༈ བཀའ་བློན་ལྷན་རྒྱས་ལ་མར་ཡུལ་སྟོད་ཝཾ་ལེ་ནས།
གངས་ཅན་འགྲོ་བའི་མགོན་པོ་རྒྱལ་བ་མཆོག་གི་འཕྲིན་ལས་ཀྱི་ཁ་ལོ་པ་འཛིན་པའི་མཛེས་རྒྱན་མངའ་བདག་ཆེན་པོ་རྣམས་ཀྱི་མདུན་སར་ཞུ་བ་འཛམ་གླིང་ཆུ་བཞིའི་མགོ་བོ་ལྷ་ལས་བབ་པའི་རྡུལ་གྱི་ཉེར་སྤྲས་ཚད་སེལ་བསིལ་ལྡན་གཙང་མའི་ལྗོངས་བོད་ཡུལ་ཞེས་སྙན་པར་གྲགས་པའི་འཛིན་མའི་ཁྱོན་ལྷར་བཅས་སྐྱེ་རྒུ་ཀུན་གྱི་སྤྱི་བོར་ཚད་སྐྱོབས་དབང་པོའི་ཏོག་བཞིན་འཇིག་རྟེན་དབང་ཕྱུག་ངུར་སྨྲིག་གར་གྱི་རོལ་པ་ཡིས་འཕྲིན་ལས་ཀྱི་ཞབས་འདེགས་རྩིབས་སྟོང་རྣམ་པར་བཀྲ་བའི་རྒྱུད་བཞིན་སྐྱེ་རྒུའི་གདུང་སེལ་འཕྲིན་ལས་ཀྱི་ཁ་ལོ་གཡས་སུ་འཁྱིལ་བ་སྙན་པའི་ཕུར་མ་ལྷབ་ལྷུབ་གཡོ་བཞིན་པར་བཞུགས་པ་བཀའ་དྲིན་གྱི་ཞོ་ཤས་ཁྱབ་ཅིང་འདིར་གནས་རིག་པ་འཛིན་པར་སྒྲོ་བཏགས་པ་རྣལ་འབྱོར་རྒྱལ་ཁམས་ཕྱོགས་མེད་དཱ་རི་འདྲ་པ་ཡང་འདུས་ཕུང་མ་ཞིག་ཙམ་དུ་གངས་ཅན་བདེ་བའི་བཅས་མགོན་པོ་མཆོག་གི་འཕྲིན་ལས་ཀྱི་ཆེད་དུ་སྒོ་གསུམ་ངལ་བ་བརྒྱ་ཕྲག་ལྷུ་རུ་བླངས་ནས་མི་བསྲུན་དྲེགས་པའི་བློ་ཅན་དུས་ངན་ངང་ཚུལ་འདྲེན་པའི་ཤུགས་འཆང་རྣམས་རང་སྒོའི་སྤྱི་བརྟོལ་བསྐྱེད་པ་དུ་མས་སུན་ཡང་གངས་ཅན་མགོན་པོའི་བཀའ་ལུང་ལྷ་ཡི་མེ་ཏོག་ལྟ་བུ་དཔྲལ་བའི་བརྒྱན་དུ་སྤུད་ཅིང་མདུན་ན་འདོན་བློ་ལྡན་རྣམས་ཀྱི་སྙན་པའི་བསྐུལ་ཚིག་རྣ་བའི་རྒྱན་དུ་བཟུང་ནས་བཟོད་པའི་སྙིང་ཁམས་ལྷག་བསམ་འཁར་བར་འཁྲས་བཞིན་འབད་པ་དུ་མས་མར་ཡུལ་བདག་པོ་སྟོད་སྨད་ལེགས་སྤེལ་ལེགས་པར་གྲུབ་ཉེའི་སྐབས་སུ་ལགས་ཤིང་།
