གྲུབ་དབང་ལྔ་པ་ཆེན་པོ་གསེར་ཁྲིར་འགོད་སྐབས་ལེགས་བཤད་ཚོགས་གཏམ་འབུལ་བའི་མགོ་བསྐུལ་མཚམས་སྦྱོར་ལྷ་ཡི་སིལ་སྙན།

༄༅།།གྲུབ་དབང་ལྔ་པ་ཆེན་པོ་གསེར་ཁྲིར་འགོད་སྐབས་ལེགས་བཤད་ཚོགས་གཏམ་འབུལ་བའི་མགོ་བསྐུལ་མཚམས་སྦྱོར་ལྷ་ཡི་སིལ་སྙན་བཞུགས་སོ།། འདིར་གང་ཞིག་གླེང་བར་བྱ་བ་ནི། བདག་ཅག་གི་སྟོན་པ་རྣམ་འདྲེན་རྒྱལ་བ་ཤཱཀྱ་སེངྒེའི་བསྟན་པ་འདི་ལ། བཤད་པ་དང་། སྒྲུབ་པ་དང་། བྱ་བ་ལས་ཀྱི་འཁོར་ལོ་ཆེན་པོ་གསུམ་གྱིས། །ལུང་རྟོགས་ཀྱི་བསྟན་པ་རིན་པོ་ཆེ་སྔར་མེད་པའི་ཡུལ་ཕྱོགས་ཀུན་ཏུ་གསར་དུ་སྲོལ་བཏོད་ནས་འཛིན་པ་དང་། སྔར་དར་ཀྱང་ཕྱིས་ཅུང་ཟད་ཉམས་པར་གྱུར་པ་རྣམས། འཆད་པ་དང་། རྩོད་པ་དང་། རྩོམ་པའི་ཕྲིན་ལས་ཀྱིས་མི་ཉམས་པར་ཡུན་རིང་དུ་གནས་པའི་སྒོ་ནས་སྐྱོང་བ་དང་། དེ་ཡང་ཉུང་ངུ་དང་། ཉི་ཚེ་བ་ཙམ་མ་ཡིན་པར་ཕྱོགས་ཐམས་ཅད་དང་གནས་སྐབས་ཀུན་ཏུ། སྒོ་ཐམས་ཅད་ནས་དར་ཞིང་རྒྱས་པར་སྤེལ་བ་སྟེ། རྒྱལ་བསྟན་འཛིན་སྐྱོང་སྤེལ་བའི་བྱེད་པོ། རྒྱ་གར་འཕགས་པའི་ཡུལ་དུ། འཛམ་བུའི་གླིང་མཛེས་པར་བྱེད་པའི་རྒྱན་དྲུག་དང་། མཆོག་གཉིས། རྨད་དུ་བྱུང་བའི་སློབ་དཔོན་བཞི། གྲུབ་པ་བརྙེས་པའི་རྣལ་འབྱོར་གྱི་དབང་ཕྱུག་བརྒྱད་ཅུ་སོགས་མཐའ་ཡས་པ་དང་། གངས་རིའི་ར་བས་བསྐོར་བའི་ཡུལ་ལྗོངས་བོད་དང་བོད་ཆེན་པོའི་རྒྱལ་ཁམས་འདིར་ཡང་། འཕགས་མཆོག་སྤྱན་རས་གཟིགས་དབང་མི་ཡི་ཟོལ་དུ་བསྟན་པ་ཆོས་སྐྱོང་བའི་རྒྱལ་པོ་སྲོང་བཙན་སྒམ་པོ་དང་། འཇམ་པའི་དབྱངས་དངོས་ཁྲི་སྲོང་ལྡེ་བཙན། གསང་བའི་བདག་པོ་མངའ་བདག་རལ་པ་ཅན། གྲུབ་པའི་སློབ་དཔོན་ཆེན་པོ་སངས་རྒྱས་གཉིས་པ་པདྨ་སམ་བྷ་ཝ་དང་། མཁན་ཆེན་ཞི་བ་འཚོ་སྟེ་མཁན་སློབ་ཉི་ཟླ་ཟུང་འདྲེལ་གྱིས་གཙོས་པའི། རྒྱ་བོད་ཀྱི་པཎ་གྲུབ་བརྒྱ་དང་རྩ་བརྒྱད། གྲུབ་བརྙེས་རྗེ་འབངས་ཉེར་ལྔ། སྔགས་པའི་རྒྱལ་པོ་སོ་ཟུར་གནུབས་གསུམ་སོགས་སྔ་འགྱུར་རྙིང་མའི་བརྒྱུད་པ་རིམ་བྱོན། ཕྱི་འགྱུར་བསྟན་པའི་སྦྱིན་བདག་གི་ཐོག་མ་ལྷ་བླ་མ་ཡེ་ཤེས་འོད་དང་། བྱང་ཆུབ་འོད་སོགས་ཀྱི་རིང་ལ་བྱོན་པའི། ཟ་ཧོར་གྱི་མཁན་པོ་དཔལ་ལྡན་མར་མེ་མཛད་ཡབ་སྲས་སོགས་བཀའ་གདམས་རིན་པོ་ཆེའི་བརྒྱུད་པ། པཎ་ཆེན་ན་རོའི་དངོས་སློབ་མར་པ་ཆོས་ཀྱི་བློ་གྲོས་ཀྱི་ཐུགས་སྲས་ཀ་ཆེན་བཞི་དང་། ཁྱད་པར་རྗེ་བཙུན་བཞད་པ་རྡོ་རྗེ། མཉམ་མེད་སྒམ་པོ་པ་ཆེན་པོ། དེའི་ཐུགས་སྲས་གྲུབ་ཐོབ་ཁམས་པ་མི་གསུམ་སོགས་ནས་རྒྱས་པའི་སྒྲུབ་བརྒྱུད་བསྟན་པའི་བདག་པོ་བསམ་གྱིས་མི་ཁྱབ་པ་རྣམས་དང་། རྒྱ་གར་གྱི་པཎ་ཆེན་ག་ཡ་ངྷ་ར་དང་། བླ་ཆེན་འབྲོག་མི་ལོ་ཙཱ་སོགས་ནས་བརྒྱུད་པའི་འཇམ་དབྱངས་གོང་མ་རྣམ་ལྔ་སོགས་བླ་མ་ས་སྐྱ་པ་ཆེན་པོའི་རིང་ལུགས་འཛིན་པའི་བསྟན་འཛིན་གྱི་སྐྱེས་