བརྟག་གཉིས་ནས་གསུངས་པ་རྡོ་རྗེའི་གླུའི་སྐད་གཉིས་ཤན་སྦྱར།

བརྟག་གཉིས་ནས་གསུངས་པ་རྡོ་རྗེའི་གླུའི་སྐད་གཉིས་ཤན་སྦྱར་བཞུགས་སོ། །ཀོལླ་ཨི་རེ་ཊཋི་ཨ་པོ་ལ་མུ་མྨུ་རེ་ཀ་ཀྐོ་ལ། གྷ་ཎ་ཀྲི་པི་ཊ་ཧོ་པཛྫ་ཨི་ཀ་རུ་ཎེ་ཀི་ཨ་ཨི་ཎ་རོ་ལ། ཏ་ཧིཾ་བ་ལ་ཁཛྫ་ཨི་ག་ཌྷྜྷེཾ་མ་ཨ་ཎ་བིཛྫ་ཨ་ཨི། ཧ་ལེ་ཀ་ལིཉྫྱ་ར་པཱ་ཎི་ཨ་ཨི་དུན་དྷུ་ར་བཛྫ་ཨ་ཨི། ཙ་ཨུ་ས་མ་ཀཧྨ་རི་སི། །བདེ་བ་ཅན་གནས་རྡོ་རྗེ་ནི། །ལྟེ་བ་རུ་ནི་པདྨ་ཡི། །རྒྱུན་དུ་འབོད་ལ་ཅང་ཏེའུ་བརྡུང་། །རྩོད་པར་མི་བྱ་སྙིང་རྗེ་བས། །དེ་ལ་ཤ་ནི་བཟའ་བ་དང་། །ཆང་ནི་ཤིན་ཏུ་བཏུང་བ་སྟེ། །ཀྱེ་ཧོ་སྐལ་ལྡན་གཞུགས་པར་བྱ། །སྐལ་བ་མེད་པ་སྤངས་ནས་སུ། །བཤང་བ་དང་ནི་གཅི་བ་རྡུལ། །ཀཏྤཱུ་ར་ལཱ་ཨི་ཨ་ཨི། མ་ལ་ཨི་ཨིནྡྷ་ཎ་སྭཱ་ལི་ཛ་ཏ་ཧཾ་བྷ་ཏུ་ཁ་ཨི་ཨ་ཨི། བྲེམཁེ་ཊ་ཀ་རནྟེ་ཤུདྡྷ་ཨ་ཤུདྡྷ་ཎ་མ་ཎི་ཨ་ཨི། ནི་རཾ་ཤུ་ཨངྒ་ཙ་ཌ་བི་ཏ་ཧིཾ་ཛ་ཤྲཱ་ཝ་པཱ་ཎི་ཨ་ཨི། མཱ་ལ་ཨ་ཛེ་ཀུནྟུ་རུ་པ་ཊ་ཨི་ཌིན་ཌི་ལ་ཏ་ཧིཾ་ཎ་བཛྫ་ཨ་ཨི།། །། ཁུ་བ་རྣམས་ནི་སྦྱར་བར་བྱ། །ཚོད་མ་དང་ནི་ཤ་ཆེན་པོ། །དེ་ལ་མང་པོ་བཟའ་བ་ཡིན། །འོང་བ་དང་ནི་འགྲོ་བར་བྱེད། །དག་དང་མ་དག་མི་དམིགས་པས། །རུས་རྒྱན་ཡན་ལག་རྣམ་ལ་གདགས། །དེ་རུ་རོ་ནི་གཞུག་པར་བྱ། །འདུས་པར་དབང་གཉིས་སྦྱོར་འཇུག་པ། །རེག་མིན་དེ་ལ་སྤངས་བྱ་མིན། །གྲུབ་པའི་ལེགས་བཤད་ཇི་བཞིན་དུ། །བློ་གསལ་པདྨ་དཀར་པོས་སྒྱུར།། བརྡ་དོན་གསུམ་གྱི་བཤད་པ་མཁའ་འགྲོའི་གསང་གཏམ་ཞེས་བྱ་བ་དགྱེས་པ་རྡོ་རྗེའི་མན་ངག། །། ༈ གསང་བ་མཆོག་གི་དགྱེས་པ་ནི། །ཐམས་ཅད་བདག་ཉིད་རྟག་བཞུགས་པའི། །རྡོ་རྗེའི་སློབ་དཔོན་ཚོགས་ཀྱི་རྗེ། །དཔལ་ལྡན་ནཱ་རོ་ཏ་པར་འདུད། །ཉི་མའི་བཏུང་བས་རབ་མྱོས་མའི། །པདྨ་གཞིབས་པས་མདར་བའི་ཞལ། །གསར་བའི་བདུད་རྩི་སྤྲོ་བ་ལ། །སྤྲིན་གསར་དག་པ་བཞིན་དུ་དཀར། །འབྱུང་བ་རོ་སྙོམས་ཀྱི་གཞུང་དང་པོ་རྡོ་རྗེའི་གླུ་བཤད་པར་བྱ་སྟེ། དཔལ་རྒྱལ་བའི་དབང་པོས་ཆོས་ཉིད་རྣམ་པར་མི་རྟོག་པའི་ཡེ་ཤེས་ཁོང་དུ་ཆུད་པའི་མཐུས་ལྟ་བ་ངན་པ་རྣམས་ཟིལ་གྱིས་གནོན་ཅིང་རང་གི་རྟོགས་པ་གོང་ནས་གོང་དུ་འཕེལ་བར་བྱེད་པས་ན་རྡོ་རྗེའི་གླུ་སྟེ། རྡོ་རྗེ་ཕ་ལམ་བཞིན་ནོ་ཞེས་གསུངས་ལ། འདི་དྲང་དོན་དུ་བཤད་པས་དཔའ་བོའི་རིམ་པའི་བརཏལ་ཞུགས་དང་། ངེས་དོན་དུ་བཤད་པས་བདག་བྱིན་གྱིས་བརླབ་པའི་བརཏལ་ཞུགས་ཏེ། དཀྱིལ་འཁོར་འཁོར་ལོའི་ཐབས་དང་ནི། །རང་བྱིན་བརླབ་པའི་རིམ་པས་ཀྱང་། །ཀུན་རྫོབ་དོན་དམ་ཚུལ་ཅན་གྱི། །བྱང་ཆུབ་སེམས་ནི་རབ་ཏུ་བསྐྱེད། །ཀུན་རྫོབ་ཀུནྡ་ལྟ་བུ་ཉིད། །དོན་དམ་བདེ་བའི་གཟུགས་ཅན་ནོ། །ཞེས་སོ། །དང་པོ་ནི། ཀོ བདེ་བ། ལླཨི་རེ། གཟུང་བ། བདེ་བ་གཟུང་བ་ཉིད་ཀྱི་ཕྱིར་བདེ་བ་ཅན་ཏེ། དོན་ཆོས་འབྱུང་གི་གཞིའི་གཞལ་ཡས་ཁང་དེ་གང་དུ་འཚོག་པར་བྱ་བའི་དཀྱིལ་འཁོར་བསྟན་པའོ། །ཊཋི་ཨ། གནས་པ། སུ་དག་གནས་ན། བོ་ལ། རྡོ་རྗེ། ཐབས་རྣལ་འབྱོར་པ་དང་། ཤེས་རབ་རྣལ་འབྱོར་མ་རྣམས་མཉམ་ཞིང་མཉམ་པ་རྡོ་རྗེ་ཡིན་པས་དེ་དག་གོ །ཇི་ལྟར་འཚོག་པ། མམྨུ་ནི། ལྟེ་བ་རུ། རེ་ཀ་ཀྐོ་ལ། པདྨ་ཡི། རྡོ་རྗེ་སློབ་དཔོན་ཡབ་ཡུམ་ལྟེ་བ་དང་། སློབ་མ་ཕོ་མོ་རྣམས་པདྨའི་འདབ་མ་རྣམས་ལ་གྲལ་རིམ་དུ་བྱ་བས་སོ། །དེར་ཇི་ལྟར་བྱ་ན། གྷ་ཎ། རྒྱུན་དུ། ཀྲི་པི་ཊ། ཅང་ཏེའུ། ཧོ། འབོད་པ་ལ། བཛྫ་ཨི། བརྡུང་པ་སྟེ། དང་པོ་བརྩམས་ནས་ཕྱག་རྒྱ་ཆེན་པོའི་དངོས་གྲུབ་མ་ཐོབ་ཀྱི་བར་དུ་རྒྱུན་ཆགས་པར་བྱ་དགོས་པས་དང་། ཚོགས་ཀྱི་དཀྱིལ་འཁོར་དེར་མཁའ་འགྲོ་མ་ཐམས་ཅད་གཏོར་མ་ལ་སོགས་པས་མཆོད་པའི་ཕྱིར་འབོད་པ་ལ་ཅང་ཏེའུར་ཀྲོལ་བར་བྱ་སྟེ། རྐང་པ་གཡོན་པའི་མཐེ་བོང་གིས་དཀྱིལ་འཁོར་གྲུ་བཞི་པའི་མཚམས་བཞིར་ལྕགས་ཀྱུ་བྲིས་ལ་དབུས་སུ་གནས་ནས། ལྷག་པའི་ལྷའི་ང་རྒྱལ་གྱིས་མཁའ་འགྲོ་མ་རྣམས་ཀྱི་མིང་གི་དང་པོ་དེའི་མཐར། ཁྲེཾ་ཧཱུྃ་ཞེས་འགྱིངས་པ་དང་བཅས་པས་དཀྲོལ་ན་ཐམས་ཅད་འོང་བར་འགྱུར་ཏེ། མ་འོངས་ན་དེ་དག་འཆི་བར་འགྱུར་ལ། གལ་ཏེ་ལས་མ་གྲུབ་ན་སློབ་དཔོན་ཁྲོས་པའི་ཏིང་ངེ་འཛིན་གྱིས་རྡུང་བར་བྱེད་ན་མཁའ་འགྲོ་མ་རྣམས་མཆི་མ་འཛག་བཞིན་དུ་ཁུགས་ཤིང་ལས་བྱེད་པར་འགྱུར་རོ། །ཅང་ཏེའུ་དེ་ལའང་ཕྱི་ནང་གཉིས་ལས། ཕྱི་ནི་རྡོ་རྗེ་ཅན་གྱི་ཤིང་གོ་ཤཱིརྵ་དང་། ཙན་དན་དམར་པོ་སོགས་གང་འདོད་པའི་ཤིང་ལས་བྱས་པ། ནང་སྐྱེས་པ་ལོ་བཅུ་དྲུག་པའི་དང་། བུད་མེད་ལོ་བཅུ་གཉིས་མའི་ཐོད་པ་སྤྱི་བོ་སྤྲད། དགའ་བ་བཅུ་དྲུག་དག་པའི་བུ་ག་བཅུ་དྲུག་རོ་སྐྲ་གསུམ་དྲིལ་གྱི་སྐུད་པས་དྲྭ་བའི་ཚུལ་དུ་བཅིངས་པ། རབ་སོར་བཅུ་གཉིས། འབྲིང་སོར་བཅུ་གཅིག་དང་བཅུ་པ། ཐ་མ་སོར་དགུ་པ། ཁ་ལ་དེའི་ཕྱེད། སྤྲེའུའི་པགས་པ་ལ་ཟླ་མཚན་གྱི་པད་འདབ་ལྟེ་བ་དང་བཅས་པ་ལྷག་པའི་ལྷ་ཚོགས་སམ། སྔགས་སམ། ས་བོན་བཀོད་ནས་རབ་ཏུ་གནས་པར་བྱས་པ་དེས་གཡོག་ཅིང་། ཆུ་སྐྱར་གྱི་རྐང་པའི་རུས་པས་བརྡུང་བར་བྱའོ། དེ་དག་ཀྱང་སཾ་ཕུ་ཊར། དེ་ནས་ཅང་ཏེའུའི་མཚན་ཉིད་བཤད། །སོགས་ཀྱིས་གསུངས་སོ། །འདིས་མཚོན་པ་གླུ་དང་། གར་དང་། ཕྱག་རྒྱ་དང་། ལྟ་སྟངས་ཁྱད་པར་དུ་བྱེད་དོ། །ལྟ་སྟངས་ཀྱིས་སེམས་ཅན་གཞུག་པ་ལ་སོགས་པའི་འཕྲིན་ལས་བཞི་ལ་སྦྱོར་བའང་བསྟན་ཏོ། །ཀ་རུ་ཎེ། སྙིང་རྗེ་བས། ཀི་ཨ་ཨི་ཎ། མི་བྱའོ། །གང་མི་བྱ་ན། རོ་ལ། འཐབ་མོ། ཚོགས་ཀྱི་དཀྱིལ་འཁོར་དུ་རྣལ་འབྱོར་ཕོ་མོ་རྣམས་རྩོད་པ་མི་བྱ་བར་ཕན་ཚུན་སྙིང་རྗེ་བར་གནས་དགོས་སོ། །ཏ་ཧིཾ། དེ་ལ། བ་ལ། ཤ ཁཛྫ་ཨི། བཟའ་བར་བྱ། གཌྷྜྷེ། འདི་འགྲེལ་བ་བཅས་ཆད་འདུག