༈ གོང་ཞབས་སུ་ཆུ་བྱ་མར་ཡུལ་ཧེ་མི་ནས་ཕུལ་བ།

རྒྱལ་བ་ཐམས་ཅད་ཀྱི་ཐུགས་རྗེའི་རང་གཟུགས་གངས་རིའི་ཁྲོད་ཀྱི་ལྷ་རྣམས་ཀྱི་ལྷ་གྲུ་འཛིན་བདག་པོ་འཇིག་རྟེན་དབང་ཕྱུག་མཆོག་གི་ཞབས་སྟེགས་ཆུ་སྐྱེས་ཀྱི་གེ་སར་རྙོག་པ་མེད་པའི་ངོགས་སུ།

དྭངས་པས་ཞུ་བ། གདོད་ནས་རྒྱལ་བ་ཉིད་དུ་གྱུར་ཀྱང་སྲིད་དང་ཞི་བའི་མཐའ་གཉིས་སྤངས་པའི་གཞན་དོན་ཁོ་ནར་བྱང་ཆུབ་ཆེན་པོའི་བསྒྲུབ་པ་ཉིད་ཀྱི་མཁའ་ཁྱབ་རྒྱལ་བའི་འཕྲིན་ལས་རྟག་པར་རོལ་ཞིང་ཐུབ་བསྟན་སྙིགས་མ་ལྔ་བདོའི་དུས་འདིར་རྒྱལ་བ་གཞན་ལས་ལྷག་པའི་ཐུགས་བསྐྱེད་རྨད་དུ་བྱུང་བས་འདུས་བྱས་པའི་མཚན་དཔེས་བརྒྱན་པའི་སྐུ་གངས་ཅན་ས་ཡི་ཐིག་ལེ་མི་འཇིགས་སེང་གེའི་ཁྲིར་ཞབས་པད་འཚོ་གཞེས་རྡོ་རྗེའི་རི་བོ་ལྟར་བརྟན་པ་ཡངས་པའི་རྒྱལ་ཁམས་སྤྱི་དང་བྱེ་བྲག་པར་བཀའ་དྲིན་གྱི་ཞོ་ཤ་ཆེན་པོས་བྱབ། འདིར་གནས་ཕྲན་གྱུར་རིག་པ་འཛིན་པ་རྒྱལ་ཁམས་པ་ཡང་འབྱུང་འདུས་ཀྱི་ཕུང་པོ་མི་སྙོམས་པས་བརྩོན་ཞིང་རྣམ་གཡེང་གི་བརླབ་དྲག་ཏུ་འཁྲུག་ཀྱང་ལྷག་བསམ་གྱི་གྲུ་གཟིངས་བཟང་པོ་བརྩོན་པའི་སྐྱ་བ་པ་བརྟེན་ཡིད་ཀྱི་ངལ་བསོ་དགེ་བའི་སྟེགས་བུར་གཞོལ་བ་ཉིད་དུ་གནས་ལ།

སྔ་སོར་སྙན་དབང་རིན་པོ་ཆེར་གསོལ་ལྟར་ཁུ་དབོན་ལབ་ཆིང་ཝམ་མེར་ལེགས་པའི་ལྟས་བྱུང་བཞིན་དེར་ལབ་ཆིང་བཟླུམ་ལེགས་པར་ཞིབ་ཚགས་ཕྲ་མོ་བྱེད་རྒྱུ་ཙམ་ལས་ཟླ་མཚམས་ལ་གྲུབ་པར་བྱས་ཤིང་། གཞུང་ཚག་ཀྱང་དེར་གྲུབ་ན་སྙམ་ཞིང་། ལ་དྭགས་མཐིལ་དུ་འགྲོ་འདོད་ཡེ་ནས་མ་ཤར་ཡང་རྒྱལ་པོ་ཁུ་དབོན་གྱི་ནན་བསྐྱེད་དང་ལེགས་བཟླུམ་རྗེས་ཀྱི་བྱ་བ་ཡང་གཙོ་རྒན་དམངས་སྤྱིའི་དབུས་སུ་བགྱིས་ན་སླད་མར་ཀླན་ཀ་བྱར་མེད་ཅིང་མཐའ་བཙན་པར་རེ་ཙམ་དང་། ལ་དྭགས་རྒྱལ་པོ་ཡང་ཁྱེའུ་བཙས་རན་གྱི་མཐིལ་དུ་སྤྱོད་པར་རིང་ཞིང་། མཐའ་འོ་མ་སོགས་རྒྱལ་སྲས་བཞུགས་པ་ཁོ་ནས་ཐག་ཆོད་པ་འདུག་ན་ཡང་། མུལ་ལྦེ་རྒྱལ་བློན་ནས་རྒྱལ་མོ་མ་བཞུགས་པར་ནེམ་ནུར་མཛད་ཀྱི་འདུག་གཤིས་ལ་དྭགས་མཐིལ་དུ་འགྲོ་བའི་སྒོ་དོད། དེ་ཚེ་ལ་དྭགས་རྒྱལ་པོ་ཡབ་ཡུམ་རྣམས་ཧོར་ཟླ་ལྔ་པའི་ཚེས་བདུན་ལ་ལ་དྭགས་སུ་བསྐྱོད་སོང་ཞིང་། ངེད་ནི་ལ་དྭགས་མཐིལ་དུ་འགྲོ་བར་ལྟས་མ་ཆུབ་པའི་ཀེག་སེལ་དུ་དམིགས་གཏོར་ཆེན་སོགས་ཡང་ཡང་གནས་ནས་མུལ་ལྦེ་རྒྱལ་པོ་དང་ལྷན་དུ་ཚེས་༡༡ལ་ལམ་དུ་ཞུགས་ཝམ་ལེའུ་ཆུ་ཤིན་ཏུ་ལྕི་བས་ལམ་བར་དུ་བགྲོད་མི་བཟོད་ཅིང་།

འཕགས་ཡུལ་ཛོ་ཀིའི་མཁས་པ་ཁ་ཅིག་ནས་ལ་དྭགས་ལྗོངས་འདི་གནས་ཉི་ཤུ་རྩ་བཞིའི་མཐེ་བོང་མ་རུའི་གནས་སུ་འདོད་པ། དོན་ལ་ཡང་གནས་ངེས་སུ་སྣང་ལ། ད་ལྟ་ཡང་ལ་དྭགས་ཀྱི་ཡུལ་མཐའ་གརྴད་རི་འཕགས་དང་ཉེ་བར་གཙུག་ལག་ཁང་རྒྱ་གར་གྱི་བཟོ་བོས་བཅོས་པའི་དབུས་སུ་རྡོ་ཡི་ལིང་ཀ་མཐོ་བོང་གི་གཟུགས་ཅན་ལ་མཐེ་བོང་མ་ཏུར་བརྗོད་པ་དང་། ལ་དྭགས་ཀྱི་ཕྱོགས་འདིར་སྤྱིར་ཤིང་གལ་པ་དང་རྩ་སོགས་ཆེས་དཀོན་ཞིང་ལྷག་ཏུ་གརྴད་དང་ཉེ་བར་རོང་ཞེས་པའི་ས་ཁྱོན་དུ་ནི་གཤག་མ་དང་བྱེ་མ་དང་། རྫ་དང་། ཟངས་ཀྱི་རི་བོ་ལྟ་བུའི་བྲག་རིའི་ཕུང་པོ་འབའ་ཞིག་ལས་དབྱར་དགུན་གྱི་དབྱེ་བ་ཡང་ཆུ་ལ་ཆབ་རོམ་ཡོད་མེད་ཙམ་ལས་གཞན་མི་རྟོག་པ་མ་རུའི་མཚན་ཉིད་ཚང་བའི་ལམ་འཕྲང་དེ་དག་ངལ་དུབ་དང་སྦྱངས་གཅོད་ཆེན་པོས་ཡོངས་སུ་བགྲོད་ནས་ལ་དྭགས་མཐིལ་གྱི་ཡུལ་མགོ་ཧེ་མི་ལས་མར་མི་བགྲོད་པའི་རྩིས་བྱས་ཀྱང་།