ཆེན་དུ་མ། གསར་རྙིང་མདོ་སྔགས་ཡོངས་ཀྱི་བསྟན་པའི་བདག་པོ། ཤར་ཙོང་ཁ་བ་བློ་བཟང་གྲགས་པ་ཡབ་སྲས་སོགས་རི་བོ་དགེ་ལྡན་པའི་རིང་ལུགས་འཛིན་པའི་སྐྱེས་བུ་རིམ་པར་བྱོན་པ་སོགས། མཁས་ཤིང་གྲུབ་པ་བརྙེས་པའི་སྐྱེས་བུ་ནམ་མཁའི་སྐར་ཚོགས་ཙམ་བྱོན་པ་དེ་རྣམས་ལས། འདིར་སྐབས་སུ་བབས་པ་ནི། རྒྱལ་བའི་དབང་པོ་པདྨ་སམ་བྷ་ཝའི་རིང་ལུགས་འཁྲུལ་མེད་འཛིན་པ་སྔ་འགྱུར་རྙིང་མ་པ་ཞེས་ཡོངས་སུ་གྲགས་པ་མདོ་སྔགས་བསྟན་པ་གཉིས་ལྡན་གྱི་བདག་པོ། རྒྱལ་བསྟན་ཡོངས་རྫོགས་གང་ཟག་གཅིག་གི་ལམ་གྱི་རིམ་པ་ཚང་ལ་མ་ནོར་བ་ཞིག་ཏུ་དྲིལ་ནས་འཆད་ཅིང་ཉམས་སུ་ལེན་པ་སྟེ། གྲུབ་པའི་སློབ་དཔོན་ཆེན་པོས། ཕྱི་ལྟར་ལག་ལེན་མདོ་སྡེའི་ལུགས་སུ་གྱིས། །རྒྱུ་འབྲས་སྤང་བླང་ཞིབ་པའི་དགོས་པ་ཡོད། །ནང་ལྟར་གསང་སྔགས་བླ་མེད་ལུགས་སུ་གྱིས། །བསྐྱེད་རྫོགས་ཟུང་དུ་འདྲེལ་བའི་དགོས་པ་ཡོད། །གསང་བ་གསང་ཆེན་ཨ་ཏིའི་ལུགས་སུ་གྱིས། །ཚེ་གཅིག་འོད་སྐུར་གྲོལ་བའི་དགོས་པ་ཡོད། །ཅེས་གསུངས་པ་ལྟ་བུའི་ལུགས་དེ་ཉིད་འཛིན་པ་ནི། དེང་སང་གི་དུས་ན་ཡང་། རྒྱ་གར་འཕགས་པའི་ཡུལ་གྲུ་ནས་བཟུང་། རྒྱ་ནག་ཆེན་པོའི་ཡུལ་ཚུན་ཆད། སྟོད་ཀྱི་མངའ་རིས་སྐོར་གསུམ། བར་གྱི་དབུས་གཙང་རུ་བཞི། སྨད་ཀྱི་མདོ་ཁམས་སྒང་དྲུག་ཏུ་གྲགས་པའི་བོད་ཆེན་པོའི་ཡུལ་གྲུ་མཐའ་དབུས་ཐམས་ཅད་ཀྱི། རྒྱལ་པོའི་ཁབ། གྲོང་དང་། གྲོང་ཁྱེར། དགེ་འདུན་འདུས་པའི་སྡེ། དབེན་པའི་ལྗོངས། གྲུབ་པའི་གནས་ཐམས་ཅད་དུ་མ་ཁྱབ་པ་མེད་ཀྱང་། གྲགས་ཆེ་བ་དབུས་ན་རྡོར་སྨིན་དཔལ་གསུམ། ཁམས་ན་ཀཿདཔལ་རྫོགས་གསུམ་ཞེས་གྲགས་པའི་ནང་ཚན། མདོ་ཁམས་རྫོགས་ཆེན་པ་ཞེས་ཆོས་མིང་གང་ཟག་ལ་ཐོགས་པའི་གདན་ས་འདི་ཉིད་ཀྱི་བདག་པོ། གྲུབ་པའི་དབང་ཕྱུག་པདྨ་རིག་འཛིན་ཞེས་མཚན་གྱི་སྙན་པ་རྒྱ་མཚོའི་མཐའི་བར་དུ་ཁྱབ་པ་འདི་ནི། བདག་ཅག་གི་སྟོན་པ་ཐུབ་པའི་དབང་པོས་བསྐལ་པ་བཟང་པོ་འདིའི་སྔོན་རོལ། བསྐལ་ཆེན་གྲངས་མེད་གསུམ་དུ་བྱང་ཆུབ་ཆེན་པོར་ཐུགས་བསྐྱེད་ནས། བྱང་ཆུབ་ཀྱི་སྤྱོད་པ་རླབས་པོ་ཆེ་ལ་བསླབ་པའི་ཚུལ་བསྟན་པའི་ཚེ། བསྐལ་པ་གྲངས་མེད་དང་པོ་ལ་རྫོགས་པའི་སངས་རྒྱས་བདུན་ཁྲི་ལྔ་སྟོང་ཞིག་ལ་བསྙེན་བཀུར་མཛད་པའི་ཐ་མར་བྱོན་པ། དུས་གསུམ་གྱི་སངས་རྒྱས་ཐམས་ཅད་སྤངས་རྟོགས་ཀྱི་ཡོན་ཏན་མཉམ་ཡང་། ཐུགས་བསྐྱེད་དང་སྨོན་ལམ་གྱི་ཁྱད་པར་རྨད་དུ་བྱུང་བས། གང་གི་མཚན་ཙམ་ཐོས་པས་ཀྱང་ངན་སོང་གི་གནས་ལས་སྒྲོལ་བའི་ཕྲིན་ལས་རྒྱལ་བ་ཀུན་ལས་ལྷག་པར་གྱུར་པ། བདེ་གཤེགས་རིན་ཆེན་གཙུག་ཏོར་ཅན་ཞེས་བྱ་བ་དེར་མངོན་པར་བྱང་ཆུབ་ཟིན་ཀྱང་། ད་དུང་ཡང་ཐབས་ལ་མཁས་པའི་མཛད་པས། སྲིད་པའི་མཐའི་བར་དུ་སྤྲུལ་པའི་རྣམ་རོལ་གྲངས་མེད་པར་སྟོན་པར་མཛད་པ་ནི། ཡབ་སྲས་མཇལ་བའི་མདོ་ལས། དཔའ་བོ་ཆེན་པོ་ཐབས་མཁས་ཏེ། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་དུ་ཡང་འདྲེན་པ་ཁྱོད། །སངས་རྒྱས་དུ་མར་སྟོན་པར་མཛད། །ཅེས་གསུངས་པ་བཞིན། ཤཱཀྱའི་རྒྱལ་པོའི་བསྟན་པ་འདིར་ཡང་། ཟབ་གསང་རྡོ་རྗེ་ཐེག་པའི་ལམ་ནས། གདུལ་བྱ་སྐལ་བ་དང་ལྡན་པ་རྣམས་འབད་མེད་དུ་གྲོལ་བར་མཛད་པའི་ཕྱིར། འཕགས་པའི་ཡུལ་དུ་གྲུབ་བརྒྱའི་སྤྱི་མེས་དཔལ་ལྡན་ས་ར་ཧ་པ། གསང་རྒྱུད་རྒྱ་མཚོའི་མངའ་བདག་སློབ་དཔོན་ཀུ་ཀུ་རི་པ། སྡེ་གསུམ་ཀློང་དགུའི་རྒྱུད་ཀྱི་ཤིང་རྟ་པཎ་ཆེན་དྲི་མེད་བཤེས་གཉེན། བོད་དུ་ཨོ་རྒྱན་སངས་རྒྱས་གཉིས་པའི་དངོས་སློབ་གྲུབ་ཆེན་རྗེ་འབངས་ཉེར་ལྔའི་ནང་ཚན། སྡེ་བརྒྱད་བྲན་དུ་བཀོལ་བ་རླངས་ཆེན་དཔལ་གྱི་སེངྒེ། གནམ་ལྕགས་མདའ་ལྟར་འཕེན་པའི་ལང་གྲོ་དཀོན་མཆོག་འབྱུང་གནས། སྤྲུལ་པའི་ཆོས་རྒྱལ་མངའ་བདག་ཁྲི་རལ། སྒྲུབ་བརྒྱུད་བསྟན་པའི་ཤིང་རྟ་ཀརྨ་པ་དུས་གསུམ་མཁྱེན་པ། འཇམ་པའི་དབྱངས་དངོས་ཐམས་ཅད་མཁྱེན་པ་བློ་བཟང་གྲགས་པའི་དཔལ་སོགས། གང་འདུལ་གདུལ་བྱའི་སྣང་ངོར་དག་ཆེན་ཡེ་ཤེས་སྒྱུ་མའི་རོལ་གར་ཅིར་ཡང་བསྟན་ནས་སླར་ཡང་། འོད་གསལ་རྫོགས་པ་ཆེན་པོའི་བསྟན་པ་གཞི་བཞེངས་སུ་སློང་བའི་ཆེད་དུ། བསམ་བཞིན་སྲིད་པ་བཟུང་བའི་ཚུལ་བསྟན་ཏེ། ཨོ་རྒྱན་གཏེར་བདག་གླིང་པའི་གཏེར་ལུང་ལས། ལང་གྲོའི་སྤྲུལ་པ་པདྨ་དྲག་པོའི་མིང་། །རྣལ་འབྱོར་འཛིན་པ་མདོ་ཁམས་སྨད་ནས་འབྱུང་། །ཞེས་པ་དང་། རིག་འཛིན་བདུད་འདུལ་རྡོ་རྗེའི་གཏེར་ལུང་ལས། རླངས་དཔལ་སྤྲུལ་པ་རི་བོའི་ཕྱོགས་ནས་འབྱུང་། །པདྨའི་མིང་ཅན་བྲང་ལ་སྨེ་བས་བརྒྱན། །ཞེས་སོགས་འཁྲུལ་མེད་རྡོ་རྗེའི་ལུང་གིས་ཡང་ཡང་བསྔགས་པ་ལྟར། ཁམས་ཀྱི་རི་བོ་ཆེའི་ཕྱོགས་སུ་སྐུ་འཁྲུངས། དགུང་ལོ་བཅུ་གསུམ་ཙམ་ནས། གྲུབ་དབང་ཀརྨ་ཆགས་མེད་ཀྱི་ཞབས་པད་བསྙེན་ནས། གསར་རྙིང་གི་གདམས་ཁྲིད་དུ་མ་དང་། ཁྱད་པར་ཕྱག་རྫོགས་ཀྱི་རྣལ་འབྱོར་ལ་ཐུགས་སྦྱངས། དེ་ནས་སྤྲུལ་པའི་གཏེར་སྟོན་བདུད་འདུལ་རྡོ་རྗེ། ཀོང་པོ་རྫོགས་ཆེན་པའི་ཐུགས་སྲས་རིག་འཛིན་ཆོས་ཀྱི་རྒྱ་མཚོ། གངས་ལྗོངས་བསྟན་པའི་བདག་པོ་རྒྱལ་དབང་ཐམས་ཅད་མཁྱེན་པ་གོང་ས་ལྔ་པ་ཆེན་པོ་སོགས་ཀྱི་ཞབས་ལ་གཏུགས་ནས། མདོ་རྒྱུད་མན་ངག་རྒྱ་མཚོ་གསན་བསམ་གྱི་ཕ་རོལ་དུ་སོན། དཔལ་གྱི་བསམ་ཡས་འཆིམས་ཕུ། ལྷོ་བྲག་མཁར་ཆུ། ཙཱ་རི་ཏྲ་སོགས་སྒྲུབ་པའི་གནས་ཆེན་རྣམས་སུ་རིམ་གཉིས་ཟབ་མོའི་རྣལ་འབྱོར་སྤྱི་དང་། ཁྱད་པར་རྫོགས་པ་ཆེན་པོའི་མན་ངག་སྙིང་ཐིག་གི་གནད་ལ་ཉམས་བཞེས་རྩལ་དུ་བཏོན་པས། ཀ་དག་ཁྲེགས་ཆོད་ཀྱི་ལྟ་བ་མངོན་དུ་གྱུར། ལྷུན་གྲུབ་ཐོད་རྒལ་གྱི་སྒོམ་པའི་རྩལ་ཆེན་རྫོགས་ནས། སྒོམ་ལམ་རིག་པ་ཚད་ཕེབས་ཀྱི་སྣང་བ་མཐར་ཕྱིན། ས་བརྒྱད་པའི་བྱང་ཆུབ་སེམས་དཔའ་རྣམས་དང་དགོངས་པ་མཉམ་པའི་ཚུལ་བསྟན་ཏེ། ཀུན་བཟང་དགོངས་པའི་རྒྱལ་ཐབས་ལ་དབང་བསྒྱུར། མངོན་པར་ཤེས་པ་དང་། རྫུ་འཕྲུལ་གྱི་རྣམ་པར་རོལ་པ་བསམ་གྱིས་མི་ཁྱབ་པས། གྲུབ་པའི་དབང་ཕྱུག་ཆེན་པོར་གྲགས་པའི་རྔ་བོ་ཆེ་ཕྱོགས་ཀྱི་ཁོར་ཡུག་ཀུན་ཏུ་ཆེས་ཆེར་ལྡིར་བས་སྐལ་བཟང་གི་གདུལ་བྱ་མཐའ་དག་དད་པའི་ས་ལ་བཀོད། སློབ་མའི་གཙོ་བོར་གྱུར་པ། འཁོན་ཆེན་པོ་ཀླུ་དབང་སྲུང་གི་སྤྲུལ་པའི་རྣམ་རོལ་ཟབ་མོ་གཏེར་གྱི་བཀའ་བབས་རིག་འཛིན་ཉི་མ་གྲགས་པ། གྲུབ་ཆེན་མེ་ལོང་རྡོ་རྗེའི་རྣམ་འཁྲུལ་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་གྱུར་ནས་ཉིན་མཚན་འོད་གསལ་གྱི་སྣང་བ་ཁོར་ཡུག་ཏུ་བརྡལ་བ་རྣལ་འབྱོར་གྱི་དབང་ཕྱུག་ནམ་མཁའ་འོད་གསལ། བདེ་གཤེགས་མྱ་ངན་མེད་པ་ཚུར་མཐོང་གདུལ་བྱའི་སྣང་ངོར་མི་ཡི་ཟོལ་དུ་བསྟན་ནས་ལུང་རིགས་བརྒལ་བརྟགས་ཀྱི་འཁོར་ལོས། ལོག་སྨྲའི་རྒོལ་བ་ཕྱེ་མར་འཇོམས་ཤིང་། ཐུབ་བསྟན་ཉིན་མོར་བྱེད་པ་རབ་འབྱམས་པ་བསྟན་པའི་རྒྱལ་མཚན་རྣམས་ཀྱི་གཙོས་བཤད་སྒྲུབ་ལས་ཀྱི་འཁོར་ལོས་རྒྱལ་བསྟན་གསལ་བར་མཛད་པའི་སློབ་ཚོགས་ནམ་མཁའི་རྒྱུ་སྐར་ལྟར་བཀྲ་བས་ཕྱོགས་ཐམས་ཅད་དུ་ཁྱབ། དེ་ནས་རྒྱལ་དབང་ཐམས་ཅད་མཁྱེན་པའི་བཀའ་ལུང་གིས་བསྐུལ་ནས། མདོ་ཁམས་སྨད་ཀྱི་ཕྱོགས་སུ་ཟབ་གསང་རྫོགས་པ་ཆེན་པོའི་བསྟན་པ་སྤེལ་ཕྱིར་ཆིབས་ཀྱི་ཁ་ལོ་བསྒྱུར་བ་ན། བསོད་ནམས་སྟོབས་ཀྱི་འཁོར་ལོས་སྒྱུར་བའི་རྒྱལ་པོ། གནམ་བསྐོས་གོང་མ་ཆེན་པའི་ལུང་གིས་བསྔགས་པས། མདོ་ཁམས་ས་ཡི་བདག་པོར་དབང་བསྐུར་བ། གནམ་སའི་དབང་ཕྱུག་ཆེན་པོ་སྡེ་དགེ་ཆོས་རྒྱལ་ཆེན་པོའི་གདུང་རབས་རིམ་པར་བྱོན་པའི་ནང་ནས། ཨོ་རྒྱན་དུས་གསུམ་མཁྱེན་པའི་བཀས་ལོ་ཙཱ་བ་ཆེན་པོ་ཅོག་རོ་ཀླུ་ཡི་རྒྱལ་མཚན་གྱི་རྣམ་འཕྲུལ་དུ་ལུང་གིས་ཟིན་པའི་ཁྲི་ཆེན་སངས་རྒྱས་བསྟན་པ་ཞེས་གྲགས་པ་དེ་ཉིད་ཀྱིས། རྣམ་གསུམ་དད་པའི་སྲི་ཞུ་ཆེན་པོས་ཞབས་པད་སྤྱི་བོར་བཞེས་ཏེ་དབུའི་མཆོད་གནས་སུ་བཀུར། གཞན་ཡང་གླིང་དཔོན་ཆེན་མགོན་པོ་ལྷུན་གྲུབ། ས་སྐྱོང་སྡེ་དགེ་རྒྱལ་པོའི་ཁྲིམས་ཀྱི་ཁ་ལོ་འཛིན་པ་གད་ཐོག་གཉེར་ཆེན་ལྷ་ལུ་ལ་སོགས་པའི་མི་ཆེན་མང་པོ་དང་། འབྱོར་ལྡན་གྱི་ཁྱིམ་བདག་དུ་མས་བསྟན་པའི་སྦྱིན་བདག་མཛད་དེ། མདོ་སྨད་ཟོ་དོར་ཡོངས་ཀྱི་གཙོ་བོ་གནོད་སྦྱིན་རི་དབང་སྤུན་དགུའི་ཡ་གྱལ། ལྷ་གཉེན་ཟིལ་ཁྲོམ་རྡོ་རྗེ་གཡུང་དྲུང་གི་གཡོན་ཞོལ། ཨོ་རྒྱན་རྡོ་རྗེ་འཆང་གི་ཞབས་ཀྱིས་བཅགས་བྱིན་གྱིས་བརླབས་ནས་བདུད་རྩི་སྨན་གྱི་སྒྲུབ་པ་མཛད་པས། དཔའ་བོ་མཁའ་འགྲོ་སྤྲིན་ལྟར་འདུ་ཞིང་། མཆོག་དང་ཐུན་མོང་གི་དངོས་གྲུབ་རང་བཞིན་གྱིས་འགྲུབ་པའི་གནས་རུ་དམ་སྐྱིད་ཕྲམ་གྱི་ལུང་པ་ཞེས། ཕུ་གངས་དཀར་གྱི་ལ་ཐོད་འཛིན་པའི་རི་རྒྱལ་པོ་གདན་ལ་བཞུགས་པ་ལྟ་བུ། ལྷོ་ཕྱོགས་ནགས་ཚལ་གྱི་འདབ་གུར་འཁྲིགས་པའི་ཀླུང་ནས། བདུད་རྩི་འོ་མའི་ཆུ་རྒྱུན་ལྟ་བུའི་རྒྱུན་འབབས་ཀྱི་མཆོད་ཡོན་བསྒྲེང་བ། རྒྱབ་རི་དར་དཀར་གྱི་ཡོལ་བ་དྲེས་པ་ལྟ་བུས་ཀུན་ནས་བསྐོར་ཞིང་། མདའ་སྒོམ་ཆེན་གྱི་སྐྱིལ་ཀྲུང་བཅས་པ་ལྟ་བུར་ཤར་བྱང་གི་རི་སྣ་བསྣོལ་བས་ཏིང་འཛིན་རང་ཤུགས་ཀྱིས་སྐྱེ་བ། མདུན་དུ་ནེའུ་སེང་མེ་ཏོག་གིས་བརྒྱན་པ་གསེར་གཞོང་མར་ཁུས་བཀང་བ་ལྟ་བུས་འདོད་ཡོན་གྱི་གཏེར་ཁ་རྡོལ་བ། ཕྱོགས་བཞིར་ས་ཡི་སྲུང་བཞི་ཚང་ཞིང་། མཚམས་བཞིར་ས་ཡི་དཔལ་བཞི་ལྡན་པ། གཞན་ཡང་འགྱུར་མེད་ཀྱི་གངས་རི་བརྟན་ཆགས། དངོས་གྲུབ་གྱི་གཡུ་མཚོ་གཏན་འཁྱིལ། དབང་ཐང་གི་བྲག་རི་རྩེ་རྒྱལ། བསོད་ནམས་ཀྱི་ཐང་ཆེན་མཐའ་རྒྱས་སོགས་བཀྲ་ཤིས་ཀྱི་དགེ་མཚན་དུ་མས་ཕྱོགས་ཐམས་ཅད་ནས་བརྒྱན་པ། རྒྱུད་དང་བསྟན་བཅོས་ནས་བཤད་པའི་སའི་དཔྱད་ཕུན་སུམ་ཚོགས་པའི་གནས་འདི་ཉིད་དུ་ཨོ་རྒྱན་བསམ་གཏན་ཆོས་གླིང་དུ་གྲགས་པའི་ཆོས་གྲྭ་ཆེན་པོ་འདི་བཏབ། འོད་གསལ་རྫོགས་པ་ཆེན་པོའི་ལམ་གྱི་རྣལ་འབྱོར་པ་ཤ་སྟག་ཚོགས་པའི་རིག་པ་འཛིན་པའི་སྡེ་ཆེན་པོ་སྟོང་ཕྱེད་ལྔ་བརྒྱར་ལོངས་པས་དགེ་འདུན་འདུས་པའི་སྡེ་རྒྱས། དེ་ནས་རིམ་པར་སྐུ་རབས་གཉིས་པ། བྱང་ཕྱོགས་གུར་དཀར་པོའི་བདག་པོ་སོག་པོ་ཨོ་རོད་ཀྱི་སྡེ་པར་འཁྲུངས་པ། འགྱུར་མེད་ཐེག་མཆོག་བསྟན་འཛིན་མཐུ་སྟོབས་དབང་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེ་ཉིད་ཁྲིར་འཁོད་པ་ནས། ས་སྐྱོང་ཆོས་རྒྱལ་ཆེན་པོ་བསྟན་པ་ཚེ་རིང་དང་བློ་གྲོས་རྒྱ་མཚོ་བཅས་པར་མཆོད་ཡོན་དུ་འདྲེལ་བས། བཀའ་གཏེར་བཤད་སྒྲུབ་ཀྱི་རྒྱུན་དང་། བསྟན་སྲིད་ཀྱི་ཕྲིན་ལས་གོང་འཕེལ་དུ་གྱུར། དེ་ནས་སྐུ་རབས་གསུམ་པ། བྱང་ཟླ་ཀླུང་སྔོན་མོ་དལ་གྱིས་འབབས་པའི་ཀླུང་འགྲམ། ཟླ་རྒྱུད་ཧོ་པའི་སྡེ་པར་སྐུ་འཁྲུངས་པ། ངེས་དོན་བསྟན་འཛིན་བཟང་པོ་ཨ་ཏི་བསྟན་པའི་རྒྱལ་མཚན་དུ་གྲགས་པ་དེ་ཉིད་ཁྲིར་འཁོད། མི་དབང་བསོད་ནམས་བཟང་པོ་ཡབ་སྲས་དང་མཆོད་ཡོན་དུ་འདྲེལ། རྗེ་འདིའི་སྐུ་རིང་ལ་སྔ་འགྱུར་བཀའ་མ་མདོ་སྒྱུ་སེམས་གསུམ་སོགས་བཤད་སྒྲུབ་ཀྱི་ཕྱག་བཞེས་གསར་སྤེལ་དང་བསྟན་པའི་བྱ་བ་རྒྱ་ཆེ། དེ་ནས་སྐུ་རབས་བཞི་པ། ཆུ་བོ་གསེར་ལྡན་དུ་གྲགས་པ། འབྲི་ཀླུང་སྔོན་མོའི་རྒྱུད་འདན་ཆོས་འཁོར་དུ་སྐུ་འཁྲུངས་པ། བདག་ཅག་རྣམས་ཀྱི་རིགས་ཀྱི་བདག་པོ། ཁྱབ་བདག་གདོད་མའི་མགོན་པོ་མི་ཡི་གཟུགས་སུ་བྱོན་པ། མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨྲོས་ན། གྲུབ་པའི་དབང་ཕྱུག་མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ་ཞེས་མཚན་གྱི་བ་དན་དཀར་པོ་སྲིད་པའི་རྩེ་མོར་གཡོ་བ་དེ་ཉིད་ཁྲིར་ཕེབས། མི་དབང་ས་ཡི་ཚངས་པ། འཇིགས་བྲལ་ཚེ་དབང་རྡོ་རྗེ་ཡབ་སྲས་དང་མཆོད་ཡོན་ཟུང་དུ་འདྲེལ། ཆོས་སྲིད་གཉིས་ཀྱི་མཛད་པས་རྒྱལ་ཁམས་ཐམས་ཅད་བདེ་སྐྱིད་ཀྱི་དཔལ་ལ་བཀོད། རྗེ་འདི་ཉིད་ཀྱི་རིང་ལ། ཐུགས་སྲས་བརྒྱུད་འཛིན་ཡོངས་ཀྱི་གཙོ་བོ་ཁྱབ་བདག་བཀའ་འགྱུར་པ་ཆེན་པོ་རྒྱལ་སྲས་གཞན་ཕན་མཐའ་ཡས་འོད་ཟེར་ཀྱི་ཐུགས་བསྐྱེད་དང་འདྲེལ་བར། བསྟན་པའི་གཞི་མ་དམ་པའི་ཆོས་འདུལ་བའི་ཕྱག་བཞེས་དང་། རྒྱུད་ཀྱི་རྒྱལ་པོ་དཔལ་ལྡན་གསང་བ་སྙིང་པོའི་བཤད་པ་སོགས་མདོ་སྔགས་བཤད་གྲུབ་ཀྱི་སྣང་བས་ཕྱོགས་ཐམས་ཅད་དུ་ཁྱབ་པར་མཛད། སྐྱབས་མཆོག་འཁོར་ལོའི་མགོན་པོ་འདི་ཉིད་ཀྱི་མ་འདྲེས་པའི་མཛད་པ། དུས་རྟག་པ་རྒྱུན་གྱི་འཁོར་ལོར། ཐུགས་འོད་གསལ་ཆོས་ཉིད་ཀྱི་ངང་དུ་ཚོགས་དྲུག་གི་སྣང་བ་ཐམས་ཅད་ཤར་གྲོལ་རྗེས་མེད་དུ་དག་པས། ཀ་དག་གདོད་མའི་དབྱིངས་ལ་རྩོལ་རྟོག་གི་གཡོ་བ་མི་མངའ་བར་བཞུགས་བཞིན་དུ། རྗེས་ཐོབ་ཡེ་ཤེས་ཀྱི་རྩལ་སྣང་དམིགས་མེད་ཀྱི་ཐུགས་རྗེ་ཆེན་པོར་ཤར་བས་མཆོག་དམན་བར་མའི་འགྲོ་བ་ཐམས་ཅད་ལ་ཉེ་འཁོན་མེད་པར་མ་འདྲིས་པའི་མཛའ་བཤེས་ཆེན་པོར་གྱུར་པའི་ངང་ནས། བསྟན་འགྲོའི་དོན་ཆེན་གྱི་ཕྲིན་ལས་ཐམས་ཅད་འབད་མེད་ལྷུན་གྲུབ་ཏུ་འབྱུང་བས་རྒྱལ་བ་རྣམས་ཀྱི་མཛད་པ་དང་དབྱེར་མེད་པ་ཞིག་སྟེ། དབུ་མ་འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་སྒྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བ་ཡིན། །ཞེས་གསུང་བ་རྗེ་འདི་ཉིད་ཀྱི་དོན་གྱི་རྣམ་ཐར་དུ་སོང་བཞིན། དོན་གཉིས་ལྷུན་གྲུབ་ངང་ལ་སྐུ་ཚེ་མཐར་ཕྱིན་ནས། དགུང་གྲངས་བདུན་ཅུ་རྩ་བརྒྱད་བཞེས་པ་ལྕགས་ཕོ་རྟའི་ལོའི་སྨིན་དྲུག་ཟླ་བའི་དམར་ཕྱོགས་ཀྱི་རྒྱལ་བ་དང་པོའི་ཚེས་ལ་གཟུགས་སྐུའི་བཀོད་པ་གདོད་མའི་གཞི་དབྱིངས་ནང་གསལ་ཆེན་པོར་འཁྱིལ་བར་གྱུར་པ་དེ་ལྟ་ནའང་། དམིགས་མཐའ་བྲལ་བའི་ཐུགས་རྗེ་ཆེན་པོའི་འཕེན་པས་འགྲོ་བ་འདུལ་བའི་ཕྲིན་ལས་རྒྱུན་མི་འཆད་ཅིང་འགོགས་པ་མེད་པ་ནི་རྒྱལ་བ་རྣམས་ཀྱི་ཆོས་ཉིད་ཡིན་པས། དེང་གི་དུས་འདིར་ཡང་། རྩོད་མེད་ཀྱི་སྤྲུལ་པའི་གཏེར་སྟོན་ཆེན་པོ། ཨོ་རྒྱན་མཆོག་གྱུར་བདེ་ཆེན་གླིང་པས་སྤྱན་དྲངས་པའི། ཨོ་རྒྱན་རྡོ་རྗེ་འཆང་ཆེན་པོའི་ཞལ་ལུང་དྲི་མ་མེད་པ་ལས། ཤྟཤྤཤྤ། སོགས། ཞེས་གསུངས་པ་ལྟར། ཨོ་རྒྱན་སངས་རྒྱས་གཉིས་པའི་རྒྱལ་ཚབས། གསར་རྙིང་རིས་མེད་ཀྱི་བསྟན་པའི་བདག་པོ། དེང་སང་ཙམ་ན་ཁམས་དབུས་གཙང་གསུམ་ཙམ་དུ་མ་ཟད་རྒྱ་གར་ཆུ་བོ་གངྒ་ཚུན་ཆད་དང་། རྒྱ་ནག་བཀྲ་ཤིས་ཁྲི་སྒོ་ཡན་ཆད་ན། མཁས་དང་གྲུབ་པའི་རྣམ་ཐར་ལ་འགྲན་ཟླར་གྱུར་པ་འགའ་ཡང་མ་མཆིས་པ་དོན་གྱིས་ཐམས་ཅད་མཁྱེན་པ། མཚན་བརྗོད་པར་དཀར་བ། འཇམ་དབྱངས་མཁྱེན་བརྩེའི་དབང་པོའམ། ཀུན་མཁྱེན་རྡོ་རྗེ་གཟི་བརྗིད་རྩལ་གྱིས་ལུང་དོན་གསལ་བར་མཛད་པ་ལྟར། སྔར་གྱི་གྲུབ་ཐོབ་ཆེན་པོའི་འཁྲུངས་ཡུལ་དང་གཅིག་པར། ཁམས་ཀྱི་རི་བོ་ཆེའི་ཕྱོགས་སུ་རྣམ་པར་དཀར་བའི་བསོད་ནམས་དང་སྨོན་ལམ་གྱི་མཐུ་ལས་གྲུབ་པ། ཨོ་རྒྱན་རྡོ་རྗེ་འཆང་ཆེན་པོའི་སྒྲིབ་མེད་ཡེ་ཤེས་ཀྱི་གཟིགས་པའི་སྤྱན་རས་ཀྱིས་བཙལ་བའི། ཡབ་མགོན་པོ་རྒྱལ་དང་། ཡུམ་བསོད་ནམས་གཡང་མཚོ་གཉིས་ཀྱི་སྲས་སུ་འཁྲུངས་པའི། སྐྱབས་མགོན་མཆོག་གི་སྤྲུལ་པའི་སྐུ་འཁྲུལ་མེད་རྡོ་རྗེའི་ལུང་གིས་ཚད་མར་གྲུབ་པ་འདི་ཉིད། ཞྭ་སེར་བསྟན་པའི་མངའ་བདག །ལྷ་གཅིག་གངས་རིའི་མགོན་པོ་འཕགས་མཆོག་ཕྱག་ན་པདྨའི་ཐུགས་རྗེ་ཡེ་ཤེས་སྒྱུ་མའི་རྣམ་རོལ། རྒྱལ་བ་འཕགས་པ་ལྷ་ཞེས་མཚན་གྱི་ཡི་གེ་སྲིད་པ་གསུམ་ན་གསལ་ཞིང་གྲགས་པ་གང་གི་ཞལ་སྔ་ནས་ཚད་མེད་པའི་ཐུགས་རྗེ་དང་བཀའ་དྲིན་ཆེན་པོས་བསྐྱངས་པའི་བདག་རྐྱེན་ལས། ད་རེས་འདིར་མདོ་ཁམས་རྫོགས་ཆེན་པའི་གདན་ས། ཨོ་རྒྱན་བསམ་གཏན་ཆོས་གླིང་གི་གཙུག་ལག་ཁང་། ཐུབ་བསྟན་ཡོངས་འདུས་དགའ་ཚལ་གྱི་ཁྱམས་ཆེན་པོ་ཐེག་པ་གསུམ་དང་ཁྱད་པར་འོད་གསལ་རྫོགས་པ་ཆེན་པོའི་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར་བའི་གནས། མི་འཇིགས་གདོང་ལྔས་བཏེགས་པའི་ཁྲི་འཕང་མཐོན་པོར། སྤྲུལ་པའི་ཉི་གཞོན་གསར་དུ་འཆར་བའི་མཚན་དཔེའི་དཀྱིལ་འཁོར་ལྷམ་མེར་འབར་ཞིང་། ཞབས་ཀྱི་ཆུ་སྐྱེས་རྣམ་པར་བཞད་པ་བཀྲ་ཤིས་གསེར་གྱི་འཁོར་ལོས་མཚན་པ་ཉེ་བར་བཀོད་པའི་དགེ་མཚན་མངོན་དུ་གྱུར་པའི་སྐབས་འདིར། སྟོན་འཁོར་ཕུན་སུམ་ཚོགས་པའི་རྟེན་འདྲེལ་དུས་སུ་བབས་པ་བཞིན། རིམ་བྱོན་སྐྱེ་བའི་ཕྲེང་བ་རྣམས་དང་ཉི་མ་དང་འོད་ཟེར་གྱི་ཚུལ་དུ་ནམ་ཡང་འདུ་འབྲལ་མེད་པ། དཔོན་སློབ་སྤྲུལ་པའི་སྐུ་འཇིགས་མེད་ཆོས་དབྱིངས་འོད་གསལ། རབ་འབྱམས་སྤྲུལ་པའི་སྐུ་པདྨ་འགྱུར་མེད་རྒྱ་མཚོ། ནམ་མཁའ་ཚེ་དབང་མཆོག་གྲུབ་ཀྱི་ཡང་སྲིད་གཉིས་པ་ཀུན་བཟང་ཐེག་མཆོག་རྡོ་རྗེ། ཁྱབ་བདག་བཀའ་འགྱུར་བའི་ཡང་སྲིད་རིན་པོ་ཆེ་ཐུབ་དབང་བསྟན་པའི་ཉི་མ། འགྱུར་མེད་ཕྱོགས་ལས་རྣམ་རྒྱལ་སོགས་རྒྱལ་བའི་ཡེ་ཤེས་ཀྱི་རྣམ་རོལ་ཐུགས་རྗེ་ཡས་སྤྲུལ་གྱི་གང་ཟག་རྣམས་དང་། བསླབ་གསུམ་ཡོན་ཏན་གྱིས་མངོན་པར་མཐོ་ཞིང་བཤད་སྒྲུབ་ཕྲིན་ལས་ཀྱི་ཁུར་ཆེན་འཛིན་པའི་ཞལ་སློབ་རྣམས་དང་། བསྐྱེད་རྫོགས་སྙིང་པོའི་ཉམས་ལེན་ལ་གཅིག་ཏུ་བརྩོན་པའི་རི་སུལ་གྱི་སྒྲུབ་པོ་རྣམས་དང་། ལྔ་རིག་སྨྲ་བའི་ཁྱུ་མཆོག་ལུང་དང་རིགས་པའི་མགྲིན་རྔ་ལྡིར་བའི་མཁས་པ་རྣམས་དང་། བསྟན་པའི་སྦྱིན་བདག་ཆེན་པོ། ས་ཆེན་ཆོས་བཞིན་སྐྱོང་བའི་མི་དབང་ཆོས་རྒྱལ་མཆོག་གི་ཞབས་པད་ཁྲིམས་ཀྱི་ཁ་ལོ་སྒྱུར་བ་གཉེར་ཆེན་མདུན་འཁོར་ལྷན་རྒྱས་དང་། དཔལ་ཆབ་མདོ་བྱམས་པ་གླིང་གི་སྐུ་ཞབས་རྒྱལ་བ་མཆོག་གི་ཞལ་སྔ་ནས་ཀྱི་དྲུང་འཁོར་ལྷན་རྒྱས་དང་། དད་འབྱོར་ཕུན་སུམ་ཚོགས་པའི་སྦྱིན་བདག་གི་ཚོགས་དང་བཅས་པའི་ལྷན་གཅིག་ཏུ་ཚོགས་པའི་དུས་བཟང་པོ་འདིར། ཇི་སྐད་དུ། འཇིག་རྟེན་སྐྱེ་བོ་ནོར་གྱིས་མགུ། །དམ་པ་ལེགས་བཤད་གཏམ་གྱིས་དགྱེས། །མཁས་པ་ཚོགས་པའི་ལྷ་གྲལ་ན། །ལེགས་བཤད་འདྲ་བའི་དགའ་སྟོན་མེད། །ཅེས་གྲགས་པ་ལྟར། ལེགས་པར་བཤད་པའི་གཏམ་ཅུང་ཟད་ཅིག་གླེང་ན། ལྷ་དང་བཅས་པའི་འགྲོ་བ་ཡོངས་ཀྱི་འདྲེན་པ་ཀུན་མཁྱེན་རྒྱལ་བ་ཤཱཀྱ་སེངྒེའི་གསུང་གི་གསང་བ་བསམ་གྱིས་མི་ཁྱབ་པ། དང་པོ་ཐོས་ནས་ཡིད་ཆེས་ཀྱི་དད་པ་སྐྱེ། བར་དུ་བསམ་ན་ངེས་ཤེས་ཀྱི་སྤྲོ་བ་འཕེལ། ཐ་མ་བསྒོམ་ན་ཡང་དག་གི་རྟོགས་པ་རྒྱུད་ལ་སྐྱེ་བའི་རྒྱུ་ཡིན་པས་ན། མགོན་པོ་བྱམས་པས། དད་དང་སྤྲོ་དང་བློ་རྣམས་ཀྱི། །རྒྱུ་ཕྱིར་ཆོས་འདི་དགེ་བ་ཡིན། །ཞེས་གསུངས་པ་ལྟར། ཐོག་མཐའ་བར་གསུམ་དུ་དགེ་བའི་ཆོས་ཀྱི་རྣམ་གྲངས་ཚད་མེད་པ་ལས། འདིར་སྐབས་སུ་བབས་པ་ཞེས། གང་དང་གང་འོས་དེ་བརྗོད་པར་བྱའོ། །མཇུག་ཏུ། ལེགས་པར་གྲུབ་པ་ལགས། དེ་ལྟར་ལེགས་བཤད་གཏམ་གྱི་སྦྱོར་བ་ཅུང་ཟད། འཕགས་མཆོག་མཁས་དབང་རྒྱ་མཚོའི་སྙན་ལམ་དུ་ཕུལ་བའི་མཐུ་ལ་བརྟེན་ནས། ས་གསུམ་གྱི་སྐྱེ་རྒུ་མཐའ་དག་གི་ཕན་བདེའི་འབྱུང་གནས་རྒྱལ་བ་ཉི་མའི་གཉེན་གྱི་ལུང་རྟོགས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་གོང་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་བླ་མ་དགེ་བའི་བཤེས་གཉེན་རྣམས་ཀྱི་ཐུགས་ཀྱི་བཞེད་དོན་ཐམས་ཅད་ཡོངས་སུ་རྫོགས་ཤིང་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱ་ཆེ་ཞིང་རྒྱུན་མི་འཆད་པར་བསྐོར་བཞིན་དུ། ཞབས་པད་བསྐལ་པ་རྒྱ་མཚོར་བརྟན་པ་དང་། དགེ་འདུན་འདུས་པའི་སྡེ་རྣམས་ཐུགས་མཐུན་ཅིང་ལོངས་སྤྱོད་ཀྱི་འདུ་བ་རྒྱས་ལ་བཤད་སྒྲུབ་ཀྱི་བྱ་བས་དུས་འདའ་བ་དང་། ཡངས་པའི་རྒྱལ་ཁམས་ཐམས་ཅད་དུ་ཡང་། ཆར་ཆུ་དུས་སུ་འབེབས། ལོ་ཕྱུག་རྟག་ཏུ་ལེགས། བདེ་སྐྱིད་ཀྱི་དཔལ་ཕུན་སུམ་ཚོགས་པ་ལ་སྤྱོད་པས་རྫོགས་ལྡན་གྱི་བསྐལ་པ་གསར་དུ་འཆར་བ་དང་། ཆོས་ལྡན་གྱི་རྒྱལ་པོ་རྣམས་ལུགས་གཉིས་ཀྱི་ཁྲིམས་བཙན་ཞིང་། ཆབ་སྲིད་འཇམ་དར་ཆེ་བས་རྒྱལ་ཁམས་ཆོས་བཞིན་སྐྱོང་བ་དང་། དཀར་ཕྱོགས་ལ་དགའ་བའི་ལྷ་ཀླུ་གཞི་བདག་རྣམས་དབུ་འཕང་མཐོ་ཞིང་གཟི་བྱིན་དང་འབྱོར་པ་རྒྱས་པས། ཡུལ་ཕྱོགས་ཐམས་ཅད་དུ་བཀྲ་ཤིས་དང་དགེ་མཚན་གྱིས་ཁྱབ་པ་སོགས། བདེ་ལེགས་ཀྱི་སྣང་བ་ཆེན་པོ་དུས་རྟག་ཏུ་འཆར་བར་གྱུར་ཅིག །ཞེས་པའང་མཁན་མིང་པདྨ་རྡོ་རྗེས་སྨྲས་པ་དགེ་ཞིང་བཀྲ་ཤིས་པར་གྱུར་ཅིག། དགེའོ།། །།