མ་ཨ་ཎ། ཆང་། བིཛྫ་ཨ་ཨི། བཏུང་བར་བྱ་བ་སྟེ། ཚོགས་ཀྱི་དཀྱིལ་འཁོར་དེར་ཤ་ནི་རྣམ་པ་ལྔ་སྟེ། གཽ་ལ་སོགས་པའི་སྒྲས་བརྗོད་པ། སཾ་ཕུ་ཊར། བཟའ་བ་འདི་དག་ཡང་དག་བརྩམ། །མེ་ཏོག་བདུག་པ་མར་མེ་དང་། །དེ་བཞིན་བཟའ་བ་བཅའ་བ་ཉིད། །ཅེས་གསུངས་པའོ། །ཆང་ནི། མཉམ་སྦྱོར་ལས། སྒེག་མོ་དང་ནི་ན་ཆུང་དང་། །མྱོས་དང་དེ་བཞིན་བདུད་རྩི་དང་། །གཅིག་ཏུ་དཔའ་དང་འདོད་ཆགས་དང་། །གཡོ་ཅན་དེ་བཞིན་བྲན་མོ་དང་། །ཞེས་གསུངས་པའི་དོན་སཾ་ཕུ་ཊར། །ཆང་ནི་སྒེག་མོ་རུ་ནི་བརྗོད། །ཅེས་སོགས་ཀྱིས་བསྟན་ཏེ། དོན་འབྲུའི་ཆང་སྒེག་མོ། བཙོས་པའི་ཆང་རབ་ཏུ་མྱོས་མ་ན་ཆུང་། བུ་རམ་གྱི་ཆང་མྱོས་བྱེད་པ། སྦྲང་རྩིའི་ཆང་ནི་བདུད་རྩི་མ། རྒུན་འབྲུམ་སྦྲང་རྩིའི་ཆང་གཅིག་ཏུ་བསྲེས་པ་དཔའ་བོ། ཉ་ལྕིབས་ནི་མཉམ་སྦྱོར་འགྲེལ་པར་ཚྭ་རུ་བཤད་དེ། ཆབ་ཚྭའི་གཏུང་བ་འདོད་ཆགས། སི་བ་བོ་ཞེས་པ་ཀཱཉྫྱི་ཀའི་འབྲུའི་ཆང་ངམ། སྐྱུར་པོའི་ཁུ་བ་ལ་བཤད་ཅིང་། བཤད་པའི་སྒྲས་བརྗོད་པ་གཡོ་ཅན་མ། རྩབས་དང་སིངས་པོས་ནི་མྱོས་བྱེད་རིགས་ལྷག་མ་གཞན་ཐམས་ཅད་དེ་བྲན་མོ། དེ་ལྟར་སངས་རྒྱས་ཀུན་གྱི་བརྡས། བདུད་རྩིའི་ལམ་ཡན་ལག་བརྒྱད་དུ་བཤད་པ་རྣམས་སོ། །ཤིན་ཏུ་དེ་ལས་གཞན་པའི་བཟའ་བ། བཅའ་བ། བལྡག་པ། གཞིབ་པ། བཏུང་བར་འོས་པའི་རིགས་ཐམས་ཅད་གཟུང་བར་གསུངས་པ་སྟེ། སཾ་ཕུ་ཊར། དེ་ལྟར་བཟའ་བ་སྣ་ཚོགས་དང་། །ཆང་དང་ཉ་དང་ཡང་དག་ལྡན། །དགའ་བའི་ལོངས་སྤྱོད་སྐལ་བཟང་བས། །དཔལ་ལྡན་རྡོ་རྗེ་སེམས་དཔའ་བསྒྲུབ། །ཅེས་པས་སོ། །ཧ་ལེ། ཀྱེ་ཧོ། ཀ་ལིཉྫྱ་ར། སྐལ་ལྡན། པཱ་ཎི་ཨ་ཨི། གཞུག་བྱ་ཞིང་། ཀྱེ་ཧོ་ཞེས་ལྷན་ཅིག་སྤྱོད་པ་མོ་ལ་བོས་ནས། རིགས་གང་དང་བྱ་བ་གང་བསྒྲུབ་པ་དེ་ལ་སྐལ་བ་དང་ལྡན་པའི་རྣལ་འབྱོར་མ་དེ་འདོད་པ་སྤྱད་པའི་ཆེད་དུ་འཕང་པར་གཞུག་པར་བྱའོ། །དུན་དྷུ་ར། སྐལ་བ་མེད་པ། བཛྫ་ཨ་ཨི། སྤངས་ནས་སུ། མ་གསུངས་པའི་རིག་མ་ལ་བདུད་རྩི་ལེན་པ་བཀག་པས་མ་ཞུགས་པ་མི་འཇུག ཞུགས་པ་ཕྱིར་དབྱུང་ངོ་། །ཙ་ཨུ་ས་མ། བཤང་བ། ཀཧྶྭཀྵྭ་རི། གཅི་བ། སིཏལ། རང་བྱུང་ངམ་རྡུལ། ཀུཏྤཱུ་ར་ས། ཁུ་བ། ལཱ་ཨི་ཨ་ཨི། སྦྱར་བར་བྱ། གཞན་དག་གོ །གཞི་མཉམ་དང་། གླ་རྩི་དང་། སི་ལ་དང་། ག་བུར་རྣམས་སུ་བསྒྱུར་ཏེ། སྒྲ་ཇི་བཞིན་པ་ལ་དེ་ཀ་ཡིན་ཀྱང་འདི་ནི་དགོངས་པའི་སྐད་ཡིན་པས་འདི་ལྟར་དུ་རིགས་པ་ཡིན་ནོ། །ཕྱག་རྒྱ་དང་སྦྱར་ནས་བདུད་རྩི་བཞི་འཛག་པ་མེད་པར་སྦྱར་བར་བྱ་བ་བསྟན་ལ། མ་ལ་ཨི་ཨིནྡྷ་ཎ། ཚོད་མ་དང་ནི། སཱ་ལི་ཛ། ཤ་ཆེན། དཔེ་ཁ་གཅིག་ལས་ས་ལི་ཨ། ཏ་ཧིཾ། དེ་ལ། བྷ་ཏུ། མང་པོ། ཁ་ཨེ་ཨ་ཨེ། བཟའ་བ་ཡིན། དོན་གཏུམ་མོའི་མེས་བཟའ་བཏུང་རྣམས་ཚོད་མ་སྟེ་ར་སཱ་ཡ་ཎ་བྱས་པ་བཞིན་དུ་ཤ་ཆེན་ལུས་ཀྱི་ཐིག་ལེས་མཚོན་ནས། གཤང་གཅི་ངག