རིག་པ་འཛིན་པ་རྡོ་རྗེ་ཚེ་དབང་ནོར་བུའི་སྔོན་གྱི་ལས་སྨོན་དང་འཕྲལ་གྱི་རྐྱེན་ལ་ཡང་བརྟེན་ཏེ་ཚེ་འདིར་ལེགས་ཉེས་ཀྱི་འཇུག་སྒོ་སྣ་ཚོགས་པར་དཔྱད་པའི་ཚུལ་ཆུ་རྒྱུན་ལ་ཐིགས་པ་ཙམ།

༄༅། །རིག་པ་འཛིན་པ་རྡོ་རྗེ་ཚེ་དབང་ནོར་བུའི་སྔོན་གྱི་ལས་སྨོན་དང་འཕྲལ་གྱི་རྐྱེན་ལ་ཡང་བརྟེན་ཏེ་ཚེ་འདིར་ལེགས་ཉེས་ཀྱི་འཇུག་སྒོ་སྣ་ཚོགས་པར་དཔྱད་པའི་ཚུལ་ཆུ་རྒྱུན་ལ་ཐིགས་པ་ཙམ་ཞེས་བྱ་བ་བཞུགས་སོ། །

༈ ཨ་ཐ། ད་ནི་སྤྱི་དོན་གཉིས་པ་སྔོན་གྱི་ལས་སྨོན་དང་འཕྲལ་གྱི་རྐྱེན་ལ་ཡང་བརྟེན་ཏེ་ཚེ་འདིར་ལེགས་ཉེས་ཀྱི་འཇུག་སྒོ་སྣ་ཚོགས་པར་དཔྱད་པའི་ཚུལ་ཆུ་རྒྱུན་ལས་ཐིགས་པ་ཙམ་ཞིག་འཆད་པར་བྱ་ན། དེ་ཡང་ཁོ་བོ་སྐྱེ་བའི་ཡུལ་ནི་རི་ཁ་བ་ཅན་གྱི་ལྗོངས་བོད་དང་བོད་ཆེན་གྱི་ཟླས་ཕྱེ་བའི་བོད་ཆེན་དེ་ལ་སྟོད་སྨད་བར་གསུམ་གྱི་མདོ་སྨད་ཀྱི་ཆ། གུ་རུའི་གནས་ཀྱི་གཙོ་བོ་ཀཿཐོག་རྡོ་རྗེ་གདན་གྱི་ལྷོ་མདོ་ཁམས་སྟག་ཚངས་སེང་གེ་བསམ་འགྲུབ་ཀྱི་བྱང་སྒང་ཆེན་ལྔའམ་དྲུག་ཏུ་དབྱེ་བའི་བུམ་པོར་སྒང་དང་སྨར་ཁམས་སྒང་དང་ཟླ་རྒྱུད་སྒང་གསུམ་གྱིས་བསྐོར་བའི་དབུས་སུ་གྱུར་ཅིང་ཅུང་ཟད་ཙམ་གྱིས་བུམ་པོར་སྒང་དང་ཉེ་བ་འཕགས་མ་དམ་ཚིག་མ་ཡི་སྐུ་བརྙན་བྲག་ལ་རང་བྱུང་དུ་གནས་པ་ལས་ཆུ་རྒྱུན་བབ་པས་མིང་ལྗང་ཆུ་གཤིས་སུ་གྲགས་ཤིང་ལུང་པ་ཁ་བྱང་དུ་ཕྱོགས་པའི་མདོར་གསེར་གྱིས་འདྲེན་པའི་ཆུ་ཀླུང་ཆེན་པོ་རྒྱུ་བ་ལས་ལྗང་ཆུའི་གཡོན་ཡུལ་དེའི་ས་ཡི་ཐིག་ལེ་མདོ་ཁམས་ཀྱི་རི་བོ་བཀྲ་བཟང་ངམ་བཙན་རྒོད་རི་བཀྲ་དང་བཙན་རི་རྡོ་རྗེ་བྲག་ཞེས་ཀྱང་བརྗོད་པ། འཇིག་རྟེན་སྐྱེ་བོ་རྣམས་ཀྱི་ངག་རྒྱུན་དུ་རི་དེ་རྒྱ་དཀར་ནས་བོད་དུ་བྱོན་པ་སྟེ་སླར་རྒྱ་དཀར་དུ་ལྡོག་དོགས་རི་གཞན་གྱི་དབུས་སུ་བཅུག་པ་ཡིན་ཞེས་ཟེར་ལ། སྤྱིར་དེ་འདྲ་ཡི་རྣ་གཏམ་ཅི་རིགས་ཡོངས་ཀྱིས་འདུག་པར་ངེས་བྱིས་པའི་སྐབས་སུ་ནི་ཡིད་ལ་ཤིན་ཏུ་མི་འཐད་མོད། ཕྱིས་མངོན་བརྗོད་ཀྱི་གཞུང་རྣམས་སུ་སྔོན་གྱི་བསྐལ་པར་འཛམ་བུའི་གླིང་གི་རི་རྣམས་ཕན་ཚུན་དུ་རྒྱུ་འགྲུལ་བྱེད་པ་ལས་སེམས་ཅན་ལ་ཤིན་ཏུ་གནོད་པ་ཆེས་ཆེ་བ་བསྐྱལ་བ་ལ་ལྷའི་དབང་པོ་བརྒྱ་བྱིན་གྱིས་རྡོ་རྗེས་རི་རྣམས་ཀྱི་རྐང་པ་བཅག་སྟེ་རྒྱུ་འགྲུལ་མེད་པར་བྱས་ཤིང་། དེ་སྐབས་རི་ཁ་ཤས་གཅིག་རྒྱ་མཚོའི་གཏིང་དུ་བྲོས་ཏེ་ཡོད་ལ། བརྒྱ་བྱིན་གྱི་རྡོ་རྗེའི་མིང་རི་འཇོམས་སུ་དེས་བཏགས་པ་ཡིན་ཞེས་དང་། དེ་བཞིན་རི་བོ་གངས་ཅན་གྱི་བུ་རི་བོ་ཉ་ཅན་དང་རི་བོ་ངུར་པ་གཉིས་འཁྲུགས་པ་ལ་རི་བོ་གཞན་གྱིས་བསྡུམ་ཀྱང་དུམ་པར་མ་ནུས་པས་གྲུབ་པའི་ལྷ་རྣམས་ཀྱིས་གདོང་དྲུག་ལ་གསོལ་བ་བཏབ་པས་གདོང་དྲུག་གིས་བསྡུམ་པས་ཀྱང་མ་ཉན་པར་ང་ཐུང་འཕོང་ནས་རི་བོ་ངུར་པ་ཚལ་པར་བཀས་པ་ཡིན་ཞེས་ཀྱང་བརྗོད་པར་མཐོང་བས། དེས་ན་ཚིག་འདི་དག་ཕྱི་རོལ་མུ་སྟེགས་རིག་བྱེད་གཞུང་ལས་བྱུང་བའི་གཏམ་དང་མཐུན་པ་ཞིག་སྔར་དུ་བྱུང་བར་སྣང་བས་གསར་དུ་དགག་བསྒྲུབ་བྱར་མེད་དོ། །

བཙན་རྒོད་རི་འདི་ལ་བླ་མ་གོང་མ་རྣམས་ནས་ཁམས་ཀྱི་པཎ་ཎེ་རི་བཀྲའི་ཡིན་ཞེས་གསུང་རུང་ཁམས་ཀྱི་པཎ་ཎེ་རི་བཀྲའི་མིང་ཅན་བར་ཁམས་ཁྱུང་པོར་ཡང་ཡོད་རུང་དོན་དུ་ནི་བདག་གི་རྩ་བའི་བླ་མ་རྡོ་རྗེ་འཆང་གི་ཞལ་སྔ་ནས་འབྲི་རྒྱུད་རེ་ཁེ་ལྗོངས་ཀྱི་ཡུལ་ལྷ་སྟྭ་མ་སྟེའུ་པོའམ་ཡོན་ཏན་རི་བཀྲར་གྲགས་པ་འདི་པཎ་ཎེ་རི་བཀྲ་ཡིན་གསུང་བས་རི་དབང་སྤུན་དགུའི་ཡ་གྱལ་ནི་དེ་ཁ་ནས་ངེས་པར་བཙན་རྒོད་རི་བཀྲ་དང་མི་གཅིག་གོ །གཞན་ཁམས་ཀྱི་རི་བོ་བཀྲ་བཟང་ཡིན་པ་ནི་དམ་པ་རྣམས་ཞལ་མཐུན། གང་ལྟར་ཨོ་རྒྱན་གུ་རུའི་བྱིན་གྱིས་བརླབས་པའི་གནས་ཆེན་ཟབ་གཏེར་བཅུ་གསུམ་ཙམ་བཞུགས་པ་ཞིག་སྟེ། རི་དབྱིབས་རྡོ་རྗེ་རྩེ་ལྔ་ལྟ་བུ་ལ་རྒྱབ་ངོས་ཀྱི་ཆ་ཅུང་ཟད་ཙམ་ལས་མཐའ་སྐོར་དུ་ཆུ་མིག་བར་མི་ཆད་པ་བརྒྱ་པྲག་དུ་མས་བསྐོར་བ་རི་ངོས་སུ་གྱེན་དུ་དྷེ་ཝ་དྷ་དུ་དང་། ས་ལ་དང་། ནི་ཙུ་ལ་དང་། ཨ་ཤྭཏ་ཐ་དང་ཨ་ཀ་རུ་ལ་སོགས་པའི་གནས་ཚལ་གྱི་འཕྲེང་བ་བཟང་པོ་སྟེ་ཤིང་སྣ་བརྒྱ་དང་བརྒྱད་ཡོད་པར་གྲགས་ཤིང་ཀུན་ཏུ་འཐུག་པ་དང་། དེ་རྣམས་ཀྱི་བར་མཚམས་ཀྱི་བྲག་རི་དཀར་དམར་གྱི་འཕྲེང་བ་དང་། གྲོགས་པོ་དང་ཤ་ལ་དཀར་པོའི་གྱེན་འགྲེང་བ་གདུགས་ཀྱི་རྩིབས་མ་ལྟར་སྤེལ་ཞིང་ཤིན་ཏུ་མཛེས་པ་སྟག་གཟིག་དོམ་དྲེལ་གུང་སྲམ་གསའ་སྤྱང་འཕར་བ་སོགས་བོད་འདིར་མཆིས་པའི་གཅན་གཟན་མ་ཚང་བ་མེད་པ་ལྟ་བུ་དང་། དེ་བཞིན་བྱ་རྒོད་ཁྲ་གླག་ནེ་ཙོ་བྱ་ཝང་ཁུ་ལིང་གུང་མོ་སོགས་བྱ་རིགས་ཀྱང་སྣ་ཚོགས་པ་དང་མི་རྒོད་སྤྲེའུ་ཕྱི་བ་དང་རི་དྭགས་ཀྱི་རིགས་རྣ་བ་གླ་བ་རི་བོང་སོགས་སེམས་ཅན་རིགས་མི་གཅིག་པ་དུ་མ་རྟག་ཏུ་འཕྱོ་བ་བག་དྲོ་ཞིང་བྱིན་ཆེ་བ་སྐྱི་ཟ་ཞིང་ཡ་ང་བ་ཡ་མ་ཆ་ཡི་གནས་རི་བོ་དེའི་ངོགས་སུ་མི་རྣམས་རྒྱུ་འགྲུལ་ཆེས་དཀའ་བ་ཨོ་རྒྱན་ཆེན་པོས་རྒྱ་དཀར་དུར་ཁྲོད་བསིལ་བ་ཚལ་དང་མཚུངས་ཞེས་པ་དང་། གཏེར་ལུང་ཁ་ཅིག་ཏུ་ཨོ་རྒྱན་དྷཱ་ན་ཀོ་ཤ་དང་ངེས་པར་མཉམ་ཞེས་གསུང་བ་དེ་ཡི་ནུབ་བྱང་གི་མཚམས་བྲག་རིའི་ངོས་སུ་འདབ་ཆགས་མགོན་པོ་ཀླུ་སྦྲུལ་འཛིན་ཏེ་ནམ་མཁའ་ལ་ལྡིང་བའི་གཟུགས་བརྙན་ཤིན་ཏུ་གསལ་བ་རི་བོ་བྱ་ཁྱུང་དུ་གྲགས་པའི་མདུན་དུ་བྲག་དུང་གཡས་སུ་འཁྱིལ་བ་ལྟ་བུའི་གོས་སྔོན་རྣལ་འབྱོར་སྒྲབ་པ་པོ་མང་པོས་བསྟི་བར་བྱས་པའི་དུང་དཀར་རི་ཁྲོད་གྲགས་པའི་འདབས་བསམ་གཏན་གྱི་སྤྱིལ་པོ་ཆུང་ངུ་ཞིག་ཏུ་བཙས་པ་ཡིན་འདུག་སྟེ། དེ་ཡང་ཨོ་རྒྱན་ཆེན་པོའི་ལུང་ལས༔ དུས་ངན་བར་གྱི་ཚིག་པ་ལ༔ བསྐལ་པ་དུམ་བུ་རྩོད་པ་དར་བ་ཡི༔ སེམས་ཅན་ཞེ་སྡང་རགས་པའི་དུས་སུ༔ མོན་བུ་སྤྱི་རིང་སྐྲ་ཡི་ལྭ་བ་ཅན༔ ཞེས་པ། རི་བོ་ཁྱུང་ཆེན་ལྡིང་བའི་དྲུང་དུ་འབྱུང་ངོ་༔ ཞེས་གསུངས་བ་ལུང་ཚིག་དེ་ནི་སྔོན་གུ་རུ་ཇོ་བོ་རྩེ་མོ་དང་། བར་དུ་རཏྣ་གླིང་པ་རྣམས་ལ་ཡང་མཐུན་པར་སྣང་ལ། ཕྱི་མའི་དུས་འདིར་བདག་ཀྱང་ཚུལ་དེ་འགྲིགས་པ་ལྟར་གྱུར་པ་ཞིག་གོ །

བདག་གི་དལ་འབྱོར་གྱི་ཡོན་ཏན་ཕུན་སུམ་ཚོགས་པའི་ལུས་རྟེན་འདིར་བསྐྱེད་པར་བྱེད་པའི་ཆ་ནི་ཞིང་སྐྱེས་ཀྱི་མཁའ་འགྲོ་མ་ཡི་རིགས་སུ་གྱུར་པ་མི་ཆོས་སུ་དགྲ་གཉེན་ལ་ཆགས་སྡང་གི་རུས་ཐོན་པ་དཀོན་མཆོག་གསུམ་ལ་མཆོག་ཏུ་དད་གུས་དང་ལྡན་ཅིང་རྡོ་རྗེ་སེམས་དཔའི་སྙིང་པོ་ཡིག་བརྒྱ་འབའ་ཞིག་ལ་ཡི་དམ་དུ་བྱེད་པས་བཅོམ་ལྡན་འདས་དཔལ་རྡོ་རྗེ་སེམས་དཔའ་ཞལ་མཇལ་བ་བཛྲ་ས་མུ་ཏྲ་ཞེས་བྱ་བ་ལ་ཕ་ནི་འཇིག་རྟེན་ཐུན་མོང་དུ་ད་ལྟ་གྲགས་ཚོད་ཀྱི་རིགས་ནི་ཁམས་མི་ཉག་གི་ཡུལ་དུ་དཀར་པོ་སྒོ་ཡི་རིགས་ལས་སྒོ་བཟའ་ལྷ་མོ་ཞེས་ལྷའི་བུ་མོ་ལ་འགྲན་པར་བཟོད་པ་ཞིག་བྱུང་ཞིང་། ཡུལ་དེའི་ལྷ་མཐུ་བོ་ཆེ་བཞག་བྲལ་ལྷ་རྩེའི་རྩེར་ནམ་མཁའི་ལྷ་ཞིག་རྨུག་ཐག་ལ་བརྟེན་ནས་བབ་སྟེ་སྒོ་བཟའ་ལྷ་མོ་དང་ཤེས་པའི་བུ་བརྒྱུད་ཡིན་ཞེས་པ་ལ་ཀུན་སློང་ཅན་དུ་མ་དཔུང་དུ་ཚོགས་ནས་ལན་བརྒྱར་བསླད་ཅིང་སྦས་ཀྱང་རྙོགས་པར་མ་ནུས་ཤིང་། སྔོན་རབས་ཉིད་ནས་གྲགས་པའི་གཏམ་གསར་དུ་འགོག་མ་སྤོབས་པས་ད་ལྟ་ཡང་རླུང་ལྟར་ཀུན་གྱི་ངག་སྒོར་གནས་ཤིང་རྒྱུ་བ་འདིའོ། །འོན་ཀྱང་ཁ་ཅིག་གིས་སྒོ་བཟའ་ལྷ་མོ་དེ་བུད་མེད་བཟང་མོ་མི་མ་ཡིན་རྣམས་དང་རྟག་ཏུ་བརྩོན་ནུས་པ་ཞིག་སྟེ། རེ་ཞིག་ན་བཞག་བྲའི་གཞི་བདག་དེ་སྐྱེས་བུ་མི་ལས་འདས་པའི་མཚར་སྡུག་དུང་གི་གོ་ཆ་ཅན་ཞིག་ཏུ་བརྫུས་པ་དང་བཤོས་པས་སང་ཕོད་དུས་སུ་ཁྱེའུ་ཞིག་བྱུང་ཞེས་རང་གི་བློ་ལ་ནི་ཕྱི་མ་འདི་ནི་རིགས་མཐུན་གཞན་དག་གིས་ངེས་པས་འཐད་ལ། གང་ལྟར་ལྷ་ཡི་ཁྱེའུ་བཙས་ནས་མི་རིང་བར་མ་དང་བྲལ་ནས་བ་ཡི་འོ་མས་བསྐྱེད་སྲིངས་ཤིང་མིང་ལ་ངུ་རྒུ་ཞེས་སུ་བཏགས་ཏེ་འདི་ནི་མི་ཉག་གི་སྐད་དུ་མངོན་པས། ཡུལ་དེའི་མི་ལ་དྲིས་ཚེ་ངུ་རྒུ་མེ་ཞེས་བོད་སྐད་དུ་བ་ཡི་འོ་མ་འཐུང་བའི་དོན་ཡིན་ཟེར་ལ། ཁྱེའུ་དེ་ལང་ཚོ་ལ་བབ་པ་ན་ཚོ་ཆེན་པོ་བཅོ་བརྒྱད་ཀྱི་བདག་པོར་གྱུར་ཅིང་ཕུལ་བྱུང་ཙམ་དུ་ཡུལ་བྱ་རྒོད་ཀྱི་ཉིན་ལམ་བཅོ་བརྒྱད་ལ་དབང་བྱས་པ་ཡིན་ཞེས་འུད་ཆེ་བར་སྒྲོགས་པས། དེ་ན་རྒྱ་རིགས་སུ་རྟོགས་པ་ཞིག་གོ །འདི་དང་མི་ཉག་གྷ་ཡི་རྒྱལ་པོའི་ལོ་རྒྱུས་ཕྱོགས་མཐུན་ཅིང་ངུ་ཞེས་མིང་ཡང་གཅིག་རུང་གྷ་ཡི་རིགས་ཁུངས་སྨོན་ཤྲི་གྱི་གཞི་བདག་ཡིན་པར་འདོད་པས། དེ་ནི་བཞག་བྲའི་བློན་པོ་མཐུ་ཤིན་ཏུ་བཙན་པ་ཞིག་ཡིན་ཟེར་རོ། །བཞག་བྲ་ནི་རྨ་རྒྱལ་སྤོམ་རའི་བུ་དགུ་ཡི་ཐུ་བོར་གྲགས་ལ། སྤོམ་བྲ་རང་ཉིད་གནོད་སྦྱིན་གྱི་དབང་པོ་རྣམ་ཐོས་བུ་ཡི་སྲས་སུ་གྱུར་པ། དེ་ཡང་ནོར་སྦྱིན་གྱི་ངོ་བོར་གནས་ཞེས་གུ་རུ་པདྨ་ཀ་རས་གསུངས་པས་དེས་ན་འདོད་རྒྱལ་རྒྱལ་ཆེན་བཞིའི་རིགས་ལས་བྱུང་བར་སྨྲའོ། །དེ་ཡང་དཀར་པོ་སྒོ་ནི་ངུ་རྒུ་མེའི་ཞང་པོ་ཡིན་ཅིང་ངུ་རང་ཉིད་ཀྱི་རིགས་ནི་དེ་ལས་གཞན་པར་ངེས་དགོས་སོ། །གང་ལྟར་དུ་མི་རིགས་དེ་ལས་ནང་ཚན་གོ་ས་ཟེའུ་ཞེས་པའི་རྒྱུད་དུ་སྐྱེས་པའི་ཁྱིམ་བཙུན་དགེ་བསྙེན་ལྷ་ཆོས་སུ་ལོ་མང་པོའི་བར་དུ་ཡི་དམ་གྱི་བསྙེན་བསྒྲུབ་ཐེམ་པར་བྱས་ཤིང་མི་ཆོས་རྒྱུད་དྲངས་ཤིང་ཁྲོ་གཏུམ་ཆེ་ཞིང་དཔལ་བརྟུལ་སྙིང་སྟོབས་ཀྱི་ངར་དང་ལྡན་པ་ཨ་ཏི་ནཱ་ཐ་རཾ་ཀ་ཞེས་ཡིན་པར་སྒྲོགས་ཏེ། དེ་ཚེ་འཕགས་པ་ཤཱ་རིའི་བུའི་སྨོན་ལམ་དང་མཐུན་པ་ཡིན་ལ། ཐུན་མོང་མ་ཡིན་པའི་ཕ་ནི་གོང་དུ་སྨོས་པའི་གནས་ཆེན་རི་བོ་བཀྲ་བཟང་གི་ཞིང་སྐྱོང་གཙོ་བོ་དེ་ཡིན་ཞེས་རང་གི་ཨ་ཕྱི་དང་ཨ་མ་ནས་རྒྱུ་མཚན་ཞིབ་མོ་ཡང་ཡང་བསྙད་ཀྱི་འདུག་པ་དང་། རྗེ་བཙུན་བླ་མ་མཆོག་ནས་ཀྱང་དེ་ལྟར་དགོངས་སོ་ཞེས་ཐོས་ལ། དེས་ན་ཡུལ་ལྷ་ཆེན་པོ་དེ་ནི་བླ་མ་གོང་མ་རྣམས་ཀྱི་ཆོས་བོན་སྐྱེ་བོས་གསོལ་བའི་མིང་ཐ་དད་ཅན་དྲེགས་བྱེད་སྟོང་སྡེའི་རྗེ་བོ་ཡིན་ཞེས་དང་། མཆོག་གི་བདག་ཉིད་ཆེན་པོར་གྱུར་པའི་གཏེར་ནས་བྱོན་པའི་སྒྲུབ་ཐབས་དང་མཐུན་པར་གཟིགས་སྣང་དུ་གཏེར་བདག་གནོད་སྦྱིན་དབང་པོའི་སྒྱུ་འཕྲུལ་ལྟར་བཞེད་པ་སོགས་གང་ལྟར་མཐུ་དང་རྫུ་འཕྲུལ་ཆེ་བ་ཞིག་གོ །ཡང་ཁ་ཅིག་ནས་མིང་གི་རྣམ་གྲངས་རྡོ་རྗེ་བྲག་བཙན་ཞེས་ཀྱང་འདོད་ན། དེ་ནི་གློ་དང་ཀོང་ཡུལ་སོགས་སུ་གྲགས་ཆེ་ཞིང་ཆགས་པའི་གནས་དང་མིང་གི་རྣམ་གྲངས་ཁུངས་ལྡན་ཅི་རིགས་སྣང་ཡང་དགོས་པ་མི་ཆེ་བས་ན་འདིར་མ་སྨྲས་ལ། སྤྱིར་ཡང་ཁོ་བོ་ཅག་མི་མ་ཡིན་དེ་ལྟའི་བུ་རུ་སྨོས་པ་འདི་ཡང་འཕྱར་བའི་གནས་ནི་ནམ་ཡང་མ་ཡིན་ཏེ། ཅི་ཕྱིར་རྫོགས་པའི་སངས་རྒྱས་རྣམས་ཀྱང་བརྒྱ་བྱིན་དང་ཉེ་དབང་ངམ་དབང་ལྡན་བདག་པོ་ལྟ་བུའི་ལྷ་ཆེས་ཆེ་བའམ་དེ་བཞིན་ཀླུ་དང་། ཡི་དྭགས་ཀྱི་རྒྱལ་པོ་ཆེན་པོ་སོགས་མི་མ་ཡིན་མཐུ་ལྡན་གྱི་སྲས་སུ་སྣང་བར་མ་མཛད་ཅིང་། རྫོགས་སངས་རྒྱས་པའི་རྟེན་ནི་མི་ཁོ་ནར་ངེས་པ་དང་། བཀའ་ལས་ཀྱང་བྱང་ཆུབ་ཀྱི་ལམ་སྡོམ་པ་སྐྱེ་བའི་རྟེན་དང་སངས་རྒྱས་མྱུར་དུ་བསྒྲུབ་པའི་རྟེན་མཆོག་ཏུ་གྱུར་པ་ནི་ལྷ་ལས་ལྷག་པའི་མི་ཡི་ལུས་ཁམས་དྲུག་ལྡན་པ་ཁོ་ན་ཆེ་ཐང་དུ་མས་བསྔགས་པར་མཛད་ན་རིགས་རུས་བསྐྱེད་པའི་ཕ་མི་ལས་ལྷག་པ་གཞན་ནམ་ཡང་ཡོད་པ་མ་ཡིན་ན་དེ་ལས་ལྡོག་སྟེ་བདག་ནི་འབྱུང་པོ་ཤ་རྗེན་བཟའ་བའི་རིགས་སོ་ཞེས་པ་ནི་གནོང་པར་བྱེད་པའི་ཚིག་ཏུ་ཟད་མོད། གཞན་སྐྱེ་བོ་ཕལ་པ་དྲག་རྩལ་ཅན་ཁ་ཅིག་ཡུལ་ལྷ་སོགས་ཀྱི་བུ་རུ་རློམས་ཤིང་འཕྱར་བ་ནི་འཇིག་རྟེན་ཕལ་པའི་ལུགས་ངན་ལས་དམ་པའི་ཆོས་ལས་སྤྱོད་པ་རྣམས་ཀྱིས་རྒྱང་རིང་པོར་དོར་བྱར་ཤེས་སོ། །དེ་ལྟ་ན་ཡང་རང་གི་མ་ཡི་གཏམ་སྟེ་རྫུན་མེད་ངེས་པ་ཡི་སེམས་ཅན་ལས་ཚུལ་འགོག་པ་མེད་པ་དང་ཡིན་ལུགས་ཇི་བཞིན་བརྗོད་ན་མི་མ་ཡིན་དེ་ཡང་མགུ་བ་སྐྱེས་ཏེ་བྱང་ཆུབ་ཀྱི་སྤྱོད་པ་བརྟས་པའི་རྒྱུར་ཡང་སྲིད་དོ་སྙམ་ནས་སྨྲས་པ་སྟེ། དཔྱོད་ལྡན་དམ་པ་རྣམས་ཀྱི་ཐུགས་ཀྱིས་མི་ཁྲེལ་བར་སྙིང་ནས་གསོལ་བ་འདེབས་སོ། །

