དྲིས་ལན་མེ་ཏོག་གི་ཆུན་པོ།
༄༅།།དྲིས་ལན་མེ་ཏོག་གི་ཆུན་པོ་བཞུགས།། ན་མ་ཤྲི་ཛྙཱ་ན་ས་ཏྭ་ཡེ། གང་གི་མཁྱེན་དང་བརྩེ་བའི་དཀྱིལ་འཁོར་ནི། །ཤེས་བྱའི་ཁམས་དང་སེམས་ཅན་ཁམས་ཇི་བཞིན། །མུ་མེད་ཆོས་ཀྱི་དབྱིངས་དང་མཉམ་གྱུར་པ། །འཇམ་མགོན་བླ་མས་དགེ་བའི་སྤོབས་པ་སྩོལ། །གང་གི་མཁྱེན་རབ་དག་པའི་མེ་ལོང་དུ། །ཤེས་བྱ་རྟོགས་དཀའི་གཟུགས་བརྙན་མ་ལུས་པ། །གཅིག་ཆར་ཉིད་དུ་མངོན་སུམ་མཛད་པའི་མགོན། །རྒྱལ་སྲས་ཐམས་ཅད་མཁྱེན་དེ་སྙིང་ནས་དྲན། །འདི་ལ་རྨོངས་རྟུལ་གཡེང་བའི་གཞན་དབང་དུ། །གྱུར་པའི་གྲོང་ཉུལ་ཕལ་པའི་སྐྱེ་བོ་ལ། །ལེགས་བཤད་གཏམ་གྱི་སྐྱེས་བཟང་ག་ལ་ཞིག །འོན་ཏང་ཁྱོད་གསུང་མི་ལྡོག་ཆོས་མཐུན་གྱི། །འབེལ་གཏམ་ཡིད་ཀྱི་ཆུ་མཚོར་གང་ཤར་བའི། །ཚིག་ཕྲེང་མེ་ཏོག་ཆུན་པོ་དཀྱུས་གཅིག་ཏུ། །རྣམ་དཔྱོད་སོར་མོས་བསྡམས་ཏེ་འབུལ་ལགས་ན། །བློ་གྲོས་མགུལ་པ་མཛེས་པའི་རྒྱན་དུ་ལོངས། །དེ་ལ་སྤྱིར་བདག་ཅག་གི་སྟོན་པ་ནི་ཤེས་བྱ་མཐའ་ཡས་པ་མཁྱེན་ཅིང་གཉིས་སུ་མེད་པར་གསུང་བའི་བདག་ཉིད་ཅན་པས། གདུལ་བྱའི་གང་ཟག་གི་བློ་དང་མཐུན་པར་ཟབ་པ་དང་རྒྱ་ཆེ་བའི་ཆོས་ཀྱི་རྣམ་གྲངས་ཇི་སྙེད་ཅིག་བསྟན་པ་དག་ཀྱང་། མ་གི་ཉན་ཐོས་ཀྱི་ཐེག་པ་ནས་བཟུང་སྟེ་ཐེག་མཆོག་འོད་གསལ་རྡོ་རྗེ་རྩེ་མོའི་བར་གྱི་རྒྱུ་དང་འབྲས་བུའི་ལྟ་གྲུབ་ཀྱི་རྣམ་བཞག་ཇི་སྙེད་ཅིག་གྲགས་པ་དེ་ཐམས་ཅད་མཐར་ཐུག་རྒྱལ་བ་ཉིད་ཀྱི་དགོངས་པའི་གསང་མཛོད་རྣམ་གྲངས་མ་ཡིན་པའི་བདེན་གཉིས་དབྱེར་མི་ཕྱེད་པའི་དོན། རྟོག་གེའི་ཡུལ་ལས་འདས་ཤིང་རྩོད་པ་ཐམས་ཅད་དང་བྲལ་བ། ཟབ་ཞི་སྤྲོས་པ་དང་བྲལ་བའི་ཡེ་ཤེས་ལ་རིམ་གྱིས་དྲངས་ནས་དངོས་སུ་སྦྱོར་བར་མཛད་པ་ཁོ་ན་ཉིད་དུ་གནས་པས། ཐོག་མཐའ་བར་གསུམ་དུ་འགལ་བའི་ཆ་ཕྲ་མོ་ཙམ་ཡང་ཡོད