རྟེན་འབྲེལ་གྱི་དཀར་ཆག་མི་ཕམ་པདྨ་དཀར་པོས་སྦྱར་བ།
རྟེན་འབྲེལ་གྱི་དཀར་ཆག་མི་ཕམ་པདྨ་དཀར་པོས་སྦྱར་བ་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། གཅིག་ཤེས་ནས་ནི་ཀུན་ལ་མཁས་འདོད་ན། །ཆོས་རྗེ་རྣམས་ཀྱི་ལེགས་བཤད་ཕུལ་བྱུང་ནས། ཉན་བསྒྲུབ་བགྱི་འོས་སྐལ་བཟང་ལ་བསྒྲགས་པ། །གཏམ་གཞི་འདྲ་འདི་བདག་གིས་རི་མོར་བྱ། །འདིར་རྟེན་ཅིང་འབྲེལ་པར་འབྱུང་པའི་སྙིང་པོ་རྫོགས་པའི་སངས་རྒྱས་རྣམས་ཀྱི་ཞལ་སྐྱིན་མཚུངས་མེད་ཆོས་རྗེའི་ཁྱད་པར་གྱི་གདམས་པ། དཔལ་ལྡན་འབྲུག་པ་ཞེས་སྙན་པའི་གདུགས་དཀར་པོ་འཛིན་པ་རྣམས་ཀྱི་ཟབ་ཆོས་འདི་ལ། རྟེན་འབྲེལ་གྱི་སྙིང་པོ་རྣམ་པར་བཤད་པ་ཞེས་པ་སྟེ་རྩ་བའི་མདོ། རྣམ་བཤད་ཉི་མའི་འོད་ཟེར་སངས་རྒྱས་དབོན་གྱིས་མཛད་པ། འཕྲུལ་གྱི་ལྡེའུ་མིག་ལོ་རས་ཀྱིས་མཛད་པ། རབ་བདུན་གྱི་དོན་ཚིགས་སུ་བཅད་པ་རྒོད་ཚང་པས་མཛད་པ། དེའི་འགྲེལ་པ་གྲུབ་ཐོབ་ཨོ་རྒྱན་པས་མཛད་པ། སི་ལུ་མའི་ཞལ་གདམས་སྤྲིངས་ཡིག་ཆོས་རྗེས་མཛད་པ། དེའི་འགྲེལ་བཤད་རླུང་གིས་མཛད་པ་བརྗེེད་པ་བསལ་བ། རྟེན་འབྲེལ་ངོ་སྤྲོད་གཉིས་ཀྱི་ཞལ་གདམས་དང་། སྒོམ་ཐབས་གཉིས་ཀྱི་ཞལ་གདམས་ཆོས་རྗེས་མཛད་པ། གཅིག་ཆོག་མའི་རྩ་བ་ཆོས་རྗེས་མཛད་པ། དེའི་འགྲེལ་པ་རྒོད་ཚང་པས་མཛད་པ། ལྷན་ཐབས་དང་ཁྲིད་ལྷ་ཁབ་པས་མཛད་པ། ཞལ་གདམས་ཀྱི་རིམ་པ་རྒོད་ཚང་པའི་གསུང་ལ་སྤྱིལ་དཀར་བའི་ཟིན་བྲིས། ཕྲ་རྒྱས་ཆེ་ཆུང་ཆོས་རྗེས་མཛད་པ། དུས་གནད་དགུའི་རྟེན་འབྲེལ་རྩ་འགྲེལ་རྗེ་དབོན་གྱིས་མཛད་པ། བདུད་ངོས་འཛིན། བདུད་ལམ་འཁྱེར་གཉིས་རྒོད་ཚང་པའི་གསུང་ལ་སློབ་དཔོན་ཆོས་སེང་གི་ཟིན་བྲིས། སྒྲིག་དུས་བཞི་སྤྲིངས་ཡིག་མ། བཞི་སྒྲོམ་ཆོས་རྗེས་མཛད་པ། དེའི་རྣམ་བཤད་དང་ཞལ་གདམས་ལོ་རས་ཀྱིས་མཛད་པ། ཡང་དེ་དང་དྲུག་གསུམ་བཅོ་བརྒྱད་ཀྱི་འགྲེལ་བཤད་ཨོ་རྒྱན་པས་མཛད་པ། ཞུས་ལན་མ་ཆོས་རྗེའི་གསུང་མར་སྟོན་གྱི་ཟིན་བྲིས། དབང་བཞིའི་གཞུང་ཆོས་རྗེས་མཛད་པ། དེའི་འགྲེལ་པ། ཆ་སྙོམས་གཞུང་གླིང་གི་གསུང་ལ་ཆོས་རྗེའི་ཟིན་བྲིས། དེའི་དོན་འགྲེལ་གསལ་བའི་མེ་ལོང་རྒོད་ཚང་པས། ཆར་འབེབས་ཆོས་རྗེས་མཛད་པ། རྟགས་ཀྱི་ཞལ་གདམས། སྤེལ་སྦྱང་ཆོས་རྗེས་མཛད་པ། ཁ་སེ་དང་། ངེས་པ་ཅན་ཆོས་རྗེས་མཛད་པ། རྟེན་འབྲེལ་ཆོ་ག་ཞིབ་མོ་ཚིགས་བཅད་མ་ཞིག་དང་ལྷུག་པ་གཉིས་ནཻ་བན་རཀྵི་ཏས་མཛད་པ། དྲག་པོའི་ལས་བྱང་ལག་ལེན་གྱི་ཡི་གེ་བཞི་གླིང་ནས་བརྒྱུད་པ་རྣམས་སོ། གཞན་ཆོས་རྗེ་རྗེའི་སློབ་མ་ཡང་སློབ་ཀྱི་ཟིན་བྲིས་མང་སྟེ། ཤིན་ཏུ་གཅེས་པ་མེད་དུ་མི་རུང་བ་རྣམས་འདི་ཙམ་མོ་ཞེས་པདྨ་དཀར་པོ་ལུགས་འདི་ལ་དཔྱད་པ་གསུམ་གྱིས་དག་པ་དེས་སྦྱར་རོ།། །།སངས་རྒྱས་རྣམ་པར་གཟིགས། གཙུག་ཏོར་ཅན། ཐམས་ཅད་སྐྱོབ། འཁོར་བ་འཇིག །གསེར་ཐུབ། འོད་སྲུང་། ཤཱཀྱ་ཐུབ་པ། ཆོས་རྗེ། སངས་རྒྱས་དབོན། ཆོས་རྗེ་གཞོན་ནུ། ཉི་མ་སེང་གེ །རྡོར་གླིང་པ། སྤོས་སྐྱ་པ། བཅུ་གསུམ་པ། འཇམ་དབྱངས་ཀུན་དགའ་སེང་གེ །མཁན་ཆེན་རྡོར་རིན། བློ་གྲོས་སེང་གེ །བློ་གྲོས་མཆོག་ལྡན། གྲུབ་ཆེན་དཀོན་བསམ་པ། ནམ་མཁའི་རྣལ་འབྱོར། རྒྱལ་དབང་རྗེ། ངག་དབང་ཆོས་ཀྱི་རྒྱལ་པོ། དེས་ཁོ་བོ་ལ། ཡང་རྗེས། འཇམ་དབྱངས་ཆོས་ཀྱི་གྲགས་པ། དེས་ཀུན་སྤངས་རྗེ། དེས་ཀྱང་ཁོ་བོ་ལའོ།།