བསྙེན་ཡིག་སྒྲུབ་ཆོག་གི་སྐོར་ཚོ།

སྔོན་འགྲོ་སྤྱིའི་ཁྲིད་ཡིག་ཐབས་ལམ་ནོར་བུའི་གན་མཛོད།

༄༅། །སྔོན་འགྲོ་སྤྱིའི་ཁྲིད་ཡིག་ཐབས་ལམ་ནོར་བུའི་གན་མཛོད་ཅེས་བྱ་བ་བཞུགས་སོ། །ན་མོ་གུ་རུ། སྐྱབས་ཀུན་འདུས་པའི་ངོ་བོ་རྡོ་རྗེ་འཆང་། །དྲིན་ཆེན་ཆོས་ཀྱི་རྒྱལ་པོར་ཕྱག་འཚལ་ནས། །སྙིང་པོའི་དོན་ལ་འཇུག་འདོད་སྐལ་བཟང་འགར། །ཕན་པའི་བསླབ་བྱར་སེམས་ནས་འདི་ལྟར་གླེང་། །དེ་ལ་རང་ཅག་རྣམས་ཀྱིས་ཚེ་རབས་དུ་མ་ནས་རྣམ་པར་དཀར་བའི་ལས་ཀྱིས་སྒྲུབ་པའི་འབྲས་བུ་དལ་འབྱོར་གྱི་རྟེན་བཟང་འདི་ལྟ་བུ་ཐོབ། བླ་མ་དགེ་བའི་བཤེས་གཉེན་ཁྱད་པར་ཅན་དུ་མའི་ཞལ་མཇལ། གདམས་ངག་མཁའ་འགྲོའི་ཁ་རླངས་མ་ཡལ་ཞིང་། དམ་ཚིག་གི་སེལ་མ་ཞུགས་པའི་བདུད་རྩིའི་སྙིང་ཁུ་ལྟ་བུ་ཐོབ་ཅིང་། རང་གིས་སྒྲུབ་ནུས་ན་མཆོག་དང་ཐུན་མོང་གི་དངོས་གྲུབ་ཕྱི་དུས་ལ་རེ་མི་དགོས་པ་འདི་ལྟ་བུ་ཡོད་པའི་སྐབས་སུ། དོན་ཆུང་ཚེ་འདིའི་བྱ་བ་དང་། ལྟར་སྣང་གི་ཆོས་ཀྱིས་རང་ཉིད་མི་བསླུ་བར་སྲོག་འཚོ་ལྷགས་སྐྱོབ་ཙམ་གྱི་ཟས་གོས་ཀྱི་མཐུན་རྐྱེན་རྙེད་སླ་ཞིང་། མཆོག་དམན་བར་མའི་ཡུལ་གང་ལ་ཡང་འདྲེལ་འདྲིས་ཀྱི་རྣམ་གཡེང་མེད་པའི་ས་ཕྱོགས་རྣམས་སུ། འདོད་པ་ཆུང་ཞིང་ཆོག་ཤེས་པ། གསོ་སླ་ཞིང་དགང་སླ་བའི་སྤྲོས་མེད་ཀྱི་སྤྱོད་པ་ལ་བརྟེན་ནས། ལེ་ལོ་དང་སྒྱིད་སྙོམས་ཀྱི་དབང་དུ་མ་ཤོར་བར། ཚེ་གཅིག་གིས་སངས་རྒྱས་ཐོབ་པའི་སེམས་མཆོག་ཁྱད་པར་ཅན་ལ་ཡིད་སྤྲོ་སང་ངེ་བའི་ངང་ནས་ཉིན་མཚན་ཁོར་ཡུག་ཏུ་ཉམས་སུ་བླངས་པ་ལ་འབད་དགོས་ཏེ། ཀུན་མཁྱེན་ཆོས་རྗེས། དེང་སང་དུས་འདིར་བདག་འདྲས་འབད་ཀྱང་ནི། །གཞན་དོན་ཉིད་འགྱུར་དག་པའང་མི་འགྱུར་ན། །རང་དོན་ཞི་བའི་ཏིང་འཛིན་ཉམས་པའི་རྒྱུ། །འདི་འདྲས་ཅི་བྱ་སྙིང་པོ་འདུག་གམ་སོམས། །ཚེ་འདིར་མ་ཆགས་འདོད་ཞེན་ཅུང་ཟད་མེད། །ལུས་ངག་བརྩོན་པས་གཞན་ཕན་བསྔོས་ན་ཡང་། །ཕྲག་དོག་ཚིག་རྩུབ་སྡིག་པའི་རྐྱེན་འགྱུར་ཞིང་། །མི་དགེའི་དབང་གྱུར་འགྲོ་ལ་ཕན་ཐོག་སོམས། །རང་གི་ནུས་པའི་ཆོས་སྲིད་དགེ་བ་དེས། །འདི་ཕྱིར་ཕན་པའི་ལམ་ལ་འགོད་བྱས་ཀྱང་། །ཅུང་ཟད་རྐྱེན་གྱིས་དགྲར་འགྱུར་སློབ་མ་གང་། །ཡི་ཆད་གནས་སུ་འགྱུར་བའང་སྙིང་ནས་སོམས། །འགའ་ལས་ཐོས་པ་འགའ་ལ་བསྒྲགས་གྱུར་དང་། །འགའ་ལ་ཟང་ཟིང་འགའ་ལ་ཆོས་སྦྱིན་དང་། །འགའ་ལ་དོན་མཐུན་འགའ་ལ་གྲོས་ཆེན་འདེབས། །འགའ་ལས་བླངས་པ་འགའ་ལ་སྦྱིན་རྣམས་ཀྱང་། །སྙིང་པོ་མེད་ལ་རང་དོན་བསླུ་བའི་རྒྱུ། །བྱིས་པའི་སྤྱོད་པ་འདྲ་ཞིང་བཞད་གད་གནས། །དོན་ཆུང་ལས་ལ་མི་ཚེ་ཟད་ཉེན་མཆི། །དེ་བས་མྱུར་དུ་དབེན་པའི་ནགས་འདབ་སོང་། །ད་ནི་སྙིང་ནས་ཡི་ཆད་མཆི་མ་ཤོར། །གྲོགས་དང་སློབ་མ་བཤེས་འདྲིས་འཇིག་རྟེན་ཆོས། །རྟག་མི་ཐུབ་ཅིང་གནོད་པའི་ཚོགས་རབ་འཕེལ། །འབྲལ་ཡང་མི་དགའ་མེད་པའི་དོན་ལ་སོམས། །དེ་བས་གཞན་ལ་ཕན་པ་ཅི་ཞིག་ཡོད། །རང་གི་དོན་སྒྲུབ་ནགས་རིའི་ཁྲོད་སོང་སྟེ། །ཉིན་མཚན་འོད་གསལ་ངང་ལས་མི་གཡོ་ཞིང་། །གདོད་མའི་ས་ལ་གཏན་སྲིད་ཟིན་པར་མཛོད། །ཅེས་གསུངས་པ་ལྟར་སྙིང་ཁུང་དུ་བཅངས་ཏེ་སྒྲུབ་པ་ལ་འབད་པའི་དུས་ལ་བབས་སོ། །དེ་ཡང་ཡུལ་སྣ་ཚོགས་ཀྱི་སྣང་བ་འདི་ནི་བྲིད་མཁས། ཡིད་ཅོལ་ཆུང་གི་བྱིས་པ་འདི་ནི་བསླུ་སྐྱེན་པས། དུས་དང་རྣམ་པ་ཐམས་ཅད་དུ་རང་གིས་རང་ལ་གཉེན་པོའི་ལྕག་གིས་བསྐུལ་ནས་ཁ་འོག་ཏུ་ལུས་ཚུད་པ་ཞིག་དགོས་མ་གཏོགས། ཡིད་ཅོལ་ཆུང་འདི་རང་དགར་བཏང་ན། ཁོ་ལུས་ཚོད་དང་མི་མཐུན་པའི་གོས་དང་། ཁ་ཚོད་དང་མི་མཐུན་པའི་ཟས་འདོད་པ་ཞིག་ཡིན་འདུག་པས། མི་དྲན་དགུ་དྲན། མི་འགྱུ་དགུ་འགྱུས་ཏེ། མཐར་ཅི་བྱེད་དང་འདི་བྱེད་མེད་པའི་དྲ་བར་ཚུད་པ་ཞིག་འོང་འདུག་པས། དམན་པའི་ས་བཟུང་། ཧྲུལ་པོའི་གོས་གྱོན། འོག་ནས་འགྲོ་བ་སྔོན་མོའི་ཆུ་ལས་མེད་པ་ཞིག་བྱས་ཏེ། ཨ་ཙ་མ། འཆི་བ་འཆི་བ་ཞེས་བྱ་བ་དེ་ནམ་འོང་ན། མདོ་མེད་ཀྱི་ཅོལ་ཆུང་ང་ཤི་ཁ་ཆོས་མེད་ལག་སྟོང་དུ་འགྲོ་བ་ཞིག་འོང་ལས་ཆེ། དེ་ལྟར་མི་ཡོང་བ་ཞིག་བླ་མ་དཀོན་མཆོག་མཁྱེན་ཨང་སྙམ་དུ། སྙིང་གྲང་ཤུར་རེ། བག་ཚ་ཤུམ་མེ། སེམས་གཉོམ་དུང་ངེ་། དུས་རྒྱུན་དུ་དྲན་རྒྱུ་འཆི་བ་ཁོ་ན་དང་། བློ་གཏོད་ས་བླ་མ་དཀོན་མཆོག་ལས་མེད་པ་ཞིག་བྱས་ནས་སྡོད་དགོས་རྒྱུ་ཡིན། དེ་ཡང་ཐོག་མར་བློ་ཆོས་སུ་འགྲོ་བར་བྱེད་པའི་ཐབས་བློ་ལྡོག་རྣམ་པ་བཞི་པོ་འདི་རྒྱུད་ལ་སྐྱེ་ངེས་པ་ཞིག་མ་བྱུང་ན། རི་འགྲིམས་དང་མཚམས་བཅད་སོགས་ཅི་བྱས་ཀྱང་ཚེ་འདིའི་ལོ་འདོད་དང་། ལྷ་མིའི་བདེ་འབྲས་ཙམ་ལས་ཐར་པའི་ལམ་དུ་འགྲོ་བའི་ཆོས་རྣམ་དག་གཏན་ནས་མི་འོང་འདུག་པས། ཐོག་མར་འདི་བཞི་ལ་ངེས་ཤེས་འཁྲུང་འཁྲུང་དུ་བློ་སྦྱོང་དགོས། དེ་ལ་དལ་འབྱོར་རྙེད་དཀའ་བའི་ཚུལ་ངོ་བོ་དཔེ་གྲངས་སོགས་གྱི་སྒོ་ནས་བསམ་པ་ཡིན་མོད་ཀྱང་། དོན་ལ་ད་རེས་ཀྱི་ལུས་རྟེན་འདིའི་སྟེང་ནས་ཆོས་ཤིག་འགྲུབ་ན་འགྲུབ་པ་ཡིན། དེ་མ་འགྲུབ་ན་ཕྱི་མ་ཆོས་རྣམ་དག་ཞིག་སྒྲུབ་པའི་རྟེན་དུ་གྱུར་པའི་མི་ལུས་ཡིད་བཞིན་ནོར་བུ་འདི་འདྲ་བ་མི་རྙེད་ཐག་ཆོད་ཡིན་བསམ་ནས་ཚེ་འདིའི་བྱ་བཞག་སོ་ཚིས་ཐམས་ཅད་བློས་ལིང་གིས་བཏང་ནས་ཆོས་ཁོ་ན་ལ་དྲིལ་འདོད་པ་ཞིག་དགོས་པ་ཡིན་པས། དལ་འབྱོར་རྙེད་དཀའ་བསམ་པ་རྒྱུད་ལ་ཨེ་སྐྱེས་དེས་ཤེས། ཚེ་མི་རྟག་པ་སྒོམ་པའི་ཚུལ། ཕྱི་སྣོད་འཇིག་རྟེན་གྱི་ཆགས་འཇིག །ནང་བཅུད་སེམས་ཅན་གྱི་སྐྱེ་འཆི། ལོ་ཟླ་དུས་ཚིགས་ཀྱི་འགྱུར་ལྡོག །གློ་བུར་འཕྲལ་རྐྱེན་གྱིས་འཁྱེར་ལུགས། སྐྱེས་མཐའ་འཆི་བ། འདུས་མཐའ་འབྲལ་བ། བསགས་མཐའ་འཛད་པ། མཐོན་པོའི་མཐའ་ལྷུང་བ་སོགས་བསམ་དགོས་པ་ཡིན་མོད་དེ། མདོ་དོན་ཚེ་ལ་ངེས་པ་མེད་པས། ད་ནང་སྔ་ཞོགས་འདིར་ཆོས་ཤིག་མ་འགྲུབ་ན། དོ་ནུབ་ཉི་མ་ནུབ་ལ་ཕྱོགས་དུས་ང་ཨེ་ཡོད་ཅི་ཤེས་སྙམ་པ་དང་། དོ་ནུབ་ཆོས་ཤིག་མ་འགྲུབ་ན་སང་ཉིན་ཉི་མ་འཛམ་གླིང་དུ་ཤར་དུས་ང་ཨེ་ཡོད་ཅི་ཤེས་སྙམ་ནས་ཉིན་མཚན་སྐད་ཅིག་ཀྱང་ཆོས་ཕྱི་བཤོལ་དུ་བཞག་ནས་ཐ་མལ་དུ་སྡོད་མི་ཕོད་པ་ཞིག་དགོས་རྒྱུ་ཡིན་པས། ཚེ་མི་རྟག་པ་རྒྱུད་ལ་ཨེ་སྐྱེས་དེས་ཤེས། ལས་རྒྱུ་འབྲས་ལ། སྤྱིར་འཁོར་བ་འགྲུབ་བྱེད་ཀྱི་ལས་ལ། རྒྱུ་མི་དགེ་བ་བཅུ་དང་། དགེ་བ་ཟག་བཅས་བཅུ་དང་། བསམ་གཟུགས་ཀྱི་སྙོམས་འཇུག་རྣམས་ཏེ། དེས་འཕང་བའི་འབྲས་བུ་ངན་སོང་གསུམ་དང་། མཐོ་རིས་ཀྱི་གནས་གཉིས་སམ་གསུམ་སྟེ། འགྲོ་བ་རྒྱུད་ལྔའམ་རིས་དྲུག་ཇི་ལྟར་སྨིན་ཚུལ། རྒྱུ་དགེ་བ་དང་མི་དགེ་བའི་ལས་རེ་རེ་ལའང་འབྲས་བུ་རྣམ་སྨིན། རྒྱུ་མཐུན། བདག་པོ། བྱེད་པའི་འབྲས་བུ་བཞི་རེ་སྨིན་ཚུལ། ལས་ཀུན་ནས་སློང་བའི་བསམ་པའི་ཁྱད་པར་གྱིས། ལས་གཅིག་ཏུ་དཀར་བ་དང་། གཅིག་ཏུ་གནག་པ་སོགས་མུ་བཞི་དང་། ལྕི་ཡང་གི་ཁྱད་པར་སོགས་ཕྲ་ཞིབ་ནས་བསམ་པ་རྣམས་ཡིན་ཀྱང་། དོན་ལ་ལས་རྒྱུ་འབྲས་བསླུ་མེད་ཀྱི་ཚུལ་ལ་ངེས་ཤེས་གཏིང་ནས་འཁྲུངས་ཏེ། སྟོན་པ་ཐམས་ཅད་མཁྱེན་པའི་གསུང་ལ་ཡིད་ཆེས་ཀྱི་དད་པ་བརྟན་པས་དོན་མེད་དུ་རྩྭ་སྔོན་གཅོད་པ་དང་། ས་ལ་རི་མོ་འབྲི་བ་སོགས་མི་དགེ་བ་དང་། ལུང་མ་བསྟན་གྱི་ལས་ཕྲ་མོ་ཙམ་ཡང་ཇི་མི་སྙམ་དུ་མི་བཞག་པར་འཇིགས་པའི་སེམས་ཀྱིས་ལྡོག་པ་དང་། མིག་ཕབས་ཏེ་བལྟ་བ་དང་། ཆུ་དང་མེ་ཏོག་གིས་དཀོན་མཆོག་མཆོད་པ་དང་། སེམས་ཅན་ཉམ་ཆུང་བ་རྣམས་ལ་བྱམས་པའི་ལུས་དང་ངག་དང་ཡིད་ཀྱི་ལས་སོགས་དགེ་བའི་ལས་ཕྲ་མོ་ཙམ་ལ་ཡང་ཇི་མི་སྙམ་དུ་མི་བཞག་པར་སྤྲོ་བའི་སེམས་ཀྱིས་འཇུག་པར་བྱེད་ན། དགེ་སྡིག་གི་ལས་རགས་པ་རྣམས་ལ་ལྟ་ཅི་སྨོས་ཏེ་སྲོག་གི་ཕྱིར་ཡང་དགེ་སྡིག་གི་འཇུག་ལྡོག་ཁྱད་དུ་མི་གསོད་པར་གུས་པས་སྒྲུབ་པ་ཞིག་དགོས་ཏེ། དེས་ལས་རྒྱུ་འབྲས་ལ་ཡིད་ཆེས་སྐྱེས་ཨེ་ཡོད་ཤེས། འཁོར་བའི་ཉེས་དམིགས་བསམ་པའི་ཚུལ་ལ། མ་གི་དམྱལ་བ་མནར་མེད་པའི་གནས་ནས། ཡ་གི་སྲིད་པའི་རྩེ་མོ་ཡོད་མིན་མེད་མིན་གྱི་གནས་ལ་ཐུག་གི་བར་གྱི་ཁམས་གསུམ་གྱི་སེམས་ཅན་ཐམས་ཅད་ལ་སྡུག་བསྔལ་གྱི་སྣང་ཚུལ་བསམ་གྱིས་མི་ཁྱབ་ཅིང་། བྱེ་བྲག་དམྱལ་བའི་ཚ་གྲང་། ཡི་དྭགས་ཀྱི་བཀྲེས་སྐོམ། དུད་འགྲོའི་གླེན་རྨོངས་དང་བཀོལ་སྤྱོད། མིའི་སྐྱེ་རྒ་ན་འཆི། ལྷ་འཕོ་ལྟུང་དང་འདུ་བྱེད་ཀྱི་སྡུག་བསྔལ་སོགས། ཐམས་ཅད་ཀྱང་ཕུང་པོ་ལྔ་དང་བཞིའི་རང་བཞིན་ཅན་སྡུག་བསྔལ་གྱི་རྒྱུ་ལས་སྐྱེས་པ། སྡུག་བསྔལ་གྱི་རང་བཞིན་ལས་མ་འདས་པ། སྡུག་བསྔལ་ཉེ་བར་ལེན་པའི་རྒྱུ་དང་ལྡན་པ་སྟེ། སྡུག་བསྔལ་གྱི་སྣོད། སྡུག་བསྔལ་གྱི་ཡོ་ལང་། མེའི་དོང་དང་། སྤུ་གྲིའི་ཚལ། དུག་སྦྲུལ་གྱི་གཟེབ་བཞིན་དུ་མཐོང་ནས་འཁོར་བ་ལས་ངེས་པར་འབྱུང་བའི་བློ་བསྐྱེད་པ་ཡིན་ཀྱང་། མདོ་དོན་འཁོར་བའི་བདེ་འབྱོར་རྣམས་ཀྱང་སྡུག་བསྔལ་གྱི་རྒྱུ་འབྲས་སུ་ཤེས་ནས་ཞི་བ་མྱ་ངན་ལས་འདས་པའི་གོ་འཕང་ཉག་གཅིག་དོན་དུ་གཉེར་བ་ལས། འཁོར་ལོས་སྒྱུར་བའི་རྒྱལ་སྲིད་ལག་ཏུ་འོང་ཡང་དང་དུ་མི་ལེན་ན། ད་ལྟའི་གནས་སྐབས་ཀྱི་བཙན་ཕྱུག་འབྱོར་གསུམ་ཕྲན་བུ་རེ་ལ་ལྟ་སྨོས་ཀྱང་ཅི་དགོས་ཏེ། དེ་རྣམས་ལ་ཡིད་སྨོན་རྨི་ལམ་ཙམ་དུ་ཡང་མི་བྱེད་པར་མ་ཟད་སྐྱུགས་ནད་ཅན་གྱིས་ཟས་མཐོང་བ་ལྟར་ཞེན་པ་གཏིང་ནས་ལྡོག་པ་ཅིག་དགོས་ཏེ། དེས་འཁོར་བའི་ཉེས་དམིགས་རྒྱུད་ལ་ཨེ་སྐྱེས་ཤེས་པ་ཡིན། མདོར་ན་ཚེ་འདིའི་ཆེ་ཐབས། ཆོས་བརྒྱད་ཀྱི་སོ་ཚིས་ཁོ་ན་ལས་སྙིང་ཐག་པ་ནས་འཆི་ཆོས་དོན་དུ་མི་གཉེར་ན་དལ་འབྱོར་རྙེད་དཀའ་མ་ཤེས་པའི་རྟགས་ཡིན། ཆོས་སྒྲུབ་འདོད་ཙམ་ཡོད་ཀྱང་སང་བྱ་གནང་བྱར་ལུས་ན་ཚེ་མི་རྟག་པར་མ་ཤེས་པའི་རྟགས་ཡིན། ཆོས་སྒྲུབ་ལོ་བྱས་ཀྱང་དགེ་སྡིག་ཕྲ་མོ་ཁྱད་དུ་བསད་ནས་ཉེས་དམིགས་ལ་མི་བསམ་པར་ངག་གི་གཏམ་དང་ལུས་ཀྱི་བྱ་བ་བྱུང་རྒྱལ་དུ་གཏོང་ན་ལས་རྒྱུ་འབྲས་མ་ཤེས་པའི་རྟགས་ཡིན། འཁོར་བ་སྤོང་བར་འདོད་ཀྱང་། ཚེ་འདིའི་བཙན་ཕྱུག་སྙན་གྲགས་ལ་ཡིད་སྨོན་འཆོར་ན་འཁོར་བའི་སྡུག་བསྔལ་མ་ཤེས་པའི་རྟགས་ཡིན། དེས་ན་དལ་འབྱོར་གྱི་མི་ལུས་རིན་པོ་ཆེ་འདི་ལྟ་བུ་ནི་ད་རེས་ལས་མི་འཐོབ། ད་རེས་ཀྱི་ལུས་རྟེན་འདི་ལ་ཆོས་ཤིག་འགྲུབ་ན་འགྲུབ། མ་འགྲུབ་ན་མི་འགྲུབ་པས་དམ་པའི་ཆོས་ཅི་འགྲུབ་ཅིག་བྱ། ཚེ་འདིའི་བྱ་བཞག་དང་སོ་ཚིས་རྣམས་ལེགས་ན་ལེགས་སུ་ཟད། ཉེས་ན་ཉེས་སུ་ཟད། ཅི་བྱུང་ན་བྱུང་སྙམ་དུ་བློ་ཕུགས་ཆོས་ལ་གཏད། ཆོས་ཕུག་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གད་ཁུང་ལ་གཏད་ནས། ཆོས་སང་བྱ་གནང་བྱར་མི་འཇོག་པར། སྔ་དྲོ་དང་ཕྱི་དྲོ། སྲོད་དང་ནམ་ཕྱེད་ཐོ་རེངས་སོགས་ནམ་དྲན་དྲན་གྱི་དུས་སུ་ཐད་ཀ་ཐད་ཀར་སྒྲུབ་ཅིང་། དེ་ཡང་སྡིག་པ་མི་དགེ་བའི་ཆོས་མ་སྐྱེས་པ་མི་བསྐྱེད་ཅིང་སྐྱེས་པ་སྤོང་བ་དང་། དགེ་བའི་ཆོས་མ་སྐྱེས་པ་བསྐྱེད་པ་དང་སྐྱེས་ཟིན་སྤེལ་བ་ཁོ་ན་ལས་གཞན་ན་ཆོས་སྒྲུབ་ཟེར་བ་དེ་ཅི་ཡང་མེད། དགེ་སྡིག་གི་རྩ་བ་ཡང་སེམས་འདི་ཁོ་ན་ལས་གཞན་ན་མེད་པས་སེམས་ཀྱི་ཉེས་པ་མ་དད་པ་དང་ལེ་ལོ་བརྗེད་ངེས་རྣམ་གཡེང་བདག་འཛིན་རྣམས་སྤོངས་ཤིག །དེ་དག་གི་གཉེན་པོར་དད་པ། བརྩོན་འགྲུས། དྲན་པ། ཏིང་འཛིན། བདག་མེད་རྟོགས་པའི་ཤེས་རབ་རྣམས་བསྐྱེད་ཅིང་སྤེལ་བ་འདི་ཁོ་ན་ཆོས་སྒྲུབ་པ་ཡིན་ཏེ། ཐེག་པ་གསུམ་དང་རྒྱུད་སྡེ་བཞིའི་ལམ་གྱི་རིམ་པ་རྣམས་ཀྱང་དམིགས་རྣམ་གྱི་ཁྱད་པར་ཙམ་ལས་དོན་གྱི་ངོ་བོ་འདི་ཁོ་ན་ལས་གཞན་མེད་པར་ཤེས་དགོས་ཏེ། སོ་སོར་ཐར་པའི་མདོ་ལས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཞེས་སོ། །དེ་ལྟར་བློ་ལྡོག་གི་ཆོས་བཞི་བསྒོམ་པ་འདི་ནི་སྤྱིར་གྱིས་དྲན་པ་ཉེ་བར་གཞག་པ་བཞིའི་ངོ་བོ་ཡིན་ཅིང་། དེ་ཡང་དལ་འབྱོར་རྙེད་དཀའ་དང་ཚེ་མི་རྟག་པ་གཉིས་ནི་གཙོ་བོར་ལུས་དྲན་པ་ཉེར་བཞག་དང་། འཁོར་བའི་ཉེས་དམིགས་ནི་ཚོར་བ་དྲན་པ་ཉེར་བཞག་དང་། ལས་རྒྱུ་འབྲས་ནི་སེམས་དང་ཆོས་དྲན་པ་ཉེར་བར་བཞག་པ་ཡིན་པས། ངོ་བོ་ཤེས་རབ་ཀྱི་རང་བཞིན་འཁོར་བ་སྤང་བྱ་དང་མྱང་འདས་བླང་བྱར་ཤེས་པར་བྱེད་པ་ཡིན་ནོ། །ཐར་པའི་ཕན་ཡོན་དང་། དད་པའི་རང་བཞིན། བཤེས་གཉེན་བསྟེན་པའི་ཚུལ་རྣམས་ཀྱང་དེ་དག་བསམ་པ་ལས་འབྱུང་བས་འགོག་བདེན་མངོན་དུ་བྱེད་པར་འདོད་ནས་དེའི་རྒྱུ་རྐྱེན་འཚོལ་བ་ལ་ཞུགས་པ་ཡིན་པའང་ཤེས་པར་བྱ་དགོས་སོ། །དེ་ལྟར་འཁོར་བའི་ཉེས་དམིགས་ཀྱིས་ཡིད་སྐྱོ་ནས། ཞི་བའི་དབྱིངས་སུ་ངེས་པར་འབྱུང་འདོད་ཀྱི་བསམ་པ་དང་ལྡན་པའི་གང་ཟག་དེས། ཐར་པའི་ལམ་སྟོན་དེ་ལས་གཞན་དུ་མ་དམིགས་པས་ཡིད་ཆེས་ཀྱི་དད་པས་དགེ་བའི་བཤེས་གཉེན་མཚན་ཉིད་དང་ལྡན་པ་གུས་པས་བསྟེན་ཅིང་གདམས་ངག་གི་སྙིང་པོ་བསྡུ་བ་ལ་འབད་དགོས། དེ་ལ་བླ་མའི་གདམས་ངག་ཐམས་ཅད་ཀྱི་ཐོག་མ་ཐེག་པ་ཆེ་ཆུང་ཐམས་ཅད་ཀྱི་ལམ་གྱི་གཞི་རྟེན་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་སུ་འགྲོ་བ་འདི་ཁོ་ན་ཡིན་ཏེ། དེའི་རྒྱུ་འཇིགས་པ་དང་། དད་པ་དང་། སྙིང་རྗེ་ཆེན་པོའི་བསམ་པ་གསུམ་དང་ལྡན་པ་ཞིག་གལ་ཆེ། དེ་ལས་གཞན་དུ་རྒྱུ་མཚན་ཅི་ཡང་མེད་པའི་སྐྱབས་འགྲོའི་ཚིག་མང་དུ་བརྗོད་པ་ནི་ཡུལ་གྱི་སྟོབས་ལས་ནམ་ཞིག་ན་ཐར་བའི་རིང་རྒྱུར་འགྲོ་བ་ཙམ་ལས། དངོས་སུ་ལམ་གྱི་མངོན་རྟོགས་སྐྱེ་བའི་རྟེན་གྱི་སྐྱབས་འགྲོ་མཚན་ཉིད་པ་ནི་མིན་ནོ། །རྒྱུ་མཚན་དེའི་ཕྱིར་གང་ལ་འཇིགས་པའི་ཡུལ་སྤྱིར་འཁོར་བའི་སྡུག་བསྔལ་མཐའ་དག་དང་། དེའི་རྩ་བ་སྐྱེ་འཆི་གཉིས། དེ་གཉིས་ཀྱི་རྒྱུ་ཟག་བཅས་ཀྱི་ལས་དང་ཉོན་མོངས་པ་ཐམས་ཅད་དང་། སྙིང་རྗེ་དང་བྲལ་བའི་སྟོང་པ་ཉིད་འབའ་ཞིག་ལ་གོམས་པས། སངས་རྒྱས་ཀྱི་ཡོན་ཏན་རིན་པོ་ཆེ་ཚད་མེད་པ་ལས་ཉམས་པའི་ཞི་བ་ཕྱོགས་གཅིག་པ་ཆད་པའི་མྱང་འདས་ཀྱི་གཡང་ས་མི་ཟད་པ་དང་། གནས་སྐབས་ལམ་གྱི་མི་མཐུན་ཕྱོགས་ཚུལ་མིན་ཡིད་བྱེད་ཀྱི་རྣམ་པར་རྟོག་པ་མཐའ་དག་དང་བཅས་གསུམ་པོ་དེ་ལ། དགྲ་ལྟ་བུ་དང་། གཡངས་ལྟ་བུ་དང་། དུག་ལྟ་བུའི་འདུ་ཤེས་ཉེ་བར་བཞག་སྟེ། དེ་རྣམས་ཀྱི་འཇིགས་པ་ལས་སྐྱོབ་པའི་ཕྱིར། རྫོགས་པའི་སངས་རྒྱས་བཅོམ་ལྡན་འདས་ནི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་རྒྱུ་དང་འབྲས་བུ་ཕྱིན་ཅི་མ་ལོག་པར་གཟིགས་པའི་མཁྱེན་པ་ཕུན་སུམ་ཚོགས་པ་དང་། སེམས་ཅན་མཐའ་དག་ལ་བརྩེ་བའི་ཐུགས་རྗེ་ཆེན་པོས་ཉིན་ལན་གསུམ་མཚན་ལན་གསུམ་འཇིག་རྟེན་གྱི་ཁམས་ཐམས་ཅད་ལ་རྟག་པར་གཟིགས་ཏེ། སུ་ནི་འཕེལ་སུ་ནི་འགྲིབ། སུ་ནི་འཁོར་བ་དང་ངན་སོང་དུ་གཞོལ། སུ་ཞིག་གི་སུག་པ་ནས་དྲངས་ཏེ་ལྷ་དང་མིའི་གོ་འཕང་ལ་ནི་བཞག །སུ་ཞིག་ནི་མྱ་ངན་ལས་འདས་པའི་གནས་ལ་འགོད་ཅེས་དགོངས་པའི་བརྩེ་བ་ཕུན་སུམ་ཚོགས་པ་དང་། རང་ཉིད་དད་པ་དང་ལྡན་ཅིང་སྣོད་དུ་གྱུར་ན་སངས་རྒྱས་བཅོམ་ལྡན་འདས་རྣམས་ནི་ཀུན་ཏུ་ཐོགས་པ་མེད་པའི་རྫུ་འཕྲུལ་དང་ལྡན་པ་ཡིན་ཏེ། དུས་སྐད་ཅིག་མ་གཅིག་ལའང་འཇིག་རྟེན་གྱི་ཁམས་བརྒྱ་ཕྲག་མང་པོར་གཤེགས་ཤིང་སྐུ་གསུང་ཐུགས་སྣ་ཚོགས་པར་སྟོན་པའི་སྒོ་ནས་འདུལ་བྱེད་ཀྱི་ཐབས་ལ་མཁས་པ་སྟོང་གིས་སེམས་ཅན་གྱི་ཁམས་བསམ་གྱིས་མི་ཁྱབ་པ་ཅིག་ཆར་དུ་གྲོལ་བར་བྱེད་པའི་ནུས་པ་ཕུན་སུམ་ཚོགས་པ་དང་ལྡན་པ་ཡིན་པས་སྐྱབས་སུ་འོས་པའི་རྒྱུ་མཚན་ཤེས་ནས་སྟོན་པ་ཚད་མར་ཡིད་ཆེས་པའི་དད་པ་དང་། དེའི་ཐུགས་སུ་ཆུད་པའི་རྟོགས་པ་དམ་པའི་ཆོས་ནི་ཆགས་སོགས་ཀུན་ནས་ཉོན་མོངས་པ་མཐའ་དག་གི་གཉེན་པོར་གྱུར་ཅིང་། བྱང་ཆུབ་མཆོག་གི་རྒྱུའི་ཚོགས་སུ་ཉེ་བར་གནས་པ། གང་ཞིག་རྒྱུད་ལ་དག་པའི་རིམ་པ་ཇི་ལྟར་སྐྱེ་བ་དེ་ལྟར་འཕགས་པའི་གང་ཟག་གི་ཁྱད་པར་རྣམ་པར་འགོད་པ་དང་། དེའི་དམིགས་པར་གྱུར་པའི་ལུང་གི་ཆོས་གསུང་རབ་ཡན་ལག་བཅུ་གཉིས་ཀྱིས་བསྡུས་པ་རྣམས་ནི་ཆོས་ཀྱི་སྐུའི་རྒྱུ་མཐུན་པ། སོ་སོའི་སྐྱེ་བོ་ལ་འཕགས་པའི་ཆོས་ཉེ་བར་གཏོད་པ། ཤེས་རབ་གསུམ་གྱི་མིག་སྦྱིན་པ་སྟེ། འདི་གཉིས་ནི་ལམ་གྱི་མཚན་ཉིད་ལ་མི་བསླུ་བས་སྐྱབས་སུ་འོས་པའི་རྒྱུ་མཚན་ཤེས་ནས་རང་གི་རྒྱུད་ལ་བསྐྱེད་པར་འདོད་པའི་དད་པ་དང་། འཕགས་པའི་དགེ་འདུན་རྣམས་ནི་ཆོས་ལས་སྐྱེས་པ། ཆོས་ལ་བརྟེན་པ། ཆོས་ཀྱི་བགོ་བཤའ་བྱེད་པ། ཆོས་ཀྱི་རྩ་ལག་ཏུ་གྱུར་པ་སྟེ། སྟོན་པས་གསུངས་པའི་ཆོས་རྣམས་བདག་ཅག་གི་རྒྱུད་ལ་སྦྱོར་བའང་འདི་དག་ལ་རག་ལས་ཤིང་། གང་འདི་རྣམས་དང་ལྷན་ཅིག་ཏུ་འགྲོགས་ཤིང་། སྤྱོད་པ་དང་། ཚུལ་ཁྲིམས་དང་། འཚོ་བ་དང་། ལྟ་བ་རྣམས་མཐུན་པར་སྤྱད་པ་དེ་དག་ནི། ཆབ་ལ་གནས་པའི་ཨུཏྤལ་བཞིན་དུ་དགེ་བའི་ཆོས་རྣམས་འཕེལ་བ་དང་། རྒྱས་པ་དང་། ཡངས་པར་འགྱུར་བས་ན་ཐར་པ་སྒྲུབ་པའི་ལམ་གྱི་གྲོགས་སུ་མི་བསླུ་བའི་མཚན་ཉིད་དང་ལྡན་པས་སྐྱབས་སུ་འོས་པའི་རྒྱུ་མཚན་ཤེས་ནས་ཡིད་དང་བའི་དད་བ་དང་ལྡན་པས། རང་གཅིག་པུའི་ཆེད་དུ་མ་ཡིན་པར་ཚེ་རབས་དུ་མར་དྲིན་ཆེན་པོས་བསྐྱངས་པའི་མ་རྒན་སེམས་ཅན་ཐམས་ཅད་འཁོར་བའི་གཅོང་རོང་ན་སྡུག་བསྔལ་གསུམ་གྱི་གཡང་ས་ལ་ལྷུང་སྟེ་ཉམས་ཐག་པར་ཡོད་པ་རྣམས་སྙིང་ཁོང་དུ་བཅངས་ཏེ། དེ་རྣམས་འཁོར་བའི་སྡུག་བསྔལ་ལས་འདོན་པར་འདོད་པའི་སྙིང་རྗེ་ཆེན་པོའི་བློ་མངོན་སུམ་དུ་བྱས་ཏེ། ཚོགས་ཞིང་སྤྱི་ལྟར་གསལ་གདབ་པའི་མདུན་དུ་སྐྱབས་སུ་འགྲོ་བར་བྱའོ། །སྐྱབས་སུ་འགྲོ་བའི་ངོ་བོ་ནི་ཁས་ལེན་པའི་དོན་ཅན་ཡིན་པས། རྫོགས་པའི་སངས་རྒྱས་མཁྱེན་བརྩེ་ནུས་གསུམ་གྱི་བདག་ཉིད་ཅན་དེ་ཉིད་གནས་སྐབས་སུ་སྟོན་པར་ཁས་བླངས་ཏེ་སྟོན་པ་འདི་ལས་གཞན་དུ་མི་བསྟེན་པར་དམ་བཅའ་བ་རྒྱུའི་སྐྱབས་འགྲོ། །སྟོན་པ་དེ་ཉིད་མཐར་ཐུག་གི་བསྒྲུབ་བྱར་ཁས་བླངས་ཏེ་འབྲས་བུ་དེ་ལས་གཞན་དོན་དུ་མི་གཉེར་བར་དམ་བཅས་པ་འབྲས་བུའི་སྐྱབས་འགྲོ། དེས་མཚོན་ཏེ། ལུང་རྟོགས་ཀྱིས་བསྡུས་པའི་དམ་པའི་ཆོས་དང་། འཕགས་པའི་དགེ་འདུན་གཉིས་ཀྱང་གནས་སྐབས་སུ་ལམ་དང་གྲོགས་སུ་ཁས་བླངས་ཏེ་དེ་དང་དེ་ལས་གཞན་པའི་ལམ་དང་གྲོགས་ལ་མི་བསྟེན་པར་དམ་བཅའ་བ་རྒྱུའི་སྐྱབས་འགྲོ་དང་། དེ་གཉིས་མཐར་ཐུག་རང་རྒྱུད་ལ་བསྒྲུབ་བྱར་ཁས་བླངས་ཏེ་རྟོགས་པ་དམ་པའི་ཆོས་རང་གི་ཁོང་དུ་ཆུད་པར་བྱས་ནས། རྒྱུ་མཐུན་ལུང་གི་ཆོས་ཀྱི་འཁོར་ལོ་གཞན་རྒྱུད་ལ་བསྐོར་ཏེ་འཕགས་པའི་ཚོགས་རྣམ་པར་བཞག་ནས་དཀོན་མཆོག་གསུམ་གྱི་གདུང་རྒྱུན་མི་གཅོད་པར་དམ་བཅའ་བ་ནི་འབྲས་བུའི་སྐྱབས་འགྲོར་ཤེས་པར་བྱའོ། །དེ་ལྟར་སྐྱབས་སུ་འགྲོ་བའི་རྒྱུ་དང་ངོ་བོ་འདི་དག་ལ་ངེས་ཤེས་ལེགས་པར་འཁྲུངས་པས། སྐྱབས་འགྲོ་ལམ་ཐམས་ཅད་ཀྱི་འཇུག་སྒོ་དང་གཞི་རྟེན་ཡིན་པ། ཕྱི་ནང་གི་ཁྱད་པར་སྐྱབས་འགྲོས་འབྱེད་པ། སྐྱབས་འགྲོའི་དགག་སྒྲུབ་ཀྱི་བསླབ་བྱ་རྣམས་ལ་ཡང་གོ་བ་ཆེན་པོ་རེ་རྙེད་རྒྱུ་ཡོད་དོ། །དེ་ཡན་ཆད་ཀྱིས་ནི་སྐྱེས་བུ་ཆུང་འབྲིང་དང་ཐུན་མོང་པའི་ལམ་གྱི་རིམ་པ་རྣམས་སོང་བ་ཡིན་ཏེ། སྐྱེས་བུ་ཆུང་ངུའི་ལམ་པ་རྣམས་ཀྱིས་ནི། རྙེད་དཀའི་དལ་རྟེན་ཡུན་རིང་དུ་མི་གནས་པར་ཤེས་ནས་ཚེ་འདིའི་བྱ་བ་རྒྱབ་ཏུ་བསྐྱུར་ཏེ། ངན་སོང་གི་ཉེས་དམིགས་ཀྱིས་འཇིགས་ནས་བདེ་འགྲོའི་རྟེན་མཆོག་རྙེད་པའི་དོན་དུ་དེ་དག་གི་རྒྱུ་འབྲས་ལ་བླང་དོར་བྱེད་པའི་རྟེན་དུ་སྐྱབས་འགྲོ་ལྷུར་ལེན་པའོ། །སྐྱེས་བུ་འབྲིང་གི་ལམ་པ་རྣམས་ནི། རྙེད་དཀའི་དལ་རྟེན་རིང་དུ་མི་གནས་པར་ཤེས་ནས་ཚེ་འདིའི་བྱ་བ་རྒྱབ་ཏུ་དོར་ཏེ། འཁོར་བ་མཐའ་དག་གི་ཉེས་དམིགས་ཀྱིས་འཇིགས་ནས། ཞི་བ་དམ་པའི་གོ་འཕང་དོན་དུ་གཉེར་ཏེ། དེ་གཉིས་ཀྱི་རྒྱུ་འབྲས་ལ་བླང་དོར་བྱེད་པའི་རྟེན་དུ་སྐྱབས་འགྲོ་ལྷུར་ལེན་པའོ། །ཅི་སྐྱེས་བུ་ཆུང་འབྲིང་གི་ལམ་གྱི་མངོན་རྟོགས་མཐའ་དག་སྐྱབས་སུ་འགྲོ་བ་ཁོ་ནས་བསྡུས་སམ་ཞེ་ན། དེ་ནི་ལེགས་པར་བསྡུས་པ་ཡིན་ཏེ། སངས་རྒྱས་ཀྱི་རྗེས་སུ་ཞུགས་ནས་ཁྱིམ་པའམ་རབ་ཏུ་བྱུང་བའི་རྟེན་ཅན་གྱི་སོ་སོར་ཐར་པའི་སྡོམ་ཁྲིམས་གང་རིགས་བླངས་ཏེ། དེའི་བཀའ་ལས་མི་འདའ་བ་ནི་སངས་རྒྱས་ལ་སྐྱབས་སུ་སོང་བའོ། །དགེ་འདུན་ལ་གུས་པས་བསྙེན་བཀུར་བྱེད་པའམ་རང་ཉིད་དགེ་འདུན་གྱི་གྲལ་དུ་ཞུགས་ཏེ་ལྟ་སྤྱོད་ཚུལ་ཁྲིམས་འཚོ་བ་སོགས་ལ་མཐུན་པར་སློབ་པ་ནི་དགེ་འདུན་ལ་སྐྱབས་སུ་སོང་བའོ། །རྒྱུ་འབྲས་ལ་ཡིད་ཆེས་པའི་ཡང་དག་པའི་ལྟ་བ་སྔོན་དུ་འགྲོ་བས། དགེ་བཅུ་བསམ་གཟུགས་ཚད་མེད་སོགས་དང་། བདེན་པ་བཞི་ལ་འཇུག་ལྡོག་བྱ་བའི་རིམ་པ་རྣམས་ནི་ཆོས་ལ་སྐྱབས་སུ་སོང་བ་ཡིན་ནོ། །རང་རང་གི་གྲུབ་པའི་འབྲས་བུ་དོན་དུ་གཉེར་ཞིང་མངོན་དུ་བྱས་པ་དག་ནི་རང་རང་གི་འབྲས་བུའི་སྐྱབས་འགྲོ་དང་སྐྱབས་སུ་འགྲོ་བ་མཐར་ཕྱིན་པའོ། །དེ་ལྟར་མཐོ་རིས་དང་ཐར་པའི་ལམ་དུ་འགྲོ་བར་བྱེད་པ་ནི་སྐྱབས་འགྲོ་ཡིན་ལ། ཐམས་ཅད་མཁྱེན་པའི་ལམ་དུ་འགྲོ་བར་བྱེད་པ་ནི། སྐྱེས་བུ་ཆེན་པོའི་ལམ་གྱི་རྩ་བ་ཐུན་མོང་མ་ཡིན་པ་བྱང་ཆུབ་མཆོག་གི་སེམས་རིན་པོ་ཆེ་བསྐྱེད་པ་འདི་ཉིད་ཡིན་ཏེ། བྱང་ཆུབ་ཀྱི་སེམས་རིན་པོ་ཆེ་འདི་ནི་སློབ་པ་ལམ་གྱི་གནས་སྐབས་ན་རྒྱལ་སྲས་བྱང་ཆུབ་སེམས་དཔའ་རྣམས་ཀྱིས་ཟབ་པ་དང་རྒྱ་ཆེ་བའི་རྣམ་པར་ཐར་པའི་སྒོ་བསམ་གྱིས་མི་ཁྱབ་པ་ཞིག་ལ་གནས་ནས། སངས་རྒྱས་ཀྱི་ཞིང་རྒྱ་མཚོ་ནི་སྦྱོང་བར་བྱེད། སེམས་ཅན་གྱི་ཁམས་རྒྱ་མཚོ་ནི་སྨིན་པར་བྱེད། བླ་ན་མེད་པའི་ཆོས་ཀྱི་སྐུའི་དགེ་བའི་རྩ་བ་རྒྱ་མཚོ་ནི་ཡོངས་སུ་རྫོགས་པར་བྱེད་པའི་སྤྱོད་པ་རླབས་པོ་ཆེའི་གཞི་དང་རྟེན་དུ་གྱུར་ཅིང་། མཐར་ཐུག་འབྲས་བུའི་གནས་སྐབས་ན་སྲིད་པའི་འཁོར་ལོ་མ་ཟད་ཀྱི་བར་དུ་ཕན་པ་དང་བདེ་བའི་འབྲས་བུ་ཟད་མི་ཤེས་པར་འཕེན་པའི་རྒྱུ་དང་རྐྱེན་ཉིད་དུ་ཉེ་བར་གནས་པ་ཡིན་པས་རྒྱུ་དང་འབྲས་བུའི་ཐེག་པ་གང་ལ་ཞུགས་ཀྱང་མེད་དུ་མི་རུང་བའི་ལམ་གྱི་སྲོག་རྩ་མི་གནས་པའི་མྱ་ངན་ལས་འདས་པའི་ས་བོན་གྲུང་པོ་ཡིན། དེའི་ངོ་བོ་ནི་སྙིང་ཐག་པ་ནས་རང་འདོད་ཀྱི་བསམ་པ་སྤུའི་རྩེ་མོ་ཙམ་ཡང་མེད་པར། གཞན་སེམས་ཅན་རྣམས་ཁོ་ནའི་ཆེད་དུ་རྫོགས་པའི་སངས་རྒྱས་ཀྱི་གོ་འཕོང་ཐོབ་པར་འདོད་པ་ཞིག་ཡིན་ཏེ། དེ་ཡང་སྙིང་རྗེ་ཆེན་པོའི་རྩ་བ་ཅན། སྙིང་རྗེའི་རྒྱུ་ལས་བྱུང་བ། སྙིང་རྗེའི་རྗེས་སུ་འགྲོ་བ། སྙིང་རྗེ་ལ་རག་ལས་པ། སྙིང་རྗེས་ཁྱད་པར་དུ་བྱེད་པ་ཞིག་ཡིན་པས་བྱང་ཆུབ་སེམས་རྒྱུད་ལ་བསྐྱེད་པར་འདོད་པས་གཞན་ཐམས་ཅད་བཞག་སྟེ་སྙིང་རྗེ་འབའ་ཞིག་ལ་རྣལ་འབྱོར་དུ་བྱའོ། །དེ་ཡང་སེམས་ཅན་ཐམས་ཅད་ལ་ཡིད་དུ་འོང་བའི་རྣམ་པ་ཅན་གྱི་བྱམས་པ་ལས་སྐྱེ་ཞིང་། དེ་ཡང་མར་ཤེས་ཤིང་དྲིན་དྲན་པ་ལས་སྐྱེ་བས། སེམས་ཅན་ཐམས་ཅད་མར་གྱུར་པའི་ཚུལ་དང་དེ་དག་དྲིན་ཆེ་བའི་ཚུལ་ལ་བསམ་པར་བྱའོ། །དེ་ལ་ཐོག་མར་སྐྱེ་སླ་ཞིང་སེམས་སྙི་བའི་ཕྱིར། ད་ལྟའི་མ་ལས་བརྩམ་པར་བྱ་སྟེ། རང་གི་མ་རྒན་དེ་ཉིད་ཀྱི་བྱད་དབྱིབས་ལུས་ངག་སྤྱོད་ལམ་གྱི་རྣམ་འགྱུར་རྣམས་ལེགས་པར་ཡིད་ཡུལ་དུ་བསམ་སྟེ། ག་རེ་ང་ད་ལྟ་ལུས་ཀྱི་ལང་ཚོ་དར། སེམས་ཀྱི་བླ་ཤེད་རྫོགས། སངས་རྒྱས་ཀྱི་བསྟན་པ་དང་མཇལ། དགེ་བའི་བཤེས་གཉེན་གྱིས་རྗེས་སུ་བཟུང་། དགེ་སྡིག་གི་བླང་དོར་ཤེས། དམ་པའི་ཆོས་རྣམ་དག་སྒྲུབ་རྒྱུ་ཡོད་པ་འདི། ང་རང་ཕོ་རྒོད་ནས་མིན། བློ་རྒྱ་ཆེ་ནས་མིན། གཞན་གྱིས་གྲོགས་བྱས་ནས་མིན། སྟེས་དབང་གིས་བྱུང་བ་མིན། འདི་རྣམས་སུའི་དྲིན་ལས་བྱུང་ན། ཨ་མ་རྒན་མོ་དྲིན་ཆེན་མ་འདིའི་དྲིན་ལས་བྱུང་བ་ཡིན་འདུག །སྙིང་རེ་རྗེ་དྲིན་ཆེན་གྱི་ཨ་མ་ད་ལྟ་གཤེད་ན་ཅི་ཞིག་བྱེད་ཀྱིན་ཡོད་ཨང་། ང་དང་པོ་ལྟོ་བར་བཟུང་ནས། ཤ་ཁྲག་གི་དྭངས་མས་གསོས། དེ་ནས་ཕྱི་རོལ་དུ་བཙས་དུས་མི་གཙང་བའི་ནང་གི་སྲིན་བུ་བཞིན་ཉམས་ཆུང་བ། སྐྱུག་བྲོ་བ། རྐང་པས་ལུས་མི་ཐེག །རྐེས་མགོ་མི་ཐེག་པར་ཉར་རེ་ཉོར་རེ། ཤི་ལ་ཁད་པ་ཞིག་ཡོད་པ་དེ་ཨ་མས་པང་དུ་བླང་། སོར་མོ་བཅུའི་བར་དུ་བཟུང་། མི་གཙང་བ་ལག་པས་ཕྱིས། བྱམས་པའི་མིག་གིས་བལྟས། སྙན་པའི་ངག་གིས་བོས། སྐན་མར་ལྕེས་བྱིན། ལུས་ཀྱི་དྲོད་ལ་བཅར། ཉིན་མོ་ལྟོ་མི་དྲན་མཚན་མོ་གཉིད་མི་དྲན་པར་བསམ་རྒྱུ་དང་དྲན་རྒྱུ་ང་རང་ལས་མེད་པ་ཞིག་བྱས། ཨ་ཙ་མ་སྙིང་རེ་རྗེ། ང་རང་ན་བ་ལས་མོ་རང་ཤི་ན་དགའ། ང་ཅུང་ཟད་དགོད་པ་དང་སྨྲ་བ་བྱེད་ནུས་པའི་ཚེ། མོས་སངས་རྒྱས་ཐོབ་པ་ཙམ་གྱི་དགའ་སྤྲོ་བྱེད། འདི་ལ་ཨ་ཕ་གྱིས། ང་ལ་ཨ་མ་གྱིས། འདི་ལ་ཆེ་གེ་མོ་གྱིས། འདི་ལ་མ་མིང་ག་གེ་མོ་གྱིས། ཞེས་འཇིག་རྟེན་གྱི་བརྗོད་པ་ཐམས་ཅད་རེ་རེ་ནས་སློབ། ཅུང་ཟད་ལང་ཐུབ་པ་ཙམ་ནས་ལག་མགོ་ནས་འཐེན་ཏེ་ལྡང་ལུགས་སློབ། ལུས་གྱི་རེག་བྱས་གཡོགས། ནུ་ཞོས་གསོས། ཟས་གྲང་མོ་ལག་པས་སྲོ། ཚ་མོ་ལ་ཕུས་འདེབས། ཅུང་ཟད་ནར་སོན་ནས་ཟས་གང་ཞིམ་དང་གང་མངར། གོས་གང་འཇམ་དང་གང་མཛེས་ཐམས་ཅད་ཕངས་སེམས་མེད་པར་བྱིན། ཉིན་གཅིག་གི་ལམ་ལ་སོང་དུས་དེ་ཉིན་བློ་མི་བདེ། དུས་དང་རྣམ་པ་ཐམས་ཅད་དུ། ན་ཡིས་དོགས། འཆི་ཡིས་དོགས། མི་སྙན་པར་གྲགས་ཀྱིས་དོགས། ངའི་ཆེད་དུ་སྡིག་སྡུག་གཏམ་ངན་ཐམས་ཅད་ལ་མ་འཛེམས་པར་མི་དང་འཛིང་། ཁྱི་དང་རྩོད་ནས་བསྐྱང་བསྐྱངས་པ་ཡིན་པས་དེ་ལས་དྲིན་ཆེ་བ་སུ་ཞིག་ཡོད། ངའི་ཆེད་དུ་བསགས་པའི་སྡིག་པ་དེ་ཁོ་ནས་ཀྱང་མ་རྒན་མོ་དེ་ནི་ངན་སོང་གི་གནས་ནས་ནམ་ཡང་ཐར་མི་ནུས་པར་སོང་བ་ཡིན་ཏེ། མ་ཤི་བར་ཡོད་ན་ནི། ད་དུང་ཡང་ངའི་དོན་དུ་རེ་དོགས་ཀྱི་བསམ་བློ་མང་པོ་བཏང་ནས་ཐ་ན་རྨི་ལམ་ཚུན་ཆད་དུ་འཁྲུལ་སྣང་དང་སྡུག་བསྔལ་གྱི་དྲ་བར་ཚུད་ནས་ཡོད། ཤི་བར་གྱུར་ན་ནི་ལས་ངན་གྱིས་རྒྱུ་བྱས། རྐྱེན་ངན་གྱིས་མཚམས་སྦྱར་ནས། ད་ལྟ་ཡང་ན་ནི་དམྱལ་བའི་གནས་སུ་སྐྱེས་ཏེ། ལྕགས་སྲེག་གི་ས་གཞི་དང་མཚོན་ཆའི་ཚལ་ན་ལས་ཀྱིས་བསྐྱེད་པའི་དམྱལ་སྲུང་དང་། གཅན་གཟན་དང་བྱ་དང་ཁྱི་གཏུམ་པོ་མང་པོས་འཇིགས་པའི་རྣམ་འགྱུར་དང་བཅས་པས་གསོད་གཏུབ་ཟ་བའི་སྡུག་བསྔལ་བསམ་གྱིས་མི་ཁྱབ་པ་མྱོང་བ་དང་། ཡང་ན་ནི་གྲང་བའི་དམྱལ་བ་ཁ་བ་དང་འཁྱག་པའི་ཁྲོད་ན། ལུས་ལ་བགོ་བའི་གོས་ནི་ལྷན་པོ་ཙམ་ཡང་མེད། གབ་པའི་སྐྱིབ་དང་འབྲོས་པའི་གནས་ནི་མེད། ཤིན་ཏུ་གྲང་བའི་རླུང་དང་ལྷགས་པའི་སྒྲ་འུར་འུར་སྒྲོག་ཞིང་ལུས་ལ་གཏབ་པས་ཆུ་བུར་ནི་རྡོལ། པགས་པ་ནི་གས། ཤའུ་ནི་ཐོན། སོ་ནི་འཐམ། སྐད་ནི་མི་ཐོན། ཨ་ཆུ་དང་ཀྱི་ཧུད་ཀྱི་སྒྲ་མི་གསལ་བར་འདོན་བཞིན་ཏུ་ཡོད་དམ། ཡང་ན་ནི་ཡི་དྭགས་ཀྱི་གནས་སུ་སྐྱེས་ནས་འཁྱག་ལྟོག་སྐོམ་གསུམ་གྱི་སྣང་བ་བསམ་པ་ནི་ཤར། ཟས་དང་སྐོམ་ནི་ལོ་གྲངས་ལྔ་བརྒྱ་རེ་ཙམ་དུ་སྒྲ་ཡང་མི་གྲགས། ཉིན་མཚན་ཀུན་ཏུ་ཟས་སྐོམ་ཡིད་ལ་བཏགས་ནས་རྒྱུ་རྒྱུ་ཞིང་ཤ་ཐང་ཆད་པར་བཙལ་ཡང་། ངན་སྐྱུག་དང་ཕྱི་ས་ཙམ་ཡང་མི་རྙེད། ཅུང་ཟད་ཙམ་རྙེད་སྲིད་ནའང་གཞན་གྱིས་འཕྲོག་པ་དང་། ཁོང་དུ་སོང་བས་ལུས་མེ་རུ་འབར་ཞིང་འཚིག་པ་སོགས་ཀྱིས་སྡུག་བསྔལ་ཞིང་ཡོད་དམ། ཡང་ན་དུད་འགྲོའི་གནས་སུ་སྐྱེས་ནས། གཅིག་གིས་གཅིག་ཟ་བའམ། མི་བཟོད་བཞིན་དུ་ཁལ་འགེལ་བ། རྨོས་རྨོ་བ། ལུས་ཀྱི་སྤུ་བཏོག་ཅིང་ཁྲག་འབྱིན་པ། ད་ལྟ་གསོད་ཀྱང་མིག་སྔོ་ཅེ་རེར་བལྟས་ནས་སྡོད་པ་ལས་ཐབས་གཞན་མེད། གླེན་རྨོངས་དང་བཀོལ་སྤྱོད་ཀྱི་སྡུག་བསྔལ་བསམ་གྱིས་མི་ཁྱབ་པ་ཞིག་ཉམས་སུ་མྱོང་ནས་བསྡད་ཡོད་དམ་སྙམ་དུ་བསམ་ཞིང་དེའི་སྡུག་བསྔལ་བློ་ཐོག་ཏུ་བླངས་ནས། ཨེ་མ་འདིའི་སྡུག་བསྔལ་རྒྱུ་དང་བཅས་པ་ད་ལྟ་ཉིད་དུ་བདག་ལ་སྨིན་ནས་འདི་སྡུག་བསྔལ་དང་བྲལ་བར་གྱུར་ཅིག བདག་གི་བདེ་བ་རྒྱུ་དང་བཅས་པ་འདི་ལ་སྨིན་ནས་འདི་བདེ་བ་དང་ལྡན་པར་གྱུར་ཅིག དེ་ལྟར་འགྱུར་བར་བླ་མ་དཀོན་མཆོག་གིས་བྱིན་གྱིས་རློབས་ཤིག་སྙམ་དུ་ཞེ་ཐག་པ་ནས་བསམ། དེ་ནས་འདི་ལྟར་བསམ་སྟེ། ག་རེ་ཡིད་སྨོན་འབའ་ཞིག་བསྒོམ་པས་ཅི་ཕན། ད་ལྟ་ནི་ངས་མ་རྒན་འདི་ལ་ཅུང་ཟད་ཞིག་ཕན་འདོགས་པའི་ནུས་པ་མི་འདུག །གང་དུ་སྐྱེས་ཡོད་པ་ཙམ་ཡང་མི་ཤེས། དམྱལ་བའི་ཚ་གྲང་ལ་རླུང་སིལ་བུ་ཙམ་དང་། དྲོད་མེ་སྟག་ཙམ་ཞིག་གིས་ཕན་འདོགས་ཀྱང་མི་ནུས། ཡི་དྭགས་ཀྱི་བཀྲེས་སྐོམ་ལ་ཟན་ཆང་བ་གང་ངམ་ཆུ་ཐིག་པ་ཙམ་ཞིག་ཀྱང་སྐྱེལ་མི་ནུས། དུད་འགྲོར་སྐྱེས་པ་ལ་འཇིགས་པ་ལས་སྐྱོབ་པ་དང་ཅུང་ཟད་ཙམ་གྱི་ངལ་བསོ་བ་ཡང་སྦྱིན་མི་ནུས་ན་ཅི་བྱེད། དེ་བས་ན་འཁོར་བའི་འཇིགས་པ་མཐའ་དག་ལས་སྐྱོབ་པའི་ནུས་པ་ཕུན་སུམ་ཚོགས་པ་མངའ་བ་དེ་རྫོགས་པའི་སངས་རྒྱས་ཡིན་འདུག་པས། མ་རྒན་འདི་རྣམས་སྡུག་བསྔལ་མཐའ་དག་ལས་སྐྱབས་པའི་ཆེད་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་དེ་ཅི་ནས་ཀྱང་ཐོབ་པར་བྱའོ་སྙམ་དུ་སྙིང་ཐག་པ་ནས་བསམ། དེ་ལྟར་ཚེ་འདིའི་མ་ལ་དམིགས་ནས་སྙིང་རྗེ་དང་བྱང་སེམས་ཅུང་ཟད་རེ་སྐྱེ་བར་འདུག་ན། དེ་ནས་ཕ་དང་མེས་པོ། སྲིང་མོ་དང་ཨ་ནེ་སོགས་ཉེ་དུ་དང་བར་མ་རྣམས་ལ་དེ་བཞིན་ཏུ་བསམ། དེ་ནས་རང་གི་ཡིད་དུ་མི་འོང་བའི་དགྲ་ལ་ཡང་དེ་བཞིན་ཏུ་བསམ་སྟེ། ག་རེ་ད་ལྟ་ངས་དགྲ་ཡིན་པར་བཟུང་ནས་ཞེ་སྡང་ཁོང་ཁྲོ་བསྐྱེད་པའི་ཡུལ་འདི་ཡང་ཚེ་རབས་སྔ་མ་རྣམས་སུ་མ་བྱས་པའི་གྲངས་ཀྱང་མི་ཆོད། དེ་ལྟར་མ་བྱས་པའི་གནས་སྐབས་སུ་ད་ལྟའི་མ་དང་ཁྱད་པར་ཅུང་ཟད་ཀྱང་མེད་པར་དྲིན་ཆེན་པོ་དེ་དང་འདྲ་བས་བསྐྱང་བསྐྱངས་པ་ཡིན། ད་ལྟ་སྐྱེ་བ་སྔ་ཕྱི་བརྗེས་ནས་ངོ་མ་ཤེས་པ་དང་། ཚེ་རབས་མང་པོའི་དྲིན་ལན་དང་ལན་ཆགས་མ་འཁོར་བའི་རྐྱེན་གྱིས་ད་ལྟ་དགྲ་ལྟར་སྣང་བ་ཡིན། ཁོས་དེ་ལྟར་ཡིན་པ་མི་ཤེས་པ་ཡིན་ཀྱང་། བདག་གིས་རྒྱལ་བའི་བཀའ་དང་བླ་མའི་མན་ངག་ཐོས་ནས་རྒྱུ་མཚན་ཤེས་བཞིན་ཚེ་རབས་གྲངས་མེད་པའི་མ་རྒན་ལ་དགྲར་བལྟས་ནས་ཅི་གནོད་བྱེད་པ་ང་རེ་ཞན། མཚང་རེ་ཆེ། ང་ལས་ཁྲེལ་མེད་ཚབས་ཆེ་བ་གཞན་སུ་ཞིག་ཡོད་སྙམ་རང་གིས་རང་ལ་ཞེ་ཁྲེལ་བདས་ནས། དགྲ་དེ་ལ་མའི་བློ་བཞག་སྟེ་སྙིང་རྗེ་དང་བྱང་ཆུབ་ཀྱི་སེམས་སྔར་བཞིན་བསྒོམ། དེ་ལྟར་དགྲ་གཉེན་བར་མའི་སེམས་ཅན་ཐམས་ཅད་ཁྱད་པར་མེད་པར་ད་ལྟའི་མ་རྒན་ལྟ་བུའི་རང་བཞིན་དུ་སེམས་སྙོམ་པར་བྱས་ནས་དེ་ལྟར་སེམས་ཅན་བརྒྱ་སྟོང་གྲངས་མེད་པ་མཐར་ནམ་མཁའི་མཐས་གཏུགས་པའི་སེམས་ཅན་ཐམས་ཅད་ལ་དེ་ལྟར་བསྒོམ་ནས་དེ་ལ་བློ་ལེགས་པར་འབྱོང་བ་དང་། དེ་ནས་སློབ་དཔོན་དང་རྒྱལ་བ་སྲས་ཀྱི་སྤྱན་སྔར་བྱང་ཆུབ་ཀྱི་སེམས་ཆོ་ག་བཞིན་དུ་བསྐྱེད་པར་བྱའོ། །དེ་ནས་བརྩམས་སྟེ་བྱང་ཆུབ་སེམས་གྱི་བསླབ་བྱ། བདག་གཞན་མཉམ་བ། བརྗེ་བ། བདག་བས་གཞན་གཅེས་རྣམས་ལ་ཁ་ཙམ་མིན་པར་སྦྱངས་ནས། རང་དོན་ཡིད་བྱེད་ཀྱི་བསམ་པ་ལ་དགྲར་བལྟས་ཏེ། ཉིན་མཚན་དུས་དྲུག་ཏུ། སེམས་བསྐྱེད་པ། བསླབ་པ་བཟུང་བ། ཉེས་ལྟུང་བཤགས་པ་སོགས་ཀྱི་སྒོ་ནས་རང་གི་ལྷག་པའི་བསམ་པ་རིན་པོ་ཆེ་ཡང་ནས་ཡང་དུ་སྦྱོང་བར་བྱེད་པ་ནི་ཐེག་པ་ཆེན་པོའི་ལམ་གྱི་མཐིལ་སོ་ཡིན་ནོ། །དེ་ལྟར་བྱང་ཆུབ་ཀྱི་སེམས་རིན་པོ་ཆེ་བཟུང་ནས་དེའི་སྤྱོད་པ་ཟབ་མོ་ལྟ་བའི་སྤྱོད་པ་དང་། རྒྱ་ཆེན་སྤྱོད་པའི་རིམ་པ་དག་ལ་ཅི་ནུས་སུ་བསླབ་པ་ཡིན་མོད་ཀྱང་། དེའི་ནང་ནས་ཀྱང་འཕགས་པའི་ལམ་མ་ཐོབ་ཚུན་གྱི་ལས་དང་པོ་བ་མོས་པས་སྤྱོད་པའི་ལམ་གྱི་གནས་སྐབས་འདིར། སྙིང་རྗེ་བྱང་ཆུབ་སེམས་ཀྱིས་གཞི་བཟུང་། སྤྱོད་པ་ཕར་ཕྱིན་དྲུག་གིས་གྲོགས་བྱས་ཏེ་གཙོ་བོར་དོན་དམ་པའི་བྱང་ཆུབ་ཀྱི་སེམས་སྤྱོད་པའི་ཐབས་ཁོ་ན་ལྷུར་བླངས་ནས་འབད་པར་བྱ་བ་ཡིན་ཏེ། ཅིའི་ཕྱིར་ཞེ་ན། དེ་ལྟར་རང་དང་གཞན་གང་གི་དོན་ལ་ཡང་མཐུ་ཆུང་ཞིང་ནུས་པ་ཞན་པ། ཚུལ་བཞིན་དུ་སྒྲུབ་པར་རྔོ་མི་ཐོགས་པ་འདི་དག་ནི་སོ་སོའི་སྐྱེ་བོའི་རྒུད་པ་དང་མ་བྲལ་ཞིང་འཕགས་པའི་འབྱོར་བ་དམ་པ་མ་ཐོབ་པའི་དབང་གིས་ཡིན་ཅིང་། ཇི་སྲིད་འཕགས་པའི་འབྱོར་བ་མ་ཐོབ་པ་དེ་སྲིད་དུ་ནི། ཡོན་ཏན་བཞི་དང་ལྡན་ཅིང་ཆགས་པ་བདུན་དང་བྲལ་བའི་ཕར་ཕྱིན་མཚན་ཉིད་པ་མི་འོང་ཞིང་། དེ་མ་ཡོང་བར་རྒྱ་ཆེན་པོའི་སྤྱོད་པའང་རྗེས་མཐུན་ཙམ་ལས་མི་འོང་བས་ཐོག་མར་སོ་སོའི་སྐྱེ་བོའི་རྒུད་པ་དང་བྲལ་ཞིང་འཕགས་པའི་འབྱོར་བ་ཐོབ་པའི་ཐབས་ལ་འབད་དགོས། དེའི་ཐབས་ནི་གོང་དུ་སྨོས་པ་ལྟར་ཐབས་དང་མ་བྲལ་བའི་ཤེས་རབ་དོན་དམ་པའི་བྱང་ཆུབ་སེམས་སྦྱོང་བ་ལས་གཞན་མེད་པས་དེ་ལ་གཙོ་བོར་བྱེད་དགོས་པ་ཡིན་ནོ། །འཕགས་པའི་ལམ་མངོན་དུ་བྱས་ནས་བཟུང་སྟེ། ཟབ་མོ་ཆོས་ཉིད་ཀྱི་དོན་དང་མ་བྲལ་བའི་སྒོ་ནས། རྒྱ་ཆེན་སྤྱོད་པའི་ངོ་བོ་ཕར་ཕྱིན་དྲུག་དང་བསྡུ་དངོས་བཞི་ལ་གཙོ་བོར་སྤྱོད་ཅིང་སྦྱངས་སྨིན་རྫོགས་གསུམ་མཐར་ཕྱིན་པར་བྱེད་པ་ཡིན་ནོ། །དེའི་གནས་སྐབས་ན་ནི་ལས་ཀྱི་དབང་གི་སྐྱེ་འཆི་རང་མཚན་པ་མེད་པས་དེ་ལ་བརྟེན་པའི་སྡུག་བསྔལ་དག་ཀྱང་རང་མཚན་པ་མི་འབྱུང་ཞིང་། སྨོན་ལམ་དང་ཏིང་ངེ་འཛིན་རང་དབང་གིས་བསམ་བཞིན་དུ་སྲིད་པར་སྐྱེ་བ་བཟུང་ནས་ཇི་ལྟར་སྒྱུ་མའི་སྐྱེས་བུས་སྒྱུ་མའི་རྩེད་མོ་ལ་ལོངས་སྤྱོད་པ་བཞིན་ཏུ། འཁོར་ལོས་སྒྱུར་བའི་འབྱོར་བས་ཀྱང་དྲེགས་པར་མི་འགྱུར་ལ། ངན་སོང་གསུམ་གྱི་ཕོངས་པས་ཞུམ་པར་མི་འགྱུར་བར་རློམ་སེམས་དང་བྲལ་བའི་བྱང་ཆུབ་ཀྱི་སྤྱོད་པ་རླབས་པོ་ཆེ་ཡོངས་སུ་རྫོགས་པར་འགྱུར་བ་ཡིན་ནོ། །དེས་ན་མོས་པས་སྤྱོད་པའི་སྐབས་སུ་ཇི་ལྟར་སྨན་ཤིང་གི་མྱུ་གུ་བསྐྱེད་ཅིང་སྲུང་བ་ལྟར་གཙོ་བོར་རང་དོན་སྤྱོད་ཀྱང་བསམ་པའི་རྒྱུ་དང་བྱེད་པའི་འབྲས་བུས་གཞན་དོན་ཁོ་ནར་འགྱུར་བ་ཡིན་ལ། འཕགས་པའི་ལམ་དུ་སྨན་ཤིང་དེ་ཉིད་ཀྱི་རྩ་བ་ལོ་འབྲས་དང་བཅས་པས་ནད་གསོ་བའི་བྱ་བ་བྱེད་པ་བཞིན་གཞི་གསུམ་གྱི་དངོས་པོ་གཏོང་བ་དང་སྤེལ་བའི་སྒོ་ནས་གཙོ་བོར་གཞན་དོན་སྤྱོད་ཀྱང་སེམས་ཅན་གྱི་ཁམས་མཐའ་ཡས་པ་བདག་གི་ལུས་སུ་བཟུང་བའི་རྣམ་གྲངས་ཀྱི་སྒོ་ནས་རང་དོན་བྱེད་པ་ཡིན་ནོ། །དེ་ལྟར་སློབ་པའི་གནས་སྐབས་ན་རང་གཞན་གྱི་དོན་ལ་ཁྱད་པར་མེད་པར་སྤྱད་པས། མི་སློབ་པའི་གནས་སྐབས་ན་དོན་གཉིས་ལྷུན་གྲུབ་ཀྱི་འབྲས་བུ་སྐུ་གཉིས་དབྱེར་མེད་པའི་མཚན་ཉིད་ཅན་མངོན་དུ་བྱེད་པ་ཡིན་ནོ། །དེ་ཡན་ཆད་ཀྱིས་རྡོ་རྗེ་ཐེག་པའི་ལམ་གྱི་སྔོན་འགྲོ་ཐུན་མོང་གི་ཐེག་པས་རྒྱུད་སྦྱང་བའི་སྐབས་ཀྱི་གང་གཅེས་གཅེས་རྣམས་ར་ཐོན་ལུག་ཐོན་དུ་བརྗོད་ནས། ད་ནི་ཐུན་མོང་མ་ཡིན་པའི་སྔོན་འགྲོ་འགལ་རྐྱེན་སྒྲིབ་པ་སྦྱོང་བ་རྡོ་རྗེ་སེམས་དཔའི་སྒོམ་བཟླས་དང་། མཐུན་རྐྱེན་ཚོགས་གཉིས་བསགས་པ་མཎྜལ་འབུལ་བའི་རིམ་པ་དང་། ཟབ་མོའི་ལམ་གྱི་སྣོད་རུང་དུ་བྱེད་པ་ལམ་དབང་བླ་མའི་རྣལ་འབྱོར་གྱི་སྐབས་རྣམས་སུ་གཅེས་པ་ནི། ཇི་སྐད་དུ། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་བ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། །ཞེས་པ་ལྟར། དོན་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བ་ནི། རང་གི་སྒྲིབ་སྦྱོང་ཚོགས་བསགས་གནད་དུ་སྨིན་པ་དང་། བརྒྱུད་ལྡན་གྱི་བླ་མ་ལས་བྱིན་རླབས་ཀྱི་འཕོ་བ་ཐོབ་པ་ལ་རག་ལས་པ་ཁོ་ན་ལས་ཐབས་གཞན་ཡོད་པར་མ་གསུངས། དེས་ན་རྟོག་པས་རྟོག་པ་དེད་ནས་རྟོག་པ་ཉིང་འཁྲུལ་ལ་ལྷག་མཐོང་དུ་རློམ་པ་དང་། ངོ་བོ་མ་མཐོང་བའི་མི་རྟོག་ལྟེང་པོ་ལ་སྒོམ་དུ་རེ་བ་ལས་བརྒྱ་འགྱུར་གྱིས་དགའ་བ་བསགས་སྦྱང་ལ་རེམ་པ་ཡིན། སྡིག་པ་སྦྱོང་བའི་ཐབས་མཐའ་ཡས་ཀྱང་ཟབ་པའི་མཐར་ཐུག་རྡོ་རྗེ་སེམས་དཔའི་སྒོམ་བཟླས་ཡིན། དེ་ཡང་སྟོབས་བཞིའི་གཉེན་པོ་ལེགས་པར་ཚང་ན་མཚམས་མེད་ཀྱི་ལས་སྒྲིབ་ཀྱང་འདག་པར་ནུས་ན་ཉེས་པ་ཕྲ་མོ་དག་པ་སྨོས་ཅི་དགོས། སྟོབས་བཞི་ལས་དང་པོ་རྟེན་གྱི་སྟོབས་ནི་སེམས་བསྐྱེད་པ་དང་སྐྱབས་འགྲོ་ཡིན་ཏེ། སྔར་བཤད་པ་ལྟར་མཐའ་ཡས་པའི་སེམས་ཅན་རྣམས་ཀྱི་སྡུག་བསྔལ་གྱིས་ཡིད་གདུང་བའི་སྡུག་བསྔལ་མཐའ་དག་གི་རྒྱུ་སྡིག་པ་མི་བཟད་པ་ལ་འཇིགས་ཤིང་སྐྲག་ནས་སྔོན་གྱི་སྡིག་པ་ལས་ལྡོག་ཅིང་ཕྱིན་ཆད་བཀའ་ལས་མི་འདའ་བའི་ཚུལ་གྱིས་སྐྱབས་སུ་འགྲོ་བའོ། །གཉེན་པོ་ཀུན་ཏུ་སྤྱོད་པའི་སྟོབས་སེམས་གཞན་དུ་མ་གཡེང་བར་སྙིང་པོ་ཡི་གེ་བརྒྱ་པ་འབུམ་ཕྲག་སོགས་བཟླ་ཞིང་རང་གཞན་གྱི་སྒྲིབ་བ་སྦྱོང་བའི་བདུད་རྩི་འབེབས་སྦྱོང་གི་དམིགས་པ་ལ་གནད་དུ་བསྣུན་པ་སོགས་དགེ་བའི་བྱ་བ་ལ་འཇུག་པ་མཐའ་དག་གོ །ཉེས་པ་སུན་འབྱིན་གྱི་སྟོབས་ནི་སྡིག་པའི་ལས་འབྲས་སྨིན་ཚུལ་ལ་བསམ་ནས་འགྱོད་པ་དང་། སོར་ཆུད་པའི་སྟོབས་ཕྱིན་ཆད་སྤོང་སེམས་གྱི་དམ་བཅའ་བརྟན་པ་སྟེ་བཞི་པོ་ཚང་ན་སྡིག་སྒྲིབ་སྦྱོང་བ་ལ་ཚེགས་མེད་ཅིང་། ཁ་ཙམ་གྱིས་བཤགས་པས་ནི་ཅིར་ཡང་མི་འགྱུར་བར་ཤེས་དགོས་སོ། །ཚོགས་བསགས་ཀྱི་སྐབས་སུ་ཡང་། ཞིང་དང་བསམ་པ་དངོས་པོ་གསུམ་དག་པ་གལ་ཆེ་བས། ཡོན་ཏན་གྱི་ཞིང་དཀོན་མཆོག་གསུམ་དང་རྡོ་རྗེ་སློབ་དཔོན། སྙིང་རྗེའི་ཞིང་ངན་སོང་བའི་འགྲོ་བ་དང་། འཇིག་རྟེན་ན་ནད་པ་དང་དབུལ་ཕོངས་འཇིགས་སྐྲག་གིས་མནར་བ་རྣམས་ལ། བསམ་པ་ངེས་འབྱུང་སྙིང་རྗེ་དད་པ་རྣམས་ཀྱིས་དྲངས་པའི་བྱང་ཆུབ་ཀྱི་སེམས་རིན་པོ་ཆེས་ཟིན་པས། དངོས་པོ་སྡིག་པ་དང་ལོག་འཚོས་མ་བསྒྲུབ་པའི་རང་གི་སྒོ་གསུམ་དང་། གཅེས་པར་བཟུང་བའི་གནས་གྲོགས་ལོངས་སྤྱོད་དང་བཅས་པ་ཕངས་མེད་དུ་འབུལ་ཞིང་གཏོང་ཐུབ་པ་ཞིག་སྤྱིར་དགོས་ཤིང་། གྲགས་པ་དང་ལྟར་སྣང་མཛེས་པ་ལྷུར་ལེན་པ་ལ་བསོད་ནམས་ཅི་ཡང་མི་འབྱུང་བར་ཤེས་དགོས། ཁྱད་པར་མཎྜལ་འབུལ་ཚུལ་ཁྲིད་ཡིག་ནས་བཤད་པ་བཞིན་ལག་ལེན་གཙང་ཞིང་འབྱོར་ཚོད་ཀྱི་ཡོ་བྱད་ཡོད་དགུ་རྩལ་སྤྲུག་ཏུ་འབུལ་བ་གལ་ཆེ། བླ་མའི་རྣལ་འབྱོར་ཞེས་པའང་བླ་མ་ཉིད་སངས་རྒྱས་སུ་མཐོང་བ་གཞིར་བཞག་ནས་དུས་རྒྱུན་དུ་མོས་གུས་གདུང་ཤུགས་རྒྱུན་མི་འཆད་པའི་ངང་ནས་གཟུགས་སྐུའི་རྣམ་འགྱུར་ཡིད་ལ་དྲན་བཞིན་ཐུགས་ཡིད་དབྱེར་མེད་གཉུག་མའི་རང་ཞལ་སྐྱོང་བ་ལ་དྲན་ཤེས་ཆུ་བོའི་རྒྱུན་བཞིན་སྤྱོད་ལམ་ཀུན་ཏུ་བསྟེན་ནུས་ན། ཚོགས་ཞོར་ལ་རྫོགས། བྱིན་རླབས་ཤུགས་ཀྱིས་འབྱུང་། རིམ་གཉིས་ཀྱི་ཡོན་ཏན་ཐམས་ཅད་དེ་ལ་བརྟེན་ནས་རྩོལ་མེད་དུ་རྒྱུད་ལ་འཆར་བ་ཡིན། དེ་ལྟར་བྱུང་ན་འོ་དོད་ཀྱིས་གསོལ་བ་མ་བཏབ་ཀྱང་ཆོག གཡོ་ཁྲམ་གྱི་ཙབ་ཙུབ་མ་མང་ཀྱང་ཆོག སྙིང་ནས་མོས་གུས་དང་། སྔགས་ཀྱི་དངོས་གྲུབ་འཐོབ་པ་ལ་སྐྱོན་ལྟར་སྣང་བའི་མཛད་སྤྱོད་རྣམས་ཀྱང་ཡོན་ཏན་དུ་མཐོང་བའི་དག་སྣང་མ་ཞིག་མེད་ན། སྐྱོན་ཡོན་སོ་སོར་བལྟ་ཞིང་གང་ཟག་བཟང་པོ་ཙམ་དུ་མཐོང་བའི་རྟོག་དཔྱོད་ནི། བྱིན་རླབས་འདྲེན་པའི་མོས་གུས་ཀྱི་ཕྱོགས་ཙམ་ཡང་ཡིན་པར་མི་འདུག ལར་དེང་སང་འགའ་རེས། སྙིང་ནས་སྔགས་ཀྱི་དངོས་གྲུབ་དོན་དུ་གཉེར་བ་ཡང་མིན། མདོ་རྒྱུད་ནས་བཤད་པ་ལྟར་བླ་མ་སངས་རྒྱས་ལས་ཀྱང་ལྷག་པར་བལྟ་དགོས་པའི་གནད་དོན་ནི་མ་གོ །ལྐོག་གྱུར་དུ་ཡིད་ངོར་ནི་ལོག་ལྟ་དང་མགུ་མཁང་བགྲང་། གཞན་ངོར་རང་ཉིད་ལ་དག་སྣང་ཅན་དུ་མཐོང་ཐབས་སམ། བླ་མ་གོ་ས་མཐོ་ཞིང་ཆེ་གྲགས་ཅན་ལ་རྣ་འཇུ་བྱས་ནས་རང་ཉིད་བཟང་བར་འདོད་ནས་དེ་ལས་སྒོམ་རྒྱུའི་གདམས་ངག་ཐོབ་པ་ཅི་ཡང་མེད་ཀྱང་དེའི་སློབ་མ་དང་ཐུགས་སྲས་ཡིན་མདོག་གི་ཁ་ཕོ་དང་། བསྟོད་ར། གསོལ་འདེབས་འུར་ཞོག །མིག་ཟིམ་ཟིམ་སྣ་ཚོགས་བྱེད་པ་སོགས་གཡོ་འཕྲུལ་ཅི་བྱས་ཀྱང་བྱིན་རླབས་འབྱུང་བའི་གོ་སྐབས་བྲལ། དེས་ན་སེམས་ལ་གཡོ་ཟོལ་མེད་པ་དམ་ཚིག་གི་རྩ་བ། །མོས་གུས་ངོ་ལྐོག་ཐུབ་པ་དག་སྣང་གི་འཆར་སྒོ་ལགས་པས། བྱིན་རླབས་འཇུག་པར་འདོད་པས་རང་སེམས་དག་སྣང་སྦྱོང་། །རྟོགས་པ་འཆར་བར་འདོད་པས་རྐྱེན་ཐུབ་དད་པ་བརྟེན། །ཅི་བསམ་འགྲུབ་པར་འདོད་པས་དམ་ཚིག་ངོ་ལྐོག་སྤང་། །དེ་རྣམས་ལག་ཏུ་ཁེལ་ན་བླ་མའི་རྣལ་འབྱོར་ཡིན། །དབང་བཞི་ལེན་ལེན་མི་དགོས་རང་དབང་རང་ལས་འཐོབ། །སེམས་ལ་རང་དབང་ཐོབ་ན་འཁོར་འདས་ལྟད་མོར་ཤར། །སྲིད་ཞིའི་རང་མཚང་མཐོང་ཚེ་རེ་དོགས་ནང་ནས་ཆོད། །རེ་དོགས་བློ་དང་བྲལ་ན་དངོས་གྲུབ་རྣམ་གཉིས་འགྲུབ། །འབྲས་བུར་རེ་སྨོན་མེད་ན་གུ་ཡངས་བློ་རེ་བདེ། །ཆོས་ཟད་བློ་བདེའི་མལ་ན་ཕ་རྗེས་བུ་ཡིས་ཟིན། །གཞན་གྱིས་བྱ་བྱེད་ཟེར་བརྗོད་བྱིས་པའི་རྩེད་མོར་མཐོང་། །རིག་པ་ཡུལ་རྗེས་མི་འབྲང་སྣང་བའི་རྫུན་ཕུག་རྡིབ། །རྫུན་སྣང་སྒྱུ་མའི་རོལ་མོ་སེམས་ཀྱི་རྒྱན་དུ་ཤར། །འཆིང་དང་གྲོལ་བའི་ཐ་སྙད་ནམ་མཁའི་མདུད་པ་ཞིག །བྱ་བྲལ་ནམ་མའི་ཀློང་ན་མཉམ་རྗེས་ཆུ་མི་ཆགས། །ཡེངས་སྒོམ་འཕྲང་ལས་གྲོལ་བའི་རྣལ་འབྱོར་སོས་རེ་དལ། །འདི་བྱ་འདི་བྱེད་མེད་པའི་ཚད་མེད་སྤྱོད་ལས་འདས། །ཕྱི་ནང་གཅེར་ཉལ་ཐུབ་ན་ནམ་མཁའི་རྣལ་འབྱོར་ཡིན། །ཀུན་མཁྱེན་ཡབ་སྲས་བརྒྱུད་པའི་གྲུབ་མཐའ་བསྙེགས་པ་ཡིན། །ཆོས་མེད་ཆོས་ལས་འདས་པ་ཆོས་པའི་ཡང་རྩེ་ལགས། །ཅེས་པ་འདི་ཚོ་བླ་མའི་གསུང་དང་རང་གི་ཀུན་རྟོག་འདྲེས་མ་ཆལ་ཆོལ་ཉམས་མཚར་གྱི་ཚུལ་དུ་སྤྲང་བཙུན་པདྨ་བཛྲ་པས་བྲིས་པའོ། །དགེའོ།།

ཞི་གནས་སྒྲུབ་པའི་ཡིག་ཆུང་ཉུང་གསལ།

༄༅། །ཞི་གནས་སྒྲུབ་པའི་ཡིག་ཆུང་ཉུང་གསལ་བཞུགས་སོ། །བླ་མ་ལ་ཕྱག་འཚལ་ལོ། །བརྩེ་ཆེན་རླུང་གི་ཤིང་རྟས་ཉེར་དྲངས་པའི། །མཁྱེན་རབ་ཉིན་མོར་བྱེད་པའི་འོད་ཟེར་གྱིས། །ས་གསུམ་འགྲོ་བའི་རྨོངས་མུན་ལྷག་མེད་དུ། །བཅོམ་མཛད་རྒྱལ་སྲས་ཆོས་ཀྱི་ཉི་མར་འདུད། །ཐུབ་མཆོག་ཤཱཀྱ་སེངྒེའི་རིང་ལུགས་ཀྱི། །འཁྲུལ་མེད་བསྟན་པའི་ལམ་བཟང་སྡེ་སྣོད་གསུམ། །གང་ཟག་གཅིག་གི་ལམ་གྱི་ཆ་རྐྱེན་དུ། །དྲིལ་ནས་ཉམས་སུ་ལེན་པ་མཁས་པའི་སྲོལ། །དེ་ཕྱིར་རྣམ་དག་ཁྲིམས་ཀྱིས་གཞི་བཟུང་ནས། །རྩེ་གཅིག་ཞི་བ་མཆོག་གི་བསམ་གཏན་ལ། །བརྟེན་ནས་ཟག་མེད་ཤེས་རབ་འཕགས་པའི་ལམ། །མངོན་དུ་བྱེད་པའི་ཚུལ་ལས་ཅུང་ཟད་གླེང་། །དེ་ལ་འདིར་སྙིང་ནས་ཐར་བ་དོན་དུ་གཉེར་བའི་གང་ཟག་བློ་དང་ལྡན་པ་རྣམས་ཀྱི་འཇུག་ངོགས་འཁྲུལ་བ་མེད་པ་ནི་རྒྱལ་བའི་བསྟན་པ་རིན་པོ་ཆེ་ཁོ་ན་ཡིན་ལ། དེ་ལ་ཇི་ལྟར་འཇུག་པའི་ཚུལ་ནི། ལམ་སྟོན་མཁས་པ་དགེ་བའི་བཤེས་གཉེན་ཁྱད་པར་ཅན་ལ་བསྟེན་ནས། དེའི་གདམས་ངག་གཞུང་སྡེ་སྣོད་གསུམ་ལ་ཐོས་བསམ་གྱིས་སྒྲོ་འདོགས་ཆོད་པར་བྱས་ནས། མངོན་རྟོགས་བསླབ་པ་གསུམ་པོ་རང་གི་རྒྱུད་ཐོག་ཏུ་བཀལ་ཏེ་ཉམས་སུ་ལེན་པ་འདི་ཡིན། དེའི་ཐོབ་རིམ་ཡང་། སློབ་དཔོན་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་གསུངས་པ་ལྟར་ཐོག་མར་ཡོན་ཏན་ཀུན་གྱི་གཞི་རྟེན་དུ་གྱུར་པ་ངེས་པར་འབྱུང་བའི་ཚུལ་ཁྲིམས་རྣམ་པར་དག་པས་རྒྱུད་བསྡམས་ཏེ། དེ་ནས་གང་ཞིག་ཉམས་སུ་བླང་བར་བྱ་བའི་ལམ་གྱི་རིམ་པ་རྣམས་ལ་ཐོས་བསམ་གྱིས་བློ་ལེགས་པར་སྦྱངས་ནས། གཟོད་ལམ་དངོས་སུ་སྒོམ་པར་བྱ་བ་ཡིན་ནོ། །ལམ་གྱི་དངོས་གཞི་དེ་ཡང་གང་ཞེ་ན། དཔལ་མགོན་ཀླུའི་དབང་པོའི་ཞལ་ནས། བསམ་གཏན་མེད་པར་ཡང་ནི་ཤེས་རབ་མེད། །ཤེས་རབ་མེད་པར་བསམ་གཏན་ཡོད་མ་ཡིན། །གང་ལ་དེ་གཉིས་མཆིས་པས་སྲིད་པ་ཡི། །རྒྱ་མཚོ་གནག་རྗེས་ལྟ་བུར་འཚལ་བར་བགྱི། །ཞེས་གསུངས་པ་ལྟར། བསམ་གཏན་དང་ཤེས་རབ་བམ་ཞི་གནས་དང་ལྷག་མཐོང་ཟུང་དུ་འཇུག་པའི་ལམ་གྱིས་སྲིད་པའི་རྒྱ་མཚོ་ལས་སྒྲོལ་ཞིང་ཞི་བའི་ལམ་ལ་སྦྱོར་ནུས་པ་ཡིན་ལ། དེའི་རྒྱུ་མཚན་དང་འཇུག་པའི་ཐོབ་རིམ་ཡང་། རྒྱལ་སྲས་ཞི་བ་ལྷས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པ་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་གསུངས་པ་བཞིན། ཐོག་མར་ཞི་གནས་ཀྱི་སེམས་ལ་བརྟན་པ་མ་ཐོབ་ན། ལྷག་མཐོང་གི་ཡེ་ཤེས་རྒྱུད་ལ་མི་སྐྱེ་བས་ཞི་གནས་བསྒོམ་དགོས། དེ་ལ་དང་པོ་ཉིད་དུ་འདོད་པའི་སས་བསྡུས་པའི་རྣམ་གཡེང་དང་རྟོག་པ་རགས་པ་ཞི་བའི་འདོད་སེམས་རྩེ་གཅིག་པ་བསྒྲུབས། དེ་ནས་གཟུགས་ཀྱི་སས་བསྡུས་པའི་བསམ་གཏན་བཞི་དང་། གཟུགས་མེད་ཀྱི་སས་བསྡུས་པའི་སྙོམས་འཇུག་བཞི་སྟེ་བསམ་གཟུགས་བརྒྱད་པོ་རིམ་གྱིས་བསྒྲུབས། དེ་ལྟར་དགུ་པོ་དེ་ནི་ཁམས་གསུམ་ས་དགུས་བསྡུས་པ་འཇིག་རྟེན་པའི་བསམ་གཏན་ནམ་བྱིས་པ་ཉེར་སྤྱོད་ཀྱི་བསམ་གཏན་ཅེས་བྱ་བ་འཇིག་རྟེན་ལས་འདས་པའི་ལམ་གྱི་རྟེན་གཞིར་གྱུར་པའོ། །ཕྱི་མ་བསམ་གཟུགས་བརྒྱད་ཀྱི་སྟེང་དུ་འདས་ལམ་ཁོ་ནས་འཐོབ་པའི་འགོག་པའི་སྙོམས་འཇུག་བསྣན་པས་དགུ་ནི་མཐར་གྱིས་གནས་པའི་སྙོམས་པར་འཇུག་པ་དགུ་སྟེ་སྔ་མ་ཐོབ་ནས་ཕྱི་མ་ཕྱི་མ་ལ་རིམ་གྱིས་འཇུག་དགོས་པས་དེ་སྐད་ཅེས་བྱའོ། །དེ་ནས་བསམ་གཏན་དང་ཏིང་ངེ་འཛིན་གྱི་དངོས་གཞི་ནི་དེ་ཙམ་དུ་འདུ་ལ། དེ་ལས་གཞན་དུ་སྤྲུལ་ལམ་གྱི་རྣམ་པར་ཐར་པ་གསུམ་དང་། ཟད་པར་བཅུ། ཟིལ་གནོན་བརྒྱད། མངོན་ཤེས་ལྔ་ལ་སོགས་པ་ནི་བསམ་གཟུགས་ཀྱི་སེམས་ལ་བརྟེན་ནས་རྣམ་གནས་ཀྱི་དྲེ་བྲག་ཡིད་ལ་བྱས་པ་ལས་འགྲུབ་པའི་ཐུན་མོང་གི་ཏིང་ངེ་འཛིན་ནོ། །འདས་ལམ་སྤྱི་དང་ཁྱད་པར་བྱང་འཕགས་ཀྱི་རྒྱུད་ཀྱིས་བསྡུས་པའི་སྒྱུ་མ་ལྟ་བུ་དང་། དཔའ་བར་འགྲོ་བ་དང་། རྡོ་རྗེ་ལྟ་བུའི་ཏིང་ངེ་འཛིན་སོགས། ཏིང་ངེ་འཛིན་དང་གཟུང་དང་སྤོབས་པ་རྣམ་པར་ཐར་བའི་སྒོ་རྒྱ་མཚོ་ལྟ་བུ་རྣམས་ནི་ཞི་ལྷག་ཟུང་དུ་འདྲེལ་བའི་ཏིང་ངེ་འཛིན་གྱི་བྱེ་བྲག་ལས་གཞན་མ་ཡིན་པར་ཤེས་པར་བྱའོ། །དེ་ལྟར་སྤྱིར་ཤེས་པར་བྱས་ནས་ཇི་ལྟར་བསྒོམ་པའི་ལག་ཁྲིད་དངོས་ནི། དབེན་པའི་གནས་སུ་འདུ་འཛི་དང་འདྲེལ་འདྲིས་ཐམས་ཅད་སྤངས་ཏེ། ངེས་འབྱུང་གི་བློ་དང་བྱང་ཆུབ་ཀྱི་སེམས་གསལ་བཏབ་སྟེ། མདུན་གྱི་ནམ་མཁར་ཕྱོགས་བཅུའི་རྒྱལ་བ་སྲས་དང་བཅས་པ་བློས་མངོན་སུམ་དུ་བྱས་ཏེ་ཡན་ལག་བདུན་པའི་བསགས་སྦྱངས་སྔོན་དུ་འགྲོ་བས་ཏིང་ངེ་འཛིན་རྣམ་པར་དག་པ་རྒྱུད་ལ་སྐྱེ་བའི་གསོལ་བ་རྩེ་གཅིག་ཏུ་གདབ། དེ་ནས་སྟན་བདེ་བར་རྡོ་རྗེའི་དཀྱིལ་ཀྲུང་དང་ཕྱེད་སྐྱིལ་སོགས་གང་བདེའི་ཚུལ་གྱིས་ལུས་དྲང་པོར་བསྲངས། ལག་མཉམ་བཞག་ཏུ་བྱ། མིག་གི་ལྟ་སྟངས་རན་པ་སོགས་ལུས་གནད་ལེགས་པར་བཅོས། དེ་ནས་རང་རྒྱུད་ལ་ཞིབ་པར་བརྟགས་ཏེ། འདོད་པ་དང་། ཞེ་སྡང་དང་། གནོད་སེམས་དང་། ང་རྒྱལ་དང་། རྨོངས་པ་དང་། དེ་ལས་གཞན་པའི་རྟོག་པ་སོགས་གང་ཤས་ཆེ་བས་རང་གི་སེམས་གནས་སུ་མི་སྟེར་བ་དེ་ངོས་བཟུང་ནས་དེའི་གཉེན་པོ་རིམ་པ་བཞིན། མི་སྡུག་པ་དང་། བྱམས་པ་དང་། སྙིང་རྗེ་དང་། ཁམས་ཀྱི་རབ་ཏུ་དབྱེ་བ་དང་། རྟེན་ཅིང་འདྲེལ་བར་འབྱུང་བའི་ཚུལ་དང་། རླུང་འབྱུང་འཇུག་སོགས་བསྒོམ་པའི་ཚུལ་གྱིས་སེམས་ལས་སུ་རུང་བར་བྱས་ཏེ་དམིགས་པ་ལ་འཇུག་ཏུ་གཏུབ་པ་ན་དེ་ནས་ཞི་གནས་དངོས་བསྒོམ་པ་ལ་འཇུག་པ་ཡིན་ནོ། །དེ་ཡང་གཞུང་དང་མན་ངག་གི་ལུགས་ཀྱིས་བསྒོམ་པའི་ཐབས་ཚུལ་བསམ་གྱིས་མི་ཁྱབ་པ་ཡོད་ཀྱང་། འདིར་རེ་ཞིག་གཞུང་གི་རྗེས་སུ་འབྲང་ནས་ཐོག་མར་སེམས་གནས་པའི་ཐབས་དགུས་འདོད་སེམས་རྩེ་གཅིག་པ་བསྒྲུབས་པའི་ཚུལ་སྨོས་ཏེ། དེ་ཡང་མདོ་སྡེ་རྒྱན་ལས། དམིགས་པ་ལ་ནི་སེམས་གཏད་ནས། ༡།དེ་རྒྱུན་རྣམ་པར་གཡེང་མི་བྱ། ༢།རྣམ་གཡེང་མྱུར་དུ་རྟོགས་བྱས་ནས། །དེ་ལ་སླར་ཡང་བརླན་པར་བྱ། ༣།བློ་ལྡན་གོང་ནས་གོང་དུ་ཡང་། །སེམས་ནི་ནང་དུ་བསྡུ་བར་བྱ། ༤།དེ་ནས་ཡོན་ཏན་མཐོང་བའི་ཕྱིར། །ཏིང་ངེ་འཛིན་ལ་སེམས་འདུལ་ལོ། ༥།རྣམ་གཡེང་ཉེས་པ་མཐོང་ནས་ནི། །དེ་ལ་མི་དགའ་ཞི་བར་བྱང་། ༦།བརྣབ་སེམས་ཡིད་མི་བདེ་ལ་སོགས། །ཡངས་པ་དེ་བཞིན་ཞི་བར་བྱ། ༧།དེ་ནས་སྡོམ་བརྩོན་ཅན་གྱིས་ནི། །སེམས་ལ་མངོན་པར་འདུ་བྱེད་བཅས། ༨།རང་གི་ངང་གིས་འབྱུང་བ་འཐོབ། །དེ་གོམས་པ་ལས་འདུ་མི་བྱེད། །ཅེས་གསུངས་པ་ལྟར་རོ། །དམིགས་པ་གང་ཡང་རུང་བ་ཞིག་ལ་སེམས་རྩེ་གཅིག་ཏུ་གཏད་དེ། དེ་ཡི་རྣམ་པ་ཡིད་ངོར་ས་ལེར་འཆར་བ་ལ་སེམས་རྩེ་གཅིག་ཏུ་འཇོག་པ་དང་། དེ་ལས་གཞན་དུ་མི་གཡེང་བར་བསྟན་པས་རྒྱུན་བསྐྱངས་ཏེ་བཞག་པ་དང་། རྣམ་གཡེང་ཕྲ་རགས་ཅི་བྱུང་ཡང་དེ་མ་ཐག་ཤེས་བཞིན་གྱི་བྱ་ར་བས་ཟིན་པར་བྱས་ཏེ་དམིགས་པའི་སྟེང་དུ་སླར་ཡང་བཞག་པ་དང་། སེམས་ཧ་ལམ་ཙམ་གནས་པས་ཆོག་པར་མི་བྱེད་པར་རྣམ་གཡེང་ཕྲ་མོ་ཙམ་ཡང་མི་འབྱུང་བར་བྱས་ཏེ་རྩེ་གཅིག་པ་ལ་བསྡུས་ཏེ་བཞག་པ་དང་། གལ་ཏེ་ཏིང་ངེ་འཛིན་སྒོམ་མི་མོས་པར་སྐྱོ་བའི་སེམས་བྱུང་ན། རྒྱལ་བ་སྲས་དང་བཅས་པའི་ཡོན་ཏན་སྤྱི་དང་བྱེ་བྲག་མངོན་ཤེས་དང་རྫུ་འཕྲུལ་སོགས་ལམ་རྟགས་ཀྱི་ཡོན་ཏན་ཕལ་ཆེར་ཏིང་ངེ་འཛིན་གྱི་མཐུར་ཤེས་པས་སྤྲོ་བ་བསྐྱེད། སེམས་གནས་པའི་མི་མཐུན་ཕྱོགས་འདུ་འཛི་སོགས་ལ་དགའ་བར་ཕྱོགས་ཚེ། འཁོར་བའི་སྡུག་བསྔལ་སྤྱི་དང་བྱེ་བྲག་ལམ་ལས་ཉམས་ཤིང་ཐ་མལ་དུ་ལུས་པའི་སྐྱོན་ཐམས་ཅད་རྣམ་གཡེང་དང་འདུ་འཛིའི་སྐྱོན་དུ་ཤེས་ནས་སྤྲོ་བའི་སེམས་ཞི་བར་བྱ། ཏིང་ངེ་འཛིན་གྱི་སྒྲིབ་པ་བརྣབ་སེམས་དང་ཡིད་མི་བདེ་བ་དང་། རྒོད་དང་། འགྱོད་པ་དང་། གཉིད་རྨུགས་དང་། གནོད་སེམས་དང་། འདོད་པ་ལ་འདུན་པ་དང་། ཐེ་ཚོམ་ལ་སོགས་པའི་རྟོག་པ་གང་ལངས་ནས་བྱུང་ཡང་། དེ་དང་དེའི་གཉེན་པོ་བསྟེན་པའི་སྒོ་ནས་ཞི་བར་བྱ། ཚུལ་དེ་ལྟ་བུའི་སྒོ་ནས་རྒྱུན་བསྲིངས་ཏེ་སྒོམ་པས་ཇི་སྲིད་བྱིང་རྒོད་སྐྱེ་བའི་དོགས་པ་དང་བཅས་ཏེ་གཉེན་པོའི་སེམས་ལ་འབད་རྩོལ་བརྟེན་དགོས་པའི་རིགས་ལ་ནི་སེམས་གནས་བརྒྱད་པ་ཞེས་བྱ། སྤང་གཉེན་ལ་རེ་དོགས་ཀྱི་འདུ་བྱེད་མི་དགོས་པར་ཇི་ཙམ་འདོད་པར་ལྷུན་གྱིས་གྲུབ་པར་གནས་པའི་ཚེ་སེམས་གནས་དགུ་པ་འདོད་སེམས་རྩེ་གཅིག་སྟེ། ཞི་གནས་མཚན་ཉིད་པ་ཡིན་ཀྱང་། ད་དུང་ལུས་སེམས་ཤིན་སྦྱང་བདེ་བ་མ་ཐོབ་བར་དུ་བསམ་གཏན་གྱི་ཉེར་བསྡོགས་དངོས་ཐོབ་པ་མིན་ཅིང་། ཤིན་སྦྱང་ཐོབ་པ་ནས་ཉེར་བསྡོགས་མི་ལྕོགས་མེད་ཅེས་བྱ་བ་ལྷག་མཐོང་གི་ཡེ་ཤེས་སྐྱེ་བའི་རྟེན་དུ་འགྱུར། དེ་ནས་བསམ་གཏན་གྱི་དངོས་གཞི་སྒྲུབ་པ་ལ་ཡིད་བྱེད་བདུན་ལས། དང་པོ་ནི་ཁམས་གསུམ་གྱི་སྐྱོན་ཡོན་དང་དེ་དག་གི་རྒྱུ་སོ་སོ་བ་སས་བསྡུས་ཀྱི་ཉོན་མོངས་དང་། བསམ་གཏན་གྱི་ཁྱད་པར་རྣམས་ཤེས་པར་བྱས་ནས། དེ་ལ་རྩེ་གཅིག་ཏུ་བསམ་པ་ནི་མཚན་ཉིད་སོ་སོར་རིག་པའི་ཡིད་ལ་བྱེད་པ་དང་། གཉིས་པ་ནི་དེ་ལྟར་བསྒོམ་པས་འོག་སའི་སྐྱོན་ལ་དོར་བྱ་དང་། གོང་སའི་ཡོན་ཏན་ལ་ཐོབ་བྱར་ཡིད་ཆེས་པ་ནི། མོས་པ་ཡིད་ལ་བྱེད་པ་དང་། དེ་ནས་འོག་སའི་ཉོན་མོངས་པའི་གཉེན་པོ་བསྟེན་པས་སྤང་བྱའི་རྟོག་པ་རགས་པ་ཉེ་བར་སྤོང་བ་ནི་རབ་ཏུ་དབེན་པའི་ཡིད་ལ་བྱེད་པ་དང་། འོག་སའི་ཉོན་མོངས་རགས་པ་དང་བྲལ་བ་ལས་ལུས་སེམས་ལས་རུང་གི་དགའ་བདེ་ཐོབ་པ་ནི་དགའ་བ་སྡུད་པའི་ཡིད་ལ་བྱེད་པ་དང་། རང་སའི་སེམས་ལ་རྒྱུན་དུ་གནས་ཤིང་འོག་སའི་ཉོན་མོངས་མི་སྐྱེ་སྙམ་བྱེད་པ་ན་ཡུལ་ལ་ཆེད་དུ་སྤྲོ་ཞིང་ཕྲ་ཞིབ་ལ་དཔྱོད་ཅིང་སྤོང་བ་ནི་དཔྱོད་པའི་ཡིད་ལ་བྱེད་པ་དང་། དེ་ནས་འོག་སའི་ཉོན་མོངས་ཕྲ་བ་སྤོང་བའི་གཉེན་པོ་རྒྱུད་ལ་སྐྱེས་པའི་བར་ཆད་མེད་ལམ་ནི་སྦྱོར་བའི་མཐའི་ཡིད་ལ་བྱེད་པ་དང་། འོག་སའི་ཉོན་མོངས་རྩ་བ་ནས་སྤངས་ཏེ་གཉེན་པོ་བསྟེན་མི་དགོས་པའི་རྣམ་གྲོལ་གྱི་ལམ་ནི་སྦྱོར་བའི་མཐའི་འབྲས་བུའི་ཡིད་ལ་བྱེད་པ་སྟེ་བསམ་གཏན་གྱི་དངོས་གཞིའི་སེམས་གྲུབ་པ་ཡིན་ནོ། །དེ་ལྟར་གྲུབ་པའི་བསམ་གཏན་དང་པོ་ནི་ཡན་ལག་ལྔ་དང་ལྡན་པ་སྟེ། རྟོག་པ་དང་། དཔྱོད་པ་དང་། དགའ་བ་དང་། བདེ་བ་དང་། ཏིང་ངེ་འཛིན་རྣམས་སོ། །བསམ་གཏན་གཉིས་པ་ནི་དེ་ལས་ཀྱང་ཞི་བས་ཡན་ལག་བཞི་པ་སྟེ། རྟོག་དཔྱོད་སྤངས་པའི་རབ་དང་། དགའ་བ། བདེ་བ། ཏིང་ངེ་འཛིན་ནོ། །བསམ་གཏན་གསུམ་པ་ན། དེ་ལས་ཀྱང་ཞི་བས་ཡན་ལག་ལྔ་དང་ལྡན་ཏེ། དགའ་བའི་རྟོག་པ་སྤངས་པའི་བཏང་སྙོམས་དང་། དྲན་པ། ཤེས་བཞིན། བདེ་བ། ཏིང་ངེ་འཛིན་རྣམས་སོ། །བསམ་གཏན་བཞི་པ་ནི་དེ་ལས་ཀྱང་ཞི་བས་རབ་མཐའི་བསམ་གཏན་ཅེས་བྱ་བ་ཡན་ལག་བཞི་པ་སྟེ། བདེ་བ་སྤངས་པའི་ཚོར་བ་བཏང་སྙོམས་དང་། དྲན་པ། འདུ་བྱེད་བཏང་སྙོམས་དང་། ཏིང་ངེ་འཛིན་རྣམས་སོ། །དེ་ལྟར་བསམ་གཏན་བཞི་མདོ་ཙམ་བརྗོད་ནས། དེ་དག་གི་རྣམ་པའི་རབ་དབྱེ་དང་། གཟུགས་མེད་ཀྱི་སྙོམས་འཇུག་སྒོམ་ཚུལ་རྣམས་ཡི་གེའི་འཇིགས་པ་དང་དགོས་གལ་ཆུང་བས་མ་བྲིས་ཤིང་ཤེས་པར་འདོད་པ་རྣམས་ཀྱིས་མངོན་པ་དང་ཕར་ཕྱིན་སོགས་ལས་ཤེས་པར་བྱའོ། །ཏིང་ངེ་འཛིན་གང་སྒོམ་ཀྱང་དེ་དག་གི་སྐབས་སུ་གལ་ཆེ་བ་ནི། བསམ་གཏན་གྱི་ཉེས་པ་ལེ་ལོ་དང་དམིགས་པ་བརྗེད་པ་དང་། བྱིང་རྒོད་དང་། ཧ་ཅང་ལྷོད་ཆེས་པས་མངོན་པར་འདུ་མི་བྱེད་པ་དང་། ཧ་ཅང་སྒྲིམ་ཆེས་པས་གནས་པ་ཆོག་མི་ཤེས་པར་ཡང་ཡང་འདུ་བྱེད་དེ་ལྔ་པོ་འདི་ཡིན་ལ། དེ་དག་གི་གཉེན་པོ་སྤོང་བའི་འདུ་བྱེད་བརྒྱད་ཅེས་པ། ཏིང་ངེ་འཛིན་གྱི་ཡོན་ཏན་ལ་ཡིད་ཆེས་ཀྱི་དད་པ་དང་། དེ་ཉིད་ཐོབ་འདོད་ཀྱི་འདུན་པ་དང་། དེ་གཉིས་ཀྱིས་བསྐུལ་བའི་རྟག་གུས་ཀྱི་སྦྱོར་བའི་བརྩོན་འགྲུས་དང་། དེའི་འབྲས་བུ་ཤིན་སྦྱང་བདེ་བ་དང་བཅས་ཏེ་བཞི་པོ་དེ་ནི་ལེ་ལོའི་གཉེན་པོ། དྲན་པ་ནི་བརྗེད་ངས་ཀྱི་གཉེན་པོ། ཤེས་བཞིན་ནི་བྱིང་རྒོད་ཀྱི་གཉེན་པོ། བྱིང་རྒོད་སྤོང་བའི་ཐབས་ཞི་ལྷག་གི་རྒྱུ་མཚན་ཡིད་ལ་བྱེད་པའི་མངོན་པར་འདུ་བྱེད་པ་ནི་འདུ་མི་བྱེད་པའི་གཉེན་པོ། བཏང་སྙོམས་ནི་འདུ་བྱེད་པའི་གཉེན་པོ་སྟེ། འདི་དག་ལ་བརྟེན་ནས་བསམ་གཏན་གྱི་སེམས་བསྒྲུབ་པར་བྱའོ། །དེ་ལྟར་བསམ་གཏན་གྱི་སེམས་གྲུབ་པར་གྱུར་པ་དེས། བདེན་པ་མཐོང་བའི་སྒོ་བཞི་པོ། ཕུང་པོ་དང་། ཁམས་དང་། སྐྱེ་མཆེད་དང་། རྟེན་ཅིང་འདྲེལ་བར་འབྱུང་བ་རྣམས་ཀྱི་རང་བཞིན་ལ། གཅིག་དུ་བྲལ་སོགས་མཐར་ཐུག་དཔྱོད་པའི་རིགས་ཤེས་ཚད་མས་དཔྱད་དེ་གང་ཡང་མ་རྙེད་པའི་དོན་ལ་རྩེ་གཅིག་ཏུ་བཞག་པ་ཞི་ལྷག་ཟུང་འདྲེལ་དུ་འགྱུར་ཞིང་། སྲིད་རྩ་དྲུང་ནས་ཕྱུངས་ཏེ་འཕགས་པའི་ལམ་ལ་སྦྱོར་བའི་ལམ་པོ་ཆེ་ཡིན་ནོ། །གཞན་ཡང་མན་ངག་ཟབ་མོ་དང་འདྲེལ་བའི་ཞི་ལྷག་རིམ་དང་གཅིག་ཆར་ཐོད་རྒལ་རྣམས་སྒྲུབ་ཚུལ་ཇི་རིགས་སུ་ཡོད་པ་ནི་ཞལ་ལས་ཤེས་པར་བྱ་བ་ཁོ་ནའོ། །འདིར་སྨྲས་པ། རྣམ་གྲོལ་ཞི་བར་གཞོལ་བའི་ལམ་གྱི་སྒོ། །ཞི་ལྷག་ཟུང་དུ་འདྲེལ་བའི་ཏིང་ངེ་འཛིན། །ཇི་ལྟར་སྒྲུབ་པའི་ཐབས་ཚུལ་ཉུང་གསལ་འདི། །སྒྲུབ་བརྩོན་རྣལ་འབྱོར་དབང་མོའི་བཞེད་སྐོང་དུ། །ཤཱཀྱའི་དགེ་སློང་པདྨ་བཛྲ་པས། །གྲུབ་དགོན་དབེན་པའི་ཚལ་ནས་བྲིས་ཏེ་ཕུལ། །དགེ་བས་ས་ལམ་རྟོགས་པ་གོང་འཕེལ་ནས། །རང་གཞན་དོན་གཉིས་ལྷུན་གྱིས་གྲུབ་གྱུར་ཅིག །དགེའོ།།

ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་བསྙེན་ཡིག་རིག་པ་འཛིན་པའི་དགོངས་རྒྱན།

༄༅། །ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་བསྙེན་ཡིག་རིག་པ་འཛིན་པའི་དགོངས་རྒྱན་ཅེས་བྱ་བ་བཞུགས་སོ། །ན་མོ་ཨརྱཱ་ལོ་ཀི་ཤྭ་ར་ཡེཿ གདུལ་བྱའི་ཞིང་ཁམས་ནམ་མཁའི་མཐའ་ཀླས་པར། །ཟབས་གསང་ཆོས་ཆར་ཕན་བདེའི་ཟིལ་མངར་ཅན། །འབེབས་མཛད་རྒྱལ་བའི་སྤྲིན་ཕུང་འབྱུང་བའི་གནས། །སྤྱན་རས་གཟིགས་དབང་གངས་ཆེན་རྒྱ་མཚོར་འདུད། །འོད་སྣང་མཐའ་ཡས་རྒྱལ་བའི་སྒྱུ་འཕྲུལ་གར། །གྲུབ་པའི་དབང་ཕྱུག་པདྨ་འབྱུང་གནས་དང་། དབྱེར་མེད་ཀུན་མཁྱེན་འཇིགས་མེད་གླིང་པ་ལ། །གུས་པས་ཕྱག་འཚལ་བཀའ་ཡི་གནང་བ་སྩོལ། །གང་ཞིག་འཕགས་མཆོག་སྡུག་བསྔལ་རང་གྲོལ་གྱི། །རིམ་གཉིས་རྣལ་འབྱོར་ཟབ་མོའི་ཉེ་ལམ་ལ། །བསྟེན་ནས་མཆོག་གི་དངོས་གྲུབ་སྒྲུབ་པའི་ཐབས། །གསལ་བྱེད་བསྙེན་ཅིང་སྒྲུབ་པའི་གནད་ཡིག་འབྲི། །དེ་ལ་འདིར་འཕགས་མཆོག་སྡུག་བསྔལ་རང་གྲོལ་གྱི་རྩ་བའི་དཀྱིལ་འཁོར་དུ་དབང་བཞི་ལེགས་པར་ཐོབ་ཅིང་དམ་ཚིག་དང་ལྡན་པའི་རྣལ་འབྱོར་པས་བསྙེན་སྒྲུབ་ཇི་ལྟར་བྱ་བའི་རིམ་པ་ལ་གསུམ་སྟེ་། མོས་སློབ་ཀྱི་དབང་དུ་བྱས་ཏེ་བསྙེན་པ་རྐྱང་པ་གཏོང་ཚུལ་དང་། བསྙེན་སྒྲུབ་སྦྲགས་མའི་ཚུལ་དུ་ཇི་ལྟར་བྱ་བའི་ཚུལ་དང་། སྨིན་སློབ་ཀྱི་དབང་དུ་བྱས་པའི་བསྙེན་སྒྲུབ་ཇི་ལྟར་བྱ་བའི་ཚུལ་ལོ། །དང་པོ་ལ་སྦྱོར་བ་དང་། དངོས་གཞི་དང་། རྗེས་ཀྱི་རིམ་པ་གསུམ་ལས། སྦྱོར་བ་ནི། །སྒྲུབ་ཐབས་རྩ་བ་ལས། འདི་ཉིད་སྒྲུབ་པའི་གནས་མཆོག་ནིཿ འཇམ་ཞིང་ཁོད་སྙོམས་ཁ་དོག་དཀརཿ དཀར་ཕྱོགས་དགེ་བསྙེན་གནས་པའི་སཿ དགྲ་འདེས་དབང་དུ་མ་བྱས་པརཿ ཞེས་པ་ལྟར་གྱི་མཚན་ཉིད་དང་ལྡན་ཞིང་། ཕྱི་ནང་གི་འགལ་རྐྱེན་དང་བྲལ་བ། མཐུན་རྐྱེན་ཚང་བའི་གནས་སུ་དགོས་པའི་ཡོ་བྱད་རྣམས་ཉེ་བར་བསགས་ཏེ། གནས་ཁང་བྱི་དོར་དང་། སྐུ་གསུང་ཐུགས་ཀྱི་རྟེན་དགྲམས་པ། མཆོད་པའི་རྣམ་པ་མཛེས་ཤིང་ཡིད་དུ་འོང་བས་སྣང་བ་ལ་བག་ཕེབས་ཤིང་བྱིན་ཆགས་པར་བྱ། དེ་ནས་ཕྱི་རོལ་ཏུ་བླ་གབ་མེད་པའི་སར། སྡེ་བརྒྱད་སྤྱི་དང་བྱེ་བྲག་གནས་གཞིའི་ས་བདག་སོགས་ལ་དམིགས་པས། །འཁོར་འདས་ཀྱི་སྦྱིན་གསོལ་ཆེན་པོ་ལྟ་བུའམ། སྡེ་བརྒྱད་མཆོད་པ་། བསང་བརྔན་སོགས་རྒྱས་བསྡུས་ཇི་ལྟར་རིགས་པ་བཏང་ནས་སྒྲུབ་པའི་སྡོངས་གྲོགས་བྱེད་པའི་ཕྲིན་ལས་བཅོལ། དེ་ནས་སྒོ་མཚམས་སུ་འོང་ནས་བགེགས་གཏོར་ཤ་ཁྲག་སྒོག་ཙོང་སོགས་ཀྱིས་བརྒྱན་པ་བཤམས་ལ། རང་ཉིད་རྟ་མཆོག་རོལ་བའི་ང་རྒྱལ་གྱིས་བགེགས་བསྐྲད་དང་མཚམས་གཅོད་དྲག་ཏུ་བྱ། བསྲུང་བའི་འཁོར་ལོ་རྡོ་རྗེའི་གུར་ཁང་སྒོང་དབྱིབས་ལྟ་བུ་ལས་ཡེ་ཤེས་ཀྱི་མེ་དཔུང་ཁ་དོག་ལྔ་ལྡན་ཕྱོགས་ཀུན་ཏུ་འཕྲོ་བར་བསམ་ལ་ལས་བྱང་གི་བགེགས་སྐྲོད་མཚམས་གཅོད་རྣམས་བྱ། དེ་ནས་སྒོ་ཟུར་དུ་ཐོ་ཆུང་དཀར་པོ་བརྩིགས་པ་ལ། རྒྱལ་ཆེན་བཞིའི་མཚན་སྔགས་དང་འདོད་གསོལ་བྲིས་པ་བཙུགས་ནས། དེ་ལ་རྒྱལ་ཆེན་དྲངས་བསྟིམ་བགྱིས་ནས་འཕྲིན་ལས་བཅོལ། དེ་ནས་གནས་ཁང་དུ་རང་གི་གདན་འོག་ཏུ་རྩྭ་ཀུ་ཤའི་གདན་དང་འབྲུ་དཀར་གྱིས་གཡུང་དྲུང་གཡས་སྐོར་དུ་བྲིས་པའི་ཁར་མལ་བཤམས། །རང་གི་ཐད་ནས་ཞལ་སྤྲོད་དུ་འོང་བར་བྱས་ཏེ་རས་བྲིས་དང་ལུགས་སྐུ་སོགས་ཡོད་ན་བཤམས། དེ་མདུན་དུ་སྟེགས་བུ་ཉིས་རིམ་གྱི་གོང་མར་གཏོར་མའི་རེ་ཟིག་ལས་བཤམས་པ་ལྟར་གྱི་ཐུགས་རྗེ་ཆེན་པོའི་རྩ་གཏོར་སྨན་རཀ་ཆད་ཐོ་བསྟན་མའི་གཏོར་མ་རྒྱུན་བཞག་བཅས་བཤམས། གཏོར་མར་གཟུངས་འཇུག་འཇོག་པར་སྤྲོ་ན། རྒྱ་ཤོག་ལ་དྲི་བཟང་དང་མཚལ་སྣག་གང་རུང་གིས་ཨོཾ་ཨ་མི་ཏ་བྷ་ཧྲཱིཿ དང་ཡིག་དྲུག་སེམས་མ་བཞིའི་སྔགས། རྟ་མགྲིན་རིགས་བཞིའི་སྔགས་བཅས་ཀྱི་གཤམ་དུ་ནམ་མཁའ་མཛོད་ཀྱི་སྔགས་འབྲི། འཕགས་པའི་ལྷ་ཚོགས་འཁོར་དང་བཅས་པས་བདག་ལ་མཆོག་དང་ཐུན་མོང་གི་དངོས་གྲུབ་སྩོལ་བར་མཛད་དུ་གསོལ། ཅེས་པའི་འཕྲོར། ཡེ་དྷར་ཚར་གཅིག་བྲིས་ཏེ་དབུ་ནས་དྲིལ་ཏེ་མགོ་མཇུག་མ་ལོག་པར་དར་དཀར་གྱིས་དྲིལ་ནས་སྙུག་སྦུབས་སམ་ཟངས་སྦུབས་སུ་བཅུག་ཏེ་འཛུད། སྟེགས་འོག་མར་ཆུ་གཉིས་སྔོན་དུ་འགྲོ་བའི་ཉེར་སྤྱོད་རྣམས་སྦྲེང་ཚར་དུ་བཤམས། བསྙེན་སྒྲུབ་ཀྱི་སྐབས་འདིར་དེ་ཙམ་ལས་གཞན་དཀྱིལ་འཁོར་སོགས་མི་དགོས་ཏེ། རྩ་བར། ཡང་ན་སྨན་རཀ་གཏོར་མར་བསྟན། །ཞེས་པ་ལྟར་རོ། །དེ་ནས་ལོང་ཁྱབ་དང་བསྟུན་ཏེ་ཞག་གྲངས་ཇི་ལྟར་རིགས་པར་སྔོན་འགྲོ་རྣམས་སྦྱངས་དགོས་ཏེ། ཐར་པའི་ལམ་གྱི་རྩ་བ་ཡིན་པས་ངེས་འབྱུང་གི་བློ་བཅོས་མ་མ་ཡིན་པ་སྐྱེ་བའི་ཐབས་སུ་བློ་ལྡོག་གི་ཆོས་བཞི་དང་། ཐེག་ཆེན་ལམ་གྱི་སྲོག་ཤིང་ཡིན་པས་བྱང་ཆུབ་ཀྱི་སེམས་རིན་པོ་ཆེ་སྐྱེ་བའི་ཐབས་སུ་ཚད་མེད་བཞིས་བློ་སྦྱོང་བ་རྣམས་རྒྱུད་ལ་འགྲོང་ངེས་ཤེས་པར་བྱས་ནས། སྐྱབས་འགྲོ་སེམས་བསྐྱེད་། ཡན་ལག་བདུན་པ་རྣམས་དང་། ཁྱད་པར་གྱི་ལམ་རྡོ་རྗེ་ཐེག་པ་དང་འབྲེལ་བའི་སྔོན་འགྲོ་སྒྲིབ་པ་སྦྱོང་བ་རྡོ་རྗེ་སེམས་དཔའི་སྒོམ་བཟླས། ཚོགས་བསོགས་པ་མཎྜལ། བྱིན་རླབས་འཇུག་པ་བླ་མའི་རྣལ་འབྱོར་རྣམས་ལ་གནད་དུ་བསྣུན་པར་བྱ། དེ་དག་གི་ཚོགས་ཞིང་སྒྲུབ་པ་ཡང་། རང་གི་སྙིང་གའི་ཧཱུྃ་གི་འོད་ཟེར་གྱིས་བླ་མ་དང་གཉིས་སུ་མེད་པ་མགོན་པོ་སྤྱན་རས་གཟིགས་དབང་ཕྱུག་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་མདུན་གྱི་ནམ་མཁར་བཛྲ་ས་མ་ཡ་ཛཿ ཞེས་བརྗོད་པས་ཚོགས་ཞིང་གི་གཙོ་བོར་ཇོ་བོ་སྤྱན་རས་གཟིགས་བཞུགས་པ་ལ་སྐྱབས་ཡུལ་དཀོན་མཆོག་གསུམ་དང་བརྒྱུད་པའི་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་སྤྲིན་ཕུང་འཁྲིགས་པ་ལྟར་གསལ་གདབ་ལ། ན་མོཿ མཐའ་མེད་འཁོར་བ་སོགས་དང་༴ ཧོཿ ཕ་མ་རིགས་དྲུག་སོགས་དང༴ ཧོཿ དུས་གསུམ་བཞུགས་པའི་སོགས་བྱའོ། །དེ་ནས་རྡོར་སེམས་བསྒོམ་བཟླས་ཀྱང་། ཨཿ བདག་ཉིད་ཐ་མལ་སྤྱི་བོ་རུ། །སོགས་སྔོན་འགྲོ་བཞིན་བྱ། བླ་མའི་འབྱོར་སྔོན་འགྲོ་བྱ་བའམ། ཡང་ན་བླ་མ་སྤྱན་རས་གཟིགས་ཀྱི་རྣམ་པར་གསལ་གདབ་ནས། གསོལ་འདེབས་ཞལ་མཐོང་མས་ཐུགས་བརྒྱུད་བསྐུལ་ཏེ། ཡིག་དྲུག་གསོལ་འདེབས་ཀྱི་ཚུལ་དུ་བགྲངས་ཤིང་། བརྒྱུད་པའི་བཤང་འདེབས་ཀྱི་མཐར་དབང་བཞི་ལེན་པ་དང་ཐུགས་ཡིད་བསྲེས་པ་སོགས་གཞུང་བཞིན་བགྱིས་ཚེ་ཐུགས་རྗེ་ཆེན་པོའི་ཕྱི་སྒྲུབ་ཏུ་ཡང་འགྱུར་པས་ཤིན་ཏུ་ལེགས། གང་ལྟར་ཀྱང་དེ་ཡན་ཆད་སྔོན་དུ་འགྲོ་བའི་ཆོས་སོ། །དེ་ནས་དངོས་གཞི་ནང་མཚམས་བཅད་པ་ནས་བཟུང་ཕྱི་ནང་གི་རྒྱུ་འགྲུལ་དང་རྣམ་གཡེང་རྣམས་ལེགས་པར་བསྡམས་ཏེ་ཐུན་བཞི་ཁྲིགས་ཆགས་སུ་གཏོང་བ་ཡིན། དེ་ལ་ཉིན་དང་པོའི་ཐོར་ཐུན་ལ་སྔོན་འགྲོ་རྣམས་མཐར་ཆགས་སུ་རྫོགས་པར་བྱས་ནས། སྔ་ཐུན་གྱི་མགོར་གཞི་བགེགས་ཀྱི་གཏོར་མ་བཤམས་ཏེ། ཚིག་བདུན་གསོལ་འདེབས། བླ་བརྒྱུད་གསོལ་འདེབས། ཚོགས་ཞིང་སྤྱན་འདྲེན། གསོལ་འདེབས་ཞལ་མཐོང་མ། སྐྱབས་སེམས་ཡན་ལག་བདུན་པ་བཅས་གཞུང་བཞིན་གྲུབ་མཐར། དཀར་གཏོར་དང་གསེར་སྐྱེམས་བྱིན་གྱིས་བརླབས་ཏེ་སྡེ་བརྒྱད་མཆོད་པ་དང་། རིག་འཛིན་རྩ་བརྒྱུད་མས་སྔོན་གཏོར་བསྔོ། དེ་ནས་ཨོཾ་ཧྲཱིཿཔདྨནྟ་ཀྲི་ཏ་བཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ། བདག་ཉིད་སྐད་ཅིག་གིས་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བ་གཟི་བྱིན་བསྐལ་བའི་མེ་ལྟར་འབར་བའི་སྐུར་གྱུར་པར་བསམ་ལ། ཧྲཱིཿ ང་ནི་པདྨ་དབང་གི་སྐུཿ སོགས་ཀྱིས་བགེགས་སྐྲོད་ཅིང་བསྲུང་འཁོར་བསྒོམ། དེ་ནས་བྱིན་དབབ་པ་ནས་བརྩམ་ཆོ་ག་དཀྱུས་བཞིན་གཏོང་བར་བྱ་སྟེ་བསྐྱེད་རིམ་གྱི་གོ་དོན་རྣམས་དཀའ་འགྲེལ་དབྱར་གྱི་རྔ་གསང་ལྟར་ཤེས་པར་བྱ་དགོས་སོ། །བསྟོད་པའི་མཇུག་ཏུ་སླེབ་པ་དང་། སྔགས་ཀྱི་གྲངས་འདྲེན་པ་ཁོ་ན་མི་བྱ་བར། ཐོག་མར་ལྷའི་གསལ་སྣང་དང་དག་དྲན་ང་རྒྱལ་གསུམ་ལ་སེམས་འཛིན་པ་གལ་ཆེ་སྟེ། རིག་འཛིན་བསྙེན་ཡིག་ཞལ་གསུང་མར། མདོར་ན་སྣང་གྲགས་རིགས་གསུམ་ཐ་མལ་དུ་སོང་བའི་བསྙེན་པས་ས་མི་ཆོད་པས། སྣང་ཞེན་ལྷ་སྐུའི་ཕྱག་རྒྱར་རྫོགསཿ སྒྲ་གྲགས་བདེ་ཆེན་སྔགས་སུ་་དགཿ དྲན་རྟོག་འོད་གསལ་ཆོས་སྐུར་སྨིནཿ ཞེས་རང་ལུགས་ཀྱི་དག་རྫོགས་སྨིན་གསུམ་འདི་བསྙེན་པའི་མདོ་ཆིང་ཆེན་པོ་ཡིན། ཞེས་གསུངས་པ་ལྟར། ཐོག་མར་གཙོ་བོ་ཁོ་ན་ལ་སེམས་བཟུང་སྟེ། དེ་ཡང་དབུ་རྒྱན་གྱི་རྩེ་ནས་པདྨའི་གདན་གྱི་བར་གྱི་སྐུ་མདོག ཞལ་ཕྱག རྒྱན་དང་ན་བཟའ། སྤྱན་གྱི་དཀར་ནག ཕྱག་ཞབས་ཀྱི་རི་མོ། མཚན་དཔེའི་རྣམ་འགྱུར། འོད་ཟེར་གྱི་འཕྲོ་འདུ་སོགས་ཆ་ཕྲ་མོ་ནས་གསལ་ཆ་འདོན་དེ་ཡང་རས་བྲིས་ལྟ་བུའི་ལེབ་ལེབ་པོ་དང་། ལྡེར་ཚོ་ལྟ་བུའི་རྡོས་བཅས་ཀྱི་བེམ་པོ། འཇའ་ཚོན་ལྟ་བུའི་སེམས་མེད་རྣམས་མ་ཡིན་པར། མདུན་རྒྱབ་གཡས་གཡོན་སྐུ་སྐབས་ཕྲ་སྦོམ་སོགས་སྐབས་ཕྱེད་པ་ལ་ནང་ཁྲོལ་རྡོས་བཅས་སོགས་སྤངས་བའི་དྭངས་མ་འོད་ཀྱི་ལུས། མཁྱེན་བརྩེ་ནུས་གསུམ་གྱི་ཡེ་ཤེས་དང་ལྡན་པའི་ལྷ་དངོས་སུ་བྱོན་པ་ལྟ་བུ་ཞིག་ལ་བསླབ། དེ་ལ་སེམས་ཟིན་ནས་རིམ་བཞིན་རིགས་བདག་འོད་དཔག་མེད་སྤྲུལ་སྐུའི་ཆ་བྱད་ཅན་དང་། རིགས་བཞིའི་སེམས་མ། རྟ་མགྲིན་རིགས་བཞི་སོགས་རེ་རེ་ནས་ལེགས་པར་གསལ་བཏབ། དེ་ནས་རིམ་བཞིན་གཞལ་ཡས་ཁང་དང་ཞིང་ཁམས་ཀྱི་བཀོད་པ་དང་། བསྲུང་བའི་འཁོར་ལོ་ཚུན་ཆད་ཀྱི་གསལ་སྣང་བཏོན་ཏེ། རེས་རྣམ་པ་སྤྱི་ལ་སེམས་བཟུང་། རེས་བྱེ་བྲག་ལ་སེམས་བཟུང་སྟེ་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོ་ཐམས་ཅད་ཡིད་ངོར་བཀྲ་ལམ་གྱིས་འཆར་བ་ལ་སློབ་པ་དེ་ལ་རྣམ་པ་གསལ་བ་ཞེས་བྱ། དེ་ལྟར་གསལ་བ་དེ་ཡང་དངོས་པོ་རང་མཚན་ཅན་དུ་བདེན་པར་མི་ཞེན་པར། དོན་རང་སྣང་ཡེ་ཤེས་ཀྱི་དཀྱིལ་འཁོར་ལ་ཞལ་ཕྱག་མདོག་དབྱིབས་སོགས་ཀྱི་སྤྲོས་པ་མི་མངའ་ཡང་། སངས་རྒྱས་རང་སྣང་གི་ཡོན་ཏན་རྣམས་གདུལ་བྱའི་བློ་ངོར་མཚོན་བྱེད་ཀྱི་བརྡར། ཞལ་ཕྱག་ཁ་དོག་སོགས། རྟགས་ཀྱི་ཕྱག་རྒྱར་ཤར་བ་ཡིན་ཏེ། ཞལ་གཅིག་རང་བྱུང་གི་ཡེ་ཤེས་ཕྱག་བཞི་ཚད་མེད་བཞི་དང་བསྡུ་བའི་དངོས་པོ་བཞི། ཞབས་གཉིས་ཐབས་དང་ཤེས་རབ་བམ་ཚུལ་ཁྲིམས་དང་ཏིང་འཛིན། དར་གྱི་ཆས་གོས་ལྔ་ཟག་མེད་ཀྱི་ཕུང་པོ། རིན་པོ་ཆེའི་རྒྱན་བདུན་བྱང་ཆུབ་ཀྱི་ཡན་ལག་བདུན། སྐུ་མདོག་དཀར་བ་སྒྲིབ་གཉིས་ཀྱི་དྲི་མ་སྤངས་པ་། རྫོགས་པའི་སངས་རྒྱས་ཀྱིས་དབུ་བརྒྱན་པ་དོན་གྱིས་སངས་རྒྱས་ཡིན་པ་ཞབས་བཞེངས་སྟབས་ཀྱིས་བཞུགས་པ་འགྲོ་བའི་དོན་ལ་གཡེལ་བ་མེད་པ་སོགས་ཀྱི་བརྡར་བསྟན་པ་ཡིན་པར་ཤེས་ནས་གཟུགས་སྐུར་སྣང་ཡང་ཆོས་སྐུའི་རང་བཞིན་ལས་མ་འདས་པར་སྣང་སྟོང་སྒྱུ་མའི་རོལ་པར་རྩལ་སྦྱོང་བ་ལ་རྣམ་དག་དྲན་པ་ཞེས་བྱ། སྦྱང་གཞི་སྐྱེ་འཆི་བར་དོ་གསུམ་དང་། ཕྲ་བའི་ལུས་ངག་ཡིད་གསུམ་ཉིད། སྦྱང་འབྲས་རྒྱལ་བའི་སྐུ་གསུམ་དང་རྡོ་རྗེ་གསུམ་གྱི་རང་བཞིན་དུ་ཡེ་ནས་གནས་པར་ཐག་བཅད་ནས། བློ་བུར་གྱི་སྒྲིབ་པ་སྦྱང་ཕྱིར་སྦྱོང་བྱེད་ཏིང་འཛིན་གསུམ་དང་གསལ་བ་གསུམ་གྱི་ལམ་འཁྱེར་དང་མ་བྲལ་བར། སྣང་གྲགས་རིག་གསུམ་ལྷ་སྔགས་ཡེ་ཤེས་ཀྱི་རོལ་པར་རྒྱས་འདེབས་པ་ལ་ང་རྒྱལ་བརྟན་པ་ཞེས་བྱ། དེ་རྣམས་བསྐྱེད་རིམ་གྱི་དངོས་གཞི་བསྙེན་པའི་དོན་ནོ། །སྲོག་སྡོམ་གཟེར་བཞིའི་ནང་ནས། བསྙེན་པའི་ཡན་ལག་ཏིང་ངེ་འཛིན་གྱི་གཟེར་ཞེས་བྱ་བ་ཡིན་པས་ཤིན་ཏུ་གལ་ཆེ། དེ་ལྟར་སྣང་བ་ལྷའི་རྣལ་འབྱོར་ལ་གཙོ་བོར་བྱས་ཏེ་ཇི་ནུས་སུ་མཉམ་པར་བཞག དེ་ནས་བཟླས་པ་ལ་འཇུག་པ་ནི། རང་ཉིད་ཐུགས་རྗེ་ཆེན་པོའི་ཐུགས་ཀ་རུཿ ཞེས་སོགས་ཀྱི་འཛབ་དགོངས་གསལ་བཏབས་ལ། ཐོག་མར་འགོག་བཟླས། དེ་ནས་ཡིད་བཟླས་དང་། ངག་བཟླས་རྣམས་རིམ་བཞིན་བྱས་ཏེ། ཐུགས་ཀའི་ཉི་ཟླའི་གའུའི་ནང་གི་ཟླ་གདན་གྱི་སྟེང་དུ། ཧྲཱིཿལ་ཡི་གེ་བདུན་པའི་སྔགས་ཕྲེང་དཀར་འཚེར་མུ་ཏིག་གི་ཕྲེང་བ་ལྟ་བུས་བསྐོར་བ་ལ་ཤེས་པ་རྩེ་གཅིག་ཏུ་གཏད་ནས། སྲོག་རྩོལ་བསྡམས་པའི་སྦྱར་བས་བར་རླུང་འཇམ་ཞིང་རན་པ་ཁམས་ལ་མི་གནོད་པ་ཙམ་དུ་བཟུང་ལ། རླུང་ཕྱིར་བྱུང་བ་ན་ཧྲཱིཿཡིག་སྔགས་ཕྲེང་དང་བཅས་པ་ལས་འོད་ལྔའི་ཟེར་ཐག་སྣལ་མ་བརྐྱང་པ་ལྟར་སྣ་བུག་གཉིས་ནས་ཕྱིར་ཐོན་ཏེ་་སྣང་སྲིད་ཐམས་ཅད་དག་པའི་འཁོར་ལོར་སྦྱངས། ནང་དུ་བརྔུབས་པ་དང་། བརྟན་གཡོ་སྣོད་བཅུད་ཀྱི་དངོས་པོ་ཐམས་ཅད་ལྟེམ་གྱིས་ཞུ་ནས་འོད་ལྔའི་རྣམ་པར་སྣ་བུག་གཉིས་ནས་སླར་ཞུགས་ཏེ་སྔགས་ཕྲེང་ཧྲཱིཿདང་བཅས་པ་ལ་ཐིམ་པར་བསམ་ཏེ། ནང་དུ་གནས་པའི་ཚེ་བར་རླུང་བཟུང་ལ་རིག་པ་སྔགས་ཕྲེང་དང་དབྱེར་མེད་དུ་བསྲེ་བ་ལ་བསླབ་པར་བྱ་བ་ནི་འགོག་བཟླས་སོ། །དེ་ནས་སྔགས་ཕྲེང་ལས་རང་སྒྲ་གྲགས་པའི་སྒྲ་གདངས་ལ་ཤེས་པ་གཏད་ནས་ཡིག་བདུན་ཆད་ལྷག་མ་སོངས་པར་ཡིད་བཟླས་ཁོ་ན་བྱ། དེ་ནས་ངག་བཟླས་བྱ་ཏེ། སྒྲ་ཧ་ཅང་ཆེ་བ་དང་། ཆུང་བ་དང་། མྱུར་ཆེས་བུལ་ཆེས། མིང་ཚིག་གིས་བར་ཆོད་པ་སོགས་སྐྱོན་རྣམས་སྤངས་སྟེ། གསལ་དག་སྙན་པའི་གདངས་དང་བཅས་ཏེ་བཟླ། དེ་ཚེ་ཐུགས་ཀའི་སྔགས་ཕྲེང་ལས་འོད་ཟེར་བྱུང་བ་གཙུག་གཏོར་དང་། མཛོད་སྤུ་དང་། ལྗགས་དང་། ཐུགས་ཀའི་དཔལ་བེའུ་དང་། བ་སྤུའི་ཁོང་བུ་སོགས་ནས་ཐོན་ཏེ་སྟོང་གསུམ་འཇིག་རྟེན་གྱི་ཁམས་འདིས་མཚོན་པའི་ཕྱོགས་བཅུའི་ཞིང་ཁམས་རྣམས་སུ་ཁྱབ་པར་སྤྲོས་པས། འོད་ཟེར་གྱི་སྣ་ལས་མཆོད་པའི་སྤྲིན་ཕུང་དང་བསྟོད་པའི་གླུ་དབྱངས། མེ་ཏོག་དང་སྤོས་ཆུའི་ཆར་ཆེན་པོ་འབེབས་པའི་བྱང་ཆུབ་སེམས་དཔའ་ཁྱེའུ་དང་བུ་མོའི་གཟུགས་ཅན་བསམ་གྱིས་མི་ཁྱབ་པ་བྱུང་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་ཅིང་བསྟོད་ནས་འགྲོ་བའི་དོན་དུ་ཐུགས་བརྒྱུད་བསྐུལ་བས། ཐམས་ཅད་ཀྱང་འཕགས་པའི་སྐུ་ཆེ་ཆུང་དང་རྣམ་འགྱུར་མ་ངེས་པ་སྣ་ཚོགས། ཕྱག་སྟོང་སྤྱན་སྟོང་དང་། ཞལ་གཅིག་ཕྱག་བཞི། ཁ་སརྤ་ཎི་སོགས་གང་ལ་གང་འདུལ་གྱི་རོལ་བར་བཞེངས་ནས་ཐམས་ཅད་ཀྱི་སྐུའི་ལྟེ་བུ་དང་གསང་གནས་སྟ་ཟུར་གཉིས། པུས་མོའི་ལྷ་ང་། ཞབས་ཀྱི་མཐིལ་འཁོར་ལོ་རྩིབས་སྟོང་པ་སོགས་ལས་སྐུ་དང་འོད་ཟེར་སྔགས་ཀྱི་རང་སྒྲས་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ཁམས་གསུམ་འགྲོ་བ་རིགས་དྲུག་གི་སེམས་ཅན་ཐམས་ཅད་ཀྱི་ལས་ཉོན་འཁྲུལ་སྣང་བག་ཆགས་དང་བཅས་པ་བ་མོ་ལ་ཉི་ཟེར་ཕོག་པ་ལྟར་སྦྱངས་ནས། ཐམས་ཅན་འཕགས་པའི་སྐུར་གྱུར་ཏེ་ཡི་གེ་དྲུག་མའི་རང་སྒྲ་བུང་བ་ཚང་ཞིག་པ་བཞིན་ཟི་དི་རི་རི་སྒྲོགས་པར་བསམ། ཡང་འོད་ཟེར་རྣམས་ཚུར་འདུ་བ་དང་ལྷན་ཅིག་རྒྱལ་བ་སྲས་དང་བཅས་པའི་མཁྱེན་བརྩེ་ནུས་པའི་ཡོན་ཏན་ཐམས་ཅད་དང་། སྣོད་བཅུད་དག་པའི་འཁོར་ལོར་གསལ་བ་ཐམས་ཅད་སྐུ་དང་ཡིག་འབྲུ་ཕྱག་མཚན་འོད་ཟེར་གྱི་རྣམ་པར་འདུས་ཏེ་རྩ་བའི་དཀྱིལ་འཁོར་དང་གཙོ་བོའི་བ་སྤུའི་བུ་ག་ནས་ཞུགས་ཏེ་ཐུགས་སྲོག་དྭངས་མའི་ཧྲཱིཿལ་ཐིམ་པར་བསམ་ཞིང་། འཁོར་འདས་བདག་གཞན་དུ་འཛིན་པའི་རྟོག་པ་ཐམས་ཅད་རིག་པའི་ཡེ་ཤེས་ཀྱི་ངང་དུ་རོ་མཉམ་དབྱེར་མེད་དུ་བསྲེ་ཞིང་། ལྟ་དང་སྣང་བ་ཆོས་ཉིད་གསུམ་གཅིག་ཏུ་འདྲེས་པའི་གནད་ལ་གོམས་པར་བྱ་བ་རྣམས་ནི། ཉེ་བསྙེན་གྱི་ཡན་ལག་སྙིང་པོ་སྔགས་ཀྱི་གཟེར་དང་སྒྲུབ་པའི་ཡན་ལག་དགོངས་པ་མི་འགྱུར་བའི་གཟེར་དང་། སྒྲུབ་པ་ཆེན་པོའི་ཡན་ལག་འཕྲོ་འདུའི་གཟེར་རྣམས་ཡིན་ཏེ། དེ་ལྟར་སྲོག་སྡོམ་གཟེར་བཞི་པོ་འདི་བསྙེན་པའི་དངོས་གཞིའི་གནད་འགག་ཆེ་ཤོས་ཡིན། འདིར་བསྙེན་རྐྱང་གི་སྐབས་སུ་སྒྲུབ་པ་དང་སྒྲུབ་ཆེན་གྱི་ཡན་ལག་འཆད་པ་ཅི་ཞེ་ན། སྤྱིར་བསྙེན་སྒྲུབ་ཡན་ལག་བཞི་པོ་འདི་ལ། ས་མཚམས་ཀྱི་སྒོ་ནས་བཞག་པའི་བསྙེན་སྒྲུབ་ཡན་ལག་བཞི། སྦྱོར་བའི་དུས་ཀྱི་བསྙེན་སྒྲུབ་ཡན་ལག་བཞི། སྒྲུབ་པའི་དུས་ཀྱི་བསྙེན་སྒྲུབ་ཡན་ལག་བཞི། བསྐྱེད་རིམ་སྡུད་པའི་ཆིངས་སུ་བཤད་པའི་བསྙེན་སྒྲུབ་ཡན་ལག་བཞི། རྫོགས་རིམ་སྡུད་པའི་ཆིངས་སུ་བཤད་པའི་བསྙེན་སྒྲུབ་ཡན་ལག་བཞི། བསྐྱེད་རྫོགས་གཉིས་ཀ་སྡུད་པའི་ཆིངས་སུ་བཤད་པའི་བསྙེན་སྒྲུབ་ཡན་ལག་བཞི་རྣམས་སུ་ཡོད་པ་ལས། འདི་སྒྲུབ་པའི་དུས་ཀྱི་བསྙེན་སྒྲུབ་ཡན་ལག་བཞི་ཡིན་ཅིང་། དེ་ལ་ཡང་བསྙེན་པ་དང་། སྒྲུབ་པ་གཉིས་སུ་དབྱེ་བའི་བསྙེན་བའི་ཡན་ལག་བཞི། སྒྲུབ་པའི་ཡན་ལག་བཞི་ཡོད་པའི་འདིར་བཤད་པའི་བསྙེན་སྒྲུབ་ཡན་ལག་བཞི་པོ་ནི། སྒྲུབ་དུས་ཀྱི་བསྙེན་པའི་བསྙེན་པ་། བསྙེན་པའི་ཉེ་བསྙེན། བསྙེན་པའི་སྒྲུབ་པ། བསྙེན་པའི་སྒྲུབ་ཆེན་བཞི་ཡིན་པར་ཤེས་པར་བྱའོ། །དེ་ལྟར་ཤེས་ཚེ་བསྙེན་བསྒྲུབ་ཀྱི་ཁོག་ཕལ་མོ་ཆེ་ཁྲོལ་འགྲོ་བ་ཡིན་པས་གོ་བའི་དམིགས་ཕྱེད་པ་ཡིན་ནོ། །དེ་ཡང་དང་པོ་ལྷར་སྣང་གསལ་བ། དེ་ནས་སྔགས་ཕྲེང་གསལ་བ། དེ་ནས་འཕྲོ་འདུ་བྱ་བ་སོགས་སྔ་མ་སྔ་མ་རྣམས་ལ་གསལ་སྣང་གི་བརྟན་པ་མ་ཐོབ་པར་ཕྱི་མ་ཕྱི་མ་རྣམས་མི་བྱ་བར་གནད་ཆེའོ། །དེ་ནས་ཐུན་བསྡུ་བ་ན། བསྙེན་པའི་ལྷག་ཆད་ཁ་སྐོང་ཕྱིར། དབྱངས་གསལ་ཡིག་བརྒྱ། ཡེ་དྷར་བཅས་ལན་གསུམ་རེ་བཟླས་མཐར་མཆོད་བསྟོད་དངོས་གྲུབ་བླང་བ་བཤགས་པ་བཅས་བཏང་རྗེས། ཉེར་བསྡུའི་ཚིག་གིས་གསལ་བཏབ་སྟེ་རིལ་འཛིན་དང་རྗེས་གཞིག་གང་རུང་གིས་ལྷར་སྣང་འོད་གསལ་དུ་བཅུག་སྟེ་ཇི་གནས་སུ་བཞག་པ་ནི་འཆི་སྲིད་ཆོས་སྐུར་སྦྱོང་བའི་ཉམས་ལེན་གྱི་གནད་ཡིན་པས་འདོར་དུ་མི་རུང་། དེ་ནས་དེ་ལས་ལྡང་བ་ན་ཡིག་དྲུག་ཚར་གཅིག་བརྗོད་པའི་རྐྱེན་གྱིས་རྗེས་ཐོབ་སྒྱུ་མའི་ལྷ་སྐུ་སྤྱན་རས་གཟིགས་ཁ་སརྤ་ཎིའི་རྣམ་པར་ལྡང་སྟེ་གནས་གསུམ་བྱིན་གྱིས་བརླབ། གོ་བགོ་ལུས་བསྲུང་། སྲུང་བའི་འཁོར་ལོ་གསལ་གདབ་པ་རྣམས་བྱས་ཏེ། བསྔོ་སྨོན་བཀྲ་ཤིས་ཀྱི་བར་དུ་བྱའོ། །དེ་ནས་ཐུན་མཚམས་ཀྱི་བྱ་བ་འགྲོ་འདུག་ཟ་འཆག་གི་སྤྱོད་པ་གང་གི་ཚེ་ཡང་། ཇོ་བོ་སྤྱན་རས་གཟིགས་ཀྱི་ང་རྒྱལ་དང་མ་བྲལ་་བའི་སྒོ་ནས། ཞིང་སྦྱོང་བ་དང་། འདོད་ཡོན་ཚོགས་སུ་བསྒྱུར་བ་དང་། སེམས་ཅན་གྱི་རྒྱུད་སྨིན་པ་སོགས་ཀྱི་ཐབས་སུ་གང་འགྱུར་བྱ་བ་ལས་སྒོ་གསུམ་ཐ་མལ་དུ་མ་ཤོར་བར་བྱ་དགོས། དེ་ནས་ཕྱི་ཐུན་གྱི་ཚེ་ཡང་སྔར་བཞིན་ཚོགས་ཞིང་སྤྱན་དྲངས་ཤིང་། གསོལ་འདེབས་སྐྱབས་སེམས་ནས་བཟུང་བསྔོ་སྨོན་བཀྲ་ཤིས་ཀྱི་བར་དཀྱུས་བཞིན་ལས་བགེགས་སྐྲོད་ཀྱི་ཚེ་གཏོར་མ་མེད་སྐབས། འདོད་ཡོན་གཏོར་མ་འདི་ཁྱེར་ལ༔ ཞེས་པའི་རྐང་པ་གཅིག་དོར་བ་ཙམ་ཁྱད་པར་རོ། །བསྙེན་ཡིག་ཁ་གཅིག་ལས་ཐུན་ཕྱི་མ་རྣམས་ལ། བགེགས་སྐྲོད་བསྲུང་འཁོར་སོགས་དོར་ནས། མཆོད་པ་བྱིན་རླབས་ནས་འཇུག་པ་དང་། ཐུན་མཐར་བསྡུ་རིམ་མི་བྱེད་པའམ། བྱེད་ཀྱང་སྲོད་ཐུན་ཀྱི་མཐའ་ལས་མི་བྱེད་པ་སོགས་ཡོད་ཀྱང་། འདི་ལྟར་བྱས་ན་ལེགས་ཏེ་རྒྱུ་མཚན་བསྙེན་པའི་སྐབས་འདིར་བསྐྱེད་རིམ་གྱི་ཆོ་གས་སྐྱེ་འཆི་བར་དོ་གསུམ་སྦྱོང་བའི་གདམས་པ་ཆ་ཚང་ལ་བློ་སྦྱོང་བའི་ཕྱིར་དང་། ཐུན་འཚམས་ཀྱི་ཉི་ལེ་སྐྲོད་པ་དང་། བར་ཆད་བསྲུང་བ་སོགས་ཀྱི་དགོས་པ་ཡོད་པའི་ཕྱིར་རོ། །དེ་ནས་སྲོད་ཐུན་ལ་ཡང་གཞན་སྔ་མ་ཇི་ལྟ་བ་བཞིན་ལས་ཚོགས་སྐོང་དང་གཏོར་བསྔོ་རྒྱས་བསྡུས་འཚམས་པ་རེ་གཏོང་། སྤྱིར་ཚོགས་སྐོང་གི་དུས་གནད་སྲོད་དང་མཚན་མོའི་ཆ་ངེས་པར་ཡིན་པས་དེ་ལྟར་བྱ་བའམ། ལྟ་བས་བདེ་བ་སོགས་ཀྱིས་ཕྱི་དྲོའི་ཐུན་ལ་བྱས་ཀྱང་འགལ་བ་མེད་དོ། །གང་ལྟར་ཡང་སྲོད་ཐུན་གྱི་མཐར་རྗེས་ཐོབ་ཀྱི་ལྷ་སྐུའི་ཐུགས་སྲོག་ལ་སེམས་བཟུང་བའམ། སྡུད་རིམ་གྱིས་ཆོས་ཉིད་དང་བསྲེ་བའམ། རྨི་ལམ་འོད་གསལ་འཛིན་པའི་གདམས་ངག་ཁྱད་པར་བ་དང་སྦྲེལ་ཀྱང་རུང་སྟེ་ཉལ་བའི་རྣལ་འབྱོར་གྱིས་ཉལ། དེ་ནས་ཐོར་ཐུན་ལ་བབས་ཚེ་ནམ་མཁའ་ནས་དཔའ་བོ་རྣལ་འབྱོར་མ་རྣམས་ཀྱིས་ཌཱ་མ་རུ་དང་དྲིལ་གཡེར་གྱི་སྒྲ་དང་བཅས་ཏེ་འོད་གསལ་ལས་གཟུགས་སྐུར་བཞེངས་ཤིག་པའི་གླུས་བསྐུལ་ཏེ་སད་པར་བསམ་ལ་རྗེས་ཐོབ་ཀྱི་ལྷ་སྐུར་ལངས་ནས། སྔོན་འགྲོ་བླ་མ་རྒྱང་འབོད་ནས་བརྩམས་སྟེ་བླ་མའི་རྣལ་འབྱོར་དབང་བཞི་བླངས་པའི་མཐར་ཐུག་གི་བར་བྱས་རྗེས་ཐོར་ཐུན་དཀྱུས་བཞིན་དུ་གཏོང་། རྒྱུན་དུ་གཞི་བགེགས་ཀྱི་གཏོར་མ་བསྔོ་རྒྱུ་ཡོད་ན་སྔ་ཐུན་གྱི་འགོར་བྱ། མེད་ཀྱང་ཆད་སྐྱོན་དུ་མི་འགྱུར། དེ་ཡན་ཆད་ཀྱིས་ཉིན་ཞག་གཅིག་གི་བྱ་བ་ཁྲིགས་སུ་ཕབས་པ་ཡིན་པས་ཚུལ་ཏེ་ལྟ་བུའི་སྒོ་ནས་བསྙེན་པ་མཚར་གྱི་བར་དུ་བྱ་ཞིང་། བསྙེན་པའི་ཚད་ཀྱང་གྲངས་དུས་རྟགས་ཀྱི་རིམ་པ་གསུམ་སྟེ་རྩ་བར། གྲངས་ཀྱི་བསྙེན་པ་བྱེ་བ་གཅིགཿ དུས་ཀྱི་བསྙེན་པ་དེའི་བཞི་འགྱུརཿ མཚན་མའི་བསྙེན་པ་རྟགས་དང་སྦྱརཿ ཞེས་སོགས་གསུངས་པ་ལྟར་རོ། །ལམ་བཞིའི་སེམས་མའི་སྔགས་རྣམས་ནི་ཐུན་གཤམ་དུ་ཅུང་ཟད་རེ་བཟླས་བར་བྱ་སྟེ་གཙོ་བོར་སྒྲུབ་པའི་བྱེ་བྲག་ཡིན་པར་ཤེས་སོ། །དེ་ཡན་ཆད་ནི་དངོས་གཞིའོ། །དོན་གསུམ་པ་རྗེས་ཀྱི་ཆོ་ག་ནི་སང་ལྟ་བུར། གྲོལ་རྒྱུའི་དོ་ནུབ་ཀྱི་ཕྱི་ཐུན་འགོ་ནས་མཆོད་གཏོར་གསར་བ་དང་། གཞན་མཆོད་རྫས་ཚོགས་ཀྱི་ཡོ་བྱད་སོགས་བཟང་ཤིང་གྱ་ནོམ་པ་བཤམས། ཚོགས་དང་སྐོང་བཤགས་སོགས་རྒྱས་པར་གཏོང་། ཕྱི་ཉིན་ཐོར་ཐུན་ལ་ཆོ་ག་དཀྱུས་ལྟར་བཏང་ནས་ཚོགས་བསྐོང་གཏོར་བསྔོ་ཆད་ཐོ་བསྟན་མ། གཏོར་བྲོ་བཅས་བྱ་ཞིང་གཏོར་མ་རྒྱུན་བཞག་རྣམས་མེ་ལ་འབུལ་བའམ་གཙང་སར་གཤེགས། དེ་ནས་དངོས་གྲུབ་ལེན་པའི་ཚེ་མཆོད་པ་ཁ་གསོས་རང་གི་མདུན་དུ་ཀཱ་པ་ལ་ཆང་དང་ཆོས་སྨན་མར་ཆོལ་གྱིས་བཀང་བ་བཤམས། རྒྱུན་བཞག་གི་སྣང་གསལ་སྦར་ཏེ། བགེགས་གཏོར་བསྔོ་ཞིང་བགེགས་སྐྲོད་སྲུང་འཁོར་བསྒོམ། མཆོད་པ་བྱིན་གྱིས་བརླབ། བྱིན་འབེབས་ཀྱི་མཐར་ཕྱོགས་བཅུའི་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་དངོས་གྲུབ་ཐམས་ཅད་འབྲུ་གསུམ་དང་བདུད་རྩི་དཀར་དམར་མཐིང་གའི་རྣམ་པར་བསྡུས་ཏེ་གཏོར་མ་དང་བདུད་རྩི་ལ་ཆར་བཞིན་དུ་བབ་ཅིང་ཐིམ་པར་བསམ་ལ། གཙོ་འཁོར་ཡོངས་རྫོགས་ཀྱི་བསྙེན་པའི་མཐར། ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃཿ ཞེས་བཏགས་པ་ཅི་རིགས་སུ་བཟླས་མཐར། མཆོད་གཏོར་རྙིང་པ་སྐད་ཅིག་གིས་ལྷར་བསྐྱེད་དེ་མཆོད་བསྟོད་བྱ། ཡེ་ཤེས་སྐུ་མཆོག་མའམ། རང་གཞུང་གི་ཐུགས་རྗེ་ཆེན་པོའི་དཀྱིལ་འཁོར་དུཿ སོགས་ཀྱིས་བཤགས་མཐར་ཡི་གེ་བརྒྱ་བ་ཉེར་གཅིག་བཟླས། དེ་ནས་གསོལ་འདེབས་ཞལ་མཐོང་མའི་རྗེས་སུ། ཧོ་ཐུགས་རྗེ་ཆེན་པོའི་ལྷ་ཚོགས་རྣམསཿ སོགས་ཀྱིས་དངོས་གྲུབ་བསྐུལ་ཏེ། གཏོར་མ་གནས་གསུམ་དུ་གཏུག་ཅིང་དབང་བཞི་བླངས། དེ་ནས་གཏོར་མའི་ལྷ་འོད་དུ་ཞུ་བ་ལས་བདུད་རྩིར་གྱུར། གཏོར་རྫས་བདུད་རྩིར་བཏབ་སྟེ་བཏུང་བར་བྱའོ། །སྐབས་འདིར་བསྙེན་པའི་ཁ་སྐོང་གི་སྦྱིན་སྲེག་བྱ་སྟེ་རིག་འཛིན་གྱི་ཞི་བའི་སྦྱིན་སྲེག་ཁ་བསྒྱུར་གྱི་སྒོ་ནས་རྫས་རྣམས་རྩ་བསྙེན་ཁོ་ནས་འབུལ་ཞིང་། མཚམས་ཀྱི་འདོད་གསོལ་ལ། ཏིང་འཛིན་མ་གསལ་ཞིང་ཆོ་ག་མ་དག་པ་དང་། སྔགས་དང་ཕྱག་རྒྱ་ནོར་ཞིང་ལྷག་ཆད་འགལ་འཁྲུལ་དུ་གྱུར་པ་ཐམས་ཅད་བྱང་ཞིང་དག་པར་གྱུར་ཅིག ཞེས་བརྗོད་པ་ཙམ་ཁྱད་པར་རོ། །དེ་ལྟ་བུའི་བསྙེན་པའི་བཅུ་ཆའི་གྲངས་ཀྱི་རྫས་སྔགས་ཀྱིས་སྦྱིན་སྲེག་བྱའོ། །དེ་ནས་བསྡུ་རིམ་མན་སྔར་ལྟར་བྱ་སྟེ་ནང་མཚམས་གྲོལ་པའོ། །དེ་ནས་ཞག་གསུམ་དང་བདུན་སོགས་ཇི་རིགས་སུ་ཐུན་མ་ཆགས་ཙམ་དང་ཚོགས་བསྐང་གསོལ་སོགས་བཏང་རག་གི་ཚུལ་དུ་ཇི་ནུས་བསྔོ་སྨོན་གྱི་མཚམས་སྦྱོར་སོགས་ལ་འབད་ཅིང་ཕྱི་མཚམས་གྲོལ་ཚེ་རྗེས་ཐོབ་ལྷར་ལྡང་གོ་བགོ་ལུས་སྲུང་བཅས་གྲུབ་མཐར། སྒོ་མཚམས་སུ་ཕྱིན་ཏེ་རྒྱལ་ཐོའི་མདུན་དུ་དཀར་གཏོར་གསེར་སྐྱེམས་བཅས་བཤམས་ནས་མཆོད་ཅིང་ཕྲིན་ལས་བཅོལ་ཏེ་རང་གནས་སུ་བཤེགས་ཐོབ་བསྡུ། གྲུབ་ན་བླ་གབ་མེད་སར་བསང་མཆོད་བརྒྱགས་བརྔན་སོགས་གནས་གཞིའི་བདག་པོ་སྤྱི་བྱེ་བྲག་ལ་མཆོད་སྦྱིན་དང་ངན་སློང་ལ་སྦྱིན་པ་སོགས་ཀྱིས་མཚོན་ཆོས་སྟོན་ཇི་ལྟར་འོས་པ་བྱའོ། །དེ་ཡན་ཆད་ཀྱིས་བསྙེན་རྐྱང་ཇི་ལྟར་གཏོང་བའི་ཚུལ་བཤད་པ་དེ་གྲུབ་བོ། །དོན་གཉིས་པ་བསྙེན་སྒྲུབ་བསྒྲགས་མའི་ཚུལ་ཇི་ལྟར་བྱ་བ་མདོར་བསྡུས་ཏེ་བསྟན་པ་ནི་བསྒྲུབ་ཐབས་རྩ་བར། དཀྱིལ་འཁོར་མདའ་གང་བཀོད་ལེགས་སྟོངཿ སྒྲུབ་རྫས་པྲ་ཁྲིད་བཞིན་དུ་བཀོདཿ ཅེས་དང་། སྒྲུབ་རྫས་བླ་རྡོ་སྲོག་འཁོར་དངཿ དམིགས་གནད་དམར་བྱང་གནད་ཡིག་ལསཿ རྟོགས་པར་བྱ་བ་ཁོ་ནའོཿ ཞེས་པ་ལྟར་པྲ་ཁྲིད་དམར་བྱང་ཁོ་ན་བཞིན་བྱ་དགོས་ཤིང་། དེ་ལ་ཇི་ལྟར་ན། དེ་ལས། འདི་ལ་སྤྱི་དོན་ལྔ་ཡིན་ཏེཿ སྒྲུབ་རྫས་བླ་རྡོ་སྲོག་འཁོར་དངཿ དཀྱིལ་ཆོག་དམིགས་གནད་ཁ་བསྒྱུར་རོ། །ཞེས་པ་ལྟར་ཤེས་པར་བྱས་ནས། ས་བཅད་གསུམ་པ་དཀྱིལ་ཆོག་གི་སྐབས་སུ། ས་ཡི་ཆོ་ག་ནས་བཟུང་སྟེཿ སྒྲུབ་པ་ཆེན་པོའི་ཁོག་དབུབ་བམཿ །ཞེས་པའི་དོན། དཔལ་ཆེན་གྱི་སྒྲུབ་པའི་ཁོག་དབུབ་རིན་པོ་ཆེའི་ཟ་མ་ཏོག་ཇི་ལྟ་བ་བཞིན་བྱས་བ་ལས། ཞི་བའི་སྐབས་སུ། གསང་མཚམས་མ་ཊཾ་བསྒྲལ་བ་གཅིག་པུ་དེ་དོར་བ་དང་། གལ་ཏེ་གསང་བསྒྲུབ་རྟ་མགྲིན་འདུས་བ་ལ་སྦྱོར་སྐབས་ཡིན་ན་དེ་ཡང་སྦྱར་བར་བྱ་ཞིང་། གཞན་ནང་མཚམས་སོགས་ཀྱི་སྐབས་བདག་ཉིད་རྟ་མཆོག་རོལ་པའི་ང་རྒྱལ་དུ་བྱ་བ་དང་། ཐིག་ཚོན་གྱི་བྱ་བ་པྲ་ཁྲིད་ལྟར་བྱ་བ་དང་། སྒྲུབ་རྫས་དབང་རྫས་སོགས་ཐུགས་རྗེ་ཆེན་པོའི་དགོས་ཆོས་རྣམས་འགོད་ཤེས་པར་བྱའོ། །དེ་ནས་དངོས་གཞི་ལ་བསྙེན་སྒྲུབ་ལས་སྦྱོར་གསུམ་གྱི། དང་པོ་ནི་པྲ་ཁྲིད་ལས། ལས་གཞུང་གཞུང་བསྲང་དེ་ཡང་ནིཿ རྩ་བསྙེན་བྱེ་བ་མ་ཐོན་པརཿ བདག་དང་དཀྱིལ་འཁོར་སྒྲུབ་རྟེན་གསུམཿ དབྱེར་མེད་ཅིག་ཏུ་གསལ་བཏབས་ཏེཿ སྒོམས་པས་སྒྲུབ་པའི་དྲོད་རྟགས་མྱུརཿ ཞེས་པ་ལྟར་བདག་མདུན་ཐ་མི་དད་དུ་སྒྲུབ། དེ་ནས་སྒྲུབ་པའི་ཚེ། བདག་བདུན་ཐ་དད་འཛབ་ཁང་དབྱེཿ ཞེས་སོགས་གསུངས་པ་ལྟར། བསྟོད་པའི་མཇུག་ཏུ། བྷྲཱྃ་བི་ཤྭ་བི་ཤྭདྡྷེ་ཕཊཿཛ༔ ཞེས་བརྗོད་པས། བདག་བསྐྱེད་དམ་ཚིག་གི་དཀྱིལ་འཁོར་ལས་མདུན་བསྐྱེད་ཡེ་ཤེས་ཀྱི་དཀྱིལ་འཁོར་ལོགས་སུ་ཕྱེ་ནས་མདུན་གྱི་ཐད་ཀར་མེ་རི་འདབ་འབྱོར་ཀྱི་ཚུལ་དུ་བསྒོམ། བུམ་པ་ལ་དམིགས་ནས། བུམ་པ་ལྷ་ཡི་གཞལ་མེད་ལཿ ཞེས་པ་ནས། གསལ་འགྲིབ་མེད་པའི་ངང་ནས་བཟླཿ ཞེས་པའི་བར་བཏང་ནས་སྙིང་པོ་ཡི་གེ་བདུན་པ་ལ་ཆིག་སྒྲིལ་དུ་བྱ། དེའི་སྒྲུབ་ཞག་ཇི་ཙམ་བྱེད་པའི་ཕྱེད་ནས་བརྩམས་ཏེ་ཁྱད་པར་ལས་བཞིའི་སྒྲུབ་པ་རྣམས་རང་རང་གི་དམིགས་གནད་པྲ་ཁྲིད་དང་རྩ་བ་གཉིས་བསྡེབ་པའི་སྒོ་ནས་ཤེས་པར་བྱའོ། །གཞན་དེ་དག་གི་བར་སྐབས་ཀྱི་བྱ་བ་ཉུ་ལེ་སྐྲོད་པ་བྱིན་འབེབས་བྱ་པ་། ཐུན་བཞིར་གཅོད་ཚུལ། ཚོགས་སྐང་ཇི་ལྟར་བྱ་བ་སོགས་ཕྲ་ཞིབ་རྣམས་ནི། སྒྲུབ་པའི་ཁོག་དབུབ་བཞིན་བྱའོ། །དེ་ནས་ལས་སྦྱོར་ནི་པྲ་ཁྲིད་ལས། ལྔ་བ་ལས་ཀྱི་མཐའ་བསྒྱུར་ནིཿ གང་གི་ཚེ་ཡང་རྟགས་བྱུང་ནསཿ དངོས་གྲུབ་བླང་ཞིང་གཏང་རག་འབུལཿ སོགས་ནས། བཅུད་ལེན་ཀུན་གྱི་མཆོག་ཏུ་འགྱུརཿ ཞེས་པའི་བར་ལྟར་ངེས་པར་བྱས་ནས། བདག་དོན་དུ་དངོས་གྲུབ་ལེན་པ་དང་། གཞན་དོན་དུ་དབང་བསྐུར་བྱེད་པ་དང་སྦྱིན་སྲེག་སོགས། སྒྲུབ་ཁོག་གི་ས་བཅད་གསུམ་པ་དངོས་གྲུབ་བླང་བའི་འགྲོས་དང་སྦྱར་ཏེ་ཤེས་པར་བྱའོ། །དེ་ནས་སྒྲུབ་པའི་རྗེས་ཀྱི་བྱ་བ་རྣམས་ནི། པྲ་ཁྲིད་ལས། སྒྲུབ་པའི་རྗེས་ཀྱི་བྱ་བ་རྣམསཿ སྤྱི་དང་མཐུན་པ་ཉིད་དུ་སྤྱོདཿ ས་མ་ཡཿ ཞེས་གསུངས་པའི་དོན་ཡང་སྒྲུབ་ཁོག་གི་ཁྱད་པར་གྱི་ལས་མཇུག་བསྡུ་བ་བཞིན་ཤེས་པར་བྱ་བ་ཁོ་ནའོ། །དེ་ཡན་ཆད་ཀྱིས་བསྙེན་བསྒྲུབ་སྦྲག་མའི་ཚུལ་དུ་ཇི་ལྟར་བྱ་བ་མདོར་བསྡུས་ཏེ་བསྟན་པའོ། །དོན་གསུམ་པ་སྨིན་སློབ་ཀྱི་དབང་དུ་བྱས་ཏེ་བསྙེན་སྒྲུབ་ཇི་ལྟར་བྱ་བའི་ཚུལ་ནི་རིག་འཛིན་གྱི་བསྙེན་ཡིག་ཞལ་གསུང་མར། མདོ་ཡི་ལམ་ལྔ་སྔགས་ཀྱི་རིག་འཛིན་བཞིས་ས་བཅད་ནས་སྐྱེ་བ་འདི་ཉིད་ལ་སྐུ་ལྔའི་དབྱིངས་སུ་སངས་རྒྱས་བའི་ཁྱད་པར་རྡོ་རྗེ་སློབ་དཔོན་གྱི་མན་ངག་ལས་ཤེས་པར་བྱ། ཞེས་གསུངས་པའི་དོན། རིག་འཛིན་གྱི་གབ་བྱང་གནད་ཀྱི་མིག་ཚགས་ལས། དེ་ཚེ་འབྲས་བུའི་ནོང་ཚུལ་གྱིཿ མན་ངག་གབ་པ་འདི་ལྟ་སྟེ། ཐ་མལ་ལུས་ལ་ཡེ་ཤེས་ཀྱིཿ ས་ཆོད་རིག་འཛིན་བརྙེས་པའི་ཚུལཿ རྒྱུད་དང་རྗེས་མཐུན་ཁྱད་པར་གནདཿ ཞེས་པ་ནསཿ ལོངས་སྐུ་ཆེན་པོའི་སྣང་བ་འཆརཿ ས་མ་ཡཿ ཞེས་པའི་བར་གྱི་བསྟན་དོན་ལྟར། རྡོ་རྗེ་སློབ་དཔོན་ལ་བསྟེན་ནས་དབང་རྫོགས་པར་ནོད་པ་ནས་བརྩམས་སྟེ་གཡོ་ཐོབ་གོམས་བརྟན་མཐར་ཕྱིན་གྱི་ཉམས་ལྔའི་འགྲོས་ཀྱི་རིམ་པ་བཞིན་བསྐྱེད་རིམ་རྡོ་རྗེའི་བཟླས་པ་དང་བཅས་པས་། ས་བདུན་པ་རིང་དུ་སོང་བ་ཚུད་ཆད་ཀྱི་སྤང་རྟོགས་མངོན་དུ་བྱེད་པའི་རྟེན་འབྲེལ་བསྒྲིགས་ཏེ། རང་སྣང་ལ་ལྷ་སྐུའི་སྣང་ཞེན་འཁོར་ཡུག་ཏུ་འབྱུང་བས་རྣམ་སྨིན་རིག་འཛིན་གྱི་གདེང་ཚད་རྙེད་པར་བྱས། དེ་ནས། དེ་ཡན་ས་ཡི་ལྷག་མ་རྣམསཿ སྙན་བརྒྱུད་ཡིད་བཞིན་ནོར་བུ་ཡིཿ མ་རྒྱུད་ཨ་ནུའི་ལམ་མཆོག་ལཿ བརྟེན་ནས་བགྲོད་པ་ལམ་འདིའི་ལུགསཿ ཞེས་གསུངས་པ་བཞིན་སྙན་རྒྱུད་ཤོག་དྲིལ་ལྟར་གཏུམ་མོའི་གདམས་པ་དང་། ཐབས་ལམ་སྦས་དོན་གསལ་བ་ལྟར་ཕོ་ཉའི་ལམ་ལ་སྦྱངས་ནས། རླུང་སེམས་ལས་སུ་རུང་བའི་དྲོད་ཚད་རྙེད་པར་གྱུར་པ་ན། ཚོམ་བུ་ཚོགས་ཀྱི་སྒྲུབ་པའི་གནས་དུས་གྲོགས་དང་རྫས་ཀྱི་ཁྱད་པར་རྣམས་ཇི་བཞིན་འཛོམ་པར་བྱས་ཏེ་སྔར་བཤད་པ་ལྟར་བསྙེན་སྒྲུབ་སྦྲགས་མའི་ཚུལ་གྱིས་ཉེ་རྒྱུའི་སྤྱོད་པ་སྐྱོང་བ་ཡིན་ལ། དེའི་ནུབ་ཐ་མ་ལ་ཟབ་དབང་གི་སྦྱོར་བས་སྔགས་ཀྱི་མཐོང་ལམ་ལ་དངོས་སུ་སྦྱོར་བ་ཡིན་ཏེ་དེའི་ཚེ་ཚེ་ལ་དབང་བའི་རིག་འཛིན་བསྙེས། མདོ་ལུགས་ཀྱི་ས་བརྒྱད་པ་མི་གཡོ་བ་དང་སྐལ་པ་མཉམ་པ་ཡིན་ནོ། །དེ་ནས་རྫོགས་པ་ཆེན་པོ་འབད་རྩོལ་དང་བྲལ་བའི་ལམ་གྱིས་། ཕྱག་ཆེན་རིག་འཛིན་གྱིས་བསྡུས་པའི་ས་ལྷག་མ་གཉིས་རྫོགས་པར་བྱས་ཏེ། ལྷུན་གྱིས་གྲུབ་པའི་རིག་འཛིན་ཆེན་པོའི་སྐུ་ལྔ་ལྷུན་གྲུབ་རིན་པོ་ཆེའི་སྦུབས་སུ་མངོན་པར་རྫོགས་པ་སངས་རྒྱས་པར་བྱང་ཆུབ་སྟེ། དེ་དག་གི་ཚུལ་ཞིབ་པ་ནི་ཞར་ལས་ཤེས་པར་བྱ་བ་ཁོ་ནའོ། །དེ་ལྟར་ན་ཐུགས་རྗེ་ཆེན་པོ་སྡུག་བསྔལ་རང་གྲོལ་ལ་བརྟེན་པའི་བསྙེན་སྒྲུབ་ཀྱི་རིམ་པ་མདོ་ཙམ་སྨྲོས་ཟིན་ཏོ། །སྨྲས་པ་། རྡོ་རྗེ་འཆང་དབང་མངོན་དུ་བྱེད་པའི་ལམ། །གསང་ཆེན་རྒྱུད་སྡེའི་ཉམས་ལེན་བསྐྱེད་རྫོགས་གཉིས། །ལག་ཏུ་བླང་སྟེ་བསྙེན་སྒྲུབ་ཡན་ལག་བཞིས། །ཇི་བཞིན་སྒྲུབ་པའི་ཐབས་ཚུལ་འདི་ཁོ་ན། །རྒྱུད་དོན་གཟིགས་པའི་བླ་མའི་མན་ངག་བཞིན། །སྒྲུབ་ཐབས་རྩ་བ་ཡན་ལག་གདང་བཅས་པར། །དཔྱད་དེ་གཏན་ལ་དབབ་པའི་ཡི་གེ་འདི། །རིག་འཛིན་དགོངས་པའི་རྒྱན་དུ་འགྱུར་བར་རློམ། །གང་འདིར་མ་རྟོགས་དབང་གིས་བཤད་ཉེས་པ། འཕགས་མཆོག་བླ་མ་སྲུང་མའི་ཚོགས་ལ་བཤགས། །དགེ་བས་འགྲོ་ཀུན་སྤྱན་རས་གཟིགས་དབང་གི །གོ་འཕང་མངོན་དུ་འཐོབ་པའི་རྒྱུར་གྱུར་ཅིག །ཅེས་པ་འདི་ནི་སྦས་པའི་རྣལ་འབྱོར་པ་ཨུ་པ་སི་ཀ་ལེགས་འོང་ངམ་ཤཱཀྱའི་དགེ་སློང་ཚུལ་ཁྲིམས་གོ་ཆས་བསྐུལ་བའི་ངོར། །མདོ་ཁམས་རྫོགས་ཆེན་པའི་བཀའ་འབང་གི་ཐ་ཤལ་པ་པདྨ་བཛྲ་པས་གྲུབ་དགོན་ཡང་དབེན་བསམ་གཏན་དགའ་ཚལ་དུ་བྲིས་པ་དགེ་ལེགས་འཕེལ། །སརྦ་ཤུ་བྷམ། །དགེའོ། །

ཐུགས་རྗེ་ཆེན་པོ་ཡང་སྙིང་འདུས་པའི་བསྙེན་ཡིག་གྲུབ་གཉིས་ནོར་བུའི་གན་མཛོད།

༄༅། །ཐུགས་རྗེ་ཆེན་པོ་ཡང་སྙིང་འདུས་པའི་བསྙེན་ཡིག་གྲུབ་གཉིས་ནོར་བུའི་གན་མཛོད་ཅེས་བྱ་བ་བཞུགས་སོ། །ཨོཾ་མ་ཎི་པདྨེ་ཧཱུྃ་ཧྲཱིཿ རྒྱལ་ཀུན་ཐུགས་རྗེའི་རང་གཟུགས་འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། །བསམ་ཡས་རྡུལ་བྲལ་ལ་ཡོན་ཏན་རྒྱ་མཚོའི་བདག །འོད་སྣང་མཐའ་ཡས་ཡེ་ཤེས་སྒྱུ་མའི་གར། །གསུང་གི་དབང་ཕྱུག་སྙིང་རྗེའི་གཏེར་ཆེན་ལ། །གུས་པས་འདུད་དོ་གྲུབ་གཉིས་ཆར་དུ་བསྙིལ། །རབ་འབྱམས་དཀྱིལ་འཁོར་ལྷ་དང་དབྱེར་མེད་པའི། །གྲུབ་པའི་སློབ་དཔོན་མཚོ་སྐྱེས་ཐུགས་ཀྱི་བཅུད། །ཟབ་ཆོས་ཡངས་སྙིང་འདུས་པའི་བསྙེན་སྒྲུབ་ཀྱི། །དམར་བྱང་ཉུང་གསལ་ཉམས་ལེན་ཁྱེར་བདེ་སྤྲོ། །དེ་ལ་འདིར་རྟེན་གྱི་གང་ཟག་ཁམས་གསུམ་གྱི་འཁོར་བ་ལས་ངེས་པར་འབྱུང་བའི་བསམ་པས་ཡིད་དྲངས་ཏེ། མཁའ་ཁྱབ་སེམས་ཅན་ཐམས་ཅད་སྲིད་པའི་མཚོ་ལས་སྒྲོལ་བའི་སེམས་སྟོབས་ཆེན་པོའི་ཁུར་ཁྱེར་ཞིང་དེ་ཡང་ལམ་ཟབ་མོ་རྡོ་རྗེ་ཐེག་པའི་རིམ་པ་གཉིས་ལ་བརྟེན་ནས་ཚེ་འདིར་ཟུང་འཇུག་གི་སྐུ་འགྲུབ་པར་འདོད་པ་དག་གིས་ལྷག་པའི་ལྷ་གང་ཡང་རུང་བ་ཞིག་ལ་ཡི་དམ་དུ་བཟུང་ལ། དེ་ཉིད་ཀྱི་སྒོ་ནས་རིམ་གཉིས་ལས་ཚོགས་དང་བཅས་པ་ལ་མཐར་ཕྱིན་པར་སློབ་དགོས་པ་ལ། ད་ལམ་འདིར་བདེ་བར་གཤེགས་པ་ཐམས་ཅད་ཀྱི་གསུང་གི་དབང་ཕྱུག་མགོན་པོ་སྤྱན་རས་གཟིགས་ཀྱི་སྒྲུབ་སྐོར་ཇི་སྙེད་གཅིག་མཆིས་པའི་ནང་ཚན་གུ་རུ་ཆོས་ཀྱི་དབང་ཕྱུག་གི་གཏེར་ཁ་ནས་བྱོན་པའི་ཐུགས་རྗེ་ཆེན་པོ་ཡང་སྙིང་འདུས་པའི་རིམ་གཉིས་ལ་གཞོལ་བར་འདོད་པ་དག་གི་དབང་དུ་བྱས་ན་ཐོག་མར་ཟབ་ཆོས་འདི་ཉིད་ཀྱི་རྩ་བའི་དཀྱིལ་འཁོར་དུ་དབང་བཞི་ལེགས་པར་ཐོབ་པས་རྒྱུད་སྨིན་ཅིང་། དམ་ཚིག་རྣམ་པར་དག་པས་གཞི་བཟུང་ནས་བསྙེན་སྒྲུབ་ལ་ཇི་ལྟར་འཇུག་པའི་ཚུལ་ལ་གསུམ་སྟེ། སྦྱོར་བ་དང་། དངོས་གཞི་དང་། རྗེས་ལ་ཇི་ལྟར་བྱ་བའི་རིམ་པའོ། །དང་པོ་ནི་ཡུན་ཇི་ཙམ་བྱེད་པའི་ལོང་ཁྱབ་དང་བསྟུན་ནས་ཕྱི་མཚམས་ཀྱི་ཁོག་ཏུ་སྔོན་འགྲོ་བློ་སྦྱོངས་དང་བསགས་སྦྱང་གི་རིམ་པ་ཅི་འགྲུབ་ཏུ་དགོས་པས། དབེན་པའི་རི་ལ་སོགས་བག་ཕེབ་གནས་སུ་སྒྲུབ་རྫས་དང་ཡོ་བྱད་ཐམས་ཅད་སྔ་ནས་ཚགས་སུ་ཚུད་པར་བྱས་ཏེ། འདུ་འཛིན་དང་འབྲེལ་འདྲིས་རིམ་གྱིས་བཅད་ལ་དུས་ཚེས་ཀྱི་རྟེན་འབྲེལ་ལ་སོགས་པར་ཕྱི་མཚམས་བསྡམས། བསམ་གཏན་གྱི་ཁང་པར་འབྲུ་དཀར་གྱི་གཡུང་དྲུང་ཆོས་སྐོར་དུ་བྲིས་པའི་ཁར་ཀུན་ཤའི་ཆུན་པོ་དགྲམ་ཞིང་བདེ་བའི་སྟན་བཤམས། རང་དང་ཞལ་སྤྲོད་དུ་ཡོད་པར་འཕགས་པའི་ཞལ་ཐང་བཀྲམ་པའི་མདུན་དུ་ཉེར་སྤྱོད་ཀྱི་མཆོད་བ་ཇི་ལྟར་འབྱོར་བ་དང་མཎྜལ་སོགས་བཀོད། དཀར་ཕྱོགས་སྐྱོང་བ་སྤྱི་དང་བྱེ་བྲག་གནས་དང་གཞི་ཡི་བདག་པོ་རྣམས་ལ་བརྒྱགས་བརྔན་དང་སྡེ་བརྒྱད་མཆོད་པ་གཏོར་མ་ཆ་གསུམ་བཅས་བཏང་ཏེ་དགེ་བའི་སྡོང་གྲོགས་མཛད་པ་དང་། བར་ཆད་སྲུང་བའི་ཕྲིན་ལས་བཅོལ། རང་ཉིད་ལས་ཀྱི་ལྷ་རྟ་མགྲིན་དུ་ལམ་གྱིས་གསལ་བས་བགེགས་ལ་གཏོར་མ་བྱིན་ནས་བསྐྲད་དེ་སྲུང་བའི་འཁོར་ལོ་གསལ་བརྟན་ཐོབ་པར་བསྒོམ། དེ་ནས་བློ་བག་ཕབ་ཏེ། དལ་འབྱོར་གྱི་རྟེན་རྙེད་དཀའ་ཞིང་ཡུན་རིང་དུ་གནས་པའི་མཐུ་མེད་པ་དང་། ལས་འབྲས་ཕྲ་མོ་ལའང་བསླུ་བ་མེད་ཅིང་རིགས་དྲུག་གང་དུ་སྐྱེས་ཀྱང་སྡུག་བསྔལ་དུ་མས་ཉམས་ཐག་པའི་ཚུལ་ཞིབ་ཏུ་བསམ་སྟེ་ངེས་འབྱུང་གི་བསམ་པ་བློ་དང་འདྲེས་པར་བྱ། དེ་རེས་རྟེན་མི་ལུས་ཐོབ་པ་དང་། རྐྱེན་དགེ་བའི་བཤེས་གཉེན་མཇལ་ཏེ་ཟབ་དགུའི་གདམས་པ་ཐོབ་པའི་སྐབས་འདིར་མ་རྒན་སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་སྒྲུབ་པར་བྱ་བའི་ཕྱིར་ལམ་ཟབ་མོ་སྒོམ་དུ་ཡོད་པ་འདི་ནི་བསྐལ་པ་མང་པོར་ཚོགས་བསགས་པའི་འབྲས་བུ་ཡིན་པས་ང་རེ་དགའ། ད་ནི་བསྙེན་སྒྲུབ་འདི་ཉིད་མཐར་ཕྱིན་ཏེ་ཉམས་རྟོགས་ཀྱི་ཡོན་ཏན་ཁྱད་པར་ཅན་ཞིག་རྒྱུད་ལ་མ་སྐྱེས་ཀྱི་བར་དུ་བརྩོན་འགྲུས་ལ་ཐང་ལྷོད་མེད་ཅིང་ཉིན་མཚན་གཡེལ་མེད་དུ་ཉམས་སུ་ལེན་པར་བགྱིའོ་སྙམ་པའི་ཡིད་སྤྲོ་སེང་ངེ་བར་བྱ། ཁྱད་པར་དུ་དམ་བཅའ་འདི་ཉིད་མཐར་མ་ཕྱིན་བར་དུ་ལུས་ཀྱི་ན་ཚ། སེམས་ཀྱི་བཟེ་རེ། གཉེན་གྲོགས་ཀྱི་བར་ཆད་ཅི་ལྟ་བུ་་བྱུང་རུང་དེ་དག་གི་དབང་དུ་ཅུང་ཟད་ཀྱང་བཏང་བར་མི་བྱའོ་སྙམས་དུ་ཞེ་དམ་དྲག་པོ་གཏིང་ཚུག་པར་བྱ། དེ་ལྟར་བློ་སྤྱངས་དང་འབྲེལ་བར་སྐྱབས་འགྲོ་སྤྱི་དང་བྱེ་བྲག་མདུན་གྱི་ནམ་མཁར་བླ་མ་དང་གཉིས་སུ་མེད་པའི་འཕགས་མཆོག་སྤྱན་རས་གཟིགས་ཡངས་སྙིང་འདུས་པ་ལ་སྐྱབས་གནས་དཀོན་མཆོག་གསུམ་བརྒྱུད་པའི་བླ་མ་མཁའ་འགྲོ་ཆོས་སྲུང་དང་བཅས་པ་ཐམས་ཅད་ཀྱིས་བསྐོར་ནས་བཞུགས་པར་མོས་པའི་དྲུང་དུ་བདག་གཞན་སེམས་ཅན་ཐམས་ཅད་སྐྱབས་སུ་འགྲོ་བའི་འདུན་པས་ན་མོ་བྱང་ཆུབ་སྙིང་པོ་ལ་མཆིས་སོགས་ཀྱི་སྐྱབས་འགྲོ་དང་། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་བའི་ཕྱིར་སྤྱན་རས་གཟིགས་ཀྱི་སྒོམ་བཟླས་ལ་འཇུག་པར་བགྱིའོ་སྙམས་པས་བདག་གི་སྒོ་གསུམ་འབད་རྩོལ་གྱིས་སོགས་ཀྱིས་སེམས་བསྐྱེད་། ཚད་མེད་བཞི་གསལ་བཏབ་ནས་ཡིད་ལ་རྩེ་གཅིག་ཏུ་སྒོམ་ཞིང་སེམས་ཅན་ཐམས་ཅད་བདེ་བ་སོགས་ཀྱིས་སྨོན་ལམ་གདབ་པ་རྣམས་བརྒྱ་སྟོང་ཁྲི་འབུམ་སོགས་བློས་གང་ལྕོགས་བྱ། དེ་ནས་མཎྜལ་སོ་བདུན་མ་སོགས་ཇི་ལྟར་རིག་པ་གང་འགྲུབ་དང་། ཚོགས་ཞིང་སྔར་ལྟར་གསལ་བའི་མདུན་དུ་། ཚོགས་བསགས་ཡན་ལག་བདུན་པ་། ཧྲཱིཿ བླ་མ་ཡི་དམ་མཁའ་འགྲོ་སོགས་དང་འབྲེལ་བར་དམིགས་འདུན་ཆུན་གཅིག་པར་ཕྱག་ཀྱང་བརྒྱ་སྟོང་ཁྲི་འབུམ་གང་འགྲུབ་དང་། ཡན་ལག་བདུན་པའི་རྗེས་སུ་སྟན་ལ་འདུག་སྟེ། བླ་མ་སྤྱན་རས་གཟིགས་བརྒྱུད་པའི་བླ་མ་དང་བཅས་པ་ལ་མོས་གུས་རྩེ་གཅིག་པས། ཨོཾ་སྭ་སྟི། བདེ་སྟོང་སྤྲོས་དང་བྲལ་བའི་སོགས་བརྒྱུད་འདེབས་ལན་གསུམ་མམ་བདུན་སོགས་ཀྱི་མཐར་ལུས་ངག་ཡིད་གསུམ་སྨིན་ཅིང་གྲོལ་བ་དང་སོགས་ཀྱི་ཚེ་མཐའ་བསྐོར་གྱི་སྐྱབས་ཡུལ་རྩ་གསུམ་དཀོན་མཆོག་ཐམས་ཅད་སྤྱན་རས་གཟིགས་ལ་ཐིམ། དེའི་སྐུ་གསུང་ཐུགས་ཀྱི་གནས་གསུམ་ལས་འོད་ཟེར་དཀར་དམར་མཐིང་གསུམ་རང་གི་གནས་གསུམ་དུ་ཐིམ་པས་བུམ་གསང་ཤེས་རབ་ཀྱི་དབང་གསུམ་ཐོབ། སྒོ་གསུམ་གྱི་དྲི་མ་དག་སྐུ་གསུམ་གྱི་གོ་འཕང་རྒྱུད་ལ་བཞག་པར་བསམ་ལ། ཨོཾ་ཨཱ་ཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃཿ ཞེས་བརྗོད་པས་སྤྱན་རས་གཟིགས་འོད་དུ་ཞུ་ནས་རང་ལ་ཐིམ་པས་རང་སེམས་དང་བླ་མའི་ཐུགས་གཉིས་སུ་འཛིན་པའི་རྟོག་པ་སྤང་ནས་འོད་གསལ་སྟོང་པ་ཉིད་ཀྱི་ངང་ལ་མཉམ་པར་བཞག་པས་དབང་བཞི་པ་ཐོབ། ཤེས་བྱའི་དྲི་མ་དག་ངོ་བོ་ཉིད་སྐུའི་གོ་འཕང་རྒྱུད་ལ་བཞག་པར་བསམ། དེ་ལས་ལྡང་བའི་ཚེ་སྣོད་བཅུད་དག་པའི་འཁོར་ལོ་ལྟ་ཞིང་། དགེ་བ་འདི་ཡིས་མྱུར་དུ་བདག །སྤྱན་རས་གཟིགས་དབང་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་པ་དང་སྨོན་ལམ་གང་མོས་བདག་པར་བྱའོ། །དེ་དག་གིས་ནི། སྐྱབས་འགྲོ་སེམས་བསྐྱེད་མཎྜལ་ཡན་ལག་བདུན་པ་ཕྱག་བླ་མའི་རྣལ་འབྱོར་བཅས་སྔོན་འགྲོའི་རིམ་པ་རྣམས་གྲུབ་ཅིང་། གཞན་ཡང་ཐུན་སྐབས་ཅི་རིགས་པར་རང་ཉིད་སྤྱན་རས་གཟིགས་སམ་ཐ་མལ་གང་མོས་ཀྱི་སྤྱི་བོར་རྡོ་རྗེ་སེམས་དཔའ་སྒོམ་སྟེ་ཡི་གེ་བརྒྱ་བའི་བཟླས་པ་སྟོབས་བཞི་ཚངས་པ་བཤགས་སྦྱང་རྣམས་ཀྱང་སྤྱི་ལྟར་བྱའོ། །སྔོན་འགྲོ་བསགས་སྦྱང་འདི་དག་དངོས་གཞིའི་ལམ་གྱི་ཡོན་ཏན་རྒྱུད་ལ་སྐྱེ་ཞིང་སྒྲིབ་པ་སྦྱངས་བ་དང་བར་ཆད་སེལ་བའི་ཐབས་ཁྱད་པར་ཅན་ཡིན་པས་གལ་ཆུང་ངུ་མ་སོང་བར་ཡིན་རིང་དུ་བྱེད་པར་གནད་ཆེའོ། །དེ་ནས་དངོས་གཞི་ནི་སྔོན་འགྲོ་རྫོགས་མཚམས་ནས་བར་མ་ཆོད་པར་བསྙེན་སྒྲུབ་དངོས་ལ་འཇུག་ཏེ་བསྙེན་པ་རྐྱང་བར་བྱེད་ན་བདག་བསྐྱེད་ཁོ་ན་ལས་མདུན་བསྐྱེད་མི་དགོས་པས་དཀྱིལ་འཁོར་སོགས་མི་དགོས་ལ་བདག་བསྐྱེད་མཆོད་གཏོར་སྨན་རཀ་ཉེར་སྤྱོད་རྣམས་དང་། སྲུངས་མའི་རྒྱུན་གཏོར་ཚོགས་ཀྱི་ཡོ་བྱད་སོགས་འདུ་བྱས་པས་ཆོག་ཅིང་། བསྙེན་བསྒྲུབ་བསྒྲགས་མར་མོས་ན་མདུན་རྟེན་གྱི་དཀྱིལ་འཁོར་སྒྲུབ་རྫས་སོགས་སྒྲུབ་ཁོག་ནས་འབྱུང་བ་ལྟར་དང་རྒྱལ་ཆེན་ཐོ་འཛུག་དམ་སྲི་མནན་པ་སྒོ་བྱང་ཕྱི་ནང་རྒྱན་བཀོད་བྱིན་འབེབས་སོགས་ཀྱང་དགོས་ལ། དུས་ནི་ལྷ་དབང་དུ་བྱ་བའི་རྟེན་འབྲེལ་གྱིས་དམར་ཕྱོགས་ཀྱི་སྲོད་ཐུན་ལ་མགོ་འཛིན་པར་གསུངས་པ་དེ་ལྟར་རམ། དཀར་ཕྱོགས་ལའང་རུང་བས་གང་ལྟར་ཡང་དགོང་ཐུན་གྱི་འགོར། རང་ཉིད་ལས་ཀྱི་ལྷ་རྟ་མགྲིན་གྱི་ང་རྒྱལ་ལ་གནས་པས་སྔོན་འགྲོའི་གཏོར་མ་དཀར་དམར་གཉིས་བསངས་སྦྱངས་བྱིན་གྱིས་བླབས་ནས་གཞི་བགེགས་སོ་སོར་བསྔོས་ཏེ་འདོད་གསོལ་དང་བགེས་བསྐྲད་བྱ། ཧྲཱིཿཧཱུྃ། ང་ནི་ཁྲོ་རྒྱལ་རྟ་མགྲིན༴སོགས། སྲུང་བའི་འཁོར་ལོ་མཚན་བཅས་སྲ་བརྟན་གཞོམ་གཞིག་དང་བྲལ་བར་བསྒོམ་བའི་རྗེས་སུ་མཚན་མེད་བློ་འདས་རེ་དོག་བྲལ་བའི་ངང་ལ་བཞག་ནས་ནང་མཚམས་བཅད། དེ་ནས་ཕྱི་རོལ་གྱི་སྒོ་དྲུང་ནས་གོམ་པ་བདུན་བཅུའི་སའམ། ཇི་ལྟར་རིག་པར་ཐོ་དཀར་ལ་རྒྱལ་ཆེན་བཞིའི་སྐུའམ་སྔགས་བྱང་བྲིས་པ་ཤིང་རྩི་བཅས་བཙུགས་ལ་རྒྱལ་ཆེན་བྲན་གཡོག་བཅས་པ་སྤྱན་དྲངས་བསྟིམ་བརྟན་མཆོད་བསྟོད་ཕྲིན་ལས་བཅོལ་བ་སོགས་བྱས་ཏེ་ཇི་སྲིད་སྒྲུབ་པ་མཐར་མ་ཕྱིན་གྱི་བར་དུ་བཞུགས་པར་བསམ་ལ་དུས་མཚམས་རྣམས་སུ་མཆོད་གཏོར་བསྔོ་ཞིང་ཕྲིན་ལས་བཅོལ་བ་སོགས་ཀྱིས་ཁ་གསོ་བར་བྱའོ། །དེ་ནས་བརྩམས་སྟེ་ཡོ་བྱད་བཏང་ལེན་དང་མི་ངོ་གསར་འཕྲད་སོགས་ཕྱི་ནང་གི་འབྲེལ་འགྲུལ་བཅས་གཏན་ནས་མི་བྱ། ཐ་ན་ཡིག་འགྲུལ་དང་མཆོད་རྫས་གསར་པ་སོགས་ལེན་དགོས་བྱུང་ནའང་། དུས་རྒྱུན་བདུད་རྩི་འཁྱིལ་བ་སྒྲུབ་པའི་ལས་ཆུ་དང་། རྟ་མགྲིན་ནམ་གཞན་ཡང་ལས་སྔགས་གང་འོས་ཀྱིས་ནུས་ལྡན་དུ་བྱས་པའི་ཡུངས་གུལ་སྟ་གོན་བྱས་ལ་བཞག་ནས་དེ་དག་གིས་བསངས་བྲབ་བདུག་གསུམ་མ་བརྗེད་པར་བྱེད། སྨྲ་བརྗོད་ཡང་རབ་ངག་བཅད་དང་། ཐ་ན་ཡང་ཐུན་པར་དུ་མཚམས་གཡོགས་སོགས་འོས་རིགས་ལས་གཞན་ཐུན་གྱི་གང་ལ་གཏམ་སྨྲ་བ་དང་སུ་བྱུང་ལ་ངག་བསྲེ་བ་མི་རུང་ཞིང་མདོར་ན་ཕྱི་གྲིམས་ལ་གུ་དོག་དོག་འདྲ་བ་ལ། ནང་ལྟ་བ་དང་ཏིང་ངེ་འཛིན་གྱི་ངང་ལ་ལྷོད་ཆགས་པས་རེ་དོགས་དང་འཁུ་འཕྲིག་ཟིལ་གྱིས་མནན་ནས་གུ་ཡང་ཁྲོལ་ལེ་ཡོད་པ་ཞིག་དགོས་སོ་ཅེས་བླ་མ་དམ་པའི་ཞལ་ལས་ཐོས་སོ། །དེ་ནས་བརྒྱུད་པའི་གསོལ་འདེབས་སྔོན་དུ་འགྲོ་བས་སྐྱབས་སེམས་ཡན་ལག་བདུན་པ་དང་ཕྱི་ནང་གསང་བའི་མཆོད་རྫས་བྱིན་གྱིས་རླབས་པ་སོགས་སྔོན་འགྲོའི་ཆོས་རྣམས་གྲུབ་པར་བྱས་ནས། ཐུན་གྱི་དངོས་གཞི་ལ། སྐུ་ཕྱག་རྒྱ་ལྷའི་རྣལ་འབྱོར། གསུང་བཟླས་པ་སྔགས་ཀྱི་རྣལ་འབྱོར། ཐུགས་འོད་གསལ་ཆོས་སྐུའི་རྣལ་འབྱོར་དང་གསུམ་ལས། དང་པོ་ནི། ཕྱི་ནང་གི་ཆོས་ཐམས་ཅད་ཀྱི་རྩ་བ་རང་གི་སེམས་ཀྱི་དེ་ཁོ་ན་ཉིད་གསལ་སྟོང་སྤྲོས་པ་དང་བྲལ་བའི་ངང་ལ་མཉམ་པར་བཞག་པ་དེ་བཞིན་ཉིད་ཀྱི་ཏིང་ངེ་འཛིན་གྱི་ངང་ལས། དེ་ལྟར་མ་རྟོགས་པའི་སེམས་ཅན་ཐམས་ཅད་ལ་དམིགས་པ་མེད་པའི་སྙིང་རྗེ་ཆེན་པོས་རྫོགས་པའི་བྱང་ཆུབ་ལ་འགོད་པར་འདོད་པའི་བྱང་ཆུབ་ཀྱི་སེམས་རིན་པོ་ཆེ་གསལ་བར་སྒོམ་པ་ཀུན་ཏུ་སྣང་བའི་ཏིང་ངེ་འཛིན། སྟོང་ཉིད་སྙིང་རྗེ་ཟུང་དུ་འཇུག་པའི་རང་བྱུང་གི་རིག་པ་ཉིད་ཡི་གེ་ཧྲཱིཿཡིག་དཀར་པོ་དྲི་མ་མེད་པར་གསལ་བ་རྒྱུའི་ཏིང་ངེ་འཛིན་ཏེ། དེ་ལས་འོད་ཟེར་འཕྲོས་པས་སྣོད་བཅུད་ཀྱི་དངོས་པོ་ཐམས་ཅད་བ་མོ་ལ་ཉི་ཟེར་ཕོག་པ་ལྟར་སྦྱང་ཏེ་སྟོང་ཉིད་ནམ་མཁའ་དྭངས་པའི་དཀྱིལ་ལྟར་མཐའ་དབུས་དང་བྲལ་བའི་ཀློང་དུ་ཧྲཱིཿལས་བྷྲཱུྃ་འཕྲོས་པ་འོད་དུ་ཞུ་བ་ལས་འབྱུང་བ་རིམ་བརྩེགས་ཞིང་ཁམས་གཞལ་ཡས་ཁང་གདན་དང་བཅས་གསལ་བའི་དབུས་སུ་པདྨ་ཉི་ཟླའི་གདན་ལ་འཕགས་པ་སྤྱན་རས་གཟིགས་སྐུ་མདོག་དམར་གསལ་བྱེ་རུའི་ལྷུན་པོ་ལ་ཉི་མའི་འོད་ཀྱིས་འཁྱུད་པ་ལྟ་བུ་ཞལ་གཅིག་ཕྱག་གཉིས་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཕྱག་གཡས་པདྨ་དམར་པོའི་ཕྲེང་བ་ཐུགས་ཀར་འདྲེན་ཅིང་། གཡོན་མཉམ་བཞག་གི་སྟེང་ན་པདྨ་ལ་གནས་པའི་བུམ་པ་བདུད་རྩིས་གང་བ་བསྣམས་པ། ཡུམ་གསང་བ་ཡེ་ཤེས་ཀྱི་མཁའ་འགྲོ་མ་དམར་སྐྱ་གྲི་ཐོད་འཛིན་པ་དང་མཉམ་པར་སྦྱོར་བ་གཉིས་ཀའང་དར་དང་རིན་པོ་ཆེའི་རྒྱན་ཅན་ཞི་བའི་ཚུལ་དགུ་དང་ལྡན་པ་ཡེ་ཤེས་ལྔའི་རང་མདངས་འོད་ལྔའི་གུར་ཁྱིམ་འཁྲིགས་པའི་དབུས་ན་བཞུགས་པ། ཡབ་ཀྱི་སྤྱི་བོར་རིག་བདག་འོད་དཔག་མེད་སྤྲུལ་བའི་སྐུ་ཡི་ཆ་བྱད་ཅན་དང་། ཐུགས་ཀར་ཙིཏྟ་རིན་པོ་ཆེའི་མཆོང་གུར་ཕུབ་པ་ལྟ་བུ་ཟླ་གམ་སྒོ་གཅིག་པའི་ནང་དུ་པད་དཀར་འདབ་མ་བརྒྱད་པའི་ལྟེ་བར་ཧྲཱིཿཡིག་དཀར་པོའི་མཐར་སྐོར་དུ་ཡི་གེ་དྲུག་མ་དངུལ་ཞུན་གྱིས་བྲིས་པ་བཞིན་གཡས་བསྐོར་དུ་གསལ་བའི་སྒོ་ནང་དུ་རྟ་མགྲིན་དམར་མོ་ཕྱག་གཡས་དབང་བསྡུད་ཀྱི་ཕྱག་རྒྱ་སྟེ་ལྕགས་ཀྱུ་དང་གཡོན་ཞགས་པ་འཛིན་པ་དུར་ཁྲོད་རོལ་བའི་ཆས་ཅན་བདུད་བཞིའི་གདན་ལ་དོར་སྟབས་ཀྱིས་བཞུགས་པ། གཙོ་བོའི་གཡས་སུ་སྲས་ནོར་བུ་འཛིན་པ་གཡས་ནོར་བུ་དང་གཡོན་དུ་སྲས་མོ་གསངས་སྔགས་འཛིན་མ་གཡོན་ཕྲེང་བ་བསྣམས་ཤིང་ཕྱག་གཞན་གཉིས་མཆོད་སྦྱིན་མཛད་པས་འདུད་པའི་ཚུལ་དུ་བཞུགས་པ་བྱང་ཆུབ་སེམས་དཔའི་ཆས་ཅན། དེའི་ཕྱི་རོལ་གྱི་པད་འདབ་དྲུག་ལ་གཡས་བསྐོར་གྱིས་མདུན་ནས་བརྩམ་སྟེ་ངོ་བོ་ལྷ་ལ་སོགས་པའི་ཐུབ་པ་དྲུག་པོ་ལ་རྣམ་པ་ཨོ་དཀར་པོ་མ་སྔོན་པོ་ཎི་སེར་པོ་པད་སེར་ནག་མེ་ལྗང་དམར་ཧཱུྃ་མཐིང་ནག་རྣམས་ཡིག་ངོ་ནང་བསྟན་དུ་འཁོད་པའི་ཡིག་འབྲུ་སོ་སོ་ལས་རང་མདོག་གི་འོད་ཟེར་གྲངས་མེད་པ་རིགས་དྲུག་སོ་སོའི་གནས་སུ་ཁྱབ་པར་སྤྲོ་བའི་འོད་ཟེར་གྱི་རྩེ་ལ་འགྲོ་འདུལ་ཐུབ་དྲུག་གི་སྤྲུལ་པའི་རྣམ་རོལ་བསམ་གྱིས་མི་ཁྱབ་པར་འབྱེད་པ། དེའི་ཕྱི་རོལ་དུ་པདྨའི་གདན་ཕྱི་ནང་གི་རིམ་པ་བཞི་སྐོར་དུ་ཡོད་པ་ལ་དུས་གསུམ་གྱིས་བསྡུས་པའི་བསྐལ་པ་བཟང་པོའི་སངས་རྒྱས་སྟོང་དང་རྩ་གཉིས་འགྲོ་བ་སྣ་ཚོགས་པ་འདུལ་ཕྱིར་སྐུ་མདོག་གཅིག་ཏུ་མ་ངེས་པར་དཀར་སེར་དམར་ལྗང་མཐིང་ག་ལ་སོགས་པ་མཚན་དང་དཔེ་བྱེད་འབར་བ་སྤྲུལ་བའི་སྐུ་ཆགས་བྲལ་ཚངས་པར་སྤྱོད་པའི་ཆ་ལུགས་སུ་བཞུགས་པ། སྒོ་བཞིར་རྟ་མགྲིན་རིགས་བཞི་ལས་བཞིའི་མདོག་ཅན་དྲག་པོའི་ཆ་བྱད་ཅན་དང་། གཞན་ཡང་གཞལ་ཡས་ཁང་གི་བར་ཁྱམས་དང་ཕྱི་རོལ་ཀུན་ཏུ་བླ་མ་རིག་འཛིན་དཔའ་བོ་མཁའ་འགྲོ་དམ་ཅན་ཆོས་སྲུང་གི་ཚོགས་དང་བཅས་བ་ཐམས་ཅད་སྐུ་སྣང་སྟོང་འོད་ཀྱི་རང་བཞིན་གསུང་གྲགས་སྟོང་སྔགས་ཀྱི་རང་སྒྲ་སྒྲོགས་པ་ཐུགས་མཁྱེན་བརྩེ་ནུས་པ་ཡེ་ཤེས་དང་བཅས་སྟེ་རྣམ་འགྱུར་ཞི་དང་ཁྲོ་ཆགས་དཔའ་བརྗིད་ཀྱི་ཉམས་བརྒྱར་འཆར་བ་སྤྲིན་དཔུང་གཏིབ་པ་ལྟར་བཞུགས་པར་བསམ་པ་རྣམས་ཚིག་དོན་འབྲེལ་ཆགས་པར་གསལ་གདབ་བོ། །དེ་ལྟར་གསལ་བའི་དམ་ཚིག་པ་རྣམས་ཀྱི་གནས་གསུམ་དུ་ཟླ་བ་པདྨ་ཉི་མའི་གདན་སོ་སོར་ཨོཾ་དཀར་ཨཱ་དམར་ཧཱུྃ་མཐིང་གསུམ་གསལ་བས་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་དུ་རྒྱས་གདབ་འོད་དཔག་མེད་རིགས་ཀྱི་བདག་པོར་བྱས་པའི་རྒྱལ་བ་རིགས་ལྔས་དབུ་བརྒྱན། རིགས་ལྔ་ཡེ་ཤེས་ལྔའི་ངོ་བོར་དབང་བསྐུར་བ་སྟེ་བསྐྱེད་པའི་རིམ་པའོ། །དེ་ནས་སྙིང་གའི་འོད་ཀྱིས་རོལ་པ་ཆེན་པོའི་ཡེ་ཤེས་ཀྱི་འཁོར་ལོ་ནམ་མཁའ་གང་བར་སྤྱན་དྲངས་ཏེ་དམ་ཡེ་དབྱེར་མེད་དུ་བརྟན་པར་བྱས་ནས་བཞུགས་སུ་གསོལ་བ་དང་། ཕྱག་འཚལ་བ་དང་། ཕྱི་ནང་གསང་བའི་མཆོད་པ་འབུལ་བ། བརྡའ་དོན་དྲན་པས་ཆེ་བའི་ཡོན་ཏན་ལ་བསྟོད་པའི་བར་རྣམས་དཀྱུས་བཞིན་བྱའོ། །དེ་ནས་བསྐྱེད་རིམ་གྱི་དངོས་གཞི་ལྷའི་རྣམ་པ་གསལ་བ་གལ་ཆེ་བས་ལུས་དྲང་པོར་བསྲང་ལ། ངག་བཟླས་བརྗོད་སོགས་ལ་མི་འཇུག་པར། སེམས་ལྷའི་སྐུ་ལ་དྲན་པར་མངོན་དུ་བཞག་སྟེ། ཐོག་མར་དབུ་རྒྱན་གྱི་ནོར་བུའི་རྩེ་མོ་ནས་ཞབས་ཀྱི་པད་གདན་ཡན་གྱི་རྣམ་པ་སྤྱི་ལ་སེམས་བཟུང་དེ་ནས་བྱེ་བྲག་ལ་གསལ་སྣང་རིམ་གྱིས་འདོན་ཏེ་སྨིན་མཚམས་ཀྱི་མཛོད་སྤུ། སྤྱན་གྱི་དཀར་ནག ཤང་གི་སྤུ་གུ ཞལ་གྱི་སྒྲོས། ཚེམས་ཀྱི་ཕྲེང་བ། ལྗགས་ཀྱི་སྲབ་མཉེན། དཔལ་བའི་དབྱེས། དབུ་སྐྲའི་ཟར་བུ། ནོར་བུའི་ཐོར་ཚུག ཕྱག་ཞབས་ཀྱི་རི་མོ། སྟོད་སྨད་ཀྱི་འཕེལ་ཁ། སྐུ་སྐེད་ཀྱི་ཕྲ་ལྡེམ། སྒེགས་ཉམས་ཀྱི་འགྱིང་ཚུལ། ཡབ་ཡུམ་འཁྲིལ་སྟབས། ཡན་ལག་གི་གཉེན་ལྕུགས། ནོར་བུའི་རྒྱན་ཆ་དར་གྱི་ན་བཟའ། ཕྱག་མཚན་གྱི་འཛིན་ཚུལ་སོགས་རེ་རེ་ནས་གསལ་སྣང་བཏོན་ཏེ་སྒོམ། ཡང་རྣམ་པ་སྤྱི་ལ་སེམས་བཟུང་། དེ་ལྟར་རེས་མོས་ཀྱི་གཙོ་བོ་ལ་གསལ་སྣང་ཐོན་པ་དང་། རིམ་པར་སྤྱི་བོའི་རིགས་བདག་དང་། ཐུགས་ཀའི་རྟ་མགྲིན། འཁོར་གྱི་ལྷ་ཚོགས་རྣམས་གསལ་འདེབས། གཙོ་འཁོར་ཡོངས་རྫོགས་ལ་སེམས་ཟིན་པ་དང་། གཞི་འབྲས་ཀྱི་དག་པ་དྲན་པས་དེ་ལྟར་གསལ་བའི་ལྷ་སྐུ་ཞལ་ཕྱག་རྒྱན་དང་རྣམ་འགྱུར་དང་བཅས་པ་ཐམས་ཅད་སེམས་ཉིད་དབྱིངས་ཀྱི་ཡོན་ཏན་མཚོན་པའི་བརྡའམ་རྟགས་ཀྱི་ཕྱག་རྒྱ་ཙམ་ལས་དངོས་པོ་རང་རྒྱུད་ཏུ་མ་གྲུབ་པར་ཤེས་པས་སྣང་སྟོང་སྒྱུ་མའི་རོལ་པར་རྩལ་སྦྱངས། དེ་ཡང་རང་གི་བློས་བཅོས་པའི་རྟོག་བཟོ་ཙམ་དུ་མི་བལྟ་བར་གདོད་ནས་འཁོར་འདས་དབྱེར་མེད་དག་མཉམ་ཆེན་པོར་བཞུགས་པའི་ཚུལ་ལ་ངེས་པ་དྲང་ནས་རབ་འབྱམས་རྒྱལ་བའི་དཀྱིལ་འཁོར་ཐམས་ཅད་དང་གཅིག་དང་ཐ་དད་བྲལ་བའི་བདག་ཉིད་མགོན་པོ་སྤྱན་རས་གཟིགས་ཀྱི་གསང་གསུམ་ཡེ་ཤེས་རྡོ་རྗེའི་བདག་ཉིད་ངའོ་སྙམས་པའི་ང་རྒྱལ་བརྟན་པོར་བྱ། གསལ་དག་བརྟན་གསུམ་འདི་ནི་བསྐྱེད་རིམ་གྱི་དངོས་གཞི་བསྙེན་པའི་དོན་པོ་ཏིང་ངེ་འཛིན་གྱི་གཟེར་ཡིན་པས་གལ་ཆུང་དུ་མ་ལུས་གནད་དུ་འགྲོ་བར་བྱ་དགོས་སོ། །གཉིས་པ་གསུང་བཟླས་པ་སྔགས་ཀྱི་རྣལ་འབྱོར་ནི་ལྷ་དང་ཉེ་བར་བསྙེན་ཅིང་དངོས་གྲུབ་སྒྲུབ་པའི་ཕྱིར་ཐུགས་རྒྱུད་བསྐུལ་བར་བྱེད་པ་སྙིང་པོ་སྔགས་ཀྱི་གཟེར་སྟེ། །འདི་ལ་ཕྱི་བསགས་སྦྱངས་དངོས་གྲུབ་སྡུད་པའི་བཟླས་པ་། ནང་དྲེགས་པ་ཚར་གཅོད་ཀྱི་བཟླས་པ། གསང་བ་དོན་གྱི་བཟླས་པ་། གནས་ལུགས་བོགས་འདོན་གྱི་བཟླས་པ་དང་བཞི་ལས། དང་པོ། ཧྲཱིཿཐ་མལ་ངག་ཞེན་སོགས་ནས་། ཨོཾ་མ་ཎི་པདྨེ་ཧཱུྃ་ཧྲཱིཿ ཞེས་པའི་བར་ཚར་གཅིག་བརྗོད། དེ་ནས་བཟླས་པའི་གཞི་དམིགས་པ་འགོད་པ་ནི། ཧྲཱིཿ ཕྱི་ནང་གསང་བའི་སོགས་ཀྱི་བསྟན་པ་ལྟར། གཙོ་བོ་དང་ཐུགས་ཀའི་སྒོར་གསལ་བའི་རྟ་མགྲིན་སྤྱི་བོའི་དཔག་མེད་དེ་སྐུ་གསུང་ཐུགས་ཀྱི་ལྷ་གསུམ་སོ་སོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿཡིག་དཀར་དམར་མཐིང་གསུམ་པོ་རང་འོད་མར་མེའི་རྩེ་མོ་ལྟར་འབར་བའི་མཐར་ཡི་གེ་དྲུག་མ་དཀར་དམར་མཐིང་གསུམ་གྱི་ཕྲེང་བ་གཡས་བསྐོར་དུ་བཀོད་དེ། རིམ་པ་བཞིན་འོད་ཟེར་སྤྲོ་བསྡུ་སྐུ་གསུང་ཐུགས་ཀྱི་དངོས་གྲུབ་བསྒྲུབ་པ་སྒོ་གསུམ་གྱི་སྒྲིབ་པ་སྦྱངས་བའི་དམིགས་པ་དང་བཅས་ཏེ། བདག་ཉིད་རྩ་བའི་ཐུགས་ཀ༴ ཞེས་སོགས་ཀྱི་མཐར་ཡིག་དྲུག་གི་བཟླས་པ་ཐུན་ཅིག་ལ་ཇི་ཙམ་བཟླ་རྒྱུའི་བཞི་ཆ་ཙམ་བཟླས། སྤྱི་གཙུག་སྣང་མཐའི༴ ཞེས་སོགས་ཀྱི་མཐར་དེ་ཙམ་དང་། རྟ་མགྲིན་ཐུགས་ཀའི༴ སོགས་ཀྱི་མཐར་ཡང་དེ་ཙམ་སྟེ་དེ་གསུམ་ཐུན་གཅིག་གི་བཞི་ཆ་ཙམ་དུ་བཟླ། དེ་ནས་དྲེགས་པ་ཚར་གཅོད་ཀྱི་བཟླས་པ་ནི་རྩ་བའི་ལྷ་གསུམ་གྱི་ཐུགས་ཀའི་སྔགས་ཕྲེང་གི་འོད་ཟེར་ལས་སྤྲུལ་པའི་ཁྲོ་ཆུང་མཚོན་ཆ་སྣ་ཚོགས་ཐོག་ཅིང་ཞལ་ནས་ཕཊཿསྒྲ་སྒྲོགས་པ་གྲངས་མེད་པར་བྱུང་སྟེ་ཞལ་གྱི་སྒོ་དང་ཤངས་ཀྱི་རླུང་སྒྲོམ་བ་སྤུའི་བུ་ག་རྣམས་ནས་ཕྱིར་ཐོན་ཏེ་མེའི་ཚྭ་ཚྭ་ལྟར་འཁྲུགས་པས་སྟོང་གསུམ་ཐམས་ཅད་བཀང་སྟེ་བདུད་དང་དགྲ་བགེགས་ཐམས་ཅད་ཚར་བཅད་བྲན་དུ་བཀོལ་བར་བསམ་ལ། བདག་ཉིད་ལྷ་གསུམ་ཐུགས༴ སོགས་ཀྱི་མཐར་ཡི་གེ་བཅུ་གཅིག་པ་འུར་ཆེམ་དྲག་པོ་སེར་འབྲུག་ལྡིར་བ་བཞིན་ཅི་རིགས་སུ་བཟླའོ། །གསུམ་པ་གསང་བ་དོན་གྱི་བཟླས་པ་ནི། རླུང་རྡོ་རྗེའི་བཟླས་པ་སྟེ། །དེ་ལྟར་སྐུ་གསུམ་ལྷ་ཚོགས་སོགས་མཐར་ངག་བཟླས་སྤངས་ཏེ་རླུང་ནང་དུ་རྔུབ་པ་ན་ཨོཾ་མ་ཞེས་པའི་སྒྲ་གདངས་ཀྱིས་འཇུག་པར་བསམ། ཁོང་དུ་གནས་པའི་ཚེ་ཎི་པད་ཅེས་པའི་སྒྲ་གདངས་ཀྱིས་གནས་པར་བསམ། ཕྱིར་འབྱིན་པའི་ཚེ་མེ་ཧཱུྃ་ཧྲཱིཿ ཞེས་པའི་སྒྲ་གདངས་ཀྱིས་སོང་བར་བསམ་སྟེ་ཚུལ་དེ་ལྟ་བུའི་རླུང་ཁུག་བརྒྱའམ་ཉེར་གཅིག་སོགས་གང་ལྕོག་ཏུ་བཟླ། བཞི་པ་གནས་ལུགས་བོགས་འབྱིན་གྱི་བཟླས་པ་ནི། ཧྲཱིཿ སྣང་བ་ཐུགས་རྗེ་ཆེན་པོའི་སྐུ་སོགས་ཀྱི་མཐར། སྒྲ་གྲགས་ཐམས་ཅད་ཐུགས་རྗེ་ཆེན་པོའི་གསུང། རྟོག་ཚོགས་ཐམས་ཅད་ཐུགས་རྗེ་ཆེན་པོའི་ཐུགས་སུ་གསལ་བས་སྣང་སྲིད་ཐམས་ཅད་ལྷ་སྔགས་ཆོས་སྐུའི་རོལ་པར་བལྟས་ཏེ་བུང་བ་ཚང་ཞིག་པ་ལྟར་ཡི་གེ་བདུན་པའི་འཛབ་དབྱངས་ཟིལ་ཁོལ་དུ་སྒྲོགས་པར་བསམ་ལ། གསལ་དག་སྙན་པའི་དབྱངས་ཀྱིས་ཐུན་གྱི་བཞི་ཆ་གཅིག་ཏུ་བཟླས་པར་བྱ་སྟེ་དེ་རྣམས་གསུངས་བཟླས་པའི་རྣལ་འབྱོར་རོ། །གསུམ་པ་ཐུགས་འོད་གསལ་ཆོས་སྐུའི་རྣལ་འབྱོར་ནི་སྒྲུབ་པའི་ཡན་ལག་དགོངས་པ་མི་འགྱུར་པའི་གཟེར་བྱ་བ་ཡིན་ཏེ། དེ་ཉིད་གསལ་གདབས་པ་ནི། ཧྲཱིཿ རང་ཉིད་ལྷ་དང་གཉིས་སུ༴ ཞེས་པ་ལ་སོགས་པ་སྟེ། བསྒོམ་བྱའི་ལྷ་དང་སྒོམ་བྱེད་ཀྱི་སེམས་གཉིས་སུ་མེད་དེ་རང་གི་སེམས་ཉིད་ཀྱི་སྣང་ཆ་ལྷ་རུ་ཤར་བའི་ཚུལ་ལ་བལྟ་ཞིང་། དེ་ལྟར་བལྟ་མཁན་གྱི་རྟོག་པ་ཁོ་རང་ལ་ཚུལ་བལྟས་པས་རང་ཡུལ་རྗེས་མེད་དུ་དག་ཏེ་གཉིས་སྣང་གི་ལྷ་མཚན་མ་དང་བཅས་པའི་ཐུགས་རྗེ་ཆེན་པོ་མ་མཐོང་ལ། མ་མཐོང་བའི་ངང་དེ་ཉིད་ལ་བཞག་པས་རང་བྱུང་དོན་གྱི་ལྷ་རིག་སྟོང་ཐུགས་རྗེ་ཆེན་པོའི་ཞལ་མཇལ། མ་སྒྲུབ་རང་གནས་ཀྱི་སངས་རྒྱས་སྒྲུབ་ཏེ་རང་བབ་ཟང་ཐལ་གྱིས་དགོངས་པའི་སྐད་ཅིག་མ་ལ། རང་སྣང་སྐྱེ་མེད་དུ་གྲོལ་བ་སྣང་བ་མཐའ་ཡས། རང་གསལ་འགགས་མེད་དུ་ཤར་བ་རྟ་མགྲིན་རྒྱལ་པོ། རང་གྲོལ་འཛིན་མེད་དུ་དག་པ་གསང་བ་ཡེ་ཤེས། ཡེ་ནས་སྐྱེ་མེད་ཀྱི་རང་གདངས་ཐུབ་ཆེན་སྤྲུལ་སྐུ། རང་བཞིན་བསམ་བརྗོད་དང་བྲལ་བ་སངས་རྒྱས་སྟོང་རྩ། ཕྲིན་ལས་རྩོལ་མེད་དུ་རྫོགས་པ་ཁྲོ་ཆེན་རྣམ་བཞི་སྟེ་དཀྱིལ་འཁོར་གྱི་འཁོར་ལོ་ཐམས་ཅད་ལྷུན་གྱིས་རྫོགས་ཤིང་། དེ་ཐམས་ཅད་ངོ་བོ་སྤྲོས་བྲལ་དུ་དབྱེར་མེད་པ་ཆོས་སྐུ་རང་བཞིན་གསལ་རིག་ཏུ་མ་འགགས་པ་ལོངས་སྐུ། ཐུགས་རྗེའི་རིག་རྩལ་སྣ་ཚོགས་འཛིན་བྲལ་དུ་ཤར་བ་སྤྲུལ་སྐུའི་རང་བཞིན་ཏེ་ཡེ་ཤེས་རང་གསལ་གྱི་རིག་པའི་ངང་དུ་ལྷ་སྔགས་ཏིང་འཛིན་གྱི་འཁོར་ལོ་ཐམས་ཅད་རྫོགས་པ་ནི་ངོ་མཚར་ཞིང་རྨད་དུ་བྱུང་བའི་གནས་ཡིན་ལ། དེའི་ངང་ལ་དགོངས་པ་གཡོ་མེད་དུ་བཞག་ནས་ཡི་གེ་བདུན་པ་སྙན་པའི་དབྱངས་ཀྱི་རྟ་ལ་དྲངས་ཏེ་བཟླས་པ་ནི་ཐུགས་འོད་གསལ་ཀྱི་རྣལ་འབྱོར་རོ། །ཐུན་གྲོལ་ཁར་དབྱངས་གསལ་ཡིག་བརྒྱ་ཡེ་དྷར་རྣམས་ལན་གསུམ་རེ་བརྗོད་པས་ཆད་ལྷག་ཁ་བསྐངས་ཤིང་མཆོད་བསྟོད་ནོངས་བཤགས་རྟེན་བཞུགས་དང་བཅས་པ་བྱས་ཏེ་བསྡུ་བའི་རིམ་པ་ལ་འཇུག་པ་ནི། ཧྲཱིཿ སྣོད་བཅུད་མ་ལུས་གཞལ་ཡས་ཁང་ལ་བསྡུ། ཞེས་པ་ལྟར་བདག་གི་ཐུགས་ཀའི་ཏིང་ངེ་འཛིན་སེམས་དཔའ་འམཧྲཱིཿལས་འོད་ཟེར་དཀར་བུན་གྱིས་འཕྲོས་ཏེ་སྣོད་བཅུད་ཡེ་ཤེས་ཀྱི་འཁོར་ལོ་གསལ་བ་ལ་ཕོག་པས་འོད་དུ་ལྟེམ་གྱིས་ཞུས་ཏེ་གཞལ་ཡས་ཁང་ལ་ཐིམ། དེ་རིམ་གྱིས་འཁོར་དང་། འཁོར་གཙོ་བོ་ལ། གཙོ་བོ་ཐུགས་སྲོག་ཧྲཱིཿལ། ཧྲཱིཿ འི་འ་ར་ཏ་ལ་ར་ཏ་ཧ་ལ་ཧི་གི་གུ་ལ། གི་གུ་ནཱ་དར་གྱུར་ཏེ་མི་དམིགས་པར་བསམ་ལ་འོད་གསལ་སྤྲོས་པ་དང་བྲལ་བའི་ངང་དུ་ཅི་ཙམ་གནས་ཀྱི་བར་དུ་མཉམ་པར་བཞག་ལ་དེའི་ངང་ལས་ལྡང་བ་ན། ཨོཾ་མ་ཎི་པདྨེ་ཧཱུྃ། ཞེས་པའི་སྒྲ་གདངས་ཀྱི་རྐྱེན་ལས་ཡབ་རྐྱང་ངམ་ལྷན་སྐྱེས་ཀྱི་སྐུ་འཇའ་ཚོན་ལྟ་བུར་ལང་ལ་གནས་གསུམ་འབྲུ་གསུམ་གྱིས་སྲུང་བ་དང་། སྤྱི་བོར་ཟླ་བ་ལ་ཧི་བཀོད་པ་འོད་དུ་ཞུ་ནས་ལུས་ལ་རྡོ་རྗེའི་གོ་ཆས་ཞུ་ལུགས་སུ་གཡོག་པར་བསམ་ཞིང་གོ་བགོ་བ་དང་། བསྲུངས་བའི་གུར་ཁང་གསལ་གདབ་པའི་ངང་ལས་ཐུན་མཚམས་ཀྱི་བྱ་བ་ཟས་གོས་ཁྲུས་དང་འགྲོ་འཆག་ཉལ་བ་སོགས་ལ་རང་རང་གིས་རྣལ་འབྱོར་གྱིས་ཟིན་པར་འཇུག་གོ །དེ་ལྟར་ཐུན་བཞིའི་ངེས་པར་ཁྲིགས་ཆགས་སུ་བྱས་ནས་སྲོད་ཐུན་ནམ་དགོང་ཐུན་གང་བདེར་ཚོགས་དང་གཏོར་བསྔོ་སོགས་བྱ། རྫོགས་རིམ་རླུང་དང་གཏུམ་མོ་སོགས་བསྒོམ་པར་འདོད་ན་རྗེས་ཐོབ་ཀྱི་ལྷ་སྐུ་ཡབ་ཡུམ་ལྷན་སྐྱེས་སྣང་སྟོང་སྒྱུ་མ་ལྟ་བུའི་སྐུའི་ནང་དུ་རྩ་གསུམ་འཁོར་ལོ་བཞི་གསལ་བཏབ་ནས་རང་རང་གི་མན་ངག་ལྟར་ཉམས་སུ་ལེན་པར་བྱ་བ་ཡིན་ནོ། །བསྙེན་པའི་ཚད་ཀྱང་གྲངས་དུས་རྟགས་ཀྱི་རིམ་པ་རྣམས་དང་མཐུན་པར་གྲུབ་ནས་གསུམ་པ་རྗེས་ཀྱི་རིམ་པ་ནི། སྒྲུབ་པ་ཆེན་པོའི་ཡན་ལག་འཕྲོ་འདུས་གཟེར་དངོས་གྲུབ་བླངས་པའི་རིམ་པ་ནི། བསྙེན་པ་གྲོལ་རྒྱུའི་སྔ་རོལ་ཞག་བདུན་ནམ་གསུམ་ཙམ་ནས་མཆོད་རྫས་གསར་པ་བཤམས། སྨན་རཀ་གཏོར་མ་སོགས་ཁ་གསོ་ཞིང་། ཚོགས་ཀྱི་འཁོར་ལོ་བརྒྱ་རྩ་སོགས་ཀྱིས་མཆོད་དངོས་གྲུབ་ཀྱིས་རྫས་རྒྱས་པར་བདག་འཇུག་དང་འབྲེལ་ན་དབང་གི་དཀྱིལ་འཁོར་བཤམས་པ་དང་། བསྡུ་ན་སྒྲུབ་གཏོར་གྱི་མདུན་དུ་ཀཱ་པཱ་ལ་ཛ་གད་ཀྱིས་བཀང་བར་བུ་རམ་དང་ཆོས་སྨན་བཏབ་པ་དར་དམར་གྱི་ཁེབ་ཅན་དང་། ཟས་སྣ་ཤིང་ཏོག་སོགས་ཅི་འབྱོར་བཤམས་ཤིང་། བཟླས་པའི་སྐབས་སུ་དངོས་གཞིའི་བསྙེན་པ་བསྡུས་ཙམ་གྱི་མཇུག་ཏུ། དངོས་གྲུབ་བསྐུལ་བའི་ཆེད་དུ་བརྒྱུད་པའི་གསོལ་འདེབས་བདུད་རྩིའི་སྨན་མཆོད་བཅས་བགྱིས་པའི་མཐར། ཧཱུྃཿནམ་མཁའི་མཐའ་དང་མཉམ་པའི་དཀྱིལ་འཁོར་ནསཿ སོགས་ཀྱིས་བསྐུལ་ཏེ་སྒྲུབ་གཏོར་གཙོ་འཁོར་ཡོངས་རྫོགས་ཀྱི་ལྷར་གསལ་བའི་གནས་གསུམ་དུ་འབྲུ་གསུམ་གསལ་བ་དང་ཐུགས་ཀའི་ཧྲཱིཿཡིག་སྔགས་ཕྲེང་དང་བཅས་པ་ལས་འོད་ཟེར་ཕྱོགས་བཅུར་སྤྲོས་པས་ནམ་མཁའི་མཐའ་དང་མཉམས་པའི་འཇིག་རྟེན་ན་བཞུགས་པའི་རྩ་གསུམ་རྒྱལ་བ་རྒྱ་མཚོའི་ཚོགས་མ་ལུས་ཤིང་ལུས་པ་མེད་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ་བས་སྔོན་གྱི་ཐུགས་དམ་ཆེན་པོའི་དབང་གིས་ཆོས་ཀྱི་སྐུ་སྤྲོས་བྲལ་ནམ་མཁའ་ལྟ་བུའི་ངང་ནས་གཟུགས་སྐུ་འཇའ་ཚོན་ལྟ་བུར་བཞེངས་ཏེ་སྒྲུབ་པའི་ལྷ་མཆོག་ཐུགས་རྗེ་ཆེན་པོ་ཡབ་ཡུམ་སྲས་འཁོར་རིག་བཞི་ཁྲོ་བོའི་ཚོགས་དང་བཅས་པའི་རྣམ་པར་མདུན་གྱི་མཁའ་ལ་ཆར་སྤྲིན་གཏིབ་པ་ལྟར་བྱོན་ཅིང་སྐུ་དགྱེས་པའི་རྣམ་འགྱུར་འབུམ་ཕྲག་ཏུ་འགྱུར། གསུང་ཡི་གེ་དྲུག་པའི་སྒྲ་དབྱངས་འབྲུག་སྟོང་ལྟར་ལྡིར། ཐུགས་མཁྱེན་བརྩེ་ནུས་པས་བདག་ལ་དགོངས་པའི་སྐུའི་གནས་རྣམས་ནས་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་རྒྱན་གྱི་འཁོར་ལོའི་བྱིན་རླབས་དངོས་གྲུབ་ཐམས་ཅད་བདུད་རྩི་དཀར་དམར་མཐིང་ཀའི་རྒྱུན། སྐུ་དང་ཡིག་འབྲུ་ཕྱག་མཚན་གྱི་རྣམ་པ་གྲངས་མེད་པ་གཏོར་མ་སྒྲུབ་རྫས་བྷནྡྷའི་བདུད་རྩི་རྣམས་ལ་ཆར་བཞིན་བབས་པས་དངོས་གྲུབ་གྱི་རྒྱ་མཚོར་འཁྱིལ་བར་བསམ་ལ་རྩ་སྔགས་ཡི་གེ་བདུན་པའི་མཐར་ཀཱ་ཡ་ཝཀྐཱཙིཏྟ་སརྦ་སིདྡྷི་ཕ་ལ་ཧོཿ ཞེས་བཏགས་པ་དབྱངས་དང་བཅས་པས་ཅི་འགྲུབ་ཏུ་བཟླས་པར་བྱ། དེ་ནས་ནུབ་ཐ་མའི་ཚེ་སྐྱ་རེངས་མ་ཤར་བའི་སྔོན་དུ་ཆོ་ག་བཟླས་པ་དང་བཅས་པ་ཚང་བར་བྱས་ཏེ་སྐྱ་རེངས་ཤར་བ་དང་མཆོད་པ་གསོ་ཞིང་མཆོད་བསྟོད་རྒྱས་པར་བྱ། ཁྱད་པར་ཚོགས་ཀྱི་འཁོར་ལོས་མཆོད་དེ་བསྐང་བའི་མཐར་ཐུག་པར་བཏང་། དེ་ནས་བདག་འཇུག་དང་འབྲེལ་ན་དབང་བླང་བའམ་ཡང་ན་བགེགས་ལ་གཏོར་མ་བྱིན་ཏེ་བསྐྲད་ནས་སྲུངས་འཁོར་དྲག་ཏུ་བསྒོམ། ཡེ་ཤེས་སྐུ་མཆོག་གི་ཀྱི་རྒྱུན་བཤགས་བྱ་ཡིག་བརྒྱ་ཉེར་གཅིག་ཙམ་བཟླས། ཧྲཱིཿ ཐུགས་རྗེ་ཆེན་པོ་ཡབ་ཡུམ༴ སོགས་ཀྱིས་བྱིན་དབབ་ལ་དངོས་གྲུབ་འབེབས་སྔགས་ཅི་རིགས་བཟླས། དངོས་གྲུབ་ཀྱིས་རྫས་ཀཱ་པཱ་ལའི་བདུད་རྩི་བླང་པ་ནང་མཆོད་དང་བསྲེས་ནས་སྨན་མཆོད་བྱ། དེ་ནས ཧྲཱིཿ ནམ་མཁའི་མཐའ་དང་སོགས་ཀྱིས་མཐར་གཏོར་མ་བཏེགས་ཏེ་གནས་གསུམ་དུ་བཞག་ཅིང་། ཀཱ་ཡ་སི་དྡྷི་ཨོཾཿ ཝཀྐཱ་སིདྡྷི་ཨཱཿ ཙིཏྟ་སིདྡྷི་ཧཱུྃཿ ཞེས་བརྗོད་པས་གཏོར་ལྷའི་གནས་གསུམ་ནས་འོད་ཟེར་དཀར་དམར་མཐིང་གསུམ་རང་གི་གནས་གསུམ་དུ་ཐིམ་པས་སྐུ་བུམ་པ་གསུང་གསང་དབང་ཐུགས་ཤེར་དབང་གསུམ་རིམ་པར་ཐོབ། སྒོ་གསུམ་གྱི་སྒྲིབ་པ་སྦྱང་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ། སླར་སྤྱི་བོར་བཞག་ནས་སརྦ་སིདྡྷ་ཕ་ལ་ཧོ། ཞེས་བརྗོད་པས་གཏོར་མའི་ལྷ་ཚོགས་ཐམས་ཅད་འོད་དུ་ལྟེམ་གྱིས་ཞུ་ནས་རང་ལྷར་གསལ་བ་ལ་ཐིམ་པས་དབང་བཞི་ཐོབ། ཤེས་བྱའི་སྒྲིབ་པ་སྦྱང་། རང་གི་སྒོ་གསུམ་ཐུགས་རྗེ་ཆེན་པོའི་གསང་བ་གསུམ་དང་དབྱེར་མི་ཕྱེད་པ་ཡེ་ཤེས་རྡོ་རྗེའི་བདག་ཉིད་དུ་གྱུར་ཏེ་ཕྱག་རྒྱ་ཆེན་པོའི་མཆོག་གི་དངོས་གྲུབ་ཐོབ་པར་བསམ་ལ། གཏོར་ཟན་བདུད་རྩིར་རྩལ། དེ་ནས་བདུད་རྩི་བཏུང་བ་དང་དངོས་གྲུབ་ཀྱི་རྫས་ཚོགས་ཀྱི་ལོངས་སྤྱོད་དང་བཅས་པ་ཚིམ་པར་རོལ་ལ་དབང་དོན་གྱི་ཡེ་ཤེས་རིང་དུ་སྐྱོང་ངོ་། དེ་ནས་སྔར་གྱི་ལྷག་མ་ལ་སོགས་པ་རྣམས་ཀྱི་སྟེང་དུ་ལྷག་མ་དང་མཆོད་རས་རྣམས་སྤུངས་ཏེ་ལྷག་ཆོག་རྒྱས་པར་བྱས་ཏེ་ཕྱི་རོལ་དུ་དོར་།སྲུངས་མའི་གཏོར་ཆོག ཆད་མདོ། བསྟན་སྐྱོངས་། གཏོར་བྲོ་བཅས་བྱ། སྐབས་འདིར་མཆོད་པ་གསར་བ་གྱ་ནོམ་པར་བཤམས་ནས་ཕྱི་མཆོད་ཉེར་སྤྱོད། ནང་སྨན་གཏོར་རཀྟ། གསང་མཆོད་སླར་ཡང་ཚོགས་མཆོད་དམ་བསྙེན་པའི་ཁ་སྐོང་སྦྱིན་བསྲེགས་བྱེད་པར་འདོད་ན་ཞི་བའི་བསྲེགས་ཀྱི་ཐབ་དཀྱིལ་དུ་ཏི་ལ་སོགས་གཙོ་བོར་གྱུར་པའི་རྫས་རྣམས་རྩ་སྔགས་ཁོ་ནས་འབུལ་ཞིང་མཚམས་སུ་ཏིང་ངེ་འཛིན་མ་གསལ་བ་དང་། སྔགས་མ་དག་པ་དང་། ཆོ་ག་ཆད་ལྷག་ཏུ་གྱུར་པའི་ཉམས་པ་ཐམས་ཅད་ཤིནྟཾ་ཀུ་རུ་ཡེ་སྭཱ་ཧཱ། ཞེས་གདགས་པ་ཙམ་ཁྱད་པར་ལ། གཞན་དཀྱུས་ལྟར་བྱ་སྟེ་གྲངས་ནི་བསྙེན་པའི་བཅུ་ཆའམ། སྤྱིར་འབུམ་ཕྲག་ཙམ་མོ། །དེ་ནས་ནོངས་བཤགས་དང་འབྲེལ་བར་ཡི་གེ་བརྒྱ་པ་བརྒྱ་སྟོང་ཁྲི་སོགས་ཅི་འགྲུབ་དང་བསྡུ་རིམ་ལྷར་ལྡང་གོ་བགོ་ལུས་བསྲུང་དགེ་རྩ་རྫོགས་བྱང་དུ་བསྔོ་བ་བཀྲ་ཤིས་སྨོན་ལམ་སོགས་མཐའ་རྒྱས་སུ་བྱ་སྟེ་དེ་རྣམས་ཞག་གྲངས་ལྔའམ་བདུན་སོགས་སྐབས་དང་བསྟུན། དེ་ནས་རྒྱལ་ཐོའི་དྲུང་དུ་གཏོར་མ་དང་གསེར་སྐྱེམས་བཤམས་ཏེ་སྡེ་བརྒྱད་དང་ཡུལ་ལྷ་སྤྱི་ལ་གཏང་རག་གི་གསེར་སྐྱེམས་ཆ་གསུམ་རྒྱལ་ཆེན་སྤྱན་འདྲེན་མཆོད་པ་སོགས་སྔར་ལྟར་འདོད་དོན་གསོལ་ལ་གཤེགས་གསོལ་བྱ་ཤིས་པ་བརྗོད་ཐོ་བླངས་ནང་མཚམས་གྲོལ། ཞག་ཤས་གནས་བསྲུངས་ཤིང་ཕྱི་རོལ་དུ་མི་འགྲོ་བར་ཚོགས་མཆོད་སོགས་དགེ་བའི་ལས་ལ་བརྩོན་བཞིན་དམ་ཚིག་དག་པའི་གྲོགས་དང་འཕྲད་པ་སོགས་ཀྱིས་རིམ་བཞིན་བག་ཡང་ངོས་ནས་ཕྱི་མཚམས་གྲོལ་ཏེ་ཅི་བདེར་བྱའོ། །སྨྲས་པ། རབ་འབྱམས་རྒྱལ་བའི་ཡེ་ཤེས་མཁྱེན་བརྩེའི་གཏེར། གཅིག་བསྡུས་གངས་ལྗོངས་འགྲོ་བའི་ལྷ་གཅིག་པུ། །སྙིང་རྗེའི་དབང་ཕྱུག་སྤྱན་རས་གཟིགས་དབང་གིས། །སྒྲུབ་ཐབས་བྱེ་བ་སྟོང་གི་སྙིང་པོའི་བཅུད། །ཡང་སྙིང་འདུས་པའི་བསྙེན་པའི་ཟིན་བྲིས་འདི། །སྐལ་བཟང་སྒྲུབ་པ་དོན་གཉེར་གང་ཟག་གི །ཆེད་དུ་དམིགས་ཏེ་རང་བློར་གང་ཤར་བྲིས། །ཉེས་འགལ་ཅི་མཆིས་འཕགས་པས་བཟོད་པར་མཛོད། །རང་རྒྱུད་ཞིང་སར་རྡོ་རྗེ་བཞིའི་ས་བོན། །སྨིན་བྱེད་ཆོ་གས་བཞག་གང་བསྐྱེད་རྫོགས་ཀྱི། །དྲོད་གཤེར་དམ་ཚིག་རྭ་བས་ལེགས་སྐྱོངས་ན། །སྐུ་བཞི་འབྲས་བུའི་སྙེ་མ་འཁྲུངས་པར་ངེས། །གྲོགས་དག་སྙིང་ནས་ཞི་བར་མངོན་དགྱེས་ན། །འདུ་འཛི་དབེན་པའི་སྨན་ལྗོངས་གྲུབ་པའི་ངོགས། །རྣལ་འབྱོར་དབང་ཕྱུག་དགྱེས་པའི་སྐྱེད་ཚལ་དེར། །རིམ་གཉིས་ལམ་གྱི་ཉིན་མཚན་བརྟེན་པར་མཛོད། །དེ་ཡང་དོན་སྤྱི་ཙམ་མིན་རང་རྒྱུད་ལ། །འདྲེས་པའི་ངེས་འབྱུང་བྱམས་དང་སྙིང་རྗེའི་བློས། །བྱང་ཆུབ་སེམས་གཉིས་སྒོམ་པས་གཞི་བཟུང་ནས། །རྡོ་རྗེ་ཐེག་པའི་ལམ་བཟང་བརྟེན་པར་མཛོད། །མཚན་ཉིད་བཞི་ལྡན་བསྐྱེད་རིམ་ལྷའི་རྣལ་འབྱོར། །གསལ་དག་བརྟེན་གསུམ་རྫོགས་པའི་ལམ་ཁྱེར་གྱིས། །དག་རྫོགས་སྨིན་པའི་ལམ་གནད་ཚང་པ་ཡིས། །སྣང་སྟོང་སྐུ་ཡི་རྡོ་རྗེར་འགྲུབ་པར་མཛོད། །འབྱུང་འཇུག་གནས་གསུམ་གཞོམ་མེད་སྔགས་ཀྱི་སྒྲ། །དག་པའི་རང་གདངས་སྔགས་ཀྱི་ལམ་ཁྱེར་གྱིས། །སྲོག་རྩོལ་དབུ་མའི་དབྱངས་སུ་སྦྱངས་པ་ལས། །གྲགས་སྟོང་གསུང་གི་རྡོ་རྗེ་འགྲུབ་པར་མཛོད། །སྣང་གྲགས་ལྷ་སྔགས་ཏིང་འཛིན་རོལ་པའི་རྩལ། །ཐམས་ཅད་རིག་གདངས་ཀ་དག་ཆེན་པོའི་ངང་། །རང་གྲོལ་འོད་གསལ་ཆོས་ཉིད་ལམ་ཁྱེར་གྱིས། བདེ་སྟོང་ཐུགས་ཀྱི་རྡོ་རྗེ་འགྲུབ་པར་མཛོད། །བསྐྱེད་རིམ་གསལ་བརྟན་ཚད་དུ་གྱུར་པས་ན། །རྫོགས་རིམ་རྡོ་རྗེའི་ལུས་ལ་གནད་བསྣུན་ནས། །རླུང་སེམས་དྷུ་ཏིར་དག་པའི་རྟེན་འབྲེལ་ལས། །དཔེ་དང་དོན་གྱི་ཡེ་ཤེས་མཐར་ཕྱིན་ནས། ཚེ་འདིར་ཟུང་འཇུག་གོ་འཕང་འགྲུབ་པར་མཛོད། །རང་དོན་རིག་འཛིན་མཆོག་གི་གནས་ཐོབ་ཏེ། །གཞན་དོན་རྣམ་བཞིའི་ཕྲིན་ལས་དབང་འབྱོར་བས། །མཁའ་འདི་ཇི་སྲིད་འགྲོ་བའི་ཉེར་འཚོ་རུ། །ཕྱག་ན་པདྨོའི་རྣམ་ཐར་སྐྱོང་བར་མཛོད། །དེ་སྐད་ལྷག་བསམ་དག་པས་ཆོས་བཞིན་དུ། །སྨྲས་པའི་དགེ་བ་ཟླ་བ་ལྟར་དཀར་བས། །ཐར་ལམ་སྣང་བའི་ཀུ་མུད་ཁ་བྱེ་ནས། །དོན་གཉིས་འབྱོར་བའི་སྐྱེད་ཚལ་མཛེས་གྱུར་ཅིག །ཅེས་ཐུགས་རྗེ་ཆེན་པོ་ཡང་སྙིང་འདུས་པའི་བསྙེན་ཡིག་གྲུབ་གཉིས་ནོར་བུའི་གན་མཛོད་ཅེས་བྱ་བ་འདི་ཡང་དུས་མཐའི་ཆོས་གཟུགས་པདྨ་བཛྲ་དུ་འབོད་པས་སྔ་འགྱུར་རྡོ་རྗེ་ཐེག་པའི་ཆོས་གྲྭ་བྱང་ཆུབ་ཆོས་གླིང་དུ་བྲིས་པ་དགེ་ལེགས་འཕེལ། །དགེ་འོ། །

རྩ་གསུམ་གསང་བ་སྙིང་ཐིག་གིས་མཚོན་པའི་ལྷག་པའི་ལྷ་རབ་འབྱམས་གང་ལའང་སྦྱར་ཆོག་པའི་བསྙེན་པའི་གསལ་བྱེད་གནད་ཀྱི་ལྡེ་མིག

