དམ་ཚིག་བསྡུས་དོན་གྱི་ལེའུའི་ཟིན་བྲིས་གསལ་བྱེད་མེ་ལོང་།
༄༅།།དམ་ཚིག་བསྡུས་དོན་གྱི་ལེའུའི་ཟིན་བྲིས་གསལ་བྱེད་མེ་ལོང་ཞེས་བྱ་བ་བཞུགས་སོ།། བླ་མ་ལ་ཕྱག་འཚལ་ལོ། །མཚོན་བྱེད་ཚིག་གི་མེ་ལོང་གིས། །གསང་བ་སྔགས་ཀྱི་ངོ་བོ་ཉིད། །སེམས་ཀྱི་དམ་པ་འོད་གསལ་བ། །སྟོན་མཛད་རྡོ་རྗེའི་ལམ་མཁན་རྒྱལ། །སྨིན་གྲོལ་ལམ་གྱི་སྲོག་གྱུར་ཅིང་། །གཞི་འཛིན་སྲུང་བྱའི་དམ་ཚིག་རྣམས། །ཤེས་ཤིང་ཉམས་ཆགས་སྦྱོང་བའི་ཕྱིར། །དམ་པས་བསྡུས་དོན་ལེའུ་དཀྲོལ། དེ་ལ་འདིར་རྡོ་རྗེ་ཐེག་པའི་ལམ་འཆད་ཉན་སྒྲུབ་པར་བྱ་བ་གང་གི་དུས་སུའང་དམ་ཚིག་རྣམ་པར་དག་པས་གཞི་བཟུང་སྟེ་རྣལ་འབྱོར་པ་རྣམས་ཀྱི་རྒྱུད་དག་པ་གལ་ཆེ། དེའི་ཡན་ལག་ཏུ་དམ་ཚིག་གི་རྣམ་གྲངས་ཤེས་ནས་དྲན་ཤེས་ཀྱིས་བསྐྱངས་ཏེ་ཉིན་མཚན་གྱི་དྲུག་ཆ་ལ་ལྟུང་བའི་བསྔོ་བ་གྲང་བྱེད་ཅིང་གསོ་སྦྱོང་གི་ཐབས་ལ་འབད་དགོས་པས་སྤྱིར་དམ་ཚིག་གི་རྣམ་པར་བཞག་པ་རྒྱ་ཆེ་བ་དང་ཕྱི་ནང་གསང་བའི་ཉམས་པ་སྐོང་བའི་ཐབས་མཐའ་ཡས་པ་ཡོད་པ་རྣམས་ཤེས་པར་བྱ་དགོས་མོད། འདིར་ལས་དང་པོ་པ་བློ་གྲོས་གསར་བུར་གྱུར་པ་རྣམས་ལ་ཕན་པའི་རྒྱུན་བཤགས་སུ་འཇུག་པ་བདེ་བས་བཤགས་རྒྱུད་ལེའུ་བཅུ་དྲུག་པ་ཉི་ཚེ་ཞིག་གི་དོན་བཤད་པར་བྱའོ། །དེ་ལ་ཁུངས་ཤེས་པར་བྱ་བའི་ཕྱིར་སྔོན་བྱུང་གི་ལོ་རྒྱུས་བརྗོད་པ། གནས་སྐབས་ཀྱི་གླེང་གཞི་འགོད་པ། ལེའུ་དངོས་ཀྱི་དོན་བཤད་པ་དང་གསུམ་ལས། དང་པོ་ནི། བཅོམ་ལྡན་འདས་རིགས་ཐམས་ཅད་ཀྱི་ཁྱབ་བདག་དཔལ་རྡོ་རྗེ་འཆང་ཆེན་པོ་རྒྱལ་ཚབ་ཀྱི་སྐྱེས་བུ་རིགས་ལྔ་དང་བཅས་པས་འོག་མིན་དང་རང་བཞིན་སྤྲུལ་པའི་ཞིང་སོ་སོར་གསུངས་པའི་གསང་བ་བླ་ན་མེད་པའི་རྒྱུད་སྡེ་ཆེན་པོ་རྣམས་མི་ཡུལ་དུ་ཇི་ལྟར་བྱུང་བའི་ཚུལ་ལ། བདག་ཅག་གི་སྟོན་པ་མཆོག་གི་སྤྲུལ་པའི་སྐུ་མཉམ་མེད་ཐུབ་པའི་དབང་པོ་ཉིད་སྐྱེ་དགུའི་ཚེ་ལོ་བརྒྱ་པ་ལ་བྱོན། ཡུན་ཧ་ཅང་མི་རིང་བར་བཞུགས་ཏེ་ཡོངས་སུ་མྱ་ངན་ལས་འདས་པར་དགོངས་ནས་ཡུལ་ཡངས་པ་ཅན་ཞེས་བྱ་བར་འཁོར་མང་པོ་དང་ཐབས་གཅིག་ཏུ་བཞུགས་པར་དབྱར་ཟླ་བ་གསུམ་འདས་ནས་སློབ་མ་རྣམས་ལ་གདམས་ངག་གསུམ་བཞག་པའི་སླད་དུ་འཁོར་འདུས་པ་རྣམས་ཀྱི་ནང་ནས་རྫུ་འཕྲུལ་ཆེར་སྤྱོད་ལ། འཇིག་རྟེན་དྲུག་གི་ཕྱོགས་བཅུ་ན་ཆོས་འདི་པར་གཏོགས་པའི་ངའི་སློབ་མ་ཇི་སྙེད་ཡོད་པ་རྣམས་བསྡུས་ཤིག་དང་། ངེས་པར་བཞག་པར་བྱ་བ་དག་ཡོད་དོ། །ཞེས་གསུངས་པ་དང་། རྫུ་འཕྲུལ་ཅན་དེས་ཐམས་ཅད་ཀྱིས་གོ་བར། རྒྱལ་བའི་ཞིང་གྱུར་རིགས་དྲུག་གང་སུ་དག །འདི་པར་ངེས་ཤིང་ཕྱོགས་པ་ཀུན་ཉོན་ཅིག །དེང་འདིར་རྒྱལ་བས་བདུད་རྩི་གསུམ་འཇོག་གིས། །དུག་གསུམ་འཇོམས་པར་འདོད་པ་ཀུན་འདུས་ཤིག །ཅེས་བསྒྲགས་པས་དམ་པའི་རིགས་ཅན་ལྔ་མ་གཏོགས་པ་ཐམས་ཅད་འདུས་པར་གྱུར་ཏོ། །དེ་ལ་སྟོན་པས་ང་ཡོངས་སུ་མྱ་ངན་ལས་འདས་པས་སུ་དག་ཐེ་ཚོམ་མ་ཆོད་པ་རྣམས་དྲི་བ་གྱིས་ཤིག་ཅེས་བཀའ་བསྩལ་པ་དང་། འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུ་ཛ་ར་ཞེས་བྱ་བ་དེ་རང་གི་སྟན་ལས་ལངས་ཏེ་སེངྒེའི་ལྟ་སྟངས་ཀྱིས་སྟོན་པའི་ཞལ་དུ་བལྟས་ནས། ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོངས་མི་མངའ། །འཇིག་རྟེན་པ་དང་མཐུན་འཇུག་ཏུ། །འདའ་བས་ཡོངས་སུ་འདུལ་བ་དགོངས། །ས་དང་རྣམ་ཐར་ལ་སྤྱད་པས། །བྱང་ཆུབ་ཐོབ་པར་འགྱུར་བ་ཡི། །འདྲེན་པའི་ཐེག་པ་རྣམ་གསུམ་ལས། །གང་དག་རིམ་པར་བཀོད་ལགས་པར། །མཉམ་པས་བླང་དོར་མེད་སྤྱོད་ཅིང་། །བྱང་ཆུབ་གཞན་ནས་མི་འཚོལ་བའི། །ཐབས་ཆེན་དཔག་གིས་མི་ལང་བ། །ངེས་པའི་ཐེག་ཆེན་ཡོངས་མ་གསུངས། །ཅེས་པ་ལ་སོགས་པ་ཞུས་པའི་ལན་དུ་སྟོན་པའི་ཞལ་ནས། དེ་ཁོ་ན་ཉིད་ངེས་པའི་ཐེག་པ་ཆེན་པོ་གནས་སྐབས་བཅུ་གཉིས་སུ་འབྱུང་སྟེ། རྨོངས་པ་གདུང་བ་སེལ་བ་ན་ཡང་འབྱུང་། འཇིག་རྟེན་གྱི་སྒྲོན་མ་ཡོངས་སུ་བཀོད་པ་ན་ཡང་འབྱུང་། གང་གིས་ངེས་པ་རྙེད་པ་ན་ཡང་འབྱུང་། སྙིང་པོ་བྱང་ཆུབ་ཏུ་ངེས་པར་ཡང་འབྱུང་། དགོངས་པ་ངེས་པར་འགྲེལ་པ་ན་ཡང་འབྱུང་། གདུལ་བྱ་སྐབས་ལ་བབས་པ་ན་ཡང་འབྱུང་། བྱིན་གྱིས་རླབས་ལས་སྣང་བ་ན་ཡང་འབྱུང་། བརྒྱུད་པ་ཐབས་ཀྱིས་གྲགས་པ་ན་ཡང་འབྱུང་། གང་གིས་ཆེད་དུ་མཛད་པ་ན་ཡང་འབྱུང་། ལུང་ཆེན་ངེས་པས་བསྟན་པ་ན་ཡང་འབྱུང་། ལས་རྒྱུན་ཡོངས་སུ་གཅོད་པ་ན་ཡང་འབྱུང་། དགོངས་པ་རྣམ་པར་བགྲོ་བ་ན་ཡང་འབྱུང་། ཞེས་གསང་སྔགས་འབྱུང་བའི་དུས་བཅུ་གཉིས་གསུངས་པའི་ནང་ནས་དང་པོ་རྨོངས་པ་གདུང་བ་སེལ་པ་ན་ཡང་འབྱུང་། ཞེས་ལུང་བསྟན་པ་ལྟར་སྟོན་པ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་འདས་པ་ན་དམ་པའི་རིགས་ཅན་སེམས་དཔའ་ཆེན་པོ་ལྔ་ནང་དུ་ཡང་དག་འཇོག་ལས་ལངས་པ་དང་། འཇིག་རྟེན་གྱི་སྟོན་པ་ནུབ་པར་གྱུར་པ་མཐོང་ནས་ཡིད་གདུང་སྟེ་རང་རང་གི་མངོན་པར་ཤེས་པས་ལང་ཀའི་ཡུལ་གྱི་གྲོང་རྡལ་གྱི་མཚོ་གླིང་རི་མ་ལ་ཡ་གནམ་ལྕགས་ཡོད་པའི་རྩེར་འདུས་ཏེ། ཨེ་མ་འོ་ཀྱི་ཧུད་ཨེ་མའོ་ཀློང་། །སྟོན་པ་སྒྲོན་མའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཅེས་པ་ལ་སོགས་པའི་གདུང་བ་བརྟོན་པའི་ཚིག་དེ་རྣམས་ཕྱོགས་བཅུའི་རྒྱལ་བ་རྣམས་ཀྱིས་གསན་ནས་ལྕང་ལོ་ཅན་གྱི་ཕོ་བྲང་དུ་འདུས་ཏེ་གསང་བའི་བདག་པོ་ལ། གསང་པ་པོ་ཡི་བདག་པོ་ཁྱོད། །སྔོན་གྱི་གོ་ཆ་ཡལ་ལམ་ཅི། །འཇིག་རྟེན་སྡུག་བསྔལ་མི་ཤེས་སམ། །སྙིང་རྗེའི་ས་ལ་བབས་ནས་ཀྱང་། །འཇིག་རྟེན་གདུང་བ་བསལ་བར་རིགས། །ཅེས་བསྐུལ་བ་དང་། གསང་བའི་བདག་པོ་གདན་ལས་བཞེངས་ནས། རྒྱལ་བས་འབྱུང་བར་ལུང་བསྟན་པའི། །བསོད་ནམས་ཆེན་པོའི་སྐལ་ཅན་རྣམས། །སྤྲུལ་པས་ཇི་ལྟར་ལུང་བསྟན་བཞིན། །ད་ལྟ་དུས་ལ་འདིར་བབས་ཀྱིས། །བསྟན་པའི་སྙིང་པོ་དམ་པ་ཞིག །ཇི་ལྟར་བཤད་ཅིང་ལུང་བསྟན་བཞིན། །སྐལ་ལྡན་ཅན་ལ་བགྲོ་བར་བྱའོ། །ཞེས་གསུང་ནས་རྨད་དུ་བྱུང་བའི་རྫུ་འཕྲུལ་གྱི་ཆོ་འཕྲུལ་དང་བཅས་ཏེ་རི་བོ་མ་ལ་ཡའི་རྩེར་དམ་པའི་རིགས་ཅན་ལྔ་དང་། རིག་འཛིན་འདུས་པ་ཕལ་མོ་ཆེའི་དབུས་སུ་བྱོན་ནས་སྔར་འོག་མིན་དུ་སྟོན་པ་རིགས་དྲུག་པའི་རྣམ་པས་གསུངས་པའི་གསང་བ་བླ་ན་མེད་པའི་རྒྱུད་སྡེ་མཐའ་དག་སླར་ཡང་བཤད་པར་མཛད་དོ། །གཉིས་པ་ནི། དུས་འདིའི་ཚེ་ན་ཡོ་ག་རྣམ་པ་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་སྤྱི་ཁྲུས་ཆེན་པོ་ཞེས་གསུང་བའི་མན་ངག་ངན་སོང་དོང་སྤྲུགས་ཀྱི་རྒྱུད་ཇི་ལྟར་བྱུང་བའི་གླེང་གཞི་ནི། གནས་ཕུན་སུམ་ཚོགས་པ་རི་བོ་མ་ལ་ཡ་གནམ་ལྕགས་ཡོད་པའི་རྩེ་མོ། སེང་གེའི་ཟ་འགྲམ་ལྟ་བུར་གྱུར་པའི་གནས། དུས་གསུམ་གྱི་རྒྱལ་བ་རྣམས་ཀྱིས་བྱིན་གྱིས་བརླབས་པའི་རིན་པོ་ཆེའི་ཁང་པ་རང་བྱུང་དུ་གྲུབ་པ་ན་ཞེས་པ་སྟེ། སྤྱི་མདོ་ལས། མི་ཡི་གནས་ཀྱི་འཇིག་རྟེན་ཁམས། །གླིང་བཞི་པ་ལས་འཛམ་གླིང་གི། །དྲག་ཤུལ་ཅན་ཞེས་བྱ་བའི་རི། །གནོད་སྦྱིན་འདུ་བའི་ས་ཡིན་ཏེ། །ཆོས་འཛིན་རིགས་ཀྱི་གྲུབ་གནས་སུ། །ཞེས་གསུངས་པ་ལྟར་རོ། །སྟོན་པ་ཕུན་སུམ་ཚོགས་པ་བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ། སྐུ་གསུམ་གྱི་སྟོན་པ་རྣམས་ཀྱི་གསུང་གི་ཚོགས་མ་ལུས་པར་སྡུད་ཅིང་། བྱང་ཆུབ་སེམས་དཔའ་དང་འགྲོ་བ་རྣམས་ཀྱི་བླ་མ་ཆེན་པོར་གྱུར་པ་སྟེ་གསང་བའི་བདག་པོ་ཕྱག་ན་རྡོ་རྗེའོ། །འཁོར་ཕུན་སུམ་ཚོགས་པ་ནི་ཐེག་པ་ཆེན་པོའི་རིགས་ཅན། ལང་ཀའི་བདག་པོ་བློ་གྲོས་ཐབས་ལྡན། ཀླུའི་རྒྱལ་པོ་གཙུག་ན་རིན་ཆེན་བློ་གྲོས་རྒྱ་མཚོ། ཚངས་པ་གཙུག་ཕུད་འཛིན་བློ་གྲོས་མཐའ་ཡས། གནོད་སྦྱིན་སྐར་མདའ་གདོང་བློ་གྲོས་དད་སེལ། དྲི་མ་མེད་པར་གྲགས་པ་བློ་གྲོས་རབ་ཞི་ལ་སོགས་ཏེ་རིག་པ་འཛིན་པའི་ཚོགས་མཐའ་ཡས་པ་རྣམས་སོ། །དེ་ལྟར་ཡང་། དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་དཔའ་དམན་པའི་ལུས། །ལངྈའི་བདག་པོ་ལ་སོགས་ལ། །ལག་ན་རྡོ་རྗེས་སྣང་བར་འགྱུར། །ཞེས་པ་ལྟར་རོ། །ཆོས་ཕུན་སུམ་ཚོགས་པ་ནི། བྱ་སྤྱོད་རྣལ་འབྱོར་བླ་མེད་པའི། །རྒྱུད་ལ་གནས་པའི་རྣལ་འབྱོར་པའི། །གཞི་འཛིན་སྲུང་བ་སྲོག་འདྲ་ཡི། །ཉམས་ཆགས་བསྐང་བཤགས་ཆོ་ག་རྣམས། །ཅེས་པ་ལྟར་ཡོ་ག་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་སྤྱི་ཁྲུས་ཆེན་མོ་ལུང་དང་མཐུན་པའི་མཚན་དམ་ཚིག་ཐམས་ཅད་ཀྱི་ཉམས་ཆགས་བསྐང་བའི་ལུང་། རྒྱུད་དང་མཐུན་པའི་མཚན་བཤགས་པ་ཐམས་ཅད་ཀྱི་རྒྱུད་མན་ངག་དང་མཐུན་པའི་མཚན་དྲི་མ་མེད་པའི་རྒྱལ་པོ་སྟེ། མཚན་གསུམ་དང་ལྡན་པའི་བཤགས་པ་རྣམས་ཀྱི་རྒྱུད་ཆེན་པོ་ལེའུ་བཅུ་དྲུག་པའི་བདག་ཉིད་ཅན་འདི་ཉིད་དོ། །དུས་ཕུན་སུམ་ཚོགས་པ་ནི། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ཞེས་པ་ལྟར་སྟོན་པ་གཤེགས་ནས་ལོ་ཉི་ཤུ་རྩ་བརྒྱད་སོང་བ་མ་ལ་ཡའི་རྩེ་མོར་སྟོན་འཁོར་ཚོགས་པའི་དུས་སུའོ། །གསུམ་པ་ནི། དེའི་ཚེ་འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུ་ཛ་རས་སྟན་ལས་ལངས་ཏེ་ཕྱག་རྣལ་འབྱོར་གྱི་ལུགས་སུ་བྱས་ནས། ཀྱཻ་ཧོ། དཔལ་ལྡན་གསང་བའི་བདག །ཅེས་པ་ལ་སོགས་པ་ཞུས་ཏེ་གླེང་བསླང་བའི་ལན་དུ་གསང་བའི་བདག་པོས། ཀྱཻ་ཧོ་དམ་པའི་རིགས་ཅན་རྣམས། །དམ་ཚིག་ས་གཞི་ལྟ་བུ་ལ། །ཐམས་ཅད་འབྲས་བུ་ལོ་ཏོག་སྨིན། །གཞི་སྲུང་སོ་ནམ་ཐབས་འབད་པ། །ཁྱོད་ལ་བཤད་ཀྱིས་ལེགས་པར་ཉོན། །ཞེས་གསུངས་ནས་བཤད་པར་དམ་བཅས་ཏེ། སྔོན་འོག་མིན་ལ་སོགས་པའི་གནས་རྣམས་སུ་རྒྱུད་དག་པའི་སེམས་དཔའ་དང་མ་དག་པའི་རུ་ཏྲ་ལ་སོགས་པའི་ངོར་བདེ་གཤེགས་ཞི་ཁྲོ་དང་། རིག་འཛིན་ཕོ་མོ་རྣམས་ཀྱིས་གསུངས་པའི་བཤགས་པ་རྣམས་ཕྱོགས་གཅིག་ཏུ་བསྡུས་ཏེ། ཐེག་པ་ལམ་ཞུགས་ཀྱི་བཤགས་པ་དང་། ན་རག་དོང་སྤྲུགས་ཀྱི་བཤགས་པ་དང་། བརྗོད་མེད་དང་། དམ་ཚིག་ཉེར་བརྒྱད། རྡོ་རྗེ་དཔལ་ཆེན། ཡེ་ཤེས་མཁའ་འགྲོ། ཞི་བ་སངས་རྒྱས། ཁྲོ་བོ་ཁྲག་འཐུང་། རུ་ཏྲའི་སྨྲེ་བཤགས། རྒྱུད་ལུང་མན་ངག་གི་བཤགས་པ། ལྟ་བའི་ཀློང་བཤགས། ཐབས་ལམ་དབང་གི་བཤགས་པ། འབྲས་བུའི་དོན་རྟོགས་སྐུ་གསུང་ཐུགས་སུ་བྱུང་བའི་བཤགས་པའི་བར་གྱིས་རྒྱུད་ཀྱི་གཞུང་དོན་ལེའུ་བཅུ་གསུམ་གསུངས་པ་དང་། དེའི་སྔོན་དུ་གླེང་གཞི་གླེང་བསླང་གི་ལེའུ་གཉིས་ཏེ་ལེའུ་བཅོ་ལྔ་པ་ཡན་ཆད་རྫོགས་པའི་རྗེས་སུ། རྒྱུད་རྫོགས་པའི་བྱ་བ་སྟོན་པ་ལེའུ་ཐ་མ་བཅུ་དྲུག་པ་འདི་ཉིད་གསུངས་ཏེ། དེ་ལ་ཡང་སྟོན་པས་འཁོར་ལ་རྒྱུད་གཏད་པ་དང་། འཁོར་རྣམས་ཀྱིས་རྗེས་སུ་ཡི་རང་བའི་བཤགས་པ་ཕུལ་བ་གཉིས་ལས། འདིར་ཕྱི་མ་འཆད་པ་ལ་འཁོར་གྱི་གཙོ་བོ་རྣམས་མཉེས་ནས་སྐུ་གསུང་ཐུགས་ལ་བཤགས་པ་གསུངས་པ་དང་། འཁོར་ཕལ་པ་རྣམས་ཀྱིས་སྤྱི་བཤགས་ཕུལ་བ་གཉིས་ལས། དང་པོ་ལ། བཤགས་ཡུལ་མངོན་དུ་བྱ་བ་དང་། བཤགས་པ་དངོས་གཉིས་ལས། དང་པོ་ནི། འདས་པ་དང་མ་འོངས་པ་དང་ད་ལྟའི་དུས་གསུམ་དུ་གཤེགས་ཤིང་འབྱོན་པར་འགྱུར་བའི་སྟོན་པ་ལམ་བདེ་བ་ནས་འབྲས་བུ་བདེ་བར་གཤེགས་ཤིང་བདུད་བཞིའི་གཡུལ་ལས་རྒྱལ་བའི་སངས་རྒྱས་བཅོམ་ལྔན་འདས་འཁོར་ས་ལ་ཞུགས་པའི་བྱང་ཆུབ་སེམས་དཔའ་རིག་པ་འཛིན་པའི་ཚོགས་དང་བཅས་པ་རྣམས་དང་། རྡོ་རྗེའི་ཐེག་པའི་སྒོར་ཞུགས་པའི་དམ་ཚིག་ཅན་མི་དང་མི་མ་ཡིན་པའི་རིགས་པ་འཛིན་པ་རྡོ་རྗེ་ཆོས་སྐྱོང་བའི་སྲུང་མ་ཡེ་ཤེས་ཀྱི་སྤྱན་དང་ལྡན་པ་མ་ལུས་ཤིང་ལུས་པ་མེད་པ་ཐམས་ཅད་བདག་ལ་དགོངས་ཤིང་དམ་ཚིག་ཉམས་ཆགས་ཐམས་ཅད་བཤགས་པའི་དཔང་པོ་མཛད་དུ་གསོལ། ཞེས་གསོལ་བ་བཏབ་པས་ཚོགས་ཞིང་རྣམས་མདུན་གྱི་ནམ་མཁར་མངོན་སུམ་དུ་བཞུགས་པར་བསམ་པའོ། །གཉིས་པ་ལ། སྤྱི་དང་ཡན་ལག་གི་དོན་གཉིས་ལས་དང་པོ་ལ། རྟེན་གཞི་བྱང་ཆུབ་ཀྱི་སེམས། བསྒྲུབ་བྱ་མཐར་ཐུག་གི་འབྲས་བུ། བསྲུང་བྱའི་དམ་ཚིག་གི་རྣམ་བཞག །ཉམས་པའི་ཉེས་དམིགས་དང་བཞི་ལས། དང་པོ་ནི། གསང་སྔགས་དམ་ཚིག་རྩ་བ་དབང་ལ་ཐུག །དབང་སྲོག་རྒྱུད་ལ་འཛིན་པ་དམ་ཚིག་སྟེ། །ཞེས་པ་ལྟར་དམ་ཚིག་དབང་ལ་བརྟེན་ནས་འཐོབ་དགོས་ཤིང་དབང་གི་སྒོར་འཇུག་པའི་དང་པོར་བྱང་ཆུབ་མཆོག་ཏུ་སེམས་བསྐྱེད་པ་ཅི་ནས་ཀྱང་གལ་ཆེ་ཞིང་མེད་དུ་མི་རུང་བ་སྟེ། ལག་ན་རྡོ་རྗེ་དབང་བསྐུར་བའི་རྒྱུད་ལས། ལག་ན་རྡོ་རྗེས་སྨྲས་པ། འཇམ་དཔལ་གང་དག་བྱང་ཆུབ་ཀྱི་སེམས་སྒོམ་པ་ལ་ཞུགས་པ་དང་། གང་གི་ཚེ་དེ་དག་གིས་བྱང་ཆུབ་ཀྱི་སེམས་གྲུབ་པར་གྱུར་པ་དེའི་ཚེ། འཇམ་དཔལ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོར་སྤྱོད་པའི་བྱང་ཆུབ་སེམས་དཔའ་དེ་དག་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་དུ་གཞུག་པར་བྱ་ཡི། གང་དག་གིས་བྱང་ཆུབ་ཀྱི་སེམས་རྫོགས་པར་མ་གྱུར་བ་དེ་དག་ནི་གཞུག་པར་མི་བྱ་སྟེ། དེ་དག་ནི་དཀྱིལ་འཁོར་ཡང་བལྟར་མི་གཞུག་གོ ། དེ་དག་ལ་ཕྱག་རྒྱ་དང་གསང་སྔགས་བསྟན་པར་མི་བྱའོ། །ཞེས་གསུངས་པ་ལྟར་ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་ཐོབ་པར་བྱ་བ་བླ་ན་མེད་པའི་བྱང་ཆུབ། དུས་ཀྱི་ཁྱད་པར་ཚེ་ལུས་གཅིག་ལ་མངོན་དུ་བྱའོ་སྙམ་པའི་བྱང་ཆུབ་ཀྱི་སེམས་རིན་པོ་ཆེ་ནི་དབང་དང་དམ་ཚིག་ཀུན་གྱི་གཞི་རྟེན་དུ་གྱུར་པའོ། །གཉིས་པ་ནི། རྡོ་རྗེ་ཐེག་པའི་ལམ་ལ་བསྙེན་ཅིང་སྒྲུབ་པའི་རིག་པ་འཛིན་པ་རྣམས་ཀྱི་མཐར་ཐུག་གི་བསྒྲུབ་བྱ་ནི་བླ་ན་མེད་པའི་བྱང་ཆུབ་ཆེན་པོ་རྫོགས་པའི་སངས་རྒྱས་ཀྱི་གོ་འཕང་སྟེ། དེ་ཡང་སྐུ་གསུང་ཐུགས་དབྱེར་མི་ཕྱེད་པའི་བདག་ཉིད་རྡོ་རྗེ་འཆང་ཆེན་པོའི་རང་བཞིན་ཏེ་དེ་ཉིད་བསྒྲུབ་པའི་ཕྱིར་རོ། །གསུམ་པ་ནི། དཀྱིལ་འཁོར་དུ་འཇུག་པའི་ཚེ་རང་གི་མེ་ཏོག་གང་ལ་ཕོག་ཅིང་སློབ་དཔོན་གྱིས་གཏད་པའི་ཡི་དམ་གྱི་ལྷ་མི་སྤོང་བ་དང་། གསང་བའི་དོན་སྟོན་པའི་རྡོ་རྗེ་སློབ་དཔོན་མི་སྨོད་པ་དང་། གསང་བ་བཅུ་ལ་སོགས་པའི་རྩ་བ་དང་ཡན་ལག་གི་དམ་ཚིག་གྲངས་སུ་བཅད་ནས་བླ་མས་གནང་ཞིང་རང་གིས་ཚུལ་བཞིན་དུ་མནོས་ཏེ་བླངས་པ་དེ་ལས་འདས་པར་བྱ་བ་མ་ཡིན་ནོ། །བཞི་པ་ནི། ཇི་ལྟར་དམ་བཅས་པའི་བཀའ་ལས་འདའ་བར་མི་བགྱི་སྟེ་ཉམས་པར་མི་བྱའོ། །གལ་ཏེ་ཉམས་པར་གྱུར་ན་རྒྱུ་དམ་ཚིག་ཉམས་པའི་ལས་དང་འབྲས་