༈ ཆོས་རྗེ་ཀུན་བཟང་དབང་པོ་ལ་ཕུལ་བ།
ཨོཾ་སྭཱསྟི། མི་ཤིག་དྭངས་མའི་ངོ་བོ་ཉིད། །སྟོང་གཟུགས་ཕྱག་རྒྱས་ཉེར་འཁྱུད་པ། །ཨེ་ཝཾ་བདེ་བ་ཆེན་པོའི་དངོས། །དཔལ་ལྡན་བླ་མའི་ཞབས་པད་དུ། །གང་གི་བཀའ་འབངས་ཐ་ཤལ་པ། །རྒྱལ་བའི་སྲས་སུ་རློམ་གྱུར་ནི། །ཡུལ་ཀུན་མྱུལ་བའི་རྣལ་འབྱོར་གཟུགས། །སྒྲོལ་མགོན་འཕྲུལ་དེས་འདི་སྐད་གསོལ། །ཨེ་མ་མགོན་པོ་མཆོག་ཁྱེད་ཉིད། །གྲུ་འཛིན་བདག་ལས་གཞན་ཅི་ཞིག །དེས་ན་འཁོར་བ་ཇི་སྲིད་དུ། །འགྲོ་དོན་ཆེད་དུ་རྟག་བཞུགས་ངེས། །འོན་ཏེ་བདག་སོགས་གདུལ་བྱའི་ངོར། །སྐལ་ལྡན་འགྲོ་བ་འདྲེན་སླད་དུ། །ཕྱོགས་དེར་ཞབས་པད་རྡོ་རྗེ་བཞིན། །བརྟན་གསོལ་འདེབས་ཀྱིས་གྲུབ་མཛོད་ཀྱི། །ཞུ་བའི་སྙིང་པོ་དེ་ལགས་ཀྱི། །ནམ་ཡང་མ་དོར་ཐུགས་རྗེ་ཅན། །གཞན་ཡང་བདག་རྨོངས་ཉོན་མོངས་པའི། །དབང་བསྒྱུར་སྒོ་གསུམ་ལས་རྣམས་ཀུན། །མཐོལ་ཞིང་གསོལ་ཚེ་འཕགས་ཁྱོད་ཀྱི། །དག་གཙང་དབུགས་དབྱུང་ཅིས་མི་མཛད། །བདག་ནི་རིང་པོར་མི་ཐོགས་པར། །དུས་ཀྱི་འཁོར་ལོ་འགྲུབ་གྱུར་པའི། །ཐུགས་འདུན་སྨོན་པས་མ་དོར་བར། །ཡང་ནས་ཡང་དུ་མཛོད་ཅིག་ཀྱེ། །དེ་སྐད་ཀཿཐོག་སྤྲུལ་སྐུ་ཡིས། །ཤུགས་འབྱུང་དད་པས་གླུ་རུ་འབུལ། །
ཞེས་ཀོང་ཡུལ་ཤིང་ལོའི་ཚལ་ནས་ནག་པོ་སྤྱོད་པས་བྱིན་གྱིས་བརླབས་པའི་སྤྲུལ་པ་དཔལ་ཚེ་དབང་ནོར་བུས་ཕུལ་བའི་ཞུ་ཡིག་བཀྲ་ཤིས་པར་གྱུར་ཅིག དགེའོ། །