སེམས་བསྐྱེད་ཀྱི་ཟིན་བྲིས་རྒྱལ་སྲས་ལམ་གྱི་གསལ་བྱེད།

༄༅།།སེམས་བསྐྱེད་ཀྱི་ཟིན་བྲིས་རྒྱལ་སྲས་ལམ་གྱི་གསལ་བྱེད་ཅེས་བྱ་བ་བཞུགས་སོ།། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སྲིད་ཞིའི་ཕན་བདེ་མཐའ་དག་བསྐྱེད་པའི་གཞི། །རྒྱལ་སྲས་རྣམས་ཀྱི་བགྲོད་པ་གཅིག་པུའི་ལམ། །ཐེག་པ་ཀུན་གྱི་མཐར་ཐུག་འབྲས་བུའི་མཆོག །བྱང་ཆུབ་མཆོག་གི་སེམས་དེར་ཕྱག་འཚལ་ལོ། །མཚོ་ལྟར་གཏིང་ཟབ་སྤྲོས་བྲལ་ལྟ་བུའི་ཀློང་། །མཁའ་ལྟར་རྒྱ་ཆེ་ཀུན་བཟང་སྤྱོད་པའི་སྒོ། །ས་བཅུའི་དབང་ཕྱུག་རྣམས་ཀྱི་སྤྱོད་ཡུལ་ལ། །ཉམ་ཆུང་བྱིས་པའི་བློ་ཡིས་ཇི་ལྟར་གཞལ། །དེ་ལྟ་ནའང་བྱང་ཆུབ་སེམས་ཀྱི་ཆུས། །ཐུགས་རྒྱུད་ཡོངས་སུ་གང་བའི་བཤེས་གཉེན་གྱིས། །བརྩེ་བའི་གསུང་གིས་བསྐུལ་བའང་ལྡོག་དཀའ་བས། །དང་པོའི་ལས་ཅན་བདག་གིས་འདི་སྐད་དོ། །དེ་ལ་འདིར་རྒྱལ་བའི་སྲས་པོ་བྱང་ཆུབ་སེམས་དཔའ་རྣམས་ཀྱི་སྤྱོད་པ་རྒྱ་མཚོ་ལྟ་བུ་ལ་འཇུག་པའི་སྒོ་དང་པོ། ཐམས་ཅད་མཁྱེན་པའི་ལམ་གྱི་རྩ་བ་ཐེག་པ་ཆེན་པོའི་བྱང་ཆུབ་མཆོག་ཏུ་སེམས་བསྐྱེད་པའི་ཆོ་ག་ལ་སྔོན་འགྲོ་དངོས་གཞི་རྗེས་ཀྱི་རིམ་པ་གསུམ་ལས། སྔོན་འགྲོ་གདམས་ངག་ཁྱད་པར་ཅན་གྱིས་བློ་བཅོས་པའི་སྐབས་སུ་སྲིད་དང་ཞི་བའི་མཐའ་གཉིས་དང་བྲལ་བའི་བྱང་ཆུབ་ཀྱི་སེམས་རིན་པོ་ཆེ་ལ་སྤྲོ་བ་བསྐྱེད་པ་ནི། ཆོ་ག་རྒྱས་པའི་ཚེ་བྱང་ཆུབ་སེམས་ཀྱི་རང་བཞིན་གཏན་ལ་དབབ་པའི་ཚུལ་རྒྱས་བསྡུས་ཇི་ལྟར་རིགས་པར་སློབ་དཔོན་གྱི་ངག་གིས་བརྡ་བཀྲོལ་ནས་སློབ་མའི་རྒྱུད་ལ་གོ་བརྡ་འཕྲོད་ངེས་སུ་བྱེད་པར་གསུངས་པ་ལས། སྐལ་བ་དང་ལྡན་པའི་གཞི་རིགས་ཀྱི་རང་བཞིན། བསླབ་པ་ལ་སྦྱོར་བའི་གཞི་སེམས་བསྐྱེད་ཀྱི་རྣམ་བཞག མྱུར་དུ་སངས་རྒྱས་ཀྱི་གོ་འཕང་ཐོབ་པའི་གཞི་བྱང་ཆུབ་སེམས་དཔའི་བསླབ་པ་དང་གསུམ་གྱི་སྒོ་ནས་ངེས་པར་བྱའོ། །དེ་ལ་དང་པོ་རིགས་ཞེས་བྱ་བ་ནི་སྤྱིར་ཁམས་དང་ས་བོན་དང་རྒྱུ་རྣམས་ལ་འཇུག་པ་ལས། འདིར་ཐར་པ་དང་ཐམས་ཅད་མཁྱེན་པའི་རྒྱུའམ་ས་བོན་ཏེ། དེ་ལ་གྲུབ་མཐའི་དབང་གིས་ཉན་ཐོས་རྣམས་ཀྱིས་ནི་བསོད་སྙོམས་དང་། ཆོས་གོས་དང་། གནས་མལ་ངན་ངོན་ཙམ་གྱིས་ཆོག་ཤེས་ཤིང་སྤོང་བ་ལ་མངོན་པར་དགའ་བའི་གང་ཟག་རྣམས་ལ་འཕགས་པའི་རིགས་ཅན་ཟེར་ཏེ། དེའི་རྒྱུད་ཀྱི་སེམས་བྱུང་ཆོག་ཤེས་པ་སྟེ་འདོད་ཆགས་མེད་པའི་དགེ་བའི་རྩ་བ་ལ་འཕགས་པའི་རིགས་སུ་འདོད། སེམས་ཙམ་པ་ལའང་ཆོས་ཅན་འདུས་བྱས་ལ་རིགས་སུ་འདོད་པ་དང་། ཆོས་ཉིད་འདུས་མ་བྱས་པའི་རིགས་སུ་འདོད་པ་གཉིས་ཡོད་དེ། དང་པོ་ནི་བྱང་ཆུབ་སེམས་དཔའི་ས་ལས། དེ་ལ་རིགས་གང་ཞེ་ན། མདོར་བསྡུ་ན་རྣམ་པ་གཉིས་ཏེ། རང་བཞིན་དུ་གནས་པ་དང་། ཡང་དག་པར་བསྒྲུབ་པའོ། །དེ་ལ་རང་བཞིན་གྱིས་གནས་པའི་རིགས་ནི། བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། དེ་ནི་གཅིག་ནས་གཅིག་ཏུ་བརྒྱུད་དེ་འཁོར་བ་ཐོག་མ་མེད་པའི་དུས་ཅན་ཆོས་ཉིད་ཀྱིས་ཐོབ་པ་དེ་ལྟ་བུ་ཡིན་ནོ། །དེ་ལ་ཡང་དག་པར་བསྒྲུབ་པའི་རིགས་ནི་སྔོན་དགེ་བའི་རྩ་བ་གོམས་པར་བྱས་པ་ལས་ཐོབ་པ་གང་ཡིན་པ་སྟེ་ཞེས་པ་ལྟར། ཐོག་མ་མེད་པའི་དུས་ནས་གཅིག་ནས་གཅིག་ཏུ་ཟབ་པའི་སེམས་ཅན་གྱི་ཤེས་པའི་རྒྱུད་ཀྱི་སྟེང་ན་ཡོད་པའི་ཟག་མེད་ཀྱི་ཡེ་ཤེས་བསྐྱེད་པའི་ནུས་པ་སྐྱེ་མཆེད་དྲུག་པོ་དང་གཅིག་དང་ཐ་དད་པ་གང་དུ་བརྗོད་དུ་མེད་པ་ཆོས་ཉིད་ཀྱིས་ཐོབ་པ་ཞེས་བྱ་བ་ཐོས་བསམ་སོགས་ཀྱིས་གསར་དུ་བསྐྱེད་པ་མ་ཡིན་པ་དེ་ལྟ་བུ་ཞིག་ལ་རང་བཞིན་གནས་རིགས་སུ་འདོད། གཉིས་པ་ནི། རྒྱུད་བླ་མ་ལས། གཏེར་དང་འབྲས་བུ་ཤིང་བཞིན་ཏུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླང་བ་མཆོག་ཉིད་དོ། །ཞེས་གསུངས་པའི་རང་བཞིན་གནས་རིགས་དེ་ཉིད་ལས། དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བཞག་དང་བསལ་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ངོ་། །ཞེས་བསལ་བཞག་དང་བྲལ་བའི་ཆོས་ཉིད་འདུས་མ་བྱས་ལ་གསལ་བར་བཤད་པ་གང་ཡིན་པའོ། །དབུ་མ་པ་སྤྱིའི་ལུགས་ལ། སེམས་ཅན་ཐམས་ཅད་ཀྱི་ཆོས་ཉིད་ཆོས་ཀྱི་དབྱིངས་རང་བཞིན་གྱིས་འོད་གསལ་བ་སྟེ། ཉོན་མོངས་པའི་སྦུབས་ན་གནས་པ་ཉིད་ལ་བདེ་གཤེགས་སྙིང་པོ་ཞེས་གྲགས་པ་ལ་དེ་ཉིད་རང་བཞིན་གནས་རིགས་སུ་འདོད་པ་ཡིན་ཏེ། ཆོས