བུ་རྣམ་པར་སྨིན་པའི་སྐལ་བས་འདིར་ཡང་ཚེ་ཐུང་ཞིང་ནད་མང་བ་སོགས་དང་ཕྱི་མ་སེམས་ཅན་དམྱལ་བ་ཆེན་པོའི་གནས་རྣམས་སུ་བརྒྱུད་ཅིང་སྐྱེ་བར་འགྱུར་རོ། །གཉིས་པ་ཡན་ལག་གི་དོན་ལ་རྩ་བ་དང་ཡན་ལག་གི་ཉམས་ཆགས་བཤགས་པ་གཉིས། དང་པོ་ལ་ཡང་གསུམ་ལས། སྐུའི་ཉམས་ཆགས་བཤགས་པ་ནི། ཀུན་སློང་འདོད་ཡོན་རྙེད་བཀུར་སོགས་ལ་ཆགས་པའི་འདོད་ཆགས་དང་། བླ་མ་དང་མཆེད་ལ་ཁོང་ཁྲོ་བའི་ཞེ་སྡང་། བཀྲི་དྲང་དགོངས་ལྡེམ་གྱི་དོན་སོགས་ལ་རྨོངས་པའི་གཏི་མུག །རིགས་གཟུགས་དབང་ཐང་སོགས་ཀྱིས་སྙེམས་པའི་ང་རྒྱལ། གཞན་གྱི་ཕུན་ཚོགས་མི་བཟོད་པའི་ཕྲག་དོག་ལ་སོགས་པ་གཉེན་པོས་མ་ནོན་པའི་ཉོན་མོངས་དྲག་པོའི་དབང་དུ་ཤོར་ནས་ནོངས་པ་སྟེ་ཉམས་པ་བགྱིས་ནས། རྡོ་རྗེ་ལྟར་གཉིས་སུ་མི་ཕྱེད་པའི་རིག་པ་བྱང་ཆུབ་ཀྱི་སེམས་ལྷ་དང་དཀྱིལ་འཁོར་གྱི་རྣམ་པ་ཐམས་ཅད་པར་འཆར་བའི་བརྗོད་བྱ་རྗོད་བྱེད་ཀྱི་རྒྱུད་དོན་མཐའ་དག་རང་ལ་སྟོན་ཅིང་སློབ་པའི་རྗེ་དཔོན་ཡང་དག་པའི་ལམ་སྟོན་པའི་སྒྲོན་མེ་ལྟ་བུར་གྱུར་པ་དབང་བསྐུར་རྒྱུད་བཤད་མན་ངག་སྟོན་པའི་བླ་མ་རྣམས་ལ་སྙིང་ཐག་པ་ནས་མ་དད་ཅིང་ལོག་པར་ལྟ་བས་རེ་ལྟོས་ཀྱི་སེམས་ཐག་བཅད་དེ་དངོས་སུ་བརྙས་བཅོས་དང་ལྐོག་ཏུ་སྨད་པ་སོགས་བྱེད་ཅིང་དམ་ཚིག་ཉམས་པ་དང་། དུས་སྔ་ཕྱི་ལ་མ་ལྟོས་པར་བླ་མ་གཅིག་དང་དཀྱིལ་འཁོར་གཅིག་པས་མཚོན་རྡོ་རྗེ་ཐེག་པའི་བསྲུང་བྱའི་དམ་ཚིག་གཅིག་གིས་བསྡུས་པའི་རྡོ་རྗེའི་སྤུན་དུ་གྱུར་པའི་མཆེད་ལྕམ་རྣམས་ཇི་སྲིད་བྱང་ཆུབ་སྙིང་པོའི་བར་དུ་སྡོང་བུ་དང་མེ་མར་གྱི་འོད་བཞིན་གཅིག་ལ་གཅིག་ལྟོས་ཀྱི་སྒོ་ནས་འགྲོག་ཅིང་ལམ་སྒྲུབ་དགོས་པ་དེ་ལ་ཀུན་སློང་ངན་པའི་དབང་གིས་རྒྱུ་རྫས་ལ་བརྣབ་སེམས་དང་ལུས་སྲོག་ལ་གནོད་སེམས་མཛད་སྤྱོད་ལ་ལོག་པར་ལྟ་བའི་དབང་གིས་ངན་སྨྲས་སྐུར་འདེབས་ཟུར་ཟ་ཁྱད་གསོད་བརྡེག་བཙོག་ལ་སོགས་རང་གིས་བགྱིས་པ་དང་གཞན་ལ་བགྱིད་དུ་སྩལ་ཀྱང་རུང་སྟེ་སྙིང་ཐག་པ་ནས་ལྟོས་མེད་ཀྱི་འདུ་ཤེས་སྐྱེས་ནས་བརྩེ་གདུང་གྱི་འདྲེལ་ཐག་གཅོད་པ་སྟེ། འདི་གཉིས་པོས་རྡོ་རྗེ་སྐུ་ཡི་དམ་ཚིག་ལས་ཉམས་ཤིང་རྩ་བའི་ལྟུང་བར་འགྱུར་ཏེ། ཚེ་འདིར་ཡང་ལུས་ལ་མཛེ་ཤུ་ལ་སོགས་པའི་ནད་དང་སྡུག་བསྔལ་འབྱུང་ཞིང་ཕྱི་མར་རྡོ་རྗེའི་དམྱལ་བ་ཆེན་པོའི་ཡང་གཏིང་དུ་ཐར་བའི་དུས་མེད་པར་ལུས་གཤགས་གཏུབ་དང་བསྲེགས་བཅད་ཀྱི་ཚོར་བ་དྲག་པོ་མྱོང་བ་དང་། གལ་ཏེ་མིར་སྐྱེས་ཀྱང་དབང་པོ་དང་ཡན་ལག་མ་ཚང་བར་འགྱུར་ཞིང་རིགས་དམན་པ་དང་། ལུས་ལ་ནད་དང་མཚོན་གྱིས་འདེབས་པ་སོགས་ཀྱིས་གདུངས་ཤིང་། སྐུའི་བྱིན་རླབས་དང་དངོས་གྲུབ་མི་འཐོབ་པར་སྐུ་རྡོ་རྗེ་འགྲུབ་པའི་རིགས་དང་སྐལ་བ་ཆད་པར་འགྱུར་རོ། །དེ་ལྟ་བུའི་ཉེས་དམིགས་དྲན་པས་འཇིགས་སེམས་དང་འགྱོད་པ་དྲག་པོས་མི་གསང་མི་སྦེད་པར་ངག་ཏུ་བསྒྲགས་པས་མཐོལ་ཞིང་ཕྱིན་ཆད་མི་བགྱིད་པའི་སྡོམ་སེམས་བརྟན་པོས་ཉེས་པ་དང་རང་རྒྱུད་སོ་སོར་ཕྲལ་ཏེ་བཤགས་པར་བགྱི་བའོ། །གཉིས་པ་གསུང་གི་ཉམས་ཆགས་བཤགས་པ་ནི། རང་གིས་དབང་ཐོབ་ཅིང་ཡི་དམ་དུ་བཅས་པའི་ལྷག་པའི་ལྷ་གང་ཡིན་པ་དེའི་སྐུ་ཕྱག་རྒྱའི་མངོན་རྟོགས་ཉིན་རེ་བཞིན་གསལ་བར་མ་བསྒོམ་པ་དང་། སྙིང་པོ་སྔགས་ཀྱི་བསྙེན་པ་གྲངས་ཚང་ཞིང་རྒྱུན་མི་འཆད་པར་མ་བཟླས་པས་གྲངས་དུས་ལས་ཆད་པ་དང་། དེ་ཡང་བརྩོན་འགྲུས་རབ་ཀྱིས་ཉིན་མཚན་གྱི་ཐུན་དྲུག །འབྲིང་གིས་ཟླ་བ་གཅིག་གི་ནང་ཡར་ངོ་མར་ངོའི་ཉ་སྟོང་གཉིས་བརྒྱད་གཉིས་ཚེས་བཅུ་གཉིས་དང་དུས་དྲུག །ཐ་མས་ཁ་ཅིག་གི་ནང་དུ་དུས་དྲུག་དེ་རྣམས་སུ་ཚོགས་དང་སྦྱིན་སྲེག་སོགས་ལས་ཀྱི་མཆོད་པ་བྱ་བ་དང་། ཁྱད་པར་དུ་བསྙེན་སྒྲུབ་གཉིས་ཀྱི་ལས་གཞུང་བསྲངས་ཏེ། ཕྱི་ཡོ་བྱད་ཚོགས་ཀྱིས་བསྐང་བ། ནང་ཕུང་པོ་རྟེན་གྱིས་བསྐང་བ། གསང་བ་བྱང་ཆུབ་སེམས་ཀྱིས་བསྐང་བའི་ཆོ་ག་རྣམས་མ་བགྱིས་ཏེ་སྟོན་པའི་བཀའ་ལྟར་མ་ལྕོགས་པ་དང་། གསང་སྔགས་ཀྱི་གཞུང་ནས་གསུངས་པ་བཞིན་རྔོ་མ་ཐོགས་ཏེ་ལག་ཏུ་མ་ལོན་པ་སོགས་གསུང་གི་དམ་ཚིག་ཉམས་པར་གྱུར་པས། ཚེ་འདིར་ཡང་ངག་ལ་ནུས་པ་མི་འབྱུང་ཞིང་ཕྱི་མར་དིག་ལྐུགས་སུ་འགྱུར་བ་དང་། གསུང་གི་བྱིན་རླབས་དང་དངོས་གྲུབ་མི་འཐོབ་པར་གསུང་རྡོ་རྗེ་འགྲུབ་པའི་རིགས་དང་སྐལ་བ་ཆད་པར་འགྱུར་རོ། །དེ་ལྟར་ཤེས་ནས་གནོང་འགྱོད་དྲག་པོས་མཐོལ་ཞིང་བཤགས་པར་བགྱིའོ། །གསུམ་པ་ཐུགས་ཀྱི་ཉམས་ཆགས་བཤགས་པ་ནི། བླ་མ་རྡོ་རྗེ་སློབ་དཔོན་རྙེད་བཀུར་སོགས་ལ་མི་གཟིགས་པའི་ཐུགས་བྱམས་པ་ཆེན་པོ་དང་ལྡན་པས་བཀའ་དྲིན་གྱིས་རྗེས་སུ་བཟུང་སྟེ། རྡོ་རྗེ་འཆང་ནས་རྩ་བའི་བླ་མའི་བར་དུ་ཞལ་ནས་སྙན་ཁུང་དུ་བརྒྱུད་དེ་སེམས་ཀྱི་དཀྱིལ་དུ་བཞག་པའི་ཐུགས་ཀྱི་སྙིང་ཁུར་གྱུར་པའི་གསང་བའི་མན་ངག་ཟབ་མོ་རྣམས་རང་ལ་བྱིན་ནས་དམ་ཚིག་གཅིག་ཏུ་འདྲེས་པར་གྱུར་པ་ན། སླར་ཡང་གསང་བར་བྱ་བའི་མཚམས་ལས་འདས་ནས། ལྟ་བ་ཟབ་མོ། སྤྱོད་པ་བརླང་པོ། ཡི་དམ་ལྷ་ཡི་མཚན་དང་སྔགས། གྲུབ་པའི་རྟགས་མཚན་རྣམས་ཏེ་གསང་བཞི། སྒྲུབ་པའི་གནས་དུས་གྲོགས་དང་རྫས་ཏེ། བར་གསང་བཞི། གསང་འོས་གཉེར་གཏད་གཉིས་ཏེ་གསང་བ་བཅུ་སོགས་གསང་བར་བྱ་བའི་དོན་རྣམས་སྣོད་མ་ཡིན་པ་རྣམས་ལ་འཆོལ་བར་སྨྲ་བ་ལ་སོགས་རྡོ་རྗེ་ཐུགས་ཀྱི་དམ་ཚིག་ཉམས་པས། ཚེ་འདི་དང་ཕྱི་མར་སེམས་སྨྱོ་འབོག་ཏུ་འགྱུར་ཞིང་། ཐུགས་ཀྱི་བྱིན་རླབས་དང་དངོས་གྲུབ་མི་འཐོབ་པར། ཐུགས་རྡོ་རྗེའི་རིགས་དང་སྐལ་བ་ཆད་པར་འགྱུར་རོ། །དེ་ལྟ་བུའི་ཉམས་ཆགས་རྣམས་ལ་སྙིང་ནས་འགྱོད་པས་མཐོལ་ཞིང་བསྡམས་པས་བཤགས་པར་བྱའོ། །གཉིས་པ་ཡན་ལག་གི་ཉམས་ཆགས་བཤགས་པ་ནི། འཁོར་བ་དང་མྱང་འདས། བདག་དང་ལྷ། གཙང་བ་དང་རྨེ་བ། སྤང་བྱ་དང་གཉེན་པོའི་ཆོས་རྣམས་དག་མཉམ་ཆོས་ཉིད་གཅིག་གི་རང་བཞིན་དུ་མ་རྟོགས་པའི་དབང་གིས་ཡན་ལག་གི་དམ་ཚིག་རྟོགས་བྱ་ལྟ་བའི་དམ་ཚིག་ལྔ། བསྒོམ་བྱ་སྒྲུབ་པའི་དམ་ཚིག་ལྔ། སྤྱད་བྱ་སྤྱོད་པའི་དམ་ཚིག་བཅོ་ལྔ་སྟེ་ཉི་ཤུ་རྩ་ལྔ་པོ་རྣམ་པར་ཉམས་ཤིང་འདས་པ་ཐམས་ཅད་མཐོལ་ཞིང་བཤགས་པར་བྱ་བའོ། །མདོར་ན་ལུས་ཀྱི་སྒོ་ནས་བསྲུང་བར་བྱ་བ་སྲོག་གཅོད་མ་བྱིན་ལེན་དང་ལོག་པར་གཡེམས་པ་སོགས་སྤང་བྱ་ལས་འདས་པ། བླ་མ་མཆེད་ལྕམ་ལ་གུས་པས་བཀུར་སྡི་རིམ་གྲོ་མ་བགྱིས་པ་སོགས་སྒྲུབ་བྱ་ལས་འདས་པས་སྐུ་ཡི་དམ་ཚིག་ལས་ཉམས་པ་དང་། ངག་གི་སྒོ་ནས་རྫུན་ཕྲ་མ་ཚིག་རྩུབ་ངག་འཆལ་སོགས་སྤང་བྱ་ལས་འདས་པ། བླ་མ་མཆེད་ལྕམ་ལ་བསྔགས་པ་བརྗོད་པ་ཁ་ཏོན་བཟླས་བརྗོད་སོགས་ངག་གི་སྒྲུབ་བྱ་ལས་འདས་པས་གསུང་གི་དམ་ཚིག་ཉམས་པ་དང་། ཡིད་ཀྱི་སྒོ་ནས་བརྣབ་སེམས་གནོད་སེམས་ལོག་ལྟ་སོགས་སྤང་བྱ་ལས་འདས་པ། བླ་མ་དང་མཆེད་ལྕམ་ལ་དག་སྣང་དང་མོས་གུས་སེམས་ཅན་ལ་བྱམས་དང་སྙིང་རྗེ་སོགས་སྒྲུབ་བྱ་ལས་འདས་པའི་སྐུ་གསུང་ཐུགས་ཀྱི་དམ་ཚིག་ཉམས་པ་སྟེ་ཕྱོགས་མཐུན་གྱི་ཉེས་ལྟུང་ཐམས་ཅད་མཐོལ་ཞིང་བཤགས་པར་བགྱིའོ། །ཞེས་གསུངས་ཏེ་རྩ་བ་ཡན་ལག་གི་དམ་ཚིག་རྣམས་ཉེ་བར་བསྡུས་ནས་དེ་དག་དང་འགལ་བའི་ཉམས་ཆགས་བཤགས་པའི་སྒོ་ནས་རྒྱུད་གསུང་བ་ལ་རྗེས་སུ་ཡི་རངས་པར་མཛད་པའོ། །དེ་ནས་འཁོར་ཕལ་པ་རྣམས་ཀྱིས་ཀྱང་སྤྱི་བཤགས་འདི་ལྟར་གསུངས་ཏེ། བྱིན་རླབས་ཀྱི་རྩ་བ་བླ་མ་སྟེ་སྔགས་ཀྱི་སྒོར་ཞུགས་པའི་རྣལ་འབྱོར་ཕོ་མོ་རྣམས་ཀྱིས་རྗེ་དཔོན་རྒྱལ་པོ་ལྟར་བཀུར་པའི་གནས་སུ་གྱུར་ཅིང་བརྒྱུད་པ་ལ་དམ་ཚིག་གི་སེལ་མ་ཞུགས་པས་རིགས་ཀྱིས་བཙུན་པ་བླ་མ་རྡོ་རྗེ་སློབ་དཔོན་རྣམས་ཀྱི་སྤྱན་ལམ་དུ། ཆོས་ཀྱི་སྐུ་དྲིན་ཞུ་ཞིང་གསོ་བའི་རྟེན་མཎྜལ་དང་མེ་ཏོག་ཚོགས་དང་ཟང་ཟིང་གི་མཉེས་པའི་ཡོ་བྱད་ཀྱི་འབྱོར་བའི་རྒྱུ་ཚོགས་ཆུང་ཞིང་ངན་པར་གྱུར་པ་ཐམས་ཅད་མཐོལ་ལོ་བཤགས་སོ། །དངོས་གྲུབ་ཀྱི་རྩ་བ་ཡི་དམ་སྟེ། མོས་པའི་ལྷ་དང་བབས་པའི་ལྷ་དང་ལྷག་པའི་ལྷ་ཞེས་གྲགས་པའི་ཡི་དམ་ཞི་ཁྲོའི་ལྷ་ཚོགས་རྣམས་ཀྱི་སྤྱན་ལམ་དུ། ལྷ་ལ་རང་རྒྱུད་དུ་བལྟས་པའི་དབང་གིས་མཆོག་དམན་དང་ཁྱད་པར་དུ་བཟུང་ནས་མངོན་པར་རྟོགས་པའི་རིམ་པ་འགའ་ཞིག་སྤོང་ཞིང་འགའ་ཞིག་ལེན་པར་བགྱིས་ཏེ་དམ་བཅའ་མི་བརྟན་པའི་ཉམས་པ་ཐམས་ཅད་མཐོལ་ཞིང་བཤགས་སོ། །ཕྲིན་ལས་ཀྱི་རྩ་བ་མཁའ་འགྲོ་དང་ཆོས་སྐྱོང་སྟེ། སྤྱིར་རྡོ་རྗེ་མཁའ་འགྲོ་བླ་མ། ཡེ་ཤེས་མཁའ་འགྲོ་ལོངས་སྐུ། ལས་ཀྱི་མཁའ་འགྲོ་སྤྲུལ་སྐུ། དམ་ཚིག་མཁའ་འགྲོ་རིག་འཛིན་ཕོ་མོ། ཤ་ཟ་མཁའ་འགྲོ་གནས་ཡུལ་དུར་ཁྲོད་ཀྱི་ཞིང་སྐྱོང་སྲུང་མ་རྣམས་ལ་མཁའ་འགྲོ་སྡེ་ལྔར་གྲགས་པ་ལྟར་ན་བླ་མ་སྔོན་དུ་སོང་བས་ལྷག་མ་མཁའ་འགྲོ་སྡེ་བཞི་པོ་རྣམས་སོ། །ཡང་ན་རིགས་ལྔ་ཡེ་ཤེས་ཀྱི་མཁའ་འགྲོའི་འཁོར་དུ་གཏོགས་པའི་འཇིག་འདས་ཇི་ལྟར་རིགས་པའི་ཚུལ་ཅན། དམ་ཚིག་མཁའ་འགྲོ། འཇིག་རྟེན་མཁའ་འགྲོ། ཤ་ཟ་མཁའ་འགྲོ། སྣ་ཚོགས་མཁའ་འགྲོ་སྟེ་སྡེ་བཞི་པོ་རྣམས་ཀྱི་སྤྱན་ལམ་དུ། དཀྱིལ་འཁོར་གཉེན་པོའི་སྒོར་སྤྱི་དང་བྱེ་བྲག་གི་དམ་ཚིག་ཁས་བླངས་ཤིང་དམ་བཅས་པ་ལས་ཉམས་ཤིང་ཚུལ་བཞིན་མ་བགྱིས་པ་ཐམས་ཅད་མཐོལ་ཞིང་བཤགས་སོ། །ཕོ་མོ་མ་ནིང་གི་རྒྱུད་གསུམ་དུ་གཏོགས་པའི་ཆོས་སྐྱོང་སྲུང་མ་རྣམས་ཀྱི་སྤྱན་ལམ་དུ། བར་ཆད་སེལ་ཞིང་བསྟན་པ་སྲུང་བའི་ཆེད་དུ། ཕྱི་ནང་གི་གཏོར་མ་ནར་མར་མི་གཏོང་བར་ལོ་དང་ཟླ་བ་ལ་འགྱངས་པར་གྱུར་པ་མཐོལ་ཞིང་བཤགས་སོ། །སྔར་དང་ད་ལྟ་ཕྱི་མའི་དུས་གསུམ་དུ་ལུས་སེམས་བསྐྱེད་ཅིང་འཇིག་རྟེན་སྟོན་པའི་ཕ་མ་དྲིན་ཅན་རྣམས་ཀྱི་སྤྱན་ལམ་དུ། ཚུར་ལ་དྲིན་གྱིས་བསྐྱངས་པའི་ལན་དུ་ཕར་ལ་དྲིན་ལན་ཆོས་ཀྱིས་མ་ལོན་ཏེ་དྲིན་མ་འཁོར་བའི་ཉེས་པ་ཐམས་ཅད་མཐོལ་ལོ་བཤགས་སོ། །ཆོས་རྡོ་རྗེའི་ཐེག་པའི་སྒོར་ཞུགས་པའི་མཆེད་སྤྱི་དང་བླ་མ་དང་དཀྱིལ་འཁོར་གཅིག་པའི་ལྕམ་དྲལ་ཉེ་བ་རྣམས་ཀྱི་སྤྱན་ལམ་དུ། དམ་ཚིག་གི་བརྩེ་གདུང་ཆུང་བས་ཕན་གྲོགས་དང་སྲི་ཞུ་ཆུང་བ་མཐོལ་ལོ་བཤགས་སོ། །ལྷ་དང་དམྱལ་བ་ལ་སོགས་འགྲོ་བ་དྲུག་གི་སེམས་ཅན་རྣམས་ཀྱི་སྤྱན་ལམ་དུ། སྙིང་རྗེ་དང་ཕན་སེམས་ཆུང་བས་ཆོས་དང་ཟང་ཟིང་གིས་ཕན་མ་ཐོགས་པ་ཐམས་ཅད་མཐོལ་ལོ་བཤགས་སོ། །མདོར་ན་ངེས་འབྱུང་གི་བསམ་པས་ལྷག་པའི་ཚུལ་ཁྲིམས་བླངས་ཏེ་རང་རྒྱུད་སྡིག་པ་མི་དགེ་བའི་ཆོས་ལས་སོ་སོར་ཐར་བར་བྱེད་པའི་རིགས་བརྒྱད་པོ་རྣམས་ཀྱི་སྡོམ་པ་དང་འགལ་བའི་ཉེས་ལྟུང་རྣམས་དང་། ཆོས་ཐེག་པ་ཆེན་པོའི་སྒོར་ཞུགས་ནས་བྱང་ཆུབ་སེམས་དཔའ་རྣམས་ཀྱི་བསླབ་པའི་གཞིར་གྱུར་པ་སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་དང་འགལ་བའི་ལྟུང་བ་རྣམས་དང་། རྡོ་རྗེ་ཐེག་པའི་སྒོར་ཞུགས