༈ གང་ལ་སྤྲུལ་སྐུ་ལ།
ས་ཡི་དཀྱིལ་འཁོར་མངའ་བརྙེས་དབང་ཕྱུག་ཆེ། །བསོད་ནམས་བྱེ་བས་གཏམ་པ་རལ་པའི་ཁྲོད། །ཁྱོད་ཞབས་ཟླ་བ་ཚེས་པས་མངོན་བརྒྱན་ཏེ། །གངས་ཅན་ལྷ་ཡི་ལྷར་གྱུར་མགོན་དེའི་ཞབས། །རྒྱལ་བསྟན་གཞུང་མང་རྒྱ་མཚོར་འཇུག་པ་ལ། །འཇིགས་མེད་བློ་གྲོས་གྲུ་རྫིང་ལེགས་ཐོབ་ནས། །ཐོས་བསམ་ནོར་བུ་བསྒོམ་པའི་བསམ་འཕེལ་གང་། །ཐོབ་རློམ་དེད་དཔོན་དེའི་ཞུ་བའི་མཆིད། །ཁྱེད་ནི་གྲུབ་རིག་ལྷ་ཡི་རྫིང་བུ་རུ། །ཐོག་མེད་ཡེ་ཤེས་རླུང་ཤུགས་ཀྱིས་སྤྱོད་ཀྱང་། །མོས་ལྡན་གདུལ་བྱའི་ཡིད་ཀྱི་རྫིང་བུ་རུ། །གང་སྐུ་ཟླ་རིགས་གསལ་ཆར་འདི་རྨད་བྱུང་། །གདོད་ནས་དགེ་བའི་ཆོས་ཁམས་ཡིད་བཞིན་སྙིང་། །ཚོགས་གཉིས་དགེ་བའི་བྱི་དོར་གྱིས་དག་ལ། །དོན་གཉིས་ལྷུན་གྲུབ་ས་དབང་རྒྱལ་མཚན་རྩེར། །བཀོད་ཚེ་འགྲོ་བའི་རེ་འདོད་ཅིས་མི་བསྐང་། །རིས་མེད་གྲུབ་མཐའ་འབྱུང་ཁམས་དུ་མའི་བཅུད། །ངེས་དོན་སྙིང་པོ་འཆི་བ་མེད་པའི་ཆབ། །གང་གི་བདེ་བླག་བཏུང་བའི་ནུས་པ་ཡིས། །ཁམས་གསུམ་འཁོར་ལོས་མི་འཇིག་ཁྱོད་རྟག་རྒྱལ། །ལག་ན་པདྨོའི་ཞིང་ཁམས་བསིལ་ལྡན་ལྗོངས། །འཆང་ཐུབ་རི་དྭགས་སྡེ་རིགས་དུ་མའི་དབུས། །ས་དབང་གང་གི་རི་བོའི་རྩེ་མོ་རུ། །མངོན་བརྗིད་སིང་ཧ་ཁྱེད་ལས་གཞན་སུ་ཞིག །སྟོབས་ལྡན་གོ་བེ་ལ་ཡི་གཙུག་ཏོར་རྩེར། །འཕགས་མཆོག་ཆོས་ཀྱི་རྒྱལ་པོ་བསྟི་ཞེས་ཡང་། །ལྔ་བདོའི་མཐའ་འདིར་ས་སྐྱོང་ཆེན་པོ་ཡི། །གཙུག་ན་ཁྱེད་བརྗིད་འདི་དང་རྣམ་དབྱེ་ཅི། །བདག་ཅག་བོད་ཆེན་ཤར་དང་ལ་སྟོད་ལྷོ། །སྐྱེ་བའི་ཡུལ་གྱི་ཐ་དད་སྙིང་སྐལ་ཡང་། །ཡིད་ཀྱི་ངང་པ་ས་སྐྱོང་རྫིང་བུ་རུ། །གཅིག་ཏུ་དཀར་བས་འཇུག་འདི་ཨེ་མ་མཚར། །དེས་ན་ཁྱོད་ནི་གྲུབ་པ་ཆེན་པོའི་ས། །བརྙེས་པར་གྲགས་བཞིན་དོན་དུའང་དེ་ལྟ་ན། །སྐྱེ་འཆི་སྤྲོས་པའི་མཚན་མ་སྤང་ཟིན་མོད། །འོན་ཀྱང་འགྲོ་བའི་སྣང་ངོར་ཅིར་ཡང་སྟོན། །དེང་དུས་གདུལ་བྱར་གྱུར་རྣམས་སྐྱོ་བསྐྱེད་ཕྱིར། །ཅུང་ཟད་བརྙེད་པའི་ཚུལ་སྟོན་གྱུར་རོ་ཞེས། །ཆོས་ཀྱི་རྒྱལ་པོ་དཔལ་གྱི་མགུར་ནས་ཏེ། །དེ་ཡི་བདག་བློ་ངལ་བའི་ལམ་དུ་དྲངས། །དེས་ན་ལྷག་བསམ་དག་པ་ཀུ་མུད་ཏ། །ཆུ་ཤེལ་ནོར་བུ་ཟླ་བ་གངས་ཀྱི་རི། །པདྨ་དཀར་པོ་སྙེམ་མེད་རྩ་ལག་བཞིན། །གཅིག་ཏུ་དཀར་བས་དགེ་བའི་རྟེན་འབྲེལ་དུ། །བརྟན་བཞུགས་ཚིགས་བཅད་ལ་ཀའི་རྫས་དང་བཅས། །ལྷོ་ཕྱོགས་སའི་ཐིག་ལེ་འཐུང་སྤྱོད་འདབས། །གཉལ་སྨད་གྲུབ་པའི་བསྟི་གནས་དགེ་རི་ནས། །དཔལ་ཆེན་རིག་པ་འཛིན་པ་དེ་ཡིས་ཕུལ། །རྟེན་འབྲེལ་འདིའི་མཐུའི་མགོན་ཁྱེད་བདེ་ལྡན་མགོན། །ཇི་བཞིན་གངས་ཅན་བདེ་འི་རྩ་ལག་ཏུ། །བསྐལ་པའམ་ནི་བསྐལ་པ་ལས་ལྷག་པར། །འཚོ་གཞེས་ཞབས་ཟུང་བརྟན་པའི་རྒྱུར་གྱུར་ཅིག །
ཞེས་རབ་མྱོས་ལྕགས་ཕོ་རྟ་ཡི་ལོ་སྨིན་དྲུག་ཟླ་བའི་ཡར་ངོ་རྣམ་པར་དགེ་བའི་ཚེས་བཟང་པོ་ལ་ཕུལ་བའི་ཞུ་ཡིག་སརྦ་མངྒ་ལཾ།