སྙིང་ཐིག་དཔལ་འདུས་སྨན་སྒྲུབ་སྐབས་ཀྱི་རྟགས་གདབ་དང་མར་མེ་སྨོན་ལམ་གྱི་སྟོང་ཐུན་བཅས།
༄༅།།སྙིང་ཐིག་དཔལ་འདུས་སྨན་སྒྲུབ་སྐབས་ཀྱི་རྟགས་གདབ་དང་མར་མེ་སྨོན་ལམ་གྱི་སྟོང་ཐུན་བཅས་བཞུགས་སོ།། དེ་ཡང་། དུས་གསུམ་ཐོག་མཐའ་དང་བྲལ་བའི་འོག་མིན་ཁྱབ་བརྡལ་ཆེན་པོའི་ཞིང་ན། ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས་དཔལ་ཀུན་ཏུ་བཟང་པོ་ཉིད་ཆོས་ཉིད་མཉམ་པ་ཆེན་པོའི་ངང་ལས་མ་གཡོས་བཞིན་དུ་དྲག་པོ་ལ་སོགས་པའི་གདུལ་བྱ་གདུག་པ་ཅན་རྣམས་ཀྱི་སྣང་ངོར་དཔལ་ཁྲག་འཐུང་ཆེན་པོའི་སྐུར་བཞེངས་ནས་འབར་བའི་དཀྱིལ་འཁོར་མངོན་པར་འདུ་མཛད་དེ། མངོན་སྤྱོད་དྲག་པོའི་ཕྲིན་ལས་ཀྱིས་ཕྱི་ནང་གསང་བའི་རུ་ཏྲའི་སྡེ་དང་དཔུང་དུ་བཅས་པ་བསྒྲལ་བའི་ཚེ་རྒྱལ་བྱེད་དཔའ་རྟགས་ཀྱི་མཚན་མ་དུར་ཁྲོད་ཆས་བརྒྱད་སྐུ་ལ་གསོལ་ཞིང་དཔལ་གྱི་ཆས་བཅུས་མངོན་པར་བརྗིད་པ་དེ་བཞིན་དུ། དེང་འདིར་རིག་འཛིན་སྒྲུབ་པ་པོ་རྣམས་ཀྱང་དུག་གསུམ་རུ་ཏྲའི་སྡེ་ལས་རྣམ་པར་རྒྱལ་ཞིང་། དཔལ་ཧེ་རུ་ཀའི་གདུང་འཚོབ་པ་དང་། ཡེ་ཤེས་དང་འཇིག་རྟེན་གྱི་མ་མོ་མཁའ་འགྲོ་རྣམས་ཀྱིས་ཚོགས་ཀྱི་རྗེ་བོར་མཐོང་ཞིང་དམ་ཅན་བསྲུང་མ་རྣམས་ལས་ལ་འཁོལ་བར་བྱ་བའི་ཕྱིར། དཔལ་གྱི་ཆས་བཅུས་མངའ་གསོལ་བའི་ཚིགས་སུ་བཅད་པ་འདི་རྣམས་རྗེས་ཟློས་གནང་བར་ཞུ། ཡང་འཛབ་ཀྱི་ནང་གསེས་ཐུགས་དམ་གནད་བསྐུལ་ཀྱི་སྔགས་ཀྱི་སྒོ་ནི། ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཧཱུྃ་ཧྲཱྀཋཿ སྐུ་གསུང་ཐུགས་རྡོ་རྗེའི་བདུད་རྩི་བསྡུས་བསྡིམ་བརྟན་པར་མཛོད། ཨ་ར་ལི་ཕཻཾཿ ཀུན་ཏུ་རོལ་ཁོས། སྔགས་དོན་ལ། ཀུན་ཏུ་རོལ་བའི་མཛད་པས་སྐུ་གསུང་ཐུགས་ཀྱི་རྡོ་རྗེའི་བདུད་རྩི་བསྡུས་ནས་དམ་ཚིག་གི་བདུད་རྩི་ལ་བསྡིམ་ནས་བརྟན་པར་མཛོད། དེ་ལྟར་མ་མཛད་ན་སྔོན་གྱི་ཐུགས་དམ་དང་འགལ་བས་ཁྱེད་རྣམས་ཀྱི་དབུ་ཁོས་ཤིག་ཅེས་པའོ། དེ་ལ་འདིར་སྒྲུབ་པ་ཆེན་པོའི་རྗེས་ཀྱི་བྱ་བ་ལ། སྒྲུབ་པའི་མཆེད་ལྕམ་དང་སྦྱིན་པའི་བདག་པོ་འཁོར་དང་བཅས་པ་རྣམས་ཚོམ་བུ་གཅིག་ཏུ་མངོན་པར་འཚང་རྒྱ་བའི་ཕྱིར་མར་མེ་སྨོན་ལམ་གྱི་སྐབས་འདིར། སྟོང་ཐུན་ཉུང་ངུ་རེ་བཤད་པ་རིག་འཛིན་བརྒྱུད་པའི་ཕྱག་སྲོལ་དུ་གདའ་བས། སྙིང་པོར་དྲིལ་ཏེ་ཞུ་ན། སྤྱིར་མཆོག་ཐུན་གྱི་དངོས་གྲུབ་གང་སྒྲུབ་ཀྱང་བསྒྲུབ་པའི་གཞི། སྒྲུབ་བྱེད་ཀྱི་ཐབས། བསྒྲུབས་པའི་འབྲས་བུ་དང་གསུམ་གྱི་སྒོ་ནས་ཤེས་པར་བྱ་དགོས་པ་ལས་འདིར་བསྒྲུབ་པའི་གཞི་ནི། རིག་པ་བྱང་ཆུབ་ཀྱི་སེམས་རྩལ་གདངས་རོལ་པ་དང་བཅས་པ་ཡེ་ནས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གདོད་ནས་དག་པའི་བདུད་རྩི་ཆེན་པོའི་རང་བཞིན་དུ་གནས་པ་ཉིད་ཡིན་ཏེ། རང་གཞུང་ལས། སྲིད་གསུམ་གདོད་ནས་བདུད་རྩི་ལྔ༔ མ་བཅོས་རང་བཞིན་ལྷུན་གྲུབ་ངང་༔ དེ་ཉིད་རྒྱལ་བའི་སྐུ་གསུང་ཐུགས༔ འབད་རྩོལ་མེད་པར་ཡེ་སངས་རྒྱས༔ ཅེས་པ་ལྟར་ལགས་ཀྱང་། གློ་བུར་གྱི་སྒྲིབ་པ་དང་། གཙང་རྨེའི་རྟོག་པས་བཅིངས་པའི་དྲི་མ་བསལ་ཐབས་བཅས་སྒྲུབ་བྱེད་ཆོ་གའི་རིམ་པ་ནི། གཞུང་ལས། རྡོ་རྗེ་འཆང་གི་ཐབས་ཚུལ་ནི༔ སྒྱུ་མ་མཁན་གྱིས་བདེ་བླག་བཞིན༔ འདུལ་བའི་ཕྲིན་ལས་ཚད་མེད་པས༔ གཉིས་སུ་འཛིན་པའི་རྣམ་རྟོག་བདུད༔ ཡེ་ཤེས་རྩི་ཡིས་འཇོམ་པའི་ཐབས༔ རྨད་དུ་བྱུང་བ་འདི་བསྟན་ཏོ༔ ཞེས་གསུངས་པ་ལྟར། མཐོང་བ་བརྒྱུད་པའི་ཕྱག་བཞེས་བཞིན་སྒྲུབ་པ་ལ། ཕུན་སུམ་ཚོགས་པ་ལྔས་གཞི་བཟུང། བསྙེན་སྒྲུབ་ཡན་ལག་བཞིས་གཞུང་བསྲངས། འབྲས་བུ་རིག་འཛིན་གྲུབ་པའི་ཚད་དང་ཕན་ཡོན་བཅས་བསྟན་པ་ལས། དང་པོ་ནི། སྒྲུབ་པའི་གནས་དུས་གྲོགས་དང་རྫས། ཞེས་པ་ལྟར། སྟོན་པ་ཕུན་སུམ་ཚོགས་པ་ནི། རྒྱུད་ཀྱི་རྒྱལ་པོ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