་མི་སྲིད་ཅིང་། འོག་མ་འོག་མས་སྤྲོས་པ་མ་ཆོད་པའི་ཞེན་པ་རྣམས་གོང་མ་གོང་མས་རྣམ་པར་བཅད་དེ་ལྟ་གྲུབ་ཀྱི་ཁྱད་པར་འདོན་ལ་སྤྲོས་པ་ཆོད་པའི་ཕྱོགས་ལས་བོག་དབྱུང་དུ་མེད་པའི་ཚུལ་ངེས་པར་དྲངས་ནས། ལྟ་གྲུབ་གོང་འོག་ཐམས་ཅད་ཡ་ཆར་མི་བཟུང་བར་གང་ཟག་གཅིག་གི་རྒྱུད་ལ་ལམ་གྱི་མངོན་པར་རྟོགས་པ་སྐྱེ་བའི་རིམ་པ་ལྟ་བུར་གོ་ན། བསྟན་པ་ཐམས་ཅད་འགལ་མེད་དུ་རྟོགས་ཤིང་། རྒྱལ་བའི་དགོངས་པ་བདེ་བླག་ཏུ་རྟོགས་པའི་གནད་ཆེན་པོ་ཞིག་ངེས་པར་ཡོད་དོ། །དེ་ཡང་བྱེ་མདོ་གཉིས་ཀྱི་ཕྱི་དོན་བདེན་གྲུབ་དོན་དམ་དུ་འདོད་པ་དེ་ཉིད་རྣམ་རིག་པས་སེམས་ཙམ་དུ་གཏན་ལ་ཕབ་ཅིང་། དེ་ཡང་དབུ་མ་པས་སྤྲོས་བྲལ་ཆོས་ཉིད་ཀྱི་གཤིས་སུ་གཏན་ལ་འབེབ་པ་དོན་དམ་པའི་བདེན་པ་དང་། རགས་པའི་ཕུང་ཁམས་དང་གཞན་དབང་རྟེན་འདྲེལ་གྱི་རོལ་པར་རིམ་བཞིན་རྣམ་པར་བཞག་པ་ཀུན་རྫོབ་བདེན་པའི་འདོད་ཚུལ་རྣམས་ལ་ངེས་པ་རྙེད་ནས་བདེན་གཉིས་ཀྱི་འཇོག་མཚམས་སྤྱིར་ངེས་པར་བྱས་སྟེ་ཁྱད་གཞི་དབུ་མའི་སྟོང་ཉིད་དང་། རྟེན་འབྱུང་གི་འཇོག་ཚུལ་གྱི་སྟེང་ནས་ཁྱད་ཆོས་འཁོར་འདས་དབྱེར་མེད་ཀྱི་ལྟ་བའམ། སྔ་འགྱུར་པའི་རང་སྐད་དུ་ལྷག་པའི་བདེན་པ་དབྱེར་མེད་བློས་སྤྱོད་ཡུལ་དང་བྲལ་བ་ཞེས་གྲགས་པའི་ཚུལ་གྱིས་རྒྱུ་འབྲས་ཀྱི་ལྟ་བའི་བྱེ་བྲག་འབྱེད་ཅིང་དེ་ལས་ཀྱང་། ཐེག་མཆོག་རྡོ་རྗེ་རྩེ་མོར་སྣང་སྟོང་ཟུང་དུ་འཇུག་པའི་འོད་གསལ་གྱི་ཐིག་ལེ་ཆེན་པོར། མངོན་སུམ་རང་ཐོག་ཏུ་གཏན་ལ་འབེབས་པའི་ཚུལ་རྣམས་མི་འགལ་བར་གནད་གཅིག་ཏུ་འབབ་ཤིང་། གཟུ་བོའི་བློ་ཡིས་ཞིབ་ཏུ་དཔྱད་ན་འོ་མ་ལས་མར་དང་། དེ་ལས་ཞུན་མར་ཉིང་ཁུར་བཏོན་པ་བཞིན་དུ་རྒྱལ་བའི་དགོངས་གསང་མཐར་ཐུག་པའི་བདེན་གཉིས་འཇོག་མཚམས་དཔྱིས་ཕྱིན་པ་ཞིག་ལུགས་འདི་ལ་ཡོད་པ་ཡིན་ནོ། །གཞན་ཡང་སྔགས་ཀྱི་ལྟ་བ་ཡུལ་སྟོང་ཉིད་སྤྲོས་བྲལ་དུ་མཚུངས་པ་ལས། ཡུལ་ཅན་ལྷན་ཅིག་སྐྱེས་པའི་བདེ་བ་ཆེན་པོས་ཁྱད་པར་བྱས་པ་ཡིན་ནོ་ཞེས་པ་དང་། དེ་ཡང་ཤེས་དང་ཤེས་བྱ་རོ་གཅིག་པ་གཉུག་སེམས་ལྷན་ཅིག་སྐྱེས་པའི་ངོ་བོར་གྲོལ་བའི་ཁྱད་པར་སོགས་ཀྱི་ཆོས་སྐད་བྱེ་བྲག་པ་རྣམས་ཀྱང་དོན་འདི་དང་འགལ་མེད་དུ་འཆད་ཤེས་ཤིང་འདིར་འབབ་པར་འགྱུར་བ་ཁོ་ནའོ། །འདི་ལྟར་བདེན་གཉིས་ཀྱི་གོ་བ་སྤྱིར་བཏང་ནས། དམིགས་གསལ་ཀུན་རྫོབ་ཀྱི་བདེན་པ་ལྷར་ལྟ་བའི་ལྷ་དེ་ཡང་གཞི་ལམ་འབྲས་བུའི་སྐབས་ཀྱི་གཞི་དུས་ཀྱི་ལྷ་ཡིན་པ་དང་། དེ་ཡང་རྒྱུ་རྒྱུད་ཀྱི་སྟེང་ནས་འཇོག་ཤེས་པ་དགོས་ཤིང་། གཞན་ཡང་ལྷ་ཡིན་ན་བཞིན་ལག་གི་རྣམ་པ་ཅན་ཡིན་པས་མ་ཁྱབ་པའི་ཕྱིར། སྒོམ་པའི་སྐབས་ཀྱི་ལྷ་ཞལ་ཕྱག་ཅན་སོགས་དང་འཁྲུལ་བར་མི་བྱ་སྟེ། སྔ་འགྱུར་ལུགས་ལ་རང་བཞིན་ཏིང་འཛིན་གཟུགས་བརྙན་སོགས་དཀྱིལ་འཁོར་བདུན་གྱི་དབྱེ་བ་བཤད་པ་དང་། གཞན་ཡང་སྟོང་པའི་ལྷ་དང་། ཡི་གེའི་ལྷ་སོགས་བཤད་པའི་གཞི་དང་དགོངས་པ་རྣམས་ཀྱང་ཤེས་པར་བྱ་དགོས་པ་ཉིད་དོ། །དེ་ལྟར་ན་མཐར་ཐུག་བདེན་པ་དབྱེར་མེད་སྐུ་དང་ཡེ་ཤེས་ཟུང་འཇུག་གི་ཉེར་ལེན། རྒྱུའི་རྡོ་རྗེ་འཛིན་པ་རང་བཞིན་ལྷུན་གྲུབ་ཀྱིས་སངས་རྒྱས་དེ་ཉིད། ཡེ་ནས་རང་ཆས་སུ་བཞུགས་པ་ནི། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་སྒྲིབ། །དེ་བསལ་ན་ནི་སངས་རྒྱས་ཉིད། །ཅེས་དང་། གསང་སྙིང་ལས། ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཞིག །ཅེས་སོགས་གསར་རྙིང་གཉིས་ཀའི་རྒྱུད་སྡེ་མཐའ་ཡས་པ་ཞིག་ནས་བཤད་དོ། །དེ་ལྟ་བུའི་སངས་རྒྱས་དེ་ཡང་ཟུང་འཇུག་གི་ཆོས་ཀྱི་སྐུ་ལ་གོ་དགོས་ཀྱི། སྟོང་རྐྱང་ལ་སངས་རྒྱས་ཀྱི་སྒྲས་བཏགས་པ་དང་། དེ་དྲང་དོན་དུ་བཀྲལ་བ་དང་། ཆོས་སྐུ་སྟོང་པ་ཕྱོགས་གཅིག་ལ་འདོད་པ་སོགས་ནི་དབྱིངས་མ་གོ་བའི་རྣམ་འགྱུར་ཁོ་ནར་ཟད་དོ། །བླ་ན་མེད་པའི་རྒྱུད་སྡེ་ནས་བསྟན་པའི་གཞི་དུས་ཀྱི་ཟུང་འཇུག་བདེན་གཉིས་དང་ཡེ་ཤེས་སུ་ལྟ་ཚུལ་དེ་ལ་ཐོག་མ་ཉིད་ནས་འཇུག་མི་ནུས་པའི་གང་ཟག་སྔགས་ཀྱིས་གདུལ་བྱར་གྱུར་པ་རྣམས་ལ་རྒྱུད་སྡེའི་རིམ་པ་བཞིན་ལྷར་ལྟ་ཚུལ་གཞན་བྱུང་བ་ཡིན་ཏེ། འདི་ལྟར་བྱ་བའི་རྒྱུད་དུ་དག་པ་ཆོས་ཉིད་ཀྱི་ལྷ་དང་། རྣལ་འབྱོར་རྒྱུད་དུ་བྱིན་གྱིས་རླབས་པའི་ལྷ་དང་། བླ་མེད་ཀྱི་རྒྱུད་དུ་ལྷུན་གྱིས་གྲུབ་པའི་ལྷ་ཞེས་འབྱུང་བ་ཡིན་ནོ། །སྤྱོད་པའི་རྒྱུད་དུ་ལྷར་ལྟ་ཚུལ་གཞན་མེད་དེ། ལྟ་སྤྱོད་གོང་འོག་རྗེས་སུ་མཐུན། །ཅེས་པས་སོ། །དེས་ན་ཀྲྀ་ཡ་པས་དོན་དམ་ཡོད་མེད། སྣང་སྟོང་གི་མཐའ་བཞི་དང་བྲལ་བའི་ཆོས་ཉིད་ཙམ་དུ་ལྟ་ཞིང་ཀུན་རྫོབ་ཡེ་ཤེས་བཞིའི་ཡོན་ཏན་ལས་རིགས་གསུམ་གྱི་ལྷར་སྣང་བར་འདོད་དེ། རྒྱུད་ལས། རང་སེམས་མཐའ་བཞི་ཡོངས་བྲལ་བར། །རིག་ཕྱིར་ཡེ་ཤེས་གཞན་ལས་མིན། །རྐྱེན་བསླང་སྣང་བའི་ཡེ་ཤེས་ཀྱིས། །སྣང་བའི་དངོས་པོ་མཐོ་འཇམ་རྩུབ། །དྲུག་ཕྱེད་རིགས་ཀྱི་དཀྱིལ་འཁོར་དུ། །མཐོང་བ་རྣམ་པར་དག་ཅེས་བྱ། །ཞེས་འབྱུང་བ་བཞིན། དཔལ་བརྩེགས་ཀྱི་ལྟ་རིམ་དུ་ཡང་དེ་ལྟར་བཤད་དོ། །ཡོ་ག་པས་དོན་དམ་མཚན་མ་མེད་པའི་དབྱིངས་མངོན་སུམ་རྟོགས་པའི་བྱིན་རླབས་ལས་ཀུན་རྫོབ་རྡོ་རྗེ་དབྱིངས་ཀྱི་ལྷར་ལྟ་བ་ཡིན་ཏེ། ལྟ་རིམ་ལས། ཡོ་ག་དོན་དམ་རྣམ་དག་པའི། །ཆོས་ཀྱི་དབྱིངས་ཀྱི་ཡེ་ཤེས་སུ། །རྟོགས་པའི་བྱིན་རླབས་ལྷར་སྣང་བ། །ཞེས་པས་གསལ་ལོ། །བླ་མེད་ཀྱི་རྒྱུད་ལ་ནང་གསེས་ཡོ་ག་གསུམ་དུ་ཕྱེ་བའི་མ་ཧཱ་ཡོ་ག་པས། དོན་དམ་དེ་བཞིན་ཉིད་རྟོགས་པའི་ཆོ་འཕྲུལ་ལྷར་འདོད་པ་དང་། ཨ་ནུ་པས་བདེ་བ་ཆེན་པོའི་རིག་རྩལ་ལྷར་འདོད་པ་དག་ཀྱང་ལྟ་རིམ་གྱི་དངོས་བསྟན་བཞིན་ནོ། །དེ་དག་གི་སྐབས་སུ་སྐྱེ་བོ་འཁྲུལ་བ་མེད་ཅེས་པ་དང་། སྐྱེ་བོ་ལྷར་མཐོང་འཁྲུལ་ཞེས་པ་དང་། འཁོར་བ་མེད་ཅེས་པ་དང་། སྐྱེ་བོས་བཏགས་པ་འཁྲུལ་ཅེས་པ་རྣམས་དོན་ལ་ད་ལྟའི་སོ་སྐྱེ་སྤྱི་མཐུན་གྱི་སྣང་ངོར་གྲུབ་པའི་ཐ་མལ་གྱི་སྣང་ཞེན་འདི་ཉིད་ཆུ་ལ་རྣག་ཁྲག་ཏུ་མཐོང་བ་དང་། དུང་ལ་སེར་པོར་སྣང་བ་བཞིན་འཁྲུལ་ཤེས་ཀྱི་ངོར་སྣང་བ་ལས་གཤིས་ལ་མ་གྲུབ་ཅེས་པའི་དོན་ཡིན་ནོ། །དེས་ན་གཞི་ལམ་འབྲས་བུ་གང་གི་དུས་སུ་ཡང་བདེན་གཉིས་ཟུང་འཇུག་དབྱེར་མེད་ཀྱི་ངོ་བོར་གནས་པ་ཤེས་དགོས་ལ། ཀུན་རྫོབ་འཁྲུལ་བའི་སྣང་བ་རྣམས། གློ་བུར་བ་གཤིས་ལ་མ་གྲུབ་པར་མདོ་རྒྱུད་མན་ངག་ཐམས་ཅད་གོང་མཐུན་ཚེ། གཤིས་ལུགས་ལ་གནས་པའི་བདེན་གཉིས་ཀྱི་ཡ་གྱལ་དུ་གྱུར་པའི་ཀུན་རྫོབ་དེ་མ་འཁྲུལ་བའི་ཤེས་པ་ཟག་མེད་ལ་སྣང་བའི་སྐུ་དང་ཡེ་ཤེས་ལས་གཞན་དུ་མི་རྙེད་དོ། །གཤིས་དང་གཉུག་མ་སོགས་མ་བཅོས་པའི་དོན་ལ་འཇུག་པས་རང་བཞིན་གྱི་གནས་ཚུལ་ལ་བརྗོད་ཀྱི། གཤིས་ལུགས་ཡིན་ན་སྟོང་པ་ཕྱོགས་གཅིག་པ་ཡིན་སྙམ་པ་དང་། དག་པ་གཉིས་ལྡན་མཐར་ཐུག་པ་ན་ཀུན་རྫོབ་རྣམ་པར་བཅད་པའི་དོན་དམ་ཕྱོགས་ཆད་དུ་འདོད་པ་སོགས་ལ་སྐྱོན་ཆེ་བར་མངོན་ནོ། །ཨ་ནུ་མན་གྱི་ལྷག་པའི་བདེན་གཉིས་དབྱེར་མེད་ཀྱི་འཇོག་ཚུལ་འདི་རྣམས། ཨ་ཏི་པས་ཡས་ནས་གཞལ་ན་ད་དུང་རྣམ་གྲངས་པའི་བདེན་གཉིས་ལས་མ་འདས་པར་མཐོང་སྟེ། ཇི་སྐད་དུ། ཨ་ཏི་ཡོ་ག་བདེན་གཉིས་བྲལ། །ཐམས་ཅད་རང་བྱུང་རང་སྣང་བའི། །ཡེ་ཤེས་མཐའ་གསུམ་བྲལ་བ་ལ། །བཏགས་པ་གཉིས་པོ་གདོད་ནས་མེད། །དེ་ཕྱིར་གསེར་ལ་གསེར་མཐོང་བཞིན། །ཇི་བཞིན་མ་ནོར་བདེན་མཐོང་ཡིན། །ཞེས་གསུངས་ཤིང་རྣམ་གྲངས་མ་ཡིན་པའི་བདེན་གཉིས་དབྱེར་མེད་སྟོན་པར་མཛད་དོ། །དེ་ལ་མཐའ་གསུམ་བྲལ། ཞེས་པ་ནི། བདེན་པ་གཉིས་སུ་རྣམ་པར་ཕྱེ་བའང་བློས་བཏགས་པ་ཙམ་ལས་དོན་ལ་མེད་ན་དེ་གཉིས་ཟུང་དུ་འཇུག་པ་ནི། དེ་ལས་ཀྱང་མེད་པས་ཀུན་རྫོབ་དང་། དོན་དམ་དང་། དབྱེར་མེད་ཅེས་པའི་བློ་མཐའ་གསུམ་ལས་གྲོལ་བའི་རང་བྱུང་གི་ཡེ་ཤེས་བདེན་མཐོང་རྣམ་པར་མི་རྟོག་པའི་ཆོས་ཉིད་བློ་ལས་འདས་པའི་རང་བཞིན་དུ་བསྟན་པར་མཛད་དོ། །ཚུལ་དེ་དག་དཔྱིས་ཕྱིན་པར་མཁྱེན་པར་འདོད་ན་རོང་ཟོམ་པ་ཆེན་པོ་ཆོས་ཀྱི་བཟང་པོས་མཛད་པའི་སྣང་བ་ལྷར་སྒྲུབ་པ་དང་། མན་ངག་ལྟ་བའི་ཕྲེང་བའི་འགྲེལ་བ་སོགས་ལ་གཟིགས་ན་བདེ་བླག་ཏུ་རྟོགས་ནུས་པ་ཡོད་པས་དབྱིངས་བཞུགས་འཚལ། སྨྲས་པ། ས་སྐྱོང་ཤེས་རབ་འོད་བཟང་འཛིན་མའི་ལྟོར། །རང་བྱུང་པདྨའི་ཕྲིན་ལས་འབབ་སྟེགས་ལས། །བབས་པའི་ཞི་བསིལ་ཆོས་ཀྱི་གང་ཆེན་མཚོ། །གངས་ལྗོངས་མཁས་གྲུབ་གདེང་ཅན་གནས་སུ་འཁྱིལ། །དེ་ལས་དྲངས་པའི་ཕྱོགས་ཀྱི་ཡུར་བ་ནི། །གནས་དང་གང་ཟག་གདམས་པའི་མིང་ཆགས་པའི། །ལམ་ལས་ཐོན་པ་སོ་སོའི་ལུགས་མང་པོར། །འཛིན་པའི་རྫིང་དང་ཁྲོན་པ་མང་ཞིག་བྱུང་། །དེ་ཕྱིར་ཆོས་དང་གང་ཟག་དང་པོའི་གདུང་། །མ་འཆོལ་ཁུངས་དང་རིགས་ཀྱིས་བཙུན་པར་གྲགས། །གཞན་དུ་གསར་བྱུང་གློ་བུར་རྡོལ་བ་དག །བསྟན་བཅོས་དང་ནི་འཇིག་རྟེན་ལས་ཀྱང་བརྟགས། །དེ་སྐད་རྙིང་སྔགས་རྒན་པོའི་རིགས་སྐྱེས་པའི། །གཏོ་ཡས་མགོ་བོ་སྐོར་བའི་སྨྱོན་ཐབས་མཁན། །བཏགས་མིང་པདྨ་བཛྲ་འབོད་དེས་ཕུལ། །ལུང་རིགས་གྲྭ་ས་སྐྱོང་རྣམས་དགྱེས་གྱུར་ཅིག །གཅིག་ཏུ་རྨོངས་དང་གཉིས་སུ་ཟ་ཟིས་དྲེལ། །གསུམ་དུ་མ་བརྟག་སྐྱོན་གྱིས་གཏམ་འདི་ལ། །ནོངས་པ་གང་མཆིས་མཁས་པའི་ཚོགས་ལ་བཤགས། །དགེ་བས་རྒྱལ་བའི་དགོངས་གསང་རྟོགས་གྱུར་ཅིག། །། སརྦ་མངྒ་ལཾ།། དགེའོ།།