ཡུལ་བདག་མ་དེའི་ཆོ་འཕྲུལ་གྱི་ངེད་དང་པོ་ལ་དྭགས་མཐིལ་ཤེལ་ཁོ་ནར་བགྲོད་རྒྱུའི་ཞེས་པའི་གཏམ་འཆོལ་ལ་བརྟེན། རྒྱལ་སྲས་རིན་པོ་ཆེ་དང་རྒྱལ་མོ་བཅས་དེར་བསྐྱོད་གྲུབ་འདུག་གཤིས་ཚེས་བཅུ་གཉིས་ལ་ངེས་ཀྱང་དེར་སོན་པར་བྱས། ཞག་ཤས་ཀྱི་རིང་ལུས་ཤིན་ཏུ་མ་བདེ་བས་བགྱིད་དགོས་རྣམས་ཇི་བཞིན་མ་ལོང་སེམས་བལ་པོར་འགྲོ་བའི་རིང་ཁྱད་ཆེས་ཆེ་བ་བཅས་ཉིན་རེ་བཞིན་ལེགས་བཟླུམ་གྱི་མཐའ་ཚགས་དགོས་པ་རྣམས་བགྱིས་ཀྱང་ལབ་རྒྱུ་དང་གླེང་རྒྱུ་ལྷག་པར་འཕེལ་བ་ཡི་ཟླ་བ་གཅིག་ལྷག་གི་བར་དུ་འཕྲོ་ཞིབ་ཚགས་དེ་སྐྱོང་དགོས་བྱུང་། སྔར་ལེགས་བཟླུམ་དངོས་གཞི་ཝཾ་ལེར་ལེགས་ལྟས་བྱུང་བ་དེ་ལ་ཡང་ངེས་ཤེས་ཁྱད་པར་ཅན་སྐྱེས་འགོར་ཆེན་པོའི་མཐར་ཧོར་ཟླ་དྲུག་པའི་ཡར་ཚེས་བདུན་ལ་ཐག་གཙང་མ་ཆོད་དེ་བཅུ་གཅིག་ལ་བཅད་ཡིག་བཀླགས་བཅུ་གཉིས་ལ་ལ་དྭགས་སྟོད་པའི་བློན་པོ་དང་། རང་རེའི་གྲ་ངོ་བཅས་སླེར་བརྫང་ནས་བློན་བུ་སྤུན་གྱི་ནང་རྫས་རགས་རིམ་སྤྲད་པ་དང་། ཁ་ཆེའི་མི་སྣ་ཚང་མ་འདུས་པའི་དབུས་སུ་ཁ་ཆེ་དང་། ལ་དྭགས་བར་གྱི་ལམ་བདེ་བའི་ཟངས་ཡིག་བཀླགས་ནས་ཁོ་རང་ཚོ་ལ་རྩིས་སྤྲད།

དེ་སྐབས་ཁ་ཆེའི་ཁུར་པ་གྱད་ཀྱི་རིགས་ཞིག་ཀྱང་དེར་གསར་དུ་སོན་ནས་ཁ་ཆེའི་ཡུལ་ཁམས་སུ་ད་ལྟ་བདེ་འཇགས་ཡོད་ཚུལ་དང་། འདི་ལོ་མ་ཁའི་ཡུལ་ནས་ཀླ་ཀློའི་བཙུན་པ་དཪྦྷེ་ཤ་ཞིག་གི་གླང་རྐང་པ་བརྒྱད་པ་ཞིག་དང་། གླང་ལྷག་པའི་དངོས་སུ་ཤ་ཡི་རལ་པ་ཁྲུ་གང་ལྷག་ཙམ་ཡོད་པ་དག་ཁྲིད་ནས་ཁ་ཆེའི་གྲོང་ཡུལ་བསྐོར་བ་སོགས་སྔོན་ཆད་མེད་པའི་མི་དང་བྱོལ་སོང་གི་རྣམ་འགྱུར་གནས་སྐབས་ཚར་བ་ལྟར་ལ་དོན་འཚུབ་ཆ་ཆེན་པོར་བྲམ་ཟེ་སོགས་རྒན་པོ་ཉམས་ཅན་རྣམས་ཀྱི་གླེང་བ་དང་པཀྵ་ནས་བློན་པོ་ཆེ་ཁ་ཞིག་ལ་སྐྱོན་ཕབས་ཏེ་དཔུང་ཁྲི་ཕྲན་ལྔ་ཙམ་ཞིག་གསོད་པར་བྱས་ཀྱང་བློན་པོ་ངོ་ཐོག་ཡུལ་མཐའ་རྒྱ་མཚོའི་དོ་ཞིག་ཏུ་འཇུག་པ་ཡིན་འདུག་ཞེས་པ་དང་། ནུབ་ཕྱོགས་བྷ་ལག་ཁ་དང་། བྷང་ཁ་སོགས་མ་འོངས་བོད་དུ་ངེས་པར་འཕྱོ་བར་ལུང་བསྟན་པའི་སྟོད་ཧོར་གྱི་སྡེ་དེ་དག་རྣམས་ཀྱང་ད་ལྟ་འཐབ་འཁྲུག་གི་གཡུལ་བཤམས་ཀྱི་སྦྱོར་བ་ལ་གནས་པ་སོགས་ཀྱི་གནས་ཚུལ་ཡོད་འདུག ངེད་ཀྱང་ཚེས་བཅུ་གསུམ་ལ་རྒྱལ་པོ་ཡས་མས་ནས་ཐོན་རྫས་ཀྱི་རྣམ་པར་གསེར་དངུལ་གྱི་སྣོད་ཉེ་བར་བཀང་ཞིང་ཁ་ཆེའི་གུར་གུམ་མའི་གེ་སར་མཚར་དུ་མངར་བ་སོགས་ཅི་ལྟར་འབྱོར་བའི་ཡོ་བྱད་བསྟབ་ཀྱང་སེ་བ་གང་ངམ་སྐར་མ་གཅིག་གམ་འཇག་མ་ཙམ་ཡང་བདག་གིར་མ་བྱས་ཤིང་མུལ་ལྦེ་རྒྱལ་པོའི་མགྱོགས་འཕྱང་ལ་བརྟེན་དེ་ལམ་བར་གྲོང་ཚན་རྣམས་ལ་ཡིག་དྲུག་གི་དགེ་བསྐུལ་བཅས་ཧེ་མིར་སོན། དེའི་ཉི་མ་ཕྱི་མར་སྐྱེ་བོ་ཁྲི་ཕྲག་ཉེ་བ་ལ་དབུ་མ་ལུགས་ཀྱི་བྱང་སྡོམ་དང་། ཐུགས་རྗེ་ཆེན་པོའི་རྗེས་གནང་བསྒོམ་ལུང་ཕོག དེ་ནས་འབུ་སྲིན་ནུར་འགྲོས་ཀྱི་བལ་ཡུལ་དུ་སྤྱོད་པའི་ལམ་ཞུགས་སུ་གནས།

འདི་ཕྱོགས་ཀྱི་མི་མ་ཡིན་ནག་པོའི་ཕྱོགས་རྣམས་སྔར་ལས་ཅུང་ཟད་ཞི་ཡང་གཏིང་ནས་ད་དུང་འཚུར་ངེས་ལྡོག་པར་མ་མཐོང་བས་ལོ་ཤས་བསྟན་རིམ་ལ་འབད་དགོས་དང་། བསྟན་རིམ་ལ་ཚུལ་བཞིན་འབད་ན་ལོ་ཤས་བདེ་བ་སྙམ་བྱེད་པས་དེ་དོན་བཞིན་གསང་པོར་སྨྲས་ཀྱང་ཉན་པར་ནི་དཀའ་བར་སེམས་མོད། ཕྱོགས་འདིའི་ཁུ་དབོན་