འགྲོ་དྲུག་སེམས་ཅན་ཐམས་ཅད་ཕ་མ་ཉིད། །ལས་ཀྱི་ཚུལ་ཡང་བསམ་གྱིས་མི་ཁྱབ་སྟེ། །བྱས་གཟོ་དྲིན་དུ་ཤེས་པའི་ངང་ཚུལ་གྱིས། །ཐོག་མེད་དུས་ནས་ཚེ་འདིའི་ཕ་མའི་བར། །ཀུན་གྱི་སྡུག་བསྔལ་མཐའ་དག་སེལ་སླད་དུ། །བྱང་ཆུབ་མཆོག་གི་བཤུལ་ལམ་འདིར་ཞུགས་པས། །བྱང་ཆུབ་སྤྱོད་བརྩོན་རིང་མིན་རྫོགས་སངས་རྒྱས། །ཕ་མའི་ཚོགས་ཀྱང་སངས་རྒྱས་སར་སྒྲོལ་ཤོག །ཉམས་ཐག་ཕ་མའི་སྡུག་བསྔལ་མི་ལྟ་བར། །རང་ཉིད་ཁོ་ན་ཞི་བདེ་ཙམ་གྱི་བློ། །ཁྲེལ་མེད་ངོ་ཚ་བོར་བ་མ་རབས་ལུགས། །རྒྱལ་དང་དེ་སྲས་རྣམས་ཀྱིས་སྨད་པའི་གནས། །ཞི་བ་ཕྱོགས་གཅིག་མྱ་ངན་འདའ་བའི་སེམས། །རང་རྒྱུད་རྣམ་རྟོག་ནམ་ཡང་མི་སྐྱེ་ཞིང་། །ཚད་མེད་སྙིང་རྗེས་ཕ་མའི་སྡུག་བསྔལ་ཀུན། །ཇི་སྲིད་བར་དུ་སེལ་བའི་བྱེད་པོར་ཤོག །འགྲོ་བ་ཐམས་ཅད་ཕ་མར་ཤེས་པ་དང་། །ལས་ཀྱི་ཚེ་འདིའི་ཕ་མའི་ཚུལ་ཇི་འདྲ། །ཆ་ཙམ་བརྗོད་ལ་ཉེས་པ་མེད་སྙམ་ཡང་། །ཉེས་ན་དམ་པ་རྣམས་ལ་བཟོད་ཀྱང་གསོལ། །ཞེས་པ་ཡང་སྨྲས་སོ། །

རིགས་ཀྱི་མཚན་ཉིད་ཕ་མ་དེ་ལྟ་བུའི་བུ་རུ་ཕྱུགས་བདག་གི་ལོར་མངལ་ཆགས་ནས་འབྲས་བུ་སྣ་ཚོགས་རྒྱས་པའི་ལོ་རྒྱལ་གྱི་ཟླ་བའི་དམར་ཕྱོགས་ཀྱི་ཚེས་དགེ་བར་པདྨ་ཊཱཀྐི་རྒྱུ་བའི་དུས་སུ་བདག་སྐྱེས་ཤིང་སྐྱེས་པའི་ཉི་མ་དེར་ནམ་མཁའ་མཐིང་ཞུན་སྔོན་པོས་ཁེབས་ཤིང་ཉི་མའི་འོད་ཟེར་རབ་ཏུ་བཀྲ་བར་གྱུར་ཞེས་ཀྱང་གྲགས་ལ་སྐྱེས་ནས་ཟླ་བ་གསུམ་ལོན་པ་ཙམ་ནས་ཚིག་གི་བརྡའ་ཅུང་ཟད་སྦྱོར་ནུས་ཤིང་ལོ་རུ་ལོངས་པ་ན་རེ་ཞིག་གི་ཚེ་རིག་འཛིན་པདྨ་མ་ཎིའི་ཕྱག་བྲིས། བླ་མ་ལོངས་སྐུ་གསུང་རྡོ་རྗེ་ཚེ་དཔག་མེད་ཀྱི་སྒྲུབ་ཐབས་དཔེ་གོང་མའི་གྲྭ་རིགས་ཞིག་གི་ལག་ཏུ་ཐོག་པ་ཁོ་བོས་བླངས་པ་མ་གཏད་པར་ཡིད་སྐྱོ་ཚུལ་གྱིས་འདི་ནི་ངེད་རང་གི་དཔེ་ཡིན་ཞེས་སོགས་ངེས་ངེས་འདྲ་བ་མང་ཞིག་སྨྲས་པས་ཁོང་ཀྱང་རིག་འཛིན་གོང་མ་དེ་རྗེས་སུ་དྲན་པའི་དད་པས་མཆི་མ་འཁྲུག་ཅིང་ཕྱིན་ཆད་བྱམས་པར་བྱས་ཞེས་གྲགས་ལ་པདྨ་ནོར་བུའི་སྤྲུལ་སྐུ་ཡིན་མིན་ཇི་ལྟར་ཡང་ཚེ་འདིར་སྔོན་གནས་རྗེས་དྲན་གྱི་ཁུལ་གཞན་ལ་སྨྲས་པའི་ཐོག་མ་དེ་ཡིན་པར་ཐོས་ལ་དེ་ནས་བརྩམས་སྔོན་གྱི་ངང་ཚུལ་ཅི་རིགས་པ་སྨྲ་བ་ཞིག་བྱུང་བར་སྣང་ལ། དེར་ལྷན་ཅིག་སྤྱོད་པ་རྣམས་ཀྱིས་ནི་སྐྱེ་བ་ཤིན་ཏུ་གསལ་བར་དྲན་པ་ཞིག་གོ་སེམས་ཤིང་ཡིད་མགུ་ཞིང་སིམ་པར་བྱེད་དོ། །གཞན་ཁ་ཅིག་ནས་དེ་ལ་ངན་སྨྲ་དང་རྨུ་ཅོར་སྣ་ཚོགས་བརྗོད་པར་གྲགས་ཀྱང་ངེད་ལ་ནི་ཁྱད་པར་གང་ཡང་མ་བྱུང་ངོ་། །སྔོན་ཚེ་ཡུལ་གྲུ་ཉི་ཚེར་གྱུར་དེ་རུ། །དམ་པའི་གྲགས་ལྡན་དེ་ཙམ་ཡང་སྲིད་དུ། །ཐོས་ཀྱང་ངན་སྨྲས་ལ་གོམས་བླུན་རྣམས་ཀྱིས། །དེ་ཡི་ཡང་སྲིད་མིན་ཞེས་མགྲིན་རྔ་བརྡུང་། །ད་ནི་འཛམ་གླིང་འབོད་འདིར་ཕྱག་རྒྱ་ཆེའི། །རིག་འཛིན་མཆོག་བརྙེས་གང་དེའི་སྒྱུ་འཕྲུལ་ཞེས། །གྲགས་པ་རིན་ཆེན་དོ་ཤལ་གངས་ཅན་གྱིས། །ཕྱོགས་མཚམས་བུ་མོའི་རྣ་ཆར་ཡོངས་འཁོད་ཚེ། །ངེད་ཀྱི་ཕ་མཚུན་མིན་ཞེས་བདག་བཟང་པོར། །བགྱིད་འོས་དེ་ཡི་མཚན་ཡང་མེ་ཁྱེར་སྲིན། །ཇི་བཞིན་རང་གནས་འཇག་ཟིལ་གསེབ་ཡིབ་པའི། །བྱེད་པོ་རྟ་བདུན་མཐོང་ཚེ་ཅི་སྨྲ་སེམས། །བདག་ནི་སོ་སོ་སྐྱེ་ཡིན་དམ་པ་མིན། །དེས་ན་གྲུབ་པའི་སྒྱུ་འཕྲུལ་ཇི་ཞིག་འགྱུར། །འོན་ཀྱང་དགེ་འབྲས་སྨིན་འོས་རྣམ་ཤེས་ཞིག །མགོན་དེས་བྱིན་གྱིས་བརླབས་སམ་ཡང་སྤྲུལ་གྱུར། །དཔུང་རང་གི་དཔག་པར་མི་ནུས་ན། །རང་མཚུངས་གཞན་གྱིས་བརྟག་པའི་ཡུལ་མ་གྱུར། །ནམ་ཡང་དད་ལྡན་མི་བསླུའི་གདེངས་ལྡན་ན། །བརྟག་དཔྱད་དགོས་མེད་ཆུ་ཡི་རི་མོར་མངོན། །འདི་འདྲའི་ཚུལ་ལ་ཅིས་ཀྱང་བརྟག་འདོད་ན། །ཡེ་ཤེས་སྤྱན་ལྡན་འཕགས་པའི་ས་སྒྲུབ་འཚལ། །ཞེས་སོ། །

དེ་ནས་རིམས་ཀྱིས་ནར་སོན་ཏེ་ལོ་གསུམ་བཞིའི་སྐབས་སུ་གནས་མལ་ངེས་པ་མེད་པའི་དབང་གིས་རྡོ་གྲམ་ཞེས་པའི་གྲོང་ཆུང་དེར་སྡོད་ཀྱི་ཡོད་སྐབས། རང་གི་ཨ་ཕྱིར་འཕགས་མས་བྱིན་གྱིས་བརླབས་པར་གུ་རུའི་ལུང་གིས་ཟིན་པ་དེ་ཡི་དཀར་ཁྲིད་ཀྱི་རྣལ་འབྱོར་བྱེད་པ་མཐོང་བས་རྐྱེན་སད་དེ་ཕྱིན་ཆད་ཚུལ་དེ་ལ་ཡིད་རབ་ཏུ་ཞུགས་པར་གྱུར་པ་ཡི་སྐྱོང་བའི་རྣམ་འགྱུར་ཁོ་ན་བྱས། དེ་འཕྲོས་ལོ་ལྔའི་སྣེ་ཟིན་ཙམ་པར་བྲག་དམར་དགོན་དུ་ཕྱིན་པར་ཚད་ཐུབ་གཏེར་སྟོན་མང་པོའི་ཞབས་ལ་ཐུག་ཅིང་། གནུབ་ཆེན་བུདྡྷ་ཛྙཱ་ནའི་སྤྲུལ་པར་གྲགས་པ་ཀུན་བཟང་ཁྱབ་གདལ་ལྷུན་གྲུབ་ཞེས་རང་གི་རིགས་ཀྱི་ཁུ་བོར་སྙེགས་པ་ཞིག་ཡོད་པ་དེ་དང་ཡུད་ཙམ་མཇལ་བ་ན་དགྱེས་པས་བདག་གྲལ་གྱི་སྒང་དུ་བཞག བཞེས་པའི་ཕུད་ནས་དྲངས་བ་སོགས་དགོངས་ཡུལ་དེའི་ཡང་སྲིད་བདག་ཡིན་མིན་ཇི་ལྟར་ཡང་ནུས་པ་ཤེད་མ་བྱེ་བ་ཞིག་ལ་སྔར་གོ་སའི་བབ་ཕྱོགས་མཚུངས་ཙམ་ཁྲེལ་ཡོད་ངོ་ཚ་ཤེས་ནས་མཛད་པ་ཁོང་ཁོ་ནར་ངེས་གཞན་རང་རང་ཕྲལ་ཆོས་བརྒྱད་སུ་རེམ་ལས་སྔར་གྱི་གོ་ས་མནོ་མཁན་མེད་པ་སྤྱིར་ཁྲེལ་ངོ་ཚ་ཆུང་བར་མ་ཟད་ལྷག་ཏུ་བདག་གི་སྐྱེ་བའི་ཡུལ་ཕྱོགས་དེར་དེ་འདྲ་ཤིན་ཏུ་གངས་ཤིང་དེ་ཡང་མི་སྐྱའི་གནས་ལས་ཆོས་གཟུགས་བཙུན་པ་རྣམས་ལྷག་པར་ཁྲེལ་ལ་མི་གནས་པར་ཐུབ་ཆོད་ཁོ་ནར་སྤྱོད་པ་ཞིག་གོ །སྤྱོད་ལྡན་ཁྲེལ་ཡོད་སྔོན་རབས་བཟང་པོའི་སྲོལ། །དེང་སང་དུས་སུ་མིང་ཙམ་ཁོ་ནར་གྱུར། །ལྷག་པར་མཐའ་ཁོབ་རེ་ཁེ་ལྗོངས་དེ་རུ། །འདི་སྣང་དྲེགས་པས་ཆོས་བརྒྱད་སུ་རེམ་ལས། །གོ་སའི་ཚུལ་ལ་དམིགས་པ་ཡེ་མ་མཐོང་། །གང་ཞིག་རྟེན་གྱི་ཁྱད་པར་དགེ་སློང་ངམ། །ཡི་དམ་ནུས་པ་རྙེད་པ་མ་ཡིན་པར། །རིགས་རུས་སྐྱེ་བས་ཐོབ་པའི་གོ་ས་ལ། །ཟང་ཟིང་ཁུར་གྱིས་དྲེགས་ནས་འགོང་མི་རུང་། །ཅི་ཕྱིར་གཏོང་འཛིན་ལྷ་ཡི་ཞེ་ཁྲེལ་ཞིང་། །བསོད་ནམས་ལས་ཉམས་མི་ཤེས་རྒྱུ་རུ་བཤད། །དེ་ལྟ་ན་ཡང་དེང་སང་དུས་དབང་གིས། །ཕྱོགས་དེར་མི་ནག་སྐྱེ་བོ་ཡ་རབས་ལས། །ཆོས་གཟུགས་འཛིན་རྣམས་ལྷག་པར་ཆགས་སྡང་ཆེ། །བག་མེད་ཆང་དང་བརླང་པོའི་བརྟུལ་ཞུགས་ཀྱིས། །བཟང་པོའི་སྲོལ་རྣམས་ཕལ་ཆེར་དྲི་མར་བྱས། །ཅེས་སོ། །

དཀྱུས་སུ་འཇུག་པ་བཞུགས་གྲལ་དེར་བདག་བྱིས་པར་སོང་བའི་བློ་བྲིད་པའི་སླད་དུ་གུ་རུ་པདྨའི་སྐུ་ཞིག་ཕྱག་གི་བྲི་བར་གནང་ཞིང་བདག་གི་སྔོན་གནས་རྗེས་སུ་དྲན་པའི་ཚུལ་ལས་བརྩམ་གསུང་གླེང་མང་དུ་བྱུང་བས་ཀྱང་རྐྱེན་བྱས་འོད་གསལ་རྡོ་རྗེ་སྙིང་པོའི་མན་ངག་སྐྱོང་ཚུལ་ཅི་རིགས་ཤིག་དེ་དུས་ནས་ཤེས་ཤིང་དྲན་ཏེ་ད་ལྟ་བར་མོས་པ་ལམ་བྱེད་ཙམ་དུ་སྙིང་གི་དབུས་སུ་བཟུང་སྟེ་གནས་མོད། དེང་སང་ཕལ་ཆེར་འཚོགས་དབུས་འཕྱོར་རྒྱན་ངོམ་ཆོས་སུ་བྱེད་ཀྱི་འདུག་ཀྱང་བདག་ནི་བཅོམ་ལྡན་འདས་དཔལ་ཀུན་ཏུ་བཟང་པོ་དང་རིག་འཛིན་དགའ་རབ་རྡོ་རྗེ་ཡི་ལན་གཅིག་མ་ཡིན་པར་ཡང་ནས་ཡང་དུ་ནན་ཏན་ཆེན་པོ་ཡི་ཤིན་ཏུ་གསང་བར་གདམས་ཤིང་གལ་ཏེ་འཕྱར་ན་སྙིང་ཁྲག་སྐྱུགས་ཏེ་ཚེ་ཡི་དུས་བྱས་ཤིང་རྡོ་རྗེ་དམྱལ་བར་བསྐལ་པ་བདུན་འབུམ་དུ་གནས་པའི་དམོད་པར་འཇིགས་པས་ཚུལ་འདི་བབ་ཆོལ་གྱི་བྱིས་པ་ནས་ད་ལྟའི་བར་ནམ་ཡང་སྨྲ་མ་མྱོང་ངོ་། །ལར་སངས་རྒྱས་ཀྱི་གསུང་ཀུན་གྱིས་བདེན་པར་འཛིན་ན་དམོད་པ་འདི་ནི་ཤིན་ཏུ་གནན་པར་རྟོགས་དགོས་སུ་སྣང་ལགས་སོ། །འདི་ལྟ་བུའི་དམོད་པ་ལ་མི་འཇིགས་ན་རྒྱུ་འབྲས་དམ་ཚིག་གཞན་ལ་ཅི་ཕྱིར་འཇིགས། དེ་བས་ཚུལ་འདི་ལ་བག་ཡོད་པར་བྱོས་ཤིག་ཁོས་སྙིང་ཁོང་རུས་པའི་གཏིང་ནས་ཐལ་མོ་སྦྱར་ཏེ་གསོལ་བ་ལགས།

སྨྲས་པ། སྔོན་སངས་རྒྱས་བསྟན་པ་རྫོགས་ལྡན་སྐབས། །མི་ཀུན་ཀྱང་ཤིན་ཏུ་གསང་བ་བསྲུང་། །གནད་དེ་ཡི་འབུམ་ཕྲག་འགྲོ་བ་ཡང་། །དུས་གཅིག་ཆར་གྲོལ་བ་ཁོ་ནར་གྱུར། །བོད་འདིར་ཡང་ཆོས་རྒྱལ་བྱང་སེམས་སྐབས། །རྗེ་གུ་རུའི་དབང་བསྐུར་མཛད་པའི་མིང་། །གསང་སླད་དུ་དབང་ལ་རིམ་པར་བཏགས། །མིང་ཁོ་ནར་དོགས་པ་དེ་ཙམ་ན། །དབང་གདམས་པ་དངོས་ལ་སྨོས་ཅི་འཚལ། །དུས་དེང་སང་སྙིགས་མའི་མར་གཤམ་གྱུར། །ཆོས་ཟབ་དགུ་ཁྲོམ་དུ་ཟོང་ལས་འཕེལ། །སྔགས་གྲུབ་པ་ཐོབ་པ་སྨོས་ཅི་འཚལ། །སེམས་ངོ་བོ་ཆ་མཐུན་མཐོང་ཡང་དཀོན། །དཔལ་ཀུན་བཟང་པདྨ་འབྱུང་གནས་ཀྱི། །བཀའ་གསང་རྒྱས་བཏབ་པ་རྒྱབ་ཀྱིས་ཕྱོགས། །ཆོས་མ་ཡིན་སྒྲིབས་ཤིང་ཆོས་ལ་བཅོལ། །རི་ཀླིང་ཀུན་གློ་སྐམ་ཐུག་པ་བཞིན། །ངེད་གྲུབ་ཐོབ་འཁྲུལ་ཞིག་ཡིན་ནོ་ལོ། །གསང་ཁྱད་གསོད་ཐུགས་ཀྱི་དམ་ཉམས་པ། །ཚུལ་འདི་འདྲས་ཁེངས་འདི་ཀྱེ་མ་ཧུད། །ཞེས་བར་སྐབས་ཀྱི་འཕྲོས་ཏེ།

དེའི་རྗེས་ཚེས་བཟང་བ་ཞིག་ལ་བྲག་དམར་བླ་བྲང་དུ་གདན་བཤམས་བཟོས་སྒོ་ཆེ་བར་མཛད་དེ་ངེད་གྲ་འབོད་མི་གནང་བྱུང་ཡང་རང་ཉིད་བྱིས་པའི་རྟགས་ཀྱིས་འགྲོ་མ་ཐུབ་པ་ཕྱོགས་དེར་རྟེན་འབྲེལ་ཁ་ཤས་ལ་གནོད་རུང་སྔོན་གྱི་ལས་ཚུལ་ཞིག་ཏུ་སྣང་། ལོ་དེ་ཡི་དཔྱིད་དེར་བླ་མ་གོང་མའི་དབོན་རིགས་ཁ་ཤས་པས་སྤྲུལ་སྐུ་ངོས་འཛིན་གྱི་ཁུལ་དུ་རྩེ་རུ་བར་ལན་གཅིག་བོས། ལམ་བར་དུ་སྔོན་གནས་རྗེས་དྲན་ཁ་ཡར་བསྙད་པར་དེ་སྐབས་མི་མགུ་བའི་གཏམ་དུ་སྨྲས་ཀྱང་། ངེད་རང་ནས་ནི་སུ་ཞིག་དྲན་པ་ཡིན་ཡང་རུང་ཕྱོགས་དེར་མི་འཚོགས་བརྒྱ་ཕྲག་པུ་བ་ཞིག་ལ་དབང་བསྐུར་བྱས་པ་ནི་ད་ལྟ་ཡང་ཡིད་ལ་ཝལ་ཝལ་དྲན་ངེས་ཡིན། དེ་གང་ཡིན་མཛུབ་མོ་བཙུག་སྟེ་སྨྲ་མ་དགོས་ན་ཁྱེད་རྣམས་སེམས་མ་འཁྲུག་ཅིག གང་ལྟར་རུ་བར་སླེབ་བསྙེན་བཀུར་ནང་དེ་ནས་ནི་ཁོ་རང་ཚོའི་ཆུ་འབབ་དེ་བྱས། ངེད་ལ་སྒེར་དུ་བཀུར་གཟོས་མ་དགོས་པ་གཞི་གྲུབ། གཞན་ནས་ནི་འབྲེལ་འབྲེལ་མེད། ཕྱིས་ངེད་ལོ་བཅུ་བདུན་ལོན་པར་ས་དམར་ཕྱོགས་སུ་ཕྱིན་སྐབས་དེ་དུས་ཀྱི་ཁྱིམ་མཚེས་བུད་མེད་ཞིག་གི་སྔར་བྱིས་པ་ཆུང་ངུ་ཞིག་བྱུང་བ་དེ་བླ་མ་འདི་འདྲ་ཨེ་ཡོང་མ་ཤེས་དེ་ཤེས་ན་ལན་ཅིག་བོས་ཏེ་འོ་མ་ཕོར་གང་ཙམ་བྱིན་ཆོག་རྒྱུ་ཡིན་འདུག་ཀྱང་མ་བྱུང་ཟེར་བ་དེ་སྐབས་ཡིན། གོང་མའི་སྐུ་གཉེན་ཚོས་ངེད་མ་མཐོང་ཅི་ཙམ་བྱས་མཐའ་དག་དེས་མཚོན་ནུས་སོ། །དེར་ཞག་ཤས་བསྡད་སླར་རང་གནས་ལོག་ཡོང་སྐབས་སྐྱེལ་མཁན་གྲུལ་བཏུབ་མེད་པས་ཞོན་རྟ་ལས་བརྡབ་དལ་འབྱོར་རྟེན་ཆུད་ཟོས་དོས་ཤོར་བྱས།

སྐུ་སྐྱེ་སྤྱི་ལ་མེད་པའི་ངེད་ལ་དགོས་ཆོས་མགྲོན་ལན་གཅིག་བུ་དེ་ཡི་སྐབས་སུ་ཡང་ངོ་མཚར་ཅན་དེ་འདྲ་བརྡོག དེ་ནས་བརྩམ་ངེད་ལོ་བཅུ་གསུམ་སྐབས་སྔར་ཟུར་བཞུགས་ཕྱིས་གདན་སར་གྱུར་པ་བླ་མ་སྐལ་བཟང་དྲུང་ནས་གདན་སར་བོས་པའི་བར་ཁོང་རྣམས་དང་ལན་གཅིག་འཕྲད་པ་ཙམ་ཡང་མ་བྱུང་ངོ་། །གཞན་ཡང་དེ་མཚུངས་ཀྱི་གཏམ་ཤིན་ཏུ་མང་བ་ཞིག་ཡོད་པ་ནི་རང་གི་སྔོན་གྱི་ལས་དང་ཕྲལ་གྱིས་རྐྱེན་ལས་གྲུབ་པར་གདའ།

ཨོཾ་མ་ཎི་པདྨེ་ཧཱུྃ་ཧྲཱིཿ བླ་གཟུགས་གཞན་རྒྱུད་ཤེས་གྲགས་ལུང་བསྟན་དང་། །མཁྱེན་དཔྱོད་བློ་གྲོས་ཆེར་རློམ་མང་ཞིག་གིས། །ཁ་མཚོན་གཅོད་འགའ་སྔ་ཕྱི་མི་མཚུངས་པ། །རང་གི་མཚན་ཉིད་སྟོན་ལས་ཅི་ཞིག་གུ། །ཕྱོགས་རིས་དབང་གིས་བསྟོད་པ་འགའ་མེད་ཅིང་། །སྨད་ཚིག་མང་ཡང་བྲག་ཆ་ལྟ་བུར་ཡལ། །བཅོས་མས་མ་ཡིན་རང་བཞིན་གཤིས་ཉིད་དུ། །སྤྲུལ་པའི་མིང་ཙམ་གྲགས་ལ་ཆེས་སྡང་ན། །བཅོས་མར་གྱུར་རྣམས་ཐལ་བར་བརླག་ངེས་ཀྱང་། །དགའ་འཛུམ་མདངས་ཀྱིས་བསུ་འདི་ཡ་མ་ཆ། །རྗེ་བཙུན་བླ་མ་པདྨ་མ་ཎི་དེ། །སྐྱེས་མཆོག་ཡོན་ཏན་དུ་མས་ཆེ་མོད་ཀྱང་། །རྣམ་པ་ལུང་ཆུང་ཀྱོག་པོའི་བས་མཐའ་རུ། །གནས་པའི་སྦས་ཚུལ་གྲུབ་བརྙེས་བཞུགས་ཤིག་གོ །བདག་ནི་གཞན་དྲིང་མི་འཇོག་རང་ལམ་དུ། །རང་སྐད་རྒྱབ་ནས་རྒྱལ་ཁམས་བགྲོད་པ་པོ། །མིང་གོག་དེ་གསོབ་འཇུག་རིན་ཅི་ཕྱིར་ཆོག །མིང་དེ་བདག་གིས་བདེ་སྤྱོད་བྱས་མིན་ན། །མིང་གོག་དེ་ལ་ཐུགས་རྩིས་མཛད་པ་པོ། །སོ་སོས་ཅི་བདེར་ཐུགས་ཚེག་མཛོད་ཅིག་གུ། །ཕ་ཤུལ་བུས་འཚོབ་གསེར་གྱི་འཕྲེང་བ་བཞིན། །གོང་མའི་རྣམ་ཐར་འཛིན་ནུས་འཆང་ཐུབ་ཀྱི། །བདག་ལ་རྟག་ཏུ་སྤྱོ་བར་མཛད་སྲིད་ཀྱང་། །བདག་སྐྱོན་ཉིད་ངེས་མི་མགུ་ཅི་ཞིག་འཚལ། །ཕ་མེས་ཙནྡན་བུ་ཚ་འགལ་དུམ་ཤིང་། །བསྟན་འཛིན་སྐྱེས་བུའི་ཤུལ་དུ་བསྟན་འཚོང་མཁན། །དེ་འདྲས་བདག་ལ་དམོད་པར་བྱེད་པ་འདི། །མཚན་ཉིད་ཅི་འདྲ་གཟུར་གནས་ཀྱིས་ལྟས་གསལ། །ཕ་མེས་བླ་འཚོང་གོང་མའི་རྐང་འདྲེན་པ། །རང་སྐྱོང་རི་བོའི་ཁུར་ལ་མི་ལྟ་བར། །གཞན་སྐྱོན་སྐྲ་རྩེའི་ཉག་ལས་གཞལ་མཁས་པའི། །མ་རབས་དེ་འདྲར་སྙིང་རྗེ་མཆི་མ་འཁྲུག །ཀྱེ་མ་འཁོར་བའི་གནས་ཚུལ་འདི་ལྟ་སྟེ། །དགྲ་ལ་གཉེན་དང་གཉེན་ལ་དགྲ་རུ་མཐོང་། །འཁྲུལ་སྣང་དྷ་དྷི་ར་ཡི་མྱོས་པ་བཞིན། །བསམ་བཞིན་ངེས་པར་སྙིང་ནས་སྐྱོ་བ་འཕེལ། །ཀྱེ་མ་སྒྱུ་མ་མཁན་གྱི་འཕྲུལ་འཁོར་བཞིན། །འདི་ལ་ནམ་ཡང་ཞེན་པའི་ཡུལ་མ་གྱུར། །འོན་ཀྱང་བྱས་འབྲས་སེམས་ལ་འཆར་སྨིན་པ། །ཀུན་རྫོབ་ངང་ཚུལ་གཏམ་དུ་དེ་སྐད་སྨྲས། །ཞེས་སོ། །

ད་ནི་དཀྱུས་སུ་འཇུག་པར་བྱ་སྟེ། དེ་ནས་མི་རིང་བར་རྡོ་གྲམ་ཞེས་སུ་ཕྱིན་ཅིང་སྡོད་པའི་སྐབས་གཏེར་སྟོན་བླ་རབས་ཁ་ཤས་ཀྱི་ཞལ་ཐང་མཐོང་བས་རྐྱེན་བྱས་དུས་རེ་ཞིག་ན། ཉིན་གཅིག་བྱིས་པའི་རྩེད་མོར་ནས་ཀྱི་སོག་སྦུག་གཅིག་ཤགས་པའི་ཕྱེད་ཚལ་གྱི་ནང་དུ་གཏེར་སྟོན་རིན་པོ་ཆེ་རཏྣ་གླིང་པ་ཞིག་པོ་གླིང་པ་ནུས་ལྡན་རྡོ་རྗེ་ཀློང་གསལ་སྙིང་པོ་སྟག་ཤམས་རྡོ་རྗེ་སྟེ་གྲུབ་པའི་སྐྱེས་བུ་དེ་ལྔ་གྲལ་སྟབས་སུ་བཞུགས་ཤིང་སྐུའི་རྣམ་པ་ཤིན་ཏུ་གསལ་བ་ཞིག་བྱུང་སྟེ། མངོན་སུམ་ནི་ཅི་ལ་ཡིན། སྟོང་གཟུགས་ལྟ་བུ་ཡང་མ་ཡིན། གསལ་ནི་ཤིན་ཏུ་རང་ཡིད་ངོར་གསལ་བས་ད་ལྟ་བརྟག་ན་བསྐྱེད་རིམ་གྱི་གསལ་སྣང་ཤར་བ་ལྟ་བུ་ཞིག་འདུག་ཀྱང་། དེ་དུས་གསལ་སྣང་ཐེབས་དོན་ནི་མེད་ལ་གང་ལྟར་ཡ་མཚན་པ་བྱུང་། དོན་དུ་ནི་དེ་དག་གི་བྱིན་རླབས་ཞུགས་པའི་ལྟས་ཤིག་ཡིན་ནམ་སྙམ། གོང་གི་དེ་རྣམས་དང་ལྷན་དུ་གཞན་ཡང་འགའ་རེ་འདུག་སྙམ་རིབ་རིབ་སྣང་ཡང་ངེས་གསལ་མི་དྲན་པས་སྨྲ་མ་ནུས་སོ། །གཞན་ཡང་དེ་སྐབས་ཕལ་ཆེར་ཞིག་ཡིད་ཀྱི་ངོར་གུ་རུ་པདྨའི་སྐུ་ཡི་བཀོད་པ་ཁོ་ན་ལམ་ལམ་སར་བྱེད་པ་ལྷག་ཏུ་སློབ་དཔོན་པདྨ་ཆ་ལུགས་སྤྱི་དང་འདྲ་བ་ལས་ཕྱག་གཡས་ས་གནོན་རྡོ་རྗེ་གཡོན་མཉམ་བཞག་ཐོད་པ་གྲུ་མོར་ཁ་ཊྭཱཾ་ག་འཛིན་པ་ཞིག་ཡང་ཡང་དུ་ལོ་ངོ་གཅིག་ཙམ་གྱི་བར་དུ་བྱུང་སྟེ། དེ་ཡང་ཆུ་བུར་མིག་གི་སྤྱོད་ཡུལ་ཅན་ནི་མ་ཡིན་མོད། མ་བསམ་པར་ཡིད་ངོར་མངོན་སུམ་ལྟ་བུར་ལམ་ལམ་པར་ཤར་བ་ཞིག་གོ །མེ་ལོང་ལ་པྲ་ཕབ་ཇི་བཞིན་དུ། །ཡོད་མེད་གཉིས་མཐའ་ལ་མ་ལྷུང་བར། །རང་སེམས་ཀྱི་ཡུལ་ན་སྣང་བའི་གཟུགས། །རྡོ་རྗེ་ཡི་སྐུ་དེ་ཅིས་མི་འཚར། །ནམ་མཁའ་ནི་ནམ་ཡང་རྒྱར་མ་ཆད། །འགྲོ་ཀུན་ལ་ནམ་མཁའ་ཁྱད་པར་སྣང་། །རྒྱ་ཆད་དུ་འཛིན་པ་བླུན་པོའི་བློ། །ཁྱབ་གདལ་དུ་ཤེས་འདི་ངོ་མཚར་ཆེ། །ལོ་ལྔ་པའི་མཇུག་དེར་སྐྱབས་མཆོག་འཁོར་ལོའི་མགོན་པོ་རྡོ་རྗེ་འཆང་ནས་ཀ་ཁ་ཡི་སྦྱོར་ཀློག་སློབ་པའི་དབུ་ཚུགས་ཤིང་དེ་འཕྲོར་རྒན་རབས་ཀྱིས་ཅུང་ཟད་ལས་གཅུན་མ་དགོས་པར་ད་ལྟའི་ཀློག་ཡིག་འབྲིང་ཙམ་འདི་ལོ་དྲུག་སྐབས་ཉིད་དུ་ཚེགས་མེད་པར་ཁོང་དུ་ཆུད་པ་ཡིན་ནོ། །

ལོ་དྲུག་ལོན་པའི་དཔྱིད་དེར་ཞང་པོའི་རྗེས་སུ་འབྲངས་ནས་ཁྲོ་རྒྱལ་དགོན་དུ་འཁོར་ཙམ་ཕྱིན་ཞིང་སླར་རང་གནས་ལྡོག་པའི་མཚམས་གཞན་རྐྱེན་གྱི་གཟེར་རོ་མང་པོ་ལ་རྟེན་ཡུལ་ངེས་པ་མེད་པ་གཅིག་ནས་གཅིག་ཏུ་བརྒྱུད་དགོས་པ་བྱུང་། དེ་དག་གི་བར་སྐབས་རྣམས་སུ་བཀྲེས་སྐོམ་དང་ཚ་གྲང་གི་སྡུག་བསྔལ་ཡང་ཅི་རིགས་པ་ཉམས་སུ་མྱོང་། བདག་ལོ་བདུན་པའི་སྐབས་དེར་རྗེ་བཙུན་འཁོར་ལོའི་མགོན་པོ་ཡང་རེ་ཁེ་སྨད་བསྭོ་ལྕི་རོང་རོལ་ལམ་དགོན་དུ་གདན་ཕབ་པར་མཛད་ཅིང་བདག་ཅག་ལྟོས་བཅས་རྣམས་ཀྱང་དེ་མཐུན་ཕྱོགས་དེར་སྡོད་གནས་བྱེད་པར་ཤར། དེ་སྐབས་རང་ལོ་བདུན་བརྒྱད་པའི་མཚམས་རྣམས་སུ་དཔལ་ཆེ་མཆོག་རྡོ་རྗེ་གྲོ་ལོད་ཀྱི་ལས་བྱང་ནོར་བུའི་འཕྲེང་བ་ཀློག་འཛིན་ཡི་དམ་བགྱིས་པར་བར་ཆད་སེལ་བ་དང་། ཐོག་མར་དངོས་གྲུབ་ལྟས་ཅི་རིགས་པར་ཤར་ཡང་། ཕྱིས་བསྙེན་བསྒྲུབ་འཕྲོ་འཐུད་རྒྱུ་མ་བྱུང་བས་དངོས་གྲུབ་ཀྱི་མཚན་མ་ཕྱིར་ཕྱོགས་སོང་། དེས་ན་ཕྱིས་འབྱུང་གིས་བྱིས་པའི་དུས་ནས་ཡི་དམ་ལྟེམ་རྐྱང་མི་རུང་ཚུལ་སྨྲ་དགོས་རྒྱུར་གདའ་ཡང་ངེད་ལ་དེ་འདྲ་མཁན་མ་བྱུང་བའི་སྐྱོན་ནོ། །

སྤྱིར་རང་ལོ་བརྒྱད་པའི་སྐབས་དེར་རྨི་ཉམས་ཀྱི་རང་བཞི་ཅི་རིགས་པ་ཞིག་བྱུང་ཞིང་ལྷག་ཏུ་ཚེ་འདིར་ཨོ་རྒྱན་ཆེན་པོའི་ཟབ་གཏེར་གྱི་སྒོ་འཕར་འབྱེད་པ་དང་མི་འབྱེད་པའི་ལྟས་རྣམས་ཀྱང་གསལ་པོར་ཤར་བ་ཡིན་འདུག ལོ་དེའི་སྔར་ཕྱིའི་ཁོངས་སུ་སྣང་བ་འདི་ཡང་བདེན་ཞེན་མེད་པ་དངོས་དང་རྨི་ལམ་དབྱེ་གསལ་མི་བཏུབ་པ་འལ་མ་འོལ་ཞིག་ཤར་ཏེ། དེ་དུས་ངོ་སྤྲོད་ཞིག་ཐོབ་ན་རྩལ་ཤིན་ཏུ་ཆེ་བ་ཡོང་རྒྱུར་འདུག་སྟེ་མ་བྱུང་། ལོ་བཅུ་གཅིག་པར་རྗེ་བཙུན་རྡོ་རྗེ་འཆང་ལ་བླ་མ་དམ་པ་ཀུན་རིམ་པས་ཉམས་རྟོགས་ཀྱི་ངང་ཚུལ་ཞུ་གནང་མཛད་པ་ཐོས་པ་སེམས་ཀྱི་འཇོག་ཕྱོགས་ཆ་ཤས་ཤེས་ནས་བསྒོམ་པ་གནས་ཉམས་ཅི་རིགས་པ་སྐྱེས། ལོ་བཅུ་གསུམ་ལོན་པར་རྒྱལ་བའི་དུས་ཆེན་ས་ག་ཟླ་བའི་ཚེས་བཟང་པོར་བཀའ་དྲིན་ཅན་བྱིན་རླབས་ཅན་ཐུགས་རྗེ་ཅན་རྩ་བའི་བླ་མ་རྡོ་རྗེ་འཆང་པད་འབྱུང་བདེ་ཆེན་གླིང་པའི་ཞབས་པད་ལ་སྤྱི་བོར་བཏུད་ནས་དུས་གསུམ་སངས་རྒྱས་ཐམས་ཅད་ཀྱི་བསྒྲོད་པ་གཅིག་པའི་ལམ་གྱི་མཐར་ཐུག་གནས་ལུགས་རྫོགས་པ་ཆེན་པོའི་ཁྲིད་བཀའ་སྔོན་འགྲོ་དལ་འབྱོར་རྙེད་དཀའ་མི་རྟག་འཆི་བ་འཁོར་བའི་ཉེས་དམིགས་ཐར་པའི་ཕན་ཡོན་ལས་རྒྱུ་འབྲས་ཀྱི་ཁྲིད་སྐྱབས་འགྲོ་སེམས་བསྐྱེད་དེ་སྐྱེས་བུ་གསུམ་གྱི་ལམ་རིམ་མ་ཚང་བ་མེད་པ་དང་མཎྜལ་རྡོར་སེམས་བསྒོམ་བཟླས་བྱིན་རླབས་བླ་མའི་རྣལ་འབྱོར་ཐུན་མོང་དང་ཐུན་མོང་མ་ཡིན་པ་བཅས་སྨིན་ཁྲིད་དུ་བཏང་བའི་རྗེས་སུ་སེམས་འཛིན་ནས་བརྩམས་དམིགས་པའི་སྤེལ་བསྒྱུར་རིམ་པར་གནང་བ་ལས་རྟོགས་འབུལ་གཉིས་ཟིན་པའི་སྐབས་སུ་རིན་ཆེན་ཟངས་ཀྱི་སྣོད་རྒྱ་ཇ་ངད་ལྡན་བསིལ་མས་བཀངས་ཏེ་ཐོག་མར་བཅུད་དང་མཐར་སྣོད་ཡང་སྩལ་ཞིང་གནས་འགྱུར་རིག་གསུམ་ཇི་བཞིན་ངོས་ཟིན་པའི་དབུགས་དབྱུང་བ་རྡོ་རྗེའི་བཀའ་ཡིས་གནང་བླ་མའི་བྱིན་རླབས་མཐུའི་རིང་པོར་མ་ཐོགས་པར་སེམས་ཆ་མཐུན་པ་གནས་འགྱུར་རིག་པ་ཡིད་ཆེས་རྐང་ཚུགས་སྐྱེས་ཀྱང་ལོ་དེའི་གཞུག་ལ་རིག་འཛིན་ཆེན་པོ་པདྨ་མ་ཎིའི་རིགས་དབོན་རིན་པོ་ཆེ་སྐལ་བཟང་ཨོ་རྒྱན་བསྟན་འཛིན་དྲུང་ནས་ཀཿཐོག་གི་མངའ་རིས་སྤྱི་དང་བྱེ་བྲག་ལྷོ་ཕྱོགས་རེ་ཁེ་ལྗོངས་ཀྱི་ཆར་རྒྱལ་བསྟན་འཛིན་འགྱུར་ཡོངས་ཀྱི་སྤྱི་ཕུད་ཚད་སྐྱོབ་དཀར་པོའི་རྩེ་མོའི་དབལ་ལྟར་མངོན་པར་མཐོ་བ་ཀུན་མཁྱེན་པདྨ་བློ་གྲོས་ཀྱི་གདན་སར་བསུ་བའི་དགོངས་བཞེད་ཀྱི་ཆེད་དུ་མངགས་ཏེ་གཉེར་པ་ལྕི་རོང་རོལ་ལམ་དུ་བྱུང་བར་བརྟེན་རྩ་བའི་བླ་མ་ལ་དགོངས་པ་ཞུས་ཏེ་གཟའ་སྐར་ལེགས་པ་ལ་ལམ་དུ་ཞུགས་ཤིང་རིམས་ཀྱིས་གསེར་གྱི་འདྲེན་པའི་ཆུ་ཀླུང་གནམ་སྔོན་ཞུ་བ་ལྟ་བུ་གཙང་ཐལ་དུ་ཀོ་བ་ལ་བརྟེན་ནས་བརྒལ་ཏེ་གསལ་སྨད་དུ་རྗེ་བླ་མ་ཡང་ངེད་བསུ་བར་ཕེབས་འདུག་པ་དང་མཇལ་བའི་ཐོག་མ་དེ་ཀར་རིག་འཛིན་གོང་མ་ཉིད་དུ་དགོངས་བཞིན་ཡུལ་ཕྱོགས་དེའི་སྐྱེ་རྒུ་མཆོག་དམན་ཐམས་ཅད་ཀྱི་གཙུག་ཏུ་ལུགས་གཉིས་ཀྱིས་མངོན་པར་མཐོ་བ་འཇིགས་མེད་སེང་གེའི་ཁྲིར་བྱིན་གྱིས་བརླབས་འགྱུར་རྟེན་འབྲེལ་བཟང་པོའི་གདན་དགེ་བ་ལ་བདག་འཇོག་ནས་གུས་པའི་ཕྱག་དང་དགྱེས་པའི་བཀུར་གཙོ་ཆེ་བར་མཛད་ཀྱང་ངེད་ཀྱིས་ནི་ལྡང་བ་དང་ཕྱག་ལན་སོགས་དེ་སྐབས་ཆོས་འབྲེལ་མེད་པས་འབུལ་མ་ཐུབ།

སྤྱིར་ངེད་ཆུང་ངུའི་སྐབས་ལྟག་ཚུག་ཟིན་མདོག་ཁ་བ་ཞིག་ཡོད་པས་ལོ་ཉི་ཤུ་རྩ་གཅིག་མར་བཏགས་ཆོས་འབྲེལ་མེད་པའི་བླ་མ་ལ་ཕྱག་མ་འཚལ། ཅི་ཕྱིར་བླ་མ་མིན་ལ་ཕྱག་མི་བཙལ་ཞེས་རྒྱ་གར་གྱི་ཡུལ་ཆོས་སུ་ཡང་དེ་ལྟར་ཡོད་པར་ཐོས་པ་ཡིན་ལ། དེ་ལྟ་ཅི་དགའ་བྱ་ཆོག་པ་ནི་རང་གི་སྐྱེ་ཡུལ་ལུང་ཁྱོག་ཏུ་སོང་བའི་ཕན་ཡོན་ཙམ་དུ་སྣང་། ཕྱིས་རྒྱལ་ཁམས་གནས་སྐོར་ལ་ཕྱོགས་ནས་ཆོས་འབྲེལ་མེད་ཀྱང་གོ་ས་དང་ངོ་བསྲུང་དབང་གིས་ཕྱག་དང་ཕྱག་ལན་ཅི་རིགས་བྱེད་དགོས་ལྷུན་གྱིས་གྲུབ། དེར་ཡང་མ་ཟད་མེ་རྟ་ལོ་གཞུག་བལ་པོའི་གནས་སྐོར་ཕྱིན་སྐབས་དམན་པའི་ས་བཟུང་དག་པའི་སྣང་བ་སྦྱངས་རྒྱུའི་རྩིས་ཀྱི་ལོ་ངོ་གསུམ་ཙམ་བླ་གཟུགས་ཆེ་ཆུང་མཆོག་དམན་མེད་པ་ཀུན་ལ་ཕྱག་དང་ཕྱག་ལན་ལྷུར་བླངས། རྗེས་སོར་མཐར་ནི་མ་འཁྱོངས་པར་དམན་ས་བཟུང་དག་སྣང་ཕྱོགས་མེད་འབྱོངས་ན་ལེགས་མོད་ཀྱང་མཐའ་མི་འཁྱོངས་ཕྱིན་གོ་བབ་མ་རྩིས་པའི་ཕྱག་དང་ཕྱག་ལན་དེ་ཡང་ངོ་མཚར་དུ་མ་སོང་ཕྲལ་སྣང་ངོར་མ་མཛེས་ཤིང་ཕུགས་རྟེན་འབྲེལ་ལ་གནོད་པར་གོ །ཉང་སྟོད་ཨརྱཱ་བས་རྒས་ཆལ་སྔ་མ་དེ་ལོ་ཉི་ཤུ་ཙམ་ནས་སླེབ་ཡོང་ཟེར་བའི་དཔེ་བྱུང་སོང་། དེ་ནས་རྗེ་བླ་མའི་ཞབས་ཕྱིར་དཀྲིས་ཏེ་ལྗང་ཆུའི་གྲོང་ཚོ་ཅི་རིགས་པར་ཕྱིན། འགྲུ་སྲིབ་ཏུ་འབྱོར་བ་ན་ཚེ་དབང་རྒྱལ་བ་འདུས་པའི་ལྷ་དབང་གཏོར་མའི་བྱིན་རླབས་ཤིག་ཞུས། དེ་ནས་བརྩམས་ཕུད་བླ་མ་ལ་ཞུས་ཞེས་པ་ཅི་ནུས་སུ་བགྱིས། དེ་ནས་བཙན་རི་གནས་ནང་དུ་སླེབ། དགུན་ངོ་དེ་དང་ལོ་ཕྱི་མའི་དབྱར་སྟོན་གྱི་བར་དུ་དེར་སྡད་ནས་འཕྲལ་ཉེ་མཁོ་བློ་འཛིན་ཐན་ཐུན་བླ་མའི་བཀའ་ལྟར་བགྱིས་རུང་། གྲྭ་ཚང་མིག་སྲོལ་གཡེང་བས་སླད་དེ་སྔར་གྱི་ཉམས་ཕྲན་བུ་དེ་ཡང་ཇེ་ཡལ་དུ་སོང་། དེར་ཡང་མ་ཟད་ཀྱི་ལོ་བཅུ་གསུམ་མར་བཏགས་མཚན་མོ་སྟོང་གཟུགས་དང་འབྲེལ་བའི་ལྷ་སྐུ་ཡི་སྣང་བ་འབྱམས་ཀླས་པར་ཤར་བ་དང་། མི་མ་ཡིན་མང་པོའི་གཟུགས་བརྙན་རྒྱུན་དུ་མཐོང་ཞིང་། རྨི་ལམ་གྱི་སྣང་བ་ཡང་འདུན་པ་གཏད་རེས་ཀྱི་ཟིན་པས་ལྷ་འདྲེ་མང་པོ་དམ་ལ་འདོགས་པ་དང་། ལེགས་ཉེས་ཀྱང་ལྐོག་གྱུར་པའི་གནས་རྣམས་གསལ་པོར་རྔོ་ཐོགས་པ་སོགས་སྒྲིབ་པ་ཅུང་ཟད་སྲབ་ཅིང་གཞོན་ནུ་རྩ་ཁམས་དྭངས་པའི་ནུས་པ་བརྗོད་ཀྱི་མི་ལངས་བ་ཡོད་པ་ཐམས་ཅད་མེ་ལོང་ལ་སྣུམ་གྱིས་བྱུགས་པ་ལྟར་གདན་སར་སླེབ་ནས་བཟུང་རིམ་གྱིས་འགྲིབ་པའི་དབུ་ཚུགས་སོང་དེ་ཡང་གྲྭ་ཚང་ནང་ནས་ནི་བརྙས་བཅོས་དང་ཁྱད་གསོད་ཀྱི་ཉམ་ཐག་པའི་གནས་སུ་འཁོད་པ་ཡིན་ཡང་ཕྱི་རོལ་ནས་བླ་མར་དམིགས་ཏེ་དཀོར་རྫས་འདྲ་ཅི་རིགས་སྦྱིན་མཁན་བྱུང་བ་ཡི་སྐྱོན་ཡང་ལོས་ཡིན། གང་ལྟར་ཚེ་འདིར་དགོས་གལ་ཆེ་བ་མང་ཞིག་མི་འགྲུབ་པའི་སྣེ་ཟིན་པ་དེར་གདའ། དེས་ན་བསམ་བཞིན་སྲིད་པར་སྐྱེ་བ་འཛིན་པ་རྣམས་མ་གཏོགས་བདག་ལྟའི་སྐྱེ་བོ་ལ་མིང་སྐུ་སྐྱེར་བཏགས་ཏེ། དེ་ལ་བླུན་ཞེན་ཅན་རྣམས་ཚོགས་ནས་འདི་ངེད་ཀྱི་བླ་མའི་སྐྱེ་བའོ་ཞེས་དང་། འདི་ངེད་ཀྱི་མེས་པོའི་སྐྱེ་བའོ་ཞེས་དང་། འདི་ཨ་ཁུའི་སྐྱེ་བའོ། །འདི་ཨ་ཞང་གི་སྐྱེ་བའོ། །ཞེས་སྒྲོགས་ཤིང་བྱིས་པ་སྭོ་མ་རྫོགས་པ་ནས་དཀོར་ལ་རྐང་རྫོངས་སུ་བཅོས་ཤིང་ནམ་ཞིག་ནར་སོན་ནའང་། རང་ཡང་དེ་ཀ་ཡིན་དྷུའི་ཁུལ་གྱི་མི་ཚེ་སྟོང་ཟད་དུ་སོང་བ་དེ་རང་གིས་ནི་མ་མནོས། གཞན་རྐྱེན་དགེ་བའི་བཤེས་གཉེན་མཚན་ལྡན་གྱིས་ནི་མ་ཟིན། རིམ་གཉིས་དགེ་སྦྱོར་ནི་མ་ནུས། དམ་ཚིག་རྒྱུ་འབྲས་ཀྱི་སྤངས་བླངས་ནི་རྐུབ་ཡང་སེ་བ་ཞིག་ལ། ཧམ་པ་ཕེ་ཟོ་མཐོ་ཙམ་ཞིག་བྱས་ཤིང་འཇིག་རྟེན་ཆོས་བརྒྱད་ཀྱི་གོ་ཆ་སྲ་བརྟན་རེ་བགོས་ནས་གཤིན་དཀོར་གསོན་གླུད་ལ་ལོགས་སྤྱད་དེ་མཐར་སྐྱེ་བ་སྔ་མའི་དགེ་འབྲས་ཅི་རིགས་པ་ཚེ་འདིར་རྫོགས་པས་ཐར་པའི་དཔྱང་ཐག་ཆད་ནས་འཁོར་བ་མཐའ་མེད་ཀྱི་གཡང་སར་ལྷུང་ཚབས་ཆེན་པོར་སྤྱོད་པ་ལ་ཨ་ཙ་མ་ཡ་རེ་ང་། དེ་ཕྱིར་བདག་ནི་སྐྱེ་བ་འདི་ནས་བཟུང་བླ་མེད་ཡང་དག་འཕགས་པའི་ས་མཆོག་དམ་པ་མ་མཐོབ་བར་དུ་སྐྱེ་བར་མིང་བཏགས་ནས་རང་དོན་ཚགས་སུ་མ་ཚུད་བཞིན་རྣམ་གཡེང་འཁོར་བའི་ལས་ལ་སྤྱོད་པ་འདི་ལྟ་བུ་གཏན་ནས་མ་གྱུར་ཅིག

