༈ བསོད་ནམས་ཆོས་སྐྱོང་དཔལ་ལྡན་ལ་ཕུལ་བ།
ཨོཾ་སྭཱསྟི། རབ་འབྱམས་རྒྱལ་བ་ཀུན་གྱི་མགྲིན་གཅིག་ཏུ། །དམ་ཆོས་སྟོན་མཛད་ཡོངས་འཛིན་དགེ་བའི་བཤེས། །སྔགས་ཀྱི་རྡོ་རྗེ་སློབ་དཔོན་ཁྱད་པར་དུ། །རང་སེམས་ཆོས་སྐུར་སྟོན་མཛད་མགོན་པོ་དེ། །སངས་རྒྱས་ཀུན་མཉམ་སངས་རྒྱས་ཀུན་ལས་ལྷག །སངས་རྒྱས་ཞིང་མང་ཙན་དན་ཕྱེ་མ་ཡི། །བྱབ་ལས་བླ་མའི་བ་སྤུའི་བུ་ག་གཅིག །དྲི་བཟང་ཆུ་བྱུག་ཕན་ཡོན་ཆེ་ཞེས་པ། །རྒྱུད་སྡེ་ཀུན་ཏུ་ཚིག་དོན་མཐུན་པར་བསྔགས། །དེས་ན་བདག་གི་ཚེ་འདིར་དཀྱིལ་འཁོར་གཙོ། །བཀའ་དྲིན་མཚུངས་མེད་པད་འབྱུང་བདེ་ཆེན་གླིང་། །འཇམ་མགོན་ཀརྨ་རིག་འཛིན་ཉིད་དུ་ངེས། །དེས་ན་ཚེ་རབས་འདྲེན་པ་པད་འབྱུང་དང་། །སྤྱོད་འཆང་དཔའ་བོ་ནམ་མཁའ་སྙིང་པོ་ཡང་། །མགོན་པོ་དེ་དང་ཐ་དད་ཡོང་ཡེ་མེད། །བདག་གི་སྒོ་གསུམ་དགེ་བཅས་དེ་ལ་འབུལ། །བླ་མའི་སྲས་དང་བཙུན་མོ་བྲན་གཡོག་ཡང་། །བླ་མ་ལྟ་བུར་བལྟ་བར་ཡོངས་བསྔགས་ཏེ། །དེས་ན་རང་གི་རྩ་བའི་སློབ་མ་ཉིད། །གྱུར་ཡང་བླ་མའི་རིགས་སྲས་གྱུར་པས་ན། །བརྙས་དང་དམན་པའི་བསམ་པ་ཡོངས་བཏང་ཞིང་། །ཆེ་ཐང་གོ་ས་གཟེངས་བསྟོད་གྱུར་པ་ཡིས། །རང་གི་ཡུན་རིང་མི་ལོ་བཅོ་ལྔའི་བར། །ཉི་བཞིན་རྒྱ་བལ་བོད་ཡུལ་ཀུན་ཁྱབ་པ། །རིན་ཆེན་རྨད་བྱུང་གུ་རུའི་མཚན་བརྡའ་ཅན། །པདྨ་རཱ་ག་བཞུས་པའི་ཁུ་བ་ཉིད། །ལན་བརྒྱའི་ཉིང་ཁུ་ལྟ་བུ་དབང་གི་མདོག །ཉི་མ་འཆར་ཁའི་འོད་དང་རབ་འདྲེས་པ། །སྣོད་མཆོག་ཟླ་བ་ཆུ་ཤེལ་ལས་བྱས་བཞིན། །སྣ་ཚོགས་དར་གྱི་ཅོད་པན་ཀླུབ་བཞིན་དུ། །འཕྲོག་བྱེད་དབང་པོ་ཇི་འདྲ་གཟི་བྱིན་ཅན། །ཡིད་འོང་སྒྲོམ་བུར་འགྱིང་བཞིན་པ་འདི་དང་། །སྔགས་སྐྱེས་བློ་གྲོས་སྣང་བ་མ་རྙིང་པའི། །ལང་ཚོ་རྒྱས་པའི་ནཱ་རི་མ་ཎི་སཱར། །འདི་ཡང་བདེ་ཆེན་ཡེ་ཤེས་སྐྱེད་པ་དང་། །རིགས་ཀྱི་ཕྲེང་བར་དུ་གནས་པའི་ཕྱིར། །དཔལ་ལྡན་རྩ་བའི་བླ་མ་འགྲོ་བའི་མགོན། །ཚེ་དབང་ནོར་བུ་འཕྲིན་ལས་འགྲོ་འདུལ་གྱིས། །སྐལ་ལྡན་བསོད་ནམས་ཆོས་སྐྱོང་དཔལ་ལྡན་ལ། །སྙིང་ནས་བརྩེ་བས་བཀའི་གནང་བ་དང་། །ཆབས་ཅིག་ཀྭོན་འཇའ་ལྷག་བསམ་གྱིས་སྦྱིན་མཐུས། །དགེ་ལེགས་དཔལ་མཆོག་ལང་ཚོ་རྟག་རྒྱས་ཤོག །
ཅེས་རང་གི་རྩ་བའི་བླ་མ་དྲན་མཆོག་དངས་མའི་མགོན་པོ་པད་འབྱུང་བདེ་བ་ཆེན་པོའི་སར་བཞུགས་པའི་རིགས་སྲས་བསོད་ནམས་ཆོས་སྐྱོང་དཔལ་ལྡན་ལ་ཀོན་འཇའ་ཐམ་ཁ་དམར་པོ་རང་གི་ཡུན་དུ་སྤྱད་པ་དང་བཅས་བསྟབ་པའི་སྐབས་སུ་མངའ་རིས་གུང་ཐུང་དང་ཉེ་བར་དགའ་བརྒྱུད་མཚོ་གླིང་ནས་དཔལ་གདོང་ཆུ་བྱ་སྨིན་དྲུག་ཟླ་བའི་ཡར་ཚེས་དགའ་བ་དང་པོར་དཔལ་རིག་པ་འཛིན་པས་ཆེད་དུ་བསྐུར་བ་ཀུན་ཏུ་དགེ་བར་གྱུར་ཅིག་སརྦ་མངྒ་ལཾ།