རི་བོ་གངས་ཅན་གྱི་ཁོངས་ཀྱི་ཆོས་ཀྱི་རྒྱལ་པོ་སྟོབས་ཀྱི་འཁོར་ལོས་བསྒྱུར་བ་ཆེན་པོ་གང་གི་སྐུ་ཞབས་སུ་ཕུལ་བའི་ཞུ་ཡིག་དཔྱིད་ཀྱི་དཔལ་མོས་བགྲང་པའི་ཀོ་ཀི་ལ་ཡི་གླུ་དབྱངས།
༈ རི་བོ་གངས་ཅན་གྱི་ཁོངས་ཀྱི་ཆོས་ཀྱི་རྒྱལ་པོ་སྟོབས་ཀྱི་འཁོར་ལོས་བསྒྱུར་བ་ཆེན་པོ་གང་གི་སྐུ་ཞབས་སུ་ཕུལ་བའི་ཞུ་ཡིག་དཔྱིད་ཀྱི་དཔལ་མོས་བགྲང་པའི་ཀོ་ཀི་ལ་ཡི་གླུ་དབྱངས་ཞེས་བྱ་བ་བཞུགས་སོ། །
ཨོཾ་སྭཱསྟི། ལེགས་བྱས་བསོད་ནམས་བགྲང་ཡས་པས། །མ་ལུས་པ་ཅན་རང་སྟོབས་ཀྱི། །དབང་བསྒྱུར་མངའ་ཐང་རྒྱས་པའི་བདག །མི་ཡི་ལྷ་མཆོག་ཞབས་སྟེགས་ངོགས། །ཚེ་རབས་དུ་མར་རྒྱལ་བའི་དབང་། །པདྨ་ཀ་རས་རྗེས་བཟུང་ཞིང་། །མ་ནོར་རྡོ་རྗེ་ཐེག་ལམ་གྱིས། །རྣལ་འབྱོར་ཕྲན་བུ་དེའི་ཞུ་ཡིག །སྭཱ་སྟི། ཀུན་བཟང་རྣམ་པར་ཇི་བཞིན་བསོད་དཔལ་ཐུགས་བསྐྱེད་རིན་ཆེན་འབྱུང་གནས་ལས། །ཀུན་ནས་དགེ་བའི་མཛད་པ་ནམ་ཡང་ཉམས་མེད་ལྷུན་པོ་མཆོག་ཏུ་བརྗིད། །ཀུན་ལ་ཁྱབ་པའི་འཕྲིན་ལས་སྟོབས་ལྡན་སྣང་བྱེད་གོ་ལ་ཡངས་པོར་སྤྱོད། ཀུན་ཏུ་མངོན་མཐོ་ངེས་ལེགས་རྒྱས་གྱུར་དབང་ཕྱུག་ཆེ་དེའི་ཞབས་སྟེགས་ངོགས། །འདིར་གནས་ལུགས་གཉིས་མཁོས་ཀྱི་སྤྲོས་པས་ཤིན་ཏུ་དབེན་པ་ཉིད་གྱུར་ཀྱང་། །དམ་པའི་རྣམ་ཐར་སློབ་ལ་ཅིག་ཏུ་ཞེན་པའི་བྱ་བྲལ་དཱ་རི་དྲ། །ཕྱོགས་ཀུན་མྱུལ་བ་ཛོ་ཀའི་གཟུགས་འཆང་སུརྦའི་ཕྱོགས་སྐྱེས་ཆོས་སྨྲ་བ། །ཕྲན་བུ་པ་དེས་ཤིས་པའི་སུཥྤ་ཁྱོར་གང་ཨུརྞའི་རྒྱན་བཅིངས་ནས། །གུས་པའི་མཆིད་གསོལ་ཡིན་ལུགས་ལྷུག་པར་མགྲིན་པའི་སྦྱོར་ལས་སྐྱེས། །འདི་ལྟ་གཅམ་བུ་མ་ཡིན་བདག་བློའི་འཆར་བའི་ངང་ཚུལ་ཉིད་དུ་ཀོ། །ཉིད་ནི་བགྲང་ཡས་བསྐལ་པ་དུ་མར་བསོད་ནམས་ཚོགས་ཆེན་བསགས་པའི་མཐུས། །གསུང་གི་རྡོ་རྗེ་འོད་དཔག་མེད་པ་ཞིང་འདིའི་འགྲོ་འདྲེན་པདྨ་འབྱུང་། །གང་གི་རྗེས་བཟུང་བཟང་པོའི་སྨོན་ལམ་རྒྱ་མཚོར་སྤྱོད་པའི་རང་གཟུགས་ནི། །ཆོས་ཀྱི་ཡུལ་དབུས་འཛམ་གླིང་སྤྱི་ཕུད་གངས་ཅན་སྐྱེ་དགུའི་དཔལ་དམ་པ། །ས་ཆེན་མ་ལུས་བདེ་བར་སྐྱོང་བར་དགེ་བཅུའི་ཁྲིམས་ཀྱི་འཁོར་ལོས་བསྒྱུར། །རྒྱལ་བསྟན་རབ་འབྱམས་སྲིད་ཞུ་བྱེད་པའི་ཆོས་ཀྱི་རྒྱལ་པོར་ཡོངས་སུ་གྲུབ། །ཀྱེ་མ་ཟས་གཙང་སྲས་ཀྱི་བསྟན་འཛིན་ལྔ་བརྒྱ་ཕྲག་བཅུ་ཐ་མའི་དུས་ཉེ་བས། །འཛམ་གླིང་དུམ་བུ་ཤཱི་ཏིའི་ལྷོ་ཡུལ་བྱེ་བ་དགུ་བཅུ་རྩ་དྲུག་དང་། །ཆོས་ཀྱི་འབྱུང་གནས་འཕགས་ཡུལ་ལགས་ཀྱང་ཤར་དང་ལྷོ་ནུབ་ཡུལ་གླིང་ཕྲན། །ཆ་ཤས་ཙམ་མིན་ཕལ་ཆེ་ལི་ཙཱ་བི་དང་མུ་སྟེགས་གྲུབ་མཐའ་ཉིད་ཀྱིས་ཁྱབ། །མ་ཧཱ་ཙི་ན་ཡང་ནི་ཕལ་ཆེ་དུ་རུ་ཀ་དང་ཟིན་ཤིང་གྱུར། །རྒྱལ་ཁབ་ཆ་ན་དགེ་འདུན་ཅུང་ཟད་གནས་མོད་དེ་ཡང་ཉི་ཚེར་སྤྱོད། །དེ་བས་ཡུལ་གླིང་ཇི་སྙེད་ཆ་ཀུན་ཐར་པའི་འབྱུང་གནས་རྒྱལ་བའི་བསྟན། །མི་སྣང་མུན་པར་སྤྱོད་པས་སྐྱེ་བོའི་ཚོགས་ཀུན་དགེ་བའི་འབྲས་བུ་དམན། །དེ་ལྟ་ན་ཡང་ཡུལ་དྲུག་དབུས་འགྱུར་བསིལ་ལྡན་རི་བོས་ཡོངས་གཏམ་པ། །བྷོ་ཊ་ཞེས་གྲགས་བྱང་ཆུབ་སེམས་དཔའི་རིགས་ཀྱི་སྐྱེ་བོས་བཟུང་བའི་ལྗོངས། །འདི་ལྟ་རྒྱལ་བ་རྒྱ་མཚོའི་མངའ་བདག་ལག་ན་པདྨ་དཀར་འཛིན་གྱིས། །བདག་གིར་བཟུང་བའི་མཐུ་ལས་འདི་ན་རྒྱལ་བའི་བསྟན་པ་ལུས་པ། །སྣང་མོད་དེ་ཡང་རིན་ཆེན་ཆོས་དག་དཀོན་ལ་རྟག་ཏུ་འཚེ་མང་བས། །བསྟན་པའི་ངོ་བོ་ཆ་ཤས་ཙམ་ལས་དུས་ཀྱི་སྡེ་ཚན་ཉུང་ངུར་གྱུར། །རྩོད་ལྡན་དབང་གི་བསྟན་པ་ཉིད་ཀྱང་གང་ཟག་བློ་ཡིས་དྲི་མས་བརྩོད། །མི་རྣམས་ཀུན་ཀྱང་དམུ་རྒོད་ཤིན་ཏུ་