༈ གོང་ཞབས་སུ།
རང་གི་སྒོ་གསུམ་ངལ་བ་བརྒྱ་ཕྲག་དུ་མ་དང་དུ་བླང་ནས་ཕྱོགས་འདིར་དགེ་བསྒྲུབ་བགྱིད་པ་རྣམས་རྫོགས་བྱང་ཆེན་པོར་བསྔོ་བར་གསོལ་བ་འདེབས་པའི་ཞུ་ཡིག
རྣམ་པར་འདྲེན་པ་ཐམས་ཅད་ཀྱི་སྤྱི་ཕུད་གངས་ཅན་མགོན་པོ་མཆོག་གི་ཞབས་པད་དུ། དངས་བའི་ཡིད་ཀྱི་ཆེད་དུ་གསོལ་བ། རྒྱལ་བ་མཆོག་གི་བཀའ་སྐྱེ་རྒུ་ཡོངས་ཀྱི་བདེ་ཐབས་སུ་དགོངས་ཏེ་ཕྱོགས་འདིར་མངགས་པར་མཛད་པའི་ལམ་བར་དང་བོད་སྔ་རབས་ཀྱི་ཡི་གེར་མར་ཡུལ་དང་ད་ལྟ་མུ་སུར་མལ་གྱི་ཀ་ར་རི་བར་དུ་བརྗོད་ཅིང་། བོད་རྣམས་ཀྱི་ལ་དྭགས་སུ་སྒྲོགས་པ་ཡུལ་མཐིལ་ཤེལ་གྱི་བར་ཕྱིན་ཞིང་། བལ་ཡུལ་ནས་མར་ཡུལ་ལམ་དུ་ཞུགས་ནས་ད་ལྟའི་བར་ལོ་ཕྱེད་གཉིས་ལ་ཉེ་བར་གྱུར་པ་དེ་སྲིད་དུ་རགས་རྩིས་སྐྱེ་བོ་འབུམ་ཕྲག་གསུམ་ལ་ཉེ་བར་དབུ་མ་ལུགས་ཀྱི་བྱང་སྡོམ་དང་ཐུགས་རྗེ་ཆེན་པོའི་བསྒོམ་བཟླས་ལུང་དང་རྗེས་གནང་གང་གཅོག་ཆུ་སྦྱིན་གྱི་ལུང་རྣམས་སྒོ་གསུམ་འབད་པས་དམ་པ་ཆོས་ཀྱི་སྦྱིན་པར་དམིགས་པ་དང་། གཞན་ཡང་བསྙེན་གནས་བསྙུང་གནས་དང་སོ་ཐར་སྐྱབས་སྡོམ་གྱི་སྡོམ་པ་ལེན་པ་ཡང་ཆེས་མང་ཞིང་ཚངས་སྤྱོད་ཀྱི་དགེ་བསྙེན་ཆོས་ཀྱི་སྒོར་ཞུགས་པ་ཡང་སྔ་ཕྱིར་བརྒྱད་བརྒྱ་ཉེ་བ་ཙམ་བྱུང་བ་དང་། གཙོ་བོར་མར་ཡུལ་གྱི་རྗེ་འབངས་རྣམས་འཁོན་སེལ་སྦྱངས་ནས་མཐུན་གཤིབ་ལེགས་སྤེལ་ལ་བཀོད་ནས་གངས་ཅན་བདེ་བའི་བརྩས་སུ་བསྒྲུབས་པ་སོགས་རང་གི་འཁོས་ལ་དཔགས་པའི་བསྡུ་དངོས་བཞིའི་དགེ་བའི་རྩ་བ་ཇི་སྙེད་བགྱིད་པ་དེ་ཀུན་མཁའ་ཁྱབ་ཀྱི་འགྲོ་བ་ཕ་མའི་རང་བཞིན་ཡོང་དང་ཐུན་མོང་དུ་བགྱིས་ཤིང་།