༄༅། །རྩ་གསུམ་གསང་བ་སྙིང་ཐིག་གིས་མཚོན་པའི་ལྷག་པའི་ལྷ་རབ་འབྱམས་གང་ལའང་སྦྱར་ཆོག་པའི་བསྙེན་པའི་གསལ་བྱེད་གནད་ཀྱི་ལྡེ་མིག་ཅེས་བྱ་བ་བཞུགས། །ན་མོ་པདྨ་ཀ་ར་ཡ། རིགས་བརྒྱའི་ཁྱབ་བདག་རྡོ་རྗེ་འཆང་དབང་དང་། །དབྱེར་མེད་མཁའ་འགྲོའི་དབང་ཕྱུག་ཧེ་རུ་ཀ །མཚོ་སྐྱེས་རྡོ་རྗེ་གསང་བ་འདུས་པའི་ལྷ། །གུས་པས་འདུད་དོ་མཆོག་ཐུན་དངོས་གྲུབ་སྩོལ། །འཛམ་གླིང་གནས་དང་རྡོ་རྗེ་ཕུང་པོ་ཡི། །གྲོང་གི་བཀོད་པ་བདེ་སྟོང་ཙཎྜ་ལིའི། །འཁོར་ལོ་རྒྱས་འདེབས་དཔའ་བོ་ཌཱཀྐིའི་ཚོགས། །ལྷན་སྐྱེས་ཚོགས་ཀྱི་མཆོད་པས་མཉེས་གྱུར་ཅིག །དམ་པའི་ཞལ་གྱི་བུམ་བཟང་ལས་འོང་ཞིང་། །རིམ་གཉིས་ལང་ཚོ་རྒྱས་པའི་རོ་བཅུད་ཅན། །གནས་གསུམ་མཁའ་འགྲོའི་ཕྱག་རྟགས་མ་ཉམས་པའི། །ཟབ་དོན་དྲི་ངད་འཐུལ་བའི་བདུད་རྩི་ཞིག །དེང་སང་འདི་ན་སྐལ་བཟང་སྐྱེ་བོའི་ངོར། །བླ་མའི་མན་ངག་ལ་བརྟེན་ཅུང་ཟད་ཙམ། །དཀྲོལ་བ་རྩ་གསུམ་སྤྲུལ་པའི་འཁོར་ལོ་ཡིས། །དག་མཉམ་ཆེན་པོར་དགོངས་ཏེ་གནང་བར་མཛོད། །དེ་ལ་འདིར་སྤྲུལ་པའི་རིག་འཛིན་ཆེན་པོ་ཉི་མ་གྲགས་པའི་ཟབ་གཏེར་ལས་བྱོན་པའི་གསང་བ་སྙིང་ཐིག་གི་ལས་བྱང་ཡིད་བཞིན་ནོར་བུ་དོན་གྱི་ཕྲིན་ལས་ཀྱི་བཀའ་འགྲེལ་བསྙེན་པའི་གསལ་བྱེད་ཙམ་ཞིག་བྱེད་པ་ལ། ཐོག་མར་སྙིང་ནས་སྒྲུབ་པ་ལ་མོས་པའི་གང་ཟག་ལ་ལམ་གྱི་གནད་ཐུན་མོང་མ་ཡིན་པ་རྣམས་ཤིན་ཏུ་གལ་ཆེ་སྟེ། སྡོམ་གསུམ་རབ་དབྱེར། གནད་རྣམས་མིན་པའི་ཆོས་གཞན་འགའ། །མ་ཚང་བ་དང་ལྷག་པ་དང་། །ཅུང་ཟད་འཁྲུལ་བར་གྱུར་ནའང་། །ཉེས་པ་ཆེན་པོ་བསྐྱེད་མི་ནུས། །ཆོས་ཀྱི་གནད་རྣམས་བཅོས་གྱུར་ན། །ཆོས་གཞན་བཟང་ཡང་འཚང་མི་རྒྱ། །དཔེར་ན་འགྲོ་བའི་སྲོག་རྩ་དང་། །ལྗོན་ཤིང་རྣམས་ཀྱི་རྩ་བ་དང་། །ས་བོན་གྱི་ནི་སྐྱེ་ས་དང་། །ཐགས་རྣམས་ཀྱི་ནི་སྲོག་ཤིང་དང་། །བཅུད་ཀྱི་ལེན་གྱི་རྩ་བ་དང་། །དབང་པོ་རྣམས་ཀྱི་གནད་རྣམས་ནི། །འཆུག་ན་སྒྲུབ་ཏུ་མི་རུང་བཞིན། །དེ་བཞིན་ཆོས་ཀྱི་གནད་འཆུག་ན། །ལེགས་ལེགས་འདྲ་ཡང་འབྲས་བུ་མེད། །དེས་ན་ལ་ལ་འཁྲུལ་ཡང་སླ། །གནད་རྣམས་འཁྲུལ་མེད་དཔྱད་དགོས་སོ། །ཞེས་གསུངས་པ་ལྟར། ལམ་གྱི་གནད་ཇི་བཞིན་དུ་མ་ཤེས་པར་རིམ་གཉིས་དང་བསྙེན་སྒྲུབ་སོགས་ལ་ཇི་ཙམ་འབད་ཀྱང་ལམ་རྟགས་ཀྱི་ཡོན་ཏན་འདི་ཡིན་བྱ་བ་གཅིག་ཀྱང་འབྱུང་བ་མེད་པས་ལམ་སྒྲུབ་པའི་སྔ་རོལ་དུ་ལམ་གྱི་གནད་འཚོལ་བ་ཁོ་ན་ལ་ཆེ་ཐང་དུ་འབད་དགོས་སོ། །དེ་ལ་ཐོག་མར་ཐེག་པ་ཆེན་པོ་པའི་གང་ཟག་རྣམས་ཀྱིས་དོན་དུ་གཉེར་བྱའི་གཙོ་བོ་ནི་དོན་གཉིས་ལྷུན་གྱིས་གྲུབ་པའི་སངས་རྒྱས་ཀྱི་གོ་འཕང་ཡིན་ལ། དེའི་རྒྱུའི་གཙོ་བོ་ནི་བྱང་ཆུབ་ཀྱི་སེམས་རིན་པོ་ཆེ་ཁོ་ན་ཡིན་ཏེ། གསང་བ་བསམ་གྱིས་མི་ཁྱབ་པའི་མདོ་ལས། གསང་བའི་བདག་པོ། ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན། བྱང་ཆུབ་སེམས་ཀྱི་རྒྱུ་ལས་བྱུང་བ་ཡིན། ཐབས་ཀྱིས་མཐར་ཕྱིན་པ་ཡིན་ནོ། །ཞེས་སོ། །དེས་ན་བྱང་ཆུབ་ཀྱི་སེམས་རིན་པོ་ཆེ་དེ་ཉིད་སྐྱེ་བའི་རྒྱུ་འཁོར་བ་མཐའ་དག་སྡུག་བསྔལ་གྱི་རང་བཞིན་མེ་འབར་བའི་ཀློང་ལྟ་བུར་མཐོང་བ་དང་། འཁོར་བ་ན་རྒྱུ་བའི་སེམས་ཅན་ཐམས་ཅད་རང་ཉིད་ཀྱི་ཚེ་རབས་སྔ་མ་རྣམས་ཀྱི་ཕ་མར་མ་གྱུར་པ་གཅིག་ཀྱང་མེད་པ་དང་། དེ་དག་ཀུན་གྱིས་ཀྱང་ཕ་མར་གྱུར་པའི་གནས་སྐབས་ན་ད་ལྟའི་ཕ་མ་བཞིན་དུ། ཟས་གོས་དྲིན་གྱིས་མ་བསྐྱངས་པ་སུ་ཡང་མེད་པ་དང་། དྲིན་ཅན་ཡིན་ངེས་ཤེས་པ་དེ་རྣམས་ཡལ་བར་དོར་ནས་རང་ཉིད་གཅིག་པུ་ཐར་བར་འདོད་པ་ནི་ཕྱི་ཐག་ཐུང་ཞིང་ཁྲེལ་མེད་པའི་སྐྱེ་བོ་ཐ་ཆད་ཡིན་པའི་ཚུལ་རྣམས་ཤེས་ནས། དེ་ལ་དྲིན་བཟོ་བའི་བསམ་པས། བདེ་བ་ལ་སྦྱོར་འདོད་ཀྱི་བྱམས་པ། སྡུག་བསྔལ་དང་བྲལ་འདོད་ཀྱི་སྙིང་རྗེ་རྣམས་ངེས་ཤེས་འཁྲུངས་ངེས་སུ་བསྒོམ་དགོས་ཀྱི། དེ་རྣམས་ཁ་ཙམ་ཚིག་ཙམ་དུ་སོང་ན་བྱང་ཆུབ་ཀྱི་སེམས་རྣམ་དག་ཞིག་རྒྱུད་ལ་མི་སྐྱེ། དེ་རྒྱུད་ལ་མ་སྐྱེས་ན་རྡོ་རྗེའི་ཐེག་པ་སྤྱི་དང་། རྫོགས་པ་ཆེན་པོ་སོགས་ལམ་ཁྱད་པར་ཅན་གང་བསྒོམ་ཡང་། སེངྒེའི་གསོབ་དང་། རི་མོར་བྲིས་པའི་མར་མེ་འདྲ་བ་ཞིག་ལས་ལམ་མཚན་ཉིད་པ་ཞིག་མི་འོང་། དེ་བས་ན་ངེས་འབྱུང་གི་བསམ་པ་དྲག་པོའི་ཉེར་ལེན་གྱི་རྒྱུ་ལས་བྱུང་བའི་སོ་ཐར་རིགས་བདུན་གང་རུང་གི་སྡོམ་པ་ལེན། དེའི་རྗེས་སུ་ཐེག་པ་ཆེན་པོའི་ལམ་གྱི་སྲོག་ཤིང་བྱང་ཆུབ་ཀྱི་སེམས་རིན་པོ་ཆེ་ལེགས་པར་བསྐྱེད། དེ་ནས་རང་ཉིད་གང་ལ་མོས་པའི་གསང་སྔགས་ཀྱི་དཀྱིལ་འཁོར་ཆེན་པོར་ཞུགས་ཏེ་རྗེས་སུ་གནང་བ་དང་། དབང་རྣམས་ཆོ་ག་བཞིན་དུ་ནོད་དགོས་ཏེ། ཕུར་པ་ཞེ་སྡང་ཁྲོས་པའི་རྒྱུད་ལས། སོ་སོ་ཐར་པ་དང་པོར་སྦྱིན། །དེ་ལ་ཉན་ཐོས་ཆོས་རྣམས་བཤད། །དེ་རྗེས་བྱང་ཆུབ་སྡོམ་ཆེན་སྦྱིན། །དེ་ལ་དབུ་མའི་ཆོས་རྣམས་བསྟན། །མཐར་ནི་གསང་སྔགས་བླ་མེད་ཀྱི། །དབང་བསྐུར་འབྲས་བུའི་རྒྱུད་འདི་བཤད། །ཅེས་དང་། ལག་ན་རྡོ་རྗེ་དབང་བསྐུར་བའི་རྒྱུད་ལས། བྱང་ཆུབ་སེམས་དཔའ་སེམས་དཔའ་ཆེན་པོ། གཟུངས་སྔགས་ཆེན་པོའི་དཀྱིལ་འཁོར་ཤིན་ཏུ་རྒྱ་ཆེ་བ་འདི་དང་ཤིན་ཏུ་ཟབ་པ་འདི་དང་གཏིང་དཔག་དཀའ་བ་འདི་གསང་བ་བས་ཀྱང་ཆེས་གསང་བ་སེམས་ཅན་སྡིག་པ་ཅན་རྣམས་ལ་བསྟན་དུ་མི་རུང་བ་འདི། ལག་ན་རྡོ་རྗེ་ཁྱོད་ཀྱིས་ཤིན་ཏུ་དཀོན་པ་ཞིག་སྨྲས་ཏེ། འདི་ནི་སྔོན་མ་ཐོས་ན། འདི་སེམས་ཅན་ཇི་ལྟ་བུ་དག་ལ་བཤད་པར་བྱ། ལག་ན་རྡོ་རྗེས་སྨྲས་པ། འཇམ་དཔལ་གང་དག་བྱང་ཆུབ་ཀྱི་སེམས་སྒོམ་པ་ལ་ཞུགས་པ་དང་། གང་གི་ཚེ་དེ་དག་གིས་བྱང་ཆུབ་ཀྱི་སེམས་གྲུབ་པར་གྱུར་པ་དེའི་ཚེ། འཇམ་དཔལ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོར་སྤྱོད་པའི་བྱང་ཆུབ་སེམས་དཔའ་དེ་དག ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་དུ་གཞུག་པར་བྱ་ཡི། གང་དག་གིས་བྱང་ཆུབ་ཀྱི་སེམས་རྫོགས་པར་མ་གྱུར་པ་དེ་དག་ནི་གཞུག་པར་མི་བྱ་སྟེ། དེ་དག་ལ་དཀྱིལ་འཁོར་ཡང་བལྟར་མི་གཞུག་གོ །དེ་དག་ལ་ཕྱག་རྒྱ་དང་གསང་སྔགས་ཀྱང་བསྟན་པར་མི་བྱའོ། །ཞེས་གསུངས་པའི་ཕྱིར་བྱང་ཆུབ་ཀྱི་སེམས་རིན་པོ་ཆེ་ནི་འདོར་དུ་མི་རུང་བའི་ལམ་གྱི་གནད་ཆེན་པོའོ། །དེ་ལྟར་ངེས་འབྱུང་དང་སྙིང་རྗེའི་བློས་ཡིད་ཆེས་ཆེར་བསྐྱེད་པས། གྲངས་མེད་པའི་བསྐལ་པ་དུ་མར་བྱང་ཆུབ་སྒྲུབ་པའི་ལོང་མེད་པར། ཚེ་ལུས་གཅིག་གམ་ཐ་ན་སྐྱེ་བ་བཅུ་དྲུག་ལས་མི་འགྱངས་པར་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བྱས་ཏེ་མ་རྒན་དྲིན་ཅན་ཐམས་ཅད་སྲིད་པའི་རྒྱ་མཚོ་ཆེན་པོ་ལས་བསྒྲལ་བར་ནུས་པ་ཞིག་བྱུང་ན་ཅི་མ་རུང་སྙམ་པའི་འཚང་རྒྱ་བ་ལ་ཤིན་ཏུ་རིངས་པའི་བློ་བཅོས་མ་མ་ཡིན་པ་ཞིག་རྒྱུད་ལ་སྐྱེས་པར་གྱུར་པ་དེའི་ཚེ་རྡོ་རྗེའི་ཐེག་པར་འཇུག་པའི་ལམ་གྱི་ཕྱོགས་དང་པོ་རྙེད་པ་ཡིན་ནོ། །དེ་ཡང་ཀུན་མཁྱེན་ཆེན་པོས། དེ་ལྟར་བྱང་ཆུབ་མཆོག་ཏུ་སེམས་བསྐྱེད་ནས། །གསང་སྔགས་ཕྱི་ནང་བསྐྱེད་རྫོགས་དོན་ལ་འཇུག །ཞེས་པ་ལྟར་རོ། །དེ་ལྟར་ཐེག་པ་ཐུན་མོང་པས་རྒྱུད་སྦྱངས་ཟིན་པའི་གང་ཟག་སྐལ་བ་དང་ལྡན་པ་དེ་རྡོ་རྗེའི་ཐེག་པར་འཇུག་པ་ལ། མཚན་ཉིད་དང་ལྡན་པའི་རྡོ་རྗེ་སློབ་དཔོན་ཞིག་བཙལ་ཏེ་གཡོ་སྒྱུ་དང་ཟོལ་ཟོག་སྤངས་ནས་མིག་གི་འབྲས་བུ་བཞིན་དུ་བསྟེན་དགོས་ཏེ། སྙིང་པོ་རྒྱན་ལས། བློ་ལྡན་ཐར་བའི་བདག་ཉིད་སེམས། །བཟོད་ལྡན་དུལ་བའི་སློབ་མ་ཡིས། །གྲུབ་པའི་རྩ་བ་མཆོག་གཅིག་པུ། །བླ་མ་བསྟེན་བྱ་དང་པོར་བརྟགས། །ཞེས་དང་། དེར་མ་ཟད་མདོ་རྒྱུད་ཐམས་ཅད་ནས་བླ་མ་མ་བསྟེན་པར་སྤྱིར་ཐར་པའི་ལམ་དུ་འགྲོ་མི་ནུས། ཁྱད་པར་རྡོ་རྗེའི་ཐེག་པའི་ལམ་གྱི་དངོས་གྲུབ་ནི་བླ་མ་ཁོ་ན་ལ་རག་ལས་པས་བླ་མ་བསྟེན་པར་ཡང་ཡང་གསུངས་ཏེ། སྡུད་པ་ལས། སློབ་མ་བཟང་པོ་བླ་མར་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །དེ་དག་ཤེས་རབ་ཕ་རོལ་ཕྱིན་པ་རྗེས་སུ་སྟོན། །སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས། །ཞེས་དང་། སྒྱུ་འཕྲུལ་དྲྭ་བ་ལས། རེ་ཞིག་དང་པོར་དངོས་གྲུབ་ནི། །སློབ་དཔོན་རྗེས་སུ་འབྲང་ཡིན་པས། །སློབ་དཔོན་མེད་པར་གྱུར་ན་ནི། །དངོས་གྲུབ་འཐོབ་པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ། །ཞེས་སོ། །བླ་མ་མེད་པར་རང་ཉམས་ཀྱིས་གསང་སྔགས་ཟབ་མོའི་དོན་མི་རྟོགས་པས་འབད་པས་བསྟེན་དགོས་ཞེས་གདམས་པ་ནི། སངས་རྒྱས་གསང་བའི་ལམ་རིམ་ལས། །སྤྱན་བཟང་འགྲོ་མཐུ་མེད་པ་ཡིས། །དམིགས་བུ་བྲལ་བའམ་ཉམས་སྟོར་བས། །བགྲོད་ཅིང་ཕྱིན་པར་མི་ནུས་བཞིན། །རྩིང་པོ་དམུ་རྒོད་རང་ཉམས་ཀྱིས། །གསང་བའི་སྙིང་པོར་མི་འགྱུར་ཏེ། །བུལ་ཤིང་མེ་ཏོག་འབྲས་བཞིན་འགྱུར། །དེ་བས་བླ་མ་ལུང་བཞིན་བཀུར། །བརྟག་སྤྱོད་ཞེ་གཅོད་བཟོད་བྱས་ཏེ། །མཐོང་བའི་གདུང་བ་ཁུར་མི་ལྟ། །དེ་ཀུན་ཡུན་གྱི་དོན་དུ་བཟོད། །དཀའ་བས་བསྟེན་ན་རྡོ་རྗེ་རྒྱལ། །ཉམས་ཀྱི་སྣང་བ་འཐོབ་འགྱུར་ཏེ། །དེ་ཚེ་རྒྱུད་ཆེན་གཞུང་བཞིན་ཡོན། །ཕུལ་ན་ཐུགས་ཀྱི་སྙིང་ཁུ་སྟེར། །དེ་ཡིས་བཞོན་པ་བཟང་འགྲོ་བཞིན། །གསང་བའི་རྫུ་འཕྲུལ་སྟོབས་ཞོན་པས། །མཐོང་འཇུག་མཐར་ཕྱིན་གཞི་བགྲོད་ནས། །ཡེ་ཤེས་སྙིང་པོའི་གནས་སུ་ཕྱིན། །ཞེས་དང་། གསང་བའི་སྙིང་པོའི་རྒྱུད་ལས། ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་སོ། །དེ་ལྟར་དངོས་གྲུབ་ཀྱི་རྩ་བ་བླ་མར་ཤེས་ནས་བླ་མ་བཙལ་ཏེ། བླ་མ་རྙེད་པའི་རྗེས་སུ་དབང་བསྐུར་སྦྱིན་པར་གསོལ་བ་ཡང་ཡང་གདབ་སྟེ། ཟུང་འཇུག་གསལ་བ་ལས། དེ་ལྟར་བྱས་ན་བླ་མ་ལ། །བདག་ལ་དབང་བསྐུར་སྩོལ་ཞེས་གསོལ། །ཞེས་པ་ལྟར་རོ། དེ་ལྟར་གསོལ་བ་གདབ་པ་ན། བླ་མས་ཀྱང་བརྟག་དཔྱད་མེད་པར་གྱ་ཚོམ་དུ་དབང་བསྐུར་བ་དང་གདམས་ངག་སྦྱིན་པར་མི་བྱ་སྟེ། སློབ་མའི་རྒྱུད་མ་རུང་བར་འགྱུར་བ་དང་། གདམས་ངག་ཟབ་མོ་ཆུད་ཟོས་སུ་འགྲོ་བ་དང་། རང་ཉིད་ལ་མཁའ་འགྲོ་མས་ཆད་པ་འབྱུང་བའི་ཉེན་ཡོད་པའི་ཕྱིར། སློབ་མའི་རྒྱུད་ཚོད་བརྟགས་ལ། གལ་སྟེ་སྣོད་དུ་མི་རུང་ན་ཐེག་པ་ཐུན་མོང་བ་ཙམ་གྱིས་ཕན་གདག་པར་བྱས་ལ་ཐབས་ཀྱིས་དེ་ལས་བྱོལ་བར་བྱ་སྟེ། ལམ་རིམ་ལས། འདོད་པ་ཕྲ་མོའི་རྒྱུར་བྱེད་དང་། །ཁེ་དང་གྲགས་པ་ཆེ་བའི་རྒྱུར། །བྱེད་ཅིང་བཅུད་ཆེན་འཛག་དང་འབོ། །མི་ཆགས་མ་རུང་བྱེད་པ་དང་། །ཟང་ཟིང་མཐའ་གཏོང་དབུས་འཆིང་དང་། །གཡོན་ཅན་ངོ་དགའ་ལྟག་སྤྲད་སྐུར། །ལྐོག་ན་རང་དགའ་བྱེད་པ་དང་། །ངག་ལ་རིགས་ངེས་བསམ་མི་ངེས། །བུད་མེད་འདོད་པ་ཕྱལ་བ་དང་། །མུན་ལྐོག་འཕྲད་པར་འདོད་སྤྱོད་བརྙེགས། །ཕོ་མོར་ཏནྟྲར་མ་བསྔགས་ལ། །བསྐལ་པར་གྲིབ་བཞིན་འཁོར་གྱུར་ཡང་། །ཐུགས་ཀྱི་བདེ་བ་སྤྲོ་མི་བྱ། །འཚམས་པར་སྐུ་བསྟན་གཅན་འཕྲང་སྦྱིན། །དེ་མིན་བེའུ་སྦྲེལ་གཡང་ལྷུང་བཞིན། །འདོད་ཁེངས་འཕྲོགས་ཤིང་གཅམ་ཕྱར་བས། །མ་རྟོགས་སྤྲོས་ན་དུར་ཁྲོད་གླིང་། །བརྒྱད་ཀྱི་མཁའ་འགྲོ་བཞིན་འདུས་ནས། །ཤ་ཟ་སྲོག་ལ་འབེབས་བཞིན་ལྷུང་། །ཞེས་སོ། །དེ་བས་ན་ཐོག་མ་ཉིད་དུ་གདམས་པ་མི་སྦྱིན་པར་ཁྱོད་གལ་ཏེ་རྡོ་རྗེའི་ཐེག་པ་ལ་འཇུག་པར་འདོད་ན། རྡོ་རྗེ་སློབ་དཔོན་བསྟེན་ཚུལ་འདི་ལྷར་དགོས་པས་ཤེས་པར་གྱིས་ཤིག་ཅེས་དང་པོ་ཁོ་ནར་སློབ་དཔོན་བྷཱ་བི་ལྷས་མཛད་པའི་བླ་མ་ལྔ་བཅུ་བ་བསྟན་པར་བྱའོ། །སློབ་མས་ཀྱང་སྔགས་ལ་བརྟེན་ནས་མཆོག་གི་དངོས་གྲུབ་འདོད་ཕྱིན་ཆད་རྡོ་རྗེ་སློབ་དཔོན་མཉེས་པར་མ་བྱས་པར་ཐབས་གཞན་མེད་པས་དེ་ཉིད་ལེགས་པར་བསླབ་སྟེ། དེ་ལས་ཇི་ལྟར་བྱུང་བ་ལྟར་དཀའ་ཚེགས་ངལ་དུབ་ཐམས་ཅད་ཁྱད་དུ་བསད་ཅིང་། ང་རྒྱལ་དང་རང་འདོད་ཀྱི་དབང་དུ་མི་གཏོང་བར། སྔོན་གྱི་གྲུབ་པ་བརྙེས་པའི་སྐྱེས་བུ་དམ་པ་རྣམས་ཀྱིས་བླ་མ་ཇི་ལྟར་བསྟེན་པའི་ཚུལ་ལ་བསླབ་པར་བྱའོ། །བླ་མ་བསྟེན་ཚུལ་འདི་སྔགས་ལམ་གྱི་རྟེན་འདྲེལ་སྒྲིག་པའི་ཐོག་མ་ཡིན་པས་ཕྱིན་ཅི་མ་ལོག་པ་ཞིག་ཅི་ནས་ཀྱང་གལ་ཆེ། གལ་ཏེ་བླ་མ་བསྟེན་ཚུལ་འདི་ཡེ་ལེ་ཕྱོད་དེ་ཞིག་ཏུ་སོང་ན། གདམས་ངག་དེ་ཡང་ཡེ་ལེ་ཕྱོད་དེ་ཞིག་ལས་མི་འོང་། དེ་མ་འོང་ཙ་ན། མོས་གུས་དང་སྙིང་རུས་དེ་ཡང་ཡེ་ལེ་ཕྱོད་དེ་ཞིག་ཏུ་འགྲོ། དེ་སོང་ན་མཆོག་གི་དངོས་གྲུབ་དེ་ཡང་དེའི་རྗེས་སུ་འགྲོ་བས་ལམ་གྱི་ཐོག་མ་འདི་ལ་སྔོན་འགྲོ་དང་སླ་ཆོས་སུ་བྱས་ནས་རྩིས་མེད་དུ་མི་འདོར་བར་གཅེས་སྤྲས་སུ་བྱེད་པ་འདི་ལམ་གྱི་གནད་གཅིག་ཡིན་ནོ། །དེ་ལྟར་རྒྱུད་ནས་བཤད་པའི་ཚུལ་དང་མཐུན་པར་བླ་མ་ལ་སྒོ་གསུམ་གྱིས་བསྙེན་བཀུར་ཕུན་སུམ་ཚོགས་པར་བགྱིས་ཤིང་། བླ་མས་ཀྱང་སྣོད་དུ་གྱུར་པར་མཐོང་ན་ངེས་པར་དཀྱིལ་འཁོར་དུ་བཅུག་སྟེ་དབང་བཞི་པོ་ཡོངས་རྫོགས་སམ་གང་རུང་སྐལ་བ་དང་འཚམས་པར་སྦྱིན་པར་བྱ་དགོས་ཏེ། ཕྱག་ཆེན་ཐིག་ལེ་ལས། དབང་མེད་པ་ལ་དངོས་གྲུབ་མེད། །བྱེ་མ་བཙིར་ལས་མར་མེད་ལྟར། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་འགྲོ། །ཞེས་དང་། སངས་རྒྱས་ཐོད་པ་ལས་ཀྱང་། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །ཅེས་དང་། གསང་བ་སྙིང་པོ་ལས་ཀྱང་། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །ཅེས་གསུངས། དེས་ན་ངེས་པར་དབང་བསྐུར་བ་ནོས་དགོས་ཤིང་། དེ་ཡང་སློབ་མའི་རྒྱུད་ཚོད་ལ་དཔག་པ་ན། གཙང་དམེ་དང་བླང་དོར་གྱི་རྟོག་པ་ཅན་དང་། ཟབ་མོའི་དོན་ལ་སྐྲག་པའི་རིགས་ལ་དབང་གོང་མ་རྣམས་བཏང་སྙོམས་སུ་བཞག་ན་ལེགས་ཏེ། དེ་ཉིད་ལས། །དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མི་ཟ་བར་གསུངས། །ཞེས་སོ། །དབང་བསྐུར་བ་ལ་ཡང་དཔོན་སློབ་གཉིས་ཀས་བསྒྲིམ་སྟེ་ཆོ་ག་ཡན་ལག་མ་ཉམས་པ་ཞིག་དགོས་ཀྱི། རྒྱུད་ནས་བསྟན་པའི་ཡན་ལག་རྣམས་ཉམས་པར་གྱུར་ན་སློབ་མའི་རྒྱུད་སྨིན་མི་ནུས་ཤིང་བྱ་བ་བརྩམ་པ་དོན་མེད་པར་འགྱུར་རོ། །དེ་བས་ན་དཀྱིལ་འཁོར་གྱི་ཆོ་ག་དང་། དལ་དུ་གཞུག་པ། དབང་བསྐུར་བ་རྣམས་ཆོ་ག་མ་ཉམས་པར་བྱེད་པ་ཤིན་ཏུ་གཅེས་ཏེ། སྡོམ་གསུམ་རབ་དབྱེར། རྡོ་རྗེའི་ཐེག་པའི་ལམ་ཞུགས་ཏེ། །མྱུར་དུ་སངས་རྒྱས་ཐོབ་འདོད་ན། །སྨིན་གྲོལ་གཉིས་ལ་འབད་པར་བྱ། །སྨིན་པར་བྱེད་པའི་དབང་བསྐུར་ཡང་། །བླ་མ་བརྒྱུད་པ་མ་ཉམས་ཤིང་། །ཆོ་ག་འཁྲུག་པར་མ་གྱུར་པ། །ཕྱི་ནང་རྟེན་འདྲེལ་བསྒྲིག་མཁྱེན་ཅིང་། །སྐུ་བཞིའི་ས་བོན་ཐེབས་ནུས་པ། །སངས་རྒྱས་གསུང་བཞིན་མཛད་པ་ཡི། །བླ་མ་བཙལ་ལ་དབང་བཞི་བླངས། །ཞེས་གསུང་། དེ་ལས་གཞན་དུ་ཆོ་གའི་ཡན་ལག་ཉམས་པར་གྱུར་ན། གདང་རོལ་ཌཱ་དྲིལ་སོགས་ཀྱི་རྟ་ལ་བསྐྱོན་ནས་མཛེས་མཛེས་དང་རྔམ་རྔམ་ཅི་བྱས་ཀྱང་། ཆོ་གའི་གཟུགས་བརྙན་དུ་སོང་བས། སློབ་མའི་རྒྱུད་ལ་ཞུས་ལོ་དང་ཐོས་ལོ་མང་པོ་བསགས་པ་ལ་ལོས་ཕན་མ་གཏོགས་དངོས་གྲུབ་ཐོབ་པའི་རྒྱུར་མི་རུང་སྟེ། དེ་ལས། ཆོ་ག་ཅུང་ཟད་ཉམས་པ་ལའང་། །ཆོ་ག་འཆག་པར་མ་གསུང་ན། །ཆོ་ག་ཕལ་ཆེར་ཉམས་པ་ལ། །ཆོ་ག་འཆག་པར་འགྱུར་རེ་ཀན། །དེས་ན་འཆད་པའི་གནས་སྐབས་སུ། །ཅུང་ཟད་ཉམས་པར་གྱུར་ཀྱང་བླ། །ཆོ་ག་ནོར་བར་གྱུར་པ་ལ། །གྲུབ་པ་ནམ་ཡང་མེད་ཅེས་གསུང་། །ཞེས་དང་། སྦྱོར་དངོས་རྗེས་ཀྱི་ཆོ་ག་རྣམས། །སངས་རྒྱས་གསུང་བཞིན་མི་ཤེས་པར། །མ་འདྲེལ་འགལ་ཞིང་ཉམས་པ་ཡི། །ཆོ་གའི་གཟུགས་བརྙན་བྱེད་པ་ལ། །དབང་བསྐུར་ཡིན་ཞེས་བླུན་པོ་སྨྲ། །ཞེས་སོགས་གསུངས་པ་ལྟར་ངེས་པས། ཆོ་ག་རྣམ་པར་དག་པ་ལ་བརྟེན་ནས་དབང་བསྐུར་རྣལ་མ་ཞིག་ཐོབ་པ་སྔགས་ལམ་གྱི་གཞི་ཡིན་པར་ཤེས་པ་འདི་ལམ་གྱི་གནད་ཡིན་ནོ། །དེ་ལྟར་དབང་ཐོབ་མ་ཐག་ནས་དབང་དུས་ཀྱི་དམ་ཚིག་མི་ཉམས་པར་བསྲུང་བའི་ཆེད་དུ་རྩ་བ་དང་ཡན་ལག་གི་ལྟུང་བ་རྣམས་ཤེས་པར་བྱ་བའི་ཕྱིར་སློབ་དཔོན་དཔའ་བོས་མཛད་པའི་རྩ་ལྟུང་བཅུ་བཞི་པ་དང་། ཡན་ལག་སྦོམ་པོའི་ལྟུང་བའི་ཚིགས་སུ་བཅད་པ་རྣམས་བློ་ལ་བླངས་ནས་ཤེས་པར་བྱ་དགོས་ཏེ། བླ་མ་ལྔ་བཅུ་པ་ལས། དེ་ནས་སྔགས་སོགས་བྱིན་པ་ཡིས། །དམ་ཆོས་སྣོད་དུ་བྱས་ནས་སུ། །རྩ་བའི་ལྟུང་བ་བཅུ་བཞི་ནི། །བཀླག་དང་འཛིན་པ་ཉིད་དུ་བྱ། །ཞེས་གསུངས་སོ། །དེ་བས་ན་དེ་དག་ཤེས་པར་བྱས་ནས་རང་སེམས་དཔང་པོར་བཞག་ཏེ་དམ་ཚིག་གི་གནས་ལ་ངོས་ལྐོག་མེད་པར་མ་འབད་ན། ལོ་ཟླ་མང་པོར་རིམ་གཉིས་དང་བསྙེན་སྒྲུབ་ལ་བརྩོན་ཀྱང་མཆོག་གི་དངོས་གྲུབ་ལྟ་ཅི། ཐུན་མོང་གི་ དངོས་གྲུབ་ཕྲན་ཚེག་ཀྱང་མི་འགྲུབ་སྟེ། སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་བཏང་ཡང་བླ། །འཆི་བའི་དུས་ལ་བབས་ཀྱང་བླ། །རྟག་ཏུ་དམ་ཚིག་བསྲུང་བར་བྱ། །ཞེས་དང་། མཉམ་སྦྱོར་ལས་ཀྱང་། དཀྱིལ་འཁོར་དག་ཏུ་མ་ཞུགས་དང་། །དམ་ཚིག་རྣམས་ནི་སྤང་བ་དང་། །གསང་བའི་དེ་ཉིད་མི་ཤེས་པས། །སྒྲུབ་ཀྱང་ཅི་ཡང་མི་འགྲུབ་བོ། །ཞེས་གསུངས་སོ། །དེ་བས་ན་དབང་ཐོབ་པའི་གང་ཟག་མཆོག་གི་དངོས་གྲུབ་དོན་དུ་གཉེར་བ་དག་གིས་དམ་ཚིག་དང་སྡོམ་པ་སྲོག་དང་བསྡོས་ནས་བསྲུང་བ་ལ་འབད་པར་བྱ་ཞིང་ཁྱད་པར་རྩ་ལྟུང་གིས་གོས་ན་རྒྱུད་ཆུད་ཟོས་ནས་ཡོན་ཏན་ཤིན་ཏུ་སྐྱེ་དཀའ་བར་གསུངས་པས་དེས་མ་གོས་པ་ལ་འབད་པ་དྲག་པོ་བྱ་ཞིང་ཅུང་ཟད་ཉེས་པར་གྱུར་ན་ཡང་དེ་མ་ཐག་ཁོ་ནར་ཆོས་བཞིན་དུ་ཕྱིར་བཅོས་ཤིང་བཤགས་བསྡམས་དྲག་པོས་སོར་ཆུད་པར་བྱའོ། །དམ་ཚིག་རྣམ་པར་དག་པ་ལ་གནས་ན་ལམ་ལ་ཆེར་མ་གོམས་ཀྱང་སྐྱེ་བ་བདུན་ལས་མི་འགྱང་བར་མཆོག་གི་དངོས་གྲུབ་འགྲུབ་ཅིང་། དམ་ཚིག་ཉམས་ན་འབད་པ་ཆེ་ཐང་དུ་བྱས་ཀྱང་དོན་མེད་དེ། གསང་བའི་མཛོད་ཀྱི་རྒྱུད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ལ་ནི། །མ་བསྒོམ་པར་ཡང་དངོས་གྲུབ་འཐོབ། །གང་ལ་སྒོམ་པ་དང་ལྡན་ཞིང་། །གལ་ཏེ་དམ་ཚིག་སྡོམ་ལ་གནས། །སྐྱེ་འདིར་ལས་དབང་གིས་མ་འགྲུབ། །སྐྱེ་བ་གཞན་དུ་དངོས་གྲུབ་འཐོབ། །རེ་ཞིག་དམ་ཚིག་ཉམས་པ་ན། །དངོས་གྲུབ་འཐོབ་པ་ལྟ་ཞོག་གི །མི་ཡི་སྐྱེ་བའང་རྙེད་པར་དཀའ། །ཞེས་སོ། །དམ་ཚིག་གི་རིམ་པ་འདི་ནི་འཆད་པའི་སློབ་དཔོན་དང་། ཉན་པའི་སློབ་མ་དང་། ལམ་བསྒོམ་པའི་རྣལ་འབྱོར་པ་དང་། །དངོས་གྲུབ་དོན་དུ་གཉེར་བའི་སྒྲུབ་པ་པོ་དབང་པོ་རབ་འབྲིང་ཐ་མ་ཀུན་གྱིས་བགྲོད་པ་གཅིག་པའི་ལམ་ཡིན་ནོ། །རྒྱུད་དང་མན་ངག་དང་སྒྲུབ་ཐབས་ཕལ་པོ་ཆེར་བླ་མ་དངོས་གྲུབ་ཀྱི་རྩ་བར་ཡང་ཡང་བསྔགས་ཤིང་དེ་དང་འདྲེལ་བར་བླ་མའི་རྣལ་འབྱོར་ཕྱི་ནང་གསང་བར་བཤད་པ་ཐམས་ཅད་ཀྱང་སྤྱིར་དམ་ཚིག་གལ་ཆེ་བ་དང་དེའི་ནང་ནས་རྩ་ལྟུང་དང་པོ་ཤིན་ཏུ་ལྕི་བས་དེ་མི་ཉམས་པར་བསྲུང་བའི་བསླབ་པ་ནི་བསླབ་བྱ་རྣམས་ཀྱི་ནང་ནས་ཀྱང་གལ་ཆེ་ཤོས་ཡིན་པས་དེའི་ཕྱིར་གསུང་བ་ཡིན་ནོ། །མདོར་ན་བསྐྱེད་རྫོགས་ཟབ་མོའི་ལམ་སློབ་པར་འདོད་པ་རྣམས་ལ་མེད་དུ་མི་རུང་བའི་ལམ་གྱི་གནད་གལ་པོ་ཆེ་དབང་ཐོབ་ཅིང་དམ་ཚིག་ལ་གནས་པ་འདི་ཡིན་པས་ལམ་ལ་འཇུག་པའི་ཐོག་མར་འདི་ལ་ཞུན་ཐར་དང་ནན་ཏན་བྱེད་པ་ཁོ་ན་གཙིགས་སུ་ཆེའོ། །དོན་དེ་ལྟར་རྗེ་བཙུན་གྲགས་པ་རྒྱལ་མཚན་གྱིས། རྡོ་རྗེ་ཐེག་ལ་དད་ཀྱང་མ་སྨིན་པས། །ཟབ་མོ་བསྒོམ་ཀྱང་འབྲས་བུ་ངན་འགྲོ་ལས། །མཆོག་གཞན་མི་འགྲུབ་སངས་རྒྱས་གསུངས་པས་ན། །བླ་མ་མཆོག་ལས་དབང་བསྐུར་ནོད་པར་མཛོད། །དབང་ཐོབ་མན་ངག་ཟབ་མོ་འཚོལ་བ་ཡིས། །ས་སྟེང་རྒྱས་པ་ཀུན་ཏུ་བཙལ་བྱས་ཀྱང་། །ཕན་པའི་དོན་པོ་གདམ་ངག་དམ་ཚིག་སྟེ། །འདི་མེད་འགྲམ་རྩ་ཟད་པའི་ཁང་རུལ་འདྲ། །ལེགས་པར་སྨིན་ནས་དམ་ཚིག་བསྲུང་བྱས་ན། །རིམ་གཉིས་ཟབ་མོའི་མན་ངག་མ་བསྟེན་ཀྱང་། །སྐྱེ་བ་བཅུ་དྲུག་དག་ན་འགྲུབ་བོ་ཞེས། །འགྲོ་བའི་རྩ་ལག་ཕན་པར་མཛད་པས་གསུངས། །བདག་ནི་ཐོས་ཉུང་ཤེས་རབ་མིག་བྲལ་ཡང་། །དྲི་མེད་རྒྱུད་ལས་ལེགས་གསུངས་མཐོང་བས་ན། །དབང་བླང་དམ་ཚིག་བསྲུང་བར་མཛོད་ཅིག་ཅེས། །ཀུན་ལ་ཐལ་མོ་སྦྱར་ནས་གསོལ་བ་འདེབས། །ཞེས་གསུངས་སོ། །དེ་ལྟར་དམ་ཚིག་ལ་གནས་པའི་གང་ཟག་དེས། རྡོ་རྗེ་སློབ་དཔོན་ལོ་དང་ཟླ་བའི་བར་དུ་བསྟེན་ཡུན་བསྲིངས་ནས་གང་ཞིག་ཉམས་སུ་ལེན་པར་བྱ་བའི་བསྐྱེད་རྫོགས་ཡན་ལག་དང་བཅས་པ་ཐོས་བསམ་གྱིས་སྒྲོ་འདོགས་ལེགས་པར་བཅད་ནས་གདམ་ངག་གི་ཕུ་ཐག་ཆོད་པ་ཞིག་བྱེད་དགོས་ཏེ། རྒྱན་བདུན་དགྲོལ་བ་ལས། དང་པོ་ཉན་པའི་ཤེས་རབ་ཀྱིས། །ཚིག་གི་རྒྱུད་ལ་ཐོས་པ་བསྐྱེད། །དེ་ནས་བསམ་པའི་ཤེས་རབ་ཀྱིས། །ཚིག་དང་དོན་དུ་འདྲེལ་བ་བསླབ། །ཞེས་དང་། གསང་བ་སྙིང་པོ་ལས། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་པའི། །ཤེས་རབ་མིག་ལྡན་རྣམས་ཀྱིས་ཟུངས། །ཞེས་སོ། །དེ་ལྟར་གསང་བ་ཆེན་པོའི་ཐེག་པ་འདི་ནི་དབང་པོ་རྣོན་པོའི་སྤྱོད་ཡུལ་ཡིན་པས་ཐོས་བསམ་དགོས་པར་མ་ཟད། གཞན་ཡང་ཐོས་བསམ་མེད་ན་རང་གིས་ཉམས་སུ་ལེན་པ་དང་། གཞན་ལ་ལམ་མ་ནོར་བ་སྟོན་པ་དང་། དངོས་གྲུབ་སྒྲུབ་པའི་ཐབས་ཕུན་སུམ་ཚོགས་པ་མི་ཤེས་པས་ཐོས་བསམ་གྱི་ཤེས་རབ་བསྐྱེད་པ་ལ་འབད་པར་བྱ་དགོས་སོ། །ཀྱེ་རྡོར་གྱི་བཀའ་འགྲེལ་མུ་ཏིག་ཕྲེང་བར་ཡང་། བློ་གྲོས་མེད་ལ་ཐོས་མེད་མ་ཐོས་པ་ལ་བསམ་པའང་མེད། །གཉིས་བྲལ་རྣལ་འབྱོར་མེད་ཅིང་རྣལ་འབྱོར་བྲལ་ལ་དངོས་གྲུབ་མེད། །ཅེས་གསུངས། ཐོས་པས་སྒྲོ་འདོགས་ཆོད་པའི་གང་ཟག་གིས་ཐེ་ཚོམ་སྤངས་ཏེ་སྒྲུབ་པ་ལ་བརྩོན་ན་མཆོག་དང་ཐུན་མོང་གི་དངོས་གྲུབ་ཐམས་ཅད་ལག་པའི་མཐིལ་ན་ཡོད་པ་དང་འདྲ་སྟེ། རིམ་ལྔའི་བཀའ་འགྲེལ་དོན་གསལ་ལས། །ཐོས་པ་རྫོགས་པར་བྱེད་པ་ཤེས་རབ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །སྒོམ་པ་ལ་ནི་རབ་ཏུ་སྦྱོར་བ་ཡིན། །དེ་ལས་དངོས་གྲུབ་བླ་ན་མེད་པའོ། །བློ་དང་ལྡན་པས་འདི་ལྟར་བསམ་ནས་ནི། །ཐོག་མར་ཐོས་པའི་དོན་ལ་འབད་པ་ཡིས། །རྟག་ཏུ་བརྩོན་པར་བྱེད་པ་གང་ཡིན་པ། །དེ་ཡི་ལག་ཏུ་དངོས་གྲུབ་ལེགས་པར་འཐོབ། །གང་ཞིག་ཚིག་ལ་ཐེ་ཚོམ་ཟ་འགྱུར་བ། །དེ་ཡིས་དོན་ནི་ཇི་ལྟར་རྟོགས་པར་འགྱུར། །ཞེས་གསུངས་སོ། །ཁ་གཅིག་རྩེ་གཅིག་ཏུ་བསྒོམ་པ་ཁོ་ན་གཙོ་ཆེ། ཐོས་པ་ཚིག་གི་སྟོང་སྒྲ་ཡིན། ཁ་བཤད་ཆུ་ཡི་ལྦུ་བ་དང་འདྲ་སྙིང་པོ་མེད་ཟེར་ནས། རང་ཉིད་ཀྱང་མི་ཚེ་རིལ་བོར་བླུན་སྒོམ་གོག་པོ་ཞིག་ལ་སྐྱེལ་ནས་གཞན་ལ་ཡང་དེ་སྐད་ཟེར་བ་ཡོད་དེ། དེ་ནི་ལས་དང་པོ་པ་རྣམས་བསླུ་བར་བྱེད་པ། ཐམས་ཅད་མཁྱེན་པའི་ལམ་དང་འབྲལ་བར་བྱེད་པའི་བདུད་ཀྱི་གསང་ཚིག་དངོས་སུ་སྟོན་པ་ཡིན་པས་བདེན་དུ་འཛིན་པ་ལྟ་ཅི། ཐོས་པར་ཡང་མི་བྱ་སྟེ། ལེགས་པར་བཤད་པ་རིན་པོ་ཆེའི་གཏེར་ལས། །བསྒོམ་ན་ཐོས་པ་མི་དགོས་ཞེས། །བླུན་པོ་བློ་རྒྱ་ཆུང་ངུ་སྨྲ། །ཐོས་པ་མེད་པར་བསྒོམ་པ་ཙམ། །འབད་ཀྱང་དུད་འགྲོ་སྒྲུབ་ཐབས་ཡིན། །རྒྱུ་འབྲས་བསླུ་བ་མེད་པ་འདི། །ཐམས་ཅད་མཁྱེན་པའི་ཁྱད་ཆོས་ཡིན། །མ་བསླབ་པ་ལ་ཀུན་མཁྱེན་དུ། །འགྲོ་ན་རྒྱུ་འབྲས་གང་ལ་བདེན། །ཐོས་པ་མེད་པའི་བསྒོམ་པ་དེ། །རེ་ཞིག་གྲུབ་ཀྱང་མྱུར་དུ་འཇིག །གསེར་དངུལ་ལེགས་པར་བཞུ་ན་ཡང་། །མེ་དང་བྲལ་ན་སྲ་བར་འགྱུར། །ཞེས་གསུངས་པས་ཐོས་བསམ་ལ་འབད་དགོས། ཐོས་བསམ་བྱེད་པའི་ཡུལ་ཡང་། སྤྱིར་སྡེ་སྣོད་གསུམ་དང་རྒྱུད་སྡེ་བཞི་པོ་ཐམས་ཅད་དང་། དེའི་དགོངས་པ་འགྲེལ་པ་ལ་ཚད་མར་གྱུར་པའི་འཕགས་ཡུལ་གྱི་ཤིང་རྟ་ཆེན་པོ་གཉིས་རྗེས་འབྲང་དང་བཅས་པའི་གཞུང་རྣམས་ལ། དེ་དག་ཤེས་མི་ནུས་སྙམ་པའི་སྒྱིད་ལུག་དང་། རང་ཉིད་ལ་བརྙས་པའི་ལེ་ལོ་རྣམས་སྤངས་ཏེ་ཅི་ནུས་སུ་བརྩོན་དགོས། ཐ་ནའང་རང་ལུགས་ཀྱི་བསྐྱེད་རྫོགས་ཀྱི་གནད་རྣམས་ཕྱིན་ཅི་མ་ལོག་པ་ཞིག་ཤེས་པར་མི་བྱེད་པའི་ཐབས་མེད། །དེ་ཤེས་པར་བྱེད་པ་ལ་དཔལ་ལྡན་གསང་བའི་སྙིང་པོ་རྩ་འགྲེལ་ཡན་ལག་དང་བཅས་པ་རྣམས་དང་། ཀུན་མཁྱེན་ཆོས་ཀྱི་རྒྱལ་པོའི་གསུང་འབུམ་དྲི་མ་མེད་པ་རྣམས་ལ་བློ་གྲོས་ཀྱི་མིག་རྒྱང་མ་ཐུང་བ་ཞིག་ཅི་ནས་ཀྱང་དགོས། གཞན་ཡང་ཀུན་མཁྱེན་ཙོང་ཁ་པ་ཆེན་པོ་དང་། འཇམ་དབྱངས་ཀུན་དགའ་རྒྱལ་མཚན་སོགས། ས་དགེའི་མཁས་གྲུབ་རྣམས་ཀྱི་གཞུང་ལའང་ཕྱོགས་རིས་ཀྱི་ལོག་ལྟ་དོར་ནས་དག་སྣང་གི་བློ་རྒྱ་བསྐྱེད་དེ། ཐོས་བསམ་ཕྱོགས་མེད་དུ་མཛད་ན། སྒྲོ་འདོགས་དང་བདེན་ཞེན་ཆོད་ནས་གྲུབ་མཐའ་ཐམས་ཅད་ཀྱི་ཡིན་ལུགས་ཤེས་པ་དང་། རྒྱལ་བསྟན་ཡོངས་རྫོགས་གང་ཟག་གཅིག་གི་ཉམས་ལེན་དུ་འདྲིལ་ཤེས་པ་དང་། རང་ལུགས་ཀྱི་གཞུང་དང་གདམ་ངག་རྣམས་ལ་མི་འཕྲོག་པའི་ངེས་ཤེས་འཁྲུངས་པ་དང་། འོད་གསལ་རྫོགས་པ་ཆེན་པོའི་གདམ་ངག་རྣམས་ཀྱང་ཨོ་རྒྱན་རྡོ་རྗེ་འཆང་། པཎ་ཆེན་དྲི་མེད་བཤེས་གཉེན། རྒྱལ་བློན་བྱང་ཆུབ་སེམས་དཔའ་དེ་རྣམས་ཀྱི་བཀའ་དྲིན་ལས་སྔ་འགྱུར་གྱི་རིང་ལུགས་དྲི་མ་མེད་པ་འཛིན་ཤེས་པའི་གང་ཟག་འབའ་ཞིག་གི་སྤྱོད་ཡུལ་དུ་གྱུར་པ་ལས་གཞན་ལ་མེད་པ་དང་། འཛམ་བུའི་གླིང་གི་ཆུ་བོ་དང་ཆུ་ཕྲན་ཐམས་ཅད་རིམ་གྱིས་རྒྱ་མཚོ་ཆེན་པོར་འབབས་ཤིང་གཞོལ་ལ། མཐར་ཐུག་རྒྱ་མཚོ་ཆེན་པོའི་འཇིང་ལས་གཞན་དུ་མི་འདའ་བ་དེ་བཞིན་དུ་ཐེག་པ་དང་གྲུབ་མཐའ་ཐམས་ཅད་རིམ་གྱིས་འོད་གསལ་རྫོགས་པ་ཆེན་པོའི་དགོངས་པར་འབབས་ཤིང་གཞོལ་ལ། མཐར་ཐུག་འོད་གསལ་རྫོགས་པ་ཆེན་པོའི་ཀློང་ལས་འདས་པ་མེད་པར་ཐག་ཆོད་པས་མཁས་པ་ཐམས་ཅད་ཀྱི་བཞེད་པའི་ཞེ་ཕུག །གྲུབ་ཐོབ་ཐམས་ཅད་ཀྱི་ཐུགས་ཀྱིས་བརྣག་པ། དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་གཤེགས་ཤུལ་ཡིན་པར་ངེས་ཤེས་གཏིང་ནས་འཁྲུངས་ཏེ་ཉམས་ལེན་ལ་སྙིང་རུས་ནུས་པ་ཞིག་འོང་བ་ཡིན་པས་ཐོས་བསམ་ལ་ཞུན་འཐར་གཅོད་པ་འདི་ལམ་གྱི་གནད་ཡིན་ནོ། །ཁྱད་པར་དུ་ཡང་ལམ་གྱི་དངོས་གཞི་ལྟ་བས་ཐག་བཅད་པ། སྒོམ་པས་ཉམས་སུ་ལེན་པ། སྤྱོད་པས་བོགས་དབྱུང་བ། འབྲས་བུ་མངོན་དུ་བྱེད་པ་རྣམས་ཀྱི་ཚུལ་ལ་མ་རྨོངས་པར་བྱེད་དགོས། དེ་ལ་ལྟ་བས་ཇི་ལྟར་གཏན་ལ་ཕབས་པའི་དོན་དེ་སྒོམ་པ་ཡིན་གྱི་ལྟ་བ་དང་སྒོམ་པ་མི་མཐུན་པར་བརྟགས་པར་མི་བྱ་སྟེ། གལ་ལྟེ་ལྟ་བ་ཡང་གཞན་དུ་ལྟ་ལ་སྒོམ་པ་ཡང་གཞན་དུ་བསྒོམ་ན། ལྟ་སྒོམ་ཡ་བྲལ་དུ་གྱུར་ཞིང་། དེར་མ་ཟད་ལྟ་བ་གཏན་ལ་ཕབས་པ་དོན་མེད་དུ་འགྱུར་ཏེ། ལྟ་བ་ནི་བསྒོམ་པའི་དོན་དུ་ཡིན་ན་སྒོམ་པས་དེ་མི་བསྒོམ་པའི་ཕྱིར་རོ། །དཔེ་དང་ཡང་འགལ་ཏེ། མིག་གིས་ཤར་དུ་བལྟས་ཏེ་གོམ་པ་ནུབ་ཏུ་འདོར་བ་དང་འདྲའོ། །དེ་བས་ན་འདིར་རྡོ་རྗེའི་ཐེག་པར་སྣོད་བཅུད་སྣང་གྲགས་སེམས་དང་བཅས་པ་ལྷ་སྔགས་ཡེ་ཤེས་ཀྱི་རོལ་པར་བསྒོམ་པ་ནི་ལྟ་བའི་དབང་གིས་ཡིན་ཏེ། ཉན་ཐོས་པས་མི་རྟག་བདག་མེད་སོགས་སུ་བསྒོམ་པ་དང་། ཐེག་ཆེན་པས་གཟུང་འཛིན་དང་བྲལ་བའི་ཤེས་རིག་གསལ་མྱོང་ཙམ་དང་། རྣམ་ཀུན་མཆོག་ལྡན་གྱི་སྟོང་ཉིད་ཞེན་བྲལ་དུ་བསྒོམ་པ་རྣམས་ལྟ་བའི་དབང་གིས་བཞག་པ་ཡིན་པ་ལྟར་རོ། །གལ་སྟེ་ཀུན་རྫོབ་ཀྱི་ཡིན་ལུགས་ཤེས་པ་ལྟ་བར་མི་རུང་ཞེ་ན། རྟེན་འདྲེལ་མཐོང་བ་ཡང་དབུ་མའི་ལྟ་བར་མི་རུང་བར་འགྱུར་རོ། །དེས་ན་འདིར་རྣལ་འབྱོར་བླ་ན་མེད་པའི་ཚུལ་གྱིས། རང་གནས་ལྷུན་གྲུབ་ཀྱི་དཀྱིལ་འཁོར་ཆེན་པོ་རང་ཆས་སུ་ཡོད་པ་ཉིད་རྟོགས་པའི་དྲི་མས་བསྒྲིབ་པ་བསལ་བའི་ཆེད་དུ། རིམ་གཉིས་ཀྱི་རྣལ་འབྱོར་སྒོམ་པ་ལ་འཇུག་པའི་སྔོན་རོལ་ཏུ་ཐུན་མོང་མ་ཡིན་པའི་གཏན་ཚིག་རྣམས་ཀྱིས་སྣང་སྲིད་དག་མཉམ་ཆེན་པོར་ལེགས་པར་གཏན་ལ་དབབ་དགོས་ཀྱི། དེ་ལྟར་གཏན་ལ་མ་ཕབ་པར་ལམ་ལ་བརྩོན་ཀྱང་འབེན་མ་མཐོང་བར་མདའ་བརྡེག་པ་དང་འདྲའོ། །ལམ་རིམ་ལས། བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པ། །བླུན་པོ་མུན་སྤྲུལ་བློ་ཅན་དེ། །ལོང་བའི་གྲོང་ཁྱེར་ཆེན་པོར་འགྲོ། །དེ་བས་མ་རིག་ལིང་ཐོག་མིག །ལྡོང་བ་རྡོ་རྗེ་ཐུར་མ་མཁན། །མཉེས་ཐོབ་སྔོན་བྱས་གཞུང་ཐོས་པས། །སྤྱན་དབྱེ་དཀྱིལ་འཁོར་མཐོང་བྱ་དགོས། །ཞེས་སོ། །དེ་ལ་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་རྟེན་དང་བརྟེན་པར་བཅས་པའི་རང་བཞིན་འདི་དག་སྣང་ཕྱོགས་ནས་གཞལ་ན་ཀུན་རྫོབ་གཟུགས་སྐུ་ལྔ་ཡི་འཁོར་ལོར་རྫོགས་པ་དང་། སྟོང་ཕྱོགས་ནས་གཞལ་ན་དོན་དམ་ཆོས་སྐུ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པ་དང་། ཟུང་འཇུག་གི་ངོས་ནས་གཞལ་ན་ལྷག་པའི་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བ་ཟུང་འཇུག་སྒྱུ་འཕྲུལ་དྲྭ་བའི་ངོ་བོར་ཡེ་ནས་སངས་རྒྱས་པ་སྟེ། །དཔལ་གསང་བའི་སྙིང་པོ་ལས། ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མ་མཱ་ཀི ། མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མར། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེད་དོ། །ཅེས་སོ། །དེ་ལྟར་ཕུང་སོགས་རྒྱལ་བའི་དཀྱིལ་འཁོར་དུ་བཞག་པའི་རྒྱུ་མཚན་ཡང་། ཀུན་གཟིགས་རོང་ཟོམ་པ་ཆེན་པོས། ཁ་ཅིག་ན་རེ། དོན་དམ་པར་རང་བཞིན་མེད་པས་སངས་རྒྱས་ཡིན་པ་དང་། ཀུན་རྫོབ་ཏུ་སངས་རྒྱས་སུ་འགྱུར་དུ་རུང་བའི་རྒྱུ་ཡིན་པས་སངས་རྒྱས་སུ་བཞག་གོ །དངོས་པོའི་མཚན་ཉིད་ནི་མ་དག་པའི་སྣང་བ་ལྟར་བདེན་ནོ་ཞེས་ཟེར་རོ། །དེ་ལྟར་བསྒྲུབ་པར་མི་བྱའོ། །ཀུན་རྫོབ་ཙམ་དུ་ཡང་ཕུང་པོ་ལྟར་སྣང་ཙམ་ཉིད་ནས་སངས་རྒྱས་གྲངས་མེད་པ་ཡོངས་སུ་དག་པའི་ཞིང་ཁམས་དང་བཅས་པའི་རང་བཞིན་ཉིད་ཡིན་ལ། སྣང་བ་དེ་གཉིས་ཀྱང་ཕན་ཚུན་ལྟོས་ན་ཡོངས་སུ་དག་པའི་སྣང་བ་ལྟར་བདེན་པར་གྲུབ་བོ་ཞེས་བཞག་པར་བྱའོ། །ཞེས་གསུངས་པ་ལྟར་ཤེས་དགོས་སོ། །དེ་ལ་རྒྱུ་མཚན་ཉིད་ཀྱི་ཐེག་པ་པས་སྤྱིར་གྱིས་བདེན་གཉིས་དབྱེར་མེད་ཙམ་ཞིག་འདོད་ཀྱང་། ཀུན་རྫོབ་བདེན་པའི་ཆ་ནས་འཁོར་འདས་གཉིས་ལ་བཟང་ངན་དུ་བལྟས་ནས་བླང་དོར་བྱེད་པ་ལ། འབྲས་བུའི་ཐེག་པ་འདིར་ཀུན་རྫོབ་ཏུའང་དག་མཉམ་ཆེན་པོར་ལྟ་བས་ཁྱད་ཆེ་བ་ཡིན་ནོ། །དེ་སྐད་དུ་ལམ་རིམ་ལས་ཀྱང་། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཐབས་ཀྱི་ལྟ་སྤྱོད་ཆེན་པོ་ནི། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཞེས་གསུངས་སོ། །དེ་ལྟར་ལྟ་བ་རྣམ་པར་དག་པར་བྱེད་པ་ནི་ལམ་གྱི་གནད་གལ་བོ་ཆེ་ཡིན་ཏེ། ཆོས་ཉིད་མཉམ་པའི་དོན་ཕྱིན་ཅི་མ་ལོག་པར་རྟོགས་ན། ལུས་ཀྱི་བསྒུལ་སྤྱོད་ཐམས་ཅད་ཕྱག་རྒྱ། ངག་གི་སྨྲ་བརྗོད་ཐམས་ཅད་སྔགས་ཚིག །སེམས་ཀྱི་འགྱུ་དྲན་ཐམས་ཅད་ཡེ་ཤེས་སུ་སོང་ནས་ཚོགས་གཉིས་འབད་མེད་དུ་རྫོགས་པ་དང་། འགལ་རྐྱེན་ལམ་དུ་སློང་། འདོད་ཡོན་གྲོགས་སུ་ཤར་ནས་ལྷུན་རྫོགས་ཀུན་ཏུ་བཟང་པོའི་ས་ལ་མིག་འཁྲུལ་ལྟར་འགྲོ་བ་ཡིན་ཏེ། ལམ་རིམ་ལས། ཇི་ལྟར་སྤྱོད་ཀྱང་སྡོམ་མི་འདའ། །བྱེད་སྤྱོད་ཚོགས་ཆེན་གཉིས་སུ་འགྱུར། །འགྲོ་དང་འདུག་དང་ཉལ་བ་ན། །མ་ཉམས་དེ་ཡི་དབྱིངས་སུ་གནས། །ཤེས་རབ་མཆོག་གིས་རྟག་ཏུ་སྤྱད། །དབྱིངས་ཉིད་ལ་ནི་ཉིད་སྤྱོད་ཕྱིར། །དབྱིངས་ཉིད་མཆོག་གི་གནས་ལ་སྤྱོད། །དེ་ཉིད་མི་གནས་མྱ་ངན་འདའ། །ཞེས་གསུངས། གལ་ཏེ་ཆོས་ཉིད་ཀྱང་དོན་དེ་བློ་ལ་མ་གསལ་ན། སྔགས་ཀྱི་སྤྱོད་པ་སྤྱད་པས་ལོག་པར་ལྟུང་བས་ཚིག་ཙམ་ལ་གདེངས་སུ་མི་བྱ་སྟེ། དེ་ལས། གོང་གི་དོན་ལྟར་མ་རྟོགས་པའི། །བློ་ངན་མཉམ་པར་ཁུང་ཕྱུང་ནས། །མ་རྟོགས་ལེ་ལོ་སྙོམ་ལས་བྱས། །དོན་མ་གྲུབ་པར་ངན་སོང་འགྲོ། །སེམས་ཀྱིས་མཉམ་པར་མ་རྟོགས་ན། །ཚིག་གི་མཉམ་པས་འཚང་མི་རྒྱ། །དེ་བས་དོན་ཚིག་ལྡན་པར་བྱོས། །འོན་ཀྱང་ཐེ་ཚོམ་མེད་པར་འགྲུབ། །ཅེས་གསུངས་སོ། །དེ་ལྟར་ལྟ་བ་གཏན་ལ་དབབ་པ་ཡན་ཆད་ཀྱིས་ལམ་གྱི་གནད་འདོར་དུ་མི་རུང་བ་དག་མདོར་བསྡུས་ཏེ་བརྗོད་ནས་བསྒོམ་པས་ཉམས་སུ་བླངས་པ་ལའང་། བསྐྱེད་པའི་རིམ་པ་དང་། རྫོགས་པའི་རིམ་པ་དང་། རྫོགས་པ་ཆེན་པོའི་རིམ་པ་དང་གསུམ་ལས། བསྐྱེད་པའི་རིམ་པ་ལའང་རྒྱས་པར་དབྱེ་ན། མར་སྐྱེ་འཆི་བར་དོ་གསུམ་གྱི་བག་ཆགས་སྦྱོང་ཞིང་དག་པར་བྱེད་ཅིང་། ཡར་འབྲས་བུ་སྐུ་གསུམ་རྫོགས་པའི་རྣམ་པ་ལམ་དུ་བྱས་པའི་སྒོ་ནས། རྩ་རླུང་ཐིག་ལེ་གསུམ་ལ་བརྟེན་པའི་སྣང་གསུམ་གྱི་སྒྲིབ་པ་ཕྲ་མོ་སྦྱོང་བར་བྱེད་པའི་བདེ་གསལ་རྣམ་པར་མི་རྟོག་པའི་རྫོགས་རིམ་ཟབ་མོ་རྣམས་དང་། ལྷན་སྐྱེས་རྫོགས་པ་ཆེན་པོའི་ཡེ་ཤེས་རང་རྒྱུད་ལ་འདྲེན་པའི་སྨིན་བྱེད་དུ་འགྱུར་ངེས་པའི་ཆོ་ག་ཡན་ལག་ཚང་བ་ཞིག་ངེས་པར་དགོས་པས་དང་པོར་དེ་ཉིད་ལ་སློབ། དེ་ནས་རྡོ་རྗེའི་ལུས་ལ་གནད་དུ་བསྣུན་ཏེ་རླུང་སེམས་དབུ་མར་གཞུག་པའི་ཐབས་མཁས་ཀྱིས་དཔེ་ཡི་འོད་གསལ་དང་མ་དག་པའི་སྒྱུ་ལུས་སྒྲུབ། སྐབས་འདིར་ཉེ་རྒྱུའི་སྤྱོད་པ་གསུམ་གང་རུང་གི་སྒོ་ནས། མཐོང་ལམ་རྣམ་པར་མི་རྟོག་པའི་ཡེ་ཤེས་སམ་ཕྱག་རྒྱ་ཆེན་པོ་མཆོག་གི་དངོས་གྲུབ། ལྷན་སྐྱེས་བདེ་བ་ཆེན་པོའི་ཡེ་ཤེས། བློ་བྲལ་བསམ་མི་ཁྱབ་པའི་ཆོས་ཉིད། ཆོས་ཉིད་མངོན་སུམ་ཆེན་པོའི་སྣང་བ་ཞེས་ཐ་སྙད་དུ་མ་འཇུག་པའི་གཞིར་གྱུར་པ་གང་ཡིན་པ་དེ་ཉིད་མངོན་དུ་བྱས་ནས་སླར་མཚན་དཔེས་བརྒྱན་པའི་བཅོས་མིན་སྟོང་གཟུགས་ཀྱི་ལྷ་སྐུར་ལྡང་བ་ན། དག་པའི་སྒྱུ་ལུས་སམ་སློབ་པའི་ཟུང་འཇུག་དུ་གྲགས་པ་ཚེ་དབང་དང་ཕྱག་ཆེན་རིག་འཛིན་གང་རུང་གིས་བསྡུས་པའི་རྟེན་དེ་ཉིད་འགྲུབ་པ་ཡིན་ནོ། །རྟེན་དེ་ཉིད་ཀྱིས་སྐུ་ལྔ་ལྷུན་གྱིས་གྲུབ་པའི་བདག་ཉིད་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བྱེད་པ་ནི་མཐར་ཕྱིན་འབྲས་བུའི་རང་བཞིན་དུ་བརྗོད་པ་ཡིན་ནོ། །དེ་ལྟར་སྨོས་པ་དེ་དག་ལས་རྫོགས་པའི་རིམ་པ་དག་དང་། སྤྱོད་པའི་རིམ་པ་རྣམས་ནི་མཆོག་གི་དངོས་གྲུབ་འདོད་པའི་གང་ཟག་གིས་དོན་དུ་གཉེར་བྱའི་ལམ་གྱི་གཙོ་བོ་སྙིང་དང་མིག་ལྟ་བུ་དག་ཡིན་མོད་ཀྱི། དེ་ལྟ་ནའང་ངེས་པར་སྒྲུབ་པར་འདོད་པ་དག་གིས་ནི་བླ་མའི་ཞལ་ལས་རྟོགས་པར་འགྱུར་ལ། དེ་ལས་གཞན་པ་དག་ལ་ནི་ཡི་གེར་བཀོད་པ་ཙམ་ལ་དོན་མེད་ཅིང་གསང་བ་ཟབ་མོ་སྐབས་མིན་པར་སྒྲོགས་པའང་དངོས་གྲུབ་ཉམས་པའི་རྒྱུར་འགྱུར་བས་མ་བྲིས་སོ། །བསྐྱེད་རིམ་གྱི་སྐབས་འདི་ནའང་ཆོ་ག་རྒྱས་པའི་རྩ་ཐོ་ལས་བྱང་འདིར་མི་འབྱུང་བས་གཞུང་གི་འགྲོས་དང་བསྟུན་ནས་ཉུང་ངུར་དྲིལ་བ་བསྐྱེད་རིམ་ལ་སེམས་སྤྱོད་ལུགས་དང་གནད་ཀྱི་མདོ་ཆེ་ལོང་ཙམ་ཞིག་འོག་ཏུ་བཤད་པར་བྱའོ། །སྨྲས་པ། མ་རིག་ལས་དང་ཉོན་མོངས་ཀྱིས་བསྐྱེད་པའི། །ཁམས་གསུམ་འབར་བའི་མེ་འོབས་ལྟར་མཐོང་ནས། །ངེས་འབྱུང་བསམ་པས་སོ་ཐར་གང་རུང་བླང་། །ཡོན་ཏན་གཞི་རྟེན་ལམ་གནད་དང་པོ་ཡིན། །ཐོག་མེད་དུས་ནས་སྐྱེ་འཆིའི་འཁོར་ལོ་འདིར། །འཁྱམས་པའི་ཚེ་ན་ཕ་མར་མ་གྱུར་མེད། །ལུས་ཅན་འདི་ཀུན་སྲིད་ལས་གདོན་པའི་བློས། །བྱང་ཆུབ་སེམས་བསྐྱེད་ལམ་གནད་གཉིས་པ་ཡིན། །ཚེ་ལུས་གཅིག་གིས་སངས་རྒྱས་སྒྲུབ་པ་ལ། །ཉེ་ལམ་མཐར་ཐུག་རྡོ་རྗེ་ཐེག་པ་སྟེ། །བླ་མར་མི་བསྟེན་དེ་འགྲུབ་ཐབས་གཞན་མེད། །ཚུལ་བཞིན་བསྟེན་པ་ལམ་གནད་གསུམ་པ་ཡིན། །དབང་བསྐུར་མེད་པར་གསང་སྔགས་སྒོམ་མི་རུང་། །དབང་བསྐུར་དེ་ཡང་ཆོ་ག་ཉམས་པས་མིན། །དེས་ན་མཚན་ཉིད་ལྡན་པའི་བླ་མ་ལས། །དབང་བཞི་ལེན་པ་ལམ་གནད་བཞི་བ་ཡིན། །དབང་བསྐུར་ཐོབ་ཀྱང་དམ་ཚིག་མི་བསྲུང་ན། །ཕན་ལས་གནོད་ཆེ་རྡོ་རྗེའི་དམྱལ་བར་ལྟུང་། །དམ་ཚིག་ལྡན་ན་དངོས་གྲུབ་ཤུགས་ལས་འཐོབ། །སྲོག་ལྟར་བསྲུང་བ་ལམ་གནད་ལྔ་བ་ཡིན། །དབང་ཐོབ་དམ་ཚིག་ལྡན་པའི་གང་ཟག་གིས། །ཉམས་ལེན་དུས་ན་རང་རྐྱ་ཐུབ་པ་དགོས། །དེ་ཕྱིར་བསྐྱེད་རྫོགས་དོན་ལ་ཐོས་བསམ་གྱིས། །སྒྲོ་འདོགས་གཅོད་པ་ལམ་གནད་དྲུག་པ་ཡིན། །ཐོས་པས་སྒྲོ་འདོགས་ཆོད་པར་གྱུར་པ་ན། །ཚིག་ལ་འཆེལ་བས་ཟབ་དོན་མི་མྱོང་བས། །དབེན་པའི་གནས་སུ་ཚེ་ལྷག་བསྒྲུབ་པ་ལ། །གཞོལ་བའི་དམ་བཅའ་ལམ་གནད་བདུན་པ་ཡིན། །དེར་ཡང་ཤེས་རབ་དང་ནི་སྙིང་རྗེ་གཉིས། །ཁ་བྲལ་གྱུར་ན་ལམ་མཆོག་མི་རྙེད་པས། །ཟུང་འཇུག་ལམ་གྱི་སྲོག་ཏུ་བཟུང་བ་ནི། །འཁྲུལ་མེད་སྔགས་ཀྱི་ལམ་གནད་བརྒྱད་པ་ཡིན། །སྟོང་ཆེན་ནས་བཟུང་ཉེར་བསྡུའི་བར་དག་གི །དམིགས་པ་གང་ལའང་ཉེས་པ་ལྔ་སྤོང་ཞིང་། །འདུ་བྱེད་བརྒྱད་བསྟེན་བྱིང་རྒོད་ཐེར་ལ་བོར། །གསལ་དག་འདོན་པ་ལམ་གནད་དགུ་བ་ཡིན། །ཐ་མལ་སྣང་ཞེན་དབྱིངས་སུ་སྦྱོང་བའི་ཕྱིར། །རྣམ་པར་གསལ་ཞིང་རྣམ་དག་དྲན་པ་དང་། །ང་རྒྱལ་བརྟན་པ་གསུམ་ལ་ཆེར་གོམས་པས། །མཚན་རྟོག་སྡོམ་པ་ལམ་གནད་བཅུ་པ་ཡིན། །ངེས་འབྱུང་ནས་བརྩམ་མཚན་རྟོག་སྡོམ་པའི་བར། །བཅུ་པོ་འདི་ཡོད་ཡང་དག་ལམ་ཡིན་ཏེ། །དེ་ལས་གཅིག་ཙམ་ཉམས་པར་གྱུར་ན་ཡང་། །ཡང་དག་ལམ་དུ་འགྲོ་བ་ཤིན་ཏུ་དཀའ། །དེ་ཕྱིར་རིམ་པ་དང་པོའི་གནས་སྐབས་ནས། བཅུ་པོ་འདི་ཀུན་གདམ་ངག་གནད་དུ་ཆེ། །དེ་བས་བཤད་པ་བཞིན་དུ་ལག་ལེན་ལ། །ཐེབས་ན་རིམ་པ་གཉིས་པའི་སྐལ་བ་ཡོད། །ཅེས་བྱ་བ་ནི་བར་སྐབས་ཀྱི་གསལ་བྱེད་དོ། །ད་ནི་བསྐྱེད་རིམ་ལ་འཇུག་པའི་ཚུལ་བསྟན་པ་ལ་ཡང་། དབང་པོའི་རིམ་པ་དང་། སྤང་བྱ་སྤོང་ཚུལ་ལ་ལྟོས་ནས་བསྐྱེད་རྫོགས་རིམ་ཅན་དུ་སློབ་པ་དང་། ཟབ་གསལ་གཉིས་མེད་ཀྱི་རྣལ་འབྱོར་བསྐྱེད་རྫོགས་ཟུང་འཇུག་ལ་སློབ་པ་དང་། བསྐྱེད་རིམ་ལའང་དག་རྫོགས་སྨིན་གསུམ་གྱི་ངེས་པ་མཐར་ཆགས་སུ་སྦྱར་བ་རིམ་གྱིས་པ་དང་། སྐད་ཅིག་དྲན་རྫོགས་སུ་བསྐྱེད་པ་རྫོགས་ཚུལ་དུ་སློབ་པ་སོགས་དུ་མ་ཡོད་དེ། རྒྱུད་ནས་ཀྱང་དེ་ལྟར་བཤད་ལ། སྔོན་གྱི་མཁས་པ་དག་གིས་ཀྱང་དེ་ལྟར་བཀྲལ་བའི་ཕྱིར་རོ། །དེ་ལ་ཕྱོགས་སུ་ཞེན་པས་འདི་ནི་བདེན་གྱི་གཞན་ནི་ཡང་དག་པ་མ་ཡིན་ནོ་ཞེས་དགག་སྒྲུབ་ཀྱིས་རིས་སུ་གཅོད་པར་མི་བྱ་སྟེ། སེམས་ཅན་གྱི་ཁམས་དང་དབང་པོ་ཡང་བསམ་གྱིས་མི་ཁྱབ་ཅིང་། དེ་བཞིན་གཤེགས་པའི་ཡེ་ཤེས་ཀྱི་ཡུལ་ཡང་བསམ་གྱིས་མི་ཁྱབ་པའི་ཕྱིར་རོ། །གཞན་དུ་ན་གང་ཟག་དབང་པོ་རབ་འབྲིང་ཐ་མའི་ཁྱད་པར་དང་། སྦྱང་བ་སྔོན་དུ་སོང་མ་སོང་གི་བྱེ་བྲག་གིས་ཉམས་སུ་ལེན་པའི་ཚུལ་ནི་འདི་དང་འདི་ལྟ་བུའོ་ཞེས་སོ་སོར་རྣམ་པར་བཞག་པ་ལ་ནི་ཉེས་པ་མེད་ཅིང་། དེ་ལྟར་ཕྱེས་ནས་གང་ཟག་སོ་སོའི་བློ་ཚོད་དང་འཚམས་པར་ཉམས་སུ་བླང་དགོས་པ་ཡང་ཡིན་ནོ། །དེ་བས་ན་སྔགས་ལ་འཇུག་པའི་ལས་དང་པོ་པ་ལྷུན་གྲུབ་རྫོགས་པ་ཆེན་པོའི་དོན་ལ་ཐོག་མ་ནས་སྦྱོར་མི་ནུས་པ་དག་གིས་ནི། སྟོང་པ་ཆེན་པོའི་རྣལ་འབྱོར་དང་། སྙིང་རྗེ་སྒྱུ་མའི་རྣལ་འབྱོར་དང་། ཕྱག་རྒྱ་གཅིག་པའི་རྣལ་འབྱོར་དང་། ཕྱག་རྒྱ་སྤྲོས་པའི་རྣལ་འབྱོར་རྣམས་རིམ་པ་བཞིན་དུ་གོམས་པར་བྱེད་ཅིང་། དེ་ཡང་བདག་སྔོན་གྱི་སངས་རྒྱས་ཡིན་པའི་ཕྱིར་བདག་གི་སྲས་སུ་དེ་བཞིན་གཤེགས་པ་རྣམས་བྱ་བ་དང་། རིགས་མི་ནུབ་ཅིང་ལྷུན་གྱིས་གྲུབ་པར་བྱ་བའི་ཕྱིར་དེ་བཞིན་གཤེགས་པའི་སྲས་སུ་བདག་བྱ་བའི་སྒོ་ནས་རྒྱུའི་རྡོ་རྗེ་འཛིན་པ་ལས་འབྲས་བུའི་རྡོ་རྗེ་འཛིན་པར་བཞེངས་ཏེ་དཀྱིལ་འཁོར་གྱི་འཁོར་ལོ་སྤྲོ་བ་སོགས་རྒྱས་པ་ཆེན་པོའི་བསྐྱེད་རིམ་སྒོང་སྐྱེས་གཙོ་བོར་གྱུར་པའི་བག་ཆགས་སྦྱོང་བའི་ཆོ་ག་དང་། ཁུ་རྡུལ་སེམས་གསུམ་ཚོགས་པ་འབྲས་བུ་དང་བཅས་པ་སྦྱོང་ཞིང་ཡེ་ཤེས་ལྔའི་ངོ་བོར་མངོན་པར་བྱང་ཆུབ་པར་བྱེད་པའམ་རྡོ་རྗེ་གསུམ་དུ་རྫོགས་པར་བྱེད་པའི་རྒྱས་པའི་བསྐྱེད་རིམ་མངལ་སྐྱེས་གཙོ་བོར་གྱུར་པའི་བག་ཆགས་སྦྱོང་བའི་ཆོ་ག་དག་ལ་འདྲིས་པར་སློབ་པ་གནད་ཆེའོ། །དེ་ལས་དབང་པོ་རྣོ་ཞིང་སྤྲོས་པ་ལ་མི་མོས་པའི་གང་ཟག་གིས། རྒྱུའི་ས་བོན་དང་། བསྐྱེད་པའི་རྐྱེན་གྱི་སྔགས་ཙམ་ལས་རྟེན་དང་བརྟེན་པར་བཅས་པ་བསྒོམ་པ་ནི་བསྡུས་པའི་བསྐྱེད་རིམ་དྲོད་གཤེར་སྐྱེས་ཀྱི་བག་ཆགས་གཙོ་བོར་སྦྱོང་བའི་ཆོ་གའོ། །གང་ཟག་ཤིན་ཏུ་དབང་རྣོན་གྱིས་རྒྱུ་རྐྱེན་གྱི་སྔགས་ཙམ་ལ་ཡང་མ་བརྟེན་པར་རིག་པ་བྱང་ཆུབ་སེམས་ཀྱི་རང་གདངས་རྟེན་དང་བརྟེན་པའི་འཁོར་ལོ་རང་གསལ་ལྷུན་གྲུབ་ཏུ་བསྒོམ་པ་ནི་ཤིན་ཏུ་བསྡུས་པའི་བསྐྱེད་རིམ་གཙོ་བོར་རྫུས་སྐྱེས་ཀྱི་བག་ཆགས་སྦྱོང་བའི་ཆོ་གའོ། །དེ་དག་ཀྱང་རང་བློ་དང་འཚམས་པར་སྦྱོང་བ་ནི་མ་ནོར་བ་ཡིན་ནོ། །ལས་དང་པོ་པའི་གང་ཟག་རིམ་གྱིས་སློབ་པ་ཞིག་གི་རྒྱུད་ཚོད་དང་སྦྱར་ནའང་། དང་པོ་སྦྱང་གཞི་དང་སྦྱོང་བྱེད་ངོ་འཕྲོད་ཅིང་རྫོགས་རིམ་གྱི་སྨིན་བྱེད་དུ་འགྲོ་བའི་ལམ་གྱི་གཏིང་ཚུགས་ཕྱིར་རྒྱས་པ་ཆེན་པོའི་བསྐྱེད་རིམ་ལ་སློབ་ཅིང་། དེ་ནས་བློ་གོམས་རིམ་ལ་ལྟོས་ནས་ཕྱི་མ་ཕྱི་མ་ལ་སློབ་དགོས་ཏེ། ཀུན་མཁྱེན་ཆོས་རྗེས། ཁྱད་པར་ལས་དང་པོ་ཡི་སྒོང་སྐྱེས་བཞིན། །ཅུང་ཟད་བརྟན་པས་མངལ་སྐྱེས་བཞིན་བསྒོམ་ལ། །བརྟན་པ་ཆེ་བས་དྲོད་གཤེར་སྐྱེས་བཞིན་བསྒོམ། །ཤིན་ཏུ་གོམས་པ་ཡང་དག་བརྟན་པ་ཡིས། །བརྫུས་སྐྱེས་བཞིན་དུ་སྐད་ཅིག་ཀྲོང་བསྐྱེད་བྱ། །ཞེས་གསུངས་པ་ལྟར་རོ། །དེ་ལས་འདིར་ནི། སྦྱངས་པའི་དབང་རྣོན་ནམ། རང་བཞིན་གྱི་དབང་རྣོན། རང་བཞིན་རྫོགས་པ་ཆེན་པོའི་རྣལ་འབྱོར་གྱི་སྣོད་དུ་གྱུར་པའི་གང་ཟག་གི་དབང་དུ་བྱས་ཏེ། ཟབ་གསལ་གཉིས་མེད་ཀྱི་རྫོགས་རིམ། ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ་ཞེས་གྲགས་པའི་ཟུང་འཇུག་གི་རྣལ་འབྱོར་གཙོ་བོར་བསྟན་པ་ཡིན་ཏེ། སེམས་ཉིད་ངལ་བསོར། རང་སེམས་ཡེ་ནས་ལྷ་ཡི་རང་བཞིན་ལ། །ལུས་ནི་དཀྱིལ་འཁོར་སྒྲ་ཚིག་གསང་སྔགས་ཉིད། །ཐམས་ཅད་ལྷུན་རྫོགས་ཡེ་ཤེས་ཆེན་པོའི་ངང་། །དམ་ཚིག་ཡེ་ཤེས་གཉིས་མེད་དགུག་གཞུག་མེད། །གཤེགས་གསོལ་མི་དགོས་བཟང་ངན་བླང་དོར་མེད། །ཡེ་ནས་དཀྱིལ་འཁོར་ཡིན་པའི་བདག་ཉིད་ལ། །ཡིན་པར་ཤེས་པའི་ཚུལ་གྱིས་གསལ་འདེབས་ལས། །མ་གྲུབ་པ་ལ་ཡང་འགྲུབ་བྱེད་པ་མིན། །ཅེས་པའི་ཚུལ་ལྟར་རོ། །ཚུལ་འདི་ལྟར་ཉམས་སུ་ལེན་པ་ལ། འདུ་འཛི་དང་རྣམ་གཡེང་ཐམས་ཅད་རྒྱང་བསྲིངས་ཏེ། གྲུབ་པ་ཐོབ་པའི་གང་ཟག་རྣམས་ཀྱིས་བྱིན་གྱིས་རླབས་པའི་གནས། དཔའ་བོ་རྣལ་འབྱོར་མ་རྣམས་རང་བཞིན་གྱིས་འདུ་བའི་ས། དུར་ཁྲོད་དང་ནགས་ཚལ་མཚོ་གླིང་སོགས་གང་ཡང་རུང་བའི་གནས་སུ་གཅིག་པུར་སྒྲུབ་དགོས་ཏེ། ཀུན་མཁྱེན་གྱིས། གང་གིས་སྒྲུབ་པའི་སྐྱེ་བོ་ངེས་འབྱུང་ཅན། །ལུས་ནི་འདུ་འཛིའི་གྲོང་ལས་རྒྱང་བསྲིངས་ཤིང་། །སེམས་ནི་སྤྲོས་པའི་ཚོགས་ལས་རིང་དུ་བསྲིངས། །དེ་ཡིས་ཏིང་འཛིན་འདི་ནི་མྱུར་དུ་འགྲུབ། །དད་ལྡན་ངོ་ཚ་ཤེས་ཤིང་ཁྲེལ་ཡོད་ལ། །བག་ཡོད་ཚུལ་ཁྲིམས་དག་ཅིང་དགེ་ལ་སྤྲོ། །མང་ཐོས་འདོད་པ་ཆུང་ཞིང་ཆོག་ཤེས་ལྡན། །དེ་ཡིས་ཏིང་འཛིན་འདི་ནི་མྱུར་དུ་འགྲུབ། །ལུས་སེམས་བསྡམས་ཤིང་དབེན་པའི་གནས་ལ་དགའ། །གཉིད་དང་སྙོམ་ལས་སྨྲ་ལ་དགའ་བ་སྤང་། །རྒོད་འགྱོད་མེད་ཅིང་གཞན་དང་འདྲིས་པ་ཉུང་། །དེ་ཡིས་ཏིང་འཛིན་འདི་ནི་མྱུར་དུ་འགྲུབ། །གྲོང་དང་གྲོང་འདབས་སྐྱེ་བོའི་འདུ་འཛི་མེད། །གནས་དང་དགོན་པར་མང་པོ་བརྟེན་འདྲིས་མེད། །དོན་དང་བྱ་བ་སྣ་ཚོགས་དྲེལ་བ་མེད། །དེ་ཡིས་ཏིང་འཛིན་འདི་ནི་མྱུར་དུ་འགྲུབ། །ཚེ་འདིའི་བདེ་དང་ཕྱི་མའི་བདེ་འབྲས་དང་། །རང་དོན་ཞི་བ་གཉེར་མིན་འགྲོ་བའི་ཕྱིར། །སྲིད་ལས་ཐར་འདོད་ངེས་འབྱུང་སྐྱོ་ཤས་ཅན། །དེ་ཡིས་ཏིང་འཛིན་མཆོག་འདི་མྱུར་དུ་འགྲུབ། །ཅེས་པ་ལྟར་རོ། །དེ་ལྟར་ཏིང་འཛིན་རྒྱུད་ལ་བསྐྱེད་པའི་རྒྱུ་རྐྱེན་ཚོགས་ན། བསྙེན་པ་རྐྱང་པའི་སྐབས་སུ་དཀྱིལ་འཁོར་མི་དགོས་ཀྱང་། བསྙེན་སྒྲུབ་སྤེལ་མ་བྱེད་ན་དཀྱིལ་འཁོར་སོགས་སྒྲུབ་པའི་ཡོ་བྱད་རྣམས་འདུ་བྱས་ལ། དམ་ཚིག་གི་རྟེན་སྐུ་གཟུགས་ཀྱང་བཀྲམ། སྨན་རཀ་ཚོགས་ཀྱི་འཁོར་ལོའི་ཡོ་བྱད་སོགས་ནང་གསང་གི་མཆོད་པའི་རྫས་དང་། ཆུ་གཉིས་ཉེར་སྤྱོད་སོགས་ཕྱི་མཆོད་ཀྱི་རྫས། རྡོ་རྗེ་དྲིལ་བུ་ཐོད་རྔ་སོགས་དམ་ཚིག་གི་རྫས་འདི་དག་སྔོན་རྡོ་རྗེ་འཆང་དང་གྲུབ་པའི་རིག་འཛིན་ཕོ་མོ་རྣམས་ཀྱིས་མཆོག་ཐུན་གྱི་དངོས་གྲུབ་གྲུབ་པའི་རྫས་སུ་བྱིན་གྱིས་བརླབས་པ་དང་། ཕྱི་ནང་གི་གནས་ཡུལ་གྱི་དཔའ་བོ་དང་རྣལ་འབྱོར་མ་རྣམས་འདུ་བར་བྱེད་པའི་ལོངས་སྤྱོད་ཁྱད་པར་ཅན་ཡིན་པའི་ཕྱིར། དངོས་གཙང་ཞིང་གྱ་ནོམས་པ་ཅི་འབྱོར་དུ་བཤམས། དེ་ནས་བདེ་བའི་སྟན་ལ་ལུས་སེམས་བག་ཕབས་ཏེ། རང་ཉིད་གཞི་དུས་ཀྱི་གསང་བ་འདུས་པའི་ལྷར་གསལ་བའི་སྙིང་གའི་སྲོག་མི་ཤིགས་པའི་ཐིག་ལེ་ཉིད་སྔར་དབང་དུས་དམ་ཚིག་གི་ཆུ་རྡོ་རྗེ་སེམས་དཔར་བྱིན་གྱིས་བརླབས་པ་དང་དབྱེར་མེད་དུ་བྱས་ནས་བྱིན་འབེབས་ཀྱི་དམ་ཡེ་གཉིས་སུ་མེད་པར་བརྟན་པར་བགྱིས་པ་དེ་ཉིད་འདིར་ཧཱུྃཿཡིག་གི་ངོ་བོར་བསྒོམ་པ་ལས་འོད་ཟེར་གྱི་སྣང་བ་བསམ་གྱིས་མི་ཁྱབ་པར་བྱུང་བས་འོག་མིན་མཐའ་དབུས་བྲལ་བའི་ཞིང་ཁམས་ན་ཆོས་སྐུ་སྤྲོས་པ་དང་བྲལ་བའི་ངོ་བོར་བཞུགས་པའི་བདེ་བར་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ་ཏེ། དམ་ཚིག་དང་ཐུགས་རྗེའི་དབང་གིས་གཟུགས་སྐུ་ཡེ་ཤེས་ཀྱི་འཁོར་ལོར་ལམ་གྱིས་བཞེངས་ནས་རྡོ་རྗེ་ཐེག་པའི་སར་ཆུད་པའི་རིག་པ་འཛིན་པའི་ཚོགས་ཞིང་གི་རྡུལ་སྙེད་དང་བཅས་པས་བསྐོར་ཏེ་མདུན་གྱི་ནམ་མཁར་སྤྲིན་ཕུང་འཁྲིགས་པ་བཞིན་བཞུགས་པའི་སྤྱན་སྔར། སྔོན་བདག་ཅག་གི་སྟོན་པས་སློབ་པ་ལམ་གྱི་གནས་སྐབས་ན། སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་གྲོགས་སུ་བཟུང་ནས། བྱང་ཆུབ་མཆོག་ཏུ་ཐུགས་བསྐྱེད་དེ་བསོད་ནམས་དང་ཡེ་ཤེས་ཀྱི་ཚོགས་གྲངས་མེད་གསུམ་དུ་རྫོགས་པར་མཛད་པ་དང་ཆོས་མཐུན་པར། བསྟན་པ་སྤྱིའི་དཀོན་མཆོག་གསུམ་རྒྱུད་སྡེ་སོ་སོའི་དཀོན་མཆོག་གསུམ་དུ་འདུས་པའི་ཚུལ་ཤེས་པས་སྐྱབས་སུ་འགྲོ་བ་དང་། ཆེད་དུ་བྱ་བ་སེམས་ཅན་ཐམས་ཅད་ཀྱི་ཕྱིར། ཐོབ་པར་བྱ་བ་སངས་རྒྱས་རྡོ་རྗེ་འཆང་གི་གོ་འཕང་། དུས་ཀྱི་ཁྱད་པར་ཚེ་གཅིག་ལ། ཐབས་ཀྱི་ཁྱད་པར་རིམ་པ་གཉིས་ཀྱི་རྣལ་འབྱོར་ལ་བརྟེན་ནས་མངོན་དུ་བྱའོ་སྙམ་པའི་བྱང་ཆུབ་མཆོག་ཏུ་སེམས་བསྐྱེད། བསོད་ནམས་མཐའ་ཡས་པ་སྡུད་པའི་ཏིང་ངེ་འཛིན་བདེན་གཉིས་ཟབ་མོའི་དོན་ལས་མི་འདའ་བའི་སྒོ་ནས་ཡན་ལག་བདུན་པས་ཚོགས་བསགས་པ་རྣམས་བྱའོ། །དེ་ནས་སྔོན་སྟོན་པས་མངོན་པར་རྫོགས་པར་འཚང་རྒྱ་བའི་སྔ་ལོགས་སུ་ཏུ་སྲོད་ལ་བདུད་ཀྱི་དཔུང་བཅོམ་པ་དང་ཚུལ་མཐུན་པར། འདིར་ཡང་ཕྱི་ནང་གི་བར་ཆད་གཞོམ་པའི་དོན་དུ་བགེགས་བསྐྲད་པ་དང་། མཚམས་གཅོད་པ་རྣམས་གཞུང་ནས་འབྱུང་བ་བཞིན་བྱའོ། །དེ་ལ་ཧཱུྃ་ཞེས་སྨོས་པ་ནི་རྒྱལ་བ་ཐམས་ཅད་ཀྱི་ཐུགས་རྡོ་རྗེའི་བདག་ཉིད་གཉིས་སྣང་རུ་ཏྲའི་སྡེ་ཚོགས་བརླག་པར་བྱེད་པ་ཆོས་ཉིད་ངང་གིས་ཁྲོས་པའི་དཔལ་ཆེན་པོའི་ང་རྒྱལ་བསྐྱེད་པའོ། །མ་རིག་པ་ནི་སྲིད་པའི་རྩ་བ་སྟེ། དངོས་པོའི་གནས་ལུགས་མི་ཤེས་པའི་རྨོངས་པ་ཡིན་ལ་འཁྲུལ་བ་ནི་བདག་གཞན་དང་འཁོར་འདས་ཐ་དད་དུ་སྣང་བའོ། །དེ་ལས་བྱུང་བའི་འདྲེ་ནི་གཉིས་སུ་འཛིན་པའི་བདེན་ཞེན་ཏེ། དེས་བསྐྱེད་པའི་མ་དག་སྣང་བའི་བག་ཆགས་སྣ་ཚོགས་སུ་ཨ་འཐས་པ་ནི་ཡན་ལག་བརྒྱད་དང་ལྡན་པའི་ཆུ་ཀླུང་ལ་རྣག་ཁྲག་དུ་མཐོང་བ་བཞིན་སྣང་སྲིད་ཡེ་ནས་སངས་རྒྱས་པའི་དཀྱིལ་འཁོར་ལ་སྒྲིབ་པའི་བགེགས་ཆེན་པོའོ། །དེ་ཇི་ལྟར་བསྐྲད་པ་ནི་འཁོར་འདས་གཉིས་སུ་སྣང་ཡང་རང་བཞིན་གཅིག་པར་ཤེས་པས་དགག་སྒྲུབ་ཀྱི་ཞེན་ཆགས་དང་བྲལ་བའི་གཏོར་མ་དང་དུ་ལོངས་ལ། མྱང་འདས་གྲུབ་པའི་རེ་བ་དང་། འཁོར་བ་མི་སྤོང་བའི་དོགས་པ་གཉིས་སུ་འཛིན་པའི་རྣམ་རྟོག་གི་རྐུན་བུ་རིག་པའི་ཡེ་ཤེས་ཀྱི་ཀློང་དུ་སྡོད་པའི་གནས་མེད་པས་གཞི་མེད་རྩ་བྲལ་གྱི་ངང་དུ་ཕྱིར་དེངས་ཤིག་པའོ། ཕྱིན་ཆད་ཆོས་ཉིད་མཉམ་པ་ཆེན་པོའི་བཀའ་ལས་ཏེ། དེའི་ངང་ལས་འདའ་བར་མ་བྱེད་ཅིག་ཅེས་གཉིས་སྣང་གི་རྟོག་པ་བཅོམ་པ་ནི་བགེགས་སྐྲོད་པའོ། །ཨོཾ་ཨཱཿཧཱུྃཿབཛྲ་གུ་རུ་སོགས་ནི། སྐུ་གསུང་ཐུགས་རྡོ་རྗེའི་རང་བཞིན་བླ་མ་མཁའ་འགྲོ་ཡི་དམ་དཔའ་བོའི་ཚོགས་ཀྱིས་ཕྱི་ནང་གི་རུ་ཏྲའི་སྡེ་བརླག་པར་གྱིས་ཤིག་ཅེས་པའོ། །མཚམས་གཅོད་པ་ལ། ཧཱུྃ་ཞེས་པ་སྣང་སྲིད་ཡེ་ཤེས་ཀྱི་འཁོར་ལོར་རྒྱས་འདེབས་པ་ཐུགས་རྡོ་རྗེའི་ཏིང་ངེ་འཛིན་ནོ། །དེ་ཡང་ཇི་ལྟར་ན་ཕྱི་རོལ་ལྟར་སྣང་བའི་སྣོད་ཀྱི་འཇིག་རྟེན་ཐམས་ཅད་ཡེ་ཤེས་རང་སྣང་གི་གཞལ་ཡས་ཁང་དུ་གདོད་མ་ནས་རྣམ་པར་དག་པ་ཡིན་མོད་ཀྱང་། བློ་བུར་གཉིས་སྣང་གི་དྲི་མས་མ་དག་པའི་སྣོད་དུ་སྣང་བའི་འཁྲུལ་བའི་རྒྱུན་རིང་མོ་ཞིག་ནས་བྱུང་བའི་མཚམས་དེང་རིག་པ་ཡེ་ཤེས་ཀྱི་རྡོ་རྗེའི་ར་བས་གཅད་པར་བྱའོ། །དེ་བཞིན་དུ་ནང་བཅུད་སྐྱེ་འགྲོར་སྣང་བ་ཐམས་ཅད་ཐབས་ཤེས་སྒྱུ་འཕྲུལ་དྲྭ་བའི་རོལ་གར་ལྷ་དང་ལྷ་མོའི་ངང་དུ་ཡེ་ནས་དག་ཀྱང་། བདག་ཏུ་རྟོག་པའི་དབང་ལས་དུག་ལྔའི་རང་གཟུགས་སྐྱེས་པ་དང་བུད་མེད་ཀྱི་རྣམ་པར་སྣང་བ་ཐམས་ཅད་བཙན་དུག་གི་ནུས་པ་འཇའ་ཚོན་དུ་ཤར་བ་ལྟར་རང་གྲོལ་བདེ་བ་ཆེན་པོར་གནས་བསྒྱུར་བའི་ཡེ་ཤེས་ལྔ་ཡི་མེ་དཔུང་ཆེན་པོས་མཚམས་གཅད་པར་བྱའོ། །འཁོར་བ་ཉིད་མྱང་འདས་ཀྱི་རང་བཞིན་ཡིན་པ་ལས། དེ་ལྟར་མ་རྟོགས་པའི་དབང་གིས་མྱང་འདས་ཐོབ་པའི་རེ་བ་དང་། འཁོར་བར་འཁྱམས་པའི་དོགས་པས་སྤང་བླང་གཉིས་སུ་འཛིན་པའི་ཞེན་པ་ནི་འཁོར་བར་འཆིང་བའི་རྒྱུན་ཐག་ཡིན་ལ། སྡུག་བསྔལ་གྱི་བདེན་པ་ཉིད་འགོག་པའི་བདེན་པར་ཤེས་པས་བླང་དོར་དང་བྲལ་བར་གནས་པ་ནི་བྲལ་ཐོབ་གཉིས་སུ་འཛིན་པའི་མཚམས་གཅོད་པར་བྱེད་པའོ། །དགེ་བ་རྣམ་པར་བྱང་བའི་ཆོས་དང་། སྡིག་པ་ཀུན་ནས་ཉོན་མོངས་པའི་ཆོས་ཐ་དད་དུ་འཛིན་ནས་འདོར་ལེན་དུ་བྱེད་པ་ནི་ཐབས་ལ་རྨོངས་པའི་ལྕགས་སྒྲོག་ཡིན་ལ། ཉོན་མོངས་ཉིད་ཡེ་ཤེས་སུ་འཁྱེར་བའི་ཐབས་མཁས་ཀྱིས་ཀུན་འབྱུང་ལམ་བདེན་དུ་ཤར་བ་ནི་འཆིང་བའི་ལྕགས་སྒྲོག་འགྲོལ་བའི་ལྡེ་མིག་ཡིན་པས་སྤང་གཉེན་གཉིས་སུ་འཛིན་པའི་མཚམས་གཅོད་པ་ཡིན་ནོ། །དེ་ལྟར་བགེགས་སྐྲོད་པ་དང་མཚམས་གཅོད་པ་འདི་དག་གིས་སྣང་སྲིད་དག་མཉམ་ཆེན་པོར་གཏན་ལ་འབེབས་པའི་ལྟ་བ་དང་། བདེན་བཞི་ལ་འཇུག་ལྡོག་བྱེད་ཚུལ་གྱི་སྒོ་ནས་རྒྱུ་འབྲས་ཀྱི་ཐེག་པའི་ཁྱད་པར་དང་། ཐ་མལ་གྱི་མཚན་རྟོག་སྡོམ་པའི་སྔགས་ཀྱི་ལམ་གནད་ཐུན་མོང་མ་ཡིན་པ་དུ་མ་ཞིག་སྟོན་ཏོ། །སྔགས་དོན་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ངོ་བོར་སྲུངས་ཤིག་ཅེས་པའོ། །རཀྵ་གཉིས་བརྗོད་པ་ནི་དོན་ཆེན་པོ་དང་ལྡན་པས་བསྐྱར་བའམ། འདིར་བསྐྱེད་རྫོགས་ཟུང་འཇུག་ཏུ་སྟོན་པའི་སྐབས་ཡིན་པས། ཐ་མལ་གྱི་མཚན་རྟོག་དང་། གྱ་ནོམས་ལྷར་ཞེན་གྱི་རྟོག་པ་གཉིས་ལས་སྲུང་བའི་དོན་དུའང་སྦྱར་རུང་ངོ་། །ཧཱུྃ་དང་ཕཊཿནི་དྲག་པོའི་ང་རོ་སྟེ། རྡོ་རྗེ་རྔམས་པའི་སྒྲས་མཚན་རྟོག་ཟིལ་གྱིས་གནོན་པར་བྱེད་པའོ། །དེའི་རྗེས་སུ་དངོས་གྲུབ་བསྒྲུབ་པའི་ནང་གི་འགལ་རྐྱེན་སེལ་བ་དང་། སྡིག་ལྟུང་དང་ཉམས་ཆགས་སྦྱོང་བའི་ཐབས་ཁྱད་པར་ཅན་ནང་གི་ཁྲུས་ལུང་བླ་མ་རྡོ་རྗེ་སེམས་དཔའི་སྒོམ་བཟླས་ལ་འཇུག་པ་གལ་ཆེ་སྟེ། མན་ངག་སྙེ་མ་ལས། །སངས་རྒྱས་ཀུན་གྱི་སྐུ་གཅིག་པོ། །པད་དཀར་ཟླ་བའི་དབུས་གནས་ཤིང་། །རྡོ་རྗེ་དྲིལ་བུ་རྒྱན་སྤྲས་པའི། །རྡོ་རྗེ་སེམས་དཔའ་ལེགས་དམིགས་ཤིང་། །ཡི་གེ་བརྒྱ་བ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་རླབས་འགྱུར་བས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་བསྐྱེད་པར་བྱ། །འབུམ་ཕྲག་ཏུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས་པས། བླ་མ་རྡོ་རྗེ་སེམས་དཔའི་རྣལ་འབྱོར་དང་འདྲེལ་བར་བདུད་རྩི་འབེབས་སྦྱོངས་ཀྱི་དམིགས་གནད་དང་ལྡན་པས་སྒྲིབ་པ་འཁྲུད་པ་དང་ནུས་པ་འཇོག་པའི་དབང་བཞི་ལེན་ཅིང་རྩ་ལྟུང་བཅུ་བཞིའི་བཤགས་པ་དང་། དམ་བཅའ་ཉི་ཤུ་པ་སོགས་ལེགས་པར་བྱའོ། །འདི་ནི་སྔགས་ཀྱི་གསོ་སྦྱོང་དུ་ཡང་འགྱུར་ཞིང་ཐུན་མཚམས་ཀྱི་བྱ་བ་ཡིན་པས་ཆོ་ག་སྤྱིའི་འགྲོས་དང་སྦྱར་ནས་འདིར་བྱེད་པ་ཉིད་ལེགས་སོ། །དེ་ནས་ཕྱོགས་བཅུའི་བདེ་བར་གཤེགས་པ་རྣམས་ཀྱིས་འབྲས་བུའི་དབང་བསྐུར་ཆེན་པོ་བྱིན་ནས་སྤྱོད་ཡུལ་མཐུན་པར་བྱིན་གྱིས་བརླབས་པ་དང་། སྣོད་ཀྱི་ཞིང་སྦྱོང་བ། བཅུད་ཀྱི་གདུལ་བྱ་སྨིན་པ་དང་། སྨོན་ལམ་ཆེན་པོ་ཡོངས་སུ་རྫོགས་པ་མཐར་ཕྱིན་པས་ལོངས་སྤྱོད་ཆེན་པོའི་དཀྱིལ་འཁོར་བྱུང་བ་རྣམས་དང་ཆོས་མཐུན་པར་སྐུ་གསུང་ཐུགས་ཀྱི་བྱིན་དབབ་པས་བདག་གནས་ཡོ་བྱད་རྣམས་སྤྱིར་བྱིན་གྱིས་བརླབས་པ་དང་། བྱེ་བྲག་ཕྱི་ནང་གི་མཆོད་ཚོགས་བྱིན་གྱིས་རླབས་པ་རྣམས་ཀྱང་ཇི་ལྟར་རིགས་པར་བྱའོ། །སྐྱབས་སེམས་ཚོགས་བསགས་རྡོར་སེམས་སྒོམ་བཟླས། བྱིན་འབེབ་མཆོད་རྫས་བྱིན་རླབས་རྣམས་ལས་བྱང་གི་དཀྱུས་འདིར་མ་བྱུང་ཡང་ངེས་པར་དགོས་པའི་ཆོ་གའི་ཡན་ལག་ཡིན་ནོ། །དེ་ཡན་ཆད་ནི་སྔོན་འགྲོའི་ཆོས་སོ། །ད་ནི་དངོས་གཞི་ལ་འཇུག་པར་བྱེད་པའི་ཚུལ་ནི། གང་ཟག་གི་དབང་པོའི་ཁྱད་པར་གྱིས་ཕལ་ཆེར་ནི་ཐོག་མར་བསྐྱེད་རིམ་ཁོ་ན་ལ་ཞུགས་ནས་དེ་བརྟན་པ་ན་རྫོགས་རིམ་ལ་སློབ་དགོས་ཏེ། ཀླུ་སྒྲུབ་ཀྱིས། བསྐྱེད་པའི་རིམ་ལ་ལེགས་གནས་ཤིང་། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་པ་ལྟར་ཡིན་ནོ། །གང་ཟག་དབང་རྣོན་གྱིས་ནི་གཅིག་ཆར་དུ་བསྐྱེད་རྫོགས་ཟུང་འཇུག་གི་ལམ་ལ་སློབ་སྟེ། །སློབ་དཔོན་སངས་རྒྱས་ཡེ་ཤེས་ཞབས་ཀྱི་གྲོལ་བའི་ཐིག་ལེ་ལས། དེས་ན་ཟབ་གསལ་བྱང་ཆུབ་ནི། །གཉིས་མེད་རྟོགས་པས་དེ་གྲོལ་ལོ། །ཟབ་མོ་ཁོ་ན་རྟོགས་པས་མིན། །གསལ་བ་དག་ཀྱང་དེ་བཞིན་ནོ། །དེ་བཞིན་ཐལ་བྱུང་ཟབ་མོ་ཡིས། །གྲོལ་འདོད་དེ་ལ་ང་མ་དད། །དེ་བས་གཉིས་མེད་རང་བཞིན་དུ། །རྟོགས་པས་ཚེ་འདིར་གྲོལ་བར་ངེས། །རྣམ་པར་རྟོག་པ་ཀུན་བྲལ་བས། །བསམ་བརྗོད་ཡུལ་ལས་ཤིན་ཏུ་འདས། །མཁའ་བཞིན་དྲི་མེད་ཀུན་འབྱུང་བ། །རྟོག་བྲལ་ཟབ་མོ་ཉིད་ཅེས་བྱ། །ཕྱག་རྒྱ་ཆེན་པོའི་གཟུགས་འཆང་བ། སྒྱུ་མ་འཇའ་ཚོན་ལྟ་བུ་རུ། །རང་དང་གཞན་གྱི་རྒྱུད་སྦྱོང་བས། །ཡང་དག་གསལ་བ་ཞེས་བྱའོ། །ཞེས་སོ། །དེ་ལས་འདིར་ནི་ཕྱོགས་ཕྱི་མ་ལྟར་སྒྱུ་མ་ལྟ་བུའི་ལྷ་སྐུ་ཕྱག་རྒྱ་ཆེན་པོའི་ལུས་དང་། དོ་ཁོ་ན་ཉིད་ལ་ཞུགས་པའི་ཐུགས་གཉིས་དབྱེར་མེད་དུ་སྦྱོར་བའི་ཟབ་གསལ་གཉིས་སུ་མེད་པའི་ཡེ་ཤེས་རྫོགས་པ་ཆེན་པོའི་རྣལ་འབྱོར་གཙོ་བོར་སྟོན་ཏོ། །དེ་ཡང་ཀུན་མཁྱེན་གྱིས། བསྐྱེད་རིམ་སྣང་འདིའི་བདེན་ཞེན་འགོག་པ་སྟེ། །རྫོགས་རིམ་སྒྱུ་མར་ཞེན་པའི་རྟོགས་པ་སྤངས། །གང་ལ་སྣང་སྟོང་བདེན་ཞེན་མེད་པ་ན། །བསྐྱེད་རྫོགས་གཉིས་མེད་རང་བཞིན་དག་པ་ཡིན། །འདི་ནི་མཐར་ཐུག་རྡོ་རྗེའི་ཐེག་པ་སྟེ། །དབང་པོ་རྣོན་པོ་ཚེ་འདིར་རྫོགས་འཚང་རྒྱ། །ཞེས་གསུངས་པ་དང་མཐུན་ནོ། །དེ་ནས་དབང་གི་དུས་སུ་བླ་མའི་བྱིན་རླབས་དང་། རང་གི་མོས་གུས་ཀྱི་སྟོབས་ལ་བརྟེན་ནས་ཉམས་ཞེན་གྱི་སྤུ་རིས་དང་བྲལ་བའི་རིག་སྟོང་ཟང་ཐལ་རྗེན་པ་མངོན་སུམ་དུ་ངོ་འཕྲོད་པའི་གང་ཟག་གིས་བསྐྱེད་རྫོགས་ཟུང་འཇུག་འཆར་ཐུབ་པས་འདི་ལྟར། ཧཱུྃཿ ཁྲེགས་ཆོད་ཀ་དག་ནམ་མཁའི་ཀློང༵ཿ འགྱུ་བ་མི་དམིགས་རྒྱ་གྲམ་རླུངཿ ཞེས་སོགས་སྨོས་ཏེ། དུས་གསུམ་གྱི་རྟོག་པ་ཐད་ཀར་ཆོད་པའི་བཞི་ཆ་གསུམ་བྲལ་གྱི་ཡེ་ཤེས་འཁོར་འདས་ཀྱི་ཐ་སྙད་དང་བྲལ་བའི་ཀ་དག་ཆེན་པོ་སྟོང་གསལ་གོ་འབྱེད་པ་ནམ་མཁའ་དབྱིངས་ཀྱི་དབང་ཕྱུག་མའི་མཁའ་ཀློང་དུ། གཉིས་སྣང་གི་འགྱུ་བ་ཕྲ་མོའང་མི་དམིགས་པའི་རྡོ་རྗེ་ལྟ་བུའི་ཏིང་འཛིན་མཚན་འཛིན་གྱི་རྟོག་པ་འཇུག་པའི་སྐབས་མི་རྙེད་པའི་རྟེན་རིག་པ་དབྱིངས་སུ་བསྐྱོད་པའི་ཡེ་ཤེས་ཀྱི་རླུང་ཁ་དོག་ལྔ་བ་རྒྱ་གྲམ་གྱི་རྣམ་པར་སྣང་བ་དམ་ཚིག་སྒྲོལ་མའི་ངོ་བོར་གནས་པའི་གཞི་ལ། རྣམ་དག་དབྱིངས་ཀྱི་རྒྱ་མཚོ་ཡོན་ཏན་ཐམས་ཅད་སྡུད་པའི་ལས་ཅན་མ་མཱ་ཀིའི་རང་བཞིན་ཆུའི་དཀྱིལ་འཁོར་ཆེན་པོ་འཁྱིལ་བའི་དབུས་སུ། འབྲས་བུའི་ཆོས་ཐམས་ཅད་ཀྱི་རྟེན་དུ་གྱུར་པ་རང་བཞིན་གསལ་བའི་ཡེ་ཤེས་རེ་ཁ་ལྔ་པའི་ཐིག་ལེ་དང་ཐིག་ཕྲན་ས་ཁམས་རྣམ་པར་དག་པ་སངས་རྒྱས་སྤྱན་མའི་རང་བཞིན་གཉིས་སྣང་འཁོར་བའི་ཞེན་ཆགས་དང་བྲལ་བས་ཀེང་རུས་ཀྱི་རི་རབ་ཆེན་པོའི་ཁོར་ཡུག་ཏུ། མཚན་མའི་ཚང་ཚིང་ཐམས་ཅད་སྲེག་པར་བྱེད་པའི་མེ་ཁམས་གོས་དཀར་མོའི་རང་བཞིན་རྩིབས་ཤར་ཐད་དུ་ཡོད་པ་དང་། གྱེན་འགྲེང་དྲང་པོར་ཟུག་པ་དང་གུར་ཁྱིམ་ཟླུམ་པོར་འཁྱིལ་བ་སོགས་སྣ་ཚོགས་པའི་དབྱིབས་སུ་ཡོད་པའི་མེ་དཔུང་ཆེན་པོ་མདའ་མདུང་རྡོ་རྗེའི་ཚྭ་ཚྭ་ཕྱོགས་བཅུར་འཕྲོ་བ་འཇིག་དུས་ཀྱི་མེ་བཞིན་དུ་འབར་བའོ། །དེ་ལྟར་རྟེན་དབང་ཆེན་གྱི་དཀྱིལ་འཁོར་ཡུམ་ལྔའི་མཁའ་ཀློང་རྣམ་པར་དག་པའི་དབུས་སུ། རིག་པ་རྡོ་རྗེ་ལུ་གུ་རྒྱུད་ཀྱི་རང་གདངས་ཡེ་ཤེས་རིན་པོ་ཆེ་ལས་གྲུབ་པའི་གཞལ་ཡས་ཁང་། དབྱིངས་རིག་འདུ་འབྲལ་མེད་པའི་རྟགས་སུ་ཀ་གདུང་རྣམས་ལ་རྒྱན་གྱི་རྣམ་པ་དུ་མས་མཛེས་པ། ཡེ་ཤེས་ཀྱི་རང་འོད་རེ་ལྡེའི་རི་མོ་བཞིན་ཕན་ཚུན་འདྲེས་པའི་རྣམ་པ་ལ་ཉ་མིག་ལྟ་བུའི་ཐིག་ལེ་ཕྲ་མོའི་ཕྲ་ཚོམ་གྱིས་མཛེས་པའི་ཟ་ར་ཚགས་དང་ཆུན་འཕྱངས་སོགས་དཔྱང་བ། ལམ་སྣང་བ་བཞིའི་སྒོ་ནས་རིག་པ་ཡེ་ཤེས་ཀྱི་དཀྱིལ་འཁོར་ཆེན་པོར་འཇུག་པའི་རྟགས་སུ་སྒོ་བཞི། ཡེ་ཤེས་བཞི་དང་ལྡན་པའི་གྲུ་ཆད། ཐེག་པ་བརྒྱད་དང་རྣམ་ཐར་བརྒྱད་མཚོན་པའི་རྒྱུ་འབྲས་ཀྱི་རྟ་བབས་དང་ལྡན་པ། དེ་དག་ཐམས་ཅད་ཀྱང་དབྱིངས་རིག་དབྱེར་མེད་ཀྱི་རོལ་པ་ལས་ཤར་བ་ཙམ་ལས། དངོས་མཚན་བདེན་ཞེན་གྱི་ཆགས་པ་རྡུལ་ཙམ་ཡང་མེད་པས་སྣ་ཚོགས་པའི་པདྨ་འདབ་མ་མཐའ་ཡས་པའི་གེ་སར་གྱི་ལྟེ་བ་ལ་རྫོགས་པ། དེའི་ཕྱི་རོལ་དུ་རྣམ་པར་ཤེས་པའི་ཚོགས་བརྒྱད་རང་ཡུལ་ལ་ཞེན་པ་མེད་པའི་རྟགས་སུ་དུར་ཁྲོད་ཆེན་པོ་བརྒྱད་ཀྱིས་བསྐོར་བ། དེའི་ཕྱི་རོལ་དུ་འཁོར་འདས་ཀྱི་སྣང་བ་ཐམས་ཅད་ཆོས་ཀྱི་དབྱིངས་རྣམ་པར་དག་པའི་ངང་ལས་གཞན་དུ་འགྱུར་བ་མེད་པའི་བརྡར་རྡོ་རྗེའི་ར་བ་ཆེན་པོས་འཁོར་བ་ལ་རང་རྩལ་ཡེ་ཤེས་ཀྱི་སྣང་བ་འགག་མེད་དུ་འཆར་བས་ཐ་མལ་གྱི་རྟོག་པ་སྲེག་པར་བྱེད་པའི་འོད་ཁ་དོག་ལྔའི་རང་བཞིན་ཤིན་ཏུ་གསལ་ཞིང་རྣམ་པར་དག་པའི་ཡེ་ཤེས་ཀྱི་མེ་དཔུང་འཕྲོ་བའོ། །ཕོ་བྲང་གི་དབུས་ཕྱུར་བུར་ཡོད་པའི་སྟེང་དུ་རིན་པོ་ཆེའི་རྒྱ་ཕིབས་ནམ་མཁའི་མཐའ་ལ་སྙེགས་པ་ལྟ་བུའི་རྩེར་རིག་པའི་ཡེ་ཤེས་གཉིས་སྣང་གི་ཡུལ་ལས་འདས་པའི་བརྡར་ཐུགས་རྗེ་ཆེན་པོའི་གདུགས་ཡིད་བཞིན་རིན་པོ་ཆེ་འབར་བའི་ཏོག་གིས་སྤྲས་པས་མཚན་པ་ཅན་གྱི་ཆོས་ཀྱི་འཁོར་ལོ་བཅུ་གསུམ་དེ་བཞིན་གཤེགས་པའི་གཙུག་ཏོར་བཞིན་ཚད་ལྟར་མི་མངོན་པའི་ཏོག་གིས་མཛེས་པར་བརྒྱན་པའོ། །སྔགས་དོན་ནི། སྐུ་གསུང་ཐུགས་ཡེ་ཤེས་ཀྱི་འཁོར་ལོ་དཀྱིལ་ཆེན་པོར་སྣང་བའོ། །ཞེས་པའི་དོན་ཏོ། །དེ་ནས་བརྟེན་པ་ལྷ་བསྐྱེད་པ་ནི། ཧཱུྃཿཞེས་ཐུགས་རྡོ་རྗེའི་ཏིང་ངེ་འཛིན་ལས། གདོད་ནས་དག་པའི་ཕོ་བྲང་གི་དབུས་སུ་སྐྱེ་མེད་པདྨའི་གདན་ལ་འཁོར་འདས་ཀྱི་མཐར་མི་གནས་པའི་ཐབས་ཤེས་ཉི་ཟླའི་དཀྱིལ་འཁོར་གྱི་སྟེང་དུ། རིག་པའི་ཡེ་ཤེས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཧཱུཾ་ཡིག་གིས་མཚན་པ་ཅན་སྤྲོ་བསྡུའི་རྣམ་པས་ཡོངས་སུ་གྱུར་པ་ལས། རྒྱལ་བ་ཐམས་ཅད་ཀྱི་གསང་བ་བསམ་གྱིས་མི་ཁྱབ་པ་གཅིག་ཏུ་འདུས་པའི་བདག་པོ་རྡོ་རྗེ་འཛིན་པ་པདྨ་འབྱུང་གནས་སྐུ་མདོག་མཐིང་ཁ་ཞལ་གཅིག་ཕྱག་གཉིས་པ་གཡས་རྡོ་རྗེ་རྩེ་ལྔ་ནམ་མཁར་འཕྱར་ཞིང་གཡོན་སྡིགས་མཛུབ་དང་བཅས་པས་དྲིལ་བུ་འཛིན་པས་ཡུམ་ལ་འཁྱུད་པ་ཞབས་གཡས་ཅུང་ཟད་བསྐུམ་ཞིང་གཡོན་བརྐྱང་བའི་འདོར་ཐབས་སུ་འགྱིང་སྟེ་བཞེངས་པའི་སྐུ་ལ་རུས་པའི་འཁོར་ལོ་དང་། མགུལ་ཆུན་དང་། རྣ་ཆ་དང་། གདུ་བུ་དང་། སྐ་རགས་དང་། སེ་རལ་ཁ་ལ་ཐལ་ཆེན་གྱི་ཚོམ་བུ་བཀོད་པ་དང་བཅས་ཏེ་ཕྱག་རྒྱ་དྲུག་གིས་བརྒྱན་པ། ཞལ་ཁྲོ་འཛུམ་གྱི་ཉམས་དང་ལྡན་ཞིང་སྐུ་གསུམ་ལྷུན་གྱིས་གྲུབ་པའི་སྤྱན་གསུམ་མངའ་བ། མཉེན་ལྕུག་འཁྲིལ་ལྡེམ་གཞོན་ཚུལ་སྟེ་ལྷག་མཐོང་གི་ཉམས་ལྔ་དང་། གསལ་འཚེར་ལྷུན་སྡུག་གཟི་བྱིན་ལྡན་པ་སྟེ་ཞི་གནས་ཀྱི་ཉམས་བཞི་སྟེ་ཚུལ་དགུ་དང་ལྡན་པ་སྟོང་ཉིད་དབྱིངས་ཀྱི་ཕྱག་རྒྱ་ཆེན་མོ་བདེ་ཆེན་ཡེ་ཤེས་བསྐྱེད་པའི་ཕོ་ཉར་སྣང་བ་ལྷན་སྐྱེས་ཀྱི་མཚོ་རྒྱལ་མ་དཀར་མོ་གྲི་ཐོད་འཛིན་པ་དང་འཁྲིལ་སྦྱོར་དུ་རོལ་བ་ལས་ཡས་བབས་ཀྱི་དགའ་བ་བཅུ་དྲུག་གི་ཐ་མ་ལས་སྐྱེས་པའི་བདེ་བ་ཆེན་པོའི་ཡེ་ཤེས་ཀྱིས་གཉུག་མ་ལྷན་གཅིག་སྐྱེས་པའི་སྟོང་ཉིད་མངོན་སུམ་དུ་རྟོགས་པའི་ལོངས་སྤྱོད་ཆེན་པོར་ཡོངས་སུ་རྫོགས་པའི་ཉམས་བརྒྱ་ཕྲག་དུ་མར་འབར་བའི་ལྷ་སྐུ་ཕྱག་རྒྱ་ཆེན་པོའི་རང་བཞིན་དུ་གསལ་ལོ། །དེ་ལྟར་གསལ་བའི་འཁོར་ལོ་ལྔའི་གནས་སུ་རིམ་བཞིན་ཆོས་སྐུ། ལོངས་སྐུ། སྤྲུལ་སྐུ། ཡང་སྤྲུལ། ཉིང་སྤྲུལ་གྱི་རྣམ་པ་ཅན་གྱི་ལྷ། ཀུན་བཟང་རྡོར་སེམས་དགའ་རབ་ཤྲཱི་སེང་རང་གི་རྩ་བའི་བླ་མ་རྣམས་ཡུམ་དང་བཅས་པ་གསལ་གདབ་སྟེ། དེ་དག་གི་རྣམ་འགྱུར་དང་ཆ་ལུགས་ནི་ཕལ་ཆེར་གཞུང་ལས་གསལ་བ་ལྟར་ལ། རྩ་བའི་བླ་མ་ཡང་ཨོ་རྒྱན་སྤྲུལ་སྐུ་ཧེ་རུ་ཀའི་ཆ་བྱད་ཅན་ཡིན་པར་མངོན་ཞིང་ཕྱག་མཚན་ལ་གསལ་ཁ་མི་འདུག་ཀྱང་རྡོ་རྗེ་དང་བྷན་ངྷའམ། ཐོད་རྔ་དང་དྲིལ་བུ་བསྣམས་པ་གང་བྱས་ཀྱང་འགལ་བ་མེད་པ་འདྲ། དེ་དག་གི་འཁོར་ཡང་ཆོས་སྐུ་ལ་རྒྱལ་བ་དགོངས་བརྒྱུད། ལོངས་སྐུ་ལ་སེམས་དཔའ་རིག་བརྒྱུད་སྤྲུལ་སྐུ་ལ་རྣལ་འབྱོར་རྣ་བར་བརྒྱུད་པ་ནས་བརྩམས་སྟེ་རྩ་བའི་བླ་མའི་བར་དུ་བཀའ་བརྒྱུད་ཀྱི་བླ་མ་ཐམས་ཅད་སྤྲིན་ཕུང་འཁྲིགས་པ་ལྟར་བསྒོམ་ཞིང་སྤྲུལ་སྐུའི་འཁོར་ཐམས་ཅད་ཧེ་རུ་ཀའི་ཆས་ཅན་བདེ་བ་ཆེན་པོའི་གར་སྟབས་ཅིར་ཡང་བསྒྱུར་བའོ། །དེ་དག་ཀྱང་ཤེལ་བུམ་གྱི་ནང་དུ་རིན་པོ་ཆེ་སྣ་ཚོགས་ཀྱི་ཕྲེང་བ་བརྒྱུས་པ་ལྟར་ཕྱི་ནང་ཟང་ཐལ་དུ་གསལ་ཞིང་ཐོགས་རེག་དང་དངོས་པོའི་སྣང་ཞེན་བྲལ་བ་དོག་པའི་རྣམ་པ་མེད་པར་ཡངས་ཆ་དང་བཅས་པར་བཞུགས་པའོ། །སྐབས་འདིར་རྩ་བའི་བླ་མ་གསང་བར་བསྒོམ་རུང་མིན་ཟེར་བ་ནི། སྤྱིར་སྔགས་ཀྱི་ལྟ་བ་སྣང་སྲིད་དག་མཉམ་ཆེན་པོར་གཏན་ལ་འབེབས་པའི་དོན་ལ་བློ་མ་ཕྱོགས་པ་དང་། ཁྱད་པར་འདིར་རྡོ་རྗེ་ཕུང་པོའི་གྲོང་ཁྱེར་གནས་ཡུལ་གྱི་བཀོད་པ་རྫོགས་པའི་དཀྱིལ་འཁོར་དུ། ཕུང་ལྔ་དུག་ལྔ་རྣམ་ཤེས་ཀྱི་ཚོགས་དང་བཅས་པ་རྣམས། སྐུ་ལྔ་ཡེ་ཤེས་ལྔའི་ངོ་བོར་སྦྱོང་བའི་ཕྱིར་བླ་མ་གསང་བ་འདུས་པའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཕྱག་རྒྱ་ཕྱི་ལྟར་བླ་མའི་རྣལ་འབྱོར། ནང་ལྟར་བསྐྱེད་རིམ་གྱི་ཕྲ་མོའི་ལྷ་སྐུ། གསང་བ་ལྟར་རྫོགས་རིམ་སྒྱུ་མའི་ལྷ་སྐུ། ཡང་གསང་ལྟར་ཟུང་འཇུག་ཆེན་པོའི་ལྷར་ཤར་བའི་རྣལ་འབྱོར་ལ་ངེས་པ་མ་རྙེད་པའི་ཀུ་ཅོ་འདོན་པ་ཡིན་ཏེ། ལྟ་བའི་ཀློང་བཤགས་ལས། ཀུན་ཏུ་བཟང་པོ་བཟང་ངན་མེད་པ་ལ། །གཙང་དང་དམེ་བར་ལྟ་བ་ཐང་རེ་ཆད། །བཟང་ངན་གཉིས་སུ་འཛིན་པ་ཉོན་རེ་མོངས། །ཞེས་དང་། ཡུམ་གྱི་མཁའ་ལ་མཐོ་དམན་མེད་པ་ལ། །སྟེང་དང་འོག་ཏུ་ལྟ་བ་ཐང་རེ་ཆད། །མཐོ་དམན་གཉིས་སུ་འཛིན་པ་ཉོན་རེ་མོངས། །ཞེས་གསུངས་པ་ལྟར་སྙིང་རྗེའི་ཡུལ་དུ་གྱུར་པའོ། །གཙོ་བོའི་ཕྱོགས་བཞིར་འཁོར་ལོ་རྩིབས་བཞི་ལ་རྟ་མགྲིན་རིགས་བཞི་ཕག་མོ་ཡུམ་བཞི་དང་སྦྱོར་བ་དུར་ཁྲོད་རོལ་བའི་ཆས་ཅན་རང་རྟགས་ཀྱི་ཕྱག་རྒྱ་འབར་བ་ཅན་ནོ། །སྒོ་བཞིར་རིགས་བཞིའི་མཁའ་འགྲོ་ལས་མདོག་ཅན་གྲི་ཐོད་གར་གྱི་ཕྱག་རྒྱ་ཅན་ཏེ་རྩ་བའི་ལྷ་ཡབ་ཡུམ་བཅུ་བཞི་ཡན་ལག་གི་ལྷ་ཡབ་ཡུམ་བཅུ་སྟེ་ཉེར་བཞི་ནི་ཕོ་བྲང་གཙོ་བོའི་ལྷའོ། །གཞན་ཡང་གནས་ཡུལ་གྱི་དཔའ་བོ་དང་རྣལ་འབྱོར་མ་རྣམས་དང་རིག་པ་འཛིན་པའི་ཚོགས་བསམ་གྱིས་མི་ཁྱབ་པ་རྣམས་ཀྱིས་བར་ཁྱམས་དང་ཕྱི་འཁོར་གྱི་པདྨའི་ཟེ་ཕོལ་དུར་ཁྲོད་དང་བཅས་པ་ཁྱབ་ནས་བཞུགས་སོ། །གཙོ་འཁོར་ཐམས་ཅད་ཀྱི་གནས་གསུམ་དུ་རྡོ་རྗེ་གསུམ་གྱི་ཡི་གེ་གསལ་བ་ལས་འོད་ཟེར་མཁའ་ཁྱབ་ཏུ་སྤྲོས་ནས་རང་བཞིན་གྱི་གནས་དང་དུར་ཁྲོད་ཆེན་པོ་བརྒྱད་ལ་སོགས་པ་ནས་གུ་རུ་རྩ་བ་གསུམ་གྱི་ལྷ་ཚོགས་ཐམས་ཅད་ཉི་ཟེར་ལ་རྡུལ་འཁྲིགས་པ་ལྟར་སྤྱན་དྲངས་ནས་དམ་ཡེ་དབྱེར་མེད་དུ་བསྲེས་ཏེ་ཕྱག་དང་མཆོད་པ་བསྟོད་པའི་རིམ་པ་རྣམས་གཞུང་ལས་འབྱུང་བ་བཞིན་བྱའོ། །དེ་ལ་སྤྱན་འདྲེན་དང་བཞུགས་གསོལ་ནི་གདོད་ནས་དམ་ཡེ་དབྱེར་མེད་ཀྱི་ངེས་པ་བརྟན་པོ་ཡོད་ན་ཆེད་དུ་མ་བྱས་ཀྱང་རུང་མོད། འོན་ཀྱང་ལྷ་དང་རང་རྒྱུད་ཐ་དད་དུ་ལྟ་བ་ཡོད་ན་དེ་གཞོམ་པའི་ཆེད་དུ་ཡིན་པས་དམ་ཡེ་དབྱེར་མེད་ཀྱི་ངེས་ཤེས་བརྟན་པོར་བྱེད་པ་གནད་ཀྱི་དོན་ཏོ། །ཕྱག་མཆོད་བསྟོད་པ་གསུམ་ཀ་ཡང་མཆོད་པའི་རྣམ་གྲངས་ཡིན་ལ། མཆོད་པ་བྱེད་པའི་ཚུལ་ལ་ཡང་རང་གི་ཐུགས་ཀ་ནས་སྤྲུལ་པའི་ལྷ་མོ་བསམ་གྱིས་མི་ཁྱབ་པ་བྱུང་ནས། དེ་དག་གིས་ཕྱི་ནང་གསང་བའི་མཆོད་པའི་སྤྲིན་ཆེན་པོ་སྤྲོས་ཏེ་རང་ལ་མཆོད་པས་མཉེས་པར་བྱེད་པ་འཕྲུལ་དགའི་ལྷ་རྣམས་ཀྱིས་འདོད་ཡོན་ལ་ལོངས་སྤྱོད་པའི་ཚུལ་ལྟ་བུ་དང་། ཕྱོགས་བཅུའི་འཇིག་རྟེན་ན་ཡོད་པའི་འདོད་ཡོན་ཐམས་ཅད་གཟུགས་རྡོ་རྗེ་མ་ལ་སོགས་པའི་ཕྱི་ནང་གསང་བའི་ལྷ་མོའི་རང་བཞིན་དུ་འཕྲུལ་པ་རྣམས་ཀྱིས་རང་རང་གི་བྱེད་ལས་དང་མཐུན་པའི་སྒོ་ནས་མཆོད་པའི་ཕྱག་རྒྱ་ཆེན་པོའི་ཏིང་ངེ་འཛིན་སྒོ་མཐའ་ཡས་པར་བཀོད་པ་རྣམས་ལ་ཐབས་མཁས་པའི་ཁྱད་པར་གྱིས་མཆོད་པས་བདེ་སྟོང་གི་ཡེ་ཤེས་མངོན་དུ་བྱེད་པ་ལྷ་ལ་ལྷ་རོལ་བ་དཔེར་ན་བུང་བས་མེ་ཏོག་གི་བཅུད་ལ་རོལ་བ་ལྟ་བུ་དང་། གཙོ་བོའི་ཐུགས་ཀ་ནས་རང་གི་རྣམ་སྨིན་གྱི་ཆ་འཛིན་པའི་ཧེ་རུ་ཀ་ཞིག་རྒྱངས་ཀྱིས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ་ཕྱག་ཚང་བྱེད་པའི་ཚུལ་གྱིས་མཆོད་པའི་སྤྲིན་སྤྲོས་པས་མཉེས་པར་བྱེད་པ་གསུམ་ལས་རང་བློར་གང་འཚམས་བྱེད་པ་ལས་ཁྱད་མེད་ཅིང་། དེ་དག་གང་ཡིན་ཀྱང་ཀུན་རྫོབ་ཏུ་སྒྱུ་མ་ལྟ་བུའི་ཏིང་ངེ་འཛིན་གྱིས་མཆོད་པ་དང་རོལ་བའི་བྱ་བ་བྱེད་ཅིང་། དོན་དམ་པར་བྱ་བྱེད་ལས་གསུམ་བདེ་སྟོང་གཉིས་སུ་མེད་པའི་ཡེ་ཤེས་ཀྱི་ངོ་བོར་གཅིག་ཏུ་རྟོགས་པས་ཡེ་ཤེས་ལ་ཡེ་ཤེས་ཐིམ་པ་ཆུ་ལ་ཆུ་བཞག་པ་བཞིན་བྱ་བ་ནི་བསོད་ནམས་དང་ཡེ་ཤེས་ཀྱི་ཚོགས་ཟུང་འདྲེལ་དུ་རྫོགས་པར་བྱེད་པའོ། །བསྟོད་པའང་དེ་ལྟར་ལས། ཁྱད་པར་དུ་ནམ་མཁའི་དབྱིངས་ལས་བསྟོད་པའི་གླུ་དབྱངས་རང་གྲག་ཏུ་བྱུང་བ་དང་། འཁོར་རྣམས་ཀྱིས་གཙོ་བོ་ལ་བསྟོད་ཅིང་། གཙོ་བོས་འཁོར་རྣམས་ལ་བསྔགས་པ་བརྗོད་པ་དང་། རྡོ་རྗེའི་ལྷ་མོ་རྣམས་ཀྱིས་གྲོགས་དང་སྦྱར་ཏེ་བསྟོད་པའི་ཚུལ་ཇི་ལྟར་བྱས་ཀྱང་འགལ་བ་མེད་དོ། །བསྟོད་པའི་ཚིག་དོན་གཞན་ནི་གོ་སླ་བས་མ་བྲིས་སོ། །དགའ་རབ་རྡོ་རྗེ་ལ་བསྟོད་པར། རྒྱ་མཚོའི་གླིང་ནས་ཡབ་མེད་སྤྲུལ་སྐུར་བལྟམས། །ཞེས་པ་ལ་རྒྱ་མཚོའི་གླིང་ནི་ནུབ་ཕྱོགས་ཨོ་རྒྱན་གྱི་ཡུལ་ཐོར་ཅོག་དགུ་ལྡན་གྱི་ཕོ་བྲང་ན་རྒྱལ་པོ་ཨུ་པ་རཱ་ཛ་དང་། བཙུན་མོ་འོད་ལྡན་མ་གཉིས་ལ་སྲས་མོ་སུ་ངྷརྨ་ཞེས་བྱ་བ་ཞིག་ཡོད་པ་རབ་ཏུ་བྱུང་ནས་དགེ་སློང་མར་གྱུར་པ་རྒྱ་མཚོ་ཞིག་གི་གླིང་དུ་དཀའ་ཐུབ་ལ་བཞུགས་པའི་དུས་སུ་རྨི་ལམ་ན་ཤེལ་གྱི་མི་དཀར་པོ་ཞིག་གིས་རིན་པོ་ཆེའི་བུམ་པ་ཞིག་སྤྱི་བོར་བཞག་པ་རྨིས་ཏེ། དེའི་ཟླ་བ་བཅུ་ན་ཁྱེའུ་ཞིག་བཙས་པ་ལས། ཡུམ་གྱིས་ཕ་མེད་པའི་བུ་ནི་མི་རུང་ངོ་སྙམ་ཏེ་ཐལ་དོང་དུ་སྦས་པ་ལ། མཁའ་འགྲོ་མ་དང་ལྷ་ཀླུ་དུ་མས་མཆོད་པ་བྱེད་པ་མཐོང་ནས་སྤྲུལ་པའི་སྐུ་ཡིན་པར་ཡིད་ཆེས་ཏེ་མཚན་དུ་རོ་ལང་བདེ་བ་གསོལ་ནས་བཤགས་པ་ཕུལ། བསྙེན་བསྐུར་མཛད་དེ་བསྐྱེད་པས་ལོ་བདུན་ན་མཁས་པའི་གྲགས་པ་ཐོབ་སྟེ་སྔགས་དང་མཚན་ཉིད་ཀྱི་པཎྜི་ཏ་ཐམས་ཅད་ཟིལ་གྱིས་མནན། དེའི་ཚེ་ན་རྒྱལ་པོ་དགྱེས་ནས་དགའ་རབ་རྡོ་རྗེ་དང་། མཁས་པ་རྣམས་ཀྱིས་དཔལ་ལྡན་ཤེས་རབ་འོད་དུ་མཚན་གསོལ། དེའི་ཕྱིར་དེ་ལྟར་བཤད་པ་ཡིན་གྱི་རྫུས་སྐྱེས་སུ་འཁྲུལ་བར་མི་བྱའོ། །བསྟོད་པ་ནི་མཆོད་པའི་བྱེ་བྲག་ཡིན་པར་མ་ཟད་བསྐྱེད་རིམ་གྱི་དག་དྲན་དང་ང་རྒྱལ་བརྟན་པའི་གསལ་འདེབས་ཀྱང་ཡིན་པའི་ཕྱིར་དེའི་རྗེས་སུ་ལྷའི་གསལ་སྣང་དང་ང་རྒྱལ་ལ་གཙོ་བོར་བསླབ་པར་བྱའོ། །ང་རྒྱལ་འཛིན་པའང་ང་ལྷ་དེ་ཡིན་ནོ་སྙམ་པའི་ཤེས་པ་ཉི་ཚེ་བ་ཙམ་མིན་པར་གྲུབ་མཐའ་འཁོར་འདས་དབྱེར་མེད་ཀྱི་ངེས་པ་གཏིང་ནས་དྲངས་པའི་ཤུགས་ཀྱིས་གཞི་འབྲས་སྦྲེལ་བའི་དག་དྲན་དང་ང་རྒྱལ་གསལ་སྣང་གསུམ་ལ་རྩེ་གཅིག་ཏུ་དྲིལ་བས་ཐ་མལ་གྱི་རྟོག་པ་རང་ཡལ་དུ་འགྲོ་བ་ཞིག་དགོས། དེ་ཡང་སྡེར་བཟོ་དང་འཇའ་ཚོན་ལྟ་བུའི་བེམ་པོའི་རྣམ་པར་མ་སོང་བར། སྟོབས་བཅུ་མི་འཇིགས་བཞི་སོགས་ཆོས་སྐུའི་ཡོན་ཏན། མཚན་དང་དཔེ་བྱད་ལ་སོགས་གཟུགས་སྐུའི་ཡོན་ཏན། བདེ་སྟོང་རྣམ་པར་མི་རྟོག་པ་སོགས་ཡེ་ཤེས་ཆེན་པོའི་རོ་ཉམས་དང་ལྡན་ཞིང་། དབང་པོའི་མངོན་ཤེས་དང་། རྫུ་འཕྲུལ་གྱི་ཆོ་འཕྲུལ་ཅིར་ཡང་འཆར་བས་སངས་རྒྱས་མངོན་དུ་བྱོན་པ་ལྟ་བུའི་བློ་འཆར་བ་ལ་བསླབ་པར་བྱ་དགོས་སོ། །དེ་ཡང་ལམ་གྱི་དངོས་གཞི་ནི་ལྟ་བ་ཏིང་ངེ་འཛིན་གཉིས་ཁོ་ན་གཙོ་བོ་ཡིན་པས་ཐོག་མ་ཉིད་ནས་བཟླས་པ་དང་ཆོ་ག་བསྐྱར་བ་སོགས་གཙོ་བོར་མི་བྱ་བར་ཟབ་གསལ་གཉིས་མེད་ཀྱི་རྣལ་འབྱོར་ཁོ་ན་ལ་ཐུན་གྱི་དངོས་གཞི་བྱའོ། །དེ་ལ་བསྐྱེད་རིམ་གྱིས་མཚོན་པའི་ཏིང་ངེ་འཛིན་གང་ལའང་སྐྱོན་བསལ་ཞིང་གསལ་སྣང་འདོན་ལུགས་གཙོ་ཆེ་བས་འདིར་དེ་ཕྱོགས་ཙམ་ཞིག་བརྗོད་པར་བྱའོ། །དེ་ལ་དཔལ་མགོན་ཀླུ་སྒྲུབ་ཞབས་ཀྱིས། རྒོད་དང་འགྱོད་དང་གནོད་སེམས་རྨུགས་པ་དང་། །གཉིད་དང་འདོད་ལ་འདུན་དང་ཐེ་ཚོམ་སྟེ། །སྒྲིབ་པ་ལྔ་པོ་འདི་དག་དགེ་བའི་ནོར། །འཕྲོག་པའི་ཆོམ་རྐུན་ལགས་པར་མཁྱེན་པར་མཛོད། །ཅེས་གསུངས་པས། སྒྲིབ་པ་ལྔ་པོ་དེ་དག་ཡོད་ན་ཏིང་ངེ་འཛིན་གང་ཡང་མི་འགྲུབ་པས་དེ་དག་གི་གཉེན་པོར། རྒོད་འགྱོད་གཉིས་ལ་ནི་འདུས་བྱས་མི་རྟག་པ་དང་། བྱས་པ་ཐམས་ཅད་དོན་མེད་པ་སོགས་སྐྱོ་བའི་སེམས་དང་། གཉིད་རྨུགས་གཉིས་ལ་ནི་སྣང་བའི་འདུ་ཤེས་དང་ཏིང་ངེ་འཛིན་གྱི་ཕན་ཡོན་དང་། ལྷར་སྣང་དྲན་པ་སོགས་དང་། འདོད་པ་ལ་འདུན་པ་བྱུང་ན་ཡུལ་གྱི་ཉེས་དམིགས་དང་། བདེན་མེད་དུ་སྦྱོང་བ་སོགས་དང་། ཐེ་ཚོམ་ལ་ནི་གདམ་ངག་དྲན་པ་དང་། ལམ་ལ་ངེས་ཤེས་འབྲས་བུ་ལ་བྲོད་པ་བསྐྱེད་པ་སོགས་ཀྱི་སྒོ་ནས་སྒྲིབ་པ་དེ་དག་དང་བྲལ་བར་བྱས་ཏེ་སེམས་གསལ་དྭངས་ཕྱེད་པའི་ངང་ནས་བསྒོམ་པར་བྱའོ། །དེ་ཡང་དང་པོ་རང་ཉིད་གཙོ་བོའི་རྣམ་པར་གསལ་བའི་ཞབས་ཀྱི་གདན་ཁྲི་ནས་དབུའི་གཙུག་ཏོར་མན་ཆད་ཀྱི་རྣམ་པ་དེ་ལ་སེམས་བཞག་སྟེ་སེམས་གནས་པའི་ཐབས་དགུས་ཞི་གནས་སྒྲུབ་པར་བྱའོ། །སེམས་གནས་པའི་ཐབས་དགུ་ནི། ཡུམ་བར་མ་ལས། སེམས་འཇོག་པར་བྱེད། རྒྱུན་དུ་འཇོག་པར་བྱེད། བསླན་ཏེ་འཇོག་པར་བྱེད། ཉེ་བར་འཇོག་པར་བྱེད། དུལ་བར་བྱེད། ཞི་བར་བྱེད། རྣམ་པར་ཞི་བར་བྱེད། རྩེ་གཅིག་ཏུ་བྱེད། མཉམ་པར་འཇོག་པར་བྱེད་དོ། །ཞེས་གསུངས་ཏེ། དེ་ལ་སེམས་འཇོག་པ་ནི་ལྷ་སྐུ་ཞལ་ཕྱག་རྒྱན་དང་བཅས་པའི་རྣམ་པ་བློ་ཡུལ་དུ་ཝལ་ལེ་གསལ་བ་ལ་སེམས་རྩེ་གཅིག་ཏུ་གཏད་པའོ། །རྒྱུན་དུ་འཇོག་པ་ནི་དམིགས་པ་དེ་ཉིད་ལས་སེམས་གཞན་དུ་མི་གཡེངས་བར་དེའི་རྒྱུན་མཐུད་དེ་འཇོག་པའོ། །བསླན་ཏེ་འཇོག་པ་ནི་དེ་ལྟར་བཞག་པ་ལས་སེམས་གཞན་དུ་འཕྲོ་ན་དེ་མ་ཐག་ཤེས་པར་བྱས་ནས་རྣམ་རྟོག་འོག་འགྱུར་མི་གཏོང་བར་སྔར་གྱི་དམིགས་པ་དེ་ཉིད་ལ་ཧྲིལ་གྱིས་འཇོག་པའོ། །ཉེ་བར་འཇོག་པ་ནི་དེ་ལྟར་རྣམ་གཡེང་ཞི་བར་བྱས་ནས་དམིགས་པ་ཤིན་ཏུ་གསལ་བ་ལ་ཡིད་རྩེ་གཅིག་ཏུ་བསྡུས་ནས་གོང་ནས་གོང་དུ་གཏོང་བར་བྱེད་པའོ། །དུལ་བར་བྱེད་པ་ནི་སེམས་ཞུམ་པ་སོགས་ཀྱིས་ཏིང་ངེ་འཛིན་ལ་མི་མོས་པར་འགྱུར་བ་དེའི་ཚེ་ཏིང་ངེ་འཛིན་གྱི་ཡོན་ཏན་སྤྱན་དང་མངོན་ཤེས་རྫུ་འཕྲུལ་སོགས་གནས་སྐབས་དང་མཐར་ཐུག་གི་འབྲས་བུ་ལ་བྲོད་པ་བསྐྱེད་དེ་དམིགས་པ་ལ་སེམས་འཇོག་པའོ། །ཞི་བར་བྱེད་པ་ནི་འདོད་པའི་དངོས་པོ་ཡིད་དུ་འོང་བའི་གཟུགས་སྒྲ་སོགས་དང་སྔོན་རྩེས་པ་དང་། བགད་པ་དང་། དགའ་མགུར་སྤྱད་པ་རྗེས་སུ་དྲན་པ་སོགས་ཀྱིས་སེམས་རྒོད་པར་གྱུར་ནས་དམིགས་པ་ལ་སེམས་མི་འཇུག་ན་རྣམ་གཡེང་གི་ཉེས་དམིགས་ཤེས་པ་དང་། འདུས་བྱས་ཀྱི་མཚན་ཉིད་དྲན་པའི་སྒོ་ནས་རྒོད་པ་ཞི་བར་བྱེད་པའོ། །རྣམ་པར་ཞི་བར་བྱེད་པ་ནི་དེ་ལས་གཞན་པའི་གཉིད་རྨུགས་དང་བརྣབ་སེམས་ཡིད་ཀྱི་བདེ་བ་སོགས་བྱུང་ན་གཉེན་པོས་བསལ་ནས་སྔར་ལྟར་འཇོག་པའོ། །རྩེ་གཅིག་ཏུ་བྱེད་པ་ནི་དེ་ལྟར་འབད་པ་དུ་མས་སེམས་གནས་པ་བསྒྲུབ་པས་དམིགས་པ་དེ་ལས་གཞན་དུ་མི་འགྲོ་བར་རྩེ་གཅིག་ཏུ་རང་གི་ངང་གིས་འཇུག་པ་ཐོབ་པའོ། །མཉམ་པར་འཇོག་པར་བྱེད་པ་ནི། །བྱིང་རྒོད་དང་བྲལ་ཏེ་སེམས་མཉམ་པ་ཉིད་ཐོབ་པ་དེའི་ཚེ་རྩོལ་བ་གློད་ནས་བཏང་སྙོམས་སུ་འཇོག་པ་ཡིན་ནོ། །དེ་ལས་སེམས་གནས་དགུ་པ་འདི་གྲུབ་པ་དེ་ནི་འདོད་སེམས་རྩེ་གཅིག་པ་ཡིན་ལ་དེའི་སྟེང་དུ་ལུས་སེམས་ཤིན་སྦྱང་གི་བདེ་བ་སྐྱེད་པར་གྱུར་པ་ན་བསམ་གཏན་དང་པོའི་ཉེར་བསྡོག་གིས་བསྡུས་པའི་ཞི་གནས་མཚན་ཉིད་པ་ཐོབ་པར་འཇོག་གོ། །དེ་ལྟ་བུའི་སེམས་གནས་བསྒྲུབ་པ་ལ། ཏིང་ངེ་འཛིན་ཐམས་ཅད་ལ་གེགས་བྱེད་པའི་ཉེས་པ་ལྔ་ཡོད་པ་དེ་དག་གི་གཉེན་པོར་སྤོང་བའི་འདུ་བྱེད་བརྒྱད་བསྟེན་པར་བྱེད་དགོས་ཏེ། དབུས་མཐའ་ལས། ཉེས་པ་ལྔ་སྤོང་འདུ་བྱེད་བརྒྱད། །བརྟེན་པའི་རྒྱུ་ལས་བྱུང་བའོ། །ལེ་ལོ་དང་ནི་གདམ་ངག་རྣམས། །བརྗེད་དང་བྱིང་དང་རྒོད་པ་དང་། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །གནས་དང་དེ་ལ་གནས་པ་དང་། །རྒྱུ་དང་འབྲས་བུ་ཉིད་དུའོ། །དམིགས་པ་བརྗེད་པར་མ་གྱུར་དང་། །བྱིང་དང་རྒོད་པ་རྟོག་པ་དང་། །དེ་སྤོང་མངོན་པར་འདུ་བྱེད་དང་། །ཞི་ཚེ་རྣལ་དུ་གནས་པའོ། །ཞེས་པ་ལྟར་རོ། །དེ་ལ་ཉེས་པ་ལྔ་ནི། ལེ་ལོ་དང་། གདམ་ངག་བརྗེད་པ་དང་། བྱིང་བ་དང་རྒོད་པ་གཉིས་དང་། མི་རྩོལ་བ་དང་། རྩོལ་བའོ། །དེ་དག་གི་གཉེན་པོར་སྤོང་བའི་འདུ་བྱེད་བརྒྱད་ལས། རིམ་པ་བཞིན། སྦྱོར་བའི་ཚེ་ན་ལེ་ལོ་ཉེས་པ་ཡིན་ལ་དེའི་གཉེན་པོར་གནས་ཏེ་ཏིང་ངེ་འཛིན་གྱི་རྟེན་དུ་གྱུར་པ་བརྩོན་འགྲུས་ཡིན་ཞིང་དེ་ལ་གནས་པར་བྱེད་པ་འདུན་པ་དང་དེའི་རྒྱུ་དད་པ་དང་། བརྩོན་འགྲུས་ཀྱི་འབྲས་བུ་ཤིན་སྦྱངས་ཏེ་བཞི་ཡིན་ནོ། །དེ་ལ་དང་པོར་ཏིང་ངེ་འཛིན་གྱི་ཡོན་ཏན་ལ་མངོན་པར་ཡིད་ཆེས་པའི་དད་པ་ལུང་དང་རིགས་པ་གཏམ་རྒྱུད་སོགས་ཀྱིས་རྒྱུད་ལ་བསྐྱེད་པར་བྱའོ། །དད་པ་སྐྱེས་པར་གྱུར་ན། དེ་དོན་དུ་གཉེར་བའི་འདུན་པ་དྲག་པོ་སྐྱེ་བར་འགྱུར་རོ། །འདུན་པ་ཡོད་ན་ཏིང་ངེ་འཛིན་བསྒོམ་པ་ལ་མྱུར་དུ་འཇུག་ཅིང་དེ་ལ་དཀའ་འཚེར་གྱི་སྣང་བ་མེད་པར་སྤྲོ་བའི་ཤུགས་ཀྱིས་བརྩོན་འགྲུས་བརྩོམ་མོ། །བརྩོན་འགྲུས་དང་ལྡན་པ་དེས་ལུས་ལྕི་བ་དང་སེམས་ལས་སུ་མི་རུང་བ་སོགས་ཀྱི་གནས་ངན་ལེན་དང་བྲལ་ནས་དམིགས་པ་ལ་ཇི་ལྟར་འདོད་པར་བཀོལ་དུ་བཏུབས་པའི་ཤིན་སྦྱངས་ཐོབ་སྟེ་ལེ་ལོ་ཆོམ་ལ་འབེབས་པར་བྱེད་དོ། །དེ་ནས་ཏིང་ངེ་འཛིན་ལ་འཇུག་པའི་གནས་སྐབས་ན་དམིགས་པ་བརྗེད་པ་ཉེས་པ་ཡིན་ཏེ་དེའི་གཉེན་པོར་རྩ་བའི་དམིགས་རྣམ་གང་ཡིན་པ་དང་དེ་ཇི་ལྟར་སྐྱོང་བའི་གདམ་ངག་དྲན་པས་བཟུང་སྟེ་མི་བརྗེད་པར་བྱེད་པའོ། །མཉམ་པར་བཞག་ནས་ཡོད་པའི་གནས་སྐབས་ན་བྱིང་རྒོད་ཞུགས་པ་ངོས་མ་ཟིན་པ་ཉེས་པ་ཡིན་ཏེ། དེའི་གཉེན་པོར་ཤེས་བཞིན་གྱི་བྱ་རས་རྟག་ཏུ་མེལ་ཚེ་བྱས་ནས་བྱིང་རྒོད་སྐྱེ་བར་ཕྱོགས་པ་དང་ངོས་བཟུང་སྟེ་འགོག་པར་བྱེད་པའོ། །བྱིང་རྒོད་གང་རུང་སྐྱེས་པར་གྱུར་པའི་ཚེ་ན་དེ་སྤོང་བ་ལ་མི་རྩོལ་བ་ཉེས་པ་སྟེ་དེའི་གཉེན་པོར་སྐྱོ་བར་འགྱུར་བ་དང་དྭངས་པར་འགྱུར་བའི་སེམས་པ་མངོན་པར་འདུ་བྱེད་པའོ། །བྱིང་རྒོད་དང་བྲལ་ནས་སེམས་ལས་སུ་རུང་བའི་ཚེ་ན་སྐྱོན་ཡོན་ལ་དགག་སྒྲུབ་བྱེད་པ་སོགས་རྩོལ་བ་དྲག་པོ་ཉེས་པ་སྟེ། དེའི་གཉེན་པོར་གྲིམ་སློད་རན་པར་བཏང་སྙོམས་སུ་བྱའོ། དེ་ལྟ་བུའི་སྒོ་ནས་དམིགས་ཐུན་ཡུན་ཐུང་ལ་གྲངས་མང་བ་གསལ་ལ་དོས་དྲག་པར་བྱས་ཏེ་སེམས་འདུལ་བའི་ཐབས་ལ་མཁས་པར་བྱའོ། །སེམས་གནས་དགུ་པོ་དེ་སྟོབས་དྲུག་གིས་རིམ་པར་འགྲུབ་སྟེ། སེམས་གནས་དང་པོ་ཐོས་པའི་སྟོབས་ཀྱིས་འགྲུབ། གཉིས་པ་སེམས་པའི་སྟོབས་ཀྱིས་འགྲུབ། གསུམ་པ་དང་བཞི་བ་དྲན་པའི་སྟོབས་ཀྱིས་འགྲུབ། ལྔ་བ་དང་དྲུག་པ་ཤེས་བཞིན་གྱི་སྟོབས་ཀྱིས་འགྲུབ། བདུན་པ་དང་བརྒྱད་པ་བརྩོན་འགྲུས་ཀྱི་སྟོབས་ཀྱིས་འགྲུབ། དགུ་པ་འདྲིས་པ་སྟེ་གོམས་པའི་སྟོབས་ཀྱིས་འགྲུབ་པ་ཡིན་ནོ། །ཡིད་བྱེད་བཞིའི་སྒོ་ནས་འགྲུབ་པར་བྱེད་པའི་ཚུལ་ཡང་ཡོད་དེ། སེམས་གནས་དང་པོ་གཉིས་ཀྱི་སྐབས་སུ་བྱིང་རྒོད་ཤས་ཆེ་བས་བསྒྲིམས་ཏེ་འཇུག་པའི་ཡིད་བྱེད་དགོས་སོ། །གསུམ་པ་ནས་བདུན་པའི་བར་ལ་ཏིང་འཛིན་དང་བྱིང་རྒོད་ཤེད་མཚུངས་ལྟ་བུར་འོང་བས་འཆད་ཅིང་འཇུག་པའི་ཡིད་བྱེད་དོ། །བརྒྱད་པའི་དུས་སུ་ཏིང་འཛིན་སྟོབས་སུ་གྱུར་པས་ཆད་པ་མེད་པར་འཇུག་པའི་ཡིད་བྱེད་དོ། །དགུ་པ་ལ་ཇི་ལྟར་འདོད་པ་བཞིན་དུ་ལྷུན་གྲུབ་ཏུ་འབྱུང་བས་རྩོལ་བ་མེད་པར་འཇུག་པའི་ཡིད་བྱེད་བྱ་བ་ཡོད་དོ། །དེའི་གནས་སྐབས་ན་ཉམས་ལྔ་འབྱུང་སྟེ། སེམས་གནས་དང་པོའི་ཚེ་རྣམ་རྟོག་མང་དུ་སོང་སྙམ་པའི་རྣམ་རྟོག་ངོས་ཟིན་གྱི་ཉམས་འོང་། གཉིས་པའི་ཚེ་རྣམ་རྟོག་རེས་ཞི་རེས་སྐྱེ་བའི་རྣམ་རྟོག་ངལ་གསོའི་ཉམས་འོང་། གསུམ་པ་ནས་བདུན་པའི་བར་ལ་སེམས་གནས་མི་གནས་འགལ་རྐྱེན་ཡོད་མེད་ཀྱི་རྗེས་སུ་བྱེད་པས་རྣམ་རྟོག་ཐང་ཆད་ཀྱི་ཉམས་འོང་། བརྒྱད་པར་སེམས་མི་གནས་སྙམ་བྱེད་དུས་ནས་གཉེན་པོའི་སྟོབས་ཀྱིས་རང་ཡལ་དུ་འགྲོ་བས་རྣམ་རྟོག་འདུ་བྱེད་ཀྱི་ཉམས་འོང་། དགུ་པར་རྐྱེན་གྱིས་མི་བརྫི་བའི་ཏིང་ངེ་འཛིན་རང་བབས་སུ་འབྱུང་བའི་རྣམ་རྟོག་མངོན་པར་འདུ་མི་བྱེད་པའི་ཉམས་འབྱུང་བ་ཡིན་ནོ། །དེ་དག་ལ་གཡོ་ཐོབ་གོམས་བརྟན་མཐར་ཕྱིན་གྱི་ཉམས་ལྔ་ཞེས་ཀྱང་བཤད་དེ། གཡོ་བའི་ཉམས་རི་གཟར་གྱི་འབབ་ཆུ་ལྟ་བུ། ཐོབ་པའི་ཉམས་རོང་ཁུང་དོག་མོ་ནས་འབབས་པའི་ཆུ་ལྟ་བུ། གོམས་པའི་ཉམས་ཆུ་བོ་ཆེན་པོའི་རྒྱུན་དལ་གྱིས་འབབ་པ་ལྟ་བུ། བརྟན་པའི་ཉམས་རྒྱ་མཚོ་འཁྱིལ་བའམ་རི་བོ་ལྟ་བུ། མཐར་ཕྱིན་པའི་ཉམས་རྒྱ་མཚོ་རླབས་དང་བྲལ་བའམ་མར་མེ་རླུང་གི་མ་བསྐྱོད་པ་ལྟ་བུའོ། །དེ་ལྟར་ཡང་ལམ་རིམ་ལས། གཡོ་ཐོབ་གོམས་བརྟན་མཐར་ཕྱིན་པ། །མུ་ལྔས་ཡོངས་སུ་རྫོགས་པར་འགྱུར། །གང་དག་གཟར་པོའི་ཆུར་གནས་ཚེ། །ཀུན་བརྟགས་གོམ་པའི་རྫ་མཁན་གྱིས། །མི་སྡོད་འགྲོ་བས་སྐྱོ་བར་བྱེད། །དེ་ཚེ་མགོ་ལ་མེ་འབར་བཞིན། །ཅུང་ཟད་ཡོད་ལ་དེ་དག་ཉུང་། །དེ་ཚེ་དལ་བུས་འབྱུང་འཇུག་བསྲིང་། །དེ་གོམས་ཆེད་དུ་བྱེད་སོགས་ན། །བཏང་སྙོམས་དང་པོར་བླང་བར་བྱ། རི་བོ་ལྟ་བུར་མི་བསྒུལ་བར། །ཐུན་རྐྱང་ནུས་ནས་སུ་མི་བྱ། །རོ་མྱོང་དོར་བས་དེ་མཐར་ཕྱིན། །ཤུགས་སྣང་མཐོང་ལ་དགའ་བྲོད་མེད། །ཅེས་དང་། གསུམ་ལྔ་ལྷར་གསལ་ཅུང་ཟད་གཡོ། །བར་ཆད་འབྱུང་བ་དང་པོའོ། །དེ་གསལ་ཐུན་གྱི་གཞི་ཆ་གསུམ། གསལ་ལ་མི་གཡོ་གཉིས་པ་སྟེ། །ཐུན་རྐྱང་ནུས་པ་གསུམ་པའོ། །དེ་ཉིན་རྐྱེན་དབང་མི་འགྲོ་བ། །བཞི་བའོ་ཁྱད་པར་གང་གནས་པ། །ཤིན་ཏུ་མི་འཕྲོག་ལྔ་པ་སྟེ། །ཞེས་བཤད་པ་ལྟར་རོ། །དེ་ལྟར་འབད་པ་དུ་མས་བསྐྱེད་རིམ་ལ་སེམས་རྩེ་གཅིག་ཏུ་བཟུང་བ་ན་འགྱུར་བའི་སྐྱོན་དུ་གྲགས་པ་ཡང་དེ་ལས། ཁྱད་པར་རབ་རིབ་མག་མོག་གྲིབ། །གང་ཚོད་དམིགས་ལ་ཚད་དང་ཚུལ། །གྲངས་དང་ཆ་ལུགས་མདོག་དང་དབྱིབས། །ཁ་དོག་འབའ་ཞིག་རིམ་པར་ནུབ། །དེ་ལྟར་གྱུར་བ་ཚོར་བྱས་ཏེ། །འདུ་བྱེད་རླུང་གིས་བསྐྱོད་མི་བྱ། །ཞེས་པ་ལྟར་རྣམ་པར་རྟོག་པའི་སྐྱོན་དེ་དག་གི་རྗེས་སུ་མི་གཏོང་བར་རྩ་བའི་དམིགས་པ་རང་ཉིད་ཀྱིས་ཇི་ལྟར་འདོད་པའི་རྣམ་པར་འཆར་བ་ལ་བསླབ་པར་བྱའོ། །དེ་ལྟར་རིམ་གྱིས་གོམས་པ་ན་དང་པོར་ལྷར་སྣང་ཡེ་མི་གསལ་ཡང་ཕྱིས་ཇེ་གསལ་དུ་གྱུར་ནས་ཐ་མ་མིག་གིས་བལྟར་ཡོད་པ་ལྟ་བུའི་བར་དུ་གསལ་བར་འགྲོ་སྟེ། དེ་ཉིད་ལས། སྨིག་རྒྱུ་དུ་བ་སྲིན་མེ་ཁྱེར། །མར་མེ་ཉི་མའི་ཚུལ་དང་སྦྱར། །ཞེས་སོ། །ཚུལ་དེས་གཙོ་བོ་ལ་ལེགས་པར་སེམས་ཟིན་པ་དང་ལུས་དཀྱིལ་གྱི་ལྷ་ལ་སེམས་བཟུང་། དེ་ནས་རིམ་གྱིས་འཁོར་རྣམས་ལའང་བསླབ་ནས་ཐ་མ་དཀྱིལ་འཁོར་ཡོངས་རྫོགས་སྔ་ཕྱི་མེད་པར་དུས་གཅིག་ཏུ་ཡིད་ངོར་འཆར་ཐུབ་པར་བྱའོ། །ནང་དུ་ཏིང་ངེ་འཛིན་གྱི་རྩལ་རྫོགས་པའི་རིམ་པས། ལྷ་སྐུ་ཆུ་ཟླ་ལྟ་བུའི་མཐོང་ཉམས་དང་། དཔའ་བོ་དང་རྣལ་འབྱོར་མ་རྣམས་ཀྱིས་ལུང་སྟོན་པ་དང་། མངོན་ཤེས་འཆར་བ་དང་། རྨི་ལྟས་ངོ་མཚར་བ་རྨི་བ་སོགས་ལམ་རྟགས་ཀྱི་སྣང་བ་མཐའ་ཡས་པ་འབྱུང་ཡང་། དེ་དག་ལ་དགའ་བྲོད་དང་མཆོག་འཛིན་བྱེད་པ་དོར་ཏེ་རིག་སྟོང་མཉམ་པ་ཆེན་པོའི་ཀློང་དུ་རེ་དོགས་དབྱིངས་སུ་གཅོད་པ་ནི་མན་ངག་གོ །དེ་ལྟར་ཚུལ་སྣ་ཚོགས་པའི་སྒོ་ནས་ཟུང་འཇུག་གི་རྣལ་འབྱོར་བརྟན་པར་བྱེད་པ་ནི་དངོས་གྲུབ་སྒྲུབ་པའི་ཐབས་རྨད་དུ་བྱུང་བ་ཡིན་པར། རྩ་རྒྱུད་གསང་བའི་སྙིང་པོ་ལས། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འབྱུང་། །ཞེས་གསུངས་པའི་དོན་ཏེ། འདི་ལྟ་བུའི་ལྷ་སྐུ་ཕྱག་རྒྱ་ཆེན་པོའི་རྣལ་འབྱོར་གཅིག་ལ་ཡང་གང་ཟག་གི་རྟོགས་པའི་བྱེ་བྲག་ལས་སྣ་ཚོགས་པར་འགྱུར་ཏེ། ལམ་གྱི་ཡན་ལག་གཞན་དང་བྲལ་བའི་ཞི་གནས་རྐྱང་པ་བདེ་གསལ་མི་རྟོག་པས་བརྒྱན་པ་མངོན་ཤེས་དང་རྫུ་འཕྲུལ་གྱི་རྟེན་དུ་གྱུར་པ་ཙམ་ནི་ཕྱི་རོལ་པ་རྣམས་དང་ཡང་ཐུན་མོང་བ་ཡིན། ངེས་འབྱུང་དང་སྟོང་ཉིད་དོན་སྤྱིའི་རྣམ་པར་ཤེས་པ་ཙམ་གྱིས་ཟིན་ན་ཐར་བའི་ལམ་དུ་རུང་བ་ཙམ་ཡིན། བྱང་ཆུབ་སེམས་ཀྱིས་ཟིན་ན་ཐམས་ཅད་མཁྱེན་པའི་འཇུག་ངོགས་སུ་འགྲོ། སྣང་བ་ལྷར་ཤེས་པའི་ལྟ་བ་དང་། བཟླས་བརྗོད་དང་། རྣལ་འབྱོར་གཞན་གྱིས་ཟིན་ན་རྡོ་རྗེའི་ཐེག་པར་འགྱུར། མཉམ་པ་ཆེན་པོའི་ལྟ་སྤྱོད་དང་ལྡན་པས་དག་རྫོགས་སྨིན་གསུམ་གྱི་ཡན་ལག་གཞན་ཚང་བར་གྱུར་ན་བླ་མེད་ཀྱི་རིམ་པ་དང་པོར་འགྱུར། རླུང་སེམས་དབུ་མར་ཐིམ་པའི་རྗེས་སུ་བྱུང་བའི་བཅོས་མིན་གྱི་རྣལ་འབྱོར་ཡིན་ན་རིམ་པ་གཉིས་པར་འགྱུར། རིམ་དང་གཅིག་ཆར་གང་ཡིན་ཀྱང་རིག་པའི་རང་བཞིན་གཉུག་མའི་དེ་ཁོ་ན་ཉིད་མངོན་སུམ་དུ་བྱས་པའི་རང་གདང་ལྷར་ཤར་བ་ཡིན་ན་ཟུང་འཇུག་རྫོགས་པ་ཆེན་པོའི་རྣལ་འབྱོར་དུ་འགྱུར་བ་ཡིན་ནོ། །རིམ་གཉིས་ཀྱི་རྣལ་འབྱོར་གང་ལ་འཇུག་ནའང་ཤེས་རབ་དང་གདམ་ངག་གི་སྟོབས་ཀྱིས་བླང་དོར་གྱི་དམིགས་ཕྱེ་ནས་ནན་ཏན་དུ་སྒྲུབ་དགོས་ཀྱི་གྱ་ཚོམ་དུ་སྔགས་ཀྱི་ཐེག་པ་ནི་ཟབ་མོའོ་སྙམ་དུ་རི་བོང་ཅལ་འདྲོགས་ཀྱིས་ཞུགས་པ་ལ་ནི་དོན་མེད་པར་མ་ཟད་ཉེན་ཡང་ཆེ་སྟེ། སློབ་དཔོན་སངས་རྒྱས་གསང་བས། ཇི་ལྟར་རལ་གྲིའི་སོ་ལ་ནན་ཏན་དུ། །ལེགས་པར་མ་བཟུང་ལག་པ་གཅོད་པར་འགྱུར། །དེ་བཞིན་ནན་ཏན་མེད་པའི་གསང་སྔགས་ལ། །ཕུང་བའམ་ཡང་ན་འབྲས་བུ་མེད་པར་འགྱུར། །ཞེས་སོ། །ཚུལ་བཞིན་དུ་ལེགས་པར་ཉམས་སུ་བླང་ན་གནས་སྐབས་དང་མཐར་ཐུག་གི་ལེགས་པ་ཐམས་ཅད་འགྲུབ་སྟེ། ལམ་རིམ་ལས། རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡིད་གཉིས་མེད་པ་ན། །དཀྱིལ་འཁོར་ཆེན་པོར་འབར་བར་འགྱུར། །འདི་ལྟར་བསྒོམས་ཤིང་སྒྲུབ་བྱས་ན། །འབྲས་བུ་མངོན་དུ་མ་བྱུང་ཡང་། །ཚེ་རབས་སྐྱེ་བ་ཐམས་ཅད་དུ། །ལྷ་མི་མཚན་རྫོགས་སྡུག་བསྔལ་སེལ། །བདེ་གཤེགས་འབྱུང་དང་མི་བཀོལ་ཅིང་། །ཐེག་པ་དམན་པར་འཇུག་མི་འགྱུར། །བྱང་ཆུབ་གཟུངས་ལ་ཞུགས་པ་ཡིན། །དེ་བས་ལམ་འདི་འབྲལ་མི་བྱ། །ཞེས་སོ། །དེ་ལྟར་ཐུན་གྱི་དངོས་གཞི་ལ་ལྷའི་རྣལ་འབྱོར་སྐྱོང་ཚུལ་མདོ་ཙམ་བཤད་ནས། གལ་སྟེ་དེས་སྐྱོ་བར་གྱུར་ན་ངག་སྒྲིབ་སྦྱོང་ཞིང་ཡི་དམ་གྱི་ཐུགས་རྒྱུད་བསྐུལ་བའི་ཕྱིར་བསྙེན་པ་བཟླ་བ་ལ་བརྩོན་པར་བྱའོ། །དེའི་ཚུལ་ཡང་། ལམ་རིམ་ལས། ཡན་ལག་མ་ཉམས་སྔགས་བཟླས་པའང་། །སྐྱོན་བཅུ་སྤངས་ཏེ་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱང་། །སྤྲོ་བསྡུ་བདག་དང་གཞན་དོན་རྫོགས། །ཕྱི་ནང་གསང་བ་གང་མོས་སུ། །བཟླས་པ་ཚད་དུ་ཕྱིན་པར་བྱ། །དུབ་ན་ཡེ་ཤེས་ཐིག་ལེ་བལྟ། །ཞེས་པ་ལྟར་ལས། འདིར་ནི་ཐུགས་ཀར་སྔགས་ཀྱི་འཁོར་ལོ་གསལ་བ་ལས་སྤྲོ་བསྡུའི་སྦྱོར་བས་སྣོད་བཅུད་སྐུ་དང་ཡེ་ཤེས་ཀྱི་རོལ་བར་བལྟ་ཞིང་སྒྲ་གྲགས་ཐམས་ཅད་སྔགས་ཀྱི་རང་སྒྲར་ཤེས་པས་བཟླས་པ་སྤྱིའི་ལུགས་སུ་བྱ་བ་དང་། རང་གཞུང་ལས། འཛབ་ཀྱི་སྙིང་པོ་བྱང་ཆུབ་སེམས། །ཞེས་སོགས་གསུངས་པ་བཞིན་མངོན་སུམ་འོད་གསལ་གྱི་དགོངས་པ་ལས་མི་གཡོ་བར་ཆོས་ཉིད་དོན་གྱི་བཟླས་པ་གཙོ་བོར་བསྟེན་པར་བྱའོ། །ཐུགས་དམ་བསྐུལ་བ། ཚོགས་ཀྱི་མཆོད་པ་སོགས་ཀྱི་དོན་ནི་ཡི་གེ་མང་བས་མ་བྲིས་སོ། །གཤེགས་གསོལ་དང་ཉེར་བསྡུ་སོགས་འདིར་མི་འབྱུང་བ་ནི་ཟུང་འཇུག་ལྷུན་གྱིས་གྲུབ་པ་ཆུ་བོའི་རྒྱུན་གྱི་རྣལ་འབྱོར་ལ་ཐུན་མཚམས་ཀྱི་རྩིས་གདབ་བྲལ་བའི་དབང་དུ་བྱས་པའོ། །གཞན་དུ་རང་བློར་འཚམས་པར་དེ་ལྟར་བྱས་ཀྱང་འགལ་བ་ནི་མ་མཐོང་ངོ་། །དེའི་རྗེས་སུ་ཞི་རྒྱས་དབང་དྲག་སོགས་ཀྱི་ཕྲིན་ལས་ཇི་ལྟར་སྒྲུབ་པ་དང་། འོད་གསལ་སྙིང་པོའི་ལམ་ལ་ཇི་ལྟར་བསླབ་པའི་རིམ་པ་ཡང་། རང་གཞུང་དུ། ལྷ་དང་དཀྱིལ་འཁོར་ལྷུན་གྲུབ་སྟེ༔ ལྷ་ཉིད་རང་ལ་རང་ཉིད་ལྷ༔ གཉིས་མེད་ལྟ་བའི་གདེངས་སྐྱེད་ཅིང༔ ཕྲིན་ལས་སྨོན་འཇུག་སེམས་བསྐྱེད་དང་༔ གསང་བའི་སྙིང་ཐིག་ཡིད་ལ་བཅགས༔ རིག་པ་ཆོས་ཟད་ཀློང་དུ་བསྐྱར༔ ས་མ་ཡ༔ རྒྱ་རྒྱ་རྒྱ༔ ཞེས་པ་ལྟར་རོ། །འདིར་སྨྲས་པ། ཟབ་ཞི་སྤྲོས་བྲལ་འོད་གསལ་ཆེན་པོ་ལས། །མ་གཡོས་བཞིན་དུ་ལྷུན་གྲུབ་མཚན་དཔེའི་སྐུ། །དཀྱིལ་འཁོར་འཁོར་ལོའི་ངོ་བོར་ཡོངས་རྫོགས་པའི། །ཟུང་འཇུག་རྡོ་རྗེ་འཛིན་པའི་གོ་འཕང་དུ། །སྒྲོད་བྱེད་ཐབས་ཚུལ་གཞན་ལས་རྨད་བྱུང་བའི། །ཉེ་ལམ་མཐར་ཐུག་རྡོ་རྗེའི་ཐེག་པ་ནི། །རྒྱལ་ཀུན་ཐུགས་ཀྱི་གསང་བ་ཟབ་མོ་ཞེས། །རྒྱ་བོད་པཎ་གྲུབ་ཡོངས་ཀྱིས་གཅིག་ཏུ་གླེང། །དེ་ཡི་ནང་ནས་ཚེ་འདིར་ལྷན་སྐྱེས་ཀྱི། །བདེ་ཆེན་ཡེ་ཤེས་འདྲེན་པའི་གར་མཁན་མར། །བརྟེན་ནས་སྣང་གསུམ་ཕྲ་བའི་བག་ཆགས་ཀུན། །སྦྱངས་ཏེ་མཆོག་གི་འོད་གསལ་ལ་སྦྱོར་བའི། །ལམ་མཆོག་བླ་མེད་སྔགས་ཀྱི་ཏནྟྲ་ཡི། །ལམ་གནད་མཐའ་དག་དབང་བཞིའི་ཉམས་ལེན་གྱི། །ལམ་ལ་འདུ་ཞེས་རྒྱུད་དོན་ཇི་བཞིན་དུ། །ལམ་ཀུན་ཡོངས་རྫོགས་གཟིགས་པའི་མགོན་དེས་གསུངས། །བསྐྱེད་རིམ་ལམ་གྱིས་ཐ་མལ་ཞེན་སྣང་སྦྱོངས། །རྫོགས་རིམ་ལམ་གྱིས་སྒྱུ་མའི་འཛིན་རྟོག་སྤངས། །རྫོགས་ཆེན་ལམ་གྱིས་ཟུང་འཇུག་ཆེན་པོར་སྦྱོར། །འདི་ལས་གཞན་པའི་ཉེ་ལམ་ཡོད་མ་ཡིན། །འདི་རུ་མ་འདུས་ཐེག་པ་གཞན་མེད་དེ། །འདི་ལ་མ་བརྟེན་སངས་རྒྱས་ཇི་ལྟར་འཐོབ། །དེ་བས་འདི་ནི་ཕྱོགས་བཅུའི་བདེ་གཤེགས་ཀྱི། །བསྒྲོད་པ་གཅིག་པུའི་ལམ་དུ་རྒྱལ་བས་གསུངས། །གྲོགས་དག་རྙེད་དཀའི་དལ་བ་རྙེད་གྱུར་ཅིང་། །ཡིད་བཞིན་ནོར་བུ་ལྟ་བུའི་གདམས་པ་མཆོག །དམ་པའི་དྲིན་ལས་ཇི་ལྟར་འདོད་པ་བཞིན། །ཉམས་སུ་ལེན་བྱར་ཡོད་པའི་གནས་སྐབས་འདིར། །མནོག་ཆུང་ཚེ་འདིའི་བྱ་བའི་སོ་ཚིས་ལ། །གཡེངས་ནས་དོན་ཆེན་འདོར་བ་ཇི་ལྟར་རིགས། །དེ་བས་དེ་རིང་ཉིད་ནས་སྒྲུབ་པ་ལ། །སྙིང་ནས་བརྩོན་པ་དྲག་པོས་གཞོལ་བར་མཛོད། །བཙན་ཕྱུག་ཁས་དྲག་གཟུགས་ཀྱིས་རྒྱགས་པ་སོགས། །སྔོན་ཆད་ལྗོངས་འདིར་མང་པོ་བྱུང་མོད་ཀྱང་། །དེང་སང་དུས་ན་མིང་ཙམ་ལུས་ལ་ལྟོས། །རང་རེ་རྣམས་ཀྱང་དེ་ལས་འདས་སམ་ཀྱེ། །ཆོས་ལ་ལོང་ཡོད་བྱས་ནས་ཕྱི་བཤོལ་དུ། །བཞག་པས་ཉིན་གཅིག་ཙམ་ན་འཆི་བདག་གིས། །ཐོག་བབས་ཚུལ་དུ་བཟུང་བའི་དུས་ཤིག་འབྱུང་། །དེ་དུས་འགྱོད་ཀྱང་འཕྱིས་སོ་སྙིང་གི་གྲོགས། །ད་ལྟ་རང་དབང་ཡོད་པའི་གནས་སྐབས་ན། །དམ་པའི་ཞལ་ལུང་ཟབ་དོན་བདུད་རྩིའི་བཅུད། །རིམ་གཉིས་ལང་ཚོ་རྒྱས་པའི་བཅུད་ལེན་དུ། །བླངས་ནས་འཆི་མེད་རྡོ་རྗེའི་ས་ལ་འགྲོ། །གལ་ལྟེ་སྐྱེ་འདིར་མཆོག་དངོས་མ་གྲུབ་ཀྱང་། །གཞན་དུ་འཕོ་ཚེ་དཔའ་བོ་རྣལ་འབྱོར་མས། །མདུན་བསུས་ཧེ་རུ་ཀཿཡི་གནས་བཅུ་རུ། །འགྲོ་བ་འདི་ལ་ཐེ་ཚོམ་ཅི་ཞིག་ཡོད། །དེ་ཕྱིར་བརྩོན་པའི་རྟ་ཕོ་ལ་ཞོན་ནས། །ངེས་འབྱུང་ལྕག་བསྐུལ་དད་པའི་སྲབ་ཀྱིས་བསྒྱུར། །གྲུབ་གཉིས་ནོར་བུས་བརྒྱན་པའི་གྲོང་ཁྱེར་དེར། །རྣམ་གཡེང་ཕྱི་བཤོལ་མ་མཛད་འབྱོན་པར་ཞུ། །འདི་ལྟར་རྡོ་རྗེའི་མཆེད་ཀྱིས་བསྐུལ་ཕྱིར་དང་། །ཟབ་མོའི་ལམ་ལ་རང་བློ་གོམས་ཕྱིར་དང་། །གསང་ཆེན་ལམ་ལ་སློབ་པའི་རྟེན་འདྲེལ་ཕྱིར། །གསང་བ་སྙིང་ཐིག་ལམ་འདིར་བདག་གིས་འབད། །བརྒྱུད་ལྡན་བླ་མའི་མན་ངག་གཙོར་བྱས་ཤིང་། །དམ་པ་དུ་མའི་གསུང་གིས་ལེགས་བརྒྱན་ཏེ། །བུང་བས་མེ་ཏོག་རྩི་བཅུད་བླངས་བཞིན་བསྡུས། །དེ་ལྟ་ནའང་བདག་བློ་མཐུ་ཞན་པས། །མ་རྟོགས་ཉམས་དང་མ་ཚང་ཕྱིན་ཅི་ལོག །རྡོ་རྗེའི་ཚིག་གི་རྒྱ་མདུད་མ་ཁྲོལ་བའི། །ཉེས་པ་ཅི་མཆིས་རྩ་གསུམ་སྲུང་མའི་ཚོགས། །ཆོས་སྤྱན་ལྡན་པ་རྣམས་ལའང་བཟོད་པར་གསོལ། །འདིར་འབད་དགེ་བ་གངས་རིའི་ཏོག་ལྟ་བུར། །རྣམ་པར་དཀར་བ་གང་ཞིག་ཐོབ་པ་དེས། །ལུས་ཅན་ཀུན་གྱིས་རྡོ་རྗེ་འཆང་གི་གནས། །ཟུང་འཇུག་དྲི་མ་མེད་པ་ཐོབ་པར་ཤོག །བདག་ཅག་རྡོ་རྗེའི་ཐེག་པར་ཞུགས་སོ་འཚལ། །མཉམ་རྫོགས་ཆེན་པོའི་དམ་ཚིག་ལ་གནས་ཤིང་། །སྒོ་གསུམ་རྡོ་རྗེ་གསུམ་དུ་གནས་གྱུར་ནས། སྒྱུ་འཕྲུལ་དྲྭ་བའི་ངོ་བོར་མངོན་རྫོགས་ཤོག །སྐྱེ་ཞིང་སྐྱེ་བ་དག་ནི་ཐམས་ཅད་དུ། །རྒྱུད་དོན་མངོན་སུམ་གཟིགས་པའི་བླ་མ་ཡིས། །རྗེས་བཟུང་སྔགས་ཀྱི་ལམ་གནད་ཀུན་རྟོགས་ཏེ། །རྒྱལ་བ་དགྱེས་པའི་ལམ་བཟང་རྙེད་པར་ཤོག །རང་དོན་ཞི་བར་གཞོལ་མིན་འགྲོ་བའི་ཕྱིར། །ཚེ་གཅིག་ལམ་གྱི་སངས་རྒྱས་དོན་གཉེར་བའི། །བྱང་ཆུབ་སེམས་དཔའ་སྔགས་ཀྱི་ཐེག་པ་ཡི། །བཞོན་པ་མཆོག་གིས་རྟག་ཏུ་འགྲོ་བར་ཤོག །བདག་ཀྱང་འདི་ནས་གཞན་དུ་འཕོས་ཚེ་ཞིང་སྐྱེས་སྔགས་སྐྱེས་ལྷན་སྐྱེས་ཀྱི། །ཕོ་ཉའི་ཚོགས་དང་ལྷན་ཅིག་ཉིད་དུ་བདེ་སྟོང་སྒྱུ་མའི་རོལ་རྩེད་ཀྱིས། །རྔ་ཡབ་དཔལ་རི་སྤྲུལ་པའི་ཞིང་དེར་མིག་འཕྲུལ་བཞིན་དུ་བགྲོད་ནས་ཀྱང་། །ཧེ་རུ་ཀཿདཔལ་མཚོ་སྐྱེས་རྡོ་རྗེའི་སྲས་ཀྱི་ཐུ་བོར་འགྱུར་བར་ཤོག །ཅེས་རིག་འཛིན་ཉི་མ་གྲགས་པས་ཁམས་སྲིན་མོ་རྫོང་ནས་སྤྱན་དྲངས་པའི་རྩ་གསུམ་གསང་བ་སྙིང་ཐིག་གི་ལས་བྱང་ཡིད་བཞིན་ནོར་བུ་ལ་བརྟེན་ནས་བསྙེན་པར་བྱེད་པའི་རྣལ་འབྱོར་པ་དག་ལ་ཉེ་བར་མཁོ་བའི་ལྷའི་རྣལ་འབྱོར་བྱེད་ཚུལ་ཉུང་ངུ་འདི་ནི། ཐམས་ཅད་མཁྱེན་པ་རྒྱལ་བའི་སྲས་པོ་གཞན་ཕན་ཕ་མཐའ་ཡས་པའི་འོད་ཟེར་ཅན་གྱི་ཞབས་རྡུལ་ལ་སྤྱི་བོས་རེག་པའི་སྐལ་བཟང་ཐོབ་ཀྱང་། རང་རྒྱུད་སྙོམ་ལས་དང་རྨོངས་པའི་ཁུར་གྱིས་ནོན་པའི་བཙུན་པའི་གཟུགས་བརྙན་ཙམ་འཛིན་པ་པདྨ་བཛྲ་དུ་འབོད་པས་དཔལ་གྱི་སེངྒེ་རིར་སྦྱར་བས་གསང་ཆེན་སྙིང་པོའི་བསྟན་པ་ཕྱོགས་དུས་ཀུན་ཏུ་དར་ཞིང་རྒྱས་པར་གྱུར་ཅིག །དགེའོ། །བཀྲ་ཤིས།།

འགྲོ་འདུལ་ཐུགས་རྗེ་ཆེན་པོའི་རྣལ་འབྱོར་གྱི་རིམ་པ་རྗེ་དབོན་པདྨ་ཀུན་གྲོལ་རྣམ་རྒྱལ་གྱིས་མཛད་པར་གྲགས་པའི་སྒོམ་ལུང་རྒད་པོ་མཛུབ་ཁྲིད་ཀྱི་གདམས་པ་ཨི་ཐི།

༄༅། །འགྲོ་འདུལ་ཐུགས་རྗེ་ཆེན་པོའི་རྣལ་འབྱོར་གྱི་རིམ་པ་རྗེ་དབོན་པདྨ་ཀུན་གྲོལ་རྣམ་རྒྱལ་གྱིས་མཛད་པར་གྲགས་པའི་སྒོམ་ལུང་རྒད་པོ་མཛུབ་ཁྲིད་ཀྱི་གདམས་པ་ཨི་ཐི། །ཨོཾ་མ་ཎི་པདྨེ་ཧཱུྃ་ཧྲཱྀཿ རབ་འབྱམས་རྒྱལ་བ་ཀུན་གྱི་ཐུགས་རྗེའི་གཟུགས། །ཁམས་གསུམ་འགྲོ་བ་ཡོངས་ཀྱི་སྐྱབས་དང་མགོན། །ཁྱད་པར་གངས་ཅན་བོད་ཀྱི་ལྷ་སྐལ་མཆོག །བླ་མ་སྤྱན་རས་གཟིགས་ལ་ཕྱག་འཚལ་ལོ། །ད་ལྟ་རྙེད་དཀའ་དལ་འབྱོར་མི་ཡི་ལུས། །ལྷ་བས་ལྷག་པའི་རྟེན་འདི་ཐོབ་ལགས་ཀྱང་། །ཡུན་རིང་མི་སྡོད་མྱུར་དུ་འཆི་འགྱུར་ཞིང་། །ཤི་ནས་ངན་སོང་སྡུག་བསྔལ་བཟོད་པར་དཀའ། །དེ་བས་ད་རེས་རང་དབང་ཡོད་དུས་འདིར། །རྣམ་གཡེང་ལེ་ལོའི་དབང་དུ་མི་གཏོང་ཞིང་། །དཀར་ནག་རྒྱུ་འབྲས་བླང་དོར་མ་ནོར་བར། །སྡིག་སྤང་དགེ་བ་སྒྲུབ་ལ་འབད་པར་བྱ། །དགེ་བའི་ལས་ལ་རྣམ་པ་མང་ན་ཡང་། །ད་རེས་ཐེག་ཆེན་བྱང་ཆུབ་སེམས་ཀྱི་ལམ། །སྟོང་ཉིད་སྙིང་རྗེ་ཟུང་དུ་འཇུག་པའི་ངང་། །རང་ལུས་ཡི་དམ་ཐུགས་རྗེ་ཆེན་པོར་བསྒོམ། །ངག་གིས་བཟླས་བརྗོད་ཡི་གེ་དྲུག་མར་འབུངས། །སེམས་ཉིད་མ་བཅོས་རང་གསལ་རྗེན་པའི་ངང་། །བྱམས་དང་སྙིང་རྗེ་བྱང་ཆུབ་སེམས་རྩལ་སྦྱོངས། །བླ་མ་ཀུན་འདུས་ཨོ་རྒྱན་རིན་པོ་ཆེ། །སྙིང་གི་དཀྱིལ་དུ་བསྒོམ་ལ་གསོལ་བ་ཐོབ། །སྦྱོར་བ་སེམས་ཅན་ཀུན་ལ་ཕན་པའི་ཕྱིར། །རྫོགས་པའི་སངས་རྒྱས་སྒྲུབ་སྙམ་སེམས་བསྐྱེད་དགོས། །དངོས་གཞི་ལྷ་དང་བླ་མའི་རྣལ་འབྱོར་དང་། །བཟླས་བརྗོད་བྱམས་དང་སྙིང་རྗེའི་རྩལ་སྦྱོང་རྣམས། །སེམས་ཉིད་མ་བཅོས་ངང་ནས་གློད་ལ་བསྒོམས། །རྗེས་སུ་དུས་གསུམ་བསགས་པའི་དགེ་རྩ་ཀུན། །སེམས་ཅན་ཀུན་གྱི་གནས་སྐབས་བདེ་སྐྱིད་དང་། །མཐར་ཐུག་སངས་རྒྱས་འགྲུབ་པའི་རྒྱུར་གྱུར་ཅེས། །རང་འདོད་ཞེན་འཁྲིས་མེད་པར་བསྔོས་ལ་ཐོངས། །དེ་ལྟར་མཛད་ན་མདོ་སྔགས་ཉམས་ལེན་འདུས། །བྱ་སླ་སྟབས་བདེ་ཆོད་ཆེ་ཉམས་འོག་ཆུད། །བཀའ་གཏེར་མན་ངག་མང་པོའི་སྙིང་ཁུ་ཡིན། །སྙིང་རུས་ནུས་ན་ཚེ་འདིར་གྲུབ་པ་ཐོབ། །དེ་ལ་འདིར་ལམ་བདེ་བ་ནས་འབྲས་བུ་བདེ་བ་རྫོགས་པའི་སངས་རྒྱས་ཀྱི་གོ་འཕང་དུ་འགྲོ་བར་འདོད་པ་དག་གིས་ཁམས་གསུམ་གྱི་འཁོར་བ་འདིར་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་ཤིང་། ལྷ་དང་ཚངས་པ་འཁོར་ལོས་སྒྱུར་བའི་རྒྱལ་པོ་རྣམས་ཀྱང་གནས་སྐབས་ཀྱི་བདེ་བ་འཕྲལ་གྱི་མགོ་སྐོར་ཙམ་ལས། རྟག་བརྟན་གྱི་སྙིང་པོ་ཏིལ་གྱི་འབྲས་བུ་ཙམ་ཡང་མེད་པར་མ་ཟད་སླར་ཡང་སྡུག་བསྔལ་ཆེན་པོའི་གཞི་རྩར་འགྱུར་བར་ཤེས་ནས་ཁམས་གསུམ་གྱི་འཁོར་བ་མཐའ་དག་ལས་ཐར་ནས་ཞི་བ་མྱ་ངན་ལས་འདས་པའི་གོ་འཕང་ཞིག་ཅི་ནས་ཀྱང་འཐོབ་པར་བྱ་སྙམ་དུ་བསམ་དགོས། འདི་ལ་ངེས་འབྱུང་གི་བསམ་པ་ཞེས་བྱ་སྟེ་ཐར་པའི་ལམ་གྱི་སྒོ་ཡིན། ད་འཁོར་བ་ལས་ཐར་བར་བྱ་བ་ལ་རང་སྟོབས་ཀྱིས་ཐར་པར་མི་ནུས་པས་སྐྱབས་ཡུལ་ཁྱད་པར་ཅན་ཞིག་ལ་བརྟེན་དགོས། །དེ་ཡང་སྐྱབས་ཡུལ་གྱི་དམ་པ་དཀོན་མཆོག་གསུམ་ལས་གཞན་མེད་དེ་འཇིག་རྟེན་པའི་ལྷ་དང་མི་དཔོན་ཇི་ལྟར་བཟང་ཡང་འཁོར་བའི་སྡུག་བསྔལ་ལས་སྐྱོབ་མི་ནུས་ཏེ། ཁོ་རང་རྣམས་ཀྱང་འཁོར་བ་ལས་མ་ཐར་བས་སྐྱབས་སུ་མི་འགྱུར་རོ། །དེས་ན་བསླུ་མེད་རྟག་པའི་སྐྱབས་ནི་སངས་རྒྱས་ཆོས་དང་དགེ་འདུན་གསུམ་ཡིན་ཅིང་། དེ་ལ་སྐྱབས་སུ་འགྲོ་བའི་ཚུལ་ནི། རྫོགས་པའི་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་འདི་ནི་སྐྱོན་ཀུན་ཟད། ཡོན་ཏན་ཀུན་རྫོགས་ཤེས་བྱའི་ཆོས་ཐམས་ཅད་ལྐོག་ཏུ་མ་གྱུར་པར་མངོན་སུམ་དུ་མཁྱེན་པས་ཐམས་ཅད་མཁྱེན་པ་ཡིན་ཅིང་། འཇིག་རྟེན་འདི་ན་བླང་དོར་གྱི་ལམ་སྟོན་པ་པོ་འདི་ལས་ལྷག་པ་མེད་ཅིང་། འདིས་བསྟན་པའི་ལམ་ལ་བསླུ་བ་མི་སྲིད་པས། དུས་ད་ལྟ་ནས་བཟུང་སྟེ་འདི་ཉིད་འབའ་ཞིག་བདག་གི་སྟོན་པ་ཡིན་པས་འདིས་ཇི་ལྟར་བསྟན་པ་དེ་ལ་སློབ་པར་བྱ་ཡི། སྟོན་པ་གཞན་ལ་ནི་ནམ་ཡང་བསྟེན་པར་མི་བྱའོ་སྙམ་དུ་སེམས་ལ་དམ་བཅའ་བྱེད་པ་ནི་སངས་རྒྱས་ལ་སྐྱབས་སུ་འགྲོ་བའོ། །བསྟན་པ་དམ་པའི་ཆོས་ལུང་དང་རྟོགས་པའི་བདག་ཉིད་ཅན་འདི་ནི་སྟོན་པ་ཚད་མར་གྱུར་པ་དེའི་ཞལ་ནས་གསུངས་ཤིང་ཉིད་ཀྱིས་མངོན་སུམ་དུ་མཛད་པ་ཡིན་པས་འདིས་ཁམས་གསུམ་གྱི་ཉོན་མོངས་ཐམས་ཅད་སྤངས་ཏེ་ཞི་བ་མྱ་ངན་ལས་འདས་པའི་གོ་འཕང་ཐོབ་པར་གདོན་མི་ཟ་བས། ད་ནས་བཟུང་སྟེ་འདི་ཁོ་ན་ལ་ལམ་དུ་བཟུང་སྟེ་བསླབ་པར་བྱ་ཡི། སྟོན་པ་གཞན་གྱི་ཆོས་ལུགས་ལ་ནམ་ཡང་བསྟེན་པར་མི་བྱའོ་སྙམ་དུ་དམ་བཅའ་བ་ནི་ཆོས་ལ་སྐྱབས་སུ་འགྲོ་བ་ཡིན་ནོ། །བྱིས་པ་སོ་སོའི་སྐྱེ་བོའི་ས་ལས་འདས་པའི་འཕགས་པའི་དགེ་འདུན་འདི་རྣམས་ནི་སྟོན་པ་སངས་རྒྱས་ཀྱི་བཀའ་བཞིན་དུ་སྒྲུབ་ཅིང་བསྟན་པ་དམ་པའི་ཆོས་དང་ཐུགས་རྒྱུད་གཅིག་ཏུ་འདྲེས་ཏེ་མི་ཕྱེད་པར་གྱུར་ནས་རང་རྒྱུད་ཀྱི་འཆིང་བ་གྲོལ་ཏེ་གཞན་གྲོལ་བའི་ལམ་དུ་འཁྲིད་པའི་ལམ་གྱི་གྲོགས་སམ་ལམ་མཁན་དུ་བསྟེན་ན་བསླུ་བ་མེད་པས། ད་ནས་བཟུང་འཕགས་པའི་དགེ་འདུན་ཁོ་ན་ལ་བཤེས་གྲོགས་སུ་བཟུང་ནས་འདི་རྣམས་ཀྱིས་གང་ལ་བསླབ་པ་དེ་ལ་མཚུངས་པར་སྤྱོད་ཀྱིས། གཞན་གྱི་གྲོགས་ལ་ནམ་ཡང་བསྟེན་ཅིང་སྤྱོད་ལམ་མཚུངས་པས་འགྲོགས་པར་མི་བྱའོ་སྙམ་དུ་དམ་བཅའ་བ་ནི་དགེ་འདུན་ལ་སྐྱབས་སུ་འགྲོ་བ་ཡིན་ནོ། །དེ་ལྟར་ཤེས་པར་བྱས་ནས་སྐྱབས་སུ་འགྲོ་བ་དངོས་ནི། །སྟན་བདེ་བ་ལ་བསྡད་དེ་ལུས་སེམས་ཀྱི་དྲེལ་བ་སྤངས་ནས་རང་ཉིད་གང་དུ་འདུག་པའི་ས་ཕྱོགས་དེ་ཉིད་དག་པའི་ཞིང་ཁམས་ཡངས་ཤིང་རྒྱ་ཆེ་བའི་དབུས་སུ་དཔག་བསམ་གྱི་སྡོང་པོ་ཡལ་འདབ་ལོ་འབྲས་ཕུན་སུམ་ཚོགས་པའི་རྩེར་པདྨ་སྟོང་ལྡན་གྱི་ལྟེ་བར་ཟླ་བའི་གདན་གྱི་སྟེང་དུ་ངོ་བོ་རྩ་བའི་བླ་མ་ལ་རྣམ་པ་ཇོ་བོ་སྤྱན་རས་གཟིགས་སྐུ་མདོག་སྟོན་ཀའི་ཟླ་བ་ལྟར་དཀར་བ་ཞལ་གཅིག་ཕྱག་བཞི་ཞབས་གཉིས་རྡོ་རྗེའི་དཀྱིལ་མོ་ཀྲུང་གིས་བཞུགས་པ། རྩ་བའི་ཕྱག་གཉིས་ཐུགས་ཀར་ཐལ་མོ་སྦྱར་བས་ཡིད་བཞིན་གྱི་ནོར་བུ་བསྣམས་པ། གཡས་གཡོན་གྱི་འོག་མ་གཉིས་ཀྱིས་ཤེལ་ཕྲེང་དང་པདྨ་དཀར་པོ་སྙན་གྱི་ཐད་ཀར་ཁ་བྱེ་བའི་ཡུ་བ་ནས་འཛིན་པ། ལང་ཚོ་དར་ལ་བབ་ཅིང་གནག་སྣུམ་རལ་པའི་ཐོར་ཚུགས་ཅན། དར་དང་རིན་པོ་ཆེའི་རྒྱན་གྱིས་མཛེས་ཤིང་། འོད་ལྔའི་ཕྲེང་བ་འཁྲིགས་པའི་ཀློང་ན་བཞུགས་པ་རལ་པའི་ཟུར་ཕུད་ལ་འོད་དཔག་མེད་པ་དམར་པོ་སྤྲུལ་སྐུའི་ཆ་བྱད་ཅན་རིགས་བདག་གི་ཚུལ་དུ་བརྒྱན་པ། དེ་ཉིད་དཀོན་མཆོག་གསུམ་འདུས་ཀྱི་ངོ་བོར་ཤེས་པས་ཀུན་འདུས་ནོར་བུའི་ལུགས་སམ། ཡང་ན་ཕྱོགས་བཅུ་དུས་བཞིའི་སྐྱབས་ཡུལ་དཀོན་མཆོག་ཐམས་ཅད་ཀྱིས་ཁྲོམ་ཚོགས་སུ་བསྐོར་བར་མོས་པའི་མདུན་དུ་བདག་སོགས་སེམས་ཅན་ཐམས་ཅད་འཁོད་ནས་སྐྱབས་སུ་འགྲོ་བར་བསམ་སྟེ་སྔར་གྱི་དམ་བཅའ་རྣམས་ཡིད་ལ་དྲན་བཞིན། ན་མོ། སྐྱབས་གནས་མཆོག་གྱུར་རྣམས་ལ་སྐྱབས་སུ་མཆི། །ཞེས་ངག་ཏུ་བརྗོད་དོ། །དེ་ལྟར་སྐྱབས་སུ་འགྲོ་བའི་དུས་སུ་ཁས་བླངས་ཤིང་དམ་བཅས་པའི་དོན་སྟོན་པ་སངས་རྒྱས་ཀྱི་གསུང་ལ་ཚད་མར་བཟུང་ནས་ཆོས་ཐེག་པ་ཆེན་པོ་ལམ་དུ་བྱས་ཏེ་གྲོགས་བྱང་ཆུབ་སེམས་དཔའི་དགེ་འདུན་ལ་བསྟེན་ཅིང་འགྲོགས་པར་བྱ་དགོས་སོ། །དེ་བྱ་བ་ལ་ཐེག་ཆེན་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་ནས་དེའི་བསླབ་པ་ལ་སློབ་དགོས་པས། འདི་ལྟར་ནམ་མཁས་གར་ཁྱབ་སེམས་ཅན་གྱིས་ཁྱབ་ཅིང་། དེ་ཐམས་ཅད་ལས་ཉོན་སྡུག་བསྔལ་གསུམ་གྱིས་ཉམ་ཐག་པར་མ་གྱུར་པ་སུ་ཡང་མེད་ཅིང་། ཉམ་ཐག་པའི་སེམས་ཅན་དེ་ཐམས་ཅད་ཚེ་རབས་ཐོག་མེད་ཀྱི་ཕ་མ་དྲིན་ཅན་ཡིན་པར་སྟོན་པ་ཐམས་ཅད་མཁྱེན་པས་གསུངས་ཕྱིར་ཕ་མ་ཡིན་པར་ཐག་ཆོད། དེས་ན་ཕ་མར་གྱུར་པའི་སེམས་ཅན་དྲིན་ཅན་དེ་རྣམས་ཁམས་གསུམ་འཁོར་བའི་ལས་སྣང་བག་ཆགས་སྡུག་བསྔལ་ཐམས་ཅད་དང་བྲལ་ནས་གཏན་གྱི་བདེ་བ་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ་སྙམ་དུ་སྙིང་རྗེ་དང་བྱམས་པ་བསྒོམ། དེའི་ནུས་པ་ད་ལྟ་བདག་ལ་མི་འདུག་པས་འགྲོ་ཀུན་སྒྲོལ་ནུས་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱའོ་སྙམ་དུ་སྨོན་པ་བྱང་ཆུབ་ཀྱི་སེམས་བསྐྱེད། སངས་རྒྱས་ཐོབ་པའི་ཐབས་ཕ་རོལ་ཏུ་ཕྱིན་པ་དྲུག་པོ་ཐབས་གསང་སྔགས་ཀྱི་སྤྱོད་པ་ལྷ་སྔགས་འོད་གསལ་གྱི་རྣལ་འབྱོར་གསུམ་གྱིས་མཐར་ཕྱིན་པར་བྱའོ་སྙམ་དུ་འཇུག་སེམས་ཁྱད་པར་ཅན་བསྐྱེད་ཅིང་། འགྲོ་རྣམས་སངས་རྒྱས་ཐོབ་པར་སེམས་བསྐྱེད་དོ། །ཞེས་ངག་ཏུ་བརྗོད་ཅིང་ཡིད་ལ་བསམ་མོ། །དེ་ལྟར་བློ་ཀུན་རྫོབ་པའི་རྣམ་པ་ཅན་གྱི་བྱང་ཆུབ་ཏུ་སེམས་བསྐྱེད་ནས། དོན་དམ་པའི་བྱང་ཆུབ་ཀྱི་སེམས་སྤྲོས་པ་ཐམས་ཅད་དང་བྲལ་བའི་སེམས་ཀྱི་རང་བཞིན་འོད་གསལ་བའི་ངང་དུ་ཇི་ཙམ་གནས་ཀྱི་བར་དུ་བཞག་པར་བྱའོ། །དེ་ནི་ཀུན་ཏུ་བཟང་པོའི་སྤྱོད་པ་ལྷ་སྔགས་ཏིང་ངེ་འཛིན་རྣམ་པ་ཐམས་ཅད་པ་ལ་སློབ་པའི་གཞིར་གྱུར་པ་ཡིན་པས། གཟུང་བའི་ཡུལ་དང་འཛིན་པའི་སེམས་སུ་རྟོག་པའི་ཡུལ་ཅན་གྱི་བློ་དང་བྲལ་བའི་རྣམ་པར་མི་རྟོག་པའི་ངང་ལ་བཞག་པས་ཡུལ་སྣོད་བཅུད་ཀྱི་སྣང་བའང་མི་དམིགས་པར་དབྱིངས་སུ་ནུབ་སྟེ་སྟོང་འཛིན་དྲི་མས་མ་བསླད་པའི་སྟོང་པ་ཆེན་པོའི་རྣལ་འབྱོར་ལ་བསླབ་པར་བྱ་ཞིང་། གཟུང་འཛིན་སྣོད་བཅུད་མི་དམིགས་སྟོང་པའི་ངང་། །ཞེས་ཚིག་གིས་ཀྱང་གསལ་གདབ་བོ། །དེ་རྣམས་ནི་སྔོན་དུ་འགྲོ་བའི་རིམ་པ་སྟེ། དངོས་གཞི་ལ་གསུམ་ལས། སྐུ་བསྐྱེད་རིམ་ལྷའི་རྣལ་འབྱོར་ནི། སེམས་ཉིད་རང་བཞིན་གྱིས་རྣམ་པར་དག་པའི་སྟོང་པ་ཉིད་ཀྱི་ངང་ལས་མ་གཡོས་པར་ནམ་མཁའ་ལ་འཇའ་ཚོན་དང་མེ་ལོང་དུ་གཟུགས་བརྙན་ཤར་བ་ལྟར་སྐད་ཅིག་གིས་བདག་ཉིད་འཕགས་པ་སྤྱན་རས་གཟིགས་སོ་སྙམ་དུ་དྲན་པ་ཙམ་གྱིས་རིམ་གྱིས་བསྐྱེད་པ་མ་ཡིན་པར་རྫོགས་ཐབས་སུ་ཝལ་གྱིས་གསལ་བ་སྟེ། རིམ་གྱིས་པ་རྣམས་ལ་རྫུས་སྐྱེས་ཀྱི་བསྐྱེད་རིམ་དང་། གཅིག་ཆར་བ་རྣམས་ལ་རྫོགས་རིམ་གྱི་ལྷ་སྐུའོ། །རྣམ་པ་ཇི་ལྟར་གསལ་བ་ནི། སྐད་ཅིག་དྲན་རྫོགས་པད་ཉི་ཟླ་གདན་སྟེང་། །ཞེས་པ་ནས། ཐུགས་ཀར་གུ་རུ་པདྨ་འབྱུང་གནས་གསལ། །ཞེས་པའི་བར་ཏེ་ཚིག་གི་རྗེས་སུ་དོན་དྲན་བཞིན་བསྒོམ་པས་དོན་གོ་སླའོ། །དེ་ལ་འོད་དཔག་མེད་ནི་རལ་པའི་ཐོར་ཚུགས་ཀྱི་རྩར་པདྨ་ཟླའི་གདན་ལ་དབུ་རྒྱན་གྱི་ཚུལ་དུ་བསྒོམ། སློབ་དཔོན་ཆེན་པོ་ནི་ངོ་བོ་རྩ་བའི་བླ་མ་རྣམ་པ་ཨོ་རྒྱན་པདྨ་བཞུགས་གནས་ཐུགས་ཀའི་དབུས་སྙིང་པདྨ་འདབ་བརྒྱད་ཀྱི་རྣམ་པར་ཁ་བྱེ་བའི་དབུས་ཟླ་གདན་ལ་ཡེ་ཤེས་སེམས་པའི་ཚུལ་དུ་བསྒོམ། གཉིས་པ་གསུང་བཟླས་པ་སྔགས་ཀྱི་རྣལ་འབྱོར་ནི། དེ་ཡི་ཐུགས་ཀར་ཟླ་སྟེང་ཧྲཱྀཿཡིག་མཐར། །ཞེས་པ་ནས། གནོད་བྱེད་དགྲ་བགེགས་ཆོས་ཉིད་དབྱིངས་སུ་དག །ཅེས་པའི་བར་ཏེ། ཐུགས་ཀའི་ཡེ་ཤེས་སེམས་དཔའ་ཨོ་རྒྱན་གྱི་ཐུགས་ཀར་ཟླ་གདན་ལ་ཧྲཱྀཿམཐར་ཡིག་དྲུག་གིས་བསྐོར་བ་ལ་སེམས་གཏད་ནས་བཟླ་བ་བསྙེན་པ། དེ་ལས་འོད་ཟེར་སྤྲོ་བསྡུའི་སྦྱོར་བས་སྣང་གྲག་དྲན་རྟོག་ཐམས་ཅད་ལྷ་སྔགས་ཡེ་ཤེས་ཀྱི་རོལ་པར་རྩལ་སྦྱོང་ཞིང་བྱིན་རླབས་དང་དངོས་གྲུབ་བསྡུ་བ་སྒྲུབ་པ། ཕྲིན་ལས་རྣམ་བཞིའི་དམིགས་པའི་ལྡེ་ཁ་བསྒྱུར་བ་ལས་སྦྱོར་ཏེ། བསྙེན་སྒྲུབ་ལས་གསུམ་ཆིག་ཆོད་ཀྱི་སྙིང་པོ་ཡི་གེ་དྲུག་མ་གསལ་དག་སྙན་པའི་དབྱངས་ཀྱིས་དལ་དྲེལ་རན་པ་ཆུ་བོའི་རྒྱུན་བཞིན་བཟླ་བའོ། །གསུམ་པ་ཐུགས་རྫོགས་རིམ་འོད་གསལ་རྣལ་འབྱོར་ནི། ལྷ་སྔགས་ཀྱི་སྣང་ཆ་དེ་དག་ཀྱང་སེམས་ཉིད་རང་བྱུང་གི་ཡེ་ཤེས་གསལ་ལ་འཛིན་རྟོག་མེད་པའི་རང་མདངས་སུ་ཤར་བ་ཙམ་ལས་ལོགས་སུ་གྲུབ་པ་རྡུལ་ཙམ་ཡང་མེད་ཅིང་། ལྷ་སྔགས་ཀྱི་རྣམ་པར་ཤར་བཞིན་པའི་རང་དུས་ཉིད་ནས་ངོ་བོ་རིག་སྟོང་དུ་སངས་སེ། རང་བཞིན་གསལ་རིག་ཏུ་རྗེན་ནེ། རོལ་རྩལ་འགགས་མེད་དུ་ལྷང་ངེ་། འཕྲོ་གནས་གང་ལྟར་ཡང་ངོ་བོ་གཉུག་མའི་ཤེས་པ་མཐའ་གྲོལ་རང་བབས་ཆེན་པོའི་ངང་དུ་མ་ཡེངས་ཙམ་དུ་ཤེས་བཞིན་ཆེན་པོའི་མིག་གིས་བལྟས་ཏེ། བློས་བྱས་ཀྱི་སྒོམ་རྒྱུ་ཏིལ་གྱི་ཤུན་པ་ཙམ་ཡང་མེད་པར་བཏང་སྙོམས་ཆེན་པོའི་ངང་ལ་བཞག་ནས་བློ་བྲལ་ཆུ་བོའི་རྒྱུན་གྱི་རྣལ་འབྱོར་ལ་བསླབ་པར་བྱའོ། །དེ་ནི་མ་ཡེངས་མི་བསྒོམ་མཐའ་བྲལ་ཆོས་སྐུའི་ངང་། །རང་བྱུང་རིག་པ་དོན་གྱི་འཛབ་འདི་བཟླས། །ཅེས་པའི་དོན་ནོ། །དེ་ལྟར་སེམས་ཉིད་འོད་གསལ་གྱི་རང་སོ་མ་ཤོར་བའི་ངང་ནས་འགྱུ་དྲན་ལྷ་སྔགས་ཡེ་ཤེས་ཀྱི་འཁོར་ལོར་རྩལ་སྦྱོང་བ་ནི། བསྐྱེད་རྫོགས་ཟུང་འཇུག་ཐེག་རྩེ་ཤིན་ཏུ་རྣལ་འབྱོར་གྱི་དགོངས་པ་རང་བཟོའི་དྲིས་མ་བསླད་པ་ཡིན་ནོ། །ཏིང་ངེ་འཛིན་གྱི་སྒོ་འདི་ལྟ་བུ་ལ་བརྟེན་ནས་སྙིང་པོ་ཡི་གེ་དྲུག་པ་ལན་གཅིག་བརྗོད་པའི་ཡོན་ཏན་ཀྱང་བསམ་གྱིས་མི་ཁྱབ་སྟེ། ཟ་མ་ཏོག་བཀོད་པའི་མདོ་ལས། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཡི་གེ་དྲུག་པའི་རིགས་སྔགས་འདི་བཟླས་པར་བྱས་ན་སྤོབས་པ་མི་ཟད་པར་འགྱུར་རོ། །ཡེ་ཤེས་ཀྱི་ཕུང་པོ་རྣམ་པར་དག་པར་འགྱུར་རོ། །བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པར་འགྱུར་རོ། །ཉི་མ་རེ་རེ་བཞིན་ཡང་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །རིགས་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ། །བྱང་ཆུབ་སེམས་དཔའ་ཕྱིར་མི་ལྡོག་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་འགྱུར་རོ། །ཞེས་དང་། གང་དག་ཕ་རོལ་གྱི་བུད་མེད་ལ་ཆགས་ནས་འདོད་ལོག་སྤྱོད་པ་དང་། སྲོག་གཅོད་པའི་ལས་དང་། ཕ་མ་གསོད་པ་དང་། དགྲ་བཅོམ་པ་གསོད་པ་དང་། དགེ་སློང་མ་སུན་ཕྱུང་བ་དང་། མཆོད་རྟེན་དང་གཙུག་ལག་ཁང་བཤིག་པ་དང་། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་པའི་ལས་ཀྱི་སྒྲིབ་པ་ཐམས་ཅད་ཀྱང་ཟ་མ་ཏོག་བཀོད་པའི་ཡི་གེ་དྲུག་པ་འདིས་རྩ་བ་ནས་འདག་པར་བྱེད་དོ། །ཅེས་སོགས་མདོ་རྒྱུད་ཀུན་ནས་ཕན་ཡོན་བསམ་གྱིས་མི་ཁྱབ་པར་གསུངས་སོ། །དེ་ཡན་ཆད་ནི་ཐུན་གྱི་དངོས་གཞིའོ། །རྗེས་ཀྱི་བྱ་བ་ནི། དགེ་སྦྱོར་ཟིན་མ་ཐག དགེ་དེས་མཁའ་མཉམ་སེམས་ཅན་རྣམས། །ཅེས་པ་ནས། བཀྲ་ཤིས་རྟག་ཏུ་སྣང་བར་ཤོག །ཅེས་པའི་བར་བརྗོད་ཅིང་། འདིར་བསྐྱེད་རྫོགས་ཟབ་མོའི་ངང་ནས་རིགས་སྔགས་ཀྱི་རྒྱལ་པོ་ཡི་གེ་དྲུག་པ་བཟླས་པའི་དགེ་བ་ཅི་ཙམ་ཐོབ་པ་དེ་ཉིད་ཀྱིས་མཚོན་རང་གཞན་རྣམས་ཀྱིས་དུས་གསུམ་དུ་བསགས་པའི་དགེ་རྩ་ཐམས་ཅད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་སྤངས་ནས། བདེ་བ་ཐམས་ཅད་ཀྱི་མཆོག་བྲི་གང་ཟད་པ་མེད་པ་རྫོགས་པའི་སངས་རྒྱས་ཀྱི་གོ་འཕང་ཐོབ་སྟེ་རྩོལ་མེད་རྣམ་པར་མི་རྟོག་པའི་ཕྲིན་ལས་ཡིད་བཞིན་གྱི་ནོར་བུ་ལྟ་བུས་འགྲོ་བའི་རེ་འདོད་ཡིད་བཞིན་དུ་སྐོང་བའི་བཀྲ་ཤིས་དམ་པ་རྟག་ཏུ་སྣང་བའི་རྒྱུར་གྱུར་ཅིག །ཅེས་བདག་གཞན་དགེ་རྩ་ཐམས་ཅད་ལ་བདེན་ཞེན་གྱི་འཆིང་བས་མ་བཅིང་པ་སྒྱུ་མ་རྨི་ལམ་ལྟ་བུའི་ཚུལ་གྱིས་བསྔོ་བར་བྱ་ཞིང་བདེ་སྨོན་བཟང་སྤྱོད་སོགས་སྨོན་ལམ་ཁྱད་པར་ཅན་གང་ཤེས་རྩེ་གཅིག་ཏུ་གདབ་པར་བྱའོ། །གྲོགས་དག་སེམས་བསྐྱེད་བསམ་པ་བཟང་པོའི་ངང་། །ལྷ་གཅིག་ཇོ་བོ་སྤྱན་རས་གཟིགས་བསྒོམ་ནས། །སྔགས་གཅིག་ཡི་གེ་དྲུག་པ་འདི་བཟླས་ན། །ཕྱི་མའི་འགྲོ་ས་ནུབ་ཕྱོགས་བདེ་བ་ཅན། །ལམ་སྣ་འདྲེན་མཁན་མགོན་པོ་འོད་དཔག་མེད། །སྐྱོ་གྲོགས་བྱེད་པ་ལྷ་མོ་སྒྲོལ་མ་སྟེ། །བར་ཆད་བདུད་རྣམས་རྟ་མཆོག་རྒྱལ་པོས་འདུལ། །བྱིན་རླབས་དབང་བསྐུར་ཨོ་རྒྱན་པདྨས་མཛད། །ཐེ་ཚོམ་མི་དགོས་མདོ་རྒྱུད་ལུང་གིས་གྲུབ། །རྒྱལ་བ་རྒྱལ་སྲས་ཡེ་ཤེས་ཆོས་ཉིད་འདྲེལ། །གདུལ་བྱ་འདུལ་བྱེད་ལས་སྨོན་ཐུགས་རྗེས་འདྲེལ། །རྒྱུ་འབྲས་མི་བསླུ་རྟེན་འདྲེལ་ཟབ་མོས་འདྲེལ། །ཐམས་ཅད་ཆོས་ཉིད་བསམ་མི་ཁྱབ་པས་འདྲེལ། །འདྲེལ་ལྡན་གཏམ་ལ་དགོས་པ་བསམ་མི་ཁྱབ། །དགེ་དེས་བདག་གཞན་འདྲེལ་པ་ཐོགས་ཚད་ཀུན། །བདེ་ཆེན་པོ་ཊ་ལ་དང་པདྨ་འོད། །སྐུ་གསུམ་དག་པའི་ཞིང་དུ་སྐྱེ་བར་ཤོག །ཅེས་པ་འདི་ནི་རྣམ་དཀར་དགེ་བའི་བསམ་པ་དང་ལྡན་པ་པདྨ་ཕུན་ཚོགས་ཀྱི་མོས་ངོར་དུས་མཐའི་མ་ཎི་པ་པདྨ་བཛྲ་པས་པདྨ་རིའི་ལྗོངས་འདབ་སུ་བྲིས་པས་རང་གཞན་སེམས་ཅན་ཐམས་ཅད་སྐུ་གསུམ་ངོ་བོ་གཅིག་གིས་བསྡུས་པའི་ཞིང་ཁམས་གང་མོས་དེར་སྐྱེ་བའི་རྒྱུར་གྱུར་ཅིག །དགེའོ།།

རྗེ་བཙུན་འཇམ་དབྱངས་དམར་སེར་གྱི་སྒྲུབ་ཐབས།

༄༅། །རྗེ་བཙུན་འཇམ་དབྱངས་དམར་སེར་གྱི་སྒྲུབ་ཐབས་བཞུགས་སོ། །བླ་མ་དང་ནི་འཇམ་པའི་དབྱངས་། །དབྱེར་མེད་གསོལ་བ་གདབ་འདོད་ན། །ངེས་འབྱུང་བྱང་ཆུབ་སེམས་ལྡན་པས། །དད་མོས་དྲག་པོས་འདི་ལྟར་སྒོམ། །ན་ནོ་གུ་རུ་མཉྫུ་ཤྲཱི་ཡེ། །རང་བདུན་ནམ་མཁར་འཇའ་འོད་ཀློང་། །པདྨ་ཉི་ཟླའི་གདན་གྱི་སྟེང་། །དྷཱིཿཡིག་དམར་སེར་ལས་བྱུང་བའི། །བླ་མ་མགོན་པོ་འཇམ་པའི་དབྱངས་། །མཚམས་སྤྲིན་གསར་བའི་ཁ་དོག་ལ། །གཞོན་ཚུལ་མཚན་དཔེའི་གཟི་འོད་འབར། །དབུ་སྐྲའི་ཟུར་ཕུད་ལྔ་ལྡན་ཞིང་། །ཨུཏྤལ་སྔོན་པོས་ཐོད་ཀྱིས་མཛེས། །དར་དང་རིན་ཆེན་རྒྱན་གྱིས་བརྒྱན། །ཕྱག་གཡས་ཤེས་རབ་རལ་གྲི་འཕྱར། །གཡོན་པས་ཨུཏྤལ་སྡོང་བུ་བསྣམས། །འདབ་མ་སྙན་ཐད་ཁ་ཕྱེ་བར། །སྟོང་ཕྲག་བརྒྱ་བའི་གླེགས་བམ་མཚན། །དགྱེས་འཛུམ་འོད་ཟེར་སྤྲོ་བའི་སྐུ། །རྡོ་རྗེའི་སྐྱིལ་ཀྲུང་ལྷམ་མེར་བཞུགས། །གནས་གསུམ་ཨོཾ་ཨཱཿཧཱུྃ་གསུམ་དང་། །ཐུགས་དབུས་པད་ཟླར་དྷཱིཿ་ཡིག་མཐར། །ཡི་གེ་དྲུག་པའི་སྔགས་ཀྱིས་བསྐོར། །སྟེང་མཁར་བརྒྱུད་གསུམ་བླ་མ་དང་། །མཐའ་སྐོར་སངས་རྒྱས་བྱང་སེམས་ཚོགས། །གྲངས་མེད་ཉི་ཟེར་རྡུལ་བཞིན་འཁྲིགས། །ཐུགས་སྲོག་དྷཱིཿལས་འོད་འཕྲོས་པས། །ཕྱོགས་བཅུའི་རྒྱལ་བའི་ཞིང་ཀུན་དང་། །ཁྱད་པར་རི་བོ་རྩེ་ལྔ་སོགས། །རང་བཞིན་སྤྲུལ་བའི་ཞིང་ཁམས་ནས། །རྗེ་བཙུན་མགོན་པོ་འཇམ་པའི་དབྱངས། །སྲས་དང་བཅས་པ་སྤྱན་དྲངས་བསྟིམས། །ཀྱེ་མ་རྒྱལ་ཀུན་མཁྱེན་བརྩེའི་གཏེར་། །མགོན་པོ་སྙིང་རྗེའི་བདག་ཉིད་དགོངས། །བདག་འདྲ་རྨོངས་པའི་གཞན་དབང་ཅན། །ལས་དང་ཉོན་མོངས་ཤུགས་ཀྱི་བདས། །སྡུག་བསྔལ་འཁོར་བའི་གཡང་སར་འཁྱམས། །ཀྱི་ཧུད་ཁྱེད་ལས་སྐྱབས་གཞན་མེད་། །ལྷང་ལྷང་གདུངས་བས་གསོལ་འདེབས་ན། །མངོན་ཤེས་དྲུག་ལྡན་མགོན་པོ་ཀྱེ། །ཡིད་ལྟར་མགྱོགས་པའི་རྫུ་འཕྲུལ་གྱིས། །མངོན་སུམ་དད་པའི་ཞིང་མཁར་བྱོན། །དགྱེས་པའི་ཞལ་བཟང་བསྟན་ནས་ཀྱང་། །ཚངས་པའི་གསུང་གིས་དབུགས་དབྱུང་ཞིང། །ཐུགས་ཀྱི་དགོངས་པས་རྗེས་བཟུང་ནས། །གཏི་མུག་མུན་པ་ཀུན་བསལ་ཏེ། །བློ་གྲོས་སྣང་བ་རབ་རྒྱས་ཤིང་། །མདོ་རྒྱུད་མན་ངག་ཟབ་མོའི་དོན། །ཇི་ལྟར་ཇི་སྙེད་ཤེས་རབ་ཀྱིས། །མངོན་སུམ་རྟོགས་པར་བྱིན་གྱིས་རློབས། །བྱམས་དང་སྙིང་རྗེའི་སེམས་འབྱོངས་ཤིང་། །རྒྱལ་སྲས་སྤྱོད་པ་རྒྱ་མཚོ་ལ། །འབད་རྩོལ་མེད་བར་སློབས་ནུས་པའི། །མཁྱེན་བརྩེའི་གཏེར་ཆེན་རྙེད་པར་ཤོག །གང་ཞིག་བདག་མཐོང་ཐོས་པ་དང་། །དྲན་རེག་གཏམ་གྱིས་འབྲེལ་བ་སོགས། །ནམ་མཁའི་མཐའ་མཉམ་སེམས་ཅན་ཀུན། །འཁོར་བའི་རྒྱ་མཚོ་ལས་བསྒྲལ་ནས། །བྱང་ཆུབ་མཆོག་ལ་འགོད་ནུས་པའི། །རླབས་ཆེན་མཛད་པའི་ཁུར་འཁྱེར་ཏེ། །མགོན་པོ་ཁྱོད་དང་མཉམ་པར་ཤོག །ཨོཾ་ཨ་ར་པ་ཙ་ན་དྷཱིཿ བཟླས་བརྗོད་བསྙེན་པས་རྒྱུད་བསྐུལ་བས། །སྐུ་གསུང་ཐུགས་ལས་འཕྲོས་པའི་འོད། །ཉི་མ་བྱེ་བའི་གཟི་བྱིན་གྱིས། །འཇིག་རྟེན་གསུམ་པོ་ཀུན་བཀང་སྟེ། །འགྲོ་བའི་སྒྲིབ་གཉིས་ཀུན་བསལ་ནས། །ཡང་དག་ཡེ་ཤེས་བསྐྱེད་པར་བསམ། །ཐུན་མཐའ་འདི་ཡང་ཅུང་ཟད་བཟླ། །ཨོཾ་གུ་རུ་མཉྫུ་ཤྲཱི་ཛྙཱ་ན་ས་ཏྭ་པྲ་ཛྙ་སིདྡྷི་ཕ་ལ་ཧཱུྃཿ དེ་ནས་རང་ལུས་རྡུལ་སྙེད་དུ། །རྣམ་པར་འཕྲུལ་པས་ཕྱག་འཚལ་ཞིང་། །གཞོན་ནུའི་སྐུ་ལུས་འཆང་བ་པོ། །སོགས་ནས་འཇམ་པའི་དབྱངས་ལ་ཕྱག་འཚལ་ལོ། །དང་། གང་བློ་མའི་བསྟོད་པ་ཅི་ནུས་བརྗོད། །དེ་ནས་སྤྲོ་ན་མཎྜལ་སོ་བདུན་མ་དང་། །ས་གཞི་སྤོས་ཆུས་སོགས། དེ་རྗེས། །རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་མར་མེ་དྲི་ཆབ་དང་། ཞལ་ཟས་རོལ་མོ་ལ་སོགས་པའི། །མཆོད་རྫས་ཇི་སྙེད་ཡོད་པ་དང་། །བདག་གིས་གུས་པས་བཤམས་པ་འདི། །རྗེ་བཙུན་མགོན་པོ་འཇམ་དཔལ་དབྱངས། །རྒྱལ་བ་སྲས་དང་བཅས་རྣམས་མཆོད། །ཨོྃ་མཉྫུ་ཤྲཱི་ས་པ་རི་ཝ་ར་ཨརྒྷཾ་སོགས་ནས་ཤབྟའི་བར་གྱིས་མཆོད། །ཀྱེ་མ་རྗེ་བཙུན་མཁྱེན་པའི་གཏེར། །ཐུགས་རྗེའི་བདག་ཉིད་བདག་ལ་དགོངས། །བདག་གིས་ཐོག་མེད་ནས་བསགས་པའི། །སྡིག་ལྟུང་ཉེས་པའི་ཚོགས་ཀུན་བཤགས། །བདག་གཞན་དགེ་ལ་རྗེས་ཡི་རངས། །རྒྱལ་བ་སྲས་དང་བཅས་པ་རྣམས། །ཆོས་འཁོར་བསྐོར་བཞིན་རྟག་བཞུགས་གསོལ། །འདིས་མཚོན་དགེ་བས་བདག་གཞན་ཀུན། །རྫོགས་པའི་བྱང་ཆུབ་ཐོབ་ཕྱིར་བསྔོ། །ཞེས་པས་གསོལ་བཏབ་ལྷ་ཚོགས་རྣམས། །འོད་ཞུ་འཇམ་པའི་དབྱངས་ལ་ཐིམ། །འཇམ་དབྱངས་སྐུ་ཡི་གནས་གསུམ་ནས། །དཀར་དམར་སྔོ་བའི་འོད་ཟེར་འཕྲོས། །བདག་གི་གནས་གསུམ་ཐིམ་པ་ཡིས། །སྒོ་གསུམ་སྒྲིབ་དག་གསང་གསུམ་གྱི། །བྱིན་རླབས་དངོས་གྲུབ་ཐོབ་པར་གྱུར། །མཐར་ནི་བླ་མ་འཇམ་པའི་དབྱངས། །འོད་དུ་ཞུ་ནས་བདག་ལ་ཐིམ། །ཐུགས་ཡིད་དབྱེར་མེད་ཆོས་ཀྱི་དབྱིངས། །སྤྲོས་བྲལ་ནམ་མཁའི་ངང་ལ་བཞག །ཨ་ཨ། དགེ་འདི་ཡིས་མྱུར་དུ་བདག །འཇམ་པའི་དབྱངས་སུ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་བརྗོད་དོ། །དེ་ལྟར་རིང་པོའི་ས་ཕྱོགས་ནས། །དད་དམ་ལྡན་པས་བསྐུལ་བའི་ངོར། །མཁན་མིང་པདྨ་བཛྲ་པས། །བྲིས་པས་འགྲོ་ཀུན་སངས་རྒྱས་ཤོག །དགེའོ།།