དེ་ནས་དཀྱུས་སུ་འཇུག་པར་བྱ་སྟེ། རི་བཀྲ་གནས་ནང་དུ་སྡོད་པའི་ལོ་དེའི་དབྱར་དུས་དེར་ཀ་ཐོག་རྒྱལ་སྲས་བསོད་ནམས་ལྡེའུ་བཙན་དང་མཇལ་ནས་དབང་བཀའ་ལྗགས་ལུང་མང་དུ་ནོས་ནས་བྱིན་རླབས་ཀྱི་རྒྱུ་ཁྱད་པར་ཞིག་ནི་གྱུར་འདུག སྟོན་ཁ་ཤར་ཙམ་ན་གདན་དྲུང་རྗེ་དབོན་རིན་པོ་ཆེའི་བཀའི་ཁྲོལ་ཆ་ཞུས་ནས་བླ་མ་ཀུན་འདུས་ཀྱི་ངོ་བོ་རྡོ་རྗེ་འཆང་བདེ་བ་ཆེན་པོའི་ཞབས་པད་བསྙེན་པར་ལྕི་རོང་གི་དབེན་པར་སོང་སྟེ། དེ་ཡང་གདན་ས་ནས་ཚུར་འོང་སྐབས་སུ་ད་ལམ་ཆོས་གཤའ་མ་ཞིག་ཅིས་ཀྱང་བྱེད་དགོས་ལ། ལྷག་ཏུ་རང་གཞན་གྱི་དོན་གཉིས་ཕུན་སུམ་ཚོགས་པའི་གཞི་རྩ་ཡང་དག་པ་ནི་ལྟ་སྒོམ་རྟོགས་པའི་གདེང་དང་ལྡན་དགོས་ངེས་སུ་འདུག་པས། དེ་སྟོན་པར་བྱེད་པ་རྩ་བའི་བླ་མ་མཚན་ཉིད་ལྡན་པ་ལ་རག་ལས་པས། རྩ་བའི་བླ་མ་ནི་འདི་ལྟ་བུ་ཆེས་ཆེར་མཇལ་དཀའ་བ་ནི་ཨུ་དུམྺ་རའི་མེ་ཏོག་ལས་ཀྱང་དཀོན་ཞིང་། གདུལ་བྱ་བསོད་ནམས་དམན་པས་ཡུན་དུ་བཞུགས་པར་ཡང་ཁ་ཚོན་མི་ཆད་ཀྱི། ད་ལྟའི་སྐབས་བསྒོམ་པ་ལ་བརྩོན་འགྲུས་ཉིན་མཚན་ཁ་སྦྱོར་དུ་བྱེད་དགོས་སོ་ཞེས་བློར་བཏགས་ཏེ་འོང་ན་ཡང་། རང་གནས་སུ་སླེབས་སྐབས་རང་གིས་རང་ལ་དཔའ་གདེངས་ཐེར་ཚུགས་ཀྱི་བསྒོམ་བསྒྲུབ་བྱེད་པའི་བློ་བརྟན་རླིང་ནི་ན་ཚོད་བྱིས་སྦར་སོང་ཞིང་སྐལ་བ་དམན་པས་འགྱང་། གཞན་རྐྱེན་གྲོགས་ནི་བསྒོམ་བསྒྲུབ་བྱེད་དགོས་ཚུལ་གྱི་གཅུང་ཐག་བླང་མཁན་སུ་ཡང་མེད། དེས་ན་ཆོས་གཤའ་མ་ཞིག་བྱེད་པའི་བློ་གཞི་ཡོད་ཀྱང་ལག་ཐོགས་འགེལ་ནུས་པའི་མཐུ་མ་ཐོབ་པར་བསྒྲུབ་པ་ཡང་དག་ཅིག་སང་བགྱིད་དོ་གནང་བགྱིད་དོ་སྙམ་པའི་ངང་ལ་བྱས་པ་དོན་མེད་ཀྱི་རོ་སྲེགས་ཕ་འདེབས་དབང་བསྐུར་གྱི་བྱ་བས་སངས་མེད་བདུད་ཀྱི་ཕྱེ་གཏོར་ལ་ཡེངས་ཏེ་ལོ་གཅིག་གཉིས་ངང་དུ་རྫོགས་ནས་རྒྱལ་བ་དགྱེས་ཤིང་འགྲོ་དོན་ནུས་པའི་གཞི་རྩ་རང་དོན་ཚགས་སུ་ཚུད་པའི་བསྒོམ་བསྒྲུབ་ཀྱི་བླ་མའི་དགོངས་པ་མཉེས་པ་གཅིག་བྱེད་བསམ་པའི་ངང་དུ་མ་འགྲུབ་པ་འདི་ནི་ད་ལྟ་འགྱོད་པ་ཆེ་བ་ལས་ཀྱང་ཆེས་ཆེ་བས་མཆི་མ་འཁྲུག་ཅིང་ཀྱེ་མ་ཀྱེ་ཧུད་ཅེས་སྨྲེང་བ་ལགས་སོ། །

ཀྱེ་མ་དལ་འབྱོར་ཐོབ་པ་དོན་ལྡན་བསྒྲུབ་བསམ་ཀྱང་། །བདུད་ཀྱི་བྱིན་གྱིས་བཤོལ་དུས་ཀྱིས་འགྱང་། །མི་ཚེ་མདོ་ཤོར་དོན་མེད་ངང་དུ་འཁྱམས། །བསམ་ཞིང་སྙིང་རླུང་དེ་ལ་ཅིས་མི་ལྡང་། །དེས་ན་བསྒོམ་བསྒྲུབ་ཕྱི་བཤོལ་མ་ཤོར་བར། །ཆེ་བཞག་ཆུང་བཤོལ་གནམ་ས་གོ་ལྡོག་ཀྱང་། །རང་ཐག་རང་གཅད་ཕ་མ་གཉེན་ཚན་དང་། །གྲོགས་འཁོར་དབང་དུ་ནམ་ཡང་མི་བཏང་བར། །རྩེ་གཅིག་དབེན་པར་ངེས་དོན་སྙིང་པོ་ལ། །ལེ་ལོ་མེད་པར་བསྒོམ་བསྒྲུབ་ནན་ཏན་བརྩོན། །ཆོས་ཀྱི་སྲོག་ཤིང་བླ་མའི་དམ་ཚིག་སྟེ། །རང་སྲོག་ཆད་སླ་དེ་ཉིད་མི་ཉམས་བསྲུང་། །

ད་དུང་སྐབས་ཀྱི་འཕྲོས་སུ་བརྗོད་ན། །དེ་ལྟར་བསྒོམ་བསྒྲུབ་ཀྱི་བསམ་པ་སྐྱེས་ཕྱིན་རང་ཉིད་ན་ཚོད་རྒན་རུང་གཞོན་རུང་ལྷག་བསམ་སྐྱེས་ཤིང་ཆོས་པའི་གྲལ་དུ་ཆུད་པ་ཡིན་པས་དེ་ལས་བློ་གཞན་དུ་འགྱུར་བ་མེད་པའི་ཞེ་གདེངས་འཆའ་སྟེ་དེ་ལ་གཞན་རྐྱེན་སྟེང་ནས་རི་ཉིལ་འོག་ནས་མཚོ་རྡོལ་ཀྱང་རང་གི་ལྷག་བསམ་དེ་ཁོ་ནར་ཐེར་བཙུགས་ཏེ་དེ་ལ་ཕ་མ་གཉེན་ཚན་གྲོགས་འཁོར་གང་གི་དབང་དུ་མི་བཏང་བར་རབ་མི་ཚེ་སྒྲུབ་པར་བསྐྱལ་བ། འབྲིང་བཅུ་གཉིས་ལོ་བསྐོར། ཐ་མ་ཡང་ལོ་འཁོར་ཕྱེད་དེ་དྲུག ཡང་མཐའ་ཡང་ལོ་གསུམ་གྱི་མཐའ་བརྟེན་པ་རེ་དམ་བཅས་ཤིང་། རང་ཉིད་འཆི་ཡང་མཚམས་ཁང་དུ་འཆི་ནུས་པ། ན་ཡང་མཚམས་ཁང་དུ་ན་ནུས་པ། སེམས་ལྷོང་སྡུག་བསྔལ་བློ་མི་བདེ་བ་ཅི་བྱུང་ཡང་ལམ་དུ་ཁྱེར་ཞིང་ཉིན་མཚན་ཐུན་དྲུག་ཏུ་བགོ་ནས་རིམ་གཉིས་ཀྱི་ཉམས་ལེན་ལ་ལྟེམ་རྐྱང་ལེ་ལོ་ཡུད་ཙམ་ཡང་མ་ཤོར་བར་བྱ་དགོས་ཀྱི་སྤྱི་མཚམས་བསྒྲུབ་ཀྱི་ཁུལ་ལ་ནང་རོ་ཉམས་རྐང་བརྐྱང་གཉིད་དང་སེམས་རྣམ་རྟོག་གི་འཕྲེང་བ་བསྒྲང་ན་ཕྱི་བ་ཁུངས་སུ་ཉལ་བའི་དཔེ་ཟླར་མ་ཡིན་པར་བསྒོམ་བསྒྲུབ་བྱས་པའི་རྗེས་ཡོད་ངེས་པ་རང་གི་ཡིད་རང་གི་ཆེས་ཐག་ཆོད་ཅིག་བྱིས་སྦ་ཆུང་ངུ་ནས་བརྩོན་དགོས་པར་འདུག་གོ །

དེ་ལྟར་བསྒོམ་བསྒྲུབ་བྱ་དགོས་ཀྱི་ལྷག་བསམ་སྐྱེས་པ་ཙམ་ནས་བདུད་ཀྱི་བར་ཆད་བརྩོམ་ཞིང་བསྒོམ་བསྒྲུབ་མ་ཞུགས་པར་ཐག་ཆོད་ཚེ་ལྷག་པར་བར་དུ་གཅོད་ལ། དེ་ཡང་རང་གི་ཕ་མ་ལ་སོགས་གཉེན་དུ་རྫུས་ནས་བཤོལ་འདེབས་པ་དང་། དེ་བཞིན་མཛའ་བའི་གྲོགས་དང་གྲྭ་འཁོར་སྦྱིན་བདག་ཞེན་ཡོད་ཡོད་པོ་དང་རང་བཞིན་གྱི་བཏང་སྙོམས་གནས་པས་ཀྱང་ཞལ་ལྕེའི་ཚུལ་དུ་དང་། མཁན་པོ་སློབ་དཔོན་དང་ཁྲིམས་ཀྱི་ཞལ་ལྟ་བ་སོགས་གང་ལ་གང་འཚམས་སུ་རྫུ་ནས་བསྒྲུབ་པ་བཅོམ་སྟེ། ད་ལྟ་ན་ཚོད་གཞོན་གྱི་བསྒྲུབ་པ་སླད་མར་བྱ་ལོང་ཡོད་ཞེས་པ་དང་། ལ་ལས་ནི་ད་རིས་གདུལ་བྱ་འཕྲིན་ལས་ཀྱི་མགོ་ཚུགས་ཚེ་རེ་ཞིག་དེ་སྐྱོང་གལ་ཆེ་ལ་མཐར་བསྒྲུབ་པ་བྱེད་ཆོག་ཞེས་པ་དང་། ལ་ལས་ནི་ངེད་ཀྱི་ཤ་ཚའི་གྲོས་འདེབས་འདི་ལྟར་བྱེད་ཀྱང་མི་ཉན་པར་ཀྱེ་ཧུད་ཞེས་སྙིང་བརྩེ་བརྩེ་ཉམས་ཐག་ཁུལ་གྱིས་བསྲུང་བ་དང་། ལ་ལས་ནི་བསྒྲུབ་པ་ལ་ཁུགས་ན་ངེད་འཁྱམ་མམ་ལྕེབ་སམ་བྱེད་ཞེས་པ་དང་། ལ་ལས་ནི་ཁྱོད་བསྒྲུབ་པ་བྱེད་ན་ངེད་ཀྱི་འཚོ་བ་དང་གཡོགས་ནི་བྱེད་མི་བཏུབ་ཀྱི་ཁྱོད་རང་ཅི་དགའ་ལ་རྒྱུགས་ཞེས་དང་།

རེས་ནི་འདི་ལོ་བྱ་བ་གལ་ཆེན་ག་གེ་མོ་དང་ཆེ་གེ་མོ་འདི་རྣམས་གྲུབ་པར་གྱིས་ལ། སང་ནས་བསྒྲུབ་པ་ལ་ངེས་པར་ཞུགས་ཆོག་ཅེས་པ་སོགས་མདོར་ན་ཞི་བས་བློ་བྲིད་ཀྱིས་བསླུ་བ། ཁྲོ་བས་བསྡིག་སྟེ་དྲག་པོ་བྱེད་པ། ཞི་ཁྲོས་གྲོས་འདེབས་སྣ་ཚོགས་པ་འདེབས་མཐའ་དག་བརྗོད་ཀྱི་མི་ལོང་སྟེ། དེ་ལྟར་ཆོས་ཀྱི་བཤོལ་འདེབས་དེ་ཀུན་ཀྱང་སྒྱུ་མ་ལྟ་བུར་ཤེས་ཤིང་མི་དགའ་ཁྲོ་བའི་རྣམ་པ་ཡང་མི་བྱེད་པར། དེའི་དབང་དུ་མི་ཤོར་བའི་ཐབས་བདག་དགོས་ཏེ། དེ་ཡང་ཕ་མ་ལ་སོགས་ཀྱིས་བཤོལ་ཚེ། ངེད་རྨི་ལྟས་ལོགས་ཤིང་མིག་ལྟས་ངན་པ་མང་དུ་མཐོང་བས་འདི་ལོ་བསྒྲུབ་པ་མ་བྱུང་ན་ངེད་འཆི་ངེས་པར་ཡོད་པས་བརྩེ་བས་རེ་ཞིག་དགོངས་པ་གནང་མཛོད།

སླད་མར་ཕ་མའི་ཅི་གསུང་བསྒྲུབ་ཞེས་ཐབས་མཁས་པོས་བྲིད་པ་སོགས་དགོངས་པ་ཁྲེལ་ཐབས་ལ་བརྩོན་པ་ཡིན་ཏེ། ཅི་ཕྱིར་ཕ་མ་ནི་ཚེ་འདིར་རང་ལ་བཀའ་དྲིན་ཆེས་ཆེ་ཞིང་ལུས་རྟེན་འདི་ཐོབ་པའི་རྒྱུ་ཡིན་པས་འཕགས་པ་རྣམས་དང་ཆ་མཚུངས་ཙམ་དུ་བསྙེན་ཞིང་བཀུར་བའི་ཡུལ་དུ་རྒྱལ་བས་གསུང་པས་ན་རབ་ཕ་མ་དགྱེས་བཞིན་པ་དང་། འབྲིང་མི་དགྱེས་མེད་པར་གནང་བ་ཐོབ་ཙམ་དང་། ཐ་མ་ཡང་རང་གི་ཆེད་དུ་ཕ་མའི་ལུས་སྲོག་ལ་བར་ཆད་མི་འགྱུར་ཞིང་གནང་བ་ཆ་ཤས་ཐོབ་པ་ཞིག་ཞི་བའི་སྒོ་ཐབས་དུ་མས་བྱ་དགོས་ལ། དེ་བས་གཞན་གྱུར་རྣམས་ལ་ཞི་བ་དང་དྲག་པོའི་སྒོ་དུ་མ་ནས་བསྒྲུབ་པ་བཤོལ་མེད་པར་ཁོ་ཐག་རང་གིས་ཆོད་དགོས་པ་ཡིན།

ཡང་བདུད་ཀྱི་བར་ཆད་ཚབས་ཆེ་བ་ལ་ནི་ཡུལ་ལ་དབང་བའི་རྒྱལ་པོ། ཞང་བློན་གཙོ་བོ་ལ་སོགས་པས་དགག་པ་དང་། ལ་ལ་ནི་ཕ་རོལ་དགྲ་བོ་མང་དུ་ཡོང་ནས་དབང་མེད་ཆགས་སྡང་ལ་སྤྱོད་འཇུག་པ་རྣམས་ཏེ། དེ་དག་ནི་འཕྲལ་གཅོད་དུ་དཀའ་བས་འཁོན་འཛིན་ཡོད་པ་ལ་རང་ཕམ་ཁ་འཛིན་ཏེ་མཁོན་སངས། རྗེ་དབོན་ལ་ཟང་ཟིང་དང་ཚིག་སྙན་དུ་མས་དགོངས་པ་ནན་གྱིས་དཀྲོལ་ལ། ཅིས་ཀྱང་རང་དབང་མི་འདུས་ན་སྤྲང་པོར་བརྫུས་ནས་གར་སོང་མེད་པར་གཞན་ཡུལ་དུ་ཕྱིན་ནས་བསྒོམ་བསྒྲུབ་ལ་འབད་པར་བྱ་དགོས་སོ། །ཡང་ལ་ལ་ནི་གནས་དང་སྐབས་ཀྱི་བླ་མ་དང་། མཆེད་གྲོགས་དབང་ཆེ་བས་ཆོས་ཀྱི་ཕྱི་བཤོལ་བྱེད་པ་ཡང་དཀའ་བའི་གནས་ཡིན་པས་ཐབས་ལ་མཁས་པས་དེ་དབང་མ་སོང་བར་ཆོས་ཇི་བཞིན་སྤྱོད་པར་འཇུག་དགོས་པ་ཡིན། དེ་ལྟར་དཀའ་བ་དུ་མས་བསྒོམ་བསྒྲུབ་བྱེད་ཆོག་པའི་རང་དབང་བྱུང་ཚེ་བསྒྲུབ་པའི་ས་སྡེ་བཙུགས་ནས་རིམ་གཉིས་ལ་དྲོད་ཐོབ་པ་ཞིག་བྱེད་དགོས་ཀྱི། དེ་མ་བྱུང་ན་འདི་ཕྱི་གང་ལ་ཡང་བྱས་པ་དོན་མེད་དུ་སོང་བ་ཡིན་པས་སྙིང་ལ་རུས་པ་བཏོན་དགོས་པ་གལ་ཆེའོ་གལ་ཆེའོ། །

ཡང་། གང་གི་བླ་མ་མཁན་སློབ་མཆེད་གྲོགས་ཞེས་པའི་སྐབས་སུ་འདི་ལྟར་གོ་དགོས་ཏེ། རང་གི་ཆོས་འབྲེལ་མེད་ཀྱང་དགོན་སྡེ་གྲྭ་རིགས་ལ་དབང་བྱེད་པའི་དཔོན་པོ་ལྟ་བུར་སོང་བ་རྣམས་ཡིན་ལ་ཆོས་ཀྱི་འབྲེལ་པ་ཡོད་ཕྱིན་ཅི་མཛད་ལེགས་མཐོང་གི་དག་སྣང་ཁོ་ན་ལ་འབད་པར་གཅེས་ཤིང་རང་ཉིད་བསྒྲུབ་པ་ལ་བློ་གཞོམ་ན་ཡང་ཐབས་མཁས་ཀྱི་དམ་སེལ་མེད་པར་བྱེད་དགོས་པས་བཀའ་ཡི་གནང་བ་ཟུར་ཙམ་རེ་ཅིས་ཀྱང་ཅི་ཐོབ་བྱ། དེ་བས་རྡོ་རྗེ་སློབ་དཔོན་ཇི་ལྟར་བ་དབང་ཁྲིད་ལུང་གི་བཀའ་དྲིན་ཐོབ་པ་ནི་བླ་མ་དམ་པ་ཞེས་བྱ་སྟེ། དེ་ཉིད་མི་དགོས་བཞིན་བཀས་མ་གནང་ན་བསྒོམ་བསྒྲུབ་བསྐལ་པ་བརྒྱར་འབད་ཀྱང་ཡོན་ཏན་མི་འབྱུང་སྟེ་ཆུ་སྔོན་བསྲུབ་ནས་མར་ལེན་འདོད་པ་དང་འདྲ་ལ། དེ་ཉིད་དགེས་ན་མི་དགེ་བ་སྤྱད་ཀྱང་བྱང་ཆེན་ལམ་དུ་འགྲོ་བས། དེས་ན་དེ་ཉིད་དགྱེས་པའི་བྱ་བ་ཁོ་ན་ལ་འབད་པ་ལས་འོས་མེད་ཀྱི། དོན་ལ་ཡང་དཀའ་སྤྱད་སྡུག་བསྒུར་ལོ་བརྒྱ་ཕྲག་དུ་མ་བགྱིས་པ་ལས་ཀྱང་སྒོ་གསུམ་རྣམ་དག་གིས་བླ་མའི་ཞབས་ཏོག་ཅུང་ཟད་ཙམ་ལས་བསོད་ནསམ་ཆེ་ངེས་ཡང་ཡིན་པས་འབད་པས་ཞབས་ཏོག་ཁོ་ན་བྱའོ། །

དེ་ལྟར་དབྱེ་གསལ་མ་ཕྱེད་པར་མགོ་ཐོམ་ལོང་ན་སླ་འདོད་ལ་ཆོས་པ་བྱེད་སྙམ་ཞིག་ལ་རྡོ་རྗེ་དམྱལ་བའི་བཞུགས་གདན་ལ་འབྱར་དོགས་ཆེ་ལགས། དེ་ལྟ་བུའི་འཕྲོས་དོན་བརྗོད་ན་དཔག་ཏུ་མེད་པས་འདིར་ཡིག་ཚོགས་སུ་འགྱུར་གྱི་མི་སྨྲ་ལ་དེ་ཙམ་ནི་ངེད་རང་གི་མདོ་མེད་པའི་ཆ་མྱོང་མི་ཚེ་སྟོང་ཟད་དུ་ཤོར་བར་ཡིད་སྐྱོ་བྱུང་བས་གཞན་དག་ལྟ་སྐུ་སྐྱེ་དང་དབོན་པོ་གྲགས་པ་རྣམས་ཀྱི་དལ་འབྱོར་དོན་མེད་དུ་མ་སོང་བར་ཆུང་ངུ་ནས་བསྒོམ་བསྒྲུབ་ལ་རང་དབང་འདུས་པོར་སྤྱོད་ནས་འཆི་ཁར་མི་འཇིགས་པའི་གདེང་རེ་ཚུགས་དགོས་རྒྱུར་གདའ་ཞེས་གལ་ཆེན་དུ་གྲོས་འདེབས་པ་ཡིན་ནོ། །

