༈ རྡོ་རྗེ་བྲག་རིག་འཛིན་ཆེན་པོ་ལྕགས་རྟ་ལྷ་ས་ནས།
སྭཱསྟི། གང་གི་གཉེན་གཤིམ་ཐུགས་ཀྱི་ཡོངས་བཅིང་ཞིང་། །དག་པའི་སྣང་བས་བསྐུལ་བའི་ཚིགས་བཅད་གསུང་། །རྣམ་དཀར་རེག་བྱས་སྦོས་ཏེ་ཕྱག་རྒྱ་ཡིས། །རེ་ཁ་ཉམས་མེད་སོན་ལ་འགུ་བ་ཐོབ། །སངས་རྒྱས་ཀུན་དངོས་མཚོ་སྐྱེས་རྡོ་རྗེ་ཡི། །རིང་ལུགས་གཅིག་གྱུར་རྡོ་རྗེའི་མདུད་པ་དེས། །ཕན་ཚུན་ཡིད་དབང་གཅིག་ཏུ་འཆིང་བྱས་ནས། །རྣམ་པར་དཀའ་བའི་ལང་ཚོ་འདི་ཀོ་རྨད། །འདིར་གནས་བཟོད་ནས་གྲུབ་པའི་རྣལ་འབྱོར་པ། །གུ་རུའི་ལུང་གི་ཕོ་ཉར་རློམ་པ་ཡང་། །ད་ལྟ་ལྷ་ལྡན་རྒྱལ་པོའི་ཕོ་བྲང་འདབ། །རིམ་གཉིས་དགེ་སྦྱོར་གོང་ནས་གོང་འཕེལ་མཆིས། །འོན་ཀྱང་ལས་སྣང་འགོག་པ་མེད་པ་ཡིས། །གཏད་མེད་སྒྱུ་འདྲ་བྲག་ཆ་ལྟ་བུ་ཚིག །རྒྱལ་གསུང་འཁོར་ལོའི་གསུམ་པ་ངེས་དོན་གྱིས། །མཐར་ཐུག་ཁྱོད་ཀྱི་སྨྲ་བ་མི་འཐད་དང་། །མངར་རིར་སྐྱེ་མང་སྲོག་ལ་མི་འཇིགས་པ། །བྱམས་པའི་སྦྱིན་པ་བྱས་འདི་ཅི་ཞེས་དང་། །རིས་མེད་རྒྱལ་བའི་བསྟན་དང་བསྟན་འཛིན་ལ། །ལྷག་པར་བྱ་བ་བྱས་འདི་གནོང་ངོ་སོགས། །དེ་འདྲ་ལྟར་སྣང་ཚིག་གི་རྒྱུད་མང་ཉིད། །ཆེན་པོའི་སོར་མོའི་བསྐུལ་ཏེ་ཐོན་ནོ་ཞེས། །རབ་དགའི་སྙན་པའི་གླུ་རུ་སྒྲོགས་པ་དེས། །བདག་བློ་དགེ་བ་འཕེལ་བའི་གྲོགས་སུ་སོང་། །གངས་ཅན་རྗེ་བོ་མཆོག་དང་འཕྲིན་ལས་པ། །ཀུན་ཀྱང་མཐུན་པའི་ཚིག་གི་མེ་ཏོག་གང་། །ལེགས་སོའི་རྔ་སྒྲ་སྒྲོགས་དང་ཆབ་གཅིག་པར། །རིག་འཛིན་རྒྱལ་ཁམས་པ་ལ་བྱབ་སྐབས་ལགས། །བདག་ནི་ཆོས་བཞིན་སྤྱོད་པའི་མལ་ས་རུ། །བླ་མའི་བྱིན་རླབས་དྲོ་འཇམ་གོས་ཀྱིས་ཀླུབས། །གནས་ལུགས་ལྟ་བའི་བཟའ་བས་ཞེ་ཁ་ཁེངས། །ལམ་ཁྱེར་གཉེ་འབོལ་ལ་བརྟེན་བདེ་མོར་མཆིས། །དེ་བཞེན་ཐེག་བརྒྱད་ལྟ་བའི་གྱེན་ཕྱུར་རྩེར། །རྣམ་པར་རྒྱལ་བ་ཨ་ཏིའི་ཁང་བཟང་དུ། །རྣམ་ཀུན་མཆོག་ལྡན་ལྷ་མོ་དཔལ་འཕྲེང་ལ། །རང་རིག་དབང་པོས་དགའ་མགུར་སྤྱོད་བཞིན་གནས། །དེ་སྐད་ནང་ལུགས་ལྷུག་པའི་གནས་ཚུལ་ཉིད། །བྱང་བདག་རིག་འཛིན་མཆོག་གི་སྤྲུལ་པའི་སྐུ། །དགྱེས་པའི་སླད་དུ་འཕྲུལ་སྣང་རྒྱལ་ཁམས་ནས། །ཕུལ་བ་འདིས་ཀྱང་ལེགས་ལམ་གོང་འཕེལ་ཤོག སརྦ་མངྒ་ལཾ།