དཔལ་སེང་གེ་རིའི་ཐུབ་བསྟན་ཉིན་བྱེད་གླིང་གི་རྒྱུན་ཇའི་བཅའ་ཡིག
༄༅།།དཔལ་སེང་གེ་རིའི་ཐུབ་བསྟན་ཉིན་བྱེད་གླིང་གི་རྒྱུན་ཇའི་བཅའ་ཡིག་བཞུགས།། ཨོཾ་སྭ་སྟི། ལྷར་བཅས་འགྲོ་བའི་སྟོན་པ་མཆོག །ཤཱཀྱ་སེང་གེར་ཕྱག་འཚལ་ཏེ་། །རྣམ་དག་བསྟན་པའི་རིང་ལུགས་དང་། །མཐུན་པའི་གཏམ་གྱི་སྦྱོར་བ་གླེང་། །དེ་ལ་འདིར་སྔ་འགྱུར་རྡོ་རྗེ་ཐེག་པའི་རིང་ལུགས་དྲི་མ་མེད་པ་འཛིན་པའི་གདན་ས་ཆེན་པོ་ཨོ་རྒྱན་བསམ་གཏན་ཆོས་གླིང་གི་བཤད་གྲྭ་བ། དཔལ་སེང་གེ་རིའི་ཆོས་གྲྭ་ཆེན་པོ་ཐུབ་བསྟན་ཉིན་བྱེད་གླིང་འདིར་བཞུགས་པའི་གཞི་བྱེས་གྲྭ་ཚང་སྤྱི་ནས་ཐུགས་ངེས་གནང་རྒྱུར། སྤྱིར་གླིང་འདི་བཤད་སྒྲུབ་ཁོ་ནའི་ཆེད་དུ་བསྐྲུན་པ་ཡིན་པས། འདིར་བཞུགས་ཐམས་ཅད་ཡང་ན་ཀློག་པ་ཐོས་བསམ་དང་། ཡང་ན་སྤོང་བ་བསམ་གཏན་གྱི་བྱ་བ་ཁོ་ནས་དུས་འདའ་དགོས་པས། དེ་ལུགས་ཀྱིས་རྒྱུན་ཇར་མི་སྡོད་མཁན་དམིགས་བསལ་ཡོད་ཚེ། བླ་བྲང་དང་། འདི་གའི་མཁན་ཆོས་བཅས་ལ་དགོངས་བ་ཞུས་ནས། གནང་བ་ཡོད་ཐོག་ཐུན་བཞི་ཆག་མེད་ཀྱི་མཚམས་ཁོ་ནར་སྡོད་དགོས་རྒྱུ་དང་། དེ་མིན་ཐམས་ཅད་རྒྱུན་ཇ་ལ་ཞུགས་ནས་བསླབ་སྦྱོང་ཁོ་ན་འཛད་དགོས་པ་ལས། རང་བབ་གུ་ཡངས་བྱས་ནས་དྲག་ཞན་སུ་ཡང་སྡོད་མི་ཆོག་ཅིང་། གལ་སྲིད་དེ་འདྲ་བྱུང་ཚེ་ཡས་མས་ནས་ཞིབ་བརྟགས་ཀྱིས། དགོན་ཆེན་གྱིས་ལས་སྣེ་གང་འོས་སུ་འདེད་པ་ལས་བཞག་མི་འོས་པ་དང་། རྒྱུན་ཇ་ལ་གསར་དུ་ཞུགས་ཚེ། ཡས་མན་ལ་སྙན་སྒྲོན་ཞུས་ཐོག དགེ་འདུན་ལ་མང་ཇ་དང་། མཁན་ཆོས་ལ་མཇལ་དར་ཕུལ་ནས་ཞུགས་དགོས་ཤིང་། རྒྱུན་ཇ་ལ་བསྡད་ནས་ཐ་ན་ཡང་ལོ་གཅིག་མ་སོང་བར་དགོངས་ཞུས་བྱེད་མི་ཆོག་ཅིང་། སྡོད་པའི་རིང་ལ་ཡང་ཚོགས་ཀྱི་འདོན་ཆ་རྣམས་དང་། སུམ་རྟགས། མདོ་སྔགས་སྨོན་ལམ། སྡོམ་གསུམ། ཡིད་བཞིན་མཛོད་བཅས་འཛིན་གྲྭ་བཞིའི་རྩ་བ་བློ་ཐོག་ནས་ཚོགས་རྒྱུག་འབུལ་དགོས་རྒྱུ་དང་། དེ་ནས་འདུལ་མངོན་ཤེར་ཕྱིན་དབུ་མ་སོགས་དང་། གསང་སྙིང་གི་རྒྱུད་བཤད་ལ་འཇུག་པ་རྣམས་ནས་ཐོག་མར་རྩ་བ་བློ་ཐོག་ནས་རྒྱུགས་སྤྲོད་ནས་སློབ་དགོས། རྒྱུན་ཚོགས་ལ་ཡང་འདོན་པའི་དབུ་མ་ཚུག་གོང་ཚུན་དང་། མང་འཚོགས་ལ་དུང་གསུམ་པ་མ་རྫོགས་གོང་ཚུན་ལ་ཐམས་ཅད་འཚོགས་ཐུབ་པ་དགོས་ཤིང་། དེ་ལས་འཕྱི་བྱུང་ན་ཕྱག་བརྒྱ་སོགས་ཀྱི་ཆད་པ་སྐབས་དང་སྦྱོར། ཚོགས་ལ་ཡང་བསླབ་གྲལ་གྱི་གོ་རིམ་ལྟར་ལས་རང་དབང་གིས་སྡོད་མི་ཆོག ཚོགས་ལ་ངག་བཅད་མི་བྱེད་པ་བྱུང་ཚེ་ཕྱག་བརྒྱ་སོགས་ཀྱི་ཆད་པ་སྦྱོར། དུས་རྒྱུན་གླིང་ནང་དུ་གཟན་ཤམས་མི་བྱེད་པར་འགྲོ་བ་དང་། ཀུ་ཅོ་འུར་ཟིང་ཕན་ཚུན་འབོད་ཤར་བྱེད་པ་དང་ཕྱི་ནང་གི་འགྲུལ་འགྲིམས་སུ་ཡང་གླིང་ནས་རྟ་ཞོན་ནས་འགྲོ་བ་དང་། གླིང་ནང་དུ་རྟ་ཁལ་མང་པོ་ཞག་ཏུ་བཞག་པ་དང། མང་ཇ་གྲྭ་གཤག་ཏུ་ལེན་པ་དང་། ཚོགས་གྲལ་ནས་དགོངས་ཞུས་མི་བྱེད་པར་འགྲོ་བ་རྣམས་གཏན་ནས་བྱེད་མི་ཆོག དེ་འདྲ་བྱུང་ཚེ་ཕྱག་དང་མཆོད་མེ་སོགས་ཀྱི་ཆད་པ་སྦྱོར། ཁྱད་པར་མཁན་ཆོས་སོགས་ལ་བརྩི་མེད་ཀྱི་ཁ་ལན་ལག་ལན་བྱེད་པ་དང་། གླིང་ནང་ནས་འཛིང་རྩོད་རྒྱག་རེས་བྱེད་པ་བཅས་དྲག་ཞན་སུ་ཐད་ནས་བྱུང་ཡང་། མང་ཇ་དང་། བརྒྱ་མཆོད་མ་ཕུལ་གྱི་བར་དུ། དར་ཆེན་ལ་བཅིང་པའི་ཆད་པ་ལ་སྦྱོར། དགེ་བསྐོས་དཔོན་གཡོགས་ནས་གཟིགས་ཏེ་ནང་དུས་རྒྱལ་སྒོ་མ་ཕྱེས་གོང་དང་། ནུབ་དུས་རྒྱལ་སྒོ་རྒྱབ་ནས་གླིང་རྒྱབ་ཏུ་འགྲིམས་འགྲུལ་བྱེད་མི་ཆོག་པ་དང་། དགེ་བསྐོས་གཉེར་པ་བཅས་ནས་འགན་འཁུར་གྱིས་བླ་བྲང་། སྤར་ཁང་། གཙུག་ལག་ཁང་བཅས་ལ་ཝ་ཁ་ཐིག་ཚག་སློད་མེད་ཀྱི་ཞིག་འཐོར་མི་འགྲོ་ངེས་ཅན་དང་། གྲྭ་གཤག་རྣམས་ཀྱང་༧ཆོས་རྗེ་རིན་པོ་ཆེའི་ཞལ་བཀོད་ལྟར། རང་རང་འདུག་རིང་ལ་སྡོད་ཅིང་འགྲོ་དུས། མཁན་ཆོས་ལ་རྩིས་སྤྲོད་པ་ལས་ཕན་ཚུན་ཉོ་བཙོང་བྱེད་མི་ཆོག་པ་དང་། གྲྭ་གཤག་ཡན་པ་བྱུང་ཚེ་མཁན་ཆོས་ནས་བརྟགས་ཏེ་ཐོབ་རིམས་སུ་བཞག་པ་ལས། དབང་ཆེ་ངན་བཙན་གྱིས་འཐེན་འཁྱེར་བྱེད་མི་ཆོག་པ་དང་། གྲྭ་གཤག་སོ་སོར་སྡོད་མི་གཞི་བྱེས་ཀྱི་གྲྭ་བ་སུ་ཡིན་ཀྱང་། ཉར་ཚག་ཚུལ་བཞིན་བྱེད་པ་མ་གཏོགས་ཞེ་མེད་ཆོག་བསམ་གྱིས་འཐོར་ཞིག་ཏུ་གཏོང་མི་ཆོག་ཅིང་། ཞིག་རལ་བྱུང་ན་དེ་ཉིད་ནས་གསོ་དགོས་པ་དང་། གཞན་ཡང་རྒྱུན་དུ་གླིང་ནང་གི་བཅའ་བཀོད་རྣམས་ཚུལ་བཞིན་བྱེད་མིན། །དགེ་བསྐོས་ཀྱི་ཞབས་ཕྱི་དགེ་ཚུལ་དང་ཆབ་རིལ་པ་སོགས་གྱིས་བྱས་ཏེ་གླིང་ཉིན་རེ་བཞིན་ཉུལ་དགོས་ཤིང་། དེ་ཡང་གོང་བཞུགས་མཁན་ཆོས་དང་བསླབ་པ་རྒན་གྲས་རྣམས་ནས་ཀྱང་བསྟན་པའི་སྤྱི་ཆོས་སུ་དགོངས་ནས་བཅའ་བཀོད་ཚུལ་བཞིན་བྱེད་པ་མ་གཏོགས། ཁོག་ཡངས་བཟང་བརྫུས། མི་ངོ་འཚོ་ཐབས་ཀྱིས་བསྟན་ཆུས་མ་ཤོར་བ་མཛད་དགོས། གླིང་འདིར་གཏོགས་པའི་བླ་སྒྲུབ་གྲྭ་ཚང་མཆོག་དམན་ཐམས་ཅད་ནས་ཀྱང་། མཁན་ཆོས་དང་བསླབ་པ་རྒན་རིམ་རྣམས་ཀྱི་ཞལ་བཀོད་ཇི་ལྟར་གནང་བ་ལྟར། མགོ་འོག་ལུས་ཆུད། དཔོན་ཞབས་གཡོགས་འདུས་ཀྱང་ལུགས་ཀའི། །ཞེ་སེམས་བསམ་པ་གཅིག་བསྒྲིལ་གྱིས་ཚུལ་བཞིན་སྒྲུབ་དགོས་པ་མ་གཏོགས། མི་མཐུན་པའི་ལོག་སྦྱོར་བསྟན་པའི་ཞབས་འདྲེན་དུ་འགྲོ་བ་སུ་ཐད་ནས་ཤོར་ཚེ་༧སྐྱབས་རྗེ་ཞི་བར་གཤེགས་པོ་དེ་ཉིད་དང་། ངེད་སྤྲུལ་སྐུ་གཉིས་བཅས་གཞན་ཕན་མཐའ་ཡས། རྫོགས་ཆེན་བཞི་བ་དང་དཔོན་སློབ་བཞི་བ་ཀྱི་ཆོས་དང་དམ་ཚིག་ལ་འགལ་བ་འགྲོ་ངེས་ཡིན་པར་མ་ཟད། །བསྟན་སྐྱོངས་སྲུང་མའི་ཚོགས་ལ་ཡང་། དམ་ཚིག་ཅན་ལ་སྡོང་གྲོགས་བྱེད་ཅིང་ཕྲིན་ལས་བསྒྲུབ་པ་དང་། དམ་ཉམས་རྣམས་ལ་བཀའ་ཆད་འབེབས་པའི་ཕྲིན་བཅོལ་སྔར་ནས་བྱས་ཤིང་ད་ལྟ་ཡང་བྱེད་བཞིན་པས། དེ་ལུགས་ཀྱིས་བླང་དོར་ཚུལ་བཞིན་བྱེད་པ་གལ་ཆེ། བསླབ་གྲྭ་པ་རྣམས་