མི་ཁོ་བོ་ནི་བྱིས་སྦའི་སྐབས་དུས་དེར། །བློ་ལྷག་བསམ་གྱི་བསྒོམ་བསྒྲུབ་བྱེད་འདོད་ཀྱང་། །རྐྱེན་བདུད་དབང་ནི་གྲོང་ཆོག་ཟ་ཐང་གིས། །བསྒོམ་བསྒྲུབ་བློ་དེ་ཡད་ཡུད་ངང་དུ་བཤོལ། །ད་འགྱོད་སེམས་གཅིག་སྙིང་ནས་སྐྱེས་ལགས་ཀྱང་། །དཔེ་བྱི་བ་བྲོས་ཤོར་གྱི་ཁུངས་འགེག་འདྲ། །དོན་དེ་ཕྱིར་དུ་ཕྱིས་འབྱུང་བདག་འདྲ་བ། །ཆོས་བསྒོམ་བསྒྲུབ་ལ་ཆུང་ནས་ཧུར་ཐག་འཚལ། །དེ་ལྟར་གྲོང་ཆོག་གི་ཟ་ཐང་ཡད་ཡུད་ལ་བརྟེན་ནས་རི་དྭགས་རྨས་མ་ལྟར་བགྱིད་བློ་ཡོད་པ་དེ་ལྟར་བྱེད་དུ་མ་བྱུང་མོད། འོན་ཀྱང་དམ་པ་ཞལ་བཞུགས་རིང་ལོ་ཁ་ཤས་དེར། ཟབ་པ་ལས་ཀྱང་ཆེས་ཆེར་ཟབ་པའི་གདམས་ངག་བཟུང་ན་འདྲིལ་བ་སྤྲོས་ན་རྒྱ་ཆེ་བ་སངས་རྒྱས་ཐམས་ཅད་ཀྱི་དགོངས་པའི་ཡེ་ཤེས་བསྒྲུབ་པར་བྱེད་པའི་ལམ་གྱི་གཙོ་བོ་གཞི་འབྲས་དབྱེར་མེད་ཀྱི་ངོ་བོ་རང་རིག་རང་གསལ་རྗེན་པར་སྟོན་པའི་ཞལ་གདམས་ཀྱི་སྙིང་པོ་ཡང་དག་པར་འདོམ་པར་མཛད་པའི་བཀའ་དྲིན་ནི་ནམ་མཁའི་ཁམས་སུ་ཡང་ཤོང་བར་དཀའ་བ་ཉིད་དོ། །དེས་ན་བླ་མ་ཀུན་འདུས་ཀྱི་ངོ་བོ་རྩ་བའི་བླ་མ་ནི་འདི་ཉིད་དུ་ངེས་པར་རྙེད་ལགས། སངས་རྒྱས་བཅོམ་ལྡན་འདས་དཔལ་རྡོ་རྗེ་སེམས་དཔའ་དང་དབྱེར་མ་མཆིས་ཤིང་རང་ལ་བཀའ་དྲིན་ཆེ་བའི་སྒོ་ནས་ནི་སངས་རྒྱས་ལས་ཀྱང་ལྷག་པའོ། །སྤྱིར་ཡང་རང་ཉིད་སྐྱེས་ནས་ཞག་བདུན་ལོན་སྐབས་སུ་ཚེ་དཔག་མེད་པའི་དཀྱིལ་འཁོར་དུ་དབང་གིས་སྨིན་པར་མཛད་ཅིང་རྗེས་སུ་བཟུང་བ་ནས་མཐར་གནས་ལུགས་ཡེ་ཤེས་ཆ་ཙམ་ལས་ལྷག་མཐང་གི་ཉམས་མྱོང་རྒྱུད་ལ་སྐྱེས་ཀྱི་བར་དངོས་སུ་བཀའ་དྲིན་གྱིས་བསྐྱང་བ་དང་། རང་གི་ཚེ་འདིར་མཇལ་བའི་བླ་མ་མཐའ་དག་ལས་ཀྱང་ཕུལ་དུ་བྱུང་བའི་དད་མོས་གུས་པ་ནི་འདི་ཁོ་ནར་ཐོབ་པས་ཚེ་རབས་དུ་མའི་ཡོངས་འཛིན་དུ་སྙིང་ནས་ངེས་སོ། །

དེ་ལྟ་ན་ཡང་བློ་མིག་མ་དག་པ་ཁ་ཅིག་གི་རྨོངས་ཞེན་ཕྱོགས་འཛིན་གྱི་དད་པ་ཡིན་ནམ་ཞེ་ན་མ་ཡིན་གྱི། བདག་གི་རྩ་བའི་བླ་མ་འདིའི་ཡོན་ཏན་བསམ་གྱིས་མི་ཁྱབ་པར་ཤེས་ནས་མི་ཕྱེད་པའི་དད་པ་ཤར་ཡིན་གྱི་དེ་གང་ཞེས་ན་གཏེར་སྟོན་པའམ་སྐྱེ་བ་སྔ་མ་ཞིག་གྲུབ་པར་བྱས་པ་ཡིན་ཞེས་པའི་མིང་རྐྱང་ཙམ་མ་དགོས་པར། སྐུ་ཚེ་འདིར་བསྒྲུབ་པའི་ས་སྡེ་བཙུགས་ནས་རྡོ་རྗེ་ཐེག་པའི་ས་ལམ་མ་ལུས་པར་སྦྱངས་ཤིང་བསྒྲོད་པ་རྡོ་རྗེ་འཆང་གི་རྒྱལ་ཚབ་ཏུ་གྱུར་པའི་རྡོ་རྗེའི་གནས་ཏིང་ངེ་འཛིན་བྱེ་བ་ཕྲག་བརྒྱར་དབང་ཐོབ་པའི་གྲུབ་པ་ལས་ཀྱང་གྲུབ་མཆོག་འཁོར་ལོས་བསྒྱུར་བ། དེ་ལྟར་གྲུབ་པ་ཡིན་ཞེས་པའི་མཐའ་གཅིག་པུ་ལ་ཡང་བརྟེན་མ་དགོས་པར་ཚེ་འདིར་བསླབ་སྦྱང་གི་ཚུལ་ཆ་ཕྲ་མོ་ཡང་མ་བྱས་པར་སྔོན་གོསམ་སྦྱངས་སྟོབས་ཀྱི་རང་བྱུང་གི་ཤེས་རབ་འགྲན་བྲལ་ཕུལ་དུ་བྱུང་བས་མདོ་རྒྱུད་ཀྱི་ཚིག་དོན་མ་ལུས་པ་མཁྱེན་ཞིང་རྟོགས་པས་ཆོས་སྒོ་ཟབ་དང་རྒྱ་ཆེ་བ་བརྟན་བརླིང་རྟོགས་པར་དཀའ་བའི་གནས་ཀུན་གསུང་ཚིག་རེ་རེས་བདེ་བླག་ཏུ་རྟོགས་པར་བྱེད་ཅིང་། དེ་ལྟའི་ཆོས་ཚུལ་བསྐལ་པ་བརྒྱ་མཚོར་སྨྲ་ཡང་འཇིགས་པ་དང་ཞུམ་པ་ནམ་ཡང་མེད་པས་ན་མཁས་པའི་མཁས་པ་ཆེན་པོ་སྟེ། ཁྱད་པར་དུ་ཡང་བསྐྱེད་རྫོགས་རྫོགས་པ་ཆེན་པོའི་མན་ངག་ཆེས་ཕྲ་ཞིང་གསང་བའི་གནས་སུ་གྱུར་པ་རྣམས་འཆད་པ་ལ་ཀུན་བཟང་རྡོ་རྗེ་སེམས་དཔའ་དངོས་སུ་བྱོན་པ་ལྟ་བུ་ཞིག་ཡོད་ལ།

མདོར་ན་མཐོང་ཐོས་དྲན་རེག་གི་གདུལ་བྱ་ཐམས་ཅད་བླ་མེད་བྱང་ཆེན་གྱི་སར་འདྲེན་པ་ལ་མཁས་པ་འཕྲིན་ལས་བཞིའི་བདག་ཉིད་ཅན་དམ་པ་ལས་ཀྱང་དམ་པའི་ཆོ་འཕྲུལ་དུ་མ་འཆང་བ་པོ་སྟེ། ངེས་པའི་དོན་ནི་རྫོགས་པའི་སངས་རྒྱས་ཉིད་ཡིན་པས་བློའི་ར་ལས་བརྒལ་མོད་གདུལ་བྱར་གྱུར་པ་པོ་སྐྱེ་བོ་བློ་དམན་རྣམས་ཀྱི་སྣང་ངོར་མཐུན་གྲུབ་ཏུ་ཡང་དེ་འདྲ་ན་སྐལ་བཟང་རྣམས་ལ་དེ་བས་ཀྱང་སྨོས་ཅི་དགོས། དེ་ལྟའི་ཡོན་ཏན་ཁྱད་པར་ཅན་ཡོད་པར་ངེས་ཀྱང་མི་མཐོང་བའི་ལོག་རྟོག་ཅན་གྱི་འགྲོ་བ་ནི་མིག་ནད་ཀྱིས་དུང་སེར་པོར་སྣང་བ་བཞིན་ལས་ཀྱི་རྐྱེན་དུ་ཤེས་པར་བྱ་ཞིང་། རང་སྣང་མ་དག་པས་སྐྱོན་གྱི་ཕུང་པོར་མཐོང་། ཁ་ཟས་རོ་བརྒྱ་དང་ལྡན་པའི་བདུད་རྩི་ལ། །ལས་ངན་ཡི་དྭགས་ཀྱིས་ཁྲོ་ཆུ་ཁོལ་མར་མཐོང་། །བདུད་རྩི་ཡི་སྐྱོན་མིན་རང་སྣང་སྐྱོན་ཡིན་པས། །སྔོན་བསགས་ལས་ངན་དུ་རང་མཚང་རང་ངོས་བཟུང་། །པད་འབྱུང་བཻ་རོ་ཡི་སྒྱུ་འཕྲུལ་རྒྱལ་བའི་དབང་། །བདེ་ཆེན་གླིང་པ་ལ་ཤིན་ཏུ་མོས་པར་རིགས། །

དེ་ནས་ཡང་དཀྱུས་སུ་འཇུག་སྟེ། ཁོ་བོ་རང་ལོ་བཅུ་དྲུག་གི་སྣེར་ཟིན་ལ་ཉེ་བ་མགོ་ཟླའི་གནམ་སྟོང་རྫོགས་རྒྱལ་ཟླའི་ཚེས་ཤར་འོད་གསལ་དུས་ཁྱད་པར་བ་དེར་རྩ་བའི་བླ་མ་དམ་པ་དེ་ཉིད་ཞིང་འདིར་སྐུ་དངོས་ཀྱིས་གདུལ་བྱར་གྱུར་པ་དེ་ཙམ་དུ་གཟིགས་ཤིང་ཞིང་གཞན་དག་པའི་གདུལ་བྱ་རྗེས་སུ་དགོངས་ནས་གཟུགས་སྐུ་ཞལ་ཕྱག་གི་རྣམ་པ་དེ་ནང་གསལ་གཞོན་ནུ་བུམ་སྐུ་ཆོས་ཀྱི་དབྱིངས་ཀྱི་སྦུབས་སུ་ཞུགས་ཏེ། དེ་ལྟ་ཡང་བདག་ལྟའི་སྐལ་དམན་ངོར་རྟག་ཞེན་བཟློག་ཕྱིར་དུ་བསྟན་པ་ལས། སྐལ་ལྡན་མཆོག་རྣམས་ཀྱི་བློ་ངོར་འཕོ་ཆེན་དྭངས་མ་རྡོ་རྗེའི་སྐུར་གཤེགས་པ་གོར་མ་ཆགས་པས་གཤེགས་བཞུགས་མི་མངའ་མོད་འོན་ཀྱང་བདག་བློ་མ་དག་པས་རེ་ཞིག་སྐུའི་བཀོད་པ་མངོན་སུམ་མི་སྣང་བས་སྙིང་ཁྲི་ཕྲག་གས་པ་ལྟ་བུའི་སྡུག་བསྔལ་སྐྱེས་ཀྱང་ཐབས་མ་རྙེད་པས་གསོལ་བ་རྩེ་གཅིག་གདུང་ཤུགས་དྲག་པོས་བཏབ་པར་བྱའོ། །སྐབས་འདིའི་རྟོགས་བརྗོད་ཅུང་ཟད་རྒྱས་པར་བརྟག་འདོད་ན་སྐྱོ་ཤས་ཀྱི་གླུ་དབྱངས་སྣ་ཚོགས་པདྨའི་འཕྲེང་བ་ཞེས་པ་སྔར་བརྗོད་ཟིན་གྱི་དེར་བལྟའོ། །

དེང་སང་རང་གི་རྩ་བའི་བླ་མ་གྲོངས་ཀྱང་སྡུག་བསྔལ་མེད་པར་གདོང་དཀར་འཛུམ་གྱི་ཉམས་བཅས་ཕོ་ཟ་སྔར་ལས་ཆེ་ཙམ་བྱེད་པ་འོང་འདུག་སྟེ་དེ་ནི་དམ་ཉམས་ཀྱི་གྲལ་དུ་འཁོད་པ་ལས་འོས་ཅི་ཡོད། རྣལ་འབྱོར་གྱི་དབང་ཕྱུག་རང་སེམས་ཆོས་ཀྱི་སྐུ་བླ་མའི་ཐུགས་དང་རོ་གཅིག་བརྙེས་པ་རྣམས་ཀྱང་གདུང་བའི་གླུ་བླངས་ཤིང་སྡུག་བསྔལ་གྱི་ཚུལ་སྟོན་ན་དེང་སང་གི་བྱ་བ་ཕལ་ཆེ་བ་ནི་བཀའ་དྲིན་མ་དྲན་པའི་ཁྲེལ་མེད་པོ་ལས་གཞན་ཅི་ཞིག དེ་ཡང་གཙོ་བོ་ནི་བླ་མ་ཞལ་བཞུགས་དུས་ཉིད་དུ་དགྱེས་པའི་ཞབས་ཏོག་འབད་པ་ཉིད་ཡིན་མོད། དེ་འོག་ནི་བླ་མ་གཤེགས་པའི་དགོངས་རྫོགས་དགེ་བ་བྱེད་པ་ཉིད་ཚོགས་ཆེ་བས་བླ་མ་དྲན་པའི་གདུང་ཤུགས་ཀྱི་འབད་པ་ཡིན་ཏེ། ཕལ་དུ་སྣང་གསལ་བྱེ་བ་ཕྲག་བརྒྱ་དགེ་བར་བསྔོ་བ་ལས་བླ་མར་སྙིང་ནས་གདུང་ཤུགས་ཀྱི་དགོངས་རྫོགས་སུ་དམིགས་ནས་མར་མེ་གཅིག་ཕུལ་བས་ཕན་ཡོན་ཆེ་སྟེ། དེས་རིགས་བསྒྲེ་ནས་དགེ་བ་གཞན་ཀུན་ཀྱང་དེ་འདྲ་བས་བླ་མའི་དགོངས་རྫོགས་སུ་དམིགས་ནས་གདུང་ཤུགས་དྲག་པོས་དགེ་བ་ལ་འབད་པ་གལ་ཆེན་གྱི་གནས་སོ། །

དཔལ་ལྡན་བླ་མ་ཡི་ཐུགས་ནི་མཁའ་འདྲ་ཡང་། །རང་ཉིད་སྡིག་རྒྱུན་ཀུན་ཟད་ཕྱིར་སྡུག་བསྔལ་དང་། །ཚོགས་གཉིས་རྒྱ་ཆེན་པོར་འཕེལ་ཕྱིར་དགོངས་རྫོགས་སུ། །དགེ་ལས་ལ་ཆེས་ཆེར་འབད་འདི་གནད་ཆེན་ཡིན། །དེ་ནས་ལོ་དེའི་དཔྱིད་ལ་དབྱར་བཏགས་མཚམས་ཀྱི་ཁུལ་བྱས་ཀྱང་ནང་དགེ་སྦྱོར་ཡ་ཧུར་བསྐྱེད་དུ་མ་བྱུང་བས་ཡི་དམ་གྱི་བསྙེན་བསྒྲུབ་འདི་གྲུབ་ཡང་མེད། རྫོགས་རིམ་ལ་གནད་དུ་དྲིལ་བ་ཡང་མེད་པས་སོས་དལ་ཉལ་རྒྱུ་བྱུང་བ་ལས་དགོས་ནུས་གང་ཡང་མེད་དོ། །

དེ་སྐབས་སུ་རྨི་ལམ་དང་འདྲེས་པའི་ཉམས་སྣང་ལྟ་བུར་རྩ་བའི་བླ་མ་དེ་ཉིད་ལན་མང་དུ་མཇལ་ཞིང་གདམས་པ་དང་རྗེས་སུ་གདམས་པ་སྩལ་ནས་བྱང་ཆེན་སྙིང་པོའི་བར་དུ་རྗེས་སུ་བཟུང་བ་ཡང་ཞལ་གྱིས་བཞེས་འོན་ཀྱང་རང་ཉིད་ཨ་འཐས་ཀྱི་བློས་བཅིངས་བས་དངོས་སུ་མཇལ་དུ་མེད་པ་ཡིས་ཡིད་སྐྱོ་བ་ནི་སངས་དུ་མེད་དོ། །ལོ་དེའི་དབྱར་སྟོན་མཚམས་སུ་གདན་དྲུང་རྗེ་དབོན་སྐལ་བཟང་ཞབས་ནས་འབོད་མཁན་སླེབ་པ་བཅས་གདན་སར་ཕྱིན་ཅིང་བླ་མའི་ཞབས་ཕྱིར་དཀྲིས་དུས་དེར་རང་གིས་རང་ལ་ཆོས་ཀྱི་བསྐུལ་འདེབས་ཀྱི་གླུ་ཡང་མང་དུ་བླངས་ལ། ལྷག་པར་གྲོས་འདེབས་དམ་བཅའ་བཅུ་གཉིས་པ་བྱས། སྤྱིར་རང་ཉིད་ཆུང་ངུའི་སྐབས་ནས་རྣ་བར་ཝང་ཝང་ཞེས་པའི་སྙན་ཞིང་སྐྱེ་བའི་སྒྲ་གཅིག་རྟག་ཏུ་ཡོང་ལ། ལྷག་པར་ལོ་དེ་སྐབས་སུ་ཆེར་སོང་ནས་བུད་མེད་དབྱངས་སྙན་པོ་ཡིས་གླུ་བླངས་པའི་ངག་རྟ་འདྲ་བ་ཞིག་ཇེ་གསལ་ཇེ་གསལ་སོང་སྟེ་ཚིག་ལ་ལ་ནི་སྐྱོར་དུ་ཡང་རུང་བ་དེ་ཐོས་པས་འཆི་བ་དབང་མེད་དུ་དྲན་ཞིང་བསྒོམ་བསྒྲུབ་མ་གྲུབ་པར་ཡིད་རབ་ཏུ་ངལ་ཞིང་ཚེ་འདིར་སྣང་གི་བྱ་བ་ལ་འཇུག་སྙིང་མི་འདོད་པར་བཙན་ཐབས་སུ་བློ་ལོག་ནུས་པ་ཞིག་ལོ་དེ་ནས་བཟུང་ལོ་གསུམ་བཞི་ཙམ་གསལ་པོ་དང་ཐོ་རེ་བ་ལོ་ལྔ་དྲུག་བར་ཙམ་བྱུང་ལ། དེ་ནས་བར་སྐབས་ཤིག་ནས་ཇེ་ཡལ་དུ་སོང་མཐར་ལོ་ཁ་ཤས་ནས་མེད་སོང་། དུས་ཕྱིས་བྱ་ལོ་ལ་སྔར་ལྟར་མི་གསལ་ཡང་ཝང་ཙམ་པ་རེ་བྱུང་ལ། ད་ལྟ་ཡང་སྐབས་སྐབས་ཡོང་འདུག དེ་དུས་ལྷ་འདྲེ་མོ་རྒྱུད་ཞིག་གནོད་པ་ཡིན་ནམ་སྙམ་ཡང་དེང་སང་བརྟག་ན་ནི་དགེ་བ་ཞིག་ཡིན་པ་འདྲ། གང་ལྟར་འདི་སྣང་ཞེན་པ་བཟློག་ཅིང་ཆོས་ལ་བསྐུལ་འདེབས་ནི་ཆེ་བ་རང་བྱུང་བས་བཀའ་དྲིན་ཆེའོ། །དེ་འདྲ་ཞིག་མ་བྱུང་ན་འདི་སྣང་ལ་ཞེན་པ་ཆེན་པོ་ཞུགས་ནས་འཁོར་བར་འཁྱམས་ངེས་སུ་གདའ།

ཚེ་རབས་དུ་མ་རུ་བསྒྲུབ་པ་ལྷག་པའི་ལྷ། །དཔལ་ལྡན་བླ་མ་ཡི་ངོ་བོ་ནཱ་དུའི་སྐུ། །ཡེ་ཤེས་མཁའ་འགྲོ་ཡི་མགྲིན་ནས་གླུ་རུ་ཐོན། །སྐལ་ལྡན་ཐར་ལམ་དུ་འགུགས་འདི་མི་མཚར་རམ། །དེ་ནས་མྱོས་བྱེད་ཀྱི་ལོ་ཤར་ཙམ་སྐབས་གནས་ཆེན་རྡོ་རྗེ་ཁྲོ་ལོད་མཇལ་བར་ཕྱིན། ལོ་གཞོན་སྐབས་ད་ལྟའི་རྒས་འཆལ་ནི་མ་བསླེབ་པས་ཀྱེལ་ཆེ་ཁུལ་ཞིག་ཡོད་གཤིས་ཟླ་བོ་ཚེས་ནི་གནས་སྐོར་ཡིན་བསམ་ལས་གཞན་མེད། ཡིན་པ་ནི་རྨི་ལམ་གྱི་ལྟས་ཤིག་ལ་བརྟེན་ནས་ཕྱིན་པ་ཡིན། དེ་སྐབས་ལྟས་དང་ཆོ་འཕྲུལ་ཅི་རིགས་བྱུང་བ་ནི་འདིར་སྨྲ་མ་དགོས་དེ་འཕྲོར་གདན་སར་འོང་བའི་ཞོར་ཉི་མ་ཕུག་གི་བྲག་ཅིག་རློག་པའི་གསེབ་ནས་ས་ཡི་རིལབུ་ཁ་དོག་དཀར་པོ་ཆེ་ཆུང་སྣ་ཚོགས་བདུན་ཅུ་ལྷག་ཙམ་གཅིག་བྱུང་། བདག་རང་ཆུང་ངུ་ནས་ཆོས་ཁོ་ནར་སྲེད་པ་ཆེས་པས་ཆོས་གཏེར་ཤོག་སེར་ནི་མི་འདུག་འདི་དམ་རྫས་ཡིན་རྒྱུའི་ཕྱག་རྟགས་ཨཿམཿའི་རི་མོ་ཡང་མི་སྣང་། དགོས་པ་ཅི་ཡོད་སྙམ་ནས་རྩིགས་ཀྱང་མ་བྱུང་ལ་ཕྱིས་དེ་ཀར་བདག་རྐྱེན་ཡང་མ་བྱས་པས་ཟག་སོང་། དེ་ཡང་དུས་དེར་བདག་བློ་ཆུང་བའི་སྐྱོན་ཏེ། དམ་རྫས་ཨཿམཿཞེས་གཏེར་སྟོན་ཕལ་ཆེར་མཚོ་རྒྱལགྱི་མཐེབ་མཛུབ་ཀྱི་རི་མོར་བཟུང་ཡང་། ལ་ལ་ནི་དེ་ལྟ་ཡང་ཡིན་མོད། ཕལ་ཆེར་དམ་རྫས་ཉིད་ལ་རང་བྱུང་ཤར་བ་ཡིན་གྱི་དེས་ན་ཡིག་འབྲུའི་གཟུགས་མེད་པ་ཡང་མི་འགལ་ཞིང་། ཡིག་འབྲུ་ཆེ་ཆུང་སྣ་ཚོགས་འབྱུང་བ་ཡང་དོན་དེས་ཡིན། འོན་ཀྱང་རྫུན་ཟོག་གི་སླད་པའི་ཐལ་བ་རུ་གཏེར་རྣམས་དང་མ་ནོར་བ་ནི་གལ་ཆེའོ། །ལོ་དེར་ཡིད་ལ་མ་བསམ་རང་ཤར་གྱི་ཚིག་ཐོལ་ཐོལ་དུ་མ་བྱུང་བ་ཐུགས་གཏེར་གྱི་ཁུལ་དུ་ཡི་གེར་བཀོད་པས་གུ་རུ་རཀྵ་ཐོད་ཕྲེང་གི་ཆོས་སྐྱོང་གླེགས་བམ་ཆེན་པོར་ལོང་ཙམ་གྲུབ་མཚམས་དགོས་མེད་ཅིག་སྙིང་ལ་ཤར་ནས་མེ་ལ་སྲེགས་པ་དེ་དུས་རྒྱུས་ཡོད་ཀྱི་གྲྭ་པ་ཡང་མང་། དེང་སང་ལ་ལ་ཞིག་ལ་ཡིད་ལ་ཚིག་དོན་ལེགས་སུ་ཆ་བ་དེ་འདྲ་ཞིག་རང་ཤར་དུ་བྱུང་ན་བར་ཆད་ཡིན་ཡང་སྤྱན་བཙུམ་པ་འདྲ་སྟེ་ངེད་ནི་ཆུང་ངུ་ནས་བླ་མའི་གསུང་ལ་ཡིད་ཆེས་མཁན་གཅིག་ལགས་པས་དེ་འདྲ་ཅི་དགའ་ལ་བོར་བ་ཡིན། ལར་འདི་འདྲ་བྱུང་བའི་རིགས་བླང་དོར་གྱི་གནས་ངོས་འཛིན་དཀའ་ཞིང་། དབྱེ་གསལ་བྱེད་ནུས་སོ་ཡང་དཀོན་མོད། འོན་ཀྱང་སངས་རྒྱས་པདྨ་འབྱུང་གནས་ཀྱི་ཞལ་ལུང་རིག་འཛིན་བརྒྱུད་ལྡན་བླ་མའི་གསུང་ངག་ལས་འབྱུང་བར་བརྟག་དགོས་མོད། འདིར་ནི་དོག་བསླངས་ཙམ་ལས་ཡིག་ཚོགས་འབྱམས་ཀླས་ཀྱི་ངལ་བས་མ་སྨོས་ཤིང་གཞན་དུ་ཟུར་ཙམ་བརྗོད་པར་སྲིད་དོ། །

