ཞི་བའི་བསྟོད་བསྐུལ།
ཞི་བའི་བསྟོད་བསྐུལ་བཞུགས་སོ། །དཔལ་ཡེ་ཤེས་ཀྱི་མགོན་པོ་བྱ་རོག་ཅན་ལ་ཕྱག་འཚལ་ལོ། །ཧཱུཾ། རབ་དཀར་ཞི་བའི་ཆ་ཙམ་གཟུང་བའང་ས་གསུམ་གྱི༑ །དབང་ཕྱུག་ཆེན་པོའི་སྤྱི་བོར་རྟག་ཏུ་བརྟེན་གྱུར་པ། །དེ་ཕྱིར་དག་པའི་ཆ་རྫོགས་ཁྱོད་ལས་གཞན་འདི་ན། །སྲིད་པའི་གདུང་སྐྱོབ་ཅི་ཡང་མེད་མནོ་སྐྱབས་ཞུས་སོ། །འདོད་ཆེན་རྣམས་ཀྱི་རྒྱུ་སྐར་བདག་པོ་ལ། །མཚན་མོའི་མགོན་པོ་ཞེས་བསྔགས་འདིའི་རྩིས་ན། །འཇིག་རྟེན་གསུམ་པོ་འདི་ན་ཅི་མཆིས་པའི། །བསྟོད་ར་ཐམས་ཅད་ཁྱོད་ལ་གཏོང་བར་འོས། །མཐའ་དག་ཉིན་མོར་བྱས་སྙམ་ཆེར་གྱུར་པ། །སྤྱང་ཀིའི་མཆེ་བའི་ཞུད་ཀྱི་ཞུམ་པར་བླ། །བདུད་བཞིའི་སྡེ་དཔུང་རྨེག་མེད་བཅོམ་པས་ཁྱོད། །གང་དང་ཅིར་ཡང་ཞུམ་ཁེངས་མེད་པས་མཚར། །ཉིད་ཀྱིས་རིགས་གསུམ་མངོན་སུམ་བགྱིས་པས་ན། །ཐོགས་པའི་སྒྲིབ་པ་ཀུན་ལས་གྲོལ་བའི་ཕྱིར། །ཐམས་ཅད་མཁྱེན་ཅིང་ཐམས་ཅད་གཟིགས་པས་དེ། །ཀུན་གྱི་སྟོན་པར་འོས་ནས་ཕྱག་བགྱིས་སོ། །ཁྱོད་ཀྱི་ཆོས་ཀྱི་འཁོར་ལོ་ཕུལ་བྱུང་བ། །རིགས་གསུམ་རྒྱུད་ལ་འཁོར་བས་ཉོན་མོངས་དགྲ། །རབ་ཞི་སྨིན་གྲོལ་བདེར་འཚོའི་བཀའ་རྟགས་ཐོད། །དཔལ་མོའི་དཔལ་གྱི་ཐོར་ཅོག་ལྟར་མཐོའོ། །ལ་ལར་ཞི་དང་འགར་ནི་ཁྲོ་བ་དང་། །ཆགས་སོགས་ཅི་དགར་སྟོན་པའི་འགྱུར་མེད་དབྱིངས། །སྔགས་ཀྱི་རྣམ་པར་འཁྲུལ་པ་ལ་སྦྱངས་བའི། །སྒྱུ་མ་བྱེད་པའི་རྫས་དང་མཚུངས་སྙམ་བགྱིད། །ཇི་ལྟར་སྨན་དང་དགོན་པའི་ཤིང་བཞིན་དུ། །འགྲོ་བའི་དགོས་པ་ཀུན་ཏུ་ཁྱོད་འཆར་ཏམ། །སྤང་གྱུར་འཇམ་པའི་དབྱངས་དེ་སྒྲོག་པས་སུ། །ཕྱིན་ཆད་དབུལ་འཕོངས་མིང་དུ་ཟད་འགྱུར་རོ། །བུ་ཆུང་ཉེས་པར་ཞུགས་ལ་མ་ཁྲོས་ནས། །བརྡེག་ཚོག་མི་སྙན་ཚིག་རྩུབ་སྨྲ་བ་ཡང་། །བྱམས་པའི་རྣམ་འགྱུར་ཉིད་དུ་བས་པ་བཞིན། །ཉིད་སྐུའི་ཁྲོ་ཚུལ་འདི་ཡང་དེ་བཞིན་ཡིན། །གང་གི་ཕྱག་བཞི་ཕྱག་ཆའི་རིགས་པས་ཀྱང་། །ཕན་པའི་གཉེན་དུ་གསོལ་བར་བྱས་པ་འདི། །སྔོན་ཚེ་སྨོན་འཇུག་ཐུགས་སྦྱངས་རྣམ་སྨིན་ཕྱིར། །རྒྱུ་འབྲས་རྟེན་འབྱུང་སྒྲུབ་བྱེད་ཆེན་པོར་སོང་། །དེ་ཁ་དགེ་བ་སྤྱོད་པའི་འདྲེན་བྱེད་དཔྱིད། །སྡིག་ཞུགས་དངངས་བ་སྲོག་གི་གཤེད་མངོན་སུམ། །གླང་ཆེན་སྨྱོན་པའི་སྣར་བཅངས་རལ་གྲི་རྣོ། །ཕས་རྒོལ་མུ་སྟེགས་ལས་ངན་རྒྱུད་གཅོད་ལགས། །སྨན་གྱི་བུ་མོ་དཔག་བསམ་ལྗོན་པའི་རྒྱལ༑ །ལྕགས་ཀྱུ་མཚོན་ཆའི་འཁོར་ལོའི་དཔལ་ནུས་ནི། །ཁྱོད་གསུང་གསང་སྔགས་རིགས་པ་གཟུངས་ཀྱི་སྡེ། །ཏིང་འཛིན་ཕྱག་རྒྱའི་ཁུང་ལས་མངོན་དུ་རྒྱུ། །གནོད་པར་སྦྱར་ཡང་ཁྱོད་མཐུའི་སྐྱོ་ཐང་གི །བདེ་བར་དྲངས་པས་ཐལ་བའི་དབྱངས་སོང་བཞིན། །ཚར་གཅོད་རྗེས་གཟུང་གཞི་གཅིག་ལ་འདུ་བས། །དཀར་ནག་ལས་ཀུན་མཉམ་པ་ཉིད་དུ་སྦྱངས༑ །ཁྱོད་དཔལ་སངས་རྒྱས་ཉིད་ཀྱི་བསྐལ་པ་ནི། །གངྒའི་ཀླུང་ནི་ཇི་སྙེད་བརྗོད་མི་ཟད། །དེ་ཕྱིར་བདག་གི་བརྗོད་པར་མི་སྤོབས་བཞིན། །སྨྲས་འདི་ཤིས་བརྗོད་སྔོན་བཏང་ཞུ་འདོད་ཆེད༑ །སྙིགས་མའི་དབང་གིས་མི་ཤེས་ཤུགས་རྒྱས་ནས། །རྒྱལ་བ་དང་ནི་མགོན་པོ་ཆེན་པོ་ཁྱོད། །སྟོན་དང་དེ་ཡི་གཉེར་ཁ་འཛིན་པའི་ཁྱད། །འབྱེད་ལས་ནོངས་པ་ཅི་དགོས་བཤགས་ལགས་སོ། །འོན་ཀྱང་ཁྱོད་ནི་རིས་མེད་ཅིར་གཟུང་བ། །དེ་ཁའི་དོན་གྲུབ་ཉིད་ཀྱི་ཉམས་ཉེས་པ། །མ་ཡིན་བྱ་བའི་ཡུལ་ལ་ཡོད་པ་ཡི། །མཛད་པའི་མཆོག་གི་སྙམ་དགའ་ཚངས་པ་ཐོབ། །དེས་ན་རྒྱལ་བའི་བསྟན་པ་རིན་པོ་ཆེ། །དུས་ཀྱི་འབྱུང་ཁུངས་རྣམས་ནའང་རྙེད་དཀའ་བ། །གང་ཡོད་མངོན་སུམ་ཕྱུང་ནས་བདག་ཅིག་གི །ལོངས་སྤྱོད་ཆེན་པོའི་ཕྱིར་དུ་སྦྱིན་པར་གསོལ། །འགའ་ལ་འཆད་ཉན་བགྱིད་རློམ་དེ་དག་ནའང་། །གསེར་ལ་ར་བཞིན་རྟོག་གེས་བསླད་པས་སུ། །འདོད་དོན་ཡིད་བཞིན་འགྲུབ་དཀས་སྐྱོན་སེལ་ཀྱང་། །མཛོད་ཅིག་གཞན་གྱིས་ནུས་པའི་ཡུལ་མིན་ནོ། །གཞན་ལྟ་ཟློག་ཟེར་ལུས་ངག་ཡིད་ངལ་རིང་། །རང་ལུགས་འཇའ་ཚོན་གར་སོང་ཁུང་མེད་པའི། །ཁ་འཆལ་ཆར་མུན་འཐིབས་པ་འདི་སོལ་ལ། །ཐུབ་བསྟན་ཉི་འོད་རྒྱས་པར་མཛད་དུ་གསོལ། །རྒྱུད་སྡེའི་ཐང་ལ་ཧོལ་རྒྱུགས་བྱས་པས་སུ། །སྨིན་དང་བསྐྱེད་རྫོགས་གནད་ཀྱི་ཆུས་འཕོངས་ནས། །ཐ་སྙད་སྨིག་རྒྱུའི་རྗེས་འབྲང་ངལ་འདི་རྣམས། །དབུགས་འབྱིན་མཛད་པར་རྟག་ཏུ་གསོལ་བ་འདེབས། །ཚེ་གཅིག་སངས་རྒྱས་ས་ལ་འགྲོ་རིངས་ནས། །སྙིང་པོའི་གསེབ་ལམ་འདི་རུ་ཞུགས་གྱུར་ཀྱང་། །བག་ལྡན་ས་མཁན་མེད་པས་ཐོམས་རྣམས་ལ། །དགེ་བའི་བཤེས་གཉེན་ཞུ་ཞེས་སྨྲེ་སྔགས་བཏོན། །བདེ་བའི་གོ་སྐབས་ཡངས་པ་འདི་ནས་སུ། །བདེ་འགྲོ་དོར་ནས་ངན་འགྲོའི་ཅ་འཕྲང་དུ། །ནན་གྱིས་འཚང་ཀུན་ཞི་བསླབས་མི་ཉན་པས། །བཀའ་ནོན་ཕོབ་ཅེས་ཁྱོད་ལ་འབོད་པ་རྒྱབ། །དཔལ་ཡོན་ཀུན་གྱི་ཀེ་ལ་ཤའི་རི་བོ། །རབ་དཀར་བདུད་རྩི་ཕུང་པོ་ཁྱོད་མདུན་དུ། །འཁོར་བའི་ཚད་གདུངས་འཐིབས་པོས་བདག་ཅག་མནར། །གཞན་དོན་དུས་ལས་ཡོལ་འདྲ་སྦྲན་ལགས་སོ། །རེ་ཞིག་རང་ལས་ལྷུ་ལོང་དེ་ནས་སོ། །དགོངས་ན་གཞན་དོན་བསགས་པའི་དགའ་ཆར་སྤྲིན། །རྒྱལ་པོས་ཕུག་སྤྱོད་མཉམ་ནོར་སྦས་པའི་མཛོད། །ཕན་མེད་ཡལ་བ་དེ་བཞིན་མི་འགྱུར་གྲང་། །གཞན་དུ་རང་ལ་རག་ལུས་ཉིད་གྱུར་ན། །དབང་ཕྱུག་རྒྱང་ཕན་འདོད་པ་ཚང་མར་སོང་། །ནད་པར་སྨན་པ་ཞིང་ལ་སོ་ནམ་སོགས། །འབད་པའང་ངལ་བ་ཁོ་ནར་མ་ཟད་དམ། །གངས་ཀྱང་ཚ་བའི་དྲོད་དང་མ་ཕྲད་རིང་། །བསིལ་བའི་ཆུ་ཀླུང་འབེབས་པ་མི་སྤྲ་ོལ། །རྩོལ་བས་ཆུ་གཏེར་བགྲོད་པས་ནོར་ཐོབ་