དྭགས་པོའི་ཆོས་བཞིའི་རྣམ་བཤད་སྐྱེས་བུ་གསུམ་གྱི་ལམ་ཉིན་མོར་བྱེད་པ།
དྭགས་པོའི་ཆོས་བཞིའི་རྣམ་བཤད་སྐྱེས་བུ་གསུམ་གྱི་ལམ་ཉིན་མོར་བྱེད་པ་ཞེས་བྱ་བ་བཞུགས་སོ། །དྭགས་པོའི་ཆོས་བཞིའི་རྣམ་བཤད། སྐྱེས་བུ་གསུམ་གྱི་ལམ་ཉིན་མོར་བྱེད་པ་ཞེས་བྱ་བ། རྗེ་བཙུན་ངག་དབང་ཆོས་ཀྱི་རྒྱལ་པོའི་ཞབས་ལ་ཕྱག་འཚལ་ལོ། །གང་གིས་ངན་སོང་ལམ་ནི་ཟློག་ནས་བདེ་འགྲོའི་བདེ་ལ་སྦྱར་བ་དང་། །གང་གིས་འཁོར་བའི་འཇིགས་པས་སྐྱོ་ནས་ཞི་ཚོལ་ཞི་བར་དབུགས་དབྱུང་དང་། །གང་གིས་མྱ་ངན་འདས་ལྷུང་དམན་བཞག་ཉིད་བྱོན་ཉིད་དུ་ཀུན་ཁྲིད་པ། །གང་གིས་བདག་ཅག་རྣམས་ཀྱི་སྟོན་པ་ལྷ་ཡི་ལྷ་ལ་ཕྱག་བགྱིའོ། །འཇམ་པའི་དབྱངས་ཀྱིས་ཟབ་མོའི་སྐབས་ཕྱེ་བར། །ཀླུ་སྒྲུབ་མཐའ་བྲལ་ལྟ་བའི་མཚོ་བཅས་པ། །མ་ཕམ་རྒྱ་ཆེན་གངས་རིར་སྤྱོད་ལས་ཀླུང་། །ཐོགས་མེད་འབབ་པས་ཕྱོགས་ཀུན་སྣུམ་བྱས་ཤིང་། །གསང་བདག་སྤྲིན་གྱི་ཉམས་ལེན་བྱིན་རླབས་ཆར། །མཆོག་གཟིགས་རྣམ་གཉིས་དུས་བབ་གུང་ཁེབས་པས། །ཨ་ཏི་ཤ་ལུགས་རྒྱལ་བའི་མྱུ་གུ་ཡི། །འབྱུང་གནས་ཆེན་པོར་བྱས་སྙམ་དགའ་བས་བསྟོད། །བསོད་ནམས་ཚོགས་ཆེན་ལས་བྱུང་བའི། །སེམས་ཅན་ཀུན་གྱི་རིན་ཆེན་ནི། །འཛམ་གླིང་མཛེས་པའི་རྒྱན་དམ་པ། །སྒམ་པོ་པ་ཞེས་གྲགས་པར་འདུད། །གཞན་གཞུང་རྒྱུ་སྐར་སྡེ་མདུན་ཁེངས་རྒྱས་མུན། །འཆར་ཁའི་གདོང་དུའང་སྡོད་ཚུགས་མི་སྲིད་པ། །ཆོས་བཞིའི་ལེགས་བཤད་འོད་ཟེར་འབུམ་མང་ཅན། །ཤཱནྟིའི་རིར་བྱོན་སྟོན་ལ་པད་དཀར་གུས། །འདིར་གང་བཤད་པར་བྱ་ན་སྐྱེས་བུ་གསུམ་གྱི་ལམ་གྱི་མཆོག་རིན་པོ་ཆེའི་འཕྲེང་བ་འཆད་ཚུལ་ཆོས་བཞིས་ལེགས་པར་གཏན་ལ་ཕབ་པ་དེའོ། །དེ་ལ་ཀླད་ཀྱི་དོན། གཞུང་གི་དོན་རྣམ་པ་གཉིས་ལས། དང་པོ་ནི། སྡོམ་དང་དམ་ཚིག་གུས་སེམས་མ་ཉམས་ཤིང་། །ཞེས་ཕྱག་བྱར་འོས་པ་ནི། གཞི་སྡོམ་པ་གསུམ་ལ་གནས་པ། བར་དུ་དམ་ཚིག་གི་སེལ་མེད་པ། སྔ་མ་སྔ་མ་ལ་ཕྱི་མ་ཕྱི་མ་གུས་པ་ཕུན་སུམ་ཚོགས་པ་སྟེ། ལུང་དང་རྟོགས་པ་བྱིན་རླབས་བརྒྱུད་པར་ལྡན། ལུང་ནི་རྒྱ་ཆེན་སྤྱོད་པའི་ཕྱོགས། རྟོགས་པས་ནི་ཟབ་མོ་ལྟ་བའི་ཕྱོགས། བྱིན་རླབས་ཀྱིས་ཉམས་ལེན་བྱིན་རླབས་ཏེ་བརྒྱུད་པ་གསུམ་དང་ལྡན་པ་བསྟན་ལ། དེ་གང་གི་ལུགས་སོ་སྙམ་ན། ཇོ་བོའི་བཀའ་བརྒྱུད་ཅེས་གསུངས་ཏེ། ཇོ་བོ་རྗེ་ལྷ་གཅིག་ནས་བརྒྱུད་པ་བཀའ་གདམས་ངག་ཏུ་སྨྲ་བ་འདི་དག་གོ །དེ་ལས་ཆོས་ཀྱི་རྒྱལ་པོ་ཉིད་ཀྱི་ཡོངས་སུ་འཛིན་པར་གཟུང་བ་བྱེ་བྲག་ཏུ་འབྱེད་པར་བླ་མ་དམ་པ་ལ་ཞེས་བྱུང་། དེ་དག་ལ་གུས་པ་ཁ་ཙམ་མ་ཡིན་པས་རྐང་གི་ཁོང་དང་སྙིང་གི་དཀྱིལ་ནས་འདུད་ཅེས་གསུངས་ཏེ་མི་ཕྱེད་པའི་དད་པ་མངའ་བ་དེས་བཏུད་པ་ཤེས་པར་བྱ་བའི་ཕྱིར་དུའོ། །གཉིས་པ་ལ། དགོས་དོན། བསྡུས་དོན། ཚིག་དོན་གསུམ་ལས། དགོས་པའི་དོན་ནི། ཐེག་པ་ཐམས་ཅད་བརྗོད་བྱར་བྱེད་པ་ཡི། །སྐྱེས་བུ་གསུམ་གྱི་ལམ་གྱི་རིམ་པ་འདི། །དུས་གསུམ་འཕགས་པ་རྣམས་ཀྱི་གཞུང་ལམ་སྟེ། །ཞེས་པས་བསྟན་ཏེ། འདིའི་བརྗོད་བྱ་ནི་གནས་སྐབས་ཐེག་པ་སྣ་ཚོགས་པ་སྟོན་པ་སྐྱེས་བུ་གསུམ་གྱི་ལམ་རིམ། དེ་རྗོད་པར་བྱེད་པ་ནི། དེ་སྟོན་པའི་གཞུང་གི་ཚོགས་སོ། །བརྗོད་བྱ་དང་རྗོད་བྱེད་ཕན་ཚུན་དུ་འབྲེལ་བ་སོགས་འབྲེལ་པ། དགོས་པ་གདུལ་བྱའི་མོས་པ་དང་བསྟུན་ནས་ཐེག་པ་སོ་སོའི་འབྲས་བུ་ལ་འགོད་པ། ཉིང་དགོས་ཐམས་ཅད་ཀྱང་མཐར་ཐུག་ཐེག་ཆེན་དུ་འབབ་ཅིང་གཞོལ་བས་རྫོགས་པའི་སངས་རྒྱས་སོ། །དེའི་ཕྱིར། ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོག་པ་པོ། །དང་། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་འབྱུང་བ་དང་། སློབ་དཔོན་འཕགས་པ་ཀླུ་སྒྲུབ་ཀྱིས། ཐར་པ་ཞེས་བྱ་གཅིག་པུ་ཉིད། །མང་པོ་དམིགས་པར་མི་འགྱུར་རོ། །ཁྱོད་ཀྱིས་ཐེག་པ་གསུམ་གསུངས་པ། །སེམས་ཅན་གཞུག་པའི་ཆེད་དུ་ལགས། །ཞེས་གསལ་བར་གསུངས་པ་བཞིན་ནོ། །གཉིས་པ་བསྡུས་དོན་ནི། ཆོས་བཞིས་རྒྱས་བཤད་དེ་དག་རེ་རེའང་། །ལྟ་སྒོམ་སྤྱོད་པ་གསུམ་གྱིས་ཉམས་སུ་བླང་། །ཞེས་བཤད་བྱ་སྐྱེས་བུ་གསུམ་གྱི་ལམ་དུ་གཞོག་པ་ཡང་གདུལ་བྱའི་དབྱེ་བས་ཏེ། བྱང་ཆུབ་ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པས། །སྐྱེས་བུ་དེ་ནི་ཐ་མར་ཤེས། །སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུངས་ལ། བློ་གྲོས་མི་ཟད་པའི་མདོ་འགྲེལ་ལས། ཡོངས་སུ་སྨིན་པར་བྱ་བའི་གང་ཟག་ནི་རྣམ་པ་བཞི་སྟེ། ཉན་ཐོས་ཀྱི་རིགས་ཅན་དང་། རང་སངས་རྒྱས་ཀྱི་རིགས་ཅན་དང་། སངས་རྒྱས་ཀྱི་རིགས་ཅན་དང་། རིགས་མེད་པའི་གང་ཟག་གོ །དེ་ལ་རིགས་ཅན་གསུམ་ནི་ཐེག་པ་གསུམ་དུ་ཡོངས་སུ་སྨིན་པར་བྱའོ། །རིགས་མེད་པའི་གང་ཟག་ཀྱང་ལྷ་དང་མིའི་བདེ་འགྲོར་ཡོངས་སུ་སྨིན་པར་བྱའོ་ཞེས་གསུངས་པ་དང་། ཡོངས་སུ་སྨིན་པའང་དེ་ཉིད་དུ། ཡོངས་སུ་སྨིན་པའི་རང་བཞིན་ནི་དཔེར་ན་འབྲས་སྨིན་པར་གྱུར་ན་བརྡོལ་བར་འོས་པ་དང་། འབྲས་བུ་སྨིན་ནས་ནང་ཀུན་ཏུ་ཟ་བར་འོས་པའི་དུས་ན་ཡོངས་སུ་སྨིན་པ་ཞེས་བྱ་བ་དེ་བཞིན་དུ། དགེ་བའི་ཆོས་རྣམས་ཀྱི་ས་བོན་ཡང་ནས་ཡང་དུ་བརྟེན་པ་དང་ལྡན་པས་ཉོན་མོངས་པ་དང་ཤེས་བྱའི་སྒྲིབ་པ་སྤོང་བར་ནུས་པ་དང་། རྗེས་སུ་མཐུན་པའི་ལུས་དང་སེམས་ལས་སུ་རུང་བ་རྙེད་ནས་ཉོན་མོངས་པ་དང་ཤེས་བྱའི་སྒྲིབ་པ་སྤོང་བའི་མཐུ་དང་ལྡན་པ་ནི་ཡོངས་སུ་སྨིན་པའི་རང་བཞིན་ཞེས་བྱའོ། །ཞེས་དང་། དེའི་རབ་དབྱེ་ཡང་དེ་ཉིད་དུ། མདོར་ན་རྣམ་པ་གསུམ་སྟེ་དབང་པོ་ཡོངས་སུ་སྨིན་པ་དང་། དགེ་བའི་རྩ་བ་ཡོངས་སུ་སྨིན་པ་དང་། ཤེས་པ་ཡོངས་སུ་སྨིན་པའོ། །དེ་ལ་དབང་པོ་ཡོངས་སུ་སྨིན་པ་ནི། ཚེ་དང་མདོག་དང་རིགས་དང་དབང་ཕྱུག་ཕུན་སུམ་ཚོགས་པ་དང་། ཚིག་བཙུན་པ་དང་། དབང་ཆེ་བར་གྲགས་པ་དང་། མིར་གྱུར་པ་དང་། རིག་པའི་གནས་རྣམས་ལ་མཁས་པའོ། །དགེ་བའི་རྩ་བ་ཡོངས་སུ་སྨིན་པ་ནི། གང་རང་བཞིན་གྱིས་ཉོན་མོངས་པ་ཤས་ཆུང་བ་ལས་ན། རང་བཞིན་གྱིས་སྡིག་པ་མི་དགེ་བའི་ཆོས་ལ་སེམས་མི་འཇུག་ཅིང་། སྒྲིབ་པ་ཆུང་བ་དང་། རྟོག་པ་ཉུང་བ་དང་། དྲང་ཞིང་མཐུན་པར་འཛིན་པ་ཡིན་ནོ། །ཤེས་པ་ཡོངས་སུ་སྨིན་པ་ནི། དྲན་པ་དང་ལྡན་པ། ཡིད་གཞུངས་པ་དང་ལྡན་པ། ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་ཤིང་ལྷན་ཅིག་སྐྱེས་པའི་ཤེས་རབ་ཀྱིས་རང་གི་སེམས་ལ་ཡོད་པའི་ཉོན་མོངས་པ་སེལ་བའི་མཐུ་དང་ལྡན་པའོ། །ཡོངས་སུ་སྨིན་པར་བྱེད་པ་ནི། ཐེག་པ་གསུམ་གྱི་རིགས་ཅན་གྱི་གང་ཟག་རྣམས་སོ་སོའི་ཐེག་པའི་ཆོས་རྣམས་དང་པོ་ཉན་པ་དང་། དེ་ནས་བསམ་པ་དང་། སྒོམ་པ་ལ་སོགས་པའི་རིམ་པས་ཁད་ཀྱིས་ཉོན་མོངས་པ་དང་། ཤེས་བྱའི་སྒྲིབ་པ་སྤོང་དུ་བཙུད་དེ་རང་རང་གི་འབྲས་བུ་ལ་འགོད་པའོ། །ཞེས་གསུངས་པས། དེ་དག་གི་ལམ་ཡང་ཡོངས་སུ་སྨིན་པར་བྱེད་པ་ཞེས་གང་གསུངས་པ་དེ་ཡིན་ནོ། །འོ་ན་འདིར་གང་ཟག་བཞིར་བཤད་པས་སྐྱེས་བུ་བཞིའི་ལམ་དུ་སོང་བ་མ་ཡིན་ནམ་སྙམ་ན། རང་རྒྱལ་གྱི་རིགས་ནི། ཕར་ཕྱིན་ལས། ཉན་ཐོས་དང་དེའི་ཕྱོགས་སུ་བསླན་པ་རང་སངས་རྒྱས་ཀྱང་སྟེ་ཞེས་འབྱུང་བས་དེ་གཉིས་ཀ་རང་ཉིད་ཞི་བའི་དབྱིངས་སུ་མྱ་ངན་ལས་འདའ་བར་འདོད་པ་མཚུངས་པས་གཅིག་ཏུ་མཛད་དོ། །མདོ་སྡེ་རྒྱན་ནས་རིགས་ཆད་དུ་གསུངས་པ་ནི་འདིར་ངན་འགྲོར་གཞོལ་བར་བཤད་པ་དང་གནད་གཅིག་སྟེ། རེ་ཞིག་ཐར་པའི་ལམ་དུ་བཀྲིར་མི་བཏུབ་པས་སོ། །ཕུགས་སེམས་ཅན་ཐམས་ཅད་སངས་རྒྱ་བའི་སྐལ་པ་ཅན་ཡིན་པས་གཏན་དུ་རིགས་ཆད་པ་ནི་མི་སྲིད་དོ། །འདིར་རིགས་མེད་དུ་གསུངས་པ་ནི་གཞན་ལས་མ་ངེས་པའི་རིགས་སུ་གསུངས་པ་ཉིད་ཡིན་ཏེ། དོན་ལ་སྐྱེས་བུ་ཆུང་ངུའོ། །དེ་ལྟར་སྐྱེས་བུ་གསུམ་གྱི་ལམ་དུ་གྲུབ་ནས། དེ་ཆོས་བཞིས་བཤད་པའི་ཚུལ་གང་ཞེ་ན། དེ་ལ་ཆོས་བཞི་ནི། ཆོས་ཆོས་སུ་འགྲོ་བ། ཆོས་ལམ་དུ་འགྲོ་བ། ལམ་འཁྲུལ་པ་སེལ་བ། འཁྲུལ་པ་ཡེ་ཤེས་སུ་འཆར་བའོ། །སྤྱིར་ཆོས་ཀྱི་སྒྲའི་དོན་ནི། རང་གི་མཚན་ཉིད་འཛིན་པ་ལ་བྱ་བ་ཡིན་ལ། འདིར་དེའི་ནང་ཚན། འཇིག་རྟེན་གྱི་ལུགས་བཟང་པོ་སྟེ། དེ་སྤྱོད་པ་ལ་ཆོས་ལ་སྤྱོད་པ་དང་། ལུགས་ངན་པ་ལ་སྤྱོད་པ་ལ་ཆོས་མིན་ལ་སྤྱོད་པར་གྲགས་པས་སོ། །དེ་ཆོས་སུ་འགྲོ་བའི་ཆོས་ནི། དེ་སྤྱད་པས་ཐར་པའི་སྣོད་དུ་རུང་བར་འགྱུར་པ་ལ་བྱ་བ་སྟེ། ཤེས་རབ་བརྒྱ་པར། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཞེས་པས་སོ། །ཆོས་ལམ་དུ་འགྲོ་བ་ཞེས་པའི་ཆོས་ནི། ཉན་རང་གི་ཉམས་ལེན། དེ་དག་ཀུན་འབྱུང་གི་གཉེན་པོར་འགྱུར་བས་ཏེ། དེ་བསྒོམས་པས་སྡུག་བསྔལ་སྤངས་ནས་མྱ་ངན་ལས་འདས་པར་འགྱུར་བའི་ཕྱིར་རོ། །ལམ་ནི་མྱ་ངན་ལས་འདས་པ་དེར་བགྲོད་པའི་ལམ་སྟེ། ཐར་པ་ཆ་མཐུན་ནས་བརྩམས་ཏེ་མི་སློབ་པར་གྱུར་གྱི་བར་དུའོ། །སྐྱེས་བུ་ཆུང་ངུའི་ལམ་ལ་ཅི་ཙམ་འབད་ཀྱང་ལམ་དེར་འཇུག་མི་ནུས། འོན་ཀྱང་དེས་ལམ་དེ་སྐྱེར་རུང་བའི་སྐལ་བ་ཅན་དུ་བྱས་ནས་གདོད་ལམ་དེ་ལ་འཇུག་དགོས་སོ། །ཞེས་ཤེས་པར་མཛད་པའི་ཕྱིར་ཡང་ངོ་། །ལམ་འཁྲུལ་པ་སེལ་བ་ཞེས་པའི་ལམ་ནི་སྤྱིར་ཐེག་ཆེན། དེར་རྒྱུ་འབྲས་གཉིས་སུ་ཡོད་པའི་རྒྱུའི་ཐེག་པའི་ཉམས་ལེན་ནོ། །དེས་འཁྲུལ་པ་ཐམས་ཅད་ཚེར་མ་འབྱིན་པ་བཞིན་དུ་དྲུང་ནས་འབྱིན་གྱི། ཉན་རང་གི་ལམ་གྱིས་ནི་ཉོན་མོངས་པའི་སྒྲིབ་པ་འམ་ཉོན་མོངས་པ་ཅན་གྱི་མུན་པ་འཇོམ་གྱི། ཤེས་བྱའི་སྒྲིབ་པ་འམ་ཉོན་མོངས་པ་ཅན་མ་ཡིན་པའི་མུན་པ་སྤོང་མི་ནུས་པས་དེ་དག་ལམ་ཡིན་ཀྱང་འཁྲུལ་པ་སེལ་བ་མ་ཡིན་ནོ། །དེའི་ཕྱིར་ཉན་ཐོས་སམ་རང་སངས་རྒྱས་སུ་བྱང་ཆུབ་པ་དེ་ཡང་རེ་ཞིག་ངལ་གསོ་བ་ཙམ་ཡིན་གྱི། མཐར་ཐེག་ཆེན་གྱི་ཉམས་ལེན་ལ་ངེས་པར་འཇུག་དགོས་སོ། །མཛོད་འགྲེལ་ལས། ཀུན་ལ་མུན་པ་བཅོམ་པར་ནི་འདོད་མོད་ཀྱི། གཏན་ནས་ནི་མ་ཡིན་ནོ་སོགས་ཀྱིས་སོ། །འཁྲུལ་པ་ཡེ་ཤེས་སུ་འཆར་བས་ནི་འབྲས་བུའི་ཐེག་པ་བཤད་པ་ཡིན་ཏེ། དེ་ཡང་སྔ་མས་ནི་འཁྲུལ་པ་དང་མ་འཁྲུལ་པ་གཉིས་སུ་ཕྱེ་ནས་མ་འཁྲུལ་པ་གཉེན་པོ། དེས་འཁྲུལ་པ་ཐམས་ཅད་འཇོམས་པར་འདོད་ལ། དེ་ཡང་འཁྲུལ་པའི་དུས་ན་མ་འཁྲུལ་པ་དངོས་སུ་མ་བྱུང་ལ་མ་འཁྲུལ་པའི་དུས་འཁྲུལ་པ་དངོས་སུ་མེད། དེའི་ས་བོན་ཡོད་པས་ས་བོན་ལ་གནོད་པ་བསྐྱལ་བས་དེས་འཁྲུལ་པ་སྐྱེད་མི་ནུས། དེ་ལ་དེས་དེ་བཅོམ་ཞེས་བཞག་པས་རྒྱུ་ལམ་དུ་བྱེད་པའམ་སྤང་བྱ་སྤོང་བའི་ལམ་ཟེར། ཕྱི་མས་ནི་འཁྲུལ་བ་བདོ་ཙ་ན་དེ་རང་བཞིན་ཤེས་ནས་འཁྲུལ་མེད་དུ་གཏན་ལ་ཕེབ་པས་ཡེ་ཤེས་སུ་ཤར་བ་ཏེ། ཐག་པ་སྦྲུལ་དུ་གཟུང་བདོ་བའི་དུས་ཐག་པར་མཐོང་བ་དང་སྦྲུལ་འཛིན་གར་སོང་མེད་པ་དུས་མཉམ་པ་བཞིན་ནོ། །དེས་འདི་ལ་འཁྲུལ་པ་སྤང་རྒྱུ་མེད། གཉེན་པོ་ལོགས་སུ་རྟེན་རྒྱུ་མེད་པས་རང་བཞིན་ཡོངས་ཤེས་ཀྱི་ཐ་སྙད་བྱས། རྒྱུ་འབྲས་ལྷུན་གྲུབ་ཏུ་སྤྱོད་པའི་ཕྱིར་འབྲས་བུའི་ཐེག་པའོ། །དེ་གཉིས་ཀ་སྐྱེས་བུ་ཆེན་པོའི་ལམ་སྟེ། སྐྱེས་བུ་ཆེན་པོ་རང་ལ་དབང་པོ་རྣོ་བ་དང་ཆེས་རྣོ་བའི་ཁྱད་པར་ལ་ལྟོས་ནས་སོ། །དེ་དག་རིམ་པ་བཞིན་འཇིག་རྟེན་ལྷ་མིའི་ཐེག་པ་དང་། ཉན་ཐོས་དང་རང་སངས་རྒྱས་ཀྱི་དང་། སངས་རྒྱས་ཀྱི་ཐེག་པ་ཞེས་བྱ། ཐེག་པའི་སྒྲའི་དོན་ནི་རྒྱུ་དང་འབྲས་བུའི་སྒོ་ནས་བཞག་པ་སྟེ། རྒྱུའི་དབང་དུ་བྱས་ནས་འདིས་བགྲོད་པས་ཐེག་པ་དེ་ཡང་བྱང་ཆུབ་རྣམ་པ་གསུམ་དུ་སེམས་བསྐྱེད་པ་སྒྲུབ་པ་དང་བཅས་པ། འབྲས་བུའི་དབང་དུ་བྱས་ནས་འདིར་བགྲོད་པས་ཐེག་པ་སྟེ། མྱ་ངན་ལས་འདའ་བ་རྣམ་པ་གསུམ། སྐྱེས་བུ་ཆུང་ངུའི་ཚེ་འདིས་འགྲོ་བའི་ཐེག་པར་བཞག་པ་ནི་བསོད་ནམས་སུ་ཉེ་བར་འགྲོ་བའི་འདུ་བྱེད་དང་མི་གཡོ་བར་ཉེ་བར་འགྲོ་བའི་འདུ་བྱེད་གཉིས་སོ། །འདིར་འགྲོ་བ་ནི་ལྷ་མིའོ། །འོ་ན་སྲོག་གཅོད་པ་ལ་སོགས་པ་བཅུས་ཀྱང་ངན་འགྲོར་འཕེན་པར་བྱེད་པས། ཐེག་པའི་སྒྲར་རུང་ན་ཅིའི་ཕྱིར་འཇིག་རྟེན་པའི་ཐེག་པར་དེ་མ་བསྡུས་ཞེ་ན། འདིར་ཐེག་པའི་དོན་ནི། རྒྱུས་བདེ་བ་སྐྱེད་པར་བྱེད་པ་དང་། འབྲས་བུའི་ཚེ་འཕགས་པའི་བདེན་པ་རྟོགས་པའི་སྣོད་དུ་རུང་བས་བྱེད་ཀྱི། དེ་དག་ནི་དེ་ལས་ལྡོག་པས་ཐེག་པར་མི་རུང་བ་ཡིན་ནོ། །དེ་ལྟ་བུའི་ཆོས་བཞི་པོ་དེ་རེ་རེའང་ལྟ་སྒོམ་སྤྱོད་པའི་ལམ་སྲང་དུ་སྲིལ་གྱིས་བཅུག་ནས་ཉམས་སུ་ལེན་དགོས་པ་ཡིན། དེ་ལྟར་དགོས་པའི་རྒྱུ་མཚན་ཡང་། དཔེར་ན་ལྟ་བ་མིག་རྒྱང་དང་འདྲ་བ་ཡིན། སྒོམ་པ་གོམ་པ་དོར་བ་དང་འདྲ་བ་ཡིན། སྤྱོད་པ་སྐྱེལ་མ་དང་འདྲ་བ་ཡིན། འབྲས་བུ་འདོད་པར་སོན་པ་དང་འདྲ་བ་ཡིན་པས་ལྟ་བ་རྣམ་པར་དག་པ་ཅིག་བྱུང་ན་སྒོམ་པ་གོལ་འགྲིབ་ཀྱི་མཐར་ལྷུང་མི་སྲིད། སྒོམ་པ་རྣམ་པར་དག་པ་ཅིག་བྱུང་ན་སྤྱོད་པ་དེའི་རྗེས་སུ་འགྲོ་ངེས་པ་ཡིན་པས་རྣམ་པར་དག་པ་ཅིག་ཀ་འོང་བ་ཡིན། དེ་བྱུང་ན་རྒྱུ་ཚོགས་གྲངས་ཚང་བས་འབྲས་བུ་གང་བསྒྲུབས་བར་ཆད་མེད་པར་འབྱུང་ངེས་པ་ཡིན་ནོ། །དེ་ལྟ་བུའི་ལམ་འདི་ཡང་བཅོམ་ལྡན་འདས་བྱམས་པའི་སྔོན་གྱི་སྨོན་ལམ་ལས། ངན་འགྲོའི་ལམ་ནི་ཟློག་བགྱིད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པའི། །བྱང་ཆུབ་སེམས་ལ་ཕྱག་འཚལ་ལོ། །ཞེས་གསུངས། དོན་འདི་བསྟན་བཅོས་ཆེན་པོ་རྣམས་སུ་རྒྱས་པར་བཞུགས་ཀྱང་། ཇོ་བོ་རྗེ་ལྷ་ཅིག་བོད་དུ་ཕེབས། ལྷ་བྱང་ཆུབ་འོད་ཀྱིས་གསོལ་བ་བཏབ་པའི་ངོར་བྱང་ཆུབ་ལམ་སྒྲོན་མཛད་མན་སྐྱེས་བུ་གསུམ་གྱི་ལམ་རིམ་དུ་གྲགས་པའི་སྙིང་པོ་ཁོལ་དུ་ཕྱུང་བ་འདི་བྱུང་བ་ཡིན། ལམ་རིམ་དེར་དང་པོ་གཉིས་མདོ་ཙམ། ཕྱི་མ་རྒྱས་པར་བཤད་པས་དེང་སང་ཐེག་པ་ཆེན་པོའི་ལམ་རིམ་ཞིག་བཤད་ནས་དེ་སྐྱེས་བུ་གསུམ་ཀའི་ལམ་རིམ་དུ་འདོད་པ་མང་སྟེ་བགད་མོའི་གནས་སོ། །ལམ་རིམ་ཕྱི་མ་འབའ་ཞིག་རྒྱས་པར་བཤད་པ་ལ་ཆོས་ཀྱི་རྒྱལ་པོ་ཟླ་འོད་གཞོན་ནུས་བསྟན་བཅོས་ཐར་པ་རིན་པོ་ཆེའི་རྒྱན་མཛད། གསུམ་ཀ་སྟོན་པ་ལ་ལམ་མཆོག་རིན་པོ་ཆེའི་འཕྲེང་བ་འདི་མཛད་ཅིང་རྒྱས་བཤད་ཕལ་ཆེ་ཚོགས་ཆོས་སུ་གསུངས་པ་ལས་འཐོན། དེ་ལ་སྒོམ་པ་ཆེན་པོས་འགྲེལ་པ་ཉུང་ངུ་། ཕག་གྲུས་ཐེག་ཆེན་ལམ་རིམ་དེ་དག་ལ་བསྟེན་ནས་ལྷོ་ལ་ཡག་པ་བྱང་ཆུབ་དངོས་གྲུབ་ཀྱིས་ཆོས་བཞི་རྩ་འགྲེལ་ཆེ་བ་ཞིག་མཛད་པས་དེང་སང་གི་བཀའ་རྒྱུད་པ་བྱིང་། དེ་ཆོས་བཞིའི་གཞུང་ལུགས་འདིའི་རྩ་བར་འཛིན་ནོ། །དེས་ན་སངས་རྒྱས་ཀྱིས་གསུངས་པའི་ཆོས་ལ་མི་ལེགས་པ་དང་ནོར་ཆ་མི་སྲིད། ཐེག་པ་མཐོ་དམན་གྱི་རིམ་པ་བྱུང་བ་ཐམས་ཅད་གདུལ་བྱའི་དབང་པོའི་རིམ་པ་དང་སྦྱར་ནས་གསུངས་པ་ཡིན། དབང་པོ་དམན་པ་ལ་མངོན་མཐོའི་ཐེག་པ་བསྟན་པའི་དུས་སུ་དེ་ལ་བདེ་ཡང་དེ་ཁ་བདེ། ལེགས་ཀྱང་དེ་ཁ་ལེགས་པ་ཡིན། དེ་བཞིན་ཉན་རང་ཐེག་ཆེན་གཉིས་ལ་ཡང་མཚུངས་པས་རང་གི་གྲུབ་མཐའི་ཁ་བཟུང་ནས་གཞན་ལ་སྨད་དུ་མི་བཏུབ། སྨད་ན་ཉེས་དམིགས་ཆེ། མདོ་དང་བསྟུན་ན་ཆོས་སྤོང་གི་ལས་གསོག རྒྱུད་སྡེ་དང་བསྟུན་ན་རང་ངམ་གཞན་གྱི་གྲུབ་མཐའ་ལ་སྨད་པའི་ཉེས་པའང་འོང་། འོ་ན་གྲུབ་མཐའ་གོང་མས་འོག་མ་སུན་ཕྱུང་བ་ཡང་དེར་མི་ཐལ་ལམ་ཞེ་ན། དེ་ཐེག་པ་འོག་མ་ལ་གནས་པའི་གང་ཟག་དེ་གོང་མ་ལ་འཇུག་པའི་ཆེད་དུ་ཡིན་པས་དེ་ལྟ་བུ་ཉེས་པ་མེད་པའི་ཁར་ལེགས་པར་བྱས་པ་ཡིན་ནོ། །གསུམ་པ་ཚིག་དོན་ལ། ཆོས་ཆོས་སུ་འགྲོ་བ། ཆོས་ལམ་དུ་འགྲོ་བ། ལམ་འཁྲུལ་པ་སེལ་བ། འཁྲུལ་པ་ཡེ་ཤེས་སུ་འཆར་བ་བཞི་ལས་དང་པོ་ལ། འདིས་འགྲོ་བ་ལྷ་མིའི་ཆོས་ལུགས། འདིར་བགྲོད་པ་མངོན་མཐོའི་ཐེག་པ་བཤད་པ་གཉིས་ལས། དང་པོ་ལ། འཇིག་རྟེན་པའི་ཡང་དག་པའི་ལྟ་བ། ལས་འབྲས་སྒོམ་པ། དགེ་སྒྲུབ་སྡིག་སྤོང་གི་སྤྱོད་པ་གསུམ་ལས། དང་པོ་ནི། ཡང་དག་ལྟ་བ། དེ་ཡང་ལས་དང་ལས་ཀྱི་འབྲས་བུ་དང་དཀོན་མཆོག་དང་བདེན་པ་ལ་སོགས་པ་ཡོད་པར་ལྟ་བ་སྟེ། ལོག་པར་ལྟ་བ་ལས་ཟློག་པའི་ཕྱིར་ཡང་དག་པ་དང་། དེ་ཡང་ཚུ་རོལ་མཐོང་བ་དག་གིས་ཡིན་པས་འཇིག་རྟེན་པ་སྟེ། དེའི་ཕྱིར་འཇིག་རྟེན་པའི་ཡང་དག་པའི་ལྟ་བ་ཞེས་བྱའོ། །ལོག་པར་ལྟ་བ་གང་ཞེ་ན། སློབ་དཔོན་རྟ་དབྱངས་ཀྱིས། སྦྱིན་མེད་མཆོད་སྦྱིན་ཡོད་མིན་དང་། །འཇིག་རྟེན་ཕ་རོལ་ཡོད་མིན་ཞིང་། །དགེ་སྦྱོང་བྲམ་ཟེ་ལྷ་རྣམས་མེད། །རྫོགས་སངས་རྒྱས་དང་དགྲ་བཅོམ་དང་། །རང་སངས་རྒྱས་དང་ལེགས་སྤྱད་དང་། །ཉེས་པར་སྤྱད་པ་ཡོད་མིན་ཞེས། །བྱ་བ་ལོག་པར་རྟོག་པ་ཡིན། །ཞེས་སོ། །དེའི་ཕྱིར་སློབ་དཔོན་ཆེན་པོ་ཀླུ་སྒྲུབ་ཀྱིས། མེད་པ་པོ་ནི་ངན་འགྲོར་འགྲོ། །ཡོད་པ་པོ་ནི་བདེ་འགྲོར་འགྲོ། །ཞེས་གསུངས་པ་ཡིན་ནོ། །གཉིས་པ་ནི། ལས་འབྲས་སྒོམ། ལས་ནི་བསོད་ནམས་མ་ཡིན་པར་འགྲོ་བའི་འདུ་བྱེད་དང་། བསོད་ནམས་སུ་ཉེ་བར་འགྲོ་བའི། མི་གཡོ་བར་ཉེ་བར་འགྲོ་བའི་འདུ་བྱེད་ཏེ། བློ་གྲོས་མི་ཟད་པའི་མདོ་འགྲེལ་ལས། དེ་ལ་སྡིག་པའི་ལས་བྱེད་པ་ལ་མངོན་པར་ཆགས་པ་ཚེ་རབས་གཞན་དུ་ལས་ཀྱི་འབྲས་བུ་ལ་གཏི་མུག་པས་མེད་པར་ལྟ་བ་རྣམས་ནི་བསོད་ནམས་མ་ཡིན་པའི་ལས་མངོན་པར་འདུ་བྱེད་དོ། །མ་རིག་པས་རྨོངས་པར་གྱུར་བ་སྲིད་པ་དང་སྲིད་པའི་ལོངས་སྤྱོད་ལ་ཡོན་ཏན་དུ་ལྟ་ཞིང་བདེ་བར་འདུ་ཤེས་པ་རྣམས་ནི་བསོད་ནམས་ཀྱི་ལས་མངོན་པར་འདུ་བྱེད་དོ། །མ་རིག་པའི་རྐྱེན་གྱིས་སྙོམས་པར་འཇུག་པའི་རོ་ལ་ཆགས་པར་ལྟ་བས་སྲིད་པ་དང་ལྟ་བ་དང་། ང་རྒྱལ་ཤས་ཆེ་བའི་བསམ་གཏན་རྣམས་ནི་མི་གཡོ་བའི་ལས་མངོན་པར་འདུ་བྱེད་པ་ཞེས་སོ། །འབྲས་བུ་ནི་བསོད་ནམས་མ་ཡིན་པའི་ལས་ཀྱི་ལམ་གྱིས་འདོད་པའི་ཁམས་ཀྱི་ནང་ཚན་ངན་སོང་གསུམ་དུ་སྐྱེའོ། །བསོད་ནམས་ཀྱི་ལས་ཀྱིས་གཙོ་བོར་འདོད་པའི་ཁམས་ཀྱི་ལྷ་མིར་རོ། །མི་གཡོ་བས་ནི་གཟུགས་དང་གཟུགས་མེད་ཀྱི་ཁམས་སུ། ཕྱི་མ་འདི་ལ་མི་གཡོ་བ་ཞེས་པའང་། དེ་དག་གི་ལས་སེམས་རྩེ་གཅིག་པའི་མཚན་ཉིད་ལ་རྣམ་པར་རྟོག་པའི་རླུང་གིས་བསྐྱོད་པར་མི་ནུས་པས་མི་གཡོ་བ་ཞེས་སམ། ཡང་ན་ལས་གཞན་གཉིས་ཀྱི་འབྲས་བུ་རྐྱེན་གྱིས་གཞན་དུ་འགྱུར་བ་ཡོད་པ་ལྟར་འདི་ལ་མ་ཡིན་པར་རྣམ་པར་སྨིན་པ་གཡོ་བ་མེད་པས་སོ། །བསོད་ནམས་མ་ཡིན་པའི་ལས་གང་ཞེ་ན་མི་དགེ་བའི་ལས་ཀྱི་ལམ་ལུས་ཀྱི་སྒོ་ནས་སྲོག་གཅོད་པ་དང་མ་བྱིན་པར་ལེན་པ་དང་། ལོག་པར་གཡེམ་པ་གསུམ། ངག་གི་སྒོ་ནས་རྫུན་ཚིག་དང་། ཕྲ་མ་དང་། ཚིག་རྩུབ་དང་། ངག་འཁྱལ་བ་བཞི། ཡིད་ཀྱིས་སྒོ་ནས། ལོག་པར་ལྟ་བ། བརྣབ་སེམས། གནོད་སེམས་གསུམ་སྟེ་བཅུའོ། །དེ་ལ་སྲོག་གཅོད་ནི། གཞི་སེམས་ཅན་ཡིན་པ། དེར་འདུ་ཤེས་པ། གསོད་པར་བསམ་པ། སྦྱོར་བ་བྱས་པ། དེ་ཉིད་ཀྱི་ཚེ་འམ་གཞན་གྱི་ཚེ་ཤི་བ་སྟེ་ཡན་ལག་ལྔ་ཚང་བ། མ་ཤི་བར་འགྱོད་ན་ན་སྨད། མྱོས་པ་དང་། སེམས་འཁྲུགས་པ་དང་། ཚོར་བས་གཟིར་བ་ཉེས་མེད་དོ། །མ་བྱིན་ལེན་ནི། གཞན་གྱི་ཡིན་པ། གཞན་གྱིས་བདག་གིར་བྱས་པ། གཞན་གྱི་ཡིན་པར་འདུ་ཤེས་པ། བརྐུ་བར་བསམ་པ། བརྐུ་བའི་སྦྱོར་བ་ལ་ཞུགས་པ། གནས་ནས་སྤགས་པ་སྟེ་ཡན་ལག་དྲུག་ཚང་བའོ། །ན་སྨད་དང་ཉེས་མེད་འདྲ། ལོག་པར་གཡེམ་པ་ནི། ཡུལ་མ་ཡིན་པ། དུས་མ་ཡིན་པ། ཡན་ལག་མ་ཡིན་པ། བགྲོད་བྱ་མ་ཡིན་པ་བཞི། དེ་དག་གང་རུང་ལ་དེར་འདུ་ཤེས་པ་དང་། འཁྲིག་པའི་སྦྱོར་བ་བྱས་པ་དང་། རྗེས་སུ་མཐུན་པའི་ཚོར་བ་མྱོང་བ་གསུམ་སྟེ་ཡན་ལག་བདུན་དང་ལྡན་པ། དེ་ལ་ཡུལ་མ་ཡིན་པ་ནི། སློབ་དཔོན་ཆེན་པོ་རྟ་དབྱངས་ཀྱིས། དམ་ཆོས་མཆོད་རྟེན་སྐུ་གཟུགས་དང་། །བྱང་ཆུབ་སེམས་དཔའི་བཞུགས་གནས་སོགས། །མཁན་པོ་དང་ནི་སློབ་དཔོན་དང་། །ཕ་མ་དྲུང་ན་གནས་པ་ནི། །ཡུལ་མིན་དེ་རུ་མི་བྱའོ། །དང་། ཟླ་མཚན་འཛག་དང་སྦྲུམ་མ་དང་། །བུ་ཆུང་དང་བཅས་མི་མོས་དང་། །སྡུག་བསྔལ་ཡིད་མི་བདེ་སོགས་དང་། །ཡན་ལག་བརྒྱད་གནས་དུས་མིན་ཡིན། །དང་། ཡན་ལག་མ་ཡིན་པ་གང་ཞེ་ན། །ཁ་དང་བཤང་ལམ་བྱིན་པ་དང་། །བརླ་བསྡམས་ལག་པས་བསྐྱོད་པ་ཡིན། །དང་། གཞན་གཟུང་ཆོས་ཀྱི་རྒྱལ་མཚན་ལྡན། །རིགས་ཀྱིས་བསྲུངས་དང་རྒྱལ་མོར་གནས། །གཞན་གྱིས་བླངས་དང་སྨད་འཚོང་དང་། །ཉེ་དུ་དག་དང་འབྲེལ་བ་ནི། །དེ་དག་བགྲོད་བྱ་མིན་པ་ཡིན། །རྣམ་པ་དེ་དག་རྣམས་ལ་ནི། །རང་གི་ཆུང་མ་བརྟེན་པ་ཡང་། །འདོད་ལོག་སྤྱོད་པར་འགྱུར་བ་ཡིན། །ཞེས་གསུངས་སོ། །རྫུན་དུ་སྨྲ་བ་ནི། གཞི་གོ་ཞིང་རིག་པར་འགྱུར་བའི་མདུན་དུ། དངོས་པོ་མི་བདེན་པ། འདུ་ཤེས་བསྒྱུར་བ། རྫུན་དུ་སྨྲས་པ། དེས་གོ་ཞིང་རིག་པ་སྟེ་ཡན་ལག་ལྔའོ། །གཞན་དག་དབྱེ་ཕྱིར་ཕྲ་མ་ཡིན། །དེ་ལ་ཚིག་རྩུབ་གང་ཞེ་ན། །གཞན་གྱི་གནད་བསྣུན་བྱེད་པ་ཡི། །ཡིད་དུ་མི་འོང་ཚིག་སྨྲ་ཡིན། །དེ་ལ་འཁྱལ་པ་གང་ཞེ་ན། །འདོད་པས་ཉེ་བར་བླང་བ་དང་། །ཆགས་པ་ཡིས་ནི་ཉེར་བསྐྱེད་ནས། །འབྲེལ་མེད་སྨྲ་བ་འཁྱལ་པ་ཡིན། །དེ་ལ་བརྣབ་སེམས་གང་ཞེ་ན། །གཞན་གྱི་ནོར་དང་ལོངས་སྤྱོད་ལ། །མཆོག་ཏུ་མངོན་པར་ཆགས་པ་ཡིན། །གནོད་སེམས་ཞེས་བྱ་གང་ཞེ་ན། །སེམས་ཅན་རྣམས་ལ་སྡང་བ་ཡིས། །བརྡེག་དང་འཆིང་དང་གསོད་པ་སྟེ། །དེ་དག་སེམས་ཅན་ལ་བྱེད་པའོ། །ལོག་པར་ལྟ་བ་ནི་སྔར་བཤད་པ་ཉིད་དོ། །དེ་དག་ལ་ལྕི་བ་ནི། ཕ་ཡང་ཡིན། རང་སངས་རྒྱས་ཀྱང་ཡིན་པ་བསད་ན་སྲོག་གཅོད་ཀྱི་ནང་ན་ལྕི། དཀོན་མཆོག་གསུམ་གྱི་དཀོར་འཕྲོག་པ་མ་བྱིན་ལེན་གྱི། མ་ཡང་ཡིན་དགྲ་བཅོམ་པ་ཡང་ཡིན་པ་ལ་ཉལ་པོ་བྱས་ན་ལོག་གཡེམ་གྱི། དེ་བཞིན་གཤེགས་པ་ལ་སྐུར་འདེབས་རྫུན་གྱི། དགེ་འདུན་གྱི་དབྱེན་ཕྲ་མའི། འཕགས་པ་རྣམས་ལ་མི་སྙན་པ་བརྗོད་པ་ཚིག་རྩུབ་ཀྱིས། ཆོས་འདོད་པ་རྣམས་གཡེང་བར་བྱེད་པ་འཁྱལ་པའི། ཡང་དག་པར་སོང་བ་དང་ཡང་དག་པར་ཞུགས་པ་རྣམས་ཀྱི་རྙེད་པ་འཕྲོག་པར་སེམས་པ་བརྣབ་སེམས་ཀྱི། མཚམས་མེད་བྱེད་པར་སེམས་པ་གནོད་སེམས་ཀྱི། ལྟ་བ་མཆོག་ཏུ་འཛིན་པ་ནི་ལོག་ལྟའི་ནང་ནས་མ་རུངས་པ་སྟེ་ལྕི་ཤོས་སོ། །དེ་ཡང་རྒྱུན་དུ་སྤྱོད་པ་དང་ཉོན་མོངས་པ་དྲག་པོས་སྤྱོད་པ་དང་། སྟོབས་བཞིས་མི་བཤགས་པ་དང་། ཡོན་ཏན་དང་གཙོ་བོའི་གཞི་ལས་བྱུང་བ་དེ་དག་གང་དང་ལྡན་པ་ནི་ལྕི་བ་སྟེ། སློབ་དཔོན་ཆེན་པོ་ཀླུ་སྒྲུབ་ཀྱིས། རྟག་དང་མངོན་པར་ཞེན་དང་གཉེན་པོ་མེད། །ཡོན་ཏན་གཙོ་ལྡན་བཞི་ལས་བྱུང་བའི་ལས། །དགེ་དང་མི་དགེ་རྣམ་ལྔ་ཆེན་པོ་སྟེ། །ཞེས་སོ། །དེ་དག་ཀུན་སློང་ཉོན་མོངས་པ་གང་གིས་གང་རྫོགས་པར་བྱེད་ན། མཛོད་ལས། གསོད་དང་གནོད་སེམས་ཚིག་རྩུབ་ནི། །ཞེ་སྡང་གིས་ནི་མཐར་ཕྱིན་བྱེད། །ལོག་གཡེམ་བརྣབ་སེམས་མ་བྱིན་ལེན། །ཆགས་པ་ཡིས་ནི་མཐར་ཕྱིན་བྱེད། །ལོག་པར་ལྟ་བ་གཏི་མུག་གིས། །ལྷག་མ་གསུམ་གྱིས་རྫོགས་པར་འདོད། །ཅེས་སོ། །དེའི་འབྲས་བུ་ནི། འཕགས་པ་སྡོང་པོ་བཀོད་པའི་མདོ་ལས། སྲོག་གཅོད་པས་ནི་སེམས་ཅན་དམྱལ་བར་འཁྲིད་དོ། །བྱོལ་སོང་གི་སྐྱེ་གནས་སུ་འཁྲིད་དོ། །གཤིན་རྗེའི་འཇིག་རྟེན་དུ་འཁྲིད་དོ། །དེ་ནས་ཇི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་པ་ནི། འདི་ལྟ་སྟེ། ཚེ་ཐུང་བ་དང་ནད་མང་བའོ། །དེ་བཞིན་དུ་བཅུ་ཀ་ལ་སྦྱར་ཏེ་གསུངས་པའི། མ་བྱིན་པར་ལེན་པས་མིར་གྱུར་པའི་ཚེ་ལོངས་སྤྱོད་ཆུང་བ་དང་། ཐུན་མོང་གི་ལོངས་སྤྱོད་དུ་འགྱུར་རོ། །ལོག་པར་གཡེམ་པས་ནི། ལྷོད་པ་དང་བཅས་པའི་ཆུང་མ་དང་། གཡོག་འཁོར་མི་བསྲུན་པ། རྫུན་གྱིས་སྐུར་བ་མང་བ་དང་། གཞན་གྱིས་བསླུ་བ། ཕྲ་མས་གཡོག་མི་མཐུན་པ་དང་། གཡོག་ངན་པ། ཚིག་རྩུབ་ཀྱིས་ཡིད་དུ་མི་འོང་བའི་ཚིག་ཐོས་པ་དང་། འཐབ་མོའི་ཚིག་ཐོས་པ། ངག་འཁྱལ་བས་ཚིག་མི་བཙུན་པ་དང་། སྤོབས་པ་ངན་པ། བརྣབ་སེམས་ཀྱིས་ཆོག་མི་ཤེས་པ་དང་འདོད་པ་ཆེ་བ། གནོད་སེམས་ཀྱིས་གནོད་པར་གླགས་བལྟ་བ་དང་། ཕ་རོལ་གྱིས་མནར་བ། ལོག་ལྟས་ལྟ་བ་ངན་པར་ལྟུང་བ་དང་། གཡོ་རྒྱུ་ཅན་དུ་འགྱུར་བའོ། །ཞེས་བསྟན་པ་མདོ་ཙམ་རེ་རེ་ལ་ཡང་རྣམ་སྨིན་ཡ་ང་བ་བསམ་གྱིས་མི་ཁྱབ་པ་ཡོད་དོ། །བཙུན་པ་ཆོས་ལྡན་རབ་འབྱོར་དབྱངས་ཀྱིས་དྲན་པ་ཉེ་བར་བཞག་པའི་དོན་བསྡུས་པར། ཆགས་དང་གཏི་མུག་འཇིགས་དང་ཁྲོ། །མི་གང་མི་ནི་གསོད་པ་དང་། །གཞན་ཡང་སྐྱེ་གནས་གསོད་བྱེད་པ། །དེ་དག་ངེས་པར་ཡང་གསོས་འགྲོ། །དང་། ཕ་དང་མ་ནི་གྲོགས་དང་གཉེན། །བཤེས་གཉེན་ལ་ནི་འཁུ་བྱེད་དང་། །ཕྲ་མ་རྫུན་ནི་སྨྲ་བའི་མི། །ཐིག་ནག་དུ་ནི་འགྲོ་བར་འགྱུར། །དང་། ར་དང་ལུག་དང་ཝ་དག་དང་། །རི་བོང་བྱི་བ་རི་དྭགས་ཕག །གཞན་ཡང་གསོས་ནས་བསད་བྱ་བ། །ལུས་ཅན་བསྡུས་འཇོམས་འགྲོ་བར་འགྱུར། །དང་། འདིར་ནི་ལུས་ཅན་གང་དག་གི །ལུས་དང་ངག་ཡིད་ཉོན་མོངས་བྱེད། །གང་དག་ལྷད་འཇུག་གཞན་གཡོ་བྱེད། །མི་དེ་དག་ནི་ངུ་འབོད་འགྲོ། །གང་གིས་ལྷ་དང་བྲམ་ཟེ་དང་། །བླ་མའི་རྫས་ཕྲོགས་སྡུག་བསྔལ་བྱས། །གང་དག་གཏམས་པ་ཕྲོག་བྱེད་པ། །དེ་དག་ངུ་འབོད་ཆེན་པོར་འགྲོ། །ནགས་ལ་སོགས་པ་མེས་གཏོང་དང་། །ལས་དེ་དག་ལ་འཇུག་བྱེད་གང་། །སྐྱེས་བུ་དེ་ནི་མེ་འབར་བའི། །ཚ་བར་ངུ་ཞིང་བསྲེག་པར་སྣང་། །དང་། མེད་པར་ལྟ་བ་གང་ཞིག་གིས། །ཆོས་དང་ཆོས་མིན་ལོག་རྟོག་ཅིང་། །གཞན་དག་ལ་ནི་ཉོན་མོངས་བྱེད། །དེ་ནི་རབ་ཏུ་ཚ་བར་བསྲེག །དང་། ཡོན་ཏན་དག་ནི་ཆེ་བ་ལ། །གནོད་པ་དྲག་པོ་བྱས་པ་འམ། །བླ་མ་ཕ་མ་བསད་བྱས་ན། །ངེས་པར་བསྐལ་པར་མནར་མེད་འཚོད། །ཞེས་གཙོ་བོའི་གནས་དང་། གསོད་པར་དགའ་བས་གཡུལ་ངོར་གསོད། །སྡིག་ཅན་དེ་དག་སྡུག་བསྔལ་དང་། །ལྡན་པའི་རལ་གྲི་སེམས་ཅན་སྐྱེ། །གང་ཕྱིར་དེ་ཡི་སེན་མོ་ནི། །ལྕགས་བྱས་འབར་རྣོ་དེ་དག་གིས། །གཅིག་གིས་གཅིག་བསོད་གང་ཡིན་དེས། །རལ་གྲིའི་སེན་མོ་ཅན་དུ་བཤད། །བྱི་བོ་བྱེད་པ་གཤལ་མ་ལི། །ལྕགས་ཀྱི་རྩེ་མོ་རྣོན་པོ་འབར། །སོར་ནི་བཅུ་དྲུག་ཡོད་པ་ལ། །ངུ་ཞིང་སྟོབས་ཀྱིས་འཛེགས་པར་འགྱུར། །བུད་མེད་ཤིན་ཏུ་འཇིགས་འཇིགས་ལྟ། །མཆུ་རྣོན་ལུས་ཆེར་འབར་བ་ཡིས། །གཞན་གྱིས་བུད་མེད་འཕྲོག་པ་ལ། །འཇུས་ནས་ཟ་བ་ཁོ་ནར་འགྱུར། །བག་ཕབ་པ་ལ་གནོད་བྱེད་མི། །ནགས་ཚལ་རལ་གྲི་སོ་ཅན་དུ། །ནུབ་བྱས་ངུ་ཞིང་བྱ་རྒོད་ཁྱི། །འུག་པ་བྱ་རོག་ཟ་བར་འགྱུར། །གང་དག་གཞན་གྱིས་ནོར་འཕྲོག་པ། །དེ་དག་ལྕགས་ཀྱི་ཐོ་ལུམ་ནི། །ཚ་བ་དག་ཀྱང་ཟ་བ་དང་། །ཡང་དང་ཡང་དུ་ཟངས་བསྐོལ་འཐུང་། །རྟག་ཏུ་རྔོན་ལ་དགའ་བ་གང་། །ལོ་ནི་བྱེ་བར་ངུ་ཞིང་ཡང་། །ཁྱི་ནི་ལྕགས་ཀྱི་མཆེ་བ་ཅན། །མི་སྲུན་ཤིན་ཏུ་དབང་མེད་ཟ། །ཆུ་སྐྱེས་ཉ་ལ་སོགས་བསད་ན། །ཆུ་བོ་རབ་མེད་འབར་བ་ཡི། །ཟངས་ཀྱི་ཁུ་བའི་ཆུར་འགྲོ་ཞིང་། །མི་དེ་མེས་ཀྱང་སྲེག་པར་འགྱུར། །གང་ཞིག་རང་དོན་ཙམ་དམིགས་ནས། །ཆོས་དང་མི་ལྡན་གཤགས་འགྱེད་ན། །སེམས་ཅན་དམྱལ་བར་དེ་ངུ་ཞིང་། །འཁོར་ལོས་མངོན་པར་གཟིར་བར་འགྱུར། །འདི་ན་གང་གིས་གཟུགས་ཅན་ལ། །གནོད་པ་རྣམ་པ་མང་བྱས་ན། །དེ་དག་ཡུན་རིང་འཁོར་ལོ་དང་། །རི་དང་ཐོ་བ་འབར་བས་གཟིར། །གང་ཞིག་ཆོས་ཀྱི་སྟེགས་འཇིག་ཅིང་། །ཡང་དག་མ་ཡིན་ལམ་སྨྲ་བའི། །མི་དེ་དག་ནི་སྤུ་གྲིའི་སོ། །གཏམས་པའི་ལམ་དུ་འགྲོ་བར་འགྱུར། །སེན་མོར་ཤིག་ལ་སོགས་བཅོམ་ན། །དེ་དག་ལུས་ནི་ཆེར་གྱུར་ནས། །སྟོན་བརྒྱར་ཡང་དང་ཡང་དུ་ཞིང་། །བྲག་སྒོར་པོ་ཡིས་འཇོམས་པར་འགྱུར། །གང་ཞིག་བརཏལ་ཞུགས་བཟང་མནོས་ནས། །ལེགས་པར་བསྲུང་བར་མི་བྱེད་པ། །དེ་ནི་ངེས་པར་ཤ་དང་རུས། །འཇིགས་པའི་མེ་མ་མུར་དུ་བསྲེག །གང་དུ་འཚོ་བ་ལོག་པ་ནི། །ཅུང་ཟད་ཀྱིས་ཀྱང་འཚོ་བྱེད་པ། །དེ་ནི་སྐྱག་འཇིམ་ནུབ་གྱུར་ནས། །སྲིན་བུ་རྣམས་ཀྱིས་ཟ་བར་འགྱུར། །འབྲུ་ཡི་ནང་ན་འཁོད་པ་ཡི། །སྲོག་ཆགས་མཐོང་ནས་འཇོམས་པ་གང་། །དེ་ནི་ལྕགས་ཀྱི་གཏུན་ཤིང་གིས། །ཡང་དང་ཡང་དུ་བརྡུང་བར་འགྱུར། །ཤིན་ཏུ་ཁྲོ་ཞིང་གཏུམ་པ་དང་། །གཡོ་བྱེད་རྫུན་དུ་སྨྲ་བ་དང་། །གཞན་ལ་གནོད་བྱེད་དགའ་བ་ནི། །གཤིན་རྗེ་སྲིན་པོར་སྐྱེ་བར་འགྱུར། །དང་། སློབ་སྤྲིང་ལས། ལྷགས་པ་དཔེ་མེད་རུས་པ་ལ་ཡང་ཐིམ་པ་ཡིས། །ལུས་སྦྲེབས་འདར་ཞིང་བསྒུར་ནས་གུམ་གུམ་པར་འདུག་པ། །ཆུ་བུར་བརྒྱ་བྱུང་བརྡོལ་བ་ལས་སྐྱེས་སྲོག་ཆགས་ཀྱིས། །རལ་གྲིས་དབད་ནས་ཞག་དང་ཆུ་སེར་རྐང་བཅས་འཛག །དཀོས་ཐག་སོ་འཐམ་སྐྲ་དང་སྤུ་རྣམས་གཡེང་གྱུར་པ། །མིག་དང་རྣ་བ་ལྐོག་མ་གནོད་པས་ཀུན་གཟིར་ཞིང་། །ལུས་དང་སེམས་ཀྱི་བར་དག་རབ་ཏུ་སློང་གྱུར་ནས། །གྲང་བའི་དམྱལ་བར་གནས་ཤིང་ཤིན་ཏུ་འོ་དོད་འབོད། །ཅེས་གསུངས། བྱོལ་སོང་གི་སྐྱེ་གནས་ཀྱང་། བཤེས་སྤྲིང་ལས། དུད་འགྲོའི་སྐྱེ་གནས་ན་ཡང་བསད་པ་དང་། །བཅིང་དང་བརྡེག་དང་སྡུག་བསྔལ་སྣ་ཚོགས་དང་། །ཞི་གྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། །ཁ་ཅིག་མུ་ཏིག་བལ་དང་རུས་པ་ཁྲག །ཤ་དང་ལྤགས་པའི་ཆེད་དུ་ཤི་བར་འགྱུར། །དབང་མེད་གཞན་དག་རྡོག་པ་ལག་པ་དང་། །ལྕགས་དང་ལྕགས་ཀྱུ་བཏབ་པས་བཏབ་སྟེ་བཀོལ། །ཞེས་དང་། གཤིན་རྗེའི་འཇིག་རྟེན་ནི། སློབ་སྤྲིངས་ལས། ཁབ་མིག་ཙམ་གྱི་ཁ་ལ་དཔག་ཚད་མང་འཇིགས་པའི། །ལྟོ་ཅན་ཉམ་ཐག་རྒྱ་མཚོ་ཆེན་པོའི་ཆུ་འཐུངས་ཀྱང་། །མགུལ་ཕུག་ཡངས་པ་ཉིད་དུ་ཕྱིན་པར་མ་གྱུར་པས། །ཁ་ཡི་དུག་གིས་ཆུ་ཡི་ཐིགས་པའང་བསྐམ་པར་འགྱུར། །ཞེས་སྐོམ་པས་རྒྱང་རིང་པོ་ནས་ཆུ་ཀླུང་ཆེན་པོ་མཐོང་སྟེ་དེའི་དྲུང་དུ་བསྙེགས་པ་ན་མེད་པར་འགྱུར་པ་འམ། རྣག་ཁྲག་དང་སྐྲ་ཤད་སོགས་སུ་འགྱུར་བ་དང་། ཁ་ཡི་དུག་གིས་ཆུའི་ཐིགས་པའང་མ་ལུས་པར་བསྐམས་པ་དང་། ནགས་ཀླུང་ཉམས་དགའ་བ་དག་ཏུ་ཕྱིན་ན་ནགས་ཚལ་མེས་བསྲེགས་པ་དང་། བསིལ་བར་འདོད་ནས་གངས་ཅན་དུ་ཕྱིན་ཡང་དེ་བྱེ་ཚན་གྱི་ཁུ་བ་རླུང་དམར་གྱིས་འཚུབས་པ་དང་། ཆར་སྤྲིན་ལས་ལྕགས་མདའི་ཆར་པ་དུད་པ་འཐུལ་ཞིང་མེ་མདག་དང་མེའི་ཚ་ཚ་རྡོ་རྗེ་ཕ་བོང་རྣམས་ལུས་ལ་འབབ་པ་དང་། ཚ་བས་ཉེན་པའི་དུས་ཟླ་བའི་འོད་ལ་སོགས་པ། གཞན་ལ་བསིལ་བར་འགྱུར་བ་དེ་ཐམས་ཅད་དེ་ལ་ཚ་བར་འགྱུར་བ་དང་། གྲང་བའི་དུས་ཉི་མ་དང་མེ་ཡང་གྲང་བའི་རེག་པར་སྣང་བས། སློབ་སྤྲིངས་ལས། འདི་ལ་སྣ་ཚོགས་འདི་ཀུན་ཕྱིན་ཅི་ལོག་ཏུ་སྣང་། །དེ་ལྟར་ངན་སོང་ནས་འཐོན་ནས་ཀྱང་ལྐུགས་པ་དང་། ཀླ་ཀློ་ལ་སོགས་པར་སྐྱེས་ནས་ཡུན་རིང་པོར་དལ་འབྱོར་གྱི་མི་ལུས་མི་འཐོབ་སྟེ། དེར། བརྒྱ་ལ་སྡིག་ནས་དམྱལ་བ་དག་ལས་ཐར་ན་ཡང་། །འཇིག་རྟེན་འགྲོ་བ་མཐའ་ཡས་བྱེ་བ་ཆེས་རྣམས་སུ། །མི་ཡི་དངོས་པོ་ཤིན་ཏུ་རྙེད་པར་དཀའ་བ་ཉིད། །གལ་ཏེ་ཀླ་ཀློ་དམྱལ་བའི་སྲུང་དང་སྤྱོད་མཚུངས་སམ། །ཞེས་གསུངས་པ་ཉིད་དོ། །དགེ་བའི་ལས་གང་ཞེ་ན། ཆོས་ལྡན་རབ་འབྱོར་དབྱངས་ཀྱིས། དགེ་བ་བཅུ་པོ་འདི་དག་ནི་མངོན་པར་མཐོ་བ་དང་། ངེས་པར་ལེགས་པ་ཐམས་ཅད་ཀྱི་རྒྱུ་ཡིན་པས་ན་སངས་རྒྱས་ཀྱི་སློབ་མ་དག་གིས་འདི་ལྟར་བསླབ་པར་བྱའོ། །དེ་ལ་དགེ་བ་བཅུ་གང་ཞེ་ན་ལུས་ཀྱི་ལས་ནི་རྣམ་གསུམ་སྟེ། སྲོག་མི་གཅོད་པ་དང་། མ་བྱིན་པར་མི་ལེན་པ་དང་། འདོད་པས་ལོག་པར་མི་གཡེམ་པའོ། །ངག་གི་ལས་ནི་རྣམ་པ་བཞི་སྟེ། རྫུན་མི་སྨྲ་བ་དང་། ཕྲ་མ་མི་སྨྲ་བ་དང་། ཚིག་རྩུབ་མོ་མི་སྨྲ་བ་དང་། ཚིག་འཁྱལ་པ་མི་སྨྲ་བའོ། །ཡིད་ཀྱི་ལས་ནི་རྣམ་པ་གསུམ་སྟེ། བརྣབ་སེམས་སྤང་བ་དང་། གནོད་སེམས་སྤང་བ་དང་། ལོག་པར་ལྟ་བ་སྤང་བའོ། །དེ་ཡང་མི་དགེ་བ་བཅུ་སྤངས་པ་ནི་དགེ་བ་བཅུ་ཡིན་པས་ཞེས་གསུངས་པའོ། །དེ་དག་ནི་གནོད་པ་ལས་ཟློག་པའི་ཆ་ནས་ཡིན་ལ་ཕན་པ་སྒྲུབ་པའི་ཆ་ནས་བསོད་ནམས་སུ་ཉེ་བར་འགྲོ་བའི་འདུ་བྱེད་ནི། དབུ་མ་འཇུག་པར། སྦྱིན་སོགས་ཆོས་གསུམ་འདི་དག་ཕལ་མོ་ཆེ། །བདེ་བར་གཤེགས་པས་ཁྱིམ་པ་རྣམས་ལ་བསྔགས། །བསོད་ནམས་ཞེས་བྱའི་ཚོགས་ཀྱང་དེ་དག་ཉིད། །ཅེས་གསུངས་ལ། འགྲོ་བ་འདི་ཀུན་བདེ་བ་མངོན་འདོད་ཅིང་། །མི་རྣམས་བདེ་བའང་ལོངས་སྤྱོད་མེད་མིན་ལ། །ལོངས་སྤྱོད་ཀྱང་ནི་སྦྱིན་ལས་བྱུང་མཁྱེན་ནས། །ཐུབ་པས་དང་པོར་སྦྱིན་པའི་གཏམ་མཛད་དོ། །ཞེས་དང་པོར་སྦྱིན་པ་བསྔགས་པ་དང་། མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད་ཅེས་ཚུལ་ཁྲིམས་དང་། ཤེས་རབ་བརྒྱ་པར། གང་ལ་བཟོད་པའི་རང་བཞིན་ཆུ། །ཁྲོ་བོའི་མེ་ནི་ཞི་བྱེད་པའི། །འདུལ་བའི་ཐབས་ཀྱི་མཆོག་ཡོད་པ། །དེ་ལ་དགྲ་རྣམས་ག་ལ་སྡང་། །ཞེས་དང་། ཕྱིར་རྗེས་སུ་ནི་ལྟ་བ་དང་། །བག་ཡོད་ཁོང་ཁྲོ་མེད་པ་དང་། །བརྩོན་འགྲུས་བརྟན་ཞིང་མི་གཡེལ་བའི། །མི་ལ་དཔལ་མགོན་ཉེ་བར་གནས། །དང་། མཐོང་དང་མ་མཐོང་ཡོན་ཏན་འདི། །ཀུན་གྱི་རྩ་བ་ཤེས་རབ་ཡིན། །སོགས་རྒྱས་པར་བཤད་དོ། །དེ་ལ་ཚུལ་ཁྲིམས་ནི་གནས་འཇོག་གི་མདོར་འཕགས་པ་ཀ་ཏྱ་ཡ་ནས་ཉི་ཚེ་བའི་ཚུལ་ཁྲིམས་སྲུང་བཅུག་པར་བཤད་པ་དང་། འདུལ་བ་ལས་ཉིན་གཅིག་པའི་ཁྲིམས་བསྙེན་གནས་ཡན་ལག་བརྒྱད་པ། དེ་ནས་ཉེས་པ་སྤོང་ནུས་འདོད་པ་སྤོང་མི་ནུས་པའི་དབང་དུ་མཛད་ནས་ལོག་གཡེམ་སོགས་སྤོང་བའི་ཡོངས་རྫོགས་དགེ་བསྙེན། སྡོམ་བརྒྱད་ལས་གོ་མིའི་དགེ་བསྙེན། ཚངས་སྤྱོད་དགེ་བསྙེན། ཡོངས་རྫོགས་དགེ་བསྙེན། ཕལ་ཆེར་སྤྱོད་པའི་དགེ་བསྙེན། སྣ་འགའ་སྤྱོད་པའི་དགེ་བསྙེན། སྣ་གཅིག་སྤྱོད་པའི་དགེ་བསྙེན། སྐྱབས་སུ་འཛིན་པའི་དགེ་བསྙེན་བརྒྱད། དེ་དག་ལ་ཁྱིམ་པའི་ཕྱོགས་ཀྱི་སྡོམ་པ་ཞེས་གསུངས་སོ། །དེ་ཡང་སྐྱེས་བུ་ཆུང་ངུའི་ཆུང་ངུས། ཡན་ལག་བརྒྱད་པའི་ཁྲིམས་ཙམ་ཡང་སྲུང་མི་ནུས། དེའི་ཚེ་བར་མའི་ཚུལ་ཁྲིམས་ཁོ་ན་ལ་སློབ་པར་བྱེད་ལ་དེས་མཐོ་རིས་སུ་འགྲོ་བ་ཡིན་ནོ། །དེ་ཙམ་གྱིས་སོ་ཐར་མུ་སྟེགས་བྱེད་ལ་ཡང་ཡོད་པ་ཡིན། བར་མ་ཞེས་པའི་སྒྲ། སྡོམ་པ་དང་སྡོམ་མིན་གྱི་ལས་གར་ཡང་བཞག་ཏུ་མེད་པས་བར་མ་ཞེས་བྱའོ། །དེས་ན་སྲོག་མི་གཅོད་པ་ལ་སོགས་པ་ཙམ་གྱིས་དེ་འགྲུབ་ལ། སྲོག་གཅོད་པ་ཡིད་ཀྱིས་སྤངས་ཏེ། ལུས་ངག་གི་དེ་ལས་སླར་ལྡོག་པ་ཡོངས་སུ་བླངས་པས་ནི་སྡོམ་པའི་ལས་སུ་འགྱུར་ལ། དེ་ལྟ་བུའི་སྡོམ་པའི་ལས་སུ་གཏོགས་པའི་སོ་སོ་ཐར་པ་ནི་ལེགས་སྨོན་ཙམ་གྱིས་མི་འགྲུབ། ངེས་པར་ལེགས་པའི་ཕྱིར་བླངས་པ་དགོས་ལ། དེ་ཡང་དཀོན་མཆོག་གསུམ་ལ་སྐྱབས་སུ་སོང་བ་ཁོ་ན་ལ་ཡོད་ཀྱིས། གཞན་ལ་མེད་པས། སྡོམ་པ་ཀུན་ལ་ཡོད་མེད་ཀྱི། །སྐྱབས་སུ་མ་སོང་བ་ལ་མེད། །ཅེས་གསུངས། སྐྱེས་བུ་ཆུང་ངུའི་འབྲིང་གི་དབང་དུ་མཛད་ནས། དང་པོར་གསོ་སྦྱོང་བྱིན་པར་བྱ། །དང་། སྐྱེས་བུ་ཆུང་ངུའི་ཆེན་པོའི་དབང་དུ་མཛད་ནས་ཡོངས་རྫོགས་ཚངས་སྤྱོད་གོ་མིའི་བར་བཤད་པ་ཡིན་ནོ། །ཚངས་པར་སྤྱོད་པ་མན་གྱིས། ཡན་ལག་བརྒྱད་པ་དེ། དུས་བཟང་པོ་ལ་སྲུང་ན་དེ་དག་གི་གསོ་སྦྱོང་དུ་འགྱུར་བ་ཡིན་ནོ། །དེའི་ཕྱིར་ཇི་སྲིད་འཚོ་དང་ཉིན་ཞག་ཏུ། །སྡོམ་པ་ཡང་དག་བླང་བར་བྱ། །དང་། སྤང་བྱ་ལྔ་བརྒྱད་ཅེས་གསུངས་སོ། །དེའི་འབྲས་བུ་ནི། མཐོ་རིས་ལྷ་དང་མི། དེ་ལས་ཆོས་ལྡན་རབ་འབྱོར་གྱིས། །རྟག་ཏུ་གཡོ་དང་སྒྱུ་སྤྱོད་ཅིང་། །སྡིག་པ་དག་ནི་མ་བྱས་ལ། །འཐབ་ལ་དགའ་ཞིང་སྦྱིན་བྱེད་པ། །དེ་ནི་ལྷ་མིན་དབང་ཕྱུག་འགྱུར། །དང་། །གང་ཞིག་བདག་བདེ་མི་འདོད་ཅིང་། །ཡོངས་སུ་གཟུང་ལ་མི་དགའ་བ། །དེ་ནི་གཟའ་རྣམས་དག་གི་མཆོག །རྒྱལ་ཆེན་བཞི་པ་ཉིད་དུ་འགྱུར། །ཕ་མ་ཕ་ཚན་གཙོ་བོ་ལ། །བཀུར་བྱས་གཏོང་ལྡན་བཟོད་པར་ལྡན། །འཐབ་མོ་ལ་ནི་དགའ་བ་གང་། །དེ་ནི་སུམ་ཅུ་རྩ་གསུམ་སྐྱེ། །རྩོད་ལ་མི་དགའ་འཐབ་མོ་ལ། །ཡིད་ནི་དགའ་བར་མི་བྱེད་ལ། །གཅིག་ཏུ་དགེ་ལ་བརྩོན་པ་ནི། །དེ་དག་འཐབ་བྲལ་ཉིད་དུ་འགྲོ། །ཐོས་པ་མང་དང་ཆོས་འཛིན་དང་། །ཤེས་རབ་ལྡན་ཞིང་ཐར་པ་འདོད། །ཡོན་ཏན་རྣམས་ལ་དགའ་བའི་མི། །དེ་དག་དགའ་ལྡན་ཉེ་བར་འགྲོ། །མི་གང་རང་ཉིད་དུལ་བ་ལ། །ཞུགས་ཤིང་ཚུལ་ཁྲིམས་འབོགས་པ་ལ། །སྤྲོ་བ་ཆེ་དང་ལྡན་པ་སྟེ། །གདོན་མི་ཟ་བར་འཕྲུལ་དགར་འགྲོ། །སེམས་ཅན་གང་ཞིག་དམན་མིན་མཆོག །སྦྱིན་དང་དུལ་དང་ཡང་དག་སྡོམ། །ཕུལ་གྱུར་ཡོན་ཏན་ལྷག་གྱུར་ཏེ། །ངེས་པར་གཞན་འཕྲུལ་དབང་བྱེད་འགྲོ། དང་། དཔའ་བོས། སངས་རྒྱས་སྐུ་གཟུགས་བཞེངས་གསོལ་བ། །དང་པོ་མྱ་ངན་སེལ་བར་བྱེད། །རྩོད་པ་ཀུན་སྤངས་མཐོང་ན་དགའ། །སྐལ་ལྡན་གཏེར་ཚོགས་དཔལ་དང་ལྡན། །ལུས་སྟོབས་ལྡན་ཞིང་སྙན་པ་དང་། །གཟི་བརྗིད་ལྡན་ཞིང་གཟུགས་མཛེས་པ། །གསུང་རབ་ཀུན་ལ་མཁས་གྱུར་ཅིང་། །དབང་པོའི་རྟ་ནི་ཐམས་ཅད་ཐུལ། །བློ་ལྡན་གཏོང་དང་ལྡན་པར་འགྱུར། །བཅོམ་ལྡན་སྐུ་གཟུགས་མཆོད་རྟེན་ལ། །ཕྲ་རབ་རྡུལ་ནི་ཇི་སྙེད་སོང་། །དེ་སྙེད་ས་འོག་ས་སྟེང་འདིར། །དེ་སྙེད་རྒྱལ་པོ་ངེས་པར་འགྱུར། །གཟུགས་དང་གཟུགས་མེད་ཏིང་འཛིན་འགྲུབ། །ཐམས་ཅད་བདེ་བར་མ་ལུས་སྤྱོད། །མཐའ་མར་སྐྱེ་རྒའི་རྒྱུད་སྤངས་ནས། །དེ་དག་བྱང་ཆུབ་གོ་འཕང་ཐོབ། །བདེ་གཤེགས་སྐུ་གཟུགས་བཞེངས་གསོལ་བ། །མཚན་བཟང་གིས་བརྒྱན་འཁོར་ལོས་བསྒྱུར། །གང་གིས་ཆོས་ཀྱི་སྦྱིན་བྱེད་ཅིང་། །དྲི་བ་དང་ནི་ཉན་པ་དང་། །རྟག་ཏུ་དེ་དག་སེམས་ཉིད་དང་། །གལ་ཏེ་ཡང་དག་སྒོམ་བྱེད་ན། །སྐྱེ་བ་དྲན་པ་རྟག་ཏུ་ཐོབ། །དང་། མེ་ཏོག་བཟང་པོས་དགེ་འདུན་ལ། །རབ་ཏུ་འཐོར་ཞིང་མཆོད་བྱེད་པ། །བརྒྱ་བྱིན་ལས་ལྷག་ལོངས་སྤྱོད་ལྡན། །སོགས་དང་། མདོར་ན། གང་ཡང་འཁོར་ལོས་སྒྱུར་བ་མཆོག །བུ་ནི་དཔའ་བོ་སྟོང་དང་ལྡན། །རྒྱ་མཚོའི་མཚམས་གྱི་ས་ལ་དབང་། །དེ་དག་བསོད་ནམས་རིན་པོ་ཆེའི། །འབྲས་བུ་ཡངས་པ་ཆེན་པོ་ཡིན། །སྣ་ཚོགས་པདྨའི་གདན་ལ་འདུག །ལྷ་དང་ལྷ་དབང་རྟག་ཕྱག་འཚལ། །བརྗིད་ཀྱིས་འཁོར་རྣམས་ཟིལ་གྱིས་གནོན། །ཚངས་པའི་འཇིག་རྟེན་སྣང་བྱེད་པ། །དེ་དག་ཉིད་ཀྱང་བསོད་ནམས་ལས། །གང་ལ་ལྷ་ཀླུ་ལྷ་མིན་གྲུབ། །དྲི་ཟ་གནོད་སྦྱིན་མི་འམ་ཅི། །མཆོག་ཏུ་གྱུར་བའི་ཚོགས་རྣམས་ཀྱིས། །རྟག་ཏུ་ལྷ་དབང་མཆོད་བྱེད་པ། །དེ་ནི་བསོད་ནམས་རིན་པོ་ཆེ། །འབྲས་བུ་ཡངས་པ་ཆེན་པོ་ཡིན། །དང་། འཇིག་རྟེན་ཕ་རོལ་འགྲོ་བ་ན། །བསོད་ནམས་གཅིག་པུ་མཆོག་ཡིན་ཏེ། །རྗེས་སུ་འགྲོ་ཞིང་བདེ་བ་འཆར། །བསོད་ནམས་གཞན་གྱིས་འཕྲོག་མི་ནུས། །སོགས་རྒྱ་ཆེའོ། །མཐོ་རིས་ཀྱི་ཡོན་ཏན་བདུན་གྱི་རྒྱུ་ཡང་། །སློབ་དཔོན་ཆེན་པོ་དབྱིག་གཉེན་གྱིས། གསོད་སར་ཆུད་པ་ལེགས་བཏང་དང་། །དེ་བཞིན་སྲོག་གི་ཕན་གདགས་ཤིང་། །སྲོག་ཆགས་འཚེ་བར་ལས་ཟློག་པས། །ཚེ་རིང་བ་ནི་ཐོབ་པར་འགྱུར། །ནད་པའི་བསྙེན་བཀུར་བྱས་སྨན་པ། །སྨན་ནི་རབ་ཏུ་སྦྱིན་པ་དང་། །སྲོག་ཆགས་བོང་བ་དབྱིག་སོགས་ཀྱིས། །འཚེ་བ་མེད་ལས་ནད་མེད་ཡིན། །ཁྲོ་བ་མེད་པ་བརྟེན་པ་དང་། །རྒྱན་སྦྱིན་པ་ཡིས་གཟུགས་བཟང་ཉིད། །ཕྲག་དོག་མེད་པའི་འབྲས་བུ་ནི། །སྐལ་བ་བཟང་པོར་ཡོངས་སུ་བཤད། །དམ་པ་མཆོད་ཅིང་བསྙེན་བཀུར་བྱས། །ང་རྒྱལ་སྤངས་པས་རིགས་མཐོར་འགྱུར། །སྦྱིན་བྱེད་བརྐུ་བ་ལས་ལྡོག་པས། །ལོངས་སྤྱོད་ཕུན་སུམ་ཚོགས་ཐོབ་འགྱུར། །དགེ་དང་སྡིག་པ་གང་ཡིན་ཞེས། །ཡང་དག་དྲི་ལ་བརྩོན་པ་དང་། །ཆོས་ཀྱི་བསྟན་བཅོས་སྦྱིན་པ་ཡིས། །བློ་གྲོས་རྒྱ་ཆེན་ཐོབ་པར་འགྱུར། །ཞེས་སོ། །མི་གཡོ་བའི་ལས་ནི། རྒྱུ་བསམ་གཏན་རྣམས་དང་སྙོམས་འཇུག་བཞི། དེའི་འབྲས་བུ་ནི། ཆོས་ལྡན་རབ་འབྱོར་གྱིས། ཚུལ་ཁྲིམས་གྱིས་ནི་མཐོ་རིས་ཐོབ། །བསམ་གཏན་གྱིས་ནི་ཁྱད་པར་འགྱུར། །ཡང་དག་ཇི་བཞིན་ཡོངས་ཤེས་པས། །མཐར་ནི་ཡང་སྲིད་མེད་པར་འགྱུར། །ཞེས་པས། འབྲས་བུ་བསམ་གཏན་པ་གཟུགས་ཁམས་ཀྱི་ལྷ་དང་། གཟུགས་མེད་ཀྱི་ལྷ་བཞིའོ། །ལས་དེ་དག་གི་རྣམ་སྨིན་འགྲུབ་པའི་ཚུལ། ཇོ་བོ་ཆེན་པོས། མཐོང་ལ་མྱོང་དང་སྐྱེས་ནས་མྱོང་། །གཞན་དུ་མྱོང་དང་མ་ངེས་པའི། །དཀར་དང་ནག་དང་འདྲེས་མའོ། །འཁོར་བའི་ལས་ནི་ལྕི་གང་དང་། །ཉེ་བ་གང་དང་གོམས་པ་གང་། །སྔོན་བྱས་གང་ཡིན་དེ་ལས་ནི། །སྔ་མ་སྔ་མ་རྣམ་སྨིན་འགྱུར། །ཞེས་མཐོང་བའི་ཆོས་འདི་ལ་སྨིན་པ་དང་། སྐྱེ་བ་ཕྱི་མ་ལ་སྨིན་པ་དང་། སྐྱེ་བ་མང་པོ་བརྒྱུད་དེ་སྨིན་པ་དང་། འགའ་ཞིག་མྱོང་བར་མ་ངེས་ཏེ། དགེ་བའི་ལས་སྟོབས་ཆེ་བས་སྡིག་པ་ཟིལ་གྱིས་གནོན་པ་དང་། སྡིག་པ་སྟོབས་ཆེ་བས་དགེ་བ་ཟིལ་གྱིས་གནོན་པ་དག་གོ །གསུམ་པ་དགེ་སྒྲུབ་སྡིག་སྤོང་གི་སྤྱོད་པ་ནི། དགེ་སྡིག་འཇུག་ལྡོག་སྤྱོད་པ་སྟེ། །ཞེས་པས། ལས་དང་། དེའི་འབྲས་བུ་བསམས་པས་ངན་སོང་གསུམ་དུ་སྐྱེས་ན་སྡུག་བསྔལ་འབའ་ཞིག་གིས་མནར་བར་འགྱུར་བ་ཤེས། དེའི་རྒྱུ་སྡིག་ཏོ་མི་དགེ་བའི་ཆོས་སུ་ཤེས་ནས་སྡིག་པ་སྤོང་། དེ་ཡང་བར་མའི་བསྙེན་གནས་དགེ་བསྙེན་ཡང་དག་པར་བླངས་ནས་བླངས་པ་གང་ཁ་ན་མ་ཐོ་བ་མེད་པར་བསྲུང་བའོ། །མཐོ་རིས་མཐོང་། དེའི་བདེ་བ་ཤེས་ནས། བདག་དེར་སྐྱེ་བར་སྨོན། དེའི་རྒྱུ་དགེ་བའི་རྩ་བ་ཡིན་པར་རིག་ནས་སྦྱིན་པ་ལ་སོགས་པ་བརྩོན་པར་བྱེད་པའོ། །འདི་ན་མི་རྟག་པ་སྒོམ་པ་དང་། འཁོར་བའི་ཉེས་དམིགས་སྒོམ་པ་སྐྱེས་བུ་ཆུང་ངུའི་ལམ་མོ་སྙམ་པ་ནི་མི་རིགས་ཏེ། འདུས་བྱས་མི་རྟག་པ་དང་། ཟག་བཅས་ཐམས་ཅད་སྡུག་བསྔལ་དུ་ལྟ་བ་ནི་འཁོར་བ་ལས་ལྡོག་པར་བྱེད་པའི་ཐབས་ཀྱི་གཙོ་བོ་ཡིན་ལ། སྐྱེས་བུ་ཆུང་ངུའི་དུས་ནི། ངན་སོང་གསུམ་ལ་འཇིགས་པར་ཟད་ཀྱི། མཐོ་རིས་ནི་བདེ་བར་ཤེས་ནས་དེ་དོན་དུ་གཉེར་བ་སྟེ། འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །ཞེས་གསུངས་པའི་ཕྱིར་རོ། །དེ་བས་ན་གང་ཟག་འདིས། ལས་དང་འབྲས་བུ་ཡོད་པར་བལྟས་པས། ལས་གང་ལས་འབྲས་བུ་གང་འབྱུང་བ་བསམ། དེས་རྣམ་སྨིན་སྡུག་བསྔལ་བསྐྱེད་པ་དེ་འདོར། བདེ་བ་བསྐྱེད་པ་དེ་ལེན་པས་ལས་རྒྱུ་འབྲས་ཉིད་ཉམས་ལེན་དུ་བྱེད་པ་ཡིན་ནོ། །གཉིས་པ་འདིར་བགྲོད་པ་མངོན་མཐོའི་ཐེག་པ་ནི། འབྲས་བུ་མཐོ་རིས་ལྷ་མི་གཉིས། །ཡོན་ཏན་བདུན་དང་ལྡན་པས་མཐོ་རིས་ཏེ། ཡོན་ཏན་བདུན་ནི་སློབ་དཔོན་དབྱིག་གཉེན་གྱིས། ཚེ་རིང་དེ་བཞིན་ནད་མེད་དང་། །གཟུགས་དང་སྐལ་བ་བཟང་དང་རིགས། །ནོར་དང་ཤེས་རབ་དག་དང་བདུན། །ཡོན་ཏན་མདོ་སྡེ་དག་ལས་གསུངས། །ཞེས་སོ། །དེ་ཡང་འདོད་གཟུགས་གཟུགས་མེད་ཀྱི་ལྷར་སྐྱེས་པ་དང་། མིར་གྱུར་པ་གཉིས་ལས། མིར་གྱུར་པ་མཆོག་སྟེ། སློབ་སྤྲིངས་ལས། གང་ཞིག་ཐོབ་ནས་སྐྱེ་བའི་རྒྱ་མཚོ་མཐར་འབྱིན་ཅིང་། །བྱང་ཆུབ་མཆོག་གི་ས་བོན་དགེ་བའང་འདེབས་བྱེད་པ། །ཡིད་བཞིན་ནོར་བུ་བས་ཀྱང་ཡོན་ཏན་ལྷག་པ་ཡི། །མི་ཉིད་ཅེས་གསུངས་པ་དང་། དལ་འབྱོར་གྱི་རྟེན་ལ་ལྷ་ལས་ལྷག་པའི་ལུས་ཞེས་བཞག་པས་སོ། །སྐྱེས་བུ་ཆུང་ངུ་བསྡུས་པ་ཡིན། དེ་དག་གིས་སྐྱེས་བུ་ཆུང་ངུའི་ལམ་མདོར་བསྡུས་ནས་བཤད་པ་སྟེ་སྐབས་དང་པོའོ།། །། གཉིས་པ་ཆོས་ལམ་དུ་འགྲོ་བ་ལ། ལྟ་བ་བདག་མེད་རྟོགས་པ། སྒོམ་པ་འཁོར་བའི་ཉེས་དམིགས་ཤེས་པ། སྤྱོད་པ་བསླབ་པ་གསུམ་ལ་ཞུགས་པ་གསུམ་ལས། དང་པོ་ནི། བདག་མེད་ལྟ་བ། བདག་ནི། མུ་སྟེགས་བྱེད་བློ་གྲོས་ངན་པ་ལོག་པར་རྟོག་པ་རྣམས་ཀྱིས། ལུས་ཀྱི་ཁོང་ན་བྱེད་པའི་བསྐྱེད་བདག་ཅེས་བྱ་བ་བྱེད་པ་པོ་དང་ཟ་བ་པོ་རྟག་པ་གཅིག་པུ་ཞིག་ཡོད་པར་བརྟག་ནས། དེ་ལ་བདག་དང་། བདག་གི་དང་། སེམས་ཅན་དང་། སྲོག་དང་། སྐྱེ་བ་པོ་དང་། གསོ་བ་དང་། སྐྱེས་བུ་དང་། གང་ཟག་དང་། ཤེད་ལས་སྐྱེས་དང་། བྱེད་པ་པོ་དང་། ཚོར་བ་པོ་དང་། རྟག་པར་ལྟ་བའི་སྒྲར་འདོགས་ཏེ། བདག་རྟག་པ་གཅིག་པུ་ཞིག་ཡོད་པས། ལས་གང་གིས་བྱས་པའི་འབྲས་བུ་ཡང་དེས་མྱོང་ངོ་། །གང་བཅིངས་པ་དེས་གྲོལ་ལོ། །གང་གིས་སྔོན་མཐོང་བ་དེས་སོ་སོར་ངོ་ཤེས་སོ། །གང་གིས་བཞག་པ་དེས་དྲན་ནོ། །གལ་ཏེ་བདག་རྟག་པ་དེ་གཅིག་མ་ཡིན་དུ་ཟིན་ན། བྱེད་པ་ཡང་གཞན། ཟ་བ་ཡང་གཞན་པས། གཞན་གྱིས་བྱས་པ་གཞན་གྱིས་མྱོང་བར་འགྱུར་ཞིང་། གཞན་བཅིངས་ལ་གཞན་གྲོལ་བ་ལ་སོགས་པའི་ཉེས་པར་འགྱུར་ཏེ། དེ་བས་ན་བདག་རྟག་པ་གཅིག་པུ་ཞིག་ཡོད་པར་འདོད་སྟེ། དབུ་མ་འཇུག་པར། ཟ་པོ་རྟག་དངོས་བྱེད་པོ་མིན་པའི་བདག །ཡོན་ཏན་བྱ་མེད་མུ་སྟེགས་རྣམས་ཀྱིས་བརྟགས། །དེ་དབྱེ་ཅུང་ཟད་ཅུང་ཟད་ལ་བརྟེན་ནས། །མུ་སྟེགས་ཅན་མང་ལུགས་ནི་ཐ་དད་གྱུར། །ཞེས་མུ་སྟེགས་པ་བདག་ཏུ་སྨྲ་བ་དག་གིས་འདོད་པའི་རྩ་བ་དེ་ཡིན། དེ་ལས་མང་དུ་གྱེས་པར་གསུངས་སོ། །དེ་ལ་ངའོ་སྙམ་དུ་འཛིན་པ་ནི་བདག་ཏུ་ལྟ་བའོ། །བདག་གིས་ཡོད་པར་འཛིན་པ་ནི་བདག་གིར་ལྟ་བའོ། །སེམས་ཅན་ལ་བདག་ཡིན་པར་འཛིན་ཅིང་སེམས་ཅན་གྱི་རྒྱུད་རྒྱུན་མི་འཆད་པར་འཛིན་པ་ནི་སེམས་ཅན་དུ་ལྟ་བའོ། །དེ་ཡོད་པར་བྱས་པར་འཛིན་པ་ནི་གསོ་བ་པོར་ལྟ་བའོ། །ཁོང་ན་སྐྱེས་བུ་རྩལ་དང་ལྡན་པ་ཞིག་ཡོད་པར་འཛིན་པ་ནི་སྐྱེས་བུར་ལྟ་བའོ། །ཡང་དང་ཡང་དུ་འགྲོ་བ་དག་ཏུ་འཛིན་པ་ནི་གང་ཟག་ཏུ་བལྟ་བའོ། །ལས་བྱས་པའི་འབྲས་བུ་ཡང་བདག་དེས་མྱོང་བར་འཛིན་པ་ནི་ཚོར་བ་པོར་ལྟ་བའོ། །བདག་དེ་ནི་ནམ་ཡང་མི་འཇིག་པར་འཛིན་པ་རྟག་པར་ལྟ་བའོ། །དེ་ནི་དེ་ལྟར་མི་རུང་སྟེ། རྟག་པ་ནི་མི་འགྱུར་བས་བྱེད་པ་པོ་དང་ཟ་བ་པོ་ཆོས་མི་མཐུན་པ་གཉིས་སུ་འགྱུར་མི་སྲིད་དོ། །རྟག་པ་ནི་གཅིག་པུ་ཡིན་པས་གང་གིས་བཅིངས་པ་དེ་ཉིད་ཀྱིས་གྲོལ་བ་ཞེས་བྱར་ཡང་གོང་མ་ལྟ་བུའི་སྐྱོན་ཡོད་པའི་སྟེང་དུ་སེམས་ཅན་ཐམས་ཅད་ནི་མི་རྟག་པར་མངོན་སུམ་དུ་སྣང་ལ། རྟག་པ་གཅིག་པུ་ནི་སུས་ཀྱང་མ་མཐོང་བས་མངོན་སུམ་དང་ཡང་འགལ་ལོ། །དེས་ཤེས་པ་དང་དྲན་པ་ཡང་དེ་བཞིན་དུ་སྦྱོར་རོ། །ཅི་སྟེ་བདག་རྟག་པ་གཅིག་པུ་དེ་ཁོ་ན་ཕུང་པོ་ལྔ་ལས་གཞན་མ་ཡིན་ན་ནི་ཕུང་པོ་བཞིན་དུ་སྐད་ཅིག་མར་འགྱུར་ལ། ཡང་ན་ཕུང་པོ་ཡང་བདག་བཞིན་དུ་རྟག་པར་འགྱུར་རོ། །ཕུང་པོ་བཞིན་དུ་ཐ་དད་དུ་མར་འགྱུར་བས་གཅིག་ཏུ་མི་རུང་བའི་སྐྱོན་དུ་ཡང་འགྱུར་ཏེ། དེ་ལྟར་ན་གང་ཟག་ལ་བདག་མེད་པ་ཞེས་བྱའོ། །ཞེས་སྔོན་གྱི་མཁན་པོ་རྣམས་འཆད་པ་དང་། སློབ་དཔོན་ཆེན་པོ་ཀླུ་སྒྲུབ་ཀྱི་བྱང་ཆུབ་སེམས་འགྲེལ་དུ། མུ་སྟེགས་རྣམས་ཀྱིས་གང་བརྟགས་པའི། །བདག་དེ་རིག་པས་དཔྱད་ན་འདིར། །ཕུང་པོ་ལས་ནི་གཞན་ཀུན་ཏུ། །སོགས་ཀྱིས་དགག་པ་བཞིན་ནོ། །སངས་རྒྱས་པ་ཐམས་ཅད་ཀྱིས་བཀག་པའི་བདག་ནི་དེ་ཡིན་ལ། དེས་ཕྱག་རྒྱ་བཞིར་ཆོས་ཐམས་ཅད་སྟོང་ཞིང་བདག་མེད་པ་ཞེས་འབྱུང་། འོ་ན་གནས་མ་བུ་པ་བདག་ཡོད་པར་འདོད་པ། དེ་ཇི་ལྟར་ཞེ་ན། བདག་རྟག་པ་དེ་ནི་དེའི་ཡང་དགག་བྱའི་གཙོ་བོ་ཡིན་ལ། དེ་ཉིད་རང་། དེ་ཁོ་ན་ཉིད་དང་དེ་ཉིད་དང་གཞན་དུ་བརྗོད་དུ་མེད་པའི་བདག་ཅེས་བྱ་བ་ཞིག་འཇོག་པར་བྱེད་དོ། །དེ་ལྟར་འཇོག་པའང་། སྔོན་རལ་པ་ཅན་དྲུག་ཅུས་དགེ་སྦྱོང་གོའུ་ཏ་མ་འདི་བདག་ཏུ་སྨྲ་བ་ཡིན་ནམ་མ་ཡིན། ཡིན་ན་བདག་ཅག་དེའི་རབ་ཏུ་བྱུང་བ་བྱ་སྟེ། དེས་བདག་ཅག་ཀྱང་འཇིག་རྟེན་ན་བཀུར་བ་དང་རྙེད་པ་དང་ལྡན་པར་འགྱུར་རོ་སྙམ་ནས་སྟོན་པའི་སྤྱན་སྔར་འོངས་ནས་དྲི་བ་བགྱིས་པ་ན། སྟོན་པས་དགོངས་པ་ཅན་གྱིས་དེ་ཁོ་ན་ཉིད་དང་དེ་ཉིད་དང་གཞན་དུ་བརྗོད་དུ་མེད་པའི་བདག་ཡོད་པར་གསུངས་པས་དེ་དག་མགུ་ནས་རབ་ཏུ་བྱུང་། གསུང་དེའི་ཕྱོགས་ལ་སྔོན་བདག་ཏུ་ལྟ་བ་ལ་བྱང་བའི་བག་ཆགས་ཅན་དག་མགུ་དེ་སྒྲ་ཇི་བཞིན་པར་བཟུང་ནས་དེ་སྐད་དུ་སྨྲ་བ་ཡིན་ནོ། །དེས་ན་མུ་སྟེགས་ཅན་རྟག་པར་ལྟ་བ་དག་ནི། བདག་ཏུ་སྨྲ་བ་དང་། སངས་རྒྱས་པ་རྣམས་བདག་མེད་པར་སྨྲ་བར་བསྟན་ལ། བྱེ་བྲག་ཏུ་སྨྲ་བ་ནས་དབུ་མ་པའི་བར་ཐ་སྙད་དུ་ལས་འབྲས་ཀྱི་རྟེན་དུ་བྱུང་བའི་བདག་ཁས་ལེན་པས། དེ་དག་སྤྱི་དང་གནས་མ་བུ་པའི་འདོད་པ་དེ་ཙམ་གྱིས་བདག་ཁས་བླངས་པས་བདག་ཏུ་སྨྲ་བར་མི་འགྱུར་དོན་ལ་དེ་ལེགས་པར་ཤེས་ན་བདག་མེད་པ་ཉིད་ངེས་པར་འགྱུར་བས་སོ། །དེས་ན་མུ་སྟེགས་ཅན་གྱིས་བཏགས་པ་དེ་ཐ་སྙད་དང་དོན་གཉིས་ཀར་མེད་པས། དབུ་མ་འཇུག་པ་ལས། མི་ཤེས་གཉིད་ཀྱིས་རབ་བསྐྱོད་མུ་སྟེགས་ཅན། །རྣམས་ཀྱིས་བདག་ཉིད་ཇི་བཞིན་བརྟགས་པ་དང་། །སྒྱུ་མ་སྨིག་སྒྱུ་སོགས་ལ་བརྟགས་པ་གང་། །དེ་དག་འཇིག་རྟེན་ལས་ཀྱང་ཡོད་མིན་ཉིད། །ཅེས་སོ། །དེ་ནི་གྲུབ་མཐའ་ངན་པས་བཏགས་པ་སྟེ་གློ་བུར་བའོ། །དེས་ན་འདི་ནི་ངར་འཛིན་རྟེན་དུའང་མི་རིགས་ལ་ཞེས་སོ། །ཐ་སྙད་དུ་ཁས་ལེན་པའི་བདག་དེ་ནི་འཇིག་ཚོགས་ལ་ལྟ་བའི་དམིགས་པ་ཡིན་ཏེ། བློ་གྲོས་མི་ཟད་པའི་མདོ་འགྲེལ་ལས། འཇིག་ཚོགས་ཞེས་བྱ་བ་ནི། གཟུགས་ལ་སོགས་པ་ལྔ་འཇིག་པའི་རང་བཞིན་ཅན་རྣམས་ཕུང་པོ་དང་ཚོགས་སུ་གྱུར་པ་ལ་བྱ་སྟེ། དེ་ལ་བདག་ཡོད་པར་ལྟ་བ་ནི་འཇིག་ཚོགས་ལ་ལྟ་བའོ། །ཞེས་པས། འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། ཞེས་འབྱུང་བའི་འཇོམས་རྒྱུ་དེ་ཡིན། ཉི་ཤུ་ཡང་གཟུགས་ལ་བདག་ཏུ་ལྟ་བ་དང་བདག་གཟུགས་དང་ལྡན་པར་དང་། གཟུགས་བདག་གི་ཡིན་པ་དང་། གཟུགས་ལ་བདག་གནས་པར་ལྟ་བ་དང་། དེ་བཞིན་དུ་ཚོར་བ་ལ་བཞི། འདུ་ཤེས་དང་འདུ་བྱེད་དང་རྣམ་པར་ཤེས་པའི་ཕུང་པོ་ལ་བཞི་ཏེ་ཉི་ཤུའོ། །དེ་ནི་ཐོག་མ་མེད་པའི་བག་ཆགས་ལས་བྱུང་བ་སྐྱེ་བས་ཐོབ་པའི་ཕྱིར་ལྷན་སྐྱེས་ཏེ། ལྷན་སྐྱེས་ཀྱི་ཤེས་རབ་ཅེས་བརྗོད་པ་བཞིན་ནོ། །དེས་ན་བློ་གྲོས་མི་ཟད་པའི་མདོ་འགྲེལ་ལས། གང་ཆོས་ཐམས་ཅད་ལ་གང་ཟག་གི་དངོས་པོ་མེད་དེ། གང་ཟག་གི་བདག་མེད་པར་ཡང་དག་པའི་ཡེ་ཤེས་ཀྱིས་ཁོང་དུ་ཆུད་པ་ནི་ཉན་ཐོས་རྣམས་ཀྱི་ཡང་དག་པའི་ལྟ་བ་ཞེས་བྱའོ། །ཞེས་གསུངས་པའི་བདག་ནི་གློ་བུར་བ་དང་ལྷན་སྐྱེས་གཉིས་ཀ་སྟེ། ཕྱི་མ་ནི། ཆོས་རྣམས་ལ་ཆོས་ཀྱི་མིག་རྡུལ་དང་བྲལ་བ་དྲི་མ་མེད་པ་ནམ་སྐྱེས་པ་ན་ཡང་བདག་མ་དམིགས་པས་འཇིག་ལྟ་སྤོང་ཞིང་། དེ་སྤངས་པས་ཉོན་མོངས་པ་དང་སྐྱོན་མ་ལུས་པ་ལས་གྲོལ་བའོ། །གྲོལ་བར་བྱེད་པ་དེ་ཁ་ཡེ་ཤེས་ཀྱི་རྡོ་རྗེའི་མིང་ཅན་ཏེ། དོན་ལ་བར་ཆད་མེད་པའི་ལམ་མོ། །དེས་ན་རྣམ་འགྲེལ་ལས། རྒྱུ་ཡི་ངོ་བོ་རྟོགས་པའི་ཕྱིར། །དེ་ཡི་མཐུན་ཕྱོགས་ཀྱང་དེས་འགྱུར། །བདག་དང་བདག་གིར་འཛིན་རྒྱས་པ། །འདུས་བྱས་སྤྱོད་ཡུལ་ཅན་ཆགས་ནི། །རྒྱུ་ཡིན་དེ་ཡི་གནོད་བྱེད་ནི། །བདག་མེད་མཐོང་བས་འགལ་བ་ཡིན། །ཞེས་སོ། །དེའི་ཕྱིར་བདག་མེད་སྒོམ་ཚུལ་ཡང་དེར། ལུང་དང་རིགས་པས་རྣམ་དཔྱད་པས། །སྡུག་བསྔལ་ཉིད་ཀྱི་ཁྱད་པར་གྱིས། །སྡུག་བསྔལ་རྒྱུད་དང་དེ་མི་རྟག །ལ་སོགས་རང་བཞིན་རྟོག་པར་མཛད། །ཅེས་དང་། བྱང་ཆུབ་སེམས་འགྲེལ་ལས། གང་གི་རྣམ་ཤེས་སྐད་ཅིག་མ། །དེ་ཡི་དེ་ནི་རྟག་མ་ཡིན། །མི་རྟག་པ་ཡི་སེམས་ཉིད་ནི། །སྟོང་པ་ཉིད་དང་འགལ་མི་འགྱུར། །མདོར་ན་སངས་རྒྱས་རྣམས་ཀྱི་སེམས། །མི་རྟག་ཉིད་དུ་བཞེད་གྱུར་ན། །དེ་དག་སེམས་དེ་སྟོང་ཉིད་དུ། །ཅི་ཡི་ཕྱིར་ན་བཞེད་མི་འགྱུར། །དང་། དེ་ཕྱིར་ཆོས་རྣམས་ཀུན་གྱི་གཞི། །གནས་མེད་སྒྱུ་མ་དང་མཚུངས་པའི། །ཞི་བ་སྲིད་པ་འཇོམས་བྱེད་པའི། །སྟོང་པ་ཉིད་འདི་རྟག་ཏུ་སྒོམ། །ཞེས་མི་རྟག་པ་དང་སྡུག་བསྔལ་ལ་སོགས་པར་གཏན་ལ་ཕབ་པ་ཉིད་ཀྱིས་རང་བཞིན་མེད་པ་གོ་ལ། དེ་ཁ་བདག་མེད་པ་འམ་སྟོང་པ་ཉིད་ཡིན་པས་དེ་ཡང་དེའི་སྒོམ་པའི་ཚུལ་ཅིག་ཡིན་པ་དང་། དེ་ལས་གཞན་བདག་མེད་སྙམ་སྒོམ་པ་ནི་བདག་སྒོམ་པ་སྟེ། བདག་མེད་ཀྱི་སྒོམ་གྱི་གོལ་ས་ཆེན་པོ་སྟེ། ལུང་འཕྲོར། སྐྱེ་མེད་ཞེས་དང་སྟོང་ཞེས་དང་། །བདག་མེད་ཅེས་པས་སྟོང་པ་ཉིད། །དམན་པའི་བདག་ཉིད་གང་སྒོམ་པ། །དེ་ནི་འདི་ན་བདག་སྒོམ་པའོ། །ཞེས་གསུངས། དེ་སྟོང་པ་ཉིད་དམ་བདག་མེད་པའི་སྒོམ་པར་མི་འགྲོ་བའི་གནད། དེ་མ་ཐག་ཏུ། དགེ་དང་མི་དགེའི་རྣམ་རྟོག་ནི། །རྒྱུན་ཆད་པ་ཡི་མཚན་ཉིད་ཅན། །སངས་རྒྱས་རྣམས་ཀྱི་སྟོང་ཉིད་གསུངས། །གཞན་ནི་སྟོང་པར་མི་བཞེད་དོ། །ཞེས་པ་སྟོང་པ་ཉིད་ནི་རྣམ་པར་རྟོག་པ་རྒྱུན་ཆད་པའི་མིང་སྟེ། སྔར་གྱི་སྒོམ་པ་ནི་མེད་པར་རྟོག་པ་ཉིད་དུ་ཟད་པས་སོ། །དེ་ཉིད་དུ། རྣམ་རྟོག་མེད་པ་སྟོང་ཉིད་ཡིན། །གང་ལ་རྣམ་རྟོག་སྣང་ཡོད་པ། །དེ་ལ་སྟོང་ཉིད་ག་ལ་ཡོད། །ཅེས་སོ། །ཞར་ལ། དམིགས་པ་དང་ནི་བྲལ་བའི་སེམས། །ནམ་མཁའི་མཚན་ཉིད་ལ་གནས་ཏེ། །ནམ་མཁའ་སྒོམ་པར་བྱེད་པ་འདི། །སྟོང་པ་ཉིད་ནི་སྒོམ་པར་བཞེད། །ཅེས་གསུངས་པས་དུས་གསུམ་འགོག་པ་དང་དམིགས་པ་དང་བྲལ་བར་སྒོམ་པ་ནི་སྟོང་ལྟ་ཧད་པོའོ་སྙམ་ནས་དེ་དགག་པ་ལྷུར་ལེན་པ་ལས། སངས་རྒྱ་བའི་ལམ་ལས་གོལ་དུ་གཞུག་པའི་ཐབས་གཞན་ཅི་ཞིག་ཡོད། ཇི་ལྟར་གོལ་དུ་འཇུག་ཁྱེར་དུས་དེར་ལུང་རིགས་ཀྱི་དཔྱད་པ་མེད་ན་འདུ་ཤེས་མེད་པ་དང་འགོག་པ་ཉིད་དུ་ལྷུང་ངོ་སྙམ་ནས་ལུང་རིགས་ཀྱི་བསམ་གཞིག་གཏོང་འཇུག་པའོ། །འདུ་ཤེས་མེད་པ་དང་འགོག་པའི་སྙོམས་འཇུག་ཏུ་འགྲོ་བ་ལ་བསམ་གཏན་གྱི་དངོས་གཞི་ཐོབ་དགོས་པ་མ་རིག་པས་ཐོས་པ་མ་དཔྱད་པའི་སྐྱོན་དང་། ལུང་རིགས་ཀྱི་དཔྱད་པས་ཆོས་ཉིད་རྟོགས་སོ་ཞེས་སྨྲ་བ་ལ་གནོད་བྱེད་དུ། ཇོ་བོ་རྗེ་ལྷ་གཅིག་གིས། མངོན་སུམ་དང་ནི་རྗེས་སུ་དཔག །སངས་རྒྱས་པ་ཡིས་དེ་གཉིས་གཟུང་། །གཉིས་པོས་སྟོང་ཉིད་རྟོགས་སོ་ཞེས། །ཚུ་རོལ་མཐོང་བའི་རྨོངས་པ་སྨྲ། །མུ་སྟེགས་ཉན་ཐོས་རྣམས་ཀྱིས་ཀྱང་། །ཆོས་ཉིད་རྟོགས་པར་ཐལ་བར་འགྱུར། །རྣམ་རིག་པས་ལྟ་སྨོས་ཅི་དགོས། །དབུ་མ་པ་ལ་མི་མཐུན་མེད། །དེས་ན་གྲུབ་མཐའ་ཐམས་ཅད་ཀྱང་། །ཚད་མས་གཞལ་ཕྱིར་མཐུན་པར་འགྱུར། །རྟོག་གེ་ཐམས་ཅད་མི་མཐུན་པས། །ཚད་མས་གཞལ་བའི་ཆོས་ཉིད་ཀྱང་། །མང་པོ་ཉིད་དུ་མི་འགྱུར་རམ། །མངོན་སུམ་རྗེས་དཔག་དགོས་པ་མེད། །མུ་སྟེགས་རྒོལ་བ་ཟློག་པའི་ཕྱིར། །མཁས་པ་རྣམས་ཀྱིས་བྱས་པ་ཡིན། །ལུང་ལས་ཀྱང་ནི་གསལ་པོ་རུ། །རྟོག་བཅས་རྟོག་པ་མེད་པ་ཡིས། །ཤེས་པ་གཉིས་ཀྱིས་མི་རྟོག་ཅེས། །དང་། བྱང་ཆུབ་སེམས་འགྲེལ་ལས། དེ་ལྟར་རྣལ་འབྱོར་པ་རྣམས་ཀྱིས། །སྟོང་པ་ཉིད་ནི་བསྒོམས་བྱས་ན། །གཞན་གྱི་དོན་ལ་དགའ་བའི་བློ། །འབྱུང་བ་ཉིད་དུ་ཐེ་ཚོམ་མེད། །ཅེས་པས་དམིགས་བྲལ་གྱི་ངང་ལ་གནས་པས་ལས་འབྲས་སྤངས་སོ་ཞེས་པའང་རིགས་པ་མ་ཡིན་ཏེ། དེ་ཉིད་དུ། ཀུན་རྫོབ་ལས་ནི་ལོགས་ཤིག་ན། །དེ་ཉིད་ཉེ་བར་མི་དམིགས་སོ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་སྟེ། །བྱས་པ་དང་ནི་མི་རྟག་བཞིན། །མེད་ན་མི་འབྱུང་ངེས་ཕྱིར་རོ། །ཞེས་གསུངས་པས་སོ། །དེས་ན། འཁོར་བའི་རྩ་བ་བདག་འཛིན་ལྷན་སྐྱེས་དང་། །དངོས་སུ་འགལ་བའི་བདག་མེད་མི་སྒོམ་པར། །དུས་གསུམ་འགོག་པ་ཡིད་བྱེད་ལྷུར་ལེན་པ། །སྒོམ་གྱི་གཟུགས་བརྙན་དུད་འགྲོའི་སྐྱེ་གནས་ཡིན། །དང་། སྟོང་ལྟ་ཧད་པོས་རྒྱུ་འབྲས་ཁྱད་དུ་གསོད། །ཅེས་སོགས་སྦྱར་བ་དག་ནོར་ས་ཆེན་པོར་འཁྱམས་པའོ། །དེ་དག་བདག་མེད་བཤད་ཚུལ་ལས་འཕྲོས་པ་ཡིན་གྱི་ཉན་ཐོས་རང་རྐྱང་གི་མ་ཡིན་ནོ། །དེ་བས་ན་བདག་མེད་གཏན་ལ་འབེབས་པ་ལ་དགག་བྱ་བདག་གི་དབྱེ་བ་ཕྱེད་པར་གྱིས་ཤིག་ཅེས་གདམས་ལ་རང་ལུགས་རིགས་པས་གཏན་ལ་འབེབས་པའི་དགག་བྱ་ནི་དང་པོ་ཡིན་ལ། ཞི་གནས་དང་མཚུངས་ལྡན་གྱི་ལྷག་མཐོང་གིས་འགོག་པ་ནི་ཕྱི་མའོ། །གཉིས་པ་ནི་མདོར་བསྟན། རྒྱས་པར་བཤད་པ་གཉིས་ལས། དང་པོ་ནི། ཉེས་དམིགས་སྒོམ་ཞེས་པས་འཁོར་བའི་སྐྱོན་བསྟན། རྒྱས་པར་བཤད་པ་ལ། དལ་འབྱོར་རྙེད་དཀའ་བ་བསམ་པ། འཆི་བ་མི་རྟག་པ་སྒོམ་པ། འཁོར་བ་སྡུག་བསྔལ་དུ་ལྟ་བ། མྱང་འདས་ཀྱི་ཕན་ཡོན་ལ་འདུན་པའོ། །དང་པོ་ནི། ཐོག་མ་མེད་པ་ནས་ཆུད་པའི་འཁོར་བ་འདིར་སྔར་མི་ཁོམ་པ་བརྒྱད་དུ་གནས་ལ་ད་རེས་མིའི་ལུས་མཆོག་ཏུ་གྱུར་པ་འདི་ལྟ་བུ་རྙེད་པ་ནི། རྒྱ་མཚོ་ཆེན་པོ་ལ་གཡོ་བའི་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཚུད་པ་ལྟར་དཀོན་པ་ཉིད་དོ། །མི་ཁོམ་པ་བརྒྱད་ནི། དམྱལ་བ་དང་། དུད་འགྲོ་དང་། ཡི་དྭགས་དང་། མཐའ་འཁོབ་ཏུ་སྐྱེས་པ་དང་། ལྷ་ཚེ་རིང་པོ་དང་། དབང་པོ་མ་ཚང་བ་དང་། ལོག་པར་ལྟ་བ་དང་། དེ་བཞིན་གཤེགས་པ་མི་འབྱུང་བར་སྐྱེས་པ་སྟེ། དེ་དག་སྡུག་བསྔལ་ལམ་བག་མེད་པས་དམ་པའི་ཆོས་ལ་སྤྱོད་པའི་སྐལ་བ་མེད་པས་ནི་མ་ཁོམ་པའོ། །དེ་བརྒྱད་ལས་ཟློག་པ་ནི། དམ་པའི་ཆོས་བྱེད་པར་ཁོམ་པའི་ཕྱིར་དལ་བ་ཞེས་བྱའོ། །འབྱོར་པ་ནི་རང་གི་འབྱོར་པ་དང་གཞན་གྱི་འབྱོར་པའོ། །དང་པོ་ལ་ལྔ་སྟེ། མིར་གྱུར་པ་དང་། ཡུལ་དབུས་སུ་སྐྱེས་པ་དང་། དབང་པོ་མ་ཚང་བ་མེད་པ་དང་། གནས་ལ་དད་པར་གྱུར་པ་དང་། ལས་ཀྱི་མཐའ་མ་ལོག་པའོ། །དེ་ལ་གནས་ཞེས་པ་དམ་པའི་ཆོས་འདུལ་བ་སྟེ། དེ་ནི་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་སྐྱེ་བའི་གནས་ཡིན་པའི་ཕྱིར་རོ། །དེ་བས་ན་དེ་ལ་དད་པ་ནི་གནས་ལ་དད་པའོ། །གཞན་གྱི་འབྱོར་པ་ཡང་ལྔ་སྟེ། སངས་རྒྱས་རྣམས་འབྱུང་བ་དང་། དམ་པའི་ཆོས་སྟོན་པ་དང་། ཆོས་བསྟན་པ་རྣམས་གནས་པ་དང་། བསྟན་པ་ལ་ཞུགས་པ་དང་གཞན་གྱི་ཕྱིར་རྗེས་སུ་སྙིང་བརྩེ་བའོ། །དེ་ལྟར་ཡང་སོ་སོ་ཐར་པ་ལས། སངས་རྒྱས་ཞེས་བྱའི་སྒྲ་འདི་ཡང་། །འཇིག་རྟེན་དག་ན་རབ་ཏུ་དཀོན། །མི་ཉིད་རྙེད་པ་ཤིན་ཏུ་དཀའ། །ཞེས་གསུངས་སོ། །དེ་ལྟ་བུའི་མིར་གྱུར་པ་ཐོབ་པ་ན། དེ་བཞིན་གཤེགས་པའམ་ཉན་ཐོས་དག་ལས་ལུང་ནོད་ཅིང་གནས་པར་བྱའོ། །དེ་བས་ན་འདི་སྐྱེ་བའི་ཉེས་དམིགས་སྒོམ་པའོ། །གཉིས་པ་ནི། འདུ་བྱེད་ཐམས་ཅད་མི་རྟག་པར་སྟོན་པ་སྟེ། རྒྱུ་རྐྱེན་གྱིས་བསྐྱེད་པའི་ཕུང་པོ་ཁམས་སྐྱེ་མཆེད་ཀྱི་ཆོས་ཐམས་ཅད་ནི་འདུ་བྱེད་ཐམས་ཅད་དོ། །དེ་དག་མི་རྟག་པ་རྣམ་པ་གཉིས་ཀྱིས་འཇིག་པར་ཤེས་པ་ནི་འདུ་བྱེད་ཐམས་ཅད་ལ་མི་རྟག་པར་རྟོག་པ་ཞེས་བྱའོ། །མི་རྟག་པ་རྣམ་པ་གཉིས་ནི། འཇིག་པའི་མི་རྟག་པ་དང་། སྐད་ཅིག་མས་འཇོམས་པའི་མི་རྟག་པའོ། །དང་པོ་མཐར་མེད་པར་འགྱུར་བ་སྟེ། རྣམ་འགྲེལ་ལས། སྔར་བྱུང་དངོས་པོ་མེད་གྱུར་པ། །མི་རྟག་ཅེས་ནི་བརྗོད་པ་ཡིན། །ཞེས་སོ། །གཉིས་པ་སྐད་ཅིག་རེར་ཡང་མི་སྡོད་པར་འཇིག་པའོ། །དེ་ནས་བྱེ་བྲག་སྨྲ་བ་བསྟན། །ཞེས་པའི་གོ་རིམ་འོས་པ་ལ་དང་པོ་ཉིད་དེ། དེ་དག་གི་གྲུབ་པའི་མཐའ་ལ། ཅི་མྱུར་ཡང་སྐད་ཅིག་དང་པོ་ལ་སྐྱེ། བར་དུ་གནས། མཐའ་མ་འཇིག་རྐྱེན་གྱིས་འཇིག་པར་བཤད་པ་ཡིན་ལ། དེས་ན་བསྐལ་པ་ཆགས་འཇིག་སྟོང་གསུམ་ལྟ་བུ་ཡང་བྱ་བ་དེ་དག་འགོ་བརྩམས་ནས་རྫོགས་པའི་བར་དུ་གནས་པར་འདོད་དོ། །མདོ་སྡེ་པ་ཡང་དེ་བཞིན་ནོ། །ཞེས་པ་ནས་ཕྱི་མ་ཡང་སྟེ། དེའི་གྲུབ་མཐའ་ལ་སྐྱེ་བ་ཁོ་ན་དེའི་འཇིག་རྐྱེན་ཡིན་པས་སྐྱེ་བཞིན་པ་དང་འཇིག་བཞིན་པ་དུས་མཉམ་པས་དངོས་པོ་སྐད་ཅིག་རེ་ལས་མི་སྡོད་པས་གནས་པའི་སྐད་ཅིག་ལ་སོགས་པ་མེད་ཀྱི། སྐད་ཅིག་སྔ་ཕྱིའི་འབྲེལ་པ་ཙམ་ལ་བཏགས་པར་འདོད་པའོ། །དེའི་ཕྱིར་འཇིག་པ་མི་རྟག་པ་དང་། སྐད་ཅིག་གིས་འཇིག་པ་མི་རྟག་པའི་མཚན་ཉིད་དུ་འཇོག་པའི་ཡང་སྐབས་བྱེད་པར་བྱའོ། །དེ་ལྟར་འདུས་བྱས་ཐམས་ཅད་འཇིག་པར་མཐོང་ནས་བདག་ཉིད་རྟག་པར་འཛིན་པའི་སྐབས་མི་སྲིད་པས། བདག་འཆི་ངེས། འཆི་བ་ཡང་དུས་བཏབ་མེད། འཆི་བ་ལ་ཆོས་མིན་པ་གང་གིས་ཀྱང་ཕན་པ་མེད་སྙམ་སྒོམ་པའོ། །འདི་ནི་འཇིག་པའི་ཉེས་དམིགས་སྒོམ་པའོ། །གསུམ་པ་ནི། འདུ་བྱེད་ཐམས་ཅད་སྡུག་བསྔལ་བར་རྟོག་པ་དང་། སྐད་ཅིག་ཀྱང་སྲིད་པར་སྐྱེ་བར་མི་འདོད་པ་དང་། རྟག་ཏུ་འཇིག་པར་ལྟ་བ་དང་། རྟག་ཏུ་ཡིད་མི་རྟོན་པ་དང་། ཕུང་པོ་རྣམས་གསོད་པོར་འདུ་ཤེས་པ་དང་། ཁམས་རྣམས་སྦྲུལ་གདུག་པ་ལྟ་བུར་འདུ་ཤེས་པ་དང་། སྐྱེ་མཆེད་རྣམས་གྲོང་སྟོང་པ་ལྟ་བུར་འདུ་ཤེས་པ་སྟེ། དང་པོ་ནི། ཟག་བཅས་ཐམས་ཅད་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་བར་རྟོགས་པའོ། །གཉིས་པ་ནི། ཁམས་གསུམ་པོ་ཐམས་ཅད་རྟག་ཏུ་འདུ་ཤེས་དང་རྗེས་སུ་འགྲོ་ཞིང་དེས་ཁྱབ་པར་མཐོང་། དེ་དག་ཏུ་སྐྱེ་རྒ་ན་འཆི་ལ་སོགས་པའི་སྡུག་བསྔལ་འབྱུང་བར་མཐོང་ནས་དེ་དག་ཏུ་སྐྱེ་བ་མི་འདོད་ཅིང་སྐྱེ་བ་མི་འཚོལ་བའོ། །གསུམ་པ་སྲིད་པ་ལ་སྡུག་བསྔལ་གྱི་སྡུག་བསྔལ་ལྡན་པ་དང་ཉོན་མོངས་པ་འབྱུང་བའི་གནས་ཡིན་པར་མཐོང་བའོ། །བཞི་པ། སྲིད་པ་ལ་ཐང་ཅིག་བདེ་བ་རྣམས་ཀྱང་ཕྱིས་སྡུག་བསྔལ་དང་ལྡན་པའི་ཕྱིར་རྟག་ཏུ་ཡིད་མི་རྟོན་པའོ། །ལྔ་པ། དཔེར་ན་གཤེད་མས་གསོད་ཅིང་སྡུག་བསྔལ་སྐྱེས་པར་བྱེད་པ་དེ་བཞིན་དུ། ཕུང་པོ་ལ་བདག་ཏུ་དམིགས་ན་ཡང་སྐྱེ་རྒ་ན་འཆིའི་སྡུག་བསྔལ་སྐྱེ་བར་མཐོང་བས་སོ། །དྲུག་པ་ཇི་ལྟར་སྦྲུལ་གདུག་པས་གཟུང་ན་སྡུག་བསྔལ་དང་ཉོན་མོངས་པ་སྐྱེ་བ་དེ་བཞིན་དུ་མིག་ལ་སོགས་པའི་ཁམས་ལ་བརྟེན་ནས་གཟུགས་ལ་སོགས་པའི་ཁམས་ལ་དམིགས་ནས་འདོད་ཆགས་དང་ཞེ་སྡང་ལ་སོགས་པའི་ཉོན་མོངས་པ་འབྱུང་བར་ཁོང་དུ་ཚུད་པའོ། །བདུན་པ་ནི་ཇི་ལྟར་གྲོང་སྟོང་པ་ན་སྐྱེ་བོ་དག་རྒྱུ་བ་མི་གནས་པས་སྟོང་པ་དེ་བཞིན་དུ་སྐྱེ་མཆེད་བཅུ་གཉིས་ཀྱང་མིག་དང་གཟུགས་ལྟ་བུ་ཙམ་དུ་ཟད་ཀྱི་བདག་དང་བདག་གིར་མེད་པར་རྟོགས་པས་སོ། །དེ་ལྟར་འཁོར་བ་ཉེས་དམིགས་ཅན་དུ་མཐོང་བ་ནི་སྡུག་བསྔལ་བའི་ཉེས་དམིགས་སྒོམ་པ་ཡིན་ནོ། །བཞི་པ་ནི། དེས་འཁོར་བ་ལ་སྐྱོ་ན་ཞི་བ་ཚོལ་བའི་བློ་སྐྱེ་ལ། ཞི་བ་ནི་མྱ་ངན་ལས་འདས་པ་ཡིན་ཏེ། མྱ་ངན་ལས་འདས་པ་དེ་ལ་རྣམ་པར་གྲོལ་བའི་བདེ་བ་ཐམས་ཅད་ཀྱི་རྟེན་དུ་ལྟ་བས་མྱ་ངན་ལས་འདས་པ་ལ་གནས་སུ་འདུ་ཤེས་པ་དང་། དེ་ཉིད་འཁོར་བ་ལས་བརྒལ་ཞིང་སྡུག་བསྔལ་ཐམས་ཅད་སྤངས་པར་ལྟ་བས་ན་སྐྱབས་སུ་འདུ་ཤེས་པའོ། །དེ་ནི་ཐར་པའི་ཕན་ཡོན་བསམ་པ་སྟེ། དེས་དམན་པའི་ཉན་ཐོས་སམ་རང་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད་པར་བྱེད་དོ། །འཁོར་བ་ལ་ཉེས་དམིགས་སུ་མཐོང་ན་ཐར་པའི་ཕན་ཡོན་མི་མཐོང་ཀ་མེད་སྙམ་དགོངས་ཏེ་འདི་ཉེས་དམིགས་སྒོམ་པའི་གཞུང་གིས་ཞར་ལ་བསྟན་ནོ། །གསུམ་པ་བསླབ་པ་གསུམ་གྱི་སྤྱོད་པ་ལ་ཞུགས་པ་ལ། མདོར་བསྟན། རྒྱས་པར་བཤད་པ་གཉིས་ལས། དང་པོ་ནི། ངེས་འབྱུང་བསླབ་པ་གསུམ་སྤྱོད་པ། །ངེས་པར་འབྱུང་བ་ནི་མྱ་ངན་ལས་འདས་པ་སྟེ། དེའི་ཕྱིར་དུ་ཡིན་པས་ལྷག་པ་ཞེས་པའི་སྒྲས་བསྟན་ནོ། །བསླབ་པ་གསུམ་ནི། ལྷག་པའི་སེམས་ཀྱི་དབང་དུ་བྱས་པའི་ཚུལ་ཁྲིམས་ཀྱི་བསླབ་པ་གང་ཡིན་པ་དེ་ནི་ལྷག་པའི་ཚུལ་ཁྲིམས་ཀྱི་བསླབ་པ། ལྷག་པའི་ཤེས་རབ་ཀྱི་དབང་དུ་བྱས་པའི་སེམས་ཀྱི་ཏིང་ངེ་འཛིན་གང་ཡིན་པ་དེ་ནི་ལྷག་པའི་སེམས་ཀྱི་བསླབ་པ། ཉོན་མོངས་པ་སྤོང་བའི་དབང་དུ་བྱས་པའི་ཡེ་ཤེས་དང་། མཐོང་བ་གང་ཡིན་པ་དེ་ནི་ལྷག་པའི་ཤེས་རབ་ཀྱི་བསླབ་པའོ། །དེ་ལ་ལྷག་པའི་ཚུལ་ཁྲིམས་ཀྱི་བསླབ་པ་གང་ཞེ་ན། ཚུལ་ཁྲིམས་ཡང་དག་པར་བླངས་པ་ནས་བརྩམས་ཏེ་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་གྱུར་བའི་བར་དུ་བཤད་པ་རྣམས་སོ། །ལྷག་པའི་སེམས་ཀྱི་བསླབ་པ་གང་ཞེ་ན། འདོད་པ་དག་ལས་དབེན་པ་སྡིག་པ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ལ་གནས་སོ་ཞེས་བསམ་གཏན་བཞི་པའི་བར་དག་བསྒྲུབས་ཏེ་གནས་པ་སྟེ། འདིར་བསམ་གཏན་རྣམས་ལ་དང་པོར་བརྟེན་ན་དང་པོ་ཁོ་ན་བདེན་པ་མངོན་པར་རྟོགས་ཤིང་སྐྱོན་མེད་ལ་འཇུག་པར་འགྱུར་གྱི། བསམ་གཏན་རྣམས་ཐམས་ཅད་ཀྱི་ཐམས་ཅད་དུ་མེད་ན་མ་ཡིན་པས་དེའི་ཕྱིར་བསམ་གཏན་རྣམས་གཙོ་བོར་བྱས་ཏེ་ལྷག་པའི་སེམས་ཀྱི་བསླབ་པ་བསྟན་ནོ། །དོན་མཐར་གནས་ཀྱི་སྙོམས་འཇུག་དགུ་མངོན་ཤེས་དང་རྫུ་འཕྲུལ་གྱི་བར་དུ་བཤད་པ་རྣམས་སོ། །ལྷག་པའི་ཤེས་རབ་ཀྱི་བསླབ་པ་གང་ཞེ་ན། བདེན་པ་བཞི་པོ་དག་ལ་ཡང་དག་པ་ཇི་ལྟ་བ་བཞིན་དུ་ཤེས་པ་གང་ཡིན་པའོ། །ཅིའི་ཕྱིར་བསླབ་པ་གསུམ་ཁོ་ན་གཟུང་ཞེ་ན། ཏིང་ངེ་འཛིན་གྱི་གནས་ཀྱི་དོན་དང་། ཡེ་ཤེས་ཀྱི་རྟེན་གྱི་དོན་དང་། བྱ་བ་བྱས་པའི་དོན་གྱི་ཕྱིར་ཏེ། དེ་ལ་དང་པོ་ཚུལ་ཁྲིམས་ཡིན་ཏེ། ཚུལ་ཁྲིམས་ལ་གནས་ན་སེམས་རྩེ་གཅིག་པའི་ཏིང་ངེ་འཛིན་ལ་རེག་པར་འགྱུར་བའི་ཕྱིར་རོ། །གཉིས་པ་སེམས་ཀྱི་བསླབ་པ་ཡིན་ཏེ། སེམས་མཉམ་པར་བཞག་པའི་དྲན་པ་རྩེ་གཅིག་པས་ཤེས་བྱའི་དངོས་པོ་ལ་ཡང་དག་པ་ཇི་ལྟ་བ་བཞིན་དུ་ཡེ་ཤེས་མཐོང་བ་དང་འཇུག་པའི་ཕྱིར་རོ། །གསུམ་པ་ལྷག་པ་ཤེས་རབ་ཀྱི་བསླབ་པ་སྟེ་ཡེ་ཤེས་མཐོང་བ་དང་ཤིན་ཏུ་རྣམ་པར་དག་པས་ཉོན་མོངས་པ་སྤོང་བ་མངོན་སུམ་དུ་བྱེད་པའི་ཕྱིར་རོ། །དེས་ནི་རང་དོན་མཐར་ཕྱིན་པ་སྟེ། ཉོན་མོངས་པ་སྤོང་བ་དེ་ནི་བྱ་བའི་མཆོག་ཡིན་ཏེ། དེའི་གོང་དུ་བྱ་བ་གཞན་མེད་པའི་ཕྱིར་རོ། །དེ་དག་གོ་རིམ་དེ་ལྟར་ངེས་པ་ཡང་ཚུལ་ཁྲིམས་རྣམ་པར་དག་པས་ནི་འགྱོད་པ་མེད་པར་བྱེད་དོ། །འགྱོད་པ་མེད་པས་དགའ་བ་དང་། མཆོག་ཏུ་དགའ་བ་དང་། ཤིན་ཏུ་སྦྱངས་པ་དང་། བདེ་བར་འགྱུར་རོ། །བདེ་བར་གྱུར་པའི་སེམས་མཉམ་པར་འཇོག་གོ །སེམས་མཉམ་པར་བཞག་ན་ཡང་དག་པ་ཇི་ལྟ་བ་བཞིན་དུ་རབ་ཏུ་མཐོང་ངོ་། །ཡང་དག་པ་ཇི་ལྟ་བ་བཞིན་དུ་མཐོང་ན་སྐྱོ་བར་འགྱུར་རོ། །སྐྱོ་ན་འདོད་ཆགས་དང་བྲལ་བར་འགྱུར་རོ། །འདོད་ཆགས་དང་བྲལ་ན་རྣམ་པར་གྲོལ་བར་འགྱུར་རོ། །རྣམ་པར་གྲོལ་ན་ལེན་པ་མེད་པར་ཡོངས་སུ་མྱ་ངན་ལས་འདའ་བས། དེ་ལྟར་ལྷག་པའི་སེམས་ཀྱི་བསླབ་པས་ལྷག་པའི་ཤེས་རབ་བསྐྱེད་པ་ནི་མཆིས་ན། ལྷག་པའི་ཤེས་རབ་ཀྱིས་ལྷག་པའི་སེམས་བསྐྱེད་པ་ཡོད་དམ་མེད་ཞེ་ན་ཡོད་དེ། འཕགས་པ་ཉན་ཐོས་གཞི་མཐོང་བ་བསམ་གཏན་གྱི་དངོས་གཞི་མ་ཐོབ་པ་དེའི་འོག་ཏུ་སྒོམ་པས་སྤང་བར་བྱ་བའི་ཉོན་མོངས་པ་རྣམས་སྤང་བའི་ཕྱིར་བརྩོན་པར་བྱེད་པ་ན། དྲན་པ་ཡང་དག་བྱང་ཆུབ་ཀྱི་ཡན་ལག་སྒོམ་པར་བྱེད་པ་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྒོམ་པར་བྱེད་པའི་བར་དག་སྒོམ་པར་བྱེད་པའི་ཤེས་རབ་ཀྱི་བསླབ་པ་དེས་སེམས་ཀྱི་བསླབ་པ་སྐྱེད་པར་བྱེད་དོ། །དེ་བས་ན་ཚུལ་ཁྲིམས་ཀྱི་བསླབ་པ་ཡོད་ལ་ལྷག་མ་གཉིས་མེད་པ་ཡོད། དང་པོ་གཉིས་ཡོད་ལ་ཕྱི་མ་མེད་པ་ཡོད། ཕྱི་མ་གཉིས་ཡོད་ལ་སྔ་མ་མེད་པ་མི་སྲིད་དོ། །གཉིས་པ་རྒྱས་པར་བཤད་པ་ལ། ལྷག་པ་ཚུལ་ཁྲིམས་ཀྱི་བསླབ་པ་དང་། ལྷག་པ་ཏིང་ངེ་འཛིན་གྱི་བསླབ་པ་དང་། ལྷག་པ་ཤེས་རབ་ཀྱི་བསླབ་པ་རྒྱས་པར་བཤད་པ་ལས། དང་པོ་ནི། དགེ་བའི་ཆོས་ལ་འདུན་པ་སྐྱེད་པ་དེ་ཉིད་ཀྱི་དབང་དུ་བྱས་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་། ཚུལ་ཁྲིམས་ཀྱི་སྡོམ་པ་དང་། དབང་པོའི་སྡོམ་པ་དང་། ཟས་ཀྱི་ཚོད་རིག་པ་དང་། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྗེས་སུ་བརྩོན་པ་ཉིད་དང་། ཤེས་བཞིན་དུ་སྤྱོད་པ་ཉིད་དོ། །དང་པོ་རབ་ཏུ་བྱུང་བ་ནི། ཁྱིམ་ནས་ཁྱིམ་མེད་པར་ལེགས་པར་གསུངས་པའི་ཆོས་འདུལ་བ་ལས་གསོལ་བ་དང་། གཞིའི་ལས་ཀྱིས་བསྙེན་པར་རྫོགས་པ་དགེ་སྦྱོང་གི་ཚུལ་ཁྲིམས་ཡང་དག་པར་བླངས་པའོ། །གཉིས་པ་ཚུལ་ཁྲིམས་གྱི་སྡོམ་པ་ནི། ཡན་ལག་དྲུག་དང་ལྡན་པ་སྟེ། ཡན་ལག་དྲུག་ནི། རབ་ཏུ་བྱུང་བ་དེ་ཚུལ་ཁྲིམས་དང་ལྡན་པར་གནས་པ་དང་། སོ་སོ་ཐར་པའི་སྡོམ་པས་བསྡམས་པ་དང་། ཆོ་ག་ཕུན་སུམ་ཚོགས་པ་དང་། སྤྱོད་ཡུལ་ཕུན་སུམ་ཚོགས་པ་དང་། ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་དང་། བསླབ་པའི་གཞི་རྣམས་ཡང་དག་པར་བླངས་ཤིང་སློབ་པར་བྱེད་པའོ། །དང་པོ་བསླབ་པའི་གཞི་ཇི་ལྟར་བླངས་པ་དག་ལ་ལུས་ཀྱི་ལས་ཀྱི་མཐའ་མ་ལོག་པ་དང་། ངག་གིས་ལས་ཀྱི་མཐའ་མ་ལོག་པར་འགྱུར་ཞིང་མ་ཉམས་པར་བྱེད་པ་དང་། སྐྱོན་མེད་པར་བྱེད་པའོ། །གཉིས་པ། སྡེ་ཚན་བདུན་པོ་དག་གི་ཚུལ་ཁྲིམས་ནི་སོ་སོ་ཐར་པའི་སྡོམ་པ་ཞེས་བྱ། དེ་ལས་འདིར་དགེ་སློང་ངོ་། །གསུམ་པ་སྤྱོད་ལམ་དང་། འཕྲལ་གྱི་བྱ་བ་དང་། དགེ་བའི་ཕྱོགས་ཀྱི་སྦྱོར་བ་ལ་བརྟེན་པ་འཇིག་རྟེན་དང་རྗེས་སུ་མཐུན་ཞིང་། འཇིག་རྟེན་དང་མི་འགལ་བ་དང་། འདུལ་བ་དང་རྗེས་སུ་མཐུན་ཞིང་འདུལ་བ་དང་མི་འགལ་བ་ཆོ་ག་དང་ལྡན་པ་ཡིན་ནོ། །སྤྱོད་ལམ་ནི་གང་དུ་འཆག་པར་བྱ་བ་དང་ཇི་ལྟར་འཆག་པར་བྱེད་པ་དེར། འཇིག་རྟེན་རྣམས་དང་། ཡང་དག་པར་སོང་བ་རྣམས་དང་། སྐྱེས་བུ་དམ་པ་རྣམས་ཀྱིས་སྨད་པར་མི་འགྱུར་བ་དང་། ཆོས་མཐུན་པ་རྣམས་དང་། འདུལ་བ་འཛིན་པ་རྣམས་དང་། འདུལ་བ་ལ་བསླབ་པ་རྣམས་ཀྱིས་སྨད་ཅིང་འཇུངས་པར་མི་འགྱུར་བ་དེ་ལྟར་འཆག་པར་བྱེད་དོ། །འཆག་པ་ཇི་ལྟ་བ་བཞིན་དུ་འགྲེང་བ་དང་འདུག་པ་དང་ཉལ་བ་ལ་ཡང་རིག་པར་བྱའོ། །འཕྲལ་གྱི་བྱ་བ་ནི་ཆོས་གོས་བགོ་བ་དང་། བཤང་བ་དང་། གཅི་བ་དང་། ཆུ་བཏུང་བ་དང་། སོ་ཤིང་བཟའ་བ་དང་། གྲོང་དུ་འཇུག་པ་དང་། བསོད་སྙོམས་སྒྲུབ་པ་དང་། བཟའ་བ་དང་ལྷུང་བཟེད་བཀྲུ་ཞིང་བཞག་པ་དང་། རྐང་པ་བཀྲུ་བ་དང་། མལ་དང་སྟན་བཤམ་པ་དང་། དེ་དག་ཉིད་བསྡུ་བ་དང་། ལྷུང་བཟེད་ཀྱི་ལས་དང་། ཆོས་གོས་ཀྱི་ལས་དང་། ཅུང་ཟད་དེ་ལྟ་བུ་དང་མཐུན་པ་གང་ཡིན་པའོ། །དེ་དག་ཀྱང་ཇི་ལྟར་རིགས་པ་དང་། གང་དུ་བྱ་བ་དང་། ཇི་ལྟར་བྱ་བ་དེར། གང་གིས་འཇིག་རྟེན་པ་རྣམས་དང་རྩོད་པར་མི་འགྱུར་ཞིང་སྨད་པར་མི་འགྱུར་བ་དང་། འདུལ་བ་འཛིན་པ་རྣམས་དང་འདུལ་བ་ལ་བསླབ་པ་རྣམས་ཀྱིས་སྨད་པར་མི་འགྱུར་བ་དང་། དམ་པ་རྣམས་དང་། ཡང་དག་པར་སོང་བ་རྣམས་དང་། ཆོས་མཐུན་པ་རྣམས་ཀྱིས་སྨད་པར་མི་འགྱུར་བ་དེ་ལྟར་ཤེས་པར་བྱའོ། །དགེ་བའི་ཕྱོགས་ཀྱི་སྦྱོར་བ་ནི། ཁ་འདོན་བྱ་བ་དང་། བླ་མ་རྣམས་ལ་འདུད་པ་དང་། ལྡང་བའི་ལས་བྱ་བ་དང་། དེ་བཞིན་དུ་གཅིག་ལ་གཅིག་རྗེས་སུ་སྙིང་བརྩེ་བའི་སེམས་ཉེ་བར་བཞག་སྟེ་ནད་གཡོག་བྱ་བ་དང་། འདུན་པ་སྦྱིན་པ་དང་། ལུང་འབོགས་པ་དང་། རབ་ཏུ་སྦྱོར་བ་དང་། ཡོངས་སུ་ཞུ་བ་དང་། ཆོས་ཉན་པ་དང་། ཚངས་པ་མཚུངས་པར་སྤྱོད་པ་མཁས་ཤིང་ལེ་ལོ་མེད་པ་རྣམས་ལ་ལུས་ཀྱིས་ཞལ་ཏ་བྱ་བ་དང་། གཞན་དག་ཀྱང་དགེ་བའི་ཕྱོགས་ཡང་དག་པར་འཛིན་དུ་གཞུག་པ་དང་། ཆོས་བསྟན་པ་དང་། ནང་དུ་ཡང་དག་འཇོག་པ་དང་། འཇུག་པ་དང་། སྐྱིལ་མོ་ཀྲུང་འཆའ་བ་དང་། འདུག་པ་དང་། གཞན་ཡང་དེ་ལྟ་བུ་དང་མཐུན་པའི་ཆོས་གང་ཡིན་པ་སྟེ། དེ་དག་ཅི་རིགས་སུ་བྱ་བ་དང་། ཇི་ལྟར་བྱ་བ་དེར། འཇིག་རྟེན་རྣམས་ནས་ཆོས་མཐུན་པ་རྣམས་ཀྱི་བར་དུ། མི་རྩོད་ཅིང་སྨད་པར་མི་འགྱུར་བ་དེ་ལྟར་བྱེད་པའོ། །བཞི་པ། དགེ་སློང་གི་སྤྱོད་ཡུལ་མ་ཡིན་པ་ལྔ་སྟེ། བཤན་པའི་གནས་དང་། སྨད་འཚོང་མའི། ཆང་འཚོང་མའི། རྒྱལ་པོའི་ཕོ་བྲང་། གདོལ་པའི་ཁྱིམ་སྟེ། དེ་དག་དེ་བཞིན་གཤེགས་པས་སྨད་པ་སྤྱོད་ཡུལ་མ་ཡིན་པའོ། །དེ་དག་སྤངས་ནས་སྤྱོད་ཡུལ་ཁ་ན་མ་ཐོ་བ་མེད་པ་གཞན་དག་ཏུ་སྤྱོད་པར་བྱེད་ཅིང་། དེར་ཡང་དུས་སུ་སྤྱོད་པར་བྱེད་པ་གང་ཡིན་པའོ། །ལྔ་པ་ལྟུང་བ་བྱུང་ན་དེ་ལས་ཚེགས་ཆུང་ངུས་ལྡང་བར་འགྱུར་བས་དེའི་ཕྱིར་ཁ་ན་མ་ཐོ་བ་ཕྲ་རབ་ཅེས་བྱའོ། །བདག་ལྟུང་བ་བྱུང་བ་འདིའི་རྒྱུས་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་དུ་མ་བྱས་པ་མངོན་དུ་བྱ་བའི་སྐལ་བ་མེད་པར་འགྱུར་བའམ། ངན་སོང་དུ་ཉེ་བར་འགྲོ་བར་འགྱུར་བའམ། བདག་ལ་བདག་ཉིད་དམ་སྟོན་པའམ་ལྷ་རྣམས་ཀྱིས་སྨད་པར་འགྱུར་བའམ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་ཆོས་ཉིད་ཀྱིས་སྨད་པར་འགྱུར་བའམ། ཕྱོགས་དང་ཕྱོགས་མཚམས་རྣམས་སུ་བདག་སྡིག་པ་ཅན་དུ་གྲགས་པ་ངན་པ་གྲགས་པར་གྱུར་ན་མི་རུང་ངོ་སྙམ་ནས། དེ་དེའི་རྒྱུར་གྱུར་པ་ཚེ་འདི་དང་ཚེ་ཕྱི་མ་ལ་མི་འདོད་པར་འགྱུར་བའི་ཆོས་དེ་དག་ལ་འཇིགས་པར་ལྟ་ཞིང་། དེས་ན་སྲོག་གི་ཕྱིར་ཡང་བསླབ་པའི་གཞི་ཕྲ་བ་དེ་དག་ལ་བསམ་བཞིན་དུ་ལྟུང་བ་འབྱིན་པར་མི་བྱེད་དོ། །རྒྱ་ལ་རྒྱ་ལམ་ན་བརྗེད་ངེས་པས་ལྟུང་བ་བྱུང་བ་ན་ཡང་མྱུར་བ་མྱུར་བ་ཁོ་ནར་ཆོས་བཞིན་དུ་ཕྱིར་འཆོས་པར་བྱེད་ཅིང་སློང་བར་བྱེད་པའོ། །དྲུག་པ། སྔོན་སོ་སོ་ཐར་པའི་སྡོམ་པ་ཡང་དག་པར་ལེན་པ་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་ཚེ། བསླབ་པའི་གཞི་ཁ་ཅིག་ནི་རང་བཞིན་གྱིས་ཐོས་ཤིང་། དེ་ལས་གཞན་པ་བསླབ་པའི་གཞི་ལྷག་མ་སོ་སོ་ཐར་པའི་མདོ་ལས་གསུངས་པ་ཉིས་བརྒྱ་ལྔ་བཅུ་པོ་དག་ཀྱང་ཟླ་བ་ཕྱེད་ཕྱེད་ན་སོ་སོ་ཐར་པའི་མདོ་འདོན་པའི་ཚེ་མཁན་པོའམ་སློབ་དཔོན་ནམ་གཏམ་འདྲེས་པ་འམ། ཕེབས་པར་སྨྲ་བ་འམ། སྨོས་འདྲིན་ནམ། གྲོགས་བཤེས་དག་ལས་ཐོས་ནས་ཐམས་ཅད་ལ་བསླབ་པར་བྱའོ། །ཞེས་དམ་བཅའ་བ་ཡང་དག་པར་བླངས་པས་དུས་དེ་ཕྱིན་ཆད་བསླབ་གཞི་རྣམས་ལ་མཁས་པར་སློབ་ལ། མཁས་པར་གྱུར་པ་དེ་དག་ལ་རེ་ཞིག་ལྟུང་བ་ཅི་འབྱུང་སྟེ། རྒྱ་ལ་བྱུང་ན་ཡང་ཆོས་བཞིན་དུ་ཕྱིར་འཆོས་པར་བྱེད་དོ། །གལ་ཏེ་བསླབ་གཞི་རྣམས་ལ་མི་མཁས་ཤིང་བློ་བྱང་བར་མ་གྱུར་པ་དེ་དག་ནི་མཁན་པོ་སོགས་སྔར་བསྟན་པའི་གནས་དེ་དག་ལ། བྱེ་བྲག་ཏུ་བཤད་པ་ལ་མཁས་པས་ཡང་དག་པར་ལེན་པར་བྱེད་དོ། །བྱེ་བྲག་ཏུ་བཤད་པ་ལ་མཁས་པས་ཡང་དག་པར་བླངས་ནས་ཀྱང་། ཇི་ལྟར་རྗེས་སུ་བསྟན་པ་བཞིན་ལྷག་ཆད་མེད་པར་སློབ་པར་བྱེད་ཅིང་། བླ་མ་དང་བླ་མ་ལྟ་བུ་དག་གིས་བསྟན་པའི་བསླབ་པའི་གཞི་དེ་དག་ལ་དོན་དང་ཚིག་འབྲུ་ཕྱིན་ཅི་མ་ལོག་པར་ཡོངས་སུ་འཛིན་པར་བྱེད་དོ། །དེ་དག་གསུམ་དུ་འདུ་སྟེ། ཚུལ་ཁྲིམས་དང་ལྡན་པར་གནས་པ་ཆུད་མི་ཟ་བའི་མཚན་ཉིད་དོ། །སོ་སོ་ཐར་པའི་སྡོམ་པས་བསྡམས་པ་རང་བཞིན་གྱི་མཚན་ཉིད། ཆོ་ག་ཕུན་སུམ་ཚོགས་པ་སོགས་བཞིས་ཡོན་ཏན་གྱི་མཚན་ཉིད་དེའི་ཆོ་ག་དང་སྤྱོད་ཡུལ་ཕུན་སུམ་ཚོགས་པ་གཉིས་ཀྱིས་གཞན་གྱིས་མཐོང་ན་མ་དད་པ་རྣམས་ཀྱང་དད་པར་འགྱུར། དད་པ་རྣམས་ཕྱིར་ཞིང་སྤེལ་བར་འགྱུར་པ་དང་། ལྷག་པར་དད་པར་བྱེད། ཡིད་འཁྲུག་པར་མི་བྱེད་ཅིང་། མི་སྙན་པ་བརྗོད་པར་མི་བྱེད་པས་གཞན་གྱི་དབང་གིས་བྱུང་བའི་ཡོན་ཏན་དང་། རྗེས་སུ་བསྔགས་པ་ཐོབ་བོ། །ཁ་ན་མ་ཐོ་བ་ལ་འཇིགས་པ་དང་། བསླབ་གཞི་ལ་ཡང་དག་པར་སློབ་པ་གཉིས་ཀྱིས་ངན་སོང་དུ་མི་ལྟུང་བདེ་འགྲོར་སྐྱེ། མ་ཐོབ་པ་ཐོབ་པར་བྱ་བའི་སྐལ་བ་ཡོད་པར་འགྱུར་ཏེ། བདག་གི་དབང་གིས་བྱུང་བ་རྗེས་སུ་བསྔགས་པའི་ཡོན་ཏན་ནོ། །དབང་པོའི་སྡོམ་པ་ནི་ཚུལ་ཁྲིམས་ཀྱི་སྡོམ་པ། དེ་ཉིད་ལ་བརྟེན་ནས་དྲན་པ་ཀུན་ཏུ་སྲུང་བ་དང་། དྲན་པ་ལ་རྟག་འགྲུས་བྱེད་པ་དང་། དྲན་པས་ཡིད་ཀུན་ཏུ་བསྲུངས་པ་དང་། གནས་སྐབས་མཉམ་པ་ལ་འཇོག་ཅིང་དེས་མིག་གིས་གཟུགས་མཐོང་བ་ན་མཚན་མར་མི་འཛིན། མངོན་རྟགས་སུ་མི་འཛིན་ལ། གཞི་གང་ཁོ་ན་ལས་དེའི་སེམས་ཀྱི་རྗེས་སུ་སྡིག་པ་མི་དགེ་བའི་ཆོས་རྣམས་ཟག་པར་འགྱུར་བ་དེ་དག་བསྡམ་པར་བྱ་བའི་ཆེད་དུ་སྒྲུབ་པར་བྱེད་ཅིང་། མིག་གི་དབང་པོ་ཡང་སྲུང་བར་བྱེད་ལ། མིག་གི་དབང་པོས་ཀྱང་སྡོམ་པ་སྒྲུབ་པར་བྱེད་པ་དང་། དེ་བཞིན་རྣ་བས་སྒྲ། སྣས་དྲི། ལྕེས་རོ། ལུས་ཀྱིས་རེག་བྱ། ཡིད་ཀྱིས་ཆོས་ལའང་འདྲའོ། །ཇི་ལྟར་དྲན་པ་ཀུན་ཏུ་སྲུང་བ་ནི། ཐོས་པ་གཟུང་བ་དང་། བསམ་པ་དང་། ཡང་དང་ཡང་དུ་བསྒོམ་པར་གྱུར་ནས་ཐོས་བསམ་སྒོམ་པའི་དབང་གིས་དྲན་པ་ཐོབ་པ་དེ་ཉིད་མི་བརྗེད་པར་བྱ་བ་དང་། མི་ཉམས་པར་བྱ་བ་དང་། ཆུད་མི་ཟ་བར་བྱ་བའི་ཕྱིར་ཐོས་བསམ་སྒོམ་པ་ལ་དུས་སུ་སྦྱོར་བར་བྱེད། གོམས་པར་བྱེད། སྦྱོར་བ་ལྷོད་པ་དང་། སྦྱོར་བ་གཏོང་པར་ཡང་མི་འགྱུར་རོ། །དྲན་པ་ལ་རྟག་འགྲུས་ནི། དྲན་པ་དེ་ཉིད་ལ་རྒྱུན་དུ་བྱེད་པ་གང་ཡིན་པ་དེ་ནི་རྟག་སྦྱོར་ཞེས་བྱའོ། །དེ་ལ་འགྲུས་པར་བྱེད་པ་ནི་གུས་སྦྱོར་རོ། །དེ་གཉིས་བསྡོམས་པ་ལ་རྟག་འགྲུས་ཞེས་བྱའོ། །དེ་ཡང་དྲན་པ་ཀུན་ཏུ་བསྲུངས་པས་དྲན་པ་མི་བརྗེད་ལ། རྟག་འགྲུས་ཀྱིས་དྲན་པ་དེ་སྟོབས་དང་ལྡན་པར་བྱེད་པའོ། །སྟོབས་དང་ལྡན་པའི་དོན་ཡང་། གཟུགས་སོགས་སྐྱེ་མཆེད་དྲུག་རྣམས་ཟིལ་གྱིས་གནོན་པར་ནུས་ཤིང་མཐུ་ཡོད་པར་འགྱུར་བའོ། །དྲན་པས་ཡིད་ཀུན་ཏུ་བསྲུངས་པ་ནི་ཉན་ས་ལས། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ལ། མིག་གི་རྣམ་པར་ཤེས་པའི་མཇུག་ཐོགས་སུ་རྣམ་པར་རྟོག་པར་བྱེད་པ་ཡིད་ཀྱི་རྣམ་པར་ཤེས་པ་སྐྱེ་སྟེ། ཡིད་ཀྱི་རྣམ་པར་ཤེས་པ་དེ་ལ་ཡང་། ཚུལ་བཞིན་མ་ཡིན་པར་རྣམ་པར་རྟོག་པ་དང་ལྡན་པ་ཀུན་ནས་ཉོན་མོངས་པ། ཀུན་ནས་སློང་བར་བྱེད་པ་ཡོད་ལ། རྣམ་པར་རྟོག་པར་བྱེད་པ་ཡིད་ཀྱི་རྣམ་པར་ཤེས་པ་དེས་གཟུགས་ཀྱི་རང་བཞིན་སྡུག་པ་དག་ལ་ནི་ཀུན་ཏུ་ཆགས་པར་བྱེད། མི་སྡུག་པ་དག་ལ་ནི་ཁོང་ཁྲོ་བར་བྱེད་པས་ན། དྲན་པ་དེ་ཉིད་ཀྱི་དབང་དུ་བྱས་ཏེ་ཅི་ནས་ཀྱང་ཀུན་ནས་ཉོན་མོངས་པ་དེ་འབྱུང་བར་མི་འགྱུར་བར་ཚུལ་བཞིན་མ་ཡིན་པར་རྣམ་པར་རྟོག་པ་ཀུན་ནས་ཉོན་མོངས་པ་ཀུན་ནས་སློང་བར་བྱེད་པ་དེ་ལས་ཡིད་དེ་ཀུན་དུ་བསྲུང་བར་བྱེད་དོ། །དེ་བཞིན་དུ་རྣ་བ་སོགས་ཀྱང་འདྲ་བར་གསུངས་སོ། །གནས་སྐབས་མཉམ་པ་ལ་འཇོག་པའི་གནས་སྐབས་མཉམ་པ་ཞེས་བྱ་བ་ནི། དགེ་བ་འམ་ལུང་དུ་མ་བསྟན་པའི་བཏང་སྙོམས་ལ་བྱ་སྟེ། དེས་ཚུལ་བཞིན་པར་རྣམ་པར་རྟོག་ལ་ཀུན་ནས་ཉོན་མོངས་པ་ཀུན་ནས་སློང་བར་བྱེད་པ་དེ་ལས་ཡིད་དེ་ཀུན་ཏུ་བསྲུང་ནས། དགེ་འམ་ལུང་དུ་མ་བསྟན་པའི་བཏང་སྙོམས་ལ་འཇོག་པར་བྱེད་དོ། །ཟས་ཀྱི་ཚོད་རིག་པ་གང་ཞེ་ན། འདི་ན་ལ་ལ་སོ་སོར་བརྟག་ཤིང་ཟས་ཟ་བར་བྱེད་ལ། རྣམ་པར་རྟོག་པའི་ཕྱིར་མ་ཡིན། རྒྱགས་པའི་ཕྱིར་མ་ཡིན། སྒེག་པའི་ཕྱིར་མ་ཡིན། བརྒྱན་པའི་ཕྱིར་མ་ཡིན། འདི་ལྟ་སྟེ་ལུས་འདི་གནས་པར་བྱ་བ་དང་། བཀྲེས་པ་བསལ་བར་བྱ་བ་དང་། ཚངས་པར་སྤྱད་པ་ལ་ཕན་པར་བྱ་བ་དང་། ཚོར་བ་རྙིང་པ་རྣམས་སྤང་བར་བྱ་བ་དང་། གསར་པ་རྣམས་མི་སྐྱེ་བར་བྱ་བའི་ཕྱིར་དང་། བདག་འཚོ་ཞིང་སྟོབས་དང་བདེ་བ་དང་། ཁ་ན་མ་ཐོ་བ་མེད་པ་དང་། བདེ་བ་ལ་རེག་པར་གནས་པར་ཡང་འགྱུར་རོ་སྙམ་དུ་སེམས་པ་ཡིན་ནོ། །སོ་སོར་བརྟགས་ཤིང་ཤེས་པའི་དོན་ནི་ཤེས་རབ་ཀྱིས་ཁམས་ཀྱི་ཟས་དེའི་ཉེས་དམིགས་ཡང་དག་པར་རྗེས་སུ་མཐོང་ནས་སུན་ཕྱུང་སྟེ་ཟ་བར་བྱེད་པའོ། །ཉེས་དམིགས་ཀྱང་ཡོངས་སུ་སྤྱོད་པའི་རྒྱུ་ལས་བྱུང་བ་དང་། ཡོངས་སུ་འཇུ་བའི་རྒྱུ་ལས་བྱུང་བ་དང་། ཡོངས་སུ་ཚོལ་བའི་རྒྱུ་ལས་བྱུང་བའོ། ཕྱི་མའང་། སྒྲུབ་པ། སྲུང་བ། མཛད་པ། ཡོངས་སུ་ཉམས་པ། ངོམས་མི་ཤེས་པ། རང་དབང་མེད་པ། ཉེས་པར་སྤྱད་པ་ལས་བྱུང་བའོ། །ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྗེས་སུ་བརྩོན་པ་གང་ཡིན་ཞེ་ན། ཉི་མ་ནུབ་པའི་དུས་ནས་གཟུང་སྟེ་ནམ་སྟོད་ཀྱི་ཆ་མེལ་ཚེ་ཐུན་གཅིག་ལྷག་ཙམ་གྱི་བར་ནི་ནམ་གྱི་ཆ་སྟོད་དོ། །ནམ་གྱི་ཐོ་རངས་ཀྱི་ཆ། མེལ་ཚེ་ཐུན་གཅིག་ལྷག་ཙམ་གྱི་ཆ་ནི་ནམ་གྱི་ཆ་སྨད་དོ། །མི་ཉལ་བར་བརྩོན་པ་ནི། ཉིན་མོ་འཆག་པ་དང་འདུག་པ་དག་གིས་སྒྲིབ་པར་འགྱུར་བའི་ཆོས་རྣམས་ལས་སེམས་ཡོངས་སུ་སྦྱོང་བའོ། །དེ་བཞིན་མཚན་མོའི་ཐུན་དང་པོ་ལ་ཡང་འཆག་པ་དང་འདུག་པ་དག་གིས་སྒྲིབ་པར་འགྱུར་བའི་ཆོས་རྣམས་ལས་སེམས་ཡོངས་སུ་སྦྱོང་བར་བྱེད་ལ། ཡོངས་སུ་སྦྱངས་ནས་དེའི་འོག་ཏུ་གཙུག་ལག་ཁང་ནས་ཕྱིར་བྱུང་སྟེ་གཙུག་ལག་ཁང་གི་ཕྱི་རོལ་ཏུ་རྐང་པ་བཀྲུས་ནས་ནང་དུ་ཞུགས་ཏེ། གློ་གཡས་པ་ཕབ་ནས་རྐང་པ་རྐང་པའི་སྟེང་དུ་བཞག་ཏེ། སྣང་བའི་འདུ་ཤེས་དང་། དྲན་པ་དང་། ཤེས་བཞིན་དང་། ལྡང་བ་ཁོ་ནའི་འདུ་ཤེས་ཡིད་ལ་བྱེད་བཞིན་དུ་ཉལ་བར་བྱེད་པ་དང་། དེ་མཚན་མོའི་ཐུན་མཐའ་མ་ལ་ཡང་མྱུར་བ་མྱུར་བ་ཁོ་ནར་སད་པར་བྱས་ནས་འཆག་པ་དང་འདུག་པ་དག་གིས་སྒྲིབ་པར་འགྱུར་བའི་ཆོས་རྣམས་ལ་སེམས་ཡོངས་སུ་སྦྱོང་བར་བྱེད་པ་ཡིན་ནོ། །འཆག་པ་ཞེས་པ་ནི། འཆག་ས་དཀྱུས་རིང་ཞིང་ཞེང་ཧ་ཅང་མི་ཆེ་བར་བྱས་པའི་ས་ཕྱོགས་སུ་འགྲོ་བ་དང་ལྡོག་པ་དང་ལྡན་པའི་ལུས་ཀྱི་ལས་སོ། །འདུག་པ་ནི་ཁྲི་འམ་ཁྲིའུ་འམ། རྩ་གཏིང་བའི་སྟེང་དུ་སྐྱིལ་མོ་ཀྲུང་བཅས་སྟེ་ལུས་དྲང་པོར་བསྲངས་ནས་དྲན་པ་ཕྱོགས་པར་བཞག་པའོ། །ཤེས་བཞིན་དུ་སྤྱོད་པ་གང་ཡིན་ཞེ་ན། ལ་ལར་འགྲོ་བ་དང་ལྡོག་པ་ལ་ཤེས་བཞིན་དུ་སྤྱོད་པར་བྱེད་པ་དང་། ཅུང་ཟད་བལྟ་བ་དང་། རྣམ་པར་བལྟ་བ་དང་། བསྐུམ་པ་དང་། བརྐྱང་བ་དང་། སྣམ་སྦྱར་དང་། ཆོས་གོས་དང་། ལྷུང་བཟེད་འཆང་བ་དང་། ཟོས་པ་དང་། འཐུངས་པ་དང་། འཆོས་པ་དང་། མྱངས་པ་དང་། སོང་བ་དང་། སྡོད་པ་དང་། འདུག་པ་དང་། ཉལ་བ་དང་། མི་ཉལ་བ་དང་། སྨྲ་བ་དང་། མི་སྨྲ་བ་དང་། གཉིད་ཀྱིས་སྙོམས་པ་བསང་བ། ལས་གང་རྩོམ་ཡང་ལས་དེ་ཉིད་ལ་དྲན་པ་ཉེ་བར་བཞག་ཅིང་བག་ཡོད་པར་སྤྱོད་པ་ལས། དེ་དྲན་པས་ཡོངས་སུ་ཟིན་ཅིང་བག་ཡོད་པས་ཀྱང་ཡོངས་སུ་ཟིན་པས་སྤྱོད་དེ། དེས་ཚེ་འདི་ལ་ཁ་ན་མ་ཐོ་བ་མེད་པ་དང་། ལྟུང་བ་མེད་པ་དང་། འགྱོད་པ་མེད་པ་དང་། ཡིད་ལ་གཅགས་པ་མེད་པ་དང་། རྗེས་སུ་གདུང་བ་མེད་པར་གྱུར་པ་དང་། ཚེ་ཕྱི་མ་ལ་ཡང་ཁ་ན་མཐོ་བ་མེད་ཅིང་ལུས་ཞིག་སྟེ་ཤི་བའི་འོག་ཏུ་ངན་སོང་དང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་མི་འགྱུར་བ་དང་། མ་ཐོབ་པ་ཐོབ་པར་བྱས་པ་ཚོགས་ཀྱི་རྒྱུ་འམ་ཐབས་སུ་འགྱུར་བ་ཡིན་ནོ། །དེ་ལྟར་ཡན་ལག་དྲུག་པའི་ཚུལ་ཁྲིམས་ནི་ཚུལ་ཁྲིམས་ཀྱི་ཚོགས་སམ་ཚུལ་ཁྲིམས་ཀྱི་ཕུང་པོ་ཞེས་བྱ། དང་པོར་ཚུལ་ཁྲིམས་ཡང་དག་པར་བླངས་པ་ནས་བརྩམས་ཏེ། ཐ་མ་རྣམ་པར་གྲོལ་བའི་ཡེ་ཤེས་ལ་ཐུག་གི་བར་དུ་རྡུལ་ཙམ་ཡང་ཉམས་པ་དང་གོད་པ་མེད་པའོ། །དེ་ལྟར་ཉམས་པ་དང་གོད་པ་མེད་པས་ཚུལ་ཁྲིམས་མཐར་ཕྱིན་ཏེ་ཟག་པ་མེད་པའི་ཚུལ་ཁྲིམས་ཀྱི་མཚན་ཉིད་དུ་གྱུར་པ་ནི་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པ་ཞེས་བྱའོ། །ཚུལ་ཁྲིམས་རིན་པོ་ཆེ་དེ་ལ་གནས་པ་ནི། མཛོད་ལས་ཚུལ་གནས་ཞེས་གསུངས་སོ། །གཉིས་པ་ལྷག་པ་ཏིང་ངེ་འཛིན་གྱི་བསླབ་པ་རྒྱས་པར་བཤད་པ་ལ། སྔོན་དུ་ཀློག་པ་ཐོས་བསམ། ཐོས་བསམ་གྱི་སྙིང་པོ་བསམ་གཏན་ལ་སྦྱོར་ཚུལ་གཉིས་ལས། དང་པོ་ནི། ཉན་ས་ལས། དེ་བཞིན་དགེ་བའི་བཤེས་གཉེན་དང་། །དམ་ཆོས་ཉན་དང་སེམས་པ་དང་། །བར་ཆད་མེད་པར་གཏོང་བ་དང་། །དགེ་སྦྱོང་རྒྱན་ནི་མཐའ་མ་ཡིན། །ཞེས་གསུངས་པས། དེ་བཞིན་གཤེགས་པ་འམ། དེའི་སློབ་མ་འམ། གཞན་འདུལ་བ་ནས་གནས་སུ་འོས་པར་གསུངས་པ་བརྟན་མཁས་གྱི་ཡོན་ཏན་གཉིས་དང་ལྡན་པའོ། །དམ་པའི་ཆོས་ཉན་པ་གང་ཞེ་ན། སངས་རྒྱས་དང་སངས་རྒྱས་ཀྱི་ཉན་ཐོས་དམ་པ་རྣམས་དང་། ཡང་དག་པར་སོང་བ་རྣམས་དང་། སྐྱེས་བུ་དམ་པ་རྣམས་ཀྱིས་བསྟན་པ་དང་བཤད་པ་དག་གསལ་བར་བྱས་པ་དང་། རྣམ་པར་ཕྱེ་བ་དང་ཡང་དག་པར་བཤད་པ་ཡིན་ནོ། །དེ་ལས་སངས་རྒྱས་ཀྱི་ཉན་ཐོས་དམ་པ་རྣམས་དང་། ཡང་དག་པར་སོང་བ་རྣམས་དང་། སྐྱེས་བུ་དམ་པ་རྣམས་ཀྱིས་བསྟན་པ་དང་བཤད་པ་དང་གསལ་བར་བྱས་པ་དང་། རྣམ་པར་ཕྱེ་བ་དང་ཡང་དག་པར་བཤད་པ་ཡིན་ནོ། །དེ་ལས་སངས་རྒྱས་ཀྱིས་བཤད་པ་ནི། གསུང་རབས་ཡན་ལག་བཅུ་གཉིས་ཏེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞི་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབ་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་དབབ་པར་བསྟན་པའི་སྡེ་དག་གོ །དེ་ལས་གླེང་གཞི་ནི། འདུལ་བ། གཏན་ལ་དབབ་པའི་སྡེ་ནི་མངོན་པ། གཞན་རྣམས་མདོ་སྡེའོ། །ཉན་པ་ནི་དགེ་བའི་བཤེས་གཉེན་ལས་ཡང་དག་པར་མནོས་ཏེ་འདུལ་བ་འཛིན་པ་འམ། མདོ་སྡེ་འམ། མ་མོ་འཛིན་པ་འམ། གཉིས་སམ་སྡེ་སྣོད་གསུམ་འཛིན་པ་སྟེ། དེ་ཡང་ཚིག་འབྲུ་དང་དོན་འཛིན་པ་གཉིས་སོ། །སེམས་པ་ནི། ཇི་ལྟར་ཐོས་པའི་ཆོས་དེ་དག་ཉིད་རང་གི་མཚན་ཉིད་དང་སྤྱིའི་མཚན་ཉིད་ཀྱི་སྒོ་ནས་སེམས་པར་བྱེད་པ་སྟེ། དེ་ཡང་བགྲང་བའི་རྣམ་པས་ཆོས་རྣམས་ལ་བགྲང་བའི་ཚུལ་གྱིས་སེམས་པ་དང་། གཞལ་བའི་རྣམ་པས་ཡོན་ཏན་དང་སྐྱོན་ཉེ་བར་བརྟག་པའི་ཚུལ་གྱིས་སེམས་པར་བྱེད་པ་གཉིས་སོ། །རིགས་པ་ཡང་བཞིར་གསུངས་ཏེ། ལྟོས་པའི་རིགས་པ་དང་། བྱ་བ་བྱེད་པའི་རིགས་པ་དང་། འཐད་པ་སྒྲུབ་པའི་རིགས་པ་དང་། ཆོས་ཉིད་ཀྱི་རིགས་པའོ། །དང་པོ་ལ་སྐྱེ་བ་ལ་ལྟོས་པ་དང་། གདགས་པའི་ལྟོས་པ་གཉིས་ཀྱི་སྔ་མ་ནི། རྒྱུ་གང་དང་རྐྱེན་གང་དག་གིས་ཕུང་པོ་རྣམས་སྐྱེ་བ་འགྱུར་བའི་ཕུང་པོའི་སྐྱེ་བ་དེ་ནི་རྒྱུ་དང་རྐྱེན་དེ་དག་ལ་ལྟོས་པ་ཡིན་ནོ། །མིང་ཚིག་ཡི་གེའི་ཚོགས་གང་དག་གི་ཕུང་པོ་སོགས་གདགས་པར་འགྱུར་བའི་ཕུང་པོའི་གདགས་པ་དེ་ནི་མིང་ཚིག་ཡི་གེའི་ཚོགས་དེ་དག་ལ་ལྟོས་པ་ཡིན་ནོ། །བྱ་བ་བྱེད་པའི་རིགས་པ་ནི། ཕུང་པོ་རང་གི་རྒྱུ་དང་རྐྱེན་གྱིས་བསྐྱེད་པ་གང་ཡིན་པ་རྣམས་ནི་རང་གི་བྱ་བ་བྱེད་པ་དེ་དང་དེ་དག་ལ་སྦྱོར་བར་བྱེད་པ་སྟེ། མིག་གིས་གཟུགས་ལྟ་བར་བྱེད་པ་ལྟ་བུ་འཐད་པ་སྒྲུབ་པའི་རིགས་པ་ནི་ཚད་མ་གསུམ་པོ་འདི་ལྟ་སྟེ། ཡིད་ཆེས་པའི་ལུང་དང་། མངོན་སུམ་དང་རྗེས་སུ་དཔག་པ་དག་གིས་ཡོངས་སུ་ཚོལ་བར་བྱེད་དེ། ཅི་འདི་ལ་ཡིད་ཆེས་པའི་ལུང་ཡོད་དམ་མེད། མངོན་སུམ་དུ་དམིགས་སམ་འོན་ཏེ་མ་ཡིན། ཅི་རྗེས་སུ་དཔགས་ནས་རིགས་སམ་འོན་ཏེ་མ་ཡིན་ཞེས་ཡོངས་སུ་ཚོལ་བར་བྱེད་པའོ། །རྣམ་འགྲེལ་ལས། མངོན་དུ་གྱུར་པ་མངོན་སུམ་གྱི་གཞལ་བ་དང་། ལྐོག་ཏུ་གྱུར་པ་དངོས་པོ་སྟོབས་ཞུགས་ཀྱི་རིགས་པས་དང་། ཤིན་ཏུ་ལྐོག་ཏུ་གྱུར་པ་ནི་ལུང་ཚད་མས་གཞལ་བར་གསུངས་སོ། །ཆོས་ཉིད་ཀྱི་རིགས་པ་ནི་དེ་དག་གི་ངོ་བོ་ཉིད་དེ་ལྟ་བུ་ཡིན་པས་ཆོས་ཉིད་དོ། །དེ་དག་ཁོ་ན་ཡིན་པ་དེ་ཉིད་འདིར་རིགས་པ་དང་། སྦྱོར་བ་དང་ཐབས་ཏེ་སའི་མཚན་ཉིད་སྲ་བ་ཞེས་པ་ལྟ་བུའོ། །བར་ཆད་མེད་པ་གང་ཞེ་ན། ཉན་སར་ནང་ལ་བརྟེན་པ་དང་ཕྱི་ལ་བརྟེན་པ་གཉིས། དེ་ལས་ཟློག་པ་ནི་བར་ཆད་མེད་པའོ། །ཞེས་གསུངས་ལ། དང་པོ་སྔོན་མི་དགེ་བ་སྤྱད་པས་འཚོ་བའི་རྐྱེན་གྱིས་འཕོངས་པ་ལྟ་བུ། ཕྱི་མ་ནི་གྲོགས་ངན་པ་དང་ཡུལ་དྲན་པའི་རྐྱེན་དག་གོ །བློ་གྲོས་མི་ཟད་པའི་མདོ་འགྲེལ་ལས། གང་ཟག་ལ་ལ་ཞིག་ཐར་བར་འགྱུར་བས་མངོན་པར་བསྡུས་པ་མྱ་ངན་ལས་འདས་པ་དང་རྗེས་སུ་མཐུན་པའི་དགེ་བའི་ཆོས་ལ་དད་པ་ཡང་དག་པར་སྐྱེས་པ་ན། འདོད་པ་ལ་ཆགས་པའི་དབང་དུ་གྱུར་ནས་ལྡོག་པ་ནི་བདུད་ཀྱི་ལས་སོ། །དབང་པོའི་སྒོ་བསྡམས་ཏེ་གནས་པ་ན། གང་ཆགས་པར་འགྱུར་བའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་རྣམས་ལ་མཚན་མར་འཛིན་ཞིང་མངོན་རྟགས་སུ་འཛིན་པ་ནི་བདུད་ཀྱི་ལས་སོ། །དེ་བཞིན་དུ་ཟས་ཀྱི་ཚོད་རིག་པ་ལ་གནས་པ་ན་རོའི་ཁྱད་པར་ལ་སེམས་ཆགས་པ་དང་། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྗེས་སུ་བརྩོན་པ་ན། གཉིད་ཀྱི་བདེ་བ་དང་ཉལ་བའི་བདེ་བ་ལ་གློས་འབེབས་པའི་བདེ་བ་ལ་ཆགས་ཤིང་སེམས་འཇུག་པ་ནི་བདུད་ཀྱི་ལས་སུ་རིག་པར་བྱའོ། །ཤེས་བཞིན་དང་བཅས་པར་གནས་པ་ན་བྱིས་པ་འམ་འགྲོ་བ་བཟང་མོ་ཁ་དོག་མཆོག་དང་ལྡན་པ་རྣམས་མཐོང་ནས་ཚུལ་བཞིན་མ་ཡིན་པ་ཡིད་ལ་བྱེད་ཅིང་དེར་སེམས་འཇུག འཇིག་རྟེན་གྱི་འཕྲལ་གྱི་བྱ་བ་མང་པོ་ལ་སེམས་འཇུག་པ་དང་། འདུ་འཛི་མང་པོའི་ནང་དུ་འགྲོ་ཞིང་སྡིག་པའི་གྲོགས་པོ་མི་དགེ་བའི་ལས་བྱེད་པ་རྣམས་མཐོང་ན་མོས་པ་སྐྱེ་བ་ནི་བདུད་ཀྱི་ལས་སོ་ཞེས་པ་རྣམས་ལས་ཟློག་པའོ། །གཏོང་བ་སྤེལ་བ་གང་ཞེ་ན། སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་ཐོབ་པར་བྱ་བའི་ཕྱིར་ཁ་ན་མ་ཐོ་བ་མེད་པའི་སྦྱིན་པ་སྦྱིན་པར་བྱེད་པ་གང་ཡིན་པའོ། །དགེ་སྦྱོང་གི་རྒྱན་གང་ཞེ་ན། ཉན་སར། དད་ལྡན་གཡོ་མེད་ནད་ཉུང་དང་། །བརྩོན་འགྲུས་ཤེས་རབ་འདོད་ཆུང་དང་། །ཆོག་ཤེས་གསོ་སླ་དགང་སླ་དང་། །སྦྱངས་དང་མཛེས་དང་དྲོད་རིག་དང་། །སྐྱེས་བུ་དམ་ཆོས་མཁས་རྟགས་དང་། །བཟོད་དང་དེས་དང་གྱ་ནོམ་ཡིན། །ཞེས་པའི་དད་པ་དང་ལྡན་པ་ནི། དད་པ་མང་བ་དང་། ངེས་པར་རྟོག་པ་མང་བ་དང་། མོས་པ་མང་བ་དང་། དགེ་བའི་ཆོས་རྣམས་ལ་འདུན་པ་ཡིན་ཞིང་། དེ་སྟོན་པ་ལ་ཡང་དང་བར་བྱེད་ཅིང་ཡིད་གཉིས་མི་བྱེད་ཐེ་ཚོམ་མི་ཟ་ལ། སྟོན་པ་ལ་བཀུར་སྟིར་བྱེད། བླ་མར་བྱེད། རི་མོར་བྱེད་ཅིང་། བསྙེན་བཀུར་བྱས། བླ་མར་བྱས། རི་མོར་བྱས། མཆོད་པར་བྱས་ནས་ཉེ་བར་བརྟེན་ཏེ་གནས་པ་དང་། སྟོན་པ་ལ་ཇི་ལྟ་བ་བཞིན་དུ་ཆོས་དང་ཚངས་པ་མཚུངས་པར་སྤྱོད་པ་རྣམས་དང་། བསླབ་པ་དང་། གདམས་ཤིང་རྗེས་སུ་བསྟན་པ་དང་། བགོ་བཤའ་དང་། བག་ཡོད་པ་དང་། ཏིང་ངེ་འཛིན་ལ་དེ་བཞིན་ནོ། །གཡོ་མེད་པ་ནི། དྲང་པོ་དང་དྲང་པོའི་རང་བཞིན་ཅན་ཡིན་ཞིང་། སྟོན་པ་དང་ཚངས་པ་མཚུངས་པར་སྤྱོད་པ་མཁས་པ་རྣམས་ལ་བདག་ཉིད་ཇི་ལྟ་བ་བཞིན་དུ་སྨྲ་བར་བྱེད་པ་ཡིན་ནོ། །ནད་ཉུང་བ་ནི། ནད་མེད་པའི་རང་བཞིན་ཡིན་ཞིང་། ཕོ་བའི་དྲོད་སྙོམས་ཤིང་འཇུ་བར་བྱེད་པ་དང་། ཧ་ཅང་མི་ཚ་བ་དང་། ཧ་ཅང་མི་གྲང་བ་དང་། གནོད་པ་མེད་ཅིང་དུས་ཚིགས་བདེ་བ་དང་ལྡན་པ། དེས་ན་དེའི་ཟོས་པ་དང་འཐུངས་པ་དང་འཆོས་པ་དང་མྱངས་པ་རྣམས་ལེགས་པར་བདེ་བར་འཇུ་བར་འགྱུར་རོ། །བརྩོན་འགྲུས་གང་ཞེ་ན། དགེ་བའི་ཆོས་རྣམས་ལ་མཐུ་དང་ལྡན་པ་དང་། བརྩོན་འགྲུས་དང་ལྡན་པ་དང་། ཕ་རོལ་གནོན་པ་དང་། བརྣག་པ་དང་བརྩོན་པ་མ་བཏང་བར་གནས་ཤིང་ཚངས་པ་མཚུངས་པར་སྤྱོད་པ་རྣམས་ལ་ལུས་ཀྱི་ཞལ་ཏ་བྱེད་པ་ལ་མཁས་པ་དང་། ལེ་ལོ་མེད་པ་དང་སྒྲུབ་ཕོད་པའོ། །ཤེས་རབ་རྣོ་བ་ནི། ལྡོབ་སྐྱེན་པ་དང་། དྲན་པ་དང་བློ་དང་ལྡན་ཞིང་དབང་པོ་རཏལ་པོ་མ་ཡིན་ལ་དིག་པ་དང་ལྐུག་པ་མ་ཡིན་ཞིང་ལག་པས་བརྡ་བྱེད་པ་མ་ཡིན་ལ། ལེགས་པར་གསུངས་པ་དང་ཉེས་པར་སྤྱད་པའི་ཆོས་ཀྱི་དོན་ཀུན་ཤེས་པར་འགྱུར་བ་དང་། ལྷན་ཅིག་སྐྱེས་པའི་བློ་དང་ཡང་ལྡན་ལ། སྦྱོར་བ་ལས་བྱུང་བའི་བློ་དང་ཡང་ལྡན་པ་ཡིན་ནོ། །འདོད་པ་ཆུང་བ་ནི། འདོད་པ་ཆུང་བ་ལ་སོགས་པའི་ཡོན་ཏན་དང་ལྡན་ཡང་བདག་འདོད་པ་ཆུང་བའི་ཡོན་ཏན་འདི་ལྟ་བུ་དང་ལྡན་པར་གཞན་གྱིས་ཤེས་པར་བྱའོ་སྙམ་གཞན་གྱི་ཤེས་པ་ཀུན་ཏུ་མི་ཚོལ་བ་ཡིན་ནོ། །ཆོག་ཤེས་པ་ནི། ཆོས་གོས་དང་བསོད་སྙོམས་དང་མལ་ཆ་དང་སྟན་ངན་ངོན་ཙམ་གྱིས་དགའ་ཞིང་ཆོག་ཤེས་པ་དང་། དེ་ཆོས་གོས་ངན་པ་ལས་བཟང་པོ་མ་རྙེད་ན་ཡང་འདོད་པར་མི་བྱེད་ཅིང་གདུང་བར་མི་བྱེད་ལ། རྙེད་ན་ཡང་སྔ་མ་བཞིན་དུ་ཆགས་པ་མེད་པ་དང་ཞེན་པ་མེད་པས་ཡོངས་སུ་ལོངས་སྤྱོད་པར་བྱེད་པ་ཆོས་གོས་ལ་ཇི་ལྟ་བ་བཞིན་དུ་བསོད་སྙོམས་དང་མལ་ཆ་དང་སྟན་ལ་ཡང་དེ་བཞིན་བྱའོ། །གསོ་སླ་བ་ནི། བདག་གཅིག་པུ་གསོ་བར་བྱེད་ཀྱི་ཕ་རོལ་པོ་གང་དག་གི་དོན་དུ་དེས་རིམ་གྲོ་བྱ་མི་དགོས་པ་འདི་ལྟ་སྟེ། ཁྱེའུ་འམ་མི་གཞན་གང་ཡང་རུང་བ་དག་གསོ་མི་དགོས་པ་དང་། དེ་ལ་སྦྱིན་པ་པོ་དང་སྦྱིན་བདག་དག་གསོ་དཀའོ་སྙམ་དུ་མི་སེམས་པའོ། །དགང་སླ་བ་ནི་ཆུང་ངུས་ཀྱང་འཚོ་བར་འགྱུར་ལ། ངན་པས་ཀྱང་འཚོ་བར་འགྱུར་བ་ཡིན་ནོ། །སྦྱངས་པའི་ཡོན་ཏན་ནི། བསོད་སྙོམས་ལ་ཕྱེ་བ་སོ་སོར་བགྲངས་ན་བཅུ་གསུམ་དེ་གཉིས་བསྡོམས་པས་བཅུ་གཉིས་ཏེ། རྙེད་པས་ཆོག་ཤེས་པའི་བསོད་སྙོམས་དང་། མཐར་གྱིས་སློང་བའི་བསོད་སྙོམས་པ་དང་། སྟན་གཅིག་པ་དང་། ཟས་ཕྱིས་མི་ལེན་པ་དང་། ཆོས་གོས་གསུམ་པ་དང་། ཕྱིང་པ་བ་དང་། ཕྱག་དར་ཁྲོད་པ་དང་། དགོན་པ་བ་དང་། ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་དང་། ཙོག་པུ་བ་དང་། གཞི་ཇི་བཞིན་པའོ། །དང་པོ་ནི། འདྲིས་པའི་ཁྱིམ་ནས་ཅི་ཐོབ་པ་ང་ཅི་རྙེད་པ་ཙམ་ཟ་བར་བྱེད་པའོ། །གཉིས་པ་ཁྱིམ་རྣམས་སུ་ཁང་ཁྱིམ་ནས་ཁང་ཁྱིམ་དུ་བླངས་ཤིང་བརྒྱུས་ཏེ་བསོད་སྙོམས་ཅི་ཐོབ་པ་དང་ཅི་རྙེད་པ་ཟ་བར་བྱེད་ཀྱི། བདག་གི་འདི་ནས་བཟའ་བ་དང་བཅའ་བ་བཟང་པོ་ཅི་ཙམ་འདོད་པ་ཐོབ་པར་འགྱུར་རོ་སྙམ་ནས་མགོ་འཕངས་གཏོད་དེ་ཁྱིམ་རྣམས་སུ་མི་འགྲོ་བ་གང་ཡིན་པའོ། །གསུམ་པ་སྟན་གཅིག་ལ་འདུག་ནས་ཅི་ཙམ་ཟ་བ་དེ་ཙམ་ཟ་བར་བྱེད་ཀྱི་སྟན་དེ་ལས་ལངས་ནས་ཟ་བར་མི་བྱེད་པའོ། །བཞི་པ་ཟས་ཀྱི་ཕྱིར་འདུག་ནས་ཇི་སྲིད་དུ་ཇི་ཙམ་གྱིས་བདག་འཚོ་བར་ཤེས་པའི་ཟས་ཐམས་ཅད་མ་ནོས་པ་དེ་སྲིད་དུ་ཟ་བར་མི་བྱེད་ཅིང་། གང་ལས་བདག་གི་ཟས་ཀྱི་བྱ་བ་དེ་ལས་ལྷག་པ་མེད་དོ་སྙམ་དུ་ཤེས་པར་འགྱུར་བ་དེའི་འོག་ཏུ་ཐམས་ཅད་བླངས་ནས་ཟ་བར་རྩོམ་པའོ། །ལྔ་པ་ཆོས་གོས་གསུམ་པོ་སྣམ་སྦྱར་དང་། བླ་གོས་དང་མཐང་གོས་ཀྱིས་འཚོ་བར་བྱེད་ཅིང་། ཆོས་གོས་གསུམ་ལས་ལྷག་པའི་གོས་གཞན་མི་འཆང་བ་ཡིན་ནོ། །དྲུག་པ་ནི་ཆོས་གོས་གསུམ་མམ་གོས་ལྷག་གང་ཅུང་ཟད་འཆང་བ་དེ་དག་ཐམས་ཅད་བལ་ལས་བྱས་པ་ཤ་སྟག་འཆང་གི་གཞན་མ་ཡིན་པའོ། །བདུན་པ། གཞན་དག་གིས་ལམ་པོ་ཆེ་འམ་ལམ་སྲང་ངམ་གཞི་མདོ་འམ་ལམ་ཀའམ་ལམ་གོལ་བར་བོར་བ་དང་སྤངས་པ་དང་བཏིང་བའི་གོས་བཤང་བས་རེག་པའམ། གཅི་བས་རེག་པའམ། བཤང་གཅི་དང་རྣག་དང་ཁྲག་དང་མཆིལ་མས་རེག་པ་གང་ཡིན་པ་དེ་ལས། མི་གཙང་བ་གང་ཡིན་པ་དེ་བོར་ལ། ཐ་གི་བ་བླངས་ཏེ་བཀྲུས་དྲུབས་ཏེ་ཁ་དོག་བསྒྱུར་ཞིང་འཆང་བའོ། །བརྒྱད་པ་ནི། གྲོང་དང་གྲོང་བརྡལ་ལས་དབེན་པའི་གནས་མལ་དགོན་པ་དང་ནགས་འདབ་དང་། བས་མཐའ་གང་ཡིན་པ་དག་ཏུ་གནས་པར་བྱེད་པའོ། །དགུ་པ་ཤིང་དྲུང་དུ་གནས་འཆའ་ཞིང་ཤིང་དྲུང་ལ་བརྟེན་པའོ། །བཅུ་པ། མ་བཀབ་པ་དང་མ་གཡོགས་པའི་ཕྱོགས་བླ་གབ་མེད་པར་གནས་འཆའ་བར་བྱེད་པའོ། །བཅུ་གཅིག་པ། གང་དུ་སྐྱེ་བོའི་ཚོགས་ཤིའོ་ཅོག་འདོར་བའི་དུར་ཁྲོད་དུ་གནས་འཆའ་བར་བྱེད་པའོ། །བཅུ་གཉིས་པ། ཁྲི་འམ་ཁྲིའུ་འམ་རྩྭ་བཏིང་བའི་སྟེང་དུ་ཙོག་པུར་འདུག་སྟེ་དུས་ཡོལ་བར་བྱེད་ཅིང་ཁྲིའམ་ཁྲིའུ་འམ་རྩིག་པ་འམ་ཤིང་དྲུང་ངམ་རྩྭ་བཏིང་བ་ལ་རྒྱབ་བམ་གློས་མི་བརྟེན་པའོ། །བཅུ་གསུམ་པ། གང་དུ་རྩྭ་གཏིང་བ་འམ་ལོ་མ་བཏིང་བའི་སྟེང་དུ་མལ་འཆའ་བར་བྱེད་ཅིང་། རྩྭ་བཏིང་བ་འམ་ལོ་མ་བཏིང་བ་དེ་ཡང་ལན་གཅིག་ཇི་ལྟར་བཏིང་བ་དེ་ཁོ་ནའི་སྟེང་དུ་མལ་འཆའ་བར་བྱེད་ཀྱི། ཡང་དང་ཡང་དུ་མི་བརྗེ་མི་འཆོས་པའོ། །ཅིའི་ཕྱིར་དེ་དག་ལ་སྦྱངས་པའི་ཡོན་ཏན་ཞེས་བྱ་ཞེ་ན། དཔེར་ན་བལ་ལམ་ཤིང་བལ་ནི་གང་གི་ཚེ་མ་བསལ་མ་བཤིག་མ་རྨེལ་བ་དེའི་ཚེ་ན་འཛིངས་ཤིང་མི་འཛོམ་མི་ཡང་ལ། འདི་ལྟ་སྟེ་སྐུད་པར་བཀལ་བའམ་གདལ་བར་བྱ་བའི་ལས་སུ་མི་རུང་ངོ་། །དེ་བཞིན་དུ་འདི་ན་ལ་ལ་བསོད་སྙོམས་ལ་ཆགས་པས་བསོད་སྙོམས་ལ་སེམས་ཞེན་ཅིང་ཀུན་ཏུ་ཞེན་པ་དང་། ཆོས་གོས་ལ་ཆགས་པས་ཆོས་གོས་ལ་སེམས་ཞེན་ཅིང་ཀུན་ཏུ་ཞེན་པ་དང་། གནས་མལ་ལ་ཆགས་པས་གནས་མལ་ལ་སེམས་ཞེན་ཅིང་ཀུན་ཏུ་ཞེན་པ་དེ། སྦྱངས་པའི་ཡོན་ཏན་དེ་དག་གིས་འདི་ལྟ་སྟེ་ཚངས་པར་སྤྱོད་པ་ལ་གནས་པར་བྱ་བའི་ཕྱིར་སེམས་རྣམ་པར་སྦྱོང་བར་བྱེད། དྲང་པོར་བྱེད། མཉེན་པར་བྱེད། ལས་སུ་རུང་བར་བྱེད། གནས་པར་བྱེད། བཏུབ་པར་བྱེད། རུང་བར་བྱེད་པས་ན་དེའི་ཕྱིར་སྦྱངས་པའི་ཡོན་ཏན་ཞེས་བྱའོ། །དེ་ལ་བསོད་སྙོམས་ལ་ཆགས་པ་ནི་བར་ཆད་རྣམ་པ་གཉིས་ཡིན་ཏེ། ཟས་བཟང་པོ་ལ་ཆགས་པ་དང་ཟས་མང་པོ་ལ་ཆགས་པའོ། །དེའི་ཕྱིར་ཟས་བཟང་པོ་ལ་ཆགས་པ་སྤང་བའི་ཕྱིར་བསོད་སྙོམས་པའོ། །ཟས་མང་པོ་ལ་ཆགས་པ་སྤང་བའི་ཕྱིར་སྟན་གཅིག་པ་དང་ཕྱིས་མི་ལེན་པའོ། །དེ་ལ་ཆོས་གོས་ལ་ཆགས་པ་ནི་བར་ཆད་རྣམ་པ་གསུམ་ཡིན་ཏེ། ཆོས་གོས་མང་པོ་ལ་ཆགས་པ་དང་། འཇམ་ཞིང་རེག་ན་བདེ་བ་ལ་ཆགས་པ་དང་། བཟང་པོ་ལ་ཆགས་པའོ། །དེ་ལ་ཆོས་གོས་མང་པོ་ལ་ཆགས་པ་སྤང་བའི་ཕྱིར་ཆོས་གོས་གསུམ་པ་ཡིན་ནོ། །ཆོས་གོས་འཇམ་ཞིང་རེག་ན་བདེ་བ་ལ་ཆགས་པ་སྤང་བའི་ཕྱིར་འཕྱིང་བ་པ་ཡིན་ནོ། །ཆོས་གོས་བཟང་པོ་ལ་ཆགས་པ་སྤང་པའི་ཕྱིར་ཕྱག་དར་ཁྲོད་པ་ཡིན་ནོ། །གནས་མལ་ལ་ཆགས་པ་ནི་བར་ཆད་རྣམ་པ་བཞི་ཡིན་ཏེ། འདི་ལྟ་སྟེ་འདུ་འཛི་ལ་ཆགས་པ་དང་། གནས་ལ་ཆགས་པ་དང་། གློས་འབེབས་པའི་བདེ་བ་དང་ཉལ་བའི་བདེ་བ་ལ་ཆགས་པ་དང་། སྟན་དང་གདིང་བ་དང་དགབ་པ་ལ་ཆགས་པའོ། །དེ་ལ་འདུ་འཛི་ལ་ཆགས་པ་སྤང་བའི་ཕྱིར་དགོན་པ་ཡིན་ནོ། གནས་ལ་ཆགས་པ་སྤང་བའི་ཕྱིར་ཤིང་དྲུང་པ་དང་བླ་གབ་མེད་པ་དང་། དུར་ཁྲོད་པ་ཡིན། དུར་ཁྲོད་པ་ནི་འཁྲིག་པ་ལ་ཆགས་པ་སྤང་བའི་ཕྱིར་ཡང་ཡིན་ནོ། །གློས་འབེབས་པའི་བདེ་བ་དང་ཉལ་བའི་བདེ་བ་སྤང་བའི་ཕྱིར་ཙོག་པུ་པ་ཡིན་ནོ། །སྟན་དང་གདིང་བ་དགབ་པ་ལ་ཆགས་པ་སྤང་བའི་ཕྱིར་གཞི་ཇི་བཞིན་པའོ། །མཛེས་པ་ནི། མཛེས་པར་འགྲོ་བ་དང་ལྡོག་པ་དང་ཅུང་ཟད་ལྟ་བ་དང་། རྣམ་པར་ལྟ་བ་དང་། བསྐུམ་པ་དང་། བརྐྱང་བ་དང་། སྣམ་སྦྱར་དང་། ཆོས་གོས་དང་ལྷུང་བཟེད་འཆང་བ་དང་ལྡན་པ་ཡིན་ནོ། །དྲོད་རིག་པ་ནི། འདི་ན་བྲམ་ཟེ་དང་ཁྱིམ་བདག་དད་པ་རྣམས་ཀྱིས། འདི་ལྟ་སྟེ་ཆོས་གོས་དང་བསོད་སྙོམས་དང་མལ་ཆ་དང་སྟན་དང་། ནད་ཀྱི་གསོས་སྨན་དང་། ཡོ་བྱད་ཐམས་ཅད་ཀྱིས་ལེགས་པར་མགྲོན་དུ་གཉེར་བ་ན་དེ་ལ་བླང་བའི་ཚོད་ཤེས་པ་ཡིན་ནོ། །སྐྱེས་བུ་དམ་པའི་ཆོས་དང་ལྡན་པ་ནི་རིགས་མཐོན་པོ་ལས་རབ་ཏུ་བྱུང་བའམ། ཕྱུག་པོའི་ཁྱིམ་ནས་རབ་ཏུ་བྱུང་བའམ། གཟུགས་བཟང་བའམ། ལྟ་ན་སྡུག་པའམ། མཛེས་པའམ། མང་དུ་ཐོས་པའམ། དམ་ཚིག་གི་བྱ་བ་དང་ལྡན་པ་ཡིན་ནམ། ཡེ་ཤེས་ཙམ་མམ། བདེ་བ་ལ་རེག་པར་གནས་པ་ཙམ་གང་ཡང་རུང་བ་ཞིག་ཐོབ་པར་འགྱུར་བ་ཡིན་ན་ཡང་། དེས་བདག་ལ་བསྟོད་པར་མི་བྱེད་ཅིང་གཞན་ལ་སྨད་པར་མི་བྱེད་ལ་ཆོས་དང་རྗེས་སུ་མཐུན་པའི་ཆོས་བསྒྲུབ་པར་བྱ་བ་ཁོ་ན་བདེན་པར་རིག་ནས་ཆོས་དང་རྗེས་སུ་མཐུན་པའི་ཆོས་ལ་ཞུགས་པ་ཡིན་ནོ། །མཁས་པའི་རྟགས་ནི། ལས་ཀྱི་མཚན་ཉིད་ཀྱི་བྱིས་པ་ཡིན་ལ། ལས་ཀྱི་མཚན་ཉིད་ཀྱི་མཁས་པ་ཡིན་ཏེ། དེ་ཡང་ཇི་ལྟར་ཞེ་ན། བྱིས་པ་ནི་ཉེས་པར་བསམ་པ་སེམས་པ་དང་། ཉེས་པར་སྨྲ་བ་བརྗོད་པ་དང་། ཉེས་པར་བྱས་པའི་ལས་བྱེད་པ་ཡིན་གྱི། མཁས་པ་ནི་ལེགས་པར་བསམ་པ་སེམས་པ་དང་། ལེགས་པར་སྨྲ་བ་བརྗོད་པ་དང་། ལེགས་པར་བྱ་བའི་ལས་བྱེད་པ་ཡིན་ནོ། །བཟོད་པ་ཆེ་བ་ནི། གཤེ་ཡང་ཕྱིར་མི་གཤེ་བ་དང་། ཁྲོས་ཀྱང་ཕྱིར་མི་ཁྲོ་བ་དང་། བརྡེག་ཀྱང་ཕྱིར་མི་བརྡེག་པ་དང་། འཚང་དྲུས་ཀྱང་ཕྱིར་འཚང་མི་འདྲུ་ཞིང་། ཚེ་དང་ལྡན་པ་དེ་གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། ཤ་སྦྲང་དང་། སྦྲང་བུ་མཆུ་རིང་དང་། རླུང་དང་ཉི་མ་དང་སྡིག་སྦྲུལ་གྱི་རེག་པ་རྣམས་དང་། གཞན་ལས་ངན་དུ་བརྗོད་པ་རྣམས་དང་། ངན་པ་འོངས་པའི་ཚིག་གི་ལམ་དག་བཟོད་པ་དང་། ལུས་ཀྱི་ཚོར་བ་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བ་སྲོག་འཕྲོག་པར་བྱེད་པ་དག་ཀྱང་བཟོད་ཅིང་དང་དུ་ལེན་པའི་རང་བཞིན་ཅན་ནོ། །དེས་པ་ཆེ་བ་ནི། འདི་ལྟ་སྟེ་སྟོན་པ་དང་ཚངས་པ་མཚུངས་པར་སྤྱོད་པ་མཁས་པ་རྣམས་ལ་བྱམས་པའི་ལུས་ཀྱི་ལས་དང་ལྡན་པ་དང་། བྱམས་པའི་ངག་གི་ལས་དང་ལྡན་པ་དང་། བྱམས་པའི་ཡིད་ཀྱི་ལས་དང་ལྡན་པ་དང་། ཆོས་དང་ལྡན་ཞིང་ཆོས་ཀྱི་ཐོབ་པའི་རྙེད་པ་ལྷུང་བཟེད་དུ་བླུགས་ཤིང་ལྷུང་བཟེད་དུ་ཆུད་ཟིན་པ་རྣམས་ཀྱང་ཐུན་མོང་དུ་ཡོངས་སུ་ལོངས་སྤྱོད་པར་བྱེད་ཅིང་ཟས་མི་བསྲི་བ་དང་། ཚུལ་ཁྲིམས་མཐུན་པར་ཞུགས་པ་དང་། ལྟ་བ་མཐུན་པར་ཞུགས་པ་ཡིན་ཏེ། དེ་ཡང་དག་པར་དགའ་བར་འགྱུར་བ། སྡུག་པར་བྱེད་པ། བླ་མར་བྱེད་པ། རྩོད་པ་མེད་པར་བྱེད་པའི་ཆོས་དྲུག་པོ་དེ་དག་དང་ལྡན་པས་འགྲོགས་ན་བདེ་ཞིང་རྣམ་པར་ཐོ་འཚམ་པ་མེད་པའི་རང་བཞིན་ཅན་ཡིན་ལ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱང་དེ་དང་ལྷན་ཅིག་གནས་པར་དགའ་བ་ཡིན་ནོ། །གྱ་ནོམ་པ་ནི། ཁྲོ་གཉེར་མེད་པ་དང་། རང་བཞིན་གྱིས་མདོག་གསལ་བ་དང་། འཛུམ་པ་སྔར་གཏོང་བ་དང་། སྲོང་པོར་སྨྲ་བ་དང་། དགའ་བར་སྨྲ་བ་དང་། སྡུག་པའི་ངང་ཚུལ་ཅན་དང་། རྒྱུད་རབ་ཏུ་དང་བའོ། །དད་པ་ནས་གྱ་ནོམ་པའི་བར་གྱི་ཆོས་དེ་དག་དང་ལྡན་པས་ཆོས་འདོད་པ་དང་། རྙེད་པ་དང་བཀུར་སྟི་དང་། སྙན་པའི་སྒྲའི་ཚོགས་མི་འདོད་པ་ཡིན་ཞིང་། སྒྲོ་འདོགས་པ་དང་སྐུར་པ་འདེབས་པའི་ལོག་པའི་ལྟ་བ་དང་མི་ལྡན་ཏེ། དེ་མེད་པའི་ཆོས་ལ་སྒྲོ་འདོགས་པར་མི་བྱེད་ཅིང་ཡོད་པའི་ཆོས་ལ་སྐུར་པ་འདེབས་པར་མི་བྱེད་པས་སོ། །དེ་འཇིག་རྟེན་པ་ལ་གྲགས་པའི་བཟོ་དང་སྙན་ངག་ཏུ་བྱས་པའི་ཡིག་འབྲུ་སྣ་ཚོགས་དང་ཚིག་སྣ་ཚོགས་དང་ཡི་གེ་སྣ་ཚོགས་གང་ཡིན་པ་དེ་དོན་མེད་པ་ཡིན་པར་རིག་ནས་ཐག་རིང་དུ་སྤོང་བར་བྱེད་ཅིང་། དེས་སྤྱོད་པ་མི་བྱེད། དེས་དགའ་བར་མི་བྱེད། ལྷུང་བཟེད་དང་ཆོས་གོས་ལྷག་པ་མི་འཆང་བ་དང་། ཁྱིམ་ན་གནས་པ་དང་རབ་ཏུ་བྱུང་བ་རྣམས་དང་འགྲོགས་པའི་འདུ་འཛི་ཉོན་མོངས་པ་འཕེལ་བར་འགྱུར་བ་ཡོངས་སུ་སྤོང་བར་བྱེད་པ་དང་། འཕགས་པ་རྣམས་དང་ལྷན་ཅིག་འགྲོགས་པའི་ཚོགས་པ་ཡེ་ཤེས་རྣམ་པར་སྦྱོང་བར་འགྱུར་བར་བྱེད་པ་དང་། གང་གི་གཞི་ལས་འཁྲུག་ལོང་དང་། གནོད་སེམས་སྐྱེ་ཞིང་དེ་དག་རྣམ་པར་གྱུར་ཅིང་གཞན་དུ་གྱུར་པ་ལས་མྱ་ངན་དང་སྨྲེ་སྔགས་འདོན་པ་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་སྐྱེ་བར་མི་འགྱུར་བ་མཛའ་སྡེ་དག་མི་ཕྱེད་པ་དང་། ཉོན་མོངས་པ་དང་ཉེ་བའི་ཉོན་མོངས་པ་སྐྱེས་སོ་ཅོག་ལ་ཡང་གཞི་འདིས་བདག་ལ་ཚེ་འདི་དང་ཚེ་ཕྱི་མར་སྡུག་བསྔལ་སྐྱེ་བར་གྱུར་ན་མི་རུང་ངོ་ཞེས་དང་དུ་མི་ལེན་ཞིང་། སྤོང་བར་བྱེད། སེལ་བར་བྱེད། བྱང་བར་བྱེད་པ་དང་། དད་པས་བྱིན་པ་ཆུད་མི་སོན་པ་དང་། ཚུལ་ཁྲིམས་མ་ཉམས་པ་དང་བརཏལ་ཞུགས་མ་ཞིག་པས་དད་པས་བྱིན་པ་ཡོངས་སུ་ལོངས་སྤྱོད་པར་བྱེད་པ་དང་། དད་པས་སྦྱིན་པ་སྤོང་བར་མི་བྱེད་པ་དང་། བསླབ་པ་འབུལ་བར་མི་བྱེད་པ་དང་། བདག་ཉིད་ཀྱི་ཉེས་པའི་སྐབས་དང་འཁྲུལ་པ་ཚོལ་ཞིང་དགེ་བ་མི་སྤྱོམས་ལ་སྡིག་པ་འཆགས་པར་བྱེད་པ་དང་། གཞན་དག་གི་ཉེས་པའི་སྐབས་དང་འཁྲུལ་པ་ལ་ལྷུག་པར་འཇོག་པ་དང་། བསམས་བཞིན་དུ་སྲོག་གི་ཕྱིར་ཡང་ལྟུང་བ་མི་འབྱིན་ཞིང་བྱུང་ན་ཡང་མྱུར་བ་མྱུར་བ་ཁོ་ནར་ཆོས་བཞིན་དུ་ཕྱིར་བྱེད་པ་དང་། འཕྲལ་གྱི་བྱ་བ་དག་ལ་ཡང་མཁས་ཤིང་ལེ་ལོ་མེད་པ་དང་། རང་ཉིད་ཀྱིས་བྱེད་ཅིང་གཞན་ལས་ལུས་ཀྱི་བསྙེན་བཀུར་མི་ཚོལ་བ་དང་། སངས་རྒྱས་རྣམས་དང་སངས་རྒྱས་ཉན་ཐོས་རྣམས་ཀྱི་མཐུ་བསམ་གྱིས་མི་ཁྱབ་པ་དང་། ཟབ་མོ་བསྟན་པ་དག་ལ། འདི་ནི་དེ་བཞིན་གཤེགས་པ་རྣམས་ཀྱིས་མཁྱེན་ཅིང་གཟིགས་པ་ཡིན་གྱི་བདག་གིས་ནི་མ་ཡིན་ནོ་སྙམ་དུ་རིག་ནས་དེ་ལ་མོས་པར་བྱེད་ཅིང་སྤང་བར་མི་བྱེད་པ་དང་། རང་གི་ལྟ་བ་མཆོག་ཏུ་འཛིན་པ་ལ་གནས་པར་མི་བྱེད་ཅིང་ཅལ་ཅོལ་དུ་འཛིན་པ་དང་། སྤང་དཀའ་བར་མི་སྨྲ་བ་ཡིན་ཏེ། དེ་ཡོན་ཏན་དེ་དག་དང་ལྡན་ཞིང་དེ་ལྟར་སྤྱོད། དེ་ལྟར་བསླབ་པ་ན་དགེ་སྦྱོང་གི་རྒྱན་གྱིས་མཛེས་པ་ཡིན་ནོ། །དེ་ནི་ཐོས་དང་བསམ་ལྡན་པས་ཞེས་པ་སྟེ། ཞི་གནས་ཀྱི་ཚོགས་བསག་ཅིང་སྲུང་བ་ཞེས་ཀྱང་བྱའོ། །གཉིས་པ། ཐོས་བསམ་གྱི་སྙིང་པོ་བསམ་གཏན་ལ་སྦྱོར་བའི་ཚུལ། བསམ་གཏན་ལ་འཇུག་པའི་ཚུལ། རྣལ་འབྱོར་སྒོམ་པ་དངོས་བཤད་པ་གཉིས་ལས་དང་པོ་ནི། ཀློག་པས་སྡེ་སྣོད་འཛིན་པའི་གྲངས་སུ་ཆུད་པའམ། ཇོ་བོ་རྗེ་ལྷ་གཅིག་གིས། ཚེ་ནི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པས་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་གྱིས། །ཞེས་པས། ཡང་ན་རྣལ་འབྱོར་སྒོམ་པའི་གདམས་ངག་ལ་ཐོས་བསམ་བྱས་ཏེ་བསྒོམ་པར་བྱའོ། །འདིར་ཁ་ཅིག་གདམས་ངག་ཙམ་གྱིས་ཆོག་ན་བསྟན་བཅོས་ཆེན་པོ་རྣམས་དོན་མེད་པས་དེ་དག་བསྟན་ནས་ཅི་བྱ་ཞེས་ཟེར་ལ། དེ་ནི་འདྲ་སྟེ་བསྟན་བཅོས་ཆེན་པོ་ལ་སྦྱང་ངེས་པར་དགོས་ན་པཎ་གྲུབ་རྣམས་ཀྱིས་རྣལ་འབྱོར་སྒོམ་པའི་གདམས་ངག་ཉུང་ངུ་གསུངས་པ་དོན་མེད་པས་དེ་དག་བསྟན་ནས་ཅི་བྱའོ། །འོ་ན་རང་ལུགས་ཇི་ལྟར་ཞེ་ན། གདུལ་བྱ་སྤྲོས་ན་མགུ་ལ། སྤྲོས་ཏེ་བཤད་པ་བཟོད་པ་ནི། ལུང་རྒྱས་པ་ལ་ཐོས་བསམ་བྱེད་ཅིང་དེའི་དབང་དུ་མཛད་དོ། །ཐོས་པས་དོན་མ་ཡིན་པ་སྤོང་སོགས་ཐོས་པ་བསྔགས་སོ། །ཡང་དག་འཇོག་ལ་མོས་ཤིང་། ཉུང་ངུ་ལས་མི་བཟོད་པ་དེ་དག་གི་དབང་དུ་མཛད་ནས། ཐོས་པ་མང་པོ་ཐོས་པ་མིན། །ཚིག་གཅིག་ཐོས་པ་ཐོས་པའི་མཆོག །ལ་སོགས་པ་དང་། ཕལ་ཆེན་ལས། ཇི་ལྟར་དམུས་ལོང་རི་མོ་མཁན། །ཚོང་འདུས་དབུས་སུ་ཕྱིན་བྱས་ནས། །སྐྱེ་བོ་མང་པོ་དགའ་བྱས་ཀྱང་། །རང་གིས་སྐད་ཅིག་མཐོང་བ་མེད། །མ་བསྒོམས་ཆོས་ཀྱང་དེ་དང་འདྲ། །ཞེས་སོགས། ཐོས་པ་སྨད་དེ་སྒོམ་པ་བསྔགས་སོ། །དེ་ཡང་སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པ་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་འབྱུང་བ་ཡིན་ཏེ། མདོར་བསྡུས་ན་ཤེར་ཕྱིན་རྒྱས་བསྡུས་སུ་འཇོག་པ་བཞིན་ནོ། །དེས་ན་ཕྱོགས་གཅིག་ངོ་ཤེས་ཀྱིས་གཞན་ཁྱད་དུ་གསོད་པ་ནི་ཆོས་སྤོང་བའི་ལས་གསོག་པའི་རྒྱུ་ཡིན་པས་སྤང་བར་བྱའོ། །དེས་ན་གང་ཟག་གཉིས་ཀས་བླ་མ་ལས་རྣལ་འབྱོར་སྒོམ་པའི་གདམས་ངག་མནོས་ནས། ཐོས་པའི་དོན་དེ་ཉིད་རི་ཁྲོད་དམ་དགོན་པ་དབེན་པར་ཕྱིན་ཏེ་སྒོམ་དགོས། མ་སྒོམ་ན་ཐོས་པ་དེ་ཉོན་མོངས་པའི་གཉེན་པོར་མི་འགྲོ། ཉོན་མོངས་པའི་གཉེན་པོར་མ་སོང་ན་ཆོས་ལམ་དུ་མ་སོང་བ་ཡིན། དེས་ན་ཆོས་ལམ་དུ་འགྲོ་བ་ནི་སྒོམ་པ་ཁོ་ན་ལ་རག་ལས་པས། དེའི་ཚུལ་ནི་གནས་དབེན་པར་སྤྱོད་ལམ་འཆག་པ་དང་འདུག་པ་དག་གིས་འདའ་བར་བྱེད་ཅིང་། མཚན་མོའི་ཐུན་དང་པོ་ལ་དེ་ཉིད་དང་། ཐུན་བར་པ་ལ་གློ་གཡས་པ་ཕབ་སྟེ་ཉལ་བར་བྱེད་པ་དང་། ཐུན་ཐ་མ་ལ་མྱུར་བ་མྱུར་བ་ལངས་ཏེ་འཆག་པ་དང་ཉལ་བ་དག་གིས་འདའ་བར་བྱེད་པའོ། །དེ་ལ་འདུག་པ་ནི་གནས་ཕུན་སུམ་ཚོགས་པ་དེ་ཉིད་དུ་སངས་རྒྱས་ཀྱིས་རྗེས་སུ་གནང་བའི་ཁྲི་འམ་རྩྭ་བཏིང་བའི་སྟེང་དུ་སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲངས་ནས་དྲན་པ་ཕྱོགས་པར་བཞག་སྟེ་འདུག་པར་བྱེད་པའོ། །ཅིའི་ཕྱིར་ཞེ་ན། རྒྱུ་རྣམ་པ་ལྔ་ཡང་དག་པར་རྗེས་སུ་མཐོང་བ་སྟེ། ལུས་ལེགས་པར་སྒྲིམས་ན་སྤྱོད་ལམ་ཤིན་ཏུ་སྦྱངས་པ་སྐྱེ་བ་དང་རྗེས་སུ་མཐུན་པ་ཡིན་པའི་ཕྱིར་མྱུར་བ་མྱུར་བ་ཁོ་ནར་ཤིན་ཏུ་སྦྱངས་པ་སྐྱེ་བར་འགྱུར་བ་དང་། དེ་བཞིན་དུ་འདུག་པས་དུས་ཡུན་རིང་པོ་འདའ་བར་བྱེད་ནུས་ཤིང་སྤྱོད་ལམ་དེས་ལུས་ཤིན་ཏུ་དལ་བར་མི་འགྱུར་བ་དང་། སྤྱོད་ལམ་དེ་ནི་གཞན་མུ་སྟེགས་དང་ཕས་ཀྱི་རྒོལ་བ་དག་དང་། ཐུན་མོང་མ་ཡིན་པ་དང་གཞན་དག་གིས་སྤྱོད་ལམ་དེས་འདུག་པར་མཐོང་ན་ཤིན་ཏུ་དད་པ་སྐྱེ་བར་འགྱུར་བ་དང་། སྤྱོད་ལམ་དེ་ནི་སངས་རྒྱས་རྣམས་དང་སངས་རྒྱས་ཀྱི་ཉན་ཐོས་རྣམས་ཀྱིས་རྗེས་སུ་གནང་ཞིང་བརྟེན་པ་ཡིན་པའི་ཕྱིར་རོ། །ལུས་དྲང་པོ་ནི། ལུས་གསལ་བར་སྲང་སྟེ་བཞག་པ་དང་། སེམས་ལ་གཡོ་མེད་ཅིང་ཚུལ་འཆོས་པ་མེད་པར་དྲང་པོར་བཞག་པའོ། །དེ་ལ་ལུས་དྲང་པོས་ཟིན་པས་ནི་རྨུགས་པ་དང་གཉིད་ཀྱི་སེམས་ཡང་དག་པར་བླངས་ཏེ་གནས་པར་མི་བྱེད་དོ། །སེམས་ལ་གཡོ་མེད་ཅིང་ཚུལ་འཆོས་པ་མེད་པས་ནི་ཕྱི་རོལ་དུ་རྣམ་པར་གཡེང་བ་ཡང་དག་པར་བླངས་ཏེ་གནས་པར་མི་བྱེད་དོ། །དྲན་པ་ཕྱོགས་པར་བཞག་པ་ནི། ཚུལ་བཞིན་ཡིད་ལ་བྱེད་པ་དང་མཚུངས་པར་ལྡན་པའི་དྲན་པ་ནི་ནག་པོའི་ཕྱོགས་ཐམས་ཅད་ལས་ཕྱིར་ཕྱོགས་ཤིང་མི་མཐུན་པ་ཡིན་པའི་ཕྱིར་དྲན་པ་ཕྱོགས་པ་ཞེས་བྱའོ། །གཞན་ཡང་ཏིང་ངེ་འཛིན་གྱི་མཚན་མ་ལ་དམིགས་པ་དང་། གཟུགས་བརྙན་གྱི་མཚན་མ་ལ་དམིགས་པའི་དྲན་པ་ནི་མཉམ་པར་བཞག་པའི་ས་པའི་དམིགས་པ་ཐམས་ཅད་ལ་ཕྱོགས་པ་ཡིན་པའི་ཕྱིར་ཡང་དྲན་པ་ཕྱོགས་པ་ཞེས་བྱའོ། །དེ་ཀ་དབེན་པ་ཕུན་སུམ་ཚོགས་པ་སྟེ། ལུས་དབེན་པ་ནི་ཁྱིམ་ན་གནས་པ་དང་རབ་ཏུ་བྱུང་བ་རྣམས་དང་ལྷན་ཅིག་མི་གནས་པ་གང་ཡིན་པའོ། །སེམས་དབེན་པ་ནི། ཉོན་མོངས་པ་ཅན་དང་ལུང་དུ་མ་བསྟན་པའི་ཡིད་ལ་བྱེད་པ་སྤངས་ཏེ། མཉམ་པར་བཞག་པའི་ས་པའམ། ཏིང་ངེ་འཛིན་གྱི་ཚོགས་ཀྱི་སྦྱོར་བ་ལས་བྱུང་བའི་ཡིད་ལ་བྱེད་པ་དགེ་བ་དོན་དང་ལྡན་པ་སྒོམ་པར་བྱེད་པའོ། །གཉིས་པ་རྣལ་འབྱོར་སྒོམ་པ་དངོས་བཤད་པ་ལ། ཞི་གནས་སྒོམ་པ། ལྷག་མཐོང་། ཞི་གནས་དང་ལྷག་མཐོང་ཟུང་དུ་འབྲེལ་བར་འཇུག་པའི་སྒོམ་པའོ། །དང་པོ་ནི། ཏིང་ངེ་འཛིན་གང་ལ་ཟེར་ན། ཡང་དང་ཡང་དུ་རྗེས་སུ་དྲན་པ་དང་། ཆ་མཐུན་པ་ལ་དམིགས་པ་དང་། རྒྱུན་དང་ཁ་ན་མ་ཐོ་བ་མེད་པ་དང་། དགའ་བ་དང་ལྡན་པའི་སེམས་ཀྱི་རྒྱུན་གང་ཡིན་པ་སྟེ། དེ་ནི་ཏིང་ངེ་འཛིན་ཅེས་བྱའོ། །ཡང་དང་ཡང་དུ་རྗེས་སུ་དྲན་པར་བྱེད་པ་ནི། ཆོས་གང་དག་བཟུང་ཞིང་ཉན་པ་དང་། བླ་མ་དག་ལས་གདམས་ཤིང་རྗེས་སུ་བསྟན་པ་ཐོབ་པ་གང་ཡིན་པ་དེའི་དབང་དུ་བྱས་ནས་མཉམ་པར་བཞག་པའི་ས་པའི་མཚན་མ་མངོན་དུ་བྱས་ཏེ་དམིགས་པ་ལ་རྒྱུན་དང་ལྡན་པའི་དྲན་པའི་རྗེས་སུ་འཇུག་ཅིང་ཉེ་བར་གཏོད་པར་བྱེད་པའོ། །ཆ་དང་མཐུན་པ་ལ་དམིགས་པ་ནི། མཉམ་པར་བཞག་པའི་དམིགས་པ་རྣམ་པ་དུ་མ་གང་ཡིན་པ་སྟེ། གང་གི་དམིགས་པ་དེ་ལ་སེམས་འཇུག་པར་བྱེད་པ་ནི་མཉམ་པར་བཞག་པ་ཞེས་བྱའོ། །དེ་ནི་ཤེས་བྱའི་དངོས་པོའི་གཟུགས་བརྙན་ཡིན་པས་ན་དེའི་ཕྱིར་ཆ་དང་མཐུན་པ་ཞེས་བྱའོ། །རྒྱུན་གང་ཞེ་ན། དམིགས་པ་དེས་དྲན་པ་རྣམ་པར་གཡེང་བ་མེད་པའི་རྣམ་པ་དང་བར་དུ་འཆད་པ་མེད་པ་དང་། རྒྱུན་ཆགས་པ་དང་། རྟག་ཏུ་གུས་པར་འཇུག་པའོ། །ཁ་ན་མ་ཐོ་བ་མེད་པ་དང་དགའ་བ་དང་ལྡན་པ་ནི་དམིགས་པ་དེ་ཉིད་ལ་མངོན་པར་དགའ་བ་ཉོན་མོངས་མེད་ཅིང་རེག་པར་གནས་པའི་དྲན་པས་ལམ་དུ་ཞུགས་པའོ། །སེམས་རྩེ་གཅིག་པ་ཉིད་དེ་ལ་ཡང་། ཞི་གནས་ཀྱི་ཕྱོགས་དང་ལྷག་མཐོང་གི་ཕྱོགས་གཉིས་ཡོད་པའི་སེམས་གནས་པ་རྣམ་པ་དགུ་པོ་གང་ཡིན་པ་དེ་ནི་ཞི་གནས་ཀྱི་ཕྱོགས་སོ། །ཤེས་རབ་ཀྱི་དཔྱོད་པ་རྣམ་པ་བཞི་པོ་གང་ཡིན་པ་དེ་ནི་ལྷག་མཐོང་གི་ཕྱོགས་ཡིན་ནོ། །དེ་ལ་སེམས་གནས་པ་རྣམ་པ་དགུ་གང་ཞེ་ན། འདི་ལ་དགེ་སློང་སེམས་ནང་ཁོ་ནར་འཇོག་པ་དང་། ཡང་དག་པར་འཇོག་པར་བྱེད་པ་དང་། བསྡུས་ཏེ་འཇོག་པར་བྱེད་པ་དང་། ཉེ་བར་འཇོག་པར་བྱེད་པ་དང་། དུལ་བར་བྱེད་པ་དང་། ཞི་བར་བྱེད་པ་དང་། ཉེ་བར་ཞི་བར་བྱེད་པ་དང་། རྒྱུད་གཅིག་ཏུ་བྱེད་པ་དང་། ཏིང་ངེ་འཛིན་དུ་བྱེད་པའོ། །དེ་ལ་སྟོབས་རྣམ་པ་དྲུག་གིས་ནི་སེམས་གནས་པ་རྣམ་པ་དགུ་པོ་དག་འགྲུབ་སྟེ། ཐོས་པའི་སྟོབས་དང་བསམ་པའི་སྟོབས་ཀྱིས་ནི། དང་པོ་ཁོ་ནར་སེམས་དམིགས་པ་ལ་འཇོག་པར་བྱེད་ཅིང་དེ་ཉིད་ལ་གཏོང་བའི་ཚུལ་གྱི་ཡང་དག་པར་འཇོག་པར་བྱེད་དོ། །དེ་ལྟར་སེམས་གཏད་པ་ལ། དྲན་པའི་སྟོབས་ཀྱིས་ཡང་དག་པར་སྡུད་ཅིང་རྣམ་པར་གཡེང་བར་མི་བྱེད་པས་བསྡུས་ཏེ་འཇོག་པ་དང་། ཉེ་བར་འཇོག་པར་བྱེད་དོ། །དེ་ནས་ཤེས་བཞིན་གྱི་སྟོབས་ཀྱིས་ནི་རྣམ་པར་རྟོག་པ་དང་། ཉེ་བའི་ཉོན་མོངས་པའི་མཚན་མ་དག་ལ་འཕྲོ་བར་མི་བྱེད་པས་དུལ་བ་དང་ཞི་བར་བྱེད་དོ། །བརྩོན་འགྲུས་ཀྱི་སྟོབས་ཀྱིས་ནི་དེ་གཉིས་ཀ་ཀུན་ཏུ་འབྱུང་བ་དང་དུ་མི་ལེན་ཞིང་རྒྱུད་གཅིག་ཏུ་བྱེད་དོ། །ཡོངས་སུ་འདྲིས་པའི་སྟོབས་ཀྱིས་ནི་ཏིང་ངེ་འཛིན་དུ་བྱེད་དོ། །དེ་ལ་འཇོག་པར་བྱེད་པ་དང་ཡང་དག་པར་འཇོག་པར་བྱེད་པ་ལ་ནི་སྒྲིམས་ཏེ་འཇུག་པའི་ཡིད་ལ་བྱེད་པ་ཡོད་ལ། བསྡུས་ཏེ་འཇོག་པ། ཉེར་འཇོག