ཁོ་བོ་ཅག་གི་འདི་དུས་ཀྱི་སྐབས་དེ་ནི་རྩ་རླུང་ཉམས་ཀྱི་ཆོ་འཕྲུལ་ཙམ་དུ་རྟོགས་ཤིང་། དེ་ལ་རེ་ཞིག་ཆེད་འཛིན་གྱིས་བདག་གིར་བྱར་མི་བཏུབ་ཅིང་། དེ་ལྟར་བགྱིས་ན་བདུད་ཀྱི་བར་ཆད་དབང་དུ་འགྱུར་བའི་ངོས་ཚིག་རང་ལ་ཐུན་མོང་མ་ཡིན་པ་ཡོད་མོད་ཀྱང་འདིར་གསལ་བར་སྨྲ་ནི་མི་བཏུབ་པ་ཞིག་གོ །སྤྱིར་འདི་འདྲ་ཡོངས་སྐབས་མི་ཆོས་ཀྱི་བར་ཆད་ནི་ཡོང་ཉེན་ཆེན་པོ་འདུག་སྟེ་ཁོ་བོ་ཡང་ལོ་བཅུ་གསུམ་སྣེ་ཟིན་ཙམ་གྱི་བྱིས་སྦའི་དུས་དེར་བློ་ལ་མ་བསམ་པར་རང་རྡོལ་གྱི་ཆོས་ཚིག་དེ་འདྲ་ཤར་བར་དགོངས་གཏེར་ཡིན་ཁུངས་བཅུག་ནས་དེ་ཞོར་ལ་བར་ཆད་ཚབས་ཤིན་ཏུ་ཆེ་བ་ཞིག་ཀྱང་ཞུགས་ཉེ་བར་བྱུང་བ་ཡིན། དེ་གང་ཞེ་ན་དགོངས་གཏེར་ལ་ཐུགས་དགྱེས་ཚོར་སག་གེ་བ་དེའི་ཁོངས་ནས་མི་ཆོས་རྫུན་མང་ཞིག་ཐོན་དུ་ཆ་མ་བྱུང་བས་སོ། །དེ་ཡང་ཅི་འདྲ་བྱུང་ཞེས་ན་རྣམ་རྟོག་ཧྲག་པོས་ཤར་བའི་གསལ་སྣང་ཕྱོགས་མཐུན་པའི་ལྷ་སྐུར་སྣང་བ་དང་། དེས་གསུང་བར་སྙམ་པའི་རྣམ་རྟོག་རང་ཤར་གྱི་ཚིག་དེ་འདྲ་ལ་ལྷ་མཐོང་ངོ་ཆོས་གསུངས་སོ་ཞེས་པའི་སྒྲོ་བཏགས་པས་སོ། །དེའི་ཅིར་འགྱུར་ཞེ་ན་མི་ཆོས་བླ་མའི་རྫུན་དུ་གྱུར་ནས་མནར་མེད་དམྱལ་བར་བསྐལ་པ་དུ་མར་གནས་པའི་ལུས་འགྲོ་བས་བར་ཆད་ཤིན་ཏུ་ཆེ་བ་ཞུགས་སུ་ཉེ་བ་བྱུང་ཞེས་པ་དེ་ལ་ཟེར་བ་ལགས། དེས་ན་རང་དང་རིགས་སྐལ་མཐུན་པ་རྣམས་ཀྱིས་དེ་འདྲར་དོགས་ཟོན་འཚལ་ཞེས་སྙིང་གྲོས་སུ་སྨྲ་བ་ཡིན།

ངེད་རང་ལ་འཆར་སྒོ་སྣ་ཚོགས་བྱུང་བ་དེ་ལྟར་ཡང་། སྐྱེ་བ་སྔ་མའི་བསགས་སྦྱངས་བསོད་ནམས་ཀྱི་མཐུ་ཡིས་རྩ་བའི་བླ་མ་དམ་པ་རྣམས་དང་མཇལ་ནས་སྐྱེ་བ་དུ་མར་རྒྱུ་འབྲས་ལ་ཡིད་ཆེས་བྱས་པའི་བག་ཆགས་ཅུང་ཟད་སད་ནས། མི་ཚེ་འདི་ཡུན་རིང་ཞིག་མེད་ཅིང་མི་གནས་པར་ཡང་མཐོང་། དེ་ལ་ཞེན་རྒྱུ་མེད་པར་ཡང་གོ །གང་ཤར་བཟང་ངན་ཀུན་སྒྱུ་མ་ལྟར་ལམ་དུ་ཁྱེར་ཚུལ་ཡང་ཐོས་པས། ལས་དང་རྟེན་འབྲེལ་གྱི་འཆར་ཆ་དེ་ཀུན་ལ་ཞེན་མྱོང་ཆེན་པོ་མི་བྱེད་པའི་ཁུལ་ཅིག་ཡིན་པས། ཟག་ཟོག་ལོག་ལས་བདུད་ཀྱི་དོང་དུ་མ་ཕྱིན་པས། དེ་ངོས་ནས་དལ་འབྱོར་དོན་མེད་མ་སོང་བ་ཙམ་པར་རློམ་མོ། །

ཚེ་རབས་གཏན་གྱི་སྐྱབས་གཅིག་ནི་འཕུལ་འགྲོའི་བླ་མ། བདུད་འདུལ་དཔའ་བོ་རུ་སྐུར་བསྟན་ཆེ་མཆོག་ཁྲོ་ལོད། བྱིན་རླབས་ནུས་པ་ཡི་ཟེར་བརྒྱ་ཕྱོགས་བཅུར་འཕྲོ་ཚེ། བདུད་ཚོགས་མུན་པ་ཀུན་ཕྱེ་མར་འཐག་པས་རྨད་དོ། །དྲན་མཆོག་བླ་མ་དེ་པདྨ་བདེ་ཆེན་གླིང་པ། ཡང་དག་ངོ་བོ་ལ་ཀུན་བཟང་རྡོ་རྗེ་སེམས་སོ། །མགོན་ཁྱོད་བྱིན་རླབས་དེ་སྙིང་ལ་ཅུང་ཟད་ཞུགས་མཐུས། ཅི་བྱས་བདེ་བའི་ཡེ་ཤེས་ཆ་ཤས་དེ་རྟོགས་པས། གང་ཤར་འགའ་ཡང་སྒྱུ་མ་ལྟར་བདེན་འཛིན་གྲོལ་སོང་། རྟེན་འབྲེལ་རོལ་པ་ཆ་ཤས་ལ་འཕྲིག་ཀྱང་ཚུད་སོང་། བཟང་བཟང་པོའི་འདོད་པའི་བརྫུ་བག་དེ་རང་སར་ཞིག་པས། དལ་འབྱོར་དོན་ལྡན་དེ་མིན་ཡང་དོན་མེད་སོང་། ད་དུང་འཕྲོས་དོན་དོགས་སློང་ཙམ་སྨྲ་ན། སྤྱིར་བསོད་ནམས་དམན་པ་རྣམས་མི་ཆོས་ཀྱི་བར་ཆད་འཇུག་པའི་སྒོ་མང་ཡང་ཕལ་ཆེ་ཞིག་ནི། སྐྱེས་བུ་དམ་པ་རྣམས་ཀྱི་རྟོགས་བརྗོད་ངོ་མཚར་ཅན་མཐོང་བའམ་ཐོས་པས་རྐྱེན་བྱས། རང་ལ་ཡང་དེ་འདྲ་ཡོང་བའི་བརྐམ་ཆགས་སྐྱེས་པ་དང་། ཡང་ཁ་ཅིག་ནི་ལོ་ཟླ་ཁ་ཤས་རེ་བསྒྲུབ་ཚུགས་བཟུང་བས་ཡུས་ཏེ་ཐུན་མོང་ལྟར་སྣང་གི་གྲུབ་རྟགས་ལ་བསྐམ་པ་དང་། ཁ་ཅིག་བསྒྲུབ་པ་ཡེ་རྒྱབ་མ་དགོས་པར་སྔོན་སྦྱངས་སྐྱེས་བུ་མཆོག་ལ་བྱུང་བ་ལྟར་གྲུབ་རྟགས་འབྱུང་འདོད་པ་དང་། ཁ་ཅིག་ནི་ཐོག་མར་རྨི་ལམ་དངོས་ཉམས་སུ་བཟང་བཟང་འདྲ་རུང་གི་ལྟས་ཐན་ཐུན་བྱུང་བར་ཕྱོགས་འཛིན་རློམ་ཞེན་དྲག་པོ་ཞུགས་ཤིང་དེ་གཞན་ལ་ངོམ་ངོམ་བྱེད་ཅིང་མཐར་གང་ཡང་མི་ཡོང་ཚེ་རེ་དོགས་ཀྱིས་ཡིད་སྨོན་མང་པོ་བཏང་བ་དང་། ལ་ལ་ནི་མཆེད་གྲོགས་གྲྭ་རིགས་གཉེན་ཚན་སྦྱིན་བདག་འདྲ་རང་ལ་དད་གུས་ཡོད་ཁུངས་ཚོས་ཉིད་ཅག་ག་གེ་ཆེ་གེ་མོས་ལུང་བསྟན་བཟང་པོ་བྱས་པ་ཡིན་ཞེས་པའི། གྲུབ་པའམ་གཏེར་སྟོན་ནམ་དམ་པ་ཁྱད་པར་བའི་སྐྱེ་བར་གྲགས་པས་གྲུབ་པའི་གནས་ཚུལ་ལྐོག་གྱུར་པ་ཡོད་པས་གསུང་བར་ཞུ་ཞེས་བསྐུལ་བས་རང་ཡང་དེ་ལྟ་ལ་བློ་འདོད་དྲག་པོ་ལྡང་ཞིང་རང་མཐོང་བཅས་པ་དང་། ཁ་ཅིག་ནི་རང་དང་འགྲན་ཟླར་འོས་པ་ཞིག་ལ་ངོ་མཚར་བྱུང་བའི་གཏམ་ཐོས་པས་དེ་ལ་ཕྲག་དོག་གིས་རང་ལ་ཡོན་ཏན་ཡོད་རྫུ་འདོད་པ་དང་། ཡང་ཁ་ཅིག་རང་ཉིད་གཞན་དང་མི་མཉམ་ལྷག་པའི་བློ་འདོད་དམ།ཡང་རང་ཉིད་དམན་པའི་རྭ་བ་ལས་ཐར་ཏེ་ཚེ་འདིར་ཁ་རྗེ་ཟ་ཐང་ཆེ་རུ་རེ་བ་སོགས་ཏེ་མདོར་ན་ལྷ་མཇལ་ལུང་བསྟན་ཐོས་མངོན་ཤེས་ཤར་ཐུན་མོང་གི་གྲུབ་རྟགས་མངོན་གྱུར་བ་ཞིག་འདོད་པའི་བརྐམ་ཆགས་དུང་དུང་པས་ཡིད་ཀུན་ཏུ་སྤྱོད་པར་བྱེད་པ་དེ་བྱུང་ཕྱིན་བར་ཆད་བདུད་ཀྱི་འཇུག་སྒོ་ཆེས་ཆེ་བ་དེ་དོད་ཚར་བ་ཡིན་པས། ཚེ་འདི་ཡུན་རིང་མི་གནས་མྱུར་དུ་འཇིག་པ་རྨི་ལམ་སད་ཁ་ལྟ་བུར་ཤེས་ནས་ཞེན་པ་མི་བྱེད། དེང་དུས་ཡིད་བདེ་སྐྱིད་ཕུན་སུམ་ཚོགས་པ་བྱུང་བ་རྣམས་སྐྱེ་བ་སྔ་མ་དགེ་བའི་བསོད་ནམས་བསགས་པ་ལས་ཡིན་ལ་ཡིད་ལ་མི་འདོད་པ་འབྱུང་བ་རྣམས་ཀྱང་ལས་ངན་གྱི་འབྲས་བུ་ལས་བྱུང་བས་དགེ་སྡིག་ལ་ཡིད་ཆེས་ཡང་དག་པར་སྐྱེས་ནས་འདོར་ལེན་ངེས་པར་བྱེད་པའི་ཡིད་གདེངས་སུ་འཆའ་བས་བདུད་ཀྱི་བར་ཆད་འཇུག་པ་ལས་གྲོལ་ཏེ་བྱང་ཆུབ་ལམ་ལ་འཇུག་པར་འགྱུར་རོ། །དེ་ལྟ་མ་ཡིན་པར་ཚེ་འདིའི་གནས་སྐབས་ཀྱི་བདེན་ཞེན་ལ་བློ་བརྟས་ཏེ། གཞི་ཅུང་ཟད་ཡོད་པ་ལ་སྒྲོ་བཏགས་ནས་བཟང་རྫུའི་ཚིག་རང་འདོད་དབང་གིས་སྨྲ་བ་ནི་བར་ཆད་ཆོས་མིན་ཞུགས་པའི་རྨང་གཞི་ཐིངས་ཚར་བ་ཡིན། གཞི་མེད་པར་ལྷ་དང་མ་མཇལ་ཞིང་ལུང་བསྟན་མངོན་ཤེས་གྲུབ་རྟགས་གཏེར་ཁ་སོགས་མེད་པ་ལ་ཡོད་པར་ཐབས་བརྫུ་བཏང་བ་ནི་བདུད་ཀྱི་བར་དུ་གཅོད་ཟིན་ནས་ལས་ཀྱང་གྲུབ་པ་སྟེ། མནར་མེད་དམྱལ་བར་བསྐལ་ཆེན་དུ་མར་བཞུགས་གྲབ་ཀྱི་འབྱོན་ཆོག་མ་དེ་ཡིན།

དེ་ལྟར་མི་ཆོས་ཀྱིས་གཞན་བསླུས་ནས་རང་ཉིད་ཕུང་ཚབ་ཆེན་པོ་ལ་སྦྱོར་བའི་སྙིང་རུལ་པོ་ནི་སྔར་མང་དུ་བྱུང་སྐད་ལ། ད་ལྟ་ཡང་མཐོང་ཐོས་ཀྱི་གནས་སུ་ཆེས་མང་མོད། མ་འོངས་ན་ཡང་དུས་དབང་གིས་མང་དུ་ཀ་འགྲོ་ཉེན་གདའ། དེ་དག་བྱེད་པའི་རྒྱུ་ནི་འདི་སྣང་ལ་ཞེན། རྒྱུ་འབྲས་མ་ཤེས། འཁོར་བའི་ཉེས་དམིགས་མ་ཐོས་པས་ལན་ཏེ། དེ་ཡང་སྐྱེ་བ་སྔ་མའི་བསགས་པ་བསོད་ནམས་དམན་པས་གྲོགས་ངན་རྐྱེན་གྱིས་འབྱུང་བ་ཡིན་ནོ། །ལས་དེ་ལྟར་སྤྱད་པ་རྣམས་ཀྱང་འདུལ་བ་ཡི་རབ་བྱུང་ཡན་ཆད་ལ་རྩ་བའི་ཕམ་པ་བཞི་སྟེ་མི་ཆོས་ཀྱི་རྫུན་ཚིག་གཞི་བསམ་སྦྱོར་བ་མཐར་ཐུག་ཚང་ཕྱིན་སླར་བཤགས་སྡོམ་སོགས་ཀྱིས་གསོ་མི་བཏུབ་པ་རྫ་བེའུ་ཆགས་པ་དང་འདྲ་བར་ལུས་རྟེན་དེའི་ཐར་པའི་དཔྱང་ཐག་ཆད་པ་ཡིན་པར་བཤད་རུང་། ཐེག་ཆེན་ཐུན་མོང་དང་ཐུན་མོང་མ་ཡིན་པ་ལྟར་ན། ལས་བསགས་པ་དེ་དག་ལ་དྲན་པས་རྗེས་སླེབས་ཀྱི་སྦ་གསང་མེད་པར་སྟོབས་བཞི་ཚང་པ་བཤགས་སྡོམ་དྲག་པོར་རྟག་ཏུ་འབད་ན་སྒྲིབ་པ་དག་རྒྱུ་ཡོད་པར་བཤད་ཡོད་དེ། དེ་འདྲ་བྱེད་མཁན་ནི་དཀའ། འགྱོད་པ་ཕོང་པར་ཅུང་ཟད་སྐྱེ་སྲིད་ཀྱང་ངེད་ལ་སྐྱོན་འདི་བྱུང་ཞེས་རང་མཚང་ངོས་ལོང་མཁན་ནི་ཤིན་ཏུ་དཀོན། ལས་ཆེན་པོ་རྣམས་ལ་དེ་ལྟར་མ་བྱས་ཕྱིན་སྡིག་པ་འདག་པར་ཡང་དཀའ། སྔར་བྱས་པ་དེ་བཤགས་རུང་ཕྱིས་སྤྱད་ན་སླར་ཡང་ཉེས་པ་སྔ་མ་ཡང་ལྡོག་ནས་ཆེ་རུ་འགྲོ། དེས་ན་སྔར་ལས་ངོ་ཚ་བ་དང་ཕྱིས་སྤྱོད་སྡོམ་པའི་ཆེད་དུ་ཉེས་བྱས་མིང་ནས་ཐོས་ཏེ་བཤགས་པ་གལ་ཆེ་སྟེ། སྡིག་བཤགས་ཐམས་ཅད་ལ་འདྲ། ལར་ཟག་ཟོག་ཚབ་ཆེན་སྤྱད་མཁན་རྣམས་ཀྱི་སྟོབས་བཞི་ཚང་བའི་བཤགས་པ་བྱེད་པ་དཀའ། དེ་མ་བྱུང་ཕྱིན་མནར་མེད་དུ་འབྱོན་ཆོག་མ་ཡིན། སྔར་རིག་འཛིན་ཆེན་པོ་རོལ་པ་རྡོ་རྗེའི་སྤྱན་སྔར་གཏེར་སྟོན་དུ་རྫུ་བ་ཞིག་གི་རང་མཚང་ངོས་ལེན་གྱི་བཤགས་སྡོམ་བྱེད་པར་ཐོས་པས་རྗེས་སུ་ཡི་རང་གཞན་ཟོག་བྱེད་པ་མང་དུ་མཐོང་ཐོས་ཡང་སྟོབས་བཞིའི་བཤགས་སྡོམ་བྱེད་སྐད་རང་ནི་མ་ཐོས་པས་ཡིད་སྐྱོའོ། །དེས་ན་གཞན་ཕལ་གྱིས་ནི་གང་ཟག་གི་ཚོད་གང་ཟག་གིས་བཟུང་བར་དཀའ་ཡང་། རང་ལ་བྱ་བ་ལྐོག་གྱུར་ཅི་འདུག་ནི་རང་གིས་རྟོགས་པར་ནུས་པས་མི་ཆོས་ཟག་ཟོག་གི་བྱ་བ་འདྲེས་པ་ཚོ་རང་གི་སྣ་རང་གི་མཛུབ་མོ་བཙུགས་ནས་འགྱོད་བཤགས་སྤང་བླངས་བྱ་འོས་པ་རྣམས་མི་ཚེ་ཡུད་ཙམ་པ་འདིར་མ་ཞེན་པར་རང་གིས་རང་ལ་སྙིང་རྗེ་དྲག་པོས་འཚལ་ཞེས་ཁོ་བོ་རྒྱལ་ཁམས་པའི་སྙིང་གྲོས་ཡང་དག་པ་ལགས་པས་གལ་ཆེ། དེ་ལྟར་ཡང་གཞན་ལ་བརྩེ་ཕྱིར་སྨྲ་བ་ལས་ཟོག་པོ་ཚོ་ཡི་མཚང་ལ་རྒོལ་འདོད་དེ་ནི་མ་ཡིན་གྱི། དེས་ན་རྫོགས་པའི་སངས་རྒྱས་ནི་རྣམ་པ་ཐམས་ཅད་པ་ཡིན་པའི་གོ་ས་ཙམ་ནི་ཡོད། དེས་ན་ཟོག་པོ་ཡང་སངས་རྒྱས་ཀྱི་སྒྱུ་འཕྲུལ་དུ་དག་སྣང་སྦྱངས་བ་རུང་ཞིང་ཟོག་པོ་ལ་མི་དགའ་བ་དང་ཞེ་སྡང་ཆེན་པོ་ཞིག་མེད་དོ། །

བསྐལ་པ་དུ་མ་རུ་འགྲུབ་དཀའ་དལ་འབྱོར་རྟེན། །ཕུན་ཚོགས་རིན་ཆེན་ནི་མི་ལུས་ཐོབ་ལགས་ཀྱང་། །བསགས་པ་བསོད་ནམས་དེ་དམན་པས་བདུད་ཀྱིས་བསླུས། །མནར་མེད་དམྱལ་བ་དེ་མཐོ་རིས་གནས་ནས་འཁོར། །ཀྱེ་ཧུད་ཡ་ང་ནི་ལོ་ཟླ་ཞག་གྲངས་མེད། །ཡུན་སྲིད་བསྐལ་ཆེན་ཞེས་ཐོས་ཀྱང་ཡིད་སོ་ངལ། །དེ་བས་རང་ལ་ནི་རང་གིས་སྙིང་རྗེ་ལྟོས། །འདི་སྣང་ཡུད་ཙམ་ལ་མ་ཞེན་རང་གྲོས་ཐོབ། །ཅེས་སོ། །ཡང་དཀྱུས་སུ་འཇུག་པར་བྱ་སྟེ། དེ་ནས་གདོང་ངན་གྱི་ལོ་ལ་སྟག་ཚང་གི་གནས་ཆེན་གྲོ་ལོད་དུ་བསྒྲུབ་པ་ལྷུར་ལེན་ཞིག་བྱ་སྙམ་ན་ཡང་གྲོས་ངན་སྟབས་ཀྱིས་ལག་དུ་མ་ལོང་བས་ཅི་རོང་དུ་འོང་ནས་བས་མཐའ་རོལ་རམ་དུ་རང་ཤོང་གི་སྒྲུབ་ཁང་དྲག་པོ་ཨེ་ཀློང་ཞེས་བཏགས་པ་ཞིག་བཅོས་ནས་ཀློང་གསལ་མཁའ་འགྲོ་སྙིང་ཐིག་གི་བླ་བསྒྲུབ་གསེར་གྱི་འབྲུ་གཅིག་གི་བསྙེན་བསྒྲུབ་ཁུལ་ཙམ་བྱས་ཀྱང་གཞུང་བཞིན་བཅས་པ་དམ་པོར་མ་གྱུར་པ་དང་ལྷག་ཏུ་ལུས་ཡང་ཡེངས་མེད་ཙམ་སྔགས་བཟླས་ལ་ཞུགས་ཚུལ་གྱིས་ཀྱང་ཡིད་རྣམ་རྟོག་གི་དབང་དུ་བསྐྱོད་བས་བསྒྲུབ་རྟགས་མཚན་མ་རྨི་ལམ་བཟང་པོར་གྲུབ་ཙམ་ཡང་མ་བྱུང་། སྤྱིར་དེ་དུས་སྐབས་རྟགས་མཚན་ལ་རེ་དགོས་ཆེན་པོ་བྱས་པའི་སྐྱོན་ཡང་ལོས་ཡིན། ཕྱིས་བསྒྲུབ་པ་ལ་སྒྲལ་མཚམས་སྔགས་བཟླས་མང་ཉུང་ཇི་ཙམ་སོང་བའི་ཕན་ཡོན་གྱིས་ནི་ནམ་ཡང་མི་བསླུ་བས་རྟགས་མཚན་མ་བྱུང་ན་སླའོ་བསམ་པ་བྱུང་བས་དེ་ནི་ཡིན་པར་ཡང་འདུག ལར་བསྙེན་བསྒྲུབ་བྱེད་པར་རློམ་ནས་སྔགས་ཡེངས་ཤིང་བཟླས་ན་རྟགས་མཚན་གྱི་རེ་བ་ཅི་ཡོད། དེ་བས་ལྟ་སྒོམ་དང་སྔགས་ལ་ཡིད་གཏད་ནས་རྣམ་རྟོག་གཞན་སྤང་བ་རང་གལ་ཆེན་དུ་སྣང་ཡང་། དེ་དུས་རྫོགས་རིམ་ཡིན་རྒྱུའི་གོ་བ་ལམ་པ་དེ་ངང་བཞག་པས་ཆོག་ཁུངས་བྱས་ཏེ་མ་ཤེས་པར་གདའ། ལར་འདི་དུས་སྐྱོ་ཤས་ཆེ་ཞིང་རང་ཉིད་ལེ་ལོས་ཆོས་མ་གྲུབ་པར་ཡིད་རབ་ཏུ་གདུང་བ་བྱུང་བས་སྐྱོ་ཤས་ཀྱི་གླུ་ཡང་མང་དུ་བླངས། ལྷག་ཏུ་རྨི་ལམ་དུ་རང་དབང་གཏེར་གནས་སུ་མང་དུ་སླེབ་པ་དང་། ཟབ་གཏེར་ཁ་བྱང་ལུང་བསྟན་དུམ་བུ་ཡང་མང་དུ་བྱུང་ཡོད། དེ་ཡི་རྟེན་འབྲེལ་གྱི་སྒོ་ཇི་བཞིན་པ་ནི་བསྒྲིགས་མ་ནུས་པར་ཟད་དོ། །གཞན་ཡང་དེ་སྐབས་རང་ཉིད་ཇི་སྲིད་འཚོ་ཡི་བར་དུ་ངོ་བསྲུང་ཁྲལ་འཇལ་ལྟ་བུ་མ་ཡིན་པར། རང་གིས་དྭངས་བས་དབང་བསྐུར། ཁྲིད་རྒྱུན་ཞུས་པར་རྩ་བའི་དམ་ཚིག་སྲོག་གི་ཕྱིར་ཡང་མི་སྤང་བ་དང་། གནས་སྐབས་ཀྱི་དགེ་སྦྱོར་ཚིག་བདུན་གསོལ་འདེབས། ཟབ་ལམ་བླ་མའི་རྣལ་འབྱོར། ཛབ་སྔགས་བཛྲ་གུ་རུ་ཡི་གེ་དྲུག་མ། རླུང་བུམ་པ་ཅན་གྲངས་བཅད་རྣམས་ཐོག་མར་ཟླ་དུས་ཀྱི་གྲངས་འཛིན་བྱས་པ་ཡིན་ཡང་ཕྱིས་ཉིན་ཞག་ཕྲུགས་རེར་བྱས། ལར་ངེད་བརྩོན་འགྲུས་ཤིན་ཏུ་ཆུང་བས་རང་ལ་རང་ཡིད་ཆད་པའི་མཆི་མ་བཀུ་བར་འདུག་ལགས་སོ། །

རང་ཉིད་ལེ་ལོ་ཆེ་ལ་ཆོས་བསྐུལ་ཕྱིར། །མགོན་པོ་མ་གཟའ་དམ་ཅན་དཔང་བཙུགས་ནས། །དམ་བཅའ་སྙིང་པོ་རྩ་བ་གཅིག་དང་ནི། །

ཡན་ལག་བཞི་བགྱིས་དགེ་བ་བྱང་ཆེན་བསྔོ། །ལྷག་བསམ་གྱིས་ཟིན་དགེ་བ་ཆེ་ཆུང་གང་། །གང་གཱའི་རྒྱུན་ལྟར་བྱང་ཆེན་མཚོར་འཇུག་ཞེས། །རྒྱལ་བས་གསུང་ན་སྣ་རེའི་དགེ་བ་ཡང་། །སངས་རྒྱས་བསྒྲུབ་འདོད་རྣམས་ཀྱིས་འབད་པར་རིགས། །