། མན་ངག་དྲོད་དང་བརྒྱད་འཆང་བ། །ཞེས་རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་དང་། སྟོན་པ་མཆོག་བརྩོན་རྟོག་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ཤིང་ཡོ་བྱད་ལྡན། ཞེས་ཡོན་ཏན་ལྔ་ལྡན་གྱི་འཁོར་ཕུན་སུམ་ཚོགས་པ་དང་། སྒྲུབ་པའི་གནས་ནི། ཇི་སྐད་དུ། གནམ་ས་བར་གྱི་དཔྱད་ལེགས་ཤིང་། །ལྗོན་ཤིང་ཆུ་ཀླུང་མེ་ཏོག་བཀྲ། །བཀྲ་ཤིས་བྱ་ཚོགས་སྐད་སྙན་སྒྲོག །གྲུབ་པས་བྱིན་གྱིས་བརླབས་པའི་གནས། ཞེས་གསུངས་པ་ལྟར། སྔོན་ཚེ་དཔལ་ཆེན་པོས་རུ་ཏྲ་བསྒྲལ་བའི་ཚེ། འཛམ་བུའི་གླིང་གི་ཡུལ་ཉི་ཤུ་རྩ་བཞི་དང་། དུར་ཁྲོད་ཆེན་པོ་བརྒྱད་ཧེ་རུ་ཀའི་གནས་སུ་བྱིན་གྱིས་བརླབས་པ་དང་། ཁྱད་པར་དུ་དཔལ་ཧེ་རུ་ཀ་དང་གཉིས་སུ་མེད་པ་གྲུབ་པའི་རིག་འཛིན་ཆེན་པོ་རང་བྱུང་པདྨ་རྒྱལ་པོས་གངས་ཅན་བོད་ཀྱི་ས་གཞི་ཐམས་ཅད་སྒྲུབ་པའི་གནས་སུ་མཛད་ནས་བྱིན་གྱིས་བརླབས་པའི་ནང་ཚན་མདོ་ཁམས་སྨད་ཀྱི་གངས་རྭ་ཉི་ཤུ་རྩ་ལྔར་གྲགས་པའི་ཡ་གྱལ། ཡོན་ཏན་གནས་ཀྱི་གཙོ་བོ་རུ་དམ་གངས་ཀྱི་ར་བའི་གནས་ཀྱི་ལྟེ་བ། ཕུ་གངས་དཀར་རྡོ་རྗེ་སློབ་དཔོན་གདན་ལ་བཞུགས་པ་ལྟ་བུ། མདའ་རི་གཉིས་ཕན་ཚུན་བསྣོལ་བ་རྡོ་རྗེའི་དཀྱིལ་ཀྲུང་བཅས་པ་ལྟ་བུ། བར་ན་བྱིན་རླབས་དངོས་གྲུབ་ཀྱི་ཆུ་རྒྱུན་འོ་མའི་མཆོད་ཡོན་སྦྲེང་བ་ལྟ་བུ་སོགས་དགེ་ཞིང་ཤིས་པའི་རྟགས་མཚན་དུ་མས་བརྒྱན་པ། སྔོན་ཨོ་རྒྱན་ཆེན་པོ་དག་པའི་འཁོར་ལྔ་དང་བཅས་པས་ནེ་སེང་མེ་ཏོག་བཀྲ་བའི་དབུས་སུ་དར་དཀར་གྱི་གུར་ཕུབ་ནས་བདུད་རྩི་སྨན་གྱི་སྒྲུབ་པ་མཛད་དེ་ས་གཞི་བྱིན་གྱིས་བརླབས་པའི་ཕྱིར་དང་། བདུད་རྩི་ཆ་བརྒྱད་དུ་བསྒོས་ཏེ་ཕྱོགས་མཚམས་རྣམས་སུ་གཏེར་དུ་སྦས་པ་སོགས་ཆོས་དང་དམ་རྫས་ཀྱི་གཏེར་ཁ་དུ་མས་གཏམས་པའི་གནས། ཞིང་སྐྱོང་ལྷའི་དགེ་བསྙེན་ཆེན་པོ་རྡོ་རྗེ་གཡུང་དྲུང་རྩལ་ལ་གཉེར་དུ་གཏད་པའི་ས་ཕྱོགས་འདིར། དུས་ཕུན་སུམ་ཚོགས་པ་ནི། ཆུ་ཤེལ་དབང་པོའི་དཀྱིལ་འཁོར་རྒྱུ་སྐར་གྱི་ལྷ་མོ་ཆུ་སྟོད་ཀྱིས་ཉ་བའི་དུས་ཚེས་དགེ་བར། སྒྲུབ་པའི་ཡོ་བྱད་རྒྱན་དང་བགོ་བ། བཟའ་བ་དང་བཏུང་བ། སྔགས་དང་གླུ་ཚིག