བརྟན་བཞུགས་གསོལ་འདེབས་ཀྱི་ཚིག་དོན་ནོར་བུའི་ཕྲེང་བ།

༄༅། །བརྟན་བཞུགས་གསོལ་འདེབས་ཀྱི་ཚིག་དོན་ནོར་བུའི་ཕྲེང་བ་བཞུགས་སོ། །ན་མོ་ཛི་ན་པུ་ཏྲ་ཡེ། ཆོས་ཀུན་མཉམ་པར་གཟིགས་པའི་ཡེ་ཤེས་ཀྱིས། །ཐོག་མཐའ་བྲལ་བའི་དབྱིངས་སུ་བྱང་ཆུབ་ཀྱང་། །བརྩེ་དང་སྨོན་པའི་ཡེ་ཤེས་སྒྱུ་མའི་སྐུས། །སྲིད་མཐའི་བར་དུ་འགྲོ་ཀུན་སྐྱོངས་བར་མཛོད། །ཕུལ་བྱུང་མཁྱེན་པས་ཤེས་བྱ་ཀུན་གཟིགས་ནས། །ཟབ་མོའི་གནད་རྣམས་ཉུང་ངུའི་ཚིག་ལམ་དུ། །དྲིལ་བ་འདི་འདྲ་བདག་བློའི་ཡུལ་མིན་ཀྱང་། །བློ་ལྡན་རྣམས་ཀྱི་སྐྱེས་ཐོབ་མཁྱེན་རབ་ཀྱི། །རྣམ་དཔྱོད་རྩལ་གྱིས་ཁྱད་པར་ངོམས་པ་ལ། །སྤྲོ་བའི་གཏམ་འདི་མཁས་པས་སྨད་འོས་མིན། །དེ་ལ་བཀའ་དྲིན་མཚུངས་མེད་རྗེ་བླ་མ་ཉིད་ཀྱི་ཞལ་ནས་གསུང་བའི་བརྟན་བཞུགས་ཀྱི་ཤོ་ལོ་ཀ་གསུམ་པོ་འདིའི་དོན་ཉུང་ངུར་དཀྲོལ་བ་ལ། བདེན་པའི་སྟོབས་ཀྱིས་སྨོན་ཚིག་ནུས་ལྡན་དུ་བྱིན་གྱིས་རློབ་པ་དང་། བརླབ་བྱ་སྨོན་པའི་དོན་དངོས་སོ། །དང་པོ་ནི། ཨོཾ་སྭ་སྡི་ཞེས་པ་ཤིས་པར་བརྗོད་པའི་སྒོ་སྟེ་འདི་ནི་སྒྲ་ཡང་པ་ཞིག་པས་ཐུན་མོང་དང་ཐུན་མོང་མ་ཡིན་པའི་བཤད་སྦྱར་ཇི་ལྟར་བྱས་ཀྱང་རུང་བ་ཞིག་ཡིན་ཀྱང་དོན་ལ་ནི་དགེ་ཞིང་ཤིས་པར་བྱེད་པའི་དོན་ནོ། །གང་ཞིག་ན་དོན་དུ་གཉེར་བ་སྨོན་པའི་ལམ་མོ། །གང་གིས་ན་བདེན་པའི་སྟོབས་ལ་བརྟེན་ནས་སོ། །ཚུལ་ཇི་ལྟར་ན་དབང་པོ་དྲུག་གི་ཡུལ་དུ་གཞན་དབང་རྟེན་ཅིང་འདྲེལ་བར་འབྱུང་བའི་རང་བཞིན་དུ་སྣང་བ་ལ། ཀུན་ཏུ་བཏགས་པའི་བློས་རང་དང་སྤྱིའི་མཚན་ཉིད་དུ་སྒྲོ་བཏགས་པའི་ཆོས་ཐམས་ཅད་ཇི་ལྟར་སྣང་ཞིང་བཏགས་པའི་དོན་དེ་ལྟར་རང་གི་ངོ་བོས་བདེན་པར་གྲུབ་པ་ཅུང་ཟད་ཀྱང་མེད་པ་ཡོངས་གྲུབ་དོན་དམ་པའི་བདེན་པ་དམིགས་པ་མཐའ་དག་དང་བྲལ་བའི་ཆོས་ཀྱི་དབྱིངས་སྟོང་པ་ཉིད་དང་། ཡུལ་དང་ཡུལ་ཅན་གཉིས་སུ་མེད་པར་ཟབ་ཞི་སྤྲོས་པ་དང་བྲལ་བའི་ངོ་བོར་མཉམ་པ་ཉིད་དུ་སྦྱོར་བའི་འཕགས་ལམ་དོན་གྱི་འོད་གསལ་གང་ཞིག །གཞི་དུས་ཀྱི་འོད་གསལ་དང་། ལམ་དུས་དཔེ་ཡི་འོད་གསལ་དག་ལས་ཁྱད་པར་དུ་བྱ་བའི་ཕྱིར་མཆོག་གི་སྒྲས་བསྟན་ཅིང་། དེ་ཉིད་ངེས་དོན་གྱི་རྡོ་རྗེ་སེམས་དཔའ་དང་། རྟོགས་པ་ཀུན་ཏུ་བཟང་པོ་དང་། མཐར་ཐུག་དེ་ཁོ་ན་ཉིད་སྟོན་པའི་བླ་མ་དམ་པ་རྣམས་ཀྱང་སྒྲ་ཇི་བཞིན་པར་ཡིན་པས་ལྡོག་ཆས་ཐ་དད་དུ་ཕྱེ་བ་ཙམ་ལས་འོད་གསལ་དོན་དམ་བདེན་པའི་ངོ་བོར་དབྱེར་མི་ཕྱེད་པའི་ཚུལ་རང་རིག་མངོན་སུམ་གྱིས་མངོན་དུ་མཛད་པའི་བདེན་པས་རྒྱལ་བའི་སྲས་བྱང་ཆུབ་སེམས་དཔའ་ཁྱོད་ཀྱི་ཞབས་ཀྱི་པདྨོ་འགྲོ་བ་ལྷ་དང་བཅས་པའི་བསོད་ནམས་ཀྱི་ཞིང་དུ་ཕྱི་ནང་གི་རྐྱེན་གང་གིས་ཀྱང་མི་གཡོ་བར་བསྐལ་པའི་བར་དུ་རྟག་བརྟན་གཞོམ་གཞིག་དང་བྲལ་བར་བཞུགས་པར་གྱུར་ཅིག་ཅེས་པའོ། །ཚུལ་འདི་ནི་བདེན་པ་ཐམས་ཅད་ཀྱི་མཆོག་ཡིན་ཏེ། བརྡར་བཏགས་པའི་དཀོན་མཆོག་གསུམ་ལས་ཁྱད་པར་དུ་གྱུར་པའི་དོན་དམ་པའི་དཀོན་མཆོག་གསུམ་བླ་མ་དང་བཅས་པ་མངོན་སུམ་དུ་གྱུར་པའི་བདེན་པ་ཡིན་པས་སོ། །དེ་སུ་ཞིག་གིས་མངོན་དུ་གྱུར་པའི་བདེན་པ་ཡིན་ཅེ་ན། སྨོན་ལམ་གྱི་ཚིག་བྱེད་པ་པོ་རང་ཉིད་ཀྱིས་སོ། །འདི་ནི་འཐད་པ་དང་བཅས་པ་སྟེ་སྔོན་གྱི་དུས་སུ་རྒྱལ་པོ་གཙུག་ན་ནོར་བུ་དང་། བྱང་ཆུབ་སེམས་དཔའ་རྟག་ཏུ་ངུ་ལ་སོགས་པས་རང་རང་གི་རྟོགས་པའི་བདེན་པས་རང་ཉིད་འཚོ་ཞིང་གཞེས་པ་དང་། དེར་མ་ཟད་སྔགས་དང་ཆོ་གའི་རིགས་རྣམས་ཐམས་ཅད་རང་རང་གི་ལས་འགྲུབ་པར་བྱིན་གྱིས་རློབ་པའི་ནུས་པ་དེ་དག་ནི་བྱེད་པོ་སོ་སོ་ལ་ཡོད་དགོས་པས་སོ། །རྗེས་འཇུག་གཞན་གྱིས་ཀྱང་རང་རང་གི་རྟོག་པས་སྦྱར་བ་ཞིག་ལས་བདེན་ཚིག་གིས་བྱིན་གྱིས་བརླབས་ཟིན་པའི་སྨོན་ཚིག་དེ་ཉིད་བརྗོད་པ་འབྲས་བུ་ཆེ་སྟེ་སྔོན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སྨོན་ལམ་མཛད་པ་རྗེས་སུ་ཟློས་པ་ཇི་ལྟ་བ་བཞིན་ནོ། །གཉིས་པ་སྨོན་པའི་དོན་དངོས་ལ། གནས་སྐབས་རྩ་རླུང་ཐིག་ལེའི་གནད་ལ་བརྟེན་ནས་བཞུགས་པར་སྨོན་པ་དང་། མཐར་ཐུགས་དྭངས་མ་འོད་གསལ་གྱི་སྐུ་འགྲུབ་སྟེ་འཇའ་ལུས་འཕོ་བ་ཆེན་པོར་བཞུགས་པར་སྨོན་པའོ། །དང་པོ་ནི་རྡོ་རྗེའི་ཐེག་པའི་ལམ་མཐའ་དག་རྡོ་རྗེའི་ལུས་ལ་གནད་དུ་བསྣུན་པ་ལས་བྱུང་བ་ཅན་ཡིན་པས། བུམ་དབང་གི་ལམ་ཐ་མལ་གྱི་མཚན་རྟོག་སྡོམ་པའི་བསྐྱེད་རིམ་གྱི་ཆོ་ག་སྔོན་དུ་གྲུབ་ཟིན་པའི་གང་ཟག་གིས་གསང་དབང་གི་ལམ་རླུང་གི་དེ་ཉིད་སྒོམ་པའི་ཐབས་ལ་གནད་དུ་བསྣུན་པས་རྩ་གཙོ་མོ་གསུམ་དང་འཁོར་ལོ་བཞི་ལས་གྱེས་པའི་ལུས་རྩ་ཡི་དཀྱིལ་འཁོར་ཐམས་ཅད་དུ་ཁྱབ་པར་རྒྱུ་བའི་རྩ་བ་དང་ཡན་ལག་གི་རླུང་དུ་གྲགས་པ་ཐབས་ཀྱིས་མ་ཟིན་ན་མ་དག་འཁོར་བའི་སྣང་བ་ཐམས་ཅད་བསྐྱེད་པའི་རྒྱུ་དང་རྐྱེན་དུ་འགྱུར་ཞིང་། ཐབས་ཀྱིས་ཟིན་ན་དག་པ་མྱ་ངན་ལས་འདས་པའི་སྣང་བ་མཐའ་དག་བསྐྱེད་པའི་རྒྱུ་རྐྱེན་དུ་འགྱུར་བའི་རླུང་དེ་དག་དང་། དེ་ལ་བརྟེན་པའི་སེམས་རྟོག་འཁྲུལ་བའི་ཤེས་པ་ཡུལ་ལ་གཡོ་བ་མཐའ་དག་ངྷུ་ཏི་ཞེས་པ་ཡོན་ཏན་ཅན་ལ་ཡོན་ཏན་གྱི་མིང་གིས་བཏགས་པ་གཉིས་སྤངས་དབུ་མའི་གཞན་དབང་དུ་གྱུར་པ་སྟེ་བྱེད་པ་བཅིང་པའི་ཐབས་ཀྱིས་དབུ་མར་ཞུགས་གནས་ཐིམ་པའི་རིམ་པས་ཚུད་ཅིང་ལས་སུ་རུང་བ་ན་སྣང་གསུམ་གྱིས་དྲངས་པའི་དཔེའི་འོད་གསལ་འཆར་རོ། །དེ་ལྟར་རླུང་ལས་སུ་རུང་བའི་སྟོབས་ཀྱིས་དབང་གསུམ་པའི་ལམ་ཁམས་ཀྱི་ཞུ་བདེ་ལས་དགའ་བཞིའི་ཡེ་ཤེས་བསྐྱེད་པ་སྟེ། དེ་ཡང་ནང་གི་ཉི་མ་ཞེས་པ་གཏུམ་མོ་དམ་ཚིག་གི་ཕྱག་རྒྱ་སྟེ་གནམ་ཞལ་དབྱིངས་ཀྱི་དབང་ཕྱུག་མའི་རྗེས་ཆགས་ཀྱི་མེ་སྦར་བས། དེར་གནས་སྐབས་སེམས་རྟོག་རགས་པ་བཅོམ་པའི་ཕན་པ་དང་དགའ་བ་ལ་སོགས་པ་གསུམ་དང་མཐར་ཐུག་ལྷན་སྐྱེས་ཀྱི་བདེ་བའི་དཔྱིད་དེ་ཕུན་སུམ་ཚོགས་པའི་དཔལ་སྦྱིན་པར་མཛད་པའི་ཟླ་བ་སྟེ་ཧེ་རུ་ཀའི་རང་བཞིན་བྱང་ཆུབ་ཀྱི་སེམས་ཞུ་བའི་བཏུང་བ་སྟེ་ཁུ་བའི་དྭངས་མ་རྣམས་ཡས་རིམ་གྱིས་འཁོར་ལོ་བཞིར་དབབ་པའི་འགྲོས་ཀྱི་རྒྱུན་མས་ལམ་གྱི་མཐའ་སྟེ་གསང་བའི་སྣ་རྩེའི་བར་དུ་སོང་ནས་སླར་ཡང་བཟུང་བ་དང་ལྡོག་པའི་སྦྱོར་བས་འཛགས་མེད་ཀྱི་ཚུལ་ཁྲིམས་ཡོངས་སུ་རྫོགས་ཏེ་སེངྒེ་རྣམ་པར་རོལ་བའི་ཕྱག་རྒྱས་འགྲེམ་པ་དང་ཁྱབ་པའི་སྦྱོར་བས་མས་རིམ་ནས་གཙུག་ཏོར་ནམ་མཁའི་འཁོར་ལོའི་བར་གྱི་བགྲང་བའི་མཐའ་ཡས་པའི་རྩ་བ་དང་ཡན་ལག་གི་རྩའི་འཁོར་ལོ་རྣམས་སུ་དུས་རྟག་ཏུ་མི་ཉམས་པར་བརྟན་པར་གྱུར་ཅིག་སྨོན་པའོ། །དེ་ལ་དུས་མ་ཡིན་པར་འཆི་བ་དང་ཚེའི་འདུ་བྱེད་བྲི་བར་བྱེད་པ་དག་ནི་ཕལ་ཆེར་ཁམས་ཀྱི་ཐིག་ལེ་ཉམས་པ་དང་ཟད་པ་དག་ལས་འབྱུང་ལ་དེའི་དབང་གིས་རྩ་ཐིག་གི་གནད་རྣམས་འཕྱུག་པར་གྱུར་ན་སྐྱེས་བུ་དམ་པ་རྣམས་ལ་ནི་ཕྱི་ནང་གི་གནས་ཡུལ་གྱི་དཔའ་བོ་དང་མཁའ་འགྲོ་མ་རྣམས་འཁྲུགས་ནས་བསུན་ཁ་ལྡང་ཞིང་ཕལ་པ་དག་ཀྱང་ཚེ་ཡི་འདུ་བྱེད་འཇིག་པའི་རྒྱུར་འགྱུར་རོ། །གལ་ཏེ་ཐིག་ལེ་འཛགས་མེད་དུ་བརྟན་པ་དང་འཕེལ་ཞིང་རྒྱས་པར་གྱུར་ན་ནི་ཕྱི་ནང་གི་འབྱུང་བའི་བཅུད་ལེན་དུ་གྱུར་ནས་བགྲེས་རྒུད་བྲལ་བའི་ལང་ཚོ་དང་གཞོམ་གཞིག་བྲལ་བའི་ཚེ་སྲོག་ལ་དབང་ཐོབ་པར་འགྱུར་བ་ཡིན་པས་དེའི་གནད་ཀྱིས་སོ། །གཉིས་པ་ནི་དེ་ལྟར་རླུང་ལས་སུ་རུང་བས་ཁམས་ཀྱི་ཞུ་བདེ་བསྐྱེད། འཛགས་མེད་ཀྱི་བདེ་བ་ཆེན་པོ་སྟོབས་སུ་གྱུར་པས་སེམས་ཀྱི་ཆ་ལ་བརྟེན་པའི་སྙིགས་མའི་ལུས་ངག་ཡིད་གསུམ་གྱི་ཁམས་ཟད་དེ་གསེར་འགྱུར་གྱི་རྩིས་ལྕགས་ཁམས་གསེར་དུ་བསྒྱུར་བའམ། མེ་དྲོད་ཀྱིས་ཆབ་རོམ་ཆུར་ཞུ་བ་ལྟར། རིག་པའི་ཆ་ལ་བརྟེན་པའི་རྡོ་རྗེ་གསུམ་གྱི་ཡོན་ཏན་མངོན་དུ་གྱུར་ནས་དབང་བཞི་པའི་ངོ་བོ་དྭངས་མ་འོད་གསལ་གྱི་སྐུར་གནས་འགྱུར་བ་ནི། གནས་ལུགས་དོན་དམ་པའི་བདེན་པ་ཀ་ནས་དག་པ་སྟེ་གདོད་མ་ནས་གློ་བུར་གྱི་ཆོས་རྣམས་ཀྱིས་གོས་མ་མྱོང་བའི་ཟབ་མོ་སྟོང་པ་ཉིད་དང་། སྣང་ལུགས་ཀུན་རྫོབ་ཀྱི་བདེན་པ་རྟེན་ཅིང་འདྲེལ་བར་འབྱུང་བའི་རང་བཞིན་ཡེ་ནས་ལྷུན་གྱིས་གྲུབ་ཅིང་འབྲལ་མི་ཤེས་པའི་སངས་རྒྱས་ཀྱི་ཆོས་རྒྱ་ཆེ་བ་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོར་སྣང་བ་ཐམས་ཅད་དེ། དེ་དག་ལ་གང་ཞིག་ཡུལ་དང་ཡུལ་ཅན་ནམ། ཆོས་ཉིད་དང་ཆོས་ཅན་ནམ། སྣང་བ་དང་སྟོང་པའམ། ཀུན་རྫོབ་དང་དོན་དམ་མམ། རྒྱུ་དང་འབྲས་བུ་སོགས་མདོར་ན་གཉིས་བཅས་ཐ་དད་དུ་འཛིན་པའི་བློའི་མཐའ་ཐམས་ཅད་ཡོངས་སུ་སྤངས་ཏེ། ཀ་དག་སྟོང་པའི་འོད་གསལ་དང་། ལྷུན་གྲུབ་སྣང་བའི་འོད་གསལ་གཉིས་མ་སྤང་ཟུང་དུ་འཇུག་པའི་དྭངས་མ་ཡེ་ཤེས་ཀྱི་སྐུ་མངོན་དུ་མཛད་ནས། རང་བཞིན་རྫོགས་པ་ཆེན་པོའི་གྲུབ་མཐའ་སྙོགས་ཏེ་རིག་འཛིན་ཆེན་པོ་དགའ་རབ་རྡོ་རྗེ་དང་། པདྨ་འབྱུང་གནས། བི་མ་ལ་མི་ཏྲ་སོགས་ཟུང་འཇུག་རྡོ་རྗེའི་སྐུ་མཆོག་བརྙེས་པའི་རིག་པ་འཛིན་པ་ཆེན་པོ་རྣམས་ཇི་ལྟ་བ་བཞིན་དུ་སྲིད་པ་འདི་ཇི་སྲིད་གནས་ཀྱི་བར་དུ་གཟུགས་སྐུ་ཡེ་ཤེས་ཀྱི་སྣང་བ་གཞོམ་བྲལ་རྡོ་རྗེའི་ཁམས་སུ་རྟག་པར་བརྟན་ནས་ཟབ་གསང་ཆོས་ཀྱི་འཁོར་ལོ་རྒྱ་ཆེ་རྒྱུན་མི་འཆད་པར་བསྐོར་བཞིན་དུ་བཞུགས་པར་གྱུར་ཅིག་ཅེས་པའོ། །དེ་ལྟར་འཕགས་ལམ་མངོན་དུ་མཛད་ནས་བཟུང་སྟེ་ལུས་ཁམས་སྐྱེ་གནས་ཀྱི་ཟག་པ་ཐམས་ཅད་ཟད་པས་འཆི་བདུད་ཀྱི་རྒྱུ་བ་མེད་ཅིང་འཆི་བདག་གི་གཡུལ་ལས་རྒྱལ་ནས། ཚེ་དང་ཡེ་ཤེས་དང་སྨོན་ལམ་དང་མོས་པ་སོགས་ལ་དབང་འབྱོར་བ་ཡིན་པས་ཇི་ལྟར་འདོད་པ་བཞིན་དུ་བཞུགས་ནུས་པ་ཡིན་ནོ། །སྨྲས་པ། བཤད་ཡམ་ཚིག་གི་མཐའ་ལ་མ་འཁྱམས་པར། །ཚིག་དོན་གནད་ཀྱི་མན་ངག་ནོར་བུའི་ཕྲེང་། །ལེགས་བཤད་གསེར་གྱི་སྐུད་པར་བརྒྱུད་པ་འདི། །དཔྱོད་ལྡན་སྒེག་མོའི་རྒྱན་དུ་འོས་སམ་སྙམ། །འདི་ལས་བྱུང་བའི་རབ་དགེ་དྲི་མེད་དེས། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་པའི་རྩ་ལག་ཀུན་མཁྱེན་ཡབ་སྲས་བཅས། །ཞབས་པད་ཡུན་དུ་བརྟན་པའི་རྒྱུར་གྱུར་ཅིག །ཅེས་པའང་རྗེ་བླ་མའི་གསུང་གི་བདུད་རྩིས་འཚོ་བའི་ཐ་ཤལ་བ་པདྨ་བཛྲ་པས་བྲིས་པ་དགེ་བར་གྱུར་ཅིག །མངྒ་ལཾ། །