དེ་ནས་གསེར་འཆང་གི་ལོ་ལ་ཡི་དམ་ལྷག་པའི་ལྷ་བཅོམ་ལྡན་འདས་བཛྲ་ཀུ་མ་རཱ་ཡི་བསྙེན་བསྒྲུབ་ཞིག་ཀྱང་བགྱིས་པས་དེ་སྐབས་སུ་༸རྗེ་གདན་དྲུང་རིན་པོ་ཆེ་ཕྱོགས་ཕེབས་མཛད་པར་ཕེབས་སྐབས་ཕྱག་དབང་ཞིག་ཞུ་བར་མ་ཕྱིན་ན་ངེད་ཨོ་ཟོབ་བྱས་པ་ལྟ་བུར་འགྲོ་ཞིང་དགོངས་མི་ཁྲེལ་བའི་ངེས་པ་མེད་སྙམ་བློར་ཤར་ནས་མཚམས་ཐུན་བཀྲལ་ནས་ཕྱག་དབང་ཞུ་བར་ཕྱིན་པས་བླ་མ་དམ་པ་དང་མཆེད་གྲོགས་ཤེས་ལྡན་ཚོ་མཚམས་དམ་པོར་ཡོད་པ་དེ་མི་ལེགས་ཙ་གསུང་བྱུང་ཡང་ངེད་རང་བློ་ཆུང་པའི་སྐྱོན་ཡིན། གཞན་དེང་སང་བླ་མ་ཁ་ཅིག་བཀའ་དྲིན་གསུམ་ལྡན་རྩ་བའི་བླ་མ་ལ་ཡང་ལྟག་ཚུགས་བཟུང་བར་བག་གྲོ་གྲོ་པོ་བྱེད་ལུགས་པ་ལྟས་ན་ཆོས་འབྲེལ་ཐོབ་ཙམ་བཀའ་དྲིན་ཅན་བླ་མ་ཕྱོགས་ཕེབས་ཞབས་བ་ལ་མཚམས་བཀྲལ་ནས་བར་ཆད་ཞུགས་དོགས་མི་དགོས་འདུག ངེད་ཀྱི་བླ་མའི་བྱ་བ་དེ་འདྲ་ལ་སྙིང་སྲབ་པོ་གཅིག་ཡོད་ཀྱི་ཞེ་ཁམས་ཆེན་པོ་བསྐྱེད་ནུས་མཁན་ཅིག་མིན་ལགས། ལར་བསྒྲུབ་པ་གློ་བུར་དུ་དེ་ལྟར་བཀྲལ་བ་ནི་བསྒྲུབ་པའི་གཡང་ཉམས་པར་རྒྱལ་བ་ཡང་དགོན་པས་གསུང་འདུག་པ་དེ་ངེས་པར་ཐུགས་མད་འདུག དུས་ཕྱིས་བསྒྲུབ་པའི་འཕྲོ་ལུས་པ་རེ་རྟག་ཏུ་བྱུང་། དེ་འདྲ་ལ་བློ་གདེངས་བསྐྱེད་ནས་དམ་བཅའ་གང་ཡིན་མ་གྲུབ་པར་རྐྱེན་དབང་གིས་བར་མ་ཆོད་པར་གལ་ཆེ་འདུག བསྒྲུབ་པ་དེ་སྐབས་སུ་སྔར་ལྟར་རྣམ་རྟོག་དབང་ཆེར་འབྱམས་པ་དེ་མ་བྱས་ཁུལ་ཡིན་ཡང་། འོན་ཏེ་གཞུང་དོན་ཇི་བཞིན་མ་རྟོགས་པས་བསྒྲུབ་པ་ཚད་ལྡན་ནི་ཅི་ལ་འགྱུར། རྟགས་ཀྱི་རིམ་པ་ཡང་ནད་གདོན་ཐོན་པའི་ལྟས་ཙམ་ལས་གཞན་ནི་ཆེ་བ་མ་བྱུང་། རྡོ་རྗེ་རྩེ་དགུ་པ་རྭ་མ་ཚངས་བ་གཅིག་ལག་ཏུ་བླངས་བ་ཡང་ཡང་རྨིས། རྭ་མ་ཚངས་བ་དེ་ཡི་དམ་གྱི་དབང་བསྐུར་ཞུས་པའི་བླ་མར་ལྟེམ་རྐྱང་ཞིག་ཤར་ཡོད་དམ་བསྐྱེད་རིམ་ཐང་ལྷོད་ཤོར་བའི་ལྟས་གང་ཡིན་ནམ་ངོས་མ་ཟིན།

ཡི་དམ་དཀྱིལ་འཁོར་ནི་ནམ་མཁའི་སྐར་ཚོགས་འདྲ། །ངོ་མཚར་ནུས་པ་ནི་རང་སོར་ཆེ་མོད་ཀྱི། །ཀུན་གྱི་ཐུགས་རྗེ་དང་འཕྲིན་ལས་འདུས་པའི་ལྷ། །བར་ཆད་ཀུན་སེལ་ཞིང་དངོས་གྲུབ་སྩོལ་མངགས་པའི། །གསང་བདག་རྡོ་རྗེ་འཆང་རྒུད་བྲལ་གཞོན་ནུའི་སྐུ། །ཉི་ཟླ་ལྟར་གྱུར་པའི་ལྷ་མཆོག་ཀཱི་ལ་ཡང་། །པད་འབྱུང་ཡབ་ཡུམ་གྱི་ལྷག་པའི་ལྷ། །དེ་ཡི་ངང་ཉིད་ལ་ཁོ་བོས་ཡི་དམ་བགྱིས། །འཕྲལ་རྐྱེན་སྤྱོད་དབང་གི་ཀླུ་གདོན་ཞུགས་ཆ་བ། །ལྷ་མཆོག་དེ་ཉིད་ཀྱི་ནུས་པས་རང་སར་དེངས། །གནས་སྐབས་ཅུང་ཟད་རེ་སྔགས་བཟླས་དེ་འདྲ་ན། །གསལ་གསུམ་ཡུན་བསྒོམ་ན་མཆོག་དོན་ཅིས་མི་འགྲུབ། །ལོ་དེར་གསལ་དུ་ནང་འཁྲུག་བྱུང་བ་སོགས་གདན་སའི་དབང་གིས་རྣམ་གཡེང་ཤིན་ཏུ་ཆེ་བས་རང་བློ་ཁེངས་པའི་བསྒྲུབ་པ་ལག་ཏུ་བླངས་རྒྱུ་ནི་བྲལ་མོད། འོན་ཀྱང་དལ་སྐབས་ཅུང་ཟད་བྱུང་རིམ་གྱིས་བསྒྲུབ་པ་ཞག་བདུན་མ་རེ་བགྱིས་ཤིང་། བར་གཅིག་རྡོ་རྗེ་རྣལ་འབྱོར་མ་ཡི་བསྙེན་པ་བདུན་ཞག་གཅིག་བྱས་པས། དེ་སྐབས་ཕྱིས་རིམ་གྱི་སྙན་པ་མངའ་ཐང་ཅུང་ཟད་འབྱུང་བའི་ལྟས་ཀྱང་བྱུང་བས།

རྣལ་འབྱོར་ང་དང་བྱ་རྒྱལ་ཁུ་བྱུག་གཉིས། །རྒྱང་རྒྱང་འགྲོ་བཞིན་སྐད་འཕང་མཐོ་རུ་འགྲོ། །དེ་ལྟ་འཚོགས་ནང་གཞོན་ནུ་ཉམས་ཉེས་དེ། །ཁྱད་གསོད་མཐོ་གནོན་བྱེད་པ་རང་ངལ་ཡིན། །ཆུ་དང་ཤིན་རྡོལ་ས་རྡོས་མི་ནོན་ཞིང་། །གནས་སྐབས་དམོད་པས་མཐར་ཐུག་གནོད་པ་མིན། །ཨེ་བདེན་ལོ་རེ་ལོ་གཉིས་འགྱང་བཞིན་དུ། །ཚིག་འདི་ཇེ་ལས་ཇེ་ཆེར་གསལ་དུ་འགྲོ། །ཞེས་སོགས་པའི་གླུ་དབྱངས་མང་དུ་བླང་ཞིང་ཡི་གེར་ཡང་བྲིས། ཡང་དུས་དེར་དབུས་གཙང་དུ་ཇོང་འགར་གྱི་དུས་འགྱུར་བསྟན་པའི་ཇུས་ཆགས་དེ་འབྱུང་ལྟས་ཡང་ཤར་རུང་ཕྱིས་བར་དཔྱད་མ་ཐུབ། གཞན་ཡང་རྨི་ལྟས་ལ་རྟེན་འབྱུང་འགྱུར་གནས་མང་ཙམ་ཤར། ལོ་འདི་ནས་བཟུང་རང་ལོ་ཉེར་ལྔའི་བར་དུ་བསྒོམ་བསྒྲུབ་ཚད་ལྡན་བསྐྱལ་རྒྱུ་བྱུང་ན་གུ་རུ་པདྨའི་སྲས་ཀྱི་དྭངས་མར་གཏོགས་པ་ཞིག་དེ་སྐབས་ནས་ཡོངས་རྒྱུ་དེ་ཡང་གནས་སྐབས་ཉི་ཚེའི་རྐྱེན་དབང་གིས་ཡལ་སོང་། ལོ་དེར་སྤྱིར་སྦྱིན་བདག་རིམ་གྲོ་བྱ་དགོས་མང་ཞིང་། ལྷག་ཏུ་སྟོན་སེར་དུད་ཚངས་གྲིབ་ཅན་ཞིག་གི་རིམ་གྲོར་གདན་དྲུང་རིན་པོ་ཆེ་དང་ཕྱག་མཛོད་ཀྱི་གསུང་ནན་ལ་བརྟེན་མི་འདོད་བཞིན་དུ་ཕྱིན་པས་ཚུར་དགོན་དུ་སླེབ་མཚམས་སིབ་ནད་ཀྱིས་བཏབ་ནས་སྤྱོད་ལམ་ལོག་པས་ཟླ་གཅིག་ལྷག་ཙམ་འཆི་ལ་ཕྱོགས་པའི་ནད་ཆེ་བ་བྱུང་། ངེད་རང་འཆི་བ་ཡས་ཆུང་རུང་། ཕྱག་མཛོད་སོགས་ནས་ནད་ན་མི་ཆོག་པའི་བསྒྱུར་སྦྱངས་ལྕི་བས་སོ་མ་གསོད་ཅིང་ཡིད་སྐྱོ་རབས་བྱུང་།

སྤྱིར་ཡང་རྗེ་དབོན་གདན་དྲུང་རིན་པོ་ཆེས་ནི་རྩེ་བའི་སྤྱན་གྱིས་སྐྱོང་བ་དང་ལྷག་ཏུ་དབང་ཆོས་ཀྱི་འབྲེལ་པ་ཞུས་པའི་བླ་མར་གྱུར་པས་བཀའ་དྲིན་མཆོག་ཏུ་ཆེ་ཞེས་སྨྲ་ཡོད། དེ་བས་དེང་སང་སྐུ་སྐྱེ་གཞན་ཁ་ཅིག་ལྟར་གདན་སར་སླེབ་ནས་དབོན་རིགས་གྲ་འཁོར་བུ་སློབ་སྦྱིན་བདག་རྣམས་ཀྱིས་བཀུར་བཀུར་ཅག་ཅོག་པོ་དེ་འདྲ་ངེད་ལ་ཡེ་ནས་མེད་པ་དེ་ཀུན་གསལ་ཡིན། ལར་སྐུ་སྐྱེ་ཟེར་བ་རྣམས་ཐེ་ཚོམ་ཟ་བ་ནི་ཤིན་ཏུ་ནས་བདེན་གྱི་ངེད་རང་ཡང་དེ་ལྟ་བུར་བློ་འགྲོ་དཀའ་བ་རང་ཡིན། དེ་ལྟར་སོམ་ཉི་ཡོད་ཕྱིན་སྐུ་སྐྱེར་མངའ་གསོལ་ནས་གདན་སར་བསུ་བ་དེ་མི་འཚལ་ལ། དེར་ནི་སུས་ཀྱང་མགུ་འཁང་བྱེད་དུ་ཅི་ལ་ཡོད། དེ་མ་ཡིན་པར་གདན་སར་སྐུ་སྐྱེར་མངའ་གསོལ་ཕྱིན་སྐྱེ་བ་ཡིན་མིན་ཐེ་ཚོམ་ཟ་རུང་དབོན་རིགས་གྲ་འཁོར་རང་རང་འཐད་ནས་མ་ཆད་པར་གང་ལེགས་རེ་བྱེད་དགོས་པ་ནི་བབ་མོད། ལེགས་སོ་བྱེད་ཞེས་པ་ཡང་འཇིག་རྟེན་གྱི་ཕོ་སྒོ་གཏམ་གཤེད་ཧམ་པ་ཐོ་ཅོ་ཆང་འཐུང་རྟ་རྒྱུགས། བག་མེད་ཀྱི་རྩེ་འཇོ་སོགས་བློ་ཆོས་ལ་དྲེད་དེ་རྒྱུ་འབྲས་རྩིང་པོར་སྤྱོད་པའི་གཞི་རྩ་དང་། དཀོར་བསྡུད་ལུགས་ཧབ་ཐོབ་བྱེད་ལུགས་ཟས་ནོར་ལ་ཆོས་ཕྱིར་མ་ཡིན་པའི་བསགས་བཀྲུན་བྱེད་ལུགས་སོགས་འཇིག་རྟེན་འདི་སྣང་གི་ལེགས་ལེགས་ལྟར་སྣང་བའི་ཕུག་ངན་སོང་གི་གཏིང་རྡོ་བྱེད་སའི་ཆར་འགྲོའི་དཔྱང་ཐག་དེ་འདྲ་ནི་སློབ་མཁན་དང་ཉན་མཁན་ཐམས་ཅད་བདུད་ཀྱིས་བསླུས་པ་སྟེ། ཕན་པ་ལྟར་བསྟན་ནས་མནར་མེད་དུ་བསྒྱུར་བ་ཡིན་པས་ལེགས་སོ་མི་ཟེར་ཏེ་ཉེས་པའི་མཐར་ཐུག་པ་ཡིན་གྱི་གོ་དགོས། དེ་བས་གནས་སྐབས་ཟས་གོས་འཕངས་མེད་དང་ནོར་ཟས་ཅི་རིགས་བསྟབ་ཅིང་སྙན་པར་བརྗོད་པ་ནི་འཇིག་རྟེན་ལུགས་ཀྱི་ཕན་འདོགས་བཟང་ངེས་ཡིན་མོད། ཡང་དག་པར་ནི་དེ་ཡང་ཁམས་མི་ཆེ་སྟེ། དེ་མ་ཡིན་པའི་ལེགས་སོ་ཇི་ལྟ་བུ་དགོས་ཤེ་ན། རང་གཞན་གྱི་དོན་ཕུན་སུམ་ཚོགས་པའི་བྱང་ཆུབ་བསྒྲུབ་པར་སློབ་པ་ལ་ཟེར་ཏེ། དེ་ལྟར་ན་སྲོག་འཚོའི་ཟས་ངན་ངོན་ཙམ་དང་གྲང་སྐྱོབས་གོས་ཧྲུལ་པོས་ཆོག་ཤེས་མོད། འདིར་སྣང་གི་ནོར་རྫས་རྨི་ལམ་ལྟ་བུར་ཞེན་རྒྱུ་ཅི་ཡོད། དེ་བས་ཆུང་ནས་ཆོས་མིན་བློ་དྲེད་དུ་མ་སོང་བར་རྒྱུ་འབྲས་དམ་ཚིག་གི་ཁེ་ཉེན་ཞིབ་ཏུ་བཤད་ནས་བློ་རྒྱུད་ཆོས་ལ་དཀྲིས་ནས། བསླབ་ཤེས་ཀྱི་ཡོན་ཏན་ལ་དོ་གལ་བཅུག བསླབ་གསུམ་རྣམ་པར་དག་དགོས་པའི་ཞལ་ལྟ་བྱེད། བསྒོམ་བསྒྲུབ་ལ་བརྩོན་པ་བསྐྱེད་པའི་བསྐུལ་ལྕགས་བཏང་། ཁྱད་པར་དུ་ས་ཉེ་རིང་གང་དུ་འདུག་ཀྱང་བཤེས་གཉེན་དམ་པ་ལ་མཚམས་སྦྱོར་ནས་དམ་ཚིག་རྣམ་པར་དག་པ་དང་གནས་ལུགས་ལྷན་སྐྱེས་ཀྱི་ཡེ་ཤེས་སྒྲིབ་་མེད་ལྟ་བར་ཡང་ཡང་དུ་ཞི་དྲག་དུ་མས་འབད་དེ་བསྐུལ་བ་དེ་ནི་ཕན་འདོགས་ཡང་དག་པ་སྟེ་ལེགས་པའི་མཐར་ཐུག་ཡིན་མོད། དེ་འདྲ་སློབ་མཁན་དཀོན་ནི་དཀོན་པོར་གདའ། དེ་འདྲ་སློབ་མཁན་བྱུང་ཚེ་སྐུ་སྐྱེའམ་སུ་ཡང་རུང་སྟེ་མནོ་ཤེས་གྲུལ་བཏུབ་རིགས་ཡིན་ན་བྱ་བ་དྲིན་དུ་ཤེས་ཤིང་གཟོར་ཡོང་། དེ་ལྟ་བུར་བྱ་བ་དྲིན་དུ་མི་རྩི་ན་རང་ཉིད་ལ་མདོ་མ་བྱུང་བ་ཡིན་གྱི་གོ་དགོས་སུ་གདའོ། །དེ་ལྟར་ཆོས་འཇིག་རྟེན་གྱི་ཕན་འདོགས་གང་ཡང་མེད་པར་སྐུ་སྐྱེར་ངོས་བཟུང་གདན་སར་མངའ་གསོལ་བཞིན་དེ་ལ་ཁྱད་གསོད་བརྙས་པ་མཐོ་ནོན་ངན་སློབ་བྱེད་པ་ནི། རང་རང་བླ་མ་གོང་མ་ལ་དད་མོས་གུས་ཞེན་མེད་པའི་མཚང་དང་དམ་ཚིག་ཉམས་ཆགས་ཡང་ངེས་པར་ཡོང་བ་ཡིན་ནོ། །དེ་ཡང་ཇི་ལྟར་བུ་ཞེ་ན་སྐྱེ་བར་དབུགས་དབྱུང་ཤིང་གདན་སར་མངའ་གསོལ་བའི་སྐུ་སྐྱེར་གྲགས་པ་དེ་ཉིད་ཆོས་ལ་བློ་ཁ་ཕྱོགས་ཤིང་བསྟན་འགྲོར་ཕན་པའི་ལྷག་བསམ་གྱི་དོན་གཉིས་བསྒྲུབ་པའི་བསམ་གཞི་ཡོད་པ་གཅིག་ཡིན་ཕྱིན་སྐྱེ་བ་ཡིན་མིན་ཐེ་ཚོམ་ཟ་བའམ། གལ་ཏེ་སྐྱེ་བ་མིན་པར་གྱུར་པ་ཞིག་ཀྱང་བརྙས་ཤིང་ཁྱད་དུ་གསོད་ན། དཔེར་ན་འཇིམ་གཟུགས་ཀྱི་ཤཱཀྱ་ཐུབ་པ་ཤཀ་ཐུབ་དངོས་མིན་ཡང་དེ་ལ་སྨོད་ན་རྣམ་སྨིན་ལྕི་བ་དང་བཤིག་པ་སོགས་ཀྱིས་ནི་མི་ཟད་པའི་ལས་ངན་དུ་འགྲོ་བ་དང་མཚུངས་པས་སོ། །ཡང་འདི་ལ་སྐྱེ་བ་ཡིན་མིན་གང་ལྟར་ཡང་བསྟན་འགྲོར་ཕན་འདོགས་ཀྱི་ནུས་པ་མེད་པར་ཆོས་མིན་གྱི་སྤྱོད་པར་དུས་འདའ་ཞིང་རྒྱལ་བའི་བསྟན་དང་བླ་མ་གོང་མའི་མཚན་ལ་རྨ་འབྱིན་ཅིང་དཀོར་གྱི་སྤྱང་ཀིར་ལྟ་བུ་སུན་ཕྱུངས་ན་གོང་ལྟར་ཉེས་པ་མི་འབྱུང་སྟེ། ཇི་ཞེ་ན། སྐུ་སྐྱེར་གྲགས་ཀྱང་ཆོས་མིན་སྤྱོད་པ་དེ་ནི་མི་གཙང་བའི་ཕུང་པོར་ཤཱཀ་ཐུབ་ཡིན་སྨྲས་མཁན་ལ་སྒྲིབ་པར་འགྱུར་ལ། དེ་ལ་འདི་མི་གཙང་བའི་ཕུང་པོའོ། །ཤཱཀྱ་ཐུབ་པ་མ་ཡིན་སྨྲ་ན་སྒྲིབ་པར་མི་འགྱུར་བར་མཚུངས་པར་གོ་དགོས་སོ། །དེ་ལྟར་ཡང་ཕྱིས་འབྱུང་རང་འདྲ་སྐྱེ་བར་གྲགས་པ་རྣམས་དང་གདན་དབོན་གྲྭ་འཁོར་ཀུན་གྱིས་ངེས་ཤིང་རྟོགས་པར་བྱ་དགོས་མོད། འོན་ཀྱང་སྤྲང་པོའི་གླུ་ལ་སྙན་ཚིག་ཡོད་ཀྱང་ཉན་མཁན་མེད་པའི་དཔེ་དང་འདྲ། དེ་ལྟའི་འཕྲོས་དོན་སྨྲས་བ་ན་ཟད་པ་མེད་མོད་ཀྱི།

ད་ནི་དཀྱུས་སུ་འཇུག་ན་ཁོ་བོ་ཅག་གདན་སར་མ་སླེབ་སྔོན་ནི་སྨོས་ཀྱང་མ་དགོས་སླེབ་ནས་ཡང་༸རྗེ་གདན་དྲུང་གི་ཐུགས་རྗེས་གཟིགས་པ་དེ་ཁོ་ན་ལས། གཞན་དེ་སྐབས་ཀྱི་དབོན་རིགས་གྲྭ་འཁོར་ཚོས་ཆོས་ཀྱི་ཕན་འདོགས་ནི་རང་རང་ལ་གཞི་མ་གྲུབ་པས་ཅི་བྱེད། འཇིག་རྟེན་གྱི་ཕན་འདོགས་ཡང་ཡེ་ནས་མ་བྱུང་མོད། དེ་ཡང་ཕར་བཞག་གདན་སར་སླེབ་ནས་མི་ལོ་བརྒྱད་ཀྱི་བར་དུ་གདན་སའི་དབོན་གཉེར་གྲྭ་འཁོར་དྲག་པ་ཕལ་ཆེ་པས་སྤྱན་རས་བཟླུམ་པོས་སྤྲུལ་སྐུ་ཞེས་མིང་ཟུར་ལ་བཀའ་བཀྱོན་རྟག་ཏུ་ཡོང་བའི་གནས་སུ་བྱས་ནས་སྡོད་པ་ཡིན། སྐུ་སྐྱེ་གཞན་ལྟར་ངེད་མིན་ཞེས་པ་དེ་ཡང་ལགས། གང་ལྟར་ཁོ་བོ་སུ་ཞིག་གི་སྐྱེ་བ་ཡིན་ཀྱང་རུང་། ངེད་རང་ལ་ནི་ཁྱད་ཅུང་ཟད་ཡང་མི་བདོག རིག་འཛིན་པདྨ་ནོར་བུའི་སྐུ་ཉེ་གྲྭ་རིགས་མང་ཞིག་གིས་དེ་མི་སྐྱེ་བ་བདག་མིན་པར་བསྒྲུབ་བཞིན་མིན་དུ་རུང་མོད། དེ་ལྟ་ན་ཡང་སྔོན་ལས་ཀྱི་དབང་གིས་ཚེ་འདིར་མིང་སྤྲུལ་སྐུར་གྲགས་དགོས་ཞིག་དང་། དེ་ཡི་ཁྲལ་ཆོས་རྗེ་པདྨ་བློ་གྲོས་ཀྱི་གདན་རབས་ལ་མཇལ་དགོས་བྱུང་འདུག་པ་དེ་ལ་ཁྱེད་རྣམས་ཁོང་ཁྲོ་དྲག་པོ་མ་མཛད་ཅིག ཁོ་བོ་ནི་བྱ་བྲལ་གུ་ཡངས་ཡན་པ་བློ་འདིའི་སྐྱེ་བར་སྨོན་གྱིས་མཆིས་ལགས་སོ། །དེ་ཡང་གདན་ས་ཡི་མིང་ཅན་དེར་རང་ཉིད་སླེབ་པ་ནས་བཟུང་རྒྱལ་ཁམས་མ་འགྲིམས་ཀྱི་བར་བླ་གྲྭའི་ནང་དུ། མཐོན་པོ་རྣམས་ལ་འགྲན་སེམས་མེད་པར་གོང་དུ་ཁུར་མཁས། བར་པ་རང་མཉམ་རྣམས་ལ་མཐོས་གནོན་མེད་པར་འགྲོགས་མཁས། དམན་པ་རྣམས་ལ་ཁྱད་གསོད་མེད་པར་བཀོལ་མཁས་སུ་རང་ངོས་ནས་ནི་བགྱིས་ཁུལ་བྱས། འོན་ཀྱང་རྒྱུད་མི་བསྲུན་པ་རེས་འགའ་དང་སྤྱོ་དངོས་པར་ནི་མཐའ་མ་བཀག་མོད། དུས་དེ་སྐབས་ཀྱི་སྤྱོད་པའི་ལོ་རྒྱུས་ཡིན་ལུགས་དྲང་པོ་ཀུན་ལ་གསལ་བ་དེ་ཡིན་ནོ། །གང་ལྟར་རྗེ་གདན་དྲུང་སྐུ་ཞོགས་སུ་སྡོད་རིང་ཡུལ་དེར་དཔག་པའི་སྐུ་སྐྱེའམ་སྤྲུལ་སྐུའི་མིང་ཅན་རྣམས་ཀྱི་མིག་སྲོལ་ལ་ངེད་རང་ནས་སྤངས་རྟོགས་ཡོན་ཏན་མེད་པས་བཟང་དཔེ་ནི་ཅི་ལ་འགྱུར། འོན་ཀྱང་ཕྱིའི་ཀུན་སྤྱོད་ལ་མ་དཔེར་འགྲོ་བ་ནི་མ་བྱས་ཏེ་འདི་སྐོར་གྱི་རྟོགས་བརྗོད་ཆ་ཤས་གཞན་དུ་བྲིས་པ་ལས་ཤེས་སོ། །