གདུལ་དཀའ་ལས་ལ་རབ་ཏུ་གཡོ། །དེ་ལྟར་ཐུབ་བསྟན་ཐ་མ་སྙིགས་མ་ལྔ་ཡི་སྤྱོད་འི་དུས་འདི་རུ། །རྫོགས་ལྡན་བཟང་པོའི་དགའ་སྟོན་བཀྱེད་སླད་རྒྱལ་བ་ཀུན་གྱིས་ཐུགས་རྗེའི་ཤུགས། །གཅིག་ཏུ་བྱས་ནས་རྒྱལ་བསྟན་གྱེན་དུ་འདེགས་པར་བྱེད་པའི་སྟོབས་ཆེན་གྱད། །མཆོག་ཁྱེད་གྲུ་འཛིན་ནས་སམ་རྔ་ཡབ་གླིང་ནས་ལྗོངས་འདིའི་དཔལ་བཟང་པོ། །ཐུགས་བསྐྱེད་སྨོན་ལམ་དུས་ལས་གཡེལ་མེད་འགྲོ་བའི་བསོད་ནམས་མགྲོན་མཆོག་ཏུ། །ལེགས་པར་བྱོན་ཏེ་ས་ཡི་དཀྱིལ་འཁོར་མ་ལུས་རང་སྟོབས་དཔུང་པ་ཡིས། །ཉེར་སྤྱོད་ལེགས་ཉེས་བདེན་བརྫུན་ཤན་འབྱེད་གཏང་འཛིན་སྔོན་རྦས་རྒྱལ་བའི་སྲོལ། །ཇི་བཞིན་བཟང་པོས་སྐྱེ་དགུ་དབང་མེད་དགེ་བཅུའི་ཁྲིམས་ལ་བཀོད་བྱས་ཤིང་། །ཁྱོད་ཀྱི་བསོད་ནམས་ཟིལ་གྱིས་མཐའ་ཡི་རྒྱལ་པོ་ཀུན་ཀྱང་ཞི་བར་སྤྱོད། །ཧོར་སོགས་སྙིགས་མའི་དཔུང་གི་དྲེགས་པའི་ཚོགས་ཀྱང་ཕྱོགས་འདིར་བྱོལ་བར་བྱེད། །མཐའ་ལྗོངས་རྣམས་སུ་རྒྱལ་པོ་རྒྱལ་ཕྲན་ཇི་སྙེད་སྐྱེ་བོ་གཡུལ་དག་ལ། །རྟག་པར་སྤྱོད་ཀྱང་བོད་ཡུལ་ས་ཆེན་ཁྱོད་ཁྲིམས་ཁོ་ནས་བདེ་བར་འཚོ། །མཆོག་ཏུ་འཇིག་རྟེན་ཀུན་ན་འབྱུང་བར་དཀའ་ཞིང་ཆེས་ཆེར་དཀོན་པ་ནི། །རྫོགས་སངས་རྒྱས་ཀྱི་བསྟན་པ་རིན་ཆེན་འདི་སྟེ་མ་ལུས་ཕུན་ཚོགས་དཔལ། །དགེ་ལེགས་ཀུན་གྱི་གཞི་རྟེན་འབྱུང་གནས་བྱེད་པོ་སྲིད་འདིར་རྣམ་ཀུན་ཏུ། །མཚུངས་པའི་ཟླས་དབེན་དེ་ནི་དམ་པའི་ཆོས་དང་དེ་འཛིན་དེ་ལགས་པ། །གང་དེ་སྙིགས་མའི་དུས་སུ་གྱུར་ཡང་རྒྱལ་བསྟན་རྫོགས་ལྡན་སྐབས་ཇི་བཞིན། །བསྟི་སྟང་བགྱིད་ལས་འདུལ་མདོ་མངོན་པ་ཐུན་མོང་ཐུན་མིན་གསང་བ་སྔགས། །མ་འདྲེས་ཉིད་གསལ་རྩོད་པ་ཡང་མིན་ས་འོག་དར་བཞིན་འབྲལ་ལ་མཛེས། །ངང་ཚུལ་བཟང་པོ་དེ་ལྟས་གངས་ཅན་རྒྱས་པར་འཚོ་འདི་ཁྱེད་ཀྱི་དྲིན། །ཀྱེ་ཧོ། རིན་སེལ་སྙིང་པོ་ཅན་གྱིས་རྒྱལ་བའི་སྐུ་གཟུགས་མཆོད་སྡོང་གཙུག་ལག་ཁང་། །ས་འདིར་ཇི་ཙམ་མཆིས་ལ་མཆོད་པའི་འཁོར་ལོ་རྒྱ་ཆེན་རྒྱ་མཚོའི་སྤྲིན། །གཞན་དུ་ཡང་ནི་བྷ་ཧིར་དྷ་དང་ནེལ་པཱལ་ལ་དང་དེ་བཞིན་དུ། །མ་ཧཱ་ཙི་ན་ལ་སོགས་རྒྱལ་ཁབ་གཞན་དུ་སྣང་བའི་དཀོན་མཆོག་རྟེན། །མ་ལུས་ཇི་སྙེད་ཀུན་ལ་རབ་དཀར་མཆོད་པའི་སྤྲིན་བཟང་འཕྲོ་བྱེད་ཅིང་། །ཕུ་དུད་རི་མོར་བགྱིད་ལ་གཡེལ་མེད་སྔོན་དུས་རྒྱལ་སྲས་མཆོག་སྤྱོད་ལྟར། །དེ་བཞིན་རྫོགས་སངས་རྒྱས་དང་ཧེ་རུ་ཀ་དཔལ་རྣམས་ཀྱིས་བྱིན་བརླབས་པའི། །གནས་ཆེན་དུ་མ་ཀུན་ཀྱང་ཉིད་ཀྱི་བསོད་ནམས་མཐུ་ཡི་རྒྱས་པར་བྱས། །ཨེ་མ། ཡོངས་ཀྱི་འདྲེན་པ་སྤྱན་རས་གཟིགས་སྤྲུལ་བླ་མ་ཆེན་པོ་ངུར་སྨྲིག་འཆང་། །དེ་བཞིན་འཕགས་པའི་སྒྱུ་འཕྲུལ་སྐྱེས་བུ་དམ་པར་གྱུར་པ་གང་འདིར་གནས། །མ་ལུས་གཙུག་གི་ལེགས་པར་མཆོད་པའི་སྲིད་ཞུ་རྟག་མཛད་རྣམ་དཀར་གྱི། །འཕྲིན་ལས་བཟང་པོ་གོང་དུ་བསྟོད་པ་འདི་ཡང་ཉིད་ཀྱི་རྣམ་པར་ཐར། །བསྟན་འཛིན་སྐྱེས་བུ་དགེ་འདུན་དཔུང་གྱུར་མ་ལུས་མཆོད་ལ་གཡེལ་མེད་ཅིང་། །གངས་ཅན་འཛིན་མའི་ལྟོ་ན་ཐེག་ཆེན་སྙན་པའི་སྒྲ་དབྱངས་བཟང་པོས་ཁེངས། །དོན་བསྒོམ་རྣལ་འབྱོར་སྤྱོད་ཀུན་དབེན་པའི་རི་བོར་འཚེ་མེད་ཡང་དག་འཇོག །ཆོས་མཐུན་གང་ཟག་ཀུན་གྱིས་བློ་སྤང་མ་ཞུམ་རྒྱབ་འདི་ཉིད་ཀྱི་མཐུ། །གངས་ཅན་འདི་ན་གྲུབ་མཐའ་རིས་མེད་ཀུན་གྱི་ཕུན་ཚོགས་དཔལ་བཟང་པོ། །མ་འདྲེས་རང་ལུགས་ཕན་ཚུན་རྩོད་མེད་བཟོ་བདེར་སྤྱོད་པ་འདི་འདྲ་བ། །ཆོས་ཀྱི་རྒྱལ་པོ་མེས་དབོན་རལ་པ་ཅན་གྱུར་གཤེགས་པ་ནས་བརྩམ་སྟེ། །ད་ལྟའི་བར་བྱོན་སྲིད་འཛིན་རྒྱལ་པོ་རྣམས་ནས་དཔེ་ཟླས་དབེན་པར་གྱུར། །དེང་དུས་འདི་ནི་མཁའ་ལ་འཆར་བའི་ཟླ་བ་ཆུ་སྣོད་དུ་མ་རུ། །ཆ་ཤས་མ་ཡིན་ལུས་རྫོགས་ཇི་བཞིན་རྒྱལ་བསྟན་གྲུབ་མཐའ་ཐ་དད་པར། །དེ་དང་དེ་ལ་ལྷག་བསམ་ཕུ་དུད་རི་མོར་རྒྱས་གྱུར་ཕན་པ་མཆོག །སྩལ་བར་མཛད་པ་འདི་ནི་འཕགས་པའི་རྣམ་པར་ཉིད་ལས་སུ་ཞིག་སྨྲ། །སྔོན་དུས་བཟང་པོ་ལགས་ཀྱང་ཚུལ་འདི་ཞུགས་ཚེ་སྙིང་སྟོབས་ཅན་རྣམས་ཡང་། །ཁུར་གྱིས་ལྕི་མོད་དེང་སང་སྙིགས་མ་འདི་འདྲར་ངལ་བ་མེད་པ་ཡིས། །དེ་བཞིན་གཤེགས་པ་ཀུན་གྱི་འབྱུང་གནས་གསུང་རབ་རིན་ཆེན་རྒྱ་མཚོ་ཞེས། །རིང་བསྲེལ་མཆོག་ཏུ་གྱུར་པ་ཆོས་ཞེས་སྡེ་སྣོད་གསུམ་དང་བཞི་པ་ཡིས། །གླེགས་བམ་རིན་ཆེན་ལས་བྱས་བརྒྱ་ཕྲག་དུ་མ་ཉིད་ཀྱང་ཆད་མེད་བསྒྲུབ། །གྲངས་མེད་འཆར་བའི་མ་མ་བསྐྲུན་པ་ལས་ཀྱང་བསོད་ནམས་འཛད་མེད་སྤྱོད། །རྟག་ཏུ་བཀླགས་པའི་ཆོས་སྒྲས་ཡང་ནི་སྲིད་པ་གསུམ་འདི་མཛེས་པར་བྱེད། །འབྲེལ་ཀུན་བྱང་ཆུབ་ཆུ་རྒྱུན་རྒྱས་མཛད་དེང་དུས་སྲིད་འདིར་ཁྱེད་ལས་སུ། །སྙིགས་མའི་དུས་འདིར་རླབས་ཆེན་རྣམ་དཀར་སྤྱོད་པ་དེ་འདྲར་རྒྱལ་དང་སྲས། །རྣམས་ཀྱི་ཤིས་པའི་མེ་ཏོག་ཆར་ཆེན་ཉིད་ལ་འབེབས་དང་ལྷན་ཅིག་ཏུ། །ཚངས་དང་བརྒྱ་བྱིན་དབང་ཕྱུག་ཆེ་རྣམས་དགའ་བས་ཀུན་ཏུ་གར་བསྒྱུར་ཞིང་། །འཇིག་རྟེན་སྐྱོང་སོགས་རྒྱལ་བའི་བསྟན་བསྲུང་ཀུན་ཀྱང་ཕྱོགས་འདིར་གུས་འདུད་ངེས། །ཀྱེ་ཧོ། གདུལ་བྱ་སྐྱོང་ཕྱིར་ལེགས་ཉེས་ཁྲིམས་ཀྱི་གཏང་འཛིན་ཚར་གཅོད་རྗེས་བཟུང་མཁས། །རྒྱལ་བསྟན་ལྷག་པར་སྤྱོད་འདི་ཆོས་རྒྱལ་མྱ་ངན་མེད་པའི་ངང་ཚུལ་དྲན། །རྩོད་ལྡན་སྙིགས་མའི་དུས་འདིར་རྫོགས་ལྡན་བཟང་པོའི་དགའ་སྟོན་དཔལ་མཐའ་དག །མཆོག་ཏུ་རྒྱས་པར་བྱེད་འདི་རིགས་ལྡན་དྲག་པོའི་འཁོར་ལོ་ཅན་དུ་དྲན། །དེ་ལྟར་གསོལ་བ་འདི་ཡང་བསྔགས་འོས་བསྔགས་པར་བྱེད་པ་སྔོན་དུས་ཀྱི། །དམ་པའི་རིང་ལུགས་ལས་བྱུང་དཔལ་མགོན་ཀླུ་དང་དཔལ་ལྡན་དཔའ་བོ་སོགས། །འཕགས་པའི་ས་ལ་བཞུགས་པའི་མཁས་རྣམས་ཀྱིས་ཀྱང་མི་ཡི་བདག་པོ་ཆེ། །དམ་པར་གྱུར་པ་རྣམས་ལ་བརྒྱ་ཕྲག་ཚིག་གི་མངོན་པར་ཡོངས་བསྟོད་མཛད། །དེ་ཕྱིར་ཉིད་ཀྱི་རྣམ་ཐར་གཅིག་ཏུ་དཀར་བའི་མཛད་པ་རྒྱ་མཚོ་ལས། །ཐིགས་པ་ཙམ་ཞིག་སྙིང་ནས་ཡི་རང་དགའ་བའི་ཤུགས་ཀྱི་མགྲིན་ནས་ཐོན། །མཐའ་དག་བརྗོད་པར་ས་ཡིས་ནུས་ཏེ་མ་ཧཱ་ཙི་ནའི་རྒྱལ་པོ་ནི། །འཇམ་དཔལ་སྤྲུལ་པར་སྨྲ་བཞིན་བྷོ་ཊའི་ཡུལ་གྱི་རྒྱལ་པོར་གྱུར་པ་གང་། །རྒྱལ་བའི་བསྟན་ལ་ལྷག་པར་བྱ་བ་བྱེད་ལ་ཟླ་མེད་ཆོས་སྐྱོང་བ། །འདི་འདྲར་སྙིང་རྗེའི་བདག་དེའི་ཐུགས་རྗེའི་མཐུ་ལས་བྱུང་ཞེས་ཅིས་མི་སྨྲ། །གང་ཞིག་སྙིགས་དུས་འདུལ་དཀའ་འདུལ་མཛད་འགྲོ་ལ་སྨན་སླད་རྒྱལ་པོའི་ཚུལ། །འཕགས་རྣམས་བསམ་བཞིན་འཇུག་པའི་རྣམ་པར་བློ་ཡི་གཞལ་བྱ་ནམ་ཡང་མིན། །དེས་ན་ས་ཡི་མངའ་བདག་མི་ཡི་དབང་ཕྱུག་མགོན་ཁྱེད་འགྲོ་རྣམས་ཀྱི། །བདེ་སྐྱིད་དཔལ་ཀུན་བསྲུང་ཞིང་རྒྱལ་བསྟན་ཀུན་ཏུ་རྒྱས་སླད་ལྗོངས་འདི་རུ། །འཁོར་ལོས་བསྒྱུར་བའི་རྒྱལ་པོ་དུང་གི་འཇིག་རྟེན་འདི་ཀུན་སྐྱོང་གི་བར། །ཚངས་ཆེན་རྒྱལ་པོའི་ཚེ་དང་གཅིག་ཏུ་བྱས་ཏེ་བསོད་ནམས་གཟི་འབར་སྐུ། །ནམ་ཡང་གཞོམ་པ་མི་མངའ་རྡོ་རྗེ་ལྷུན་པོ་ཇི་བཞིན་གཡོ་མེད་པར། །མི་འཇིག་ཤ་ར་ཎ་ཡི་ཡོངས་འདེགས་རྟག་པ་ཤ་ཤྭ་ཏ་ཡི་ཁྲིར། །མཐའ་བཞིའི་མི་བདག་ཀུན་གྱི་པི་རོཿཁྱེད་ཀྱི་ཙ་ར་ཎཱ་ཡར་འདུད། །ཟླ་མེད་ཀུན་ཏུ་མཛེས་པའི་གོ་འཕང་ཆེ་མཐོ་དབང་ཕྱུག་འབུམ་གྱི་རྩེར། །སུམ་རྩེན་བདག་པོ་དེ་དང་སྤུན་ཟླར་བྱས་ཏེ་མཐའ་ཡས་དགེ་བ་ཡི། །དཔལ་འབྱོར་ནམ་ཡང་ཉམས་མེད་གོང་ནས་གོང་འཕེལ་དཀར་ཕྱོགས་དགེ་བ་ལྟར། །དགའ་བ་མ་སིམ་སྤྲོ་བ་བདེ་བ་འབའ་ཞིག་རོལ་པའི་ལང་ཚོ་ཆེ། །ཀུན་ཏུ་བཟང་པོར་སྤྱོད་གྱུར་འཁོར་ལོ་བསྒྱུར་རྒྱལ་རྩིབས་ཀྱི་མུ་འཁྱུད་བཞིན། །ཕུན་སུམ་ཚོགས་པའི་ཆབ་སྲིད་ཀུན་ཏུ་རྒྱས་ཤིང་ཡོངས་སུ་བལྟས། །ཚུལ་དེ་བཞིན་དུ་ཞབས་པད་བརྟན་པར་རྩེ་གཅིག་མོས་འདུན་དྲག་པོ་ཡི། །གསོལ་བ་འདེབས་ཀྱི་དགེ་བའི་བསམ་པ་ཇི་བཞིན་བསླུ་བ་མེད་པ་རུ། །གྲུབ་གྱུར་ལེགས་བྱས་དཔལ་དུ་འབར་ནས་སྲིད་རྩེའི་བར་དུ་ཁྱབ་པར་ཤོག །དེ་ལྟར་སྨོན་པ་འདི་ཀོ་ལེགས་རྟོགས་ཁོང་དུ་ཆུད་གྱུར་ཀུན་གཟིགས་པ། །བདུད་བཞིའི་དཔུང་ཀུན་འཇོམས་མཛད་དཔའ་དང་སྲས་གྱུར་གཞན་ཕན་རྒྱ་ཆེན་བདག །སློབ་གྱུར་ཞི་བར་གཞོལ་བཅས་ཀུན་གྱི་བདེན་མཐུ་ནུས་པའི་གཟི་བྱིན་གྱི། །ཇི་ལྟར་སྨྲས་པའི་དོན་ཀུན་ཡོངས་གྲུབ་མི་དབང་མཆོག་གང་རྒྱས་གྱུར་མཛོད། །དེ་སྐད་བདག་བློའི་འཁྲི་ཤིང་ནས། །ཞུ་བའི་ཡི་གེ་ཀོ་ཀི་ལ། །ཡིན་ལུགས་ལྷུག་པའི་དབྱངས་སྒྲོགས་བཞིན། །རབ་དཀར་གོས་ཀྱི་སྒྲོ་གཤོག་ལྡིང་། །བྱ་མ་རྟ་ཡི་རླུང་གིས་བསྐྱོད། །ཕུན་ཚོགས་དཔྱིད་ཀྱི་དཔལ་མོའི་ཁབ། །དབང་ཕྱུག་ཆེན་པོའི་ཞབས་ཀྱི་སྟེགས། །པདྨ་རྒྱས་པའི་ངོགས་དེར་ཞུགས། །ཀུན་ཏུ་བཟང་པོའི་དཔལ་ལ་སྤྱོད། །སྙན་ཚིག་བཟང་པོའི་འཇིག་རྟེན་ཁེངས། །རྟེན་འབྲེལ་བཟང་པོ་ཡར་ཟླ་བཞིན། །དགེ་ལེགས་བཟང་པོ་འཕེལ་རྒྱས་ཤོག །མངྒ་ལཾ་བྷ་ཝནྟུ།
ཞེས་ཤར་ཕྱོགས་ཤིང་ལོའི་ཚལ་ཀོང་ཡུལ་ཉང་ཁ་རི་ཁྲོད་འབོལ་ཆུ་མིག་ནས་དོན་གྲུབ་ས་ལུག་གི་སྦོ་ཟླའི་ཚེས་བརྒྱད་ལ་དཔལ་ཚེ་དབང་ནོར་བུས་ཕུལ་བའི་ལི་ཀ་རཿ མངྒ་ལཾ།