ཁུ་ཁྲག་ཡིད། བཞི་པའི་ཐིག་ལེ་རྣམས་ཀྱང་འཕོ་བ་མེད་པས་དྭངས་མ་མི་ཤིགས་པའི་ཐིག་ལེར་མཚོན་པས། ཕུང་པོ་ཁམས་སྐྱེས་མཆེད་མང་པོ་རྣམས་འཇའ་ཚོན་ཙམ་དུ་དེའི་མཐའ་ལ་བཟའ་བ་ཞེས་པའི་དོན་ཏོ། །པྲེ་མཱ་ཎ། འོང་བ། ཁེ་ཊ། འགྲོ་བ། ཀརནྟེ། བྱའོ། ཤུདྡྷ། དག་པ། ཨ་ཤུདྡྷ། མ་དག་པ། ཎ་མ་ཎི་ཨ་ཨི། མི་དམིགས་པས། བྱང་སེམས་དཀར་པོ་སྟེང་དུ་འོང་བ་དང་། དམར་པོ་འོག་ཏུ་འགྲོ་བར་བྱ་སྟེ། དག་པ་ཡེ་ཤེས་ཀྱི་རླུང་། མ་དག་པ་ལས་ཀྱི་རླུང་ཞེས་གཉིས་སུ་མི་དམིགས་པའི་བཞོན་པ་ལ་ཞོན་ནས་སོ། །དོན་སྲོག་ཐུར་རམ། ཉི་ཟླ་སྒྲ་གཅན་གྱི་ཁྱིམ་དུ་འདྲེས་པའོ། །ནི་རཾ་ཤུ། རུས་རྒྱན། ཨངྒ་ཡན་ལག ཙ་ཌ་བི། གདགས་པར་བྱ། ཕ་རོལ་ཏུ་ཕྱིན་པ་དྲུག་རྫོགས་པར་བྱ་བས་ཏེ། ཕྱིར་རུས་པའི་རྒྱན་གྱིས་དང་། ནང་བྱང་སེམས་ཀྱི་བགྲོད་པ་གཉིས་ཀྱིས་སོ། །ཏ་ཧིཾ་ཛ། དེ་རུ། ཤྲཱ་ཝ། རོ། པཱ་ཎི་ཨ་ཨི། ནི་གཞུག་པར་བྱ། ཚོགས་ཀྱི་དཀྱིལ་འཁོར་དེ་རུ་རོ་མཚན་ཉིད་དང་ལྡན་པ་དྲངས་ནས་བསྒྲུབ་པས་མཁའ་ལ་སྤྱོད་པའི་རིག་འཛིན་དང་། གཞན་ཡང་དེས་མཚོན་ནས་ས་སྤྱོད། ས་འོག་སྤྱོད་ཀྱི་གྲུབ་པ་སོགས་ཐུན་མོང་བའི་དངོས་གྲུབ་རབ་འབྱམས་གང་འདོད་པ་བསྒྲུབ་པར་བྱའོ། །མཱ་ལ་ཨ་ཛེ། འདུས་པར། ཀུནྟུ་རུ། དབང་པོ་གཉིས་སྦྱོར། བ་ཊ་ཨི། འཇུག་པ། རྩིའི་ཞིང་དུ་རླུང་ལ་ཞོན་ནས་ཐིག་ལེ་དཀར་དམར་འདུ་བ་དེར། ཤེས་བྱ་དང་ཤེས་བྱེད། གཟུང་བ་དང་འཛིན་པ། ཉི་མ་དང་ཟླ་བ། ཨཱ་ལི་ཀཱ་ལི། ཐབས་དང་ཤེས་རབ་ཀྱི་ཆས་ཕོ་དབང་མོ་དབང་གི་ཐ་སྙད་བཞག་ཏུ་རུང་བ་ཐམས་ཅད་མཉམ་པར་སྦྱར་བས་མངོན་པར་ཤེས་པ་དྲུག་ཐོབ་པར་འགྱུར་རོ། །ཌིན་ཌིམ། རེག་མིན། ཏ་ཏཾ། དེ་ལ། ཎ་བཛྫ་ཨ་ཨི། སྤང་བྱ་མིན། ཚོགས་དྲུག་ལ་མ་ཞེན་ཞིང་། མི་སྤོང་བར་ལམ་དུ་ཁྱེར་བས་བདེ་བ་ཆེན་པོའི་ལོངས་སྤྱོད་དུ་བྱའོ། །གླུ་འདི་ལེན་པའི་དུས་ནི། ཐུན་མཚམས་ཚོགས་ཀྱི་དུས། དགའ་སྟོན་གཞན་གཉིས་ཀྱི་སྐབས། དབང་བསྐུར། སྤྱོད་པའི་དུས་སོ། །ལེན་ལུགས། ཇི་སྐད་བཤད་པ་ནི་བཞི་འགྱུར་ཡིན་ལ། ཤླཽ་ཀ་རེའི་མཐར་རྐང་པ་འོག་མ་གཉིས་སྦྱར་བ་ནི་དྲུག་ལྡན་ཏེ། དོན་རིམ་གྱིས་པའི་གང་ཟག་མཆོག་བར་དམན་ཤིན་ཏུ་དམན་པ་བཞིའི་དང་པོས། ཕྱི་རོལ་གྱི་མཁའ་འགྲོ་མཉེས་པས་འགྲུབ། གཉིས་པས་ཕྱག་རྒྱའི་སྟོབས་ལས། གསུམ་པ་དེ་ལ་གོམས་པར་བསྒོམས་པའི་སྟོབས་ལས། བཞི་པ་ནི་ཇི་སྐད་བཤད་པའི་འགྲོས་ཇི་བཞིན་པས་མངོན་ཤེས་སོགས་གྲུབ་པའི་ཡོན་ཏན་རྙེད་པར་བསྟན་པས་དྲུག་ལྡན་དང་བཞི་ལྡན་གཉིས་ཐོབ་པ་ཡིན་ནོ། །བླངས་པའི་དགོས་པ་ནི། དམ་ཚིག་བསྲུངས་པ་དང་། འདི་གཉིས་ཀྱི་ནི་ཚོགས་བསྲུང་ཞིང་། །ཞེས་པའི་དོན། ཚོགས་པ་དེར་བར་ཆད་མེད་པ་དང་། བསོད་ནམས་ཀྱི་ཚོགས་རྫོགས་པའོ། །དེ་བཞིན་བདག་ཀྱང་བསྲུང་བ་ཉིད། བདག་བར་ཆད་ལས་བསྲུང་