༈ བལ་ཡུལ་ཡམ་བུའི་བློན་འབངས་ལ་ཟ་འོག་ཕུག་ནས་ས་སྦྲུལ་ལོ།

ཨོཾ་སྭཱསྟི། ན་མོ་གུ་རུ་ཝེ། དུས་གསུམ་སངས་རྒྱས་ཐམས་ཅད་འདུས་པའི་དཔལ། །ཨོ་རྒྱན་མཚོ་སྐྱེས་པདྨ་བདེ་ཆེན་གླིང་། །བདག་གི་སྤྱི་བོའི་རྒྱན་དུ་རྟག་ཏུ་རོལ། །བྱང་ཆུབ་གོ་འཕང་བརྙེས་ཀྱང་གཏང་འོས་མིན། །འདི་ན་གངས་ཅན་བོད་ཡུལ་མི་ཡི་རིགས། །བུདྡྷ་མཱརྒ་ཛོ་ཀི་རྒྱལ་ཁམས་པར། །བལ་ཡུལ་རྒྱལ་པོའི་བློན་པོ་བློ་གྲོས་ཅན། །ཡིད་ཀྱི་བཤེས་གྱུར་དེ་ཡི་འདི་སྐད་ལོ། །ཁྱོད་ལ་མཁོ་བའི་ཡོ་བྱད་ཅི་འོས་པ། །བལ་པོའི་རྒྱལ་ཁམས་འདི་ནས་གཏང་ངོ་ཞེས། །ཚིག་གི་ཏམ་བུ་ར་བརྒྱུད་དངས་བ་ཡི། །སོར་མོས་བསྐུལ་བའི་སྙན་ཚིག་སྤྱིར་ཡང་ལེགས། །འོན་ཀྱང་བདག་ནི་མཐའ་ཡས་འགྲོ་བའི་དོན། །གཏན་བདེ་བྱང་ཆུབ་གོ་འཕང་བསྒྲུབ་པ་ལ། །འདི་སྣང་ཟང་ཟིང་དགོས་པ་འགའ་མ་མཆིས། །དེ་ཡི་མཚན་ཉིད་ཅུང་ཟད་འདིར་བཤད་ན། །བལ་པོའི་ཡུལ་དེར་བཟོ་རིགས་མཁས་པ་ཡིས། །བསྐྲུན་པའི་ལྷ་སྐུའི་འབྱུང་ཁུངས་ཡིན་ལགས་ཀྱང་། །བདག་ནི་རང་ཤར་ལྷ་སྐུ་བརྟེན་བརྟེན་ནས། །གསེར་ཟངས་ཙན་དན་སྐུ་ལ་དོ་གལ་མེད། །དེ་བཞིན་བལ་ཡུལ་རིག་བྱེད་འབྱུང་བའི་གནས། །བརྡའ་སྤྲོད་སྔོན་བརྗོད་གླེགས་བམ་མང་ན་ཡང་། །བདག་ནི་གཞོམ་མེད་སྒྲ་ལ་བློ་འཇུག་པས། །ཐ་སྙད་གླེགས་བམ་དག་གིས་དགོས་པ་མེད། །འཕགས་པའི་ཡུལ་དང་ཉེ་བས་ཀ་ཤིའི་རས། །དབང་པོའི་གཞུ་འདྲ་བལ་ཡུལ་ནས་བྱུང་ཡང་། །བདག་ནི་ཁྲེལ་ཡོད་ངོ་ཚའི་གོས་བཟང་ལ། །སྨོན་ལམ་ཤིང་བལ་རས་ཀྱི་འདོད་པ་མེད། །བོད་དུ་དཀོན་པའི་སྨན་མཆོག་བལ་པོའི་ཡུལ། །མང་མོད་བདག་ནི་སྡུག་བསྔལ་སེལ་བའི་སྨན། །དམ་པ་ཆོས་ཀྱི་བདུད་རྩི་བརྟེན་བརྟེན་ནས། །བལ་ཡུལ་ལ་སྒོའི་སྨན་ལ་སྨོན་དགོས་མེད། །གཞན་གྱུར་བལ་པོའི་ཡུལ་ནས་ཟངས་ལྕགས་སྤྱད། །སྐྱེ་བོ་ཕལ་ལ་ཉེར་མཁོ་འབྱུང་མོད་ཀྱང་། །བདག་ནི་འདོད་བྱུང་ཆོག་ཤེས་རྣམ་པ་དེས། །ཟངས་ལྕགས་མཁར་བའི་རྫས་ལ་སྐྱུག་མེར་བརྒྱབ། །འབྲས་དང་ཀ་ར་བུ་རམ་སྲན་མ་སོགས། །བལ་པོའི་ཡུལ་མི་རྣམས་ཀྱི་ཁ་ཟས་ཀྱང་། །བདག་ནི་ངན་ངོན་སྲོག་འཚོས་ཆོག་ཤེས་པས། །མངར་ཞིམ་ཟས་ལ་འདོད་ཞེན་རྡུལ་ཙམ་མེད། །