དེས་ཀྱང་བདག་ཚེ་རབས་ཀུན་ཏུ་སངས་རྒྱས་ཐམས་ཅད་ཀྱི་འཕྲིན་ལས་ཀྱི་བྱེད་པོ་འཕགས་པ་སྤྱན་རས་གཟིགས་དབང་ཕྱུག་གི་བྲན་དུ་གྱུར་ཏེ་ཁམས་གསུམ་འཁོར་བའི་སྡུག་བསྔལ་མཐའ་དག་སེལ་བའི་བྱེད་པོར་འགྲུབ་པར་བསྔོ་སྨོན་གྱི་རྒྱས་འདེབས་ཅི་ནས་ཀྱང་བཀའ་དྲིན་ཆེན་པོའི་ཁྱབ་པ་དང་། དེ་ལྟར་དགེ་བ་རྫོགས་བྱང་དུ་བསྔོ་བའི་དགེ་བ་རླབས་ཆེན་གྱུར་པ་དེ་ཡི་མཐུ་བྱིན་ཡང་དུས་སྐབས་འདིར་ནི་གངས་རིའི་ཁྲོད་ཀྱི་ལྷ་ཡི་ལྷ་འཇིག་རྟེན་མགོན་པོ་མཆོག་ཁྱེད་ཉིད་ཀྱི་ཞབས་པད་བརྟན་པ་དང་། གཞན་ཡང་བསྟན་འཛིན་གྱི་སྐྱེས་བུ་དམ་པར་གྱུར་པ་རྣམས་ཀྱི་སྐུ་ཚེ་བརྟན་ཞིང་ཐུགས་མཐུན་པ་དང་། རྒྱལ་བསྟན་འཁོར་ལོའི་གསུམ་པོ་རྒྱས་པ་དང་།
མཐར་ཐུག་ངེས་དོན་སྙིང་པོའི་བསྟན་པ་མཆོག་ཏུ་དར་བའི་ཆེད་དུ་བསྔོ་བ་སྟེ་དེ་ཁོ་ན་བཞིན་འགྲུབ་པར་ཡང་ཐུགས་སྨོན་གྱི་དོ་ར་ནས་ནམ་ཡང་མི་བསྐྱུད་པ་ཅི་ནས་ཀྱང་མཁྱེན་མཁྱེན་མཁྱེན་ཞེས་གསོལ་བ་འདེབས་པའི་རྟེན་དངོས་པོ་པདྨའི་རྣལ་མ་ལྟར་ཕྲ་ཡང་མོས་དགེ་ཀུན་བཟང་རོལ་པའི་སྤྲིན་དུ་དམིགས་ནས་ཕུལ་བ་ཉིད་དང་། འཆི་མེད་བསྐལ་པའི་ཤིང་གི་པདྨོ་ལྟར་རྣམ་པར་དཀར་བ་ལྷ་ཡི་རེག་བྱ་སྲིད་དུ་རིང་བའི་མཎྜལ་ལ་འཕགས་ཡུལ་གྱི་རཱུ་པ་ཀརྴ་པཱ་ཎ་ཉི་ཤུ་རྩ་བདུན་ཚོམ་བུར་བཀོད་ཅིང་། བྷ་ལག་ཁ་ཡི་གསེར་གྱི་ཀཪྴ་པཱ་ཎ་དབང་པོའི་གྲངས་ལྡན་གྱིས་ཀྱང་མཛེས་པར་བྱས་པ་སྔ་སོར་བཀའ་རྒྱ་རིན་པོ་ཆེ་ལྷན་དུ་ཕུལ་དུ་བྱུང་བའི་གནང་སྐྱེས་ཟབ་གོས་ཇི་སྙེད་པ་རྣམས་རྣལ་མ་གཅིག་ཡང་ཆུད་ཟོས་མ་སོང་བ་ལེགས་སྤེལ་གྱི་རྒྱུ་སོང་ཞིང་། སུ་ཝརྞ་སྲང་གི་འཁོར་ལོ་སྔ་མ་ལྔ། བར་མ་གཅིག་ཕྱི་མ་གསུམ་སྟེ་ཁྱོན་སྲང་གི་འཁོར་ལོ་དགུ་ལྡན་ཕེབས་པ་དེ་ཡང་གོང་སྨོས་ཕྲན་གྱི་རྣམ་པར་དགེ་ཚོགས་སྒྲུབ་པ་རྣམས་བྱང་ཆེན་སྙིང་པོའི་བར་ཉམས་མེད་རྫོགས་བྱང་དུ་བསྔོ་བའི་རྟེན་དུ་གུས་པས་ཕུལ་བ་རྣམ་ཀུན་ཐུགས་རྗེ་ཆེན་པོའི་དཀྱིལ་འཁོར་དུ་ཆུབ་པ་མཁྱེན་མཁྱེན་མཁྱེན་སརྦ་མངྒ་ལཾ།