བ་དང་། ཡེ་ཤེས་ཀྱི་ཚོགས་རྫོགས་པའོ། །འདིས་ནི་འཇིག་རྟེན་དབང་དུ་བྱེད། འཇིག་རྟེན་གསུམ་དབང་དུ་སྡུད་པ་དང་། འདིས་ནི་སྔགས་ཀྱི་བཟླས་པ་ཉིད། འདིས་ནི་རླུང་སེམས་དྷཱུ་ཏཱིར་གཞུག་པས་བཟླས་པ་སྟེ། དོན་རྣམ་པར་མི་རྟོག་པའི་ཡེ་ཤེས་རྙེད་པས་རྣམ་པར་རྟོག་པས་བཞག་པའི་ལྟ་བ་ཐམས་ཅད་ཟིལ་གྱིས་གནོན་པའོ། །དེ་ཙམ་དུ་མ་ཟད། གང་དུ་གུས་བཅས་གླུ་ལེན་དང་། །ནས། གླུ་ཡི་བྱིན་རླབས་མཚན་ཉིད་དོ། །ཞེས་པའི་བར་གྱིས་ཚོགས་ཀྱི་དཀྱིལ་འཁོར་དེ་བྱིན་གྱིས་རློོབས་པའི་རྟགས་དེར་སྒོག་པའི་དྲི་འབྱུང་སྟེ། ཤ་ཟ་ལས་བྱེད་ཀྱི་མཁའ་འགྲོ་འདུས་ནས་བྱིན་གྱིས་རློབ་པ་དང་། བྱ་རྒོད་ཀྱི་དྲིས་ཞིང་སྐྱོང་འཇིག་རྟེན་གྱི་ཌཱ་ཀི་མཆོག་འདུས་ནས་དང་། ག་པུར་གྱི་དྲིས་ཞིང་སྐྱོང་གི་ཕོ་ཉ་ཡེ་ཤེས་པ་དང་། མཱ་ལ་ཡར་སྐྱེས་ཏེ་ཙན་དན་སྦྲུལ་གྱི་སྙིང་པོའི་དྲིས་ལྷན་ཅིག་སྐྱེས་མ་འདུས་ནས་བྱིན་གྱིས་རློབས་པར་བྱེད་པ་ཤེས་སོ། །སྒྲའི་སྒོ་ནས། འཇིག་རྟེན་པ་རྣམས་ལ་བ་ལ་ཚེའི་སྒྲ་འོང་ཡང་ཡེ་ཤེས་ཀྱི་ཌཱ་ཀི་མ་རྣམས་ལ་ངང་པ་དང་བུང་བའི་སྒྲ་ཆེན་པོ་ཡང་འབྱུང་ལ། དེས་བྱིན་གྱིས་རློབས་པར་ཞེས་ཤེས་ནུས་སོ། །གཉིས་པ་ནི་བདེ་བ་ཅན་ཤེས་རབ་ཀྱི་ཕ་རོལ་ཏུ་ཕྱིན་མ་ལ་བཙུན་མོའི་བྷ་གར་བཏགས་པ་དེའོ། །དེ་ལྟར་ཡང་། བུད་མེད་ཀཀྐོ་ལ་བདེ་ཅན། །ཨེ་ཝཾ་རྣམ་པའི་རང་བཞིན་དུ། །བདེ་བ་བསྲུང་བ་ཉིད་ཀྱི་ཕྱིར། །བདེ་བ་ཅན་ཞེས་རབ་ཏུ་བསྒྲགས། །སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་འཛིན་པ་རྣམས་ཀྱི་གནས། །ཞེས་སོ། །གནས་རྡོ་རྗེ་ནི། དེ་ལ་གནས་པ་བྱང་ཆུབ་ཀྱི་སེམས་རྡོ་རྗེ། ངོ་བོའི་སྒོ་ནས་དོན་དམ་སེམས་བསྐྱེད། རྣམ་པའི་སྒོ་ནས་ཀུན་རྫོབ་སེམས་བསྐྱེད་དུ་འཇོག་པ་དེའོ། །དེ་ལྟར་ཡང་། འདི་ཉིད་འཁོར་བ་ཞེས་བྱ་སྟེ། །ནས། ཀུན་རྫོབ་དོན་དམ་ཚུལ་ཅན་ནོ། །ཞེས་པའི་བར་གྱིས་སོ། །ལྟེ་བ་རུ་ནི། དེ་འཁོར་ལོ་དྲུག་གི་ལྟེ་བར་དང་པོའི་དབྱངས་ཡིག་སྟོང་ཆེན་ཡི་གེ་ལྔའི་རྣམ་པར་ཤེས་པའམ། བློ་ཞེས་བཏགས་པའི་ཐིག་ལེ་དྲུག་ཏུ་གནས་པས་ཏེ། ག་པུར་ཉིད་ནི་བདག་མེད་མ། །བདེ་བ་བདག་མེད་ཚུལ་ཅན་ཉིད། །དེ་ཡི་བདེ་བ་ཕྱག་རྒྱ་ཆེ། །ལྟེ་བའི་དཀྱིལ་འཁོར་ཉིད་དུ་གནས། །དང་པོའི་དབྱངས་ཡིག་རང་བཞིན་ཏེ། །བློ་ཞེས་སངས་རྒྱས་རྣམས་ཀྱིས་བཏགས། །ཞེས་སོ། །པདྨ་ཡི། པདྨའི་འཁྱུད་པས་བསྐུལ་བ་དེ། །རྫོགས་པའི་རིམ་པའི་རྣལ་འབྱོར་ལས། །དེ་ཉིད་བཅོམ་ལྡན་ཤེས་རབ་མ། །དེ་ནི་རིང་མིན་ཐུང་བ་མིན། །གྲུ་བཞི་མ་ཡིན་ཟླུམ་པོ་མིན། །དྲི་དང་རོ་དང་མྱ་ངན་འདས། །ལྷན་ཅིག་སྐྱེས་དགའ་བྱེད་པ་ཅན། །ཞེས་སོ། །ཇི་ལྟར་བསྐུལ་བའི་ཚུལ་ནི། །རྒྱུན་དུ། རྒྱུན་ཆགས་པར། འབོད་ལ་ཅང་ཏེའུ། འདིར་རྡོ་རྗེ་མེ་ལ་སྲོག་ཞུགས་པས་རྒྱས་པ་དེ། དོན་རྩ་དབུ་མར་དག་པ་དེར་དགུག་པའི་ཆེད་དུ། བརྡུང་། སྲོག་ཐུར་གོང་བུ་གཅིག་པའམ་ཉི་ཟླ་མཉམ་པ་ཉིད་དུ་སྒྲ་གཅན་གྱིས་བཟུང་བ་ངེས་སོ། །རྩོད་པར་མི་བྱ། འདི་ནི་འབར་བ། འདི་ནི་འཛག་པ། འདི་ནི་འབར་འཛག་འཐབ་པའི་དུས་ཞེས། ངེས་པ་མེད་པས་སོ། །སྙིང་རྗེ་ལས། གཉིས་སུ་མེད་པའི་ཡེ་ཤེས་སུ་སྙོམས་པར་ཞུགས་ཤིང་ལས་ཀྱི་རླུང་གིས་བསྐུལ་བའི་ཞུ་བའི་ཐིག་ལེ་ཡང་དང་ཡང་དུ་འཁོར་ལོ་དྲུག་ཏུ་མས་རིམ་གྱིས་བརྟན་པར་བྱེད་པ་སྟེ། རྣལ་འབྱོར་མ་ལུས་དབུས་གནས་སུ། །ནས། བདེ་བ་ཞེས་བྱ་སྐུ་རུ་བརྗོད། །ཅེས་པའི་བར་གྱིས་སོ། །དེ་ལ་ཤ་ནི་བཟའ་བ་དང་། བདེ་བ་བསྐྱེད་པ་དེས་ཕུང་སོགས་ལྔ་སྒྲིབ་བྲལ་དུ་བཟའ་བ་སྟེ། དེ་ལས་སྐྱེས་ལ་རྣལ་འབྱོར་དེ། །དེ་ཡི་བདེ་བ་བཟའ་བ་ཉིད། །ཅེས་སོ། །ཆང་ནི་ཤིན་ཏུ་བཏུང་བ་སྟེ། །ཐིག་ལེ་བསྟན་པའི་དགའ་བའི་ཆང་། །སོ་སོ་རང་རིག་པས་འཐུང་ཞིང་། སོ་སོ་རང་རིག་གི་ཆང་དེའང་མངོན་པར་བྱང་ཆུབ་པ་མས་བརྟན་པའི་དགའ་བས་འཐུང་སྟེ། དེང་ནི་ཆང་ཡང་བཏུང་བར་བྱ། །དེ་ནས་རང་ཡང་བཏུང་བ་ཉིད། །ཅེས་སོ། །ཀྱེ་ཧོ་ཞེས་བོད་པ། སུ་བོད་ན། སྐལ་ལྡན། འཚང་རྒྱ་ངེར། རིགས་གང་ལ་ཤིས་པའི་ཕྱག་རྒྱ་ལ་ནི་སྐལ་ལྡན་ཡིན་ལ། བཟློག་པ་ལས་དངོས་གྲུབ་རྙེད་པར་མི་འགྱུར་བས་སྐལ་མེད་དོ། །དེ་ལྟར་ཡང་། ཕྱག་རྒྱའི་རྟགས་དང་མཚན་མ་དང་། །འདིས་ནི་རིགས་ནི་མཚོན་པར་བྱ། །རིགས་འཚེལ་སྒོམ་པའི་སྦྱོར་བ་ལས། །དངོས་གྲུབ་མེད་ཅིང་སྒྲུབ་པོའང་མེད། །ཅེས་ནས། འདོད་པས་ཕྱག་རྒྱ་ཤེས་པར་བྱ། །ཞེས་པའི་བར་རོ། །ཕྱག་རྒྱའང་མཚན་ཉིད། ཤིན་ཏུ་བཞིན་བཟང་མིག་ཡངས་མ། །ནས། སྐྲ་བཟང་སྒྲུབ་པ་པོ་ལ་དགའ། །ཞེས་པའི་བར་གྱིས་བཤད་པ་དེའོ། །གཞུག་བྱ་ཞིང་། ཕྱག་རྒྱ་དེ་ལ་རྗེས་སུ་ཆགས་པར་བྱའོ་ཞེས་པ་སྟེ། །རང་གཞན་དོན་ནི་རབ་བསྒྲུབ་ཕྱིར། །ཕྱི་ནས་ཕྱག་རྒྱ་རྗེས་ཆགས་བྱ། །བོ་ལ་ཀཀྐོ་ལར་བཅུག་ནས། །ཀུནྟུ་རུ་བྱེད་བརཏལ་ཞུགས་ཅན། །ཞེས་སོ། །སྐལ་བ་མེད་པ་སྤངས་ནས་སུ། །བྱང་ཆུབ་ཀྱི་སེམས་ཕྱིར་ལྷུང་ན་མཆོག་སྒྲུབ་པའི་སྐལ་བ་མེད་པས་ཕྱིར་ལྷུང་དུ་འཇུག་པ་སྤང་སྟེ། དེར་ནི་སྦྱོར་བ་ལས་བྱུང་བའི། །ནས། མི་འཆི་ལྕེ་ཡིས་བླང་བ་ཉིད། །ཅེས་སོ། །དྲི་མེད་འོད་དུ་ཡང་། ལན་ཅིག་རྟག་ཏུ་ཁུ་བ་ལྟུང་བའི་ཕྱིར། །གཉིས་ཀ་ལ་ཡང་མཆོག་གི་བདེ་བ་མེད། །ཅེས་པས་སོ། བཤང་བ་རྣམ་སྣང་དང་ནི། གཅི་བ་མི་བསྐྱོད་པ། རྡུལ་རིན་འབྱུང་། ཁུ་བ་འོད་དཔག་མེད་རྣམས་ནི་སྦྱར་བར་བྱ། དོན་ཡོད་གྲུབ་པ་དེ་མངོན་པར་བྱང་ཆུབ་པ་ལྔས་དམ་པ་རིགས་བརྒྱ་རྫོགས་པའི་རྡོ་རྗེའི་སྐུར་ལྡང་ངོ་། །དེ་དང་ལྷན་ཅིག་ཕྱག་རྒྱ་ཆེ། །བདེ་བ་སྦྱིན་པའི་དངོས་གྲུབ་འགྱུར། །གཟུགས་སྒྲ་དེ་བཞིན་དྲི་དང་ནི། །རོ་དང་དེ་བཞིན་རེག་བྱ་ཉིད། །ཆོས་ཀྱི་དབྱིངས་ཀྱི་རང་བཞིན་ཡང་། །ཤེས་རབ་ཉིད་ཀྱིས་སྦྱང་བར་བྱ། །དེ་ཉིད་ལྷན་ཅིག་སྐྱེས་པའི་གཟུགས། །ཞེས་སོ། །ཚོད་མ་དང་ནི་ཁམས་ལྔ་རྣམ་པར་རྟོག་པའི་རླུང་། ཤ་ཆེན་པོ། མི་རྟོག་པའི་རླུང་། དེ་ལ་མང་པོ་བཟའ་བ་ཡིན། ཐམས་ཅད་ཟད་པར་བྱས་ནས་གསུང་རྡོ་རྗེར་བཞེད་དོ། །བདེ་ཆེན་བཟང་པོའི་རྣལ་འབྱོར་མ། །དེ་ཉིད་དཀྱིལ་འཁོར་འཁོར་ལོ་དང་། །ཡེ་ཤེས་ལྔ་ཡི་རང་བཞིན་ཅན། །ཞེས་སོ། །འོང་བ་དང་ནི་འགྲོ་བར་བྱེད་པ་དཀར་ཆ་སྟེང་གཙུག་ཏོར་དུ་འོང་བ་སྟེ་བརྟན་པ་དང་། དམར་ཆ་རྐང་མཐིལ་དུ་འགྲོ་བར་བྱེད་པ་དེ་གནོན་པའོ། །དག་དང་། ཆོས་ཐམས་ཅད་གནས་པ་ལྟར་མཐོང་བས་གཟིགས་པ་དག་པ་དང་། མ་དག་མི་དམིགས་པས། སངས་མ་རྒྱས་པའི་ཆོས་ཅིའང་རྣལ་འབྱོར་པ་དེའི་གཟིགས་པ་ལ་མེད་པས་མ་དག་པ་མི་དམིགས་པའོ། །རུས་རྒྱན་ཡན་ལག་རྣམས་ལ་གདགས། །རྣལ་འབྱོར་ཡེ་ཤེས་ལྔའི་བདག་ཉིད་དུ་རྫོགས་པས་ཏེ། དེ་ཉིད་མེ་ལོང་ཡེ་ཤེས་གཟུགས། །མཉམ་ཉིད་ཡེ་ཤེས་དངོས་པོ་ཅན། །ཡང་དག་གྱུར་པ་སོ་སོར་རྟོག །དེ་ཉིད་བྱ་བ་ནན་ཏན་ཏེ། །ཆོས་དབྱིངས་ཤིན་ཏུ་རྣམ་དག་པ། །ཞེས་སོ། དེ་རུ་རོ་ནི་གཞུག་པར་བྱ། །བྱང་ཆུབ་ཀྱི་སེམས་སུ་རྩ་རླུང་ཐིག་ལེ་བདེ་བའི་འགྲོས་ཐམས་ཅད་བདག་མེད་པའི་རང་བཞིན་གྱིས་གཞུག་སྟེ། འདུས་པར་དབང་པོ་གཉིས་སྦྱོར་འཇུག་པ། གཙུག་ཏོར་མཆོག་ཏུ་འདུས་པའམ་ཐིམ་པ་དེའི་ཚེ་ཐབས་ཤེས་ཀྱི་སྦྱོར་བ་མཐར་ཐུག་ནས་མི་གནས་པའི་མྱ་ངན་ལས་འདས་པར་འཇུག་པ་སྟེ། དེ་ཉིད་དཀྱིལ་འཁོར་བདག་པོ་ང་། །དེ་ཉིད་བདག་མེད་རྣལ་འབྱོར་མའི། །ཞེས་སོ། །རེག་མིན། དེ་ལྟ་བུའི་སངས་རྒྱས་ཀྱི་གནས་སྐབས་དེ་བསམ་པས་རེག་པར་མི་ནུས་པ་སྟེ། ཆོས་ཀྱི་རང་བཞིན་ཡིན་པས་དེ། །ཆོས་ཀྱི་དབྱིངས་ཀྱི་རང་བཞིན་ཅན། །ཞེས་སོ། །དེ་ལ་སྤང་བྱ་མིན། བདག་ལས་གཞན་ནོ་ཞེས་ལོགས་སུ་སྤང་མི་དགོས་ཏེ་རང་གི་སེམས་ཉིད་དག་པ་དེ་མིན་པས་སོ། །ལྟོ་བ་གནས་སུ་བརྗོད་པར་བྱ། །ནས། དེས་ནི་བླ་མེད་རྙེད་པར་འགྱུར། །ཞེས་པའི་བར་གྱིས་བསྟན་ཏོ། །ད་ནི་ཞར་ལ་ངག་དང་ལུས་ཀྱི་བརྡ་བཤད་པར་བྱ་སྟེ། མ་ད་ན། ཆང་། བ་ལ། ཤ མཱ་ལ་ཡ་ཛ། འདུ་བ། ཁེ་ཊ། འགྲོ་བ། ཤྲཱ་ཝ། རོ། ནི་རཾ་ཤུ རུས་རྒྱན། པྲེ་མཥ་ཎ། འོང་བ། ཀྲི་པི་ཊ། ཅང་ཏེའུ། དུན་དྷུ་ར། སྐལ་མེད། ཀ་ལིཉྫྱ་ར། སྐལ་ལྡན། ཌིན་ཌི་མ། རེག་མིན། པདྨ་བྷཉྫྱ་ན། ཐོད་པ། ཏྲི་བི་ཏ། བཟའ་བ། མ་ལ་ཏིནྡྷ་ན། ཚོད་མ། ཙཱ་རུ་ས་མ། ལྕི་བ། ཀཧྶྭ་རི། གཅི་བ། སྲི་། རང་བྱུང་ངམ་རྡུལ། ཀཏྤཱུ་རི། ཁུ་བ། སཱ་ལི་ཛ། ཤ་ཆེན། ཀུནྟུ་རུ། དབང་པོ་གཉིས་སྦྱོར། བོ་ལ། རྡོ་རྗེ། ཀཀྐོ་ལ་པདྨའོ། །ལུས་ཀྱི་བརྡ་ནི། མཛུབ་མོ་བསྒྲེང་སྟེ་སྟོན་ན། ལེགས་པར་འོངས་སམ་དྲི་བ། མཛུབ་མོ་དང་གུང་མོ་གཤིབས་ནས