ལ་དྭགས་རྒྱལ་པོ་དང་མུ་ཝེ་རྒྱལ་པོ་གཉིས་ཀྱི་ཆིངས་འདུམ་ལ་ཕེབས་སྐོར།
༄༅། །ལ་དྭགས་རྒྱལ་པོ་དང་མུ་ཝེ་རྒྱལ་པོ་གཉིས་ཀྱི་ཆིངས་འདུམ་ལ་ཕེབས་སྐོར། །
༈ ཨོཾ་སྭཱསྟི་སིདྡྷི་ཛྙིཾ་རཱ་ཛ་བྷ་ཝནྟུ། མི་འགྱུར་གདོད་ནས་དག་པ་ཆོས་ཀྱི་དབྱིངས། །བྲི་གང་ལས་འདས་རྟག་པ་གཡུང་དྲུང་ཆེ། །སྲིད་ཞི་ཕུན་ཚོགས་དཔལ་ཀུན་འབྱུང་བའི་གནས། །རང་བཞིན་འོད་གསལ་ཆོས་སྐུ་ངོ་བོ་ཉིད། །ཀུན་གྱི་རྒྱུད་དུ་ཏིལ་ལ་མར་བཞིན་དུ། །གནས་མོད་གསེར་ལ་གཡའ་བཞིན་གློ་བུར་གྱིས། །སྒྲིབ་པ་གསལ་བྱེད་བདེན་གཉིས་ཟུང་འཇུག་སྐུ། །དྲན་མཆོག་བླ་མ་ཀུན་ཏུ་བཟང་པོར་འདུད། །རྣམ་ཀུན་མི་འགྱུར་བདེ་བ་ཚད་མེད་པ་ཡི་ནམ་མཁའི་མཐར་གཏུགས་སེམས་ཅན་སྒྲོལ་སླད་དུ། །རྫོགས་སངས་རྒྱས་འགྱུར་ཡི་དམ་ཞི་དང་ཁྲོ་བོ་མཆོག་གི་སྤྲུལ་སྐུ་ཚད་མེད་ཐུགས་རྗེའི་གར། །དེ་སྲས་བྱང་ཆུབ་སེམས་དཔའི་ཚོགས་དང་སློབ་གྱུར་རང་སངས་རྒྱས་དང་ཉན་ཐོས་འཕགས་པའི་ཚོགས། །གང་གི་ཐུགས་དང་ཞལ་ལ་ལེགས་གནས་ལུང་དང་རྟོགས་པའི་དམ་པའི་ཆོས་རིན་ཆེན་སྒྲོན་མེ་ཆེ། །རིན་ཆེན་མཆོག་གསུམ་རབ་ཏུ་གཉེན་ཞིང་བསྟན་པ་ཡུན་དུ་གནས་པའི་ཕྱིར། །ས་བཅུའི་མགོན་པོ་རྡོ་རྗེ་ཆོས་སྐྱོང་ཆེན་པོར་སྤྲུལ་དང་དེ་ལས་གཞན། །འཇིག་རྟེན་ལས་ཀྱི་ཚུལ་སྣང་ཕྱོགས་སྐྱོང་ཞིང་སྐྱོང་བསྲུང་མ་དམ་ཚིག་ཅན། །མཐུ་དང་རྫུ་འཕྲུལ་འབྱམས་ཀླས་ལེགས་ཉེས་སྟངས་འཛིན་རིག་དུས་ཀུན་མཁྱེན་ཆེ། །དེ་ལྟར་གཅིག་དང་དུ་མའི་སྤྲོས་བྲལ་གཅིག་ཏུ་མ། །རང་ཤར་དཀོན་མཆོག་རིན་ཆེན་རྩ་བ་གསུམ་གྱི་ཚོགས། །མ་གྲུབ་བཞིན་སྣང་སྒྱུ་འདྲའི་འགྲོ་ལ་དུས་རྟག་པར། །ཕན་དང་བདེ་བའི་འབྱུང་གནས་རྟོག་མེད་རྗེས་ཆགས་ཀྱི། །རྒྱུན་ཆད་མེད་མཛད་དེ་ལ་བསྐུལ་བརྟན་མི་འཚལ་ཡང་། །གཉིས་འཛིན་ལས་ཉོན་སྒྲིབ་པས་བཅིང་རྣམས་སྙིགས་དུས་ཀྱི། །མི་བཟད་དུཿཁས་རབ་ཏུ་མནར་ལ་མ་བཟོད་པས། །དཔུང་དང་ར་མདར་སྒྲན་གྱིས་དུས་འདིར་དགོངས་མཛོད་ལ། །སྐྱེ་དགུ་སྤྱི་དང་བྱེ་བྲག་རྒྱལ་བའི་བསྟན། །ཉེར་གནས་གནས་རིའི་བསྐོར་བའི་ཡུལ་ལྗོངས་འདིར། །ནད་ཞི་མུ་གེ་མེད་ཅིང་ཁྱད་པར་དུ། །མཐའ་དམག་གདུག་པའི་མཚོན་སྐལ་ཡོངས་ཉམས་ནས། །རིས་མེད་འགྲོ་ཀུན་ཕན་བདེའི་དཔལ་བཟང་པོས། །བསྲུང་ཕྱིར་གངས་ཅན་མགོན་པོའི་ཕྲིན་ལས་སུ། །མར་ཡུལ་བདག་པོའི་ལེགས་བཟླུམ་བདག་འབད་འདི། །ཇི་བཞིན་དུས་སྲིད་བར་དུ་གནས་པར་མཛོད། །
ཅེས་སྐྱབས་ཡུལ་རྣམས་ལ་མཆོག་ཏུ་གུས་པས་རང་བློ་ངལ་གསོ་བའི་སླད་དུ་གསོལ་འདེབས་ཤུགས་འབྱུང་འགག་པ་མེད་པའི་ཚིགས་སུ་བཅད་པ་ཁ་ཤས་ཤིག་གིས་མདུན་བསུས་ཏེ་འདིར་བརྗོད་པར་བྱ་བ། དེ་ཡང་རྒྱལ་བ་ཆོས་ཀྱི་སྐུ་ཡི་ཞིང་ནམ་མཁའི་མཐའ་ཐུག་པ་ཉིད་དུ་རྒྱ་ཆད་ཕྱོགས་ལྷུང་ལས་འདས་པ་མི་གནས་གནས་པ་ཆེན་པོའི་བརྡར་བཞག་པ་དེ་ལས་སངས་རྒྱས་ཐམས་ཅད་ཀྱི་ལོངས་སྤྱོད་རྫོགས་སྐུའི་ཞིང་རྒྱན་སྟུག་པོ་བཀོད་པ་ཡེ་ཤེས་ཀྱི་གཟི་བརྗིད་དཔལ་དུ་འབར་བས་སྒྲིབ་གཉིས་ཀྱི་དྲི་མ་བཅོམ་པར་སླ་བ། དེ་ལས་མཆོག་གི་སྤྲུལ་པའི་སྐུའི་ཞིང་ལྷའི་བུ་དབང་ཕྱུག་ཆེན་པོའི་གནས་ལས་མ་གཡོས་བཞིན་དུ་བསྒྱུར་བའི་ཟློས་གར་འཇིག་རྟེན་གྱི་ཁམས་སྟོང་གསུམ་བྱེ་བ་ཕྲག་བརྒྱའི་བདག་ཉིད་ཅན་སྟོན་པ་སྐུ་གསུམ་གྱི་རྒྱལ་བ་ཆོས་ཀྱི་སྐུ་ཆོས་ཀྱི་དབྱིངས་གཅིག་ཏུ་མཉམ་བཞིན་ལོངས་སྤྱོད་རྫོགས་པའི་སྐུ་གཅིག་དང་ཐ་དད་པ་མ་ཡིན་པ། སྤྲུལ་པའི་སྐུ་གདུལ་བྱའི་མོས་པ་བཞིན་མ་འདྲེས་སོ་སོར་སྣང་བའི་བདག་ཉིད་ཅན་རྒྱལ་བ་ཐམས་ཅད་ཀྱི་བཀོད་པ་རྟག་པར་མཉམ་པ། དེ་ལྟ་བུ་ལས་དུས་འདིར་རྒྱལ་བ་རྣམས་ཀྱི་ཐུགས་རྗེས་བཟོད་པ་དང་ལྡན་པ་མི་མཇེད་འཇིག་རྟེན་གྱི་ཁམས་ལྷ་རྣམས་ཀྱི་གསེར་གྱི་པདྨ་འདབ་མ་བཅུ་ཕྲག་བརྒྱར་བྱས་པ་རྒྱལ་བའི་དགེ་མཚན་གྱི་སྤྲས་པ་མཐོང་བས་བསྐལ་པ་བཟང་པོ་ཞེས་གདགས་པ་རྣམ་འདྲེན་མཆོག་གྱུར་སྟོང་ལས་བཞི་པ་ཁམས་གསུམ་གྱི་བླ་མ། འཇིག་རྟེན་གསུམ་གྱི་མགོན་པོ། སྲིད་པ་གསུམ་གྱི་སྒྲོན་མེ། མཚུངས་པ་མི་མངའ་བ་བདག་ཅག་གི་སྟོན་པ་ཤཱཀྱའི་དབང་པོ་ཤཱཀྱའི་ཏོག་ཤཱཀྱ་དོན་ཀུན་གྲུབ་པ་ཞེས་རྫོགས་པའི་སངས་རྒྱས་གཞན་རྣམས་ལས་ཆེས་རྨད་དུ་བྱུང་བའི་ཐུགས་བསྐྱེད་ཀྱིས་ཛམྦུ་གླིང་གི་སྐྱེ་དགུ་བསྐལ་པ་རྩོད་ལྡན་གྱི་མཐའ་ལ་མཐར་ཐུག་པ་ཕ་ལ་ཕར་མི་འཛིན་ཞིང་། མ་ལ་མར་མི་འཛིན་པ། བྲམ་ཟེ་དང་དགེ་སྦྱོང་ལ་ཁྱད་པར་དུ་མི་བྱེད་ཅིང་། མི་དགེ་བའི་ལས་ལམ་བཅུ་ཡོངས་སུ་བདོ་ཞིང་མཚམས་མེད་པའི་ལས་ལ་ཞུགས་པའི་དུས་སུ་དགའ་ལྡན་གྱི་གནས་ཆོས་ཀྱི་རྒྱལ་མཚན་མཐོན་པོ་ནས་སྐྱེ་བ་སྤྲུལ་པའི་སྐུ་དམ་པ་ཏོག་དཀར་པོ་ཉིད་གཟིགས་པ་ལྔས་ཛམྦུ་གླིང་དུ་སྐྱེ་བའི་སྲིད་པ་ཡོངས་སུ་བཟུང་བའི་ཚུལ་སྣང་བར་བྱས་ཏེ་མཆོག་གི་སྤྲུལ་པའི་སྐུའི་མཛད་པ་འཇིག་རྟེན་དང་འཇིག་རྟེན་ལས་འདས་པ་དང་བླ་ན་མེད་པ་སྟེ་ཚུལ་བཅུ་གཉིས་ལེགས་པར་བརྟན་པ་ཆོས་ཀྱི་འཁོར་ལོ་རིམ་པ་གསུམ་བདེན་པ་བཞི་དང་། མཚན་མ་མེད་པ་དང་། ཕྱིར་མི་ལྡོག་པ་སྙིང་པོའི་གཏམ་སྟེ། དང་པོ་ནི་དྲང་བ་དང་། བར་བ་ནི་ངེས་པའི་དོན་རྩ་བ་ཉིད་དང་། ཕྱི་མ་ནི་ངེས་དོན་གསལ་བ་ལེགས་པར་རྣམ་པར་དབྱེ་བ་བཤད་སྦྱར་ཚུལ་གྱི་སྟེ་གདུལ་བྱ་རྣམས་རང་རང་དབང་སྐལ་དང་ལྡན་དང་མཐུན་པར་དཀྲི་བར་མཛད་ཅིང་། རིག་པ་འཛིན་པའི་སྡེ་སྣོད་རྣམས་ནི་ཐུན་མོང་གི་གནས་ཨོ་རྒྱན་གྱི་ཡུལ་དང་དཔལ་ལྡན་འབྲས་སྤུངས་སོགས་སུ་ཡང་སྣང་བར་མཛད་ཅིང་ཐུན་མོང་མ་ཡིན་པ་རྡོ་རྗེ་བཙུན་མོའི་མཁར་རྟག་ཏུ་གནས་བཞིན་པར་བརྟན་པར་མཛད་པ་དང་། གདུལ་བྱ་འགའ་ཞིག་ལ་དགོངས་ཏེ་ཐེག་པ་གསར་ལ་མ་འོངས་འབྱུང་འགྱུར་དུ་ལུང་བསྟན་པའི་ཚུལ་ཡང་མཛད་ནས་ཐུན་མོང་གི་ངོར་བྱང་ཕྱོགས་གྱད་ཀྱི་ཡུལ་རྩྭ་ཅན་དུ་དགུང་ལོ་བརྒྱད་ཅུ་པར་མྱ་ངན་ལས་འདས་པའི་ཚུལ་སྤྲུལ་པའི་སྐུ་ལོངས་སྐུ་བཞི་མཐུན་པའི་བཀོད་པས། ཞི་བ་ཆོས་ཀྱི་སྐུར་གཤེགས་པའི་ཚུལ་བསྟན་ཅིང་གང་གི་བསྟན་པ་རིན་ཆེན་སྒྲོན་མེ་ཡུན་རིང་དུ་གནས་པའི་ཆེད་དུ་ཐུན་མོང་གི་སྡེ་སྣོད་རྣམས་འཕགས་པའི་གནས་བརྟན་བཅུ་དྲུག་དང་། རྒྱལ་ཚབ་འོད་སྲུང་སོགས་ལ་གཏད་ཅིང་། ཐེག་ཆེན་རྣམས་རིགས་གསུམ་མགོན་པོ་སོགས་ཉེ་སྲས་རྣམས་དང་། རྒྱལ་ཚབ་བྱམས་པ་ལ་ཉེ་བར་གཏད་ཅིང་སྨོན་ལམ་གྱི་མཐུས་བསྟན་པ་ལྔ་བརྒྱ་ཕྲག་བཅུའམ་བཅུ་གཅིག་ཏུ་གནས་པར་བྱིན་གྱིས་རླབས་ཤིང་། དེ་ཡང་བྱང་ནས་བྱང་གི་ཕྱོགས་སུ་འཕེལ་ཞིང་ལྷོ་ཕྱོགས་སུ་བསྡུད་པར་གསུང་བ་ལྟར་རྡོ་རྗེ་གདན་གྱི་བྱང་ཕྱོགས་ཁ་བས་ཡོངས་སུ་བརྒྱན་པའི་རི་བོའི་ཁྲོད་བྷོ་ཊ་ཞེས་བོད་དུ་སྒྲོགས་པ་འཕགས་པ་སྤྱན་རས་གཟིགས་དབང་ཕྱུག་གིས་བདག་གིར་བཟུང་བའི་ཡུལ་ཁམས་ས་ཡི་དཀྱིལ་འཁོར་རྒྱ་ཁྱོན་ནི་མི་ཁྱིམ་བྱེ་བའི་གྲངས་སུ་ཉེ་བས་བཅིང་བའི་ཡུལ་གྱི་ཚད་ཅན་དུ་མཁས་པའི་དབང་པོ་ཁ་ཅིག་གིས་བཞེད་བཞིན་སྔོན་དུས་སྐྱེ་བོའི་ཚོགས་ཀྱི་ཡོངས་སུ་ཁེངས་ཤིང་འབྱོར་བར་ངེས་ཀྱང་། དེང་དུས་སངས་རྒྱས་ཀྱི་བསྟན་པ། རིན་ཆེན་དང་མཇལ་བའི་མི་ལུས་དམ་པ་རྙེད་པར་དཀའ་བའི་མཚན་ཉིད་ཀྱི་མི་ཁྱིམ་གྱི་གྲངས་ནི་དེ་ལྟར་སྨོས་ཀྱང་ཅི་འཚལ་ཏེ་སྐྱེ་བོའི་གྲངས་ཡོངས་སུ་བསྡོམས་ཀྱང་དེའི་རྗེས་སུ་འགྲོ་བ་དཀའ་བར་སྣང་ལ། གང་ལྟར་ཡུལ་ལྗོངས་འདིར་འཕགས་པ་རིགས་གསུམ་མགོན་པོའི་སྤྲུལ་པའི་སྐུ་རྒྱུན་མི་ཆད་པར་བྱོན་ནས་སེམས་ཅན་ལ་ཕན་ཅིང་བདེ་བའི་སླད་དུ་སངས་རྒྱས་ཀྱི་བསྟན་པ་རིན་པོ་ཆེ་འཕེལ་ཞིང་རྒྱས་པར་མཛད་པ་སྟེ། དེ་ཡང་ཐོག་མར་ཡུལ་ལ་དབང་བ་རྒྱལ་པོའི་ཚུལ་གྱི་འདུལ་བར་དགོངས་ཏེ་བྱང་ཆུབ་སེམས་དཔའ་ཁྱིམ་ན་གནས་པའི་ཚུལ་ཅན་ཆོས་ཀྱི་རྒྱལ་པོ་མེས་དབོན་ཡབ་སྲས་རྣམས་རིམ་པར་བྱོན་ཞིང་དེ་རྣམས་ཀྱི་དུས་སུ་རྫོགས་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་འགྲོ་བའི་ཡུལ་དུས་དབང་པོ་དང་མཚམས་པར་སློབ་དཔོན་ཆེན་པོ་དང་མཁན་པོ་ཆེན་པོ་སོགས་འཇིག་རྟེན་མིག་མཁས་པོ་ཆེན་པོ་རྣམས་སུ་སྣང་བར་མཛད་ནས་དམ་པའི་ཆོས་ཀྱི་དབུ་བརྙེས་པ་དང་སྲོལ་གཏོད་པ་དང་དར་རྒྱས་སུ་སྤེལ་བར་བྱས་ཤིང་། དེ་ནས་ཡང་རིམ་པས་ད་ལྟ་ལ་ཐུག་གི་བར་མོས་པ་ཐ་དད་ཀྱི་ངོ་བཞིན་པཎྜི་ཏ་དང་། ལོ་ཙཱ་བ་དང་། རབ་ཏུ་བྱུང་བ་དང་། དགེ་བསྙེན་གྱི་ཚུལ་བགྲང་གིས་མི་ཆོད་པ་བྱོན་ཏེ། དམ་པའི་ཆོས་ཚུལ་གྱི་སྒོ་ཕར་བརྒྱ་ཕྲག་དུ་མ་དབྱེ་བར་མཛད་ཅིང་། གདུལ་བྱ་རྣམས་ཀྱི་འཁོར་བའི་སྒོ་བཅད། ཐར་པའི་ལམ་དབྱེ་བྱང་ཆུབ་ཀྱི་འབྲས་བུའི་གསོས་རྨད་དུ་བྱུང་བ་ཡི། སྒྱུ་འཕྲུལ་མདོ་དང་སེམས་ཀློང་མན་ངག་གི་སྡེ་འཛིན་པ་དང་། ལམ་འབྲུ་དང་བཅས་ཤིང་། ཆོས་དྲུག་གི་གདམས་པ་རིགས་གཉིས་དང་། དུས་འཁོར་བདེ་དགྱེས་གསང་འདུས་ཀྱི་མཚོན་སྔགས་བླ་ན་མེད་པའི་ཆོས་ཚུལ་འབྱམས་ཀླས་པ་དང་། གཞན་ཡང་གཉུག་མའི་དོན་ཟབ་མོ་གཙོ་བོར་སྟོན་པ་ཞི་བྱེད་སྤྱོད་ཡུལ་ཕྱག་ཆེན་བསམ་གྱིས་མི་ཁྱབ་པ་དང་། དབུ་མའི་ལྟ་ཁྲིད་སོགས་རྣམ་གྲངས་བརྗོད་པར་དཀའ་བ་དང་། ཐེག་པ་ཆེན་པོ་ལམ་གྱི་གཞུང་ཤིང་མེད་དུ་མི་རུང་བ་ཤིང་རྟ་ཆེན་པོའི་སྲོལ་བསྟན་པ་སྤྱིའི་རིམ་པའམ་བྱང་ཆུབ་ལམ་རིམ་དུ་གྲགས་པ་ཉིད་དང་། བྱང་ཆུབ་བློ་སྦྱོང་གི་གདམས་པ་ཚོགས་དུ་མ་འབྱམས་ཀླས་པ་སོགས་མདོར་ན་བསླབ་པ་གསུམ་ལས་ཚུལ་ཁྲིམས་ཀྱི་སོ་ཐར་བྱང་སེམས་རིག་འཛིན་གྱི་སྡོམ་པ་གསུམ་གྱི་རྒྱུན་དང་ཤེས་རབ་དང་ཏིང་ངེ་འཛིན་གྱི་བསླབ་པའི་མན་ངག་རྣམ་གྲངས་ཚད་བཟུང་ལས་འདས་པ་ཀུན་ཀྱང་འཁོར་བའི་རྒྱ་མཚོ་ལས་བརྒལ་བར་ཐར་པ་མཆོག་གི་ལམ་དུ་འཇུག་པ་བླ་ན་མེད་པའི་གོ་འཕང་བསྒྲོད་པ། དུས་གསུམ་གཤེགས་པའི་ཤུལ་དུ་སྙེག་པ་དེ་ལྟ་བུའི་ཆོས་ཚུལ་མཆོག་ཏུ་གྱུར་པ་དུ་མས་འཛམ་གླིང་སྤྱི་ལས་ཁྱད་པར་དུ་བྱས་པས་གངས་རིའི་ཁྲོད་འདི་ནི་ཡུལ་གྱི་ཆ་ནས་དམན་པ་དང་ཉུང་ངུ་ཉིད་དུ་ཟད་ཀྱང་། མངོན་མཐོ་ངེས་ལེགས་ཀྱི་སྒོ་ནས་གངས་ཅན་བྷོ་ཊ་ཉིད་བྱང་ཕྱོགས་ཤམྦྷ་ལ་ལས་ལྷག་པར་བདོ་བུའི་ངང་ཚུལ་ཅན་སྟེ། ད་ལྟ་འཛམ་གླིང་འདི་ན་གདུགས་ཀྱི་ཏོག་གམ་རྒྱལ་མཚན་གྱི་རྩེ་མོ་བཞིན་མངོན་པར་མཛེས་ཤིང་འཕགས་པར་གྱུར་པའི་ཡུལ་བོད་དང་བོད་ཆེན་པོ་གཉིས་སུ་བཞག་པའི་བོད་ཆེན་པོ་ཞེས་ཉི་འོག་གི་ཡུལ་མདོ་ཁམས་སྒང་ལྔའམ་སྒང་དྲུག་ཏུ་གྲགས་པ་དང་། བོད་ཀྱི་རྒྱལ་ཁམས་ཉིད་ལ་གླིང་དགུ་བཅད་པའི་དབུས་འགྱུར་གྱི་མཚལ་དུ་བཞི་དང་། སྟོད་དུ་རྣམ་པར་གྱེས་པའི་ཡུལ་མངའ་རི་སྐོར་གསུམ་སྟེ། དེ་ན་སྐྱེ་རྒུ་ཐམས་ཅད་ཀྱི་མ་འདྲིས་པའི་མཛའ་བཤེས་རྒྱལ་བསྟན་ཡོངས་རྫོགས་ཀྱི་མངའ་བདག་ལྷར་བཅས་འགྲོ་བ་ཡོངས་ཀྱི་མཆོད་འོས་ལག་ན་པདྨོ་འཛིན་པ་གང་ངུར་སྨྲིག་གར་གྱིས་སྒེག་པ་ངེས་ལེགས་ཀྱི་དེད་དཔོན་ཆེན་པོ་མངོན་མཐོ་གྲུ་འཛིན་གྱི་སྤོར་སེང་གེའི་ཁྲིར་འཇིག་རྟེན་མཛེས་པའི་རྒྱན་གྱུར་བདུན་པས་ཡུལ་དབུས་སུ་བསྟན་པ་བསྐྱང་བའི་ལོ་ཀན་ལྡན་ལྕགས་བྱི་ནས་སོ་གསུམ་འདས་ཤིང་ད་ལྟ་དཔལ་གདོང་ཆུ་བྱ་སྟེ་སོ་བཞིའི་སྟེང་དུ་སླེབ་པ་དང་། འཛམ་གླིང་ཕྱོགས་ཀྱི་རྒྱལ་པོ་ཆེན་པོ་རྣམས་ལས། ཏ་སིག་རྒྱལ་པོས་ཧ་ཧ་བཱཀྵཿ ར་འབོད་པ་ཤར་ཕྱོགས་ཀྱི་རྒྱ་མཚོ་ཆེན་པོའི་བར་ས་ཡི་དཀྱིལ་འཁོར་ཆེན་པོ་ལ་དབང་མཛད་ཆོས་ཀྱི་རྒྱལ་པོ་འཇམ་དབྱངས་གོང་མ་ཤུབ་ཙི་ན་གྱི་གདུང་ལས་གནམ་སྐོས་ལྷས་སྐྱོང་གི་རྒྱལ་ཐབས་བསྐྱང་ནས་ལོ་བཅོ་བརྒྱད་པ། ལྷོ་ཕྱོགས་འཕགས་པའི་ཡུལ་རྒྱ་བལ་གྱི་མཚམས་སིནྡྷུ་ལ་ནས་རྒྱ་མཚོ་ཆེན་པོའི་བར་ས་ཡི་དཀྱིལ་འཁོར་མཐའ་དག་ལ་དབང་སྤྱོད་པ་ནུབ་ཕྱོགས་ཏ་སིག་ཅེས་དང་། ད་ལྟར་ཟུར་ཆག་སྐད་སྟག་གཟིག་ཅེས་བརྗོད་པ་ཀླ་ཀློའི་རྒྱལ་པོ་བཱ་ཀྵཱཿ དྷེ་བྷཪྴའི་རིགས་ལས་བཱཀྵཱ་ཨ་མ་རཱ་ཞེས་པས་ཌི་ལིར་སྲིད་བསྐྱང་ནས་ལོ་བདུན་གྱི་སྟེང་དུ་གནས་པ། བྱང་ཕྱོགས་བསིལ་ལྗོངས་དང་ཉེ་བའི་ཡུལ་ས་ཋ་ན་ཞེས་སྔར་ཌི་ལིའི་འོག་ཏུ་འདུས་ཀྱང་ད་ལྟ་རང་དབང་དུ་ཤས་ཆེ་བ་ཡུལ་ན་དིཪྵ་ནས་བྱུང་བའི་རིགས། རཱ་ཛ་མ་ལ་ར་ཁང་གི་སྲིད་སྐྱོང་ནས་ལོ་བརྒྱད་སོང་བའི་སྐབས། ཆུ་ཀླུང་ཆེན་པོའི་ནཱི་ལའི་ངོགས་རི་བོ་གངས་ཅན་ཆེན་པོའི་ལྷོ་སྨད་ཀྱི་ཆར་འཛམ་གླིང་སུམ་ཆུའི་ཡུལ་དུ་མངོན་རློམ་གྱི་ང་རྒྱལ་ལྡན་པ་བསྟན་བཅོས་རྣམས་སུ་རཀྨ་ཞེས་དང་། ད་ལྟ་ཟུར་ཆག་གི་རུམ་དུ་འབོད་པའི་སྟོབས་ཀྱི་རྒྱལ་པོ་ཧ་སི་རཏྟི་ཨ་ཝ་བྷ་ཀ་ར་སིདྡྷིའི་རྒྱུད་ཧ་སི་རཏྟི་ཨ་ལས་ཁྲིམས་བསྐྱང་བའི་དུས་ཏེ་སྐར་རྩིས་པ་སྤྱིའི་རབ་བྱུང་བཅུ་གཉིས་འདས་ཤིང་བཅུ་གསུམ་པ་ཤར་ནས་ལོ་ལྔ་སོང་བ། དེའི་དུས་རྒྱ་དཀར་དང་རྒྱ་ནག་གི་མངའ་རིས་ཀྱི་མཚམས་སྟོད་ཧོར་དང་སོག་པོའི་རྒྱུ་སྲང་བོད་ཡུལ་གྱི་སྟོད་མངའ་རི་སྐོར་གསུམ་གྱི་ས་ཡི་ཐིག་ལེ་རི་ཡི་རྒྱལ་པོ་ཀེ་ཏ་རའི་ནུབ་ཕྱོགས་ཀླུང་སེང་གེ་ཁ་འབབ་དུ་གྲགས་པ་ནཱི་ལའི་ཆུ་མགོ་མར་ཡུལ་གཡའ་ཡིས་སྐོར་བའི་ལྗོངས་ཀྱི་བདག་པོ་རྒྱལ་པོ་མང་པོས་བསྐུར་བའི་རིགས་དྲི་མ་མེད་པ་ཤཱཀྱ་ལིཙྪ་བའི་རྒྱུད་བོད་ཀྱི་རྗེ་བོ་ལྷ་བཙད་པོ་མེས་དབོན་གྱི་གདུང་ལས་སྐྱིད་ལྡེ་ཉི་མ་མགོན་གྱི་སྲས། མགོན་གསུམ་གྱི་གཅེན་དཔལ་ལྡེ་རིག་པ་མགོན་ནས་མངའ་ཐང་ལང་ཚོ་ད་ལྟའི་བར་དུ་ཉམས་པ་མེད་པ་སྤྱོད་པའི་རྒྱུན་མར་ཡུལ་ལ་དྭགས་རྒྱལ་པོ་ཞེས་ཡུན་ནས་ཡུན་དུ་དགེ་བའི་དཔལ་དང་ལྡན་པ་དེ་ལྟ་ལ། ཕྱི་མའི་དུས་འདིར་ཆུ་བོ་སི་ཏའི་ལྷོ་ཕྱོགས་ཀྱི་ཁྱོན་འདིར་རྒྱལ་པོ་ཆེན་པོ་དང་། ཁམས་ཀྱི་རྒྱལ་པོ་དང་། རྒྱལ་ཕྲན་དང་རྒྱལ་རིགས་ཀྱི་ཚོགས་མཐའ་དག་ཐུབ་བསྟན་ལྔ་བརྒྱའི་མཚམས་དུས་ཀྱི་འགྱུར་བས་གཅིག་ལ་གཅིག་གིས་རྒོལ་ཞིང་མཛའ་བཤེས་ཉེ་དུ་རྣམས་ཀྱང་བརྩེ་བ་ཆུང་ཞིང་ཕན་པའི་མཚམས་སྦྱོར་དཀོན་ཞིང་གནོད་པའི་སྦྱོར་བ་ལྷུར་ལེན་པའི་སྐྱེ་བོ་མང་བ་ཡི་མར་ཡུལ་བདག་པོ་ཁུ་དབོན་ཡང་མི་མཛའ་བའི་ངང་ཚུལ་བརྟས་པས་མཐའི་དམག་དཔུང་ཆེན་པོ་དྲག་ཏུ་གཡོ་བའི་རྒྱུ་རྐྱེན་ལ་ཞུགས་ཏེ་སྐྱེ་རྒུ་མཐའ་ཡས་པ་ལ་བཟོད་པར་དཀའ་བའི་དུཿཁ་སྟེར་བར་ཆས་པ་ལ། གངས་ཅན་མགོན་པོ་ལག་ན་པདྨོ་སྡོམ་བརྩོན་རྒྱལ་པོའི་ཚུལ་དུ་སྤྲུལ་གྱུར་གང་གི་རིས་སུ་མ་ཆད་པའི་སྐྱེ་རྒུ་མཐའ་དག་ལ་བྱམས་པ་དང་བརྩེ་བའི་ཐུགས་ཀྱི་ཡོངས་སུ་བྱས་པས་འགྲོ་བ་སྤྱི་དང་བྱེ་བྲག་ཏུ་མར་ཡུལ་ཕན་བདེའི་རྩ་ལག་ཏུ་དགོངས་ནས་གངས་ཅན་ཁྲིམས་ཀྱི་བྱེད་པོ་མདུན་ན་འདོན་ཆེན་པོ་རྣམས་བརྒྱུད་དེ་ཉི་འོག་བོད་ཆེན་གྱི་ཕྱོགས་སུ་རང་དབང་གི་ཆོས་སྨྲ་བའི་གོ་སར་སྐྱེས་གྱུར་ཕྱོགས་མེད་རིས་མེད་ཀྱི་རྣལ་འབྱོར་རྒྱལ་ཁམས་པ་བསྟེན་པ་བཞི་ལྡན་བྷོ་ཊ་ཛོ་ཀི་ཧ་རི་ནཱ་ཐ་ལ་རྒྱལ་བའི་ཕྲིན་ལས་ཀྱི་བྱེད་པོར་མངའ་རི་སྟོད་ཀསྨི་ར་ཡི་ཡུལ་མཚམས་སུ་ཁྱོད་ཉིད་བགྲོད་པས་འོས་ཞེས་བཀའ་ལུང་ཕེབས་པར་གྱུར་ཡང་། རང་ཉིད་སྤྱིར་ནམ་འཆི་ཆ་མེད་ཀྱི་བློ་ལ་ལྷག་ཏུ་བསྒྲང་བྱས་ཡོངས་སུ་བསོད་ནམས་ཚོགས་ཆེན་གྱི་ལས་སུ་བལ་ཡུལ་རང་བྱུང་མཆོད་རྟེན་ཆེན་པོའི་ཞིག་གསོ་ཞིག་གྲུབ་ན་སྙམ་པ་ཙམ་ལས་གཞན་ཕྱོགས་བགྲོད་ཀྱི་སྤྲོས་པ་མང་པོ་མི་ལྡན་པ་དང་། སྟོད་ཕྱོགས་སུ་བགྲོད་པར་ལྟས་ཀྱང་ཅུང་ཟད་འཚུབ་ཅིང་། ལྷག་ཏུ་བདག་ལྟ་བློ་གྲོས་ཀྱི་ལང་ཚོ་མ་བརྟས་པས་འཇིག་རྟེན་མཐུན་འཇུག་གི་སྤྱོད་པར་མི་མཁས་པ་ཀུན་གྱི་མངོན་པར་གསལ་བར་གྱུར་པ་དེ་བཞིན་པས་རྒྱལ་པོ་དྲེགས་ལྡན་དག་གི་ལེགས་བཟླུམ་རྔོ་ཐོགས་པར་དཀའ་བ་ཡི་འགྲོ་བར་མི་སྤྲོ་ཚུལ་གསོལ་ཡང་སྐྱེ་རྒུ་དུ་མར་ཕན་བདེའི་བཙས་སུ་བཀའ་ནན་ཆེན་པོས་བཅིང་བ་ལ་རྟེན་སྒོ་གསུམ་གྱི་ངལ་བ་མཐའ་དག་ཁྱད་དུ་བསད་དེ་ཆུ་ཕོ་སྤྲེལ་གྱི་ལོ་ཧོར་ཟླ་བདུན་པར་མརའ་རི་སྟོད་སྒར་ཐོག་ཏུ་འབྱོར་ཞིང་། ལ་དྭགས་རྒྱལ་པོ་དང་མུལ་ལྦེ་རྒྱལ་པོ་གཉིས་ཀ་ཝཾ་ལེར་འཕྲལ་འབྱོར་དགོས་ཚུལ་གྱི་སྔ་འགྲོས་སོ་སོའི་ཕེབས་བསུ་དེར་བྱུང་བའི་ཁྲོད་ནས་བརྫངས་ཤིང་རང་ཉིད་ཟླ་བ་དེའི་དམར་ཕྱོགས་ཚེས་བཅུར་བོད་ཡུལ་རྗེ་བོ་དང་ལ་དྭགས་བདག་པོའི་ཡུལ་མཚམས་གུ་རུའི་གནས་ཆེན་བདེ་མཆོག་ལྷ་རི་དཀར་པོ་དང་། ཧོར་ཟླ་བརྒྱད་པའི་ཚེས་༡ལ་ཁ་སྦྱོར་དུ་སོན། ལ་དྭགས་ནས་རྒྱལ་སྲས་དང་རྒྱལ་མོ་ཡང་ཝཾ་ལེར་རིགས་ཁྱད་ཀྱི་ཕེབས་གྲུབ་འདུག་ཅིང་། མུལ་ལྦེ་རྒྱལ་པོ་སྔར་བླ་མ་དཀོན་མཆོག་ལ་དད་པ་ཆེ་བར་གྲགས་གཤིས་ཕྲལ་འབྱོར་ཡོང་བར་བྱས་ཀྱང་ཟླ་བ་དེ་ཀའི་ཚེས་༡༧ལ་མུལ་ལྦེ་རྒྱལ་པོའི་བཀའ་བློན་བསྟན་འཛིན་སོན་པའི་རག་མར་ལ་དྭགས་རྒྱལ་པོའི་ཕོ་ཉ་ཁ་ཆེ་ནས་ཡོང་བར་ཁ་ཆེ་ནས་དཔུང་ཆེ་བ་གཉིས་ཡོང་རྒྱུའི་མི་དང་ཡི་གེ་ལག་ཟིན་བྱུང་གཤིས། དོགས་ཟིན་གྱི་ཕྲལ་ཡོང་མ་བདེ་བས་ཟླ་མཚམས་ཙམ་ལ་ཡོང་རྩིས་ཡིན་ཚུལ་བྱུང་བ་དེ་ལྟར་གངས་ཅན་རྗེ་བོ་གཞུང་ས་མཆོག་ཏུ་བར་འཆིང་བགྱིད་པར་ངེད་དགོས་ཚུལ་གསོལ་བ་བཞིན་ཁ་ཆེའི་དཔུང་གི་སྣ་འདྲེན་བྱེད་པ་མི་འོས་ཤིང་། ཡིད་ཀྱང་འཁྲུགས་པས་ཕན་ཚུན་ལ་འཕྲོས་ཀྱང་གསལ་བར་བགྱིས་པར་ལ་དྭགས་རྒྱལ་བློན་ནས་ཁྱོད་ལ་དྭགས་སུ་ཡོངས་བའི་ངེས་པ་མ་རྙེད་གོང་དུ་ཁ་ཆེར་ཨ་ཁུའི་སྣ་ཚོགས་ཞུས་པར་བརྟེན་དེ་དང་ཆ་མཐུན་གྱི་ཉེར་ལེན་བཏང་བ་ལས་འདིར་ཕེབས་རྒྱུར་ཐོས་ནས་བཏང་བ་མིན་ཚུལ་སོགས་དང་།མུལ་ལྦེ་རྒྱལ་པོའི་བློན་པོས་ཀྱང་ཁྱོད་འདིར་ཕེབས་རྒྱུར་ཐོས་པ་ནས་རྒྱལ་པོ་ནས་ཀྱང་དམག་འཁྲུག་གི་བསམ་སྦྱོར་བཤོལ་བ་ཡིན་ཚུལ་ཟེར་བས་དེ་ལ་ངོས་ཀྱི་ལ་དྭགས་དང་མུལ་ལྦེ་རྒྱལ་པོ་ཁུ་དབོན་གཉིས་ཐད་ནས་ཁ་ཆེར་ན་བབ་དང་ཝ་གིར་ལ་རྒྱལ་པོ་ཁུ་དབོན་སྐུ་ངོ་ནང་ལེགས་སྤེལ་གྲུབ་གཤིས་ཁ་ཆེ་ནས་དཔུང་དང་མི་སྣ་སུ་ཡང་ཡོང་མི་དགོས་ཚུལ་ཡི་གེ་ཕྲལ་བཏང་དགོས་ཚུལ་སྨྲས་བཞིན་ལ་དྭགས་པས་ཟེ་རེག་མིག་སྟོན་དང་མུལ་ལྦེ་ནས་ཀྱང་ཟེར་རེག་དེ་མཐུན་སྟོན་རྒྱུར་དགོས་ཚུལ་བཅས་ཕོ་ཉ་ཚེས་ཉེར་བདུན་ལ་བརྫངས་ཀྱང་མུལ་ལྦེ་རྒྱལ་པོ་རང་ནས་འདི་རིགས་ལ་དྭགས་པའི་རྫུན་རྩོམ་ལ་གསན་པ་ཡིན་འདུག་ཞེས་ཕོ་ཉ་ཟློག་འདུག ཁ་ཆེའི་དཔུང་འཇུག་འདི་ཚབ་ཤིན་ཏུ་ཆེ་གཤིས་དེ་རྟིང་ཡང་ལན་གཉིས་བསྐྱར་ནན་བྱས་ཀྱང་སྔ་ཕྱི་གསུམ་ཀ་མལ་ལྦེ་རྒྱལ་པོ་རང་གི་ཐུགས་རྟོག་སྟབས་བཏང་བར་མ་མཛད་ཅིང་། ཁོང་རང་ནས་ངེད་ཀྱི་ངག་བཀོད་དང་མཐུན་པའི་ཡི་གེ་ཞིག་བསྐུར་ཡོད་ཟེར་འདྲ་བཤུས་ནི་སྟོན་མ་བྱུང་། དེ་སྐབས་ཁ་ཆེའི་ཡི་གེ་དེ་ཕྱིས་ཁ་ཆེའི་ཡིག་མཁན་རྣམས་ཀྱི་བོད་སྐད་དུ་བསྒྱུར་ཚིག་འོག་ཏུ་འཆད་པར་འགྱུར་ལྟར་གྱི་དམག་ཉེན་ཤིན་ཏུ་ཆེ་བ་ཡོད་ངེས་ཡིན་འདུག་པ་དེ་ལྟར་ངེད་ནས་ལྷག་བསམ་དག་པས་ལ་དྭགས་པའི་ཕོ་ཉ་བརྫང་བ་ལན་དུ་མར་བཟློག་པར་བྱེད་པ་ནི་སྤྱིར་ཁ་བ་ཅན་དགོས་ལ་དྭགས་ལྗོངས། ཡང་དགོས་མུལ་ལྦེ་རང་མ་རུང་བར་འགྱུར་བའི་གོད་ཆག་ཡིན་འདུག་ཀྱང་འདི་ལོ་དཀོན་མཆོག་གི་ཐུགས་རྗེས་ཁྱབ་ནས་རྐྱེན་མ་བྱུང་བ་དེར་གདའ། རྒྱལ་པོ་ཕུན་སུམ་ཚོགས་རྣམ་རྒྱལ་ནི་རྒྱུ་རྐྱེན་མང་པོ་ཞིག་གིས་ངེད་ལ་དྭགས་སུ་སླེབ་སྐབས་ཟུར་བཞུགས་མཛད་ནས་ཟླ་བ་ཁ་ཤས་སོང་འདུག་པ། དེ་ཡང་ལེགས་སྤེལ་གང་སྐབས་བབ་བྱུང་ན་བྱེད་རྒྱུ་གང་སྤྱིར་ཐོག་མར་ཁུ་དབོན་ལེགས་སྤེལ་བྱེད་སྐབས་སྐུ་ངོ་ཚང་མ་འཛོམ་པ་ཁོ་ན་ལེགས། མུལ་ལྦེ་རྒྱལ་པོ་མ་འབྱོར་བ་ཡུན་རིང་སྐབས་གསུང་པ། དེ་ཡང་རྒྱལ་པོ་ཆོས་ལ་མི་མོས་པ་མིན། ངེད་ལ་དད་པ་མེད་པ་ཡང་མིན། བླང་དོར་གྱི་གནས་གཏན་ནས་མི་ཤེས་པ་ཡང་མིན་འདུག་རུང་རྒྱ་འདྲེ་འགོང་པོ་དུ་རུ་ཀའི་འདྲེ་གསར་བྱུང་ནག་པོའི་ཕྱོགས་ཅན་མང་པོ་མཐའ་དམག་གི་སྣ་འདྲེན་སོགས་རྒྱལ་ཁམས་དུ་མི་ངན་པ་སྣ་ཚོགས་བསྐྱེད་པར་འདོད་པས་ཡིད་བསྒྱུར་བ་ཉིད་དུ་ཤེས་ལ། དེ་དང་དེའི་ཆོ་འཕྲུལ་མངོན་གྱུར་དང་ལྐོག་འགྱུར་ཆེས་མང་བ་སྔ་ཕྱི་རིམ་ཅན་དུ་བྱུང་ཞིང་། དེ་རྣམས་ཀྱི་ནུས་པས་མི་རྣམས་ཀྱང་རྣམ་རྟོག་སྣ་ཚོགས་པའི་ལབ་ཆོལ་སེལ་འཇུག་ཕུང་ཁྲོལ་གྱི་ཚིག་མང་པོས་དུས་འདའ་བ་ཞིག་འདུག་ཀྱང་། དུས་འདིར་གཞུང་གི་སྐུ་རིམ་གོང་སའི་ཐུགས་རྗེ་ལ་རྟེན། འགོར་ཆེའི་མཐར་མར་ཡུལ་བདག་པོ་ཡས་མས་ཀུན་ཝཾ་ལེར་ལྷན་ཅིག་ཏུ་འཛོམས་པར་གྱུར་པས་ལེགས་ཚོགས་ཀྱི་རྒྱུར་གྱུར། རང་ཡང་མར་ཡུལ་དུ་སླེབ་ནས་རྩ་ཆུ་ཡི་སྙོམས་པས་གྲོ་ཚལ་བ་དང་། སྐབས་སུ་རྩ་དཀར་དང་རླུང་ནད་ཀྱིས་ཀྱང་ཚེར་བ་སོགས་ལུས་ཀྱང་མི་བདེ་ཞིང་། ལྷག་ཏུ་རང་ཉིད་ནམ་འཆི་ཆ་མེད་དུ་ངེས་ན་བལ་ཡུལ་རང་བྱུང་མཆོད་རྟེན་ཆེན་པོའི་ཞིག་གསོ་ལ་རིང་བས་ཐོག་མར་ལ་དྭགས་ཕྱོགས་སུ་ཟླ་བ་གསུམ་ལས་མི་སྡོད་པའི་རྩིས་བྱས་ཤིང་། ཅིས་ཀྱང་འདི་ལོ་དགུན་བལ་པོར་བགྲོད་མ་ཐུབ་ཚེ་ཞང་ཞུང་དང་མར་ཡུལ་དག་གི་ཡུལ་མཐའ་ལྷོ་ཕྱོགས་ཀྱི་འཆར་གདོད་ནས་གྲུབ་པའི་གནས་ཆེན་རྒྱ་བོད་དུ་གྲུབ་མཐའ་འཛིན་པ་ཀུན་ལ་རླུང་ལྟར་དུ་གྲགས་པ་ཡུལ་ཉེར་བཞི་ལས་མཁའ་སྤྱོད་ཀྱི་གནས་བརྒྱད་ཀྱི་ཡ་གྱལ་དུ་གྱུར་པ་དང་། སྒྱུ་འཕྲུལ་སྲས་ཀྱི་བསྟན་ལ་སྟོན་པ་གཉིས་པ་ལྟ་བུ་འཕགས་མཆོག་ཀླུ་སྒྲུབ་ཞབས་ཀྱི་གསེར་གྱི་རི་བོར་བྱིན་གྱིས་རླབས་པར་དགོངས་པ་གཎྜ་རི་དང་། ལན་ཚྭའི་འབྱུང་ཁུངས་སུ་སྣང་བ་མཎྜོ་རི་སོགས་དཔའ་བོ་དང་རྣལ་འབྱོར་མ་ངེས་པར་འདུ་བའི་གནས་ཆེན་དེ་རྣམས་སུ་ཚོགས་གཏོར་འདུ་མཆོད་སོགས་འགྲུབ་ན་བསྟན་འགྲོ་སྤྱི་དང་བྱེ་བྲག་ལ་ཕན་ཆེ་བའི་ལྟས་ངེས་པ་དང་། རང་གི་ཚོགས་གསུམ་འཕེལ་བ་ཡང་གཞིར་བཅས་ཀྱི་ས་ཁད་ཀྱང་ཤིན་ཏུ་ཉེ་ཞིང་བསྒྲོད་འདོད་ཐུན་མོང་མ་ཡིན་པ་ཡོད་ན་ཡང་། རྒྱལ་པོ་སྤྱིར་མུལ་ལྦེ་ནས་མ་བྱོན་ཞིང་། བྱོན་ནས་ཤེལ་དུ་དོན་གཞན་མེད་པར་ཟླ་བ་ཧྲིལ་པོ་གཉིས་རང་གཞན་དུཿཁ་དྲག་པོ་ལ་འཁོད་པར་མཛད་པས་བདག་གི་དགེ་ལེགས་དེ་རྣམས་བཤོལ་བའི་རྒྱུར་སོང་། འོན་ཀྱང་ད་ལྟ་ཁུ་དབོན་བཟང་སྤེལ་ལེགས་པར་གྲུབ་པའི་འདི་བསྟན་འགྲོ་སྤྱི་དང་བྱེ་བྲག་མང་པོར་ཕན་པ་དང་བདེ་བའི་རྒྱུར་རྒྱལ་བ་དགྱེས་པའི་ཆེད་དུ་དམིགས་ནས་བློ་ཡི་ངལ་བ་སངས་བ་ལས་འོས་ཅི་ཡོད། མང་ཡུལ་རྒྱལ་ལ་གཏམ་ཁུངས་སྐྱེལ་དྲིས་པར། མི་ཚོགས་ནས་དེ་ལྟ་ངེས་པར་ཟེར་བ་ལས་ཁུངས་འདི་ཡིན་སྟོན་རྒྱུ་མེད་ཟེར། ངེས་པར་ཟེར་ན་རྩ་བ་སྟོན་དགོས་དང་། ངེས་མེད་ཡིན་ཚེ་ངེས་པ་དང་མི་འབྲེལ་ཞིང་། སྤྱིར་ཡང་རྒྱལ་རིགས་དྲ་མ་རྣམས་ཀྱི་ཁྱད་པར་གྱི་ཡོན་ཏན་ལྔ་ལས་དཔྱད་བཟོད་དུ་བྱེད་པ་ཉིད་ཀྱང་གཙོ་བོ་ཡིན་ན་ཁུངས་དང་མི་ལྡན་པའི་ཁ་ལ་སླ་ཆོལ་གྱི་རྒྱུག་པ་རྒྱལ་པོ་རང་གི་མཚན་ཉིད་ཅི་ལྟར་འགྱུར་རྒྱལ་པོ་ཉིད་རང་དང་ཤེས་ལྡན་མཐའ་དག་གིས་གཟིགས་ཤིག །ངེད་ལྟ་བུ་ཡང་ལས་ཉོན་མ་སྤང་པས་དགྲ་གཉེན་གྱི་སྣང་བ་དབྱིངས་སུ་དག་པ་ནི་སྨོས་ཅི་འཚལ། ཚུལ་དེ་ཧྲག་བ་ཡང་ཡོད་པས་འཁྲུལ་ཞིག་དང་དངོས་གྲུབ་ཀྱི་དྲི་ཙམ་ཡང་མེད་མོད། འོན་ཀྱང་ཆོས་ལྟར་བཅོས་པའི་སྒྲིབ་ཤིང་ལ་བརྟེན། དད་ལྡན་རང་འདོད་ཆེད་གཉེར་གྱིས་ཤེས་བཞིན་བསླུས་པ་ནི་བྱིས་པ་མོན་ཤེས་ནས་ད་ལྟའི་བར་སྔར་ཡང་མ་བྱས། ད་ཡང་མི་བྱེད་ལ། དེར་ཡང་མ་ཟད་སྐྱེ་བ་ཀུན་ཏུ་ཚུལ་དེར་ནི་འཇུག་པར་མི་འགྱུར་གྲངས། ཁོ་བོ་ཅག་བྱ་བྲལ་ཁོས་མེད་ཁྱེར་ཞན་པ་ཞིག་ཡིན་ཡང་ཡུལ་རྒྱ་དཀར་དབུས་འགྱུར་གྱི་ཆ་ནས་རྒྱ་ནག་གྲག་སྒོའི་བར་རང་འཁོས་ཀྱི་ཆོས་སྨྲ་བ་པོ་དམ་པ་ཆོས་ཀྱི་འཕྲིན་ལས་སྐྱོང་བ་ཞིག་ཡིན། ཞེས་སྨྲས་པར་བདག་དེ་སྐབས་ལྷ་འདྲེས་བསླུས་པ་ཡིན་འདུག་ཞེས་གསང་སྔགས་གཅིག་དང་ཕྱག་རྒྱ་གཅིག་ལ་ཞེ་གདེང་མཛད་ཕྱིར་ཞུ་ཐེས་ཡང་མི་འདུག་ལ། གཞན་གྱི་ཞུ་དབང་དུ་མ་སོང་བ་དགོས་གསུང་བ་ནི་ངོས་རང་ལོ་བཅུ་དྲུག་ནས་ཕལ་གྱི་ངག་རྗེས་སུ་འབྲང་འདོད་མ་བྱུང་ཞིང་། རྒྱལ་བས་གསུང་པའི་བླང་དོར་གནས་གང་ཐུབ་དང་། སྙིགས་མ་ལྔ་བདོ་བའི་མཐར་ཐུག་ཏུ་སྐྱེས་པས་ཉོན་མོངས་པ་དང་། བག་མེད་དབང་གིས་མ་ཐུབ་པ་ཡང་བཏང་སྙོམས་མ་ཡན་པར་འགྱོད་བཤགས་ཅི་ནུས་བྱས། ཉེས་པ་གང་ཡང་ལོག་ལྟ་ཡི་དབང་གིས་བྱས་པ་ནི་ཡེ་ནས་མེད་ངེས་ཡིན། རྩ་བའི་བླ་མའི་བཀས་ངེས་པར་གནང་ན་སྲོག་ཀྱང་འདོར་ནུས་པའི་ཞེ་གདེང་ཡོད་ལ། ཡན་ལག་གི་བླ་མ་རྣམས་ལ་ཡང་དག་སྣང་སྦྱང་ཞིང་བཀའ་སྩལ་འབད་པས་སངས་རྒྱས་ཀྱི་བཀའ་ལ་ཡིད་ཆེས་པ་ཡི་སྒོ་ནས་སྒྲུབ་ཅི་ནུས་བྱས། གཞན་ནི་ཚེ་འདི་སྣང་གི་ཉེ་དུ་གྲྭ་འཁོར་སྦྱིན་བདག་མཛའ་བཤེས་གུས་པ་བྱེད་མཁན་རྣམས་ལ་ཡང་འཕྲལ་ཡུན་བདེ་བའི་བསྔོ་སྨོན་ཉིད་ལ་གང་ཟེར་ལ་ཉན་པ་དེ་སྔར་ཡང་ཡེ་ནས་མ་བྱེད་ན། ད་ལམ་ལ་དྭགས་རྒྱལ་པོའི་གཟི་བརྗིད་མི་བཟོད་ནས་ཞུས་ཚད་ཉན་འགྲོ་དགོངས་པ་ཡིན་སྲིད་ཀྱང་མར་ཡུལ་བདག་པོའི་ལེགས་སྤེལ་བྱེད་ན་རང་གི་མ་སྨད་པའི་བློ་གྲོས་སྟེང་ནས་གཟུ་བོས་དཔྱད་དེ་བྱེད་པ་ལས། སྔར་རྒྱལ་སྲས་སྐུ་མཆེད་ཀྱི་བར་དུ་ཡང་གཞན་མེད་ཅིང་ད་དུང་ཁུ་དབོན་ལེགས་སྤེལ་ལྟ་བུ་ཞིག་བགྱིད་པར་སྲིད་ན་ཡང་ལ་དྭགས་རྒྱལ་པོའི་ཞུས་དབང་དང་མུལ་ལྦེ་རྒྱལ་བློན་ཏེ་ཕྱོགས་གཉིས་ཀའི་ཞུས་དབང་དུ་བདག་ག་ལ་འགྱུར་བས་ཚུལ་དེ་ཐུགས་ལས་ཆུང་ངུར་གནང་ཆོག སམ་ཊ་ཞེས་རྡུལ་བྱང་ལ་བཀོད། མུལ་ལྦེ་རྒྱལ་པོ་སྔར་འགོར་ཆེ་བའི་བཤགས་སྟེན་ཨ་ཆེད་འཕགས་ཡུལ་གྱི་ཀརྴ་པ་ཎའི་ཕུང་པོ་རྣམ་པར་སྤུང་ནས་བསྟན་པར་མཛད་པ། རྒྱལ་པོ་ནས་དེ་ལྟར་གསུང་བ་གནོང་བའི་ལས་གནོང་བར་ངོས་བཟུང་ནས་འགྱོད་བཤགས་བྱེད་པ་ཡང་མཁས་པ་དམ་པ་ཡིན་མོད། འོན་ཀྱང་བློ་འདུས་བྱས་ཡིན་པས་མི་རྟག་རུང་ད་ལྟའི་དུས་སྐབས་འདིར་གཞན་གྱི་རིན་ཐང་མཆོག་ཏུ་རྩི་བའི་དངོས་པོ་འདི་ལྟའི་རིགས་ལ་བདག་རང་གི་བློ་ལ་ཧ་ཅང་གི་ཅེར་ཅེར་པོ་མི་འཆར་ཞིང་སྔོན་བསགས་ལས་འཕྲོ་གུ་རུའི་ཐུགས་རྗེས་ཕྱོགས་མེད་ཡུལ་དུ་ལྟོ་རྒྱབ་ཕྱེད་ཙམ་གྱིས་དད་རྫས་རྟག་པར་དཔྱད་དུ་ཡོད་ན་ལབ་ཆིང་གི་ཞུ་རྟེན་དང་བཤགས་པར་དམིགས་པའི་རྫས་འདི་ལྟ་ནི་སེ་བ་གང་བདག་གིར་མི་བྱ་སྟེ། དེར་མ་ཟད་མར་ཡུལ་ལྗོངས་སུ་སླེབ་ནས་ངེད་ལོ་ཕྱེད་ལྷག་སོང་ཡང་དེ་རིང་ངེད་རང་དཔོན་སློབ་ཚང་མའི་འཚོ་ཆས་ཀྱང་རིན་བཅད་ཏེ་ཉོས་པ་ལས། ལ་དྭགས་རྒྱལ་པོ་ཡོན་སྦྱར་བ་ཅུང་ཟད་ཡང་མ་བླང་བ་ཀུན་གྱི་མཐོང་ཡུལ་དུ་བབ་པ་འདི་ཡིན། དེ་ལྟར་འཚོ་ཆས་ཙམ་ཡང་ཁྱེད་རྒྱལ་པོ་ཡས་མས་ནས་སྔར་དང་ད་དུང་ཡང་མི་བླང་ན་ཕྱོགས་བཞིའི་ལབ་ཆིང་ཆེད་དུ་ཁབ་སྐུད་ཙམ་ཡང་མི་ལེན་པའི་ཞེ་དམ་བཅས་པ་ཡིན་པས་རྒྱལ་པོའི་མཐོལ་བཤགས་ནི་བླང་ལ། དངོས་པོ་ནི་མི་འཚལ། ཞེས་དུས་སྙིགས་མ་དེར་ཀར་ཟློག་མུལ་ལྦེ་རྒྱལ་བློན་སོགས་ནས་ཕན་ཚུན་ཤོར་གླེང་བགྱིས་བཞིན་མ་དུ་འགྲོ་བས་རང་གཞན་སུམ་པ་ལས་མི་འདུག་གཤིས་སྐུ་ཞབས་ནས་ཐུགས་རྗེ་གང་ཆེ་དགོངས་བཅད་ཀྱི་གཅོད་མཚམས་ཞུས་པར་༝ གཞི་ནས་སྔར་ཕན་ཚུན་ལབ་ཤེར་ཅུང་ཟད་ཉན་རྩིས་མ་བྱས་ནའང་བདེན་ཚིག་བརྗོད་ལོང་མ་བྱུང་བར་གཅོད་མཚམས་བྱས་སོང་ཞེས་མ་འོངས་ཀླན་ཀ་འབྱུང་བར་དོགས་པས་དེ་ལྟ་ཉན་པ་མི་བྱེད་དཀའ་མེད་དེ་སྐད་ལ་དྭགས་ཡུལ་སྐད་བྱེ་བྲག་པ་ནི་སྔར་བོན་གྱི་སྟོན་པ་གཤེན་རབ་གུ་གེར་འཁྲུངས་ཤིང་། ཞང་ཞུང་ཞེས་པ་ནི་མངའ་རི་སྐོར་གསུམ་གྱི་སྤྱི་མིང་དང་། ལ་དྭགས་ཡུལ་དབུས་འགྱུར་གྱི་སེར་སྐྱ་ལྟ་བུ་ནི་གུ་གེ་ཡིན་ཡང་། སྔོན་ཞང་ཞུང་གི་སྐད་ཞེས་བོད་ཀྱི་བརྡ་ལས་ཕལ་ཆེར་ལག་པ་ཞིག་ཡོད་སྣང་ཡང་ད་ལྟ་བོད་ཀྱི་སྐད་དང་ཕལ་ཆེར་གཅིག་པར་གྱུར་ཡང་། ཞང་ཞུང་གི་སྐད་རྙིང་གནས་པ་ཡང་མང་དུ་སྣང་ཞིང་། ལ་དྭགས་ཀྱི་ཡུལ་མཚམས་བྷ་ཏིའི་རང་སྐད་རྙིང་པ་དངོས་འབྲུ་ཤ་དང་བོད་སྐད་འདྲའོ་ཆ་ལྟ་བུར་ཡོད་དགོས་ཀྱང་ད་ལྟ་ནི་དེ་ལས་ཟུར་ཆགས་ཤིང་གྲུབ་མཐའི་དབང་གིས་ཀླ་ཀློའི་སྐད་རིམ་གྱིས་འཕེལ་ཡོད་འདུག་པས།༝ ཇི་སྐད་དུ། རྒྱལ་རིགས་འཕྲིས་ཀྱང་ཐུབ་ཆོད་སྤང་། །གཞོན་ནུ་བརྙས་པ་ཡང་མི་བྱ། །དྲེགས་པ་ཅན་ལ་གནོང་མི་བཀུར། །ཆེན་པོ་རྣམས་ལ་དྷ་མི་འབེབས། །ཞེས་ལྟར། དེ་སྐབས་ཁ་ཅིག་ནས་ན་རེ། མུལ་ལྦེ་རྒྱལ་པོར་རིགས་སྲས་འབྱུང་ན་བར་སྨོན་ལ་དེ་ལྟ་བྱུང་ན་སྨོས་མེད་དང་། དེ་མིན་རྒྱལ་སྲས་རྒྱལ་མོའི་སྲས་དང་མུལ་ལྦེ་རྗེའི་སྲས་མོ་ཞིག་ཡོད་པ་ཆབ་ཅིག་བཞག་ན་ཇི་ལྟར་རུང་ཞེས་བདག་ལ་དྲི་བར་མཛད་པ་དེ་ལ་སྨྲས་པ། ཚུལ་དེ་བདག་ལ་དྲི་བར་མི་འོས་ཤིང་། ལན་འདེབས་ཀྱང་མི་བཏུབ་ལ། གཡོང་ནི་ཕ་ཡི་རིགས་དགུ་རྒྱུད། མ་ཡི་རིགས་གསུམ་རྒྱུད་ཀྱི་བར་གཉེན་དུ་མི་སྡེབ་པར་ཕྱི་ནང་གི་གཞུང་ལུང་མང་པོར་རླུང་ལྟར་དུ་གྲགས་ཤིང་། བོད་ཡུལ་དབུས་སུ་ཕ་ཡི་རིགས་སུ་གྱུར་ཚད་དང་། གཙང་པ་རྣམས་ཀྱིས་དེ་ཡི་ཁར་མ་ཡི་རིགས་གསུམ་རྒྱུད་ཀྱི་བར་དུ་འཛེམས་ཤིང་། རྒྱ་ནག་ཏུ་ཡང་དེ་དང་འདྲ་སྐད་དང་། ད་ལྟ་འཕགས་ཡུལ་དུ་སངས་རྒྱས་ཀྱི་གྲུབ་མཐའ་དཀོན་ཡང་མུ་སྟེགས་བྱེད་ཀྱི་གྲུབ་མཐའ་གར་ཡོད་དུ་གོང་དུ་བཤད་པ་དེ་ལས་མི་འདའ་མོད། འོན་ཀྱང་བོད་ཡུལ་མཐའ་འཁོབ་ཁ་ཅིག་དང་། འཕགས་ཡུལ་ཀླ་ཀློའི་གྲུབ་མཐའ་ལྷག་པར་དར་བའི་གནས་སུ་སྤུན་དངོས་མའི་བུ་དང་བུ་མོ་ཁྱིམ་ཐབ་ཏུ་སྦྲེལ་བར་ཐོས་ཏེ། དེ་ནི་བྱམས་པ་ལུང་བསྟན་པའི་མདོ་ལས། རྩོད་ལྡན་སྙིགས་མའི་མཐའ་ལ་ཐུག་པའི་དུས་སུ་སངས་རྒྱས་ཀྱི་བསྟན་པ་མི་གནས་ཤིང་། མཚོན་གྱི་བསྐལ་པ་དང་ཉེ་བ་ཆ་མཐུན་སྐབས་མི་རྣམས་ཁྲེལ་དང་ངོ་ཚ་བྲལ་ཏེ། ཁྱི་དང་། ཕག་པ། ཝ་སྐྱེས་བཞིན། སྲིང་མོ་དང་བུ་མོ་སོགས་དང་། ལྷན་ཅིག་ཏུ་འཚོགས་ཤིང་དེ་ནས་མཚོན་གྱི་བསྐལ་པ་དངོས་ཀྱི་འཛམ་གླིང་གི་སྐྱེ་རྒུ་ཕལ་ཆེར་ཁ་དག་པར་གསུངས་ཏེ། སྤྱིར་དེ་ལྟ་བུའི་དུས་ཀྱི་ཉེན་པ་དང་། ཡུལ་ཁིནྟུ་སྟེས་དབང་གི་དེ་ལྟར་གྱུར་པ་ལ་ནི། ཡུལ་གྱི་ལྷ་རྣམས་གྲིབ་ཀྱིས་ནོན་ཅིང་། བཀྲ་མི་ཤིས་པའི་རྒྱུ་ལྟས་ངན་དུ་སྐྱེ་བོ་མཁས་པ་རྣམས་ཀྱིས་བརྗོད་པར་བྱས་ན་ཡ་རབས་དྲྭ་མ་རྣམས་ཀྱིས་ཚུལ་ལུགས་ལ་ནི་དེ་མི་འབྱུང་མོད། འོན་ཀྱང་མི་ངན་ཅི་བྱེད་ཡ་ཆ་ཁ་ཅིག་ནས་ཡུལ་དབང་རྗེ་བཙན་མགུ་བའི་ཁ་བསག་ཚུལ། དེ་ལྟ་ཤཱཀ་རིགས་ཡིན་ཞེས་སྨྲེང་བ་པོ་བྱུང་བ་ནི་ཚིག་དེ་རྣམ་པར་འཁྱམས་པ་སྟེ། སྔོན་དྲང་སྲོང་སེར་སྐྱའི་གསུང་ནི། དགོས་པས་དགག་པ་ཟིལ་གྱི་གནོན་པ་རྒྱལ་པོ་རྒྱལ་རིགས་ཀྱི་སྤྱིུ་ནས་དབང་བསྐུར་བར་འོས་པའི་བུ་ལ་ཕ་ཡི་བཀས་གནང་སྟེ་རྒྱལ་སྲིད་ཀྱི་དབང་ཐང་བོར་ནས་དཀའ་ཐུབ་ཀྱི་ནགས་སུ་གནས་ནས་རིགས་མི་མཉམ་པ་དང་། མཉམ་ཡང་གཞན་གྱི་བུད་མེད་ལ་ལག་པས་རེག་པ་ཙམ་ཡང་མི་བྱེད་པའི་བརྟུལ་ཞུགས་འཛིན་པར་མས་དབེན་གྱི་སྙིང་པོ་བསྟེན་པར་གསུང་པ་ཡིན་གྱི། དེ་མ་ཡིན་པ་གཞན་ལ་ཕྱི་རོལ་དྲང་སྲོང་གི་རིག་བྱེད་དུ་ཀུན་ཏུ་མ་བསྟེན་པ་ཡིན་ནོ། །གལ་ཏེ་རིགས་བྱེད་དུ་བསྟན་ན་ཡང་། སངས་རྒྱས་བསྟན་པ་དང་མི་མཐུན་པའི་ཚིག་ཅིའི་ཕྱིར་གཡུལ་དུ་ཤི་བ་ལྷར་སྐྱེ་བ་དང་། རྒྱལ་རིགས་ཀྱི་ཆེད་དུ་མི་དགེ་བའི་ལས་ལམ་ཆེན་པོ་རུང་བར་བཤད་པ་ནི་ལོག་པར་བལྟ་བས་ཀུན་ཏུ་ནོན་པ་ཡིན་པས་དེ་ཡང་སྤང་བྱར་ཤེས་པས་རྟོགས་པ་ཉིད་དོ། །དྲང་སྲོང་སེར་སྐྱས་སྐྱོང་བའི་རྒྱལ་རིགས་ཤཱཀྱ་སྤུན་རྣམས་ནུ་བོ་རྒྱལ་སྲིད་ལ་དགའ་བ་ཤི་བའི་འོག་ཏུ་ཤཱཀྱར་གྱུར་པ་སྤུན་ཆེ་རིམ་ནས་རྒྱལ་སྲིད་ལ་བཀོད་ཀྱང་ཕོ་བོ་གསུམ་ལ་སྲས་མ་བྱུང་བར་གྲོངས་ཤིང་། ནུ་བོ་ལ་སྲས་བྱུང་བའི་རྒྱུད་ཤཱཀྱ་ཆེན་པོའི་རིགས་ལས་བསྐལ་བཟང་འདྲེན་པ་བཞི་པ་བྱོན་པ་སྟེ། དེ་ཡང་མས་དབེན་སྲིང་མོའི་བུ་རྒྱུད་ལས་མིན་པ་ཤེས་དགོས་སོ། །དེས་ན་ཚིག་འདི་དག་ནི་མི་རིགས་པས་གཞན་ལ་གོ་བར་གྱིས་ཤིག ཅིའི་ཕྱིར་འདི་ཡི་སྐྱེ་བོ་མང་པོ་ལ་ཕན་ནམ། དེ་ལས་ལྡོག་གམ། མངོན་ཤེས་མ་ཐོབ་པས་བརྟག་མི་ནུས་པ་ཡིས་སོ། །ཞེས་སྨྲས་པ་གོང་གི་སྨྲ་བ་པོ་རྣམས་སྤྱོམ་ཆུང་ངུ་ཁ་རོག་སྟེ་སྡོད་དོ། །འདིར་ཡི་གེའི་ཚེགས་སུ་ཆེ་ཡང་སྐྱེ་བོ་དྲྭ་མ་རྣམས་ཀྱི་ཚུལ་སྤྱོད་ལ་ཕན་ཕྱིར་ཉུང་ངུའི་ངག་གིས་ཆ་ཙམ་བྲིས་པའོ། །དེ་ལྟར་ལེགས་ཉེས་བྱེད་ཤེས་སྙིང་ནས་བཅོལ་བར་ཁྲེལ་གཞུང་ངོ་ཚས་དབུལ་བ་རྣམས་ནི་བག་ཡངས་སྤྱོད་པའི་བཙས་སུ་ཆེ་ཡང་ཁྲེལ་ལྡན་མཛངས་པའི་ཚོགས་རྣམས་འཆིང་བའི་ཞགས་པར་དམ་པ་དང་།༝ གང་གི་བཀའ་དྲིན་མི་བརྗེད་པར་དྲན་ཞེས་དོན་གྱིའམ་གཅམ་བུ་ཡིན་ཀྱང་རུང་དུས་དེར་ནི་དགའ་ཚོར་ཚད་མེད་བྱས་སོང་ཡང་། ཡིད་ལ་རིང་དུ་གནས་མིན་ནི་མ་ཤེས་མོད། སྤྱིར་ཁོ་བོ་ནི་བྱ་བྲལ་ཕྲ་མོ་ལས་ཀྱང་། ཕྲ་མོར་གྱུར་གཤིས་དངོས་སུ་ཕན་གནོད་རྔམ་ཆེན་འགྲུབ་མཁན་ནི་མིན་མོད། འོན་ཀྱང་མདོ་ཁམས་ནས་ད་ལྟའི་བར་གནོད་པ་སྐྱལ་བའི་ཡུལ་ནི་ཧ་ཅང་མི་མང་སྟེ་ཉུང་ངུ་ཉིད་དུ་ཟད། ཕན་གདགས་ནི་ཁོས་དཔག་གིས་མཆོག་དམན་དུ་ག་ལ་བྱས་ཀྱང་དེ་ཀུན་དགེ་བའི་ལས་འབྲས་བསླུ་མེད་ཉིད་ལས་རང་གི་ལས་ཀྱི་རྒྱུ་བས་དྲིན་དུ་སེམས་པ་ནི་ཤེས་ལྡན་དམ་པ་རེ་ཟུང་ཙམ་སྟེ། གཞན་ནི་ཤིན་ཏུ་ཕྲ་བར་ཟད་དོ། །༝ དུས་སྐབས་འདིར་ཡང་སྐྱེ་རྒུ་སྤྱི་དང་བྱེ་བྲག་མང་པོའི་བདེ་ཐབས་སུ་དགོངས་ནས། གངས་ཅན་མགོན་པོ་རྒྱལ་བ་མཆོག་གི་བཀས་མངགས་བཞིན་བལ་ཡུལ་ནས་ཆུ་སྤྲེལ་སྦོ་ཟླའི་མཐར་མར་ཡུལ་གྱི་ལམ་དུ་ཞུགས། ད་ལྟ་ཆུ་བྱ་སྣྲོན་ཟླ་རྫོགས་སུ་འཆའ་བ་སྟེ་ད་དུང་བལ་ཡུལ་སླེབ་པར་ལས་སྔར་ལོ་ཧྲིལ་པོ་གཅིག་དང་ཕྱེད་གཉིས་རིང་སྒོ་གསུམ་གྱི་ངལ་བ་ཀུན་བཟོད་པ་གསུམ་གྱི་གོ་ཆས་དང་དུ་བླང་། མར་ཡུལ་སྟོད་རིང་ལབ་ཆིང་ལ་བརྟེན་པའི་དར་སྐུད་གཅིག་གསེར་དངུལ་ཀེ་བ་གང་གུང་གུམ་འཇག་མ་གཅིག་གིས་མཚོན་སྟེ་དངོས་པོའི་ཡོ་བྱད་ཕྲ་མོ་དེ་ཡང་སྔར་མ་བླང་ན་རགས་པ་སྨོས་ཅི་འཚལ། ད་དུང་ཡང་བླང་བར་མི་བྱེད་སྟེ། དེར་ཡང་མ་ཟད་རང་ཉིད་ཀྱི་འཚོ་ཆས་ཀྱང་ཟོང་གིས་བཅད་ནས་ལ་དྭགས་པས་ཉིན་རེར་བུད་ཤིང་ཁུར་ཁ་ཤས་ཀྱི་མཚན་མཐེ་ཐུག་ཙམ་ལས་རྒྱལ་པོ་ཡས་གསུང་ལ་ཡང་ཚེགས་སུ་འགྲོ་བ་ཅུང་ཟད་ཀྱང་མེད་པ་ཀུན་གྱིས་མཐོང་གསལ་གཏན་ལ་ཕབ་པ་འདི་ཡིན།༝ ༝ ༝ ཅི་ཕྱིར་གདེང་ཅན་དབང་པོ་ཆེ་རིམ་བཞིན་མགོ་བོ་ཡང་མང་ལ་སྡུག་བསྔལ་ཡང་དེ་ཉིད་ཐོབ་པར་གསུང་བ་བཞིན། རྨད་དུ་བྱུང་བའི་བསོད་ནམས་ཅན་རེ་ཟུང་ནི་སྲིད་མཐའ་མ་སྐག གཞན་ནི་ཅི་ཙམ་འབྱོར་བཞིན་སྡུག་བསྔལ་ཡང་དེ་སྙེད་ལྡན་པ་ལུང་རིགས་མཐུན་པར་མ་ཟད་དངོས་སུ་གྲུབ་བཞིན་པ་དང་།༝ ༝ ཡ་རབས་དྲ་མ་རྣམས་ནི་ཁྲེལ་ཡོད་ངོ་ཚ་ཆེ་ཞིང་བྱ་བ་དྲིན་དུ་བཟོ་བའི་རང་བཞིན་ཅན་ཡིན་ལ་དོན་དུ་ཡང་དེ་མེད་ཐབས་མེད་པ་སྟེ་མངོན་མཐོ་ལྷ་མིའི་ཐེག་པ་ལ་དེ་མེད་ན་ངན་འགྲོ་ལས་མི་གྲོལ། ཉན་རང་གི་ཐེག་པར་ཞི་ལམ་གྱི་བསླབ་པའི་ཀུན་སྤྱོད་ལ་དེ་མེད་ཐབས་མེད། ཐེག་ཆེན་གྱི་ལྷག་བསམ་ཡང་ཁྲེལ་ངོ་ཚ་བྱས་བཟོ་ལས་སྐྱེ་སྟེ་དེ་མེད་ན་མཁའ་ཁྱབ་པ་མ་ཡིན་པས་མི་ཕན། འབྲས་བུ་སྔགས་ཀྱི་ཐེག་པ་ལ་ཡང་མེད་ཐབས་མེད་དེ་དྲིན་གཟོ་མ་དགོས་ན་སངས་ཐམས་ཅད་ལས་རྩ་བའི་བླ་མ་ལྷག་ཞེས་ག་ལ་བརྗོད། དེས་ན་ཡ་རབས་ཀྱི་གོ་འཕང་ལ་གནས་པ་རྣམས་ཡ་རབས་ཀྱི་རྣམ་ཐར་ལ་ངེས་པར་སློབ་དགོས་ཞེས་པའི་དོན་ཡིན་གྱི་ངེད་ལ་སྟོད་ར་བཏང་དགོས་ཞེས་པའི་ཚིག་ལ་སྙེགས་པ་མིན་ལ།
སྨྲས་པ། གཞན་གྱི་སྐྱོན་ཡོན་ཆ་ཤས་འོལ་ཕྱི་ཉིད། །ཐོས་པའི་མོད་ལ་ངང་ཚུལ་ཕྱོགས་མཐོང་མོད། །འོན་ཀྱང་རྩིང་ངེ་སྤང་སྟེ་ཞིབ་དཔྱད་བློས། །གཟུར་གནས་དྲང་པོ་ཉིད་ཀྱི་ཐིག་བཏབ་པས། །སྐྱེ་དགུ་རིས་མེད་དགའ་དགུ་བསྐྱེད་པ་འདི། །སྐྱེས་མཆོག་མི་ཡི་སེང་གེ་གངས་ཅན་མགོན། །གང་གི་ཐུགས་རྗེས་འཇུག་པ་ཁོ་ན་ལས། །བདག་གིས་བགྱི་བ་ཅུང་ཟད་ཡང་མ་དམིགས། །ཞེས་སོ། །
ལ་དྭགས་ཡུལ་སྐད་ཞབས་འཐམས་སུ་གྲགས་པ་རྗེ་བོ་གཅིག་ཤོས་ལ་མ་མགུ་ནས་གཅིག་ཤོས་ལ་མགོ་བཏད་ཞུ་ནས་བླང་བ་འདི་རིགས་ཆེ་ཕྲ་སུ་ལ་ཡང་ནང་མི་ཤིམ་པའི་རྒྱུ་མཐོང་ཐོས་མྱོང་གྲུབ་ཏུ་སྣང་བས་དེ་རིགས་སྐུ་ངོ་ནང་ཐབས་མཁས་མཐུན་འཇུག་གི་སྟེང་ནས་བླང་ན་མ་གཏོགས། མ་གཟོས་པའི་རང་མཚམས་ཀྱི་སྐུ་ངོ་ནང་ཕན་ཚུན་སྨོས་ཅི་འཚལ་ཡུལ་སྤྱི་གང་དང་མི་མཐུན་པའི་མི་མགོ་ལྟད་བཞེས་ན་མི་མཛེས་པའི་རྒྱུར་འགྲོ་བས་གལ་ཆེ་ཐུགས་སུ་འཇུག་འོས་དང་ ༝ དེ་ལྟར་ད་ལྟའི་དུས་ན་དུཿཁ་རཱུ་པ་ཀ་ར་ཎ་ཡི་སྒོ་ཆུ་བདག་གི་ཕྱོགས་ནས་ཆུ་གཏེར་གྱི་དཀྱིལ་འཁོར་འཁྲུག་ནས་ལུད་པ་ལྟ་བུ་འབྱུང་བར་ཉེ་བ་ཉིད་མཐུན་པའི་རླུང་ཤུགས་ཀྱིས་བརྡས་པ་ལྟར་དུས་ལོ་རེ་ཞིག་བར་ཕྱིར་བཅིལ་བ་ཡི་བསིལ་ལྗོངས་ཀྱི་ར་བར་འཁོད་པའི་སྐྱེ་དགུའི་ཡིད་ཀྱི་ངལ་གསོར་གྱུར། ལར་རྒྱའི་གནས་གལ་ཆེ་བའི་རིགས་རྣམས་སྐུ་མཆེད་དངོས་སུའམ་དེ་མིན་ཕོ་ཉ་ཚད་ཐུབ་ཡི་གེའི་ལམ་ནས་མོལ་མཆིད་ཞིབ་གྲོས་བཟང་པོས་བླང་དོར་འཇུག་པ་མཐུན་པར་བྱ་སྟེ་འདི་ནི་ཡུལ་ཁམས་མི་ཉམས་པའི་རྒྱུ་བདུན་རྒྱལ་བས་བསྔགས་པའི་ནང་ཚན་གཙོ་ཆེ་ཤོས་ཤིག་ཡིན། དེ་ཡང་དེ་ལྟར་ཐུགས་སུ་བཞག་འོས་ཏེ། དེ་བཞིན་གཤེགས་པས་མ་སྐྱེའི་དགྲ་ཡི་མདུན་ན་འདོན་བྲམ་ཟེ་དབྱར་བྱེད་ལ་ཡུལ་ཡངས་པ་ཅན་མི་ཉམས་པའི་རྒྱུ་བདུན་བཀའ་སྩལ་པ། ངས་སྤོང་བྱེད་པ་ལ་རྣམ་པར་མི་འགྱུར་བའི་རྒྱུ་བདུན་བཤད་དོ། །བདུན་ནི་ཡང་དང་ཡང་དུ་འདུ་ཞིང་འདུ་བ་ལ་རིང་དུ་གནས་པ་དང་། ༡ འགྲོ་འདུག་དང་དགོས་པ་དང་བྱ་བ་མཐུན་པར་གནས་པ་དང་། ༢ སྨོན་པར་བྱ་བ་མ་ཡིན་པ་ལ་མི་མོས་སྨོན་པ་མི་འདིར་ཁྲིམས་བཅས་པ་བཞིན་དུ་སྤྱོད་པ་དང་། ༣ བུད་མེད་བགྲོད་བྱ་མ་ཡིན་པ་ལ་མི་བགྲོད་པ་དང་། ༤ རྒན་རབས་ལ་བཀུར་སྟི་བྱེད་ཅིང་ཚིག་ཉན་པ་དང་། ༥ མཆོད་རྟེན་ལ་མཆོད་ཅིང་སྔོན་གྱི་མཚན་མ་མི་འདོར་བ་དང་། ༦ ཡུལ་གྱི་དགྲ་བཅོམ་པ་རྣམས་ལ་དད་པས་བསྙེན་བཀུར་བྱེད་པའོ། ། ༧ སྤོང་བྱེད་པ་རྣམས་དེ་དག་གཅིག་དང་ལྡན་ན་ཡང་། མ་སྐྱེས་དགྲས་ཐུབ་པར་མི་འགྱུར་ན་བདུན་དང་ལྡན་ན་ལྟ་ཅི་སྨོས་ཞེས་གསུངས་པ་ལྟར་སྟེ། སྔོན་གྱི་མཚན་མ་མི་འདོར་བ་ནི་ཞྭ་གོས་རྒྱན་རྣམས་སྔར་རྙིང་པ་ལ་སྤྱོད་ཅིང་གསར་འགྲོ་མི་བྱེད་པའི་དོན་ཡིན་ལ། དེང་དུས་དགྲ་བཅོམ་མངོན་གྱུར་མི་རྟོགས་ཚེ་ཕྱོགས་རེ་མ་ཡིན་པར་སངས་རྒྱས་པ་ཡི་གྲུབ་མཐའ་རིས་མེད་ཀྱི་དགེ་སློང་ཚངས་པ་མཚུངས་པར་སྤྱོད་པ་ཀུན་ལ་བསྙེན་བཀུར་བ་སྟེ། དེ་རྣམས་ངེས་པར་ཕྱི་མཐར་ཐུག་གི་བར་དུ་འབད་བྱའི་གཙོ་བོ་ཡིན་ཞེས་འདིར་ཁོ་བོས་ལེགས་པར་གདམས་པ་ལགས་ན་མཆོག་དམན་ཀུན་གྱིས་འབད་པས་ལྷུ་རུ་བླང་བར་འོས་སོ། །འཇིག་རྟེན་ན་གསལ་གྲགས་ཡ་རབས་མཆོག །ཁྲེལ་ཡོད་ངོ་ཚ་མཐོ་རིས་ལྷ་མིའི་ཐེག །ལེགས་པར་སྤྱོད་ནི་ངེས་ལེགས་ཐར་པ་ཡང་། །རིང་པོ་མ་ཡིན་མྱུར་དུ་འགྲུབ་པར་ངེས། །ཞེས་པ་ཡང་སྨྲས་སོ། །དེ་ལྟར་དམ་དུ་བཅའ་བ་ཚུལ་ཇི་བཞིན་དང་དུ་བླང་བའི་ལེན་པའི་དབང་པོར། འཕགས་པ་དཀོན་མཆོག་རིན་པོ་ཆེ་རྣམ་པ་གསུམ་སྟེ་རྫོགས་པའི་སངས་རྒྱས་བཅོམ་ལྡན་འདས། དམ་པའི་ཆོས། འཕགས་པའི་དགེ་འདུན་གྱི་ཚོགས་མཁའ་ཁམས་ཕྱུར་ཕུར་ཁེངས་པ་ཉིད་དང་། བླ་མེད་སྔགས་ཀྱི་དཀོན་མཆོག་གསུམ། དཀྱིལ་འཁོར་རིགས་ཀྱི་གཙོ་བོ་བླ་མ། དཀྱིལ་འཁོར་འཁོར་ལོའི་རང་བཞིན་ཡི་དམ། རང་སྣང་ཡུམ་དང་ཆོས་ཀྱི་གཉེར་འཛིན་མཁའ་འགྲོ་སྟེ་རྩ་བ་གསུམ་དང་། དེ་ལྟར་དཀོན་མཆོག་རྩ་གསུམ་གྱི་རང་མདངས་སྒྱུ་འཕྲུལ་གྱི་རོལ་པས་རྒྱལ་བའི་བསྟན་པ་རིན་པོ་ཆེ་གཉེན་པར་བྱེད་ཅིང་སེམས་ཅན་གྱི་བདེ་སྐྱིད་སྤེལ་བར་ལེགས་ཉེས་ཀྱི་གཏོང་ཚུལ་བཞིན་དུ་འཛིན་པ་དཔལ་རྡོ་རྗེ་ནག་པོ་ཆེན་པོ་དང་། རྡོ་རྗེ་ལྷ་མོ་ནག་མོའི་ཚོགས་ཏེ། དེ་ལས་རྫོགས་པའི་སངས་རྒྱས་འོད་ཟེར་དཔལ་རྩེགས་རྒྱལ་པོ་གང་སྟོང་གསུམ་འཇིག་རྟེན་གྱི་ཁམས་འདིར་ཆོས་ཀྱི་སྤྲིན་གྱི་དབང་ཕྱུག་ཆེན་པོ་འཕགས་མཆོག་སྤྱན་རས་གཟིགས་སྙིགས་དུས་ཆོས་བྱེད་སྒྲུབ་པོ་རྣམས་ལ་འཚེ་བའི་དགྲ་བགེགས་བསྒྲལ་དང་། རྣལ་འབྱོར་ཕལ་གྱུར་རྣམས་ཀྱི་བར་དོའི་དུཿཁ་བསལ་བ། དབུལ་འཕོང་གྱུར་པ་རྣམས་ལ་ནོར་གྱི་དངོས་གྲུབ་སྟེར་བ་སྟེ་ཚུལ་དེ་གསུམ་ལ་གཞན་ལས་རྨད་དུ་བྱུང་བའི་ཐུགས་བསྐྱེད་གསར་དམ་ཅན་དཔལ་རྡོ་རྗེ་ནག་པོ་ཆེན་པོ་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་ཡབ་ཡུམ་སྲས་འཁོར་བཀའ་སྡོད་ཕོ་ཉའི་ཚོགས་དང་བཅས་པ་དང་། དཔལ་ཧེ་རུ་ཀས་གདུག་པ་ཅན་རྣམས་ཐབས་ཀྱི་རང་འདྲའི་གཟུགས་ཀྱིས་བཏུལ་ཕྱིར་འཇིགས་བྱེད་དྲེགས་པའི་ཆ་བྱད་རྡོ་རྗེ་ནག་པོ་ཆེན་པོ་ཕྱག་བཞི་པ་ཡབ་ཡུམ་སྲས་འཁོར་དང་བཅས་པ་དང་། དཔལ་ཁྲག་འཐུང་ཆེན་པོ་གངས་རིའི་བདག་པོའི་གྲས་ཀྱི་ཚུལ་བཟུང་ཞིང་རྒྱལ་བའི་བསྟན་པ་ཉེ་བར་བསྲུང་བ་ཐལ་བས་ཁེབས་པའི་ཞིང་དུ་ཐལ་བའི་དབང་པོར་སངས་རྒྱས་པ་རྡོ་རྗེ་ནག་པོ་ལེགས་ལྡན་ཚོགས་ཀྱི་བདག་པོ་ཡབ་ཡུམ་སྲས་འཁོར་དང་བཅས་པ་རྣམས་དང་། ཁྱད་པར་དུ་སྲིད་ཞི་ཟབ་གསལ་ཕོ་མོ་གཉིས་ཆོས་ཐམས་ཅད་གཉིས་མེད་དུ་རོ་མཉམ་ཞིང་དྲེགས་པའི་གཙོ་བོ་ལྷ་ཆེན་ཀླུ་བདུད། སྒྲ་གཅན་སྟེ་འཆི་བདག་གསུམ་གྱི་སྲོག་དབྱེར་མེད་དུ་འདྲེས་པས་མ་ནིང་ནག་པོ་ཞེས་སུ་མཚན་གསོལ་བ་གཅིག་གྱུར་རིག་པའི་རྒྱལ་པོ་འཁོར་འདས་དུར་ཁྲོད་ཀུན་ཏུ་སྤྱོད་པའི་མངའ་བདག་ལྷ་ཡི་ལྷ་བདུད་ཀྱི་བདུད་བགེགས་ཀྱི་བགེགས་ཆེན་པོ་བླ་མེད་རྡོ་རྗེ་ཐེག་པའི་བསྲུང་མ་རྨད་དུ་བྱུང་བ་འཆོལ་པའི་ཁྲོ་རྒྱལ་ནག་པོ་སྐལ་ལྡན་ནག་པོ་སྨུག་འཛིན་ནག་པོ་རིག་པའི་རང་མདངས་ལས་ཤར་བའི་རང་སྣང་གི་ཡབ་རང་སྣང་གི་ཡུམ་དབྱེར་མི་ཕྱེད་ལ་ཐ་དད་དུ་གྲུབ་པ་སྔགས་ཀྱི་བདག་མོ་རྡོ་རྗེ་རལ་གཅིག་མ་དང་བཅས་པ་མ་ནིང་ནག་པོ་ཡབ་ཡུམ་སྲས་འཁོར་བྲན་གྱི་ཚོགས་དང་བཅས་པ་ཞིང་རབ་འབྱམས་མཚམས་སྦྱོར་གྱི་རྡུལ་སྙེད་ཀྱི་གྲངས་དང་མཉམ་པ་དང་། གཞན་ཡང་སྟག་ཞོན་ལ་སོགས་པ་སྐུའི་མགོན་པོའི་རིགས་དང་། ལ་ལ་གྷོ་ར་སོགས་གསུང་གི་མགོན་པོའི་རིགས་དང་། རྡོ་རྗེ་གུར། བེར་ནག མིའུ་ཐུང་། ལྷོ་ནུབ་ཟང་གྲི་ཅན་སོགས་ཐུགས་ཀྱི་མགོན་པོའི་རིགས་དང་། སེང་ཞོན་ཚོགས་བདག་ལྗང་སྔོན་སོགས་ཡོན་ཏན་གྱི་མགོན་པོའི་རིགས་དང་། ཏྲཀྵད་བདུད་རྒྱལ་ཐོད་པ་ཅན་སོགས་ཕྲིན་ལས་ཀྱི་མགོན་པོའི་རིགས་དང་། དེ་བཞིན་ཞལ་བཞི་པ་སེང་གེ་ནག་པོ་ཞིང་སྐྱོང་ཆེན་པོ་ཀུན་དགའ་གཞོན་ནུ་ལ་སོགས་པ་ཉེ་བའི་མགོན་པོ་དང་། ནག་པོ་ཆེན་པོ་དེ་རྣམས་དང་མཐུ་དང་རྫུ་འཕྲུལ་ཡོན་ཏན་མཚུངས་པར་སྤྱོད་པ་འདོད་ཁམས་ཀྱི་བདག་མོ་སྲིད་པ་གསུམ་གྱི་རྒྱལ་མོ་ལྷ་རྣམས་བསྲུང་བའི་རྫོང་། ལྷ་མ་ཡིན་རྣམས་འཇོམས་གཤེད་མ་འཆི་བདག་ལས་ཀྱི་གཤིན་རྗེའི་སྲིང་མོ་ལྷ་དབང་གཞན་འཕྲུལ་དབང་བྱེད་ཀྱི་ཡིད་སྐྱེས་སྲས་མོ་དབང་ལྡན་བདག་པོའི་རིགས་ཀྱི་བུ་མོ་རྡོ་རྗེ་ནག་མོ་རི་ཁྲོད་དབང་ཕྱུག་མ་དུད་པ་ལྟར་སྔོ་ཞིང་སོལ་བ་ལྟར་གནག་པ་དེ་བཞིན་གཤེགས་པ་ལས་ཀྱི་རིགས་དང་ལྡན་ཞིང་མ་འོངས་པ་ན་དམ་ཚིག་སྒྲོལ་མར་སངས་རྒྱས་པའི་རང་རྟགས་ལག་ན་རལ་གྲིའི་མཚོན་ཆ་འཛིན་པ་སྲིན་གྱི་རྒྱལ་པོ་ཟིལ་གྱིས་གནོན་ཅིང་། ཆགས་ལྡན་དྲེགས་པ་རྣམས་ཀྱི་མདངས་འཕྲོག་ཕྱིར་ཁ་ར་ལ་ཞོན་ཏེ་སྐད་ཅིག་གི་སྲིད་གསུམ་ཁྱབ་པར་ཉུང་བ་དཔལ་ལྡན་ལྷ་མོ་ནག་མོ་ཉིད་དང་། དེ་དང་གཉིས་སུ་མེད་པ་སྔགས་ཀྱི་རང་གཟུངས་སྨོན་ལམ་གྱི་མཐུའི་བྱུང་བ་རྡོ་རྗེ་རེ་མ་ཏི་ནམ་གྲུ་ནག་མོ་དྲེའུ་ལ་ཞོན་པ་དཔོན་གཡོག་གཉིས་ངེས་པའི་དོན་དུ་དགྲ་བཅོམ་མར་གྱུར་ཀྱང་གདུལ་བྱ་འདྲེན་པའི་ཐབས་ལ་མཁས་པས་འཕགས་པ་བརྒྱད་དང་བཅུ་ཡི་དབང་བསྐུར་ཐོབ་པར་བསྟན་པ་རང་རང་གི་ཡབ་དང་སྲས་དང་འཁོར་དང་གཡོག་བྲན་འབངས་ཀྱི་ཚོགས་མ་ལུས་ཤིང་ལུས་པ་མེད་པ་རྣམས་དང་། རྒྱལ་བའི་ཐུགས་རྗེའི་འཇུག་པ་དང་སེམས་ཅན་ལས་ཀྱི་འཇིག་རྟེན་སྐྱོང་བ་ཆེན་པོར་གྲུབ་པ་ཚངས་པ་དང་། དྲག་པོ་དང་། ཁྱབ་འཇུག་དང་། དབང་པོ་དང་། རྟོག་འདོད་དང་། སྐེམ་བྱེད་དང་། དགྲ་སྟ་ཅན་སོགས་མཐུ་དང་ལྡན་པ་རྒྱལ་བའི་ཞལ་མཐོང་ཞིང་འཇིག་རྟེན་གྱི་འཕེལ་ཟད་བྱེད་པའི་ཚུལ་ཅན་དང་། དེ་བཞིན་གཤེགས་པས་བསྟན་པ་ལེགས་པར་གཏད་པ་ཀུན་རྫོབ་ཉན་ཐོས་ཀྱི་ཐེག་པར་ཆོས་མིན་རྡུལ་མེད་བསྙེས་པའི་ཚུལ་བཟུང་། བཟུང་ཞིང་ཐེག་པ་ཆེན་པོར་ས་བརྒྱད་པ་དང་། ཡང་བཅུ་པའི་བྱང་ཆུབ་སེམས་པར་ཡང་གསུང་ཞིང་ངེས་པའི་དོན་དུ་དེ་བཞིན་གཤེགས་པའི་སྤྲུལ་པར་ཡང་བསྟན་པ་ཕྱོགས་བཞིར་བསྟན་པ་སྐྱོང་བ་ངལ་སོས་པོ་སོགས་རྒྱལ་པོ་ཆེན་པོ་བཞི་སླས་ཀྱི་བཙུན་མོ་དང་མཛའ་མོ་དང་། བྲན་མོ་དང་སྡེ་ཆེན་སྟོབས་དང་ལྡན་པ་སྲས་དང་གཡོག་དང་དཔུང་གི་ཚོགས་མ་ལུས་པ་རྣམས་དང་། འགྲོ་བ་ལྷ་དང་བཅས་པའི་འཇིག་རྟེན་ལ་ལེགས་ཉེས་ཆོས་བཞིན་དུ་སྤྱོད་པའི་ཁྲིམས་ཀྱི་བདག་པོ་ཆེན་པོ་དཔལ་ཆེན་པོ་བཀའ་སྡོད་མཐུ་ཆེན་དྲེགས་པ་ཡོངས་ཀྱི་འཁོར་ལོས་བསྒྱུར་བ་དགེ་སྡིག་གི་རོང་འཛིན་པ་གཤིན་རྗེ་ཆོས་ཀྱི་རྒྱལ་པོ་ཡུམ་ཙ་གུཎྜི་དང་བཅས་པ་དང་། གཞན་ཡང་ཚངས་པ་ལྷ་ཡི་གཤིན་རྗེ་གཅེར་བུ་ནག་པོ། དབང་པོ་གཤིན་རྗེ་སྲོག་བདག་དམར་པོ་མེ་འབར་གཤིན་རྗེ་མ་རུ་ཙེ། སྲིན་པོའི་གཤིན་རྗེ་རཱ་ཧུ་ལ། ཀླུ་ཡི་གཤིན་རྗེ་ནཱ་ག་རཀྵ། གནོད་སྦྱིན་གྱི་གཤིན་རྗེ་དྲག་པོ་རྟ་སྔོན། དབང་ལྡན་གྱི་གཤིན་རྗེ་ཙུ་ཚུནྡ་ར་དང་། ས་འོག་གི་གཤིན་རྗེ་བྱེ་བ་གུ་རིང་སྟེ་སྲིད་གསུམ་གཤིན་རྗེའི་ཚོགས་ཡབ་ཡུམ་སྲས་འཁོར་མ་ལུས་པ་མེད་པ་དང་། རྒྱལ་བའི་བསྟན་བསྲུང་ཨརྐ་དཀར་ལ་དམ་བཅས་པ་གཙང་རིས་ཀྱི་མགོན་པོ་བདུན་ཅུ་རྩ་ལྔ། ཨརྐ་དམར་ལ་དམ་བཅས་པའི་མགོན་པོ་ཉི་ཤུ་རྩ་ལྔ། དྲེགས་པའི་སྡེ་དཔོན་སུམ་ཅུ། སྔགས་བདག་དྲེགས་པ་བཅོ་བརྒྱད། ཕྱིའི་ལྷ་སྲིན་སྡེ་བརྒྱད། ནང་གི་ལྷ་སྲིན་སྡེ་བརྒྱད། གསང་བའི་ལྷ་སྲིན་སྡེ་བརྒྱད། གབ་པའི་ལྷ་སྲིན་སྡེ་བརྒྱད། བརྟགས་ཆགས་ཀྱི་ལྷ་སྲིན་སྡེ་བརྒྱད་སོགས་ལྷ་མ་ཡིན་སྡེ་རིགས་སུམ་བརྒྱ་དྲུག་ཅུ། ཀུན་གྱི་མཐུ་སྟོབས་གཅིག་ཏུ་དྲིལ་བ་གླིང་ཆེན་བཅུ་དྲུག་གཙོ་བོ་གྱད་ཆེན་དམར་པོ་ཕྱག་གཉན་ཚང་པ་དུང་གི་མཆེ་བ་ཅན་འཁོར་འབྱུང་པོ་འགོང་པོ་རྒྱལ་བསྭེན་མི་སྲུན་པ་བྱེ་བ་ཕྲག་དུང་ཕྱུར་གྲངས་མེད་ཚོགས་དང་བཅས་པ། འཛམ་གླིང་བོད་ཀྱི་གཙུག་ལག་ཁང་། གཡུ་རུ་ཁྲ་འབྲུག་ར་ས་འཕྲུལ་སྣང་། གཞན་ཡང་དཔལ་གྱི་བསམ་ཡས་མཐའ་འདུལ། ཡང་འདུལ་གྱི་གཙུག་ལག་ཁང་གི་བསྲུང་མ་རྣམས་དང་། དབུས་ཀྱི་ཟབ་ཕུ་ལུང་། ཤར་གྱི་ལྗོན་པ་ལུང་སོགས་ལུང་ཆེན་ལྔ། ལུང་ཕྲན་བརྒྱད། དཔལ་གྱི་ཙ་རི་ཏྲ་དང་སྟག་ཚང་ལ་སོགས་པའི་གནས་ཆེན་བཞི། གནས་ཕྲན་བཅུ་དྲུག གྲགས་པའི་མཚོ་ཆེན་བཞི། གངས་རི་ཆེན་པོ་ཉི་ཤུ་རྩ་གཅིག རྫོང་བཅོ་བརྒྱད། པདྨ་བཀོད་སོགས་སྦས་པའི་ཡུལ་ཆེན། འབྲས་ལྗོངས་སོགས་སྦས་ཡུལ་འབྲིང་པོ། རོལ་པ་མཁའ་འགྲོའི་གླིང་སོགས་སྦས་ཡུལ་ཆུང་ངུ་སྟེ་མདོར་ན་སྦས་པའི་ཡུལ་ལྗོངས་ཆེ་ཕྲ་སུམ་ཅུ་རྩ་དྲུག་རྣམས་ཀྱི་བསྲུང་མ་དང་། བོད་ཡུལ་གྱི་མཐུ་ཆེན་དྲེགས་པ་སྡེ་བཞི། ཕྲང་བསྲུང་བཞི། སྒོ་བསྲུང་བཞི། གཙུག་ལག་ཆོས་འཁོར་གྱི་དཀར་བདག་གཙོ་བོ་ཐུགས་ཀྱི་རྒྱལ་པོ་སྡེར་ཆེན། གསུང་གི་རྒྱལ་པོ་དགྲ་ལྷ། སྐུའི་རྒྱལ་པོ་པུ་ཏྲ། ཡོན་ཏན་གྱི་རྒྱལ་པོ་ཤིང་བྱ་ཅན། ཕྲིན་ལས་པེ་ཧར་མེའོ་ཆེ། བཙུན་མོ་ལྔ། བློན་པོ་ལྔ། རྒྱལ་ཆེན་ལྔ། རུ་འདྲེན་བཞི་སོགས་མཐུ་ལྡན་དྲེགས་པ་བརྗོད་ལས་འདས་པ་དང་། བོད་ཡུལ་རྟགས་ཆགས་ཀྱི་ལྷ་ཆེན། ཏི་སེའི་ཞིང་སྐྱོང་ལེགས་གྲུབ་རྡོ་རྗེ། རྨ་རྒྱལ་སྤོམ་ར། རྡོ་རྗེ་གཡུང་དྲུང་། གཉན་ཆེན་ཐང་ལྷ་རྡོ་རྗེ་འབར་བ། འཛམ་གླིང་སྐྱེས་གཅིག་རྡོ་རྗེ་ལེགས་པ་སོགས་དགེ་བསྙེན་ཉི་ཤུ་རྩ་གཅིག གནམ་མཚོ་ཕྱུག་མོ། ཤ་མེད་གངས་དཀར། རྐོང་བཙུན་དེ་མོ་སོགས་འཛམ་གླིང་བསྟན་མ་བཅུ་གཉིས། མངའ་རིས་ཕྱོགས་སུ་མཐུ་སྟོབས་ནུས་པ་ཅན། ཆེ་བཙན་རོལ་པ་སྐྱ་བདུན། སྟ་སྒོ་གངས་བཙན། སྐུ་ལྷ་གེ་གོད། རོང་གི་སྐུ་ལྷ་མཆེད་གསུམ་སོགས་ཕོ་རྒྱུད་རྣམས་དང་། ཙ་མུཎ་མ་སོགས་མ་ཡུམ་སྲིད་པའི་རྒྱལ་མོ་ཆེན་མོ་རྣམས་དང་། སྐྱིད་གྲོང་བྷོདྷེ་མ་བདུན། གློ་བོའི་རྡོ་རྗེ་ལེགས་ལྡན། ཁྱུང་ལུང་བྷོདྷེ་སྤྱན་གཅིག་སོགས་མ་མོ་བདུན། ཕུག་བདག་ཆེན་མོ་དགུ་ལ་སོགས་པའི་མོ་རྒྱུད་ཀྱི་སྤྱི་དང་། ཁྱད་པར་དུ་མར་ཡུལ་ལྗོངས་སུ་དཀར་པོའི་ཕྱོགས་སྐྱོང་བའི་ཡུལ་བདག་མ་ཆེན་མོ་སྔོན་ཚེ་དཔལ་ཆེན་པོ་པདྨ་སཾ་བྷ་ཝའི་སྤྱན་སྔར་སྲོག་གི་སྙིང་པོ་མདངས་གསོལ་དུ་ཕུལ་ནས་དམ་ཚིག་གཉན་པོ་བླང་ཞིང་། བར་དུ་ཇོ་བོ་རྗེ་དང་། ལོ་ཆེན་རིན་ཆེན་བཟང་པོའི་སྤྱན་སྔར་སེམས་བསྐྱེད་གསོན་གཤིན་ཆོས་བཞིན་སྒྲུབ་པའི་གང་ཟག་སྐྱོང་བར་ཞལ་གྱིས་བཞེས་བཞིན་ཕྱི་མའི་དུས་འདིར་མར་ཡུལ་གྱི་རྒྱལ་བློན་རྣམས་དགེ་བའི་རྩས་སུ་བདག་གི་བསྒྲུབ་པའི་གྲོགས་མོ་མཛའ་བཤེས་མ་རྡོ་རྗེ་ཆེན་མོ་སྡེ་འཁོར་གཡོག་དང་བཅས་པ་རྣམས་དང་། དེ་བཞིན་བདག་གི་དགེ་བའི་འཕྲིན་ལས་བྱེད་པ་པོ་མཐུ་ཆེན་དྲེགས་པའི་ཚོགས་སྤྱི་དང་བྱེ་བྲག་མ་ལུས་པ་དང་། གཞན་ཡང་ཁ་ཆེ་ཁྲི་བརྟན་གྱི་ཡུལ་དང་། ཁ་ཆེ་ཛ་ལནྡྷ་རིའི་ཕུག་ཡུལ་ག་དྷ་ཝར་ཞང་ཞུང་འབྲུ་ཤ་སོགས་ད་ལྟ་ཀླ་ཀློ་རྣམས་ཀྱི་བརྡས་ནང་ཁོམ་དང་ཆགས་སོར་འབོད་པའི་ཡུལ་གྱི་མངོན་ཤེས་དང་རྫུ་འཕྲུལ་དྲེགས་པའི་མཐུ་དང་ལྡན་པ་རྣམས་དང་། སྐྱེ་བོ་རྣམས་ཀྱི་མནའ་དང་བུག་གི་དབང་པོར་གཞན་གྱི་མ་བཅོལ་ཀྱང་ལས་ཀྱི་ཤུགས་ཀྱིས་བྱེད་པ་དཀར་པོ་སྤྱན་གཅིག་སོགས་སྲོག་བདག་དགུ་དང་། སེར་སྐྱོང་སོགས་སྲོག་བདག་སྟོང་སྡེའི་ཚོགས་རྣམས་ལེགས་བཟླུམ་ཆད་དོན་གྱི་ཡི་གེ་འདི་ཡི་རྒྱབ་རྫི་གཉེར་དམ་དུ་ཞུ་ཞིང་གསོལ་བ་ཡིན་པས་ཁྱེད་རྣམས་མཐུ་དང་སྟོབས་དང་ནུས་པ་རྩལ་ཤུགས་མ་ཆུང་བར་གང་ཞིག་ཆེད་དོན་འདི་ལ་མི་གནས་པ་བྱེད་པ་པོ་གང་ཡིན་པ་དེ་ལ་བཀའ་ཡི་ཆད་པ་དྲག་པོ་ཕོབས་ཤིག དེ་ཡང་ལྷ་ཆེན་པོའི་དམོད་པ་དང་་། དྲེགས་པ་དྲག་ཤུལ་ཅན་གྱི་ཆད་པ་དང་། རིགས་སྔགས་གྲུབ་པའི་རྦོད་གཏོང་རྣམས་ཀྱི་ནུས་མཐུ་ནི་མཚན་ཉིད་གསུམ་དང་ལྡན་པ་སྟེ། རྣམ་སྨིན་འཇིག་རྟེན་ཕྱི་མར་དུས་མི་བཏབ། ལས་ཀྱི་རྣམ་པར་སྨིན་པ་དབང་བཙན་ནོ་ཞེས་པའི་སྙད་མི་གདགས། རང་བཞིན་གྲུབ་པའི་སྐྱེ་འཆིར་ཁུང་མི་འབྱིན་པ་སྟེ། དེས་ན་འདིར་ཡང་ཡེ་ཤེས་དང་ལས་དང་འཇིག་རྟེན་རང་རྒྱུད་ཀྱི་གྲུབ་པར་བསམ་པ་ཙམ་གྱི་ལས་སྒྲུབ་པར་དབང་བ་སྔགས་ཀྱི་དམོད་པའི་མཚོན་ཆ་ཅན་དྲག་ཤུལ་ནུས་པའི་སྟོབས་དང་ལྡན་པ་ཁྱེད་རྣམས་ཀྱི་རྣལ་འབྱོར་པ་བདག་གི་འཕྲིན་ལས་སུ་བཅོལ་བའི་ལས་ནི་སེམས་ཅན་གྱི་བདེ་སྐྱིད་འཕེལ་བར་བྱེད་པ་དང་། ཆོས་བཞིན་གྱི་ཁྲིམས་བཙན་པར་འགྱུར་བ་དང་། སངས་རྒྱས་ཀྱི་བསྟན་པ་རིན་པོ་ཆེ་འཕེལ་རྒྱས་ནུབ་མེད་ཡུན་རིང་དུ་གནས་པར་བྱ་བའི་ཕྱིར་འབད་པས་བསྒྲུབ་པར་བགྱིས་པ་འདི་ཡི་གཉེར་མཛོད་ལ། ལེགས་སྤེལ་བཟང་བཟླུམ་གྱི་ཡི་གེ་འདི་ཡི་ཆད་མདོའི་དོན་ལས་ཆེ་ཕྲ་སུའི་འགལ་བ་བྱས་པ་ཡིན་ཡང་རུང་། དེ་ལ་བཀའ་ཡི་ཆད་པ་དྲག་པོ་ལོ་དང་ཟླ་བ་མི་འགྱང་བར་ཞག་དང་། ཟ་མའི་ཁོངས་སུ་ངེས་པར་འབེབ་པ་དང་། དེ་ཡང་མནའ་དང་ཆད་ལ་མི་རྩི་བ་གང་ཡིན་པ་དེ་ཡི་ལུས་སྲོག་ཕྲོལ་ཅིག ཀླད་ཁྲག་ཞོ་ལྟར་དཀྲུག་ཅིག སྙིང་ཕྱུང་ཤིག སྙིང་ཁྲག་དྲོན་མོ་ཞལ་དུ་གསོལ་ཤིག སྲོག་རྩ་ཆོད་ཅིག ཚེ་དང་བསོད་ནམས་སྣུབས་ཤིག དྲོད་དབུགས་ཁྲོལ་ཅིག མདངས་དང་རླུང་རྟ་ཉམས་པར་གྱིས་ཤིག ལས་ཀྱི་རླུང་དམར་དྲག་པོ་ལ་སྐྱོན་ཅིག གཤིན་རྗེའི་ལྕགས་མཁར་ནག་པོའི་སྒོ་དྲུང་དུ་སྐྱོལ་ཅིག འཆི་བདག་ལས་ཀྱི་གཤིན་རྗེའི་ལྟོ་བར་བྲུབ་ཅིག བདུན་བརྒྱུད་ཚུན་ཆད་ཀྱི་རིགས་རུས་སྡེ་ཆེན་མཐའ་དག་བརླག་པར་གྱིས་ཤིག མངའ་ཐང་ལོངས་སྤྱོད་མཐའ་དག་པ་མོ་སད་ཀྱིས་ཁྱེར་བ་བཞིན་དུ་ཆོམ་ཤིག གང་ཞིག་དཀོན་མཆོག་ཚད་ལ་བཞག་པའི་བྲོ་ཚལ་བ་བསླུ་བར་བྱས་ན་མཆོད་འོས་བསླུ་བ་དང་དམ་པའི་ཆོས་སྤོང་བ་ཉིད་ཡིན་པས། དེ་ཡི་རྣམ་པར་སྨིན་པ་ནི་མཚམས་མེད་ལྔ་ལས་ཀྱང་ལྕི་བའི་རྣམ་སྨིན་ཅན་ཏེ་དེས་ན་མནར་མེད་པའི་དམྱལ་བ་ཆེན་པོ་མཆོག་གི་བསྐལ་པའི་བར་དུ་སྡུག་བསྔལ་གྱི་ཚོར་བ་དྲག་པོ་མྱོང་བར་གདོན་མི་ཟ་བས་དེས་ན་འདི་དང་ཕྱི་མ་གཉིས་ཀའི་ཁེ་ཉེན་ལ་ལེགས་པར་བསམ་ནས་མནའ་དཔང་དེ་ལ་རྗེ་བློན་འབངས་བཅས་སུས་ཀྱང་འདའ་བར་མ་བྱེད་ཅིག །འདིར་བཀོད་པའི་བླང་དོར་ཚུལ་བཞིན་བཟུང་བར་བྱེད་པ་སུ་ཡང་རུང་སྟེ་དེ་ལ་དཀོན་མཆོག་རྩ་གསུམ་ཆོས་སྐྱོང་དམ་ཅན་ཡེ་ཤེས་སྤྱན་དང་ལྡན་པ་རྣམས་ཀྱི་དགྱེས་པའི་སྤྱན་རས་ཀྱི་བུ་ལྟར་རྟག་ཏུ་བཙའ་བར་མཛད་པ་དང་། མི་མ་ཡིན་མཐུ་ལྡན་དྲེགས་པ་རྣམས་ཀྱིས་ཡང་གྲོགས་ལྟར་བསྲུང་བ་ཡི། འདིར་ཚེ་དང་བསོད་ནམས་དཔལ་དང་ལོངས་སྤྱོད་སྙན་པ་དང་གྲགས་པ་སྟོབས་དང་གཟི་བརྗིད་དབང་ཐང་དང་ཕྱུག་གཡང་རིགས་རྒྱུད་དང་འཁོར་གཡོག་མཐའ་དག་གོང་དུ་འཕེལ་ཞིང་རབ་ཏུ་རྒྱས་པ་དང་། མི་དང་མི་མ་ཡིན་པ་ཀུན་གྱི་ཡིད་དུ་འོང་བ་དང་། ལྷ་འདྲེ་མི་གསུམ་དགའ་བས་འདུ་ཞིང་འཇིགས་པ་བརྒྱད་ཅུ་དྲག་ངེས་པར་ཞི་བ་དང་། དུས་མ་ཡིན་པའི་འཆི་བའི་འཇིགས་པ་མི་འབྱུང་ཞིང་། དུས་ཀྱི་འཆི་བར་གྱུར་པ་ན་ཡང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཛོད་སྤུ་ནས་བྱུང་བའི་འོད་ཟེར་གྱིས་རེག་སྟེ་འཆི་བའི་སྡུག་བསྔལ་དང་བར་དོའི་འཇིགས་སྐྲག་མེད་པར་སྐད་ཅིག་མ་དེར་མངོན་པར་དགའ་བ་ལྟ་བུ་སངས་རྒྱས་ཀྱི་ཞིང་གཞན་དང་གཞན་བདེ་བ་ཅན་གྱི་ཞིང་དུ་མེ་ཏོག་པདྨའི་སྦུབས་སུ་ཞུགས་ཏེ་སྐྱེ་བའི་ཉིང་མཚམས་སྦྱར་ནས་དེ་མ་ཐག་མེ་ཏོག་པདྨའི་སྡོང་པོ་ཁ་དབྱེ་ཞིང་སངས་རྒྱས་འོད་དཔག་མེད་པའི་ཞལ་མཐོང་ནས་གསུང་གི་གནང་བ་གནོད་པར་གྱུར་ཅིག བདེ་བ་ཅན་དུ་ཉིན་རེ་བཞིན་སངས་རྒྱས་དང་བྱང་ཆུབ་སེམས་དཔའ་ཇི་སྙེད་འབྱོན་པ་རྣམས་ཀྱི་ཞལ་མཇལ་ཞིང་གདམས་པ་ཐོབ་པ་དང་། སངས་རྒྱས་ཀྱི་ཞིང་གཞན་ཚད་མེད་པ་དུ་ཡང་འོད་དཔག་མེད་པའི་སྨོན་ལམ་གྱི་མཐུའི་ཡོངས་སུ་བསྒྲོད་དེ་སངས་རྒྱས་གྲངས་མེད་པའི་ཞལ་ལྟ་ཞིང་དམ་པའི་ཆོས་ཐོས་ཤིང་། ཚོགས་རྣམ་པ་གསུམ་ཡོངས་སུ་སྤེལ་ཞིང་རྒྱལ་བ་དང་རྒྱལ་བའི་སྲས་ཀྱི་ཐུ་བོ་རྣམས་ཀྱི་སྨོན་ལམ་མཆོག་ཅི་ཙམ་པ་དེ་ཐམས་ཅད་ལ་སྤྱོད་པའི་སྐལ་བ་མཆོག་དང་ལྡན་ཅིང་མཐའ་ཡས་པའི་སེམས་ཅན་ཐམས་ཅད་སྒྲོལ་བའི་དེད་དཔོན་བླ་ན་མེད་པའི་གྲུ་ཐར་པའི་བཤེས་གཉེན་ལྷ་དང་མིའི་སྟོན་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་རིང་པོ་མ་ཡིན་པར་མྱུར་བ་ཉིད་དུ་འགྲུབ་པར་གྱུར་ཅིག །དེ་ལྟར་མར་ཡུལ་ལྗོངས་རི་ཡི་རྒྱལ་པོ་ཀེ་ཏ་ར་ཡི་བྱ་འདབ་ནས་འབྲུ་ཤའི་ཡུལ་ལ་རེགས་ཀྱི་བར་དུ་སྐྱེ་དགུ་རྣམས་ཀྱི་བླང་དོར་གྱི་གནས་ལེགས་ཉེས་ཀྱི་གཏོང་ཆོས་བཞིན་ཉིད་དུ་འཛིན་པ་དཀོན་མཆོག་སྤྱི་དང་མགོན་པོ་ཚོགས་དང་དྲག་ཤུལ་དྲེགས་པ་ཅན་རྣམས་ལ་ཡང་གསོལ་བ་འདེབས་ཤིང་འཕྲིན་ལས་བཅོལ་བ་དེ་རྣམས་ཇི་བཞིན་ཉིད་དུ་དཀོན་མཆོག་རིན་པོ་ཆེ་རྣམ་པ་གསུམ་དང་བླ་མེད་བསྔགས་ཀྱི་དཀོན་མཆོག་རྩ་གསུམ་གྱི་བདེན་པའི་མཐུ་བྱིན་གྱིས་རླབས་པའི་ནུས་པས་དེ་ཁོ་ན་ཉིད་དུ་འགྲུབ་པ་དང་། ལྷག་དང་དྲང་སྲོང་བདེན་ཚིག་གྲུབ་པ་དང་། འབྱུང་པོ་ཚིག་གི་ནུས་པ་ཐོབ་པ་རྣམས་ཀྱི་ཡང་འགྲུབ་པའི་གྲོགས་མཛོད་ཅིག། གཞན་ཡང་བདག་ཉིད་ལས་ཀྱི་བྱ་བ་འདིར་ཞུགས་ཏེ་མཐོང་དང་ཐོས་པ་དང་དྲན་པ་དང་རེག་པ་དང་བགྲོད་པའི་བཤུལ་ལམ་དུ་སྲིན་འབུ་ཕྲ་མོ་ཉམས་པར་བྱས་པ་ཡང་སྟེ་རླུང་གི་རྫི་ཕྱོགས་ཀྱི་བྱབ་པའི་བཏང་སྙོམས་ཉིད་དུ་གནས་པའི་འགྲོ་བ་དང་བཅས་ཤིང་། དེ་ནི་ཞི་བ་དང་ཆགས་པའི་ཡུལ་དུ་གྱུར་པ་དང་། དེ་ལས་ཀྱང་ཁྲོ་བ་དང་འཁྲུག་པའི་ཡུལ་དུ་གྱུར་རྣམས་ཏེ་མདོར་ན་འབྲེལ་གྱུར་གྱི་འགྲོ་བ་མ་ལུས་ཤིང་ལུས་པ་མེད་པ་ཐམས་ཅད་ལ་བྱང་ཆུབ་སེམས་ཀྱི་ཡོངས་སུ་བཟུང་ཞིང་དགེ་བའི་ཚོགས་ཐུན་མོང་དུ་བསྔོས་པ་ཉིད་དང་། ཁྱད་པར་ས་ཡི་ཕྱོགས་འདིའི་འགྲོ་བ་རྣམས་ཀྱི་སེམས་སྡང་བ་དང་། འཁྲུག་པ་དང་། ཀུན་ཏུ་མི་བཟད་པས་དཀྲིས་ཏེ་གཡུལ་བཤམས་པ་དང་། འགྱེད་པ་དང་། འཐབ་པ་སོགས་ལས་ལྡོག་པར་བྱས་ཤིང་འགྲོ་བ་ཕལ་མོ་ཆེ་བྱང་ཆུབ་སེམས་ཀྱི་སྡོམ་པ་ལ་ཡང་དག་པར་བཀོད་ཅིང་། ཅི་ལྟར་འོས་པའི་བསླབ་པ་ལ་བརྒྱུད་པ་སོགས་དགེ་བའི་རྩ་བ་འདི་དག་བདག་གི་ཡོངས་སུ་མ་བཟུང་བར་གཞན་ལ་བསྔོ་བའི་མཐུ་དང་ནུས་པ་ལ་བརྟེན་ཏེ་འགྲོ་བ་དེ་ཀུན་ཚེ་འདིར་རང་རང་གི་ལེགས་པ་ཕུན་སུམ་ཚོགས་པའི་དཔལ་མ་ལུས་པ་རབ་ཏུ་རྒྱས་ནས་ཡོངས་སུ་སྤྱོད་པ་དང་། མི་བྲལ་བ་དང་། སྐྱེ་བ་ཕྱི་མ་ཡང་བདེ་བ་དང་དགེ་བ་དང་རྟག་ཏུ་འགྲོགས་ཤིང་ཐར་པ་བྱང་ཆུབ་མཆོག་གི་འབྲས་བུ་རིང་པོ་མ་ཡིན་པ་མྱུར་དུ་ཐོབ་པའི་རྒྱུ་རུ་སྨོན་ལམ་གྱིས་རྒྱས་བཏབ་པ་དེ་ཁོ་ན་ཉིད་དུ་འགྲུབ་པར་གྱུར་ཅིག