༈ གོང་ས་མཆོག་ལ།

བཀྲ་ཤིས་དགེ་བའི་འཁོར་ལོས་རྣམ་པར་མཛེས་པའི་ཞབས་ཀྱི་ཉེ་བར་བསྙེན་པའི་ཡིད་འཕྲོག་དབང་པོའི་ངོགས་སུ་དངས་ཤིང་སིམ་པ་ཆེན་པོས་ཞུ་བ།

སྔ་སོར་ཕྲན་རང་གི་བླང་དོར་གྱི་གནས་བཀའ་ལུང་ཞུ་འོས་དོན་ཚན་གསུམ་དུ་བཅད་པ་ཚང་མར་སྨིན་གྲུབ་གནམ་བསྐོས་གསེར་གྱི་ཕྱག་རྒྱའི་རེ་ཁས་བརྒྱན་པ་ཚངས་པའི་མཛེས་རྒྱན་དུ་ཕེབས་པ་སྙིང་གི་བདུད་རྩི་དམ་པར་གྱུར། འདི་ནས་བལ་ཡུལ་ཕྱོགས་ལམ་འཕྲང་དོག་པ་དང་། ལྷག་ཏུ་རྒྱལ་ཁག་ཕན་ཚུན་འཁྲུག་ཟིང་ཆེ་ཞིང་རང་བྱུང་མཆོད་རྟེན་ཆེན་པོའི་ཞིག་གསོ་འགྲུབ་ན་ལུས་སྲོག་ལྟོས་མེད་བགྱིད་འདོད་ཀྱི་ཕྱོགས་འདིར་འགོར་ཆེས་ལོ་ཡང་མང་གཤིས། ཞིག་གསོའི་རྒྱུར་དངོས་པོ་རྣམས་གཞུང་སའི་ཕྱག་ཏུ་ཕུལ་ནས་རང་ཉིད་དབེན་པའི་གནས་ཡུལ་འདོད་ལགས་ཀྱང་བལ་ཡུལ་མཆོད་རྟེན་ཆེན་པོའི་ཞིག་གསོ་ཕྲན་རང་དངོས་བགྲོད་ཀྱི་ལེགས་ཚུལ་བཀའ་ལུང་ཕེབས་པ་ཡི་དེ་དོན་སྙིང་ལ་གཞག་ནས་བགྲོད་པའི་ལམ་ཞུགས་སྐབས་སུ་གནས།

ཀཿཐོག་གི་སྐོར་སྔ་སོར་སྙན་འབུལ་ཞུས་བཞིན་ཧོར་ཟླ་བརྒྱད་པའི་ཚེས་ཉེར་ལྔར་ཞྭ་དམར་ཐམས་ཅད་མཁྱེན་པར་ཁྲི་འདོན་གྱི་རྣམ་པ་ཙམ་བྱས་འདུག་ལ། དེ་ལ་སྡེ་དགེ་བསོད་ནམས་མགོན་ནས་ཀྱང་ཇི་ལྟར་གནས་ཚུལ་གྱི་ཡི་གེ་དང་། སྔར་ཀཿཐོག་རྒྱལ་སྲས་བསོད་ནམས་ལྡེའི་བཙན་རང་ཉིད་ཀྱི་གདུང་ཚབ་ཏུ་བསྐོ་བཞག་བྱས་པའི་སྲས་སྦ་ཁའི་རི་བླ་མ་སོགས་ཀྱི་ཡི་གེ་བྱུང་བ་ཡང་། ཐུགས་རྗེ་ཆེན་པོའི་སྤྱན་རས་ཀྱི་གཟིགས་ཡུལ་དུ་ཕུལ་བ་འདི་བཞིན་ལགས་ཤིང་། ཀཿཐོག་སྐུ་སྐྱེས་ཁུལ་འབའ་ཕྱོགས་སུ་བྱུང་བ་དེ་ཡང་ཞྭ་དམར་སྤྲུལ་པའི་སྐུ་ཀཿཐོག་ཏུ་ཁྲི་འདོན་སྐབས་ཡོད་འདུག་པས་ཁོ་པ་དང་ལྷན་དུ་ཀཿཐོག་རྒྱལ་སྲས་རང་གི་དབོན་རིགས་ཡིན་ངེས་བཀྲ་ཤིས་ཕུན་