་དབྱིངས་བསྟོད་པ་ལས། ཇི་ལྟར་བུམ་ནང་མར་མེ་ནི། །ཕྱི་རོལ་ཀུན་ཏུ་མི་སྣང་ལྟར། །དེ་བཞིན་ཆོས་ཀྱི་དབྱིངས་འདི་ཡང་། །འཁོར་བར་འོད་ནི་གསལ་མ་ཡིན། །ཞེས་དང་། ཕལ་པོ་ཆེ་ལས། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་རིགས་ཞེས་བྱ་བ་ནི་ཆོས་ཀྱི་དབྱིངས་ལྷུར་ལེན་པ་ནམ་མཁའ་ལྟར་ཡངས་པ་རང་བཞིན་གྱིས་འོད་གསལ་བ་སྟེ། ཞེས་གསུངས་པ་ལྟར་རོ། །རྒྱས་འགྱུར་གྱི་རིགས་ནི་ཐེག་པ་ཆེན་པོའི་ཆོས་ལ་ཐོས་བསམ་དང་བྱང་ཆུབ་ཏུ་སེམས་བསྐྱེད་པ་སོགས་ཀྱི་རྣམ་པར་དཀར་བའི་རྐྱེན་གང་ཡང་རུང་བས་རང་བཞིན་གནས་པའི་རིགས་ལ་གསོས་དང་པོར་བཏབ་པ་ཉིད་ཡིན་ཏེ། རྒྱ་མཚོའི་སྤྲིན་ལས། སེམས་བསྐྱེད་པ་ནི་གཞན་ཡིན་པར་རིག་པར་བྱ་སྟེ། རིགས་དེ་ཉིད་གནས་སྐབས་ཀྱི་ཁྱད་པར་གཞན་དུ་གྱུར་པ་ལ་མིང་གཞན་གྱིས་བསྟན་པ་ནི་ཡང་དག་པར་བསྒྲུབས་པ་ཞེས་བྱ་བས་སོ། །ཞེས་དང་། སེམས་བསྐྱེད་ཀྱི་སྐབས་སུ་ཡང་། དེ་རིང་སངས་རྒྱས་རིགས་སུ་སྐྱེས། །ཞེས་པའི་དོན་ཡིན་ནོ། །དེས་ན་འདིར་ནི་ཀུན་མཁྱེན་ཆོས་ཀྱི་རྒྱལ་པོས། ཕར་པ་དགེ་བའི་རྟེན་ནི་རིགས་ཡིན་ལ། །དེ་ཡང་སེམས་ཀྱི་རང་བཞིན་འོད་གསལ་བ། །དྲི་མེད་ཁམས་ཏེ་རང་བཞིན་གནས་པའི་རིགས། །དེ་ཡི་སྣང་ཆ་སྐུ་གཉིས་དཔེ་རྣམས་དགུ། །སྙིང་རྗེའི་རང་བཞིན་ཡེ་ནས་གནས་པ་ནི། །རྒྱས་འགྱུར་རིགས་ཞེས་བདེ་བར་གཤེགས་པས་གསུངས། །རྩ་བ་རིག་པའི་ཡེ་ཤེས་འོད་གསལ་ལ། །ངོ་བོ་དུག་གསུམ་མེད་པའི་དགེ་བ་ཡིན། །ཞེས་པའི་འགྲེལ་པར། དེའང་རང་བཞིན་གྱིས་དག་ཅིང་ངོ་བོ་ཉིད་དྲི་མ་མེད་པའི་སེམས་ཉིད་སངས་རྒྱས་ཀྱི་ཡེ་ཤེས་དམ་པ་ཡེ་ནས་གནས་པའི་སེམས་ཀྱི་རང་བཞིན་འོད་གསལ་བའི་སྣང་ཆ་ལས་སངས་རྒྱས་ཀྱི་གཟུགས་སྐུའི་ཡོན་ཏན་ལྷུན་གྲུབ་ཏུ་ཡོད་པ་དཔེ་དགུས་བསྟན་ཅིང་སྟོང་ཆ་ལ་ཆོས་སྐུའི་ཡོན་ཏན་ནམ་མཁའ་ལྟ་བུའི་དཔེ་མདོ་དང་རྒྱུད་ཐམས་ཅད་ནས་བཤད་ལ་དེ་གཉིས་དབྱེར་མི་ཕྱེད་པ་ནི་ཐོག་མ་མེད་པའི་ཆོས་ཁམས་དགེ་བ་སྟེ། འགྱུར་བ་མེད་པའི་གནས་པའི་རིགས་དང་། དྲི་མ་སྦྱངས་ནས་ཡོན་ཏན་རྒྱས་པར་མངོན་པས་རྒྱས་འགྱུར་གྱི་རིགས་ཞེས་བཏགས་ཀྱང་། རྩ་བ་རིག་པའི་འོད་གསལ་བ་ཉིད་དོ། །ཞེས་གསུངས་པ་ལྟར། སྒྲ་ཇི་བཞིན་དུ་འདོད་དེ། རིགས་གཉིས་སུ་བཤད་པའང་ངོ་བོ་གཅིག་ལ་ལྡོག་པས་ཕྱེ་བ་ཙམ་ལས་དོན་ལ་ནི་རང་གི་སེམས་ཉིད་སྤྲོས་བྲལ་རང་བྱུང་གི་ཡེ་ཤེས་གཤིས་ཅིར་ཡང་མ་གྲུབ་པ་ལ་གདངས་འགག་མེད་དུ་འཆར་བའི་གཉུག་མའི་ཤེས་པ་དྭངས་གསལ་རྗེན་པ་འདི་ཉིད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ས་བོན་ནམ་བདེ་བར་གཤེགས་པའི་སྙིང་པོ་ཡིན་ཏེ། སེམས་ཀྱི་རྡོ་རྗེ་ལ་བསྟོད་པ་ལས། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ནས་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་། གསང་བའི་སྙིང་པོ་ལས། ཕྱོགས་བཅུ་དུས་བཞི་ཀུན་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་འཚོལ་ཞིག །ཞེས་དང་། རྡོ་རྗེ་གུར་ལས། ཆོས་ཀྱི་དབྱིངས་ནི་མཆོག་ཏུ་ཞི། །འདི་ནི་རིན་ཆེན་སེམས་སུ་བརྗོད། །འདོད་དོན་འབྲས་བུ་རབ་སྟེར་བ། །སེམས་ཀྱི་དེ་ཉིད་རང་བཞིན་དག །ཅེས་དང་། དོ་ཧ་ལས་ཀྱང་། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །དེ་ལྟ་བུའི་བདེ་གཤེགས་སྙིང་པོ་དེ་ནི་འགྲོ་བ་ཐམས་ཅད་ལ་ཁྱབ་གདལ་དུ་ཡོད་དེ། ཟླ་བ་སྒྲོན་མེའི་མདོ་ལས། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །ཅེས་གསུངས་པ་ལྟ་བུའོ། །དེ་ལྟར་བྱང་ཆུབ་ཆེན་པོའི་རིགས་སམ་ཁམས་བདེ་བར་གཤེགས་པའི་སྙིང་པོ་དེ་ཉིད་རང་ལ་ཡོད་པའི་ཚུལ་འདི་དག་ཐོག་མར་ངེས་དགོས། དེ་མ་ངེས་ན་སངས་རྒྱས་སྒྲུབ་པར་འདོད་པའི་བློ་མི་སྐྱེ་སྟེ། དཔེར་ན་ས་འོག་ན་གསེར་ཡོད་པར་མ་ངེས་ན་གསེར་རྐོ་འདོད་ཀྱི་བསམ་པ་མི་སྐྱེ་བ་ལྟ་བུའོ། །དེས་ན་རིགས་དེ་དག་ཡོད་པར་རྟགས་ཀྱི་སྒོ་ནས་ཀྱང་ཤེས་པར་བྱ་སྟེ། རྒྱུད་བླ་མ་ལས། གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང་། །མྱ་ངན་འདས་ལ་འདོད་པ་དང་། །དོན་གཉེར་སྨོན་པའང་མེད་པར་འགྱུར། །སྲིད་དང་མྱ་ངན་འདས་ལ་དེའི། །སྡུག་བདེའི་སྐྱོན་ཡོན་མཐོང་བ་འདི། །རིགས་ཡོད་ལས་ཡིན་གང་ཕྱིར་དེ། །རིགས་མེད་དག་ལ་མེད་ཕྱིར་རོ། །ཞེས་གསུངས་པ་ལྟར། སྲིད་པའི་སྡུག་བསྔལ་ལ་སྐྱོ་བའི་སེམས་ཅན་དེས། ཐར་བའི་བདེ་བ་ལ་སྨོན་པའི་སེམས་སྐྱེ་བ་དེ་ཡང་ཡེ་ནས་རང་གི་རྒྱུད་སྡུག་བསྔལ་དང་འབྲལ་རུང་དང་མྱང་འདས་འཐོབ་རུང་དུ་ཡོད་པའི་རྟགས་ཡང་དག་པ་ཡིན་པར་བཤད་དོ། །དེ་ལྟར་བདེ་གཤེགས་སྙིང་པོ་དེ་ཉིད་རང་ལ་ཡོད་ཀྱང་མི་མངོན་པ་ཅི་ཞེ་ན་ཐོག་མ་མེད་པའི་དུས་ནས་གོམས་པའི་ལས་ཉོན་བག་ཆགས་ཀྱིས་སྒྲིབ་པའི་ཕྱིར་ཡིན་ཏེ། རྒྱུད་བླ་མ་ལས། ཐོག་མེད་གྱུར་ཀྱང་ཐ་མ་དང་ལྡན་པ། །རང་བཞིན་གྱིས་དག་རྟག་པའི་ཆོས་ཅན་ནི། །ཐོག་མེད་སྦུབས་ཀྱིས་བསྒྲིབ་ཕྱིར་མི་མཐོང་སྟེ། །ཇི་ལྟར་གསེར་གྱི་གཟུགས་ནི་བསྒྲིབས་པ་བཞིན། །ཞེས་པ་ལྟར་དང་། བརྟགས་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་ཉིད། །ཅེས་སོ། །དེ་ལྟར་གཤིས་ཀྱི་གནས་ལུགས་ཤེས་པ་ཙམ་གྱིས་མི་ཕན་པས་སྒྲིབ་པ་སྤོང་བའི་ཚུལ་ལ་འབད་དགོས་ཤིང་། དེའི་ཐབས་ཀྱི་མཆོག་ནི་བྱང་ཆུབ་ཏུ་སེམས་བསྐྱེད་པ་ཁོ་ན་ཡིན་ཏེ། སེམས་མ་བསྐྱེད་པར་སངས་རྒྱས་པའི་ཐབས་གཞན་མེད་པ་ཡང་། དཔལ་མགོན་འཕགས་པ་ཀླུ་སྒྲུབ་ཞབས་ཀྱིས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ཡང་ནི་མི་འཐོབ་ཅིང་། །འཁོར་བར་བདག་གཞན་དོན་བསྒྲུབ་པའི། །ཐབས་གཞན་ཡོད་པ་མ་ཡིན་ནོ། །ཞེས་དང་། སྤྱོད་འཇུག་ལས། འདི་ཉིད་དེ་བཞིན་གཤེགས་པ་མཉེས་བྱེད་ཡིན། །རང་དོན་ཡང་དག་འགྲུབ་པའང་འདི་ཉིད་དོ། །འཇིག་རྟེན་སྡུག་བསྔལ་སེལ་བའང་འདི་ཉིད་དེ། །དེ་བས་བདག་གིས་རྟག་ཏུ་འདི་ཉིད་བྱ། །ཞེས་གསུངས་པ་ལྟར་རོ། །བྱང་ཆུབ་མཆོག་ཏུ་སེམས་བསྐྱེད་པ་དེ་ཡང་དགེ་རྩ་གོམས་པ་ལས་སམ། ཐེག་ཆེན་གྱི་སྡེ་སྣོད་ཐོས་པ་ལས་སམ། དགེ་བའི་བཤེས་གཉེན་གྱིས་རྗེས་སུ་བསྟན་པ་ལས་ཀྱང་རུང་སྟེ་རིགས་སད་པའི་རྟགས་དང་ལྡན་པའི་གང་ཟག་ཞིག་ལ་སྐྱེ་བས། དེ་ལ་རྒྱས་འགྱུར་གྱི་རིགས་སད་པའི་རྟགས་ནི། མདོ་སྡེའི་རྒྱན་ལས། །སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་དང་། རང་བཞིན་གནས་རིགས་སད་པའི་རྟགས་ནི། དབུ་མ་འཇུག་པ་ལས། སོ་སོའི་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ནས། །ལུས་ཀྱི་བ་སྤུ་ལྡང་བར་འགྱུར་བ་གང་ཡིན་པ། །དེ་ལ་རྫོགས་སངས་རྒྱས་པའི་བློ་ཡི་ས་བོན་ཡོད། །ཅེས་པ་ལྟར་རོ། །དེ་ལྟ་བུའི་རིགས་སད་པའི་རྟགས་དང་ལྡན་པ་དག་གིས། གཞུང་ནས་བཤད་པ་ལྟར་གྱི་ཆོ་ག་ཡན་ལག་ཚང་བ་ཞིག་གི་སྒོ་ནས་བྱང་ཆུབ་མཆོག་གི་སེམས་རིན་པོ་ཆེ་ཇི་ལྟ་བ་བཞིན་དུ་བསྐྱེད་ནས་བསླབ་པ་ལ་ཚུལ་བཞིན་དུ་སློབ་པར་བྱས་ན་རིང་པོར་མི་ཐོགས་པར་ཆོས་ཀྱི་རྒྱལ་པོ་ཐམས་ཅད་མཁྱེན་པའི་གོ་འཕང་འཐོབ་ནས་མཐའ་ཡས་པའི་ལུས་ཅན་ཐམས་ཅད་ཀྱི་སྐྱབས་དང་མགོན་དང་དཔུང་གཉེན་བྱེད་པར་འགྱུར་ཏེ། ཀུན་མཁྱེན་ཆོས་རྗེས། མ་ལུས་འགྲོ་ཀུན་བདེ་གཤེགས་སྙིང་པོ་ཅན། །གློ་བུར་དྲི་མས་གཡོགས་པའི་སྦུབ་ནང་ན། །འོད་གསལ་ཆོས་ཁམས་མར་མེ་ཡེ་ནས་གནས། །སྐུ་དང་ཡེ་ཤེས་ལྷུན་གྱིས་གྲུབ་པའི་ཆོས། །རང་ལ་ཡོད་དེ་དེ་ཉིད་ལྷུན་གྱིས་གྲུབ། །སྟོང་དང་སྙིང་རྗེའི་སྙིང་པོ་ལྷུར་ལེན་པས། །ཁམས་དེ་བྱང་ཆུབ་ཞེས་བྱའི་མིང་ཐོབ་ནས། །མ་ལུས་སྐྱེ་དགུའི་ཚོགས་ལ་ཕན་བདེ་བྱེད། །ཅེས་སོ། །དོན་གཉིས་པ་བསླབ་པ་ལ་སྦྱོར་བའི་གཞི་སེམས་བསྐྱེད་དངོས་ཀྱི་རྣམ་པར་བཞག་པ་ལ། སེམས་བསྐྱེད་སྐྱེ་བའི་རྟེན། བརྟེན་པ་བྱང་ཆུབ་སེམས་ཀྱི་རང་བཞིན། བྱང་ཆུབ་སེམས་ཀྱི་ཕན་ཡོན་བསྟན་པ་དང་གསུམ་ལས། དང་པོ་རྟེན་ལ་ལུས་ཀྱི་རྟེན་ནི་སེམས་ཙམ་གྱི་ལུགས་ལྟར་ན་སོ་ཐར་རིགས་བདུན་གང་རུང་གི་རྟེན་ལ་སྐྱེ་བས་གླིང་གསུམ་གྱི་སྐྱེས་པ་དང་བུད་མེད་ཡིན་པ་དགོས་ཀྱང་དབུ་མའི་ལུགས་འདི་ལ་དེ་ལྟར་དགོས་པའི་ངེས་པ་མེད་དེ། མདོ་སྡེ་རྣམས་ལས་ལྷ་དང་ཀླུ་དང་ལྷ་མ་ཡིན་དང་དྲི་ཟ་དང་། ནམ་མཁའ་ལྡིང་ལ་སོགས་པ་འགྲོ་བ་དུ་མས་བྱང་ཆུབ་མཆོག་ཏུ་སེམས་བསྐྱེད་པར་བསྟན་པས་ལུས་ཀྱི་རྟེན་ལ་མི་ལྟོས་པར། བསམ་པའི་རྟེན་གཙོ་ཆེ། དེ་ལ་རྣམ་གྲངས་མང་ཡང་། སངས་རྒྱས་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་སེམས་ཀྱི་ཕན་ཡོན་ཐོས་པ་དང་གསུམ་ལ་འདུ་བ་ཡིན་ཏེ། དཀོན་མཆོག་སྒྲོན་མེའི་མདོ་ལས། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །རྒྱལ་སྲས་རྣམས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