༈ རྒྱལ་དབང་སྐལ་བཟང་རྒྱ་མཚོར་ཕུལ་བའི་ཆབ་ཤོག །
༈ ལྷ་བཅས་སྐྱེ་རྒུ་ཡོངས་ཀྱི་གཙུག་གི་ནོར་བུས་མཆོད་པའི་ཡུལ་འཇིག་རྟེན་མགོན་པོ་ངུར་སྨྲིག་གར་གྱི་རོལ་པ་ཀུན་གཟིགས་བླ་མ་ཆེན་པོའི་ཞབས་སྟེགས་ཆུ་སྐྱེས་རྣམ་པར་བཞད་པའི་ངོགས་སུ། གུས་པས་ཞུ་གསོལ།
གདོས་ནས་བྲི་གང་ལས་འདས་དང་པོའི་མགོན་པོ་ཉིད་དུ་རྒྱལ་བ་ཡོངས་ཀྱི་སྤྱི་མེས་སུ་བརྙེས་ཤིང་མཁའ་ཁྱབ་འགྲོ་ལ་དམིགས་པ་མེད་པའི་སྙིང་རྗེས་རྣམ་ཀུན་མཆོག་དང་ལྡན་པའི་འོད་གསལ་གྱི་རང་མདངས་རྣམ་པ་ཐམས་ཅད་པ་འགྲོ་བ་རྣམས་ཀྱི་དཔལ་དང་མགོན་དུ་གང་ལ་གང་འདུལ་གྱི་སྒྱུ་འཕྲུལ་གྱི་རོལ་པ་ཚད་བཟུང་ལས་འདས་བཞིན་སངས་རྒྱས་ཉིད་དང་། དེའི་སྲས་དང་སློབ་མའི་ཚུལ་དང་། དེ་བཞིན་འཁོར་ལོས་བསྒྱུར་བའི་རྒྱལ་པོ་དང་། སྟོབས་ཀྱི་རྒྱལ་པོ་བློན་པོ་ཁྱིམ་བདག་དང་། ཡིད་བཞིན་གྱི་ནོར་བུ་དང་། དཔག་བསམ་གྱི་ཤིང་སོགས་རྟེན་དང་བརྟེན་པ་སྣ་ཚོགས་པའི་གཟུགས་ཀྱི་སེམས་ཅན་གྱི་རེ་བ་བཞིན་དུ་བསྐོང་བར་བྱེད་ཅིང་མཐར་ཐུག་ཐར་པ་དང་ཐམས་ཅད་མཁྱེན་པའི་ལམ་ལ་ཡང་དག་པར་སྦྱོར་ཅིང་གནས་སྐབས་སུ་ཕུན་སུམ་ཚོགས་པའི་དཔལ་མ་ལུས་ཤིང་ལུས་པ་མེད་པ་སྟེར་བའི་དེད་དཔོན་དམ་པར་གྱུར་པ་རྒྱལ་བ་རྣམས་ཀྱི་འཕྲིན་ལས་ཀྱི་རང་གཟུགས་ཉིད་དུ་ངེས་བཞིན་དེང་དུས་ཐུབ་བསྟན་ལྔ་བདོའི་འགྲོ་བ་རྣམས་ལ་ཕན་པ་དང་བདེ་བ་དང་དགེ་ལེགས་མཐའ་དག་རྩ་བའི་སླད་དུ། རྒྱལ་བ་ཀུན་གྱི་མཁྱེན་བརྩེ་ནུས་པའི་རང་གཟུགས་གསར་དུ་བདོ་བ་ཡི་ངུར་སྨྲིག་གར་གྱི་རོལ་པ་མཚན་དཔེའི་སྐུ་ཉིན་བྱེད་འགུམ་གྱི་སྣང་བ་ཡང་ཟིལ་གྱིས་གནོན་པའི་བདག་ཉིད་ཅན་འཇིགས་པ་ཐམས་ཅད་དང་བྲལ་བས་ཕྱོགས་ཐམས་ཅད་ལས་རྣམ་པར་རྒྱལ་བ་འཕྲོག་བྱེད་དབང་པོའི་ཁྲི་ལ་ལྷན་ནེ་ལྷང་ངེར་འཚོ་ཞིང་བཞེས་ཏེ་བཞུགས་པའི་སྲིད་ན་ཟླ་བོས་དབེན་པ་ཉིད་དུ་གྱུར།
འདིར་གནས་ཕྲན་བུ་ལས་ཀྱང་ཕྲན་བུར་གྱུར་པ་བྱ་བྲལ་དང་། རི་དྲ་པ་ཡང་སྐྱབས་གྱུར་དཔལ་མགོན་དམ་པ་རྣམས་ཀྱི་ཐུགས་རྗེ་ལ་བརྟེན་འཚོ་བ་མ་བརྙིལ་ཞིང་དགེ་བའི་འདུན་པ་ཉམས་མེད་དམ་པའི་རྣམ་ཐར་ལ་སློབ་པའི་མོས་པ་ཅི་ནུས་འབད་བཞིན་ད་ལྟ་ལ་སྟོད་རྒྱལ་གྱི་ཤྲཱིའི་འདབས་སུ་བགྲོད་པའི་གནས་སྐབས་སུ་མཆིས།