པ། །མངོན་གྱུར་རྒྱུ་མཚན་གསོལ་ནས་ཁྱོད་ཐུགས་བསྐུལ། །བདག་མཐུ་ཞན་པས་ཁྱོད་ལ་རེས་པ་སྟེ། །སྟོབས་མཉམ་རེ་ལྟོས་ཞུ་དགོས་མ་མཆིས་པ། །དཔའ་བོ་ཕན་ཚུན་འདྲ་བའང་གཟིགས་མཛོད་ཅེས། །ལྡབ་ལྡིབ་འཆི་ཀའི་ངག་འདྲས་སྤོས་ཐོལ་ཞུས། །ཕུག་པ་ཞྭ་ལྟར་གྱོན་ནས་ཁྱོད་སྒྲུབས་ཤིང་། །དམ་རྫས་རྟེན་དུ་བཙུགས་ནས་ཁྱོད་བོས་ལ། །དཀའ་དགུ་དང་དུ་བླང་ནས་ཁྱོད་མཆོད་ཀྱང་། །མཆོག་སྟེར་མི་མཛད་མགོན་པོ་ཁྱོད་རེ་ཞན། །བདག་ལ་ཆོས་ཀྱི་བར་ཆད་ཐམས་ཅད་བདོའོ། །སྡུག་བསྔལ་ཚོགས་ཀྱང་ཅུང་ཟད་གྲ་མ་ཆག །ན་རྒ་འཆི་བའི་འཇིག་པའང་དྲུང་གཉེར་བས། །མཆི་མ་ལྷུག་པར་ཤོར་གྱི་རོགས་ལ་བྱོན། །གནོད་པ་བྱེད་པ་འདི་ཀུན་ཚ་རཾ་རཾ། །གྲོགས་ཡོངས་བསིལ་སྐྱོབ་སྤྲིན་བཞིན་ཡལ་ལེ་ལེ། །ཅི་དྲག་ལ་གཏོར་སྨྲེ་དངངས་དི་རི་རི། །ཁྱོད་སྙན་བསུན་རུང་མི་བྱའི་ཐབས་མ་བྱུང་། །ཚུལ་གནས་ཐོས་བསམ་བསྒོམ་ལ་འབད་པ་ཡི། །ལུང་རྟོགས་བསྟན་པ་འཛིན་ལ་གེགས་འདི་འདྲ། །ཚར་གཅོད་མི་མཛད་བཏང་སྙོམས་ཁྱོད་བཞུགས་ན། །བསྟན་བསྲུང་གཉན་པོ་མིང་དུ་ཟད་པར་འགྱུར། །འཇིག་རྟེན་འདི་ན་དབུལ་ཞིང་འཕོངས་པ་མོད། །ཕལ་ཆེར་ཆོས་ལས་ནོར་ལ་རིན་ཐང་ཆེ། །འདི་འདྲའི་དུས་འདི་ཞི་བར་མི་མཛད་ན། །རྒྱལ་བའི་སྤྱན་སྔར་དམ་བཅས་གཡེལ་བ་ཡིན། །ཐུགས་རྗེ་དབང་ཕྱུག་དེ་ཡང་ཐོས་པའི་ལམ། །གཞན་དོན་མཐར་ཕྱིན་བརྙེས་པའང་ཁ་སྐད་ཀ །ནུས་པ་དེ་ཡང་འགར་སྟེ་གཞན་རྡུགས་སྙམ། །རྣལ་འབྱོར་ཡི་ཆད་སྐྱེ་ཡི་སྙིང་མ་རིང་། །བདག་ནི་ཆོས་བཞིན་སྤྱོད་འདོད་མ་ལགས་པ། །བསམ་པ་གཉིས་པ་མ་མཆིས་ཁྱེད་རང་དཔང་། །དེ་ཕྱིར་ཞུ་ཚིག་བདེན་པའི་གཏམ་གསན་ནས། །འཁོར་དང་བཅས་པ་མཐུ་རྩལ་ལའུར་ཕྱུང་།། ཅེས་མགོན་པོ་ཕྱག་བཞི་པ་ཞི་བའི་ལས་ལ་བསྐུལ་བ་པདྨ་དཀར་པོས་སྦྱར་བའོ།། །།