བྲོ་གར་འདུ་འཕྲོ། ཨ་ལི་ཀ་ལི་སྟེ་ལྔ་ཚང་བའི་སྒོ་ནས། སྒྲུབ་པའི་ཐབས་ཕུན་སུམ་ཚོགས་པ་ནི། མངའ་བདག་ཚངས་པ་ལྷའི་མེ་ཏོག་གི་ཡེ་ཤེས་སྒྱུ་མའི་ཟློས་གར་གྲུབ་པའི་རིག་འཛིན་ཆེན་པོ་ཀུན་མཁྱེན་འཇིགས་མེད་གླིང་པའམ་པདྨ་དབང་ཆེན་ཡེ་ཤེས་རོལ་པའི་རྡོ་རྗེའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བ་ཆེ་མཆོག་བདུད་རྩི་འཁྱིལ་པའི་དཀྱིལ་འཁོར་ལ་བརྟེན་ནས་བདུད་རྩི་སྨན་གྱི་སྒྲུབ་པ་སྟེ། རང་གཞུང་ལས། འཇམ་དཔལ་རྣོན་པོའི་ཐུགས་བསྐྱེད་དང་༔ བདག་ཉིད་ཆེན་པོ་པདྨ་ཡི༔ ཀློང་བྱང་ཌཱཀྐིའི་བརྡ་རིས་ཀྱིས༔ རྒྱུད་དོན་ཇི་བཞིན་གཏན་ལ་ཕབས༔ ཞེས་པ་ལྟར་ཕུན་སུམ་ཚོགས་པ་ལྔ་དང་ལྡན་པས། དངོས་གཞི་བསྙེན་སྒྲུབ་རྣམ་བཞིའི་གཞུང་བསྲང་བ་ལའང་ཉིན་དང་པོར་སའི་ཆོ་ག་དང་། ཕྱི་ནང་གསང་བའི་མཚམས་བཅད་པ། ལྷ་བུམ་སློབ་མ་སྟ་གོན་དང་། ཆུ་ཚོན་གྱིས་དཀྱིལ་འཁོར་བཀྲམ་ནས་དལ་གྱི་རྫས་འགོད་པ་སྔོན་དུ་བཏང་བ་བསྙེན་པ་དང་། སྒྲུབ་པ་ཆེན་པོའི་ཁོག་ནང་དབྱུང་༔ ཞེས་གསུངས་པ་བཞིན་དུ་བདག་མདུན་སྒྲུབ་པའི་རྫས་རྣམས་དབྱེར་མེད་དུ་བསྐྱེད་རིམ་གྱི་ལས་གཞུང་བསྲངས། འཛབ་ཁང་དབྱེ་ནས་བསྙེན་སྒྲུབ་ལས་སྦྱོར་གྱི་བཟླས་པ་མཐར་ཆགས་སུ་བཏང་སྟེ་རྩ་བའི་སྒྲུབ་པ་ཞག་གསུམ། དེ་ནས་གསང་ཆེན་རིགས་བསྡུས་བདུད་རྩི་འཁྱིལ་བའི་དཀྱིལ་འཁོར་ལ་བརྟེན་ནས་ཁྲོལ་བུའི་སྒྲུབ་པ་ཞག་གསུམ། སྨན་བཏག་བཙག་སྦོལ་གསུམ། བདུད་རྩི་དཀྱིལ་འཁོར་དུ་འགོད་པ་སྔོན་དུ་འགྲོ་བས། དཀྱིལ་འཁོར་དྲུག་དང་སྦྱོར་བ་བརྒྱད་ལྡན་དུ་ཞལ་བསྒྱུར་ཏེ་ཕྱེ་སྒྲུབ་ཀྱི་