འཕགས་པ་འཇམ་དཔལ་གྱི་སྒྲུབ་ཐབས་ཤེས་རབ་བློ་འཕེལ།

༄༅། །འཕགས་པ་འཇམ་དཔལ་གྱི་སྒྲུབ་ཐབས་ཤེས་རབ་བློ་འཕེལ་ཅེས་བྱ་བ་བཞུགས་སོ། །སྐལ་བཟང་ཐར་བ་དོན་གཉེར་པས། །རྨོང་བའི་དྲྭ་བ་ཀུན་བསལ་ནས། ཤེས་རབ་སྣང་བ་རྒྱས་འདོད་ན། །མགོན་པོ་འཇམ་པའི་དབྱངས་ཉིད་བསྒྲུབས། །དེ་ལ་སྦྱོར་དངོས་རྗེས་གསུམ་ལས། །ཐོག་མར་ཡིད་མཐུན་གནས་གཙང་མར། །འཇམ་དཔལ་དང་ནི་དབྱངས་ཅན་མའི། །སྐུ་རྟེན་བྲིས་སྐུ་ཚད་ལྡན་བཀྲམ། །དེ་མཐུན་སྟེགས་བུ་ཁོད་སྙོམས་སྟེང་། །ཚོན་དཀྱིལ་ཚོམ་བུ་གང་འཛོམ་མཐར། །ཉེར་སྤྱོད་བདུན་དང་དཀར་མངར་གྱིས། །མཆོད་གཏོར་རིལ་བུས་བརྒྱན་པས་བཤམ། །སྤྲོ་ན་དབུས་སུ་མཉྫིའི་ཁར། །སྐུ་དང་རྒྱུད་ཀྱི་གླེགས་བམ་དང་། །ཤེས་རབ་རིལ་བུ་དང་བཅས་པའི། །སྒྲུབ་པའི་རྫས་བཅས་དར་གདུག་ཕུབ། །བདེ་བའི་སྟན་ལ་བག་ཕབས་ཏེ། །ངེས་འབྱུང་བྱང་ཆུབ་སེམས་གཉིས་ཀྱིས། །རྒྱུད་སྦྱངས་སྐྱབས་འགྲོ་སེམས་བསྐྱེད་བྱ། །མདུན་མཁར་ཚོགས་ཞིང་གསལ་བཏབ་སྟེ། ན་མོ། སྐུ་གསུམ་རྒྱལ་བ་རིགས་ལྔ་ཡི། །ཐུགས་རྗེའི་རྣམ་འཕྲུལ་ལྷག་པའི་ལྷ། །ཉི་ཟླའི་དཀྱིལ་འཁོར་ཤར་བ་ལྟར། །འགྲོ་བའི་བློ་མུན་སེལ་མཛད་པའི། །མཁྱེན་རབ་བདག་པོ་འཇམ་དཔལ་དབྱངས་། །ཤེས་རབ་ལྷ་མོ་དབྱངས་ཅན་མ། །རྒྱལ་བ་སྲས་དང་བཅས་རྣམས་ལ། །བདག་ནི་སྙིང་ནས་སྐྱབས་སུ་མཆི། །ལན་གསུམ། །བདག་གཞན་འགྲོ་བ་ཐམས་ཅད་ཀྱི། །མི་ཤེས་མུན་པ་ཀུན་བསལ་ནས། །ཀུན་མཁྱེན་ཡེ་ཤེས་ཐོབ་པའི་ཕྱིར། །ལྷག་པའི་ལྷ་མཆོག་སྒྲུབ་པར་བྱ། །ལན་གསུམ། །དེ་ནས་མཆོད་རྫས་བརླབ་པ་ནི། །རང་ཉིད་ལྷར་གསལ་ཐུགས་ཀར་ནས། རཾ་ཡཾ་ཁཾ་འཕྲོས་དངོས་འཛིན་སྦྱངས། །བྷྲཱུྃཿལས་རིན་ཆེན་སྣོད་ཡངས་པར། །ཨོཾ་ལས་ཉེར་སྤྱོད་གཏོར་མར་བཅས། །འདོད་ཡོན་མཆོད་པའི་སྤྲིན་ཕུང་ནི། །ནམ་མཁའ་མཉམ་པར་སྤེལ་ཞིང་བསྒྱུར། །ཨོཾ་བཛྲ་ཨ་རྒྷཾ་ཨཱ ཧཱུྃ་སོགས་ནས་ཤབྟའི་བར་དང་། ཨོཾ་མ་ཧཱ་བ་ལིངྟ་སརྦ་པུ་ཛ་ཨཱ་ཧཱུྃཿ ལན་གསུམ། དེ་ནས་དངོས་གཞིའི་རིམ་པ་ནི། ཨོཾ་སྭ་བྷ་ཝ་ཤུདྡྷོ་སོགས་ནས་ཨཏྨ་ཀོ་ཧཾ། །སྣང་ཞིང་སྲིད་པའི་ཆོས་རྣམས་ཀུན། །སྟོང་ཉིད་ནམ་མཁའ་ལྟ་བུའི་ངང་། །སྙིང་རྗེ་སྒྱུ་མའི་ཆོ་འཕྲུལ་ལས། །ཕྱོགས་བཅུ་ཐམས་ཅད་དག་པའི་ཞིང་། །ཡངས་ཤིང་རྒྱ་ཆེ་མུ་མཐའ་མེད། །རིན་ཆེན་གསེར་གྱི་ས་གཞི་ལ། །བཻཌཱུརྱ་ཡི་མིག་མང་བྲིས། །སྣ་ཚོགས་ལྗོན་པའི་ཡལ་འདབ་རྣམས། །མེ་ཏོག་འབྲས་བུའི་ཁུར་གྱིས་དུད། །ཡན་ལག་བརྒྱད་ལྡན་རྫིང་བུ་ལ། །ཆུ་བྱའི་ཚོགས་རྣམས་འཕུར་ལྡིང་གཡོ། །ཁོར་ཡུག་རི་དང་སྐྱེད་མོའི་ཚལ། །ལྷ་དང་དྲང་སྲོང་གྲུབ་པ་དང་། །རིག་པ་འཛིན་པའི་ཚོགས་ཀྱིས་བསྟེན། །དེ་དབུས་མཆོག་དང་ཐུན་མོང་གི །དངོས་གྲུབ་འདོད་འབྱུང་འོ་མའི་མཚོ། །དྭངས་བསིལ་དཀར་ཟླུམ་འཁྱིལ་བ་ལ། །ཆུ་སྐྱེས་པདྨ་ཨུཏྤ་ལ། །ཀུནྡའི་ཚོགས་ཀྱིས་མཛེས་པར་ཁྱབ། །མཚོ་དཀྱིལ་པདྨའི་སྡོང་པོ་ནི། །རྩ་བ་གཅིག་ལས་སྐྱེས་པ་ཡི། །ཡལ་འདབ་ལོ་འབྲས་ཕྱོགས་ཀུན་གཡོ། །རྩེ་མོ་གཉིས་སུ་གྱེས་པའི་སྟེང་། །སྣ་ཚོགས་འདབ་མ་སྟོང་ལྡན་པའི། །པདྨ་ཉི་ཟླའི་གདན་གྱི་དབུས། །མུྃཿདང་ཧྲཱིཿཡི་ས་བོན་ལས། གཡས་སུ་རྒྱལ་བ་ཀུན་གྱི་ཡབ། །རྒྱལ་སྲས་གཞོན་ནུའི་ཚུལ་འཛིན་པ། །སྨྲ་བའི་སེངྒེ་འཇམ་དཔལ་དབྱངས། །དམར་སེར་གུར་གུམ་གསལ་བའི་མདངས། །རལ་བའི་ཟུར་ཕུད་ལྔ་དང་ལྡན། །ཕྱག་གཡས་ཤེས་རབ་རལ་གྲི་འཕྱར། །འགྲོ་བློའི་མི་ཤེས་དྲྭ་བ་གཅོད། །གཡོན་པས་ཨཏྤལ་གླེགས་བམ་བསྣམས། །ཤེས་བྱའི་ཆོས་ཀུན་ཐུགས་སུ་ཆུད། །སེམས་དཔའི་སྐྱིལ་མོ་ཀྲུང་གི་བཞུགས། །གཡོན་དུ་རྒྱལ་བ་ཀུན་གྱི་ཡུམ། །རྒྱ་མཚོའི་བུ་མོ་དབྱངས་ཅན་མ། །སྟོན་ཟླ་གཞོན་ནུའི་ལང་ཚོ་ཅན། །གནག་སྣུམ་དབུ་སྐྲའི་ཟར་བུ་དང་། །སྨིན་འཁྱུག་ནུ་འབུར་སྒེག་པའི་ཉམས། །ཕྱག་གཉིས་རིན་ཆེན་པི་ཝཾ་བསྒྲེང་། །ཆོས་ཀུན་མ་འདྲེས་གསལ་བར་སྟོན། །ཞབས་ཟུང་ཙོག་པུའི་སྟབས་ཀྱིས་བཞུགས། །གཉིས་ཀའང་དར་གྱི་ཆས་གོས་དང་། །རྣམ་མང་རིན་ཆེན་རྒྱན་གྱིས་སྤྲས། །བལྟ་བས་མི་ངོམ་མཚན་དཔེར་ལྡན། །སྣ་ཚོགས་འོད་ཀྱི་དཀྱིལ་འཁོར་མཛེས། །ཉི་ཟླའི་དཀྱིལ་འཁོར་རྒྱས་པ་ལ། །རྒྱུར་སྐར་ཚོགས་ཀྱིས་བསྐོར་བ་བཞིན། །མཐའ་སྐོར་སངས་རྒྱས་བྱང་སེམས་དང་། དཔའ་བོ་མཁའ་འགྲོ་ཆོས་སྲུང་ཚོགས། །བསམ་གྱིས་མི་ཁྱབ་རྡུལ་འཁྲིགས་བཞིན། །གནས་གསུམ་ཡི་གེ་གསུམ་གྱིས་མཚན། །རྡོ་རྗེ་གསུམ་གྱི་ངོ་བོ་གྲུབ། །རྣམ་སྣང་མཛད་དང་ལོ་ཙཱ་ནའི། །རིགས་ཀྱི་བདག་པོར་བྱས་པ་ཡི། །གཤེགས་པ་ལྔ་དང་གཤེགས་མ་ལྔས། །ཡབ་ཡུམ་སོ་སོར་དབུ་བརྒྱན་གྱུར། །སྤྱན་འདྲེན་པ་ནི། སྙིང་གའི་ཧཱུྃ་གི་འོད་ཟེར་གྱིས། །རང་བཞིན་ཆོས་དབྱིངས་གནས་མཆོག་ནས། །གྲངས་མེད་ཡེ་ཤེས་སེམས་དཔའི་ཚོགས། །མདུན་གྱི་ནམ་མཁར་སྤྱན་དྲངས་སོ། །ཨོཾ་བཛྲ་ས་མ་ཡཱ་ཛཿ ཨོཾཿམཐའ་དབུས་བྲལ་བ་རིག་པའི་དབྱིངས། །དུས་གསུམ་རྒྱལ་བ་ཀུན་གྱི་གནས། །འདུ་འབྲལ་མེད་པའི་དཀྱིལ་འཁོར་ནས། ལྷུན་གྱིས་གྲུབ་པའི་ལྷ་ཡི་ཚོགས། མཁའ་ལ་འཇའ་ཚོན་ཤར་བ་བཞིན། །ཡེ་ཤེས་རང་གསལ་སྤྱན་འདྲེན་གཤེགས། ཨོཾ་མཉྫུ་ཤྲཱི་སྭ་ར་སྭ་ཏི་ས་པ་རི་ཝ་ར་བཛྲ་ས་མ་ཡ་ཛཿཛཿ བཞུགས་སུ་གསོལ་བ་ནི། །བརྟན་དང་གཡོ་བའི་འཇིག་རྟེན་ཀུན། །དེ་བཞིན་གཤེགས་པའི་བདག་ཉིད་དེ། །དམ་ཚིག་ཡེ་ཤེས་དབྱེར་མེད་པས། །ཆུ་ལ་ཆུ་བཞག་ལྟ་བུར་བཞུགས། །བཛྲ་ཏིཥྛནྟུ། ཕྱག་འཚལ་བ་ནི། །སྲིད་དང་ཞི་བ་མཉམ་པ་ཉིད། །དབྱིངས་ལ་བཟང་ངན་མ་མཆིས་ཀྱང་། །དོན་དམ་ལྷ་ཞལ་མཐོང་བའི་བརྡར། །དད་གུས་གདུང་བས་ཕྱག་འཚལ་ལོ། །ན་མོ་པཱུ་ཛ་ཧོཿ མཆོད་པ་ནི། དབང་པོའི་སྤྱོད་ཡུལ་ཇི་སྙེད་པ། །ཐམས་ཅད་ཀུན་བཟང་རོལ་བའི་རྒྱན། །སྣང་སྲིད་ཆོས་ཀུན་སྤང་བླང་བྲལ། ཤར་གྲོལ་ཞེན་མེད་མཆོད་པར་བཞེས། །རུ་པ་ཤབྟ་གནྡྷེ་ར་ས་པཪྴེ་དྷརྨ་སརྦ་མ་ཧཱ་སུ་ཁ་པཱུ་ཛ་ཧོ། །བསྟོད་པ་ནི། །ཨེ་མ་ཧོ་རྒྱལ་བ་ཐམས་ཅད་ཀྱི། །སྐུ་གསུང་ཐུགས་ཀྱི་བདག་ཉིད་ཆེ། །ཤེས་དང་ཤེས་བྱ་ཐམས་ཅད་ལ། །རྟག་ཁྱབ་བྲི་གང་མེད་པར་བཞུགས། །ལྟ་དང་ཐེ་ཚོམ་ཀུན་སྤང་པའི། །དད་པའི་ཡིད་ལ་མངོན་སུམ་དུ། །མཁའ་ལ་འཇའ་ཚོན་ཇི་བཞིན་དུ། །མཚན་དཔེའི་དཀྱིལ་འཁོར་གསལ་བར་སྣང་། །རྟོག་མེད་རྡོ་རྗེའི་གསུང་གི་དབྱངས། །གདུལ་བྱའི་ཡིད་དང་རྗེས་མཐུན་པས། །རྣམ་ཐར་ཐེག་པའི་སྒོ་མོ་ནི། །བསམ་གྱིས་མི་ཁྱབ་ཀུན་དུ་གྲགས། །སྤྲོས་མེད་མཁའ་དང་མཉམ་པའི་ཐུགས། །གཟུངས་དང་ཏིང་འཛིན་ཡེ་ཤེས་ཀྱི། །གཏེར་གྱུར་སྙིང་རྗེའི་རང་བཞིན་ཅན། །ཕྱོགས་དང་རིས་མེད་མཉམ་པར་བརྡལ། །དཔག་བསམ་ཤིང་དང་ནོར་བུ་ལྟར། །ལྷུན་གྲུབ་ཡོད་ཏན་ཚོགས་ཆེན་པོ། །འགྲོ་བའི་དོན་ཆེན་བསྒྲུབ་པའི་ཕྱིར། །འབད་རྩོལ་མེད་པར་ཉེ་བར་གནས། །ཨེ་མ་ཧོ་སྲིད་པ་ཇི་སྲིད་པར། །རྒྱལ་བ་ཀུན་གྱི་ཕྲིན་ལས་ནི། །ཆགས་ཐོགས་མེད་པར་བསྒྲུབ་མཛད་པའི། །ལྷག་པའི་ལྷ་མཆོག་ཁྱོད་ཕྱག་འཚལ། །བདག་སོགས་འགྲོ་བ་ཐམས་ཅད་ཀྱི། །མི་ཤེས་དྲྭ་བ་ཀུན་བཅད་ནས། །ཟབ་དང་རྒྱ་ཆེའི་ཆོས་ཀུན་ལ། །བློ་གྲོས་སྣང་བ་རྒྱས་པར་མཛོད། །དེ་ནས་བཟླས་པ་བྱ་བ་ནི། །ཡབ་ཡུམ་ཐུགས་ཀར་ཨུཏྤལ་སྟེང་། །ཟླ་དཀྱིལ་དབུས་སུ་མཱུྃཿ་དང་ཧྲཱིཿ། །མཐར་བསྐོར་གདན་ལ་མ་རེག་ཙམ། །སྔགས་ཀྱི་ཕྲེང་བ་གཡས་སུ་འཁོར། །འོད་ཀྱིས་ཕྱོགས་བཅུའི་ཞིང་ཀུན་ཁྱབ། །རྒྱལ་བ་སྲས་བཅས་མཆོད་ཅིང་བསྐུལ། །དྲན་དང་ཤེས་རབ་ཏིང་ངེ་འཛིན། །གཟུང་དང་སྤོབས་པའི་ཡོན་ཏན་རྣམས། །སྐུ་དང་དབྱངས་གསལ་ཕྱག་མཚན་གྱི། །རྣམ་པར་ཚུར་འདུས་རང་ལ་ཐིམ། །འཆད་རྩོད་རྩོམ་ལ་ཐོགས་མེད་པའི། །བློ་གྲོས་སྣང་བ་རྒྱས་པར་བསམ། །ཨོྃ་ཝ་ཀི་ཤྭ་རི་མུྃ། །ཅེས་དང་། ཨོཾ་ཨ་ར་པ་ཙ་ན་ཡ་ཏི་ན་མཿ། སྔགས་ཚན་གཉིས་སམ་སོ་སོར་བཟླ། །དེ་ནས་ཡུམ་སྔགས་བཟླས་པ་ནི། །ཨོཾ་ཝ་ཀྱེ་དཱེ་ཝ་པྲ་ཛྙཱ་ཛྙཱ་ན་སརྦ་སིདྡྷི་ཧྲཱིཿ། འབྲུ་འབུམ་རེ་བཟླས་བསྙེན་པའོ། །སྒྲུབ་དུས་མདུན་རྟེན་རང་འདྲ་བའི། །ལྷར་བསྒོམ་ཐུགས་ཀར་སྔགས་ཕྲེང་བཀོད། །སྤྲོ་བསྡུས་བཟུས་པ་སྔར་བཞིན་བྱ། །ལས་སྦྱོར་བདག་མདུན་ཐུགས་ཀ་ནས། སྔགས་ཀྱི་འོད་ཟེར་ཕྱོགས་བཅུར་སྤྲོས། །ཁམས་གསུམ་སེམས་ཅན་ཐམས་ཅད་ཀྱི། །མི་ཤེས་རྨོངས་པ་ཀུན་བསལ་ནས། །ཤེས་རབ་སྣང་བ་རྒྱས་གྱུར་ཏེ། །སྐྱེས་པ་ཐམས་ཅད་འཇམ་དཔལ་དབྱངས་། །བུད་མེད་ཐམས་ཅད་དབྱངས་ཅན་མར། །གྱུར་བའི་ལྗགས་རྣམས་ཨུཏྤ་ལ། །མུཾཿདང་ཧྲཱིཿ་ཡི་མཚན་པ་ལས། །སྔགས་དང་རྡོ་རྗེའི་རྒྱུད་ཀྱི་སྒྲ། །ནམ་མཁའ་ཁྱབ་པར་སྒྲོགས་པར་བསམ། །སྔགས་ཚན་གསུམ་དང་འཇམ་དཔལ་གྱི། །མཚན་ཡང་དག་པར་བརྗོད་པའི་རྒྱུད། །གསུམ་བདུན་ཉེར་གཅིག་ལ་སོགས་པ། །གསལ་དག་སྙན་པའི་དབྱངས་ཀྱིས་བརྗོད། །དེ་ཚེ་དངོས་ཉམས་རྨི་ལམ་དུ། །རིག་པ་དྭངས་ཤིང་སྙིང་རྗེ་དང་། །ཤེས་རབ་སྤོབས་པའི་གཏེར་ཁ་རྡོལ། །བསྟན་བཅོས་སྣ་ཚོགས་བློ་ལ་འཆར། །སྐུ་གསུང་ཐུགས་ཀྱི་རྟགས་རྣམས་མཐོང་། །ཉི་ཟླ་ཤར་དང་ཁྲུས་བྱེད་པ། །གོས་དཀར་གྱོན་དང་གངས་རིར་འཛེགས། །དེ་སོགས་རྟགས་མཚན་བསམ་ལས་འདས། །རེ་དོགས་རློམ་སེམས་སྤང་བར་བྱ། །ཐུན་མཐར་དབྱངས་གསལ་ཡིག་བརྒྱ་དང་། །རྟེན་འབྲེལ་སྙིང་པོ་གསུམ་གསུམ་དུ། །བཟླས་པས་བརྟན་བྱས་ཆད་ལྷག་སྐོང་། །དེ་ནས་རྗེས་ཀྱི་རིམ་པ་ནི། །མཆོད་བསྟོད་བརྟན་བཞུགས་ཉེར་བསྡུ་བྱས། །རང་རིག་སེམས་ཀྱི་དཀྱིལ་འཁོར་དུ། །ལྷ་ཚོགས་གསལ་སྟོང་ཆེན་པོར་ཤར། །ནམ་མཁར་འཇའ་འཚོན་ཡལ་བ་ལྟར། སྐྱེ་མེད་ཆོས་ཀྱི་དབྱིངས་སུ་བཞག །ཨ་ཨཿ རྗེས་ཐོབ་འཇམ་དཔལ་དཔའ་བོའི་སྐུ། །གསལ་ལ་འཛིན་མེད་ཆུ་ཟླ་བཞིན། །མ་ཡེང་ཙམ་དུ་གནས་པ་ལས། །ཀུན་ཏུ་བཟང་པོའི་སྤྱོད་པ་སྤྱད། ཨོཾ་ཨ་ར་པ་ཙ་ན་དྷི༔ བསྔོ་བ་སྨོན་ལམ་ཤིས་པ་བརྗོད། །འཇམ་དཔལ་དཔའ་བོའི་དང་། །དུས་གསུམ་གཤེགས་པའི་སོགས། །དགེ་བ་འདི་ཡིས་ཤེས་རབ་ལྷའི། །གོ་འཕང་མྱུར་དུ་ཐོབ་གྱུར་ནས། །འགྲོ་བ་གཅིག་ཀྱང་མ་ལུས་པ་། །དེ་ཡི་ས་ལ་འགོད་པར་ཤོག །གང་ཚེ་བལྟ་བར་འདོད་པའམ། །ཅུང་ཟད་འདྲི་བར་སོགས་དང་། ཕྱོགས་བཅུ་ནམ་མཁའི་སོགས་བརྗོད། །ཨོཾ་བཀྲ་ཤིས་གང་ཞིག་ཕྱོགས་བཅུའི་ཞིང་ཀུན་དུ། །མཆོག་གསུམ་ཉི་ཟླའི་སྣང་བ་རྟག་འཆར་བས། འགྲོ་བའི་མི་ཤེས་མུན་པ་ཀུན་བཅོམ་སྟེ། །ཐར་གླིང་ཉིན་མོར་བྱེད་པའི་བཀྲ་ཤིས་ཤོག །བཀྲ་ཤིས་གང་ཞིག་འགྲོ་བའི་སྙིང་ལ་གནས། །རྟག་ཏུ་མི་འགྱུར་ཡེ་ཤེས་ཆེན་པོའི་སྐུ། །དང་པོའི་སངས་རྒྱས་འཇམ་དཔལ་གཞོན་ནུའི་ཞལ། །མངོན་སུམ་ཉིད་དུ་མཐོང་བའི་བཀྲ་ཤིས་ཤོག །བཀྲ་ཤིས་གང་ཞིག་སོ་སོར་ཡང་དག་རིག །རྣམ་བཞིར་དབང་འབྱོར་ངག་གི་དཔལ་ཐོབ་ནས། འཆད་རྩོད་རྩོམ་པས་གདུལ་བྱའི་སྐལ་པ་བཞིན། །ཟབ་རྒྱས་ཆོས་ཆར་འབེབས་པའི་བཀྲ་ཤིས་ཤོག །ཅེས་པའང་དད་དམ་གྱི་ནོར་དང་ལྡན་པའི་བཙུན་པ་དཀོན་མཆོག་ནོར་བུས་གསོལ་བ་བཏབ་པའི་ངོར་དོན་གྱི་ཐམས་ཅད་མཁྱེན་པ་གྲུབ་པའི་དབང་ཕྱུག་ཨོ་རྒྱན་ཆེ་མཆོག་དཔལ་གྱི་རྡོ་རྗེའི་གསུངས་པའི་འཇམ་དཔལ་དང་དབྱངས་ཅན་མ་སྦྲག་སྒྲུབ་ཤེས་རབ་བློ་འཕེལ་གྱི་རྩ་བའི་ཚིག་རྐང་གཞིར་བཟུང་ནས་ཅུང་ཟད་རྒྱས་སུ་བཏང་སྟེ་བཀླག་ཆོག་ཏུ་བཀོད་པ་འདི་ནི། ཞུ་བ་པོ་དེ་ཉིད་ཀྱིས་ལྷ་རྫས་ཀྱི་སྐྱེས་བཅས་འདི་ལྟར་དགོས་ཅེས་བསྐུལ་བའི་ནན་ངོ་མི་ལྡོག་ཙམ་དུ་རིག་འཛིན་གྱི་བཙུན་པ་པདྨ་བཛྲ་པས་དབེན་གནས་པདྨ་དགྱེས་པའི་ཐང་ནས་བྲིས་པ་ཐོག་མཐའ་བར་དུ་དགེ་བར་གྱུར་ཅིག །དགེའོ། །དགེའོ། །དགེའོ།།

རྡོ་རྗེ་ཕུར་པའི་མངོན་རྟོགས་བསྡུས་པ།

༄༅། །རྡོ་རྗེ་ཕུར་པའི་མངོན་རྟོགས་བསྡུས་པ་བཞུགས་སོ། །ཧེ་རུ་ཀ་ལ་ན་མོ། ཨརྦུ། གར་ཡང་མ་གྲུབ་དབྱིངས་ཀྱི་རྒྱ་མཚོ་ལ། །ཅིར་ཡང་མི་འཛིན་བློ་ཡི་རླབས་ཐིམ་པས། །རང་གསལ་མངོན་སུམ་ལྷན་སྐྱེས་བདེ་བ་ཆེ། །ང་ནི་ངེས་དོན་ཟུང་འཇུག་ཀཱི་ལ་ཡ། །དབྱིངས་རིག་དབྱེར་མེད་འོད་གསལ་ཆེན་པོའི་རྩལ། །གར་དགུའི་རྣམ་རོལ་སྒྱུ་འཕྲུལ་དྲྭ་བའི་སྐུ། །དཀྱིལ་འཁོར་འཁོར་ལོའི་ཕྱག་རྒྱར་ཡོངས་ཤར་བ། །ང་ནི་དྲང་དོན་རྟགས་ཀྱི་ཀཱི་ལ་ཡ། །ཆགས་པས་རང་གི་བཙུན་མོར་འཁྱུད་ཅིང་སྦྱོར། །སྡང་བས་བདུད་སྡེའི་ཚོགས་ལ་རྔམས་ཤིང་འཁྲུག །རྨོངས་པས་གཙང་རྨེའི་རྟོག་བྲལ་རོ་ཆས་ཅན། །ང་ནི་དུག་གསུམ་འབར་བའི་ཀཱི་ལ་ཡ། རྒྱས་བཤད། མཚན་དཔེའི་སྐུ་ལ་རུས་པའི་རྒྱན་སྤྲས་པའི། །མཛེས་ཤིང་སྒེག་པའི་གར་གྱིས་མ་མོ་འབུམ། །དབང་དུ་སྡུད་ཅིང་ཆགས་ཆེན་སྙིང་རྗེའི་ཤུགས། །གཡོས་པའི་བཞད་སྒྲས་རྩེན་ཅིང་བསྲུང་པས་དགྱེས། །ཁོང་ནས་ཁྲོས་པའི་ལུས་ཀྱི་ཤ་འགྱུར་བའི། །ཁྲོ་གཉེར་གཡོ་བ་དཔའ་བའི་ཉམས་འབར་བས། །བརླང་པོར་གཤེ་བའི་ང་རོ་སྒྲོག་བཞིན་དུ། །རྔམས་པའི་སྟབས་ཀྱིས་བདུད་བགེགས་གསོད་ཅིང་ཟ། །ཤིན་ཏུ་རྨོངས་པའི་གཉིས་རྟོག་ཞི་བའི་ཉམས། །ཤ་རྒྱས་ཡན་ལག་རགས་ཤིང་ཁྲག་ཞགས་ཆགས། །མི་སྡུག་ཐོད་སྦྲུལ་དུར་ཁྲོད་ཆས་བགོས་ནས། །དྲག་ཤུལ་སྒྲ་ཡིས་སྲིད་གསུམ་བརྒྱལ་བར་བྱེད། །སྙིང་རྗེའི་སྒེག་ཅིང་བཞད་པའི་གར་ལྡན་པས། །ཆགས་ཆེན་རྒྱ་མཚོའི་དབའ་རླབས་གཡོ་བའི་དབུས། །བདེ་སྟོང་ལྷན་སྐྱེས་རིག་པའི་རྩལ་རྫོགས་པ། །འདོད་ཁམས་སྤྲུལ་སྐུར་སྒྲོལ་བའི་ཀཱི་ལ་ཡ། །དཔའ་བས་རྔམས་ཤིང་གཤེ་བའི་གར་ལྡན་པས། །ཞེ་སྡང་མེ་དཔུང་འབར་བའི་དཔལ་གྱི་རྩེར། །གསལ་སྟོང་རྡོ་རྗེ་ཁྲོས་པའི་ཉམས་རྒྱས་པ། །གཟུགས་ཁམས་ལོངས་སྐུར་སྒྲོལ་བའི་ཀཱི་ལ་ཡ། །ཞི་བས་མི་སྡུག་དྲག་ཤུལ་གར་ལྡན་པས། །གཏི་མུག་མུན་པ་འཁྲིགས་པའི་ཀློང་དཀྱིལ་ནས། །མི་རྟོག་འོད་གསལ་ངང་དུ་འབྱམས་ཀླས་པ། །གཟུགས་མེད་ཆོས་སྐུར་སྒྲོལ་བའི་ཀཱི་ལ་ཡ། །དོན་བསྡུས། དུག་གསུམ་རྟོག་པའི་ངར་དང་མ་བྲལ་བཞིན། །བདེ་གསལ་མི་རྟོག་རིག་པའི་རྩལ་རྫོགས་ནས། །སྐུ་གསུམ་འབྲས་བུ་ལམ་དུ་མངོན་བྱེད་པ། །འདི་ནི་ཐབས་ཆེན་རྡོ་རྗེའི་ཐེག་པའོ། །པདྨ་བཛྲ་པས་སོ། །དགེའོ།།

དཔལ་ཆེན་མཚན་ཐུན་ལས་བྱང་།

༄༅། །དཔལ་ཆེན་མཚན་ཐུན་ལས་བྱང་། །མཚན་མོ་གཉིད་ཁ་སོགས་ནམ་ཡང་། སྣང་བ་ལྷ། གྲག་པ་སྔགས། དྲན་རྟོག་ཆོས་ཉིད་ཡེ་སྟོང་ཐུགས་སུ་ཤེས་པ་ཞིག་ལ་དུས་རྒྱུན་བསླབ་ཕྱིར། འདི་ཁེར་བུས་ལས་བྱང་གི་གོ་ཆོད། ཐུན་བཟུང་དུས་ཡང་འདི་ཁོ་ནས་ཆོག །ཞེས་གསུངས། ཧཱུྃ སྟོང་གསུམ་སྟོང་གི་འཇིག་རྟེན་ན། །ཕྱོགས་བཅུ་སྟོང་གི་འཇིག་རྟེན་ན། །སྐྱེ་འགྲོ་རྩི་ཤིང་ནགས་ཚལ་རྣམས། །ཀུན་ཀྱང་དཔལ་ཆེན་རོལ་པའི་ལྷ། །སྐུ་ལ་དུར་ཁྲོད་ཆས་བརྒྱད་གསོལ། །གསུང་གི་འཛབ་དབྱངས་འབྲུག་ལྟར་སྒྲོག །ཐུགས་ནི་མི་རྟོག་ཆོས་དབྱིངས་བཞུགས། །སྐུ་གསུང་ཐུགས་ཀྱི་བྱིན་རླབས་ཀྱིས། །ལུས་ངག་ཡིད་གསུམ་བྱིན་གྱིས་རློབས། །པདྨ་བཛྲ་པས་དཔལ་ཆེན་མཚན་ཐུན་ལས་བྱང་གི་ཚབ་འདི་ཁོ་ནས་ཆོག་རྒྱུར་དམིགས་ནས་བྲིས་པ་དགེའོ།།

དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་འབྲིང་པོའི་སྒྲུབ་ཐབས་ཡེ་ཤེས་ཆར་འབེབས་ལས་བསྙེན་པའི་ལས་བྱང་ཉུང་ངུར་དྲིལ་བ།

༄༅། །དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བ་འབྲིང་པོའི་སྒྲུབ་ཐབས་ཡེ་ཤེས་ཆར་འབེབས་ལས་བསྙེན་པའི་ལས་བྱང་ཉུང་ངུར་དྲིལ་བ་བཞུགས་སོ། །ཨོཾ་སྭ་སྟི། མཆོག་ཏུ་མི་འགྱུར་བདེ་ཆེན་རྡོ་རྗེའི་བདག །མཁའ་ལྟར་ཀུན་ཁྱབ་དཀྱིལ་འཁོར་རྒྱ་མཚོའི་གཙོ། །རིགས་ཀྱི་བདག་པོ་རིག་པའི་རྡོ་རྗེ་ལ། །རྣམ་ཀུན་འདུ་འབྲལ་མེད་པའི་ཕྱག་གིས་འདུད། །གསང་ཆེན་རྒྱུད་སྡེའི་ཡང་ཞུན་སྙིང་པོའི་བཅུད། །ཚེ་གཅིག་སངས་རྒྱས་སྒྲུབ་པའི་གསང་ལམ་ཆེ། །དཔལ་ལྡན་སྒྱུ་འཕྲུལ་དྲྭ་བའི་བསྙེན་པ་ལ། །འཇུག་པའི་ལས་བྱང་སྙིང་པོར་དྲིལ་ཏེ་བརྗོད། །དེ་ལ་འདིར་སློབ་དཔོན་གྱིས་སྔོན་དུ་བྱ་བའི་བསྙེན་པ་སོགས་ལ་ཉེ་བར་མཁོ་བའི་ལས་བྱང་གནས་སྐབས་སུ་ཁྱེར་བདེ་བ་ཞིག་འབྲིང་པོ་ལས་ཅུང་ཟད་བསྡུས་ཏེ་གཏེར་ཆེན་ཆོས་ཀྱི་རྒྱལ་པོའི་གསུང་སོར་བཞག་སྟེ་བྲི་བ་ལ། ཐོག་མར་སྒྱུ་འཕྲུལ་དྲྭ་བའི་དཀྱིལ་འཁོར་དུ་དབང་གིས་སྨིན་ཅིང་དམ་ཚིག་དང་སྡོམ་པ་ལ་གནས་པས་རྒྱུད་དག་པའི་གང་ཟག་རང་གཞན་གྱི་དོན་གཉིས་སྒྲུབ་པའི་ཕྱིར་མཆོག་ཐུན་གྱི་དངོས་གྲུབ་དོན་དུ་གཉེར་བ་དག་གི་བསམ་གཏན་དང་རྗེས་སུ་མཐུན་པའི་གནས་སུ་ཡོ་བྱད་རྣམས་ཚོགས་པར་བྱས་ཏེ། རྟེན་མཆོད་ཚུལ་བཞིན་བཤམས་པའི་མདུན་དུ་སྟན་བདེ་བ་ལ་འཁོད་ནས་ཇི་ལྟར་སྒྱུབ་པའི་རིམ་པ་དངོས་ལ་གསུམ་སྟེ། སྔོན་འགྲོ། དངོས་གཞི། རྗེས་ཀྱི་རིམ་པའོ། །དང་པོ་ལ་དྲུག་ལས། ཐོག་མར་རྒྱུད་སྦྱང་བ་ནི། རང་གི་སྙིང་གའི་ཧཱུྃ་གི་འོད་ཟེར་གྱིས་རང་བཞིན་གྱི་གནས་ནས། བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་སད་པར་བྱས་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཞིང་། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་དབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ་ལ་སོགས་པར་བརྗོད་ལ། ཚོགས་ཞིང་རྣམས་རང་ལ་བསྡུས་ཏེ་ཀ་དག་གཉིས་སུ་མེད་པའི་ཀློང་དུ་རང་བབས་སུ་མཉམ་པར་བཞག་གོ། །གཉིས་པ་མཚམས་བཅད་པ་ནི། ཧཱུྃ་ཞེས་བརྗོད་པས། འདི་ལྟར་གཟུང་བ་དང་འཛིན་པའི་ཆོས་ཐམས་ཅད་སྟོང་ཞིང་བདག་མེད་པ་ནམ་མཁའ་ལྟ་བུའི་ངང་ལ་མཉམ་པར་བཞག །སྟོང་ཉིད་དེའི་ངང་ལས། ཧཱུྃ་བཛྲ་དྷྲིཀ྄་ཞེས་བརྗོད་པས། རང་ཉིད་སྐད་ཅིག་གིས་རྡོ་རྗེ་སེམས་དཔའ་མཐིང་ག་རྡོ་རྗེ་དང་དྲིལ་བུ་འཛིན་པའི་སྐུར་བསྒོམ་མོ། །རྡོ་རྗེ་གསོར་བའི་ཕྱག་རྒྱ་བཅས་ཏེ། ཧཱུྃ ལུས་ངག་ཡིད་གསུམ་རྡོ་རྗེ་ནི། །སྐུ་གསུང་ཐུགས་ཀྱི་ཡེ་ཤེས་ཏེ། །སྐུ་གསུང་ཐུགས་ཀྱི་ཡེ་ཤེས་ནི། །རྡོ་རྗེ་སེམས་དཔའ་དཔའ་བོ་ཡིན། །རྡོ་རྗེ་སེམས་དཔའ་ང་གནས་པས། །ཡེ་ཤེས་རྡོ་རྗེ་གསོར་ཞིང་སྤྲོ། །ཧཱུྃ་བཛྲ་ཛྭ་ལཱ་ན་ལཱརྐ་ཧཱུྃ་ཕཊ། ཅེས་བརྗོད། དེ་ནས་ཡིད་ཀྱིས་སྐུ་མདོག་དང་ཕྱག་མཚན་རིམ་བཞིན་བསྒྱུར་ཏེ་སོ་སོའི་རྒྱ་དང་བཅས། ཨོཾ་ཙཀྲ་ཛྭ་ལཱ་ན་ལཱརྐ་ཧཱུྃ་ཕཊ། སྭཱཾ་རཏྣ་ཛྭ་ལཱ་ན༴ ཨཱཾ་པདྨ་ཛྭ་ལཱ་ན༴ ཧཱཾ་ཁཏྒ་ཛྭ་ལཱ་ན་ལཱརྐ་ཧཱུྃ་ཕཊ། ཅེས་བརྗོད་པས། རིགས་ལྔའི་ཕྱག་རྒྱ་ལས་ཕྱག་མཚན་ཕྲ་མོ་གྲངས་མེད་པ་སྤྲོས་ཏེ་བདུད་བགེགས་ལོག་པར་འདྲེན་པ་ཐམས་ཅད་ཚར་བཅད། ཚུར་འདུས་པ་ལ་ཕྱོགས་མཚམས་ཐམས་ཅད་ཕྱག་རྒྱ་རྣམ་པ་ལྔའི་གུར་ཁང་ཡེ་ཤེས་ཀྱི་མེ་ཁ་དོག་ལྔར་འབར་ཞིང་འཕྲོ་བ་དང་བཅས་པས་ཕྱོགས་ཐམས་ཅད་ཡོངས་སུ་ཁྱབ་ཅིང་ཅིས་ཀྱང་མི་ཤིགས་པར་བསམ་མོ། །ཨེ་མའོ། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་ཆེ་མཆོག་གིས། །ཉིད་ཀྱིས་མཚན་དུ་གསོལ་བ་ནི། །ཅིས་ཀྱང་མི་ཕྱེད་མི་ཤིགས་ལ། །ཅིས་ཀྱང་མ་གཡོས་མ་འདྲེས་པས། །བདེ་ཆེན་མཆོག་ཏུ་གྱུར་པའོ། །གསུམ་པ་བཤགས་པ་ནི། བཛྲ་ས་མཱ་ཛཿས། བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མངོན་སུམ་དུ་སད་པའི་སྤྱན་སྔར། སེམས་ཅན་ཐམས་ཅད་ཀྱི་དོན་དུ་མཆོག་གི་བྱང་ཆུབ་ཚེ་འདི་ཉིད་ཀྱིས་མངོན་དུ་བྱ་སྙམ་པའི་དྲན་པས། ཚེ་རབས་ཐོག་མ་མེད་པ་ནས་བསགས་པའི་མི་དགེ་བའི་ལས་རྣམས་ལ་གནོང་ཞིང་འགྱོད། ཕྱིན་ཆད་སྲོག་ལ་བབ་ཀྱང་མི་བགྱིད། སྔར་བྱས་ཀྱི་གཉེན་པོར་རྣལ་འབྱོར་གྱི་རིམ་པ་ལ་འཇུག་པར་བགྱིའོ་སྙམ་པའི་སེམས་བརྟན་པོས། སྤྲོ་ན། ཡེ་ཤེས་སྐུ་མཆོག་མའམ། བསྡུ་ན། ཡེ་ནས་གཉིས་མེད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་ནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ཞེས་བརྗོད་པས་སྡིག་སྒྲིབ་ཐམས་ཅད་དག་པར་མོས་ནས་མཉམ་ཉིད་ཀྱི་དོན་ལ་བློ་བཞག་གོ། བཞི་པ་དམ་བཅའ་བ་ནི། རྡོ་རྗེ་རྩེ་གཅིག་པའི་ཕྱག་རྒྱ་བཅིངས་ཏེ་ལྷག་བསམ་རྩེ་གཅིག་པས། རྒྱས་པར་དམ་བཅའ་ཉི་ཤུ་པའམ། བསྡུ་ན། ཀུན་ཏུ་བཟང་པོ་བླ་ན་མེད་པ་ཡི། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །དོན་དམ་དང་ནི་ཀུན་རྫོབ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་བཟུང་བར་བགྱི། །ཞེས་བྱས་པས་ཀྱང་ཆོག་གོ། །ལྔ་པ་བྱིན་དབབ་པ་ནི། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་བྱས་ལ། ཨོཾ་ཧཱུྃ་ཨ་ལ་ལ་ཧོཿ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཚོགས་ཀྱི་སྒྲ་སྦྱར་ཞིང་། ཧཱུྃ་ཧཱུྃ་ཧཱུྃ་ཧཱུྃ་གིས་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་བདག་གནས་ཡོ་བྱད་རྣམས་ལ་ཐིམ་སྟེ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་བསམ་མོ། །དྲུག་པ་མཆོད་རྫས་བྱིན་གྱིས་བརླབ་པ་ནི། ཕྱི་མཆོད་རྣམས། ཨོཾ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་གིས་སྦྱང་། སྟོང་པའི་ངང་ལས་རང་ཉིད་རྡོར་སེམས་སུ་གསལ་བའི་ཐུགས་ཀའི་ཧཱུྃ་ལས་ཨ་དྷཱུ་པུ་ཨཱ་གན་རྣམས་འཕྲོས། སྥ་ར་ཎ་ཕཊ། ནམ་མཁའི་ཁམས་ཐམས་ཅད་ཁྱབ། སཾ་ཧ་ར་ན་ཧཱུྃ། འཁོར་འདས་ཀྱི་རྩི་བཅུད་ཐམས་ཅད་བསྡུས་ནས་མཆོད་རྫས་རྣམས་ལ་ཐིམ་པར་གྱུར། ན་མཿས་མནྟ་བུདྡྷཱུ་ནཾ་ག་ག་ན་ཁཾ་ས་མ་ཡེ་སྭཱ་ཧཱ། ཨོཾ་ཤྲཱི་བཛྲ་རཱ་ག་དྷཱུཔེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། བདེ་མཆོག་སྒྱུ་འཕྲུལ་དྲྭ་བ་ཆེན་པོའི་རོལ་པ་ལས། རྡོ་རྗེ་ཞབས་བསིལ་མ་ལ་སོགས་པ། མཆོད་པའི་ལྷ་མོ་ཁྲུས་གཞོང་དང་། སྤོས་ཁང་མནྡྷ་རའི་མེ་ཏོག་ལ་སོགས་པ་ཐོགས་པ་ནམ་མཁའ་གང་བ་རྣམས་སུ་གྱུར་པར་བསམ་པས་བྱིན་གྱིས་བརླབ་བོ། །ནང་མཆོད་བདུད་རྩི་བསང་སྦྱང་རྒྱས་པར་གཞུང་བཞིན་དང་། བསྡུ་ན། རཾ་ཡཾ་ཁཾ། སྟོང་པའི་ངང་ལས་བདུད་རྩིའི་སྣོད་དུ་དམ་རྫས་ཤ་ལྔ་བདུད་རྩི་ལྔ་རིགས་ལྔ་ཡབ་ཡུམ་གྱི་ས་བོན་གྱིས་མཚན་པ་རྣམས་འོད་དུ་ཞུ་ནས་ཡོངས་སུ་གྱུར་པ་ལས་རིགས་ལྔ་ཡབ་ཡུམ་གྱི་སྐུར་གྱུར་ཏེ་དེ་རྣམས་རྗེས་ཆགས་ཀྱི་སྦྱོར་བས་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་འཁྱིལ་བ་ལ། ཨོཾ་གྱིས་མཚན་པའི་ཁ་གཅོད་རྡོ་རྗེ་རྒྱ་གྲམ་གྱི་ལྟེ་བ་དང་རྭ་རྣམས་སུ་རྟ་མགྲིན་ཡུམ་བཞི་དང་བཅས་པ་གསལ་བར་གྱུར། ཨོཾ་གྱི་འོད་ཟེར་གྱིས་འཁོར་འདས་ཀྱི་བདུད་རྩི་ཐམས་ཅད་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་གྱུར་པ་ལས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་མོ། །གཡོན་པའི་མཐེབ་སྲིན་གྱི་རྡོ་རྗེས་བདུད་རྩི་ལ་རེག་སྟེ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཞེས་བཟླ་ཞིང་གཡོན་སྐོར་དུ་དཀྲུགས་ཏེ། ཧཱུྃ་ཧཱུྃ་ཧཱུྃ་ཧཱུྃ་ཞེས་བརྗོད་པས་ཡུམ་བཞི་བདུད་རྩི་ལ་ཐིམ་པར་བསམ་མོ། །གཏོར་མ་བསང་སྦྱངས། སྟོང་པའི་ངང་ལས་གཏོར་གཞོང་པདྨའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ལ་ཨོཾ་གྱིས་མཚན་པར་གྱུར། ཨོཾ་མ་ཧཱ་བ་ལིང་ཏ་ཏེ་ཛྭ་བ་ལིང་ཏ་ལ་བཱ་དྱ་གུ་ཧྱ་ས་མ་ཡེ་སྭཱ་ཧཱ། ལན་བདུན་བརྗོད་པས། གཟུགས་རྡོ་རྗེ་མ་ལ་སོགས་ལྷ་མོ་ནམ་མཁའ་གང་བས་འདོད་ཡོན་དཔག་ཏུ་མེད་པར་སྤྲོ་བའི་བདག་ཉིད་དུ་གྱུར་པར་བསམ། རཀྟ་བསང་སྦྱངས། སྟོང་པའི་ངང་ལས་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་རཀྟ་ལ་ར་ཡིག་དམར་པོས་མཚན་པར་གྱུར། ཨོཾ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱཿ ཆགས་མེད་རཀྟའི་རྒྱ་མཚོ་རྦ་རླབས་འཁྲུག་པས་ནམ་མཁའ་གང་བར་བསམ་མོ། །ཤིན་ཏུ་བསྡུ་ན་སྔགས་རྣམས་ལན་གསུམ་གསུམ་བརྗོད་པས་ཀྱང་འགྲུབ་བོ། གཉིས་པ་དངོས་གཞི་ལ། ཁྱད་པར་སྦྱོར་བ་སེམས་བསྐྱེད་པ་དང་། ཏིང་ངེ་འཛིན་གྱི་རིམ་པ་དངོས་དང་གཉིས་ལས། དང་པོ་ལ་ཀུན་རྫོབ་སེམས་བསྐྱེད་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །དོན་དམ་སེམས་བསྐྱེད་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པ་ཙམ་གྱིས་ཀྱང་རུང་ལ་སྤྲོ་ན་ལྔ་ག་རྒྱས་པར་རམ་ཡང་ན། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་འགགས་གནས་དམིགས་འགྲོ་དང་འོང་། །རང་བཞིན་མེད་ལས་དེ་ལྟར་སྣང་། །སྣང་དུས་ཉིད་ནས་དེ་དངོས་མེད། །ཅེས་བརྗོད་དོ། །གཉིས་པ་ཏིང་ངེ་འཛིན་གྱི་རིམ་པ་དངོས་ལ། ཏིང་ངེ་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་རིམ་པའི་ཏིང་ངེ་འཛིན་དང་གསུམ། དང་པོ་ལའང་གསུམ་ལས། དེ་བཞིན་ཉིད་ནི། དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་དངོས་མེད་པའོ། །འདི་ལྟར་སྣང་བའི་ཆོས་ཐམས་ཅད་མི་དམིགས་ཤིང་སྤྲོས་པ་དང་བྲལ་བ་སྟོང་པ་ཉིད་དུ་བསྒོམ་པའོ། ཀུན་སྣང་ནི། དེ་བཞིན་ཉིད་ནི་སྤྲོས་མེད་ཀྱང་། རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗཻ་ཆེན་པོ་མཁའ་ཁྱབ་ཏུ་བསྒོམ་པའོ། རྒྱུའི་ཏིང་ངེ་འཛིན་ནི། དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། ཞེས་པས། རང་རིག་སྣང་སྟོང་གཉིས་སུ་མེད་པའི་རང་བཞིན་ཨ་དཀར་པོའི་རྣམ་པར་བསྒོམ་པའོ། །དེ་ཉིད་བརྟན་པའི་ཡན་ལག་ཏུ་སྤྲོ་བསྡུ་བྱ་བ་ནི། ཨ་སྥ་ར་ཎ་ཕཊ། ཨ་ཡིག་ལས་ཨ་གྲངས་མེད་པ་ནམ་མཁའ་གང་བར་འཕྲོས། སཾ་ཧ་ར་ཎ་ཧཱུྃ། མཁའ་ཁྱབ་ཀྱི་ཨ་རྣམས་གཞིའི་ཨ་ལ་ཐིམ་པར་གྱུར། ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཕྱོགས་བཅུ་གང་བར་གསལ་གྱུར་ནས། །བསྡུས་ཀྱང་འཕེལ་འགྲིབ་མེད་པར་བསྟན། །དེ་ལས་མིང་ཚོགས་གསལ་འབར་ཀུན། །སྤྲོ་ཞིང་བསྡུ་བ་དེ་བཞིན་ནོ། །འདི་ནི་རྡོ་རྗེ་དངོས་གྲུབ་ཀྱི། །བརྟན་འབྱུང་ཡེ་ཤེས་རྒྱུ་ཡིན་ནོ། །ཞེས་པའི་དོན་དྲན་པར་བྱའོ། གཉིས་པ་ལ། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། དང་པོ་གཞི་དབང་ཆེན་གྱི་དཀྱིལ་འཁོར་བསྒོམ་པ་ནི། སེམས་ཉིད་ཨ་དཀར་པོ་དྲི་མ་མེད་པར་གསལ་བ་ལས། ཨེ་ཡཾ་ཝཾ་ལཾ་སུཾ་རཾ་རྣམས་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་འོད་དུ་ཞུ་བ་ལས་རིམ་པ་བཞིན་ཨེ་ལས་ནམ་མཁའི་ཆོས་ཀྱི་འབྱུང་གནས་འབྱམས་ཀླས་པའི་དབྱིངས་སུ། ཡཾ་ལས་རླུང་གི་དཀྱིལ་འཁོར་ལྗང་ཁུ་གཡོ་བའི་བ་དན་གྱིས་མཚན་པ། ཝཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། །ལཾ་ལས་སའི་དཀྱིལ་འཁོར་སེར་པོ་གྲུ་བཞི། སཾ་ལས་རིན་པོ་ཆེ་སྣ་བཞིའི་རང་བཞིན་གྱི་རི་རབ་ཟུར་བཞི་པ། རཾ་ལས་མེའི་ཁོར་ཡུག་ནམ་མཁའི་མཐའ་ཀླས་པར་འབར་བའོ། །གཉིས་པ་རྟེན་གཞལ་ཡས་ཁང་བསྐྱེད་པ་ནི། རི་རབ་ཀྱི་སྟེང་དུ་རྒྱུ་ཡི་ཨ་ལས་བྷྲཱུྃ་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུཾ། བྷྲཱུྃ་བི་ཤྭ་བི་ཤུདྡྷེ་བཛྲ་ཛྙཱ་ན་ཙཀྲ་མཎྜལ་བྷྲཱུྃ། བྷྲཱུྃ་ཡིག་ཡོངས་སུ་གྱུར་པ་ལས། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གྲུ་བཞི་སྒོ་བཞི་ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རིན་པོ་ཆེའི་རྩིག་པ་རིམ་པ་ལྔ་དང་ལྡན་པ་རིན་པོ་ཆེའི་ཕ་གུ་དྲྭ་བ་དྲྭ་ཕྱེད་ཤར་བུ་མདའ་ཡབ་གདུགས་དང་རྒྱལ་མཚན་བ་དན་རིན་པོ་ཆེའི་ཏོག་སྟོང་འོད་ཟེར་མཐའ་ཡས་པར་སྤྲོ་བ། ཕྱི་ནང་གི་རྒྱན་དང་བཀོད་པ་ངོ་མཚར་དུ་མས་ཁྱད་པར་དུ་འཕགས་པ། གཞལ་ཡས་ཁང་གི་མཚན་ཉིད་ཐམས་ཅད་རྫོགས་པ་དྭངས་ཤིང་སྒྲིབ་པ་མེད་པར་ཀུན་ཏུ་གསལ་བ། གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པར་བསམ་ཞིང་། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྤྱོད། །འཁོར་ལོ་རྩིབས་བཞི་མུ་ཁྱུད་བཅས། །གྲུ་ཆད་བཞིས་བརྒྱན་བར་ཁྱམས་དང་། །ཀུན་ཏུ་གྲུ་བཞི་སྒོ་ཁྱུད་ལྡན། །རོལ་མོ་སྣ་ཚོགས་སྤྲིན་ཕུང་བཞིན། །ཞེས་གསལ་གདབ་བོ། །གསུམ་པ་གདན་བསྐྱེད་པ་ནི། གཞལ་ནས་ཁང་གི་དབུས་ཀྱི་ལྟེ་བ་དང་རྩིབས་བཞི་ལ་རིམ་པ་བཞིན་དབུས་སུ་སེང་གེ །ཤར་དུ་གླང་པོ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་མཁའ་ལྡིང་རྣམས་ཀྱིས་བཏེགས་པའི་རིན་པོ་ཆེའི་ཁྲི་བཀོད་པ་ཕུལ་དུ་བྱུང་བའི་སྟེང་དུ། སྣ་ཚོགས་པདྨའི་ལྟེ་བར་ཉི་མའི་དཀྱིལ་འཁོར་དང་། ཟླ་བ་ཉ་གང་བ་སྟེ་གདན་ལྔ་བརྩེགས། འཁོར་ལོའི་གོང་རས་དང་། གྲུ་ཆད་ཀྱི་གྲྭ་བཞིར་པདྨ་དང་ཉི་ཟླའི་གདན་སུམ་བརྩེགས། ཁྱམས་ཀྱི་ཤར་ནུབ་གཉིས་སུ་རིན་པོ་ཆེའི་ཁྲིར་པད་ཉི་ཟླ་བའི་གདན་བཞི་བརྩེགས། ལྷོ་བྱང་དང་མཚམས་བཞིར་སྣ་ཚོགས་པདྨའི་གདན་རེ་རེ། སྒོ་བཞིར་ཉི་མའི་དཀྱིལ་འཁོར་རེ་རེ་རྣམས་གསལ་བར་བསམ་ལ། སེང་གེ་གླང་ཆེན་རྟ་དང་ཁྱུང་། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་པ་བཞིན་ནོ། །གཉིས་པ་ལྷ་བསྐྱེད་པ་ལ་གསུམ་སྟེ། ལྷ་བསྐྱེད་པ་དངོས་དང་། གསལ་གདབ་པ། དབང་བསྐུར་བྱིན་གྱིས་བརླབ་པའོ། དང་པོ་ནི། གཞིའི་ཨ་ཉིད་ལས་ཡི་གེ་བཞི་བཅུ་རྩ་གཉིས་ཐོན་ཏེ་སོ་སོའི་གདན་སྟེང་དུ་འཁོད་པ་ནི། དབུས་སུ་ཋ་ཐ། རྩིབས་བཞིའི་ཤར་དུ་ཊ་ཏ། ལྷོར་ཌ་ད། ནུབ་ཏུ་ཌྷ་དྷ། བྱང་དུ་ཎ་ན། རྩིབས་མཆན་གྱི་ཤར་ལྷོའི་གདན་ལ་ཀ་ཙ། ལྷོ་ནུབ་ཏུ་ཁ་ཚ། ནུབ་བྱང་དུ་ག་ཛ། བྱང་ཤར་དུ་གྷ་ཛྷ། གྲུ་ཆད་ཀྱི་ཤར་ལྷོའི་གདན་ལ་པ་ཡ། ལྷོ་ནུབ་ཏུ་ཕ་ཝ། ནུབ་བྱང་དུ་བ་ར། བྱང་ཤར་དུ་བྷ་ལ། ཁྱམས་ཀྱི་ཤར་དུ་ཀྵ། ནུབ་ཏུ་ཨ། ཤར་ལྷོར་ཨི། བྱང་དུ་ཨཱི། ལྷོར་ཨུ། ནུབ་བྱང་དུ་ཨཱུ། ལྷོ་ནུབ་ཏུ་ཨེ། བྱང་ཤར་དུ་ཨཻ། སྒོ་བཞིའི་ཤར་སྒོར་ང་ཤ། ལྷོ་སྒོར་ཉ་ཥ། ནུབ་སྒོར་མ་ས། བྱང་སྒོར་ཨོ་ཨོ་ཧ། དེ་རྣམས་རང་རང་གི་ལྷའི་ཁ་དོག་དང་མཐུན་པར་སོ་སོའི་གདན་ལ་འཁོད་པའི་མཐར། ཨ་ཞེས་བརྗོད་པས་གཞིའི་ཨ་དེ་འོད་དུ་ཞུ་ནས་ཡིག་འབྲུ་རྣམས་ལ་ཁྱབ་པར་ཐིམ་པས་ཤིན་ཏུ་གསལ་ཞིང་འབར་བར་བསམ་ལ། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཨ་སྥ་ར་ཎ་ཕཊ། ཅེས་བརྗོད་པས་ཡིག་འབྲུ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུྃ། སླར་འདུས་ནས་ཡིག་འབྲུ་རྣམས་ལ་ཐིམ་པ་འོད་དུ་ཞུ་བ་ལས། བཛྲ་ཙཀྲ་རཏྣ་ཁངྒ་གྷཎྜ། ཞེས་བརྗོད་པས་དབུས་སུ་རྡོ་རྗེ་དང་དྲིལ་བུ། རྩིབས་བཞིའི་ཤར་དུ་འཁོར་ལོ་དང་དྲིལ་བུ། ལྷོར་རིན་པོ་ཆེ་དང་དྲིལ་བུ། །ནུབ་ཏུ་པདྨ་དང་དྲིལ་བུ། །བྱང་དུ་རལ་གྲི་དང་དྲིལ་བུ། །རྩིབས་མཆན་གྱི་ཤར་ལྷོར་རིན་པོ་ཆེའི་མྱུ་གུ་དང་མེ་ལོང་། ལྷོ་ནུབ་ཏུ་རལ་གྲི་དང་ཕྲེང་བ། ནུབ་བྱང་དུ་པདྨ་དང་པི་ཝཾ། བྱང་ཤར་དུ་རྡོ་རྗེ་དང་རྔ་ཡབ། གྲུ་ཆད་བཞིའི་ཤར་ལྷོར་ཀླུ་ཤིང་དང་སྤོས་ཁང་། ལྷོ་ནུབ་ཏུ་པུསྟི་དང་མེ་ཏོག །ནུབ་བྱང་དུ་རིན་པོ་ཆེའི་སྙེ་མ་དང་མར་མེ། བྱང་ཤར་དུ་ཨུཏྤལ་དང་དྲི་ཆབ། ཁྱམས་ཀྱི་ཤར་དུ་རྡོ་རྗེ། ནུབ་ཏུ་དྲིལ་བུ། ཤར་ལྷོར་པི་ཝཾ། བྱང་དུ་གོ་མཚོན། ལྷོར་གསེག་པར། ནུབ་བྱང་དུ་པུསྟི། ལྷོ་ནུབ་ཏུ་སྒྲོམ་བུ། བྱང་ཤར་དུ་མེ་ཆུ། ཤར་སྒོར་ནྲྀ་མགོ་གདེངས་པ་དང་ལྕགས་ཀྱུ། ལྷོ་སྒོར་རྡོ་རྗེ་རྩེ་ལྔ་དང་ཞགས་པ། ནུབ་སྒོར་ཐོད་དབྱུག་སྦྲུལ་གྱིས་དཀྲིས་པ་དང་ལྕགས་སྒྲོག །བྱང་དུ་རྡོ་རྗེ་རྒྱ་གྲམ་དང་དྲིལ་བུ་སྟེ་ཕྱག་མཚན་བཞི་བཅུ་རྩ་གཉིས་སུ་གྱུར། སྥ་ར་ཎ་ཕཊ། དེ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུྃ། སླར་འདུས་ནས་ཕྱག་མཚན་རྣམས་ལ་ཐིམ་པ་ཡོངས་སུ་གྱུར་པ་ལས། ཧཱུྃ་བཛྲ་དྷྲིཀ྄ །རང་ཉིད་དཀྱིལ་འཁོར་གྱི་དབུས་སུ་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་མཐིང་ག་མཐིང་དཀར་དམར་བའི་ཞལ་གསུམ་ཕྱག་དྲུག་གི་གཡས་དང་པོ་རྡོ་རྗེ་ཐུགས་ཀར་འཛིན་ཅིང་། གཡོན་དང་པོ་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། བར་པ་གཉིས་འཁོར་ལོ་དང་རིན་པོ་ཆེ། ཐ་མ་གཉིས་ཀྱི་པདྨ་དང་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། ཞབས་གཉིས་རྫོགས་པའི་སྐྱིལ་མོ་ཀྲུང་གིས་བཞུགས་པའོ། །མཱུྃ་དྷཱ་ཏྭེ་ཤྭ་རཱི། དེའི་པང་དུ་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ་ཕྱག་གཡས་དྲིལ་བུ་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་རྡོ་རྗེ་ཐུགས་ཀར་འཛིན་པ། བརྟུལ་ཞུགས་ཀྱི་སྐྱིལ་མོ་ཀྲུང་གིས་འཁྲིལ་བ། གཉིས་ཀའང་ལྷ་རྫས་ཀྱི་དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་། ཚི་གུས་སྨད་དཀྲིས། ཁ་དོག་སྣ་ཚོགས་པའི་ཅོད་པན། ཟི་ལྡིར། གར་གྱི་ཕུ་དུང་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། སྙན་ཆ། མགུལ་རྒྱན། སེ་མོ་དོ། དོ་ཤལ། སྐ་རགས། ཕྱག་ཞབས་ཀྱི་གདུ་བུ་སྟེ་རིན་པོ་ཆེའི་རྒྱན་བརྒྱད་ཀྱིས་མཛེས་པར་སྤྲས་པ། མཉེན་ལྕུག་འཁྲིལ་ལྡེམ་གཞོན་ཚུལ་ཅན། གསལ་འཚེར་ལྷུན་སྟུག་གཟི་བྱིན་ལྡན་པ་སྟེ། ཞི་བའི་ཉམས་དགུ་རྒྱས་པ། འོད་ཟེར་ཁ་དོག་དྲུག་རེ་རེ་ཡང་བྱེ་བ་ཕྲག་དྲུག་དྲུག་ཏུ་འཕྲོ་ཞིང་འབར་བའི་ཀློང་ན་བདེ་སྟོང་གཉིས་སུ་མེད་པའི་ངོ་བོར་བཞུགས་པའོ། །ཨོཾ་ཛི་ན་ཛིཀ྄ །ལཱྃ་དྭ་ཥ་ར་ཏི། ཤར་གྱི་རྩིབས་ལ་རྣམ་པར་སྣང་མཛད་དང་སྤྱན་མ་ཡབ་ཡུམ་དཀར་པོ་འཁོར་ལོ་དང་དྲིལ་བུ། སྭཱཾ་རཏྣ་དྷྲིཀ྄ །མཱྃ་མོ་ཧ་ར་ཏི། ལྷོར་རིན་ཆེན་འབྱུང་ལྡན་དང་མཱ་མ་ཀཱི་ཡབ་ཡུམ་སེར་པོ་རིན་པོ་ཆེ་དང་དྲིལ་བུ། ཨཱྃ་ཨཱ་རོ་ལིཀ྄ །པཱྃ་རཱ་ག་ར་ཏི། ནུབ་ཏུ་སྣང་བ་མཐའ་ཡས་དང་གོས་དཀར་མོ་ཡབ་ཡུམ་དམར་པོ་པདྨ་དང་དྲིལ་བུ། ཧཱཾ་པྲཛྙཱ་དྷྲིཀ྄ ཏཱྃ་བཛྲ་ར་ཏི། བྱང་དུ་དོན་ཡོད་གྲུབ་པ་དང་སྒྲོལ་མ་ཡབ་ཡུམ་ལྗང་གུ་རལ་གྲི་དང་དྲིལ་བུ། ཡབ་རྣམས་གཡས་རང་རྟགས་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པས་ཡུམ་ལ་འཁྱུད་ནས་ཞབས་རྫོགས་པའི་སྐྱིལ་མོ་ཀྲུང་གིས་བཞུགས་པ། ཡུམ་རྣམས་གཡས་དྲིལ་བུ་འཛིན་པས་ཡབ་ཀྱི་མགུལ་ནས་འཁྱུད་ཅིང་། གཡོན་རང་རྟགས་ཐུགས་ཀར་འཛིན་པ། ཞབས་བརྟུལ་ཞུགས་ཀྱི་སྐྱིལ་མོ་ཀྲུང་གིས་རོལ་པའོ། །ཀྵཱིཾ་ཧི་རཱ་ཛ་ཡ། རྩིབས་མཆན་བཞིའི་ཤར་ལྷོར་ས་སྙིང་དཀར་པོ་རིན་པོ་ཆེའི་མྱུ་གུ། ཧཱུྃ་ལཱ་སྱེ་ས་མ་ཡ་སྟྭཾ། སྒེག་མོ་དཀར་མོ་མེ་ལོང་། ཏྲྃ་ཨ་གརྦྷ་ཡ། ལྷོ་ནུབ་ཏུ་ནམ་སྙིང་སེར་པོ་རལ་གྲི། ཏྲྃ་མཱ་ལྱེ་ས་མ་ཡ་ཧོཿ ཕྲེང་བ་མ་སེར་མོ་རིན་པོ་ཆེའི་ཕྲེང་བ། ཧྲཱིཾ་ཧཱ་ཧཱུྃ་པདྨ་པྲ་ད་མ། ནུབ་བྱང་དུ་སྤྱན་རས་གཟིགས་དམར་པོ་པད་དཀར། ཧྲཱིཾ་གཱི་ཏི་རཱ་ཀོ྅་ཧཾ། གླུ་མ་དམར་མོ་པི་ཝཾ། ཛྲཱིཾ་ཀུ་རུ་པཱ་ཎ། བྱང་ཤར་དུ་ཕྱག་རྡོར་མཐིང་ཁ་རྡོ་རྗེ། ཨ་ནིརྟི་རཱ་ག་ཡ་མྱེ། གར་མ་ལྗང་གུ་རྔ་ཡབ་འཛིན་པས་གར་རྒྱ་མཛད་པ། མཻ་དྷ་ར་ཎེ་སྭཱ་ཧཱ། གྲུ་ཆད་བཞིའི་ཤར་ལྷོར་བྱམས་པ་དཀར་པོ་ཀླུ་ཤིང་། ཛཿདྷཱུ་པེ་པྲ་ཝེ་ཤ །བདུག་སྤོས་མ་དཀར་སེར་སྤོས་ཁང་། ཐླྷིཾ་ནིསྶ་རཾ་བྷ་ཡ་སྭཱ་ཧཱ། ལྷོ་ནུབ་ཏུ་སྒྲིབ་སེལ་དམར་པོ་ཆོས་ཀྱི་འཁོར་ལོ། །ཧཱུྃ་པུཥྤེ་ཨཱ་ཝེ་ཤ །མེ་ཏོག་མ་དམར་སེར་མེ་ཏོག་གི་ཕྲེང་བ། ཧཱུྃ་ས་རཱ་ཛ་ཡ་སྭཱ་ཧཱ། ནུབ་བྱང་དུ་ཀུན་བཟང་དམར་ལྗང་རིན་པོ་ཆེའི་སྙེ་མ། བཱྃ་དཱི་པ་སུ་གི་རཱི། མར་མེ་མ་དམར་ལྗང་མར་མེ། མཱུྃ་ཤྲཱི་ཨཾ་རཱ་ག་ཡ་སྭཱ་ཧཱ། བྱང་ཤར་དུ་འཇམ་དཔལ་དཀར་ལྗང་ཨུཏྤལ། ཧོཿགནྡྷེ་ཙིཏྟ། དྲི་ཆབ་མ་དཀར་ལྗང་དྲིའི་དུང་ཆོས། སེམས་དཔའ་རྣམས་གཡས་རང་རྟགས་དང་། གཡོན་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། ཞབས་གཡས་ཅུང་ཟད་བརྐྱང་བའི་ཕྱེད་སྐྱིལ་གྱིས་བཞུགས་ཤིང་། སེམས་མ་རྣམས་གཡས་ཡབ་ལ་འཁྱུད་ཅིང་གཡོན་རང་རྟགས་འཛིན་པ། ཞབས་གཡོན་ཅུང་ཟད་བརྐྱང་པའི་ཕྱེད་སྐྱིལ་གྱི་ཡབ་ལ་རོལ་པའོ། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨོཾ། ཁྱམས་ཀྱི་ཤར་དུ་ཀུན་ཏུ་བཟང་པོ་མཐིང་ག་མཉམ་བཞག་གི་ཕྱག་རྒྱ་ཅན་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཨ་ཨ་ཨ་བཛྲཱི་བྷ་དྲ་ས་མནྟ་ཨཱཿ ནུབ་ཏུ་ཀུན་ཏུ་བཟང་མོ་མཐིང་ག་གཡོན་སྟེང་དུ་བཞག་པའི་མཉམ་བཞག་གི་ཕྱག་རྒྱ་ཅན་པདྨའི་སྐྱིལ་ཀྲུང་གིས་བཞུགས་པ། གཤེགས་པ་གཤེགས་མ། སེམས་དཔའ་སེམས་མ། ཀུན་བཟང་ཡབ་ཡུམ་རྣམས་ཞི་བའི་རྒྱན་ཆས་བཅུ་གསུམ་གྱིས་མཛེས་ཤིང་ཚུལ་དགུའི་ཉམས་ཀྱིས་རྒྱས་པའོ། །ཨོཾ་མུ་ནེ་ཀྲེཾ་སྭཱ་ཧཱ། ཁྱམས་ཀྱི་ཤར་ལྷོར་ལྷའི་ཐུབ་པ་དཀར་པོ་པི་ཝཾ་འཛིན་པ། ཨོཾ་མུ་ནེ་ཧཱུྃ་ཏྲཱུཾ་སྭཱ་ཧཱ། བྱང་དུ་ལྷ་མིན་གྱི་ཐུབ་པ་མཐིང་ག་གོ་མཚོནའཛིན་པ། ཨོཾ་མུ་ནེ་སྲུཾ་སྭཱ་ཧཱ། ལྷོར་མི་ཡི་ཐུབ་པ་སེར་པོ་གསེག་པར་འཛིན་པ། ཨོཾ་མུ་ནེ་བྲཾ་སཱ་ཧཱ། ནུབ་བྱང་དུ་བྱོལ་སོང་གི་ཐུབ་པ་དམར་ནག་པུསྟི་འཛིན་པ། ཨོཾ་མུ་ནེ་ཀྵཾ་སྭཱ་ཧཱ། ལྷོ་ནུབ་ཏུ་ཡི་དྭགས་ཀྱི་ཐུབ་པ་སེར་ནག་རིན་པོ་ཆེའི་སྒྲོམ་བུ་འཛིན་པ། ཨོཾ་མུ་ནེ་ཡེ་སྭཱ་ཧཱ། བྱང་ཤར་དུ་དམྱལ་བའི་ཐུབ་པ་དུད་ཁ་མེ་ཆུ་འཛིན་པ། དྲུག་ཀའང་དབུ་གཙུག་ཏོར་དང་ལྡན་ཞིང་ཚངས་པར་སྤྱོད་པའི་ཆ་ལུགས་ཅན། འགྲོ་བའི་དོན་ལ་འགྲེང་སྟབས་སུ་གཤེགས་པའི་ཚུལ་ཅན་ནོ། །ཧཱུྃ་ཡ་མཱནྟ་ཀྲིཏ་ཕཊ། ཤར་སྒོར་གཤིན་རྗེའི་གཤེད་སྨུག་ནག་ནྲྀ་མགོ་གདེངས་པ་འཛིན་པ། ཨོཾ་མ་ཧཱ་བཛྲ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ལྕགས་ཀྱུ་མ་སྨུག་ནག་ལྕགས་ཀྱུ་འཛིན་པ་དང་མཉམ་པར་སྦྱོར་བ། ཧཱུྃ་པྲཛྙཱནྟ་ཀྲིཏ་ཕཊ། ལྷོ་སྒོར་སྟོབས་པོ་ཆེ་སེར་ནག་རྡོ་རྗེ་རྩེ་ལྔ་འཛིན་པ། ཨོཾ་མ་ཧཱ་རཏྣ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ཞགས་པ་མ་སེར་ནག་ཞགས་པ་འཛིན་པ་དང་མཉམ་པར་སྦྱོར་བ། ཧཱུྃ་པདྨཱནྟ་ཀྲིཏ་ཧཱུྃ། ནུབ་སྒོར་རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་འཛིན་པ། ཨོཾ་མ་ཧཱ་པདྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། ལྕགས་སྒྲོག་མ་དམར་ནག་ལྕགས་སྒྲོག་འཛིན་པ་དང་མཉམ་པར་སྦྱོར་བ། ཧཱུྃ་བིགྷྣཱཾ་ཏ་ཀྲིཏ་ཧཱུྃ་ཕཊ། བྱང་སྒོར་བདུད་རྩི་འཁྱིལ་བ་ལྗང་ནག་རྡོ་རྗེ་རྒྱ་གྲམ་འཛིན་པ། ཨོཾ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷེ་ཤྭ་རཱི་ཛྭ་ལཱི་ནི་ཧཱུྃ་ཕཊ། དྲིལ་བུ་མ་ལྗང་ནག་དྲིལ་བུ་འཛིན་པ་དང་མཉམ་པར་སྦྱོར་བ། ཁྲོ་བོ་བཞི་ཀའང་གཡོན་སྡིགས་མཛུབ་མཛད་ཅིང་། །ཡུམ་རྣམས་གཡོན་པ་དུང་ཁྲག་སྟོབ་པའི་ཚུལ་ཅན། ཐམས་ཅད་ཀྱང་ཁྲོ་ཞིང་གཏུམ་པ་རྣམ་པར་འགྱུར་བའི་ཞལ་ཅན། གར་གྱི་ཉམས་དགུས་སྒེག་ཅིང་། དུར་ཁྲོད་རོལ་པའི་ཆས་བརྒྱད་ཀྱིས་བརྒྱན་ཏེ། བསྐལ་པའི་མེ་དཔུང་འབར་བའི་ཀློང་ན་གདུག་པ་ཅན་ཚར་གཅོད་པའི་ཚུལ་གྱིས་བཞུགས་པ། དེ་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ཀྱང་མེ་ལོང་གི་གཟུག་བརྙན་ནམ། ཆུ་ནང་གི་ཟླ་བ་ལྟར་སྣང་སྟོང་སྒྱུ་འཕྲུལ་དྲྭ་བའི་ཡེ་ཤེས་ཀྱི་འཁོར་ལོར་བཞུགས་པའོ། །གཉིས་པ་གསལ་གདབ་པ་ནི། གདན་ལ་རྫོགས་དང་སེམས་དཔའི་ཚུལ། །འཁོར་ལོ་རྒྱལ་པོ་རྒྱལ་མོ་དང་། །གཡས་ནས་མཐོང་ཐོས་སྣོམ་པ་དང་། །མྱོང་དང་བཙུན་མོའི་ཚོགས་དང་བཅས། །གྲུ་ཆད་ལ་ནི་མཐོང་བྱེད་དང་། །ཐོས་བྱེད་སྣོམ་བྱེད་མྱོང་བྱེད་རྣམས། །བཙུན་མོའི་ཚོགས་དང་ལྡན་པར་གནས། །བར་ཁྱམས་ལ་ནི་ཐུབ་དྲུག་དང་། །མདུན་དང་རྒྱབ་ཏུ་བྱེད་པ་དང་། །བྱ་བ་དག་ནི་གནས་པར་བསྟན། །སྒོ་ཁྱུད་བཞི་ལ་འཇོམས་པ་ནི། །བཙུན་མོའི་ཚོགས་དང་ལྡན་པར་གནས། །རྡོ་རྗེ་འཁོར་ལོ་རིན་པོ་ཆེ། །པདྨ་རལ་གྲི་དྲིལ་བུ་འབར། །ཨུཏྤལ་ཀླུ་ཤིང་ལ་སོགས་མཚན། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ཆོས་ཀྱི་འཁོར་ལོ་རིན་ཆེན་སྙེ། །གཟུགས་མཛེས་རིན་ཆེན་ཕྲེང་བ་དང་། །པི་ཝཾ་གར་མཁན་མཆོག་ཉིད་དེ། །མེ་ཏོག་ཕྲེང་བ་སྤོས་མཆོད་མ། །མར་མེ་བྱུག་པ་ལ་སོགས་པའི། །ལས་ལ་འཁྲིལ་ཞིང་ཆོས་ལ་བརྟེན། །དབུ་རྣམས་འཕྱོ་ཞིང་འདུད་པའི་ཚུལ། །གོང་གི་ཕྱག་རྒྱ་ཆེན་པོ་བཞིན། །གཉིས་མེད་དབྱིངས་ཀྱི་ངང་དུ་འཁྲིལ། །སྒོ་བཞིར་ཁྲོ་བོའི་ཕྱག་རྒྱ་ནི། །ནྲྀ་མགོ་གདེངས་དང་རྡོ་རྗེ་གནོན། །ཐོད་སྤྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱི་གནོན། །ལྕགས་ཀྱུ་ཞགས་པ་སྥོ་ཊ་ཧོཿ སྒོ་བཞིར་གནས་པ་དེ་དག་ཀྱང་། །འདུད་ཚུལ་འཁྲིལ་བ་གོང་མ་བཞིན། །ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཏུ་བསྟན། །གསེག་པར་དང་ནི་པི་ཝཾ་དང་། །གོ་ཆ་པུ་སྟི་རིན་ཆེན་སྒྲོམ། །མེ་དང་ཆུ་ནི་རབ་ཏུ་བསྟན། །ཡུམ་ནི་དམིགས་མེད་ཆོས་ཀྱི་དབྱིངས། །ཀུན་བཟང་མཉམ་བཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་པདྨོའི་སྐྱིལ། །གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །མཐིང་ག་དཀར་པོ་སེར་ལེ་བརྒན། །ལྗང་གུ་ལ་སོགས་སྣ་ཚོགས་པའི། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེ་ལྷུན་སྡུག་གཟི་བྱིན་ལྡན། །འོད་ཟེར་འཕྲོ་བའི་ཚོགས་ཆེན་པོ། །འབར་བའི་ཕྲེང་བས་འཁྲིགས་པ་སྟེ། །མཐའ་དབུས་མེད་པར་ཁྱབ་པ་ཡི། །དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་པས་གསལ་གདབ་བོ། །གསུམ་པ་དབང་བསྐུར་བ་དང་། བྱིན་གྱིས་བརླབ་པ་གཉིས་ལས། དང་པོ་ནི། དེ་ལྟར་གསལ་བའི་ལྷ་ཚོགས་ཐམས་ཅད་ཀྱི་སྲོག་གི་གོར་རང་འདྲ་བའི་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་རེ་རེའི་ཐུགས་ཀར་སོ་སོའི་ཕྱག་མཚན་གྱི་ལྟེ་བར་ས་བོན་ལ་སྔགས་ཕྲེང་གིས་བསྐོར་བས་མཚན་པར་བསམ་ལ། ས་བོན་རྣམས་ལས་འོད་ཟེར་འཕྲོས་པར་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དབང་གི་ལྷ་རིགས་ལྔ་ཡབ་ཡུམ་གྱི་རྣམ་པར་བཛྲ་ས་མཱ་ཛཿས་སྤྱན་དྲགས་པར་བསམ་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བསྐུལ་བས། དེ་རྣམས་གཉིས་སུ་མེད་པར་སྦྱོར་བ་མཛད། རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བས་ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་འགྱུར། ཆུའི་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་རང་རང་གི་རིགས་བདག་བདག་པོར་གྱུར་པའི་རིགས་ལྔ་སྤྲུལ་སྐུའི་ཆ་བྱད་ཅན་གྱིས་དབུ་བརྒྱན་པར་མོས་ལ། དེ་ཡང་རྡོ་རྗེ་མི་བསྐྱོད་པ་ལ་མཚོན་ན་རྡོ་རྗེ་བསྡམ་པ་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ཨོཾ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཕྱག་རྒྱ་དེ་ལས་མཛུབ་མོ་གཉིས་བརྐྱང་བ་དཔྲལ་བར་བཞག་ལ། ཨོཾ་མ་ཧཱ་ཨཱ་དཪྴ་ཛྙཱ་ན་བཛྲ་སྭཱ་བྷཱ༴ སྲིན་ལན་བརྐྱང་བ་རྣ་ལྟག་གཡས་པར། ཨོཾ་མ་ཧཱ་ས་མ་ཏཱ་ཛྙཱ་ན༴ མཐེ་བོང་བརྐྱང་བ་ལྟག་པར། ཨོཾ་མ་ཧཱ་པྲ་ཏྱ་བེཀྵ་ཎ་ཛྙཱ་ན༴ མཐེ་ཆུང་བརྐྱང་བ་རྣ་ལྟག་གཡོན་པར། ཨོཾ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན༴ ཞེས་པས། གཙོ་བོ་ཡབ་ཡུམ་བྱེད་པོ་ཡབ་ཡུམ་ཐུབ་པ་དྲུག་དང་བཅུ་ལ་མི་བསྐྱོད་པ་བདག་པོར་གྱུར་པའི་རིགས་ལྔའི་ཅོད་པན་གྱིས་དབུ་བརྒྱན་པར་གྱུར། དེས་མཚོན་ནས་རིགས་གཞན་བཞི་ལའང་རིགས་གང་ཡིན་པ་དེའི་སྔགས་དང་པོར་བརྗོད་ཅིང་སྤྱི་བོའི་གནས་སུ་འཇོག་ལ། གང་དབུས་སུ་སོང་བའི་སྔགས་རྒྱ་དང་རིགས་བདག་གི་ཤུལ་དུ་མི་བསྐྱོད་པ་འཇོག་པ་ལས། རྣམ་སྣང་གི་རྒྱ་དང་ཨཱ་དཪྴ་དང་པོར་བརྗོད་པའི་སྔགས་ཚན་ལྔས། རྣམ་སྣང་ས་སྙིང་བྱམས་པ་གཤིན་རྗེའི་གཤེད་རྣམས་ཡུམ་དང་བཅས་པ་ལ་རྣམ་སྣང་བདག་པོར་གྱུར་པའི་རིགས་ལྔའི༴ ས་མནྟ་དང་པོར་བརྗོད་པའི་སྔགས་ཚན་ལྔས། རིན་འབྱུང་ནམ་སྙིང་སྒྲིབ་སེལ་སྟོབས་པོ་ཆེ་རྣམས་ཡུམ་དང་བཅས་པ་ལ་རིན་འབྱུང་བདག་པོར༴ པྲ་ཏྱ་དང་པོར་བརྗོད་པའི་སྔགས་ཚན་ལྔས། སྣང་མཐའ་སྤྱན་རས་གཟིགས་ཀུན་བཟང་རྟ་མགྲིན་རྣམས་ཡུམ་དང་བཅས་པ་ལ་སྣང་མཐའ་བདག་པོར༴ ཀྲྀ་ཏྱཱ་དང་པོར་བརྗོད་པའི་སྔགས་མཚན་ལྔས། དོན་གྲུབ་ཕྱག་རྡོར་འཇམ་དཔལ་བདུད་རྩི་འཁྱིལ་བ་རྣམས་ཡུམ་དང་བཅས་པ་ལ་དོན་གྲུབ་བདག་པོར་གྱུར་པའི་རིགས་ལྔའི་ཅོད་པན་གྱིས་དབུ་བརྒྱན་པར་བསམ་མོ། །ཕུང་པོ་ལྔ་དག་པ་རིགས་ལྔའི་སངས་རྒྱས་སུ་ང་རྒྱལ་བྱ་ཞིང་། རིགས་ལྔའི་དབང་རྒྱ་གནས་སོ་སོར་འཇོག་ཅིང་དབང་སྔགས་བརྗོད་པའོ། །གཉིས་པ་ནི། ལྷ་ཐམས་ཅད་ཀྱི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱ་དམར་པོ། སྙིང་ཁར་ཉི་མ་ལ་ཧཱུྃ་སྔོན་པོ། དེ་རྣམས་ཀྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། རྡོ་རྗེ་གསུམ་གྱི་ལྷ་ཚོགས་ནམ་མཁའ་གང་བར་བྱོན། ཡི་གེ་གསུམ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དང་གཉིས་སུ་མེད་པར་གྱུར། ཡི་གེ་གསུམ་ཡོངས་སུ་གྱུར་པ་ལ་སྤྱི་བོར་རྣམ་སྣང་དཀར་པོ་འཁོར་ལོ་འཛིན་པ། མགྲིན་པར་སྣང་མཐའ་དམར་པོ་པདྨ་འཛིན་པ། སྙིང་ཁར་མི་བསྐྱོད་པ་སྔོན་པོ་རྡོ་རྗེ་འཛིན་པ་རྣམས་ཀྱིས་རྒྱས་གདབ་པར་བསམ་ཞིང་རྡོ་རྗེའི་ཕྱག་རྒྱ་གནས་གསུམ་དུ་བཞག་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨོཾ་སརྦ་ཏ་ཐཱ་ག་ཏ་མ་ཧཱ་ཝཱ་ཀ༴ ཨོཾ་སརྦ་ཏ་ཐཱ་ག་ཏ་མ་ཧཱ་ཙིཏྟ༴ ཞེས་བརྗོད། ཤིན་ཏུ་བསྡུ་ན། གཙོ་བོའི་མངོན་རྟོགས་ཙམ་ཀྱིས་མཐར་བསྐྱེད་སྔགས་རྣམས་ཚང་བར་བརྗོད་ནས། དེ་ལྟར་རྟེན་དང་བརྟེན་པར་སོགས་ཀྱི་མཐར། གདན་ལ་རྫོགས་དང་སེམས་དཔའི་ཚུལ། །སོགས་ཀྱིས་གསལ་གདབ་ལ། དབང་བསྐུར་རྒྱས་གདབ་རྣམས་སྔགས་རྒྱ་ཙམ་གྱིས་ཆོག་གོ། གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་བཞི་སྟེ། ཡེ་ཤེས་ཀྱི་དཀྱིལ་འཁོར་སྤྱན་དྲང་བ། མཆོད་པ་འབུལ་བ། བཤགས་སྨོན་དམ་བཅའ། ཛྲབ་བཟླ་བའོ། །དང་པོ་ལའང་བཞི་སྟེ། སྙན་གསན་དབབ་པ། སྤྱན་དྲང་བ། རིག་པའི་མེ་ཏོག་དོར་བ། དངོས་གྲུབ་བསྐུལ་ནས་བསྟིམ་ཞིང་བརྟན་པར་བྱ་བའོ། །དང་པོ་ནི། གཙོ་བོའི་ཡེ་ཤེས་སེམས་དཔའི་ཐུགས་ཀར་དྭངས་མའི་སྲོག་ཧཱུྃ་ཡིག་མཐིང་ག་ཡེ་ཤེས་ལྔའི་རང་བཞིན་རྟག་ཏུ་འཆར་བཞིན་པ། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྐུལ་བས། ཆོས་སྐུ་འགྱུར་བ་མེད་པའི་ངང་ལས། གཟུགས་སྐུ་བཞི་བཅུ་རྩགཉིས་སྒྱུ་འཕྲུལ་ཡེ་ཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམ་ལ། ལྕགས་ཀྱུའི་ཕྱག་རྒྱ་དང་བཅས་པས། ཨོཾ་ཨེ་ཧྱེ་ཧི་བྷ་ག་ཝཱ་ན་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ ས་མ་ཡ་སྟྭཾ། ཞེས་པས་སྙན་གསན་ཕབ་ལ། གཉིས་པ་ནི། ཨོཾ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉས་གནས་བསྐྱོད་ལ། །བདེ་གཤེགས་བཞུགས་ཤིང་རྣམ་གྲོལ་དགྱེས་པ་བསྐྱེད། །དམ་ཚིག་པའི་ཐུགས་ཀ་ནས་འཕྲོས་པའི། ཛཿཧཱུྃ་བཾ་ཧོཿས་དགུག་བཅིངས་བསྡམས་ལ་དགྱེས་པ་བསྐྱེད་ནས། དམ་ཚིག་གི་དཀྱིལ་འཁོར་དང་མེ་རི་འདབ་འབྱར་དུ་བཞུགས་པར་བསམ་མོ། གསུམ་པ་ནི། ཨོཾ་བཛྲ་ས་མ་ཡ་ཨོཾ། ཨཱྃ་བཛྲ་ས་མ་ཡ་ཨཱྃ། ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་བརྗོད་པས། རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱའོ། བཞི་པ་ནི། ཨོཾ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོ་བདག་སྦྱོར་ཅིག །ཅེས་བརྗོད་པས་ལྷ་རྣམས་དངོས་གྲུབ་སྩོལ་བ་ལ་ཕྱོགས་པ་དང་། ཨོཾ་བཛྲ་ས་མ་ཡ་ཧཱུྃ། ཡེ་ཤེས་ཀྱི་འཁོར་ལོ་དམ་ཚིག་པ་ལ་ཆུ་ལ་ཆུ་བཞག་པ་བཞིན་དབྱེར་མེད་དུ་གྱུར་པར་བསམ། ཨོཾ་བཛྲ་ས་མ་ཡ་སྟྭཾ། ནམ་མཁའ་ལྷའི་དཀྱིལ་འཁོར་ཉིད་གྲུབ་པར་མ་གྱུར་གྱི་བར་བརྟན་པར་བྱས་ལ། ཨོཾ་བཛྲ་ས་མ་ཡ་ཧོཿ དེ་ཡང་ཤིན་ཏུ་དབང་དུ་གྱུར་ཏེ་དགྱེས་པ་ཆེན་པོས་རྗེས་སུ་ཆགས་པར་བྱས། ཛཿཧཱུྃ་བྃ་ཧོཿཞེས་བརྗོད་པས་བརྟན་ཅིང་གསལ་བར་བྱས་ནས། ཀཱ་ཡ་ཝ་ཀཱ་ཙིཏྟ་ཏིཥྛ་བཛྲ། ཞེས་བཞུགས་སུ་གསོལ་ལོ། །གཉིས་པ་ཕྱག་དང་མཆོད་པ་གཉིས་ལས། དེ་གཉིས་ཀའི་ཚེ། རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་རྡོ་རྗེ་སེམས་དཔའ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ་སེམས་ཅན་ཐམས་ཅད་དང་བྱ་བྱེད་ཐུན་མོང་པར་གྱུར་ནས་ཕྱག་དང་མཆོད་པ་ལ་སོགས་ལས་ཀྱི་རིམ་པ་ལ་འཇུག་པར་མོས་པས། དེའི་དང་པོ་ཕྱག་འཚལ་བ་ནི། མི་རྟོག་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེ་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། །དམིགས་མེད་ཆོས་ཀྱི་སྐུ་ལ༴ ལོངས་སྤྱོད་རྫོགས་པའི་སྐུ་ལ༴ ཅིར་ཡང་སྤྲུལ་པའི་སྐུ་ལ༴ མི་འགྱུར་རྡོ་རྗེའི་སྐུ་ལ༴ མངོན་པར་བྱང་ཆུབ་སྐུ་ལ་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱིས་བསྒྲུབས་པ་ཡི། །ཚོགས་གཉིས་རྫོགས་ཤིང་ཡོན་ཏན་མཐར་ཕྱིན་པའི། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ། །ཨ་ཏི་པཱུ་ཧོཿ པྲ་ཏི་པཱུ་ཧོཿ ཞེས་པས་ཕྱག་བྱའོ། །གཉིས་པ་མཆོད་པ་ལ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། ལག་པ་གཡས་གཡོན་གྱི་སོར་མོའི་བྲེ་ཁ་བཅུ་ལ་ཉི་ཟླའི་དཀྱིལ་འཁོར་གྱི་སྟེང་དུ་རིགས་ལྔ་ཡབ་ཡུམ་གྱི་ས་བོན་རྣམས་ཀྱིས་མཚན་པར་བསམ་ལ། ཧཱུྃ། སྒྱུ་འཕྲུལ་དྲྭ་བས་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡིས། །སྙིང་པོའི་ཕྱག་རྒྱ་འདའ་དཀའ་འོ། །མི་བསྐྱོད་ཉི་མའི་དཀྱིལ་ཡི་གེ །ལྔ་གཉིས་ཟུང་དུ་སྤྲད་པ་ལས། །སྦྱར་བའི་ཕྱག་རྒྱ་འབྱུང་བའི་རྒྱུ། །ཨོཾ་དང་མཱུྃ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱུ། །འདི་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིས། །ཨ་ལ་ལ་སྟེ་མཆོད་པ་འབུལ། །ཨ་ལ་ལ་སྟེ་དགྱེས་པར་མཛོད། །གཉིས་པ་ཀུན་བཟང་ནི། ཨོཾ་ཧཱུྃ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ༴ སོགས་སྭཱ་ཧཱ། ཞེས་པས་ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། གསུམ་པ་ཞབས་བསིལ་ནི། ཨོཾ་ཨཱ་ཧ་ར་ཨཱ་ཧ་ར་སརྦ་བི་དྱཱ་དྷ་ར་པཱུ་ཛི་ཏེ་ན་མཿས་མནྟ་བུདྡྷ་ནཾ་ག་ག་ཁཾ་ས་མ་ཡེ་སྭཱ་ཧཱ། ཞེས་པས་རིམ་པར་ཕྱག་ཞབས་བསིལ་ཞིང་ཞལ་དུ་གསོལ་བར་བསམ་མོ། བཞི་པ་བཞི་བསྣོལ་ནི། སོ་སོའི་ཕྱག་རྒྱ་སྟོན་ཅིང་། ཨོཾ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷིཧུ། ས་མ་ཡོ་ཏ་མུཿསརྦ་མ་ཧཱ་སུ་ཁ་སིདྡྷིཧུ། ཨོཾ་ཤྲཱི་བཛྲ་རཱ་ག་དྷཱུ་པེ་དྷཱུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས་ཤངས་ལ་སོགས་པའི་དབང་བོ་སོ་སོ་ལ་ཐིམ་པར་བསམ་ལ། ཨོཾ་ཨཱཿཧཱུྃ། རབ་ཏུ་དགའ་བས་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་དམ་པ་གྲུབ་པར་མཛོད། །མཆོད་ཆེན་ཐམས་ཅད་དག་ཅིང་ལྷུན་གྱིས་གྲུབ་པར་མཛོད། །ཅེས་བརྗོད་ལ། སྐྱེས་དང་སྐྱེས་ལན་གྱི་ཚུལ་དུ་ལྷ་རྣམས་མཉེས། ལྷ་མོ་རྣམས་སླར་བྱུང་སྟེ་རང་གི་གནས་བཞིར་ཐིམ་པས་སྐུ་གསུང་ཐུགས་ཕྲིན་ལས་བཞིའི་དངོས་གྲུབ་ཐོབ་པར་བསམ་མོ། ལྔ་པ་སྨན་མཆོད་ནི། ཨོཾ་ཧཱུཾ། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་གྲོལ་བ། །དུག་ལྔ་སེལ་བའི་བདུད་རྩི་སྨན། །ཐུགས་རྗེ་ཆེན་པོའི་དཀྱིལ་འཁོར་འདིར། །བདག་ཅག་དད་པས་འབུལ་ལགས་ན། །ཐུགས་རྗེས་དགོངས་ཏེ་བཞེས་སུ་གསོལ། །བཞེས་ནས་ཀུན་ཏུ་དགྱེས་མཛོད་ལ། །བླ་མེད་དངོས་གྲུབ་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྤྱིར་འབུལ་ཞིང་། གཞན་ཡང་། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོ་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨོཾ་སརྦ་ཏ་ཐཱ་ག་ཏ༴ རྒྱལ་བ་ཆོས་ཀྱི་སྐུ་ཡི་དགོངས་པ་ཡི། །བདེ་གཤེགས་རིགས་ལྔ་རིགས་གསུམ་མགོན་པོ་དང་། །སངས་རྒྱས་གསང་བའི་བར་དུ་བྱིན་བརླབས་ཏེ། །འདས་དང་མ་བྱོན་ད་ལྟ་དུས་གསུམ་གྱི། །སྒྱུ་འཕྲུལ་བརྒྱུད་པའི་བླ་མ་ཐམས་ཅད་ལ། སྨན་མཆོད༴ ཨོཾ་སརྦ་ཏ་ཐཱ༴ བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །འགྲོ་བའི་དོན་མཛད་སྤྲུལ་སྐུ་ཐུབ་དྲུག་ལ། སྨན་མཆོད༴ ཨོཾ་སརྦ༴ གཞན་ཡང་རྒྱལ་བའི་དཀྱིལ་འཁོར་རབ་འབྱམས་དང་། །དཔའ་བོ་མཁའ་འགྲོ་དམ་ཅན་སྲུང་མའི་ཚོགས། །ཞིང་སྐྱོང་གཞི་བདག་སྲིད་གསུམ་ཀ་དག་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཡེ་ཤེས་ཀྱི་བདུད་རྩིའི་ཟེག་མ་མཁའ་ལ་སྤྲིན་བཞིན་ཆགས་པ་ལས་བདུད་རྩིའི་ཆར་ཆེན་པོ་བབས་ཏེ་ལྷ་ཚོགས་རྣམས་མཉེས་ཤིང་ཚིམ་པར་བསམ་ལ། ཨོཾ་ཨཱཿཧཱུྃ་ཀཱ་ཡ་སིདྡྷི་ཨོཾ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་རིམ་པར་བརྗོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། དྲུག་པ་གཏོར་མའི་མཆོད་པ་ནི། འདོད་ཡོན་གྱི་ལྷ་མོ་དཔག་ཏུ་མེད་པས་དཀྱིལ་འཁོར་པ་རྣམས་དགྱེས་པ་བསྐྱེད་ནས་རང་ལ་གཉིས་མེད་དུ་གྱུར་པར་བསམ་ཞིང་། ཨོཾ་ཨཱཿཧཱུྃ་སུ་ར་ཨུ་པ་བྷྱཿཀ་མཱ་ལ་བཛྲ་ཨ་མྲྀ་ཏ་ཧ་ར་ཎ་པྲ་ཏཱིཙྪ་བྷ་ག་ཝ་ན་ཛཿཧཱུྃ་བྃ་ཧོཿཨ་ལ་ལ་ཧོཿ བདུན་པ་གསང་བསྣན་གྱི་མཆོད་པ་ནི། ཨོཾ་ཨཱཿཧཱུྃ་ཨ་ལ་ལ་ཧོཿ ཞེས་ལན་གསུམ་གྱིས་དང་པོས་ལྷ་རྣམས་དགྱེས་པ་བསྐྱེད། གཉིས་པས་ཉན་ཐོས་རྣམས་འགོག་པ་ལས་བསླང་། གསུམ་པས་དེ་བཞིན་གཤེགས་པ་རྣམས་གཞན་དོན་ལ་བསྐུལ་བར་གསལ་གདབ་བོ། བརྒྱད་པ་ཏིང་ངེ་འཛིན་གྱི་མཆོད་པ་ནི། ཨོཾ། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་དང་། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུའི་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་དབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཆོས་ཀྱི་དབྱིངས་དང་མཉམ་སྦྱོར་ཞིང་། །མཆོད་པའི་ཕྱག་རྒྱ་ཆེན་པོར་བསྒོམ། དགུ་བ་བསྒྲལ་མཆོད་ནི། རྃ་བཛྲ་ཛྭ་ལ་རྃ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་མོ། བཅུ་པ་སྦྱོར་མཆོད་ནི། མཁའ་གསང་བྱིན་གྱིས་བརླབས། ས་མ་ཡ་སྟྭཾ། ས་མ་ཡ་ཧོཿ ཨ་ནུ་ར་གོ་ཧཾ། ཨ་ནུ་ར་ག་ཡ་མྱེ། ཛཿཧཱུྃ་བྃ་ཧོཿ ཧཱུྃ་ཧཱུྃ་ཧཱུྃ། སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ཨོཾ་ཧཱུྃ། བཟའ་དང་བཅའ་དང་བཏུང་དང་བགོ །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམ་པ་ནི་བླ་ན་མེད་པའི་དུག་གསུམ་ལམ་དུ་སློང་བའི་མཆོད་པའོ། བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ཨོཾ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། ཞེས་མཆོད་པའི་ང་རྒྱལ་བྱ་ཞིང་རོལ་མོ་ཡེ་ཤེས་ཀྱི་སྒྲས་བསྐུལ་ལོ། བཅུ་གསུམ་པ་གླུ་ཡེ་ཤེས་ཀྱི་མཆོད་པ་ནི། ཨོཾ ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས། ཧོཿ ཨོཾ། རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ། ཧོཿ ཨོཾ། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ། ཧོཿ ཨོཾ། མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་སྤྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ། ཧོཿ ཨོཾ། ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུལ་ལ་ལྷུན་གྱིས་གྲུབ། ཧོཿ ཨོཾ ཐམས་ཅད་མ་ལུས་ལྷུན་གྱིས་གྲུབ། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ། ཧོཿ ཞེས་ཡོན་ཏན་རྗེས་སུ་དྲན་པའི་སྒོ་ནས་ཆོས་ཉིད་ཀྱི་རང་སྒྲས་བསྟོད་པར་བྱའོ། ཤིན་ཏུ་བསྡུ་ན། ཀུན་བཟང་ཞབས་བསིལ་བཞི་བསྣོལ་སྨན་གཏོར་རྣམས་སྔགས་མཆོད་ཙམ་བྱས་ལ། བསྟོད་པ་ཡང་ཤོ་ལོ་ཀ་ཐ་མ་ཙམ་གྱིས་ཀྱང་དོན་འདུས་སོ། གསུམ་པ་ནི། ཧོཿ སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པའི་རིགས་ལྔའི་བདེ་བར་གཤེགས་པ་རིགས་མཆོག་གཟུངས་ཀྱི་ཡུམ་གྱི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག །ཐབས་ལ་མཁས་པའི་བདག་ཉིད། སྒྲོལ་པའི་མཁའ་འགྲོ། རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་ཚོགས་པ་རྣམས་ཀྱིས། དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་པོ་མ་ནོར་བར་གནོས་པ་ལས། རྩ་བ་དང་ཡན་ལག་གི་ཉམས་ཆག་དང་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གི་སྐུ་བཟོད་པ་ཆེན་པོ་དང་དུ་བཞེས་ནས་ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་བླ་མན་ཆད་ནས་དངོས་གྲུབ་ཀྱི་སྐལ་བ་དང་རིགས་བརྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། བདག་ཅག་དམ་ཚིག་འདི་ལ་མངོན་པར་ཞུགས་པ་རྣམས། །བཅད་གཏུབ་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པས་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །ཨོཾ་ཧཱུྃ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རློབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབས། །བྱང་ཆུབ་སྤྱོད་དཀའ་བདག་གིས་སྤྱད། རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཅེས་བརྗོད་དེ་ཤར་སྒོར་འཁོད་པའི་ལས་ཀྱི་རྡོ་རྗེ་སེམས་དཔའ་དེ་ཉིད་གཙོ་བོའི་ཐུགས་ཀར་ཐིམ་པར་བསམ་མོ། བཞི་པ་ཛྲབ་ལ་དེ་ཉིད་བརྗོད་པ་དང་། ཛྲབ་དགོངས་གཉིས་ལས། ཡང་དག་དོན་གྱི་སྙིང་པོ་ནི། །ཇི་སྙེད་བརྗོད་པའི་ཁ་བརྒྱུད་ཀྱང་། །གང་ནས་བཙལ་ཀྱང་མི་རྙེད་པས། །རང་རིག་དྲི་མེད་དག་པ་ཡིས། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ནོ། །སེམས་ཉིད་ཐེག་པར་རབ་ངེས་ན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ད་ལྟ་ཉིད་དུ་མངོན་གྱུར་ཅིག །ཅེས་དེ་ཁོ་ན་ཉིད་ཀྱི་དོན་དྲན་པས་ངེས་ཤེས་བསྐྱེད་དོ། གཉིས་པ་ནི། ལྷ་རྣམས་ཀྱི་ཡེ་ཤེས་སེམས་དཔའ་སོ་སོའི་ཐུགས་ཀར་རང་རང་གི་ཕྱག་མཚན་གྱི་ལྟེ་བར་དྭངས་མའི་སྲོག་ཧཱུྃ་ཡིག་ལ་སོགས་པའི་མཐར་བཟླས་བྱའི་སྔགས་ཀྱི་ཕྲེང་བས་བསྐོར་བར་གསལ་བཏབ་ལ། སྔགས་བཟླས་པའི་ཚེ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་དམིགས་ལ། དམ་ཡེ་འཕྲོ་འདུ་སྟེ་གསལ་བ་གསུམ་དང་ལྡན་པའི་ངང་ནས་བཟླས་བྱའི་སྔགས་ནི། བསྐྱེད་སྔགས་རྣམས་རིམ་པ་བཞིན་བརྒྱ་དང་ཉེར་གཅིག་སོགས་གཙོ་འཁོར་འགྲོས་སྦྱར་ནས་བཟླ་ཞིང་། རྟགས་དང་དུས་དང་གྲངས་ཀྱི་དབྱེ་བས་རབ་འབྲིང་ཐ་མའི་ཚད་རྫོགས་ཀྱི་བར་དུ་བཟླ་བར་གསུངས་སོ། །བསྙེན་པའི་ཚད་ཀྱང་ལས་རུང་ཙམ་ལ་གཙོ་བོའི་སྔགས་ཆིག་འབུམ། ཞི་བ་རིགས་བཞི་ལ་ཁྲི་རེ། སེམས་དཔའ་མན་ཆད་ལ་ལྔ་སྟོང་རེ་གསུངས་པ་རྣམས་དུས་ཀྱི་དབང་གི་བཞི་འགྱུར་རེ་བཟླ་དགོས་ཤིང་ཁ་སྐོང་དུ་སྤྱི་ཛྲབ་བོ་དྷི་ཙིཏྟ་འབུམ་ཕྲག་གཅིག་གིས་མཐའ་བརྟེན་ཡན་ཆད་བཟླ་ཞིང་དེ་ཐམས་ཅད་ལ་འབུལ་རྗེས་སུ་ཁྲི་སོགས་བཅུ་ཆའི་གྲངས་ཀྱི་ཁ་སྐོང་དང་། བཅུ་ཆའི་སྦྱིན་སྲེག་དང་བཅས་པ་བྱ་བ་ཡིན་ནོ། །དེ་ནས་གཞི་བསྟོད་རྒྱས་པ་གཞུང་ལྟར་རམ། བསྡུ་ན། མི་རྟོག་རྡོ་རྗེ་སོགས་དང་། བསྟོད་པར་འོས་པས་བསྟོད་མཐར། བཤགས་པ་ནི། ཡེ་གནས་གཉིས་མེད་སོགས་བརྗོད་པས་ཉེས་བྱས་སུ་གྱུར་པ་ཐམས་ཅད་བཤགས་ཤིང་དག་པར་བྱའོ། །གསུམ་པ་རྗེས་ཀྱི་ཆོ་ག་ལ། ཚོགས་ཀྱི་མཆོད་པ། བརྟན་མ་སྐྱོང་བ། ཉེར་བསྡུ་བྱ་བ། གོ་བགོ་ལུས་བསྲུང་། སྤྱོད་ལམ་གྱི་རྣལ་འབྱོར་དང་ལྔ། དང་པོ་ཚོགས་ཀྱི་མཆོད་པ་ལ་ལྔ་ལས། དང་པོ་བཤམས་ཤིང་བྱིན་གྱིས་བརླབ་པ་ནི། ཛ་གད་དང་མཱཾ་ས་གཙོ་བོར་གྱུར་པའི་ཡོ་བྱད་ཅི་འབྱོར་པ་བཤམ་ནས། བསང་ཆུ་འཐོར་ལ། ཨོཾ་མ་ཧཱ་ཀྲོ་དྷེ་ཤྭ་རཱི་སརྦ་དྲ་བྱཱཾ་བི་ཤྭ་དྷ་ནི་ཧཱུྃ་ཕཊ་ཀྱིས་བསང་། རྃ་ཡྃ་ཁྃ་གིས་བསྲེག་གཏོར་བཀྲུས་ཏེ་སྟོང་པར་སྦྱངས། མ་སཱུརྱ་མཎྜལ། ཞལ་ཟས་ཀྱི་སྣོད་དུ་ཉི་མ་ལ་ཧཱུྃ་ཨོཾ་སྭཱ་ཨཱྃ་ཧཱ་ལས་བཟའ་བཏུང་གི་དངོས་པོ་ཡེ་ཤེས་ལྔའི་རང་བཞིན་བདུད་རྩི་རོ་བརྒྱ་པ་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པ་དང་བཅས་པའི་སྤྲིན་འཕྲོ་བར་བསམ་ལ། ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབས། གཉིས་པ་ཚོགས་ཞིང་སྤྱན་འདྲེན་པ་ནི། ཨོཾ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོད་དཀྱིལ་འཁོར་གཤེགས་སུ་གསོལ། །བཅོམ་ལྡན་རྡོ་རྗེ་སེམས་དཔའ་ནི། །རིགས་བཞི་ལྷ་དང་ལྷ་མོ་དང་། །འཁོར་གྱི་སེམས་དཔའ་སེམས་མ་དང་། །ཀུན་བཟང་སྤྲུལ་པའི་ཚོགས་ཆེན་དང་། །སྒོ་བ་བཞི་སོགས་གཤེགས་སུ་གསོལ། །ཨོཾ་ཨེ་ཧྱེ་ཧི་སོགས་ཀྱིས་ཚོགས་ཞིང་དཔག་ཏུ་མེད་པ་མཁའ་ཁྱབ་ཏུ་སད་པར་བྱས་ལ། ཨོཾ། ཐུགས་རྗེ་ལྕགས་ཀྱུས་ཐུགས་དམ༴ སོགས་དང་། ཨོཾ་ཤྲཱི་བཛྲ་ཨཾ་ཀུ་ཤ་ཛཿ དེ་བཞིན་དུ། པཱ་ཤ་ཧཱུྃ། སྥོ་ཊ་བཾ། གྷནྜེ་ཧོཿས་དགུག་གཞུག་བཅིངས་མཉེས་པར་བྱ། གསུམ་པ་མཆོད་པ་ལ་གཉིས་ཀྱི།དང་པོ་ཏིང་ངེ་འཛིན་གྱི་མཆོད་པ་ནི། རྒྱས་པར་སྤྲོ་ན་ཆོ་ག་རྒྱས་པའི་སྐབས་ལྟར་རམ། བསྡུ་ན། ཨོཾ་ཤྲཱི་བཛྲ་རཱ་ག་དྷཱུ་པེ་དྷཱུ། སོགས་བཞི་བསྣོལ་དང་། ཨོཾ་ཤྲཱི་བཛྲ་རཱ་ག་ལཱ་སྱེ་ཧཱུྃ། དེ་བཞིན་དུ། མཱ་ལྱེ་ཏྲཱཾ། གཱིརྟི་ཧྲཱིཿ ནཱི་རྟི་ཨ། ཞེས་མཆོད་དོ། །གཉིས་པ་རྫས་ཀྱི་མཆོད་པ་ནི། ཞལ་ཟས་ཀྱི་ཕུད་རིམ་པར་སྤྲོས་ལ། ཧཱུྃ། ཐབས་དང་ཤེས་རབ་ལྡན་གྱུར་ཅིང་། །བྱང་ཆུབ་སེམས་དང་མ་ཆགས་པའི། །གཉིས་སུ་མེད་པར་ཐིམ་གྱུར་ནས། །ཚོགས་ཆེན་གཉིས་ཀྱང་རྫོགས་པར་རོལ། །ཧོཿ བདེ་བར་གཤེགས་པའི་དཀྱིལ་འཁོར་གྱི་ལྷ་ཚོགས་རྣམས་ལ་ཚོགས་ཀྱི་མཆོད་པ་ཆེན་པོ་འབུལ་ཞིང་མཆིས་ན། སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམ་ནས། དམ་ཚིག་ཉམས་ཆག་ཐམས་ཅད་སྐོངས་ཏེ། བླ་ན་མེད་པའི་དངོས་གྲུབ་ཐོབ་པར་མཛད་དུ་གསོལ། ཞེས་འདོད་ཡོན་ལྔ་དང་སུ་ར་ཏོ་བཅུ་དྲུག་ལ་སོགས་པའི་གླུ་གར་དང་རོལ་མོ་སྣ་ཚོགས་པས་མཆོད། བཞི་པ་ཚོགས་ལ་རོལ་པ་ནི། ལས་ཀྱི་རྡོ་རྗེས་འཁོར་འདུས་པའི་གཙོ་བོ་ལ་ཕྱག་བྱས་ཐབས་ཤེས་ཀྱི་རྫས་བསྣོལ་མར་འབུལ་ཞིང་། མཉམ་ཉིད་མི་གཡོ་མཉམ་པའི་སངས་རྒྱས་དཔལ། །ལོག་རྟོག་མཚན་པའི་སྤྲོས་པ་ངང་གིས་ཞི། །དམ་ཚིག་བཞིན་ལས་ཅི་བདེར་སྤྱད་ནས་ཀྱང་། །མཉམ་རྫོགས་ཆེན་པོའི་མཆོད་པ་བཞེས་སུ་གསོལ། །ཞེས་བསྟོད། དེས་ཀྱང་པདྨའི་ཕྱག་རྒྱ་བསྐོར་ཞིང་། ཨ་ལ་ལ་ཧོཿ ཞེས་ལེན། དེ་ནས་གཞན་རྣམས་ལ་ཡང་རིམ་པར་སྟོབ། རྣལ་འབྱོར་པ་རྣམས་ལྷའི་ཏིང་ངེ་འཛིན་གསལ་བ་ལ་ཁྱད་པར་དཀྱིལ་འཁོར་གྱི་ལྷ་རྣམས་རང་གི་ཕུང་པོ་ཁམས་དང་སྐྱེ་མཆེད་ཉིད་ལས་མི་གཉིས་པར་ཤེས་པས་ནང་གི་སྲེག་བླུགས་ཀྱི་ཆོ་ག་ཇི་ལྟ་བའི་དམ་ཚིག་གིས་ཚིམ་པར་རོལ་ཞིང་ལོངས་སྤྱད་དེ། དེའི་མཐར། ཧོཿ བདག་ཅག་རྡོ་རྗེ་སློབ་དཔོན་མཆེད་དང་ལྕམ་དྲལ་རྣམས་ཀྱིས་ཛ་གད་དཔའ་བོ་གསོལ་བ་འགྲོ་བ་མ་ལུས་པ་དབང་དུ་འདུ་བར་གྱུར་ཅིག མ་ཧཱ་མཱཾ་ས་གསོལ་བས་རྣལ་འབྱོར་གྱི་དབང་ཕྱུག་ཆེན་པོར་གྱུར་ཅིག རྡོ་རྗེའི་ཚེ་གསོལ་བས་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་པར་གྱུར་ཅིག ཞལ་ཟས་ཀྱི་བྱེ་བྲག་མང་པོ་གསོལ་བས་ཞི་ཁྲོའི་ཕྲིན་ལས་ཀྱི་རྫུ་འཕྲུལ་སྣ་ཚོགས་ལ་དབང་འབྱོར་བར་གྱུར་ཅིག ཅེས་སྨོན་ལམ་བཏབ་བོ། ལྔ་བ་ལྷག་མའི་མཆོད་པ་ནི། ལྷག་མ་རྣམས་གསོག་འཇོག་མེད་པར་བསྡུས། ལྷ་མཆོད་པའི་ལྷག་མ་བསྣན་པ་དཀྱིལ་འཁོར་དང་ཧ་ཅང་མི་ཉེ་བའི་ཤར་ལྷོར་དྲིའི་མཎྜལ་ཟླུམ་པོར་བྱས་པའི་སྟེང་དུ་བཞག །རྩ་བའི་དཀྱིལ་འཁོར་གསལ་བ་ལས་ཁྱད་པར་ལྷག་མའི་གནས་སུ། བྷྲཱུྃ་བི་ཤྭ་བི་ཤུདྡྷེ་བཛྲ་ཙཀྲ་མཎྜ་ལ་བྷྲཱུྃ། ལྷག་མའི་དཀྱིལ་འཁོར་མཚན་ཉིད་རྫོགས་པ་གདན་དང་བཅས་པའི་ནང་གི་དབུས་དང་ཕྱོགས་བཞིར། ཨོཾ་བཛྲ་དྷྲིཀ྄ ཨོཾ་ཛི་ན་ཛིཀ྄ སྭཱཾ་རཏྣ་དྷྲིཀ྄ ཨཱྃ་ཨ་རོ་ལིཀ྄ ཧཱ་པྲ་ཛྙཱ་དྷྲིཀ྄ རིགས་ཀྱི་ཡབ་ལྔ་སྐད་ཅིག་གིས་གསལ་བར་གྱུར། གཏོར་མའི་དམ་ཚིག་གསང་བའི་ལོངས་སྤྱོད་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་བསམ་ལ། ཨོཾ་ཨཱཿཧཱུྃ། ལན་གསུམ་བརྗོད་པས་བྱིན་གྱིས་བརླབས། ཧཱུྃ། ལས་ཀྱི་རྡོ་རྗེ་བྱེད་པར་དབང་བསྐུར་བའི། །མཁའ་འགྲོ་ལྷག་སྡུད་མ་སྲིང་གིང་གི་ཚོགས། །ལྷག་མ་ཁ་ཆུའི་དམ་ལ་གཏོགས་པ་རྣམས། །དམ་ཚིག་བཞིན་དུ་མཆོད་ཀྱིས་གཤེགས་སུ་གསོལ། །ཧོཿ མཁའ་འགྲོ་མ་གསང་བའི་རྒྱུད་དུ་གཏོགས་པའི་མཁའ་འགྲོ་སུམ་ཅུ་རྩ་གཉིས་སྔོན་གྱི་ཐུགས་དམ་དུས་ལས་མི་འདའ་བར་སྒྲུབ་པའི་སྡོང་གྲོགས་ལ་གཤེགས་ཤིག །ཨེ་ཨཱ་ར་ལི་ཧྲཱིཾ་ཧྲཱིཾ་ཛཿཧཱུྃ་བཾ་ཧོཿ ཌཱ་ཀི་ནི་ཧཱུྃ་ཛཿ ཞེས་བརྗོད་ཅིང་ཧེ་རུ་ཀའི་དམ་རྒྱ་དཔྲལ་བར་བཅིངས་ནས་སྤྱུགས་པའ་◌ིབརྡ་དང་བཅས་པས་སྤྱན་དྲངས་པས། མཁའ་འགྲོ་མ་སོ་གཉིས་སྤྲིན་གཏིབས་པ་བཞིན་བྱོན་ཏེ་རིགས་ལྔའི་གཙོ་བོ་ལ་གཙོ་བོ་བདུན། དོན་གྲུབ་ལ་དྲུག གཞན་གསུམ་ལ་ལྔ་ལྔ་འཁྲིལ་ཞིང་སྒོ་མ་བཞི་གཙོ་བོའི་གདན་གྱི་ཚུལ་དུ་བཞུགས་པ་ལ་མེ་ཏོག་ལ་སོགས་པས་སྤྱིར་མཆོད་ནས། དམར་གྱི་རཀྟ་གཏོར་མར་སྦྲེང་ཞིང་། ཧེ་རུ་ཀའི་ཐོད་པའི་ཐལ་མོ་རྒྱ་དང་བཅས་པས། ཨོཾ་བཛྲ་ཌཱ་ཀི་ནཱི་པྲ་ཏཱིཙྪེ་མཾ་བ་ལིཾ་ཏེ་ཧཱུྃ་ཕཊ། དེ་བཞིན་དུ། ཨོཾ་བུདྡྷ་ཌཱ་ཀི་ནཱི་པྲ༴ སོགས་ནས་ཨོཾ་ཕཊ། ཨོཾ་རཏྣ་ཌཱ་ཀི་ནཱི་སོགས་ཏྲཱྃ་ཕཊ། ཨོཾ་པདྨ་ཌཱ་ཀི་ནཱི་སོགས་ཧྲཱིཿཕཊ། ཨོཾ་ཀརྨ་ཌཱ་ཀི་ནཱི་སོགས་ཨཱཿཕཊ། ཅེས་པས་གཏོར་མ་ཕུལ་ལ། ཧཱུྃ། མཁའ་འགྲོ་གིང་དང་དབང་ཕྱུག་མ། །མ་བདུན་སྲིང་བཞི་འབར་མ་བརྒྱད། །ཕོ་ཉ་ལ་སོགས་ལྷག་སྡུད་ཚོགས། །དབལ་གྱི་ཕམ་ཕབས་འདི་གསོལ་ལ། །བཅོལ་བའི་ཕྲིན་ལས་སྒྲུབ་པར་མཛོད། །ཅེས་བརྗོད་ཅིང་སྨན་དང་རཀྟས་མཆོད་ནས། ཧོཿ ལྷག་སྡུད་ཀྱི་དམ་ཚིག་ལ་གཏོགས་པའི་མཁའ་འགྲོ་དམ་ཅན་རྒྱ་མཚོའི་ཚོགས་འཁོར་དང་བཅས་པ་རྣམས་ལྷག་མའི་དམ་ཚིག་འདིས་ཚིམས་ཤིང་དགྱེས་པར་གྱུར་ཏེ། དམ་ཚིག་ཉམས་ཆག་ཐམས་ཅད་སྐོང་ནས་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སོལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྟོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། ཁྱད་པར་དུ་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཆོག་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་སྡོང་གྲོགས་མཛོད་ཅིག །ཅེས་ཕྲིན་ལས་བཅོལ། ཡ་ཧི་གཙྪ་ཞེས་པས། མགྲོན་རྣམས་རང་གནས་སུ་གཤེགས་པར་བསམ་ལ་གཏོར་མ་ཕྱི་རོལ་དུ་བསྐྱལ། ཧཱུྃ་ཞེས་པས་ལྷག་མའི་དཀྱིལ་འཁོར་རིགས་ལྔ་རང་ལ་བསྟིམ་ནས་མཎྜལ་ཀྱང་བསྡུའོ། གཉིས་པ་བརྟན་མ་བསྐྱང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱིས་བྲན་ལ། ཏྲཾ་རཏྣ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཏྲྃ་རཏྣ་ཏྲཻ་ལོཀྱ་ཕཊ། གཏོར་མའི་རྡུལ་ཕྲ་རབ་རེ་རེ་ཞིང་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབ། ཧཱུྃ།ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་བྱོན་དམ་སྐོང་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་མང་པོའི་སྒྲ་དང་བཅས། །འདིར་བྱོན་དམ་སྐོང་ཕྲིན་ལས་མཛོད། །ཆེ་ཞེ་ཆེན་མོ་ཁྱེད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་བསྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉན་པོ་རྗེས་དགོངས་ལ། །དམ་རྫས་བཀའ་ཡི་གཏོར་མ་ལོངས། །བཅོལ་བའི་ཕྲིན་ལས་གྲུབ་པར་མཛོད། ཨོཾ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རཀྨ། མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ། ཞེས་དང་། མ་ཧཱ་པཉྩ་སོགས་ཀྱིས་སྨན་རཀ་སྦྲེང་། ཕྲིན་ལས་བཅོལ། ཡ་ཧི་གཙྪས་གཤེགས་གསོལ་བྱས་ལ་གཙང་སར་བསྐྱལ་ལོ། །ཐུན་མཚམས་ལ་འཇུག་པའམ་ཉལ་བ་ན། བྷྲཱུྃ་བི་ཤྭ་བི་ཤུདྡྷེ་ཧཱུྃ་ཨོཾ་སྭཱ་ཨཱྃ་ཧཱ་ཞེས་པས་དཀྱིལ་འཁོར་གསལ་བཏབ་ལ། བཛྲ་པདྨ་ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མི། ཛཿཧཱུྃ་བཾ་ཧོཿ བོ་དྷི་ཙིཏྟ་སྥ་ར་ཎ་ཕཊ། ཅེས་བརྗོད་པས། ཡབ་ཡུམ་སྙོམས་པར་འཇུག་པའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་གྱི་སྤྲིན་འཕྲོས་པས་སྣོད་བཅུད་ཐམས་ཅད་དག་ཅིང་འོད་གསལ་བར་བྱས། སཾ་ཧ་ར་ཎ་ཧཱུྃ། ཞེས་བརྗོད་པས། དག་པའི་སྣོད་བཅུད་གཞལ་ཡས་ཁང་སྲུང་འཁོར་དང་བཅས་པ་ལ་ཐིམ། གཞལ་ཡས་ཁང་གི་རྒྱན་ཐམས་ཅད་ཡབ་རྣམས་ལ་ཐིམ། དངོས་པོ་ཐམས་ཅད་ཡུམ་རྣམས་ལ། ལྷ་ཐམས་ཅད་གཙོ་བོ་རྡོ་རྗེ་སེམས་དཔའ་ལ། ཡུམ་ཐམས་ཅད་དབྱིངས་ཕྱུག་མ་ལ། དེ་ཡབ་ལ། དེ་ཡེ་ཤེས་སེམས་དཔའ་ལ། དེ་ཏིང་ངེ་འཛིན་སེམས་དཔའ་ལ། དེ་ཧཱུྃ་ལ། ཧཱུྃ་གྱེན་རྫོགས་ནཱ་དའི་བར་ཐིམ་ནས་རྣམ་པར་རྟོག་མེད་ལྷུན་གྲུབ་ནམ་མཁའ་ལྟ་བུའི་ངང་ལ་མཉམ་པར་བཞག །ཉལ་བ་ལས་ལངས་པའམ། སྤྱོད་ལམ་ལ་འཇུག་པ་ན། ཧཱུྃ་བཛྲ་དྷྲིཀ྄ །ཅེས་བརྗོད་པས། རྡོ་རྗེ་སེམས་དཔའ་ཞལ་གཅིག་ཕྱག་གཉིས་པ་སྣང་སྟོང་སྒྱུ་འཕྲུལ་དྲྭ་བའི་སྐུར་ལྡང་ངོ་། བཞི་པ་གོ་བགོ་ཞིང་ལུས་བསྲུང་བ་ནི། རང་ཉིད་རྡོར་སེམས་སུ་གསལ་བའི་སྤྱི་བོར་ཨོཾ། མགྲིན་པར་ཨཱཿ སྙིང་གར་ཧཱུྃ་ཡིག་རྣམས་ཀྱིས་མཚན་པར་གྱུར། བཛྲ་ཀཱ་ཝཱ་ཙི་རཀྵ་ཧཾ། ཞེས་བརྗོད་པས། ལུས་ཐམས་ཅད་རྡོ་རྗེ་རྒྱ་གྲམ་གྱི་གོ་ཆས་ཞུ་ལུགས་སུ་གཡོགས་པས་སྒོ་གསུམ་རྡོ་རྗེ་གསུམ་དང་དབྱེར་མེད་དུ་བཅིངས་པར་བལྟས་ལ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱིས་ཀུན་ལ་ཁྱབ། །ཅེས་བརྗོད་ཅིང་ང་རྒྱལ་བྱ། དེ་ནས། མཛུབ་མོ་གཡས་སུ་ཏྲཱཾ་ལས་ཁྲོ་བོ་གནོད་སྦྱིན་ནག་པོ་ཕྱག་གཉིས་ཀྱི་མཆེ་བ་དང་སྡིགས་མཛུབ། གཡོན་དུ་ཨོཾ་ལས་ཁྲོ་བོ་མི་འཆི་ཐབས་སྦྱོར་དམར་པོ་རྒྱ་གྲམ་དང་སྡིགས་མཛུབ་ཅན་དུ་བསྐྱེད་ལ། ལྟེ་བ་སྙིང་ག་ལྟག་པ་དང་། དཔྲལ་བ་སྤྱི་བོའི་གནས་ལྔ་རུ། ཨོཾ་ཏྲུྃ་ཞེས་བརྗོད་བཞིན་པར་མཛུབ་མོ་གཉིས་བསྣོལ་ནས་རིམ་པར་རེག་པས། གནས་དེ་དང་དེར་ཁྲོ་བོ་གཉིས་པོ་ཟུང་རེ་ཞབས་བསྣོལ་ཐབས་སུ་ཞལ་ཕྱིར་གཟིགས་ཏེ་བསྲུང་བའི་ལས་མཛད་པའི་ཐུགས་ཀ་ནས་རྡོ་རྗེ་ལུ་གུ་རྒྱུད་བྱུང་ནས་སྲུངས་ཤིང་བརྟན་པར་བྱས་ལ། ཨོཾ་རཏྣ་མུ་ཀུ་ཊ་ཨ་བྷི་ཥིཉྩ་ཏྲཾ་ཏྲཾ། ཞེས་རིགས་ལྔའི་དབུ་རྒྱན་གྱིས་དབང་བསྐུར་བར་བསམ། ཨོཾ་རཏྣ་མ་ལེ་ཨ་བྷི་ཥིཉྩ་ཏྲཾ་ཏྲཾ། རིན་པོ་ཆེའི་ཕྲེང་བ་བཅིངས་པར་བསམ་མོ། །ཨོཾ་ཨཱརྱ་ལཾ་བྷོ་དྷ་ར་ཨ་བྷི་ཥིཉྩ་ཧྲཱིཿཧྲཱིཿདར་མཐིང་དམར་གྱི་ཅོད་པན་གྱིས་དབུ་བརྒྱན་པར་བསམ་མོ། །ཨོཾ་གུ་ཧྱ་ས་མ་ཡ་སྟྭཾ། ཞེས་བརྟན་པར་བསམ་ཞིང་ཡི་གེ་བརྒྱ་པ་ལན་གསུམ་ལ་སོགས་པར་བཟླས་པས་ཤིན་ཏུ་བརྟན་པར་བྱས་ལ། དགེ་བ་བསྔོ་ཞིང་བཀྲ་ཤིས་བརྗོད་པ་རྣམས་ཀྱིས་མཐའ་བརྒྱན་པར་བྱའོ། །ལྔ་བ་སྤྱོད་ལམ་རྒྱུན་གྱི་རྣལ་འབྱོར་ནི། སྣོད་བཅུད་སྣང་གྲགས་ཐམས་ཅད་སྒྱུ་འཕྲུལ་དྲྭ་བའི་རང་བཞིན་དུ་ཤེས་ཤིང་། ཟ་ཉལ་འགྲོ་འཆགས་སོགས་སྤྱོད་ལམ་ཐམས་ཅད་ཐབས་ཤེས་ཁྱད་པར་ཅན་གྱིས་ཟིན་པས་དོན་ཡོད་པར་བྱའོ། །དེ་ལྟར་དཔལ་ལྡན་སྒྱུ་འཕྲུལ་དྲྭ་བ་ཡི། །བསྙེན་སྒྲུབ་ལམ་གྱི་རིམ་པ་ལ་འཇུག་པའི། །ལས་བྱང་སྙིང་པོའི་དོན་དྲིལ་ཉུང་ངུ་འདི། །རང་དང་སྐལ་མཉམ་རྣམས་ལ་ཕན་ཕྱིར་བྲིས། །རང་བཟོའི་ནོངས་པ་མཆིས་ན་མཁས་ལ་བཤགས། །དམ་པའི་རྗེས་འབྲང་ལེགས་པའི་ཆ་མཆིས་ན། །དགེ་དེས་ལམ་བཟང་འདིར་ཞུགས་སྐལ་བཟང་རྣམས། །དཔལ་ལྡན་རྡོ་རྗེ་སེམས་དཔའི་གནས་ཐོབ་ཤོག །ཅེས་རྡོར་སེམས་སྒྱུ་དྲྭའི་བསྙེན་པའི་ལས་བྱང་ཉུང་ངུར་དྲིལ་བ་འདི་ནི་གཏེར་ཆེན་ཆོས་ཀྱི་རྒྱལ་པོའི་གསུང་ལས་ཉེ་བར་བསྡུས་ཏེ་ཤཱཀྱའི་དགེ་སློང་པདྨ་བཛྲས་བྲིས་པ་དགེ་ལེགས་འཕེལ། །དགེའོ། །མདྒ་ལཾ།།