ནས་ཀྱང་། ཐོག་མར་སུམ་རྟགས། དེ་ནས་སྡོམ་གསུམ། མདོ་སྔགས་སྨོན་ལམ། ཡིད་བཞིན་མཛོད། མངོན་པ་། འདུལ་བ་མདོ་རྩ་བ་། དབུ་མ་ཤེར་ཕྱིན། བྱམས་ཆོས། རྒྱུད་ཀྱི་རྒྱལ་པོ་དཔལ་ལྡན་གསང་བའི་སྙིང་པོ་སོགས་ཀྱི་བར་སྔ་མ་སྔ་མ་སྔོན་དུ་མ་སོང་བར་ཕྱི་མ་ཕྱི་མ་ལ་མཐོ་སྙེགས་ཀྱིས་མི་སློབ་པར་གོ་རིམ་བཞིན་འཇུག་དགོས་པ་དང་། ནམ་གྱི་ཆ་སྟོད་དང་ཆ་སྨད་སོགས་ལ་བརྩོན་འགྲུས་ཀྱིས་བསླབ་སྦྱོང་དང་། དགོངས་ཚོགས་གྲོལ་བ་དང་རང་བཤག་སྟེང་ནས་འཛིན་གྲྭ་སོ་སོའི་དཔེ་ཆ་སྐྱོར་བ་སོགས་བསླབ་དོན་ལྟར་བྱ། འདི་ནས་་གཞུང་ཚན་རྫོགས་པ་རྣམས་ཀྱིས་གཞུང་དེ་དང་དེའི་བཤད་པ། དགོན་ཆེན་གྱི་མདོ་སྔགས་སྨོན་ལམ་དང་། དབྱར་གནས་སྒྲུབ་མཆོད་སོགས་ཀྱི་སྐབས་ཚོགས་བཤད་ཀྱི་རྒྱུགས་འབུལ་བྱེད་དགོས་ཤིང་། དེ་ལྟར་སློབ་གཉེར་རྫོགས་པ་དང་། གསང་བ་བླ་ན་མེད་པ་སེམས་ཀློང་མན་ངག་སྡེ་སོ་སོ་དང་། ཆོས་དབྱིངས་རིན་པོ་ཆེའི་མཛོད་དང་། ཐེག་མཆོག་རིན་པོ་ཆེའི་མཛོད་སོགས་ཀྱི་ཉམས་ཁྲིད་ལེགས་པར་ནོས་ཏེ། དབེན་པའི་རི་ཁྲོད་རྣམས་སུ་སོང་ནས་ཟབ་དོན་སྙིང་པོའི་སྒྲུབ་པ་ལ་རྩེ་གཅིག་ཏུ་གཞོལ་བའི་སྒོ་ནས་གྲུབ་འབྲས་མངོན་སུམ་དུ་མཛད་དེ། རྒྱལ་དབང་པདྨ་སམ་བྷ་ཝ་དང་། མཁན་ཆེན་ཞི་བ་འཚོ། ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གསུམ་ཀྱི་རྗེས་སུ་འབྲངས་པའི་སྔ་འགྱུར་རྡོ་རྗེ་ཐེག་པའི་རིང་ལུགགས་དྲི་མ་མེད་པའི་གྲུབ་མཐའ་སློང་ནུས་པ་ཞིག་དགོས་པ་ལགས་སོ། །དགེ་ལེགས་ངོ་མཚར་བྱེ་བ་འབྱུང་བའི་གཞི། །ཐུབ་བསྟན་ཡོངས་རྫོགས་པདྨོ་དགྱེས་པའི་གཉེན། །སྨྲ་བའི་ཉིན་བྱེད་གྲུབ་དབང་རྫོགས་ཆེན་པའི། ཐུགས་བསྐྱེད་བསྟན་པ་མཐའ་རྒྱས་བཀྲ་ཤིས་ཤོག །ཅེས་པ་འདིའང་༧རྒྱལ་སྲས་གཞན་ཕན་མཐའ་ཡས་ཀྱིས་བཀའ་བཀོད་ལྟར་མཁན་པདྨ་བཛྲ་ནས་བྲི་གནང་མཛད་པའོ།། །།