་པའི་རིག་པ་འཛིན་པ་རྣམས་ཀྱི་བསྲུང་བར་བྱ་བ་སྔགས་ཀྱི་དམ་ཚིག་སོགས་བཅས་པ་དང་རང་བཞིན་གྱི་ཁ་ན་མ་ཐོ་བའི་ཉེས་ལྟུང་དུ་གྱུར་པ་ཅི་མཆིས་ཐམས་ཅད་མཐོལ་ཞིང་བཤགས་སོ། །ཇི་ལྟར་ན་ཉེས་དམིགས་དྲན་པས་གནོང་འགྱོད་དྲག་པོས་རང་རྒྱུད་ཀྱི་ཉེས་པ་སུན་ཕྱུང་སྟེ་མི་འཆབ་པར་དག་ལ་བརྗོད་དོ། །གཞན་གྱིས་ཕྱིར་བཅོས་པར་བསྐུལ་བ་སོགས་ལ་གཡོ་སྒྱུའི་སྒོ་ནས་ཉེས་པ་མི་སྦེད་པར་ཉེས་པ་ཅན་ཏུ་ཁས་ལེན་ཏེ། སླན་ཆད་དེ་ད་ཕྱིན་ཆད་སྲོག་ལ་བབས་ཀྱང་བྱ་བ་ངན་པའི་སྡིག་རྒྱུན་གཅོད་ཅིང་སྤོང་བའི་སེམས་ཀྱིས་སྡོམ་པར་བགྱིད་དོ། །གཞན་ཡང་སྐྱེ་བ་ཐོག་མ་མེད་ནས་ད་ལྟའི་བར་དུ་དུས་གསུམ་སྟེ་སྔར་འདས་པའི་དུས་སུ་ལུས་ངག་གིས་བྱས་ཤིང་སེམས་ཀྱིས་བསགས་པར་གྱུར་པ་དང་། ད་ལྟའི་དུས་སུ་བྱེད་ཅིང་གསོག་བཞིན་པ་དང་། མ་འོངས་པའི་དུས་ན་བྱེད་འགྱུར་གྱི་ལས་སེམས་ཀྱིས་བསགས་ཤིང་ཡོད་པའི་སྡིག་པ་དང་སྒྲིབ་པའི་ཚོགས་ཐམས་ཅད་དེ་བཞིན་དུ་མཐོལ་ཞིང་བཤགས་ན། བདག་གི་རྒྱུད་ཚངས་པར་བཤགས་ཡུལ་དམ་པ་ཁྱེད་རྣམས་ཀྱིས་བཟུང་བར་མཛད་དུ་གསོལ། དེ་ལྟར་བཟུང་ནས་དངོས་གྲུབ་ཀྱི་སྣོད་དུ་དགོངས་སྟེ་འགྱུར་མེད་རྟག་པའི་སྐུ། འགགས་མེད་རྡོ་རྗེའི་གསུང་། འཁྲུལ་མེད་བདེ་ཆེན་གྱི་ཐུགས་ལ་སོགས་པ་ཕྱག་རྒྱ་ཆེན་པོ་མཆོག་གི་དངོས་གྲུབ་དང་། མཁའ་སྤྱོད་རལ་གྲི་རིལ་བུ་སོགས། ཐུན་མོང་གི་དངོས་གྲུབ་རྣམས་དུས་ཕྱི་མར་སྡོད་མི་འཚལ་བར་ད་ལྟ་ཉིད་དུ་བསྩལ་བར་མཛད་དུ་གསོལ། །ཞེས་གསུངས་ནས་འཁོར་རྣམས་རྗེས་སུ་ཡི་རངས་པར་གྱུར་ཏོ། །དེ་ལྟར་ན་མདོ་དགོངས་པ་འདུས་པ་ནས་བཤད་པའི་རྩ་བ་དང་ཡན་ལག་གི་དམ་ཚིག་ཉི་ཤུ་རྩ་བརྒྱད་དང་། རྒྱུད་སྒྱུ་འཕྲུལ་དྲྭ་བ་ནས་བཤད་པའི་རྩ་བ་ལྔ་དང་ཡན་ལག་བཅུ། སེམས་ཕྱོགས་རྫོགས་པ་ཆེན་པོའི་ལུགས་ཀྱི་རྩ་བ་སྐུ་གསུང་ཐུགས་ཀྱི་དམ་ཚིག་གསུམ་ལ་ཉེར་བདུན་དུ་དབྱེ་བ་དང་ཡན་ལག་ཉེར་ལྔར་བཤད་པ་རྣམས་ཀྱི་དོན་ཡང་དག་པར་བསྡུས་ཏེ་བཤད་པའི་སྐུ་གསུང་ཐུགས་ལ་བཤགས་པའི་ལེའུའི་འབྲུ་མནན་ཏེ་ཚིག་གི་དོན་བཤད་ཟིན་ཏོ། །། །སྨྲས་པ། ཆོས་རྣམས་ཀུན་གྱི་རང་བཞིན་གཉུགས་མའི་སེམས། །གདོད་ནས་རྣམ་དག་རྒྱལ་བའི་དཀྱིལ་འཁོར་དུ། །ཡེ་ནས་ལྷུན་གྲུབ་ཆེན་པོར་བཞུགས་པ་ཉིད། །ལམ་དུ་བྱེད་པའི་རྡོ་རྗེའི་ཐེག་པ་སྟེ། །དབང་དོན་ལྟ་བའི་ཡེ་ཤེས་རིམ་གཉིས་ཀྱི། །བསྒོམ་པས་བསྐྱངས་ཤིང་ཉེ་རྒྱུས་འཚམས་སྦྱར་ནས། །གྲུབ་གཉིས་འབྲས་བུའི་རང་བཞིན་མངོན་བྱེད་པའི། །གཞི་འཛིན་སྲོག་རྩ་དམ་ཚིག་ཡིན་པར་གསུངས། །དེ་ཕྱིར་ཉམས་མེད་མིག་གི་འབྲས་བཞིན་བསྲུང་། །ཉམས་ན་ཕྱིར་བཅོས་རིན་ཆེན་བུམ་པ་བཟང་། །ཞོམ་པ་འཆོས་ལྟར་གཉེན་པོའི་ཐབས་ཆེ་བས། །གསོ་བར་སླ་ཕྱིར་སྟོབས་བཞིས་བཤགས་པར་མཛོད། །འདིར་འབད་དགེ་བས་བདག་ཅག་མཆེད་དང་ལྕམ། །གསང་བའི་ཐེག་པར་ཞུགས་སོ་ཅོག་རྣམས་ཀྱི། །ཉམས་ཆགས་ཉེས་ལྟུང་དྲི་མ་ཀུན་དག་ནས། །ཟུང་འཇུག་རྡོ་རྗེའི་ས་མཆོག་འགྲུབ་པར་ཤོག །ཅེས་སྐུ་གསུང་ཐུགས་ཀྱི་རྒྱུན་བཤགས་སུ་འཁྱེར་བདེ་བའི་ཚིག་དོན་གྱི་ཟིན་བྲིས་ཉུང་ངུར་དྲིལ་བ་འདི་ནི་དགེ་ཚུལ་འཇིགས་མེད་ཆོས་དར་གྱིས་ལྷ་རྫས་དང་ཡི་གེ་བརྒྱ་པ་འབུམ་ཐེར་སྒྲུབ་པའི་དབྱར་དམ་བཅས་ནན་ཏན་གྱིས་བསྐུལ་བའི་ངོ་མི་ལྡོག་ཙམ་དུ། རྡོ་རྗེའི་ཐེག་པ་ལ་མོས་པས་སློབ་པ་པདྨ་བཛྲ་པས་དཔལ་གྱི་སེངྒེ་རིའི་ཆོས་གྲྭར་བྲིས་པས་རང་གཞན་རྣམས་ཀྱི་དམ་ཚིག་རྣམ་པར་དག་པའི་རྒྱུར་གྱུར་ཅིག། དགེའོ།། དགེའོ།། དགེའོ།།