་ལ་དད་གྱུར་ན། །བློ་དང་ལྡན་པ་རྣམས་ཀྱི་སེམས་སྐྱེའོ། །ཞེས་དང་། མདོ་རྒྱན་ལས། དེ་ཡི་རྩ་བ་སྙིང་རྗེར་འདོད། །ཅེས་པ་ལྟར། དེ་ལས་ཀྱང་སྙིང་རྗེ་ནི་བྱང་ཆུབ་ཐོབ་པའི་རྒྱུའི་གཙོ་བོ་མེད་ན་མི་རུང་ཞིང་ཡོད་ན་དེ་ཁོ་ནས་ཀྱང་ཆོག་པ་ཡིན་ཏེ། དབུ་མ་འཇུག་པ་ལས། །ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་དང་། །གསང་བ་བསམ་གྱིས་མི་ཁྱབ་པའི་མདོ་ལས། གསང་བའི་བདག་པོ་ཐམས་ཅན་མཁྱེན་པའི་ཡེ་ཤེས་དེ་ནི་བྱང་ཆུབ་ཀྱི་རྒྱུ་ལས་བྱུང་བ་སྙིང་རྗེ་ཆེན་པོའི་རྩ་བ་ཅན་ཐབས་ཀྱིས་མཐར་ཕྱིན་པའོ། །ཞེས་སོ། །ཆོས་ཡང་དག་པར་སྡུད་པའི་མདོ་ལས། སྤྱན་རས་གཟིགས་ཀྱིས་གསོལ་པ། བཅོམ་ལྡན་འདས་སངས་རྒྱས་ཐོབ་པར་འདོད་པས་ཆོས་མང་པོ་ལ་བསླབ་པར་མི་བགྱི་ཡི་ཆོས་གཅིག་ལ་བསླབ་པར་བྱའོ། །དེ་གང་ཞེ་ན། སྙིང་རྗེ་ཆེན་པོའོ། །བཅོམ་ལྡན་འདས་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་དེ་འཁོར་ལོ་རིན་ཆེན་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིས་པ་ལགས་སོ། །ཞེས་གསུངས་པ་ལྟར་སྙིང་རྗེ་ཆེན་པོ་དང་ལྡན་པའི་བསམ་པ་གཙོ་ཆེའོ། །གཉིས་པ་བརྟེན་པ་སེམས་བསྐྱེད་ཀྱི་རང་བཞིན་ལ། སེམས་བསྐྱེད་ཀྱི་མཚན་ཉིད་དང་། རབ་ཏུ་དབྱེ་བ་གཉིས་སོ། །དང་པོ་ལ་མཚན་གཞི་དང་མཚན་ཉིད་གཉིས་ལས། མཚན་གཞི་ནི། སེམས་དང་སེམས་བྱུང་ལ་བཞེད་པ་མི་མཐུན་པ་མང་ཡང་། འདིར་ནི་གཙོ་སེམས་ཉིད་བཟུང་ཞིང་། དེ་ཡང་སྒོ་ལྔའི་རྣམ་ཤེས་ཁ་ཕྱིར་བལྟས་རྟོག་མེད་ཀྱི་རྣམ་པ་ཡིན་ལ། ཉོན་ཡིད་ནི་ནང་དུ་ཀུན་གཞི་ལ་དམིགས་ནས་ངར་འཛིན་གྱི་རྣམ་པ་ཅན་ཡིན་པས་དེ་དག་ནི་མཚན་གཞིར་མི་རུང་། དེས་ན་འདིར་ནི་དཀར་ཆོས་ཐམས་ཅད་ཀྱི་རྟེན་དུ་རུང་བ་ཡིད་ཀྱི་རྣམ་པར་ཤེས་པ་ཉིད་མཚན་གཞིར་འདོད་པ་ཡིན་ཏེ། དེ་ལྟར་ཡང་ཉི་ཁྲི་སྣང་བ་ལས། སེམས་བསྐྱེད་པ་ཞེས་བྱ་བ་ལ་སེམས་ནི་རྣམ་པར་ཤེས་པ་སྟེ་རྣམ་པར་རིག་པའོ། །རྣམ་པར་ཤེས་པ་གང་ཡིན་ཞེ་ན། ཡིད་ཀྱི་རྣམ་པར་ཤེས་པ་སྟེ། དཀར་པོའི་ཆོས་ཐམས་ཅད་ལ་དམིགས་པ་ནི་དེ་ལ་སྲིད་པའི་ཕྱིར་རོ། །ཞེས་གསུངས་པ་ལྟར་ཀུན་མཁྱེན་ཆེན་པོ་ཙོང་ཁ་པ་སོགས་མཁས་གྲུབ་ཐམས་ཅད་ཀྱིས་བཞེད་པ་ཡིན་ནོ། །མཚན་ཉིད་ནི། གཞན་སེམས་ཅན་ཐམས་ཅད་སྲིད་པའི་སྡུག་བསྔལ་ལས་བསྒྲལ་ཏེ་ཐམས་ཅད་མཁྱེན་པའི་བདེ་བ་བླ་ན་མེད་པ་ལ་འཇོག་པའི་དོན་གྱི་ཆེད་དུ་བྱང་ཆུབ་ཐོབ་པར་འདོད་པའོ། །དེ་ལྟར་ཡང་མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །གཉིས་པ་དབྱེ་བ་ལ། ངོ་བོའི་སྒོ་ནས་དབྱེ་བ། སྐྱེ་ཚུལ་གྱི་སྒོ་ནས་དབྱེ་བ། གྲོགས་ཀྱི་སྒོ་ནས་དབྱེ་བ། ས་མཚམས་ཀྱི་སྒོ་ནས་དབྱེ་བ། བཞེད་ཚུལ་གྱི་སྒོ་ནས་དབྱེ་བ་དང་ལྔ་ལས། དང་པོ་ལ་ངོ་བོ་གཅིག་ཏུ་བསྟན་པ་དང་། ལྡོག་པ་གཉིས་སུ་དབྱེ་བའོ། །དེ་ལ་ངོ་བོ་གཅིག་ཏུ་བསྟན་པ་ནི་ཐབས་སྙིང་རྗེ་ཆེན་པོའི་དང་མ་བྲལ་བའི་སྒོ་ནས་ཆོས་ཐམས་ཅད་ལ་རང་བཞིན་མེད་པར་རྟོགས་པའི་ཤེས་རབ་ཁྱད་པར་ཅན་དེ་ལ་སྟོང་ཉིད་སྙིང་རྗེའི་སྙིང་པོ་ཅན་གྱི་སེམས་ཞེས་བྱ་སྟེ། བསླབ་བཏུས་ལས། སྟོང་ཉིད་སྙིང་རྗེའི་སྙིང་པོ་ཅན། །བསྐྱེད་པས་བསོད་ནམས་དག་པར་འགྱུར། །ཞེས་དང་། མངོན་རྟོགས་རྒྱན་ལས། ཤེས་པས་སྲིད་ལ་མི་གནས་ཤིང་། །སྙིང་རྗེའི་ཞི་ལ་མི་གནས་པ། །ཞེས་སོ། །རྒྱུད་བླ་མ་ལས་ཀྱང་། བདག་སྲེད་མ་ལུས་ཤེས་རབ་ཀྱིས་བསལ་ནས། །སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །དེ་ལྟར་བློ་རྩེ་བྱང་ཆུབ་ཐབས་བརྟེན་ནས། །འཕགས་པ་འཁོར་བའམ་མྱ་ངན་འདའ་མི་འགྱུར། །ཞེས་བཤད་དོ། །སྟོང་པ་ཉིད་དང་སྙིང་རྗེ་གཉིས་པོ་ཡ་བྲལ་བར་གྱུར་ན་ནི་རྫོགས་པའི་བྱང་ཆུབ་ལས་ཕྱིར་ལྡོག་པར་འགྱུར་ཏེ། སྡུད་པ་ལས། ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྟུང་། །ཞེས་དང་། འཇམ་དཔལ་རྣམ་པར་འཕྲུལ་བའི་མདོ་ལས། སྟོང་པ་ཉིད་ལ་སོ་སོར་རྟོག་ཅིང་སེམས་ཅན་ཡལ་བར་འདོར་བ་ཡང་བདུད་ཀྱི་ལས་སོ། །ཤེས་རབ་ཀྱིས་རྣམ་པར་མི་དཔྱོད་ཅིང་སྙིང་རྗེ་ཆེན་པོ་ལ་དམིགས་པར་འཛིན་པ་ཡང་བདུད་ཀྱི་ལས་སོ། །ཞེས་དང་། ས་ར་ཧས་ཀྱང་། སྙིང་རྗེ་དང་བྲལ་སྟོང་པ་ཉིད་ཀྱིས་ཀྱང་། །དེས་ནི་ལམ་མཆོག་རྙེད་པ་མ་ཡིན་ཏེ། །གལ་ཏེ་སྙིང་རྗེ་འབའ་ཞིག་སྒོམ་ན་ཡང་། །འཁོར་བ་འདི་ནས་ཐར་པ་ཡོད་དམ་ཅི། །ཞེས་མདོ་རྒྱུད་བསྟན་བཅོས་ཐམས་ཅད་ནས་སྟོང་ཉིད་སྙིང་རྗེ་ཟུང་དུ་འཇུག་པ་ལ་བྱང་ཆུབ་ཀྱི་སེམས་སུ་གསུངས་སོ། །གཉིས་པ་དེ་ལ་ལྡོག་པས་དབྱེ་ན་སྨོན་པ་བྱང་ཆུབ་ཀྱི་སེམས་དང་། འཇུག་པ་བྱང་ཆུབ་ཀྱི་སེམས་གཉིས་སོ། །དེ་ལྟར་ཡང་སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་པ་ལྟར། སྙིང་རྗེ་ཆེན་པོ་ཡིད་ཀྱིས་ལུས་ཅན་ཐམས་ཅད་སྲིད་པའི་མཚོ་ལས་བསྒྲལ་བའི་ཕྱིར་སངས་རྒྱས་ཐོབ་པར་བྱའོ་སྙམ་པའི་བསམ་པ་རྐྱང་པ་ཞིག་དང་པོར་སྐྱེ་བ་ནི་སྨོན་པའི་སེམས་ཡིན་ཏེ། འགྲོ་འདོད་ལྟ་བུའོ། དེ་ནས་བྱང་ཆུབ་སེམས་དཔའི་སྡོམ་པ་བླངས་ནས་སྦྱོར་བ་ཕ་རོལ་དུ་ཕྱིན་པ་དྲུག་ལ་སློབ་པར་འདོད་པས་སྤྱོད་པ་ཕྱོགས་གཅིག་ལ་ཞུགས་པ་ནས་བཟུང་སྟེ་འཇུག་པའི་སེམས་ཡིན་ཏེ། འགྲོ་བ་དངོས་ལྟ་བུའོ། །དེ་ལྟར་ཀཱ་མ་ཤི་ལའི་སྒོམ་རིམ་དང་པོ་ལས། བྱང་ཆུབ་ཀྱི་སེམས་དེ་ཡང་རྣམ་པ་གཉིས་ཏེ་ཞུགས་པའི་སེམས་དང་སྨོན་པའི་སེམས་སོ། །དེ་ཉིད་འགྲོ་བ་དེ་དག་ལ་ཕན་པའི་ཕྱིར་སངས་རྒྱས་སུ་གྱུར་ཅིག ཅེས་གང་ཐོག་མར་དོན་དུ་གཉེར་བ་དེ་སྨོན་པའི་སེམས་དང་། གང་ཕན་ཆད་སྡོམ་པ་བཟུང་སྟེ་ཚོགས་རྣམས་ལ་ཞུགས་པ་དེ་ནི་ཞུགས་པའི་སེམས་སོ། །ཞེས་གསུངས་པ་བཞིན། དང་པོ་ཚོགས་ལམ་ཆུང་ངུ་དང་། གཉིས་པ་ཚོགས་ལམ་འབྲིང་པོ་ནས་བཞག་པ་ཡིན་ནོ། །གཉིས་པ་སྐྱེ་ཚུལ་གྱི་སྒོ་ནས་རགས་པ་བརྡ་ལས་སྐྱེས་པ་ཀུན་རྫོབ་སེམས་བསྐྱེད་དང་ཕྲ་བ་ཆོས་ཉིད་ཀྱིས་ཐོབ་པ་དོན་དམ་པའི་སེམས་བསྐྱེད་གཉིས་ཡོད་དེ། སྒོམ་རིམ་བར་མ་ལས། བྱང་ཆུབ་ཀྱི་སེམས་དེ་ཡང་རྣམ་པ་གཉིས་ཏེ། ཀུན་རྫོབ་དང་། དོན་དམ་པའོ། །དེ་ལ་ཀུན་རྫོབ་ནི། སྙིང་རྗེས་སེམས་ཅན་མཐའ་དག་གདོན་པར་དམ་བཅས་ནས་འགྲོ་བ་ལ་ཕན་པའི་ཕྱིར་སངས་རྒྱས་སུ་གྱུར་ཅིག་སྙམ་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་སེམས་དང་པོ་བསྐྱེད་པའོ། །དེ་ཡང་ཚུལ་ཁྲིམས་གྱི་ལེའུ་ལས་བསྟན་པའི་ཆོ་ག་བཞིན་དུ་བྱང་ཆུབ་སེམས་དཔའི་སྡོམ་པ་ལ་གནས་པ་མཁས་པ་ཕ་རོལ་པོ་ལས་བསྐྱེད་པར་བྱའོ། །དེ་ལྟར་ཀུན་རྫོབ་བྱང་ཆུབ་ཀྱི་སེམས་བསྐྱེད་ནས་དོན་དམ་བྱང་ཆུབ་ཀྱི་སེམས་བསྐྱེད་པའི་ཕྱིར་འབད་པར་བྱའོ། །དོན་དམ་པའི་བྱང་ཆུབ་ཀྱི་སེམས་ནི་འཇིག་རྟེན་ལས་འདས་པ་སྤྲོས་པ་མཐའ་དག་དང་བྲལ་བ་ཤིན་ཏུ་གསལ་བ་དོན་དམ་པའི་སྤྱོད་ཡུལ་དྲི་མ་མེད་པ་མི་གཡོ་བ་རླུང་མེད་པའི་མར་མེའི་རྒྱུན་བཞིན་དུ་མི་གཡོ་བའོ། །དེ་གྲུབ་པ་ནི་རྟག་ཏུ་གུས་པར་ཡུན་རིང་དུ་ཞི་གནས་དང་ལྷག་མཐོང་གི་རྣལ་འབྱོར་ལ་གོམས་པར་བྱས་པ་ལས་འབྱུང་ཞེས་གསུངས་སོ། །དེ་ལ་དང་པོ་སྨོན་འཇུག་གིས་བསྡུས་པའི་ཀུན་རྫོབ་བྱང་ཆུབ་ཀྱི་སེམས་དེ་རྒྱུ་ལྔ་ལས་སྐྱེ་སྟེ། དེ་ཡང་གྲོགས་བྱང་ཆུབ་སེམས་དཔའི་བཤེས་གཉེན་དང་འགྲོགས་ནས་དེས་བྱང་ཆུབ་སེམས་ཀྱི་ཕན་ཡོན་བརྗོད་པ་སོགས་ཀྱི་རྟེན་ལས་སྐྱེ་བ་ཡོད་ཀྱང་གྲོགས་ལ་རགས་ལས་ཤིང་དགེ་བའི་བཤེས་གཉེན་དང་བྲལ་ན་བྱང་ཆུབ་ཀྱི་སེམས་བརྗེད་པར་འགྱུར་སླ་བའི་ཕྱིར་མི་བརྟན་པའི་སེམས་ཞེས་བྱའོ། །རྒྱུ་རིགས་སད་པ་དང་དགེ་རྩ་རྒྱས་པར་འགྱུར་བ་སྟེ་སྙིང་རྗེ་ཆེན་པོ་སྐྱེས་པ་དང་། ཐེག་པ་ཆེན་པོའི་སྡེ་སྣོད་ཐོས་པ་དང་། དགེ་བ་གོམས་པ་སྟེ་བྱང་ཆུབ་ཀྱི་སེམས་ཡུན་རིང་དུ་བསྒོམ་པ་ལས་སྐྱེ་བ་བཞི་ནི་ལྡོག་པར་དཀའ་བས་བརྟན་པའི་སེམས་ཅེས་བྱའོ། །དེ་ལྟར་ཡང་། མདོ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་སོ། །འཕགས་རྒྱུད་ཀྱིས་བསྡུས་པ་ཞི་ལྷག་ཟུང་འདྲེལ་གྱི་ངོ་བོར་གྱུར་པའི་དོན་དམ་སེམས་བསྐྱེད་ནི། ཡོངས་འཛིན་རྫོགས་པའི་སངས་རྒྱས་རྣམས་མཉེས་པར་བྱས་ནས་དེ་ལས་གདམས་ངག་ནོད་པ་དང་། རྒྱུ་བསོད་ནམས་དང་ཡེ་ཤེས་ཀྱི་ཚོགས་དུས་ཡུན་རིང་པོར་བསགས་པ་དང་། འབྲས་བུ་ཆོས་ཐམས་ཅད་རྣམ་པར་མི་རྟོགས་པའི་ཡེ་ཤེས་དང་པོར་སྐྱེ་བ་སྟེ། དེ་གསུམ་ལ་བརྟེན་ནས་སྦྱོར་ལམ་ཆོས་མཆོག་ཆེན་པོའི་རྟེན་ལས་དང་པོ་ཐོབ་པ་དང་མཚུངས་ལྡན་དུ་སྐྱེ་བ་ཡིན་ཏེ། དེ་ཉིད་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོགས་ཡེ་ཤེས་ནི། །སྐྱེ་ཕྱིར་དེ་ནི་དམ་པར་འདོད། །ཅེས་སོ། །གསུམ་པ་གྲོགས་ཀྱི་དབྱེ་བ་ལའང་། གསུམ་དུ་དབྱེ་བ་དང་། དྲུག་ཏུ་དབྱེ་བ་དང་། ཉེར་གཉིས་སུ་དབྱེ་བའོ། །དང་པོ་ནི། ལྷག་པའི་བསླབ་པ་གསུམ་དང་མཚུངས་པར་ལྡན་པའི་སེམས་བསྐྱེད་གསུམ་དུ་བཞག་སྟེ། ཡུམ་བར་མ་ལས། གང་ཁ་ན་མ་ཐོ་བ་སྡོམ་པའི་སེམས་དང་། དགེ་བའི་ཆོས་སྡུད་པའི་སེམས་དང་། སེམས་ཅན་སྨིན་པར་བྱེད་པའི་སེམས་བསྐྱེད་པ་འདི་གསུམ་ལ་ནན་ཏན་དུ་བྱའོ། །ཞེས་སོ། །གཉིས་པ་ནི། ཕ་རོལ་ཏུ་ཕྱིན་པ་དྲུག་ལ་ལྟོས་ནས་བཞག་སྟེ། ཉི་ཁྲི་ལས། ཕ་རོལ་ཏུ་ཕྱིན་པ་དྲུག་དང་ལྡན་པའི་སེམས་ཡངས་པ་ཚད་མེད་པ་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་དུ་མ་གྱུར་པ་སྟེ། ཞེས་བཤད་པ་ལྟར་རོ། །གསུམ་པ་ནི། དཔེ་ཉེར་གཉིས་དང་ཆོས་མཐུན་པའི་གྲོགས་འདུན་པ་སོགས་ཉི་ཤུ་རྩ་གཉིས་དང་མཚུངས་པ་ལྡན་པའི་སེམས་བསྐྱེད་རྣམས་ཏེ། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་པ་ལྟར་ཡིན་ལ། དེ་རྣམས་ཀྱི་དཔེ་གྲོགས་སྦྱོར་བའི་ཆོས་མཐུན་ཇི་ལྟར་བརྩི་བའང་འདི་ལྟར་སྟེ། བྱང་ཆུབ་ལ་འདུན་པ་དང་མཚུངས་པར་ལྡན་པའི་སེམས་བསྐྱེད་ནི་ས་ལྟ་བུ་ཡིན་ཏེ། སངས་རྒྱས་དང་དེའི་རྒྱུ་ཚོགས་གཉིས་ཀྱི་ཆོས་དཀར་པོ་ཐམས་ཅད་ཀྱི་གཞིར་གྱུར་པས་སོ། །དེའི་རྒྱུན་གནས་པའི་བསམ་པ་དང་ལྡན་པའི་སེམས་བསྐྱེད་ནི་གསེར་ལྟ་བུ་སྟེ། ཕ་རོལ་ཏུ་ཕྱིན་པ་དྲུག་གི་སྒོ་ནས་གཞན་ལ་ཕན་བདེ་སྒྲུབ་པའི་བསམ་པ་བཟང་པོ་བྱང་ཆུབ་ཀྱི་བར་འགྱུར་བ་མི་མངའ་བས་སོ། །བསམ་པ་དེ་ཉིད་ཆེས་ཆེར་འཕེལ་བའི་ལྷག་པའི་བསམ་པ་དང་ལྡན་པའི་སེམས་བསྐྱེད་ནི་ཟླ་བ་ཚེས་པ་ལྟ་བུ་སྟེ་བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་སོགས་དགེ་བའི་ཆོས་མཐའ་དག་གོང་ནས་གོང་དུ་འཕེལ་བས་སོ། །རྣམ་པར་མི་རྟོག་པའི་ཡེ་ཤེས་ལ་དངོས་སུ་སྦྱོར་བའི་ཞི་ལྷག་གི་སྦྱོར་བ་དང་ལྡན་པའི་སེམས་བསྐྱེད་ནི་མེ་ལྟ་བུ་ཡིན་ཏེ། སྒྲིབ་པའི་བུད་ཤིང་བསྲེགས་པ་ལ་མྱུར་བས་སོ། །སྦྱིན་པའི་ཕར་ཕྱིན་དང་ལྡན་པའི་སེམས་བསྐྱེད་ནི་གཏེར་ཆེན་པོ་ལྟ་བུ་སྟེ། ཆོས་དང་ཟང་ཟིང་གི་ལོངས་སྤྱོད་ཀྱིས་སེམས་ཅན་ཐམས་ཅད་ཚིམ་པར་བྱས་ཀྱང་མི་ཟད་པས་སོ། །ཚུལ་ཁྲིམས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་རིན་པོ་ཆེའི་འབྱུང་གནས་ལྟ་བུ་ཡིན་ཏེ་སྟོབས་དང་མི་འཇིགས་པ་ལ་སོགས་པའི་ཡོན་ཏན་ཀྱི་རིན་པོ་ཆེ་རྣམས་འབྱུང་བས་སོ། །བཟོད་པའི་ཕར་ཕྱིན་དང་ལྡན་པའི་སེམས་བསྐྱེད་ནི་རྒྱ་མཚོ་ཆེན་པོ་སྟེ། མེ་མཚོན་སོགས་མི་འདོད་པའི་དངོས་པོ་ཐམས་ཅད་ཐོག་ཏུ་བབས་ཀྱང་ཡིད་མི་འཁྲུགས་པས་སོ། །བརྩོན་འགྲུས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་རྡོ་རྗེ་ལྟ་བུ་ཡིན་ཏེ། བླ་ན་མེད་པའི་བྱང་ཆུབ་ལ་ཡིད་ཆེས་བརྟན་པར་འགྱུར་པས་བདུད་བཞི་རྣམས་ཀྱིས་སྐབས་མི་ཕྱེད་པས་སོ། །བསམ་གཏན་གྱི་ཕར་ཕྱིན་དང་ལྡན་པའི་སེམས་བསྐྱེད་ནི་རི་ཡི་རྒྱལ་པོ་ལྟ་བུ་ཡིན་ཏེ། མཚན་མའི་རྣམ་པར་གཡེང་བས་ཏིང་ངེ་འཛིན་ལས་ཡིད་བསྐྱོད་མི་ནུས་པས་སོ། །བདག་མེད་གཉིས་རྟོགས་ཤེས་རབ་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་སྨན་ཆེན་པོ་ལྟ་བུ་ཡིན་ཏེ། ཆགས་སོགས་ཉོན་མོངས་པའི་སྒྲིབ་པ་དང་། གཟུང་བར་རྟོག་པ་སོགས་ཤེས་བྱའི་སྒྲིབ་པའི་ནད་རབ་ཏུ་ཞི་བར་བྱེད་པས་སོ། །ཐབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་དགེ་བའི་བཤེས་གཉེན་ལྟ་བུ་སྟེ། སྙིང་རྗེ་དང་ཐབས་ལ་མཁས་པས་འབྱོར་རྒུད་གང་གི་དུས་སུའང་སེམས་ཅན་གྱི་དོན་ཡོངས་སུ་མི་གཏོང་བས་སོ། །སྨོན་ལམ་གྱི་ཕར་ཕྱིན་དང་ལྡན་པའི་སེམས་བསྐྱེད་ནི་ཡིད་བཞིན་གྱི་ནོར་བུ་ལྟ་བུ་སྟེ། ཡིད་ལ་ཇི་ལྟར་སྨོན་པའི་འབྲས་བུ་མངོན་དུ་གྲུབ་པས་སོ། །སྟོབས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་ཉི་མ་ལྟ་བུ་ཡིན་ཏེ། གདུལ་བྱའི་རྒྱུད་ཀྱི་དགེ་བའི་ལོ་ཏོག་སྨིན་པར་བྱེད་པའི་མཐུ་དང་ལྡན་པས་སོ། །ཡེ་ཤེས་ཀྱི་ཕར་ཕྱིན་དང་ལྡན་པའི་སེམས་བསྐྱེད་ནི་དྲི་ཟའི་གླུ་དབྱངས་ལྟ་བུ་སྟེ། གདུལ་བྱའི་ཁམས་དབང་དང་མཐུན་པར་ཡིད་འདུན་པར་བྱེད་པའི་ཆོས་སྟོན་པས་སོ། །མངོན་ཤེས་དྲུག་དང་ལྡན་བའི་སེམས་བསྐྱེད་ནི་རྒྱལ་པོ་ཆེན་པོ་ལྟ་བུ་སྟེ། གཞན་དོན་སྒྲུབ་པ་ལ་མཐུ་ཆེན་པོ་དང་ལྡན་པས་སོ། །ཚོགས་གཉིས་དང་ལྡན་པའི་སེམས་བསྐྱེད་ནི་བང་མཛོད་ལྟ་བུ་སྟེ། བསོད་ནམས་དང་ཡེ་ཤེས་བསམ་གྱིས་མི་ཁྱབ་པའི་གནས་སུ་གྱུར་པས་སོ། །བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་དང་ལྡན་པའི་སེམས་བསྐྱེད་ནི་ལམ་པོ་ཆེ་ལྟ་བུ་ཡིན་ཏེ། དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་གཤེགས་ཤིང་རྗེས་སུ་གཤེགས་པར་འགྱུར་བས་སོ། །ཐབས་ཤེས་གཉིས་དང་ལྡན་པའི་སེམས་བསྐྱེད་ནི་བཞོན་པ་བཟང་པོ་ལྟ་བུ་ཡིན་ཏེ། སྲིད་ཞི་གཉིས་ཀྱི་མཐའ་ལ་མི་ལྟུང་བར་མི་གནས་པའི་མྱང་འདས་ཀྱི་སར་བདེ་བླག་ཏུ་བགྲོད་པས་སོ། །རང་གི་ཐོས་པ་མི་བརྗེད་པར་འཛིན་པའི་གཟུངས་དང་གཞན་ལ་ཐོགས་མེད་དུ་འཆད་པའི་སྤོབས་པ་གཉིས་དང་ལྡན་པའི་སེམས་བསྐྱེད་ནི། བཀོད་མའི་ཆུ་ལྟ་བུ་སྟེ། བྲི་བ་དང་ཟད་པ་མེད་པས་སོ། །མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཞི་བའོ། །ཞེས་སྟོན་པའི་ཆོས་ཀྱི་དགའ་སྟོན་དང་ལྡན་པའི་སེམས་བསྐྱེད་ནི་སྒྲ་སྙན་ལྟ་བུ་ཡིན་ཏེ་སྙན་པར་བསྒྲགས་པས་སོ། །བགྲོད་པ་གཅིག་པའི་ལམ་དང་ལྡན་པའི་སེམས་བསྐྱེད་ནི། ཆུ་བོའི་རྒྱུན་ལྟ་བུ་སྟེ། གཞན་གྱི་དོན་དུ་འབད་རྩོལ་མེད་པར་ཤེས་རབ་དང་སྙིང་རྗེས་ངང་གིས་འཇུག་པས་སོ། །ཆོས་ཀྱི་སྐུ་དང་ལྡན་པའི་སེམས་བསྐྱེད་ནི་སྤྲིན་ལྟ་བུ་ཡིན་ཏེ། དགའ་ལྡན་གྱི་གནས་ན་བཞུགས་སྟེ། མཛད་པ་བཅུ་གཉིས་ཀུན་ཏུ་སྟོན་པའི་སྤྲིན་ཆེན་པོ་ལས་ཆོས་ཀྱི་ཆར་ཆེན་པོས་གདུལ་བྱའི་ལོ་ཏོག་སྨིན་པར་བྱེད་པས་སོ། །ཞེས་བཤད་པར་བྱའོ། །བཞི་པ་ས་མཚམས་ཀྱི་སྒོ་ནས་དབྱེ་བ་ལ་ཡང་། བཞིར་དབྱེ་བ་དང་། ལྔར་དབྱེ་བ་དང་། ཉེར་གཉིས་སུ་དབྱེ་བའི་ས་མཚམས་བསྟན་པའོ། །དང་པོ་ནི། རྒྱན་ལས། མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་པ་ལྟར། ཚོགས་སྦྱོར་ཀྱི་ལམ་ན་མོས་པས་སྤྱོད་པའི་སེམས་བསྐྱེད། ས་དང་པོ་ནས་བདུན་པའི་བར་དུ་ལྷག་བསམ་དག་པའི་སེམས་བསྐྱེད། །དག་པ་ས་གསུམ་རྣམ་པར་སྨིན་པའི་སེམས་བསྐྱེད། སངས་རྒྱས་ཀྱི་ས་ན་སྒྲིབ་པ་སྤང་བའི་སེམས་བསྐྱེད་དང་བཞིར་བཤད་པའོ། །གཉིས་པ་ནི་ཉི་ཁྲི་ལས། ལས་དང་པོ་པའི་སེམས་བསྐྱེད་དང་། ཡོངས་སུ་སྦྱང་བ་བྱས་པའི་སེམས་བསྐྱེད་དང་། ཆོས་མཐོང་བའི་སེམས་བསྐྱེད་དང་། རྣམ་པར་གྲོལ་བའི་སེམས་བསྐྱེད་དང་། བསམ་གྱིས་མི་ཁྱབ་པའི་སེམས་བསྐྱེད་པ་སྟེ། རབ་འབྱོར་འདི་ལ་མ་ཞུགས་པ་ཞུགས་པར་བྱའོ། །ཞུགས་པ་ཡོངས་སུ་སྦྱང་བར་བྱའོ། །ལྷའི་མིག་བསྐྱེད་པར་བྱའོ། །འཕགས་པའི་ལམ་བདེན་བསྒོམ་པར་བྱའོ། །སངས་རྒྱས་ཀྱི་སྤྱན་སྒྲིབ་པ་མེད་པ་ཐོབ་པར་བྱའོ། །ཞེས་གསུངས་པ་ལྟར་རོ། །ཚོགས་སྦྱོར་མཐོང་སྒོམ་མི་སློབ་པའི་ལམ་ལྔའི་དབྱེ་བས་ལྔར་ཤེས་པར་བྱའོ། །གསུམ་པ་གོང་དུ་བཤད་པའི་སེམས་བསྐྱེད་ཉེར་གཉིས་པོ་ས་མཚམས་གང་དང་གང་ལ་བཞག་ཅེ་ན། རྒྱན་འགྲེལ་དོན་གསལ་ལས། དེ་ལ་དང་པོ་གསུམ་ནི་ཆུང་ངུ་དང་། འབྲིང་དང་། ཆེན་པོ་ཉིད་ཀྱིས་ལས་དང་པོ་པའི་སས་བསྡུས་སོ། །དེའི་འོག་ཏུ་གཅིག་ནི་ས་དང་པོ་ལ་འཇུག་པའི་ལམ་གྱིས་བསྡུས་སོ། །དེའི་འོག་ཏུ་བཅུ་ནི། རབ་ཏུ་དགའ་བ་ལ་སོགས་པའི་ས་བཅུས་བསྡུས་ཏེ། མཐོང་བ་དང་། སྒོམ་པའི་ལམ་གྱི་སྤྱོད་ཡུལ་ཅན་ཡིན་ནོ། །དེའི་འོག་ཏུ་ལྔ་ནི་ཁྱད་པར་གྱི་ལམ་གྱིས་བསྡུས་སོ། །དེའི་འོག་ཏུ་སེམས་བསྐྱེད་པ་གསུམ་ནི་སྦྱོར་བ་དང་དངོས་དང་མཇུག་གི་སྒོ་ནས་སངས་རྒྱས་ཀྱི་སས་བསྡུས་སོ། །དེ་ལྟར་སེམས་བསྐྱེད་པའི་རབ་ཏུ་དབྱེ་བ་ནི། ལས་དང་པོ་པའི་ས་ནས་སངས་རྒྱས་ཀྱི་སའི་བར་གྱིས་བསྡུས་པ་ཡིན་ནོ། །ཞེས་པའི་དོན། དང་པོ་གསུམ་ནི། ཚོགས་ལམ་ཆེ་འབྲིང་ཆུང་གསུམ་དང་། དེ་ནས་གཅིག་སྦྱོར་ལམ། དེ་ནས་ས་བཅུ་པོ་སོ་སོར་སྦྱར། དེ་ནས་ལྔ་དག་པ་ས་གསུམ་དང་། དེ་ནས་གསུམ་ས་བཅུ་པ་ཆོས་ཀྱི་སྤྲིན་གྱི་སྦྱོར་དངོས་མཇུག་གསུམ་ལ་ཀུན་མཁྱེན་ཆེན་པོས་གསུངས་སོ། །ལྔ་པ་བཞེད་ཚུལ་གྱི་སྒོ་ནས་དབྱེ་བ་ནི། སེམས་ཅན་ཐམས་ཅད་སངས་རྒྱས་ལ་བཀོད་ནས་རང་ཉིད་འཚང་རྒྱ་བར་འདོད་པ་ཕྱུགས་རྫི་ལྟ་བུ་དཔེ་མེད་པའི་སེམས་བསྐྱེད་དང་། བདག་གཞན་ཐམས་ཅད་དུས་མཉམ་དུ་སངས་རྒྱས་པར་འདོད་པ་ལ་མཉེན་པ་ལྟ་བུ་ཡེ་ཤེས་དམ་པའི་སེམས་བསྐྱེད་དང་། རང་ཉིད་སངས་རྒྱས་ནས་གཞན་དགྲོལ་བར་འདོད་པ་རྒྱལ་པོ་ལྟ་བུ་འདོད་ཆེན་གྱི་སེམས་བསྐྱེད་དང་གསུམ་དུ་ཡོད་ཅིང་། དེ་རྣམས་ཀྱང་བློ་སྟོབས་ཆེ་ཆུང་གིས་གྲངས་མེད་གསུམ་དང་། བདུན་དང་། སུམ་ཅུ་རྩ་བདུན་ནས་སངས་རྒྱས་ཀྱི་གོ་འཕང་ཐོབ་པར་འགྱུར་བར་འདོད་པ་ཡིན་ནོ། །གསུམ་པ་བྱང་ཆུབ་སེམས་ཀྱི་ཕན་ཡོན་ནི་བསམ་གྱིས་མི་ཁྱབ་ཀྱང་། མདོར་བསྡུ་ན། སྤྱོད་འཇུག་ལས། གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་བཟུང་། །བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམ་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་དང་། དཔལ་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་དང་། བཟང་པོ་སྤྱོད་པ་ལས། གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བའི་མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་ཅིག་ཙམ་ཡང་དད་པ་བསྐྱེད་པ་ན། །བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་གསུངས་པ་ལྟར་བསོད་ནམས་མཐའ་ཡས་སོ། །གསུམ་པ་མྱུར་དུ་སངས་རྒྱས་ཐོབ་པའི་གཞི་བྱང་ཆུབ་སེམས་དཔའི་བསླབ་པ་བསྟན་པ་ནི། རྒྱས་པར་གཞུང་ལས་ཤེས་པར་བྱའོ། །མདོར་ན་ཐེག་ཆེན་བྱང་ཆུབ་སེམས་ཀྱི་སྒོར་ཞུགས་ནས་བཟུང་། དགེ་བའི་རྩ་བ་ཆེ་ཕྲ་གང་བསྒྲུབས་ཀྱང་རུང་སྟེ། སྦྱོར་བ་སེམས་བསྐྱེད། དངོས་གཞི་དམིགས་མེད། རྗེས་ལ་བསྔོ་བ་གསུམ་གྱིས་ཟིན་པར་བྱ། དེ་ཡང་ཁ་ཙམ་ཚིག་ཙམ་མ་ཡིན་པར་སྙིང་ཐག་པ་ནས་གཞན་དོན་ཁོ་ནར་བསམ་པ་མ་གཏོགས་རང་འདོད་ཀྱི་བསམ་པ་སྤུའི་རྩེ་མོ་ཙམ་ཞིག་ཀྱང་མ་འདྲེས་པར་བྱ་དགོས་ཏེ། སྤྱོད་འཇུག་ལས། དངོས་སམ་ཡང་ན་བརྒྱུད་ཀྱང་རུང་། །སེམས་ཅན་དོན་ལས་གཞན་མི་སྤྱད། །སེམས་ཅན་ཁོ་ནའི་དོན་གྱི་ཕྱིར། །ཐམས་ཅད་བྱང་ཆུབ་རྒྱུར་བསྔོའོ། །ཞེས་པ་ལྟར་རོ། །གལ་ཏེ་རང་འདོད་ཀྱི་བསམ་པ་སྐད་ཅིག་མ་ཞིག་སྐྱེས་ན་ཡང་དེ་ནི་བྱང་ཆུབ་སེམས་དཔའ་ལ་ཤིན་ཏུ་ལྕི་བའི་ལྟུང་བ་ཡིན་ཏེ། སྡུད་པ་ལས། གལ་ཏེ་བསྐལ་པ་བྱེ་བ་མང་པོར་དགེ་བའི་ལས་ལམ་བཅུ། །སྤྱད་ཀྱང་རང་རྒྱལ་དགྲ་བཅོམ་ཉིད་ལ་འདོད་བསྐྱེད་ན། །དེ་ནི་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་གསུངས་སོ། །དེས་ན་དུས་དང་རྣམ་པ་ཐམས་ཅད་དུ་རང་གི་སེམས་རྒྱུད་ལ་བརྟག་པ་འདི་ཁོ་ན་གལ་ཆེ་སྟེ། སྤྱོད་འཇུག་ལས། དེ་ལྟའི་བདག་གིས་སེམས་འདི་ནི། །ལེགས་བཟུང་ལེགས་པར་བསྲུང་བར་བྱ། །སེམས་བསྲུང་བརྟུལ་ཞུགས་མ་གཏོགས་པར། །བརྟུལ་ཞུགས་མང་པོས་ཅི་ཞིག་བྱ། །ཞེས་དང་། ལུས་དང་སེམས་ཀྱི་གནས་སྐབས་ལ། །ཡང་དང་ཡང་དུ་བརྟག་བྱ་བ། །དེ་ཉིད་ཁོ་ན་འདོར་ན་ནི། །ཤེས་བཞིན་བསྲུང་བའི་མཚན་ཉིད་དོ། །ཞེས་གསུངས་པ་ལྟར་བྱང་ཆུབ་སེམས་དཔའི་བསླབ་པའི་གནང་བཀག་ཐམས་ཅད་ཀྱི་ས་མཚམས་རང་འདོད་ཀྱི་ཞེན་འཁྲིས་ཡོད་མེད་ཁོ་ན་ལ་རག་ལས་པས་རྩ་བ་སེམས་ལ་ཐུག །སེམས་མི་ཉམས་པར་བསྲུང་བའི་ཐབས་ཀྱང་དྲན་པ་དང་ཤེས་བཞིན་གཉིས་སྲོག་གི་ཕྱིར་ཡང་མི་ཉམས་པ་ཞིག་བྱེད་དགོས་པ་ལགས་ཏེ། རྒྱལ་བའི་སྲས་པོ་ཞི་བ་ལྷས། སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དག །སྲོག་ལ་བབས་ཀྱང་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཞེས་གསུངས་པ་འདི་ལ་སངས་རྒྱས་ཐོབ་པར་འདོད་པ་ཐམས་ཅད་ཀྱིས་ཁོག་པའི་ནང་གི་སྙིང་བཞིན་དུ་གཅེས་སྤྲས་སུ་མཛད་དགོས་པར་གདའ་ལགས། །རྒྱལ་བའི་བཀའ་གསང་ཤིན་ཏུ་རྒྱ་ཆེ་ཡང་། །ངེས་བའི་སྙིང་པོ་བྱང་ཆུབ་མཆོག་གི་སེམས། །གཅིག་པུ་ལགས་ཀྱི་འདི་ལ་ཆིག་དྲིལ་དུ། །ཉམས་ལེན་མཛད་ན་སངས་རྒྱས་ལག་རྩེར་ཡོད། །བདག་ནི་ཐོས་ཉུང་བློ་དམན་སྦྱངས་པ་ཕྲ། །དེ་ཕྱིར་ཕྱོགས་འདིར་ཉེས་པ་གང་བཤད་པའི། །སྡིག་དེ་ཐོག་མེད་ནས་བསགས་ལས་རྣམས་དང་། །ལྷན་ཅིག་ཆོས་ཀྱི་སྤྱན་ལྡན་རྣམས་ལ་བཤགས། །གལ་ཏེ་དམ་པའི་གསུང་གིས་བསྐྱེད་པའི་ཆ། །ལེགས་པའི་ཤས་ཙམ་འདི་ལ་ཡོད་སྲིད་ན། །དེ་མཐུས་མཐའ་ཡས་མ་རྒན་དྲིན་ཆེན་རྣམས། །ཀུན་མཁྱེན་རྒྱལ་བའི་གོ་འཕང་ཐོབ་ཕྱིར་བསྔོ། །ཞིང་མང་དག་ན་རྒྱལ་སྲས་བྱེ་བའི་དབུས། །ལྷམ་མེར་མཛེས་པའི་རྒྱལ་བའི་སྐུ་མཆོག་དག །མཐོང་ནས་ཆོས་མིག་རྡུལ་དང་བྲལ་གྱུར་ཏེ། །ཀུན་བཟང་སྤྱོད་པ་རྒྱ་མཚོར་བརྩོན་པར་ཤོག །ཅེས་པ་འདི་ནི་དགེ་བའི་བཤེས་གཉེན་དམ་པ་གང་གི་གསུང་མི་ལྡོག་ཙམ་དུ་ཐེག་པ་ཆེན་པོའི་ཆོས་ལ་མོས་པ་ཐོབ་པའི་བཙུན་གཟུགས་པདྨ་བཛྲ་དུ་འབོད་པས་བྲིས་ཏེ་ཕུལ་བས་བདག་ཀྱང་ཐེག་པ་ཆེན་པོའི་ལམ་ལ་ཚུལ་བཞིན་དུ་སློབ་པའི་སྐལ་བ་དང་ལྡན་པའི་རྒྱུར་གྱུར་ཅིག། དགེའོ།། མངྒལཾ།།