༈ གོང་ཞབས་སུ་ཆུ་སྤྲེལ་ལོ་ལ།
ལྷར་བཅས་འགྲོ་བའི་སྐྱབས་གཅིག་མཚུངས་པ་མི་མངའ་བ་འདྲེན་པ་ཡོངས་ཀྱི་སྤྱི་ཕུད་རྒྱལ་བ་མཆོག་གི་གསེར་གྱི་འཁོར་ལོ་རྣམ་པར་བཀྲ་བའི་ཞབས་ཀྱི་ཉེ་བར་བསྙེན་པའི་ཆུ་སྐྱེས་དབང་པོའི་གེ་སར་ངོགས་སུ་དངས་བ་ཆེན་པོས་ཞུ་གསོལ།
རྒྱལ་བ་ཐམས་ཅད་ཀྱི་ཡེ་ཤེས་རོ་མཉམ་པ་ཐུགས་རྗེའི་གོང་བུ་གཅིག་ཏུ་འདུས་པའི་རང་གཟུགས་བསྟན་སྙིགས་ལྔ་བདོ་བའི་འགྲོ་བ་རྣམས་ཀྱི་དཔལ་དང་། སྐྱབས་དང་མགོན་དང་དཔུང་གཉེན་དམ་པར་ངོ་མཚར་རྡོ་རྗེའི་སྐུ་བརྙན་གདུལ་བྱའི་ཞིང་སར་སྨོན་ལམ་གྱིས་འདུས་བྱས་པ་གང་མི་འཇིགས་པ་སེང་གེའི་ཁྲི་ལ་འཚོ་གཞེས་བརྟན་པར་བཞུགས་པ་ནི་བསྟན་འགྲོ་སྤྱི་དང་བྱེ་བྲག་ཡོངས་སུ་བཀའ་དྲིན་དོ་ཟླས་དབེན་པ་ཉིད་དུ་གྱུར། འདིར་གནས་བྱ་བྲལ་ཕྲན་བུར་གྱུར་པ་ཡང་། ལུས་སེམས་འདུས་བྱས་ཀྱི་རང་མཚང་མ་བསྟན་ཙམ་ཁྱོ་རེ་བའི་ངང་ཆེས་དམུ་རྒོད་པའི་འགྲོ་བའི་དབུས་སུ་རྣམ་གཡེང་ཁུར་གྱིས་དུབ་ཀྱང་ལྷག་བསམ་གྱི་འཁར་བ་དང་ཆོས་ཉིད་ཀྱི་ངལ་སྟེགས་ལ་བརྟེན་དེ་ཇི་བདེར་གནས་པའི་ཁུལ་དུ་མཆིས་ལ། ལྗོངས་འདིའི་སེམས་ཅན་སྤྱི་མཐུན་ལས་ཀྱི་བྱེད་པས་ཅི་ལྟར་འགྱུར་མ་ངེས་ཀྱང་། སྤྱི་དང་བྱེ་བྲག་གི་བདེ་ཐབས་ལ་དམིགས་དཀོན་མཆོག་ལ་གསོལ་བ་བཏབ་ཅིང་རང་གི་ཐབས་མཁོས་ལ་དཔག་པའི་བསམ་སྦྱོར་ལྷོད་མེད་དུ་མཆིས་ནའང་།
ད་ལམ་འདི་ཕྱོགས་གནས་ཚུལ་ཞུ་འོས་ཁ་ཤས་བློས་ཆོས་དཀའ་བས་སྔོན་འཕྲོས་སུ་བཀའ་ཤག་ཏུ་ཕུལ་ལྟར་དང་། ད་ནི་འགྲིག་ཟླུམ་ཡོང་མིན་ཅི་ལྟར་ཡང་། རིང་མིན་ཅི་མྱུར་དུ་ཐག་ཆོད་དམ་སྙམ་པ་དང་། ལ་དྭགས། མུལ་ལྦེ། བྷལ་ཏི་ནང་ཚགས་ཀྱི་འགྲིགས་ཟླུམ་བྱུང་ན་སྨོས་མེད་དང་། དེ་ལྟར་མ་བྱུང་ཚེ་རེ་ཞིག་བཟང་དུས་ཙམ་མམ་སྟོད་ཧོར་སོགས་མཐའ་དམག་རྔམ་ཆེན་གྱི་སྣ་འདྲེན་མི་བྱེད་པའི་མཐའ་འདོམ་ཙམ་བགྱིས་ན་བྱེད་ཡོང་ངམ་རེ་ཞིང་། དེ་ཡང་ཅི་ལྟར་ལེགས་བཀའ་ཡིས་འཁོར་ལོས་ཕྲལ་དུ་ཁྱབ་པ་ཞིག་ཅི་ནས་ཀྱང་མཁྱེན་མཁྱེན་མཁྱེན། ཞེས་དཀྱུས་རིང་ཐུགས་རྗེའི་སྤྱན་རས་གཡོ་བར་བྱེད་པའི་རྟེན་ལྷ་གོས་རྣམ་པར་དཀར་བས་བཅིབས་ཏེ་ཟླ་ཚེས་བཟང་པོ་ལ་ཕུལ་བའི་ཞུ་ཡིག་སརྦ་མངྒ་ལཾ། ཞབས་པད་མཆོག་ཏུ་ཞུ་ཆུང་། ཧོར་ཟླ་དགུ་པ། བཅུ་གཉིས་པ། དང་པོ་རྣམས་སུ་ལྷ་འདྲེའི་འཚུབ་ཀྱི་འཛེར་ལྟས་ཕྲན་བུ་ཤར་བས་དེ་སེལ་གྱི་རིམ་གྲོ་ཡང་བཀའ་ཡི་འཁོར་ལོས་ཁྱབ་གསོལ་བ་འདེབས་པ་སྟེ། བདག་ལྟ་བུའི་བྱིས་པའི་འཁྲུལ་ཤེས་ཀྱིས་ཇི་བཞིན་རྔོ་ཐོགས་པ་ག་ལ་འགྱུར་ཡང་། སྙིང་ནས་དུང་དང་ཀུ་མུད་ལྟ་བུའི་ལྷག་བསམ་གྱི་གསོལ་བར་ཆོས་དབྱིངས་ཚོམ་འཁྲུང་མེད་པ་ཅིས་ཀྱང་མཁྱེན་མཁྱེན་མཁྱེན་སརྦ་མངྒ་ལཾ།