བྱ་དང་རི་དྭགས་སྤུ་རིས་ངོ་མཚར་ཅན། །གསུང་སྙན་དུས་ཚོད་འཛིན་ཤེས་གནས་སྐབས་སུ། །མཚར་བར་སྲིད་ཀྱང་རྨི་ལམ་གཟུགས་བརྙན་བཞིན། །ཡང་དག་དོན་ལ་འདོད་ཞེན་རྡུལ་ཙམ་མེད། །དེས་ན་བལ་པོའི་ཡོ་བྱད་ངོ་མཚར་ཡང་། །ཞེན་མེད་རྣལ་འབྱོར་པ་ལ་དགོས་པ་དབེན། །འདོད་ཆུང་ཆོག་ཤེས་ལྡན་པ་འཕགས་པའི་ནོར། །འདིའི་ཁོ་བོ་རྟག་ཏུ་ཕྱུག་པར་གནས། །འོན་ཀྱང་བལ་ཡུལ་གྲུབ་པའི་གནས་ཡིན་པས། །བདག་ལ་བྱ་བ་བགྱིད་འོས་འགའ་མཆིས་པ། །ཁ་ཅིག་གྲུབ་མོད་ཁ་ཅིག་ད་དུང་ནི། །འཕགས་ཡུལ་སྐད་དུ་སྭ་ཡམ་བྷུ་ཙྱཻ་ཏ། །གངས་ཅན་རྣམས་ཀྱིས་འཕགས་པའི་ཤིང་ཀུན་ཞེས། །དེང་དུས་ཞིག་གསོ་སྐབས་སུ་བབ་མཐོང་བས། །རྒྱ་བལ་བོད་ཡུལ་ཀུན་གྱི་བདེ་ཐབས་སུ། །རང་འདོད་མེད་པའི་ཞབས་ཏོག་བགྱིད་སྙམ་ལ། །བལ་ཡུལ་རྗེ་འབངས་སྤྱིའི་བསོད་ནམས་ཀྱི། །སྔ་སོར་འཕྲོས་པའི་དུས་སུ་དོན་མ་སྨིན། །ད་ཆ་བལ་པོའི་འཛིན་མ་ལ་འཁོད་པའི། །རཱ་ཛ་ཀ་ཤིང་བློ་དང་ལྡན་གྱུར་པས། །ཤིང་ཀུན་མཆོད་རྟེན་ཞིག་གསོ་ལེགས་གྲུབ་ནས། །བསོད་ནམས་ཚད་མེད་ཐོབ་པར་འགྱུར་རོ་ཀྱེ། །ཕྱོགས་དེར་བདག་གི་འདོད་པ་དེ་ཙམ་སྟེ། །གཞན་གྱུར་ལྷག་པའི་བསམ་པས་ཡང་འདི་ལྟ། །རིས་མེད་འགྲོ་བ་བདེ་ཞིང་སྐྱིད་པ་དང་། །རྒྱལ་པོ་ཕན་ཚུན་རྟག་ཏུ་མཛའ་ཞིང་གཤིམ། །སངས་རྒྱས་བསྟན་པ་པ་དར་ཞིང་རྒྱས་བྱེད་ཅིང་། །འགྲོ་ཀུན་ཐར་པ་ཐམས་ཅད་མཁྱེན་པའི་ལམ། །བཟང་པོར་གཞུག་པར་འདོད་པའི་གདུང་སེམས་ལས། །རང་ཉིད་ཚེ་འདིའི་ཟས་ནོར་གོས་ཀྱི་ཆེད། །སྙན་པར་གྲགས་པའི་གཏམ་ལ་དོན་གཉེར་བ། །ནམ་ཡང་མ་མཆིས་དེ་ཤནྟ་རི་པ། །ཁ་བ་ཅན་གྱི་ཛོ་ཀིའི་མཚན་མཚན་ཉིད་དེ། །བལ་པོ་རྒྱལ་བློན་རྣམས་ཀྱི་ཤེས་པར་འཚལ། །གང་ཞིག་བདག་མཐོང་ཐོས་དྲན་རེག་འགྲོ་བ། །མཐའ་དག་རིང་པོ་མི་ཐོགས་བྱང་ཆུབ་ཀྱི། །ལམ་བཟང་ལ་ཞུགས་འཁོར་བའི་སྒོ་བཅད་ནས། །རྟག་ཏུ་ཞི་བ་གཡུང་དྲུང་དེ་བརྙེས་ཤོག །

ཞེས་བལ་པོ་ཡི་རྗེ་བློན་སྤྱི་དང་བྱེ་བྲག་མདུན་ན་འདོན་ཆེན་པོ་རྣམས་ལ་གངས་ཅན་རི་བོའི་ཁོངས་སུ་སྐྱེས་པའི་ཛོ་ཀི་དེ་ཤནྟ་རི་པས་ཆེད་དུ་དཀར་པོའི་ལོ་རྒྱལ་གྱི་ཟླ་བའི་ཚེས་བཟང་པོར་བསྲིང་པ་སརྦ་མངྒ་ལཾ།