སོགས་ཚང་མ་བདེ་འཇགས་ཀྱི་རྒྱུ་རྒྱལ་དབང་ཐམས་ཅད་མཁྱེན་པའི་བཀའ་ཡི་གནང་བའི་མཐུ་ལས་བྱུང་བ་ཡིན་ཡང་ཡང་སྨྲས་བཞིན་མར་ཡུལ་རྗེ་བོའི་ཐུགས་སུ་ཡང་ཤིན་ཏུ་འཕྲོད་པས་དེ་ཡིན་བསྟན་པ་ལ་བྱ་བ་མཛད་བཞེད་ཀྱི་དགེ་དགོན་དཔེ་ཐུབ་ཁྲི་རྩེ་ལ་ཡང་དགེ་རྒྱུན་མཆོད་གཞིས་ཕྲན་བུ་སྦྱོར་རྩིས་རྒྱལ་སྲས་རིན་པོ་ཆེ་ནས་མཛད་ཀྱི་འདུག་ལ་དངོས་འབྱོར་སྐྱེས་ཆེར་འབུལ་རྒྱུ་མི་འདུག་ཀྱང་། ཞབས་པད་མཆོག་གི་བཀའ་དྲིན་དྲན་ནས་བཀའ་དྲིན་ཆེ་གསོལ་བར་ལ་དྭགས་སྟོད་ཀྱི་མངའ་འོག་ཏུ་དཔོན་ཁག་ད་ལྟ་མཁར་གྱི་ལས་མཚན་མཐོན་པོར་གནས་པའི་སྤུན་འབྲི་གུང་དགོན་གྱི་བླ་མར་བྱས་པ་ཞིག མུལ་ལྦེའི་བཀའ་བློན་བཅས་ངེད་སྒར་ཐོག་ཏུ་སླེབ་མཚམས་གཏིང་ཟིན་རྒྱུར་བྱས་སོང་ཞིང་འདི་ཕྱོགས་སུ་རང་གི་གནས་ཚུལ་ཆ་ཤས་རགས་རིམ་སྒྲིབ་མེད་དུ་ཕུལ་བ་དེ་ལྟར་དང་། གཞན་ཡང་རང་ཉིད་བྱེ་བྲག་པ་མདོ་ཁམས་ཕྱོགས་ཀྱི་གནས་ཚུལ་ཅུང་ཟད་ཟད་ཟུར་དུ་གསོལ་བ་ལ་ཆོས་དབྱིངས་ཚོམ་འཁྲུངས་མེད་པ་དང་། གང་ཅིར་བསྟན་དང་འགྲོ་བའི་དོན་དུ་ཞབས་པད་བསྐལ་པ་ལས་ལྷག་པར་རྫུ་འཕྲུལ་གྱི་རྐང་པ་ལ་བརྟེན་ཏེ་བཞུགས་པར་སྙིང་ནས་གསོལ་བ་འདེབས་པ་དེ་ཁོ་ན་བཞིན་རེ་འབྲས་དོན་ལྡན་དུ་མཛད་དུ་གསོལ།

ཞེས་ཚད་མེད་ཐུགས་རྗེའི་སྤྱན་རས་གཡོ་བར་བྱེད་པའི་རྟེན་རྐང་འཐུང་དབང་པོ་ཙི་ཏྲ་ཀ་ཡི་པ་ཊ་ལྟར་རྣམ་པར་གསལ་བའི་གོས་རེག་འཇམ་ཟླ་བའི་ཞུན་མ་འཁྱིལ་བ་ལྟ་བུའི་བཅིབ་སྟེ་དཔལ་གདོང་ཆུ་མོ་བྱ་ཡི་ལོ་ཟླ་ཚེས་དགེ་བ་ལ་ཕྲན་གྱུར་དཔལ་རིག་པ་འཛིན་པ་རྒྱལ་ཁམས་པས་མར་ཡུལ་ཧེ་མིའི་སྐྱེད་ཚལ་ནས་ཕུལ་བའི་ཞུ་ཡིག་སརྦ་མངྒ་ལཾ།