འདུལ་བྱེད། ཞི་བྱེད། ཉེ་བར་ཞི་བྱེད་ལ་བར་དུ་ཆད་ཅིང་འཇུག་པའི་ཡིད་ལ་བྱེད་པ་ཡོད། རྒྱུད་གཅིག་ཏུ་བྱེད་པ་ལ་ནི། བར་དུ་ཆད་པ་མེད་པར་འཇུག་པའི་ཡིད་ལ་བྱེད་པ་ཡོད། ཏིང་ངེ་འཛིན་དུ་བྱེད་པ་ལ་ནི། ལྷུན་གྱིས་གྲུབ་པར་འཇུག་པའི་ཡིད་ལ་བྱེད་པ་ཡོད་དེ་དེ་ལྟར་ཡིད་ལ་བྱེད་པ་བཞི་དང་ལྡན་ནོ། །གཉིས་པ་ལྷག་མཐོང་སྒོམ་པ་ནི། དགེ་སློང་ནང་གི་སེམས་ཀྱི་ཞི་གནས་ལ་བརྟེན་ནས་ཆོས་རྣམས་རྣམ་པར་འབྱེད་པར་བྱེད་པ་དང་། རབ་ཏུ་རྣམ་པར་འབྱེད་པ་དང་། ཡོངས་སུ་རྟོག་པར་བྱེད་པ་དང་། ཡོངས་སུ་དཔྱོད་པར་བྱེད་པའོ། །ཡང་ན་སྒོ་གསུམ་མམ་རྣམ་པ་དྲུག་ལ་དམིགས་པའོ། །སྒོ་གསུམ་གང་ཞེ་ན། མཚན་མ་ཙམ་གྱི་རྗེས་སུ་ཞུགས་པའི་ལྷག་མཐོང་དང་། ཡོངས་སུ་འཚོལ་བའི་རྗེས་སུ་ཞུགས་པ་དང་། ཡོངས་སུ་འཚོལ་བ་ལ་སོ་སོར་རྟོག་པའི་རྗེས་སུ་ཞུགས་པའོ། །དང་པོ་གང་གི་ཐོས་པ་གཟུང་བའི་ཆོས་སམ་གདམས་ངག་ལ་མཉམ་པར་བཞག་པའི་ས་པའི་ཡིད་ལ་བྱེད་ཅིང་སེམས་པར་མི་བྱེད། ཉེ་བར་རྟོག་པར་མི་བྱེད་པའོ། །གཉིས་པ། གང་གི་ཚེ་སེམས་པར་བྱེད། རྟོག་པར་བྱེད། འཇལ་བར་བྱེད། ཉེ་བར་རྟོག་པར་བྱེད་པའོ། །གསུམ་པ། གང་གི་ཚེ་བསམས་ཤིང་བརྟགས་ལ་གཞལ་ཞིང་ཉེ་བར་བརྟགས་ནས་ཇི་ཙམ་མཉམ་པར་བཞག་པ་དེ་བཞིན་དུ་སོ་སོར་རྟོག་པར་བྱེད་པའོ། །གཞི་རྣམ་པ་དྲུག་ལ་དམིགས་པ་གང་ཞེ་ན། དོན་དང་། དངོས་པོ་དང་། མཚན་ཉིད་དང་། ཕྱོགས་དང་། དུས་དང་། རིགས་པ་ཡོངས་སུ་ཚོལ་བར་བྱེད་ཅིང་ཡོངས་སུ་བཙལ་ནས་ཀྱང་དེ་དག་ལ་སོ་སོར་རྟོག་པར་བྱེད་དོ། །དང་པོ་འདིའི་དོན་ནི་འདི་ཡིན་ནོ་ཞེས་པ། གཉིས་པ་དངོས་པོ་རྣམ་པ་གཉིས་ཏེ་ནང་གི་དང་ཕྱི་རོལ་གྱིའོ། །གསུམ་པ་རང་གི་མཚན་ཉིད་དང་། སྤྱིའི་མཚན་ཉིད་དོ། །བཞི་པ། ནག་པོའི་ཕྱོགས་དང་དཀར་པོའི་ཕྱོགས་སོ། །དེ་ལ་ནག་པོའི་ཕྱོགས་ནི་སྐྱོན་དང་ཉེས་དམིགས་ཀྱི་སྒོ་ནས་སོ། །དཀར་པོའི་ཕྱོགས་ནི་ཡོན་ཏན་དང་ཕན་ཡོན་གྱི་སྒོ་ནས་སོ། །ལྔ་པ་དུས་རྣམ་པ་གསུམ་པོ་འདས་པ་དང་། མ་འོངས་པ་དང་། ད་ལྟར་བྱུང་བའི་དུས་ཏེ། འདི་ལྟར་འདས་པ་ནི་འདི་ལྟ་བུ་ཞིག་བྱུང་བར་གྱུར་ཏོ། །མ་འོངས་པའི་དུས་ན་འདི་ལྟ་བུ་ཞིག་འབྱུང་བར་འགྱུར་རོ། །ད་ལྟར་བྱུང་བའི་དུས་ན་འདི་ལྟ་བུ་ཞིག་ད་ལྟ་ཡོད་དོ། །དྲུག་པ་སྔར་བཤད་པའི་རིགས་པ་བཞི་པོ་དག་གོ །དེས་ནི་ལྷག་མཐོང་ཐམས་ཅད་ཡང་དག་པར་བསྡུས་པ་ཡིན་ནོ། །ཅིའི་ཕྱིར་གཞི་རྣམ་པ་དྲུག་ཏུ་བཞག་ཅེ་ན། རྟོགས་པ་རྣམ་པ་གསུམ་གྱི་དབང་དུ་བྱས་པའི་ཕྱིར་ཏེ། རྟོགས་པ་རྣམ་པ་གསུམ་ནི། དོན་རྟོགས་པ་དང་། དངོས་པོའི་མཐའ་རྟོགས་པ་དང་། ཡང་དག་པ་ཇི་ལྟ་བ་བཞིན་དུ་རྟོགས་པའོ། །དེ་ལ་དོན་ཡོངས་སུ་རྟོགས་པ་ནི། སྨྲས་པའི་དོན་རྟོགས་པ་ཡིན་ནོ། །དངོས་པོ་དང་རང་གི་མཚན་ཉིད་འཚོལ་བས་ནི་དངོས་པོའི་མཐའ་རྟོགས་པ་ཡིན་ནོ། །སྤྱིའི་མཚན་ཉིད་དང་ཕྱོགས་དུས་རིགས་པ་ཡོངས་སུ་ཚོལ་བ་ནི་ཡང་དག་པ་ཇི་ལྟ་བ་བཞིན་དུ་རྟོགས་པ་ཡིན་ནོ། །རྣལ་འབྱོར་པས་ཤེས་པར་བྱ་བ་ནི། ཤེས་པར་བྱ་བའི་དོན་དང་། ཤེས་བྱའི་དངོས་པོ་ཇི་སྙེད་ཡོད་པ་དང་། ཇི་ལྟ་བ་བཞིན་དུ་ཡང་དག་པར་ཡོད་པ་ཉིད་གང་ཡིན་པ་དེ་ཙམ་དུ་ཟད་པའི་ཕྱིར་རོ། །གསུམ་པ་ཞི་གནས་དང་ལྷག་མཐོང་ཟུང་དུ་འབྲེལ་བར་འཇུག་པའི་སྒོམ་པ་ནི། ཞི་མ་གནས་ན་ལྷག་མི་མཐོང་། ལྷག་མ་མཐོང་ན་ཉོན་མོངས་སྤངས་བར་མི་ནུས་པས་ཞི་གནས་སྐྱེས་ནས་ལྷག་མཐོང་ལ་འཇུག་ཅིང་ལྷག་མཐོང་ཤར་ནས་བདེན་པ་རྣམས་མངོན་པར་རྟོགས་པར་བྱ་བའི་ཕྱིར་ཆ་མཐུན་པའམ་རྗེས་སུ་མཐུན་པའི་དམིགས་པ་ལ་སེམས་ཉེ་བར་གཏོད་པར་བྱེད་དོ། །དེ་ཡང་ལུང་ལས་ནམ་གྲུ་གལ་ཏེ་དགེ་སློང་རྣལ་འབྱོར་པ་རྣལ་འབྱོར་སྤྱོད་པ་དེ་འདོད་ཆགས་སྤྱད་པ་ཁོ་ན་ཞིག་ཡིན་ན་ནི་མི་སྡུག་པ་ལ་སེམས་ཉེ་བར་གཏོད་པར་བྱེད་དོ། །ཞེ་སྡང་སྤྱད་པ་ཞིག་ཡིན་ན་ནི་བྱམས་པ་ལའོ། །གཏི་མུག་སྤྱད་པ་ཞིག་ཡིན་ན་ནི་རྐྱེན་འདི་ཉིད་ཀྱི་རྟེན་ཅིང་འབྲེལ་བར་འབྱུང་བ་ལའོ། །ང་རྒྱལ་སྤྱད་པ་ཞིག་ཡིན་ན་ནི་ཁམས་རབ་ཏུ་དབྱེ་བ་ལ་སེམས་གཏོད་པར་བྱེད་དོ་ཞེས་དང་། ཡང་། རྣམ་པར་རྟོག་པ་སྤྱད་པ་ཁོ་ན་ཞིག་ཡིན་ན་ནི་དབུགས་བརྔུབ་པ་དང་དབུགས་དབྱུང་བ་དྲན་པ་ལ་སེམས་ཉེ་བར་གཏོད་པ་དང་། འདུ་བྱེད་རྣམས་ཀྱི་རང་གི་མཚན་ཉིད་ལ་ཀུན་དུ་རྨོངས་པའམ། བདག་དང་། སེམས་ཅན་དང་། སྲོག་དང་། སྐྱེ་བ་པོ་དང་། གསོ་བ་དང་། གང་ཟག་གི་དངོས་པོ་ལ་ཀུན་དུ་རྨོངས་པ་ཞིག་ཡིན་ན་ནི་ཕུང་པོ་ལ་མཁས་པ་ལ་སེམས་ཉེ་བར་གཏོད་པར་བྱེད་དོ། །རྒྱུ་ལ་ཀུན་དུ་རྨོངས་པ་ཞིག་ཡིན་ན་ནི་ཁམས་ལ་མཁས་པ་ལའོ། །རྐྱེན་ལ་ཀུན་དུ་རྨོངས་པ་ཞིག་ཡིན་ན་ནི་སྐྱེ་མཆེད་ལ་མཁས་པ་ལའོ། །མི་རྟག་པ་དང་། སྡུག་བསྔལ་དང་། བདག་མེད་པ་ལ་ཀུན་དུ་རྨོངས་པ་ཞིག་ཡིན་ན་ནི་རྟེན་ཅིང་འབྲེལ་པར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པ་ལ་སེམས་ཉེ་བར་གཏོད་པར་བྱེད་དོ། །འདོད་པའི་ཁམས་ཀྱི་འདོད་ཆགས་དང་བྲལ་བར་འདོད་པ་ཞིག་ཡིན་ན་ནི་འདོད་པ་རྣམས་ཀྱི་རགས་པ་ཉིད་དང་། གཟུགས་རྣམས་ཀྱི་ཞི་བ་ཉིད་ལའོ། །གཟུགས་རྣམས་ལས་འདོད་ཆགས་དང་བྲལ་བར་འདོད་པ་ཞིག་ཡིན་ན་ནི། གཟུགས་རྣམས་ཀྱི་རགས་པ་ཉིད་དང་། གཟུགས་མེད་པ་རྣམས་ཀྱི་ཞི་བ་ཉིད་ལ་སེམས་གཏོད་པར་བྱེད་དོ། །འཇིག་ཚོགས་ཐམས་ཅད་ལས་སྐྱོ་བར་འདོད་ཅིང་རྣམ་པར་གྲོལ་བར་འདོད་པ་ཞིག་ཡིན་ན་ནི་བདེན་པ་སྡུག་བསྔལ་དང་། བདེན་པ་ཀུན་འབྱུང་བ་དང་། བདེན་པ་འགོག་པ་དང་། བདེན་པ་ལམ་ལ་སེམས་ཉེ་བར་གཏོད་པར་བྱེད་དོ། །ནམ་གྲུ། དེ་ལྟར་ན་དགེ་སློང་རྣལ་འབྱོར་སྤྱོད་པ་རྗེས་སུ་མཐུན་པའི་དམིགས་པ་ལ་སེམས་ཉེ་བར་གཏོད་པར་བྱེད་པ་ཡིན་ནོ། །ཞེས་གསུངས་པས། སྔར་ཆ་དང་མཐུན་པ་ཞེས་པའང་དེ་དག་སྟེ། དེ་ལས་མི་སྡུག་པ་ནི་རྣམ་པ་དྲུག་སྟེ། མི་གཙང་བའི་མི་སྡུག་པ་དང་། སྡུག་བསྔལ་གྱི། དྲན་པའི། བལྟོས་པའི། ཉོན་མོངས་པའི། རབ་ཏུ་འཇིག་པའི་མི་སྡུག་པའོ། །དང་པོ་ནང་ལ་བརྟེན་པ་དང་ཕྱི་རོལ་ལ་བརྟེན་པ་གཉིས་ཀྱི་ནང་ལ་བརྟེན་པ་ནི། ལུས་འདི་སྐྲ་ལ་སོགས་པ་མི་གཙང་བའི་རྫས་སོ་དྲུག་ཏུ་ཤེས་པར་བྱ་བ་ཡིན་ལ། ཕྱི་མ་ནི་རྣམ་པར་སྔོ་བ་སོགས་འདུ་ཤེས་དགུའམ་ཀེང་རུས་སུ་ལྟ་བ་གང་ཡིན་པའོ། །འདོད་ཆགས་ནི་ལྔ་སྟེ། ནང་གི་འདོད་པ་རྣམས་ནི་འདོད་པ་ལ་འདུན་པའི་འདོད་ཆགས་དང་། ཕྱི་རོལ་གྱི་འདོད་པ་རྣམས་ཀྱིས་འཁྲིག་པ་ལ་འདུན་པའི་འཁྲིག་པའི་འདོད་ཆགས་དང་། ཡུལ་ལ་འདུན་པ་ཡུལ་གྱི་འདོད་ཆགས་དང་། གཟུགས་ལ་འདུན་པ་གཟུགས་ཀྱི་འདོད་ཆགས་དང་། འཇིག་ཚོགས་ལ་འདུན་པ་འཇིག་ཚོགས་ཀྱི་འདོད་ཆགས་སོ། །འདོད་ཆགས་རྣམ་པ་ལྔ་པོ་དེ་དག་སྤང་བ་དང་བསལ་བ་དང་། ཀུན་མི་འབྱུང་བར་བྱ་བའི་ཕྱིར་མི་སྡུག་པ་རྣམ་པ་དྲུག་ལ་དམིགས་པ་ཡིན་ནོ། །བྱམས་པ་ནི་མཛའ་བཤེས་ཀྱི་ཕྱོགས་དང་དགྲ་བོའི་ཕྱོགས་དང་ཐ་མལ་བའི་ཕྱོགས་ལ་མཉམ་པར་བཞག་པའི་ས་པའི་ཕན་པའི་བསམ་པ་ཉེ་བར་བཞག་སྟེ། བདེ་བ་ཆུང་ངུ་དང་འབྲིང་དང་ཆེན་པོ་ཉེ་བར་སྒྲུབ་པའི་ཕྱིར་མོས་པ་གང་ཡིན་པའོ། །དེ་ལ་མཛའ་བཤེས་ཀྱི་ཕྱོགས་དགྲ་བོའི་ཕྱོགས་དང་ཐ་མལ་པའི་ཕྱོགས་གང་ཡིན་པ་དེ་ནི་དམིགས་པ་ཡིན་ནོ། །དེ་ལ་མཉམ་པར་བཞག་པའི་ས་པའི་ཕན་པའི་བསམ་པ་དང་བདེ་བ་ཉེ་བར་སྒྲུབ་པའི་ཕྱིར་མོས་པ་གང་ཡིན་པ་དེ་ནི་དམིགས་པར་བྱེད་པ་ཡིན་ཏེ། དེ་ལྟར་ན་དམིགས་པ་གང་ཡིན་པ་དང་དམིགས་པར་བྱེད་པ་གང་ཡིན་པ་དེ་དག་གཅིག་ཏུ་བསྡུས་པ་ནི་བྱམས་པ་ཞེས་བྱའོ། །དེ་བས་ན་བྱམས་པ་དང་ལྡན་པའི་སེམས་ནི་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ་དང་རྒྱ་ཆེན་པོར་གྱུར་པ་ཚད་མེད་པར་མོས་ཏེ་ཁྱབ་པར་བྱས་ནས་བསྒྲུབས་ཏེ་གནས་སོ། །མཛའ་བཤེས་ཀྱི་ཕྱོགས་དང་དགྲ་བོའི་ཕྱོགས་ཐ་མལ་པའི་ཕྱོགས་གང་ཡིན་པ་དེ་དག་ལས་སྡུག་བསྔལ་བར་གྱུར་པ་དེ་ནི་སྙིང་རྗེའི་དམིགས་པ་དེ་དང་བྲལ་བར་འདོད་པ་ནི་དམིགས་པར་བྱེད་པ་ཡིན་ནོ། །བདེ་བར་གྱུར་པ་ཡིན་པ་དེ་ནི་དགའ་བའི་དམིགས་པ་དེ་དང་མི་འབྲལ་བར་འདོད་པ་ནི་དམིགས་པར་བྱེད་པའོ། །དེ་བས་གང་ཟག་གནོད་སེམས་སྤྱད་པ་སེམས་ཅན་རྣམས་ལ་བྱམས་སོགས་སྒོམ་པར་བྱེད་ན་གནོད་སེམས་གང་ཡིན་པ་དེ་སྲབ་མོར་བྱེད་ཅིང་གནོད་སེམས་སྤྱད་པ་ལས་སེམས་རྣམ་པར་སྤྱོད་པར་བྱེད་དོ། །རྐྱེན་འདི་ཉིད་ཀྱིས་རྟེན་ཅིང་འབྲེལ་པར་འབྱུང་བ་ནི། དུས་གསུམ་དུ་འདི་ལྟ་སྟེ་ལྟོས་པ་ལ་སོགས་པའི་རིགས་པ་དང་ལྡན་པའི་འདུ་བྱེད་ཙམ་དང་། ཆོས་ཙམ་དང་། དངོས་པོ་ཙམ་དང་། རྒྱུ་ཙམ་དང་། འབྲས་བུ་ཙམ་གང་ཡིན་པ་སྟེ། ཆོས་རྣམས་ཁོ་ནས་ཆོས་རྣམས་འདྲེན་པར་བྱེད་པ་ཉིད་དུ་ཟད་ཀྱི། བྱེད་པ་པོ་དང་ཚོར་བ་པོ་ཉིད་མེད་པ་དེ་ནི་རྐྱེན་འདི་པ་ཉིད་ཀྱི་རྟེན་ཅིང་འབྲེལ་བར་འབྱུང་བའི་དམིགས་པ་སྟེ་གང་ཟག་གཏི་མུག་སྤྱད་ཅིང་གཏི་མུག་ཆེ་བ་དམིགས་པ་དེ་ཡིད་ལ་བྱེད་ན་གཏི་མུག་སྲབ་མོར་བྱེད་ཅིང་གཏི་མུག་སྤྱད་པ་ལས་སེམས་རྣམ་པར་སྦྱོང་བར་བྱེད་དོ། ཁམས་ཀྱི་དབྱེ་བ་གང་ཞེ་ན། ཁམས་དྲུག་པོ་འདི་ལྟ་སྟེ། སའི་ཁམས་དང་། ཆུའི། མེའི། རླུང་གི ནམ་མཁའི། རྣམ་པར་ཤེས་པའི་ཁམས་སོ། །དེ་ལ་སའི་ཁམས་ནི། རྣམ་པ་གཉིས་ཏེ་ནང་དང་ཕྱི་རོལ་གྱིའོ། །དེ་ལ་ནང་གི་སའི་ཁམས་ནི། ནང་སོ་སོའི་ལུས་མ་ཟིན་པ་དང་། ཟིན་པར་གྱུར་པ་འདི་སྲ་བ་དང་སྲ་བར་གྱུར་པ་ཡོད་པ་གང་ཡིན་པའོ། །ཕྱི་རོལ་གྱི་སའི་ཁམས་ནི། ཕྱི་རོལ་མ་ཟིན་པ་དང་ཟིན་པར་གྱུར་པ་ལ་སྲ་བ་དང་སྲ་བར་གྱུར་པ་ཡོད་པ་གང་ཡིན་པའོ། །དེ་བཞིན་དུ་ཕྱི་ནང་གི་མ་ཟིན་པ་དང་ཟིན་པར་འགྱུར་བ་ལ་གཤེར་བ་དང་གཤེར་བར་གྱུར་པ་དང་། རླན་པ་དང་རླན་པར་གྱུར་པ་གང་ཡིན་པ་ཆུའི་ཁམས་སོ། །ཚ་བ་དང་ཚ་བར་གྱུར་པ་དང་དྲོ་བ་དང་དྲོ་བར་གྱུར་པ་ཡོད་པ་གང་ཡིན་པ་མེའི་ཁམས་སོ། །རླུང་དང་རླུང་ལས་གྱུར་པ་དང་། ཡང་བ་ཉིད་དང་གཡོ་བ་ཉིད་ཡོད་པ་ཡིན་པ་རླུང་གི་ཁམས་སོ། །མིག རྣ་བ། སྣ། ཁ། མགྲིན་པ་གང་གིས་མིད་པར་བྱེད་པ། གང་དུ་མིད་པར་བྱ་བ། གང་གིས་མིད་པ་ན་སྨད་ཀྱི་ཆར་འཛག་པར་བྱེད་པ་དང་། གཞན་ཡང་གང་དག་དེ་ལྟ་བུ་དང་མཐུན་པ་དག་ནི་ནམ་མཁའི་ཁམས་སོ། །མིག་གི་རྣམ་པར་ཤེས་པ་དང་། རྣ་བ་དང་། སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་གང་ཡིན་པ་སེམས་དང་། ཡིད་དང་། རྣམ་པར་ཤེས་པ་ཡིན་ཏེ། དེ་ནི་རྣམ་པར་ཤེས་པའི་ཁམས་སོ། །དེ་ལ་གང་ཟག་ང་རྒྱལ་སྤྱད་པ་ཁམས་ཀྱི་རབ་ཏུ་དབྱེ་བ་དེ་དག་ཡིད་ལ་བྱེད་ན་ལུས་ལ་རིལ་པོར་འདུ་ཤེས་པ་རྣམ་པར་འཇིག་པར་བྱེད་ཅིང་མི་སྡུག་པའི་འདུ་ཤེས་ཀྱང་ཐོབ་པར་འགྱུར་ལ། དེས་ཁེངས་པར་ཡང་མི་འགྱུར་ཞིང་། ང་རྒྱལ་ཡང་སྲབ་མོར་བྱེད་ལ་ང་རྒྱལ་སྤྱད་པ་དེ་ལས་ཀྱང་སེམས་རྣམ་པར་སྦྱོང་བར་བྱེད་དོ། །དབུགས་བརྔུབ་པ་དང་དབུགས་དབྱུང་བ་དྲན་པ་ནི། དབུགས་བརྔུབ་པ་དང་དབུགས་དབྱུང་བའི་དམིགས་པ་དྲན་པ་གང་ཡིན་པའོ། །དེ་ལ་དབུགས་བརྔུབ་པ་ནི་དབུགས་དབྱུང་བའི་མཇུག་ཐོགས་སུ་ཁ་ནང་དུ་བལྟས་པའི་རླུང་ལྟེ་བའི་ཕྱོགས་ཡན་ཆད་དུ་ནང་དུ་འཇུག་པ་གང་ཡིན་པའོ། །ཁ་ཕྱིར་བལྟས་པའི་རླུང་ལྟེ་བའི་ཕྱོགས་ཡན་ཆད་ནས་ཁའམ་སྣའི་རྩེ་མོའམ་དེ་བས་ཕྱི་རོལ་ཚུན་ཆད་ཀྱི་བར་དུ་ཕྱིར་དབྱུང་བ་ནི་དབྱུང་བའོ། །འདི་ལ་ཡོངས་སུ་སྦྱངས་པ་རྣམ་པ་ལྔ་སྟེ། བགྲང་བས་ཡོངས་སུ་སྦྱངས་པ་དང་། ཕུང་པོ་ལ་འཇུག་པ་དང་། རྟེན་ཅིང་འབྲེལ་བར་འབྱུང་བ་ལ་འཇུག་པ་དང་། བདེན་པ་ལ་འཇུག་པ་དང་། རྣམ་པ་བཅུ་དྲུག་གིས་ཡོངས་སུ་སྦྱང་བའོ། །དང་པོ་ལ་རེ་རེ་ནས་བགྲང་བ་དང་ཟུང་དུ་བགྲང་བ་དང་རྗེས་སུ་མཐུན་པར་བགྲང་བ་དང་། རྗེས་སུ་མི་མཐུན་པར་བགྲང་བའོ། །བགྲང་བས་ཡོངས་སུ་བྱང་བ་དེ་ཡང་དབང་པོ་རཏལ་པོ་རྣམས་ལ་བསྟན་པ་ཡིན་ཏེ། དེ་ནི་དེ་དག་གི་སེམས་གནས་པར་བྱ་བ་དང་། སེམས་མངོན་པར་དགའ་བར་བྱ་བ་ལ་རྣམ་པར་མི་གཡེང་བའི་གནས་ཡིན་གྱི། གཞན་དུ་བགྲང་བ་མེད་ན་དེ་དག་གི་སེམས་རྨུགས་པ་དང་གཉིད་ཀྱིས་ཀུན་ནས་དཀྲིས་པའི་སེམས་ཕྱི་རོལ་དུ་རྣམ་པར་གཡེང་བར་འགྱུར་བས་སོ། །དབང་པོ་རྣོན་པོ་བློ་གསལ་བ་གང་དག་ཡིན་པ་དེ་དག་ནི་བགྲང་བའི་སྦྱོར་བ་ལ་དགའ་ཞིང་འཇུག་པ་མ་ཡིན་ཏེ། བགྲང་བའི་སྦྱོར་བའི་ལུང་ཕོགས་པ་ཉིད་ཀྱིས་མྱུར་བ་མྱུར་བ་ཁོ་ནར་རྟོགས་པར་འགྱུར་བས་དེས་མངོན་པར་དགའ་བར་མི་བྱེད་དོ། །དེ་དག་གི་དབུགས་བརྔུབ་དབུགས་དབྱུང་བའི་དམིགས་པ་ལ་དྲན་པ་ཉེ་བར་གཏད་པ། གང་དུ་འཇུག་པ་དང་། ཇི་ལྟར་འཇུག་པ་དང་། གང་གི་ཚེ་འཇུག་པ་དེ་དག་ཐམས་ཅད་དྲན་པ་ཉེ་བར་བཞག་པས་རྗེས་སུ་རྟོགས་པར་བྱེད། ཉེ་བར་ཤེས་པར་བྱེད་དེ་དེ་ལྟ་བུར་ནི་དེ་དག་གི་སྦྱོར་བ་ཡིན་ནོ། །སྦྱོར་བ་དེ་ལ་ཀུན་དུ་བརྟེན་ཅིང་གོམས་པར་བྱས་པ་ན་མང་དུ་བྱས་པའི་རྒྱུས་ལུས་ཤིན་ཏུ་སྦྱངས་པ་དང་སེམས་ཤིན་ཏུ་སྦྱངས་པ་ཡང་སྐྱེ་བར་འགྱུར་ཞིང་རྩེ་གཅིག་པ་ཉིད་ལ་རེག་པར་འགྱུར་དམིགས་པའི་མངོན་པར་དགའ་བ་ཡང་ཐོབ་པར་འགྱུར་རོ། །དེ་ལྟར་ཡོངས་སུ་སྦྱངས་པ་བྱས་པ་སྟེ་གཟུང་བ་དང་འཛིན་པའི་དངོས་པོ་ཡིད་ལ་བྱེད་པས་ཕུང་པོ་རྣམས་ལ་འཇུག་པར་བྱེད་དོ། །དབུགས་བརྔུབ་འབྱུང་གི་རྟེན་ལུས་ཡིད་ལ་བྱེད་པས་གཟུགས་ཀྱི་ཕུང་པོ་ལ་འཇུག་པ་བརྔུབ་འབྱུང་དེར་འཛིན་པའི་དྲན་པ་དང་མཚུངས་པར་ལྡན་པའི་མྱོང་བས་ནི་ཚོར་བ། ཀུན་ཤེས་པར་བྱེད་པ་གང་ཡིན་པ་དེས་ནི་འདུ་ཤེས། དྲན་པ་གང་ཡིན་པ་དེ་དང་སེམས་གང་ཡིན་པ་དང་། དེ་ལ་ཤེས་རབ་གང་ཡིན་པ་དེ་ནི་འདུ་བྱེད། སེམས་དང་ཡིད་དང་རྣམ་པར་ཤེས་པ་གང་ཡིན་པ་དེ་ནི་རྣམ་ཤེས་ཀྱི་ཕུང་པོ་ཡིན་ནོ་ཞེས་འཇུག་པར་བྱེད་དོ། །དེ་ལྟར་ཕུང་པོ་ལ་ཞུགས་པ་དེ་ལ་ལན་མང་དུ་གནས་པ་གང་ཡིན་པ་དེས་གང་གི་ཚེ་ཕུང་པོ་ཙམ། འདུ་བྱེད་ཙམ། དངོས་པོ་ཙམ་དུ་མཐོང་ཞིང་ཡོངས་སུ་ཤེས་པར་གྱུར་པ་དེའི་ཚེ། དེ་འདུ་བྱེད་དེ་དག་ཉིད་ཀྱི་རྟེན་ཅིང་འབྲེལ་བར་འབྱུང་བ་ལ་འཇུག་པར་བྱེད་དོ། །དབུགས་བརྔུབ་འབྱུང་འདི་དག་གི་རྟེན་ནི་གང་ཡིན་རྐྱེན་ནི་གང་ཡིན་ཞེས་ཡང་དག་པར་ཚོལ་ཞིང་ཡོངས་སུ་འཚོལ་བར་བྱེད་ན། དེ་འདི་སྙམ་དུ་སེམས་ཏེ་དབུགས་བརྔུབ་པ་དང་དབྱུང་བ་འདི་དག་ནི་ལུས་ལ་བརྟེན་ཅིང་ལུས་རྐྱེན་དུ་བྱས་པ་དང་། སེམས་ལ་བརྟེན་ཅིང་སེམས་རྐྱེན་དུ་བྱས་པ་ཡིན་ནོ་སྙམ་སེམས་ཤིང་། དེས་ལུས་དང་སེམས་ཀྱི་རྐྱེན་གང་ཡིན་ཞེ་ན་སྲོག་གི་དབང་པོ་དེའི་རྐྱེན། སྔོན་གྱི་འདུ་བྱེད། དེའི་རྐྱེན་མ་རིག་པའོ་སྙམ་དུ་འཇུག་པར་བྱེད་ལ། མ་རིག་པ་འགགས་ན་དེ་དག་འགག་པར་འགྱུར་རོ་སྙམ་དུ་སེམས་ཏེ། དེ་དེ་ལྟར་རྟེན་ཅིང་འབྲེལ་བར་འབྱུང་བ་ལ་འཇུག་པ་ལན་མང་དུ་ཡོངས་སུ་སྤྱད་པ་བྱས་པས་འདུ་བྱེད་གང་དག་རྟེན་ཅིང་འབྲེལ་བར་འབྱུང་བ་དེ་དག་ནི་མི་རྟག་པ་ཡིན་ནོ། །གང་མི་རྟག་པ་དེ་ནས་སྡུག་བསྔལ་སོགས་བདེན་བཞི་ལ་ཞུགས་ནས་དེ་གང་གི་ཚེ། དེ་ལ་ལན་མང་དུ་གནས་པར་བྱེད་ཅིང་བདེན་པ་རྣམས་མངོན་པར་རྟོགས་པར་བྱེད་པ་དེ་ནི་དེའི་བདེན་པ་ལ་འཇུག་པས་ཡོངས་སུ་སྦྱང་བ་ཞེས་བྱའོ། །དེ་ལྟར་བདེན་པ་ཡོངས་སུ་སྦྱང་བ་བྱས་པས་དེའི་མཐོང་བས་སྤང་བར་བྱ་བའི་ཉོན་མོངས་པ་རྣམས་སྤངས་པ་ན། སྒོམ་པས་སྤང་བར་བྱ་བ་རྣམས་ལུས་པས་དེ་དག་སྤང་བའི་ཕྱིར་རྣམ་པ་བཅུ་དྲུག་གིས་ཡོངས་སུ་སྦྱོང་བར་བྱེད་དོ། །རྣམ་པ་བཅུ་དྲུག་གང་ཞེ་ན། འདི་ལྟ་སྟེ་དྲན་བཞིན་དུ་དབུགས་བརྔུབས་ན་དྲན་བཞིན་དུ་དབུགས་བརྔུབས་སོ་སྙམ་དུ་སློབ་པར་བྱེད་པ་དང་། དེ་བཞིན་དྲན་བཞིན་དུ་དབུགས་འབྱུང་བ་ལ་དང་། རིང་བ་དང་ཐུང་བ་དང་ལུས་ཀྱི་ཐམས་ཅད་ཡང་དག་པར་མྱོང་ཞིང་བརྔུབས་ན། དེ་ལྟར་བརྔུབས་སོ་དབྱུང་ངོ་སྙམ་པ་དང་། དེ་བཞིན་ལུས་ཀྱི་འདུ་བྱེད་ཤིན་ཏུ་སྦྱངས་ནས་དང་། སེམས་ཀྱི་འདུ་བྱེད་ཤིན་ཏུ་སྦྱངས་ནས་དང་། སེམས་རྣམ་པར་གྲོལ་བས་དང་། འགོག་པར་རྗེས་སུ་ལྟ་བས་དང་། དབུགས་བརྔུབས་སོ་དང་ཕྱུང་ངོ་སྙམ་པའོ། །དེ་ལྟར་མཐོང་བ་དང་སྒོམ་པས་སྤང་བར་བྱ་བའི་ཉོན་མོངས་པ་རྣམས་སྤངས་པ་ན་དགྲ་བཅོམ་པ་ཟག་པ་ཟད་པར་འགྱུར་རོ། །གང་ཟག་རྣམ་པར་རྟོག་པ་སྤྱད་པས་དེ་ལ་རབ་ཏུ་སྦྱོར་བར་བྱེད་ཅིང་། ནང་གི་སོ་སོའི་དམིགས་པར་བྱ་བ་དང་བཅས་པ་རྣམ་པར་གཡེང་བ་དང་བཅས་པ་ཉེ་བ་ན་དེ་ལ་དགའ་བ་བསྐྱེད་དེ་རབ་ཏུ་སྦྱོར་བར་བྱེད་ན། དེས་དེ་ལ་རབ་ཏུ་སྦྱོར་བར་བྱེད་པ་དེའི་རྣམ་པར་རྟོག་པའི་ཀུན་ཏུ་འཁྲུག་པ་གང་ཡིན་པ་དེ་འབྱུང་བར་མི་འགྱུར་ཞིང་། མྱུར་བ་མྱུར་བར་དམིགས་པ་ལ་སེམས་ཀུན་དུ་གནས་པ་དང་མངོན་པར་དགའ་བ་ཡང་དག་པར་སྐྱེ་བར་འགྱུར་ཏེ། དེ་ནི་གང་ཟག་རྣམ་པར་རྟོག་པ་སྤྱད་པའི་སྤྱད་པ་རྣམ་པར་སྦྱོང་བའི་དམིགས་པ་ཡིན་ནོ། །ཕུང་པོ་ལ་མཁས་པ་ནི། ཕུང་པོ་ནི་ལྔ་སྟེ། གཟུགས་ཀྱི་ཕུང་པོ་དང་། ཚོར་བའི། འདུ་ཤེས་ཀྱི། འདུ་བྱེད་ཀྱི། རྣམ་པར་ཤེས་པའི་ཕུང་པོའོ། །དེ་དག་གི་མཚན་ཉིད་རབ་དབྱེ་བདག་ཉིད་ཐ་དད་པ་དང་བདག་ཉིད་མང་པོར་ཤེས་ཤིང་དེ་ལས་ལྷག་པ་མི་དམིགས་ཤིང་རྣམ་པར་རྟོག་པར་མི་བྱེད་པ་གང་ཡིན་པའོ། །ཁམས་ལ་མཁས་པ་གང་ཞེ་ན། ཁམས་ནི་བཅོ་བརྒྱད་དེ། མིག་གི་ཁམས། གཟུགས་ཀྱི། མིག་གི་རྣམ་པར་ཤེས་པའི། རྣ་བ། སྒྲའི། རྣ་བའི་རྣམ་པར་ཤེས་པའི། སྣ། དྲིའི། སྣའི་རྣམ་པར་ཤེས་པའི། ལྕེ། རོའི། ལྕེའི་རྣམ་པར་ཤེས་པའི། ལུས་ཀྱི། རེག་བྱའི། ལུས་ཀྱི་རྣམ་པར་ཤེས་པའི། ཡིད་ཀྱི། ཆོས་ཀྱི། ཡིད་ཀྱི་རྣམ་པར་ཤེས་པའི་ཁམས་ཏེ། ཆོས་བཅོ་བརྒྱད་པོ་དེ་དག་རང་རང་གི་ཁམས་དང་རང་གི་ས་བོན་དང་རང་རང་གི་རིགས་ལས་སྐྱེ་བ་དང་འཇུག་པ་དང་། འབྱུང་བ་ཤེས་ཤིང་དགའ་བ་ལ་ངེས་པར་རྟོག་པ་གང་ཡིན་པའོ། །སྐྱེ་མཆེད་ལ་མཁས་པ་ནི་བཅུ་གཉིས་ཏེ། མིག་གི་སྐྱེ་མཆེད་དང་། གཟུགས་ཀྱི། རྣ་བའི། སྒྲའི། སྣའི། དྲིའི། ལྕེའི། རོའི། ལུས་ཀྱི། རེག་བྱའི། ཡིད་ཀྱི་ཆོས་ཀྱི་སྐྱེ་མཆེད་དོ། །ཉན་སར། མིག་ནི་མིག་གི་རྣམ་པར་ཤེས་པ་མཚུངས་པར་ལྡན་པ་དང་བཅས་པ་སྐྱེ་བའི་བདག་པོའི་རྐྱེན་ཡིན་ནོ། །གཟུགས་རྣམས་ནི་དམིགས་པའི་རྐྱེན་ཡིན་ནོ། །འགགས་མ་ཐག་པའི་ཡིད་ནི་མཚུངས་པ་དེ་མ་ཐག་པའི་རྐྱེན་ཡིན་ནོ། །ཞེས་དེ་བཞིན་རྣ་བའི། རྣ་བའི་རྣམ་ཤེས་མཚུངས་ལྡན་དང་བཅས་པའི་བདག་པོའི་རྐྱེན་དུ་འགྱུར་བ་སོགས་ཀུན་ལ་སྦྱར་ཏེ་གསུངས་པས། དེ་ལྟར་རྐྱེན་གསུམ་ལས་རྣམ་པར་ཤེས་པའི་ཚོགས་དྲུག་པོ་མཚུངས་པར་ལྡན་པ་དང་བཅས་པ་རྣམས་འབྱུང་བར་འགྱུར་བ་ཡིན་ནོ། །རྟེན་ཅིང་འབྲེལ་བར་འབྱུང་བ་ལ་མཁས་པ་ནི། རྟེན་ཅིང་འབྲེལ་བར་འབྱུང་བ་ནི་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་ངག་འདོན་པ་དང་། སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །ཆོས་རྣམས་ཁོ་ནས་ཆོས་རྣམས་མངོན་པར་སྐྱེད་པར་བྱེད་ཅིང་། ཆོས་རྣམས་ཁོ་ནས་ཆོས་རྣམས་ཡོངས་སུ་སྐྱེད་པར་བྱེད་ལ། འདུ་བྱེད་རྣམས་ཁོ་ནས་འདུ་བྱེད་རྣམས་འདྲེན་པར་བྱེད་དེ་དེ་དག་ཀྱང་རྒྱུ་ལས་བྱུང་བ་དང་། རྟེན་ཅིང་འབྲེལ་བར་འབྱུང་བའི་ཕྱིར་སྔོན་མ་བྱུང་བ་ལས་བྱུང་ནས་ཀྱང་འཇིག་པར་འགྱུར་བ་ཡིན་པས། དེའི་ཕྱིར་འདུ་བྱེད་དེ་དག་ནི་མི་རྟག་པ་ཡིན་ནོ། །གང་མི་རྟག་པ་དེ་ནི་སྡུག་བསྔལ་བའོ། །སྡུག་བསྔལ་བ་དང་རང་དབང་མེད་པ་དང་ཉམ་ཆུང་བ་དེ་དག་ནི་བདག་མེད་ཅིང་སྟོང་པའོ། །དེ་ལྟར་མི་རྟག་སྡུག་བསྔལ་སྟོང་བདག་མེད་པ་ཤེས་པ་དེ་ནི་རྟེན་འབྲེལ་ལ་མཁས་པའོ། །གནས་དང་གནས་མ་ཡིན་པ་ལ་མཁས་པ་ནི་རྟེན་འབྲེལ་གྱི་བྱེ་བྲག་སྟེ། དེ་ཡང་མི་འདྲ་བའི་རྒྱུ་ཤེས་པ་སྟེ། དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པའི་འབྲས་བུ་ཡོད་དེ། དགེ་བའི་ལས་ཀྱི་རྣམ་པར་སྨིན་པའི་འབྲས་བུ་ནི་འདོད་པ་ཡིན་ནོ། །མི་དགེ་བའི་ལས་ཀྱི་རྣམ་པར་སྨིན་པའི་འབྲས་བུ་ནི་མི་འདོད་པ་ཡིན་ནོ། །ཞེས་ཤེས་པ་གང་ཡིན་པའོ། །དེ་དག་ལྔ་ཡང་མདོར་བསྡུ་ན། རང་གི་མཚན་ཉིད་ལ་མཁས་པ་དང་། སྤྱིའི་མཚན་ཉིད་ལ་མཁས་པ་ཡིན་ཏེ། ཕུང་པོ་ལ་མཁས་པས་ནི་རང་གི་མཚན་ཉིད་ལ་མཁས་པ་བསྟན་ནོ། །ལྷག་མ་རྣམས་ཀྱིས་ནི་སྤྱིའི་མཚན་ཉིད་ལ་མཁས་པ་བསྟན་ནོ། །ཇི་ལྟར་ན་ཞི་གནས་ཀྱི་སེམས་དགུ་པ་ཐོབ། ལྷག་མཐོང་གི་སྤྱོད་པ་དེ་ཁམས་གོང་གི་དངོས་གཞི་བསྐྱེད་པ་ལ་དང་པོར་ཡིད་ལ་བྱེད་པ་བཞི་དགོས་ཏེ། ཉན་སར་སེམས་རྩེ་གཅིག་པ་ཉིད་དང་སྒྲིབ་པ་རྣམ་པར་སྦྱོང་བའི་ལོག་པར་སྤྱོད་པ་སྤོང་བར་བྱེད་ཅིང་། ཡང་དག་པའི་སྦྱོར་བ་ལ་སློབ་པར་བྱེད་པའི་ལས་དང་པོ་པས་ཡིད་ལ་བྱེད་པ་རྣམ་པ་བཞིས་རབ་ཏུ་བརྩོན་པར་བྱེད་དེ། བཞི་གང་ཞེ་ན། སེམས་ཀུན་དུ་གདུང་བར་འགྱུར་བའི་ཡིད་ལ་བྱེད་པ་དང་། སེམས་མངོན་པར་བརླན་པར་འགྱུར་བའི་ཡིད་ལ་བྱེད་པ་དང་། ཤིན་དུ་སྦྱངས་པ་བསྐྱེད་པའི་ཡིད་ལ་བྱེད་པ་དང་། ཡེ་ཤེས་དང་མཐོང་བ་རྣམ་པར་སྦྱོང་བའི་ཡིད་ལ་བྱེད་པའོ། །ཞེས་སོ། །དང་པོ། ཀུན་ཏུ་སྐྱོ་བར་འགྱུར་བ་དང་། མཐུན་པའི་ཆོས་རྣམས་ལ་སེམས་ཀུན་དུ་སྐྱོ་བར་བྱེད་པ། གཉིས་པ་མངོན་པར་དགའ་བར་འགྱུར་བ་དང་མཐུན་པའི་ཆོས་རྣམས་ལ་སེམས་མངོན་པར་དགའ་བར་བྱེད་པ། གསུམ་པ་དུས་དུས་སུ་སྐྱོ་བར་འགྱུར་བ་དང་། དུས་དུས་སུ་དགའ་བར་འགྱུར་བ་དང་། སེམས་ནང་དུ་ཞི་བར་བྱེད་ཅིང་མཚན་མ་མེད་པ་དང་། རྣམ་པར་རྟོག་པ་མེད་པ་ལ་ཉེ་བར་འཇོག་པར་ཡང་བྱེད་ལ་དྲན་པ་རྩེ་གཅིག་པ་ལ་ཡང་འཇུག་པར་བྱེད་དེ། རྒྱུ་དེ་དང་རྐྱེན་དེས་དེའི་ལུས་དང་སེམས་ཀྱི་གནས་ངན་ལེན་གྱི་གཉེན་པོ་ལུས་དང་སེམས་རབ་ཏུ་སིམ་པར་བྱེད་པ་ལུས་ཤིན་ཏུ་སྦྱངས་པ་དང་སེམས་ཤིན་ཏུ་སྦྱངས་པ་བསྐྱེད་པར་བྱེད་པའོ། །བཞི་པ་ནང་གི་སེམས་ཞི་གནས་དེ་ཉིད་ལ་བརྟེན་ནས་དེ་ལྟར་སེམས་ནང་དུ་ཡང་དག་པར་རབ་ཏུ་ཞི་བར་ཞི་བའི་ཡིད་ལ་བྱེད་པ་དེས། དུས་དུས་སུ་ལྷག་པའི་ཤེས་རབ་ཆོས་རྣམ་པར་འབྱེད་པ་ལ་ཡང་དང་ཡང་དུ་ཕྱིར་ཞིང་ཕྱིར་ཞིང་རྣལ་འབྱོར་དུ་བྱེད་པའོ། །དེའི་སེམས་རྩེ་གཅིག་པ་ཉིད་དང་། སེམས་དང་ལུས་ཤིན་ཏུ་སྦྱངས་པ་དེ་ཉིད་མངོན་པར་འཕེལ་བ་ན། རྒྱུ་གཅིག་ནས་གཅིག་ཏུ་བརྒྱུད་དེ་ལེན་པའི་ཚུལ་གྱིས་རགས་ཤིང་རྟག་པར་བླ་བའི་སེམས་རྩེ་གཅིག་པ་ཉིད་དང་། སེམས་དང་ལུས་ཤིན་ཏུ་སྦྱངས་པ་འདྲེན་པར་བྱེད་དེ་ཇི་ཙམ་ན་དེའི་རགས་ཤིང་རྟག་པར་བླ་བའི་སེམས་རྩེ་གཅིག་པ་ཉིད་དང་། སེམས་དང་ལུས་ཤིན་ཏུ་སྦྱངས་པ་རིང་པོར་མི་ཐོགས་པར་སྐྱེ་བར་འགྱུར་བའི་སྔ་ལྟས་སུ་དེའི་ཀླད་པ་ལྕི་བར་སྣང་བ་སྐྱེ་བར་འགྱུར་ཏེ། དེ་ཡང་གནོད་པའི་མཚན་ཉིད་ནི་མ་ཡིན་ནོ། །དེ་སྐྱེས་མ་ཐག་ཏུ་སྤོང་བ་ལ་དགའ་བའི་བར་ཆད་བྱེད་པ་ཉོན་མོངས་པ་རྣམས་ཀྱི་ཕྱོགས་སུ་གྱུར་པ་སེམས་ཀྱི་གནས་ངན་ལེན་གང་ཡིན་པ་དེ་སྤོང་བར་འགྱུར་ཞིང་། དེའི་གཉེན་པོ་ལས་སུ་རུང་བ་དང་། སེམས་ཤིན་ཏུ་སྦྱངས་པ་སྐྱེ་བར་འགྱུར་རོ། །དེ་སྐྱེས་པས་ལུས་ཤིན་དུ་སྦྱངས་པ་སྐྱེ་བ་དང་མཐུན་པར་འབྱུང་བ་ཆེན་པོའི་རླུང་དག་ལུས་ལ་འབྱུང་བར་འགྱུར་ཏེ། དེ་དག་རྒྱུ་བའི་རྒྱུས་ནི་སྤོང་བ་ལ་དགའ་བའི་བར་ཆད་བྱེད་པ་ཉོན་མོངས་པ་རྣམས་ཀྱི་ཕྱོགས་སུ་གྱུར་པ་ལུས་ཀྱི་གནས་ངན་ལེན་གང་ཡིན་པ་དེ་དང་འབྲལ་བར་འགྱུར་ཞིང་། དེའི་གཉེན་པོ་ཤིན་ཏུ་སྦྱངས་པས་ལུས་ཐམས་ཅད་རྐྱལ་པ་གང་བ་བཞིན་དུ་སྣང་བར་འགྱུར་རོ། །དང་པོར་དེ་སྐྱེས་པར་འགྱུར་པ་དེའི་ཚེ་ན་སེམས་དགའ་བ་དང་སེམས་ཤིན་ཏུ་ཉམས་བདེ་བ་དང་། སེམས་མཆོག་ཏུ་དགའ་བ་དང་ལྡན་པ་ལ་དམིགས་པ་དང་། མངོན་པར་དགའ་བ་དང་བཅས་པ་ཡང་སྣང་བར་འགྱུར་རོ། །དེའི་འོག་ཏུ་ཤིན་ཏུ་སྦྱངས་པའི་ཤུགས་དང་པོ་སྐྱེས་པ་གང་ཡིན་པ་དེ་ཁད་ཀྱིས་ཤིན་ཏུ་ཕྲ་བར་འགྱུར་ཞིང་ལུས་ལ་ཤིན་ཏུ་སྦྱངས་པ་གྲིབ་མ་ལྟ་བུ་དང་ལྡན་པར་འགྱུར་རོ། །སེམས་དགའ་བ་གང་ཡིན་པ་དེ་སྤོང་བར་འགྱུར་ཞིང་སེམས་ཞི་གནས་ཀྱི་ཉེ་བར་བརྟན་ཞིང་རབ་ཏུ་ཞི་བའི་རྣམ་པས་དམིགས་པ་ལ་འཇུག་པར་འགྱུར་རོ། །དེའི་འོག་ཏུ་རྣལ་འབྱོར་པ་ལས་དང་པོ་པ་དེ་ཡིད་ལ་བྱེད་པ་དང་བཅས་པ་ཞེས་བྱ་བའི་གྲངས་སུ་འགྲོའོ། །དེ་ཅིའི་ཕྱིར་ཞེ་ན། དེས་དང་པོར་གཟུགས་ན་སྤྱོད་པ་མཉམ་པར་བཞག་པའི་ས་པའི་ཡིད་ལ་བྱེད་པ་ཆུང་ངུ་ཐོབ་པའི་ཕྱིར་ཏེ། དེས་ན་ཡིད་ལ་བྱེད་པ་དང་བཅས་པ་ཞེས་བྱའོ། །ལས་དང་པོ་པ་ཡིད་ལ་བྱེད་པ་དང་བཅས་པ་དེའི་རྟགས་ནི་འདི་དག་ཡིན་ཏེ། དེས་གཟུགས་ན་སྤྱོད་པའི་སེམས་ཆུང་ངུ་ཐོབ་པ་དང་། ལུས་ཤིན་ཏུ་སྦྱངས་པ་དང་། སེམས་ཤིན་ཏུ་སྦྱངས་པ་དང་། སེམས་རྩེ་གཅིག་པ་ཆུང་ངུ་ཐོབ་པ་དང་། ཉོན་མོངས་པ་རྣམ་པར་སྦྱོང་བའི་དམིགས་པ་ལ་སྤྱོད་པའི་སྐལ་བ་ཡོད་ཅིང་ནུས་པ་དང་། དེའི་སེམས་ཀྱི་རྒྱུད་འཇམ་པར་འགྱུར་བ་དང་། ཞི་གནས་ཀྱིས་ཉེ་བར་དཀྲིས་པ་དང་། དེས་སྤྱོད་པ་རྣམ་པར་སྤྱོད་པ་ཡང་སྤྱད་ཟིན་པ་ཡིན་ཏེ། གལ་ཏེ་ཆགས་པར་འགྱུར་བའི་ཡུལ་ལ་སྤྱོད་པར་གྱུར་ཀྱང་། འདོད་ཆགས་ཀྱིས་ཀུན་ནས་དཀྲིས་པ་དྲག་པོ་སྐྱེ་བར་མི་འགྱུར་ཞིང་། གཉེན་པོ་ཅུང་ཟད་ཙམ་དང་ངན་ངོན་ཙམ་ལ་རྟེན་ཅིང་ཅུང་ཟད་བསལ་བ་ཙམ་གྱིས་སེལ་ནུས་པར་འགྱུར་བ་དང་། ཞེ་སྡང་བར་འགྱུར་བ་དང་། གཏི་མུག་པར་འགྱུར་བ་དང་། ཁེངས་པར་འགྱུར་བ་དང་། མཐུན་པ་དང་རྣམ་པར་རྟོག་པར་འགྱུར་བ་དང་། མཐུན་པའི་ཡུལ་རྣམས་ལ་ཡང་དེ་བཞིན་དུ་རིག་པར་བྱའོ། །དེ་ནང་དུ་ཡང་དག་འཇོག་ལ་འདུག་སྟེ་སེམས་གཏོད་པར་བྱེད་པ་ན་མྱུར་བ་མྱུར་བར་སེམས་དང་ལུས་ཤིན་ཏུ་སྦྱངས་པར་འགྱུར་བ་དང་། ལུས་ཀྱི་གནས་ངན་ལེན་དག་གིས་ཤིན་ཏུ་གནོད་པར་མི་འགྱུར་བ་དང་། སྒྲིབ་པ་ཐམས་ཅད་ཤས་ཆེར་ཀུན་ཏུ་མི་འབྱུང་བ་དང་། འདོད་པ་དང་དགའ་བ་དང་ཡོངས་སུ་གདུང་བ་དང་ལྡན་པའི་འདུ་ཤེས་ཡིད་ལ་བྱེད་པ་ཤས་ཆེར་ཀུན་ཏུ་མི་འབྱུང་བ་དང་། ལངས་ཏེ་རྒྱུ་བ་ན་ཡང་ལུས་དང་སེམས་ལ་ཤིན་ཏུ་སྦྱངས་པ་ཁ་ཅིག་དང་ལྡན་པར་འབྱུང་བ་དང་། དེ་ལྟ་བུ་དང་མཐུན་པ་དག་ནི་ཡིད་ལ་བྱེད་པ་དང་བཅས་པའི་རྟགས་དང་མཚན་མ་ཡོངས་སུ་འབྱུང་བ་དག་ཡིན་པར་རིག་པར་བྱའོ། །དེ་ལྟར་ཡིད་ལ་བྱེད་པ་ཐོབ་པའི་རྣལ་འབྱོར་པ་སྤོང་བའི་དགའ་བ་ཆུང་ངུ་ལ་ཞུགས་པ་དེའི་གོང་དུ་བགྲོད་པར་བྱ་བ་ནི་གཉིས་ཁོ་ནར་ཟད་དེ། །གཉིས་གང་ཞེ་ན། འདི་ལྟ་སྟེ་འཇིག་རྟེན་པའི་དང་། འཇིག་རྟེན་ལས་འདས་པའོ། །དེ་ལ་ལས་དང་པོ་པའི་རྣལ་འབྱོར་པ་ཡིད་ལ་བྱེད་པ་དང་བཅས་པ་དེ་ནི་བདག་འཇིག་རྟེན་པའམ་འཇིག་རྟེན་ལས་འདས་པའི་བགྲོད་པས་འགྲོ་བར་བྱའོ་སྙམ་ནས། ཡིད་ལ་བྱེད་པ་དེ་ཉིད་ལ་ལན་མང་དུ་བྱེད་དོ། །ཇི་ལྟ་ཇི་ལྟར་ལན་མང་དུ་བྱེད་པ་དེ་ལྟ་དེ་ལྟར་ཉིན་མཚན་དེ་དང་དེ་དག་འདས་པས་དེའི་ཤིན་ཏུ་སྦྱངས་པ་དང་། སེམས་རྩེ་གཅིག་པ་ཉིད་དེ་འཕེལ་ཞིང་རྒྱས་པ་དང་ཡངས་པར་འགྱུར་རོ། །གང་གི་ཚེ་དེའི་ཡིད་ལ་བྱེད་པ་དམ་ཞིང་བརྟན་ལ་སྲ་བ་དང་། དམིགས་པ་ཡོངས་སུ་དག་པ་ལ་མོས་པ་འཇུག་པར་འགྱུར་བ་དང་། ཞི་གནས་དང་ལྷག་མཐོང་གི་ཕྱོགས་ཀྱི་མཚན་མ་རྣམས་ཀྱང་ཡོངས་སུ་ཟིན་པར་འགྱུར་པ་དེའི་ཚེ་ན། དེ་འཇིག་རྟེན་པའི་ལམ་མམ། འཇིག་རྟེན་ལས་འདས་པའི་ལམ་གང་གིས་འགྲོ་བར་འདོད་པ་དེ་ལ་སྦྱོར་བ་རྩོམ་པར་བྱེད་དོ། །འཇིག་རྟེན་པའི་ལམ་གྱིས་འགྲོ་བ་དེ་ཡང་རྣམ་པ་གཉིས་ཏེ་འཆིང་བ་མཐའ་དག་ཡོད་པ་སོ་སོ་སྐྱེ་བོ་རྣམས་དང་། འཆིང་བ་མ་ཚང་བའི་སློབ་པ་རྣམས་སོ། །དེ་ལ་འདོད་པའི་འདོད་ཆགས་དང་བྲལ་བའི་ཕྱིར་རབ་ཏུ་བརྩོན་པའི་རྣལ་འབྱོར་པ་ནི་ཡིད་ལ་བྱེད་པ་རྣམ་པ་བདུན་གྱིས་འདོད་པའི་འདོད་ཆགས་དང་བྲལ་བ་རྗེས་སུ་ཐོབ་བོ། །བདུན་གང་ཞེ་ན། མཚན་ཉིད་སོ་སོར་རིག་པ་དང་། མོས་པ་ལས་བྱུང་བ་དང་། རབ་ཏུ་དབེན་པ་དང་། དགའ་བ་སྡུད་པ་དང་། དཔྱོད་པའི་ཡིད་ལ་བྱེད་པ་དང་། སྦྱོར་བ་མཐར་ཐུག་པ་ཡིད་ལ་བྱེད་པ་དང་། སྦྱོར་བ་མཐར་ཐུག་པའི་འབྲས་བུ་ཡིད་ལ་བྱེད་པའོ། །དེ་ལ་མཚན་ཉིད་སོ་སོར་རིག་པའི་ཡིད་ལ་བྱེད་པ་ནི། ཡིད་ལ་བྱེད་པ་གང་གང་གིས་འདོད་པ་རྣམས་ལ་རགས་པའི་མཚན་ཉིད་དུ་སོ་སོར་རིག་པར་བྱེད་ཅིང་བསམ་གཏན་དང་པོ་ལ་ཞི་བའི་མཚན་ཉིད་དུ་སོ་སོར་རིག་པར་བྱེད་པའོ། །ཇི་ལྟར་ན་འདོད་པ་རྣམས་ལ་རགས་པའི་མཚན་ཉིད་དུ་སོ་སོར་རིག་པར་བྱེད་ཅེ་ན། འདོད་པ་རྣམས་ཀྱི་གཞི་དྲུག་པོ་དོན་དང་དངོས་པོ་དང་། མཚན་ཉིད་དང་། ཕྱོགས་དང་། དུས་དང་། རིགས་པ་ཡོངས་སུ་ཚོལ་བ་ན་རགས་པའི་མཚན་ཉིད་དུ་སོ་སོར་རིག་པར་བྱེད་པའོ། །ཇི་ལྟར་ན་བསམ་གཏན་དང་པོ་ལ་ཞི་བའི་མཚན་ཉིད་དུ་སོ་སོར་རྟོག་པར་བྱེད། །བསམ་གཏན་དང་པོ་ལ་ནི་འདོད་པའི་ཁམས་ཀྱི་རགས་པ་གང་ཡིན་པ་དེ་ལྟ་བུ་རྣམ་པ་ཐམས་ཅད་ཀྱི་སྒོ་ནས་མེད་དོ་ཞེས། དེས་བསམ་གཏན་དང་པོ་ནི་རགས་པ་ཉིད་དང་བྲལ་བའི་ཕྱིར་ཞི་བ་ཡིན་ནོ། །ཞེས་དེ་ལྟར་བསམ་གཏན་དང་པོ་ལ་ཞི་བའི་མཚན་ཉིད་དུ་སོ་སོར་རྟོག་པར་བྱེད་དོ། །ཡིད་ལ་བྱེད་པ་དེ་ཡང་ཐོས་པ་དང་བསམ་པ་འདྲེས་པ་ཡིན་པར་རིག་པར་བྱའོ། །དེས་དེ་ལྟར་འདོད་པ་རྣམས་ཡོངས་སུ་ཤེས་ནས་བསམ་གཏན་དང་པོ་ཡོངས་སུ་ཚོལ་བ་དང་། རགས་པ་ཞི་བའི་མཚན་ཉིད་ཇི་ལྟ་བ་བཞིན་གྱིས་ཐོས་པ་དང་བསམ་པ་ལས་ཡང་དག་པར་འདས་ནས་གཅིག་ཏུ་སྒོམ་པའི་རྣམ་པས་མོས་པར་བྱེད། མཚན་མ་དེ་ཉིད་ལ་དམིགས་པའི་ཞི་གནས་དང་ལྷག་མཐོང་སྒོམ་པར་བྱེད་དོ། །སྒོམ་པར་བྱེད་པ་ན་ཇི་ལྟར་ཡོངས་སུ་ཚོལ་བ་དང་། རགས་པ་ཞི་བའི་མཚན་ཉིད་དེ་དག་ལ་ཡང་དང་ཡང་དུ་ཞི་བར་བྱེད་དོ། །དེ་ནི་མོས་པ་ལས་བྱུང་བའི་ཡིད་ལ་བྱེད་དོ་ཞེས་བྱའོ། །དེ་ཀུན་ཏུ་རྟེན་ཅིང་གོམས་པར་བྱས་ལན་མང་དུ་བྱས་པའི་རྒྱུས་དང་པོ་ཁོ་ནར་ཉོན་མོངས་པ་སྤོང་བའི་ལམ་སྐྱེ་བར་འགྱུར་ཞིང་ཉོན་མོངས་པ་སྤོང་བའི་ལམ་ཡང་དག་པར་སྐྱེས་པ་གང་ཡིན་པ་དེ་དང་ལྡན་པའི་ཡིད་ལ་བྱེད་པ་དེ་ནི་རབ་ཏུ་དབེན་པ་ཡིད་ལ་བྱེད་པ་ཞེས་བྱའོ། །དེས་དང་པོར་འདོད་པ་ན་སྤྱོད་པའི་ཉོན་མོངས་པ་སྤང་བ་དང་། དེའི་ཕྱོགས་ཀྱི་གནས་ངན་ལེན་དང་བྲལ་བའི་ཕྱིར་དེའི་འོག་ཏུ་སྤོང་བ་ལ་དགའ་བ་དང་། རབ་ཏུ་དབེན་པ་ལ་དགའ་བར་འགྱུར་ཞིང་། སྤོང་བ་དེ་ལ་ཕན་ཡོན་དུ་མཐོང་བ་དང་། རབ་ཏུ་དབེན་པ་ལས་སྐྱེས་པའི་དགའ་བ་དང་བདེ་བ་ཆུང་ངུ་ལ་རེག་ནས། འདི་ལྟ་སྟེ་རྨུགས་པ་དང་། གཉིད་དང་། རྒོད་པ་སྤང་བའི་ཕྱིར་དུས་དུས་སུ་རབ་ཏུ་དང་བར་འགྱུར་བའི་ཡིད་ལ་བྱེད་པས་ཡང་དག་པར་རབ་ཏུ་དགའ་བར་བྱེད་ཅིང་ཀུན་ཏུ་སྐྱོ་བར་འགྱུར་བའི་ཡིད་ལ་བྱེད་པས་ཀུན་ཏུ་སྐྱོ་བར་བྱེད་པ་དེ་ནི་དགའ་བ་སྡུད་པའི་ཡིད་ལ་བྱེད་པ་ཞེས་བྱའོ། །དེ་ལྟ་སྤོང་བའི་དགའ་བ་དང་སྒོམ་པའི་དགའ་བ་ལ་ཡང་དག་པར་རབ་ཏུ་བརྩོན་ན། རྒྱུ་འམ་གནས་ཀྱང་རུང་སྟེ། དེ་ལ་དགེ་བའི་ཕྱོགས་ལ་སྦྱོར་བ་ལ་གེགས་བྱེད་པ་འདོད་པ་དང་ལྡན་པའི་ཉོན་མོངས་པའི་ཀུན་ནས་དཀྲིས་པ་ཀུན་ཏུ་འབྱུང་བར་མི་འགྱུར་བ་ན་དེ་འདི་སྙམ་དུ་སེམས་ཏེ། ཅི་བདག་ལ་འདོད་པ་རྣམས་ལ་འདོད་པ་ལ་འདུན་པ་ཡོད་བཞིན་དུ་མི་མྱོང་ངམ། འོན་ཏེ་མེད་པས་མི་མྱོང་སྙམ་དུ་སེམས་ཞིང་། དེ་ཡོངས་སུ་སྤྱོད་པར་འདོད་པས་རབ་ཏུ་དང་བར་འགྱུར་བའི་མཚན་མ་སྡུག་གུ་གང་ཡང་རུང་བ་ཡིད་ལ་བྱེད་དེ། དེའི་བག་ལ་ཉལ་ཐམས་ཅད་ཀྱི་ཐམས་ཅད་དུ་མ་སྤངས་པའི་ཕྱིར་མཚན་མ་དེ་ཡིད་ལ་བྱེད་པ་ན་བརྟེན་པ་ལ་གཞོལ་བ་དང་། བརྟེན་པ་ལ་འབབ་པ་དང་། བརྟེན་པ་ལ་བབ་པའི་སེམས་མངོན་པར་འདུ་བྱེད་པས་མངོན་པར་ཟིན་པ་དང་། ཆུ་བཞིན་དུ་བཅུས་པ་དང་། ཆོས་ཉིད་ཀྱི་མངོན་པར་ཟིན་པ་དེས་སྤོང་བ་ལ་དགའ་བ་སྒོམ་པ་ལ་དགའ་བ་རྒྱ་ཆེར་གནས་པར་བྱའོ་སྙམ་པ་དེ་ནི་དཔྱོད་པའི་ཡིད་བྱེད་དོ། །དེ་དེ་ལྟར་སྤོང་བ་ལ་དགའ་བ་དང་། སྒོམ་པ་ལ་དགའ་བ་རྒྱ་ཆེར་གནས་ཤིང་ཞི་གནས་དང་ལྷག་མཐོང་སྒོམ་པ་ལ་རབ་ཏུ་བརྩོན་པར་བྱེད་ན་ཡང་དང་ཡང་དུ་སྤྱོད་པར་བྱེད་ཅིང་དེའི་གཉེན་པོ་སྒོམ་པར་བྱེད་དེ། དུས་དུས་སུ་སྤངས་པ་དང་མ་སྤངས་པ་ཉིད་ལ་དཔྱོད་པར་བྱེད་པ་ན་འདོད་པ་ན་སྤྱད་པའི་ཉོན་མོངས་པ་ཐམས་ཅད་ལས་རེ་ཞིག་ཙམ་གྱི་ཚུལ་གྱིས་སེམས་འབྲལ་བར་བྱེད་ཅིང་ས་བོན་གཏན་བཅོམ་པ་ནི་མ་ཡིན་ཏེ། དེའི་ཚེ་ན་བསམ་གཏན་དང་པོ་ལ་སྦྱོར་བའི་ལམ་གྱི་མཐར་ཐུག་པ་ཉོན་མོངས་པ་ཐམས་ཅད་ཀྱི་གཉེན་པོར་གྱུར་པའི་ཡིད་ལ་བྱེད་པ་ཡང་དག་པར་སྐྱེས་པ་དེ་ནི་སྦྱོར་བའི་མཐའ་ཐུག་པའི་ཡིད་ལ་བྱེད་པ་ཞེས་བྱའོ། །དེའི་མཇུག་ཐོགས་ཁོ་ནར་རྒྱུ་དེ་དང་རྐྱེན་དེས་བསམ་གཏན་དང་པོའི་དངོས་གཞི་ལ་སྙོམས་པར་འཇུག་ཅིང་བསམ་གཏན་གྱིས་དངོས་གཞི་དང་ལྡན་པའི་ཡིད་ལ་བྱེད་པ་སྐྱེས་པ་དེ་ནི་སྦྱོར་བ་མཐར་ཐུག་པའི་འབྲས་བུ་ཡིད་ལ་བྱེད་པ་ཞེས་བྱའོ། །དེ་ལ་རབ་ཏུ་དབེན་པ་ཡིད་བྱེད་དང་། དགའ་བ་སྡུད་པའི་ཡིད་ལ་བྱེད་པ་སྐྱེས་པར་གྱུར་པའི་ཚེ་ན་ནི་དབེན་པ་ལས་སྐྱེས་པའི་དགའ་བ་དང་བདེ་བས་ལུས་ཡོངས་སུ་ཚིམ་པར་བྱེད་དོ། །སྦྱོར་བ་མཐར་ཐུག་པའི་ཡིད་ལ་བྱེད་པའི་ཚེ་ན་ནི་ལན་འགའ་ལན་འགའ་ནི་བདེ་བའི་དངོས་པོ་ཆུང་ངུའི་ཚུལ་གྱིས་ཁྱབ་པར་བྱེད་དོ། །ལན་འགའ་ལན་འགའ་ནི་བདེ་བའི་དངོས་པོ་ཤིན་ཏུ་མང་པོ་དང་། ཤིན་ཏུ་རྒྱ་ཆེན་པོའི་ཚུལ་གྱིས་ཁྱབ་པར་བྱེད་དོ། །སྦྱོར་བ་མཐར་ཐུག་པའི་འབྲས་བུའི་ཡིད་ལ་བྱེད་པ་སྐྱེས་པའི་ཚེ་ན་ནི་འདི་ལྟ་སྟེ་ལུས་ཐམས་ཅད་དབེན་པ་ལས་སྐྱེས་པའི་དགའ་བ་དང་བདེ་བས་མ་ཁྱབ་པ་དང་ཁྱབ་པར་བྱ་བ་ཅུང་ཟད་ཀྱང་མེད་དོ། །དེ་དེའི་ཚེ་ན་འདོད་པ་དག་ལས་དབེན། སྡིག་པ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་པ་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོའི་ཡན་ལག་ལྔ་བསྒྲུབས་ཏེ་གནས་པ་དང་། འདོད་པ་ན་སྤྱོད་པའི་གཉེན་པོའི་ལམ་སྒོམ་པའི་འབྲས་བུ་ལ་གནས་པ་དང་། འདོད་པ་རྣམས་ལས་འདོད་ཆགས་དང་བྲལ་བ་ཐོབ་པ་ཞེས་བྱའོ། །དེ་ལ་མཚན་ཉིད་སོ་སོར་རིག་པའི་ཡིད་ལ་བྱེད་པས་ནི་སྤང་བར་བྱ་བ་གང་ཡིན་པ་དེ་ཡོངས་སུ་ཤེས་པར་བྱེད། ཐོབ་པར་བྱ་བ་གང་ཡིན་པ་དེ་ཡང་ཡོངས་སུ་ཤེས་པར་བྱེད་ཅིང་སྤང་བར་བྱ་བ་དང་ཐོབ་པར་བྱ་བའི་ཕྱིར་སེམས་གཏོད་པར་བྱེད། མོས་པ་ལས་བྱུང་བའི་ཡིད་ལ་བྱེད་པས་ནི་སྤང་བར་བྱ་བ་དང་ཐོབ་པར་བྱ་བའི་ཕྱིར་ཡང་དག་པར་སྦྱོར་བ་རྩོམ་པར་བྱེད་དོ། །རབ་ཏུ་དབེན་པ་ཡིད་ལ་བྱེད་པས་ནི་ཉོན་མོངས་པ་ཆེན་པོ་སྤོང་བར་བྱེད་དོ། །དགའ་བ་སྡུད་པའི་ཡིད་ལ་བྱེད་པས་ནི་ཉོན་མོངས་པའི་རྣམ་པ་འབྲིང་སྤོང་བར་བྱེད་དོ། །དཔྱོད་པའི་ཡིད་ལ་བྱེད་པས་ནི་ཐོབ་པ་ལ་མངོན་པའི་ང་རྒྱལ་མེད་པ་ལ་སེམས་འཇོག་པར་བྱེད་དོ། །སྦྱོར་བ་མཐར་ཐུག་པའི་ཡིད་ལ་བྱེད་པས་ནི་ཉོན་མོངས་པའི་རྣམ་པ་ཆུང་ངུ་སྤོང་བར་བྱེད་དོ། །སྦྱོར་བ་མཐར་ཐུག་པའི་འབྲས་བུ་ཡིད་ལ་བྱེད་པས་ནི་ཡིད་ལ་བྱེད་པའི་རྣམ་པ་དེ་དག་སྒོམ་པའི་འབྲས་བུ་ཉམས་སུ་མྱོང་བར་བྱེད་དོ། །གཞན་ཡང་མཚན་ཉིད་སོ་སོར་རིག་པའི་ཡིད་ལ་བྱེད་པ་གང་ཡིན་པ་དང་མོས་པ་ལས་བྱུང་བའི་ཡིད་ལ་བྱེད་པ་གང་ཡིན་པ་དེ་ནི་སུན་འབྱིན་པའི་གཉེན་པོ་དང་ལྡན་པ་སྟེ། རྗེས་སུ་མཐུན་པའི་ཡིད་ལ་བྱེད་པ་ཡིན་ནོ། །རབ་ཏུ་དབེན་པའི་ཡིད་ལ་བྱེད་པ་གང་ཡིན་པ་དང་སྦྱོར་བ་མཐར་ཐུག་པ་ཡིད་ལ་བྱེད་པ་གང་ཡིན་པ་ནི་སྤོང་བའི་གཉེན་པོ་དང་ལྡན་པ་ཏེ་གཉེན་པོ་ཡིད་ལ་བྱེད་པ་དེ་ལ་དགའ་བ་སྡུད་པའི་ཡིད་ལ་བྱེད་པ་གང་ཡིན་པ་དེ་ནི་གདུང་བར་འགྱུར་བའི་ཡིད་ལ་བྱེད་པ་ཡིན་ནོ། །དེ་ལ་དཔྱོད་པ་ཡིད་ལ་བྱེད་པ་གང་ཡིན་པ་དེ་ནི་སོ་སོར་རྟོག་པའི་ཡིད་ལ་བྱེད་པ་ཞེས་བྱ་སྟེ། དེ་ལྟར་ན་ཡིད་ལ་བྱེད་པ་དྲུག་པོ་དེ་དག་ཏུ་ནི་ཡིད་ལ་བྱེད་པ་བཞི་པོ་འདི་ལྟ་སྟེ། རྗེས་སུ་མཐུན་པ་དང་། གཉེན་པོ་དང་། དང་བར་འགྱུར་བ་དང་། སོ་སོར་རྟོག་པ་དག་འདུས་པར་རིག་པར་བྱའོ། །ཇི་ལྟར་ཡིད་ལ་བྱེད་པ་བདུན་གྱིས་བསམ་གཏན་དང་པོ་ལ་སྙོམས་པར་འཇུག་པ་དེ་བཞིན་དུ་བསམ་གཏན་གཉིས་པ་དང་། གསུམ་པ་དང་བཞི་པ་ལ་སྙོམས་པར་འཇུག་པ་དང་། ནམ་མཁའ་དང་། རྣམ་ཤེས་དང་། ཅི་ཡང་མེད་པ་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལ་སྙོམས་པར་འཇུག་པ་ཡང་ཡིད་ལ་བྱེད་པ་བདུན་གྱི་ཡིན་པར་རིག་པར་བྱའོ། །དེ་ལ་བསམ་གཏན་དག་རྣམ་པ་བཞིས་རྣམ་པར་བཞག་སྟེ། མི་མཐུན་ཕྱོགས་ཉམས་པར་བྱེད་པ་དང་། གཉེན་པོ་སྒོམ་པ་དང་། བསྒོམས་པའི་ཕན་ཡོན་དང་། དེ་གཉིས་ཀའི་གནས་སོ། །དེ་ལ་འདོད་པ་དག་ལས་དབེན་པ་སྡིག་པ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །དབེན་ཞེས་བྱ་བ་ལ་མི་མཐུན་པའི་ཕྱོགས་ཉམས་པ་བསྟན་པ་ལ་འདོད་པ་ནི། ཉོན་མོངས་པའི་འདོད་པ་དང་། དངོས་པོའི་འདོད་པ་དག་གོ །དབེན་པ་ནི་མཚུངས་པར་ལྡན་པ་ལས། དབེན་པ་དང་། དམིགས་པ་ལས་དབེན་པའི་ཕྱིར་རོ། །སྡིག་པ་མི་དགེ་བའི་ཆོས་ནི་ཉོན་མོངས་པའི་འདོད་པའི་རྒྱུ་ལས་བྱུང་བའི་ལུས་དང་ངག་དང་ཡིད་ཀྱི་ཉེས་པར་སྤྱོད་པར་གཏོགས་པ་རྣམས་སྤངས་པའོ། །རྟོག་པ་དང་བཅས་དཔྱོད་པ་དང་བཅས་ཞེས་པ་ནི་རྟོག་དཔྱོད་ལ་སྐྱོན་དུ་མི་ལྟ་བའི་ཕྱིར་འདོད་པའི་གཉེན་པོ་རང་གི་ས་པའི་རྟོག་པ་དང་དཔྱོད་པ་དགེ་བ་དག་དང་ལྡན་པས་གཉེན་པོ་བསྒོམ་པ་བསྟན་ནོ། །དེ་གཉིས་ཀྱིས་སྡིག་པ་མི་དགེ་བའི་ཆོས་འཇོམས་པར་བྱེད་པས་གཉེན་པོ་ཡིན་ནོ། །དབེན་པ་ལས་སྐྱེས་པའི་ཞེས་པས་ཕན་ཡོན་བསྟན་ཏེ། འདོད་པ་ལས་དབེན་པ་སྦྱོར་བ་མཐར་ཐུག་པའི་ཡིད་ལ་བྱེད་པ་ལས་སྐྱེས་པ་ཞེས་བྱ་བ་ནི་རྒྱུ་དེ་དང་རྐྱེན་དེས་དེའི་མཇུག་ཐོགས་ཁོ་ནར་ཡང་དག་པར་བསྐྱེད་པ་ལ་བྱའོ། །དགའ་བ་དང་བདེ་བ་ཅན་ཞེས་པ་ནི་འདོད་པ་དང་རེ་བའི་དོན་ཐོབ་ཅིང་དགའ་བ་ལ་སྐྱོན་དུ་མི་ལྟ་བའི་ཕྱིར་དང་། གནས་ངན་ལེན་ཐམས་ཅད་དང་བྲལ་ཞིང་སེམས་དང་ལུས་ལས་སུ་རུང་བ་རྒྱ་ཆེན་པོ་དང་ལྡན་པའི་ཕྱིར་རོ། །བསམ་གཏན་ཞེས་བྱ་བ་ནི་དམིགས་པ་ལ་ཡང་དག་པར་ཉེ་བར་གཏོད་པ་དང་། དྲན་པ་རྩེ་གཅིག་ཏུ་ཉེ་བར་གཏོད་པའི་ཕྱིར་རོ། །དང་པོ་འདོད་པའི་ཁམས་ནས་བསྐྱོད་པའི་གོ་རིམ་བཞིན་དུ་བགྲང་བའི་ཕྱིར་དང་པོ་ཞེས་བྱའོ། །བསྒྲུབས་ཏེ་ཞེས་པ་ནི་སྦྱོར་བ་མཐར་ཐུག་པའི་འབྲས་བུ་ཡིན་པའི་ཕྱིར་རོ། །གནས་ཞེས་པ་ནི། ཕྱིས་བསྒོམས་པ་ལན་མང་དུ་བསྒྲུབས་པས་ཅི་འདོད་པ་བཞིན་ཐོབ་པ་དང་ཚེགས་མེད་པར་ཐོབ་པའི་ཕྱིར་བསམ་གཏན་གྱི་སྙོམས་པར་འཇུག་པ་དེ་དག་མཚན་མོ་དང་ཉིན་མོ་དང་ཉིན་མཚན་བདུན་གྱི་བར་རམ། ཇི་སྲིད་འདོད་པའི་བར་དུ་འདའ་བར་བྱེད་པའོ། །དེ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་བ་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ་ལ་དཔྱོད་པ་མེད་པ་ནི་ཏིང་ངེ་འཛིན་དེ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་བསྒྲུབས་ཏེ་གནས་སོ། །ཞེས་གསུངས་པ་དེ་ལ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ་ཞེས་བྱ་བ་ནི་རྟོག་དཔྱོད་དང་བཅས་པའི་ཏིང་ངེ་འཛིན་གྱི་མཚན་མ་དག་ལ་སེམས་རྣམ་པར་བཟློག་ནས་རྟོག་དཔྱོད་མེད་པའི་ཏིང་ངེ་འཛིན་མཚན་མ་མེད་པ་དག་ལ་ལེགས་པར་གཏོད་ཅིང་། དམིགས་པ་ལ་མི་རྟོག་པར་དཔྱོད་པ་ལས་རྣམ་པར་བྲལ་ཏེ་དམིགས་པ་བརྟན་པ་ལ་སྤྱོད་པ་ལ་ངང་གཅིག་གིས་སེམས་ཞི་བ་དང་དང་བར་འཇུག་པར་བྱེད་ཅིང་རྣམ་པར་འཇོག་པར་བྱེད་པའི་ཕྱིར་སེམས་ཀྱི་རྒྱུད་གཅིག་ཏུ་གྱུར་པ་ཞེས་བྱ་བ་ནི། དེས་སྒོམ་པ་གོམས་པར་བྱས་པའི་ཕྱིར་རྟོག་དཔྱོད་མེད་པའི་ཏིང་ངེ་འཛིན་དེ་ཉིད་ལ་རྟོག་པ་དང་དཔྱོད་པས་བར་དུ་གཅོད་ཅིང་སྐབས་སུ་འཆད་པའི་གནས་སྐབས་ལས་ཡང་དག་པར་འདས་ཏེ་བར་དུ་གཅོད་པ་མེད་པ་དང་། སྐབས་སུ་འཆད་པ་མེད་པའི་གནས་སྐབས་ཐོབ་པའི་ཕྱིར་རོ། །རྟོག་དཔྱོད་རྣམ་པ་ཐམས་ཅད་ཀྱི་ཐམས་ཅད་དུ་སྤངས་པ་ཡིན་ནོ། །དགའ་བ་དང་བདེ་བ་ཅན་ཞེས་པའི་སྐབས་དགའ་བ་ལ་སྐྱོན་དུ་མི་བལྟ་བས་སོ། །ཡང་དག་པར་རབ་ཏུ་དགའ་བ་དང་ལྡན་ཞིང་ཡིད་བདེ་བ་དང་ལྡན་པའི་ཕྱིར་དང་། བསམ་གཏན་དང་པོའི་རྟོག་དཔྱོད་ཉོན་མོངས་པའི་ཕྱོགས་གནས་ངན་ལེན་ཐམས་ཅད་དང་བྲལ་བས་དེའི་གཉེན་པོའི་སེམས་དང་ལུས་ཤིན་ཏུ་སྦྱངས་ཤིང་ལས་སུ་རུང་བའི་བདེ་བ་དང་ལྡན་པས་དགའ་བ་དང་བདེ་བ་ཅན་ཞེས་བྱའོ། །དེ་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ་བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པར་བྱ་སྟེ། དགའ་བ་མེད་པ་བསམ་གཏན་གསུམ་པ་བསྒྲུབས་ཏེ་གནས་སོ། །ཞེས་གསུངས་པ་དེ་ལ་དེ་དགའ་བའི་འདོད་ཆགས་དང་བྲལ་བ་ཞེས་བྱ་བ་ནི་དགའ་བའི་མཚན་མ་དག་ལ་སྐྱོན་དུ་ལྟ་བའི་ཕྱིར་དེ་དགའ་བའི་འདོད་ཆགས་དང་བྲལ་བས་ཞེས་གསུངས་སོ། །བཏང་སྙོམས་ལ་གནས་ཤིང་ཞེས་བྱ་བ་ནི་དགའ་བ་མེད་པ་བསམ་གཏན་གསུམ་པ་ལ་སེམས་གཏོད་པར་བྱེད་པ་དེའི་ཚེ་ན་དེའི་སེམས་ཀུན་ཏུ་འཁྲུག་པར་བྱེད་པའི་སྐྱོན་རྣམ་པ་གཉིས་པོ་བསམ་གཏན་གཉིས་པོ་ལ་རྟོག་དཔྱོད་ད་ལྟར་གྱི་དགའ་བ་དང་བྲལ་བས་ན་དེའི་ཕྱིར་བཏང་སྙོམས་ལ་གནས་ཤིང་ཞེས་བྱ་བ་གསུངས་ཏེ། སེམས་ཀུན་ཏུ་འཁྲུག་པར་བྱེད་པའི་ཆོས་དེ་གཉིས་ནི་སེམས་རྒྱུད་དུ་བཏང་སྙོམས་སུ་བཞག་པ་ལ་གེགས་བྱེད་པ་ཡིན་པས་ན། བསམ་གཏན་དང་པོ་ལ་ནི་རྟོག་དཔྱོད་ཡོད་པས་དེས་ན་རྒྱུན་དུ་བཏང་སྙོམས་ལ་འཇུག་པར་མི་འགྱུར། གཉིས་པ་ལ་ནི་དགའ་བ་ཡོད་པ་དེས་ན་དེར་ཡང་རྒྱུན་དུ་བཏང་སྙོམས་ལ་འཇུག་པར་མི་འགྱུར་ཏེ། དེ་བས་བསམ་གཏན་དང་པོ་དང་གཉིས་པ་གཉིས་ལ་དེ་དག་ལ་བཏང་སྙོམས་ཤས་ཆེར་མེད་པས་དེའི་ཕྱིར་བསམ་གཏན་གསུམ་པ་ལ་སྙོམས་པར་ཞུགས་པའི་བསམ་གཏན་པ་དེ་ནི་བཏང་སྙོམས་ལ་གནས་པ་ཞེས་བྱའོ། །དྲན་པ་དང་ཤེས་བཞིན་ཅན་ཡིན་ཏེ་ཞེས་བྱ་བ་ནི་དེ་བཏང་སྙོམས་ལ་གནས་པ་ན་ཇི་ལྟ་ཇི་ལྟར་དགའ་བ་དང་ལྡན་པའི་འདུ་ཤེས་ཡིད་ལ་བྱེད་པ་དེ་དག་ཀུན་ཏུ་འབྱུང་བར་མི་འགྱུར་བ་དེ་ལྟ་དེ་ལྟར་དྲན་པ་ཉེ་བར་བཞག་སྟེ་གནས་པར་བྱེད་དོ། །གལ་ཏེ་བསམ་གཏན་གསུམ་པ་ལ་ལེགས་པར་གོམས་པར་མ་བྱས་པས་བརྗེད་ངེས་པའི་ཕྱིར་བརྒྱ་ལ་བརྒྱ་ལམ་ན་དགའ་བ་དང་ལྡན་པའི་འདུ་ཤེས་ཡིད་ལ་བྱེད་པ་དེ་དག་ཀུན་འབྱུང་བར་གྱུར་ན་མྱུར་བ་མྱུར་བ་ཁོ་ནར་དེ་དག་ལ་ཤེས་རབ་ཀྱིས་སོ་སོར་རྟོག་པར་བྱེད། ལེགས་པ་ཁོ་ནར་རབ་ཏུ་ཤེས་པར་བྱེད་ཅིང་བྱུང་ངོ་ཅོག་དང་དུ་མི་ལེན་པར་སྤོང་བར་བྱེད་སེལ་བར་བྱེད་བྱང་བར་བྱེད་ཅིང་སེམས་བཏང་སྙོམས་སུ་བྱེད་པ་ན་དེའི་ཕྱིར་དྲན་པ་དང་ཤེས་བཞིན་ཅན་ཡིན་ཏེ་ཞེས་གསུངས་སོ། །བདེ་བ་ལུས་ཀྱིས་མྱོང་ལ་ཞེས་བྱ་བ་ནི་གཉིས་ཏེ། དེའི་ཚེ་ན་གཟུགས་ཀྱི་ལུས་དང་ཡིད་ཀྱི་ལུས་ཀྱི་ཚོར་བའི་བདེ་བ་དང་ཤིན་ཏུ་སྦྱངས་པའི་བདེ་བ་སོ་སོར་མྱོང་བར་བྱེད་པས་ན་དེའི་ཕྱིར་བདེ་བ་ལུས་ཀྱི་མྱོང་ལ་ཞེས་གསུངས་སོ། །འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། ཞེས་བྱ་བ་ནི་བསམ་གཏན་གསུམ་པ་མན་ཆད་ལ་ནི་བདེ་བ་དེ་ལྟ་བུ་ཡང་མེད་ལ། རྒྱུན་དུ་བཏང་སྙོམས་ལ་གནས་པ་ཡང་མེད་དོ། །བསམ་གཏན་གསུམ་པའི་གོང་མ་དག་ལ་ནི་བཏང་སྙོམས་ཡོད་ཀྱང་བདེ་བ་དེ་ལྟ་བུ་མེད་དེ། དེ་ལྟར་འོག་མ་དག་ལ་བདེ་བ་དང་བཏང་སྙོམས་མེད་པ་དང་གོང་མ་དག་ལ་བདེ་བ་མེད་པའི་ཕྱིར་རོ། །འདི་ལྟ་སྟེ། བསམ་གཏན་གསུམ་པ་འདི་ནི་དེ་དག་གི་གནས་ཡིན་པས་ན་འཕགས་པས་ཀྱང་དེ་ལ་དམིགས་ཏེ་གནས་པའི་གང་ཟག་གང་ཡིན་པ་དེའི་དབང་དུ་མཛད་ནས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་དེ། འཕགས་པ་ཞེས་བྱ་བ་ནི་སངས་རྒྱས་དང་སངས་རྒྱས་ཀྱི་ཉན་ཐོས་རྣམས་སོ། །དགའ་བ་མེད་པ་ཞེས་བྱ་བ་ནི། དེ་ལྟར་བཏང་སྙོམས་ལ་གནས་པས་དེའི་ཚེ་དྲན་པ་དང་ཤེས་བཞིན་ཀུན་ཏུ་བསྟེན་ཅིང་གོམས་པར་བྱས་ལན་མང་དུ་བྱས་པའི་རྒྱུས་དགའ་བ་དང་ལྡན་པའི་ཚོར་བ་སེམས་དགའ་བར་བྱེད་པ་དེ་སྤོང་བར་བྱེད་ཅིང་དགའ་བའི་གཉེན་པོ་དགའ་བ་མེད་པ་ཞི་བ་དང་རབ་ཏུ་ཞི་བའི་ཚོར་བ་སེམས་ལས་སྐྱེས་པར་གྱུར་པས་ན་དེའི་ཕྱིར་དགའ་བ་མེད་པ་ཞེས་གསུངས་སོ། །དེ་བདེ་བ་ཡང་སྤངས་ཏེ་སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་བདེ་བ་ཡང་ནུབ་པས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་བསྒྲུབས་ཏེ་གནས་སོ་ཞེས་གསུངས་པ་དེ་ལ། དེ་བདེ་བ་ཡང་སྤངས་ཏེ་ཞེས་བྱ་བ་ནི། བདེ་བའི་གཉེན་པོ་ནི་རིགས་འདྲ་བའི་ཕྱིར་སྤོང་བའི་གཉེན་པོ་མ་བསྟན་པར་དེའི་གཉེན་པོས་བྱས་པ་བདེ་བ་སྤངས་པ་གང་ཡིན་པ་དེ་ཉིད་བསྟན་ཏེ། དེའི་གཉེན་པོ་གང་ཞེ་ན་འདི་ལྟ་སྟེ་བཏང་སྙོམས་དང་དྲན་པ་དང་ཤེས་བཞིན་ཡིན་ནོ། །དེ་དག་ལ་རྟེན་ཅིང་གོམས་པར་བྱས་པས་བསམ་གཏན་གསུམ་པ་ལས་བསྐྱེད་ཅིང་བསམ་གཏན་གསུམ་པའི་ས་པའི་བདེ་བ་གང་ཡིན་པ་དེ་སྤོང་བར་བྱེད་པས་ན། དེའི་ཕྱིར་དེ་བདེ་བ་ཡང་སྤངས་ཏེ་ཞེས་གསུངས་སོ། །སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་ཞེས་བྱ་བ་ནི་དེའི་ཚེ་ན་བསམ་གཏན་པ་དེས་བདེ་བ་དང་སྡུག་བསྔལ་ལས་ཡང་དག་པར་འདས་པ་རྗེས་སུ་ཐོབ་ཅིང་དེས་སྔོན་སྤངས་པ་གང་ཡིན་པ་དང་ད་ལྟ་སྤོང་བར་བྱེད་པ་གང་ཡིན་པ་དེ་དག་གཅིག་ཏུ་བསྡུས་པས་ན་དེའི་ཕྱིར་སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་ཞེས་གསུངས་སོ། །དེ་ལ་བསམ་གཏན་བཞི་པ་ལ་སྙོམས་པར་འཇུག་པའི་ཚེ་ན་ནི་སྡུག་བསྔལ་སྤངས་སོ། །བསམ་གཏན་གསུམ་པ་ལ་སྙོམས་པར་འཇུག་པའི་ཚེ་ན་ནི་ཡིད་བདེ་བ་ནུབ་བོ། །བསམ་གཏན་དང་པོ་ལ་འཇུག་པའི་ཚེ་ན་ནི་ཡིད་མི་བདེ་བ་ནུབ་བོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཞེས་བྱ་བ་ནི་དེས་རེ་ཞིག་བདེ་བ་དང་སྡུག་བསྔལ་སྤངས་པའི་ཕྱིར་དེ་ལ་ཚོར་བའི་ལྷག་མ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཉི་ཚེ་ཡོད་པས་ན་དེའི་ཕྱིར་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་ཞེས་གསུངས་སོ། །བཏང་སྙོམས་དང་དྲན་པ་ཡོངས་སུ་དག་པས་ཞེས་བྱ་བ་ནི་དེས་དེའི་ཚེ་ན། བསམ་གཏན་དང་པོ་ཡན་ཆད་ཀྱི་ས་འོག་མ་པའི་སྐྱོན་འདི་ལྟ་སྟེ། རྟོག་པ་དང་དཔྱོད་པ་དང་དགའ་བ་དང་དབུགས་བརྔུབ་པ་དང་དབུགས་དབྱུང་བ་ཐམས་ཅད་སྤངས་པར་གྱུར་ཅིང་། དེ་དག་སྤངས་པའི་ཕྱིར་དེ་ལ་བཏང་སྙོམས་དང་དྲན་པ་གང་ཡོད་པ་དེ་ཡོངས་སུ་དག་པ་དང་ཡོངས་སུ་བྱང་བར་འགྱུར་ཏེ། དེས་ན་བསམ་གཏན་བཞི་པ་ལ་སྙོམས་པར་ཞུགས་པའི་སེམས་དེ་ཡིད་ལ་གཡོ་བ་མེད་པར་གནས་ཤིང་། གཡོ་བ་ཐམས་ཅད་དང་བྲལ་བས་ན་དེའི་ཕྱིར་བཏང་སྙོམས་དང་དྲན་པ་ཡོངས་སུ་དག་པ་ཞེས་གསུངས་སོ། །དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཐོགས་པའི་འདུ་ཤེས་རྣམས་ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་བསྒྲུབས་ཏེ་གནས་སོ། །ཞེས་གསུངས་པ་དེ་ལ། དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམས་ལས་ཡང་དག་པར་འདས་ཏེ་ཞེས་བྱ་བ་ནི་ནམ་མཁར་མོས་པར་བྱེད་པའི་ཕྱིར། ཁ་དོག་སྔོན་པོ་དང་སེར་པོ་དང་དམར་པོ་དང་དཀར་པོ་དང་ལྡན་པའི་འདུ་ཤེས་དེ་དག་མི་སྣང་ཞིང་སྐྱོ་ལ་འདོད་ཆགས་དང་བྲལ་བས་ཡང་དག་པར་འདས་པ་ན་དེའི་ཕྱིར་དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་རྣམ་ལས་ཡང་དག་པར་འདས་ཞེས་བྱ་བ་གསུངས་སོ། །ཐོགས་པའི་འདུ་ཤེས་རྣམས་ནུབ་པར་གྱུར་ཅིང་ཞེས་བྱ་བ་ནི་དེ་དེ་དག་ལས་ཡང་དག་པར་འདས་ཤིང་མི་སྣང་བར་གྱུར་པའི་རྒྱུས་ཁ་དོག་བསགས་པའི་རྒྱུར་གྱུར་པའི་སྒྲིབ་པའི་འདུ་ཤེས་རྣམ་པ་དུ་མ་རྣམ་པ་སྣ་ཚོགས་མང་པོ་དག་དང་བྲལ་བས་ན་དེའི་ཕྱིར་ཐོགས་པའི་འདུ་ཤེས་རྣམས་ནུབ་པར་གྱུར་ཅིང་ཞེས་གསུངས་སོ། །སྣ་ཚོགས་པའི་འདུ་ཤེས་རྣམས་ལ་ཡིད་ལ་མི་བྱེད་པས་ཞེས་བྱ་བ་ནི་དེ་དེ་དག་དང་བྲལ་ནས་ཐོགས་པ་ཁྱད་པར་ཅན་རྣམ་པ་སྣ་ཚོགས་དེ་དག་ཉིད་ལ་འདི་ལྟ་སྟེ། ཟས་དང་། སྐོམ་དང་། བཞོན་པ་དང་། གོས་དང་། རྒྱན་དང་། གནས་དང་། སྐྱེད་མོས་ཚལ་དང་། ནགས་ཚལ་དང་། དམག་དང་། རི་ལ་སོགས་པ་ཉེ་བར་འདོད་ཆགས་པའི་འདུ་ཤེས་འཇུག་པ་གང་ཡིན་པའི་འདུ་ཤེས་དེ་དག་དེ་རྣམས་ལ་གཏད་ཀྱང་རྣམ་པ་ཐམས་ཅད་ཀྱི་ཐམས་ཅད་དུ་དེ་ལ་འབྱུང་བར་མི་འགྱུར་བས་ན་དེའི་ཕྱིར་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ཞེས་གསུངས་སོ། །ནམ་མཁའ་མཐའ་ཡས་སོ་སྙམ་ནས་ཞེས་བྱ་བ་ནི། དེས་དེ་ལྟར་གཟུགས་དང་ཐོགས་པ་དང་སྣ་ཚོགས་པའི་འདུ་ཤེས་དག་རྣམ་པར་བཤིག་ནས་ནམ་མཁའ་ལ་མཐའ་ཡས་པའི་རྣམ་པས་མོས་པར་བྱེད་པས་ན་དེའི་ཕྱིར་ནམ་མཁའ་མཐའ་ཡས་སོ་སྙམ་ནས་ཞེས་བྱ་བ་གསུངས་སོ། །ནམ་མཁའ་མཐའ་ཡས་སྐྱེ་མཆེད་བསྒྲུབས་ནས་གནས་སོ་ཞེས་བྱ་བ་ནི་དེ་ནམ་མཁའ་མཐའ་ཡས་ཀྱི་ཉེར་བསྡོགས་ལས་ཡང་དག་པར་འདས་ཤིང་སྦྱོར་བ་མཐར་ཐུག་པའི་ཡིད་ལ་བྱེད་པས། གོང་མ་སྦྱོར་བ་མཐར་ཐུག་པའི་འབྲས་བུའི་དངོས་གཞི་ལ་སྙོམས་པར་འཇུག་པར་བྱེད་པས་ན་དེའི་ཕྱིར་ནམ་མཁའ་ཡས་སྐྱེ་མཆེད་བསྒྲུབས་ཏེ་གནས་སོ་ཞེས་བྱ་བ་གསུངས་སོ། །དེ་ཇི་སྲིད་དུ་དངོས་གཞི་ལ་སྙོམས་པར་མི་འཇུག་བར་དུ་ནི་དེ་ནམ་མཁའ་ཁོ་ན་ལ་དམིགས་པར་བྱེད་དོ། །སྙོམས་པར་ཞུགས་ནས་ནི་ནམ་མཁའ་དེ་ཉིད་དང་དེ་ལས་གཞན་པ་རང་གི་ས་པའི་ཕུང་པོ་རྣམས་ལ་དམིགས་པར་བྱེད་དེ། ཉེར་བསྡོགས་ཀྱི་ཚེ་ན་ནི་ས་འོག་མའི་ཕུང་པོ་རྣམས་ལ་ཡང་དམིགས་པར་བྱེད་དོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་བསྒྲུབས་ཏེ་གནས་སོ། །ཞེས་གསུངས་པ་དེ་ལ། དེ་རྣམ་པ་ཐམས་ཅད་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་པར་ཤེས་པ་མཐའ་ཡས་སོ་སྙམ་ནས་ཞེས་བྱ་བ་ནི། དེ་རྣམ་པར་ཤེས་པ་གང་གིས་ནམ་མཁའ་མཐའ་ཡས་མོས་པར་བྱེད་པ་ནམ་མཁའ་མཐའ་ཡས་པའི་རྣམ་པས་མོས་པར་བྱེད་པའི་རྣམ་པར་ཤེས་པ་དེ་ཉིད་ཀྱི་རྣམ་ཤེས་མཐའ་ཡས་སྐྱེ་མཆེད་ལ་སྙོམས་པར་འཇུག་པར་འདོད་པས་ནམ་མཁའ་མཐའ་ཡས་སྐྱེ་མཆེད་ཀྱི་འདུ་ཤེས་ལས་ཟློག་སྟེ་རྣམ་པར་ཤེས་པ་དེ་ཉིད་ལ་མཐའ་ཡས་པའི་རྣམ་པས་མོས་པར་བྱེད་ཅིང་ནམ་མཁའ་མཐའ་ཡས་སྐྱེ་མཆེད་ཀྱི་དངོས་གཞི་ཉེར་བསྡོགས་དང་བཅས་པ་ལས་ཡང་དག་པར་འདས་པས་ན་དེའི་ཕྱིར་དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་ཤེས་མཐའ་ཡས་སོ་སྙམ་ནས་ཞེས་གསུངས་སོ། །རྣམ་ཤེས་མཐའ་ཡས་སྐྱེ་མཆེད་བསྒྲུབས་ཏེ་སྔར་བཞིན་ནོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཅི་ཡང་མེད་པའི་སྐྱེ་མཆེད་བསྒྲུབས་ཏེ་གནས་སོ། །ཞེས་གསུངས་པ་ནི། དེ་རྣམ་ཤེས་མཐའ་ཡས་སྐྱེ་མཆེད་ལས་བསྐྱེད་ཅིང་རྣམ་པར་ཤེས་པ་ལས་གཞན་པའི་དམིགས་པ་ཅི་ཡང་དང་ལྡན་པ་གཟུགས་ཅན་དང་གཟུགས་ཅན་མ་ཡིན་པ་ཡོངས་སུ་ཚོལ་བར་བྱེད་པ་ན་མ་རྙེད་དེ། དེས་དམིགས་པ་དེ་མ་རྙེད་པ་ན་རྣམ་ཤེས་མཐའ་ཡས་སྐྱེ་མཆེད་དངོས་གཞི་ཉེར་བསྡོགས་དང་བཅས་པ་ལས་ཡང་དག་པར་འདས་ཏེ་དམིགས་པ་གཞན་ཅི་ཡང་མེད་དོ་ཞེས་མོས་པར་བྱེད་ཅིང་། ཅི་ཡང་མེད་པའི་འདུ་ཤེས་ཁོ་ན་ལ་མོས་པར་འགྱུར་ཏེ། དེས་འདུ་ཤེས་ལ་མོས་པ་དེ་ལན་མང་དུ་བྱས་པའི་རྒྱུས་ཅི་ཡང་མེད་པའི་སྐྱེ་མཆེད་ཀྱི་ཉེར་བསྡོགས་ལས་ཡང་དག་པར་འདས་ཏེ་སྦྱོར་བ་མཐར་ཐུག་པའི་བར་དུ་ཡིད་ལ་བྱས་པས། སྦྱོར་བ་མཐར་ཐུག་པའི་འབྲས་བུའི་དངོས་གཞི་ལ་སྙོམས་པར་འཇུག་པར་བྱེད་པས་ན། དེའི་ཕྱིར་དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཅི་ཡང་མེད་པའི་སྐྱེ་མཆེད་བསྒྲུབས་ཏེ་གནས་སོ་ཞེས་བྱ་བ་གསུངས་སོ། །དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་བསྒྲུབས་ཏེ་གནས་སོ་ཞེས་གསུངས་པ་དེ་ལ། དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་ཞེས་བྱ་བ་ནི་དེ་ཅི་ཡང་མེད་པའི་སྐྱེ་མཆེད་ལས་བསྐྱོད་ཅིང་ཅི་ཡང་མེད་པའི་སྐྱེ་མཆེད་ཀྱི་འདུ་ཤེས་ལ་རགས་པར་འདུ་ཤེས་ཤིང་ཉེས་དམིགས་སུ་འདུ་ཤེས་པས་ཅི་ཡང་མེད་པའི་སྐྱེ་མཆེད་ཀྱི་འདུ་ཤེས་ལས་ལྡོག་པར་བྱེད་པས་ན་དེའི་ཕྱིར་དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ནས་ཞེས་བྱ་བ་གསུངས་སོ། །འདུ་ཤེས་མེད་ཅེས་བྱ་བ་ནི། དེ་སྔོན་ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པའི་ཚེ་ན་ནི་ཅི་ཡང་གི་འདུ་ཤེས་ལས་ཡང་དག་པར་འདས། ད་ལྟ་ནི་ཅི་ཡང་མེད་པའི་འདུ་ཤེས་ལས་ཡང་དག་པར་འདས་པས་ན་དེའི་ཕྱིར་འདུ་ཤེས་མེད་ཅེས་བྱ་བ་གསུངས་ཏེ། འདི་ལྟ་སྟེ་ཅི་ཡང་གི་འདུ་ཤེས་དང་ཅི་ཡང་མེད་པའི་འདུ་ཤེས་མེད་པ་ལ་བྱའོ། །འདུ་ཤེས་མེད་མིན་ཞེས་བྱ་བ་ནི། དེའི་འདུ་ཤེས་ཏེ། འདི་ལྟ་སྟེ་དཔེར་ན་འདུ་ཤེས་མེད་པའམ། འགོག་པའི་སྙོམས་པར་འཇུག་པ་དག་འདི་ལྟར་རྣམ་པ་ཐམས་ཅད་ཀྱི་ཐམས་ཅད་དུ་འགག་པ་མ་ཡིན་ཏེ། འདུ་ཤེས་དེ་ཕྲ་ཞིང་དམིགས་པ་ལ་མཚན་མ་མེད་པར་འཇུག་པ་ཁོ་ན་མ་ཡིན་པས་ན། དེའི་ཕྱིར་འདུ་ཤེས་མེད་མིན་ཞེས་བྱ་བ་གསུངས་སོ། །དེ་ལ་བསམ་གཏན་ལ་སྙོམས་པར་འཇུག་པའི་ཚེ་ན། ལུས་སའི་འོག་ཏུ་འབྱིང་བར་སྣང་བ་ལྟ་བུའི་རྟགས་འབྱུང་ངོ་། །གཟུགས་མེད་པ་དག་ལ་སྙོམས་པར་འཇུག་པའི་ཚེ་ན་ནི་ལུས་ནམ་མཁའ་ལ་འཕར་བ་ལྟ་བུའི་རྟགས་འབྱུང་སྟེ། དེ་དག་ལ་ཞི་གནས་ཀྱི་རྣམ་པས་བཏང་སྙོམས་སུ་བཞག་ན་ཡང་དག་པའི་སྦྱོར་བ་ཡིན་ནོ། །དེ་ལ་སེམས་མེད་པའི་སྙོམས་པར་འཇུག་པ་ནི་རྣམ་པ་གཉིས་ཏེ། འདུ་ཤེས་མེད་པའི་སྙོམས་པར་འཇུག་པ་དང་། འགོག་པའི་སྙོམས་པར་འཇུག་པའོ། །དེ་ལ་འདུ་ཤེས་མེད་པའི་སྙོམས་པར་འཇུག་པ་ལ་ནི་སོ་སོ་སྐྱེ་བོ་ཁོ་ན་སྙོམས་པར་འཇུག་པར་བྱེད་དོ། །འགོག་པའི་སྙོམས་པར་འཇུག་པ་ལ་ནི་འཕགས་པ་ཁོ་ན་སྙོམས་པར་འཇུག་པར་མཛད་དོ། །དེ་ལ་ཡིད་ལ་བྱེད་པ་རྣམ་པ་གཉིས་ཀྱི་ནི་སྙོམས་པར་འཇུག་པ་དེ་གཉིས་ལ་སྙོམས་པར་འཇུག་པར་འགྱུར་ཏེ། འདི་ལྟ་སྟེ། འདུ་ཤེས་ལ་མི་ཕྱོགས་པའི་ཡིད་ལ་བྱེད་པས་ནི་འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་འཇུག་པར་བྱེད། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལས་བསྐྱོད་ཅིང་དམིགས་པ་ཡང་དག་པར་འགགས་པའི་ཡིད་ལ་བྱེད་པས་ནི་འགོག་པའི་སྙོམས་པར་འཇུག་པ་ལ་སྙོམས་པར་འཇུག་པར་བྱེད་དོ། །དེ་ལ་འདུ་ཤེས་ནི་ནད་དོ། །འདུ་ཤེས་ནི་སྡུག་བསྔལ་ལོ། །འདུ་ཤེས་ནི་ཟུག་རྔུའོ། །འདི་ལྟ་སྟེ་འདུ་ཤེས་མེད་པ་འདི་ནི་གྱ་ནོམ་པའོ་ཞེས་བྱ་བ་ནི་འདུ་ཤེས་ལ་མི་ཕྱོགས་པའི་ཡིད་ལ་བྱེད་པ་སྟེ། དེ་ཡོངས་སུ་གཟུང་ནས་འདུ་ཤེས་བྱུང་ངོ་ཅོག་ལ་དྲན་པ་མེད་པ་དང་། ཡིད་ལ་བྱེད་པ་མེད་པར་བྱེད་དེ། དེས་དེ་བསྒོམས་པའི་རྒྱུས་ན་སྦྱོར་བའི་ལམ་ལ་ནི་སེམས་དང་བཅས་པའི་གནས་སྐབས་སུ་གྱུར་ལ། སྙོམས་པར་ཞུགས་མ་ཐག་ཏུ་ནི་སེམས་འབྱུང་བར་མི་འགྱུར་བས་དེ་ལྟར་ངེས་པར་འབྱུང་བའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པས་དགེ་རྒྱས་ཀྱི་འདོད་ཆགས་དང་བྲལ་ལ་འབྲས་བུ་ཆེ་བ་དག་གི་འདོད་ཆགས་དང་མ་བྲལ་བའི་སེམས་དང་སེམས་ལས་བྱུང་བའི་ཆོས་རྣམས་འགོག་པ་གང་ཡིན་པ་དེ་ནི་སེམས་མེད་པའི་སྙོམས་པར་འཇུག་པ་ཞེས་བྱའོ། །དེ་ནི་དེ་ལྟར་ཐོབ་པ་ཡིན་ནོ། །དེ་ལ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཐོབ་པའི་འཕགས་པ་མཆོག་ཏུ་ཞི་བའི་གནས་པས་གནས་པར་འདོད་པ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལས་སེམས་བསྐྱོད་པར་བྱེད་ཅིང་། དེའི་སེམས་དེ་དེ་ལས་བསྐྱོད་པ་ནི་དམིགས་པ་མི་རྙེད་དེ། དེ་མ་རྙེད་ན་འགག་ཅིང་འབྱུང་བར་མི་འགྱུར་རོ་སྙམ་ནས། དེ་ལྟར་ཅི་ཡང་མེད་པའི་སྐྱེ་མཆེད་ཀྱི་འདོད་ཆགས་དང་བྲལ་བའི་སློབ་པའམ། དགྲ་བཅོམ་པ་ཡང་རུང་སྟེ། གནས་པའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པས་སེམས་དང་སེམས་ལས་བྱུང་བའི་ཆོས་རྣམས་འགོག་པ་གང་ཡིན་པ་དེ་ནི་འགོག་པའི་སྙོམས་པར་འཇུག་པ་ཞེས་བྱ་སྟེ། དེ་ནི་དེ་ལྟར་ཐོབ་པར་འགྱུར་རོ། །དེ་ལ་བསམ་གཏན་ལ་བརྟེན་ནས་མངོན་པར་ཤེས་པ་འགྲུབ་པར་འགྱུར་ཏེ། ཇི་ལྟར་འགྲུབ་ཅེ་ན། བསམ་གཏན་པ་བསམ་གཏན་ཡོངས་སུ་དག་པ་ཐོབ་པ་དེ་བསམ་གཏན་ཡོངས་སུ་དག་པ་དེ་ལ་བརྟེན་ནས། རྫུ་འཕྲུལ་གྱི་ཡུལ་ལམ་སྔོན་གྱི་གནས་རྗེས་སུ་དྲན་པ་འམ། ལྷའི་རྣ་བའམ་འཆི་འཕོ་བ་དང་། སྐྱེ་བ་ཤེས་པའི་སེམས་ཀྱི་རྣམ་གྲངས་ཤེས་པ་ལས་བརྩམས་ཏེ། མངོན་པར་ཤེས་པའི་དབང་དུ་བྱས་པའི་ཆོས་ཐོས་པ་དང་གཟུང་བ་དང་ཀུན་ཆུབ་པར་བྱས་པ་གང་ཡིན་པ་དེ་ཉིད་མཉམ་པར་བཞག་པའི་ས་པའི་ཡིད་ལ་བྱེད་པ་དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པར་འགྱུར་ཏེ། དོན་སོ་སོ་ཡང་དག་པར་རིག་པ་དང་ཆོས་སོ་སོ་ཡང་དག་པར་རིག་པ་དེས་དེ་ལྟ་དེ་ལྟར་སེམས་མངོན་པར་འདུ་བྱས་ཤིང་ལན་མང་དུ་བྱས་པའི་རྒྱུས་ན་དེའི་སྒོམ་པའི་འབྲས་བུ་མངོན་པར་ཤེས་པ་ལྔ་འབྱུང་བར་འགྱུར་བའི་དུས་ཀྱང་ཡོད། རྟགས་ཀྱང་ཡོད་པར་འགྱུར་རོ། །གཞན་ཡང་དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པར་གྱུར་པ་དེས་མངོན་པར་ཤེས་པ་ཐམས་ཅད་མངོན་པར་འགྲུབ་པའི་ཕྱིར་འདུ་ཤེས་རྣམ་པ་བཅུ་གཉིས་སྒོམ་པར་བྱེད་དེ། འདི་ལྟ་སྟེ། ཡང་པའི་འདུ་ཤེས་དང་། འཇམ་པའི། ནམ་མཁའི་ཁམས་ཀྱི། སེམས་དང་ལུས་མེད་པའི། མོས་པའི། སྔོན་སྦྱང་པ་ཉམས་སུ་མྱོང་བའི། གོ་རིམ་རྗེས་སུ་དྲན་པའི། རྣམ་པ་སྣ་ཚོགས་འདུ་ཤེས་པའི་སྒྲ་སྐད་ཀྱི། སྣང་བའི་གཟུགས་ཀྱི་མཚན་མའི། ཉོན་མོངས་པས་བྱས་པའི་གཟུགས་རྣམས་འགྱུར་བའི། རྣམ་པར་ཐར་པའི། ཟིལ་གྱིས་གནོན་པའི་སྐྱེ་མཆེད་ཀྱི། ཟད་པར་གྱི་སྐྱེ་མཆེད་ཀྱི་འདུ་ཤེས་སོ། །ཏིང་ངེ་འཛིན་རྣམ་པ་མང་པོ་དག་ལ་ཏིང་ངེ་འཛིན་གྱི་ཚོགས་སམ་ཕུང་པོ་ཞེས་བྱའོ། །བདེན་པ་མཐོང་ནས་ཟག་པ་མེད་པའི་ཏིང་ངེ་འཛིན་དུ་འགྱུར་ཏེ་ཏིང་ངེ་འཛིན་མཐར་ཕྱིན་པའོ། །གསུམ་པ་ལྷག་པ་ཤེས་རབ་ཀྱི་བསླབ་པ་རྒྱས་པར་བཤད་པ་ལ། དངོས་དང་། རང་རྒྱལ་ཀྱི་ལམ་བཤད་པ་གཉིས་ལས། དང་པོ་ལ་བདེན་པ་སྦྱོང་ཚུལ། དེ་ལམ་དང་སྦྱོར་བ། བྱང་ཕྱོགས་ཀྱི་སྒོམ་རིམ་བཤད་པ་གསུམ་ལས་དང་པོ་ནི། མདོ་ལས་ཏིང་ངེ་འཛིན་གྱི་ཕུང་པོ་ཡོངས་སུ་རྫོགས་ནས་ཤེས་རབ་ཀྱི་ཕུང་པོ་ཡོངས་སུ་རྫོགས་པར་བྱེད་པ་ཞེས་གསུངས་པས། ཤེས་རབ་ནི། འདི་ནི་སྡུག་བསྔལ་འཕགས་པའི་བདེན་པའོ། །ཞེས་ཡང་དག་པ་ཇི་ལྟ་བ་བཞིན་དུ་ཤེས་པ་དང་། དེ་བཞིན་འདི་ནི་ཀུན་འབྱུང་། འདི་ནི་སྡུག་བསྔལ་འགོག་པ། འདི་ནི་སྡུག་བསྔལ་འགོག་པར་འགྲོ་བར་བྱེད་པའི་ལམ་འཕགས་པའི་བདེན་པའོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་པ་སྟེ། འཕགས་པའི་བདེན་པ་བཞི་ཕྱིན་ཅི་མ་ལོག་པར་ཤེས་པ་ནི་ཤེས་རབ་ཀྱི་ཕུང་པོ་ཡོངས་སུ་རྫོགས་པར་བྱེད་པའོ། །ཅིའི་ཕྱིར་དེ་དག་ལ་བདེན་པ་ཞེས་བྱ་ཞེ་ན། སྡུག་བསྔལ་ཡང་སྡུག་བསྔལ་པའི་དོན་དང་། ལམ་གྱི་བར་ཡང་ལམ་གྱི་བར་གྱི་དོན་གྱིས། ཡང་དག་པ། དེ་བཞིན་པ། ཕྱིན་ཅི་མ་ལོག་ཅིང་མ་སླད་པ་ཡིན་པས་ན་དེའི་ཕྱིར་བདེན་པ་ཞེས་བྱའོ། །རང་གི་མཚན་ཉིད་ཀྱིས་མི་བསླུ་བ་དང་། དེ་མཐོང་ན་ཕྱིན་ཅི་མ་ལོག་པའི་བློ་དག་སྐྱེ་བར་འགྱུར་བས་ན་དེའི་ཕྱིར་ཡང་བདེན་པ་ཞེས་བྱའོ། །ཅིའི་ཕྱིར་དེ་དག་ལ་འཕགས་པའི་བདེན་པ་ཞེ་ན། འཕགས་པ་རྣམས་ཀྱིས་དེ་དག་དེ་ཁོ་ན་ལྟ་བུ་ཡིན་པར་བདེན་པའི་སྒོ་ནས་ཡང་དག་པ་ཇི་ལྟ་བ་བཞིན་མཁྱེན་ཅིང་གཟིགས་ཀྱི། བྱིས་པ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་མི་མཐོང་བས་ན་དེའི་ཕྱིར་འཕགས་པའི་བདེན་པ་རྣམས་ཞེས་བྱའོ། །བྱིས་པ་རྣམས་ལ་ཡང་དེ་དག་ཆོས་ཉིད་ཀྱི་བདེན་མོད། རྟོགས་པས་མ་ཡིན་གྱི་འཕགས་པ་རྣམས་ལ་ནི་གཉིས་ཀས་བདེན་པ་ཡིན་ནོ། །བཞིར་འཇོག་པའི་རྒྱུ་མཚན་ཡང་ནག་པོའི་ཕྱོགས་དང་དཀར་པོའི་ཕྱོགས་ལ་བརྟེན་པའི་རྒྱུ་དང་འབྲས་བུ་རྣམ་པར་བཞག་པས་བདེན་པ་བཞིར་བཞག་པ་སྟེ། དེ་ལ་བདེན་པ་སྡུག་བསྔལ་ནི་ནག་པོའི་ཕྱོགས་ཀྱི་འབྲས་བུ་ཡིན། བདེན་པ་ཀུན་འབྱུང་ནི་རྒྱུ་ཡིན། བདེན་པ་འགོག་པ་ནི་དཀར་པོའི་ཕྱོགས་ཀྱི་འབྲས་བུ་ཡིན། བདེན་པ་ལམ་ནི་རྒྱུ་ཡིན། དེ་དག་རིམ་པ་བཞིན་ནད་དང་། ནད་ཀྱི་རྒྱུ། ནད་ཞི་བ་དང་། སྨན་བསྟེན་པ་ལྟ་བུས་སྡུག་བསྔལ་ཤེས་བྱ། ཀུན་འབྱུང་སྤང་བྱ། འགོག་པ་ཐོབ་བྱ། ལམ་བསྟེན་བྱར་བཤད་དོ། །ཇོ་བོ་རྗེ་ལྷ་གཅིག་གིས། བདེན་པ་དག་ནི་རྣམ་བཞི་སྟེ། །སྡུག་བསྔལ་དེ་བཞིན་ཀུན་འབྱུང་དང་། །འགོག་པ་ལམ་སྟེ་དེ་ལྟ་ན། །དེ་དག་ཇི་ལྟར་མངོན་རྟོགས་རིམ། །སྡུག་བསྔལ་ཉེར་ལེན་ཕུང་པོ་ཡི། །ཀུན་འབྱུང་ལས་དང་ཉོན་མོངས་ཏེ། །འགོག་པ་མྱ་ངན་འདས་པ་གཉིས། །ལམ་ནི་ཕྱོགས་མཐུན་སུམ་ཅུ་བདུན། །ཞེས་པས། བདེན་བཞིའི་སྒོ་ནས་འཇུག་ཚུལ། ཟག་པ་དང་བཅས་པའི་འབྲས་བུ་ཉེ་བར་ལེན་པའི་ཕུང་པོ་ལྔ་ནི་སྡུག་བསྔལ་སྣ་ཚོགས་ཀྱི་གཞི་ཡིན་པས། བལྟ་སླ་བའི་ཕྱིར་ཐོག་མར་སྡུག་བསྔལ་གྱི་བདེན་པ་རྟོགས་སོ། །དེ་ནས་སྡུག་བསྔལ་གྱི་རྒྱུ་བརྟགས་ན་ལས་དང་ཉོན་མོངས་པ་ལས་བྱུང་བར་རིག་སྟེ་ཀུན་འབྱུང་བའི་བདེན་པ་རྟོགས་སོ། །དེ་ནས་ལས་དང་ཉོན་མོངས་པ་སྤངས་ཏེ་ལྷག་མ་དང་བཅས་པའི་མྱང་འདས་དང་། ཕུང་པོ་ལྔ་དང་ཡང་བྲལ་བའི་ལྷག་མེད་ཀྱི་མྱང་འདས་བདེ་བ་ཡིན་པ་རིག་སྟེ་འགོག་པའི་བདེན་པ་རྟོགས་སོ། །དེ་ནས་འགོག་པ་ཐོབ་པར་བྱ་བའི་ཐབས་ནི་བྱང་ཆུབ་ཀྱི་ཕྱོགས་སོ་བདུན་ཡིན་པར་རིག་སྟེ་ལམ་གྱི་བདེན་པ་རྟོགས་སོ། །དེ་ལྟར་ཟག་པ་དང་བཅས་པ་དང་། ཟག་པ་མེད་པ་ཡང་རྒྱུ་དང་འབྲས་བུ་ཙམ་དུ་ཟད་དེ། བྱེད་པ་པོ་དང་ཟ་བ་པོའི་བདག་མེད་པར་མཐོང་བས་གང་ཟག་ལ་བདག་མེད་པར་རྟོགས། འཁོར་བ་ནི་སྡུག་བསྔལ་མི་ཟད་པ་ཡིན་ཞིང་། མྱ་ངན་ལས་འདས་པ་ནི་ཞི་བ་བདེ་བར་རིག་ལ། དེ་གཉིས་ལས་གཅིག་སྤང་ཞིང་གཅིག་ཐོབ་པར་བྱར་རུང་བར་རྟོགས་པ་དང་། སྡུག་བསྔལ་གྱིས་ཁོང་དངངས་ཤིང་མི་བཟོད་དོ། །འཁོར་བས་སྐྱོ་ཞིང་ཡིད་འབྱུང་བ་དང་། སྙིང་རྗེ་ཤིན་ཏུ་ཆུང་སྟེ་དགེ་བ་སྤྱོད་པ་ཡང་སེམས་ཅན་མང་པོའི་དོན་གྱི་ཕྱིར་མ་ཡིན་གྱི་བདག་གཅིག་པུའི་དོན་དུ་སྤྱོད་ཅིང་། བདག་ཉིད་མྱ་ངན་ལས་འདས་པའི་བདེ་བ་བསྒྲུབ་པའོ། །གཉིས་པ་ནི། ཚོགས་ཀྱི་ལམ་དུ་རབ་ཏུ་བྱུང་བ་ནས་ཤེས་བཞིན་དུ་གནས་པ་ལ་མངོན་པར་དགའ་བའི་བར་དང་། དེ་ནས་དྲོད་རྩེ་བཟོད་པ་ཆུང་གསུམ་དུ་ཁམས་གསུམ་གྱི་བདེན་པ་བཞིའི་རྣམ་པ་མི་རྟག་སྡུག་བསྔལ་སྟོང་བདག་མེད། རྒྱུ་ཀུན་འབྱུང་རབ་སྐྱེ་རྐྱེན་འགོག་ཞི་གྱ་ནོམ་ངེས་འབྱུང་། ལམ་རིགས་པ་སྒྲུབ་པ་ངེས་འབྱིན་བཅུ་དྲུག་མཚུངས་པར་སྒོམ། འབྲིང་ནས་དང་པོར་ལམ་གྱི་བཞི་དོར་ནས་བཅུ་གཉིས་སྒོམ། དེ་ནས་འགོག་པའི་བཞི་དོར། དེ་ནས་ཀུན་འབྱུང་གི་བཞི་དོར། དེ་ནས་དུཿཁའི་གཅིག་དོར་གཉིས་དོར་ནས་གཉིས་སྒོམ་པའི་བར་ནི་འབྲིང་ཡིན་ལ། གཉིས་པོ་སྲེད་པ་ཤས་ཆེ་ན་ལེ་ལོ་དང་། ང་རྒྱལ་གྱི་གཉེན་པོ་མི་རྟག་དུཿཁ་གཉིས། ལྟ་བ་ཤས་ཆེ་ན་བདག་དང་བདག་གིར་ལྟ་བའི་གཉེན་པོ་བདག་མེད་སྟོང་པ་ཉིད་སྒོམ། དེ་ནས་བཟོད་ཆེན་དང་ཆོས་མཆོག་དུ་འདོད་ཁམས་ཀྱི་སྡུག་བསྔལ་ཕུང་པོ་ལྔ་ལ་དམིགས་པ་སྐད་ཅིག་རེ་རེའོ། །དེ་ནས་མཐོང་ལམ་དུ་སྡུག་བསྔལ་ཆོས་བཟོད་སོགས་བཟོད་ཤེས་བཅོ་ལྔ་ལ་མཐོང་ལམ་ཐམས་ཅད་ཆོས་མཆོག་དང་ས་གཅིག་གོ །དཔལ་རྩེགས་ཀྱིས། མཐོང་བའི་ལམ་ནི་སེམས་ཀྱི་སྐད་ཅིག་མ་བཅུ་དྲུག་གོ །ཞེས་འབྱུང་བ་ནི་སྔ་མ་ཉན་ཐོས་དང་གཞུང་ཕྱི་མ་ཐེག་ཆེན་གྱི་གཞུང་བཙན་པར་བྱས་པས་སོ། །དེས་སྒོམ་པའི་ལམ་ནི། ལམ་ཆུང་ངུ་དང་། ལམ་འབྲིང་པོ་དང་། ལམ་ཆེན་པོ་དང་། སྦྱོར་བའི་ལམ་དང་། བར་ཆད་མེད་པའི་ལམ་དང་། རྣམ་པར་གྲོལ་བའི་ལམ་དང་། ཁྱད་པར་གྱི་ལམ་མོ། །ཞེས་དང་། དང་པོ་གསུམ་ལ་ཆུང་འབྲིང་ཆེ་གསུམ་སྟེ་དགུར་བཤད། དེ་ལྟར་སྒོམ་བྱ་འཕགས་ལམ་ཡན་ལག་བརྒྱད། དེར་འདོད་པ་ཁམས་དང་བསམ་གཏན་བཞི་དང་གཟུགས་མེད་བཞི་སྟེ། ས་དགུ་པོ་རེ་རེ་ལ་སྒོམ་སྤངས་ཀྱི་ཉོན་མོངས་པ་དགུ་དགུ་སྟེ་གྱ་གཅིག་གི་གཉེན་པོར་གྱུར་པའོ། །ཅིག་ཆར་བ་ལ་ནི་ཁམས་གསུམ་གྱི་ཉོན་མོངས་པ་སྒྲིལ་ནས་སྤོང་པས་དགུར་སྐྱེའོ། །མི་སློབ་ལམ་ནི་སྲིད་རྩེ་ཉོན་མོངས་པ་དགུ་ཟད་པ་ཐོབ་ཅིང་ཤེས་པ་ཡིན་ནོ། །དེ་ལ་ཚོགས་ལམ་ཆེན་པོ་འདོད་སེམས་ལ་བརྟེན་པ་གཙོ་ཆེ། སྦྱོར་མཐོང་གཉིས་ནི་སྒོམ་བྱུང་ཡིན་པས་བསམ་གཏན་དང་པོའི་ཉེར་བསྡོགས་དངོས་གཞི་ཙམ་མོ། །རྟོག་པ་མེད་པ་དཔྱོད་པ་ཙམ། དངོས་གཞི་ཁྱད་པར་ཅན་དེ་གསུམ། བསམ་གཏན་གཉིས་པ་གསུམ་པ་བཞི་པ་སྟེ་དྲུག་ལ་བརྟེན་ནོ། །འདོད་སེམས་རྣམ་གཡེང་ཆེ་བས་ཞི་གནས་མེད་ལ་གཟུགས་མེད་ལ་ཤས་ཆུང་བས་མི་བརྟེན་སྒོམ་ལམ་ས་དྲུག་པ་དེ་དང་གཟུགས་མེད་དང་པོ་གསུམ་ལ་བརྟེན། སྲིད་རྩེ་རྒྱུ་བ་མི་གསལ་བས་བརྟེན་དུ་མི་རུང་ངོ་། །བསམ་གཏན་གཉིས་པ་མན་ཆད་ཀྱི་ཉེར་བསྡོགས་པས་དང་པོའི་དངོས་གཞི་ལ་རྟེན་པ་སླའོ། །ལམ་དེ་དག་ལས་ཚོགས་ལམ་དུ་དྲན་པ་ཉེར་བཞག་བཞི་སྒོམ། དྲོད་དུ་ཡང་དག་སྤོང་བ་བཞི། རྩེ་མོར་རྫུ་འཕྲུལ་རྐང་པ་བཞི། བཟོད་པར་དབང་པོ་ལྔ། ཆོས་མཆོག་ཏུ་སྟོབས་ལྔ། མཐོང་ལམ་དུ་བྱང་ཆུབ་ཡན་ལག་བདུན། སྒོམ་ལམ་དུ་འཕགས་ལམ་ཡན་ལག་བརྒྱད་སྒོམ་མོ། །གསུམ་པ་ནི་དྲན་པ་ནི་གང་། ཉེ་བར་བཞག་པ་གང་ཞེ་ན། དྲན་པ་ནི་ཤེས་རབ་བོ། །ཉེ་བར་བཞག་པ་ནི་ཏིང་ངེ་འཛིན་ཏེ། དེ་ཉིད་སྒོམ་པའི་ཡུལ་བཞི་ཡོད་པས་དྲན་པ་ཉེ་བར་བཞག་པ་བཞི་ཞེས་བྱའོ། །དེ་ཡང་ལུས་ལ་ལུས་ཀྱི་རྗེས་སུ་ལྟ་ཞིང་དྲན་པ་ཉེ་བར་བཞག་པ། ཚོར་བ། སེམས། ཆོས་ལའོ། །བརྩོན་འགྲུས་ཤིན་ཏུ་གཉེན་པོར་གྱུར་པ་དང་། བརྩོན་འགྲུས་ཤིན་ཏུ་སྦྱངས་པ་དང་། བརྩོན་འགྲུས་ཐོབ་པ། བརྩོན་འགྲུས་ཤིན་ཏུ་བསྟེན་པ། བསྟེན་པའི་ཕྱིར་ཡང་དག་སྤོང་བ་བཞི་སྟེ། མི་དགེ་བའི་ཆོས་མ་སྐྱེས་པ་མི་བསྐྱེད་པ་དང་། སྐྱེས་པ་སྤོང་བ་དང་། དགེ་བའི་ཆོས་མ་སྐྱེས་པ་བསྐྱེད་པ་དང་། སྐྱེས་པ་གནས་པར་བྱ་བ་དང་། ཕྱིར་ཞིང་འབྱུང་བར་བྱ་བ་དང་། ཉམས་པར་མི་འགྱུར་བ་དང་། ཡོངས་སུ་རྫོགས་པར་བྱ་བའི་ཕྱིར་འདུན་འབད་བརྩོན་སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པའོ། །དང་པོ་གཉིས་ལ་ཡང་དག་པའི་སྤོང་བ་ཞེས་རིགས་མོད། ཕྱི་མ་གཉིས་ལ་ཡང་དེ་སྐད་ཅིའི་ཕྱིར་གདགས་ཞེ་ན། དགེ་བ་སྐྱེ་བ་དང་གནས་པའི་མི་མཐུན་ཕྱོགས་སྤོང་བས་དེ་སྐད་གདམས་པར་མཛད་པས་མི་རིགས་པ་མ་ཡིན་ནོ། །འདུན་པ་བརྩོན་སེམས་དཔྱོད་ལ་ཤིན་ཏུ་གནས་ལ་བརྟན་པའི་ཕྱིར་རྫུ་འཕྲུལ་གྱི་རྐང་པ་བཞི་སྟེ་རྫུ་འཕྲུལ་གྱི་མངོན་པར་ཤེས་པ་ལྔ་བཤད་པ་དེའི་ནང་ནི་རྫུ་འཕྲུལ་གྱི་མངོན་པར་ཤེས་པ། རྐང་པ་དེ་དག་ཐོབ་པར་བྱེད་པའི་རྒྱུ་འམ་གཞི་ཡིན་པས་སོ། །འདུན་པ་ནི་གང་གུས་པར་བྱེད་པ་དང་དད་པ་ལ་བརྟེན་ཏེ་སེམས་རྩེ་གཅིག་པ་ལ་རེག་པར་བྱེད་དོ། །བརྩོན་འགྲུས་ནི་གང་རྒྱུན་དུ་སྦྱོར་བ་ལ་བརྟེན་ནས་སེམས་རྩེ་གཅིག་པ་ལ་རེག་པར་བྱེད་པའོ། །སེམས་ནི་གང་ཚེ་རབས་གཞན་དུ་ཏིང་ངེ་འཛིན་བསྒོམས་པ་ལ་བརྟེན་ནས་ཚེ་འདིར་སེམས་ཏེ་སྔོན་གྱི་སེམས་དང་རྗེས་སུ་མཐུན་པར་གྱུར་ཏེ་མྱུར་དུ་སེམས་རྩེ་གཅིག་པ་ལ་རེག་པར་འགྱུར་བའོ། །དཔྱོད་པ་ནི་ཤེས་རབ་ཏེ། དེའི་གོང་དུ་བཤད་པའི་ཆོས་རྣམས་ཀྱི་མཚན་ཉིད་ལ་མཁས་པའོ། །དེ་ལྟར་ཏིང་ངེ་འཛིན་བཞི་སྒོམ་པ་ལ་སྤོང་བའི་འདུ་བྱེད་བརྒྱད་འབྱུང་བར་གྱུར་ཏེ། འདུན་པ་ནི་བདག་ནམ་ཞིག་ན་ཏིང་ངེ་འཛིན་ཡོངས་སུ་རྫོགས་ཤིང་། སྡིག་པ་མི་དགེ་བའི་ཆོས་རྣམས་ཀྱི་བག་ལ་ཉལ་སྤོང་བར་གྱུར་ཅིག་གུ་སྙམ་དུ་སེམས་པ། རྩོལ་བ་ནི། གཉེན་པོ་སྒོམ་པ་ལ་སྦྱོར་བ་མི་གཏོང་བ། དད་པ་ནི་སྦྱོར་བ་མ་བཏང་བའི་གོང་དུ་རྟོགས་པར་བྱ་བ་ལ་ཡིད་ཆེས་པ། ཤིན་ཏུ་སྦྱངས་པ་ནི་དད་པ་སྔོན་དུ་བཏང་བའི་དགའ་བ་སྟེ། ཡིད་དགའ་བར་འགྱུར་བའི་རིམ་གྱིས་སྡིག་པ་མི་དགེ་བའི་ཆོས་ཀྱི་གནས་ངན་ལེན་སྦྱང་བ། དྲན་པ་ནི་ཞི་གནས་ཀྱི་སེམས་འཛིན་པའོ། །ཤེས་བཞིན་ནི་ལྷག་མཐོང་ངོ་། །སེམས་པ་ནི་སྤངས་པ་དང་མ་སྤངས་པ་ལ་དཔྱོད་པ་དང་། ཞི་གནས་དང་ལྷག་མཐོང་དང་མི་མཐུན་པའི་ལུས་དང་ངག་གི་ལས་ཀུན་དུ་སྤོང་བ། བཏང་སྙོམས་ནི་སྡིག་པ་མི་དགེ་བའི་ཆོས་དང་མཐུན་པ་དག་ལ་དཔྱོད་པའི་སེམས་ཀུན་ནས་ཉོན་མོངས་པ་མེད་ཅིང་མཉམ་པ་ཉིད་དུ་བྱེད་པ། དེ་ལ་འདུན་པས་རྫུ་འཕྲུལ་སྒྲུབ། བརྩོན་པས་མཐར་འབྱིན། སེམས་ཀྱིས་མི་ཉམས་པར་བྱེད། །དཔྱོད་པས་གང་དང་གང་བྱ་བ་མ་ནོར་བར་གཏན་ལ་འབེབས་སོ། །དད་བརྩོན་དྲན་ཏིང་ཤེས་རབ་ཀྱི་དབང་པོ་ནི་དབང་པོ་ལྔ་སྟེ། འཇིག་རྟེན་པའི་དད་པའི་ནང་ནས་འཇིག་རྟེན་ལས་འདས་པ་ལ་དད་པ་མཆོག་དམ་པ། ཁྱད་ཞུགས་པ། བླ་ན་མེད་པའོ། །དེ་ལྟ་བུའི་དད་པ་ཉིད་དབང་པོའོ། །བརྩོན་འགྲུས་ཀྱི་དབང་པོ་ནི། དད་པར་གྱུར་པ་ན་ཡིད་ཆེས་པས་བརྩོན་པར་གྱུར་པ། དྲན་པའི་དབང་པོ་ནི། ཉམས་པར་མི་བྱེད་ཅིང་བརྗེད་པར་མི་བྱེད་པ། ཏིང་ངེ་འཛིན་གྱི་དབང་པོ་ནི། རྩེ་གཅིག་ཏུ་བྱེད་པས་རྩེ་གཅིག་ཏུ་དམིགས་པ། ཤེས་རབ་ཀྱི་དབང་པོ་ནི། རབ་ཏུ་རྟོགས་པའི་ཆོས་དེ་དག་གི་མཚན་ཉིད་འབྱེད་པའོ། །དེ་དག་འཇིག་རྟེན་ལས་འདས་པའི་ཆོས་རྟོགས་པར་བྱེད་པའི་དབང་པོ་ཡིན་པའི་ཕྱིར་དབང་པོ་སྟེ་དབང་བྱེད་པའི་དོན་ནོ། །དད་པའི་དབང་པོས་ནི། དགེ་བའི་ཆོས་རྣམས་ལ་འཇུག་པར་བྱེད་པ་ལ་དབང་བྱེད་དེ། དེའི་དབང་གིས་དགེ་བའི་ཆོས་ལ་འཇུག་པའི་ཕྱིར་རོ། །བརྩོན་འགྲུས་ཀྱིས་ནི་དགེ་བའི་ཆོས་རྣམས་བསྐྱེད་པ་ལ་དབང་བྱེད་དེ། དེའི་མཐུས་དགེ་བའི་ཆོས་རྣམས་བསྐྱེད་པར་བྱེད་པས་སོ། །དྲན་པས་ནི་དགེ་བའི་རྩ་བ་རྣམས་ཆུད་མི་ཟ་བ་ལ་དབང་བྱེད་དེ། །དེས་མི་བརྗེད་པར་བྱེད་པའི་ཕྱིར་རོ། །ཏིང་ངེ་འཛིན་གྱིས་གཞན་དུ་མི་གཡེང་བ་ལ་དབང་བྱེད་དེ། དེས་དམིགས་པའི་ཡུལ་ལ་རྩེ་གཅིག་ཏུ་འཇོག་པས་སོ། །ཤེས་རབ་ཀྱི་དབང་པོས་མཐར་འབྱིན་པ་ལ་དབང་བྱེད་དེ། དེས་དགེ་བའི་ཆོས་རྣམས་མཐར་ཐུག་པར་བྱེད་པས་སོ། །དད་བརྩོན་དྲན་ཏིང་ཤེས་རབ་ཀྱི་སྟོབས་ནི་སྟོབས་ལྔ་སྟེ། དད་པ་ལ་སོགས་པ་འདི་རྣམས་དབང་པོའི་ཚེ་ན་དད་པ་ལ་སོགས་པའི་ཆོས་རྣམས་མངོན་དུ་བྱ་བ་དང་། སྒྲུབ་པར་བྱེད་པ་ལ་དབང་བྱེད་པ་ཙམ་དུ་ཟད་ཀྱི། མི་མཐུན་པའི་ཕྱོགས་རྣམས་ཀྱིས་མི་ཚུགས་པ་མ་ཡིན་ནོ། །སྟོབས་ཀྱི་དུས་ན་ནི་དེ་དག་ཉིད་རབ་ཏུ་གོམས་ཤིང་རྒྱས་ཏེ་མཐུ་དང་ལྡན་པར་གྱུར་པས་མ་དད་པ་ལ་སོགས་པའི་མི་མཐུན་ཕྱོགས་ཀྱིས་མི་ཚུགས་པས་སྟོབས་ལྔ་ཞེས་བྱའོ། །དྲན་པ་ཤིན་ཏུ་འབྲེལ་པ་དང་། རབ་ཏུ་ཤེས་པ། བརྩོན་འགྲུས། དགའ་བ། བག་ཡང་། ཏིང་ངེ་འཛིན། བཏང་སྙོམས་ཤིན་ཏུ་འབྲེལ་པར་བསྟན་པའི་ཕྱིར་བྱང་ཆུབ་ཀྱི་ཡན་ལག་བདུན་སྟེ། བྱང་ཆུབ་ནི་ཟད་ལ་མི་སྐྱེ་བའི་ཡེ་ཤེས་རྣམ་པར་མི་རྟོག་པའི་ཏིང་ངེ་འཛིན་ལ་བྱའོ། །དྲན་པ་ལ་སོགས་པ་བདུན་པོ་འདི་དག་བྱང་ཆུབ་དེ་ཐོབ་པར་བྱེད་པའི་རྒྱུ་འམ་གྲོགས་ཡིན་པས་ཡན་ལག་གོ །དྲན་པ་ཡང་དག་བྱང་ཆུབ་ཀྱི་ཡན་ལག་ནི། ཆོས་རྣམས་སེམས་ལ་གསལ་ཞིང་མ་བརྗེད་པའི་དྲན་པ་སྟེ། དྲན་པས་རྟོགས་པར་བྱ་བའི་ཆོས་རྣམ་པ་གསུམ་སྟེ། ཆོས་ཀྱི་དབྱིངས་དང་། དེའི་ལམ་དང་། དེ་སྟོན་པའི་གཞུང་ངོ་། །ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི། ཆོས་གང་དང་གང་གི་ཆ་དང་ཕྱོགས་སུ་གཏོགས་པ་ཇི་ལྟ་ཇི་ལྟ་བུར་དེའི་ཟླ་དང་ཕྱོགས་སུ་བསླན་ཞིང་དབྱེ་བར་བྱ་བའི་ཆོས་དེ་དག་དེ་དག་ལ་འདི་ནི་འདིའི་ཕྱོགས་སུ་གཏོགས་ཞེས་གང་དང་གང་གི་ཟླ་ལ་གཏོགས་པ་ཤེས་ཤིང་ཆ་སོ་སོར་རྣམ་པར་འབྱེད་པ་ཤེས་པའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི། ཆོས་དེ་དག་མི་བརྗེད་པར་འཛིན་པའི་ཕྱིར་སྤྲོ་བ་དང་སྟོབས་དང་བཏུལ་བའི་ཕྱིར་མི་ལྡོག་པར་འདུན་པ་མཐུ་བརྩོན་པ་མི་གཏོང་བ། ལམ་མངོན་པར་རྟོགས་པར་བྱ་བ་ལ་བརྩོན་པའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི། གང་གིས་གང་བསྒྲུབས་ཤིང་དེའི་མི་མཐུན་ཕྱོགས་སྤོང་བ། གང་གིས་ཞེས་པ་ནི་དགའ་བ་དེ་དུས་གསུམ་གྱི་ཆོས་ཐོབ་པར་དགའ་བའོ། །དེས་རྒྱུ་བྱས་ནས་སེམས་མ་ཞུམ་པ་དང་སྤྲོ་བར་འགྱུར་རོ། །གང་བསྒྲུབས་པ་ནི་ལུས་དང་སེམས་ལས་སུ་རུང་བ་བསྒྲུབས་པ་སྟེ། ལུས་ལས་སུ་རུང་བ་ནི་གཟུགས་ཀྱི་ཕུང་པོ་རྟེན་དུ་གྱུར་པས་ཉོན་མོངས་པ་སྐྱེ་བའི་རྒྱུ་མི་བྱེད་ཅིང་། ཉོན་མོངས་པ་སྐྱེ་བ་དང་རྗེས་སུ་མི་མཐུན་པར་གནས་པའོ། །སེམས་ལས་སུ་རུང་བ་ནི། ཞུམ་པ་དང་རྒོད་པའི་དབང་དུ་མ་གྱུར་ལ། ཞི་གནས་དང་ལྷག་མཐོང་ཟུང་དུ་འབྲེལ་པས་དོན་རྟོགས་ཤིང་རྩེ་གཅིག་ཏུ་གནས་པར་ནུས་པའོ། །དེའི་མི་མཐུན་ཕྱོགས་སྤོང་བ་ནི་མཐོང་བའི་ལམ་ལ་བར་དུ་གཅོད་པའི་མི་མཐུན་ཕྱོགས་སྤོང་བའོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་གང་གིས་གང་སྤངས་ནས་དམིགས་པའི་ཡུལ་ལ་རྩེ་གཅིག་ཏུ་གནས་པར་ནུས་པའོ། །གང་གིས་སྤངས་ན། གོང་དུ་བཤད་པའི་ལུས་དང་སེམས་ཤིན་སྦྱངས་གཉིས་ཀྱིས། གང་སྤངས་ན་ཉོན་མོངས་པ་རྣམས་སྤངས། དམིགས་པའི་ཡུལ་ལ་རྩེ་གཅིག་ཏུ་གནས་པར་ནུས་པ་ནི་ཞི་གནས་ལ་འཇུག་པའི་དམིགས་པ་ལ་སེམས་རྩེ་གཅིག་ཏུ་འཇོག་པར་ནུས་པའོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི། ཏིང་ངེ་འཛིན་གང་གིས་དེ་བཞིན་ཉིད་ཀྱི་ཡེ་ཤེས་སོ་སོ་རང་གིས་རིག་ཅིང་དེ་བཞིན་ཉིད་མངོན་སུམ་དུ་བྱེད་པའོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི། ཡིད་བདེ་བ་དང་ཡིད་མི་བདེ་བ་གང་གི་དབང་དུ་ཡང་མི་འགྱུར་ཞིང་ཆགས་པ་དང་ཁོང་ཁྲོ་བས་སེམས་ཀུན་ཏུ་མ་ཟིན་པ་འཇིག་རྟེན་གྱི་ཆོས་རྣམས་མི་ཕྲོགས་པའོ། །འདི་དག་བྱང་ཆུབ་ཀྱི་ཡན་ལག་ཏུ་བཞག་པ་ཡང་། དྲན་པ་རྟེན་གྱི་ཡན་ལག་སྟེ། དྲན་པ་ཉེ་བར་གནས་པར་གྱུར་ན། དགེ་བའི་ཆོས་ཐམས་ཅད་སེམས་ལ་གསལ་བའི་ཕྱིར་རོ། །ཆོས་རྣམ་འབྱེད་རང་བཞིན་གྱི་ཡན་ལག་ཏེ། དེ་ཉིད་བྱང་ཆུབ་ཀྱི་མཚན་ཉིད་ཡིན་པའི་ཕྱིར་རོ། །བརྩོན་འགྲུས་ནི་ངེས་པར་འབྱུང་བའི་ཡན་ལག་སྟེ། དེས་ཇི་སྲིད་འགྲོ་བར་བྱ་བར་ཕྱིན་པའི་ཕྱིར་རོ། །དགའ་བ་ནི་ཕན་ཡོན་གྱི་ཡན་ལག་སྟེ། དེས་རྒྱུད་ལ་ཚིམ་པར་བྱ་བའི་ཕྱིར་རོ། །ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ནི་ཉོན་མོངས་པ་མེད་པའི་ཡན་ལག་ཏེ། ཤིན་ཏུ་སྦྱངས་པ་ནི་ཉོན་མོངས་པ་མེད་པ་སྟེ། དེས་གནས་ངན་ལེན་སྤོང་བར་བྱེད་པའི་ཕྱིར་རོ། །ཏིང་ངེ་འཛིན་ནི་ཉོན་མོངས་པ་མེད་པ་སྟེ། དེ་ལ་གནས་པའི་གནས་གཞན་དུ་མི་འགྱུར་བའི་ཕྱིར་རོ། །བཏང་སྙོམས་ནི་ཉོན་མོངས་པ་མེད་པ་སྟེ། དེའི་དུས་ན་ཆགས་སེམས་དང་ཡིད་མི་བདེ་བ་དང་བྲལ་བའི་ཕྱིར་རོ། །སྒོམ་པའི་ལམ་ལ་ནི་འཕགས་ལམ་ཡན་ལག་བརྒྱད་དེ། ཡང་དག་པའི་ལྟ་བ། ཡང་དག་པའི་རྟོག་པ། ཡང་དག་པའི་ངག ཡང་དག་པའི་ལས། ཡང་དག་པའི་འཚོ་བ། ཡང་དག་པའི་རྩོལ་བ། ཡང་དག་པའི་དྲན་པ། ཡང་དག་པའི་ཏིང་ངེ་འཛིན་ནོ། །འཕགས་པ་རྣམས་ཡེ་ཤེས་གང་གིས་བྱང་ཆུབ་སྒྲུབ་པའི་ཡེ་ཤེས་དེ་ལ་ལམ་ཞེས་བྱའོ། །བརྒྱད་པོ་དེ་དག་ལམ་གྱི་ཡེ་ཤེས་དེའི་གྲོགས་སུ་གྱུར་པའི་ཕྱིར་ཡན་ལག་གོ །དེ་ལ་དང་པོ་ཡོངས་སུ་གཅོད་པའི་ཡན་ལག་དེས་ཇི་ལྟར་མྱོང་བའི་དེ་ཁོ་ན་ལ་སྤྱོད་པར་བྱེད་པའི་ཕྱིར་དང་། གཉིས་པ་གཞན་གོ་བར་བྱེད་པའི་ཡན་ལག་སྟེ། དེས་ཇི་ལྟར་ཁོང་དུ་ཆུད་པ་སེམས་ལ་བརྟགས་ནས་ཚིག་ཏུ་སྨྲ་བའི་ཕྱིར་རོ། །ངག་ལས་འཚོ་གསུམ་གཞན་ཡིད་ཆེས་པར་བྱེད་པའི་ཡན་ལག་སྟེ། དེ་དག་གི་རིམ་པ་བཞིན་དུ་ལྟ་བ་ལ་སོགས་པ་རྣམ་པར་དག་པ་དེ་ལ་ཡིད་ཆེས་པའོ། །དེ་ཡང་ངག་གིས། ཇི་ལྟར་ཁོང་དུ་ཆུད་པ་དྲིས་པ་ལ་ལུང་བསྟན་པའི་སྒོ་ནས་འདིའི་ལྟ་བ་རྣམ་པར་དག་གོ་ཞེས་གཞན་ཡིད་ཆེས་པར་འགྱུར་རོ། །ལས་ཀྱིས་མི་བྱ་བ་མི་བྱེད་པ་དང་། འོང་བ་དང་ལོག་པ་ལ་སོགས་པ་གང་སྤྱོད་པས་ཚུལ་ཁྲིམས་རྣམ་པར་དག་པར་ཡིད་ཆེས་སོ། །འཚོ་བས་ཆོས་གོས་ལ་སོགས་པ་ཆོས་བཞིན་དུ་ཚོལ་བའི་ཕྱིར་འཚོ་བ་རྣམ་པར་དག་པར་ཡིད་ཆེས་སོ། །རྩོལ་བ་ཉོན་མོངས་པའི་སྒྲིབ་པ་སྦྱོང་བའི་ཡན་ལག་སྟེ། དེས་ཀུན་དུ་སྦྱོར་བ་མ་ལུས་པ་སྤོང་བར་བྱེད་པའི་ཕྱིར་རོ། །དྲན་པ་ནི་ཉེ་བའི་ཉོན་མོངས་པ་སྦྱོང་བའི་ཡན་ལག་སྟེ། དེས་ཞི་གནས་དང་ལྷག་མཐོང་གི་མཚན་མ་མ་བརྗེད་པས་ཞུམ་པ་དང་། རྒོད་པའི་ཉོན་མོངས་པ་སྐྱེ་བའི་སྐབས་མེད་པའི་ཕྱིར་རོ། །ཏིང་ངེ་འཛིན་ནི་ཡོན་ཏན་ཁྱད་པར་ཐོབ་པ་ལ་སྒྲིབ་པ་སྦྱོང་བའི་ཡན་ལག་སྟེ། དེས་སྒྲིབ་པ་སྦྱངས་ནས་མངོན་པར་ཤེས་པ་ལ་སོགས་པའི་ཡོན་ཏན་སྒྲུབ་པར་བྱེད་པའི་ཕྱིར་རོ། །འཕགས་ལམ་ཡན་ལག་བརྒྱད་པོ་དེ་དག འཁོར་ལོ་དང་འདྲ་བའི་ཕྱིར་ཆོས་ཀྱི་འཁོར་ལོ་ཞེས་བྱ་སྟེ། ཇི་ལྟར་འཁོར་ལོ་ལྟེ་བ་དང་། རྩིབས་དང་མུ་ཁྱུད་གསུམ་གྱིས་འཁོར་ལོར་གྱུར་པ་དེ་བཞིན་དུ། འཕགས་པའི་ལམ་ཡན་ལག་བརྒྱད་པ་ལ། ངག་ལས་འཚོ་གསུམ་འཕགས་པ་དགྱེས་པའི་ཚུལ་ཁྲིམས་ཞེས་བྱ་སྟེ་ཚུལ་ཁྲིམས་ཀྱི་ཕུང་པོ་གཏོགས་པ་ལྟེ་བ་དང་འདྲའོ། །ལྟ་རྟོག་དྲན་རྩོལ་བཞི་ཤེས་རབ་ཀྱི་ཕུང་པོར་གཏོགས་ཏེ་རྩིབས་དང་འདྲའོ། །ཏིང་ངེ་འཛིན་ནི་སྤྲོས་པ་ཐམས་ཅད་ཞི་བར་བྱེད་པས་མུ་ཁྱུད་དང་འདྲའོ། །རྣམ་པ་གཉིས་སུ་ནི། འཁོར་ལོ་རིན་པོ་ཆེ་དེས་ཕྱོགས་མ་རྒྱལ་བ་རྣམས་ནི་རྒྱལ་བར་བྱེད། རྒྱལ་བ་རྣམས་སུ་གནས་འཆའ་བ་དེ་བཞིན་དུ། འཕགས་པའི་ལམ་གྱི་ཆོས་འདི་ཡང་ས་གོང་མ་མ་ཐོབ་པ་རྣམས་ནི་སྒྲིབ་པ་ལས་རྒྱལ་ནས་ཐོབ་པར་བྱེད། སྒྲིབ་པ་སྤངས་ནས་ཐོབ་པ་རྣམས་ལ་ནི་གནས་སོ། །རྣམ་པ་གསུམ་དུ་ན་ཇི་ལྟར་འཁོར་ལོ་དེ་མགྱོགས་སུ་འགྲོ་ཞིང་བླ་འོག་ཀུན་ཏུ་དགྲ་སེལ་བ་དེ་བཞིན་དུ་འཕགས་ལམ་ཡན་ལག་བརྒྱད་པོ་འདི་ཡང་ཤེས་རབ་མྱུར་བའི་རང་བཞིན་ཅན་ཡིན་པས་བླ་ལ་ནི་གཟུགས་མེད་པའི་ཁམས་ཀྱི་ཉོན་མོངས་པ་སེལ། འོག་ཏུ་ནི་འདོད་པའི་ཁམས་ཀྱི་ཉོན་མོངས་པ་སེལ་བས་སོ། །གསུམ་པ་རང་རྒྱལ་གྱི་ཉམས་ལེན་བཤད་པ་ལ། རྟོགས་བྱ་ལྟ་བ། བསྒོམ་བྱ་ཉམས་ལེན་གྱི་ཁྱད་པར་གཉིས་ལས། དང་པོ་ནི། མགོན་པོ་བྱམས་པས། གཟུང་དོན་རྟོག་པ་སྤོང་ཕྱིར་དང་། །ཞེས་གང་ཟག་གི་བདག་མེད་པ་ཁོང་དུ་ཆུད་པའི་ཡེ་ཤེས་ཙམ་དུ་མ་ཟད་ཆོས་ཀྱི་བདག་མེད་པའི་ཡང་ཕྱོགས་གཅིག་རྟོགས་པར་བཤད་དོ། །བློ་གྲོས་མི་ཟད་པའི་མདོ་འགྲེལ་ལས་དེ་ལ་གང་ཟག་ལ་བདག་མེད་པ་ནི་གང་ལ་བདག་ཏུ་སྒྲོ་བཏགས་པ་མེད་པ་ཞེས་དང་། ཡང་། ཆོས་ལ་བདག་མེད་པ་ནི་གང་ལ་གཟུགས་སུ་བཏགས་པ་མེད་པ་ཡང་ཞེས་བྱ་བ་ལ་སོགས་པས་བསྟན་ཏེ། ཇི་ཙམ་དུ་བདག་དང་ཆོས་སུ་ཐ་སྙད་བཏགས་པ་རྣམས་ནི་སྒྲོ་བཏགས་ཏེ། བརྗོད་དུ་མེད་པའི་ཆོས་ཉིད་གང་ལ་མིང་དང་བརྡར་བཏགས་པ་མེད་པ་ཉིད། ཆོས་ཀྱི་ཚུལ་ཁྲིམས་ཞེས་བྱ་སྟེ། ཆོས་ཀྱི་རང་བཞིན་ནི་དེ་ཡིན་པའི་ཕྱིར་རོ། །ཞེས་པ་གཟུང་བའི་བདག་མེད་པ་དང་། འཛིན་པའི་བདག་མེད་པ་གཉིས་ལས་དང་པོ་རྟོགས་པས་ཕྱོགས་གཅིག་ཞེས་བྱའོ། །འཕགས་པ་བི་ན་ཤ་ལུང་བསྟན་པའི་མདོ་ལས། རྟེན་ཅིང་འབྲེལ་བར་འབྱུང་བ་ཟབ་མོ་མཐོང་བ་དང་། ཆོས་དབྱིངས་མཐའ་དང་དབུས་མེད་པ་རྟོགས་སོ། །ཞེས་གསུངས་པ་ཡིན་ལ། དེ་སེམས་ཙམ་རྣམ་བདེན་པས་གཏན་ལ་འབེབས་པའི་ལྟ་བ་ཡིན་པས། གྲུབ་མཐའ་འདི་ལ་རང་རྒྱལ་གྱི་ཆ་དང་མཐུན་པ་ཞེས་བྱའོ། །གཉིས་པ་རྒྱུ་གསུམ། རྐྱེན་གཉིས་ལས། དང་པོ་ལ་བསགས་པའི་རྒྱུ། སངས་རྒྱས་མཉེས་པར་བྱེད་པའི་རྒྱུ། རིགས་གསུམ་གྱི་དང་པོ་ནི། གང་གིས་བསགས་པ། རྒྱུ་རྟེན་སྒྲུབ་པ་གསུམ། རྒྱུ་ནི་འདུན་པ་ཆེ་བ་སྟེ། དཀོན་མཆོག་དང་བདེན་པ་དང་ལས་ལ་ཡིད་ཆེས་ནས་འདི་ཁོ་ན་བདེན་གྱི་གཞན་དུ་མ་ཡིན་ཞེས་འཛིན་པའོ། །འདི་རྒྱུར་འཇོག་པའང་། ཡིད་ཆེས་པར་གྱུར་ན་བརྩོན་འགྲུས་བརྩམས་པའོ། །རྟེན་ནི་བརྩོན་འགྲུས་ཆེན་པོ་སྟེ། སྤང་བར་བྱ་བ་མ་ལུས་པ་སྤོང་བ་དང་འཐོབ་པར་བྱ་བ་ཐོབ་པར་བྱེད་པ་ལ་སེམས་སྤྲོ་བ་ནི་བརྩོན་འགྲུས། འདི་རྟེན་ཏུ་འཇོག་པ་ཡང་དགེ་བ་བྱེད་པ་རྣམས་བརྩོན་འགྲུས་ལ་བརྟེན་པའི་ཕྱིར་རོ། གཅིག་པུ་དགོན་པ་ན་གནས་ཤིང་འདུ་འཛི་དང་མི་འདྲེ་བ་ནི་བག་ཡོད་པ་ཆེན་པོ་སྟེ། འདིས་ནི་སྒྲུབ་པ་བསྟན་ཏེ། སྤང་བར་བྱ་བ་དང་བསྒྲུབ་པར་བྱ་བ་གཉིས་ནི་བག་ཡོད་པས་སྒྲུབ་པས་སོ། །དེ་གསུམ་ལ་ཆེན་པོ་ཞེས་བཞག་པས་ནི་རང་སངས་རྒྱས་ཀྱི་དེ་གསུམ། ཉན་ཐོས་དག་གི་དེ་གསུམ་ལས་ལྷག་པར་སྟོན་པ་ཡིན་ནོ། །གང་བསགས་པ་ནི། སེར་སྣའི་གཉེན་པོ་བསགས་པ་དང་། འདོད་པ་ལ་ཆགས་པའི། ཉོན་མོངས་པའི་གཉེན་པོ་བསགས་པའོ། །དང་པོ་སྦྱིན་པ་རྣམ་པར་གྲོལ་བ་ཐོབ་པའི་རྒྱུར་གྱུར་པ་རྣམས་ཏེ། ཚོགས་བསགས་པ་ཞེས་བྱའོ། །གཉིས་པ། གང་གིས་བསྲུང་མི་དགེ་བ་བཅུ་ལས་ལྡོག་ཅིང་རྣམ་པར་གྲོལ་བ་འདོད་པའི་སེམས་ཀྱི། གང་བསྲུང་བ་ཡན་ལག་དྲུག་པའི་ཚུལ་ཁྲིམས། གང་གི་ཕྱིར་སྲུང་བ་མྱ་ངན་ལས་འདས་པ་ཐོབ་པར་བྱ་བའི་ཕྱིར་བསྲུང་བའོ། །གསུམ་པ་ཐོས་པ་ལ་མི་དགའ་བས་ཉན་ཐོས་ལྟར་ཐོས་པ་མི་མང་བར་ཐོས་པ་ཅུང་ཟད་ཅིག་གིས་ཆོས་ཀྱི་ནན་ཏན་བྱེད་པའོ། །གཉིས་པ་སངས་རྒྱས་མཉེས་པར་བྱེད་པའི་རྒྱུ་ནི་རྣམ་པ་གཉིས་ཏེ། ཆོས་ཉིད་ཀྱིས་མཉེས་པར་བྱེད་པ་དང་། ཟང་ཟིང་གིས་མཉེས་པར་བྱེད་པའོ། །དང་པོ་སངས་རྒྱས་ཀྱིས་ཇི་སྐད་དུ་བསྟན་པའི་བཀའ་ལུང་དང་། བསླབ་པའི་ཚིག་ལས་འདའ་བར་མི་བྱེད་པའོ། །གཉིས་པ་བསྐལ་པ་བརྒྱའི་བར་དུ་ཕྱག་འཚལ་བ་དང་། སྐོར་བ་དང་ཆོས་གོས་ལ་སོགས་པའི་བསྙེན་བཀུར་བྱེད་པ་སྟེ་གཉིས་པོ་ལ་ཞུམ་ཞིང་དཔའ་བཀོང་བ་མེད་པའི་ཕྱིར་རོ། །དེ་གཞན་ལ་མ་ཉན་པར་རང་གིས་ཆོས་རྟོགས་པ་དང་། སངས་རྒྱས་འཇིག་རྟེན་དུ་མི་འབྱུང་བའི་ཚེ་རང་སངས་རྒྱས་འབྱུང་ངོ་ཞེས་བཤད་པ་དང་ཇི་ལྟར་མི་འགལ་ཞེ་ན། འདིར་ནི་དང་པོ་སློབ་པའི་ཚོགས་བསགས་པའི་སྐབས། དེ་ནི་འབྲས་བུ་ཐོབ་པའི་དུས་ལ་དགོངས་པས་མི་འགལ་ལོ། །གསུམ་པ་རིགས་ནི། ང་རྒྱལ་སྤྱོད་པ། སྙིང་རྗེ་ཆུང་བ། ཉོན་མོངས་ཆུང་བའོ། །དབང་པོ་འབྲིང་དང་སྦྱོར་བ་དམ་པས་ངོ་བོ་ལ་ང་རྒྱལ་སྤྱོད་པའི་རིགས་ཞེས་བྱ། སྦྱོར་བ་དམ་པས་རྟག་ཏུ་འབྱུང་བ་ལ་གཞོལ་བའོ། །བདག་འབའ་ཞིག་གི་དོན་ལ་འཇུག་ཅིང་གཞན་གྱི་དོན་མི་བྱེད་པས་སྙིང་རྗེ་ཆུང་བའི་རིགས་སོ། །དེ་ལ་བདག་ཞི་བར་བྱ་བ་དང་། གྲོལ་བ་མྱ་ངན་ལས་འདས་པ་ཙམ་ལས་བྱ་བ་གཞན་མི་བྱེད་པས་བྱ་བ་ཉུང་བའམ་བྱེད་པ་ཉུང་བ་བདག་གི་དོན་ལ་འཇུག་པ་དང་གཞན་གྱི་དོན་ལ་མི་འཇུག་པ་ཞེས་ཀྱང་གསུངས་སོ། །ལུས་དབེན་པ་ལ་དགའ་བ་དང་། སེམས་དབེན་པ་ལ་དགའ་བ་དང་། གནས་དབེན་པ་ལ་དགའ་བས་ཉོན་མོངས་པ་ཆུང་བའི་རིགས་ཏེ། དང་པོ་རང་བཞིན་གྱིས་འགྲོ་བ་མང་པོ་དང་འདྲེ་བར་མ་མོས་ཤིང་བསེ་རུ་བཞིན་དུ་གཅིག་པུར་གནས་པ་ལ་མོས་པའོ། །གཉིས་པ། འདོད་པ་དང་ཁོང་ཁྲོ་བའི་རྣམ་པར་རྟོག་པ་རིང་དུ་སྤོང་བ་ལ་མོས་པའོ། །གསུམ་པ་ཤིང་དྲུང་དང་རི་སུལ་ན་གནས་འཆའ་བའོ། །གཉིས་པ་རྐྱེན་ནི་རྣམ་པ་བཞི་སྟེ། ཡོན་ཏན་དང་། གནས་དང་། རྟོག་པ་དང་། འབྱུང་བའོ། །དང་པོ་ཉོན་མོངས་པ་ཆུང་ཞིང་དགེ་བ་ཆེ་བ་དང་། རྫུ་འཕྲུལ་ཆེ་བ་དང་། འབྲས་བུའི་ས་ལ་མངོན་པར་དགའ་བ་སྟེ་གསུམ། དང་པོ་མཐུ་དང་གཟི་བརྗིད་དང་བྱིན་རྣམས་ལ་གཞན་གྱི་ཟིལ་གྱིས་མི་གནོན་ཅིང་། དེས་གཞན་ཟིལ་གྱིས་གནོན་པའི་ཕྱིར་རོ། །དེ་ལ་བསྙེན་པར་དཀའ་བ་ཞེས་ཀྱང་གསུངས་སོ། །གཉིས་པ་སྟོད་ནས་མེ་འབར་བ་དང་། སྨད་ནས་ཆུ་གྲང་མོའི་རྒྱུན་འབབ་པ་དང་། གཅིག་ཏུ་གྱུར་ནས་མང་པོར་འགྱུར་བ་དང་། མང་པོར་གྱུར་ནས་གཅིག་ཏུ་འགྱུར་བ་ལ་སོགས་པའི་མཐུ་དང་ལྡན་པས་མཐུ་ཆེ་བ་ཞེས་ཀྱང་བྱའོ། །གསུམ་པ་འགྲོ་བ་ཐམས་ཅད་ཀྱི་བསོད་ནམས་ཀྱི་ཞིང་དུ་གྱུར་པའི་དུས་ན་དགྲ་བཅོམ་པའི་འབྲས་བུ་ཐོབ། མངོན་པར་དགའ་བ་ནི་འབྲས་བུ་དེ་ཐོབ་པར་བྱ་བར་སེམས་མོས་པས་སོ། །འདི་ལ་སྦྱིན་པའི་གནས་ཀྱི་ས་ལ་མངོན་པར་དགའ་བ་ཞེས་ཀྱང་བྱའོ། །གཉིས་པ་གནས་ཞེས་པ། རྒྱུན་མི་འཆད་པར་རྟེན་ཅིང་འབྲེལ་པར་འབྱུང་བ་ལ་ལྟ་བའོ། །རྒྱུ་དང་རྐྱེན་ལས་དུས་མཉམ་དུ་འབྲས་བུ་འབྱུང་བ་རྟེན་ཅིང་འབྲེལ་བར་འབྱུང་བའོ། །རྟེན་ཅེས་པས་རྒྱུ་དང་རྐྱེན་ལ་བརྟེན་ཏེ་འབྱུང་བ་ཡིན་པས་ན། འདིས་ནི་རྒྱུ་མེད་པར་སྨྲ་བ་འགོག་པར་བྱེད་དོ། །འབྲེལ་ཅེས་པས། རྒྱུ་དང་འབྲས་བུ་མཐུན་པ་ལས་སྐྱེ་ཡི་མི་མཐུན་པ་ལས་མ་ཡིན་ཏེ། དཔེར་ན་མ་རིག་པ་ལས་འདུ་བྱེད་འབྱུང་གི དབང་ཕྱུག་དང་བྱེད་པ་པོ་ལས་མི་འབྱུང་བས་དེས་ནི་མི་མཐུན་པ་རྒྱུར་སྨྲ་བ་འགོགས་པར་བྱེད་དོ། །འབྱུང་བས་རྒྱུ་དང་འབྲས་བུ་བར་ཆད་མེད་པར་སྐྱེ་བ་ལ་བྱ་སྟེ། འདིས་ནི་མེད་པར་སྨྲ་བ་འགོག་པར་བྱེད་དོ། །ཅིའི་ཕྱིར་རྟེན་ཅིང་འབྲེལ་བར་འབྱུང་བ་བཤད་ཅེ་ན། འགྲོ་བ་འདི་དག་མ་རིག་པའི་རྐྱེན་ལས་སྐྱེ་ཡི། མི་མཐུན་པའི་རྒྱུ་དང་རྒྱུ་མེད་པ་ལས་མི་སྐྱེའོ། །ཞེས་བསྟན་པའི་ཕྱིར་རོ། །དེ་ཡང་ཕྱིའི་རྟེན་ཅིང་འབྲེལ་བར་འབྱུང་བ་དང་ནང་གི་རྟེན་ཅིང་འབྲེལ་བར་འབྱུང་བ་གཉིས། དང་པོ། ས་བོན་ལས་མྱུ་གུ མྱུ་གུ་ལས་འདབ་མ། འདབ་མ་ལས་སྡོང་བུ། སྡོང་བུ་ལས་སྦུ་གུ སྦུ་གུ་ལས་སྙིང་པོ། སྙིང་པོ་ལས་མེ་ཏོག མེ་ཏོག་ལས་འབྲས་བུའོ། །རྐྱེན་དྲུག་སྟེ་ས་ཆུ་མེ་རླུང་ནམ་མཁའ་དུས་ཀྱི་ཁམས་སོ། །ནང་གི་རྟེན་ཅིང་འབྲེལ་བར་འབྱུང་བ་ནི་རྣམ་པ་གཉིས་ཏེ། ལུགས་སུ་འབྱུང་བ་དང་། ལུགས་སུ་མི་འབྱུང་བའོ། །ལུགས་འབྱུང་ལ་རྒྱུ་དང་འབྲེལ་པ། རྐྱེན་དང་འབྲེལ་བའོ། །དེ་ལ་རྒྱུ་དང་འབྲེལ་བ་ནི། འདི་ཡོད་པས་འདི་འབྱུང་། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་ཤེས། རྣམ་ཤེས་གྱི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་འབའ་ཞིག་པ་འདི་འབྱུང་བར་འགྱུར་རོ། །དེ་ལ་མ་རིག་པ་ནི་ལས་ལེགས་ཉེས་དང་། དེའི་འབྲས་བུ་མི་ཤེས་པ་ནི་ལེན་པ་དང་། ཡང་དག་པའི་དོན་མི་ཤེས་པ་དང་། འདུ་བྱེད་ནི་ལས་ལེགས་ཉེས་བྱེད་པའོ། །རྣམ་པར་ཤེས་པ་ནི་ལས་བགོས་པའི་ཀུན་གཞིའི་རྣམ་པར་ཤེས་པ་སྐྱེ་བར་ཐོག་མར་མཚམས་སྦྱོར་བའོ། །མིང་དང་གཟུགས་ནི་ཕུང་པོ་ལྔར་གྱུར་པའོ། །སྐྱེ་མཆེད་དྲུག་ནི་དབང་པོ་རྣམས་དོད་པའོ། །རེག་པ་ནི་གསུམ་འདུས་ནས་ཡོངས་སུ་གཅོད་པའོ། །ཚོར་བ་ནི་རེག་པ་ལས་བྱུང་བ་རྣམ་པ་གསུམ་མྱོང་བའོ། །སྲེད་པ་ནི་ཚོར་བ་ལ་ཞེན་ཅིང་མི་ངོམས་པའོ། །ལེན་པ་ནི་སྲེད་པས་གཡེན་བཅོས་ནས་འཛིན་ཅིང་ཡོངས་སུ་མི་གཏོང་བའོ། །སྲིད་པ་ནི་ལེན་པ་ལས་བྱུང་བའི་ལས་ཟག་པ་དང་བཅས་པའོ། །སྐྱེ་བ་ནི་སྲིད་པ་དང་མཐུན་པའི་འབྲས་བུ་འགྲུབ་པའོ། །རྒ་ཤི་ནི་ཕུང་པོ་སྨིན་པ་དང་ཕུང་པོ་འཇིག་པའོ། །མྱ་ངན་ནི་མི་དགའ་བའོ། །སྨྲེ་སྔགས་འདོན་པ་ནི་མྱ་ངན་ལས་བྱུང་བའི་ཚིག་ཏུ་སྨྲ་བའོ། །སྡུག་བསྔལ་ནི་ལུས་ལ་གནོད་པའོ། །འབའ་ཞིག་པ་ནི་བདག་གི་མེད་པའོ། །བཅུ་གཉིས་པོ་དེ་དག་ནི་བྱ་བ་གཉིས་གཉིས་སུ་ཉེ་བར་གནས་ཏེ་མ་རིག་པ་ནི་སེམས་ཅན་རྨོངས་པར་ཡང་བྱེད་པ་དང་། འདུ་བྱེད་མངོན་པར་འགྲུབ་པའི་རྒྱུ་ཡང་འབྱིན་ནོ། །འདུ་བྱེད་ནི་མ་འོངས་པའི་རྣམ་པར་སྨིན་པ་མངོན་པར་འགྲུབ་པ་དང་། རྣམ་པར་ཤེས་པ་མངོན་པར་འགྲུབ་པའི་རྒྱུ་ཡང་འབྱིན་ནོ། །རྣམ་ཤེས་ནི་སྲིད་པའི་ཉིང་མཚམས་ཀྱང་སྦྱར་རོ། །མིང་གཟུགས་མངོན་པར་འགྲུབ་པའི་མིང་གཟུགས་ཀྱི་ཕན་ཚུན་སྟོན་པར་བྱེད་དོ། །སྐྱེ་མཆེད་དྲུག་མངོན་པར་འགྲུབ་པའི་སྐྱེ་མཆེད་དྲུག་ནི་རང་གི་ཡུལ་རྣམ་པར་ཕྱེ་བ་ཡང་སྟོན་ནོ། །རེག་པ་མངོན་པར་འགྲུབ་པའི་རེག་པ་ནི་དམིགས་པ་ལ་རེག་པར་ཡང་བྱེད་དོ། །ཚོར་བ་མངོན་པར་འགྲུབ་པའི་ཚོར་བ་ནི་ཡིད་དུ་འོང་བ་དང་ཡིད་དུ་མི་འོང་བ་གཉིས་ཀ་མ་ཡིན་པ་མྱོང་བར་ཡང་བྱེད་དོ། །སྲིད་པ་མངོན་པར་འགྲུབ་པའི་སྲེད་པ་ཆགས་པར་འགྱུར་བའི་དངོས་པོ་ལ་མངོན་པར་ཆགས་པར་བྱེད་དོ། །ལེན་པ་མངོན་པར་འགྲུབ་པའི་ལེན་པ་ནི་ཀུན་ནས་ཉོན་མོངས་པས་འཆིང་བར་ཡང་བྱེད་དོ། །སྲིད་པ་མངོན་པར་འགྲུབ་པའི་སྲིད་པ་ནི་སྲིད་པའི་རྒྱུ་གཞན་དུ་གནས་པར་བྱེད་དོ། །སྐྱེ་བ་མངོན་པར་འགྲུབ་པའི་སྐྱེ་བ་ནི་ཕུང་པོ་འབྱུང་བར་ཡང་བྱེད་དོ། །རྒ་བ་མངོན་པར་འགྲུབ་པའི་རྒ་བ་ནི་དབང་པོ་ཡོངས་སུ་འགྱུར་བར་བྱེད་དོ། །འཆི་བ་མངོན་པར་འགྲུབ་པའི་རྒྱུ་ཡང་འབྱིན་ནོ། །འཆི་བ་ནི་འདུ་བྱེད་འཇིག་པར་བྱེད་དོ། །ཡོངས་སུ་མ་ཤེས་པས་རྒྱུན་མི་འཆད་པའི་རྒྱུ་ཡང་འབྱིན་ནོ། །དེ་དག་ཡན་ལག་ལྔར་ཡང་འགྱུར་ཏེ། དང་པོ་གསུམ་འཕེན་པའི་ཡན་ལག་ཏེ། འོག་མ་བཞི་འཕངས་པའི། དེའི་འོག་མ་གསུམ་སྒྲུབ་པའི། སྐྱེ་བ་མངོན་པར་འགྲུབ་པའི། རྒ་ཤི་ཉེས་དམིགས་ཡན་ལག་གོ །ཇི་ལྟར་འཕེན་ན། མ་རིག་པ་ཡོད་པས་ལེགས་ཉེས་བྱེད་ཅིང་ལས་ཀྱིས་རྣམ་པར་ཤེས་པ་ལ་བག་ཆགས་བགོས་ནས། དེ་གསུམ་གས་ནི་ཕྱི་མ་སྐྱེ་བ་འབྱུང་བར་འགྱུར་རོ། །སྲེད་ལེན་སྲིད་གསུམ་གྱིས་ལས་དེ་བསྐུལ་ནས་ཚེ་མངོན་པར་འགྲུབ་པར་འགྱུར་རོ། །དེ་ནས་ལང་ཚོ་དང་སྲོག་འཕངས་པ་འཇིག་པས་ཉེས་དམིགས་སུ་འགྱུར་རོ། །ཡང་ལས་ཉོན་མོངས་ཚེ་གསུམ་དུ་ཡང་འགྱུར་ཏེ། མ་རིག་སྲེད་ལེན་ཉོན་མོངས། འདུ་བྱེད་སྲིད་པ་ལས། ལྷག་མ་བདུན་ནི་ཚེ་ཏེ་སྡུག་བསྔལ་ཞེས་ཀྱང་བྱའོ། །གསུམ་ལས་གཉིས་འབྱུང་གཉིས་ལས་བདུན་འབྱུང་། བདུན་ལས་གསུམ་འབྱུང་བས་ཐོག་མ་དང་ཐ་མ་མེད་པ་ཡང་འཁོར་རོ། །དང་པོ་གཉིས་འདས་པའི་ཉོན་མོངས་པ་དང་ལས་ཏེ་ད་ལྟར་གྱི་རྒྱུར་འགྱུར་བའོ། །བར་མ་ལྔ་ད་ལྟར་གྱི་འབྲས་བུ། སྲེད་ལེན་སྲིད་པ་ད་ལྟར་གྱི་ཉོན་མོངས་དང་ལས་ཏེ་མ་འོངས་པའི་རྒྱུར་འགྱུར་བ། སྐྱེ་བ་དང་རྒ་ཤི་མ་འོངས་པའི་འབྲས་བུའོ། །རྐྱེན་དང་འབྲེལ་བ་ནི། ཁམས་དྲུག་འདུས་པ་ལས་ཕུང་པོ་འགྲུབ་བོ། །ལུགས་ལས་ལྡོག་པ་ནི། མ་རིག་པ་འགགས་པས་འདུ་བྱེད་འགག འདུ་བྱེད་འགགས་པས་རྣམ་ཤེས་འགག དེ་འགགས་པས་མིང་དང་གཟུགས། དེ་འགགས་པས་སྐྱེ་མཆེད་དྲུག དེ་འགགས་པས་རེག་པ། དེ་འགགས་པས་ཚོར་བ། དེ་འགགས་པས་སྲེད་པ། དེ་འགགས་པས་ལེན་པ། དེ་འགགས་པས་སྲིད་པ། དེ་འགགས་པས་སྐྱེ་བ། དེ་འགགས་པས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགགས་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་འབའ་ཞིག་པོ་འདི་འགག་པར་འགྱུར་རོ། །དེ་ཡང་མ་རིག་པ་འགགས་པས་ཅི་ཡང་མེད་པར་འགྱུར་བ་མ་ཡིན། རྟེན་ཅིང་འབྲེལ་བར་འབྱུང་བར་མི་འགྱུར་བ་མ་ཡིན། ཀུན་ནས་ཉོན་མོངས་པའི་ཕྱོགས་འགགས་ནས་རྣམ་པར་བྱང་བའི་ཕྱོགས་སུ་གྱུར་ཏེ། དཔེར་ན་སྨན་བཅུད་ཀྱི་ལེན་བྱ་བ་ཟོས་ན་ཚེ་ཐུང་བ་དང་ནད་མང་བ་འགྱུར་ནས། ཚེ་རིང་བ་དང་ནད་མེད་པ་རྙེད་པར་གྱུར་བ་བཞིན་དུ། མ་རིག་པ་འགག་སྟེ་རིག་པར་གྱུར་ནས་རང་སངས་རྒྱས་ཀྱི་འབྲས་བུ་འགྲུབ་པར་འགྱུར་བ་ཡིན་ནོ། །གཉིས་པ་འདིར་བགྲོད་པ་ཉན་རང་གི་ཐེག་པ་ནི། འབྲས་བུ་ཉན་རང་བྱང་ཆུབ་བོ། །མངོན་པར་རྫོགས་པ་ཐོབ་པའི་དུས་ན་ཡང་དགེ་བའི་བཤེས་གཉེན་ལ་མ་ལྟོས་པར་བདག་ཉིད་ཀྱི་བདེན་པ་བཞིའི་དེ་ཁོ་ན་ཉིད་རྟོགས་པར་མི་ནུས་ཏེ། དབང་པོ་བརཏལ་བས་ཐེག་པ་དམན་པ་ཞེས་བྱའོ། །དགེ་བའི་བཤེས་གཉེན་ལས་ཉན་ཅིང་། གཞན་ལ་ཡང་སྒྲོགས་ཏེ་ཐོས་པར་བྱེད་པས་ན་ཉན་ཐོས་ཞེས་བྱའོ། །དེའི་འབྲས་བུ་ཐོབ་པ་ནི་རྣམ་པ་བཞི་སྟེ། རྒྱུན་ཞུགས་ཕྱིར་འོང་ཕྱིར་མི་འོང་དགྲ་བཅོམ་པ། དེ་ལ་ཞུགས་པ་བཞི་སྟེ་འཕགས་པའི་གང་ཟག་ཡ་བརྒྱད་ཅེས་བྱ། དགྲ་བཅོམ་པ་ནི་རྒྱན་ཅན་རྒྱན་མེད། དང་པོ་གཉིས་ཀའི་ཆ་ལས་རྣམ་པར་གྲོལ་བ། གཉིས་པ་ཤེས་རབ་རྐྱང་གྲོལ་བའོ། །དེ་རྟོགས་པས་ཕྱེ་བའོ། །སྤངས་པ་ནི། ཁམས་གསུམ་གྱི་ཕྲ་རྒྱས་ཐམས་ཅད་སྤངས་ལ་ཕུང་པོའི་ལྷག་མ་དང་བཅས་པ་དང་། ཕུང་པོའི་ལྷག་མ་ཡང་མེད་པ་ཞི་བའི་དབྱིངས་སུ་གནས་པའོ། །རང་སངས་རྒྱས་ནི་མཛོད་ནས། སྟོན་དང་བསེ་རུ་བྱང་ཆུབ་པར། །བསམ་གཏན་མཐའ་བརྟེན་གཅིག་ལ་ཀུན། །ཞེས་ལུགས་དེ་ལ་སྲིད་པ་ཐ་མ་ཚུན། སྦྱོར་ལམ་དྲོད་པ། དེ་ནས་འབྲས་བུ་མངོན་དུ་བྱེད་པའི་ཚེ་བསམ་གཏན་བཞི་པའི་རབ་ཀྱི་མཐའ་ལ་བརྟེན་ནས་ལྷག་མའི་ལམ་ཐམས་ཅད་སྐད་ཅིག་སུམ་ཅུ་རྩ་བཞིས་ཐོབ་པར་འདོད་དེ། སྐད་ཅིག་མ། །སུམ་ཅུ་རྩ་བཞིས་ཐོབ་ཕྱིར་རོ། །ཞེས་དང་། ཉན་ཐོས་ལས་རིགས་ལོག་པ་ཡང་རྩེ་བཟོད་ཚུན། དེ་ནས་མི་ལྡོག་པར་འདོད། ཐེག་ཆེན་གྱི་གཞུང་ནས། ཕྱིར་མི་འོང་ནས་རང་རྒྱལ་དུ་ཡང་འགྲོ་བ་ཡོད་པ་དང་། རིགས་ངེས་པ་བསྐལ་པ་བརྒྱའི་བར་དུ་རང་རྒྱལ་གྱི་ལམ་སྒྲུབ་པར་བཤད་པས་ལམ་ལྔ་རིམ་གྱིས་འཇུག་པས་རང་རྒྱལ་གྱི་རིགས་ཅན་གྱི་སློབ་པ་འཕགས་པ་ཡང་ཡོད་པར་ཤེས་པར་བྱའོ། །དེའི་འབྲས་བུ་ནི། ཏིང་ངེ་འཛིན་ཐོབ་པ་དང་། མངོན་པར་བྱང་ཆུབ་ཐོབ་པ་ཡང་རྣམ་པ་གཉིས་ཏེ། མི་གཡོ་བ་ཐོབ་པ་དང་རྒྱུན་དུ་ཡིད་ལ་བྱེད་པའོ། །དང་པོ། རྟེན་ཅིང་འབྲེལ་བར་འབྱུང་བ་ལ་སོགས་པ་ཏིང་འཛིན་གྱི་ཡུལ་དམིགས་པའི་སེམས་རྩེ་གཅིག་ཏུ་གནས་པ་ཐོབ་པས་ཕྱི་རོལ་ཏུ་མི་གཡེང་བར་ནུས་པའོ། །གཉིས་པ་བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པ་དེ་དག་ལ་རྒྱུན་དུ་ཡིད་ལ་བྱེད་པའོ། །མངོན་པར་བྱང་ཆུབ་པ་ཡང་རྣམ་པ་གཉིས་ཏེ། སྟོན་པ་དང་རྗེས་སུ་སྟོན་པ་མེད་པར་མངོན་པར་བྱང་ཆུབ་པ་དང་། རྟེན་ཅིང་འབྲེལ་བར་འབྱུང་བར་མངོན་པར་བྱང་ཆུབ་པའོ། །དང་པོ་ནི་མཁན་པོ་དང་སློབ་དཔོན་མེད་པར་ཟད་ལ་མི་སྐྱེ་བའི་ཡེ་ཤེས་བསྐྱེད་པར་བྱེད་པའོ། །གཉིས་པ་དམིགས་པའི་ཡུལ་གང་ཡང་རུང་བ་ལས་ཆོས་ཐམས་ཅད་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་དུ་ཤེས་ཤིང་ཁོང་དུ་ཆུད་པའོ། །སྐྱེས་བུ་འབྲིང་པོ་བསྡུས་པ་ཡིན། །ཞེས་པས་སྐྱེས་བུ་འབྲིང་པོའི་ལམ་ལེགས་པར་བསྡུས་ནས་བཤད་པའི་སྐབས་ཏེ་གཉིས་པའོ།། །། གསུམ་པ་ལམ་འཁྲུལ་པ་སེལ་བ་ལ། འདིས་འགྲོ་བ་ཕར་ཕྱིན་རང་རྐང་གི་ལམ། འདིར་བགྲོད་པ་མི་གནས་པའི་མྱང་འདས་བཤད་པ་གཉིས་ལས། དང་པོ་ལ་མཐར་ཐེག་པ་གཅིག་ཏུ་སྒྲུབ་ཚུལ། རྒྱུ་ཐེག་ཆེན་པའི་ལམ་དངོས་བཤད་པ་གཉིས་ལས། དང་པོ་ནི། འདུལ་བའི་དབང་གི་ཕྱིར་མོས་པའི་རྐྱེན་ཙམ་དུ་དབང་པོའི་རིམ་པ་དང་སྦྱར་ནས་ཐེག་པ་གསུམ་དུ་བཤད། དེའི་ཉན་ཐོས་དང་རང་སངས་རྒྱས་ནི་འཁོར་བས་སྐྱོ་ཞིང་སྡུག་བསྔལ་བ་མི་བཟོད་པས། དེ་མྱུར་དུ་ཞི་བར་བྱ་བའི་ཕྱིར་རིང་ཐབས་བསྟི་བའི་གནས་ཙམ་དུ་ཟད་ཏེ། གཏན་དུ་མྱ་ངན་ལས་འདའ་བའི་གནས་མ་ཡིན་པས། འབྲས་བུ་ཐོབ་ནས་སངས་རྒྱས་ཀྱིས་བསྐུལ་ཏེ་ཆོས་ལ་བདག་མེད་པར་རྟོགས་པར་མཛད་ཅིང་། བྱང་ཆུབ་ཀྱི་སྤྱོད་པ་ལ་སྤྱོད་དུ་བཅུག དེས་བསྒྲུབས་ནས་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ། མཐའ་མར་ཐེག་པ་ཆེན་པོ་འདུ་བས་ན། ལང་ཀར་གཤེགས་པའི་མདོ་ལས། ཉན་ཐོས་ཟག་པ་མེད་པའི་དབྱིངས་ལ་གནས་པ། དེ་བཞིན་གཤེགས་པའི་འོད་ཟེར་གྱིས་བསྐུལ་སྟེ། ཐེག་པ་ཆེན་པོ་ལ་འཇུག་ཅིང་ཐེག་པ་གཅིག་ཏུ་བཤད་པ་དང་། དམ་པའི་ཆོས་པདྨ་དཀར་པོའི་མདོ་ལས། ཉན་ཐོས་མང་པོ་སངས་རྒྱས་སུ་འགྲུབ་པར་ལུང་བསྟན་ཞིང་ཐེག་པ་གཅིག་ཏུ་བཤད་པ་ལ་སོགས་པའི་ཚུལ་གྱིས་ཐེག་པ་གསུམ་དུ་མེད་དེ་གཅིག་ཏུ་ཟད་དོ། །མདོ་ཁ་ཅིག་ལས་ཞི་བ་ཕྱོགས་གཅིག་པའི་ཉན་ཐོས་ནི་དེ་བཞིན་གཤེགས་པ་མང་པོས་བསྐུལ་ཡང་འཚང་རྒྱ་བའི་སྐལ་བ་མེད་དོ་ཞེས་འབྱུང་བ་ཡང་། བདེན་པ་བཞི་ལ་ངེས་པ་རྙེད་ནས་དགྲ་བཅོམ་པའི་འབྲས་བུ་མ་ཐོབ་པའི་བར་དུ་བསྒྱུར་དུ་མི་རུང་བ་ལ་བྱའོ། །མདོ་ཁ་ཅིག་ལས་དགྲ་བཅོམ་པ་ནི་ས་བོན་ཚིག་པ་དང་འདྲ་ཞེས་འབྱུང་བ་དང་། འཆིང་བུ་བྱི་དོར་བྱས་ཀྱང་རིན་པོ་ཆེ་བཻཌཱུརྻར་མི་འགྱུར་བའི་དཔེས་ཉན་ཐོས་ཀྱིས་སངས་རྒྱས་མི་འགྲུབ་པ་སྐད་འབྱུང་བ་ཡང་། ཐོག་མ་ནས་ཐེག་པ་ཆེན་པོ་ལ་འཇུག་པར་བྱ་ཞིང་། དོན་ཆུང་ངུ་ཉིད་ལས་སུ་འགྱུར་བ་ཐེག་པ་དམན་པ་ལ་ཡང་མི་འཇུག་པར་བྱ་བའི་ཕྱིར་སྨད་པ་ཡིན་ནོ། །ཚུལ་འདི་ལྟར་མི་འདོད་ན་ནི་འཕགས་པ་ཏིང་ངེ་འཛིན་རྒྱལ་པོ་ལ་སོགས་པ་མདོ་སྡེ་མང་པོ་ལས་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་འབྱུང་བ་དང་། སེམས་ཅན་ཐམས་ཅད་སངས་རྒྱས་སུ་འགྱུར་ཏེ་སྣོད་མ་ཡིན་པ་གང་ཡང་མེད་དོ། །ཞེས་འབྱུང་བ་སོགས་དང་འགལ་བར་འགྱུར་རོ། །དེ་ལྟར། དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །ཞེས་པས་ཀྱང་གསུངས་སོ། །གཉིས་པ་ལ་བདེན་གཉིས་ཀྱི་ལྟ་བ། ཟུང་འཇུག་གི་སྒོམ་པ། ཕར་ཕྱིན་དྲུག་གི་སྤྱོད་པ་གསུམ་ལས། དང་པོ་ནི། བདེན་གཉིས་ལྟ་བ། བདེན་པ་གཉིས་ནི། ཀུན་རྫོབ་གྱི་བདེན་པ་དང་དོན་དམ་པའི་བདེན་པའོ། །དང་པོ་ནི་བློ་གྲོས་མི་ཟད་པའི་མདོ་ལས། ཀུན་རྫོབ་ཀྱི་བདེན་པ་གང་ཞེ་ན་འཇིག་རྟེན་གྱི་ཐ་སྙད་དང་། ཡི་གེ་དང་སྒྲ་དང་བརྡས་བསྟན་པ་ཇི་སྙེད་པ་ཞེས་གསུངས། དེའི་འགྲེལ་པར། དེ་ལ་འཇིག་རྟེན་གྱི་ཐ་སྙད་ནི་བསྟན་པའོ། །ལྷག་མ་རྣམས་ནི་བཤད་པ་སྟེ། ཞེས་པས་དེ་གཉིས་དབྱེར་མེད་གཏན་ལ་འབེབས་པའི་གཞི་ཡིན་ལ། ཡི་གེ་ནི་ཨ་ལ་སོགས་པ་གསུང་རབ་ཀྱི་ལུང་དང་འབྲེལ་བ་རྣམས་སོ། །ཇི་སྙེད་ཞེས་པ་ཡིད་ཀྱི་དང་ངག་གི་སྟོན་པ་གཉིས་སོ། །ཡིད་ཀྱི་བསྟན་པ་ནི་བརྒྱ་བྱིན་གྱིས་ཡིད་ཀྱིས་ཆོས་མངོན་པ་བཤད་པ་དང་། དེ་དག་གིས་ཀྱང་ཐེ་ཚོམ་ཡིད་ལ་བརྟགས་པ་དང་། ལན་ཡང་ཡིད་ཀྱི་ཚིགས་སུ་བཅད་པས་བླན་ནོ་ཞེས་པ་མདོ་ལས་འབྱུང་བ་ལྟ་བུ་དང་། ངག་གི་བསྟན་པ་ནི་ཚིག་གི་རིག་བྱེད་རྣམ་པ་སྣ་ཚོགས་ཉན་པའི་གང་ཟག་རྣམས་ཀྱིས་རྣ་བའི་ལམ་དུ་སོང་བ་རྣམས་སོ། །ལུས་ཀྱི་རྣམ་འགྱུར་གྱིས་བསྟན་པ་ནི། རང་སངས་རྒྱས་སྒྲ་མེད་ལུས་ཀྱི་རྣམ་འགྱུར་གྱིས་ཆོས་བསྟན་པའམ། མིག་ཤེས་ཀྱིས་མཐོང་བ་ཐོབ་ནས་བརྡའ་སྤྲོད་པར་འགྱུར་བ་ལྟ་བུའོ། །མདོར་བསྡུ་ན་འདུལ་བར་བྱ་བའི་སེམས་ཅན་གྱི་དབང་དུ་ཇི་ཙམ་དུ་ཐ་སྙད་དུ་བརྗོད་པ་ཐམས་ཅད་ཀུན་རྫོབ་ཀྱི་བདེན་པའོ། །དོན་དམ་བདེན་པའང་མདོ་དེ་ལས། དོན་དམ་པའི་བདེན་པ་ནི། གང་ལ་སེམས་ཀྱི་རྒྱུ་བ་ཡང་མེད་པ་སྟེ་ཡི་གེ་ལྟ་ཅི་སྨོས་ཞེས་གསུངས་ལ། དེའི་འགྲེལ་པར། དོན་དམ་པ་དང་། དེ་རིག་པའི་ཡེ་ཤེས་གཉིས་སུ་མེད་པའི་ཕྱིར་སེམས་ཀྱི་ཡུལ་དུའང་མི་འགྱུར་ན་ཡི་གེ་ལྟ་ཅི་སྨོས་ཞེས་བྱ་བའི་ཐ་ཚིག་གོ་ཞེས་གསུངས་པ་ཉིད་དོ། །དེ་ལྟར་ཇོ་བོ་རྗེ་ལྷ་གཅིག་གིས། ཆོས་ཀྱི་དབྱིངས་ལ་དབྱེར་མེད་ཕྱིར། །ལྟ་བ་ཐ་དད་རུང་མ་ཡིན། །འོན་ཀྱང་བློ་ཡི་བྱེ་བྲག་གིས། །ལྟ་བ་ཐ་དད་ཅུང་ཟད་བརྗོད། །དབུ་མ་ཉིད་དུ་སྨྲ་བ་རྣམས། །དེ་དོན་བདེན་པ་གཉིས་སུ་འདོད། །ཀུན་རྫོབ་དང་ནི་དོན་དམ་མོ། །བདེན་གཉིས་རྣམ་དབྱེ་ཤེས་པ་དག །ཐུབ་པའི་བཀའ་ལ་མི་རྨོངས་ཏེ། །དེ་དག་མ་ལུས་ཚོགས་བསགས་ནས། །ཕུན་ཚོགས་ཕ་རོལ་འགྲོ་བ་ཉིད། །ཞེས་སོ། །གཉིས་སུ་འཇོག་པའི་དགོས་པ་ཡང་། །ཡང་དག་ཀུན་རྫོབ་རྣམས་ཀྱི་སྐས། །མེད་པར་ཡང་དག་ཁང་ཆེན་གྱི། །སྟེང་དུ་འགྲོ་བར་བྱེད་པ་ནི། །མཁས་ལ་རུང་བ་མ་ཡིན་ནོ། །ཞེས་ཀུན་རྫོབ་ཀྱི་བདེན་པའི་ཐབས་ལས་དོན་དམ་པའི་བདེན་པ་འབྱུང་བས་ཏེ། ཀུན་རྫོབ་ཇི་ལྟར་སྣང་བ་འདི། །རིག་པས་བརྟགས་ན་འགའ་མི་རྙེད། །མ་རྙེད་པ་ཉིད་དོན་དམ་ཡིན། །ཡེ་ནས་གནས་པའི་ཆོས་ཉིད་དོ། །ཞེས་པའི་ཚུལ་གྱིས་སོ། །འདི་ན་དོན་དམ་པར་ཅང་མེད་པས་དོན་དམ་བདེན་པར་འཇོག་ཅིང་། ཀུན་རྫོབ་ཏུ་ཐམས་ཅད་ཡོད་པས་ཀུན་རྫོབ་གྱི་བདེན་པ་འཇོག་པར་བྱེད་དོ། །དེ་ལྟ་ན་དོན་དམ་པར་ཅང་མེད་པར་བློས་འཇོག་པར་ནུས་པས་སེམས་ཀྱི་རྒྱུ་བ་མེད་པར་མ་སོང་། དོན་དམ་པར་ཅང་མེད་དོ་ཞེས་སྨྲས་པ་ཉིད་ཀྱིས་ཡི་གེ་ལྟ་ཅི་སྨོས་ཞེས་པ་དང་འགལ་ལ། དེ་ལྟ་བུ་དོན་དམ་པར་ལྟ་བ་ཆད་པའི་ཕྱོགས་ཆེན་པོར་ལྷུང་ངོ་། །ཀུན་རྫོབ་འདི་ལྟར་གནས་པ་བསྒྲུབས་པའི་ཕྱིར་དངོས་པོར་འཛིན་པ་མི་ལྡོག་པས། རྟག་པར་ཡང་བལྟས་ཏེ་དོན་ལ་མཐའ་གཉིས་ཀར་ལྟུང་བས། གང་དག་རང་དངོས་གཞན་དངོས་ཀྱི། །དངོས་དང་དངོས་མེད་ཉིད་མཐོང་བ། །དེ་དག་སངས་རྒྱས་བསྟན་པ་ལ། །ཡང་དག་མཐོང་བ་མ་ཡིན་ནོ། །ཞེས་ཇོ་བོ་རྗེ་ལྷ་གཅིག་གིས་གསུངས་སོ། །རང་གི་འདོད་པ་ནི་དོན་དམ་པར་ཡོད་པ་མ་ཡིན་པ་དང་། སྣང་ངོར་མེད་པ་མ་ཡིན་པ་གཉིས་ཀའི་མཚན་གཞི་ཀུན་རྫོབ་ཏུ་བཞག་པའི་ཆོས་ཅན་རྣམས་ཏེ། དེ་དག་རབ་རིབ་ཅན་ལ་ནམ་མཁའ་ནས་སྐྲ་བཤད་འཛག་པར་སྣང་བ་ལྟ་བུ་སྟེ། རབ་རིབ་པའི་ངོར་ཡོད་པ་དང་། མིག་སྐྱོན་མེད་པའི་ངོར་གྲུབ་མ་མྱོང་བས། དེ་མི་བདེན་པར་སོང་བ་བཞིན་འདི་དག་རིགས་པས་དཔྱད་ན་དེ་འདྲ་བས་སྒྱུ་མ་ཙམ། རྨི་ལམ་ཙམ་དུ་གསུངས་པ་ཡིན་ནོ། །འོ་ན་མ་རྙེད་པ་ཉིད་དོན་དམ་ཡིན་ཞེས་པ་ཇི་ལྟར་དྲངས་ན། དེ་ལྟར་འཁྲུལ་པ་མ་མཐོང་བ་ཉིད་ལ་འཁྲུལ་མེད་དུ་འཇོག་གི དེ་ནི་བདག་ཅག་གི་བློས་མི་བཟོད། འཕགས་པ་ཡང་དག་པར་སོང་བ་རྣམས་ཀྱི་གཟིགས་པ་ཡིན་པས་ན། ཡང་དག་པའི་མཐོང་བས་རྙེད་པ་དོན་དམ་པ་དང་ཕྱིན་ཅི་ལོག་པའི་མཐོང་བས་མཐོང་བ་ཀུན་རྫོབ་ཏུ་བཞག་ཅིང་། དེ་ཐ་སྙད་ཙམ་དུ་མི་བསླུ་བས་བདེན་པར་བཞག་པ་སྟེ། དེ་ལྟ་བས་ན། དངོས་ཀུན་ཡང་དག་རྫུན་པ་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཡང་དག་མཐོང་ཡུལ་གང་དེ་དེ་ཉིད་སྟེ། །མཐོང་བ་རྫུན་པ་ཀུན་རྫོབ་བདེན་པར་གསུངས། །ཞེས་དང་། རྒྱལ་བའི་སྲས་པོ་ཅང་མི་གསུང་། །མི་གསུང་བས་དེ་རྒྱ་ཆེར་བཤད། །ཅེས་པ་ཅང་མེད་མོ་གཤམ་གྱི་བུ་ལྟ་བུ་ཡིན་ན་རྒྱ་ཆེར་བཤད་ཅེས་པའང་མི་གསུངས། འོ་ན་ཀུན་རྫོབ་ཀྱི་བཏང་བའི་དོན་དམ་པ་ཞིག་ཡོད་པར་སྨྲ་བ་ཡིན་ནམ་ཞེ་ན། རྣམ་པ་རྫུན་པ་དེས་སྨྲས་པ་དེ་ལྟ་བུར་ཡང་མི་འདོད། སྐྲ་ཤད་མ་མཐོང་བ་དེ་ཡང་དག་པར་མཐོང་བ་ཡིན་ལ། དེས་སྐྲ་ཤད་ཀྱི་མེད་པ་མ་གཟུང་ཞིང་། དེ་དག་པའི་དངོས་པོའི་ཁྱད་པར་ཡོད་པར་ཡང་མ་གཟུང་བས། མ་མཐོང་བ་ཉིད་དེ་མཐོང་བར། །ཤིན་ཏུ་ཟབ་པའི་མདོ་ལས་གསུངས། །དང་། འདི་ལ་མཐོང་དང་མཐོང་བྱེད་མེད་སོགས་ལུང་གིས་ཀྱང་གྲུབ་པ་ཡིན་ནོ། །བློ་གྲོས་མི་ཟད་པའི་མདོ་འགྲེལ་ལས། ཐ་སྙད་དེ་ནི་ཀུན་རྫོབ་ཅེས་བྱ་ཏེ། ཀུན་རྫོབ་ཀྱི་ཆོས་རྣམས་དོན་དམ་པར་མེད་ཀྱི། ཀུན་རྫོབ་ཀྱི་ཆོས་མེད་པར་ཡང་དོན་དམ་པར་བསྟན་པར་མི་ནུས། ཞེས་གསུངས་སོ། དེ་ལས་ཟློག་པ་ནི་དོན་དམ་སྟེ་ཞེས་གསུངས་སོ། །དེ་ཀས། གཟུགས་སོགས་ཇི་ལྟར་སྣང་བ་ནས། །བདེ་གཤེགས་བར་གྱི་ཆོས་རྣམས་ཀུན། །རི་བོང་བ་ལང་རྭ་ཡི་དཔེས། །དབུ་མ་ཉིད་དུ་གོམས་པར་བྱ། །ཞེས་གསུངས། རེ་ཞིག་བློས་ཅིར་ཡང་མ་གཟུང་བ་དེ་ཙམ་གྱི་ཡོད་མེད་གཉིས་ཀ་གཉིས་མིན་སོགས་དང་བྲལ་བར་གྲུབ་པས་དེ་ལ་ཐ་སྙད་དབུ་མ་ཅེས་གདགས་པར་མཛད་ཀྱི། དེ་ཡང་ཕྱོགས་སུ་ལྷུང་བ་མེད་པ་ཞིག་གོ །དེ་ཀས་ཇོ་བོ་རྗེ་ལྷ་ཅིག་གིས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་དུ་ཡང་མེད། །མཐའ་བཞི་ལས་ནི་རྣམ་གྲོལ་བ། །དེ་ཉིད་དབུ་མར་མཁས་རྣམས་བཞེད། །ཅེས་གསུངས་སོ། །འོ་ན་མཐའ་དང་བྲལ་བར་གྲུབ་བམ་ཞེ་ན་དེ་ཡང་མ་གྲུབ་སྟེ་མཐའ་དགག་པའི་དབང་དུ་བྱས་ནས་མཐའ་དང་བྲལ་ཞེས་བསྟན་གྱི་མཐའ་བྲལ་དུ་འདོད་ནས་སྨྲ་བ་མ་ཡིན་ཏེ། དབུ་མ་མཐའ་ལས་རྣམ་གྲོལ་ན། །མཐའ་དང་བྲལ་ཕྱིར་དབུ་མའང་མེད། །མཐའ་དབུས་མེད་པར་གང་ལྟ་བ། །དེ་ནི་ཡང་དག་ལྟ་བ་སྟེ། །བླ་ན་མེད་པའི་ལྟ་བ་ཡིན། །བློ་ལྡན་རྣམས་ཀྱིས་རྟག་ཏུ་སྒོམས། །གང་ཞིག་ལྟ་བ་དེར་ཞུགས་པ། །དེས་ནི་ཐམས་ཅད་མཁྱེན་པ་ཐོབ། །ཅེས་གསུངས། དེའི་ཕྱིར་འདི་ལ་གཞི་དབུ་མ་ཞེས་བྱའོ། །གདུལ་བྱའི་དབང་ལས་དེ། བདེན་པ་གཉིས་དང་བདེན་པ་གཅིག་སྟེ། མདོ་ལས། མི་བསླུ་བའི་ཆོས་ཅན་མྱ་ངན་ལས་འདས་པ་ནི་བདེན་པ་གཅིག་པུའོ། །འདུ་བྱེད་ཐམས་ཅད་དང་སྣོད་ཀྱི་འཇིག་རྟེན་ནི་རྫུན་པ་བསླུ་བའི་ཆོས་ཅན་ནོ། །ཞེས་དང་། བདེན་གཉིས་སམ་གཅིག་པུར་གཞོག་བྱེད་ཟད་ནས་བདེན་གཉིས་ཟུང་འཇུག་ཏུ་བསྟན་པའི་སྐབས་ཏེ། ཕྱི་མ་འདི་དབུ་མ་འཇུག་པར། བདེན་པ་གཉིས་སུའང་རང་བཞིན་མེད་པའི་ཕྱིར། །དེ་དག་རྟག་པ་མ་ཡིན་ཆད་པ་མིན། །ཞེས་དང་། གལ་ཏེ་ངས་དམ་བཅས་འགའ་ཡོད། །དེས་ན་ང་ལ་སྐྱོན་འདི་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་སློབ་དཔོན་ཆེན་པོ་ཀླུ་སྒྲུབ་ཀྱིས་བཤད་དོ། །གཉིས་པ་ཟུང་འཇུག་གི་སྒོམ་པ་ལ། སྐྱེས་བུ་འབྲིང་དང་ཁྱད་པར་འབྱེད། །དེ་ཉིད་ཀྱི་གདུལ་བྱའི་བློའི་ཁྱད། ལམ་དབུ་མ་ངོས་གཟུང་། དེར་མས་རིམ་ནས་དྲང་བའི་ཚུལ་བཤད་པའོ། །དང་པོ་ནི། བློ་གྲོས་མི་ཟད་པའི་མདོ་འགྲེལ་ལས། འདི་ལྟར་ཕུང་པོ་ལྔ་རྣམས་ལ་འཕགས་པ་ཉན་ཐོས་པ་དག་ལྟར་སྡུག་བསྔལ་བ་དང་། མི་རྟག་པ་ལ་སོགས་པར་རྟོག་པ་མ་ཡིན་གྱི། ཐོག་མ་ཉིད་ནས་ངོ་བོ་ཉིད་ཀྱིས་མ་སྐྱེས་པར་ཤེས་པ་ནི་སྡུག་བསྔལ་ཤེས་པའོ། །ཞེས་དང་། ཉན་ཐོས་དག་ལྟར་ཀུན་འབྱུང་བའི་བདེན་པ་ལ། རྒྱུ་དང་རྐྱེན་ལ་སོགས་པར་རྟོག་པ་ནི་མ་ཡིན་གྱི། སྡུག་བསྔལ་གྱི་ཕུང་པོ་འབྱུང་བའི་རྒྱུ་འདོད་ཆགས་ཀྱི་རང་བཞིན་སྲེད་པ་ཞེས་བྱ་བ་རབ་ཏུ་སྤང་བའི་ཐབས་ཤེས་པ་ནི་ཀུན་འབྱུང་བ་ཤེས་པ་ཞེས་བྱའོ། །དང་། ཚོར་བ་འབྱུང་བའི་རྒྱུ་དེ་སྟོང་པ་ཉིད་དུ་ཕྱིན་ཅི་མ་ལོག་པར་ཁོང་དུ་ཆུད་པ་ཞེས་གང་དུ་ཡང་གཅིག་ཏུ་ངེས་པར་མི་འགྱུར་རོ། །འགོག་པའི་བདེན་པ་ལ་འཕགས་པ་ཉན་ཐོས་པ་དག་ལྟར་ཞི་བ་དང་གྱ་ནོམ་པ་ལ་སོགས་པར་རྟོག་པ་ནི་མ་ཡིན་གྱི་མ་རིག་པ་ལ་སོགས་པ་བག་ལ་ཉལ་རྣམས་ཐོག་མ་ནས་མ་སྐྱེས་པས་མཐའ་མ་འགག་པ་མེད་པར་ཤེས་པ་ནི་འགོག་པ་ཤེས་པའོ། །དང་། ལམ་གྱི་བདེན་པ་ལ་ཡང་འཕགས་པ་ཉན་ཐོས་པ་དག་ཉོན་མོངས་པའི་ཕྱོགས་སྤོང་བ་དང་། རྣམ་པར་བྱང་བའི་ཕྱོགས་སྒྲུབ་པར་རྟོག་པ་ནི་མ་ཡིན་ཏེ། ཉོན་མོངས་པ་དང་རྣམ་པར་བྱང་བའི་ཕྱོགས་གཉིས་ཀ་ལ་ཡང་མཉམ་པ་ཉིད་དུ་རྟོགས་པས་དེ་གཉིས་ལ་སྒྲོ་འདོགས་མེད་པ་ནི་ལམ་ཤེས་པ་ཞེས་བྱའོ། །དང་། རང་གི་མཚན་ཉིད་རྟོགས་པ་ནི་ཤེས་རབ་ཡིན་ལ། སྤྱིའི་མཚན་ཉིད་རྟོགས་པ་ནི་ཡེ་ཤེས་ཡིན་ནོ། །ཞེས་ཉན་ཐོས་ཀྱི་ཤེས་རབ་དང་ཡེ་ཤེས་ཐེག་ཆེན་པའི་དབང་དུ་མཛད་ནས་ཤེས་རབ་ཉིད་གོང་དུ་བཤད་པ་ལྟ་བུའི་ཚུལ་དུ་སྟོང་པར་རྟོགས་པ་ལ་ཡེ་ཤེས་ཞེས་བྱ་སྟེ། འདིས་ནི་ཤེས་རབ་ཀྱིས་ཟིན་པ་བསྟན་ནོ། །དང་། དེ་ལྟར་བདེན་པ་བཞི་རྟོགས་ཀྱང་སྙིང་རྗེ་ཆེན་པོས་སེམས་ཅན་གྱི་དོན་གྱི་ཕྱིར་ཉན་ཐོས་བཞིན་དུ་ཞི་བ་ཕྱོགས་གཅིག་པའི་མྱ་ངན་ལས་འདས་པ་མངོན་སུམ་དུ་མི་བྱེད་ཅིང་ཐབས་རྣམ་པ་སྣ་ཚོགས་ཀྱིས་སེམས་ཅན་སྨིན་པར་བྱེད་དེ། འདིས་ནི་ཐབས་ཀྱིས་ཟིན་པ་བསྟན་ནོ། །ཞེས་པའི་ཐབས་ཤེས་དེ་མེད་པ་ལ་དགོངས་ནས་སྡུད་པར། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྷུང་། །ཞེས་གསུངས་སོ། །ཡང་བློ་གྲོས་མི་ཟད་པའི་མདོ་འགྲེལ་ལས། དེ་ལ་སྤོང་བ་ལ་ཁྱད་ཞུགས་པ་ནི་ཉན་ཐོས་ཀྱི་བྱང་ཆུབ་ཀྱི་ཉོན་མོངས་པའི་སྒྲིབ་པ་ཙམ་སྤོང་བར་ཟད་ཀྱི། འདིས་ནི་ཉོན་མོངས་པ་དང་ཤེས་བྱའི་སྒྲིབ་པ་གཉིས་སྤོང་བས་སྤོང་བ་ཁྱད་ཞུགས་སོ། །ཡེ་ཤེས་ནི་ཉན་ཐོས་ཀྱིས་གང་ཟག་ལ་བདག་མེད་པ་ཙམ་ཁོང་དུ་ཆུད་པར་ཟད་ཀྱི། འདིས་ནི་གང་ཟག་དང་ཆོས་ལ་བདག་མེད་པར་ཡེ་ཤེས་ཀྱི་ཁོང་དུ་ཆུད་པས་སོ། །སྒྲུབ་པ་ནི་ཉན་ཐོས་ལ་སོགས་པ་བདག་གི་དོན་སྒྲུབ་པ་ཙམ་དུ་ཟད་ཀྱི། འདིས་ནི་བདག་དང་གཞན་གྱི་དོན་སྒྲུབ་པར་བྱེད་པས་ན་སྒྲུབ་པ་ཁྱད་ཞུགས་སོ། །དུས་ནི་ཉན་ཐོས་ལ་སོགས་པ་ཚེ་གསུམ་མམ་ཚེ་བདུན་གྱི་བར་དུ་སྦྱོར་བ་ཙམ་དུ་ཟད་ཀྱི། འདིས་ནི་བསྐལ་པ་གྲངས་མེད་གསུམ་གྱི་བར་དུ་སྦྱོར་བས་ན་དུས་ཁྱད་ཞུགས་སོ། །ཐོབ་པ་ནི་ཉན་ཐོས་ཀྱི་དགྲ་བཅོམ་པའི་འབྲས་བུ་ཐོབ་པར་ཟད་ཀྱི། འདིས་ནི་བླ་ན་མེད་པའི་བྱང་ཆུབ་ཐོབ་པས་ན་ཐོབ་པ་ཁྱད་ཞུགས་སོ། །ལྡན་པ་ནི་ཉན་ཐོས་དག་ཟད་པར་གྱི་སྐྱེ་མཆེད་དང་ཟིལ་གྱིས་གནོན་པའི་སྐྱེ་མཆེད་ལ་སོགས་པའི་ཡོན་ཏན་དང་ལྡན་པར་ཟད་ཀྱི་འདིས་ནི་སྟོབས་དང་མི་འཇིགས་པ་ལ་སོགས་པའི་ཡོན་ཏན་དང་ལྡན་པས་ན་ལྡན་པ་ཁྱད་ཞུགས་སོ། །སྤྱོད་པ་ནི་ཉན་ཐོས་ལ་སོགས་པ་ས་དང་ཕ་རོལ་ཏུ་ཕྱིན་པ་ལ་མི་སྤྱོད་ཀྱི། འདི་ནི་ས་དང་ཕ་རོལ་ཏུ་ཕྱིན་པ་ལ་སྤྱོད་པས་ན་སྤྱོད་པ་ལ་ཁྱད་ཞུགས་སོ། །ཞེས་སམ་ཆེན་པོ་བདུན་དང་ལྡན་པར་བཤད་པས་ཐེག་པ་མཆོག་དམན་དུ་བཞག་གོ །བློ་གྲོས་མི་ཟད་པའི་མདོར་ཤེས་རབ་ནི་རྣལ་འབྱོར་སྤྱོད་པའི་ས་ཐམས་ཅད་ཀྱི་སྦྱོར་བའོ། །ཞེས་གསུངས། འགྲེལ་པར་མི་གཙང་བའམ། བྱམས་པའམ། རྟེན་ཅིང་འབྲེལ་བར་འབྱུང་བའམ། སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་སྒོམ་པ་རྣལ་འབྱོར་སྤྱོད་པའོ། །ཏིང་ངེ་འཛིན་དེ་དག་སྒོམ་པའི་རྒྱུའམ་གཞི་ལ་རྣལ་འབྱོར་སྤྱོད་པའི་ས་ཞེས་བྱ་སྟེ། ཤེས་རབ་འདི་རྣལ་འབྱོར་སྤྱོད་པའི་ལམ་ཡིན་པས་སྦྱོར་བའོ། །དེ་ཡང་ཇི་ལྟར་ལམ་ཞེ་ན་མཉན་པའི་ཤེས་རབ་དང་བསམས་པའི་ཤེས་རབ་ལ་མ་བརྟེན་པར་གང་ཡང་སྒོམ་པར་མི་ནུས་པའོ། །ཤེས་རབ་ནི་ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ཀྱི་འདྲེན་པའོ། །ཞེས་བྱ་བ་ལ་ཐེག་པ་ཐམས་ཅད་ནི་ཉན་ཐོས་དང་། རང་སངས་རྒྱས་ཀྱི་ཐེག་པ་དང་ཐེག་པ་ཆེན་པོའོ། །ཐེག་པ་དེ་དག་ལ་གནས་པ་ནི་ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ཏེ། དེ་དག་ཁམས་གསུམ་ནས་བཏོན་ནས་སོ་སོའི་རྣམ་པར་གྲོལ་བ་ལ་འགོད་པར་བྱེད་པས་ཤེས་རབ་ནི་ཐེག་པ་ཐམས་ཅད་ལ་ཞུགས་པ་རྣམས་ཀྱི་འདྲེན་པའོ། །ཞེས་སོ། །ཐེག་པ་དེ་དག་གི་ཁྱད་པར་ཤེས་རབ་དང་སྙིང་རྗེ་གཉིས་ཀས་ཡིན་ནོ། །ཤེས་རབ་ཀྱང་ལུང་མང་པོ་ཐོས་པ་ཙམ་གྱིས་མ་ཡིན་ཏེ་ཆོས་རྣམ་པར་འབྱེད་པའོ། གཞན་དུ་ན་ལྷས་བྱིན་གྱིས་གླང་པོ་ཆེ་རབ་བརྟན་གྱི་ཁུར་པོའི་ཚད་ཀྱི་གླེགས་བམ་ཁ་ཏོན་དུ་ནུས་པ་དང་། ལེགས་སྐར་གསུང་རབ་ཡན་ལག་བཅུ་གཉིས་ལ་མཁས་པར་བཤད་ལ། འཕགས་པ་ལམ་ཕྲན་བསྟན་རྡུལ་སྤང་ངོ་། །དྲི་མ་སྤང་ངོ་། །ཞེས་པའི་ཚིག་གཉིས་ལས་ཁོང་དུ་མ་ཆུད་པ་དེ་གཉིས་ལས་སྔ་མ་གཉིས་ཀྱིས་དོན་མ་གོ་བས་དམྱལ་བར་ཕེབས། ཕྱི་མས་དོན་གོ་བས་དགྲ་བཅོམ་སྟེ་སྡེ་སྣོད་གསུམ་ཤེས་པའི་སྟོན་པར་བསྐོས་པ་ལྟ་བུའོ། །དེ་བས་ན་མྱང་འདས་ལས། ཉན་ཐོས་ཀྱིས་ནི་དེ་བཞིན་གཤེགས་པའི་རིགས་མི་མཐོང་སྟེ་ཏིང་ངེ་འཛིན་ཤས་ཆེ་བའི་ཕྱིར་དང་། ཤེས་རབ་ཆུང་བའི་ཕྱིར་རོ། །བྱང་ཆུབ་སེམས་དཔའ་རྣམས་ཀྱིས་ནི་མཐོང་མོད་ཀྱི། མི་གསལ་ཏེ་ཤེས་རབ་ཤས་ཆེ་བའི་ཕྱིར་དང་། ཏིང་ངེ་འཛིན་ཆུང་བའི་ཕྱིར་རོ། །དེ་བཞིན་གཤེགས་པས་ནི་ཐམས་ཅད་གཟིགས་ཏེ་ཞི་གནས་དང་ལྷག་མཐོང་མཚུངས་པར་ལྡན་པའི་ཕྱིར་རོ་ཞེས་གསུངས། ཀ་མ་ལ་ཤཱི་ལའི་སྒོམ་རིམ་ལས། །ཞི་གནས་ཙམ་འབའ་ཞིག་གོམས་པར་བྱས་པས་ནི་རྣལ་འབྱོར་པ་རྣམས་ཀྱིས་ནི་སྒྲིབ་པ་མི་སྤོངས་ཀྱི། རེ་ཞིག་ཉོན་མོངས་པ་རྣམ་པར་གནོན་པ་ཙམ་དུ་ཟད་དེ། ཤེས་རབ་ཀྱི་སྣང་བ་འབྱུང་བ་མེད་པར་བག་ལ་ཉལ་ལེགས་པར་ཆོམ་མི་སྲིད་པའི་ཕྱིར་བག་ལ་ཉལ་ལེགས་པར་ཆོམས་པར་མི་འགྱུར་རོ། །དེ་བས་ན་འཕགས་པ་དགོངས་པ་ངེས་པར་འགྲེལ་པ་དེ་ཉིད་ལས། བསམ་གཏན་གྱིས་ནི་ཉོན་མོངས་པ་རྣམས་རྣམ་པར་གནོན་ནོ། །ཤེས་རབ་ཀྱིས་ནི་བག་ལ་ཉལ་ལེགས་པར་འཇོམས་པར་བྱེད་དོ་ཞེས་བཀའ་སྩལ་ཏོ། །འཕགས་པ་ཏིང་ངེ་འཛིན་རྒྱལ་པོ་ལས་ཀྱང་། ཏིང་ངེ་འཛིན་དེ་སྒོམ་པར་བྱེད་མོད་ཀྱི། །དེས་ནི་བདག་དུ་འདུ་ཤེས་འཇིག་མི་བྱེད། །དེ་ནི་ཉོན་མོངས་ཕྱིར་ཞིང་རབ་འཁྲུགས་ཏེ། །ལྷག་སྤྱོད་ཀྱིས་ནི་ཏིང་འཛིན་འདིར་སྒོམ་བཞིན། །གལ་ཏེ་ཆོས་ལ་བདག་མེད་སོ་སོར་རྟོག །སོ་སོ་དེ་བརྟགས་གལ་ཏེ་སྒོམ་ན་ནི། །དེ་ཉིད་མྱ་ངན་འདས་ཐོབ་འབྲས་བུའི་རྒྱུ། །རྒྱུ་གཞན་གང་ཡིན་དེས་ནི་ཞི་མི་འགྱུར། །ཞེས་གསུངས་སོ། །བྱང་ཆུབ་སེམས་དཔའི་སྡེ་སྣོད་ལས་ཀྱང་གང་དག་ཆེས་འདུལ་བ་འཕགས་པ་མ་ཐོབ་པར་ཏིང་ངེ་འཛིན་ཙམ་གྱིས་ཆོག་པར་འཛིན་པ་ཐོབ་པ་ནི་ང་རྒྱལ་གྱི་དབང་གིས་མངོན་པའི་ང་རྒྱལ་དུ་ལྷུང་ཞིང་སྐྱེ་བ་དང་རྒ་བ་དང་ན་བ་དང་འཆི་བ་དང་། མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་དང་ཡིད་མི་བདེ་བ་དང་འཁྲུག་པ་ལས་ཡོངས་སུ་མི་གྲོལ། འགྲོ་བ་དྲུག་གི་འཁོར་བ་ལས་ཡོངས་སུ་མི་གྲོལ། སྡུག་བསྔལ་གྱི་ཕུང་པོ་ལས་ཡོངས་སུ་མི་གྲོལ་ཏེ་ཞེས་གསུངས་སོ། །མཁས་པར་རློམ་པ་དག་གི་གཞུང་ན་ཏིང་ངེ་འཛིན་རྒྱལ་པོའི་ལུང་ཚིགས་བཅད་དང་པོ་འདི་སྒོམ་མ་ཤེས་པའི་སྐྱོན་དུ་འདྲེན་ཏེ། དེ་ལྟར་ན་དེ་ཞི་གནས་མཚན་ཉིད་པ་འཇིག་རྟེན་པའི་ལྷག་མཐོང་དང་བཅས་པ་ཡིན་པར་བསྟན་ལ། འོན་ཀྱང་དེ་བདག་མེད་པར་གཏན་ལ་ཕེབས་པའི་ཤེས་རབ་དང་མི་ལྡན་པས་སླར་འཁོར་བར་འཁྱམས་ཐར་པར་མི་འགྲོ་བར་བཤད་པ་སྟེ། འཇིག་རྟེན་པའི་བསམ་གཏན་སྙོམས་འཇུག་རྣམས་སོ། །ཁ་ཅིག་དེས་ན་ཤེས་རབ་བསྔགས་ལ་དེའི་ཤེས་རབ་ཀྱང་རིགས་པས་གཏན་ལ་འབེབས་པ་འདིའོ་སྙམ་དུ་ཡང་འཛིན་ཏེ། སྒོམ་རིམ་དེ་ཉིད་དུ། ཞི་གནས་དང་བྲལ་བའི་ལྷག་མཐོང་གིས་ནི་རྣལ་འབྱོར་པའི་སེམས་ཡུལ་རྣམས་ལ་རྣམ་པར་གཡེང་བར་འགྱུར་གྱི། རླུང་གི་ནང་ན་འདུག་པའི་མར་མེ་བཞིན་དུ་བརྟན་པར་མི་འགྱུར་རོ། །ཞེས་བཤད་པས་ཞི་གནས་ལ་གནས་པའི་ལྷག་མཐོང་གིས་བདག་མེད་པར་གཏན་ལ་ཕབ་པ་ཞིག་དགོས། དེ་ལ་ཐོག་མར་རེ་ཞིག་ཞི་གནས་སྒྲུབ་པར་བྱ་སྟེ། ཕྱི་རོལ་གྱི་ཡུལ་ལ་རྣམ་པར་གཡེང་བ་ཞི་ནས་ནང་དུ་དམིགས་པས་རྒྱུན་དུ་རང་གི་ངང་གིས་འཇུག་པ་ལ་དགའ་བ་དང་། ཤིན་ཏུ་སྦྱངས་པ་དང་ལྡན་པའི་སེམས་སེམས་ཉིད་ལ་གནས་པ་ནི་ཞི་གནས་ཞེས་བྱའོ། །ཞི་གནས་དེ་ཉིད་ལ་དམིགས་པའི་ཚེ་དེ་ཁོ་ན་ལ་རྣལ་འབྱོར་སྤྱོད་པ་གང་ཡིན་པ་དེ་ནི་ལྷག་མཐོང་ཡིན་ཏེ་ཞེས་གསུངས་པས། བདག་ལྟ་ལྷན་སྐྱེས་ལ་གནོད་པ་སྐྱེལ་མཁན་དེ་ནི་དེ་ཉིད་ཡིན་ནོ། །དགོངས་འགྲེལ་ལས། ཐོས་པ་དང་བསམ་པ་ལས་བྱུང་བའི་ལྟ་བ་རྣམ་པར་དག་པའི་རྒྱུ་ལས་བྱུང་བ་ཡིན་ནོ་དང་། སྲེད་མེད་ཀྱི་བུས་ཞུས་པ་ལས་ཐོས་པ་དང་ལྡན་པས་ནི་ཤེས་རབ་འབྱུང་བར་འགྱུར་རོ། །ཤེས་རབ་དང་ལྡན་པ་ནི་ཉོན་མོངས་པ་རབ་ཏུ་ཞི་བར་འགྱུར་རོ་ཞེས་གསུངས་ན་ཐོས་བསམ་གྱིས་གཏན་ལ་ཕབ་པའི་ལྟ་བ་འདིས་བདག་མེད་མི་རྟོགས་ན་དེ་སྐད་བསྟན་པ་དོན་མེད་པར་འགྱུར་རོ་སྙམ་ན། དེ་ནི་སྒོམ་རིམ་དུ་ཚུལ་བཞིན་བསམས་པ་གང་ཞེ་ན། གང་ངེས་པའི་དོན་དང་དྲང་བའི་དོན་གྱི་མདོ་ལ་སོགས་པ་ལེགས་པར་གཏན་ལ་འབེབས་པ་སྟེ། དེ་ལྟར་བྱང་ཆུབ་སེམས་དཔའ་ཐེ་ཚོམ་མེད་ན་སྒོམ་པ་ལ་གཅིག་ཏུ་ངེས་པར་འགྱུར་རོ། །དེ་ལྟ་མ་ཡིན་པ་ཐེ་ཚོམ་གྱི་འཕྱང་མོ་ཡུག་གི་ཐག་པ་ལ་འདུག་པ་ནི་ལམ་ཁ་བྲག་གི་མདོར་ཕྱིན་པའི་མི་ལྟར་གང་དུ་ཡང་གཅིག་ཏུ་ངེས་པར་མི་འགྱུར་རོ། །ཞེས་པས་བསྒོམ་བྱ་ལ་ཐེ་ཚོམ་མེད་པ་ཡིད་ཆེས་པའི་ཕྱིར་དང་པོར་ལུང་རིགས་ལ་བརྟེན་པ་གསུངས་པ་སྟེ། ལམ་སྒྲོན་ལས། ལུང་དང་རིགས་པ་དག་གིས་ནི། །ཆོས་རྣམས་ཐམས་ཅད་སྐྱེ་མེད་པའི། །རང་བཞིན་མེད་པ་ངེས་བྱས་ནས། །རྣམ་པར་རྟོག་མེད་དེ་བསྒོམ་བྱ། །ཞེས་འབྱུང་། དེ་ལ་དཔྱད་སྒོམ་ཞེས་བྱ། སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཞེས་གསུངས་པ་འཇོག་སྒོམ་སྟེ། དེ་ཉིད་དུ། སེམས་ཀྱི་གླང་ཆེན་མྱོས་པ་ནི། །ཆོས་ལ་སེམས་པའི་ཀ་ཆེན་ལ། །ཇི་ལྟར་བཏགས་པ་མི་འཆོར་བ། །དེ་ལྟར་འབད་པ་ཀུན་གྱིས་བརྟག །ཅི་ནས་ཏིང་འཛིན་བརྩོན་པ་ནི། །སྐད་ཅིག་གཅིག་ཀྱང་མི་འཆོར་བར། །བདག་གི་ཡིད་ནི་གར་སྤྱོད་ཅེས། །དེ་ནས་ཡིད་ལ་སོ་སོར་བརྟག །ཅེས་གསུངས་པ་ཡིན། དེ་ཡང་སྦྱོར་བ་དང་མཉམ་བཞག་ལས་ལངས་པའི་རྗེས་ཐོགས་སུ་བསམ་པ་ལ་བསྟེན་པ་ནི་ལེགས་ཀྱི་དེ་ལྷག་མཐོང་སྒོམ་པའི་དངོས་གཞིར་རློམ་པ་ནི་བསམ་བྱུང་སྒོམ་བྱུང་ཤན་མ་ཕྱེད་པའི་རྫོབ་རྟགས་ཆེན་པོའོ། །དེས་ན་མཉམ་བཞག་བརྟན་དགོས་པའི་གཙོ་བོ་ཐམས་ཅད་དེས་འགྲུབ་པའི་ཕྱིར་ལུས་ངག་གི་དགེ་བ་བཞག་ནས་དེ་ཁོ་ན་ལ་ནན་ཏན་བྱ་སྟེ། ཇོ་བོ་རྗེ་ལྷ་གཅིག་གིས། སྤྱིར་ན་མཉམ་བཞག་སེམས་བརྟན་ན། །ལུས་ངག་དགེ་བ་གཙོར་མི་བྱ། །ཡང་ན་མཉམ་བཞག་མི་གསལ་ན། །འཇིག་རྟེན་མཐུན་འཇུག་བྱ་བའི་ཕྱིར། །ལུས་ངག་དགེ་བ་ཅི་ནུས་བྱ། །ཞེས་དང་། ལམ་སྒྲོན་ལས། རྣལ་འབྱོར་ཞི་གནས་འགྲུབ་གྱུར་ན། །མངོན་ཤེས་དག་ཀྱང་འགྲུབ་པར་འགྱུར། །ཞེས་དང་། མངོན་ཤེས་འགྲུབ་པའི་དགོས་པའང་། དེ་ཉིད་དུ། བསོད་ནམས་ཡེ་ཤེས་རང་བཞིན་གྱིས། །ཚོགས་ནི་ཡོངས་སུ་རྫོགས་པ་ཡི། །རྒྱུ་ནི་སངས་རྒྱས་ཐམས་ཅད་དག །མངོན་ཤེས་བསྐྱེད་པ་ཉིད་དུ་བཞེད། །ཇི་ལྟར་འདབ་གཤོག་མ་ཚང་བའི། །བྱ་ནི་མཁའ་ལ་འཕུར་མི་ནུས། །དེ་བཞིན་མངོན་ཤེས་སྟོབས་བྲལ་བས། །སེམས་ཅན་དོན་བྱེད་ནུས་མ་ཡིན། །མངོན་ཤེས་ལྡན་པའི་ཉིན་མཚན་གྱིས། །བསོད་ནམས་དག་ནི་གང་ཡིན་དེ། །མངོན་ཤེས་དག་དང་བྲལ་གྱུར་ལ། །སྐྱེ་བ་བརྒྱར་ཡང་ཡོད་མ་ཡིན། །ཞེས་དང་། ཞི་གནས་གྲུབ་པ་མ་ཡིན་ན། །མངོན་ཤེས་འགྲུབ་པར་མི་འགྱུར་བས། །དེ་ཕྱིར་ཞི་གནས་བསྒྲུབ་པའི་ཕྱིར། །ཡང་དང་ཡང་དུ་འབད་པར་བྱ། །ཞེས་གསུངས་སོ། །གཉིས་པ་དེ་ཉིད་ཀྱི་གདུལ་བྱའི་བློའི་ཁྱད་ནི། བློ་རབ་སྟོང་པ་ཉིད་ཇི་ལྟ་བ་དེ་ལྟར་སློབ་པ་བཟོད་པ་ཟབ་མོ་ལ་མོས་པ་ཞེས་བྱ་སྟེ། འཇུག་པར། སོ་སོ་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ཞིང་། །ལུས་ཀྱི་བ་སྤུ་ཡང་ནི་ལྡང་བར་འགྱུར་བ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །ཅེས་གསུངས། གཉིས་པ་ནི། སྒྱུ་མ་ལྟ་བུའི་ལམ་གྱི་རིམ་པའམ་མངོན་པར་རྟོགས་པ་རྣམས་ལ་སློབ་པར་སྤྲོ་བ་སྟེ། རྒྱ་ཆེན་པོ་ལ་མོས་པ། གསུམ་པ་ནི་ལྟ་བ་རྣམ་པར་དག་པ་མི་བཟོད་པ་སེམས་ཙམ་དུ་སྨྲ་བ། སྔ་མ་དེའི་དབང་དུ་བྱས་ནས་ཐབས་ཤེས་ཟུང་འཇུག་སྒོམ་བྱར་སྟོན་པ་དང་། གཉིས་པ་ཐབས་ཤེས་ཟུང་འབྲེལ་གྱི་སྒོམ་པ་ལ་ཁྲིད་པ་ཡིན། འདི་གཉིས་ཤེར་ཕྱིན་མདོའི་དངོས་བསྟན་དང་སྦས་དོན་འབྱེད་ཚུལ་ལ་ཕྱེ་ཡི། གསུམ་པ་དེ་སྔ་མ་ལ་དང་ཆེས་སྔ་མར་བཀྲི་དགོས་པ་ཡིན་ནོ། །དེ་ལ་ཡང་རྣམ་པ་བདེན་རྫུན་གཉིས་བྱུང་། གཉིས་ཀ་ལ་ཐབས་སྔར་བསྒོམས་ནས་ཤེས་རབ་ཕྱིས་སྒོམ་པ་སྟོན་ནོ། །འདིར་ཟུང་འཇུག་སྒོམ་ཞེས་གསུངས་ཏེ་ཟུང་འཇུག་ནི་ལམ་དབུ་མའོ། །གསུམ་པ་ལམ་དབུ་མ་ངོས་འཛིན་པ་ནི། གྲུབ་མཐའ་བཞི་ཀའི་གཞུང་ལས་རང་རང་དབུ་མ་པར་བཞག་མོད་ཀྱང་། གཞན་གསུམ་མཐའ་ཐམས་ཅད་དང་བྲལ་བ་མ་ཡིན་པ་དང་། ཕྱི་མ་ཡིན་པའི་ཁྱད་ཀྱི་སྤྱིར་བཏང་ལ་ཕྱི་མ་འབའ་ཞིག་དབུ་མ་པར་གསུངས་སོ། །དེ་ཡང་ཆོས་ཀྱི་འཁོར་ལོའི་མདོར། ཉན་ཐོས་ཀྱི་བདེན་པ་མངོན་པར་རྟོགས་པའི་ལམ་ལ། མཐའ་གཉིས་དང་བྲལ་བ་དབུ་མའི་ལམ་ཞེས་གསུངས་པའི་མཐའ་གཉིས་ནི། ཆད་པར་ལྟ་བ་མེད་མཐའ་དང་། རྟག་པར་ལྟ་བ་ཡོད་མཐར་བཞག་ལ། དེ་གཉིས་སུ་མ་ལྷུང་བ་ཙམ་ལ་དགོངས་ལ། འདིའི་རྟག་ལྟར་འཇིག་རྟེན་པའི་ཡང་དག་པའི་ལྟ་བའང་འདུ་བས། སྤྱོད་འཇུག་ལས། འཇིག་རྟེན་པ་ཡི་དངོས་མཐོང་ཞིང་། །ཡང་དག་ཉིད་དུ་རྟོག་བྱེད་ལ། །སྒྱུ་མ་ལྟ་བུ་མིན་པས་འདིར། འཇིག་རྟེན་པ་དང་རྣལ་འབྱོར་རྩོད། །འཇིག་རྟེན་རྣལ་འབྱོར་གྱིས་གནོད་ཅིང་། །ཞེས་གསུངས་པ་ཡིན། མུ་སྟེགས་བྱེད་ཀྱི་ལུགས་བདག་ཏུ་ལྟ་བས་རྟག་པར་བཞག་པ་དེ་ཙམ། འཇིག་རྟེན་པའི་ཡང་དག་པའི་ལྟ་བ་མཐོང་བ་རང་གིས་བྲལ་སྟེ། འཇུག་པར། མི་ཤེས་གཉིད་ཀྱིས་རབ་བསྐྱོད་མུ་སྟེགས་ཅན། །རྣམས་ཀྱིས་བདག་ཉིད་ཇི་བཞིན་བརྟགས་པ་དང་། །སྒྱུ་མ་སྨིག་སྒྱུ་སོགས་ལ་བརྟགས་པ་གང་། །དེ་དག་འཇིག་རྟེན་ལས་ཀྱང་ཡོད་མིན་ཉིད། །ཅེས་གསུངས། དེས་ན་འཇིག་རྟེན་པའི་ལྟ་བ་དེ་ཕྱིན་ཅི་ལོག་བཞིའི་བློ་དང་མ་བྲལ་བས་གྲུབ་མཐའ་ལ་ཞུགས་པས་སུན་ཕྱུང་ནུས་པ་ཡིན་ནོ། །ཕྱིན་ཅི་ལོག་བཞི་ནི། མི་གཙང་བ་ལ་གཙང་བ། མི་རྟག་པ་ལ་རྟག་པ། སྡུག་བསྔལ་བ་ལ་བདེ་བ། བདག་མེད་པ་ལ་བདག་ཏུ་འཛིན་པའོ། །འདིའི་བདག་ཏུ་ལྟ་བ་ནི་རིལ་པོ་དང་རྟག་པར་འཛིན་པ་ལས་བྱུང་བ་ཡིན་པས་ཕྱི་རོལ་གྱི་ཁམས་བེམ་པོ་འདི་དག་རྡུལ་ཕྲ་རབ་ཏུ་བཤིག་ནས་བསྟན་པས་རིལ་པོའི་འདུ་ཤེས་འཇིག ནང་སེམས་ཀྱི་ཆོས་སྐད་ཅིག་མར་གཏན་ལ་ཕབ་པས་རྟག་པར་འཛིན་པ་འཇིག་གོ །གྲུབ་མཐའ་དེ་གཉིས་ཀྱང་དངོས་པོ་སྒྱུ་མ་ལྟ་བུར་གཏན་ལ་འབེབས་པ་སྟེ། སྒྱུ་མ་ཟིལ་པ་ཆུ་སྦུར་དང་། །རྨི་ལམ་གློག་དང་སྤྲིན་ལྟ་བུར། །འདུས་བྱས་ཆོས་རྣམས་དེ་ལྟར་བལྟ། །ཞེས་འདོན་པ་ཡིན་ནོ། །སེམས་ཙམ་རྣམ་རྫུན། དབུ་མ་གཞན་སྟོང་དུ་དེང་སང་གྲགས་པ་དེ་རང་ཉིད་དབུ་མར་འདོད་ལ། དེའི་དབུ་མ་ནི། རྗེ་བཙུན་བྱམས་པས། ཡོད་པས་མེད་པས་ཡོད་པས་ན། །དེ་ཕྱིར་དབུ་མའི་ལམ་ཡིན་ནོ། །ཞེས་པ་སྟེ། མ་བརྟགས་ཉམས་དགའ་བ་ཙམ་དུ་གཞན་དབང་གི་དངོས་པོ་ཡོད་པ་སྟེ། སྒྱུ་མ་མཁན་གྱིས་རྡེའུ་ཤིང་བུ་རྟ་གླང་དུ་སྤྲུལ་པ་ལྟ་བུ། བརྟགས་ན་སྣང་བ་ནི་གཟུང་བ། དེར་ལྟ་བ་ནི་འཛིན་པ་གཉིས་པོ་དོན་ལ་ཡོད་མ་མྱོང་བས་གཏན་མེད་ལ་འཁྲུལ་པ་སྣང་བ་སྟེ། རྡེའུ་ཤིང་བུ་ལ་རྟ་གླང་ཡོད་མ་མྱོང་བ་ལྟ་བུ། མེད་ཀྱང་སྣང་བ་རི་མོ་ལ་མཐོ་དམའ་ཟུར་དུ་སྣང་བ་ལྟ་བུ་སྟེ། ཇི་ལྟར་ཚུལ་བཞིན་བྲིས་པའི་རི་མོ་ལ། །མཐོ་དམའ་མེད་ཀྱང་སྣང་བ་ཇི་བཞིན་དུ། །ཡང་དག་མ་ཡིན་རྟོག་ལ་རྣམ་ཀུན་ཏུ། །གཉིས་པོ་དོན་ལ་མེད་ཀྱང་སྣང་བར་འགྱུར། །ཞེས་གསུངས། བརྟགས་ནས་གཟུང་འཛིན་དེ་གཉིས་དག་པའི་ཤུལ་ན་ཡོངས་གྲུབ་འབའ་ཞིག་ལུས་ཏེ་དེ་ནི་དོན་དམ་པའི་བདེན་པ་ཡིན་པས་ཡོད་པ་རྟག་ཐེར་ཟུག་པ་གཡུང་དྲུང་དུ་འདོད་པ། དཔེར་ན་སྒྱུ་མར་མཐོང་ན་རྟ་གླང་མེད་ཀྱི། རྡེའུ་ཤིང་བུ་རང་ཡིན་པ་བཞིན་ནོ། །དེས་རྟག་ཆད་སེལ་ཚུལ་ཡང་། སློབ་དཔོན་ཀླུའི་བཤེས་གཉེན་གྱིས། དབུ་མའི་ལམ་ཞེས་བྱ་བ་ཡང་། །རྣམ་རིག་ཙམ་ཉིད་མ་རྟོགས་པར། །རིགས་པས་བརྟགས་ན་འདིར་གཞན་ནི། །རྣམ་པ་ཀུན་ཏུ་མི་འཐད་དོ། །ཞེས་གསུངས། དེའི་འགྲེལ་པ། སློབ་དཔོན་ཡེ་ཤེས་ཟླ་བས་མཛད་པར། དབུ་མའི་ལམ་དེ་ཡང་དཔྱད་ན་རྣམ་པར་རིག་པ་ཙམ་ཉིད་དེ། རྣམ་པར་རིག་པ་ཙམ་ཉིད་ནི། གཙོ་བོར་ན་རྟེན་ཅིང་འབྲེལ་བར་འབྱུང་བའི་དངོས་པོ་མཚོན་པའོ། །གཞན་གྱི་དབང་འཁྲུལ་པ་ཙམ་ཡིན་པས་གཟུང་བ་དང་འཛིན་པ་ཉིད་དུ་སྣང་བའི་ཕྱིར། གལ་ཏེ་ཇི་ལྟར་སྣང་བ་དེ་བཞིན་དུ་ཡོད་ན་ནི་རྟག་པའི་མཐར་འགྱུར་རོ། །ཅི་སྟེ་ཅི་ཡང་མེད་ན་ནི། དེ་ལྟར་ན་ཆད་པར་འགྱུར་ཏེ། དེ་བས་ན་གདགས་པའི་གཞི་ཡོད་པ་ཉིད་དུ་ཁས་བླང་བར་བྱ་དགོས་ཏེ་ཞེས་གསུངས་པས་ཀུན་རྫོབ་མེད་པས་རྟག་ལྟ་སེལ། ཡོངས་སུ་གྲུབ་པ་ཡོད་པས་ཆད་ལྟ་བསལ་ཏེ་དོན་རྩ་འདི་ལ་ཕྱེ་སྟེ། དབུ་མ་སྒྲུབ་ཚུལ་དབུས་མཐའ་རྣམ་འབྱེད་དུ་རྒྱས་པར་གསུངས་སོ། །འདི་དང་། དོན་སྨྲ་བ་གཉིས་ཀྱི་དབུ་མ་དེ་ལ། དབུ་མ་ངོ་བོ་ཉིད་མེད་པར་སྨྲ་བ་རྣམས་ཀྱིས་སུན་འབྱིན་པ་ནི། སྔར་ཡོད་གསར་དུ་མེད་ཅེས་པ། །དེས་ན་ཆད་པར་ལྟ་བར་འགྱུར། །དང་། སྔར་མེད་གསར་དུ་ཡོད་ཅེས་པ། །དེས་ན་རྟག་པར་ལྟ་བར་འགྱུར། །ཅེས་འཕངས་ནས། རང་ལུགས། ཡོད་ཅེས་བྱ་བ་རྟག་པར་ལྟ། །མེད་ཅེས་བྱ་བ་ཆད་པར་ལྟ། །ཞེས་རྟག་ཆད་དེ་དང་བྲལ་བ་སྟེ། །བད་ས་དང་རིགས་མཐུན་པའི་མདོ་ལས། ཀུན་དགའ་བོ། ཡོད་ཅེས་བྱ་བ་ནི་རྟག་པར་འགྱུར་རོ། །མེད་ཅེས་བྱ་བ་ནི་ཆད་པར་འགྱུར་རོ། །དེ་ལྟ་བས་ན་དེ་བཞིན་གཤེགས་པ་དབུ་མའི་ལམ་གྱི་ཆོས་སྟོན་ནོ་ཞེས་གསུངས་སོ། །ཇོ་བོ་རྗེ་ལྷ་གཅིག་གིས། མེད་པ་ཡོད་པའི་ཟླས་དྲངས་ཏེ། །ཡོད་པའང་མེད་པའི་ཟླས་དྲངས་པས། །དེ་ཕྱིར་མེད་པར་བརྗོད་མི་བྱ། །ཡོད་པ་ཉིད་དུའང་མི་བརྟག་གོ །ཞེས་གསུངས་པས། བློས་བསམ་དུ་མེད་པས་བརྗོད་རྒྱུ་ཟད་པ་དེ་ཙམ་ལ་ཁས་ལེན་དང་བྲལ་བའམ། ལྟ་བ་ཀུན་ཟློག་པ་འམ། འཁོར་གསུམ་ཡོངས་སུ་དག་པ་འམ། དམིགས་པ་ཐམས་ཅད་ཉེ་བར་ཞི་བ་ཞེས་བྱའོ། །འདི་ན་ཕལ་ཆེར་སྣང་བས་མེད་མཐའ་འགོག་ཅིང་སྟོང་པས་ཡོད་མཐའ་དགག་པར་འདོད་ལ། འགའ་ཞིག་སྟོང་པས་མེད་མཐའ་དང་། སྣང་བས་ཡོད་མཐའ་སེལ་བས་རྟག་ཆད་དང་བྲལ་བར་འདོད་དེ། ཕྱོགས་གཉིས་གཟུང་བའི་ཕྱིར་མཐར་ལྷུང་བར་ཟད་དོ། །དེས་ན་དབུ་མར། སྔར་མེད་གསར་དུ་ཡོད་ཅེས་པ། །དེས་ན་རྟག་པར་ལྟ་བར་འགྱུར། །དངོས་པོ་གསར་དུ་སྐྱེ་བ་ཡོད་པར་ཁས་བླངས་པ་དེ་རྟག་པའི་མཐར་ལྷུང་བར་བསྟན། སྔར་ཡོད་གསར་དུ་མེད་ཅེས་པ། །དེས་ན་ཆད་པར་ལྟ་བར་འགྱུར། །ཞེས་ད་ལྟ་ཡོད་པ་སྐད་ཅིག་གིས་འཇིག་པར་ཁས་བླངས་པས་ཆད་པར་ལྟུང་བ་བསྟན། རྟག་པ་ཞེས་པ་ཆོས་གང་ཡོད་པ་མི་འཇིག་པ་ཞིག་དང་། མི་རྟག་པ་ཞེས་པ་ཡོད་ནས་མེད་པར་འགྱུར་བ་སྟེ། དབུས་མཐར། མི་རྟག་དོན་ནི་མེད་དོན་དང་། །ཞེས་དང་། རྣམ་འགྲེལ་དུ། སྔར་བྱུང་དངོས་པོ་མེད་གྱུར་བ། །མི་རྟག་ཅེས་ནི་བརྗོད་པ་ཡིན། །དང་། གང་གི་རང་བཞིན་འཇིག་མེད་པ། །དེ་ལ་མཁས་རྣམས་རྟག་ཅེས་བརྗོད། །དེས་ན་ངོ་ཚའི་ལྟ་བ་འདི། །སྤོངས་ལ་དེ་ནི་རྟག་པར་སྨྲོས། །ཞེས་འབྱུང་བ་ཡིན་ནོ། །དེ་ལྟ་བུའི་ལམ་དེ་དག་བསྒོམས་ཀྱང་འགྲུབ་དཀའ་བས་ཚེ་འདིར་བདེན་པ་མཐོང་མི་ནུས་སམ་སྙམ་ན་ནུས་ཏེ། ཇོ་བོ་རྗེ་ལྷ་གཅིག་གིས། དབུ་མའི་མན་ངག་ཏུ། དེ་ལྟར་གུས་པ་དང་། ཡུན་རིང་བ་དང་། རྒྱུན་མ་ཆད་པར་སྒྲུབ་ན་སྐལ་བ་དང་ལྡན་པ་རྣམས་ཀྱིས་ཚེ་འདི་ཉིད་ལ་བདེན་པ་མཐོང་བར་འགྱུར་ཏེ། ཞེས་གསུངས་པའི་ཚེ་གཅིག་ནི་དང་པོར་ལམ་དུ་ཞུགས་པའི་རྟེན་ལ་བྱེད་དགོས། གཞན་དུ་ན་ཐམས་ཅད་ཀྱང་ཚེ་གཅིག་ལ་བདེན་པ་མཐོང་བར་ཐལ་བས་སོ། །འོ་ན་བྱང་ཆུབ་སེམས་དཔའ་ཅི་ཙམ་བརྩོན་འགྲུས་དང་ལྡན་ཡང་གྲངས་མེད་གསུམ་ལས་སྔར་སངས་མི་རྒྱ་ལ། གྲངས་མེད་གཅིག་ནི་མོས་པས་སྤྱོད་པའི་སྐབས་སུ་རྫོགས་དགོས་པར་བཤད་པ་དང་མི་འགལ་ལམ་ཞེ་ན། དེ་ནི་རིམ་གྱིས་པའི་དབང་དང་། འདི་ནི་ཅིག་ཅར་བའི་དབང་དུ་བྱས་པས་མི་འཐད་པ་མེད་དེ་རྗེ་བཙུན་བྱམས་པས། རྫོགས་པའི་སངས་རྒྱས་རྣོན་པོ་ཡིས། །རྟོགས་སླ་རཏལ་པོས་རྟོགས་དཀར་བཞེད། །ཅེས་གསུངས་ཚེ་གཅིག་གིས་བདེན་པ་མཐོང་བ་དེས་ཀྱང་སྨོན་ལམ་རྒྱ་ཆེན་པོ་བཏབ་ན་དེ་སྨོན་ལམ་རྫོགས་པར་བྱ་བའི་ཕྱིར་གྲངས་མེད་མང་པོར་འཚང་མི་རྒྱ་བར་བཞུགས་པའང་ཡོད་དེ་འཕགས་པ་ཀུན་བཟང་དང་འཇམ་དབྱངས་ལྟ་བུའོ། །ཡང་ཁ་ཅིག་ཅིག་ཅར་བའི་ཐ་སྙད་ཕ་རོལ་ཏུ་ཕྱིན་པ་ལས་མི་འབྱུང་ངོ་སྙམ་ན། དེ་ལྟར་མ་ཡིན་ཏེ། ཇོ་བོ་རྗེ་ལྷ་གཅིག་གིས། དྲན་པ་གཅིག་པའི་མན་ངག་ཅེས་པར། འཕགས་པ་ཀླུ་སྒྲུབ་ཕྱག་འཚལ་ནས། །ཨ་ཝ་དྷཱུ་ཏཱི་བདག་གིས་ནི། །ཅིག་ཅར་འཇུག་པའི་མན་ངག་བྲི། །འདིར་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནས་ཉེ་བར་གཟུང་སྟེ་དབང་བསྐུར་བ་ཆེན་པོ་མ་ཐོབ་ཀྱི་བར་དེ་སྲིད་དུ་ཞེས་གསུངས་པས་སོ། །མདོར་བསྡུ་ན། ལྟ་བས་ཇི་ལྟར་གཏན་ལ་ཕབ་པ་དེ་ལ་གོམས་པར་བྱ་བ་ཉིད་སྒོམ་པ་ཡིན་པས་ལྟ་ཐོག་ནས་སྒོམ་པ་འཚོལ་བ་ཞེས་བྱའོ། །གསུམ་པ་འདིར་དམའ་རིམ་ནས་དྲང་བའི་ཚུལ་བཤད་པ་ལ། ཟུང་འཇུག་སྒྲུབ་པའི་ཕྱིར་ཐབས་སྔོན་ལ་བསྒོམས་ནས་ཤེས་རབ་ཕྱི་ལ་སྒོམ་པ། གོམས་པར་བྱ་བའི་ཕྱིར་ཤེས་རབ་སྔར་བསྒོམས་ནས་ཐབས་ཕྱི་ལ། གོམས་པ་མངོན་དུ་གྱུར་ནས་ཐབས་ཤེས་ཟུང་འཇུག་སྒོམ་པ་བཤད་པ་ལས། དང་པོ་ལ་ཐབས་སྒོམ་པ་དང་ཤེས་རབ་སྒོམ་པ་གཉིས་ལས། དང་པོ་ནི། ཇོ་བོ་རྗེ་ལྷ་གཅིག་གིས། འཁོར་བ་ཐོག་མ་མེད་པ་ནས། །དངོས་འཛིན་གདོན་གྱིས་བརླམས་པ་ཡི། །འགྲོ་ཀུན་ཡུལ་དུ་བྱས་ནས་ནི། །ཐམས་ཅད་རྗེས་སུ་འཛིན་པ་ཡི། །བྱམས་ཆེན་ཚད་མེད་སྔོན་འགྲོ་བས། །སྡུག་བསྔལ་རྒྱ་མཚོ་སྐེམས་བྱེད་པའི། །སྙིང་རྗེ་ཆེན་པོ་ཚད་མེད་པས། །བདག་དང་གཞན་དོན་སྒྲུབ་པ་ཡི། །བྱང་ཆུབ་སེམས་ནི་རིན་པོ་ཆེ། །ཡང་དག་བརྟན་པ་བསྐྱེད་པར་བྱ། །ཞེས་པས་ཐེག་པ་ཆེན་པོ་ལ་མོས་པ་ཐེག་པ་ཆེན་པོའི་རིགས་ཅན་དེས་སེམས་ཅན་ཐམས་ཅད་ཕ་མ། ཕ་མ་དྲིན་ཅན། དྲིན་ལན་མ་འཇལ་ན་རང་ཉིད་ངན་པ་ཐ་ཤལ་དུ་འགྲོ་བས་སེམས་ཅན་ཐམས་ཅད་ལ་ཕ་མར་ལྟ། དེ་དྲིན་ཅན་དུ་ལྟ། དྲིན་ལན་མ་གཞལ་ན་རང་ངན་པར་ལྟའོ། །དེས་དེ་ཐམས་ཅད་བདེ་བ་དང་ལྡན་པར་འདོད་པ་སྐྱེའོ། །འདིས་ནི་བདེ་བ་སེམས་ཅན་ཐམས་ཅད་རང་རྒྱུད་པར་བྱས་ནས་དེ་ལྟར་བསྒོམས་པས་སེམས་ཅན་ལ་དམིགས་པའི་བྱམས་པའོ། །བྱམས་པ་དེ་སྐྱེས་ན་དེ་ལས་སྙིང་རྗེའི་བློ་སྐྱེ་སྟེ་བདེ་བ་དང་ལྡན་པ་ལ་སྡུག་བསྔལ་དང་འབྲལ་དགོས་པའི་ཕྱིར་དེའང་འཁོར་བ་སྡུག་བསྔལ་དུ་ལྟ་དགོས་ལ་དེ་མཐོང་ན་ཕ་མ་སྡུག་བསྔལ་དང་བྲལ་བར་འདོད་པའི་བློ་སྐྱེ། སྙིང་རྗེ་སྐྱེས་ན་བྱང་ཆུབ་ཀྱི་སེམས་སྐྱེ་བར་འགྱུར་ཏེ། སྡུག་བསྔལ་དང་བྲལ་བ་ལ་དེ་དག་ལ་མཁོས་མེད། བདག་གིས་སྡུག་བསྔལ་གྱི་འདམ་དེ་ལས་དྲང་དགོས། དེ་དྲང་པ་ལ་རྫོགས་པའི་སངས་རྒྱས་མ་ཐོབ་ན་བྱ་ས་མེད་པས་གཞན་དོན་དུ་རྫོགས་པའི་སངས་རྒྱས་སུ་སྨོན་ལམ་འདེབས་ཏེ། འདི་ནི་སྨོན་པ་བྱང་ཆུབ་ཏུ་སེམས་བསྐྱེད་དོ། །དེ་ཡང་རྒྱུ་འབྲས་རྟེན་འབྲེལ་དུ་བལྟས་པས་ཡིན་ན། སྨོན་པ་དེ་ཡང་འཇུག་པའི་སེམས་བསྐྱེད་པ་དང་མི་ལྡན་ན་འཕེལ་བ་དང་། ཡངས་པ་དང་། དགོས་པ་ཐམས་ཅད་འགྲུབ་མི་ནུས་པར་ཤེས་ན་འཇུག་པའི་སེམས་བསྐྱེད་པ་ཡིན་ཏེ། ལམ་སྒྲོན་ལས། འཇུག་སེམས་བདག་ཉིད་སྡོམ་པ་མ་གཏོགས་པར། །ཡང་དག་སྨོན་པ་འཕེལ་བར་འགྱུར་མ་ཡིན། །རྫོགས་པའི་བྱང་ཆུབ་སྨོན་པ་འཕེལ་འདོད་པ། །དེ་ཕྱིར་འབད་པ་འདི་ནི་ངེས་པར་བླང་། ཞེས་སོ། །སེམས་དེ་ཡང་། ལམ་སྒྲོན་ལས། འཇུག་པའི་སེམས་ཀྱི་བདག་ཉིད་སྡོམ་གནས་པས། །ཚུལ་ཁྲིམས་བསླབ་པ་གསུམ་ལ་ལེགས་སློབ་པས། །ཚུལ་ཁྲིམས་བསླབ་པ་གསུམ་ལ་གུས་ཆེར་འགྱུར། །ཞེས་གསུངས་པས། དེ་ལ་བྱང་ཆུབ་སེམས་ཀྱི་སྡོམ་པ་ཞེས་ཀྱང་བརྗོད་དོ། །དེ་ནི་ཁྱི་དང་གདོལ་པ་དང་བྲན་གྱི་འདུ་ཤེས་དང་ལྡན་པ་གཡོ་སྒྱུ་དང་བྲལ་བའི་བྱང་ཆུབ་སེམས་དཔའ་དེ་ཚོགས་ལམ་པ་ཡིན་པས། ཉིན་དང་མཚན་དུ་ལུས་དང་ངག་དང་ཡིད་ཀྱི་བྱ་བ་ཐམས་ཅད་དོན་མེད་པར་མི་འགྱུར་རོ། །འདི་ལྟར་སེམས་དེས་ཟས་ཀྱི་ཚོད་རིག་པར་བྱ་བ་དང་། དབང་པོའི་སྒོ་སྡོམ་པ་དང་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་དང་། ཉིན་དང་མཚན་དུ་རྣལ་འབྱོར་ལ་བརྩོན་པར་བྱའོ། །དེ་ཡང་ཡན་ལག་དྲུག་པའི་ཚུལ་ཁྲིམས་ལ་སོགས་ནས་དགེ་སྦྱོང་བརྒྱད་ཀྱི་བར་ཉན་ཐོས་ཀྱི་རྟོགས་པ་དང་མཐུན་ལ། ཤེས་རབ་དང་སྙིང་རྗེའི་ཁྱད་པར་གྱི་འདི་གོང་དུ་འགྱུར་བ་ཡིན་ནོ། །སློབ་དཔོན་ཛེ་ཏ་རིས་དེ་ལྟར་ཐོས་པ་དང་བསམ་པ་ལ་གནས་པས་ཚོགས་ཀྱི་ལམ་ཕལ་པ་དང་ཁྱད་པར་ཅན་སྦྱོང་ངོ་། །དེ་ལས་གོང་དུ་སྒོམ་པ་ལས་བྱུང་བས་མོས་པས་སྤྱོད་པའི་ས་དག་ལ་དབང་པོ་དང་སྟོབས་ལ་སོགས་ཀྱི་བདེན་པ་དག་སྒོམ་པའི་ས་སྦྱང་བ་ནི་དཀོན་མཆོག་སྤྲིན་ལ་སོགས་པར་བལྟ་ཞིང་། རབ་ཏུ་དགའ་བ་ལ་སོགས་པའི་ས་སྦྱང་བ་ནི་ས་བཅུ་པའི་ལེའུ་ལས་བསྟན་ནོ། །ཞེས། ཐེག་པ་ཆེན་པོ་ནི་ཤིན་ཏུ་རྒྱས་པའི་སྡེ་སྣོད་ཡིན་པས་ཐམས་ཅད་བརྗོད་མི་ནུས། དེས་ན་སྙིང་པོ་ཙམ་བླངས་ཏེ། སྙིང་པོ་ནི་འཕགས་པ་ག་ཡ་གོ་རི་ལས་གཉིས་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་མདོར་བསྡུས་པ་སྟེ། འདི་ལྟ་སྟེ། ཐབས་དང་ཤེས་རབ་བོ། །ཞེས་སོ། །དེ་ལ་ཐབས་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དང་། ཚད་མེད་པ་དག་བསྡུ་བའི་དངོས་པོ་ལ་སོགས་པའི་དབྱེ་བས་ཕྱེ་བ་རྣམས་དང་། ཤེས་རབ་ནི་ཐབས་དེ་ཉིད་ཕྱིན་ཅི་མ་ལོག་པར་ཡོངས་སུ་དཔྱོད་པའི་རྒྱུའོ། །དེས་ཀྱང་ཐབས་ཡང་དག་པར་བརྟགས་ནས་ཕྱིན་ཅི་མ་ལོག་པས་བདག་དང་གཞན་གྱི་དོན་ཇི་ལྟ་བ་བཞིན་ཉམས་སུ་ལེན་པས་སྔགས་ཀྱིས་ཟིན་པའི་དུག་སྤྱོད་པ་དང་འདྲ་བར་ཀུན་ནས་ཉོན་མོངས་པར་མི་འགྱུར་རོ། །དེ་ཡང་མདོ་དེ་ཉིད་ལས། ཐབས་ནི་བསྡུ་བ་ཤེས་པའོ། །ཤེས་རབ་ནི་ཡོངས་སུ་དཔྱོད་པ་ཤེས་པའོ་ཞེས་གསུངས། འཕགས་པ་དད་པའི་སྟོབས་བསྐྱེད་པ་ལས། ཐབས་ལ་མཁས་པ་གང་ཞེ་ན་གང་ཆོས་ཐམས་ཅད་ཀྱི་བསྡུ་བ་ཤེས་པ་ལ་མཁས་པའོ། །འདི་དག་ལ་ནི་ས་ལ་གནས་པས་ཀྱང་བརྟེན་པར་བྱ་ཡི། ཤེས་རབ་ཙམ་འབའ་ཞིག་གིས་ནི་མ་ཡིན་ནོ། །གང་གི་ཕྱིར་ས་བཅུ་པ་ལ་སོགས་པའི་མདོ་ལས་ཕ་རོལ་ཏུ་ཕྱིན་པ་ལྷག་མ་རྣམས་ལ་ཡང་མི་སྤྱོད་པ་མ་ཡིན་ནོ་ཞེས་གསུངས་པས་སོ། །སོ་སོ་སྐྱེ་བོའི་དབང་དུ་མཛད་ནས། འཕགས་པ་ག་ཡ་གོ་རིའི་མདོ་ལས། ཐབས་དང་བྲལ་བའི་ཤེས་རབ་ནི་འཆིང་བའོ། །ཤེས་རབ་དང་བྲལ་བའི་ཐབས་ཀྱང་འཆིང་བའོ། །ཞེས་གསུངས། དེ་བཞིན་ལམ་སྒྲོན་ལས། ཐབས་དང་བྲལ་བའི་ཤེས་རབ་དང་། །ཤེས་རབ་བྲལ་བའི་ཐབས་དག་ཀྱང་། །གང་ཕྱིར་འཆིང་བ་ཞེས་གསུངས་པས། །དེ་ཕྱིར་གཉིས་ཀ་སྤང་མི་བྱ། །ཞེས་དང་། ཤེས་རབ་ཕ་རོལ་ཕྱིན་སྤང་པའི། །སྦྱིན་པའི་ཕ་རོལ་ཕྱིན་ལ་སོགས། །དགེ་བའི་ཚོགས་རྣམས་ཐམས་ཅད་དག །རྒྱལ་བ་རྣམས་ཀྱིས་ཐབས་སུ་བཤད། །ཐབས་སྒོམ་དབང་གི་བདག་ཉིད་ཀྱིས། །གང་ཞིག་ཤེས་རབ་རྣམ་སྒོམ་པ། །དེས་ནི་བྱང་ཆུབ་མྱུར་དུ་ཐོབ། །བདག་མེད་གཅིག་པོ་བསྒོམས་པས་མིན། །ཞེས་པས། དེ་གཉིས་ལས་ཀྱང་དང་པོར་ཐབས་དང་། ཕྱིས་ཤེས་རབ་སྒོམ་པ་བཤད་དོ། །ཐབས་དེའི་གཙོ་བོ་ཡང་སྙིང་རྗེ་ཆེན་པོ་ཡིན་ལ། དེ་ཡང་བྱམས་པ་རྒྱུད་ལ་ཕྱིན་ཅི་མ་ལོག་པ་ཅིག་སྐྱེས་ན་འབྱུང་བས་བྱམས་པ་ཚད་མེད་པ་ཡང་ཡང་བསྒོམ་པར་བྱའོ། །དེ་འབྱོངས་པའི་ཚད་ཀྱང་། བདག་གི་བདེ་ལ་གཞན་སྦྱོར་ནུས། །བྱམས་པ་ཚད་དུ་ཕྱིན་པ་ལགས། །མས་བུ་ལ་རང་གི་ཕུན་སུམ་ཚོགས་པ་ཐམས་ཅད་ལ་འཕངས་པ་མེད་པར་སྟེར་བ་ལྟ་བུའོ། །དེ་ནས་སྙིང་རྗེ་བསྒོམ་དེ་འབྱོངས་པའི་ཚད་ནི། གཞན་གྱི་སྡུག་བསྔལ་བདག་ལེན་ནུས། །སྙིང་རྗེ་ཚད་དུ་ཕྱིན་པ་ལགས། དེ་ཡང་མས་བུའི་ཕྱིར་རང་གླུད་དུ་གཏོང་ནུས་པ་ལྟ་བུའོ། །དེ་ནས་བྱང་ཆུབ་ཀྱི་སེམས་སྒོམ་སྟེ། དེ་ཡང་བདག་དང་གཞན་མཉམ་པར་སྒོམ་པ་དང་། བདག་བས་གཞན་གཅེས་པར་དང་། བདག་གཞན་མ་གྲུབ་པར་སྒོམ་པའི་སྒོ་གསུམ་གྱིས་སོ། །དེ་འབྱོངས་པའི་ཚད་ཀྱང་། གནོད་སྐྱེལ་ཀྱིས་བློ་མི་སྨས་ན། །བྱང་སེམས་ཚད་དུ་ཕྱིན་པ་ལགས། །བུ་ཆུང་ངུས་མར་བརྡེགས་ཀྱང་དེ་ལ་བློ་མི་སྨས་པའི་ཁར་དགའ་དགར་བྱེད་པ་ལྟ་བུའོ། །འདིར་བདག་ནི་ལས་འབྲས་ཀྱི་རྟེན་དུ་རུང་བའི་བདག་དེ་ཡིན་ལ། དེ་ཡང་འཇུག་པར། གང་ཕྱིར་ཐུབ་པས་བདག་དེ་ས་ཆུ་མེ། །རླུང་དང་ནམ་མཁའ་རྣམ་ཤེས་ཞེས་བྱ་བ། །ཁམས་དྲུག་དང་ནི་མིག་སོགས་རེག་པ་ཡི། །རྟེན་དྲུག་དག་ལ་བརྟེན་ནས་ཉེར་བསྟན་ཞིང་། །སེམས་དང་སེམས་བྱུང་ཆོས་རྣམས་ཉེར་བཟུང་ནས། །དེས་གསུངས་ཞེས་པས། དེ་མེད་པར་གཏན་ལ་འབེབས་པའི་ཚེ། དེ་ཕྱིར་ངར་འཛིན་རྟེན་ནི་དངོས་པོ་མིན། །ཕུང་ལས་གཞན་མིན་ཕུང་པོའི་ངོ་བོ་མིན། །ཕུང་པོར་རྟེན་མིན་འདི་ནི་དེ་ལྡན་མིན། །འདི་ནི་ཕུང་པོ་རྣམས་བརྟེན་འགྲུབ་པར་གསུངས། །ཞེས་ལྔའམ། ཤིང་རྟ་རང་ཡན་ལག་ལས་གཞན་འདོད་མིན། །གཞན་མིན་མ་ཡིན་དེ་ལྡན་ཡང་མིན་ཞིང་། །ཡན་ལག་མ་ཡིན་ཡན་ལག་དག་དེར་མིན། །འདུས་པ་ཙམ་མིན་དབྱིབས་མིན་དེ་བཞིན་ནོ། །ཞེས་བཤད་པ་བདུན་གྱིས་བདག་དེ་མེད་པར་ངེས་པ་རྙེད་ནུས་པ་ཡིན་ནོ། །དེ་ལྟར་ངར་འཛིན་པའི་རྟེན་ཡུལ་བདག་དེ་མ་གྲུབ་ན་བདག་འཛིན་འཇིག དེ་ཞིག་ན་དེས་ཕྱི་ནས་བཞག་པའི་གཞན་ག་ལ་འགྲུབ་སྟེ་གཞན་ཞེས་པའི་ཐ་སྙད་བདག་འཛིན་ལ་ལྟོས་ནས་བཞག་པའི་ཕྱིར་རོ། །འདི་ཙམ་ཆོས་ཀྱི་བདག་མེད་བསྡུས་པར་བསྟན་པར་སྟེ་གཞན་དེ་གཟུང་འཛིན་དུ་མར་རྟོག་པས། རྟོག་པ་དེ་བཟློག་པའི་ཕྱིར། ཤེས་རབ་སྒོམ་པ་ལ་འཇུག་པ་ཡིན་ནོ། །གཉིས་པ་ཤེས་རབ་སྒོམ་པ་ནི། ཕྱི་རོལ་གྱི་དོན་བཀག་ནས་སེམས་ཙམ་དུ་བསྟན། སེམས་ཀྱང་མེད་པར་བསྟན་ནས་གཉིས་མེད་ཀྱི་ཤེས་པ་རང་རིག་ཙམ། དེ་ཡང་མཐའ་བྲལ་དབུ་མར་གཏན་ལ་ཕབ་ནས་སྣང་བ་མེད་པའི་ཏིང་ངེ་འཛིན་མངོན་དུ་བྱ་བའི་སྒོ་གསུམ་དུ་འདུ་སྟེ། མདོ་སྡེ་རྒྱན་ལས། སེམས་ལས་གཞན་མེད་པར་ནི་བློས་རིག་ན། །དེ་ནས་སེམས་ཀྱང་མེད་པ་ཉིད་དུ་རྟོགས། །བློ་དང་ལྡན་པས་གཉིས་པོ་མེད་རིག་ནས། །དེ་མི་ལྡན་པ་ཆོས་ཀྱི་དབྱིངས་ལ་གནས། །ཞེས་གསུངས། དེ་བཞིན་སྟོན་པ་ཉིད་ཀྱིས་ལང་ཀར་གཤེགས་པ་ལས། སེམས་ཙམ་ལ་ནི་བརྟེན་ནས་སུ། །ཕྱི་རོལ་དོན་ལ་མི་རྟོག་གོ །དེ་བཞིན་ཉིད་ལ་གནས་ནས་སུ། །སེམས་ཙམ་ལས་ཀྱང་འདའ་བར་བྱ། །སེམས་ཙམ་ལས་ནི་འདས་ནས་སུ། །སྣང་བ་མེད་ལ་གནས་པར་བྱ། །སྣང་མེད་གནས་པའི་རྣལ་འབྱོར་པ། །དེ་ཡིས་ཐེག་པ་ཆེན་པོ་མཐོང་། །ཞེས་གསུངས་སོ། །དེའི་དང་པོ་གཉིས་ཀྱིས་རྣམ་བདེན། དེ་ནས་གཉིས་ནི་རྣམ་རྫུན། ལྷག་མས་དབུ་མར་བཤད་པ་ཡིན་ནོ། །དང་པོ་བཟོད་པ་དང་གཉིས་པ་ཆོས་མཆོག་པའི་རྟོགས་པ་སྔོན་གྱི་མཁས་པ་རྣམས་ཀྱིས་མགྲིན་གཅིག་པར་བཤད་པས། གཞན་སྟོང་དགག་པའི་ངལ་བ་རྣམས་དོན་མེད་པ་དང་། ཆོས་མཆོག་གི་ཕྱི་ལོགས་སུ་མཐོང་ལམ་སྐྱེ། དེ་ནས་ཐམས་ཅད་དབུ་མ་རབ་ཏུ་མི་གནས་པར་སོང་བ་སྔོན་གྱི་མཁས་པ་རྣམས་མགྲིན་གཅིག་པས། རབ་ཏུ་མི་གནས་པའམ་རང་སྟོང་དབུ་མ་དགག་པར་སེམས་པ་རྣམས་ཀྱང་རང་གི་བློ་གྲོས་མུན་པར་འཇུག་པ་ཙམ་མོ། །དེས་ན་སེམས་ཙམ་དང་། དེའི་དབྱེ་བ་ཇོ་བོ་རྗེ་ལྷ་གཅིག་གིས། གཟུང་དང་འཛིན་པ་ལས་གྲོལ་བའི། །རྣམ་ཤེས་དམ་པའི་དོན་དུ་ཡོད། །ཅེས་ཚུལ་གཉིས་བཤད་པ་ནི། དེ་དག་གི་ཤེས་རབ་ཡིན་ལ། དེ་སྒོམ་པའི་ཚུལ་ཀླུའི་བཤེས་གཉེན་གྱིས། རྫོགས་པའི་བྱང་ཆུབ་འདོད་རྣམས་ཀྱི། །མི་རྟོག་ཡེ་ཤེས་བསྐྱེད་པའི་ཕྱིར། །དེ་བས་རྣམ་པར་རིག་ཙམ་དུ། །སྒོམ་པ་རྟག་ཏུ་སྦྱར་བ་བྱ། །དེའི་འགྲེལ་པ་ཡེ་ཤེས་ཟླ་བས་མཛད་པར། གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དེ་དག་གིས་རྣམ་པར་མི་རྟོག་པའི་ཡེ་ཤེས་ཡོངས་སུ་བསྒྲུབ་པའི་ཕྱིར་འདི་ཐམས་ཅད་ནི་རྣམ་པར་རིག་པ་ཙམ་མོ་ཞེས་རྣམ་པར་རིག་པ་ཙམ་ཉིད་དུ་སྒོམ་པ་ལ་རྟག་ཏུ་སྦྱར་བར་བྱའོ། །དེ་ལྟར་རྣམ་པར་རིག་པར་སྣང་བ་མཐོང་བ་སྐྱེས་ཏེ། ཐམས་ཅད་ལ་དངོས་པོའི་ངོ་བོ་མི་མཐོང་ན་གཟུང་བ་མེད་པར་འཛིན་པ་ཡང་མེད་དོ། །ཞེས་རྣམ་པར་རིག་པ་ཙམ་ཡང་ཡང་དག་པར་རྗེས་སུ་མི་མཐོང་སྟེ། དེའི་ཕྱིར་གཟུང་བ་དང་འཛིན་པར་རྣམ་པར་རྟོག་པ་དང་བྲལ་བས་རྣམ་པར་མི་རྟོག་པའི་ཡེ་ཤེས་ལྷུན་གྱིས་གྲུབ་པ་ཉིད་དུ་འབྱུང་བར་འགྱུར་ཏེ། དེའི་ཕྱིར་སྒོམ་པ་རྟག་ཏུ་སྦྱར་བར་བྱ། ཞེས་བྱ་བ་སྨོས་ཏེ། འདི་ནི་ཕན་ཡོན་ཡིན་པས་སྒྲིམས་ཤིག་ཅེས་སྟོན་ཏོ། །དེ་ལྟར་སྒོམ་པ་ལ་མངོན་པར་བརྩོན་པའི་བློ་གྲོས་དང་ལྡན་པ་ནི་ས་བཅུར་རིམ་གྱིས་རྣམ་པར་འཇུག་པས་མི་རྟོག་པའི་ངོ་བོ་ཉིད་མཐོང་སྟེ། གཟུང་བ་དང་འཛིན་པའི་བདག་ཉིད་གཉིས་པོ་གང་ཡིན་པ་དེ་ཡང་གཉིས་མེད་ཀྱི་ངོ་བོ་ཉིད་དུ་རྟོག་ཅིང་། འདི་ན་རྟག་པར་བྱ་བ་ཡང་མེད་ལ་རྟོག་པ་ཡང་མེད་དེ་འདི་ཐམས་ཅད་མེད་པ་ལ་སྒྲོ་བཏགས་པ་ཡིན་པས། འདི་ཀུན་རྨི་ལམ་དང་འདྲའོ། །ཞེས་ངེས་པར་བྱེད་དོ། །དེའི་ཕྱིར་རྣམ་རྟོག་མི་རྟོག་བདག་ཉིད་ཡིན། །གཉིས་དང་གཉིས་མེད་བདག་ཉིད་དེ། །འདི་དག་ཐམས་ཅད་རྨི་ལམ་བཞིན། །འདི་ལ་བརྟག་བྱ་རྟོག་བྱེད་མེད། །ཅེས་བྱ་བ་སྨོས་ཏེ་དེ་ནི་འདི་སྐད་དུ་ཕྱིན་ཅི་ལོག་ཏུ་འགྱུར་བ་མ་གཏོགས་པར་ཆོས་ཕྲ་རབ་ཙམ་ཡང་མེད་དེ། དེ་བས་ན་ཕྱིན་ཅི་ལོག་སྤང་པ་ཙམ་ཞིག་བྱ་བར་ཟད་དོ། །ཞེས་བསྟན་པར་འགྱུར་རོ། །དངོས་པོ་གང་ཡང་བསྣན་མེད་ཅིང་། །བསལ་བ་ཡང་མེད་དེ་ཡི་ཕྱིར། །ཞེས་བྱ་བ་དེ་ཉིད་བསྒྲུབ་པར་བྱེད་དོ། །འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་བྱ་བ་སྟེ་དེའི་ཕྱིར། ཆོས་ཀྱི་རང་གི་ངོ་བོ་ཉིད། །དེ་བཞིན་ཉིད་ཙམ་མཐོང་བས་གྲོལ། །ཞེས་བྱ་བ་སྨོས་སོ། །ཞེས་གསུངས་པ་འདི་ཡང་། སྔར་བཤད་པ་བཞིན་ཞི་གནས་བསྒྲུབས། དེ་ནས་ལྷག་མཐོང་སྐྱེས་པའི་ཞི་ལྷག་ཟུང་འབྲེལ་གྱིས་རྣམ་པར་རིག་པ་ཙམ་དུ་གཏན་ལ་དབབ་པ་ཡིན་ནོ། །དབུ་མ་པས་ཀྱང་ལང་ཀར་གཤེགས་པའི་ལུང་དེ་དང་མཐུན་པར། ཐོག་མར་ཕྱི་རོལ་གྱི་དོན་མེད་པར་སེམས་སྣང་དུ་གཏན་ལ་ཕབ་པ་སོགས་ནི་འདྲ་ལ། དེར་དོན་མེད་ལ་དེར་སྣང་བ་བདེན་པ་དང་གཉིས་སུ་མེད་པར་ཁས་མི་ལེན་པས་སྔ་མ་ལས་ཁྱད་ཞུགས་སོ། །དེས་ན་ལུགས་འདི་བསྒོམ་བྱའི་ཤེས་རབ་ནི་ལམ་སྒྲོན་ལས། ཕུང་པོ་ཁམས་དང་སྐྱེ་མཆེད་རྣམས། །སྐྱེ་བ་མེད་པར་རྟོགས་གྱུར་པའི། །རང་བཞིན་སྟོང་ཉིད་ཤེས་པ་ནི། །ཤེས་རབ་ཅེས་ནི་ཡོངས་སུ་བཤད། །ཅེས་གསུངས། དེ་སྒོམ་ཁྱེར་ཡང་དེ་ཉིད་དུ། །དེ་བས་ཆོས་རྣམས་མ་ལུས་པའི། །རང་བཞིན་དག་ནི་མི་དམིགས་པས། །བདག་མེད་པ་ནི་སྒོམ་གང་ཡིན། །དེ་ཉིད་ཤེས་རབ་སྒོམ་པ་ཡིན། །ཤེས་རབ་ཀྱིས་ནི་ཆོས་རྣམས་ཀུན། །གང་གི་རང་བཞིན་མ་མཐོང་ཞིང་། །ཤེས་རབ་དེ་ཉིད་རིག་བཤད་པ། །རྣམ་རྟོག་མེད་པར་དེ་བསྒོམ་བྱ། །རྣམ་རྟོག་ལས་བྱུང་སྲིད་པ་འདི། །རྣམ་པར་རྟོག་པའི་བདག་ཉིད་དེ། །དེ་ཕྱིར་མ་ལུས་རྟོག་སྤངས་པ། །མྱ་ངན་འདས་པ་མཆོག་ཡིན་ནོ། །ཞེས་འཁོར་བ་ཐམས་ཅད་རྣམ་རྟོག་ཏུ་བཤད་པ་དང་། དེ་སྤངས་པ་ཐར་པའམ་མྱ་ངན་ལས་འདས་པར་བཤད་དོ། །སྒོམ་བདག་མེད་པ་སྒོམ་ཚུལ་རྒྱས་པར་ཇོ་བོ་རྗེ་ལྷ་གཅིག་ཉིད་ཀྱིས་དབུ་མའི་མན་ངག་ཏུ་རྒྱས་པར་བསྟན་པ་ནི། ཐེག་པ་ཆེན་པོའི་དབུ་མའི་མན་ངག་ནི་འདི་ཡིན་ཏེ། ཀུན་རྫོབ་ཏུ་ཆོས་ཐམས་ཅད་ཚུར་རོལ་མཐོང་བའི་ངོར་བྱས་ནས་རྒྱུ་འབྲས་ལ་སོགས་པ་རྣམ་པར་བཞག་པ་ཐམས་ཅད་ཇི་ལྟར་སྣང་བ་བཞིན་དུ་བདེན་པ་ཡིན་ལ་དོན་དམ་པའམ་ཡང་དག་པར་ཀུན་རྫོབ་ཇི་ལྟར་སྣང་བ་དེ་ཁོ་ན་གཏན་ཚིགས་ཆེན་པོ་རྣམས་ཀྱིས་གཞིགས་ཅིང་བཙལ་ན་སྐྲའི་རྩེ་མོ་བརྒྱར་གཤགས་པའི་ཚད་ཙམ་ཡང་གཟུང་དུ་མེད་དོ་ཞེས་ངེས་པར་ཁོང་དུ་ཆུད་པར་བྱའོ། །སྟན་བདེ་བ་ལ་སྐྱིལ་མོ་ཀྲུང་བཅས་ཏེ་འདུག་ལ་འདི་ལྟར་རེ་ཞིག་དངོས་པོ་ནི་གཉིས་ཏེ། གཟུགས་ཅན་དང་གཟུགས་ཅན་མ་ཡིན་པའོ། །དེ་ལ་གཟུགས་ཅན་རྣམས་ནི་རྡུལ་ཕྲ་རབ་འདུས་པ་ཡིན་ལ། དེ་ཡང་ཕྱོགས་ཆའི་དབྱེ་བས་ཕྱེ་ཞིང་གཞིགས་ན་ཤིན་ཏུ་ཕྲ་བ་ཡང་ལུས་པ་མེད་ཅིང་སྣང་བ་ཡང་མེད་དོ། གཟུགས་ཅན་མ་ཡིན་པ་ནི་སེམས་ཡིན་ལ། དེ་ཡང་དེ་ལྟར་འདས་པའི་སེམས་ནི་འགགས་ཤིང་ཞིག མ་འོངས་པའི་སེམས་ནི་མ་སྐྱེས་ཤིང་མ་བྱུང་། ད་ལྟར་གྱི་སེམས་ནི་འདི་ལྟར་ཡང་ཤིན་ཏུ་བརྟག་དཀའ་སྟེ། ཁ་དོག་མེད་ཅིང་དབྱིབས་དང་བྲལ་བ། ནམ་མཁའ་དང་འདྲ་བས་མ་གྲུབ་པའམ། ཡང་གཅིག་དང་དུ་མ་དང་བྲལ་བས་སམ། ཡང་ན་མ་སྐྱེས་པས་སམ། ཡང་ན་དེ་རང་བཞིན་གྱིས་འོད་གསལ་བ་ལ་སོགས་པ་རིག་པའི་མཚོན་གྱིས་དཔྱད་ཅིང་གཞིགས་ན་མ་གྲུབ་པར་རྟོགས་སོ། །དེ་ལྟར་གཉིས་པོ་ཅིའི་ངོ་བོར་ཡང་མི་གྲུབ་ཅིང་མེད་ཙ་ན་སོ་སོར་རྟོག་པའི་ཤེས་རབ་དེ་ཉིད་ཀྱང་མ་གྲུབ་སྟེ། དཔེར་ན་ཤིང་གཉིས་ཕན་ཚུན་དྲུད་པས་མེ་བྱུང་བའི་རྐྱེན་གྱིས་ཤིང་གཉིས་པོ་ཉིད་ཚིག་ཅིང་མེད་པའི་རྗེས་ལ་གང་གིས་སྲེག་པར་བྱེད་པའི་མེ་དེ་ཉིད་ཀྱང་རང་ཞི་བ་དེ་བཞིན་དུ་རང་དང་སྤྱིའི་མཚན་ཉིད་ཀྱི་ཆོས་ཐམས་ཅད་མེད་པར་གྲུབ་ཙ་ན་ཤེས་རབ་ཉིད་ཀྱང་སྣང་བ་མེད་ཅིང་འོད་གསལ་བ་ཅིའི་ངོར་ཡང་མ་གྲུབ་པས་བྱིང་བ་དང་རྒོད་པའི་སྐྱོན་དུ་འགྱུར་བ་ཐམས་ཅད་བསལ་ཏེ། བར་སྐབས་དེར་ཤེས་པ་ཅིར་ཡང་མི་རྟོག