ཚོགས་ནས་ཀྱང་ཀཿཐོག་གི་ཞིག་གསོ་སྒྲུབ་ཆོག་པ་དགོས་ཚུལ་སྔ་ཕྱིར་ནན་བསྐྱེད་དང་། འདི་རེས་ཀྱང་དོ་གལ་བྱས་འདུག་པར་ཞིག་གསོ་བྱས་ཆོག་ཚུལ་གྱི་འཕྲོས་ཀྱང་སྡེ་དགེ་བསོད་ནམས་མགོན་པོ་ལ་བཏང་བའི་ཟེ་རེག་ཀྱང་བུ་ཚས་ཕ་མར་ལེགས་ཉེས་གསོལ་ལྟར་གཟིམ་ལམ་དུ་ཕབ་པ་ཆོས་དབྱིངས་ཚོམ་པ་མེད་པ་དང་།

ལར་ཀཿཐོག་འདི་ལྟར་མདོ་དང་སྒྱུ་འཕྲུལ་སེམས་ཕྱོགས་འབའ་ཞིག་གི་བསྟན་པ་འཛིན་པར་བསྲེག་བཅད་བརྡར་བའི་གསེར་བཞིན་དབོན་རབས་དང་གདུང་རབ་ལྟ་བུ་མ་ཡིན་པ་མདོ་དགོངས་པ་འདུས་པ་དང་། སྒྱུ་འཕྲུལ་གསང་བ་སྙིང་པོ། སེམས་ཕྱོགས་ཀུན་བྱེད་རྒྱལ་པོ་མ་བུ་རྣམས་ཀྱི་རྣམ་བཤད་འབྲུ་ནོན་ངེས། རང་བློས་སྤེལ་བར་ནས་པའི་ཀློག་དང་། བསམ་པ་སྡོམ་གསུམ་དག་པས་བླ་མའི་ཐུགས་ཟིན་གྱི་ཐོག་མར་ཉེ་གནས་མཛད་ཅིང་། སྒོམ་པ་སེམས་ཕྱོགས་ཀྱི་ཉམས་ལེན་མི་གཡོ་བའི་ཉམས་ལ་སོགས་པ་ཏིང་ངེ་འཛིན་བཟང་པོ་སྐྱེས་པ་ལ་རྒྱལ་ཚབ་ཏུ་རིན་པར་བརྒྱུད་པ་བླ་མ་གདན་རབས་བཅུ་གསུམ་གྱི་བར་དེ་ཁོ་ན་ལྟར་བྱུང་འདུག་ཅིང་། དེ་རྗེས་ཀྱང་ཛྙཱ་ན་ཀེ་རུ་ནས་ཙམ་བུ་འབོར་བཀྲ་ཤིས་རྒྱ་མཚོའི་བར་དེ་ཡི་སྒྲིག་ལམ་ཕྱོགས་མཐུན་ལ་སེམས་ཁྲིད་ཉམས་ལེན་གྱི་མཐིལ་སྨར་ཚངས་བཀའ་བརྒྱུད་ལ་འབྲེལ་ཆེ་བ་བྱུང་འདུག་ཅིང་། དེ་རྗེས་བླ་རབས་ཁ་ཤས་ཀཿཐོག་དྲུང་པ་ཞེས་དབོན་བརྒྱུད་ཀྱི་བསྐྱང་ཞིང་བཙུན་ཚུགས་མ་ཤོར་ཙམ་ལས་ཐོས་བསམ་བསྒོམ་པའི་སྲོལ་ཅུང་ཟད་དམན་པས་དགོན་པའི་ལར་རྒྱ་ཡང་ཕྱིས་གཏིང་སྡེ་དགེས་བདག་གིར་བྱས་ཤིང་།

དེ་མཚམས་གཏེར་སྟོན་ཀློང་གསལ་སྙིང་པོ་ལ་སྡེ་དགེ་སངས་རྒྱས་བསྟན་པས་དགོན་པ་ཚང་འགྲིལ་ཕུལ་ཞིང་དྲུང་པའི་ཆོས་གཞིས་གཉིས་སུ་བསྒོས་ཏེ་ཕྱེད་གཏེར་སྟོན་ལ་ཕུལ། ཕྱེད་སྡེ་དགེའི་ལོ་སྐར་འདུ་བའི་ཐེས་སུ་གྱུར། གཏེར་སྟོན་ཀློང་གསལ་སྙིང་པོའི་སྲས་བདག་གི་བླ་མ་བསོད་ནམས་ལྡེའུ་བཙན་ཏེ། དེས་བདག་ཀཿཐོག་གི་ཁྲི་ལ་སྡོད་པར་ནན་གྱིས་གནང་ཡང་ལས་ཀྱི་དབང་གི་རྒྱལ་ཁམས་ཁོ་ནར་བློ་རྩེ་གཏད་པ་ཡི་ཀཿཐོག་གི་ཁྲི་ལ་སྡོད་པར་ནན་གྱིས་གནང་ཡང་ལས་ཀྱི་དབང་གི་རྒྱལ་ཁམས་ཁོ་ནར་བློ་རྩེ་གཏད་པ་ཡི་ཀཿཐོག་ཆ་ཤས་ཙམ་ཡང་སྡོད་རྒྱུ་མ་བྱུང་ཚུལ་སྔར་ནས་སྙན་དབང་ནོར་བུའི་ངོགས་སུ་གསོལ་ལྟར་ལ། ད་ཆ་རང་ཉིད་ནི་འཆི་ཆ་མེད་དུ་གནས་པས་བླ་མའི་ཐོབ་ཐང་དང་རེ་བ་དང་དོགས་འཚང་རྒྱབ་མཁན་མང་ཡང་ཅི་བདེར་བོར་ནས་ནམ་ཞིག་ཟོག་པོ་གྲུབ་རྫུས་འདྲེས་ཁྱེར་དམ་ཉམས་ཞིག་གི་དགོན་པ་དེ་བཟུང་ནས་རྣམ་པར་དག་པའི་ཆོས་ཚུལ་ཀུན་ནུབ་པར་བྱེད་པ་གདོན་མི་ཟད་བར་སྣང་བས་དེས་ན་ཞྭ་དམར་སྤྲུལ་སྐུའི་སྐྱེ་ཕྲེང་ཉི་ཤུ་རྩ་གཅིག་བར་འབྱུང་ཞེས་ཨོ་རྒྱན་པདྨས་སྔོན་གྱི་གཏེར་སྟོན་རྙིང་པ་མང་པོའི་ལུང་དུ་ཡོད་པར་ཐོས་ན་དེ་ཚེ་ཁོང་ལ་ཁྲི་བཟུང་བའི་མཚན་སྐྱོང་ཙམ་ཞིག་མཛད་པར་གསོལ་ནས། གདན་ས་ཇི་བཞིན་དངོས་གནས་རྙིང་མའི་གདུང་རིགས་ཁུངས་ལྡན་ཞིག་གམ། དེ་མིན་འོས་བབ་ཞིག་བརྟག་རྩིས་བྱས་ཀྱང་དུས་ཀྱི་དབང་གི་དམ་པའི་ཆོས་བཞིན་དུ་སྤྱོད་པ་ཚེ་འདི་སྣང་ཤས་ཆུང་ཞིག་རྙེད་པར་ཆེས་དཀའ་བར་མ་ཟད་ཕྱོགས་རིས་ཆགས་སྡང་མང་པོའི་ཅོ་འདྲི་བ་ཡི་བོད་ཆེན་རྒྱལ་ཁམས་བྱེ་བྲག་ཀཿཐོག་མངའ་རིས་གདུལ་བྱ་སྤྱི་མཐུན་གྱི་བསོད་ནམས་ལས་མ་གྲུབ་པར་འདི་ལ་དཀོན་མཆོག་ཆོས་བསྲུང་ཡེ་ཤེས་སྤྱན་ལྡན་རྣམས་ཀྱི་མ་དགོས་ཚེ་བདག་ལྟ་ཀཿཐོག་ནས་ས་ཡུལ་རིང་པོའི་གནས་སུ་བསྐལ་པའི་བྱ་བྲལ་འཁོས་སྟོབས་ཕྲ་མོར་གནས་པ་ནམ་འཆི་ཆ་མེད་ཞིག་གི་བརླབ་ཆེན་རྒྱལ་བསྟན་གྱི་བྱ་བ་ཇི་ལྟར་བགྱིད་སྙམ་ནས་རང་ལས་ཡིན་ཀྱང་ཡུས་དཀོན་མཆོག་ལ་འཚོང་དགོས་ཤར་ཞིང་ཀཿཐོག་གི་གྲྭ་སྤྱི་སྦྱིན་བདག་རིས་སུ་མ་ཆད་པའི་འདོད་མཐུན་དུ་སྐྱེ་བོ་རྣམས་གྲགས་རྗེས་འབྲང་བ་ཤས་ཆེ་གཤིས་ཞྭ་དམར་མཆོག་སྤྲུལ་ལྟ་བུ་ལ་ཐམས་ཅད་མོས་པར་ངེས་ཡང་ཚང་མ་འདོད་མཐུན་དུ་མ་གྱུར་པ་དང་གཞན་ཡང་གཅིག་ཤོས་བཀོལ་ན་གཅིག་ཤོས་བློ་ལ་མི་རན་པ་སོགས་ངེད་རང་ངོས་ཀྱི་མདོ་ཁམས་སུ་སླེབ་ན་ལས་གཞན་ཅི་ལྟར་བྱས་ཀྱང་ཕྱོགས་ལྷུང་ཆགས་སྡང་སྐྱེ་འཕེལ་མེད་པ་ཞིག་མི་ཡོང་འདུག་པས་ད་ཆ་ལར་རྒྱའི་མཚན་སྐྱོང་ཞྭ་དམར་བ་ལ་བསྔགས་ནས་དགོན་པའི་ཁུར་ལེན་དངོས་གཞི་ཆུ་འབབ་ཉིད་དུ་གཞག་ན་སྙམ་པས་དེ་ལྟར་ལེགས་སམ་ཡང་ན་འདི་ནས་བསྐོ་བཞག་དམིགས་བསལ་ཞིག་བགྱིས་ན་ལེགས་སྙིང་ཐག་པ་ནས་རང་གི་གནས་ཚུལ་གསོང་པོར་གསོལ་བ་ལགས་ན་ཐུགས་རྗེ་ཆེན་པོའི་དོ་ར་ནས་མི་བསྐྱུད་པར་ཡེ་ཤེས་ཆེན་པོའི་གསལ་སྣང་གི་ཁྱབ་པའི་བཀའ་ལུང་བཟང་པོ་དང་།

བོད་ཆེན་དབུས་འགྱུར་རྒྱལ་བསྟན་སྙིང་པོ་འོད་གསལ་རྡོ་རྗེ་རྩེ་མོའི་རིང་ལུགས་ཀྱང་བསླད་མེད་མ་ཉམས་ཡུན་རིང་དུ་གནས་པའི་ཐུགས་སྨོན་བཟང་པོའི་སྐྱབས་འཇུག་ཀྱང་བརྩེ་བ་ཆེན་པོའི་མ་བོར་བ་ཅི་ནས་ཀྱང་མཁྱེན་མཁྱེན་མཁྱེན་ཞུ་རྒྱུ་དང་། གཞན་ཡང་མདོ་ཁམས་ཀྱི་ཕྱོགས་བདག་གི་སྐྱེས་ཡུལ་དངོས་གཞི་དེར་ཡང་སྔར་ནས་དཔོན་པོ་མེད་ཅིང་ཁྲིམས་འོག་ཏུ་མ་ཆུབ་པ་ལ་དགོན་པའི་བླ་གཙོ་ཆེ་ཁ་ནས་ཅུང་ཟད་ལེགས་སྤེལ་སྤྱི་འཆིང་བྱེད་སྲོལ་འདུག་ཀྱང་ད་ལྟ་ནི་དུས་ཀྱི་དབང་གིས་དགོནཁག་རྣམས་ལ་ཡང་རྩི་མེད་རྡོ་རུ་བོད་ཞིང་ལྷག་ཏུ་རྐུན་ཁྲིམས་ཇག་ཁྲིམས་བསྡམ་པ་ལ་ཞེ་འཁོན་དུ་བཟུང་ནས་བླ་གྲྭ་ཁ་ཤས་སྨས་ལ་བཀོད་པ་སོགས་དེ་བཞིན་ཡུལ་མཚན་ཕན་ཚུན་ཡང་ཚབ་ཆེར་འཁྲུག་གི་ཡོད་འདུག་པ་ན་ནིང་ཆུ་སྤྲེའུ་ལོར་ཡུལ་ཕྱོགས་དེ་ཡི་དགོན་ཁག་སྤྱི་ནས་འཐབ་འཁྲུག་བྱུང་ཚུལ་དང་དེ་ལ་ཅི་ལྟར་ལེགས་ཀྱི་འཕྲོས་རྒྱ་ཁར་རྫོང་དཔོན་བརྒྱུད་གཞུང་སའི་རྟ་བཤད་སྟེང་ནས་ངེད་ལ་དྭགས་བགྲོད་པའི་ལམ་བར་པྲ་དུན་རྩེར་ཟླ་༦ཚེས་༦ལ་བྱུང་ཡང་ཡིག་ལན་འཕྲལ་གཏོང་མ་ཐུབ་ལ།

འདི་ལོ་ཁམས་ཕྱོགས་ཀྱི་ཕོ་ཉ་དངོས་མ་ཁ་ཡར་ལ་དྭགས་རང་དུ་འབྱོར་བྱུང་བ་འཐབ་འཁྲུག་སྔར་ལས་ཀྱང་ཆེ་བ་སོང་སྐད་་ཀྱི་དམུ་རྒོད་ཀྱི་འགྲོ་བ་བདག་ལྟའི་ངག་བཀོད་ཉན་པར་དཀའ་ཡང་ཅུང་ཟད་ཕན་རེ་ནས་དགོན་ཁག་དང་ཡུལ་ཁག་འོས་པ་འོས་པ་ལ་ན་ནིང་རྟ་ཤད་སྟེང་ནས་བྱུང་བའི་ཡིག་ལན་ཚུལ་དུ་ལེགས་སྤེལ་གྱི་ཡི་གེ་བཀའ་ཤག་བརྒྱུད་མདོ་ཁམས་སུ་གཏང་རྒྱུར་བྱས་པ་ཡང་བུ་ཚའི་སྐྱིད་སྡུག་ཕ་མ་ལ་སྨྲེང་ལྟར་གསོང་པོའི་ངག་གི་སྙན་དབང་ཡིད་བཞིན་གྱི་ནོར་བུར་གསོལ་ལྟར་ཆོས་དབྱིངས་ཚོམ་འཁྲུང་སྐད་ཅིག་ཀྱང་མེད་པ་ནས་མཐའ་འཁོབ་ཀྱི་སྐྱེ་རྒུ་དེ་རྣམས་བདེ་ལེགས་སུ་འགྱུར་བའི་ཐུགས་སྨོན་གྱི་སྐྱབས་འཇུག་ཅི་ནས་ཀྱང་མཁྱེན་མཁྱེན་མཁྱེན་ཞེས་ཞུ་རྒྱུ་དང་།

ཡང་འདི་ལོ་ཕྲན་བལ་པོར་བགྲོད་པ་ཡིས་ལམ་བར་དང་བལ་ཡུལ་མཐིལ་དུ་དགེ་བའི་བྱ་བ་བགྱིད་འོས་ལ་མི་དང་མི་མ་ཡིན་པས་བསམ་ངན་སྦྱོར་རྩུབ་ཀྱི་འཚེ་བས་མི་ཚུགས་པ་ཐུགས་དམ་རྡོ་རྗེའི་གོ་ར་བསྲུང་བའི་འཁོར་ལོ་ཆུབ་པ་ཡང་ཐུགས་བརྩེའི་དབྱིངས་ནས་མི་བོར་བ་ཅི་ནས་ཀྱང་མཁྱེན་མཁྱེན་མཁྱེན་ཞེས་དགུ་ལྡན་དུ་གསོལ་ཞིང་བཀའ་མཆིད་བཟང་པོ་ཡང་གསེར་གྱི་འདྲེན་པའི་ཆུ་ཀླུང་བཞིན་ཆད་མེད་དུ་སྩོལ་བ་ཅི་ནས་ཀྱང་མཁྱེན་མཁྱེན་མཁྱེན་ཞེས་དཀྱུས་རིང་ཐུགས་རྗེའི་སྤྱན་རས་ཀྱི་བྱབ་པར་བྱེད་པའི་རྟེན་སུམ་རྩེན་ཡོངས་འདུའི་འདབ་མ་ལ་འཁུ་བའི་ལྷ་གོས་བཟང་པོས་བཅིབ་སྟེ་མར་ཡུལ་ཧེ་མི་ནས་ཕུལ་བའི་ཞུ་ཆུང་སརྦ་མངྒ་ལཾ།