གསེར་འཕྱང་གི་ལོ་འདི་ནས་ཕྱིའི་དགོན་རིས་སྦྱིན་བདག་ཡུལ་སྡེ་ཡོངས་ནི་མགུ་ཞིང་འཕྲིན་ལས་ནི་རྒྱས་པའི་དབུ་ཚུགས། སིན་པ་ནི་གཞན་དོན་མི་ནུས་པ་ལ་འཕྲིན་ལས་སྐྱེ་བ་བདུད་ཀྱི་ཕྱེ་གཏོར་དུ་ནི་སྙིང་ནས་ངེས། ནང་གི་གྲྭ་རིགས་རྣམས་ཀྱིས་ནི་སྔར་ལས་ལྷག་ཙམ་གྱི་བཀའ་སྐྱོན་བརྙས་པ་ཁོ་ན་གནང་། རང་ཉིད་རྣམ་གཡེང་ཟང་ཟིང་གི་བློ་འདོད་དེ་འདྲ་སྙིང་ནས་མེད་ངེས་ཡིན་ཞིང་། དེ་སྟབས་རྗེ་བླ་མར་དགོངས་པ་ལན་གཅིག་མ་ཡིན་པར་ཡང་ཡང་ནན་དུ་ཞུས་པས། འདི་ལོ་ཟུར་མང་གཏེར་སྟོན་དྲུང་དུ་འགྲོ་ཆོག་པའི་བཀའ་ཡི་ཁྲོལ་ཆ་ཡང་བྱུང་ལ། དེ་མིན་སྡོད་དགོས་བྱུང་བར་ཀུན་མཁྱེན་དྲི་མེད་འོད་ཟེར་གྱི་ཚིག་དོན་མཛོད་དཔེ་ལྟ་བྱས་པས་རྐྱེན་བྱས། དེ་ཕན་ཆད་ཀྱི་ཉམས་ལེན་མཉམ་མེད་སྒམ་པོ་པ་ཡབ་སྲས་ཀྱི་རྩེ་གཅིག་གི་རྣལ་འབྱོར་དུ་བརྡར་བཞག་པའི་གནས་འགྱུ་བར་ལག་འགྱེལ་བའམ་གཉིས་མེད་དུ་རྟོགས་པ་ནི།

ཁྱབ་བདག་རྩ་བའི་བླ་མ་ཀུན་བཟང་པདྨ་བདེ་བ་ཆེན་པོའི་སྤྱན་སྔར་སྐྱེས་ཤིང་ངོ་འཕྲོད་ཀྱང་འདི་སྐབས་སུ་དེ་ཡང་ཕྱོགས་རེ་བ་རྒྱ་ཆུང་ངུར་སོང་སྟེ་སེམས་གཞི་མེད་རྩ་བྲལ་ཞེས་པ་དེ་སེམས་འཚོལ་སྐབས་ཀྱི་གོ་བབ་ཤེས་རབ་ཅན་ཕལ་ཆེ་ལ་བླ་མ་མྱོང་བ་ཅན་གྱི་ངོ་སྤྲོད་ཚེ་བློ་ཡུལ་དུ་ཡོང་བ་ཐུན་མོང་དེ་དང་ཡེ་མི་འདྲ་བའི་མྱོང་བ་ཞིག་སྐྱེས་པས་སྔར་གྱི་ཚིག་དེ་ཚོ་གོ་པ་འོལ་ཅི་རུ་སོང་། འདི་སྐབས་སུ་ཡང་ཕྱོགས་གཅིག་ནས་གོ་བར་འདུག་ཀྱང་གོ་བ་དེ་ནི་ཡང་དག་པའི་གོ་བ་སྤྲོས་པ་ཆོད་པ་དེར་གྱུར་གོ་བ་རྣམ་པར་དག་པ་དང་ནི་རྟོགས་པ་དང་གཉིས་ཧ་ཅང་གི་ཁྱད་ཆེ་བ་མེད་ཞེས་གྲུབ་ཐོབ་ཨོ་རྒྱན་པའི་གསུང་ཡིད་བཟང་བརྩེ་བའི་རྣམ་ཐར་དུ་དྲངས། ངེད་རང་གི་ཤར་ཚུལ་དང་ནི་ཐུན་གཞན་ཚོ་དང་མཐུན་མིན་ནི་མ་ཤེས་སོ། །དེ་ཡན་ཆད་དུ་ཉམས་ཀྱི་འཆར་ཆ་ཚད་བཟུང་ལས་འདས་པ། བྱུང་བ་སྔོན་གྱི་སྦྱངས་ལྷག་ཏུ་གྱུར་ཀྱང་དེ་ངོ་ཅུང་ཟད་མ་འཕྲོད་པ་དང་ཚུལ་བཞིན་སྐྱོང་རྒྱུ་མ་བྱུང་བས་ཕྱིས་དཀོར་རྫས་ལ་ལོངས་སྤྱོད་ཚེ་འགྲིབ་པར་གྱུར་པ་ཡི་ཚད་བཟུང་མ་ནུས་གཤིས། དེས་ན་སྐབས་འདིའི་ཉམས་མྱོང་ཉིད་ཚེ་འདིར་དགེ་སྦྱོར་གཤའ་མ་སྐྱེ་བའི་རྐང་དེ་ནས་ཚུགས་པ་ཡིན་འོན་ཀྱང་འདི་དུས་ཀྱི་ཕྱག་ཆེན་ལ་མོས་ཞེན་ཆེ་ཞིང་སེམས་ངོ་གོམས་འདྲིས་ཡང་དེ་གའི་ཞེས་པ་ལྟར་སྐྱོང་བ་ཡིན་པས། དེ་ལ་བཀའ་བརྒྱུད་པ་གོང་མ་རྣམས་ཀྱི་ཞལ་ནས་ཕྱག་ཆེན་རྟོགས་པའི་སྣེ་ཟིན་དགེ་སྦྱོར་སྐྱེས་ཀྱང་དེ་སྐབས་བརྩོན་པས་མ་སྐྱོངས་ན་སྒོམ་འགྲིབ་འགྲོ་གསུངས་པ་དེ་ཡང་ཤིན་ཏུ་ནས་ཐུགས་ཆད་འདུག དེ་ལ་མཁས་གྲུབ་སོག་བཟློག་པ་ཡབ་སྲས་རྣམས་ཀྱི་ནི། སེམས་ཕྱོགས་ཀྱི་མན་ངག་སྤྱི་བཏང་ཡུལ་ལམ་དུ་བྱེད་པ་དང་། ཀློང་ཆེན་པ་ཡན་ཡུལ་ཅན་ལམ་དུ་བྱེད་པས་རྫོགས་ཆེན་སྙིང་ཐིག་ལུགས་ལ་ངོ་བོ་མཐོང་ཕྱིན་མི་འགྲིབ་ཅེས་གསུངས་པ་དེ་ཡང་ཅི་ལྟ་བ་མཁྱེན་པའི་ལེགས་བཤད་ཡང་དག་པར་མངོན་ནོ། །

བསོད་ནམས་མཐུ་ཡིས་བདེ་ཆེན་གླིང་དང་མཇལ། །རྒྱུ་དེས་ཆོས་ཀྱི་སྲོག་རྩ་བྱིན་རླབས་ཞུགས། །སྨོན་ལམ་སྟོབས་ཀྱི་ཀུན་མཁྱེན་གསུང་ལ་མོས། །རྐྱེན་དེས་རྫོགས་ཆེན་གྲུབ་མཐར་མོས་གུས་བརྙེས། །དེ་དག་སྟོབས་ཀྱི་ཉམས་ལེན་རྐང་པ་ཚུགས། །སྐལ་པ་དམན་ཡང་སྐལ་མེད་མིན་ཙམ་མངོན། །བཟང་ངན་ལས་ཀུན་བསླུ་མེད་རྒྱལ་བས་གསུངས། །ཇི་བཞིན་མ་འདྲེས་སྣང་བ་ཡ་མཚན་སྐྱེས། །ཞེས་སོ། །ཉམས་མྱོང་དེ་ཀའི་རྒྱུན་ལ་བརྟེན་ནས་བླ་མ་གོང་མ་མང་ཞིག་གིས་བཞེད་པ་ལྟར་ན་བདེ་སྟོང་དཔེ་ཡི་ཡེ་ཤེས་ཡང་དེ་སྐབས་ཆ་མཐུན་སྐྱེས་པར་རློམ་ཡང་། རྒྱུད་སྡེ་ཆེན་པོའི་དགོངས་དོན་ལྟར་ན་དེ་ཅུང་ཟད་མིན་པར་སྣང་ཡང་། གང་ལྟར་ཉམས་མྱོང་བརྟན་པོར་སྐྱེས་པའི་ནུས་པས་ཕྱི་ནང་རྟེན་འབྲེལ་གཅིག་པའི་གནད་ཀྱིས་ཕྱི་ན་ཡང་རང་ཉིད་གར་གནས་དེ་རུ་སྤྲིན་སྨུག་ན་བུན་འཇའི་རང་བཞིན་ཡ་མཚན་པ་དང་། རླུང་ཡང་དལ་བར་གཡོ་ཞིང་བག་དྲོ་ཡིད་དུ་འོང་བའི་རྣམ་པ་དང་། རང་གི་དྲུང་ན་འཁོད་པ་ཀུན་བག་ཕེབས་པ་དགའ་འཛུམ་གྱི་ངང་ཚུལ་དུ་སྣང་སྟེ། དོན་ལ་རང་སེམས་ལ་བདེ་ཉམས་ཀྱི་ཤར་ལུགས་ཙམ་ལས་ངེས་བཟུང་ཚད་མ་ནི་ཕྱིར་ཡོད་གང་ལྟར་དེ་སྐབས་སུ་བདེ་སྡུག་སྙན་མི་སྙན་ཚ་གྲང་གི་མྱོང་རེག་རྣམས་ཀྱང་རྣམ་རྟོག་གི་རང་གཟུགས་ལས་གཞན་པའི་རང་རྒྱུད་བྱེ་བྲག་པར་མ་འགྲུབ་པའི་ངང་ཚུལ་དུ་རྟོགས་པས་དེ་དག་ཀུན་ཀྱང་རིག་ངོ་རོ་མཉམ་ཉིད་དུ་ཤར་བ་དང་། ལྷ་ལ་ཆགས་པ་འདྲེ་ལ་སྡང་ཞེན་ཡང་རེ་དོགས་ཀྱི་འཆར་ཆ་ཕྲ་མོ་ཙམ་ལས་གཞན་རང་སར་ཞི་ཞིང་མངོན་ཞེན་རེ་དོགས་ཁོ་རང་ཡང་རང་ཤར་རང་གྲོལ་ཆོས་ཉིད་ཀྱི་ཡོ་ལོང་ལས་གཞན་དུ་མེད་པ་ནི་ངེས་ཤེས་གཏིང་ཚུགས་པ་སོགས་གཞན་བློར་འགལ་བ་རང་བློར་མ་འགལ་བའི་མྱོང་བ་དུ་མ་ཞིག་ཤར་ཏེ། དེ་ངང་ཟླ་བ་གསུམ་ཙམ་བར་དུ་ཉམས་དེ་ཀ་བརྟན་པར་གནས་སོང་། འདི་སྐབས་སུ་དབེན་པའི་གནས་བརྟེན་གཏུམ་མོ་རླུང་ཐིག་གནད་དུ་བསྣུན་ནས་བོགས་བསྟེན་དགོས་རྒྱུ་ལ། དེ་ལྟར་མ་འགྲུབ་པས་ཕྱིས་དགེ་སྦྱོར་ལ་བོགས་བསྐྱེད་ཤིན་ཏུ་ཆུང་བ་བྱུང་། སྤྱིར་ནི་མི་བརྟན་པའི་མྱོང་བ་རྣམས་ཉམས་དང་བརྟན་པ་ནི། རྟོགས་པ་ཡིན་ཞེས་སྨྲ་ཡང་དོན་ལ་སེམས་ཉིད་རིགས་རྒྱུད་རང་གསལ་གྱི་ངོ་བོ་ལ་ནི་ནམ་ཡང་འཕོ་འགྱུར་མེད་ཀྱང་། གནས་སྐབས་སུ་ཀུན་རྫོབ་རྩ་རླུང་ཐིག་ལེ་འཕེལ་འགྲིབ་ཀྱི་རྟེན་འབྲེལ་དང་རྐྱེན་དབང་རྣམ་རྟོག་རླུང་གི་བྱེད་ལས་ཀྱི་དགེ་འབྱོར་ལ་འཕེལ་བ་དང་འགྲིབ་པའི་ངང་ཚུལ་དུ་མ་ཞིག་ནི་སྟོན་མོད། འཕེལ་འགྲིབ་སྣང་ཡང་འཕེལ་འགྲིབ་ཀྱི་རྣམ་རྟོག་ཁོ་རེའི་རང་ངོ་མཉམ་ཉིད་དུ་ཤེས་པས་རྦ་རླབས་རྒྱ་མཚོར་ངོ་ཤེས་པ་ལྟ་བུར་སྙིང་ནས་ཐག་ཆོད་ཅིང་ཐེ་ཚོམ་ཕྲ་བ་ཅི་བྱས་གུ་ཡངས་ཟོལ་བདེ་བ་རྟོགས་པ་ཡིན་ལ་དེ་མ་ཡིན་པར་ངོ་བོ་འགྱུར་མེད་དེ་རྣམ་རྟོག་འགྱུར་བཅས་ཀྱིས་བསྒྲིབས་ནས་འཕེལ་འགྲིབ་ཉམས་ལ་བླང་དོར་དང་གང་ཤར་དེ་ཐོག་ཏུ་མི་བདེ་བའི་ཡིད་གཉིས་ཕྲ་མོ་ཡོད་ཕྱིན་ཉམས་མྱོང་ཕྱོགས་སུ་རང་ལུགས་ལ་བཞག་གོ །དེ་ལྟའི་རྣམ་བཞག་དང་རང་གི་ཉམས་མྱོང་ཕྲན་བུ་སྐྱེས་པའི་ངང་ཚུལ་རྒྱས་པར་ཡི་གེ་འཇིགས་པས་འདིར་མ་བཀོད་ཀྱི་གཞན་དུ་སྨྲ་བས་དེར་རྟོགས་པར་བྱའོ། །འདི་ལོ་ཟུར་མང་དུ་འགྲོ་ཐག་ཆོད་རྩིས་ཀྱི་རྗེ་གདན་དྲུང་ལ་ཐོན་ཕྱག་ཞུ་བའི་ཕྱིར་ཉི་མ་ཕུག་ཏུ་སླེབས་སྐབས་གདན་ས་ནས་ཕོ་ཉ་ཆེད་མངགས་ཀྱི་ཕྱག་མཛོད་རི་བཀྲ་གནས་ནང་འགྲོ་ལམ་དུ་གློ་བུར་གནམ་རྡོ་ཞིག་སྤྱི་བོར་ལྷུངས་ནས་ཚེ་དུས་བྱས་པར་ཇི་མྱུར་དུ་གཤེད་འཕྲལ་དད་ལམ་བསྟན་ཡོངས་དགོས་ཚུལ་ཕེབས་པས་དེ་ཕྲལ་དུ་སྐུ་ཞོགས་སུ་བཅར་ནས་གཤེད་ཕྲལ་ལམ་བསྟན་རྣམས་ཁ་ཞེ་མེད་པར་བསྒྲུབ།

དེ་སྐབས་ལན་གཅིག་ཉམས་ཀྱི་སྣང་བར་འཕགས་པ་སྤྱན་རས་གཟིགས་བཅུ་གཅིག་ཞལ་ཁྲུ་གང་པ་ཙམ་དང་། རྨི་ལམ་དུ་འོད་ཀྱི་རྣམ་པར་རྡོ་རྗེ་ཁྲོ་ལོད་དཀར་པོ་ཞིག་ཀྱང་མཇལ་ཕྱག་མཛོད་ཀྱི་གཤེགས་རྫོང་གྲུབ་ཕྲལ་དུ་ཟུར་མང་དུ་འགྲོ་རྩིས་ཡིན་ཡང་ཕྱག་མཛོད་གཤེགས་སྟབས་ཀྱིས་གདན་དྲུང་ནས་རེ་ཞིག་བཀའི་མ་གནང་ཞིང་། དེ་ནས་བྱ་བ་གཅིག་གྲུབ་ཚེ་གཅིག་ཤར་བ་ཆུའི་གཉེར་མ་བཞིན་སངས་དུས་མེད་པས་དུས་འདས་ནས་རང་གི་བློ་འདོད་ལ་ཡོད་པའི་རི་དྭགས་རྨས་མ་ལྟ་བུ་དབེན་པའིག་ནས་སུ་རྩེ་གཅིག་ཏུ་བསྒྲུབ་པ་ལ་གཞོལ་ནས་ལུས། རྟེན་འདིར་གྲུབ་པ་ཐོབ་པ་ཞིག་ཅིས་ཀྱང་བྱའོ་སྙམ་ཡང་མ་གྲུབ་པ་དེར་གདའ། གང་ལྟར་གོང་གི་ཉམས་ཀྱི་འཕྲོས་སུ་འདི་སྐབས་ཅི་སྣང་ཀུན་ལྷ་ཡི་རང་བཞིན་དུ་རང་ཤར་བ་ཞིག་བྱུང་། དེ་སྐབས་དགེ་སྦྱོར་སྐྱེ་ཚུལ་ཙམ་ལས་གཞན་དུ་མ་དམིགས་ཡང་། དུས་ཕྱིས་རྒྱུད་གཞུང་གི་དོན་ཆ་ཤས་ཐོས་ཚེ། རྒྱུད་ནས་བཤད་བཞིན་པའི་ལུས་དབེན་རྣམ་པ་སྐྱེས་པ་ཡིན་འདུག

འདིར་སྨྲས་པ། བཅོས་མེད་ཆོས་ཉིད་བཅོས་མའི་སེམས་ཀྱིས་བསྒྲིབས། །མ་བཅོས་རང་རིག་རང་ངོ་ཤེས་པའི་ཚེ། །ཅིར་སྣང་བདེ་ཆེན་ལྷ་ཡི་རོལ་པར་ཤར། །ཞལ་ཕྱག་ཅན་དང་ཤེས་ལས་འདས་པའི་ལྷ། །གཟོ་མེད་གཉུག་མའི་མཁའ་ལ་རང་གྲུབ་འདི། །ལྷ་སྐུ་ཕྱག་རྒྱ་ཆེན་པོའི་རང་འགྲོས་ཏེ། །རྡོ་རྗེ་ཐེག་པའི་སྤྱི་གཞུང་གསང་འདུས་ཀྱི། །རྒྱུད་ལ་ཐུག་ཞེས་འཕགས་བོད་ཤིང་རྟ་ཆེ། །ཀུན་གྱིས་བཞེད་བཞིན་ངེས་ཤེས་སྙིང་ནས་སྐྱེས། །སྲིད་དང་ཞི་བའི་མཐའ་ལ་མི་གནས་པའི། །མཐའ་བྲལ་ཕྱག་རྒྱ་ཆེ་འདི་རྨད་དུ་བྱུང་། །ཚུལ་འདི་རང་ཡང་སྐལ་བཟང་ཉིད་དུ་སེམས། །ཞེས་སོ། །ལྷག་ཏུ་འདི་དུས་ཟུར་མང་གཏེར་སྟོན་རིན་པོ་ཆེ་བཛྲ་ལ་ལཱི་ཏ་དང་མཇལ་དགོས་ཡོད་ཀྱང་རང་དབང་དུ་མ་གྱུར་ཏེ། རིན་ཆེན་ཆོས་དག་དཀོན་ལ་རྟག་ཏུ་འཚེ་བ་མང་། ཞེས་པ་ལྟར་ཕྱག་མཛོད་དུས་ལས་ཡོལ་བ་དེས་ངེད་རང་ལ་ནི་གདན་སའི་ཁུར་གྱིས་ཆོས་ཀྱི་བར་ཆད་ཤིན་ཏུ་ཆེ་བ་བྱུང་། ཕྱིས་ཆོས་བསྒྲུབ་བཞེད་རྣམས་ཕྱི་བཤོལ་དབང་དུ་ཡུད་ཙམ་ཡང་བཏང་མི་རུང་བར་གདའོ། །ལོ་དེར་གསལ་གྱི་ནང་འཁྲུག་སྟོབས་ཆེ་བ་དེ་ཡང་བཟླུམ་པས་ཐོག་མར་དཀའ་ཚེགས་ཆེ་ཡང་རང་གི་འབད་པ་ཆེན་པོ་བྱས་ཤིང་མཐར་འགྲིག་ལ་ཉེ་སྐབས་༸རྗེ་གདན་དྲུང་དང་ཀུན་རྣམ་ཡང་བྱོན་པ་ཡིན། ལོ་དེའི་སྟོན་གཞུག་ལ་ཀཿཐོག་ཏུ་ཕྱིན་རྒྱལ་བའི་སྲས་བསོད་ནམས་ལྡེའུ་བཙན་ཞལ་མཇལ་ཞིང་ལྷ་ལས་བབ་པའི་དུས་བཟང་པོར་ཚངས་སྤྱོད་དགེ་བསྙེན་གྱི་སྡོམ་པ་ཞུས་ནས་སྐྲ་ཕུད་ཡང་དེ་སྐབས་སུ་ཕུལ་བས་མིང་བསོད་ནམས་ཐེག་མཆོག་བསྟན་འཛིན་དཔལ་བཟང་པོར་བཏགས། སྐྱབས་འགྲོའི་བསླབ་བྱ་སྡོམ་པ་ནི་སྔར་ནས་ཡང་ཐོབ་མོད། སྐྲ་ཕུད་ནི་དེ་སྐབས་བར་ཕུལ་རྒྱུ་མ་བྱུང་། ཡིན་པ་ནི་གྲོགས་ཀྱི་མིག་སྲོལ་ངན་པའི་སྐྱོན་དང་རྩ་བའི་བླ་མ་ཞལ་མ་བཞུགས་ཕྱིན་གང་འབྱུང་དུ་འབུལ་པར་བློ་མ་ཕྱོགས་པའི་དོན་ཀྱང་ཡིན། དེ་བས་སྔོན་ལ་ཕོ་མོ་སྐྲ་བཅད་ནི་མང་དུ་བྱུང་ཡང་། རང་གི་རྒྱུད་ལ་སྐྱབས་འགྲོའི་སྡོམ་པ་ཡོད་པས་ལྟུང་བ་ཆེན་པོ་ནི་མི་འགྱུར་རུང་རང་གི་སྐྲ་མ་གཅོད་པར་གཞན་གྱི་སྐྲ་བྲེག་པར་ནི་ཉེས་བྱས་ནི་ཡོང་བར་བྱེད་དགོས། ལར་སྐྱབས་འགྲོ་ནས་ཚངས་སྤྱོད་ཀྱི་དགེ་བསྙེན་བར་བླངས་ཡུལ་མ་འབྱོར་ན། དཀོན་མཆོག་རྟེན་གྱི་དྲུང་དུ་རང་གིས་བླངས་བར་ཡང་རུང་བར་བཞེད་པས་སོ། །

འདི་རེས་རིག་འཛིན་རོལ་པ་རྡོ་རྗེ་ཉག་གཤིས་ཕྱོགས་སུ་བཞུགས་ཡོད་འདུག་པས་མཇལ་འདོད་སྐོམ་ནད་ཅན་ཆུས་གདུང་བ་ལྟ་བུས་རྒྱུ་ཤས་གྲུ་ཁ་བར་ཕྱིན་ཀྱང་ཟླ་བོ་གཉིས་འགྲོ་མ་འདོད་པའི་གཡོ་སྒྱུས་དེ་ནས་ལོག་དགོས་བྱུང་། དེ་མིན་ངེད་རང་གཅིག་པུར་འགྲོ་ཆོག་མོད་ཀྱང་། མི་རྣམས་ཀྱི་སྨྱོ་འདུག་ཞེས་པའི་ཁ་ཟེར་ལ་འཇིགས་ནས་འགྲོལ་བཏུབ། ཚེ་འདིའི་གཏམ་མི་སྙན་པར་དགོས་པས་བསླུས་པ་ཡིན། དམ་པའི་ལྷ་ཆོས་སྙིང་ནས་བསྒྲུབ་པ་རྣམས་ཚེ་འདི་སྣང་ལོ་འདོད་ཀྱི་གཏམ་མཐའ་དག་རྒྱབ་ཏུ་བོར་དགོས་འདུག་གོ །མི་ཚེ་ཡུད་ཙམ་ལས་མི་ཡི་འཕྱ་ཁྲེལ་ངན་བརྗོད་ཅི་བྱུང་བཟོད་པར་ལྷ་ཆོས་གཤའ་མ་ཞིག་དགོས་པར་གདའ་སྟེ། ད་རེས་ངེས་བློ་ཚན་ཨན་ཆུང་བས་བླ་མ་མ་མཇལ་གྱིས་ཕོང་ངོ་། །དེ་ཡང་གྲོགས་ངན་སྤྱང་ཀི་རྒྱབ་སེར་རྐྱེན་ལས་བྱུང་བ་ཡིན། ཆོས་ཀྱི་གེགས་བྱེད་པའི་གྲོགས་དེ་ལྟ་བུའི་དབང་དུ་འདི་ནས་བྱང་ཆུབ་ནམ་ཐོབ་བར་དུ་མི་འགྲོ་བར་སྨོན་གྱིས་འགྲུབ་པའི་དཔང་པོ་རྒྱལ་བ་སྲས་དང་། སློབ་མ་དེས་གསུང་བཀའ་ལུང་རྣམས་ཀྱིས་མཛོད་ཅིག འདི་བྲིས་དགེ་བས་མཉམ་འགྲོ་བ་ཀུན། །རྗེ་བཙུན་བླ་མའི་རྣམ་ཐར་རྗེས་ཞུགས་ཏེ། །ས་དང་ལམ་གྱི་ཡོན་ཏན་རིམ་རྫོགས་ནས། །ཀུན་ཏུ་བཟང་པོའི་གོ་འཕང་ཐོབ་པར་ཤོག །མངྒ་ལཾ།