དབུ་འཛུག་པ་ཞག་གཅིག་སྔོན་དུ་བཏང་བས་ཞག་གསུམ་དུ་སྒྲུབ་པ། ཉིན་ཐ་མར་བདུད་རྩི་འབེབས་བསྐྱིལ་དངོས་གྲུབ་བླང་བ། ཁ་སྐོང་གི་སྦྱིན་སྲེག་དང་བཅས་པས་སྒྲུབ་ཆེན་མཐར་དབྱུང་བ་བཅས་སྤྱིར་སྒྲུབ་ཞག་བཅུ་གཅིག་གི་ཁོངས་སུ་བདུད་རྩི་སྨན་གྱི་སྒྲུབ་པ་ཕྱག་བཞེས་འབྲིང་པོ་ལྟར་ལ། དེ་ལྟར་བསྒྲུབས་པའི་འབྲས་བུ་ནི། རང་སྐལ་དང་འཚམས་པར་ཞི་སོགས་ལས་བཞི་དང་། འདོད་གཟུགས་ཀྱི་ལྷ་དང་སྐལ་བ་མཉམ། ཕྲ་ཡང་གི་ཡོན་ཏན་བརྒྱད་དེ་ཐུན་མོང་གི་གྲུབ་པ་བརྒྱད་དང་། མཆོག་གི་དངོས་གྲུབ་འཕགས་ལམ་གྱིས་བསྡུས་པའི་རིག་འཛིན་བཞི། མཐར་ཐུག་མཆོག་གི་བདུད་རྩི་བདེ་བ་ཆེན་པོའི་སྐུ་ཁ་སྦྱོར་ཡན་ལག་བདུན་གྱི་བདག་ཉིད་ཅན་དུ་འགྲུབ་ཅིང་། ཞར་བྱུང་དུ་ཐོབ་པའི་ཕན་ཡོན་ཡང་གཞུང་ལས། ཚེ་རིང་ནད་མེད་བདེ་བ་དང་༔ ལང་ཚོ་ཁ་དོག་སྟོབས་གཟི་བརྗིད༔ འཕེལ་ཞིང་དབང་པོ་རྣམ་རིག་གསལ༔ མཁའ་ལ་འགྲོ་ཞིང་སྦྱོར་ངན་གྱི༔ ནུས་པས་མི་ཚུགས་ཏིང་འཛིན་གསལ༔ ཁྱད་པར་ཡོན་ཏན་བསམ་མི་ཁྱབ༔ ལུས་ལ་གནས་པའི་བདུད་རྩི་ལྔ༔ དྭངས་མར་གྱུར་ནས་འཆི་མེད་འགྲུབ༔ འདུ་བའི་ནད་སེལ་བདུད་བཞི་འཇོམས༔ བཅུད་ལེན་ཀུན་གྱི་རྒྱལ་པོ་ཡིན༔ སྤངས་རྟོགས་ཡོན་ཏན་ངང་གིས་འཕེལ༔ འདི་སྒྲུབ་རྒྱལ་བས་སྲས་སུ་དགོངས༔ རྟོག་ལ་ཡེ་ཤེས་སྨན་སྦྱར་བས༔ དུག་ལྔ་ཡེ་ཤེས་ལྔ་རུ་རྫོགས༔ གང་དུ་སྒྲུབ་པའི་གནས་ཕྱོགས་དེ༔ ཉི་ཤུ་རྩ་བཞིའི་ཡུལ་དང་མཉམ༔ དཔའ་བོ་མཁའ་འགྲོ་ཤུགས་ལ་འདུ༔ བཀྲ་ཤིས་བྱིན་ཆགས་ཏིང་འཛིན་འཕེལ༔ ས་དགྲ་ཞི་ཞིང་ཆར་ཆུ་འབེབས༔ ལྷ་ཀླུ་དགའ་བས་སྣོད་བཅུད་རྒྱས༔ རྩི་ཤིང་ལོ་ཐོག་ཕུན་སུམ་ཚོགས༔ དེ་ཕྱིར་རྣལ་འབྱོར་ཆེ་རྣམས་ཀྱིས༔ སེམས་བསྐྱེད་ཏིང་འཛིན་དམ་རྫས་ཀྱི༔ ཆོ་གར་ལྡན་པས་འདི་སྒྲུབས་ཤིག༔ དེ་ཡིས་བསོད་ནམས་བརྗོད་མི་ལང༔ རྡོ་རྗེ་དམ་ཚིག་གནས་ལའང་༔ རང་བཞིན་སྤྱོད་པའི་ཡོན་ཏན་ལས༔ བསྒྲུབས་པའི་ཡོན་ཏན་དེ་ལྟའོ༔ ཞེས་གསུངས་པ་ལྟར་ཡོན་ཏན་བསམ་གྱིས་མི་ཁྱབ་པར་འགྲུབ་པར་འགྱུར་བ་ཡིན་ནོ། །དེ་ནས་སྒྲུབ་པའི་མཐའ་རྒྱས་སུ་མར་མེ་ལ་བརྟེན་པའི་སྨོན་ལམ་དང་བཀྲ་ཤིས་ཀྱི་མེ་ཏོག་ཆར་དུ་བསྙིལ་བ། འཁོར་གསུམ་ཡོངས་དག་གི་བསྔོ་བས་རྒྱས་གདབ་པ། ཐོ་འགྲོལ་དང་གནས་བསྲུང་བཅས་མཐར་ཆགས་སུ་བྱ་བ་ལས། འདིར་མར་མེ་ལ་བརྟེན་པའི་སྨོན་ལམ་གདབ་པའི་ཚུལ་ལའང་མཚོན་བྱ་དོན་གྱི་མར་མེ་ནི། སྣང་སྲིད་ཐམས་ཅད་བདེན་གཉིས་དབྱེར་མེད་བྱང་ཆུབ་སེམས་ཀྱི་དཀྱིལ་འཁོར་དུ་གནས་པ་གང་ཞིག །བསྒོམས་བྱུང་གཙོ་བོར་གྱུར་པའི་ཤེས་རབ་གསུམ་གྱིས་གཏན་ལ་ཕབ་པའི་ལྟ་བ་རྣམ་པར་དག་པ་དང་། དེ་དང་རྗེས་སུ་མཐུན་པའི་རྣལ་འབྱོར་ལྔའི་རིམ་གཉིས་ཀྱི་ཏིང་འཛིན་བྱིང་རྒོད་ཀྱིས་གཡོ་བ་དང་བྲལ་བའི་ཤེས་འཇུག་ཟུང་དུ་འཇུག་པའི་ཏིང་ངེ་འཛིན་ཡིན་ལ། དེ་མཚོན་བྱེད་དབྱིངས་སྤྲོས་བྲལ་གྱི་ཀོང་བུར་ལྷན་སྐྱེས་བདེ་བ་ཆེན་པོའི་མར་ཁུ་བསྐྱིལ་བ་ལ་རང་བྱུང་ཡེ་ཤེས་ཀྱི་སྒྲོན་མེ་སྦར་བས་འོད་གསལ་ཆེན་པོའི་སྣང་བ་མཐའ་དབུས་མེད་པར་བརྡལ་བས་སྒྲིབ་གཉིས་ཀྱི་མུན་ཁམས་མ་ལུས་ལྷག་མེད་དུ་བསལ་ཏེ་སྲིད་པ་དུག་གསུམ་གྱི་གཡང་སར་ཉམ་མི་ང་ཞིང་། རྒྱུ་འབྲས་ས་ལམ་གྱི་ཡོན་ཏན་ཐམས་ཅད་རྩོལ་མེད་དུ་རྫོགས་ནས། མཐར་ཐུག་གདོད་མའི་ནང་དབྱིངས་ཆེན་པོར་མངོན་པར་བྱང་ཆུབ་སྟེ་སྐུ་དང་ཡེ་ཤེས་འདུ་འབྲལ་མེད་པའི་ངང་ནས་ལྷུན་གྱིས་གྲུབ་པའི་ཕྲིན་ལས་རྒྱ་ཆེ་རྒྱུན་མི་ཆད་པས་ནམ་མཁའ་དང་མཉམ་པའི་ལུས་ཅན་མཐའ་དག་དཔལ་ཀུན་ཏུ་བཟང་པོའི་གོ་འཕང་ལ་འགོད་པའི་སྨོན་འདུན་རྩེ་གཅིག་པས་འདི་བཞིན་རྗེས་སུ་ཟློས་ཏེ་གསུང་བར་ཞུ། །རིག་པ་བྱང་ཆུབ་སེམས་སོགས་སོ། །ཞེས་པ་འདི་ནི་པདྨའི་ཐང་དུ་སྨན་སྒྲུབ་འཚོགས་དུས་མཁན་རིན་པོ་ཆེ་པདྨ་བཛྲ་གྱིས་གུང་སེང་ཐུན་མཚམས་ཞིག་ཏུ་ཤར་མར་སྤེལ་བ་བཞིན་བྲིས་པའོ།། །།