དེ་ཡང་སྤྱིར་སྙིགས་དུས་ཀྱི་ངང་ཚུལ་དུ་ཁ་ཏཱུ་པ་ཀ་གཡོ་གྱུར་སྔ་ལྟས་ཀྱི་ཕྱོགས་འདིར་མི་མ་ཡིན་དྲེགས་གྱུར་མང་པོ་ལྷག་པར་འཁྲུག་པས་མི་རྣམས་ཀུན་ཀྱང་རང་དབང་མེད་པར་སེམས་རྒྱུད་འཁྲུགས་ཏེ་གཅིག་གིས་གཅིག་ལ་གདེང་ཁེལ་མེད་པའི་ངང་ཚུལ་ཆེས་ཆེར་སྟོན་ཡང་གཞུང་ས་མཆོག་ནས་བསྟན་རིམ་ལ་འབད་པ་དང་། ལྷག་ཏུ་གངས་ཅན་མགོན་པོ་ཐམས་ཅད་མཁྱེན་གཟིགས་ཆེན་པོ་ཡི་ཐུགས་དམ་སྐྱབས་འཇུག་བཟང་པོས་ཁྱབ་པའི་མཐུ་ལ་བརྟེན་ཕྲལ་ཚེགས་ཆེ་བྱུང་ཡང་མཐར་ཧོར་ཟླ་དང་པོའི་ཚེས་ལ་མུལ་ལྦེ་རྒྱལ་པོའང་འདིར་སོན་ཞིང་། འདི་དང་ཁད་ཉེ་བར་ཞག་གཅིག་གི་གང་ཙམ་ནས་སྔར་ནག་ཕྱོགས་གདོན་གྱིས་བསླད་པ་ལས་ཅུང་ཟད་གྲོལ་བས་ཡིད་སྐྱི་ཟིང་བྱེད་ཅིང་དད་པའི་ཤུགས་ཀྱང་འཕེལ་བ་སྐད་དུ་གྲགས་ལ། ཤེལ་དུ་བཞུགས་རིང་གི་བློ་ལྡན་གཟུར་གནས་ཀྱི་ཞུས་པའི་ཚིག་དང་ཁོ་རང་ནས་གསུང་བ་རྣམས་ཀྱང་ཕལ་མོ་ཆེ་མི་དྲན་པ་ལྟ་བུ་བྱུང་སྣང་ཞིང་འདིར་སླེབ་ནས་ཀྱང་ངེད་དང་འཕྲད་པའི་ཐོག་མར་ལུས་གཡོ་འདར་དང་བཅས་པ་རྒྱལ་ཐབས་སུ་གྱུར་པ་སོགས་གདོན་ལས་ཅུང་ཟད་གྲོལ་ཏེ་སྔར་གཤིས་ལས་ཆེས་ལྡོག་པ་དང་། འོན་ཀྱང་ཕྱོགས་འདིའི་མཐའ་དམག་གི་ཁ་རླངས་ལྟ་བུའི་མི་མ་ཡིན་རྣམས་ཀྱི་ཆོ་འཕྲུལ་དང་འཚུབ་ལྷོངས་ཐུན་མོང་དུ་རྟོགས་པ་དང་། ལྐོག་གྱུར་གྱི་གནས་སུ་གྲུབ་པ་ཡང་བཟོད་དཀའ་བས་ལེགས་བཟླུམ་ལ་ཤིན་ཏུ་མཐོ་མཚམས་པར་གྱུར་ཀྱང་རིམ་གཉིས་ལམ་ཁྱེར་གྱིས་དབྱིངས་སུ་ཅུང་ཟད་བཅིལ་བའི་ཁུལ་བགྱིས་ཤིང་། ཕན་ཚུན་དགེ་སྡིག་བླང་དོར་གྱི་ཁེ་བཤད་ཉན་དཀྲོལ་ཡང་ཡང་བྱས་པར་བརྟེན་ཁུ་དབོན་ཕན་ཚུན་ས་རིས་ལྷ་ཕྱག་སོགས་བཟང་པོའི་སྲོལ་རྒྱུན་བཞིན་ལེགས་སྤེལ་རགས་པ་ནག་ཟླའི་དཀར་ཚེས་བཟང་པོར་གྲུབ་ཅིང་གཞུག་ཚག་སྐྱོང་འོས་ཕྲན་བུ་དང་། བློན་པོ་རྣམས་ལ་དྭགས་སུ་སྡོད་ནས་ས་རིས་འོས་འཚམ་སྤྲོད་པར་དན་སོང་ཡང་།