ཆེད་དུ་གསོལ་འོས། རྒྱལ་བ་རྣམས་ནི་ཡང་དག་པའི་དོན་དུ་སྐྱེ་འཆིའི་སྤྲོས་པ་མཐའ་དག་བྲལ་བ་ཟབ་ཞི་སྤྲོས་བྲལ་བདེ་བ་ཆེན་པོ་རྟག་བརྟན་གཡུང་དྲུང་གི་ངོ་བོ་ལ་འཕོ་འགྱུར་བགྲེས་རྒུད་ཐམས་ཅད་ལས་འདས་པ་མཁས་ལྟར་གདལ་བའི་སྐུ་ཅན་ལ་བསྐུལ་བ་དང་གསོལ་གདབ་ཀྱི་བྱ་བར་མ་དམིགས་ཀྱང་འགྲོ་བའི་དོན་དུ་ཤར་བའི་གཟུགས་ཀྱི་སྐུ་ནི་གདུལ་བྱ་རྣམས་སྐྱོ་བ་བསྐྱེད་པ་དང་། སྤྲོ་བསྲིང་བའི་སླད་དུ་གདལ་བྱ་ཉིད་དང་མཚུངས་པར་སྐྱེ་འཆིའི་སྤྲོས་པ་ཅིར་ཡང་སྟོན་ཞིང་བསྐུལ་བ་དང་གསོལ་གདབ་ཚུལ་ལ་ཡང་ལྟོས་པར་མཛད་ན། དེང་དུས་སྙིགས་མ་ལྔ་བདོ་བའི་འགྲོ་བ་སྤྱི་དང་བྱེ་བྲག་གངས་ཅན་གྱི་གདུལ་བྱ་ཉོན་མོངས་ཤིང་ཉམས་ཐག་པ་བདག་ཅག་རྣམས་ཀྱི་དཔལ་དང་མགོན་དང་དཔུང་དང་གྲུ་གཟིངས་དང་བདེ་བའི་གླིང་དམ་པར་གངས་ཅན་འགྲོ་བ་ཡོངས་ཀྱི་ལྷ་ཡི་ལྷ་འཇིག་རྟེན་གསུམ་གྱི་མགོན་པོ་ལག་ན་པདྨོ་ཅན་གང་ཁྱེད་ཀྱི་ཞབས་པད་བསྐལ་པ་རྒྱ་མཚོའི་བར་དུ་བརྟན་པར་སྙིང་ནས་གསོལ་བ་འདེབས་པར་དངོས་པོའི་ཡོ་བྱད་ནི་པདྨའི་སྣལ་མའམ་ཀུ་ཤའི་རྩ་ལྟར་ཤིན་ཏུ་ནས་ཀྱང་ཕྲ་བའི་རང་བཞིན་དུ་གྱུར་རུང་ལྷག་པའི་བསམ་པ་ནི་ད་ལྟའི་གནས་སྐབས་འདི་ཉིད་ཁོ་ན་ཙམ་མ་ཡིན་པ་ཡུན་རིང་མོ་ཉིདནས་དུང་དང་ཟླ་བ་ཀུ་མུད་པད་རྩ་ལྟར་གཅིག་ཏུ་དཀར་བའི་བློས་ལོ་དུས་སུ་སྐུའི་གསལ་རྐྱེན་ཞི་བའི་རྟེན་འབྲེལ་བསྒྲིག་དགིས་མཆོག་ཏུ་གལ་ཆེ་བར་གསལ་སྣང་དུ་འཆར་བཞིན་རྟེན་འབྲེལ་བསྒྲིགས་ཚུལ་མཚོན་བྱེད་ཆེད་དུ་བསྔགས་ཏེ་ཚིགས་སུ་བཅད་པ་བཀྲ་ཤིས་པའི་གྲངས་ལྡན་དང་རྟེན་འབྲེལ་གྱི་ཡོ་བྱད་ཕྲན་བུ་བཅས་ཕུལ་བ་འདི་བཞིན་པར་ཐུགས་རྗེ་བརྩེ་བ་ཆེན་པོའི་སྤྱན་རས་ཀྱི་བྱབ་ཅིང་།
ཞབས་པད་བསྐལ་པ་རྒྱ་མཚོའི་བར་དུ་བརྟན་པར་དགོངས་པ་གཏད་པ་མཁྱེན་མཁྱེན་མཁྱེན་བརྒྱ་ཕྲག་དུ་མའི་གསོལ་བ་འདེབས་པ་རེ་འབྲས་དོན་ལྡན་དུ་མཛད་པ་ན་རིས་སུ་མ་ཆད་པའི་འགྲོ་བ་འཕགས་ཆེན་རྣམས་ཀྱི་ཐུགས་རྗེ་ཆེན་པོའི་དོ་རར་ཡེ་ནས་ཆུབ་བཞིན་གནསཔ་ཡིན་མོད་ཀྱང་རང་ཉིད་བྱིས་པའི་བློས་འདོད་གདུང་གིས་བདག་ཅག་ལྟོས་པར་བཅས་པ་ཀུན་ཐུགས་རྗེ་ཆེན་པོའི་དཀྱིལ་འཁོར་ནས་ལྷག་པར་མི་བོར་བར་གསོལ་བ་འདེབས་པ་ཡང་ཆོས་དབྱིངས་ཚོམ་འཁྲུངས་མེད་པའི་ཀློང་དུ་འཇུག་པ་མཁྱེན་མཁྱེན་མཁྱེན། ཞེས་བརྩེ་ཆེན་ཐུགས་རྗེ་ཆེན་པོའི་རང་བཞིན་དཀྱུས་རིང་སྤྱན་རས་གཡོ་བར་བྱེད་པའི་རྟེན་ལྷ་ཡི་རེག་བྱ་སྲིད་དུ་རིངས་བས་བཅིངས་ཏེ་ཨངྐི་ར་ཡི་ལོ་ཞལ་གསར་དུ་འཆར་ཉེ་བ་མགོ་ཟླའི་དཀར་ཕྱོགས་ཀྱི་རྒྱལ་བ་དང་པོ་ལ་རྒྱལ་གྱི་རྩིབ་རིའི་འདབ་ནས་ཕུལ་བའི་ཞུ་ཡིག་སརྦ་མངྒ་ལཾ།