སྒྱུ་འཕྲུལ་ཞི་བའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཟླ་བའི་འོད་ཟེར།

༄༅། །སྒྱུ་འཕྲུལ་ཞི་བའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཟླ་བའི་འོད་ཟེར་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། ནམ་ཡང་མི་འགྱུར༵་ལྷུན་གྲུབ་ཕྲིན་ལས་བཞི། །ཀུན་ཁྱབ་རིས་མེ◌༵ད་འགྲོ་བ་འདུལ་མཛད་པ། །བླ་མ་རྡོ་རྗེ་སེམས་དཔའི་ངོ་བོ་ལ། །ཕྱག་བྱས་རྒྱུད་ལུང་ཞི་བའི་སྦྱིན་སྲེག་བྲི། །འདིར་ས་ག་ཟླ་བའི་སྦྱིན་སྲེག་བཀླག་ཆོག་མར་བཀོད་པ། ལོ་ཆེན་རིན་པོ་ཆེའི་གསུང་གཞིར་བཞག་ནས། བསྙེན་པའི་ཁ་སྐོང་སོགས་མདུན་བསྐྱེད་ཀྱི་དཀྱིལ་འཁོར་དང་མ་འབྲེལ་བའི་ཚེ། ཇི་ལྟར་བྱ་བའི་རིམ་པ་ཅུང་ཟད་བསྒྱུར་ཏེ་བྲི་བ་ལ། སྒྱུ་འཕྲུལ་དྲྭ་བ་ཞི་བ་འབྲིང་པོའི་དཀྱིལ་འཁོར་དང་སྦྱར་ནས་སྟོན་ཏེ། དེ་ལ་ཐོག་མར་བཅས་གཤོམས་ནི། ཐབ་སྟེགས་གྲུ་བཞི་པ་རྒྱར་ཁྲུ་དོ་དང་དཔངས་སུ་ཁྲུ་ཕྱེད་པའི་ཁར་དྲི་དཀར་པོ་དང་བ་བྱུང་གིས་ཆག་ཆག་བཏབ། དེའི་སྟེང་ངོས་ཀྱི་མཐའ་ནས་ཟླུམ་སྐོར་གྱི་མུ་ཁྱུད་ནག་པོ་ལ་ཨོཾ་ཡིག་དང་སེང་མགོ་སྤེལ་བའི་ནང་དུ་འཁོར་ལོ་རྩིབས་བཞི་པ་བྲི། དེའི་ལྟེ་བར་ཐབ་ཁུང་རྩིགས་ན་རྒྱར་ཁྲུ་གང་དང་དཔངས་སུ་ཁྲུ་ཕྱེད་ཟླུམ་པོར་བསླང་བའི་ཕྱིར་བཀྱེད་པའི་སོར་བཞིའི་ཚད་ཅན་གྱི་ཁ་ཁྱེར་བང་རིམ་གསུམ་ལ། ནང་ནས་རིམ་པར་འཁོར་ལོ་ལྕགས་ཀྱུ་འོད་ཕྲེང་གིས་བསྐོར་བའི་དབུས་སུ་སྲབ་མཐུག་སོར་གང་ཙམ་པའི་ཐབ་མཚན་འཁོར་ལོ་ཨོཾ་གྱིས་མཚན་པ་སྟེ། ཐམས་ཅད་ཀྱང་ཚོན་དཀར་པོས་ཁ་བསྒྱུར་རོ། །བྲི་ཐབ་བྱེད་ན། ཐབ་སྟེགས་བྲི་རྩིགས་གང་བྱེད་ཀྱང་རུང་ཞིང་། གཞིའི་འཁོར་ལོ་ཨོཾ་སེང་སྤེལ་བའི་མུ་ཁྱུད་དང་བཅས་པ་བྲི་དུས་ཁ་ཁྱེར་གྱི་འོག་ཏུ་ཚུད་པས་བྲི་མི་དགོས་ལ། གཞན་ཐམས་ཅད་སྔར་དང་འདྲ་བར་རྡུལ་ཚོན་དཀར་པོས་བྲི་བར་བྱའོ། །གང་ལྟར་ཡང་འོ་མ་ཅན་གྱི་ཤིང་རྩེ་མོའི་ཆ་ལས་བྱུང་བའམ་དགོན་པའི་བ་གཅི་སྐམ་གཙང་སྲོག་ཆགས་མེད་པ་ཐབ་ནང་དུ་ཐབ་ལས་ཅུང་ཟད་དམའ་བ་ཟླུམ་པོར་བརྩིགས་པའི་ཤར་ལྷོར་མེ་ཚང་བཅའ། སྟེགས་བུའི་གྲྭར་མདའ་བཞི་བཙུགས་པ་སྲད་བུ་དཀར་པོས་བསྣོལ་མར་བྲན་ཅིང་སྟེང་ནས་མེ་དར་དཀར་པོ་དགབ། སྟེགས་བུའི་ཤར་ལྷོའི་ཟུར་དུ་མདའ་དར་དམར་པོ་གཟུག ཐབ་ཀྱི་མདུན་དུ་སྟན་དཀར་ཞིང་འཇམ་པ་དང་། དེའི་གཡས་གཡོན་དུ་ཁྲུ་གང་བའི་ཚད་ཀྱི་རྫས་སྟེགས་དང་མཆོད་སྟེགས་དཀར་པོ་སྟེ་གསུམ་ག་ལ་སྣ་ཚོགས་པདྨ་འདབ་མ་བརྒྱད་པ་རེ་བྲི། སྟན་གྱི་མདུན་དུ་ཞེང་མཐོ་གང་དཔངས་སློབ་དཔོན་གྱི་སྐེད་པ་ཙམ་སླེབ་པའི་མེ་ཡོལ་གངས་རི་བྲིས་པ་བཞག གཡས་ཕྱོགས་རྫས་སྟེགས་ཀྱི་པདྨའི་ལྟེ་བར་བ་ལས་བྱུང་བའི་མར་ཁུ་དགང་བླུགས་ཀྱི་གཟར་བུ་ཁ་སྦྱར་བ་དང་བཅས་པ། མདུན་གྱི་འདབ་མར་འོ་མ་ཅན་གྱི་རྩེ་མོའི་ཆ་ལས་བྱུང་བའི་ཡམ་ཤིང་མཐོ་གང་བ་རྩེ་གཉིས་མར་ཁུས་ཉུག་པ། པད་འདབ་ལྷག་མ་བདུན་ལ་ཏིལ་དཀར། མངར་གསུམ། ནས་དཀར་དང་འབྲས་དཀར་གྱི་ཆན་སོགས་ཁ་ཟས་དཀར་པོ་དང་། ཙནྡན་དཀར་པོ་སོགས་དྲི་དཀར་པོའི་རིགས་དང་། ཙམ་པ་ཀ་སོགས་མེ་ཏོག་དཀར་པོའི་རིགས་ཏེ་ཐམས་ཅད་རང་བཞིན་ནམ་བཅོས་པས་དཀར་བ་འདས་མ་འདས་ཀྱི་ཁྱད་པར་གྱིས་ཕྱི་ནང་ཉིས་རིམ་དང་ཐུགས་དམ་བསྐུལ་བའི་རྫས་ཡུངས་ཀར་རྣམས་རིན་པོ་ཆེ་དཀར་པོའི་སྣོད་དུ་བཤམ། གཡོན་ཕྱོགས་མཆོད་སྟེགས་ཀྱི་པདྨའི་ལྟེ་བར། འོ་མ་འབྲས་ཆན་དངུལ་ཕྱེ་མེ་ཏོག་དཀར་པོ་རྣམས་དང་བསྲེས་པའི་མར་དཀར་གྱི་འདས་གཏོར་ཟླུམ་པོ་རིལ་བུ་དྲུག་གིས་བསྐོར་བ་མཉྫིའི་སྟེང་བཀོད་པའི་མདུན་དུ་རྒྱུ་དེ་ལས་འཇིག་རྟེན་ལས་འདས་པའི་གཏོར་མ་དཀར་ཟླུམ། མདུན་གྱི་པད་འདབ་ལ་རྡོར་དྲིལ། དེའི་གཡས་གཡོན་གྱི་འདབ་མར་སྨན་རཀ །པད་འདབ་ལྷག་མ་ལྔ་ལ་ཞབས་བསིལ་དང་བཞི་བསྣོལ་གྱི་མཆོད་རྫས་རང་བཞིན་ནམ་བཅོས་པས་དཀར་བ་གཡས་བསྐོར་དུ་བཤམ་ཞིང་ལས་བུམ་ཀྱང་ཅི་བདེར་བཞག་གོ། །དེ་ལྟར་བཤམས་ཟིན་ནས་ཆོ་ག་ནི། སློབ་དཔོན་ཆས་གོས་དང་རིན་པོ་ཆེའི་རྒྱན་དཀར་པོས་བརྒྱན་ལ་རྡོ་རྗེའི་སྐྱིལ་ཀྲུང་གིས་ཤིས་པའི་ཕྱོགས་སུ་ཁ་བལྟས་པས་འདུག་ནས། དོན་གྱི་སེམས་ཆོས་ཐམས་ཅད་ཀྱི་གཤིས་ལུགས་ལྷག་པ་བདེན་པ་དབྱེར་མེད་ཀྱི་ལྟ་བ་རྟོགས་ཤིང་བྱང་ཆུབ་ཀྱི་སེམས་དང་ལྡན་པས། ཀུན་སློང་སྟོངས་ཀྱི་སེམས་རང་གཞན་གྱི་གནོད་སྡིག་སེལ་བར་འདོད་པའི་སེམས་ཞི་ཞིང་དང་བའི་སྒོ་ནས། ངག་སྔགས་རྣམས་ཕྲ་ཞིང་ཞི་བ་རྒྱུན་མི་ཆད་པར་བཟླ་བའི་ཚུལ་གྱིས་ཆོ་གའི་ལས་ལ་འཇུག་སྟེ། ཨོཾ་ཛི་ན་ཛིཀ྄་ཅེས་པས། རང་ཉིད་རྣམ་པར་སྣང་མཛད་དཀར་པོ་ཞལ་གཅིག་ཕྱག་གཉིས་པའི་རྣམ་པས་དཀྱིལ་འཁོར་གྱི་ཤར་སྒོའི་ཐད་དུ་འཁོད་དེ་སྦྱིན་སྲེག་གི་ལས་རིམ་ལ་འཇུག་པར་མོས་པས། རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔ་ཡི་ངོ་བོ་དང་། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་དུ་མོས་པ་བརྟན་པར་བྱས་ལ། ཨོཾ་མ་ཧཱ་བཛྲ། ཞེས་རྡོ་རྗེ་གསོར་ཞིང་ཐུགས་ཀར་འཛིན། ཨོཾ་བཛྲ་གྷཎྜེ་ཨཱཿ དྲིལ་བུ་དཀྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་འཁྱུད་རྒྱ་བྱས་ཏེ་དམ་ཚིག་གསུམ་དྲན་པར་བྱའོ། །དེ་ནས་ཕྱི་མཆོད་རྣམས་སྒྲུབ་ཐབས་ལྟར་བརླབ་ཅིང་། སྨན་རཀ་གཉིས་སྔགས་ཙམ་གྱིས་བྱིན་རླབས་གསོ། ལས་གཏོར་དང་སྲེག་རྫས་རྣམས་ལ་ལས་བུམ་གྱི་ཆུ་འཐོར་ཞིང་། ཧཱུཾ་བིགྷྣཱནྟ་ཀྲྀཏ་ཕཊ་དང་། སྭ་བྷཱ་ཝས་བསང་སྦྱང་། སྟོང་པའི་ངང་ལས་མ་དང་ཨ་ལས་ཉི་ཟླའི་གའུའི་སྣོད་དུ་རང་གི་ཐུགས་ཀ་ནས་གཏོར་མའི་གནས་སུ་འབྲུ་གསུམ་དང་སྲེག་རྫས་ཀྱི་གནས་སུ་འབྲུ་ལྔ་སྤྲོས་ཏེ་འཕྲོ་འདུས་ཡོངས་སུ་གྱུར་པ་ལས་ཞི་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་དཀར་པོ་འཕྲོ་བ་དང་སྲེག་རྫས་རྣམས་རོ་བརྒྱ་ལྡན་པའི་ཟག་མེད་ཡེ་ཤེས་ཀྱི་བདུད་རྩི་ནམ་མཁའ་གང་བས་ཞི་བའི་ལས་སྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བསམ་ལ། ཨོཾ་ཨཱཿཧཱུཾ། ཨོཾ་ཧཱུཾ་སྭཱ་ཨཱཾ་ཧཱ་ཞེས་བཟླས་པས་བྱིན་གྱིས་བརླབ། དེ་ནས་ཐབ་བསང་སྦྱང་། སྟོང་པའི་ངང་ལས་མདུན་དུ་བྷྲཱུཾ་ཡིག་འཕྲོ་འདུས་ཡོངས་སུ་གྱུར་པ་ལས་འཁོར་ལོའི་ལྟེ་བ་ལ་གནས་པའི་ཞི་བའི་ཐབ་ཁུང་དཀར་ཞིང་ཟླུམ་པ་ཁ་ཁྱེར་བང་རིམ་གསུམ་དང་ལྡན་པ་འོད་ཟེར་དཀར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་དཀར་པོ་འབར་བར་བསམ་ལ། ཨོཾ་ཨགྣེ་ཡེ་ཛྭ་ལ་ཛྭ་ལ་ཧུཾ་ཕཊ། ཅེས་རྒྱུན་བཞག་གམ་གཙུབ་ཤིང་ལས་བྱུང་བའི་མེ་དུ་བ་མེད་པས་སྤར་ལ། ཐབ་ཀྱི་མེའི་དབུས་སུ་མ་དང་དཱིཿལས་བྱུང་བའི་ཉི་མ་དང་ར་སྐྱེས་ཀྱི་གདན་ལ་ཨོཾ་ཡིག་དཀར་པོའི་འཕྲོ་འདུས་ཡོངས་སུ་གྱུར་པ་ལས་ཨགྣེ་དེ་བ་རི་ཥི་ཧཱུཾ་ཞི་བའི་མེ་ལྷ་དཀར་པོ་ཞི་ཞིང་འཛུམ་པ་དྲང་སྲོང་གི་ཆ་བྱད་ཅན་གུནྡྷེ་དང་བགྲང་ཕྲེང་འཛིན་པའི་སྐུར་གྱུར། ཨ་དཪྴ་སོགས་ཀྱིས་བསྐུར་བརླབ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣེ་དེ་བ་ས་མ་ཡ་ཧཱུཾ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོས་གཡབ་ཅིང་། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་རྒྱ་དང་བཅས། ཨགྣེ་དེ་བ་རི་ཥི་ཛཿཛཿས་སྤྱན་དྲང་། ཛཿཧཱུྃ་བཾ་ཧོཿས་བསྟིམ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད། མེ་ལྷ་ཞལ་ཅུང་ཟད་གདངས་པ་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ལག་གཉིས་དེ་བཞིན་གཤེགས་པའི་ཁུ་ཚུར་དུ་བྱས་པས་དགང་བླུགས་བཟུང་ནས། ཨོཾ་ཨགྣེ་ཡེ་སྭཱ་ཧཱ། ཞེས་གཡས་པའི་བླུགས་གཟར་བདུན་གྱིས་གཡོན་པའི་དགང་གཟར་བཀང་སྟེ་རྗེས་གཟར་བུ་ཁ་སྦྱར་ཏེ་པུས་མོའི་ནང་ལས་མི་འདའ་བས་གཡས་བསྐོར་གྱིས། ཨོཾ་ཨགྣེ་དེ་བ་རི་ཥི་ཧ་བྱ་ཀ་བྱ་དི་བྱ་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་ལན་གསུམ་གྱིས་དགང་བླུགས་ཕུལ། དེ་རྗེས་སྔགས་དེ་ཁོ་ནས་ཡམ་ཤིང་མར་ཁུ་བསྲེག་རྫས་རྣམས་རེ་རེ་ནས་ལྔའམ་བདུན་སོགས་ཇི་ལྟར་རིགས་པ་ཕུལ་ནས། ཧཱུཾ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱབས་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་སྤྲུལ་པ་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་ཆིབས། །བགྲང་ཕྲེང་འཛིན་ཅིང་རིག་སྔགས་གསུང་། །བདུད་རྩིའི་བཅུད་ལྡན་གུནྡྷེ་བསྣམས། །ཆོས་ཀྱི་བདུད་རྩིས་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་ལ། ཡུངས་ཀར་ཐབ་ཏུ་གཏོར་ཞིང་། ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་ཐམས་ཅད་ཞི་བའི་ཕྲིན་ལས་མཛད་དུ་གསོལ། ཞེས་འདོད་དོན་གསོལ། དེ་དག་སྦྱིན་ལྷ་སྟེ་འཇིག་རྟེན་པའི་མེ་ལྷ་མཆོད་པའི་ཆོ་གའོ། །དེ་ནས་སྲེག་ལྷ་ཞེས་པ་འདས་པའི་མེ་ལྷ་མཆོད་པ་ནི། མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་དབུས་སུ་བྷྲཱུཾ་ཡིག་འཕྲོ་འདུས་ཡོངས་སུ་གྱུ་པ་ལས། བྷྲཱུཾ་བི་ཤྭ་བི་ཤུདྡྷེ་ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་གདན་དང་བཅས་པ་གསལ་བར་བསམ་ལ། ཡེ་ཤེས་ཕྱོགས་བཞི་དབུས་བརྟགས་ཏེ། ཞེས་པ་ནས། ཉི་ཟླ་པདྨ་རིན་པོ་ཆེ། །ཞེས་པའི་བར་གྱིས་གསལ་བཏབ་ལ། རང་གི་ཐུགས་ཀ་ནས་ཡི་གེ་བཞི་བཅུ་རྩ་གཉིས་འཐོན་ཏེ་སོ་སོའི་གདན་སྟེང་དུ་འཁོད་པ་ནི་དབུས་སུ་ཊ་ཏ། རྩིབས་བཞིའི་ཤར་དུ་ཋ་ཐ། ལྷོར་ཊ་ད། ནུབ་ཏུ་ཌྷ་དྷ། བྱང་དུ་ཎ་ན། རྩིབས་མཆན་གྱི་ཤར་ལྷོའི་གདན་ལ་ཀ་ཙ། ལྷོ་ནུབ་ཏུ་ཁ་ཚ། ནུབ་བྱང་དུ་ག་ཛ། བྱང་ཤར་དུ་གྷ་ཛྷ། གྲུ་ཆད་ཀྱི་ཤར་ལྷོའི་གདན་ལ་པ་ཡ། ལྷོ་ནུབ་ཏུ་ཕ་ཝ། ནུབ་བྱང་དུ་བ་ར། བྱང་ཤར་དུ་བྷ་ལ། ཁྱམས་ཀྱི་ཤར་དུ་ཀྵ། ནུབ་ཏུ་ཨ། ཤར་ལྷོར་ཨི། བྱང་དུ་ཨཱི། ལྷོར་ཨུ། ནུབ་བྱང་དུ་ཨཱུ། ལྷོ་ནུབ་ཏུ་ཨེ། བྱང་ཤར་དུ་ཨཻ། སྒོ་བཞིའི་ཤར་སྒོར་ང་ཤ ལྷོ་སྒོར་ཉ་ཥ །ནུབ་སྒོར་མ་ས། བྱང་སྒོར་ཨོ་ཨཽ། དེ་རྣམས་ཁ་དོག་དཀར་པོ་སོ་སོའི་གདན་ལ་འཁོད་པར་གྱུར། སྥ་ར་ཎ་ཕཊ། ཅེས་བརྗོད་པས་ཡིག་འབྲུ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུཾ། སླར་འདུས་ནས་ཡིག་འབྲུ་རྣམས་ལ་ཐིམ་པས་ཡོངས་སུ་གྱུར་པ་ལས། ཨོཾ་ཛི་ན་ཛིཀ྄ ལཾ་དྭེ་ཥ་ར་ཏི། ཧཱུཾ་བཛྲ་དྷྲིཀ྄ མུཾ་དྷཱ་ཏྭེ་ཤྭ་རཱི། སྭཱ་རཏྣ་དྷྲིཀ྄ མཱཾ་མོ་ཧ་ར་ཏི། ཨཱཾ་ཨཱ་རོ་ལིཀ྄ པཱཾ་ར་ག་ར་ཏི། ཧཱཾ་པྲ་ཛྙཱ་དྷྲིཀ྄ ཏཱཾ་བཛྲ་ར་ཏི། ཀྵཱིཾ་ཧི་རཱ་ཛ་ཡ། ཧཱུྃ་ལཱ་སྱེ་ས་མ་ཡ་སྟྭཾ། ཏྲཾ་ཨ་གརྦྷ་ཡ། ཏྲཱྃ་མཱ་ལེ་ས་མ་ཡ་ཧོཿ ཧྲཱིཾ་ཧ་ཧཱུཾ་པདྨ་པྲ་ད་མ། ཧྲཱིཾ་གཱི་ཏི་ར་གོ་ཡ་ཧཾ། ཛྲིཾ་ཀུ་རུ་པ་ཎ། ཨཾ་ནིརྟི་རཱ་ག་ཡ་མེ། མཻ་ཏྲི་དྷ་ར་ཎི་སྭཱ་ཧཱ། ཛཿདྡྷཱུ་པེ་པྲ་ཝེ་ཤ་ཡ། ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུྃ་པུཥྤེ་ཨཱ་བེ་ཤ ཧཱུྃ་སྭ་རཱ་ཛ་ཡེ་སྭཱ་ཧཱ། བཾ་དཱི་པ་སུ་གི་རཱི། མུཾ་ཤྲཱི་ཨཱཾ་རཱ་ག་ཡ་སྭཱ་ཧཱ། ཧོཿ གནྡྷེ་ཙིཏྟ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨོཾ། ཨ་ཨ་ཨ་བཛྲཱི་བྷ་དྲ་ས་མནྟ་ཨཱཿ ཨོཾ་མུ་ནེ་ཀྲེཾ་སྭཱ་ཧཱ། ཨོཾ་མུ་ནེ་ཧཱུྃ་ཏྲུཾ་སྭཱ་ཧཱ། ཨོཾ་མུ་ནེ་སྲུཾ་སྭཱ་ཧཱ། ཨོཾ་མུ་ནེ་པྲེཾ་སྭཱ་ཧཱ། ཨོཾ་མུ་ནེ་ཀྵཾ་སྭཱ་ཧཱ། ཨོཾ་མུ་ནེ་ཡེ་སྭཱ་ཧཱ། ཧཱུྃ་ཡ་མཱནྟ་ཀྲྀཏ་ཕཊ། ཨོཾ་མ་ཧཱ་བཛྲ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཧཱུྃ་པྲ་ཛྙཱནྟཀྲྀ་ཏ་ཕཊ། ཨོཾ་མ་ཧཱ་རཏྣ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཨོཾ་པདྨཱནྟ་ཀྲྀཏ་ཧཱུྃ་ཕཊ། ཨོཾ་མ་ཧཱ་པདྨ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཧཱུྃ་བིགྷྣཱནྟ་ཀྲྀཏ་ཧཱུྃ་ཕཊ། ཨོཾ་མ་ཧཱ་ཀརྨ་དྷ་རོ་མ་ཧཱ་ཀྲོ་དྷཱི་ཤྭ་རཱི་ཛྭ་ལཱི་ནི་ཧཱུྃ་ཕཊ། ཅེས་སོ་སོའི་སྔགས་བརྗོད་པས། བཅོམ་ལྡན་འདས་དཔལ་རྣམ་པར་སྣང་མཛད་ལ་སོགས་ཏེ་བཞི་བཅུ་རྩ་གཉིས་རྒྱལ་བའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་དཀར་པོ་གཡས་འཁོར་ལོ་དང་གཡོན་རང་རྟགས་འཆང་བ་སོ་སོའི་གདན་ལ་བཞུགས་པའི་སྐུ་ལས་འོད་ཟེར་དཀར་པོའི་ཕྲེང་བ་མཁའ་ཁྱབ་ཏུ་སྤྲོ་པས་ཞི་བའི་ཕྲིན་ལས་མཛད་པར་བསམ་ལ། གདན་ལ་རྫོགས་དང་སེམས་དཔའི་ཚུལ། ཞེས་པ་ནས། དཀྱིལ་འཁོར་བསམ་ཡས་ལྷུན་གྱིས་གྲུབ། །ཞེས་པའི་བར་སྐུ་མདོག་སྟོན་པའི་རྐང་པ་གཉིས་དོར་བས་གསལ་ལ་གདབ། རིགས་ལྔའི་ཕྱག་རྒྱ་གནས་ལྔར་གཏུགས་ལ། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཨཱ་དཪྴ༴ ས་མ་ཏཱ༴ པྲ་ཏྱ་བེ་ཀྵ་ཎ༴ ཀྲྀ་ཏྱཱ་ནུཥྛ་ན༴ ཞེས་པས་དབང་བསྐུར། རྡོ་རྗེའི་ཕྱག་རྒྱ་གནས་གསུམ་དུ་གཏུགས་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཝཱ་ཀ༴ ཙིཏྟ༴ ཞེས་རྒྱས་གདབ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་ཀྱི་འཁོར་ལོ་སྤྱན་དྲངས་པར་བསམ་ལ། ཨོཾ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོག་དཀྱིལ་འཁོར་གཤེགས་སུ་གསོལ། །ཨོཾ་ཨེ་ཧྱེ་ཧི་ཨཱ་ན་ཡ་ཛཿཧཱུྃ་བྃ་ཧོཿ ཞེས་པས་དམ་ཚིག་པ་དང་གཉིས་སུ་མེད་པར་གྱུར་པར་བསམ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ཨོཾ་ཛིན་ཛིཀ྄ ཅེས་ལན་གསུམ་གྱིས་བཀང་བའི་དགང་བླུགས་ཁ་སྦྱར་བ། ལུང་ལས་བཤད་པའི་ཞི་བ་ཞེ་གཉིས་ཀྱི་སྤྱི་སྔགས། ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཞེས་པའི་མཐར་སྤེལ་ཚིག་སྔར་ལྟར་བཏགས་པས་ལན་གསུམ་ཕུལ། དེ་ནས་ཡམ་ཤིང་མར་ཁུ་སོགས་སྲེག་རྫས་གཞན་རྣམས་ལྷ་རང་རང་གི་སྔགས་ཀྱིས་སོ་སོར་གཙོ་འཁོར་གྱི་འགྲོས་སྦྱར་ཏེ་འབུལ་བའམ་མི་ནུས་ན། བོ་དྷི་ཙིཏྟ་སྤྱིར་བརྒྱའམ་ཉེར་གཅིག་ཙམ་བཅུ་ཚན་རེ་རེའི་མཐར་སྤེལ་ཚིག་སྔར་ལྟར་སྦྱར་ནས་འབུལ་ལོ། །ཞེས་གསུངས་པས། བསྙེན་པའི་ཁ་སྐོང་གི་དབང་དུ་བྱས་ན། རྣལ་འབྱོར་པ་བདག་གི་ལྷ་ཉེ་བར་མ་བསྒོམ་པ། སྙིང་པོ་དག་པར་མ་བགྲངས་པ། ཛཔ྄་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ་ལ་སོགས་པའི་དམ་ཚིག་ཉམས་ཆག་ཞིག་རལ་དུ་གྱུར་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་སྦྱར་རོ། །དེ་རྗེས། ཨོཾ་ཛི་ན་ཛིཀ྄་ས་པ་རི་ཝཱ་ར་མ་ཧཱ་བ་ལིདྟ་ཁཱ་ཧིས་ལས་གཏོར་དང་། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་སྨན་རཀ་ཕུལ་ནས། ཨོཾ ཕྱོགས་བཅུ་དུས་བཞི་རྫོགས་པ་ཡི། །ཞེས་སོགས་ཀྱིས་བསྟོད་ལ་ཐབ་ཁུང་དུ་ཡུངས་ཀར་འཐོར་ཞིང་། ཨོཾ ཡེ་ཤེས་ཀློང་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་འབར་བའི་སྦྱིན་སྲེག་འབུལ། །བདག་གིས་ཞི་བའི་ཕྲིན་ལས་མཐར་ཕྱིན་ནས། །སྐུ་གསུང་ཐུགས་ཀྱི་དངོས་གྲུབ་ཐོབ་པར་མཛོད། །ཅེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་དཀར་པོ་འཕྲོས། བསྒྲུབ་བྱ་ལ་རེག་པས་ནད་གདོན་སྡིག་སྒྲིབ་ཐམས་ཅད་ཞི་བར་བསམ་མོ། །དེ་ནས་གཏང་རག་གི་མཆོད་བསྟོད་དང་བཟོད་གསོལ་བྱས་ལ། མེ་ལྷའི་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་གཞལ་ཡས་ཁང་གདན་དང་བཅས་པ་རང་ལ་ཐིམ་པར་བསམ་མོ། །སླར་ཡང་། ཨོཾ་ཨགྷེ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་བླུགས་གཟར་བདུན་གྱི་མར་ཁུས་མེ་གསོས་ཏེ་འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། ཨོཾ་ཨགྣེ་དེ་བ་རྀ་ཥི་ཧ་བྱ་སོགས་ཀྱིས་བསྲེག་རྫས་ལྷག་རྣམས་ཕུལ། ཀུན་བཟང་སོགས་ཀྱིས་མཆོད། ཨོཾ་ཨགྣེ་དེ་བ་རྀ་ཥི་མ་ཧཱ་བ་ལིངྟ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་ལས་གཏོར་དང་སྨན་རཀ་ཕུལ། མེ་སྟེ་བསྲེག་བྱས་བསྟོད། ཡིག་བརྒྱས་ནོངས་པ་བཤགས། བཛྲ་མུཿས། མེ་ལྷ་ཡེ་ཤེས་པ་རང་གནས་སུ་གཤེགས། །དམ་ཚིག་པ་འབར་བའི་རྣམ་པར་གྱུར་པར་བསམ་ལ་ལས་ཀྱི་རྗེས་བསྡུ་ཞིང་བསྔོ་སྨོན་ཤིན་བརྗོད་ཀྱིས་མཐའ་བརྒྱན་པར་བྱའོ། །ཞེས་པ་འདི་ཡང་རང་དང་སྐལ་མཉམ་འགའ་ལ་ཉེར་མཁོའི་ཆེད་དུ་པདྨ་བཛྲ་གྱིས་བྲིས་པ་དགེའོ།།

སྒྱུ་འཕྲུལ་དྲྭ་བ་ཁྲོ་བོའི་སྒྲུབ་ཐབས་བདེ་ཆེན་ཆར་འབེབས་ཀྱི་སྙིང་པོའི་དོན་བསྡུས།

༄༅། །སྒྱུ་འཕྲུལ་དྲྭ་བ་ཁྲོ་བོའི་སྒྲུབ་ཐབས་བདེ་ཆེན་ཆར་འབེབས་ཀྱི་སྙིང་པོའི་དོན་བསྡུས་བཞུགས་སོ། །བླ་མ་དང་གཉིས་སུ་མེད་པ་དཔལ་ཧེ་རུ་ཀ་ལ་ཕྱག་འཚལ་ལོ། །སྲིད་ཞིར་མི་གནས་ཤེས་རབ་ཆེན་པོའི་གདངས། །གདུལ་དཀའི་འགྲོ་ལ་ཐུགས་རྗེ་རབ་ཁྲོས་པ། །འཇིགས་རུང་ཉམས་བརྒྱའི་གར་གྱིས་སྲིད་པ་གསུམ། །འཇིགས་བྱེད་བླ་མ་ཧེ་རུ་ཀ་དེས་སྐྱོངས། །མཁའ་སྤྱོད་མེ་རི་འབར་བའི་ཕོ་བྲང་དུ། །ཁྲག་འཐུང་མངོན་རྫོགས་རྒྱལ་པོའི་ཞལ་བལྟ་ཕྱིར། །སྔོན་བྱོན་རིག་འཛིན་བྱེ་བའི་གཤེགས་ཤུལ་ལ། །འཇུག་འདོད་སྐལ་བཟང་རྣམས་ཀྱི་དོན་ཆེད་དུ། །མཁའ་འགྲོ་མི་བཟད་འབར་བའི་སྤྲིན་འཕྲོ་བའི། །ཚོགས་ཀྱི་དཀྱིལ་འཁོར་ཆེན་པོའི་ཏིང་འཛིན་གྱི། །གསང་ལམ་རྡོ་རྗེའི་ཐེམ་སྐས་འདི་སྦྱིན་གྱིས། །གཡེལ་མེད་བརྩོན་པས་འདི་ལ་འབད་པར་འོས། །དེ་ལ་འདིར་སྒྱུ་འཕྲུལ་དྲྭ་བ་ཁྲོ་བོ་ཧེ་རུ་ཀའི་དཀྱིལ་འཁོར་བསྡུས་པའི་སྒྲུབ་ཐབས་སྙིང་པོར་དྲིལ་ཏེ་བསྙེན་པའི་ལས་བྱང་ཉུང་གསལ་གཏེར་ཆེན་ཆོས་ཀྱི་རྒྱལ་པོའི་གསུང་ལས་ཉེ་བར་བསྡུས་ཏེ་བཀོད་པ་ལ། སྒྲུབ་པ་པོ་འདི་ཉིད་དཀྱིལ་འཁོར་དུ་ཞུགས་ཤིང་ཕྱི་ནང་གསང་བའི་དབང་ཐོབ་པ། རྩ་བ་དང་ཡན་ལག་གི་དམ་ཚིག་ལ་ཡང་དག་པར་གནས་པ། སྒྲུབ་འབྲས་གནས་སྐབས་སུ་རིག་འཛིན་བཞི་དང་། མཐར་ཐུག་མི་སློབ་པའི་ཟུང་འཇུག་ཧེ་རུ་ཀའི་གོ་འཕང་དོན་དུ་གཉེར་བ་རྣམས་ཀྱིས་སྒྲུབ་པའི་ཐབས་འདི་ལ། སྔོན་འགྲོ་དང་། དངོས་གཞི། རྗེས་དང་གསུམ་མོ། དང་པོ་ལ་བདུན་གྱི། དང་པོ་བྱ་བའི་སྔོན་འགྲོ་ནི། དུར་ཁྲོད་དང་རི་བོ་དབེན་པ་ལ་སོགས་པ་བསམ་གཏན་དང་རྗེས་སུ་མཐུན་པའི་གནས་ཁང་མཛེས་པར་བརྒྱན། རྟེན་དང་ཕྱི་ནང་གི་མཆོད་གཏོར་ལ་སོགས་མཁོ་བའི་ཡོ་བྱད་རྣམས་ཚོགས་པར་བཤམས་ནས། བདེ་བའི་སྟན་ལ་འདུག་གོ། གཉིས་པ་རྒྱུད་སྦྱང་བ་ནི། རང་གི་སྙིང་གའི་ཧཱུྃ་གི་འོད་ཟེར་གྱིས་རང་བཞིན་གྱི་གནས་ནས་བླ་མ་དང་གཉིས་སུ་མེད་པའི་དཔལ་ཧེ་རུ་ཀ་ལ་ཕྱོགས་བཅུ་དུས་བཞིའི་སྐྱབས་ཡུལ་མ་ཚང་བ་མེད་པས་བསྐོར་བ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་སད་པར་བྱས་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །ཞེས་ལན་གསུམ་ལ་སོགས་པས་རྒྱུད་དག་པར་བྱས་ལ། ཚོགས་ཞིང་རྣམས་རང་ལ་བསྡུས་ཏེ་གནས་ལུགས་སྤྲོས་བྲལ་སྟོང་པ་ཉིད་ཀྱི་ངང་ལ་མཉམ་པར་བཞག་པར་བྱའོ། གསུམ་པ་མཚམས་བཅད་པ་ལ། མཚན་མེད་དང་། མཚན་བཅས་གཉིས་ལས། དང་པོ་ནི། ཧཱུྃ་ཞེས་བརྗོད་པས། འདི་ལྟར་གཟུང་བ་དང་འཛིན་པས་བསྡུས་པ་མཚན་མའི་དམིགས་ཡུལ་ཐམས་ཅད་སྟོང་ཞིང་བདག་མེད་པ་ནམ་མཁའ་ལྟ་བུར་བསྒོམས་པས་ཐ་མལ་གྱི་བདེན་འཛིན་བསལ་ལོ། གཉིས་པ་ནི། འདིར་ཁྲོ་བོ་འཆོལ་བའི་མཚམས་གཅོད་གླེང་གཞི་ལྟར་འབྱོར་བར་སྣང་གསུངས་པ་བཞིན་འཇུག་བདེ་བས། སྟོང་པའི་ངང་ལས་བཛྲ་མ་ཧཱ་ཤྲཱི་ཧེ་རུ་ཀ་ཞེས་བརྗོད་པས་བདག་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་རྡོ་རྗེ་དང་དུང་ཁྲག་འཛིན་པ་ཡུམ་ཀྲོ་དྷཱི་ཤྭ་རི་མ་དང་མཉམ་པར་སྦྱོར་བའི་སྐུར་གྱུར། ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜ་ལ། ཧ་ལ་ཧ་ལ། ཞེས་བརྗོད་པས་ཐུགས་ཀའི་ཧཱུྃ་ལས་ཁྲོ་བོའི་སྤྲིན་སྤྲོས་པས་གདུག་པ་ཅན་ཐམས་ཅད་ཚར་བཅད། ཚུར་འདུས་པ་ལས་སྟེང་འོག་ཕྱོགས་མཚམས་བཅུར་ཉི་མ་ལ་གནས་པའི་ཕྱོགས་སྐྱོང་བཅུའི་སྙིང་གར། ཨོཾ་བཛྲ་ཀྲོ་དྷ་ཀཱི་ལ་ཡ་ཕཊ་ཛཿ ཞེས་ཕུར་བུའི་ཚུལ་དུ་བཏབ་པ་རྣམས་ཁྲོ་བོ་བཅུར་གྱུར་པ་ནི། ཨོཾ་ཧཱུྃ་ཀཱ་ར་བཛྲ་མ་ཧཱ་ཀྲོ་དྷ་ཧཱུྃ་ཧཱུྃ་ཕཊ། དེ་བཞིན་དུ། ཧཱུྃ་ཀཱ་རའི་ཚབ་ཏུ། བི་ཛ་ཡ། ནཱི་ལ་དཎྜ། ཡ་མཱནྟ་ཀ །ཨཱརྱ་ཨ་ཙ་ལ། ཧྱ་གྲཱི་ཝ། ཨ་པ་རཱ་ཛི་ཏ། ཨ་མྲྀ་ཏ་ཀུནྜ་ལཱ། ཏྲཻ་ལོཀྱ་བི་ཛ་ཡ། མ་ཧཱ་བ་ལ་རྣམས་བཅུག་སྟེ། ཞེས་བརྗོད་པའི་རྐྱེན་གྱིས་རིམ་པ་བཞིན། སྟེང་དུ་ཧཱུཾ་མཛད། ཤར་དུ་རྣམ་རྒྱལ། མེར་དབྱུག་སྔོན་ཅན། ལྷོར་གཤིན་རྗེ་གཤེད། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། རླུང་དུ་འདོད་པའི་རྒྱལ་པོ། བྱང་དུ་བདུད་རྩི་འཁྱིལ་བ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་རྣམས་སྐུ་སྟོད་ཁྲོ་བོ་ལ་སྨད་ཕུར་བུ་འབར་བས་བགེགས་ལ་གཟིར་བ། དེ་རྣམས་ལས་སྤྲུལ་པ་ཡང་སྤྲུལ་མཚོན་ཆ་སྣ་ཚོགས་དང་བཅས་པའི་འོད་ཟེར་རྣོན་པོ་འཁྲུག་ཅིང་འབར་བ་སྲུང་བའི་འཁོར་ལོས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་མོ། །བཞི་པ་བཤགས་པ་ནི། བཛྲ་ས་མཱ་ཛཿ བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མངོན་སུམ་དུ་སད་པའི་སྤྱན་སྔར། སེམས་ཅན་ཐམས་ཅད་ཀྱི་དོན་དུ་མཆོག་གི་བྱང་ཆུབ་ཚེ་འདི་ཉིད་ཀྱིས་མངོན་དུ་བྱ་སྙམ་པའི་དྲན་པས། ཚེ་རབས་ཐོག་མེད་ནས་བསགས་པའི་མི་དགེ་བའི་ལས་རྣམས་ལ་གནོང་ཞིང་འགྱོད། ཕྱིན་ཆད་སྲོག་ལ་བབས་ཀྱང་མི་བགྱིད། སྔར་བྱས་ཀྱི་གཉེན་པོ་རྣལ་འབྱོར་གྱི་རིམ་པ་ལ་འཇུག་པར་བགྱིའོ་སྙམ་པའི་སེམས་བརྟན་པོས། ཧཱུྃ། ཡེ་ཤེས་སྐུ་མཆོག་གམ། བསྡུ་ན། ཡེ་ནས་མཉམ་ཉིད་ཆོས་སྐུར་དག་པ་ལས། །མ་རིག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་ལྡོག་དོན་ཕྱིར་རྒྱལ་བའི་དམ་ནོས་ཏེ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་པས། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ། །ཞེས་བརྗོད་པས་སྡིག་སྒྲིབ་དག་པར་བསམ། ལྔ་པ་དམ་བཅའ་བ་ནི། རྡོ་རྗེ་རྩེ་གཅིག་པའི་ཕྱག་རྒྱ་དང་ལྷག་བསམ་བརྟན་པོས། སྤྲོ་ན། རྣལ་འབྱོར་དབང་པོ་དང་། བསྡུ་ན། ཀུན་ཏུ་བཟང་པོ་བླ་ན་མེད་པ་ཡི། །བྱང་ཆུབ་མཆོག་ཏུ་བདག་གིས་སེམས་བསྐྱེད་དེ། །ཀུན་རྫོབ་དང་ནི་དོན་དམ་བྱང་ཆུབ་སེམས། །དེང་ནས་ཚུལ་བཞིན་ཡོངས་སུ་བཟུང་བར་བགྱི། །ཞེས་བརྗོད། དྲུག་པ་བྱིན་དབབ་པ་ནི། ཡེ་ཤེས་ཀྱི་འཁོར་ལོ་ཐམས་ཅད་མཁའ་ཁྱབ་ཏུ་སད་པར་བྱས་ལ། ཨོཾ་ཧཱུྃ་ཨ་ལ་ལ་ཧོཿ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་རློབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་པའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །རོལ་མོ་སྣ་ཚོགས་ཀྱི་སྒྲ་སྦིར་ཞིང་། ཧཱུྃ་ཧཱུྃ་ཧཱུྃ་ཧཱུྃ་གིས་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་བདག་གནས་ཡོ་བྱད་རྣམས་ལ་ཐིམ་སྟེ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་བསམ། བདུན་པ་མཆོད་རྫས་བྱིན་གྱིས་བརླབ་པ་ནི། ཕྱི་མཆོད་རྣམས། ཨོཾ་མ་ཧཱ་ཀྲོ་དྷཱི་ཤྭ་རཱི་སརྦ་དྲ་བྱཾ་བི་ཤྭ་དྷ་ནི་ཧཱུྃ་ཕཊ་ཀྱིས་བསང་། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་གིས་སྦྱང་། སྟོང་པའི་ངང་ལས་རང་ཉིད་ཧེ་རུ་ཀར་གསལ་བའི་ཐུགས་ཀའི་ཧཱུྃ་ལས། ཨ། དྷཱུ། པུ། ཨཱ། གན་རྣམས་འཕྲོས། སྥ་ར་ཎ་ཕཊ། ནམ་མཁའི་ཁམས་ཐམས་ཅད་ཁྱབ། སཾ་ཧ་ར་ཎ་ཧཱུྃ། འཁོར་འདས་ཀྱི་རྩི་བཅུད་ཐམས་ཅད་བསྡུས་ནས་མཆོད་རྫས་རྣམས་ལ་ཐིམ་པར་གྱུར། ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ཨོཾ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། བདེ་མཆོག་སྒྱུ་འཕྲུལ་དྲྭ་བ་ཆེན་པོའི་རོལ་པ་ལས། རྡོ་རྗེ་ཞབས་བསིལ་མ་ལ་སོགས་པ་མཆོད་པའི་ལྷ་མོ་ཁྲུས་གཞོང་དང་སྤོས་ཁང་མནྡྷ་རའི་མེ་ཏོག་ལ་སོགས་པ་ཐོགས་པས་ནམ་མཁའ་གང་བ་རྣམས་སུ་གྱུར་པར་བསམ་ལ་བྱིན་གྱིས་བརླབ། དེ་ནས་བདུད་རྩི་བསང་། རཾ་ཡཾ་ཁཾ། སྟོང་པའི་ངང་ལས་བདུད་རྩིའི་སྣོད་དུ་དམ་རྫས་ཤ་ལྔ་བདུད་རྩི་ལྔ་རིགས་ལྔ་ཡབ་ཡུམ་གྱི་ས་བོན་གྱིས་མཚན་པ་རྣམས་འོད་དུ་ཞུ་ནས་ཡོངས་སུ་གྱུར་པ་ལས་རིགས་ལྔ་ཡབ་ཡུམ་གྱི་སྐུར་གྱུར་ཏེ་དེ་རྣམས་རྗེས་ཆགས་ཀྱི་སྦྱོར་བས་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོར་འཁྱིལ་བ་ལ། ཨོཾ་གྱིས་མཚན་པའི་ཁ་གཅོད་རྡོ་རྗེ་རྒྱ་གྲམ་གྱི་ལྟེ་བ་དང་རྭ་རྣམས་སུ་རྟ་མགྲིན་ཡུམ་བཞི་དང་བཅས་པ་གསལ་བར་གྱུར། ཨོཾ་གྱི་འོད་ཟེར་གྱིས་འཁོར་འདས་ཀྱི་བདུད་རྩི་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་གྱུར་པ་ལས་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་མོ། །གཡོན་པའི་མཐེབ་སྲིན་གྱི་རྡོ་རྗེས་བདུད་རྩིར་རེག་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཞེས་བཟླས་ཤིང་གཡོན་སྐོར་དུ་དཀྲུགས་ཏེ། ཧཱུྃ་ཧཱུྃ་ཧཱུྃ་ཧཱུྃ་ཞེས་བརྗོད་པས། ཡུམ་བཞི་བདུད་རྩི་ལ་ཐིམ་པར་བསམ་མོ། །གཏོར་མ་བསང་སྦྱངས། སྟོང་པའི་ངང་ལས་གཏོར་གཞོང་པདྨའི་སྣོད་ཡངས་ཤིང་རྒྱ་ཆེ་བའི་ནང་དུ། གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ལ་ཨོཾ་གྱིས་མཚན་པར་གྱུར། ཨོཾ་བ་ལིངྟ་ཏེ་ཛྭ་བ་ལིངྟ་བ་ལ་བ་དྱ་གུ་ཧྱ་ས་མ་ཡེ་སྭཱ་ཧཱ། ལན་བདུན་བརྗོད་པས། གཟུགས་རྡོ་རྗེ་མ་སོགས་ལྷ་མོ་ནམ་མཁའ་གང་བས་འདོད་ཡོན་དཔག་ཏུ་མེད་པར་སྤྲོ་བའི་བདག་ཉིད་དུ་གྱུར། རཀྟ་བསང་སྦྱངས། སྟོང་པའི་ངང་ལས་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་རཀྟ་ལ་ར་ཡིག་དམར་པོས་མཚན་པར་གྱུར། ཨོཾ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱཿ ཆགས་མེད་རཀྟའི་རྒྱ་མཚོ་རྦ་རླབས་འཁྲུགས་པས་ནམ་མཁའ་གང་བར་བསམ་མོ། ཤིན་ཏུ་བསྡུ་ན་སྔགས་རྣམས་ལན་གསུམ་གསུམ་བརྗོད་པས་ཀྱང་འགྲུབ་བོ། །གཉིས་པ་དངོས་གཞི་ལ། ཁྱར་པར་གྱི་སྦྱོར་བ་དགོས་ཆེད་ཀྱི་སྒོ་ནས་སེམས་བསྐྱེད་པ་དང་། ཏིང་ངེ་འཛིན་གྱི་རིམ་པ་དངོས་གཉིས། དང་པོ་ནི། དེ་བཞིན་གཤེགས་པ་ཐམས་ཅད་གདུག་པ་ཅན་གྱི་ཡུལ་ལ་ཐུགས་རྗེ་ཆེན་པོས་ཆེར་ཁྲོས་ནས་འདུལ་བར་མཛད་པ་བཞིན་དུ། ཤིན་ཏུ་གདུག་ཅིང་གཏུམ་པའི་འགྲོ་བ་རྣམས་ལ་རྗེས་སུ་ཆགས་པའི་སྙིང་རྗེ་ཆེན་པོ་རྡོ་རྗེ་ཁྲོ་བོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དཀྱིལ་འཁོར་དུ་ལྡང་བར་བགྱིའོ་སྙམ་པས། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་དང་། །ང་རྒྱལ་ཆེན་པོ་བརྟན་པའི་ཕྱིར། །སྒྱུ་འཕྲུལ་དྲྭ་བའི་ཏིང་འཛིན་བསྒོམ། །ཞེས་པས་དམ་བཅའ་ཞིང་སེམས་བསྐྱེད་དོ། །གཉིས་པ་ཏིང་ངེ་འཛིན་གྱི་རིམ་པ་དངོས་ལ། ཏིང་ངེ་འཛིན་གསུམ་གྱིས་ཁོག་དབུབ་པ། རྟེན་དང་བརྟེན་པའི་དཀྱིལ་འཁོར་བསྐྱེད་པ། ལས་ཀྱི་ཏིང་ངེ་འཛིན་དང་གསུམ། དང་པོ་ལའང་གསུམ་ལས། དེ་བཞིན་ཉིད་ནི། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །འདི་ལྟར་སྣང་བའི་ཆོས་ཐམས་ཅད་དམིགས་མེད་སྤྲོས་པ་དང་བྲལ་བའི་སྟོང་པ་ཉིད་དུ་བསྒོམ་པའོ། ཀུན་སྣང་ནི། ཨེ་མའོ་ཀུན་ཏུ་བཟང་པོ་ནི། །བདེ་ཆེན་སྤྲོས་བྲལ་ཐིག་ལེ་ལས། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་པར་བྱ། །དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེས་མཁའ་ཁྱབ་ཀུན་ཏུ་སྣང་བར་བསྒོམ་པའོ། རྒྱུའི་ཏིང་ངེ་འཛིན་ནི། ངེས་པ་ལས་ནི་རྡོ་རྗེ་ཆེ། །དེ་ལས་དཔལ་ཆེན་ཧེ་རུ་ཀ །འབར་བ་ཆེན་པོའི་གར་དགུ་ཡི། །འཇིགས་པ་ཡི་ནི་དུས་ལྟར་དྲག །ཅེས་པས། རང་རིག་སྣང་སྟོང་གཉིས་སུ་མེད་པའི་རང་བཞིན་ཧཱུྃ་ཡིག་མཐིང་ག་གསལ་ཞིང་འབར་བར་གྱུར། སྥ་ར་ཎ་ཕཊ། དེ་ལས་འོད་ཟེར་ཧཱུྃ་གི་རྣམ་པ་ནམ་མཁའ་གང་བར་འཕྲོས། དོན་གཉིས་བྱས། སཾ་ཧ་ར་ཎ་ཧཱུྃ། མཁའ་ཁྱབ་ཀྱི་ཧཱུྃ་རྣམས་གཞིའི་ཧཱུྃ་ལ་ཐིམ། དེ་འོད་དུ་ཞུ་བ་ལས་བཛྲ་ཧཱུྃ་ཞེས་བརྗོད་པས། རྡོ་རྗེ་སྔོན་པོ་རྩེ་དགུ་པར་གྱུར། སྥ་ར་ཎ་ཕཊ། དེ་ལས་འོད་ཟེར་འཕྲོས། དོན་གཉིས་བྱས། སཾ་ཧ་ར་ཎ་ཧཱུྃ། ཚུར་འདུས་འོད་དུ་ཞུ་བ་ལས། ཨོཾ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ། ཅེས་བརྗོད་པས། རྒྱུའི་ཧེ་རུ་ཀ་སྐུ་མདོག་སྨུག་ནག་ཅིར་ཡང་འགྱུར་བ། རྡོ་རྗེ་དང་དུང་ཁྲག་འཛིན་པ་འབར་བའི་གར་དགུ་དང་ལྡན་པར་བསམ་མོ། །གཉིས་པ་ལ། རྟེན་གཞལ་ཡས་ཁང་བསྒོམ་པ་དང་། བརྟེན་པ་ལྷ་བསྒོམ་པ་གཉིས་ཀྱི། དང་པོ་ལ་གསུམ་ལས། དང་པོ་གཞི་དབང་ཆེན་གྱི་དཀྱིལ་འཁོར་བསྒོམ་པ་ནི། རྒྱུའི་ཧེ་རུ་ཀའི་ཧཱུྃ་ལས། ཨེ་ཡཾ་ར་སུཾ་ཀེཾ་རཾ་རྣམས་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོས་འདུས་འོད་དུ་ཞུ་བ་ལས་རིམ་པ་བཞིན། ཨེ་ལས་ནམ་མཁའ་ཆོས་ཀྱི་འབྱུང་གནས་གྲུ་གསུམ་འབྱམས་ཀླས་པའི་དབྱིངས་སུ། ཡཾ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ་གཡོ་བའི་བ་དན་གྱིས་མཚན་པ། ར་ལས་རཀྟའི་རྒྱ་མཚོ་དམར་པོ་ཟླུམ་པོ་རྦ་རླབས་འཁྲུགས་པ། སུཾ་ལས་ཞིང་ཆེན་གྱི་ས་གཞི་སྨུག་ནག་གྲུ་བཞི་པ། ཀེཾ་ལས་ཀེང་རུས་ཀྱི་རི་རབ་སྔོ་སྐྱ་གྲུ་བཞི་བང་རིམ་བཞི་དང་ལྡན་པ། རཾ་ལས་མེའི་དཀྱིལ་འཁོར་དམར་ནག་ནམ་མཁའི་མཐའ་ཀླས་པར་འབར་བར་བསམ་ལ། དུར་ཁྲོད་ཆེན་པོ་རབ་འཇིགས་པ། །ཁྲག་གི་རྒྱ་མཚོ་འཁྲུག་པའི་དཀྱིལ། །ཀེང་རུས་ཆེན་པོའི་རི་རབ་ཀྱི། །སྟེང་གི་འབར་བའི་ཀློང་དཀྱིལ་ན། །ཞེས་པས་གསལ་གདབ་ཅིང་། དེ་དག་ཀྱང་ཕྱི་ལྟར་ན་འབྱུང་བ་ལྔ། ནང་ལྟར་ན་ཡེ་ཤེས་ལྔའི་རང་བཞིན། གསང་བ་ལྟར་ན་ཡུམ་ལྔའི་མཁའ་རྣམ་པར་དག་པའོ། །གཉིས་པ་རྟེན་གཞལ་ཡས་ཁང་བསྒོམ་པ་དངོས་ནི། རི་རབ་ཀྱི་སྟེང་དུ་རྒྱུའི་ཧཱུྃ་ལས་བྷྲཱུྃ་སྨུག་ནག་ཆད། སྥ་ར་ཎ་ཕཊ། སཾ་ཧ་ར་ཎ་ཧཱུྃ། བྷྲཱུྃ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ། ཡེ་ཤེས་རིན་པོ་ཆེའི་བྷཉྫ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནང་ཉིས་རིམ་འབར་བའི་བར་ཁྱམས་གཉིས་དང་ལྡན་པའི་ཕྱི་མའི་རྩིག་པ་རིམ་པ་ལྔ་དང་ནང་རྩིག་པ་རིམ་པ་གསུམ་པ་སྟེ། གཉིས་ཀའང་ཐོད་པ་སྐམ་རྙིང་རློན་གསུམ་ཁྲག་ཞག་གི་འདམ་གྱིས་བརྩིགས་ཤིང་གནམ་ལྕགས་ཨུརྨོའི་གཟེར་གྱིས་གཏམས་པ་སོགས་དུར་ཁྲོད་རོལ་པའི་གཞལ་ཡས་ཁང་གི་མཚན་ཉིད་ཐམས་ཅད་རྫོགས་པ་དྭངས་ཤིང་སྒྲིབ་པ་མེད་པར་ཀུན་ཏུ་གསལ་བ། གཞི་ཚད་མེད་པའི་ཡེ་ཤེས་ཀྱི་འཁོར་ལོའི་ལྟེ་བ་ལ་རྫོགས་པའི་ཕྱི་རོལ་སྲུང་བའི་ཁོར་ཡུག་གི་ནང་དུ་རུ་དྲ་ལོངས་སྤྱོད་དང་བཅས་པ་དབྱིངས་སུ་བསྒྲལ་བའི་དུར་ཁྲོད་ཆེན་པོ་བརྒྱད་ཀྱི་བཀོད་པ་འཇིགས་སུ་རུང་བས་ཕྱོགས་ཐམས་ཅད་ཡོངས་སུ་གང་བར་བསམ་ལ། ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡོངས་མ་ཆད་པའི། །ཕྱི་དང་ནང་མེད་ཀུན་ཏུ་ནང་། །འཁོར་བའི་འཁོར་ལོའི་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྦྲུལ་སྣ་ཚོགས་ཉི་ཟླས་བརྗིད། །འབར་བའི་འཕྲོ་བ་མང་པོ་འཁྲུག །ཅེས་གསལ་གདབ། གསུམ་པ་གདན་བསྐྱེད་པ་ནི། གཞལ་ཡས་ཁང་གི་དབུས་ཀྱི་ལྟེ་བ་དང་འཁོར་ལོ་རྩིབས་བཞི་ལ། སྣ་ཚོགས་པདྨའི་ལྟེ་བར་ཟླ་བ་དང་ཉི་མའི་དཀྱིལ་འཁོར་བརྩེགས་པ་རེ་རེ། དེ་རྣམས་ཀྱི་སྟེང་དུ། དབུས་སུ་ལྷ་ཆེན་པོ་དབང་ཕྱུག་དང་དྲག་པོ། ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་སྲིན་པོ། བྱང་དུ་གདོན་སྦྱིན་རྣམས་རང་རང་གི་ཆུང་མ་དང་བཅས་པའི་ཕོ་རྣམས་ཁ་སྦུབ་དང་མོ་རྣམས་གན་རྐྱལ་བྱི་ཆིངས་སུ་བསྣོལ་བ། དེ་རྣམས་ཀྱི་སྟེང་དུ། དབུས་སུ་གཏུམ་པ་དོམ། ཤར་དུ་ཁྱུ་མཆོག །ལྷོར་མ་ཧེ། ནུབ་ཏུ་གཟིག །བྱང་དུ་སྟག་རྣམས་ཟུང་རེ་རེས་ཕོ་རྣམས་ཀྱི་སོག་ཕྲག་དང་། མོ་རྣམས་ཀྱི་ནུ་ཕྲག་ནས་ནན་ཏུར་དུ་བརྫིས་པ། འཁོར་ལོའི་གྲྭ་བཞི་དང་། གྲུ་ཆད་བཞི། ཁྱམས་ནང་མའི་ཕྱོགས་མཚམས་བརྒྱད། སྒོ་བཞི་རྣམས་སུ་ཉི་མ་ལ་གནས་པའི་ཞིང་གི་གདན་རེ་རེ། ཁྱམས་ཕྱི་མའི་ཕྱོགས་རེར་དྲུག་དྲུག་དང་། སྒོ་བཞི་རྣམས་སུ་ཞིང་སྐམ་པོའི་གདན་རྐྱང་པ་རེ་རེ། ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱིས་སྤར་བས་ནི། །དབང་ཕྱུག་ལྷ་ཆེན་ལ་སོགས་བཟུང་། །ཞེས་གསལ་གདབ་བོ། །གཉིས་པ་བརྟེན་པ་ལྷ་བསྐྱེད་པ་ལ་གཉིས་ཏེ། ཧེ་རུ་ཀར་བསྐྱེད་ནས་སྙོམས་འཇུག་བྱ་བ་དང་། ངོ་མཚར་སྲས་ཀྱི་དཀྱིལ་འཁོར་སྤྲོ་བའོ། དང་པོ་ནི། ནམ་མཁར་གནས་པའི་རྒྱུའི་ཧེ་རུ་ཀ་དབུས་ཀྱི་གདན་ལ་བཞུགས་པ་ལས། དེ་ཉིད་དཔལ་ཆེན་པོ་སྐུ་མདོག་སྨུག་ནག་ཅིར་ཡང་འགྱུར་བ། དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ཚོགས་འཛིན་པར་གྱུར་ཏེ། དེ་བཞིན་ཉིད་ཀྱི་དབྱིངས་ཉིད་ནས་ཁྲོ་མོ་དབང་ཕྱུག་ཆེན་མོ་མངོན་དུ་ཕྱུངས་ཏེ། ཧི་ཧི་ཞེས་དགྱེས་པའི་མདངས་ཀྱིས་ཡབ་ལ་བཏུད་ཅིང་། པདྨ་རྒྱས་པར་མཛད་ནས་གཉིས་སུ་མེད་པར་འཁྲིལ་བའི་དགྱེས་པས་རོལ་པར་བསམ། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱི་དབྱིངས་ནས་ནི། །ཁྲོ་མོ་དབང་ཕྱུག་མངོན་ཕྱུངས་ཏེ། །ཧི་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་དེ། །གཉིས་མེད་འཁྲིལ་བས་དགྱེས་པར་ཐིམ། །ཞེས་བརྗོད་པས་གསལ་གདབ། གཉིས་པ་ལ། སྔགས་ཀྱི་སྤྲུལ་པ་སྤྲོ་བ། དེ་རིགས་ལྔར་བསྡུ་བ། འཁོར་གྱི་དཀྱིལ་འཁོར་བསྐྱེད་པའོ། །དང་པོ་ནི། ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུྃ། ཞེས་བརྗོད་པས་ཡབ་ཡུམ་གཉིས་ཀྱི་སྦྱོར་མཚམས་ནས་བྱང་ཆུབ་སེམས་ཀྱི་སྤྲིན་ལས་འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཁྱབ་པར། ཁྲོ་བོ་འཆོལ་བ་མཚོན་ཆ་སྣ་ཚོགས་ཀྱི་ཆར་འབེབས་པ་དཔག་ཏུ་མེད་པ་སྤྲོས། ལྟས་ཆེན་པོ་བཅོ་ལྔས་གདུག་པ་ཅན་གྱི་ཚོགས་ཐམས་ཅད་ཚར་བཅད་པར་བསམ་མོ། གཉིས་པ་དངོས་དང་། ཡན་ལག་གི་ལྷ་བསྒོམ་པའོ། དང་པོ་ནི། མཁའ་ཁྱབ་ཀྱི་ཁྲོ་བོའི་སྤྲིན་རྣམས་སླར་འདུས་པ་ལས། རྡོ་རྗེའི་རིགས་ཀྱི་ཁྲོ་བོ་རྣམས་རང་ལ་ཐིམ་པས་འབྲས་བུའི་ཧེ་རུ་ཀར་གྱུར་པ་ནི། ཨོཾ་བཛྲ་ཤྲཱི་ཧེ་རུ་ཀ་ཧཱུྃ། བཛྲ་ཀྲོ་དྷཱི་ཤྭ་རཱི་སྟྭཾ། བདག་ཉིད་བཅོམ་ལྡན་འདས་དགྱེས་པ་ཆེན་པོ་བཛྲ་ཧེ་རུ་ཀ་སྐུ་མདོག་མཐིང་ནག་ཆར་སྤྲིན་ལྟར་གནག་ཅིང་། ཉི་མ་བྱེ་བའི་གཟི་བྱིན་འབར་བ། དབུ་གསུམ་གྱི་གཡས་ཞལ་དཀར་ལ་བཞད་པ། གཡོ་ཞལ་དམར་ལ་གཤེ་བ། དབུས་ཞལ་མཐིང་ནག་དྲག་པོར་ཁྲོས་པའི་ཉམས་ཅན། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། རྣམ་པར་འགྱུར་བའི་ཞལ་གདངས་ཤིང་མཆེ་བ་གཙིགས་པ། གློག་ལྟར་འཁྱུག་པའི་ལྗགས་འདྲིལ་ཞིང་རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་ཧཱུྃ་སྒྲ་འབྱིན་པ། རྫི་སྨིན་སྨ་ར་ལས་འབར་བའི་མེ་འཁྱོག་པོར་སྤྲོ་བ། སྐུ་ཆེ་ཞིང་ཡན་ལག་རགས་པ། ལང་ཚོ་རྒྱས་པའི་འགྱུར་བག་ཅན། རྡོ་རྗེའི་བ་སྤུས་གཏམས་པ། སྒེག་པ་དཔའ་བ་མི་སྡུག་པ། རྒོད་དང་གཤེ་དང་འཇིགས་སུ་རུང་། སྙིང་རྗེ་རྔམས་དང་ཞི་བ་སྟེ། གར་གྱི་ཉམས་དགུས་རབ་ཏུ་རྒྱས་པ། ཕྱག་དྲུག་གི་དང་པོ་གཉིས་ཀྱིས་རྡོ་རྗེ་རྩེ་དགུ་དང་དྲིལ་བུ་འཛིན་པས་ཡུམ་ལ་འཁྱུད་པ། གཉིས་པས་རྡོ་རྗེ་རྩེ་ལྔ་དང་། བྷཉྫ་དམར་གྱིས་གང་བ་ཐོགས་པ། གསུམ་པས་ཞིང་གི་དབྱུག་པ་དང་སྟོང་གི་འཇིག་རྟེན་འདེགས་པ། ཞབས་བཞི་བརྐྱང་ཞིང་། གཡོན་བསྐུམ་པའི་གྱད་ཆེན་པོའི་སྟབས་ཀྱིས་རང་གི་སྟན་ལ་རོལ་པ། དབུ་རེ་རེ་ལ་ཐོད་པ་སྐམ་པོ་ལྔ་ལྔ་རིགས་ལྔའི་ཅོད་པན་ཅན་གྱིས་དབུ་བརྒྱན་པ། ཁྲག་འཛག་པའི་མགོ་བོ་ལྔ་བཅུའི་དོ་ཤལ་དང་། ཐོད་པ་ཚལ་བུའི་དཔུང་རྒྱན་ཅན། ཞིང་ཆེན་གྱི་གཡང་གཞི་དང་། གླང་པོ་ཆེའི་ཀོ་བ་རློན་པས་སྟོད་གཡོགས་ཤིང་། སྟག་གི་ལྤགས་པའི་ཤམ་ཐབས་གྲོལ་བ། ཀླུ་རྒྱལ་རིགས་དཀར་པོས་སྐྲ་ཆིངས། རྗེ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུལ་ཆུ། དམངས་རིགས་ལྗང་གུས་སྐ་རགས་དང་དོ་ཤལ། གདོལ་པ་ནག་པོས་ཕྱག་ཞབས་ཀྱི་གདུ་བུ་སྟེ། ཐམས་ཅད་ཀྱང་གདུག་པ་སྦྲུལ་གྱི་རྣམ་པ་ཅན། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཀྱིས་མཚན་པ་སྟེ་དུར་ཁྲོད་རོལ་པའི་ཆས་བརྒྱད་དང་། དཔལ་གྱི་ཆས་བཅུ་སྐུ་ལ་རྫོགས་ཤིང་། སྙན་གོང་ནས་ཉི་ཟླའི་འོད་ཟེར་སྤྲོ་བ། ཡུམ་ཀྲོ་དྷཱི་ཤྭ་རཱི་མ་སྔོ་སྐྱ་ཞལ་གཅིག་ཕྱག་གཉིས་སྤྱན་གསུམ། གཅེར་བུ་སྐྲ་གྲོལ་ཞིང་ལང་ཚོས་སྒེག་པའི་ཉམས་འགྱུར་ཅན། གཡས་དྲིལ་བུ་འཛིན་པས་ཡབ་ལ་འཁྱུད་ཅིང་། གཡོན་ཐོད་པ་ཁྲག་གིས་གང་བ་གཙོ་བོའི་ཞལ་དུ་སྟོབ་པ། གཟིག་གི་ལྤགས་པའི་ཤམ་ཐབས་སོགས་དུར་ཁྲོད་རོལ་པའི་ཆས་ཅན། ཞབས་གཡོན་བརྐྱང་ཞིང་། གཡས་བསྐུམ་པས་གཙོ་བོ་དང་དགྱེས་པར་འཁྲིལ་བ། སྟོང་པ་ཉིད་དང་སྙིང་རྗེ་ཆེན་པོ་ཟུང་དུ་འཇུག་པའི་བདག་ཉིད་ཅན། བསྐལ་པའི་མེའི་ཕུང་པོ་རབ་ཏུ་འབར་བའི་ཀློང་ན་ཁམས་གསུམ་པའི་དབང་ཕྱུག་ཆེན་པོའི་ངོ་བོར་བཞུགས་པའོ། །དེ་ནས། དེ་བཞིན་གཤེགས་པའི་རིགས་དང་། རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་ཀྱི་ཁྲོ་བོའི་ཚོགས་རྣམས་སོ་སོར་འདུས་པ་ལས་རིགས་བཞིའི་ཧེ་རུ་ཀར་གྱུར་ནས་འཁོར་ལོའི་རྩིབས་བཞིར་རང་རང་གི་གདན་ལ་བཞུགས་པ་ནི། ཨོཾ་བུདྡྷ་ཤྲཱི་ཧེ་རུ་ཀ་ཧཱུྃ། བུདྡྷ་ཀྲོ་དྷཱི་ཤྭ་རཱི་སྟྭཾ། ཤར་གྱི་རྩིབས་ལ། བུདྡྷ་ཧེ་རུ་ཀ་སྐུ་དང་རྩ་ཞལ་སྨུག་ནག །གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་འཁོར་ལོ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག ཐ་མས་ཞིང་དབྱུག་དང་ཏྲི་ཤཱུལ་འཛིན་པ། ཡུམ་བུདྡྷ་ཀྲོ་དྷཱི་ཤྭ་རཱི་མ་སྨུག་ནག་དང་མཉམ་པར་སྦྱོར་བ། ཨོཾ་རཏྣ་ཤྲཱི་ཧེ་རུ་ཀ་ཧཱུྃ། རཏྣ་ཀྲོ་དྷཱི་ཤྭ་རཱི་སྟྭཾ། ལྷོའི་རྩིབས་ལ་རཏྣ་ཧེ་རུ་ཀ་སྐུ་དང་རྩ་ཞལ་སེར་ནག གཡས་སྔོ་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རིན་པོ་ཆེ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག ཐ་མས་ཞིང་དབྱུག་དང་དགྲ་སྟྭ་འཛིན་པ། ཡུམ་རཏྣ་ཀྲོ་དྷཱི་ཤྭ་རཱི་མ་སེར་མོ་དང་མཉམ་པར་སྦྱོར་བ། ཨོཾ་པདྨ་ཤྲཱི་ཧེ་རུ་ཀ་ཧཱུྃ། པདྨ་ཀྲོ་དྷཱི་ཤྭ་རཱི་སྟྭཾ། ནུབ་ཀྱི་རྩིབས་ལ་པདྨ་ཧེ་རུ་ཀ་སྐུ་དང་རྩ་ཞལ་དམར་ནག །གཡས་དཀར་གཡོན་སེར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་པདྨ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག ཐ་མས་ཞིང་དབྱུག་དང་རྔེའུ་ཆུང་འཛིན་པ། ཡུམ་པདྨ་ཀྲོ་དྷཱི་ཤྭ་རཱི་མ་དམར་མོ་དང་མཉམ་པར་སྦྱོར་བ། ཨོཾ་ཀརྨ་ཤྲཱི་ཧེ་རུ་ཀ་ཧཱུྃ། ཀརྨ་ཀྲོ་དྷཱི་ཤྭ་རཱི་སྟྭཾ། བྱང་གི་རྩིབས་ལ་ཀརྨ་ཧེ་རུ་ཀ་སྐུ་དང་རྩ་ཞལ་ལྗང་ནག གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་རྒྱ་གྲམ་དང་དྲིལ་བུ། གཉིས་པས་རྡོ་རྗེ་དང་དུང་ཁྲག ཐ་མས་ཞིང་དབྱུག་དང་ཐོང་གཤོལ་འཛིན་པ། ཡུམ་ཀརྨ་ཀྲོ་དྷཱི་ཤྭ་རཱི་མ་ལྗང་མོ་དང་མཉམ་པར་སྦྱོར་བ། ཁྲག་འཐུང་ཡབ་ཡུམ་ཐམས་ཅད་ཀྱང་གར་དགུའི་རོས་སྒེག་ཅིང་། རྒྱན་དང་ཆ་ལུགས་གཙོ་བོ་དང་མཐུན་པ་རང་རང་གི་གདན་ལ་གཡས་བརྐྱང་པའི་སྟབས་ཀྱིས་བཞུགས་པའོ། གཉིས་པ་ནི། རང་རང་གི་ཐུགས་རིན་པོ་ཆེའི་གུར་ཁྱིམ་ལྟ་བུའི་ནང་དུ་ཉི་མ་ལ་གནས་པའི་རང་འདྲ་བའི་ཡེ་ཤེས་སེམས་དཔའ་རེ་རེ། དེའི་ཐུགས་ཀར་ཏིང་འཛིན་སེམས་དཔའ་རྡོ་རྗེ་རྩེ་དགུ་པའི་ལྟེ་བར་ཧཱུྃ་ཡིག་ཕྲ་མོ་འབར་བ་རེས་མཚན་པར་བསམ་ལ། དེ་ལས་འོད་ཟེར་འཕྲོས་པས་ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་དབང་གི་ལྷ་རིགས་ལྔ་ཡབ་ཡུམ་གྱི་རྣམ་པར་བཛྲ་ས་མཱ་ཛཿས་སྤྱན་དྲངས་པར་བསམ་ཞིང་། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བསྐུལ་བས། དེ་རྣམས་གཉིས་སུ་མེད་པར་སྦྱོར་བ་མཛད། རྗེས་ཆགས་ཀྱི་མེས་ཞུ་བའི་ཡེ་ཤེས་ལྔའི་ཆུ་རྒྱུན་མགོ་བོའི་གནས་ལྔར་བབས་ཏེ་དབང་བསྐུར་བར་བསམ་ཞིང་། རིགས་ལྔའི་དབང་རྒྱ་སྤྱི་བོའི་གནས་ལྔར་འཇོག་ཅིང་དབང་སྔགས་རྣམས་བརྗོད་པ་སྟེ་རྡོ་རྗེ་ཕྱིར་བསྡམས་ལས་གུང་མོ་གཉིས་བརྐྱང་བ་སྤྱི་བོར་བཞག་ལ། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན༴ ཕྱག་རྒྱ་དེ་ལས་མཛུབ་མོ་གཉིས་བརྐྱང་བ་དཔྲལ་བར་བཞག་ལ། ཨོཾ་མ་ཧཱ་ཨཱ་དཪྴ༴ སྲིན་ལག་བརྐྱང་བ་རྣ་ལྟག་གཡས་པར། ཨོཾ་མ་ཧཱ་ས་མ་ཏཱ༴ མཐེ་བོང་བརྐྱང་བ་ལྟག་པར། ཨོཾ་མ་ཧཱ་པྲ་ཏྱ་བེཀྵ་ན༴ མཐེའུ་ཆུང་བརྐྱང་བ་རྣ་ལྟག་གཡོན་པར། ཨོཾ་མ་ཧཱ་ཀྲྀཾ་ཏྱཱ་ནུཥྵཱ་ན༴ ཞེས་རིམ་པར་དབང་བསྐུར་བས། ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་བསྒྱུར། ཆུའི་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་དེ་བཞིན་གཤེགས་པ་རིགས་ལྔས་དབུ་བརྒྱན་པར་བསམ་མོ། །སྤྱི་བོར་ཟླ་བ་ལ་གནས་པའི་ཨོཾ་དཀར་པོ། མགྲིན་པར་པདྨ་ལ་གནས་པའི་ཨཱཿདམར་པོ། སྙིང་གར་ཉི་མ་ལ་གནས་པའི་ཧཱུྃ་སྔོན་པོ། དེ་རྣམས་ཀྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། སྐུ་གསུང་ཐུགས་རྡོ་རྗེའི་ལྷ་ཚོགས་ནམ་མཁའ་གང་བར་བྱོན། ཡི་གེ་གསུམ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དང་གཉིས་སུ་མེད་པར་གྱུར། ཡི་གེ་གསུམ་ཡོངས་སུ་གྱུར་པ་ལས་རྣམ་སྣང་དཀར་པོ་འཁོར་ལོ་འཛིན་པ། སྣང་མཐའ་དམར་པོ་པདྨ་འཛིན་པ། མི་བསྐྱོད་པ་སྔོན་པོ་རྡོ་རྗེ་འཛིན་པ་རྣམས་ཀྱིས་རྒྱས་བཏབ་པར་བསམ་ཞིང་། རྡོ་རྗེའི་ཕྱག་རྒྱ་སྤྱི་བོར་གཏུགས་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ༴ རྡོ་རྗེའི་ཕྱག་རྒྱ་མགྲིན་པར། ཨོཾ་སརྦ་ཏ་ཐཱ་ག་ཏ་མ་ཧཱ་ཝཱ་ཀ༴ རྡོ་རྗེའི་ཕྱག་རྒྱ་སྙིང་གར། ཨོཾ་སརྦ་ཏ་ཐཱ་ག་ཏ་མ་ཧཱ་ཙིཏྟ༴ ཞེས་བརྗོད་ཅིང་སྐུ་གསུང་ཐུགས་རྡོ་རྗེ་གསུམ་དུ་ང་རྒྱལ་བྱའོ། །གསུམ་པ་ལ་སྲས་ཀྱི་དཀྱིལ་འཁོར་སྤྲོ་བ་དང་། དབང་ཕྱུག་མ་བསྐྱེད་པ་གཉིས་ལས། དང་པོ་ནི། ཡབ་ཀྱི་གསང་གནས་ཧཱུྃ་ལས་ཡེ་ཤེས་ཀྱི་རྡོ་རྗེ་རྩེ་མོ་ལྔ་པའི་ལྟེ་བར་བྱང་ཆུབ་ཀྱི་སེམས་ཨོཾ་དཀར་པོར་གནས་པའི་བུ་གར་ཕཊ་ཀྱིས་བཀག་པ། ཡུམ་གྱི་མཁའ་པཾ་ལས་པདྨ་འདབ་མ་བརྒྱད་པའི་ལྟེ་བར་ཉི་མ་ལ་རཀྟ་ཨཾ་དམར་པོ་གནས་པའི་གེ་སར་ཨས་མཚན་པར་མོས་ལ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾ། ཨ་ནུ་རཱ་ག་ཡ་མི། སྦྱོར་བའི་བརྡས་ཕན་ཚུན་བསྣོལ་མར་བསྐུལ་ཏེ། ཛཿཧཱུྃ་བྃ་ཧོཿ ཞེས་ཕྱག་རྒྱ་བཞིས་འཁྱུད་སྡོམ་སྤྲད་ནས། ཧཱུྃ་ཧཱུྃ་ཧཱུྃ་ཞེས་རིགས་ལྔའི་ཁྲག་འཐུང་ཡབ་ཡུམ་རྣམས་རྗེས་སུ་ཆགས་པའི་སྦྱོར་བས་སྙོམས་པར་ཞུགས་ཏེ། དགྱེས་པའི་བཞད་སྒྲ་ཧ་ཞེས་བརྗོད་པས་སྦྱོར་མཚམས་ནས་བྱང་ཆུབ་ཀྱི་སེམས་སྤྲིན་ཁྲོ་མོ་བརྒྱད་ཀྱི་རྣམ་པར་ཐོན་ནས་རིགས་བསྡུས་ཏེ། འཁོར་ལོའི་གྲྭ་དང་གྲུ་ཆད་བཞིར་རང་རང་གི་གདན་ལ་བཞུགས་པ་ནི། ཨོཾ་བཛྲ་གཽ་རཱི་ཧ། རྩིབས་མཆན་གྱི་ཤར་ལྷོར་ཀཽ་རཱི་མ་སྔོན་མོ་གཡས་ཞིང་དབྱུག་དང་གཡོན་བྷན་དམར་འཛིན་པ། ཨོཾ་བཛྲ་ཙཽ་རཱི་ཧ། ལྷོ་ནུབ་ཏུ་ཙཽ་རཱི་མ་སེར་མོ་མདའ་གཞུ་འགེངས་པ། ཨོཾ་བཛྲ་པྲ་མོ་ཧཱི་ཧ། ནུབ་བྱང་དུ་པྲ་མོ་ཧ་དམར་མོ་ཆུ་སྲིན་གྱི་རྒྱལ་མཚན་འཕྱར་བ། ཨོཾ་བཛྲ་བེ་ཏ་ལཱི་ཧ། བྱང་ཤར་དུ་བཻ་ཏ་ལཱི་ནག་མོ་གཡས་རྡོ་རྗེ་འཕྱར་ཞིང་གཡོན་བྱིས་པའི་བམ་ཟ་བ། ཨོཾ་བཛྲ་པུཀྐ་སཱི་ཧ། གྲུ་ཆད་ཀྱི་ཤར་ལྷོར་པུཀྐ་སཱི་དམར་སེར་ཞིང་ཆུང་གི་རྒྱུ་མ་འདྲེན་པ། ཨོཾ་བཛྲ་གྷསྨ་རཱི་ཧ། ལྷོ་ནུབ་ཏུ་གྷསྨ་རི་ལྗང་གུ་གཡས་པའི་རྡོ་རྗེས་གཡོན་གྱི་དུང་དམར་དཀྲུག་ཅིང་གསོལ་བ། ཨོཾ་བཛྲ་སྨ་ཤ་ནཱི་ཧ། ནུབ་བྱང་དུ་སྨ་ཤ་ནཱི་མཐིང་ནག་བྱིས་པའི་རོ་བཟུང་ནས་སྙིང་ཟ་བ། ཨོཾ་བཛྲ་ཙཎྜ་ལཱི་ཧ། བྱང་ཤར་དུ་ཙཎྜ་ལཱྀ་སེར་སྐྱ་མགོ་ལུས་འདྲལ་བ། ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་གཙིགས་པ། སྐྲ་སེར་པོ་གྱེན་དུ་བརྫེས་པ་གཅེར་བུ་དུར་ཁྲོད་རོལ་པའི་ཆས་ཅན། གཡོན་བརྐྱང་པའི་སྟབས་ཀྱིས་གནས་པའོ། །དེ་ནས་སྔར་བཞིན་དགྱེས་པའི་བཞད་སྒྲ་ཧེ་ཞེས་བརྗོད་པས། བྱང་ཆུབ་ཀྱི་སེམས་ཀྱི་སྤྲིན་ཕྲ་མེན་བརྒྱད་ཀྱི་རྣམ་པར་ཐོན་ནས་རིགས་བསྡུས་ཏེ། གསེར་ཁྱམས་ཀྱི་ཕྱོགས་མཚམས་བརྒྱད་དུ་རང་རང་གི་གདན་ལ་བཞུགས་པ་ནི། ཨོཾ་བཛྲ་སིདྷ་མུ་ཁཱི་ཧེ། ཤར་དུ་སེང་གདོང་མ་སེར་མོ་ཕྱག་གཉིས་ཐུགས་ཀར་གྱེན་དུ་བསྣོལ་བས་ཏི་ར་བཟུང་ནས་ཟ་བ། ཨོཾ་བཛྲ་བྱཱ་གྲྀ་མུ་ཁཱི་ཧེ། ལྷོར་སྟག་གདོང་མ་དམར་མོ་ཕྱག་གཉིས་མཐུར་དུ་བསྣོལ་ནས་རོ་བཟུང་བ། ཨོཾ་བཛྲ་ཤྲཱི་གཱ་ལ་མུ་ཁཱི་ཧེ། ནུབ་ཏུ་ཝ་གདོང་མ་ནག་མོ་ཞིང་ཆུང་བཟུང་ནས་ལྕེས་ལྡག་པ། ཨོཾ་བཛྲ་ཤྭ་ན་མུ་ཁཱི་ཧེ། བྱང་དུ་སྤྱང་གདོང་མ་མཐིང་ནག་ཞིང་ཆུང་གི་ཁོག་པ་འདྲལ་བ་སྟེ་མཆེ་བ་ཅན་བཞིའོ། །ཨོཾ་བཛྲ་གྲྀདྡྷ་མུ་ཁཱི་ཧེ། ཤར་ལྷོར་བཞད་གདོང་མ་དམར་སེར་གཡོན་ཞིང་ཆུང་བཟུང་བའི་རྒྱུ་མ་གཡས་པས་དྲངས་ནས་གསོལ་བ། ཨོཾ་བཛྲ་ཀངྐ་མུ་ཁཱི་ཧེ། ལྷོ་ནུབ་ཏུ་ཀངྐའི་མགོ་ཅན་དམར་སྐྱ་བམ་རོའི་རྐང་ལག་བཟུང་ནས་ཕྲག་པར་འགེལ་བ། ཨོཾ་བཛྲ་ཀཱ་ཀ་མུ་ཁཱི་ཧེ། ནུབ་བྱང་དུ་བྱ་རོག་གདོང་ཅན་ནག་མོ་གཡས་རལ་གྲི་དང་གཡོན་བྷན་དམར་འཛིན་པ། ཨོཾ་བཛྲ་ཨུ་ལཱུ་ཀཱ་མུ་ཁཱི་ཧེ། བྱང་ཤར་དུ་འུག་གདོང་མ་མཐིང་ནག་གཡས་ལྕགས་ཀྱུ་དང་གཡོན་བྷན་དམར་འཛིན་པ་སྟེ་གཤོག་པ་ཅན་བཞི། ཐམས་ཅད་ཀྱང་གཅེར་བུ་རང་རང་ཁྲོས་པའི་ཞལ་ཅན་དྲག་མོའི་རྣམ་འགྱུར་དུར་ཁྲོད་འབར་བའི་ཆས་དང་ལྡན་པའོ། །སླར་ཡང་དགྱེས་པའི་བཞད་སྒྲ་ཕཊ་ཅེས་བརྗོད་པས་བྱང་ཆུབ་ཀྱི་སེམས་སྤྲིན་སྒོ་སྐྱོང་བཞིའི་རྣམ་པར་ཐོན་ནས་རིགས་བསྡུས་ཏེ་སྒོ་བཞིར་རང་རང་གི་གདན་ལ་བཞུགས་པ་ནི། ཨོཾ་བཛྲ་ཨཱརྱ་ཏེ་ཛ་ཏེ་ང་ཛཿ ཤར་སྒོ་རྟ་གདོང་མ་སྔོན་མོ་ལྕགས་ཀྱུ་འཛིན་པ། ཨོཾ་བཛྲ་ཨ་མུ་ཁེ་ཧཱུྃ། ལྷོ་སྒོར་ཕག་གདོང་མ་ནག་མོ་མཆེ་ཞགས་འཛིན་པ། ཨོཾ་བཛྲ་ལོ་ཀ་བཾ། ནུབ་སྒོར་སེང་གདོང་མ་དམར་མོ་ལྕགས་སྒྲོག་འཛིན་པ། ཨོཾ་བཛྲ་བྷསྨི་པ་ལ་ཡ་བ་ཏུ་ཧོཿ བྱང་སྒོར་སྤྱང་གདོང་མ་ལྗང་གུ་དྲིལ་བུ་འཛིན་པ། བཞི་ཀའང་གཅེར་བུ་གཏུམ་ཞིང་ཁྲོས་པའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ། ཞལ་ཕྱིར་ཕྱོགས་ནས་འཁོད་པའོ། །གཉིས་པ་ནི། བདག་ཉིད་བཛྲ་ཧེ་རུ་ཀར་གསལ་བའི་ཐུགས་ཀ་ནས། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། ཉི་ཤུ་རྩ་བརྒྱད་འཕྲོས། ཁྱམས་ཕྱི་མའི་ཕྱོགས་བཞིར་དྲུག་དྲུག་དང་། སྒོ་བཞིར་རེ་རེ་སྟེ་རང་རང་གི་སྟན་ལ་འཁོད་པ་ལས་རིམ་པ་བཞིན། མ་ནུ་རཀྵ་སཱི་བྷྱོ། བྲ་ཧྨ་ཎི་བྷྱོ། རཽ་ཏྲི་བྷྱོ། བིཥྞ་བཻ་བྷྱོ། ཀུ་མཱ་རཱི་བྷྱོ། ཨིནྡྲ་ནཱི་བྷྱོ། ཤར་སྟོད་ནས་གཡས་བསྐོར་དུ་རིམ་པ་བཞིན། སྲིན་མོ་སྨུག་ནག་ཐོད་རློན་འཆང་བ། ཚངས་མ་དམར་སེར་པདྨ་བསྣམས་པ། ལྷ་ཆེན་མོ་དཀར་ལྗང་ཏྲི་ཤུལ་འཛིན་པ། རྟོག་འདོད་མ་སྔོན་མོ་འཁོར་ལོ་འཆང་བ། གཞོན་ནུ་མ་དམར་མོ་མདུང་ཐུང་འཕེན་པ། བརྒྱ་བྱིན་མ་དཀར་མོ་ཨིནྡྲ་གདེངས་པའོ། །བཛྲ་པིངྒ་ལཾ་བྷྱོ། ཨ་མྲྀ་ཏ་བྷྱོ། སཽ་མྱ་བྷྱོ། དཎྜ་དཾ་བྷྱོ། རཀྵ་སཱི་བྷྱོ། བྷཀྵ་སཱི་བྷྱོ། ལྷོ་སྟོད་ནས་རིམ་པ་བཞིན། རྡོ་རྗེ་མ་སེར་མོ་དུང་ཁྲག་འཐུང་བ། བདུད་རྩི་མ་དམར་མོ་པདྨ་བསྣམས་པ། ཟླ་བ་མ་དཀར་མོ་པུཎྜ་རཱི་ཀ་འཛིན་པ། བེ་ཅོན་མ་ལྗང་ནག་དབྱུག་ཏོ་འཕྱར་བ། སྲིན་མོ་དམར་མོ་དུང་ཁྲག་འཐུང་བ། ཟ་བ་མ་ལྗང་ནག་རྒྱུ་མ་འདྲེན་པའོ། །ར་ཏི་བཛྲ་བྷྱོ། རུ་དྷི་ར་མ་ཏྟཱ་བྷྱོ། ཨེ་ཀ་ཙ་རི་ཎཱི་བྷྱོ། མ་ནོ་ཧ་རཾ་བྷྱོ། སིདྡྷི་ཀཾ་བྷྱོ། ཝ་ཡ་ཝི་བྷྱོ། ནུབ་སྟོད་ནས་རིམ་པ་བཞིན་དགའ་བ་དམར་མོ་ཀ་ཏར་འཕྱར་བ། སྟོབས་ཆེན་དཀར་མོ་གཤོལ་མདའ་འཛིན་པ། རྡོ་རྗེ་སེར་མོ་སྤུ་གྲིས་གཅོད་པ། འདོད་པ་དམར་མོ་མདའ་གཞུ་འགེངས་པ། ནོར་སྲུང་མ་དཀར་མོ་བུམ་པ་འཛིན་པ། རླུང་ལྷ་མ་སྔོན་མོ་བ་དན་འཕྱར་བའོ། །མ་ཧཱ་མཱ་ར་ཎ་བཛྲ་བྷྱོ། ཨགྣེ་བྷྱོ། ཝཱ་ར་ཧཱི་བྷྱོ། ཙ་མུཎྜཱི་བྷྱོ། སུ་ཏ་ནཾ་བྷྱོ། ཝཱ་རུ་ཎཱི་བྷྱོ། བྱང་སྟོད་ནས་རིམ་པ་བཞིན། གསོད་བྱེད་མ་དཀར་མོ་རལ་གྲི་འཛིན་པ། མེ་མོ་དམར་མོ་གསལ་ཤིང་འཕྱར་བ། ཕག་མོ་ནག་མོ་མཆེ་ཞགས་འཛིན་པ། རྒན་བྱེད་མ་དམར་མོ་ཞིང་ཆུང་ཟ་བ། སྣ་ཆེན་མ་དཀར་ལྗང་ཐོད་ཁྲག་འཐུང་བ། ཆུ་ལྷ་སྔོན་མོ་སྦྲུལ་ཞགས་འཛིན་པའོ། །བཛྲ་མ་ཧཱ་ཀཱ་ལི་བྷྱོ། བཛྲ་ཙ་ཀཱ་ལ་བྷྱོ། བཛྲ་ཀུམྦྷ་ཀརྞ་བྷྱོ། བཛྲ་ལམྦོ་ད་ར་བྷྱོ། ཤར་སྒོར་རྡོ་རྗེ་ནག་མོ་ཆེན་མོ་ལྕགས་ཀྱུ་འཛིན་པ། ལྷོ་སྒོར་རྡོ་རྗེ་མོ་སེར་ནག་ཞགས་པ་འཛིན་པ། ནུབ་སྒོར་རྡོ་རྗེ་བུམ་སྣ་མ་དམར་ནག་ལྕགས་སྒྲོག་འཛིན་པ། བྱང་སྒོར་རྡོ་རྗེ་གསུས་འཛིན་མ་ལྗང་ནག་དྲིལ་བུ་འཁྲོལ་བ་སྟེ་ཐམས་ཅད་ཀྱང་གཏུམ་ཞིང་ཁྲོས་པ་དྲག་མོའི་ཉམས་ཅན་དུར་ཁྲོད་རོལ་པའི་ཆས་ཀྱིས་བརྒྱན་ཏེ། འདོད་རྒུར་བསྒྱུར་བའི་རྣམ་རོལ་ཅིར་ཡང་འཆར་བས་མེ་དཔུང་འབར་བའི་དབུས་ན་གནས་པའི་ལྷ་ཐམས་ཅད་ཀྱི་སྲོག་གི་གོར་ཡེ་ཤེས་སེམས་དཔའ་དྭངས་མའི་སྲོག་ཡིག་དང་བཅས་པས་མཚན་པའོ། །སྔགས་ཚིག་གིས་གསལ་གདབ་པ་ནི། ཧཱུྃ་ཧ་ཧེ་ཕཊ་བྷྱོ་རཾ། ཞེས་པས་དཀྱིལ་འཁོར་གྱི་འཁོར་ལོ་ཐམས་ཅད་གསལ་བརྟན་སྒྲིབ་པ་མེད་པ་འབར་བའི་འོད་ཟེར་མཁའ་ཁྱབ་ཏུ་འཕྲོ་བའི་བདག་ཉིད་དུ་གནས་པར་བསམ་མོ། །སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་སྐུ། །དབུ་གསུམ་ཕྱག་དྲུག་ཞབས་བཞིར་བགྲད། །ཀོ་རློན་གོས་ནི་སྣ་ཚོགས་གྱོན། །རྔམ་པའི་སྒྲ་ཆེན་འཇིགས་པར་སྒྲོགས། །སྦྲུལ་དང་ཐོད་ཕྲེང་ཉི་ཟླའི་ཆས། །སྟོང་གི་འཇིག་རྟེན་ཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟྭ་གཤོལ་ལ་སོགས། །རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །གནས་དང་ཡུལ་གྱི་ཕྱག་རྒྱ་དང་། །སྒོ་བཞིའི་ཕྱག་རྒྱས་རབ་མཛེས་ཤིང་། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་ནི་བརྒྱད་ཀྱིས་མཛེས། །རང་གི་སྟན་དང་ལག་ཆ་དང་། །ཅི་བགྱི་ཞེས་ནི་ཆས་ཏེ་གནས། །མཐའ་དབུས་མེད་པར་ཁྱབ་པ་ཡིས། །འཇིག་རྟེན་དྲུག་གི་ཕྱོགས་བཅུ་ན། །འབར་བའི་དཀྱིལ་འཁོར་གསལ་བར་སྣང་། །ཞེས་གསལ་གདབ་བོ། །ཏིང་འཛིན་གསུམ་དང་ལྷའི་མངོན་རྟོགས་རྣམས་བསྙེན་པའི་དོན་པོ་ཆེ་ཡིན་པས་དང་པོ་པ་རྣམས་ཧ་ཅང་བསྡུས་ན་མི་དགའ་བས་དེ་ཙམ་བྱས་ལ། མངོན་རྟོགས་མ་འདྲེས་ཤིང་གོམས་པར་གྱུར་པ་ན་གཙོ་བོའི་མངོན་རྟོགས་ཙམ་གྱི་མཐར་བསྐྱེད་སྔགས་རྣམས་ཚང་བར་བརྗོད་མཐར། ཧཱུྃ་ཧ་ཧེ་ཕཊ་བྷྱོ་རཾ་སོགས་ཀྱིས་གསལ་གདབ་པ་དང་དབང་བསྐུར་རྒྱས་གདབ་རྣམས་སྔགས་རྒྱ་ཙམ་གྱིས་ཀྱང་རུང་ངོ་། གསུམ་པ་ལས་ཀྱི་རིམ་པའི་ཏིང་ངེ་འཛིན་ལ་ལྔ་སྟེ། ཡེ་ཤེས་ཀྱི་དཀྱིལ་འཁོར་སྤྱན་དྲང་བ། མཆོད་པ་འབུལ་བ། བཤགས་ཤིང་དངོས་གྲུབ་གསོལ་བ། དམ་བཅའ་བ། འཛབ་བཟླ་བའོ། །དང་པོ་ལ་བཞི་སྟེ། སྙན་གསན་དབབ་པ། སྤྱན་དྲངས་པ་དངོས། རིག་པའི་མེ་ཏོག་དོར་བ། དངོས་གྲུབ་བསྐུལ་ཏེ་བསྟིམ་པའོ། དང་པོ་ནི། གཙོ་བོའི་ཡེ་ཤེས་སེམས་དཔའི་ཐུགས་ཀར་དྭངས་མའི་སྲོག་ཧཱུྃ་མཐིང་ག་ཡེ་ཤེས་ལྔའི་རང་བཞིན་རྟག་ཏུ་འཆར་བཞིན་པ། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་བསྐུལ་བས། ཆོས་སྐུ་འགྱུར་བ་མེད་པའི་ངང་ལས། གཟུགས་སྐུ་ལྔ་བཅུ་རྩ་བརྒྱད་སྒྱུ་འཕྲུལ་ཡེཤེས་ཀྱི་འཁོར་ལོའི་རྣམ་པ་ཅན་དུ་སད་པར་བསམ་ལ། ཧཱུྃ ཕྱོགས་དུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ལས། །དཀྱིལ་འཁོར་ཐམས་ཅད་སྤྱན་དྲང་ངོ་། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཕྱོགས་དུས་ཀུན་ནས་གཤེགས་པ་ཡི། །བསྙེན་པའི་དཀྱིལ་འཁོར་རབ་ཏུ་རྫོགས། །ཉེ་བར་གྱུར་པའི་དམ་ཚིག་མཆོག །ཨོཾ་རུ་ལུ་རུ་ལུ་ཧཱུྃ། ཞེས་སྙན་གསན་དབབ། གཉིས་པ་ནི། ཨེ་ཧྱེ་ཧི་ཨཱ་ན་ཡ་ཛཿཧཱུྃ་བྃ་ཧོཿ རཾ་ཞེས་པས་དམ་ཚིག་གི་དཀྱིལ་འཁོར་དང་མེ་རི་འདབ་འབྱར་དུ་བཞུགས་པར་བསམ་མོ། །གསུམ་པ་ནི། ཨོཾ་བཛྲ་ཀྲོ་དྷ་ས་མ་ཡ་ཧཱུྃ། ཞེས་བརྗོད་པས། རང་བཞིན་གྱི་དཀྱིལ་འཁོར་དང་ཏིང་ངེ་འཛིན་གྱི་དཀྱིལ་འཁོར་གཉིས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱའོ། བཞི་བ་ནི། ཨོཾ ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ཨོཾ་བཛྲ་ཀྲོ་དྷ་ས་མ་ཡ་སྟྭཾ། ཨོཾ་བཛྲ་ཀྲོ་དྷ་ས་མ་ཡ་ཕཊ། ཨོཾ་བཛྲ་ཀྲོ་དྷ་ས་མ་ཡ་ཧོཿ ཞེས་པས་ཡེ་ཤེས་ཀྱི་འཁོར་ལོ་དམ་ཚིག་པ་ལ་དབྱེར་མེད་དུ་བསྟིམས་ནས། ཧཱུཾ་ཧ་ཧེ་ཕཊ། ཅེས་བརྗོད་པས་བརྟན་པར་བྱས་ལ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ། ཞེས་བཞུགས་སུ་གསོལ་ལོ། གཉིས་པ་ལ་ཕྱག་དང་མཆོད་པ་གཉིས་ལས། དེ་གཉིས་ཀའི་ཚེ་ཡང་། རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་དཀྱིལ་འཁོར་གྱི་ཤར་སྒོར་འཁོད་དེ། སེམས་ཅན་ཐམས་ཅད་དང་བྱ་བྱེད་ཐུན་མོང་པར་གྱུར་ནས་ཕྱག་དང་མཆོད་པ་སོགས་ལས་ཀྱི་རིམ་པ་ལ་འཇུག་པར་མོས་པའོ། དེའི་དང་པོ་ཕྱག་འཚལ་བ་ནི། ཧཱུཾ སྲིད་གསུམ་འཇོམས་པའི་ལྷ་ལ་ཕྱག་འཚལ་ལོ། །མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོས་པའི་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་ཁྲོ་བོའི་ཚོགས་ལ་ཕྱག་འཚལ་ལོ། །ཨ་ཏི་པཱུ་ཧོཿ པྲ་ཏིཙྪ་ཧོཿ ཞེས་པས་ཕྱག་བྱའོ། གཉིས་པ་མཆོད་པ་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། ཧཱུྃ རྣམ་པར་གྲོལ་བ་མཚོན་པའི་ཕྱིར། །དབུས་ཀྱི་ཁྲོ་བོའི་ཕྱག་རྒྱ་ནི། །གཡས་དཀར་གཡོན་དམར་དབུས་མཐིང་ཞལ། །རྩེ་དགུ་རྩེ་ལྔ་ཏི་ར་གཡས། །དྲིལ་བུ་དུང་དམར་འཇིག་རྟེན་གཡོན། །དཔལ་ཆེན་ཡེ་ཤེས་ཐབས་ཀྱི་རྒྱ། །ཤེས་རབ་དབྱིངས་མའི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པས་ཤེས་རབ་ཐབས་ལ་བརྟེན། །གཡོན་པས་དུང་དམར་གཙོ་ལ་སྟོབ། །ཀྲོ་དྷི་ཤྭ་རཱི་དབྱིངས་ཀྱི་རྒྱ། །འབར་བའི་གདན་ལ་བཞུགས་ནས་ཀྱང་། །མཆོད་བཞེས་དམ་སྐོང་དངོས་གྲུབ་སྩོལ། །ཞེས་པ་ཙམ་མོ། །གཉིས་པ་ཀུན་བཟང་ནི། ཨོཾ་ཧཱུྃ བདེ་བར་གཤེགས་སོ་ཁྲོ་རྒྱལ་གཙོ། །རྒྱལ་བ་རྒྱ་མཚོའི་ཡེ་ཤེས་ཀྱིས། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པས་ཕྱི་ནང་གསང་བའི་འདོད་ཡོན་གྱི་དངོས་པོ་མཐའ་དག་སྤྱོད་ཡུལ་ཡོངས་སུ་དག་པ་ཀུན་ཏུ་བཟང་པོའི་མཆོད་སྤྲིན་ཆེན་པོར་འབུལ་ལོ། གསུམ་པ་ཞབས་བསིལ་ནི། ཨོཾ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། བཞི་པ་བཞི་བསྣོལ་ནི། ཨོཾ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུ། སརྦ་མ་ཧཱ་སུ་ཁ་སིདྡྷི་ཧུ། ཨོཾ་ཤྲཱི་བཛྲ་རཱ་ག་དྷཱུ་པེ་དྷཱུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ལྷ་མོ་རྣམས་ཀྱིས་དཀྱིལ་འཁོར་གྱི་ལྷ་ཚོགས་མཆོད་ནས་ཤངས་ལ་སོགས་པའི་དབང་པོ་སོ་སོ་ལ་ཐིམ་པར་བསམ་མོ། ལྔ་བ་སྨན་མཆོད་ནི། ཧཱུྃ རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཅན་ཀུན་བསྒྲལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་གྱི། །ཐུགས་དམ་དབྱིངས་ནས་བསྐུལ་བའི་ཕྱིར། །འདི་ནི་སྔོན་གྱི་ཐ་ཚིག་སྟེ། །སྐུ་གསུང་ཐུགས་ཀྱི་ངང་ཉིད་དུ། །བདག་ཅག་དད་པས་འབུལ་ལགས་ན། །བླ་མེད་འཕྲུལ་གྱི་དངོས་གྲུབ་སྩོལ། ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྤྱིར་འབུལ་ཞིང་གཞན་ཡང་། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོ་བཅས་པ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྒྱལ་བ་ཆོས་ཀྱི་སྐུ་ཡི་དགོངས་པ་ཡིས། །བདེ་གཤེགས་རིགས་ལྔ་རིགས་གསུམ་མགོན་པོ་དང་། །སངས་རྒྱས་གསང་བའི་བར་དུ་བྱིན་རླབས་ཏེ། །འདས་དང་མ་བྱོན་ད་ལྟ་དུས་གསུམ་གྱི། །སྒྱུ་འཕྲུལ་བརྒྱུད་པའི་བླ་མ་ཐམས་ཅད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཞན་ཡང་དབང་བསྐུར་རྒྱུད་བཤད་མན་ངག་གི །བརྒྱུད་པའི་བཀའ་བབ་དུ་མའི་ཆུ་བོ་ཀུན། །གཅིག་འདུས་དྲིན་ཅན་རྩ་བའི་བླ་མ་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཚོགས་རྗེ་ཚོགས་བདག་དཔལ་ཆེན་ཧེ་རུ་ཀ །འབར་བའི་རྒྱལ་པོ་ཁྲོ་རྒྱལ་ཡབ་ཡུམ་བཅུ། །ཀཽ་རཱི་ལ་སོགས་མ་མོ་བརྒྱད་རྣམས་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སིདྷ་ལ་སོགས་ཕྲ་མེན་མཆེ་གཤོག་བརྒྱད། །རྡོ་རྗེ་གདོང་མོ་སྒོ་སྐྱོང་རྣམ་པ་བཞི། །མ་ཚོགས་དབང་ཕྱུག་ཉི་ཤུ་རྩ་བརྒྱད་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གཞན་ཡང་རིག་འཛིན་དཔའ་བོ་མཁའ་འགྲོ་དང་། །དམ་ཅན་ཆོས་སྐྱོང་རིགས་དྲུག་ཕ་མ་སོགས། །སྲིད་གསུམ་ཀ་དག་རྒྱལ་བའི་དཀྱིལ་འཁོར་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། ཨོཾ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་མཐར་དངོས་གྲུབ་བླང་བ་ནི། རང་གི་ལྕེ་ཧཱུྃ་ཡིག་དང་། སྨན་གྱི་སྟེང་དུ་ཨོཾ་ཨཱཿཧཱུྃ་གསུམ་བསྒོམས་ཏེ། ཨོཾ་སརྦ་ཏ་ཐཱ་ག་ཏ་ཀཱ་ཡ་སིདྡྷི་ཨོཾ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་རིམ་པར་བརྗོད་ཅིང་བླངས་ནས་ལྕེ་ལ་བཞག་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་མོ། །དྲུག་པ་གཏོར་མའི་མཆོད་པ་ནི། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ། དྷུ་པ། པུཥྤ། དཱི་པཾ། གནྡྷེ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་གཏོར་མ་འདོད་ཡོན་གྱི་ཕུང་པོ་ལས་འདོད་ཡོན་དྲུག་གི་ལྷ་མོ་ནམ་མཁའ་གང་བར་འཕྲོས། དཀྱིལ་འཁོར་པ་རྣམས་ཀྱི་དབང་པོ་དྲུག་གི་གནས་སུ་ཐིམ་པས་དགྱེས་པ་བསྐྱེད་ནས་རང་ལ་གཉིས་མེད་དུ་གྱུར་པར་བསམ་མོ། བདུན་པ་བདུད་རྩི་གསང་བསྣན་གྱི་མཆོད་པ་ནི། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་ལྷ་རྣམས་ཀྱི་ཞལ་དུ་མུ་ཏིག་དཀར་པོ་དྲི་མ་མེད་པ་ལྟ་བུ་གསོལ་བས་དགྱེས་ཤིང་ཚིམ་པར་བསམ་མོ། བརྒྱད་པ་རཀྟའི་མཆོད་པ་འབུལ་བ་ལ་གསུམ་ལས། དང་པོ་ནི། ཧཱུཾ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་སྤྱན་དྲངས་ཏེ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་འཁྱིལ། །མཁའ་འགྲོ་འབར་བའི་ཆོགས་བཅས་ཀྱིས། །མ་ལུས་བཞེས་ནས་བསྣམས་སུ་གསོལ། །ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨཱ་ཝེ་ཤ་ཡ། ཨཱ་ཝེ་ཤ་ཡ། པྲ་ཝེ་ཤ་ཡ། པྲ་ཝེ་ཤ་ཡ། ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་རཀྟའི་དྭངས་མ་ཡེ་ཤེས་ཀྱི་བདུད་རྩིའི་ངོ་བོར་སུམ་གཅིག་རོལ་པར་བསམ་མོ། གཉིས་པ་ནི། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། སརྦ་དུཥྚན་ས་མ་ཡ་རུ་དྲ་མཱ་ར་ཡ་ཁ་ཁ་ཁཱ་ཧི་ཁཱ་ཧི། ཧྲྀཿད་ཡ་པི་པ་ཧཱུྃ་ཕཊ། ཅེས་རཀྟའི་ཁུ་བ་ཞིང་བཅུའི་དགྲ་བགེགས་ཀྱི་ངོ་བོར་སུམ་གཉིས་རོལ་པར་བསམ་མོ། །གསུམ་པ་ནི། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ས་མ་ཡ་མ་ཧཱ་མཱཾ་ས། མ་ཧཱ་རཀྟ། མ་ཧཱ་ཙིཏྟ། མ་ཧཱ་བ་སུ་ཏ། མ་ཧཱ་གོ་རོ་ཙ་ན། མ་ཧཱ་ཀེཾ་ནི་རི་ཏི། མ་ཧཱ་པཉྩ་ཨ་མྲྀ་ཏ། མ་ཧཱ་ཨརྒྷཾ་པྲ་ཏཱིཙྪ་ཧོཿ ཁ་ཁ་ཁ། ལེ་ལེ་ལེ། ཧཱུྃ་བྷྱོ། ཧཱུྃ་བྷྱོ། ཧཱུྃ་བྷྱོ། ཞེས་རཀྟའི་རྩིག་མ་ཞིང་བཅུའི་དུག་གསུམ་ཤ་ཁྲག་རུས་པའི་དངོས་པོར་ལྷག་མེད་དུ་རོལ་པར་བསམ་མོ། དགུ་པ་བསྒྲལ་མཆོད་ནི། རཾ་བཛྲ་ཛྭ་ལ་རཾ། རཾ་ལས་ཡེ་ཤེས་ཀྱི་མེ་འབར་བས་སེམས་ཅན་ཐམས་ཅད་ཀྱི་སྙིང་ནང་ན་གནས་པའི་རིགས་དྲུག་གི་ས་བོན་བག་ཆགས་དང་བཅས་པ་བསྲེགས། རྣམ་ཤེས་ཆོས་ཀྱི་དབྱིངས་སུ་བསྒྲལ་བར་བསམ་མོ། བཅུ་བ་སྦྱོར་མཆོད་ནི། ཨོཾ་ཕཊ། ཨེ་ཨེ། ས་མ་ཡ་སྟྭཾ། ས་མ་ཡ་ཧོཿ ཨ་ནུ་རཱ་གོ་ཧཾཿ ཨ་ནུ་རཱ་ག་ཡ་མྱེ། ཛཿཧཱུྃ་བྃ་ཧོཿ ཧཱུྃ་ཧཱུྃ་ཧཱུྃ། བོ་དྷི་ཙིཏྟ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པ་དང་དབྱེར་མེད་པའི་ང་རྒྱལ་བྱའོ། བཅུ་གཅིག་པ་འདོད་ཡོན་རོ་མཉམ་གྱི་མཆོད་པ་ནི། ཨོཾ་ཧཱུྃ། བཟའ་དང་བཅའ་དང་བཏུང་དང་བགོ། །ལོངས་སྤྱོད་ལྔ་ལྡན་ཐམས་ཅད་ནི། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཆོས་ཉིད་ལ་ཡང་ཆོས་ཉིད་རོལ། །ཞེས་འདོད་ཡོན་གྱི་སྣང་བ་ཐམས་ཅད་ལྷ་དང་ལྷ་མོར་དག་པ་དང་དཀྱིལ་འཁོར་གྱི་ལྷ་ཐམས་ཅད་བདེ་བ་ཆེན་པོར་རོ་གཅིག་ཏུ་གྱུར་པར་བསམ་པ་ནི་བླ་ན་མེད་པའི་དུག་གསུམ་ལམ་དུ་སློང་བའི་མཆོད་པའོ། བཅུ་གཉིས་པ་རོལ་མོ་ཡེ་ཤེས་ཀྱི་མཆོད་པ་ནི། ཀོ་ཊ་ཀྵ། ཀོ་ཊ་པ། ཀོ་ཊ་ཀོ་ཊ། ཀོ་ཊ་པཤྩ། ཀོ་ཊཱི་རཱ་ག ཀོ་ལཀྵ། ཀོ་ལ་བ། ཀོ་ལ་ཀོ་ལ། ཀོ་ལ་པཤྩ། ཀོ་ལ་བྷསྟ་ཐཱ། ཞེས་བརྗོད་ལ་རོལ་མོ་སྣ་ཚོགས་པའི་སྒྲ་སྦིར་རོ། །བཅུ་གསུམ་པ་གླུ་ཡེ་ཤེས་ཀྱི་མཆོད་པ་ནི། ཧཱུྃ གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟངས་ཡག་ཟ་བྱེད་ཆེ། ཧོཿ ཧཱུྃ རྔམ་པའི་ང་རོ་འབྲུག་སྟོང་ལྡིར། །གཏུམ་ཆེན་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའི་འཐོར་རླུང་གཡེང་བ་ཆེ། ཧོཿ ཧཱུྃ ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ། ཧོཿ ཧཱུྃ ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ། ཧོཿ ཧཱུྃ བདུད་ཀུན་གྱི་ནི་བདུད་པོ་ཆེ། །བདུད་ཀྱི་བདུད་དེ་བདུད་འཇོམས་པ། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ། ཧོཿ ཧཱུྃ རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་སྟེ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ། ཧོཿ ཞེས་ཡོན་ཏན་རྗེས་སུ་དྲན་པའི་སྒོ་ནས་བསྟོད་པ་བྱའོ། །ཤིན་ཏུ་བསྡུ་ན་དབབ་དྲངས་བསྟིམ་བརྟན་མཆོད་པ་རྣམས་སྔགས་ཙམ་དང་བསྟོད་པའང་ཤྭ་ལོ་ཀ་མཐའ་མ་ཁོ་ནས་ཆོག་གོ། གསུམ་པ་ནི། ཨོཾ་བཛྲ་ཨེ་ས་ཧུ། བེ་ས་ཧུ། ས་མ་ཡ་བྷཀྵ་ཧུ། རུ་ལུ་རུ་ལུ་ཧཱུྃ་བྷྱོ་ཧཱུྃ ཛཿཧཱུྃ་བྃ་ཧོཿ ཨོཾ་པྲ་ཏཱིཙྪ་ཧོཿ ཧོཿ སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན། དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་བཅོམ་ལྡན་འདས་དཔལ་ཆེན་པོ་ཧེ་རུ་ཀ་ལ་སོགས་པ་རིགས་ལྔའི་བདེ་བར་གཤེགས་པ་རིགས་མཆོག་གཟུངས་ཀྱི་ཡུམ་གྱི་དབྱིངས་ན་རྣམ་པར་བཞུགས་པ་སེམས་དཔའི་ཚོགས། སེམས་མའི་འཁོར། ཡེ་ཤེས་ཆེན་པོའི་དབང་ཕྱུག་ཐབས་ལ་མཁས་པའི་བདག་ཉིད། སྒྲོལ་བའི་མཁའ་འགྲོ། རང་བཞིན་གྱི་རྣལ་འབྱོར། ངོ་བོ་ཉིད་ཀྱི་སྐུ། མ་ལུས་མི་ལུས་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་འཚོགས་པ་རྣམས་ཀྱིས་དང་པོ་གསང་བ་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་མོ་མ་ནོར་བར་མནོས་པ་ལས། རྩ་བ་དང་ཡན་ལག་གི་དམ་ཚིག་ཉམས་ཆག་དང་། འགལ་འཁྲུལ་ཞིག་རལ་དུ་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས་པར་མཆིས་ན། དབྱིངས་ཉིད་ནམ་མཁའ་དང་འདྲ་བའི་ངང་གིས་སྐུ་བཟོད་པ་ཆེན་པོ་དང་དུ་བཞེས་ནས་ཚངས་པ་མཆོག་ཡིད་བཞིན་དུ་ཐོབ་པར་སྩལ་དུ་གསོལ། བཅོམ་ལྡན་འདས་དཔལ་ཆེན་པོའི་སྐུ་གསུང་ཐུགས་ཀྱི་བླ་མན་ཆད་ནས། དངོས་གྲུབ་ཀྱི་སྐལ་བ་དང་རིགས་རྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར་དུས་ད་ལྟ་ཉིད་དུ་ཐོབ་པར་སྩལ་དུ་གསོལ། རྣལ་འབྱོར་པ་ལ་བར་དུ་གཅོད་པར་བྱེད་པའི་ཕྱི་ནང་གི་མི་ཤིས་པའི་རྐྱེན་ཐམས་ཅད་ཕྲིན་ལས་རྣམ་པ་བཞིས་ཇི་ལྟར་འདུལ་བར་འཚམས་པ་བཞིན་མཛད་ནས་མིང་ཙམ་ཡང་མི་གྲགས་པར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབ་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི། །འོད་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། བཞི་པ་ནི། ཨོཾ་ཧཱུྃ བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབས། །བྱང་ཆུབ་སྤྱོད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཅེས་བརྗོད་དེ་ཤར་སྒོར་འཁོད་པའི་ལས་ཀྱི་ཧེ་རུ་ཀ་གཙོ་བོའི་ཐུགས་ཀར་ཐིམ་པར་བསམ། ལྔ་བ་ནི། ལྷ་རྣམས་ཀྱི་ཡེ་ཤེས་སེམས་དཔའི་ཐུགས་ཀར་རྡོ་རྗེའི་ལྟེ་བར་ཉི་མའི་གདན་སྲན་ཟླུམ་ཙམ་གྱི་དབུས་སུ་རིགས་ལྔ་ལ་ཧཱུཾ། ཀཽ་རཱི་མ་བརྒྱད་ལ་ཧ། ཕྲ་མེན་བརྒྱད་ལ་ཧེ། སྒོ་སྐྱོང་བཞི་ལ་ཕཊ། དབང་ཕྱུག་མ་རྣམས་ལ་བྷྱོ་རེ་རྣམས་རུ་ལུ་འབྲུ་བརྒྱད་པའི་སྔགས་ཀྱི་ཕྲེང་བ་རེ་རེས་བསྐོར་བར་གསལ་བཏབ་ལ། སྔགས་བཟླས་པའི་ཚེ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་ཡེ་ཤེས་ཀྱི་ལྷ་ཚོགས་རྣམས་དགྱེས་པ་བསྐྱེད། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཤིང་ཐིམ་པར་དམིགས་པ་སྟེ། དམ་ཡེ་འཕྲོ་འདུའི་གསལ་བ་གསུམ་དང་ལྡན་པའི་ངང་ནས་སྐྱོན་བཅུ་སྤངས་ཏེ་བཟླ་བར་བྱའོ། བཟླ་བྱའི་སྔགས་ནི། ཨོཾ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ་མ་ཧཱ་ཀྲོ་དྷཱི་ཤྭ་རཱི་སྟྭཾ། ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུྃ། ཞེས་པའོ། །དེས་མཚོན་ནས་རིགས་བཞི་དང་། གནས་ཡུལ་གྱི་མ་མོ་སྒོ་སྐྱོང་དབང་ཕྱུག་མ་རྣམས་སོ་སོའི་བསྐྱེད་སྔགས་ལ་རུ་ལུ་འབྲུ་བརྒྱད་སྦྱར་བ་གཙོ་འཁོར་གྱི་འགྲོས་དང་སྦྱར་ནས་བརྒྱ་དང་ཉེར་གཅིག་བདུན་སོགས་རིམ་པར་བཟླ་ཞིང་། སྤྱི་ཛྲབ་ནི། རུ་ལུ་ཉིད་ལ་གཙོ་བོར་བྱའོ། །དེ་ཡང་ངེས་རྫོགས་ལས། རྟགས་དུས་གྲངས་ཀྱི་ཕྱེ་བར་རབ་འབྲིང་ཐ་མའི་ཚད་རྫོགས་ཀྱི་བར་དུ་བྱ་བར་གསུངས་ཀྱང་། མོས་སྒོམ་ཉི་ཚེ་བ་ལས་རུང་ཙམ་གྱི་བསྙེན་ཚད་ནི། གཙོ་བོ་བཛྲ་ཧེ་རུ་ཀ་ལ་ཆིག་འབུམ། རིགས་བཞིའི་ཧེ་རུ་ཀ་ལ་ཆིག་ཁྲི་རེ། ཀཽ་སེང་སྒོ་མ་དབང་མོ་བཅས་ལ་ལྔ་སྟོང་རེ་གསུངས་པ་རྣམས་དུས་ཀྱི་དབང་གིས་བཞི་འགྱུར་དང་། སྤྱི་ཛབ་ཁོ་ན་འབུམ་ཕྲག་བཞིས་མཐའ་བརྟེན་པ་བཟླ་ཞིང་། དེ་ཐམས་ཅད་ལ་འབུམ་རྗེས་སུ་ཁྲི་སོགས་བཅུ་ཆའི་གྲངས་ཀྱི་ཁ་སྐོང་དང་། བཅུ་ཆའི་སྦྱིན་སྲེག་དང་བཅས་པ་བྱ་བ་ཡིན་ནོ། །བསྙེན་པའི་མཇུག་ཏུ། སྤྲོ་ན་གཞི་བསྟོད་རྒྱས་པ་གཞུང་ལྟར་རམ། ཡང་ན། ཧཱུྃ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །མ་སྲིང་མཁའ་འགྲོའི་ཚོགས་ལ་ཕྱག་འཚལ་ལོ། །ཞེས་བརྗོད། ཡེ་ནས་གཉིས་མེད་སོགས་ཀྱིས་བཟླས་པའི་ཉེས་བྱས་སུ་གྱུར་པ་ཐམས་ཅད་བཤགས་པར་བྱའོ། གསུམ་པ་རྗེས་ཀྱི་ཆོ་ག་ལ། ཚོགས་ཀྱི་མཆོད་པ། བརྟན་མ་སྐྱོང་བ། ཉེར་བསྡུ་བྱ་བ། གོ་བགོ་ལུས་བསྲུང་། སྤྱོད་ལམ་གྱི་རྣལ་འབྱོར་དང་ལྔ། དང་པོ་ཚོགས་མཆོད་ལའང་ལྔ་ལས། དང་པོ་བཤམས་ཤིང་བྱིན་གྱིས་བརླབ་པ་ནི། ཛ་གད་མཱཾ་ས་གཙོ་བོར་གྱུར་པའི་ཡོ་བྱད་ཅི་འབྱོར་བཤམས་ནས་བསང་ཆུ་གཏོར་ལ། ཨོཾ་མ་ཧཱ་ཀྲོ་དྷཱི་ཤྭ་རཱིས་བསང་། རཾ་ཡཾ་ཁཾ་གིས་བསྲེགས་གཏོར་བཀྲུས་ཏེ་སྟོང་པར་སྦྱངས། མ་སཱུརྱ་མཎྜ་ལ། ཞལ་ཟས་ཀྱི་སྣོད་དུ་ཉི་མ་ལ་ཧཱུྃ་ཨོཾ་སྭཱ་ཨཱཾ་ཧཱ་ལས་བཟའ་བཏུང་གི་དངོས་པོ་ཡེ་ཤེས་ལྔའི་རང་བཞིན་བདུད་རྩི་རོ་བརྒྱ་པ་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པ་དང་བཅས་པའི་སྤྲིན་འཕྲོ་བར་བསམ་ལ། ཡི་གེ་གསུམ་ལན་གསུམ་བརྗོད་པས་བྱིན་གྱིས་བརླབས། གཉིས་པ་ཚོགས་ཞིང་སྤྱན་འདྲེན་པ་ནི། ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་སྤྱན་འདྲེན་གྱི། །དུར་ཁྲོད་མཆོད་པའི་གནས་འདི་རུ། །ཞིང་ཆེན་གསར་རྙིང་སྟན་དུ་བཏིང་། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་གཤེགས་ནས་བསྣམས་སུ་གསོལ། །ཨོཾ་རུ་ལུ་རུ་ལུ་ཧཱུྃ། ཨེ་ཧྱེ་ཧི་ཨ་ན་ཡ་ཛཿཧཱུྃ་བྃ་ཧོཿ ཞེས་པས་སྤྱན་དྲངས་ལ་དགུག་གཞུག་བཅིང་མཉེས་བྱ། གསུམ་པ་མཆོད་པ་གསུམ་ལས། དང་པོ་སྤྱིར་མཆོད་པ་ནི། ཧཱུྃ། བླ་མེད་མཆོག་གི་མཆོད་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པ་བཞེས་སུ་གསོལ། །ཨོཾ་ཨཱཿཧཱུྃ་སུ་ར་ཏ་ཨུ་པ་བྷྱཿ ཀ་མ་ལ་མཱ་ལ་བཛྲ་ཨ་མྲྀ་ཏ་ཧ་ར་ཎ་པྲ་ཏཱིཙྪ་བྷ་ག་ཝཱན། ཛཿཧཱུྃ་བྃ་ཧོཿ ཨ་ལ་ལ་ཧོཿ ཨོཾ་པ་ན་པེཾ་པེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུཿ སརྦ་མ་ཧཱ་སུ་ཁ་སིདྡྷི་ཧུ། གཉིས་པ་བྱེ་བྲག་ཏུ་མཆོད་པ་ནི། ཨོཾ་ཤྲཱི་བཛྲ་རཱ་ག་དྷཱུ་པེ་དྷཱུ། དེ་བཞིན་དུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ཨོཾ་ཤྲཱི་བཛྲ་རཱ་ག་ལཱ་སྱེ་ཧཱུྃ། མཱ་ལྱེ་ཏྲཾ། གཱི་ཏི་ཧྲཱིཿ ནཱིརྟི་ཨཿ གསུམ་པ་ཁྱད་པར་གྱི་མཆོད་པ་ནི། ཚོགས་ཕུད་ཆ་གསུམ་མམ་བཞིར་སྤྲོས་ཏེ། དང་པོ་མཆོད་པ་ནི། ཧཱུྃ སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེ་དང་འཇིགས་པར་སྟོན་པ་དང་། །སྙིང་རྗེ་རྔམས་དང་ཞི་བ་ལ་སོགས་པ། །སྐུ་ཡི་དངོས་པོ་ཤིན་ཏུ་བསྒྱུར་བ་ཡིན། །གར་ཡང་སྒྲུབ་པོ་རྣལ་འབྱོར་ལས། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། །མཱཾ་ས་ལ་སོགས་རོ་མཆོག་གསོལ། །མེ་ཏོག་སོགས་དང་ཙནྡན་དྲི། །བཟང་དགུ་འབུལ་ལོ་བཞེས་སུ་གསོལ། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །སྒྲུབ་པའི་རྫས་འདི་ཐམས་ཅད་ལ། །ཧཱུྃ་དང་ཕཊ་ཀྱིས་ལྡན་པར་མཛོད། ཛཿཧཱུྃ་བྃ་ཧོཿ ཤྲཱི་ཧེ་རུ་ཀ་མ་ཧཱ་བཛྲ། ཨི་དཾ། དྷུ་པ། པུཥྤ། དཱི་པཾ། གནྡྷེ། བ་ལིཾ་ཏ་པྲ་ཏཱིཙྪ་ཧོཿ ཤྲཱི་མཱན་ཁ་ཁ་ཁཱ་ཧི་ཁཱ་ཧི། ཞེས་པས་ཚོགས་རྫས་འདོད་ཡོན་དྲུག་གི་ལྷ་མོ་མཁའ་ཁྱབ་ཏུ་སྤྲོས་པས་ཚོགས་ཞིང་རྣམས་ཀྱི་གནས་དྲུག་ཏུ་ཐིམ་པས་དགྱེས་པར་བསམ་མོ། །བར་པ་བཤགས་པ་ནི། ཧཱུྃ ཚེ་རབས་ཐོག་མ་མེད་པ་ཚུན་ཆད་ནས། །ད་ལྷའི་ལུས་འདི་བླངས་པ་ཡན་ཆད་དུ། །ལུས་ཀྱི་སྡིག་བྱས་སྤྱོད་པ་ངན་དུ་སྤྱད། །ངག་གི་ཚིག་འཁྱལ་སྨྲ་བ་ངན་དུ་བརྗོད། །སེམས་ཀྱི་བློ་ནོར་ལོག་པར་བསམ་པ་སོགས། །འདོད་ཁྲོ་གཏི་མུག་དབང་གིས་ནོངས་བགྱིས་པ། །བཀྲ་བའི་ལྷ་ཚོགས་ཁྱེད་ལ་བཟོད་པར་གསོལ། །ཡེ་ཤེས་ལྷ་ལ་རྟོག་པ་མི་མངའ་ཡང་། །དེ་ཡི་འཁོར་དུ་གཏོགས་པའི་ལྷ་སྲིན་རྣམས། །མི་ཡི་སྐྱོན་མཐོང་ཙམ་ན་བར་ཆད་རྩོམ། །ནོངས་ཤིང་འགལ་འཁྲུལ་ཅི་མཆིས་མཐོལ་ཞིང་བཤགས། །མཐོལ་བཤགས་བཞེས་ནས་ཚངས་པ་སྩལ་དུ་གསོལ། །ཞེས་དང་ཡི་གེ་བརྒྱ་པ་ཡང་བརྗོད་ཅིང་། ཚོགས་རྫས་བདུད་རྩི་ལྔའི་རང་བཞིན་དུ་ཕུལ་བས་ཐུགས་དམ་བསྐང་ཞིང་ཉམས་ཆག་དག་པར་བསམ་མོ། །ཐ་མ་བསྒྲལ་སྟོབ་ནི། ཚོགས་ཆ་གསུམ་པའི་འདོད་ཡོན་གྱི་ལྷ་མོ་ཧཱུྃ་ཞེས་པས་རང་ལ་བསྡུས་ནས། ཨེ་རཾ་ཛྭ་ལ་རཾ། ཧཱུྃ་ཧ་ཧེ་ཕཊ་བྷྱོ་རཾ། སྣོད་བཅུད་ཐམས་ཅད་ཁྲག་འཐུང་འབར་བའི་དཀྱིལ་འཁོར་དུ་བཞེངས་པར་བསམ་ལ། ནྲྀ་ཡཾ་ཛཿ ནྲྀ་བཛྲ་ཨངྐུ་ཤ་ཛཿ ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཛཿ ཛཿཧཱུྃ་བྃ་ཧོཿ སྡེར་མོའི་སྔགས་མཐར། བོ་དྷི་ཙིཏྟ་སིདྡྷི་ཀུ་རུ་ཧཱུྃ་ཧཱུྃ། ཨོཾ་བཛྲ་ཀྲོ་དྷ་ཕཊ་ཛཿ བཛྲ་སཏྭ་ཧཱུྃ། ཛྙཱ་ན་ས་ཏྭ་ཨོཾ། ཨ་ཡཾ། སྥ་ར་ཎ་ཕཊ། ཅེས་ཚེ་ལུང་གི་དགོངས་པས་བསྒྲལ། ཨོཾ་བྷྲཱུྃ། ཧཱུྃ་བྷྲཱུྃ། ཏྲཱྃ་བྷྲཱུྃ། ཧྲཱིཿབྷྲཱུྃ། ཧཱ་བྷྲཱུྃ། ཞེས་གཏུབ་ནས། ཧཱུྃ བཻ་ཌཱུར་སྔོན་པོའི་རིན་ཆེན་རི་རབ་ལ། །ཉི་མ་སྟོང་གི་འོད་ཟེར་གདལ་བ་ལྟར། །སེམས་དཔའ་སྔོན་པོ་འོད་ཀྱི་དཀྱིལ་འཁོར་ཅན། །དཔལ་ལྡན་གཟི་བྱིན་འབར་བ་ལ་ཕྱག་འཚལ་ལོ། །འོད་ཕུང་སྟུག་པོ་སྤྲིན་ལྟར་འཁྲིགས་པ་ཡི། །འཇིགས་བྱེད་རྔམས་སྟབས་བརྐྱང་བསྐུམ་ཚུལ་དུ་བཞུགས། །ཟ་བྱེད་བསྐལ་པའི་མེ་ལྟར་འབར་བ་སྟེ། །གདུག་པ་ཐམས་ཅད་རྡོ་རྗེའི་ཞལ་དུ་འདྲེན། །མི་བཟད་མཆེ་བ་གཙིགས་པའི་ཞལ་གདངས་ཤིང་། །ཁམས་གསུམ་ཟ་བར་ཆས་པའི་རྐན་སྒྲ་ཅན། །ཉི་ཟླ་རབ་ཏུ་འབར་བའི་སྡང་མིག་གིས། །བདུད་དཔུང་སྲེག་པར་མཛད་ལ་ཕྱག་འཚལ་བསྟོད། །འབྱུང་པོའི་ཤ་ནི་ཟན་ལས་ཞིམ། །གཏི་མུག་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །སྐུ་ཡི་དངོས་གྲུབ་སྩལ་དུ་གསོལ། །འབྱུང་པོའི་ཁྲག་ནི་ཆང་ལས་ཞིམ། །འདོད་ཆགས་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །གསུང་གི་དངོས་གྲུབ་སྩལ་དུ་གསོལ། །འབྱུང་པོའི་རུས་པ་མར་ལས་ཞིམ། །ཞེ་སྡང་མཆོད་པ་བླ་ན་མེད། །བླ་མེད་མཆོད་པ་འདི་བཞེས་ལ། །ཐུགས་ཀྱི་དངོས་གྲུབ་སྩལ་དུ་གསོལ། །ཞེས་དང་རྩ་སྔགས་ཀྱི་མཐར་ཁཱ་ཧི་བཏགས་པས་འབུལ་ཞིང་སྟོབ་བོ། བཞི་པ་ཚོགས་ལ་རོལ་པ་ནི། ལས་ཀྱི་རྡོ་རྗེས་འཁོར་ལོ་འདུས་པའི་གཙོ་བོ་ལ་ཕྱག་བྱས་ཐབས་ཤེས་ཀྱི་རྫས་བསྣོལ་མར་འབུལ་ཞིང་། མཉམ་ཉིད་མི་གཡོ་མཉམ་པའི་སངས་རྒྱས་དཔལ། །ལོག་རྟོག་མཚན་མའི་སྤྲོས་པ་ངང་གིས་ཞི། །དམ་ཚིག་བཞིན་ལས་ཅི་བདེར་སྤྱད་ནས་ཀྱང་། །མཉམ་རྫོགས་ཆེན་པོའི་མཆོད་པ་བཞེས་སུ་གསོལ། །ཞེས་འབུལ་ཞིང་། དེས་ཀྱང་པདྨའི་ཕྱག་རྒྱ་བསྐོར་ཞིང་། ཨ་ལ་ལ་ཧོཿ ཞེས་ལེན་ཅིང་རྣལ་འབྱོར་པ་རྣམས་ལྷར་སྣང་གི་ངང་ནས་ནང་གི་སྲེག་བླུགས་ཀྱི་ཚུལ་དུ་ཚིམ་པར་རོལ་ཞིང་། དེའི་མཐར་སྨོན་ལམ་ཡང་གདབ་བོ། །ལྔ་པ་ལྷག་མའི་ཆོ་ག་ལ་སྔར་ཟུར་དུ་བཅད་པའི་ཕུད་དང་མེ་གཏོར་བཅས་བཤམས་ལ། ལྷག་མའི་དམ་ཚིག་གསང་བའི་འདོད་ཡོན་བདུད་རྩིའི་ཕུང་པོ་ཟད་མི་ཤེས་པར་བསམ་ལ། ཨོཾ་ཨཱཿཧཱུྃ་གིས་བྱིན་གྱིས་བརླབས་ནས། འདོད་རྒྱལ་གྱི་ཕྱག་རྒྱ་བཅིངས་ཏེ། ཨེ་ཨཱ་ར་ལི་ཧྲཱིཾ་ཧྲཱིཾ། ཨོཾ་ཌཱ་ཀི་ཨཱ་ཀཪྵ་ཡ། ཨཱ་ཀཪྵ་ཡ། པྲ་བེ་ཤ་ཡ། པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཥ་ཡ་ཏོ་ཥ་ཡ། མོ་ཧ་ཡ། མོ་ཧ་ཡ། སརྦ་བཛྲ་ཌཱ་ཀི་ནཱི་ནཱཾ། ཧྲི་ད་ཡཾ་ཧཱུྃ་ཛཿ ཛཿཧཱུྃ་བྃ་ཧོཿ ཌཱ་ཀི་ཧཱུྃ་ཛཿ ཞེས་སྤྱུགས་པའི་བརྡ་དང་བཅས་ཏེ་སྤྱན་དྲངས་པས། ལྷག་མའི་མགྲོན་རྣམས་བྱ་ཁྱུང་ཐང་ལ་ལྷགས་པ་བཞིན་སྐད་ཅིག་གིས་བྱོན་པར་བསམ་ཞིང་། ཛ་གད་ཀྱི་ཁ་ཕྲུ་མཁའ་དབྱིངས་ཀྱི་རྒྱས་དམེ་གཏོར་དུ་དབབ་ཅིང་། ཨོཾ་གུ་རུ་ཀྲོ་དྷ་རཏྣ་ས་མ་ཡ་པྲཱི་ཤ་པུརྦ་བུདྡྷ་ཀྵེ་ཊ་ཀྵོ་བྷ་ཀ་ར་ཧཱུྃ་ཕཊ། ཅེས་པས་བྱིན་གྱིས་བརླབས་ནས་ཕུད་ལྷག་བསྲེས་ལ། ཧེ་རུ་ཀ་ཡི་ཐོད་རྒྱ་བཅས་ཏེ། ཨོཾ་བཛྲ་ཌཱ་ཀི་ནཱི་པྲ་ཏཱིཙྪ་མཾ་བ་ལིཾ་ཏེ་ཧཱུྃ་ཕཊ། དེ་བཞིན་དུ། ཨོཾ་བུདྡྷ་ཌཱ་ཀི་ནཱི་ནས་ཨོཾ་ཕཊ། ཨོཾ་རཏྣ་ཌཱ་ཀི་ནཱི་ནས་ཏྲཱཾ་ཕཊ། ཨོཾ་པདྨ་ཌཱ་ཀི་ནཱི་ནས་ཧྲཱིཿཕཊ། ཨོཾ་ཀརྨ་ཌཱ་ཀི་ནས་ཨཱཿཕཊ། ཅེས་མཆོད་ཅིང་སྨན་རཀ་སྦྲེང་སྟེ། སླས་དང་བྱི་མོ་བྲན་མོའི་ཚོགས། །ལྷག་མའི་མཆོད་སྦྱིན་འདོད་པ་སྦྱིན། །རང་གི་དམ་ཚིག་རབ་བསྒྲགས་པས། །གང་འདོད་ལས་དེ་བྱེད་པར་བསྒོ། །སྔོན་ཚེ་དཔལ་ཆེན་ཧེ་རུ་ཀ །ཤིན་ཏུ་གདུག་ཅིང་གཏུམ་བག་ཅན། །ཐམས་ཅད་མ་ལུས་འདུལ་མཛད་པའི། །དབང་དང་བྱིན་རླབས་རྨད་པོ་ཆེ། །ལྷ་ཆེན་ལ་སོགས་དབང་དུ་བསྡུས། །འཁོར་རྣམས་དབང་ཕྱུག་སླས་སུ་བྱས། །སོ་སོའི་ལས་རྣམས་བསྐོས་པ་དེ། །ཇི་ལྟར་དམ་བཅས་ཁས་བླངས་པའི། །མ་ཐོགས་མྱུར་དུ་མངོན་པར་ཕྱུང་། །དམ་བཅས་བཞིན་དུ་མ་བྱས་ནས། །ཇི་ལྟར་དམ་བཅས་མནའ་བོར་བའི། །སྡོམ་བཅས་དེ་ལས་འདའ་བར་འགྱུར། །དམ་ཚིག་དེ་ལས་འདས་གྱུར་ན། །མགོ་ལུས་སྙིང་ཡང་ཚལ་པ་བདུན། །ཡཀྵ་ཁྲོ་བོས་གཏུབ་པར་འགྱུར། །དེ་བས་རྣལ་འབྱོར་སྔགས་འཆང་གིས། །ཇི་ལྟར་བཅོལ་བ་བཞིན་དུ་བྱོས། །ལས་དེ་མངོན་དུ་མ་བྱས་ན། །རང་གིས་མནའ་བོར་ཁས་བླངས་པས། །རུལ་མྱག་ཚིག་ནས་དམྱལ་བར་འགྲོ། །རྣལ་འབྱོར་དམ་ལ་གནས་གྱུར་པའི། །ལས་རྣམས་ཡོངས་སུ་བྱ་བ་དང་། །འཁོར་རྣམས་བུ་གཅིག་བཞིན་དུ་སྐྱོང་། །ཕྲ་མེན་མ་ཡང་དངོས་གྲུབ་ཐོབ། །བཅོལ་བའི་ལས་རྣམས་མངོན་དུ་བྱོས། །ཞེས་བརྗོད་ཅིང་ལྷག་གཏོར་ཕྱིར་དོར་ནས། ཡ་ཧི་གཙྪཿ ཞེས་པས་ཕྱི་རོལ་འཁོར་གྱི་མགྲོན་རྣམས་རང་གནས་སུ་གཤེགས་པར་བསམ་མོ། །གཉིས་པ་བརྟན་མ་སྐྱོང་བ་ནི། ཕྱི་རོལ་དུ་བརྟན་མའི་གཏོར་མ་སྨན་ཕུད་ཀྱིས་བྲན་ལ། ཏྲཾ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཏྲཾ་རཏྣ་ཏྲཻ་ལོཀྱ་ཕཊ། གཏོར་མའི་རྡུལ་ཕྲ་རབ་རེ་རེ་ཞིང་རིན་པོ་ཆེའི་གུར་ཁང་ལོངས་སྤྱོད་ཟད་མི་ཤེས་པས་ནམ་མཁའ་གང་བར་བསམ་ལ། འབྲུ་གསུམ་གྱིས་བྱིན་གྱིས་བརླབས། ཧཱུྃ ཚོགས་དང་བཀའ་ཡི་ཚོགས་བཅས་ཉིད། །ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །འདིར་བྱོན་དམ་སྐོངས་ཕྲིན་ལས་མཛོད། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་མོ་བཞི། །བོད་ཁམས་སྐྱོང་བའི་ཆེ་ཞེ་ཆེན་མོ་རྣམས། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་མང་པོའི་སྒྲ་དང་བཅས། །འདིར་བྱོན་དམ་སྐོངས་ཕྲིན་ལས་མཛོད། །ཆེ་ཞེ་ཆེན་མོ་ཁྱེད་རྣམས་ཀྱང་། །ཨ་སུ་ར་ཡི་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །རླངས་ཆེན་དཔལ་གྱི་སེང་གེ་ཡིས། །ཞིང་ཆེན་སྟན་ལ་བཀོད་ནས་ཀྱང་། །ལག་ཏུ་རྡོ་རྗེ་གཏད་ནས་ནི། །དབང་བསྐུར་གསང་བའི་མཚན་ནས་བརྗོད། །རྡོ་རྗེ་འཆང་གི་གྲལ་དུ་བཞག །བོད་ཁམས་བསྲུང་ཞིང་སྐྱོང་བ་དང་། །རྣལ་འབྱོར་སྒྲུབ་པའི་གྲོགས་བྱ་ཞེས། །ཇི་ལྟར་ཁས་བླངས་དམ་བཅས་པའི། །གཡར་དམ་གཉན་པོ་རྗེས་དགོངས་ལ། །དམ་རྫས་བཀའ་ཡི་གཏོར་མ་ལོངས། །བཅོལ་བའི་ཕྲིན་ལས་འགྲུབ་པར་མཛོད། ཨོཾ་ལ་ལ། ལེ་ལེ། ཏཾ་ཏཾ། ཏེ་ཏེ། ཁ་རཀྨ། མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃ། ཞེས་དང་། མ་ཧཱ་པཉྩ་སོགས་ཀྱིས་སྨན་གཏོར་རཀྟས་ཀྱང་མཆོད་ཅིང་སྨན་རཀ་སྦྲེང་། ཕྲིན་ལས་གསོལ་ནས། ཡ་ཧི་གཙྪས་གཤེགས་གསོལ་བྱས་ལ། གཏོར་མ་གཙང་སར་བསྐྱལ་ལོ། གསུམ་པ་ཉེར་བསྡུ་བྱ་བ་ནི། ཐུན་མཚམས་ལ་འཇུག་པའམ་ཉལ་བ་ན། བྷྲཱུྃ་བི་ཤྭ་བི་ཤུདྡྷེ། ཧཱུྃ་ཧ་ཧེ་ཕཊ་བྷྱོ། ཞེས་པས་དཀྱིལ་འཁོར་གསལ་བཏབ་ལ། སྐབས་འདིར་མཆོད་བསྟོད་དང་བཟོད་གསོལ་ནི་བྱས་ཀྱང་ཆོག་ལ་མ་བྱས་ཀྱང་མི་འགལ་ལོ། །དེ་ནས་རྟག་མཐའ་བསལ་ཕྱིར། ཧཱུྃ་ཞེས་བརྗོད་པས། རང་གི་སྙིང་གའི་འོད་ཀྱིས་ཕོག་པས་དག་པའི་སྣོད་བཅུད་ཐམས་ཅད་གཞལ་ཡས་ཁང་སྲུང་འཁོར་དང་བཅས་པ་ལ་ཐིམ། གཞལ་ཡས་ཁང་གི་རྒྱན་ཐམས་ཅད་ཡབ་རྣམས་ལ་ཐིམ། དངོས་པོ་ཐམས་ཅད་ཡུམ་རྣམས་ལ་ཐིམ། འཁོར་རྣམས་ཕྱི་ནས་རིམ་བཞིན་གཙོ་བོ་ཡབ་ཡུམ་ལ་ཐིམ། ཡུམ་ཡབ་ལ་ཐིམ། དེ་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་ཧཱུྃ་ལ་ཐིམ། ཧཱུྃ་གྱེན་རྫོགས་ནཱ་དའི་བར་དུ་བསྡུས་ནས་མཉམ་པ་ཉིད་ཀྱི་དབྱིངས་སུ་བསྟིམ་མོ། །ཆད་པའི་མཐའ་བསལ་བའི་ཕྱིར། ཉལ་བ་ལས་ལངས་པའམ་སྤྱོད་ལམ་ལ་འཇུག་པ་ན། ཨོཾ་བཛྲ་མ་ཧཱ་ཤྲཱི་ཧེ་རུ་ཀ་ཧཱུྃ། ཞེས་བརྗོད་པས། དཔལ་ཆེན་པོ་ཧེ་རུ་ཀ་ཞལ་གཅིག་ཕྱག་གཉིས་པ་སྣང་སྟོང་སྒྱུ་འཕྲུལ་དྲྭ་བའི་སྐུར་ལྡང་ངོ་། །བཞི་པ་གོ་ཆ་བགོ་ཞིང་ལུས་བསྲུང་བ་ནི། རང་གི་སྤྱི་བོར་ཨོཾ། མགྲིན་པར་ཨཱཿ སྙིང་གར་ཧཱུྃ་ཡིག་རྣམས་ཀྱིས་མཚན་པར་བསམ་ཞིང་། བཛྲ་ཀཱ་ཝཱ་ཙི་རཀྵ་ཧཾ། ཞེས་བརྗོད་པས་ལུས་ཐམས་ཅད་རྡོ་རྗེའི་གོ་ཆས་བཅིངས་ཏེ་ཅིས་ཀྱང་མི་ཤིགས་པར་བལྟས་ལ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱིས་ཀུན་ལ་ཁྱབ། །ཅེས་བརྗོད་ཅིང་ང་རྒྱལ་བྱ། དེ་ནས་མཛུབ་མོ་གཡས་གཡོན་གཉིས་སུ་ཨོཾ་དང་ཏྲཱུཾ་ལས་རྡོ་རྗེ་གནོད་སྦྱིན་དང་མི་འཆི་ཐབས་སྦྱོར་བསྐྱེད་ལ། ལྟེ་བ་སྙིང་ག་ལྟག་པ་དང་། དཔྲལ་བ་སྤྱི་བོ་གནས་ལྔ་དུག ཨོཾ་ཏྲུཾ། ཞེས་བརྗོད་བཞིན་པར་མཛུབ་མོ་གཉིས་བསྣོལ་ཏེ་རིམ་པར་རེག་པས། ཁྲོ་བོ་གཉིས་དང་རྡོ་རྗེའི་ལུ་གུ་རྒྱུད་ཀྱིས་བསྲུང་ཞིང་བརྟན་པར་བྱའོ། །དེ་ནས་ཐོད་པའི་ཕྱག་རྒྱ་མགོ་བོའི་གནས་ལྔར་བཞག་ལ། ཨོཾ་བཛྲ་ཀ་པཱ་ལ་ཨ་བྷི་ཥིཉྩ་ཏྲཾ་ཏྲཾ། ཞེས་ཐོད་པའི་ཁང་བུ་རིགས་ལྔའི་ཅོད་པན་གྱིས་དབང་བསྐུར་བར་མོས། དར་དཔྱངས་ཀྱི་ཕྱག་རྒྱ་བཅས་ལ། ཨཱོཾ་ཨཱརྱ་ལམྦྷོ་དྷ་ར་ཨ་བྷི་ཥིཉྩ་ཧྲཱིཿཧྲཱིཿ ཞེས་པས་ཅོད་པན་མཐིང་ག་གཡས་སུ་འཕྱང་ཞིང་དམར་པོ་གཡོན་དུ་འཕུར་བར་བསམ་མོ། །ཨོཾ་གུ་ཧྱ་ས་མ་ཡ་སྟྭཾ། ཞེས་བརྟན་པར་བསམ་ཞིང་། ཡི་གེ་བརྒྱ་པ་ལན་གསུམ་ལ་སོགས་པར་བཟླས་པས་ཤིན་ཏུ་བརྟན་པར་བྱས་ལ། དགེ་བ་བསྔོ་ཞིང་བཀྲ་ཤིས་བརྗོད་པ་རྣམས་ཀྱིས་མཐའ་རྒྱས་པར་བྱའོ། ལྔ་པ་སྤྱོད་ལམ་གྱི་རྣལ་འབྱོར་ནི། སྣང་སྤྱོད་ཐམས་ཅད་རང་བཞིན་སྒྱུ་འཕྲུལ་དྲྭ་བའི་དཀྱིལ་འཁོར་དུ་ཤེས་ཤིང་ཟ་ཉལ་འགྲོ་འཆགས་ཀྱི་སྤྱོད་ལམ་ཐམས་ཅད་ཐབས་ཤེས་ཀྱི་རྣལ་འབྱོར་ཁྱད་པར་ཅན་གྱིས་ཟིན་པའི་སྒོ་ནས་དོན་ཡོད་པ་ལ་བསླབ་པར་བྱའོ། །དེ་ལྟར་ཧེ་རུ་ཀ་དཔལ་སྒྲུབ་པའི་ཐབས། །གཏེར་ཆེན་བླ་མའི་གསུང་གི་བདུད་རྩིའི་བཅུད། །བསྙེན་པའི་ལས་བྱང་ཉུང་ངུར་དྲིལ་བ་འདི། །དང་པོའི་ལས་ཅན་རྣམས་ལ་ཕན་ཕྱིར་བྲིས། །གཟུ་ལུམ་རས་ཆོད་ཉེས་པ་མཆིས་ན་བཤགས། །ལེགས་པར་བཤད་པའི་ཆ་ཤས་གང་ཡོད་པའི། །དགེ་དེས་ལན་འདིར་སློབ་པའི་གང་ཟག་རྣམས། །ཟུང་འཇུག་ཆེན་པོའི་གོ་འཕང་མངོན་བྱེད་ཤོག །ཅེས་སྒྱུ་འཕྲུལ་དྲྭ་བ་ཧེ་རུ་ཀའི་སྒྲུབ་ཐབས་གཏེར་ཆེན་ཆོས་ཀྱི་རྒྱལ་པོའི་གསུང་ལས་བསྙེན་པའི་ལས་བྱང་ཉུང་ངུར་བསྡུས་ཏེ། རང་དང་སྐལ་མཉམ་རྣམས་ལ་ཕན་པའི་བློས་རིག་འཛིན་གྱི་བཙུན་པ་པདྨ་བཛྲས་གཡི་སྟོད་དབེན་པའི་ནགས་ཚལ་དྲྭ་བ་ཅན་དུ་བྲིས་པ་གསང་ཆེན་སྙིང་པོའི་བསྟན་པ་ཕྱོགས་དུས་ཀུན་ཏུ་རྒྱས་པའི་རྒྱུར་གྱུར་ཅིག། །།

སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་ལ་བསྟེན་པའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཉི་མའི་འོད་ཟེར།

༄༅། །སྒྱུ་འཕྲུལ་དྲྭ་བ་ཁྲོ་བོའི་དཀྱིལ་འཁོར་ལ་བསྟེན་པའི་སྦྱིན་སྲེག་བསྙེན་པའི་ཁ་སྐོང་གི་ཆེད་དུ་བྱས་པ་ཉི་མའི་འོད་ཟེར་ཞེས་བྱ་བ་བཞུགས་སོ། །ཧེ་རུ་ཀ་ལ་ཕྱག་འཚལ་ལོ། །འདིར་སྒྱུ་འཕྲུལ་ཁྲོ་བོའི་སྦྱིན་སྲེག་གི་ཆོ་ག་བཀླག་ཆོག་མར་བཀོད་པ། ལོ་ཆེན་རིན་པོ་ཆེའི་གསུང་སོར་བཞག་ལས། མདུན་དཀྱིལ་དང་མ་འབྲེལ་བ་བསྙེན་པའི་ཁ་སྐོང་སོགས་ཀྱི་ཆེད་དུ་ཞི་བའི་སྲེགས་བླུགས་ཀྱི་ཁ་བསྒྱུར་ཅུང་ཟད་བགྱིས་ཏེ་བྲིའོ། །དེ་ལ་ཐོག་མར་བཅས་བཤོམས་ནི། ཐབ་སྟེགས་གྲུ་བཞིར་རྒྱར་ཁྲུ་དོ་དང་དཔངས་ཁྲུ་ཕྱེད་པའི་ཁར་དྲི་དཀར་པོ་དང་བ་བྱུང་གི་ཆག་ཆག་བཏབ། དེའི་ངོས་ཀྱི་མཐའ་ནས་ཟླུམ་སྐོར་གྱི་མུ་ཁྱུད་ནག་པོ་ལ་ཧཱུྃ་ཡིག་དང་སེང་མགོ་སྤེལ་བའི་ནང་དུ་འཁོར་ལོ་དཀར་པོ་རྩིབས་བཞི་པ་བྲི། དེའི་ལྟེ་བར་ཐབ་ཁུང་བརྩིག་ན་རྒྱར་ཁྲུ་གང་དང་དཔངས་སུ་ཁྲུ་ཕྱེད་ཟླུམ་པོར་བསླང་བའི་སྟེང་ནས་ཕྱིར་འགྱེད་པའི་སོར་བཞིའི་ཚད་ཅན་གྱི་ཁ་ཁྱེར་བང་རིམ་གསུམ་པ་ནང་ནས་རིམ་པར་འཁོར་ལོ་ལྕགས་ཀྱུ་འོད་ཕྲེང་གིས་བསྐོར་བའི་དབུས་སུ་སྲབ་འཐུག་སོར་གང་ཙམ་པའི་ཐབ་མཚན་འཁོར་ལོ་ཧཱུྃ་ཡིག་གིས་མཚན་པ་སྟེ། ཐམས་ཅད་ཀྱང་ཚོན་དཀར་པོས་བྲི་བར་བྱའོ། །གང་ལྟར་ཡང་འོ་མ་ཅན་གྱི་ཤིང་རྩེ་མོའི་ཆ་ལས་བྱུང་བའམ། དགོན་པའི་བ་ལྕི་སྐམ་པོ་སྲོག་ཆགས་མེད་པས་ཐབ་ནང་དུ་ཐབ་ལས་ཅུང་ཟད་དམའ་བའི་ཟླུམ་པོར་བརྩིགས་པའི་ཤར་ལྷོར་མེ་ཚང་བཅའ། སྟེགས་བུའི་གྲར་མདའ་བཞི་བཙུགས་པ་སྲད་བུ་དཀར་པོ་བསྣོལ་མར་བྲན་ཅིང་སྟེང་ནས་མེ་དར་དཀར་པོ་དགབ། སྟེགས་བུའི་ཤར་ལྷོའི་ཟུར་དུ་མདའ་དར་དམར་པོ་གཟུག །ཐབ་ཀྱི་མདུན་དུ་སྟན་དཀར་ཞིང་འཇམ་པ་དང་། དེའི་གཡས་གཡོན་དུ་ཁྲུ་གང་བའི་ཚད་ཀྱིས་རྫས་སྟེགས་དང་མཆོད་སྟེགས་དཀར་པོ་སྟེ་གསུམ་ཀ་ལ་སྣ་ཚོགས་པདྨ་འདབ་མ་བརྒྱད་པ་རེ་བྲི། སྟན་གྱི་མདུན་དུ་ཞེང་མཐོ་གང་དང་དཔངས་སློབ་དཔོན་གྱི་སྐེད་པ་ཙམ་སླེབ་པའི་མེ་ཡོལ་གངས་རི་བྲིས་པ་བཞག །གཡས་ཕྱོགས་རྫས་སྟེགས་ཀྱི་པདྨའི་ལྟེ་བར་བ་ལས་བྱུང་བའི་མར་ཁུ་དགང་བླུགས་ཀྱི་གཟར་བུ་ཁ་སྦྱར་བ་དང་བཅས་པ། མདུན་གྱི་འདབ་མར་འོ་མ་ཅན་གྱི་རྩེ་མོའི་ཆ་ལས་བྱུང་བའི་ཡམ་ཤིང་མཐོ་གང་བརྩེ་གཉིས་མར་ཁུས་ཉུག་པ། པད་འདབ་ལྷག་མ་བདུན་ལ། ཏིལ་དཀར། མངར་གསུམ། ནས་དཀར། འབྲས་དཀར་གྱི་ཆན་སོགས་ཁ་ཟས་དཀར་པོ་དང་། ཙནྡན་དཀར་པོ་སོགས་དྲི་དཀར་པོའི་རིགས་དང་། ཙམ་པ་ཀ་སོགས་མེ་ཏོག་དཀར་པོའི་རིགས་ཏེ་ཐམས་ཅད་རང་བཞིན་ནམ་བཅོས་པས་དཀར་བ་འདས་མ་འདས་ཀྱི་ཁྱད་པར་གྱི་ཕྱི་ནང་ཉིས་རིམ་དང་ཐུགས་དམ་བསྐུལ་བའི་རྫས་ཡུངས་ཀར་རྣམས་རིན་པོ་ཆེ་དཀར་པོའི་སྣོད་དུ་བཤམ། གཡོན་ཕྱོགས་མཆོད་སྟེགས་ཀྱི་པདྨའི་ལྟེ་བར། འོ་མ། འབྲས་ཆན་དངུལ་ཕྱེ་མེ་ཏོག་དཀར་པོ་རྣམས་བསྲེས་པའི་མར་དཀར་གྱི་འདས་གཏོར་ཟླུམ་པོ་རིལ་བུ་དྲུག་གིས་བསྐོར་བ་མཉྫིའི་སྟེང་བཀོད་པའི་མདུན་དུ་རྒྱུ་དེ་ལས་འཇིག་རྟེན་པའི་གཏོར་མ་དཀར་ཟླུམ། བདུན་གྱི་པད་འདབ་ལ་རྡོར་དྲིལ། དེ་ཡི་གཡས་གཡོན་གྱི་འདབ་མར་སྨན་རཀ །པད་འདབ་ལྷག་མ་ལྔ་ལ་ཞབས་བསིལ་དང་བཞི་བསྣོལ་གྱི་མཆོད་རྫས་རང་བཞིན་ནམ་བཅོས་པས་དཀར་བ་གཡས་བསྐོར་དུ་བཤམས་ཤིང་ལས་བུམ་ཀྱང་ཅི་བདེར་བཞག་གོ། །དེ་ལྟར་ཤོམས་ཟིན་ནས་ཆོ་ག་ནི། སློབ་དཔོན་ཆས་གོས་དང་རིན་པོ་ཆེའི་རྒྱན་དཀར་པོས་བརྒྱན་ལ་རྡོ་རྗེའི་སྐྱིལ་ཀྲུང་གིས་ཤིས་པའི་ཕྱོགས་སུ་ཁ་བལྟས་པས་འདུག་ནས། དོན་གྱི་སེམས་ཆོས་ཐམས་ཅད་ཀྱི་གཤིས་ལུགས་ལྷག་པ་བདེན་པ་དབྱེར་མེད་ཀྱི་ལྟ་བ་རྟོགས་ཤིང་བྱང་ཆུབ་ཀྱི་སེམས་དང་ལྡན་པས། ཀུན་སློང་སྟོངས་ཀྱི་སེམས་རང་གཞན་གྱི་གནོད་སྡིག་སེལ་བར་འདོད་པའི་སེམས་ཞི་ཞིང་དང་བའི་སྒོ་ནས། ངག་སྔགས་རྣམས་ཕྲ་ཞིང་ཞིབ་ལ་རྒྱུན་མི་ཆད་པར་བཟླ་བའི་ཚུལ་གྱིས་ཆོ་གའི་ལས་ལ་འཇུག་སྟེ། ཨོཾ་བུདྡྷ་ཤྲཱི་ཧེ་རུ་ཀ་ཧཱུྃ། ཞེས་པས་རང་ཉིད་བུདྡྷ་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པས་དཀྱིལ་འཁོར་གྱི་ཤར་སྒོའི་ཐད་དུ་འཁོད་དེ་སྦྱིན་སྲེག་གི་ལས་རིམ་ལ་འཇུག་པར་མོས་པས། རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ་དང་། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་པའི་བྱང་ཆུབ་སེམས་ཀྱི་རང་བཞིན་དུ་མོས་པ་བརྟན་པར་བྱས་ལ། ཨོཾ་མ་ཧཱ་བཛྲ་ཧཱུྃ། ཞེས་པས་རྡོ་རྗེ་གསོར་ཞིང་ཐུགས་ཀར་འཛིན། ཨོཾ་བཛྲ་གྷཎྜེ་ཨ། དྲིལ་བུ་དཀྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་འཁྱུད་རྒྱ་བྱས་ཏེ་དམ་ཚིག་གསུམ་དྲན་པར་བྱའོ། །དེ་ནས་ཕྱི་མཆོད་རྣམས་སྒྲུབ་ཐབས་ལྟར་བརླབ་ཅིང་། སྨན་རཀ་གཉིས་སྔགས་ཙམ་གྱིས་བྱིན་གྱིས་བརླབ་བོ། །ལས་གཏོར་དང་སྲེག་རྫས་རྣམས་ལ་ལས་བུམ་གྱི་ཆུ་འཐོར་ཞིང་། ཧཱུྃ་བིགྷྣཱནྟ་ཀྲྀཏ་ཕཊ་དང་། སྭ་བྷཱ་ཝས་བསང་སྦྱང་། སྟོང་པའི་ངང་ལས་མ་དང་ཨ་ལས་ཉི་ཟླའི་གྭའུའི་སྣོད་དུ་རང་གི་ཐུགས་ཀ་ནས་གཏོར་མའི་གནས་སུ་འབྲུ་གསུམ་དང་སྲེག་རྫས་ཀྱི་གནས་སུ་ཧཱུྃ་ལྔ་སྤྲོས་ཏེ་འཕྲོ་འདུས་ཡོངས་སུ་གྱུར་པ་ལས་ཞི་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་དཀར་པོ་འཕྲོ་བ་དང་། སྲེག་རྫས་རྣམས་རོ་བརྒྱ་ལྡན་པའི་ཟག་མེད་ཡེ་ཤེས་ཀྱི་བདུད་རྩི་ནམ་མཁའ་གང་བས་ཞི་བའི་ལས་སྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བསམ་ལ། ཨོཾ་ཨཱཿཧཱུྃ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཞེས་བཟླས་པས་བྱིན་གྱིས་བརླབ། དེ་ནས་ཐབ་བསང་སྦྱངས། སྟོང་པའི་ངང་ལས་མདུན་དུ་བྷྲཱུྃ་ཡིག་འཕྲོ་འདུས་ཡོངས་སུ་གྱུར་པ་ལས་འཁོར་ལོའི་ལྟེ་བ་ལ་གནས་པའི་ཞི་བའི་ཐབ་ཁུང་དཀར་ཞིང་ཟླུམ་པ་ཁ་ཁྱེར་བང་རིམ་གསུམ་དང་ལྡན་པ་འོད་ཟེར་དཀར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པའི་ཡེ་ཤེས་ཀྱི་མེ་འོད་དཀར་པོ་འབར་བར་བསམ་ལ། ཨོཾ་ཨགྣེ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་རྒྱུན་བཞག་གམ་གཙུབ་ཤིང་ལས་བྱུང་བའི་མེ་དུ་བ་མེད་པ་སྦར་ལ། ཐབ་ཀྱི་མེའི་དབུས་སུ་མ་དང་དཱིཿལས་བྱུང་བའི་ཉི་མ་དང་ར་སྐྱེས་ཀྱི་གདན་ལ་ཨོཾ་ཡིག་དཀར་པོ་འཕྲོ་འདུས་ཡོངས་སུ་གྱུར་པ་ལས་ཨགྣེ་དེ་ཝ་རྀ་ཥི་ཧཱུྃ་ཞི་བའི་མེ་ལྷ་དཀར་པོ་ཞི་ཞིང་འཛུམ་པ་དྲང་སྲོང་གི་ཆ་བྱད་ཅན་གུནྡྷེ་དང་བགྲང་ཕྲེང་འཛིན་པའི་སྐུར་གྱུར། ཨ་དཪྴ་སོགས་ཀྱིས་བསྐུར་བརླབ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣེ་དེ་ཝ་ས་མ་ཡ་ཧཱུྃ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོས་གཡབ་ཅིང་། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་ཕྱག་རྒྱ་དང་བཅས། ཨགྣེ་དེ་ཝ་རི་ཥི་ཛཿཛཿས་སྤྱན་དྲངས། ཛཿཧཱུྃ་བྃ་ཧོཿས་བསྟིམ། ཀུན་བཟང་ཞབས་བསིལ་བཞི་བསྣོལ་གྱིས་མཆོད། མེ་ལྷའི་ཞལ་ཅུང་ཟད་གདངས་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ལག་གཉིས་དེ་བཞིན་གཤེགས་པའི་ཁུ་ཚུར་དུ་བྱས་པས་དགང་བླུགས་བཟུང་ནས། ཨོཾ་ཨགྣེ་ཡེ་སྭཱ་ཧཱ། ཞེས་གཡས་པའི་བླུགས་གཟར་བདུན་གྱིས་གཡོན་པའི་དགང་གཟར་བཀང་སྟེ་རྗེས་གཟར་བུ་ཁ་སྦྱར་ནས་པུས་མོའི་ནང་ལས་མི་འདའ་བས་གཡས་བསྐོར་གྱིས། ཨོཾ་ཨགྣེ་དེ་ཝ་རྀ་ཥི་ཧ་བྱ་ཀ་བྱ་དི་བྱ་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤཱིནྟཾ་ཀུ་རུ་ཡེ་སྭཱ་ཧཱ། ཞེས་ལན་གསུམ་གྱིས་དགང་བླུགས་ཕུལ། དེ་རྗེས་སྔགས་ཁོ་ནས་ཡམ་ཤིང་། མར་ཁུ་སྲེག་རྫས་རྣམས་རེ་རེ་ནས་ལྔའམ་བདུན་སོགས་གྲངས་ཇི་ལྟར་རིག་པ་ཕུལ་ལ། ཧཱུྃ། ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་པོ་ཡོངས་སུ་སྐྱོབ་པའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་གྲུབ་པ་དྲང་སྲོང་ཚུལ། །ཉོན་མོངས་སྲེག་པའི་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱི་སྤྲུལ་པའི་ཐེག་པ་ཆིབས། །བགྲང་ཕྲེང་འཛིན་ཅིང་རིག་སྔགས་གསུང་། །བདུད་རྩིའི་བཅུད་ཅན་གུནྡྷེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་ལ་བསྟོད་དེ་ཕྱག་ཀྱང་འཚལ། །ཞེས་བསྟོད་ལ། ཡུངས་ཀར་ཐབ་ཏུ་འཐོར་ཞིང་། ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་ཐམས་ཅད་ཞི་བའི་ཕྲིན་ལས་མཛད་དུ་གསོལ། །ཞེས་འདོད་གསོལ། དེ་ནས་འདས་པའི་སྲེག་ལྷ་མཆོད་པ་ནི། མེ་ལྷའི་ལྟོ་བ་ཡངས་ཤིང་རྒྱ་ཆེ་བའི་དབུས་སུ་བྷྲཱུྃ་ཡིག་འཕྲོ་འདུས་ཡོངས་སུ་གྱུར་པ་ལས། བྷྲཱུྃ་བི་ཤྭ་བི་ཤུདྡྷེ་ཡེ་ཤེས་རིན་པོ་ཆེའི་རང་བཞིན་བྷཉྫ་འབར་བའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནང་ཉིས་རིམ་འབར་བའི་བར་ཁྱམས་གཉིས་དང་ལྡན་པའི་ལྷ་གནས་རྣམས་སོ་སོའི་གདན་དང་བཅས་པ་གསལ་བར་གྱུར། འབར་བའི་འཁོར་ལོ་རྩིབས་བཞི་པ། །ཞེས་པ་ནས། དབང་ཕྱུག་ལྷ་ཆེན་ལ་སོགས་བཟུང་། །ཞེས་པའི་བར་གྱིས་གསལ་བཏབ་ལ། བདག་གི་ཐུགས་ཀ་ནས་རིགས་ལྔའི་ཧེ་རུ་ཀའི་གནས་སུ་ཧཱུྃ་ཡིག་ཟུང་ལྔ། ཁྲོ་མོ་བརྒྱད་ཀྱི་གནས་སུ་ཧ་བརྒྱད། ཕྲ་མེན་བརྒྱད་ཀྱི་གནས་སུ་ཧེ་བརྒྱད། སྒོ་མ་བཞིའི་གནས་སུ་ཕཊ་བཞི། དབང་མོ་རྣམས་ཀྱི་གནས་སུ་བྷྱོ་ཉི་ཤུ་རྩ་བརྒྱད་རྣམས་སྤྲོས་ཏེ་སོ་སོའི་གདན་ལ་འཁོད་པར་བསམ། སྥ་ར་ཎ་ཕཊ། སཾ་ཧ་ར་ཎ་ཧཱུཾ། འོད་ཟེར་སྤྲོ་བསྡུས་ཡོངས་སུ་གྱུར་པ་ལས། ཨོཾ་བུདྡྷ་ཤྲཱི་ཧེ་རུ་ཀ་ཧཱུྃ། ཞེས་པ་ནས། བཛྲ་ལམྦྷོ་དྷ་ར་བྷྱོ། ཞེས་པའི་བར་བརྗོད་པས། བཅོམ་ལྡན་འདས་དགྱེས་པ་ཆེན་པོ་བུདྡྷ་ཧེ་རུ་ཀ་ལ་སོགས་ཏེ་ལྔ་བཅུ་རྩ་བརྒྱད་ཁྲག་འཐུང་རོལ་པའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་དཀར་པོ་གཡས་འཁོར་ལོ་དང་གཡོན་རང་རྟགས་འཆང་བ་སོ་སོའི་གདན་ལ་བཞུགས་པའི་སྐུ་ལས་འོད་ཟེར་དཀར་པོའི་ཕྲེང་བ་མཁའ་ཁྱབ་ཏུ་སྤྲོ་བས་ཞི་བའི་ཕྲིན་ལས་མཛད་པར་བསམ་ལ། སྨུག་ནག་སྔོ་ནག་སེར་ནག་དང་། །ཞེས་པ་ནས། ཅི་བགྱི་ཞེས་ནི་ཆས་ཏེ་གནས། །ཞེས་པའི་བར་གྱིས་གསལ་བཏབ་ལ། རིགས་ལྔའི་དབང་རྒྱ་གནས་སོ་སོར་བཞག་སྟེ། ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཨཱཏྨ་ཀོ྅་ཧཾ། དེ་བཞིན་དུ། ཨོཾ་མ་ཧཱ་ཨཱ་དཪྴ་ཛྙཱ་ན༴ ཨོཾ་མ་ཧཱ་ས་མ་ཏཱ༴ ཨོཾ་མ་ཧཱ་པྲ་ཏྱ་བེཀྵ་ཎ༴ ཨོཾ་མ་ཧཱ་ཀྲྀ་ཏྱཱ་ནུཥྛཱ་ན༴ རྡོ་རྗེའི་ཕྱག་རྒྱ་གནས་གསུམ་དུ་བཞག་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ། ཝཱ་ཀ༴ ཙིཏྟ༴ ཞེས་བརྗོད་ཅིང་སྐུ་གསུང་ཐུགས་རྡོ་རྗེ་གསུམ་དུ་ང་རྒྱལ་བྱའོ། །ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་ཀྱི་འཁོར་ལོ་སྤྱན་དྲངས་པར་བསམ་ལ། ཧཱུྃ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་སྤྱན་འདྲེན་གྱིས། །དུར་ཁྲོད་ཆེན་པོའི་གནས་འདི་རུ། །ཞིང་ཆེན་གསར་རྙིང་སྟན་དུ་བཏིང་། །དམར་གྱི་ཨརྒྷཾ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་གཤེགས་ནས་བསྣམས་སུ་གསོལ། །ཨོཾ་རུ་ལུ་རུ་ལུ་ཧཱུྃ། ཨེ་ཧྱེ་ཧི་ཨཱ་ན་ཡ་ཛཿཧཱུྃ་བཾ་ཧོཿ ཞེས་དམ་ཚིག་པ་དང་དབྱེར་མེད་དུ་བསྟིམ་པར་བསམ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེའི་འོད་ཀྱི་སྦུ་གུ་ཅན་གྱིས་སྲེག་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ཨོཾ་བུདྡྷ་ཤྲཱི་ཧེ་རུ་ཧཱུྃ་ཞེས་བདུན་གྱིས་བཀང་བའི་དགང་བླུགས་ཁ་སྦྱར་བ། ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་སྤེལ་ཚིག་སྔར་ལྟར་བཏགས་པས་ལན་གསུམ་ཕུལ། དེ་ནས་ཡམ་ཤིང་དང་མར་ཁུ་སོགས་བསྲེག་རྫས་གཞན་རྣམས་ཀྱང་རུ་ལུ་ཁོ་ནས་གཙོ་འཁོར་སྤྱིར་བརྒྱའམ་ཉེར་གཅིག་སོགས་བཅུ་ཚན་ལྟ་བུའི་མཚམས་ཇི་ལྟར་རིགས་པར་སྤེལ་ཚིག་སྤེལ་ནས་ཕུལ་ལོ། །གསུངས་པས་བསྙེན་པའི་ཁ་སྐོང་ལ། རྣལ་འབྱོར་པ་བདག་གི་རྩ་བ་དང་ཡན་ལག་གི་དམ་ཚིག་ཉམས་ཆག་དང་འགལ་འཁྲུལ་དུ་གྱུར་པ། ལྷ་ཉེ་བར་མ་སྒོམ་པ། སྙིང་པོ་དག་པར་མ་བགྲངས་པ། ཛབ་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ་ལ་སོགས་པའི་ཉམས་ཤིང་ཞིག་རལ་ཏུ་གྱུར་པ་ཅི་མཆིས་པ་ཐམས་ཅད་ཤཱིནྟཾ་ཀུ་རུ་སྭཱ་ཧཱ། དེ་ནས་རུ་ལུའི་མཐར། མ་ཧཱ་བ་ལིངྟ་ཁཱ་ཧི། བཏགས་པས་འདས་པའི་ལས་གཏོར་དང་། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་སྨན་རཀ་བྲན་ལ། ཧཱུྃ། གཏུམ་ཆེན་དུས་མཐའི་མེ་ལྟར་འབར། །ཞེས་སོགས་ཀྱིས་བསྟོད་ལ། ཐབ་ཏུ་ཡུངས་ཀར་འཐོར་ཞིང་། ཧཱུྃ། ཡེ་ཤེས་ཀློངས་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་འབར་བའི་སྦྱིན་སྲེག་འབུལ། །བདག་གིས་ཞི་བའི་ཕྲིན་ལས་མཐར་ཕྱིན་ནས། །སྐུ་གསུང་ཐུགས་ཀྱི་དངོས་གྲུབ་ཐོབ་པར་མཛོད། །ཅེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་དཀར་པོ་འཕྲོས། བསྒྲུབ་བྱ་ལ་རེག་པས་ནད་གདོན་སྡིག་སྒྲིབ་ཐམས་ཅད་ཞི་བར་བསམ། དེ་ནས་གཏང་རག་གི་མཆོད་བསྟོད་དང་བཟོད་གསོལ་བྱས་ལ། ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་གཞལ་ཡས་ཁང་གདན་དང་བཅས་པ་རང་ལ་ཐིམ་པར་བསམ་མོ། །སླར་ཡང་། ཨོཾ་ཨགྣེ་ཡེ་ཛྭ་ལ་ཛྭ་ལ་ཧཱུྃ་ཕཊ། ཅེས་བླུགས་གཟར་གྱིས་མར་ཁུ་ཕུལ་བས་མེ་གསོས་ཏེ། འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། ཨོཾ་ཨགྣེ་དེ་ཝ་རྀ་ཥི་ཧ་བྱ་སོགས་ཀྱིས་བསྲེག་རྫས་ལྷག་རྣམས་ཕུལ། ཀུན་བཟང་སོགས་ཀྱིས་མཆོད། ཨོཾ་ཨགྣེ་དེ་ཝ་རི་ཥི་མ་ཧཱ་བ་ལིངྟ་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་པཉྩ་ཨ་མྲྀ་ཏ་ཁཱ་ཧིས་ལས་གཏོར་དང་སྨན་རཀ་ཕུལ། མེ་སྟེ་བསྲེག་བྱས་བསྟོད། ཡིག་བརྒྱས་ནོངས་པ་བཤགས། བཛྲ་མུཿས་མེ་ལྷ་ཡེ་ཤེས་པ་རང་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་པར་བསམ་ལ། ལས་ཀྱི་རྗེས་བསྡུ་ཞིང་བསྔོ་ཤིས་ཀྱིས་མཐའ་བརྒྱན་པར་བྱའོ། །དེ་ལྟར་སྦྱིན་སྲེག་ཟིན་ནས་ལས་ཀྱི་མཇུག་བསྡུ་ཚུལ་ནི། མེ་རང་ཞིར་འཇུག་པའམ། ལོང་མེད་ན་འོ་མ་དང་དྲི་དཀར་པོས་གཞིལ་བར་བྱས་ནས་ཐལ་བ་འབབ་ཆུར་བསྐྱལ་ལོ། །ཅེས་པ་འདི་ནི་རང་དང་སྐལ་མཉམ་གྱི་གང་ཟག་ཆོ་གའི་ལག་ལེན་ལ་ཆེར་མ་འདྲིས་པ་འགའ་ཞིག་ལ་ཉེར་མཁོའི་ཆེད་དུ་པདྨ་བཛྲ་པས་བྲིས་པ་དགེ་ལེགས་འཕེལ། །དགེའོ། །