མར་མེའི་སྨོན་ལམ་ཉུང་ངུ།
༄༅། །མར་མེའི་སྨོན་ལམ་ཉུང་ངུ་བཞུགས། །ནམ་མཁའི་མཐར་ཐུག་ཞིང་ཁམས་རབ་འབྱམས་ན། །དཀོན་མཆོག་རིན་ཆེན་རྣམ་གསུམ་རྟེན་དང་བཅས། །བསོད་ནམས་བསགས་པའི་ཞིང་མཆོག་བཞུགས་སོ་འཚལ། །མ་ལུས་དེ་དག་ཀུན་གྱི་སྤྱན་ལམ་དུ། །སྣང་གསལ་མར་མེའི་མཆོད་པ་འདི་འབུལ་བས། །བདག་དང་མཐའ་ཡས་སེམས་ཅན་ཐམས་ཅད་ཀྱི། །མ་རིག་གཏི་མུག་མུན་པ་ཀུན་བསལ་ནས། །ཀུན་མཁྱེན་ཡེ་ཤེས་སྣང་བ་མཐོང་བར་ཤོག །མར་མེའི་སྨོན་ལམ་ཉུང་ངུ་འདི་ནི་པདྨ་བཛྲ་པས་བྲིས་སོ། །ཨོཾ་མ་ཧཱ་ཤུནྱ་ཏ་ཛྙཱ་ན་ས་མ་ཏི་ཧཱུྃཿ དབྱིངས་རིག་དབྱེར་མེད་བདེ་ཆེན་རྩལ། །སྲིད་ཞི་ཀུན་ཁྱབ་མཆོད་པའི་སྤྲིན། །བསང་མཆོད་འདོད་ཡོན་མཁོ་དགུའི་ཆར། །མི་བཟད་རྒྱན་གྱི་འཁོར་ལོར་ཤར། །མཆོད་ཡུལ་མཉེས་ཤིང་སྦྱིན་ཡུལ་ཚིམ། །ཚོགས་གཉིས་རྫོགས་ཤིང་སྒྲིབ་གཉིས་བྱང་། །རེ་དོགས་གཟུང་འཛིན་དབྱིངས་སུ་དག །གདོད་མའི་གཞི་ལ་གྲོལ་པར་ཤོག །ས་མ་ཡ། རྒྱ་རྒྱ་རྒྱ། བྱ་བྲལ་པདྨ་བཛྲ་པས་སོ། །དགེའོ། །