༈ བཀྲ་བཟང་པ་ལ།
སྭཱསྟི། སྔགས་རིགས་མངོན་པར་མཐོ་བའི་སྒོ། །གྲུབ་པའི་གདུང་གྱུར་ལྟ་ན་སྡུག །དམ་པ་ཁྱོད་ནི་མིག་སྟོང་ཅན། །དམ་པ་རྡོ་རྗེ་འཛིན་དེའི་ངོགས། །གཞུང་ལུགས་ནགས་རླུང་སྟུག་པོ་ན། །རྣམ་དཔྱོད་ལྡན་ལང་ཚོས་རབ་མྱོས་ཤིང་། །མྱོང་བའི་གྷི་ཝང་འཛག་གྱུར་པ། །ཐབས་ཀྱི་ཐལ་ཀ་ཅན་དེའི་མཆིད། །ཁྱོད་ནི་སྔོན་བསགས་གསེར་གྱི་གཞིར། །ལེགས་བྱས་བདུད་རྩི་ཉེར་བསྐྱེད་པ། །སྨོན་ལམ་དག་པ་ཡོངས་འདུའི་ཤིང་། །དགེ་བའི་འབྲས་བུ་གཡུར་དེ་རྨད། །པདྨ་ཀ་ར་གདེངས་ཅན་དབང་། །གང་བདེའི་ཐུགས་རྗེ་ཆུ་ཁུར་ཅན། །ལེགས་པར་བསྔགས་པ་སྤྲིན་གྱི་སྒྲ། །ཤིས་བརྗོད་མེ་ཏོག་ཁྱོད་ལ་འཐོར། །གང་ཁྱེད་དམ་པའི་བག་ཆགས་མཆོག །དུས་བུ་སད་པར་གྱུར་པ་ཡིས། །བླ་མའི་མོས་གུས་སྙིང་སྟོབས་བརྟས། །དེས་ནི་རྟག་ཏུ་དགེ་བར་ངེས། །དོན་དེས་ཕྱི་མའི་དུས་དག་ཀྱང་། །བདག་ཅག་ནམ་ཡང་འདུ་འབྲེལ་མེད། །ལྷན་གཅིག་རྔ་ཡབ་དཔལ་རི་ལ། །ཚོམ་བུ་གཅིག་ཏུ་མེ་རེ་རེ། །རྟག་ཏུ་འཚོག་པར་སྙིང་དཀྱིལ་ནས། །སྨོན་ལམ་འདེབས་མཆིས་འགྲུབ་པར་ངེས། །སྐལ་བཟང་རྡོ་རྗེའི་སློབ་མ་དང་། །འབྲེལ་བཟང་བྱང་ཆུབ་བར་འགྲོགས་ཤོག །
ཅེས་བོད་ཡུལ་ཀུན་ཏུ་མི་ཡོངས་སུ་གྲགས་པ་ཀཿཐོག་སྤྲུལ་སྐུ་ཞེས་གཟོད་མ་ཉིད་ཀྱི་རྣལ་འབྱོར་པ་ཚེ་དབང་ནོར་བུས་རང་གི་སློབ་མ་བཀྲ་བཟང་ཞབས་དྲུང་ལ་ཆེད་དུ་བརྗོད་པའི་ལི་ཀཱ་ར་མངྒ་ལཾ།