བུར་བསྒྲུབ་པ་རྣམས་གཅིག་ཏུ་བསྡུས་པ་ཙམ་བདག་གིས་དུས་སྐད་ཅིག་མ་རེ་རེ་ལ་བ སྒྲུབ་པར་བྱའོ་སྙམ་པའི་བསམ་པ་གོ་ཆ་ཆེ་བ་དང་། དེ་ཡང་བྱ་བ་ཐམས་ཅད་ལད་མོ་ཡིན་པས་རྒྱལ་བ་སྲས་བཅས་ཀྱི་ཇི་ལྟར་རྫོགས་སྨིན་སྦྱང་བ་མཛད་པ་ལྟར་བདག་གིས་བསྒྲུབ་པར་བྱ་སྙམ་པ། རིག་འཛིན་གོང་མ་རྣམས་ཀྱིས་ཇི་ལྟར་དཀའ་བ་སྤྱད་པ་ལ་སོགས་པའི་རྣམ་ཐར་ཐོས་ན་ངས་དེ་བས་ལྷག་པ་ཞིག་མ་འོང་ན་དེ་བས་ཞན་ཞིག་བྱེད་ཐབས་མི་འདུག་སྙམ་དུ་བསམ་དགོས། དེ་ཡང་སེམས་ཅན་ཐམས་ཅད་སངས་རྒྱས་ཀྱི་གོ་འཕང་མ་ཐོབ་བར་དུ་བདག་གིས་སེམས་ཅན་རེ་རེ་ནས་ཆོས་ཐེག་པ་ཆེན་པོ་བསྟན་བྱང་ཆུབ་ཏུ་སེམས་བསྐྱེད་དུ་འཇུག་པ་དང་། བྱང་ཆུབ་སེམས་དཔའི་བསླབ་པ་ལ་སྦྱོར་བའི་ཐབས་བསྐལ་པའི་བར་དུ་འབད་དགོས་ཀྱང་སྐྱོ་བའི་བསམ་པ་སྐད་ཅིག་ཙམ་ཡང་མི་སྐྱེ་བ་ཡིན། དེ་ནི་སྒྱིད་ལུག་བདག་ཉིད་བརྙས་པའི་ལེ་ལོའི་གཉེན་པོ་ཡིན། དེ་དག་ཐམས་ཅད་སྡོམ་ན་འཕགས་པ་བཟང་པོ་སྤྱོད་པའི་སྨོན་ལམ་གྱི་མདོ་ལས་གསུངས་པའི་རྒྱ་མཚོ་མང་པོ་རྣམས་དང་། སྲིད་པ་ཐམས་ཅད་དུ་ཡང་འཁོར་བ་ན། །ཞེས་པས། རྒྱ་ཆེ་བ་ནམ་མཁའི་མཐའ་དང་མཉམ་པ། རྒྱུན་རིང་བ་ཇི་སྲིད་འཁོར་བ་མ་སྟོང་བར་དུ་བསྒྲུབ་འདོད་ཀྱི་བསམ་པ་དེ་ཡིན། དེ་ལྟར་སྲིད་པ་མ་སྟོང་བར་དུ་བསྒྲུབ་མི་ནུས་སྙམ་ན་སྡུག་བསྔལ་མེད་དེ། ཞི་བ་ལྷས། བསོད་ནམས་ཀྱིས་ནི་ལུས་བདེ་ལ། །ཤེས་རབ་ཀྱིས་ནི་སེམས་བདེ་ན། །གཞན་དོན་འཁོར་བར་གནས་ཀྱང་ནི། །སྙིང་རྗེ་ཅན་དག་ཅི་སྟེ་སྐྱོ། །ཞེས་པས། སྣང་བཅས་བསོད་ནམས་ཀྱི་ཚོགས་ཀྱིས་གནས་སྐབས་སུ་རྒྱལ་རིགས་ཤིང་སཱ་ལ་ལྟ་བུ་དང་། བྲམ་ཟེ་དང་ཁྱིམ་བདག་གི་རིགས་སཱ་ལ་ལྟ་བུ་ལ་སོགས་པའི་མཐོ་རིས་ཀྱི་རིགས་མཐོ་བ་དཔལ་དང་ལོངས་སྤྱོད་དང་ལྡན་པའི་གོ་འཕང་ཐོབ་ནས་ལུས་ལ་སྡུག་བསྔལ་མེད་ཅིང་སྡུག་བསྔལ་བདེ་བར་འགྱུར་བའི་ཏིང་ངེ་འཛིན་ཐོབ་པ་དང་། བདག་མེད་རྟོགས་པའི་ཤེས་རབ་ཀྱིས་སྲིད་པ་གསུམ་པོ་དོན་དམ་སྤྲོས་པ་དང་བྲལ་བ། ཀུན་རྫོབ་སྒྱུ་མ་ལྟ་བུའི་རང་བཞིན་དུ་སྐྱེ་འཆི་བདེ་སྡུག་ཐམས་ཅད་གཟིགས་པས་སེམས་ལ་སྡུག་བསྔལ་རང་མཚན་པ་མེད་པས་གཞན་དོན་དུ་འཁོར་བར་གནས་ཀྱང་སྐྱོ་བའི་འདུ་ཤེས་མི་བསྐྱེད། སྦྱོར་པའི་བརྩོན་འགྲུས་མཐར་ཐུག་སངས་རྒྱས་མ་ཐོབ་ཀྱི་བར་དུ་རྟོགས་བྱ་གོང་མ་གོང་མ་རྟོགས་རྒྱུ་ཡོད། སྤང་བྱ་གོང་མ་གོང་མ་རྣམས་སྤང་རྒྱུ་ཡོད་པས་དེའི་ཕྱིར་ཕ་རོལ་ཏུ་ཕྱིན་པ་དྲུག་ལ་བསླབ་དགོས། དེ་ལྟར་བསམ་པ་དང་སྦྱོར་བ་གཉིས་ཀས་ཉིན་མི་དལ། མཚན་མི་ཉལ་བར་སྒོ་གསུམ་ཆོས་མེད་ཀྱི་ངང་དུ་སྐད་ཅིག་ཀྱང་མི་ལུས་པར་རྟག་པར་དགེ་བ་ལ་སྦྱོར་དགོས། གུས་སྦྱོར་ལ་ཕྱིའི་ཡོངས་འཛིན་བླ་མ་དགེ་བའི་བཤེས་གཉེན་དང་། དེའི་བསྟན་པའི་ཆོས་ཐེག་པ་ཆེན་པོ་དང་། རང་གི་རྒྱུད་ཀྱི་བྱང་ཆུབ་ཀྱི་སེམས་ལ་གུས་པ་དང་སྤྲོ་བ་བསྐྱེད་དགོས། སྦྱོར་བ་ཞེས་པ་མི་འབྲལ་བའི་ཚིག་ཡིན། དེ་ཡང་ཆོས་བཤད་པའི་ཚེ་སྐྱོ་བ་བྱུང་ན། གུས་པའི་དཔུང་དང་། བརྟན་པའི་དཔུང་དང་། དགའ་བའི་དཔུང་དང་། དོར་བའི་དཔུང་བཞི་ལས། དོར་བའི་དཔུང་བསྐྱེད་དགོས། དོར་བ་དེ་ལ་རེ་ཞིག་དོར་བ་དང་། གཏན་དུ་དོར་བ་གཉིས་ལས། རེ་ཞིག་དོར་བ་ཡིན། གཏན་དུ་དོར་བ་རེ་ཞིག་བྱ་བའི་ཆོས་དེ་ཟིན་པ་ཞིག་སྟེ་ཆོས་བཤད་ཟིན་པ་ལྟ་བུ་སྟེ། དེ་ལ་བླ་མ་སློབ་མ་གཉིས་བླ་མས་ཆོས་ཟིན་པ་ལྟ་བུ་ཡིན། སློབ་མས་ནི་མིན་ཏེ་བཤད་པ་བཞིན་ད་གཟོད་བསྒྲུབ་དགོས་པས་སོ། །ཆོག་ཤེས་མེད་པའི་བརྩོན་འགྲུས་ནི། སྦྱིན་སོགས་ལ་ཆོག་ཤེས་སུ་མི་འཛིན་པར་སངས་རྒྱས་ཀྱི་གོ་འཕང་མ་ཐོབ་ཀྱི་བར་ལ་སྤང་བྱ་སྤང་རིམ་དང་། ཡོན་ཏན་སྐྱེ་རིམ་རྣམས་ཡོད་པས་དེའི་བར་ལ་བརྩོན་འགྲུས་རྒྱུན་རིང་ལ་ཤུག ས་དྲག་པ་བསྐྱེད་དགོས། ལྔ་པ་བསམ་གཏན་གྱི་ཕར་ཕྱིན་ལ། བསམ་གཏན་སྒྲུབ་པར་བྱེད་པ་ལ་དང་པོ་བསམ་གཏན་གྱི་རྒྱུ་ཚོགས་དབེན་པ་གཉིས་བསྟེན་དགོས། དེ་གཉིས་གང་ཡིན་ན་ལུས་འདུ་འཛི་ལས་དབེན། སེམས་རྣམ་རྟོག་ལས་དབེན་པ་གཉིས་བསྟེན་དགོས། དང་པོ་ནི་ལུས་ཀྱི་དབེན་པ་ནི། འཇིག་རྟེན་ཚེ་འདིའི་བྱ་བཞག་ཐམས་ཅད་ཆེ་བཞག་ཆུང་བསྐྱུར་བྱས་ནས་ཚེ་འདིའི་བྱ་བ་ཐམས་ཅད་ལིང་གིས་བློས་བཏང་། སེམས་རྣམ་རྟོག་ལས་དབེན་པ་འཇིག་རྟེན་ཚེ་འདི་སྒྲུབ་པའི་བསམ་སྦྱོར་ཐམས་ཅད་སྤང་ནས། བསམ་རྒྱུ་ཆོས་ལས་མེད་པ། དྲན་རྒྱུ་ཆོས་ལས་མེད་པ། བྱེད་རྒྱུ་ཆོས་ལས་མེད་པ། སྒྲུབ་རྒྱུ་ཆོས་ལས་མེད་པ་སྟེ་ཆོས་ཉག་མ་གཅིག་པོ་ལས་བསམ་རྒྱུ་མེད་པ་ཞིག་ཡིན། དེ་གཉིས་ཐེག་པ་ཐུན་མོང་གི་དབེན་པ་ཡིན། ཐུན་མོང་མ་ཡིན་པ་བྱང་ཆུབ་སེམས་དཔའ་རྣམས་རང་འདོད་ཡིད་བྱེད་ཀྱི་བསམ་པ་ལས་དབེན་པ་ཡིན། རང་འདོད་ཡིད་བྱེད་ཀྱི་བསམ་པས་མ་དབེན་ན། སྡུད་པ་ལས། ཇི་ལྟར་དཔག་ཚད་ལྔ་བརྒྱ་ཡོད་པའི་རི་ཡི་སུལ། །སྦྲུལ་གྱི་གང་བར་ལོ་མང་བྱེ་བར་གནས་བྱེད་ན། །དབེན་པ་འདི་མི་ཤེས་པའི་བྱང་ཆུབ་སེམས་དཔའ་ནི། །ལྷག་པའི་ང་རྒྱལ་རྙེད་ནས་འདྲེ་བར་གནས་པ་ཡིན། །ད་ལུས་དབེན་པར་བྱེད་པ་ལ་ལུས་འདུ་འཛི། སེམས་རྣམ་རྟོག་སོགས་ལས། དང་པོ་ལ་འཇིག་རྟེན་སྤང་བ་དང་རྣམ་རྟོག་དོར་བ་གཉིས་ལས། དང་པོ་འཇིག་རྟེན་ལ་གཉིས་ཡོད། ཕྱི་ཡོ་བྱད་ཀྱི་ཆགས་པ་དང་ནང་སེམས་ཅན་གྱི་ཆགས་པ་སྤང་བ་གཉིས་ལས། དང་པོ་ཕྱི་ཡོ་བྱད་ཀྱི་ཉེས་དམིགས་དྲན་དགོས། ཉེས་དམིགས་ཇི་ལྟར་དྲན་ན་བསགས་སྲུང་སྤེལ་གསུམ་མམ་བརླག་གསུམ་གྱི་ཉེས་དམིགས་དྲན་དགོས། དང་པོ་བསགས་ལུགས་ལ་ཆོས་འཇིག་རྟེན་གཉིས་ལས། འཇིག་རྟེན་པའི་ལུགས་ལ། དབྱར་ཇག་པ། དགུན་རྐུན་མ་ལ་སོགས་སྡུག་སྡིག་པ་གཉིས་ལས་བསྒྲུབས། ཆོས་ཀྱི་ལུགས་ལ་དང་པོ་ཀ་ཁ་སློབ་དུས་ནས་ཡི་གེ་ཤེས་ན་རང་གི་ཁ་སོས་འགྲོ་ཟེར་ནས་ཀུན་སློང་ཚེ་འདིར་གཏད་ནས་བླ་མ་དང་གྲྭ་བ་རང་གི་ཚོད་ཀྱིས་ཆོས་དང་དམར་ཟུང་བརྗེས་ནས་འཇིག་རྟེན་བསྒྲུབས་པ་ཡིན། དེ་ནས་སྲུང་བ་ལ་ཉིན་གྱི་མི། མཚན་གྱི་ཁྱི་བྱས་ནས་དགྲ་རྐུན་གཅན་གཟན་ལ་སོགས་པ་ལས་བསྲུང་དགོས། སྤེལ་བ་ནི་གཅིག་བཅུ་ཐོག་ཏུ་ཨེ་འགྲོ་བལྟ་བ་དང་། བཅུ་བརྒྱ་ཐོག་ཏུ་ཨེ་འགྲོ་དང་། བརྒྱ་སྟོང་ཐོག་ཏུ་ཨེ་འགྲོ་བལྟ་དགོས་པའི་སྡུག་བསྔལ་སོགས་དྲན་དགོས། ནང་སེམས་ཅན་ལ་ཆགས་པ་སྤང་བའི་ཐབས་ལ་རྒྱས་པར་བྱེད་ན་བློ་ལྡོག་རྣམ་པ་བཞི། བསྡུ་ན་མི་རྟག་མཐའ་བཞི་བསྒོམ་དགོས། དང་པོ་རང་ཉིད་ལ་བསམ་ན་རང་ཉིད་དང་པོ་སྐྱེ་བའི་དུས་སུ་ཡང་གཅིག་པུར་སྐྱེས། རྒྱུ་རྫས་ལོངས་སྤྱོད་ཐམས་ཅད་སྔོན་ལ་དེད་འོངས་བ་ཅི་ཡང་མེད། ཚེ་ཕྱི་མ་ལ་གཉེན་དང་མཛའ་བཤེས་སོགས་ཐམས་ཅད་ཤུལ་དུ་བཞག་ནས་རྗེས་སུ་འབྲང་བ་གཅིག་ཀྱང་མེད་པས། དང་པོ་སྐྱེ་དུས་དང་མཐར་འཆི་དུས་གཉིས་སུ་གཅིག་པུར་འགྲོ་དགོས་ན་ད་ལྟ་གཅིག་པུར་དབེན་པའི་གནས་སུ་འདུག་དགོས། དེ་ལྟར་ཕྱི་ཡོ་བྱད་ནང་སེམས་ཅན་གྱི་ཆགས་པ་སྤངས་ནས་རི་ཁྲོད་དབེན་པ་བསྟེན་དགོས། དབེན་པ་བསྟེན་དུས་ཡོ་བྱད་མཐའ་གཉིས་ལ་མ་ལྷུང་བར་བྱེད་དགོས་ཤིང་། གནས་ངན་ངོན་རི་ཕུག་ལ་སོགས་པ། ཟས་གོས་ངན་ངོན་སློང་མོ་དང་རྙེད་སླ་བ་ཕྱག་དར་ཁྲོད་ཀྱི་གོས་རྣམས་འཆང་ཞིང་འདོད་པ་བསོད་སྙོམས་ཀྱི་མཐའ་ལ་མ་ལྷུང་བར་བྱེད་དགོས། ཡང་ཧ་ཅང་ངལ་ཞིང་དུབ་པའི་མཐའ་ལུས་སྲོག་གི་བར་ཆད་དུ་འབྱུང་བའི་དཀའ་སྤྱད་དྲག་པོ་སྤངས་ཏེ་མཐའ་གཉིས་ལ་མི་ལྷུང་བ་ཞིག་དགོས། དེ་ནས་རི་ཁྲོད་དུ་སོང་ནས་རྣམ་རྟོག་དོར་དགོས། དེ་ལ་སྤྱིར་རྣམ་པར་རྟོག་པའི་གཡེང་བ་ཐམས་ཅད་སྤང་དགོས། ཁྱད་པར་འདོད་ཁམས་པའི་འདོད་པའི་ཡོན་ཏན་ལྔ་པོ་འདི་ལ་ཆགས་ཤིང་ཞེན་ནས་འདོད་པ་ཡིན་ལ། དེ་དག་གི་ནང་ནས་སེམས་མི་གནས་པར་གཡེང་བར་བྱེད་པ། ཡུལ་བུད་མེད་ཀྱི་བདེ་བ་ལ་ཆགས་པ་འདི་ཡིན་པས་འདི་གཙོ་བོར་སྤོང་དགོས། དེའི་ཉེས་དམིགས་རྣམས་བསམ་དགོས་བུད་མེད་ཅེས་པ་དེའི་དབང་དུ་ཤོར་ན་དེ་ལས་འབུད་མི་ཤེས་པས་བུད་མེད་དམ། འབྲས་ས་ལུའི་ཞིང་ལ་ལྕགས་སྲེག་གི་སེར་བ་བབ་པ་བཞིན་དགེ་བ་བྱང་ཆུབ་ཀྱི་ཕྱོགས་ཀྱི་ཆོས་ནག་པོར་འཇོམ་པར་བྱེད་པས་ནག་མོ་ཞེས་བརྗོད་པ་ཡིན། དེ་ལྟ་བུའི་བུད་མེད་དམ་ནག་མོ་དེ་ལ་ཞེན་པ་ལྡོག་པར་བྱེད་པ་ལ། རྒྱུ་བ སྒྲུབ་པར་དཀའ་བ་ངོ་བོ་མི་གཙང་བ། འབྲས་བུ་གནོད་པ་མང་བ་དང་གསུམ་ལས། དང་པོ་ནི་རང་བཞིན་གྱིས་རིན་མ་བྱིན་པར་བུད་མེད་དེ་མི་ལོན་པས་རྒྱུ་ཅུང་ཟད་ཡོད་པ་ཞིག་ཡིན་ན་རྟ་མཛོ་མང་པོ་མ་བྱིན་ན་བུད་མེད་དེ་མི་ལོན། བནྡེ་ཞིག་ཡིན་ཡང་ཌཱ་དྲིལ་གཟན་ཤམ་ལ་སོགས་པ་བུད་མེད་དེའི་ཕྱོགས་སུ་གཏོང་དགོས། དེ་ལྟར་སྡིག་སྡུག་བསྔལ་གཉིས་ཀྱིས་བསྒྲུབས་པའི་བུད་མེད་དེ་ངོ་བོ་མི་གཙང་བའི་རང་བཞིན་རྫས་སུམ་ཅུ་སོ་དྲུག་གི་རང་བཞིན་ཅན། ད་ལྟ་བུད་མེད་དེའི་ཡུལ་ལ་མིག་ཤོར་འདུག་སྟེ་ལེགས་པར་བརྟགས་ན། ཁ་དོག་དཀར་པའི་རྒྱུ་ཆུ་སེར་དམར་བའི་རྒྱུ་ཁྲག་ཡིན་པས་དོན་ལ་ཁྲག་དང་ཆུ་སེར་མི་གཙང་བའི་རྐྱལ་བ་ཡིན། དེ་ཇི་ལྟར་ཡིན་ན་ཆགས་ཡུལ་བུད་མེད་དེ་ཤེས་རབ་རལ་གྲིས་མགོ་མཇུག་མེད་པར་བཤས་ན་དྲི་མི་ཞིམ་པ། རྒྱུ་མི་གཙང་བ། རྣམ་པ་མགོ་བོ་ན་ཀླད་པ། སྣ་གཉིས་ནས་སྣབས། མིག་ནས་མིག་ཆུ་ལ་སོགས་པ་མི་གཙང་བ་ཡིན། འོན་ཀྱང་དེ་ལ་ཆགས་པའི་རྒྱུ་ཚུལ་མིན་ཡིད་བྱེད་ཀྱི་རྒྱུ་ལས། བུད་མེད་དེའི་དབྱིབས། ཁ་དོག རེག་བྱ་གསུམ་ལ་ཆགས་པ་ཡིན། དབྱིབས་ལ་ཆགས་པའི་གཉེན་པོ་བུད་མེད་ཀྱི་ལུས་དེ་གཅན་གཟན་གྱི་ཟོས་འཕྲོ་དུམ་བུའི་རྣམ་པར་བསྒོམ། ཁ་དོག་གི་གཉེན་པོ་རྣམ་པར་དམར་བ། རྣམ་པར་བམ་པ། རྣམ་པར་སྔོ་བ། རྣམ་པར་འབུས་གཞིགས་པ་དང་། གཞན་ཡང་མེས་མགོ་དང་ཡན་ལག་ཐམས་ཅད་ཚིག་པའི་རྣམ་པར་བསྒོམ། རེག་བྱ་ལ་ཆགས་པའི་གཉེན་པོ། མཛོད་ལས། ཀེང་རུས་ཆགས་བཅས་ཐམས་ཅད་ལ། །རུས་པ་རྒྱ་མཚོའི་བར་དག་ཏུ། ། སྤྲོ་ཞིང་སྡུད་པ་ལས་དང་པོ། །རྐང་རུས་ནས་ནི་ཐོད་ཕྱེད་བར། །བཏང་བས་སྦྱང་པ་བྱས་པར་བཤད། །སྨིན་མའི་བར་དུ་སེམས་འཛིན་པས། །ཡིད་ལ་བྱེད་པ་རྫོགས་པ་ཡིན། །ཞེས་པ་བཞིན་དང་། རང་ཉིད་དམ་ཆགས་ཡུལ་བུད་མེད་ཀྱི་ལུས་ཀེང་རུས་ཀྱི་རྣམ་པ་ལྷུ་ཚིགས་ཀྱི་མཚམས་སྦྲེལ་བའི་རྒྱུས་པ་ཕྲ་མོ་མ་གཏོགས་ཤ་དང་པགས་པའི་རྣམ་པ་མེད་པར་བསམ་པའམ། ཡང་ན་དང་པོ་ཆགས་ཡུལ་བུད་མེད་ཀྱི་སྨིན་མཚམས་སུ་རྨ་མཐེ་བོང་གི་རྗེས་མངོན་པ་ལྟ་བུ་དཀྱིལ་རུས་པ་སྐྱ་སེང་བ་མཐའ་སྐོར་ཐམས་ཅད་རྣག་དང་ཆུ་སེར་གྱིས་བསྐོར་བ་ཞིག་བསམ་ནས་དེ་ནས་རིམ་གྱིས་ཕྱི་སྣོད་དང་ནང་བཅུད་ཀྱི་སེམས་ཅན་ཐམས་ཅད་ཀྱང་སྔ་མའི་རྨ་དེས་རིམ་གྱིས་ཟིན་ནས་མཐར་རྒྱ་མཚོ་ཆེན་པོ་ལ་མ་ཐུག་གི་བར་དུ་ཀེང་རུས་ཀྱི་རྣམ་པར་སོང་། ཡང་རིམ་གྱིས་མཐའི་རྒྱ་མཚོ་ནས་ཕྱི་སྣོད་ནང་བཅུད་ཐམས་ཅད་རིམ་གྱིས་སྔ་མ་བཞིན་སོས་ནས་སྔ་མའི་བུད་མེད་ཀྱི་ལུས་ཀྱི་ཕྱེད་དམ་ཡང་ན་ཐོད་ཕྱེད་ཀྱི་བར་ཤ་དང་རུས་པར་སོས་ནས་ལུས་ཕྱེད་ནས་ལུས་ཕྱེད་ཀྱི་ཀེང་རུས་དཀར་སེང་ངེ་བ་ལ་སེམས་འཛིན། ཡང་རང་གི་ལུས་སྔ་མ་དེ་བཞིན་བསྒོམ་པ་ནི་ཐེག་པ་དམན་པའི་ལུགས་ཀྱི་འདོད་ཆགས་ཀྱི་གཉེན་པོ་ཡིན། བྱང་ཆུབ་སེམས་དཔའི་ལུགས་ལ་རང་ལས་ཆེ་བ་ཐམས་ཅད་ལ་མའི་འདུ་ཤེས། རང་དང་མཉམ་པ་ཐམས་ཅད་ལ་སྲིང་མོའི་འདུ་ཤེས། རང་ལས་ཆུང་བ་ཐམས་ཅད་ལ་བུ་མོའི་འདུ་ཤེས་བསྐྱེད། དེ་དག་བསྡུ་ན་ཐམས་ཅད་ལ་མའི་འདུ་ཤེས་བསྒོམ། དེ་ནི་བྱང་སེམས་ལས་དང་པོ་པའི་བསྒོམ་བྱ་ཡིན། རྡོ་རྗེ་ཐེག་པའི་ལུགས་ལ་བུད་མེད་ཐམས་ཅད་ལྷ་དང་ལྷ་མོའི་རང་བཞིན་དུ་གསལ་བས་སྐུ་དང་ཡེ་ཤེས་ཀྱི་རོལ་པ་ལ་ཆགས་པའི་ཐབས་མེད། དེ་ལྟར་མ་བསྒོམ་ན། བུད་མེད་ཕུང་བར་བྱེད་པ་སྟེ། །འདི་ཕུང་ཚེ་རབས་ཀུན་ཏུ་ཕུང་། །ཞེས་སོ། །དེ་ལྟར་གོམས་པས་སེམས་འདོད་ཆགས་ལས་དབེན་ནས་རི་ཁྲོད་བརྟེན་དགོས། དེ་ལྟར་རི་ཁྲོད་དུ་གཅིག་པུར་འདུག་མི་ཚུགས་པ་ཡིན་པས། དེ་ལ་དབེན་པའི་ཡོན་ཏན་རྣམས་དྲན་དགོས། དབེན་པ་དེ་ལ་སླེབས་མ་ཐག་ཏུ་ཡུལ་བུད་མེད་སོགས་མེད་པས་ཡུལ་དེའི་རྐྱེན་ལས་བྱུང་བའི་ཉོན་མོངས་པ་ཐམས་ཅད་ངང་གིས་ཞི་བ། བྱ་དང་རི་དྭགས་འགྲོགས་ན་སོགས། སྔོན་གྱི་སངས་རྒྱས་དང་བྱང་ཆུབ་སེམས་དཔའ་རིག་པ་འཛིན་པའི་ཚོགས་ཐམས་ཅད་རི་ཁྲོད་ལ་བརྟེན་པས་འབྲས་བུ་འགྲུབ་པ་ཤ་སྟག་ཡིན། ཐུན་མོང་མ་ཡིན་པ་རང་འདོད་ཀྱི་བསམ་པས་དབེན་དགོས། དེ་དབེན་པ་བརྟེན་ནས་བསམ་གཏན་སྒོམ་པར་བྱེད་པ་ལ། སེམས་འགྱོད་པ་མེད་པའི་ཚུལ་ཁྲིམས་རྣམ་པར་དག་པ་བསྲུང་དགོས། ཚུལ་ཁྲིམས་ལྡན་པའི་མགོ་ལ་དེར་འདུག་སྟེ། །ཞེས་པ་བཞིན་ནོ། །དེ་ནས་སེམས་མི་གཡེང་བའི་རྒྱུ་བསམ་གཏན་བསྒོམ་དགོས་ཏེ། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རབ་ཏུ་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ་ཅེས་པས། ཚུལ་ཁྲིམས་དང་པོ་བླངས་ནས་ཉམས་པ་མ་བྱུང་ན་བདུད་ཀྱི་རྒྱལ་མཚན་བསྙིལ། བསྟན་པའི་རྒྱལ་མཚན་སྒྲེང་པ་པོ་ཡིན་ལ། གལ་ཏེ་ཉམས་པ་བྱུང་ན་ཅི་མི་སྙམ་དུ་མི་བཞག་པར་སྔར་བྱས་ཀྱི་ལས་ལ་འགྱོད་པ་བསྐྱེད་ནས་ཆོས་བཞིན་དུ་བཤགས་པ་དང་ཕྱིར་བཅོས་བྱེད་ན་བདུད་ཀྱི་རྒྱལ་མཚན་བསྙིལ། བསྟན་པའི་རྒྱལ་མཚན་སྒྲེང་པ་པོ་ཡིན་པས། དེའི་སྟེང་དུ་བསྐྱེད་རྫོགས་གཉིས་སྒོམ་པར་བྱེད་པ་ལ་དམ་ཚིག་ས་གཞི་ལྟ་བུའི་སྡོམ་པ་གསུམ་གྱི་གནང་བཀག་གི་གནས་ལ་བླང་དོར་བྱེད་པའི་སྡོམ་གསུམ་རྣམ་པར་དག་པ་ཞིག་གིས་བསམ་གཏན་བསྒོམ་དགོས། བསམ་གཏན་གྱི་ངོ་བོ་མི་གཡེང་བ་ཡིན། འགྲོ་འདུག་ཟ་ཉལ་ཐམས་ཅད་ལ་སེམས་དེ་དྲན་པའི་ཐག་པས་བཏགས་ནས་བསྒོམ་དགོས། ཆོས་ལ་སེམས་པའི་ཀ་ཆེན་ལ། ། ཇི་ལྟར་བཏགས་བཞིན་མི་འཆོར་བ། །ཞེས་པས། དམིགས་པའི་ཡུལ་ཆོས་དེ་ཕུར་པའམ། ཀ་བ་ལྟ་བུ་ལ་བླང་དོར་གྱི་གནས་མི་བརྗེད་པའི་དྲན་པ་ཐག་པ་ལྟ་བུ་དེས་གཞན་དུ་མི་གཡེང་བར་བཏགས་དགོས། དེ་ནས་ཤེས་བཞིན་བྱ་ར་བ་ལྟ་བུའི་སེམས་དེ་གནས་སམ་མི་གནས་བརྟག དེས་འཇུག་ལྡོག་གི་གནས་ལ་གཟོབ་པ་བག་ཡོད་བག་མ་ལྟ་བུའི་སེམས་དེ་གཡེང་བར་གྱུར་ན་སྔ་མའི་ཡུལ་ལ་སེམས་བླན་ཏེ་འཇོག་དགོས། ལས་དང་པོ་པས་སེམས་དེ་ཕྱི་རོལ་གྱི་ཡུལ་དུ་གཡེང་དུ་མི་འཇུག་པར་བྱམས་པ་དང་བྱམས་པའི་ཏིང་ངེ་འཛིན་རྣམས་ལ་དཔྱད་འཇོག་སྤེལ་མར་བྱས་ཏེ་དྲན་པའི་ཐག་པས་བཏགས། ཤེས་བཞིན་གྱིས་སོ་དང་བྱ་ར་བྱེད་དགོས། དང་པོ་བསམ་གཏན་གྱི་འབོལ་ཆུང་ཕྱོགས་ཕྱོགས་སུ་ཁྲུ་དོ་རེ་ཡོད་པ་ཕྱི་མཐོ་བ་སྔོན་ཅུང་ཟད་དམའ་བའམ། ཡང་ན་མལ་ས་དེ་བཞིན་དུ་བཅོས། དེའི་སྟེང་དུ་ལུས་རྣམ་སྣང་ཆོས་བདུན་ཞི་གནས་བསྒོམ་དུས་ལུས་ལ་ལྷོད་ཆགས་པ། སེམས་ལ་ཟུག་རྔུ་མེད་པ་ཞིག་དགོས། ཞི་གནས་དེ་ལ་དམིགས་བཅས་ཀྱི་ཞི་གནས་དང་། དམིགས་མེད་ཀྱི་ཞི་གནས་གཉིས་ལས། དང་པོ་དམིགས་བཅས་ནི་བྱམས་པ་དང་བྱམས་པའི་ཏིང་ངེ་འཛིན་ལྟ་བུའི་སེམས་དགེ་བའི་དམིགས་རྣམ་ལ་བཟུང་ནས་དྲན་ཤེས་བག་ཡོད་རྣམས་བརྟེན་དགོས། ནང་གི་སེམས་མི་གཡེང་བའི་རྒྱུ། སྔོན་སོང་གི་རྗེས་མི་གཅོད། མ་འོངས་པའི་མདུན་མི་བསུ། ད་ལྟ་ཚོགས་དྲུག་གི་ཡུལ་དུ་གཡེང་མི་འཇུག རང་གི་སེམས་ལ་གྲིམ་ལྷོད་གང་དགའ་གང་ཟག་རང་རང་གི་ཁམས་དང་བསྟུན་ནས། གྲིམ་ལྷོད་གང་དགའ་ཞིག་གི་སྟེང་དུ་བཅའ་བཅོས་མི་བྱེད་པར་འཇོག་པ་ཡིན། དམིགས་མེད་ནི་བྱམས་སོགས་ག ཅིག་གི་སྟེང་དུ་ཅེར་ཟིན་མི་བྱ་བར། སེམས་བཅའ་བཅོས་མེད་པར་ཅོག་གེ་ལྷུག་པར་སེམས་གློད་ལ་བཞག སྐབས་སྐབས་སུ་དྲན་པ་དང་ཤེས་བཞིན་བག་ཡོད་རྣམས་ཀྱིས་ཟིན་པར་བྱ། དེ་ལྟར་སེམས་ཇེ་གནས་ཇེ་གནས་ལ་འོངས་དུས། གཟོད་བསམ་གཏན་གྱི་དབྱེ་བ་བྱེད་དགོས། བྱམས་སོགས་ཀྱི་ཏིང་ངེ་འཛིན་བསྒོམ་པ་བྱིས་པ་ཉེར་སྤྱོད་ཀྱི་བསམ་གཏན་ཞེས་བརྗོད་དེ། བསྒོམ་པའི་ཉམས་ཇེ་ཆགས་ལ་ཡོངས་ཏེ། དགའ་བའི་དོན་ཅི་ཡང་མེད་ཀྱང་སེམས་དགའ་ཡལ་ལེ་འོང་བ་བདེ་ཉམས། སེམས་རྣམ་རྟོག་རྙོགས་མ་དྭངས་ནས་ཁང་པའི་ཕྱི་ནང་མཐོང་བ་སོགས་གསལ་ཉམས། སེམས་ལ་རྣམ་རྟོག་ཨེ་སྐྱེས་བལྟས་ན་སྐྱེ་རྒྱུ་མི་འདུག་སྙམ་པ་ལྟ་བུ་མི་རྟོག་པའི་ཉམས། དེ་དག་ནི་ཞི་གནས་རྐྱང་པ་ཡིན་པས་བདེ་གསལ་མི་རྟོག་པའི་ཉམས་ཞེན་དང་བཅས་པས་བྱིས་པ་ཉེར་སྤྱོད་ཀྱི་བསམ་གཏན་ཡིན་ཏེ་བདེ་བ་སོགས་ལ་ཞེན་པ་དེས་ནི་ཐར་པའི་གོ་འཕང་ཐོབ་པའི་རྒྱུར་མི་འགྱུར་ཏེ༑ ངའི་བདེ་བ་དང་གསལ་བ་དང་མི་རྟོག་པ་ཞེས་གང་ཟག་གི་བདག་དང་། བདེ་བ་སོགས་ལ་ཞེན་པ་ཆོས་ཀྱི་བདག་འཛིན་སེམས་ལ་ལུས་འདུག་པས་ཐར་བའི་རྒྱུ་བདག་མེད་རྟོག་པ་དང་འགལ་བ་ཡིན་ནོ། །དེ་ལྟར་གོམས་པས་བསམ་གཏན་ཡན་ལག་གཟུགས་མེད་རྣམ་པས་ཕྱེས་ཏེ་བསྒོམ་པས་སྤྱན་དང་མངོན་ཤེས་རྫུ་འཕྲུལ་ལ་སོགས་པ་ཐོབ་པ་བསམ་གཏན་གྱི་ཡོན་ཏན་ཡིན། དེ་ནས་དོན་རབ་འབྱེད་པ་དེའི་སྟེང་དུ་གང་ཟག་གི་བདག་དང་ཆོས་ཀྱི་བདག་རིགས་པས་དཔྱད་དེ་སྟོང་པ་ཞི་གནས་ཆུ་དང་འོ་མ་འདྲེས་པ་བཞིན་ཟུང་འཇུག་ཏུ་གོམས་པ་ཡིན། དེ་ཡང་བློའི་འཛིན་སྟངས་ནི་ཁ་སྤོར་འགྲོ་བས་སྔ་མའི་བདེ་སོགས་ཀྱི་ཞེན་པ་མི་འོངས་ཀྱང་། སྟོང་འཛིན་གཉེན་པོའི་བློ་འདོར་དུ་མི་བཏུབ་པས། སྔ་མ་ནི་ཚོགས་ལམ་དང་། འདི་ནི་སྦྱོར་ལམ་གྱི་སྐབས་ཀྱི་བསྒོམ་པ་གཙོ་ཆེ། དེ་བཞིན་གཤེགས་དགེའི་བསམ་གཏན་ནི༑ དེ་བཞིན་གཤེགས་པའི་བསམ་གཏན་དང་ཆ་འདྲ་བ་ཡིན་ཏེ། དེ་ནི་མཐོང་ལམ་པའི་དུས་སུ། ཞི་ལྷག་རོ་གཅིག་ཏུ་གྱུར་ནས་དངོས་འཛིན་དང་། སྟོང་འཛིན་གཉིས་དང་བྲལ་ནས་དངོས་པོའི་ཡིན་ལུགས་ཇི་ལྟ་བའི་གཤིས་སུ་ཕེབས་ཏེ་སྤྲོས་པའི་ཁས་ལེན་ཐམས་ཅད་དང་བྲལ་བ་ཡིན་ནོ། །ཤེས་རབ་ཀྱི་ངོ་བོ་ཆོས་རབ་ཏུ་འབྱེད་པ་ཡིན། ཆོས་ཞེས་པ་མང་ཚིག་ཡིན་པས། གང་ཡིན་ན་ཤེས་བྱའི་ཆོས་འཁོར་འདས་ལམ་གསུམ་གྱིས་བསྡུས་པ་ཐམས་ཅད་པོ་རྣམས་ཡིན་ལ། དེ་དག་གཏན་ལ་འབེབས་པ་ལ༑ འཕགས་པ་ཀླུས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་འདུ། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པ་འོ། །ཞེས་པས། དབྱེ་གཞི་ཤེས་བྱ་ཙམ་ལྡོག་ལ། དབྱེ་ངོ་བདེན་པ་གཉིས་སུ་དབྱེ་བ་ཡིན། དང་པོ་ཀུན་རྫོབ་ཅེས་པ་དང་། ཀུན་གཤོབ་ཅེས་པ་དང་། ཀུན་རྫུན་ཞེས་པ་རྣམས་དོན་གཅིག་མིང་གི་རྣམ་གྲངས་ཡིན་ལ། དེ་སུའི་ངོར་བདེན་ན་བྱིས་པ་སོ་སོའི་སྐྱེ་བོའི་བློ་འཁྲུལ་པའི་ངོར་བདེན་པ་ལྟར་སྣང་བ་ཡིན་པས་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་ཞེས་པ་རྣམས་ཡིན། དེའི་མཚན་ཉིད་ནི། ཨ་བུའི་ཞལ་ནས། བློ་འཁྲུལ་བ་ཡུལ་དང་བཅས་པ་ཀུན་རྫོབ་བདེན་པའི་མཚན་ཉིད་ཅེས་གསུངས་པ་ལྟར་རམ། བླ་མ་མི་ཕམ་ལྟར་ན། ཤེས་བརྗོད་འཇུག་གསུམ་གྱི་ཡུལ་དུ་གྱུར་པ་ཀུན་རྫོབ་བདེན་པའི་མཚན་ཉིད། ཅེས་བློ་ཡི་ཡུལ་དུ་ཤེས་པར་བྱར་རུང་། ངག་གིས་བརྗོད་དུ་རུང་བ། ལུས་ཀྱིས་ལས་སུ་འཇུག་རྒྱུ་ཡོད་པ་རྣམས་རང་ལུགས་ཀྱི་ཀུན་རྫོབ་བདེན་པའི་མཚན་ཉིད་ཡིན། གསར་མའི་བཞེད་པ་ལྟར་ན། ཐ་སྙད་དཔྱོད་བྱེད་ཀྱི་ཚད་མས་དཔྱད་པའི་རྙེད་ནོར་གང་ཞིག་ཀུན་རྫོབ་བདེན་པའི་མཚན་ཉིད་ཅེས་བཞེད། དོན་དམ་པའི་བདེན་པ་ནི། དོན་དམ་པ། ཆོས་ཀྱི་དབྱིངས། དེ་ཁོ་ན་ཉིད། དངོས་པོའི་གནས་ལུགས་སམ་ཡིན་ལུགས། ཡང་དག་པའི་མཐའ། སྟོང་པ་ཉིད། དེ་བཞིན་ཉིད་ལ་སོགས་པ་དོན་གཅིག་མིང་གི་རྣམ་གྲངས་ཡིན་ལ། སུའི་ངོར་བདེན་ན་འཕགས་པ་རྣམས་ཀྱི་སོ་སོ་རང་རིག་པའི་ཡེ་ཤེས་ཀྱི་ཡུལ་དུ་བདེན་པའམ་མི་བསླུ་བས་དོན་དམ་པའི་བདེན་པ་ཞེས། དེའི་མཚན་ཉིད་ནི། ཨ་བུས། བློ་འདས་སྨྲ་བསམ་བརྗོད་མེད་དོན་དམ་བདེན་པའི་མཚན་ཉིད་ཅེས་དང་། བླ་མ་མི་ཕམ་ལྟར་ན། ཤེས་བརྗོད་འཇུག་གསུམ་གྱི་ཡུལ་ལས་འདས་པ་དོན་དམ་བདེན་པའི་མཚན་ཉིད་ཅེས། བློ་རྣམ་པར་རྟོག་པས་ཤེས་སུ་མི་རུང་བ་དང་། དེས་ན་ངག་གིས་བརྗོད་དུ་མེད་པ། ལུས་ཀྱིས་འཇུག་ཏུ་མི་རུང་པའི་ཕྱིར་ན་དོན་དམ་པའི་བདེན་པ་ཞེས་བཞག འོ་ན་སུས་ཤེས་ན། འཕགས་པ་རྣམས་ཀྱི་སོ་སོར་རང་རིག་པའི་ཡེ་ཤེས་ཀྱི་ཡུལ་དང་ཡུལ་ཅན་གཉིས་སུ་མེད་པའི་ཚུལ་གྱིས་གཟིགས་པ་ཡིན་ཏེ། དཔལ་ལྡན་ཟླ་བས། མ་མཐོང་བའི་མཐོང་བ་ཆེན་པོ། མ་གཟིག་པའི་གཟིགས་པ་ཆེན་པོ་ཞེས། འཇུག་པ་ལས། གང་ཚེ་སྐྱེ་མེད་དེ་ཉིད་ཡིན་ན་བློ་ཡང་སྐྱེ་བ་དང་བྲལ་བ། ། ཞེས་པས། ཡུལ་སྐྱེ་མེད་ཀྱི་རྣམ་པར་བློ་སྐྱེ་མེད་དུ་ཤར་བའམ། ཡུལ་སྤྲོས་བྲལ་གྱི་རྣམ་པ་ལ་བློ་སྤྲོས་བྲལ་དུ་ཤར་བ་ལ། ཡུལ་ཆོས་ཉིད་མཐོང་ཞེས་ཡུལ་ཡུལ་ཅན་གྱི་རྣམ་པ་ལྟར་མཐོང་སྒྲུབ་ཕྱོགས་ནས་བསྟན་པ་དང་། ཡུལ་དང་ཡུལ་ཅན་ཐ་དད་དུ་མཐོང་བ་མེད་ཅེས་དགག་ཕྱོགས་ནས་བསྟན་ཀྱང་། དོན་ལ་སྤྲོས་པའི་མཚན་མ་ཅིར་ཡང་མ་མཐོང་བའི་ཚུལ་གྱིས་མཐོང་བ་ཡིན། གསར་མ་ལྟར་ན། དོན་དམ་དཔྱོད་བྱེད་ཀྱི་ཚད་མས་དཔྱད་པའི་རྙེད་ནོར་གང་ཞིག་དོན་དམ་བདེན་པའི་མཚན་ཉིད་ཅེས་ཐ་སྙད་གཉིས་ཀྱི་ཚད་མའི་ཡུལ་ལས་འདས་པ་ཞིག་ཡིན་ནས་བཟུང་ཤེས་བྱ་མ་ཡིན་པས་བསམ་མིན་བྱེད་པོ་ལྟ་བུ་ཡིན་པས་དེ་ནི་ཧ་ཤང་གི་ལྟ་བ་ཡིན་ཞེས་འདོད། དེ་ལྟ་བུའི་བདེན་པ་གཉིས་པོ་དེ་ཡུལ་གང་ལས་ཐོས་པར་བྱ་ན་བླ་མ་དགེ་བའི་བཤེས་གཉེན་མཚན་ཉིད་དང་ལྡན་པ་ལས་ཐོས་དགོས། གང་གིས་ཐོས་པ་བྱེད་ན། སློབ་མ་མཚན་ཉིད་དང་ལྡན་པས་ཐོས་དགོས། གང་ཐོས་པར་བྱ་ན་བདེན་པ་གཉིས་ཀྱི་རྣམ་པར་བཞག་པ་ཐམས་ཅད་ཐོས་པར་བྱ་དགོས་ལ། དེ་ལ་རྟ་རྒྱུག་པ་ལ་དཀྱུས་ས་གཅིག་ཏུ་བསྟན་ཀྱང་རྟ་མགྱོགས་བུལ་གྱི་དབང་གིས་སྣ་ཚོགས་པ་བཞིན། ཡུལ་བདེན་པ་གཉིས་གཏན་ལ་དབབ་པ་ལ་ཐམས་ཅད་གཅིག་ཀྱང་། གང་ཟག་བློའི་རྩལ་འཕང་གི་གོ་རིམ་གྱིས་བདེན་པ་གཉིས་ཀྱི་དེ་ཁོ་ན་ཉིད་ཇི་ལྟ་བ་བཞིན་རྟོགས་མ་རྟོགས་ཀྱི་དབྱེ་བ་ལ། དང་པོ་ཉན་ཐོས་པ་རྣམས་ཀྱི་བདེན་པ་གཉིས་ནི། དང་པོ་ཀུན་རྫོབ་བདེན་པ་ནི་རགས་པ་ཕུང་པོ་ལྔ་ལ་སོགས་པའི་ཆོས་ཐམས་ཅད་ཀུན་རྫོབ་ཀྱི་བདེན་པ་ཡིན། དོན་དམ་པའི་བདེན་པ་ནི་གང་ཟག་གི་བདག་ཕུང་པོ་ལྔ་དང་གཅིག་ཐ་དད་དུ་བརྟགས་པས་མ་རྙེད་པ་དང་། ཆོས་ཀྱི་བདག་རགས་པ་ཆས་དབྱེས། ཕྲ་བ་རྡུལ་ཕྲན་དང་ཤེས་པ་སྐད་ཅིག་ཆ་མེད་པའི་རང་བཞིན་དུ་རྟོགས་པ་དེ་ཡིན། མདོ་སྡེ་པས། སྣང་ལ་དོན་བྱེད་ནུས་པ་དོན་དམ་བདེན་པ་ཞེས་ཡུལ་རང་མཚན་དོན་བྱེད་ནུས་པའི་དངོས་པོ་རྣམས་ཡིན། དོན་བྱེད་མི་ནུས་པ་སྤྱི་མཚན་རྣམས་ཀུན་རྫོབ་བདེན་པར་བཞེད། སེམས་ཙམ་པས། ཀུན་བརྟགས་གཞན་དབང་ཡོངས་གྲུབ་གསུམ་དུ་ཆོས་ཐམས་ཅད་བསྡུས་ཏེ་ཀུན་བརྟགས་གཞན་དབང་གཉིས་ཀུན་རྫོབ་བདེན་པ་དང་། ཡོངས་གྲུབ་དོན་དམ་བདེན་པར་བཞེད་པ་ཡིན། དང་པོ་ཀུན་བརྟགས་ལ་དབྱེ་ན། མཚན་ཉིད་ཆད་པའི་ཀུན་བརྟགས་དང་། རྣམ་གྲངས་པའི་ཀུན་བརྟགས་གཉིས། དང་པོ་ནི། རི་བོང་གི་རྭ་དང་། མོ་གཤམ་གྱི་བུ། ནམ་མཁའི་མེ་ཏོག་ལ་སོགས་པ་རྣམས་ཡིན། གཉིས་པ་ནི། ཀ་བ་དང་བུམ་པ་ལ་སོགས་པ་ཡིན། གཞན་དབང་ལ་དག་པ་གཞན་དབང་དང་། མ་དག་གཞན་དབང་གཉིས་ཡིན། མ་དག་གཞན་དབང་ནི། ལོག་རྟོག་འཁྲུལ་པའི་སྣང་བ་འདི་སེམས་ཅན་ལ་སྣང་བའི་སྣོད་བཅུད་དུ་སྣང་བ་ཡིན། དག་པ་གཞན་དབང་ནི་འཕགས་པ་རྣམས་ཀྱི་རྗེས་ཐོབ་ཀྱི་ཀུན་རྫོབ་ཙམ་ཞེས་འདོད་པའི་སྒྱུ་མ་དང་རྨི་ལམ་གྱི་སྣང་བ་དེ་ཡིན། གཞན་དབང་སེམས་དང་སེམས་ལས་བྱུང་བ་རྣམས་ཡིན་ཅིང་དེ་དག་རྒྱུ་རྐྱེན་རྟེན་འབྲེལ་གྱི་དབང་གིས་བྱུང་བ་ཡིན་ལ། གཞན་དབང་གི་ངོ་བོ་ཤེས་པ་རང་རིག་རང་གསལ་ནི་ཆོས་ཅན་ཡོངས་གྲུབ་དོན་དམ་པའི་བདེན་པ་ཡིན། ཡོངས་གྲུབ་ནི་གཞན་དབང་གི་ངོ་བོ་ཤེས་པ་རང་རིག་རང་གསལ་བ་ཀུན་བརྟགས་གཟུང་འཛིན་གཉིས་དང་བྲལ་བ་རྣམ་ཐར་སྒོ་གསུམ་གྱི་རང་བཞིན་ཅན་དེ་ཡུལ་ཅན་སོ་སོ་རང་རིག་པའི་ཡེ་ཤེས་སུ་འདོད། ཀུན་བརྟགས་གཟུང་འཛིན་གཉིས་ཀྱི་གཞན་དབང་གི་ངོ་བོ་ལ་སྟོང་པའི་སྟོང་ཆ་དེ་ཡུལ་ཆོས་ཀྱི་དབྱིངས་སམ་ཆོས་ཉིད་ཡོངས་གྲུབ་དུ་བཞེད་པ་ཡིན། དབུ་མ་པ་ལ། དབུ་མ་རང་རྒྱུད་པ་དང་ཐལ་འགྱུར་བ་གཉིས་ལས། དང་པོ་ནི་རྗེས་ཐོབ་ཁས་ལེན་དང་བཅས་པའི་རྣམ་གྲངས་པ་རྩལ་དུ་འདོན་ཞིང་རྣམ་གྲངས་མ་ཡིན་པའི་དོན་དམ་ཐལ་འགྱུར་དང་དགོངས་པ་མཐུན། ཐལ་འགྱུར་བས་དང་པོ་ནས་སྤྲོས་པ་ཉེ་བར་ཞི་བའི་དབྱིངས་འཕགས་པ་གསུམ་གྱི་མཉམ་བཞག་གི་ཡེ་ཤེས་ལྟར་ཁས་ལེན་ཐམས་ཅད་དང་བྲལ་བར་གཏན་ལ་འབེབས་པ་ཡིན་པས་ཐལ་འགྱུར་དང་རང་རྒྱུད་ཀྱི་ཁྱད་པར་འདི་རྒྱ་གར་འཕགས་པའི་ཡུལ་དུ་ཡོངས་སུ་གྲགས་ལ། རང་སྟོང་གཞན་སྟོང་ཞེས་པ་བོད་ཀྱི་བླ་མ་རྣམས་ཀྱིས་བཏགས་པ་ལས་རྒྱ་གར་དུ་མ་གྲགས། དེས་ན་གཞུང་སྤྱི་མོའི་དབུ་མ་ནི། རྒྱལ་བའི་བཀའ་ཡུམ་སྲས་བཅུ་བདུན་པོའི་དགོངས་པ་དངོས་བསྟན་སྟོང་ཉིད་ལྟར་དུ་བཀྲལ་བ་འཕགས་པ་ཀླུའི་དབུ་མ་རིགས་པའི་ཚོགས་རྣམས་ཡིན། སྦས་དོན་ལམ་གྱི་མངོན་རྟོགས་ལྟར་བཀྲལ་བ་རྒྱལ་ཚབ་མ་ཕམ་པའི་མངོན་རྟོགས་རྒྱན་རྣམས་ཡིན་ཅིང་། གཙོ་བོ་འཕགས་པའི་རིགས་ཚོགས་དང་ཨཪྱ་དེ་བའི་དབུ་མ་བཞི་བརྒྱ་པ་རྣམས་ཐལ་རང་གང་གི་ཕྱོགས་སུ་འཐེན་རྩོད་བྱེད་རྒྱུ་མེད་དེ་དང་པོ་དབུ་མ་ཞེས་ཐལ་རང་གི་ཕུགས་གཏུགས་ས་གཞུང་སྤྱི་མོ་ཞེས་དགོངས་པ་གང་ལ་ལེན་པའི་གཞི་ཡིན། བྲམ་ཟེའི་རིགས་ཀྱི་སློབ་དཔོན་སངས་རྒྱས་བསྐྱངས་ཀྱིས་རྩ་བའི་དགོངས་པ་ཐལ་འགྱུར་དུ་བཀྲལ་ནས་རང་བཞིན་དང་བདེན་པའི་ཐ་སྙད་མ་སྦྱར་བ་ལ། རྒྱལ་རིགས་ཀྱི་སློབ་དཔོན་ལེགས་ལྡན་འབྱེད་ཀྱིས་དེའི་དགོངས་པ་རང་རྒྱུད་ལྟར་དུ་བཀྲལ་ཏེ་རང་བཞིན་དང་བདེན་པའི་སྒྲ་མ་སྦྱར་ན་མི་འཐད་དེ་མིག་ཡོད་བཞིན་དུ་མེད་ཅེས་སྨྲ་དགོས་པས། མིག་རང་བཞིན་གྱིས་མེད། བདེན་པར་མེད། དོན་དམ་པར་མེད་ཅེས་བཞེད། རང་རྒྱུད་པ་ལ་ནང་གསེས་གོང་མ་དང་འོག་མ་གཉིས་ལས་སློབ་དཔོན་དཔལ་སྦས་ལ་སོགས་པས། དོན་དམ་པ་སྒྱུ་མ་ལྟ་བུ་དེ་ཡང་སྒྱུ་མ་སྒྱུ་མ་ལྟར་རིགས་པས་གྲུབ་པར་བཞེད། གོང་མ་ཡེ་ཤེས་སྙིང་པོ་དང་། ཞི་བ་འཚོ། ཀ་མ་ལ་ཤཱི་ལ་སྟེ་རང་རྒྱུད་ཤར་གསུམ་མཁན་པོ་ཞེས་གྲགས་པས་རང་རེ་རྣམས་ཀྱི་ལྟ་བ་དེ་དག་གི་རྗེས་སུ་འབྲང་དགོས། དེའི་ལུགས་ཀྱི་བདེན་པ་གཉིས་ནི། བདེན་གཉིས་ལས། སྣང་དུ་འདྲ་ཡང་དོན་བྱེད་དང་། །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པས། །ཀུན་རྫོབ་ཀྱི་ནི་དབྱེ་བ་བྱེད། །ཅེས་པ་ལྟར། ཀུན་རྫོབ་ཀྱི་བདེན་པ་ནི་ཡུལ་རང་གི་མཚན་ཉིད་ཀྱི་ངོས་ནས་བློ་ལ་མི་བསླུ་སྟེ། མེས་ཚ་བསྲེགས་དང་། ཆུས་ངོམ་པའི་བྱ་བ་བྱེད་པ་མི་བསླུ་བ་སོགས་ཡུལ་རང་ངོས་ནས་མི་བསླུ་བ་དོན་བྱེད་ནུས་པའི་དངོས་པོ་རང་མཚན་ཐམས་ཅད་ཡང་དག་ཀུན་རྫོབ་དང་། སྣང་ལ་དོན་བྱེད་མི་ནུས་པ་ཟླ་བ་གཉིས་སྣང་དང་རི་མོར་བྲིས་པའི་མར་མེ་ལ་སོགས་པ་རྣམས་ནི་དོན་བྱེད་མི་ནུས་པ་ལོག་པའི་ཀུན་རྫོབ་ཏུ་བཞེད། དོན་དམ་པ་ལ་རྣམ་གྲངས་པའི་དོན་དམ་ནི་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་གཅིག་དང་དུ་མའི་རང་བཞིན་དང་བྲལ་བས་གཟུགས་སྟོང་པའོ། །ཞེས་སྣང་བས་ཡོད་མཐའ་སེལ་ཞིང་། སྟོང་པ་ཉིད་གཟུགས་སོ་ཞེས་སྟོང་ཉིད་ཅིར་ཡང་མ་ཡིན་པ་ལས་རྟེན་འབྱུང་འགགས་པ་མེད་པར་སྣང་བས་སྟོང་པས་མེད་མཐའ་སེལ་ཞིང་། སྟོང་པ་ཉིད་ལས་ཀྱང་གཟུགས་གཞན་མ་ཡིན། གཟུགས་ལས་ཀྱང་སྟོང་པ་ཉིད་གཞན་མ་ཡིན་ཞེས། སྟོང་དང་རྟེན་འབྱུང་དབྱེ་བསལ་མེད་པའི་རང་བཞིན་དུ་གཏན་ལ་ཕབ་ནས་ལས་དང་པོ་པ་རྣམས་ཀྱིས་མཐའ་བཞི་རིམ་གྱིས་བཀག་ནས་ངེས་པ་ཅིག་ཆར་དུ་དྲངས་བ་ཡིན་པས། དུས་ཕྱིས་ཀྱི་བདེན་སྟོང་ཐལ་འགྱུར་གྱི་དགོངས་པར་བཞེད་པ་རྣམས་ཀྱི་ལྟ་བ་རང་རྒྱུད་པའི་རྣམ་གྲངས་པའི་དོན་དམ་ལས་འཕགས་པ་ཞིག་གི་ཁྱད་མི་ཐོན་ན་རྣམ་གྲངས་མིན་པར་ལྟ་ཅི་སྨྲོས། རྣམ་གྲངས་མ་ཡིན་པའི་དོན་དམ་ནི། རྒྱན་ལས། ཡང་དག་ཏུ་ནི་སྤྲོས་པ་ཡིས། །ཚོགས་རྣམས་ཀུན་ལས་དེ་གྲོལ་ཡིན། ། ཞེས་པས། ནམ་ཞིག་གོམས་པ་སྟོབས་སུ་གྱུར་པའི་ཚེ་སོ་སོ་རང་རིག་པའི་ཡེ་ཤེས་ཀྱིས་ཡུལ་ཆོས་ཀྱི་དབྱིངས་མངོན་སུམ་དུ་གཟིགས་ནས་ཡོད་མེད་ཡིན་མིན་ལ་སོགས་པའི་སྤྲོས་པའི་མཐའ་བཞིའམ་བརྒྱད་དང་བྲལ་བའི་རང་བཞིན་དུ་འདོད་པས། དེ་ཡང་ཡོད་མེད་སོགས་སུ་བཞག་པ་ཐམས་ཅད་ནི་བློ་ཡིན་ལ་འདིར་གཉིས་ཀྱི་བློའི་རྒྱུ་བ་ཐམས་ཅད་རབ་ཏུ་འགགས་པས་སྤྲོས་བྲལ་ཙམ་དུ་འཛིན་པ་ཉེ་བར་ཞི་བ་ཡིན་པས་ཐལ་འགྱུར་བ་དང་དགོངས་པ་གཅིག་ཏུ་འབབས་པ་ཡིན། དབུ་མ་ཐལ་འགྱུར་བའི་ལུགས་ཀྱིས་བདེན་པ་གཉིས་ནི། ཟླ་བའི་འཇུག་པ་ལས། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །དེས་གང་བཅོས་མ་འཁྲུལ་པར་གྱུར་ཏེ་ནི། །ཀུན་རྫོབ་བདེན་ཞེས་ཐུབ་པ་དེས་གསུངས་སོ། །ཞེས་པས། སྣང་ཙམ་པ་ཀུན་རྫོབ་ཀྱི་དངོས་པོ་ལ་མངོན་པར་ཞེན་པ་མ་རིག་པས་བཅོས་མར་གྱུར་པའི་དངོས་པོ་དེ་དག་ནི་ཀུན་རྫོབ་ཀྱི་བདེན་པ་ཞེས་བཞག་ལ། དེ་ལ་ཡང་ལོག་གཉིས་སུ་འདོད་ལ་དེ་ཡང་རང་རྒྱུད་པ་ལྟར་ཡུལ་རང་ངོས་ནས་བསླུ་མི་བསླུའི་སྒོ་ནས་མི་བཞག་པར་གཙོ་ཆེ་བ་བློ་གནོད་པ་ཡོད་མེད་ཀྱི་སྒོ་ནས་བཞག་པ་ཡིན་པས། བློ་གནོད་མེད་ཀྱི་རྣམ་ཤེས་དྲུག་གི་ཡུལ་དུ་གྱུར་པ་ཡང་དག་ཀུན་རྫོབ་དང་། བློ་གནོད་བཅས་བད་ཀན་གྱི་ནད་ལ་སོགས་པས་འཁྲུལ་པའི་ཤེས་ངོ་ལ་སྣང་བ་རྣམས་ལོག་པའི་ཀུན་རྫོབ་ཏུ་བཞེད། དོན་དམ་པའི་བདེན་པ་ལ་རང་རྒྱུད་པ་ལྟར་རྣམ་གྲངས་ཡིན་མིན་མི་དབྱེ་བར། དང་པོ་ཉིད་ནས་འཕགས་པ་གསུམ་གྱི་མཉམ་བཞག་དང་མཐུན་པའི་ཡེ་ཤེས་གཏན་ལ་འབེབ་པ་ཡིན་པས་མཐའ་ཐམས་ཅད་དང་བྲལ་བའི་ཡེ་ཤེས་ཁས་ལེན་ཀུན་དང་བྲལ་བའི་གནས་ལུགས་གཏན་ལ་ཕེབས་པས། ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་གསུངས་པ་བཞིན། ཡོད་མེད་དུ་ཁས་བླང་ན་གཞན་གྱི་རྒོལ་བས་འཇིགས་ནས་ཁས་མི་ལེན་པ་མ་ཡིན་པར་དངོས་པོའི་ཡིན་ལུགས་ལ་ཁས་བླངས་བྲལ་བས། འདིའི་ལུགས་ཀྱི་བདེན་པ་གཉིས་པོ་གཅིག་པ་བཀག་ཙམ་གྱི་ཐ་དད་དུ་འདོད། རང་རྒྱུད་གོང་མས་བདེན་གཉིས་ངོ་བོ་གཅིག་ལ་ལྡོག་པ་ཐ་དད་དུ་འདོད། འོག་མས་བདེན་གཉིས་ངོ་བོས་ཐ་དད་དུ་འདོད་པ་ཡིན། དེ་ལྟར་བདེན་པ་གཉིས་ཀྱི་གོ་བ་སྤྱིར་བསྟན་ནས། ད་བསྒོམ་པའི་དུས་སུ་ཐུན་དང་ཐུན་མཚམས་ཕྱེ་སྟེ་ཐུན་གྱི་སྔོན་འགྲོ་རྣམས་སོང་ནས། དངོས་གཞི་བསྒོམ་པ་ལ། ཆོས་ཐམས་ཅད་ཅེས་པ་ཤེས་བྱའི་ཆོས་ཐམས་ཅད་ཡིན་པས། དེ་དག་བསྡུ་ན་ཕུང་པོ་ལྔར་འདུས། དེ་ཡང་བསྡུ་ན་བེམ་ཤེས་གཉིས་སུ་འདུ་བས། ཆོས་གང་ཟག་གི་བདག་མེད་གཉིས་བསྒོམ་དགོས། དེ་ལ་དང་པོ་དགག་བྱའི་སྣང་ཚུལ་ངེས་པའི་དབང་དུ་བྱས་ན། རྒྱུན་ལ་གང་ཟག་ཅེས་བྱ་སྟེ། །མཚན་ཉིད་འཛིན་ལ་ཆོས་ཞེས་བྱ། །ཞེས་པས། ང་ཐོག་མ་མེད་པ་ནས་འདིར་འོངས། འདི་ནས་ཕ་རོལ་ཏུ་འགྲོ་སྙམ་པའི་ཕུང་པོའི་རྒྱུན་ལ་དམིགས་ནས་ངའོ་སྙམ་པ་དེ་གང་ཟག་གི་བདག་ཡིན། དེའི་འཛིན་སྟངས་ནི་མ་ངེས་ཏེ། རེས་འགའ་ང་ནའོ་ཞེས་ཕུང་པོ་ལ་ངར་དམིགས། ཁྱོད་ཀྱི་ཅི་ན་ཞེས་དྲིས་ན་ངའི་མགོ་ནའོ་ཞེས་ང་ཡིར་བར་དམིགས་པ་ཡིན། དེས་ན་རྒྱུན་ལ་དམིགས་པ་གང་ཟག་གི་བདག་འཛིན་དང་དེའི་ཡུལ་གང་ཟག་ཡིན། དེའི་གདགས་གཞི་ཕུང་པོ་ལྔ་ཆོས་བདག་གི་ཡུལ་དང་། དེ་བདེན་པར་འཛིན་པ་ཆོས་ཀྱི་བདག་འཛིན་ཡིན། དེ་ཡང་གང་ཟག་གི་བདག་འཛིན་གྱི་འཛིན་སྟངས་རྟག་པ་གཅིག་པུ་རང་དབང་ཅན་དུ་འཛིན་པ་ཡིན་པས། དང་པོ་གང་ཟག་བདག་ཅེས་བྱ་བ་དེ་ཕུང་པོ་ལྔ་པོ་འདི་དང་གཅིག་གམ་ཐ་དད་དཔྱད་པས། གཅིག་ཡིན་ན། བདག་རྟག་གཅིག་རང་དབང་ཅན་ཡིན་པ་བཞིན་ཕུང་པོའང་རྟག་གཅིག་རང་དབང་ཅན་ཡིན་དགོས་པ་དང་། ཡང་ན་ཕུང་པོ་མི་རྟག་པ་དུ་མ་གཞན་དབང་ཅན་ཡིན་པ་བཞིན་བདག་དེ་ཡང་མི་རྟག་པ་དང་དུ་མ་གཞན་དབང་ཅན་དུ་འགྱུར་དགོས་པས། དེ་ལྟར་བརྟག་ན་བདག་ཕུང་གཅིག་ཏུ་མ་གྲུབ། གཞན་ཡིན་ན། ཡུལ་དུས་སྣང་བ་གསུམ་གྱིས་མ་བསྐལ་པས་བདག་ཕུང་ཐ་དད་དུ་དམིགས་དགོས་ན་དེ་མ་དམིགས་པས། བདག་གཞི་མེད་དུ་གཏན་ལ་ཕབས། དེ་ནས་བདག་མེད་ཀྱང་ཕུང་པོ་ཙམ་ཡོད་དོ་སྙམ་ན་དེ་ཡང་དཔྱད་ན་མ་གྲུབ་སྟེ། བེམ་པོ་གཟུགས་ཀྱི་ཆོས་ཡིན་ནས་བཟུང་རྡུལ་ཕྲན་བསགས་པ་ལས་མ་འདས། དེ་ཡང་རྡུལ་ཕྲན་ཆ་མེད་ཀྱི་རང་བཞིན་དུ་གཏན་ལ་འབེབས་དགོས། དེ་ཡང་ཕྱི་རོལ་གྱི་རི་ར་བ་བྲག་ཁང་ཁྱིམ་གྱི་རྣམ་པར་སྣང་བ་འདི་དག་ལ་བརྟག་དགོས། དང་པོ་ཁང་པ་ལྟ་བུ་ཞིག་ལ་བརྟག་ན། དང་པོ་ཁང་པ་ཞེས་རིལ་པོ་གཅིག་ཏུ་བཟུང་བ་ཡིན་པས། དེ་ཡང་མ་བརྟགས་པས་ལན། བརྟག་ན་ཁང་པ་ཞེས་པ་དེ། རྡོ་དང་རྩིགས་པ་གྱང་དང་ཤིང་ཆ་ལ་སོགས་པ་དུ་མ་འདུས་པའི་རང་བཞིན་ཡིན། འདུས་པ་དེ་སོ་སོར་བཤིགས་པ་ན་ཁང་པར་འཛིན་པའི་བློ་ལྡོག་ནས་རྡོ་དང་ས་ལ་སོགས་པར་འཛིན། དེ་ཡང་རྡུལ་དུ་མ་བསགས་པ་ཡིན་པས་རྡོ་གཅིག་ལྟ་བུ་དེ་དང་པོ་ཕྱོགས་ཚལ་པ་བཞིར་ཕྱེ་བས་གཅིག་ཏུ་འཛིན་པ་ལྡོག དེ་ནས་ཚལ་པ་བཞི་ཆ་ལྟ་བུ་དེ་ཡང་ཆ་བཞིར་ཕྱེས་ན་ཚལ་པའི་ཕྱོགས་གཅིག་ཏུ་འཛིན་པ་ལྡོག དེའི་ནང་གསེས་གཅིག་པོ་དེ་ཡང་ཕྱོགས་ཆས་ཕྱེས། ཕྱོགས་ཆ་རང་བཞིན་མེད་པར་འགྱུར་བ་ཡིན་པས་ན། ཤེས་རབ་སྙིང་པོ་ལས། གཟུགས་སྟོང་པ་ཞེས་གསུངས་པ་དེ་ཡིན། དེ་ལྟར་མ་བརྟགས་མ་དཔྱད་ན་ཁང་པ་ལ་སོགས་པའི་རྣམ་པར་རུང་བ། སྟོང་ཉིད་ཅིར་ཡང་མ་ཡིན་པ་ལས་རྟེན་འབྱུང་འགགས་པ་མེད་པར་འཆར་བ་ནི། སྟོང་པ་ཉིད་གཟུགས་སོ་ཞེས་པ་ཡིན། སྣང་བས་ཡོད་མཐའ་སེལ། སྟོང་པས་མེད་མཐའ་སེལ་ཏེ། སྟོང་པ་ཉིད་ལས་གཟུགས་གཞན་མ་ཡིན། གཟུགས་ལས་ཀྱང་སྟོང་པ་ཉིད་གཞན་མ་ཡིན་ཞེས་པས་སྟོང་དང་རྟེན་འབྱུང་དབྱེ་བསལ་མེད་པའི་ངེས་ཤེས་སྐྱེས་སྐྱེས་སུ་བསྒོམ། རང་གི་ནག་ཚང་ལྟ་བུ་ལ་ཡང་དང་པོ་ནག་ཚང་ཞེས་གཅིག་ཏུ་འཛིན་ཀྱང་། དེ་ལ་སྒོ་ཕུག་སོ་སོར་ཕྱེ་བས་གཅིག་ཏུ་འཛིན་པ་ལྡོག་ནས་འདི་སྒོའོ་ཞེས་པ་དང་འདི་ཕུག་ཅེས་འཛིན་ཀྱང་དེ་དག་རེ་ལྡེ་སོ་སོར་ཕྱེ་བ་ན་སྒོ་ཕུག་ཏུ་འཛིན་པ་ལོག་ནས་རེ་ལྡེར་འཛིན་ལ། རེ་ལྡེ་དེ་ཡང་སྣལ་མར་ཕྱེ་ན་རེ་ལྡེ་འཛིན་པ་ལོག་ནས་སྣལ་མར་འཛིན་པ་ཡིན་ལ། སྣལ་མ་དེ་ཡང་རྒྱ་སོ་སོར་ཕྱེ་ན་སྤུ་ཉག་མ་ལས་སྣལ་མའི་འཛིན་པ་ལོག སྤུ་དེ་ཡང་རྡུལ་ཕྲན་ཕྱོགས་ཆས་ཕྱེས། ཕྱོགས་ཆ་རང་བཞིན་མེད་པར་གཏན་ལ་ཕབ་ནས་དེ་ལྟར་དཔྱད་པས་གཟུགས་སྟོང་པ་དང་སྟོང་པ་གཟུགས། སྟོང་པ་ལས་གཟུགས་གཞན་མ་ཡིན་པ་དང་། གཟུགས་ལས་སྟོང་པ་ཉིད་གཞན་མ་ཡིན་པ་སྟེ་སྟོང་ཉིད་བཞི་སྦྱོར་གྱི་རིགས་པས་སྣང་སྟོང་ཟུང་འཇུག་ཏུ་ངེས་ཤེས་དྲངས། དེ་ལྟར་རི་གླིང་ར་བ་སྐྱེད་ཚལ་ནས་གསེར་རི་རོལ་མཚོ་རི་རབ་ལ་སོགས་པར་བརྟག དེ་ནས་ནང་རང་གི་ཕུང་པོ་ལ་བརྟག་དགོས་ཏེ། ད་ལྟ་ངའི་ལུས་གཅིག་པོ་འདི་ཞེས་གཅིག་པུ་རྟག་པ་རང་དབང་ཅན་དུ་འཛིན་པས། དེ་ལ་བརྟག་དཔྱད་དགོས་ཏེ། ངའི་ལུས་འདི་རྟག་པ་ཡིན་ནམ་སྙམ་ན་མ་ཡིན་ཏེ་དང་པོ་ཕ་མའི་ཁུ་རྡུལ་གཉིས་ཡུངས་དཀར་གྱི་བཅུ་ཆ་གཤགས་པའི་ཚད་ནས་ཇེ་ཆེ་ཇེ་ཆེར་འཕེལ་ཏེ་འགྱུར་བའི་གནས་སྐབས་རྣམས་ནས་རིམ་བཞིན་ལུས་ཡོངས་སུ་རྫོགས་ནས་ཕྱིར་བཙའ་ཞིང་བྱིས་པ་ནས་རྒན་པོའི་བར་དུ་འགྱུར་བ་ནི་རགས་པ་འགྱུར་བའི་མི་རྟག་པ་ཡིན་ལ། ཕྲ་བ་ཆོས་ཉིད་ཀྱི་མི་རྟག་པ་ནི་སྐད་ཅིག་རེ་རེ་བཞིན་འགྱུར་ཞིང་ཆུ་བོའི་རྒྱུན་བཞིན་ཡིན་པས་མི་རྟག གཅིག་པུ་ཞིག་ཡིན་ནམ་སྙམ་ན་མ་ཡིན་ཏེ། ཤ་དང་པགས་པ་དང་ཁྲག་དང་ཆུ་སེར་དང་རུས་པ་དང་སྣབས་དང་བད་ཀན་དང་རྒྱུས་རུས་པ་ལྟ་བུ་གཅིག་ལ་ཡང་རྒྱུ་རུས་མགོ་སུམ་བརྒྱ་དང་དྲུག་ཅུ་དེ་ཡང་རྡུལ་ཕྲན་དུ་མའི་རང་བཞིན། གཞན་ཡང་སོ་སུམ་ཅུ། སྐྲ་ཉི་ཁྲི་ཆིག་སྟོང་། བ་སྤུ་བྱེ་བ་ཕྲག་གསུམ་ལ་སོགས་པ་དུ་མ་ཆ་ཤས་ཀྱི་རང་བཞིན་ཅན་ཡིན། རང་དབང་ཅན་ཡིན་སྙམ་ན་མིན་ཏེ། ལས་དང་ཉོན་མོངས་པའི་གཞན་དབང་ཡིན་ཏེ། ལུས་ཀྱི་ན་ཚ་དང་བདེ་སྡུག་མཛེས་མི་མཛེས་སོགས་ལས་ལ་རགས་ལས་པའི་གཞན་དབང་ཅན་ཡིན། ལུས་རིལ་པོ་གཅིག་ཏུ་འཛིན་ཀྱང་དེ་སོ་སོར་ཕྱེས་ཏེ་སྡེབ་ལྔར་ཕྱེས་ན་ལུས་འཛིན་ཞིག་ནས་སྡེབ་ཏུ་འཛིན་པ་ཡིན་ལ་སྡེབ་དེ་ཡང་སོག་པ་དང་དཔུང་པ་དང་ལག་ངར་དང་ལག་མགོ་སོ་སོར་ཕྱེ་བས་སྡེབ་འཛིན་ཞིག་ནས་ལྷུ་རེ་རེར་འཛིན་པ་ཡིན་ལ། དེ་ཡང་ཤ་དང་པགས་པ་ཁྲག་དང་རུས་པ་ལ་སོགས་སོ་སོར་ཕྱེ་བས་ལྷུར་འཛིན་པ་དེ་ཞིག་ནས་ཤ་ལྤགས་སོགས་དེ་དང་དེར་འཛིན་པ་ཡིན་ལ་ཤ་དང་ལྤགས་པ་ལ་སོགས་པ་དེ་དག་ཕྱོགས་ཆས་ཕྱེས་ཤིང་། ཕྱོགས་ཆ་རང་བཞིན་མེད་པར་དཔྱད་པས་ལུས་སྟོང་པའོ་ཞེས་ལུས་ནམ་མཁའ་ལྟ་བུར་འགྱུར་ལ། སྟོང་ཉིད་ཅིར་ཡང་མ་ཡིན་པ་ལས་རྟེན་འབྱུང་འགགས་པ་མེད་པའི་སྟོང་པ་ཉིད་ལུས་སོ། །ལུས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་ལུས་གཞན་མ་ཡིན་ཞེས་སྣང་བས་ཡོད་མཐའ་བསལ་ཏེ་སྣང་བཞིན་དུ་མ་གྲུབ་པ་དང་སྟོང་པས་མེད་མཐའ་སེལ་ཏེ་སྟོང་པ་རྟེན་འབྱུང་དུ་འཆར་རུང་བ་ཡིན་པས། དེས་ན་སྟོང་རྟེན་འབྱུང་དབྱེ་བསལ་མེད་པར་གྲུབ་སྟེ། རྒྱལ་བུ་དཀོན་མཆོག་འབང་གིས། གཟུགས་སྒྲ་ཉིད་ཀྱང་སྤྲོས་བྲལ་ཏེ། །སྤྲོས་བྲལ་ཉིད་ཀྱང་གཟུགས་སྒྲར་ཤར། །གཟུགས་སྒྲ་ཉིད་ལས་ལོག་ཤིག་ཏུ། །སྤྲོས་བྲལ་ལོགས་སུ་མ་དམིགས་སོ། །སྤྲོས་བྲལ་ཉིད་ལས་ལོགས་ཤིག་ཏུ། །གཟུགས་སྒྲ་ལོགས་སུ་མ་དམིགས་སོ། །ཞེས་པ་བཞིན་ནོ། །དེ་ལྟར་ཕྱི་ནང་གི་ཆོས་ཐམས་ཅད་ལ་བློ་རྣམ་དཔྱོད་ཀྱི་ཤེས་རབ་ཅེས་ཁ་ཕར་འཁོར་ནས་ཡུལ་ལ་དཔྱད་པ་བྱས་ནས་ངེས་ཤེས་དྲངས་བའི་བློ་དེ་ལ་མིང་བཏགས་ན་བློ་རྣམ་དཔྱོད་ཀྱི་ཤེས་རབ་བམ། ཡིད་དཔྱོད་ཀྱི་ལྟ་བ་ཞེས་བྱ། རྫོགས་པ་ཆེན་པོ་དང་ཕྱག་རྒྱ་ཆེན་པོའི་ལྟ་བ་ནི་ཡིད་དཔྱོད་ཀྱི་ལྟ་བ་སྔོན་ལ་སོང་བའི་སྒོ་ནས། ཡུལ་ཅན་སེམས་ཀྱི་གཤིས་ལུགས་ལ་བརྟགས་པའི་སོ་སོ་རང་རིག་པའི་ཡེ་ཤེས་ཞེས་ཁ་ནང་དུ་འཁོར་བའི་མཉམ་བཞག་སྟེ་དེ་ལ་མིང་བཏགས་ན་མཉམ་བཞག་ཡེ་ཤེས་ཀྱི་ལྟ་བ་ཞེས་འདོགས་པ་ཡིན་པས། དེས་ན་སྔ་མ་བློ་རྣམ་རྟོག་དང་ཕྱི་མ་བློ་ལས་འདས་པའི་ཡེ་ཤེས་ཡིན་པས་ཁྱད་གནམ་ས་བས་ཆེ། དེ་ལྟར་དཔྱད་སྒོམ་བྱས་ནས་ཀྱང་གར་ཡང་འགྲོ་མི་འདོད་པའི་ཚེ་མཉམ་བཞག་གི་ལྟ་བ་དང་རྗེས་མཐུན་པ་བློ་བཅའ་བཅོས་མེད་པར་ཅི་གནས་འཇོག ཡང་རྣམ་རྟོག་སྐྱེ་བ་ན་དཔྱད་ཅིང་འཇོག་པ་སྟེ་དཔྱད་འཇོག་སྤེལ་མར་བྱས་ནས་བསྒོམ་པས་སེམས་ལ་ཁ་ལོ་ལེགས་པར་ལོབ་ནས་བཏང་བཞག་ལས་སུ་རུང་བ་འབྱུང་བ་ཡིན། དེ་ནས་ནང་སེམས་ལ་དཔྱད་དགོས་ཏེ། སེམས་ཀྱང་རྟག་གཅིག་རང་དབང་ཅན་དུ་འཛིན་པ་སྟེ། ལེགས་པར་བརྟག་ན། སེམས་རྟག་པ་མ་ཡིན་ཏེ། སྐྱེ་འགགས་ཀྱི་ཕྲེང་བ་ཤ་ར་ར་བྱེད་པའི་རང་བཞིན་ཅན་ཆུ་བོའི་རྒྱུན་ལྟ་བུའི་མི་རྟག་པ་ཡིན། གཅིག་པུ་ཞིག་ཡིན་སྙམ་ན་མ་ཡིན་ཏེ། འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་དང་ཕྲག་དོག་སེར་སྣ་ལ་སོགས་པའི་མི་དགེ་བའི་རྟོག་པ་དུ་མ། དད་ངེས་འབྱུང་བྱང་ཆུབ་ཀྱི་སེམས་ལ་སོགས་པ་དགེ་བའི་རྟོག་པ་དུ་མ། སྔར་སོང་བ་དང་སྨྲ་བ་དང་ཟོས་པ་ལ་སོགས་དྲན་པའི་ལུང་མ་བསྟན་གྱི་རྟོག་པ་དུ་མའི་རང་བཞིན་ཅན། གཞན་ཡང་རྣམ་པར་ཤེས་པ་ཚོགས་བརྒྱད། སེམས་བྱུང་ལྔ་བཅུ་རྩ་གཅིག་ལ་སོགས་པ་དུ་མའི་རང་བཞིན་ཅན་ཡིན། རང་དབང་ཅན་ཡིན་ནམ་སྙམ་ན་མ་ཡིན་ཏེ། ཡུལ་གྱི་གཞན་དབང་ཅན། ཡུལ་སྡུག་པ་དང་འཕྲད་ན་འདོད་ཆགས་སྐྱེས། ངན་པ་དང་འཕྲད་ན་ཞེ་སྡང་སྐྱེ། བར་མ་དང་འཕྲད་ན་གཏི་མུག་གི་རྟོག་པ་སྐྱེ། གཞན་འཁོར་བ་ལ་ངེས་འབྱུང་། མྱང་འདས་ལ་དད་པ་ལ་སོགས་པ་ཡུལ་གྱི་གཞན་དབང་ཅན་ཡིན། ཡང་སེམས་འདས་པ་ནི་འདི་ན་བསགས་ཏེ་གནས་སོ་ཞེས་པ་མེད་པས་མ་གྲུབ། ད་ལྟ་བ་ནི་སྐད་ཅིག་གིས་རང་ཡལ་རྗེས་མེད་དུ་འགྱུར་བས་མ་གྲུབ། མ་འོངས་པ་ནི་འདི་ནས་འོངས་ཤོམས་བྱེད་དོ་སྙམ་པ་མི་རྙེད་པས་མ་སྐྱེས་པ་མ་ཐོབ་པས་མ་གྲུབ། དེ་ལྟར་དབང་པོ་རབ་ཀྱིས་དུས་གསུམ་དུ་དཔྱད་པས་མ་རྙེད་པས་སེམས་རང་བཞིན་མེད་པའི་ངེས་པ་འདྲོངས་ཀྱང་། དབང་པོ་རྟུལ་པོ་དག་གིས་དེ་ལྟར་དཔྱད་ནས་མ་རྙེད་ཀྱང་མེད་ནའང་ད་དུང་མི་དྲན་དགུ་དྲན་གྱི་རྟོག་པ་ཞིག་འཆར་གྱིན་འདུག་པས་འདི་གང་ལྟར་ཀྱང་ཡོང་ལས་ཆེ་སྙམ་ན། སེམས་བྱུང་གནས་འགྲོ་གསུམ་ལ་བརྟག་དགོས་ཏེ། འདོད་ཆགས་ལ་སོགས་པའི་རྟོག་པ་འདི་དང་པོ་མེད་ཀྱང་གློ་བུར་དུ་ག་ཤེད་ནས་སྐྱེ་འོང་བས་འདི་ཡོད་དོ་སྙམ་ན། དང་པོ་སེམས་སྐྱེ་སའམ་བྱུང་སའམ་ཤར་ས་ལ་བརྟག་དགོས་ཏེ། སེམས་ཤིག་སྐྱེས་ཕྱིན་ཆད་ཕྱི་ཡུལ་དྲུག་གམ། ནང་དབང་པོ་དྲུག་གམ། དེ་གཉིས་ཀའི་བར་གང་རུང་ལས་སྐྱེས་པ་མ་གཏོགས་སྐྱེ་བའི་ཐབས་མེད་པས། དང་པོ་ཕྱི་ཡུལ། མིག་གི་ཡུལ་གཟུགས། རྣ་ཤེས་ཀྱི་ཡུལ་སྒྲ། སྣ་ཤེས་ཀྱི་ཡུལ་དྲི། ལྕེ་ཤེས་ཀྱི་ཡུལ་རོ། ལུས་ཤེས་ཀྱི་ཡུལ་རེག་བྱ༑ དེ་དག་གིས་བཞག་པའི་ཡིད་ཀྱི་ཡུལ་ཆོས་ཁམས་ཏེ་དྲུག་པོ་ལ་དཔྱད་དགོས་ཏེ། དང་པོ་མིག་ཤེས་ཀྱི་ཡུལ་གཟུགས་འདི་དག་ལ་བློ་རྣམ་དཔྱོད་ཀྱི་ཤེས་རབ་ཀྱི་ཕྱོགས་ཆས་དབྱེ་ཞིང་ཕྱོགས་ཆ་རང་བཞིན་མེད་པ་རྡུལ་དུ་བཤིགས་ནས་རང་བཞིན་གྱིས་མ་གྲུབ་པས་དེ་ལས་ཤེས་པ་སྐྱེ་བའི་ཡུལ་མེད། དེ་བཞིན་དུ་སྒྲ་སོགས་ཐམས་ཅད་རྡུལ་དུ་གྲུབ་པའི་རང་བཞིན་དངོས་པོའི་ཆོས་ཡིན་པས་རྡུལ་གྲུབ་ཀྱི་ཆོས་ཐམས་ཅད་བློ་རྣམ་དཔྱོད་ཀྱི་ཤེས་རབ་ཀྱིས་ཆ་བཞིར་ཕྱེས། ཆ་རེ་རེ་ནས་ཆ་བཞི་བཞིར་བསལ་ཏེ་དཔྱད་པས་མཐར་རྡུལ་ཕྲན་ཉི་ཟེར་གྱི་རྡུལ་འབྲིང་པོ་ཞིག་ཆ་བཞི་བཅུར་བསྒོས་པའི་ཆ་གཅིག་ལྟ་བུ་ལ་རྡུལ་ཕྲན་ཆ་མེད་དུ་འདོད་ལ་དེ་ལའང་སྟེང་འོག་དང་ཕྱོགས་ཀྱི་ཆས་ཕྱེས་པས་རྡུལ་ཕྲན་རང་བཞིན་མེད་པའི་ཆོས་གཞི་མེད་རྩ་བྲལ་སྟོང་པ་ཉིད་ཀྱི་ཆོས་སུ་གནས་པས་དེ་དག་ལས་སེམས་སྐྱེ་བའི་ཡུལ་མེད། འོ་ན་ཅིག་སྐྱེས་པ་འདི་ཅི་ཡིན་སྙམ་ན་རྟེན་འབྱུང་འགགས་པ་མེད་པ་སྟོང་ཉིད་ཀྱི་རྩལ་རོལ་པ་འཆར་ཚུལ་ཆེ་བའི་རྒྱན་ཡིན་པས་སྟོང་རྟེན་འབྱུང་གི་ངེས་ཤེས་དང་དེ་ལྟར་ཕྱི་ཡུལ་དྲུག་པོ་རང་བཞིན་མ་གྲུབ་པས་དཔེར་ན་མ་མེད་ན་བུ་སྐྱེས་པའི་ཐབས་མེད་པ་བཞིན་སེམས་སྐྱེ་བའི་ཐབས་མེད། འོ་ན་ནང་དབང་པོ་དྲུག་པོ་ལ་སེམས་སྐྱེ་བ་ཡིན་ནམ་སྙམ་ན་མ་ཡིན་ཏེ། དབང་པོ་དྲུག་ནི་མིག་དབང་རྣ་དབང་སྣ་དབང་ལྕེ་དབང་ལུས་དབང་ལྔ་རང་རང་གི་ཡུལ་འཛིན་པ་ལ་དབང་བྱེད་པས་ན། དབང་པོ་དང་། དྲུག་པོ་འགགས་མ་ཐག་པ་ཡིས། །རྣམ་ཤེས་གང་ཡིན་དེ་ཡིད་དོ། །ཞེས་པས། སྒོ་ལྔའི་ཤེས་པ་སྔ་མ་འགགས་པས་ཡིད་ཤེས་རྟོག་མེད་སྐྱེ་བའི་སྐབས་ཕྱེ་བ་དང་ཡིད་རྟོག་མེད་དང་དྲུག་པོ་འགགས་མ་ཐག་པས་ཡིད་ཤེས་རྟོག་བཅས་སྐྱེ་བའི་རྒྱུ་བྱེད་པས་དབང་པོ་ཞེས་བཞག་པས། དབང་པོ་གཟུགས་ཅན་པ་ལྔ་པོ་སྔར་ལུས་ཀྱི་གནས་སྐབས་ཀྱི་དཔྱད་པ་བཞིན་དཔྱད་དེ་རྡུལ་ཕྲན་རང་བཞིན་མེད་པས་ནང་དབང་པོ་ལས་སེམས་སྐྱེ་བའི་ཐབས་མེད་དེ་དཔེར་ན་ཕ་མེད་ན་བུ་སྐྱེ་བའི་ཐབས་མེད་པ་དང་འདྲ། འོ་ན་དབང་ཡུལ་གཉིས་ཀྱི་བར་དུ་སྐྱེ་བ་ཡིན་ནམ་སྙམ་ན་མ་ཡིན་ཏེ། དབང་ཡུལ་གཉིས་ཀྱི་བར་ན་ཡང་ཉིན་མོ་སྣང་བའི་རྡུལ་དང་མཚན་མོ་མུན་པའི་རྡུལ་གཉིས་ལས་གཞན་མེད་པས་སྣང་མུན་གྱི་རྡུལ་གཉིས་པོ་ནི་རྡུལ་ཕྲན་དེ་ཡང་ཆ་ཤས་མེད་པའི་རང་བཞིན་ཡིན་པས་དེ་ལས་སེམས་སྐྱེས་ས་མ་གྲུབ། དེ་ལྟར་སེམས་ལ་དཔྱད་ན་མེད་པ་ལྟ་བུ་ཞིག་རེད་ཀྱང་། འོན་ཀྱང་སེམས་སྐྱེས་ནས་གནས་པའི་ཡུལ་ཞིག་ཡོད་པས་ན་སེམས་གནས་ས་ཡོད་དོ་སྙམ་ན། དེ་ཡང་མེད་དེ། མོ་གཤམ་ལ་བུ་དང་པོ་ནས་སྐྱེ་མ་མྱོང་ན་བར་དུ་གནས་ས་མེད་པ་དང་འདྲ་བས་འདི་དཔྱད་མི་དགོས་ཀྱང་། ད་དུང་ཡང་སེམས་ཞིག་ཡོད་དོ་སྙམ་ན། དེ་དཔྱད་དགོས་ཏེ་སྔ་མ་བཞིན་ཕྱི་ཡུལ་དྲུག ནང་དབང་པོ་དྲུག དེ་དག་གི་བར་དུ་དཔྱད་པས་སེམས་གནས་ས་མེད། དེ་ལྟར་སེམས་སྐྱེ་གནས་གཉིས་པོ་མེད་ཀྱང་མཐར་འགགས་ས་ཡོད་དོ་སྙམ་ན། དེ་ཡང་དཔེར་ན་མོ་གཤམ་གྱི་བུ་དང་པོ་སྐྱེ་བ་དང་བར་དུ་གནས་པ་མེད་པས་མཐར་འཆི་རྒྱུ་མེད་པ་བཞིན། ཕྱི་ཡུལ་དྲུག་ནང་དབང་པོ་དྲུག་དེ་གཉིས་ཀྱི་བར་རྣམས་སུ་དཔྱད་པས་རྡུལ་ཕྲན་ཕྱོགས་ཆས་ཕྱེས་པས་རང་བཞིན་མ་གྲུབ་པས་དེ་ལ་ཡང་འགགས་པའི་ས་མེད། དེ་ལྟར་སེམས་བྱུང་གནས་འགྲོ་གསུམ་བཙལ་བས་མ་རྙེད་ཀྱང་། ད་དུང་ཡང་རྣམ་རྟོག་ཅིག་ཐོལ་ཐོལ་སྐྱེས་འདུག་པས་འདི་ཡོད་པ་ཡིན་ནམ་སྙམ་ན་མ་ཡིན་ཏེ། སེམས་འདི་ལ་དངོས་པོ་ཞིག་ཡོད་ན། དབྱིབས་དང་ཁ་དོག་གཉིས་ལས་དངོས་པོ་ཡོད་མི་སྲིད་པས། སེམས་ལ་དབྱིབས་ཟླུམ་པོ། གྲུ་བཞི། ཟླ་གམ། གྲུ་གསུམ། རིང་པོ། ཐུང་ངུ་། ནར་མོ། ཕྱལ་ལེའམ། ཕྱལ་ལེ་མ་ཡིན་པའི་དབྱིབས་ཡོད་མེད་དཔྱད་ན་དབྱིབས་མེད། ཁ་དོག་དཀར་སེར་དམར་ལྗང་སོགས་ཡོད་མེད་དཔྱད་ན་ཁ་དོག་མེད། སྐྱེས་པ་དང་བུད་མེད་དང་མ་ནིང་དང་རྟ་དང་གླང་པོ་ལ་སོགས་པའི་གཟུགས་ཡོད་མེད་བརྟག་ན་གཟུགས་སུ་མ་གྲུབ། ད་དུང་ཡང་ཡོད་དོ་སྙམ་ན། ཕྱི་ཡུལ་སྣང་དབང་པོ་ལུས་ཕྱི་ནང་ཐམས་ཅད་དུ་སེམས་མཐོང་རྒྱུ་ཨེ་ཡོད་བལྟས་ན་སེམས་ལ་གཟུགས་སུ་མཐོང་རྒྱུ་མེད། རྣ་བས་ཉན་ན་སེམས་ལ་སྒྲ་ཐོས་རྒྱུ་མེད་པས། འཇིག་རྟེན་པའི་རྒན་པོ་རྣམས་ཀྱིས་མིག་གིས་མ་མཐོང་། རྣ་བས་མ་ཐོས་ན་མེད་ཟེར་བ་ལས་ཡོད་ཅེས་མི་སྨྲ་བ་དེས་ན་སེམས་རང་བཞིན་གྱིས་མ་གྲུབ། ད་དུང་ཡང་སྣས་སེམས་ཀྱི་དྲི་ཚོར་རྒྱུ་ཨེ་ཡོད། ལྕེས་སེམས་ཀྱི་རོ་མྱོང་རྒྱུ་ཨེ་ཡོད་བལྟས། ལག་པས་ལུས་ཕྱི་ནང་ཀུན་ཏུ་སེམས་ལ་རེག་རྒྱུ་ཡོད་མེད་བརྟག་ན་མེད་པས་དེས་ན་སེམས་སྟོང་པའོ། །ཞེས་དང་། དེ་ལྟར་མ་བརྟགས་མ་དཔྱད་པར་སྟོང་ཉིད་ཅིར་ཡང་མ་ཡིན་པ་ལས་རྟེན་འབྱུང་འགགས་པ་མེད་པའི་རང་བཞིན་དུ་སེམས་སྣང་ཆོག་པས། སྟོང་པ་ཉིད་སེམས་སོ། །ཞེས་དང་། དེ་ལྟར་སྟོང་རྟེན་འབྱུང་དབྱེ་བསལ་མེད་པ་ཆུ་ཟླ་ལྟར་སེམས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་སེམས་གཞན་མ་ཡིན་ནོ། །ཞེས་སྟོང་ཉིད་བཞི་སྦྱོར་གྱི་ངེས་ཤེས་བློ་གཞན་གྱིས་མི་འཕྲོག་པ་བསྐྱེད། དེ་ནས་དེ་ལྟར་དཔྱད་པས་མ་རྙེད་ཀྱང་མ་བརྟགས་མ་དཔྱད་པར་རྟེན་འབྱུང་འགགས་པ་མེད་པའི་རང་བཞིན་སྒྱུ་མའི་དཔེ་བརྒྱད་དུ་ངེས་པ་དྲངས་དགོས། གཞན་ནི་གོ་སླ་ཞིང་། སྒྱུ་མ་ལྟ་བུའི་སྐབས། དཔེར་ན་སྒྱུ་མ་མཁན་ཁྱུང་པོ་སྤུ་ཁ་ཞེས་བྱ་བས། སྒྱུ་མའི་ཤིང་བུ་དང་རྡེའུ་ལ་སོགས་པ་ལ། སྒྱུ་མའི་རིགས་སྔགས། ཨོཾ་ཐི་བི་ཐི་བི་སྭཱ་ཧཱ་ཞེས་པའི་སྔགས་ཀྱིས་བསྔགས་པས། སྒྱུ་མའི་སྣང་བ་རྟ་དང་གླང་པོ་ལ་སོགས་པའི་སྣང་བ་སྣང་ཞིང་མིག་འཕྲུལ་བར་བྱེད་པ་དང་། ཡང་སྒྱུ་མའི་འཁྲུལ་འཁོར་བཤིགས་པར་འདོད་ན། ཨོཾ་མི་ཐི་མི་ཐི་སྭཱ་ཧཱ་ཞེས་པའི་སྔགས་བཏབ་པས་སྒྱུ་མའི་སྣང་བ་ཞི་ནས་ཤིང་བུ་དང་རྡེའུ་སྣང་བ་བཞིན་སྒྱུ་མ་མཁན་མ་རིག་པའི་རྒན་པོ་དེས། རྒྱུ་གཟུང་འཛིན་གཉིས་ལ། རྐྱེན་ལས་དང་ཉོན་མོངས་པའི་རིགས་སྔགས་ཀྱིས་བཏབ་པས། མཐོ་སྲིད་རྩེ་ནས་དམའ་རྡོ་རྗེ་དམྱལ་བའི་བར་གྱི་སྒྱུ་མའི་སྣང་བ་ལྟ་བུའི་འགྲོ་བ་རིགས་དྲུག་པོའི་སྣང་བ་སྣ་ཚོགས་ཤར་བ་ཡིན་ཀྱང་། དཔེར་ན་ཤིང་བུ་རྡེའུ་དེ་ལ་དང་པོ་སྔགས་ཀྱིས་མ་བཏབ་པ་དང་། མཐར་སྔགས་ཀྱིས་ཞི་བར་བྱས་པའི་དུས་གཉིས་སུ་སྒྱུ་མའི་སྣང་བ་དེ་གྲུབ་ཅིང་བར་དུ་རྐྱེན་གྱི་དབང་གིས་སྣང་བ་བཞིན། སེམས་ཉིད་བདེ་བར་གཤེགས་པའི་སྙིང་པོ་དེ་ཐོག་མ་གཞི་མ་འཁྲུལ་བའི་གནས་སྐབས་དང་། མཐར་མངོན་པར་རྫོགས་པར་སངས་རྒྱས་པའི་དུས་སུའང་འཁྲུལ་སྣང་སྒྱུ་མ་ལྟ་བུ་དེ་མ་གྲུབ་ཀྱང་། འོན་ཀྱང་གློ་བུར་འཁྲུལ་བའི་དབང་གིས་སྒྱུ་མའི་སྣང་བ་ལྟར་འཁྲུལ་བ་ཡིན་པས་འཁྲུལ་སྣང་འདི་དག་སྒྱུ་མ་ལ་སོགས་པའི་དཔེ་བརྒྱད་དུ་བསམ་ཞིང་ཡང་དང་ཡང་དུ་དཔྱད་འཇོག་སྤེལ་མར་བསྒོམ། ཐུན་གྱི་རྗེས་སུ་ཐམས་ཅད་འདྲ། ཐུན་མཚམས་སུ་དབྱེ་བ་རྣམས་ལ་དཔེ་བལྟས་དང་བསམ་དཔྱོད་བྱེད། དེ་དག་གིས་འཇུག་པའི་བསླབ་བྱ་རྣམས་སོང་།