༈ རྣམ་འདྲེན་འཕགས་མཆོག་སྤྲུལ་པའི་སྐུ་ལ།
རྒྱལ་ཀུན་ཡེ་ཤེས་མཚོ་ཀློང་དུ། །ཚད་མེད་སྙིང་རྗེའི་པདྨ་དཀར། །སྲིད་ཞི་ཡོངས་གྲོལ་ཕྱག་རྒྱ་ཅན། །འཕགས་གྱུར་དེ་ཡི་ཞབས་སྟེགས་ངོགས། །འདིར་གནས་ཐོས་མཚོར་འཇུག་པ་ལ། །བསམ་པའི་གྲུ་རྫིང་མ་སྨན་ཅིང་། །ཡང་དག་འཇོག་པའི་ནོར་བུ་གང་། །ཐོབ་རློམ་དེད་དཔོན་ངང་ཚུལ་ཅན། །སྔོན་གོམས་གསེར་གྱི་ཟར་བུ་ལ། །སྦྱངས་སྟོབས་འཕྲོག་བྱེད་ཙར་མས་གཡོགས། །མ་སྨད་སྤོབས་པའི་སོར་མོ་ཡི། །རྒྱུད་བསྐུལ་ཤུགས་འབྱུང་ངག་འདི་གསོལ། །ཁྱོད་ནི་བསྐལ་མང་ཕ་རོལ་ནས། །བྱང་ཆུབ་སེམས་བསྐྱེད་ས་བོན་དེ། །ཚོགས་གཉིས་ཤེར་གྱི་ཡོངས་དཀྲུན་པས། །དེང་དུས་ཡོངས་འདུ་དབང་པོར་གྲུབ། །སྔོན་གོམས་བག་ཆགས་མཐུ་བཟང་པོ། །ནམ་ཡང་ཡོལ་བ་མེད་པ་ཡིས། །རིས་མེད་ཆོས་ཚུལ་རྒྱ་མཚོ་ལ། །སྤྱན་ཡངས་ཁྱེད་ལས་ཅིས་མི་བསྔགས། །འཕགས་རྣམས་ཆོས་མིག་རྡུལ་བྲལ་བ། །ཐོབ་པས་ཆོས་ཚུལ་མཐའ་ཡས་ཀུན། །ཆུ་ཀླུང་རྒྱ་མཚོར་འཇུག་པ་བཞིན། །རྒྱལ་བའི་ཆོས་དབྱིངས་ལ་འཇུག་པར། །རྒྱལ་བས་ཡོངས་སུ་བསྔགས་གསུང་བཞིན། །མགོན་ཁྱེད་སྐྱེ་བའི་འཕྲེང་བ་ཀུན། །རྣམ་པར་དག་པའི་ཆོས་ཚུལ་རྣམས། །གཅིག་ཏུ་འཛིན་པར་མཛད་འདི་རྨད། །དམ་པ་ཁྱོད་ཀྱང་དགེས་པ་ཡིས། །ཡང་ཡང་བདག་གི་གཏམ་གླེང་ཞིང་། །བདག་ཀྱང་ཁྱེད་ལ་འགུ་ཐོབ་ནས། །དགའ་བའི་སེམས་ཀྱི་གཅིག་ཏུ་དཀར། །དེས་ན་ཤུལ་ལམ་རིང་པོ་ཡིས། །ཅུང་ཟད་སྐལ་ཡང་ཕན་ཚུན་ཡིད། །ཟླ་འོད་ཨུཏྤལ་དཀར་པོ་བཞིན། །ཆོས་མཐུན་ཚོགས་པ་གཅིག་ཏུ་བྱས། །མགོན་ཁྱོད་སྦས་པའི་ཡུལ་ལྗོངས་དེར། །བསྟན་དང་འགྲོ་ལ་ཕན་པ་ཡི། །ལྷག་པའི་བྱ་བ་མཛད་པ་ལ། །བདག་ཀྱང་སྙིང་ནས་ཡིད་རང་ཐོབ། །ངེས་ཀྱང་གངས་ཅན་དབུས་འགྱུར་དུ། །སྐྱེས་མཆོག་བསོད་ནམས་མ་སྨད་པས། །འདུན་པར་ཆོས་བཞིན་སྤྱོད་པ་ཡིས། །བག་ཡངས་ཞུམ་པ་མེད་པར་གནས། །དེ་ནི་རིང་པོ་མ་ཡིན་པར། །མདོ་ཁམས་འཛིན་མའི་ཁྱོན་ཡངས་པོར། །རྒྱལ་བསྟན་བྱ་བ་བགྱིད་དགོས་ཀྱི། །ཡིད་ཀྱི་ཤིང་རྟ་མཆོག་དེ་མཆིས། །དེས་ན་རེ་ཞིག་འཚོ་བ་ན། །ཕན་ཚུན་དགེ་ལེགས་བཟང་པོ་ཡི། །འབྲེལ་པ་གོང་ནས་གོང་འཕེལ་དུ། །སྨོན་ནོ་དཔལ་ལྡན་འགྲོ་བའི་མགོན། །དེ་སྐད་མ་བཅོས་གཉུག་མའི་ཚིག །གང་ཤར་ལྷུག་པར་སྤེལ་བའི་གཏམ། །ཡིན་ལུགས་དྲང་པོར་བརྗོད་པའི་ངག །འདི་ཀོ་དམ་པ་དགྱེས་པའི་འཕྲིན། །ས་སྤྱོད་འོག་མིན་འཚུར་བུ་ཡི། །གཙུག་ལག་རྩེན་ནས་རྒྱལ་ཁམས་པ། །གདོད་མ་ཉིད་ནས་གྲུབ་པ་ཡི། །རིག་པ་འཛིན་དེའི་ལི་ཁི་ཏཾ། །སརྦ་མངྒ་ལཾ།