ཅིར་ཡང་མི་འཛིན། དྲན་པ་དང་ཡིད་ལ་བྱེད་པ་ཐམས་ཅད་སྤངས་ཏེ། ཇི་སྲིད་དུ་མཚན་མ་འམ་རྣམ་པར་རྟོག་པའི་དགྲའམ། ཆོམ་རྐུན་མ་ལངས་ཀྱི་བར་དུ་དེ་ལྟ་ལ་ཤེས་པ་གནས་པར་བྱའོ། །གང་གི་ཚེ་ལྡང་བར་འདོད་ན་དལ་བུས་སྐྱིལ་ཀྲུང་བཤིག་ལངས་ཏེ། སྒྱུ་མ་ལྟ་བུའི་ཡིད་ཀྱིས་ལུས་དང་ངག་དང་ཡིད་ཀྱི་དགེ་བ་ཅི་ནུས་ཀྱིས་བྱའོ། །དེ་ལྟར་གུས་པ་དང་ཡུན་རིང་པ་དང་རྒྱུན་མ་ཆད་པར་བསྒྲུབས་ན་སྐལ་བ་དང་ལྡན་པ་རྣམས་ཀྱིས་ཚེ་འདི་ཉིད་ལ་བདེན་པ་མཐོང་བར་འགྱུར་ཏེ། ཆོས་ཐམས་ཅད་ནམ་མཁའི་དཀྱིལ་ལྟ་བུར་འབད་པ་དང་རྩོལ་བ་མེད་ཅིང་རང་གིས་ངང་གིས་གྲུབ་པ་མངོན་སུམ་དུ་བྱེད་དོ། །དེའི་རྗེས་ལ་ཐོབ་པས་ནི་ཆོས་ཐམས་ཅད་སྒྱུ་མ་ལྟ་བུར་ལ་སོགས་པར་ཤེས་སོ། །གང་གི་ཚེ་རྡོ་རྗེ་ལྟ་བུའི་ཏིང་ངེ་འཛིན་མངོན་དུ་མཛད་ཕན་ཆད་ནི་རྗེས་ལ་ཐོབ་པ་མི་མངའ་སྟེ། དུས་ཐམས་ཅད་དུ་མཉམ་པར་བཞག་པའོ། །དེ་ལྟ་མ་ཡིན་ན་བྱང་ཆུབ་སེམས་དཔའ་དང་ཁྱད་པར་ཅི་ཡོད་ཅེས་བྱ་བ་ལ་སོགས་པའི་རིགས་པ་དང་ལུང་འདིར་མི་བརྗོད་དོ། །གཞན་གྱི་དོན་དུ་བསྐལ་པ་གྲངས་མེད་པར་ཚོགས་བསགས་པ་དང་། སྨོན་ལམ་བཏབ་པའི་མཐུས་གདུལ་བྱ་རྣམས་ཇི་ལྟར་འདོད་པ་བཞིན་དུ་འགྱུར་རོ། །ལུང་དང་རིགས་པ་ཤིན་ཏུ་མང་མོད་ཀྱི་འདིར་མ་སྤྲོས། །ཞེས་གསུངས་པ། དབུ་མ་ཐལ་འགྱུར་བའི་ལུགས་ཐུན་མོང་མ་ཡིན་པ་རིམ་གྱིས་བཀྲི་ཚུལ་ལམ་སྒྲོན་ནས་ཇི་ལྟར་བཤད་པ་ནི་དེ་ཡིན་ནོ། །ཐལ་འགྱུར་བ་དང་རང་རྒྱུད་པའི་སྒོམ་ལུགས་ལ་ཁྱད་པར་ཆེན་པོ་ཡོད་པ་སྐད་བྱེད་པའང་རིགས་པ་མ་ཡིན་ཏེ། ཀ་མ་ལ་ཤཱི་ལས། དེ་བཞིན་དུ་ཆོས་ཐམས་ཅད་རང་གི་བློས་བཏགས་པ་ལས་གུད་ན་མེད་པར་ཁོང་དུ་ཆུད་པར་བྱའོ། །དེའི་ཕྱིར་ཆོས་ཐམས་ཅད་དོན་དམ་པར་རང་བཞིན་མེད་པར་བསམ་མོ། །རང་བཞིན་གང་ཡང་མེད་དོ་སྙམ་པ་དེ་ཡང་། ཡང་དག་པའི་ཤེས་རབ་ཀྱིས་སྤངས་ཏེ་ཡོད་མེད་ལས་འདས་པའི་ཡུལ་དེ་ལྟ་བུ་ལ་ཤེས་པ་ཡང་ཡོད་མེད་དང་བྲལ་བ་དེ་ལྟ་བུས་དམིགས་པ་མེད་པར་བསྒོམ་པར་བྱའོ། །དེ་ལྟ་བས་ན་བར་བར་དུ་སེམས་ཀྱིས་སེམས་ལ་བརྟགས་ཏེ་དམིགས་པ་ལ་སེམས་འཇུག་ན་ཡང་དེ་བཞིན་དུ་ངང་གིས་འཇུག་པ་མངོན་པར་འདུ་བྱ་བ་མེད་པ་དེ་ཁོ་ན་ཉིད་ལ་ཤིན་ཏུ་གསལ་བར་གནས་པར་བྱའོ། །དེས་སེམས་ཀྱི་རྒྱུད་མི་གཡེལ་བར་བྱའོ། །ཅི་སྟེ་སེམས་གཡེལ་བར་གྱུར་ན། འདི་ལྟར་དངོས་པོ་ཀུན་ནི་གཟུང་བ་དང་འཛིན་པ་སྟེ་གཟུང་བའི་དངོས་པོ་རྡུལ་ཕྲ་རབ་ཏུ་བློས་བཤིག་སྟེ། དེ་ཉིད་ཀྱང་སོ་སོར་ཕྱེ་ན་དངོས་པོ་མེད་དོ། །འཛིན་པ་ཡང་དེ་ལས་གུད་ན་མེད་དེ་དེའི་རྣམ་པར་སྣང་བའི་ཕྱིར་རོ། །དེས་གཡེང་བ་ཞི་བར་བྱས་ནས་གོང་མ་ཉིད་ལ་གནས་པར་བྱའོ། །ཞེས་ཚུལ་དེ་སྒོམ་རིམ་དུ་ཡང་གཏན་ལ་ལེགས་པར་ཕབ་པ་མཐུན་པས་སོ། །སྒོམ་རིམ་འབྲིང་པོ་ལས། དེ་དེ་ལྟར་ཤེས་རབ་ཀྱི་གཟུགས་ལ་སོགས་པའི་དངོས་པོའི་ངོ་བོ་ཉིད་ཡང་དག་པ་ཇི་ལྟ་བ་བཞིན་དུ་བརྟགས་ནས་བསམ་གཏན་བྱེད་ཀྱི། གཟུགས་ལ་སོགས་པ་ལ་གནས་ནས་བསམ་གཏན་མི་བྱེད། འཇིག་རྟེན་འདི་དང་ཕ་རོལ་གྱི་བར་ལ་གནས་ནས་བསམ་གཏན་མི་བྱེད་དོ། །གཟུགས་ལ་སོགས་པ་དེ་དག་མི་དམིགས་པའི་ཕྱིར་རོ། །དེ་ལྟ་བས་ན་མི་གནས་པའི་བསམ་གཏན་ཞེས་བྱའོ། །ཤེས་རབ་ཀྱི་དངོས་པོ་མཐའ་དག་གི་ངོ་བོ་ཉིད་ལ་སོ་སོར་བརྟགས་ནས་གང་གི་ཕྱིར་མི་དམིགས་པར་བསམ་གཏན་བྱེད་པ་དེའི་ཕྱིར་ཤེས་རབ་མཆོག་གི་བསམ་གཏན་པ་ཞེས་བྱ་སྟེ། འཕགས་པ་ནམ་མཁའ་མཛོད་དང་། འཕགས་པ་གཙུག་ན་རིན་ཆེན་ལ་སོགས་པར་བསྟན་པ་བཞིན་ནོ་ཞེས་པས་སོ། །ཐུན་གཅིག་ལ་ཐབས་ཤེས་སྒོམ་ཚུལ་ནི། བློ་གྲོས་མི་ཟད་པའི་མདོ་འགྲེལ་ལས། སྙིང་རྗེ་ཆེན་པོའི་དམིགས་པ་ལ་སེམས་འདོད་ཆགས་པ་ནི་ཁམས་དང་འགྲོ་བ་དང་སྐྱེ་གནས་ཀྱིས་བསྡུས་པའི་སེམས་ཅན་ཐམས་ཅད་ནི་སྡུག་བསྔལ་རྣམ་པ་གསུམ་གྱིས་ཇི་ལྟར་མཐུན་པ་བཞིན་དུ་སྡུག་བསྔལ་བ་ཡིན་ནོ་སྙམ་དུ་སེམས་མངོན་པར་འདུ་བྱེད་པ་དེ་ནི་ཐབས་སོ། །དེའི་འོག་ཏུ་སེམས་ཅན་དང་སྡུག་བསྔལ་ལ་སོགས་པའི་མཚན་མ་ཡང་རབ་ཏུ་སྤང་ཏེ། རྟོག་པ་ཞི་བ་དང་། སྤྱོད་པ་རབ་ཏུ་ཞི་བར་བསམ་གཏན་བྱེད་པ་འདི་ནི་ཤེས་རབ་སྟེ་ཞེས་སོ། །གཉིས་པ་གོམས་པར་བྱ་བའི་ཕྱིར་ཤེས་རབ་སྔར་བསྒོམས་ནས་ཐབས་ཕྱི་ནས་སྒོམ་པའི་ཚུལ་ནི། ཇོ་བོ་རྗེ་ལྷ་གཅིག་ཉིད་ཀྱིས། དྲན་པ་གཅིག་པའི་མན་ངག་ཞེས་པ་འདི་གསུངས་ཏེ། འདིར་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནས་ཉེ་བར་བཟུང་སྟེ་དབང་བསྐུར་ཆེན་པོ་མ་ཐོབ་ཀྱི་བར་དེ་སྲིད་དུ་དེའི་བྱ་བ་ནི་གཉིས་ཏེ། ཤེས་རབ་ཀྱི་བྱ་བ་དང་ཐབས་ཀྱི་བྱ་བའོ། །དེ་ལ་ཤེས་རབ་ནི་ཆོས་ཐམས་ཅད་གདོད་མ་ནས་མ་སྐྱེས་པ་དང་པོ་ཉིད་ནས་ཆོས་ཀྱི་དབྱིངས་ཉིད་དུ་ཤེས་པའོ། །དེའི་བྱ་བ་ནི་ལས་དང་པོ་པ་དེ་ཉིད་ནས་ཇི་སྲིད་དབང་བསྐུར་བ་མ་ཐོབ་ཀྱི་བར་དེ་སྲིད་དུ་ཉིན་མཚན་དུས་རྟག་ཏུ་དེ་ཉིད་སྒོམ་པར་བྱའོ། །ཐབས་ནི་སེམས་ཅན་མི་གཏོང་བའི་བྱང་ཆུབ་ཀྱི་སེམས་སོ། །དེའི་བྱ་བ་ནི་ལུས་དང་ངག་དང་ཡིད་ཀྱི་བྱ་བ་ཐམས་ཅད་སེམས་ཅན་གྱི་ཆེད་མ་ཡིན་པ་ཅི་ཡང་མེད་དེ། དངོས་སམ་བརྒྱུད་པས་སོ། །འདིར་ཡང་སེམས་ཅན་ལ་དམིགས་པ་དང་། དམིགས་པ་མེད་པའི་རིམ་པའོ། །དེའི་རིམ་པ་ནི་འདི་ཡིན་ཏེ་མི་མཁས་པ་རབ་རིབ་ཅན་དང་། མཁས་པ་རབ་རིབ་དྭངས་པའོ། །གང་གི་ཚེ་ཆོས་ཀྱི་སྐུ་མངོན་སུམ་དུ་མཛད་ཕན་ཆད་ཤེས་རབ་མངའ་སྟེ་ཡེ་ཤེས་ཉིད་དུ་གྱུར་ནས་གནས་སོ། །ཤེས་རབ་ཀྱི་བྱ་བ་ནི་མི་མངའ་སྟེ་གོམས་ནས་མཐར་ཕྱིན་པའི་ཕྱིར་རོ། །ཐབས་དེའི་བྱ་བ་ནི་དམིགས་པ་མེད་པར་རང་གི་ངང་གི་ལྷུན་གྱིས་གྲུབ་པ་དང་། འབད་པ་དང་རྩོལ་བ་མེད་པར་འབྱུང་ངོ་། །བྱང་ཆུབ་སེམས་དཔའ་ལས་དང་པོ་པའི་གང་ཟག་གིས་བདག་ཡོད་པས་སེམས་ཅན་ཞེས་བཏགས་ཤིང་། དེས་སྡུག་བསྔལ་བ་ལ་སྙིང་རྗེ་སྐྱེད་དོ། །དེ་ནས་གོམས་ནས་ནི་སེམས་ཅན་ཞེས་བྱ་བ་ནི་དང་པོ་ཉིད་ནས་མེད་ཀྱི་གློ་བུར་དུ་བཏགས་པར་ཟད་དོ། །གཞན་དུ་ན་རྟེན་འབྲེལ་གྱི་ཕུང་པོ་དང་ཁམས་དང་སྐྱེ་མཆེད་ཙམ་ཞིག་ལས་འདི་ནི་ཅི་ཡང་མེད་དོ་སྙམ་དུ་རྟོགས་པ་དང་། ཡང་འདི་དག་ནི་རང་གི་སེམས་འབའ་ཞིག་དུ་ཟད་ཀྱི་གཞན་འདི་ན་ཅི་ཡང་མེད་དོ་སྙམ་དུ་རྟོགས་ནས། དེས་སྡུག་བསྔལ་བ་རྣམས་ལ་སྙིང་རྗེ་སྐྱེའོ། །གང་གི་ཚེ་སངས་རྒྱས་ཀྱི་ས་ལ་དམིགས་པའི་ཡུལ་མེད་དེ། འཕགས་པ་རབ་ཀྱི་རྩལ་གྱི་རྣམ་པར་གནོན་པ་ལས་ཇི་སྐད་དུ། སངས་རྒྱས་བཅོམ་ལྡན་འདས་ཀྱི་ཡེ་ཤེས་ཀྱིས་ཅི་ཡང་མི་གཟིགས་ཏེ། དེ་ཅིའི་ཕྱིར་ཞེ་ན། ཡེ་ཤེས་ཀྱི་ཡུལ་མི་མངའ་བའི་ཕྱིར་རོ་ཞེས་གསུངས་སོ། །འོ་ན་དུས་དེ་ན་ཡེ་ཤེས་ཡོད་དམ་མེད་ཅེ་ན། འཕགས་པ་ཀླུ་སྒྲུབ་མི་བཞེད་དེ། ཇི་སྐད་དུ། སེམས་ནི་སངས་རྒྱས་ཐམས་ཅད་ཀྱིས། །མ་གཟིགས་མི་གཟིགས་གཟིགས་མི་འགྱུར། །རང་བཞིན་མེད་པའི་རང་བཞིན་ལ། །ཅི་ལྟ་བུ་ཞིག་གཟིགས་པར་འགྱུར། །ཞེས་གསུངས་པ་དང་། བརྒྱུད་པའི་མན་ངག་ནི་འདི་ཡིན་ནོ། །དེས་ན་གཞན་གྱི་དོན་ལས་མ་གཏོགས་པ་བྱ་བ་གཞན་ཅི་ཡང་མི་མངའ་ལ། འདི་ལྟར་གཞན་གྱི་དོན་ནི་འདོད་པར་བྱ་བའི་དོན་གྱི་འབྲས་བུའི་གཙོ་བོ་ཡིན་ནོ། །ཇི་སྐད་དུ་འཕགས་པ་ཀླུ་སྒྲུབ་ཀྱི་ཞལ་སྔ་ནས། གཞན་དོན་ཕུན་སུམ་ཚོགས་པ་ནི། །འབྲས་བུ་ཡི་ནི་གཙོ་བོར་འདོད། །སངས་རྒྱས་ཉིད་སོགས་དེ་ལས་གཞན། །དེ་དག་དོན་གྱི་འབྲས་བུར་འདོད། །ཞེས་གསུངས་སོ། །ཞེས་དྲི་བར་མཛད་པ་ཉིད་དོ། །དེ་ལྟ་བུའི་སྟོང་ཉིད་སྒོམ་ཚུལ་ཡང་། བྱང་ཆུབ་སེམས་འགྲེལ་དུ། དགེ་དང་མི་དགེའི་རྣམ་རྟོག་ནི། །རྒྱུན་ཆད་པ་ཡི་མཚན་ཉིད་ཅན། །སངས་རྒྱས་རྣམས་ཀྱི་སྟོང་ཉིད་གསུངས། །གཞན་ནི་སྟོང་པར་མི་བཞེད་དོ། །དམིགས་པ་དང་ནི་བྲལ་བའི་སེམས། །ནམ་མཁའི་མཚན་ཉིད་ལ་གནས་ཏེ། །ནམ་མཁའ་སྒོམ་པར་བྱེད་པ་འདིས། །སྟོང་པ་ཉིད་ནི་སྒོམ་པར་བཞེད། །དེ་ལྟ་བུའི་སྟོང་ཉིད་ལ་གནས་ན་གཞན་གྱི་དོན་ལ་དགའ་བ་ངང་གིས་འབྱུང་བས། དེ་ལྟར་རྣལ་འབྱོར་པ་རྣམས་ཀྱིས། །སྟོང་པ་ཉིད་འདི་བསྒོམ་བྱས་ན། །གཞན་གྱི་དོན་ལ་དགའ་བའི་བློ། །འབྱུང་བ་ཉིད་དུ་ཐེ་ཚོམ་མེད། །ཅེས་པས་སོ། །བློ་གྲོས་མི་ཟད་པའི་མདོ་འགྲེལ་ལས། མཚན་ཉིད་ཀྱི་བདེན་པ་ཁོང་དུ་ཆུད་པས་དོན་དམ་པ་དང་། ཀུན་རྫོབ་ཀྱི་བདེན་པ་དང་། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་ལ་སོགས་པའི་བདེན་པ་རྣམས་དེ་བཞིན་ཉིད་ཀྱི་མཚན་ཉིད་རོ་གཅིག་པར་རྟོགས་ཀྱང་ཐབས་རྣམ་པ་སྣ་ཚོགས་ཀྱི་ཐེག་པ་གསུམ་དུ་གང་རིགས་རིགས་སུ་སེམས་ཅན་རྣམས་ཡོངས་སུ་སྨིན་པར་བྱེད་དོ། །ཞེས་གསུངས་སོ། །དེ་ཡང་འདི་ཉིད་དུ། ཆོས་ཉིད་ནམ་མཁའ་ལྟ་བུ་ལ། །སྣང་བ་བྱང་ཆུབ་སེམས་སུ་སྦྱང་། །ཞེས་བསྟན་ཏེ། མཉམ་བཞག་ནམ་མཁའ་ལྟ་བུ། རྗེས་ཐོབ་ཐབས་ཐམས་ཅད་བྱང་ཆུབ་སེམས་ཀྱིས་ཟིན་པས་སྣང་བ་སྒྱུ་མ་ལྟ་བུར་ལམ་དུ་ཁྱེར་བ་ཞེས་བྱ། སྒྱུ་མ་ལྟ་བུའི་དོན་ཡང་། བློ་གྲོས་མི་ཟད་པའི་མདོ་འགྲེལ་ལས་འདི་ལྟ་སྟེ། སྐྱེས་བུ་སྒྲིན་པོ་ཞིག་གིས། སྒྱུ་མའི་ཆ་ལུགས་ཀྱི་བཟོ་བོས་ལྷ་དང་། མི་དང་། གནོད་སྦྱིན་དང་། དུད་འགྲོའི་གཟུགས་སྣ་ཚོགས་ཀྱི་སྒྱུ་མ་རྣམས་སྤྲུལ་པ་དེ་དག་ལ་མིག་གིས་ཀུན་ཏུ་ལྟ་ཞིང་། རང་བཞིན་དང་རྒྱུན་དུ་གནས་པར་རེ་ནས་བརྟགས་པས་རང་བཞིན་མེད་ཅིང་དེ་མ་ཐག་ཏུ་འཇིག་པ་ཡིན་པར་མཐོང་ནས་ཀྱེ་མའོ། །འདི་ནི་སྒྱུ་མ་སྟེ། སྟོང་པར་རང་བཞིན་མེད་པའོ་ཞེས་སེམས་པ་དེ་བཞིན་དུ་ཞེས་འབྱུང་བ་ལྟར་རོ། །གསུམ་པ་ཐབས་ཤེས་རབ་ཟུང་འཇུག་ཏུ་སྒོམ་པའི་ཚུལ་ནི། བྱང་ཆུབ་སེམས་འགྲེལ་ལས། ཀུན་རྫོབ་ལས་ནི་ལོགས་ཤིག་ན། །དེ་ཉིད་ཉེ་བར་མི་དམིགས་སོ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་སྟེ། །བྱས་པ་དང་ནི་མི་རྟག་བཞིན། །མེད་ན་མི་འབྱུང་ངེས་ཕྱིར་རོ། །ཞེས་པ་བློ་གྲོས་མི་ཟད་པའི་མདོ་འགྲེལ་ལས། དེ་ལྟ་མོད་ཀྱི་སེམས་རབ་ཏུ་སྦྱངས་པའི་མཐུས་བྱང་ཆུབ་སེམས་དཔའ་མཉམ་པར་འཇོག་པའི་ཚེ་ན་དུས་གཅིག་ཏུ་ཐབས་དང་ཤེས་རབ་གཉིས་ཀ་ལ་སྤྱོད་ཀྱང་ཐབས་ཀྱི་དབང་དུ་གྱུར་ནས་མཚན་མ་འབའ་ཞིག་ལ་དམིགས་པའམ། ཤེས་རབ་ཀྱི་དབང་དུ་གྱུར་ནས་ཐབས་དང་བྲལ་བར་མཚན་མ་མེད་པ་སྒོམ་པ་ཡང་མ་ཡིན་ཏེ། གཉིས་ཀ་ལ་ལྷུན་གྱིས་གྲུབ་པར་སྤྱོད་པ་དེ་ནི་ཐབས་དང་ཤེས་རབ་ཟུང་དུ་འབྲེལ་བའི་བསམ་གཏན་ཞེས་དང་། ཡང་དོན་དམ་པའི་བདེན་པ་མངོན་དུ་བྱེད་པར་ཡང་མི་གཟུང་ཞེས་བྱ་བ་ནི། ཐབས་ཀྱིས་ཡོངས་སུ་ཟིན་པས་ཇི་ལྟར་འཕགས་པ་ཉན་ཐོས་རྣམས་ཞི་བ་ཕྱོགས་གཅིག་པའི་མྱ་ངན་ལས་འདས་པ་ལ་གནས་པ་ལྟ་བུར་དེ་བཞིན་ཉིད་འབའ་ཞིག་གི་ཕྱོགས་སུ་ཡང་གནས་པར་མི་བྱེད་ཅེས་དང་། ཡང་སྔར་བསྟན་པ་ལྟར་སྤྱོད་ལམ་ཐམས་ཅད་དུ་མཉམ་པར་བཞག་པ་ཡིན་ཡང་། སེམས་ཅན་ཡོངས་སུ་སྨིན་པར་བྱ་བའི་ཆེད་དུ་རྒྱལ་རིགས་དང་རྗེའུ་རིགས་ལ་སོགས་པ་འཇིག་རྟེན་ཐམས་ཅད་ཀྱི་རྗེས་སུ་བསྙེགས་ཏེ། དེ་དག་དང་མཐུན་པར་སྤྱོད་པའི་ཐབས་མཁས་པ་དང་ཡང་ལྡན་ལ། ཤེས་རབ་ཀྱིས་ཟིན་པས་དེ་དག་གི་ནང་ན་གནས་ཀྱང་འཇིག་རྟེན་དང་མ་འདྲེས་པ་ཡིན་ནོ། །ཇི་ལྟར་མ་འདྲེས་ཞེ་ན་འཇིག་རྟེན་གྱི་ཆོས་བརྒྱད་ལས་འདས་པ་ཉོན་མོངས་པ་ཐམས་ཅད་དང་མ་འདྲེས་པ་ཞེས་གསུངས་སོ། །འདུ་འཛིའི་ནང་ན་ཡང་སྤྱོད་ལམ་དབེན་པ་ནི་སེམས་ཅན་གྱི་དོན་ལ་འཇིག་རྟེན་གྱི་རྗེས་སུ་བསྙེགས་ཤིང་འདུ་འཛི་མང་པོའི་ནང་ན་གནས་ན་ཡང་སེམས་དབེན་ཞིང་རྩེ་གཅིག་ཏུ་གནས་ཞེས་བྱ་བའི་ཐ་ཚིག་གོ །དེ་ལྟ་བུའི་ཆོས་ལ་གནས་པ་ནི། བསྟན་མ་ཐག་པའི་ཆོས་ལ་གནས་པ་སྟེ། བྱང་ཆུབ་སེམས་དཔའ་དེ་ནི་ཤེས་རབ་ཀྱིས་ཡོངས་སུ་ཟིན་པས་ཉོན་མོངས་པ་དང་འཇིག་རྟེན་གྱི་ཆོས་ཀྱི་དབང་དུ་མི་འགྱུར་བའི་ཕྱིར་མཉམ་པར་བཞག་པའི་གནས་ཀྱང་མི་འདོར་ལ། ཐབས་ཀྱིས་ཡོངས་སུ་ཟིན་པས་འཇིག་རྟེན་གྱི་བྱ་བ་ཐམས་ཅད་དུ་ཡང་སྣང་ངོ་། །ཞེས་བསྟན་པ་དང་། འཕགས་པ་གཙུག་ན་རིན་པོ་ཆེ་ལས། ཇི་སྐད་དུ། །དེ་བྱམས་པའི་གོ་ཆ་བགོས་ཤིང་སྙིང་རྗེ་ཆེན་པོ་ལ་གནས་ཏེ། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་མངོན་པར་བསྒྲུབས་པས་བསམ་གཏན་དུ་བྱེད་དོ། །དེ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་གང་ཞེ་ན། གང་སྦྱིན་པ་དང་མ་བྲལ་བ། ཚུལ་ཁྲིམས་དང་མ་བྲལ་བ། བཟོད་པ་དང་མ་བྲལ་བ། བརྩོན་འགྲུས་དང་མ་བྲལ་བ། བསམ་གཏན་དང་མ་བྲལ་བ། ཤེས་རབ་དང་མ་བྲལ་བ། ཐབས་དང་མ་བྲལ་བ། ཞེས་བྱ་བ་ལ་སོགས་རྒྱ་ཆེར་བཀའ་སྩལ་པ་སྟེ་དེ་ལྟ་བུའི་བྱང་ཆུབ་སེམས་དཔའ་དེ་ལ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ལ་བསམ་གཏན་པ་ཞེས་བྱའོ། །དེ་ཡང་འདི་ཉིད་དུ། བདེན་གཉིས་ཚོགས་གཉིས་བསྒྱུར་བ་འདི། །སྐུ་གཉིས་རྒྱུ་རུ་ཤེས་པར་བྱ། །ཞེས་གསུངས་པ་སྟེ། གཞི་བདེན་པ་གཉིས་དེ་ཁར་མ་བཞག་པར་ཀུན་རྫོབ་ཀྱི་བདེན་པ་དེ་བྱང་ཆུབ་སེམས་དཔའི་ཐབས་ལ་མཁས་པས་བསོད་ནམས་ཀྱི་ཚོགས་སུ་བཏང་། དོན་དམ་པའི་བདེན་པ་དེ་མངོན་དུ་བྱས་པ་ཡེ་ཤེས་ཀྱི་ཚོགས་སུ་སོང་ནས། འབྲས་བུའི་དུས་སུ་སྔ་མས་གཟུགས་སྐུ་རྣམ་པ་གཉིས་དང་། ཕྱི་མས་ཆོས་ཀྱི་སྐུ་འགྲུབ་ལ། དེ་ལྟ་བས་ན་གཞི་ལ་ཇི་ལྟར་གནས་པ། ལམ་དུ་གཏན་ལ་ཕབ་པས་འབྲས་བུའི་དུས་ན་མངོན་དུ་འགྱུར་བ་སྟེ། གཞི་དུས་ཀྱི་བདེན་གཉིས་ཟུང་འཇུག་དེ་ལམ་དུས་ཀྱི་ཐབས་ཤེས་ཟུང་འཇུག་དུ་སོང་། ལམ་དུས་ཀྱི་ཐབས་ཤེས་ཟུང་འཇུག་དེ་འབྲས་བུའི་དུས་ཀྱི་སྐུ་གཉིས་ཟུང་འཇུག་ཏུ་སོང་བས་སོ། །འདི་ལ་དགོངས་ནས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་གསུངས། འོ་ན། རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པ་མཆོག་ཡིན་ནོ། །དང་པོ་ཡིས་ནི་དང་པོའི་སྐུ། །ཕྱི་མའི་ཡིས་ནི་ཕྱི་མ་གཉིས། །གསུངས་པས་ཡང་དག་པར་བླངས་པའམ་རྒྱས་འགྱུར་གྱི་རིགས་ནི་གསར་དུ་བྱུང་བ་ཡིན་པས་དེ་དང་འགལ་ལོ་སྙམ་ན་མི་འགལ་ཏེ། དེ་ནི་རིགས་ལ་གནས་པ་ཙམ་མ་ཡིན་པར་རིགས་ཅན་ལམ་ལ་སྦྱོང་བའི་སྐབས་རྙེད་པ་ཉིད་ནས་དེ་སྐད་གདགས་པ་ཡིན་པ་དང་། སྐུ་ཕྱི་མ་གཉིས་ཀྱང་སྟོང་པ་སྙིང་རྗེའི་སྙིང་པོ་ཅན་ཞེས་བྱ་བའི་སྙིང་རྗེའི་མཐུ་ལས་གཙོ་བོར་འབྱུང་བ་ཡིན་ནོ། །ཁབ་ལེན་གྱི་ནུས་པ་ལྕགས་དང་ཕྲད་ན་མངོན་པ་བཞིན་རིགས་དེ་གཉིས་ཀྱང་ཁབ་ལེན་རང་དང་། དེ་ལྕགས་དང་ཕྲད་པ་ལྟ་བུའི་ཁྱད་དུ་མངོན་ནོ། །དེ་བས་གཞི་དུས་ལས་ལམ་གྱི་ཚེ་བསལ་བྱའམ་བསྣན་བྱ་བཞག་ཏུ་མེད་པ་ཉིད་གཏན་ལ་ཕབས་ན་སུ་ཞིག་སྤང་སུ་ཞིག་ལེན་ཏེ། བདེ་སྡུག་བླང་དོར་མི་འདོད་ན། །ལྟ་བ་ཚད་དུ་ཕྱིན་པ་ལགས། །ཞེས་གསུངས་ཏེ། བདེ་བ་ནི་མྱང་འདས། སྡུག་བསྔལ་ནི་འཁོར་བ་གཉིས་པོ་བྱས་མི་རྟག་ལྟ་བུའི་རང་བཞིན་ནམ་ངོ་བོ་གཅིག་ཡིན་པས། གཅིག་སྒྲུབ་གཅིག་འདོར་བར་མི་འདོད་པའོ། །འདི་ནས་རྣམ་རྟོག་ཆོས་སྐུའི་མགོ་ཚུགས། མངོན་རྟོགས་རྒྱན་ལས། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །ཞེས་པ་ལྟ་བུས་མཐའ་བྲལ་དབུ་མ་པའི་གྲངས་སུ་ཆུད་པ་ཡིན་ནོ། །གསུམ་པ་ཕར་ཕྱིར་དྲུག་གི་སྤྱོད་པ་ནི། ཕ་རོལ་ཕྱིན་དྲུག་སྤྱོད་པ་སྟེ། སྦྱིན་པའི་ཕ་རོལ་ཏུ་ཕྱིན་པ། ཚུལ་ཁྲིམས་ཀྱི། བཟོད་པའི། བརྩོན་འགྲུས་ཀྱི། བསམ་གཏན་གྱི། ཤེས་རབ་ཀྱི་ཕ་རོལ་ཏུ་ཕྱིན་པའོ། །ཐབས་དང་སྟོབས་དང་སྨོན་ལམ་དང་ཡེ་ཤེས་ཀྱི་ཕ་རོལ་ཏུ་ཕྱིན་པ་ནི་ཤེས་རབ་ཉིད་ཀྱི་དབྱེ་བར་ཟད་པས་ན་དྲུག་ཏུ་འདུས་སོ། །དེ་ལ་ཆོས་ཀྱི་རྒྱལ་པོ་ཟླ་འོད་གཞོན་ནུའི་ཞལ་སྔ་ནས་འཇིག་རྟེན་ལས་འདས་མ་འདས་ཀྱི་སོ་མཚམས་མདོ་ནས་འཁོར་གསུམ་དུ་རྟོག་མི་རྟོག་ལ་གཟུང་ནས་ཡོད་ཅེས་གསུངས་པ་ནི་དབུ་མ་པའི་ལུགས་ཐུན་མོང་མ་ཡིན་པ་གསལ་པོར་མཛད་པ་ཡིན་ཏེ། འཇུག་པར། སྦྱིན་པ་སྦྱིན་བྱ་ལེན་པོ་གཏོང་པོས་གཏོང་། །འཇིག་རྟེན་འདས་པའི་ཕ་རོལ་ཕྱིན་ཞེས་བྱ། །གསུམ་དུ་དམིགས་པ་ཡོད་ན་འཇིག་རྟེན་པའོ། །ཞེས་འབྱུང་བས་སོ། །འདི་ན་ཁ་ཅིག་ཁ་འབར་མ་ལ་སོགས་པའི་བྱ་བ་ལ་ཞུགས་པའི་ཚེ། གཏོར་མའི་མགྲོན་འདི་ལའོ་སྙམ་སུ་ལ་མི་དམིགས་པར་གཏོང་དེ་ནི་དགེ་བ་དམིགས་མེད་དོ་ཟེར། དེ་ལྟ་བུས་ན་ལྐུག་པ་ཟན་གཏོང་བའང་དེར་ཐལ། དམིགས་མེད་དུ་གར་འགྲོ་དེ་ནི་མི་ཤེས་པ་གཏི་མུག་གི་ནང་ཚན་དུ་གཏོགས། སྒོམ་རིམ་ལས་ཀྱང་སོ་སོ་སྐྱེ་བོ་རྣམས་ཀྱི་བཙན་ཐབས་སུ་དམིགས་པ་མེད་པར་བྱེད་མི་ནུས་པར་བཤད་ལ། དམིགས་པ་མེད་པའི་གོ་རྒྱུ་སྤྱོད་འཇུག་ལས། སྟོང་ཉིད་བག་ཆགས་གོམས་པས་ནི། །དངོས་པོའི་བག་ཆགས་སྤོང་འགྱུར་ཞིང་། །ཅི་ཡང་མེད་ཅེས་གོམས་པས་ནི། །དེ་ཡང་ཕྱི་ནས་སྤོང་བར་འགྱུར། །གང་ཚེ་གང་ཞིག་མེད་དོ་ཞེས། །བརྟག་བྱའི་དངོས་པོ་མི་དམིགས་པ། །དེ་ཚེ་དངོས་མེད་རྟེན་བྲལ་བ། །བློ་ཡི་མདུན་ན་ཇི་ལྟར་གནས། །གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས་པ་ལ་བྱེད་པ་ཡིན། དེས་ན་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་ན་སྦྱིན་སོགས་ལྔ་ཕ་རོལ་ཏུ་ཕྱིན་པར་མི་འགྲོ། དེ་དང་ལྡན་ན་འགྲོ་བར་གསུང་བའི་གནད་དེ་ཁ་ཡིན། དེ་ལ་ཁ་ཅིག་སྦྱིན་སོགས་འཁོར་གསུམ་ཡོངས་དག་ཏུ་གཏོང་ཁྱེར་ཇི་ལྟར་བྱེད་ཟེར་དྲི་བའང་སོ་སྐྱེ་ལ་འཁོར་གསུམ་དུ་དག་པ་མངོན་དུ་བྱ་བའི་ཕྱིར། སྦྱིན་པ་ལ་སོགས་པ་ལ་ཤེས་རབ་གྱི་དཔྱད་པ་གསུངས་ཀྱི་དེ་ཙམ་འཁོར་གསུམ་དག་པ་ཡིན་པར་མི་འདོད་པས་དྲི་བ་པོ་རྨོངས་པ་ཡིན་ནོ། །འོ་ན་སོ་སྐྱེ་ལ་ཕར་ཕྱིན་དྲུག་གི་མིང་གསུངས་ན་དེ་ཇི་ལྟར་འབྲེལ་ཅེ་ན། དེ་ལྟར་གདགས་པར་མཛད་པ་ནི། དེ་དག་ཡོངས་སུ་བསྔོ་བས་ཟིན་པ་ལ་དགོངས་པ་སྟེ། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་དང་། སྤྱོད་འཇུག་ལས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་ཕྱུང་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་པས་དགེ་བ་དེའི་འབྲས་བུ་འབྱིན་པའི་ནུས་པ་སྲིད་པའི་ཕ་རོལ་ཏུ་ཡང་འགྲོ་བ་ལ་དགོངས་ནས་དེ་དག་ལ་ཕ་རོལ་ཏུ་ཕྱིན་པའི་སྒྲ་ཞུགས་སོ། །འདིར་དགེ་བ་འང་། སློབ་དཔོན་ཆེན་པོ་ཨཱརྻ་དེ་བས། དེ་ཕྱིར་བསམ་པའི་རྩ་བ་ལ། །བསོད་ནམས་སྡིག་པ་རྣམ་པར་གནས། །ཞེས་གསུངས་པ་ཉིད་ཚད་མར་འགྱུར་ལ། དེས་ན་གཞན་དོན་གྱི་གྲོགས་སུ་མི་འགྲོ་བའི་དགེ་བའང་འདིར་སྡིག་པ་སྟེ་ཉན་རང་དུ་སེམས་བསྐྱེད་པ་ལྟ་བུ། གཞན་དོན་གྱི་གྲོགས་སུ་འགྱུར་ན་གསོད་པ་དང་ཕྲོགས་པ་དང་། འཁྲིག་པ་དང་རྫུན་དབྱེན་ཚིག་རྩུབ་ངག་འཁྱལ་ཡང་འདིར་དགེ་བར་འགྱུར་བ་སྟེ། བཙུན་པ་ཆོས་ལྡན་རབ་འབྱོར་དབྱངས་ཀྱིས། ད་ནི་དེ་དག་གི་གནང་བ་ཉིད་བརྗོད་པར་བྱ་སྟེ། གང་བདག་གི་དོན་ལ་རྗེས་སུ་ལྟ་བ་ཅུང་ཟད་ཙམ་ཡང་མེད་ལ། བྱེད་པ་གཞན་གྱི་དོན་འབའ་ཞིག་འདོད་ཅིང་། ཐམས་ཅད་དུ་སྙིང་རྗེ་དང་ལྡན་པ་དག་ལ་ནི་ཡིད་ཀྱི་ཉེས་པར་སྤྱོད་པ་གསུམ་མ་གཏོགས་པས་སམ། ལོག་པར་ལྟ་བ་ཉིད་མ་གཏོགས་པ་དག་ལ་རྗེས་སུ་གནང་སྣང་བ་སྟེ། དེ་ནི་བྱང་ཆུབ་སེམས་དཔའི་སྡོམ་པ་གཏན་ཕབ་པའི་གཙུག་ལག་ལས་ལྟའོ། །ཞེས་གསུངས་ཤིང་གསང་ཆེན་ཐབས་ལ་མཁས་པའི་མདོ་ལས་བཤད་དོ། །མདོར་བསྡུ་ན་འཇུག་པ་བྱང་ཆུབ་ཀྱི་སེམས་བསྐྱེད་པའི་ཚུལ་ཁྲིམས་བསླབ་པ་གསུམ་གྱི་བདག་ཉིད་དེ། དེ་ཡང་སློབ་དཔོན་ཛེ་ཏ་རིས། དེ་ལྟར་བྱང་ཆུབ་སེམས་དང་སྡོམ་པ་བཟུང་བའི་བྱང་ཆུབ་སེམས་དཔའི་ཚོགས་གཉིས་པོ་སྤྱོད་པས་ཡོངས་སུ་རྫོགས་པར་བྱེད་པ་དེས་ན་སྤྱོད་པ་ལ་མངོན་པར་སྦྱར་བར་བྱའོ། །དེ་ཡང་རྣམ་པ་གསུམ་སྟེ། ལས་དང་པོ་པ་ལ་ནི་སྡོམ་པའི་ཚུལ་ཁྲིམས་གཙོ་བོ་ཡིན་པས་ཕྱིར་ན་ཡི་དམ་གྱི་སྤྱོད་པའོ། །མོས་པས་སྤྱོད་པ་ཅན་ལ་ནི་དགེ་བ་ཆོས་སྡུད་པའི་ཚུལ་ཁྲིམས་གཙོ་བོ་ཡིན་པའི་ཕྱིར་ན་ཏིང་ངེ་འཛིན་གྱི་སྤྱོད་པའོ། །ས་ལ་ཞུགས་པ་ལ་ནི་སེམས་ཅན་གྱི་དོན་བྱ་བ་ཉིད་གཙོ་བོ་ཡིན་པའི་ཕྱིར་ན་སེམས་ཅན་བརྟེན་པའི་སྤྱོད་པའོ། །ཞེས་གསུངས་པ་ལྟར་བསླབ་པར་བྱའོ། །གཉིས་པ་འདིར་བགྲོད་པ་མི་གནས་པའི་མྱང་འདས་ནི། འབྲས་བུ་མི་གནས་མྱ་ངན་འདས་ཞེས་གསུངས་ཏེ། རྒྱུའི་གནས་སྐབས་ན་ཤེས་རབ་བསྒོམས་པས་འབྲས་བུའི་དུས་སུ་འཁོར་བ་ལ་མི་གནས་ཏེ། རང་དོན་ཆོས་ཀྱི་སྐུ་མངོན་དུ་མཛད་པས་སོ། །རྒྱུའི་གནས་སྐབས་སྙིང་རྗེ་བསྒོམས་པས་འབྲས་བུའི་གནས་སྐབས་སུ་ཞི་བ་མྱ་ངན་ལས་འདས་པར་མི་ལྟུང་སྟེ་གཞན་དོན་གཟུགས་ཀྱི་སྐུ་མངོན་དུ་མཛད་པའི་ཕྱིར་རོ། །དེ་ལྟར་སྐུ་གསུམ་མཛད་པ་དང་བཅས་པ་ལ་འབྲས་བུའི་གནས་སྐབས་ལེགས་པར་བསྡུས་ཏེ། དེ་དག་ཕར་ཕྱིན་རང་གང་གི་དབང་དུ་མཛད་ནས་བཤད་པ་སྟེ། དེའི་ལམ་རིམ་རྒྱས་པ་ཐར་པ་རིན་པོ་ཆེའི་རྒྱན་ལས་བཤད་དོ། །སྐྱེས་བུ་ཆེན་པོ་བསྡུས་པ་ཡིན། ཞེས་སྐྱེས་བུ་ཆེན་པོའི་ལམ་རིམ་རྒྱུའི་ཐེག་པ་བཤད་པའི་སྐབས་ཏེ་གསུམ་པའོ།། །། བཞི་པ་འཁྲུལ་པ་ཡེ་ཤེས་སུ་འཆར་བ་ལ། གཞི་བསྒྱུར་བའི་ལམ། རང་བཞིན་ཡོངས་སུ་ཤེས་པའི་ལམ་གཉིས་ལས། དང་པོ་ནི། ལམ་སྒྲོན་ནས། སྔགས་མཐུ་ཉིད་ལས་གྲུབ་པ་ཡི། ནས། ཡོངས་རྫོགས་སློབ་དཔོན་དབང་བསྐུར་བ་ཞེས་པའི་བར་གྱིས་གསུངས་ཏེ་ཐོག་མར་རྡོ་རྗེ་ཐེག་པར་བྱང་ཆུབ་ཀྱི་སེམས་བསྐྱེད་ཚུལ་ལ། ཀུན་རྫོབ་དང་དོན་དམ་གཉིས་བྱུང་བའི་དང་པོ་ནི་སྔར་བཤད་པ་དེ་ཁ་ཡིན་ལ། གཉིས་པ་དམ་ཚིག་གསུམ་བཀོད་སོགས་ལས་ལུས་འབུལ་གྱི་སྒོ་ནས་དོན་དམ་པའི་བྱང་ཆུབ་ཀྱི་སེམས་བསྐྱེད་པ་དང་། རྣམ་སྣང་མངོན་བྱང་ནས་བྱུང་བ་བཞིན། འཕགས་པ་ཀླུ་སྒྲུབ་ཀྱི་བྱང་ཆུབ་སེམས་འགྲེལ་དུ། ཀུན་ཏུ་དངོས་པོ་དང་བྲལ་ཞིང་། །ཕུང་པོ་སྐྱེ་མཆེད་ཁམས་རྣམས་དང་། །གཟུང་དང་འཛིན་པ་རྣམ་སྤངས་པ། །ཆོས་བདག་མེད་པ་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་བྱ་བའི་བྱང་ཆུབ་ཀྱི་སེམས་ཆེན་པོ་ཇི་ལྟར་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་ཆེན་པོ་རྣམས་ཀྱིས་བསྐྱེད་པ་དེ་བཞིན་དུ། བདག་གིས་ཀྱང་སེམས་ཅན་མ་སྒྲལ་བ་རྣམས་བསྒྲལ་བ་དང་། མ་གྲོལ་བ་རྣམས་དགྲོལ་བ་དང་། དབུགས་མ་ཕྱིན་པ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བའི་ཕྱིར། དུས་འདི་ནས་གཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་བྱུང་ཆུབ་ཆེན་པོར་སེམས་བསྐྱེད་པར་བགྱིའོ། །དེ་ལྟར་བྱང་ཆུབ་ཀྱི་སེམས་སྨོན་ལམ་གྱི་རང་བཞིན་བྱང་ཆུབ་སེམས་དཔའ་སྔགས་ཀྱི་སྒོར་སྤྱད་པ་སྤྱོད་པར་འདོད་པ་རྣམས་ཀྱིས་བསྐྱེད་པར་བྱ་བ་ཡིན་ཏེ། དེ་ཕྱིར་དེའི་རང་བཞིན་བཤད་པར་བྱ་བའོ། །ཞེས་རྒྱས་པར་གསུངས་ལ། པཎྜྻི་ཏ་ཡེ་ཤེས་སྙིང་པོས། འདི་ལྟར་བྱང་ཆུབ་ནི་རང་གི་སེམས་ལས་བཙལ་བར་བྱའོ། །ཞེས་འབྱུང་བའི་ཕྱིར་ཐོག་མར་རང་གི་སེམས་ཁོ་ན་ལ་བརྟག་པར་བྱའོ། །དེ་ལ་རང་གི་སེམས་ནི་ལུང་ལས་གསུངས་པའི་ཚིག་ལྔ་པོ། དངོས་པོ་ཐམས་ཅད་དང་བྲལ་བ་ཞེས་བྱ་བ་ནི། མུ་སྟེགས་ཅན་འཁྲུལ་པས་སྒྲོ་བཏགས་པ་བདག་ལ་སོགས་པ་བརྟག་པའི་དངོས་པོ་དང་བྲལ་བ་ཞེས་བྱ་བའི་དོན་གང་ཡིན་པའོ། །ཕུང་པོ་ཁམས་སྐྱེ་མཆེད་དུ་གཟུང་བ་དང་འཛིན་པ་རྣམ་པར་སྤངས་པ་ཞེས་བྱ་བ་ནི། ཉན་ཐོས་ལ་སོགས་པའི་ཚུལ་གྱི་ཀུན་ཏུ་བཏགས་པའི་ངོ་བོ་ཡོད་པ་དང་མེད་པའི་རང་བཞིན་ཡོངས་སུ་སྤངས་ཏེ་རྡུལ་ཕྲ་མོ་ཚོགས་པ་ཉིད་འཛིན་པ་མིག་ལ་སོགས་སྐྱེ་མཆེད་དྲུག་དང་། གཟུང་བ་གཟུགས་ལ་སོགས་པའི་ཡུལ་དྲུག་དང་བྲལ་བ་ཞེས་བྱ་བའི་དོན་གང་ཡིན་པ་དེ་རྡུལ་ཕྲ་རབ་སུན་ཕྱུང་བའི་ཕྱིར་རོ། །དེའི་ཕྱིར་ཚིག་གསུམ་པ་ཆོས་ལ་བདག་མེད་པ་མཉམ་པ་ཉིད་ཅེས་བྱ་བ་གསུངས་པ་ཡིན་ཏེ། རྣམ་པར་ཤེས་པ་ཙམ་གྱི་ཚུལ་ལ་འཇུག་པར་བྱ་བའི་ཕྱིར་རོ། །དེའི་ཕྱིར་ཚིག་བཞི་པ་རང་གི་སེམས་གཟོད་མ་ནས་མ་སྐྱེས་པ་ཞེས་བྱ་བ་གསུངས་པ་ཡིན་ཏེ། དེ་བས་ན་དེ་ནི་རྟེན་ཅིང་འབྲེལ་བར་འབྱུང་བ་ཡིན་པའི་ཕྱིར་སྒྱུ་མ་ལྟ་བུ་ཡིན་ནོ། །གང་ཞིག་རྟེན་ནས་མི་སྐྱེ་ཞིང་རང་གི་ངོ་བོ་ཉིད་ལས་ཉམས་པར་མི་འགྱུར་བ་དེ་ནི་དོན་དམ་པའི་རང་བཞིན་ཞེས་བྱའོ། །དེའི་ཕྱིར་རང་བཞིན་མེད་པས་རང་གི་སེམས་གཟོད་མ་ནས་མ་སྐྱེས་པ་ཞེས་བྱ་ཡི། རྟེན་ཅིང་འབྲེལ་བར་འབྱུང་བའི་ངོ་བོ་ཉིད་དུ་ཀུན་རྫོབ་ཏུ་ཡོད་པའི་ཕྱིར་སྒྱུ་མ་དང་འདྲ་བ་ནི་མི་དགག་གོ །ཞེས་དང་། དེ་ལྟར་དེ་སྔོན་དུ་བཏང་བའི་སྨོན་པ་བྱང་ཆུབ་ཀྱི་སེམས་དོན་དམ་པའི་ངོ་བོ་ཉིད་ལ་སྤྱོད་པའི་མཚན་ཉིད་ཤེས་རབ་དང་མཚུངས་པར་ལྡན་པ་ནི་འཇུག་པའི་སེམས་ཞེས་བྱ་སྟེ། དེ་ཁོ་ན་ཉིད་ངེས་པ་ལ་འཇུག་པའི་ཐབས་ཡིན་པའི་ཕྱིར་རོ། །ཞེས་གསུངས་པ་ལྟར་རྣལ་འབྱོར་རྒྱུད་དུ་བྱང་ཆུབ་སེམས་དཔའ་དོན་གྲུབ་ལ་དེ་བཞིན་གཤེགས་པ་རྣམས་ཀྱིས་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་ལྟར་བསྐྱེད་ཅིག་པར་གདམས་པ་དང་། བརྟག་གཉིས་ལས། དཀྱིལ་འཁོར་འཁོར་ལོའི་ཐབས་དང་ནི། །རང་བྱིན་བརླབ་པའི་རིམ་པས་ཀྱང་། །ཀུན་རྫོབ་དོན་དམ་ཚུལ་ཅན་གྱི། །བྱང་ཆུབ་སེམས་ནི་རབ་ཏུ་བསྐྱེད། །ཅེས་གསུངས་པ་དོན་ལ་གཅིག དེས་ན་སྔགས་པས་བསྐྱེད་རིམ་གྱི་སྔོན་དུ་དེ་ལྟ་བུའི་སྨོན་པ་བཏང་ནས་འཇུག་པའི་ཕྱིར་རྣལ་འབྱོར་དེ་སྒོམ་པར་བྱེད་པ་ལྟ་བུའོ། །དེས་ན་བྱང་ཆུབ་ཏུ་སེམས་དེ་ལྟ་བུ་བསྐྱེད་ནས་དེ་སྦྱོང་བ་ལ། རྡོ་རྗེ་ཐེག་པ་པ་ཐམས་ཅད་ཟུང་འཇུག་བསྒོམ་བྱར་བྱེད་པ་མཐུན་ལ། འོན་ཀྱང་བསྐྱེད་རིམ་མན་ཆད་ལ་ནི། དེ་བཞིན་ཉིད་གསལ་བཏབ་ནས་དེའི་རང་གདངས་ལྷར་སློང་བ་དེ་ནས་སྔགས་དང་ཏིང་ངེ་འཛིན་གྱི་སྤྲོ་བསྡུ་བྱེད་པ་ཡིན་ལ། དེ་ནི་ཆུ་འཁྱག་རོམ་དུ་ལོངས་པ་ལྟ་བུ་དེ་བཞིན་ཉིད་དེ་ཁ་དེ་དག་ཏུ་ལོངས་པས་མཚན་མ་དང་བཅས་པ། མཚན་མ་དེ་ལ་ཞི་ཚུལ་ཆགས་ཚུལ་ཁྲོ་ཚུལ་ལ་སོགས་པ་ཉོན་མོངས་པ་མི་སྤོང་བར་རྣམ་པ་དེ་ལྟར་བསྒྱུར་བས་དུག་སྔགས་ཀྱིས་ཟིན་པ་ལྟ་བུ་ཡིན་ནོ། །དེ་བས་ན་སྭ་བྷཱ་ཝའི་སྔགས་སམ། ཤཱུནྱ་ཏའི་སྔགས་དོན་གཟུང་འཛིན་གྱིས་བཏང་བར་མཐུན་ཡང་། ཤུལ་ན་ནཱ་ད་ཙམ་ལས་པ་དང་། ཅི་ཡང་མི་དམིགས་པར་བཏང་བའི་ཚུལ་གཉིས། གཉིས་ཀ་ལ། དེ་ལས་ལྡང་བ་ནི་སྔར་གྱི་སྟོང་ཉིད་དེ་ཡོད་རིང་ལ་སེམས་གནས་པ་ཙམ་ཡིན་ལ། དེ་ནས་སྔར་གྱི་སྨོན་འཇུག་གི་སེམས་དབང་དང་ལྡན་པས་དེ་གཞལ་ཡས་ཁང་ལ་སོགས་པར་ལོངས་པའི་རྒྱུ་བྱེད་དེ་ནས་གཞན་གྱི་དོན་བྱེད་པ་ལ་འཇུག་པ་ཡིན་ནོ། །དེས་ན་ཕ་རྒྱུད་མན་ལ་ཤེས་རབ་དོན་དམ་དང་། ཐབས་ཀུན་རྫོབ་ལ་བཞག་པ་ཕར་ཕྱིན་དང་མཐུན་པ་ཡིན་ནོ། །དེ་ལྟར་ཡེ་ཤེས་སྙིང་པོས། སྤྱོད་པས་ཀུན་ནས་བླང་བའི་སེམས་ཆོས་ཐམས་ཅད་ཀྱི་སྟོང་པ་ཉིད་ཀྱི་ངོ་བོ་ཁོང་དུ་ཆུད་པ་ཡང་། ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པ་ཉིད་ཀྱི་སེམས་ཞེས་བྱའོ། །བྱང་ཆུབ་ཀྱི་མཚན་ཉིད་ཀྱི་སེམས་ནི་བྱང་ཆུབ་ཀྱི་སེམས་ཞེས་བྱ་བས་དེ་དང་མཚུངས་པར་ལྡན་པའི་ཤེས་རབ་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་གསུངས་པའི་ཕྱི་མ་བྱང་ཆུབ་དང་མཚན་ཉིད་མཐུན་པར་ལམ་སྒོམ་པས་དེ་སྐད་གསུངས་ལ། དེ་ཁ་འཇུག་གནས་ལྡང་བའི་སེམས་ཞེས་རྣམ་པ་གསུམ་དུའང་བཞག་པ་ཡིན་ནོ། །དབང་གོང་མ་གཉིས་ལ། དང་པོའི་སངས་རྒྱས་རྒྱུད་ཆེན་ལས། །རབ་ཏུ་འབད་པས་བཀག་པའི་ཕྱིར། །ཞེས་གསུངས་པ། བརཏལ་ཞུགས་ཙམ་དོན་དུ་གཉེར་བ་དང་འདུལ་བའི་བསྟན་པ་མི་ཉམས་པའི་ཕྱིར་དང་ཀུན་རྫོབ་སྒྱུ་མ་ལྟ་བུ་ལ་བློ་མ་འབྱོངས་པའི་དབང་དུ་མཛད་པ་ཡིན་ནོ། །གཞན། དེ་ཉིད་རིག་ལ་ཉེས་པ་མེད། །ཞེས་པའི་དེ་ཁོ་ན་ཉིད་རིག་པ་ནི་རང་བཞིན་ཡོངས་སུ་ཤེས་པ་ཡིན་ལ། དེས་འདོད་ཆགས་ལ་སོགས་པ་སྤྱད་པས། བཀག་པ་སྤྱད་པར་འགྱུར་བའི་ཕྱིར་སོགས་ཀྱི་ཉེས་པ་དེར་མི་འགྱུར་ཞེས་སྟོན་པ་ཡིན་ལ། དེ་ཁོ་ན་ཉིད་རིག་པ་ནི་ཕྱག་རྒྱ་ཆེན་པོ་ཡིན་ནོ། །གཉིས་པ་རང་བཞིན་ཡོངས་སུ་ཤེས་པའི་ལམ་ལ། གཞི་དྲི་མ་མེད་པ། ལམ་དྲི་མ་མེད་པ། འབྲས་བུ་དྲི་མ་མེད་པ་གསུམ་ལས། དང་པོ་ནི། རང་གི་སེམས་ཀྱི་ཆོས་ཉིད་དང་། །གཞན་གྱི་སེམས་ཀྱི་ཆོས་ཉིད་ལ། །གཉིས་སུ་ཡོད་པ་མ་ཡིན་ན། །བདག་གཞན་འཛིན་པ་ཇི་ལྟར་འཐད། །ཅེས་གསུངས་པའི་རང་ནི་སེམས་ཀྱི་ཆོས་ཉིད་འདི་ཁ་འདོད་ཆགས་ལ་སོགས་པ་འཁྲུལ་པ་ཐམས་ཅད་ཀྱིའང་ཆོས་ཉིད་ཡིན་པས། དེ་དག་གི་དང་སེམས་ཀྱི་ཆོས་ཉིད་གཉིས་སུ་བྱར་མེད་ཅིང་གཉིས་སུ་བྱར་མེད། དེ་བས་ན་གཞི་ཡིན་ལུགས་ལ་ཆོས་ཀྱི་དབྱིངས་མ་གཏོགས་པ་ཆོས་ཅི་ཡང་མེད་པས། གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུའི་ཉམས་ཀྱིས་དུ་མའི་གར་མཛད་དོ། །ཞེས་སམ། ཆོས་ཀྱི་དབྱིངས་ལས་མ་གཏོགས་པ། །ཆོས་འགའ་ཡོད་པ་མ་ཡིན་ནོ། །ཞེས་གསུངས། འོ་ན་འཁྲུལ་པ་འདི་དག་ཇི་ལྟར་ལྟ་ཞེ་ན། ཆོས་ཉིད་དེ་ལྟ་བུ་མ་གོ་བའམ་མ་རིག་པས་ཕྱིན་ཅི་ལོག་ཏུ་མངོན་པར་ཞེན་པའོ། །དེ་ལྟ་བུའི་ཞེན་པ་དང་ཆོས་ཉིད་ཀྱང་ལྷན་ཅིག་ཏུ་སྐྱེས་པ་ཡིན་ལ། ལྷན་ཅིག་སྐྱེའོ་བྱས་ཀྱང་རྭ་ཕན་ཚུན་བཞིན་དུས་མཉམ་པར་རོང་ངེ་འབྱུང་བ་མ་ཡིན། འོ་ན་ཇི་ལྟར་ཞེ་ན། ཐག་ནག་སྦྲུལ་དུ་མཐོང་བའི་ཚེ། ཐག་མཐོང་དང་སྦྲུལ་མཐོང་ལྷན་ཅིག་སྐྱེས་པ་ཡིན་པས་དུས་དེར་བརྟགས་ན་ཐག་པ་རང་མཐོང་། སྦྲུལ་མ་མཐོང་། འོན་ཀྱང་ཐག་པ་ཐག་པར་མ་མཐོང་སྦྲུལ་དུ་མཐོང་བས་དངངས་པ་དེ་ལ་ཕྱིན་ཅི་ལོག་ཞེས་བྱའོ། །ཇི་ཙམ་སྦྲུལ་དུ་བརྟགས་ཀྱང་ཐག་པ་རང་དུ་འདུག་ལ། སྦྲུལ་དུ་མ་འགྱུར་བ་བཞིན། འཁྲུལ་པ་དང་ཆོས་ཉིད་ཀྱང་འདྲ་བས་ན། འཁྲུལ་པ་ཁོ་ནའི་སྟེང་དུ་ཡེ་ཤེས་འཚོལ་གྱི། འཁྲུལ་པ་སྤངས་ནས་ཡེ་ཤེས་འཚོལ་རུང་བསྡད་ན་གོལ་བ་ཡིན་ནོ། །དེས་ན་བརྟག་གཉིས་ལས། འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཡིན། །འཁོར་བ་སྤངས་ནས་གཞན་དུ་ནི། །མྱ་ངན་འདས་པས་རྟོགས་མི་འགྱུར། །ཞེས་གསུངས་པ་དང་། རྨོངས་ཕྱིར་འཁོར་བའི་གཟུགས་ཅན་ཏེ། །རྨོངས་མེད་འཁོར་བ་དག་པ་ཡིན། །འཁོར་བ་མྱ་ངན་འདས་པར་འགྱུར། །ཞེས་གསུངས། །འབྲས་བུ་ནའང་། རང་སྣང་དག་ཚེ་གཞན་སྣང་ཤུལ་དུ་མི་ལས་ཏེ་བདག་གཞན་གཉིས་སུ་མ་གྲུབ་པའི་གནད་ཀྱིས་སོ། །དེ་བས་ན། ཆོས་ཐམས་ཅད་ཀྱི་ཆོས་ཉིད་དེ་ལ་ཡང་། རང་བཞིན་མེད་པ་ཞེས་གསུངས་ཏེ། འདིར་རང་བཞིན་མེད་པ་ནི་ཕྱོགས་ལྷུང་ཐམས་ཅད་དང་བྲལ་བའི་དོན་ལ་མཛད་ཀྱི། དོན་དམ་པར་ཅང་མེད་རང་བཞིན་མེད་པའི་དོན་དུ་མི་འཛིན་ནོ། །གཉིས་པ་ལམ་དྲི་མ་མེད་པ་ལ་རྩལ་སྦྱོང་བ་ལ་གསུམ་སྟེ། ལྟ་བ་ཕྱག་རྒྱ་ཆེན་པོ། སྒོམ་པ་འོད་གསལ་དྲི་མེད། སྤྱོད་པ་ཅིར་སྣང་ཐུག་ཕྲད་དུ་ངོ་སྤྲད་པ་གསུམ་ལས། །དང་པོ་ནི། གཞིའི་མཐའ་དབུས་ཐམས་ཅད་དང་བྲལ་བ་དེ་ཁ་ལ་ཕྱག་རྒྱ་ཆེན་པོ་ཞེས་བཏགས་པས། དབུ་མ་ཆེན་པོ་དང་། རྫོགས་པ་ཆེན་པོ་དང་། དེ་གསུམ་ཐ་དད་དུ་འབྱེད་པ་རྣམས་རྨོངས་པའོ། །དེ་ལ་དེ་སྐད་གདགས་པའང་། ཐམས་ཅད་ཕྱག་རྒྱ་དེས་བཏབ་པས་དང་། དེ་ཀ་དྲི་མས་སྒྲིབ་མ་མྱོང་བས་རང་བཞིན་རྣམ་དག རྟོགས་པ་ཡེ་རྫོགས་སུ་བཞུགས་པས་སེམས་ཀྱི་ཆོས་ཉིད་ཀ་རྫོགས་པའི་སངས་རྒྱས། བདེ་བར་གཤེགས་པར་བཤད་ལ། རྨོངས་པ་གློ་བུར་བའི་ཆོས་ཀྱིས་བསྒྲིབས་པས་དེ་ལ་བདེ་གཤེགས་སྙིང་པོ་ཞེས་དང་། འབྲས་བུའི་དུས་ན་སྙིང་པོའི་དོན་དེ་ལ་བྱའོ། །འོ་ན་དྲི་མས་སྒྲིབ་པ་དེ་བསལ་དགོས་པས་འཁྲུལ་པ་ཡེ་ཤེས་སུ་མི་འགྲོའོ་སྙམ་ན། དེ་ནི་མ་ཡིན་ཏེ། དཔེར་ན་མཁྲིས་ནད་ཅན་གྱིས་དུང་སེར་པོར་མཐོང་དུས་དུང་གི་སྟེང་དུ་སེར་པོ་མ་སླེབ། སླེབ་ན་ནད་མེད་ཀྱིས་ཀྱང་དེར་མཐོང་དགོས་པ་ལ་མི་མཐོང་། དེ་བས་ན་འཁྲུལ་གཞི་ལས་འཁྲུལ་པ་ལོགས་སུ་འདོད་པ་ནོར་བ་ཡིན་ནོ། །དེའི་ཕྱིར་འདི་སྐད་དུ། འཁོར་བའི་རང་བཞིན་ཤེས་གྱུར་པ། །དེ་ཉིད་མྱ་ངན་འདས་པར་བརྗོད། །དེ་སྐད་གསུངས་པས་འཁོར་འདས་ལ། །བཟང་ངན་འཛིན་པ་ཇི་ལྟར་འཐད། །ཅེས་གསུངས་པས་འཁོར་བ་མྱང་འདས། འཁྲུལ་པ་འཁྲུལ་མེད། ཉོན་མོངས་ཡེ་ཤེས། རྣམ་རྟོག་ཆོས་སྐུ་སོགས་གྲུབ་པ་ཡིན་པ་དེ་ལྟར་བརྟག་གཉིས་སུ། རྣམ་དག་ཡེ་ཤེས་གཟུགས་ཅན་དང་། །འཁོར་བ་རྣམ་པར་བྱང་བ་གཉིས། །ཁྱད་པར་ཅུང་ཟད་ཡོད་མ་ཡིན། །ཞེས་གསུངས་པ་ལ། འབྲོག་འགྱུར་དུ། འཁོར་བ་རྣམ་པར་རྟོག་པ་གཉིས། །ཞེས་གསུངས་པའོ། །དེས་ན་གཞི་སྟེང་དུ་འཁྲུལ་པ་འདོར་རྒྱུ་མེད་ལ། གང་ཟག་ལ་འཁྲུལ་པ་ཡེ་ཤེས་སུ་འགྱུར་རྒྱུ་ཡོད་པ་སྔར་བཤད་པའི་མ་རིག་པ་དང་རིག་པའི་ཁྱད་ལས་སོ། །གཉིས་པ་སྒོམ་པ་འོད་གསལ་དྲི་མེད་ནི། །སྟོང་དང་རྟེན་འབྱུང་དོན་གཅིག་པ། །དབུ་མའི་ལམ་དུ་གསུངས་པས་ན། །ཞེས་གསུངས་ཏེ། ཀུན་རྫོབ་རྟེན་ཅིང་འབྲེལ་བར་འབྱུང་བ་འདི་ཁའི་རང་བཞིན་ཤེས་པ་སྟོང་ཉིད་ཡིན་ལ། དེ་ཁོ་ན་དབུ་མའི་ལམ་དྲི་མ་མེད་པ་ཡིན་པས་དེ་ཡོངས་སུ་ཤེས་པ་ནི་མ་རིག་པའི་མུན་པ་དང་བྲལ་བའི་ཕྱིར་འོད་གསལ་ཏེ་དེ་ལ་མི་གཡོ་བར་གནས་པས་ལྟ་ཐོག་ནས་སྒོམ་པ་རྙེད་པ་ཡིན་ནོ། །དུས་དེར་སྣང་བ་མེད་པས་སྣང་བ་ལམ་དུ་འཁྱེར་བ་ཡང་མིན། སྣང་མེད་དུ་མ་གྲུབ་པས་སྟོང་རྐྱང་ལམ་དུ་ཁྱེར་བ་ཡང་མིན། སྟོང་མི་སྟོང་ལས་དམིགས་རྒྱུ་གཞན་མེད་པས་དམིགས་པ་ཐམས་ཅད་ཉེ་བར་ཞི་བ་སྟེ། དངོས་པོ་མེད་ལ་སྒོམ་པ་མེད། །བསྒོམ་པར་བྱ་བ་སྒོམ་པ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པའོ། །ཞེས་གསུངས་པའི་ཕྱིར་རོ། །དེ་ལ་ཡོད་པར་སྒྲོ་འདོགས་པའམ་མེད་པར་སྨྲས་པའི་སྐུར་འདེབས་མེད་པར། སྟོང་ཉིད་སྟོན་པའི་བླ་མ་ཞིག་ལོགས་ན་ཚོལ་དགོས་ཇི་ལྟར་འཐད་དེ་སྒྲོ་འདོགས་ཐམས་ཅད་བཅད་ཟིན་པའི་ཕྱིར་ཕྱིས་སྒྲོ་འདོགས་གཅོད་རུང་སྡོད་མི་དགོས་ཞེས་པའོ། །གསུམ་པ་སྤྱོད་པ་དྲི་མ་མེད་པ་ལ་རྩལ་སྦྱང་བ་ནི། རང་གི་སེམས་ལ་བཟོ་ཤེས་ན། །ཐམས་ཅད་བདེན་པར་མ་གྲུབ་པས། །ཇི་ལྟར་སྣང་ཡང་བློ་སྦྱོང་གི །གྲོགས་དང་མཐུན་པའི་རྒྱུ་རུ་སྦྱར། །གེགས་སེལ་ལོགས་ནས་ཅི་ཞིག་དགོས། །ཞེས་གསུངས་ཏེ། དེ་ལྟར་རང་གི་སེམས་ཀྱི་ཆོས་ཉིད་མཐོང་ནས་འདོད་ཆགས་ལ་སོགས་པ་ཐམས་ཅད་བློ་སྦྱོང་གི་གྲོགས་སུ་འགྲོ་བས། གསང་སྔགས་པ་འཁྲིག་པས་འདོད་ཆགས་ལམ་དུ་འཁྱེར། མངོན་སྤྱོད་ཀྱིས་ཞེ་སྡང་། འོད་གསལ་གྱིས་གཏི་མུག་སོགས་དེ་ཉིད་རང་གི་དུས་སུ་ལམ་དུ་འཁྱེར་བ་ཡིན་པས་དེ་དག་ཉོན་མོངས་པའི་ཕྱོགས་སུ་སོང་དྲགས་སྙམ་ཀླན་ཀ་མི་གདགས་ཏེ། སྐྱེ་བོ་མི་བཟད་པ་ཡི་ལས། །གང་དག་གང་གིས་འཆིང་འགྱུར་བ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །ཞེས་གསུངས། དེས་ཚོགས་དྲུག་གང་ཕྲད་ཚུལ་བཞིན་དུ་ངོ་ཤེས་པ་སྔར་འདྲིས་ཀྱི་མི་དང་ཕྲད་པ་ལྟ་བུ་ཡིན་ནོ། །འདི་ནི་གཟུགས་སོ་སྙམ་པ་སོགས་ནི་ཚུལ་མ་ཡིན་པར་འཇོག་པ་ཡིན་པས། ངོ་ཤེས་ཁྱེར་ལ་ཁྱད་ཆེའོ། །གསུམ་པ་འབྲས་བུ་དྲི་མ་མེད་པ་ནི། གཞན་ལས་བདུད་བཞི་རིམ་པ་ཅན་འཇོམས་ཚུལ་བཤད་པ་ལ། འདིར་ནི་མ་རིག་པ་བཅོམ་པའི་དུས་དེ་ཁར་བདུད་བཞི་བཅོམ་པ་དུས་ཀྱི་འཁོར་ལོ་ལས་གསུངས་པ་བཞིན། མ་རིག་པ་འཁོར་བ། རིག་པ་མྱ་ངན་ལས་འདས་པ་སྟེ། འཁོར་འདས་ལག་པའི་ལྟོ་རྒྱབ་ལྟ་བུར་འདོད་པ་ཡིན་ནོ། །དེས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱང་བ་བྱས་པ་ལས། །དག་པ་དེ་ཉིད་མྱ་ངན་འདས། །ཞེས་གསུངས་པས་ཀུན་གཞི་ལ་རྣམ་ཤེས་དང་ཡེ་ཤེས། དང་པོ་འཁོར་བའི་རྒྱུ་འབའ་ཞིག་པ་དང་། ཕྱི་མ་མྱ་ངན་ལས་འདས་པའི་རྒྱུར་འཇོག་པ་ཡང་མི་འཐད་དེ། དེ་ལྟ་ན་གཞི་དུ་མར་ཐལ་བའི་སྐྱོན་འབྱུང་ངོ་། །རང་ལུགས་ནི། རྩ་བ་གཅིག་ལ་སྡོང་པོ་གཉིས། །རྒྱུ་མཚན་དེ་ལས་འབྲས་བུ་གཅིག །ཅེས་གསུངས་པ་ཉིད་འདོད་པ་ཡིན་ནོ། །དེ་ལྟར་ལམ་འདི་ཀུན་ཀྱང་ལམ་གཅིག་ཏུ་བཞག་པ་དང་། ཉན་ཐོས་སམ། ཐེག་ཆེན་དུ་རིགས་ངེས་པ་དེ་ནས་ཁྲིད་པས་གསུམ་མམ་འབྲས་བུའི་ཐེག་པ་ལས་སྙིང་པོའི་དོན་ལ་དང་པོ་ཉིད་ནས་ཁྲིད་ཆོག་པས་ལམ་རིམ་བཞིར་ཡང་འགྱུར་ལ། བཀའ་གདམས་པ་གཞན་ནི། སྐབས་གསུམ་པ་ཡན་ལས་མི་འཆད་ལ། དགོན་པ་བ་ཆེན་པོའི་མན་ངག་ལས་བཞི་པའང་ཟུར་ཙམ་བྱུང་བས། ལམ་སྒྲོན་གྱི་ཞལ་གྱི་གདམས་པ་ཐུན་མོང་མ་ཡིན་པར་འདི་དགོས་སོ་ཞེས་ཤེས་པར་བྱའོ། །གདུལ་བྱ་སོ་སོ་ལ་འདྲེན་ཚུལ་སོ་སོ་ཟབ་པ་གནས་སྐབས་ཐེག་པ་རང་ས་ན་བདེན་པ་དང་། བློ་ངོར་ཟབ་པ་ཁོ་ནས་འཐུས་ན་ཐེག་པ་གོང་མར་འཁྲིད་མི་དགོས་ལ། དེར་དྲང་བས་ལུགས་གོང་མ་ཟབ་པ་ཡིན་ནོ། །དེ་ནི་སྐྱེས་བུ་ཆེན་པོའི་ཡང་ཆེན་པོའི་ལམ་རིམ་འབྲས་བུའི་ཐེག་པ་བཤད་པའི་སྐབས་ཏེ་བཞི་པའོ།། །།དེ་ལྟར་ལམ་གྱི་མཆོག་རིན་པོ་ཆེའི་འཕྲེང་བ་ཚིགས་སུ་བཅད་པ་ཕྱེད་དང་བཅས་པའི་བཅུ་གཉིས་པ་ཆོས་ཀྱི་རྒྱལ་པོ། ཆོས་ཀྱི་རྗེ། ཆོས་ཀྱི་དབང་ཕྱུག་ཆེན་པོ་སྒམ་པོ་པ་དགེ་སློང་འཚོ་བྱེད་ཅེས་བྱང་ཕྱོགས་གངས་རིའི་ལྗོངས་འདིའི་བསྟན་པ་ལ་བྱ་བ་བྱེད་པར་སྟོན་པས་ལུང་བསྟན་པ་དེས་མཛད་པ་རྫོགས་སོ།། །། ད་དུས་དགག་བཞག་རྩོད་སྤོང་ལྟར་སྣང་སྤྲིན། །ལེགས་བཤད་འབྲུག་སྒྲས་འཕོངས་པའི་ཚོགས་འཐུག་པོས། །བདག་ཉིད་ཆེན་པོའི་གཞུང་ལུགས་གནམ་གྱི་ཁྱོན། །བསྒྲིབས་ནས་ཅུང་ཟད་ལྟ་བའི་སྐབས་མ་དབྱེ། །དེར་ཁྲོས་མཐར་གནས་མགོན་པོས་སྔོན་སྦྱངས་པའི། །ང་རོས་བསྙེམས་པའི་འཕྲུལ་ཆེན་འདི་བཀྱེ་བས། །ཐུབ་བསྟན་དུས་བཞིའི་ཐོག་མ་སླར་འོང་སྙམ། །མཁས་པའི་ལྗོན་ཤིང་གུས་པའི་ལོ་མ་འཐོར། །སྔོན་བྱུང་དབྱངས་ཀྱི་པདྨོ་རྣམ་དབྱེ་ཕྱིར། །རྟ་བདུན་འོད་ཚོགས་རྒྱས་པ་འདི་སྦྱར་ན། །སྲིད་ལས་རབ་བཟློག་ཆེད་ཞུགས་དེ་དག་སྤྱིར། །ཚུལ་བཞིན་སྣང་བའི་ཉི་ཟླ་འབར་གྱུར་ཅིག །ཅེས་ལམ་མཆོག་རིན་པོ་ཆེ་འམ་དྭགས་པོའི་ཆོས་བཞིའི་རྣམ་པར་བཤད་པ། སྐྱེས་བུ་གསུམ་གྱི་ལམ་ཉིན་མོར་བྱེད་པ་ཞེས་བྱ་བ་འདི་ཙཱ་རི་ཏྲའི་གནས་སྒོ། བྱར་ཡུལ་སའི་ཐིག་ལེ་ལྷས་བསྟན་གྱི་རི་བོ་གསང་སྔགས་ཆོས་ཀྱི་གླིང་ཞེས་བྱ་བའི་གཙུག་ལག་ཁང་དུ་དགེ་སློང་པདྨ་དཀར་པོས་སྦྱར་བའི་ཡི་གེ་པ་ནི་གྲོ་མོ་བ་བློ་གྲོས་རྣམ་རྒྱལ་གྱིས་བགྱིས་པའི་དགེ་བས་སངས་རྒྱས་ཀྱི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་གྱུར་ཅིག་གུ། །འདི་ན་ཨ་ཏི་ཤ་ལུགས་འཆད་སྨྲ་དེ། །དེ་གཞུང་རྩྭ་ལྟར་དོར་ནས་རྣམ་གཞན་གྱི། །གྱི་ནར་སྨྲས་མོད་དེ་དག་ལ་སྙིང་རྗེས། །རྗེས་སུ་འཛིན་ལ་པད་དཀར་འོངས་པ་ཡིན།། །།མངྒ་ལམ།། །།