ནོ་ནོ་ནས་སྡོད་གནས་མུལ་ལྦེར་དགོས་ཚུལ་གྱི་ཞུ་བ་ནན་ཆེ་བྱེད་འདུག་པ་དེས་ཅུང་ཟད་བཤད་དཀའ་སྣང་ཡང་དོན་དུ་ནི་འགྲིག་བཟླུམ་གྱི་གཞི་གྲུབ་པར་གྱུར་སོང་བ་སྔ་འཕྲོས་ཀྱི་གནས་ཚུལ་ལགས་ཤིང་། སྔ་སོར་མུལ་ལྦེ་རྒྱལ་པོ་ཤེལ་དུ་སྡོད་པ་དེ་སྐབས་ཀྱི་གནས་ཚུལ་ཞིག་ཡང་ཕུལ་ཡོད་པ་སྐུ་ཞབས་སུ་འབྱོར་པ་གཞིར་བཅས་ཤིང་། དེའི་བཀའ་ལན་སྔར་གནང་མ་ཚར་ཚེ་མུལ་ལྦེ་རྒྱལ་པོ་འདིར་འབྱོར་གཤིས་གནས་ཚུལ་དེ་འགྱུར་བའི་རང་བཞིན། གོང་གསལ་ལྟར་ཕྱི་མ་དགོས་པར་སྣང་ལ། འོན་ཀྱང་རང་གི་སྒོ་གསུམ་གྱི་ངལ་བ་དུ་མ་ལྷུར་བླང་བགྱིས་པ་ཉིད་བསྟན་འགྲོ་དགེ་བའི་བཙས་རྒྱལ་བ་དགྱེས་པའི་མཆོད་སྤྲིན་བཟང་པོར་དམིགས་པ་ཆུད་མི་ཟ་བ་ཐུགས་རྗེ་བརྩེ་བའི་དོ་རར་འཇུག་པ་ཅི་ནས་མཁྱེན་མཁྱེན་མཁྱེན། ལ་དྭགས་རྒྱལ་པོ་སྐུ་མཆེད་ཀྱི་ལེགས་སྤེལ་ཆོད་ཡིག་མགོ་མཆན་ཞུ་རྒྱུའི་སྐོར་ལན་སྩལ་ཆོ་འཕྲུལ་ཟླ་བར་ཡིད་ཀྱི་རྒུད་པ་སེལ་པའི་བདུད་རྩི་ཐོབ་ཅིང་། སྔ་ཕྱིར་གནང་སྐྱེས་ཕོན་ཆེ་ཡང་ཡང་སྩལ་བ་འབྱོར། འདིར་གཏོང་འོས་ཕལ་མོ་ཆེ་གྲུབ་ཟིན་གཤིས་ཞུ་བར་མཛངས་ཤིང་། གང་ལྟར་བཀའ་གླེགས་དེའི་ལན་ཞུ་ཞིབ་མོ་ཡང་འདིའི་ལེགས་སྤེལ་གྲུབ་པའི་གནས་ཚུལ་རིམ་བརྒྱུད་ཕུལ་སྐབས་འབུལ་རྒྱུ་ཆོས་དབྱིངས་རྙོག་པ་མེད་པའི་ཀློང་དུ་འཇུག་པ་ཞུ་ཞུ་ཞུ།
ཞེས་བྱམས་པས་ཡོངས་སུ་འཁྱུད་པའི་སྤྱན་རས་གཡོ་བར་བྱེད་རྟེན་ལྷ་གོས་རྣམ་པར་དརཀ་པབས་བཅིབ་སྟེ་དཔལ་གདོང་ཆུ་བྱ་ཟླ་༢ཚེས་༡༩བཟང་པོར་ཕུལ་བའི་ལི་ཁི་ཏཾ་མངྒ་ལཾ།