ཁྱད་པར་དུ་བསིལ་ལྡན་ར་བའི་ལྗོངས་འདིར་རྣམ་འདྲེན་རྒྱལ་བ་གངས་ཅན་མགོན་པོ་སོགས་སྐྱེས་བུ་མཆོག་གྱུར་དམ་པ་རྣམས་སྐུ་ཚེ་འཚོ་བཞེས་ཞབས་པད་བརྟན་ཅིང་ཐུགས་ཀྱི་བཞེད་དགུ་ལྷུུན་གྱིས་གྲུབ་པ་དང་། རྒྱལ་བསྟན་རིས་སུ་མ་ཆད་པའི་དགེ་འདུན་གྱི་སྡེ་འཕེལ་ཞིང་དེ་རྣམས་ཐུགས་མཛའ་བཤེས་དམ་པ་ཆོས་ཀྱི་སྒྲ་རྒྱུན་མི་ཆད་པ་དང་། མངའ་འབངས་ཀྱི་སྐྱེ་རྒུ་ཁོལ་བུ་དང་ཉི་ཚེ་ཙམ་མ་ཡིན་པར་རྒྱལ་ཁམས་ཀུན་ནད་དང་མུག་མཚོན་ཆའི་བསྐལ་པ་ལས་ཐར་ཏེ་རྫོགས་ལྡན་བཀང་པོའི་དགའ་སྟོན་པ་རྟག་ཏུ་སྤྱོད་པའི་རྒྱུར་གྱུར་ཅིག །དེ་སྐད་རྣམ་པར་དགེ་བའི་རྒྱ་མཚོ་ལ། །རྒྱལ་བའི་ཐུགས་རྗེ་སུམ་རྩེན་བདག་པོ་ཡི། །གཞན་ཕན་བཀའ་ལུང་ནོར་རྒྱས་བསྲུབ་ཐག་གིས། །བདག་བློ་དག་པའི་གྱེན་ཕྱུར་ཡིད་འཛིན་གྱི། ། ༡ ལེགས་བསྲུབ་རྒྱལ་ཁམས་ལྷ་རྫིང་མཛེས་པའི་རྒྱན། །ཚིག་གི་ཟླ་བ་གཞོན་ནུ་འདི་ཤར་བས། །ཕྱོགས་ཀྱི་བུ་མོའི་རྣ་བ་མཛེས་པའི་རྒྱན། །ཨུཏྤལ་དཀར་པོའི་ཆུན་པོར་ཅིས་མི་འགྱུར། ། ༢ དེས་ན་ལེགས་སྤེལ་ཚིག་གི་འཕྲེང་བ་འདི་ཇི་བཞིན། །སྨོན་ཞིང་རེ་བར་བྱས་པའི་དོན་ཀུན་གྱི་མཐའི་མཐར། །འབྲི་རྒུད་མེད་པར་ཡོངས་འདུ་ཤིང་གི་རྩ་བ་བཞིན། །བསྐལ་པའི་བར་དུ་ཉམས་མེད་རབ་ཏུ་གནས་པར་ཤོག ། ༣ སྙིགས་དུས་འགྲོ་བ་བསོད་ནམས་ཆེས་ཆེར་དམན་ན་ཡང་། །རྒྱལ་བའི་ཐུགས་རྗེའི་འཇུག་པ་བསམ་གྱིས་མི་ཁྱབ་པས། །མི་ཟད་སྡུག་བསྔལ་ལས་རྒྱུན་སྐད་ཅིག་ཉིད་ལ་བཟློག །དགེ་ལེགས་ཕུན་ཚོགས་དཔལ་གྱི་དགའ་སྟོན་ལ་སྤྱོད་ཤོག ། ༤ ཁྱད་པར་སཱ་ལའི་ངང་མཚུངས་རྡུལ་དཀར་གྱིས་སྤྲས་ནོར་འཛིན་མེ་ལོང་ངོས། །སྐྱེ་དགུ་དགའ་བདེའི་དཔལ་སྤྱོད་མིག་ཡངས་འཛུམ་པའི་རྣམ་འགྱུར་བརྟན་ལྟར་གསལ། །དེ་ལ་མི་བདེ་ར་རིའི་གོས་མིན་དགའ་བོའི་སྲས་མོའི་བླ་གབ་བཞིན། །འཆི་མེད་དགའ་བའི་ཚལ་གནས་ཇི་བཞིན་དགའ་བའི་དཔལ་གྱིས་ཡོངས་འཚོ་ཤོག ། ༥ ཐོག་མ་མེད་པའི་དུས་ནས་རབ་བསགས་འདུ་དགེ་སིནྡྷི་སུ་ཏ་ཀ་ཡི་སྦྱོར་བ་དང་། །བདག་མེད་འདུས་མ་བྱས་པ་ཆོས་དབྱིངས་དོན་དམ་བདག་པོ་ཟབ་གསལ་ནོར་བུ་ཀཽསྟུ་བྷི། །གང་དག་དེ་མཐུས་འཁོར་བའི་རང་བཞིན་རོལ་ཧའི་ཕུང་པོ་མཐའ་དག་ས་ལེ་སྦྲམ་དུ་བྱས། །འགྲོ་ཚོགས་བདེ་བས་ཕོངས་རྣམས་ཡིད་མཛོད་ཕུན་ཚོགས་ནོར་བུ་ཡོངས་བཀང་བྱེད་པོར་བདག་གྲུབ་ཤོག །༦ གང་ཞིག་བདག་སེམས་ཆགས་པས་བཟུང་བའི་ཡུལ། །ཁྱད་པར་མི་བཟད་སྡང་པའི་ཡུལ་གྱུར་ལ། །བདག་གི་དུས་གསུམ་དགེ་བསྐྱེད་ཡོངས་བསྔོའི་མཐུསའི། །བདག་དང་ཚོམ་བུ་གཅིག་ཏུ་བྱང་ཆུབ་ཤོག ། ༧ ནམ་མཁའི་མཐར་ཐུག་ཅི་ཙམ་སེམས་ཅན་ཀུན། །མ་ལུས་བདག་གི་མཛའ་བོར་ཡོངས་བཟུང་ཞིང་། །སངས་རྒྱས་བྱང་འཕགས་ཕྲིན་ལས་མ་ལུས་པའི། །བྱེད་པོ་ཉིད་དུ་བདག་ཉིད་ཡོངས་གྲུབ་ཤོག ། ༨ ཞེས་ཡུལ་བསིལ་ལྡན་གངས་ཀྱི་ཕྲེང་བས་སྐོར་བའི་སྟོད་མངའ་རི་སྐོར་གསུམ་གྱི་གངས་རིའི་རྒྱལ་པོ་ཀེ་ཏ་ར་ཡི་ནུབ་ཕྱོགས་བོད་པ་རྣམས་ཀྱི་སེང་གེ་ཁ་འབབ་ཏུ་བརྗོད་པ་འཕགས་ཡུལ་ཀླུང་ཆེན་པོ་ནཱི་ལ་མི་ཆུ་མགོ་ལྗོངས་མར་ཡུལ་གཡའ་ཡི་སྐོར་བ་ཞེས་ཀསྨི་ར་ཡི་ཡུལ་དང་ཉེ་བར་འབྲེལ་བ་བོད་ཀྱི་ལ་དྭགས་དང་། སྟག་གཟིག་གི་ཀ་ར་ཏི་བོད་དུ་བསང་གྲགས་པ། ད་ལྟའི་དུས་སུ་འཛམ་གླིང་འཛིན་མའི་ལྷོ་ཡི་ཁྱོན་ཕྱོགས་གསུམ་རྒྱ་མཚོ་ལ་ཐུག་གི་བར་དུ་དབང་བསྒྱུར་བ་དབང་ཐང་དང་སྟོབས་ཀྱི་དཔུང་པས་ཆེས་ཆེར་དྲེགས་པ་ཏ་སིག་དུ་རུ་ཀ་ཡི་རྒྱལ་པོ་སྟོབས་ཀྱི་འཁོར་ལོས་བསྒྱུར་བ་བཱཀྵ་ཡི་མངའ་འོག་ཏུ་གནས་པ་ཡུལ་ལ་དྭགས་ཀྱི་མངའ་བདག་ལྷ་རིགས་བཙད་པོའི་གདུང་རྒྱལ་པོ་ཁྲི་ལ་བཞུགས་པ་ཆེ། ཟུར་དུ་གྱེས་པ་ཁུ་བོ་རྒྱལ་པོ་བཅས་ལེགས་སྤེལ་ཇི་བཞིན་པ་མར་ཡུལ་སྟོད་ཝམ་ལེའི་དགོན་དུང་གྱིས་ཤིང་དེ་ཡི་གྲོས་ཞིབ་མོར་བགྱིས་འོས་ཁ་ཤས་ནི་རྒྱལ་པོ་ཁ་དབོན་ཡུལ་ལྗོངས་དེ་ཡི་སེར་སྐྱ་མཆོག་དམན་མཐའ་དག་གི་འདོད་གདུང་ཆེན་པོ་དང་མི་མ་ཡིན་མཐུ་སྟོབས་ནུས་པ་ཅན་གྱིས་ཀྱང་བསྐུལ་བ་ཡི་འགྲོ་བར་མི་སྤྲོ་བཞིན་མར་ཡུལ་གྱི་མཐིལ་ཤེལ་གྱི་ཕོ་བྲང་བར་དུ་ཕྱིན་ཅིང་། དེར་རྒྱལ་པོ་རྣམས་ཀྱི་ལེགས་སྤེལ་ཞིབ་ཚང་བློན་བུ་དག་ལ་ཡང་སྤྲོད་འཇིགས་གསར་དགོས། ཧེ་ན་ཀུའི་རྒྱལ་པོ་ལ་ཡང་ཁོ་རང་གི་དབང་རིས་བདག་ཐོབ་གེས་ཉི་མའི་སྐབས་སུ་འཛགས་པ་གང་ཡིན་བཅོས་བསྒྱུར་མེད་པར་མུལ་ལྦེ་དང་ཟངས་དཀར་བཞིན་གཏན་འཇགས་ཀྱི་བརྟན་བརླིང་ཁ་ཆེ་དང་ལ་དྭགས་བར་གྱི་ཚོང་པའི་རྒྱུ་འགྲུལ་ལ་ཕན་པ་ལ་ཡིག་ཟངས་ཀྱི་བྱང་བུ་མཐའ་བཙན་བཅས་རྣམ་པར་དཀར་བ་དགེ་བའི་བགྱིད་པ་ཅི་ནུས་རྒྱལ་བ་མཆོག་གི་འཕྲིན་ལས་སུ་འབད་པར་བྱས་ཤིང་། ས་ཡི་ཕྱོགས་འདི་ཉིད་སྟོབས་འབྱོར་ཅི་ལྟར་ཡང་རང་སོ་རྒྱལ་རིགས་དྲ་མ་དང་པོ་ཉིད་ནས་གནས་ཤིང་། ཏ་སིག་རྒྱལ་པོས་ཀྱང་བུར་བཟུང་སྟེ་རཱ་ཛ་ཞེས་མིང་གི་གསང་མཐོན་པོར་སྡོད་པ་ལ་རྟེན་གངས་ཅན་དབུས་འགྱུར་དབྱིངས་ནས་བསྔགས་པའི་ཕྲིན་ལས་པར་གྱུར་ཀྱང་ཕན་ཚུན་ཀུན་ཏུ་འཇམ་དེས་གཟོས་ཤིང་རླིང་བས་ལེགས་ཟླུམ་ཆད་པོའི་ཡི་གེ་རྣམས་བྲིས་རིམ་བཞིན་སོ་སོར་ཞིབ་ཏིག་བྱས་ཤིང་མཐར་ཐུག་མདོ་དོན་མནའ་རྩིགས་བསྐོར་ཆུ་བྱ་སྣྲོན་ཟླའི་ཚེས་ཉི་ཤུ་བརྒྱད་ལ་བཀླགས། དེ་ལ་ཕན་ཚུན་གྱི་ཡིད་མཐུན་པར་བྱས་ནས་རྒྱབ་ཡིག་ཆུ་སྟོད་ཟླ་བའི་ཚེས་གཅིག་ལ་བླང་ནས་གཉིས་ལ་གྲུབ་པར་བྱས། འདའ་མེད་བྲོ་བོ་བ་དངོས་གཞི་ཆུ་སྟོད་ཟླ་བའི་ཚེས་དྲུག་ལ་དཔལ་གྱི་གཏོར་མ་བཤམ་ནག་པོ་ལྕམ་དྲལ་གྱི་སྐུ་བརྙན་བྱིན་ལྡན་ཡུལ་དེ་ཡི་རྟེན་དུ་བཞག་པ་དག་སྤྱན་དྲངས་ནས་བཀོད། དགོན་ཁག་སོ་སོ་རང་ལུགས་བསྲུང་མའི་བྲིས་སྐུ། བདག་གི་ཡང་ཅི་ནུས་པའི་བདེན་སྟོབས་བརྗོད་ནས་རྩིགས་ཀྱི་ཡི་གེ་བསྒྲགས་ཤིང་། རྒྱལ་པོ་བློན་འབངས་དང་བཅས་པའི་ཚོགས་སྤྱི་ཡི་སྤྱི་བོར་ཆོས་སྐྱོང་གི་སྐུ་བརྙན་དང་། དཔལ་གྱི་གཏོར་མ་བཀོད་དེ་གོང་གསལ་གྱི་བྲོ་ཚིག་རང་རང་གི་མནའ་དམ་ལེགས་པར་བླང་བ་ཡིན་ལ། དེས་ན་ཕན་ཚུན་ཐམས་ཅད་ཀྱང་ཡིད་ཆེས་ཡིད་བདེའི་གནས་སུ་འཁོད་སོང་ལ། དེ་ཡི་ཉི་མ་ཕྱི་མ་ཚེས་བདུན་ལ་རྒྱུད་རྩིས་ལུགས་ཀྱི་ཉི་མ་མེ་བཞིའི་འགྲུབ་སྦྱོར་ལ་སྨོན་ལམ་ཚིགས་བཅད་བཟང་པོས་མཐའ་བསྐང་ནས་རྒྱུད་རྩིས་པའི་ཚེས་བཅུ་གཅིག་གི་སྔ་ཆར་རྒྱལ་པོ་ཕན་ཚུན་གྱི་སྣ་ཆེན་ཞང་བློན་རྒན་གཙོ་དགོན་སྡེའི་བླ་མ་ལས་སྣེ་བཅས་ཚངས་པའི་དབུས་སུ་ལེགས་པར་བཀླགས་ཏེ་ལེགས་སྤེལ་བྱ་བ་རྗེས་གཙང་ཐག་ཆོད་བཀྲ་ཤིས་དགེ་བའི་འཁོར་ལོ་བཟང་པོར་གྲུབ་པ་དེ་དུས་ཇི་སྲིད་རྟག་ཏུ་གནས་པར་གྱུར་ཅིག །རྒྱལ་ཀུན་ཐུགས་ཀྱི་གོ་འབྱེད་དམིགས་མེད་བརྩེ་བློའི་སྤྲིུན་སྤུང་ཡོངས་རྒྱས་ཤིང་། །རྒྱལ་གྱུར་སྨོན་ལམ་བཟང་འཇུག་འགྲོ་ཕན་དོན་བསྒྲུབ་ཆུ་ཁུར་མྱུ་གུའི་རྒྱུན། །རྒྱལ་ཞིང་སྐལ་ལྡན་བཟང་པོའི་འདུན་སར་ཕུན་ཚོགས་དཔལ་སྙེ་ཡོངས་རྒྱས་བྱེད། །རྒྱལ་བ་རྒྱ་མཚོའི་མངའ་བདག་ཐར་འབྲས་ཡོངས་སྟེར་གང་གི་བཀའ་དྲིན་གྱིས། །རྒྱལ་ཁམས་དགེ་ལེགས་བྱེད་པའི་དཔལ་གྱུར་གང་། །རྣམ་པར་རིག་པའི་བློ་གྲོས་མ་སྨད་པས། །ལེགས་བྱས་འཛིན་མའི་ཁྱོན་ཀུན་བདེ་བའི་བཙས། །དམ་པ་གང་འདི་ཡུན་ནས་ཡུན་གནས་ཤོག །སརྦ་མངྒ་ལཾ་བྷ་ཝནྟུ་སྭཱ་ཧཱ། དགེའོ། །དགེའོ།། །།