༈ ཞབས་པད་ཡིད་བཞིན་གྱི་ནོར་བུ་རིན་པོ་ཆེར།

གུས་པས་ཞུ་གསོལ། དེང་དུས་རི་ཁ་བ་ཅན་གྱི་ཁྲོད་དུ་ཡོངས་རྫོགས་བསྟན་པའི་མངའ་བདག་གངས་ཅན་མགོན་པོ་མཆོག་དང་དེ་སྲས་ཐུ་བོ་དམ་པ་ངུར་སྨྲིག་གར་གྱི་རོལ་པ་གང་དཀྱིལ་འཁོར་ལོའི་རང་བཞིན་གཅིག་ཏུ་འདུས་ཏེ་སྨིན་གྲོལ་ཆོས་ཀྱི་འཁོར་ལོ་རྒྱ་ཆེན་བསྐོར་བར་མཛད་པ་ནི་འགྲོ་བ་ཐམས་ཅད་ཀྱི་ཀྱེ་མ་འོ་འདི་ནི་འཇིག་རྟེན་མཛེས་པར་བྱས་སོ། །ཀྱེ་མའོ་འདི་ནི་འཇིག་རྟེན་དགེ་བའི་བཅས་སོ། །ཀྱེ་མའོ་འདི་ནི་སྐྱེ་དགུ་མཐའ་དག་ལ་སྨན་པར་བྱེད་པའི་རྒྱུའོ། །ཞེས་འོག་མིན་གྱི་བར་དུ་སྒྲོགས་པར་ངེས་ན་འདིར་གནས་ཕྲན་བུ་ས་འོག་འབུ་སྲིན་གྲོག་མའི་མཆོད་ཟླར་གྱུར་པ་བདག་ཀྱང་ཡིད་དངས་ཤིང་སིམ་པར་གྱུར་པ་ནི་ཆུ་སྐྱེས་ཁ་འབུས་པ་ལྟ་བུའི་སྙིམ་པའི་དཀྱིལ་འཁོར་སྤྱི་བོར་བཟླུམ་བཞིན་པས་ལེགས་འབུལ་མཚོན་བྱེད་ཡུལ་ཀསྨི་ར་ནས་བྱུང་བའི་གོས་མཆོག་འཕགས་རྒྱལ་གྱི་རས་བེའུ་ཡི་དོ་ཟླར་བྱས་པ་ཡུལ་འདིར་ཟླ་བྲལ་འཕགས་ཡུལ་གྱི་རཱུ་པ་ན་དྲུག་ཅུ་ལས་མི་དམན་ངེས་པའི་རིན་ཐང་ཅན་དངོས་པོ་པདྨའི་རྣལ་མ་ལྟ་བུ་ཆེས་ཆེར་ཕྲ་ཡང་ལྷག་བསམ་མོས་དགེ་གྱེན་ཕྱུར་གྱི་ངོས་ལྟར་ཡང་ས་རློམ་བཞིན་ཕྱག་བཅས་ཕུལ་བའི་ཞུ་ཡིག་སརྦ་མངྒ་ལཾ།

ཞབས་པད་ཡིད་བཞིན་གྱི་ནོར་བ་རིན་པོ་ཆེ་གནས་ཚུལ་ཞུ་ཆུང་། འདིར་རྒྱལ་སྲས་རིན་པོ་ཆེ་བསླབ་པ་གསོ་ན་སེམས་ཀྱང་རྒྱལ་རིགས་ཀྱི་བུ་དྲེགས་ཤིང་བརྒྱག་པ་འདོད་པའི་ལང་ཚོ་བདོལ་བ་ཡི་དེ་ལྟ་ཅི་ཙམ་བརྗོད་ཀྱང་སྐབས་སུ་མ་གྱུར་པས་དེ་ཚེ་ཁོ་པ་རང་གི་རྩ་བའི་བླ་མ་འབྲུག་པ་ཐམས་ཅད་མཁྱེན་པ་ལ་བཤགས་འབུལ་ཞིག་བགྱིས་ན་ལེགས་ཚུལ་སྨྲས་ཀྱང་ཐོག་མར་བློ་ལ་དེ་ཡང་ཤིན་ཏུ་འཇུག་དཀའ་ཞིང་མཐར་ལས་འབྲས་དམ་ཚིག་གི་མཚན་ཉིད་ཅི་རིགས་བཤད་ཅིང་འཇམ་པོས་དཀྲིས་པས་ཅུང་ཟད་ཁུག་སྟེ་བཤགས་འབུལ་བྱེད་རྒྱུའི་རྩིས་སུ་བྱས་སོང་བ་གནས་ཚུལ་ལགས་ཤིང་། ཕྱོགས་འདིའི་བགྱིད་འོས་ལ་སྨན་པའི་བཀའ་ཐམ་རིན་པོ་ཆེ་ཞིག་ཞུ་བ་སྐབས་བབས་འགྱུར་མིན་སྙན་དབང་ཡིད་བཞིན་གྱི་ནོར་བུ་རིན་པོ་ཆེར་ཕུལ་བར། དེ་ལ་བཀའ་སྩལ་མ་ཕེབས་པ་ད་ཆ་ལ་དྭགས་མཐིལ་དུ་བགྲོད་རྩིས་མིན་གཤིས། དོན་དེས་ཞུ་བར་མི་ནུས་ཀྱང་བདག་གི་གནས་ཚུལ་ཚིག་ཉོག་གི་འཕྲེང་བས་གཟིགས་ངོར་མ་སྤྱོད་པ་མིན་ན་རུང་ཡང་ཆོས་དབྱིངས་ཚོམ་འཁྲུང་རྒྱུར་གྱུར་པ་ནི་མ་ལགས་སྙམ་པའི་བློ་ངལ་བྱུང་བས་དེས་ན་ཟབ་དབྱིབས་རིན་པོ་ཆེ་ཚོམ་འཁྲུང་མེད་པར་མཁྱེན་མཁྱེན་མཁྱེན་དགུ་ལྡན་དུ་གསོལ་བ་འདེབས་པ་དེ་ཁོ་ན་བཞིན་ཐུགས་རྗེ་ཆེན་པོས་གཟིགས་པས་བྱབ་པར་མཛད་དུ་གསོལ།