་བསྒྲེང་སྟེ་སྟོན་པ་ལན་ཏེ། ལེགས་པར་འོངས་སོ་ཞེས་པའོ། །གཡོན་པའི་མཐེ་བོང་བཅངས་ནས་སྟོན་ན། སྐུ་ཁམས་བདེ་འམ། སྙུན་གྱི་ཕྱག་རྒྱ། གཡས་པའི་མཐེ་བོང་བཅངས་ནས་སྟོན་པ་བདེའོ། །བུམ་དབང་མ་ཐོབ་པའི་རྣལ་འབྱོར་པ་ལ་མི་སྲིད་པས། དེ་ཐོབ་མ་ཐོབ་དྲི་མ་དགོས། སྲིང་ལག་དང་མཐེ་བོང་སྦྱར་ནས་སྟོན་ན། དེ་གཉིས་ཀྱི་ཐིག་ལེ་དཀར་དམར་ལྕེ་ཐོག་ཏུ་བཞག་པའི་གསང་དབང་ཐོབ་བམ། མགྲིན་པ་སྟོན་ན། མགྲིན་པར་མིད་ནས་ལོངས་སྤྱད་པའི་གསང་དབང་ཐོབ་བོ། །སྲིན་ལག་བསྒྲེངས་ནས་སྟོན་ན། དབང་གསུམ་ཐོབ་བམ། ཁུ་ཚུར་བཅངས་པའི་མཐེའུ་ཆུང་བསྒྲེངས་ནས་སྟོན་ན། གསུམ་པ་ཐོབ་པ་ཨ་ཅང་བཞི་པའང་ཐོབ་བོ། །ཁུ་ཚུར་བཅངས་ནས་གུང་མོ་བསྒྲེངས་ཏེ་སྟོན་ན། ཟག་པ་མེད་པའི་བདེ་བ་ཉམས་སུ་མྱོང་ངམ། ཁུ་ཚུར་བཅངས་ནས་མཛུབ་མོ་བརྐྱང་བསྐུམ་ཡང་ཡང་བྱ་ནས་སྟོན་པ། ཟག་མེད་ཀྱི་བདེ་བ་མྱོང་ཞིང་རྣམ་པར་རྟོག་པ་ལས་གྲོལ་ལོ། །མགོའི་གོས་ཐོད་སྟོན་ན། བདེ་བ་ཆེན་པོ་མཚོན་པའི་རྩ་གང་ན་གནས་སམ། རྩེ་གསུམ་གྱི་ཕྱག་རྒྱ་མཐེ་བོང་གིས་མཐེའུ་ཆུང་མནན་ཏེ་སོར་མོ་གསུམ་བསྒྲེངས་ནས་སྟོན་ན། དྷཱུ་ཏཱི་རོ་བརྐྱང་ངོ་ཞེས་པའོ། །ནུ་མ་ལ་ལག་པ་འཇུས་ཏེ་སྟོན་ན། ནུ་མའི་འོ་མ་འདྲ་བའི་བྱང་སེམས་དཀར་པོ་གང་ན་གནས། ལག་པས་སྐྲ་མཚམས་ཕྱེ་སྟེ་སྟོན་པ། སྤྱི་བོ་བདེ་ཆེན་གྱི་འཁོར་ལོ་ནའོ། །ལག་པ་ས་ལ་འཇོག་པ་སྟོན་ན། ས་གཞི་ལ་རྟེན་ཅིང་ལོངས་སྤྱོད་པ་བཞིན་དུ་ཕྱག་རྒྱ་ལ་རྟེན་ཅིང་ལོངས་སྤྱོད་དམ། ལག་པ་ནམ་མཁའ་ལ་ཡུག་པ་སྟོན་ན། ཕྱག་རྒྱ་ཤེས་རབ་ནམ་མཁའ་དང་འདྲ་བ་ལ་ལོངས་སྤྱོད་དོ། །བཞིན་ཁྲོ་གཉེར་སྟོན་ན། འདོད་ཆགས་ཀྱི་འཆིང་བར་མི་འགྱུར་རམ། གཙུག་ཕུད་གྲོལ་བ་སྟོན་ན། ཐབས་ཤེས་པ་མི་འཆིང་ཞིང་གྲོལ་བའི་རྒྱུར་འགྱུར། དཔྲལ་བ་སྟོན་ན། རྩ་རླུང་བྱང་ཆུབ་སེམས་ཀྱི་ཐབས་ལ་བརྟེན་ནས་མས་བརྟན་གྱི་ལྷན་སྐྱེས་ཀྱི་སེམས་མངོན་དུ་བྱེད་པར་ཕྱོགས་སམ། རྒྱབ་སྟོན་པ་འཁོར་བ་ལ་རྒྱབ་ཕྱོགས་པའི་ཕྱིར་བྱས་སོ། །རྐང་མཐིལ་སྟོན་ན། རྐང་མཐིལ་ཐུར་དུ་ཕྱོགས་པ་ལྟར། བྱང་ཆུབ་ཀྱི་སེམས་ཐུར་དུ་མི་ལྷུང་ངམ། བྱིས་པ་སྒོ་ང་རྩེ་བ་ལྟར་སྟོན་ན། བྱང་ཆུབ་ཀྱི་སེམས་བརྟན་པ་ཇེ་མཐོ་ཇེ་མཐོ་གྱུར་ཏོ། །རྣལ་འབྱོར་མ་གང་། ངག་གི་ཨེ་མ་བུ་ནི་སྙིང་རྗེ་ཆེན་པོ་ཞེས་སྨྲ་ལ། འཕྲེང་བ་སྟོན་ན། འོ་སྐོལ་གཉིས་ལྷན་ཅིག་ཏུ་འདུ་འམ། བརཏལ་ཞུགས་བཟང་པོ་ཞེས་བརྗོད་ཅིང་། །འཕྲེང་བ་དེ་ལ་གཏད་པ་འདུའོ་ཞེས་པའོ། །བརྡ་དོན་གསུམ་གྱི་བཤད་པ་མཁའ་འགྲོའི་གསང་གཏམ་ཞེས་པ་པདྨ་དཀར་པོས་སྦྱིན་པའི་རྫས་སོ།། །། ཨོཾ་ཡེ་དྷརྨྨུ་ཧེ་ཏུ་པྲ་བྷཱ་ཝ་ཧེ་ཏུནྟེ་ཥཱནྟ་ཐཱ་ཏོ་་ཝ་ད་ཏ། ཏེ་ཥཱཉྩྨ་ཡོ་ནི་རོ་དྷ་ཨེ་ཝཾ་ཝཱ་དཱི་མཧཱ་ཤྲ་མ་ཎཿསྭཱ་ཧཱ།། །།སརྦ་མངྒ་ལཾ།། །།